། ། རྒྱ་གར་སྐད་དུ། བཛྲ་དུནྡ་ནཱ་མ་ནཱ་ག་ས་མ་ཡ། བོད་སྐད་དུ། རྡོ་རྗེ་མཆུ་ཞེས་བྱ་བ་ཀླུའི་དམ་ཚིག། ཐམས་ཅད་བཁྱེན་པ་ལ་ཕྱག་འཚལ་ལོ། ། དེ་ནས་བཅོམ་ལྡན་འདས་གྲོང་ཁྱེར་ཆེན་པོ་གཡོག་འཁོར་ན་བཞུགས་ཏེ། འཁོར་འདུས་པ་ཆེན་པོ་འཇོག་པོ་ལ་སོགས་པ་ཀླུའི་འཁོར་དང་། ལྷ་དང་མིའི་ཚིགས་ཀྱི་འཁོར་ཆེན་པོ་ལ་སེམས་ཅན་རྣམས་ཀྱི་དོན་ཆེན་པོའི་ཕྱིར་ཏེ། བསམ་པ་དང་རེ་བ་ཐམས་ཅད་ཡོངས་སུ་སྐོང་བ་བདེ་བར་བྱེད་པའི་ཆོས་སྟོན་ཏོ།། དེ་ནས་གྲོང་ཁྱེར་དེ་ནས་བྲམ་ཟེའི་ཁྱེའུ་ཁྱབ་མ་སྤྱན་ཞེས་བྱ་བ་ཕྱུག་པ། ནོར་ཆེ་བ། ལོངས་སྤྱོད་ཆེ་བ། རྫས་དང་ཡོ་བྱད་མང་པོ་ཕུན་སུམ་ཚོགས་པ། རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་ཕྱིན་པ། སྔགས་ལ་འཇུག་པ། སྔགས་གྲུབ་པ་ཞིག་འ་སྟེ། དེ་ཡང་དང་ཡང་དུ་ཀླུ་འགུགས་ཤིང་མེའི་སྦྱིན་སྲེག་བྱེད་དོ།། བྲམ་ཟེ་དེའི་ལོ་ཏོག་སྨིན་ཁར་ཆར་ཆད་པར་གྱུར་ནས། དེས་ང་རྒྱལ་གྱི་སྒྲས་སྔགས་བརྗོད་པ་དང་མཐུན་པས་འདི་སྐད་ཅེས།། བདག་གིས་ཆར་པའི་རྒྱུན་དབབ་ཅིང་ཀླུ་དགུག་པར་བྱའོ་ཞེས་སྨྲས་ཏེ། དེས་མེའི་སྦྱིན་སྲེག་བྱ་བར་བཤམས་ནས་ཏིལ་དང་། འབྲས་དང་། ཡུངས་ཀར་རྣམས་འབྲུ་མར་ཚ་བ་དང་བསྲེས་ཏེ་སྦྱིན་སྲེག་བྱེད་དོ།། དེ་ནས་ཀླུ་མི་བསྲུན་པ་ཞིག་གི་གཟུགས་བྱས་ཏེ། དེས་ལྕགས་ཀྱི་ཕུར་བུ་ལ་བསྔགས་ནས་ཀླུའི་སྤྱི་བོར་བཏབ་པ་དང་། ཀླུའི་སྤྱི་བོ་གས་ནས་སྡུག་བསྔལ་གྱི་ཚོར་བ་ཆེན་པོར་གྱུར་ཏོ།། ཀླུ་དེའང་ཆེར་འཁྲུགས་ཏེ་ཁྲོས་ནས་སྐད་ཅིག་ཐང་ཅིག་ཡུད་ཙམ་དེ་ལ་ཀླུས་ཁྱབ་པར་བྱེད་པའི་ཤུགས་ཀྱིས་ཆེར་གནོད་ཅིང་རྡུལ་འབྱུང་བའི་འོད་ཟེར་ཚ་བ་རང་གི་ལུས་ལས་བཀྱེ་སྟེ། གནོད་པ་ཆེན་པོས་ཁེབས་པར་བྱས་ནས་བྲམ་ཟེ་དེའི་ཞིང་ཚིག་པར་བྱས་སོ། ། དེ་ཡང་ལྕེ་འབབ་པའི་ཆར་གྱི་རྒྱུན་ཆེན་པོ་བྲམ་ཟེའི་ལུས་ལ་ཕབ་ནས་བྲམ་ཟེ་དེ་མགོན་མེད། སྐྱབས་མེད། དཔུང་གཉེན་མེད་དེ། མེའི་སྦྱིན་སྲེག་བྱེད་པ་བཏང་ནས། དེ་བཅོམ་ལྡན་འདས་ལ་མགོན་དང་། སྐྱབས་དང་། དཔུང་གཉེན་བཙལ་ཏེ་འབྲོས་པར་བསམས་ནས། བཅོམ་ལྡན་འདས་ཀྱི་དྲུང་དུ་བརྒྱུགས་ཏེ། བཅོམ་ལྡན་འདས་གལ་བ་དེར་སོང་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ།། བཅོམ་ལྡན་འདས་ཀླུ་ཁྲོ་བོས་བདག་གི་སྲོག་མ་རུངས་པར་འཚལ་ཏེ་སྐྱབས་སུའང་མ་མཆིས་ན། བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱིས། བྲམ་ཟེ་ཆེན་པོ་དེ་དབུགས་ཕྱུང་ནས་འདི་སྐད་ཅེས་བཀའ་སྩལ་ཏོ། ། བྲམ་ཟེ་ཆེན་པོ་མ་འཇིགས་ཤིག། ངས་ཁྱོད་ཀྱི་མགོན་དང་། སྐྱབས་དང་། དཔུང་གཉེན་བྱའོ་ཞེས་བཀའ་སྩལ་ནས་ཅང་མི་གསུང་བར་བཞུགས་སོ།། དེ་ནས་བཅོམ་ལྡན་འདས་ལ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ།། བཅོམ་ལྡན་འདས་གཟིགས་སུ་གསོལ། མངོན་སུམ་དུ་གྱུར་བཞིན་དུའང་ཀླུ་མི་བསྲུན་པས་ལོ་ཏོག་མ་རུངས་པར་བགྱིད་ན། བཅོམ་ལྡན་འདས་ཁྱོད་ཡོངས་སུ་མྱ་ངན་ལས་འདས་ཀྱི་སླད་ན་སྨད་མའི་ཚེ་སླད་མའི་དུས་ན་སེམས་ཅན་ཐམས་ཅད་ཀྱི་རྟེན་ནི་སུ་ལགས། ཇི་ལྟར་འགྱུར། བཅོམ་ལྡན་འདས་ལོ་ཏོག་ཐམས་ཅད་ཀྱི་དོན་དུ་ལོ་ཏོག་རྣམས་ཚིག་པར་མི་འགྱུར་བ་དང་། ཀུན་ཏུ་སྲུང་བ་དང་། རབ་ཏུ་འཕེལ་བར་བགྱིད་པར་འགྱུར་བ་ལོ་ཏོག་ཡོངས་སུ་སྐྱོང་ཞིང་ཀླུ་ཟློག་པ་དེ་བཤད་དུ་གསོལ། དེ་ནས་བཅོམ་ལྡན་འདས་ཀྱིས།། གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་ཏོ།། ལག་ན་རྡོ་རྗེ་ཀླུ་རབ་ཏུ་འགྲོ་བར་བྱེད་པའི་སྙིང་པོ་སྦས་པ་རྡོ་རྗེ་ཞེས་བྱ་བའི་གཟུངས་དེ་བཞིན་གཤེགས་པའི་སྙིང་པོ་དང་ཕྱག་རྒྱ་སྟོན་གྱི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པ་ཡོད་དེ་ངས་བཤད་པར་བྱའོ།། དེས་མྱུར་དུ་གནོད་པ་བཀག་པའི་ཕྱིར་ལོ་ཏོག་ཐམས་ཅད་མྱུར་དུ་བསྲུང་བར་འགྱུར་རོ། ། ལེགས་པར་བསྲུངས་པར་འགྱུར་རོ།། མེའི་རི་སུལ་ཆེན་པོ་སོ་སོ་ཕྱོགས་བཅུ་ཀུན་ནས་ཀླུ་ཐམས་ཅད་ཀྱི་མཚམས་བཅད་པར་འགྱུར་རོ།། མེ་ལྕེ་འབར་བའི་རིམ་པའི་སྤྲིན་ཆེན་པོ་ནམ་མཁའ་ལྡིང་འདབ་མ་གདེངས་པའི་ཤུགས་ཞེས་བྱ་བའི་སྤྲིན་གྱི་རིམ་པས་ནམ་མཁའ་ཁེབས་པར་བྱེད་དོ། ། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ཀུན་ཏུ་སྲུང་སྟེ་གནས་པར་འགྱུར་རོ། ། དེས་ཀླུ་ལ་སོགས་པ་ཐམས་ཅད་ཀུན་ཏུ་རབ་ཏུ་འབར་བར་འགྱུར་རོ།། ཀླུ་མི་འགྲུངས་པ་རྣམས་ཕུང་བར་འགྱུར་རོ།། འདུམ་པར་འགྱུར་རོ།། དེ་ནས་བཅོམ་ལྡན་འདས་ལ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ།། བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་སྨན་པའི་སླད་དུ་གཟུངས་ཆེན་པོ་འདིའི་སྔགས་ཀྱི་ཚིག་བཤད་དུ་གསོལ། དེ་ནས་བཅོམ་ལྡན་འདས་ཀྱིས་སྙིང་པོ་འདི་བཀའ་སྩལ་ཏོ།། ན་མོ་བྷ་ག་ཝ་ཏེ། སརྦྦ་བུདྡྷཱ་ནཱན། ན་མོ་བྷ་ག་པ་ཏེ་ཤཀྱ་རཱ་ཛ་ཡ། ཨོཾ་ཛྭ་ལ་ཛྭ་ལ། གི་རཱི་བ་བྷ་ནི། དིཔྟ་བེ་ག་མ་ཧཱ་བ་དེ་བྷ་ག་ཝ་ཏེ་མ་ཧཱ་ཙཎྜ་ཏྲི་ད་ཡ་ས་ལ་ནི། ཧུ་རུ་ཧུ་རུ། ཧ་ར་ཧ་ར། ད་ཧ་ད་ཧ། པ་ཙ་པ་ཙ། སརྦ་ས་སྱ་ནཱ་ཤ་ཡ། ནཱ་ཀུ་ལ་བཾ་ཤནྟ་ར་དྷ་ར་པྲ་ས་ར་ཙཎྜ་བེ་ག་མ་ཧཱ་བ་ལ་པ་རཱ་ཀྲ་མ་སྥུ་རི་ཏ་རོ་དྲ་བཱཀྟཱ། མ་ཐ་མ་ཐ། པྲ་ཛྭ་ལ་མཱ་ལ་དྷཱ་ར་ཎི། ཙཎྜ་བེ་ག་བ་ཏི། པྲ་བ་ར་བི་མནྟ་ར་ཎི། ཧཱུཾ་ཧཱུཾ་བ་ལ་བ་ཏི། བེ་ག་བ་ཏི། ས་ར་ས་རེ། བི་ས་ར་བ་སི་ར་ས་རནྟི། སརྦ་ས་དྲི་སྱན་མ་དྲི་བ་ན་ཡ་དྲི། ཕུ་ཡ་ཕ་ལ་ཕཊ། དྲ་སནྡྷ་རཱ་ཎི། ཨ་བ་སརྦནྟུ་སརྦ་ན་ག་ཏོ་ཤ་སརྦ་པ་བྷ་བ་བྷ་ནི། བེ་ག་ཏཾ་བེ་ག་བ་ཏི་སཱཧཱ། ཧཱུཾ་ཧཱུཾ་ཕཊ། ནཱ་ག་བི་ས་ར་ཎི་ཕཊ། ཛྭ་ལ་མཱ་ལི་ནི་ཕཊ། ཛྭ་ལ་མཱ་ལི་ནི་ཕཊ། ཕཊ་ཕཊ་སྭཱ་ཧཱ། བཅོམ་ལྡན་འདས་ཀྱིས་ཀླུ་ཐམས་ཅད་དང་། ཀླུ་མ་བགྲུངས་པ་ཐམས་ཅད་མ་རུངས་པར་བྱེད་པའི་རིག་པ་འདི་བཤད་མ་ཐག་ཏུ། ཀླུ་དང་ཀླུ་ཆེན་པོ་ཐམས་ཅད་ཀླད་པ་ན་བར་གྱུར། ལུས་རུལ་ཏེ་ལུས་རྣགས་ཤིང་དྲི་མི་ཞིམ་པར་གྱུར་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ།། བཅོམ་ལྡན་འདས་སྔགས་ཀྱི་ཚིག་ཤིན་ཏུ་མི་བཟད་པ་དག་བཀའ་སྩལ་ཏོ།། བཅོམ་ལྡན་འདས་བདག་ཅག་གིས་ནོངས་པ་བགྱིས་པ་མི་དྲན་དུ་ལགས་ཀྱིས་ཀྱང་། བཅོམ་ལྡན་འདས་རིག་འཛིན་གནོད་པ་བགྱིད་པས་བདག་ཅག་ལ་བརྙེས་པ་དང་། རྡེག་པ་དང་། འཆིང་བ་དང་། སྐྲོད་པ་དང་། གནོད་པ་དེའི་ཚེ་བཅོམ་ལྡན་འདས་ཀླུ་མི་བགྲུངས་པ་རྣམས་འཁྲུགས་ཏེ། དེའི་ཚེ་ལོ་ཏོག་དང་། མེ་ཏོག་དང་། འབྲས་བུ་མ་རུངས་པར་བགྱིད། སེར་བ་འབབ་པར་བགྱིད། སད་དང་རླུང་གིས་འཁྲུག་པར་བགྱིད། ཧ་ཅང་ཆར་ཆེ་བ་དང་། ཆར་མི་འབབ་པ་དང་། དུས་མ་ལགས་པར་ཆར་འབབ་པར་བགྱིད་དོ།། བཅོམ་ལྡན་འདས་རིག་པ་འཛིན་པ་སྔགས་སྨྲ་བས་བྱམས་པ་ལ་གནས་པར་བགྱི། བྱམས་པའི་གོ་བགོ་བར་བགྱི། བྱམས་པའི་རལ་གྲི་ལག་ན་ཐོགས་པར་བགྱི་སྟེ། བྱམས་པས་གནོད་པ་བགྱིད་པ་ཐམས་ཅད་ཞི་བར་བགྱིའོ།། བཅོམ་ལྡན་འདས་དེང་སླན་ཆད་དེ་བཞིན་གཤེགས་པའི་སྤྱན་སྔར་བདག་ཅག་དམ་བཅའ་བར་འཚལ་ཏེ། གང་ན་རིག་པའི་རྒྱལ་མོ་འདི་རབ་ཏུ་སྤྱོད་པ་དེར་བཅོམ་ལྡན་འདས་ཀླུ་གཙེ་བར་མི་བགྱིད་དོ།། གང་ན་སྙིང་པོའི་གཟུངས་འདིས་པ་སྲུང་བར་བགྱིས་པ་དང་། ཡོངས་སུ་བསྐྱབ་པ་དང་། ཡོངས་སུ་བཟུང་བ་དང་། ཡོངས་སུ་བ་སྐྱང་བར་བགྱིས་པ་དང་། སྲད་བུ་བྲེ་བ་དང་། མཚམས་དགུམ་པ་དང་། དཀྱིལ་འཁོར་གྱིས་རིས་བཅང་པར་བགྱིས་པ་དེར། བཅོམ་ལྡན་འདས་བདག་ཅག་གིས་རྟག་པར་རྒྱུན་དུ་གནོད་པ་ཐམས་ཅད་བཟློག་པར་བགྱི་འཚལ་ལོ།། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ཀུན་ཏུ་བསྲུང་བར་འཚལ་ལོ།། ཡོངས་སུ་བསྐྱང་བར་འཚལ་ལོ། ། ཐ་ན་རྐུན་པོ་དང་། གཡོ་ཅན་དང་། རི་དགས་དང་། བྱ་རྣམས་ཀྱང་ཀུན་ཏུ་བསྲུང་བར་འཚལ་ཏེ། སླད་ཀྱིས་ཀྱང་མ་རུངས་པར་མི་བགྱིད་དོ།། དེ་ནས་བཅོམ་ལྡན་འདས་ཀྱིས། ཀླུའི་བདག་པོ་དེ་དག་ལ་ལེགས་སོ་ཞེས་བྱ་བ་གནང་སྟེ། ཀླུའི་བདག་པོ་ལེགས་སོ་ལེགས་སོ།། ཁྱེད་ཀྱིས་དེ་ལྟར་གྱིས་ཤིག། ཁྱེད་ཀྱིས་འཛམ་བུའི་གླིང་ལེགས་པར་སྲུང་པས་སྲུང་བར་གྱིས་ཤིག། དེ་ནས་དེའི་འོག་ཏུ་ཆོ་གར་བྱ་བ་ལས་ཐམས་ཅད་བྱེད་པ་དགེ་བར་བྱ་བ་བརྗོད་པར་བྱའོ།། ལོ་ཏོག་ལ་གནོད་པར་བྱེད་ན་དེའི་ཚེ་རིག་པ་འཛིན་པས་ཞིང་གི་དབུས་སམ། ཁང་སྟེང་ངམ། གནས་མཐོན་པོར་དཀྱིལ་འཁོར་གྲུ་བཞི་པ་བྱས་ལ། ཕྱོགས་བཞིར་བུམ་པ་བཀང་བ་བཞི་གཞག་གོ།། མེ་ཏོག་སིལ་མས་གཅལ་བཀྲམ་སྟེ་གཞག་གོ། གཟུགས་འཁྱིལ་བ་བདུན་བྱའོ།། འབྲས་ལས་བྱས་པའི་འཁྱིལ་པ་བདུན་བྱས་ཏེ། གཟུགས་རེ་རེ་ཞིང་ཡང་གཟུགས་ཉི་ཤུ་རྩ་རེ་བྱའོ།། འབྲས་དང་འོ་ཐུག་བསྲེས་པ་དང་ཞོ་དང་འོ་མ་གཞག་པར་བགྱིའོ། ། ཕྱོགས་བཞིར་དྲིལ་བུ་གཞག་པར་བྱའོ།། པདྨ་ལྟ་བུར་ཟན་གྱི་གཏོར་མ་སྔ་མ་བཞིན་གཞག་པར་བྱའོ།། དཀྱིལ་འཁོར་གྱི་དབུས་སུ་བུམ་པ་ཆེན་པོ་བཞག་སྟེ་བ་ལས་བྱུང་བ་ལྔ་དང་འོ་མ་དང་ཆུས་དགང་ངོ་། ། ཡུངས་ཀར་དང་འབྲས་ཡོས་བླུགས་པར་བྱའོ།། སྔགས་ལན་དྲུག་ཅུར་ཡོངས་སུ་བཟླས་པར་བྱའོ།། སེང་ལྡེང་གི་ཕུར་བུ་བཞི་དང་ལྕགས་ཀྱི་ཕུར་བུ་གཅིག་བྱ་སྟེ། ཐམས་ཅད་སོར་བརྒྱད་ཀྱི་ཚད་དུ་བྱའོ།། བ་སེར་སྐྱའི་ལྕི་བ་འམ་བག་ཕྱེ་ལས་བྱས་པའི་ཀླུའི་གཟུགས་བཞི་བྱ་སྟེ། དཀྱིལ་འཁོར་གྱི་གྲཝ་བཞིར་གཞག་པར་བྱའོ།། སེང་ལྡེང་གི་ཕུར་བུ་དེ་དག་ཀྱང་སྙིང་ཁར་ནུབ་པར་གཟུགས་སོ། ། སྔགས་བརྒྱ་རྩ་བརྒྱད་ཡོངས་སུ་བཟླས་པར་བྱའོ།། ཤར་ཕྱོགས་སུ་ཀླུ་མགོ་བདུན་པ་གཞག་པར་བྱའོ།། ནུབ་ཕྱོགས་སུ་མགོ་བརྒྱད་པའོ། ། ལྷོ་ཕྱོགས་སུ་མགོ་ལྔ་པའོ།། བྱང་ཕྱོགས་སུ་མགོ་གསུམ་པའོ།། དཀྱིལ་འཁོར་གྱི་དབུས་སུ་མགོ་དགུ་པ་གཞག་པར་བྱའོ།། པོག་པོར་རེ་རེ་སྟེ་ལྔ་གཞག་པར་བྱའོ།། ཡུངས་ཀར་དང་བྲས་ཡོས་སུ་བསྲེས་པ་ལ་ལན་ཉི་ཤུ་རྩ་གཅིག་བཟླས་པ་བྱས་ཏེ་ཕྱོགས་བཞིར་གཏོར་རོ། ། གཟུངས་འདི་བྲིས་ལ་རྒྱལ་མཚན་གྱི་རྩེ་མོ་ལ་བཏགས་ཏེ་དཀྱིལ་འཁོར་གྱི་གྲཝ་བཞིར་གཟུགས་སོ།། ཞིང་གི་དབུས་སུའང་གཟུགས་སོ། ། སྐྱེད་མོས་ཚལ་གྱི་དབུས་སུའང་གཟུགས་སོ།། དེ་གཙུགས་མ་ཐག་ཏུ་ཕྱོགས་བཞི་ཀུན་ནས་རི་སུལ་ཆེན་པོས་མཚམས་བཅད་པར་འགྱུར་རོ།། ཇི་སྲིད་དུ་ཕུར་བུ་མ་ཕྱུང་བ་དེ་སྲིང་དུ་མཚམས་བཅད་པ་ཆེན་པོར་འགྱུར་རོ། ། ལོ་ཏོག་ཐམས་ཅད་དང་། མེ་ཏོག་དང་། འབྲས་བུ་ཐམས་ཅད་ལེགས་པར་བསྲུངས་པར་འགྱུར་རོ།། ཐ་ན་འདབ་མ་གཅིག་ཀྱང་བསྐམས་པར་མི་འགྱུར་ན། ཡལ་ག་དང་སྡོང་བུ་བསྐམས་པར་འགྱུར་པ་ལྟ་ཅི་སྨོས། སྲོག་ཆགས་ཀྱི་རིགས་རི་དགས་དང་བྱ་ཐམས་ཅད་ཀྱང་ཁ་བཅིངས་པར་འགྱུར་རོ།། མ་རུངས་པར་བྱེད་ཀྱང་མི་ནུས་སོ།། གནས་དེར་རླུང་དང་། སྤྲིན་དང་། སེར་བ་དང་། སད་དང་། དུས་མ་ཡིན་པའི་རླུང་གིས་ཀྱང་མ་རུངས་པར་བྱེད་མི་ནུས་སོ།། ཀླུའི་གནོད་པ་བྱས་ཀྱང་མ་རུངས་པར་བྱེད་མི་ནུས་སོ།། མ་རུངས་པ་ཞིག་ཏུ་གྱུར་ན་དེའང་སླར་རྟས་པར་འགྱུར་རོ། ། ཡང་སྟོབས་དང་། རྟས་པ་དང་། འོངས་ཡོད་པར་འགྱུར་རོ།། བུམ་པ་ཆེན་པོའི་ནང་ན་ཡོད་པ་དེའང་ཞིང་དང་། ཀུན་དགའ་ར་བ་དང་། སྐྱེད་མོས་ཚལ་གྱི་ཕྱོགས་བཞི་ཀུན་ཏུ་གཏོར་བར་བྱས་ན་སྲོག་ཆགས་ཐམས་ཅད་མེད་པར་འགྱུར་རོ།། སྦྲུལ་དང་། བྱི་བ་དང་། ནེའུ་ལེ་དང་། བྱི་དུར་དང་། དོམ་དང་། སྦལ་པ་དང་། ཤ་སྦྲང་དང་། སྦྲང་བུ་དང་། བྱི་བ་དང་། འདབ་ཆགས་རྣམས་མེད་པར་འགྱུར་རོ།། གྲོག་སྦུར་ཐམས་ཅད་མེད་པར་འགྱུར་རོ།། ཐ་ན་ཕྱེ་མ་ལེབ་ལ་སོགས་པའང་ནམ་ཡང་མི་འབྱུང་ངོ་།། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། སྒོ་ང་ལས་སྐྱེས་པའི་བར་གྱིས་ཀྱང་མ་རུངས་པར་བྱེད་མི་ནུས་སོ།། རླན་དང་མེ་ཏོག་ལས་སྐྱེས་པའི་སྲོག་ཆགས་ཀྱི་རྣམ་པ་དག་ཀྱང་ཕུར་བུ་མ་བྱུང་གི་བར་དུ་ནམ་ཡང་མི་འབྱུང་ངོ་། ། ཕུར་བུ་མ་ཕྱུང་གི་བར་དུ་ཀླུའི་ཉེས་པ་རྣམ་པ་སྣ་ཚོགས་མི་འབྱུང་ཞིང་རབ་ཏུ་འབྱུང་བར་མི་འགྱུར་རོ།། བདེ་བ་དང་། ལོ་ལེགས་པ་དང་། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ཡོངས་སུ་འགྲུབ་པར་འགྱུར་རོ།། རོ་ཞིམ་པ་དང་འཇམ་པར་འགྱུར་རོ།། ཀླུ་ཐམས་ཅད་ཀྱང་རྟག་པར་རྒྱུན་དུ་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ།། ཕྱེ་མ་ལ་ལན་ཉི་ཤུ་རྩ་གཅིག་བཟླས་པར་བྱས་ཏེ། ལོ་ཏོག་དང་། མེ་ཏོག་དང་། འདབ་མ་དང་། ཤིང་ལྗོན་པ་རྣམས་ལ་གཏོར་ན་སྲོག་ཆགས་ཐམས་ཅད་ལྷུང་ཞིང་མེད་པར་འགྱུར་རོ།། སྲིན་བུ་ཏྲཾ་མ་བུ་ཀ་དང་། ཏྲཻ་ལ་ཏ་དང་། སྦྲུལ་གདུག་པ་དང་། རྐང་བརྒྱད་པ་དང་། སྲོག་ཆགས་ཀྱི་རིགས་གཞན་དག་ཀྱང་ཕུར་བུ་མ་ཕྱུང་གི་བར་དུ་མེད་པར་འགྱུར་རོ།། མི་འབྱུང་བར་འགྱུར་རོ།། ཞིང་གི་ཕྱོགས་བཞིར་ཞི་བའི་ལས་བྱ་སྟེ། ནས་དང་། གྲོ་དང་། ཏིལ་དང་། ཡུངས་ཀར་དང་། འབྲས་དང་། མར་བསྲེས་ཏེ་སྦྱིན་སྲེག་བྱས་ན་ཞི་བ་ཆེན་པོར་འགྱུར་རོ།། ཐ་ན་དུད་འགྲོའི་སྐྱེ་གནས་སུ་སོང་བ་དག་གིས་ཀྱང་མ་རུངས་པར་བྱེད་མི་ནུས་སོ། ། གཟུངས་འདི་དང་ཆོ་གར་བྱ་བ་འབྱུང་བ་མཐའ་དག་བྲི་བར་བྱ་སྟེ། སངས་རྒྱས་བཅོམ་ལྡན་འདས་དང་། དྲང་སྲོང་ཆེན་པོ་ཉེས་འདོར་དང་། རྡོ་རྗེ་འཛིན་བྲིས་ལ་རྒྱལ་མཚན་གྱི་རྩེ་མོ་ལ་བཏགས་ཏེ་གནས་མཐོན་པོར་གཟུགས་སོ། ། གཏོར་མ་དང་། མེ་ཏོག་དང་། བདུག་པའང་དབུལ་ལོ།། སེང་ལྡེང་གི་ཕུར་བུ་སོར་བརྒྱད་པ་ལ་ལན་སྟོང་ཡོད་སུ་བཟླས་པ་བྱས་ཏེ་ཁང་སྟེང་དུ་བཙུགས་ན་རླུང་དང་། སད་དང་། སྤྲིན་དང་། སེར་བ་ཐམས་ཅད་ཐུབ་པར་འགྱུར་རོ།། ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་མ་རུངས་པར་བྱེད་པའི་སྲོག་ཆགས་རྣམས་མེད་པར་འགྱུར་ཏེ། ཤ་སྦྲང་དང་། སྦྲང་བུ་དང་། པི་ཙི་ལི་ཀ་དང་། བྱི་བ་དང་། སྦྲང་མ་དང་། ཏྲེམ་བུ་ཀ་དང་། ཏཱ་ལ་ཏ་དང་། བི་ཤ་ཀི་ཏ་ཀ་དང་། ཉ་ཕྱིས་ཅན་དང་། ཉ་དང་། ལོ་མི་ཀ་དང་། སྦལ་བ་དང་། ནེའུ་ལེ་དང་། ཕག་དང་། ཀན་ཏི་ཀ་དང་། སེང་གེ་དང་། རྐང་མངས་དང་། རྐང་གཅིག་པ་དང་། རུས་སྦལ་དང་། གྲོག་མོ་དང་། སྦྲང་རྩིའི་སྦྲང་མ་དང་། ཐང་གི་སྦྲང་མ་དང་། བུང་བ་དང་། ནག་པོ་དང་། ཤང་ག་ནི་ཀ་དང་། སའི་འོག་ནས་བྱུང་བ་དང་། མ་ལུ་ཤི་ཀ་དང་། འུག་པ་དང་། བྱི་བ་དང་། མཆུ་རིངས་ལ་སོགས་པའི་སྲོག་ཆགས་ཀྱི་རིགས་ཐམས་ཅད་ཀྱང་མེད་པར་འགྱུར་རོ། ། མི་འབྱུང་བར་འགྱུར་རོ།། ཐམས་ཅད་ཕུང་བར་འགྱུར་རོ།། བྱ་རོག་དང་། བྱིའུ་དང་། ཁུ་ག་རྟ་དང་། ཕུག་རོན་དང་། མུ་དུ་རི་ཀ་དང་། འུག་པ་དང་། ཁ་ན་ཛ་ན་ཀ་དང་། ནེ་ཙེ་དང་། རི་སྐེགས་ལ་སོགས་པ་ཐམས་ཅད་མེད་པར་འགྱུར་རོ།། སྔགས་འདིས་ཕུར་བུ་ལ་ཡོངས་སུ་བཟླས་པར་བྱ་སྟེ་ཕྱོགས་བཅིང་ངོ་། ། ན་མོ་བུདྡྷཱ་ཡ། ཨོཾ་ཀི་ལི་མི་ལི་ཙཎྜེ། མེ་རེ་ལི། ཙཎྜེ་ཙཎྜེ། བནྡྷ་ཡ་སྭཱ་ཧཱ། ད་ནས་དྲང་སྲོང་ཆེན་པོ་ཉེས་འདོར་བཅོམ་ལྡན་འདས་དང་ཧཅང་ཡང་མི་རིང་བ་ཞོག་ན་འདུག་པས་གཟུངས་འདི་ཐོས་ནས། དེ་སྟན་ལས་ལངས་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་གིས་སྲོག་ཆགས་ཀྱི་རིགས་གནོད་པར་སེམས་པ། རབ་ཏུ་གནོད་པར་སེམས་པ། དུག་འཆང་བ་དང་། ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་དང་། སྡོང་བུ་དང་། རྩ་བ་མ་རུངས་པར་བགྱིད་པ་ཐམས་ཅད་ཀྱི་ཁ་བཅིང་བར་བགྱིའོ།། བཟློག་པར་བགྱིའོ།། བསྡིགས་པར་བགྱིའོ།། ཕྱོགས་བཞི་ཀུན་ནས་དཔག་ཚད་དུ་མཚམས་གཅད་པ་ཆེན་པོ་བགྱིའོ།། ཀུན་ཏུ་བསྲུང་བར་བགྱིའོ།། བཅོམ་ལྡན་འདས་སླད་མའི་ཚེ་སླད་མའི་དུས་ན་གནོད་པར་སེམས་པ། རབ་ཏུ་གནོད་པར་སེམས་པ་ཐམས་ཅད་བཟློག་པར་བགྱིའོ།། སྔགས་ཀྱི་ཚིག་རྗེས་སུ་སྩལ་བར་བགྱིའོ། ། བཅོམ་ལྡན་འདས་སེམས་ཅན་ཐམས་ཅད་ཀྱི་དོན་དང་། བདག་ལ་ཐུགས་བརྩེ་བའི་སླད་དུ་དེ་བྱིན་གྱིས་བརླབ་ཏུ་གསོལ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ།། དྲང་སྲོང་ཆེན་པོ་ངས་བྱིན་གྱིས་བརླབས་ཀྱིས། སེམས་ཅན་ཐམས་ཅད་ཀྱི་དོན་དང་། ལོ་ཏོག་དང་། མེ་ཏོག་དང་། འབྲས་བུ་དང་། ལྡུམ་ར་ཡོངས་སུ་བསྲུང་བའི་ཕྱིར་གཟུངས་ཀྱི་སྔགས་ཀྱི་ཚིག་སྤྲོས་ཤིག། དེ་ནས་དྲང་སྲོང་ཆེན་པོ་རྣམས་ཀྱིས་བཅོམ་ལྡན་འདས་ཀྱི་སྤྱན་སྔར་འདུག་ནས་འདི་སྐད་ཅེས་སྨྲས་སོ།། ན་མོ་བྷ་ག་ཝ་ཏེ་ཤཱཀྱ་རཱ་ཛཱ་ཡ། ཏ་ཐཱ་གཱ་ཏཱ་ཡ། ན་མོ་ཨ་ཀ་ཏཱ་ཡ། མ་ཧཱ་རི་ཥི་ཡ། ཏདྱ་ཐཱ། ཀྵ་མི་ཙུ་ལི། ཙ་ལ་ཙ་ར་ཙ་ར། ཧོ་མི་ལི། བནྡྷ་ནི། ནཱ་ཤ་ནི། ད་ཧ་ད་ཧ། སུ་མུ་རི་ཙ་རི་སརྦ་དུཥྚན་བནྡྷ་བནྡྷ་ན། དུནྡ་བནྡྷ་ན། ས་ར་ས་ར་ཎི། ཀྵ་ཀྵུ་ཀྵཱ། མ་ཎི་ཤུ་རི་བི་ས་ར་ས་ར། ཧ་ལྀ་ཧུ་ལི། ཧུ་ཏི་ཧུ་ཏི། ས་ར་མ་ཎི། ས་རནྟུ། སརྦ་པཱ་པཾ་བཱ་ན་ཀ་ཀྵུ་དྷི་ལི་སྭཱ་ཧཱ། དྲང་སྲོང་ཆེན་པོ་ཉེས་འདོར་གྱིས་བཅོམ་ལྡན་འདས་ཀྱི་སྤྱན་སྔར་རིག་པ་འདི་སྤྲོས་མ་ཐག་ཏུ་ཀླུ་དང་། གནོད་སྦྱིན་དང་། སྲིན་པོ་གནོད་པར་སེམས་པ་དེ་དག་ཐམས་ཅད་ཁས་བུབ་ཏུ་འགྱེལ་ནས་བཅོམ་ལྡན་འདས་ལ་སྐད་ཀྱིས་གསང་མཐོན་པོས་སྨྲེ་སྔགས་འདོན་ཏེ། བཅོམ་ལྡན་འདས་བདག་ཅག་མ་རུངས་ལགས་སོ། ། དྲང་སྲོང་གི་དམོད་པ་བབ་པར་གྱུར་ཏོ།། བཅོམ་ལྡན་འདས་བདག་ཅག་དྲང་སྲོང་གི་དམོད་པའི་མེས་ཚིག་གོ། ཀུན་ཏུ་ཚིག་གོ། བཅོམ་ལྡན་འདས་ཤཱཀྱ་ཐུབ་པ་བདག་ཅག་སླན་ཆད་འཛམ་བུའི་གླིང་དུ་སེམས་ཅན་རྣམལ་རྣམ་པར་འཚེ་བར་མི་བགྱིད་དོ། ། བཅོམ་ལྡན་འདས་བདག་ཅག་སླན་ཆད་ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་མ་རུངས་པར་མི་བགྱིད་དོ། ། སྲོག་ཆགས་ཀྱི་རིགས་ཐམས་ཅད་ཟློག་པར་བགྱིད་དོ།། བཅོམ་ལྡན་འདས་ཀྱིས། དེ་དག་ལ་བཀའ་སྩལ་པ། ཀླུའི་བདག་པོ་དག་ཁྱེད་ཀྱིས་དེ་ལྟར་གྱིས་ཤིག། འཛམ་བུའི་གླིང་པའི་སེམས་ཅན་ཐམས་ཅད་ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་དང་། ཡལ་ག་བདེ་བར་ཀུན་ཏུ་འཕེལ་བར་གྱུར་པ་རྗེས་སུ་སྲུངས་ཤིག། དེ་ནས་དྲང་སྲོང་ཆེན་པོ་དེས་ཆོ་གར་བྱ་བ་སྨྲས་པ། བཅོམ་ལྡན་འདས་ཁ་ཤར་ཕྱོགས་སུ་བལྟས་ཏེ་མཆིས་ལ། རིག་པ་དྲང་སྲོང་ཆེན་པོའི་སྙིང་པོ་འདི་རིལ་པ་བྲིང་གར་ཆབ་བཅུས་ལ་ལན་བརྒྱ་རྩ་བརྒྱད་ཡོངས་སུ་བཟླས་པ་བགྱི་སྟེ། དྲང་སྲོང་གི་མི་སྨྲ་བས་ཕྱོགས་བཞིར་གཏོར་བར་བགྱིའོ།། ཨ་པ་ས་ར་ས་ར། ཤ་པ་ཏ་པ་དཱ་མ་ཧྲྀ་ད་ཡ་ཀྲོ་དྷ། ཨ་མུ་ཀ་བནྡྷ་ཡ། པྲ་ཎ་ཙ་ར། སུ་མུ་རུ་ཙ་ཡ་སྭཱ་ཧཱ། སྔགས་འདི་ལན་བདུན་སྟོང་བཟླས་པ་བགྱི་སྟེ། བཟླས་པ་ཙམ་གྱིས་ཀླུ་གནོད་པར་སེམས་པ་ཐམས་ཅད་ཚབས་གདུངས་པར་འགྱུར་རོ།། རྐང་གཉིས་པ་དང་རྐང་བཞི་པའི་བར་གྱི་སྲོག་ཆགས་ཀྱི་རིགས་ཐམས་ཅད་དམོད་པས་གདུངས་པར་གྱུར་ཏེ་ཐམས་ཅད་འབྱེར་རོ། ། སླར་ཡང་ཕྱོགས་དེར་ལོ་ཏོག་ལ་གནོད་པ་མི་བགྱིད་དོ།། སྲོག་ཆགས་ཀྱི་རིགས་ཐམས་ཅད་མ་མཆིས་པར་འགྱུར་རོ།། སྲོག་ཆགས་ཀྱི་རིགས་ཐམས་ཅད་ཕྱིས་ཀྱང་མ་མཆིས་པར་འགྱུར་རོ། ། ཡང་ལོ་ཏོག་དང་། མེ་ཏོག་དང་། འབྲས་བུ་དང་། འདབ་མ་མ་རུངས་པར་མི་བགྱིད་དོ།། དེ་ནས་བཅོམ་ལྡན་འདས་ཀྱིས། དྲང་སྲོང་ཆེན་པོ་ལ་ལེགས་སོ་ཞེས་བྱ་བ་གནང་སྟེ། དྲང་སྲོང་ཆེན་པོ་ལེགས་སོ་ལེགས་སོ།། ཁྱོད་ཀྱིས་ཅི་ནས་ཀྱང་སེམས་ཅན་ཐམས་ཅད་ལ་ལེགས་པར་སྲུང་བར་འགྱུར་བ་དང་། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་ལེགས་པར་སྲུང་བར་གྱུར་པ་དེ་ལྟར་གྱིས་ཤིག། དེ་ནས་བཅོམ་ལྡན་འདས་ལ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ།། སླད་མའི་ཚེ་སླད་མའི་དུས་ན་རྗེས་སུ་སྲུང་བར་བགྱིད། ཡོངས་སུ་སྲུང་བར་བགྱིད་ན། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ལག་ན་རྡོ་རྗེ་ལེགས་སོ་ལེགས་སོ།། སེམས་ཅན་ཐམ་ཅད་ཡོངས་སུ་སྲུངས་ཤོག། ལོ་ཏོག་ལ་གནོད་པར་བྱེད་པ་ཀླུའི་ཆོ་ག་རྫོགས་སོ།། །། དེ་ནས་དེའི་འོག་ཏུ་བཅོམ་ལྡན་འདས་ཞམ་རིང་ཆེན་པོ་དང་། འཁོར་འདུས་པ་ཆེན་པོ་དང་། བཀོད་པ་ཆེན་པོ་དང་། ཡོན་ཡོད་པའི་མཐུ་ཆེན་པོ་དང་། ཆོ་འཕྲུལ་ཆེན་པོ་ཀུན་ཏུ་སྟོན་པས་རྒྱལ་པོ་ཆེན་པོ་རྣམ་ཐོས་ཀྱི་བུའི་གནས་སུ་གཤེགས་སོ།། དེ་ནས་བཅོམ་ལྡན་འདས་རྣམ་ཐོས་ཀྱི་བུའི་གནས་དང་ཧ་ཅང་ཡང་མི་རིང་བ་ཞིག་ཏུ་བྱོན་པ་དང་། ས་ཕྱོགས་དེ་ན་འབྲོག་གི་ནགས་ཉི་ཤུ་པ་ཞེས་བྱ་བ་ཞིག་ཡོད་དེ། ནགས་དེའི་མཐོངས་ན་རྫིང་བུ་ཞིག་ཡོད་ལ། རྫིང་བུ་དེའི་མཐུས་ཁྱུང་ལོ་ཅན་གྱི་ཕོ་བྲང་འཁོར་གྱི་ཞིང་དང་། ཀུན་དགའ་དང་། ནགས་དང་། འདབ་མ་དང་། མེ་ཏོག་དང་། འབྲས་བུ་རྣམས་ཀུན་ཏུ་ཚིམ་པར་གྱུར་ཏོ།། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། བ་ལང་དང་། རྟ་དང་། རྟ་རྒོད་མ་དང་། མ་ཧེ་དང་། གླང་པོ་ཆེ་དང་། བོང་བུ་དང་། སྐྱེ་བོའི་ཚེགས་ཐམས་ཅད་བདེ་བས་ཚིམ་པར་གྱུར་ཏོ།། རྫིང་བུ་དེའང་ཕྱོགས་བཞི་ཀུན་ཏུ་རྒྱར་དཔག་ཚད་གཉིས་ཀྱི་ཚད་དོ། ། རྫིང་བུ་དེའང་མེ་ཏོག་ཨུཏྤ་ལ་དང་། པདྨ་དང་། ཀུ་མུ་ཏ་དང་། པུཎྜ་རི་ཀ་སྣ་ཚོགས་ཀྱིས་ཀུན་ཏུ་ཁེབས་ཤིང་། ཉ་སྣ་ཚོགས་དང་། ཆུ་བྲན་དང་། ཉ་མིད་དང་། ཆུ་སྲིན་བྱིས་པ་གསོད་དང་། བུང་པ་གཟུགས་སྣ་ཚོགས་ཅན་ནོ།། དེ་ནས་དེའི་འོག་ཏུ་ཐན་པ་བྱུང་བ་དེའི་ཚེ་ནགས་ཚལ་དང་། མེ་ཏོག་དང་། འབྲས་བུ་དང་། འདབ་མ་དང་། ཡལ་ག་ཐམས་ཅད་བསྐམས་ཏེ་མེ་ཏོག་དེ་དག་བརྙིངས་སོ། ། ཆུ་སྲིན་དང་། ཉ་མིད་དང་། ཆུ་སྲིན་བྱིས་པ་གསོད་དང་། བུང་བ་གཟུགས་སྣ་ཚོགས་པ་དེ་དག་ཀྱང་མུ་བྲི་སྟེན་ཅུང་ཟད་ཅིག་ལུས་པས་ཕྱོགས་བཅུར་རྒྱུག། ཀུན་ཏུ་རྒྱུག། རབ་ཏུ་རྒྱུག་སྟེ། སྲོག་འགགས་ལ་ཐུག། སྲོག་ཆད་ལ་ཐུག་པས་སྙིང་འཕར་ཞིང་རྒྱུག་གོ། དེ་ནས་བཅོམ་ལྡན་འདས་ཞམ་རིང་བ་ཆེན་པོ་དང་རྫིང་བུ་དེར་བྱོན་པ་དང་། དེ་ན་ཉ་དང་། ཆུ་སྲིན་དང་། ཆུ་སྲིན་བྱིས་པ་གསོད་དང་། བུང་བ་བརྒྱ་སྟོང་དུ་མ་སྲོག་འགགས་ལ་ཐུག། སྲོག་ཆད་ལ་ཐུག་སྟེ་ཕྱོགས་བཅུར་བརྒྱུག་ཅིང་སྙིང་རྗེ་རྗེ་ལྟར་གཟིགས་ནས། བཅོམ་ལྡན་འདས་ཀྱིས་བྱམས་པའི་དམིགས་པ་སྙིང་རྗེས་དབུགས་ཕྱུང་སྟེ་སེ་གོལ་གྱི་སྒྲས་ཀླུ་རྣམས་འབོད་ཅིང་། ལན་གཉིས་ལན་གསུམ་དུ་སེ་གོལ་རྡེབ་ཅིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམ་སུ་སྒྲ་གྲགས་པར་མཛད་དོ། ། སྔོན་གྱི་ལས་ཀྱི་རྐྱེན་འགའ་ཞིག་གིས་སྲོག་ཆགས་དེ་དག་ཀྱང་སྲོག་མ་ཆད་དོ།། ཀླུ་ཆེན་པོ་དེ་དག་གིས་སྒྲ་དེའང་མ་ཐོས། བཅོམ་ལྡན་འདས་ཀྱང་རྗེས་སུ་མ་དྲན་ནོ།། དེ་ནས་བདུད་ཀྱི་རིས་ཀྱི་གནོད་སྦྱིན་རྣམ་པར་འཐོར་རླུང་ཞེས་བྱ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྒྲ་བསྒྲགས་པ། ཞག་བདུན་གྱི་ཉིན་པར་སྲེག་པའི་བསྐལ་པ་འབྱུང་སྟེ། འདི་ནི་སྲིད་པའི་རྩེ་མོ་ནས་མནར་མེད་པའི་སེམས་ཅན་དམྱལ་བ་མནར་མེད་པ་ལ་ཐུག་པའི་བར་དག་ལས་གང་ཚིག་པར་མི་འགྱུར་བ་བ་ཅུང་ཟད་ཀྱང་མི་སྲིད་དོ།། འཇིག་རྟེན་དུ་འཇིགས་པ་ཆེན་པོ་འབྱུང་ཞེས་སྒྲ་གྲག་གོ། དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མ་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དེ་དག་ཐམས་ཅད་ཀྱིས་སྒྲ་དེ་ཐོས་ནས། ཀྱི་ཧུད་ཀྱི་ཧུད་འཇིག་རྟེན་མ་རུངས་པར་གྱུར་ཏོ་ཞེས་ངུའོ།། དེ་ནས་བཅོམ་ལྡན་འདས་ཀྱིས་ལས་ཀྱི་རྐྱེན་གྱིས་འདི་མྱོང་བར་མཁྱེན་མོད་ཀྱི། འོན་ཀྱང་དགོངས་པར་མཛད་དེ། བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུནས་འོད་ཟེར་བྱུང་ནས། འོད་ཟེར་ངེས་ཀླུའི་ཁྱིམ་ཐམས་ཅད་སྣང་བར་བྱས་ནས་ཀྱང་སླར་ལོག་སྟེ་སྤྱི་བོའི་གཙུག་ཏུ་ནུབ་པར་གྱུར་ཏོ། ། དེ་ནས་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་ཞེས་བྱ་བས་ཀླུ་ཐམས་ཅད་བསྡུས་ནས་འདི་སྐད་ཅེས་སྨྲས་སོ།། ཀྱེ་ཀླུ་དང་ཀླུ་ཆེན་པོ་དག་ཅིའི་ཕྱིར་འོད་ཟེར་བྱུང་ཞིང་རྐྱེན་གང་གིས་འཇིག་རྟེན་དུ་བྱུང་། དེ་ནས་ཀླུའི་རྒྱལ་པོ་ཆེན་པོ་རྒྱ་མཚོས་བསམས་ན། བཅོམ་ལྡན་འདས་ཀྱི་མཐུས་འོད་ཟེར་བྱུང་བར་མཐོང་ངོ་།། དེ་ནས་ཀླུའི་རྒྱལ་པོ་རྒྱ་མཚོ་དང་། གཞན་ཡང་ཀླུའི་རྒྱལ་པོ་མཐུ་ཆེ་བ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ།། བཅོམ་ལྡན་འདས་འོད་ཟེར་རབ་ཏུ་བཀྱེ་བའི་རྒྱུ་གང་ལགས། རྐྱེན་གང་ལགས། འོད་ཟེར་རབ་ཏུ་བཀྱེ་སྟེ་ཁང་པ་ཐམས་ཅད་སྣང་བར་བགྱིས་ཏེ་སླར་ལེག་པར་བྱེད་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ཀླུའི་བདག་པོ་དག་སྲོག་ཆགས་བརྒྱ་སྟོང་ཕྲག་མང་པོ་འགགས་པས་འགག་པར་འགྱུར་བའོ།། དེ་ནས་ཀླུའི་རྒྱལ་པོ་རྒྱ་མཚོས་སྐད་ཅིག་ཐང་ཅིག་ཡུད་ཙམ་དེ་ལ་རྫིང་བུ་ཆར་གྱི་རྒྱུན་གྱི་ཆུས་བཀང་ནས་བདེ་བས་ཚིམ་པར་བྱས་སོ། ། དེ་ནས་ཕྱོགས་དེར་གོ་སྐབས་ཆེན་པོ་བྱུང་བར་གྱུར་ནས་ས་ཕྱོགས་དེར་བཅོམ་ལྡན་འདས་འཁོར་ཆེན་པོས་ཀུན་ནས་བསྐོར་ཏེ་མདུན་དུ་བདར་བའི་དབུས་ན་བཞུགས་སོ། ། ཀླུའི་འཁོར་ཆེན་པོ་འདུས་པ་ནི། འདི་ལྟ་སྟེ། ཀླུའི་རྒྱལ་པོ་སྟོང་ཕྲག་བརྒྱད་ཅུ་སྟེ། ཀླུའི་རྒྱལ་པོ་རྒྱ་མཚོ་ལ་སོགས་པ་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་དེ་སྟན་ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་ཏེ་ཕྱག་འཚལ་ན་ལ་གསུམ་བསྐོར་བ་བྱས་ནས་མེ་ཏོག་དང་། བདུག་པ་དང་། འཕྲེང་བ་དང་། སྤོས་དང་། བྱུག་པ་དང་། རྒྱན་དང་། ལྷབ་ལྷུབ་དང་། ན་བཟའ་སྣ་ཚོགས་ཀྱིས་བཅོམ་ལྡན་འདས་ལ་མཆོད་དེ། བཅོམ་ལྡན་འདས་ཀྱི་སྤྱན་སྔར་འདུག་གོ། དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་གང་ན་བ་དེར་ལོགས་སུ་ཐལ་མེ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་འཇིགས་པ་ཆེན་པོ་མི་བཟད་པ་འཇིག་རྟེན་དུ་བྱུང་སྟེ། འདི་ལྟར་ཐན་པ་བྱུང་ཞིང་མུ་གེའི་དགོན་པར་གྱུར་པ་ལགས་སོ།། བཅོམ་ལྡན་འདས་སྡུག་བསྔལ་འདིས་སེམས་ཅན་ཐམས་ཅད་མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས་པར་གྱུར་ན། བཅོམ་ལྡན་འདས་ཀྱིས་དེ་ལྟ་བུ་དང་མཐུན་པའི་སྔགས་ཀྱི་ཚིག་བཤད་དུ་གསོལ། གང་གིས་སླད་མའི་ཚེ་སླད་མའི་དུས་ན་སྡུག་བསྔལ་སྣ་ཚོགས་སུ་ལྷུང་བའི་འཇིག་རྟེན་ཀུན་ཏུ་སྒྲོལ་བ་དང་། ཧ་ཅང་ཆར་ཆ་བ་དང་། ཆར་མ་མཆིས་པ་དང་། དུས་མ་ལགས་པའི་ཆར་དང་། སེར་བ་དང་། སད་དང་། ཚ་བ་མ་མཆིས་པར་བགྱིད་པ་དང་། མུ་གེའི་དགོན་པ་རབ་ཏུ་མ་མཆིས་པར་བགྱིད་པ་དང་། བཟློག་པ་དང་། ཡོངས་སུ་བསྐྱང་བའི་སླད་དུ་གཟུངས་ཀྱི་སྔགས་ཀྱི་ཚིག་བཤད་དུ་གསོལ། དེ་ནས་བཅོམ་ལྡན་འདས་ཀྱིས། རྒྱལ་པོ་ཆེན་པོ་རྣམ་ཐོས་ཀྱི་བུ་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་ལ་འདི་སྐད་ཅེས་བཀའ་སྩལ་ཏོ། ། རྒྱལ་པོ་ཆེན་པོ་དག་ཀླུའི་སྙིང་པོའི་གཟུངས་ཀྱི་སྔགས་ཀྱི་ཚིག་བསྐུལ་མ་འདེབས་པ་ཀུན་ནས་འབར་བའི་གློག་ཅེས་བྱ་བ་ཡོད་དེ། དེ་དྲན་པ་ཙམ་གྱིས་ཀླུ་ཐམས་ཅད་ཀྱི་ཁྱིམ་དང་། ཀླུ་ཐམས་ཅད་ཀྱི་ལུས་འབར་བར་འགྱུར་རོ།། ཀླུ་མི་བགྲུངས་པ་ཐམས་ཅད་ཀྱི་སྙིང་འཕར་བར་འགྱུར་རོ།། ཀླུ་ཐམས་ཅད་ཀྱི་མགོ་ཚལ་པ་བདུན་དུ་འགས་པར་འགྱུར་རོ།། མིག་དང་མགོ་རྣམས་གས་ནས་དུམ་བུ་དུམ་བུར་ཆད་ཅིང་འདྲུལ་བར་འགྱུར་རོ། ། རྒྱལ་པོ་ཆེན་པོ་དག་ཀླུ་གནོད་པར་སེམས་པ་དང་། རབ་ཏུ་གནོད་པར་སེམས་པ་རྣམས་ཀྱི་དོན་དང་། སེམས་ཅན་ཐམས་ཅད་ཀྱི་ཕྱིར་ཟུང་ཞིག། དེ་ནས་རྒྱལ་པོ་ཆེན་པོ་བཞིས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ།། བཅོམ་ལྡན་འདས་ཀླུའི་སྙིང་པོའི་སྔགས་ཀྱི་ཚིག་བསྐུལ་མ་འདེབས་པ་ཀུན་ནས་འ་བའི་གྲོག་ཅེས་བགྱི་བ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ཀླུའི་ལྟ་སྟངས་དང་། དེ་བཞིན་གཤེགས་པའི་གཟིགས་སྟངས་ཀྱིས་རྣམ་པར་གཟིགས་ནས། ཀླུའི་འཁོར་འདུས་པ་ཐམས་ཅད་ལ་འདི་སྐད་ཅེས་བཀའ་སྩལ་ཏོ། ། ཀླུའི་བདག་པོ་དག་ང་ལས་གཟུངས་ཀྱི་ཚིག་གི་སྔགས་ཀྱི་ཚིག་ཉོན་ཅིག། ཏདྱ་ཐཱ། ཨོཾ་བི་པུ་ལེ། པྲ་བ་རེ། ནཱ་གེ་མ་ཧཱ་ནཱ་ག་ཧྲྀ་ད་ཡ། ཨཱ་བརྟེ། ཛ་ལ་ཛྭ་ལ། སརྦ་ནཱ་ག་ཧྲྀ་དཱ་ཡ་ནི། ཀི་མི་ཀི་མི། ནཱ་ག་ཀུ་ལ་བི་དཱན་ས་ནི། ཧ་ན་ཧ་ན། སརྦ་ནཱ་ག་དུཥྚན་ཧྲྀ་ད་ཡཱ་ནི། ཧ་ན་ཧ་ན། སརྦ་དུཥྚཱན་ནཱ་ག་བ་བན་ནི། པ་ཙ་པ་ཙ་བ་ཙ་ཡ། སརྦ་དུཥྚཱན་ན་གཱ་ནཱན། ཨ་ཀྲྀ་མ་ཨ་ཀྲྀ་མ། ས་མུ་དྲ་སཱ་ག་ར། བ་མི་ལེ། བི་ཀྲ་མ། མ་ཧཱ་ནཱ་ག་ག་ཏེ་ཛ་བ་རེ་སྭཱ་ཧཱ། བཅོམ་ལྡན་འདས་ཀྱིས་ཀླུའི་སྙིང་པོའི་གཟུད་ཀྱི་སྔག་ཀྱི་ཚིག་འདི་གསུངས་པ་ཙམ་གྱིས་ཀླུ་དེ་དག་ཐམས་ཅད་འདར་ཞིང་ལུས་རུལ་ཏེ་དྲི་མི་ཞིམ་པར་གྱུར་ཏེ། མེ་འབར་བ་བཞིན་དུ་ལུས་ལ་དུ་བར་འཐུལ་ཞིང་འགྲེ་ལྡོག་གོ། ཐམས་ཅད་སྐད་ཆེར་བཅོམ་ལྡན་འདས་ལ་ངུ་ཞིང་ཐམས་ཅད་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་སྔགས་ཀྱི་ཚིག་ཤིན་ཏུ་མི་བཟད་པ་དག་བཀའ་སྩལ་ཏོ།། བཅོམ་ལྡན་འདས་བདག་ཅག་ཐམས་ཅད་ཀྱི་སྙིང་ལ་གཡོ་མ་མཆིས་པར་འགྱུར་རོ། ། བཅོམ་ལྡན་འདས་བདག་ཅག་ཐམས་ཅད་ཚིག་སྟེ་མ་རུངས་པར་གྱུར་ཏོ།། བཅོམ་ལྡན་འདས་དང་སླན་ཆད་མཐུན་པར་བགྱིད་དོ།། བཅོམ་ལྡན་འདས་ཀྱི་སྤྱན་སྔར་ཡི་དམ་བགྱིད་དོ།། བཅོམ་ལྡན་འདས་བདག་ཅག་ཀླུའི་སྐྱེ་གནས་ན་གནས་ཀྱི་བར་དུ་བཅོམ་ལྡན་འདས་ཡང་བདག་ཅག་འཛམ་བུའི་གླིང་དུ་འཚེ་བར་མི་བགྱིད་དོ།། མ་རུངས་པར་མི་བགྱིད་དེ།། མེ་ཏོག་དང་། ཡལ་ག་དང་། འབྲས་བུ་དང་། ལོ་ཏོག་ཐམས་ཅད་ཡོངས་སུ་རྒྱས་པར་བགྱིད་དོ།། དུས་དུས་སུ་ཆར་གྱི་རྒྱུན་འབབ་པར་བགྱིད་དོ།། བདེ་བ་དང་ཡིད་བདེ་བར་བགྱིད་དོ།། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་འགྲུབ་པར་བགྱིད་དོ།། དེ་བཞིན་གཤེགས་པའི་བཀའ་རྗེས་སུ་སྐྱོང་བར་བགྱིད་དོ།། བདེན་པའི་དམ་ཚིག་ལ་གནས་པར་བགྱིད་དོ།། བུ་གཅིག་པ་ལ་བགྱི་བ་བཞིན་དུ་སེམས་ཅན་ཐམས་ཅད་རྗེས་སུ་སྦྱོང་བར་བགྱིད་དོ། ། བཅོམ་ལྡན་འདས་ཕྱོགས་གང་དང་གང་ན་རིག་པའི་རྒྱལ་མོ་འདི་སྤྱོད་པ་དེར་བཅོམ་ལྡན་འདས་བདག་ཅག་མཐུན་པར་བགྱིད་དོ། བཅོམ་ལྡན་འདས་རིག་པའི་རྒྱལ་མོ་འདི་དྲན་པ་ཙམ་གྱིས་ཀྱང་བདག་ཅག་ཐམས་ཅད་ཀྱིས་ཆར་གྱི་རྒྱུན་འབབ་པར་བགྱིད་དོ།། དྲན་པ་ཙམ་གྱིས་ཀྱང་ཧ་ཅང་ཆར་ཆེ་བ་ཟློག་པར་བགྱིད་དོ།། བཅོམ་ལྡན་འདས་ཀྱིས་བཀའ་སྩལ་པ་ལས་ལོག་པར་མི་བགྱིད་དོ།། བཅོམ་ལྡན་འདས་ལའང་མནས་བསྒག་པའི་སྔགས་ཀྱི་ཚིག་སྩལ་ཏོ།། དེ་ནས་ཀླུའི་རྒྱལ་པོ་དེ་དག་ཐམས་ཅད་ཀྱིས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་སྨྲས་སོ། ། ཏདྱ་ཐཱ། ཨོཾ་ཙ་ཏ་ཙ་ཏ། བི་ཙ་ཏ། ཤ་ཏ་ཤ་ཏ། པ་ཙ་ར་ཏི་སྭཱ་ཧཱ། བཅོམ་ལྡན་འདས་གལ་ཏེ་རིག་པ་འཛིན་པས་གདུག་ཞག་གཅིག་ཆོ་ག་བགྱིས་ལ། བདག་ཅག་གིས་སེམས་ཅན་ཐམས་ཅད་ཡོངས་སུ་བསྐྱང་བའི་དོན་དུ་འཛམ་བུའི་གླིང་ཐམས་ཅད་དུ་ཆར་གྱི་རྒྱུན་མ་ཕབ་ན། བཅོམ་ལྡན་འདས་བདག་ཅག་ཡང་དག་པར་རྫོགས་པའི་སངས་རྒྱས་ལ་འཁུས་པར་འགྱུར་རོ། ། བདག་ཅག་ཀླུའི་སྐྱེ་གནས་ནས་འཆི་འཕོ་བར་གྱུར་ཏུའང་མཆི་སྟེ། བཅོམ་ལྡན་འདས་དེའི་ཚེ་རིག་པ་འཛིན་པས་མནས་བསྒག་པའི་གདུ་ཀྱི་སྔགས་ཀྱི་ཚིག་འདི་ཐོག་མ་ཉིད་དུ་ལན་བདུན་དུ་བརྗོད་པར་བགྱིའོ། ། དེའི་འོག་ཏུ་སྐེ་ཚེའི་ས་བོན་བརྒྱ་རྩ་བརྒྱད་ཀླུའི་ས་བོན་དུ་མཚེའུར་དོར་རོ།། བཅོམ་ལྡན་འདས་དེའི་ཚེ་བདག་ཅག་ཐམས་ཅད་ཀྱི། ཁང་ཁྱིམ་མཐའ་དག་ཞུགས་འབར་བར་གྱུར། བདག་ཤི་ཀེང་རུས་ཀྱི་ལྷག་མ་ཙམ་ཞིག་ལུས་ནས་ཡོངས་སུ་ཐར་པར་མ་གྱུར་ཀྱི་བར་དུ་དུམ་བུ་དུམ་བུར་འཆད་པར་འགྱུར་རོ།། དེའི་ཚེ་བདག་ཅག་ཐམས་ཅད་ཀྱིས་མྱུར་བར་ཆར་གྱི་རྒྱུན་འབབ་པར་བགྱིད་དོ། ། གལ་ཏེ་མྱུར་དུ་ཆར་གྱི་རྒྱུན་མ་ཕབ་ན། བཅོམ་ལྡན་འདས་དེའི་ཚེ་བདག་ཅག་ཐམས་ཅད་འགུམ་པའི་དུས་ཀྱི་དབང་དུ་མཆིའོ།། བུ་དང་ཚ་བོར་བཅས་ཏེ་འགུམ་པར་མཆིའོ། ། དེ་ནས་རྣམ་ཐོས་ཀྱི་བུ་ལ་སོགས་པ་རྒྱལ་པོ་ཆེན་པོ་བཞིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་ཀླུ་མ་ནས་བསྒག་པའི་སྔགས་ཀྱི་ཚིག་ཤིན་ཏུ་མི་བཟད་པ་དག་བཤད་དོ། ། སྙིང་རྗེ་མ་མཆིས་པའི་མནས་བསྒག་པའི་ཚིག་དག་བཤད་དོ།། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དག་ཕྱི་མའི་ཚེ་ཕྱི་མའི་དུས་ན་ཀླུ་མི་འགྲུངས་པ། མ་རུངས་པ། གཏུམ་པ། གནོད་པར་བྱེད་པ་དག་འབྱུང་སྟེ། དེའི་ཚེ་མནའ་འདིས་འཇིགས་པར་འགྱུར། སྐྲག་པར་འགྱུར། དུས་དུས་སུ་ཆར་གྱི་རྒྱུན་ནི་ལེགས་པར་འབེབས་སོ།། དུས་དུས་སུ་ལོ་ཏོག་དང་། མེ་ཏོག་དང་། འབྲས་བུ་རྣམས་སྒྲུབ་བོ།། དེ་ནས་བཅོམ་ལྡན་འདས་ལ། རྒྱལ་པོ་ཆེན་པོ་རྣམ་ཐོས་ཀྱི་བུས་འདི་སྐད་ཅེས་གསོལ་ཏོ།། བཅོམ་ལྡན་འདས་ཆོ་ག་རྒྱ་ཆེར་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་ཆོ་ག་བཀའ་སྩལ་པ། ཆར་མི་འབབ་པའི་དུས་ན་དེས་རི་འམ། དགོན་པའི་གནས་སམ། གཙུག་ལག་ཁང་ངམ། ཆུ་མིག་གམ། མཚེའུ་འམ། མཚོ་འམ། ལྟེང་ཀ་འམ། ཁྲོན་པ་འམ། ཀླུའི་གནས་ཀྱི་མཚེའུ་འམ། འཇིམ་པ་དང་ལྕི་བར་བསྲེས་པའི་དཀྱིལ་འཁོར་གྲུ་གསུམ་དུ་བྱ་སྟེ། དཀྱིལ་འཁོར་དབུས་ཟབ་ཁྲུ་གང་བརྐོས་ལ། ཁ་ཁྱེར་ཡང་ཁྲུ་གང་བར་བྱའོ།། ཤིན་ཏུ་འཇམ་པ་དང་། ཤིན་ཏུ་ཕྱི་བ་བྱའོ།། སྤོས་ཆུས་ཁོར་ཡུག་ཏུ་གཏོར་རོ།། དེའི་དབུས་སུ་ཀླུའི་རྒྱལ་པོ་ཆེན་པོ་བཞི་བྱ་སྟེ། བ་སེར་སྐྱའི་ལྕི་བ་དང་འཇིམ་པར་བསྲེས་པས་ཀླུའི་རྒྱལ་པོ་མགོ་དགུ་གདེངས་ཀ་ཅན་ལུས་དབྱིབས་དགུ་པར་བྱས་ཏེ། ཐམས་ཅད་ཀྱི་མགོ་ལའང་ཡིད་བཞིན་གྱི་ནོར་བུ་བྱའོ།། ཤར་ཕྱོགས་སུ་ཀླུའི་རྒྱལ་པོ་རྒྱ་མཚོ་བྱའོ། ། ལྷོ་ཕྱོགས་སུ་ཀླུའི་རྒྱལ་པོ་གདུགས་བྱའོ།། ནུབ་ཕྱོགས་སུ་ཀླུའི་རྒྱལ་པོ་ཆུ་ལྔ་བྱའོ།། བྱང་ཕྱོགས་སུ་ཀླུའི་རྒྱལ་པོ་ལམ་བུ་ཀར་བྱའོ།། དེའི་གཡོག་འཁོར་བདུན་བདུན་མགོ་གསུམ་པ། མགོ་གཉིས་པ། མགོ་ལྔ་པར་བྱའོ།། ལུས་དག་སྤོས་སྣ་ཚོགས་ཀྱིས་བྱུག་པར་བྱའོ།། ཙན་དན་དཀར་དམར་དང་། སུ་ར་བོན་ཙན་དན་དང་། ཤུག་པ་དང་། གུར་ཀུམ་རྣམས་ཕྱེབྱེ་མར་བྱས་ཏེ་གཏོར་བར་བྱའོ། ། མེ་ཏོག་དང་མེ་ཏོག་འཕྲེང་བ་གདགས་སོ།། གནས་དེའི་དབུས་སུ་འབྲས་ཡོས་དང་ཡུངས་ཀར་གྱིས་གཏོར་བར་བྱའོ།། གྲཝ་བཞིར་རྒྱལ་པོ་ཆེན་པོ་བཞི་གཞག་བར་བྱའོ། ། ཕྱོགས་ཆེན་པོ་བཞིར་སངས་རྒྱས་ཤཱཀྱ་ཐུབ་པའི་སྐུ་གཟུགས་རིང་བསྲེལ་དང་བཅས་པ་དང་། མཆོད་རྟེན་རིང་བསྲེལ་དང་བཅས་པ་དག་གཞག་གོ།། དར་དང་བ་དན་གྱིས་བརྒྱན་པར་བྱའོ། ། མཆོད་པ་ལྔས་མཆོད་དོ།། ཨ་ཀ་རུ་དང་། ཙན་དན་དང་། དུ་རུ་ཀས་བདུག་གོ། རྒྱ་སྤོས་དང་། ན་ལ་དང་། ཀུན་དུ་རུ་དང་། ཡུངས་ཀར་དང་། གནྡྷ་ར་ས་དང་། སྲ་རྩིའི་པོག་དང་། པོག་དཀར་པོ་རྣམས་དང་། སྦྲང་རྩི་དང་བསྲེས་ཏེ་སྔགས་ལན་ཉི་ཤུ་རྩ་གཅིག་བཟླས་ཏེ་ཀླུ་རྣམས་ལ་བདུག་པར་བྱའོ།། དཀྱིལ་འཁོར་གྱི་མཐའ་ཀུན་ཏུ་ནས་ཕྱེས་པདྨ་བྲི་བར་བྱའོ།། སྒོ་བཞི་བཏོད་ལ་ངོས་བཞི་རེ་རེར་ཡང་གཏོར་མས་གཞོང་པ་བཀང་བ་བདུན་བདུན་གཞག་པར་བྱའོ། ། གཏོར་མ་དཀར་པོ་དང་ཅི་འབྱོར་པའི་རོ་རྣམ་པ་མང་པོ་གཞག་གོ། མེ་ཏོག་སིལ་མ་གཏོར་བར་བྱའོ།། བུམ་པ་བཀང་བ་བཞི་གཞག་གོ། བུམ་པ་གཏོར་མས་བཀང་བ་བཞི་གཞག་གོ། པོག་པོར་བཞི་ནས་གུ་གུལ་གྱི་བདུག་པས་བདུག་གོ། མེ་མར་ཁ་བརྒྱད་དུ་བུད་དོ།། རིག་པ་འཛིན་པས་ཤར་གྱི་སྒོར་སྦྱིན་སྲེག་ཤིང་ཀ་ར་ཝཱི་ར་དང་། ཡུངས་ཀར་དང་། ཅེ་ཙ་དམར་པོ་བསྲེས་ཏེ་ལན་བརྒྱ་རྩ་བརྒྱད་དེར་གཏོར་ཏོ།། དོར་བ་བརྒྱ་རྩ་བརྒྱད་ཚང་བ་དང་། ཀླུ་ཐམས་ཅད་ཆར་གྱི་རྒྱུན་འབེབས་ཏེ། འཛམ་བུའི་གླིང་ཐམས་ཅད་དུ་ཕྱོགས་བཞི་ཀུན་ནས་ཆར་གྱི་རྒྱུན་འབེབས་སོ།། ཀླུ་དེ་དག་ཐམས་ཅད་འདིར་ཆར་འབེབས་སོ།། འདི་ནི་ཆོ་ག་དང་པོའོ།། ། ཡུངས་ཀར་གྱི་བར་དང་སྦྲང་རྩི་དང་། ཤིང་ཀ་ར་ཝཱི་རའི་མེ་ཏོག་དང་། ནཱ་ག་གེ་སར་དང་བཏགས་པའི་རིལ་བུ་བྱས་ལ། དེ་ནས་རིལ་བུ་ལ་སྔགས་ལན་བརྒྱ་རྩ་བརྒྱད་བཟླས་པ་བྱས་ཏེ། ཀླུའི་མཆོད་བོར་ན་བོར་མ་ཐག་ཏུ་ཀླུ་ཐམས་ཅད་དགའ་བར་འགྱུར་ཏེ་ཆར་གྱི་རྒྱན་ཆེན་པོ་འབེབས་སོ། ། གལ་ཏེ་དེ་མ་ཐག་མ་ཕབ་ན་ཀླུ་དེ་དག་ཐམས་ཅད་ལུས་ཞིག་པར་འགྱུར་རོ།། ཀླད་པ་ན་བར་འགྱུར་རོ།། སྡུག་བསྔལ་ཆེན་པོ་འབྱུང་བར་འགྱུར་རོ། ། འདི་ནི་ཚི་ག་གཉིས་པའོ།། ། སྦྱིན་སྲེག་བྱས་པའི་ཐལ་བ་དང་རྩབ་མོ་དཀྲུགས་ལ་སྔགས་ལན་དྲུག་ཅུ་བཟླས་པ་བྱ་སྟེ། ཁྱིམ་གྱི་ནང་དུ་པོན་ཕོ་མ་ཐག་ཏུ་ཀླུ་ཐམས་ཅད་འཁྲུགས་པར་གྱུར་ཏེ། དེའི་ཕྱིར་ཆར་གྱི་རྒྱུན་འབེབས་སོ།། གལ་ཏེ་དེ་མ་ཐག་ཏུ་མ་ཕབ་ན་ཀླུ་ཐམས་ཅད་ཀྱི་ལུས་ལ་ཤ་བཀྲ་འབྱུང་ཞིང་མཛེས་བཏབ་པར་འགྱུར། ལོང་བར་འགྱུར་རོ།། འདི་ནི་ཆོ་ག་གསུམ་པའོ།། ། ཤུག་པ་དང་། ཨུཏྤལ་སྔོན་པོ་དང་། བ་པྲ་དང་། ཟངས་ཕྱེ་དང་། ཡུངས་ཀར་དང་། ཨིནྡྲ་ཧསྟ་དང་། པ་ལ་ཤ་བསྲེས་ཏ་བུ་རམ་ཁུ་བས་སྨྲས་ལ་ཤེས་རབ་ཅན་གྱིས་སྔགས་ལན་བརྒྱད་ཅུ་བཟླས་ཏེ། རིལ་བུ་རྒྱ་ཤུག་གི་འབྲུ་ཙམ་དུ་བྱས་ལ་ཆར་མི་འབབ་པའི་དུས་ན་རིལ་བུ་བདུན་ཀླུའི་ཁྱིམ་དུ་བོར་ན་ཉིན་མཚན་བདུན་ཆར་འབེབས་སོ།། གལ་ཏེ་འཕྲལ་དུ་མ་ཕབ་ན་དེའི་ཕྱིར་ཀླུའི་ཁྱིམ་གྱི་ཆུ་ཐམས་ཅད་བསྐམས་པར་འགྱུར་རོ། ། ཀླུའི་ཁྱིམ་ན་གནས་པ་ཐམས་ཅད་གཅེར་བུར་འགྱུར་རོ།། རིལ་བུ་གཅིག་རྒྱལ་མཚན་གྱི་རྩེ་མོ་ལ་བཏགས་ཏེ་ཀླུའི་མཆོད་གཟུགས་སོ། ། བ་དན་སྔོན་པོ་གདགས་སོ།། སྔགས་འདི་བྲིས་ཏེ་དེར་གདགས་པར་བྱས་ན་ཇི་སྲིད་དུ་རྒྱལ་མཚན་མ་བསྡུས་པ་དེ་སྲིད་དུ་ཀླུ་ཐམས་ཅད་ཆར་འབེབས་སོ།། ཡང་རྒྱལ་མཚན་གྱི་རྩེ་མོ་ལ་བཏགས་ཏེ་ཁང་ཐོག་མཐོན་པོར་གཟུགས་སོ། ། སེར་བ་འབབ་པའི་དུས་ནའང་ཀླུ་རྣམས་སེར་བ་འབབས་ཀྱང་མི་ནུས་སོ།། ཀླུ་རྣམས་ཀྱིས་གསེར་གྱི་ཁ་དོག་འདྲ་བ་དེ་འདྲ་བར་མཐོང་སྟེ། ཀླུ་ཐམས་ཅད་སྔངས་སྐྲག་ཅིང་གནས་དེར་འདོད་པ་བཞིན་ཆར་འབེབས་སོ། ། ཨོཾ་སུ་པྲ་ཏེ་བཛྲ་དུན་ཏེ་མི་ལི་མི་ལི་སྭཱ་ཧཱ། འདི་ནི་སྔགས་སོ།། བག་ཕྱེ་ལས་ཀླུ་མགོ་དགུ་པའི་གཟུགས་བྱས་ལ་ལུས་མཚལ་གྱིས་བསྐུ་བར་བྱའོ། ། མགུལ་དུ་བ་དན་གདགས་སོ།། དཀྱིལ་འཁོར་གྲུ་བཞི་བྱས་ཏེ་དབུས་སུ་ཀླུའི་གཟུགས་བཞག་ལ་མེ་ཏོག་སིལ་མས་གཏོར་རོ།། གཏོར་མ་དཀར་པོ་ཅི་འབྱོར་ཚད་སྦྱིན་ནོ།། མེ་ཏོག་དང་བདུག་སྤོས་ཀྱང་སྦྱིན་ནོ།། བལ་པོ་སེའུའི་ཤིང་གི་ལྕུག་མ་ལ་ལན་ཉི་ཤུ་རྩ་གཅིག་ཡོངས་སུ་བཟླས་པ་བྱས་ཏེ། སྔགས་དང་བལ་པོ་སེའུའི་ཤིང་གི་ལྕུག་མ་ལ་ཀླུའི་གཟུགས་བྱས་ལ་ལན་བརྒྱ་རྩ་བརྒྱད་དུ་བྱབ་པ་བྱས་ན་ཀླུ་གང་གི་མིང་བྲིས་པའི་ཀླུ་དེ་བཀུག་པར་འགྱུར་ཏེ། ཀླུ་དེའང་རང་གི་ཁྱིམ་ལ་དགའ་བར་མི་འགྱུར་རོ།། གལ་ཏེ་ཆར་གྱི་རྒྱུན་ལེགས་པར་མ་ཕབ་ན་འཕྲལ་དུ་སྲོག་མ་རུངས་པར་འགྱུར་རོ། ། ཡུངས་ཀར་ལ་ལན་སྟོང་རྩ་བརྒྱད་རེ་རེ་ལ་ཡོངས་སུ་བཟླས་པ་བྱ་སྟེ། སྟོང་རྩ་བརྒྱད་དུ་ཚང་ན་ཀླུའི་གཟུགས་ཐམས་ཅད་འགྲོ་ཞིང་མགོ་གདེངས་ཀ་བྱེད་དོ།། དེའི་འོག་ཏུ་བལ་པོ་སེའུའི་ལྕུག་མས་བསྡིགས་ན་ལྡང་ཞིང་ལྕེ་སྟོན་པར་འགྱུར་རོ།། ལུས་ཀྱི་བར་དུ་སྟོན་པར་འགྱུར། ཀླུ་ཐམས་ཅད་དབང་དུ་འགྱུར་ཏེ། གང་བསྒོ་བ་དེ་བཞིན་བྱེད་དོ། ། འོ་མ་དང་ཡུངས་ཀར་ལ་སྔགས་བརྒྱ་རྩ་བརྒྱད་ཡོངས་སུ་བཟླས་པ་བྱས་ཏེ་གནས་ཐམས་ཅད་དུ་གཏོར་ན། ཐམས་ཅད་ལ་ཕྱིར་ལེགས་པར་བྱས་པར་འགྱུར་རོ།། འདི་ནི་ཆོ་ག་བཞི་པའོ།། ། དེ་ནས་ཀླུའི་རྒྱལ་པོ་རྒྱ་མཚོ་དང་། གཞན་ཡང་ཀླུའི་རྒྱལ་པོ་མཐུ་ཆེ་བ་ཀླུའི་རྒྱལ་པོ་བརྒྱ་སྟོང་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ།། བཅོམ་ལྡན་འདས་སྔགས་ཀྱི་ཚིག་ཤིན་ཏུ་མི་བཟད་པ་དག་བཀའ་སྩལ་ཏོ།། ལས་སྒྲུབ་པ་ཤིན་ཏུ་མི་བཟད་པ་དག་བཀའ་སྩལ་ཏོ།། བཅོམ་ལྡན་འདས་བདག་ཅག་གིས་ཀྱང་དེ་དང་འདྲ་བར་བཤད་པར་བགྱིའོ། ། དུས་དུས་སུ་ཆར་གྱི་རྒྱུན་འབེབས་སོ།། སླན་ཆད་སེམས་ཅན་དག་ལ་རྣམ་པར་འཚེ་བར་མི་བགྱིད་དོ།། བཅོམ་ལྡན་འདས་བདག་ཅག་གིས་ཀླུའི་མི་བསྲུངས་པ་རྣམ་པར་འཚེ་བར་བགྱིད་པ་རྣམས་ཀྱི་དོན་དུ་དམ་ཚིག་མ་འཚལ་བ་རྣམས་བཟློག་པའི་སྔགས་ཀྱི་ཚིག་བཤད་པར་འཚལ་ན། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ།། ཀླུའི་བདག་པོ་དག་ངས་དམ་ཚིག་གི་སྔགས་བྱིན་གྱིས་བརླབས་ཀྱིས་དེ་ཤོད་ཅིག། ན་མོ་བྷ་ག་ལ་ཏེ་ཤཱཀྱ་མུན་ཡེ། ཏ་ཐཱ་ག་ཏཱ་ཡ། ཏདྱ་ཐཱ། བྷུ་ཛེ་བྷུ་ཛེ། ས་མ་ཡ་བྷུ་ཛེ། ཏཏྟ་བྷུ་ཛེ། པྲ་བ་ར་བྷུ་ཛི། ས་མནྟ་ཨཱ་ཀར་བྷུ་ཛེ། དུ་རུ་དུ་རུ་སཿ། ས་མ་ཡ་བ་ལ་ནེ་སྭཱ་ཧཱ། ནཱ་ག་མ་ར་ས་ཉྩོད་ནི་སྭཱཧཱ། བཅོམ་ལྡན་འདས་སླད་མའི་ཚེ་སླང་མའི་དུས་ན་ཀྲུ་མི་བགྲུངས་པ་ཐམས་ཅད་སླར་བཟློག་པའི་སླད་དུ་བདག་ཅག་གིས་ཀླུའི་དམ་ཚིག་གི་སྔགས་འདི་བཤད་དོ། ། ཧ་ཅང་ཆར་ཆེ་བའི་ཚེ་དང་། ཆར་དཀོན་པའི་ཚེ་དང་། སད་དང་། སེར་བ་དང་། སེར་བ་འབབ་པའི་ཚེ་སྔགས་འདི་དྲན་པར་བྱའོ།། བརྗོད་པར་བགྱིའོ།། དེ་ནས་ཀླུ་ཐམས་ཅད་བསྐུལ་བར་བགྱིའོ། ། རིག་པ་འཛིན་པ་དེས་ཤིན་ཏུ་ཁྲུས་བགྱིས་ཏེ་གཙང་མར་བགྱིས་ལ། གོས་གསར་པ་བགོས་ཏེ་ཀླུའི་གནས་སུ་མཆི་བར་བགྱིའོ།། ཀླུའི་གནས་སུ་ཅི་འབྱོར་པའི་སྤོས་ཀྱི་དཀྱིལ་འཁོར་བགྱིས་ཏེ། བཅོམ་ལྡན་འདས་ཤཱཀྱ་ཐུབ་པའི་སྐུ་གཟུགས་སམ། སྐུ་གདུང་དང་བཅས་པའི་མཆོད་རྟེན་དཀྱིལ་འཁོར་དེའི་སྟེང་དུ་བཞག་སྟེ་སྤོས་ཆབ་ཀྱིས་བཀྲུ་བར་བགྱི། མེ་ཏོག་དང་བདུག་པས་མཆོད་པར་བགྱི། ཀླུ་ཀུན་ཡང་བཀྲུ་བར་བགྱིའོ།། སྐུ་བསིལ་བའི་ཆབ་དེ་ལ་ལན་བརྒྱད་ཡོངས་སུ་བཟླས་པ་བགྱིས་ཏེ། དེའི་ནང་དུ་ཡུངས་ཀར་སྩལ་ནས་མཚེའུ་དེའི་ནང་དུ་དབོ་ཞིང་ཕྱོགས་བཞི་ནས་བདུག་པས་བདུགས་ན། དེ་ཕོ་མ་ཐག་ཏུ་སྐད་ཅིག་དེ་ལ་ཀླུའི་གནས་འགུལ་ཞིང་དུ་བ་ལྟ་བུ་བྱུང་ནས་སྤྲིན་གྱི་དཀྱིལ་འཁོར་ཆེན་པོར་གྱུར་ཏེ། ནམ་མཁའི་དཀྱིལ་དེ་ཁེབས་པར་ཆར་གྱི་རྒྱུན་འབེབས་སོ། སེར་བ་འབབ་པའི་དུས་སུ་ཡུངས་ཀར་དང་ཏིལ་བསྲེས་པ་ལ་ལན་ཉི་ཤུ་རྩ་གཅིག་བཟླས་པ་བགྱིས་ཏེ་ཕྱོགས་བཞིར་བཅིང་བར་བྱའོ།། ཀླུའི་ཕྱོགས་སུ་གཏོར་བར་བགྱིའོ།། སེར་བ་མི་འབབ་པ་དང་ཀླུ་ཐམས་ཅད་ཀྱང་གཅོད་པར་འགྱུར་རོ། ། སད་དང་། སེར་བ་དང་། དུས་མ་ཡིན་པའི་རླུང་རབ་ཏུ་ཞི་བར་འགྱུར་རོ།། ཀླུའི་མཚོ་འགྲམ་མམ། ཁྲོན་པ་འམ། ལྟེང་ཀ་འམ། རྫིང་བུའི་འགྲམ་མམ། རིའི་རྩེ་མོར་ཤིང་ཨརྒ་དང་། ཞུན་མར་དང་། ཡུངས་ཀར་དང་། ཤིང་ཀ་ར་ཝཱི་རའི་མེ་ཏོག་གིས་སྟོང་རྩ་བརྒྱད་སྦྱིན་སྲེག་བྱས་ན་ཐམས་ཅད་འགྲུབ་པར་འགྱུར་རོ།། སྦྱིན་སྲེག་བྱས་མ་ཐག་ཏུ་ཆར་གྱི་རྒྱུན་ཆེན་པོ་འབབ་པར་འགྱུར་རོ། ། ཧ་ཅང་ཡང་ཆར་ཆེ་བའི་དུས་ན་འབྲས་ཡོས་དང་ཡུངས་ཀར་ལ་ལན་བརྒྱ་རྩ་བརྒྱད་བཟླས་པ་བྱས་ཏེ་ནམ་མཁའ་ལ་གཏོར་ན་ཆར་ཆེན་པོ་བཟློག་པར་འགྱུར་རོ།། ། བཅོམ་ལྡན་འདས་གལ་ཏེ་བདག་ཅག་གིས་དགུང་གསུམ་གྱིས་ཆར་གྱི་རྒྱུན་མ་ཕབ་ན། བཅོམ་ལྡན་འདས་དེའི་ཚེ་ཤ་བཀྲ་འབྱུང་བར་འགྱུར་ལགས་སོ།། ལོང་བ་དང་ལུས་དྲི་མི་ཞིམ་པར་འགྱུར་ལགས་སོ། ། སངས་རྒྱས་དང་། ཆོས་དང་། དགེ་འདུན་སླུ་བར་བགྱིད་པ་ལགས་སོ།། འཇིག་རྟེན་གསུམ་སླུ་བར་བགྱིད་པ་ལགས་སོ།། བདག་ཅག་ཀླུའི་སྐྱེ་གནས་ནས་འཕོ་བར་གྱུར་ཅིག། བཅོམ་ལྡན་འདས་གཞན་ཐམས་ཅད་ལའང་སྦྱོར་བར་བགྱིད་ན་ཐམས་ཅད་རུང་བར་འགྱུར་རོ། ། དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་དེ་དག་དབུགས་ཕྱུང་། དམ་ཚིག་ལ་བཀོད་ནས། རྒྱལ་པོ་ཆེན་པོ་རྣམ་ཐོས་ཀྱི་བུ་ལ་ཡོངས་སུ་གཏད་དེ་རྗེས་སུ་གཏད་ནས་ས་ཕྱོག་དེ་ནས་གཤེགས་སོ། ། རྣམ་ཐོས་ཀྱི་བུ་ནི་བཞི་ལ་བཞུགས་སོ།། ཀླུའི་དམ་ཚིག་ཅེས་བྱ་བ་ཆར་འབེབས་པའི་སྐབས་རྫོགས་སོ།། ། ནས་བཅོམ་ལྡན་འདས་ཚངས་པའི་ཁང་པ་བརྩེགས་པར་བཞུགས་པ་དང་། ལྷའི་ཚོགས་དུ་མ་ལྷགས། བྱང་ཆུབ་སེམས་དཔའི་འཁོར་ཆེན་པོའང་ལྷགས། ལྷ་རྣམས་ཀྱི་དབང་པོ་བརྒྱ་བྱིན་དང་། ཚངས་པ་དང་ཁྱབ་འཇུག་དང་། དབང་ཕྱུག་ཆེན་པོ་དང་། ཀླུའི་དབང་པོ་མཐུ་ཆེ་བ་ཐམས་ཅད་ཀྱང་ལྷགས། ནམ་མཁའ་ལྡིང་གི་དབང་པོ་དང་། རྒྱལ་པོ་ཆེན་པོ་གསེར་མིག་གི་འདབ་མ་ཅན། རྡོ་རྗེའི་མཆུ་ཅན། བདག་ཉིད་ཆེན་པོ་ལུས་འབར་ཞིང་ཁྲོ་བ། འཇིགས་སུ་རུང་བའི་རྩལ་ཅན། རིན་པོ་ཆེ་ཐ་དད་པ་སྣ་ཚོགས་དང་། མུ་ཏིག་དང་། གསེར་གྱིས་སྤྲས་པའི་ཅོད་པན་མགོ་ལ་ཐོགས་པ། གསེར་གྱིས་ཀླུབས་པ། དྲག་པའི་གཟུགས་ཅན། འགྱིང་བར་ལྟ་བ། ཀླུའི་དབང་པོ་གདན་དུ་བཏིང་བ། གཡོག་འཁོར་མང་པོ་ཐམས་ཅད་དང་ལྷགས་སོ།། གནོད་སྦྱིན་གྱི་དབང་པོ་ལག་ན་རྡོ་རྗེ་གནོད་སྦྱིན་བྱེ་བ་དང་། རྡོ་རྗེ་འཛིན་གཡོག་འཁོར་རིག་འཛིན་སྟོང་ལྷགས་ཏེ། བཅོམ་ལྡན་འདས་ནི་ནོར་བུ་རིན་པོ་ཆེ་སྣ་ཚོགས་ཀྱིས་སྤྲས་པ། མུ་ཏིག་དམར་པོ་ཐ་དད་པ་མང་པོས་བརྒྱན་པའི་སེང་གེའི་ཁྲི་ལ་བཞུགས་པ། ཁང་པ་བརྩེགས་པ་ན་ཞམ་རིང་ཆེན་པོ་དང་། དེ་བཞིན་གཤེགས་པའི་བྱིན་གྱི་རླབས་ཆེན་པོས་བྱིན་གྱིས་བརླབས་པ་དང་ལྡན་པས་བཞུགས་ཏེ། བཅོམ་ལྡན་འདས་ནི་འོད་ཟེར་སྣ་ཚོགས་བྱེ་བ་ཁྲག་ཁྲིག་བརྒྱ་སྟོང་གིས་སུ་ནི་ཤིན་ཏུ་བརྒྱན། གསེར་གྱི་མཆོད་སྡོང་ལྟར་ནི་འབར་། ཉི་མ་ལྟར་ནི་སྣང་། མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་མངའ་བ། འོད་འདེབ་གང་བས་ནི་སྐུ་ལེགས་པར་བརྒྱན། དེ་བཞིན་གཤེགས་པའི་སྐུ་ནི་ཤིན་ཏུ་རྣམ་པར་དག་ཅིང་ཤིན་ཏུ་དྲི་མ་དང་སྐྱོན་མེད་པའི་འོད་ནི་གསལ། དེ་ནས་བཅོམ་ལྡན་འདས་ཀྱིས་འཁོར་ཆེན་པོ་འདུས་པར་གྱུར་པ་མཁྱེན་ནས་སྐུ་ལས་འོད་ཟེར་སྣ་ཚོགས་ཕྱུང་སྟེ། འོད་ཟེར་གྱི་སྣང་བ་དེས་ཕྱོགས་བཅུ་ཀུན་ཏུ་ཁྱབ་པར་མཛད་དོ།། དེ་ནས་ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོས་དེ་བཞིན་གཤེས་པའི་འོད་ཟེར་ལ་བལྟས་ནས་འཛམ་བུའི་གླིང་ན་ཀླུ་མི་བགྲུངས་པས་སད་དང་། སེར་བ་དང་། རླུང་དང་། སེར་སྨིན་པ་བ་སྟེ། མེ་ཏོག་དང་། འབྲས་བུ་ཐམས་ཅད་དང་། ལོ་ཏོག་ཐམས་ཅད་དང་། ཤིང་དང་། རྩཝ་དང་། ཤིང་གེལ་བ་དང་། སྨན་དང་། ནགས་ཚལ་དང་། སྨན་གྱི་བར་བསྲེགས་ཏེ་མ་རུངས་པར་བྱས་ནས། ཡལ་གའང་འཛམ་བུའི་གླིང་ན་མེད་པར་བྱས་ན། དེ་ན་སེམས་ཅན་དེ་དག་སྡུག་བསྔལ་ཆེན་པོས་གཟིར་ཞིང་ཉམ་ཐག་པའི་སྐད་ཕྱུང་བ་ཐོས་སོ། ། དེ་ནས་ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཀླུ་གནོད་པར་སེམས་པ་གཏུམ་པོ་རྣམས་ཀྱིས་འཛམ་བུའི་གླིང་རྣམ་པར་བཤིག་སྟེ། ཐམས་ཅད་མ་རུངས་པར་བགྱིས་ནས་སེམས་ཅན་རྣམས་སྡུག་བསྔལ་མི་བཟད་པ་ཆེན་པོ་མྱོང་ངོ་། ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལྷའི་དབང་པོ་དག་འདི་ནི་མངོན་སུམ་དུ་གྱུར་པ་ཡིན་ཏེ། དེ་བཞིན་གཤེགས་པའི་བྱིན་རླབས་དང་། སངས་རྒྱས་ཀྱི་ཡེ་ཤེས་ཟབ་མོ་དང་། དེ་བཞིན་གཤེགས་པའི་ཡོན་ཏན་གྱི་ཁྱད་པར་གྱི་བྱིན་གྱི་རླབས་ལ་ལྟོས་ཤིག། དེ་ནས་བཅོམ་ལྡན་འདས་ནམ་མཁའ་ལྡིང་བསྒྱིངས་པས་རྣམ་པར་བལྟས་པ་ཞེས་བྱ་བ་ཀུན་ནས་མེ་ལྕེ་འབར་བའི་འཕྲེང་བ་ཅན་རྣམ་པར་འཕྲུལ་པའི་ཏིང་ངེ་འཛིན་ལ་སྙོམས་པར་ཞུགས་སོ། ། སྟོམས་པར་ཞུགས་མ་ཐག་ཏུ་སྐུ་ཕྲག་པ་གཉིས་རབ་ཏུ་འབར་ཏེ། འབར་མ་ཐག་ཏུ་ཀླུ་ཐམས་ཅད་ཀྱི་ལུས་རབ་ཏུ་འབར་བར་གྱུར་ཏོ། ། དེ་ནས་ཀླུའི་རྒྱལ་པོ་ཆེན་པོ་ཀུན་ནས་གདུགས་ཀྱི་རྣམ་པས་བསྐོར་བས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ།། བཅོམ་ལྡན་འདས་ཚིག་ལགས་སོ། ། བདེ་བར་གཤེགས་པ་ཚིག་ལགས་སོ།། དེ་ནས་བཅོམ་ལྡན་འདས་ཀྱིས་ཅང་མི་གསུང་བར་གནང་ནས་སྟེང་དུ་རྣམ་པར་གཟིགས་ཏེ་ཕྱོགས་བཅུ་ཀུན་ཏུའང་གཟིགས་ཏེ། བཞིན་གཤེགས་པ་ཐམས་ཅད་ལ་ཕྱག་བཞེས་ཏེ་ནམ་མཁའ་ལྡིང་གི་ཤུགས་ཆེན་པོས་ཀུན་ཏུ་འབར་བ་ནམ་མཁའ་ལྡོང་གི་གཟི་བརྗིད་ཀྱི་སྙིང་པོའི་དཀྱིལ་འཁོར་འདི་རྗེས་སུ་དགོངས་སོ།། ཨོཾ་བཛྲ་པ་ཏི་ག་རུ་ཌ་བེ་གེ་ཧཱུཾ་ཧཱུཾ། ར་ཙི་སྲི་ཛ་ཧཱུཾ་ཕཊ། དེ་ནས་ཀླུ་མི་བསྲུན་པ་དེ་དག་ལུར་ཡུར་པོར་གྱུར་ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ་འདར་ཡེད་ཡོད་དོ།། དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པའི་ནམ་མཁའ་ལྡིང་མེ་ལྕེ་འབར་བ་ཞེས་བྱ་བའི་སྙིང་པོ་ཆེན་པོ་བཀའ་སྩལ་པ། ན་མོ་བྷ་ག་ཝ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨོཾ་བཛྲ་ཛྭ་ལ་ཛྭ་ལ། པྲ་ཛྭ་ལ། ཧན་ཧ་ན། སརྦ་ནཱ་ག་ཧྲྀ་ད་ཡ་དྷཱ་རཎཱི། ཧ་ར་ཧ་ར། སརྦ་ཀ་ན་ནན་བ་ལ་བཱིརྱ་བ་ར་ཀྲ་མན། ད་ཧ་ད་ཏཱ། སརྦ་ནཱ་ཀ་ཏ། ཤྲཱི་ར་ཎི། བ་ཙ་པ་ཙ། སརྦ་ནཱ་ག་མཛཱ་ཎཱ~ཾ། ག་རུ་ཌ་བེ་ག་པ་ཤི་ནི་པ་ཏེ། ནད་པ་ཏ་ཡ་བ་ཏ་ཡ། 5་ནཱ་ག་བ་བ་ན་ནི། ཨོཾ་མ་ཏ་མ་ཏ། མ་ཧཱ་བི་ཙི་ཏྲ་མ་ནི་མོ་ཧུ་ལི་དར་ཧཱ་མ་ཧཱ་རུ་ཏྲ་བེ་ག་ད་ར་བི་ཙི་ཏྲ། ཨཱ་བ་ར་ཎ་བི་བུ་ཧུ་ཤཱི་ཏ་ཀཽསླྀ་པ། སརྦ་ནཱ་གཱ་ནཱན། ཀ་ར་ཀ་ར། སྨ་ར་སྨ་ར། བྷོ་ག་རུ་ཌེ་ན་པནྡྷ་གན་བནྡྷ་ན་ཤཀྱ་མུ་ནེ་པྲ་ཙ་ན་མ་ནུ་པ་ལ་ཡ། ཏརྫ་ཡ། ནཱ་ག་ནཱན། བ་ཀྵི་ཡ། དུཥྚན་པྲ་མ་ཏ་ཡ། བཱ་ཡུ་བེ་ཛ་ག་བན། སྥོ་ཊ་ཡ། མཱུརྡྷ་ནཱན་ཤོ་ཥ་ཡ། ཏི་དུ་ཛྭ་ལ་ན། ཧཱུཾ་ཧཱུཾ་ཕཊ་ཕཊ། པྲ་མ་ཏ་སརྦ་པ་ཏ་ཨ་ཤིན་ནེམ་ཀན། ནཱ་ཤ་ཡ་ནཱ་ཤ་ཡ། སརྦ་ནཱ་ག་བ་ལན་བ་ཧ་ར། པ་ཙ་དུར་ཏེ་ན། ཨཱ་གར་བ་ཡ། སུ་ཤ་ནཱ་ག་ནཱན། གརྫ་གརྫ་མ་ཧཱ་ག་རུ་ར་བེ་ག་ན། ཙུ་ཙུ། ཕཊ་ཕཊ། སྭམྦྷ་ཡ་ནི་ཤཱི་ཏ་པ་ལ་པ་ཀན། ས་ཡ། ཧཱུཾ་ཧཱུཾ་ཕཊ་ཕཊ། སྟམྦྷ་ཡ། ཤཱི་ཏ་བཱ་ཡུ། མུ་གྷ་ན། སརྦ་ནཱ་གཱ་བྷི་ཧ་རི་ཎཾ། ཧཱུཾ་ཧཱུཾ། ཕཊ་ཕཊ། བྷོ་ནཱ་ག་ཨ་དྷི་པ་ཏི། མུཉྩ་ཏྲིཿབྷཀྵ་བུ་ཡུན་ག་རུ་ཌ་ཀྲོ་དྷ་མ་ཧཱ་བེ་ག་བནྡྷ་ཡ་བཱ་ཡུ་བ་ལ་ཧ་ཀན་ཏི་ཏི་ཊི་ཊི་ཊི། ཧཱུ~ཾ་ཧཱུཾ། ཕཊ་ཕཊ། བྷ་ཤ་ཡ། བ་ཏ་ཤཱི་ཏ་ཨཱ་ཤི་ནི་ན། ནཱ་ཤ་ཡ། ཙི་ཏི་ཙི་ཏི། ཕཊ་ཕཊ་སཱཧཱ། ཨཱ་ཤཱ་ཡ། ནཱ་གཱ་ནཱན། བནྡྷ་ཡ། བཛྲ་བནྟེ་ན་ཏ་ཐཱ་ག་ཏ་ས་མདྷེ་ན། ས་ཏྱ་ན། ཙཱུ་ཧཱུཾ་ཧཱུ། ཕཊ་@་ཕཊ་སྭཱ་ཧཱ། ཏི་ཏི་ཏི་ཏི། ཧཱུཾ་ཧཱུཾ། ཕཊ་ཕཊ་སྭཱ་ཧཱ། ཛ་ལཾ་བ་དུཿ། སརྦ་ཨ་ཤནྟ་ཐཱ་ག་ཏ་ཨ་དྷིཥྚ་ནེ་ན་ཧཱུཾ་ཕཊ། ཨ་མྲྀ་ཏ་མ་བྷ་བ་ཏུ། སརྦ་ཤཽ་ཏ་བཱ་ཡུ་བེ་ག་ཨཱ་ཤ་ནི་ཧུཾ་ཧཱུཾ། ཕཊ་ཕཊ། མཱ་ཏི་ཀྲ་མ་སྥོ་ཊ་ཡ་ནཱ་ག་མཱ་ཏི་ཀྲ་མ་མཱ་ཏེ་མུཿནཱ། ཡ་ཏི་ཤཱི་ཏི། ཧུ་རུ་ཧུ་རུ། ཧཱུཾ་ཧཱུཾ། ཕཊ་ཕཊ་སྭཱཧཱ། བརྟ་ཡ་སྭཱཧཱ། ནཱ་ག་སྥོ་ཊ་ཡ་སྭཱ་ཧཱ། ནཱ་ག་བི་ད་རཱ་ཡ་སྭཱ་ཧཱ། ཨོཾ་སྭཱཧཱ། ས་སྭཱ་ཧཱ། བྷུ་བ་སྭཱཧཱ། ཏ་ཐཱ་ག་ཏ་ས་མ་ཡ་སྭཧཱ་ཏྲཻ་ལོ་ཀྱ་པཱུ་ཛ~ཾ་ཏཱ་ཡ་སྭཱ་ཧཱ། ཨོཾ་ཧཱུཾ་ཧཱུཾ། ཧཱུ~ཾ་ཧཱུཾ་ཧཱུཾ། ཕཊ་ཕཊ་ཕཊ། ཀླུའི་བདག་པོ་དག་དེ་བཞིན་གཤེགས་པའི་ནམ་མཁའ་ལྡིང་གི་འབར་བའི་སྙིང་པོ་ཞེས་བྱ་བའི་གཟུངས་ཆེན་པོ་འདི་ཀླུ་མི་བསྲུན་པ་ཐམས་ཅད་ཟློག་པར་བྱེད་པའོ། ། སྤྲིན་དང་། ལྷགས་པ་དང་། རླུང་དང་། སེར་བ་ཐམས་ཅད་འཇིག་པའོ།། ཟློག་པའོ།། ལོ་ཏོག་ཡོངས་སུ་སྐྱོང་བའོ།། མེ་ཏོག་དང་། འབྲས་བུ་དང་། ནགས་ཚལ་ཡོངས་སུ་སྐྱོང་བའོ། ། བདུད་རྩིའི་འབྲས་བུ་ཡོངས་སུ་འགྲུབ་པར་བྱེད་པའོ།། དེ་བས་བསྟབས་པ་འཕེལ་བར་བྱེད་པའོ།། ཀྱེ་ཀླུའི་བདག་པོ་དག་འདི་དྲན་མ་ཐག་པ་ཙམ་གྱིས་ཀླུའི་དཀྱིལ་འཁོར་བྱེད་པ། བུ་དང་ཆུང་མར་བཅས་པ་དང་། བློན་པོར་བཅས་པ་དང་། མངག་གཞུག་པར་བཅས་པ་དང་། འཁོར་དང་བཅས་པ་ལྷགས་པའི་སྟོབས་བྱེད་པ། རླུང་གི་སྟོབས་བྱེད་པ། སྡུད་པ་དང་སྟོབས་བྱེད་པ། ཀུན་ཐམས་ཅད་མཐུན་པ་དེ་བཞིན་གཤེགས་པའི་བཀའ་གནང་བ་དང་། དེ་བཞིན་གཤེགས་པའི་དམ་ཚིག་གི་བྱིན་གྱི་རླབས་ཀྱིས་ཕྱི་མའི་ཚེ་ཕྱི་མའི་དུས་ན་འཛམ་བུའི་གླིང་འདིར་ལོ་ཏོག་ཐམས་ཅད་དང་། མེ་ཏོག་དང་། འབྲས་བུ་ཐམས་ཅད་དང་། རྫས་དང་། ཤིང་དང་། སྨན་ཐམས་ཅད་ཀུན་ཏུ་སྲུང་བ་གྱིས་ཤིག། དུས་དུས་སུ་ཆར་གྱི་རྒྱུན་ཕོབ་ཅིག། བདག་གི་སྲོག་ཇི་ལྟ་བ་དེ་བཞིན་དུ་འཛམ་བུའི་གླིང་གི་སེམས་ཅན་ཐམས་ཅད་རྟས་པར་བྱེད་པ། མེ་ཏོག་དང་། འབྲས་བུ་དང་། ལོ་ཏོག་རྣམས་ཡོངས་སུ་སྦྱོངས་ཤིག། གལ་ཏེ་གཞན་དུ་འགྱུར་ཏེ་དེ་བཞིན་གཤེགས་པའི་བཀའ་ལུང་དགེ་བ་ལྟར་མ་བྱས་ན། དེའི་ཚེ་ཀླུ་ཐམས་ཅད་ཀྱི་ཁྱིམ་ཀུན་ཏུ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་འབར་བར་གྱུར་ཅིག། ཀླུ་ལ་མུ་གེ་ཆེན་པོ་འབྱུང་བར་གྱུར་ཅིག། སྟོབས་བྲི་ཞིང་བརྩོན་འགྲུས་མ་རུངས་པར་གྱུར་ཅིག། ཆུབ་སྐམས་པར་གྱུར་ཅིག། ཁྱིམ་བསྐམས་པར་གྱུར་ཅིག། ལུས་རྩུབ་པར་གྱུར་ཅིག། འདབ་བཟངས་ཀྱིས་འཇིགས་པ་དང་མེ་དང་བྱེ་མའི་འཇིགས་པ་དང་། རྟག་ཏུ་བཀྲེས་པ་དང་སྐོམ་པས་འཇིགས་པ་ཅན་དུ་གྱུར་ཅིག། ཕར་རྒྱུག་ཚུར་རྒྱུག་ཅིང་ལུས་ཀུན་ཏུ་ཚིག་པ་དང་། ཉི་མའི་དུགས་ཀྱིས་ཡོངས་སུ་གདུངས་པས་ལུས་ཚིག་པར་གྱུར་ཅིག། ནད་དང་། གནོད་པ་དང་། ནད་འགོ་བ་སྣ་ཚོགས་པ་འདུས་པར་གྱུར་ཅིག། དེ་ལྟར་ཕྱི་མའི་ཚེ་ཕྱི་མའི་དུས་ན་ཀླུ་མི་བསྲུན་པ། ཀླུ་གཏུམ་པ། རབ་ཏུ་གཏུམ་པ་རྣམས་གལ་ཏེ་དེ་བཞིན་གཤེགས་པའི་ནམ་མཁའ་ལྡིང་འབར་བ་ཞེས་བྱ་བའི་སྙིང་པོའི་གཟུངས་འདི་ལས་འགལ་བར་བྱེད་ན་སྡུག་བསྔལ་འདི་ལྟ་བུ་མྱོང་བར་འགྱུར་ཏེ། ཀླུའི་བདག་པོ་དག་དེའི་ཕྱིར་བདེན་པའི་ཡི་དམ་གྱིས་དེ་བཞིན་གཤེགས་པའི་དམ་ཚིག་གི་རྗེས་སུ་བསྲུང་བར་བྱའོ། ། འཛམ་བུའི་གླིང་གི་སེམས་ཅན་ཐམས་ཅད་ཡོངས་སུ་བསྐྱང་བར་བྱའོ།། བསྲུང་བར་བྱའོ།། བསྒྲུབ་པར་བྱའོ།། དེ་ནས་ཀླུའི་རྒྱལ་པོ་ཀུན་ནས་གདུགས་ཀྱི་རྣམ་པས་བསྐོར་བ་དང་། ཀླུའི་རྒྱལ་པོ་ཆེན་པོ་རྒྱ་མཚོ་དང་། ཀླུའི་རྒྱལ་པོ་ཆེན་པོ་དགའ་བོ་དང་། བསྙེན་དགའ་བོ་དང་། ཀླུའི་རྒྱལ་པོ་ཆེན་པོ་གཟི་ཅན་དང་། ཀླུའི་རྒྱལ་པོ་ཆེན་པོ་ཕུལ་བ་དང་། ཀླུའི་རྒྱལ་པོ་ཆེན་པོ་ཆུ་ལྷ་དང་། ཀླུའི་རྒྱལ་པོ་ཆེན་པོ་འབར་བ་ཀུན་ཏུ་འཛིན་པ་ཁ་བྱེ་རབ་ཏུ་དགའ་བའི་གཙུག་ཅེས་བྱ་བ་དང་། ཀླུའི་རྒྱལ་པོ་ཆེན་པོ་ཚངས་པའི་མགོ་དང་། ཀླུའི་རྒྱལ་པོ་ཆེན་པོ་འཇིག་རྟེན་གསུམ་དུ་གྲགས་པའི་རྒྱལ་མཚན་དང་། ཀླུའི་རྒྱལ་པོ་ཆེན་པོ་དབང་ཕྱུག་འོད་དང་། ཀླུའི་རྒྱལ་པོ་ཆེན་པོ་འོད་རྣམ་པར་གྲགས་པ་ཞེས་བྱ་བ་དང་། ཀླུའི་རྒྱལ་པོ་ཆེན་པོ་ཀུན་ནས་རྒྱལ་མཚན་གྱི་རྣམ་པ་ཞེས་བྱ་བ་དང་། ཀླུའི་རྒྱལ་པོ་ཆེན་པོ་ནོར་བུ་མགོ་དང་། ཀླུའི་རྒྱལ་པོ་ཆེན་པོ་རབ་ཏུ་གནས་པ་ཚངས་པའི་གཙུག་དང་། ཀླུའི་རྒྱལ་པོ་ཆེན་པོ་གཙུག་གི་ནོར་བུ་འབར་དང་། ཀླུའི་རྒྱལ་པོ་ཆེན་པོ་མཚོ་ཆེན་པོ་གནོན་དང་། ཀླུའི་རྒྱལ་པོ་ཆེན་པོ་ཀུན་ཏུ་ལྟ་བའི་མིག་དང་། ཀླུའི་རྒྱལ་པོ་ཆེན་པོ་ཁྱབ་འཇུག་ཁོར་ཡུག་དང་། ཀླུའི་རྒྱལ་པོ་ཆེན་པོ་ཀུན་ནས་རྣམ་པར་བྲལ་དང་། ཀླུའི་རྒྱལ་པོ་ཆེན་པོ་རབ་ཏུ་དགའ་བས་ཆར་འབེབས་དང་། ཀླུའི་རྒྱལ་པོ་ཆེན་པོ་རྣམ་དག་རབ་དགའ་དང་། ཀླུའི་རྒྱལ་པོ་ཆེན་པོ་རབ་ཏུ་གཏོར་བ་དང་། ཀླུའི་རྒྱལ་པོ་ཆེན་པོ་གློག་འབར་དང་ཀླུའི་རྒྱལ་པོ་ཆེན་པོ་ས་སྲུངས་ཀྱི་བུ་དང་། ཀླུའི་རྒྱལ་པོ་ཆེན་པོ་ཆུ་འབེབས་སྣ་ཚོགས་དང་། ཀླུའི་རྒྱལ་པོ་ཆེན་པོ་བཏང་བཟུང་སྟོབས་དང་། ཀླུའི་རྒྱལ་པོ་ཆེན་འཇིག་རྟེན་གསུམ་དུ་རབ་ཏུ་ཆར་འབེབས་དང་། ཀླུའི་རྒྱལ་པོ་ཆེན་པོ་རྣམ་ཐོས་བུ་སྣ་ཚོགས་དང་། དེ་ལ་སོགས་པ་ཀླུའི་རྒྱལ་པོ་ཆེན་པོ་བརྒྱད་ཁྲི་བཞི་སྟོང་ཀླུའི་རྒྱལ་པོ་ཆེན་པོ་རེ་རེའང་གཡོག་འཁོར་ཀླུའི་རིགས་སྟོང་ཕྲག་བདུན་ཅུ་རྩ་བདུན་ཡོད་པ་དེ་དག་བཅོམ་ལྡན་འདས་ག་ལ་བ་དེར་སོང་ནས། བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ་མཆོད་པ་ཆེན་པོས་མཆོད་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་ཀྱིས་སྔགས་ཀྱི་ཚིག་ཤིན་ཏུ་མི་བཟད་པ་དྲག་པོ་ཆེན་པོ་ལྔ་དཀའ་བ་ཆེན་པོ་དག་བཀའ་སྩལ་པས། བཅོམ་ལྡན་འདས་བདག་ཅག་ནི་ཕུང་ངོ་།། ཚིག་གོ། ལུས་རབ་ཏུ་འདར་རོ།། སྤུ་ཟིང་ཞེས་བགྱིད་དོ།། བཅོམ་ལྡན་འདས་བདག་ཅག་བས་པར་བཅོམ་ལྡན་འདས་ཀྱི་སྤྱན་སྔ་ན་མངོན་སུམ་དུ་གྱུར་པར་གནས་པ་ལགས་ཏེ། འདི་ལྟར་འཇིགས་སྐྲག། བ་སྤུའི་བུ་ག་ནས་སྤྱི་བུང་ཞེས་བགྱིད་ཅིང་། འཇིགས་པ་མི་བཟད་པ་ཆེན་པོ་སྐྱེས་ཏེ། བས་པར་ཡང་སྒྱིད་ལུག་ཅིང་མཆིས་སོ། ། བཅོམ་འདས་སླད་མའི་ཚེ་སླད་མའི་དུས་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་སླད་ན་དགེ་སློང་དྲག་ཤུལ་བགྱིད་པ་ནོར་ལ་བརྐམ་པ་དག་མཆིས་པ་ལ། སད་དང་། རླུང་དང་། སེར་བ་བཟློག་པའི་སླད་དུ་གསོལ་བ་བཏབ་པར་གྱུར་ན། བཅོམ་ལྡན་འདས་དེ་ལ་ཀླུ་མི་འགྲུངས་པ་དེ་དག་གིས་ཇི་ལྟར་ནན་ཏན་དུ་བགྱི། དེ་དག་གི་སྲོག་སླར་ཞིང་ཇི་ལྟར་འགྱུར། བཅོམ་ལྡན་འདས་བདག་ཅག་གི་བུ་དང་ཚ་བོ་ཇི་ལྟ་བུ་མང་བར་འགྱུར། དེ་ནས་བཅོམ་ལྡན་འདས་ཀྱིས། ཀླུའི་བདག་པོ་ཆེན་པོ་དེ་དག་ལ་འདི་སྐད་ཅེས་བཀའ་སྩལ་ཏོ།། ཀླུའི་བདག་པོ་དག་ཕྱི་མའི་ཚེ་ཕྱི་མའི་དུས་ན་བྱམས་པ་ལ་གནས་པར་བྱའོ། ། དེ་བཞིན་གཤེགས་པའི་དམ་ཚིག་དང་མཐུན་པར་བྱའོ།། དུས་དུས་སུ་ཆར་གྱི་རྒྱུན་ཕོབ་ཅིག། དུས་དུས་སུ་མེ་ཏོག་དང་། འབྲས་བུ་དང་། ལོ་ཏོག་སྒྲུབས་ཤིག། རླུང་དང་། སྤྲིན་དང་། སེར་པ་ཐམས་ཅད་ཟློག་ཅིག། ཆུད་ཟ་བར་མ་བྱེད་ཅིག། ཀླུའི་བདག་པོ་དག་དེའི་ཕྱིར་ཁྱེད་ཕྱི་མའི་ཚེ་ཕྱི་མའི་དུས་ན་གནོད་པ་མེད་པར་གནས་པར་གྱིས་ཤིག། ཀླུའི་བདག་པོ་དག་གལ་ཏེ་ཡང་དག་པར་དམ་ཚིག་མ་བསྲུངས་ན་དེའི་ཕྱིར་ཀླུའི་བདག་པོ་དག་ཁྱེད་ལ་ཉེས་པ་ཆེན་པོར་འགྱུར་རོ་ཞེས་སྨྲའོ།། ཐོག་མར་ཀླུ་བསྐུལ་བའི་རིག་པ་རྫོགས་སོ། ། །། དེ་ནས་དེའི་འོག་ཏུ་རྩ་བའི་རིག་པའི་ཆོ་ག་ཀླུ་རྣམས་ཀྱི་ཁྲོས་པ་ཞི་བར་བྱེད་པ་ནམ་མཁའ་ལྡིང་འབར་བའི་གཟི་བརྗིད་ཀྱི་སྙིང་པོའི་དཀྱིལ་འཁོར་འདི་བརྗོད་པར་བྱའོ། ། ཐོག་མ་ཁོ་ནར་གནམ་དུ་བལྟས་ཏེ་ཡུངས་ཀཱར་དང་ཆུ་བསྲེས་པ་ཕྱོགས་བཞིར་གཏོར་ན། སད་དང་། རླུང་དང་། སྤྲིན་དང་། སེར་བ་ཐམས་ཅད་ཐུབ་པར་འགྱུར་རོ། ། བཅིངས་པར་འགྱུར་རོ།། ཀླུ་ཐམས་ཅད་འདར་ཡང་ཡོད་ཅིང་འཁོད་པར་འགྱུར་རོ།། ཐལ་བ་དང་ཆུར་བསྲེས་ལ་ལན་ཉི་ཤུ་རྩ་གཅིག་བཟླས་པ་བྱས་ཏེ་དབང་བསྐུར་ན་བདག་བསྲུང་བ་བྱས་པར་འགྱུར་རོ། ། འབྲུག་ཟེར་བའི་ཚེ་ཡུངས་ཀར་ལ་ལན་ཉི་ཤུ་རྩ་བདུན་ཡོངས་སུ་བཟླས་པ་བྱས་ལ། ཆུ་ལ་ལན་བདུད་དུ་ཡོངས་སུ་བཟླས་པ་བྱས་ཏེ་གནམ་ལ་སྤྲིན་བཅིང་བར་བྱའོ། ། དེ་ནས་སྤྲིན་ལ་བལྟས་ཏེ་ཡུངས་ཀར་གནམ་དུ་གཏོར་ན་མེ་ཏོག་དང་འབྲས་བུ་ཐམས་ཅད་བསྡུས་ནས་སའི་སྟེང་དུ་ལྷུང་ངོ་།། སྔགས་ཀྱང་བརྗོད་ཅིང་ཁྲོས་པས་ཕཊ་ཅེས་བྱ་བ་བརྗོད་པར་བྱ་སྟེ། ཕཊ་ཅེས་བྱ་བ་ལན་གསུམ་གྱིས་ཀླུ་ཕྲུག་གུ་རྣམས་ཀྱང་ལྷུང་བར་འགྱུར། ཀླུ་རྣམས་ཀྱི་ལུས་ཀྱང་ཞིག་སྟེ་ཐང་ལ་ལྷུང་བར་འགྱུར་རོ།། བལ་པོ་སེའུའི་ལྕུག་མ་ལ་ལན་ཉི་ཤུ་རྩ་གཅིག་ཡོངས་སུ་བཟླས་པ་བྱས་ཏེ་འཁོར་ལོའི་ཚུལ་དུ་ལན་བདུན་བསྐོར་ན། ཀླུ་མི་བགྲུངས་པ་ཐམས་ཅད་སད་དང་། སྤྲིན་དང་། རླུང་དང་། སེར་བ་ཐམས་ཅད་ས་ལ་མི་འབེབས་སོ། ། མགོ་ཚལ་པ་བདུན་དུ་འགས་སོ།། མི་འབྱུང་ངོ་།། ཁྲོས་པས་བརྒྱ་རྩ་བརྒྱད་ཡོངས་སུ་བཟླས་པ་བྱས་ན་ཀླུ་རྣམས་རིགས་དང་། སྤྲིན་དང་། གཡོག་འཁོར་ཀུན་དང་བཅས་ཏེ་སའི་སྟེང་དུ་ལྷུང་ངོ་། ། ཀླུའི་ཁྱིམ་དང་། གཞལ་ཡས་ཁང་མཐའ་དག་དང་། ཆུ་དང་། ཤིང་དང་། ནགས་ཚལ་དུ་བཅས་པ་མེ་ལྕེ་འབར་བ་གཅིག་ཏུ་འགྱུར་རོ།། ཀླུའི་རྒྱལ་པོ་ཆེན་པོ་གཟི་བརྗིད་ན་བ་མཐུ་ཆེ་བ་ཐམས་ཅད་ཀྱང་ཀླད་ནད་དྲག་པོས་བཏབ་པར་འགྱུར་རོ། ། གལ་ཏེ་རིག་པ་འཛིན་པས་མྱུར་དུ་མ་བསྐྱབས་ན་རིགས་ཐམས་ཅད་ཕུང་བར་འགྱུར་རོ།། བུ་དང་། ཚ་བོ་དང་། འཁོར་དུ་བཅས་པ་དང་། བཞོན་པར་བཅས་ཏེ་རྣམ་པར་མེད་པར་འགྱུར་རོ།། མིག་མེད་པར་འགྱུར་རོ།། ཆར་མེད་པའི་དུས་ན་ཡུངས་ཀར་ལ་ལན་སྟོང་བཟླས་ཏེ་ཁྱིམ་ལ་གཏོར་ན། ཀླུ་ཐམས་ཅད་འདར་ཡང་ཡོད་ཅིང་ཁྱིམ་དང་མཚོ་མེ་ལྕེ་འབར་བ་གཅིག་ཏུ་གྱུར་ཏེ། འདོད་པ་བཞིན་དུ་མྱུར་དུ་ཆར་གྱི་རྒྱུན་འབེབས་སོ།། ཡང་དང་ཡང་ཆར་གྱི་རྒྱུན་འབེབས་སོ།། གང་གི་ཚེ་ཆར་དགོས་པ་དེའི་ཚེ་རིག་པ་འཛིན་པས་ཆུ་དང་ཡུངས་ཀར་ལ་ལན་བརྒྱ་རྩ་བརྒྱད་ཡོངས་སུ་བཟླས་པ་བྱས་ཏེ་གནས་མཐོན་པོར་སོང་ལ། ཤར་ཕྱོགས་སུ་བལྟས་ཏེ་འདུག་ནས་ཆུ་སྙིམ་པ་བདུན་ལ་སྔགས་ལན་བདུན་བདུན་དུ་ཡོངས་སུ་བཟླས་ཏེ་ཤར་ཕྱོགས་སུ་གཏོར་ན། ཀླུའི་རྒྱལ་པོ་ཐམས་ཅད་འཕྲལ་དུ་གཅིག་ཏུ་འདུས་ཏེ་ཆར་གྱི་རྒྱུན་འབེབས་སོ།། སྐྱ་རེངས་ཤར་བའི་དུས་ན་ཡུངས་ཀར་དང་། གུར་ཀུམ་དང་། ཆུར་བསྲེས་ལ་ལན་བདུན་བཟླས་པ་བྱས་ཏེ་ཕྱོགས་བཞིར་གཏོར་ཞིང་། སྟེང་དང་འོག་ཏུའང་གཏོར་ན་སད་དང་། རླུང་དང་། སྤྲིན་དང་། སེར་བ་ཐམས་ཅད་ལ་ཀུན་ནས་དཔག་ཚད་ཚུན་ཆད་དུ་མཚམས་ཅད་པར་འགྱུར་རོ། ། ཀླུ་མི་བསྲུན་པ་ཐམས་ཅད་བཅིངས་པར་འགྱུར་རོ།། ཀླུ་ཐམས་ཅད་མི་གདའ་བར་འགྱུར་རོ།། བ་སེར་སྐྱའི་ལྕི་བ་ས་ལ་མ་ལྷུང་བར་བླངས་པ་དང་། དེ་ཉིད་ཀྱི་མར་དང་། འོ་མ་དང་གཅིན་བླངས་ལ་སབ་ཏ་བྱི་ས་ཀ་དང་། བག་ཕྱེ་དང་། ཐམས་ཅད་བསྲེས་ལ་ལན་དགུ་བཅུ་རྩ་གཉིས་བཟླས་པ་བྱས་ཏེ། དེ་ནས་ཀླུ་མགོ་ལྔ་པ་བྱའོ།། མགོ་གདངས་ཀ་ཅན་གྱི་སྐྱིལ་མོ་ཀྲུང་བཅས་པ་ལུས་བཅུས་པ་བྱས་ཏེ། ཙན་དན་དཀར་པོ་དང་གུར་ཀུམ་གྱིས་ལུས་བཀྲུ་བར་བྱའོ།། སྟན་གཙང་མའི་སྟེང་དུ་གཞག་གོ། དར་གྱི་ཅོད་པན་གྱིས་དབང་བསྐུར་རོ། ། མེ་ཏོག་གི་འཕྲེང་བ་གདགས་སོ།། དཀྱིལ་འཁོར་གྲུ་བཞི་པ་བྱས་ཏེ་མེ་ཏོག་སིལ་མ་གཏོར། བུམ་པ་གང་བ་བཞི་གཞག་གོ། མདའ་བཞི་བཙུགས་ཏེ་དར་གྱི་བ་དན་དཀར་པོ་བཞི་གདགས་སོ། ། དཀྱིལ་འཁོར་གྱི་དབུས་སུ་གཏོར་མ་གཞག་གོ། དཀྱིལ་འཁོར་གྲ་བཞིར་སེང་ལྡེང་ག་ཕུར་བུ་བཞི་གཟུགས་སོ།། ཚེན་སྣ་ལྔའི་སྐུད་པས་ལན་ལྔ་བསྐོར་རོ།། ཀུན་ལའང་ལན་ཉི་ཤུ་རྩ་གཅིག་བཟླས་ཏེ་ལས་བྱའོ། ། བུམ་པའི་མགུལ་དར་གྱིས་བཅིང་ངོ་།། ན་ལ་ད་དང་། སྲ་རྩི་པོག་དང་། རྒྱ་སྤོས་དང་། ཀུན་དུ་ར་དང་། སེན་མོ་དང་། ནཱ་ག་པུས་པ་དང་། ཡུངས་ཀར་དཀར་པོ་དང་། ཤ་ཀར་དང་བསྲེས་ལ་ལན་བརྒྱ་རྩ་བརྒྱད་བཟླས་ལ་བདུག་པར་བྱའོ།། བདུག་པ་འདི་སྦྱར་ལ། དེ་ནས་རིག་པ་འཛིན་པས་ཤིན་ཏུ་ཁྲུས་བྱས་ཏེ་གོས་གཙང་མ་གྱོན་ལ། སྔགས་འདི་ཉིད་ཀྱིས་ཉེ་རེག་དང་། བྲག་བཅིང་བ་དང་། མཚམས་བཅིང་བ་དང་། ཕྱོགས་བཅིང་བ་དང་། དཀྱིལ་འཁོར་བཅིང་བ་དང་། གོས་གདེག་པ་དང་། བདག་བསྲུང་བ་དང་། ཁྲུས་བྱ་བ་རྣམས་བྱའོ།། ཀླུ་ཁ་ཤར་ཕྱོགས་སུ་བསྟན་ཏེ་བཞག་ལ། རིག་པ་འཛིན་པ་ཀླུ་ལ་བལྟས་ཏེ་སྐྱིལ་མོ་ཀྲུང་དུ་འདུག་ལ། སྔགས་འདི་ཉིད་ཀྱིས་དགུག་པ་དང་། གཏོར་མ་དང་བདུག་པས་སླར་གཏང་བར་བྱའོ། ། དེ་ནས་རིག་པ་འཛིན་པས་སྟོང་རྩ་བརྒྱད་བརྒྱད་བཟླས་ཏེ། ཡུངས་ཀར་རེ་ར་ལ་བཟླས་ལ་ཀླུའི་གཟུགས་ལ་བསྣུན་པར་བྱའོ།། མར་མེ་ཁ་བཞི་ཕུང་ངོ་།། ཀླུའི་མིང་ཟའོ། ། གང་པོས་པ་དེ་འགྲེང་བར་འགྱུར་རོ།། བཟླས་པ་སྟོང་རྩ་བརྒྱད་ཚང་བར་བྱས་ན་ཀླུའི་རྒྱལ་པོ་ཆེན་པོ་ཐམས་ཅད་དབང་དུ་འགྱུར་རོ།། ཐམས་ཅད་སྟོང་པར་འགྱུར་རོ།། ཅི་བསམ་པ་དེ་ཐམས་ཅད་སྦྱིན་པར་འགྱུར་རོ། ། དབང་ཐམས་ཅད་ཟློག་པར་འགྱུར་རོ།། དབང་གི་སྐྱེ་བོ་དང་། འཁོར་དུ་བཅས་པ་དང་། བུ་དང་། ཚ་བོར་བཅས་པ་ཐམས་ཅད་དབང་དུ་འགྱུར་རོ།། ལས་ཐམས་ཅད་བྱེད་པར་འགྱུར་རོ། ། རང་གི་ཁྱིམ་བཞིན་དུ་ཡོངས་སུ་སྐྱོང་བར་འགྱུར་རོ།། ཀླུའི་གཟུགས་དེ་གནས་དབེན་པར་བཞག་ལ། མེ་ཏོག་དང་བདུག་པ་སྦྱིན་ནོ།། ལང་ལོང་མེད་པར་བཞག་ཅིང་མི་མཐོང་བར་བྱ་སྟེ། སུ་ལའང་མི་བསྟན་ནོ།། གོས་གཙང་མས་དགབ་པོ།། ནམ་དགོས་པ་ཡོད་པ་དེའི་ཚེ་ཡུངས་ཀར་ལ་ལན་བརྒྱ་རྩ་བརྒྱད་བཟླས་པ་བྱས་ཏེ་བསྣུན་ན་དགོས་པ་ཐམས་ཅད་བྱེད་པར་འགྱུར་རོ། ། གར་བཏབ་པ་དེར་འགྲོ་ཞིང་སླར་ཡང་འོང་ངོ་།། རྨི་ལམ་དུ་དགོས་པ་ཐམས་ཅད་སྟོན་ཅིང་ལས་ཐམས་ཅད་བྱེད་པར་འགྱུར་རོ།། ཀླུའི་མངག་གཞུག་པ་ཞེས་བྱའོ། ། གང་གི་ཚེ་དུས་མ་ཡིན་པའི་སྤྲིན་དང་། རླུང་དང་། སེར་བ་དང་། སད་བྱུང་བ་དེའི་ཚེ་སྐེ་ཚེའི་འབྲུ་དང་ཡུངས་ཀར་དུ་བསྲེས་ལ་ལན་བརྒྱ་རྩ་གཅིག་བཟླས་པ་བྱས་ཏེ།། ཁྲོས་པས་ཀླུའི་གཟུགས་ལ་བསྣུན་ན་སྐད་ཅིག་དེ་ལ་རླུང་དང་། སེར་བ་དང་། སྤྲིན་མེད་པར་འགྱུར་ཏེ། ཐམས་ཅད་བཅིང་བར་འགྱུར་རོ།། ཐན་པ་བྱུང་བ་དེའི་ཚེ་ཡི་གེར་བྲིས་ལ་སྐུད་པ་དམར་པོས་དཀྲིས་ལ་སྐུད་པ་ལ་མདུད་པ་ཉི་ཤུ་རྩ་གཅིག་བོར་ཏེ། ཀླུའི་མགུལ་དུ་བཏགས་ལ་ཀླུའི་སྤྱི་བོར་ལན་ཉི་ཤུ་རྩ་གཅིག་བཟླས་པ་བྱས་ན་སྐད་ཅིག་དེ་ལ་ཆར་གྱི་རྒྱུན་འབེབས་ཏེ། སྒྲུབ་པ་པོས་ཇི་ལྟར་འདོད་པ་བཞིན་ཆར་འབེབས་སོ།། ཧ་ཅང་ཆར་ཆེན་སྐུད་པ་སྔོན་པོ་ལ་ལན་བདུན་བཟླས་པ་བྱས་ཏེ་མདུད་པ་བདུན་བོར་ན་ཆར་ཆེན་པོ་མི་འབབ་པར་འགྱུར་རོ།། ཆོ་ག་དང་རིག་པ་སྒྲུབ་པ་གཞན་ཐམས་ཅད་ལའང་སྔགས་འདི་ཐོག་མ་ཁོ་ནར་ལན་བདུན་བརྗོད་དོ། ། འདི་ཀུན་ཏུ་སྦྱོར་བ་སྟེ། བརྗོད་པ་སྒྲུབ་པ་འགྲུབ་བོ།། ནམ་མཁའ་ལྡིང་ཆེན་པོ་རྡོ་རྗེ་ཤུགས་འབར་བ་ནམ་མཁ་ལྗོལྡོང་གི་སྙིང་པོ་དཀྱིལ་འཁོར་ཞེས་བྱ་བའི་གཟུངས་རྫོགས་སོ། ། ། དེ་ནས་དེའི་འོག་ཏུ་རྩ་བའི་སྙིང་པོའི་ཆོ་ག་བསྟན་ཏོ།། གཟུངས་བཏོན་མ་ཐག་པ་ཙམ་གྱིས་ཀླུ་ཐམས་ཅད་འདར་ཡེད་ཡོད་དོ། ། བལ་པོ་སེའུའི་ཤྲིང་ཀི་ལྕུག་མ་དང་། ཤིང་ཀ་ར་ཝཱི་རའི་ལྕུག་མས་རླུང་དང་སྤྲིན་བཟློག་པར་བྱའོ།། བའི་ལྕི་བ་ས་ལ་མ་ལྷུང་བས་ཁང་སྟེང་དུ་དཀྱིལ་འཁོར་གྲཝ་བཞི་པ་ཤིན་ཏུ་རྣམ་པར་ཕྱེ་བ་རེའུ་ཆ་ལེགས་པར་བྱས་ཏེ། སེང་ལྡེང་གི་ཕུར་བུ་སོར་བརྒྱད་པ་བརྒྱད་ཕྱོགས་མཚམས་སུ་གཟུགས་སོ།། མདའ་ལྔ་གཟུགས་སོ།། རྩེ་གསུམ་པ་གཟུགས་སོ།། མདའ་བཞི་ལ་ཚོན་སྣ་ལྔའི་སྐུད་པ་བཞིས་འཁོར་བར་བསྐོར་རོ། ། བུམ་པ་གང་བ་བཞི་དང་། བོག་པོར་དང་། གཏོར་མའི་བུམ་པ་བཞི་གཞག་གོ།། གཏོར་མ་དཀར་པོས་བཀང་བ་བཞི་དཀྱིལ་འཁོར་གྱི་དབུས་སུ་གཞག། མེ་ཏོག་སིལ་མས་གང་བར་གཏོར། པྲ་ཡོས་དང་ཡུངས་ཀར་གྱིས་གཏོར་རོ།། ཐམས་ཅད་ལ་ལན་བདུན་བདུན་གྱི་བཟླས་པ་བྱས་ཏེ་གཟུགས་སོ།། ཡུངས་ཀར་དང་ཆུ་བསྲེས་ལ་བཟླས་པ་བྱས་པས་ཕྱོགས་བཞིར་མཚམས་གཅད་དོ། ། དེ་ནས་དཔག་ཚད་ཚུན་ཆད་ཀུན་ཏུ་མཚམས་ཆེན་པོ་བཅད་པར་འགྱུར་རོ།། དེར་ཀླུ་མི་བསྲུན་པ་རྣམས་འཕྲོག་མི་ནུས་སོ།། ཀླུ་ཆེན་པོ་རྣམས་ཀྱང་རྟག་ཏུ་དུས་མ་ཡིན་པའི་རླུང་དང་། སྤྲིན་དང་། སེར་བ་འབེབས་མི་ནུས་སོ།། མེ་ཏོག་དང་འབྲས་བུ་ཐམས་ཅད་ལ་འཚེའང་མི་ནུས། ལན་འགའ་ཡང་རྩའི་ལོ་མ་ལའང་འཚེ་མི་ནུས། བཅིང་བལྔས་བསྡམས་ཏེ་ཐམས་ཅད་བཅིངས་པར་འགྱུར་རོ། ། འདི་ཟླ་བ་བརྒྱད་དུ་མཚམས་བཅིངས་པར་འགྱུར། གནོད་སྦྱིན་དང་། འབྱུང་པོ་དང་། སྲིན་པོ་དང་། ཡི་དགས་དང་། གྲུལ་བུམ་དང་། གསང་བ་པ་དེ་རྣམས་གནས་འདི་ལས་མི་འདའ་འོ།། དེ་ནས་རིག་པ་འཛིན་པ་དཀྱིལ་འཁོར་གྱི་དབུས་སུ་འདུག་སྟེ། བལ་པོ་སེའུའི་ཤིང་གི་ལྕུག་མ་ལ་ལན་བདུན་བཟླས་པས་ཀླུ་བཟློག་པར་བྱའོ། ། ཤིན་ཏུ་ཁྲོས་པས་བཟློག་པར་བྱ་བ་ནི་མ་ཡིན་ནོ།། ཀླུའི་སྐྱིལ་མོ་ཀྲུང་གི་ཕྱག་རྒྱ་བཅིང་བར་བྱ་སྟེ། མཛུབ་མོ་གཉིས་མགོ་བོ་གདེངས་ཀ་ལྟར་བྱས་ལ་མཐེའུ་ཆུང་གཉིས་བརྐྱང་ངོ་།། འདི་ནི་ཀླུ་ཐམས་ཅད་ཀྱི་ཕྱག་རྒྱའོ།། བརྗོང་མ་ཐག་ཙམ་གྱིས་ཀླུ་ཐམས་ཅད་ཀྱི་སྙིང་དག་ལ་གནོད་པར་འགྱུར་རོ།། གལ་ཏེ་ཀླུ་དག་ཕྱོགས་དེ་མ་རུངས་པར་བྱ་བར་འདོད་ན་དེའི་ཚེ་བྱེ་ཚན་མགོ་ལ་འབབ་བོ། ། མགོ་དང་། མཇུག་མ་དང་། ཁོག་པ་ཇི་ཙམ་པ་དེ་ཙམ་དུ་ལུས་ལ་རལ་གྲིའི་ཆར་གྱི་རྒྱུན་འབབ་པར་འགྱུར་རོ།། དེ་ནས་ཀླུ་ཐམས་ཅད་སྤངས་སྐྲག་པར་གནས་པར་འགྱུར་དེའི་ཚེ་འཛམ་བུའི་གླིང་དུ་དུས་དུས་སུ་ཆར་གྱི་རྒྱུན་འབེབས་སོ། ། གྲུ་མི་བསྲུངས་པ་ཐམས་ཅད་དབང་དུ་འགྱུར་རོ།། ཁང་སྟེང་དུ་དཀྱིལ་འཁོར་གྲུ་བཞི་པ་བྱས་ཏེ། མེ་ཏོག་སིལ་མས་གང་བར་གཏོར་ལ་བདུག་པས་བདུགས་ཏེ། བུམ་པ་ཆུས་གང་བ་ཐམས་ཅད་ལ་ལན་བདུན་དུ་བཟླས་པར་བྱའོ།། གཏོར་མ་གཞག་གོ། སེང་ལྡེང་གི་པུར་བུ་ལ་ལན་ཉི་ཤུ་རྩ་གཅིག་བཟླས་ཏེ། སེང་ལྡེང་གི་ཕུར་བུ་དཀྱིལ་འཁོར་གྱི་དབུས་སུ་བཙུགས་ན་རླུང་དང་། སྤྲིན་དང་། སེར་བ་དང་། སད་ཀྱི་ཉེས་པ་ཐམས་ཅད་བཅིངས་པར་འགྱུར་ཏེ། ཕུར་བུ་མ་ཕྱུང་གི་བར་དུ་ཐུབ་པར་འགྱུར་རོ།། ཡུངས་ཀར་ལ་ལན་བདུན་བཟླས་ལ་སྤྲིན་ལ་བལྟས་ཏེ་གཏོར་ན་སེར་བ་ཐམས་ཅད་འཆད་པར་འགྱུར་རོ། ། ཤིང་ཀ་ར་ཝཱི་རའི་ལྕུག་མ་ལ་ལན་ཉི་ཤུ་རྩ་གཅིག་བཟླས་ཏེ་གདུ་བུར་བྱས་ན་ཐམས་ཅད་དུ་སེར་བ་ཆོད་པར་འགྱུར་རོ། ། ཤིང་ཀ་ར་ཝཱི་ར་དམར་པོའི་མེ་ཏོག་ལ་ལན་ཉི་ཤུ་རྩ་གཅིག་བཟླས་ཏེ། གློག་འབྱུང་བའི་ཚེ་ན་ནམ་མཁའ་ལ་འཕངས་ན་ནམ་མཁའ་ཉིད་དུ་འདུག་སྟེ་བཅིངས་པར་འགྱུར་རོ།། ཆུ་ལ་ལན་བདུན་བཟླས་ཏེ་གཏོར་ན་གྲོལ་བར་འགྱུར་རོ།། འབྲུག་ཟེར་བའི་ཚེ་རྩེ་གསུམ་པ་ལ་ལན་ཉི་ཤུ་རྩ་གཅིག་བཟླས་ཏེ། དཀྱིལ་འཁོར་གྱི་དབུས་སུ་བཙུགས་ན་རྩེ་གསུམ་པ་མ་ཕྱུང་གི་བར་དུ་འབྲུག་ཟེར་ཏེ་སྤྲིན་བཅིངས་པར་འགྱུར་རོ། ། ཕྱུང་ནས་གྲོལ་བར་འགྱུར་རོ།། རལ་གྲི་ལ་ལན་བདུན་བཟླས་ཏེ། ཀླུའི་ཕྱག་རྒྱ་སྐྱིལ་མོ་ཀྲུང་གིས་བཟུང་ལ་སྤྲིན་ལ་བལྟས་ཏེ་འདུག་ན་བཟུང་མ་ཐག་ཏུ་ཀླུ་མཐའ་དག་འབར་བར་འགྱུར་ཏེ། ཀླུ་ཐམས་ཅད་ལྐུགས་པར་འགྱུར་རོ།། རལ་གྲི་ཐོགས་ལ་ལན་བརྒྱ་རྩ་བརྒྱད་བཟླས་ཏེ། གུར་ཀུམ་གྱིས་དེའི་སྟེང་དུ་ནམ་མཁའ་ལྡིང་བྲིས་ནས་ཇི་ལྟ་ཇི་ལྟ་བུར་བསྐོར་བ་ད་ལྟ་དེ་ལྟ་བུར་ནམ་མཁའ་ལྡིང་གི་འདབ་གཤོག་ཀླུའི་ལུས་ལ་འབབ་པར་འགྱུར་ཏེ། ཀླུ་ཐམས་ཅད་སྐྲག་ཅིང་ཕྱོགས་བཅུར་འབྲོས་པར་འགྱུར་ཏེ། ཕྱིས་རླུང་དང་སར་པ་འབེབས་མི་ནུས་སོ། ། ཤིང་ཀ་ར་ཝཱི་རའི་མེ་ཏོག་དང་ཡུངས་ཀར་བསྲེས་ཏེ། དཀྱིལ་འཁོར་དུ་ལན་དྲུག་ཅུ་སྦྱིན་སྲེག་བྱས་ན་ཀླུ་ཐམས་ཅད་གྲང་བའི་སྟོབས་བྱེད་པ་དང་། སེར་བ་དང་ཁ་བའི་བར་ལ་སོགས་པ་ཐུར་པར་འགྱུར་རོ། ། གང་གི་ཚེ་ཆར་དགོས་པར་འགྱུར་པ་དེའི་ཚེ་ཆར་འབེབས་སོ།། སྤྲ་ཚོལ་ལས་ཀླུའི་གཟུགས་ཚད་སོར་བཞི་པ་མགོ་ལྔ་པ་བྱས་ཏེ། གསེར་གྱིས་གཡོགས་ལ་སྟེང་གོས་དཀར་པོས་གཡོག་ཏེ། རྩ་བའི་སྔགས་ལན་སྡོང་བཟླས་པ་བྱས་ལ། བུམ་པ་གསར་པ་མ་སྤྱད་པའི་ནང་དུ་བཅུག་སྟེ་ལུས་གོས་ཀྱིས་དཀྲིའོ།། རྒྱས་གདབ་བོ།། བའི་ལྕི་བས་དཀྱིལ་འཁོར་གྲཝ་བཞི་པ་བྱས་ལ་ཐ་ཡོས་དང་ཡུངས་ཀར་གྱིས་གཏོར་ལ་འདུག་པས་བདུག་སྟེ། སྔགས་འདི་བརྗོད་པར་བྱའོ།། བལ་པོ་སེའུའི་ཤིང་གི་ལྕུག་མ་ལ་ལན་བདུན་བཟླས་ཏེ། བུམ་པ་ལ་དལ་བུ་དལ་བུས་གཞུས་ན་སེར་བ་ཐམས་ཅད་བུམ་པའི་ནང་དུ་འཕོའོ། ། ཀླུ་ཐམས་ཅད་དབང་དུ་འགྱུར་རོ།། ཀླུའི་རྒྱལ་པོའི་གཟུགས་སྤྲ་ཚིལ་ལ་བྱས་པ་ལ་ཀླུ་ཐམས་ཅད་ཀྱི་མིང་བྲིས་ན་གང་གི་མིང་གིས་རིགས་བརྗོད་པས་ཀླུ་དེ་དབང་དུ་འགྱུར་ཏེ། འཁོར་དང་བཅས་པ་བྲམ་ཟེའི་གཟུགས་ཀྱིས་མདུན་ན་འདུག་ཅིང་ཅི་བསྒོ་བ་དེ་ཐམས་ཅད་བྱེད་དོ།། ཀླུའི་རྒྱལ་པོ་ཆོས་ཅན་མ་ཡིན་པ། ཡུལ་ཡོངས་སུ་མི་སྐྱོང་བ། ལེ་ཏོག་དང་འབྲས་བུ་ཆུད་གཟོན་པའི་ཀླུའི་ཁྱིམ་དུ་སོང་སྟེ། ཤིན་ཏུ་ཁྲུས་བྱས་ལ་གོས་དཀར་པོ་གཙང་མ་བགོས་ཏེ་རིག་པ་ལན་ཉི་ཤུ་རྩ་གཅིག་བརྗོད་ན། ཀླུའི་ཁྱིམ་དེ་ནས་བུད་མེད་རྒན་མོ་དག་འབྱུང་ཞིང་། རིག་པ་འཛིན་པ་ཅི་ཚོལ་ཞེས་ཟེར་བ་དང་། ལན་མ་གདབ་པར་རྡོ་རྗེས་ལ་བརྡབ་པར་བྱའོ།། ཕཊ་ཅེས་བྱ་བ་བརྗོད་པར་བྱའོ།། ཀླུ་རྒན་མོ་དེ་ངུས་ནས་ཤིའོ་ཤིའོ་ཞེས་ཟེར་ཞིང་ཁྱིམ་དུ་འཇུག་གོ། ། དེ་ནས་ཀླུ་རྣམས་འདུས་ཏེ་དང་ངས་སྐྲག་སྟེ། ཁྱེའུའི་གཟུགས་སུ་བསྒྱུར་ནས་རིག་པ་འཛིན་པའི་མདུན་དུ་འདུག་སྟེ། ཀྱེ་རིག་པ་འཛིན་པ་ཅི་ཞིག་ཚོལ། རིག་པ་འཛིན་བས་སྔར་སྔགས་བརྗོད་ལ། ཁྲོས་པས་བལ་པོ་སེའུའི་ཤིང་གི་ལྕུག་མ་ས་ལ་བརྡབས་པ་དང་། ཁྱེའུའི་གཟུགས་ཅན་དེ་ས་ལ་འགྲེ་ལྡོག་ཅིང་། ཀྱེ་རིག་པ་འཛིན་པ་ཅི་ཞིག་ཚོལ་ཞེས་སྨྲའོ།། རིག་པ་འཛིན་པས་སྙིང་རྗེ་མེད་པར་བྱ་སྟེ། བསྒྱེལ་བའི་ཚུལ་བསྒྱེལ་བ་དང་། འདི་སྐད་ཅེས་ཀྱི་རིག་པ་འཛིན་པ་བསྒོ་བ་ཐམས་ཅད་གྱིད་དོ།། སྨྲའོ།། དེ་ནས་རིག་པ་འཛིན་པས་འདི་སྐད་ཅེས་བརྗོད་དོ། ། དེ་བཞིན་གཤེགས་པའི་དམ་ཚིག་སྲུངས་ཤིག། སྲུང་ངོ་།། རིག་པ་འཛིན་པས་ཡང་འདི་སྐད་ཅེས་བརྗོད་དོ།། དགེ་བ་བཅུ་ཟུང་ཞིག། འཛིན་ཏོ།། རིག་པ་འཛིན་པས་ཡང་གསུམ་ལ་སྐྱབས་སུ་གསོལ། བཏང་ངོ་།། རྗེས་སུ་འཛིན་ཏོ།། རིག་པ་འཛིན་པ་ཕུར་བུ་དབྱུང་དུ་གསོལ། མི་དབྱུང་ངོ་།། འདི་སྐད་ཅེས་བརྗོད་དེ། དེ་བཞིན་གཤེགས་པའི་དམ་ཚིག་བཟླས་པ་རྗེས་སུ་ཟུང་ཞིག། གདོད་ཕུར་བུ་དབྱུང་ངོ་ཞེས་བྱའོ།། འོན་ཀྱང་ཀླུ་དེ་འཁོར་དང་བཅས་ཏེ་གཉིས་ལ་གཏུག་གོ། གསུམ་ལ་སྐྱབས་སུ་འགྲོ་བར་བྱ་བ་དང་། དགེ་བ་བཅུའི་ལས་ཀྱི་ལམ་རྗེས་སུ་སྦྱིན་པར་བྱའོ། ། དམ་ཚིག་རྗེས་སུ་འཛིན་དུ་གཞུག་གོ།། དེ་ནས་གདོད་ཕུར་བུ་ཕྱུང་ལ་དེ་ཉིད་དུ་ཁ་ཟས་ཀྱང་བྱིན་དང་ཀླུ་ཐམས་ཅད་དབང་དུ་འགྱུར་རོ།། རང་གི་ཁྱིམ་དུ་འཇུག་པ་བཞིན་དུ་ཞུག་ཤིང་ལས་སུ་བྱ། བ་རྣམས་ཅི་འདོད་པ་བཞིན་དུ་བྱ་བ་ཐམས་ཅད་བསྒོ་བ་བཞིན་དུ་བྱེད་པར་འགྱུར་རོ།། གང་དུ་བཏང་བ་དེར་འགྲོའོ།། བྱ་བ་ཐམས་ཅད་བྱེད་པར་འགྱུར་རོ།། ཀླུའི་ཁྱིམ་དེར་ཕྱིས་ཀླུ་མི་བསྲུན་པ་མི་འབྱུང་ངོ་། ། དུས་དུས་སུ་ཆར་གྱི་རྒྱུན་འབེབས་སོ།། དུས་དུས་སུ་ལོ་ཏོག་སྒྲུབ་བོ།། དེར་མེ་ཏོག་དང་། འབྲས་བུ་དང་། ལོ་མ་རྣམས་སྒྲུབ་བོ།། ཕྱིས་གནོད་པ་བྱེད་པར་མི་འགྱུར་རོ།། བཀླགས་པས་འགྲུབ་པའི་གཟུངས་ཆེན་པོ་ལས་ཐམས་ཅད་ལ་སྦྱར་བར་བྱའོ།། ལས་ཐམས་ཅད་འགྲུབ། མཆོག་འགྲུབ་པ། བླ་ན་མེད་པའོ།། རྩ་བའི་སྔགས་ཀྱི་བྱ་བའི། ཆོ་ག་དང་བཅས་པ་རྫོགས་སོ།། ། དེ་ནས་ནམ་མཁའ་ལྡལྡིང་གཽ་རྒྱལ་པོ་དེས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གིས་ཀླུ་ཐམས་ཅད་ཀྱི་སྙིང་འབར་བར་བགྱིད་པ། དུས་མ་ལགས་པའི་རླུང་དང་། སྤྲིན་དང་། སེར་བ་ཐམས་ཅད་ཟློག་པ། མེ་ཏོག་དང་། འབྲས་བུ་དང་། ལོ་ཏོག་ཐམས་ཅད་སྒྲུབ་པ། སའི་རྡུལ་དང་། སྙིང་པོ་དང་། བྱིན་འཕེལ་བར་བགྱིད་པ། རྡོ་རྗེའི་མཆུ་གློག་འབར་བ་ཞེས་བྱ་བའི་གཟུངས་བརྗོད་པར་བགྱི་ན། སེམས་ཅན་ཐམས་ཅད་ཀྱི་རེ་བ་ཐམས་ཅད་ཡོངས་སུ་བསྐང་བའི་སླད་དུ། བཅོམ་ལྡན་འདས་དེ་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས། ནམ་མཁའ་ལྡིང་གི་དབང་པོ་ལ་འདི་སྐད་ཅེས་བཀའ་སྩལ་ཏོ། ། ནམ་མཁའ་ལྡིང་གི་བདག་པོ་རྡོ་རྗེ་མཆུ་ཞེས་བྱ་བའི་གཟུངས་བྱིན་གྱིས་བརླབས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་དག་གིས་ཀྱང་བྱིན་གྱིས་བརླབས་ཀྱིས། ནམ་མཁའ་ལྡིང་གི་བདག་པོ་ཀླུ་མི་བསྲུན་པ་རྣམས་ཚར་གཅད་པའི་ཕྱིར་སྤྲོས་ཤིག། དེ་ནས་ནམ་མཁའ་ལྡིང་གི་བདག་པོས་རྡོ་རྗེ་མཆུ་ཞེས་བྱ་བའི་གཟུངས་འདི་སྨྲས་སོ། ། ན་མོ་རཏྣ་ཏྲ་ཡཱ་ཡ། ན་མ་ཤྲུཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མ་སྟྲཻ་ལོ་ཀྱ་ཨ་དྷི་པ་ཏ་ཡེ། ན་མཿཙ་ཏུར་ན་མོ་མ་ཧཱ་རཱ་ཛཱ་ནཱན། ཨོཾ་བཛ་དུནྟེ་དུནྟེ། མ་ཧཱ་དུནྟ། དུ་ཏི་དུ་ཏི། བཛྲ་ཤི་ཁརྡནྟེ། མ་ཎི་ཀ་ན་ཀ་བི་ཙི་ཏ། ཨཱ་བ་ར་ཎ་བི་བྷུ་ཥེ་ཏ་ཤ་རཱི་རེ། ཧཱུཾ་ཧཱུཾ་ཧཱུ་ཙཱུ་ཧཱུཾ། ཕ་ཕཊ་ཕཊ་ཕཊ་ཕཊ། ནཱ་ག་རཱ་ཛ་བི་དྲཱ་པ་ཎི་ཧྲི་ད་ཡཾ། སྥོཊ་ཡ་བཛྲ་དུནྟ་ན། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཛྭ་ལི་ཏ་བཛྲ་དུདྷེ་ན། ཧ་ན་ཧ་ན། ག་རུ་ཌ་བཀྵ་ནི་པ་ཏེ་ན་བྷ་སྨིཾ་ཀུ་རུ་ཀུ་རུ་ཀུ་རུ་ཀུ་རུ་ཀུ་རུ། དུཥྚན་ནཱ་གཱ་ནན། ཧཱུཾ་ཧཱུཾ་ཙཱུ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ། བྷོ་བྷོ་པནྡྷ་གེཌྜྷྱ་སྥུསྤུ་ཏ་སྤ་ཏ་སྥུ་ཏ་དན་དུ་ནཱ་ག་སྨ་ཤཱ་ནི་ཀྲོ་དྷ་རཱ་ཛ་མ་ཧཱ་བ་ལ་པ་རཱ་ཀྲ་མ། ཛཱ་ལ་ཛྭ་ལ། པྲ་ཛྭ་ལ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ། བྷོ་ག་རུ་ཌ་རཱ་ཛ་བ་བཛྲ་དུནྟེ། སུ་བརྞ་པཀྵ་མ་ཧཱ་བ་ལ། མ་ཧཱ་ཀ་ནཾ། ཀ་བི་ཙི་ཏྲི་མ་ཧཱུཾ་ད་ར། བཀྵ་ཡ་དུཥྚ་ནཱ་གན་བི་བ་དུ་བྷོ་བཱ་ཡུ་བ་ལ་ཀན་ཧཱུ་ཧཱུཾ། ཕཊ་ཕཊ། ཤོ་ཥ་ཡ་ཤཱི་ཏ་བ་ལ་ཧ་ག་ག་རུ་ཌ་ཨུཥྤེ་ཎ། ཧུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། བྷོ་བྷོ་བཛྲ་དུནྟ་བི་ཙུ་ཧཱུ་ན། བི་དུ་ཛྭ་ལ་ན། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། བཉྫ་ཡ། སརྦ་ཤ་རི་ནི་མཱ་ཏི་ཀྲ་མ་སི་མན། བྷོ་པ་མ་ནཱ་གེན་དྲ་མཱ་ཏེ། བཛྲ་དུནྟེ་ནེ་མཱུར་ནཱམ?། སཱ་ཏ་ཡཱ་མི། ཧ་ར་ཧ་ར། པྲ་ཧ་ར་ཧཱུཾ་ཕཊ། མ་ཏ་མ་ཏ། སརྦ་ནཱ་གཱ་ནཱན། ཧཱུཾ་ཧཱུཾ་ཕཊ། ཏ་ཐཱ་ག་ཏ་བ་ཙན་མ་ནུ་སྥ་ར་ཙུ་ཧཱུ~ཾ་ཕཊ། བཛྲ་པཱ་ཙ་ས་མ་ཡ། མ་ནུ་པཱ་ལ་ཡ། ཧཱུཾ་ཧཱུཾ་ཕཊ། ཏྲཻ་ལོ་ཀྱ་ཨ་དྷི་པ་ཏེར་བ་ཙ་ན་མ་ནུ་པཱ་ལ་ཡ། ཧཱུཾ་ཧཱུཾ་ཕཊ། ས་ར་ས་ར། སཱ་ར་སྭ་ར། ས་མ་ཡ། མ་ནུ་པཱ་ལ་ཡ། ཏྲི་རཏྣ་ས་ཏྱེ་ན། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། ཧྲིཿབཛྲ་དུནྟ་སརྦ་ནཱ་ག་བི་དྲ་ན་ཀ་ར་ཧཱུཾ་ཧཱུཾ་ཧཱུཾ། ཕཊ་སྭཱ་ཧཱ། ཏྲི་རཏྣ་མ་ནུ་པཱ་ལ་ཡ་ཧཱུཾ་ཧཱུཾ་ཧཱུཾ་ཕཊ། པྲ་མ་དན་ཏ་ཧ་ད་ས་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། བི་ནི་ཙ་ཀྲ་ཧ་ཏ། ཧཱུཾ་ཧུཾ་ཧཱུཾ་ཕཊ་སྭཱཧཱ། མ་ཧེ་ཤ་ར་ཏྲི་ཤཱུ་ལ་ཧ་སྟཱ་ཡ་ཧུཾ་ཧཱུཾ་ཧཱུཾ་ཕཊ་སྭཱ་ཧཱ། ག་རུ་ཌ་ཏེ་ཛ་ཧསྟཱ་ཡ་ཧཱུཾ་ཧཱུཾ་ཕཊ་སྭཱ་ཧཱ། ག་རུ་ཌ་བི་ཀྲ་མཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ནཱ་ག་ཀུ་ལ་ན་ཤ་ནཱ་ཡ་ཧུཾ་ཧཱུཾ་ཕཊ་སྭཱ་ཧཱ། ཀ་རུ་ཌ་སརྦ་ཨཱ་ཤཱ་ནི་བ་པ་ནཱ་ཡ་ཧཱུཾ་ཧཱུཾ་ཕཊ་སྭཱ་ཧཱ། སརྦ་པཱ་པ་པཱ་ཡུ་ས~ཾ་བྷཀྵ་ཎཱ་ཡ་ཧཱུཾ་ཧཱུཾ་ཕཊ་སྭཱ་ཧཱ། སརྦ་ཨ་ཀཱ་ལ་བཱ་ཏ་མེ་གྷ་ཨཱ་ཤྭ་ནཻ་བ་ར་ཎ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། མ་ཧཱ་བཛྲ་ཛྭ་ལ་སྭཱ་ཧཱ། སརྦ་དུཥྚན་ནཱ་ག་བི་ནཱ་ཤ་ཀཱ་ཡ་སྭཱ་ཧཱ། ག་རུ་ཌ་ཧྲི་ད་ཡ་སྭཱ་ཧཱ། ག་རུ་ཌ་དུནྟ་ཡ་སྭཱ་ཧཱ། སརྦ་ནཱ་ཤ་ནཱ་ཡ་སྭཱ་ཧཱ། ཨོཾ་དུ་རུ་དུ་རུ་སྭཱ་ཧཱ། མུ་རུ་མུ་རུ་སྭཱ་ཧཱ། ཏུ་རུ་ཏུ་རུ་སྭཱ་ཧཱ། དི་རི་རི་ར། དུ་རུ་རུ་རུ་རུ་རུ་རུ་རུ་རུ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ་ཕཊ་སྭཱ་ཧཱ། ནམ་མཁའ་ལྡིང་གི་དབང་པོས་རྡོ་རྗེ་མཆུའི་གཟུངས་འདི་བརྗོད་མ་ཐག་ཏུ་ཀླུའི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ཁས་བུབ་ཏུ་འགྱེལ་ནས་ལུས་རྡུལ་བྱུང་ཞིང་ལུས་རབ་ཏུ་འདར་ཏེ་བརྒྱལ་ནས་ས་ལ་འགྲེ་ལྡོག་གོ། ། ཀྱེ་མའོ་གཟུངས་ཆེན་པོ་སྔགས་ཀྱི་ཚིག་མི་བཟད་པ་དག་སྤྲས་སོ་ཞེས་འཛར་ཞིང་། ཐམས་ཅད་ལུས་འདར་ཡང་ཡེང་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། འདི་སྐད་ཅེས་གསལ་ཏོ།། བཅོམ་ལྡན་འདས་བསྐྱབ་ཏུ་གསོལ།། བདེ་བར་གཤེགས་པ་བསྐྱབ་ཏུ་གསལ། བཅོམ་ལྡན་འདས་བདག་ཅག་སྲན་ཆད་འཛམ་བུའི་གླིང་དུ་མ་རུངས་པར་མི་བགྱིད་དོ།། མེ་ཏོག་དང་། འབྲས་བུ་དང་། ལོ་ཏོག་མ་རུངས་པར་མི་བགྱིད་དོ།། བཅོམ་ལྡན་འདས་ས་ཕྱོགས་འདི་མཆོད་རྟེན་དང་འདྲ་བར་འཛིན་ཏེ། གང་ན་ཆོ་གའི་རྒྱལ་པོ་ཆེན་པོ་འདི་སྤྱོད་པ་དང་། གང་ན་གནས་པས་སྤྱོད་པ་དེར་བཅོམ་ལྡན་འདས་བདག་ཅག་གིས་རྒྱུན་དུ་དེ་བཞིན་གཤེགས་པའི་མཆོད་རྟེན་དང་འདྲ་བར་འཛིན་ཏོ། ། ཡུལ་ལམ། གྲོང་ཁྱེར་རམ། ལྗོངས་སམ། རི་བྲག་གམ། གྲོང་ངམ། གཙུག་ལག་ཁང་དེ་རྟག་པར་རྒྱུན་དུ་བསྲུང་བ་དང་། བསྐྱོང་བ་དང་། སྦ་བར་བགྱིའོ།། སད་དང་། རླུང་དང་། སེར་བ་དང་། དུས་མ་ལགས་པའི་སྤྲིན་ཐམས་ཅད་སྣུམ་པ་དང་། མངར་བ་དང་། ཡིད་དུ་འོང་བ་དང་། རོ་ཞིམ་པ་དང་། སྟ་བེ་དང་། རོ་བྲོ་བའི་མེ་ཏོག་དང་། འབྲས་བུ་དང་། ལོ་ཏོག་ཐམས་ཅད་བསྒྲུབ་པར་བགྱིའོ།། འཐབ་པ་དང་། སྡིག་པ་ཐམས་ཅད་བྱང་བ་དང་། ལྟས་ངན་པ་ཐམས་ཅད་བསལ་བར་བགྱིའོ།། དུས་དུས་སུ་ཆར་གྱི་རྒྱུད་དབབ་པར་བགྱིའོ།། མེ་ཏོག་དང་། འབྲས་བུ་དང་། ལོ་ཏོག་རྣམས་ཡང་དག་པར་འགྲུབ་པར་བགྱི། ཤ་སྦྲང་དང་སྦྲང་བུ་མཆུ་རིངས་དང་། བྱི་བ་དང་། སྦྲུལ་དང་། སྦལ་བ་དང་། ཏྲེ་མ་བུ་ག་དང་། མ་ཀྵི་ཀ་དང་། ཏྲཻ་ལ་ཏ་དང་། ཤཏ་པ་དང་། བུང་བ་དང་། ནེ་ཙེ་དང་། རི་སྐེགས་ཀྱི་འཇིགས་པ་ཐམས་ཅད་མེད་པར་བགྱི། རྣམ་པར་འཇིག་པར་བགྱི། ཡམས་ཀྱི་ནད་དང་འགོ་བ་ཐམས་ཅད་རབ་ཏུ་ཞི་བར་བགྱིའོ།། བཟློག་པར་བགྱིའོ།། བཅོམ་ལྡན་འདས་སླན་ཆད་སྡིག་པའི་ལས་ཀུན་ཏུ་སྤྱོང་བའི་ཚུལ་མི་སྤོང་པར་ཆར་གནོད་པར་འབབ་པ་དང་། དུས་མ་ལགས་པའི་ཆར་ཐམས་ཅད་མ་མཆིས་པར་བགྱིའོ།། བཅོམ་ལྡན་འདས་རང་གི་གནའི་ཡི་དམ་གྱིས་གནས་པར་བགྱིའོ།། བཅོམ་ལྡན་འདས་དཀོན་མཆོག་གསུམ་གྱི་དགོངས་པ་བསླབ་པའི་སྡོམ་པ་ཡོངས་སུ་བསྐྱང་བར་བགྱིའོ། ། བཅོམ་ལྡན་འདས་སླན་ཆད་འཛམ་བུའི་གླིང་གི་སེམས་ཅན་རྣམས་ལ་འཚེ་བར་མི་བགྱིད། བུ་གཅིག་པ་བཞིན་དུ་ཡོངས་སུ་བསྐྱང་བར་བགྱིའོ། ། བཅོམ་ལྡན་འདས་དེ་བཞིན་གཤེགས་པའི་བཀའ་ལུང་བཞིན་དུ་སླད་མའི་ཚེ་སླད་མའི་དུས་ན་སེམས་ཅན་ཐམས་ཅད་ཡོངས་སུ་བསྐྱང་བར་བགྱིའོ།། ཀུན་ཏུ་འཛིན་པར་བགྱིའོ།། དགེ་བ་དང་། བདེ་བ་དང་། ལོ་ལེགས་པར་ཀུན་ཏུ་བསྒྲུབ་པར་བགྱིའོ།། དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་ལ་དབུགས་ཕྱུང་ནས་འདི་སྐད་ཅེས་བཀའ་སྩལ་ཏོ། ། ཀླུའི་རྒྱལ་པོ་དག་དེ་ལྟར་གྱིས་ཤིག། ཡལ་པར་མ་གཏང་ཞིག། དེ་ནས་དེའི་འོག་ཏུ་ཆོག་བྱ་བ་བརྗོད་པར་བྱ་སྟེ། སྔགས་འདི་དཔའ་བ་གཅིག་པུ་ནི།། ལས་ཀུན་བྱེད་པ་དགེ་བ་སྟེ། ། ཤེས་རབ་ཅན་གྱིས་ལན་ཅིག་དྲན།། དགོས་པ་ཐམས་ཅད་བྱེད་པར་འགྱུར།། མཐོན་པོའི་གནས་སུ་མཁས་པ་ཡིས།། སྒྲ་སྐད་ཆེན་པོ་བརྗོད་པར་བྱ།། གནས་གང་དང་གང་དུ་སྒྲ་བསྒྲགས་པ་དེ་དང་དེར་དུས་མ་ཡིན་པའི་རླུང་དང་། སད་དང་། སྤྲིན་དང་། སེར་བ་དང་། གློག་ཐམས་ཅད་ཀྱིས་མི་ཚུགས་སོ།། སུས་ཀྱང་བྱིན་འཕྲོག་པར་མི་ནུས་སོ།། གཙེ་བར་མི་ནུས་སོ། གནས་མཐོན་པོའི་རིའི་མ། དགོན་པའི་གནས་སམ། གྲོང་ངམ། གཙུག་ལག་ཁང་ངམ། གནས་ཁང་ཤིན་ཏུ་མཐོ་བ་དེར་རིག་པ་འཛིན་པ་གཙང་མར་བྱས་ཏེ། གོས་གཙང་མ་དཀར་པོ་བགོས་ལ་ཁ་ཤར་ཕྱོགས་སུ་བལྟས་ཏེ། བའི་ལྕི་བའམ་འཇིམ་པ་བསྲེས་པས་དཀྱིལ་འཁོར་ཁྲུ་གང་གྲཝ་བཞི་པ་བྱས་ལ། དཀྱིལ་འཁོར་གྱི་དབུས་སུ་མདའ་གང་ཙམ་པ་ཞིག་བཙུགས་ཏེ་སྔགས་ལན་ཉི་ཤུ་རྩ་གཅིག་བཟླས་སོ། ། དཀྱིལ་འཁོར་གྱི་གྲཝ་བཞིར་སེང་ལྡེང་གི་ཕུར་བུ་སོར་བརྒྱད་པ་བཙུགས་ཏེ། སྔགས་ལན་ཉི་ཤུ་རྩ་གཅིག་བཟླས་པ་བྱས་ཏེ། ཚོན་སྣ་ལྔའི་སྐུད་པས་ལན་གསུམ་འཁྲིས་པར་བསྐོར་རོ།། དཀྱིལ་འཁོར་གྱི་དབུས་སུ་པོག་པོར་བཞག་ལ་ལན་བདུན་བཟླས་པའི་བདུག་པས་བདུག་གོ།། ལན་ཉི་ཤུ་རྩ་གཅིག་བཟླས་པ་བྱས་ལ་ཡུངས་ཀར་གྱིས་གཏོར་རོ།། མེ་ཏོག་སིལ་མས་གང་བར་གཏོར་རོ།། ཕྱོགས་བཞིར་གཏོར་མའི་བུམ་པ་བཞི་གཞག་གོ། དཀྱིལ་འཁོར་གྱི་དབུས་སུ་གཏོར་མ་གཞག་པར་བྱ་སྟེ། ཞོ་དང་། འོ་མ་དང་། འབྲས་བཅོས་པ་དང་། བུ་རམ་དང་། ཤ་ཀ་རས་གདབ་བོ།། ཆུ་དང་ཡུངས་ཀ་ར་ལ་སྔགས་ལན་ལྔ་བརྗོད་དེ། ཕྱོགས་བཞིར་མཚམས་གཅད་པར་བགྱི། ཟླ་བ་ཉ་ལ་སྦྱོར་བ་བྱའོ།། སྐད་ཆེར་བཀླགས་ལ་ཕྱོགས་བཞི་དང་། སྟེང་དང་། འོག་ཏུ་ཡུངས་ཀར་གཏོར་ཞིང་ཀླུ་ཐམས་ཅད་ཀྱི་སོ་སོའི་མིང་ནས་བརྗོད་ན། ཆོ་ག་འདི་བྱས་མ་ཐག་ཏུ་དུས་མ་ཡིན་པའི་རླུང་དང་། སྤྲིན་དང་། སེར་བ་དང་། ཀླུ་མི་བསྲུན་པ་ཐམས་ཅད་བཅིངས་པར་འགྱུར། ཐུབ་པར་འགྱུར་རོ།། ལྟས་ངན་པ་དང་། ཡམས་ཀྱི་ནད་དང་། གནོད་པ་དང་། ནད་འགྲོ་བ་དང་། གདོན་དང་། འབྱུང་པོ་དང་། ཤ་ཟ་དང་། གནོད་སྦྱིན་དང་། སྲིན་པོ་ཐམས་ཅད་རྒྱང་རིང་དུ་སྤངས་པར་འགྱུར་རོདཔག་ཚད་གཅིག་ཁོ་ར་ཁོར་ཡུག་ཏུ་མཚམས་བཅད་པར་འགྱུར་རོ། ། ནད་ཐམས་ཅད་དང་། ན་བ་ཐམས་ཅད་དང་། གནོད་པར་སེམས་པ་དང་། རབ་ཏུ་གནོད་པར་སེམས་པ་དང་ཕྱིར་རྒོལ་བ་དང་། ཕྱིར་གནོད་པར་བྱེད་པ་ཐམས་ཅད་ཀྱིས་མི་ཚུགས་པར་འགྱུར་རོ།། མེ་ཏོག་དང་། འབྲས་བུ་དང་། ལོ་ཏོག་ཐམས་ཅད་ལེགས་པར་ཡོངས་སུ་འགྲུབ་པར་འགྱུར། ལེག་པར་ཡོངས་སུ་སྨིན་པ་དང་རོ་ཞིམ་པར་འགྱུར་རོ། ། ས་བོན་ལེགས་པར་བཏབ་པ་ཐམས་ཅད་ལེགས་པར་འཁྲུངས་པར་འགྱུར་རོ།། གཤེད་བྱེད་དང་། ལས་དང་། བྱད་སྟེམས་ཐམས་ཅད་རྣམ་པར་འཇོག་པར་འགྱུར། མི་ཚུགས་པར་འགྱུར་རོ།། ཇི་སྲིད་དུ་ཕུར་བུ་མ་ཕྱུང་བ་དེ་སྲིད་དུ་མཚམས་ཆེན་པོ་བཅད་པར་འགྱུར་རོ།། དེ་སྲིད་དུ་ཀླུ་ཐམས་ཅད་ཀྱིས་ཆར་གྱི་རྒྱུན་འབེབས་སོ། མེ་ཏོག་དང་། འབྲས་བུ་དང་། ལོ་ཏོག་ཐམས་ཅད་ལེགས་པར་ཡོངས་སུ་རྒྱས་པར་འགྲུབ་པར་འགྱུར་རོ།། གང་དང་གང་དུ་དགོས་པར་འགྱུར་བ་ཐམས་ཅད་ལན་ཅིག་དྲན་པར་བྱས་ན་འགྲུབ་པར་འགྱུར་རོ། ། སྤྲ་ཚོལ་ལས་ནམ་མཁའ་ལྡིང་གི་གཟུགས་སོར་བརྒྱད་པ་སྐྱིལ་མོ་ཀྲུང་བཅས་པ། འདབ་མ་བརྐྱང་བ། ཀླུ་རྒྱལ་གདན་དུ་བཏང་བ། མགོ་དགུ་པ། མགོ་རྒྱན་དུ་ཐོག་པཀླུ་མགོ་གསུམ་པ་ལག་པ་གཡས་ན་ཐོགས་པ། ནོར་བུ་རིན་པོ་ཆེ་འབར་བ་ལག་པ་གཡོན་ན་ཐོགས་པ། གསེར་གྱིས་གཡོགས་པ་བྱས་ཏེ་ཆོ་ག་བཞིན་དུ་ཚོན་གྱིས་རི་མོ་བྲིས་ལ། སྟན་སྣ་ཚོགས། ཀྱི་སྟེང་དུ་བཞག་ལ། ཉིན་ཞག་གཅིག་ལ་སྔགས་སྟོང་བརྗོད་དོ།། ནམ་ལུས་ཀྱིས་མི་ཐུབ་པའི་ཚེ་ཁ་ཟས་དཀར་པོ་བཟའ་བར་བྱ་སྟེ། ཡང་ཁྲུས་བྱས་ལ་བསྒྲུབ་པར་བྱའོ།། གུ་གུལ་གྱིས་བདུག་གོ། མེ་ཏོག་དང་། འདུག་པ་དང་། གཏོར་མ་ཅི་འབྱོར་པ་སྦྱར་རོ།། མར་མེ་བཏང་ལ་དེའི་མདུན་དུ་ཉལ་ན་སྟོན་པར་འགྱུར་ཞིང་ལས་ཐམས་ཅད་རྗོད་པར་འགྱུར་རོ།། མཆོག་ཐམས་ཅད་སྦྱིན་པར་འགྱུར་རོ།། ལས་ཐམས་ཅད་བྱེད་པར་འགྱུར་རོ། ། ཅི་བསྒོ་བ་བྱེད་པར་འགྱུར་རོ།། ལང་ལོང་མེད་པའི་གནས་སུ་བཞག་ལ། ནམ་ཐན་པ་བྱུང་བའི་ཚེ་རིག་པ་འཛིན་པས་བླངས་ཏེ་ཀླུའི་གནས་སུ་བཀུར་བར་བྱ། ཀླུའི་གནས་མཚོར་བཞག་ལ་མེ་ཏོག་དང་བདུག་པ་བྱིན་ལ། ཡུངས་ཀར་ལ་སྔགས་ལན་གསུམ་བཟླས་ཏེ་གནས་སུ་གཏོར་ན་འཕྲལ་དུ་ཀླུ་བས་ཅད་ཆར་གྱི་རྒྱུན་འབེབས་སོ།། གལ་ཏེ་འཕྲལ་དུ་ཆར་གྱི་རྒྱུན་མི་འབེབས་ན། དེའི་ཕྱིར་ཀླུའི་གནས་ཀུན་ཏུ་ནམ་མཁའ་ལྡིང་གིས་གང་བར་མཐོང་བར་འགྱུར། གནས་མེ་ལྕེ་གཅིག་ཏུ་འབར་བར་འགྱུར། བྱེ་ཚན་མགོ་ལ་འབབ་པར་འགྱུར། ཆུ་བསྐམས་པར་འགྱུར་རོ།། ཐན་པ་བྱུང་བའི་ཚེ་སྤྲིན་ལ་བསྟན་ན་ཆར་འབེབས་པར་འགྱུར་རོ། ། རླུང་དང་། སྤྲིན་དང་། སེར་བ་དང་། སད་དང་། ཆར་སྤྲིན་ལ་བསྟན་ན་སྐད་ཅིག་ཏུ་མེད་པར་འགྱུར་རོ།། དཔག་ཚད་བདུན་གྱི་ནང་དུ་ཕྱོགས་བཞི་ཀུན་ཏུ་སེར་བ་མི་འབབ་ཅིང་། སད་དང་དུས་མ་ཡིན་པའི་རླུང་གིས་མི་ཚུགས་པར་འགྱུར་ཏེ། ཐམས་ཅད་ཐུབ་པར་འགྱུར། རླུང་འཁྲུགས་པའི་ཚེ་ལམ་གྱི་བཞི་མདོར་གཞག་གོ།། ཡང་ན་གྲོང་ཁྱེར་གྱི་སྐོར་རོ།། ཡང་ན་རྒྱལ་པོའི་སྒོར་གཞག་གོ།། དེས་རླུང་ཐམས་ཅད་ཆོད་པར་འགྱུར་རོ།། རླུང་ཆེན་པོ་རྣམ་པར་འཐོར་རླུང་ཡང་ཆོད་པར་འགྱུར་རོ།། ཕྱིས་ལྡང་མི་ནུས་སོ།། བསྟན་མ་ཐག་ཏུ་ཀླུ་ཐམས་ཅད་འབྲོས་པར་འགྱུར་རོ། ། རྡོ་རྗེ་མཆུའི་གཟུངས་ལས་ཐམས་ཅད་བྱེད་པ། ནམ་མཁའ་ལྡིང་བཀླགས་པས་འགྲུབ་པ་མཆོག་ཏུ་འགྲུབ་བོ།། དེ་ནས་ཚངས་པ་དང་། དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ཅག་ཐམས་ཅད་ཚོགས་པས་ཀྱང་རྡོ་རྗེ་འབར་བའི་ལྕེ་འབབ་པའི་མཆུ་ཞེས་བགྱི་བའི་གཟུངས་བརྗོད་པར་བྱ་སྟེ། ཀླུ་ཐམས་ཅད་ཀྱི་སྙིང་འཕྲོག་པ། སྙིང་འགེམས་པ། ཀླུ་མི་བསྲུན་པའི་རིག་ཕུང་བར་བགྱིད་པ། རླུང་དང་། སྤྲིན་དང་། སེར་བ་ཐམས་ཅད་སེལ་བ། ལོ་ཏོག་དང་། མེ་ཏོག་དང་། འབྲས་བུ་ཐམས་ཅད་སྒྲུབ་པ་འབུལ་ན། སེམས་ཅན་ཐམས་ཅད་ལ་སྨན་པར་བགྱི་བའི་སླད་དུ། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི་དག་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དག་སེམས་ཅན་ཐམས་ཅད་ཀྱི་དོན་དང་། ཕན་པ་དང་། བདེ་བའི་ཕྱིར་ངས་བྱིན་གྱིས་བརླབ་ཀྱིས་རྗོད་ཅིག། དེ་ནས་ཚངས་པ་དང་། ཁྱབ་འཇུག། དང་། དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི་པོ་དག་གིས་གཟུངས་འདི་སྨྲས་སོ།། ན་མོ་རཏྣ་ཏྲ་ཡཱ་ཡ། ན་མོ་བྷ་ག་བ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་ས་མྱཀ་སཾ་བུདྡྷཱ་ཡ། ནམ་ཤྩཿབཛྲ་དྷ་རཱ་ཡ། མ་ཧཱ་བ་ལ་པ་རཱ་པ་མཱ་ཡ། ན་མ་སྟྲཻ་ལོ་ཀྱ་མུརྟ་ཡེ། མ་ཤྩ་ཏུརཎཱཾ། ན་མོ་བཛྲཱ་ཤ་ནི་ཛྭ་ལི་ཏ་རོ་ཏྲཱནྡ་ཧ་སཱ་ཡ། ཛ་ཡ་མེ་ཧཱ་བ་ལ་བཱིརྱ་པ་ར་ཀྲ་མ་བོ་དྷ་ར་ཛ་བྲཱདྡྷེ་བྲཧྨ་ས་ར། བྷེ་བྷོ་ན་ག་ཨ་དྷི་པ་ཏི་བི་ས་ར་ཏ་བི་ས་ར་ཏ། མ་རེ་བྲཧྨ་དཱནྟེ་ནཱ་མཱ་མུརྡྷ་ནཱན། པྲ་ཏ་ཡ་ཧཱུཾ་ཧཱུ~ཾ་ཕཊ། བྷ་ར་བྷ་ར། བིཀྵུ་ཙཀྲ་ཧསྟ་ན་པོ་ཤཱ་ནཱ་གེན་དུ་མ་ཏི་བིཥྚ་ཙཀྲེ་ཤྲྀནྟྲྀནྣ་མི། ཏུ་ཏི་ཏུཏི། ལི་ལི་ལི་ལི་ཧཱུཾ་ཧཱུཾ་ཕཊ། མུ་ཧུ་མུ་ཧུ་མུ་ཧྱནྟུ་སརྦ་དུཥྚནཱ་གཱ་ནཱཾ། སྥོཊ་ཡ་ཧྲྀ་ད་ཡཾ་མ་ཧེ་ཤྭ་ར་ཛྭ་ལི་ཏ་ཏྲི་ཤཱུ་ལ་དྷ་ར། ཧ་ན་ཧ་ན་ཧཱུཾ་ཧཱུཾ་ཕཊ། མུ་ཙི་མུ་ཙི། ཏུ་ཏི་ཏུ་ཏི། བྷ་བ་བྷ་བ། ཀྵི་ཎི་ཀྵི་ནི་ཀླི་ནི། ཙ་ཏུརྞྞ་མ་རི་ཙི་ནཱན། ཛྭ་ལི་ཏ་ཤཀྟི། དྷ་ར་དྷ་ར། ཧཱུཾཧཱུ~ཾཧཱུ~ཾ་ཕཊ། སྥུ་ར་སྥུ་ར། བོ་སྥུ་ར་བི་སྥུ་ར། ཙཱ་ར་ཙ་ར། ནཱ་ཤ་ཡ། དུཥྛན་ནཱ་ག་ཧྲྀ་ད་ཡཾ། སྥོ་ཊ་ཡ་ཧཱུ~ཾ་ཧཱུ་ཕཊ། ས་ཧ་ར་སཾ་ཧ་ར། དུཥྚན་ཡ་ཤ་ན། བ་ཏི་ནཱ་གན་ཤཱི་ཏི་བ་དྱཱ་ཛྭ་ལ་བྷསྨི་ཀུ་རུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ས་མ་ཡ་མ་ནུ་སྥ་ར་བྷོ་ནཱ་ག་ཨ་དྷི་པ་ཏེ་བཛྲ་བ་ཡ་བྷོ་བྷོ་ཏུ་ཏི་ཏུ་ཏི་ཧུ~ཾ་ཧཱུ~ཾ་ཕཊ་ཕཊ་སྭཱ་ཧཱ། བཛྲ་ཨཱ་ཤཱ་ན་ནི་ནཱ་ཤ་ཡ་ཧཱུ~ཾ་ཕཊ་སྭཱ་ཧཱ། སརྦ་ནཱ་ག་ཧྲི་ད་ཡཱ་ནི། བི་སྥོ་ཊ་ཡ་ཧཱུཾ་ཕཊ་སྭཱཧཱ། བུདྡྷ་བ་ལོ་ཀི་ཏཱ་ཡ་སྭཱཧཱ། བྲཧྨ་ཡ་སྭཱ་ཧཱ། བིཥྞུ་མུརྟི་སྭཱ་ཧཱ། མ་ཧེ་ཤྭ་ར་ཛྭ་ལི་ཏ་ཏྲི་ཤཱུ་ལཱ་ཡ་སྭཱ་ཧཱ། ཙ་ཏུར་མ་ཧཱ་རཱ་ཛ་ས་མ་མ་དྷ་རཱ་ཡ་སྭཱཧཱ། བྷུ་ཛཾ་གཱ་ཡ་སྭཱ་ཧཱ། ནཱ་ག་ཨ་དྷི་པ་ཏ་ཡེ་སྭཱ་ཧཱ། ཨོཾ་དྷི་རི་དྷི་རི་སྭཱཧཱ། ། ཛྭ་ལི་ཏ་བཱཀྟཱ་ཡ་སྭཱ་ཧཱ། རོ་མ་ཧཱ་ར་ནཱ་ཤ་ཡ་སྭཱ་ཧཱ། ཛུ་ཏི་ཛུ་ཏི་ཛུ་ཏི་སྭཱཿ། ཕཊ་ཕཊ་ཕཊ་ཕཊ་ཕཊ་སྭཱ་ཧཱ། དེ་ནས་རྡོ་རྗེ་འབར་བའི་ལྕེ་འབབ་པའི་མཆུ་ཞེས་བྱ་བའི་གཟུངས་འདི་བརྗོད་མ་ཐག་ཏུ་ཀླུ་མ་བསྲུན་པ་ཐམས་ཅད་ལུས་རུལ་ཏེ་དྲི་མ་ཞིམ་པར་གྱུར་ཏོ། ། ལུས་ཤིག་ཤིག་པོར་གྱུར་ཅིང་ཤ་བཀྲེས་བཏབ་པར་གྱུར་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་འདི་སྐད་ཅེས་གསོལ་ཏོ། བཅོམ་ལྡན་འདས་བསྐྱབ་ཏུ་གསོལ། བཅོམ་ལྡན་འདས་ལྷ་དང་བཅས་པའི་འཇིག་རྟེན་གྱིས་སྨད་པར་གྱུར་ཏོ།། བཅོམ་ལྡན་འདས་བདག་ཅག་ནི་བརླག་གོ།། བཅོམ་ལྡན་འདས་སླན་ཆད་འཛམ་བུའི་གླིང་གི་སེམས་ཅན་རྣམས་ལ་འཚེ་བར་མི་བགྱིད་དོ། ། གནོད་པར་མི་བགྱིད་དོ།། བཅོམ་ལྡན་འདས་རྡོ་རྗེ་འབར་བའི་ལྕེ་འབབ་པའི་མཆུའི་གཟུངས་འདི་བརྗོད་པ་དར། བཅོམ་ལྡན་འདས་ཀླུ་ཐམས་ཅད་གནོད་པར་སེམས་ཤིང་མི་མཆི་སྟེ། ཐ་ན་ལྟ་བར་ཡང་མི་བགྱིད་ན། འཇུག་པ་ལྟ་སྨོས་ཀྱང་ཅི་འཚལ། དེ་ནས་འདིའི་ཆོ་ག་བརྗོད་དེ། གཟུངས་འདི་དྲན་པ་ཙམ་གྱིས་ཀླུ་ཐམས་ཅད་ཀྱི་ལུས་དུམ་བུ་དུམ་བུར་འདྲུལ་ལོ། ། ལུས་དྲི་མི་ཞིམ་པར་འགྱུར་རོ།། ཡུངས་ཀར་ལ་ལན་ཉི་ཤུ་རྩ་གཅིག་བཟླས་ཏེ་ཕྱོགས་བཞིར་གཏོར་ན་ཀླུ་ཐམས་ཅད་བཅིངས་པར་འགྱུར་རོ།། དཔག་ཚད་བདུན་ཁོ་ར་ཁོར་ཡུག་ཏུ་མཚམས་བཅད་པར་འགྱུར་རོ། ། རྡོ་རྗེ་ལ་ལན་བརྒྱ་རྩ་བརྒྱད་བཟླས་པ་བྱས་ཏེ་ཀླུ་བཟློག་པར་བྱའོ།། ལན་ཅིག་བརྗོད་ན་རླུང་དང་། སྤྲིན་དང་། སེར་བ་ཐམས་ཅད་ཟློག་གོ། ཐམས་ཅད་མེད་པར་འགྱུར། རོ།། དྲན་པ་ཙམ་གྱིས་སེར་བ་ཐམས་ཅད་སྐད་ཅིག་ཏུ་མེད་པར་འགྱུར་རོ།། གལ་ཏེ་འབབ་ནའང་ཡུད་ཙམ་གྱིས་ཆུར་འགྱུར་རོ།། སེར་པ་འབབ་པའི་དུས་ན་རྡོ་རྗེ་བསྐོར་ན་ཕྱོགས་གང་དུ་བསྐོར་བ་དེར་སེར་བ་འགྲིམས་པར་འགྱུར་ཏེ། ཕྱོགས་དེར་སེར་བ་མི་འབབ་པར་འགྱུར་རོ།། ནང་པར་དབེན་པར་སོང་སྟེ་ནང་དུ་ཡང་དག་འཇོག་ཏུ་ཞུགས་ལ། སྐྱིལ་མོ་ཀྲུང་གི་ཕྱག་རྒྱ་བཅིངས་ཏེ། སྔགས་འདི་ལན་སུམ་ཅུ་རྩ་གཉིས་བརྗོད་དེ། བརྗོད་མ་ཐག་ཏུ་རླུང་དང་། སྤྲིན་དང་། སེར་བ་ཐམས་ཅད་མེད་པར་འགྱུར་རོ།། རླུང་ཐམས་ཅད་རྣམ་པར་འཇིག་པར་འགྱུར་རོ།། མི་འབྱུང་བར་འགྱུར།། ཡུངས་ཀར་ཕྱོགས་བཞིར་གཏོར་ན་ལོ་གཅིག་ཁྱུད་ཀོར་དུ་མཚམས་བཅད་པར་འགྱུར་རོ། ། རླུང་དང་། སྤྲིན་དང་། སེར་བ་ཐམས་ཅད་བཅིངས་པར་འགྱུར་རོ།། ཀླུ་ཐམས་ཅད་དབང་དུ་འགྱུར་རོ།། བུ་དང་ཚ་བོ་འཁོར་དང་བཅས་པ་རྒྱུན་དུ་རྒྱུན་མི་འཆད་པར་ཕྱི་བཞིན་འབྲང་བར་འགྱུར་རོ། ། ལས་ཐམས་ཅད་བྱེད་པར་འགྱུར་རོ།། དྲིལ་བུ་ལ་ལན་ཉི་ཤུ་རྩ་གཅིག་བཟླས་ཏེ་སེར་བ་འབབ་པའི་དུས་ན་དཀྲོལ་ནཀླུ་མི་བསྲུན་པ་ཐམས་ཅད་ཀྱི་ཀླད་པ་འགས་པར་འགྱུར་རོ། ། ནམ་མཁའ་ལས་ས་ལ་ལྷུང་བར་འགྱུར་ཏེ། ལས་ཐམས་ཅད་བྱེད་པར་འགྱུར་རོ།། གཟུངས་འདི་ནི་ཐམས་ཅད་དུ་ཐོགས་པ་མེད་པར་འགྱུར་རོ། ། དེ་ནས་བཅོམ་ལྡན་འདས་ཀྱིས། ནམ་མཁའ་ལྡིང་གི་དབང་པོ་ཆེན་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་ལེགས་སོ་ཞེས་བྱ་བ་གནང་སྟེ། ཚངས་པ་ཆེན་པོ་སེམས་ཅན་ཐམས་ཅད་ལ་ཕན་པ་དང་། བདེ་བ་དང་། ཀླུ་མི་བསྲུན་པ་དང་། སྙིང་རྗེ་མེད་པ། འཚེ་བ་རྣམས་གདུལ་བ་དང་། ཚར་གཅད་པ་དང་། ཆང་པས་གཅད་པའི་ཕྱིར་ཁྱོད་ཀྱིས་རིག་པ་ཆེན་པོའི་གཟུངས་སྔགས་ཀྱི་ཚིག་འདི་བརྗོད་ནས་འཛམ་བུའི་གླིང་དུ་བཞག་པ་ལེགས་སོ་ལེགས་སོ། ། དེ་ནས་ཀླུའི་རྒྱལ་པོ་ཆེན་པོ་རྒྱ་མཚོ་དང་། ཀླུའི་རྒྱལ་པོ་ཆེན་པོ་རྣམ་པར་ཀུན་ནས་བསྐོར་བ་དང་། གཞན་ཡང་ཀླུའི་རྒྱལ་པོ་ཆེན་པོ་གཟི་བརྗིད་ཆེ་ཞིང་རྫུ་འཕྲུལ་ཆེ་བ་དང་། གཞན་ཡང་ཀླུ་མི་བསྲུན་པ་བྱེ་བ་ཕྲག་དུ་མ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ཅག་འཁོར་དང་བཅས་པས་སླད་མའི་ཚེ་སླད་མའི་དུས་ན་འཛམ་བུའི་གླིང་ཐམས་ཅད་ཀྱི་མེ་ཏོག་དང་། འབྲས་བུ་དང་། ལོ་ཏོག་དང་། ལོ་མ་དང་། ཡལ་ག་རྣམས་བསྲུང་བར་བགྱིའོ།། ཡོངས་སུ་བསྐྱད། པར་བགྱིད་དོ།། རླུང་དང་། སྤྲིན་དང་། སེར་བ་དང་། སད་དང་། ཚད་པ་ཐམས་ཅད་ཟློག་པར་བགྱིད་དོ།། དུས་དུས་སུ་ཆར་གྱི་རྒྱུན་འབེབས་པར་འཚལ་ལོ།། རང་གི་མནའི་ཡི་དམ་གྱིས་དེ་བཞིན་གཤེགས་པའི་དམ་ཚིག་བསྐྱང་བར་འཚལ་ལོ། ། སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་ཤིང་བསམ་པ་གྲུབ་པར་འཚལ་ལོ།། མི་འཚེ་བར་འཚལ་ལོ།། བཅོམ་ལྡན་འདས་གལ་ཏེ་ཆོ་གའི་རྒྱལ་པོ་འདི་ལས་གོང་དུ་སྔགས་དང་གཟུངས་ཇི་སྐད་བཤད་པའི་ཡོན་ཏན་གྱི་ཁྱད་པར་རྣམས་དང་འགལ་བར་བགྱིད་ན། བདག་ཅག་བྱང་ཆུབ་ཏུ་མངོན་པར་འཚང་རྒྱ་བར་མ་གྱུར་ཅིག། འདི་ནི་བྲོ་བོར་བ་སྟེ། ཏདྱ་ཐཱ། པ་ཀི་ཙ་ཏི། ཤུ་ལི་ཤུ་མུ་ལ། ཤ་ཤ་ཤུ་ཤུ། ཏི་ཏི་བི་རི་ཏི། ཧུ་ཡུ་ཧུ་ཡུ། ཧུ་རི་ཏི་སྭཱ་ཧཱ། བཅོམ་ལྡན་འདས་འདི་ནི་ཀྲུའི་མནའ་ལགས་ཏེ། སླད་མའི་ཚེ་སླད་མའི་དུས་ན་ཀླུ་མི་བསྲུན་པ་རྣམས་འཇིག་པར་བགྱིད་དོ། ། ཐན་པ་དང་། ཐན་པ་ཆེ་བ་དང་། དུས་མ་ལགས་པའི་ཆར་དང་། རླུང་དང་། སྤྲིན་དང་། སེར་བ་དང་། སད་དང་། དུས་མ་ལགས་པའི་རླུང་དང་གློག་བྱུང་ན། རི་འམ་ཁང་པ་མཐོན་པོའི་སྟེང་དུ་རིག་པ་འཛིན་པ་ཁ་ཤར་ཕྱོགས་སུ་བལྟས་ཏེ་མནའ་འདི་དག་གིས་བསྟོད་དེ་ལན་བདུན་བརྗོད་ལ། ཆུ་དང་ཡུངས་ཀར་བསྲེས་པ་ཕྱོགས་བཞིར་གཏོར་བར་བྱའོ། ། གཏོར་ཅིང་དྲན་མ་ཐག་ཏུ་ཀླུ་ཐམས་ཅད་ཀྱི་ལུས་རྣམས་དུམ་བུ་བརྒྱར་འཆད་པར་འགྱུར་རོ།། གྱེས་པར་འགྱུར་རོ།། འགུགས་པར་འགྱུར་ཏེ། དེའི་སླད་དུ་ཆར་གྱི་རྒྱུན་འབེབས་སོ།། བཅོམ་ལྡན་འདས་ཀྱིས་བཀའ་སྩལ་པ། ཀླུའི་རྒྱལ་པོ་ཁྱེད་ཀྱིས་དེ་ལྟར་བྱོས་ཤིག། རྡོ་རྗེ་མཆུའི་ཆོ་ག་རྫོགས་སོ།། བོད་སྐད་དུ། རྡོ་རྗེ་མནམ་ལྕགས་མཆུ་ཞེས་བྱ་བའི་གཟུངས།

CLOSE WINDOW