Wylie

e-texts based on the ACIP/ALL Input

། །།རྒྱ་གར་སྐད་དུ། བཛྲ་ཧྲི་ད་ཡ་བཛྲ་ཛི་ཧྭཱ་ན་ལ་ནཱ་མ་དྷ་ར་ཎཱི|་བོད་སྐད་དུ། རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དུར་ཁྲོད་ཆེན་པོ་བསིལ་བའི་ཚལ་ན་བཞུགས་ཏེ་དེ་ན་འཁོར་ཉེ་བའི་སྲས་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་དང་། ལྷ་དང་། མི་དང་|་ལྷ་མ་ཡིན་དང་། ཀླུ་རྣམས་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་རྡོ་རྗེ་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཐུགས་ཀ་ནས་འོད་ཟེར་རབ་ཏུ་བཀྱེ་བར་གྱུར་ཏེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཁྱབ་པར་བྱས་ནས་སེམས་ཅན་ཐམས་ཅད་ཀྱི་ནད་དང་། མི་བདེ་བ་དང་། སྡུག་བསྔལ་ཐམས་ཅད་དང་བྲལ་བར་བྱས་སླར་བཅོམ་ལྡན་འདས་ཀྱི་ཐུགས་སུ་ཞུགས་སོ། །དེ་ནས་དྲང་སྲོང་ཆེན་པོ་ཉེས་འདོར་ལངས་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་འདི་ན་སེམས་ཅན་ཐམས་ཅད་ལ་ནད་དང་། དུག་དང་། རིམས་དང་། དགྲ་དང་། གདོན་དང་། བྱད་སྟེམས་དང་། རྦོད་གཏོང་དང་། ཆར་ཆེས་པ་དང་། ཆར་མི་འབབ་པ་དང་། ལོ་ཏོག་མ་རུངས་པར་བྱེད་པ་རྣམས་ཀྱིས་སེམས་ཅན་ཐམས་ཅད་སྡུག་བསྔལ་ཞིང་ཉམ་ཐག་པར་གྱུར་ན། དེ་ལ་ཇི་ལྟར་བསྲུང་བ་དང་། བསྐྱབ་པ་དང་། སྦ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཉེས་འདོར། །ང་ལ་རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་ཡོད་དེ། དེས་སེམས་ཅན་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་བྱེད་དོ། །དེ་ངས་བཤད་ཀྱིས་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་།དེ་ནས་བཅོམ་ལྡན་འདས་ཀྱིས་བཛྲ་བཛྲ་ཧཱུཾ་ཞེས་གསུངས་པས་རྡོ་རྗེ་སྙིང་པོ་ཁྲོ་ཞིང་གཏུམ་པ། གདུག་པའི་ཆ་ལུགས་ཅན་ཐོན་ནས་བཅོམ་ལྡན་འདས་ཀྱི་སྣམ་ལོགས་ན་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་མགྲིན་གཅིག་ཏུ་གཟུངས་འདི་བཀའ་སྩལ་ཏོ། །ཉི་མ་ནཱན། ཟླ་བ་ནཱན། ཀླད་པ་ནཱན། ཀུ་ན་ཞི། ཙི་ཏ་ཀུ་ལི་ནཱན། ཡཀྵ་ཟློག་བྱེར། དེ་ནས་གཟུངས་འདི་གསུངས་མ་ཐག་ཏུ་བགེགས་དང་། ལོག་འདྲེན་ཐམས་ཅད་འཇིགས་ཤིང་སྐྲག་ནས་ཁ་སྦུབ་ཏུ་འགྱེལ་ཏེ་ཝུ་བར་སྐྱུག་ཅིང་བརྒྱལ་བར་གྱུར་ཏོ། །དེ་ནས་ཀླུའི་རྒྱལ་པོ་མཐའ་ཡས་ཀྱང་འཇིགས་སྐྲག་ནས་ལུས་འདར་ཞིང་བཅོམ་ལྡན་འདས་ལ་ཕྱག་@#། །འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་དགྲ་དང་། གདོན་ཐམས་ཅད་བརླག་པར་བྱེད་པའི་གཟུངས་འདི་བརྗོད་པར་བགྱིའི། བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། །ན་མོ་བུདྡྷ་ཡ། ཙི་ཏྲ་མུ་དྲ་ཡཀྵ་ཟློག་བྱེར། དེ་ནས་གཟུངས་འདི་སྨྲས་མ་ཐག་ཏུ་ས་ཆེན་པོ་གཡོས་པར་གྱུར་ཏེ། འཇིག་རྟེན་གྱི་ཁམས་ཐམས་ཅད་ཁ་སྦུབ་ཏུ་འགྱེལ་ཏེ|་གདོན་དང་ལོག་འདྲེན་ཐམས་ཅད་ཁ་སྦུབ་ཏུ་འགྱེལ་ཏེ། ཁྲག་ཏུ་སྐྱུག་ཅིང་དབུགས་དང་བྲལ་བར་གྱུར་ཏོ། །དེ་ནས་ཡང་ཀླུ་མཐའ་ཡས་ཀྱིས་འདི་སྐད་ཅེས་བརྗོད་དོ|་|བཅོམ་ལྡན་འདས། བདག་གིས་སེམས་ཅན་ཐམས་ཅད་ལ་བསྲུང་བ་དང་། བསྐྱབ་བ་དང་། སྦ་བར་བགྱིའོ། །བཅོམ་ལྡན་འདས་ཀྱི་བསྟན་པ་བསྲུང་བར་བགྱིའོ། །སངས་རྒྱས་ཀྱི་བསྟན་པ་ཡུན་རིང་དུ་གནས་པར་བགྱིའོ། །ཆར་དུས་སུ་དབབ་ཅིང་ལོ་ཏོག་ཐམས་ཅད་བསྲུང་བར་བགྱིའོ། །ནད་དང་དགྲ་དང་གདོན་ཐམས་ཅད་གཞོམ་པར་བགྱིའོ། །བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་ལྟར་བགྱིད་པ་ལས་ལྡོག་པར་མི་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཀླུའི་རྒྱལ་པོ་མཐའ་ཡས། །ཁྱོད་ཀྱིས་ཇི་ལྟར་དམ་བཅས་པ་ལྟར་གྱིས་ཤིག་། དམ་ཚིག་རྗེས་སུ་སྲུངས་ཤིག་།ཇི་ལྟར་ངའི་བཀའ་བཅག་ན་ངན་སོང་དུ་ལྷུང་བར་གྱུར་ཏ་རེ། ངའི་ཇི་ལྟར་བསྒོ་བ་ཐམས་ཅད་གྱིས་ཤིག་།དེ་ནས་གསང་བའི་བདག་པོས་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་བཀླགས་པས་འགྲུབ་པ་དྲག་པོ་རབ་ཏུ་མི་བཟད་པ་འདི་སྨྲས་སོ། །བཛྲ་བཛྲ་ཧཱུཾ། ན་མོ་བུདྡྷཱ་ཡ་ཙི་ཏྲ་མུ་དྲ་ཡཀྵ་ཟློག་བྱེར། ནཱ་ག་ཤིག་།ནཱ་ག་བྱེར། ནཱ་ག་ནན|་ནཱ་ག་གོ་ལ་ནན། ནཱ་ག་ཧ་ན་ཧ་ན་མཱ་ར་ཡ་རྦད་ནན། ས་གདོན་ནག་པོ་སོད་ས་གདོན་ནག་པོ་སོད། ས་གདོན་ནག་པོ་ནན། ཕྱུག་ཙི་ཕཊ། ཙི་ཀ་ཕྱུ་ཕཊ། ལྕེ་པ་ཏི་ཕཊ། ཨེ་ག་བ་ར་ཙེ་དི་ནཱ་ག་བ་ར་མ་མ་ཧཱ་བ་ལ་ས་ཏ་ཡེ་གོ་དེ་སད་ཏེ་ནན། ཐུམ་རིལ་རྦད་ཆེ་གེ་མོ་མཱ་ར་ཡ། ཛཿརྦད་ནན། ནཱ་ག་ཧྲིལ་ཧྲིལ། ནཱ་ག་ཕྲོཾ་ཕྲོཾ། ནཱ་ག་ཕོབ། བཛྲ་པྲ་བེ་ཤ་ཡ་ས་འདི་སྲུངས་ཤིག། བྱེར་ཡ། བྷྱོར་མ་མ་ཧཱ་ཨ་ཧཱུཾ་ཧཱུཾ་ཕཊ་སྭཱཧཱ། མཱ་ར་ཡ་ཤཱནྟིཾ་ཀུ་རུ་སྭཱ་ཧཱ། ར་ཤ་མཱ་ར་ཡ་རྦད་ཤིག་བྱེར། ནན་ནན། ཧ་ན་ཧ་ན་མཱ་ར་ཡ་རྦད་ནན། དེ་ནས་གཟུངས་འདི་གསུངས་མ་ཐག་ཏུ་ནམ་མཁའ་ལ་གནམ་ལྕགས་དྲག་པོའི་རྡོ་རྗེའི་ཐོག་ཕབ་ནས་དགྲ་དང་། གདོན་དང་། ལོ་ཏོག་མ་རུངས་པར་བྱེད་པ་ཐམས་ཅད་ཀྱི་ལུས་དུམ་བུ་དུམ་བུར་གཏུབས་ནས་རྡུལ་ཕྲ་རབ་བཞིན་དུ་བརླག་པར་བྱས་སོ། །དེ་ནས་བཅོམ་ལྡན་འདས་ཀྱིས་ཆོ་ག་བཀའ་སྩལ་པ། དྲང་སྲོང་ཆེན་པོ། སའི་དཀྱིལ་འཁོར་གྲུ་བཞི་པ་བྱི་དོར་བྱས་ནས་བའི་རྣམ་ལྔས་བྱུག་པར་བྱའོ། །ཙནྡན་དང་རྒྱ་སྤོས་དྲི་ཞིམ་པོས་བྱུག་པར་བྱའོ། །མེ་ཏོག་སིལ་མ་དགྲམ་མོ། །བུམ་པ་གང་བ་གཞག་གོ་།མར་མེ་འབུད་དོ། །གཏོར་མ་བཟང་པོ་བཞག་གོ་།ལྕགས་སམ་སེང་ལྡེང་གི་ཕུར་པ་གཟུག་@#། །སོ|་|དབུས་སུ་རྡོ་རྗེ་སྙིང་པོ་གཞག་པར་བྱའོ། །དེའི་མདུན་དུ་ཀླུ་མཐའ་ཡས་གཞག་གོ་།དེ་ནས་མཆོད་པར་འདོད་ན་མེ་ཏོག་ལ་སོགས་པ་མཆོད་པ་ལྔ་བྱའོ། །ཀླུ་མཆོད་པར་འདོད་ན་འཁར་བའི་སྣོད་དུ་འོ་མ་དང་། ཀླུ་སྨན་སྣ་ཚོགས་དང་། རྩི་སྨན་སྣ་ཚོགས་ཀྱིས་བྱའོ། །ནད་དང་དུག་སྲུང་བར་འདོད་ན་ཚིལ་ཆེན་དང་། གླ་རྩི་དང་། སྐུད་པ་སྔོན་པོ་དང་། རྨ་བྱའི་སྒྲོས་བྱའོ། །ཀླུ་ནག་པོ་ཆེན་པོ་ལ་ནི། ཚིལ་ཆེན་དང་། གླ་རྩི་དང་། ཚོན་སྐུད་སྣ་ལྔ་དང་། སེང་ལྡེང་གི་ཕུར་པས་བྱའོ། །འབྱུང་པོ་ཐམས་ཅད་ལ་ནི། ཕུར་པ་དང་། ཡུངས་ཀར་གྱིས་བྱའོ|་|སྐྱ་རེངས་འཆར་ཀའི་གདོན་ལ་ནི། ཕུར་པ་དང་། ཉུངས་ཀར་དང་། ཉུངས་ནག་དང་། སྐེ་ཚེ་དང་། ཐལ་ཆེན་གྱིས་བྱའོ། །འབྱུང་པོ་ཀུན་ཏུ་རྒྱུ་བ་ལ་ནི། ཕུར་བུ་ལྔ་དང་། ཐོད་བས་བྱའོ། །གཞན་དག་གསད་པར་འདོད་ན། ཕུར་པ་དང་། གཟུགས་དང་། ཐོད་པས་བྱའོ། །མནན་པར་འདོད་ན། ཐོད་པ་དང་། དུག་དང་། ཉུངས་ཀར་གྱིས་བྱའོ། །ལོ་ཏོག་གཞོམ་པར་འདོད་ན། ཐོད་པ་དང་། དུག་དང་། ཉུངས་ཀར་དང་། ཚིལ་ཆེན་དང་། ཁྲག་སྣ་ཚོགས་ལ་བྱའོ། །ལོ་ཐོག་སྲུང་བར་འདོད་ན། ཐལ་ཆེན་དང་། སྐེ་ཚེ་དང་། ཕུར་བུས་བྱའོ། །ཀུན་ཏུ་སྲུང་བ་ཞེས་བྱ་བ་གཞན་གྱི་རྦོད་གཏོང་བཟློག་པར་འདོད་ན། མཆོད་རྟེན་དང་། གཟུགས་དང་། ཐོད་པ་དང་། ཉུངས་ཀར་དང་། ཕུར་པས་བྱའོ། །ཐམས་ཅད་ཞི་བར་འདོད་ན། ཐབ་ཁུང་རྙིང་པར་ཙནྡན་ནམ་རྒྱ་ཤུག་ལ་མེ་བཏང་ལ་དཀར་གསུམ་དང་། མངར་གསུམ་དང་། འབྲས་དང་། ཏིལ་དང་། མར་དཀར་ལ་སྦྱིན་སྲེག་བྱ་ཞིང་། ཆེ་གེ་མོ་མཱ་ར་ཡ་ཤིནྟིཾ་ཀུ་རུ་སྭཱཧཱ། ཞེས་བཟླས་ན་ཐམས་ཅད་སྲུང་བར་འགྱུར་རོ། །གང་དག་གསད་པར་འདོད་ན། སླ་ངའི་ནང་དུ་སེང་ལྡེང་ངམ་གདུག་པའི་ཤིང་ལ་མེ་བཏང་ལ་གདུག་པའི་རྫས་སྣ་ཚོགས་དང་། སྐེ་ཚེ་དང་། ཏིལ་དང་། མར་ནག་དང་། ཚིལ་ཆེན་དང་མིང་བྱང་སྤེལ་ཏེ། སྦྱིན་སྲེག་བྱ་ཞིང་། ཆེ་གེ་མོ་ར་ཤ་མཱ་ར་ཡ་རྦད་ཅེས་བཟླས་ན། དགྲ་དང་། གདོན་ཐམས་ཅད་བརླག་པར་འགྱུར་རོ། །བདག་དང་གཞན་སྲུང་བར་འདོད་ན། རྨ་བྱའི་མཁྲིས་པ་དང་། ཀ་ར་དང་། སའི་བདུད་རྩི་ལོ་ལྔ་བརྒྱ་ལོན་པས་བྱའོ། །ཀླུ་ས་བདག་སྲུང་བར་འདོད་ན། སྤོས་དང་། གུ་གུལ་ནག་པོ་དང་། གླ་རྩི་དང་། མུ་ཟི་དང་། ལྡོང་རོས་དང་། དྲི་ཆེན་དང་། སྦྲང་རྩིས་བྱའོ། །མཆོག་ཏུ་སྲུང་བར་འདོད་ན། འབྲས་བུ་གསུམ་དང་། བུ་ཆུང་གི་རང་བྱུང་དང་། དྲི་ཆུས་བྱའོ། །ཁྱད་པར་དམ་པ་སྲུང་བ་ཆེན་པོ་ནི། ཨ་རུ་ར་རྣམ་པར་རྒྱལ་བ་བཅང་ཞིང་གཟུངས་འདི་བརྗོད་པར་བྱའོ། །ཤིག་བྱེར་ནཱན། མགོ་ནཱན། ཧ་ན་ཧ་ན་མ་ར་ཡ་རྦད་ནཱན། དྲང་སྲོང་ཆེན་པོ་ཉེས་འདོར། གཟུངས་འདི་ཡིད་ལ་རབ་ཏུ་ཟུངས་ཤིག་།སེམས་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་གྱིས་ཤིག་།ངའི་བསྟན་པ་རྗེས་སུ་སྲུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དྲང་སྲོང་ཆེན་པོ་ཉེས་འདོར་དང་། @#། །ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། །།རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་རྫོགས་སོ།། །།འདི་དང་པོ་སྐ་ཅོག་གིས་བསྒྱུར་ཞིང་། ཕྱིས་གཉན་ལོ་ཙྪ་བ་དྷརྨ་གྲགས་ཀྱིས་ཀྱང་བསྒྱུར་རོ། ། །།རྒྱ་གར་སྐད་དུ། མཱ་ཡཱ་ཛཱ་ལ་མ་ཧཱ་ཏནྟྲ་རཱ་ཛཱ་ནཱ་མ། བོད་སྐད་དུ། རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ།

CLOSE WINDOW