rKTs

e-texts navigator

Volume

Page

142b₁ spong ba bzhi'i thal gong shin tu rgyas pa dang ldan pa'o/ /rdzu 'phrul gyi rkang pa bzhi'i dpung mgo dang ldan pa'o/ /stobs lnga'i thong ka shin tu yangs pa dang ldan pa'o/ /dbang po lnga'i lte ba shin tu zab pa dang ldan pa'o/ /byang chub kyi yan lag bdun gyi lto ba dang ldan pa'o/ /lam
142b₂ yan lag brgyad pa'i sta zur dang ldan pa'o/ /ye shes mtha' yas pa'i spu'i khung bu dang ldan pa'o/ /dge ba'i rtsa ba phun sum tshogs pa thams cad 'dren pa'i lag pa dang ldan pa'o/ /dge ba bcu'i las kyi lam legs par srung ba'i sor mo dang ldan pa'o/ /ngo bo nyid
142b₃ kyis rnam par dag pa'i chos nyid mthong ba dang / sgom pa'i sen mo dang ldan pa'o/ /chos thams cad la som nyi med pa'i rtsi ba logs dang ldan pa'o/ /sa'i rim pa'i tshul thob pa'i sgal tshigs dang ldan pa'o/ /dus las mi 'da' bar chos ston pa'i stobs dang ldan pa'o/ /
142b₄ bsam gtan dang / rnam par thar pa dang / ting nge 'dzin dang / snyoms par 'jug pa thams cad la yongs su sbyang ba legs par byas pa'i zhi gnas dang lhag mthong gi brla dang ldan pa'o/ /chos kyi nges pa la 'jug pa'i pus mo dang ldan pa'o/ /chos ji lta ba bzhin
142b₅ du ston pa'i rje ngar dang ldan pa'o/ /chos rtogs pas bsrungs pa'i rnam pa'i dran pa dang ldan pa'o/ /nyon mongs pa thams cad las rnam par rgyal ba'i long bu dang ldan pa'o/ /phyogs bcur 'gro ba'i rkang pa dang ldan pa'o/ /bstan pa mtshams 'byor bar 'gro zhing 'ong ba dang
142b₆ ldan pa'o/ /ngo tsha shes pa dang / khrel yod pa'i gos gyon pa'o/ /byang chub kyi yan lag gi chos kyi me tog gi phreng bas brgyan pa'o/ /shin tu rnam par spel ba'i tshig gis chos ston pa'o/ /'thun pa dang mi 'thun pa dang bral ba'o/ /'chi 'pho dang / 'gro ba dang /
142b₇ skye ba'i shes rab dang / ye shes dang / mngon par shes pa zab mo'i phye ma'i bsgo bas bsgos pa'o/ /tshul khrims kyi phung po mtha' yas pa'i byug pa dang ldan pa'o/ /tshangs pa'i g.yog 'khor dang ldan pa'o/ /tshangs pa'i lam mya ngan las 'das pa'i lam dang ldan pa'o/ /

_{iiif viewer powered by OpenSeadragon}

142a - 143a

Texts on this page