| e-texts navigator |
| Wylie |
180b1 །རྒྱ་གར་སྐད་དུ། དྷརྨ་ཙཀྲ་པྲ་བརྟ་ན་སཱུ་ཏྲ། བོད་སྐད་དུ། ཆོས་ཀྱི་འཁོར་ལོ་རབ་ཏུ་བསྐོར་བའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་བཱ་རཱ་ཎ་སཱིའི
180b2 དྲང་སྲོང་ལྷུང་བ་རྒྱུ་བའི་གནས་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་ལྔ་སྡེ་རྣམས་བོས་ཏེ་བཀའ་སྩལ་པ། དགེ་སློང་དག་རབ་ཏུ་བྱུང་བ་མཐའ་གཉིས་པོ་འདི་ལ་གནས་པར་མི་བྱའོ། །གང་སུ་དག་འདིར་འདོད་པ་རྣམས་དང་བདེ་བ་ལ་ཞེན་པ་ནི་མི་རིགས་པ
180b3 དང་དམན་པར་འགྱུར་རོ། །སོ་སོའི་སྐྱེ་བོ་རྣམས་ནི་དོན་མེད་པ་དང་ལྡན་པའི་ཕྱིར་གང་སུ་དག་ལུས་དུབ་པ་དང་འབྲལ་བའི་སྡུག་བསྔལ་བསྔགས་པར་བྱ་བ་མ་ཡིན་པ་རྣམས་ཀྱི་དོན་མེད་པ་དང་ལྡན་ནོ། །དགེ་སློང་དག་འདི་རྣམས་ནི་མཐའ་གཉིས་ཀྱི་མཐའ་སྟེ་དེ་ལ་འཇུག་པར་མི་བྱའོ། །
180b4 དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་དབུ་མའི་ལམ་འདི་གསུངས་སོ། །མིག་བྱེད་པ་དང་། ཡེ་ཤེས་བྱེད་པ་དང་། ཞི་བར་བྱེད་པ་དང་། མངོན་པར་ཤེས་པ་དང་། ཡང་དག་པར་ཁོང་དུ་ཆུད་པ་དང་། མྱ་ངན་ལས་འདས་པ་ལ་ཡང་དག་པར་འཇུག་གོ། །དགེ་སློང
180b5 དག་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ནས་གསུངས་པའི་དབུ་མའི་ལམ་གང་ཞེ་ན། མིག་བྱེད་པ་དང་། ཡེ་ཤེས་བྱེད་པ་དང་། ཞི་བར་བྱེད་པ་དང་། མངོན་པར་ཤེས་པ་དང་། ཡང་དག་པར་ཁོང་དུ་ཆུད་པ་དང་། མྱ་ངན་ལས་འདས་པ་ལ་ཡང་དག་པར་འཇུག
180b6 གོ། །དབུ་མའི་ལམ་ནི་འཕགས་པའི་ལམ་ཡན་ལག་བརྒྱད་དེ། བརྒྱད་པོ་དེ་ནི་འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ
180b7 དང་། ཡང་དག་པའི་ཏིང་ངེ་འཛིན་ཏོ། །དབུ་མའི་ལམ་འདི་ཡང་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་གསུངས་སོ། །མིག་བྱེད་པ་དང་། ཡེ་ཤེས་བྱེད་པ་དང་། ཞི་བར་བྱེད་པ་དང་། མངོན་པར་ཤེས་པ་དང་། ཡང་དག་པར་ཁོང་དུ་ཆུད་པ་དང་། མྱ་ངན་ལས
iiif viewer powered by OpenSeadragon
