| Wylie |
ག་རུ་ཌ་བཛྲ་ཙཀྲ་ཀྲི་ཡི་ཏན་ཏྲ།། བོད་སྐད་དུ། རྡོ་རྗེ་ཁྱུང་གཙུག་ལག་འཁོར་ལོའི་རྒྱུད། བཅོམ་ལྡན་འདས་ཁྲོ་རྒྱལ་མཁའ་ལྡིང་རྒྱལ་པོ་ལ་ཕྱག་འཚལ་ལོ།། དེ་ནས་གསང་བའི་བདག་པོ་ལག་ན་རྡོ་རྗེས། དཔལ་ཀུན་ཏུ་བཟང་པོ་ལ་འཕྲིན་ལས་ཀྱི་མཆོད་པ་སྣ་ཚོགས་པས་མཆོད་དེ། འཕྲིན་ལས་ཀྱི་མདའ་བཞིས་བསྐུལ་བས་དེ་རྣམས་ཀྱི་བསམ་པ་མཁྱེན་ནས། དེའི་ཚེ་འཕྲིན་ལས་ཐེ་ཚོམ་བཀའ་སྩལ་པ། ། ལས་ཀྱི་འཁོར་ལོ་བསྐོར་བ་དང།། སྔགས་ཀྱི་སྐྱོན་མཐོང་སྤང་བའི་ཕྱིར། ཁྱུང་གི་རྒྱུད་ཆེན་འབུམ་སྡེ་རྣམས།། ལྡེ་མིག་རྣམ་པ་གསུམ་གྱིས་འབྱེད།། ཐེམས་ནི་འཁོར་ལོ་ལྡེ་མིག་ཡིན།། ཚད་མ་སྔགས་ཀྱི་ལྡེ་མིག་ཡིན། ། རྩིས་ནི་མན་ངག་ལྡེ་མིག་ཡིན།། དང་པོ་ཐེམས་ཀྱི་གདམ་ངག་བཤད། ཁྱུང་ཆེན་ཡབ་ཡུམ་རྣམ་པ་ལྔ།། རྩ་བའི་འཁོར་ལོ་བཞི་རུ་བཤད།། རྒྱས་འབྲིང་ཐ་མ་གསུམ་དུ་བསྟན།། སྐུ་ལས་བྱུང་བའི་འཁོར་ལོ་གསུམ། ། བཞི་བརྒྱད་རྣམ་པ་བཅུ་རྣམས་སོ།། རིམ་པ་གཉིས་དང་ལྡན་པ་ལ།། དབུས་སུ་སྐུ་གསུམ་མཚན་མ་གསུམ།། ཕྱི་རིམ་ཁྱམས་ལ་བྲི་བ་ནི།། རྡོ་རྗེ་བཞི་བརྒྱད་བཅུ་རྣམས་སོ།། རྩ་བ་གསུམ་གྱི་འཁོར་ལོ་ལས། ། ལས་ཀྱི་འཁོར་ལོ་རྒྱས་འབྲིང་ཐ།། ལས་ཀྱང་རྒྱས་འབྲིང་རྣམ་པ་བཞི།། བཞི་བཅུ་བརྒྱ་རྩ་འབུམ་དུ་བསྟན།། སྐྱོན་སྤངས་ཡོན་ཏན་བཞི་དང་ལྡན།། སྦས་པའི་འཁོར་ལོ་རྣམ་པ་བདུན།། རྩ་བ་ལྷ་ཡི་འཁོར་ལོ་བཤད། ། གབ་པའི་འཁོར་ལོ་རྣམ་པ་བརྒྱད།། དྲེགས་པ་འདུལ་བའི་འཁོར་ལོ་གསུངས།། གསང་བའི་འཁོར་ལོ་རྣམ་པ་བཞི།། མཛེ་ནད་ལས་ཀྱི་འཁོར་ལོའི་གསུངས།། དེ་ལས་ཕྱེ་བས་རྒྱས་འབྲིང་གསུམ།། བཅོ་ལྔ་ཉི་ཤུ་བཞི་རྩ་གཅིག། གབ་པ་ལས་ཀྱི་འཁོར་ལོར་གསུངས།། བསྲུང་དོན་གསུམ་ལ་ཉི་ཤུ་གཅིག། གནད་བཟློག་སུམ་ཅུ་རྩ་དྲུག་འདོད།། རྨེ་འཁྲུག་ལས་ཀྱི་འཁོར་ལོ་ནི།། རྣམ་པ་སུམ་ཅུ་རྩ་གསུམ་འདོད།། རྡོ་རྗེ་ཁྱུང་ཆེན་འཕྲིན་ལས་ཀྱི་རྒྱུད་ཕྱི་མ་ལས། ཐེམས་བསྟན་པའི་ལེའུ་སྟེ་དང་པོའོ།།།། གཉིས་པ་ཚད་མ་བསྟན་པ་ནི།། ཚད་མ་རྣམ་པ་བཞི་ཡིན་ཏེ།། བསྙེན་པའི་ཚད་མ་ལྔ་ཉིད་ལ།། ཕྱེ་བ་ལྔ་བཅུ་ཐམ་པར་བཤད། ། བསྡུས་པས་ཕོ་མོ་གཉིས་སུ་འདུས།། རིགས་ཀྱི་དབྱེ་བས་ལྔ་རུ་འགྱུར།། འཁོར་གྱིས་བསྡུ་ས་བཞི་རུ་འདུས།། ཕྱེ་བས་རྣམ་པ་བརྒྱད་དུ་འདུས།། བསྒྲུབ་པའི་ཚད་མ་ལྔ་ཉིད་ལ།། ལྔ་བཅུ་བསྡུས་པས་གོང་དང་མཚུངས། ། འཁོར་གྱི་བཞི་ལས་བརྒྱད་དུ་བསྟན།། ལས་ལ་འཁོར་ལོ་གསུམ་དུ་བསྟན།། ལས་དང་རྨེ་འཁྲུག་སྤོག་པ་གསུམ།། ལས་ལ་རྒྱས་འབྲིང་བཞིས་བསྟན་པའོ།། རྨེ་འཁྲུག་སུམ་ཅུ་རྩ་དྲུག་སྟེ།། སྤོག་པ་རྣམ་པ་བདུན་དུ་བསྟན། ། ལས་ཀྱི་ལྷག་མ་རྣམ་པ་བཞི།། མནན་དང་བསྲེག་དང་འཕང་བ་དང།། གདབ་པ་དང་ནི་བཞི་རུ་བསྟན།། གནན་པ་བཞི་ལས་རྒྱས་འབྲིང་གསུམ།། བསྲེག་པ་བཞི་ལས་རྒྱས་འབྲིང་གསུམ། ། འཕང་བ་བཞི་ལས་རྒྱས་འབྲིང་གསུམ།། གདབ་པ་བཞི་ལས་རྒྱས་འབྲིང་གསུམ།། གསང་བ་དགུ་དང་བཅུ་བར་བཤད།། རྡོ་རྗེ་ཁྱུང་ཆེན་འཕྲིན་ལས་ཀྱི་རྒྱུད་ཕྱི་མ་ལས།། ཚད་མ་བསྟན་པའི་ལེའུ་སྟེ་གཉིས་པའོ། །།། གསུམ་པ་རྩིས་ཀྱི་ལས་རྣམས་ནི།། ལས་ཀྱི་བསྙེན་པ་ལྔ་ཡིན་ཏེ།། མན་ངག་བསྙེན་པ་རྣམ་པ་གསུམ།། བསྡུས་པའི་བསྙེན་པ་གཅིག་ཏུ་འདོད།། འཁོར་གྱི་བསྙེན་པ་བཞི་ཡིན་ལ།། མན་ངག་བསྙེན་པ་རྣམ་པ་གསུམ། ། བསྡུས་པའི་བསྙེན་པ་གཅིག་ཏུ་འདོད།། རྩ་བའི་འཁོར་ལོ་བཞི་ལས་བཅུ།། རང་གཤེད་དཀྲུག་པའི་འཁོར་ལོ་བཅུ།། རྟ་ལོག་དཀྲུག་པ་སུམ་བཅུར་བཤད།། མཛེ་ནད་སྤུ་གྲི་རྣམ་པ་བཅུ། ། ཀླུ་བདུད་སྦྲུལ་ནག་རྫོགས་པ་ཅིག། བཟླས་ཐབས་གསུམ་ལ་གཉིས་སུ་འདུས།། གནད་ནས་གསད་པའི་བསྐོར་ཐབས་ལྔ།། སྲོག་གི་འཁོར་ལོ་རྣམ་པ་བཞི།། ཐུས་ཀ་རྣམ་པ་བཞི་ཉིད་ལ།། བསྡུས་པས་ཡན་ལག་གཉིས་སུ་འདུས། ། དུས་ཀྱིས་ཕྱེ་བས་གཏད་ཐབས་བཞི།། རིགས་ཀྱི་དབྱེ་བས་རྣམ་པ་ལྔ།། བྱེ་བྲག་ལས་ལ་བརྒྱ་རྩ་གཅིག། ལས་ཕྲན་འཁོར་ལོ་བརྒྱ་རྩ་གཅིག། བརྟག་པ་ལས་ཀྱི་འཁོར་ལོ་བདུན།། གསང་བ་ལས་ཀྱི་འཁོར་ལོར་བཤད། ། རྡོ་རྗེ་ཁྱུང་ཆེན་འཕྲིན་ལས་ཀྱི་རྒྱུད་ཕྱི་མ་ལས།། རྩིས་བསྟན་པའི་ལེའུ་སྟེ་གསུམ་པའོ།།།། འཕྲིན་ལས་འཁོར་ལོ་རྒྱུད་ཆེན་འདི།། གསང་ཆེན་ལས་ཀྱི་སྐལ་ཅན་ལས།། གསུམ་པ་བསྒྲགས་ནས་དམྱལ་བར་ལྟུང། ། རིན་ཆེན་ལྟ་བུར་རབ་ཏུ་ཆོངས།། ཞེས་བཅོམ་ལྡན་འདས་དཔལ་ཀུན་ཏུ་བཟང་པོ་བཀའ་སྩལ་པས། གསང་བའི་བདག་པོ་ལ་སོགས་པ་དྲག་པོ་ཆེན་པོའི་འཁོར་རྣམས་ཡི་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། རྡོ་རྗེ་ཁྱུང་ཆེན་འཕྲིན་ལས་ཀྱི་རྒྱུད་ཕྱི་མ་ལས། རྒྱུད་ཡོངས་སུ་གཏད་པའི་ལེའུ་སྟེ་བཞི་པའོ།།།། རྡོ་རྗེ་ཁྱུང་གཙུག་ལག་འཁོར་ལོའི་རྒྱུད་རྫོགས་སོ། ། རྒྱ་གར་སྐད་དུ། ཀྲི་ཡི་བཛྲ་ཙག་ཀྲ་ཏན་ཏྲ། བོད་སྐད་དུ།། རྡོ་རྗེ་གཙུག་ལག་འཁོར་ལོའི་རྒྱུད། དཔའ་ཀུན་ཏུ་བཟང་པོ་ལ་ཕྱག་འཚལ་ལོ།། དེ་ནས་བཅོམ་ལྡན་འདས་གསང་བ་གསུམ་གྱི་བདག་པོ་འཇིགས་པའི་རྒྱན་སྣ་ཚོགས་དང་ལྡན་པ་གསང་བའི་བྷ་ག་ལས་བཞེངས་ཏེ།
CLOSE WINDOW