| e-texts navigator |
| བོད་ཡིག |
61b1 de bzhin gshegs pa la mchod pa'i las mdzad pas ma tshim mam/ 'jam dpal gyis smras pa/ lha'i bu 'di ji snyam du sems/ rgya mtsho chen po chu thams cad len pas gzhar yang chog shes sam/ lha'i bus smras pa/ 'jam dpal de ni ma lags so/ /'jam dpal gyis
61b2 smras pa/ lha'i bu de bzhin du rgya mtsho chen po mtsho gting dpag dka' ba de lta bu'i thams cad mkhyen pa'i ye shes tshad med dpag tu med pa btsal bar bya ste/ byang chub sems dpa' de bzhin gshegs pa la mchod pa'i las kyis gzhar yang tshim par mi bya'o/ /lha'i bus smras
61b3 pa/ 'jam dpal byang chub sems dpas ci la dmigs te de bzhin gshegs pa la mchod par bgyi/ 'jam dpal gyis smras pa/ lha'i bu byang chub sems dpas dmigs pa bzhis de bzhin gshegs pa la mchod par bya'o/ /bzhi gang zhe na/ 'di lta ste/ thams cad
61b4 mkhyen pa nyid la dmigs pa dang / sems can thams cad rab tu dgrol ba la dmigs pa dang / dkon mchog gsum gyi gdung mi 'chad par bya ba la dmigs pa dang / sangs rgyas kyi zhing gi yon tan bkod pa yongs su gzung ba la dmigs pa ste/ lha'i bu byang chub
61b5 sems dpas dmigs pa bzhi po de dag gis de bzhin gshegs pa la mchod par bya'o/ /lha'i bus smras pa/ 'jam dpal khyod kyis tshangs pa'i ris kyi lha'i bu'i nang du tshangs pa gtsug phud can la byang chub sems dpa'i lam bzhi pa sgrub pa zhes bgyi ba'i chos kyi rnam grangs
61b6 bshad pa de/ 'jam dpal legs par bshad du gsol/ de la ni bdag dang thams cad dang ldan pa'i 'khor 'di yang nyan par 'tshal lo/ /'jam dpal byang chub sems dpa' rnams la chos kyi ser sna ma mchis/ slob dpon gyi chos kyi dpe mkhyud kyang ma mchis/ 'jam
61b7 dpal gyis smras pa/ lha'i bu de'i phyir legs par rab tu nyon la yid la zung shig dang / bzhi pa sgrub pa zhes bya ba'i chos kyi rnam grangs de ngas khyod la bshad do/ /lha'i bu bzhi po 'di dag ni byang chub sems dpa' rnams kyi lhag pa'i bsam pa'i sems bskyed par rig par bya'o/ /
iiif viewer powered by OpenSeadragon
Texts on this page
D252 - 'phags pa bzhi pa sgrub pa zhes bya ba theg pa chen po'i mdo