| Wylie |
146a2 ། རྒྱ་གར་གྱི་མཁས་པ་ཤྲཱི་སིདྷ་དང།། བོད་ཀྱི་བནྡེ་བཻ་རོ་ཙ་ནས་བསྒྱུར་བའོ།།།། རྒྱ་གར་སྐད་དུ། བོ་དྷི་ཙིཏྟ་ས་མནྟ་བྷ་དྲ་བིཏྶྭ་པ་རཱ་ཀྲ་མོ་ད་ཡ་ཏནྟྲ་ནཱ་མ། བོད་སྐད་དུ།
146a3 བྱང་ཆུབ་ཀྱི་སེམས་ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ཅེས་བྱ་བ། དཔལ་ཀུན་ཏུ་བཟང་པོ་ཐིག་ལེ་བདེ་བ་ཆེན་པོར་རང་ཤར་བའི་སྐུ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག
146a4 ན།བཅོམ་ལྡན་འདས་རིག་པ་རྩལ་གྱི་རྒྱལ་པོ་ཆེན་པོ། ཟང་ཐལ་འོག་མིན་གྱི་གནས་གསང་བ་མཆོག་གི་གཞལ་ཡས་ན་བཞུགས་པའི་ངང་ན་ཐིག་ལེ་ཆེན་པོ་རང་ཉིད་ལ་གཟིགས་ཏེ། ཅོག་བཞག་ཆེན་པོའི་ཏིང་
146a5 ངེ་འཛིན་ཞེས་བྱ་བའི་ངང་ལ་སྙོམས་པར་ཞུགས་སོ།། དེའི་ཚེ་དུས་དེ་ཉིད་ཁོ་ནར། ངོ་བོ་ཉིད་ཀྱི་ཆོ་འཕྲུལ་ཇི་ལྟར་ཤར་བའི་བདེ་བར་གཤེགས་པ་རྣམས་དང།། གཞན་ཡང་ཉིད་ལས་མ་འདས་པའི་སྟོང་གསུམ
146a6 འཇིག་རྟེན་པའི་འཁོར་ཐམས་ཅད་དང་ཐབས་ཅིག་སྟེ།གཞན་ཡང་གསང་བ་ཆེན་པོ་དེ་རྟོག་པ་དང་ལྡན་པའི་འཁོར་རང་བཞིན་དོན་ལ་གནས་པ་དང། རང་བཞིན་བལྟ་བ་ཆེན་པོ་དང། རིག་པའི་སྣང་ཚུལ་ཇི་ལྟ་
146b1 བར་རྟོགས་པའི་འཁོར་འབའ་ཞིག་གཉིས་སུ་མེད་པར་འདུས་སོ།། དེ་ནས་བཅོམ་ལྡན་འདས་རིག་པ་རྩལ་གྱི་རྒྱལ་པོ་ཆེན་པོ་དེ་ལྷུན་གྲུབ་ཟག་མེད་བདེ་བ་ཆེན་པོ་འདུ་འབྲལ་མེད་པའི་ཏིང་ངེ་འཛིན་ལ་སྙོམས་པར
146b2 ཞུགས་སོ།། དེའི་ཚེ་དེའི་དུས་ན། ཉིད་ལས་མི་གཞན་པའི་འཁོར་ཐམས་ཅད་ལྷུན་གྲུབ་འགག་པ་མེད་པར་རང་གསལ་བར་གྱུར་ཏོ།། དེ་ནས་བཅོམ་ལྡན་འདས་རིག་པའི་རྒྱལ་པོས་འདི་སྐད་ཅེས་གསུངས་སོ།། ལྷུན
146b3 གྲུབ་འགག་མེད་བདེ་ཆེན་ལ།འཁོར་བ་མྱང་འདས་ཅིར་ཤར་བ།། རིག་པའི་རྩལ་ཡིན་གཞན་ན་མེད།། རྟོགས་པའི་འཁོར་ཚོགས་དང་སེམས་ཀྱིས།། ཅིར་སྣང་ལྷུན་གྲུབ་ཆེན་པོར་གསལ།། ཞེས་གསུངས་པ་དང།
146b4 རྟོགས་པ་རང་གསལ་གྱི་ནང་ནས་རྡོ་རྗེ་སེམས་དཔའ་རང་བཞེངས་ནས། འདི་སྐད་ཅེས་གསོལ་ཏོ།། ཀྱེ་ཀྱེ་རིག་པའི་རྩལ་ཤར་བཅོམ་ལྡན་འདས།། གབ་པའི་དབྱིངས་ནས་མངོན་ཕྱུང་སྟེ།། ཕྲིན་ལས་མཛད་པ་ཅིར
146b5 ཡང་སྟོན།། ཐུགས་རྗེའི་ཆོ་འཕྲུལ་རིས་དང་བྲལ།། ཐིག་ལེ་ཟག་མེད་ཀུན་ཏུ་བཟང།། ཟང་ཐལ་ཆེན་པོའི་དབྱིངས་ཉིད་ལས།། རང་བྱུང་ཕྱོགས་མེད་རང་གྲོལ་གྱིས།། གའུ་རིག་པའི་མཐོངས་གསལ་ནས།། གསང
146b6 དུ་མེད་པའི་ཚིག་བརྗོད་ནས།། རྟོགས་པའི་འཁོར་ལ་བསྟན་དུ་གསོལ།། ཨེ་མ་ཧོ།། གསུང་དུ་གསོལ་ཞེས་ཞུས་སོ།། དེ་ནས་རིག་པའི་རྒྱལ་པོ་ཆེན་པོ་དེས།། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་པ།
147a1 རིག་པ་ལྷུན་གྲུབ་ཟག་མེད་བདེ།། མཁའ་ལ་ཉི་མ་ཤར་བ་བཞིན།། འཁོར་འདས་ཀུན་ལ་ཁྱབ་པར་གསལ།། ཁྱབ་གསལ་གཉིས་མེད་ཐིག་ལེ་ཆེ།། ལྷུན་གྲུབ་ཆེན་པོའི་ངོ་བོར་ཤར།། འབད་པ་མེད
147a2 པར་ཡེ་སངས་རྒྱས།། འགྱུར་མེད་ཐ་སྙད་རྒྱུ་འབྲས་མེད།། རྣམ་ཀུན་བྱང་སེམས་བདེ་བར་གཤེགས།། ཤེས་དང་མི་ཤེས་ཐ་སྙད་ཀྱང།། ལྷུན་གྲུབ་ཉིད་ལས་གཞན་མ་གྲུབ།། འཁོར་བའི་རྐྱེན་འགྱུར་རྣམ་སྨིན
147a3 ལས།། འགྲོ་དྲུག་ཉིད་དུ་སྣང་བ་ལས།། ངོ་བོ་མ་ཡིན་རྐྱེན་ལྟར་ཤར།། ཀུན་བརྟགས་རྣམ་རྟོག་མཚན་ཉིད་ཀྱང།། གང་ལྟར་བརྟགས་པ་དེ་ལྟར་སྣང།། ཇི་ལྟར་རྟོག་པའི་རྣམ་གྲངས་ཀུན།། གཅིག་ལས་ཡུལ་དུས
147a4 ཀུན་ཏུ་རྒྱུ།། དཔེར་ན་ཉི་མའི་ཟེར་བཞིན་དུ།། ཐིག་ལེ་གཅིག་ལས་དུ་མ་མེད།། ལྷུན་གྲུབ་ཟང་ཐལ་རང་བཞིན་ནི།། མཐའ་དང་བྲལ་བའི་རྟོགས་མཐའ་མེད།། རང་གསལ་དགོངས་པར་གནས་པར་བྱའོ།། ལྷུན
147a5 གྲུབ་རང་བྱུང་འགག་མེད་ཀྱིས།། འཁོར་འདས་ཆོ་འཕྲུལ་ཉིད་དུ་བསྟན།། ལྷུན་གྲུབ་ཕྱོགས་མེད་འབྲས་བུ་ནི།། རང་བྱུང་ཡེ་ཤེས་ཉིད་ལ་རྫོགས།། རིག་པ་སྤྱི་བླུག་ཆེན་པོར་ཤར།། རྩོལ་མེད་རྩལ་སྤྲུགས་ཀླུང་ཆེན
147a6 ལས།། བགྲོད་མེད་ས་ཡི་ཡོན་ཏན་ཤར།། རང་སྣང་དབྱེར་མེད་ཅིག་ཆར་ས།། དེ་ལས་རྩོལ་མེད་འབྲས་བུའི་མཆོག།། རིག་པའི་རྩལ་ཤར་རྣལ་འབྱོར་པས།། ཤེས་པ་ཆོས་སྐུ་རང་གསལ་ལ།། མ་ཡེངས་ཅོག་བཞག
147b1 ཉིད་དུ་བཞག།ཅེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། གླེང་གཞིའི་ལེའུ་སྟེ་དང་པོའོ།།།། དེ་ནས་རིག་པའི་རྒྱལ་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་
147b2 གསུངས་སོ།། འཁོར་བའི་སྡུག་བསྔལ་ཅི་ཤར་དང།། མྱ་ངན་འདས་པའི་བདེ་བ་ཉིད།། རིག་པའི་ཡེ་ཤེས་རྩལ་དུ་རྫོགས།། རྣམ་རྟོག་ཅི་སྐྱེ་རིག་པའི་རྩལ།། རང་བྱུང་ཡེ་ཤེས་འགག་མེད་ལ།། རྟོག་དང་རིག་པ་ཐ
147b3 དད་མེད།། ལྷུན་གྲུབ་ཕྱོགས་མེད་རིག་པའི་རྩལ།། ཀུན་སྤངས་ཀུན་གྱི་དངོས་གཞིར་ཤར།། གཟུང་འཛིན་ཕྲ་རགས་རྟོག་པ་རྣམས།། རོལ་པ་ཆེན་པོའི་ཆོ་འཕྲུལ་ཡིན།། ཡང་དག་དོན་ལ་བརྗོད་དུ་མེད།། མ་བཅོས
147b4 གོ་རྟོགས་མི་སྐྱེ་བས།། བརྗོད་མེད་བརྗོད་བྱ་ཚིག་གིས་མཚོན།། ཀུན་བཟང་ལྷུན་གྲུབ་གདལ་བ་ལ།། འཁོར་དང་མྱང་འདས་རྣམ་པར་དག། ཚིག་དང་ཚིག་དོན་བརྗོད་བྱ་བྲལ།། བྱ་བཙལ་བྲལ་ཞིང་གཉེན
147b5 པོ་མེད།། ཤེས་པ་རང་གསལ་རང་ལ་ཞོག། བྱ་བ་བཏང་བའི་སྐྱེས་བུའམ།། རྒྱ་མཚོར་སྣང་བའི་རྫས་ལྟ་བུ།། བྱེད་སྤྱོད་མེད་པར་རང་བཞིན་གསལ།། གཟུང་འཛིན་རྒྱུ་འབྲས་གང་ཡང་མེད།། དེ་ལྟ་ཉིད་ཀྱིས་འབྲས
147b6 བུ་ཐོབ།། དྲང་དོན་རྩོལ་སེམས་ཁར་མ་ལུས།། རྣམ་རྟོག་ཀུན་བརྟགས་མཚན་མ་རྣམས།། རང་བྱུང་རང་གསལ་ཉིད་ཀྱི་ངང།། ཆོས་ཉིད་ལྷུན་གྲུབ་འགག་མེད་ལས།། ཆོས་རྣམས་རང་བཞིན་ཉིད་དུ་གནས།། དཔེར
148a1 ན་རིན་ཆེན་གསེར་གླིང་ན།། ས་རྡོ་མི་གནས་གསེར་དུ་སྣང།། སེམས་ཉིད་རང་བྱུང་ཡེ་ཤེས་ལ།། ཅིར་སྣང་ཅི་སྲིད་བདེ་ཆེན་འབར།། དཔེར་ན་སྐས་ཀྱི་གདང་བུ་ལྟར།། རིམ་པར་བགྲང་མེད་སེམས
148a2 ཉིད་ལ།། བགྲོད་ཅོལ་ལམ་གྱི་ཐོགས་རྒྱུ་མེད།། རང་བྱུང་རང་ཤར་རྣམ་གྲོལ་ལམ།། བགྲོད་མེད་རྩོལ་བྲལ་རིག་པའི་ཀླུང།། སྔ་ཕྱི་མེད་པར་མངོན་མཐར་ཕྱིན།། རིག་པ་རྩལ་གྱི་རང་བཞིན་ནི།། ཡེ་ཤེས་ཉི་མ་མངོན
148a3 ཤར་བས།། ཤར་བ་ཉིད་ན་ནུབ་པ་མེད།། ཀུན་བཟང་ཐིག་ལེ་ཆེན་པོ་ཉིད།། མ་བཅོས་ལྷུན་གྲུབ་གཡོ་བ་མེད།། རྒྱུ་འབྲས་རྟོག་འཛིན་ཅི་ཡང་མེད།། ཡུལ་མེད་སྒྱུ་མ་ཡུལ་ལ་རོལ།། སེམས་ཉིད་ནམ་མཁའི་ཉི་མ
148a4 འདྲ།། རང་བྱུང་ལྷུན་གྲུབ་གདལ་བ་མེད།། བླང་དོར་གཉིས་མེད་འབད་རྩོལ་མེད།། མདོར་ན་རིག་པའི་རྩལ་ཞེས་བྱ།། མཁའ་ལ་ཉི་མ་ཤར་བ་བཞིན།། འདིར་གསལ་འདིར་མི་གསལ་དང་བྲལ།། ཀུན་ལ་ཁྱབ
148a5 ཅིང་དབྱེ་བསལ་མེད།། དེ་བཞིན་ལུང་དང་མན་ངག་དང།། རིག་པ་དག་གི་རྩལ་དག་གིས།། སྣང་སྲིད་འཁོར་འདས་ཆོས་རྣམས་ཀུན།། སེམས་ཉིད་ཡིན་པར་ཐག་ཆོད་ན།། བྱང་སེམས་བདེ་བ་ཀུན་ལ
148a6 བརྡལ།། བྱང་ཆུབ་སེམས་ཀྱིས་བལྟ་ཐག་ཆད།། སེམས་ཉིད་ཉི་ཟེར་སྤྲོ་ཞིང་བསྡུ།། རིག་པ་རྩལ་གྱི་རང་བཞིན་ནི།། གང་ཡང་ཡིན་ནོ་ཅིར་ཡང་འཆར།། དེ་ཡང་བྱང་སེམས་བདེ་བའི་ཀློང།། ཆོས་སྐུ་རང་གསལ་ངང
148b1 ལ་བཞག།བསམ་དང་བྲལ་བའི་ཡེ་ཤེས་མཐོང།། རང་བྱུང་རང་གསལ་རྫོགས་པའི་དོན།། མཐའ་དབུས་བྲལ་བས་ཡེ་སངས་རྒྱས།། གྱི་ན་རྩོལ་བྲལ་དབུ་མའི་ལམ།། ཞེན་ཞིང་བྲལ་བས་གཟའ་གཏད་
148b2 མེད།། ཕྱོགས་མེད་ལྷུན་འབྱམས་ཀུན་བཟང་འདིས།། འཁོར་འདས་རང་ལུགས་གཞི་བྱས་ནས།། རང་བྱུང་གཉིས་མེད་བདེ་དོན་རྟོགས།། རང་རིག་རང་གསལ་བླང་དོར་བྲལ།། རྣམ་དག་ལམ་ཆེན་དགོངས་པའི
148b3 ཕུགས།། ཁྱུང་ཆེན་དར་མ་མཁར་ལྡིང་བཞིན།། སྤྲོར་མེད་བསྡུར་མེད་རང་སར་གྲོལ།། རྩོལ་བསྒྲུབ་མེད་ཅིང་གཡང་ས་བྲལ།། གཡང་ས་ཉིད་ཀྱང་སེམས་སུ་ཤེས།། འཁོར་བ་ཉིད་ཀྱང་ཡེ་ཤེས་ལ།། ཡེ་ནས་འཁོར
148b4 འདས་གཉིས་སུ་མེད།། ལྷུན་གྲུབ་ཉིད་ལས་གཞན་དུ་མེད།། རང་རིག་ཅིར་ཡང་མ་གྲུབ་པས།། ཞེན་བློ་བསམ་འདོད་ཀུན་དང་བྲལ།། རིག་པ་མཐའ་བྲལ་སྟོང་པ་ཉིད།། འོད་གསལ་ནམ་མཁའི་རང་བཞིན
148b5 འདྲ།། གཟུང་འཛིན་མེད་པས་མཉམ་པའི་ངང།། རོལ་པའི་ཆོ་འཕྲུལ་ཅིར་ཡང་སྟོན།། ཆོ་འཕྲུལ་བསྟན་ཡང་རང་རྒྱུད་བྲལ།། རིག་པ་སྒྱུ་མ་ཆུ་ཟླ་འདྲ།། ཀུན་ཏུ་འཆར་ཞིང་ལྷུན་གྱིས་གྲུབ།། འདི་ཡིན་འདི་མིན་ཐ
148b6 སྙད་བྲལ།། རིག་པ་མ་བསླད་དྲི་མ་བྲལ།། ནམ་མཁའ་ལྟ་བུའི་རིག་པ་ལ།། ནམ་མཁའ་དབྱིངས་ལྟར་བསམ་དང་བྲལ།། བསམ་མེད་བློ་བདེ་ནམ་མཁའ་བཞིན།། རང་རྒྱུད་ཡེ་ཤེས་བསམ་དང་བྲལ།། མི་སྐྱེ་མི
149a1 འགག་ཅིར་མི་གནས།། རིག་པའི་རྒྱལ་པོ་བལྟ་བ་ཡིན།། བལྟར་མེད་ཡེངས་མེད་བལྟ་བ་ཡིན།། སྔ་ཕྱི་དུས་ལས་མ་དམིགས་ཏེ།། འགྱུར་མེད་སེམས་ཀྱི་གཡུང་དྲུང་ཡིན།། ཞེ་འདོད་དག་ལས་འབྱུང་མི
149a2 སྲིད།། འདོད་པ་མེད་ཅིང་ལེན་པ་དག། ལྷུན་གྲུབ་བདེ་འབྱམས་ཡངས་དོག་མེད།། རང་གྲོལ་དག་པ་ཆེན་པོ་ལ།། འཕོ་འགྱུར་མེད་པས་རྡོ་རྗེ་འདྲ།། རྣམ་རྟོག་རླུང་གིས་བསྐྱོད་གྱུར་ཀྱང།། ལྷུན་གྲུབ་ངང་ལས་གཡོས
149a3 པ་མེད།། གཞི་འཛིན་རིག་པ་རྒྱ་མཚོ་བཞིན།། ཕྱི་ནང་གསང་བ་ཀུན་གྱི་དངོས།། མཐའ་དབུས་མེད་ཅིང་ཕྱོགས་དང་བྲལ།། རང་བྱུང་འགག་མེད་བལྟ་བ་ལ།། ལམ་དང་ལམ་གྱི་རྩོལ་བ་མེད།། རྡོ་རྗེ་ཉི་ཆེན་འབར་བ
149a4 ལྟར།། སྐྱེ་འཇིག་འཕོ་འགྱུར་ནུས་མཐའ་མེད།། རིན་ཆེན་གླིང་དང་ཉི་མ་ལྟར།། རང་གསལ་འགག་མེད་རྟོག་དང་བྲལ།། འཁོར་བའི་གནས་ཉིད་ཡེ་སངས་རྒྱས།། རང་སེམས་རིག་པ་གང་སྣང་བ།། བསམ་པ་ཅི
149a5 འགྱུས་ཡེ་ཤེས་ངང།། ལྷུན་གྲུབ་གཞི་འཛིན་རིག་པ་ལ།། སེམས་ཅན་ཆོས་ཉིད་གང་ཡང་མེད།། དབུས་དང་མཐའ་བྲལ་དཀྱིལ་དུ་རྫོགས།། རྟོག་པ་མ་ཡིན་ཆད་མཐའ་མིན།། མི་རྟག་མ་ཡིན་རྟག་མཐའ་མེད།། ཤེས
149a6 པ་མི་འགག་འདོད་པ་མིན།། བྱ་བྱེད་མེད་ཅིང་རྩོལ་སེམས་དག། བགྲོད་མེད་རྩོལ་བྲལ་རིག་པའི་ཀློང།། ཕྱོགས་བྲལ་ཕྱོགས་ལ་གནས་པ་མེད། རང་རིག་ཡུལ་མེད་ཡུལ་དང་བྲལ།། ལེན་མེད་འཛིན་མེད་འདོད་པ
149b1 མེད།། རང་བྱུང་འགག་མེད་མི་ལྡན་ན།། ཕྱོགས་འཛིན་མཐའ་ལ་ཞེན་པས་འཁྲུལ།། ཕྱོགས་མེད་རིག་པ་རང་ཤར་འདི།། ཐ་སྙད་མི་ལ་མི་གནས་ཏེ།། སྐྱེ་འགག་མེད་པར་རྣམ་བརྟགས་ཤིང།། བཀྲི་དྲང་དྲང
149b2 འཐོམས་སེམས་ཅན་ལ།། ཐུགས་རྗེས་བཏེགས་ནས་འཁོར་ལོ་བསྐོར།། ཐ་སྙད་ལམ་གྱིས་འགྲོ་བ་འདྲེན།། སྣ་ཚོགས་སྣང་བའི་ཆོས་རྣམས་ཀུན།། སྐུ་གསུང་ཐུགས་ལས་མ་གཡོས་པའི།། མི་ཟད་འཁོར་ལོ་རྣམ
149b3 གསུམ་པོ།། ནམ་མཁའ་ལྟ་བུ་ཡེ་ནས་བསྐོར།། ཟག་མེད་བདེ་བ་ཡེ་ཤེས་སྐུ།། ལྷུན་གྲུབ་ཆེན་པོ་བསམ་མི་ཁྱབ།། གང་ཞིག་འགྲོ་བའི་སྒྲ་སྐད་རྣམས།། ཟག་མེད་བདེ་ཆེན་རིག་པའི་གསུང།། གང་ཞིག་ཁ་དོག
149b4 དབྱིབས་སྣང་བ།། སྐུ་མཆོག་རྒྱན་གྱི་འཁོར་ལོ་ཟབ།། སེམས་ཉིད་དབྱེར་མེད་རྡོ་རྗེའི་ཐུགས།། གཉིས་སུ་མེད་པས་ཀུན་ཏུ་བཟང།། སྐུ་གསུམ་མི་འབྲལ་བདེ་བ་ཆེ།། སེམས་ཉིད་ཡེ་ནས་སངས་རྒྱས་པས།། རྩོལ་བ
149b5 མེད་པར་ལྷུན་གྱིས་གྲུབ།འདོད་དགུ་བསྒྱུར་བའི་རིན་པོ་ཆེ།། བཀོལ་བ་མེད་ཅིང་དབྱིངས་ན་གསལ།། ཡི་གེ་མེད་ཅིང་ཚིག་ལས་འདས།། རིག་པ་རྩལ་ཞེས་བྱ་བ་ནི།། སྣང་སྲིད་འཁོར་འདས་ཆོས་རྣམས་
149b6 ཀུན།། སེམས་མ་ཡིན་པའི་ཆོས་ཡོད་མིན།། ཆོས་རྣམས་མ་ལུས་ཐམས་ཅད་ཀུན།། རིག་པའི་རྩལ་དུ་རང་ཤར་བས།། དེ་ཉིད་ཆོས་སྐུ་རང་གསལ་བ།། ཡེངས་དང་མ་ཡེངས་མཐའ་ལས་གྲོལ།། རིག་པ་རང་གསལ
150a1 ཡེ་ཤེས་ལ།། རྟོགས་པ་ངེས་མེད་དོན་གྱི་མཆོག། རང་ཤར་རིག་པ་དབྱིངས་ན་གསལ།། རིག་པ་བརྡལ་ཁྱབ་རང་བཞིན་ལ།། རང་བྱུང་ཡེ་ཤེས་ངང་གིས་གསལ།། ཆོས་སྐུ་རང་གསལ་ངང་ཉིད
150a2 ལ།། ཞེན་འཆིང་མེད་ཅིང་དམིགས་དང་བྲལ།། རིག་པ་རྩལ་གྱི་རང་བཞིན་ནི།། དཔེར་ན་མཁའ་ལ་ཉི་ཤར་བཞིན།། རིག་པ་རང་གསལ་ཕྱོགས་དང་བྲལ།། ཕྱོགས་རྣམས་མེད་ཅིང་ཀུན་ལ་ཁྱབ།། སྣ་ཚོགས་རིག
150a3 པའི་ཆོས་སྐུར་གསལ།། ཞེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས།། རིག་པ་རྩལ་གྱི་ལེའུ་སྟེ་གཉིས་པའོ།།།། དེ་ནས་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས
150a4 དཔའ་ལ་འདི་སྐད་ཅེས་གསོལ་ཏོ།། ཀྱེ་ཀྱེ་དགོངས་པ་རང་ཤར་དབྱིངས་ན་གསལ།། དོན་དམ་མ་རྟོགས་སྣང་མེད་ལ།། གབ་པའི་དོན་ཆེན་མངོན་དུ་ཕྱུང།། བླ་མས་དགོངས་པའི་དབྱིངས་བརྟོལ་བའི།། ཚད་མ་ངག
150a5 ལྡན་བླ་མ་ཡིས།། མན་ངག་བདུད་རྩི་བཅུད་དུ་བསྟན།། བསླད་པས་མི་སློད་ཆོས་སྐུ་ལ།། རྣམ་རྟོག་ཀུན་བརྟགས་ག་ལ་ཡོད།། གསེར་ལ་གཡའ་བྱུང་གསེར་ཉིད་བསྒྲིབ།། གཡའ་བྱུང་གསེར་བས་འདས་པ
150a6 མེད།། ཐིག་ལེས་ཆོས་སྐུ་ཁྱབ་པར་གསལ།། དཔེར་ན་འཁོར་ལོས་སྒྱུར་རྒྱལ་ལ།། མཚན་དཔེ་ཞེན་མེད་རང་ལ་ཚང།། དམིགས་ཕྱེད་རྒྱན་ཆ་རང་ལ་གསལ།། དེ་བཞིན་སེམས་ཅན་སེམས་ཉིད་ལ།། ཐིག་ལེ་ཆེན་པོ
150b1 ངོ་སྤྲོད་ན།། མ་བསླད་ཆོས་སྐུ་ངང་གིས་གསལ།། ཐིག་ལེ་ཆོས་སྐུ་རང་གསལ་ལ།། མཚན་དཔེ་ཞེན་མེད་རང་ལ་ཚངས།། ངོ་བོ་ཉིད་ནི་དམིགས་སུ་མེད།། གར་ཡང་མ་གཡོས་འགྱུར་བ་མེད།། ཉམས་སུ་བླང་མེད
150b2 གཟའ་གཏད་བྲལ།། སྐྱེ་མེད་འགག་མེད་ཤར་ནུབ་མེད།། གར་མཐོང་ཅིར་གསལ་ཆོས་སྐུར་མཐོང།། གང་དུའང་མ་བགྲོད་ཀློང་དུ་གནས།། འབྱུང་འཇུག་མེད་ཅིང་གཞག་བྱ་བྲལ།། འདས་དང་མ་འོངས་ད་ལྟ
150b3 རུ།། སྣང་ཞེན་མེད་ཅིང་བགྲོད་དུ་མེད།། རང་བྱུང་ཡེ་ཤེས་རང་གསལ་བས།། མི་མཐུན་ཕྱོགས་དང་གཉེན་པོ་མེད།། དཔེར་ན་དམུས་ལོང་མིག་ཕྱེ་བས།། རང་ལུས་གཞན་ནས་བཙལ་མི་དགོས།། དེ་བཞིན་ཐིག་ལེ
150b4 ཆེན་པོ་ཡང།། མཚན་མ་ཆོས་སྐུར་ངོ་ཤེས་ན།། མི་མཐུན་མེད་པས་གཉེན་པོ་མེད།། ཆོས་སྐུ་རང་གསལ་གདེང་རྙེད་ན།། བགྲོད་རྩོལ་འབད་པ་ག་ལ་ཡོད།། དམ་པར་བལྟ་མེད་ཞེན་འཆིང་མེད།། ཕྱོགས་རྣམས་མེད
150b5 ཅིང་ཕྱོགས་དང་བྲལ།། དཔེར་ན་ནམ་མཁའི་རང་བཞིན་ལྟར།། རང་གི་ངོ་བོ་རང་གསལ་ལྟར།། རང་གསལ་ཉིད་ལ་གནས་པ་མེད།། དམིགས་མེད་མཚན་མ་ཅིར་མི་གནས།། སྣང་སྟོང་ཀུན་གསལ་ཡེ་ཤེས
150b6 སྐུ།། ཐིག་ལེ་རང་གསལ་རང་བཞིན་ལ།། སྣང་དང་སྟོང་པ་གཉིས་སུ་མེད།། དངོས་པོར་སྣང་བའི་ཐ་སྙད་རྣམས།། སྣང་ཞེས་ཐ་སྙད་ཅི་བྱུང་ཡང།། མཚན་མ་རང་གྲོལ་ཐ་སྙད་བྲལ།། རྣམ་རྟོག་ཡེ་ཤེས་དགོངས་པར
151a1 ལྡན།། འཁོར་དང་མྱ་ངན་འདས་རྣམས་ཀུན།། གཉིས་ཀ་ཡེ་ཤེས་རང་གསལ་ལ།། དགག་སྒྲུབ་མེད་ཅིང་སྤང་བླང་མེད།། འབྱུང་འཇུག་མེད་ཅིང་རྣམ་བྲལ་མེད།། ཐ་སྙད་མེད་ཅིང་སྙིང་པོ་མེད།། དག
151a2 དང་མ་དག་ཚིག་མཐའ་བྲལ།། གང་ཡང་བདེ་དང་སྡུག་བསྔལ་མེད།། རྩོལ་བ་མེད་ཅིང་སྤྱོད་མཐའ་བྲལ།། བྱ་བྱེད་མེད་ཅིང་ཆོས་སྐུར་གསལ།། བྱེད་པ་མེད་ཅིང་འཆིང་གྲོལ་དག། བདག་གཞན་ཡེ་ནས་གཉིས་སུ
151a3 མེད།། འགྲོ་བ་རིགས་དྲུག་བདེར་གཤེགས་ཤིང།། ཡོད་མེད་མཚན་མ་དབྱེར་མེད་ལ།། བླང་དོར་དབྱེ་བསལ་ངང་གིས་བྲལ།། མ་ལུས་ཆོས་རྣམས་ཐམས་ཅད་ཀུན།། ཤེས་པ་ཆོས་སྐུར་རང་གསལ་བས།། ཀུན་ཏུ
151a4 བཟང་པོའི་དགོངས་པ་ལ།། གར་ཡང་མ་གཡོས་ཆོས་ཉིད་ཡིན།། རང་བྱུང་ཉིད་དུ་རང་གྲོལ་བས།། གཞན་དག་རྩོལ་བསྒྲུབ་ག་ལ་ཡོད།། སོ་སོར་རྟོགས་པའི་ཤེས་རབ་ཀྱིས།། ཐེག་པ་ནོ་བརྩེགས་རང་བྱུང
151a5 བྲལ།། རང་བྱུང་ཐིག་ལེ་གཅིག་ཏུ་འདུས།། ཐིག་ལེ་མི་རྟོག་རང་བཞིན་གསལ།། ཆོས་སྐུ་རྡོ་རྗེ་འགྱུར་མེད་ལུང།། རང་བྱུང་ཡེ་ཤེས་རང་ལགས་པས།། ཐམས་ཅད་ཡེ་ཤེས་ངོ་བོར་གསལ།། ཞེས་གསུངས་སོ།། ཀུན
151a6 ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས།གབ་པ་མངོན་དུ་ཕྱུང་བའི་ལེའུ་སྟེ་གསུམ་པའོ།།།། དེ་ནས་ཡང་རང་བྱུང་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་
151b1 གསོལ་ཏོ།། རང་བྱུང་ཡེ་ཤེས་འགག་མེད་ལ།། བཀག་པས་མི་ཁེགས་ཡེ་ཤེས་ཤར།། ཟང་ཐལ་ཆེན་པོའི་རང་བཞིན་ནི།། རང་གསལ་གང་དུ་མི་རྟོག་ཕྱིར།། བཙལ་མེད་རིག་པའི་ཤུགས་ལས་འབྱུང།། དཔེར་ན
151b2 གླང་ཆེན་སྨཡོན་པ་ལྟར།། བཏགས་བྲོས་བཏང་ན་རང་ལྡོག་ལྟར།། རྣལ་འབྱོར་ཤེས་པ་ཡན་བཏང་ན།། མ་བཙལ་གནས་ལུགས་ངང་དུ་ལྡོག། རང་བྱུང་མི་འགག་རྩལ་དུ་ཁྱེར།། གང་ལའང་མ་ཆགས་ཐོགས་པ
151b3 མེད།། རང་ཤར་ཆེན་པོའི་ལྟ་བ་ལ།། དོན་འགྱུར་ཉམས་སུ་བླང་པ་མེད།། ཡེ་ཤེས་ཆེན་པོའི་ཆོ་འཕྲུལ་ཡིན།། རང་བྱུང་རང་གསལ་ཟང་ཐལ་ཡིན།། ཟང་ཐལ་ཉིད་ལ་གཟུང་དུ་མེད།། འཛིན་མེད་རིག་པ་ཡེ་ཤེས
151b4 ཤར།། འཁྲུལ་རྟོག་སྡུག་བསྔལ་སྣ་ཚོགས་ཀྱང།། མྱང་རྒྱུ་མེད་པར་ཤུགས་ལ་སྣང།། རྩོལ་མེད་རང་བྱུང་རང་ས་ཟིན།། འདི་ལ་ཆེད་དུ་གཟུང་དུ་མེད།། འདི་ལ་ཉམས་སུ་བླངས་དང་བྲལ།། འདི་ལ་རྟོག་པས་དགག
151b5 ཏུ་མེད།། ཡེ་ཤེས་རང་ཤར་ལྟ་བའི་གདེངས།། རྩོལ་བ་མེད་པ་སྒོམ་པའི་མཆོག། བཙལ་མི་དགོས་པས་འབྲས་བུའི་དོན།། ཞེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། ཡེ་ཤེས
151b6 ཟང་ཐལ་གྱི་ལེའུ་སྟེ་བཞི་པའོ།།།། དེ་ནས་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ།། རྒྱལ་འགྲོ་ལམ་པའི་སེམས་ཅན་རྣམས།། ལྷུན་གྲུབ་ངང་ལ་དབྱེར
152a1 མེད་པས།། ཐམས་ཅད་མཁྱེན་པའི་སྤྲུལ་སྐུ་ཡིན།། ཐུག་ཕྲད་ཉིད་དུ་ཡེ་སངས་རྒྱས།། མ་བཅོས་སྐུ་གསུང་འཁོར་ལོ་བསྐོར།། ཆོས་རྣམས་ཀུན་བཟང་རོལ་པར་ཤར།། གང་ཡང་མ་ཡིན་ཆོས་ཀྱི
152a2 སྐུ།། གཞན་དུ་མི་རྟོག་བཙལ་དུ་མེད།། གང་ཡང་མ་སྤངས་ཀུན་ཏུ་རོལ།། དཔེར་ན་སྐྱེས་བུ་ངོ་ཤེས་དང།། ཕྲད་པའི་དུས་ན་ཐེ་ཚོམ་མེད།། རྣལ་འབྱོར་དྲན་རིག་ཅི་འགྱུས་པ།། ཡེ་ཤེས་ཟང་ཐལ་ཆོས་སྐུར
152a3 ཤེས།། གང་ཡང་མ་སྤངས་རང་སར་གྲོལ།། གཞན་དུ་སྐད་ཅིག་ཙམ་ཡང་མེད།། ཐིག་ལེ་ཐུག་ཕྲད་ཆོས་ཀྱི་སྐུ།། རང་བཞིན་མི་འགྱུར་ཀ་དག་པའི།། སྤང་བྱ་སྤོང་བྱེད་གཉིས་སུ་མེད།། འབྲས་བུ་ཀུན་བཟང་གཏན
152a4 ཚིགས་ཡིན།། ཞེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། ཆོས་ཉིད་ཐུག་ཕྲད་ཀྱི་ལེའུ་སྟེ་ལྔ་པའོ།།།། དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ
152a5 དེས།། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ།། བདེ་ཆེན་ལྷུན་གྲུབ་ཅོག་བཞག་ལ།། རྩོལ་མེད་རིག་པ་བསམ་དང་བྲལ།། གཟུང་འཛིན་གཉེན་པོ་རང་སར་གཞག། མཉམ་ཉིད་ཡེ་ཤེས་འབྲས་བུའི
152a6 མཆོག།ཅོག་བཞག་ཆེན་པོའི་ངང་དུ་གསལ།། དཔེར་ན་རྒྱ་མཚོ་དངས་པ་ལ།། གདོས་པ་མེད་པར་སྣང་སྲིད་གསལ།། རྣལ་འབྱོར་རང་རིག་ཅིར་གསལ་བ།། མིང་དང་གདགས་གཞི་གང་ཡང་མེད།། གདགས་གཞི་
152b1 བྲལ་བ་དོན་གྱི་མཆོག།མཉམ་ཉིད་རང་གསལ་རིག་པའི་ཀློང།། སྣང་བ་ཉིད་ན་གྲུབ་པ་མེད།། རང་རིག་སྟོང་ཉིད་མི་གཡོ་བ།། དེ་ལ་མི་རྩོལ་རྣལ་འབྱོར་མཆོག། དབང་པོའི་ངོ་ལ་གང་སྣང་བ།། མི་རྟོག་ཅིར་
152b2 གསལ་གདགས་གཞི་བྲལ།། སྣང་མེད་མི་འགག་ཅིར་མི་དགོངས།། གཉེན་པོ་མེད་པས་འབད་རྩོལ་བྲལ།། ཞེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། མཉམ་ཉིད་ཅོག་བཞག
152b3 གི་ལེའུ་སྟེ་དྲུག་པའོ།།།། དེ་ནས་ཡང་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ་སེམས་དཔའ་ལ་འདི་སྐད་ཅེས་བཀའ་སྩལ་ཏོ།། ཉོན་ཅིག་སེམས་དཔའ་རྡོ་རྗེ་ཁྱོད།། དབང་པོ་ཡང
152b4 རབ་དོན་རྫོགས་ནས།། འབྲིང་དང་དམན་པའི་དོན་བཤད་ཉོན།། ཆོས་སྐུ་ཉག་གཅིག་དངོས་མཚན་མེད།། དངོས་མེད་ཆོས་སྐུ་ཚོལ་འདོད་ན།། དཔེར་ན་གྲོང་རྒྱུའི་ཁྱི་རྐུན་གྱིས།། ཅང་མེད་ཁང་སྟོང་བཙལ་གྱུར
152b5 ཀྱང།། འདོད་པ་མ་རྙེད་སུན་ཕྱིན་ནས།། ཞེན་ལོག་སླར་ལ་ཉལ་བ་ལྟར།། རྣལ་འབྱོར་རང་རིག་ཅིར་སྐྱེས་ལ།། དབང་པོ་མི་དགག་ནང་དུ་བལྟ།། ཅིར་སྣང་བརྟགས་ཤིང་བདག་པོར་བལྟ།། གཟུང་འཛིན་གང་སྐྱེས
152b6 རྩ་བ་མེད།། ནང་དུ་བལྟ་ཞིང་ལྟ་མཁན་བཙལ།། བཙལ་བས་ཅིར་ཡང་མ་རྙེད་ཅིང།། གང་དུའང་མ་མཐོང་མིང་མ་ཐོགས།། རྗེས་མེད་ནམ་མཁའི་བྱ་ལམ་འདྲ།། སྣང་མེད་རང་བྱུང་ནམ་མཁའ་འདྲ།། དེ་ལ་གནས
153a1 པ་འབྲས་བུའི་མཆོག།ཅེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། ཚོལ་བ་རྗེས་མེད་ཀྱི་ལེའུ་སྟེ་བདུན་པའོ།།།། དེ་ནས་རིག་པའི་རྒྱལ་པོ་ཀུན་ཏུ་བཟང་པོ་
153a2 དེས།། རྡོ་རྗེ་སེམས་དཔའ་ལ་བཀའ་སྩལ་པ།། ཆོས་སྐུ་ཡེ་ནས་དམིགས་གཏད་མེད།། དམིགས་གཏད་མེད་པའི་དོན་འདོད་ན།། དཔེར་ན་མིག་ནད་ཅན་དག་གིས།། གང་ཡང་རུང་བའི་དངོས་པོ་ལ།། རྒྱང་མིག
153a3 བལྟས་ཤིང་ཡིན་མིན་བརྟགས།། བརྟགས་པའི་རྗེས་ལ་དམིགས་པ་འཚུབས།། གང་མཐོང་མ་ཤེས་མདོངས་པ་ལྟར།། རྣལ་འབྱོར་སྐྱེས་བུ་གང་ཞིག་གིས།། རྫས་ཀྱི་རྣམ་པ་གང་རུང་བ།། འབྲུ་ཚུགས་བལྟས་ཤིང་མ
153a4 གཏང་ན།། དྲན་མེད་འཛིན་མེད་ལོང་གིས་སྐྱེ།། མ་བཏང་ཡུན་བསྲིང་ཡེ་ཤེས་འཆར།། ཡེ་ཤེས་མཁའ་མཉམ་ནམ་མཁའ་འདྲ།། དྲན་པ་མེད་པའི་བློང་བློང་པོ།། མྱོང་མེད་ཉམས་སྐྱེ་དྲན་རིག་འགག། དམིགས་པ
153a5 རྗེས་མེད་གྱི་ནར་འདུག།བཏང་སྙོམས་ཆེན་པོའི་ཆོས་སྐུ་ཐོབ།། ཅེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། དམིགས་པ་རྗེས་མེད་གྱི་ལེའུ་སྟེ་བརྒྱད་པའོ།།།། དེ་ནས་རིག་
153a6 པའི་རྒྱལ་པོ་ཀུན་ཏུ་བཟང་པོས།རྡོ་རྗེ་སེམས་དཔའ་ལ་བཀའ་སྩལ་པ། དཔེར་ན་ཁྱུང་ཆེན་རྩོལ་མེད་ཀྱང།། རྩོལ་བ་ཡིད་ཙམ་སྟེགས་ལ་བརྟེན།། རྟེན་མེད་ཡེ་ཤེས་ཐོབ་འདོད་ན།། དཔེར་ན་ཁྱི་གསར་རྟོད་བཏགས་
153b1 ན།། གང་དུ་མི་འགྲོ་དེར་འཁོར་ལྟར།། གང་ཡང་རུང་བའི་མཚན་མའམ།། དམིགས་དང་བཅས་པའི་མཚན་མེད་ལ།། ཡེངས་པ་མེད་པར་བློ་གཏད་ནས།། མ་གོམས་བར་དུ་བརྟག་པར་བྱ།། གོམས་ཤིང་དམིགས་པ
153b2 གསལ་གྱུར་ནས།། ནུས་པ་ཕྲ་མོ་འབྱིན་ནུས་ན།། གདེང་གིས་ཟིན་བའི་བླ་མ་ཡིས།། ཀུན་བཟང་ལྷུན་གྲུབ་དགོངས་པའི་དོན།། དུས་དེ་ཁ་ནར་ལུང་ཕོག་ན།། སྙན་ཁུང་བརྒྱུད་པའི་མན་ངག་གིས།། རང་བྱུང་ཡེ་ཤེས
153b3 ཤུགས་ལས་འཆར།། མཚན་བཅས་མཚན་མེད་རང་སར་གྲོལ།། ཁྱུང་ཆེན་ནམ་མཁར་ལྡིང་བ་འདྲ།། དེ་ལྟར་མ་ཤེས་རྟོག་མེད་ན།། གང་ཡང་རུང་བའི་མཚན་མའམ།། བློ་རྩེ་གང་འཕྲོད་དམིགས་པ་ལས།། བལྟས
153b4 པས་ཤེས་དང་བརྟགས་པས་ཤེས།། བསྒོམས་པས་ཤེས་དང་བཤར་བས་ཤེས།། གཤུར་བས་ཤེས་དང་ལོག་གནོན་ཤེས།། ཐུན་མོང་ཐབས་ཀྱི་མན་ངག་དྲུག། མང་པོར་བསྒོམ་དང་རང་ཉིད་བསྒོམ།། མཚན་མ་ཅན
153b5 ལ་བསྟེན་ནས་ནི།། མཚན་མེད་ཡེ་ཤེས་ཤུགས་ལས་སྐྱེས།། ཟག་བཅས་དག་ལ་བརྟེན་ནས་ནི།། ཟག་མེད་བདེ་ཆེན་ཤུགས་ལས་འབྱུང།། ཞེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད
153b6 ལས།རྟོད་ཕུར་གྱི་ལེའུ་སྟེ་དགུ་པའོ།།།། དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། རིག་པའི་རྩལ་ནི་རྣམ་གསུམ་སྟེ།། རང་བྱུང་བརྟགས་
154a1 སྣང་གཉིས་མེད་གསུམ།། མཁའ་ལ་ཉི་ཤར་བྱ་བྱེད་སྤྲེའུ།། ཆུ་དང་འོ་མ་འདྲེས་ལྟར་སྣང།། གབ་པ་མངོན་ཕྱུང་རྣམ་གསུམ་སྟེ།། རང་གནས་མ་ཤེས་ཡུལ་གྱིས་བསྒྲིབས།། གཉིས་སུ་མེད་དེ་རྣམ
154a2 གསུམ་པོ།། དམུས་ལོང་དམིགས་ཕྱེ་མེ་ལོང་དང།། རིན་ཆེན་འདམ་ནས་ཐོན་ལྟར་སྣང།། ཆོས་ཉིད་ཟང་ཐལ་རྣམ་གསུམ་སྟེ།། རང་བཞིན་རྩལ་རང་གཉིས་མེད་གསུམ།། ལྷོ་སྨཡུག་གླང་ཆེན་མན་ཤེལ་འདྲ།། ཆོས
154a3 ཉིད་གསུམ་ཕྲད་གསུམ་ཉིད་དེ།། རང་བྱུང་རྐྱེན་དང་གཉིས་མེད་གསུམ།། རིན་ཆེན་གསེར་གླིང་ངོ་ཤེས་མི།། རལ་གྲི་ཁ་མང་ལྟ་བུར་སྣང།། ཅོག་བཞག་རྣམ་གསུམ་ཉིད་ཡིན་ཏེ།། གནས་ལུགས་འབྲས་བུ་ལམ་དང
154a4 གསུམ།། ནམ་མཁའ་དང་ནི་རྒྱ་མཚོ་དང།། བྱ་བ་བཏང་བའི་སྐྱེས་ལྟར་སྣང།། ཚོལ་བ་རྗེས་མེད་རྣམ་གསུམ་སྟེ།། ནང་དང་ཕྱི་དང་གཉིས་སུ་མེད།། ཁྱི་རྐུན་ནམ་མཁའི་བྱ་ལམ་དང།། ཆུ་ལ་རལ་གྲི་བཏབ་ལྟར
154a5 སྣང།། དམིགས་པ་རྗེས་མེད་དག་ཀྱང་གསུམ།། ཕྱི་དང་ནང་དང་གཉིས་སུ་མེད།། མ་འདྲིས་དབང་སྟོང་མིག་ནད་ཅན།། ཆུ་ལ་ཆུ་ཐིམ་ལྟ་བུར་སྣང།། རྟོད་ཕུར་དག་ཀྱང་རྣམ་གསུམ་སྟེ།། དོན་ཡོད་གང་གསལ་ཞེན
154a6 པ་མེད།། བུམ་པ་བདུད་རྩི་བུ་ཆུང་གཟུགས།། ཁྱུང་ཕྲུག་གཤོག་རྫོགས་ལྟ་བུར་སྣང།། སྣང་སྲིད་འཁོར་འདས་ལམ་པའི་ཆོས།། ཟབ་མོའི་གདམས་ངག་ཇི་སྙེད་པ།། འདི་རུ་མ་འདུས་གང་ཡང་མེད།། ཅེས་གསུངས
154b1 སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། དབྱེ་ཐབས་འཁོར་ལོའི་མན་ངག་རྒྱ་ཆེ་གྲུབ་མཐའི་ལེའུ་སྟེ་བཅུ་པའོ།།།། དེ་ནས་རང་གྲོལ་རིག་པའི་རྒྱལ་པོ་ཀུན་ཏུ་བཟང་པོ་དེས། རྡོ་རྗེ
154b2 སེམས་དཔའ་ལ་བཀའ་སྩལ་པ།། རིག་པ་རྩལ་འབྱོངས་རྣལ་འབྱོར་ལ།། དྲོད་རྟགས་མཐར་ཕྱིན་འདི་ལྟར་འབྱུང།། ཕྱི་དང་ནང་དང་གསང་བ་གསུམ།། འོད་དང་ཉི་ཤར་ཤེས་པ་འཕྱོ།། ཕྱོགས་རིས་མེད་དང་འདོད
154b3 པ་ཆུང།། འབྲས་བུ་དག་ལ་མི་རེ་ཞིང།། གཡེངས་པ་བདུད་ལ་ཉམ་ང་མེད།། རིག་པའི་ཆོ་འཕྲུལ་དག་ཏུ་འཆར།། གབ་པ་མངོན་ཕྱུང་མཐར་ཕྱིན་རྟགས།། ཕྱི་ནང་གསང་བ་གསུམ་དུ་འདུས།། ནམ་མཁའི་མཐོང་ཕྱེ
154b4 སྙིང་རྗེ་ཆེ།། ཆགས་མེད་བླ་མ་མཆེད་གྲོགས་གདུང།། དམ་ཚིག་ལ་གནས་ཉེ་རིང་མེད།། སྤྱོད་ཡུལ་གང་ལ་ཞེ་འདོད་མེད།། ཡེ་ཤེས་ཟང་ཐལ་མཐར་ཕྱིན་རྟགས།། ཕྱི་ནང་གསང་བ་གསུམ་དུ་འབྱུང།། ནམ་མཁར
154b5 འགྲོ་དང་ཐོགས་པ་མེད།། ལུས་ཡོད་མི་ཚོར་སྙམ་བྱེད་བྲལ།། སྤྱོད་ཡུལ་གང་ལ་ཡང་འཛིན་མེད་པའོ།། ཐུག་ཕྲད་གོམས་རྟགས་ངོ་ཤེས་ན།། ཕྱི་ནང་གསང་བའི་རྟགས་གསུམ་འབྱུང།། གང་ལ་ཞུམ་མེད་སྐྱེངས་མེད
154b6 དང།། གཙང་སྨེ་བླང་དོར་སྤང་ལེན་མེད།། ཅེར་མཐོང་ཐུག་ཕྲད་ཡེ་ཤེས་ཤར།། ཅོག་བཞག་ཀློང་གྱུར་མི་རྩོལ་རྟགས།། ཕྱི་དང་ནང་དང་གསང་བ་གསུམ།། རྩོལ་བ་ཆུང་དང་ཁོང་ཁྲོ་མེད།། ལུས་སེམས་རང
155a1 ལུགས་སྤྱོད་ཡུལ་བྲལ།། བཙལ་བ་རྗེས་མེད་རྩད་ཆོད་རྟགས།། ཕྱི་ནང་གསང་བ་གསུམ་དུ་འཆར།། རྩོལ་བ་ཆུང་དང་ཞེན་ཆགས་ལོག། སྒོ་གསུམ་ལས་ལ་རྗེས་མེད་འཆར།། དམིགས་པ་རྗེས་མེད
155a2 མཐིལ་ཕེབས་རྟགས།། ཕྱི་ནང་གསང་བ་གསུམ་དུ་འཆར།། གང་ལ་ཐིས་མི་འཛུགས་པ་དང།། སེམས་ལ་གཏད་སོ་མ་རྙེད་ཅིང།། དབྱེར་མེད་གཟུང་འཛིན་མེད་པར་འཆར།། རྟོད་ཕུར་དམིགས་པ་བརྟན་ཐོབ
155a3 རྟགས།། ཕྱི་ནང་གསང་བ་གསུམ་དུ་འཆར།། མེ་ཆུ་རླུང་དང་ཁ་དོག་ལྔ།། གཡོ་དང་འཕུར་བ་ཡང་བ་དང།། སྟན་ལ་མི་སྣང་སྒྲ་མི་ཚོར།། གཉིད་ཆོམས་ཤིག་ནི་མི་ཚོར་དང།། ཡར་མར་དབུགས་རྒྱུ་མི་ཚོར
155a4 དང།། སྤྱོད་ཡུལ་སྒྱུ་མ་ལྟ་བུར་གསལ།། མཉམ་གཞག་རྗེས་ཐོབ་མེད་པ་དང།། ཆིག་ཆོད་དག་ཏུ་ངང་གིས་འཆར།། ཞེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། དྲོད་རྟགས་འབྲས
155a5 བུ་བསྟན་པའི་ལེའུ་སྟེ་བཅུ་གཅིག་པའོ།།།། དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། གདམས་ངག་དོན་རྟོགས་གདེང་ལྡན་ན།། དུས་དེ་ཁོ་ནར
155a6 འབྲས་བུ་འཐོབ།། སྤྱོད་ཡུལ་རིག་པ་རང་ཤར་ཡིན།། ཤེས་པ་ལྷུག་པ་རང་བྱུང་ཉིད།། ཆགས་མེད་ཕྱོགས་མེད་རང་གྲོལ་ཉིད།། ཞེན་པ་རང་ལོག་ཕྱོགས་རིས་མེད།། རེ་དོགས་མེད་ཅིང་ཕྱོགས་རིས་མེད།། དུ་མ་རོ
155b1 གཅིག་འཕེལ་འགྲིབ་མེད།། ལྷུན་གྲུབ་ཕྱག་རྒྱ་ཆེན་པོ་ཉིད།། ད་ལྟ་ཉིད་དུ་འབྲས་བུ་གྲུབ།། དེ་དུས་ཅིར་སྣང་ཡེ་ཤེས་ལ།། ལྷུན་གྲུབ་འགྱུར་མེད་སྐྱེ་བ་མེད།། རང་ཤར་སྤྲུལ་པ་དཔག་མེད་འགྱེད།། ཐམས་ཅད
155b2 འབྲས་བུ་རང་ཤར་ན།། ཐམས་ཅད་མཁྱེན་པའི་འབྲས་བུ་ཡིན།། འདྲེ་ལྡོག་སྤྱིའུ་ཚུགས་གར་སོང་ཡང།། འབྲས་བུ་ཉིད་དེ་མངོན་སངས་རྒྱས།། འཁོར་འདས་དབྱེར་མེད་འབྲས་བུའི་མཆོག། འཁོར་བ་ཉིད་ལ་མྱང
155b3 འདས་གསལ།། སྡུག་བསྔལ་བདེ་བར་རང་ཤར་ན།། དོན་གྱི་འབྲས་བུ་སྐྱེ་བ་མེད།། ཅེས་གསུངས་སོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས། འབྲས་བུ་མངོན་དུ་ཕྱུང་བའི་ལེའུ་སྟེ་བཅུ་གཉིས
155b4 པའོ།།།། དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེ་ཉིད་སྣང་བ་རང་གྲོལ་ཡེ་ཤེས་རང་གསལ་གྱི་ཏིང་ངེ་འཛིན་ལ་སྙོམས་པར་ཞུགས་སོ།། དེའི་དུས་དེ་ཉིད་ཁོ་ནར་རྡོ་རྗེ་སེམས
155b5 དཔའ་ཉིད་ལས་མི་གཞན་པའི་འཁོར་རྣམས་ལ་འཛུམ་པ་མཛད་དེ།རིག་པའི་རྒྱལ་པོ་ལ་བསྟོད་པ། རིག་པའི་རྒྱལ་པོ་སྐྱེ་མེད་ནམ་མཁའི་ཐུགས།། རྡོ་རྗེའི་སྐུ་ལ་འགྱུར་མེད་སྐྱེ་འཇིག་བྲལ།། བྱིན་རླབས་གསུང་
155b6 གིས་ཚིག་མེད་དོན་ལ་མཚོན།། འདུ་འབྲལ་མེད་པར་སྐུ་གསུང་ཐུགས་ཀྱི་ངང།། ཨེ་མ་ཧོ།། ཨེ་མ་ཧཽ།། ཞེས་བརྗོད་པས་རབ་ཏུ་དགྱེས་པར་གྱུར་ཏོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལས།
156a1 བསྟོད་པའི་ལེའུ་སྟེ་བཅུ་གསུམ་པའོ།།།། དེ་ནས་བཅོམ་ལྡན་འདས་རིག་པའི་རྒྱལ་པོ་ཀུན་ཏུ་བཟང་པོ་དེས་རྡོ་རྗེ་སེམས་དཔའ་ལ་རྒྱུད་དང་མན་ངག་གི་དོན་གཏད་པ། ཀྱེ་ཀྱེ་རིག་པའི་སྐྱེས་བུ
156a2 ཆེན་པོས་རྒྱུད་འདི་ཟུང།སྒྲ་དང་ཚིག་ཕྱིར་མ་འབྲེངས་དོན་གྱི་གཏེར།། ཡང་དག་དོན་ཆེན་གསང་བའི་རྒྱུད་མཆོག་འདི།། ང་ཡི་ཐུགས་བརྟོལ་དགོངས་པའི་བཅུད་ཕྱུང་ནས།། རྒྱ་མཚོ་ལྟ་བུར་གཏིང་ཟབ་དཔག་
156a3 དཀའི་དོན།། ཀུན་དང་ཀུན་གྱི་ཐུན་མོང་མ་ཡིན་པས།། ཉིད་ལས་མི་གཞན་ཁྱད་མེད་འཁོར་རྣམས་ལ།། ཁྱབ་པར་སྟོན་ཅིག་སེམས་དཔའ་རྡོ་རྗེ་ཁྱོད།། སྣོད་ལྡན་ལས་འཕྲོ་ཡོད་པའི་གང་ཟག་གམ།། རིག་པ་སྤྱི
156a4 བླུགས་ཤར་བའི་གང་ཟག་ལ།། ཐེ་ཚོམ་ཡིད་གཉིས་མེད་པར་མྱུར་དུ་སྟོན།། ཞེས་གསུངས་པས།། ཉིད་ལས་མི་གཞན་པའི་འཁོར་ཐམས་ཅད་རྗེས་སུ་ཡི་རང་བར་གྱུར་ཏོ།། ཀུན་ཏུ་བཟང་པོ་རིག་པ་རང་གི་རྩལ
156a5 ཤར་བའི་རྒྱུད་ལས།རྒྱུད་གཏད་པ་དང་རྗེས་སུ་ཡི་རང་བ་བསྟན་པའི་ལེའུ་སྟེ་བཅུ་བཞི་པའོ།། ཀུན་ཏུ་བཟང་པོ་རིག་པ་རང་གི་རྩལ་ཤར་བའི་རྒྱུད་ལེའུ་བཅུ་བཞི་པ་རྫོགས་སོ།། ཤྲཱི་སིདྷ་དང་བཻ་རོས་
156a6 བསྒྱུར་བའོ།། བར་འདིར་རིན་པོ་ཆེ་གདམས་ངག་སྣ་ཚོགས་འཁོར་ལོ་འཛུད།།།
་