| e-texts navigator |
| Wylie |
173b1 ཕྱིའི་སྐྱེ་མཆེད་དྲུག་པོ་དག་གང་ཡིན་པ་དེ་ནི་སྡུག་བསྔལ་ཞེས་བྱ་སྟེ། སྡུག་བསྔལ་དེ་ནི་མི་རྟག་པ་དང་། སྡུག་བསྔལ་བ་དང་། ནད་དང་། འབྲས་དང་། ཟུག་རྔུ་དང་། སྡིག་པ་དང་། བདག་མེད་པ་དང་། རབ་ཏུ་འཇིག་པའི་ཆོས་ཉིད་དུ་བལྟའོ། །འདོད་ཆགས་དང་། ཞེ་སྡང་དང་།
173b2 གཏི་མུག་དང་། ང་རྒྱལ་དང་། ངའོ་སྙམ་དུ་མངོན་པར་ཞེན་པ་དང་། བདག་གི་བདག་ནི་འདི་ཡིན་ནོ་སྙམ་དུ་བདག་ཏུ་མངོན་པར་ཞེན་པ་དང་། འབྱུང་བར་འགྱུར་རོ་སྙམ་པ་དང་། འབྱུང་བར་མི་འགྱུར་རོ་སྙམ་པ་དང་། གཟུགས་ཅན་དུ་འགྱུར་རོ་སྙམ་པ་དང་། གཟུགས་ཅན་མ་ཡིན་པར
173b3 འགྱུར་རོ་སྙམ་པ་དང་། འདུ་ཤེས་ཅན་དུ་འགྱུར་རོ་སྙམ་པ་དང་། འདུ་ཤེས་ཅན་མ་ཡིན་པར་འགྱུར་རོ་སྙམ་པ་དང་། འདུ་ཤེས་ཅན་མ་ཡིན་ལ། འདུ་ཤེས་ཅན་མ་ཡིན་པ་ཡང་མ་ཡིན་པར་འགྱུར་རོ་སྙམ་པ་དང་། ཕུང་པོ་རྣམས་བདག་གོ་སྙམ་པ་དང་། ཕུང་པོ་རྣམས་ལས་བདག
173b4 གཞན་ནོ་སྙམ་པ་དང་། ཕུང་པོ་རྣམས་ལ་བདག་སྙམ་པ་དང་། བདག་ལ་ཕུང་པོ་རྣམས་སོ་སྙམ་པ་དང་། ཁམས་རྣམས་དང་། སྐྱེད་མཆེད་རྣམས་བདག་གོ་སྙམ་པ་དང་། སྐྱེ་མཆེད་རྣམས་ལས་བདག་གཞན་ནོ་སྙམ་པ་དང་། སྐྱེ་མཆེད་རྣམས་ལ་བདག་གོ་སྙམ་པ་དང་། བདག
173b5 ལ་སྐྱེ་མཆེད་རྣམས་སོ་སྙམ་པ་དང་། ཚོར་བ་བདག་གོ་སྙམ་པ་དང་། ཚོར་བར་བྱེད་པ་བདག་གོ་སྙམ་པ་དང་། གཟུགས་ཅན་ཆུང་ངུ་བདག་གོ་སྙམ་པ་དང་། གཟུགས་ཅན་མ་ཡིན་པ་ཆུང་ངུ་བདག་གོ་སྙམ་པ་དང་། གཟུགས་ཅན་མཐའ་ཡས་པ་བདག་གོ་སྙམ་པ་དང་།
173b6 གཟུགས་ཅན་མ་ཡིན་པ་མཐའ་ཡས་པ་བདག་གོ་སྙམ་པ་དང་། བདག་རྟག་གོ་སྙམ་པ་དང་། བདག་མི་རྟག་གོ་སྙམ་པ་དང་། རྟག་ཀྱང་རྟག་ལ་མི་རྟག་ཀྱང་མི་རྟག་གོ་སྙམ་པ་དང་། རྟག་པར་ཡང་མ་ཡིན་མི་རྟག་པ་ཡང་མ་ཡིན་ནོ་སྙམ་པ་དང་། བདག་མཐའ་ཡོད་དོ་སྙམ་པ་དང་།
173b7 བདག་མཐའ་ཡོད་པ་མ་ཡིན་ནོ་སྙམ་པ་དང་། མཐའ་ཡོད་ཀྱང་ཡོད་ལ་མཐའ་མེད་ཀྱང་མེད་དོ་སྙམ་པ་དང་། མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་ནོ་སྙམ་པ་དང་། དེ་བཞིན་སོང་བ་ཤི་ནས་འབྱུང་བར་འགྱུར་རོ་སྙམ་པ་དང་། འབྱུང་བར་མི་འགྱུར་རོ་སྙམ་པ་དང་།
iiif viewer powered by OpenSeadragon
