| e-texts navigator |
| Wylie |
198a1 གཙང་བར་བྱང་ཆུབ་སེམས་དཔས་བསམ་པར་བྱའོ། །ལུས་ལ་མི་གཙང་བར་ལྟ་བ་ན་བྱང་ཆུབ་སེམས་དཔས་འདི་སྙམ་དུ་བསམ་པར་བྱ་སྟེ། ལུས་ཞེས་བྱ་བ་འདི་ནི་རུས་པ་སུམ་བརྒྱ་དྲུག་ཅུས་ཁོག་པ་བསླང་བ། ཤིང་ངན་པའི་ཁྱིམ་ལྟར་ཚིགས་སུམ
198a2 བརྒྱས་སྦྱར་བ། རྩའི་དྲ་བ་བཞི་བརྒྱས་གླགས་པ། ཤ་སྤར་ཚད་ལྔ་བརྒྱས་གཡོགས་པ། སྡོམ་རྩ་དྲུག་གིས་ཁེབས་པ། རྩ་བདུན་བརྒྱས་གང་བ། རྒྱུས་པ་བདུན་བརྒྱས་འབྲེལ་བ། ཆུ་བ་བཅུ་དྲུག་གིས་བརྟེན་པ། ཆུ་བ་གཉིས་ཀྱིས་ཁྱབ་པར་དཀྲིས་པ། རྒྱུ་མ་འདོམ་ཕྱེད
198a3 དང་བཞིས་ནང་ཁྲོལ་བྱས་པ། ལོང་ཀ་དང་། ཕོ་བ་དང་འབྲེལ་བའི་གཉེ་མ་རིམ་པ་བཅུ་དྲུག་ཏུ་འཁྱིལ་བ། རྩ་ཕྲན་ཉིས་སྟོང་ལྔ་བརྒྱས་སྐར་ཁུང་བྱས་པ། གཤིས་བརྒྱ་རྩ་བདུན་གྱིས་སྣོད་ཆག་པ་ལྟར། ཤིག་ཤིག་པོར་གྱུར་པ། སྤུའི་ཁུང་བུ་བྱེ་བ་བརྒྱ་སྟོང་ཕྲག་བརྒྱད་ཅུས
198a4 རྩ་ལྟར་ཁེབས་པ། དབང་པོ་ལྔའི་བུ་ག་དགུ་ཡོད་པ། གནས་བདུན་དང་ལྡན་པ། མི་གཙང་བས་ཡོངས་སུ་གང་བ། ཀླད་པ་སྙིམ་པ་གང་དང་། ཚིལ་སྙིམ་པ་གང་དང་། ཞག་སྙིམ་པ་གསུམ་དང་། བད་ཀན་སྙིམ་པ་དྲུག་དང་། མཁྲིས་པ་སྙིམ་པ་དྲུག་དང་། རླུང
198a5 གིས་མཐའ་དག་དྲངས་པ་དང་། ཁྲག་བྲེ་གང་དང་། ངན་སྐྱུགས་ཕུལ་གང་དང་། དེ་དག་ཐམས་ཅད་ཀྱིས་བང་བ་བར་ཆད་ཅན་ལྟར་སོ་སོར་ཡོངས་སུ་གང་བ། པགས་པ་རིམ་པ་བདུན་གྱིས་ཀུན་ནས་བསྐོར་བ། རོ་བྲོ་བ་དྲུག་གིས་གསོ་བ། ལུས་ཀྱི་མེ་ལ་ངན་སྐྱུགས་ཀྱི་སྦྱིན་སྲེག
198a6 བྱེད་པ། རྟག་ཏུ་མཐར་འཛག་པ། ལུས་ཀྱི་ཡན་ལག་དེ་དག་ཐམས་ཅད་ཀྱིས་བལྟ་ན་མི་སྡུག་པ། དྲི་ང་བ། རྣག་གི་རང་བཞིན་ཡིན་ན་འདི་ལ་སུ་ཞིག་གུས་པར་བྱེད་དེ། སྐད་ཅིག་དགོས་པའི་ཕྱིར་སྣོད་བརྙན་མ་ཙམ་དུ་ཟད་པ་དང་། ཁུར་བཀུར་བའི་ཕྱིར་ཤིང་རྟ་ལྟ་བུ
198a7 འབའ་ཞིག་ཡིན་པར་ཆོས་ཀྱི་བློས་གཟུང་བར་བྱའོ། །དེ་ལ་འདི་སྐད་ཅེས་བྱ་སྟེ། འདི་ལྟར་མི་གཙང་ཕུང་པོའི་ལུས་ལ་ནི། །གཟུགས་མངོན་ང་རྒྱལ་ཅན་གང་གུས་བྱེད་པ། །བྱིས་པའི་བློ་ཅན་དེ་ནི་མངོན་བཞིན་དུ། །མི་ཤེས་ངན་སྐྱུགས་བུམ་པ་ཐོགས་ཤིང་འགྲོ་།དེ་ཡི
iiif viewer powered by OpenSeadragon
