རྒྱ་གར་སྐད་དུ། ཡཀྵ་རཏྣ་སིདྷི་ཕ་ལ་སཱུརྱ་ཙནྡྲ་གུ་ཧྱ་ཧྲྀ་ད་ཡ་ན་མ་མ་ཧཱ་ཏན་ཏྲ་རཱ་ཛ། བོད་སྐད་དུ། གནོད་སྦྱིན་རིན་པོ་ཆེ་བཟང་པོའི་དངོས་གྲུབ་ཉི་ཟླ་གསང་བའི་སྙིང་པོ་རྒྱུད་ཀྱི་རྒྱལ་པོ་ཆེན་པོ། བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་གསང་བའི་བདག་པོ་དྲེགས་པ་ཕྱག་ན་རྡོ་རྗེ་ཆེན་པོ་ཉིད། རི་རྒྱལ་ལྷུན་པོའི་རྩེ་མོ་གནོད་སྦྱིན་འདུས་པའི་རྫོང་རྩུབ་འགྱུར་གྱི་ཚལ་ཆེན་པོ་ན། ། འཁོར་འཇིག་རྟེན་དང་འཇིག་རྟེན་ལས་འདས་པའི་ཚོགས་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་བའི་ཚོགས་རྣམས་ཐབས་ཅིག་ཏུ་བཞུགས་པ་ནི་འདི་ལྟ་སྟེ། རྡོ་རྗེ་འདུས་པ་དང། རྡོ་རྗེ་སྟོབས་ཆེན་དང། རྡོ་རྗེ་ཕུར་བུ་དང། རྡོ་རྗེ་བེ་ཅོན་དང། རྡོ་རྗེ་གཏུམ་པོ་དང། རྡོ་རྗེ་ཁྲོས་པ་དང། རྡོ་རྗེ་འབེབས་པ་དང། རྡོ་རྗེ་འཇོམས་པ་ལ་སོགས་པ་སངས་རྒྱས་དང། བྱང་ཆུབ་སེམས་དཔའི་ཚོགས་དུ་མ་དང། གཞན་ཡང་དཔལ་ཚངས་པ་དང།། བརྒྱ་བྱིན་དང། རྒྱལ་པོ་ཆེན་པོ་བཞི་དང། ཕྱོགས་སྐྱོང་བཅུ་ལ་སོགས་ཏེ། ལྷ་དང། ཀླུ་དང། ལྷ་མ་ཡིན་དང། གནོད་སྦྱིན་གྱི་ཚོགས་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་བ་རྣམས་དང་ཐབས་ཅིག་ཏུ་བཞུགས་སོ། ། དེའི་ཚེ་དེའི་དུས་ན་བཅོམ་ལྡན་འདས་དཔལ་གསང་བའི་བདག་པོས་ལོ་ཀའི་མ་རུངས་པ་ཐམས་ཅད་འདུལ་བའི་ཕྱིར།། བདུད་ཀྱི་དཔུང་ཐམས་ཅད་རྣམ་པར་འཇིགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས། ། ཞབས་སྟངས་ཐབས་སུ་བགྲད་དེ་སྤྱན་སྡང་མིག་ཏུ་གཟིགས་ནས་རྡོ་རྗེ་ནམ་མཁའ་ལ་གསོར་ཞིང། ཨོཾ་ནཱ་ཤ་ཡ་སརྦ་དུཥྟན་ཏ་ཀ་ཧ་མ་ཙ་བྷ་སྨི་ཀུ་རུ་ཧཱུཾ་ཧཱུཾ་ཕཊ། ཅེས་གསུངས་པ་ཙམ་གྱིས་བྷ་ག་ཝན་གསང་བའི་བདག་པོའི་ཐུགས་ཁ་ནས་རྡོ་རྗེ་རབ་ཏུ་འབར་བ་མང་པོ་བྱུང་སྟེ། ལོ་ཀའི་མ་རུངས་པ་ཐམས་ཅད་བཏུལ་ཞིང་ཚར་བཅད་ནས་སླར་འདུས་ཏེ། གསང་བའི་བདག་པོ་ཉིད་ཀྱི་དབུའི་གཙུག་ཏུ་ནུབ་པར་གྱུར་ཏོ།། ཡང་དེའི་ཚེ་དེའི་དུས་སུ་ལོ་ཀའི་ལྷ་དང། ཀླུ་དང། གནོད་སྦྱིན་སྲིན་པོའི་ཚོགས་ཐམས་ཅད་ཀྱིས་རང་རྟགས་སྲོག་གི་སྙིང་པོ་མདོངས་གསོལ་དུ་ཕུལ་ནས། བྱང་ཆུབ་མཆོག་ཏུ་སེམས་བསྐྱེད་དེ་སེམས་ཅན་གྱི་འགྲོ་དོན་བྱ་བར་ཁས་བླངས་ཤིང་དམ་བཅས་སོ།། ཡང་དེའི་ཚེ་གནོད་སྦྱིན་ཨ་པ་ར་ཙིཏྟ་ཞེས་བྱ་བ་འཁོར་ནོར་ལྷ་ཆེན་པོ་བརྒྱད་དང་བཅས་པ་སྟན་ལས་ལངས་ཏེ། བཅོམ་ལྡན་འདས་གསང་བའི་བདག་པོའི་སྤྱན་སྔར་ཐལ་མོ་སྦྱར་ནས་འདི་སྐད་ཅེས་གསོལ་ཏོ།། ཀྱེ་བྷ་ག་ཝན་གསང་བའི་བདག་པོ་ཆེན་པོ། དཔལ་སྲིད་པ་གསུམ་ལས་རྣམ་པར་རྒྱལ་བ་བདག་ཅག་ལ་བསྐྱབ་ཏུ་གསོལ། ། བདེ་བར་གཤེགས་པས་བསྐྱབ་ཏུ་གསོལ། ཞེས་བཟླས་ཞིང་འདུད་པའི་ཚུལ་གྱིས་སྤྱན་སྔ་ནས་འཁོད་པར་གྱུར་ཏོ།། དེ་ནས་དེ་ལ་བྷ་ག་ཝན་གསང་བའི་བདག་པོས་བཀའ་སྩལ་པ། ཀྱེ་གནོད་སྦྱིན་ནོར་ལྷའི་ཚོགས་ཐམས་ཅད་ཤིན་ཏུ་ལེགས་པར་ཉོན་ཅིག། མ་འོངས་པའི་དུས་ལྔ་བརྒྱ་པའི་ཐ་མ་ལ། སེམས་ཅན་དབུལ་ཞིང་ཕོངས་པ་དང། སྡུག་ཅིང་ཕོངས་པ་ཉོན་མོངས་པ་རྣམས་ཀྱི་མགོན་སྐྱབས་གྱིས་ཤིག། དེ་དག་ལ་བཟའ་བ་དང། བཅའ་བ་དང། བཏུང་བ་ལ་སོགས་པ་ལོངས་སྤྱོད་ཕུན་སུམ་ཚོགས་པའི་དངོས་གྲུབ་བྱིན་ཅིག། གལ་ཏེ་ཁྱེད་རྣམས་ཀྱིས་ངའི་བཀའ་དང་དམ་ཚིག་ལས་འགལ་བ་བྱས་ན། ། སྙིང་ཁྲག་ཁ་ནས་སྐྱུག་ཅིང་མགོ་ཚལ་པ་བརྒྱར་འགས་ཏེ་དམྱལ་བའི་གནས་སུ་སྐྱེ་བར་གྱུར་ཏ་རེ། ཞེས་བཀའ་སྩལ་ནས། སྤྱི་བོར་རྡོ་རྗེ་བཞག་ནས་དམ་ཕོག་གོ། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བའི་སྙིང་པོའི་རྒྱུད་ལས། གླེང་བཞིའི་ལེའུ་སྟེ་དང་པོའོ།།།། དེ་ནས་ཡང་དེའི་ཚེ་གནོད་སྦྱིན་ཨ་པ་ར་ཙིཏྟ་འཁོར་ནོར་ལྷ་ཆེན་པོ་བརྒྱད་དང་བཅས་པ། བྷ་ག་ཝན་གསང་བའི་བདག་པོའི་ཞབས་ལ་སྤྱི་བོས་ཕྱག་འཚལ་ཏེ། ཐམས་ཅད་ཀྱིས་ནེ་ལེའི་རྐྱལ་པ་རིན་པོ་ཆེ་སྣ་བདུན་གྱིས་བཀང་པ་རིག་པའི་མེ་ཏོག་ཕྱག་ཏུ་ཕུལ་ནས་མགྲིན་གཅིག་ཏུ་འདི་སྐད་གསོལ་ཏོ།། ཀྱེ་མ་གསང་བདག་རྡོ་རྗེ་འཆང། ། བདག་ཅག་རྣམས་ལ་དགོངས་སུ་གསོལ།། ཇི་ལྟར་དུས་གསུམ་མགོན་པོ་རྣམས།། བྱང་ཆུབ་མཆོག་ཏུ་སེམས་བསྐྱེད་ནས།། དེ་བཞིན་བླ་མེད་བྱང་ཆུབ་སེམས།། མཐའ་ཡས་སེམས་ཅན་མ་ལུས་རྣམས། ། དབུལ་འཕོངས་སྡུག་བསྔལ་བསལ་བ་དང།། ཕྱི་རབས་རྣལ་འབྱོར་ཐམས་ཅད་ལ།། འབྱོར་པའི་ལོངས་སྤྱོད་ནོར་རྫས་དང།། ཕུན་སུམ་ཚོགས་པའི་དངོས་གྲུབ་བཞིན།། འཁོར་དང་རིགས་རྒྱུད་ཐམས་ཅད་སྤེལ། ། རྒྱུད་འདི་གང་ན་བཞུགས་པའི་སར།། བདག་ཅག་རྣམས་ཀྱིས་བསྲུང་ཞིང་བསྐྱབ།། མདོར་ན་རྒྱུད་འཆང་རྣལ་འབྱོར་དེ།། གཙུག་གི་ནོར་བུ་རིན་ཆེན་ལྟར།། བདག་གིས་རྟག་ཏུ་སྤྱོ་བོར་བཀུར། ། ཅི་བསམ་ལྷུན་གྱིས་གྲུབ་པར་བགྱི།། དེ་ལ་བརྟེན་ནས་སེམས་ཅན་རྣམས།། ཉོན་མོངས་སྡུག་བསྔལ་ཞི་གྱུར་ཅིག། བསོད་ནམས་འགྲོ་བའི་དོན་དུ་བསྔོ།། བླ་མེད་གོ་འཕང་ཐོབ་པར་ཤོག། ཕྱི་རབས་དབུལ་འཕོངས་ཐམས་ཅད་ཀྱི། ། སྡུག་བསྔལ་ཞི་བར་བྱ་བའི་ཕྱིར།། ཡིད་བཞིན་ནོར་བུ་ལྟ་བུ་ཡི།། གསང་སྔགས་འདི་ནི་སུས་ཟློས་པ།། དེ་ཡི་མཐུན་འཇུག་བསྒྲུབ་པའི་ཕྱིར།། ང་ཉི་དེ་ཡི་ཕྱི་བཞིན་འབྲང།། དེ་ཕྱིར་འདི་ལ་བརྩོན་པར་བྱོས། ། ཞེས་བྱང་ཆུབ་མཆོག་ཏུ་སེམས་བསྐྱེད་ནས་མཐའ་ཡས་སེམས་ཅན་གྱི་འགྲོ་དོན་བྱ་བའི་ཁས་བླངས་ཤིང་དམ་བཅའ་འོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། ཨ་པ་ར་ཙིཏྟས་བྱང་ཆུབ་མཆོག་ཏུ་སེམས་བསྐྱེད་པའི་ལེའུ་སྟེ་གཉིས་པའོ། །།། དེ་ནས་བཅོམ་ལྡན་འདས་གསང་བའི་བདག་པོས།། ནོར་ལྷའི་ཚོགས་རྣམས་ལ་བཀའ་སྩལ་པ།། ལྔ་བརྒྱ་དུས་ཀྱི་ཐ་མ་ལ། ། སེམས་ཅན་ཉོན་མོངས་བསོད་ནམས་བྲི།། ནད་དང་སྡུག་བསྔལ་འཚེ་བ་མང།། དེ་དུས་འགྲོ་ལ་ཕན་བྱའི་ཕྱིར།། དབུལ་འཕོངས་འགྲོ་རྣམས་དོན་ཕྱིར་དུ།། ང་ཡིས་ཁྱེད་ལ་བྱིན་གྱིས་བརླབ།། སྲོག་གི་སྙིང་པོ་སྨྲ་བར་གྱིས། ། ཞེས་གསུངས་པ་དང།། གནོད་སྦྱིན་ཨ་པ་ར་ཙིཏྟ་འཁོར་ནོར་ལྷ་ཆེན་པོ་བརྒྱད་དང་བཅས་པས་རང་རང་གི་སྙིང་པོ་སྨྲས་པ། ཨོཾ་ཧྲིཾ་ཛ་ཨ་པ་ར་ཙིཏྟ་ཛ་ཛ། ཨོཾ་མ་ཎི་བྷ་དྲཱ་ཡ་སྭཱ་ཧཱ། ཨོཾ་པཱུ་ར་ན་བྷ་དྲཱ་ཡ་སྭཱ་ཧཱ། ཨོཾ་དྷ་ན་དཱ་ཡ་སྭཱ་ཧཱ། ཨོཾ་བཻ་ཤྲ་མ་ན་ཡེ་སྭཱ་ཧཱ། ཨོཾ་ཧི་ལི་མི་ལི་ནི་སྭཱ་ཧཱ། ཨོཾ་པི་ཙི་ཀུཎྜ་ལི་ནི་སྭཱ་ཧཱ། ཨོཾ་མུ་ཁེ་ན་དྷ་ཡ་སྭཱ་ཧཱ། ཨོཾ་ཙ་རེན་དྲཱ་ཡ་སྭཱ་ཧཱ། ཞེས་ཨ་པ་ར་ཙིཏྟ་དང། གངས་པ་བཟང་པོ་དང། རྣམ་ཐོས་ཀྱི་བུ་དང། ནོར་སྦྱིན་དང། སྔོན་པོ་ཀི་ལི་མི་ལི་དང། དམར་པོ་པི་ཙི་ཀུཎྜ་ལི་དང། སེར་པོ་མུ་ཁེན་དྷ་དང། དཀར་པོ་བ་རན་ཏྲ་རྣམས་ཐམས་ཅད་ཀྱིས་རང་རང་གི་སྙིང་པོ་སྨྲས་ནས། མགྲིན་གཅིག་ཏུ་འདི་སྐད་ཅེས་གསོལ་ཏོ། ། ཀྱེ་མ་གསང་བདག་རྡོ་རྗེ་འཆང།། བདག་ཅག་རྣམས་ནི་ནོར་གྱི་ལྷ།། མཐའ་ཡས་སེམས་ཅན་མ་ལུས་པའི།། དབུལ་འཕོངས་སྡུག་བསྔལ་ཞི་བྱའི་ཕྱིར།། བཀའ་བཞིན་རྗེས་སུ་བསྒྲུབ་པར་བགྱི།། དེ་ལ་བྱིན་གྱིས་བརླབ་ཏུ་གསོལ། ། ཞེས་སྨྲས་ནས་རང་རང་གི་སྟན་ལ་འཁོད་པར་གྱུར་ཏོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པའི་རྒྱུད་ལས། སྲོག་གི་སྙིང་པོའི་ཕུལ་བའི་ལེའུ་སྟེ་གསུམ་པའོ། །།། དེ་ནས་ཡང་གནོད་སྦྱིན་མོ་ཐམས་ཅད་སྟན་ལས་ལངས་ཏེ། མགྲིན་གཅིག་ཏུ་བྷ་ག་ཝན་གསང་བའི་བདག་པོ་ལ་འདི་སྐད་ཅེས་གསོལ་ཏོ།། ཀྱེ་གསང་བའི་བདག་པོ་ཆེན་པོ། ། བདག་ཅག་རྣམས་ཀྱིས་ཀྱང་དཔལ་རྡོ་རྗེ་འཆང་ཁྲོ་བོའི་རྒྱལ་པོ་ཟློས་པ་རྣམས་ཀྱི་བྲན་མོ་དང་བསྙེན་བཀུར་མ་བགྱིས་པའི་ཕྱིར་སྙིང་པོ་འདི་དག་འབུལ་གྱི་བྱིན་གྱིས་བརླབ་ཏུ་གསོལ། ཞེས་གསོལ་ཏེ་རང་རང་གི་སྙིང་པོ་སྨྲས་པ། ཨོཾ་ཤྭི་རི་ཡཀྵི་ནི་སྭཱ་ཧཱ། ཨོཾ་དད་ཏ་ཡེ་སྭཱ་ཧཱ། ཨོཾ་སུ་བྷ་དྲཱི་སྭཱ་ཧཱ། ཨོཾ་གུབ་ཏ་སྟ་ཡེ་སྭཱ་ཧཱ། ཨོཾ་ཨིབ་བྱ་ཡེ་སྭཱ་ཧཱ། ཨོཾ་སྭ་ར་ཤ་ཏྱེ་སྭཱ་ཧཱ། ཨོཾ་ཨརྱ་ཡེ་སྭཱ་ཧཱ། ཨོཾ་ཙཎྜ་ཀ་སྟྱེ་སྭཱ་ཧཱ། ཞེས་རིགས་སྐྱེད་མ་དང། བཟང་མོ་དང། རབ་ཏུ་བཟང་མོ་དང།། སྦས་མ་དང། རབ་ཏུ་སྦས་མ་དང། ལྷ་མོ་དང། དབྱང་ཅན་མ་དང། འཕགས་མ་དང། ཟླ་ཤེལ་ཅན་ནོ་ཞེས་རང་རང་གི་སྙིང་པོ་སྨྲས་པ་དང། བཅོམ་ལྡན་འདས་གསང་བའི་བདག་པོས་དེ་དག་ལ་ལེགས་སོ་ཞེས་བྱ་བ་གནང་སྟེ་ལེགས་སོ་ལེགས་སོ། ། ཁྱེད་རྣམས་ཀྱིས་མ་འོངས་པའི་ཚེ་མ་འོངས་པའི་དུས་ན། རྣལ་འབྱོར་སྒྲུབ་པ་པོ་རྣམས་ཀྱི་བསྙེན་བཀུར་མ་བྱས་པའི་ཕྱིར། རང་རང་གི་སྙིང་པོ་སྨྲས་པ་ནི་ཤིན་ཏུ་རབ་ཏུ་ལེགས་སོ་ཞེས་གནང་བ་མཛད་དོ། ། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བའི་སྙིང་པོའི་རྒྱུད་ལས། གནོད་སྦྱིན་མོ་རྣམས་ཀྱིས་སྲོག་གི་སྙིང་པོ་ཕུལ་བའི་ལེའུ་སྟེ་བཞི་པའོ། །།། དེ་ནས་བཅོམ་ལྡན་འདས་གསང་བའི་བདག་པོ་ལ། གནོད་སྦྱིན་མོ་རྣམས་ཀྱིས་འདི་སྐད་ཅེས་གསོལ་ཏོ།། ཀྱེ་བཅོམ་ལྡན་འདས་གསང་བའི་བདག་པོ་ཆེན་པོ། བདག་ཅག་རྣམས་ཕྱི་མའི་ཚེ་ཕྱི་མའི་དུས་ལྔ་ཐ་མ་ལ། སེམས་ཅན་རྣམས་ཀྱི་དོན་དང། སྒྲུབ་པ་པོ་ལ་བསྙེན་བཀུར་མ་བགྱིས་ན། བདག་ཅག་རིགས་དང་རྒྱུད་དུ་བཅས་པ་ཐམས་ཅད་ཕུང་ཞིང་བརླག་པར་གྱུར། དམ་པའི་ཆོས་སྤོང་བར་གྱུར། དེ་བཞིན་གཤེགས་པ་ཐམས་ཅད་སྨད་པར་གྱུར། བཅོམ་ལྡན་འདས་དཔལ་གསང་བའི་བདག་པོ་ཁྲོ་བོ་ཆེན་པོའི་རྡོ་རྗེས་སྤྱི་བོ་ཁོས་ཤིག། ལན་བརྒྱ་རྣམ་པར་ཤིག་ཅིག། ཤི་ནས་མྱུར་བ་ཉིད་དུ་སེམས་ཅན་དམྱལ་བའི་གནས་སུ་སྐྱེ་བར་གྱུར་ཅིག། ཅེས་རང་དམ་རང་གིས་བཅས་ཤིང་ཁས་བླངས་སོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བའི་སྙིང་པོའི་རྒྱུད་ལས་གནོད་སྦྱིན་མོ་རྣམས་རང་དམ་རང་གིས་བཅས་ཤིང་བྲོ་དོར་བའི་ལེའུ་སྟེ་ལྔ་པའོ། །།། དེ་ནས་ཡང་དེའི་ཚེ་འདུས་པའི་འཁོར་རྣམས་ཀྱི་ནང་ནས་རྡོ་རྗེ་འདུས་པ་ཆེན་པོ་སྟན་ལས་ལངས་ཏེ། གསང་བའི་བདག་པོ་ལ་འདི་སྐད་ཅེས་གསོལ་ཏོ།། ཀྱེ་བཅོམ་ལྡན་འདས་གསང་བའི་བདག་པོ་ཆེན་པོ། གནོད་སྦྱིན་ནོར་ལྷའི་རྒྱལ་པོ་ཨ་པ་ར་ཙིཏྟ་ཞེས་བགྱི་བ་དེ་ལྟར་མཐུ་དང་རྫུ་འཕྲུལ་ཆེ་བ་འདི་རྒྱུ་ཅི་ལས་བྱུང། རྐྱེན་ཅི་ལས་གྱུར།། ཕ་དང་མ་ནི་གང་ལགས། རིགས་ནི་ཅིའི་རིགས། རུས་ནི་ཅིའི་རུས། འདི་སྒྲུབ་ན་ཚུལ་ཅི་ལྟར་སྒྲུབ། གྲུབ་པའི་རྟགས་དང་ཕན་ཡོན་ཇི་ལྟར་འབྱུང། བདག་ཅག་རྣམས་ལ་བསྟན་དུ་གསོལ།། ཞེས་གསོལ་ཏེ་རང་གི་སྟན་ལ་འཁོད་དོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བའི་སྙིང་པོའི་རྒྱུད་ལས། ཞུས་པའི་ལེའུ་སྟེ་དྲུག་པའོ།།།། དེ་ནས་བཅོམ་ལྡན་འདས་གསང་བའི་བདག་པོས། རྡོ་རྗེ་འདུས་པའི་འཁོར་རྣམས་ལ་བཀའ་སྩལ་པ། ཨེ་མ་ཧོ། རྡོ་རྗེ་འདུས་པ་ང་ལ་ཉོན། ། ཁྱོད་ཀྱིས་ཞུས་པ་ཤིན་ཏུ་ལེགས།། སེམས་ཅན་རྣམས་ལ་ཕན་པའི་ཕྱིར།། ཁྱོད་ལ་ང་ཡིས་བཤད་པར་བྱ།། གནོད་སྦྱིན་རྒྱལ་པོ་ནོར་གྱི་ལྷ། ཨ་པ་ར་ཞེས་བྱ་བ་འདི།། བསྐལ་པ་བཟང་པོ་འདས་པའི་ཚེ། ། སངས་རྒྱས་རིན་ཆེན་སྙིང་པོ་ལ།། བྱང་ཆུབ་མཆོག་ཏུ་སེམས་བསྐྱེད་ནས།། གྲངས་མེད་གསུམ་དུ་ཚོགས་བསགས་པས།། ད་ལྟ་མི་ཟད་ནོར་གྱི་ལྷ།། མཐུ་དང་རྫུ་འཕྲུལ་བསམ་མི་ཁྱབ།། སྣ་ཚོགས་ཅིར་ཡང་སྐུ་སྤྲུལ་ཅིང། ། སེམས་ཅན་རྣམས་ཀྱི་དོན་ལ་བརྩོན།། མི་ཟད་ནེ་ལེའི་རྐྱལ་པ་ནས།། ནོར་དང་ལོངས་སྤྱོད་སྦྱིན་པ་འགྱེད།། དེ་ཕྱིར་མཚན་ཡང་སངས་རྒྱས་ཀྱིས།། གཞན་གྱིས་མི་ཐུབ་ཅེས་བྱར་བཏགས། ། ཤེས་སོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། གནོད་སྦྱིན་ནོར་ལྷ་ཇི་ལྟར་གྱུར་པའི་རྒྱུ་མཚན་བསྟན་པའི་ལེའུ་སྟེ་བདུན་པའོ།།།། དེ་ནས་གནོད་སྦྱིན་ནོར་ལྟ་ཡི། ། ཆོ་འབྲང་ང་ཡིས་བཤད་པར་བྱ།། ཕ་ནི་ཞེ་སྡང་ལྷ་མ་ཡིན།། དུས་ནི་སྒྲ་གཅན་འཛིན་ཞེས་བྱ།། མ་ནི་འདོད་ཆགས་ལྷ་ཡི་རིགས།། ལྷ་མོ་ཨུ་མ་དེ་བ་ཡིན།། རུས་ནི་ང་རྒྱལ་འབྱུང་པོ་སྟེ། རིགས་ནི་ཕྲག་དོག་གནོད་སྦྱིན་རིགས། ། རྫུ་འཕྲུལ་གཟི་བརྗིད་ཕུན་སུམ་ཚོགས།། སྟོབས་ཆེན་ནོར་ལྷ་མངའ་ཐང་སྒྱུར།། རྒྱལ་བའི་སྲས་པོ་ཕོངས་པའི་མགོན།། ཨ་པ་ར་ཞེས་བྱ་བར་གྲགས།། ཤེས་གསུངས་སོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། ཕ་དང། མ་དང། རུས་དང། རིགས་བསྟན་པའི་ལེའུ་སྟེ་བརྒྱད་པའོ།།།། དེ་ནས་གཞན་ཡང་བཤད་བྱ་བ།། ནོར་བདག་སྒྲུབ་པར་འདོད་པ་ཡིས།། བསྒྲུབ་ཚུལ་རྣམ་པ་བཞི་རུ་ངེས། ། ཡང་ན་བཅུ་གཅིག་ཚུལ་དུ་སྦྱར།། བསྙེན་དང་བསྒྲུབ་དང་ལས་སྦྱོར་རོ།། དང་པོ་དག་ལ་རྣམ་པ་གསུམ།། མཁས་པས་ཤེས་ན་དངོས་གྲུབ་ཉེ།། བར་མ་དག་ནི་སྒྲུབ་པའི་ཐབས།། གནས་དང་དཀྱིལ་འཁོར་དག་བྱེད་དང། ། བསྒྲུབ་རྫས་མཆོད་རྫས་རིམ་པར་སྦྱར།། མཚམས་དང་བཤགས་སྦྱང་ཆོ་ག་བྱ།། བསྐྱེད་དང་སྤྱན་དྲང་བསྟིམ་པ་དང།། མཆོད་དང་བསྟོད་པའི་རིམ་པ་བཤད།། བསྒྲུབ་པའི་ཡན་ལག་རྫོགས་པ་ན། ། གནོད་སྦྱིན་བྲན་དུ་འཁོལ་བར་འགྱུར།། ཞེས་སོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། བསྙེན་པ་བསྒྲུབ་པའི་ལེའུ་སྟེ་དགུ་པའོ།།།། དེ་ནས་རྣལ་འབྱོར་བསྒྲུབ་པ་པོས། ། མི་གཙང་དམ་ཚིག་བསྲུང་བར་བྱ།། བསྒྲུབ་པ་ཆེན་པོ་དུས་དག་ཏུ།། རྩ་སྔགས་རྣམ་པ་གསུམ་དུ་དྲིལ།། ཕྱི་ནང་མཆོད་པ་རྒྱས་པར་དབུལ།། རྟ་གཏོར་བྱིན་བརླབ་ཁས་ཀྱང་བླང། ། གསང་མཆོད་དུད་པ་རྒྱུན་མི་གཅད།། པདྨ་ཕྱག་རྒྱ་བཅས་ཏེ་བསྟན།། མི་ཡུལ་མི་འཁྱིས་མི་སྨྲ་བར།། རྒྱུན་ཆད་མེད་པ་ཆུ་བོའི་གཞུང།། སྒོ་གསུམ་རྩེ་གཅིག་རྣལ་འབྱོར་པས།། ཡི་དམ་ཆེ་བའི་ང་རྒྱལ་བསྐྱེད། ། སྒོ་དགུ་སྐྱེ་མཆེད་བྱིན་གྱིས་བརླབས།། ཏིང་འཛིན་རྣམ་གསུམ་རིམ་པ་ལྟར།། དགུ་ལ་དགུ་གསུམ་ཉི་ཤུ་བདུན།། མཁས་པས་དེ་ཉིད་ཤེས་པར་བྱ།། ཞེས་སོ།། གནོད་སྦྱིན་རིན་པོ་ཆེ་ཉི་ཟླ་གསང་བ་སྙིང་པོའི་རྒྱུད་ལས། བསྒྲུབ་པ་ཆེན་པོ་མན་ངག་བསྟན་པའི་ལེའུ་སྟེ་བཅུ་པའོ།།།། དེ་ནས་གྲུབ་རྟགས་བསྟན་པར་བྱ།། སྤྱིར་ན་ནོར་ལྷའི་གྲུབ་རྟགས་ལ།། རྣམ་པ་གསུམ་དུ་ཤེས་པར་བྱ།། རྨི་ལམ་མཐོང་སྣང་ཐ་མ་ཡིན། ། བསྒྲུབ་རྫས་མཐོང་སྣང་འབྲིང་པོ་ཡིན།། དམ་ལ་བྱོན་ན་མཆོག་ཡིན་ནོ།། སྤྱིར་ན་རྫུ་འཕྲུལ་བསམ་མི་ཁྱབ།། མཚན་མ་ཅིར་ཡང་སྟོན་པ་ཡིན།། བརྗོད་པར་མི་ནུས་ནོར་ལྷའི་རྟགས།། ཁོ་ཡི་རྟགས་ལ་ངེས་པ་མེད། ། རེས་འགའ་སྤྲུལ་པ་སྣ་ཚོགས་འགྱེད།། རེས་འགའ་མཚན་མ་ཅིར་ཡང་སྟོན།། རེས་འགའ་གཟུགས་བྱད་སྣ་ཚོགས་སྟོན།། རེ་འགའ་སྒྲ་སྐད་སྣ་ཚོགས་བྱིན།། རེས་འགའ་ཁྲོ་ཚིག་ཤེས་པ་འཕྱོག། རེས་འགའ་ཉམས་འཇིགས་ལུས་པོ་འདར། ། རེས་འགས་སྐྲག་ཅིང་སྐྱི་ཡང་གཡའ།། ཁོ་ཡི་རྟགས་ལ་ངེས་པ་མེད།། བྱུང་བའི་དུས་སུ་དངོས་གྲུབ་བླང།། ཞེས་སོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། བསྒྲུབ་རྟགས་བསྟན་པའི་ལེའུ་སྟེ་བཅུ་གཅིག་པའོ།།།། དེ་ནས་རྣལ་འབྱོར་སྒྲུབ་པ་པོས།། གྲུབ་པའི་རྟགས་མཐོང་དངོས་གྲུབ་བླང།། དམ་ལ་བྱོན་ནས་མཚན་ཉིད་བརྟགས།། དམའ་དབབ་རྣོལ་གྱིས་གཅོད་པར་བྱ། ། ཕྱག་རྒྱས་བཟུང་ལ་ཟིལ་གྱིས་གནན།། རྡོ་རྗེ་རྩེ་གཅིག་ཕྱག་རྒྱ་བསྟན།། སེམས་བསྐྱེད་དམ་བཅའ་དྲན་དུ་གཞུག། རིན་ཆེན་ཕྱག་རྒྱས་གཏོར་མ་བྱིན།། པདྨའི་ཕྱག་རྒྱས་དངོས་གྲུབ་བླང།། དམ་མདར་ཆད་བྱ་ཐེམས་བཟུང་ལ། ། མནའ་བསྒག་གང་འདོད་ལས་བཅོལ་ཞེས།། དཔའ་བོ་ང་ཡིས་བཤད་པ་ཡིན།། ཞེས་སོ།། གནོད་སྦྱིན་རིན་པོ་ཆེ་ཉི་ཟླ་གསང་བའི་སྙིང་པོའི་རྒྱུད་ལས།། མན་ངག་ལས་ཀྱི་རིམ་པ་བསྟན་པའི་ལེའུ་སྟེ་བཅུ་གཉིས་པའོ། །།། དེ་ནས་སྤོགས་པའི་མན་ངག་བསྟན།། གལ་ཏེ་གྲུབ་པར་མ་གྱུར་ན།། ལན་གསུམ་བར་དུ་བསྐྱར་བར་བྱ།། དམ་ཚིག་སྔགས་བཟླས་བཀའ་ནན་བྱ།། དམ་བསྒྲག་དམ་དཔོག་དམ་ཚིག་བསྐུལ། ། དེས་ཀྱང་གྲུབ་པར་མ་གྱུར་ན།། དམ་ཚིག་ཆད་པ་གཅད་པར་བྱ།། མ་ཉིན་གཟིར་བའི་མན་ངག་གིས།། ཨར་ལ་གཏད་ཅིང་ཤི་ས་བསྟན།། ལོངས་སྤྱོད་ཐོབ་པར་ཐེ་ཚོམ་མེད།། ཅེས་སོ། ། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། སྤོགས་པའི་ལེའུ་སྟེ་བཅུ་གསུམ་པའོ།།།། དེ་ནས་ཡང་དག་བཤད་བྱ་བ།། དང་པོ་རྣལ་འབྱོར་སྣོད་ལྡན་གྱིས། ། བསྒྲུབ་པར་བྱ་བའི་ཡན་ལག་ནི།། འགྲོ་དོན་རྫོགས་པར་འདོད་པ་ལ།། གཞན་དོན་སྐྱབས་འགྲོ་ཨུ0f84སེམས་སྐྱེད་གཅེས།། ནོར་ལྷ་ཤིན་ཏུ་གདུག་རྩུབ་ཆེ།། ཡིད་བཞིན་ནོར་བུའི་མན་ངག་གིས།། ཡེ་ཤེས་ལྷ་བསྙེན་ཤིན་ཏུ་གཅེས། ། གནོད་སྦྱིན་གཏེར་བདག་དྲེགས་པ་ཆེ།། ལག་ན་རྡོ་རྗེའི་མན་ངག་གིས།། ལས་ངག་བསྙེན་པ་ཤིན་ཏུ་གཅེས།། དེ་ནས་བསྒྲུབ་པའི་དུས་དག་ཏུ།། རྟེན་དང་བཅའ་ལུགས་ཤིན་ཏུ་གཅེས།། སྐུ་གཟུགས་སྲོག་གི་འཁོར་ལོ་ལ། ། དབང་བསྐུར་རབ་གནས་ཤིན་ཏུ་གཅེས།། ནོར་ལྷའི་བསྙེན་བསྒྲུབ་དུས་དག་ཏུ།། མཆོད་བསྟོད་འཕྲིན་ལས་ཤིན་ཏུ་གཅེས།། རྩ་སྔགས་སྲོག་སྙིང་ཤམ་བུ་ལ།། དངོས་གྲུབ་ཤམ་བུ་ཤིན་ཏུ་གཅེས། ། བསྒྲུབ་པ་ཆེན་པོའི་དུས་དག་ཏུ།། མི་སེམས་བསྐུལ་བ་ཤིན་ཏུ་གཅེས།། བསྒྲུབ་རྟགས་མཚན་མ་མཐོང་བའི་ཚེ།། དངོས་གྲུབ་བླང་བ་ཤིན་ཏུ་གཅེས།། བསྙེན་བསྒྲུབ་ལས་ཁའི་དུས་དག་ཏུ།། དམ་ཚིག་བསྲུང་བ་ཤིན་ཏུ་གཅེས། ། གནོད་སྦྱིན་ཤིན་ཏུ་མི་བསྲུན་པས།། བླ་སྲོག་གཟུང་བ་ཤིན་ཏུ་གཅེས།། ལས་རྣམས་འགོར་ཞིང་འཁུ་ལྡོག་ཆེ།། དམ་ཚིག་གཟིར་སྔགས་ཤིན་ཏུ་གཅེས།། གཏེར་བདག་འདོད་ཡོན་དག་ལ་དགེས། ། དུས་གཏོར་མཆོད་པ་ཤིན་ཏུ་གཅེས།། ཞེས་གསུངས་སོ།། གནོད་སྦྱིན་རིན་པོ་ཆེ་ཉི་ཟླ་གསང་བ་སྙིང་པོའི་རྒྱུད་ལས། གཅེས་པ་བསྡུས་པའི་མན་ངག་གི་ལེའུ་སྟེ་བཅུ་བཞི་པའོ།།།། དེ་ནས་བཅོམ་ལྡན་འདས་གསང་བའི་བདག་པོས་རྒྱུད་ཡོངས་སུ་བཟུང་བ་འདི་བཀའ་སྩལ་ལོ། ། ཨེ་མ་ངོ་མཚར་རྨད་དུ་བྱུང།། རྒྱུད་ཀྱི་ཡོན་ཏན་བསམ་མི་ཁྱབ།། ནོར་ལྷའི་ནུས་པ་བརྗོད་མི་ལང།། ཐམས་ཅད་དབང་དུ་འདུས་པ་ནས། ། དབང་ཆེན་དབང་ཕྱུག་འཁོར་ལོས་སྒྱུར།། འདི་བསྒྲུབ་ཡོན་ཏན་བསམ་མི་ཁྱབ།། ལྷ་འདྲེ་མི་གསུམ་དབང་དུ་འདུས།། ཁམས་གསུམ་འཁོར་བའི་འཇིག་རྟེན་ན།། དབང་དུ་མི་འདུ་གང་ཡང་མེད། ། དཔེར་ན་ནམ་ལ་དབྱར་གྱི་དུས།། ཤ་རུས་དག་ལ་སྦྲང་འདུ་བཞིན།། མི་ནོར་ཐམས་ཅད་དབང་དུ་འདུ།། སེམས་ཅན་ཀུན་གྱི་ཡིད་ཀྱང་འཕྲོག། ཐམས་ཅད་དགའ་ཞིང་དང་བ་སྐྱེ།། ཀུན་གྱི་སྙིང་དང་ཡིད་དུ་འོང། ། བཟའ་བཏུང་ནོར་དང་ལོངས་སྤྱོད་རྣམས།། རྣལ་འབྱོར་པ་ལ་ཐམས་ཅད་འདུ།། བསོད་ནམས་རི་རྒྱལ་ལྷུན་པོ་འདྲ།། ཚེ་ཡང་བསྐལ་པ་བདུན་དུ་ཐུབ།། གཟི་བརྗིད་ཉི་མའི་འོད་དང་མཉམ།། ལྷ་མོ་ཀླུ་མོ་གནོད་སྦྱིན་མོ། ། མི་ལ་སོགས་པའི་བུ་མོ་རྣམས།། བདག་ལ་ཤིན་ཏུ་ཆགས་པར་འགྱུར།། མཁའ་འགྲོ་མ་ཚོགས་ཐམས་ཅད་ཀྱང།། བུ་གཅིག་པ་ཡི་མ་བཞིན་བྱམས།། ལྷ་ཀླུ་གནོད་སྦྱིན་འབྱུང་པོ་ཡང།། གཙུག་གི་ནོར་བུ་རིན་ཆེན་ལྟར། ། བདག་ལ་རྟག་ཏུ་སྤྱི་བོས་འཁུར།། བདུད་དང་སྲིན་པོ་ལ་སོགས་པའི།། འཇིག་རྟེན་དྲེགས་པའི་ལྷ་འདྲེ་ཡང།། བྲན་བཞིན་ཅི་བཅོལ་ལས་རྣམས་བྱེད།། དེ་ཕྱིར་རྟག་ཏུ་བརྩོན་པར་བྱ། ། ཞེས་གསུངས་སོ།། གནོད་སྦྱིན་རིན་པོ་ཆེ་ཉི་ཟླ་གསང་བ་སྙིང་པོའི་རྒྱུད་ལས། རྒྱུད་ཀྱི་ཆེ་བའི་ཕན་ཡོན་བསྟན་པའི་ལེའུ་སྟེ་བཅོ་ལྔ་པའོ།།།། དེ་ནས་བཅོམ་ལྡན་འདས་གསང་བའི་བདག་པོས། རྡོ་རྗེ་འདུས་པ་ལ་སོགས་པའི་འཁོར་རྣམས་ལ་བཀའ་སྩལ་པ། ཨེ་མ་ཧོ། ང་ཡི་རྒྱུད་ཀྱི་རྒྱལ་པོ་འདི།། ཨུ་དུམ་འབར་བའི་མེ་ཏོག་ལྟར།། འཇིག་རྟེན་ཁམས་ན་ཤིན་ཏུ་དཀོན།། སྣོད་དང་ལྡན་ལ་བསྟན་གྱུར་ན།། འཛམ་གླིང་ཉི་མ་ཤར་བ་འདྲ། ། སྣོད་མེད་རྣམས་ལ་བསྟན་བྱས་ན།། གནོད་སྦྱིན་ཡཀྵའི་ཚོགས་རྣམས་ཀྱིས།། དུས་མིན་པར་ནི་སྲོག་ཟད་སྐེམ།། དེ་ཕྱིར་གསང་ཞིང་སྤྱད་པར་བྱ།། ཞེས་བཀའ་སྩལ་ཏོ།། གནོད་སྦྱིན་རིན་པོ་ཆེ་ཉི་ཟླ་གསང་བ་སྙིང་པོའི་རྒྱུད་ལས། རྒྱུད་བཅས་ཐབས་བསྟན་པའི་ལེའུ་སྟེ་བཅུ་དྲུག་པའོ།།།། དེ་ནས་རྡོ་རྗེ་འདུས་པ་ཆེན་པོས། བཅོམ་ལྡན་འདས་གསང་བའི་བདག་པོ་ལ་འདི་སྐད་ཅེས་གསོལ་ཏོ།། ཀྱེ་བཅོམ་ལྡན་འདས་གསང་བའི་བདག་པོ་ཆེན་པོ། རྒྱུད་འདིའི་མཚན་ནི་གང་ལགས། འདི་བཟུང་ན་ཇི་ལྟར་བཟུང་བར་བགྱི། བདག་ཅག་རྣམས་ལ་བསྟན་དུ་གསོལ། ཞེས་གསོལ་བ་དང། གསང་བའི་བདག་པོས་བཀའ་སྩལ་པ། རྡོ་རྗེ་འདུས་པ་ཆེན་པོ་རྒྱུད་འདི་རྗེས་སུ་སྒྲུབ་པའི་རྣལ་འབྱོར་པ་རྣམས་ལ་སྦྱིན་པའི་གཏེར་ཆེན་འབྱུང་བའི་ཕྱིར། གནོད་སྦྱིན་ནོར་ལྷའི་རྒྱུད་ཅེས་བྱ་བར་ཟུང་ཞིག། དགོས་འདོད་ཐམས་ཅད་འབྱུང་བའི་ཕྱིར། དངོས་གྲུབ་རིན་ཆེན་བཟང་པོའི་རྒྱུད་ཅེས་བྱ་བར་ཟུང་ཞིག། ཕོངས་པ་རྣམས་ཀྱི་མགོན་སྐྱབས་སུ་གྱུར་པའི་ཕྱིར། ཉི་ཟླ་གསང་བ་སྙིང་པོའི་རྒྱུད་ཅེས་བྱ་བར་ཡང་ཟུང་ཞིག། ཅེས་བཀའ་སྩལ་ཏོ། ། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། རྒྱུད་ཀྱི་མཚན་བསྟན་པའི་ལེའུ་སྟེ་བཅུ་བདུན་པའོ།།།། དེ་ནས་རྡོ་རྗེ་འདུས་པ་ཆེན་པོ་ལ་སོགས་པའི་འཁོར་རྣམས་ཡི་རང་ནས་འདི་སྐད་ཅེས་བཅོམ་ལྡན་འདས་གསང་བའི་བདག་པོ་ལ་བསྟོད་དོ། ། ཀྱེ་མ་གསང་བདག་རྡོ་རྗེ་འཆང།། དུག་གསུམ་ནད་སེལ་སྨན་པའི་གཙོ།། འཆི་བདག་བདུད་འཇོམས་ལྷ་ཡི་ལྷ།། དགོས་འདོད་སྐོང་བའི་རིན་པོ་ཆེ། ། མ་རིག་མུན་སེལ་ཉི་ཟླའི་ཟེར།། ཁམས་གསུམ་འཁོར་བའི་གཉེན་གཅིག་པོ།། བཅོམ་ལྡན་མཐུ་སྟོབས་གསང་བའི་བདག། རྡོ་རྗེ་འཆང་ལ་ཕྱག་འཚལ་འདུད།། ཅེས་བསྟོད་དོ།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ལས། འདུས་པའི་འཁོར་རྣམས་རྗེས་སུ་ཡི་རང་བའི་ལེའུ་སྟེ་བཅོ་བརྒྱད་པའོ།།།། གནོད་སྦྱིན་རིན་པོ་ཆེ་བཟང་པོ་ཉི་ཟླ་གསང་བ་སྙིང་པོའི་རྒྱུད་ཅེས་བྱ་བའི་རྒྱུད་ཀྱི་རྒྱལ་པོ་རྫོགས་སོ། །།། རྒྱ་གར་གྱི་མཁན་པོ་བ་སུ་དྷ་ར་མཁས་པ་ནོར་འཛིན་དང། བོད་ཀྱི་ལོ་ཙ་བ་སྣུབས་སངས་རྒྱས་རིན་པོ་ཆེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།།།

CLOSE WINDOW