| Wylie |
རྒྱ་གར་སྐད་དུ། ཤྲཱི་ཀཱ་ལ་ཀ་པཱ་ལ་མ་ཧཱ་ཏན་ཏྲ། བོད་སྐད་དུ། དཔལ་ནག་པོ་ཐོད་པ་ཆེན་པོའི་རྒྱུད། དཀོན་མཆོག་གསུམ་ལ་ཕྱག་འཚལ་ལོ།། འདི་སྐད་བདག་གིས་ཐོས་པ་དུས་གཅིག་ན། རི་རབ་རིའི་རྩེ་མོ་བྱང་ཤར་གྱི་མཚམས་ན་ཡོངས་འདུ་ཤིང་གི་གནས་མཆོག། གནམ་ལྕགས་རྔུར་མོ་གྲུ་གསུམ་སྨུག་ནག་འཁར་བའི་གཞལ་ཡས་ཁང་རྒྱ་ཁྱོན་དཔག་ཏུ་མེད་པ། ཐོད་པ་བརྩེགས་པའི་འཁོར་ལོ་ལ་ཀེང་རུས་ཀྱི་གྲོང་ཁྱེར་གྱི་ར་བས་བསྐོར་བ། ཞིང་ཆེན་གྱི་ཀ་བ་དང་མཆོག་ཕྲན་གྱི་དྲལ་མ་ཅན། སྤྲིན་མེད་པའི་ཉི་མ་དང་ཟླ་བ་དཀར་རྒྱས་པ་དང། གཟའ་དང་སྐར་མ་རྣམས་ཀྱིས་མཛེས་པར་བྱས་པ། བསེའི་ལོགས་ལ་མཆོང་གི་ཟུར་བཙུད་པ། རྨང་གནམ་ལྕགས་འབར་བས་བྱས་པ། ཁ་བད་གཡུས་བརྒྱན་པ། ཞིང་ཆེན་པོ་ཁ་གདེངས་པའི་རྒྱལ་མཚན་གྱིས་ཕྱོགས་དང་མཚམས་བརྒྱན་པ། མཐའ་མ་ལྕགས་རི་ནག་པོས་བསྐོར་བ། ཕྱོགས་དང་མཚམས་ཐམས་ཅད་ཁྲག་དང་ཁྲག་གི་རྒྱ་མཚོ་རྦ་གློང་འཁྲུག་པ། རོ་དང་རོ་ཆེན་དང། རོའི་རྩིགས་པ་དང། རོའི་འཕྲེང་བ་དང། རོའི་རུས་པ་དང། རོ་ཆད་པ་དང། རོ་འཆད་པ་དང། རོ་ཞེ་སྡང་གི་མེས་ཚིག་པ་དང། ཕྱེད་ཚིག་པ་དང། ཀེང་རུས་ཕུང་པོ་དང། ཀེང་རུས་ཀྱི་ཕྱེད་པ་དང། རུས་པ་བྲུལ་བ་དང། རོ་བམ་པ་དང། རྣམ་པར་བཾ་པ་དང། རེངས་པ་དང། འཁུམས་པ་དང། ལངས་པ་དང། འགྱེལ་བ་དང། ཀླད་པ་ལུག་པ་དང། རྣམ་པར་དམར་བ་ལ་སོགས་པས། གཞལ་ཡས་ཁང་བསྐོར་ཏེ་གནས་པའི་འདམ་རྫབ་ཀྱི་ནང་ན་འབུ་དང། སྲིན་དང། དུས་ཁྲོད་ཀྱི་ཀེང་རུས་དང། སྟག་དང། ཁྱི་དང། སྤྱང་ཁྱི་དང། ལྕེ་སྤྱང་ནག་མོ་དང། ཀང་ཀ་དང། གྱི་ལིང་དང། ལིན་དུ་དང། འུག་པ་དང། བྱ་རོག་དང། དོམ་དང། དྲེད་དང། དུར་བྱ་ལ་སོགས་པ་དཔག་ཏུ་མེད་པ་རྣམས་ཀྱིས་ཤ་ལ་ཟ་བ་དང། འཆའ་བ་དང། འཐུང་བ་དང། ལྷག་པོ་དང། མཆོང་བ་དང། བསྐོར་བ་དང། ལྟ་བ་དང། རྒོད་པ་དང། ཆོ་ངེས་འདེབས་པ་དང། ཀུ་ཆོ་འདོན་པ་ལ་སོགས་པས་བསྐོར་ཅིང་ཡ་ང་བ་དང། དུར་ཁྲོད་ཆེན་པོའི་གནས་མནམ་པ་དང་དྲི་ང་བས་དཔག་ཚད་བརྒྱད་ཁྲི་བཞི་སྟོང་དུ་ཁྱབ་པའི་དབུས་ན། ཐོད་པ་དགུ་བརྩེགས་པའི་གཞལ་ཡས་ཁང། མི་རོ་དང་རྟ་རོ་ལ་སོགས་པ་གཅལ་དུ་དཀྲམ་པའི་ནང་དུ། བདུད་ཀྱི་ཡུམ་གཤིན་རྗེའི་སྲིང་མོ།། དཔལ་ལྷ་མོ་ནག་མོ་ཆེན་མོ་སྐུ་མདོག་མཐིང་ནག་འབར་བ་ལ། ལྕགས་ཀྱི་དྲིའུ་རྟ་རྐང་གསུམ་ལ་ཕྱིན་ཕྱོགས་སུ་ཞོན་པ། རེ་ལྡེ་དང་གླང་ཆེན་གྱི་ཀོ་བས་དཀྲིས་པ། ཞབས་གཉིས་ལྕགས་སྒྲོག་ཏུ་བཅུག་སྟེ། ལྟེ་བ་ནས་ཉི་མའི་དཀྱིལ་འཁོར་འཆར་བ་དང། སྤྱི་བོའི་གཙུག་ནས་མར་གྱི་ཚེས་བརྒྱད་འཆར་བ། མཆེ་བ་ཟུར་གསུམ་རྣམ་པར་གཙིགས་པ། སྤྱན་དམར་པོ་སྡང་མིག་ལྟག་པའི་སྤྱན་དང་ལྡན་པ། རལ་པ་ཁམ་ནག་སྲིད་པའི་རྩེ་མོར་འབར་བ། གཡས་པ་གནམ་ལྕགས་ཀྱི་རལ་གྲི་འཕྱར་བ། ལག་པ་གཡོན་པ་ན་ནེའུ་ལེ་རིན་པོ་ཆེའི་འཕྲེང་བས་བརྒྱན་པ་བསྣམས་པ། དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་ཅིང། རླུང་དུད་ཁ་དམར་ནག་གི་ནང་ན་ཞེ་སྡང་འདུ་བྱེད་འཁྲུག་པ། མེ་དཔུང་དམར་ནག་གི་འོད་ལས་འདོད་ཆགས་ཀྱི་ཚ་ཚ་འཕྲོ་བ། དེའུ་དབུས་ན་རབ་ཏུ་འཇིགས་པར་གནས་པའི་འཕགས་མ་ལྷ་མོ་ནག་མོ་ཆེན་མོ། འཁོར་སྲིན་པོ་དང། སྲིན་མོ་དང། ཤ་ཟ་དང། གྲུལ་བུམ་དང། འབྱུང་པོ་དང། འབྱུང་མོ་དང། དྲི་ཟ་མོ་དང། ཀླུ་མོ་དང། གནོད་སྦྱིན་དང། གནོད་སྦྱིན་མོ་དང། མ་མོ་མཁའ་འགྲོ་མ་ལ་སོགས་པ་དཔག་ཏུ་མེད་པས་བསྐོར་ཅིང་གནས་ཏེ་འདུག་གོ། གཞན་ཡང་ལྷ་མ་སྲིན་སྡེ་བརྒྱད་འཁོར་མང་པོ་དང། རྣམ་ཐོས་ཀྱི་སྲས་དང། འཕགས་སྐྱེས་དང། མིག་མི་བཟང་དང། ཡུལ་འཁོར་སྲུང་ལ་སོགས་པ་ཐམས་ཅད་འདུས་ཏེ་གནས་པར་གྱུར་པ་དང། དེའི་ཚེ་དཔལ་མཁའ་འགྲོ་མ་ཉིད་དྲང་སྲོང་གནམ་གྱི་བུ་ལ་གཟིགས་པར་གྱུར་ཏོ། ། དཔལ་ཐོད་པ་ནག་པོ་ཆེན་བའི་རྒྱུད་ལས། གླེང་གཞྀའི་ལེའུ་སྟེ་དང་པོའོ།།།། དེ་ནས་དཔལ་མཁའ་འགྲོ་མ་ཉིད་ཀྱིས་སྐུ་གསུང་ཐུགས་ཀྱི་གསང་སྔགས། ལས་རྣམས་ཡོངས་སུ་རྫོགས་པར་བྱེད་པའི་གསང་སྔགས་དྲག་པོ་འདི་གསུངས་སོ།། ཨོཾ་རུ་རུ་ཙ་ཏི་ཨ་ཤུག་མེ། བ་ཏི་རུ་བ་ཁ་ཤ་ལ་རག་མོ་ཧཱུཾ། ཀུ་མ་ར་ད་ཧཱུཾ་ནན། ཙ་ཤི་ཀུ་མཱ་ར། ཨ་བུད་ཏ་ཁུག་ཤི་མུག་ཤི་རེ་མ་ཏི་ཁུག་ཉི་ཀི་ལ་ཀཱི་ཙ། ཏུད་ཏ་ཀེ་ཤུ་མུད་ཉ་དགྲ་ལ་ཆུག་སྭཱ་ཧཱ། ཨོཾ་ཤེ་ཀེ་མུད་ཉིད་དགྲ་བོ་ཁ་ལ་ཡན། ཏ་ཧཱུཾ་ཙཀྲ། དགྲ་བོ་ཁ་མ་ཡ་ན། རུ་རུ་ཨ་ཤུག་མེ། ཀ་ལིང་ཀ་རུ་རུ་ཨ་ཤུག་མེ། སྱེ་ཏ་ཏུདྷ་དགྲ་བོ་མ་ར་ཡ་སྭཱ་ཧཱ། ཨོཾ་མ་སྙིང་ཤ་རག་མོ་མ་ཧྲིང་ཐུཾ་རྦད། མ་མ་སྙིང་རྩ་སྲོག་ལ་ཆུཾ་ཐུཾ་ཤ་རྦད། མ་མྱོས་གུག་ཚ་ར་ལིང་ཤ་སྙིང་རྦད། ཐུཾ་རིལ་ལི་ལི་ལང་ཏོ་རྦད། སྙིང་ཏོ་རྦད་མཱ་ར་ཡ་ཕཊ་སྭཱ་ཧཱ། དེ་ནས་དཔལ་ལྡན་མཁའ་འགྲོ་མས། ། གསང་སྔགས་གསུངས་པའི་མོད་ལ་ནི།། རི་རབ་འགུལ་ཞིང་རྒྱ་མཚོ་འཁྲུག། ས་གཞི་རྣམ་པ་དྲུག་ཏུ་གཡོས།། དྲག་པོའི་གནམ་ལྕགས་ཆར་དུ་བབ།། ནད་ཀྱི་འདུ་འཕྲོ་སྐར་ལྟར་འཁྲུག། མཚོན་གྱི་བསྐལ་པ་མེ་ལྟར་འབར།། འཇིགས་པའི་དགྲ་ཡི་གནམ་ས་ཁེངས།། ཐམས་ཅད་ཕུང་བའི་ཆོ་འཕྲུལ་གྱིས།། རང་གི་འཁོར་རྣམས་མཁའ་འགྲོ་མས།། སྲོག་ནས་དྲངས་བཞིན་མ་མོ་འདུས།། གཅིག་ལ་གཅིག་ཀྱང་རྦོད་པའི་སྟབས། ། ཐམས་ཅད་ཡང་དག་གསོད་ལ་བརྩོན།། དེ་ཚེ་འཇིག་རྟེན་ཐམས་ཅད་བསྲེགས།། རྣམ་པར་བྲེད་ནས་འདར་བར་གྱུར།། མིག་རྩ་རིག་རིག་ལྟ་བྱེད་ཅིང།། བསྟོད་པ་སྣ་ཚོགས་བྱེད་པ་ཡིན། ། འཇིག་རྟེན་དྲེགས་པའི་ལྷ་སྲིན་ཡང།། ཐམས་ཅད་གུས་བཅས་བསྟོད་པ་སྤོབས།། ཤ་ཁྲག་སྲོག་དབུགས་ལེན་པའོ།། མ་མོ་མཁའ་འགྲོ་གནོད་སྦྱིན་མ།། སྲིན་པོ་གཤིན་རྗེ་ཡི་དགས་སོགས།། ཕོ་མོ་ཞབས་དྲུང་འདུས་ནས་ཀྱང། ། ཁྲག་ཏུ་སྐྱུག་ཅིང་བཀའ་ཉན་བྱེད།། དཔལ་ཐོད་པ་ནག་པོའི་རྒྱུད་ལས། གསང་སྔགས་དྲག་པོ་ཆོ་འཕྲུལ་བསྟན་པའི་ལེའུ་སྟེ་གཉིས་པའོ།།།། དེ་ནས་ཡང་དེའི་ཚེ་དེའི་དུས་ན་དཔལ་ལྷ་མོ་ནག་མོ་ཆེན་མོ་དང། གནོད་སྦྱིན་གྱི་རྒྱལ་པོ་རྣམ་ཐོས་སྲས་ཀྱིས། ལས་རྣམ་པ་ལྔའི་ཚུལ་གྱིས་བསྟོད་པ། དམ་པ་རྣམས་ཀྱིས་བགྲོད་པའི་ཁྱད་པར་ནི།། ཚོགས་ཀྱིས་སྦྱངས་ནས་དོན་དམ་མཐོང་བའི་ས།། བསྙེན་པོ་ཡེ་ཤེས་རིམ་པར་བསྒོམ་པ་ལས།། མཐར་ཕྱིན་ས་ལ་ཕྱིན་པའི་དོན་མཆོག་ལགས།། དེ་བས་ལྷ་མོ་ཁྱོད་ཀྱི་མཚན་ཉིད་ནི།། འདི་ལྟར་རབ་ལྡན་ཁྱོད་ཀྱི་ཁྱད་པར་ཏེ།། དང་པོ་ཚོགས་ལ་ཡང་དག་བར་བསགས་པས།། དང་པོའི་སར་སྦྱོར་སྦྱོར་བའི་ཏིང་འཛིན་བརྙེས།། རབ་ཏུ་དགའ་བའི་ས་ལ་དོན་དམ་ནི།། རྣམ་པར་མི་རྟོག་སྐྱེ་མེད་ཚུལ་གྱིས་གཟིགས།། དཔལ་ལྡན་བྱང་ཆུབ་སེམས་དཔའི་ཁྱད་པར་ཏེ།། རང་སེམས་ས་གཉིས་དག་ལ་རབ་བསྟེན་ནས།། དེ་བཞིན་ས་གསུམ་དག་པའི་ཕ་རོལ་སོན།། རང་སེམས་བཞི་བཞིའི་ས་ལ་ཆེར་བསྒོམས་པས།། ལྔ་པའི་ས་ལ་བསམ་གཏན་ཕ་རོལ་སོན།། རང་དྲུག་པ་ཡི་ས་ལ་ཆེར་སྦྱངས་པས།། བདུན་པ་ལ་ནི་ཐབས་ཀྱིས་ཕ་རོལ་སོན།། རང་སེམས་བརྒྱད་པའི་ས་ལ་ཆེར་སྦྱངས་པས།། དཔལ་ལྡན་ལྷ་མོ་ནག་མོའི་སྨོན་ལམ་ཉིད།། དགུ་པ་ལ་ཡང་སྟོབས་ཀྱི་ཡོན་ཏན་བསྒྲུབས།། དེ་ཡི་སྟོབས་ཀྱིས་ཡེ་ཤེས་འཕེལ་བར་བསྒོམ།། འདི་ལྟར་རྣམ་པར་རྫོགས་པར་བྱས་ནས་ནི།། སངས་རྒྱས་ས་ལ་སྨིན་པའི་སྨོན་ལམ་ཅན།། ས་བརྒྱད་ནོན་པ་གཞོན་ནུའི་ཚུལ་འཆང་མ།། འགྲོ་བ་འདུལ་ཕྱིར་དྲག་པོའི་ཚུལ་སྟོན་ཅིང།། གདུག་པ་འདུལ་མཛད་ཁྱོད་ལ་ཕྱག་འཚལ་བསྟོད།། བདག་ཀྱང་ཁྱོད་ཀྱི་ལམ་ལྟར་མྱུར་འགྲུབ་ཤོག། དཔལ་ཐོད་པ་ནག་པོ་ཆེན་པོའི་རྒྱུད་ལས། དཔལ་ནག་པོ་ཆེན་མོ་ལ། གནོད་སྦྱིན་གྱི་རྒྱལ་པོ་རྣམ་ཐོས་སྲས་ཀྱིས་ལམ་རྣམ་པ་ལྔའི་ཚུལ་གྱིས་བསྟོད་པ་སྟེ་ལེའུ་གསུམ་པའོ།།།། དེ་ནས་དྲི་ཟའི་རྒྱལ་པོ་ཟུར་ཕུད་ལྔ་པས། དཔལ་གྱི་ལྷ་མོ་དཀར་མོར་གྱུར་པ་དང། དཔལ་གྱི་ལྷ་མོ་སེར་མོར་གྱུར་པ་དང། དཔལ་གྱི་ལྷ་མོ་དམར་མོ་གྱུར་པ་དང། དཔལ་གྱི་ལྷ་མོ་ནག་མོ་གྱུར་པ་དེ་ཉིད་ལ་དེ་ལྟར་བསྟོད་པ། སེམས་ཉིད་ཞི་བར་གྱུར་པའི་མཚན་ཉིད་ནི།། སེམས་ཉིད་གུད་ན་མེད་ཅིང་སེམས་ཀྱང་མེད།། དོན་དམ་སྤྲོས་བྲལ་ཁ་དོག་གཟུགས་ཀྱང་མེད།། ཀུན་རྫོབ་སྒྱུ་མ་ཙམ་དུ་རང་གི་སེམས།། མཐུན་པར་བསྟན་པ་ཞི་བ་དཔལ་ལྷ་མོ།། ཞི་མཛད་ཞི་འགྱུར་ཞི་བའི་ངང་ཚུལ་ཅན།། ཞི་བའི་འཁོར་གྱིས་བསྐོར་བའི་གཙོ་མོ་ནི།། རྟགས་ཀྱི་སྐུ་མདོག་དཀར་མོ་ཤིན་ཏུ་དག། དུས་གསུམ་ཀུན་ཏུ་ཐམས་ཅད་ཞི་མཛད་མ།། བདག་གི་རྣལ་འབྱོར་ཏིང་འཛིན་འདི་ཡི་མཐུས།། སྔོན་འདས་ཞི་བར་གྲུབ་པ་ཁྱོད་ལ་ནི།། བདག་གི་སྨོན་ལམ་འཕྲིན་ལས་བཅོལ་བ་ཡང། ། བདག་ལ་ཕྱི་ཡི་དགྲ་བགེགས་ནད་རྣམས་ནི།། ཕྱི་ཡི་ཚུལ་གྱིས་བར་ཆད་ཞི་བར་མཛོད།། དེ་བཞིན་ནང་གི་ནད་དང་དགྲ་བགེགས་རྣམས།། ནང་གི་ཚུལ་གྱིས་ཉོན་མོངས་རྣམ་རྟོག་རྣམས། ། ཐམས་ཅད་ཞི་བར་འགྱུར་བའི་འཕྲིན་ལས་མཛོད།། སེམས་ཉིད་རྒྱས་པར་གྱུར་པའི་ཁྱད་པར་ནི།། སེམས་ཉིད་གུད་ན་མེད་ཅིང་སེམས་ཀྱང་མེད།། དོན་དམ་སྤྲོས་བྲལ་ཁ་དོག་གཟུགས་ཀྱང་མེད།། ཀུན་རྫོབ་སྒྱུ་མ་ཙམ་དུ་རང་གི་སེམས། ། མཐུན་པར་བསྟན་པ་རྒྱས་ལ་དཔལ་ལྷ་མོ།། རྒྱས་མཛད་རྒྱས་གྱུར་རྒྱས་པའི་ངང་ཚུལ་ཅན།། རྒྱས་པའི་འཁོར་གྱིས་བསྐོར་བའི་གཙོ་མོ་ནི།། རྟགས་ཀྱི་སྐུ་མདོག་སེར་མོ་རབ་ཏུ་བརྗིད། ། དུས་གསུམ་ཀུན་ཏུ་ཐམས་ཅད་རྒྱས་མཛད་མ།། བདག་གི་རྣལ་འབྱོར་ཏིང་འཛིན་འདི་ཡི་མཐུས།། སྔོན་འདས་རྒྱལ་བ་གྲུབ་པ་ཁྱོད་ལ་ནི།། བདག་གི་སྨོན་ལམ་འཕྲིན་ལས་བཅོལ་བ་ཡང།། བདག་ལ་ཕྱི་ཡི་དགྲ་བགེགས་ནད་རྣམས་ནི། ། ཕྱི་ཡི་ཚུལ་གྱིས་བདག་དོན་རྒྱས་པར་མཛོད།། དེ་བཞིན་ནང་གི་ནད་དང་དགྲ་བགེགས་རྣམས།། ནང་གི་ཚུལ་གྱིས་བསོད་ནམས་ཡེ་ཤེས་རྣམས།། ཐམས་ཅད་རྒྱས་གྱུར་ཅིག་པའི་འཕྲིན་ལས་མཛོད། ། རང་སེམས་དབང་དུ་གྱུར་པའི་ཁྱད་པར་ནི།། སེམས་ཉིད་གུད་ན་མེད་ཅིང་སེམས་ཀྱང་མེད།། དོན་དམ་སྤྲོས་བྲལ་ཁ་དོག་གཟུགས་ཀྱང་མེད།། ཀུན་རྫོབ་སྒྱུ་མ་ཙམ་དུ་རང་གི་སེམས།། མཐུན་པར་བསྟན་པས་དབང་མཛད་དཔལ་ལྷ་མོ། ། དབང་མཛད་དབང་འགྱུར་དབང་གི་ངང་ཚུལ་ཅན།། དབང་གི་འཁོར་གྱིས་བསྐོར་བའི་གཙོ་མོ་ནི།། རྟགས་ཀྱི་སྐུ་མདོག་དམར་མོ་ཤིན་ཏུ་མཛེས།། དུས་གསུམ་ཀུན་ཏུ་ཐམས་ཅད་དབང་མཛད་མ། ། བདག་གི་རྣལ་འབྱོར་ཏིང་འཛིན་འདི་ཡི་མཐུས།། སྔོན་འདས་དབང་མཆོག་གྲུབ་པ་ཁྱོད་ལ་ནི།། བདག་གི་སྨོན་ལམ་འཕྲིན་ལས་བཅོལ་བ་ནི།། བདག་ལ་ཕྱི་ཡི་དགྲ་བགེགས་ནད་རྣམས་ནི། ། ཕྱི་ཡི་ཚུལ་གྱིས་བདག་དོན་དབང་དུ་མཛོད།། དེ་བཞིན་ནང་གི་ནད་དང་དགྲ་བགེགས་རྣམས།། ནང་གི་ཚུལ་གྱིས་ཉོན་མོངས་རྣམ་རྟོག་རྣམས།། ནང་གི་ཚུལ་གྱིས་ཐམས་ཅད་དབང་དུ་མཛོད།། རང་སེམས་དྲག་པོར་གྱུར་པའི་ཁྱད་པར་ནི། ། སེམས་ཉིད་གུད་ན་མེད་ཅིང་སེམས་ཀྱང་མེད།། དོན་དམ་སྤྲོས་བྲལ་ཁ་དོག་གཟུགས་ཀྱང་མེད།། ཀུན་རྫོབ་རྒྱུ་མ་ཙམ་དུ་རང་གི་སེམས།། མཐུན་པར་བསྟན་པ་དབང་མཛད་དྲག་པོ་དཔལ་ལྷ་མོ། ། དབང་མཛད་དྲག་མཛད་དྲག་འགྱུར་དྲག་མོའི་ངང་ཚུལ་ཅན།། དྲག་པོའི་འཁོར་གྱིས་བསྐོར་བའི་གཙོ་མོ་ནི།། རྟགས་ཀྱི་སྐུ་མདོག་ནག་མོ་ཤིན་ཏུ་འཇིགས།། དུས་གསུམ་ཀུན་ཏུ་ཐམས་ཅད་ཞི་མཛད་མ། ། བདག་གི་རྣལ་འབྱོར་ཏིང་འཛིན་འདི་ཡི་མཐུས།། སྔོན་འདས་དྲག་པོ་གྲུབ་པ་ཁྱོད་ལ་ནི།། བདག་གི་སྨོན་ལམ་འཕྲིན་ལས་བཅོལ་བ་དང།། བདག་ལ་ཕྱི་ཡི་དགྲ་བགེགས་ནད་རྣམས་ནི།། ཕྱི་ཡི་ཚུལ་གྱིས་གནོད་པ་དྲག་པོ་སོད། ། དེ་བཞིན་རང་གི་ནད་དང་དགྲ་བགེགས་རྣམས།། ནང་གི་ཚུལ་གྱིས་ཐམས་ཅད་འཆི་བར་མཛོད།། ཁྱོད་ཀྱི་རང་བཞིན་ཅི་ཡང་མ་ཡིན་པས།། འདི་ལྟར་མཚན་ཉིད་ཅི་ཡང་སྣང་བ་ནི། ། འཕྲིན་ལས་རྣམ་བཞིའི་འགྲོ་དོན་མཛད་པ་ལགས།། བདག་ཀྱང་ལས་བཞིའི་རང་བཞིན་ལྷུན་གྲུབ་ནས།། ཁྱོད་ལྟར་གཞན་གྱི་དོན་ལ་བརྩོན་པར་ཤོག། དཔལ་གྱི་ལྷ་མོ་གྱུར་པ་དྲི་ཟའི་འཁོར་གྱིས་བསྐོར་བ་ལ། ། དྲི་ཟའི་རྒྱལ་པོ་ཟུར་ཕུད་ལྔ་པས་འཕྲིན་ལས་རྣམ་བཞིའི་སྒོ་ནས། བསྟོད་པ་སྟེ་ལེའུ་བཞི་པའོ།།།། དེ་ནས་ནམ་མཁའ་ལྡིང་གི་རྒྱལ་པོ་རྡོ་རྗེ་གསེར་མིག་ཅན་གྱིས་རང་གི་འཁོར་དཔག་ཏུ་མེད་པ་རྣམས་དང་ལྷན་ཅིག་ཏུ། དཔལ་ལྷ་མོ་ནག་མོ་ལ་ནམ་མཁར་ལྡིང་གི་འཁོར་གྱིས་བསྐོར་ནས། རིའི་རྒྱལ་པོ་རི་རབ་ཀྱི་རྩེ་མོ་ལ་དྲག་པོ་འཇིགས་པར་གྱུར་ནས་གནས་པ་ལ་བསྟོད་པ། དཔལ་ལྡན་ནག་མོ་དཔག་པར་དཀའ་བའི་དོན། ། ཐབས་ཀྱི་ཆོ་འཕྲུལ་ནམ་མཁའི་མཐའ་ལ་སྤྱོད།། བྱང་ཆུབ་སེམས་དཔའི་སྤྲུལ་པ་ཁྱོད་ཉིད་ལ།། སྒོ་གསུམ་རྡུལ་སྙེད་དབྱངས་ཀྱིས་ཕྱག་འཚལ་བསྟོད།། ཁྱོད་ནི་བདག་གི་མཆོད་པས་མ་བསྒྲིབས་ཀྱང། ། དཔལ་ལྡན་དངོས་གྲུབ་དམ་པ་ཐོབ་བྱའི་ཕྱིར།། འདོད་པའི་ཡོན་ཏན་མཁའ་ལ་ཆར་འབབས་པས།། མཆོད་པའི་ཚོགས་འདིས་དབང་པོ་རྒྱས་གྱུར་ཅིག། དཔལ་ལྡན་ཁྱོད་ནི་དགེ་སྡིག་དབང་པོ་སྟེ།། བདག་གི་ལུས་ངག་སེམས་ཀྱི་སྒྲིབ་པའི་ཚོགས། ། ཁྱོད་ཀྱི་ཐད་དུ་འགྱོད་པས་རབ་བཤགས་ནས།། ཐུགས་རྗེའི་ཤུགས་ཀྱིས་སྒྲིབ་པ་བྱང་བར་མཛོད།། ཁྱོད་ཀྱིས་ཁྱད་པར་ཡོངས་སུ་འཕགས་པ་ནི།། འགྲོ་བའི་དོན་མཛད་བདག་དོན་ཕུན་སུམ་ཚོགས། ། དགའ་མཐུན་ཕྲག་དོག་མེད་པས་སྤྲོ་བ་ནི།། རྗེས་སུ་ཡི་རང་ཁྱོད་ཀྱི་རྒྱུ་ལ་འབུལ།། འདི་ལྟར་ཡོན་ཏན་ལྡན་པའི་སྐུ་མཆོག་ནི།། ནག་མོ་འཇིགས་པའི་མཐུ་སྟོབས་ཀྱིས།། ཕྱོགས་བཅུ་དུས་གསུམ་ཀུན་ཏུ་འགྲོ་དོན་ལ། ། སྒྱུ་འཕྲུལ་དྲ་བའི་ཚུལ་གྱིས་བསྐུལ་བར་སྤོབས།། ཡང་དག་ཡོན་ཏན་ཁྱོད་ཀྱི་སྐུ་མཆོག་ནི།། གདུག་པ་འདུལ་ཞིང་བསྟན་པ་བསྲུང་བའི་ཕྱིར།། སེམས་ཅན་ཟད་པར་མ་གྱུར་བར་དུ་ནི། ། མྱ་ངན་མི་འདའ་བཞུགས་པར་གསོལ་བ་གདབ།། འདི་ལྟར་ཕྱག་འཚལ་མཆོད་ནས་བཤགས་པ་དང།། རྗེས་སུ་ཡི་རང་བསྐུལ་ཞིང་གསོལ་བ་ཡི།། དགེ་བ་འདི་ཡིས་ངན་སོང་སྟོངས་གྱུར་ནས།། ཐམས་ཅད་ཚོགས་རྫོགས་བྱང་ཆུབ་ཆེན་པོར་བསྔོ། ། དཔལ་ལྷ་མོ་ནག་མོ་ཆེན་མོ་ལ། ནམ་མཁའ་ལྡིང་གི་རྒྱལ་པོ་འཁོར་དང་བཅས་པས་ཡན་ལག་བདུན་པའི་མཆོད་བརྗོད་བསྟོད་པ་སྟེ་ལེའུ་སྟེ་ལྔ་པའོ།།།། དེ་ནས་ཀླུའི་རྒྱལ་པོ་དགའ་བོས། དཔལ་ལྷ་མོ་ནག་མོ་ཆེན་མོ་ཀླུའི་འཁོར་གྱིས་བསྐོར་བའི་སྐུ་ལ། ཡོན་ཏན་རྟགས་ཀྱི་སྒོ་ནས་བསྟོད་པ། གསང་སྔགས་རྣལ་འབྱོར་གྲུབ་པའི་བདག་ཉིད་མ།། ཡོན་ཏན་རྟགས་ཀྱི་སྐུ་མདོག་ཕྱག་མཚན་ནི། ། དོན་དུ་སྣང་བ་མེད་ཀྱང་འདུལ་བའི་ཕྱིར།། རྟགས་ཀྱི་ཕྱག་རྒྱ་འདི་ལྟར་བསྟོད་པའོ།། ཧཱུཾ། སྔོན་ཚེ་དཔལ་ཆེན་ཐུགས་ཀྱི་ལྷ་མོ་ནི།། ཉི་མ་བྱང་ཤར་མཚམས་ཤེད་ན།། གཡུ་མཚོ་བསེ་མཁར་ནང་ན་བཞུགས་པ་ནི། ། འཕྲིན་ལས་རྣམ་བཞི་མ་ལུས་མཛད་པའི་རྟགས།། སྐུ་མདོག་མཐིང་ནག་ཞལ་གཅིག་ཕྱག་གཉིས་བཞུགས་པ་ནི།། ཆོས་ཉིད་སྐྱེ་མེད་ཐབས་དང་ཤེས་རབ་ལྡན་པའི་རྟགས།། གདུག་པ་འདུལ་ཕྱིར་དྲེའུ་ནག་རྐང་གསུམ་ཞོན། ། ཁམས་གསུམ་འདུལ་ཕྱིར་བླུན་པོ་བུང་བུ་གནོན།། མྱ་ངན་མི་འདའ་རྟགས་སུ་ལྕགས་སྒྲོ་མངའ།། བདག་དོན་ཕུན་ཚོགས་གླང་ཆེན་ཀོ་བས་བརྒྱན།། གཞན་དོན་ཕུན་སུམ་ཚོགས་ཕྱིར་རེ་ལྡེས་དཀྲིས། ། བྱང་ཆུབ་སེམས་ལྡན་སྤྱི་གཙུག་ཟླ་བས་བརྒྱན།། ཤེས་རབ་རྟགས་ཕྱིར་ཉི་མས་ལྟེ་བ་བརྒྱན།། དུག་གསུམ་སྡོང་པོ་གཅོད་པའི་རལ་གྲི་དང།། བསོད་ནམས་གཏེར་འབྱིན་ཕྱག་མཚན་ནེའུ་ལེ་བསྣམས། ། དབང་དྲག་རྫོགས་ཕྱིར་རལ་པ་ཁམས་ནག་སྤྲུག། ཉོན་མོངས་འདྲེན་ཕྱིར་རྣོ་དབལ་མཆེ་བ་གཙིགས།། འཁོར་བ་ལྗགས་ལ་གཏར་ཕྱིར་རྐན་སྒྲ་བསྡེབས།། གདུག་པ་ཞེ་ལ་གནན་ཕྱིར་སྡང་མིག་བགྲད། ། ཐམས་ཅད་དབང་སྡུད་ཆགས་ཕྱིར་སྤྱན་རྩ་དམར།། གཉེན་པོའི་ཚོགས་བཅོམ་མི་འགྱུར་སྐུ་མདོག་ནག། མ་མོ་འདུལ་ཕྱིར་དུར་ཁྲོད་རྒྱན་གྱིས་བརྒྱན།། སྐུ་གསུང་ཐུགས་ལྡན་རྟགས་ཀྱི་ཁ་ཊྭཱཾ་གསོར།། སྐུ་གསུམ་རྫོགས་བྱེད་ཐོད་པའི་འཕྲེང་བས་བརྒྱན། ། དྲག་པོ་མྱུར་མགྱོགས་བསྟན་ཕྱིར་ཚུབས་མས་བརྒྱན།། ཉོན་མོངས་བསྲེགས་ཕྱིར་མེ་དཔུང་ནང་ན་བཞུགས།། འདོད་ཁམས་བསྐྱང་ཕྱིར་ཡོངས་འདུའི་ཤིང་ལ་བརྟེན། ། ལྷ་མིན་འདུལ་ཕྱིར་རྫོང་གི་བཀའ་བཟློག་མ།། དཔལ་བརྟུལ་བརྟེན་ཕྱིར་སྟག་གི་ཤམ་ཐབས་བསྣམས།། བསྟན་པ་བསྲུང་ཕྱིར་དྲག་པོའི་ཆ་ལུགས་རྫོགས།། ང་རྒྱལ་དབང་སྡུད་བདག་མེད་སྒྲ་སྒྲོགས་རྟགས། ། ཐབས་ཀྱི་སྙན་ཆ་གཡས་པ་སེང་གེས་བརྒྱན།། ཞེ་སྡང་དབང་སྡུད་དུག་ཆེན་འདུལ་བའི་ཕྱིར།། ཤེས་རབ་བསྙན་ཆ་གདུག་པ་སྦྲུལ་གྱིས་བརྒྱན།། འདུ་བྱེད་མི་རྟག་རྟགས་ཀྱི་དྲིལ་བུ་སྒྲོག། ཆགས་ཕྱིར་རྔམ་མཛད་ཁྲག་གི་རྦ་གློང་འཐུང། ། དམ་ཚིག་བསྲུང་ཕྱིར་ཞིང་ལྤགས་བརྒྱན་དུ་མཛད།། ཐ་དད་ལས་རྣམས་འདུལ་ཕྱིར་རྨ་བྱས་བརྒྱན།། ཉོན་མོངས་སྒྲིབ་པའི་ཚོགས་རྣམས་རབ་སྦྱངས་ནས།། ཡེ་ཤེས་རིག་པའི་ཚོགས་རྣམས་བཤད་མཛད་ཕྱིར། ། རང་བཞིན་གནས་མཆོག་བྱང་ཤར་མཚམས་ན་བསྟན།། དབུ་མའི་ས་ལ་གནས་རྟེན་དྲེའུ་ཆིབས།། ཉོན་མོངས་གདུག་པ་འདུལ་ཕྱིར་སྲིན་མོའི་ཚུལ།། བྱང་ཆུབ་སེམས་དཔའ་ཁྱོད་ལ་ཕྱག་འཚལ་བསྟོད། ། དཔལ་ཐོད་པ་ནག་པོ་ཆེན་པོའི་རྒྱུད་ལས། དཔལ་ལྷ་མོ་ནག་མོ་ཆེན་མོ་ལ། ཀླུའི་རྒྱལ་པོ་དགའ་བོས་རྟགས་ཀྱི་སྒོ་ནས་བསྟོད་པ་སྟེ་ལེའུ་དྲུག་པའོ།།།། དེ་ནས་གྲུལ་བུམ་གྱི་རྒྱལ་པོ་སྦྲུལ་མགོ་དགུ་པས། དཔལ་ལྷ་མོ་ཆེན་མོ་ལ་གྲུལ་བུམ་གྱི་འཁོར་གྱིས་བསྐོར་བའི་སྐུ་གསུང་ཐུགས་ཀྱི་ཕྱག་རྒྱ་ལ་བསྟོད་པ། དོན་དམ་གཉིས་མེད་བྱང་ཆུབ་སེམས་ཀྱང་མེད།། སྲིད་པ་གདུལ་ཕྱིར་རྟགས་ཀྱི་ཕྱག་རྒྱ་ནི། ། རང་སེམས་རྣམ་དག་དྲག་པོའི་གཞལ་ཡས་ཁང།། རཀྟ་ཁྲག་གི་རྦ་གློང་འཁྱིལ་བ་ལ།། ཀེང་རུས་ཐོད་འཕྲེང་ཞིང་གི་རྒྱན་གྱིས་བརྒྱན།། སྐུ་མདོག་གནག་ལ་རབ་བརྗིད་ཁྲོ་མོའི་རྒྱལ།། སྔོན་མོ་རལ་པ་འཛིངས་པའི་སྤྲུལ་པ་འགྱེད། ། སྐུ་ཡི་སྤྲུལ་པ་དཔལ་ལྡན་རེ་མ་ཛུ།། གྲུ་གསུམ་སེར་ནག་ཞལ་གྱི་དབྱིངས་ནས་བཞེངས།། ཡོན་ཏན་རྒྱས་མཛད་སེར་མོ་ཁ་ལ་བཞད།། འཕྲིན་ལས་རྒྱས་པ་ཐམས་ཅད་ཉེ་བར་མཛོད། ། གསུང་གི་སྤྲུལ་པ་དཔལ་ལྡན་རེ་མ་ཏི།། གྲུ་གསུམ་དམར་ནག་ཞལ་གྱི་དབྱིངས་ནས་བཞེངས།། དམར་མོ་ཆེན་མོ་དབང་ཆེན་གཏུམ་མོ་སྟེ།། དབང་གི་འཕྲིན་ལས་ཐམས་ཅད་གྲུབ་པར་མཛོད།། ཐུགས་ཀྱི་སྤྲུལ་པ་དཔལ་ལྡན་རེ་མ་ཛ། ། གྲུ་གསུམ་སྔོ་སྐྱ་ཞལ་གྱི་དབྱིངས་ནས་བཞེངས།། དཀར་མོ་ཆེན་མོ་ཞི་བའི་ཕོ་ཉ་སྟེ།། ཞི་བའི་འཕྲིན་ལས་ཐམས་ཅད་གྲུབ་པར་མཛོད།། སྐུ་གསུང་ཐུགས་ལྡན་སྤྲུལ་པ་རྒྱ་མཚོ་ལ། ། དྲེགས་པ་འཇོམས་མཛད་བདུད་དཔུང་ཟིལ་གྱིས་གནོན།། སྐུ་གསུང་ཐུགས་ཀྱི་དངོས་གྲུབ་སྩལ་ནས་ཀྱང།། འགྲོ་དྲུག་སྒྲོལ་མཛད་སེམས་ཅན་ཀུན་གྱི་མ།། དུས་གསུམ་རྒྱལ་བའི་བསྟན་པ་རྒྱས་མཛད་མ། ། བདག་གི་ལུས་ངག་ཡིད་གསུམ་བྱིན་གྱིས་བརློབས།། དཔལ་ཐོད་པ་ནག་པོ་ཆེན་པོའི་རྒྱུད་ལས། གྲུལ་བུམ་གྱི་རྒྱལ་པོ་སྦྲུལ་མགོ་དགུ་པས། དཔལ་ལྷ་མོ་ནག་མོ་ཆེན་མོའི་སྐུ་གསུང་ཐུགས་ཀྱི་ཕྱག་རྒྱ་ལ་བསྟོད་པའི་ལེའུ་སྟེ་བདུན་པའོ། །།། དེ་ནས་ལྷ་མ་ཡིན་གྱི་རྒྱལ་པོ་ཐག་བཟངས་རིས་ཆེན་པོས། དཔལ་ལྷ་མོ་ནག་མོ་ཆེན་མོ་ལ་ལྷ་མ་ཡིན་གྱི་འཁོར་གྱིས་བསྐོར་བའི་སྐུ་ལ། དོན་དམ་པའི་སྒོ་ནས་ཤིན་ཏུ་ཡང་དག་པས་བསྟོད་པ། སྤྲོས་བྲལ་འོད་གསལ་ཡང་དག་ཞི་བའི་ངང།། ཐུགས་ཀྱི་ཐུགས་མཆོག་རྣམ་དག་བདེན་པའི་ཡུལ།། གདོད་ནས་གཉིས་མེད་ནམ་མཁའི་སྙིང་པོ་ནི།། དཔལ་ལྡན་ཁྱོད་ཀྱི་རང་བཞིན་ཁྱད་པར་ལགས། ། དེ་ཡི་རྣམ་དག་བརྗོད་མེད་ངོ་བོ་ལ།། བྱིས་པ་རྣམས་ནི་བསྟོད་པ་བྱེད་པ་ལྟུང།། བླུན་པོ་རྣམས་ཀྱི་དངོས་པོར་རབ་བརྟགས་ནས།། གཟུགས་ཅན་ཚུལ་དུ་གང་ཞིག་བསྟོད་པའི་ཚིག། རྒྱལ་བའི་དགོངས་པ་ཐུགས་ཆུད་ཁྱོད་ཉིད་ལ། ། ཚིག་དང་ཡི་གེའི་སྒོ་ནས་བསྟོད་པ་རྣམས།། ནམ་ཀྱང་སྒྲོལ་བར་གྱུར་པའི་ཆོས་ཉིད་མིན།། གདོད་ནས་གཉིས་མེད་བདེ་ཆེན་མ་རྟོགས་པར།། ཁྱོད་ཀྱི་སྨོན་ལམ་རྟགས་ཀྱི་ཆོ་འཕྲུལ་ལ། ། དོན་དུ་གཟུང་ཞིང་གང་ཞིག་བསྟོད་པ་རྣམས།། ཁྱོད་ལ་བརྟེན་ནས་ཐམས་ཅད་ལྟུང་བར་འགྱུར།། གང་ཞིག་སྐྱེ་བ་མེད་པ་ཤེས་པ་དང།། གདོད་ནས་གཉིས་མེད་སྙིང་པོ་བསྒོམ་ནུས་ན།། གང་ཟག་དེ་ཡིས་ཁྱོད་ནི་བསྟོད་པ་ཡིན། ། ཁྱོད་ཀྱི་གཟུགས་དང་ཁ་དོག་འཛིན་པ་ཡིན།། བསྐལ་པ་གྲངས་མེད་འདས་པས་རབ་ལྟས་ཀྱང།། ཁྱོད་ཀྱི་གཟུགས་དང་ཁ་དོག་མཐོང་མི་ནུས།། གང་ཞིག་གཟུགས་སུ་མི་འཛིན་རྣམས་ཀྱིས་མཐོང། ། སྒྲ་དང་ཚིག་ཏུ་བརྗོད་པ་ཐམས་ཅད་ཀྱིས།། ཁྱོད་ཉིད་བོས་ཀྱང་བསྐལ་པར་མི་ཐོས་ཏེ།། འདི་དག་སྤངས་པའི་རྣལ་འབྱོར་དེ་ཡིས་ནི།། ཁྱོད་ཀྱང་མཐོང་ལ་དེ་ཡང་ཁྱོད་ཀྱིས་ཐོས།། གང་ཞིག་ཐོས་འདོད་ངལ་བས་ཁྱོད་བསྒྲུབས་ན། ། བླུན་པོ་དེ་ཡིས་ནམས་ཀྱང་ཁྱོད་ཉིད་སྤངས།། ལུས་ངག་སྤངས་པའི་སེམས་ཀྱིས་ཁྱོད་མཆོད་ན།། མཆོད་ནས་དངོས་གྲུབ་དེ་ཡིས་ཐོབ་པར་འགྱུར།། ཁྱོད་ནི་རྒྱལ་བ་མང་པོའི་ཡོན་ཏན་སྡུད། ། ཆོས་ཀྱི་དབྱིངས་ལ་རྒྱལ་བ་རྣམས་དང་མོལ།། ཟབ་མོ་དབུ་མའི་རང་བཞིན་སྟོན་པ་ཁྱོད།། མི་མཇེད་འཇིག་རྟེན་ཤིན་ཏུ་རྒྱུད་རྩུབ་པ།། ཕྱི་རོལ་ཚུལ་གྱི་ཐབས་ཀྱིས་འདྲེན་མཛད་མ།། ཁྱོད་ཀྱི་སྐུ་ནི་འདི་ལྟར་རབ་བརྟགས་པ། ། སྡིག་པ་མང་པོ་སྟོང་ཉིད་ངང་དུ་བཤགས།། སྟོང་ཉིད་དམ་པ་སྟོང་པ་ཡང་དག་ཁྱོད།། སྟོང་པ་གཉིས་མེད་ཤེས་པ་རྣམས་ཀྱིས་བསྟོད།། འདི་ལྟར་བསྟོད་ན་བསྟོད་པར་འགྱུར་གྲང་བས། ། ཁྱོད་ཉིད་བསྟོད་བྱའི་ཡུལ་ཅན་མ་ཡིན་ང།། བྱིས་པ་དྲང་ཕྱིར་དོན་ལ་འདི་ལྟར་བསྟོད།། དཔལ་ཐོད་པ་ནག་པོའི་རྒྱུད་ལས། དཔལ་ལྷ་མོ་ནག་མོ་ཆེན་མོར་གྱུར་པ་ལ། ལྷ་མ་ཡིན་གྱི་རྒྱལ་པོ་ཐག་བཟངས་རིས་ཀྱིས་བསྟོད་པ་སྟེ་ལེའུ་བརྒྱད་པའོ། །།། དེ་ནས་ལྷའི་དབང་པོ་བརྒྱ་བྱིན་གྱིས། དཔལ་ལྷ་མོ་ནག་མོ་ཆེན་མོ་ལྷའི་འཁོར་གྱིས་བསྐོར་བ་ལ། དང་པོ་དེའི་དམ་ཆོས་དགེ་བ་བཅུའི་རྣམ་པར་སྨིན་པའི་སྒོ་ནས་བསྟོད་པ། འཇིག་རྟེན་འཁོར་བ་འདི་ནི་ལས་ལ་གྲུབ།། ལས་ནི་རྣམ་གཉིས་དགེ་སྡིག་གཉིས་ཀྱི་མཐུས།། མཐོ་རིས་ངན་སོང་སྲིད་པའི་གྲོང་ཁྱེར་སྨིན།། སྔོན་འདས་བསྐལ་པ་དང་པོའི་ཕ་རོལ་ནས།། དགེ་བཅུའི་ལས་ལ་རང་སེམས་ཆེར་སྦྱངས་ནས། ། ལམ་གྱི་ཁྱད་པར་གོང་མ་རབ་རྫོགས་ཀྱང།། མཐོ་རིས་སྐྱེས་པ་རྣམས་ལ་དགེ་བ་བཅུའི།། ཚུལ་གྱིས་སྟོན་མཛད་ཕྱི་རོལ་བསྒྱུར་བ་ཡི།། དཔལ་ལྡན་ལྷ་མོ་ཁྱོད་ལ་ཕྱག་འཚལ་བསྟོད། ། འདས་པའི་དུས་ན་སྲོག་གཅོད་རབ་སྤངས་པས།། སྐུ་ཚེ་རིང་ཞིང་གཟུགས་བྱད་ཕུན་སུམ་ཆོགས།། གཞན་གྱི་ལན་ཚོགས་གནོད་པའི་རྐྱེན་དང་བྲལ།། འཆི་བདག་འཇོམས་མཛད་ཁྱོད་ལ་ཕྱག་འཚལ་བསྟོད། ། མ་བྱིན་ལེན་པའི་ཚུལ་ལ་རབ་སྦྱངས་པས།། བསོད་ནམས་ཚོགས་ཀྱི་ལོངས་སྤྱོད་ཕུན་སུམ་ཚོགས།། བསོད་ནམས་ལོངས་སྤྱོད་མི་འགྲིབ་རབ་བརྟན་བརྙེས།། སྦྱིན་པའི་གཏེར་འཆང་ཁྱོད་ལ་ཕྱག་འཚལ་བསྟོད། ། མི་ཚངས་སྤྱོད་པའི་དཀའ་ཐུབ་རྣམས་བསྲུངས་པས།། མངལ་གྱི་གྲོང་ཁྱེར་དམན་ལས་ཁྱད་པར་འཕགས།། སྲིད་པའི་འདོད་ཆགས་རིང་དུ་སྤངས་པ་སྟེ།། དགེ་སྦྱོང་ཆེན་པོ་ཁྱོད་ལ་ཕྱག་འཚལ་བསྟོད།། ཉོན་མོངས་བརྫུན་ཚིག་སྤངས་པའི་རྣམ་སྨིན་གྱིས། ། བཀའ་བཙན་གསུང་གིས་འཇིག་རྟེན་འདུལ་བའི་གཙོ།། གསུང་མཆོག་རྣམ་དག་བརྙེས་པའི་རང་བཞིན་ཏེ།། བདེན་པ་གསུང་བ་ཁྱོད་ལ་ཕྱག་འཚལ་བསྟོད། ། ཕྲ་མའི་སྐྱོན་སྤངས་མི་ཕྱེད་འཁོར་དང་ལྡན།། ཉིད་ལ་རྣམ་པར་འདུད་པའི་འཁོར་གྱིས་བསྐོར།། ལྷ་དང་ལྷ་མིན་བདེན་པས་འདུལ་མཛད་པ།། དཀར་མོའི་འཁོར་སྐྱོང་ཁྱོད་ལ་ཕྱག་འཚལ་བསྟོད།། ངག་འཁྱལ་སྤངས་པའི་ཡོན་ཏན་སྨིན་པ་ནི། ། ཏིང་འཛིན་རྩེ་གཅིག་མི་གཡོ་བར་ཆད་སྤངས།། དགོངས་འབྲེལ་ཚུལ་དུ་བསྟན་པ་སྐྱོང་མཛད་མ།། བྱིས་པ་འདུལ་མཛད་ཁྱོད་ལ་ཕྱག་འཚལ་བསྟོད།། ང་རྒྱལ་ཚིག་རྩུབ་སྤངས་པའི་ཡོན་ཏན་ནི། ། ཞི་བའི་ཚིག་འཇམ་ལྷ་མོ་དབྱངས་ཅན་མ།། ཚིག་རྩུབ་གཤེ་བའི་གཉེན་པོ་མེད་པ་སྟེ།། ཚིག་རྩུབ་འདུལ་མཛད་ཁྱོད་ལ་ཕྱག་འཚལ་བསྟོད།། རང་སེམས་བརྣབ་སེམས་སྤངས་པའི་ཁྱད་པར་ནི། ། འཛིན་པའི་རྣམ་རྟོག་རྣམ་པར་སྤང་པའི་རྟགས།། བདག་མེད་རྟགས་སུ་སེང་གེ་རྣ་བས་བརྒྱན།། བརྣབ་སེམས་སྤངས་པ་ཁྱོད་ལ་ཕྱག་འཚལ་བསྟོད།། གཟུང་བའི་ཡུལ་ལ་གནོད་སེམས་རྣམ་སྤངས་པས།། ཕྱི་རོལ་ཡུལ་ནི་གཉིས་མེད་ཆོས་སུ་གཟིགས། ། གང་ལ་གནོད་སེམས་ཡང་དག་སྤངས་པའི་རྟགས།། སྦྲུལ་གྱི་རྣ་བ་ཅན་ལ་ཕྱག་འཚལ་བསྟོད།། ལོག་པར་ལྟ་བའི་ཕྱོགས་ནི་རྣམ་སྤངས་ཏེ།། སངས་རྒྱས་ཆོས་ལས་འཁྲུངས་པའི་གཟུགས་བརྙན་ཁྱོད། ། ལྟ་བ་རྣམ་པར་དག་པའི་ངང་ཚུལ་ཅན།། སྤྲོས་བྲལ་དོན་ལྡན་སྟོན་ལ་ཕྱག་འཚལ་བསྟོད།། འཇིག་རྟེན་འདི་ན་ལས་གཉིས་དག་མ་དག། མ་དག་མི་དགེ་བཅུ་ལས་ངན་སོང་གྲུབ། ། དག་པའི་དགེ་བ་བཅུ་ལས་མཐོ་རིས་གྲུབ།། ལས་འདི་དགེ་བ་དང་པོར་རབ་སྤྱད་པས།། གོང་ནས་གོང་མའི་ས་ལ་རབ་གནས་ཀྱང།། དགེ་བཅུའི་རྟགས་ནི་དམན་པའི་ཞིང་འདིར་བསྟན།། གདུག་པའི་ཚུལ་གྱིས་འགྲོ་བ་འདྲེན་མཛད་མ། ། བསྟོད་པར་འོས་པ་ཁྱོད་ལ་ཕྱག་འཚལ་བསྟོད།། དཔལ་ཐོད་པ་ནག་པོ་ཆེན་པོའི་རྒྱུད་ལས། དཔལ་ལྷ་མོ་ནག་མོ་ཆེན་མོ་ལ། ལྷའི་དབང་པོ་བརྒྱ་བྱིན་གྱིས་དང་པོ་དགེ་བཅུའི་སྒོ་ནས་རྣམ་པར་ཐར་པའི་སྒོ་ནས་བསྟོད་པ་སྟེ་ལེའུ་དགུ་པའོ། །།། དེ་ནས་མི་འམ་ཅིའི་རྒྱལ་པོ་ལྗོན་པས། དཔལ་ལྷ་མོ་ནག་མོ་ཆེན་མོ་ལ་མི་འམ་ཅིའི་འཁོར་གྱིས་བསྐོར་བ་ལ་གཉིས་སུ་མེད་པའི་སྒོ་ནས་བསྟོད་པ། དཔལ་ལྡན་ལྷ་མོ་གཉིས་སུ་མེད་པ་སྟེ།། དོན་དམ་སྤྲོས་བྲལ་ཆོས་ཉིད་འདི་ལས་འཚལ།། དོན་དམ་ཀུན་རྫོབ་གཉིས་སུ་མེད་པས་བདེན།། འཁོར་བ་མྱ་ངན་འདས་པ་གཉིས་མེད་ཟབ།། སེམས་ཅན་སངས་རྒྱས་གཉིས་སུ་མེད་པས་འཕགས། ། ལས་དང་རྣམ་སྨིན་གཉིས་སུ་མེད་པས་བསྟོད།། རྒྱུ་དང་འབྲས་བུ་གཉིས་མེད་ཡང་དག་སྨིན།། ཡུལ་དང་ཡུལ་ཅན་གཉིས་མེད་གཅིག་གི་དང།། སྤྲོས་དང་སྤྲོས་མེད་དོན་དམ་དབྱིངས་ཀྱིས་བསྡུས། ། བསོད་ནམས་ཡེ་ཤེས་གཉིས་མེད་ཚོགས་ཆེན་ཏེ།། མཐོ་དང་དམའ་བ་གཉིས་མེད་དག་པས་བསྟོད།། བདག་དང་བདག་གི་ཆོས་ནི་ངང་ཚུལ་གཅིག། གཟུང་དང་འཛིན་པ་གཉིས་ནི་འཁོར་བའི་མཐའ། ། མཐོ་རིས་ངན་སོང་གཉིས་བྲལ་དག་པའི་ཞིང།། བཟང་ངན་གཉིས་མེད་རང་བཞིན་གཅིག་གིས་བསྟོད།། བསྐྱེད་དང་རྫོགས་པ་གཉིས་མེད་ལྷུན་གྲུབ་མཆོག། སངས་རྒྱས་སེམས་ཅན་གཉིས་མེད་སེམས་ཉིད་དེ། ། བསྒྲུབ་དང་བསྒྲུབ་བྱ་གཉིས་མེད་གྲུབ་པའི་ངང།། བདག་གཞན་གཉིས་མེད་ཚུལ་མཆོག་གཅིག་གིས་བསྟོད།། ཡབ་ཡུམ་མཁའ་དབྱིངས་གཉིས་མེད་བྱང་ཆུབ་སེམས།། ཐབས་དང་ཤེས་རབ་གཉིས་མེད་འབྲེལ་བའི་དོན། ། སྟོང་དང་མི་སྟོང་གཉིས་མེད་ཞི་བའི་ངང།། འགྱུར་དང་འགྱུར་མེད་རྩོལ་བྲལ་ཕྱག་འཚལ་བསྟོད།། སྒྲ་ཚིག་གཉིས་མེད་བརྗོད་པ་མེད་པའི་ངང།། ལུས་ངག་གཉིས་མེད་སེམས་ཉིད་གཅིག་གི་ཚུལ། ། རྩོལ་བྱེད་རྩོལ་བྱེད་གཉིས་མེད་དོན་གཅིག་པས།། རྣམ་པར་སྤྲོས་མེད་དོན་དམ་དབྱིངས་ཀྱིས་བསྟོད།། མུ་སྟེགས་སངས་རྒྱས་གཉིས་མེད་ཚུལ་གཅིག་པས།། དབྱིངས་དང་ཡེ་ཤེས་གཉིས་མེད་དོན་རྟོགས། ། སྲིད་དང་རྣམ་གྲོལ་ཡང་དག་དོན་གཅིག་པས།། ཐམས་ཅད་གཉིས་མེད་སྐུ་ལ་ཕྱག་འཚལ་བསྟོད།། ཕྱི་དང་ནང་གཉིས་གཉིས་མེད་གཅིག་གི་ངང།། སེམས་ལྡན་སེམས་མེད་རྣམ་དག་ཞི་བའི་ཚུལ།། སྣང་དང་མི་སྣང་གཉིས་མེད་གཅིག་གིས་མཐོང། ། གཉིས་མེད་དོན་མཆོག་མཐོང་ལ་ཕྱག་འཚལ་བསྟོད།། འདི་དག་རྣམས་ནི་དོན་དམ་ཟབ་མོའི་ཚུལ།། སྤྲོས་པ་མེད་པའི་དོན་དང་འབྲེལ་བ་དེ།། ཁྱོད་ཀྱི་རྒྱུད་ལ་འདི་དག་ཡོངས་སུ་ཚང། ། འདི་ལྟར་བསྟོད་པས་བདག་ཀྱང་ཁྱོད་ལྟར་ཤོག། གཉིས་སུ་མེད་པས་ཐུགས་སུ་ཆུད་པའི་མཆོག། གཉིས་མེད་དོན་ལ་རྟག་ཏུ་གནས་པའི་མཆོག། གཉིས་སུ་མེད་པ་དེ་ནི་ཁྱོད་ཉིད་དེ།། བདག་ཀྱང་གཉིས་མེད་དོན་གྱིས་འདིར་འགྲུབ་ཤོག། དཔལ་ཐོད་པ་ནག་པོ་ཆེན་པོའི་རྒྱུད་ལས། དཔལ་ལྷ་མོ་ནག་མོ་ཆེན་མོ་ལ། མི་འམ་ཅིའི་རྒྱལ་པོ་ལྗོན་པས་གཉིས་མེད་པའི་སྒོ་ནས་བསྟོད་པ་སྟེ་ལེའུ་བཅུ་པའོ། །།། དེ་ནས་དཔལ་རྡོ་རྗེ་མཁའ་འགྲོ་མ་ཉིད་ཀྱིས། ཐམས་ཅད་བསྒྲལ་བའི་ཕྱིར་དྲག་པོའི་གསང་ཐུན་གྱི་ངན་སྔགས་འདི་གསུངས་སོ།། ཏྲག་རགྴ་ཁ་མུན་ཏྲ་བྷྱོ། རུ་ལུ་རུ་ལུ་མ་ར་ཡ་ཐུན་ཡ། ཏྲག་རགྴ་སྙིང་ཁྲག་སྙིང་བྷྱོ། མ་ར་ཡ་ཐུན་ཡ། སྤུ་ཏ་སྤུ་ཏ་བྷྱོ། མ་ར་ཡ་ཐུན་ཡ། ཤ་ཤ་ཏྲག་ཤ་ཏྲག་མཱ་ར་ཡ་ཐུན་ཡ། ཏྲག་མོ་ཏྲ་བ། སྙིང་ཏྲག་སྙིང་ཏྲག་མཱ་ར་ཡ་ཐུན་ཡ། ཏྲག་མོ་ཏྲག་མ། མ་ར་ཡ་ཐུན་ཡ། འདི་དག་གསུངས་པའི་མོད་ལ་ནི། ། འཇིག་རྟེན་ཐམས་ཅད་ཕུང་བར་གྱུར།། གནམ་ལྕགས་འཕྲེང་བ་ལྟ་བུ་ཡི།། མདའ་ནི་འཇིག་རྟེན་ཆར་པ་འབབ།། ལྕགས་སོལ་མལ་ནས་ཕྱུང་འདྲ་བའི།། ཕུར་པ་འཇིག་རྟེན་སྙིང་ལ་ཟུག། གནམ་ལྕགས་ཚ་ཚ་ལྟ་བུ་ཡི། ། ཡུངས་དཀར་མང་པོ་ཐད་དུ་ཐིམ།། ལས་ཀྱི་དྲ་བ་འཇོམས་པའི་ཕྱིར།། ཁམ་བུའི་ཐུན་ནི་སྙིང་ལ་གནོད།། ཐམས་ཅད་ཁ་ནས་ཁྲག་སྐྱུག་ཅིང།། ཁ་ཐུན་ཤུགས་ཀྱིས་མྱོས་པ་དང། ། འཇིག་རྟེན་དུག་གི་ཆར་པ་བབས།། གསང་ཐུན་གསང་བའི་སྔགས་ཟོར་ཡིན།། དེ་ཚེ་འཇིག་རྟེན་དངངས་ནས་བསྲེག། ཐམས་ཅད་སྐྱབས་ནས་བསྟོད་པ་བྱེད།། དཔལ་ཐོད་པ་ནག་པོ་ཆེན་པོའི་རྒྱུད་ལས་དྲག་པོ་གསང་ཐུན་གྱི་གསང་སྔགས་བསྟན་པ་སྟེ་ལེའུ་བཅུ་གཅིག་པའོ། །།། དེ་ནས་སྲིན་པོའི་རྒྱལ་པོ་ལང་ཀ་མགྲིན་བཅུས། རང་གི་འཁོར་སྲིན་པོའི་ཚོགས་དང་བཅས་པས། དཔལ་རྡོ་རྗེ་མཁའ་འགྲོ་མ་ལ་བསྟོད་པ། དབྱིངས་ཕྱུག་དཔལ་ལྡན་རྡོ་རྗེ་མཁའ་འགྲོ་མ།། འགྲོ་བ་ཐུགས་རྗེས་བསྐྱང་ཕྱིར་ཡུམ་གྱིས་ཚུལ།། མཚན་མའི་སྐྱོན་སྤངས་སྐུ་མདོག་དམར་མོར་སྟོན།། དྲག་ཤུལ་སྤྱོད་ཕྱིར་གཅེར་བུ་སྲིན་མོའི་ཚུལ།། ལྷ་ཆེན་གདུག་ཕྱིར་སྡང་མིག་རལ་པ་གསིགས། ། སྐྱེ་ཤི་རྩད་གཅོད་མི་བཟད་མཆེ་བ་གཙིགས།། བྱང་ཆུབ་སེམས་ལྡན་སྤྱི་གཙུག་ཟླ་གསལ་རྒྱས།། གཡུལ་ངོ་བཟློག་ཕྱིར་མདུང་དང་རུ་མཚོན་བསྣམས།། སྲིད་གསུམ་བསྒྲལ་ཕྱིར་ཤེས་རབ་རལ་གྲི་བསྣམས། ། དགྲ་བགེགས་འདུལ་ཕྱིར་ནད་ཀྱི་རྐྱལ་པ་བསྣམས།། དབུལ་བ་སེལ་ཕྱིར་ནེའུ་ལེའུ་རྐྱལ་པ་ཐོགས།། འཆི་བདག་བཟློག་ཕྱིར་སྙན་ཆ་སེང་གེས་བརྒྱན།། གདུག་པ་འདུལ་ཕྱིར་ཀླུ་དབང་སྙན་ཆར་བརྒྱན། ། འབྱུང་པོ་དངངས་ཕྱིར་ཐོད་པའི་འཕྲེང་བས་བརྒྱན།། རྣལ་འབྱོར་བསྐྱང་ཕྱིར་དྲིལ་ཆེན་སྒྲ་སྙན་སྒྲོགས།། ཀླུ་ཆེན་འདུལ་ཕྱིར་སྦྲུལ་གྱི་སྐེ་རགས་བཅིངས།། བདུད་དཔུང་སྦ་བཀོང་ཞིང་ལྤགས་གོས་སུ་གོན། ། སྨོན་ལམ་མི་འདོར་སྐུ་སྨད་རེ་ལྡེས་དཀྲིས།། མཛེས་པར་བྱ་ཕྱིར་རྐང་སྒྲོག་ལྕགས་ལས་བྱས།། ཉོན་མོངས་མཚོ་སྐེམས་ལྟེ་བ་ཉི་མས་བརྒྱན།། སྲིན་པོ་འདུལ་ཕྱིར་ཆིབས་སུ་བོང་བུ་ཆིབས།། སྟོང་གསུམ་བགྲོད་ཕྱིར་ཚུབ་མའི་ནང་ན་བཞུགས། ། དུར་ཁྲོད་གནས་ཕྱིར་གཡོག་འཁོར་མ་མོའི་ཚོགས།། འཁོར་བ་འཇིག་ཚེ་སྡུག་བསྔལ་སེམས་ཅན་རྣམས།། ཁྱོད་ཀྱི་ཞལ་དུ་ཐམས་ཅད་བཞུགས་པར་འགྱུར།། བརྩེ་ལྡན་ཐུགས་རྗེས་འགྲོ་བ་ཀུན་བསྐྱང་ནས། ། བྱང་ཆུབ་སྤྱོད་པ་ཐར་ལམ་སྟོན་མཛད་པའི།། ལྷ་མོ་མཐུ་ཆེན་ཁྱོད་ལ་ཕྱག་འཚལ་བསྟོད།། དཔལ་རྡོ་རྗེ་མཁའ་འགྲོ་མ་ལ། སྲིན་པོའི་རྒྱལ་པོ་ལང་ཀ་མགྲིན་བཅུས་བསྟོད་པ་སྟེ་ལེའུ་བཅུ་གཉིས་པའོ། །།། དེ་ནས་དཔལ་ལྷ་མོ་ནག་མོ་ཆེན་མོ་ལ་འཁོར་ཐམས་ཅད་ཡོངས་སུ་བཅས་ཏེ། དཔལ་ལྷ་མོ་ནག་མོའི་ཐད་དུ་སོང་ནས་ཡོངས་སུ་བསྟོད་པ། ནད་ཀྱི་བདག་མོ་དཔལ་ལྷ་མོ་ནག་མོ་ཆེན་མོ། འགྲོ་བ་ཀུན་གྱི་མངའ་མཛད་ཁྱོད་ལ་ཕྱག་འཚལ་ལོ།། ཏིལ་མར་གྱིས་བསྐུས་ལན་བུ་གཅིག་པ་ལ།། རོ་ཉེས་རྣ་ཆས་བགེགས་ཤིང་ཆ་ལུགས་མ་ལུས་འཆང།། རྒྱན་དུ་རྐང་སྒྲོག་ལྕགས་ལས་བྱས་པ་གཅིག་གིས། ། རང་གི་རྐང་པ་མཛེས་པར་བྱས་པ་ཡི།། གཅེར་བུ་བོང་བུ་ཞོན་ཞིང་ཀུན་ཏུ་རྒྱུ་བའི་ལྷ་མོ་ཁྱོད།། བདག་ཉིད་མཛེས་པར་ཤེས་ཤིང་གཞན་ལྟ་ཁྱོད་ཀྱིས་མཁྱེན།། ཁྱོད་ཀྱི་སྤྱོད་པ་དོད་ལ་སུ་ཞིག་ཤེས། ། ནག་ཞིག་འཁོར་བ་འཇིག་པའི་ཚེ་ན་མི་རུས་དག་ལ་ཁྲག་དང་ཞག་འཛག་དུ་འཐུལ་བ་ན།། ལྷ་མོ་ཁྱོད་ཀྱི་ཞལ་དུ་འགྲོ་ཀུན་སྐད་ཅིག་ཙམ་གྱིས་བཞུགས་པར་འགྱུར།། ནག་མོ་མི་ཐོད་ཐོགས་པས་ཁྱོད་ནི་གྲུབ་པའི་རྣལ་འབྱོར་མ་སྟེ་དུར་ཁྲོད་སྟེང་དུ་དགྱེས། ། གཡོན་ཅན་རྣམ་བཞིའི་ནད་བྱེད་འཆི་བའི་འཇིགས་པ་སེལ་ཞིང་ཞི་ལ་མི་བཟད་དྲིལ་ཡང་སྒྲོགས།། ཁྱོད་ནི་དཔའ་བོ་དག་གིས་མགོ་བོ་མཚོན་གྱིས་ལེགས་པར་བཅད་པའི་འཕྲེང་བ་ཐོགས་ཤིང་གར་ཡང་བྱེད། ། ལག་པ་གཉིས་ཀྱང་བསྐུམ་གྱིས་གཙོ་ཆེ་ལ།། ཀླུ་དབང་འཇིགས་པའི་སྐེ་རགས་འཆིང་ཞིང་ལག་ན་མདུང་དང་རལ་གྲི་ཐོགས་པ་ལ།། ཁྲག་གི་ཆང་གིས་རབ་ཏུ་མྱོས་པ་མིག་རྩ་དམར་པོར་འགྱུར་ཞིང་མཚན་མོ་དུར་ཁྲོད་རྒྱུ་བ་དེ་ནི་འབྱུང་པོ་ཕལ་ཆེན་རྣམས་ཀྱིས་མཐོང། ། ཀོ་རློན་ཆན་པས་དྲས་ཏེ་རྐྱང་བའི་གོས་ཀྱིས་གནམ་གྱི་ཕྱེད་གཡོགས་མ།། ཕྱེད་ནི་སྨྱུག་མའི་རེ་ལྡེས་རབ་ཏུ་དཀྲིས། ། མི་ཡི་རྒྱུ་མ་ལྕགས་ཀྱིས་བཀང་བ་དག་གིས་ཞལ་གྱི་ཟླ་གམ་བརྒྱན་ཅིང་འགྲམ་པར་སིལ།། ལུས་ནི་སྣུམ་གྱིས་བྱུགས་ཤིང་ཁྲག་དང་ཐིག་ལེས་བྲིས།། མི་རོའི་ཤ་ལ་སོས་ནི་ཆེམ་ཆེམ་གཙོད་བྱེད་ཅིང།། ནག་མོ་ཐོད་པ་ཅན་ནི་བདག་ལ་སྐྱོང་གྱུར་ཅིག། དྲག་མོ་མི་ཤ་ཁ་ནི་ཐོགས་པ་སྔ་ནས་མ་བྱུང་ཁྱོད་མཐོང་ན།། མ་མོ་རྣམས་ཀྱང་སྐྲག་ཅིང་དངངས་འཐོན་ནས།། མིག་རྩ་རིག་རིག་ལྷ་མོ་ཁྱོད་ལ་འདུད།། ནག་མོ་ལུས་མདོག་གནག་ཅིང་བཟོད་པར་དཀའ་བ་ཁྱོད་ལ་ནི། ། བརྒྱ་བྱིན་ལ་སོགས་ཉོན་ཅིག་བཞིན་དུ་བསྟོད་ཕྱག་འཚལ།། གཤིན་རྗེ་རྣམས་ཀྱང་འདར་ཞིང་འདུད་པར་བྱེད།། མི་རྣམས་དག་ནི་འགྲོ་བ་མ་ལུས་པ་ཡི་འཇུག་བཏུལ་ནས། ། རྣ་བ་ཡ་གཅིག་ལ་ནི་བྲང་གིས་འགྲོ་བའི་གདེངས་ཀར་ལྡན།། ཡ་གཅིག་ལ་ནི་སེང་གེ་མཚུངས་བྱེད་བརྒྱན་ཅིང་རྒྱ་མཚོ་བསྐོར་བའི་ས་གཞི་གནོན།། སྟེང་གི་ཕྱོགས་ནས་རྒྱུ་བའི་ཉི་མའི་འོད་ཟེར་སྟོང་གི་འོད་ལྡན་ཁྱོད་ཀྱི་ལྟེ་བའི་ཕྱོགས་སུ་གཞག། རྒྱ་མཚོའི་ཀློང་ན་མེ་འབར་ཆུ་རྣམས་སྐེམས་པར་བྱེད་པའི་བུད་མེད་ཐམས་ཅད་ཞི་མཛད་མ།། ལྷ་ཆེན་སྐུ་དང་མཚམས་པར་བཞུགས་པའི་བཀའ་ཟློག་ནག་མོ་མིན་ནད་ཕྱུགས་ནད་ཀུན་ལ་འཇིགས་པ་མེད། ། མ་ཅིག་ཁྱོད་ཉིད་ལ་ནི་བདག་ནི་གུས་པས་ཕྱག་འཚལ་མཆོད་ཅིང་བསྟོད་པར་བགྱི།། རྒྱ་མཚོ་གཏིང་ནས་མེ་འབར་མ།། མཚོ་རྣམས་སྐེམས་པར་ནུས་པ་སྟེ།། བུད་མེད་ཐམས་ཅད་ཞི་མཛད་མ། ། ལྷ་ཆེན་སྐུ་ཡི་ཕྱེད་དུ་བཞུགས།། རྫོང་དང་དཀའ་བཟློག་ནག་མོ་ཆེ།། ལྷ་དང་ལྷ་མིན་ཕྱག་བྱས་པས།། མི་ནད་ཕྱུགས་ནད་གང་ཡིན་ཁྱོད་ཀྱིས་མཁྱེན།། དེ་ལ་འཇིགས་པ་མེད་པ་འགྱུར།། མི་ནད་ཐམས་ཅད་ཞི་མཛད་མ། ། རྣལ་འབྱོར་དབང་ཕྱུག་ཆེན་མོ་ཁྱོད།། རྟག་པར་བདག་ལ་སྐྱོང་གྱུར་ཅིག། དཔལ་ཐོད་པ་ནག་པོ་ཆེན་པོའི་རྒྱུད་ལས། དཔལ་ལྷ་མོ་ནག་མོ་ཆེན་མོ་ལ།། འཛམ་བུ་གླིང་གི་མིའི་ཡུལ་དུ་བྲམ་ཟེ་ཆོག་སྲེད་ཀྱིས་བསྟོད་པ་སྟེ་ལེའུ་བཅུ་གསུམ་པའོ། །།། དེ་ནས་རིགས་ཤེས་རྣམ་པར་ལྡན་པས། བྲམ་ཟེ་ཀེའུ་འདི་ནས་དཔལ་ལྷ་མོ་ནག་མོ་ཆེན་མོ་ལ་རྣམ་པར་བསྟོད་པ། ལྷ་མོ་མཐུ་ཆེན་ཁྱོད་ལ་ཕྱག་འཚལ་ལོ། ། བདག་གི་བཙུན་པར་ཁྱོད་ལ་བསྟོད།། འཇིག་རྟེན་འདི་ན་རང་དབང་ཐོབ།། སྔོན་གྱི་བྲམ་ཟེས་བསྟོད་པ་ལྟར།། བཀྲ་ཤིས་མཆོག་བསྒྲུབ་སེམས་བདེ་གནས།། ཡིད་མྱུར་གཟུགས་ཆེན་ཀུན་ཏུ་གྲགས། ། མ་མོར་བྱེད་ཅིང་འཇིག་རྟེན་སྐྱོང།། དཔའ་བརྟན་རྟག་སྤྱོད་བརྩོན་འགྲུས་ཆེ།། འཐབ་མོ་གཡུལ་ལས་རྟག་ཏུ་རྒྱལ།། སྙིང་རྗེ་ཆེ་ཞེས་མངོན་པར་བསྟོད་པ་ལྟར།། གོས་སུ་དར་གོས་སྔོན་པོ་གོན།། སྡུག་དང་མི་སྡུག་སྣ་ཚོགས་འཆང། ། སྤྱན་མིག་མཐོང་ན་ཀུན་ཀྱང་དངངས།། དཔག་མེད་མཆོག་བསྒྲུབ་སེམས་བདེར་གནས།། དད་ཅིང་ཕྱོགས་པའི་མི་རྣམས་སྡུད།། བར་བར་རི་བྲག་ཟབ་མོར་གནས།། བར་བར་ཚལ་དང་ཤིང་ལ་གནས། ། བར་བར་ཕུག་ཆུ་འགྲམ་ན་གནས།། བར་བར་རྒྱ་མཚོའི་གཏིང་ན་གནས།། བར་བར་རི་རབ་རྩེ་ལ་གནས།། ལྷ་མོའི་གནས་རྟེན་དེ་རུ་བཅའ།། གལ་ཏེ་རི་འཚལ་མི་རྒོད་དག་རྟག་ཏུ་ལྷ་མོ་ཁྱོད་ལ་མཆོད། ། རྨ་བྱའི་སྒྲོས་ནི་རྒྱལ་མཚན་བྱས།། རྟག་ཏུ་འཇིག་བརྟེན་བསྲུང་བར་ནུས།། སེང་གེ་སྟག་སྤྱང་རྟག་ཏུ་རྟོག། གནག་ལུག་བྱ་རྣམས་སྲུང་བར་བྱེད།། རྡོ་རྗེ་དྲིལ་ཆེན་དཀྲོལ་ནས་ནི།། བྱིན་དྷི་རིལ་སྒྲ་ཀུན་ཏུ་སྒྲོགས། ། ལན་འགའ་ལག་ཏུ་ཏྲི་ཤུལ་ཐོགས།། ལག་གཉིས་ལག་ན་ཟླ་བའི་རུ་མཚོན་ཐོགས།། མར་གྱི་ཚེས་དགུ་བཅུ་གཅིག་ལ།། དེ་ཡི་དུས་སུ་མཆོད་བྱས་ནས།། ལྷ་མོ་མཆོད་པས་ལྷག་པ་མེད།། འདུད་ཚུལ་ལྷ་ཆེན་སྲིན་མོར་སྟོན། ། འཐབ་མོ་གཡུལ་མཐོང་སྟག་སྙིང་རྗེ།། སྐྱེ་བོ་མང་པོའི་ནང་རྟགས་ཅན།། ལྷ་མོ་མཆོད་པས་ལྷག་པ་མེད།། རེ་འགའ་རྩེ་དགའི་བུ་མོར་སྟོན།། ལྷ་དག་འཐབ་ཚེ་རྒྱལ་བར་བྱེད།། གཙོ་བོར་བྱེད་ཅིང་ཁ་ལོ་སྒྱུར། ། བུད་མེད་ནང་ན་མཆོག་ཙམ་སྤྱོད།། ཚིག་དབང་འཇིག་རྟེན་མགོན་པོར་གྲགས།། རྒྱལ་པོའི་ཁྱབ་ནས་པདྨ་འདྲ།། ཞལ་བཟངས་ཟླ་བ་ཉ་བ་འདྲ།། ཆུ་བོ་དག་ལ་གྲུ་ཟམ་འདྲ།། དགྲ་བོ་ཆོམ་རྐུན་འཇིགས་པའི་ཚེ། ། དྲན་པས་ཉོན་མོངས་ཞི་མཛད་ཅིང།། དེ་དག་ཐམས་ཅད་སེལ་བར་མཛད།། དེ་བས་བདག་གིས་བཙུན་པར་བསྟོད།། དཔལ་ཐོད་པ་ནག་པོ་ཆེན་པོའི་རྒྱུད་ལས། ལྷ་མོ་མཐུ་ཆེན་ལ་བྲམ་ཟེ་ཀེའུ་དི་ནས་བསྟོད་པ་སྟེ་ལེའུ་བཅུ་བཞི་པའོ། །།། དེ་ནས་དཔལ་ལྡན་རྡོ་རྗེ་མཁའ་འགྲོ་མས། གསང་སྔགས་རྣམ་པ་གསུམ་གྱི་ཁྱད་པར་གསུངས་པ། དང་པོར་སྔགས་ཀྱི་མགོ་ལ་ཨོཾ།། རུ་རུ་ཙ་ཏི་ཨ་ཤུག་མེ།། བ་ཏི་རུ་ཏྲ་ཁ་ཤ་ལ། ། རག་མོ་ཧཱུཾ་རྣམས་བཅུ་བདུན་སྔགས།། བོད་པ་སྲོག་གི་སྙིང་པོ་ཡིན།། ཀུ་མ་ར་སྟེ་འདོད་ལ་ཞོན།། དྷ་དུན་ན་ནི་དབྱིངས་ན་གནས།། ཙ་ཤ་ཀུ་མ་རག་ཞོན་དྲག། ཨ་ཙུད་ཏ་ཁུག་ཤི་མུག་ཤི། རེ་མ་ཏི་ཡི་ཁུག་ཉིད་ཡིན།། གསང་སྔགས་ཡི་གེ་རྩ་གསུམ་སྟེ།། གནད་ལ་བོར་བའི་བོད་པ་ཡིན།། ཏུཏྟ་ཀེ་ཤུག་མུད་ཉིད་ཉ་ནི།། དགྲ་ལ་ཆུ་གཅེས་རྦད་པ་དང།། བོད་པའི་གསང་སྔགས་ཁྱད་པར་ཡིན།། དེ་བཞིན་རྦད་པའི་མགོ་ལ་ཨོཾ། ། ཤེ་ཁེ་མུད་ཉི་ཞེས་བོས་ནས།། དགྲ་བོ་ཁ་ལ་ཡན་ཞེས་རྦད།། ཡི་གེ་བཅུ་པ་རྦད་པ་ཡི།། སྲོག་གི་སྙིང་པོར་གྱུར་པ་ཡིན།། དྷ་དུ་དབྱིངས་ཀྱི་དཀྱིལ་འཁོར་དུ།། ཙཀྲ་འཁོར་ལོས་གསད་པ་ནི། ། དགྲ་བོ་ཁ་ལ་ཡན་ཞེས་བསྒྲུབས།། སྔགས་དགུ་དབྱངས་སུ་གསད་ཕྱིར་རྦད།། དེ་ལྟར་ཉེ་བར་བསྐུལ་བའི་ཕྱིར།། རུ་རུ་ཨ་ཤུག་མེ་མ་འཁོར།། ཀ་ལི་ཀི་ནེ་སྒྲ་གཟུགས་ལ།། རུ་རུ་ཨ་ཤུག་མེ་ཞེས་བསྐུལ།། སྱེ་ཀ་ཏེ་ཏུད་ཏ་ཞེས་ལ། ། ཁྱོད་ཀྱི་དགྲ་བོ་གསད་པའི་ཕྱིར།། མཱ་ར་ཡ་ཞེས་གསད་པ་དང།། སྭཱ་ཧཱ་སྔགས་ཀྱི་ཤམ་བུ་ཚང།། ཡི་གེ་ཉི་ཤུ་རྩ་ལྔ་འདི།། ཉེ་བར་ལས་ལ་བསྐུལ་བ་ཡི།། རྦད་པ་ཉིད་དུ་བྱིན་གྱིས་བརླབས། ། ཐམས་ཅད་འདུས་པའི་འཕྲེང་བ་འདི།། བཞི་བཅུ་རྩ་བཞི་རྦད་སྔགས་ཡིན།། འདིར་ཡང་གསད་ཕྱིར་མགོ་ལ་ཨོཾ།། མ་ཞེས་ང་ལ་བོས་ནས་ནི།། དགྲ་ཡི་སྙིང་ཤ་གཅོད་པ་ནི།། རེག་མོ་སྤྲུལ་པའི་སྙིང་པོ་ཡིན། ། མ་སྲིང་སྙིང་པོས་གསད་བའི་ཕྱིར།། དབང་པོ་ཐུམ་དང་ལུས་སྲོག་རྦད།། གསང་སྔགས་ཡི་གེ་བཅུ་པ་འདི།། གསད་པའི་སྤྱི་ཁྱབ་སྔགས་ཀྱི་མགོ།། མ་མ་སྙིང་རྩ་སྲོག་ལ་ཆུམ།། ཡི་གེ་བདུན་པའི་ནང་གསད་ཡིན། ། ཕྱི་རོལ་རྦད་པ་ཐུམ་ཤ་རྦད།། ཡི་གེ་གསུམ་པའི་དེ་ཉིད་ཡིན།། ཕྱི་ནང་གསད་ཕྱིར་མ་མོ་བརླང།། སྔགས་ཀྱི་བརྡ་ནི་གུག་ཚར་ལིང།། སྒྲ་ལྟར་བཤད་པ་ཤ་སྙིང་རྦད།། ཡི་གེ་བརྒྱད་པ་འདི་ཡིས་ནི།། བསྒྲུབ་བྱའི་ཕྱི་ནང་གཉིས་ཀ་གསོད། ། དབང་པོ་རྣམས་ནི་ཤི་ན་ཐུམ།། བརྡ་ཚིག་སྒྲ་ལྟར་བྱིན་གྱིས་བརླབས།། དབང་པོ་ཀུན་ལ་རི་ལི་ལི།། ལང་རྡོ་རྦད་ནི་གསད་པ་ཡིན།། ཡི་གེ་བདུན་པ་དབང་པོ་གསད།། སྒོ་ལྔའི་ཤེས་པས་སྙིང་པོ་རྦད། ། སྒོ་ལྔའི་གསང་སྔགས་གསུམ་པ་ཡིན།། ཐམས་ཅད་གསོད་ཕྱིར་ཀུན་གྱི་སྒྲ།། མ་ར་ཡ་ཞེས་གསད་པ་ཡིན།། ཕཊ་ཀྱིས་དྲག་སྔགས་ཐམས་ཅད་རྫོགས།། དེ་བཞིན་སྭཱ་ཧཱ་སྔགས་ཀྱི་མཐའ།། ཡི་གེ་དྲུག་པའི་མཐུ་སྟོབས་ནི། ། ལུས་དང་དབང་པོ་ཤེས་པ་དང།། ཐམས་ཅད་གསད་པའི་གསང་སྔགས་ཡིན།། ཡི་གེ་བཞི་བཅུ་རྩ་བཞིས་ནི།། དྲག་པོ་སྔགས་ཀྱི་ལུས་རྣམས་རྫོགས།། དཔལ་ཐོད་པ་ནག་པོ་ཆེན་པོའི་རྒྱུད་ལས། ། གསང་སྔགས་རྣམ་པ་གསུམ་གྱི་ཁྱད་པར་བཤད་པ་སྟེ་ལེའུ་བཅོ་ལྔ་པའོ།།།། དེ་ནས་དཔལ་རྡོ་རྗེ་ནག་མོ་ཆེན་མོས།། འཁོར་བྱེ་བ་དུང་ཕྱུར་དང་བཅས་ནས་དུད་འགྲོའི་འཇིག་རྟེན་དུ་རྣམ་པར་སོང་ངོ། ། དེ་ནས་འཇིག་རྟེན་གྱི་ཁམས་ན་དུད་འགྲོའི་རྣམ་པ་འདབ་མ་ཅན་གྱི་རིགས་དང། སྡེར་མོ་ཅན་དང་མཆེ་བ་ཅན་གྱི་རིགས་དང། རྭ་དང་གཞུག་མ་ཡོད་པའི་རིགས་དང། དྲོད་ལས་སྐྱེས་པ་དང་གཤེར་ལས་སྐྱེས་པ་དང། མངལ་ལས་སྐྱེས་པ་དང། སྒོ་ང་ལས་སྐྱེས་པ་དང། རྫུས་ཏེ་སྐྱེས་པ་ལ་སོགས་པ་རྣམས་ཀྱིས་རྣམ་པར་བསྟོད། དུད་འགྲོ་དེ་དག་ཀྱང་མཐུ་དང་ལྡན་པ། རྫུ་འཕྲུལ་དང་ལྡན་པ། བསོད་ནམས་དང་ལྡན་པ། རྣམ་པར་འཕྲུལ་བ་དང་ལྡན་པ། ལྷག་པའི་བསམ་པ་དང་སྟོན་པའི་ཞལ་མཐོང་བའི་ཁྱད་པར་ཡོད་པ། སངས་རྒྱས་ཀྱི་ཐེག་པ་པ་ཡིན་ཏེ། ལམ་དང་ཉེ་བ། ལམ་དུ་འཇུག་པ། ལས་ལ་གནས་པ། ལམ་གྱི་འཕྲུལ་བ་ཅན་འབའ་ཞིག་སྟེ། དེ་དག་རྣམས་ཀྱིས་དཔལ་རྡོ་རྗེ་མཁའ་འགྲོ་མའི་རྣམ་པར་འཕྲུལ་བ་ཡང་ཤེས་ནས།། དེའི་ཚེ་ཚིགས་སུ་བཅད་པའི་སྒོ་ནས་ཡོངས་སུ་བསྟོད་པ། འཇིག་རྟེན་གཙོ་ལ་རྟག་ཏུ་གུས་ཕྱག་འཚལ། ། མ་རྣམས་ནང་ན་ཁྱོད་ནི་མཆོག་གྱུར་ཏེ།། འཇིག་རྟེན་གསུམ་པོ་ཐམས་ཅད་ཀུན་གྱི་མཆོག། བྱད་བཞིན་རབ་མཛེས་ཐམས་ཅད་ལྟ་བར་འོས།། མིག་ཡངས་པདྨ་སྔོན་པོའི་འདབ་མ་འདྲ།། བསོད་ནམས་རིན་ཆེན་འབར་བའི་གྲགས་པས་བརྒྱན། ། དཔེར་ན་རིན་ཐང་མེད་པའི་ནོར་བུས་མཚུངས།། དིང་བདག་དམ་པ་ཁྱོད་ལ་བསྔགས་པས་ན།། ཇི་ལྟར་སེང་གེ་གཅན་གཟན་མཆོག་གྱུར་པ།། སྔགས་སོགས་ཙིག་ནི་འདི་ལས་འབྱུང་བ་ཡིན། ། བསམ་པའི་དངོས་པོ་ཐམས་ཅད་གྲུབ་པར་མཛོད།། དེ་ནས་དཔལ་རྡོ་རྗེ་མཁའ་འགྲོ་མས་འཁོར་རྣམས་ཀྱི་གཉེར་གསུངས་པ། འཇིག་རྟེན་འདི་ན་བཟང་པོའི་དུས།། ཟླ་གཅིག་དྲུག་ལྡན་ང་ཡི་དུས། ། ཡར་གྱི་ཚེས་དགུ་བཅུ་གཅིག་དང།། དེ་བཞིན་མར་གྱི་བཅུ་གཅིག་དགུ། འཕོ་བ་དང་ནི་ཕྱེད་དུས་དྲུག། ང་ནི་འཇིག་རྟེན་ཉུལ་བའི་དུས།། ལྷ་མིན་དྲང་སྲོང་རྣམས་ཀྱིས་མཆོད།། རྣལ་འབྱོར་ཏིང་འཛིན་དྲོད་ཉུང་ཞིང། ། དགེ་སྡིག་ལས་ཀྱིས་བག་ཆགས་ལྟ།། དེ་ཡི་དུས་སུ་ཁྱེད་རྣམས་ཀྱིས།། ང་ཡི་འཁོར་རྣམས་བསྐྱང་བ་དང།། དམ་ཚིག་ལྡན་པ་བསྲུང་བ་དང།། ལྟ་བ་ཅན་ལ་གུས་པ་དང།། སྤྱོད་པ་ཅན་རྣམས་བསྲུང་བར་ཤིས། ། དམ་ཉམས་གསད་པར་འོས་པ་ནི།། དཀོན་མཆོག་གསུམ་ལ་གནོད་པ་དང།། སློབ་དཔོན་སྨོད་པར་བྱེད་པ་དང།། དམ་ཚིག་མཆེད་ལས་འཁུས་པ་དང།། སྡིག་ཅན་ཡོངས་ལ་གནོད་པ་དེ།། མྱུར་དུ་གསོད་པའི་ཕོ་ཉར་བྱོས། ། དེ་ནས་འཁོར་དེར་འདུས་པ་རྣམས་ཀྱིས་ཤིན་ཏུ་བསྟོད་ཅིང་ཐམས་ཅད་བཀའ་ཉན་པར་གྱུར་ནས།། རྣལ་འབྱོར་དབང་ཕྱུག་ཆེན་མོའི་ཐད་དུ་འདུས་ནས།། རྡོ་རྗེ་ཐེག་པ་ཆེན་པོའི་སྲུངས་མར་གྱུར་ཏེ་རྒྱུད་དག་པའི་ཚུལ་གྱིས་བྱིན་གྱིས་བརླབས་སོ། ། དཔལ་ཐོད་པ་ནག་པོ་ཆེན་པོའི་རྒྱུད་ལས། དུད་འགྲོའི་འཇིག་རྟེན་རྣམ་པར་བཏུལ་བ་སྟེ་ལེའུ་བཅུ་དྲུག་པའོ།།།། དེ་ནས་རྡོ་རྗེ་ལྷ་མོ་ནག་མོ་ཆེན་མོས་འཁོར་བྱེ་བ་དུང་ཕྱུར་དང་བཅས་ཏེ། ཡི་དགས་ཀྱི་འཇིག་རྟེན་དུ་རྣམ་པར་རྒྱུ་ཞིང་རྣམ་པར་སོང་ངོ།། ཡི་དགས་ཀྱི་ཞིང་དང།། ཁམས་དང། མཚན་ཉིད་ནི་འདི་ལྟ་སྟེ།། ཡི་དགས་ནམ་མཁའ་ལ་རྒྱུ་བ་མཐུ་བོ་ཆེའི་རིགས་བསམ་གྱིས་མི་ཁྱབ་པ་གཟུགས་མི་འདྲ་བ་ཁ་དོག་ཐ་དད་པ་དང། ལས་དང་བསོད་ནམས་ལས་གྲུབ་པའི་ང་རྒྱལ་ཅན་རྣམས་དང། ས་གཞི་དང། གླིང་བར་དང། མུན་པ་དང། གྲིབ་མ་དང། ཚལ་གྱི་ནང་ན་འདུག་པའི་རིགས་སེར་སྣའི་རྣམ་པར་སྨིན་པ་ལ་ཤས་ཆེར་གྱུར་པ། ལུས་ཉོན་མོངས་པའི་རང་བཞིན་ཅན་སོ་སོའི་སྡུག་བསྔལ་མི་འདྲ་བ་སྟེ་ཚ་ན་མང་པོས་གདུངས་པ། རང་གི་ཤེས་པ་འཁྲུལ་བའི་དྲ་བ་དང་རྒྱ་མདུད་དང། སྲིད་པའི་ཕུར་པ་ཆེན་པོས་བཏབ་སྟེ་འདུག་པ་ལྟར་སྟོན་པ། དེ་དག་འདུལ་བའི་གཉེན་པོ་ཆ་འདྲ་བའི་སྤྲུལ་པ་ཁྱད་པར་དང་བཅས་པར་གྱུར་ཏོ།། དེ་ནས་དཔལ་ལྷ་མོ་ཆེན་མོས་ཡི་དྭགས་ཀྱི་སྒྲིབ་པ་སྦྱང་པའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་གསུངས་པའི་གསང་སྔགས་འདི་གསུངས་སོ།། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་ར་གྟོ་མེ་བྷ་བ། སུ་ཏོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡད་ཙྪ་སརྦ་ཀརྨ་སུ་ཙ་མེ། ཙིཏྟཾ་ཤྲི་ཡང་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བན་སརྦ་ཏ་ཐཱ་ག་ཏ་བཛྲ་མྨེ་མུ་ཉྩ་བཛྲྀ་བྷཱ་བ་མ་ཧཱ་ས་ཡ་ས་ཏྭ་ཨ། དེ་ལྟར་ཡི་དྭགས་ཀྱི་ཚོགས་ཐམས་ཅད་ཀྱང་སྒྲིབ་པ་སྦྱངས་ཏེ་དག་པར་བྱས་ནས། རྡོ་རྗེ་ཐེག་པ་ཆེན་པོའི་སྲུངས་མ་དང། རྣལ་འབྱོར་གྱི་གྲལ་དུ་བཀོད་དོ།། དེ་ནས་ཡི་དྭགས་ཀྱི་ཚོགས་ཀྱིས་བསྟོད་པ། སངས་རྒྱས་སྟོང་གི་བསྟན་པའི་གདུང་འཛིན་པ། ། གསང་སྔགས་འཁོར་སྐྱོང་འགྲོ་བ་འདུལ་མཛད་ཅིང།། ཆོས་དང་རྫས་རྣམས་མི་འཇིག་སྟེར་མཛད་མ།། སྦྱིན་པའི་བདག་མོ་ཁྱོད་ལ་ཕྱག་འཚལ་བསྟོད།། དམ་པ་རྣམས་དང་འཐུན་པའི་དོན་མངའ་བ། ། སེམས་ཅན་དོན་རྣམས་མཐུན་པར་འདྲེན་མཛད་ཅིང།། དོན་དང་འཐུན་པས་དོན་མཐུན་སྨོན་ལམ་ཅན།། དོན་མཐུན་ཆོ་འཕྲུལ་ཁྱོད་ལ་ཕྱག་འཚལ་བསྟོད།། ཐོག་མ་བར་དང་ཐ་མ་དགེ་སེམས་ཀྱིས། ། གང་གཟུགས་ཇི་ལྟར་འོས་པའི་རྣ་བ་ལ།། མཐུན་པའི་ཚིག་དང་གསུང་གིས་འདུལ་མཛད་མ།། སྙན་པར་སྨྲ་བ་ཁྱོད་ལ་ཕྱག་འཚལ་བསྟོད།། དཔལ་ཐོད་པ་ནག་པོ་ཆེན་པོའི་རྒྱུད་ལས།། ཡི་དྭགས་ཀྱི་འཇིག་རྟེན་བཏུལ་བ་སྟེ་ལེའུ་བཅུ་བདུན་པའོ། །།། དེ་ནས་དཔལ་རྡོ་རྗེ་མཁའ་འགྲོ་མས་འཁོར་བྱེ་བ་དུང་ཕྱུར་དང་བཅས་ཏེ། དམྱལ་བའི་འཇིག་རྟེན་དུ་རྣམ་པར་སོང་ངོ།། འཇིག་རྟེན་དེ་ནི་འདི་ལྟ་སྟེ།། མི་དགེ་བའི་རྣམ་པར་སྨིན་པའི་ངོ་བོ་སྡུག་བསྔལ་གྱི་རྒྱ་མཚོ་ཆེན་པོ་མཐའ་ལ་ཐུག་པ་མེད་པ་ལ་གནས་པ་དང། དེ་ལྟ་བུའི་སྤྲུལ་པའི་གཟུགས་བརྙན་ཁྱད་པར་ཅན་རྣམས་དང་ལྡན་པར་གྱུར་ཏོ།། དེ་ནས་དཔལ་ལྡན་མཁའ་འགྲོ་མས། སྡིག་པའི་ཚོགས་སྦྱངས་བའི་གསང་སྔགས་ཀྱི་དོན་བཤད་པ།། མི་དགེ་བའི་རྣམ་སྨིན་སྦྱང་བའི་ཕྱིར།། རྒྱལ་བས་གསུངས་པའི་ཡི་གེ་ནི།། རྒྱལ་བ་ང་ཡིས་བརྟན་པར་བྱ།། ཨོཾ་ནི་རྒྱལ་བ་རྣམས་ཀྱི་སྐུ། ། བཛྲ་ས་ཏྭ་ཁྱོད་བརྗོད་པས།། རྡོ་རྗེ་སེམས་དཔའ་ཉིད་དུ་འགྱུར།། དམ་ཚིག་གིས་མཉེས་ས་མ་ཡ།། མ་ནུ་པ་ལ་ཡ་བརྗོད་པས།། དམ་ཚིག་སྟོབས་ཀྱི་ཟིལ་གྱིས་གནོན།། བཛྲ་སད་ཏྭ་ཁྱབ་པའི་མཚན། ། ཏྭེ་ནོ་པ་ཏིཥྛ་བརྗོད་པས།། མཉེས་བྱེད་སྤྱོད་པ་རླབས་པོ་ཆེ།། དྲྀ་ཌྷོ་མེ་བྷ་ཞེས་བརྗོད་པས་ནི།། དེ་འདྲའི་ཐབས་ཆེན་བདག་ལ་ནུས།། སུ་པོ་ཥྱོ་མེ་བྷ་བ་ནི།། རྣམ་ཐར་མཆོག་གི་བདག་ཉིད་ཡིན།། ཨ་ནུ་རགྟོ་མེ་བྷ་བ། ། མི་རྟོག་གནས་སུ་བདག་ཉིད་འགྱུར།། སུ་ཏོ་ཥྱོ་མེ་བྷ་བ་ཡང།། གཉིས་སུ་མེད་པའི་བདག་ཉིད་ཡིན།། སརྦ་སིདྡྷི་མེ་ཞེས་པ།། དངོས་གྲུབ་ཐམས་ཅད་བདག་ལ་འདུས།། པྲ་ཡད་ཙྪ་ནི་དེ་ཚད་མེད།། དེ་ཡི་བྱིན་བརླབས་བསྟན་པ་ཡིན། ། སརྦ་ཀརྨ་ཞེས་བརྗོད་པས།། ལས་ཀྱི་འབྲས་བུ་རྣམ་དག་པའི།། རྗེས་སུ་བདག་ཉིད་དག་པ་ཡིན།། ས་ཙ་མེ་བྱིན་ཚད་མེད་གསལ།། དེ་ལྟར་བྱང་བྱང་ཆུབ་སེམས་ཙིཏྟཾ།། ཤྲི་ཡང་ཀུ་རུ་ཧཱུཾ་བརྗོད་པས། ། བདག་གི་ལུས་ལས་དེ་ལྟར་གྲུབ།། ཧ་ཧ་ཧ་ཧ་གཉིས་མེད་བཞད།། ཧོ་ནི་གཉིས་མེད་གཉིས་ཆེན་པོ།། བྷ་ག་ཝན་གྱི་མཚན་ཉིད་ནི།། བཅོམ་ལྡན་འདས་དང་ཐ་དད་མིན།། སརྦ་ཏ་ཐཱ་ག་ཏ་དང།། བཛྲ་མྨེ་མུ་ཉྩ་ནི།། ཐམས་ཅད་དེ་བཞིན་གཤེགས་རྡོ་རྗེ།། བཛྲ་སྭ་བྷ་བ་མ་ཧཱ་དང།། ས་མ་ཡ་དང་སྭཱ་ཧཱ་ཨ།། རྡོ་རྗེ་མཛད་དུ་གསོལ་བ་ཡིན།། དེ་ནས་རབ་ཏུ་གསུངས་པ་ནི།། སྔོན་འདས་དུས་ན་གསད་སོགས་པས། ། དེ་ཉིད་དམྱལ་བར་འདིར་སྐྱེས་ནས།། ཁྱོད་ལ་གནོད་པ་མ་ཡིན་ཏེ།། དེ་ཡི་རྣམ་པར་སྨིན་པ་ནི།། ཤེས་པ་འཁྲུལ་བས་ཡུལ་འདི་མཐོང།། གནོད་པའི་དམྱལ་དཔོན་རྗེ་བོ་ནི།། དེ་ཉིད་སེམས་ཅན་ཡིན་གྱུར་ན། ། དེ་ཡི་སྡིག་པ་གང་དུ་འགྲོ།། གང་དུ་དེ་ཡི་རྣམ་སྨིན་ནི།། རྒྱལ་བས་གང་དུ་མ་གསུངས་སོ།། གནོད་བྱེད་སེམས་ཅན་ཡིན་ན་གོ། ཐུག་པ་མེད་པར་ཅིས་མི་འགྱུར།། རང་སེམས་ངེས་པར་འཁྲུལ་ཡིན་པས།། ཆོས་ཉིད་རབ་ཏུ་ཤེས་པས་བྱོས། ། ཁྱེད་རྣམས་མ་འོངས་ཆོས་ཆེན་ལ།། རབ་ཏུ་སྤྱོད་པར་གྱུར་པ་ནི།། ཁྱིམ་གྱི་ཐ་སྟག་དེ་ལ་ནི།། འཁོར་ལོ་རྡོ་རྗེ་རིན་པོ་ཆེ།། པདྨ་རྒྱ་གྲམ་གཙོ་བོ་དང།། བྷ་ག་ཁ་ཊྭཱཾ་རལ་གྲི་དང།། དབུ་རྒྱན་ཅོད་པན་ལྷ་ཡི་རིགས། ། རྣལ་འབྱོར་ཕྱག་རྒྱ་འཛིན་པར་འགྱུར།། ང་ཡི་འཁོར་རྣམས་བསྐྱང་བ་དང།། རིགས་ཀྱང་འཛིན་པར་ཤིན་ཏུ་བྱོས།། དེ་ནས་དམྱལ་བའི་འཇིག་རྟེན་ཐམས་ཅད་ཀྱིས་བསྟོད་པ། བྱམས་པའི་རང་བཞིན་ཕན་པའི་སེམས། ། གཞན་གྱི་རྒྱུད་རྣམས་ཆེར་སྐྱོབ་སྙིང་རྗེ་ཅན།། གཞན་གྱི་དོན་ཐོབ་དགའ་བ་ཅན།། ཟུག་རྔུ་ཀུན་དང་བྲལ་བའི་བཏང་སྙོམས་ལ།། ཕྱག་འཚལ་བསྟོད་དེ་རབ་ཏུ་གུས་ཕྱག་འཚལ། ། དེ་ལྟར་དམྱལ་བའི་འཇིག་རྟེན་ཐམས་ཅད་དགའ་བར་བྱས་ཏེ། རྡོ་རྗེ་ཐེག་པ་ཆེན་པོའི་སྲུང་མ་དང། རྣལ་འབྱོར་གྱི་གྲལ་དུ་བཀོད་དོ།། དཔལ་ཐོད་པ་ནག་པོ་ཆེན་པོའི་རྒྱུད་ལས། དམྱལ་བའི་འཇིག་རྟེན་བཏུལ་བ་སྟེ་ལེའུ་བཅོ་བརྒྱད་པའོ། །།། དེ་ནས་དཔལ་རྡོ་རྗེ་ལྷ་མོ་ནག་མོ་ཆེན་མོས་འཁོར་བྱེ་བ་དུང་ཕྱུར་དང་བཅས་ཏེ། ལྷ་མ་ཡིན་གྱི་འཇིག་རྟེན་དུ་སོང་ངོ།། དེའི་ཚེ་ལྷ་མ་ཡིན་གྱི་རྒྱལ་པོ་འཁོར་དང་བཅས་པས། ། ལྷ་མ་ཡིན་གྱི་ང་རྒྱལ་ཉོན་མོངས་པ་རྣམས་ལས་ཆེར་གྲུབ་རྣམས་ཀྱིས།། མགྲིན་གཅིག་ཏུ་དཔལ་ལྡན་རྡོ་རྗེ་མཁའ་འགྲོ་མ་ལ་འདི་སྐད་ཅེས་གསོལ་ཏོ།། དཔལ་ལྡན་བྱང་ཆུབ་སེམས་དཔའ་ཁྱོད་ཀྱིས་ནི། ། བདག་ཅག་བཏུལ་ནས་ཐར་པའི་ལམ་ལ་བཀོད།། སྐུ་གསུང་ཐུགས་ཀྱི་གཟི་བརྗིད་མ་བཟོད་པས།། བཀའ་ཉོན་ཆོས་སྐྱོང་ཐེག་ཆེན་ཞིང་ལ་མཆིས།། སྲིད་པ་འདི་ནས་ཞིང་ཁམས་མཐར་ཕྱིན་དུ། ། བདག་ཅག་བསྐྱང་ཕྱིར་བསྐུལ་ཞིང་གསོལ་བ་ནི།། ཁྱོད་ཀྱི་ཐད་དུ་སྨོན་ལམ་བཏབ་པ་ནི།། ཚེ་རབས་ཀུན་ཏུ་དགེ་བའི་བཤེས་གཉེན་མཛོད།། ཡིད་བཞིན་ནོར་བུ་བུམ་པ་དཔག་བསམ་སོགས།། སེམས་ལྡན་མེད་ཀྱང་གཞན་གྱི་དོན་འབྱུང་ན། ། སྙིང་རྗེ་བརླན་པའི་དཔལ་ལྡན་བྱང་ཆུབ་སེམས། ཁྱད་པར་ཅི་ཞིག་སྨོས་ཏེ་ཕྱག་འཚལ་བསྟོད།། ས་ཆུ་མེ་རླུང་འབྱུང་བའི་སྟོབས་ཀྱིས་ཀྱང།། འཇིག་རྟེན་འདེགས་བྱེད་སེམས་མེད་འདི་འདྲ་ན། ། སྨོན་ལམ་དབང་གིས་འགྲོ་བའི་རྟེན་འགྱུར་བ།། ཁྱོད་ཀྱི་རྣམ་ཐར་ཁྱད་པར་མེད་ཀྱང་བསྟོད།། བདུད་དང་སྲིན་པོ་གཤིན་རྗེ་གནོད་སྦྱིན་སོགས།། སྙིང་རྗེ་ཆུང་ཡང་མོས་པས་བརྟེན་ནས་ཕན།། དཔལ་ལྡན་སྙིང་རྗེའི་ང་རྒྱལ་ཅན་ཁྱོད་ལ། ། མོས་པས་སྐྱོབས་ཀྱང་ཆེར་སྐྱོབ་མཛད་ཕྱིར་བསྟོད།། འཇིག་རྟེན་འདི་ན་སྲིད་པའི་འཁོར་ལོ་རྣམས།། བྱེད་པ་མེད་ཀྱང་ལས་ཀྱི་དབང་བཙན་པས།། སྔགས་དང་ཕྱག་རྒྱ་ཏིང་འཛིན་སྨོན་བརླན་ན། ། འཁོར་བའི་ཕ་རོལ་སོན་པར་མཛད་ཕྱིར་བསྟོད།། ལྟས་ངན་བདུད་དང་མུ་སྟེགས་ལ་བརྟེན་ནས།། འཇིག་རྟེན་འདི་ཡི་དྲེགས་པ་ཐང་གཅིག་བསྐྱེད།། བདག་ཅག་དམ་པ་ཁྱོད་ལ་སྐྱབས་གསོལ་བས། ། བདག་དོན་ཕུན་སུམ་ཚོགས་པ་སྒྲུབ་ཕྱིར་བསྟོད།། འཇིག་རྟེན་དངོས་པོ་སྟོབས་ཀྱི་ཁྱད་པ་ནི།། རྟེན་ཅིང་འབྲེལ་བའི་ནུས་པ་དཔག་མེད་ནས།། ཤེས་རབ་སྙིང་རྗེའི་བདག་ཉིད་ཅན་ཁྱོད་ལ།། རྟེན་ན་མཆོག་ཏུ་གྲུབ་ཕྱིར་ཕྱག་འཚལ་བསྟོད། ། དེ་ནས་ལྷ་མ་ཡིན་ཐམས་ཅད་ཡང་དག་པའི་ལམ་ལ་བཞག་པ་དང། སངས་རྒྱས་ཀྱི་བསྟན་པ་ལ་བཀོད་ནས། རྡོ་རྗེ་ཐེག་པ་ཆེན་པོའི་སྲུང་མ་དང། རྣལ་འབྱོར་གྱི་གྲལ་དུ་བཀོད་དོ། ། དཔལ་ཐོད་པ་ནག་པོ་ཆེན་པོའི་རྒྱུད་ལས། ལྷ་མ་ཡིན་གྱི་འཇིག་རྟེན་བཏུལ་བ་སྟེ་ལེའུ་བཅུ་དགུ་པའོ།།།། དེ་ནས་དཔལ་རྡོ་རྗེ་མཁའ་འགྲོ་མ་ཆེན་མོ་ལ་འཁོར་བྱེ་བ་དུང་ཕྱུར་དང་བཅས་ཏེ། སླར་དང་པོའི་གནས་བྱང་ཤར་མཚམས་རི་རབ་ཀྱི་སྟེང་ཡོངས་སུ་ཤིང་གི་གནས་མཆོག་ཏུ་སོང་ངོ། ། དེར་འཁོར་དཔག་ཏུ་མེད་པ་མཐུ་དང་ལྡན་པའི་དྲག་པོ་ལྷ་མ་སྲིན་སྡེ་བརྒྱད་ལ་སོགས་པས་བསྐོར་ཏེ་འདུག་པ་དང། ལྷའི་དབང་པོ་ལ་སོགས་པས་དཔལ་གྱི་ལྷ་མོ་ལ་མཆོད་པ་རྣམ་པ་ལྔས་མཆོད་པ་དང། དེ་ནས་དཔལ་གྱི་ལྷ་མོས་འཁོར་རྣམས་ལ་གསུངས་པ། མཆོད་པ་རྣམ་ལྔ་ཞེས་བྱ་བ། སྔོན་འདས་པའི་བསྐལ་པ་དཔག་ཏུ་མེད་པའི་སྔོན་རོལ་ནས། བདག་གི་དགེ་བའི་བཤེས་གཉེན་དང། འཕགས་པ་སྤྱན་རས་གཟིགས་ཀྱི་དབང་པོས་ང་ལ་བཤད་པ། ངས་ཁྱོད་ལ་བཤད་གྱིས་ཉོན་ཅིག་མཆོད་པ་རྣམ་པ་ལྔ་འདི་ལྟ་སྟེ། སྔགས་དང། ཕྱག་རྒྱ་དང། ཏིང་ངེ་འཛིན་དང། རྫས་དང། ཚིག་བཤད་ལྔའོ།། དེ་ནི་ལམ་ལྔ་ལ་སྦྱར་བ་སྟེ། དེ་རྣམས་ལུས་ངག་ཡིད་གསུམ་གྱི་བསག་པ་ནི། སྦྱོར་བ་དང་ཐེག་པ་ཆེན་པོའི་ཚོགས་ཀྱི་ལམ་དུ་འགྱུར་རོ།། དེ་རྣམས་ལ་ལུས་ངག་ཡིད་གསུམ་གྱིས་སྦྱོར་བ་ནི། ཐེག་པ་ཆེན་པོའི་སྦྱོར་ལམ་དུ་ཤེས་པར་བྱ། དེ་རྣམས་ཀྱི་ལུས་ངག་ཡིད་གསུམ་གྱི་རིག་པ་ནི། ཐེག་པ་ཆེན་པོའི་ཚོགས་ཀྱི་ལམ་དུ་འགྱུར་རོ།། དེ་ལ་རྫས་ནི་སྦྱིན་པའི་རོལ་ཏུ་ཕྱིན་པ་ཡིན་པས། ས་དང་པོ་བསྒོམ་པ་དང། སྔགས་ནི་ཚུལ་ཁྲིམས་ཡིན་པས། ས་གཉིས་པ་སྒོམ་པ་དང། ཕྱག་རྒྱ་བཟོད་པ་ཡིན་པས། ས་གསུམ་པ་བསྒོམ་པ་དང། ཚིག་བཤད་ནི་བརྩོན་འགྲུས་ཡིན་པས། ས་བཞི་པ་བསྒོམ་པ་དང། ཏིང་ངེ་འཛིན་ནི་བསམ་གཏན་ཡིན་པས། ས་ལྔ་པ་བསྒོམ་པ་དང། དེ་རྣམས་སོ་སོར་མ་འདྲེས་པ་ནི་ཤེས་རབ་ཡིན་པས། ས་དྲུག་པ་བསྒོམ་པ་དང། དེ་ཐམས་ཅད་ནི་བྱང་ཆུབ་པའི་ཐབས་སུ་གྱུར་པས། ས་བདུན་པ་བསྒོམ་པ་དང། དེ་རྣམས་ལུས་ངག་ཡིད་གསུམ་གྱི་སྨོན་པ་བྱང་ཆུབ་སེམས་སུ་གྱུར་པས། ས་བརྒྱད་པ་བསྒོམ་པ་དང། དེ་ལས་དད་པ་ལ་སོགས་པའི་སྟོབས་སྐྱེས་པས། ས་དགུ་པ་བསྒོམ་པ་དང། དེ་རྣམས་སྦྱར་གཞག་པའི་འབྲས་བུ་ཡེ་ཤེས་སུ་གྱུར་པས། ས་བཅུ་པ་སྒོམ་པ་ནི། ཐེག་པ་ཆེན་པོའི་བསྒོམ་ལམ་དུ་འགྱུར་རོ།། དེའི་མཐར་ཕྱིན་པའི་འབྲས་བུ་ནི། སངས་རྒྱས་ཀྱི་ས་ལ་གཟུགས་རྣམ་པར་སྣང་མཛད། རྣམ་པར་ཤེས་པ་རྡོ་རྗེ་སེམས་དཔའ། ཚོར་བ་རིན་ཆེན་འབྱུང་ལྡན། འདུ་ཤེས་སྣང་བ་མཐའ་ཡས། འདུ་བྱེད་དོན་ཡོད་གྲུབ་པ་ནི་མཐར་ཕྱིན་པའོ།། རིགས་ཀྱི་བུ་ཆོས་ཀྱང་འདི་ལས་གྱུར་པ་སྟེ། ཁྱོད་ཀྱིས་ཀྱང་ཡང་དག་པར་སྦྱོར་ཅིག། མ་འོངས་པའི་དུས་ན་བསྟན་པ་ལ་གནོད་པ་རྣམས་ལ། ཐོད་པ་ནག་པོའི་ནང་དྲག་པོས་བཀང་སྟེ་དཀྱིལ་འཁོར་དུ་བཀོད་དེ། བྱང་རི་གཉན་པོའི་ཁ་ནས་འཕང་བར་བྱའོ།། དེ་ནས་ལྷ་རྣམས་ཀྱིས་བསྟོད་པ། ཆོས་དབྱིངས་རྣམ་དག་ཐུགས་སུ་ཆུད་པའི་ཡུམ།། མངོན་སྤྱོད་རྒྱལ་བ་མང་པོས་བྱྀན་བརླབས་པས།། དུས་འདིར་འགྲོ་དྲུག་གྱེན་དུ་འདྲེན་པའི་དཔལ།། ལ་ལར་དྲག་པོ་རྣམས་ཀྱི་ཆུང་མར་སྟོན། ། གདུག་པའི་མ་དང་འཇིགས་པའི་སྲིང་མོ་དང།། ལ་ལར་ཚོགས་ཀྱི་རྗེ་མོ་མཐུན་པའི་གཟུགས།། ཡོན་ཏན་ཆ་ལས་ཅི་ཡང་འགྱུར་བའི་གཟུགས།། ཟུག་རྔུ་ཟབ་མོ་སྟོན་ལ་ཕྱག་འཚལ་བསྟོད། ། དཔལ་ཐོད་པ་ནག་པོ་ཆེན་པོའི་རྒྱུད་ལས། ལྷའི་འཇིག་རྟེན་བཏུལ་བ་སྟེ་ལེའུ་ཉི་ཤུ་པའོ།།།། དཔལ་ཐོད་པ་ནག་པོ་ཆེན་པོའི་རྒྱུད་རྫོགས་སོ།།།། རྒྱ་གར་སྐད་དུ།
CLOSE WINDOW