Wylie | e-texts produced with ocr Programm |
རྒྱ་གར་སྐད་དུ། ཨཱརྱ་མཻ་ཏྲི་ཡ་པྲསྠཱ་ནན་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། ནི།། འཕགས་པ་བྱམས་པ་འཇུག་པ་ཞེས་བྱ་བ་ཐེག་པ་ཆེན་པོའི་མདོ། ། །། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་ལྔ་སྟོང་ཐམ་པའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ཁྲིའི་བྱང་ཆུབ་སེམས་དཔའི་དགེ་འདུན་ཆེན་པོ་ཐམས་ཅད་ཀྱང་མངོན་པར་ཤེས་པ་མངོན་པར་ཤེས་པ་ཡིན་ཞིང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཕྱིར་མི་ལྡོག་པ་ཤ་སྟག་དང་ཐབས་གཅིག་ཏུ་བཞུགས་སོ། ། དེའི་ཚེ་འཇམ་དཔལ་གཞོན་ནུར་གྱུར་པ་ཡང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། བྱང་ཆུབ་སེམས་དཔའ་སྤོབས་པ་བརྩེགས་པ་དང་། བྱང་ཆུབ་སེམས་དཔའ་རྣམ་པར་རྩེ་བ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་དང་། ཟླ་འོད་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཡང་འཁོར་དེ་ཉིད་དུ་འདུས་པར་གྱུར་ཏེ་འཁོད་དོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། ། དེ་ནས་བྱང་ཆུབ་སེམས་དཔའ་བྱམས་པས་ཞུས་ནས། དེའི་ཚེ་བཅོམ་ལྡན་འདས་ཅང་མི་གསུང་བར་དུས་ཡོལ་བར་མཛད་དོ།། དེ་ནས་འཇམ་དཔལ་གཞོན་ནུར་གྱུར་པས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ།། བྱམས་པ་འདི་ལྟར་བྱས་པ་དང་། ཞུས་ནས་ཞུ་བ་ལུང་བསྟན་པའི་ཕྱིར། ཁྱོད་ལ་དེ་བཞིན་གཤེགས་པ་སྐབས་འབྱེད་པར་མཛད་དོ།། གལ་ཏེ་དེ་བཞིན་གཤེགས་པ་ལ་སངས་རྒྱས་ཀྱི་ཐེག་པ་ལས་བརྩམས་ཏེ་ཞུ་བར་མི་བྱེད། རང་སངས་རྒྱས་ཀྱི་ཐེག་པ་ལས་བརྩམས་ཏེ་ཞུ་བར་མི་བྱེད། ཉན་ཐོས་ཀྱི་ཐེག་པ་ལས་བརྩམས་ཏེ་ཞུས་བར་མི་བྱེད། ཕུང་པོ་དང་། ཁམས་དང་། སྐྱེ་མཆེད་ཡོངས་སུ་ཤེས་པར་བྱ་བའི་ཕྱིར་ཞུ་བར་མི་བྱེད། འདོད་ཆགས་དང་། ཞེ་སྡང་དང་། གཏི་མུག་ཟད་པར་བྱ་བའི་ཕྱིར་ཞུ་བར་མི་བྱེད། ཕ་རོལ་ཏུ་ཕྱིན་པ་ལས་བརྩམས་ཏེ་ཞུ་བར་མི་བྱེད། ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་ཞུ་བར་མི་བྱེད་ན། དེ་ལྟར་ན་ཞུས་ནས་ཞུ་བ་ལུང་བསྟན་པའི་ཕྱིར། ཁྱོད་ལ་དེ་བཞིན་གཤེགས་པས་སྐབས་འབྱེད་པར་མཛད་དོ།། གལ་ཏེ་ཁྱོད་འདུ་བྱེད་རྣམས་ལས་ཡང་དག་པར་འདའ་བར་བྱ་བ་དང་། མྱ་ངན་ལས་འདས་པ་ཐོབ་པར་བྱ་བའི་ཕྱིར་ཞུ་བར་མི་བྱེད་དམ། གལ་ཏེ་ཁྱོད་བདེན་པ་ཁོང་དུ་ཆུད་པར་བྱ་བའི་ཕྱིར་ཞུ་བར་མི་བྱེད་དམ། ལམ་དང་ལམ་བསྒོམ་པར་བྱ་བའི་ཕྱིར་ཞུ་བར་མི་བྱེད་དམ། གལ་ཏེ་ཁྱོད་འབྲས་བུ་ཐོབ་པར་བྱ་བ་དང་། མངོན་སུམ་དུ་བྱ་བའི་ཕྱིར་ཞུ་བར་མི་བྱེད་དམ། གལ་ཏེ་ཁྱོད་མི་གནས་པའི་ཕྱིར་དེ་བཞིན་གཤེགས་པ་ལ་ཞུ་བར་མི་བྱེད་དམ། ཡི་གེ་རྣམས་མི་རྗོད་པར་ཞུ་བར་བྱེད་ན། དེ་ལྟ་ན་ཞུས་ནས་ཞུ་བ་ལུང་བསྟན་པའི་ཕྱིར། ཁྱོད་ལ་དེ་བཞིན་གཤེགས་པའི་སྐབས་འབྱེད་པར་མཛད་དེ། དེ་ཅིའི་ཕྱིར་ཞེ་ན་བྱམས་པ་ཇི་ཙམ་དུ་སྒྲོ་འདོགས་པ་དེ་ཙམ་དུ་ཆགས་པ་ཡོད་ལ། སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པ་ཆགས་པ་མེད་པའི་ཕྱིར་རོ།། དེ་ནས་ཚེ་དང་ལྡན་པ་ཤཱ་ར་དྭ་ཏི། བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།། འཇམ་དཔལ་སྒྲོ་བཏགས་པ་སྒྲོ་བཏགས་པ་ཞེས་བྱ་བ། འཇམ་དཔལ་ཇི་ཙམ་གྱིས་ན། སྒྲོ་བཏགས་པར་འགྱུར། འཇམ་དཔལ་གྱིས་སྨྲས་པ། བཙུན་པ་ཤཱ་ར་དྭ་ཏིའི་བུ་ཆོས་ཐམས་ཅད་ནི་སྟོང་པ་ཉིད་མཉམ་པ་ཉིད་ཀྱིས་མཉམ་པ་ཡིན། མཚན་མ་མེད་པ་མཉམ་པ་ཉིད་ཀྱིས་མཉམ་པ་ཡིན། སྨོན་པ་མེད་པ་མཉམ་པ་ཉིད་ཀྱིས་མཉམ་པ་ཡིན། ཇི་ལྟ་བ་བཞིན་མཉམ་པ་ཉིད་ཀྱིས་མཉམ་པ་ཡིན། དེ་བཞིན་ཉིད་མཉམ་པ་ཉིད་ཀྱིས་མཉམ་པ་ཡིན། ཆོས་ཀྱི་དབྱིངས་མཉམ་པ་ཉིད་ཀྱིས་མཉམ་པ་ཡིན། ཡང་དག་པའི་མཐའ་མཉམ་པ་ཉིད་ཀྱིས་མཉམ་པ་ཡིན། མི་སྐྱེ་མི་འགག་མི་གནས་པ་མཉམ་པ་ཉིད་ཀྱིས་མཉམ་པ་ཡིན། མ་སྐྱེས་མ་བྱུང་བ་མཉམ་པ་ཉིད་ཀྱིས་མཉམ་པ་ཡིན། ཆོས་ཐམས་ཅད་ནམ་མཁའ་དང་མཉམ་པ་ཉིད་ཀྱིས་མཉམ་པ་ཡིན། བཙུན་པ་ཤཱ་ར་དྭ་ཏིའི་བུ་གང་དག་འདི་ལྟར་ཆོས་ཐམས་ཅད་མཉམ་པ་ཉིད་ལ་མི་མཉམ་པར་བརྟགས་ནས། མེད་བཞིན་དུ་སྒྲོ་འདོགས་པས་སྒྲོ་འདོགས་པར་བྱེད་དེ། འདི་ནི་སངས་རྒྱས་སོ།། འདི་ནི་ཆོས་སོ།། འདི་ནི་དགེ་འདུན་ནོ།། འདི་ནི་བདག་གོ།། འདི་ནི་སེམས་ཅན་ནོ།། འདི་ནི་གང་ཟག་གོ།། འདི་ནི་ཤེད་ལས་སྐྱེས་པའོ།། འདི་ནི་ཤེད་བུའོ།། འདི་ནི་བྱེད་པ་པོའོ།། འདི་ནི་ཚེར་རབ་བོའོ། ། འདི་ནི་ཆད་པའོ།། འདི་ནི་རྟག་པའོ།། འདི་ནི་སོ་སོའི་སྐྱེ་བོའོ།། འདི་ནི་ཉན་ཐོས་སོ།། འདི་ནི་རང་སངས་རྒྱས་སོ།། འདི་ནི་བྱང་ཆུབ་སེམས་དཔའོ།། འདི་ནི་ཁ་ན་མ་ཐོ་བ་དང་བཅས་པའོ།། འདི་ནི་ཁ་ན་མ་ཐོ་བ་མེད་པའོ།། འདི་ནི་ཟག་པ་དང་བཅས་པའོ།། འདི་ནི་ཟག་པ་མེད་པའོ།། འདི་ནི་འདུས་བྱས་སོ།། འདི་ནི་འདུས་མ་བྱས་སོ།། འདི་ནི་ཀུན་ནས་ཉོན་མོངས་པའོ།། འདི་ནི་རྣམ་པར་བྱང་བའོ། ། འདི་ནི་དགེ་བའོ།། འདི་ནི་མི་དགེ་བའོ།། འདི་ནི་འཇིག་རྟེན་པའོ།། འདི་ནི་འཇིག་རྟེན་ལས་འདས་པའོ།། འདི་ནི་འཁོར་བའོ།། འདི་ནི་མྱ་ངན་ལས་འདས་པའོ།། འདི་ནི་དངོས་པོའོ།། ། འདི་ནི་དངོས་པོ་མ་ཡིན་པའོ།། འདི་ནི་ཡོད་པའོ།། འདི་ནི་མེད་པའོ།། འདི་ནི་ཐོབ་པའོ།། འདི་ནི་མངོན་པར་རྟོགས་པའོ།། འདི་ནི་མངོན་སུམ་དུ་བྱའོ།། འདི་ནི་ལམ་མོ།། འདི་ནི་ལམ་གྱི་འབྲས་བུའོ། ཞེས་བྱ་བ་འདི་ནི་སྒྲོ་བཏགས་པ་ཞེས་བྱའོ།། དེ་ཅིའི་ཕྱིར་ཞེ་ན། བཙུན་པ་ཤཱ་ར་དྭ་ཏིའི་བུ་མཉམ་པ་ཉིད་ནི་རྣམ་པར་རྟོགས་པ་མེད་ཅིང་། གང་དག་འདི་ལྟར་རྣམ་པར་རྟོག་པ་དེ་དག་ནི་མཉམ་པ་ཉིད་དུ་སྒྲོ་འདོགས་པ་ཡིན་ཏེ། མི་མཉམ་པར་སྤྲོ་འདོགས་པ་ནི་མ་ཡིན་ལ། གང་དག་མཐོང་བ་མེད་པར་མཉམ་པ་ཉིད་མཐོང་བ་དེ་དག་ནི། མཉམ་པ་ཉིད་མཐོང་བ་ཡིན། སྒྲོ་འདོགས་པ་ལ་སྤྱོད་པ་ནི་མི་མཉམ་པར་མཐོང་བ་ཡིན་ཞིང་། གང་དག་མཉམ་པ་ཉིད་ལ་སྒྲོ་མི་འདོགས་པ་དེ་དག་ནི་མཉམ་པ་ཉིད་མཐོང་བ་ཡིན་ལ། སྒྲོ་འདོགས་པ་ལ་སྤྱོད་པ་ནི་མཉམ་པ་ཉིད་མཐོང་བ་མ་ཡིན་པའི་ཕྱིར་རོ།། བསྟན་པ་འདི་བཤད་པ་ན། དགེ་སློང་ཉིས་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ཏེ། དགེ་སློང་དེ་དག་འདུལ་བ་ལ་དབང་མཛད་པའི་ཕྱིར། བཅོམ་ལྡན་འདས་ཅང་མི་གསུང་བར་དུས་ཡོལ་བར་མཛད་དོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།། འཇམ་དཔལ་ཁོ་བོ་ནི་ཉན་ཐོས་ཀྱི་ཐེག་པ་ལས་བརྩམས་ཏེ། དེ་བཞིན་གཤེགས་པ་ལ་ཞུ་བར་མི་བྱེད་དོ།། རང་སངས་རྒྱས་ཀྱི་ཐེག་པ་ལས་བརྩམས། ཡང་དག་པར་རྫོགས་པའི་སངས་རྒྱས་ཀྱི་ཐེག་པ་ལས་བརྩམས་ཏེ། དེ་བཞིན་གཤེག་པ་ལ་ཞུ་བར་མི་བྱེད་པ་ནས། ཁོ་བོ་ནི་མི་གནས་པའི་བར་དུ་དེ་བཞིན་གཤེགས་པ་ལ་ཞུ་བར་མི་བྱེད་དོ།། འཇམ་དཔལ་ཁོ་བོ་ནི་དེ་བཞིན་གཤེགས་པ་ལ་ཅི་ནས་དེ་བཞིན་ཉིད་དང་མི་འགལ་བ་དེ་ལྟར་ཞུ་བར་མི་བྱེད་དོ། ། འཇམ་དཔལ་ཁོ་བོ་ནི་གང་དག་དེ་བཞིན་ཉིད་དང་འགལ་བར་མི་བྱེད་པ་དང་། གང་དག་ཆོས་ཐམས་ཅད་དབེན་པ་ཉིད་ཀྱི་ཕྱིར། ཆོས་ཅི་ཡང་མི་དམིགས་པ་དང་། གང་དག་ཆོས་ཀྱི་དབྱིངས་མི་གཡོ་བ་ཉིད་ཀྱི་ཕྱིར། འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱིས་མི་གོས་པ་དང་། གང་དག་འཁོར་བ་མི་དམིགས་པ་ཉིད་ཀྱི་ཕྱིར། འཁོར་བ་ལས་འདའ་བར་མི་བྱེད་པ་དང་། གང་དག་གང་ནས་ཀྱང་འོང་བ་མེད་པ་ཉིད་དང་། གང་དུ་ཡང་འགྲོ་བ་མེད་པ་ཉིད་ཀྱི་ཕྱིར། མྱ་ངན་ལས་འདས་པ་ཐོབ་པར་མི་བྱེད་པ་དེ་དག་གི་ཕྱིར། དེ་བཞིན་གཤེགས་པ་ལ་ཞུ་བར་བྱེད་དོ།། འཇམ་དཔལ་ཁོ་བོ་ནི་ཅི་ནས་ཀྱང་ཡི་གེ་རྣམས་ཀྱང་མི་རྗོད། ཚིག་གི་ལམ་ལ་ཡང་མི་དཔྱོད་ལ། ཤེས་རབ་ཀྱིས་ཀྱང་བྱེ་བྲག་ཕྱེད་པར་འགྱུར་བ་དང་། ཤེས་པ་ཡང་གང་ཡང་མེད་ལ། འདི་ལ་རྣམ་པར་གྲོལ་བ་གང་ཡང་མེད་པ་དེ་ལྟར་དེ་བཞིན་གཤེགས་པ་ལ་ཞུ་བར་བྱེད་དོ། ། དེ་ཅིའི་ཕྱིར་ཞེ་ན། ཡི་གེ་སྟོང་པ་ཉིད་ཀྱི་ཕྱིར་དང་། ཐམས་ཅད་སྐྱེ་བ་མེད་པ་ཉིད་ཀྱི་ཕྱིར་རོ།། དེ་ནས་འཁོར་དེར་བྱང་ཆུབ་སེམས་དཔའ་གང་དག་འདུས་པར་གྱུར་པ་དེ་དག་འདི་སྙམ་དུ་སེམས་ཏེ། ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་དེ་ཁོ་ན་ལྟར་ལྡེམ་པོ་ངག་སྲེལ་ཞིང་འདུག་པའི་ཚིག་འདི་དག་ཀྱང་སྟོན་ལ། བརྗོད་པ་ཐམས་ཅད་ཀྱང་ཆོས་ཉིད་དང་མཐུན་པར་སྦྱོར་བ་ལས་ན། ཟབ་མོའི་ཤེས་རབ་དང་ལྡན་ནོ་སྙམ་མོ།། དེ་ནས་བཅོམ་ལྡན་འདས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་དེ་ཙམ་དུ་ཟབ་མོའི་བཟོད་པ་ལ་ངེས་ཤིང་། ཤེས་རབ་དང་སྤོབས་པ་སྟོན་པ་ལ་མཁས་པ་ནི་ངོ་མཚར་ལགས་སོ། ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཡུན་ཇི་སྲིད་ཅིག་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ། བཅོམ་ལྡན་འདས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ཀྱི་དོན་དང་། སྨན་པའི་སླད་དུ། དེ་བཞིན་གཤེགས་པས་ལེགས་པར་བཀའ་སྩལ་དུ་གསོལ། དེ་ལྟར་བགྱིས་ན་བྱང་ཆུབ་སེམས་དཔའི་ཐེག་པའི་རིགས་ཀྱི་བུ་འམ། རིགས་ཀྱི་བུ་མོ་རྣམས་ཀྱིས་གནས་དེ་དག་ཀྱང་ཐོས་ལ། འཇུག་པ་དེ་ཡང་ཐོས་ནས་སླར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩོན་པར་འགྱུར་ལགས་སོ། ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་ཡུན་རིང་པོ་ནས་ཚངས་པར་སྤྱད་པ་སྤྱད་དོ།། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་གྱི་རྒྱལ་བ་རྣམས་ལ་བྱ་བ་བྱས་སོ། ། དགེ་བའི་རྩ་བ་བསྐྱེད་དོ།། ཟབ་མོའི་བཟོད་པ་དང་ལྡན་ནོ།། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཡང་དག་པར་ཞུགས་ཏེ། བསྐལ་པ་བརྒྱད་ཁྲི་བཞི་སྟོང་ལོན་ནས། དེའི་འོག་ཏུ་གདོད་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ།། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གི་ཐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་མཚན་ཅི་ལགས། དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཀའ་སྩལ་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ།། རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ།། བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ།། བ་དང་། ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ།། ། རྣམ་པར་རྩེ་བ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཡུན་རིང་ཞིང་ཚད་མེད། བསམ་གྱིས་མི་ཁྱབ་དཔག་ཏུ་མེད་པའི་སྔོ་རོལ། དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་བཟངས་འོད་ཅེས་བྱ་བ་འཇིག་རྟེན་དུ་བྱུང་ངོ་། ། རིགས་ཀྱི་བུ་དེ་བཞིན་གཤེགས་པ་གསེར་བཟངས་འོད་ཀྱི་སྤུའི་ཁུང་བུ་རེ་རེ་ནས་འོད་ཟེར་བྱེ་བ་ཁྲག་ཁྲིག་འབུམ་ཕྲག་མང་པོ་བྱུང་སྟེ། དེ་བཞིན་གཤེགས་པའི་འོད་ཟེར་དེ་དག་ཀྱང་གསེར་གྱི་འོད་ལྟར་བཟང་ལ་འོད་ཟེར་རེ་རེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རེ་རེ་འོད་ཀྱིས་སྣང་བར་བྱེད་དོ། ། འོད་ཟེར་རེ་རེས་ཀྱང་པདྨ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཤར་ཕྱོགས་འགེངས་པར་བྱེད་དོ། ། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། ཕྱོགས་མཚམས་དང་། སྟེང་དང་འོག་ཀྱང་དེ་དང་འདྲའོ།། ཕྱོགས་རེ་རེར་ཡང་དེ་བཞིན་གཤེགས་པ་རེ་རེས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དུ་མ་འགེངས་པར་མཛད་དོ།། དེ་བཞིན་གཤེགས་པའི་སྐུ་རེ་རེས་ཀྱང་སེམས་ཅན་བྱེ་བ་ཁྲག་ཁྲིག་འབུམ་ཕྲག་ཏུ་མ་སངས་རྒྱས་དང་ཆོས་རྣམས་ལ་འདུལ་བར་མཛད་དེ། ཕྱིར་མི་ལྡོག་པ་ལ་འགོད་དོ།། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེའི་གསེར་གྱི་འོད་འཇིག་རྟེན་གྱི་ཁམས་རྟག་ཏུ་སྣང་བར་བྱེད་དོ། ། སངས་རྒྱས་ཀྱི་ཞིང་དེ་ན་ཉི་མ་དང་། ཟླ་བ་གཉིས་ཀྱི་མིང་མེད་དོ།། རྒྱུ་སྐར་དང་། གཟའ་དང་། སྐར་མ་དང་། མེའི་འོད་ཀྱི་མིང་ཡང་མི་གྲག་གོ། ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ།། བཙུན་པ་བཅོམ་ལྡན་འདས་དེ་ལྟ་ན།། སངས་རྒྱས་ཀྱི་ཞིང་དེ་ན་ཇི་ལྟར་གདུགས་མཚན་རྣམ་པར་གཞག་པར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་ཀྱི་སངས་རྒྱས་ཀྱི་ཞིང་དེ། ས་གཞི་ཆེན་པོ་དེ་རིན་པོ་ཆེ་སྣ་བདུན་ལས་གྲུབ་པ་ཡིན་ཏེ། ལག་མཐིལ་ལྟར་མཉམ་པར་གྱུར་ལ་རིན་པོ་ཆེ་སྣ་བདུན་གྱི་ས་གཞི་ཆེན་པོ་དེ་ལས་ཀྱང་རིན་པོ་ཆེ་སྣ་བདུན་གྱི་པདྨ་ཤིང་རྟའི་ཕང་ལོ་ཙམ་ལ་མཛེས་ཤིང་བལྟ་ན་སྡུག་པ་དང་། དྲི་ཞིམ་པོའི་ངད་ལྡང་ལ་ཡིད་དུ་འོང་བ་དག་མངོན་པར་འཕགས་ཏེ། པདྨ་རེ་རེ་ལས་དྲི་བསུང་གི་ངད་ལྡང་བའི་དྲི་དེས་ཀྱང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་སྟེ། སེམས་ཅན་གང་དག་གིས་དྲི་དེ་ཚོར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་སོ། ། པདྨ་དེ་དག་ཀྱང་སྔ་དྲོའི་དུས་ཀྱི་ཚེ་མེ་ཏོག་རྒྱས་ལ། ཕྱེ་མ་རེད་ཀྱི་དུས་ཀྱིས་ཚེ་ན་རྙིས་པར་འགྱུར་ཏེ། དེས་ན་སེམས་ཅན་དེ་དག་འདི་སྙམ་དུ་སེམས་ཏེ། ཕྱེ་མ་རེད་ཀྱི་དུས་ལ་བབ་བོ་སྙམ་མོ།། རིགས་ཀྱི་བུ་དེ་ལྟར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེའི་སངས་རྒྱས་ཀྱི་ཞིང་དེ་ན་ཉིན་མཚན་རྣམ་པར་གཞག་པར་མངོན་པ་ཡོད་དོ། ། རིགས་ཀྱི་བུ་སངས་རྒྱས་ཀྱི་ཞིང་དེ་ན་མི་ཁོམ་པ་བརྒྱད་ནི་ཐ་ན་མིང་ཙམ་ཡང་མེད་དོ།། སྡུག་བསྔལ་བའི་མིང་ཙམ་དང་། ཉན་ཐོས་དང་། རང་སངས་རྒྱས་རྣམས་ཀྱང་མིང་ཙམ་ཡང་མེད་དེ། སངས་རྒྱས་ཀྱི་ཞིང་དེ་ནི་བྱང་ཆུབ་སེམས་དཔའ་འཁྲིག་པའི་ཆོས་དང་བྲལ་བ། དྲི་ང་བ་མེད་པ་འབའ་ཤིག་གིས་ཡོངས་སུ་གང་བར་འགྱུར་ཏོ། ། འདུས་པ་རེ་རེ་ཡང་བྱང་ཆུབ་སེམས་དཔའ་ཁྲག་ཁྲིག་ཕྲག་བཅུ་གཉིས་ཡོད་དོ།། དེའི་མཇུག་ཏུ་བཅོམ་ལྡན་འདས་དེའི་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་འདུས་པར་འགྱུར་ཏོ།། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ་ཡང་ཆོས་གཞན་མི་སྟོན་ཏེ། བྱང་ཆུབ་སེམས་དཔའི་སྡེ་སྣོད་ཕྱིར་མི་ལྡོག་པའི་འཁོར་ལོ་འབའ་ཤིག་སྟོན་པར་མཛད་དོ། ། བྱང་ཆུབ་སེམས་དཔའི་སྡེ་སྣོད་ཕྱིར་མི་ལྡོག་པའི་འཁོར་ལོའི་ཆོས་ཀྱི་རྣམ་གྲངས་གང་ཞེ་ན། འདི་ལྟ་སྟེ། ཆོས་གང་ཡང་དེ་བཞིན་ཉིད་ལས་ཕྱིར་མི་ལྡོག་པ་དང་། ཆོས་གང་ཡང་ཆོས་ཀྱི་དབྱིངས་ལས་ཕྱིར་མི་ལྡོག་པ་དང་། ཆོས་གང་ཡང་ཡང་དག་པའི་མཐའ་ལས་ཕྱིར་མི་ལྡོག་པ་དང་། འདོད་ཆགས་འདོད་ཆགས་ཀྱི་ངོ་བོ་ཉིད་ལས་ཕྱིར་མི་ལྡོག་པ་དང་། ཞེ་སྡང་ཞེ་སྡང་གི་ངོ་བོ་ཉིད་ལས་ཕྱིར་མི་ལྡོག་པ་དང་། གཏི་མུག་གཏི་མུག་གི་ངོ་བོ་ཉིད་ལས་ཕྱིར་མི་ལྡོག་པ་དང་། གཟུགས་གཟུགས་ཀྱི་ངོ་བོ་ཉིད་ལས་ཕྱིར་མི་ལྡོག་པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྣམ་པར་ཤེས་པའི་ངོ་བོ་ཉིད་ལས་ཕྱིར་མི་ལྡོག་པ་དང་། མིག་མིག་གི་ངོ་བོ་ཉིད་ལས་ཕྱིར་མི་ལྡོག་པ་དང་། རྣ་བ་དང་། སྣ་དང་། ལྕེ་དང་ལུས་དང་། ཡིད་ཡིད་ཀྱི་ངོ་བོ་ཉིད་ལས་ཕྱིར་མི་ལྡོག་པ་དང་། ངོ་བོ་ཉིད་གང་ཡིན་པ་དེ་ནི་དངོས་པོ་མེད་ལ། དངོས་པོ་མེད་པ་གང་ཡིན་པ་དེ་ནི་གང་ནས་ཀྱང་ཕྱིར་མི་ལྡོག་ལ། གང་དུ་ཡང་མི་འཇུག་པའོ། ། རིགས་ཀྱི་བུ་དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ། སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་དེ་དག་ལ། བྱང་ཆུབ་སེམས་དཔའི་སྡེ་སྣོད་ཕྱིར་མི་ལྡོག་པའི་འཁོར་ལོའི་ཆོས་ཀྱི་རྣམ་གྲངས་ཡང་དག་པར་སྟོན་ཏོ། ། དེའི་ཚེ་ཆོས་ཀྱི་རྒྱལ་པོ་ཆོས་དང་ལྡན་པ། གླིང་བཞི་པའི་དབང་ཕྱུག་འཁོར་ལོས་སྒྱུར་བའི་རྒྱལ་པོ་གསེར་མདོག་ཅེས་བྱ་བ་ཞིག་བྱུང་ངོ་། ། རིགས་ཀྱི་བུ་རྒྱལ་པོ་གསེར་མདོག་དེས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ། བྱང་ཆུབ་སེམས་དཔའི་དགེ་འདུན་ཆེན་པོ་དང་བཅས་པ་ལ། ལོ་བྱེ་བ་ཕྲག་བརྒྱད་ཅུ་རྩ་བཞིའི་བར་དུ་མཆོད་པ་དང་། བསྙེན་བཀུར་ཐམས་ཅད་ཀྱིས་བསྙེན་བཀུར་བྱས། བླ་མར་བྱས། རི་མོར་བྱས་མཆོད་པར་བྱས་སོ། ། རིགས་ཀྱི་བུ་འདི་ལྟར་རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་འཁོར་དང་བཅས་པས་ཀྱང་། རྒྱལ་པོ་ཆེན་པོ་གསེར་མདོག་གི་བསམ་པ་རིག་ནས། བཅོམ་ལྡན་འདས་དེ་བཞིན་གཤེགས་པ་གསེར་བཟངས་འོད་དེ་ལ་བསྙེན་བཀུར་བྱ་བར་སྤྲོ་བར་གྱུར་ཏོ།། རིགས་ཀྱི་བུ་རྒྱལ་པོ་གསེར་མདོག་དེས། འཁོར་གྱི་ཁྱམས་དཔག་ཚད་བརྒྱད་ཅུ་རྩ་བཞི་པ་ཞིག་བྱས་ཏེ། འཁོར་གྱི་ཁྱམས་དེར་དར་གྱི་ལྡ་ལྡི་ནི་བྲེས། མེ་ཏོག་གིས་ནི་པུས་མོ་ནུབ་པ་ཙམ་དུ་ཁྱབ་པར་བྱས། སྟེང་གི་བར་སྣང་ལ་ནི་མུ་ཏིག་དམར་པོའི་དྲ་བ་བྲེས། སྙིང་པོའི་སྤོས་ཀྱི་མཆོག་གིས་ནི་གདུག་ཏེ། འཁོར་གྱི་ཁྱམས་དེར་དེ་བཞིན་གཤེགས་པ་དེའི་གདན་བྱེ་བ་འབུམ་ཕྲག་དགུ་བཅུ་རྩ་དགུ་རི་བའི་རས་བཅོས་བུ་བྱེ་བ་ཁྲག་ཁྲིག་འབུམ་ཕྲག་དུ་མ་བཏིང་བ་ཁྲིའི་རྐང་པ་རིན་པོ་ཆེ་དུ་མས་སྤྲས་པ་ཞིག་བཤམས་སོ། ། བྱང་ཆུབ་སེམས་དཔའ་རེ་རེའི་སྟན་ཡང་བྱེ་བ་ཕྲག་འབུམ་རི་བ་དག་བཤམས་སོ།། དེའི་ཚེ་དེ་བཞིན་གཤེགས་པ་དེ་དཔག་ཚད་ཉིས་སྟོང་ན་བཞུགས་ཏེ། རིགས་ཀྱི་བུ་འདི་ལྟར་རྒྱལ་པོ་གསེར་མདོག་གིས་གཤེགས་ཤུལ་དཔག་ཚད་ཉིས་སྟོང་ལེགས་པར་བརྒྱན་ནས། འདི་ལྟ་སྟེ། ལམ་དེའི་ངོས་གཡས་གཡོན་དུ་སྟེགས་བུ་རིན་པོ་ཆེ་སྣ་ཚོགས་ཀྱིས་སྤྲས་པ་དག་བྱས་སོ། ། ལམ་དེ་ཡང་པུས་མོ་ནུབ་པ་ཙམ་དུ་མེ་ཏོག་གིས་ཁེབས་པར་བྱས་སོ།། སྟེང་གི་བར་སྣང་ལ་རིན་པོ་ཆེ་སྣ་ཚོགས་ཀྱིས་དྲ་བའི་བླ་རེ་བྲེས་སོ།། སྟེགས་བུ་དེ་དག་ལ་ཡང་རིན་པོ་ཆེའི་ཤིང་ལྗོན་པ་འཕང་དུ་མདའ་རྒྱང་གང་ཙམ་ཡོད་པ་དག་བཙུགས་སོ། ། རིན་པོ་ཆེའི་ཤིང་ལྗོན་པ་གཅིག་ནས་རིན་པོ་ཆེའི་ཤིང་ལྗོན་པ་གཅིག་ཏུ་རིན་པོ་ཆེའི་ཐ་གུ་བྲེས་སོ།། རིན་པོ་ཆེའི་ཤིང་ལྗོན་པ་གཉིས་གཉིས་ཀྱི་བར་དུ། རྫིང་རིན་པོ་ཆེའི་སྟེགས་བུ་བསྐོར་བ། གསེར་གྱི་བྱེ་མ་བདལ་བ། བཻཌུཪྻའི་ཐེམ་སྐས་ཀྱི་རིམ་པ་བཅས་པ། མེ་ཏོག་ཨུཏྤ་ལ་དང་། པདྨ་དང་། ཀུ་མུ་ཏ་དང་པདྨ་དཀར་པོས་གང་བ། ངུར་པ་སྐད་འབྱིན་པ་དང་ལྡན་པ་དག་བྱས་སོ།། དེ་བཞིན་དུ་རིན་པོ་ཆེའི་ཤིང་ལྗོན་པའི་བར་ཐམས་ཅད་དུ་ཡང་རྫིང་དག་བྱས་ཏེ། བཀོད་པ་དེ་ཁོ་ན་དང་འདྲ་བར་བཀོད་དོ།། རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་དུ་མེ་ཏོག་སིལ་མ་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ། ། རིན་པོ་ཆེའི་སྤོས་ཀྱི་སྣོད་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ།། རྔ་བོ་ཆེ་དང་། རྫ་རྔ་དང་འཁར་རྔ་དང་། ཀིམ་པ་ལ་དང་། པི་ཝང་དང་། འཁར་དཀྲོལ་ལ་སོགས་པ་རོལ་མོའི་ཆ་བྱད་རྣམ་པ་སྣ་ཚོགས་པའི་མི་ལྔ་བརྒྱ་ལྔ་བརྒྱ་བཀོད་དོ།། གདུགས་དང་། རྒྱལ་མཚན་དང་། བ་དན་ཐོགས་པའི་མི་ལྔ་བརྒྱ་ལྔ་བརྒྱ་བཀོད་དོ། ། དེ་ལྟར་རིན་པོ་ཆེའི་ཤིང་ལྗོན་པ་རེ་རེའི་དྲུང་ཐམས་ཅད་དུ། མི་བརྒྱ་ཕྲག་དེ་སྙེད་དེ་སྙེད་བཀོད་ནས། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་གསེར་བཟང་འོད་ཕན་ཚུན་དུ་གཤེགས་པ་དེའི་ཚེ། ཁྱེད་ཀྱིས་མེ་ཏོག་སིལ་མ་འདི་དག་གིས་གཏོར་ཅིག། ཙན་དན་གྱི་ཕྱེ་མ་འདི་དག་གིས་གཏོར་ཅིག། པོག་པོར་འདི་དག་གིས་བདུག་པར་གྱིས་ཤིག། སིལ་སྙན་འདི་དག་ཀྱང་དཀྲོལ་ཅིག། གདུགས་དང་། རྒྱལ་མཚན་དང་། བ་དན་འདི་དག་ཀྱང་བསྒྲེངས་ཤིག་ཅེས་བསྒོའོ།། རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་དུ། རིན་པོ་ཆེའི་མེ་ཏོག་གི་སྣོད་ཐོགས་པའི་མི་ལྔ་བརྒྱ་ལྔ་བརྒྱ་ཡང་བཀོད་དོ། ། ལྷག་མ་རྣམས་ཀྱང་དེ་བཞིན་དུ་སྦྱར་ཏེ། གང་གི་ཚེ་དེ་བཞིན་གཤེགས་པ་དེ། ལམ་འདི་ནས་ཕན་ཚུན་དུ་གཤེགས་པ་དེའི་ཚེ། ཁྱེད་ཀྱིས་རིན་པོ་ཆེའི་མེ་ཏོག་འདི་དག་གིས་གཏོར་ཅིག་ཅེས་བསྒོའོ། ། རིགས་ཀྱི་བུ་དེ་དེ་ལྟར་བཅོམ་ལྡན་འདས་དེ་བཞིན་གཤེགས་པ་གསེར་བཟངས་འོད་དེ། གཙུག་ལག་ཁང་དེ་ནས་བྱུང་མ་ཐག་ཏུ་འཁོར་གྱི་ཁྱམས་སུ་གཤེགས་ཏེ། དེའི་བར་དུ་གཙུག་ལག་ཁང་ནས། བྱང་ཆུབ་སེམས་དཔའ་རྣམས་ལ་སྣང་བ་བྱུང་ངོ་།། རིགས་ཀྱི་བུ་འདི་ལྟར་ལམ་དཔག་ཚད་ཉིས་སྟོང་པོ་དེ་དག། བྱང་ཆུབ་སེམས་དཔའ་སེམས་དཔའ་ཆེན་པོས་གང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རེ་རེ་ཕན་ཚུན་དུ་མདོམ་རེ་ཙམ་ན་འགྲེང་ངོ་།། རིགས་ཀྱི་བུ་འདི་ལྟར་དེ་བཞིན་གཤེགས་པ་དེ་ཕན་ཚུན་དུ་གཤེགས་པ་ན། འདི་ལྟ་སྟེ། སངས་རྒྱས་ཀྱི་མཐུས་བྱང་ཆུབ་སེམས་དཔའ་རེ་རེའི་མགོ་བོའི་དྲང་ཐད་ཀྱི་སྟེང་ན། དངུལ་གྱི་གདུགས་དཀར་པོ་གསེར་གྱི་རྩ་བ་ཅན། མུ་ཏིག་དམར་པོའི་དྲ་བས་གཡོགས་པ་གསེར་གྱི་དྲིལ་བུ་གཡེར་ཀའི་དྲ་བས་བསྐོར་བ། མ་བཟུང་བར་ནམ་མཁའ་ལ་ཕན་ཚུན་དུ་འགྲོའོ།། བྱང་ཆུབ་སེམས་དཔའ་ཐམས་ཅད་ཀྱང་དེ་དང་འདྲའོ། ། རིན་པོ་ཆེའི་གདུགས་དེ་དག་ལ་དྲིལ་བུ་གཡེར་ཀའི་དྲེ་བ་བཏགས་པ་གང་ཡིན་པ་དེ་དག་རླུང་གིས་བསྐྱོད་པ་ལས། སྒྲ་སྙན་ཅིང་ཡིད་དུ་འོང་བ་འབྱུང་སྟེ། རིན་པོ་ཆེའི་གདུགས་དེ་དག་རླུང་གིས་བསྐྱོད་པ་ལས། སྒྲ་ཇི་ལྟ་བུ་འབྱུང་བ་དེ་འདྲ་བ་ནི་སིལ་སྙན་ཡན་ལག་འབུམ་དང་ལྡན་པ་ལས་ཀྱང་མི་འབྱུང་ངོ་།། རིན་པོ་ཆེའི་གདུགས་དང་། དྲིལ་བུ་གཡེར་ཀ་དེ་དག་དང་རིན་པོ་ཆེའི་ཤིང་ལྗོན་པའི་ལོ་མ་དེ་དག་དང་། རིན་པོ་ཆེའི་ཐ་གུ་དེ་དག་དང་། རིན་པོ་ཆེའི་སྟེགས་བུ་དེ་དག་དང་། སིལ་སྙན་དང་། ཀླུ་དབྱངས་དེ་དག་ལས་ཀྱང་སངས་རྒྱས་ཀྱི་མཐུས། ཆོས་ཀྱི་སྒོ་རྣམ་པ་སྣ་ཚོགས་ཀྱི་སྒྲ་འབྱུང་སྟེ། དེ་ནས་སེམས་ཅན་གང་དག་སྦྱིན་པ་ལ་མོས་པ་དེ་དག་གིས་ནི་སྦྱིན་པའི་སྒྲ་ཐོས་སོ།། གང་དག་ཚུལ་ཁྲིམས་ལ་མོས་པ་དེ་དག་གིས་ནི་ཚུལ་ཁྲིམས་ཀྱི་སྒྲ་ཐོས་སོ། ། དེ་བཞིན་དུ་གང་དག་བཟོད་པ་དང་། བརྩོན་འགྲུས་དང་། བསམ་གཏན་ལ་མོས་པ་དང་། གང་དག་ཤེས་རབ་ལ་མོས་པ་དེ་དག་གིས་ནི་ཤེས་རབ་ཀྱི་སྒྲ་ཐོས་སོ།། དེ་བཞིན་དུ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། འགག་པ་མེད་པའི་སྒྲ་དང་། དེ་བཞིན་དུ་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་གྱི་སྒྲ་དང་། དེ་བཞིན་དུ་མངོན་པར་ཤེས་པ་དང་། སྟོབས་དང་། མི་འཇིགས་པ་དང་། སོ་སོ་ཡང་དག་པར་རིག་པ་དང་། སངས་རྒྱས་ཀྱི་ཆོས་མ་འདྲེས་པ་དག་གི་སྒྲ་འབྱུང་སྟེ། སེམས་ཅན་རྣམས་ཇི་ལྟ་བུར་མོས་པ་དེ་ལྟ་བུའི་སྒྲ་འབྱུང་ཞིང་ཐོས་སོ། ། ཆོས་ཀྱི་སྒྲ་དེ་ཐོས་ནས་ཀྱང་སེམས་ཅན་དཔག་ཏུ་མེད། གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ།། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ། ལམ་དེ་ནས་ཕན་ཚུན་དུ་གཤེགས་པ་ན། དབུའི་དྲང་ཐད་ཀྱི་སྟེང་གི་བར་སྣང་ལ། རིན་པོ་ཆེ་འབུམ་ཕྲག་དུ་མས་སྤྲས་པའི་ལྷའི་རིན་པོ་ཆེའི་གདུགས་མ་བཟུང་བར་འཕགས་ཏེ་ཕན་ཚུན་དུ་འགྲོའོ། ། རིན་པོ་ཆེའི་གདུགས་དེ་དང་དྲིལ་བུ་གཡེར་ཀ་དེ་དག་རླུང་གིས་བསྐྱོད་པ་ལས་སྒྲ་སྙན་ཅིང་ཡིད་དུ་འོང་བ་བྱུང་སྟེ། དེ་བཞིན་གཤེགས་པའི་ཕྱག་རྒྱ་ཞེས་བྱ་བའི་ཆོས་བསྟན་པ་བྱུང་ངོ་། ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་དེ་བཞིན་གཤེགས་པ་གསེར་བཟངས་འོད་དེའི་རིན་པོ་ཆེའི་གདུགས་དེ་ལས་བྱུང་བ། དེ་བཞིན་གཤེགས་པའི་ཕྱག་རྒྱ་ཞེས་བགྱི་བའི་ཆོས་བསྟན་པ་གང་ལགས་པ་དེ། བཅོམ་ལྡན་འདས་དེ་བཞིན་གཤེགས་པས་ལེགས་པར་བཀའ་སྩལ་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། དེ་བཞིན་གཤེགས་པའི་ཕྱག་རྒྱའི་བརྩམས་པ་ཙམ་ངས་བཤད་པར་བྱའོ།། རིགས་ཀྱི་བུ་ཆོས་ཐམས་ཅད་ནི་སྟོང་པ་ཉིད་ཀྱི་ཕྱག་རྒྱ་དང་། མཚན་མ་མེད་པའི་ཕྱག་རྒྱ་དང་། སྨོན་པ་མེད་པའི་ཕྱག་རྒྱ་དང་། སྐྱེ་བ་མེད་པ་དང་། འགག་པ་མེད་པ་དང་། གནས་པ་མེད་པའི་ཕྱག་རྒྱ་དང་། དངོས་པོ་མེད་པའི་ཕྱག་རྒྱ་དང་། ཆོས་ཀྱི་དབྱིངས་ཀྱི་ཕྱག་རྒྱ་དང་། དེ་བཞིན་ཉིད་ཀྱི་ཕྱག་རྒྱ་དང་། ཡང་དག་པའི་མཐའི་ཕྱག་རྒྱ་དང་། ཇི་ལྟ་བ་བཞིན་གྱི་ཕྱག་རྒྱ་དང་། འདོད་ཆགས་དང་བྲལ་བའི་ཕྱག་རྒྱ་དང་། དབེན་པའི་ཕྱག་རྒྱ་དང་། རྣམ་པར་གྲོལ་བའི་ཕྱག་རྒྱ་དང་། མཚན་ཉིད་མེད་པའི་ཕྱག་རྒྱ་དང་། བྱེད་པ་མེད་པ་དང་། འགྲོ་བ་མེད་པའི་ཕྱག་རྒྱ་དང་། གཟུང་དུ་མེད་པ་དང་། གནས་མེད་པའི་ཕྱག་རྒྱས་བཏབ་བོ།། རིགས་ཀྱི་བུ་ཆོས་ཐམས་ཅད་ནི་ནམ་མཁའི་ཕྱག་རྒྱས་བཏབ་བོ།། རིགས་ཀྱི་བུ་དཔེར་ན། ནམ་མཁའ་ལ་ནི་ཕྱག་རྒྱ་བརྐོ་བར་བླ་བ་ཡང་མ་ཡིན་ལ། ཕྱག་རྒྱར་ཡང་འདུག་པ་དང་། ཕྱག་རྒྱའི་འབུར་ཡང་གདགས་སུ་མེད་དེ། དེ་ཅིའི་ཕྱིར་ཞེ་ན། གནས་ཀྱང་མེད། རྐྱེན་ཀྱང་མེད། རྒྱུ་ཡང་མེད། སྐྱེད་པ་ཡང་མེད། རྟེན་ཡང་མེད་པའི་ཕྱིར། རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ནམ་མཁའ་དང་འདྲ་བ་དང་། ནམ་མཁའི་རྣམ་པ་ཅན་དང་། ནམ་མཁའི་ངོ་བོ་ཉིད་དང་། ནམ་མཁར་སྟོན་པར་ཡང་དག་པར་ཤེས་པ་དང་། ནམ་མཁའ་ལ་ནི་ཆོས་ཐམས་ཅད་གདགས་སུ་མེད་པར་གནས་ཏེ། གདགས་པ་ཙམ་དུ་ཟད་དོ།། ཇི་ལྟར་ནམ་མཁའི་ཆོས་ཐམས་ཅད་གདགས་སུ་མེད་པར་གནས་ཏེ། གདགས་པ་ཙམ་དུ་ཟད་པ་དེ་བཞིན་དུ་ཆོས་ཐམས་ཅད་ལ་ཡང་གདགས་སུ་མེད་པར་གནས་ཏེ། གདགས་པ་ཙམ་དུ་ཟད་པར་ཡང་དག་པར་ཤེས་པ་དང་། གང་ཆོས་རྣམས་གདགས་པ་ཙམ་དུ་ཤེས་པ་དེ་ནི་དེ་བཞིན་ཉིད་དང་འགལ་བར་མི་བྱེད་པའོ། ། གང་དེ་བཞིན་ཉིད་དང་འགལ་བར་མི་བྱེད་པ་དེ་ནི་དེ་བཞིན་གཤེགས་པའི་ཕྱག་རྒྱ་ཤེས་པའོ།། འདི་ནི་དེ་བཞིན་གཤེགས་པའི་ཕྱག་རྒྱ་སྟེ། དེས་ན་དེ་བཞིན་ཉིད་ལ་རྨོངས་པར་མི་འགྱུར་རོ། ། བསྟན་པ་འདི་བཤད་པ་ན། བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ།། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་བཀའ་སྩལ་པ། རིགས་ཀྱི་བུ་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ། བྱང་ཆུབ་སེམས་དཔའི་དགེ་འདུན་དང་བཅས་པར་འཁོར་གྱི་ཁྱམས་དེར་གཤེགས་ཏེ། དེར་བྱོན་པ་དང་། ལྷ་འབུམ་དག་མཆོད་པའི་ལས་བྱ་བ་ལ་སྤྲོ་བར་གྱུར་ཏེ། མེ་ཏོག་ཨུཏྤལ་དང་། པདྨ་དང་། ཀུ་མུ་ཏ་དང་། པདྨ་དཀར་པོ་རྣམས་འཐོར་བར་བྱེད་དོ། ། ལྷའི་མེ་ཏོག་མནྡ་ར་བའི་ཆར་ཡང་འབེབས་སོ།། སིལ་སྙན་བྱེ་བ་ཕྲག་འབུམ་དག་ཀྱང་དཀྲོལ་བར་བྱེད་དོ།། རིགས་ཀྱི་བུ་འདི་ལྟར་དེ་བཞིན་གཤེགས་པ་གསར་བཟངས་འོད་དེས། འཁོར་གྱི་ཁྱམས་དེར་བཞུགས་པ་ན། རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་མཆོད་པའི་ལས་བྱ་བ་དང་། སྙེན་བཀུར་བྱ་བ་དང་། བླ་མར་བྱ་བའི་ཕྱིར་ཉེ་བར་གནས་པར་གྱུར་ཏེ། མཆོད་པ་ཇི་ལྟ་བུ་དག་གི་ཕྱིར་སྤྲོ་བར་གྱུར་ཅེ་ན། འདི་ལྟ་སྟེ། དེ་བཞིན་གཤེགས་པ་དེ་བྱང་ཆུབ་སེམས་དཔའི་དགེ་འདུན་དང་བཅས་པ་བཞུགས་པ་ལ་བྱང་ཆུབ་སེམས་དཔའ་རེ་རེའི་རྒྱབ་ན་གླང་པོ་ཆེ་དཀར་པོ་རྒྱན་ཐམས་ཅད་ཀྱིས་བརྒྱན་པ་ཉེ་བར་གནས་ལ། གླང་པོ་ཆེའི་རྒྱལ་པོ་དེའི་སྣ་ལ་ཡང་འདི་ལྟ་སྟེ། རླུང་དང་ཉི་མ་བསྐྱབ་པའི་ཕྱིར། རིན་པོ་ཆེའི་གདུགས་གསལ་ཞིང་བལྟ་ན་སྡུག་པ་ཐོགས་པ་དང་། གླང་པོ་ཆེའི་རྒྱལ་པོ་ཐམས་ཅད་ཀྱི་སྣ་ལ་ཡང་། མུ་ཏིག་སྔོན་པོ་གསལ་བའི་མུ་ཏིག་གི་ངོ་ཤལ་འཕྱང་བ་དང་། མུ་ཏིག་གི་དོ་ཤལ་དེ་ལས་ཀྱང་། ཆུ་བསིལ་ཤིང་བཻ་ཌཱུཪྻ་སྔོན་པོ་འདྲ་ལ། ཡན་ལག་བརྒྱད་དང་ལྡན་པ་འབབ་སྟེ། ཆུ་དེས་ཆུའི་བྱ་བ་བྱེད་པའོ།། བྱང་ཆུབ་སེམས་དཔའ་དག་འཁོད་པ་དག་ཏུ། འདི་ལྟ་སྟེ། ལྷའི་མཐུས་ལག་པ་གཡས་པ་ལ་རིན་པོ་ཆེའི་ལྷུང་བཟེད་བྱུང་བར་གྱུར་ཏོ། ། ལྷ་རྣམས་ཀྱང་བྱང་ཆུབ་སེམས་དཔའ་དེ་དག་གི་ལྷུང་བཟེད་འཛིན་པར་བྱེད་དོ།། དེ་བཞིན་གཤེགས་པ་གསེར་བཟངས་འོད་དེ་ལ་ནི་ཚངས་པ་ཉིད་རིན་པོ་ཆེའི་གདུག་ཐོགས་ཏེ་སྣམ་ལོགས་ན་འདུག་གོ། རིན་པོ་ཆེའི་གདུགས་དེ་ལས་ཀྱང་མུ་ཏིག་གི་དོ་ཤལ་དག་འཕྱང་ངོ་།། མུ་ཏིག་གི་དོ་ཤལ་དེ་དག་ལས་ཀྱང་། ཆུ་བསིལ་ཞིང་བཻ་ཌཱུཪྻ་སྔོན་པོ་འདྲ་ལ། ཡན་ལག་བརྒྱད་དང་ལྡན་པ་འབབ་སྟེ། ཆུ་དེས་དེ་བཞིན་གཤེགས་པ་དེའི་ཆུའི་བྱ་བ་མཛད་དོ།། ལྷའི་དབང་པོ་བརྒྱ་བྱིན་ནི་བཅོམ་ལྡན་འདས་དེའི་ལྷུང་བཟེད་འཛིན་ཏོ།། རིགས་ཀྱི་བུ་འདི་ལྟར་དེ་བཞིན་གཤེགས་པ་དེ་བྱང་ཆུབ་སེམས་དཔའི་འཁོར་དང་བཅས་པར་བཞུགས་ན་ཐག་ཏུ། བྱང་ཆུབ་སེམས་དཔའ་དེ་དག་ལ་ལྷ་མོ་རེ་རེ་མདུན་ན་འདུག་སྟེ། ལྷའི་སྤོས་དྲི་ཞིམ་པོ་སྣ་དུ་མ་མཆིག་ལ་འཐག་པར་བྱེད་དོ།། སྤོས་དེ་འཐག་པ་ན་ཡང་རྫི་ཕྱོགས་དང་རྫི་ཕྱོགས་མ་ཡིན་པར་སེར་བུ་ལྡང་སྟེ། སེར་བུ་དེས་བྱང་ཆུབ་སེམས་དཔའ་དེ་དག་གི་ལུས་ལ་སྤོས་ཀྱིས་ཕོག་པར་བྱེད་དོ། ། སྐྱེས་བུ་དམ་པ་དེ་དག་ནི་དྲི་ང་བ་མེད་པ་སྟེ། དེ་དག་ནི་ལྷ་མོའི་འདུ་ཤེས་ཀྱང་མཇུག་པར་མི་བྱེད་ལ། དེ་དག་ནི་སྤོས་ཀྱི་མཚན་མ་ཡང་མི་སྐྱེད་ན། ཆགས་པར་ལྟ་ག་ལ་འགྱུར་ཏེ། དེ་ནི་གནས་མེད་དོ། ། རིགས་ཀྱི་བུ་འདི་ལྟར་རྒྱལ་པོ་གསེར་མདོག་དེས། དེ་བཞིན་གཤེགས་པ་གསེར་བཟངས་འོད་བཞུགས་པར་རིག་ནས། བུ་སྟོང་དང་། བུད་མེད་བརྒྱད་ཁྲི་བཞི་སྟོང་དང་། རྒྱལ་པོ་བརྒྱད་ཁྲི་བཞི་སྟོང་དང་། ཁྱིམ་བདག་བརྒྱད་ཁྲི་བཞི་སྟོང་དང་། ཚོང་དཔོན་བརྒྱད་ཁྲི་བཞི་སྟོང་དང་། བློན་པོ་བརྒྱད་ཁྲི་བཞི་སྟོང་དང་། བུ་མོ་བརྒྱད་ཁྲི་བཞི་སྟོང་དང་། གཞན་ཡང་སྐྱེ་བོའི་ཚོགས་མང་པོ་དག་དང་ལྷན་ཅིག་ཏུ། རང་གི་ལག་ནས་བཅའ་བ་དང་། བཟའ་བ་བསོད་པ་མང་པོ་མཆོག་ཏུ་གཙང་བས་ཚིམ་པར་བྱས་ཏེ། ཅི་བཞེད་པ་བསྟབས་སོ།། ཚིམ་པར་བྱས་ཤིང་ཅི་བཞེད་པ་བསྟབས་ཏེ། བཤོས་གསོལ་ནས་གསང་སྡེར་སྒྱུ་སྟེ། ཕྱག་བཅབས་པར་རིག་ནས། དེ་བཞིན་གཤེགས་པ་ལ་བྱེ་བ་འབུམ་ཕྲག་དགུ་བཅུ་རྩ་དགུ་རི་བའི་རས་བཅོས་བུ་ཐུགས་ཅིག་ཕུལ་ལོ། ། བྱང་ཆུབ་སེམས་དཔའ་རེ་རེ་ལ་ཡང་བྱེ་བ་ཕྲག་འབུམ་རི་བའི་རས་བཅོས་བུ་ཕྲུགས་རེ་རེ་ཕུལ་ལོ།། ཕུལ་ནས་ཀྱང་སྐྱེ་བོའི་ཚིགས་དེ་དག་དང་། ཡུལ་མི་གཙོ་བོ་རྣམས་དང་ལྷན་ཅིག་ཏུ་ཐལ་མོ་སྦྱར་ནས། འདི་ལྟ་སྟེ། ཆོས་མཉན་པ་ལ་གུས་པའི་ཕྱིར། དེ་བཞིན་གཤེགས་པའི་སྤྱན་སྔར་འཁོད་དོ།། རིགས་ཀྱི་བུ་འདི་ལྟར་དེ་བཞིན་གཤེགས་པ་གསེར་བཟངས་འོད་དེས་སྐྱེ་བོའི་ཚོགས་ཆེན་པོ་གུས་པས་འཁོད་པ་དང་། བྱང་ཆུབ་སེམས་དཔའ་རྣམས་ཆོས་འདོད་པར་ཐུགས་སུ་ཆུད་ནས། སྒོ་སོ་སོ་བ་ཞེས་བྱ་བའི་ཆོས་ཀྱི་རྣམ་གྲངས་བསྟན་ཏོ།། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་གང་བཅོམ་ལྡན་འདས་དེ་བཞིན་གཤེགས་པ་གསེར་བཟངས་འོད་དེས་བསྟན་པའི་བྱང་ཆུབ་སེམས་དཔའ་རྣམས་ཀྱི་སྒོ་སོ་སོ་བཞི། བྱ་བ་ཆོས་ཀྱི་རྣམ་གྲངས་དེ་གང་ལགས། བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་དེ་ལེགས་པར་བཀའ་སྩལ་དུ་གསོལ། དེ་ལྟར་བགྱིས་ན་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་འམ། རིགས་ཀྱི་བུ་མོ་རྣམས་ཀྱང་སྒོས་པའི་ཆོས་ཀྱི་རྣམ་གྲངས་དེ་ལ་སློབ་པར་འགྱུར་བ་ལགས་སོ། ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ།། རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། སྒོ་སོ་སོ་བའི་ཆོས་ཀྱི་རྣམ་གྲངས་དེ་ལས་བརྩམ་པ་ཙམ་ཞིག་བཤད་པར་བྱའོ།། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྒོས་སོ་བ་ནི་གཞན་མ་ཡིན་གྱི། ཕ་རོལ་ཏུ་ཕྱིན་པ་དྲུག་ཁོ་ནར་ཟད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྒོ་སོ་སོ་བ་ནི་དེ་ཡིན་ནོ། ། དེ་ཅིའི་ཕྱིར་ཞེ་ན། འདི་ཉིད་ལ་སྔོན་གྱི་དེ་བཞིན་གཤེགས་པ་རྣམས་ཀྱིས་ཀྱང་བསླབས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་ཡང་བསྐོར། སེམས་ཅན་རྣམས་ཀྱང་ཡོངས་སུ་སྨིན་པར་མཛད་ནས། ཡོངས་སུ་མྱ་ངན་ལས་འདས་ལ། མ་འོངས་པའི་དེ་བཞིན་གཤེགས་པ་རྣམས་ཀྱང་སྒོ་སོ་སོ་བ་འདི་ཉིད་ལ་བསླབས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་། ད་ལྟར་བྱུང་བའི་དུས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་ན་བཞུགས་ཤིང་འཚོལ་གཞེས་པའི་དེ་བཞིན་གཤེགས་པ་དེ་དག་ཀྱང་སྒོ་སོ་སོ་བའི་ཆོས་ཀྱི་རྣམ་གྲངས་འདི་ཉིད་ལ་བསླབས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བར་མཛད་པའི་ཕྱིར་རོ། ། རིགས་ཀྱི་བུ་གང་བྱང་ཆུབ་སེམས་དཔའི་སྒོ་སོ་སོ་བ་ཡང་དག་པར་སྨྲ་བས་སྨྲ་བ་ནི། ཕ་རོལ་ཏུ་ཕྱིན་པ་དྲུག་པོ་འདི་དག་ཉིད་ཡང་དག་པར་སྨྲ་བས་སྨྲ་བའོ།། དེ་ལ་སྒོ་སོ་སོ་བ་དེའི་བྱེ་བྲག་ནི་གང་ཡིན། ཉེས་པ་ནི་གང་ཡིན། རྣམ་པར་གནོན་པ་ནི་གང་ཡིན། ངེས་པར་འབྱུང་བ་ནི་གང་ཡིན་ཞེ་ན། སེར་སྣའི་སེམས་ནི་བྱང་ཆུབ་སེམས་དཔའི་ཉེས་པའོ།། ཀུན་ཏུ་འཛིན་པའི་སེམས་ནི་བྱང་ཆུབ་སེམས་དཔའི་ཉེས་པའོ།། ཡོངས་སུ་འཛིན་པའི་སེམས་ནི་བྱང་ཆུབ་སེམས་དཔའི་ཉེས་པའོ། ། ནོར་ཀུན་ཏུ་སྲུང་བ་ལ་བགོ་བ་ཤར་མི་བྱེད་པ་ནི་བྱང་ཆུབ་སེམས་དཔའི་ཉེས་པའོ།། དེ་ལ་བྱང་ཆུབ་སེམས་དཔའ་གང་སེར་སྣའི་སེམས་རྣམ་པར་གནོན་ཅིང་བཅོམ་ནས། སྦྱིན་པ་ཡིད་ལ་བྱེད་པ་སྐྱེད་པ་དེ་ནི་དེའི་རྣམ་པར་གནོན་པ་ཡིན་ནོ། ། དེ་ལོངས་སྤྱོད་ཇི་ལྟར་ཆུང་ཡང་རུང་ལོངས་སྤྱོད་རྒྱ་ཆེན་པོ་དག་ཀྱང་རུང་སྟེ། དགེ་སྦྱོང་དང་། བྲམ་ཟེ་དང་། སློང་བ་རྣམས་ལ་བགོ་བཤའ་བྱེད་ལ། དེ་དགའ་བའི་སེམས་དང་། ཀུན་ཏུ་འཛིན་པ་མེད་པའི་སེམས་དང་། མགུ་བའི་སེམས་དང་། རྣམ་པར་སྨིན་པ་ལ་རེ་བ་མེད་པར་སེམས་ཅན་ཐམས་ཅད་ལ་སྙིང་རྗེ་བས་ཕན་པའི་དངོས་པོ་སྔོན་དུ་བཏང་བའི་སེམས་བསྐྱེད་པས་ལག་བརྐྱང་སྟེ། སྦྱིན་པ་སྦྱིན་པར་བྱེད་པའི་བྱང་ཆུབ་སེམས་དཔའ་དེ་ནི་སྒོ་སོ་སོ་བ་ལ་སློབ་པ་ཡིན་ཏེ། འདི་ནི་བྱང་ཆུབ་སེམས་དཔའ་ངེས་པར་འབྱུང་བའོ།། རིགས་ཀྱི་བུ་འཆལ་པའི་ཚུལ་ཁྲིམས་ནི་བྱང་ཆུབ་སེམས་དཔའི་ཉེས་པའོ།། ཉམས་པའི་ཚུལ་ཁྲིམས་དང་། འདྲེས་པའི་ཚུལ་ཁྲིམས་དང་། ཞིག་པའི་ཚུལ་ཁྲིམས་དང་། རལ་བའི་ཚུལ་ཁྲིམས་དང་། ནག་ནོག་གི་ཚུལ་ཁྲིམས་ནི་བྱང་ཆུབ་སེམས་དཔའི་ཉེས་པའོ།། བྱང་ཆུབ་སེམས་དཔའི་འཆལ་པའི་ཚུལ་ཁྲིམས་དང་། ཉམས་པའི། ཚུལ་ཁྲིམས་དང་། འདྲེས་པའི་ཚུལ་ཁྲིམས་དང་། ཞིག་པའི་ཚུལ་ཁྲིམས་དང་། རལ་བའི་ཚུལ་ཁྲིམས་དང་། ནག་ནོག་གི་ཚུལ་ཁྲིམས་གང་ཞེ་ན། བྱང་ཆུབ་སེམས་དཔའ་གང་ཉན་ཐོས་ཀྱི་སེམས་སམ། རང་སངས་རྒྱས་ཀྱི་སེམས་སམ། དམིགས་པ་ཅན་གྱི་སེམས་བསྐྱེད་པ་དང་། ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པ་འམ། དམིགས་པའི་ལྟ་བ་འདོད་པ་དང་། ཉན་ཐོས་ཀྱི་གཏམ་མམ། རང་སངས་རྒྱས་ཀྱི་གཏམ་མམ། དམིགས་པ་ཅན་གྱི་གཏམ་ལ་དགའ་བར་འཛིན་པ་འདི་ནི་བྱང་ཆུབ་སེམས་དཔའི་ཚུལ་ཁྲིམས་འཆལ་པ་དང་། ཚུལ་ཁྲིམས་ཉམས་པ་དང་། ཚུལ་ཁྲིམས་འདྲེས་པ་དང་། ཚུལ་ཁྲིམས་ཞིག་པ་དང་། ཚུལ་ཁྲིམས་རལ་བ་དང་། ཚུལ་ཁྲིམས་ནག་ནོག་ཅན་ཞེས་བྱའོ།། བྱང་ཆུབ་སེམས་དཔའི་སྒོ་སོ་སོ་བ་ལ་མི་སྤྱོད་པ་དང་། མི་སློབ་པ་ནི་ཚུལ་ཁྲིམས་འཆལ་པའི་རབ་ཡིན་ནོ།། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཅིའི་སླད་དུ། བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པའི་བསླབ་པ་གཞན་ལས་འགལ་བ་བགྱིས་ན་ནི། ཚུལ་ཁྲིམས་འཆལ་བར་མི་འགྱུར་ལ། གང་གི་ཚེ་ཉན་ཐོས་ཀྱི་སེམས་སམ། རང་སངས་རྒྱས་ཀྱི་སེམས་སམ། དམིགས་པ་ཅན་གྱི་སེམས་བསྐྱེད་པ་དེའི་ཚེ་ནི་ཚུལ་ཁྲིམས་འཆལ་པའི་རབ་ཏུ་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ།། རིགས་ཀྱི་བུ་བྱང་ཆུབ་སེམས་དཔས་དེ་བཞིན་གཤེགས་པའི་བསླབ་པ་གཞན་ལས་འགལ་པབར་བྱས་སམ། ངས་ལྟུང་བར་འགྱུར་བའི་ཆོས་བཞི་གང་དག་གསུངས་པ་དེ་དག་གི་ཉེས་པ་བྱས་སམ། མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཏེ་འདུག་གམ། མཚམས་མེད་པ་ལྔ་བྱས་སུ་ཟིན་ཀྱང་། བྱང་ཆུབ་སེམས་དཔའ་དེ་བྱང་ཆུབ་ཀྱི་སེམས་ཀྱང་མ་བཏང་མ་སྤངས་ཏེ། བྱང་ཆུབ་ཀྱི་སེམས་དང་མ་བྲལ་ལ། དམིགས་པ་ཅན་གྱི་སེམས་དང་། མངོན་པར་ཞེན་པའི་སེམས་ཀྱང་མི་བསྐྱེད་ན། བྱང་ཆུབ་སེམས་དཔའ་དེ་ནི་ཚུལ་ཁྲིམས་དང་ལྡན་པ་ཁོ་ན་ཡིན་པ་དང་། ཚུལ་ཁྲིམས་མ་ཉམས་པ་དང་། ཚུལ་ཁྲིམས་མ་འདྲེས་པ་དང་། ཚུལ་ཁྲིམས་མ་ཞིག་པ་དང་། ཚུལ་ཁྲིམས་མ་རལ་བ་དང་། ཚུལ་ཁྲིམས་ན་ག་ནོག་ཅན་མ་ཡིན་པར་གཟུང་བར་བྱ་སྟེ། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང་སློབ་པ་ཡང་ཡིན་ནོ། ། དེ་ཅིའི་ཕྱིར་ཞེ་ན། དེ་དག་ནི་བྱང་ཆུབ་སེམས་དཔའི་བྱང་ཆུབ་ལ་བར་དུ་གཅོད་པར་བྱེད་པ་མ་ཡིན་པའི་ཕྱིར་རོ།། བྱང་ཆུབ་སེམས་དཔའི་སྡིག་པའི་ལས་བྱས་པས་སྲིད་པར་འགྲོ་བསྐྱེད་དུ་ཟིན་ཀྱང་། འོན་ཀྱང་བྱང་ཆུབ་སེམས་དཔའ་ནི་ཇི་ཙམ་དུ་སྲིད་པར་འགྲོ་བ་སྐྱེད་པ་དེ་ཙམ་དུ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་དོ།། བྱང་ཆུབ་སེམས་དཔའ་དེ་བཞིན་གཤེགས་པའི་བསླབ་པ་ཇི་ལྟར་བཅས་པ་ལ་བསླབས། སུ་ཟིན་ཀྱང་། དེ་ཉན་ཐོས་ཀྱི་སེམས་སམ། རང་སངས་རྒྱས་ཀྱི་སེམས་སམ། དམིགས་པར་ལྟ་བ་དང་ལྷན་ཅིག་སྟེན་པར་བྱེད་ན། བྱང་ཆུབ་སེམས་དཔའ་བྱང་ཆུབ་སེམས་དཔའི་ཚུལ་ཁྲིམས་ལས་ཉམས་པར་འགྱུར་རོ།། རིགས་ཀྱི་བུ་དེ་ལྟ་བས་ན། བྱང་ཆུབ་སེམས་དཔའ་གང་བྱང་ཆུབ་ཀྱི་སེམས་མི་གཏོང་ལ། དམིགས་པར་ལྟ་བའི་སེམས་ཀྱང་མི་སྐྱེད་པའི་བྱང་ཆུབ་སེམས་དཔའ་དེ་ནི། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང་སློབ་པ་ཡིན་ནོ།། རིགས་ཀྱི་བུ་གཞན་ཡང་གནོད་སེམས་ཀྱི་ཐ་བའི་ཉེས་པའི་སེམས་ནི་བྱང་ཆུབ་སེམས་དཔའི་ཉེས་པའོ། ། སེམས་ཅན་རྣམས་ལ་མི་སྙོམས་པའི་ཡིད་ལ་བྱེད་པ་ནི། བྱང་ཆུབ་སེམས་དཔའི་ཉེས་པའོ།། སེམས་ཅན་རྣམས་དང་ཆོས་རྣམས་ལ་ཐ་དད་པར་འདུ་ཤེས་པ་ནི་བྱང་ཆུབ་སེམས་དཔའི་ཉེས་པའོ། ། སེམས་ཅན་ལ་དམིགས་པ་ལ་རྟེན་པའི་བྱམས་པ་ཕྱོགས་གཅིག་པ་ནི། བྱང་ཆུབ་སེམས་དཔའི་ཉེས་པའོ།། སྟོང་པ་ཉིད་ལ་མི་བཟོད་པ་ནི་བྱང་ཆུབ་སེམས་དཔའི་ཉེས་པའོ།། འདི་ལ། ནི་སྦྱིན་ནོ།། འདི་ལ་ནི་མི་སྦྱིན་ནོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ།། འདི་ལ་ནི་ཡོན་དབུལ་ལོ།། འདི་ལ་ནི་མི་དབུལ་ལོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ།། འདི་ལ་ནི་ཆོས་བཤད་པར་བྱའོ།། འདི་ལ་ནི་ཆོས་བཤད་པར་མི་བྱའོ་སྙམ་པ་དེ་ནི། བྱང་ཆུབ་སེམས་དཔའི་ཉེས་པའོ།། འདི་ལ་ནི་བསྙེན་བཀུར་བྱའོ།། འདི་ལ་ནི་བསྙེན་བཀུར་མི་བྱའོ་སྙམ་པ་དེ་ནི་བྱང་ཆུབ་སེམས་དཔའི་ཉེས་པའོ།། བྱང་ཆུབ་སེམས་དཔའ་ཇི་ཙམ་དུ་སོ་སོར་འབྱེད་པར་བྱེད་དོ། ། འདི་ནི་ཚུལ་ཁྲིམས་དང་ལྡན་པའོ།། འདི་ནི་ཚུལ་ཁྲིམས་འཆལ་པའོ་སྙམ་དུ་སོ་སོར་ཕྱེ་ནས། ཚུལ་ཁྲིམས་འཆལ་པ་ལ་བརྙས་པར་བྱེད་པ་དེ་ནི་བྱང་ཆུབ་སེམས་དཔའི་ཉེས་པའོ།། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལ་སེམས་མཉམ་པ་དང་། ཆོས་ཐམས་ཅད་ལ་སེམས་མཉམ་པར་བྱ་དགོས་ཤིང་། ཉི་མ་དང་ཟླ་བའི་དཀྱིལ་འཁོར་འདྲ་བ་དང་། ས་དང་ཆུ་དང་། མེ་དང་རླུང་དང་། ནམ་མཁའ་ལྟ་བུར་སྙོམས་པའི་སེམས་དང་། སྟོང་པ་ཉིད་ལ་བཟོད་པ་དང་ལྡན་པར་བྱ་དགོས་པའི་ཕྱིར་རོ།། བྱང་ཆུབ་སེམས་དཔའ་གང་སེམས་ཅན་གང་ཡང་ཡོངས་སུ་མི་གཏོང་ལ་མི་གནས་པའི་སེམས་དང་། ཚད་ངེས་པར་མི་བྱེད་པས་སེམས་ཅན་ཐམས་ཅད་ཀྱི་ཕྱིར། སྙིང་རྗེ་བསྐྱེད་ཅིང་བྱམས་པས་མོས་པར་བྱས་ཏེ། ཁྱབ་པར་བྱས་ནས་བསྒྲུབས་ཏེ་གནས་ལ། ཆོས་རྣམས་ལ་ཡང་སྟོང་ངོ་སྙམ་དུ་བཟོད་པའི་བྱང་ཆུབ་སེམས་དཔའ་དེ་ནི། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང་སློབ་པ་ཡིན་ནོ། ། གཞན་ཡང་བྱང་ཆུབ་སེམས་དཔའ་གང་འཁོར་བ་ལ་ཚད་ངེས་པར་བྱེད་པ་དེ་ནི། བྱང་ཆུབ་སེམས་དཔའི་ཉེས་པ་སྟེ། བསྐལ་པ་འདི་ཙམ་གྱི་བར་དུ་ནི་བདག་འཁོར་བར་བྱའོ།། བསྐལ་པ་འདི་ཙམ་གྱི་བར་དུ་ནི་འཁོར་བར་མི་བྱའོ་སྙམ་པ་དེ་ནི། བྱང་ཆུབ་སེམས་དཔའི་ཉེས་པའོ།། སེམས་ཅན་འདི་སྙེད་ཅིག་ནི་བདག་གིས་གྲོལ་བར་བྱའོ།། སེམས་ཅན་འདི་སྙེད་ཅིག་ནི་བདག་གིས་གྲོལ་བར་མི་བྱའོ་སྙམ་པ་དེ་ནི། བྱུང་ཆུབ་སེམས་དཔའི་ཉེས་པའོ། ། འདི་ན་བརྩོན་འགྲུས་སོ།། བདག་ནི་བརྩོན་འགྲུས་ཅན་ནོ།། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་མངོན་པར་རྫོགས་པར་འཚང་རྒྱ་བར་བྱའོ་སྙམ་པ་དེ་ནི། བྱང་ཆུབ་སེམས་དཔའི་ཉེས་པའོ། ། དེ་ལ་བྱང་ཆུབ་སེམས་དཔའི་རྣམ་པར་གནོན་པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་འདི་ལྟར་གོ་ཆ་བགོ་བར་བྱ་སྟེ། འཁོར་བའི་སྔོན་གྱི་མཐའ་མི་མངོན་ནོ་ཞེས་ཇི་སྙེད་དུ་འབྱུང་བ་དེ་སྲིད་དུ། བདག་འཁོར་བ་ན་འཁོར་འཁོར་ཏེ། གལ་ཏེ་བདག་སེམས་ཅན་རེ་རེའི་ཕྱིར་ཡང་། བསྐལ་པ་དེ་ཁོ་ནར་སྙེད་དུ་འཁོར་བ་ན་འཁོར་བར་བྱ་དགོས་པར་གྱུར་ན་ཡང་བདག་གིས་སྤྲོ་བར་བྱའོ།། རྣམ་གྲངས་འདི་བཞིན་དུ་སེམས་ཅན་ཐམས་ཅད་ཀྱི་དོན་གྱི་ཕྱིར། ཕྱི་མའི་མཐའི་མུར་ཐུག་པ་དེ་ཇི་སྲིད་དུ་འཁོར་བ་ན་འཁོར་དགོས་ན་ཡང་བདག་གིས་སྤྲོ་སྟེ། དེ་ཡང་བརྩོན་འགྲུས་དང་། ང་རྒྱལ་དང་། བྱང་ཆུབ་ལ་མངོན་པར་ཞེན་པ་སྤངས་ལ། མི་དམིགས་པའི་བརྩོན་འགྲུས་ཀྱི་གོ་ཆས་སྤྲོ་བར་བྱའོ། སྙམ་སྟེ། དེ་ལྟར་བྱང་ཆུབ་སེམས་དཔའ་གོ་ཆ་བགོས་པ་དེ་ནི། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང་སློབ་པ་ཡིན་ནོ།། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་གང་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་སོང་ན། སེམས་ཅན་རྣམས་ཀྱི་དོན་ནུས་ཤིང་ལྕོགས་ལ། འོས་ཡིན་བཞིན་དུ། དེ་དགོན་པའི་ཕྱོགས་དབེན་པ་གཅིག་ཏུ་འདུག་ནས། དབེན་པ་ན་བསམ་གཏན་གྱི་རོའི་དགའ་བ་དང་། བདེ་བ་ལ་བརྟེན་ཅིང་གནས་པ་དེ་ནི་བྱང་ཆུབ་སེམས་དཔའི་ཉེས་པའོ།། བྱང་ཆུབ་སེམས་དཔའ་གང་སྦྱིན་པ་ཡང་སྦྱིན་པར་བྱེད་ལ། སྐྱོ་བ་ཡང་མེད། སེམས་ཀྱི་དམིགས་པ་ལ་ཡང་མི་རྟེན། ནང་དུ་ཡང་དག་འཇོག་ཀྱང་འཕེལ་བར་བྱེད། བསམ་གཏན་གྱི་རོ་མྱང་བ་ཡང་མེད། མི་གནས་པའི་བསམ་གཏན་པ་ཡང་ཡིན་ན། བྱང་ཆུབ་སེམས་དཔའ་འདི་ནི། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང་སློབ་པ་ཡིན་ནོ།། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན། ཆོས་ཐམས་ཅད་རང་བཞིན་གྱིས་སྟོང་པར་ཤེས་ནས་འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གང་ཡང་མེད་དོ་སྙམ་དུ་དེ་ལྟར་ཤེས་ན། བདག་ཉིད་དུལ་བར་བྱ་བ་དང་། ཞི་གནས་ལ་རྣལ་འབྱོར་དུ་བརྩོན་པར་གནས་ལ། སེམས་ཅན་གཞན་ཕྱིན་ཅི་ལོག་ཏུ་དམིགས་པའི་འཛིན་འཁྲིས་ཟིར་བ་དེ་དག་ལ། སྟོང་པ་ཉིད་བདག་མེད་པའི་ཚུལ་དེ་མི་རྗོད་མི་སྟོན། བརྡ་སྤྲོད་པར་མི་བྱེད་པ་ནི། བྱང་ཆུབ་སེམས་དཔའ་དེའི་ཐབས་ལ་མི་མཁས་པ་ཡིན་པར་རིག་པར་བྱ་སྟེ། ཉེས་པ་བྱེད་པ་ཡང་ཡིན་ནོ།། བྱང་ཆུབ་སེམས་དཔའ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན། ཆོས་ཐམས་ཅད་ངོ་བོ་ཉིད་མེད་པར་ཤེས་ཤིང་། ཆོས་ཐམས་ཅད་ངོ་བོ་ཉིད་ཀྱིས་སྟོང་པར་ཤེས་ནས། འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གང་ཡང་མེད་དོ་སྙམ་སྟེ། དེ་ལྟར་ངོ་བོ་ཉིད་ཀྱིས་སྟོང་པའི་ཆོས་འདི། དག་ལུས་ཀྱི་མངོན་སུམ་དུ་བྱས་ཏེ། ཐམས་ཅད་ལ་མི་དམིགས་པའི་སེམས་དང་ལྡན་ལ། སེམས་ཅན་ཕྱིན་ཅི་ལོག་ཏུ་སེམས་ཤིང་། དམིགས་པ་ཅན་གང་ཡིན་པ་དེ་དག་ཀྱང་། ཕྱིན་ཅི་ལོག་གིས་ཟིན་ཅིང་། དམིགས་པའི་སེམས་སུ་གྱུར་པ་དེ་ལས་རབ་ཏུ་གྲོལ་བར་བྱས་ནས། དེ་དག་ལ་ཡང་ཆོས་ཐམས་ཅད་ངོ་བ་ཉིད་མེད་དོ།། ཞེས་ཆོས་སྟོན་ཅིང་། དེ་དག་ཀྱང་རྒྱས་ཐམས་ཅད་རང་བཞིན་གྱིས་སྟོང་ངོ་ཞེས་བྱ་བ་ལ་འཇུང་པར་བྱེད་པའི་བྱང་ཆུབ་སེམས་དཔའ་དེ་ནི་ཐབས་ལ་མཁས་པ་ཡིན་པར་རིག་པར་བྱ་སྟེ། བྱང་ཆུབ་སེམས་དཔའི་སྒོ་སོ་སོ་བ་ལ་སྤྱོད་པ་དང་། སློབ་པ་ཡང་ཡིན་ནོ།། རིགས་ཀྱི་བུ་དེ་ལྟར་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་བཤོས་གསོལ་ནས། འཁོར་གྱི་ཁྱམས་དེར་འཁོར་དེའི་ནང་དུ་བྱང་ཆུབ་སེམས་དཔའི་སྒོ་སོ་སོ་བ་ཞེས་བྱ་བའི་ཆོས་ཀྱི་རྣམ་གྲངས་འདི་རྒྱས་པར་བཤད་དོ། ། བཅོམ་ལྡན་འདས་དེས་ཆོས་ཀྱི་རྣམ་གྲངས་འདི་བཤད་པ་ན། སེམས་ཅན་ཚད་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ།། རིགས་ཀྱི་བུ་ངས་བསྐལ་པའམ་བསྐལ་པཔ་ལས་ལྷག་པར་བྱང་ཆུབ་སེམས་དཔའི་སྒོ་སོ་སོ་བའི་ཆོས་ཀྱི་རྣམ་གྲངས་ལས་བརྩམས་ཏེ། ཆོས་བསྟན་དུ་ཟིན་ཀྱང་། སྤོབས་པའམ། ཆོས་ཀྱི་སྒོ་རྣམས་ཟད་པར་མི་འགྱུར་མོད་ཀྱི། འོན་ཀྱང་དེའི་བརྩམ་པ་ཙམ་བསྟན་པ་ཡིན་ནོ།། རིགས་ཀྱི་བུ་དེ་ལྟར་ན་རྒྱལ་པོ་གསེར་མདོག་དེས། དེ་བཞིན་གཤེགས་པ་དེ་བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དང་ཐབས་ཅིག་ཏུ་ལོ་བྱེ་བ་ཕྲག་བརྒྱད་བཅུ་རྩ་བཞི་ཐམ་པར། བཀོད་པ་དེ་ལྟ་བུ་དང་། བསྙེན་བཀུར་དང་། ཕུ་དུད་དུ་བྱ་བ་དེ་ལྟ་བུ།། བཀུར་སྟི་བྱས། བླ་མར་བྱས། རིམ་གྲོས་བྱས། མཆོད་པ་བྱས་སོ།། ། བམ་པོ་གཉིས་པ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཙུན་པ་བཅོམ་ལྡན་འདས་རྒྱལ་པོ་གསེར་མདོག་དེས་དེ་བཞིན་གཤེགས་པ་དེ་དང་། བྱང་ཆུབ་སེམས་དཔའ་དེ་དག་གིས་གཙུག་ལག་ཁང་མ་བགྱིས་ལག། སམ། དེ་བཞིན་གཤེགས་པ་དེ་དང་། བྱང་ཆུབ་སེམས་དཔའ་དེ་དག་གང་ན་བཞུགས་བཞུགས་ལགས་དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དེ་བཞིན་གཤེགས་པ་དེ་དང་། བྱང་ཆུབ་སེམས་དཔའ་དེ་དག་གི་རང་རང་གིས་སྤྲུལ་པའི་ཁང་པ་བརྩེགས་པའི་ནང་ན་གནས་གནས་སོ།། དེ་ནས་བཅོམ་ལྡན་འདས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་བཀའ་སྩལ་པ། རིགས་ཀྱི་བུ་དེ་ལྟར་ལོ་བྱེ་བ་ཕྲག་བརྒྱད་ཅུ་རྩ་བཞི་པོ་དེ་དག་འདས་པའི་ཐ་མའི་ཉིན་པར་རྒྱལ་པོ་གསེར་མདོག་གིས་དེ་བཞིན་གཤེགས་པ་དེ་ལ་བཤོས་གསོལ་ཡོན་ཕུལ་ཏེ། སླར་གཤེགས་པར་རིག་ནས། བསམ་པ་འདི་ལྟ་བུ་ཞིག་བསམས་ཏེ། ཅི་བདག་གིས་དགེ་བའི་རྩ་བ་འདི་བརྒྱ་བྱིན་དུ་འགྱུར་བར་ཡོངས་སུ་བསྔོ་བར་བྱའམ། འོན་ཏེ་ཚངས་པར་འགྱུར་བ་ཡོངས་སུ་བསྔོ་བར་བྱ་འམ། འོན་ཏེ་འཁོར་ལོས་སྒྱུར་བ་ཐོབ་པར་བྱ་བའི་ཕྱིར་ཡོངས་སུ་བསྔོ་བར་བྱ་སྙམ་མོ།། དེ་ནས་དེའི་སེམས་བསྐྱེད་པ། བཅོམ་ལྡན་འདས་དེ་བཞིན་གཤེགས་པ་གསེར་བཟངས་འོད་དེས་ཐུག་སུ་ཆུད་དེ། དེ་ནས་དེ་བཞིན་གཤེགས་པས་རྒྱལ་པོ་དེའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས། རྒྱལ་པོ་དང་སྐྱེ་བོའི་ཚིགས་མང་པོ་དེ་དག་གི་མདུན་དུ་སྟེང་གི་བར་སྣང་ལ། དེ་བཞིན་གཤེགས་པའི་སྐུ་དེ་ཁོ་ན་བཞིན་དུ་རྣམ་པ་ཐམས་ཅད་ཡོངས་སུ་རྫོགས་པའི་ལུས་ཤིག་སྤྲུལ་ཏེ། དེ་སྟེང་གི་བར་སྣང་དེ་ལ་འདུག་ནས་རྒྱལ་པོ་གསེར་མདོག་ལ་ཚིག་སུ་བཅད་པ་འདི་སྐད་ཅེས་སྨྲས་སོ།། དཔེར་ན་མི་ནི་ཤེས་རབ་འཚལ། བྱིས་པའི་རང་བཞིན་གྱུར་པ་ཞིག། རྒྱལ་པོ་བསྙེན་བཀུར་བྱས་ནས་ནི།། བྱ་དགའ་ཆུང་ངུ་གསོལ་བར་བྱེད།། དེ་བཞིན་ལ་ལས་སངས་རྒྱས་ལ།། བསམ་གྱིས་མི་ཁྱབ་མཆོད་བྱས་ནས།། ཚངས་པ་བརྒྱ་བྱིན་རྒྱལ་པོའི་སྲིད།། དམའ་བའི་གནས་ལ་འདོད་པར་བྱེད།། རྒྱལ་པོ་གྱུར་དང་བརྒྱ་བྱིན་དང་།། དེ་བཞིན་ཚངས་པར་འགྱུར་བ་རྣམས།། འདི་དག་མི་རྟག་བསྟན་པ་ཡིན།། བརྟན་མ་ཡིན་ཏེ་འཇིག་ཚུལ་ཅན།། སྲོག་ཆགས་ཀུན་ལ་ཕན་པའི་ཕྱིར། ། བྱང་ཆུབ་སེམས་ནི་བསྐྱེད་པར་གྱིས།། སངས་རྒྱས་འཇིག་རྟེན་མཁས་རྣམས་ཀྱིས།། དེ་འདྲའི་སེམས་ནི་བསྔགས་པ་ཡིན།། རྒྱལ་པོ་ཁྱོད་ནི་ཡུལ་འཁོར་བཅས།། མཆོད་པ་རྒྱ་ཆེན་བྱས་ཟིན་གྱིས།། བྱང་ཆུབ་སེམས་ནི་བླ་ན་མེད། ། རྒྱ་ཆེན་སེམས་ནི་ཁྱོད་ཀྱིས་སྐྱེད།། དམའ་བའི་སྨོན་ལམ་མ་འདེབས་ཤིག། དེ་ནི་བྱིས་པའི་སྤྱོད་ཡུལ་ཡིན།། ཤེས་རབ་བཟང་པོ་མཁས་པར་གྱིས།། བྱང་ཆུབ་མཆོག་ལ་འཇུག་པར་གྱིས།། མྱ་ངན་འདས་པ་འདོད་པའི་ཕྱིར། ། སངས་རྒྱས་དེ་བཞིན་གཤེགས་རྣམས་ལ།། གང་གིས་སྟོང་གསུམ་ཐམས་ཅད་ཀྱང་།། རིན་ཆེན་བཀང་སྟེ་ཕུལ་བ་བས།། གང་གིས་ཐལ་མོ་སྦྱར་བྱས་ནས།། སེམས་ཀྱིས་བྱང་ཆུབ་བསྔོས་བྱས་ལ། ཚིག་ཏུ་བརྗོད་པ་མ་བྱས་ཀྱང་། དེ་ནི་དེ་བས་ཤིན་ཏུ་ཆེ།། གང་གིས་སེམས་ཅན་ཐམས་ཅད་ལ།། བསྐལ་པ་བྱེ་བ་བརྗོད་མེད་དུ།། སེམས་ཅན་ཀུན་ལ་བསྙེན་བྱས་ཀྱང་།། དེ་ཡི་བཅུ་དྲུག་ཆར་མི་ཕོད།། གང་ཞིག་ཐལ་སྦྱར་བྱང་ཆུབ་སེམས་བསྐྱེད་དང་། ། ཕྱོགས་བཅུ་དག་ན་སེམས་ཅན་དོན་མཛད་པ།། རྣམ་འདྲེན་སངས་རྒྱས་གང་དག་བཞུགས་རྣམས་ལ།། བསོད་ནམས་འདོད་པའི་མི་འགའ་སྔོན་ཆད་ཀྱི།། འཁོར་བའི་བསྐལ་པ་བྱེ་བར་མཆོད་པ་བས།། མི་གང་མཁས་ཤིང་མཛངས་པའི་རང་བཞིན་ཅན།། བདེ་བར་གཤེགས་པའི་བསྟན་ལ་ཡིད་ཆེས་ཤིང་།། བྱང་ཆུབ་སེམས་ནི་བརྟན་པོར་བསྐྱེད་ནས་ཀྱང་།། བདེ་གཤེགས་མཆོད་རྟེན་ལ་ནི་མེ་ཏོག་འབུལ།། འདི་ནི་དེ་བས་བསོད་ནམས། ཁྱད་པར་བརྗོད།། བྱང་ཆུབ་སེམས་ཀྱིས་མེ་ཏོག་འབུལ་བྱེད་ལ།། བསོད་ནམས་སྔ་མ་དེ་ཡི་དཔེར་མི་རུང་།། རྒྱ་མཚོ་དང་ནི་ཆུ་ཡི་ཐིགས་པ་བཞིན།། སངས་རྒྱས་ཞིང་འདིར་སེམས་ཅན་ཇི་སྙེད་པ།། བསྐལ་པ་རེ་རེ་ལ་ནི་སངས་རྒྱས་གྱུར། ། བསྐལ་པ་མང་པོར་ལས་གཞན་མི་བྱེད་པར།། བསོད་ནམས་བཤད་ཀྱང་མཐའ་ནི་ཐུག་པ་མེད།། དེ་དག་བྱང་ཆུབ་སེམས་ཀྱི་རྣམ་སྨིན་བསྟན།། བསྐལ་པ་མཐའ་ཡས་བར་དུ་བཤད་ན་ཡང་།། ཅུང་ཟད་ཙམ་ཡང་ཡོངས་སུ་བརྗོད་མི་འགྱུར། ། ས་གཞི་དག་ལས་རྡུལ་ནི་བླངས་པ་བཞིན།། དེ་ལྟར་རྒྱལ་པོ་སྐྱེས་མཆོག་ཁྱོད་ཀྱིས་ཀྱང་།། བྱང་ཆུབ་སེམས་ཀྱི་ཕན་ཡོན་འདི་ཐོས་ནས།། མྱུར་དུ་བློ་གྲོས་དམའ་བ་ཀུན་སྤོངས་ལ།། བྱང་ཆུབ་ཕྱིར་ནི་རྒྱ་ཆེན་སེམས་སྐྱེད་ཅིག། འཇིག་རྟེན་འདྲེན་པ་གསེར་གྱི་མཆོད་སྡོང་འོད།། བསམ་གྱིས་མི་ཁྱབ་ཡོན་ཏན་ཀུན་ལྡན་པ།། དེ་ཡིས་བྱང་ཆུབ་སེམས་ཀྱི་རྣམ་པར་སྨིན།། འདི་འདྲ་ཞེས་ནི་ཕན་ཡོན་འདི་དག་བསྟན།། བྱང་ཆུབ་སེམས་ཀྱི་རྣམ་སྨིན་བསྟན་པ་ཡི།། བསོད་ནམས་དེ་ལ་གལ་ཏེ་གཟུགས་ཡོད་ན།། ཞིང་རྣམས་གངྒཱའི་བྱེ་སྙེད་གང་བྱས་ཀྱང་།། དེ་དག་བཀང་བས་ཆ་ཙམ་ཟད་པ་མེད།། རྗེས་སུ་བསྟན་པ་འདི་འདྲ་ཐོས་ནས་ཀྱང་།། རྒྱལ་པོ་གཙོ་བོའི་སེམས་ནི་དགའ་གྱུར་ཏེ།། སོར་མོ་བཅུ་ཡི་ཐལ་མོ་སྦྱར་བྱས་ནས།། སངས་རྒྱས་ཕྱག་འཚལ་ཞེས་ནི་ཚིག་ཏུ་སྨྲས།། བྱང་ཆུབ་ཕྱིར་ནི་བདག་གིས་སེམས་བསྐྱེད་དེ།། བདག་ནི་ཆོས་རྗེ་སངས་རྒྱས་གྲུབ་པར་ཤོག། བྱང་ཆུབ་རྡུལ་བྲལ་འདུས་མ་བྱས་རྟོགས་ནས།། སེམས་ཅན་གངྒཱའི་བྱེ་སྙེད་དགྲོལ་བར་བགྱི།། སངས་རྒྱས་སྐུ་དེས་ཚིག་བཅད་འདི་བརྗོད་ནས།། དེ་ཚེ་རྒྱལ་པོའི་གཙོ་བོ་དགའ་གྱུར་པ།། ཤེས་ནས་སྟོང་གསུམ་ཐམས་ཅད་རབ་གཡོས་ཏེ།། ངང་པའི་རྒྱལ་པོ་བཞིན་དུ་མཁའ་ལས་སོང་།། རྒྱལ་པོ་གསེར་མདོག་སེམས་ནི་ངད་གྱུར་ནས།། བུ་དང་བུ་མོ་དེ་བཞིན་ཆུང་མ་དང་།། རྒྱལ་པོ་དང་ནི་ཚོང་དཔོན་ཁྱིམ་བར་རྣམས། ། སངས་རྒྱས་ལ་ནི་ཕྱག་འཚལ་འདོང་ཞེས་བོས།། བྱེ་བ་བརྒྱ་ཕྲག་དྲུག་ཅུས་ཡོངས་བསྐོར་ཅིང་།། མེ་ཏོག་རྣམས་དང་ཕྲེང་དང་བདུག་པ་ཐོགས།། སངས་རྒྱས་ག་ལ་བར་ནི་གཉིས་རྒྱུད་སོང་།། ཞབས་ལ་ཕྱག་འཚ་ནས་ནི་ཕྱོགས་གཅིག་འདུག། དེ་བཞིན་བུ་དང་བུ་མོ་ཆུང་མ་དང་།། བློན་པོ་དང་ནི་ཚོང་དཔོན་ཁྱིམ་བདག་དང་།། རྒྱལ་པོ་གཞན་དང་དེ་བཞིན་འཁོར་གྱི་རྣམས།། དེ་དག་ཀྱང་ནི་ཕྱག་འཚལ་གུས་པར་འཁོད།། ལྷ་རྣམས་ཀྱིས་ཀྱང་དེ་བཞིན་པར་སྣང་ཁྱབ། ། སིལ་སྙན་དཀྲོལ་ཞིང་མེ་ཏོག་ཆར་པ་ཕབ།། གསེར་གྱི་མདོག་དེ་ཡུལ་གྱི་མིས་བསྐོར་ནས།། ཐལ་མོ་སྦྱར་བྱས་སངས་རྒྱས་ཞུ་བར་བྱེད།། སྟོབས་བཅུ་ལྡན་པ་དཔག་མེད་ལྷ་ཡི་ལྷ།། མི་འདུལ་ལ་ལོ་བསྒྱུར་བ་ཁྱོད་ལ་ཞུ། ། གང་གིས་བྱང་ཆུབ་སེམས་ནི་བརྟན་པོར་བསྐྱེད།། དེ་ཡི་བསོད་ནམས་ཇི་ཙམ་སྐྱེད་འགྱུར་ལགས།། བཅོམ་ལྡན་ཇི་ལྟར་སྤྱོད་པ་སྤྱད་བགྱིས་ན།། བསྐལ་པ་མང་པོར་སྡུག་བསྔལ་མི་མཐོང་བར།། ངེས་པར་བདེ་དང་བདེ་བླག་ཚིམ་གྱུར་པས།། བྱང་ཆུབ་བདུད་རྩི་མྱ་ངན་མེད་པར་རྟོགས།། བདག་གཞར་རྐང་ལག་བཏང་ཡང་མི་འཚལ་ཞིང་།། མགོ་དང་རང་ཤ་རྩལ་ཡང་མི་འཚལ་བར།། བདག་ནི་ངེས་པར་བདེར་གནས་སྤྱོད་པ་ཡི། ། ཐབས་འདིར་ཐུབ་པས་བདག་ལ་བསྟན་དུ་གསོལ།། རྟག་ཏུ་བདེ་དང་བདེ་བླག་ལྡན་པར་ཤོག། ནམས་ཀྱང་བདག་ལུས་སྡུག་བསྔལ་མ་གྱུར་ཅིག། བྱམས་དང་བཟོད་དང་དུལ་དང་སྡོམ་པ་ལ།། གནས་ནས་བདག་གིས་བྱང་ཆུབ་མཆོག་རེག་ཤོག། ལེ་ལོ་མ་མཆིས་རྟག་ཏུ་བསླབ་ལ་སློབ།། བདག་གིས་བསླབ་པ་རྣམས་ཀྱང་གཞིག་མི་བགྱིས།། འདྲེན་པ་བདག་གིས་དམ་བཅས་བརྟན་པར་བགྱི།། ནམས་ཀྱང་ཚིགས་ཙམ་ལྷུར་ལེན་ཡོངས་མ་བགྱིད། ། རང་བྱུང་བསོད་ནམས་འབྲས་བུ་བདག་ལ་གསུངས།། དེ་བཞིན་གཤེགས་པ་ཐེག་པ་བདེ་བས་གསུངས།། ཇི་ལྟར་སྤྱད་པའི་བསླབ་པ་བཀའ་སྩ་ལ་གསོལ།། ཐོས་ནས་ཇི་ལྟར་བསྟན་བཞིན་གནས་པར་བགྱི།། གསེར་འོད་གསེར་བཀོད་འོད་བཟངས་དེས་གསུངས་པ།། ཀྱེ་ཀྱེ་ས་ཡི་བདག་པོ་མཉན་པར་གྱིས།། བདེ་བའི་རྒྱུ་ཡི་བསོད་ནམས་ཁྱོད་ལ་བཤད།། བསླབ་པའང་བཤད་ཀྱིས་དེ་ཕྱིར་ང་ལས་ཉོན།། གང་གིས་སྟོང་གསུམ་རིན་ཆེན་གང་བྱས་ལ། ། སྟོབས་བཅུ་མངའ་བ་རྣམས་ལ་འབུལ་བྱེད་པ།། དེ་བས་བྱང་ཆུབ་ཏུ་ནི་སྨོན་བྱེད་པ།། བསོད་ནམས་ཤིན་ཏུ་མང་པོ་འཕེལ་བར་འགྱུར།། གང་གིས་ཞིང་རྣམས་གངྒཱའི་བྱེ་མ་སྙེད།། རིན་ཆེན་གང་བར་བྱས་ནས་སྦྱིན་པར་བྱིན། ། དེ་བས་བྱང་ཆུབ་ཏུ་ནི་སྨོན་བྱེད་པ།། བསོད་ནམས་ཤིན་ཏུ་མང་པོ་འཕེལ་བར་འགྱུར།། གང་གིས་བསྐལ་པ་བྱེ་བ་ཁྲག་ཁྲིག་ཏུ།། སེམས་ཅན་ཐམས་ཅད་ལ་ནི་མཆོད་པ་བྱེད།། དེ་བས་བྱང་ཆུབ་ཏུ་ནི་སྨོན་བྱེད་པ། ། བསོད་ནམས་ཤིན་ཏུ་མང་པོ་འཕེལ་བར་འགྱུར།། གལ་ཏེ་སེམས་ཅན་ཐམས་ཅད་དགྲ་བཅོམ་གྱུར།། ཡེ་ཤེས་དབང་ཐོབ་གྱུར་པ་དེ་དག་ལ།། བསོད་ནམས་འདོད་པའི་གང་ཟག་ལ་ལ་ཞིག། བསྐལ་པ་ཁྲག་ཁྲིག་བར་དུ་མཆོད་པ་བྱེད།། གང་གིས་སྙིང་རྗེ་བསྐྱེད་ནས་བྱང་ཆུབ་ཏུ།། རྒྱ་ཆེན་སེམས་ནི་སྐྱེད་པར་བྱེད་གྱུར་ཏེ།། སེམས་ཅན་ལ་ལ་གང་གིས་བྱང་ཆུབ་ཏུ།། སེམས་ཀྱི་གཙོ་བོ་བསྐྱེད་པ་བྱས་ནས་ཀྱང་། ། གོམ་པ་བདུན་ནི་བོར་བའི་བསོད་ནམས་འདི།། དེ་བས་ཁྱད་པར་འཕགས་པར་འགྱུར་བ་ཡིན།། གལ་ཏེ་སེམས་ཅན་མཐའ་དག་སངས་རྒྱས་ཏེ།། སྤོབས་པ་མཐའ་ཡས་ལྡན་པ་ཉིད་གྱུར་ལ།། ཇི་ལྟར་སྔོན་གྱི་འཁོར་བའི་བསྐལ་པའི་བར། ། སེམས་ཅན་གཅིག་པུས་མཆོད་པ་བྱས་པ་དང་།། མཁས་པའི་མ་ནི་གང་ཡང་རུང་བ་ཡིས།། བྱང་ཆུབ་མཆོག་ཏུ་སེམས་ནི་བསྐྱེད་ནས་ཀྱང་།། མེ་ཏོག་གཅིག་པུ་ཕུལ་བའི་བསོད་ནམས་འདི། ། དེ་བས་ཁྱད་པར་འཕགས་པར་འགྱུར་བ་ཡིན།། བསྐལ་པ་བྱེ་བ་ཁྲག་ཁྲིག་མང་པོར་ནི།། བསོད་ནམས་དེ་ཡི་བཤད་པ་བརྩམས་བྱས་ཀྱང་།། བསོད་ནམས་འབྲས་བུ་དེ་ཡི་བཤད་པ་ནི།། ནམས་ཀྱང་ཟད་པབར་འགྱུར་བ་མ་ཡིན་ནོ། ། རིགས་ཀྱི་བུ་འདི་ལྟར་བཅོམ་ལྡན་འདས་དེ་བཞིན་གཤེགས་པ་གསེར་བཟངས་འོད་དེས་རྒྱལ་པོ་གསེར་མདོག་དེ་ལ་འདི་སྐད་ཅེས་བཀའ་སྩལ་ཏོ།། རྒྱལ་པོ་ཆེན་པོ་ཆོས་གཅིག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་ཐེག་པ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལ། སྡུག་བསྔལ་བ་དང་། ཡིད་མི་བདེ་བར་ཡང་མི་འགྱུར་རོ།། ཆོས་གཅིག་པོ་གང་ཞེ་ན། འདི་ལྟ་སྟེ། བག་ཡོད་པ་སྟེ། རྒྱལ་པོ་ཆེན་པོ་བྱང་ཆུབ་སེམས་དཔའ་བག་ཡོད་པ་ནི།། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།། དེ་ལ་བག་ཡོད་པ་གང་ཞེ་ན། འདི་ལྟ་སྟེ། བསླབ་པ་ཡོངས་སུ་མི་གཏོང་བ་དང་། དམ་བཅས་པ་ལས་མི་ཉམས་པ་དང་། སེམས་ཅན་ཐམས་ཅད་ལ་བྱམས་པས་གནས་པ་དང་། སེམས་ཅན་ཐམས་ཅད་ཡོངས་སུ་མི་གཏོང་བ་དང་། བྱང་ཆུབ་ལ་འདུན་པ་བརྟན་པ་དང་། བརྩོན་འགྲུས་མི་གཏོང་བ་དང་། དགེ་བའི་ཤེས་གཉེན་རྣམས་ལ་སྟེན་ཅིང་བསྙེན་བཀུར་བྱེད་པ་དང་། ཆོས་ལ་གུས་པ་དང་། ཐོས་པ་མང་པོས་ཆོག་མི་ཤེས་པ་དང་། གཞན་དག་ལ་ཆོས་ཀྱི་བགོ་བཤའ་བྱེད་པ་དང་། ཟང་ཟིང་མེད་པར་ཆོས་སྟོན་པ་དང་། སྤངས་པའི་ཡོན་ཏན་དང་། ཡོ་བྱད་སྦྱངས་པ་རྣམས་མི་གཏོང་བ་དང་། འདོད་པ་ཉུང་བ་དང་། ཆོག་ཤེས་པ་དང་། ང་རྒྱལ་བཅོམ་པ་དང་། ཆོས་ཉན་པལ་རྣ་བ་བླགས་ཏེ་ཉན་པ་དང་། བླ་མ་ལ་གུས་པ་དང་། བཟོད་པ་ལ་གནས་པ་དང་། གནོད་སེམས་ཀྱི་ཐ་བའི་ཉེས་པ་རྣམ་པར་སྤངས་པ་དང་། ཟབ་མོ་སྟོང་པ་ཉིད་ཀྱིས་ཆོས་ལ་མོས་པ་དང་། དམིགས་པར་ལྟ་བ་ཐམས་ཅད་རྣམ་པར་སྤངས་པ་དང་། ནང་དུ་ཡང་དག་འཇོག་ལ་འདུན་པ་དྲག་པོ་དང་ལྡན་པ་དང་། སེམས་ཅན་ཡོངས་སུ་སྨིན་པར་བྱ་བ་ལ་མི་གཡེལ་བ་དང་། འདུ་ཤེས་ཟློག་པ་དང་། བྲེ་མོའི་གཏམ་རྣམ་པར་སྤོང་བ་དང་། ལུས་དང་། སེམས་དབེན་པར་གནས་པ་དང་། དགོན་པར་གནས་པ་དང་། སེམས་མཉེན་པ་དང་། ཚུལ་ཁྲིམས་མཆོག་ཏུ་མི་འཛིན་པ་དང་། བདག་ལ་མི་བསྟོད་པ་དང་། གཞན་ལ་མི་སྨོད་པ་དང་། འགྱོད་པ་ཐམས་ཅད་ལས་ངེས་པར་འབྱུང་བར་བྱེད་པ་དང་། སྔོན་པར་འབྱུང་བ་དང་། དགེ་སྦྱོང་གི་ཚུལ་ལ་རྒྱུན་དུ་དགའ་བདངག་། གསོང་པོར་སྨྲ་བ་དང་། བཞིན་ཁྲོ་གཉེར་མེད་པ་དང་། ཆོས་ཐམས་ཅད་སྐྱེ་བ་མེད་པ་དང་། འགག་པ་མེད་པ་ལ་འཛུད་པ་དང་། ཆོས་ཐམས་ཅད་ནམ་མཁའ་དང་འདྲ་བར་རྟོགས་པ་འདི་ནི་བྱང་ཆུབ་སེམས་དཔའི་བག་ཡོད་པ་ཞེས་བྱའོ།། རྒྱལ་པོ་ཆེན་པོ་གཞན་ཡང་བྱང་ཆུབ་སེམས་དཔའི་བག་ཡོད་པ་ནི་འདི་ལྟ་སྟེ། ཉན་ཐོས་དང་། རང་སངས་རྒྱས་ཀྱི་སེམས་དང་། དམིགས་པར་ལྟ་བའི་སེམས་ཐ་ན་རྨི་ལམ་དུ་ཡང་ཡིད་ལ་མི་བྱེད་པ་སྟེ། རྒྱལ་པོ་ཆེན་པོ་འདི་ནི་བྱང་ཆུབ་སེམས་དཔའི་བག་ཡོད་པའོ།། རྒྱལ་པོ་ཆེན་པོ་ཆོས་བཞི་དང་ལྡན་པའི་བྱང་ཆུབ་སེམས་དཔའ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མགོ་བོ་དང་། རྐང་ལག་དང་། མིག་དང་། ཡན་ལག་དང་། ཤ་དང་། ཁྲག་དང་། རུས་པ་དང་། རྐང་དང་། ཚིལ་དང་། མདོག་དང་། པགས་པ་དང་། ལུས་ཐམས་ཅད་ཡོངས་སུ་གཏོང་བ་ཡང་ཡོངས་སུ་བཏང་མི་དགོས་པར། བདོག་པ་ཐམས་ཅད་ཡོངས་སུ་གཏོང་བར་ཡང་འགྱུར་ལ། ཐེག་པ་བདེ་བས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བཞི་གང་ཞེ་ན། རྒྱལ་པོ་ཆེན་པོ་འདི་ལ་བྱང་ཆུབ་སེམས་དཔའ་ནི་དགེ་བའི་ཆོས་ཡོངས་སུ་འཚལ་བ་ཡིད་མ་བརྟན་པ་ཡིན་ཏེ། དེ་ནི་དགེ་བའི་རྩ་བ་གང་ཅི་བསྐྱེད་ཀྱང་རུང་སྟེ། དེ་ལ་བརྟན་པོར་གནས་ཤིང་། ཞུམ་པ་མེད་པའི་སེམས་དང་ལྡན་ལ། ཐེག་པོ་ཆེན་པ་ལ་ཤིན་ཏུ་བརྟན་ནོ།། རྒྱལ་པོ་ཆེན་པོ་གཞན་ཡང་བྱང་ཆུབ་སེམས་དཔའ་ནི་ཚུལ་ཁྲིམས་ཀྱི་ཕུང་པོ་ཤིན་ཏུ་ཡོངས་སུ་དག་པ། འཕགས་པ་དང་མཁས་པས་བསྔགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱིས་ཡོངས་སུ་ཟིན་པ་དང་ལྡན་པ་ཡིན་ཏེ། དེས་ནི་བདག་ཉིད་ཚུལ་ཁྲིམས་ལ་གནས་པར་རིག་ནས་ཆོས་ཀྱི་དགའ་བ་ཉམས་སུ་མྱོང་། རྒྱལ་པོ་ཆེན་པོ་གཞན་ཡང་བྱང་ཆུབ་སེམས་དཔའ་ནི་བྱམས་པས་གནས་པ་དང་། བསམ་གཏན་ལ་བསམ་གཏན་པ་དང་། མི་གནས་པའི་བསམ་གཏན་པ་ཡིན་ཏེ། རྒྱལ་པོ་ཆེན་པོ་བྱང་ཆུབ་སེམས་དཔའ་ཏིང་ངེ་འཛིན་ལ་གནས་ཤིང་། མི་གནས་པ་ཡིད་ལ་བྱེད་པ་དང་། སེམས་ཅན་ཐམས་ཅད་ལ་སྙོམས་པའི་སེམས་དང་ལྡན་པའི་བདེ་བར་གནས་པ་ཅི་འདྲ་བ་དེ་ལྟ་བུའི་བདེ་བའི་རྣམ་པ་གཞན་མེད་དོ།། རྒྱལ་པོ་ཆེན་པོ་གཞན་ཡང་བྱང་ཆུབ་སེམས་དཔའ་ནི། ཇི་ལྟ་བ་བཞིན་དུ་ཆོས་ལ་རྟོག་པ་ཡིན་ཏེ། དེ་ནི་འདི་ལྟར་ཇི་ལྟ་བ་བཞིན་དུ་ཡོངས་སུ་རྟོག་སྟེ། འདུ་བྱེད་ཀྱི་རྣམ་པ་འདི་དག་ཐམས་ཅད་ནི་སྟོང་པ་སྟེ། འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གམ། ཡོངས་སུ་གཏོང་བ་གང་ཡིན་པ་འམ། ཡོངས་སུ་བཏང་བ་གང་ཡིན་པ་འམ། ལེན་པ་གང་ཡིན་པ་འམ། བཟོད་པར་བྱེད་པ་གང་ཡིན་པ་འམ། གང་ལ་བཟོད་པར་བྱ་བ་འམ། བཟོད་པར་བྱ་བ་གང་ཡིན་པའམ། རྩོམ་པ་གང་ཡིན་པའམ། གང་གི་ཕྱིར་རྩོམ་པའམ། བསམ་གཏན་བྱེད་པ་གང་ཡིན་པ་འམ། བསམ་གཏན་དུ་བྱ་བ་གང་ཡིན་པའམ། སྒོམ་པར་བྱེད་པ་གང་ཡིན་པའམ། བསྒོམ་པར་བྱ་བ་གང་ཡིན་པ་གང་ཡང་མེད་དོ་སྙམ་མོ།། དེ་དེ་ལྟར་ཇི་ལྟ་བ་བཞིན་དུ་རྟོག་པ་ན། འདུས་བྱས་ཀྱི་ཆོས་ཐམས་ཅད་རང་བཞིན་གྱིས་སྟོང་པར་རིག་ནས། དམིགས་པར་ལྟ་བ་གང་ལ་ཡང་མངོན་པར་ཞེན་པ་མེད་ལ། བདེ་བར་ཡང་གནས་ཏེ། རྒྱལ་པོ་ཆེན་པོ་ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདེ་བ་ཐམས་ཅད་དང་ལྡན་པར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། ། རིགས་ཀྱི་བུ་དེ་ལྟར་རྒྱལ་པོ་གསེར་མདོག་དེས་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་རི་བའི་གོས་ཀྱི་སྦྱིན་པ་དེ་བཞིན་གཤེགས་པ་དེ་ལ་ཕུལ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་སེམས་ཅན་ཐམས་ཅད་ལ་གློ་བརྗེ་བའི་སླད་དུ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ།། ཞེས་གསོལ་ནས། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། ། བདག་ནི་ཞུམ་པ་མ་མཆིས་སེམས་ཀྱིས་སུ།། མི་མཆོག་སྤྱན་སྔར་ཚིག་འདིས་གསོལ་བར་བགྱི།། སེམས་ཅན་ཀུན་ལ་སྙིང་རྗེ་བསྐྱེད་ནས་ཀྱང་།། འདྲེན་པ་སེམ་ནི་བྱང་ཆུབ་གཞོལ་བར་བགྱི། ། བདག་ལ་ནམས་ཀྱང་གཡོ་སྒྱུ་མ་མཆིས་ཏེ།། སྟོབས་བཅུ་ལྡན་པས་བདག་གི་བསམ་པར་མཁྱེན།། ཡོན་ཏན་མངའ་བ་གྲགས་ཆེན་འདྲང་ནི།། ལྷ་མི་གཞན་ལ་བདག་གི་དབང་མ་མཆིས། ། བདག་ནི་སྡུག་རྣམས་སྐྱབས་དང་སྐྱོབ་པ་དང་།། དཔུང་གཉེན་གྱུར་ཏེ་སྡུག་བསྔལ་ཆོས་རྣམས་དགྲོལ།། ཁྱུ་མཆོག་བདག་ཉིད་བདེ་ལ་གནས་ནས་ཀྱང་།། སྲོག་ཆགས་རྣམས་ནི་བདག་གིས་བདེ་ལ་དགོད། ། འདྲེན་པ་བདེ་གཤེགས་གསུངས་པའི་ཆོས་གང་དག། དེ་ལ་བདག་ནི་སྤྱད་ཕྱིར་གནས་པར་བགྱི།། འདྲེན་པ་ཇི་ལྟར་ཁྱོད་ནི་ལྷ་མིས་མཆོད།། དེ་ལྟར་བདག་ཀྱང་མི་རྣམས་མཆོད་རྟེན་ཤོག། བྱང་ཆུབ་ཐམས་ཅད་མཆོག་ནི་ཚོལ་བགྱིད་ཅིང་།། བསྐལ་པ་མང་པོར་སྦྱིན་པ་སྦྱིན་པར་བགྱི།། ཟས་སྐོམ་གོས་དང་ཤིང་རྟ་བཞོན་པ་དང་།། གསེར་དངུལ་རིན་ཆེན་དུ་མའི་སྦྱིན་པ་བགྱི། ། འདྲེན་པ་བདག་ནི་བསླབ་ལ་གུས་པར་བགྱི།། དེ་ནི་ཇི་བཞིན་ཡོངས་སུ་བསྲུང་བར་བགྱི།། ཉམས་པར་མི་བགྱི་གང་ལའང་གནས་མི་བགྱི།། འདྲེན་པ་བདག་ནི་ཚུལ་ཁྲིམས་དག་པར་བགྱིད། སེམས་ཅན་ཀུན་ལ་སྙོམས་པའི་བསམ་པ་ཡིས།། སྲོག་ཆགས་རྣམས་ལ་བྱམས་པའི་སེམས་སུ་བགྱི།། བཀུར་སྟི་བགྱིས་དང་བཀུར་སྟི་མ་བགྱིས་པ།། མཐོ་བར་འགྱུར་དང་དམའ་བར་འགྱུར་མ་མཆིས། ། བསྐལ་པ་བྱེ་བ་མང་པོ་བསམ་ཡས་པར།། བདག་ནི་ཇི་སྲིད་སྔོན་ཆད་འཁོར་བར་གྱུར།། མི་དཔའ་ཁྱོད་ལ་རྟེན་ནས་ཇི་སྲིད་དུ།། སེམས་ཅན་གཅིག་གི་ཕྱིར་ཡང་སྤྲོ་བར་བགྱི།། ལྷ་མིའི་འདྲེན་པ་བདེ་གཤེགས་གསུངས་པ་ཡི། ། བསམ་གཏན་བདེ་བ་དེ་ལ་གནས་པར་བགྱིས།། འདྲེན་པ་བསམ་གཏན་བདེ་ལ་རེག་གནས་ཤིང་།། རྟག་ཏུ་དགོན་པའི་གནས་སུ་གནས་པར་བགྱིས།། བདག་ནི་སྟོང་པ་ཉིད་ལ་ངེས་པར་བགྱི། ། ལྟ་བ་ལ་ནི་རྟེན་པ་ཡོད་མི་བགྱི།། དམའ་བའི་སྤྱོད་པ་རྟག་ཏུ་རྣམ་པར་སྡང་།། མཆོག་གི་སྤྱོད་པ་དྲི་མེད་སྤད་པར་བགྱི།། རིགས་ཀྱི་བུ་དེ་ལྟར་རྒྱལ་པོ་གསེར་མདོག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཐག་པ་དེའི་མོད་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་སོ།། རྒྱལ་པོ་བརྒྱད་ཁྲི་བ་ནི་སྟོང་པོ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ།། ཁྱིམ་བདག་བརྒྱད་ཁྲི་བཞི་སྟོང་པོ་དེ་དག་དང་། ཚོང་དཔོན་བརྒྱད་ཁྲི་བཞི་སྟོང་པོ་དེ་དག་དང་། བུ་དང་བུ་མོ་དང་། ཆུང་མ་དེ་དག་དང་། གཞན་སྐྱེ་བོའི་ཚོགས་ཆེན་པོ་དེ་དག་དང་། ལྷའི་བུ་བརྒྱད་ཁྲི་བཞི་སྟོང་རྣམས་རྒྱལ་པོ་གསེར་མདོག་དེའི་རྗེས་སུ་སློབ་ཅིང་། ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། ། རིགས་ཀྱི་བུ་འདི་ལྟར་རྒྱལ་པོ་གསེར་མདོག་དེས། བུ་ཐུ་བོ་རྒྱལ་པོར་བཅུག་གོ།། བཅུག་ནས་ཀྱང་བུ་རྣམས་དང་། བུ་མོ་རྣམས་དང་། ཆུང་མ་རྣམས་དང་། ཚོང་དཔོན་དང་། ཁྱིམ་བདག་དང་། བློན་པོ་དང་། རྒྱལ་ཕྲན་རྣམས་དང་ལྷན་ཅིག་ཏུ་སྲོག་ཆགས་བྱེ་བས་བསྐོར་ཏེ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་།། དེ་དག་དེ་ལྟར་རབ་ཏུ་བྱུང་ནས། ལོ་ཁྲིའི་བར་དུ་ཚངས་པར་སྤྱོད་པ་ཡོངས་སུ་དག་པ། ཡོངས་སུ་བྱང་བ་སྤྱད་དོ།། རྒྱལ་པོ་གསེར་མདོག་གིས་ཀྱང་། མངོན་པར་ཤེས་པ་བསྒྲུབས་ནས། མང་དུ་ཐོས་པའི་མཐར་ཕྱིན་པར་གྱུར་ཏོ།། བྱབས་པའི་ཏིང་ངེ་འཛིན་ཀྱང་བསྒྲུབས་སོ། ། དེ་དགེ་བའི་རྩ་བ་དེ་དང་། ལྷག་པའི་བསམ་པ་ལ་ཡང་དག་པར་ཞུགས་པ་དེས་འཁོར་ལོ་སྒྱུར་བའི་རྒྱལ་པོར་གྱུར་པས། སངས་རྒྱས་ཉི་ཁྲི་མཉེས་པར་བྱས་ཏེ། སངས་རྒྱས་བཅོམ་ལྡན་འདས་དེ་དག་ཐམས་ཅད་ལ་ཡང་། ན་བཟའ་དང་། ཞལ་ཟས་དང་། གཟིམས་ཆ་དང་། གདན་དང་། སྙུན་གྱི་གསོས་སྨན་དང་། ཡོ་བྱད་ཀྱིས་བསྙེན་བཀུར་བྱས། བླ་མར་བྱས་ནས། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་ཐད་དུ། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་།། རིགས་ཀྱི་བུ་དེའི་ཚེ་དེའི་དུས་ན། རྒྱལ་པོ་གསེར་མདོག་ཏུ་གྱུར་པ་དེ། གཞན་ཞིག་ཡིན་པ་སྙམ་དུ་ཁྱོད་སོམ་ཉི་འམ། ཡིད་གཉིས་སམ། ཐེ་ཚོམ་ཟན། རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ།། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི། དེའི་ཚེ་དེའི་དུས་ན། རྒྱལ་པོ་གསེར་མདོག་ཏུ་གྱུར་ཏོ།། རིགས་ཀྱི་བུ་དེའི་ཚེ་དེའི་དུས་ན། ཚངས་པར་གྱུར་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེ་ལ་མཆོད་པའི་ལས་ལ་བརྩོན་པར་གྱུར་པ་གང་ཡིན་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉི་འམ། ཡིད་གཉིས་སམ། ཐེ་ཚོམ་ཟ་ན། རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ།། དེ་ཅིའི་ཕྱིར་ཞེ་ན། རྣམ་པར་རྩེ་བ་ཁྱོད་ཉིད་དེའི་ཚེ་དེའི་དུས་ན་ཚངས་པར་གྱུར་ཏོ།། རིགས་ཀྱི་བུ་དེའི་ཚེ་དེའི་དུས་ན། ལྷའི་དབང་པོ་བརྒྱ་བྱིན། བཅོམ་ལྡན་འདས་གསེར་བཟངས་འོད་ལ་བསྙེན་བཀུར་དང་རིམ་གྲོ་བྱེད་པར་སྤྲོ་བར་གྱུར་པ་གང་ཡིན་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ཙོམ་ཟ་ན། རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ།། དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན། ལྷའི་དབང་པོ་བརྒྱ་བྱིན་དུ་གྱུར་ཏེ། བྱང་ཆུབ་ཏུ་སེམས་མ་བསྐྱེད་པར་མི་གནས་པའི་སེམས་ཀྱིས། དེ་བཞིན་གཤེགས་པ་དེ་ལ་བསྙེན་བཀུར་བྱས་སོ།། རིགས་ཀྱི་བུ་དེའི་ཚེ་དེའི་དུས་ན། སེམས་ཅན་ཇི་སྙེད་ཀྱིས་རྒྱལ་པོ་གསེར་མདོག་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་གི་ནང་ན། ཐ་ན་སེམས་ཅན་གཅིག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པ་ངས་མ་མཐོང་སྟེ། དེ་དག་ཐམས་ཅད་ནི་ཤེས་རབ་ཆེ་བ་དང་། བརྩོན་འགྲུས་ཆེ་བ་ཤ་སྟག་སྟེ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྒྲུབས་ཤིང་། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ནས། སངས་རྒྱས་ཀྱི་ཞིང་ཐ་དད་པ་དག་ཏུ་མཚན་ཐ་དད་པའི་དེ་བཞིན་གཤེགས་པར་གྱུར་ཏེ། འཇིག་རྟེན་དུ་བྱུང་ནས་ཐམས་ཅད་ཀྱིས་ཆོས་ཀྱི་འཁོར་ལོ་བསྐོར་ཏེ། ཆོས་ཀྱི་འཁོར་ལོ་བསྐོར་ནས། ཡོངས་སུ་མྱ་ངན་ལས་འདས་སོ།། དེ་བཞིན་གཤེག་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་ཀྱང་། ང་དང་ཁྱོད་དང་བྱང་ཆུབ་སེམས་དཔའ་བྱམས་པ་དང་། འཁོར་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་འདུས་པ་གང་ཡིན་པ་འདི་དག་གིས་ཀྱང་མཐོང་ངོ་།། མཆོད་པ་བྱས་སོ།། བསྙེན་བཀུར་བྱས་སོ།། དེ་བཞིན་གཤེགས་པ་དེ་དག་གི་དམ་པའི་ཆོས་ཀྱང་གཟུང་ངོ་།། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ།། བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་ཙམ་དུ་ཡུན་རིང་དུ་ཐོགས་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡང་དེ་ཙམ་དུ་དཀའ་བ་ནི་ངོ་མཚར་ལག་སོ། ། དེ་ཅིའི་སླད་དུ་ཞེ་ན། དེར་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དེ་སྙེད་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེའི་གསུང་རབ་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ། བཅོམ་ལྡན་འདས་ཀྱིས་ནི་མ་བསྐྱེད་པའི་སླད་དུའོ།། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་དེ་ནི་དེ་བཞིན་ཏེ། ཁྱོད་ཇི་སྐད་ཟེར་བ་བཞིན་དུ། བླ་ན་མེད་པ་ཡང་དག་པ་རྫོགས་པའི་བྱང་ཆུབ་འདི་ནི་ཡུན་རིང་དུ་ཐོགས་སོ། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡང་དཀའོ།། རིགས་ཀྱི་བུ་ངས་མངོན་པར་ཤེས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟངས་འོད་དེའི་སྔོན་རོལ་དང་། དེའི་འོག་ཏུ་ཡང་སངས་རྒྱས་མང་པོ་བྱེ་བ་ཁྲག་ཁྲིག་ཕྲག་འབུམ་དག་ལ་ངས་རི་མོ་བྱས། མཆོད་པ་བྱས། བཀུར་སྟི་བྱས། བླ་མར་བྱས་མོད་ཀྱི། དེ་སྲིད་དུ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་དེ། གཞན་དུ་ན་ང་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་འདི་དག་དེ་ཙམ་དུ་མཛེས་ཤིང་། དེ་ཙམ་དུ་བལྟ་ན་སྡུག་ལ། དེ་ཙམ་དུ་སྙིང་དུ་སྡུག་པ་ནི་ངོ་མཚར་ཏོ་སྙམ་སྟེ། དེ་དག་ལ་ངའི་སྡུག་པའི་སེམས་དང་། དགའ་བ་དང་གུས་པ་སྐྱེས་པར་ཟད་དེ། ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ནམ་ཡང་སེམས་མ་བསྐྱེད་དོ།། རིགས་ཀྱི་བུ་དེ་བས་ན་རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་དང་། རང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་དང་། ཉན་ཐོས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ལ། བྱང་ཆུབ་སེམས་དཔའ་རྣམས་ཀྱིས་ཇི་ལྟར་མཆོད་པ་བྱས་སུ་ཟིན་ཀྱང་དེ་སྲིད་དུ་ཡང་། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་བསྐྱེད་དེ། གཞན་དུ་ན་ཕྱིས་གང་གི་ཚེ་དགེ་བའི་རྩ་བ་ཡོངས་སུ་འདུས་པར་གྱུར་པ་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་ཟད་དོ། ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། ། དང་པོར་ངན་ངོན་དམ་གཟིགས་པ་ནི། གྲགས་པ་ཆེན་པོ་ཤེས་རབ་ཕ་རོལ་སོན།། མི་མཆོག་སངས་རྒྱས་བྱེ་བ་ཁྲག་ཁྲིག་དང་།། བསམ་ཡས་རྣམས་ལ་གུས་པས་མཆོད་པ་བྱེད། དང་པོར་ཡོན་ཏན་འབྱུང་གནས་རྣམས་མཆོད་ཀྱང་།། བདག་ནི་མཁས་པ་ཆོས་ཀུན་ཤེས་པའི་མཆོག། འཇིག་རྟེན་མཆོད་རྟེན་སངས་རྒྱས་གྱུར་ཅིག་ཅེས།། དེ་སྲིད་དུ་ཡང་སེམས་ནི་སྐྱེད་མི་བྱེད།། དེ་དག་རང་རྒྱལ་བྱེ་བ་སྙེད་ལ་ཡང་། ། གུས་པ་བསྐྱེད་ནས་མཆོད་པ་བྱེད་མོད་ཀྱི། མི་འདུལ་ཁ་ལོ་སྒྱུར་བ་རྫོགས་སངས་རྒྱས།། གྱུར་ཅེས་སེམས་ནི་དེ་སྲིད་སྐྱེད་མི་བྱེད།། གུས་པ་རྒྱ་ཆེན་ཡང་དག་བསྐྱེད་ནས་ཀྱང་། ། དབང་དུ་གྱུར་པ་བྱེ་སྙེད་མཆོད་མོད་ཀྱི།། ཡེ་ཤེས་རྒྱ་མཚོ་མི་མཆོག་འདྲ་བར་ནི།། དེ་སྲིད་དུ་ཡང་སེམས་ནི་སྐྱེད་མི་བྱེད།། དོན་དམ་གཟིགས་པ་རྣམས་ཀྱི་གཟུགས་མཐོང་ནས།། དགའ་བའི་ཤུགས་ནི་རྒྱ་ཆེན་བསམ་མི་ཁྱབ།། མཁས་པ་མི་འདུལ་རྫོགས་པའི་སངས་རྒྱས་སུ།། གྱུར་ཅེས་སེམས་ནི་དེ་སྲིད་སྐྱེད་མི་བྱེད།། གང་ཚེ་དེ་དག་བསོད་ནམས་རྒྱ་ཆེན་བསགས།། ལུས་དང་ཡིད་ཀྱིས་བདེན་པ་བསྒོམས་པ་ན། ། འདྲེན་པ་མི་རྣམས་མཆོག་ཏུ་གྱུར་ཅིག་ཅེས།། བྱང་ཆུབ་དོན་དུ་སེམས་ནི་བསྐྱེད་པར་བྱེད།། དེ་དག་གིས་ནི་བསྐལ་པ་བྱེ་བ་སྙེད།། བསྙེན་བསྐུར་བྱས་པས་བསོད། ནམས་ཚོགས་བསགས་ནས།། སེམས་དགེ་བ་དང་འཇམ་ཞིང་མཉེན་པ་ཡིས།། དེ་ཚེ་བྱང་ཆུབ་ཏུ་ཡང་སེམས་བསྐྱེད་དེ།། བདག་གིས་དགེ་བའི་རྩ་བ་གང་བསགས་པ།། དེ་ནི་བདག་ཀྱང་ཐམས་ཅད་གཟིགས་གྱུར་ཅིག། ནམས་ཀྱང་བདག་གི་སྨོན་ལམ་ཉམས་མ་འགྱུར།། དེ་དག་དེ་སྐད་སྨོན་ལམ་འཇུག་པར་འགྱུར།། བདག་གིས་དགེ་བའི་རྩ་བ་གང་བསགས་པ།། དེས་ན་སྲོགས་ཆགས་ཐམས་ཅད་རྒལ་གྱུར་ཅིག། མི་དགེའི་ལས་ནི་བདག་གིས་གང་བྱས་པ།། དེ་ཡི་འབྲས་བུ་མི་བཟོད་བདག་གིས་སྤངས།། མཐུ་དང་བརྩོན་འགྲུས་བརྟན་པོ་བསྐྱེད་ནས་ནི།། ཕྱི་ནས་བྱང་ཆུབ་མཆོག་ཏུ་སེམས་ཀྱང་བསྐྱེད།། ། སེམས་ནི་ནམ་ཡང་ཞུམ་པར་མ་གྱུར་ཅིག། དགའ་བ་རྒྱ་ཆེན་བས་མ་ཡས་ཐོབ་གྱུར་ཅིག། མཁས་པ་སེམས་ལ་དམིགས་པར་མི་བྱེད་དེ།། བྱང་ཆུབ་མི་དམིགས་བདག་ཉིད་ཀུན་མི་དམིགས། ། ཆོས་འདི་མཐའ་དག་སྟོང་པར་ཤེས་ན་ནི།། དེས་ན་བྱང་ཆུབ་སེམས་ནི་བརྗེད་མི་འགྱུར།། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཅིའི་སླད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བྱམས་པ་ཞེས་བགྱི།། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདིས་མིང་འདི་ག་ལ་རྙེད་ལགས། ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྩེ་བ་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པ་བས་ཀྱང་། ཆེས་གྲངས་མེད་པ་ཡུན་རིང་པོ་ཚད་མེད་པ་འདས་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གདུགས་ཞེས་བྱ་བ་འཇིག་རྟེན་དུ་བྱུང་སྟེ། རིགས་ཀྱི་བུ་དེ་བཞིན་གཤེགས་པ་རིན་ཆེན་གདུགས་དེ་བཙས་མ་ཐག་ཏུ་གོམ་པ་བདུན་བོར་བ་ན། གནས་གཙང་མའི་རིས་ཀྱི་ལྷ་རྣམས་ཀྱིས། སྟེང་གི་བར་སྤང་ལ་རིན་རྗེན་སྣ་བདུན་གྱི་གདུགས་བཟུང་ངོ་།། རིན་པོ་ཆེའི་གདུགས་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་སོ། ། དེར་ལྷ་རྣམས་ཀྱིས། ཀྱེ་མ་འདི་ནི་དེ་བཞིན་གཤེགས་པ་རིན་ཆེན་གདུགས་ཞེས་བྱ་བར་འགྱུར་རོ་ཞེས་སྒྲ་བསྒྲགས་ཏེ། དེས་ན་དེ་བཞིན་གཤེགས་པ་དེའི་མཚན་རིན་ཆེན་གདུགས་རིན་ཆེན་གདུགས་ཞེས་བྱ་བར་གྱུར་ཏོ། ། དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གདུག་དེའི་གསུང་རབ་ལ། དགེ་སློང་བློ་གྲོས་བརྟན་པོ་ཞེས་བྱ་བ། ཚོང་དཔོན་གྱི་རིགས་པས་རབ་ཏུ་བྱུང་བ་ཞིག་ཡོད་དེ། རིགས་ཀྱི་བུ་དགེ་སློང་བློ་གྲོས་བརྟན་པོ་དེ་བསོད་སྙོམས་པར་གྱུར་ཏོ།། དེའི་ཚེ་དེའི་དུས་ན། དེ་བཞིན་གཤེགས་པ་རིན་ཆེརན་གདུགས་དེའི་བསྟར་བ་ལ་བབ་པ་ན་འཛམ་བུའི་གླིང་དེ་ན། གྲོང་བརྒྱད་ཁྲི་བཞི་སྟོང་ཡོད་དོ།། གྲོང་ཁྱེར་བརྒྱད་ཁྲི་བནི་སྟོང་ཡོད་དོ།། གྲོང་རྡལ་བརྒྱ་ཁྲི་བཞི་སྟོང་ཡོད་དོ། ། ཡུལ་འཁོར་བརྒྱད་ཁྲི་བཞི་སྟོང་ཡོད་དོ།། ཚེ་འདུས་བརྒྱད་ཁྲི་བཞི་སྟོང་ཡོད་དོ།། དགེ་སློང་བློ་གྲོས་བརྟན་པོ་དེ་ཡང་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་ཚོང་དུས་དེ་དག་ཐམས་ཅད་དུ་བསོད་སྙོམས་ཀྱི་ཕྱིར་རྒྱུ་བར་གྱུར་ལ། དེ་འདི་སྙ་པ་དུ་སེམས་ཏེ། ནམ་སྲོག་ཆགས་བརྒྱ་ཚང་བར་བསླབ་པའི་གཞི་ལྔ་ལ་མ་བཀོད་ཀྱི་བར་དུ་བདག་གིས་གཟན་མི་བཟའོ།། སྙམ་མོ།། རིགས་ཀྱི་བུ་འདི་ལྟར་དགེ་སློང་བློ་གྲོས་བརྟན་པོ་དེས་དེ་ལྟ་བའི་ཡིད་མ་དེ་བཅས་ནས། གྲོང་ངམ་གྲོང་ཁྱེར་རམ། གྲོང་རྡལ་ལམ། ཡུལ་འཁོར་རམ། ཚོང་དུས་གང་དང་གང་དུ་བསོལ་སྙོམས་ཀྱི་ཕྱིར་རྒྱུ་བ་དེ་དང་དེར་སྲོག་ཆགས་བརྒྱ་ཚང་བར་བསླབ་པའི་གཞི་ལྔ་ལ་མ་བཀོད་ཀྱི་བར་དུ་གཟན་མི་བཟའོ། ། རིགས་ཀྱི་བུ་དགེ་སློང་བློ་གྲོས་བརྟན་པོ་དེས། གང་གི་ཚེ་ཉི་མ་གཅིག་གིས་སྲོག་ཆགས་བརྒྱ་བསླབ་པའི་བཞི་ལྔ་ལ་བཀོད་པ་དེའི་དུས་དང་དེའི་སྐབས་ཀྱང་ཡོད་དོ། ། གང་གི་ཚེ་ཉི་མ་གཉིས་ཀྱིས་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང་དེའི་སྐབས་ཀྱང་ཡོད་དེ། དེས་གཟན་བཅས་ནས་ཉི་མ་གསུམ་པའི་ཚེ་གཟན་བཟའོ།། གང་གི་ཚེ་ཉི་མ་གསུམ་གྱི་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང་དེའི་སྐབས་ཀྱང་ཡོད་དོ།། ཉི་མ་བཞིས་སྲོག་ཆགས་བརྒྱ་ཚང་བར་བསླབ་པའི་གཞི་ལྔ་ལ་བཀོད་པ་དེའི་དུས་དང་དེའི་སྐབས་ཀྱང་ཡོད་དོ།། རིགས་ཀྱི་བུ་གང་གི་ཚེ་ཉི་མ་ལྔ་དང་། དྲུག་དང་། བདུན་གྱིས་སྲོག་ཆགས་བརྒྱ་བསླབ་པའི་གཞི་ལྔ་ལ་བཀོད་པ་དེའི་དུས་དང་དེའི་སྐབས་ཀྱང་ཡོད་དེ། དེ་ནག་བདུན་གྱི་བར་དུ་གཟན་ཆད་ཀྱང་སེམས་ཅན་རྣམས་ལ་སྙིང་རྗེ་བའི་ཕྱིར་སེམས་ཡོངས་སུ་མི་སྐྱོ་སྟེ། ཞག་བརྒྱད་པའི་ཚེ་གཟན་བཟའོ།། རིགས་ཀྱི་བུ་རྣམ་གྲངས་དེ་ལྟ་བུས་དགེ་སློང་བློ་གྲོས་བརྟན་པོ་དེས། ལོ་བརྒྱད་ཁྲི་བ་ནི་སྟོང་གི་བར་དུ་ཡོངས་སུ་མི་སྐྱོ་བའི་སེམས་ཀྱིས་གྲོང་ཁྱེར་ཆེན་པོ་དེ་དག་ཏུ་སོང་ཞིང་། གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། ཚོང་དུས་དེ་དག་ཏུ་སོང་ནས། སེམས་ཅན་དེ་དག་བསླབ་པའི་གཞི་ལྔ་ལ་བཀོད་དོ།། རིགས་ཀྱི་བུ་དགེ་སློང་བློ་གྲོས་བརྟན་པོ་དེས། ལོ་བརྒྱད་ཁྲི་བཞི་སྟོང་པོ་དེ་དག་འདས་ནས་སྲོག་ཆགས་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་བསླབ་པའི་གཞི་ལྔ་ལ་བཀོད་དོ།། རིགས་ཀྱི་བུ་འདི་ལྟར་དགེ་སློང་བློ་གྲོས་བརྟན་པོ་དེ་འདི་སྙམ་དུ་སེམས་ཏེ། བདག་གིས་སེམས་ཅན་མང་པོ་འདི་དག་བསླབ་པའི་གཞི་ལྔ་ལ་བཀོད་ཟིན་གྱིས། བདག་གིས་འདི་དག་བླ་ར་མེད་པ་ཡང་དག་པར་རྫོགས་པའི་བྱང་ཆུབ་ལ་གཟུང་གོར་མ་ཆག་གོ་སྙམ་ཏོ།། དེ་དག་གི་ཐད་དུ་སོང་ནས། ལོ་བཞི་ཁྲི་ཉིས་སྟོང་གི་བར་དུ་སངས་རྒྱས་ཀྱི་བསྔགས་པ་བརྗོད་དོ།། ཆོས་ཀྱི་བསྔགས་པ་བརྗོད་དོ།། དགེ་འདུན་གྱི་བསྔགས་པ་བརྗོད་དོ།། ཐེག་པ་ཆེན་པོའི་བསྔགས་པ་བརྗོད་དོ། ། སེམས་ཅན་བསླབ་པའི་གཞི་ལྔ་ལ་བཀོད་པ་གང་ཡིན་པའི་སེམས་ཅན་དེ་དག་གིས་ནང་ནས། ལོ་བརྒྱད་ཁྲི་བཞི་སྟོང་པོ་གཞན་འདས་ནས། སྲོག་ཆགས་བྱེ་བ་ཕྲག་གསུམ་དུ་ཚང་བ། གང་དག་སྔོན་གྱི་སངས་རྒྱས་རྣམས་ལ་དགེ་བའི་རྩ་བསྐྱེད་པ། རྒྱ་ཆེན་པོ་ལ་མོས་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཙུད་དོ།། ལྷག་མ་དམན་པ་ལ་མོས་པ་རྐྱེན་གྱི་མཐུན་དང་ལྡན་པ་དེ་དག་ནི། རང་སངས་རྒྱས་ཀྱི་བྱང་ཆུབ་དང་། ཉན་ཐོས་ཀྱི་ཐེག་པ་ལ་སེམས་བསྐྱེད་དུ་བཅུག་གོ།། རིགས་ཀྱི་བུ་འདི་ལྟར་དགེ་སློང་བློ་གྲོས་བརྟན་པོ་དེ་འདི་སྙམ་དུ་སེམས་ཏེ། བདག་གིས་སེམས་ཅན་འདི་དག་ཐེག་པ་གསུམ་པོ་ལ་མོས་པར་བྱས་ཟིན་གྱིས། བདག་གིས་སེམས་ཅན་འདི་དག་བག་ཡོད་པར་གནས་པར་བྱ་བའི་ཕྱིར། ཏིང་ངེ་འཛིན་ལ་གཟུད་པ་བསྟན་ཏོ་སྙམ་མོ།། རིགས་ཀྱི་བུ་དེ་ལྟར་དགེ་སློང་བློ་གྲོས་བརྟན་པོ་དེས། ཡང་ལོ་ཉི་ཁྲི་ཆིག་སྟོང་གི་བར་དུ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་པོ་དེ་དག་ལ་ཏིང་ངེ་འཛིན་ལ་དམིགས་པའི་ལུང་ཕོག་གོ།། རིགས་ཀྱི་བུ་དགེ་སློང་བློ་གྲོས་བརྟན་པོ་དེས། སྲོག་ཆགས་བྱེ་བ་ཁྲག་ཁྲིག་འབུམ་ཕྲག་སུམ་ཅུ་རྩ་དྲུག་པོའི་སེམས་ཅན་དེ་དག་ཐམས་ཅད་ཅི་ནས་བྱམས་པའི་ཏིང་ངེ་འཛིན་སྒྲུབ་པར་འགྱུར་བ་དེ་ལྟ་དེ་ལྟ་བུར་གདམས་ངག་བསྟན་ཅིང་། དེ་ལྟ་དེ་ལྟ་བུར་རྗེས་སུ་སྟོན་ཏོ། ། རིགས་ཀྱི་བུ་འདི་ལྟར་དགེ་སློང་བློ་གྲོས་བརྟན་པོ་དེ་གང་གི་ཚེ་གྲོང་དུ་འགྲོ་བ་དེའི་ཚེ། བྱམས་པའི་ཏིང་ངེ་འཛིན་ལ་སྙོམས་པར་ཞུགས་ཏེ་འགྲོའོ།། དེ་བྱམས་པའི་ཏིང་ངེ་འཛིན་ལ་སྟོན། པར་ཞུགས་ནས། གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་འཁོར་རམ། ཚོང་དུས་སུ་བསོད་སྙོམས་ཀྱི་ཕྱིར་འགྲོ་སྟེ། དེ་འགྲོ་བ་ན་དེ་ན་སེམས་ཅན་བྱམས་པ་ལ་གནས་པ་གང་ཡིན། པ་དེ་དག་ཐམས་ཅད་དགེ་སློང་བློ་གྲོས་བརྟན་པོ་དེའི་རྐང་པ་སྒོའི་ཐེམ་པ་ལ་བཞག་པའི་ཚེ། བྱམས་པའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ།། རིགས་ཀྱི་བུ་ལྷག་པའི་བསམ་པ་དང་། དགེ་བའི་རྩ་བ་ལ་ཡིད་ཆེས་པ་དང་། སྟོང་པ་ཉིད་ལ་མོས་པའི་ཁྱད་པར་ལ་ལྟོས། དེའི་ཕྱིར་དགེ་སློང་བློ་གྲོས་བརྟན་པོའི་རྐང་པ་སྒོའི་ཐེམ་པ་ལ་བཞག་པའི་ཚེ། སེམས་ཅན་དེ་དག་ཐམས་ཅད་བྱམས་པའི་ཏིང་འཛིན་ལ་ཇི་ལྟར་བཙུད་པ་བཞིན་དུ། བྱམས་པའི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ནས་དེའི་ཚེ་དགེ་སློང་བློ་གྲོས་བརྟན་པོ་དེའི་བྱམས་པའི་ཏིང་ངེ་འཛིན་གྱི་རྣམ་པར་འཕྲུལ་པ་དེ་ལྟ་བུ་མཐོང་ནས། ས་པྤའི་ལྷ་རྣམས་ཀྱིས། ཨ་ལ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བྱམས་པར་འགྱུར་ཏེ། འདི་ལྟར་འདི་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་ཚོང་དུས་སུ་འགྲོ་བ་ན་སེམས་ཅན་རྣམས་བྱམས་པའི་ཏིང་ངེ་འཛིན་ལ་སྙོམས་པར་འཇུག་པའི་ཕྱིར་རོ་ཞེས་སྒྲ་སྒྲོགས་ཤིང་སྐད་འབྱིན་པར་བྱེད་དོ། ། ས་བླའི་ལྷ་རྣམས་ཀྱི་སྒྲ་ཐོས་ནས། བར་སྣང་གི་ལྷ་རྣམས་ཀྱིས་སྒྲ་སྒྲོགས་ཤིང་སྐད་ཕྱུང་ངོ་། ། དེ་དག་གིས་སྒྲ་ཐོས་ནས། རྒྱལ་ཆེན་བཞིའི་རིས་ཀྱི་ལྷ་རྣམས་དང་། སུམ་ཅུ་རྩ་གསུམ་པའི་ལྷ་རྣམས་དང་། འཐབ་བྲལ་དང་། དགའ་ལྡན་དང་།། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ནས། གནས་གཙང་མའི་ལྷ་རྣམས་ཀྱི་བར་གཅིག་ནས་གཅིག་ཏུ་སྒྲ་ཐོས་ནས། ཨ་ལ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བྱམས་པར་འགྱུར་ཏེ། འདི་ལྟར་འདི་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། ཚོང་དུས་སུ་སོང་བ་དང་། སེམས་ཅན་རྣམས་བྱམས་པའི་ཏིང་ངེ་འཛིན་ལ་སྙོམས་པར་ཞུགས་པའི་ཕྱིར་རོ། ། ཞེས་སྒྲ་བསྒྲགས་ཤིང་སྐད་ཕྱུང་ངོ་།། དེའི་མིང་དེ་ལ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གདུགས་དེས་རྗེས་སུ་ཡི་རང་བར་མཛད་དེ། འདི་སྐད་དུ་བྱང་ཆུབ་སེམས་དཔའ་དགེ་སློང་བློ་གྲོ་བརྟན་པོ་འདི་ནི་སྲིད་པར་འགྲོ་བའི་འཆི་འཕོ་དང་སྐྱེ་བ་ཐམས་ཅད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བར་འགྱུར་ཏེ། མངོན་པར་གྲགས་པར་འགྱུར་རོ།། བྱང་ཆུབ་ཐོབ་པའི་ཚེ་ཡང་འདིའི་མིང་དེ་ཉིད་དུ་འགྱུར་ཏེ། འཇིག་རྟེན་དུ་ཉན་ཐོས་ཀྱི་དགེ་འདུན་དཔག་ཏུ་མེད་པ་དང་། རིན་པོ་ཆེ་བཀོད་པའི་སངས་རྒྱས་ཀྱི་ཞིང་གི་བདེ་བ་ཐམས་ཅད་དང་ལྡན་པའི་སེམས་ཅད་རྣམས་འདུས་པའི་ནང་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། ། རིགས་ཀྱི་བུ་དེའི་ཚེ་དེའི་དུས་ན། དགེ་སློང་བློ་གྲོས་བརྟན་པོ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སོམ་ཉི་འམ། ཡིད་གཉིས་སམ། ཐེ་ཙོམ་ཟ་སྲིད་དེ། དེ་ཚུན་ཆད་ཚེ་རབས་ཐམས་ཅད་དུ། མིང་འདི་ལྟ་སྟེ། བྱམས་པ་ཞེས་བྱ་བ་འབའ་ཤིག་ཏུ་འགྱུར་རོ།། བྱང་ཆུབ་ཐོབ་པའི་ཚེ་ཡང་འདིའི་མིང་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བ་དེ་ཁོ་ནར་འགྱུར་ཏེ། རིགས་ཀྱི་བུ་རྒྱུ་ནི་ཡིན། རྐྱེན་ནི་དེ་ཡི་ཏེ། དེས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ། བྱམས་པ་བྱམས་པ་ཞེས་བྱའོ།། དེ་ནས་བཅོམ་ལྡན་འདས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སྔོན་བྱུང་བ་འདི་བཤད་མ་ཐག་པ་དེའི་མོད་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ།། སྟེང་གི་བར་སྣང་ལ་ཡང་ལྷའི་གླུ་དབྱངས་གྲག་གོ།། མེ་ཏོག་གི་ཆར་ཡང་བབ་བོ།། དེ་ནས་དེའི་ཚེ་རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། གཞན་ཡང་ལྷའི་བུ་འབུམ་ཕྲག་དུ་མ་དག་གིས། ལྷའི་མེ་ཏོག་མནྡཱ་ར་བ་དག་ཁྱེར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ག་ལ་བ་དེར་གཏོར་ཚིག་འདི་སྐད་དུ། ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ནི་སྐྱེ་བོ་མང་པོ་ལ་ཕན་པའི་ཕྱིར་ཞུགས་ཏེ། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་སྐྱེ་བོ་ཕལ་པོ་ཆེའི་དོན་དང་། ཕན་པ་དང་། བདེ་བའི་ཕྱིར་གོ་ཆ་ཆེན་པོ་བགོས་ཏེ། འདི་ལྟར་ཐམས་ཅད་མཁྱེན་པ་ཉིད་མ་ཐོབ་པར་ཡང་སེམས་ཅན་བྱེ་བ་ཁྲག་ཁྲིག་འབུམ་དེ་སྙེད་ཀྱི་དོན་བྱས་པའི་ཕྱིར་རོ། ། སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་མིང་ཙམ་ཐོས་པ་དེ་དག་ཀྱང་རྙེད་པའི་མཆོག་ལེགས་པར་རྙེད་པ་ཡིན་ན། ཤའི་མིག་གིས་མངོན་སུམ་དུ་མཐོང་ནས། དགའ་བ་ཐོབ་པ་དེ་དག་ལྟ་ཅི་སྨོས། བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བདག་ཅག་ཕྱག་འཚལ་ལོ་ཞེས་སྨྲས་སོ། ། དེ་ནས་ལྷའི་བུ་དེ་དག་གིས་ཚིག་དེ་སྐད་ཅེས་སྨྲས་མ་ཐག་པ་དེའི་མོད་ལ། སྐྱེ་བོའི་ཚོགས་ཆེན་པོ་དང་བཅས། ལྷ་དང་མི་དང་། ལྷ་མ་ཡིན་དུ་བཅས་པའི་འཇི་རྟེན་གྱིས། ཚིག་མཐུན་པའི་ཚིག་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ། ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ་ཞེས་སྨྲས་སོ།། ཆོས་ཀྱི་རྣམ་གྲངས་འདི་བསྟན་པ་ན། སྲོག་ཆགས་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། ། དགེ་སློང་ལྔ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམས་པར་གྲོལ་ལོ།། སྲོག་ཆགས་སྟོང་ཕྲག་དུ་མ་ནི་དགེ་བའི་རྩ་བ་ཡོངས་སུ་སྨིན་པར་གྱུར་ཏེ། དེ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་འཁོར་འདུས་པ་གཉིས་པ་ལ་དགྲ་བཅོམ་པ་མངོན་སུམ་དུ་བྱེད་པར་འགྱུར་རོ་ཞེས་དེ་དག་ཀྱང་བཅོམ་ལྡན་འདས་ཀྱིས་ལུང་བསྟན་ཏོ། ། དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས། ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདིའི་མིང་བྱམས་པའི་དང་པོ་སེམས་བསྐྱེད་པ་ཞེས་བྱ་བར་ཟུང་ཤིག། བྱང་ཆུབ་སེམས་དཔའ་རྣམ་པར་རྩེ་བས་ཞུས་པ་ཞེས་བྱ་བར་ཡང་ཟུང་ཤིག། བྱང་ཆུབ་སེམས་དཔའ་ལུང་བསྟན་པ་ཞེས་བྱ་བར་ཟུང་ཤིག། དེ་བཞིན་གཤེགས་པའི་ཕྱག་རྒྱ་བསྟན་པ་ཞེས་བྱ་བར་ཡང་ཟུང་ཤིག། བྱང་ཆུབ་སེམས་དངཔ་གི། སྒོ་སོ་སོ་ཞེས་བྱ་བར་ཟུང་ཤིག། ཀུན་དགའ་བོ་ཆོས་ཀྱི་རྣམ་གྲངས་འདི་གཟུང་བའི་ཕྱིར་དང་། གཞན་དག་ལ་ཡང་རྒྱས་པར་ཡང་དག་བསྟན་པར་བྱ་བའི་བར་གྱི་ཕྱིར་ཁྱོད་ལ་གཏད་དོ།། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་གང་བར་བྱས་ཏེ། དེ་བཞིན་གཤེགས་པ་རྣམས་ལ་ཕུལ་བ་བས་ནི། གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་དང་པོ་འཇུག་པ་འདི་ཐོས་ནས། སེམས་ཀྱི་རྒྱུད་བྱང་ཆུབ་ཏུ་གཞོལ་བ་དང་། བྱང་ཆུབ་ཏུ་སྨོན་པས་མོས་པར་བྱེད་དམ། འཛིན་ཏམ། འཆང་ངམ། ཀུན་ཆུབ་པར་བྱེད་དམ། སྒོམ་མམ། གཞན་དག་ལ་རྒྱས་པར་ཡང་དག་པར་སྟོན་པར་བྱེད་ན། འདི་ནི་དེ་བས་ཆེས་བསོད་ནམས་མང་དུ་བསྐྱེད་པར་འགྱུར་རོ། ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ།། མི་ལུས་ཐོབ་པ་རྙེད་པར་དཀའ་སངས་རྒྱས་འབྱུང་བའང་རྙེད་པར་དཀའ། ། སངས་རྒྱས་དད་པ་རྙེད་པར་དཀའ།། བྱང་ཆུབ་སེམས་ཀྱང་རྙེད་པར་དཀའ།། གནས་སྐབས་བཞི་པོ་འདི་དག་ནི།། བསྐལ་པ་བྱེ་བར་རྙེད་དཀའ་སྟེ། ། དེ་ཕྱིར་ཐོབ་ནས་མ་སྤངས་ཤིག། མཐུ་རྩལ་དག་ཀྱང་ཆུང་མ་གཟོན།། མི་ལུས་ཐོབ་པ་རྙེད་པ་དང་།། སངས་རྒྱས་འབྱུང་བ་རྙེད་པ་དང་།། སངས་རྒྱས་དད་པའང་སྙེད་པ་དང་བྱང་ཆུབ་སེམས་ནི་སྐྱེད་གྱུར་ན། ། དེ་ཕྱིར་བརྩོན་འགྲུས་བསྐྱེད་ནས་ཀྱང་།། རྟག་ཏུ་བག་ནི་ཡོད་པར་གྱིས།། དྲང་སྲོང་ཆེན་པོ་དེ་དག་གིས།། བག་ཡོད་པས་ནི་བྱང་ཆུབ་བརྙེས།། སངས་རྒྱས་ཆོས་རྣམས་ཐམས་ཅད་ཀྱི།། རྩ་བའི་སྒོ་དང་ཚུལ་གྱི་ལམ།། བག་ཡོད་པ་དང་བརྩོན་འགྲུས་ཡིན།། མཁས་པ་རྣམས་ཀྱང་འདི་ལ་སློབ།། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་རྣམ་པར་རྩེ་བ་དང་། བྱང་ཆུབ་སེམས་དཔའ་བྱམས་པ་དང་། ཐམས་ཅད་ལྡན་པའི་འཁོར་དེ་དང་། ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། འཕགས་པ་བྱམས་པ་འཇུག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།
CLOSE WINDOW