Wylie | e-texts produced with ocr Programm |
། རྒྱ་གར་སྐད་དུ། ཤྲཱི་ཛྙཱ་ན་རཱ་ཛ་ཏནྟ་རཱ་ཛ། བོད་སྐད་དུ། དཔལ་ཡེ་ཤེས་རྒྱལ་པོའི་རྒྱུད་ཀྱི་རྒྱལ་པོ། དཔལ་བདེ་བ་ཆེན་པོ་ལ་ཕྱག་འཚལ་ལོ།། ཀྱེ་མ་སངས་རྒྱས་ཀྱི་སངས་རྒྱས།། ཀྱེ་མ་སངས་རྒྱས་མཛད་པ་ལེགས།། གང་ཕྱིར་སེམས་ཅན་ཐམས་ཅད་ཀྱིས།། མྱ་ངན་འདས་པ་ཐོབ་བྱའི་ཕྱིར། ། དད་དང་བརྩོན་འགྲུས་རྫོགས་བྱས་ཏེ།། བླ་མའི་རྗེས་སུ་འཇུག་པར་བྱ།། རང་རིག་གཉིས་སུ་མེད་པ་ལ།། གཞན་རིག་གཉིས་སུ་འཛིན་པས་འཁྲུལ།། གཟོད་ནས་མ་སྐྱེས་མ་གྲུབ་ལ། ། སྐྱེས་དང་གྲུབ་པར་འཛིན་པས་འཁྲུལ།། དངོས་པོ་རོ་མཉམ་གྱུར་པ་ལ།། དམན་དང་གྱ་ནོམ་འཛིན་པས་འཁྲུལ།། འཁོར་བ་ཡོངས་སུ་ཤེས་པ་ཉིད།། མྱ་ངན་འདས་པར་བརྗོད་པ་ལ། ། སངས་རྒྱས་སེམས་ཅན་རྟོག་པས་འཁྲུལ།། རང་བཞིན་ལྷུན་གྱིས་གྲུབ་པ་ལ།། རྒྱུ་དང་རྐྱེན་གྱིས་སྐྱེ་བས་འཁྲུལ།། བརྡ་དང་ཐ་སྙད་བྲལ་བ་ལ།། བློ་ཡི་སྤྱོད་ཡུལ་བྱེད་པས་འཁྲུལ། ། མཐའ་བྲལ་དབུ་མར་གནས་པ་ལ།། རྟག་དང་ཆད་པར་འཛིན་པས་འཁྲུལ།། ཤེས་བརྗོད་ཡུལ་ལས་འདས་པ་ལ།། བདག་དང་བདག་གིར་འཛིན་པས་འཁྲུལ།། དངོས་པོ་མཚན་མ་ལ་སོགས་པའི།། རྣམ་རྟོག་ཀུན་གྱིས་སྟོང་པ་ལ།། དངོས་པོར་རྗེས་སུ་འཛིན་པས་འཁྲུལ།། རང་ཉིད་གཉིས་སུ་མེད་པ་ལ།། བདེན་པ་གཉིས་སུ་འཛིན་པས་འཁྲུལ། ། གདུལ་བྱ་སྣ་ཚོགས་འདུལ་བ་ཡི།། ཐེག་པ་དུ་མའི་གོང་འོག་ལ། སྒྲོ་དང་སྐུར་པ་འདེབས་པས་འཁྲུལ།། སེམས་ཅན་འཁྲུལ་པ་སྣ་ཚོགས་ཀྱིས།། ལས་ཀྱི་རྣམ་སྨིན་ལ་སོགས་ལ། ། བལྟ་བས་སྐུར་པ་འདེབས་པས་འཁྲུལ།། རང་རིག་གཟོད་ནས་འོད་གསོལ་ལ།། སྐུ་མདོག་ཕྱག་མཚན་ལ་སོགས་པ།། རྡོ་རྗེ་འཛིན་པར་འདོད་པས་འཁྲུལ།། འཁྲུལ་པ་དང་ནི་འཁྲུལ་པའི་གཞི།། འདོད་ཆགས་འདོད་ཆགས་ཆེན་པོ་སྟེ།། འཁྲུལ་གཞི་འཁྲུལ་པ་ལས་འདས་ན།། འདོད་ཆགས་ཆེན་པོ་བཅོམ་ལྡན་འདས།། ཞེ་སྡང་ཞེ་སྡང་ཆེན་པོ་དང་། ། དེ་བཞིན་ཞེ་སྡང་བཅོམ་ལྡན་འདས།། གཏི་མུག་གཏི་མུག་ཆེན་པོ་སྟེ།། དེ་བཞིན་གཏི་མུག་བཅོམ་ལྡན་འདས།། འདི་ཡིས་ངེས་པར་གྲོལ་འགྱུར་གྱི།། འདི་སྤངས་གཞན་གྱིས་གྲོལ་བ་མིན། ། བདག་པོ་ལྷ་དང་བླ་མ་སྤུན། བདག་པོ་ལྷན་ཅིག་རྣལ་འབྱོར་ཙམ།། ཐེག་པ་སྤྱི་བསྡུས་དེ་ལས་གཞན།། སྐྱེ་བོའི་བེམས་པོ་ཆེ་དང་བརྒྱད།། དེ་དག་རང་རིག་ཐོབ་པའི་རྒྱུ། ། དེ་ཕྱིར་དམ་ཚིག་གཙོ་བོར་བསྲུངས།། འབྲས་བུའི་ཁྱད་པར་རང་རིག་འབྱུང་།། ཀྱེ་མ་མགོན་པོ་ཀྱེ་སངས་རྒྱས།། འདོད་ཆགས་དབྱེ་བ་དེ་ལྟར་ན།། དེ་ཡི་ངོ་བོ་ཇི་ལྟར་ལགས། ། ཞེ་སྡང་ལ་སོགས་དེ་དང་འདྲ།། རྡོ་རྗེ་སྙིང་པོ་སྙིང་རྗེ་ཆེ།། ལེགས་པར་ཉོན་ལ་ཡིད་ལ་ཟུང་།། ལས་དང་ལས་ཀྱི་རྣམ་སྨིན་གྱི།། རྒྱུ་འབྲས་མི་ཤེས་གཏི་མུག་སྟེ། ། ལུས་སེམས་ཀུན་ནས་འཁྲུགས་པ་དག། ཞེ་སྡང་ཡིན་ཏེ་སྒོ་གསུམ་གྱིས།། ཀུན་ནས་བསླང་སྟེ་ནོར་བུའི་མཐར།། ས་བོན་འབྱུང་བ་འདོད་ཆགས་སོ།། དབང་སོགས་ངོ་བོ་གང་མ་ཤེས། ། འདོད་ཆགས་ལ་སོགས་ཆེན་པོར་ངེས།། རང་རིག་ངོ་བོ་གང་ལ་གནས།། འོག་མ་སྤོང་བའི་གཉེན་པོ་སྟེ།། ངོ་བོ་སྒྱུ་མར་གང་ཤེས་དང་།། དབང་པོའི་སྒོ་བསྡུས་ཐབས་ཡིན་ཏེ། ། གོང་མ་སྐྱེ་བའི་རྒྱུར་འགྱུར་བའི།། ཕྱིར་ཡང་ཆེན་པོར་གྱུར་པ་སྟེ།། གཞན་གྱི་དོན་དུ་གྱུར་པ་དང་།། དེ་ལས་གཞན་དགེ་མོས་འགྱུར་དང་།། མང་པོ་མི་མོས་སྤོང་བ་དང་། ། ཉོན་མོངས་སྤྱི་ཡིས་ཟིལ་མ་ནོན།། བྱེ་བྲག་འདོད་ཆགས་ཞེ་སྡང་སོགས།། ཟིལ་གྱིས་མི་ནོན་འོག་མ་ཡི།། རྣམ་རྟོག་གང་ཡང་མི་སྐྱེ་དང་།། ཉོན་མོངས་སྤྱི་དང་བྱེ་བྲག་སྤོང་། ། གཉེན་པོ་ཡིན་པར་ངེས་པ་དང་།། ཉོན་མོངས་སྐྲ་རྩེ་ཙམ་མི་སྐྱེ།། གཉིས་ནི་གོང་དང་འདྲ་བ་སྟེ།། བཅུ་གཉིས་འདོད་ཆགས་ཆེན་པོ་དག། བཅོམ་ལྡན་འདས་སུ་གསུངས་པ་སྟེ། ཞེ་སྡང་ལ་སོགས་དེ་བཞིན་ནོ།། ཟབ་མོའི་ལྷ་སྤྱོད་མ་རྟོགས་པར།། སྔགས་སྤྱོད་བཟླས་པ་ལ་སོགས་བྱེད།། དེ་དག་ངལ་བ་དོན་མེད་ཡིན།། དེ་དག་བླ་མ་དམ་པ་ལས།། མན་ངག་དམ་པ་བརྟུལ་བྱ་སྟེ། ། འཁྲུལ་པ་དང་ནི་འཁྲུལ་གཞི་ལས།། སད་པར་བྱེད་པའི་ཆོ་ག་བླང་།། དེའི་ཚེ་རྒྱུད་ཀྱི་དོན་ལ་དགའ་ཞིང་རྗེས་སུ་ཡི་རང་བར་གྱུར་ཏོ།། དཔལ་ཡེ་ཤེས་རྒྱལ་པོ་ཞེས་བྱ་བའི་རྒྱུད་ཀྱི་རྒྱལ་པོ་རྫོགས་སོ། ། ། རྒྱ་གར་གྱི་མཁན་པོ་ག་ཡ་དྷ་ར་དང་། ལོ་ཙ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།།
CLOSE WINDOW