Wylie |
ཨཱརྱ་མ་རཱ་ཛ་ཀྲོ་དྷི་རཱ་ཛ་ཏནྟྲ། བོད་སྐད་དུ། ཁྲོ་བོ་གཤིན་རྗེའི་རྒྱལ་པོའི་རྒྱུད། དཔལ་འཇིགས་བྱེད་རྒྱལ་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། འོག་མིན་གྱི་གནས་ན་དཔལ་རྡོ་རྗེ་སྲིན་པོ་བཞུགས་ཏེ། དེ་ཡི་ཚེ་དཔལ་ཕྱག་ན་རྡོ་རྗེས། ཁྲོ་བོའི་རྒྱལ་པོ་ཏ་ཀི་ར་ཛས་བསྟན་པ། བསྲུང་བའི་བདག་པོ་བསྟན་པའི་ཐབས་བསྟན་དུ་གསོལ་ཞེས་ཞུས་པས། དཔལ་འཇིགས་བྱེད་ཆེན་པོས་བཀའ་སྩལ་པ། བསྟན་པ་ནི་ཐུགས་ཀྱི་སྙིང་པོའོ།། གནོད་བྱེད་འཇོམས་པའི་ཐབས་ནི་བསྲུང་བ་སྟེ། བཅོམ་ལྡན་འདས་གཤིན་རྗེའི་རྒྱལ་པོ་ཏ་ཀིའི་རཱ་ཛ་དེ་ཡི་ཐབས་དང་མན་ངག་གང་དུ་བསྟན་པ་ནི། ཁྲོ་བོ་ཏ་ཀི་རཱ་ཛ་དངོས་པོ་དེ་ཡི་ཐབས་བསྟན་པ་ནི། གསད་པའི་ཐབས་དང། གསོ་བའི་ཐབས་དང། དབབ་པའི་ཐབས་དང། གཅད་པའི་ཐབས་དང་བཞིའོ།། དེ་ལ་གསང་པའི་ཐབས་ནི།། ཁྲོ་བོ་ཏ་ཀི་ར་ཛ་སྐུ་མདོག་མཐིང་ནག་ལ་ཉི་ཟླ་པདྨའི་གདན་ལ་བཞུགས་པ། སྟག་གི་ཤམ་ཐབས་དང། ཆུ་སྲིན་གྱི་གཡང་གཞི་དང། སྦྲུལ་གྱི་ཆུན་བུ་དང། དུར་ཁྲོད་ཀྱི་ཆས་བརྒྱད་ཀྱིས་རབ་ཏུ་བརྒྱན་པ་དང། ཕྱག་གཡས་ན་ཤེལ་གྱི་གྲི་བསྣམས། གཡོན་ན་ལྕགས་ཀྱུ་སྤར་ཤད་བསྣམས་པ་སྟེ་དགྲ་བགེགས་ཀྱི་འབིགས་པའོ།། དེའི་ཐུན་རྫས་ནི་ཉུངས་ཀར་ལ་བསྔགས་ལ་གཏོར་མ་ལ་ཐུན་བྲབ། ལིང་ག་གསར་རྙིང་གཉིས། རང་དྲི་མི་གཏོང་བར། སྙིང་ཁར་མིང། དཔྲལ་བར་རུས། ལྟེ་བར་མཚན། དེ་ཡི་སྒོམས་སུ་གསད་པའི་མ་རཱ་ཛ། ལྷ་འདྲེ་གཉན་སར་སྦས་གནན་ལ། ཞག་བདུན་དག་ཏུ་བསྒྲུབ་པར་བྱ།། དེ་ཡི་སྒྲུབ་པའི་དྲག་སྔགས་བསྟན་པ་ནི། ཨོཾ་ཏ་ཀི་རཱ་ཛ་ཙིཏྟ་ཧཱུ~ཾ་ཕཊ། ཅེས་འབུམ་ཚོ་བདུན་དུ་བཟླས་སོ།། གསད་པའི་ལེའུ་སྟེ་དང་པའོ།།།། གསོ་བའི་རིམ་པ་བསྟན་པ་ནི། གུ་གུལ་དཀར་པོ་ལ་མེ་གཏང་ལ། ནད་པའི་དྲི་མ་བཀྲུ་ཞིང་ཆུ་ལ་བསྔགས་ལ་ལུས་མགོ་འཇུག་ཁྱབ་པར་བྱུག་གོ། བསྲུང་བའི་དྲག་སྔགས་ནི། ཨོཾ་ཏ་ཀི་རཱ་ཛ་ཧཱུ~ཾ་ཕཊ། གསོ་བའི་ལེའུ་སྟེ་གཉིས་པའོ།།།། ཡང་དབབ་པའི་ཐབས་བསྟན་པ་ནི། ཁྲག་སྣ་མང་པོ་ཚོགས་ཚད་དང། ། དམ་ཉམས་དམིགས་པའི་སྔོ་སྣ་དང།། གངས་ཆུ་ལ་སོགས་པའི་ཆུ་སྣཚོགས་ལ་སྔགས་བཟླས་ཏེ། ཞག་བདུན་ན་འབུམ་ཚོ་བདུན་ལ་དགྲ་ཡུལ་དུ་སྔོ་གསེབ་ཏུ་གཏོར་རོ།། སེར་བའི་སྔགས་ནི། ཨོཾ་ཏ་ཀི་ར་ཙ་ཙན་དྷ་ཀ་ཧཱུ~ཾ་ཕཊ། རཱ་ཛ་དུ་ལི་ཤག་ཏྲང་ཕྲོཾ་ཧྲིལ། ན་ག་རཱ་ཛ་དུད་ཕྲོཾ་ཤར་ཕོབ། ཅེས་པས་ཆུ་མིག་མེད་པར་སེར་བ་ཕེབས་སོ།། ཐོག་སེར་དབབ་བའི་ལེའུ་སྟེ་གསུམ་པའོ།།།། སེར་བ་གཅད་པའི་ཐབས་ནི་འདི་དག་གོ། ཁྲོ་བོའི་རྒྱལ་པོ་ཀ་ཏི་རཱ་ཛས་སྟོང་ཁམས་མེའི་རང་བཞིན་དུ་ཁྱབ་པས། སྡང་མིག་བགྲད་པ་ན་མཆེ་བ་གཙིགས་པ། ཁ་ནས་མེའི་འོད་འཕྲོ་བ། གཡོན་པ་སྡིགས་མཛུབ་གྱེན་ལ་བསྒྲེང་བ། གཡས་པ་ཡུངས་ཀར་དྲིལ་ནས་འཕེན་པའི་དྲག་སྔགས་ནི། ཨོཾ་ཏ་ཀི་རཱ་ཛ་ཙིནྡྷ་ཙིནྡྷ་ཁརྒ་ཧཱུ~ཾ་ཕཊ། ཅེས་གཅད་པའི་ལེའུ་སྟེ་བཞི་པའོ།།།། ཡང་དེ་ཡི་དཔལ་རྡོ་རྗེ་སེམས་དཔའ་རྡོ་རྗེ་སྲིན་པོ་ལ། དཔལ་ཕྱག་ན་རྡོ་རྗེས་ཞུས་པ། སྨྱོ་འབོག་གི་ཐབས་དང་སྦྱོར་ཐབས་བསྟན་དུ་གསོལ། རྡོ་རྗེ་སྲིན་པོས་བཀའ་སྩལ་བ། བསྟན་པའི་སྙིང་པོ་ལ་གནོད་པ་བྱེད་པ་ལ། ཚེས་གསུམ་གྱི་ཆུ་དང་ཡུངས་ཀར་ལ་སྔགས་བརྡེག་སྟེ། ཨོཾ་ཏ་ཀི་རཱ་ཛ་ཙིཏྟ་ཀརག་ཁརག་ཧཱུ~ཾ་ཕཊ། ཅེས་པས་དགྲ་ཡི་ཐེམ་པའི་འོག་གམ་ཁང་རྩར་གཏོར་ན་ངེས་པར་ཉམས་པར་འགྱུར་རོ།། སྨྱོ་འབོག་གི་ལེའུ་སྟེ་ལྔ་པའོ།།།། དེ་ནས་ཡང་ཕན་པའི་ཐབས་བསྟན་དུ་གསོལ་ཞེས་ཞུས་པས། དཔལ་རྡོ་རྗེ་མཆང་གི་བཀའ་སྩལ་པ། འཇིག་རྟེན་རིམས་ནད་ཚུབ་མ་ལྟ་བུར་བྱུང་ཡང། བནྡྷེ་སྔགས་པའི་རུས་པ་དང། ཡུངས་ཀར་དང། ཁྲག་ཟོར་ལ་སྔགས་ལ་བརྡེག་སྟེ། ཨོཾ་ཏ་ཀི་རཱ་ཛ་ཙིནྡྷ་ཀརག་ཁརག་ཧཱུ~ཾ་ཕཊ། ཅེས་ཡུངས་ཀར་དང་རིན་པོ་ཆེ་སྣ་ཚོགས་ལ་འབུམ་བཟླས་ནས་མགུལ་དུ་བཏགས་ན་ཐུབ་བོ།། སྲེའུ་གསོ་བའི་ལེའུ་སྟེ་དྲུག་པའོ།།།། ཡང་ངན་སྔགས་ཀྱི་དུག་མདའ་འཕངས་ན། ཡུངས་ཀར་དང། ཁྲག་སྣ་དང། གཏོར་མ་ལ་ངན་སྔགས་བཟླས་ཏེ། ཨོཾ་ཏ་ཀི་རཱ་ཛ་ཙིནྡྷ་ཀརག་ཁརག་ཧཱུ~ཾ་ཕཊ། ཅེས་པས་དགྲ་ཕྱོགས་སུ་འཕང་སྟེ། བྷྱོ། ཆོས་ཀྱི་ཆོས་ཟོར་འཕེན་པ་སླར་ལ་བཟློག། རྒྱ་ཡི་ངན་སྔགས་འཕེན་པ་སླར་ལ་བཟློག། བོན་གྱི་བོན་ཟོར་འཕེན་བ་སླར་ལ་བཟློག། བྷྱོ་རང་གིས་རང་ལ་ཟོ། རང་སྔགས་ཀྱིས་རང་ཕུང་དུ་ཆུག། རང་མཚོན་རང་ལ་ཟུག། རང་གི་དམོད་པས་རང་ཕུང་དུ་ཆུག། ཅེས་སོ།། ངན་སྔགས་དུག་མདའི་ལེའུ་སྟེ་བདུན་པའོ། །།། དེ་ནས་དཔལ་ཆེན་པོས་བཀའ་སྩལ་བ། ཧཱུ~ཾ་བཅོམ་ལྡན་དཔལ་ཆེན་གཤིན་རྗེ་གཤེད།། ཁྲོ་བོའི་རྒྱལ་པོ་ཏ་ཀི་ར་ཛ་ནི།། མཐིང་ནག་མེ་ལྟར་འབར་བའི་འོད་ལྡན་ཞིང།། སྐུ་སྨད་སྟག་གི་ཤམ་ཐབས་བརྒྱན། ། ཆུ་སྲིན་གཡང་གཞི་ལྷབས་སེ་ལྷབས།། ཕྱག་གཡས་ཤེལ་གྱི་གྲི་གུག་བསྣམས།། དམ་ཉམས་དགྲ་བགེགས་གཤོག་པ། དམ་རྫས་བདུད་རྩི་འབར་བ་འདི་གསོལ་ལ།། སྡང་དགྲ་གནོད་བགེགས་རྡུལ་དུ་ལྷོགས། ། ཧཱུ~ཾ། སྲིན་པོ་འདུལ་མཛད་ཁྲོ་རྒྱལ་བཙོ།། སྨུག་ནག་མེ་ལྟར་འབར་བའི་དཀྱིལ་འཁོར་ནས།། རྡོ་རྗེ་རལ་གྲི་སྦྱོར་བས་གདུག་པ་འདུལ།། ཐོགས་མེད་ནམ་མཁའ་ལྟ་བུའི་ཞལ་མངའ་བ། ། བེ་ཅོན་ཞགས་པས་དགྲ་བགེགས་སྙིང་ནས་འདྲེན།། མཐིང་ནག་མེ་ཡི་དཀྱིལ་འཁོར་འོད་ཀྱིས་ཀུན་ཏུ་བསྐོར།། གྲི་གུག་འབར་བ་ཕྱག་ན་བསྣམས་པ་ཡིས།། ལས་ངན་དགྲ་བགེགས་སྙིང་ཁྲག་དྲོན་མོ་འདྲེན། ། ཤངས་ན་དབུགས་བྱུང་རླུང་ནག་ཚུབ་མར་འཚུབ།། སྦྱན་རྩ་དམར་པོ་བཟློག་པས་སྟོང་གསུམ་མེ་ཡིས་བསྲེག། ཞལ་ནས་ཁྲག་འཛག་སྟོང་གསུམ་འཚིག། སྐུ་བསྐྱོད་ཙམ་གྱིས་མ་མོ་དབང་དུ་སྡུད།། བསྟན་པ་གཉན་པོ་བསྲུང་བའི་བྱ་ར་བྱེད། ། དམ་རྫས་བདུད་རྩི་འབར་བ་འདི་གསོལ་ལ།། ཐུགས་དམ་དུས་ལ་བབ་བོ་ས་མ་ཡ།། མ་གཡེལ་བཅོལ་བའི་འཕྲིན་ལས་མཛོད།། ཅེས་བསྐུལ་བའི་ལེའུ་སྟེ་བརྒྱད་པའོ། །།། དེ་ནས་ཡང་ཐོད་པ་མཚན་དང་ལྡན་པ་རུ།། རྟེན་འབྲེལ་ནུས་མཐུ་ཚངས་བསོགས་པ།། གྲུ་གསུམ་ཟླ་གམ་གྲུ་བཞིའི་ནང་དུ་ནི།། རྫས་གསལ་ནས་ནི་ཞག་གྲངས་ཉི་ཤུ་རྩ་གཅིག་བཟླས་ན་གདོན་མི་ཟའོ། ། ལྷ་འདྲེའི་རྒྱུ་སྲང་ཡོད་ན། གཉན་པོ་གང་ཡོད་ས་རུ་སྦ།། སྒོ་རུ་ཁྲུ་གང་བརྐོས་ནས་ནི།། སྦས་ཏེ་གཡམ་པས་ཁ་ཡང་གཅད།། ལས་ཀྱི་རྡོ་རྗེ་རྐང་པ་མནན།། བཅིང་བ་ཕྱག་ན་རྡོ་རྗེར་སྒོམ།། ཧཱུ~ཾ། ང་ནི་ཁྲོ་བོའི་རྒྱལ་པོ་སྟེ། ། ཏ་ཀི་རཱ་ཛ་ཡིན་ངེས་པས།། སྦྱོར་བ་འདི་ནི་བྱ་བར་གསུངས།། མནན་བའི་ལེའུ་སྟེ་དགུ་པའོ།།།། སྦྱོར་བ་འདི་ཡི་མན་ངག་ཀྱང།། རང་གི་སྲོག་བཞིན་མ་བཅངས་ན།། སྣོད་དང་མི་ལྡན་སྤེལ་བ་ན། ། ན་རག་ཆེན་པོར་ལྷུང་བར་འགྱུར།། དེ་བས་ནན་ཏན་ཆེར་བསྐྱེད་ལ།། རིན་ཆེན་ལྟ་བུའི་གང་ཟག་ལ།། མནའ་དམ་བཅས་ལ་གཏད་པར་བྱ།། ཞེས་གསུངས་སོ།། ཁྲོ་བོ་འདོད་པའི་རྒྱུད་བཀའ་ཁྱད་པར་ཅན། ། དོན་གྱི་མན་ངག་སྙིང་པོའི་རྒྱུད།། རྒྱུད་གཏད་པའི་ལེའ་སྟེ་བཅུ་པའོ།།།། འཕགས་པའི་རྒྱལ་པོ་གཤིན་རྗེ་གཤེད་ཁྲོ་བོ་ཀ་ཏི་རཱ་ཛའི་རྒྱུད་ཚོགས་རྫོགས་སོ།།།།
CLOSE WINDOW