| Wylie |
།།། རྒྱ་གར་སྐད་དུ། བཛྲ་བྷ་ར་ཧི་ཀུ་ཀུ་པ་ར་གུ་ཧ་ཏན་ཏྲ་ར་ཙ་ནཱ་མ། བོད་སྐད་དུ། རྡོ་རྗེ་ཕག་མོ་བྲམ་ཟེ་ལྕམ་དྲལ་གསང་བ་རྒྱུད་ཀྱི་རྒྱལ་པོ། ཕོ་ཐེམས་མོ་ཐེམས་ཞེས་བྱ་བ། རྡོ་རྗེ་མཁའ་འགྲོ་མ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བྲམ་ཟེ་བློ་ལྡན་མཆོག་སྲེད་ཅེས་བྱ་བ། ཨུ་རྒྱན་གྱི་ཡུལ་ན་ཡུམ་གྱི་བྷ་ག་ལ་རྗེ་བཙུན་མ་ཉིད་ལ་བྱིན་རླབས་ཞུ་ཞིང་སྙོམ་པར་ཞུགས་སོ། ། དེའི་ཚེ་བཀྲ་ཤིས་བྱིན་རླབས་འབྱུང་བའི་གནས་ནི། འདི་ལྟ་སྟེ། གནས་དང་ཉེ་བའི་གནས། ཞིང་དང་ཉེ་བའི་ཞིང། དུར་ཁྲོད་དང་ཉེ་བའི་དུར་ཁྲོད། འདུས་པ་དང་ཉེ་བའི་འདུས་པ། མཚན་དྷོ་དང་ཉེ་བའི་མཚན་དྷོ། ཨུ་རྒྱན་ཡུལ་གྱི་ལྷོ་ནུབ། རྒྱལ་པོ་ཛའི་ཁང་འགྲམ་ཚངས་པ་ཀླུ་གནོད་གྱི་ལྷ་ཁང་རྩུབ་འགྱུར་ཚལ་གྱི་དུར་ཁྲོད་ན། ཤིང་དང། མེ་ཏོག་དང། བྱ་སྣ་ཚོགས་སྐད་འབྱིན་པ། རྔ་དང་ཅང་ཏེའུ་པི་ཝང། ། སིལ་སྙན་ལ་སོགས་པའི་སྒྲ་དང། སྒྲ་སྣ་ཚོགས་ཀྱིས་བརྒྱན་པ། ལྕེ་སྤྱང་དང། བ་ཞད་དང། ནེ་ཙོ་དང། དུར་བྱ། ཀང་ཀ། ཁྲ་དང་འུག་པ་ལ་སོགས་པ་མང་པོ་ནི། ལ་ལ་ནི་ལྡིང། ལ་ལ་ནི་འཕུར། ལ་ལ་ནི་མཆོང། ལ་ལ་ནི་རྔམ། འཚིགས་པ་དང། རྒྱུག་པ་དང། འདྲལ་བ་དང། ཀུན་ཀྱང་སྒྲ་སྐད་སྣ་ཚོགས་ཀྱི་སྒྲ་གྱེན་ལ་སྒྲོགས་པ། རི་བོ་ཀུན་ནི་ཀེང་རུས་ཀྱི་རི་ལ། ཀ་ར་ཀ་ར་དང། ཧ་ཧ་དང། ཧེ་ཧེ་དང། སྤྱུག་པའི་སྒྲ་སྣ་ཚོགས་སྒྲོགས་པའི་དབུས་ན། བཅོམ་ལྡན་འདས་མ་རྡོ་རྗེ་ཕག་མོ་དེ། སྐུ་མཉམ་པའི་ངང་ལས་མ་གཡོས་ཀྱང་སྤྲུལ་སྐུ་གདུག་པ་འདུལ་བའི་དོན་དུ། རོའི་གདན་ལ་བརྗིད་པའི་གཟི་མདངས་དང་བཅས་ནས། སྒེག་མོའི་ཚུལ་དུ་བཞུགས་སོ།། ཡུལ་དང། གནས་དང། སྐུ་བཞུགས་པའི་ལེའུ་སྟེ་དང་པོའོ།།།། དེ་ནས་བྲམ་ཟེ་མཆོག་སྲེད་ཀྱིས། ལྷ་རྣམས་དང། བརྒྱ་བྱིན་དང། ཚངས་པ་དང། སྲིན་པོ་དང། ལྷ་མ་ཡིན་དང། དྲི་ཟ་དང། མི་འམ་ཅི་དང། ལྟོ་འཕྱེ་ཆེན་པོ་དང། ཀླུ་དང། གནོད་སྦྱིན་དང་ཐབས་ཅིག་ཏུ་བཞུགས་སོ།། དེ་ནས་འཁོར་རྣམས་ཀྱིས་མེ་ཏོག་དང། སྤོས་དང། མར་མེ་དང། བྱུག་པ་དང། ཞལ་ཟས་དང། སྒྲ་ལ་སོགས་པ་སྣ་ཚོགས་ཀྱིས་མཆོད་དོ།། དེ་ནས་བྲམ་ཟེ་མཆོག་སྲེད་ཀྱིས། མཁའ་འགྲོ་མའི་གཙོ་མོ་རྡོ་རྗེ་ཕག་མོ་ལ་འདི་སྐད་བསྟོད་ནས་ཞུས་སོ།། དཔལ་ལྡན་རྡོ་རྗེ་མཁའ་འགྲོ་མ།། མཁའ་འགྲོ་མ་ཡི་འཁོར་ལོ་སྒྱུར། ། བསྐལ་པ་མེ་ལྟར་འབར་བའི་འོད།། མཁའ་འགྲོ་ཁྱོད་ལ་ཕྱག་འཚལ་ལོ།། འཁོར་བ་མྱ་ངན་འདས་སྤངས་ཤིང།། འཁོར་བ་མྱ་ངན་འདས་ལ་བཞུགས།། ཀུན་རྫོབ་དོན་དམ་གཉིས་སུ་མེད། ། གཉིས་མེད་གཟུགས་ལ་ཕྱག་འཚལ་ལོ།། གཡས་པ་རྟོག་མེད་ཕག་གི་ཞལ།། གཡོན་པ་ཆགས་ཚུལ་ཁྲོ་མོའི་ཞལ།། ཞལ་གཉིས་སུ་ནི་སྤྲུལ་མཛད་མ།། སྒྲུབ་པ་པོ་ལ་གྲོགས་མཛད་མ།། རྡོ་རྗེ་རྣམ་འབྱོར་མ་ལ་བསྟོད། ། ཕག་མོ་ཁྱོད་ལ་ཕྱག་འཚལ་ལོ།། གཡས་གཡོན་བརྐྱང་བསྐུམ་ཐབས་དང་ཤེས་རབ་འབྲེལ།། སྤྲོས་མེད་ཆོས་ཀྱི་དབྱིངས་ལས་མ་གཡོས་ཀྱང།། ཐབས་ཀྱིས་གང་ལ་གང་དགོས་འདུལ་བ་ཡི།། སྨོན་ལམ་དབང་གི་འགྲོ་བའི་དོན་མཛད་མ། ། ཡིད་བཞིན་ནོར་བུ་ཁྱོད་ལ་ཕྱག་འཚལ་ལོ།། གཡས་པ་སྐྱོན་ཀུན་གཅོད་བྱེད་གྲི་གུག་བསྣམས།། ཤིན་ཏུ་དཀར་བའི་ཐོད་པ་གཡོན་ན་བསྣམས།། པདྨའི་གདན་ལ་ཡ་བདུད་ཟིལ་གྱིས་གནོན། ། རྗེ་བཙུན་རྡོ་རྗེ་རྣལ་འབྱོར་མ་ལ་ཕྱག་འཚལ་བསྟོད།། ལན་གསུམ་སྐོར་བ་བྱེད་ཅིང་ཕྱག་བཙལ་ནས།། སྤྱན་སྔར་ཐལ་སྦྱར་དཔུས་བཙུགས་མིག་གདངས་ཏེ།། ངག་ཏུ་འདི་སྐད་ཅེས་ཞུས་སོ།། ཀྱེ་རྗེ་བཙུན་རྡོ་རྗེ་ཕག་མོ་ཁྱོད། ། འགྲོ་བ་སེམས་ཅན་གདུལ་སླད་དུ།། སྤྲུལ་སྐུ་འགྲོ་བའི་དོན་དུ་བཞེངས་སུ་གསོལ།། ཀྱེ་ཧོ་རྡོ་རྗེ་འཛིན་པ་བསྐུལ་མ་འདེབས།། ཀྱེ་ཧོ་ཐོད་པ་དགུ་བརྩེགས་ཆོས་འབྱུང་གཞལ་ཡས་ནས། ། ཆོས་ཉིད་དོན་རྟོགས་ཆོས་སྐུའི་ཕག་མོ་སྐུ་བཞེངས་འཚལ།། བདེ་བ་བྱིན་རློབ་ལོངས་སྐུའི་ཕག་མོ་སྐུ་བཞེངས་འཚལ།། སྣ་ཚོགས་སྟོན་ཞིང་སྤྲུལ་སྐུའི་ཕག་མོ་སྐུ་བཞེངས་འཚལ།། ནག་མོའི་ཆ་ལུགས་བདུད་མོའི་ཕག་མོ་སྐུ་བཞེངས་འཚལ། ། ལེགས་ཉེས་སྟངས་འཛིན་དམ་ཚིག་ཕག་མོ་སྐུ་བཞེངས་འཚལ།། དགྲ་བགེགས་བདུད་མཛད་བསྟན་སྲུངས་ཕག་མོ་སྐུ་བཞེངས་འཚལ།། སྐུ་ཡི་སྤྲུལ་པ་དཀར་མོ་ཉི་ཁྲི་སྐུ་བཞེངས་འཚལ། ། གསུང་གི་སྤྲུལ་པ་དམར་མོ་ཉི་ཁྲི་སྐུ་བཞེངས་འཚལ།། ཐུགས་ཀྱི་སྤྲུལ་པ་ནག་མོ་ཉི་ཁྲི་སྐུ་བཞེངས་འཚལ།། འཇིག་རྟེན་པ་དང་ཡེ་ཤེས་ལྷ།། མ་ལུས་པར་ནི་སྐུ་བཞེངས་འཚལ།། ཞེས་བསྐུལ་ལོ། ། བརྡས་བསྐུལ་བའི་ལེའུ་སྟེ་གཉིས་པའོ།།།། དེ་ནས་ཡང་དག་བཤད་བྱ་བ།། མཉམ་པའི་ངང་ལས་མ་གཡོས་ཀྱང།། རྡོ་རྗེ་ཕག་མོ་འགྲོ་བའི་དོན་དུ་སྐུ་བཞེངས་པ་བསྟན་ཏེ། གཡས་ཀྱི་ཕག་ཞལ་ཕྱེ་སྟེ། སྤྱན་གཡས་པ་ལས། སྤྲུལ་སྐུའི་ཡི་གེ་ཨཱ+ོཾ་བསྐུལ་བར་སྟོན་ཏེ། ཏི་སྟ་ར་པྲ་ན་ཡེ། དཔལ་ལྡན་རྒྱལ་པོ་ཡུལ་འཁོར་སྲུང།། ཆོས་སྐུ་རྣམ་དག་དོན་དུ་སྐུ་མདོག་དཀར་པོ་སྤྲུལ།། ངེས་དོན་སྒྲོགས་ཕྱིར་པི་ཝང་རྒྱུད་མང་བསྣམས། ། ཤར་ཕྱོགས་དྲི་ཟའི་གདོན་རྣམས་བསྲུང་བ་དང།། ཞི་བའི་འཕྲིན་ལས་མཛད་པའི་དོན་དུ་སྤྲུལ།། སྤྱན་གཡོན་ལོངས་སྐུའི་ཚུལ་དུ་ཨ་སྟོན་ཏེ།། བི་ཏ་ར་ཤ་ག་ཏོ་མེ། དཔལ་ལྡན་རྒྱལ་པོ་སྤྱན་མི་བཟང། ། འགྲོ་བའི་དོན་ལ་མ་ཆགས་སྐུ་མདོག་དམར།། འཁོར་བ་བཅིངས་པའི་ཞགས་པ་ཕྱག་ན་བསྣམས།། ནུབ་ཕྱོགས་ཀླུ་ཡི་གདོན་རྣམས་བསྲུང་བ་དང།། དབང་གི་འཕྲིན་ལས་མཐའ་རུ་དབྱུང་དུ་གསོལ།། སྤྱན་ནི་དབུས་མ་ཆོས་སྐུ་ཧཱུཾ་སྟོན་ཏེ། ། བེ་དུ་རག་ཤ་བེ། དཔལ་ལྡན་རྒྱལ་པོ་འཕགས་སྐྱེས་པོ།། ཆེ་བའི་ཡོན་ཏན་རྒྱས་པས་སྐུ་མདོག་སེར།། འཁོར་བའི་བག་ཆགས་འཇོམས་ཕྱིར་བེ་ཅོན་བསྣམས།། ལྷོ་ཕྱོགས་གྲུབ་བུམ་གདོན་ཚོགས་བསྲུངས་བ་དང། ། རྒྱས་པའི་འཕྲིན་ལས་མཐའ་རུ་དབྱུང་དུ་གསོལ།། དེ་གསུམ་ངོ་བོ་ཉིད་ཀྱི་ཚུལ་དུ་རབ་གྲི་སྟེ།། མཐའ་གཉིས་འཇོམས་མཛད་བེ་ཧེ་ཤེ་ན་མ་རེ་ཡེ།། དཔལ་ལྡན་རྒྱལ་པོ་རྣམ་ཐོས་སྲས། ། མཛད་པའི་འཕྲིན་ལས་མཐར་ཕྱིན་སྐུ་མདོག་ལྗང།། འཁོར་བའི་བག་ཆགས་འཇོམས་ཕྱིར་བེ་ཅོན་རལ་གྲི་བསྣམས།། བྱང་ཕྱོགས་གནོན་སྦྱིན་ཚོགས་རྣམས་བསྲུང་བ་དང།། དྲག་པོའི་འཕྲིན་ལས་མཐའ་རུ་དབྱུང་དུ་གསོལ། ། ཆོས་ཀྱི་རྒྱལ་པོ་དུང་ལྟ་བུ་དང། དམར་པོ་སྒྲིབ་སེལ་མེ་ལྟ་བུ་དང། འཇིགས་སྐྱོབ་གསེར་ལྟ་བུ་དང། གདུག་པ་འདུལ་བྱེད་མུན་ནག་ལྟ་བུ་དང། དེ་ལས་གྱད་བཞིར་སྤྲུལ། དེ་ལས་ལྔ་བརྒྱ་རྩ་གཅིག་སྤྲུལ། དེ་ལས་དམག་དཔོན་བཞི་རུ་སྤྲུལ་ཐབས་ཀྱི་ཚུལ་དུ་སྤྲུལ་པ་ཡིན། གཡས་ཀྱི་ཕག་ཞལ་ལས་དཔའ་བོ་སྤྲུལ་པའི་ལེའུ་སྟེ་གསུམ་པའོ།།།། དེ་ནས་ཡང་དག་བཤད་བྱ་བ།། དེ་ལྟར་དེ་རྣམས་སྤྲུལ་པ་ལས། ། བྲམ་ཟེ་མཆོག་སྲེད་ངོ་མཚར་སྐྱེས།། ཨེ་མ་ངོ་མཚར་རྨད་ཀྱི་ཆོས།། འཁོར་བ་བུད་མེད་གདུལ་བའི་ཕྱིར།། སྤྲུལ་པ་འགྱེད་པ་ངོ་མཚར་ཆེ།། གཡས་ཀྱི་ཕག་གདོང་ནག་མོ་ལས།། རྟོག་མེད་རོ་དང་བཅས་པ་ཌཱ་ཀི་འབུམ། ། གཡོན་གྱི་ཁྲོ་ཞལ་དམར་མོ་ལས།། བདེ་ཆེན་ལས་ལ་འཁོར་བའི་ཌཱ་ཀི་འབུམ།། སྦྱི་གཙུག་ཐོད་པ་དུམ་བུ་བདུན་པ་ལས།། སངས་རྒྱས་རབ་བདུན་ལྡན་པའི་ཌཱ་ཀི་འབུམ།། རིན་ཆེན་རྣམ་ལྔས་དབུ་རྒྱན་བྱས་པ་ལས། ། རིགས་ལྔ་ཡབ་དང་ལྡན་པའི་ཌཱ་ཀི་འབུམ།། གཡུང་དྲུང་དམར་པོ་གཡོན་དུ་འཁྱིམ་བ་ལས།། ཉོན་མོངས་བག་ཆགས་སྲེག་བྱེད་ཌཱ་ཀི་འབུམ།། དགའ་བའི་ཙ་ཀྲ་མྱུར་དུ་འཁོར་བ་ལས། ། བདེ་ཆེན་གཉིས་མེད་རྟོགས་པའི་ཌཱ་ཀི་འབུམ།། བསྐལ་པའི་མེ་ཆེན་འུར་འུར་འབར་བ་ལས།། ཐ་དད་རྟོག་པ་སྲེག་པའི་ཌཱ་ཀི་འབུམ།། གཡས་ན་ཟངས་གྲི་རྣོན་པོ་བསྣམས་པ་ལས།། རྣམ་རྟོག་དྲི་མ་གཅོད་བྱེད་ཌཱ་ཀི་འབུམ། ། གཡོན་པ་ཐོད་པ་ཕྱི་དཀར་ནང་དམར་བསྣམས་པ་ལས།། བདེ་བ་ཡབ་ཀྱི་ཞལ་དུ་སྟོབ་པའི་ཌཱ་ཀི་འབུམ། ཁ་ཊྭཱཾ་རྩེ་གསུམ་རབ་ཏུ་འབར་བ་ལས།། དུག་གསུམ་རྩད་ནས་གཅོད་པའི་ཌཱ་ཀི་འབུམ། ། ཐོད་པ་གསུམ་གྱིས་རབ་ཏུ་འབར་བ་ལས།། དུར་ཁྲོད་རྒྱལ་མཚན་འདུལ་བའི་ཌཱ་ཀི་འབུམ།། ཌ་མ་རུ་ཡི་སྒྲ་ཆེན་སྒྲོགས་པ་ལས།། སྙན་བརྒྱུད་གདམས་ངག་སྟོན་པའི་ཌཱ་ཀི་འབུམ།། དྲང་ཅིང་ཡུ་བ་དཀར་པོ་འདྲིལ་བ་ལས། ། ལྷ་མེན་གཡུལ་ངོ་བཟློག་པའི་ཌཱི་ཀ་འབུམ།། མི་མགོ་ལྔ་བཅུའི་དོ་ཤལ་བྱས་པ་ལས།། འདུ་བྱེད་ལྔ་བཅུ་རྩ་གཅིག་སྤྲུལ་བར་མཛད་པའི་ཌཱ་ཀི་འབུམ།། གཡོན་བརྐྱང་གཡས་བསྐུམ་ཞབས་ཀྱི་བཞུགས་ཚུལ་ལས། ། འཁོར་བའི་འདམ་ལས་སྒྲོལ་བའི་ཌཱ་ཀི་འབུམ།། རོ་ཡི་གདན་ལ་བརྗིད་པར་བཞུགས་པ་ལས།། དུར་ཁྲོད་ཤ་ལ་མི་པོད་རྫི་བའི་ཌཱའ་ཀི་འབུམ།། ཕྱག་གཉིས་གསེར་གྱི་གདུ་བུ་ཁྲོལ་བ་ལས། ། སྲོག་གཅོད་ཉོན་མོངས་སྤོང་བྱེད་ཌཱ་ཀི་འབུམ།། དཔུང་པའི་རྒྱན་རྣམས་རབ་ཏུ་འབར་བ་ལས།། ཉོན་མོངས་གཉེན་པོས་འདུལ་བྱེད་ཌཱ་ཀི་འབུམ།། མཆེ་བ་ཟླ་ཚེས་དཀར་པོ་གཙིག་པ་ལས།། འཁོར་བ་རྩད་ནས་གཅོད་པའི་ཌཱ་ཀི་འབུམ། ། ཕག་ཞལ་གྱེན་ལ་སྤྱན་གསུམ་གཟིགས་པ་ལས།། སྐུ་གསུམ་ལྷུན་གྱིས་གྲུབ་པའི་ཌཱ་ཀི་འབུམ།། རྩ་ཞལ་སྤྱན་གསུམ་ཐུར་དུ་གཟིགས་པ་ལས།། ཁམས་གསུམ་ཟིལ་གྱིས་གནོན་པའི་ཌཱ་ཀི་འབུམ། ། སྙན་ཆ་གསེར་གྱི་རྣ་རྒྱན་མཛད་པ་ལས།། དམ་ཚིག་གཞུང་ལྟར་བསྲུང་བའི་ཌཱ་ཀི་འབུམ།། པདྨའི་གདན་ལ་རབ་ཏུ་བརྗིད་པ་ལས།། བདེ་ཆེན་གཉིས་མེད་རྟོགས་པའི་ཌཱ་ཀི་འབུམ།། སྤྱི་བོ་ཧ་ལས་གྱུར་པའི་ཌཱ་ཀི་ལས། ། ལྟ་བ་ཉམས་སུ་ལེན་པའི་ཌཱ་ཀི་འབུམ།། མགྲིན་པ་རི་ལས་གྱུར་པའི་ཌཱ་ཀི་ལས།། མ་བསྒོམས་བྱིན་གྱིས་བརློབ་པའི་ཌཱ་ཀི་འབུམ།། སྙིང་ཁ་ནི་ལས་གྱུར་པའི་ཌཱ་ཀི་ལས།། སྤྱོད་པ་སྣ་ཚོགས་བསྒྱུར་པའི་ཌཱ་ཀི་འབུམ། ། ལྟེ་བ་ས་ལས་གྱུར་པའི་ཌཱ་ཀི་ལས།། འབྲས་བུ་གསེར་ཁུང་རྡོལ་བའི་ཌཱ་ཀི་འབུམ།། གཞན་ཡང་སྐུ་ཡི་སྤྲུལ་པ་པྲ་མ་ཧ་ཏི་དང།། གསུང་གི་སྤྲུལ་པ་པདྨ་ད་རི་དང།། ཐུགས་ཀྱི་སྤྲུལ་པ་ལང་ཀུན་ད་རི་དང། ། ཡོན་ཏན་སྤྲུལ་པ་ཁ་སྲན་མ་ཀུན་དང།། འཕྲིན་ལས་སྤྲུལ་པ་རྡོ་རྗེ་ཌཱ་ཀི་དང།། རཏྣ་ཌཱ་ཀི་དང། པདྨ་ཌཱ་ཀི་དང། ཀརྨ་ཌཱ་ཀི་དང། དེ་ལས་སྤྲུལ་བའི་རིགས་ཀྱི་ཕོ་ཉ་མང་པོ་སྤྲུལ།། གཡུང་མོ་ཌཱ་ཀི་མ་དང། ཀོ་ཏ་མ་དང། གུ་གུ་དྷ་རི་ཧ་དང། གཟུགས་ཅན་མ་དང། ཁྭ་གདོང་མ་དང། འུག་གདོང་མ་དང། ཁྱི་གདོང་མ་དང། ཕག་གདོང་མ་དང། གཤིན་རྗེ་སྲེག་བྱེད་མ་དང། གཤིན་རྗེ་མཆེ་བ་མ་དང། གཤིན་རྗེ་ཕོ་ཉ་མ་དང། གཤིན་རྗེ་འཇོམས་མ་དང། རབ་ཏུ་གཏུམ་མོ་དང། མིག་བཙུམ་མ་དང། འོད་ལྡན་མ་དང། སྣ་ཆེན་མ་དང། དཔའ་བོ་བློ་གྲོས་མ་དང། མིའུ་ཐུང་མ་དང། ལང་ཀའི་དབང་ཕྱུག་མ་དང། ཤིང་གྲིབ་མ་དང། ས་སྲུངས་མ་དང། འཇིགས་བྱེད་མ་དང། རླུང་ཤུགས་མ་དང། ཆང་འཐུང་མ་དང། སྔོ་བསངས་མ་དང། ཤིན་ཏུ་བཟང་མོ་དང། རྟ་སྣ་མོ་དང། གཙུག་ཕུད་ཅན་དང་བྱ་གདོང་མ་དང། འཁོར་ལོ་ཤུགས་ཅན་མ་དང། དུམ་སྐྱེས་མ་དང། ཤོ་ན་དིང་དང། འཁོར་ལོ་གོ་ཆ་མ་དང། ཤིན་ཏུ་དཔའ་མོ་དང། སྟོབས་ཆེན་མོ་དང། འཁོར་ལོ་སྒྱུར་བ་མོ་དང། བརྩོན་ཆེན་མོ་དང། དེ་ལ་སོགས་པ་མཁའ་འགྲོ་མ་བྱེ་བ་ཕྲག་འབུམ་ཕྲག་མང་པོ་སྤྲུལ་ལོ། ། རྡོ་རྗེ་ཕག་མོའི་སྐུ་ལས་མཁའ་འགྲོ་དཔའ་མོ་སྤྲུལ་པའི་ལེའུ་སྟེ་བཞི་པའོ།།།། དེ་ནས་མཁའ་འགྲོ་འབུམ་གྱིས་བསྟོད་པ། བཅོམ་ལྡན་འདས་མའི་སྐུ་བསྟན་ཏེ། སྤྱན་འཁོར་ལ་གཟིགས་ནས། ཞལ་འཛུམ་པ་མཛད་དེ། འདི་སྐད་ཅེས་བཀའ་སྩལ་ཏོ།། འཁོར་བའི་སེམས་ཅན་གདུལ་སླད་དུ།། ཐབས་ཀྱིས་འདུལ་བའི་རིམ་པ་དང།། རྒྱལ་པོ་གསང་ཞིང་བསྒྲུབ་པར་བྱའོ།། བཅོམ་ལྡན་ཕག་མོ་བསམ་མི་ཁྱབ། ། ཅེས་གསུངས་ནས་ཐུགས་དེ་ཉིད་ལས་མ་གཡོས་བཞིན་དུ། འགྲོ་བའི་དོན་དུ་ལས་ཀྱི་ཕག་མོར་སྐུ་སྤྲུལ་ཏེ། སྐུ་ལ་རྒྱན་གསོལ་ཏེ། སྐུ་གསུང་ཐུགས་ཡོན་ཏན་འཕྲིན་ལས་ལྔ་ལས། ཡི་གེ་མ་སྔོན་དུ་བསྟན་ཏེ། མ་ཧ་ར་ནི་ས། ཡི་གེ་བཞི་པ་དང་ལྔ་པ་དང། གསུམ་པ་དང། གཉིས་པ་དང། གཅིག་པ་དང། དྲུག་པ་དང། བདུན་པ་དང། དེ་ལས་ཡི་གེ་ལྔ་པ་ལ།། དང་པོར་མངོན་པར་སངས་རྒྱ་བའི་ཡི་གེ་དང། གཉིས་པ་ཐུན་མོང་གི་ཟས་ཚོགས་འདུ་བའི་ཡི་གེ་དང། གསུམ་པ་འབྱུང་བ་རོ་སྙོམས་པའི་ཡི་གེ་དང། བཞི་པ་ལྷ་འདྲེ་དཔུང་བསྐྱེད་པའི་ཡི་གེ་དང། ཚེ་སྲིང་བར་བྱེད་པའི་ཡི་གེ་དང་ལྔའོ།། དེའི་དང་པོ་ལ་བཞི། ཞེས་སྡང་གི་སྒོ་ནས་སངས་རྒྱ་བར་བྱེད་པའི་ཡི་གེ་དང། འདོད་ཆགས་ཀྱི། གཏི་མུག་གི། གཉིད་དང་བསམ་གཏན་ཆོས་སྐུར་སྲེ་བར་བྱེད་པའི་ཡི་གེའོ།། ཐུན་མོང་གི་ཟས་ཚོགས་འདུ་བར་བྱེད་པའི་ཡི་གེ་ལ། ནོར་སྒྲུབ་པ་དང། ཆུ་སྦྱིན་པ་དང། ཚ་ཚ་དང་ཐང་སྐུ་ལ་མཆོད་པ་བྱེད་པ་དང། དཔལ་བོའི་སྟོན་མོ་དང། གའུའི་སྦྱོར་བ། སྔགས་ཀྱི་སྦྱོར་བ། ཕག་མོ་ཆང་དགུག་པ། ལྷ་མོའི་མཚན་དགུག་པ། ཆུ་ལ་མི་བྱིང་བ། མངོན་པར་ཤེས་པའི་སྦྱོར་བ། མེས་མི་ཚིག་པ། བཅུད་འཕེལ་བར་བྱེད་པ། རྨ་སྔགས། མཛེ་གསོ་བ། ཞོ་ཆང་བསྲུང་བ། སྲིའུ་གསོ་བ། སེར་བ་བསྲུང་བ། འཆི་བ་བཟློག་པ། རྨི་ལམ་ངན་པ་བཟློག་པ། ལམ་འཇིགས་པ་བསྲུང་བ་ཕྱོགས་ངན་བཟློག་པ། མིག་མཐོང། པྲ་དབབ་པ། འགོ་ནད་བཟློག་པ། ཤ་རོ་དབྱུང་བ། ཡི་དམ་ལྷའི་ཞལ་མཐོང་བར་བྱ་བ། བྱིན་བརླབས་དབབ་པ། བསྲུང་བ་གདགས་པ་དང། ས་འོག་གི་གདོན་མཐོང་བ་དང། རྒྱལ་པོ་ཆེན་པོ་དབང་དུ་བསྡུ་བ་དང། ཕོ་བྲང་གྲོང་ཁྱེར་གཡོ་བར་བྱ་བ་དང། བཙུན་མོ་གཡོ་བར་བྱ་བ་དང། མི་དང་རྩོད་པ་རྒྱལ་བར་བྱ་བ་དང། རྟ་ཕྱུགས་བསྲུང་བ་དང། རྐུན་མོ་མི་འབྱུང་བའོ། ། དེ་རྣམས་ཕན་གདགས་པའོ།། ཚར་གཅད་པ་ལ། མཐུ་དང། ཀླུ་ལ་གཏད་པ་དང། ཐོག་སེར་དབབ་པ་དང། སྨྱོ་བ་དང། འབྱེད་པ་དང། བཟའ་མི་འབྱེད་པ་དང། ཟོར་དང། ལྟས་ངན་དང། བྱ་དམག་དང། ཁྱི་དམག་དང། ཞིང་སེལ་དང། ཁང་སེལ་དང། དུར་སེལ་དང། ལྐུགས་པ་དང། རེངས་པ་དང། རྨུགས་པ་དང། དབུ་རྡེབ་པ་དང། བརྟུལ་ཞུགས་པ་ལ་སོགས་པའོ།། ལས་ཚོགས་ཀྱི་ལེའུ་སྟེ་ལྔ་པའོ། །།། ལྷ་འདྲེ་དཔུང་བསྐྱེད་པའི་ཡི་གེ་ལ་བརྒྱད་དེ། བརྟུལ་ཞུགས་ཀྱི་དཔུང་དང། ལྷའི། གླུའི། སྔགས་ཀྱི། འབྱུང་བ་བཞིའི། སྦྱིན་སྲེག་གི། རྫས་དང་སྔགས་ཀྱི་དཔུང། རིག་པ་ཡེ་ཤེས་ཀྱི་དཔུང་ངོ། ། དཔུང་བསྐྱེད་པའི་ལེའུ་སྟེ་དྲུག་པའོ།།།། འབྱུང་བ་བཞི་རོ་སྙོམས་པའི་ཡི་གེ་ལ་དྲུག་སྟེ། ཙ་ཀྲ་བཞི་ལ་བརྟེན་པའི་ཡི་གེ་བཞི་དང། ལྷ་མོ་བསྐྱེད་པའི་ཡི་གེ་དང། ལྟ་སྒོམ་བཞིའི་ཡི་གེ་དང། ཡི་གེ་འགྲོ་བཟློག་གི་ཡི་གེ་དང། འབྱུང་པ་རོ་སྙོམས་ཀྱི་ཡི་གེ་བཞི་དང། མངོན་ཤེས་འཆར་བའི་ཡི་གེ་བཞིའོ།། འབྱུང་བ་རོ་སྙོམས་ཀྱི་ཡི་གེ་བཞིའི་ལེའུ་སྟེ་བདུན་པའོ།།།། ཚེ་སྲིང་བར་བྱེད་པའི་ཡི་གེ་བཞི་ལ། ཕྱི་ནང་གསང་བ་དེ་ཁོ་ན་ཉིད་ཀྱི་བཅུད་ལེན་ནོ། ། ཕྱིའི་བཅུད་ལེན་ནི། སྲིད་པ་ཕོའི་བཅུད་ཅོང་ཞིའི་བཅུད་ལེན་དང། སྲིད་པ་མོའི་བཅུད་བྲག་ཞུན་གྱི་བཅུད་ལེན་དང། འབྱུང་བ་ཕོའི་བཅུད་ཆུའི་བཅུད་ལེན་དང། ། འབྱུང་བ་མོའི་བཅུད་སའི་བཅུད་ལེན་དང་བཞིའོ།། ནང་ཤི་བཅུད་ལེན་ནི། བདུད་རྩི་ལྔ་སྟེ། དྲི་ཆེན། དྲི་ཆུ། ཤ་ཆེན། པདྨ་རཀྟ། བྱང་སེམས་དང་ལྔའོ།། གསང་བའི་བཅུད་ལེན་ནི། བུ་མོ་ལོ་བཅུ་དྲུག་ལོན་པའོ། ། བླ་ན་མེད་པའི་བཅུད་ལེན་ནི། ལྟ་སྒོམ་སྤྱོད་གསུམ་མོ།། ཚེ་བསྲིང་བའི་བཅུད་ལེན་གྱི་ལེའུ་སྟེ་བརྒྱད་པའོ།།།། དེ་ནས་བྲམ་ཟེ་མཆོག་སྲེད་ངོ་མཚར་སྐྱེས་ནས། ཡེ་ཤེས་ཌཱ་ཀི་མ་ལ་བསྟོད་པ། ཨཱ+ེ་མ་ཧོ། རྡོ་རྗེ་ཕག་མོ་བདེ་གཤེགས་ཡུམ།། འདོད་པའི་དབང་ཕྱུག་སྐལ་ལྡན་མ།། མཁའ་འགྲོ་ཆེན་མོ་རྣལ་འབྱོར་གཙོ།། རྡོ་རྗེ་དབྱིངས་ཀྱི་ཌཱ་ཀི་ཡུམ།། ཕྱག་རྒྱ་ཆེན་པོ་རྡོ་རྗེའི་སྐུ།། ཧེ་རུ་ཀ་དང་ཡང་དག་སྦྱོར།། དབུ་སྟོང་མ་ལ་སྤྱན་སྟོང་མ། ། སྟོང་ཕྲག་བཅུ་ཡི་ཞལ་གདོང་ཅན།། ཉི་མ་འབུམ་གྱི་གཟི་བརྗིད་ཅན།། སྤྱན་མིག་དམར་སེར་གློག་སྟོང་འགྱུ།། ཁ་གཉེར་མཆེ་བ་རབ་ཏུ་གཙིགས།། དབུ་སྐྲ་གྱེན་བརྫཻས་ཐོག་སེར་འབེབས། ། སེང་གེའི་གཟུགས་ཅན་འདབ་བཟངས་གཟུགས།། གླང་པོ་ཆེན་པོ་ཆེ་བའི་གཟུགས།། འཇིག་རྟེན་གསུམ་པོ་ལྟོ་བ་ཅན།། རྒྱ་མཚོའི་མཐའ་དག་སྐེ་རགས་ཅན།། ཐོད་པ་དང་ནི་ཁ་ཊཱཾ་འཛིན།། རྡོ་རྗེ་ཟངས་གྲིས་འབྱུང་པོ་འཇོམས། ། མི་རུས་འཕྲེང་བའི་རྒྱན་ཆས་ཅན།། མི་མགོ་སྐམ་པོའི་དོ་ཤལ་ཅན།། བདེ་གཤེགས་འབུམ་ནི་ཁྱོད་ཀྱི་འཁོར།། ཆེ་བའི་ལྷ་ཚོགས་ཁྱོད་ཀྱི་བྲན།། རིག་པའི་རྒྱལ་པོ་གདོན་གཟུགས་ཅན། ། རྣལ་འབྱོར་ཆེ་བའི་དངོས་གྲུབ་འབེབས།། དཔའ་བོ་དངོས་གྲུབ་ཆེར་གསལ་ནས།། ཧཱུཾ་དང་ཕཊ་ཀྱི་འབྲུག་སྒྲ་ཅན། ཁྲོ་བོའཾ་གཟུགས་ཀྱིས་ཁམས་གསུམ་སྒྲོལ།། རྒྱ་མཚོའི་གླིང་རྣམས་སྐེམས་པར་བྱེད།། སྣ་ཚོགས་ཆོས་རྣམས་ཟིལ་གྱིས་གནོན། ། སྲིད་པ་གསུམ་ནི་ཟ་བར་བྱེད།། ཟས་སུ་མ་ཧྭ་མང་ས་གསོལ།། མ་ཧཱ་རཀྟ་བདེ་བར་གཤེགས།། མ་ལུས་གདུག་པ་སྐྲག་པར་བྱེད།། འཇིགས་པར་མཛད་ཅིང་གསོད་པར་བྱེད། ། དམག་གི་དཔུང་རྣམས་རེངས་པར་བྱེད།། ངོ་མཚར་འདོད་པའི་གཟུགས་མངའ་བ།། ཡིད་ལ་འདོད་པའི་དངོས་གྲུབ་གསོལ།། ཕག་མོ་ཁྱོད་ལ་ཕྱག་འཚལ་བསྟོད།། བདག་གིས་ཁྱོད་ལ་གང་གསོལ་བ།། དོན་དེ་དེ་རིང་གྲུབ་པར་མཛོད། ། བཅོམ་ལྡན་འདས་མ་ཕག་གདོང་ཅན།། སྐྱོན་ཀུན་གཅོད་བྱེད་གྲི་གུག་གཡས།། ཐོད་དཀར་ཁྲག་གིས་བཀང་བ་གཡོན།། བདུད་ཀྱི་སྙིང་མནན་ཁྱོད་ལ་འདུད།། གཡོན་པ་ཆགས་ཚུལ་ཁྲོ་མོའི་ཞལ། ། གཡས་པ་ཕག་གདོང་རྟོག་མེད་ཞལ།། སྐུ་མདོག་དམར་མོ་འོད་ཟེར་འཕྲོ།། ཕག་མོའི་སྐུ་ལ་ཕྱག་འཚལ་བསྟོད།། བདེན་པ་གཉིས་ཀྱི་དོན་ལྡན་པའི།། ཞལ་གཉིས་སུ་ནི་སྤྲུལ་མཛད་མ།། སྒྲུབ་པ་པོ་ལ་གྲོགས་མཛད་མ། ། རྣལ་འབྱོར་མ་ལ་ཕྱག་འཚལ་བསྟོད།། དུས་གསུམ་བདེ་གཤེགས་ཀུན་གྱི་ཡུམ།། རྟོག་པ་ཐམས་ཅད་རྣམས་སྤངས་ཤིང།། སྐུ་ནི་ཕག་མོར་སྟོན་མཛད་མ།། སྤྲུལ་སྐུ་ཁྱོད་ལ་ཕྱག་འཚལ་བསྟོད། ། འཁོར་བ་མྱ་ངན་འདས་སྤངས་ཤིང།། དོན་དམ་ཀུན་རྫོགས་དབྱེར་མེད་པས།། གཉིས་མེད་སྐུ་ལ་ཕྱག་འཚལ་བསྟོད།། སྤྲོད་མེད་དབྱིངས་ལས་མ་གཡོས་ཀྱང།། གང་ལ་གང་གིས་འདུལ་དོན་དུ།། སྨོན་ལམ་ཐུགས་རྗེས་དོན་མཛད་མ། ། ཡིད་བཞིན་ནོར་བུ་ཁྱོད་ལ་བསྟོད།། ཅེས་བསྟོད་དོ།། བསྟོད་པའི་ལེའུ་སྟེ་དགུ་པའོ།།།། སློབ་དཔོན་པདྨ་འབྱུང་གནས་ཀྱིས། ཇོ་མོ་མཁར་ཆེན་མཚོ་རྒྱལ་ལ་གདམས་པ། མཁའ་འགྲོ་མ་ནོར་བུ་འཕྲེང་བའི་རྒྱུད་རྫོགས་སོ།།།། གཏད་རྒྱ། གཏེར་རྒྱ། སྦས་རྒྱ།།།།
CLOSE WINDOW