| Wylie | e-texts produced with ocr Programm |
སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པའོ།། ། བོད་སྐད་དུ། གློག་ཐོབ་ཀྱི་ཞུས་པ་ཞེས་བྱ་བ་ཐེག་པ་ཆེན་པོའི་མདོ།། །། བམ་པོ་དང་པོ།། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ། དགེ་སློང་གིས་དགེ་འདུན་ཆེན་པོ་ཐམས་ཅད་ཀྱང་ཡོན་ཏན་ཁྱད་པར་དུ་འཕགས་པ་ཕུན་སུམ་ཚོགས་ཤིང་སེང་གེའི་སྒྲ་སྒྲོགས་པ་སྟོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་དང་ཐབས་ཅིག་ཏུ་བཞུགས་ཏེ། དེ་དག་ཐམས་ཅད་ཀྱང་གཟུངས་རབ་ཏུ་ཐོབ་པ། སྤོབས་པ་ཐོགས་པ་མེད་པར་གྱུར་པ། མི་སྐྱེ་བའི་བཟོད་པ་མངོན་སུམ་དུ་བྱས་པ། ཕྱིར་མི་ལྡོག་པ་ལ་གནས་པ། ཏིང་ངེ་འཛིན་རྣམས་དང་ལྡན་པ། མངོན་པར་ཤེས་པས་རྣམ་པར་རྩེན་པ། སེམས་ཅན་གྱི་སེམས་ཀྱི་སྤྱོད་པའི་ཚུལ་རབ་ཏུ་རྟོགས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་ཉི་མའི་རྒྱལ་མཚན་དང་། བྱང་ཆུབ་སེམས་དཔའ་ཟླ་བའི་རྒྱལ་མཚན་དང་། བྱང་ཆུབ་སེམས་དཔའ་ཀུན་ཏུ་འོད་དང་། བྱང་ཆུབ་སེམས་དཔའ་ཟླ་བའི་རྒྱལ་པོ་དང་། བྱང་ཆུབ་སེམས་དཔའ་ཤིན་ཏུ་མཐོ་བསལ་དང་། བྱང་ཆུབ་སེམས་དཔའ་རྣམ་པར་སྣང་བྱེད་དང་། བྱང་ཆུབ་སེམས་དཔའ་སེང་གེའི་བློ་གྲོས་དང་། བྱང་ཆུབ་སེམས་དཔའ་རིན་པོ་ཆེའི་ཡོན་ཏན་འོད་དང་། བྱང་ཆུབ་སེམས་དཔའ་དོན་ཐམས་ཅད་གྲུབ་པ་དང་། བྱང་ཆུབ་སེམས་དཔའ་སྔོན་གྱི་རྐྱེན་དང་ལྡན་པ་དང་། བྱང་ཆུབ་སེམས་དཔའ་སྨོན་ལམ་དང་སྤྱོད་པ་ཕུན་སུམ་ཚོགས་པ་དང་། བྱང་ཆུབ་སེམས་དཔའ་སྟོང་པའི་བློ་གྲོས་དང་། བྱང་ཆུབ་སེམས་དཔའ་མཉམ་པའི་སེམས་དང་། བྱང་ཆུབ་སེམས་དཔའ་དགའ་སྲེད་དང་། བྱང་ཆུབ་སེམས་དཔའ་འཁོར་ལོ་མོས་པ་དང་། བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་དང་། བྱང་ཆུབ་སེམས་དཔའ་བློ་གྲོས་སྤྱོད་པ་དང་། བྱང་ཆུབ་སེམས་དཔའ་གློག་ཐོབ་དང་། བྱང་ཆུབ་སེམས་དཔའ་རྣམ་པར་རྒྱལ་བའི་སྤོབས་པ་དང་། བྱང་ཆུབ་སེམས་དཔའ་སེང་གེའི་ང་རོ་དང་། བྱང་ཆུབ་སེམས་དཔའ་རབ་དབྱངས་དང་། བྱང་ཆུབ་སེམས་དཔའ་སད་བྱེད་དང་། བྱང་ཆུབ་སེམས་དཔའ་སྤྱོད་པ་སྦྱར་བ་ལ་མཁས་པ་དང་། བྱང་ཆུབ་སེམས་དཔའ་རབ་ཏུ་ཞི་བའི་སྤྱོད་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་གཙོ་བོར་གྱུར་ཏོ། ། གཞན་ཡང་བརྒྱ་བྱིན་ལྷའི་དབང་པོ་དང་། རྒྱལ་པོ་ཆེན་པོ་བཞི་དང་། འཇིག་རྟེན་གྱི་ཁམས་མི་མཇེད་ཀྱི་བདག་པོ་ཚངས་པའི་རྒྱལ་པོ་དང་། མཐུ་ཆེན་པོ་དང་ལྡན་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་ལ་སོགས་པའི་འཁོར་ཚད་མེད་པ་རྣམས་དང་ཡང་ཐབས་ཅིག་ཏུ་བཞུགས་སོ།། དེ་ནས་དེའི་ཚེ་བྱང་ཆུབ་སེམས་དཔའ་ཐོག་ཐོབ་ཅེས་བྱ་བས་འཁོར་མང་པོ་རབ་ཏུ་ཞི་ཞིང་ཡོངས་སུ་དག་པ་དག་འདུས་པར་གྱུར་པ་མཐོང་བ་དང་། སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ལ་ཐེ་ཙོམ་ཅུང་ཟད་ཅིག་མཆིས་ཏེ་དེང་ཞུ་བར་འཚལ་ན། དེ་བཞིན་གཤེགས་པས་ཐུགས་རྗེས་གསན་ཅིང་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གློག་ཐོབ་ལ་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ལ་སྐབས་ཕྱེས་ཁྱོད་ཅི་དང་རྩི་འདོད་པ་དྲིས་ཤིག་དང་། ཁྱོད་ལ་ཡང་དག་པར་བསྟན་པར་བྱའོ།། དེ་ནས་བཅོམ་ལྡན་འདས་ལ། བྱང་ཆུབ་སེམས་དཔའ་གློག་ཐོབ་ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཇི་ལྟ་བུ་ཞིག་དང་ལྡན་པར་གྱུར་ན། བསམས་པ་ཐམས་ཅད་ཡོངས་སུ་རྫོགས་པར་བགྱིད་ཅིང་། སྐྱོན་རྣམས་ཀྱིས་གོས་པར་མི་འགྱུར་བ་དང་། དབང་པོ་དང་། རང་བཞིན་ཇི་ལྟ་བ་བཞིན་དུ་ཐབས་མཁས་པས་སེམས་ཅན་དེ་དག་དྲངས་ཏེ། ལུས་ཞིག་པའི་འོག་ཏུ་ངན་འགྲོ་རྣམས་སུ་ལྷུང་བར་མི་འགྱུར་ཞིང་། གདོན་མི་འཚལ་བར་མཉམ་པ་ཉིད་རྟོགས་པར་འགྱུར་བ་དང་། འཇིག་རྟེན་ན་གནས་ཀྱང་པདྨ་བཞིན་སྐྱོན་གྱིས་གོས་པར་མི་འགྱུར་བ་དང་། ཆོས་ཀྱི་དབྱིངས་ལས་མ་གཡོས་པར་ཡང་སངས་རྒྱས་ཀྱི་ཞིང་ཀུན་ཏུ་རྒྱུ་ཞིང་། རྟག་པར་དེ་བཞིན་གཤེགས་པའི་གཟུགས་ཀྱི་སྐུ་མཐོང་བ་དང་འབྲལ་བར་མི་འགྱུར་བ་དང་། རྣམ་པར་ཐར་པ་གསུམ་ལ་རབ་ཏུ་གནས་ཀྱང་། སྙོམས་པར་མི་འཇུག་པར་སེམས་ཅན་གྱི་མོས་པ་ཇི་ལྟ་བ་བཞིན་དུ། སངས་རྒྱས་ཀྱི་ཞིང་གི་བཀོད་པ་ཡོངས་སུ་སྦྱངས་ནས་སྐད་ཅིག་མ་གཅིག་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་ལགས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གློག་ཐོབ་ཀྱིས། བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་ཞུ་བ་ཞུས་པ།། བླ་ནམ་མཆིས་མི་ཡི་གཙོ།། མཁྱེན་དང་གཟིགས་པ་ཚད་མ་མཆིས།། མ་འདྲེས་ཆོས་ལ་བཞུགས་ནས་ནི།། འཇིག་རྟེན་རྣམས་ལ་ཕན་འདོགས་མཛད།། སེམས་ཅན་ཀུན་ལ་སྙོམས་པར་གཟིགས།། འཇིག་རྟེན་ཀུན་གྱི་མགོན་སྐྱབས་མཛད།། ལོག་དང་ཡང་དག་ལམ་བསྟན་ནས།། མཐར་ཐུག་བདེལ་དགོད་པར་མཛད། ། ཡོན་ཏན་མཆོག་ནི་རབ་བསགས་པས།། རིན་ཆེན་སྣ་ཚོགས་ཕུང་པོ་འདྲ།། འཇིག་རྟེན་ཤེས་རབ་ཉི་མ་ཁྱོད།། ཁམས་གསུམ་མཆོད་འོས་གཙོ་བོ་ལགས།། ཐེག་པ་ཆེན་པོ་བཀས་བཤད་ནས། ། བྱང་ཆུབ་ལམ་ནི་རྫོགས་པར་མཛོད།། ཞལ་མཚན་ཟླ་བ་ཉ་བ་འདྲ།། ཞི་གནས་དག་ནི་ཕུན་སུམ་ཚོགས།། ཉེར་ཞི་ཆོས་ནི་རབ་བསྟན་ནས།། ཉོན་མོངས་རྣམས་ནི་ཞི་བར་མཛད། ། བྱང་ཆུབ་སྤྱོད་པ་བཀས་བཤད་ནས།། སེམས་ཅན་རྣམས་ལ་ཕན་མཛད་གསོལ།། སངས་རྒྱས་ཞིང་དང་སྐུ་ཚེ་དང་།། གཟུགས་སྐུ་དང་ནི་འཁོར་རྣམས་དང་། ། འཕྲིན་ལས་གསུམ་དང་ཆོས་རྣམས་ཀྱང་།། ཐམས་ཅད་ཀུན་ནི་རྣམ་པར་དག། བཅོམ་ལྡན་བྱང་ཆུབ་སེམས་དཔའ་ཡི།། རྣམ་དག་སྤྱོད་པ་བཀས་བཤད་གསོལ།། ཇི་ལྟར་བདུད་ནི་གདུལ་བར་བགྱི།། ཇི་ལྟར་ཆོས་ནི་བསྟན་པར་བགྱི།། ཇི་ལྟར་དྲན་པ་ཉམས་མི་འགྱུར།། ཁྱོད་ཀྱི་བཀས་ནི་བཤད་དུ་གསོལ།། ཇི་ལྟར་དཔའ་བོ་དག་གིས་ནི། ། འཁོར་བ་ཀུན་ཏུ་ཞུགས་གྱུར་ཀྱང་།། མཚན་ཉིད་གཅིག་ལ་གནས་བགྱིད་ཅིང་།། ཆོས་ལ་རྟག་ཏུ་གཡོ་མི་འགྱུར།། ཇི་ལྟར་སངས་རྒྱས་རྣམས་ལ་ནི།། བརྟེན་ཅིང་མཆོད་པ་བགྱིས་ནས་ནི།། རྟག་པར་སངས་རྒྱས་སྐུ་བལྟས་ཀྱང་།། མཐར་ནི་མཚན་མ་སྤོང་འགྱུར་ལགས།། རྣམ་ཐར་གསུམ་པོ་མངོན་བགྱིས་ཀྱང་།། མཁའ་ལ་བྱ། ནི་འཕུར་བ་བཞིན།། ཡོན་ཏན་ཕུན་ཚོགས་མ་གྱུར་པར།། ནམ་ཡང་མྱ་ངན་མི་འདའ་ལགས།། དབང་པོ་རང་བཞིན་ཡོངས་རྟོགས་ནས།། འཇིགས་པ་མ་མཆིས་རྗེས་འབྲང་ཞིང་། ། མངོན་པར་ཞེན་པ་མ་མཆིས་པས།། སེམས་ཅན་དེ་དག་སྨིན་བགྱིད་ལགས།། སྔར་ནི་འཇིག་རྟེན་བདེ་བཏང་ནས།། སླད་ཀྱིས་དང་བའི་སེམས་སྐྱེད་དེ།། ཤེས་གྱ་ནོམ་ཕུན་ཚོགས་པས།། བླ་མེད་བྱང་ཆུབ་འཐོབ་འགྱུར་བ།། འདི་འདྲའི་ཟབ་མོ་གྱ་ནོམ་དོན།། དེ་བཞིན་གཤེགས་པས་བཀས་བཤད་གསོལ། དེ་ནས་བཅོམ་ལྡན་འདས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་གློག་ཐོབ་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་སེམས་ཅན་ཚད་མེད་པ་རྣམས་ལ་ཕན་ཞིང་བདེ་བར་བྱ་བ་དང་། ད་ལྟར་གྱི་ལྷ་དང་བཅས་པའི་འཇིག་རྟེན་དང་། མ་འོངས་པའི་བྱང་ཆུབ་སེམས་དཔའ་རྣམས་ཡོངས་སུ་གཟུང་བའི་ཕྱིར། དེ་བཞིན་གཤེགས་པ་ལ་དོན་འདི་ལྟ་བུ་ཞུས་པ་ལེགས་སོ་ལེགས་སོ། ། དེའི་ཕྱིར་ཀློག་ཐོབ་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཞིག་དང་། ཁྱོད་ལ་ཡང་དག་པར་བསྟན་པར་བྱའོ།། བྱང་ཆུབ་སེམས་དཔའ་གློག་ཐོབ་ཀྱིས། བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཀློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གཏེར་ཆེན་པོ་དང་། ཟད་མི་ཤེས་པའི་གཏེར་དང་། ཀུན་ཏུ་ཟད་མི་ཤེས་པའི་གཏེར་དང་། མཐའ་མེད་པའི་གཏེར་རྣམ་པ་ལྔ་དང་ལྡན་པ་སྟེ། བྱང་ཆུབ་སེམས་དཔའ་དེ་ལྟ་བུའི་གཏེར་ཕུན་སུམ་ཚོགས་པར་གྱུར་པས། རྒུད་པ་རྣམས་གཏན་དུ་སྤོང་ཞིང་། གོང་དུ་བསྟན་པ་ལྟ་བུའི་ཡོན་ཏན་ཁྱད་པར་དུ་འཕགས་པའང་ཡོངས་སུ་རྫོགས་པར་བྱེད་ལ། ཚོགས་ནུབ་དུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་འཐོབ་པར་འགྱུར་རོ། ། ལྔ་གང་ཞེ་ན། འདི་ལྟ་སྟེ། འདོད་ཆགས་སྤྱོད་པའི་གཏེར་དང་། ཞེ་སྡང་སྤྱོད་པའི་གཏེར་དང་། གཏི་མུག་སྤྲོད་པའི་གཏེར་དང་། ཆ་མཉམ་པའི་སྤྱོད་པའི་གཏར་དང་། ཆོས་ཐམས་ཅད་ཀྱི་གཏེར་གང་ཡིན་པའོ།། ཐོག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདོད་ཆགས་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཡིན་ཞེ་ན། འདི་ལྟ་སྟེ། སེམས་ཅན་རྣམས་ནི་འདོད་ཆགས་ཀྱི་སྤྱོད་པའི་རྗེས་སུ་མཐུན་ཞིང་། ཕྱིན་ཅི་ལོག་གིས་བཅིངས་པས། མཚན་མ་རྣམས་ཀྱི་རྗེས་སུ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ལ་སོགས་པའི་ཡུལ་དག་ལ་རྣམ་པ་སྣ་ཚོགས་སུ་རྣམ་པར་བརྟགས་ནས། བརྟན་པ་ཉིད་དུ་མངོན་པར་ཞེན་པ་དང་། བདེ་བ་ལ་ཆགས་ཤིང་མྱོས་པར་གྱུར་པ་ཡིན་ལ། བྱང་ཆུབ་སེམས་དཔའ་ནི་སེམས་ཅན་དེ་དག་གི་སེམས་ཀྱི་སྤྱོད་པ་རྣམ་པ་སྣ་ཚོགས་གང་ཡིན་པ་ཡང་དག་པ་ཇི་ལྟ་བ་བཞིན་དུ་ཤེས་པས། སེམས་ཅན་དེ་དག་གང་ལ་མོས་ཤིང་འདུན་པ་དང་།། སྤྱོད་ཡུལ་གང་ལ་ཆགས་ཤིང་གོམས་པས་མཐུ་ཅན་དུ་གྱུར་པ་དང་། དད་པ་ཇི་ལྟ་བུ་དང་ལྡན་ཞིང་ཕུན་སུམ་ཚོགས་པར་གྱུར་པ་དང་། སྔོན་དགེ་བའི་རྩ་བ་ཇི་ལྟ་བུ་བསྐྱེད་པ་དང་། ཐེག་པ་གང་ལ་གཞོལ་བར་བྱེད་པ་དང་། དགེ་བའི་རྩ་བ་ཇི་སྙེད་ཡོད་པ་དག་རྣམ་ཞིག་ན་ཡོངས་སུ་སྨིན་པར་གྱུར་པའང་རབ་ཏུ་ཤེས་ཏེ། བྱང་ཆུབ་སེམས་དཔའ་ནི་སེམས་ཅན་དེ་དག་གི་འདོད་པ་ཐམས་ཅད་ཡོངས་སུ་སྤང་བའི་ཕྱིར་དང་། དེ་དག་གི་དགེ་བའི་སེམས་རྟག་པར་རྒྱུན་མི་འཆད་པར་བྱ་བའི་ཕྱིར་ཤིན་ཏུ་ལེགས་པར་བརྟགས་ནས་ཡོངས་སུ་གསོ་བར་བྱེད་དོ།། གློག་ཐོབ་སེམས་ཅན་རྣམས་ཀྱི་དབང་པོ་དང་། སྤྱོད་པའི་བྱེ་བྲག་ཤིན་ཏུ་ཤེས་པར་དཀའ་བར་རིག་པར་བྱ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་རིག་པར་མི་ནུས་ནཱ། སོ་སོར་སྐྱེ་བོ་དང་མུ་སྟེགས་ཅན་རྣམས་ལྟ་སྨོས་ཀྱང་ཅི་དགོས། གློག་ཐོབ་སེམས་ཅན་ཁ་ཅིག་ནི་འདོད་པ་རྣམས་ལ་མངོན་པར་ཞེན་པར་གྱུར་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པའང་ཡོད་དོ། ། སེམས་ཅམ་ཅིག་ནི་འདོད་པའི་ཡུལ་རེག་པ་ཙམ་མམ། འདོད་པའི་སེམས་ཀྱིས་ཚིག་སྨྲས་པ་ཙམ་གྱིས་ཐ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པའང་ཡོད་དོ། ། སེམས་ཅན་ཁ་ཅིག་ནི་གཟུགས་སྡུག་གུ་དག་མཐོང་ནས། འདོད་ཆགས་ཀྱི་སེམས་སྐྱེས་པ་ལས་གཟུགས་དེ་རྣམ་པར་འགྱུར་ཞིང་། ཞིག་པར་མཐོང་བ་ཉིད་ཀྱིས་ཁོང་དུ་ཆུད་པར་གྱུར་ནས། འདོད་པའི་གདུང་བ་ཉེ་བར་ཞི་སྟེ། མི་རྟག་པ་ཉིད་ཤིན་ཏུ་ཡིད་ལ་བྱེད་པ་ཉིད་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པའང་ཡོད་དོ། ། སེམས་ཅན་ཁ་ཅིག་ནི་བུད་མེད་མཐོང་བ་ན། མངོན་པར་ཞེན་པ་སྐྱེས་པ་མེད་ཀྱང་། ཕྱིས་ཡིད་ལ་དྲན་པའི་དབང་གིས་འདོད་ཆགས་ཀྱི་སེམས་སྐྱེས་ནས་དེའི་ཁ་དོག་དང་དབྱིབས་ཡིད་ལ་བྱས་ནས་རྗེས་སུ་ཆགས་པ་སྐྱེ་བར་འགྱུར་བའང་ཡོད་དོ། ། སེམས་ཅན་ཁ་ཅིག་ནི་རྨི་ལམ་ན་གཟུགས་ཡིད་དུ་འོང་བ་དག་མཐོང་བའི་དབང་གིས་འདོད་ཆགས་ཀྱི་མངོན་པར་ཞེན་པ་བསྐྱེད། ཡིད་ལ་བྱེད་ཅིང་ཡོངས་སུ་གཉེར་བར་བྱེད་པའང་ཡོད་དོ།། སེམས་ཅན་ཁ་ཅིག་ནི་བུད་མེད་ཀྱི་སྒྲ་ཐོས་པ་ཙམ་གྱིས་འདོད་ཆགས་ཀྱི་སྲེད་པ་སྐྱེད་པར་བྱེད་ལ། རེས་འགའ་ནི་མཐོང་བ་ཙམ་གྱིས་འདོད་ཆགས་ཀྱི་སེམས་དང་བྲལ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པའང་ཡོད་པས། དེའི་ཕྱིར་གློག་ཐོབ་བྱང་ཆུབ་སེམས་དཔའ་ནི་འདོད་ཆགས་ཀྱི་ནད་རྣམ་པ་སྣ་ཚོགས་གང་ཡིན་པ་དང་། འདོད་ཆགས་ཀྱི་སྨན་རྣམ་པ་སྣ་ཚོགས་གང་ཡིན་པ་དེ་དག་ཐབས་མཁས་པས་ལེགས་པར་ཁོང་དུ་ཆུད་ཀྱང་། ཆོས་ཀྱི་དབྱིངས་ལ་གཉིས་སུ་འཛིན་པའི་མཚན་མའང་མེད་ལ། ཆོས་ཀྱི་དབྱིངས་ལ་རྨོངས་པར་གྱུར་པའི་སེམས་ཅན་དེ་དག་ལའང་སྙིང་རྗེ་ཆེན་པོ་བསྐྱེད་པར་བྱའོ།། ། གློག་ཐོབ་འདོད་ཆགས་དང་། ཞེ་སྡང་དང་། གཏི་མུག་ཅེས་བྱ་བ་དང་། ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བའི་ཆོས་ཅུང་ཟད་ཙམ་ཡང་དམིགས་སུ་མེད་པས། བྱང་ཆུབ་སེམས་དཔའ་འདི་སྙམ་དུ་བདག་གིས་མཐོང་བ་ལྟར་ན། སེམས་ཅན་རྣམས་ནི་མཚན་མ་མེད་པ། རང་བཞིན་གྱིས་སྟོང་ཞིང་དབེན་པ། བཏགས་པ་ཙམ་དུ་རྣམ་པར་གཞག་པ། ཚོགས་ཤིང་འདུས་པའི་ཆོས་འདི་ལ་འདོད་ཆགས་དང་། ཞེ་སྡང་དང་། གཏི་མུག་སྐྱེད་པར་བྱེད་པས། བདག་གིས་འདི་དག་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས། འདོད་ཆགས་ཀྱིས་རྨོངས་པར་གྱུར་པའི་སེམས་ཅན་དེ་དག་གི་ཆེད་དུ་སྙིང་རྗེ་ཆེན་པོ་ལ་གནས་ནས། སྔོན་གྱི་སྨོན་ལམ་ཡོངས་སུ་རྫོགས་པར་བྱའོ།། ཆོས་ཀྱི་དབྱིངས་ལས་མ་གཡོས་པར་རྩོལ་བ་མེད་པའི་ཡེ་ཤེས་ཀྱིས་ཡོངས་སུ་སྨིན་པར་བྱའོ་སྙམ་དུ་སེམས་སོ། ། སྐྱེས་པ་གང་ཞིག་བུད་མེད་དག་ལ་ཡང་དག་པ་མ་ཡིན་པས་སྡུག་པའི་འདུ་ཤེས་བསྐྱེད་ནས། འདོད་ཆགས་ལྕི་བ་སྐྱེས་པར་གྱུར་ན་བྱང་ཆུབ་སེམས་དཔས་བུད་མེད་ཤིན་ཏུ་སྡུག་ཅིང་མཛེས་པ། གཟུགས་ཀྱི་མཚན་ཁྱད་པར་དུ་འཕགས་པ། རིན་པོ་ཆེའི་རྒྱན་འཕྲེང་དང་ལྡན་པ། རྒྱན་རྣམ་པ་སྣ་ཚོགས་ཀྱིས་རབ་ཏུ་བརྒྱན་པས་ལྷའི་བུ་མོ་དང་འདྲ་བར་གྱུར་པ། སྔོན་མ་མཐོང་བ་དག་ཏུ་བསྒྱུར་ནས། སེམས་ཅན་དེ་དག་གིས་ཇི་ལྟར་སྲེད་ཅིང་རྗེས་སུ་ཆགས་པ་དང་། ཤིན་དུ་མངོན་པར་ཞེན་པར་གྱུར་པ་སྟོན་པར་བྱེད་དོ། ། དེ་དག་གི་ནུས་པ་དང་སྦྱར་ནས་ཐབས་ཀྱིས་འདོད་ཆགས་ཀྱི་དུག་མདའ་དབྱུང་བའི་ཆེད་དུ་རང་དབང་དུ་གྱུར་པའི་མཐུས་བུད་མེད་ཀྱི་གཟུགས་སུ་བསྒྱུར་ནས། དེའི་མདུན་དུ་སྣང་བར་བྱས་ནས་ཆོས་བསྟན་པ་ཉིད་ཀྱིས་སེམས་ཅན་དེ་དག་ཆོས་ཀྱི་དབྱིངས་རྟོགས་པར་བྱས་ཏེ་མི་སྣང་བར་གྱུར་ཏོ། ། བུད་མེད་གང་ཞིག་སྐྱེས་པ་དག་ལ་འདོད་ཆགས་ཀྱི་སེམས་སྐྱེས་པར་གྱུར་ན། བྱང་ཆུབ་སེམས་དཔས་སྐྱེས་པའི་ལུས་བསྟན་ནས། འདོད་ཆགས་ཀྱི་དུག་མདའ་དབྱུང་བའི་ཆེད་དུ་ཆོས་བསྟན་པ་ཉིད་ཀྱིས་ཆོས་ཀྱི་དབྱིངས་ལ་ཞུགས་པར་བྱས་ནས་མི་སྣང་བར་བྱེད་དོ།། གློག་ཐོབ་འདོད་ཆས་ཀྱི་སྤྱོད་པ་ཉི་ཁྲི་ཆིག་སྟོང་དང་། སྤྱོད་པ་གཞན་དེ་དག་ཀྱང་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔས་རྩོལ་བ་མེད་པའི་ཡེ་ཤེས་ཀྱི་སྒོ་མོ་བྱེ་བ་སྟོང་ཕྲག་ཚད་མེད་པ་བསྐྱེད་དེ། སེམས་ཅན་ཁོང་དུ་ཆུད་པར་བྱས་ནས་ཐམས་ཅད་རྣམ་པར་གྲོལ་བར་གྱུར་ཀྱང་། བདག་གིས་སེམས་ཅན་ལ་འདི་ལྟ་བུའི་ཆོས་བསྟན་ཏོ་སྙམ་དུ་སེམས་པའང་མེད་ལ། སེམས་ཅན་རྣམ་པར་གྲོལ་བར་གྱུར་པའང་མི་དམིགས་སོ།། གློག་ཐོབ་འདི་ལྟ་སྟེ། དཔེར་ན་རྒྱ་མཚོ་མ་དྲོས་པའི་ཀླུའི་རྒྱལ་པོ་ནི་ལས་ཀྱི་མཐུའི་དབང་གིས་དེའི་ཕོ་བྲང་གི་ནང་ནས་ཆུ་ཀླུང་ཆེན་པོ་བཞི་བྱུང་ནས། སེམས་ཅན་ཆུ་དང་སྐམ་ལ་གནས་པ་དག་དབྱར་ཚ་བའི་དུས་ཀྱི་ཚེ་བསིལ་བ་དང་། རླན་གྱིས་མེ་ཏོག་དང་འབྲས་བུ་དག་རྒྱས་ཤིང་། འབྲུ་རྣམས་འཕེལ་བར་གྱུར་ནས་སེམས་ཅན་མང་པོ་ཤིན་ཏུ་བདེ་བར་བྱེད་ཀྱང་། ཀླུའི་རྒྱལ་པོ་དེ་བདག་གིས་ཆུ་ཀླུང་བཞི་པོ་འདི་དག་ཕྱུང་ངོ་།། དབྱུང་བར་བྱའོ་སྙམ་དུ་མི་སེམས་མོད་ཀྱི། འོན་ཀྱང་ཆུ་ཀླུང་བཞི་པོ་དག་རྟག་ཏུ་འབབ་ཅིང་སེམས་ཅན་རྣམས་ཉེ་བར་སྤྱོད་པར་བྱེད་དོ། ། བྱང་ཆུབ་སེམས་དཔའ་ཡང་དེ་བཞིན་དུ་སྔོན་གྱི་སྨོན་ལམ་ཡོངས་སུ་རྫོགས་པར་གྱུར་པའི་དབང་གིས་རྩོལ་བ་མེད་པའི་ཡེ་ཤེས་ཀྱིས་འཕགས་པའི་བདེན་པ་བཞི་བསྟན་ནས། འཁོར་བའི་ཡོངས་སུ་གདུང་བ་ཐམས་ཅད་བསལ་ཏེ། ལྷ་དང་མི་རྣམས་ལ་འཕགས་པའི་རྣམ་པར་གྲོལ་བའི་བདེ་བ་སྦྱིན་པར་བྱེད་ཀྱང་། བྱང་ཆུབ་སེམས་དཔའ་དེ་དག་གིས་ཆོས་བསྟན་ཏོ།། བསྟན་པར་བྱའོ་སྙམ་དུ་མི་སེམས་མོད་ཀྱི་འོན་ཀྱང་རང་གི་ངང་གིས་སྙིང་རྗེ་ཆེན་པོའི་བསམ་པ་ལ་གནས་ནས། སེམས་ཅན་རྣམས་ལ་སོ་སོར་བརྟགས་ཏེ། ཅི་རིགས་པར་ཆོས་སྟོན་པར་བྱེད་དོ།། གཞན་ཡང་གློག་ཐོབ་འདི་ལྟ་སྟེ། དཔེར་ན་བརྒྱ་བྱིན་ལྷའི་དབང་པོ་ལ་ལྷའི་བུ་མོ་ཁྲག་ཁྲིག་ཕྲག་བཅུ་གཉིས་ཡོད་པ་དེ་དག། བརྒྱ་བྱིན་ལྷའི་དབང་པོའི་རང་གི་མཐུའི་དབང་གིས་ལུས་མང་པོ་བསྟན་ནས། ལྷའི་བུ་མོ་དེ་དག་དེ་དང་ལྷན་ཅིག་འདོད་པའི་བདེ་བ་ཡོངས་སུ་རྫོགས་པར་མྱོང་བས། དེ་དག་སོ་སོ་ནས་འདི་སྙམ་དུ་བདག་གཅིག་པུ་ནི་དེང་ལྷའི་དབང་པོ་དང་ལྷན་ཅིག་རྩེས་སོ་སྙམ་དུ་སེམས་ཀྱང་། ཡང་དག་པར་ལྷའི་དབང་པོ་དེ་ལ་མངོན་པར་ཞེན་པར་གྱུར་པ་ཅིའང་མེད་དོ། ། བྱང་ཆུབ་སེམས་དཔའ་ཡང་དེ་བཞིན་དུ་སེམས་ཅན་གང་ཡོངས་སུ་བཟླ་བའི་འོས་སུ་གྱུར་པ་དེ་དག་གི་བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱེད་ཀྱང་། བྱང་ཆུབ་སེམས་དཔའ་ལ་མངོན་པར་ཞེན་པར་གྱུར་པ་མེད་དོ། ། གཞན་ཡང་གློག་ཐོབ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་རི་མཐོན་པོའི་རྩེ་ལ་ཤར་བའི་ཚེ། འོད་ཀྱིས་འཛམ་བུའི་གླིང་ཀུན་ཏུ་སྣང་བར་བྱེད་པས། གང་དུ་སྣང་བར་བྱས་པའི་གནས་དེ་དག་ཏུ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམ་པ་སྣ་ཚོགས་རབ་ཏུ་སྟོན་པར་བྱེད་ཀྱང་། ཉི་མའི་དཀྱིལ་འཁོར་ད་ནི་ཁ་དོག་གཅིག་པ། འོད་གཅིག་པ་ཉིད་དེ། ཐ་དད་པའི་མཚན་མ་མེད་དོ།། བྱང་ཆུབ་སེམས་དཔའ་ཡང་དེ་བཞིན་དུ་ཤེས་རབ་ཀྱི་ཉི་མའི་དཀྱིལ་འཁོར་གྱིས་ཆོས་ཀྱི་དབྱིངས་སྡུད་བར་བྱས་ནས། སེམས་ཅན་གྱི་མངོན་པར་ཞེན་པའི་རིའི་རྩེ་མོ་དེ་དག་ཏུ་ཤར་བ་ན། དམིགས་པའི་མཚན་ཉིད་གཅིག་ཏུ་གྱུར་ཅིང་། དེ་དག་གི་མོས་པ་ཇི་ལྟ་བ་བཞིན་དུ་ཆོས་སྟོན་པར་བྱེད་ཀྱང་། ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དོ། ། གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདོད་ཆགས་ཀྱི་སྤྱོད་པའི་གཏེར་ཅེས་བྱའོ།། བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་བསྐལ་པ་འམ། བསྐལ་པ་ལས་ལྷག་པར་སེམས་ཅན་གྱི་མོས་པ་སྣ་ཚོགས་ཇི་ལྟ་བ་བཞིན་དུ་ལུས་ཚད་མེད་པ་བསྟན་ནས། ཚིག་རྣམ་པ་སྣ་ཚོགས་ཀྱིས་ཆོས་སྟོན་པར་བྱེད་ཀྱང་།། ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དོ།། གཞན་ཡང་གློག་ཐོབ་འདི་ལྟ་སྟེ། དཔེར་ན་གསེར་ཡང་དག་པ་ནི་མགར་བའི་ཐབས་མཁས་པའི་མཐུའི་དབང་གིས་མོས་པ་ཇི་ལྟ་བ་བཞིན་དུ་རྒྱན་རྣམ་པ་སྣ་ཚོགས་སུ་བྱས་ཏེ། མཚན་ཉིད་ཐ་དད་པར་གྱུར་ཀྱང་། གསེར་གྱི་རང་བཞིན་ལ་ནི་ཐ་དད་དུ་གྱུར་པ་ཅིའང་མེད་དོ།། བྱང་ཆུབ་སེམས་དཔའ་ཡང་དེ་བཞིན་དུ་ཆོས་ཀྱི་དབྱིངས་ཤིན་ཏུ་ལེགས་པར་བརྟགས་ནས། སེམས་ཅན་མོས་པ་རྣམ་པ་སྣ་ཚོགས་ཇི་ལྟ་བ་བཞིན་དུ་ལུས་ཚད་མེད་པ་དག་བསྟན་ནས། ཚིག་རྣམ་པ་སྣ་ཚོགས་ཀྱིས་སྟོན་པར་བྱེད་ཀྱང་། ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དོ། ། འདི་ནི་རྟག་པར་ཆོས་ཀྱི་དབྱིངས་ལ་ཞུགས་པས་མཚན་ཉིད་གཅིག་ཏུ་གྱུར་པ་ཞེས་བྱའོ།། བྱང་ཆུབ་སེམས་དཔའ་གང་གསེར་འདི་ལྟ་བུ་ཐོབ་པར་གྱུར་ན། སེམས་ཅན་གྱི་ཆེད་དུ་རྣམ་པ་སྣ་ཚོགས་ཀྱི་སྒོ་ནས་ཆོས་སྟོན་པར་བྱེད་པས། དེ་དག་གིས་ཆོས་ཐོས་པའི་དབང་གིས་འཕགས་པའི་ནོར་ཕུན་སུམ་ཚོགས་པའི་དབང་ཕྱུགས་དང་ལྡན་པར་གྱུར་པས། འཁོར་པབའི་རྒུད་པ་དག་གཏན་དུ་ཡོངས་སུ་སྤོང་བར་བྱེད་དོ། ། གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཞེ་སྡང་སྤྱོད་པའི་གཏེར་ཅེས་བྱ་བ་ཇི་ལྟ་བུ་ཞེ་ན། འདི་ལྟ་སྟེ། སེམས་ཅན་རྣམས་ནི་ང་རྒྱལ་དང་མཚུངས་པར་ལྡན་པ། བདག་དང་བདག་གིར་འཛིན་པ་དང་བཅས་པ། བདག་དང་བདག་གི་མཚན་མ་ལ་གནས་པས། ཡུན་རིང་པོ་ནས་བྱམས་པ་དང་བཟོད་པ་མ་བསྒོམས་པ། ཞེ་སྡང་གི་གདུང་བས་རང་གི་སེམས་བཤིག་པར་གྱུར་པ། སངས་རྒྱས་དང་། ཆོས་དང་། དགེ་འདུན་རྗེས་སུ་དྲན་པར་མ་གྱུར་པ། ཞེ་སྡང་གི་གདུག་པས་གཡོགས་པ། ཆོས་ཉིད་ལ་རྨོངས་པར་གྱུར་པ་ཡིན་ཡང་བྱང་ཆུབ་སེམས་དཔའ་ནི་ཞེ་སྡང་མང་བའི་སེམས་ཅན་དེ་དག་ལ་ནམ་ཡང་གནོད་སེམས་དང་རྣམ་པར་འཚེ་བ་སྐྱེད་པར་མི་བྱེད་ཀྱི། འདི་སྙམ་མ་སེམས་ཅན་འདི་དག་ནི་གཏི་མུག་གིས་རྨོངས་པས་ཆོས་རྣམས་གཟོད་མ་ཉིད་ནས་རབ་ཏུ་དབེན་ཞིང་ཞི་བ། དྲི་མ་དང་རྙོག་པ་མེད་པ། འདུམ་པ་མེད་པ། རྩོད་པ་མེད་པ། རབ་ཏུ་དབེན་པའི་ཆོས་ཉིད་ལ་ཕྱིན་ཅི་ལོག་དང་མཚུངས་པར་ལྡན་པར་གྱུར་པའི་དབང་གིས་ཡང་དག་པ་མ་ཡིན་པའི་ཞེ་སྡང་དང་། ཁོན་དུ་འཛིན་པ་བསྐྱེད་པར་གྱུར་ཏོ་སྙམ་དུ་སེམས་པ་ཁོ་ནར་ཟད་དོ། ། དེ་སྙམ་དུ་བསམས་ནས་ཀྱང་། སྙིང་རྗེ་ཆེན་པོ་ལ་གནས་ཏེ། རྟག་པར་བདག་ཉིད་འགྱོད་ཅིང་བཤགས་པར་ཡང་བྱེད་ལ། གལ་ཏེ་ལུས་ཀྱི་ཡན་ལག་དང་ཉིང་ལག་གཅོད་པ་ཞིག་ཡོད་ནའང་། ཞེ་སྡང་སྤྱོད་པའི་སེམས་ཅན་དེ་དག་འདུལ་བར་འདོད་པའི་ཕྱིར་བཟོད་པ་ལ་རབ་ཏུ་གནས་པར་བྱེད་དོ།། གལ་ཏེ་ཞེ་སྡང་སྤྱོད་པའི་སེམས་ཅན་ཚད་མེད་པ་དེ་དག་ཕན་ཚུན་གཅིག་པ་གཅིག་རྒྱབ་ཀྱིས་ཕྱོགས་ཤིང་། ཞེ་སྡང་དང་ཁོན་དུ་འཛིན་པའི་ལས་ཡོངས་སུ་རྫོགས་པའི་དབང་གིས་སྦྲུལ་གདུག་པ་ངན་འགྲོའི་ལུས་སུ་ལྟུང་བར་གྱུར་པ་དག་ལ་ནི་བྱང་ཆུབ་སེམས་དཔའ་བཟོད་པ་ལ་རབ་ཏུ་གནས་པ་དེས། འདི་ལྟར་བྱམས་པ་དང་དྲན་པའི་སྟོབས་ཀྱིས་སེམས་ཅན་དེ་དག་བཏུལ་ནས་ངན་འགྲོའི་རྣམ་པར་སྨིན་པ་ལེན་པར་འགྱུར་ཞིང་། གདོན་མི་ཟ་བར་མཉམ་པ་ཉིད་རྟོགས་པར་བྱེད་པ་གང་ཡིན་པ་འདི་ནི་བྱང་ཆུབ་སེམས་དཔའ་ཐབས་མཁས་པས། སེམས་ཅན་གྱི་ཞེ་སྡང་གི་སྤྱོད་པ་ཡོངས་སུ་བསལ་བར་བྱེད་པ་ཞེས་བྱའོ།། གཞན་ཡང་གློག་ཐོབ་བྱང་ཆུབ་སེམས་དཔའ་ནི་གལ་ཏེ་སེམས་ཅན་ཞེ་སྡང་ཅན་དག་མཐོང་བར་གྱུར་ན། འདི་སྙམ་དུ་ཆོས་ཐམས་ཅད་ནི་རང་བཞིན་གྱིས་རྣམ་པར་དག་པ་ཡིན་ན། ཀྱེ་མ་སེམས་ཅན་འདི་དག་ནི་ཞེ་སྡང་གི་རྗེས་སུ་འབྲངས་ནས། ཡང་དག་པ་མ་ཡིན་པས་རྣམ་པར་རྟོག་པ་བསྐྱེད་ནས། མཉམ་ཞིང་རྩོད་པ་མེད་པ་ཆོས་ཉིད་འདི་ལ་ཞེ་སྡང་གི་བསམ་པ་བསྐྱེད་པས། སེམས་ཅན་འདི་དག་ཆོས་ཀྱི་དབྱིངས་ཉིད་མ་རྟོགས་པར་གྱུར་ཏོ། ། གལ་ཏེ་སེམས་ཅན་འདི་དག་ཆོས་ཉིད་མཐོང་བར་གྱུར་ན་ནི། གཞན་དག་ལ་གནོད་སེམས་བསྐྱེད་པར་མི་འགྱུར་བ་ཞིག་ན། ཆོས་ཀྱི་དབྱིངས་ཉིད་མ་རྟོགས་པར་གྱུར་ཏོ། ། དེའི་ཕྱིར་ཞེ་སྡང་སྐྱེས་པར་འགྱུར་རོ་ཞེས་བྱང་ཆུབ་སེམས་དཔའ་དེས་ཞེ་སྡང་མང་བའི་སེམ་ཅན་དེ་དག་ལ་ལྷག་པར་སྙིང་བརྩ་བ་བསྐྱེད་ནས་སྙིང་རྗེ་ཆེན་པོ་ལ་གནས་ཏེ། སྔོན་གྱི་སྨོན་ལམ་ཡང་ཡོངས་སུ་རྫོགས་པར་བྱེད་ལ། རྩོལ་བ་མེད་པ་ཡེ་ཤེས་ཀྱིས་སེམས་ཅན་གྱི་ཞེ་སྡང་གི་སྤྱོད་པ་རྣམ་པར་གཞིག་པའི་ཕྱིར། ཆོས་ཀྱི་སྒོ་མོ་རྣམ་པ་སྣ་ཚོག་ཡང་དག་པར་སྟོན་པར་བྱེད་ཀྱང་། བདག་གིས་སེམས་ཅན་གྱི་ཞེ་སྡང་བསལ་བའི་ཕྱིར་ཆོས་བསྟན་ཏོ་སྙམ་དུ་མི་སེམས་སོ།། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་མཚན་ཉིད་ཤིན་ཏུ་ལེགས་པར་རྟོགས་པའི་ཕྱིར་རོ། ། འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལ་གནས་ནས། ཉོན་མོངས་པའི་སྤྱོད་པ་རབ་ཏུ་བསལ་བ་ཞེས་བྱའོ། ། གློག་ཐོབ་འདི་ལྟ་སྟེ། དཔེར་ན་མུན་པ་བསལ་ནས་སྣང་བ་འཐོབ་པར་འགྱུར་ཡང་། མུན་པ་སེལ་བར་བྱེད་པ་མེད་དེ། འདི་ལྟར་མུན་པ་དང་སྡང་བའི་ཇི་བོ་ཉིད་ནམ་མཁའ་དང་མཚུངས་ཤིང་དབྱེར་མེད་པ་ཡིན་ནོ། ། དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་དབྱེར་མེད་པའི་ཡེ་ཤེས་དེ་ལ་བརྟེན་ནས།། ཐབས་ལ་མཁས་པས་ཆོས་རབ་ཏུ་བསྟན་ཏེ། ཞེ་སྡང་སྤྱོད་པའི་སེམས་ཅན་རྣམ་པ་སྣ་ཚོགས་འདུལ་ཞིང་ཞི་བར་བྱེད་ཀྱང་ཆོས་ཀྱི་དབྱིངས་ལ་ཐ་དད་དུ་གྱུར་པ་མེད་དོ།། གློག་ཐོབ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ཤར་ནས་འོད་ཀྱིས་གང་དང་གང་དུ་སྣང་བར་བྱས་པ་དེ་དག་ཐམས་ཅད་ནི་ཉི་མའི་དཀྱིལ་འཁོར་གྱིས་བསྡུས་པ་ཡིན་ནོ།། དེ་བཞིན་དུ་བྱང་ཆུབ་སེམས་དཔའ་ཡང་ཞེ་སྡང་གི་སྤྱོད་པ་འདུལ་ཞིང་བསལ་བའི་ཕྱིར་ཇི་ཙམ་དུ་ཚིག་ཏུ་བརྗོད་པ་ཐམས་ཅད་ཆོས་ཀྱི་འཁོར་ལོ་ཡིན་ཡང་ཆོས་ཀྱི་དབྱིངས་ལ་ནི་ཐ་དད་དུ་གྱུར་པ་མེད་དེ། འདི་ལྟར་ཞེ་སྡང་གི་སྤྱོད་པ་ཉི་ཁྲི་ཆིག་སྟོང་དང་། སྤྱོད་པ་གཞན་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔའ་རྩོལ་བ་མེད་པའི་ཡེ་ཤེས་ཡོངས་སུ་གྲུབ་པས་སེམས་ཅན་དེ་དག་གི་ཞེ་སྡང་གི་སྤྱོད་པ་རྣམ་པ་སྣ་ཚོགས་ཀྱི་རྗེས་སུ་ཆོས་སྟོན་པར་བྱེད་ཀྱང་། བདག་གིས་སེམས་ཅན་ལ་ཆོས་བསྟན་ཏོ།། སྟོན་ཏོ།། སྟོན་པར་འགྱུར་རོ་སྙམ་དུ་སེམས་པ་མེད་དེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཞེ་སྡང་སྤྱོད་པའི་གཏེར་ཅེས་བྱའོ། ། བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་བསྐལ་པ་འམ། བསྐལ་པ་ལས་ལྷག་པར་སེམས་ཅན་གྱི་མོས་པ་རྣམ་པ་སྣ་ཚོགས་ཀྱི་རྗེས་སུ་ཚིག་འབྲུ་དང་། ཡི་གེ་དང་། བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་། ཞེ་སྡང་སྤྱོད་པའི་མཐའ་རྙེད་པར་མི་འགྱུར་ལ། བྱང་ཆུབ་སེམས། དཔའ་དེའི་ཤེས་རབ་དང་སྤོབས་པའང་གདུགས་པར་མི་འགྱུར་ཏེ། འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་ཞེ་སྡང་སྤྱོད་པའི་གཏེར་ཅེས་བྱའོ། ། གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏི་མུག་སྤྱོད་པའི་གཏེར་ཅེས་བྱ་བ་ཇི་ལྟ་བུ་ཞེ་ན། གློག་ཐོབ་བྱང་ཆུབ་སེམས་དཔའ་རྣམས་ཀྱི་སྤྱོད་པ་འདི་ལྟ་བུ་འདི་ནི་ཤིན་ཏུ་དཀའ་བའི་དངོས་པོ་ཡིན་ཏེ། འདི་ལྟར་སེམས་ཅན་རྣམས་ནི་ཉོན་མོངས་པའི་རྗེས་སུ་འབྲང་བ། གཞན་ལ་གནོད་པ་བྱེད་པ། མ་རིག་པའི་མངལ་གྱི་སྒོངས། ཀུན་ཏུ་དཀྲིས་པས་དར་གྱི་སྲིན་བུ་བཞིན་དུ་བདག་ཉིད་བཅིངས་པས་ཆོས་ཀྱི་དབྱིངས་རྟོགས་པའི་ཐབས་མེད་པ། བྱ་བ་དག་ལ་ལེགས་པར་སོ་སོར་མི་རྟོག་ང།། བདག་ཏུ་ལྟ་བ། མངོན་པར་ཞེན་པ། ལམ་ལོག་པར་ཞུགས་པ། བུལ་བའི་སྤྱོད་པ་ལ་གནས་པ། ངེས་པར་འབྱུང་བར་དགའ་བ་ཡིན་པས། འདི་ལྟ་བུ་ལ་སོགས་པས་རྨོངས་པར་གྱུར་པའི་སེམས་ཅན་དག་གི་ཆེད་དུ་དང་པོ་སེམས་བསྐྱེད་པ་ནས་སྦྱོར་བ་ཆེན་པོ་བསྐྱེད་དེ། ངལ་ཞིང་སྡུག་བསྔལ་བའང་མེད། ལེ་ལོའང་མེད་པར་རྐྱེན་གང་དང་། མོས་པ་གང་དང་། ཆོས་བསྟན་པ་ཇི་ལྟ་བུ་ཞིག་གིས་སེམས་ཅན་འདི་དག་བྱང་ཆུབ་སེམས་དཔའི་སྤྱོད་པ་ལ་བཙུད་དེ། རྣམ་པར་གྲོལ་བ་ཐོབ་པར་འགྱུར་སྙམ་དུ་སེམས་ཏེ། བྱང་ཆུབ་སེམས་དཔའ་སྔོན་གྱི་ཆོས་ཀྱི་དབྱིངས་ལེགས་པར་སོ་སོར་བརྟགས་པས་རྩོལ་བ་མེད་པའི་ཡེ་ཤེས་ཀྱིས་སྙིང་རྗེ་ཆེན་པོ་ལ་གནས་ཏེ། སེམས་ཅན་དེ་དག་ཆོས་ཀྱི་དབྱིངས་ལ་རྨོངས་པར་གྱུར་པར་རིག་ནས། ཅི་ནུས་ཅི་ལྕོགས་ཀྱིས་ཆོས་བསྟན་ནས་རབ་ཏུ་དུལ་བར་བྱེད་ཀྱང་བདག་གིས་ཆོས་བསྟན་ཏོ། ། སྟོན་ཏོ།། སྟོན་པར་འགྱུར་རོ་སྙམ་དུ་སེམས་པ་མེད་དོ།། འོན་ཀྱང་དེའི་སྔོན་གྱི་སྨོན་ལམ་གྱི་མཐུས། རྟེན་ཅིང་འབྲེལ་པར་འབྱུང་བ་ལེགས་པར་སོ་སོར་བརྟགས་ནས་རང་གི་ངང་གིས་ཆོས་ཀྱི་སྒོ་མོ་བརྒྱ་སྟོང་དུ་མ་བསྟན་ཏོ། ། སེམས་ཅན་དེ་དག་གི་མ་རིག་པའི་ལས་ཀྱི་འདུ་བྱེད་བསལ་ནས་རྣམ་པར་གྲོལ་བ་འཐོབ་པར་བྱེད་དོ།། གློག་ཐོབ་འདི་ལྟ་སྟེ། དཔེར་ན་སྨན་པ་བཟང་པོ་ནད་མང་པོ་གསོ་བ་ལ་མཁས་པ། སྔར་སྨན་དཔྱད་རྣམས་ལ་ཤིན་ཏུ་གོམས་པར་གྱུར་པ་ནི་ནད་ཀྱི་མཚན་མ་མཐོང་མ་ཐག་ཏུ། སྔགས་དང་སྨན་བཏང་བ་ཐམས་ཅད་རབ་ཏུ་རྟོགས་པར་གྱུར་པས། དེས་གསོས་པས་གང་ཡང་མི་གསོས་པ་མེད་དོ།། དེ་བཞིན་དུ་བྱང་ཆུབ་སེམས་དཔའ་ཡང་འདི་ལྟར་ཆོས་ཀྱི་དབྱིངས་ཤིན་ཏུ་ལེགས་པར་རྟོགས་པས། རྩོལ་བ་མེད་པའི་ཡེ་ཤེས་ཀྱིས་གཏི་མུག་གི་སྤྱོད་པ་བསགས་པའི་སེམས་ཅན་དེ་དག་གི་དབང་པོ་དང་། རང་བཞིན་ཇི་ལྟ་བ་བཞིན་དུ་ཆོས་ཀྱི་སྒོ་མོ་བརྒྱ་སྟོང་དུ་མ་བསྟན་ནས། ཐམས་ཅད་རབ་ཏུ་གསལ་བར་རྟོགས་པར་བྱེད་དོ།། གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏི་མུག་སྤྱོད་པའི་གཏེར་ཅེས་བྱའོ། ། བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན། རྟེན་ཅིང་འབྲེལ་པར་འབྱུང་བ་ཤིན་ཏུ་ལེགས་པར་སོ་སོར་བརྟགས་ནས། གཏི་མུག་སྤྱོད་པའི་སེམས་ཅན་དེ་དག་གི་ཆེད་དུ་བསྐལ་པ་འམ། བསྐལ་པ་ལས་ལྷག་པར་དེ་དག་གི་རང་བཞིན་དང་། འདུན་པ་ཇི་ལྟ་བ་བཞིན་དུ་ཚིག་འབྲུ་དང་། ཡི་གེ་དང་། བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་། གཏི་མུག་སྤྱོད་པའི་མཐའ་ཡང་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་དང་སྤོབས་པའང་གཏུགས་པར་མི་འགྱུར་ཏེ། འདི་ནི་བྱང་ཆུབ་སེམས་དཔའ་ཆོས་ཐམས་ཅད་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་གཏི་མུག་སྤྱོད་པའི་གཏེར་ཅེས་བྱའོ།། འདི་གཏི་མུག་གི་སྤྱོད་པ་ཉི་ཁྲི་ཆིག་སྟོང་དང་། སྤྱོད་པ་གཞན་གཏོགས་པར་བརྒྱ་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔས་ཡོངས་སུ་སྤང་བའི་ཕྱིར་ཆོས་ཀྱི་སྒོ་མོ་བརྒྱ་སྟོང་དུ་རབ་ཏུ་ཕྱེ་ནས། ཡང་དག་པར་སྟོན་པ་གང་ཡིན་པ་དེ་ནི་བྱང་ཆུབ་སེམས་དཔའི་གཏི་མུག་སྤྱོད་པའི་གཏེར་ཅེས་བྱའོ། ། གཞན་ཡང་ཀློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆ་མཉམ་པའི་སྤྱོད་པའི་གཏེར་ཅེས་བྱ་བ་ཇི་ལྟ་བུ་ཡིན་ཞེ་ན། འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ཤིན་ཏུ་དག་ཅིང་ཡོངས་སུ་གསལ་བ་དྲི་མ་མེད་པ། ལམ་གྱི་བཞི་མདོར་བཞག་ན། གཟུགས་བརྙན་རྣམས་དེར་སྣང་ཞིང་འཕེལ་བ་དང་འགྲིབ་པ་མེད་ཀྱང་། མེ་ལོང་གི་དཀྱིལ་འཁོར་དེ་བདག་ནི་གཟུགས་བརྙན་རྣམ་པ་སྣ་ཚོགས་འདི་དག་སྟོན་པར་བྱེད་དོ་ཞེས་མི་སེམས་མོད་ཀྱི། འོན་ཀྱང་མེ་ལོང་གི་དཀྱིལ་འཁོར་དེ་ཤིན་ཏུ་བྱི་དོར་ལེགས་པར་བྱས་ན། གཟུགས་བརྙན་གྱི་རྣམ་པ་ཐམས་ཅད་རང་གིས་རབ་ཏུ་སྣང་བར་འགྱུར་རོ།། དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ཀྱི་མེ་ལོང་གི་དཀྱིལ་འཁོར་ཤིན་ཏུ་ལེགས་པར་བྱི་དོར་བྱས་པས། རྩོལ་བ་མེད་པའི་ཏིང་ངེ་འཛིན་ལ་གནས་ནས། སེམས་ཅན་རྣམས་ཀྱི་སེམས་ཀྱི་སྤྱོད་པ་བྱེ་བྲག་ཇི་ལྟ་བ་བཞིན་དུ་ཆོས་ཀྱི་སྒོ་མོ་བརྒྱ་སྟོང་དུ་མ་རྣམ་པར་ཕྱེ་སྟེ་བསྟན་ནས། དེ་དག་ཐམས་ཅད་རབ་ཏུ་རྟོགས་ཤིང་རྣམ་པར་གྲོལ་བ་ཐོབ་པར་བྱས་ཀྱང་། ཆོས་ཀྱི་མཚན་མ་དང་། སེམས་ཅན་གྱི་མཚན་མ་སྐྱེད་པར་མི་བྱེད་དོ།། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེས་ཆོས་ཀྱི་དབྱིངས་ཀྱི་མཚན་ཉིད་ཤིན་ཏུ་ལེགས་པར་རྟོགས་པའི་ཕྱིར་དང་། སྤྱོད་པ་བཞི་པོ་འདི་དག་དང་མཚུངས་པར་ལྡན་པའི་སེམས་ཅན་གང་ཡིན་པ་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པས་དེ་དག་གི་དབང་པོ་དང་། རང་བཞིན་དུ་ཆོས་སྟོན་པར་བྱེད་ཀྱང་། ཆོས་ཀྱི་དབྱིངས་དང་། སེམས་ཅན་གྱི་ཁམས་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་པས་གཉིས་སུ་འགྱུར་བའི་མཚན་ཉིད་ཀྱང་མེད་དོ།། ཆོས་ཀྱི་དབྱིངས་དང་། སེམས་ཅན་གྱི་ཁམས་ཇི་སྙེད་པ་དེ་དག་གཉིས་སུ་མེད་ཅིང་ཐ་དད་པར་བསལ་བར་མཐོང་བའི་ཕྱིར་རོ། ། གློག་ཐོབ་འདི་ལྟ་སྟེ། དཔེར་ན་ནམ་མཁའ་ལ་ཐ་དད་པ་རྣམ་པ་སྣ་ཚོགས་ཀྱི་མཚན་མའང་མེད་ལ། རྣམ་པར་གཞག་པའང་མེད་དོ། ། དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ཤིན་ཏུ་ལེགས་པར་སོ་སོར་བརྟགས་ནས། ཆོས་ཐམས་ཅད་མཚན་ཉིད་གཅིག་ཏུ་འཇུག་པར་རྟོགས་པ་དང་། སྔོན་གྱི་སྨོན་ལམ་གྱི་མཐུས་སེམས་ཅན་གྱི་སྤྱོད་པ་ཇི་ལྟ་བ་བཞིན་དུ་ཆོས་རྣམ་པ་སྣ་ཚོགས་སྟོན་པར་བྱེད་ཀྱང་། ཆོས་ཀྱི་དབྱིངས་ལ་ནི་ཐ་དད་དུ་གྱུར་པ་མེད་དོ།། གློག་ཐོབ་ཆ་མཉམ་པ་སྤྱོད་པ་འདི་ལ་ཉི་ཁྲི་ཆིག་སྟོང་ཡོད་པ་དང་། སྤྱོད་པ་གཞན་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་ཀྱང་། བྱང་ཆུབ་སེམས་དཔས་སོ་སོར་བརྟགས་ནས། ཐམས་ཅད་བསལ་བར་རྟོག་པར་འགྱུར་ཏེ། འདི་ལྟ་སྟེ། དཔེར་ན་སྨན་པ་མཁས་པ་ནད་དང་། སྨན་གཏོང་བ་རབ་ཏུ་ཤེས་པ་བཞིན་དུ་རྩོལ་བ་མེད་པའི་ཡེ་ཤེས་ཀྱིས་ཆོས་རྣམ་པ་སྣ་ཚོགས་སྟོན་པར་བྱེད་པ་གང་ཡིན་པ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆ་མཉམ་པ་སྤྱོད་པའི་གཏེར་ཅེས་བྱའོ།། བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན། སེམས་ཅན་རྣམས་ཀྱི་ཆེད་དུ་བསྐལ་པ་འམ། བསྐལ་པ་ལས་ལྷག་པར་དེ་དག་མོས་པ་ཇི་ལྟ་བ་བཞིན་དུ་བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་། སྤྱོད་པ་དེ་དག་གི་མཐའ་ཡང་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་དང་སྤོབས་པའང་གདུགས་པར་མི་འགྱུར་ཏེ། འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་ཆ་མཉམ་པའི་སྤྱོད་པའི་གཏེར་ཅེས་བྱའོ། ། །། བམ་པོ་གཉིས་པ་སྟེ་ཐ་མ།། གཞན་ཡང་གློག་ཐོབ་བྱང་ཆུབ་སེམས་དཔའ་དེས་དེ་ལྟ་བུའི་ཡེ་ཤེས་ཡོངས་སུ་རྫོགས་པར་གྱུར་པས། སེམས་ཅན་རྣམས་ཀྱི་དབང་པོ་དང་། སྤྱོད་པ་དང་། བསམ་པའང་ཐབས་མཁས་པས་རབ་ཏུ་རྟོགས་པས། གལ་ཏེ་འདོད་ཆགས་མང་བའི་སེམས་ཅན་མཐོང་བར་གྱུར་ན། དེ་དག་རབ་ཏུ་དུལ་ཞིང་དེ་དག་གི་ནད་གསོ་བའི་ཕྱིར། སོ་སོའི་སྐྱེ་བོ་དང་མཐུན་པར་འདོད།། པ་རྣམས་ལ་ཡོངས་སུ་སྤྱོད་པ་དང་། བུ་དང་། ཆུང་མ་དང་། ཁྱིམ་གྱི་སོ་ཆིས་ཕུན་སུམ་ཚོགས་པར་སྟོན་པར་བྱེད་ཀྱང་། པདྨ་བཞིན་དུ་མ་གོས་ཤིང་མངོན་པར་ཞེན་པར་གྱུར་པ་མེད་དོ། ། སེམས་ཅན་གང་གཏི་མུག་ཅིང་བློ་དང་མི་ལྡན་པ་དེ་དག་ནི། བྱང་ཆུབ་སེམས་དཔའ་ཐབས་མཁས་པ་མི་ཤེས་པས། འདི་སྙམ་དུ་བློ་དང་ལྡན་པ་སུ་ཞིག་སོ་སོའི་སྐྱེ་བོ་དང་ཐ་མི།། དད་པར་འདོད་པ་རྣམས་ཉམས་སུ་ལེན་པར་བྱེད་ཅེས། བྱང་ཆུབ་སེམས་དཔའ་དེ་ལ་འདི་ནི་བྱང་ཆུབ་སྤངས་པ་ཡིན་ནོ་སྙམ་དུ་སེམས་པར་བྱེད་དེ། སེམས་ཅན་དེ་ལྟ་བུ་དེ་དག་ནི་སེམས་ཡོངས་སུ་མི་གཙང་བའི་ཕྱིར། ཞེ་སྡང་ཆེན་པོ་སྐྱེས་ནས་གུས་པར་མི་འགྱུར་བས། ལས་དེའི་དབང་གིས་ལུས་ཞིག་སྟེ་ཤི་བའི་འོག་དུ་སེམས་ཅན་དམྱལ་བ་ཆེན་པོར་ལྷུང་བར་འགྱུར་ཡང་། འདི་ལྟར་བྱང་ཆུབ་སེམས་དཔའ་ཤིན་ཏུ་གསང་བས་གདུལ་བའི་རྒྱུ་དང་རྐྱེན་གྱིས་ཁ་ན་མ་ཐོ་བའི་རྣམ་པ་ཡོངས་སུ་ཟད་ནས། གདོན་མི་ཟ་བའི་མཉམ་པ་ཉིད་འཐོབ་པ་ལ་རབ་ཏུ་བཀོད་པར་བྱེད་དོ།། གློག་ཐོབ་འདི་ལྟ་སྟེ། དཔེར་ན་མེ་རབ་ཏུ་འབར་བ་ནི་རྩ་དང་ཤིང་དང་ཕྲད་པར་གྱུར་པ་ན། ཐམས་ཅད་རབ་ཏུ་འབར་ཞིང་མེའི་ཕུང་པོ་ཉིད་དུ་མངོན་པར་འགྲུབ་པར་འགྱུར་རོ།། དེ་བཞིན་དུ་བྱང་ཆུབ་སེམས་དཔའ་ཡང་ཡེ་ཤེས་ཀྱི་མེ་འབར་བར་གྱུར་པ་ན། སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་དང་། དགེ་བ་དང་། མི་དགེ་བ་ཇི་སྙེད་པ་དེ་དག་བྱུང་ཆུབ་སེམས་དཔའ་དང་ལྷན་ཅིག་འགྲོགས་ཤིང་ཐམས་ཅད་རབ་ཏུ་འབར་ནས། ཤེས་རབ་ཉིད་དུ་མངོན་པར་འགྲུབ་པ་འགྱུར་ཏེ། འདི་ནི་བྱང་ཆུབ་སེམས་དཔའི་མ་འདྲེས་པའི་ཆོས་ཤེས་བྱའོ། ། གཞན་ཡང་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ཀྱི་མ་འདྲེས་པའི་མཚན་ཉིད་ནི། འདི་ལྟ་སྟེ། རིན་པོ་ཆེ་སྣ་བཞི་ལས་མངོན་པར་གྲུབ་པ་ཡིན་པས། སེམས་ཅན་རྣམས་ཀྱང་དེའི་རྗེས་སུ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམ་པ་སྣ་ཚོགས་ཀྱི་མཚན་ཉིད་དུ་གྱུར་པར་བྱེད་དེ། གལ་དེ་བཻ་ནུཪྻ་རི་ངོས་སུ་ཕྱིན་ན་ནི། ཐམས་ཅད་ཀྱང་བཻ་ཌཱུཪྻའི་ཁ་དོག་གཅིག་པ་ཉིད་དུ་འགྱུར་བར་བྱེད་དོ། ། གསེར་གྱི་ཁ་དོག་གི་ངོས་སུ་ཕྱིན་ན་ནི། ཐམས་ཅད་གསེར་གྱི་ཁ་དོག་ཉིད་དུ་འགྱུར་བར་བྱེད་དོ།། དངུལ་དང་ཆུ་ཤེལ་གྱི་ཁ་དོག་ཏུ་གྱུར་པའང་དེ་བཞིན་ནོ། ། དེ་བཞིན་དུ་བྱང་ཆུབ་སེམས་དཔའ་ཡང་མ་འདྲེས་པའི་ཆོས་ཐོབ་པས། སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་དང་།། དགེ་བ་དང་། མི་དགེ་བ་ཇི་སྙེད་པ་དེ་དག་བྱང་ཆུབ་སེམས་དཔའི་ཐད་དུ་ཕྱིན་ཅིང་ལྷན་ཅིག་འགྲོགས་པར་གྱུར་ན། ཐམས་ཅད་བྱང་ཆུབ་སེམས་དཔའི་ཡེ་ཤེས་ལ་འཇུག་པ་ཉིད་དུ་གྱུར་པར་བྱེད་ཀྱང་དེའི་སེམས་མི་གཙང་ཞིང་། རང་གི་སྡིག་པའི་ལས་ཀྱི་དབང་གིས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཤིན་རྗེའི་འཇིག་རྟེན་དུ་ལྷུང་བར་གྱུར་པས། འདི་ལྟར་བྱང་ཆུབ་སེམས་དཔའི་མ་འདྲེས་པའི་ཡོན་ཏན་དང་། སྨོན་ལམ་གྱི་སྟོབས་ཀྱིས་ཁ་ན་མ་ཐོ་བའི་རྣམ་པར་སྨིན་པ་ཟད་པའི་འོག་ཏུ་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་པ་ལ་དཀོད་པར་བྱེད་དོ། ། གློག་ཐོབ་སྔོན་བྱུང་བ་འདས་པ་བསྐལ་པ་ཚད་མེད་པ། དཔག་ཏུ་མེད་པ། གྲངས་མེད་པ་ན། སྙིགས་མ་ལྔའི་དུས་ཀྱི་ཚེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བ། ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རིན་པོ་ཆེའི་ཕུང་པོ་ཡོན་ཏན་གྱི་སྒྲ་ཞེ་བྱ་བ་བྱུང་སྟེ། དེའི་ཚེ་སྐྱེ་དགུ་རྣམས་ཚེ་ལོ་བརྒྱ་ཉི་ཤུ་ཐུབ་པར་གྱུར་ཏེ། ད་ལྟར་ང་ཇི་ལྟ་བ་བཞིན་ནོ།། དེའི་ཚེ་སེམས་ཅན་རྣམས་འདོད་ཆགས་དང་། ཞེ་སྡང་དང་། གཏི་མུག་ཤིན་དུ་ཆེ་བས། ཉོན་མོངས་པ་རྣམས་ཀྱིས་ཟིལ་གྱིས་ནོན་པས། ཕ་མ་དང་། ཕུ་ནུ་དང་། གྲོགས་པོའི་ཡིད་དང་འགལ་བར་བྱེད་པ། མཁན་པོ་དང་སློབ་དཔོན་གྱི་རྗེས་སུ་མི་འབྲང་བ། བྱས་པའི་དྲིན་མི་གཟོ་བ། རྟག་པར་གནོད་སེམས་དང་བཅས་པ། གཡོ་སྒྱུ་དང་རྐུན་བུའི་སེམས་དང་ལྡན་པ།། ཕན་ཚུན་གཅིག་ལ་གཅིག་གནོད་པ་བྱེད་པ། ཚུལ་བཞིན་མ་ཡིན་པར་སྤྱོད་པ། སངས་རྒྱས་དང་། ཆོས་དང་། དགེ་འདུན་ལ་གུས་པ་མེད་པ། སེར་སྣས་ཟིལ་གྱིས་ནོན་པས་ཡི་དགས་ཀྱི་ཆོས་སྤྱོད་པའི་སེམས་ཅན་དེ་ལྟ་བུ་ཤ་སྟག། སངས་རྒྱས་ཀྱི་ཞིང་དེ་ན་གནས་པར་གྱུར་པས་ནི་ཤིན་ཏུ་གདུལ་དཀའ་བར་གྱུར་ཏོ།། དེའི་ཚེ་བཅོམ་ལྡན་འདས་དེའང་སྔོན་གྱི་སྨོན་ལམ་གྱི་མཐུས། དུས་ངན་པ་དེའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏེ། བཅོམ་ལྡན་འདས་དེ་ལ་ཉིན་ཐོས་ཆེན་པོའི་ཚོགས་ནི་ཉི་ཁྲི་ཉིས་སྟོང་མངའ་བར་གྱུར་ཏོ། ། དེའི་ཚེ་དེའི་དུས་ན་རྒྱལ་པོ་རྒྱ་ཆེར་བྱིན་པ་ཞེས་བྱ་བ་འཛམ་བུ་གླིང་ལ་དབང་བའི་དབང་ཕྱུག་དང་ལྡན་པ། སངས་རྒྱས་ཀྱི་བསྟན་པ་ལ་སེམས་ཤིན་དུ་དང་བར་གྱུར་པ་ཞིག་ཡོད་པ་དེས། དེ་བཞིན་གཤེགས་པ་དེ་ཉན་ཐོས་ཀྱི་དགེ་འདུན་དང་བཅས་པར་དབྱར་ཟླ་བ་གསུམ་སྤྱན་དྲངས་ཏེ། མཆོད་པ་རྒྱ་ཆེར་བཤམས་ནས་མཆོད་ཅིང་རིམ་གྲོ་བྱས་སོ། ། དེའི་ཚེ་དགེ་སློང་དྲི་མ་མེད་པ་ཞེས་བྱ་བ་སྤོབས་པ་ཕུན་སུམ་ཚོགས་པ། ཆོས་སྟོན་པའི་ཐབས་ལ་མཁས་པས་འཁོར་མང་པོ་རྣམས་ཉན་པར་སྤོབ། སེམས་ཅན་ཡོངས་སུ་སྨིན་པར་བྱེད་པ་ལ་རྟག་པར་ངལ་བ་མེད་པ། རེ་བ་མེད་པར་ཆོས་སྟོན་པ། མདོག་གསལ་ཞིང་གསོང་པོར་སྨྲ་བ། གཟུགས་དང་སྟོབས་ཕུན་སུམ་ཚོགས་པ། བྱད་བཞིན་སྡུག་ཅིང་མཛེས་པ། སེམས་ཅན་རྣམས་ཀྱིས་མཐོང་བར་མོས་ཤིང་། རིམ་གྲོ་དང་། བཀུར་སྟི་དང་། བླ་མར་བྱེད་ཅིང་བསྔགས་པ་བརྗོད་པ་ཞིག་ཡོད་དེ། དགེ་སློང་གསར་བུ་དག་ཀྱང་རྟག་པར་དྲི་མ་མེད་པའི་རྗེས་སུ་འབྲང་ཞིང་། རྒྱལ་པོའི་ཕོ་བྲང་འཁོར་དུ་འབྱུང་ཞིང་འཇུག་པ་དག་ལ་ཐོགས་པ་མེད་པར་གྱུར་པས་གོས་དང་། བཟའ་བ་དང་། བཏུང་བ་དང་། མལ་སྟན་དང་། ན་བའི་གསོས་སྨན་རྣམ་པ་སྣ་ཚོགས་ཀྱིས་ཀྱང་རིམ་གྲོ་བྱས་པར་གྱུར་ཏོ།། དེའི་ཚེ་འཁོར་མང་པོ་དེ་ལས་དགེ་སློང་ཕལ་ཆེར་ལུས་ཀྱི་སྡོམ་པ་དང་། སེམས་ཀྱི་ཤེས་རབ་སྒོམ་པ་མི་ཤེས་པ། སངས་རྒྱས་དང་། ཆོས་དང་། དགེ་འདུན་ལ་གུས་པ་མེད་པ། རྟག་པར་ལྟ་བ་དང་། ཆད་པར་ལྟ་བ་དང་། བདག་ཏུ་ལྟ་བ་ལ་སོགས་པ་དང་ལྡན་པ་དང་། སངས་རྒྱས་ཀྱི་ཆོས་ལ་སྐུར་པ་འདེབས་པ། རྣམ་པར་གཡེང་ཞིང་གདུལ་དཀའ་བ། དབང་པོ་རྣམས་མི་སྡོམ་པ། ཆོས་བཞིན་མ་ཡིན་པ་ལ་གནས་པ། དགེ་སློང་གི་ཚུལ་མེད་པར་བདག་ཉིད་དགེ་སྦྱོང་དུ་ཁས་འཆེ་བ། ལུས་དང་། ངག་དང་། ཡིད་ཀྱི་ལས་ཐམས་ཅད་ལོག་པར་ཞུགས་པ་ཤ་སྟག་གནས་པར་གྱུར་ཏོ།། དེའི་ཚེ་བཅོམ་ལྡན་འདས་དེ་དབྱར་འདས་ནས་ཡོངས་སུ་མྱ་ངན་འདས་པ་དང་། རྒྱལ་པོ་རྒྱ་ཆེར་བྱིན་པས་ཙན་དན་དམར་པོས་སྐུ་ཞུགས་ལ་བཞིན་ནས་མཆོད་པ་བྱས་ཏེ། རིང་བསྲེལ་གྱི་མཆོད་རྟེན་ངོས་བཞི་ཀུན་ཏུ་ཙན་དན་དམར་པོའི་མུ་ཁྱུད་ཀྱིས་བསྐོར་བ། པདྨ་གསེར་གྱི་ཁ་དོག་དང་ལྡན་པ་བྱེ་བ་ཕྲག་བརྒྱད་ཅུ་བརྩིགས་སོ།། དེའི་ཚེ་དགེ་སློང་དྲི་མ་མེད་པ་ནི་བཅོམ་ལྡན་འདས་དེས་མང་དུ་ཐོས་པའི་མཆོག་ཏུ་ལུང་བསྟན་པས། དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་དམ་པའི་ཆོས་རྒྱ་ཆེར་སྤེལ་ཏེ། གྲོང་དང་། གྲོང་ཁྱེར་དང་། གྲོང་རྡལ་གང་དང་གང་དུ་སོང་བ་དེར། སེམས་ཅན་བརྒྱ་སྟོང་ཚད་མེད་པ་སྙེད་ཡོངས་སུ་བདུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པར་གྱུར་ཏེ། དེའི་ཚེ་དགེ་སློང་སྡིག་ཅན་མང་པོ་རྣལ་འབྱོར་ཁོང་དུ་མ་ཆུད་པ། རྟག་པར་ཕྲག་དོག་དང་བཅས་པ། བདུད་ཀྱིས་བསླུས་པ་རྣམས་རྒྱལ་པོ་དེ་ག་ལ་བ་དེར་དོང་སྟེ། འདི་སྐད་དུ་རྒྱལ་པོས་བཀུར་བའི་དགེ་སློང་དྲི་མ་མེད་པ་ནི་རྒྱལ་པོའི་ཕོ་བྲང་དུ་འབྱུང་ཞིང་འཇུག་ལ་ཐགས་ཐོགས་མ་མཆིས་ཏེ། དགེ་སློང་འདི་འདོད་ཆགས་དང་བྲལ་བའང་མ་ལགས་ལ། དུས་མ་ལགས་པར་ཡང་ཟས་འཚལ་ཏེ། སྤོས་དང་འཕྲེང་བ་དག་གིས་ཀྱང་ལུས་བརྒྱན་པར་བགྱིད་པས་ཡང་དག་པར་ཚངས་པ་སྤྱོད་པ་མ་ལགས་པས། མཆོད་པ་མཛད་པའི་མི་རིགས་སོ། བདག་ཅག་ནི་དོན་འདིའི་སླད་དུ་འདིར་མཆིས་ནས་རྒྱལ་པོ་ལ་གསོལ་བ་ལགས་ཀྱིས། སླད་ཀྱིས་འགྱོད་པར་ཡང་མ་མཛད་ཅིག། སངས་རྒྱས་ཀྱི་ཡང་དག་པའི་བསྟན་པ་ལ་ཐུགས་མི་ཆེས་པའང་མི་བསྐྱེད་དུ་གསོལ་ཞེས་སྨྲས་སོ། ། དེའི་ཚེ་བདུད་སྡིག་ཅན་ཞེས་བྱ་བ་ཞིག་ཀྱང་བདག་ཉིད་དགེ་སློང་གི་གཟུགས་སུ་བསྒྱུར་ནས་རྒྱལ་པོ་ག་ལ་བ་དེར་སོང་སྟེ་སྔ་མ་བཞིན་དུ་སྨྲས་པ། དེའི་ཚེ་རྒྱལ་པོ་རྒྱ་ཆེར་བྱིན་པའང་ཡང་ནས་ཡང་དུ་དེ་སྐད་སྨྲས་པ་ཐོས་ནས། འདི་སྙམ་དུ་དགེ་སློང་དྲི་མ་མེད་པ་ནི་རབ་ཏུ་བརྩོན་ཞིན་བློ་དང་ལྡན་པས་བདག་གིས་བླ་མར་བཀུར་བ་ཡིན་ཏེ། དངོས་པོ་འདི་ལྟ་བུ་བྱེད་པ་ནི་གནས་མེད་དོ་སྙམ་མོ།། དེ་ནས་དེའི་ཚེ་བདུད་ཀྱི་འཁོར་རྣམས་པར་སྣང་ལས་ལུས་ཕྱེད་བསྟན་ནས་རྒྱལ་པོ་དེ་ལ་ཚིགས་སུ་བཅད་དེ་སྨྲས་པ། ། རྒྱལ་པོ་བཟོ་ཡི་སྒྱུ་རྩལ་སློབས།། དུས་ཚོད་དག་ལ་མཁས་པར་གྱིས།། རྒྱལ་པོ་དེ་ནི་མ་ཤེས་ན།། མི་རྒྱལ་རྟགས་དང་ལྡན་མ་ཡིན།། སངས་རྒྱས་ཉན་ཐོས་དགྲ་བཅོམ་པ། ། ཡེ་ཤེས་ཆེན་པོ་ལྡན་པ་ཡི།། ཚིག་དག་ལ་ནི་མི་རྟེན་པར།། ཅི་ཡི་ཕྱིར་ན་ཆད་པར་ལྟ།། དགེ་སློང་རྣམས་ནི་ཕན་གྲདགས་ཕྱིར།། ཁྱོད་ལ་བདེན་ཚིག་སྨྲ་བ་ཡིན།། ཆང་སྨྲ་ངན་འགྲོར་འགྲོ་བའི་མི། ། ཡང་དག་ཚངས་སྤྱོད་མ་ཡིན་པས།། དེ་ནི་རྒྱལ་པོའི་ཕོ་བྲང་དུ།། བཙུན་མོ་དག་དང་ལྷན་ཅིག་རྩེ།། རྒྱལ་པོ་འཁོར་དང་བཅས་པ་ཡིས།། ལེགས་པར་རྟོགས་ལ་ཐེ་ཙོམ་སོལ།། རྒྱལ་པོས་དངོས་པོ་འདི་ཐོས་པས།། སེམས་ལ་སྐྲག་ཅིང་མྱ་ངན་སྐྱེས།། འཁོར་རྣམས་དང་ནི་ལྷན་ཅིག་ཏུ།། མྱུར་ཞིང་རིངས་པར་ཕོ་བྲང་དོང་།། དེ་ཚེ་དྲི་མེད་པོ་བྲང་ནང་།། ཆོས་རྣམས་རང་བཞིན་སྟོང་པ་དང་།། བདག་དང་སེམས་ཅན་མེད་པ་ཡི།། དམ་པའི་དོན་ནི་སྟོན་པར་བྱེད།། རྒྱལ་པོ་དམག་འཁོར་བཅས་པ་རྣམས།། ཐམས་ཅད་བདུད་ཀྱིས་བསླུས་པ་ན། ། ཕོ་བྲང་ནང་གི་བཙུན་མོ་རྣམས།། དགེ་སློང་ཡོངས་བསྐོར་མཐོང་བ་དང་།། ཞེ་སྡང་གླང་ཆེན་མྱོས་པ་བཞིན།། གཤེད་མ་དག་ལ་རབ་བསྒོ་བ།། དགེ་སློང་ང་ཡི་བཙུན་མོ་བསླུས། ། སྡུག་བསྔལ་ཆོས་ཀྱིས་ཆད་པས་ཆོད།། བློན་པོ་འཁོར་དང་བཅས་པ་རྣམས།། ཐམས་ཅད་བདུད་ཀྱིས་ཟིན་པས་ན།། དགེ་སློང་ཉེས་པ་མེད་པ་ལ། སེམས་ཀྱིས་གནོད་པ་བྱ་བར་བསམས།། གཤེད་མ་མཚོན་ཐོགས་འོངས་པ་དང་།། དྲི་མེད་སྙིང་བརྩེ་མཆི་མ་བྱུང་།། རྒྱལ་པོས་ཁྱོད་ནི་ཆོས་མིན་ན།། ཅི་ཡི་ཕྱིར་ན་མཆི་མ་བྱུང་།། དྲི་མེད་རྒྱལ་པོ་ལ་སྨྲས་པ།། དངོས་པོ་འདི་ནི་ཡིད་ཆེས་དཀའ།། རེ་ཞིག་སྐད་ཅིག་སྡོད་ཅིག་དང་།། བདག་ལ་གསད་པའི་དབང་ཡོད་དོ།། རྒྱལ་པོས་དགེ་སློང་ཚིག་ཐོས་ནས། ། གཤེད་མ་དག་ལ་སྡོད་ཅིག་བསྒོ།། བདེན་པའི་དངོས་པོ་ཅི་ཞིག་ཡོད།། ཁྱེད་ཀྱིས་མྱུར་དུ་སྨྲ་བའི་རིགས།། ལྷག་པའི་བསམ་པ་ལྡན་གྱུར་ཅིང་། ། སྙིང་རྗེས་འཇིག་རྟེན་ཕན་འདོགས་པས།། སོར་མོ་བཅུ་ཡི་ཐལ་སྦྱར་ཏེ།། བདེན་པའི་ཚིག་ནི་འདི་སྐད་སྨྲས།། རྒྱལ་པོ་ཆེན་པོས་མཁྱེན་པར་མཛོད།། གལ་དེ་ཡང་དག་ཉེས་མེད་ན། ། ས་འདི་རྣམ་པ་དྲུག་ཏུ་གཡོས།། མཁའ་ལ་མེ་ཏོག་ཆར་ཕོབ་ཅིག། དེ་སྐད་ཚིག་ནི་སྦས་མ་ཐག། ས་ཆེན་རྣམ་པ་དྲུག་ཏུ་གཡོས།། མཁའ་ལ་ལྷ་ཡི་མེ་ཏོག་བབས། ། བདུད་འཁོར་མྱ་ངན་སྐྱེས་པར་འགྱུར།། དེ་ཚེ་རྒྱལ་པོ་དང་བ་སྐྱེས།། རྐང་ལ་ཕྱག་བྱས་བཟོད་པར་གསོལ།། བདག་ནི་དམྱལ་བར་ལྷུང་འགྱུར་ན།། མགོན་མེད་བདག་ལ་སྟོབས་མཛོད་ཅིག། ཀྱི་ཧུད་སྡིག་པ་དེ་ཕྲད་པས།། གདུག་པའི་སེམས་ནི་སྐྱེས་པར་གྱུར།། སྡིག་པའི་གྲོགས་པའི་རྗེས་འབྲངས་པས།། མགོན་དང་སྐྱབས་བྱེད་སུ་ཡང་མེད། ། སྟོན་པ་ཆེན་པོ་མ་གཏོགས་པར།། ཕྱོགས་བཅུར་བདག་གི་མགོན་བྱེད་མེད།། བདག་གིས་རྒྱལ་སྲིད་སྤངས་ནས་ནི།། ནམ་འཚོའི་བར་དུ་སྐྱབས་སུ་མཆི།། དགེ་སློང་དེས་ནི་རྒྱལ་པོ་དང་། ། གཡོག་འཁོར་བསམ་པ་རིག་གྱུར་ནས།། དམ་པའི་དོན་ནི་རབ་ཏུ་བཤད།། རྒྱལ་པོས་ཐོས་ནས་དང་བ་ཐོབ།། འཁོར་ནི་བྱེ་བ་བརྒྱ་སྟོང་དང་།། རྒྱལ་སྲིད་སྤངས་ནས་རབ་ཏུ་བྱུང་། ། སྦྱངས་པའི་སྡོམ་པ་བླངས་པས་ན།། གཞན་གྱིས་མགྲོན་གཉེར་ཡོང་མི་ལེན།། དེ་ཚེ་རྒྱལ་པོའི་ཕོ་བྲང་ནང་།། བཙུན་མོ་འཁོར་བཅས་བརྒྱད་ཁྲི་རྣམས།། དམ་པའི་དོན་ནི་ཐོས་པས་ན། ། ཕྱིར་མི་ལྡོག་ལ་གནས་པར་གྱུར།། རྒྱལ་པོས་སངས་རྒྱས་གསུངས་པ་བཞིན།། ཁོ་ནི་ཉི་ཤུ་རྩ་བཞིའི་བར།། ཉིན་མཚན་རྟག་པར་སྡིག་བཤགས་ཀྱང་།། འོན་ཀྱང་སྡིག་པའི་ལས་མ་ཟད། ། ལོ་ནི་བྱེ་མང་སྡུག་བསྔལ་མྱོང་།། སྡིག་ཟད་དེ་བཞིན་གཤེགས་དང་ཕྲད།། སྔོན་ནི་སྐྲག་པར་བྱས་པའི་རྒྱུས།། རྣམ་སྨིན་ལྷག་མ་རྟག་པར་དམན། ། མཐར་གྱིས་རྣལ་འབྱོར་རབ་བསྒོམས་ཏེ།། སངས་རྒྱས་བྱེ་བ་སྟོང་མཆོད་ནས།། སོ་སོར་ཞིང་ཁམས་གཞན་དག་ཏུ།། ཐམས་ཅད་མངོན་པར་རྫོགས་སངས་རྒྱས།། ཐམས་ཅད་ཀུན་ཀྱང་མཚན་མཐུན་པར།། ཡོན་ཏན་གྲགས་པ་ཞེས་བྱར་གྱུར།། དེ་ཚེ་རྒྱལ་པོ་རྒྱ་ཆེར་བྱིན།། དགེ་སློང་བྱམས་བཟོད་དེ་ལ་ནི།། གདུག་པའི་སེམས་ནི་བསྐྱེད་པས་ན། ། ལོ་ནི་བྱེ་བ་མང་པོར་ཡང་།། སྔོན་གྱི་སྡིག་ལས་མངོན་གྱུར་པས།། ངུ་འབོད་ཆེན་པོ་ལྷུང་བར་གྱུར།། རྣམ་སྨིན་དེ་ནི་ཟད་ནས་ཀྱང་།། སླར་ཡང་མི་ལུས་ཐོབ་གྱུར་ཏེ། ། དེ་བཞིན་གཤེགས་པ་ཀུན་སྤྱན་ཕྲད།། རྟག་ཏུ་བསྙེན་བཀུར་རིམ་གྲོ་བྱས།། གཞན་ཡང་སངས་རྒྱས་བྱེ་བ་ཕྲག། བརྒྱད་ཅུ་དག་ནི་རིམ་གྲོ་བྱས། ། དེ་ཡི་འོག་ཏུ་སངས་རྒྱས་པ།། དེ་ནི་ང་བདག་ཉིད་ཡིན་ནོ།། ཆོས་སྨྲ་ཉེས་པ་མེད་པ་ལ།། གནོད་པ་བྱས་པའི་དགེ་སློང་ནི།། མ་འོངས་མངོན་པར་འཚང་རྒྱ་བ།། བྱང་ཆུབ་སེམས་དཔའ་བྱམས་པ་ཡིན། ། དེ་ཚེ་རྒྱལ་པོ་ཕོ་བྲང་ནང་།། བཙུན་མོ་འཁོར་ནི་བརྒྱད་ཁྲི་རྣམས།། ཤིན་ཏུ་དང་བས་དགེ་རྩ་བསྐྱེད།། སངས་རྒྱས་ཚད་མེད་རིམ་གྲོ་བྱས།། དེ་ལྟར་སྤྱོད་པ་རབ་བསྐྱེད་ནས། ། སེམས་ཅན་ཕན་གཏགས་སྨོན་ལམ་བཏབ།། སངས་རྒྱས་བྱེ་བ་སྟོང་མཆོད་ནས།། སོ་སོར་མངོན་པར་འཚང་ཡང་རྒྱ།། ངས་དེང་ཁྱོད་ལ་བསྒོ་བ་ནི།། ཐམས་ཅད་གནོད་སེམས་མ་སྐྱེད་ཅིག། གང་ཞིག་བྱམས་བསྒོམས་སངས་རྒྱས་བསྔགས།། མྱུར་དུ་བྱང་ཆུབ་ཆེན་པོ་འཐོབ། དེ་ལྟ་བས་ན་གློག་ཐོབ་སེམས་ཅན་རྣམས་ཀྱི་དབང་པོ་དང་། རང་བཞིན་དང་། བསམ་པ་དག་ལ་མི་མཁས་པ་དག་གིས་དུས་ཐམས་ཅད་དུ་གནོད་སེམས་བསྐྱེད་པར་མི་བྱའོ།། གློག་ཐོབ་འདི་ལྟ་སྟེ། དཔེར་ན་རི་རྣམས་ཀྱི་ནང་ན་རི་རབ་མཆོག་ཏུ་གྱུར་པ་དེ་བཞིན་དུ། དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན། མཆོག་དང་། གཙོ་བོ་དང་། བླ་ན་མེད་པར་གྱུར་པ་ཡིན་ནོ།། འདི་ལྟ་སྟེ། དཔེར་ན་ཆུ་བོ་ཐམས་ཅད་ཀྱི་ནང་ན་རྒྱ་མཚོ་ཆེན་པོ་མཆོག་ཏུ་གྱུར་པ་དེ་བཞིན་དུ། དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་མཆོག་ཏུ་ཟབ་ཅིང་རྒྱ་ཆེ་བར་གྱུར་པ་ཡིན་ནོ།། གཞན་ཡང་འདི་ལྟ་སྟེ། དཔེར་ན་རྒྱལ་པོ་རྣམས་ཀྱི་ནང་ན་འཁོར་ལོས་སྒྱུར་བའི་རྒྱལ་པོ་མཆོག་དང་། གཙོ་བོ་དང་། བླ་མར་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་གོང་ན་མེད་པར་གྱུར་པ་ཡིན་ནོ། ། གློག་ཐོབ་དེ་བཞིན་གཤེགས་པ་ནི་དེ་ལྟ་བུའི་མཁྱེན་པ་དང་ལྡན་པའི་ཕྱིར་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་སྤྱོད་པའི་སེམས་དང་སེམས་ལས་བྱུང་བ་འཇུག་ཅིང་འགྱུར་བ་ཇི་སྙེད་པ་དེ་དག་ཐམས་ཅད་དེ་བཞིན་གཤེགས་པས་རབ་ཏུ་མཁྱེན་ཅིང་སེ་གོལ་གཏོགས་པ་གཅིག་ལ་ཐམས་ཅད་ཡོངས་སུ་སྡུད་པར་མཛད་དོ། ། གློག་ཐོབ་དེ་བཞིན་གཤེགས་པ་ནི་རྣམ་པ་ཐམས་ཅད་མཁྱེན་པ་ཉིད་དང་ལྡན་པས། འདི་ལྟ་སྟེ། དཔེར་ན་སྐྱེས་བུ་མིག་དང་ལྡན་པས་རྩོལ་བ་ལ་མི་ལྟོས་པར་རང་གི་ལག་མཐིལ་ན་སྐྱུ་རུ་ར་འབྲས་བུ་གསལ་བར་མཐོང་ཞིང་ཐེ་ཚོམ་མེད་པ་དེ་བཞིན་དུ། དེ་བཞིན་གཤེགས་པའང་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཇི་སྙེད་པ་དག་རབ་ཏུ་མཁྱེན་པས། འཁོར་མང་པོའི་ནང་དུ་ཆོས་རྣམ་པ་སྣ་ཚོགས་ཡང་དག་པར་སྟོན་པར་མཛད་དོ། ། སངས་རྒྱས་ཀྱི་ཞིང་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན། འདོད་ཆགས་ཀྱི་སྤྱོད་པ་དང་མཚུངས་པར་ལྡན་པའི་སེམས་ཅན་རྣམས་འདོད་ཆགས་ཀྱིས་ཡོངས་སུ་གདུངས་ནས་ཉིན་མཚན་དུ་ཡིད་ལ་བྱེད་ཅིང་། དོན་མེད་པར་དུས་ལས་འདས་པར་བྱེད་པའང་ངས་རབ་ཏུ་མཁྱེན་ཅིང་གཟིགས་སོ། ། འདོད་ཆགས་ཀྱི་གདུང་བའི་ལུས་དང་ངག་གི་ལས་རྣམ་པ་སྣ་ཚོགས་སློང་བར་བྱེད་པ་དག་ཀྱང་ངས་རབ་ཏུ་མཁྱེན་ཅིང་གཟིགས་སོ།། ཞེ་སྡང་སྤྱོད་པའི་སེམས་ཅན་ཞེ་སྡང་གི་ཟིལ་གྱིས་ནོན་ནས། གཅིག་ལ་གཅིག་ཞེ་སྡང་གིས་ཕྲག་དོག་བྱེད་པ་དང་། གནོད་པ་བྱས་པའི་ཕྱིར་མནར་མེད་པའི་གནས་སུ་ལྟུང་བར་འགྱུར་བ་དག་ཀྱང་ངས་རབ་ཏུ་མཁྱེན་ཅིང་གཟིགས་སོ། ། གཏི་མུག་སྤྱོད་པ་དང་མཚུངས་པར་ལྡན་པའི་སེམས་ཅན་རྣམས་མ་རིག་པའི་མུན་ནག་གི་བསྒྲིབས་ཤིང་རྨོངས་པའི་མངོན་པར་ཞེན་པ་དང་། ལོག་པར་ལྟ་བའི་རྗེས་སུ་འབྲང་བ་ལ་མོས་པར་གྱུར་པ་དག་ཀྱང་ངས་རབ་ཏུ་མཁྱེན་ཏོ། ། འོས་སུ་གྱུར་པ་དང་། འོས་སུ་མི་འགྱུར་བ་དང་། འཕེལ་ཞིང་རྩོལ་བ་དང་བཅས་པ་དང་། ལྡོག་ཅིང་ཉམས་པར་གྱུར་པ་དང་། དེ་བཞིན་གཤེགས་པའི་ཐེག་པར་དགེ་བའི་རྩ་བ་བསྐྱེད་པ་དང་། རང་སངས་རྒྱས་ཀྱི་ཐེག་པར་དགེ་བའི་རྩ་བ་བསྐྱེད་པ་དང་། ཉན་ཐོས་ཀྱི་ཐེག་པར་དགེ་བའི་རྩ་བ་བསྐྱེད་པ་དག་ཀྱང་ངས་རབ་ཏུ་མཁྱེན་ཏོ། ། དེ་བཞིན་གཤེགས་པ་ནི་དེ་ལྟ་བུའི་མཁྱེན་པ་དང་ལྡན་པས་འཁོར་མང་པོའི་ནང་དུ་བཞུགས་ནས། སེམས་ཅན་གྱི་སེམས་ཀྱི་སྤྱོད་པའི་བྱེ་བྲག་ཀྱང་རབ་ཏུ་མཁྱེན་པས། གལ་ཏེ་དུས་ལ་མ་བབ་པར་རིག་པར་གྱུར་ན་ནི། ཅང་མི་གསུང་ཞིང་བཏང་སྙོམས་སུ་བཞག་ནས་སེམས་ཅན་འདི་དག་ནི་ཆོས་ལ་རྨོངས་པར་གྱུར་པས། ཁོང་དུ་ཆུད་པར་མ་གྱུར་ཏོ་སྙམ་དུ་དགོངས་སོ། ། དེ་བཞིན་གཤེགས་པ་ནི་དབང་པོ་དང་སྟོབས་ཁྱད་པར་འཕགས་པ་ཕུན་སུམ་ཚོགས་ཤིང་། དུས་རབ་ཏུ་མཁྱེན་པའི་ཕྱིར་གདུལ་བའི་འོས་སུ་གྱུར་པ་དང་། བསམ་པ་མཆོག་ཏུ་གྱུར་པ་དང་། བཟོད་པར་ནུས་པའི་འོས་སུ་གྱུར་པ་དང་། ཚིག་ལེགས་པར་ཉན་པར་གྱུར་པ་དག་ཀྱང་ངས་རབ་ཏུ་མཁྱེན་ཏེ། དེ་ལྟར་མཁྱེན་པར་གྱུར་ནས་ཀྱང་སེམས་ཅན་དེ་དག་ཡོངས་སུ་སྡུད་ཅིང་ཕན་འདོགས་པར་བྱེད་དོ། ། དེ་ལྟ་བས་ན་གློག་ཐོབ་བྱང་ཆུབ་སེམས་དཔའ་ལས་དང་པོ་པ་ཡང་དག་པའི་གནས་སྐབས་སུ་མ་ཞུགས་པ། སེམས་ཅན་རྣམས་ཀྱི་ལྷག་པའི་བསམ་པ་ལེགས་པར་ཁོང་དུ་མ་ཆུད་པ་དག་གིས་ཁྱིམ་ན་གནས་པ་འམ། རབ་ཏུ་བྱུང་བའང་རུང་སྟེ། ཐམས་ཅད་ཀུན་ལ་སྨོད་ཅིང་གནོད་སེམས་བསྐྱེད་ནས། ཡུན་རིང་པོར་བདག་ཉིད་ལ་གནོད་པར་འགྱུར་བར་མི་བྱའོ། ། དེའི་ཕྱིར་བྱང་ཆུབ་སེམས་དཔའ་དང་པོ་སེམས་བསྐྱེད་པ་ནས། ཐེག་པ་ཆེན་པོ་ལ་གནས་པ་ཐམས་ཅད་ལ་སངས་རྒྱས་ཀྱི་འདུ་ཤེས་བསྐྱེད་པར་བྱའོ། ། སེམས་ཅན་གཞན་དག་སྡིག་པ་མི་དགེ་བའི་ལས་བྱེད་པར་མཐོང་ནའང་གནོད་སེམས་བསྐྱེད་པར་མི་བྱའོ།། དེ་ཅིའི་ཕྱིར་ཞེ་ན། དེ་བཞིན་གཤེགས་པས་རྟག་ཏུ་སེམས་ཅན་གང་རྣམ་པར་དཀར་ཞིང་ཡོངས་སུ་དག་པའི་ཆོས་ལས་ཅུང་ཟད་ཅིག་ཉན་པར་གྱུར་ན། རྣམས་ཀྱང་ཡོངས་སུ་མྱ་ངན་ལས་མི་འདའ་བར་མི་འགྱུར་རོ།། ཞེས་གསུངས་པས་སོ།། བྱང་ཆུབ་སེམས་དཔའ་ནི་གལ་ཏེ་འདོད་ཆགས་སྤྱོད་པའི་སེམས་ཅན་མཐོང་ན། སེམས་ཅན་འདི་དག་འདོད་ཆགས་ཀྱི་གདུང་བས་བསྲེགས་པར་གྱུར་པའང་བདག་གིས་ཉེས་པ་ཡིན་ནོ་སྙམ་དུ་སེམས་སོ། ། ཞེ་སྡང་དང་གཏི་མུག་གི་གདུང་བས་བསྲེགས་པར་གྱུར་པ་དེ་དག་མཐོང་ནའང་། འདི་དག་ཐམས་ཅད་ནི་བདག་གིས་ཉེས་པ་ཡིན་ནོ་སྙམ་དུ་སེམས་སོ།། དེ་ཅིའི་ཕྱིར་ཞེ་ན། བདག་གིས་སེམས་ཅན་ཐམས་ཅད་ན་བའི་སྡུག་བསྔལ་དང་ལྡན་པར་གྱུར་པ་དེ་དག་མཐོང་བར་གྱུར་ན། སྨན་ཡོངས་སུ་བཙལ་ཏེ། ཐབས་མཁས་པས་ཡོངས་སུ་གསོ་བའི་རིགས་པ་ལས་བདག་སྔོན་སེམས་ཅན་གྱི་ནད་བསལ་བར་ཡི་དམ་བཅས་ན། དེང་ཡལ་བར་དོར་བ་འདི་ཉིད་བདག་གི་ཉེས་པ་ཡིན་ནོ་སྙམ་དུ་སེམས་པས་སོ།། བྱང་ཆུབ་སེམས་དཔའ་ནི་དེ་ལྟ་བུའི་བསམ་པ་དང་ལྡན་པས་བདག་ཉིད་ཀྱི་ཉེས་པ་ལ་ལྟ་ཞིང་། སེམས་ཅན་རྣམས་ལ་བྱམས་པའི་སེམས་སྐྱེད་པར་བྱེད་དོ།། གལ་ཏེ་གསོད་པ་འམ། ལུས་ཀྱི་ཡན་ལག་དང་ཉིང་ལག་གཅོད་ཅིང་གཏུབ་པ་ཞིག་དང་ཕྲད་པར་གྱུར་ནའང་། ཕ་རོལ་གནོད་པ་བྱས་པ་དེ་དག་ལ་ལན་བྱའོ་སྙམ་པའི་བསམ་པ་མེད་དོ།། གློག་ཐོབ་བྱང་ཆུབ་སེམས་དཔའ་དེ་ལྟར་ཡང་དག་པར་སྒོམ་པ་ན། འདས་པའི་མི་དགེ་བའི་ལས་ཇི་སྙེད་པ་དག་ཀྱང་གཏན་དུ་ཟད་ཅིང་། མ་ལུས་པར་འབྱང་བར་འགྱུར་ལ། མ་འོངས་པའི་མི་དགེ་བ་རྣམས་ནི་ཡང་ལྡང་བར་མི་འགྱུར་རོ།། གློག་ཐོབ་སྔོན་བྱུང་བ་འདས་པའི་བསྐལ་པ་ཚད་མེད་གྲངས་མེད་པ། ། དེ་བཞིན་གཤེགས་པ་མར་མེ་མཛད་ཀྱི་ཡང་ཆེས་སྔ་རོལ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མཆོག་ཏུདུ་སྐྱེས་པ་ཞེས་བྱ་བ་འཇིག་རྟེན་དུ་བྱུང་ངོ་། ། འཇིག་རྟེན་གྱི་ཁམས་ནི་འོད་ཟེར་ཅན་ཞེས་བྱ་བ་སྟེ། རྒྱལ་པོའི་གྲོང་ཁྱེར་རབ་ཏུ་བདེ་བ་ཞེས་བྱ་བའི་ཚལ་ན་བཞུགས་སོ།། དེའི་ཚེ་ཤན་པ་འཇིགས་སུ་རུང་བ་ཞེས་བྱ་བ་ཁྲོ་གདུམ་ཆེ་ཞིང་གསོད་པ་ལ་དགའ་བ། བཟོད་པ་དང་བྱམས་པའི་སེམས་མེད་པ། ལག་པ་ཁྲག་གིས་བསྐུས་པ་མཐོང་བ་ཐམས་ཅད་སྐྲག་པར་འགྱུར་བ་ཞིག་ཡོད་དེ། དེའི་ཚེ་ཤན་པ་དེས་གླང་ཞིག་ཁང་པའི་ནང་དུ་བཅིངས་ཏེ། ནང་དུ་ཞུགས་ནས་གསོད་པར་བྱས་པ་ལས། གླང་དེས་དེ་མཐོང་ནས་ཤིན་ཏུ་སྐྲག་པས་ཐག་པ་བཅད་དེ་བྲོས་ནས་དེ་བཞིན་གཤེགས་པ་མཆོག་ཏུ་སྐྱེས་པ་བཞུགས་པའི་ཚལ་ག་ལ་བ་དེར་སོང་ངོ་། ། དེའི་ཚེ་ཤན་པ་དེའང་མཚོན་ཐོགས་ནས་ཕྱི་བཞིན་དུ་བསྙགས་པས། གླང་དེ་སྐྲག་ནས་གཡང་ས་ཟབ་མོ་ཞིག་ཏུ་ལྷུང་བའི་སྲོག་ཅན་མཇུག་པ་མདུན་ཞིག་སྡུག་བསྔལ་བས་སྒྲ་ཕྱུང་ངོ་། ། དེའི་ཚེ་ཤན་པས་གླུང་དེ་མཐོང་ནས། ཞེ་སྡང་ཆེར་སྐྱེས་ཏེ་གཡང་ས་ཟབ་མོ་དེ་ཉིད་དུ་ཞུག་ནས་མཚོན་ཐོགས་ཏེ། གསད་པར་བྱས་པ་ལས་མཚོན་མ་བཏབ་པའི་བར་སྐབས་དེར།། དེའི་ཚེ་དེ་བཞིན་གཤེགས་པ་མཆོག་ཏུ་སྐྱེས་པ་ཚལ་དེར་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་བསྐོར་བ་དག་ལ། རྟེན་ཅིང་འབྲེལ་པར་འབྱུང་བའི་ཆོས་ཀྱི་རྣམ་གྲངས་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་ཀྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག། སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨེ་སྔགས་འདོན་པ་དང་། སྡུག་བསྔལ་བ་དང་།། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་རྟེན་ཅིང་འབྲེལ་བར་འབྱུང་བ་འདི་དག་ཐམས་ཅད་ནི་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་གོ་ཞེས་རྒྱ་ཆེར་རྣམ་པར་ཕྱེ་སྟེ་སྟོན་པར་མཛད་པས། གློག་ཐོབ་རྟེན་ཅིང་འབྲེལ་པར་འབྱུང་བ་འདི་ལ་མ་རིག་པའང་འདུ་བྱེད་ལ་མི་སེམས་མི་རྟོག་ལ། འདུ་བྱེད་ཀྱང་མ་རིག་པ་ལ་མི་སེམས་མི་རྟོག་གོ།། དེ་བཞིན་དུ་སྐྱེ་བའང་རྒ་ཤི་ལ་མི་སེམས་མི་རྟོག་ལ། རྒ་ཤིའང་སྐྱེ་བ་ལ་མི་སེམས་མི་རྟོག་པས། དེ་ལྟར་ན་ཆོས་ཐམས་ཅད་ནི་རང་བཞིན་དམིགས་སུ་མེད་པས་མངོན་པར་འདུ་བྱ་བ་མེད་པ། དྲན་པ་མེད་པ། བདག་དང་བདག་གི་བ་མེད་པ། རང་བཞིན་གྱིས་རྣམ་པར་དག་པ། ཕན་ཚུན་གཅིག་གིས་གཅིག་མི་རིག་པ་ཡིན་ནོ།། སོ་སོའི་སྐྱེ་བོ་རྣམས་འདི་ལྟ་བུའི་ཆོས་མ་ཐོབ་པའི་ཕྱིར། གཟུགས་ནི་བདག་ཡིན་ནོ།། བདག་ནི་གཟུགས་རྣམས་དང་ལྡན་ནོ།། གཟུགས་ནི་བདག་གི་ཡིན་ནོ་ཞེས་འཛིན་པར་བྱེད་དེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་ལའང་དེ་བཞིན་ནོ།། བདག་དང་བདག་གིར་འཛིན་པ་ལ་མངོན་པར་ཞེན་པ་འདིའི་དབང་གིས་མི་རྟག་པ་ལ་རྟག་པར་འཛིན་པར་བྱེད། སྡུག་བསྔལ་ལ་བདེ་བར་འཛིན་པར་བྱེད་མི་སྡུག་པ་ལ་སྡུག་པ་ཉིད་དུ་འཛིན་པར་བྱེད། བདག་མེད་པ་ལ་བདག་ཏུ་འཛིན་ཅིང་ཕྱིན་ཅི་ལོག་བཞི་སྐྱེད་པར་བྱེད་དོ།། ཕྱིན་ཅི་ལོག་ཏུ་ལྟ་བའི་ཕྱིར་མ་རིག་པས་རྨོངས་ནས། ཡང་དག་པར་ཚུལ་བཞིན་དུ་ཡིད་ལ་མི་བྱེད་ཅིང་། སེམས་ཀྱི་རྗེས་སུ་མངོན་པར་ཞེན་པར་གྱུར་པས། སྲིད་པའི་སྲེད་པ་འཆིང་བ་གཅོད་པར་མི་ནུས་ཤིང་། འཁོར་བའི་འཁོར་བར་རྒྱུན་མི་འཆད་པར་འབོར་བར་གྱུར་པ་ཡིན་ནོ། ། མཁས་པ་དག་ནི་ཆོས་ཀྱི་དབྱིངས་ཀྱི་མཚན་ཉིད་ལ་ཤིན་ཏུ་ལེགས་པར་རྟོག་པར་བྱེད་པའི་ཕྱིར་བདག་དང་། གང་ཟག་དང་། སེམས་ཅན་ཞེས་བྱ་བ་ནས་སྲོག་ཅེས་བྱ་བའི་བར་དུ་ཅུང་ཟད་ཙམ་ཡང་ཡོད་པར་ཡང་དག་པར་རྗེས་སུ་མི་མཐོང་ལ། སྐྱེ་བ་དང་། རྒ་བ་དང་། ནུ་བ་དང་། འཆི་བ་དང་། གསོད་པ་དང་། གནོད་པ་བྱེད་པ་དག་ཀྱང་མི་དམིགས་སོ་ཞེས་གསུངས་པ་དང་།། གློག་ཐོབ་དེའི་ཚེ་ཤན་པ་འཇིགས་སུ་རུང་བས་རྒྱང་ནས་དེ་བཞིན་གཤེགས་པས་ཆོས་བཤད་པའི་སྒྲ་ཐོས་ནས་གོ་བར་གྱུར་པས་དེ་མ་ཐག་ཏུ་གསོད་པའི་སེམས་ཉེ་བར་ཞི་བར་གྱུར་ནས་མཚོན་ཆ་སྤངས་ཏེ་གཡང་ས་ནས་བྱུང་ནས། བཅོམ་ལྡན་འདས་དེ་ག་ལ་བ་དེར་སོང་སྟེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་གཏུགས་ནས་ཕྱག་བྱས་ཏེ། ཕྱོགས་གཅིག་ཏུ་འདུག་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ནི་དེང་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ནས་ལམ་བསྒྲུབ་པར་འཚལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་རིགས་སོ།། དགེ་སློང་ལེགས་པར་འོངས་སམ་ཞེས་གསུངས་མ་ཐག་ཏུ། དགེ་སློང་གི་དངོས་པོར་བསྒྱུར་ནས་རྫོགས་པར་བསྙེན་པར་གྱུར་ཏོ།། དེ་ནས་དེ་བཞིན་གཤེགས་པ་མཆོག་ཏུ་སྐྱེས་པས། དེའི་ལྷག་པའི་བསམ་པ་ཐུགས་ཀྱིས་མཁྱེན་ནས། མཐར་གྱིས་ཡོངས་སུ་སྨིན་པར་མཛད་ཅིང་། བྱང་ཆུབ་སེམས་དཔའི་སྤྱོད་པ་རྣམས་རྒྱ་ཆེར་ཡང་དག་པར་བསྟན་པ་འཇིགས་སུ་རུང་བས་ཐོས་པས། མི་སྐྱེ་བའི་ཆོས་ལ་བཟོད་པ་ཐོབ་ནས། སངས་རྒྱས་ཀྱི་བསྟན་པ་ལས་ཕྱིར་མི་ལྡོག་པ་ཐོབ་པར་གྱུར་ཏོ། ། གླང་དེའང་དེ་བཞིན་གཤེགས་པ་དེས་རྟེན་ཅིང་འབྲེལ་པར་འབྱུང་བའི་ཆོས་ཀྱི་ཆོག་སྟོན་པའི་གསུང་སྦ་ཤིན་དུ་གྱ་ནོམ་པ་ཐོས་ནས། སེམས་ལ་རབ་ཏུ་དགའ་བ་སྐྱེས་པས། ཤི་འཕོས་པའི་འོག་ཏུ་དགའ་ལྡན་གྱི་ལྷའི་གནས་སུ་སྐྱེས་ནས། བྱམས་པ་དང་ཕྲད་དེ་ཡང་དག་པའི་དད་པ་དང་ལྡན་པར་གྱུར་ཏོ།། གློག་ཐོབ་དེ་ལྟར་ན་སེམས་ཅན་རྣམས་ཀྱི་སྤྱོད་པ་ནི་ཤིན་ཏུ་ཟབ་པ་དང་། རྣམ་པར་རིག་པར་དཀའ་ཞིང་། ཤེས་པར་དཀའ་བ་ཡིན་ཏེ། དེའི་ཕྱིར་གློག་ཐོབ་བྱང་ཆུབ་སེམས་དཔའ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བར་འདོད་པས། སེམས་ཅན་གྱི་དབང་པོ་དང་། སྤྱོད་པ་དག་ལ་ཤིན་ཏུ་མཁས་པར་བྱས་ནས། སེམས་ཅན་ཐམས་ཅད་ལ་མཉམ་པའི་སེམས་དང་། ཐོགས་པ་མེད་པའི་སེམས་ལ་རབ་ཏུ་གནས་ཏེ། ཆོས་ཐམས་ཅད་ལ་རྟག་ཏུ་མངོན་པར་ཞེན་པ་མེད་པར་བྱའོ།། ཅི་བདོག་པའི་རྣམས་ཡོངས་སུ་སྤངས་ཏེ། ཚུལ་ཁྲིམས་རྣམ་པར་དག་པ་བསྒྲུབ་པར་བྱའོ།། བཟོད་པ་ལ་གནས་པར་བྱའོ།། བརྩོན་འགྲུས་བསྐྱེད་པར་བྱའོ།། བསམ་གཏན་དང་ཏིང་ངེ་འཛིན་ལ་མཉམ་པར་གཞག་པར་བྱའོ།། ཡང་དག་པ་ཇི་ལྟ་བ་བཞིན་དུ་ཆོས་ཐམས་ཅད་ཀྱི་ངོ་བོ་ཉིད་ལ་སོ་སོར་བརྟག་པར་བྱའོ།། གློག་ཐོབ་བྱང་ཆུབ་སེམས་དཔའ་གང་ཆོས་དྲུག་པོ་འདི་དག་ཡོངས་སུ་རྫོགས་པར་གྱུར་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། ། ཇི་ལྟར་ཡོངས་སུ་རྫོགས་པར་བྱེད་ཅེ་ན། འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་ལ་བརྟེན་ནས་མངོན་པར་སྒྲུབ་པར་བྱེད་པའི་ཕྱིར་རོ། ། གློག་ཐོབ་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་གཏེར་གང་ཞེ་ན། འདི་ལྟ་སྟེ། བྱང་ཆུབ་སེམས་དཔས་གཟུགས་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་ཤིང་། གཟོད་མ་ཉིད་ནས་སྐྱེ་བ་མེད་པ་དང་། རང་བཞིན་གྱིས་རྣམ་པར་དག་པར་མཐོང་བ་གང་ཡིན་པའོ།། བྱང་ཆུབ་སེམས་དཔའ་ནི་གཟུགས་ལ་མཁས་པ་ཐོབ་པའི་ཕྱིར་སོ་སོ་ཡང་དག་པར་རིག་པ་བཞི་དང་ལྡན་པར་འགྱུར་རོ། ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པའོ།། དོན་སོ་སོ་ཡང་དག་པར་རིག་པ་ནི། གཟུགས་ཀྱི་དོན་རྣམས་ལ་ཐོགས་པ་མེད་པར་གྱུར་པའི་ཕྱིར་རོ།། གཟུགས་ཀྱི་དོན་གང་ཞེ་ན། འདི་ལྟ་སྟེ། དོན་དམ་པ་གང་ཡིན་པའོ།། དོན་དམ་པ་གང་ཞེ་ན། གཟུགས་དམིགས་སུ་མེད་པ་གང་ཡིན་པ་སྟེ། དོན་དམ་པའི་ཡེ་ཤེས་པ་འདི་ལྟ་བུ་དང་ལྡན་པ་གང་ཡིན་པ་དེ་ནི། དོན་སོ་སོ་ཡང་དག་པར་རིག་པ་ཞེས་བྱའོ།། ཆོས་སོ་སོ་ཡང་དག་པར་རིག་པ་ནི་གཟུགས་ཀྱི་ཆོས་རྣམས་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་གང་ཡིན་པ་དེ་ནི། ཆོས་སོ་སོ་ཡང་དག་པར་རིག་པ་ཞེས་བྱའོ།། ངེས་པའི་ཚིག་སོ་སོ་ཡང་དག་པར་རིག་པ་ནི། འདི་ལྟ་སྟེ། གཟུགས་རྣམས་ལ་ཐོགས་པ་མེད་པའི་ཡེ་ཤེས་ཀྱི་ཐབས་མཁས་པས་ངེས་པའི་ཚིག་རྣམ་པ་སྣ་ཚོགས་ཀྱིས་རྣམ་པར་འབྱེད་པ་གང་ཡིན་པ་དེ་ནི། ངེས་པའི་ཚིག་སོ་སོ་ཡང་དག་པར་རིག་པ་ཞེས་བྱའོ།། སྤོབས་པ་སོ་སོ་ཡང་དག་པར་རིག་པ་ནི། འདི་ལྟ་སྟེ། གཟུགས་ཀྱི་ཆོས་རྣམས་སེམས་ཅན་གྱི་དབང་པོ་ཇི་ལྟ་བ་བཞིན་དུ་རྣམ་པར་ཕྱེ་སྟེ་སྟོན་པར་བྱེད་ཀྱང་། ཀུན་ནས་ཉོན་མོངས་པ་མེད་ཅིང་། མངོན་པར་ཞེན་པ་མེད་པ་གང་ཡིན་པ་དེ་ནི། སྤོབས་པ་སོ་སོ་ཡང་དག་པར་རིག་པ་ཞེས་བྱའོ།། བྱང་ཆུབ་སེམས་དཔའ་ནི་འདི་ལྟ་བུའི་ཡེ་ཤེས་དང་ལྡན་པས། གཟུགས་ཀྱི་ཆོས་ལ་རྨོངས་ཤིང་མངོན་པར་ཞེན་པར་གྱུར་པའི་སེམས་ཅན་ཐམས་ཅད་ཀྱི་རང་བཞིན་དང་། འདུན་པ་ཇི་ལྟ་བ་བཞིན་དུ་རྩོལ་བ་མེད་པའི་ཡེ་ཤེས་ཀྱིས་ཅི་རིགས་པར་ཆོས་སྟོན་པར་བྱེད་ཀྱང་། ཆོས་ཀྱི་དབྱིངས་ལ་མཚན་ཉིད་གཉིས་སུ་གྱུར་པ་མེད་དེ། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་བར་ལའང་དེ་བཞིན་དུ་རྒྱས་པར་སྦྱར་ཏེ། གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར་ཞེས་བྱའོ།། བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན། སྤྱོད་ཡུལ་རྣམས་ལ་རྨོངས་པར་གྱུར་པའི་སེམས་ཅན་དེ་ལྟ་བུ་དག་ཡོངས་སུ་གདུལ་བར་འདོད་པའི་ཕྱིར། དེ་དག་གི་མོས་པ་ཇི་ལྟ་བ་བཞིན་དུ་དེ་དག་རེ་རེ་ལའང་བསྐལ་པ་འམ། བསྐལ་པ་ལས་ལྷག་པར་ཚིག་རྣམ་པ་སྣ་ཚོགས་ཀྱི་ཐབས་ལ་མཁས་པས་ཆོས་སྟོན་པར་བྱེད་ཀྱང་། དེ་དག་གི་མཐའ་ཡང་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་ལའང་འགྲིབ་པ་མེད་ཅིང་ཆོས་ཀྱི་དབྱིངས་དང་མི་འབྲལ་བར་གཉིས་སུ་མེད་ཅིང་དབྱེར་མེད་པའི་རྗེས་སུ་འབྲང་བ་གང་ཡིན་པ་དེ་ནི། བྱང་ཆུབ་སེམས་དཔའ་ཐབས་ལ་མཁས་པས་ཆོས་ཐམས་ཅད་དབྱེར་མེད་པའི་མཚན་ཉིད་བསྟན་པས་འཐོབ་པའི་ཆོས་ཀྱི་གཏེར་ཅེས་བྱའོ། ། ཆོས་ཀྱི་གཏེར་འདིས་སེམས་ཅན་དག་ལ་ཅི་རིགས་པར་ཆོས་བསྟན་ནས། ཟད་མི་ཤེས་པའི་ཆོས་ཀྱི་གཏེར་ཕུན་སུམ་ཚོགས་པར་གྱུར་ཏེ། འཁོར་བའི་རྒུད་པ་གཏན་དུ་སྤོང་བ་གང་ཡིན་པ་འདི་ནི། གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏེར་ཆེན་པོ་དང་། ཟད་མི་ཤེས་པའི་གཏེར་དང་། ཀུན་ཏུ་ཟད་མི་ཤེས་པའི་གཏེར་དང་། མཐའ་མེད་པའི་གཏེར་རྣམ་པ་ལྔ་ཞེས་བྱའོ།། བྱང་ཆུབ་སེམས་དཔའ་གང་གཏེར་འདི་ལྟ་བུ་དང་ལྡན་པར་གྱུར་ན། ཡོན་ཏན་ཁྱད་པར་དུ་འཕགས་པ་རྣམས་ཡོངས་སུ་རྫོགས་པར་གྱུར་པའི་ཕྱིར། ཚེགས་ཆུང་ངུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། ། ཆོས་ཀྱི་གཏེར་བསྟན་པའི་ཆོས་ཀྱི་རྣམ་གྲངས་འདི་བསྟན་པའི་ཚེ། བྱང་ཆུབ་སེམས་དཔའ་གློག་ཐོབ་ནི་གཟུངས་རབ་ཏུ་ཐོབ་པར་གྱུར་ཏོ།། བྱང་ཆུབ་སེམས་དཔའ་ལྔ་བརྒྱ་ནི་གློག་གི་འོ། ཟེར་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ།། ལྷའི་བུ་སུམ་ཁྲི་དྲུག་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ།། དེ་ནས་བཅོམ་ལྡན་འདས་ལ། བྱང་ཆུབ་སེམས་དཔའ་ཟླ་བའི་རྒྱལ་མཚན་གྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་ཀྱིས་ཇི་སྐད་དུ་རྩོལ་བ་མ་མཆིས་པའི་ཡེ་ཤེས་ཞེས་གང་གསུང་པ་དེའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་གང་གིས་དགེ་བའི་ཆོས་རྣམས་ལ། ལུས་དང་སེམས་ཀྱི་རྗེས་སུ་མཐུན་པས་དམིགས་ཤིང་མངོན་པར་འདུ་བྱེད་པ་གང་ཡིན་པ་དེ་ནི་རྩོལ་བ་དང་བཅས་པ་ཞེས་བྱའོ། ། བྱང་ཆུབ་སེམས་དཔའ་གང་ལུས་དང་སེམས་རབ་ཏུ་དུལ་བར་གྱུར་ན། དྲན་པ་མེད་པ། གནས་པ་མེད་པ། རྣལ་འབྱོར་སྒོམ་པའི་མཚན་མ་དང་བྲལ་བར་གྱུར་པ་དང་། དེ་སྔོན་གྱི་སྨོན་ལམ་དང་ཡེ་ཤེས་ཡོངས་སུ་རྫོགས་པར་གྱུར་པས། སངས་རྒྱས་ཀྱི་ཞིང་བྱེ་བ་སྟོང་ཕྲག་མང་པོ་རྣམས་སུ་རྣམ་པ་སྣ་ཚོགས་སུ་སྟོན་པར་བྱེད་ཀྱང་། ཆོས་ཀྱི་དབྱིངས་ལ་གཡོ་བ་མེད་པ་དང་། རྟག་ཏུ་ཆོས་སྟོན་པར་བྱེད་པས་ཆོས་ཀྱི་མཚན་མ་ཅུང་ཟད་ཀྱང་མེད་པ་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱས་ཀྱང་། སེམས་ཅན་གང་ཡོངས་སུ་བཟླས་པ་མེད་པ་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱངས་ཀྱང་། སངས་རྒྱས་ཀྱི་ཡོངས་སུ་དག་པ་ཡང་དག་པར་རྗེས་སུ་མི་མཐོང་བ་དང་། རྟག་པར་སངས་རྒྱས་རྣམས་རྗེས་སུ་དྲན་པར་བྱེད་ཀྱང་། གཟུགས་ཀྱི་མཚན་ཉིད་དུ་མི་ལྟ་བ་དང་། སངས་རྒྱས་ཀྱི་ཞིང་ཀུན་ཏུ་རྒྱུ་བར་བྱེད་ཀྱང་། ཆོས་ཀྱི་དབྱིངས་དང་མི་འབྲལ་བ་གང་ཡིན་པ་འདི་ནི། བྱང་ཆུབ་སེམས་དཔའི་རྩོལ་བ་མེད་པའི་ཡེ་ཤེས་ཤེས་བྱའོ།། བྱང་ཆུབ་སེམས་དཔའ་རྣམས་ནི་འདི་ལྟ་བུའི་ཡེ་ཤེས་དང་ལྡན་པའི་ཕྱིར། སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱས་ཀྱང་གང་བྱས་པ་དེ་དག་ལ་མངོན་པར་ཞེན་པའང་མེད་དོ།། དེའི་ཚེ་བཅོམ་ལྡན་འདས་ཀྱིས་རྩོལ་བ་མེད་པའི་ཡེ་ཤེས་འདི་བསྟན་པ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏོ།། བརྒྱ་བྱིན་ལྷའི་དབང་པོའང་སུས་གསུམ་གྱི་ལྷ་རྣམས་དང་བཅས་པར་སྟེང་གི་བར་སྣང་ལས་མེ་ཏོག་མན་ད་ར་བ་དང་། ཨུཏྤ་ལ་དང་། ཀུ་མུ་ད་དང་། པདྨ་དང་། པུཎྜ་རི་ཀ་དང་། ཙན་དན་གྱི་ཕྱེ་མའི་ཆར་མངོན་པར་ཕབ་སྟེ། བཅོམ་ལྡན་འདས་ལ་མངོན་པར་གཏོར་ཏོ།། ལྷའི་རྔ་རྣམས་ཀྱང་རང་སྒྲ་བྱུང་བར་གྱུར་ཏོ།། ངོ་མཚར་རྨད་དུ་བྱུང་བའི་སྣང་བ་ཆེན་པོས་ཀྱང་ཀུན་ཏུ་སྣང་བར་བྱས་ཏེ། སེམས་ཅན་གང་ལ་རེག་པར་གྱུར་པ་དེའི་ལུས་ཀྱང་ཤིན་ཏུ་བསིལ་བར་གྱུར་ཏོ། ། དེ་ནས་བཅོམ་ལྡན་འདས་ཀྱིས། བྱང་ཆུབ་སེམས་དཔའ་གློག་ཐོབ་ལ་བཀའ་སྩལ་པ། གློག་ཐོབ་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཀྱང་གནས་འདིར་ཆོས་ཀྱི་རྣམ་གྲངས་འདི་ལྟ་བུ་གསུངས་སོ། ། མ་བྱོན་པའི་དེ་བཞིན་གཤེགས་པ་རྣམས་འཇིག་རྟེན་དུ་འབྱུང་བའི་ཚེའང་གནས་འདིར་ཆོས་ཀྱི་རྣམ་གྲངས་འདི་ལྟ་བུ་གསུང་བར་འགྱུར་རོ། ། འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན། ད་ལྟར་བཞུགས་པའི་དེ་བཞིན་གཤེགས་པ་རྣམས་ཀྱང་། ཆོས་ཀྱི་རྣམ་གྲངས་འདི་རྒྱུན་མི་འཆད་པར་མཛད་པའི་ཕྱིར་འོད་ཟེར་ཆེན་པོ་སྐྱེད་པར་མཛད་དོ།། དེ་ནས་ཚེ་དང་ལྡན་པ་ཀུན་དགའ་བོས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། བདག་གིས་ཇི་ལྟར་ཡོངས་སུ་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ནི་མི་ཟད་པའི་གཏེར་བསྟན་པ་ཞེས་བྱའོ། ། ཆོས་ཐམས་ཅད་དབྱེར་མེད་པའི་མཚན་ཉིད་བསྟན་པ་ཞེས་ཀྱང་བྱ་སྟེ། ཁྱོད་ཀྱིས་དེ་ལྟར་མིང་ཡོངས་སུ་གཟུང་བར་བྱའོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་གློག་ཐོབ་དང་། ཚེ་དང་ལྡན་པ་ཀུན་དགའ་བོ་དང་། འཁོར་བཞི་པོ་རྣམས་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཐམས་ཅད། བཅོམ་ལྡན་འདས་ཀྱི་གསུངས་པ་ལ་ཡི་རངས་ཏེ། མངོན་པར་བསྟོད་དོ།། འབ་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། མི་ཟད་པའི་གཏེར་བསྟན་པའི་ལེའུ་སྟེ། འདུས་པ་ཉི་ཤུ་པ་རྫོགས་སོ།། །
CLOSE WINDOW