rKTs

e-texts navigator

Volume

Page

191a₁ dpyod pa las sems dbang ba'i rnam pa mngon par bsgrub pa'i rdzu 'phrul gyi rkang pa 'thob ste/ de shin tu cher mngon par 'dus byas pa med par rdzu 'phrul mngon du 'thob bo/ /de 'dod na sems bskyed pa gcig gis
191a₂ 'jig rten gyi khams gang ga'i klung gi bye ma snyed dag tu 'gro zhing der song ba yang shes la 'di nas kyang mi g.yo'o/ /de na chos ston par yang snang la 'di na gtam brjod pa'i rgyun yang mi 'chad do/ /rnam par 'phrul pa'i rgyal po
191a₃ 'di ni byang chub sems dpa'i rdzu 'phrul gyi rnam par 'phrul pa ste/ rnam par 'phrul pa des rdzu 'phrul gyi cho 'phrul gyis gdul ba'i sems can rnams gdul bar byed de/ lha yang rung / mi yang rung sems can gang dag rtag par
191a₄ 'du shes pa de dag la sreg pa'i bskal pa nye bar ston te/ de na stong gsum gyi 'jig rten gyi khams tshig par de dag gis mthong la 'jig rten gyi khams de zhig par yang mi 'gyur ro/ /sems can gang dag lhag pa'i nga rgyal can
191a₅ de dag la ni gnod sbyin lag na rdo rje'i gzugs su nye bar ston te/ de rdo rje 'bar ba kun tu rab tu mched cing 'bar ba rab tu 'jigs par byed pas de dag 'jigs par byas nas de dag nga rgyal med par gyur te de la phyag 'tshal lo/ /gang dag
191a₆ 'khor los bsgyur ba'i kha dog la mos pa de dag la ni 'khor los bsgyur ba'i kha dog dang gzugs kyis chos ston/ gang dag brgya byin gyi kha dog la mos pa de dag la ni brgya byin gyi kha dog dang gzugs kyis chos ston/ gang dag
191a₇ bdud kyi kha dog la mos pa de dag la ni bdud kyi kha dog dang gzugs kyis chos ston/ sems can gang dag tshangs pa'i kha dog la mos pa de dag la ni tshangs pa'i kha dog dang gzugs kyis chos ston/ gang dag nyan thos dang rang sangs rgyas kyi
191a₈ kha dog la mos pa de dag la ni/ de lta bu'i kha dog dang gzugs nyid kyis chos ston/ sems can gang dag sangs rgyas kyi kha dog la mos pa de dag la ni sangs rgyas kyi kha dog dang gzugs kyis chos ston to/ /

_{iiif viewer powered by OpenSeadragon}

190b - 191b

Texts on this page