rKTs

e-texts navigator

Volume

Page

10b₁ zla ba gsum spyan drangs te mchod pa rgya cher bshams nas mchod cing rim gro byas so/ /de'i tshe dge slong dri ma med pa zhes bya ba spobs pa phun sum tshogs pa/ chos ston pa'i thabs la mkhas pas 'khor mang po rnams nyan par spro ba/ sems can yongs su smin par byed pa
10b₂ la rtag par ngal ba med pa/ re ba med par chos ston pa/ mdog gsal zhing gsong por smra ba/ gzugs dang stobs phun sum tshogs pa/ byad bzhin sdug cing mdzes pa/ sems can rnams kyis mthong bar mos shing rim gro dang / bkur sti dang / bla mar byed cing
10b₃ bsngags pa brjod pa zhig yod de/ dge slong gsar bu dag kyang rtag par dri ma med pa'i rjes su 'brang zhing rgyal po'i pho brang 'khor du 'byung zhing 'jug pa dag la thogs pa med par gyur pas gos dang / bza' ba dang / btung ba dang / mal stan dang / na ba'i gsos sman rnam pa
10b₄ sna tshogs kyis kyang rim gro byas par gyur to/ /de'i tshe 'khor mang po de las dge slong phal cher lus kyi sdom pa dang / sems kyi shes rab bsgom pa mi shes pa/ sangs rgyas dang / chos dang / dge 'dun la gus pa med pa/ rtag par lta ba dang / chad par lta ba dang /
10b₅ bdag tu lta ba la sogs pa dang ldan pa/ sangs rgyas kyi chos la skur ba 'debs pa/ rnam par g.yeng zhing gdul dka' ba/ dbang po rnams mi sdom pa/ chos bzhin ma yin pa la gnas pa/ dge sbyong gi tshul med par bdag nyid dge sbyong du khas 'che ba/ lus dang ngag dang yid
10b₆ kyi las thams cad log par zhugs pa sha stag gnas par gyur to/ /de'i tshe bcom ldan 'das de dbyar 'das nas yongs su mya ngan las 'das pa dang / rgyal po rgya cher byin pas tsan dan dmar pos sku zhugs la bzhen nas mchod pa byas te ring bsrel gyi mchod rten ngos bzhi kun tu
10b₇ tsan dan dmar po'i mu khyud kyis bskor ba/ pad ma gser gyi kha dog dang ldan pa bye ba phrag brgyad cu brtsigs so/ /de'i tshe dge slong dri ma med pa ni bcom ldan 'das des mang du thos pa'i mchog tu lung bstan pas de bzhin gshegs pa de yongs su mya ngan las 'das pa'i 'og tu

_{iiif viewer powered by OpenSeadragon}

10a - 11a

Texts on this page