rKTs

e-texts navigator

Volume

Page

189b₁ de bdag dang gzhan dag gi sngon gyi gnas la bskal pa gang ga'i klung gi bye ma snyed nas brtsam nas chos ston to/ /che ge mo zhig na bdag ming 'di zhes bya bar gyur/ rigs ni 'di zhes bya/ tshe'i tshad ni 'di tsam zhig thub/
189b₂ bde ba dang / sdug bsngal ni 'di lta bu zhig myong zhes bya ba dang / sems can gzhan rnams kyi yang de bzhin du rab tu shes so/ /de sems can rnams sngon gyi dge ba'i rtsa ba rgyu las byung ba rab tu shes te/ sems
189b₃ can 'di dag ni rgyu'i stobs can/ 'di dag ni rkyen gyi stobs can/ 'di dag gi rgyu ni nyan thos kyi theg pa/ sems can 'di dag gi rgyu ni rang sangs rgyas kyi theg pa/ sems can 'di dag gi rgyu ni theg pa chen po'o zhes de
189b₄ sems can rnams kyi sngon gyi rgyu shes nas de dag la de bzhin du chos ston to/ /de sngon gyi gnas mngon du byed pas sngon gyi sbyor ba phun sum tshogs pa thob bo/ /de sangs rgyas rnams la sngon dge ba'i rtsa ba ji snyed pa skyed pa
189b₅ byang chub tu yongs su ma bsngos pa de dag rjes su dran par byas nas bla na med pa yang dag par rdzogs pa'i byang chub tu yongs su bsngo'o/ /de sngon gyi gnas kyang rjes su dran la chos thams cad sngon gyi mthar 'pho ba med par yang rab tu
189b₆ shes/ gang yang sngon gyi mtha' nas phyi ma'i mthar 'gro ba med par mthong / phyi ma'i mtha' nas sngon gyi mthar 'gro ba med par mthong ngo / /chos thams cad gang du yang 'gro ba dang 'ong ba med par yang rab tu shes so/ /de sngon
189b₇ gyi mthar rjes su dran pa na sngon gyis mthar lta bar mi 'gyur/ de phyi ma'i mtha' rjes su dran pa na phyi ma'i mthar lta bar mi 'gyur te/ chos thams cad mtha' dang dbus med par yang rab tu shes so/ /de sems can thams
189b₈ cad kyi sngon gyi gnas kyang rjes su dran la gzugs sngon gyi mtha' dben pa nyid du yang rab tu shes/ tshor ba dang / 'du shes dang / 'du byed rnams dang / rnam par shes pa sngon gyi mthas dben pa nyid du yang rab tu

_{iiif viewer powered by OpenSeadragon}

189a - 190a

Texts on this page