Wylie

e-texts based on the ACIP/ALL Input

དགེ་སློང་ཚུལ་ཁྲིམས་རྒྱལ་བས་གཏན་ལ་ཕབ་པ།། །།བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ། མཐིང་ནག་མཛེས་པས་འཇམ་པར་འཚེར་བའི་དབུ། །ལྕང་ལོ་རྫིངས་བསྐྱོད་མཐིང་གི་མཚོ་ལྟར་གཡོ། །དགེ་བའི་སྤྱི་གཙུག་མཚན་མཆོག་གཡས་སུ་འཁྱིལ། །གཙུག་ཏོར་འཕགས་པས་སྐྱེ་བོས་བལྟར་མི་མཐོང་། །སྲིད་པའི་སྡུག་བསྔལ་མ་ལུས་གཞོམ་པ་དང་། །མཐུ་ཆེན་བྱིན་གྱིས་རྒལ་བ་གཞོམ་པའི་ཕྱིར། །དབུ་རྒྱན་ཅོད་པན་རྒྱལ་བའི་མཆོག་གསང་ཞིང་།། ཆོས་ཀྱི་རྒྱལ་ཐབས་དབང་གི་ཕ་རོལ་ཕྱིན། །རིན་ཆེན་སྤུག་དང་ཨུཏྤལ་འདྲ་བ་ཡི། །ཤིན་ཏུ་དྭངས་པར་དཀར་ནག་ཕྱེད་པའི་སྤྱན། །སྨིན་ཚུགས་མཛེས་པས་ཟླ་བ་ཚེས་ལྟར་འཁྱུག་། མིག་འཛུམས་ཟུར་གྱིས་ལྟ་བས་བྱམས་པའི་རྟགས། །སིལ་སྙན་རྣམ་དག་མཚན་རབ་འབྲུ་ཆགས་པ། །རིན་ཆེན་མ་ལུས་རྣམ་པ་དུ་མས་སྤྲས། །རྒྱལ་བའི་ཞིང་མང་རྣམ་པ་སྣ་ཚོགས་སུ། །རྣམ་ཐར་དཔག་ཡས་ཆོས་སྒོ་གྲངས་མེད་གནས། །ཤངས་ཀྱི་དབྱིབས་ལེགས་སྐྱེ་བོ་ཡོངས་ལས་འཕགས། །མཐོ་ལ་ཡིད་ཙམ་ཟུར་ལ་ལེགས་པའི་མཚན། །དྲང་ལ་ཆུ་ཕྲན་འདྲ་བར་མཛེས་པའི་ཚུལ། །བཟང་ལེགས་བསྐལ་པ་བརྒྱར་ཡང་བལྟར་མི་ངོམས། །པདྨ་ལེ་བརྒན་ཚོན་ལྟར་དམར་བའི་སྒྲོས། །ཡིད་གཞུངས་འཕེལ་བ་འཁྱིལ་བ་བཟད་ལེགས་སྐུ། །མདོག་སྡུག་ཆུ་སྐྱེས་སྣང་བ་མཚོ་ལོ་བཞིན། །ཤིན་ཏུ་དང་བའི་ཡིད་ཀྱིས་འཛུམ་པ་མཛད། །ཞལ་རས་ཟླ་འདྲ་གསེར་གྱི་མདོག་གིས་རྒྱས། །འོད་ཀྱི་དཀྱིལ་འཁོར་གསེར་ཕྲེང་དུ་མས་སྤྲས། །གསལ་བའི་འོད་ཕུང་ཉི་མ་བརྒྱ་བས་ལྷག་།འོད་ཟེར་སྣ་ཚོགས་སྤྲིན་ཕུང་བཞིན་དུ་འཕྲོ། །ཆོས་དབྱིངས་འཇམ་པའི་དབྱངས་ཀྱི་སྒྲ་སྒྲགས་པ། །ཀ་ལ་པིང་ཀ་ལྟ་བུར་ཡིད་འཕྲོག་མཛད། །སང་སང་དབྱངས་རབ་གསུང་དབྱངས་རབ་སྒྲགས་པ། །སེངྒེའི་ང་རོ་གསེར་གྱི་དྲིལ་ལྟར་འཁྲོལ། །སྐྱེས་མཆོག་མཛད་པ་སྒོམ་པར་མཛད་པའི་སྐུ། །ཆ་ལུགས་བཞིན་འཆང་གཟི་བརྗིད་འཕགས་པའི་སྐུ། །གཞོན་ནུའི་ཚུལ་ཆགས་ཤིན་ཏུ་གཞོན་པར་གདའ། །གདུལ་བྱའི་སྐྱེ་བོ་གཞོན་ནུ་གཟུགས་ཀྱིས་གདུལ། །དབུ་རྒྱན་རིན་ཆེན་རྣམ་པ་སྣ་ཚོགས་དང་། །མུ་ཏིག་དོ་ཤལ་གསེར་གྱི་རྒྱན་དུ་བཀོད།། པདྨ་ལྷ་ཡིན་བཟའ་སིལ་མ་བསྣམས། །གཡས་ན་མཚོན་མཆོག་བསྣམས་པ་ཐབས་ཀྱིས་འདུལ། །དཔེ་མེད་རྣོ་བ་ཤེས་རབ་ཉིད་དུ་ངེས། །ཆོས་དབྱིངས་ཚུལ་ཉིད་ཡང་དག་བརྗོད་པ་དང་། །མི་ཤིགས་རྡོ་རྗེ་གཏན་ནས་འབིགས་པའི་ཚུལ། །གཡོན་པ་ཤེས་རབ་ཕ་རོལ་ཕྱིན་པ་དང་། །བླང་དོར་གཉིས་མེད་བསམ་གྱིས་མི་ཁྱབ་དབྱིངས། ། ཟབ་མོའི་ཆོས་ཉིད་ཐུགས་སུ་ཆུད་པའི་དོན། །བཅོམ་ལྡན་འདས་ཀྱིས་འཇམ་དཔལ་རྣོན་པོ་ལ་བསྟོད་པ་རྫོགས་སོ།། །།འཇམ་དཔལ་ངག་གི་དབང་ཕྱུག་ལ་བུ་མོ་བརྒྱད་ཀྱིས་བསྟོད་པ།

CLOSE WINDOW