| Wylie |
།།། དེ་ནས་ངང་དངས་ཁྱེའུ་ཆུང་གིས།། སྐྱེ་མེད་དོན་གྱི་སྟོན་པ་ལ།། མ་བསྒྲུབས་པ་རུ་གྲུབ་པ་ན།། མ་བཙལ་རང་ལས་ཇི་ལྟར་རྙེད།། ཅེས་ཞུས་པ་དང།། སྟོན་པས་འཁོར་ལ་བཀའ་སྩལ་པ། ། ཡོངས་རྫོགས་བླ་མེད་ཐེག་པ་འདིར།། བསྒྲུབས་པའི་འབྲས་བུ་མི་འདོད་དེ།། མ་བསྒྲུབས་པ་ཡི་འབྲས་བུ་ཡིན།། ཐེག་པ་རིམ་དགུའི་རྩོལ་བསྒྲུབ་འབྲས་བུ་ཞེ་འདོད་ཡིན།། རྩོལ་བས་བསྒྲུབས་པས་དོན་མི་གྲུབ། ། ཞེ་འདོད་འབྲས་བུ་བློ་བཏགས་ཡིན།། བློ་བཏགས་ཆོས་ཀྱིས་སངས་མི་རྒྱ།། དེ་ཕྱིར་བློ་འདས་ཐེག་པ་འདི།། གཏིང་མཐའ་ཡས་པའི་ཀློང་དཀྱིལ་ནས།། མུ་མཐའ་ཡོངས་གྲོལ་གདམས་ངག་གིས། ། མ་བསྒྲུབས་རང་ལ་ལྷུན་གྱིས་གྲུབ།། གྲུབ་ཟིན་དོན་ལས་མ་འདས་ན།། ད་གདོད་རྩོལ་བས་བསྒྲུབ་ཏུ་མེད།། མེད་པ་དེ་ཀ་གྲུབ་པ་ཡིན།། ཞེས་གསུངས་སོ།། མ་བཙལ་རང་ལས་རྙེད་པ་ནི།། ཐོག་མེད་དུས་ནས་རང་ཆས་ལྡན། ། རང་ལས་ཡེ་ནས་གཞན་མི་འཚོལ།། སྐྱེ་མེད་སྙིང་པོ་ཆོས་སྐུ་དེ།། རང་ལས་རྙེད་པས་གཞན་ན་མེད།། མཐའ་ཡས་ཆོས་ཉིད་དབྱིངས་ཆེན་ནས།། སྙིང་པོ་སྐྱེ་མེད་ཀ་ནས་དག། དོན་དམ་ཆོས་སྐུ་ངང་ལས་རྙེད། ། བློ་འདས་འབྲས་བུ་རང་ཆས་ལྡན།། གཞན་ལས་མ་བཙལ་ལྷུན་གྲུབ་པས།། མ་བཙལ་ཆོས་སྐུ་རང་ལས་རྙེད།། ཅེས་གསུངས་སོ།། རིན་པོ་ཆེ་གསེར་གྱི་ཉི་མའི་རྒྱུད་ལས།། མ་བསྒྲུབས་པ་རུ་གྲུབ་པ་དང། ། མ་བཙལ་རང་ལས་རྙེད་པའི་ལེའུ་སྟེ་བཅུ་དྲུག་པའོ།།།། དེ་ནས་ངང་དངས་ཁྱེའུ་ཆུང་གིས།། སྐྱེ་མེད་དོན་གྱི་སྟོན་པ་ལ།། མ་བསྒོམས་མཐའ་རུ་ཇི་ལྟར་ཕྱིན།། ཅེས་ཞུས་པ་དང།། སྟོན་པས་འཁོར་ལ་བཀའ་སྩལ་པ། ། མ་བསྒྲུབས་མཐའ་རུ་གྱིན་པ་ནི།། ཡོངས་རྫོགས་བླ་མེད་ཐེག་པ་ཡིན།། དེ་ཡང་ཇི་ལྟར་ཡིན་ཞེ་ན།། ཆོས་ཉིད་གཏིང་ཡངས་དོན་རྟོགས་པས།། མ་བསྒོམས་པ་རུ་མཐའ་རུ་ཕྱིན། ། ཡིད་བཟུང་དྲན་རྟོག་མི་བསྒོམ་སྟེ།། ཆོས་ཉིད་དོན་གྱི་ཀློང་གནས་པས།། མ་བསྒོམས་མཐའ་རུ་ཕྱིན་པ་ཡིན།། ཉོན་མོངས་མ་རྟོགས་ཇི་སྙེད་ཀུན།། རང་བྱུང་ངང་དངས་མུ་མཐའ་གྲོལ།། གཏིང་མཐའ་ཡས་པའི་ཀློང་གནས་པས། ། མ་བསྒོམས་མཐའ་རུ་ཕྱིན་པ་ཡིན།། རྩ་རླུང་ལྷ་སྐུ་མི་བསྒོམ་སྟེ།། སྙིང་པོ་དོན་གྱི་ཀློང་གནས་པས།། མ་བསྒོམས་པ་རུ་མཐའ་རུ་ཕྱིན།། བསམ་གཏན་བསྒོམ་པ་དམིགས་མེད་པས།། མ་བསྒོམས་པ་རུ་མཐའ་རུ་ཕྱིན། ། ཐེག་དགུའི་བསྒོམ་བཞིན་མི་བསྒོམ་པས།། མ་བསྒོམས་པ་རུ་མཐའ་རུ་ཕྱིན།། མུ་མེད་མཐའ་སྟོང་དོན་རྟོགས་པས།། གང་ཡང་བློ་ཡི་མི་བསྒོམ་པས།། མ་བསྒོམས་མཐའ་རུ་ཕྱིན་པ་ཡིན། ། ཞེས་གསུངས་སོ།། རིན་པོ་ཆེ་གསེར་གྱི་ཉི་མས་མ་རིག་ཀ་དག་གི་རྒྱུད་ལས་མ་བསྒོམས་མཐའ་རུ་ཕྱིན་པའི་ལེའུ་སྟེ་བཅུ་བདུན་པའོ།།།། དེ་ནས་ངང་དངས་ཁྱེའུ་ཆུང་གིས།། སྐྱེ་མེད་དོན་གྱི་སྟོན་པ་ལ། ། མ་བསྲུངས་ཀ་ནས་ཇི་ལྟར་དག། ཅེས་ཞུས་པ་དང།། འཁོར་ལ་བཀའ་སྩལ་པ།། མ་བསྲུངས་ཀ་ནས་དག་པ་ནི།། ཀུན་རྫོགས་ཆེན་པོའི་ཐེག་པ་ཡིན།། ཆོས་ཉིད་གཏིང་ཡངས་དོན་རྟོགས་པས། ། མ་བསྲུངས་པ་རུ་ཀ་ནས་དག། སྐྱེ་མེད་ཀ་དག་ཀློང་གནས་པས།། དམ་ཚིག་མ་བསྲུངས་ཀ་ནས་དག། སྙིང་པོའི་དོན་ལས་མི་འདའ་བས།། དམ་ཚིག་མ་བསྲུངས་ཀ་ནས་དག། སྙིང་པོ་ཆོས་ཉིད་ཀ་དག་ལ། ། གཡོ་སྒྱུ་ཉམས་འགྲིབ་སྐྱོན་མེད་པས།། མ་བསྲུངས་དམ་ཚིག་ཀ་ནས་དག། ཅེས་གསུངས་སོ།། རིན་པོ་ཆེ་གསེར་གྱི་ཉི་མས་མ་རིག་ཀ་དག་གི་རྒྱུད་ལས།། མ་བསྲུངས་ཀ་ནས་དག་པའི་ལེའུ་སྟེ་བཅོ་བརྒྱད་པའོ། །།། དེ་ནས་ངང་དངས་ཁྱེའུ་ཆུང་གིས།། སྐྱེ་མེད་དོན་གྱི་སྟོན་པ་ལ།། མ་སྦྱངས་སྒྲིབ་རྣམས་ཇི་ལྟར་དག། ཅེས་ཞུས་པ་དང།། སྟོན་པས་འཁོར་ལ་བཀའ་སྩལ་པ།། ཀུན་རྫོགས་ཐོད་རྒལ་ཐེག་པ་ལ།། སྒྲིབ་པ་སྦྱང་དང་མི་འཚལ་ཏེ། ། སྐྱེ་མེད་ཀ་དག་དོན་རྟོགས་པས།། མ་སྦྱངས་སྒྲིབ་རྣམས་ཀ་ནས་དག། ཆོས་ཉིད་ཀ་དག་སྒྲིབ་དག་པས།། སྒྲིབ་གཉིས་མ་སྦྱངས་ཀ་ནས་དག། བློ་འདས་མུ་མཐའ་ཡོང་གྲོལ་བས།། སྒྲིབ་གཉིས་མ་སྦྱངས་ཀ་ནས་དག། གཏིང་ཡངས་སྙིང་པོའི་ཀློང་གནས་པས།། སྒྲིབ་པ་མ་སྦྱངས་ཀ་ནས་དག། ཐེག་གཞན་ཆོས་ཚུགས་སྒྲིབ་པ་མ་སྦྱངས་པར།། སྐྱེ་མེད་ཀ་དག་དོན་རྟོགས་སྒྲིབ་པ་རྣམ་པར་དག། ཅེས་གསུངས་སོ། ། རིན་པོ་ཆེ་གསེར་གྱི་ཉི་མའི་རྒྱུད་ལས།། མ་སྦྱངས་པར་སྒྲིབ་པ་ཀ་ནས་དག་པར་བསྟན་པའི་ལེའུ་སྟེ་བཅུ་དགུ་པའོ།།།། དེ་ནས་ངང་དངས་ཁྱེའུ་ཆུང་གིས།། སྐྱེ་མེད་དོན་གྱི་སྟོན་པ་ལ།། དེ་རྣམས་ལ་འདའ་ཇི་ལྟར་ལགས། ། ཞེས་ཞུས་པ་དང།། སྟོན་པས་འཁོར་ལ་བཀའ་སྩལ་པ།། ལ་འདའ་ཆེན་པོ་ང་ཡིས་བཤད།། འཁོར་རྣམས་མ་ཡེངས་གུས་པས་ཉོན།། ཡོངས་རྫོགས་ཐོད་རྒལ་ཐེག་པ་ཡི།། ལ་འདའ་ཆེན་པོ་འདི་ལྟར་བཤད། ། འཇུག་མེད་བསྒོམ་མེད་བསྲུང་མེད་པའི་བྱ་རྩལ་རྩོལ་བསྒྲུབ་མེད་པར་ལ་འདའ་བོ།། ལྟ་མེད་སྒོམ་མེད་སྤྱོད་མེད་པའི་ཐེག་མེད་བློ་འདས་ཀློང་དུ་ལ་འདའ་བོ།། སྦྱང་བསྒྲོད་ས་ལམ་མེད་པ་ཡིས། ། སྦྱང་ཞིང་བསྒྲོད་དུ་མེད་པར་ལ་འདའ་བོ།། གཞི་མེད་འཁྲུལ་མེད་རྐྱེན་མེད་པའི།། གཞི་འཁྲུལ་རྒྱུ་རྐྱེན་མེད་པར་ལ་འདའ་བོ།། མ་རིག་སྒྲིབ་མེད་ཀ་དག་པའི།། བག་ཆགས་སྒྲིབ་མེད་པར་ལ་འདའ་བོ། ། དངོས་མེད་མཚན་མེད་བསམ་འདས་པའི།། བློ་འདས་བརྗོད་དུ་མེད་པར་ལ་འདའ་བོ།། ཞེས་གསུངས་སོ།། རིན་པོ་ཆེ་གསེར་གྱི་ཉི་མའི་རྒྱུད་ལས།། ལ་འདའ་བསྟན་པའི་ལེའུ་སྟེ་ཉི་ཤུ་པའོ།།།། དེ་ནས་ངང་དངས་ཁྱེའུ་ཆུང་གིས། ། སྐྱེ་མེད་དོན་གྱི་སྟོན་པ་ལ།། རྒྱུད་ཀྱི་མཚན་མིང་ཇི་ལྟར་གཟུང།། ཞེས་ཞུས་པ་དང།། སྟོན་པས་འཁོར་ལ་བཀའ་སྩལ་པ།། དགོས་འདོད་མ་ལུས་ཀུན་འབྱུང་བས།། རིན་ཆེན་ལྟ་བུའི་རྒྱུད་ཡིན་ནོ། ། སྙིང་པོ་འགྱུར་བ་མེད་པའི་ཕྱིར།། རིན་ཆེན་གསེར་གྱི་རྒྱུད་ཡིན་ནོ།། ཡེ་ཤེས་ཉི་མས་མ་རིག་ཀ་དག་པས།། ཉི་གསལ་གཏི་མུག་ཀ་དག་རྒྱུད་ཡིན་ནོ།། སེམས་ཉིད་ཡེ་ནས་སངས་རྒྱས་པས། ། ཡེ་སངས་རྒྱས་པའི་རྒྱུད་དུ་ཟུང།། ཆོས་སྐུ་ལ་འདའ་གཏན་འབེབས་ཕྱིར།། ལ་འདའ་གཏན་འབེབས་རྒྱུད་དུ་ཟུང།། ཞེས་གསུངས་སོ།། རིན་ཆེན་གསེར་གྱི་ཉི་མའི་རྒྱུད་ལས།། རྒྱུད་ཀྱི་མཚན་བསྟན་པའི་ལེའུ་སྟེ་ཉེར་གཅིག་པའོ། །།། སྣོད་མེད་སྡིག་ཅན་དམ་མེད་པའི།། ཆོས་འཚོང་ལག་ཏུ་ཤོར་ར་རེ།། ཞེས་གསུངས་སོ།། རིན་ཆེན་གསེར་གྱི་ཉི་མས་མ་རིག་གཏི་མུག་ཀ་དག་ཡེ་སངས་རྒྱས་པའི་རྒྱུད་ཅེས་བྱ་བ་རྫོགས་སོ། །།། རྒྱ་གར་སྐད་དུ།། རཏྣ་ཨ་ས་པ་ཏ་བྷི་ར་པྲ་ར་ཚེ་ད་ནཱ་མ།། བོད་སྐད་དུ།། རིན་པོ་ཆེ་བྱེ་མ་རིག་གཅོད་ཀྱིས་ཀློང་སྡེའི་སྤྲོས་པ་གཅོད་པ་ཞེས་བྱ་བ། ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ།། རྡོ་རྗེ་སེམས་དཔའ་ལ་སོགས་པ།། ཀློང་སྡེ་སྤྲོས་གཅོད་བསྟན་པར་བྱ།། འཁོར་རྣམས་མ་ཡེངས་གུས་པས་ཉོན།། རིན་ཆེན་ལྟ་བུའི་གདམས་ངག་འདི།། མ་ཆགས་སེར་སྣ་ཆུང་བ་དང། ། དད་ལྡན་བླ་མ་སྙིང་ལ་སེམས།། ང་རྒྱལ་དྲེགས་པ་ཆུང་བ་དང།། སྔོན་གྱི་ལས་འཕྲོ་སྐལ་ལྡན་ལ།། ཀློང་སྡེ་སྤྲོས་གཅོད་བཤད་པར་བྱ།། རྫ་ཤིང་སྣོད་ངན་མ་ཡིན་པའི།། གུ་ལང་གསེར་གཟོའི་སྣོད་དུ་བླུག། སྙིང་པོའི་རང་བཞིན་མཚོན་མེད་བརྗོད་མེད་ཀྱང།། མ་མཚོན་བརྗོད་མེད་མི་རྟོགས་པས།། བརྗོད་བྲལ་བརྡལ་བརྟེན་ནས་བཤད།། རྩལ་གྱི་ཀློང་སྡེ་རིམ་པར་ཕྱེ་བ་ལ།། དབྱེ་ན་བསམ་ལས་འདས་མོད་ཀྱང། ། བསྡ་ན་གཅིག་ཏུ་འདུས་པར་སྣང།། གཅིག་བུ་རྟོག་པར་བྱ་བའི་ཕྱིར།། ཀློང་སྡེ་མདོ་ཙམ་བསྟན་པར་བྱ།། ཡེ་གནས་བཞི་ཡི་ཀློང་སྡེ་དང།། ཐོག་མར་གནས་པའི་ཀློང་སྡེ་དང།། སྔོན་ནས་གནས་པའི་ཀློང་སྡེ་དང། ། ཀུན་ཁྱབ་ཡོངས་བརྡལ་ཀློང་སྡེ་དང།། མཁའ་དབྱིངས་ཆོས་དབྱིངས་ཀློང་དུ་འདུས།། ཀུན་གཞི་སྤྱི་ཁྱབ་ཀློང་སྡེ་དང།། གཡོ་བ་ཁྱབ་བྱེད་ཀློང་སྡེ་དང།། འབྱུང་ལྔའི་རྩལ་གྱི་ཀློང་སྡེ་དང།། འོད་ལྔ་ཟེར་གྱི་ཀློང་སྡེ་བཞི། ། མ་འགགས་འགག་མེད་ལྷབ་ལྷུབ་བཞི་རུ་འདུས།། གསལ་ལ་མི་གཡོའི་ཀློང་སྡེ་དང།། ཤེས་པ་སྣང་ཚུལ་ཀློང་སྡེ་དང།། འཆར་སྒོ་འཁྲུལ་སྒོའི་ཀློང་སྡེ་དང།། གཞི་ཤེས་འཁྲུལ་ཆོད་ཀློང་དུ་འདུས། ། ཡིད་འཁོར་ལོ་གསུམ་བསྟན་པ་ལས། ཁམས་གསུམ་འཁོར་བར་འདུས་པ་ཡང།། སྙིང་པོ་མ་བུ་ཕྲད་པ་ཡིས།། དབྱེ་མེད་འགྱུར་མེད་ཀློང་དུ་འདུས།། འགྱུར་བ་མེད་པའི་ཀློང་སྡེ་དང།། སྐྱེ་བ་མེད་པའི་ཀློང་སྡེ་དང། ། རྒྱུ་རྐྱེན་མེད་པའི་ཀློང་སྡེ་དང།། བརྗོད་དུ་ནེད་པའི་ཀློང་སྡེ་དང།། སྐྱེ་འགག་མེད་པའི་ཀློང་སྡེ་དང།། འཕོ་འགྱུར་མེད་པའི་ཀློང་སྡེ་དང།། དབྱེ་བསལ་མེད་པའི་ཀློང་སྡེ་དང།། དགག་བསྒྲུབ་མེད་པའི་ཀློང་སྡེ་དང། ། སྤང་བླང་མེད་པའི་ཀློང་སྡེ་དང།། ཕྱི་ནང་མེད་པའི་ཀློང་སྡེ་དང།། གཟུང་འཛིན་མེད་པའི་ཀློང་སྡེ་དང།། ཕྱོགས་མཚམས་མེད་པའི་ཀློང་སྡེ་དང།། མཐའ་དབུས་མེད་པའི་ཀློང་སྡེ་དང། ། ཤར་ནུབ་མེད་པའི་ཀློང་སྡེ་དང།། ཁ་དོག་མེད་པའི་ཀློང་སྡེ་དང།། བྱེ་བྲག་མེད་པའི་ཀློང་སྡེ་དང།། ཆགས་པ་མེད་པའི་ཀློང་སྡེ་དང།། ཞེན་པ་མེད་པའི་ཀློང་སྡེ་དང།། བཏགས་པ་མེད་པའི་ཀློང་སྡེ་དང། ། མཚོན་དུ་མེད་པའི་ཀློང་སྡེ་དང།། མཚོན་ལས་འདས་པའི་ཀློང་སྡེ་དང།། བསམ་དུ་མེད་པའི་ཀློང་སྡེ་དང།། དམིགས་སུ་མེད་པའི་ཀློང་སྡེ་དང།། དཔེ་མེད་པ་ཡི་ཀློང་སྡེ་དང།། ཚིག་དང་བཏགས་མེད་ཀློང་སྡེ་དང། ། ཡི་གེས་མཚོན་མེད་ཀློང་སྡེ་དང།། ཆོས་མེད་སྟོན་མེད་ཀློང་སྡེ་དང།། བཤད་མེད་ཉན་མེད་ཀློང་སྡེ་དང།། མང་མེད་ཉུང་མེད་ཀློང་སྡེ་དང། དེ་ལ་སོགས་པའི་ཀློང་སྟེ་རྣམས།། བྱང་སེམས་ཆོས་ཉིད་ལྟ་བའི་ཀློང། ། ཞེ་འདོད་མེད་པར་སྤྲོས་པ་ཆོད།། འགྱུར་བ་མེད་པར་སྤྲོས་པ་ཆོད།། ཚིག་ལས་འདས་པར་སྤྲོས་པ་ཆོད།། ཕྱོགས་རིས་མེད་པར་སྤྲོས་པ་ཆོད།། བྱང་སེམས་མཁའ་དབྱིངས་མཁའ་ཀློང་དུ།། སངས་རྒྱས་རང་སེམས་ངང་དངས་ཏེ། ། འུབ་ཆུབ་ཚིག་གི་ཀློང་ཆེན་དུ།། མ་བཅོས་དབྱེ་བསལ་མེད་པར་ཞོག། ཁ་གཏིང་མེད་པའི་ཀློང་ཆེན་དུ།། སངས་རྒྱས་རང་སེམས་ངང་དངས་ཏེ།། གཞི་ནས་མ་བཅོས་ལྷུན་གྱིས་གྲུབ། ། བསམ་མེད་ངང་བཞག་བསྒོམ་མེད་ངང།། བསམ་བསྒོམ་ཅི་ཡང་མི་བྱ་སྟེ།། ཡིད་ཀྱིས་མ་བྱས་བློ་ཡིས་མ་བཅོས་ཏེ།། སེམས་ཀྱིས་མ་བཞག་རྟོག་པས་མ་གཡེངས་པར།། རྟོག་འགྱུར་མེད་པའི་ཀློང་ཆེན་དུ། ། བསམ་དུ་མེད་པས་སྤྲོད་བ་ཆོད།། རྩིས་གདབ་མེད་པར་སྤྲོས་པ་ཆོད།། བསྒོམ་རྒྱུ་མེད་པར་སྤྲོས་པ་ཆོད།། དམིགས་པ་མེད་པར་སྤྲོས་པ་ཆོད།། སེམས་ལ་བཞག་མེད་སྤྲོས་པ་ཆོད།། བྱར་མེད་སྤྲོས་བྲལ་ཀློང་ཆེན་དུ། ། རྩོལ་བསྒྲུབ་སྤངས་པའི་རང་བཞིན་ལ།། གང་ཡང་བྱ་བ་བཏང་བ་ལ།། བྱ་རྒྱུ་ཅི་ཡང་མི་བདོག་སྟེ།། ལུས་ཀྱང་རྩོལ་བསྒྲུབ་མེད་པར་ཞོག། ངག་ཀྱང་བརྗོད་དུ་མེད་པར་ཞོག་ཡིད་ཀྱ་ང་གཡོ་འགུལ་མེད་པར་ཞོག། སེམས་ཀྱང་དྲན་རྟོག་མེད་པར་ཞོག། འཁོར་བའི་ལམ་ལ་མ་ཆགས་པར།། ལུས་ངག་ཡིད་གསུམ་རྩོལ་བསྒྲུབ་མེད་པར་ཞོག། ཆགས་བ་མེད་པར་སྤྲོས་པ་ཆོད།། ཞེན་པ་མེད་པར་སྤྲོས་པ་ཆོད།། དགག་བསྒྲུབ་མེད་པར་སྤྲོས་པ་ཆོད། ། བླང་དོར་མེད་པར་སྤྲོས་པ་ཆོད།། གཟུང་འཛིན་མེད་པར་སྤྲོས་པ་ཆོད།། མི་འགྱུར་སྤྲོས་བྲལ་ཀློང་ཆེན་དུ།། ཐོག་མཐའ་མེད་པའི་དུས་མཐའ་ནས།། རང་ལ་རང་ཆས་ཡོད་པ་ཡི། ། རང་སངས་ངང་རྒྱས་ཆོས་སྐུའི་ཀློང།། ངང་སངས་འགྱུར་མེད་སངས་རྒྱས་ཏེ།། རེ་བའི་ས་མེད་སྤྲོས་པ་ཆོད།། དོགས་པའི་རྒྱུ་མེད་སྤྲོད་པ་ཆོད།། གསལ་གདངས་ཆེན་པོར་སྤྲོས་པ་ཆོད།། རང་སྤངས་ཡིན་གྱིས་སྤྲོས་པ་ཆོད། ། རེ་དོག་རྩད་ཆོད་སྤྲོས་པ་ཆོད།། བསྲུང་མཚམས་འདས་པའི་ཀློང་ཆེན་དུ།། ངང་ལས་མི་འདའ་སྤྲོས་པ་ཆོད།། རྩོལ་བསྒྲུབ་འདས་པའི་ཀློང་ཆེན་དུ།། རྩོལ་བསྒྲུབ་མེད་ཀྱིས་སྤྲོས་པ་ཆོད། ། བཙལ་བས་མི་རྙེད་ཀློང་ཆེན་དུ།། བཙལ་དུ་མེད་ཀྱིས་སྤྲོས་པ་ཆོད།། སྦྱང་དུ་མེད་པའི་ཀློང་ཆེན་དུ།། སྒྲིབ་པ་སྦྱང་མེད་སྤྲོས་པ་ཆོད།། བགྲོད་དུ་མེད་པའི་ཀློང་ཆེན་དུ།། ལམ་ལ་བགྲོད་མེད་སྤྲོས་པ་ཆོད།། རྒྱུ་རྐྱེན་མེད་པའི་ཀློང་ཆེན་དུ། ། ཡེ་ཤེས་རང་ཡིན་སྤྲོས་པ་ཆོད།། ཕྲ་བའི་རང་བཞིན་གཟུང་འཛིན་བྲལ།། གཉིས་འཛིན་མེད་ཀྱིས་སྤྲོས་པ་ཆོད།། ལུང་གི་རང་བཞིན་གཏན་ལ་འབེབས།། མ་ནོར་རང་བཞིན་སྤྲོས་པ་ཆོད། ། རྒྱུད་ཀྱི་རང་བཞིན་གཉིས་མེད་འབྲེལ།། སེམས་ཆོས་གཉིས་མེད་ཀློང་ཆེན་དུ།། གཉིས་སུ་མེ་པར་སྤྲོས་པ་ཆོད།། འཛིན་སེམས་མེད་པའི་ཀློང་ཆེན་དུ།། མན་ངག་དག་གིས་རང་བཞིན་ཏེ།། ཞེར་འཛིན་མེད་པར་སྤྲོས་པ་ཆོད། ། གཞི་མོ་མའི་འགྱུར་ཀློང་ཆེན་དུ།། མ་བཅོས་གཞག་པས་ལས་རྣམས་ཟིན།། མ་བཙལ་བྱར་མེད་སྤྲོས་བྲལ་སྤྲོས་པ་ཆོད།། དངོས་མེད་བསམ་འདས་སེམས་ཉིད་དེ།། ངོས་བཟུང་མེད་པར་སྣ་ཚོགས་སྣང། ། དངོས་པོ་མེད་པར་ཀུན་ལ་ཁྱབ།། གཤོག་པ་མེད་པར་ནམ་འཕངས་གཅོད།། འདེགས་པ་མེད་པར་ནམ་མཁར་སྙེག། འདེད་པ་མེད་པར་ཀུན་ཏུ་འཆོར།། བཅོལ་བ་མེད་པར་ལས་རྣམས་བྱེད། ། འགུགས་པ་མེད་པར་སླར་ལ་ལྡོག། དགོས་པ་མེད་པར་བག་ཆགས་སོག། ཅི་མ་གྲུབ་པར་སྣ་ཚོགས་སྣང།། རྟེན་པ་མེད་པར་ཐམས་ཅད་རྟེན།། ཅི་ཡང་མེད་པར་སྡུག་བསྔལ་མྱོང།། སྐྱེ་ཤི་ཀུན་དང་བྲལ་བ་ལ། ། སྐྱེ་རྒས་ན་འཆིའི་གཞི་མ་ཅན།། སྡུག་བསྔལ་ངོ་བོ་མ་གྲུབ་པས།། སྐྱིད་སྡུག་སྣ་ཚོགས་འབྱུང་བའི་རྒྱུ།། སེམས་ཉིད་རིན་ཆེན་འོད་གསལ་དེ།། ངོ་བོ་ཅིར་ཡང་མ་གྲུབ་པས།། མཚན་ཉིད་ཅིར་ཡང་འཆར་བ་སྟེ། ། མཉམ་པ་ཉིད་ཀྱི་ཀློང་ཆེན་དུ།། དབྱེ་བསལ་མེད་པར་སྤྲོས་པ་ཆོད།། ཕྱོགས་མཚམས་འདས་པའི་ཀློང་ཆེན་དུ།། རྩིས་གདབ་མེད་པར་སྤྲོས་པ་ཆོད།། ཕྱི་ནང་གཉིས་སུ་སྣང་ཚད་ཀུན།། གཉིས་མེད་ཀློང་དུ་སྤྲོས་པ་ཆོད། ། མང་བར་ཕྱེ་ཡང་གཅིག་ལས་མེད།། གཅིག་པུ་སྐྱེ་མེད་བྱང་ཆུབ་སེམས།། ངང་དངས་ཆེན་པོར་རང་སེམས་རྫོགས།། ངང་སངས་ཆེན་པོར་གསལ་གདངས་ཡིན།། འགྱུར་མེད་མ་བཅོས་ཀློང་དུ་ཞོག། རིན་ཆེན་བྱེ་མ་རེག་གཅོད་ཀྱིས། ། ཕྱེ་ཚད་དབྱེ་མེད་སྤྲོད་པ་ཆོད།། བརྗོད་ཚད་བརྗོད་མེད་སྤྲོས་པ་ཆོད།། བསྟན་ཚད་བཏགས་མེད་སྤྲོས་པ་ཆོད།། ཡིད་ལ་འགྱུས་ཚད་སྤྲོས་པ་ཆོད།། རིག་པས་མྱོང་ཚད་སྤྲོས་པ་ཆོད། ། སེམས་ཀྱིས་བརྟགས་ཚད་སྤྲོས་པ་ཆོད།། བློ་ཡིས་ཕྱེ་ཚད་སྤྲོས་པ་ཆོད།། སྨྲ་བསམ་བརྗོད་འདས།། རིན་ཆེན་འོད་འབར་ཀློང་ཆེན་དུ།། ཅིར་ཡང་བཟུང་དུ་མེད་པ་ལ།། གང་ཡང་བསམ་དུ་མེད་པར་བཞག། དབྱེ་གསལ་ཞེ་འདོད་ཚིག་འདས་པའི།། འགྱུར་བ་མེད་པའི་ཀློང་དུ་བཞག། བསམ་མེད་རང་བཞག་བསྒོམ་མེད་ཀློང།། རྟོགས་ཞེན་མེད་པའི་ཀློང་དུ་བཞག། བྱར་མེད་སྤྲོས་བྲལ་ཆགས་མེད་ཀློང། ། དགག་བསྒྲུབ་བྱ་རྩལ་མེད་པ་ཡི།། མ་ཆགས་མ་ཞེན་ཀློང་དུ་བཞག། ཡེ་ནས་འདུ་འབྲལ་མེད་པའི་ཀློང།། ངང་དངས་རང་སངས་ཆོས་སྐུ་བཞག། བཞག་པ་མ་ཡིན་བཞག་རྒྱུ་ཅི་ཡང་མེད།། རེ་ཞིག་བློ་ལ་མཚོན་པ་ཙམ། ། ཞེས་གསུངས་སོ།། རིན་ཆེན་བྱེ་མ་རེག་ཆོད་འདི།། དད་པ་བརྟན་ལ་ཤེས་རབ་ཆེ།། བློ་ཆེ་བློ་འདས་བློ་རྣོ་བ།། ཀློང་སྡེའི་སྤྲོས་པ་གཅོད་ལ་བསྟན།། ང་རྒྱལ་དྲེགས་པས་ཁེངས་པ་དང།། དོན་དུ་མི་བསྒོམ་ཚིག་ཏུ་སྨྲ། ། ལྟ་བ་ཁར་ཟག་དམ་ཚིག་མེད།། ལག་ཏུ་ཐོབ་ནས་ཟོང་དུ་ཆེ།། དེ་ལྟ་བུ་ཡི་གང་ཟག་ལ།། ཡུལ་མཁར་སྟེར་ཡང་མི་སྦྱིན་ནོ། རིན་ཆེན་བྱེ་མ་རེག་ཆོད་ཀྱི་ཀློང་སྡེ་སྤྲོས་པ་གཅོད་པ་བསྟན་པ་ཞེས་བྱ་བ་རྫོགས་སོ། །།། རྒྱ་གར་གྱི་གུ་རུ་པདྨ་སམ་བྷ་བ་དང།། བོད་ཀྱི་ལོ་ཙ་བ་ཀ་བ་དཔལ་བརྩེགས་ཀྱིས་བསྒྲུར་ཅིང་ཞུས་ཏེ་གཏན་ལ་ཕབ་པའོ།། ལས་འཕྲོ་ཅན་དང་འཕྲད་པར་ཤོག། རྒྱ་རྒྱ་རྒྱ།།།། རྒྱ་གར་སྐད་དུ། ། བོད་སྐད་དུ།། རིན་ཆེན་སྤུ་གྲི་འབར་བ་སེམས་སྡེ་སྤྲོས་པ་གཅོད་པ་ཞེས་བྱ་བ།། བཅོམ་ལྡན་འདས་མཚོན་མེད་བརྗོད་ལས་འདས་པའི་ཆོས་སྐུ་ལ་ཕྱག་འཚལ་ལོ།། གང་ཞིག་མཚོན་མེད་དོན་ལ་མོས་པ་ལ། ། སེམས་སྡེ་སྤྲོས་གཅོད་བསྟན་པར་བྱ།། གླང་པོ་སེང་གེ་ཁྱུང་གིས་བློས།། གུང་ལང་གསེར་བཟོའི་སྣོད་དུ་བླུག། རྫ་ཤིང་སྣོད་ལ་ཡོངས་མ་བསྟན།། སྙིང་པོའི་རང་བཞིན་བརྗོད་མེད་ཀྱང། ། བརྗོད་མེད་ཚིག་ལ་བརྟེན་ནས་ཀྱང།། རྡོ་རྗེ་སེམས་དཔའ་ལ་སོགས་པ།། སེམས་སྡེ་རེ་ཞིག་ཕྱེ་ནས་བསྟན།། སེམས་ཀྱི་རང་བཞིན་གང་ཞེ་ན།། མ་བྱས་མ་བཅོས་སྣ་ཚོགས་འབྱུང་བའོ།། བློ་ཡིས་མ་བཅོས་སེམས་ཀྱིས་མ་བཅོས་སོ། ། སྣ་ཚོགས་ཇི་ལྟར་འབྱུང་ཞེ་ན།། སེམས་ནི་ཇི་སྙེད་ཇི་ལྟར་འབྱུང།། གནོད་སྦྱིན་གྱིས་སེམས་དང།། དྲི་ཟའི་སེམས་སེམས་དང།། ལྷ་མ་ཡིན་གྱི་སེམས་དང།། ནམ་མཁའ་ལྡིང་གི་སེམས་དང། ། མི་འམ་ཅིའི་སེམས་དང།། ལྷོ་འཕྱེ་ཆེན་པོའི་སེམས་དང།། མི་དང་མི་མ་ཡིན་པའི་སེམས་དང། བྱོལ་སོང་གི་སེམས་དང།། ཡི་དྭགས་ཀྱི་སེམས་དང།། དམྱལ་བ་ལ་སོགས་པའི་འགྲོ་བ་རིགས་དྲུག་ཐ་དད་པའི་སེམས་དང། ། རྟོགས་པའི་སེམས་དང།། ཆགས་པའི་སེམས་དང།། གང་ལ་ཆགས་པ་མེད་པའི་སེམས་དང།། ཞེ་སྡང་ནང་གི་སེམས་དང།། བྱམས་པའི་སེམས་དང།། གཏི་མུག་གི་སེམས་དང།། ཤེས་རབ་གསལ་བའི་སེམས་དང། ། ཐེ་ཙོམ་གྱི་སེམས་དང།། གང་ལ་ཐེ་ཙོམ་མེད་པའི་སེམས་དང།། ངེས་པའི་སེམས་དང།། མ་ངེས་པའི་སེམས་དང།། དཔེའི་སེམས་དང།། དཔེ་ལས་འདས་པའི་སེམས་དང། ། མུན་པའི་སེམས་དང།། མུན་པ་མེད་པའི་སེམས་དང།། སྣང་བའི་སེམས་དང།། ང་རྒྱལ་གྱི་སེམས་དང།། ང་རྒྱལ་མེད་པའི་སེམས་དང།། ཕྲག་དོག་གི་སེམས་དང།། ཕྲག་དོག་མེད་པའི་སེམས་དང། ། བསྡུ་བའི་སེམས་དང།། འཕྲོ་བའི་སེམས་དང།། འབྱེད་པའི་སེམས་དང།། འབྱེད་པ་མེད་པའི་སེམས་དང།། འཁྲུལ་པའི་སེམས་དང།། ཞི་བའི་སེམས་དང།། འཐབ་པའི་སེམས་དང།། འབྱར་བའི་སེམས་དང། ། རྩོད་པའི་སེམས་དང།། མཐུན་པའི་སེམས་དང།། བརྗོད་པའི་སེམས་དང།། བརྗོད་པ་མེད་པའི་སེམས་དང།། ལྷའི་སེམས་དང།། ཀླུའི་སེམས་དང།། བདུད་ཀྱི་སེམས་སྡེ་དང།། ལྷ་མ་ཡིན་གྱི་སེམས་སྡེ་དང། ། གནོད་སྦྱིན་གྱི་སེམས་སྡེ་དང།། མིའི་སེམས་སྡེ་དང།། ལྟོ་འཕྱིའི་སེམས་སྡེ་དང།། འབྱུང་པོའི་སེམས་སྡེ་དང།། ནམ་མཁའ་ལྡིང་གི་སེམས་སྡེ་དང།། དྲི་ཟའི་སེམས་སྡེ་དང།། གྲུབ་བུམ་གྱི་སེམས་སྡེ་དང། ། སྐྱེས་པའི་སེམས་སྡེ་དང།། བུད་མེད་ཀྱི་སེམས་སྡེ་དང།། མ་ནིང་གི་སེམས་སྡེ་དང།། ཡུལ་གྱི་སེམས་སྡེ་དང།། རིགས་ཀྱི་སེམས་སྡེ་དང།། ཤའི་སེམས་སྡེ་དང།། ཁྲག་གི་སེམས་སྡེ་དང།། རུས་པའི་སེམས་སྡེ་དང། ། ཆུ་སེར་གྱི་སེམས་སྡེ་དང།། ནང་ཁྲོལ་གྱི་སེམས་སྡེ་དང།། མགོའི་སེམས་སྡེ་དང།། ཡན་ལག་གི་སེམས་སྡེ་དང།། ལུས་སོ་སོའི་སེམས་དང།། འབའ་ཏའི་སེམས་དང།། སུ་རའི་སེམས་དང།། ཕྲུ་བའི་སེམས་དང། ། བཟའ་རུའི་སེམས་དང།། ཕོ་ཚོར་གྱི་སེམས་དང།། ཚོད་མའི་སེམས་དང།། གྲང་བའི་སེམས་དང།། ལྟོ་ཕོར་གྱི་སེམས་དང།། སྒྲོམ་གྱི་སེམས་དང།། གཡིས་ཀྱི་སེམས་དང།། རྫ་མའི་སེམས་དང། ། བདག་གི་སེམས་དང།། གཞན་གྱི་སེམས་དང།། ཕའི་སེམས་སྡེ་དང།། མའི་སེམས་སྡེ་དང།། བུའི་སེམས་སྡེ་དང།། ཕུ་ནུའི་སེམས་སྡེ་དང།། དགྲ་བོའི་སེམས་སྡེ་དང།། དབང་ཕྱུག་གི་སེམས་སྡེ་དང། ། ཚངས་པའི་སེམས་སྡེ་དང།། གཏོགས་འདོད་ཀྱི་སེམས་སྡེ་དང།། དབང་པོའི་སེམས་སྡེ་དང།། ཚོགས་བདག་གི་སེམས་སྡེ་དང།། ཀུན་ཏུ་རྒྱུའི་སེམས་སྡེ་དང།། ཚོང་པའི་སེམས་སྡེ་དང།། ཞི་བའི་སེམས་སྡེ་དང། ། ཆུ་བོ་ལྟ་བུའི་སེམས་སྡེ་དང།། ཁྲོན་པ་ལྟ་བུའི་སེམས་སྡེ་དང།། བཀོད་མ་ལྟ་བུའི་སེམས་སྡེ་དང།། འཁོར་ལོ་ལྟ་བུའི་སེམས་སྡེ་དང།། ཟོ་ཆུ་ལྟ་བུའི་སེམས་སྡེ་དང།། བཀོད་ཆུ་ལྟ་བུའི་སེམས་སྡེ་དང། ། གསེར་ཆུ་ལྟ་བུའི་སེམས་སྡེ་དང།། ཀུན་ཏུ་བསྲུང་བའི་སེམས་སྡེ་དང།། སེར་སྣའི་སེམས་སྡེ་དང།། གཏོང་བ་ལྟ་བུའི་སེམས་སྡེ་དང།། བྱི་བ་ལྟ་བུའི་སེམས་སྡེ་དང།། ལྕེ་འབབ་པ་ལྟ་བུ་སེམས་སྡེ་དང། ། གློག་ལྟ་བུའི་སེམས་སྡེ་དང།། སྤྲིན་ལྟ་བུའི་སེམས་སྡེ་དང།། བྱི་ལ་ལྟ་བུའི་སེམས་དང།། ཁྱི་ལྟ་བུའི་སེམས་སྡེ་དང།། གླུ་ལྟ་བུའི་སེམས་སྡེ་དང།། གར་ལྟ་བུའི་སེམས་སྡེ་དང།། སིལ་སྙན་ལྟ་བུའི་སེམས་སྡེ་དང། ། རྨ་བྱ་ལྟ་བུའི་སེམས་སྡེ་དང།། རྔ་སྒྲ་ལྟ་བུའི་སེམས་སྡེ་དང།། འབྲུག་ལྟ་བུའི་སེམས་སྡེ་དང།། སེང་གེ་ལྟ་བུའི་སེམས་སྡེ་དང།། བུང་བ་ལྟ་བུའི་སེམས་སྡེ་དང།། སྦྲང་མ་ལྟབུའི་སེམས་སྡེ་དང། ། གློག་ལྟ་བུའི་སེམས་སྡེ་དང།། བྱ་རྒོད་ལྟ་བུའི་སེམས་སྡེ་དང།། བྲང་པོ་ཆེའི་སེམས་སྡེ་དང།། ཕོ་རོག་གི་སེམས་སྡེ་དང།། མཆིལ་བའི་སེམས་སྡེ་དང།། ངང་བའི་སེམས་དང།། གྲོ་ཆའི་སེམས་དང།། ཁུག་རྟའི་སེམས་དང། ། བྱ་མ་ལུག་གི་སེམས་དང།། ཁྲའི་སེམས་དང།། ཁྱུང་གི་སེམས་དང།། ཁུ་བྱུག་གི་སེམས་དང།། ཆུ་སྲིན་ལྟ་བུའི་སེམས་སྡེ་དང།། རུས་སྦལ་ལྟ་བུའི་སེམས་སྡེ་དང།། སྦྲུལ་ལྟ་བུའི་སེམས་སྡེ་དང། ། མ་ཧེ་ལྟ་བུའི་སེམས་དང།། འུག་པ་ལྟ་བུའི་སེམས་དང།། སྤྲེའུ་ལྟ་བུའི་སེམས་སྡེ་དང།། བྱ་རོག་ལྟ་བུའི་སེམས་སྡེ་དང།། རྟ་ལྟ་བུའི་སེམས་སྡེ་དང།། བཞད་ལྟ་བུའི་སེམས་སྡེ་དང།། ཀ་མ་ཀ་ལྟ་བུའི་སེམས་དང། ། སྤྱང་ཀི་ལྟ་བུའི་སེམས་དང།། ཝ་ལྟ་བུའི་སེམས་དང།། གླ?ང་པོ་ཆེ་ལྟ་བུའི་སེམས་སྡེ་དང།། འུག་པ་ལྟ་བུའི་སེམས་སྡེ་དང།། ཁྲ་ལྟ་བུའི་སེམས་སྡེ་དང།། ཁྱིམ་གྱི་སེམས་སྡེ་དང།། ཁྱིམ་མེད་པའི་སེམས་སྡེ་དང། ། ཐར་པའི་སེམས་དང།། མཐར་པའི་སེམས་སྡེ་དང།། སྲིན་པོའི་སེམས་སྡེ་དང།། མི་རྒོད་ཀྱི་སེམས་སྡེ་དང།། ནང་གི་སེམས་སྡེ་དང།། རྒྱལ་པོའི་སེམས་སྡེ་དང།། སྨད་འཚོང་མའི་སེམས་སྡེ་དང།། འཕྱོན་པའི་སེམས་སྡེ་དང། ། བྲལ་ཟེའི་སེམས་སྡེ་དང།། ཤན་པའི་སེམས་སྡེ་དང།། ཡི་དྭགས་ཀྱི་སེམས་དང།། ཚེར་མའི་སེམས་སྡེ་དང།། ཤིང་བལ་གྱི་སེམས་སྡེ་དང།། སའི་འོག་སེམས་སྡེ་དང།། ས་བླའི་སེམས་སྡེ་དང། ། ས་སྟེངས་ཀྱི་སེམས་སྡེ་དང།། ནམ་མཁའི་སེམས་སྡེ་དང།། དྲ་བའི་སེམས་སྡེ་དང།། རྒྱའི་སེམས་སྡེ་དང།། ཞགས་པའི་སེམས་སྡེ་དང།། ལིག་རའི་སེམས་སྡེ་དང།། ལྕགས་ཀྱུའི་སེམས་སྡེ་དང།། ཐོ་བའི་སེམས་སྡེ་དང། ། འཇུག་ཐུག་གི་སེམས་སྡེ་དང།། སྣོད་ཀྱི་སེམས་སྡེ་དང།། ཁྲིན་མུན་གྱི་སེམས་སྡེ་དང།། མེ་ལྕེའི་སེམས་སྡེ་དང།། ཐོ་ལུམ་གྱི་སེམས་སྡེ་དང།། མར་མེ་དང་ལྷ་བཤོས་ཀྱི་སེམས་དང།། སྤོས་ཀྱི་སེམས་སྡེ་དང། ། མེ་ཏོག་དང།། དྲི་ཟའི་སེམས་དང།། ཟང་གཞོང་གི་སེམས་དང།། འཁར་གཞོང་གི་སེམས་དང།། བུམ་པའི་སེམས་དང།། དུང་ཕོར་གྱི་སེམས་དང།། སྐྱེས་བུའི་སེམས་དང།། ཚ་བསྐལ་དང། ། ཟ་མ་ཏོག་དང།། བཤོལ་གྱི་སེམས་དང།། འབྱོར་གྱི་སེམས་དང།། སྟེའུའི་སེམས་དང།། བོང་བུའི་སེམས་དང།། བའི་སེམས་དང།། རྟའི་སེམས་དང།། ཉི་མའི་སེམས་དང།། ཟླ་བའི་སེམས་དང། ། དངུལ་གྱི་སེམས་དང།། གསེར་གྱི་སེམས་དང།། གཡུའི་སེམས་དང།། བྱི་རུའི་སེམས་དང།། མཐིང་བུན་གྱི་སེམས་དང།། མུ་ཏིག་གི་སེམས་དང།། ལྕགས་ཀྱི་སེམས་སྡེ་དང།། ཟངས་ཀྱི་སེམས་དང། ། ར་གན་གྱི་སེམས་སྡེ་དང།། རིན་ཆེན་ལྔའི་སེམས་སྡེ་དང།། མུ་ཏིག་སེམས་སྡེ་དང།། རླུང་གི་སེམས་སྡེ་དང།། ཆུའི་སེམས་སྡེ་དང།། སའི་སེམས་སྡེ་དང།། ནམ་མཁའི་སེམས་སྡེ་དང།། མིའི་སེམས་སྡེ་དང། ། འབྱུང་བ་ལྔ་ལྟ་བུའི་སེམས་སྡེ་དང།། གདུང་ཤིང་གི་སེམས་སྡེ་དང།། གཏུབ་ཤིང་གི་སེམས་སྡེ་དང།། སྒོའི་སོགས་དང།། སྒོ་རེག་གི་སེམས་སྡེ་དང།། གཡག་ཤིང་གི་སེམས་དང།། ལྡེ་མིག་གི་སེམས་དང། ། སྒོ་འབྱེད་པའི་སེམས་དང།། སྡེབ་པའི་སེམས་སྡེ་དང།། ཤིང་ལེབས་ཀྱི་སེམས་སྡེ་དང།། འདམ་གྱི་སེམས་སྡེ་དང།། རྙོག་ཆུའི་སེམས་སྡེ་དང།། ཚོན་རྩིའི་སེམས་དང།། ནོར་བའི་སེམས་དང།། དུག་གི་སེམས་དང། ། སྨན་གྱི་སེམས་དང།། ཁ་ཟས་ཀྱི་སེམས་དང།། ཆུང་དོང་གི་སེམས་དང།། མདའི་སེམས་དང།། གཞུའི་སེམས་དང།། མདུང་གི་སེམས་དང།། ཕུབ་ཀྱི་སེམས་དང།། ཁྲབ་ཀྱི་སེམས་དང།། ཁྲབ་ལག་གི་སེམས་སྡེ་དང། ། རྐང་ཆས་ཀྱི་སེམས་སྡེ་དང།། ཧེ་བླག་གི་སེམས་དང།། རྨོག་གི་སེམས་དང།། དགྲའི་སེམས་དང།། སྲིད་སྡེའི་སེམས་དང།། བརྡེག་པའི་སེམས་དང།། འཏབ་རྩོད་ཀྱི་སེམས་སྡེ་དང། ། རྩོད་པའི་སེམས་སྡེ་དང།། ཤི་བའི་སེམས་སྡེ་དང།། བསྲེག་པའི་སེམས་སྡེ་དང།། མྱ་ངན་གྱི་སེམས་སྡེ་དང།། སྨྲེ་སྔགས་ཀྱི་སེམས་སྡེ་དང།། སྡུག་བསྔལ་གྱིསེམས་སྡེ་དང།། ན་བའི་སེམས་སྡེ་དང། ། ཚོགས་ཀྱི་སེམས་སྡེ་དང།། སྨན་དཔྱད་ཀྱི་སེམས་སྡེ་དང།། ཕན་པའི་སེམས་སྡེ་དང།། བེད་བའི་སེམས་དང།། ལྷ་གསོལ་གཏང་རག་གི་སེམས་དང།། སྐྱེད་པའི་སེམས་དང།། སྒྲོག་གི་སེམས་དང།། ཤིང་གི་སེམས་དང། ། ལན་ཚྭའི་སེམས་དང།། སྤུ་གྲིའི་སེམས་དང།། ཐིག་གི་སེམས་དང།། རྡོ་རྗེའི་སེམས་དང།། དྲིལ་བུའི་སེམས་དང།། རྒྱ་མཚོའི་སེམས་དང།། ཕ་བོང་གི་སེམས་སྡེ་དང།། ཞིང་གི་སེམས་དང། ། ཕུག་གི་སེམས་དང།། སྐྱེ་བའི་སེམས་དང།། ན་བའི་སེམས་དང།། རྒས་པའི་སེམས་དང།། མེད་པ་བཙལ་གྱིས་མི་སྙེད་པའི་སེམས་སྡེ་དང།། ཡོད་པ་ཤོར་གྱིས་དགོས་པའི་སེམས་སྡེ་དང།། སྣང་ན་སྣོད་ཀྱི་སེམས་སྡེ་དང། ། གྲག་པ་སྒྲའི་སེམས་སྡེ་དང།། དྲན་རྟོག་ཡིད་ཀྱི་སེམས་སྡེ་དང།། མེ་ཏོག་གི་སེམས་སྡེ་དང།། འབྲས་བུའི་སེམས་སྡེ་དང།། རྩ་བའི་སེམས་སྡེ་དང།། ཡལ་གའི་སེམས་སྡེ་དང།། སྡོང་བུའི་སེམས་དང། ། མངར་བའི་སེམས་སྡེ་དང།། ཁ་བའི་སེམས་དང།། སྐྱུར་བའི་སེམས་དང།། ཚྭ་བའི་སེམས་དང།། གླག་པའི་སེམས་དང།། བསྐ་བའི་སེམས་དང།། ཡི་གེའི་སེམས་སྡེ་དང།། ཚ་ཚྭ་འི་སེམས་སྡེ་དང།། བྱ་གག་ལྟ་བུའི་སེམས་སྡེ་དང། ། ཀུན་དགའ་ར་བ་ལྟ་བུའི་སེམས་སྡེ་དང།། དབྱར་སྤྲིན་ལྟ་བུའི་སེམས་སེམས་སྡེ་དང།། མེ་ལོང་ལྟ་བུའི་སེམས་སྡེ་དང།། ཏིལ་མར་ལྟ་བུའི་སེམས་སྡེ་དང།། དགུན་འཆང་ལྟ་བུའི་སེམས་སྡེའོ། ། དེ་དག་ལ་སོགས་སེམས་སྡེ་མཐའ་ཡས་ཀུན།། རིན་ཆེན་སྤུ་ཡི་འབར་བ་ཡིས།། སྣ་ཚོགས་མཐའ་ཡས་སེམས་སྡེ་ཀུན།། ཡེ་ཐོག་གཞི་རུ་སྤྲོས་པ་ཆོད།། ཀུན་གཞི་ཀློང་ཡངས་མཛོད་ཆེན་དང། ། རྩལ་སྣང་སེམས་སྡེ་ཇི་སྙེད་ཀུན།། སྙིང་པོའི་ཀློང་དུ་ཐིམ་ནས་ཀྱང།། གཉིས་སུ་མེད་པར་སྤྲོས་པ་ཆོད།། དབྱེ་གསལ་མེད་པར་སྤྲོས་པ་ཆོད།། རྩིས་གདབ་མེད་པར་སྤྲོས་པ་ཆོད།། མ་བཅོས་མ་བསླད་སྤྲོས་པ་ཆོད། ། བཟུང་དུ་མེད་ཀྱི་སྤྲོས་པ་ཆོད།། དགག་བསྒྲུབ་གཉིས་མེད་སྤྲོས་པ་ཆོད།། སྤོང་ལེན་གཉིས་མེད་སྤྲོས་པ་ཆོད།། བཟང་ངན་གཉིས་མེད་སྤྲོས་པ་ཆོད།། བདག་གཞན་གཉིས་མེད་སྤྲོས་པ་ཆོད།། རྩོལ་བསྒྲུབ་གཉིས་མེད་སྤྲོས་པ་ཆོད། ། བྱང་ཆུབ་སེམས་ཀྱི་རང་བཞིན་ལ།། སེམས་ཉིད་རང་དག་སྤྲོས་པ་ཆོད།། ནང་ན་མེད་པར་སྤྲོས་པ་ཆོད།། ཕྱི་ན་མེད་པར་སྤྲོས་པ་ཆོད།། ཕྱི་ནང་གཉིས་སུ་མེད་པར་སྤྲོས་པ་ཆོད།། དེ་ལྟར་གཉིས་སུ་མེད་པར་སྤྲོས་པ་ཆོད། ། དེ་ལྟར་གཉིས་མེད་སེམས་ཉིད་ལ།། སངས་རྒྱས་རྣམས་ཀྱིས་ཅང་མ་གཟིགས།། མི་གཟིགས་གཟིགས་པར་མི་འགྱུར་རོ།། དེ་ཡང་ཇི་ལྟར་མི་གཟིགས་ན།། ཁ་དོག་ཏུ་ཡང་མ་གཟིགས་སོ།། དབྱིབས་སུ་ཡང་མ་གཟིགས་སོ། ། མུན་པ་རུ་ཡང་མ་གཟིགས་སོ།། སྣང་བ་རུ་ཡང་མ་གཟིགས་སོ།། སྟོང་པ་རུ་ཡང་མ་གཟིགས་སོ།། ཕོ་མོ་རུ་ཡང་མ་གཟིགས་སོ།། མི་ནང་དུ་ཡང་གཟིགས་སོ།། ཁམས་གསུམ་དུ་ཡང་མ་གཟིགས་སོ། ། ལྷ་ཡི་སེམས་མེད་སྤྲོས་པ་ཆོད།། ཀླུ་ཡིསེམས་མེད་སྤྲོས་པ་ཆོད།། གནོད་སྦྱིན་སེམས་མེད་སྤྲོས་པ་ཆོད།། དྲི་ཟའི་སེམས་མེད་སྤྲོས་པ་ཆོད།། རིགས་དྲུག་སེམས་མེད་སྤྲོས་པ་ཆོད།། བརྗོད་ཚད་མེད་པར་སྤྲོས་པ་ཆོད། ། ཕྱེ་ཚད་མེད་པར་སྤྲོས་པ་ཆོད།། བཏགས་ཚད་མེད་པར་སྤྲོས་པ་ཆོད།། ཡིད་ལ་འགྱུས་ཚད་མེད་པར་སྤྲོས་པ་ཆོད།། སེམས་ཀྱིས་བཟུང་ཚད་མེད་པར་སྤྲོས་པ་ཆོད།། རིག་པས་མྱོང་ཚད་སྤྲོས་པ་ཆོད། ། བློ་ཡི་སྤྲོས་ཚད་སྤྲོས་པ་ཆོད།། ཡི་གེའི་ཚིག་གཅིག་མཐའ་ཡས་ཀུན།། བརྗོད་མེད་ངང་དུ་སྤྲོས་པ་ཆོད།། ཅེས་གསུངས་སོ།། རིན་པོ་ཆེ་གྲིའི་འབར་བས་སེམས་སྡེའི་སྤྲོས་པ་བཅད་པ་ཞེས་བྱ་བ་རྫོགས་སོ། །།། རྒྱ་གར་གྱི་གུ་རུ་པདྨ་སམ་བྷ་བས་བཤད།། བོད་ཀྱི་ལོ་ཙ་བ་ཀ་བ་དཔལ་བརྩེགས་ཀྱིས་བསྒྱུར་ཅིང་གཏན་ཕབ་པའོ།། ཨི་ཐི།།།། རྒྱ་གར་སྐད་དུ། ། བོད་སྐད་དུ།། ཆུ་གྲི་འབར་བས་དབང་སྡེ་སྤྲོས་པ་གཅོད་པ་ཞེས་བྱ་བ།། མཚོན་མེད་བརྗོད་ལས་འདས་པའི་ཀུན་ཏུ་བཟང་པོ་ཉིད་ལ་ཕྱག་འཚལ་ལོ།། རྡོ་རྗེ་སེམས་དཔའ་ལ་སོགས་ལ། ། དབང་སྡེ་སྤྲོས་བཅད་བཤད་པར་བྱའོ།། རྡོ་རྗེ་སེམས་དཔའ་སྐུ་ཡི་དབང།། ཨུ་རྒྱན་དགའ་རབ་རྡོ་རྗེ་ཐོབ།། དགའ་རབ་རྡོ་རྗེའི་དབང་ཆེན་ཡང།། འཇམ་དཔལ་བཤེས་གཉེན་བདག་གིས་ཐོབ།། འཇམ་དཔལ་བཤེས་གཉེན་དབང་མཆོག་དེ། ། ཤཱི་རི་སིང་ཧ་བཀའ་ཡིས་དབང།། ཨུ་རྒྱན་གུ་རུ་པདྨས་ཐོབ།། འཁས་པའི་དབང་ཐོབ་དབང་གི་ཆུ་བོ་བཞི།། དབང་གི་སྤྲོས་གཅོད་བཤད་པར་བྱ།། ཐེག་པ་འོག་མའི་དབང་སྡེ་དང། ། རྫོགས་པ་ཆེན་པོའི་དབང་སྡེའོ།། ཐེག་པ་འོག་མའི་དབང་སྡེ་ནི།། དབང་གི་ཆུ་བོ་བཅོ་བརྒྱད་ནི།། དེ་དག་རྒྱས་པར་འདིར་མ་བཤད།། གཞན་དུ་ཞིབ་པར་གསུངས་པས་སོ།། མ་སྨིན་སྨིན་པར་བྱེད་པ་དང། ། སྨིན་པ་གྲོལ་བར་བྱེད་པ་དང།། གསང་སྔགས་སྒོ་ནི་དབང་ལ་ཐུག། དབང་གིས་སྣོད་དང་ལྡན་པར་བྱེད།། དབང་རྣམས་རྫོགས་པར་མ་བྱས་ཤིང།། སློབ་དཔོན་གཉེས་པར་མ་བྱས་ན།། ཉན་པ་ལ་སོགས་རྩོམ་པ་རྣམས། འབྲས་བུ་མེད་ཅིང་བརླག་པར་འགྱུར།། དཔེ་ནི་རྫ་སོ་མ་གཏང་བའི།། སྣོད་དུ་ཆུ་ནི་བླུག་གྱུར་ན།། རྫ་ཡང་འཆག་ལ་ཆུ་ཡང་འབོ།། འབྲས་བུ་རྡོ་རྗེའི་ཐེག་པ་ཡང།། དབང་གིས་སྨིན་པར་མ་བྱས་པར། རྒྱ་གར་སྐད་དུ། མ་ཧཱ་སརྦ་ཧྲི་ད་ཡ། བུདྡྷ་ནཱ་མ། མ་ཧཱ་ཀ་ལ་ཏནྟྲ་ནཱ་མ། བོད་སྐད་དུ།། བསྟན་པ་ཐམས་ཅད་ཀྱི་སྙིང་པོ་སེམས་ཅན་ཐམས་ཅད་ལ་སངས་རྒྱས་རང་ཆས་ཆེན་པོར་བཞུགས་པའི་རྒྱུད་ཅེས་བྱ་བ། ། སངས་རྒྱས་འོད་མེད་འགྱུར་བ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན།། ཆོས་ཀྱི་དབྱིངས་སྤྲོས་པ་དང་བྲལ་བའི་ངང་ན།། རང་བྱུང་རིག་པའི་རྒྱལ་པོ་སངས་རྒྱས་འོད་ཕུང་པོ་ཆེན་པོ། ། རྒྱལ་བ་རིགས་ལྔ་དང་འདུ་འབྲལ་མེད་པར་བཞུགས་སོ།། འདི་སྐད་བདག་གིས་བསྟན་པའི་དུས་གཅིག་ན།། མཚན་རྫོགས་རྡོ་རྗེ་འཆང་གི་ཞིང་ཁམས།། འོད་དཔག་མེད་ཀྱི་ཡུལ་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོ་ཆེན་པོ་ཞེས་བྱ་བ་བཞུགས་སོ། ། དེའི་ཚེ་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་ཀྱེ་སངས་རྒྱས་འོད་ཕུང་ཆེན་པོ།། རྒྱན་འོད་ཀྱི་ཕུང་པོ་ཆེན་པོ།། སངས་རྒྱས་ཀྱི་སྐུ་གསུམ་གསུང་དུ་གསོལ། ཅེས་ཞུས་སོ།། རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོས་བཀའ་སྩལ་པ།། སངས་རྒྱས་ཆོས་ཀྱི་སྐུ་ནི་རང་གི་སྙིང་གི་དཀྱིལ་ན་བཞུགས་སོ།། ཡེ་ཤེས་ཟང་ཐལ་གྱི་སྐུ་ནི་རང་གི་མིག་གི་དཀྱིལ་ན་བཞུགས་སོ། ། སངས་རྒྱས་ཁྲོ་བོའི་སྐུ་རང་གི་ཀླད་པའི་དཀྱིལ་ན་བཞུགས་སོ།། ཞེས་གསུངས་སོ།། དེ་ནས་སངས་རྒྱས་འོད་ཀྱི་ཕུང་པོས་འདི་སྐད་ཅེས་གསུངས་སོ།། གསང་བའི་བདག་པོ།། རང་གི་སྙིང་གི་དཀྱིལ་ན་སངས་རྒྱས་འོད་ཕུང་ཆེན་པོར་བཞུགས་སོ། ། སངས་རྒྱས་ཆོས་ཀྱི་སྐུ་རྟེན་པ་རང་གི་ལུས་ལ་བརྟེན་ནོ།། བཞུགས་པ་སྙིང་གི་དཀྱིལ་ན་བཞུགས་སོ།། གསལ་བ་རང་གི་མིག་ན་གསལ་ལོ།། རང་གི་སྙིང་གི་ནང་ན་སངས་རྒྱས་བཞུགས་པ་ནི། ། རང་གི་རིག་པ་མ་འགགས་པ་ཝལ་ལེ་བ་འདི་རང་ཡིན་ནོ།། རང་གི་ཤེས་པ་ཝལ་ལེ་བ་འདི་སངས་རྒྱས་ཆོས་ཀྱི་སྐུ་ཡིན་ནོ།། ཡེ་ཤེས་ཟང་ཐལ་རྟེན་པ་རང་གི་མིག་ལ་བརྟེན་ནོ། ། གནས་པ་རང་གི་མིག་གི་འབྲས་བུའི་དཀྱིལ་ན་གནས་སོ།། གསལ་བ་མཐོང་བ་མ་འགགས་པར་གསལ་ལོ།། རང་གི་མིག་གི་འབྲས་བུའི་དཀྱིལ་ན་མཐོངབ་མ་འགགས་པར་ཟང་ཐལ་གསལ་བ་འདི།། སངས་རྒྱས་ཡེ་ཤེས་ཟང་ཐལ་གྱི་སྐུ་ཡིན་ནོ། ། རང་གི་ཀླད་པའི་ནང་ན་སངས་རྒྱས་ཁྲོ་བོའི་སྐུ་ཐམས་ཅད་ཐུགས་རྗེས་འཛིན་བྱེད་ལྕགས་ཀྱུ་དང་བཅས་ནས་བཞུགས་སོ།། རང་གི་ཀླད་པའི་ནང་ཐམས་ཅད་འོད་ལྔ་མེར་རེ་ཡོད་དོ། ། ཞེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་བཞུས་སོ།། ཀྱེ་ཀྱེ་སངས་རྒྱས་འོད་དཔག་མེད་ཆེན་པོ།། སངས་རྒྱས་ཀྱི་ངོ་བོ་གསུམ་གསུང་དུ་གསོལ།། ཞེས་ཞུས་སོ།། འོད་དཔག་མེད་ཆེན་པོས་བཀའ་སྩལ་པ། ། གསང་བའི་བདག་པོ་སངས་རྒྱས་ཀྱི་ངོ་བོ་རངགི་རིག་པ་སྐྱེ་ཤི་མི་མངའ་བ་འདི་ཡིན་ནོ།། རིག་པའི་ངོ་བོ་མ་འགགས་པར་སལ་ལེ་གསལ་བ་འདི་ཡིན་ནོ།། རིག་པ་མ་འགགས་པར་ཝལ་ལེ་སལ་ལེ་བ་འདི་སངས་རྒྱས་ཡིན་ནོ། ཞེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་ཀྱེ་སངས་རྒྱས་ཀྱི་རངལུས་གསུམ་གསུང་དུ་གསོལ།། ཅེས་ཞུས་སོ། ། སངས་རྒྱས་འོད་ཕུང་ཆེན་པོ་བཀའ་སྩལ་པ།། གསང་བའི་བདག་པོ་སངས་རྒྱས་རངགི་ལུས་འོད་ཀྱི་ཕུང་པོ་འདི་ཡིན་ནོ།། འོད་ཁ་དོག་རྣམ་པ་ལྔ་ཕྲ་ལ་དངས་པ།། གསལ་ལ་འཚེར་བ།། རང་བཞིན་གྱིས་བཀྲག་ལ་ཉམ་ང་བ་མེར་མེར་པོར་ཡོད་དོ། ། རང་གི་རིག་པ་འོད་ཀྱི་ཕུང་པོ་ཆེན་པོར་བཞུགས་པ་འདི་ཀ་སངས་རྒྱས་ཀྱི་དགོངས་པ་ཡིན་ནོ།། སངས་རྒྱས་རང་ལུས་འོད་ཀྱི་ཕུང་པོ་ཞེས་བྱ་བའོ།། སངས་རྒྱས་འོད་ཀྱི་ཕུང་པོ་མེད་ན་སྣང་གསལ་གྱི་མཐའ་དགགས་པས། ། མུ་སྟེགས་ཆད་པ་དང་ཁྱད་མེད་དུ་འགྲོ།། རྡོ་རྗེ་འཛིན་པ་སངས་རྒྱས་རང་གི་རིག་པ་མ་འགགས་པར་ས་ལེ་བ་འདི་ཡིན་ནོ།། རང་གི་རིག་པ་འོད་ཀྱི་ཕུང་པོར་ཤེས་པར་གྱིས་ཤིག། ཅེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་ཀྱེ་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་མེད་པ་གསུམ་གསུང་དུ་གསོལ།། ཞེས་ཞུས་སོ།། དེ་ནས་སངས་རྒྱས་འོད་ཀྱི་ཕུང་པོས་འདི་སྐད་ཅེས་བཀའ་སྩལ་ཏོ། ། གསང་བའི་བདག་པོ་རང་གི་རིག་པ་ཆོས་ཀྱི་སྐུ་ལ།། རང་གི་རིག་པའི་ངོ་བོས་མ་འགགས་པར་གསལ་བས་སངས་རྒྱས་ཀྱི་དགོངས་པ་ཡིན་ནོ།། རིག་པ་དང་མི་འབྲལ་བས་སྒོམ་དུ་མེད། ། སྐྱེ་ཤི་མེད་པ་ཡིན་ནོ།། སངས་རྒྱས་དགོངས་པ་ལ་སྒོམ་དུ་མེད་པ་ཡིན་ནོ།། སངས་རྒྱས་ཀྱི་དགོང་པ་ངོ་ཤེས་ན་ལས་དང་དགེ་སྡིག་མེད་པ་ཡིན་ནོ།། ཞེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཀྱེ་ཀྱེ་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་ཡོད་པ་གསུམ་གསུང་དུ་གསོལ།། ཞེས་ཞུས་སོ།། འོད་ཕུང་ཆེན་པོས་བཀའ་སྩལ་པ།། སངས་རྒྱས་ཀྱི་ངོ་བོ་རང་གི་རིག་པ་གསལ་སྟོང་དབྱེར་མེད་པར་ཡོད་དོ། ། སངས་རྒྱས་ཀྱི་རང་ལུས་འོད་ཕུང་ཆེན་པོར་ཡོད་དོ།། ཡེ་ཤེས་ཀྱི་སྐུ་ལ་གསལ་འགྲིབ་མེད་པས།། སྐུ་དང་ཡེ་ཤེས་རྒྱུན་ཆད་མེད་པར་ཡོད་དོ།། ཞེས་གསུངས་སོ། ། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཨེ་མ་ཧོ།། སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་གནས་གསུམ་གསུང་དུ་གསོལ།། ཞེས་ཞུས་སོ།། དེ་ནས་སངས་རྒྱས་འོད་ཕུང་ཆེན་པོས་བཀའ་སྩལ་པ། ། གསང་བའི་བདག་པོ་ཁྱོད་ཉོན་ཅིག། སེམས་ཅན་ཐམས་ཅད་ལ་རང་གི་སྙིང་གི་དཀྱིལ་ན།། ཆོས་སྐུ་སྟོང་པ་རིག་པ་སྙིང་པོ་ཅན་དུ་གནས་སོ།། རིག་པ་འོད་ཀྱི་ཁང་པ་ཅན་དུ་གནས་སོ།། འོད་མཐའ་མེད་པའི་ཡུལ་ཅན་དུ་གནས་སོ། ། ཞེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཨེ་མ་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་འཆར་ལུགས་གསུམ་གསུང་དུ་གསོལ།། ཞེས་ཞུས་སོ། ། སངས་རྒྱས་འོད་ཕུང་ཆེན་པོས་བཀའ་སྩལ་པ།། རང་རིག་གསལ་སྟོང་དབྱེར་མེད་འོད་ཀྱི་ཕུང་པོ་ཆེན་པོར་བཞུགས་པ་འདི་ལ།། རང་གི་ཤེས་རབ་ཀྱིས་བརྩལ་ཞིང་བརྟགས་ན།། མངོན་རྟགས་ཐམས་ཅད་འཕྲལ་པ་འཆར་རོ། ། རང་གི་མིག་སྲིད་པའི་མེ་ལོང་ལ་བཅུག་ནས་མ་ཡེངས་པར་བལྟས་བལྟས་པས།། སངས་རྒྱས་ཀྱི་ཞིང་ཁམས་རྣམ་པར་དག་པ་མངོན་སུམ་དུ་འཆར་རོ།། མ་རིག་པ་འཁྲུལ་པའི་སྣང་བའི་འགགས་པས་དག་པ་ཡེ་ཤེས་ཀྱི་སྣང་བ་འཆར་རོ། ། ཞེས་བཀའ་སྩལ་ཏོ།། དེ་ནས་གསང་བའི་བདག་པོས་འདི་སྐད་ཅེས་ཞུས་སོ།། ཨེ་མ་སངས་རྒྱས་འོད་ཕུང་ཆེན་པོ། སངས་རྒྱས་ཀྱི་གྲོལ་བ་གསུམ་གསུང་དུ་གསོལ། ། ཞེས་ཞུས་སོ།། བཅོམ་ལྡན་འདས་རྣམ་པར་གྲོལ་བའི་བདེ་བར་གཤེགས་པ་འོད་ཀྱི་ཕུང་པོས་བཀའ་སྩལ་པ།། གསང་བའི་བདག་པོ་ཁྱོད་ཉོན་ཅིག། རིག་པ་སེམས་དང་བྲལ་བས་གཟུང་འཛིན་རྣམ་རྟོག་དང་བྲལ་ལོ། ། རིག་པ་གཅེར་བུ་རུ་ཕྱུང་བས་རང་འོད་ཡུལ་ལ་ཤར་ནས།། ཡུལ་ཡེ་ཤེས་སུ་གྲོལ་ལོ།། ཡེ་ཤེས་ཀྱི་སྐུ་ལ་མཚན་མའི་ཟུངས་མེད་པས་ལས་དགེ་སྡིག་རྣམ་སྨིན་ལས་གྲོལ་ལོ།། ཞེས་བཀའ་སྩལ་ཏོ། ། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་མི་དགོས་པ་གསུམ་གསུང་དུ་གསོལ།། ཞེས་ཞུས་སོ།། སངས་རྒྱས་ཀྱི་འོད་ཀྱི་ཕུང་པོས་བཀའ་སྩལ་པ། ། སྣང་བ་རང་ལོག་འོང་བས་ལས་ངན་བག་ཆགས་སྦྱང་མི་དགོས།། ཡེ་ཤེས་ཚང་ཁབ་འོང་བས་ཆེད་དུ་སྒོམ་མི་དགོས།། རང་གི་རིག་པ་སྐྱེ་ཤི་མེད་པས་འཁོར་བའི་སྡུག་བསྔལ་སྤང་མི་དགོས།། ཞེས་གསུངས་སོ། ། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་ཀྱེ་སངས་རྒྱས་འོད་ཀྱི་ཕུང་པོ། སངས་རྒྱས་ཀྱི་དགོས་པ་གསུམ་གསུང་དུ་གསོལ།། ཞེས་ཞུས་སོ།། སངས་རྒྱས་འོད་ཀྱི་ཕུང་པོས་བཀའ་སྩལ་པ། ། རང་གི་རིག་པ་འོད་ཀྱི་ཕུང་པོར་ངོ་ཤེས་དགོས་སོ།། རིག་པ་རང་གི་ངོ་བོ་མ་འགགས་པར་ཝལ་ལེ་ཁྱུག་གེ་གསལ་བའི་འདི་ཀ་སངས་རྒྱས་སུ་ངོ་ཤེས་དགོས་སོ།། སངས་རྒྱས་ཀྱི་སྐུ་ལ་མཚན་མའི་གཟུགས་མེད་པས། ། སངས་རྒྱས་ཀྱི་སྐུ་དང་སངས་རྒྱས་ཀྱི་ཡེ་ཤེས་ཐ་དད་དུ་འཛིན་པའི་རྟོག་པའི་ལས་གྲོལ་ཏེ།། གཅིག་ཏུ་ཤེས་དགོས་སོ།། ཞེས་གསུངས་སོ།། སངས་རྒྱས་རང་ཆས་ཆེན་པོའི་རྒྱུད་ལས་སངས་མངོན་སུམ་དུ་བསྟན་པའི་ལེའུ་སྟེ་དང་པོའོ། ། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་ཀྱེ་སངས་རྒྱས་འོད་ཀྱི་ཕུང་པོ་ཆེན་པོ།། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཇི་སྙེད་ཅེག་གསུངས་ཀྱང། ། ཆོས་ཐམས་ཅད་ཀྱི་རྩ་བ་གདམས་ངག་ཏུ་འདུས་པས།། གདམས་ངག་ཐམས་ཅད་ཀྱི་དམར་ཐག་གར་བཅད་ཅེས་ཞུས་སོ།། སངས་རྒྱས་འོད་ཀྱི་ཕུང་པོས་བཀའ་སྩལ་བ།། རང་འཆི་བའི་ཚེ་དྲོད་རྐང་མཐིལ་ནས་ཡལ་ནས། ། སྤྱི་བོ་ཚངས་པའི་བུ་ག་ན་ཡར་ལ་འཐོན།། སེམས་གློ་བའི་ནང་ནས་འཐོན་ནས་དབུགས་སྣ་སྒོར་ཆད།། སངས་རྒྱས་སྙིང་གི་ནང་ནས་འཐོན་མིག་ན་ཡར་ལ་བྱོན་པའི་དུས་སུ།། འཁོར་བ་རུ་བཟློག་ནས་སྣང་སྲིད་ཐམས་ཅད་འོད་ཀྱི་སྐུ་རུ་འཆར་རོ། ། སྣང་སྲིད་འོད་དང་སྐུ་རུ་ཤར་བ་དེ། རང་གི་རིག་པའི་ཤར་ལུགས་སམ།། རང་སྣང་སམ། རང་གདངས་རང་ལ་ཤར་བ་ཤེས་པས།། རང་འོད་སྐུ་དང་གཉིས་སུ་མེད་པར་ཐིམ་ནས་སངས་རྒྱས་པས། ། གདམས་ངག་གི་དམར་ཐག་སྣང་སྲིད་ཐམས་ཅད་འོད་དང་སྐུ་རུ་ཤར་བའི་དུས་སུ་བཅད་དོ།། ཞེས་གསུངས་སོ།། དེ་ནས་གསང་བའི་བདག་པོས་འདི་སྐད་ཅེས་ཞུས་སོ། ། ཨེ་མཧོ། སངས་རྒྱས་འོད་ཀྱི་ཕུང་པོ་ཆེན་པོ།། གདམས་ངག་དེ་དག་ནམ་དགོས་ན་བདག་འཆི་འབི་དུས་སུ་དགོས་པས།། བདག་འཆི་བའི་དུས་ཀྱི་དམར་ཐག་གར་བཅད་ཅེས་ཞུས་སོ།། སངས་རྒྱས་འོད་ཕུང་ཆེན་པོས་བཀའ་སྩལ་པ། ། གསང་བའི་བདག་པོ་འཆི་བ་ལ་འཆི་ལུགས་རྣམ་པ་གཉིས་ཡིན་ནོ།། ཀུན་ཏུ་བཟང་མོའི་ངང་དུ་འཆི་བ་དང།། ཀུན་ཏུ་བཟང་པོའི་ངང་དུ་འཆི་བའོ།། ཀུན་ཏུ་བཟང་མོའི་ངང་དུ་འཆི་བ་ནི། ། ནང་སྲོག་པ་རྩལ་འདུས་ནས་འཆི་བ་ཡིན་པས།། ན་ཚ་ཟུགས་གཟེར་མེད་པར་ཉལ་ཏེ་འཆིའོ།། ཀུན་ཏུ་བཟང་པོའི་ངང་དུ་འཆི་བ་ནི།། ནད་ཐམས་ཅད་སྙིང་ལ་འདུས་ནས་འཆི་བ་ཡིན་པས།། ན་ཚ་ཟུག་གཟེར་ཤིན་ཏུ་ཆེ་བ་ཡིན་ནོ། ། ན་ཚ་ཟུག་གཟེར་ལྷག་པ་རེ་ལ་རྟོགས་པའི་ཤེས་རབ་ལྷག་པར་སྐྱེ་བས།། བདག་འཆི་བའི་དུས་སུ་དམར་ཐག་ཀུན་ཏུ་བཟང་པོའི་ངང་དུ་འཆི་བ་ལ་ཐག་བཅད་དོ།། ཞེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཨེ་མ་ཧོ།། སངས་རྒྱས་འོད་ཀྱི་ཕུང་པོ།། ཤི་ནས་གདམས་ངག་ཐེབས་པ་གཅིག་སངས་རྒྱ་བས།། བདག་སངས་རྒྱ་བའི་དམར་ཐག་གར་བཅད་ཅེས་ཞུས་སོ།། དེ་ནས་སངས་རྒྱས་འོད་ཀྱི་ཕུང་པོས་བཀའ་སྩལ་པ། ། གསང་བའི་བདག་པོ།། སངས་རྒྱས་ལ་གཉིས་ཡིན་ནོ།། ཆོས་ཉིད་མ་དང་ཕྲད་པ་དང།། ཡེ་ཤེས་རང་ས་ཟིན་པའོ།། ཆོས་ཉིད་མ་དང་ཕྲད་པ་ནི།། འཁྲུལ་སྣང་འགགས་ནས་དག་དངུལ་དཀར་གྱི་ཡང་ཞུན་ནམ། ། མེ་ལོང་གཡའ་དག་པ་འམ།། ནམ་མཁའ་རྣམ་པར་དག་པ་ལྟ་བུར་དོན་ཆོས་ཉིད་དག་པ་ཡིན་ནོ།། སྣང་འཆར་བ་ཡིན་ནོ།། ཡེ་ཤེས་རང་ས་ཟིན་པ་ནི་འོད་ལྔ་ངོ་ཤེས་རང་འོད་ཀྱི་སྣང་བ་ལ་གཉིས་སུ་མེད་པར་ཐིམ་ནས་སངས་རྒྱས་པས། ། བདག་སངས་རྒྱ་བའི་དམར་ཐག་ཆོས་ཉིད་མ་དང་ཕྲད་པའི་དུས་སུ་བཅད་དོ།། ཞེས་གསུངས་སོ།། སངས་རྒྱས་རང་ཆས་ཀྱི་རྒྱུད་ལས། ། དམར་ཐག་བཅད་པའི་ལེའུ་སྟེ་གཉིས་པའོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་ཀྱེ། སངས་རྒྱས་འོད་ཀྱི་ཕུང་པོ།། སངས་རྒྱས་ཀྱི་མཚན་ལྔ་གསུང་དུ་གསོལ།། ཞེས་ཞུས་སོ། ། སངས་རྒྱས་འོད་ཀྱི་ཕུང་པོས་བཀའ་སྩལ་པ།། གསང་བའི་བདག་པོ།། སངས་རྒྱས་འོད་ཀྱི་ཕུང་པོའི་མཚན་ལྔ་ནི།། ཡང་དག་པར་རྫོགས་པའི་སངས་རྒྱས་ཆོས་སྐུ་ཐིག། ཉག་གཅིག་སེམས་འཕྲུལ་རྟོག་དང་བྲལ་བ་དང། ། ཐོག་མའི་སངས་རྒྱས་པ་ལ་རྩལ་ཤར་བས།། འོད་མི་འགྱུར་བ་དང་རིག་པ་འཛིན་ཆགས་དང་བྲལ་བ།། ཀུན་ཏུ་བཟང་པོ་དང།། སངས་རྒྱས་འགྲེས་རྒུད་མི་མངའ་བ།། གཞོན་ནུ་བུམ་པའི་སྐུ་དང། ། རང་བཞིན་ལྷུན་རྒྱུ་རྐྱེན་དང་བྲལ་བ་བྱེད་མཁན་མེད་པ་གྱིས་གྲུབ་པའི་སངས་རྒྱས་དང་ལྔ་ཡིན་ནོ།། ཀྱེ་རྡོ་རྗེ་འཛིན་པ་ཁྱོད་ཉོན་ཅིག། རང་གི་ཤེས་རིག་གི་ངོ་བོ་འདི་དངོས་པོ་དང་ཁ་དོག་གང་ཡང་མ་གྲུབ་པར། ། སྟོང་སང་ངེར་འདུག་པ་འདི་ཀ་ཆོས་ཉིད་ཀུན་ཏུ་བཟང་མོ་ཡིན་ནོ།། སྟོང་པ་བརྡོ་ཙ་ན་སྟོང་པ་བྱང་ཆུབ་དུ་མ་སོང་བར།། རང་གི་ཤེས་རིག་ཝལ་ལེ་གསལ་བ་འདི་ཀ་རིག་པ་ཀུན་ཏུ་བཟང་པོ་ཡིན་ནོ། ། རང་གི་རིག་པ་ངོ་བོ་སྟོང་པ་དང་ཤེས་རིག་མ་འགགས་པར་གསལ་བ་དབྱེར་མེད་དུ་འདུག་པའི་འདི་ཀ་ཡང་དག་པར་རྫོགས་པའི་སངས་རྒྱས་ཉག་གཅིག་ཡིན་ནོ།། རང་གི་རིག་པ་གསལ་སྟོང་དབྱེར་མེད་འདི་ཀ་སངས་རྒྱས་ཉག་གཅིག་ཏུ་ཤེས་པར་གྱིས་ཤིག། རང་གི་རིག་པ་མ་འགགས་པར་ས་ལེ་གསལ་བ་འདི་ཀ་རིག་པ་ཀུན་ཏུ་བཟང་པོ་ཡིན་ནོ།། གསང་བའི་བདག་པོ་རང་གི་རིག་པ་འགགས་མེད་དུ་འཆར་བ་འདི་ཀ་སངས་རྒྱས་ཀུན་ཏུ་བཟང་པོར་ཤེས་པར་གྱིས་ཤིག། རང་གི་རིག་པ་འོད་ཀྱི་ཕུང་པོར་བཞུགས་པས།། འདི་ལ་སྐྱེ་ཤི་མེད་པས་སངས་རྒྱས་འོད་མི་འགྱུར་བ་ཡིན་ནོ།། རིགས་ཀྱི་བུ་རང་གི་རིག་པ་འོད་དུ་འབར་བ་འདི། ། སངས་རྒྱས་འོད་མི་འགྱུར་བ་ཡིན་པར་ཤེས་པར་བྱའོ།། རང་གི་སྙིང་གི་ནང་ན།། རང་གི་རིག་པ་འོད་ཀྱི་ཕུང་པོར་བཞུགས་པ་དེ་སངས་རྒྱས་ཡིན་ནོ།། རང་གི་རིག་པ་འོད་ཀྱི་ཕུང་པོ་ལ་སྐྱེ་ཤི་མེད་པས་གཞོན་ནུ་ཡིན་ནོ། ། བུམ་པའི་ནང་དུ་མར་མེ་བཏང་བ་བཞིན་སྙིང་གི་དཀྱིལ་ན་རང་གི་རིག་པ་འོད་ཀྱི་ཕུང་པོ་ཆེན་པོ་གསལ་ལ་རྟོག་པ་མེད་པར་བཞུགས་པ་དེ་བུམ་པའི་སྐུ་ཡིན་ནོ།། རིགས་ཀྱི་བུ་རང་གི་སྙིང་གི་དཀྱིལ་ན། ། སངས་རྒྱས་འོད་ཀྱི་ཕུང་པོ་བུམ་པའི་ནང་གི་མར་མེ་བཞིན་ཡོད་པ་དེ་སངས་རྒྱས་གཞོན་ནུ་བུམ་པའི་སྐུ་རུ་ཤེས་པར་གྱིས་ཤིག། སངས་རྒྱས་ཆོས་ཀྱི་སྐུ་རྟེན་པ་རང་གི་ལུས་ལ་བརྟེན་ནས་ཡོད་དོ།། བཞུགས་པ་རང་གི་སྙིང་གི་དཀྱིལ་ན་བཞུགས་སོ། ། གསལ་བ་རང་གི་མིག་ན་ཕར་ལ་གསལ་བས།། རང་བཞིན་ལྷུན་གྱིས་གྲུབ་པའི་སངས་རྒྱས་ཡིན་ནོ།། གསང་བའི་བདག་པོ་རྡོ་རྗེ་འཛིན་པ་ཆེན་པོ།། རང་གི་མིག་གི་འབྲས་བུའི་དཀྱིལ་ན། ། མཐོང་བ་མ་འགགས་པར་གསལ་བ་འདི་ཀ་རང་བཞིན་ལྷུན་གྱིས་གྲུབ་པའི་སངས་རྒྱས་ཡིན་ནོ།། དེ་ངོ་ཤེས་པར་གྱིས་ཤིག་ཅེས་བཀའ་སྩལ་ཏོ།། ཀྱེ་གསང་བའི་བདག་པོ་སངས་རྒྱས་ཆོས་ཀྱི་སྐུ་ནི། ། ངོ་བོ་རང་བཞིན་ཐུགས་རྗེ་གསུམ་དུ་བཞུགས་སོ།། ངོ་བོ་ནི་རང་གི་ཤེས་རིག་ངོ་བོ་སང་ངེ་བསལལེ་བ་འདི་ཀ་སངས་རྒྱས་ཀྱི་ངོ་བོ་ཡིན་ནོ།། རང་གི་རིག་པ་རང་བཞིན་འོད་ཀྱི་ཕུང་པོར་བཞུགས་པ་ཡིན་ནོ། ། ཐུགས་རྗེ་ནི་འོད་ལྔའི་སྦུགས་ན་སངས་རྒྱས་རིགས་ལྔའི་སྐུ་བཞུགས་པ་ཡིན་ནོ།། ངོ་བོ་རང་བཞིན་ཐུགས་རྗེ་གསུམ་དུ་འདུ་འབྲལ་མེད་པར་སྙིང་གི་དཀྱིལ་ན་བཞུགས་སོ།། དེ་ངོ་ཤེས་པར་གྱིས་ཤིག། ཅེས་བཀའ་སྩལ་ཏོ།། སངས་རྒྱས་རང་ཆས་ཀྱི་རྒྱུད་ལས།། བདེ་བར་གཤེགས་པའི་མཚན་བསྟན་པའི་ལེའུ་སྟེ་གསུམ་པའོ།།།། དེ་ནས་ཡང་གསང་བའི་བདག་པོ་རྡོ་རྗེ་འཛིན་པ་ཆེན་པོ་དེས་འདི་སྐད་ཅེས་ཞུས་སོ། ། ཨེ་མ་ཧོ། སངས་རྒྱས་འོད་ཕུང་ཆེན་པོ།། མ་རིག་པའི་སེམས་རྣམ་པར་གྲོལ་བའི་ཡེ་ཤེས་འོད་ཀྱི་ཕུང་པོ་ཇི་ལྟར་གྲོལ།། ཅེས་ཞུས་སོ།། དེ་ནས་རྣམ་པར་གྲོལ་བའི་ཡེ་ཤེས་འོད་ཀྱི་ཕུང་པོས་བཀའ་སྩལ་པ། ། གསང་བའི་བདག་པོ་ཁྱོད་ཉོན་ཅིག། རྣམ་པར་གྲོལ་བའི་ཡེ་ཤེས་འོད་ཀྱི་ཕུང་པོར་གྲོལ་བ་ལ་གསུམ་ཡིན་ནོ། འཇུག་པ་དང།། གྲོལ་བ་དང།། མཐར་ཕྱིན་པའོ།། འཇུག་པ་ལ་གཉིས་ཏེ།། འོད་རང་གི་རིག་པ་ལ་ཚུར་འཇུག་པ་དང། ། རང་གི་རིག་པ་འོད་ལ་ཕར་འཇུག་པའོ།། འོད་རང་གི་རིག་པ་ལ་ཚུར་འཇུག་པ་ནི།། འཁྲུལ་པའི་སྣང་བ་འགགས་པ་དང།། སངས་རྒྱས་ཀྱི་ཞིང་ཁམས་རྣམ་པར་དག་པ།། ཕྲ་ལ་དྭངས་པ། ། གསལ་ལ་འཚེར་བ།། རང་བཞིན་གྱིས་བཀྲག་ལ་ཉམ་ང་བ།། མེར་མེར་སྣང་བ་ཐམས་ཅད་སྐུ་དང་ཡེ་ཤེས་སུ་འཆར་རོ།། གསང་བའི་བདག་པོ་དེ་ནི་འོད་རང་གི་རིག་པ་ལ་ཚུར་འཇུག་པ་ཡིན་ནོ།། རང་གི་རིག་པ་འོད་ལ་ཕར་འཇུག་པ་ནི། ། སྣང་བ་འོད་ཀྱི་སྐུ་རུ་ཕར་ཤར་བ་དེ།། རང་གི་རིག་པའི་རང་མདངས་རང་ལ་ཤར་བར་ངོ་ཤེས་པས་རང་གི་འོད་དེ་སྐུ་ལ་ཐིམ་ནས་སངས་རྒྱའོ།། དེ་རང་གི་རིག་པ་འོད་ལ་ཕར་འཇུག་པ་ཡིན་ནོ། ། རྡོ་རྗེ་འཛིན་པ་རང་གི་རིག་པ་རང་གདངས་ཡེ་ཤེས།། ཡེ་ནས་རང་བཞིན་གྱིས་འོད་གསལ་བར་བཞུགས་པ་ཡིན་པས།། རང་གི་རིག་པའི་རང་འོད་རང་གིས་ངོ་ཤེས་པར་བྱའོ།། རང་ངོ་ཤེས་ནས་རིག་པ་འོད་ལ་འཇུག་པ་ཡིན་ནོ། ། རིག་པ་འོད་ལ་ཞུགས་པས་རྣམ་པར་གྲོལ་བའི་ཡེ་ཤེས་སངས་རྒྱས་འོད་ཀྱི་ཕུངཔོར་སངས་རྒྱའོ།། ཀྱེ་རྡོ་རྗེ་འཛིན་པ་རང་ཆས་ཆེན་པོ་དེ་ནི།། འདས་པ་དང་མ་འོངས་པས་ཀྱང་བསྟན་པར་མི་ནུས་སོ། ། ཞེས་བཀའ་སྩལ་ཏོ།། དེ་ནས་གསང་བའི་བདག་པོས་བསྐོར་བ་ལན་གསུམ་བྱས་ནས།། ཨེ་མ་ཧོ། རྣམ་པར་གྲོལ་བའི་སངས་རྒྱས་བདེ་བར་གཤེགས་པ་འོད་ཀྱི་ཕུང་པོ།། སེམས་ཅན་མ་རིག་པའི་མུན་པ་བསལ་ལོ། ། རང་གི་དོན་ཆེན་པོ་རངགི་རྙེད་དོ།། དག་པའི་སྣང་བ་ཤེས་པས་འཁྲུས་པའི་རྩ་བ་ཆོད་དོ།། འཁྲུལ་པའི་རྩ་བ་ཆོས་པས་རང་གི་ཡེ་ཤེས་རངས་ཟིན་ནོ།། ཡེ་ཤེས་རང་ས་ཟིན་པས་ལས་ངན་པ་དང་བག་ཆགས་ཐམས་ཅད་སྦྱང་མི་དགོས་པར་རང་དག། ཅེས་གསང་བའི་བདག་པོས་གསོལ་ཏོ།། དེ་ནས་རྣམ་པར་གྲོལ་བའི་བདེ་བར་གཤེགས་པས་འདི་སྐད་ཅེས་བཀའ་སྩལ་ཏོ།། གསང་བའི་བདག་པོ་ཕྱོགས་བཅུ་དུས་གསུམ་གྱི་སངས་རྒྱས་ཀྱིས་ཀྱང་དོན་ཆེན་པོ་དེ་ཅམ་མཚོན་མི་ནུས་སོ། ། ཞེས་བཀའ་སྩལ་ཏོ།། དེ་ནས་རྣམ་པར་གྲོལ་བ་འོད་ཀྱི་ཕུངཔོས་འདི་སྐད་ཅེས་བཀའ་སྩལ་ཏོ།། གསང་བའི་བདག་པོ་གྲོལ་བ་གསུམ་ཡིན་ནོ། ། ཤ་ཁྲག་གི་ལུས་རིན་པོ་ཆེ་འོད་འབར་བའི་སྐུ་ལྔ་ཚོམ་བུའི་དཀྱིལ་འཁོར་དུ་གྲོལ་ལོ།། སེམས་རྟོག་བཅས་ཡེ་ཤེས་མི་རྟོག་པར་གྲོལ་ལོ།། ཡུལ་ས་རྡོ་རི་བྲག་ཆོས་ཉིད་སྟོང་པ་ཉིད་དུ་གྲོལ་ནས། ། སྣང་འོད་ཀྱི་དཀྱིལ་འཁོར་དུ་གྲོལ་ཞིང་ཤར་རོ།། རྡོ་རྗེ་འཛིན་པ་མཐར་ཕྱིན་པ་ལ་གཉིས་ཡིན་ནོ།། མངོན་པར་ཤེས་བ་དྲུག་རང་བྱུང་དུ་ཤར་བས།། སེམས་ཉིད་ཐུགས་རྗེ་མ་འགགས་པར་འགྲོ་བའི་དོན་མཐར་ཕྱིན་ནོ། ། སྣང་བ་རིག་པའི་ངང་དུ་ཐིམ་པས།། རིག་པ་ཀ་དག་གི་ས་ལ་རང་ས་ཟིན་ནས་མཐར་ཕྱིན་ནོ།། ཞེས་རྣམ་པར་གྲོལ་གྲོལ་བའི་འོད་ཀྱི་ཕུང་པོས་བཀའ་སྩལ་ཏོ།། སངས་རྒྱས་རང་ཆས་ཀྱི་རྒྱུད་ལས། ། གྲོལ་ཚུལ་བསྟན་པའི་ལེའུ་སྟེ་བཞི་པའོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཨེ་མ་གོ། གསང་བའི་ཡེ་ཤེས་རང་ལ་སྟོན་པའི་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་མིན་པ་གསུམ་གསུང་དུ་གསོལ། ། ཅེས་ཞུས་སོ།། དེ་ནས་ཡང་བདེ་བར་གཤེགས་པ་འོད་ཀྱི་ཕུང་པོས་བཀའ་སྩལ་པ། རྡོ་རྗེ་འཛིན་པ་ཆེན་པོ་བྱས་པའི་ཆོས་ཀྱིས་སངས་རྒྱས་ཐོབ་པ་མིན་ནོ།། སངས་རྒྱས་འདུས་མ་བྱས་ཡིན་པས། ། བྱས་པའི་ཆོས་ཀྱིས་སངས་རྒྱ་ན་བྱས་པའི་ཆོས་ཅན་འཇིག་པས་ན་སངས་རྒྱས་མིན་ནོ།། སངས་རྒྱས་ཀྱི་སྐུ་ལ་སྐྱེ་ཤི་མེད་པས་འདུས་བྱས་མིན་ནོ།། ཞེས་བཀའ་སྩལ་ཏོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཀྱེ་ཀྱེ་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་ཡིན་པ་གསུམ་གསུང་དུ་གསོལ།། ཅེས་ཞུས་སོ།། དེ་ནས་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོས་འདི་སྐད་ཅེས་བཀའ་སྩལ་ཏོ། ། ཀྱེ་གསང་བའི་བདག་པོ་ཁྱོད་ཉོན་ཅིག། རང་གི་རིག་པ་ལ་སྐྱེ་ཤི་མེད་པས།། རང་གི་རིག་པ་ཝལ་ལེ་བ་འདི་སངས་རྒྱས་ཡིན་ནོ།། རང་གི་རེག་པ་ངོས་གཟུང་དང་བྲལ་བའི་འོད་ཀྱི་ཕུང་བོར་འདུག་པ་འདི་ཀ་སངས་རྒྱས་ཡིན་པར་ངོ་ཤེས་ན། ། ཆོས་སྐུ་ཐོབ་པ་ཡིན་ནོ།། ཀྱེ་གསང་བའི་བདག་པོ་རངགི་རིག་པ་ངོས་གཟུང་གི་མཐའ་དང་བྲལ་ཞིང།། མི་འགྱུར་བ་འོད་ཀྱི་ཕུང་པོ་རབཞུགས་པས།། ཤེས་རིག་གི་ངོ་བོ་ཝལ་ལེ་ཁྱུག་གེ་གསལ་བ་འདི་ཀ་སངས་རྒྱས་ཆོས་ཀྱི་སྐུ་ཡིན་ནོ། ། དེ་ངོ་ཤེས་པར་གྱིས་ཤིག། ཅེས་བཀའ་སྩལ་ཏོ།། དེ་ནས་ཡང་རྣམ་པར་གྲོལ་བའི་བདེ་བར་གཤེགས་པ་འོད་ཀྱི་ཕུང་པོས་འདི་སྐད་ཅེས་བཀའ་སྩལ་ཏོ།། ཀྱེ་གསངབའི་བདག་པོ་ཡེ་ཤེས་ཀྱི་སྐུ་ལ་གསལ་འགྲིབ་མེད་པ། ། དུས་གསུམ་མཉམ་པ་ཉིད་རང་གི་རིག་པ་ཝལ་ལེ་གསལ་གྱིན་འདུག་པ་འདི་ཀ།། ཡང་དག་རྫོགས་པའི་སངས་རྒྱས་འདུས་མ་བྱས་ཀྱི་སྐུ་ཡིན་ནོ། ། ཞེས་བཀའ་སྩལ་རོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཨེ་མ་ཧོ། སངས་རྒྱས་འོད་ཆེན་པོ། སངས་རྒྱས་ཀྱི་སྐུ་དང་ཡེ་ཤེས་གསུང་དུ་གསོལ།། ཅེས་ཞུས་སོ།། བཅོམ་ལྡན་འདས་རྣམ་པར་གྲོལ་བ་འོད་ཀྱི་ཕུང་པོས་བཀའ་སྩལ་པ། ། ཀྱེ་རྡོ་རྗེ་འཛིན་པ་ཁྱོད་ཉོན་ཅིག་སེམས་ལ་སངས་རྒྱས་སྐུ་གསུམ་ཡེ་ཤེས་ཤེས་རབ་ཀྱི་སྐུ་རུ་བཞུགས་སོ།། ཤེས་རབ་ཀྱི་སྐུ་ལ་མཚན་མའི་གཟུགས་མེད་དོ། ། ཤེས་རབ་ཀྱི་སྐུ་ལ་མཚན་མའི་གཟུགས་མེད་པས།། སྐུ་དང་ཡེ་ཤེས་རྒྱུན་ཆད་མེད་པར་བཞུགས་སོ།། ཤེས་རབ་རང་ལ་གསལ་བའི་སྐུ་རང་བྱུང་གི་ཡེ་ཤེས་སུ་གསལ་བས།། སྐུ་དང་ཡེ་ཤེས་ཐ་དད་མེད་པར་བཞུགས་སོ། ། སྐུ་དང་ཡེ་ཤེས་ཐ་དད་མེད་པ་ནི། རང་གི་རིག་པ་ཝལ་ལེ་བ།། འོད་ཀྱི་ཕུང་པོར་འདུག་པ་འདི་ཡིན་ནོ།། འདི་ཀ་སངས་རྒྱས་ཆོས་ཀྱི་སྐུ་ཡིན་ནོ།། རིག་པའི་ངོ་བོ་མ་འགགས་པར་ཝལ་ལེ་གསལ་བ་འདི་ཀ་ཆོས་སྐུ་ཡིན་པས། ། ཆོས་ཀྱི་སྐུ་དེ་ཀ་ངོ་བོ་ཉིད་ཀྱི་སྐུ་ཡིན་པས།། སྐུ་དང་ཡེ་ཤེས་ཐ་དད་མེད་པར་ཤེས་པར་བྱའོ།། ཡེ་ཤེས་སྐུ་བཞིར་ཤེས་པར་བྱའོ།། སངས་རྒྱས་སྐུ་གསུམ་ཤེས་རབ་ཀྱི་སྐུ་ཤེས་པར་བྱའོ། ། ཤེས་རབ་ཀྱི་སྐུ་ལ་ཡེ་ཤེས་རྒྱུན་ཆད་མི་མངའ་བར་ཤེས་པར་བྱའོ།། ཤེས་རབ་ཀྱི་སྐུ་རང་གདངས་འོད་དངསྐུ་རུ་ཤར་བས། རང་འོད་རང་ལས་ཤར་བར་ཤེས་པར་བྱའོ།། རིག་པ་མི་གནས་ཐོན་པས་ལོངས་སྐུ་ཁ་མིག་རྣ་བ་ཅན་གྱིས་སྣང་སྲིད་ཁེངས་ནས་ཐམས་ཅད་འོད་ཀྱི་སྐུ་རུ་ཤར་བ་དེ་ཤེས་རབ་ཀྱི་སྐུའི་རང་བཞིན་དུ་ཤེས་པར་བྱའོ། ། རང་གི་ཤེས་རབ་ཀྱི་སྐུའི་རང་བཞིན་ངོ་ཤེས་ན། རང་གི་རང་བཞིན་འོད་ལྔ་ལ་གཉིས་སུ་མེད་པར་ཐིམ་ནས་སངས་རྒྱའོ། ། ཀྱེ་གསང་བའི་བདག་པོ།། དོན་ཆེན་པོ་དེ་ནི་འདས་པ་དང་མ་འོངས་པས་ཀྱང་སྟོན་ནུས་རི་བཀའ་སྩལ་ཏོ།། ཞེས་སངས་རྒྱས་རང་ཆས་ཆེན་པོའི་རྒྱུད་ལས།། སྐུ་དང་ཡེ་ཤེས་ཀྱི་ལེའུ་སྟེ་ལྔ་པའོ། །།། དེ་ནས་གསང་བའི་བདག་པོ་རྡོ་རྗེ་འཛིན་པ་ཆེན་པོ་དེས་འདི་སྐད་ཅེས་ཞུས་སོ།། ཨེ་མ་ཧོ། རྣམ་པར་གྲོལ་བའི་སངས་རྒྱས་འོད་ཕུང་ཆེན་པོས།། སངས་རྒྱས་ཆོས་སྐུ་བསྟན་དུ་གསོལ། ། ཅེས་ཞུས་སོ།། དེ་ནས་ཡང་རྣམ་པར་གྲོལ་བའི་སངས་རྒྱས་འོད་ཕུང་ཆེན་པོས་འདི་སྐད་ཅེས་བཀའ་སྩལ་ཏོ།། ཀྱེ་གསང་བའི་བདག་པོ་ཁྱོད་ཉོན་ཅིག། རང་གི་རིག་པ་འགྱུར་བ་མེད་པ་ཝལ་ལེ་ཁྱུག་གེ་གསལ་བ་འདི་ཀ་ཆོས་ཀྱི་སྐུ་ཡིན་ནོ། ཞེས་བཀའ་སྩལ་ཏོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་རྣམ་པར་གྲོལ་བའི་སངས་རྒྱས་འོད་ཕུང་ཆེན་པོས།། ལོངས་སྤྱོད་རྫོགས་པའི་སྐུ་བསྟན་དུ་གསོལ། ། ཅེས་ཞུས་སོ།། དེ་ནས་ཡང་རྣམ་པར་གྲོལ་བའི་སངས་རྒྱས་འོད་ཕུང་ཆེན་པོས་འདི་སྐད་ཅེས་བཀའ་སྩལ་ཏོ།། ཀྱེ་རྡོ་རྗེ་འཛིན་པ་ཆེན་པོ་ཁྱོད་ཉོན་ཅིག། རངགི་རིག་པ་འགགས་པ་མེད་པར་ཝལ་ཙེར་འཆར་བ་དེ་ཤེས་པ་དེ་ཀ་ལོངས་སྐུ་ཡིན་ནོ། ། ཞེས་བཀའ་སྩལ་ཏོ།། དེ་ནས་གསང་བའི་བདག་པོས་འདི་སྐད་ཅེས་ཞུས་སོ།། ཀྱེ་སངས་རྒྱས་འོད་ཕུང་ཆེན་པོ།། སངས་རྒྱས་སྤྲུལ་པའི་སྐུ་བསྟན་དུ་གསོལ། ། ཅེས་ཞུས་སོ།། དེ་ནས་རྣམ་པར་གྲོལ་པའི་བདེ་བར་གཤེགས་པ་འོད་ཀྱི་ཕུང་པོས་འདི་སྐད་ཅེས་བཀའ་སྩལ་ཏོ།། ཀྱེ་གསང་བའི་བདག་པོ་ཁྱོད་ཉོན་ཅིག། རང་གི་རིག་པ་ཅིར་ཡང་འཆར་བ་འདི་ཀ་སངས་རྒྱས་སྤྲུལ་པའི་སྐུ་ཡིན་ནོ། ། ཞེས་བཀའ་སྩལ་ཏོ།། དེ་ནས་ཡང་སངས་རྒྱས་འོད་ཕུང་ཆེན་པོས་འདི་སྐད་ཅེས་བཀའ་སྩལ་ཏོ།། ཀྱེ་གསང་བའི་བདག་པོ།། རང་གི་རིག་པ་འགྱུར་བ་མེད་པ་ཝལ་ལེ་ཝ་གསལ་བ་འདི་ཀ་ཆོས་སྐུ་ཡིན་ནོ། ། སྣང་བ་འོད་དུ་ཤར་བས་རང་གི་རིག་པའི་ཆོས་འཕྲུལ་ཡིན་པས།། འོད་ལྔ་པོ་ཡང་སྤྲུལ་པ་ཡིན་ནོ།། སངས་རྒྱས་སྐུ་བཞི་རང་ལ་བཞུགས་པས་རང་གིས་ལྟོས།། རང་ལ་རང་གིས་བལྟས་པས་སངས་རྒྱས་རང་རིག་པར་འདུག། རང་གི་རིག་པ་སངས་རྒྱས་ཡིན་པས་སངས་རྒྱས་གཞན་དུ་མ་ཚོལ་ཅིག། ཅེས་བཀའ་སྩལ་ཏོ།། སངས་རྒྱས་རང་ཆས་རྒྱུད་ལས།། སྐུ་གསུམ་ངོ་སྤྲད་པའི་ལེའུ་སྟེ་དྲུག་པའོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཀྱེ་ཀྱེ་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོ་ཆེན་པོ།། སངས་རྒྱས་ཀྱི་ཡིན་པ་གསུམ་གསུང་དུ་གསོལ།། དེ་ནས་འོད་ཀྱི་ཕུང་པོས་བཀའ་སྩལ་པ།། ཀྱེ་རྡོ་རྗེ་འཛིན་པ་ཁྱོད་ཉོན་ཅིག། སངས་རྒྱ་ས་འདུས་མ་བྱས་ཡིན་པས།། བྱས་པའི་ཆོས་ཀྱིས་སངས་རྒྱས་མི་རྒྱ་བ་ཡིན་ནོ།། སངས་རྒྱས་སྐུ་གསུམ་ཤེས་རབ་སྐུ་རུ་བཞུགས་སོ།། ཤེས་རབ་ཀྱི་སྐུ་ནི་མཚན་མའི་གཟུགས་མེད་པས། ལས་ཀྱི་རྣམ་པར་སྨིན་པས་མགོས་པ་ཡིན་ནོ།། མ་དག་པ་འཁྲུལ་པའི་སྣང་པ་འདི་སངས་རྒྱས་སུ་ཤར་བས། ལས་ངན་བག་ཆགས་སྦྱང་མི་དགོས་པ་ཡིན་ནོ།། ཞེས་གསུངས་སོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཀྱེ་ཀྱེ་རྣམ་པར་གྲོལ་བའི་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་མིན་པ་གསུམ་གསུང་དུ་གསོལ།། ཞེས་ཞུས་སོ།། དེ་ནས་བཅོམ་ལྡན་འདས་ཀྱིས་འོད་ཕུང་བཀོད་པའི་ནང་ནས་འདི་སྐད་ཅེས་བཀའ་སྩལ་ཏོ། ། ཀྱེ་གསང་བའི་བདག་པོ་རྡོ་རྗེ་འཛིན་པ་ཆེན་པོ།། སངས་རྒྱས་ཆོས་ཀྱི་སྐུ་འདུས་མ་བྱས་པ་ཡིན་པས།། བྱས་པའི་ཆོས་ཀྱིས་སངས་རྒྱ་ན་འདུས་བྱས་སུ་འགྲོ་བས་སངས་རྒྱས་མིན་ནོ། ། སངས་རྒྱས་ཤེས་རབ་ཀྱི་སྐུ་ལ་མཚན་མ་མེད་པས།། རྣམ་པར་སྨིན་པས་གོས་པ་མེད་དོ།། རང་འོད་རང་གིས་ཤེས་ན་སངས་རྒྱ་བས།། སྒོམ་པ་དང་སྒྲུབ་པ་སངས་རྒྱས་མིན་ཞེས་བཀའ་སྩལ་ཏོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཀྱེ་ཀྱེ་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོ།། སངས་རྒྱས་ཀྱི་ཚོག་པ་གསུང་དུ་གསོལ། ཅེས་ཞུས་སོ།། དེ་ནས་རྣམ་པར་གྲོལ་བའི་སངས་རྒྱས་རྒྱན་འོད་ཀྱི་ཕུང་པོ་ཆེན་པོས། ། ཕྱི་ནང་མེད་པར་འོད་དུ་འབར་བ་དེ་འདི་སྐད་ཅེས་བཀའ་སྩལ་ཏོ།། ཀྱེ་བྱང་ཆུབ་སེམས་དཔའ་ཆེན་པོ།། ཁྱོད་མ་ཡེངས་པར་ཉོན་ཅིག། བདེ་གཤེགས་ཡེ་ཤེས་ཀྱི་ལུས་ཅན་དེ། ། ཆོས་ལས་འདས་པའི་སངས་རྒྱས་ཡིན་ནོ།། སྒོམ་པ་དང་སྒྲུབ་པ་མི་དགོས།། རྩོལ་བ་དང་བྲལ་བ་ཡིན་ཏེ།། རང་འོད་ངོ་ཤེས་པས་ཆོག་གོ། སངས་རྒྱས་ཡེ་ཤེས་ཀྱི་སྐུ་ལ་གདོས་བཅས་ཤ་ཁྲག་གི་ལུས་དང་བྲལ་ནས་མེད་པས། ། ལས་ལ་དགེ་སྡིག་མེད་དོ།། སྤྱད་པས་ཆོག་གོ། རང་གི་རིག་པ་འོད་ཀྱི་ཕུང་པོར་བཞུགས་པས།། གསལ་འགྲིབ་དང་བྲལ་ཏེ་ཡུལ་ཡེ་ཤེས་སུ་གསལ་བས་ཆོག་གོ། ཞེས་བཀའ་སྩལ་ཏོ།། དེ་ནས་ཡང་གསང་བའི་བདག་པོས་འདི་སྐད་ཅེས་ཞུས་སོ། ། ཀྱེ་ཀྱེ་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་འོང་བ་གསུམ་གསུང་དུ་གསོལ།། ཞེས་ཞུས་སོ།། དེ་ནས་བཅོམ་ལྡན་འདས་རྣམ་པར་གྲོལ་བའི་སངས་རྒྱས་འོད་ཀྱི་ཕུང་པོ་ཆེན་པོས་འདི་སྐད་ཅེས་བཀའ་སྩལ་ཏོ། ཀྱེ་གསང་བའི་བདག་པོ་རྡོ་རྗེ་འཛིན་པ་ཆེན་པོ།། ཁྱོད་རྩེ་གཅིག་གི་ཏིང་ངེ་འཛིན་གྱིས་ཉོན་ལ།། སོ་སོར་རྟོག་པའི་ཤེས་རབ་ཀྱི་ཟུང་ཞིག། འཁྲུལ་བའི་སྣང་བ་འགགས་པས་དག་པའི་སྣང་བ་འོང་ངོ། ། ཤ་ཁྲག་གི་ལུས་བོར་བས་འོད་གསལ་གྱི་ལུས་འོང་ངོ།། སེམས་རྟོག་བཅས་མེད་པས་ཡེ་ཤེས་རྟོག་མེད་འོང་ངོ།། ཞེས་བཀའ་སྩལ་ཏོ། དེ་ནས་ཡང་གསང་བའི་བདག་པོ་རྡོ་རྗེ་འཛིན་པ་ཆེན་པོ་ངེས་འདི་སྐད་ཅེས་ཞུས་སོ། ཀྱེ་ཀྱེ་སངས་རྒྱས་འོད་ཕུང་ཆེན་པོ།། སངས་རྒྱས་ཀྱི་ཐིམ་ལུགས་གསུམ་གསུང་དུ་གསོལ།། ཅེས་ཞུས་སོ།། དེ་ནས་རྣམ་པར་གྲོལ་བའི་སངས་རྒྱས་འོད་ཕུང་ཆེན་པོ་དེས་ཞལ་འཛུམ་པ་མཛད་ནས། ། འདི་སྐད་ཅེས་བཀའ་སྩལ་ཏོ།། རྡོ་རྗེ་འཛིན་པ་ཆེན་པོ་ཁྱོད་ཉོན་ཅིག། རང་གི་རིག་པ་མིག་ནས་འཐོན་ནས།། འཁྲུལ་པའི་སྣང་བ་རགས་པ་འདི།། དག་པའི་སྣང་བ་འོད་ལྔའི་ནང་དུ་ཐིམ་མོ། ། དག་པའི་སྣང་བར་རང་གི་རིག་པ་རང་འོད་དུ་ངོ་ཤེས་པས།། རང་འོད་ལྔ་ལ་གཉིས་སུ་མེད་པར་ཐིམ་ནས།། སངས་རྒྱས་བཞི་བཅུ་རྩ་གཉིས་སུ་སངས་རྒྱས་སོ།། ལོངས་སྐུ་ཞེ་གཉིས་རང་གི་རིག་པ་གསལ་སྟོང་དབྱེར་མེད་ལ་ཚུར་ཐིམ་ནས། ། འགྱུར་བ་མེད་པ་རིན་པོ་ཆེའི་སྦུབས་ནས།། རང་གི་རིག་པ་རང་གསལ་རྟོག་མེད་འོད་ཀྱི་ཕུང་པོཆེན་པོར་བཞུགས་སོ།། ཀྱེ་གསང་བའི་བདག་པོ།། དོན་ཆེན་པོ་དེ་ལ་སྒོམ་དུ་མེད་དོ། ། ངོ་ཤེས་པས་ཆོག་པའི་ལེའུ་སྟེ་བདུན་པའོ།། མ་སངས་རྒྱས་རང་ཆས་ཆེན་པོའི་རྒྱུད་ཅེས་བྱ་བ།། བལྟས་པས་སངས་རྒྱ་རྫོགས་སོ།། གུཧྱ། ས་མ་ཡ། ཨི་ཐི། བཀའི་སྲུངས་མ་རང་བྱུང་རྒྱལ་མོ།། ཨེ་ཀ་ཛ་ཏི་སྤུན་དྲུག་གིས་བྱ་ར་གྱིས་ཤིག། སྲུངས་ཤིག། དམ་ཚིག་མི་སྲུང་བའི་སྙིང་ཐོན་ཅིག། སྙིང་ཁྲག་འཇིབས་ཤིག། སྲོག་རྩ་ཆོད་ཅིག། ཨེ་ཀ་ཛ་ཏི་བྲན་མོ་བཅུ་བཞིས་དམ་ཚིག་མི་སྲུང་བ་རྣམས་ལ་ཞགས་པས་ཆིངས་ཤིག། བཀའ་གཉེར་གཏད་དོ།། སྲུངས་ལ་ལས་འཕྲོ་ཅན་དང་སྤྲོད་ཅིག། སྔགས་སྲུངས་ཨེ་ཀ་ཛ་ཏིའི་གཡོག་མོ་ལྔ་བཅུ་བརྒྱད་ཀྱིས།། དེ་བཞིན་གཤེགས་པའི་ཀའ་འདི་ཟུང་ཞིག། སྦོས་ཤིག། ཆོངས་ལ་དམ་ལ་མི་གནས་པའི་སྲོག་ཆོད་ཅིག་དབུགས་ལོང་ཞིག། ཤ་ཟོ་ཞིག་ཁྲག་འཐུངས་ཤིག། རུས་པ་མུར་ཅིག། དངོས་པོ་མེད་པར་ཐོང་ཞིག། བདེ་བར་གཤེགས་པ་ཐམས་ཅད་ཀྱིས་བཀའི་ཆད་པས་ཆོད་ཅིག། དམྱལ་ཁམས་བཅོ་བརྒྱད་ཀྱིས་ཁ་བསྐོར་ལ།། མནར་མེད་པའི་དམྱལ་བ་ནས་ཐོན་པའི་དུས་མེད་པར་གྱུར་ཅིག། སངས་རྒྱས་རང་ཆས་ཀྱི་རྒྱུད་ཆེན་པོ་འདི་ནི། སངས་རྒྱས་རྡོ་རྗེ་སེམས་དཔའི་དགོངས་པ། ། བལྟས་པས་སངས་རྒྱ་བ་ཡིན་ནོ།། དང་པོ་སྲིད་པ་ཆགས་པ་ནས།། ད་ལྟ་ཡན་ཆད་མི་ལ་ཡོད་རི་སྐན་ནོ།། འཇིག་རྟེན་དུ་མ་འཕེལ་བར་བྱས་པ་ཡིན་ནོ།། ལྕེ་སྒོམ་ནག་པོས་འཆད་པ་སྟག་ཅན་ཐོན་ནས་གཞན་ལ་ཤོར་རི་སྐན། ། སྔགས་ཀྱི་སྲུངས་མས་སྲུངས་ཤིག། ས་མ་ཡ། རྒྱ་རྒྱ་རྒྱ། རྒྱ་རྒྱ་རྒྱ། ། འཁོར་བའི་དགྲ་བཅོམ་འཕགས་ལམ་ལ།། ཞི་བའི་དོན་ལ་བསྐལ་མང་གནས།། འཕགས་པའི་ཐུགས་རྗེས་མ་བསྐུལ་ན།། མྱང་འདས་ལམ་ལ་ཕྱིན་མི་འགྱུར།། རང་སངས་རྒྱས་ཀྱིས་ཉོན་མོངས་བཅོམ། ། སངས་རྒྱས་ཐམས་ཅད་ཀྱི་བསྟན་པའི་གཞི་རྒྱུད་མཆོག་རིན་པོ་ཆེ་སྤུངས་པ་ལས།། འབྲས་བུ་འགོག་པའི་ལེའུ་སྟེ་བཅུ་པའོ།།།། ལག་མཐའ་མེད་པའི་དུས་འདི་རུ།། མ་རིག་རྒྱུ་རྐྱེན་ལས་བྱུང་བའི། ། སེམས་ཅན་ནམ་མཁའ་མཐའ་དང་མཉམ།། མིང་དུ་བཏགས་པ་ཁམས་གསུམ་ལ།། བདེ་གཤེགས་སྙིང་པོ་འགྲོ་རྣམས་ཀུན།། མཉམ་པ་ཉིད་དུ་ཡོངས་ཁྱབ་ཀྱང།། མི་ཡི་གྲུ་ལ་མ་བརྟེན་པའི།། སྡུག་བསྔལ་ཆུ་ལས་མི་སྒྲོལ་བས། ། ཐར་ལམ་སྒྲུབ་པའི་རྟེན་གཅིག་པུ།། མི་ལུས་ཐོབ་པ་ཤིན་ཏུ་དཀའ།། དགེ་བ་ཕྲ་མོ་ཙམ་དང་ནི།། མཁར་ཆེན་དག་ལས་འབྱུང་བ་ཡི།། རྨི་ལམ་ཙམ་ལས་ཐོབ་པ་དཀའ།། སྔོན་ཚེ་བསོད་ནམས་དགེ་བའི་མཐུས། ། འབྲས་བུ་དུས་འདིར་བྱུང་བ་ཡིན།། གཙང་མའི་མི་ལུས་མ་ཐོབ་ན།། ངན་སོང་གནས་ན་ཐར་ལམ་བྲལ།། བསོད་ནམས་ལྡན་པའི་ལྷ་ཡིས་ཀྱང།། གཡེང་བས་ཐར་པ་ཐོབ་པ་མིན། ། ལོངས་སྤྱོད་ལྡན་པའི་རྣམ་ཐོས་བུ།། རྫུ་འཕྲུལ་ལྡན་པའི་དབང་ཕྱུག་ཀྱང།། ཐར་པ་ཐོབ་པའི་རྟེན་མ་ཡིན།། དུས་གསུམ་སངས་རྒྱས་ཐམས་ཅད་ཀུན།། མི་ལུས་ལ་བརྟེན་བྱང་ཆུབ་བགྲོད།། མི་ཡི་ལུས་ཙམ་ཐོབ་པས་ཀྱང། ། མཉེན་པ་མེད་པའི་གྲུ་བཞིན་དུ།། འཁོར་བ་མི་བགྲོད་གཟུགས་བརྙན་ཡིན།། ངན་སོང་གསུམ་དང་ཚེ་རིངས་ལྷ།། མཐའ་འཁོབ་དབང་པོ་མ་ཚང་བ།། ལོག་ལྟ་ལྐུགས་པ་བརྒྱད་རྣམས་སྡུད། ། ཁོམ་ལྡན་མི་ལུས་ཤིན་ཏུ་དཀོན།། དལ་བ་ཕུན་སུམ་ཚོགས་པ་ཀུན།། གྲོགས་པོ་སངས་རྒྱས་འབྱུང་བ་དཀོན།། འཁོར་བའི་སྡུག་བསྔལ་མཐོང་བ་ཡི།། ཞེན་ཆགས་བྲལ་བའི་མིག་ལྡན་དཀོན།། སངས་རྒྱས་ཡོན་ཏན་མཐོང་བ་ཡི། ། རིག་པ་ཅན་གྱི་དད་པ་དཀོན།། མི་རྟག་རྒྱུད་ལ་བསྐུལ་བ་སྟེ།། བརྩོན་འགྲུས་ལྡན་པའི་བྱང་ཆུབ་དཀོན།། རང་གཞན་འདི་ཕྱིའི་དགོས་འདོད་འབྱུང།། དལ་འབྱོར་མི་ལུས་རིན་ཆེན་དེ། ། ལྷག་བསམ་ལྡན་པས་དོན་གཉིས་འགྲུབ།། ནོར་བུ་རིན་ཆེན་དཔེར་བྱར་མིན།། སེམས་ཅན་རྡུལ་ཕུང་ཙམ་ལུས་སུ།། མི་ལུས་སོར་སྟེང་རྡུལ་བས་ཉུང།། ངན་སོང་གནས་ངན་གཞན་དག་ལས།། རྩིག་ལོགས་གཏོར་བའི་སྲན་འབྲུའམ། ། མེ་ལོང་ངོས་ལ་གསེར་ཕྱེ་གཏོར།། ཆགས་པས་མི་ལུས་ཐོབ་པ་ཉུང།། མི་ལུས་ནམ་མཁའི་སྐར་མ་ཙམ།། དལ་འབྱོར་ཐོབ་པ་ཉི་ཟླ་དཀོན།། རྒྱ་མཚོ་ཆེར་དབུས་གཉའ་ཤིང་བུག། མཐའ་ཡི་རུལ་སྦལ་མགྲིན་ཆུད་པས། ། དལ་འབྱོར་མི་ལུས་ཐོབ་པ་དཀོན།། ཐོབ་ཀྱང་དུས་བརྒྱའི་ཟ་མ་གཅིག། ལན་ཅིག་ཐོབ་པ་སྲིད་པ་ཙམ།། ཕྱི་ནས་ཐོབ་པ་བརྒྱ་ལ་དཀའ།། ནོར་བུ་རིན་ཆེན་རྙེད་དུས་སུ།། འདམ་དུ་མ་བསྐུར་ཕྱི་བདར་གྱིས། ། རྒྱལ་མཚན་རྩེ་ལ་གསོལ་བ་ཐོབ།། དགོས་འདོད་འབྱུང་བའི་སྒྲོམ་དུ་ཆུག། ཕྱིན་ཅི་ལོག་གི་དགྲ་ཀུན་ལ།། མ་བསྐུར་བསྟན་པའི་སྒྲོན་མེས་བསྲུངས།། འཕོངས་པའི་སྡུག་བསྔལ་མ་ལུས་སོལ། ། བདེ་ལེགས་ཕུན་སུམ་ཚོགས་ཀུན་འབྱུང།། སངས་རྒྱས་ཐམས་ཅད་ཀྱི་བསྟན་པའི་གཞི་རྒྱུད་མཆོག་རིན་པོ་ཆེ་སྤུངས་པ་ལས། རྟེན་དལ་འབྱོར་རྙེད་དཀའ་བའི་ལེའུ་སྟེ་བཅུ་གཅིག་པའོ། །།། ཀྱེ་མ་དལ་འབྱོར་ཐོབ་ཀྱང་ནི།། གལ་ཏེ་ཕན་པ་མ་བསྒྲུབས་ན།། ཕྱིས་ནས་འབྱོར་ལྡན་མི་འགྱུར་ཏེ།། འདུས་བྱས་ཐམས་ཅད་མི་རྟག་ཅིང།། མི་རྟག་འཇིག་ཆེན་ཅི་བས་ཏེ།། དཔེར་ན་སྦྲུལ་གདུག་ཆེན་པོ་བཞི། ། སྣོད་ནང་བཅུག་ནས་ཁ་མ་གཅད།། མ་རེག་མ་བལྟས་བསྲུང་དུ་བཅུག། ཤོར་ན་གཤེད་མས་རལ་གྲིས་གསོད།། སྦྲུལ་རྣམས་རང་གནས་དཀའ་བ་བཞིན།། རླུང་མཁྲིས་བད་ཀན་འདུས་པ་བཞིན།། མ་འཕེལ་མ་ཟད་རང་ས་རུ། ། ནད་མེད་སོ་ལ་སྡོད་པ་དཀའ།། གལ་ཏེ་འཕེལ་ཟད་ཅིས་ཀྱང་འཆི།། སྔོན་དུ་མ་ཤིའི་དཔེ་མེད་དང།། ཕྱི་མ་མི་འཆིའི་ཁས་ལེན་མེད།། ད་ལྟ་འཆི་བས་མི་འཇིགས་པའི།། ས་ཕྱོགས་དེ་ནི་མཐོང་ཐོས་དང། ། དྲན་པའི་ཡུལ་ན་མེད་པ་ཡིས།། འདི་ལ་དགག་པར་བྱ་ཐབས་མེད།། གཉེན་བཤེས་བརྩེ་མང་མཐའ་སྐོར་ཡང།། ཉིན་མཚན་གཅིག་ཀྱང་ཤོལ་ཐབས་མེད།། བརྩེ་བའི་བུ་དང་མཛའ་བ་གྲོགས། ། འདི་ལ་སྐད་ཅིག་བསྒོ་མི་ནུས།། ཟང་ཟིང་ནོར་དང་མདུན་གྲོས་གཏམ།། འདི་ལ་བསྲུང་ཐབས་གང་ལ་ཡོད།། ཆེ་བཙུན་དྲེགས་པ་ལྡན་གྱུར་ཀྱང།། འཆི་བདག་བདུད་ལ་བཟློག་མི་ཚུགས།། སངས་རྒྱས་སྟོང་གི་མཐུ་སྟོབས་ཀྱང། ། འདི་ལ་སྐྱོབ་པར་མི་ནུས་ན།། ཐབས་གཞན་ཀུན་གྱིས་ལྟ་ཅི་སྨོས།། དཔེར་ན་རི་བོ་ཆེན་པོ་བཞི།། སྐྱེས་བུ་ལག་པ་བརྐྱང་བསྐུམ་ཙམ།། འཇིགས་པའི་དབུས་ནས་འབྲོས་ཐབས་མེད།། དེ་བཞིན་སྐྱེ་རྒས་ན་འཆི་ལས། ། སུས་ཀྱང་འབྲོས་ཐབས་མ་མཆིས་པས།། སྐྱེས་པའི་མཐའ་དེ་འཆི་ངེས་ཡིན།། ཚེ་འདི་མི་རྟག་མྱུར་དུ་འཆི།། རི་གཟར་ཁ་ཡི་ཆུ་འབབ་བཞིན།། ཉིན་མཚན་གཅིག་གིས་གཅིག་དེད་ནས། ། འཆི་བའི་ཕྱོགས་སུ་ཕར་ཕར་འགྲོ།། རྩལ་པོ་ཆེ་ཡིས་མདའ་འཕངས་བཞིན།། ཚེ་འདི་སྐད་ཅིག་མི་སྡོད་པར།། འཆི་ལ་ཇེ་ཉེ་ཇེ་ཉེ་འགྲོ།། འདི་དང་ཕྱི་མ་འབྲེལ་ནས་ཡོད།། སྐྱེ་ཤི་གཉིས་པོ་ལག་འབྲེལ་བ། ། བཤའ་ལུག་གཤན་པས་ཁྲིད་པ་བཞིན།། གོམ་གང་ཕྱིན་ཅིང་ཤི་ལ་ཉེ།། དེ་བཞིན་ལོང་མེད་ཕ་རོལ་འགྲོ།། རྨི་ལམ་གློག་དང་སྤྲིན་བར་གྱི།། ཉི་མ་ལྟ་བུར་ཡུད་ཙམ་ཡིན།། རྒྱུ་རྐྱེན་མང་པོ་ཚོགས་པ་ཡི།། འཛམ་གླིང་ལས་ཀྱི་ས་པ་རྣམས། ། ཚེ་ལ་ངེས་པ་མེད་པ་དང།། ལུས་ལ་སྙིང་པོ་མེད་པས་སུ།། ནད་དང་གདོན་དང་ཕྱི་ནང་གི།། འཆི་རྐྱེན་རྣམ་པ་མང་བའི་དོན།། མི་ཚེ་ཟས་ཀྱིས་གསོས་ནས་ཀྱང།། འཚོ་བར་མི་འགྱུར་ལྟོགས་ནས་འཆི། ། འཆི་བའི་རྐྱེན་ནི་ཤིན་ཏུ་མང།། སང་ཙམ་འཆིའམ་སུས་ཤེས་ན།། རྟག་ཏུ་བསྡད་སྙམ་མི་བྱེད་པར།། དེ་རིང་ཉིད་ལ་བརྟུན་ཏེ་བྱ།། སྙོམས་ལས་ལེ་ལོར་སྡོད་པ་དེ།། འཆི་བདག་བདུད་དང་ཕྲད་ཙམ་ན། ། བཟུར་ཐབས་མེད་དེ་ཐོག་རྒྱབ་འདྲ།། ཡུན་རིང་འདོད་ལ་སྐད་ཅིག་ཚེ།། སྐྱེ་བའི་མཐུན་རྐྱེན་ཐམས་ཅད་ཟད།། འཆི་བའི་འགལ་རྐྱེན་ཀུན་ཚང་ནས།། ཕྱི་ཡི་འབྱུང་བ་ཐམས་ཅད་འཁྲུག། ངན་སྐྱུགས་རྣམས་ཀྱིས་ལུས་ཁེབས་ཤིང།། སྟོབས་ཟད་བག་བཞི་ས་ལ་ལྷུང།། ངལ་དུབ་ལྡང་དུབ་ལུས་ཀུན་ན།། དབུགས་ནི་ངར་ངར་དངང་སྐྲག་བྱེད།། ཤེས་པ་ཕྱད་ཕྱོད་བན་བུན་དུ།། ཡི་མུག་ག་ཆད་དུས་དེ་རུ། ། གཉེན་བཤེས་ཚོགས་ཀྱིས་མཐའ་སྐོར་ཡང།། སྲོག་གཅོད་ཚོར་བ་རང་གིས་མྱོང།། ཤི་ནས་ཟླ་མེད་གཅིག་པུར་འགྲོ།། གཉེན་གྱིས་མ་ཕན་བཤེས་མི་ཕན།། ཉེ་བ་རྣམས་ལ་ཅི་ཕྱིར་ཆགས།། ཟས་ནོར་རྣམས་ཀྱིས་མདུན་གང་ཡང། ། དང་ཁར་འོང་བ་ཆུ་ལས་མེད།། ཕ་རོལ་ནོར་མེད་ལག་སྟོང་འགྲོ།། བསགས་པའི་ནོར་ནི་གཞན་གྱིས་ཁྱེར།། རྣམ་སྨིན་ཤི་བའི་རྗེས་སུ་འབྲང།། ནོར་ཕྱིར་སྡིག་པ་ཅི་ལ་བསོག། བཙན་པོ་དབང་ཆེན་མདུན་མ་ཡང། ། དབང་མེད་འཆི་བདག་གཤིན་རྗེས་ཁྲིད།། རྒྱབ་རྟེན་མགོན་སྐྱབས་སུ་ལ་རེ།། ཡུལ་ཁྱིམ་མཁར་སོགས་རྨི་ལམ་བཞིན།། སྐད་ཅིག་མི་རྟག་ཞིག་ནས་འགྲོ།། ལུས་དང་ཁ་དོག་སྟོབས་རྣམས་ཀྱང། ། ཀུན་ནས་མི་མཐུན་ཟུག་རྔུ་ལྡང།། རྣམ་པར་བམ་ཞིང་འབུས་གཞིགས་དང།། རུལ་དང་མྱགས་དང་དངོས་པོ་ལ།། ཁྱི་དང་ཕག་ཀྱང་སྐྱུག་བྲོ་སྟེ།། མི་ལུས་ཆོས་མེད་ཕྱི་མའི་དགྲ།། འཇིག་རྟེན་ཕ་རོལ་འགྲོ་ཙམ་ན། ། སྐྱབས་གནས་དཀོན་མཆོག་མ་གཏོགས་པ།། ཅིས་ཀྱང་ཕན་པ་མེད་པ་ལ།། བདག་འཛིན་ཅན་ཚོའི་རོ་བརྒྱ་ལ།། འཆི་བའི་འཇིགས་པས་བསམ་མི་ཁྱབ།། དེ་བས་ཀྱང་ནི་ཕྱི་མ་འཇིགས།། ཆོས་མེད་ངན་སོང་གནས་སུ་འགྲོ། ། མདོ་མེད་གསེར་གླིང་སྟོང་ལོག་བྱས།། རྒྱུས་ཡོད་བཞིན་དུ་ལྟོགས་གྲིར་ཤི།། དོན་མེད་མི་ལུས་ཤ་ཐང་ཆད།། མཐོ་སར་བསླེབས་ནས་གཡང་ལ་འཕྱོང།། དུག་སྦྲུལ་མཚོ་ནས་ཐོན་པ་དཀའ། ། མུན་པའི་གླིང་ན་ཉི་ཟླ་མེད།། ནོར་བུ་རིན་ཆེན་དུས་དེར་སྟོར།། དབུལ་པོ་རྣམས་ཀྱི་ཕུན་ཚོགས་བྲལ།། ལས་ཀྱི་གཤིན་རྗེ་ཞེ་རེ་གནག། འཁྲུལ་པའི་སེམས་ཅན་ཉོན་རེ་མོངས།། སངས་རྒྱས་ཐམས་ཅད་ཀྱི་བསྟན་པའི་གཞི་རྒྱུད་མཆོག་རིན་པོ་ཆེ་སྤུངས་པ་ལས། འཆི་བ་མི་རྟག་པའི་ལེའུ་སྟེ་བཅུ་གཉིས་པའོ།།།། འཁོར་བ་གཏིང་མཐའ་མེད་པ་ནས།། སྐྱེ་ཤི་སྡུག་བསྔལ་ཟད་མེད་ལ།། སྐྱབས་གནས་ནུས་པ་ཤིན་ཏུ་དཀོན། ། འཇིགས་ཤིང་སྐྲག་པའི་མི་རྣམས་ཀུན།། བདེ་རུ་རེ་བའི་སྐྱབས་གནས་སུ།། རི་དང་ནགས་ཚལ་ལྗོངས་རྣམས་དང།། ལྗོན་ཤིང་སྐྱེད་ཚལ་ཁང་པ་དང།། ཡོ་བྱད་གྲོགས་བཤེས་རྒྱལ་པོ་ལ།། སྐྱབས་སུ་འགྲོ་སྟེ་མཆོག་མ་ཡིན། ། ལ་ལ་ལྷ་ཀླུ་གནོད་སྦྱིན་དང།། རྫུ་འཕྲུལ་ལྡན་པའི་བདུད་རིགས་ལ།། སྐྱབས་སུ་འགྲོ་སྟེ་ཕན་མི་ཐོགས།། ཁོ་རང་ཡང་ནི་སེམས་ཅན་ལ།། འཁོར་བའི་སྡུག་བསྔལ་ཅི་ལ་སྐྱོབ། ། འགའ་ཞིག་ཕྱིན་ཅི་ལོག་གི་བློས།། ཕྱ་དང་དབང་ཕྱུག་ལ་སོགས་ལ།། སྐྱབས་སོང་ལོག་པའི་གནས་སུ་འགྲོ།། དགྲ་འོང་མི་ལ་སྐྱེལ་མ་བཅོལ།། སྔོན་ལ་སྐྱེལ་མ་དགྲས་ཁྱེར་བཞིན།། མུ་སྟེགས་ཁོ་རང་དམྱལ་བར་སོང། ། གཞན་ལ་བསྐྱབ་ཐབས་ག་ལ་ཡོད།། སྐྱབས་དེ་མཆོད་འོས་མ་ཡིན་པས།། དད་པའི་གནས་མིན་སྤང་བར་བྱ།། སྡུག་བསྔལ་ཀུན་ལས་ཐར་པ་ལས།། སྐྱབ་ཏུ་ནུས་པ་ཤིན་ཏུ་དཀོན།། འཇིག་རྟེན་ཁམས་ན་འབྱུང་དཀའ་བའི། ། སངས་རྒྱས་ཆོས་དང་དགེ་འདུན་ཏེ།། བླ་ན་མེད་པའི་དཀོན་མཆོག་གསུམ།། དད་པས་སྐྱབས་སུ་འགྲོ་བྱེད་ཅིང།། འཕགས་པའི་བདེན་པ་བཞི་ཡི་ལམ།། ཤེས་རབ་ཀྱིས་ནི་ལྟ་བྱེད་པ། ། སྐྱབས་གནས་རྣམས་ཀྱི་མཆོག་ཡིན་ལ།། སྙིང་ནས་བློ་ཕུགས་དེ་ལ་གཏད།། ཆུང་འབྲིང་ཆེན་པོའི་བློ་ལྡན་པ།། དང་པོ་ཚེ་འདིས་བསླུས་པར་མཐོང།། འཇིག་རྟེན་ཆོས་བརྒྱད་བློ་ལོག་ནས།། ངན་སོང་སྡུག་བསྔལ་འཇིགས་པ་ལ། ། ཚེ་འདི་ཇི་སྲིད་འཚོ་ཡི་བར།། གནས་སྐབས་སྐྱབས་སུ་འགྲོ་བར་བྱ།། ཉམས་ལེན་མི་དགེ་བཅུ་སྤང་ཞིང།། དགེ་བ་སྤྱོད་ཅིང་མི་རྟག་བསྒོམ།། ལེགས་སྨོན་སྡོམ་པ་སྐྱེ་བ་ཡིན།། འབྲས་བུ་ལྷ་མིའི་གོ་འཕང་ཐོབ། ། དེ་ནས་གཉིས་པ་གང་ཟག་འབྲིང།། འདུས་བྱས་ཐམས་ཅད་འཇིག་པར་མཐོང།། བདེ་སྡུག་ཀུན་ལ་བློ་ལོག་ནས།། འཁོར་བའི་སྡུག་བསྔལ་ཤེས་པ་ཡིས།། དུས་ནི་ཇི་སྲིད་འཚོ་ཡི་བར།། ཐུན་མོང་སྐྱབས་སུ་འགྲོ་བ་དང། ། ཉམས་ལེན་རང་དོན་བསླབ་བྱ་གསུམ།། སྤྱོད་ཅིང་བདེན་པ་སྟོང་པ་བསྒོམ།། ངེས་འབྱུང་སྡོམ་པ་སྐྱེ་བ་སྟེ།། འབྲས་བུ་འཕགས་པ་ཉན་རང་ཐོབ།། སྐྱེས་བུ་མཆོག་ཏུ་གྱུར་པ་རྣམས། ། སེམས་ཅན་རྣམས་ཀྱི་སྡུག་བསྔལ་མཐོང།། རང་གི་དོན་ལ་བློ་ལོག་ནས།། ཐེག་པ་དམན་ལ་འཇིགས་པ་ཡིས།། བྱང་ཆུབ་སྙིང་པོ་མ་མཆིས་པར།། ཁྱད་པར་མཆོག་གི་སྐྱབས་འགྲོ་བྱེད།། ཉམས་ལེན་གཞན་དོན་ཕར་ཕྱིན་དྲུག། སྤྱོད་ཅིང་སྟོང་ཉིད་སྙིང་རྗེ་བསྒོམ།། བྱང་ཆུབ་སེམས་ཀྱི་སྡོམ་པ་སྐྱེ།། འབྲས་བུ་རྫོགས་པའི་བྱང་ཆུབ་འཐོབ།། སྐྱབས་སུ་འགྲོ་བའི་བྱེད་ལུགས་ནི།། འཁོར་བའི་སྡུག་བསྔལ་ཟད་པ་དང། ། སངས་རྒྱས་ཡོན་ཏན་མཐོང་བ་ཡི།། དད་པ་སྒོ་གསུམ་གུས་པ་ཡིས།། རྣམ་པ་ཐམས་ཅད་ཀུན་མཁྱེན་དཔལ།། རྫོགས་སངས་རྒྱས་དང་དེ་སྲས་ལ།། སྟོན་པ་བྱ་ཞིང་དེ་ཉིད་ཀྱི།། གོ་འཕང་ཐོབ་ཕྱིར་སྐྱབས་འགྲོ་བྱ། ། ཚིག་ཏུ་བརྗོད་པ་སྐྱབས་འགྲོ་མིན།། དོན་གྱི་སྐྱབས་འགྲོ་སངས་རྒྱས་མཆོད།། སྒོམ་ཡང་དེ་ལ་སྒྲུབ་ཀྱང་དེ།། གཏད་སོ་དེ་ལ་འཕུལ་བ་དེ།། གསོལ་བ་དེ་ལ་བཏབ་པ་ཡིས།། བྱིན་རླབས་དེ་ཡི་གོ་འཕང་ཐོབ། ། ཆོས་ལ་སྐྱབས་འགྲོ་དེ་ཡི་གསུང།། སྐྱབས་སུ་མཆི་བ་ཁ་ཆོས་མིན།། སངས་རྒྱས་འདོད་ཕྱིར་ལམ་དེ་ཉིད།། གང་ཟག་རིགས་དང་མཐུན་པ་རུ།། ཐེག་པ་གསུམ་གྱི་དམ་ཆོས་ལ།། ཐོས་བསམ་སྒོམ་གསུམ་ཤེས་རབ་ཀྱི། ། བློས་སྦྱོང་བསླབ་གསུམ་ནན་ཏན་སྐྱེད།། སྐྱོན་དག་ཡོན་ཏན་གོང་དུ་འཕེལ།། ལམ་མཐར་ཕྱིན་པས་གོ་འཕང་ཐོབ།། དགེ་འདུན་སངས་རྒྱས་མཛད་པ་ལ།། ཚིག་གི་མི་ཕན་རྗེས་སུ་བསྒྲུབ། ། ཐར་པ་ལམ་སྟོན་གྲོགས་ཉིད་དུ།། ཟག་པ་མེད་པའི་སྐྱབས་འགྲོ་ལ།། མི་དགེའི་ཁྱིམ་སྤངས་རབ་ཏུ་བྱུང།། དགེ་བའི་ཚུལ་ཁྲིམས་སྡོམ་པ་གསུམ།། འབྲལ་བ་མེད་པར་གྲོགས་སུ་བསྟེན།། དགེ་སློང་དགོན་པར་རྩལ་རྫོགས་པས། ། གོ་འཕང་བླ་ན་མེད་པ་ཐོབ།། དཀོན་མཆོག་རིན་ཆེན་རྣམ་གསུམ་ལ།། དགེ་འདུན་སྐྱབས་སོང་རབ་བྱུང་བས།། མི་དང་མི་ལོན་ལོག་སྣང་ཅན།། འགྲན་སེམས་ཅན་ཀུན་མཆོད་བྱེད་འགྱུར། ། ཆོས་ཀྱིས་འཁོར་བའི་སྐྱོན་དག་ནས།། མྱ་ངན་འདས་པའི་ཡོན་ཏན་འབྱུང།། སངས་རྒྱས་ཉོན་མོངས་སེམས་ཅན་ལ།། རྣམ་ཀུན་མཁྱེན་ཉིད་སངས་རྒྱས་ཐོབ།། དཀོན་མཆོག་གསུམ་གྱི་བདེན་པ་དེ།། ཚེ་འདིའི་ནད་གནོད་དགྲ་བགེགས་ཀྱིས། ། འཚེ་བ་རྣམས་ནི་ཞི་བ་དང།། སྡིག་སྒྲིབ་བྲལ་བས་ཕྱི་མ་རུ།། ངན་སོང་འཇིགས་པ་ཀུན་ལས་ཐར།། ཐ་མལ་འགྲོ་བ་འཁྲུལ་གནས་ནས།། འཇིགས་ཚོགས་ལོག་པ་ལས་སྐྱབས་ཏེ། ། སངས་རྒྱས་ལམ་ལ་རབ་ཞུགས་པའི།། སྡོམ་པ་ཀུན་གྱི་རྟེན་དུ་འགྱུར།། སྡོམ་པ་འདི་གནས་ཀུན་ཀྱང་ཡོད།། སྐྱབས་འགྲོ་ཉམས་ན་བསླབ་ཀུན་ཉམས།། སྐྱབས་འགྲོ་བསྟན་པའི་སྲོག་ཤིང་ཡིན།། སྐྱབས་གནས་སངས་རྒྱས་ཉག་གཅིག་སྟེ། ། ཐུབ་པའི་ཆོས་ཀུན་དེ་ལ་ཚང།། ཚོགས་ན་དེ་ཡི་མཐར་ཐུག་གོ། སངས་རྒྱས་ཀུན་སྟོན་སྐྱབས་རྙེད་ནས།། འཇིག་རྟེན་ངན་ལ་སྐྱབས་མི་ཞུ།། སངས་རྒྱས་གཟུགས་བརྙན་གུས་བྱས་ཀྱང། ། དེ་ཡིས་བརྒྱ་ཡི་ཆར་མི་ཕོད།། ལམ་མཆོག་ཆོས་ལ་སྐྱབས་སོང་ནས།། སེམས་ཅན་རྣམས་ལ་འཚེ་མི་བྱ།། བྱས་ན་ལམ་དེ་ཉིད་ལས་བཟློག། ཡིག་འབྲུ་ཙམ་ལ་དད་བྱས་པས།། འགྲོ་བ་ཀུན་ལ་ཕན་བདེ་འབྱུང། ། དགེ་འདུན་སྐྱབས་སོང་བསྟན་པ་ནི།། སྨད་དགྲ་མུ་སྟེགས་རྣམས་མི་འགྲོགས།། སྡིགས་དང་འགྲོགས་ན་དགེ་བ་སྟོར།། དྲི་ངན་འགོས་པས་མི་གཙང་ལྟུང།། རྒྱལ་མཚན་འཛིན་པའི་ལམ་ཞུགས་པའི།། སེར་རུ་གོས་ཙམ་འཆང་བ་ལ། ། སྟོན་པའི་འདུ་ཤེས་གུས་པ་བླང།། དཀོན་མཆོག་བཀའ་དྲིན་མ་བརྗེད་ཕྱིར།། དུས་དང་རྒྱུན་གྱི་མཆོད་པ་འབུལ།། ཚོགས་རྫོགས་སྒྲིབ་པའི་ལས་རྣམས་འདག། དོག་ལ་དྲག་པོ་ཅི་བྱུང་ཡང། ། ཐབས་གཞན་མི་བཙལ་མཁྱེན་ཚིག་གཅིག། ཕྱོགས་དང་གནས་ནི་གང་འདུག་ཀྱང།། དཀོན་མཆོག་ཞིང་ཡིན་དེར་ཤེས་བྱ།། ཚེ་དང་འགལ་བ་ཆེན་པོའི་དོན།། སྐྱབས་གསུམ་མི་སྤང་སྲོག་ལྟར་བརྩི།། བསླབ་པ་མཐའ་རྫོགས་ཡོན་ཏན་ནི། ། སངས་རྒྱས་ཀུན་གྱིས་བརྗོད་པར་དཀའ།། མཐའ་ཡས་མུ་མེད་བསམ་མི་ཁྱབ།། སངས་རྒྱས་ཐམས་ཅད་ཀྱི་བསྟན་པའི་གཞི་རྒྱུད་མཆོག་རིན་པོ་ཆེ་སྤུངས་པ་ལས། ། སྐྱབས་གནས་ཁྱད་པར་ཅན་གྱི་ལེའུ་སྟེ་བཅུ་གསུམ་པའོ།།།། ཡང་དག་མ་ཡིན་ཀུན་རྟོག་ལས།། ཀུན་རྫོབ་ལོག་པའི་བདེན་པ་དེ།། སྡུག་བསྔལ་ཀུན་འབྱུང་ཉོན་མོངས་རྣམས།། ཚུལ་བཞིན་མ་ཡིན་ལྷན་ཅིག་སྐྱེས། ། མ་རིག་ལས་བྱུང་ཀུན་བརྟགས་ཀྱིས།། མ་རིག་ཉོན་མོངས་ཁམས་རྣམས་ལས།། དགེ་བས་ལྷ་མིར་སྐྱེ་བའི་ལས།། མི་དགེ་ངན་སོང་སྐྱེ་བའི་ལས།། རྒྱུ་འབྲས་ཤེས་ཀྱང་དེ་ཡི་ནི།། རང་བཞིན་མ་ཤེས་ལས་འབྲས་ལ། ། རྨོངས་པའི་མ་རིག་ལས་སྤྱད་པས།། རྟེན་འབྲེལ་ལུས་སུ་འབྱུང་བ་ལ།། དོན་དམ་གནས་ལུགས་བདེན་པ་ཡིན།། མཐར་ཐུག་འགོག་པའི་ལམ་ཞུགས་ནས།། སྲིད་པའི་ལུགས་བཟློག་ཚོགས་སྦྱོར་གྱི། ། ལམ་ཞུགས་གཉེན་པོས་འཁོར་བ་སྤངས།། དམྱལ་བའི་སྡུག་བསྔལ་ཤེས་པ་ལ།། ལྷ་མི་གདུག་པར་མི་ཤེས་པའི།། དགེ་བའི་ལས་ལ་སྤྱོད་པ་ཡི།། རྒྱུ་འབྲས་རྨོངས་པའི་མ་རིག་བཅོམ།། ཁམས་གསུམ་གནས་ལ་ཆགས་ཞེན་མེད། ། ལས་ཀྱི་སྒྲིབ་པ་ཟད་པ་ཡིས།། འབྲས་བུ་དགྲ་བཅོམ་རང་རྒྱལ་ཐོབ།། མཐོང་བའི་ལམ་ཞུགས་གཟུང་འཛིན་སྤངས།། ཀུན་བརྟགས་གཞན་དབང་སྣ་ཚོགས་ཀྱི།། མ་རིག་པ་ཡི་རྟོག་ཚོགས་བཅོམ། ། ཉོན་མོངས་ཁམས་རྣམས་སྒྲིབ་པ་ཟད།། བདག་གཞན་གཉིས་ཀྱི་བདག་མེད་རྟོགས།། འབྲས་བུ་ས་བཅུའི་ཡོན་ཏན་ཐོབ།། སྒོམ་པའི་ལམ་ཞུགས་བག་ཉལ་སྤངས།། དེ་ཉིད་ཁོ་ན་ལ་རྨོངས་པའི། ། ལྷན་ཅིག་སྐྱེས་པའི་མ་རིག་བཅོམ།། ཤེས་བྱའི་བཟང་ཞེན་སྒྲིབ་པ་ཟད།། མཐར་ཕྱིན་མི་སློབ་པ་ཡི་ལམ།། ལྷུན་གྲུབ་ས་ལ་རྫོགས་སངས་རྒྱས།། ཐམས་ཅད་དོན་གཅིག་ཉིད་ལ་རྒྱུ།། ལམ་གྱི་མཐར་ཐུག་སྙིང་པོའི་དོན། ། གཞི་རྡོག་ལམ་གྱི་འབྲས་བུའོ།། སངས་རྒྱས་ཐམས་ཅད་ཀྱི་བསྟན་པའི་གཞི་རྒྱུད་མཆོག་རིན་པོ་ཆེ་སྤུངས་པ་ལས། ལམ་གྱི་བདེན་པ་ལ་འཇུག་པའི་ལེའུ་སྟེ་བཅུ་བཞི་པའོ།།།། དཔེར་ན་ས་གཞི་དུལ་བ་ཡི། ། རྒྱུ་རྐྱེན་འཛོམས་པའི་ཞིང་ས་ལ།། ས་བོན་ཚ་བ་སོ་ནམ་དྲོད།། འབྲས་བུ་ཚ་བ་སྐྱུར་བ་སྟེ།། ས་བོན་མངར་བ་སོ་ནམ་བསིལ།། འབྲས་བུ་མངར་དང་བསྐ་བ་སྐྱེ།། དེ་བཞིན་རྣམ་རྟོག་སེམས་ཀྱི་གཟུགས། ། བསོད་ནམས་ལས་བྱུང་མི་ལུས་ཀྱི།། ངན་རྟོག་ཀུན་སློང་ཕྱིན་ཅི་ལོག། མི་དགེ་ལས་སྤྱོད་ངན་སོང་འགྲུབ།། བཟང་རྟགས་ཀུན་སློང་བྱམས་པ་ཡིས།། དགེ་བ་སྤྱོད་པས་བདེ་འགྲོ་གནས།། ཡང་དག་ལམ་ཞུགས་བྱང་ཆུབ་ཐོབ། ། ཡང་ཁར་གནས་པའི་འཕྱེ་བོ་བཞིན།། ཡན་ལག་གཉིས་སུ་གོམ་གང་འཁྲུལ།། ཡར་ལ་འགྲོའམ་མར་ལ་ལྟུང།། སོ་མཚམས་ལམ་བཞིན་མི་ལུས་ཀྱང།། འདི་ནས་ལམ་ལོག་སྲིད་པར་ལྟུང། ། བདེན་པའི་ལམ་ཞུགས་ཞི་བ་འཐོབ།། འཁོར་འདས་སོ་འགག་དལ་འབྱོར་ཏེ།། འཁོར་བ་སྤངས་ནས་མྱང་འདས་དོན།། དགེ་འདུན་རྗེས་སུ་དྲན་པས་འབྱུང།། བསྟན་པའི་རྒྱལ་མཚན་འཛིན་པ་ལ། ། ལུས་ཀྱི་བྱ་བ་གཙོ་བའི་ཕྱིར།། བྱ་བ་རྒྱུད་ཅེས་རྒྱལ་བས་གསུངས།། ཐེག་པ་སྣ་ཚོགས་གདུལ་བྱའི་བློ།། སྡེ་སྣོད་མ་མོའི་ཚོགས་རྣམས་ལས།། བློ་དམན་ཕལ་གྱིས་རྟོགས་བྱའི་ཕྱིར།། བསྟན་པའི་སྙིང་པོ་རྒྱུད་འདི་ཉིད། ། དགྲ་བཅོམ་ཆོས་ཀྱི་སྤྱན་ལ་གཏད།། གཙུག་ལག་ཁང་སྐྱོང་མཆོད་བྱས་ནས།། མི་ནུབ་འཛམ་བུ་གླིང་དུ་དར།། དེ་ཚེ་ལྷ་དང་ལྷ་མ་ཡིན།། དྲི་ཟར་བཅས་པའི་འཇིག་རྟེན་ནས།། ལྷག་པའི་འཁོར་རྣམས་ཡི་རངས་ཏེ། ། བཅོམ་ལྡན་འདས་ལ་མངོན་པར་བསྟོད།། མི་མཆོག་ལྷ་ཡི་ལྷར་གྱུར་པ།། རྐང་གཉིས་གཙོ་བོ་ཆོས་ཀྱི་བདག། དམ་པའི་བདེ་བ་འབྱུང་གནས་ལ།། ཀུན་ནས་དང་བས་ཕྱག་འཚལ་བསྟོད།། སངས་རྒྱས་ཐམས་ཅད་ཀྱི་བསྟན་པའི་གཞི་རྒྱུད་མཆོག་རིན་པོ་ཆེ་སྤུངས་པ་ལས། མཚན་གཏད་རྗེས་སུ་ཡི་རང་ཕུལ་བའི་ལེའུ་སྟེ་བཅོ་ལྔ་པའོ།།།། སངས་རྒྱས་ཀྱི་བསྟན་པ་ཐམས་ཅད་ཀྱི་གཞིའི་རྒྱུད་མཆོག་རིན་ཆེན་སྤུངས་པ་ཞེས་བྱ་བ་རྫོགས་སོ། །།། ཨུ་རྒྱན་གྱི་མཁན་པོ་པདྨ་སམ་བྷ་བ་དང། ཞུ་ཆེན་གྱི་ལོ་ཙ་བ་ཀ་བ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ཕྱིས་ཨུ་རྒྱན་ཉིད་ཀྱིས་མ་དག་པ་རྣམས་རང་འགྱུར་མཛད་ནས་གསལ་བར་བྱས་པའོ། །།། ཨེ་མ་ཧོ། རྒྱལ་བས་ལུང་བསྟན་པདྨ་བདག་གིས་སུ།། སྨོན་ལམ་སྟོབས་ཀྱིས་རྒྱ་ནས་བོད་དུ་ཕྱིན།། གཙུག་ལག་ཁང་སྐྱོང་མངའ་བདག་བསམ་པ་བསྒྲུབས། ། སངས་རྒྱས་བསྟན་པ་བོད་དུ་དར་རྒྱས་བྱས།། ཁྱད་པར་ལྔ་བརྒྱའི་དུས་སུ་བསྟན་པའི་རྩས།། སངས་རྒྱས་བསྟན་པ་སྤྱི་ཡི་ཐུན་མོང་དུ།། བྱ་བ་གཞི་རྒྱུད་རིན་ཆེན་སྤུངས་པ་འདི།། ཡི་གེར་བྲིས་ནས་རིན་ཆེན་གཏེར་དུ་སྦས། ། སྐྱེས་བུ་ལས་ཅན་གཅིག་དང་ཕྲད་པར་ཤོག། མདྒལཾ།།།། རྒྱ་གར་སྐད་དུ། མ་ཧཱ་པ་ན་ས་མ་ཨ་བི་བོ་དྷི་ས་ཏ་མ་ཧཱ་ཏན་ཏྲ་ཁ་ཡ་མ་ལ་ནཱ་མ། བོད་སྐད་དུ། ཐེག་པ་ཆེན་པོའི་མངོན་པར་རྟོགས་པ་བྱང་ཆུབ་ལམ་གྱི་རྒྱུད་ཆེན་ནམ་མཁའ་དང་མཉམ་པ་ཞེས་བྱ་བ། བཅོམ་ལྡན་འདས་མི་ལས་འཕགས་པའི་རྒྱལ་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། ། བཅོམ་ལྡན་འདས་མི་ལས་འཕགས་པའི་རྒྱལ་པོ་དགའ་ལྡན་ལྷའི་གནས།། རིན་པོ་ཆེའི་གཞལ་མེད་ཁང་ཆེན་པོ་ན། ལྷག་པའི་འཁོར་འཇམ་དཔལ་དང།། སྤྱན་རས་གཟིགས་ཀྱི་དབང་པོ་དང། ། མི་འཇིགས་པ་དང་ཡོན་ཏན་མཐའ་ཡས་རྒྱལ་པོ་དང།། སྟོབས་པོ་ཆེ་ལ་སོགས་པའི་རིགས་ཅན་རྣམས་དང་ཐབས་ཅིག་བཞུགས་སོ།། དེའི་ཚེ་སངས་རྒྱས་ཀྱི་སྐུ་གསུང་ཐུགས་ཀྱི་གསང་བའི་མཛོད་འཛིན་གྱིས་སྒོ་བསམ་མི་ཁྱབ་པར་བསྟན་པ་ནི། རྡུལ་མེད་རྡུལ་བྲལ་དྲི་མེད་དང།། རྡུལ་གཅིག་སྟེང་ན་རྡུལ་སྙེད་ཀྱི།། སངས་རྒྱས་སྲས་རྣམས་གང་བྱུང་བ།། དཔལ་ལྡན་སངས་རྒྱས་པདྨ་སྐྱེས།། རེ་རེའི་ཞིང་དུ་སྐུ་གསུང་ཐུགས། ། ལྷམ་མེ་ལྷན་ནེ་ལྷང་ངེ་བ།། མ་གཡོས་བཞིན་དུ་འཕྲོས་པ་ནི།། མཁའ་དང་མཉམ་པའི་གསང་བ་ལས།། སྐུ་ནི་གདུལ་བྱའི་གྲངས་དང་མཉམ།། གསུང་ནི་སྒྲ་སྐད་ཇི་ཙམ་པར།། ཐུགས་ནི་མི་གཡོ་ཀུན་ལ་ཁྱབ། ། ཡོན་ཏན་ནམ་མཁའ་མཛོད་མངའ་བའི།། འཕྲིན་ལས་ཐ་དད་དོན་གཅིག་སྟེ།། ནམ་མཁའི་མཐའ་ལ་རབ་གནས་པའི།། སྐུ་གསུང་ཐུགས་ཀྱི་སྙིང་པོ་ཡི།། ཁམས་གསུམ་པ་ཡི་ངོ་བོ་ཉིད།། མ་དག་པ་ཡི་མུན་པ་ལ། ། དག་པ་ཉི་མའི་འོད་ཟེར་གྱིས།། ནམ་མཁའི་དཀྱིལ་འཁོར་སད་བྱེད་པའི།། དད་པ་ཆོས་དབྱིངས་རྒྱ་མཚོ་ལས།། ཡེ་ཤེས་སྣང་བ་ལ་མེ་བའི།། ཡིད་བཞིན་ནོར་བུའི་སེམས་ཉིད་ལ།། ཐེག་པ་སྣ་ཚོགས་ཐབས་ཚུལ་གྱིས། ། དགོས་འདོད་སྣ་ཚོགས་དོན་མཆོག་གསུམ།། ཐ་མ་འབྲིང་དང་མཆོག་གྱུར་པའི།། འགྲོ་ཀུན་ལམ་ལ་དགོད་པར་མཛད།། རང་ཉིད་འདོད་པ་ལས་གྲོལ་ནས།། སེམས་ཅན་ཡོངས་སུ་སྨིན་པའི་ཕྱིར། ། ཐེག་པ་འདི་ལ་འབྱུང་འདོད་གང།། ཞེ་འདོད་སྐྱོ་བའི་བློ་སྤངས་ཏེ།། བྱང་ཆུབ་སེམས་ནི་གཅིག་སྤྱོད་པས།། ཀུན་མཁྱེན་ཡོན་ཏན་འབྱུང་བ་ལ།། ཐེག་པ་ཆེན་པོའི་དོན་ལ་ནི།། བག་མེད་སྤྱོད་པ་རབ་སྤངས་ཏེ། ། དྲན་དང་ཤེས་བཞིན་ལྡན་པ་ཡིས།། བཤེས་གཉེན་ཞི་དུལ་ཉེར་ཞི་བའི།། ཡོན་ཏན་བཅོམ་ལྡན་ལུང་གིས་ཕྱུག། བརྩེ་བའི་བདག་ཉིད་སྐྱོ་བ་སྤང།། ཀུན་ལ་སྙོམས་པའི་ཡབ་ཡུམ་ལགས།། འཁོར་བའི་ཡིད་སུན་དད་པར་ལྡན། ། བག་ཡོད་དྲན་པའི་བློ་གྲོས་ཅན།། བདོག་པ་ཀུན་ཀྱང་ཆོས་ཕྱིར་སྲོག། འདོར་ནུས་རྣལ་འབྱོར་རབ་ཏུ་བརྩོན།། རང་གི་སེམས་ནི་འདུལ་བ་དང།། གཞན་གྱི་སེམས་ནི་གཟུང་བའི་དོན། ། བསོད་ནམས་ཡེ་ཤེས་འཕེལ་བའི་རྒྱུ།། ཚུལ་དང་མི་མཐུན་མེད་པ་རུ།། ཀུན་ཏུ་སྤྱོད་ལམ་གཙང་བ་ཡི།། ལེགས་པར་དཀྲུགས་ཤིང་གོ་བགོས་ཏེ།། ལྷ་དང་མི་རྣམས་འདུལ་བའི་ཕྱིར།། གཙང་མའི་ས་ཕྱོགས་ཉམས་དགའ་བར། ། ཡངས་པའི་ཁྲི་ལ་གདན་བཤམས་ཏེ།། ལེགས་པའི་ཚོན་གྱིས་ཁ་བསྒྱུར་ལ།། རྔུལ་ཟན་ནག་པོ་བཤམས་བྱས་ལ།། བཅོས་བུའི་རས་རྣམ་སྣ་ཚོགས་བཏིང།། རྐང་རྟེན་བཅས་པའི་ཁྲི་ལ་འདུག། རྐང་པ་ལེགས་བཀྲུས་འཛེགས་ནས་སུ།། ཆོས་གོས་གཙང་མ་རབ་བགོས་ཏེ།། བྱང་ཆུབ་སེམས་ལྡན་མདངས་སྣུམ་པས།། ཆོས་ཀྱི་སྟན་ལ་རབ་འདུག་སྟེ།། དགེ་བསྙེན་དགེ་སློང་ཕ་མ་དང།། རྒྱལ་པོ་དག་དང་དེ་ཡི་འཁོར། ། སེམས་ཅན་རྩེ་གཅིག་ལྷག་གྱུར་ལ།། ཕྲག་དོག་ལེ་ལོ་རྣམས་སྤངས་པའི།། བྱམས་ཤིང་མཆུ་བའི་གཏམ་སྙན་གྱིས།། སྣ་ཚོགས་དོན་ལྡན་ཆོས་བཤད་པ།། ཐབས་ལ་མཁས་པ་ཆེན་པོའི་ཚིག། འདི་ལྟ་སྟེ། ཤ་མེ་ཤ་མ་བ་ཏེ། ཤ་མེ་ཏེ་ཤ་ཏྲུ་ཨང་གུ་རེ། མམ་ཀུ་རེ། མཱ་ར་ཇི་ཏེ། ཀེ་ར་ཊེ། ཡུ་ཀེ་ཡུ་རེ། ཏེ་ཙོ་བ་ཏི། ཨོ་ལོ་ཡ་ནི། བི་ཤ་ཐ། ནི་རྨ་ལེ། མ་ལ་ས་ནི་ཡེ། ཁུ་ཁུ་རེ། ཁ་གེ་གྲ་སྭེ། གྲ་སྭ་ནི། ཨོ་མུ་ཁི། ས་རང་མུ་ཁྲི། ཨ་མུ་ཁྲི། ཤ་མི་ཏ་ནི། སརྦ་གྲ་ཧ་ན། བྷན་དྷ་ན་ནི། ནི་གྲི་ཧྲི་ཏྲ། སརྦ་ར་པྲ་ཐ་ཏི་ན། བི་མུག་ཏ། མ་ར་བ་ཤ། སྠ་པི་ཏྭ་བྷུ་ཏ་མུ་ཏྲ། ཨ་ནུད་ག་ཏི་ཏྭ། སརྦ་མ་རཻ། པུ་ཙ་རི་ཏ། པ་ར་པ་རི་ཤུད་དྷྱེ། བི་གད་ཚྭ་རུ། སརྦ་མ་ར་ཀ་མ་ནི། ཞེས་པས་ཉོན་མོངས་སེལ་བ་དང།། བདུད་དཔུང་ཚར་གཅོད་ཚིག་ཡིན་པས།། ལེགས་པར་ཁ་ཏོན་བྱས་པ་ན།། བདུད་ཀྱི་རིགས་ཀྱི་ལྷ་རྣམས་ཀྱིས།། ཐེག་པ་ཆེན་པོའི་རིགས་ཅན་གྱི། ། དྲུང་དུ་འོང་བར་མི་འགྱུར་ཏེ།། འོངས་ཀྱང་བར་ཆད་མི་ཚུགས་པའོ།། ཀུན་ལ་སྙོམས་པའི་བརྩེ་སེམས་ཀྱིས།། བྱམས་པའི་ཡིད་ཀྱིས་བདུད་བཏུལ་ནས།། བྱང་ཆུབ་སེམས་ཀྱི་དཀྱིལ་འཁོར་དུ།། བདག་ལ་སྨན་པའི་འདུ་ཤེས་བསྐྱེད། ། ཆོས་ལ་སྨན་གྱི་འདུ་ཤེས་དང།། ཆོས་ཉན་ནད་པའི་འདུ་ཤེས་ཀྱིས།། ཁ་བུབ་སྣོད་བཞིན་སྐྱོན་སྤོངས་ལ།། ཁྱོད་ནི་མ་ཡེངས་རྩེ་གཅིག་ཉོན།། ང་ཡིས་ལེགས་པར་བསྟན་པའི་དོན།། ཞབས་རྡོལ་སྣོད་བཞིན་མ་སོང་བར། ། དྲན་དང་ཤེས་བཞིན་ལྡན་པར་ཟུང།། དུག་ཅན་ཉོན་མོངས་མ་སྦགས་པར།། བྱང་ཆུབ་སེམས་ལ་ནན་ཏན་བསྐྱེད།། ཡེངས་པའི་རྐྱེན་གྱིས་ས་མི་ཆོད།། མ་ཡེངས་སངས་རྒྱས་ཀུན་གྱི་ལམ། ། བྱང་ཆུབ་སངས་རྒྱས་ཡུན་མི་རིང།། ཞེས་བཀའ་སྩལ་ཏོ།། ཐེག་པ་ཆེན་པོའི་མངོན་པར་རྟོགས་པ་བྱང་ཆུབ་ལམ་གྱི་རྒྱུད་དང་མཉམ་པ་ལས།། གླེང་གཞི་སྣ་གཏད་པའི་ལེའུ་སྟེ་དང་པོའོ།།།། དེ་ནས་རིགས་ལྡན་འཁོར་གྱི་ནང། ། ལྷ་ཡི་དབང་པོས་སྟན་ལས་ལངས།། གུས་པས་ཐལ་སྦྱར་ཕྱག་འཚལ་ནས།། སྤྱན་སྔར་འདུག་སྟེ་འདི་སྐད་གསོལ།། ཀྱེ་མ་བཅོམ་ལྡན་ལྷ་ཡི་ལྷ།། སེམས་ཅན་ནམ་མཁའ་མཐའ་དང་མཉམ། ། རྟོག་པ་སྣ་ཚོགས་ཐ་དད་ལ།། ཐེག་པ་གཅིག་གིས་ཇི་ལྟར་སྒྲོལ།། བྱང་ཆུབ་སེམས་སུ་གང་ལྟར་འདུས།། ཐེ་ཚོམ་བསལ་ཕྱིར་གསུང་དུ་གསོལ།། བཅོམ་ལྡན་འདས་ཀྱིས་བཀའ་སྩལ་པ།། ཉོན་ཅིག་རིགས་ལྡན་བརྒྱུད་པར་བཅས། ། སེམས་ཅན་མཁའ་དང་མཉམ་པ་ལས།། སངས་རྒྱས་འཕྲིན་ལས་དེ་ཙམ་སྟེ།། ཁམས་གསུམ་འདི་དག་སེམས་ཅན་དུ།། བྱང་སེམས་ཐིག་ལེ་གཅིག་ཏུ་བསྟན།། དེ་ཉིད་མ་རིག་བག་ཆགས་ཀྱིས། ། ཀུན་ཏུ་རྟོགས་པ་ཐ་དད་པའི།། འཁྲུལ་པའི་སེམས་ཅན་དཔག་མེད་རྣམས།། གདུལ་བྱར་གྱུར་པ་ཐ་འབྲིང་མཆོག། བྱིས་པ་འཕགས་པ་བྱང་ཆུབ་སེམས།། མ་རིག་མ་དག་དྲུག་པ་ལས།། དཔེར་ན་དཔག་བསམ་ཤིང་གཅིག་གིས། ། རྩ་བས་ས་འོག་ཀླུ་ཡི་དོན།། སྡོང་པོས་ས་སྟེངས་མི་རྣམས་དགའ།། རྩེ་མོས་ས་བླའི་ལྷ་རྣམས་མགུ།། སྲིད་གསུམ་དགའ་བར་མཛད་པ་བཞིན།། བྱང་ཆུབ་སེམས་གཅིག་འོད་ཟེར་གྱིས། ། དགེ་བས་ལྷ་མིའི་བདེ་བ་བསྒྲུབ།། དེ་སྤངས་ཉན་ཐོས་རང་སངས་རྒྱས།། སྤངས་ཐོབ་ས་བཅུ་ལ་གནས་པའི།། ཐེག་གསུམ་སྐུ་གསུམ་ཞིང་ཁམས་སུ།། དགའ་མགུ་རངས་པའི་བསམ་པ་ཅན། ། བྱང་ཆུབ་སེམས་ནི་གཅིག་ཏུ་བསྟན།། སེམས་ཅན་ནམ་མཁའི་མཐའ་མཉམ་ལ།། ཉོན་མོངས་ཁམས་རྣམས་རེ་རེ་ཞིང།། དེ་དག་བཅོམ་གྱིས་གང་ལ་ལང།། བྱང་ཆུབ་སེམས་ནི་གཅིག་བཅོམ་ན།། དེ་རྣམས་ཐམས་ཅད་བཅོམ་པ་ཡིན། ། བཅོམ་ལྡན་བྱང་ཆུབ་རྡོ་རྗེ་ནི།། ཤེས་རབ་སྙིང་རྗེ་ཆེན་པོ་ཡིས།། ཐེག་པ་མ་ལུས་ཀུན་འདུས་པས།། ཐེག་པ་ཆེན་པོ་ཞེས་སུ་བརྗོད།། ཐམས་ཅད་མ་ལུས་བསྐྱཻད་པའི་ཕྱིར།། ཐེག་པ་ཆེན་པོ་ས་གཞི་འདྲ། ། ཐམས་ཅད་མ་ལུས་ཤོང་བའི་ཕྱིར།། ཐེག་པ་ཆེན་པོ་བར་སྣང་འདྲ།། ཐམས་ཅད་མ་ལུས་ཁྱབ་པའི་ཕྱིར།། ཐེག་པ་ཆེན་པོ་ནམ་མཁའ་འདྲ།། ཐམས་ཅད་མ་ལུས་དབང་བྱེད་ཕྱིར།། ཐེག་པ་ཆེན་པོ་རྒྱལ་པོ་འདྲ། ། ཐམས་ཅད་མ་ལུས་གཅིག་ཡིན་ཕྱིར།། ཐེག་ཆེན་བྱང་ཆུབ་སེམས་ཡིན་ནོ།། ཐེག་པ་ཆེན་པོའི་མངོན་པར་རྟོགས་པའི་བྱང་ཆུབ་ལམ་གྱི་རྒྱུད་ཆེན་ནམ་མཁའ་དང་མཉམ་པ་ལས།། གླེང་བསླངས་ཐེག་པ་ཆེན་པོ་ངོས་གཟུང་བའི་ལེའུ་སྟེ་གཉིས་པའོ། །།། ཀུན་ལ་ཁྱབ་པའི་ཆོས་ཉིད་དབྱངས།། རྒྱལ་བའི་གསུང་དབྱངས་གཅིག་ལས་སུ།། སེམས་ཅན་མོས་པ་ཐ་དད་པའི།། ཆོས་ཚུལ་མཐའ་ཡས་དཔག་མེད་ལས། ། མདོར་བསྡུས་སྦྱོང་བྱེད་གཉེན་པོའི་ཆོས།། བརྒྱད་ཁྲི་བཞི་སྟོང་གྲངས་བརྗོད་པ།། དུག་གསུམ་ལྷན་སྐྱེས་འདུལ་བའི་ཕྱིར།། འདུལ་བ་འཛིན་པའི་སྡེ་སྣོད་དུ།། སེམས་ཅན་རྣམས་ལ་གནོད་པ་སྤང། ། སྡིག་པ་ཅི་ཡང་མི་བྱ་བར།། སྡོམ་པ་གསུམ་པོ་ཚུལ་བཞིན་བསྲུངས།། མདོ་སྡེ་འཛིན་པའི་སྡེ་སྣོད་ལ།། འགྲོ་བ་ཀུན་ལ་ཕན་དོན་དུ།། དགེ་བ་ཕུན་སུམ་ཚོགས་པ་ཡི།། ཏིང་འཛིན་ལྷག་པའི་བསམ་པ་བསྟན། ། མ་མོ་འཛིན་པའི་སྡེ་སྣོད་ཀྱིས།། རང་གི་སེམས་ནི་གདུལ་བའི་ཕྱིར།། སྣ་ཚོགས་ཚུལ་གཅིག་དོན་སྟོན་པའི།། ཤེས་རབ་གསུམ་ལ་ནན་ཏན་བསྐྱེད།། རིགས་པ་གཉིས་ལ་ལེགས་གནས་པའི།། རང་རིག་ཡེ་ཤེས་མངོན་དུ་བྱས། ། འདི་ནི་སངས་རྒྱས་བསྟན་པ་ལས།། གཉེན་པོ་ཀུན་འདུས་སྡེ་སྣོད་ཡིན།། དོན་གཅིག་ཉིད་ལས་མ་རྨོངས་པའི།། འབྲས་བུ་གཅིག་ཏུ་རྒྱལ་བར་གསུངས།། ཐོག་མེད་དུས་ན་མ་རིག་པས།། བག་ཆགས་ཉོན་མོངས་དབང་གིས་སུ། ། ལས་ཀྱིས་སྐྱེ་བ་དཔག་མེད་བླངས།། སྐྱེ་ཤི་གཉིས་ཀྱི་སྡུག་བསྔལ་ལ།། བསྒྲང་གིས་མི་ལངས་མཐའ་ལས་འདས།། སེམས་ཅན་གཅིག་གིས་ལུས་བླངས་པའི།། ཤ་རུས་བསགས་ན་རི་རབ་ཙམ། ། ཁྲག་དང་ཆུ་སེར་རྒྱ་མཚོ་ཙམ།། སྡུག་བསྔལ་ནམ་མཁའི་མཐར་མི་ཤོང།། དོན་མེད་སྲིད་པའི་གློང་དུ་འཁྱམས།། ཤས་ཆེར་ངན་སོང་རྦ་ལ་གཡེངས།། ད་ལྟར་དྲན་ཡང་སྐྱི་ཤ་གཡའ།། དོན་མེད་འབའ་ཞིག་ཡིན་པར་ཟད། ། མི་ཤེས་སྲིད་པའི་གློང་འདི་ན།། གཟུགས་མེད་སྟོང་པའི་ཆགས་ཞེན་ཅན།། སེམས་ཅན་མཐའ་ཡས་བསམ་མི་ཁྱབ།། གཟུགས་ཅན་དབང་པོ་ཕྱོགས་གཅིག་ཏུ།། ཡུལ་ལྔར་ཞེན་པ་དཔག་ཏུ་མེད། ། འདོད་ཁམས་ཡུལ་དྲུག་ཕྱི་ནང་དུ།། ཆགས་སྡང་ཟུག་རྔུའི་ལས་ཀྱིས་མནར།། ཁམས་གསུམ་བག་ཆགས་བར་དོ་ན།། སེམས་ཅན་མཁའ་ཡིས་ཁམས་མཉམ་ལས།། ལས་ཀྱིས་འཁོར་བའི་འདོད་གཟུགས་རྣམས། ། ཕལ་ཆེར་ངན་སོང་གནས་ན་འཁོར།། མི་ལུས་ཐོབ་པ་ཤིན་ཏུ་ཉུང།། དེ་ལས་དལ་འབྱོར་ཐོབ་པ་ནི།། ཉིན་མོའི་སྐར་མ་མཐོང་བས་དཀོན།། ལན་ཅིག་སྲིད་པའི་མི་ལུས་ཀྱང།། དོན་མེད་ཁ་རྗེ་དབང་ཐོབ་མིན། ། བླ་མ་དཀོན་མཆོག་ཐུགས་རྗེ་དང།། རང་གི་བསོད་ནམས་ཚོགས་བསགས་པའི།། དགེ་བའི་འབྲས་བུ་ཚེ་འདིར་སྨིན།། གནས་སྐབས་སྤྲིན་བར་ཉི་མ་ཙམ།། རྟག་མི་ཐུབ་སྟེ་འགག་པའི་ཆོས། ། དེ་བས་དམ་པའི་ཆོས་དཀོན་ཏེ།། བསྐལ་པ་སྟོང་ཕྲག་མང་པོ་རུ།། དམ་ཆོས་ཉི་མ་འཆར་བ་ཉུང།། ཆོས་མེད་མུན་པའི་འཇིག་རྟེན་མང།། རང་སེམས་སངས་རྒྱས་མཇལ་བ་དེ།། ཡིད་བཞིན་ནོར་བུ་བས་ཀྱང་དཀོན། ། སྟོན་པའི་དམ་ཆོས་སྤྱོད་པ་ནི།། འཁོར་ལོ་སྒྱུར་རྒྱལ་ཉིད་ལས་ཉུང།། དགེ་འདུན་རྗེས་སུ་བསྒྲུབ་པའི་དུས།། མེ་ཏོག་ཨུ་དུམ་བར་བས་དཀོན།། སྔར་འདས་མ་བྱོན་ད་ལྟར་གྱི།། སངས་རྒྱས་བསྟན་པ་དཔག་མེད་ཀྱང།
CLOSE WINDOW