| Wylie |
ཨ་མྲི་ཏ་ཀུ་ཎྜ་ལི་ཀརྨ་ཏན་ཏྲ་ནཱ་མ། བོད་སྐད་དུ། བདུད་རྩི་འཁྱིལ་བ་ལས་ཀྱི་རྒྱུད་ཅེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ།། དེ་སྐད་བདག་གིས་ཐོས་པའི་དུས་གཅིག་ན།། གསང་བའི་དོན་རྣམས་ཉེར་བཀོད་ནས། ། དེ་ཉིད་རིམ་པར་ཕྱེ་ནས་བཤད།། བཅོམ་ལྡན་གསང་བའི་བདག་པོ་ཡིས།། དེ་ཉིད་དོན་དེ་ལེགས་གསུངས་ཏེ།། མཉམ་ཉིད་ངང་ལ་སྙོམས་ཞུགས་ཏེ།། བཅོམ་ལྡན་བདུད་རྩི་འཁྱིལ་བ་ཡིས། ། གསང་བའི་དོན་འདི་ལེགས་པར་གསུངས།། དེ་ནས་འདུས་པ་ཆེན་པོ་རྣམས།། བདུད་རྩི་འཁྱིལ་ལ་ལེགས་བཏུད་དེ།། ཐལ་མོ་སྦྱར་ཏེ་འདི་སྐད་གསོལ།། གསང་བའི་བདག་པོ་གོས་སྔོན་གྱི། ། སྒྲུབས་པའི་ཐབས་དང་ལྡན་རྣམས་ཀྱིས།། ལེགས་པར་གྱུར་ནས་བདག་ལ་གསོལ།། གསང་ཆེན་བདག་ལ་ཕྱག་འཚལ་བསྟོད།། ཅེས་གསོལ་བ་དང། བཀའ་སྩལ་པ། ཇི་ལྟར་གསང་བདག་བསྒྲུབ་པ་ཡི། ། དོན་དྲིས་ཁྱོད་ནི་ངོ་མཚར་ཆེ།། གང་གིས་སྒྲུབ་པའི་ཐབས་འབྱུང་བ།། དེ་ཉིད་བདག་གིས་བསྟན་པར་བྱ།། ཡིད་དང་མཐུན་པའི་དབེན་པ་རུ།། དཔལ་ལྡན་སྐུ་གཟུགས་བཀྲམ་བྱས་ཏེ།། མཆོད་པ་བསྟོད་པ་སྔོན་སོང་ནས། ། གསང་སྔགས་ཀྱི་ནི་བཟླས་པ་རྩམ།། ཨཱ+ོཾ་ན་མོ་བཛྲ་པ་ཎི་མ་ཧཱ་ཡག་ཀྵ་སེ་ན་པ་ཏི་བཛྲ་ཀྲོ་དྷ་ནི་ལམ་བ་ར་ཧཱུཾ་ཕཊ། དེ་ནི་སྐྱོན་རྣམས་སྤངས་ཏེ་བཟླས།། བདུན་ཁྲིའམ་འབུམ་དུ་ཐེམ་གྱུར་ནས།། དེ་ནས་བསྒྲུབ་པ་སྦྱར་བ་བྱ། ། དེ་ལ་དང་པོ་ཕན་བསྒྲུབ་པའི།། སྦྱོར་བ་དང་པོ་བཤད་པར་བྱ།། གནོད་སྦྱིན་ཉེན་གྱིས་ཟིན་གྱུར་ན།། དང་པོ་མཎྜལ་སྔོན་པོར་བྱ།། འཁོར་ལོ་རྩིབས་བརྒྱད་ཐིག་བཏབ་ལ། ། དབུས་སུ་དཔལ་ལྡན་གོས་སྔོན་བྲི།། རྩིབས་ལ་གཙོ་བོ་དཔལ་ལྡན་བྲི།། ཤེས་རབ་གཙང་མར་གྱུར་པ་ལ།། དྲི་ཡི་ཆུ་ཡིས་ལེགས་བཀྲུས་ཏེ།། དཀོན་མཆོག་གསུམ་ལ་ཕྱག་འཚལ་ནས།། རི་རབ་རྩེ་ལ་བྱང་ཕྱོགས་ནས། ། ཆུ་བླངས་རིན་ཆེན་སྣོད་དུ་བླུགས།། ཀུ་ཤ་ལ་ཡིས་ཁ་རྒྱན་བྱ།། ཁ་དོག་སྔོན་པོས་མགུལ་ཆིངས་བྱས།། གཟུངས་ཐག་སྔོན་པོས་མགུལ་ནས་གདགས།། རྣལ་འབྱོར་སྲིན་ལག་དག་ལ་གདགས། ། བུམ་པའི་དབུས་སུ་གོས་སྔོན་བསྐྱེད།། དཀྲུག་ནས་སྤོས་དག་འབྲུ་སྣ་བླུགས།། ལག་པ་གཡས་ཀྱིས་འབྲུ་སྣ་ཐོགས།། གསང་སྔགས་འདི་ཡིས་བསྒྲུབས་བྱས་ཏེ།། བུམ་པར་བླུགས་ཤིང་བསྟིམ་པར་བྱ།། ཨཱ+ོཾ་ན་མོ་བཛྲ་པཱ་ཎི་ཡེ་མ་ཧཱ་ཡག་ཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷ་ནི་ལམ་བར་བཛྲ་ཧཱུཾ། མ་ཧཱ་ཡཀྵ་ཧ་ན་ཧ་ན་ཤུད་དྷེ་ཤུད་དྷེ་ཧཱུཾ་ཕཊ། སརྦ་ཡག་ཤ་ཀུ་རུ་བ་ཡ་མོ་ཧ་ཡ་ཧཱུཾ་ཕཊ།། ཡཀྵ་བིད་ཏ་ན་སུ་རུ་སུ་རུ་ཧཱུཾ་ཕཊ། ཡཀྵ་སརྦ་བིད་ཏན་ན་ཤ་ཡ་མ་ཧཱ་པ་ལ་ཧཱུཾ་ཕཊ། ཅེས་པའོ།། དེ་ལྟར་སྟོང་དུ་གྲངས་ཐེམ་ནས།། ནད་པ་དེ་ནི་མདུན་བཞག་སྟེ།། སེམས་བསྐྱེད་ཆོ་ག་སྔོན་འགྲོ་བས།། བུ་མོས་ནད་པ་བཀྲུ་བར་བྱ།། ཡང་ན་བདག་གིས་ཁར་བླུགས་ཏེ། ། ནད་པའི་ལུས་ལ་གཏོར་བ་ཡིས།། ཁྲོ་མོའི་སྤྲུལ་པ་མང་པོ་སྤྲོས།། ནད་པའི་ལུས་ལ་བཏགས་པར་བསམ།། དེ་ཡིས་གནོད་སྦྱིན་འབྲོས་པར་འགྱུར་རོ།། གནོད་སྦྱིན་བཟློག་པའི་ཆོ་གའོ།། ཀླུ་བཟློག་པའི་ཆོ་གའི་ལས་དག་ནི། ། མཎྜལ་སྔོན་པོ་ཆག་གང་གདབ།། སྟེང་དུ་འཁར་གཞོང་བཟང་པོ་རུ།། ཞིབ་པ་ཡི་ནི་ཕྱེ་དག་དང།། མེ་ཏོག་སྔོན་པོའི་ཆུ་ཡིས་བཀྲུས།། པད་མ་འདབ་མ་དྲུག་བྱས་ཏེ།། གཅིག་ལ་ཁེ་དང་བུ་མོ་དགོད། ། གཅིག་ལ་སྦྲུལ་གྱི་ཆུན་པོ་དགོད། སྦལ་པ་ཉ་དང་ལྕོང་མོ་ནི།། འདབ་མ་གཅིག་ལ་དགོད་པར་བྱ།། གཅིག་ལ་གཙང་བ་མགོ་དགུ་དགོད།། གཅིག་ལ་བ་གླང་དམར་པོ་དགོད།། གཅིག་ལ་ནོར་བུ་རིན་ཆེན་དགོད། ། ཐ་མའི་ཕྱོགས་སུ་བལ་པོ་ཡི།། སེའུ་ཡི་ལྕུག་མ་དགོད་པར་བྱ།། དངུལ་གྱི་གཞོང་པ་ཆུས་བཀང་ལ།། ནང་དུ་ལྕུག་མ་བདུན་གཞུག་བྱ།། ལོ་བརྒྱད་ལོན་པའི་བུས་པ་ལ།། གསང་བའི་བདག་པོས་དབང་བསྐུར་ནས། ། ལྕུག་མ་ཀླུ་ཟིན་ལུས་ལ་བརྡེག། བདག་ཉིད་གོས་སྔོན་གསང་བ་ཡིས།། རྨ་བྱའི་ལྕུག་མས་བྱ་བར་བྱ།། བུམ་པའི་སྦྱོར་བ་གོང་བཞིན་ཏེ།། དེ་དག་གིས་སྔགས་གསུངས་པ་འདིའོ།། ཨོཾ་ནཱི་ལཱཾ་བར་ཧཱུཾ། ནཱ་ག་རཱ་ཛ་སརྦ་དུཥྟན། ཏ་ཀ་ཏ་ཀ། ཧ་ལ་ཧ་ལ། བན་དྷ་བན་དྷ་ཕཊ།། ནཱ་ག་ནི་ནཱ་ག་ནི། ན་ཡ་ནི་ན་ཡ་ནི་ཧཱུཾ་ཕཊ། ཏྲི་ནི་ཀུ་རུ་ཀ་ལ་པ་ར་ནཱ་ག་ཧྲི་ད་ཏ་ཡ་ཧཱུཾ་ཕཊ། ཨོཾ་དུ་རུ་དུ་རུ། དུ་རུ་ནི་ཀུ་རུ་ཧཱུཾ་ཕཊ་སྔགས་བཟླས་འོད་ཟེར་འཕྲོས་པ་ལས། ། གོས་སྔོན་ཁྲོ་བོའི་སྐུར་གྱུར་ནས།། ནད་པའི་ལུས་ལ་བྱབ་པར་བསམ།། ཕྲལ་ནས་རིགས་དྲུག་གནས་སུ་དགུག། དུག་གཞོམ་བདུད་རྩི་སྨན་གྱིས་གསོ།། དེ་ནས་ཀླུ་ཡི་གནས་སུ་བསྐྱལ། ། ལན་ཉི་ཤུ་རྩ་གཅིག་གོ། ལན་གཅིག་གིས་ནི་འགྲུབ་འགྱུར་ན།། མང་དུ་བྱས་ན་སྨོས་ཅི་དགོས།། ཀླུ་ནད་བཀློག་པའི་ཆོ་གའོ།།།། ཡི་དྭགས་བརྗེད་བྱེད་བཟློག་པ་ནི།། མཎྜལ་སྔོན་པོ་ལེགས་བྱུགས་ཏེ། ། སྟེང་དུ་དཔལ་ལྡན་སྐུ་གཟུགས་དགྲམ།། མཆོད་དང་བསྟོད་པ་སྔོན་སོང་བའི།། དཀྱིལ་འཁོར་གཉིས་ཀྱི་བདག་ཉིད་ཀྱིས།། དུང་དང་ཀུན་དའི་མདོག་འདྲ་བའི།། སྐུད་པ་དཀར་པོས་ལེགས་བཞག་སྟེ།། འོད་ཞུ་དཔལ་ལྡན་སྐུ་ཆེ་བསམ། ། བཀུག་བསྟིམ་འོད་ཞུ་སྐུར་གནས་པས།། དེ་ཉིད་སྐུར་གནས་སྐུད་པ་དེ།། ཁ་དོག་ལྔ་དང་འོད་ལྡན་བསམ།། དེ་ལ་མདུད་པ་སྟོང་རྩ་གཉིས།། བུམ་པ་དག་ཏུ་སྔགས་ཏེ་བཟླས།། ཡུངས་ཀར་དང་ནི་སྐེ་ཚེ་ལ། ། སྔགས་ཏེ་བཏབ་ལ་ལུས་ལ་གཏོར།། ན་མ་ས་མན་ཏ་ཀཱ་ཡ་བཱཀ་ཙིཏྟ་བཛྲཱ་ནཱན། ན་མོ་བཛྲ་ཀྲོ་དྷ་ནཱི་ལཱཾ་བར་ཧཱུཾ། པྲེ་ཏ་བ་ཤེ་ནི་ཤ་ཀ་ར་ཧ་ན་ཧ་ན་ཧཱུཾ་ཕཊ། པ་ཙ་པ་ཙ་ཧཱུཾ་ཕཊ། བི་ཤ་སྟ་བ་ཡ་ཧཱུཾ་ཕཊ། པྲེ་ཏ་བི་ན་ཤ་ཀ་ར་ཡོ་ཏ་པོ་ཊ་ཡ་ཧཱུཾ་ཕཊ། སརྦ་བིགྷ་ནན་པ་ཙ་དེ་བ་ཀུ་རུ་ཧཱུཾ་ཧཱུཾ། ཨོཾ་དུ་རུ་ཡི་ཏ་ཛ་ལ་ཡ་ཧཱུཾ་ཕཊ། ཕྲལ་ནས་དག་པའི་ཆོ་ག་བྱ།། ཟངས་ཕུར་གསུམ་གྱི་སྐུད་པ་དེ།། མཐའ་དང་དབུས་སུ་བཏག་བྱས་ནས། ། ཟིན་པའི་སྐེ་རུ་གདགས་པར་བྱ།། ཡི་དྭགས་བརྗེད་བྱེད་བསྲུང་བ་ཡི།། ཆོ་ག་འདིར་ནི་བཤད་པ་ཡིན།། རིམས་ལ་སོགས་པ་བསྲུང་འགྱུར་ན།། མཎྜལ་སྔོན་པོ་གོས་སྔོན་བསྒྲུབ།། མེ་ཏོག་སྔོན་པོའི་ཁུ་བ་ལ། ། སྦངས་པ་སྐུད་པ་སྔོན་པོ་སྟེ།། གསང་བའི་བདག་པོར་བྱིན་བརླབས་ཏེ།། དགུག་གཞུག་ཞུ་བའི་སྐུད་པ་དེ།། མདུད་བྱས་གོང་མའི་སྔགས་ཀྱིས་འཚོ།། བྱིས་པའི་གདོན་རྣམས་བསྲུང་འདོད་ན།། སྐུད་པ་གོང་དང་འདྲ་བྱས་ལ། ། བྱིས་པའི་མགུལ་དུ་བཏགས་པས་འཚོ།། དུག་གིས་ཟིན་པ་གསོ་འདོད་ན།། སྔོན་དུ་སྦྲུལ་གྱི་གཟུགས་བྱས་ལ།། བདག་ཉིད་གསང་བའི་བདག་པོ་ཡིས།། རྩཝ་ནི་ཀུ་ཤས་ལུས་ལ་བྱབ།། ནད་པའི་ལུས་ལ་དུག་བྱུང་ནས། ། སྦྲུལ་གྱི་ལུས་ལ་ཐིམ་པར་བསམ།། གནས་གསུམ་པོར་ནི་ཟླ་བ་གསུམ།། དེ་སྟེང་ཡི་གེ་ཨ་གསུམ་ལས།། བདུད་རྩིའི་རྒྱུད་ཀྱི་ལུས་དག་ནས།། དུག་གི་སྦྲུལ་རྣམས་འབྱུང་བར་བསམ།། ཡང་ན་སྙིང་ནས་ཧྲི་འཕྲོས་པས། ། ལུས་ཀྱི་དུག་རྣམས་བསྡུས་ནས་ནི།། སྟོང་གསུམ་གཞན་དུ་སོང་བར་བསམ།། དེ་ནི་དུག་གིས་ཟིན་པ་རྣམས།། མྱུར་དུ་སོས་པར་ཐེ་ཚོམ་མེད།། ནོར་སྒྲུབ་ཆོ་གའི་ལས་དག་ནི།། མདུན་དུ་སྟེགས་བུ་གྲུ་བཞི་ལ། ། གོས་སྔོན་སྒྲུབ་པ་སྔོན་སོང་ནས།། སྤྲུལ་པ་བརྒྱད་པོ་རྣམ་ཐོས་དང།། ཨརྱ་ཛྷམ་བྷ་བསམ་པར་བྱ།། རིན་ཆེན་མ་སྤྱད་སྣོད་དག་ཏུ།། འབྲུ་དང་སྨན་དང་རིན་ཆེན་གཞུག། ཡིད་བཞིན་ནོར་བུས་གང་བ་བསྐྱེད། ། དབང་བསྐུར་བྱིན་གྱིས་བརླབས་བྱས་ནས།། དེ་ཡི་བསྒྲུབ་པའི་གསང་སྔགས་བཟླས། ཨོཾ་རཏྣ་ནཱི་ལམ་བ་ར་ད་ཧ་ཛམ་བྷ་ལ་ཛ་ལེན་དྲཱ་ཡ་སྭཱ་ཧཱ། ད་ར་ས་ར་རྦ་བིད་ཏྲ་སིད་དྷི་ས་མ་ཡ་ཧཱུཾ། ཞེས་བཟླས་སོ།། དེ་ལྟར་བཟླས་པའི་བསམ་པ་ནི།། བདག་གི་སྔགས་ལས་འོད་ཟེར་འཕྲོས།། ཡེ་ཤེས་སངས་རྒྱས་ཀུན་ལ་ཕོག། སངས་རྒྱས་འོད་དང་འདྲེས་ནས་ནི།། ཡིད་བཞིན་ནོར་བུའི་ཚུལ་དུ་དགུག། ཡང་འཕྲོས་ནོར་གྱི་ལྷ་ལ་ཕོག། དེ་ནས་ནོར་ལྷ་ཕྲ་མོའི་ཚོགས།། སྟོང་གསུམ་ནོར་རྣམས་བཀུག་ནས་ནི།། རང་གི་རྟེན་ལ་བསྟིམ་པར་བྱ།། རྨི་ལམ་ནོར་བུ་སྤྱོད་པ་དང།། དཀོན་མཆོག་གསུམ་ཡང་དྲན་པར་བྱ།། དྲན་པར་གྱུར་པའི་རྣལ་འབྱོར་པས། ། ནོར་གྱི་དངོས་གྲུབ་ཐོབ་པར་འགྱུར།། ཆོ་གས་ནོར་ནི་བསྒྲུབ་པའོ།། གསང་བའི་ཆོ་གའི་ལས་བྱེད་ན།། ལྷོ་རུ་དྲག་པོའི་དཀྱིལ་འཁོར་བྲུ།། དེ་ནས་ཁྲག་དང་དུག་གིས་དགང།། རྐང་རྗེས་ལ་སོགས་དུག་དང་སྦྱར། ། གང་ཡིན་པའི་གཟུགས་བྱས་ཏེ།། སྙིང་ཁར་གྲུ་གསུམ་བྲུས་ནས་ནི།། ཤིང་ཤུན་མིང་རུས་བྲིས་ལ་གཞུག། ཁ་བཅད་ཁུང་དུ་གཞུག་པར་བྱ།། ཡང་ན་དུག་གིས་མེ་སྦར་ཏེ།། རབ་ཏུ་ཚ་བས་བྱུགས་ཤིང་སྐམ། ། དེས་ནི་ཚ་བས་འཆི་བར་འགྱུར།། དེ་བཞིན་དུ་གྲང་བའི་སྦྱོར་བའང་དེ།། ཕུར་བུས་བཏབ་ན་འཆི་བར་འགྱུར།། ཨོཾ་ན་མོ་ནཱི་ལཱཾ་པ་ར་ཧཱུཾ། ཀཱི་ལི་ཀཱི་ལ་ཡ་མ་ར་ཡ་ཕཊ། ཡུངས་ཀར་ཡུངས་ནག་སྐེ་ཚེ་དང། ། དུག་འབྲུམ་ལན་ཚྭ་ལ་སོགས་པ།། གོས་སྔོན་ཕྲ་མོས་བྱིན་བརླབས་ཏེ།། གསང་བའི་སྔགས་འདི་བཟླས་ཤིང་བརྡེག། ཨོཾ་ན་མོ་ནཱི་ལཱཾ་བ་ར་བཛྲ་ཧཱུཾ། ཆེ་གེ་མོ་མཱ་ར་ཡ་མཱ་ར་ཡ།། ན་ཤ་ན་ཡ་སཾ་ག་ཤ་ཧཱུཾ་མཱ་ར་ཡ་ཧཱུཾ་ཕཊ། མ་ཧཱ་རཱ་ཛ་ཀ་ལ་ནན་མཱ་ར་ཡ་ཕཊ། ཅེས་པའོ།། མནན་པའི་ལས་ཀྱི་ཆོ་ག་ནི།། གང་ཡིན་གཟུགས་དང་མིང་རུས་ཏེ།། ལམ་སྲང་དག་ཏུ་མནན་བྱས་ཏེ།། ཁུང་དུ་གྲུ་གསུམ་ཁྲུ་གང་ལ།། ཟབ་སུ་སོར་ནི་བཅུ་དྲུག་གོ། ནང་དུ་གདུག་པས་ཆག་ཆག་གདབ།། གང་ཡིན་ཚོན་སྐུད་སྣ་ལྔས་བཅིང།། རྒྱ་གྲམ་འབར་བས་སྟེང་ནས་མནན།། ཡང་ན་རི་རབ་སྦྱོར་བ་སྟེ།། སྟེང་དུ་ལས་ཀྱི་གོས་སྔོན་གྱིས།། གཟིར་བ་བྱས་ནས་འགྲུབ་པར་འགྱུར། ། མནན་པ་ལས་ཀྱི་ཆོ་གའོ།། རེངས་པར་འགྱུར་བའི་ཆོ་ག་ནི།། ཁུག་པར་གྱུར་པའི་གདུལ་བྱ་ལ།། སྤྱི་བོའི་གཙུག་ཏུ་ཕུར་བས་གདབ།། ལུས་ཀུན་ཁྱབ་ནས་རེངས་པར་འགྱུར།། དེ་དག་བྱུང་བར་གྱུར་ནས་ནི། ། འོ་མ་སྦྲང་རྩི་བུ་རམ་དང།། ཛ་ཏི་པ་ལ་བསྲེས་པས་བྱུག། ཟླ་བ་ཨ་ལི་ཆུ་རྒྱུན་ལ།། ཨ་མྲྀ་ཏ་ཡི་སྔགས་བཟླས་ན།། འཚོ་བར་འགྱུར་བ་ཐེ་ཚོམ་མེད།། སྨྱོ་འབོགས་ཀྱི་ཆོ་ག་ནི།། གང་ཡིན་ཤ་ཡི་སྟེང་དུ་བཞག། སྙིང་ནས་ཁམས་གསལ་རྣམ་པར་རྒྱལ།། རླུང་གི་གདན་ལ་འདུག་པར་བསྐྱེད།། ཨོཾ་ན་མོ་ནཱི་ལཾ་བ་ར་ཧཱུཾ། ཆེ་གེ་མོ་མུ་ཁང་ཀུ་རུ་ཧཱུཾ། མ་ཧཱ་རཱ་ཛ་ནརྀ་ཨུ་ཙ་ཏ་ཡ་ཧཱུཾ་ཕཊ། སྔགས་གཟེར་འོད་ཟེར་གཉིས་འཕྲོས་པས། ། སྙིང་ནས་འོག་གི་རླུང་བསྐུལ་ཞིང།། ཤ་བ་ཡིས་ནི་འཕྲོས་པར་འགྱུར།། ཞེས་གསུངས་སོ།། དེ་ནས་བཅོམ་ལྡན་འདས་ཕྱག་ན་རྡོ་རྗེའི་ཏིང་འཛིན་ལས་བཞེངས་ཏེ། བདུད་རྩི་འཁྱིལ་བ་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་དཔལ་ལྡན་བདུད་རྩི་འཁྱིལ།། གསང་སྔགས་བདག་པོ་ཁྱོད་ལེགས་སོ།། གང་ཕྱིར་དཔལ་ལྡན་རྡོ་རྗེ་འཛིན།། མི་གཉིས་པའི་དོན་ཀུན་སྤྱོད།། བདུད་རྩིའི་བདག་པོ་ཁྱོད་ལ་བསྟོད། ། ཅེས་གསུངས་སོ།། འཕགས་པ་བདུད་རྩི་འཁྱིལ་བ་ལས་ལས་གཉིས་ཀྱི་དོན་གཉིས་གཏན་ལ་ཕབ་པ་རྫོགས་སོ།།།། དེ་ནས་ཡང་དག་བཤད་བྱ་བ།། ཐམས་ཅད་ཐོགས་པ་མེད་གྱུར་པ།། རྒྱུད་རྣམས་མ་ལུས་ཀུན་འདུས་པའི།
CLOSE WINDOW