rKTs

e-texts navigator

Volume

Page

223b₁ bo thog ma med pa'i dus kyis rnam par spros pa'i bag chags kyis bsgos pa/ rnam par rtog pas skye ba dang / gnas pa dang / 'jig pa la mngon par zhen pa rnams kyang gcig pa dang / tha dad pa dang / gnyi ga dang / gnyi ga ma yin pa dang / yod pa dang / med pa dang / yod pa yang ma yin/ med pa yang ma yin
223b₂ pa dang / rtag pa dang / mi rtag pa la rab tu brten pas so so rang gis rig par bya ba'i dngos po'i sgo la dmigs pa yang smig rgyu'i dba' rlabs de dag ji lta ba bzhin no/ /dper na la la zhig gis sngags dang / 'khrul 'khor gyis sems can du bgrang ba ma yin pa ston pa 'dre dang sbyor bar ldan na g.yo ba'i las byed de/
223b₃ byis pa rnams kyis rnam par rtog pas 'gro ba dang / 'ong ba nyid du mngon par zhen to/ /de bzhin du mu stegs byed lta ba ngan pa'i bsam pa can dag kyang / gcig pa dang / tha dad pa dang / gnyi ga dang / gnyi ga ma yin pa dang / yod pa dang / med pa dang / yod pa yang ma yin/ med pa yang ma yin pa dang /
223b₄ rtag pa dang / mi rtag pa'i lta ba la rten cing spros pa la mngon par zhen pas yang dag pa ma yin par sgro 'dogs so/ /blo gros chen po de bas na so so rang gis rig pa 'phags pa'i ye shes kyi dngos po 'dod pa dag gis skye ba dang / gnas pa dang / 'jig pa dang / gcig pa dang / tha dad pa dang / gnyi ga dang /
223b₅ gnyi ga ma yin pa dang / yod pa dang / med pa dang / yod pa yang ma yin/ med pa yang ma yin pa dang / rtag pa dang / mi rtag pa la sogs pa'i lta ba ngan pa'i rnam par rtog pa rnams yongs su spang bar bya'o/ /de nas bcom ldan 'das kyis don de nyid yang bstan pa'i phyir tshigs su bcad pa 'di dag
223b₆ gsungs so/ /sgyu ma rmi lam chu grib shing / /skra shad 'dzings dang smig rgyu ltar/ /srid gsum dag ni rab rtogs na/ /mthar ni rnam par grol bar 'gyur/ /skom pa'i 'du shes kyi/ /g.yo bas sems ni bslus pas na/ /smig rgyu la ni chur rtog kyang / /chu yi dngos po yang dag med/ /de bzhin
223b₇ rnam shes sa bon pa/ /g.yo zhing gyur pas yul du snang / /byis pa rnam rtog gang skyes pa/ /rab rib can gyi rab rib bzhin/ /thog ma med pa'i 'khor ba la/ /dngos por 'dzin cing mngon zhen pa/ /mi 'thun khye'us khye'u dbyung bzhin/ /'dod rgyu 'dzin pa rab tu spongs/ /sgyu ma ro langs 'khrul 'khor dang / /

_{iiif viewer powered by OpenSeadragon}

223a - 224a

Texts on this page