rKTs

e-texts navigator

Volume

Page

198a₁ par shes pa de ni sdug bsngal yongs su shes pa'o/ /de la kun 'byung ba yongs su shes pa gang zhe na/ chos rnams ji ltar kun tu 'byung ba de bzhin du spong ba'o/ /ji ltar kun tu 'byung zhe na/ kun tu 'byung ba zhes bya ba ni kun du
198a₂ byung ma thag tu 'ong ba med par spong ba dang kun du 'byung ba la 'gro ba med par spong ba 'di ni chos rnams kyi tshul te/ 'di la spong bar 'gyur ba'i chos gang yang byung ba med de/ sred pa bag la nyal gang gis srid pa byung ba'i sred pa bag la nyal
198a₃ de spangs pa zhes bya'o/ /de la sdug bsngal 'gog pa gang zhe na/ gang sdug bsngal dang / kun 'byung ba gnyis shin tu 'gag cing chos gang yang 'jig pa med pa de ni 'gog pa zhes bya'o/ /'gog pa zhes bya ba'i gang mtshan mar
198a₄ dmigs pa thams cad 'gog pa ste/ de ltar chos rnams kyi ngo bo nyid 'gag pas skye bar yang mi byed/ 'gog par yang mi byed pa de ni 'gog pa zhes bya'o/ /de la lam gang zhe na/ lam gang gis chos thams cad btsal na
198a₅ dge ba dang / mi dge ba dang / zag pa dang bcas pa 'am/ zag pa med pa 'am/ kha na ma tho ba dang bcas pa dang / kha na ma tho ba med pa 'am/ 'dus byas dang / 'dus ma byas sam/ 'jig rten pa dang / 'jig rten las 'das pa dag mi
198a₆ dmigs pa de ni lam zhes bya'o/ /chos thams cad tha dad pa med pa'i phyir lam mnyam pa nyid do/ /nyon mongs pa thams cad kyi yongs su gdung ba med pa'i phyir lam rab tu zhi ba'o/ /ngan 'gro thams cad dang bral ba'i phyir lam nye bar
198a₇ zhi ba'o/ /zag pa thams cad yongs su zad pa'i phyir lam zag pa med pa'o/ /lam de ni dmigs par lta ba thams cad kyis bgrod par bya ba ma yin pa'o/ /lam de ni rnal 'byor spyod pa yang dag par zhugs pa rnams kyis rtogs sla ba'o/ /lam
198a₈ de ni sngon gyi de bzhin gshegs pa rnams bzhud cing rjes su bzhud pa'o/ /lam de ni mtshan mar rnam par rtog pa thams cad spangs pa'i phyir mtshan ma med pa'o/ /lam gang gis gnyis dang mtshan mar mi ltung ba de ni lam zhes bya ste/

_{iiif viewer powered by OpenSeadragon}

197b - 198b

Texts on this page