rKTs

e-texts navigator

Volume

Page

217b₁ byang chub sems dpa' sems dpa' chen po chos bzhi dang ldan na/ rnal 'byor gyi thabs chen po thob pa zhes bya'o/ /de la ji ltar na byang chub sems dpa' sems dpa' chen po rang gi snang ba rnam par 'byed pa la mkhas pa yin zhe na/ 'di lta ste/ des 'di ltar khams
217b₂ gsum pa 'di ni sems tsam gyi cha ste/ bdag dang bdag gi dang bral ba/ g.yo ba med pa/ 'gro ba dang 'ong ba dang bral ba/ thog ma med pa'i dus kyi spros pa'i bag chags kyis yongs su bsgos pa/ khams gsum gyi gzugs rnam pa sna tshogs la nye bar spyod pas rab tu bcings
217b₃ pa/ lus dang longs spyod rnam par gzhag pa'i rnam par rtog pa'i rjes su 'jug par snang ngo zhes rab tu rtog ste/ 'di ni byang chub sems dpa' sems dpa' chen po rang gi sems snang ba rnam par 'byed pa la mkhas pa zhes bya'o/ /ji ltar na byang chub sems dpa' sems dpa' chen po phyi
217b₄ rol gyi dngos po dngos po med par rab tu rtog pa la mkhas pa yin zhe na/ 'di lta ste/ dngos po thams cad ni smig rgyu dang / rmi lam la sogs pa lta bu ste/ thog ma med pa'i dus kyi spros pa'i gnas ngan len rnam par rtog pa'i bag chags kyi rgyu las byung ba'o zhes dngos po thams cad
217b₅ kyi rang bzhin la rab tu rtog pa ste/ byang chub sems dpa' sems dpa' chen po rnams de ltar phyi rol gyi dngos po la dngos po med par rab tu rtog pa ni byang chub sems dpa' sems dpa' chen po phyi rol gyi dngos po dngos po med par rab tu rtog pa la mkhas pa zhes bya'o/ /ji ltar na byang chub
217b₆ sems dpa' sems dpa' chen po skye ba dang / gnas pa dang / 'jig pa'i lta ba rnam par spong ba la mkhas pa yin zhe na/ 'di lta ste/ dngos po thams cad ni sgyu ma dang / rmi lam la sogs pa dang mtshungs pas bdag dang gzhan dang gnyis ka las dngos po rnams mi skye ste/ rang
217b₇ gi sems snang ba tsam gyi rjes su 'jug pa'i phyir phyi rol gyi dngos po dngos po med par mthong ba dang / rnam par shes pa rnams 'jug pa med pa dang / rkyen rnams spungs pa med par mthong ba dang / rnam par rtog pa'i rkyen las khams gsum byung bar mthong bas phyi nang gi chos thams cad

_{iiif viewer powered by OpenSeadragon}

217a - 218a

Texts on this page