| Wylie |
། སྣང་བ་ཡེ་ཤེས་ཀྱིས་བག་ལ་ཞ་བའི་མན་ངག་གོ། མཐོང་སྣང་རིམ་གྱིསའཆར་གྱིས་གཅིག་པུར་དལ་བར་སྡོད།། ཕུང་པོ་སྒྲིབས་ཤིང་ཡིན་གྱི་སྣང་བའི་སྒྲིབ་ཤིང་སོལ། ། དགོངས་པ་རྩེ་གཅིག་པའི་མན་ངག་གོ། སངས་རྒྱས་ཀྱི་ལས་ལ་བགྲོད་མི་དགོས་ཀྱིས། རྗེ་བློན་བྲལ་པས་ཆོག། ཆུ་ཟླ་རྐྱེན་དང་སྤྲོད་ལ་ནམ་མཁའ་གུད་དུ་ཆོད། སེམས་དང་ཡེ་ཤེས་ཕྱེ་ནས་སྣང་བས་ཆོག། ཀུན་ཏུ་འོད་ཀྱི་ས་ལ་སྦྱངས་མི་དགོས་ཀྱིས།། འཁྲུལ་སྣང་འགགས་པས་ཆོག། འབྲས་བུ་གྲུབ་མི་དགོས་ཀྱིས། སྐུ་གསུམ་འདུ་འབྲལ་མེད་པ་ནམ་མཁའ་ཉི་མ་ལྟ་བུའོ།། སྒྲིབ་པ་སྦྱང་མི་དགོས་ཀྱིས། རྒྱུ་རྐྱེན་མེད་པའི་ཡེ་ཤེས་ལ་དྲི་མ་མེད་དེ། མན་ཤེལ་དང་སྣང་བའི་ཚུལ་ལོ།། སངས་རྒྱས་རང་ལ་འབྱུང་གི་གཞན་དུ་མ་ཚོལ་ཅིག། ཆོས་ལ་སངས་རྒྱས་མེད་པར་བསྟན་པ་སྐྲ་ཤད་དང་སོལ་བ་ལྟ་བུའོ།། དེ་ནས་སངས་རྒྱས་གཞོན་ནུ་མཚན་རབ་ཏུ་ཤེས་པས་ཡར་གཟིགས་པས་སངས་རྒྱས་གཞོན་ནུ་བུམ་པའི་སྐུ་མཐོང། མར་གཟིགས་པས་འགྲོ་དྲུག་གི་སྡུག་བསྔལ་མཐོང།། ཐད་ཀར་གཟིགས་པས་སེམས་ཅན་གྱི་དེ་བཞིན་གཤེགས་པའི་སྐུ་གསུང་ཐུགས་མཁྱེན་ནས། ཡེ་ཤེས་ཆིག་ཆོད་དུ་གསུང་པའོ།། ཞེས་སེམས་ཕྱོགས་ཆེན་པོ་ནམ་མཁའ་མཛོད་ཀྱི་རྒྱུད་ལས། ཡེ་ཤེས་ཆིག་ཆོད་དུ་བསྟན་པ་སྟེ་ལེའུ་བརྒྱད་པའོ།།།། དེ་ནས་མཆོངས་པ་ལྔ་བཤད་པ་ནི། ། རྡོ་རྗེ་སེམས་དཔའ་འགྲོ་དྲུག་མེ་ལོང་ལ་གཟུགས་བརྣན་ཤར་བ་བཞིན་མཁྱེན་ཏེ། ལས་དགེ་སྡིག་ལས་འདས་པ་འདི་གསུངས་སོ།། འཁོར་བ་ཞེ་ལ་མནན་པའི་ཕྱིར།། མཆོངས་པ་ལྔའི་མན་ངག་བཤད་དོ། ཀུན་ཏུ་བཟང་པོའི་སྐུའི་སྤྲུལ་པ་བསྟན་པ། རིན་ཆེན་ཤེལ་གྱི་མི་བོ་ཅིག། དང་པོ་འགག་མེད་ཀློང་ནས་ཡོངས།། བར་དུ་བགྲོད་མེད་ལམ་ལ་གནས།། ཐ་མར་སྐྱེ་མེད་ངང་དུ་འགྲོ།། གོམས་པ་ལྔ་ཡིས་ཕ་རོལ་ཕྱིན། ། རིན་ཆེན་ཤེལ་གྱི་མི་བོ་དེ།། ཁྱུང་ཆེན་གཤོག་རྫོགས་རྟ་རུ་ཞོན།། རྩོལ་བ་མེད་པར་དབྱིངས་སུ་ཕྱིན།། གཡོན་ན་གླང་ཆེན་འགྱུར་མེད་འདུར།། གླང་ཆེན་འགྱུར་མེད་ཁྲི་སྟེང་ས་ན།། བཙུན་མོ་རྒྱན་བཟང་འོད་དུ་འབར། ། ཤེས་རབ་དབྱིངས་ན་ཐབས་ལྡན་རྫོགས།། གཡས་ན་སེང་ལྕམ་དཀར་མོ་མཆོང།། སེང་ལྕམ་དཀར་མོའི་གདན་སྟེང་ན།། གཡུ་ཡི་མི་ཕོ་ཟུར་ཕུད་ཅན།། རྐང་མེད་མཁའ་ལ་སྟོབས་ཀྱིས་འགྲོ། ། ཕྱིན་པ་མེད་པར་དབྱིངས་སུ་གཅོད།། འགྲོད་མེད་ལམ་དུ་འཇུག་ཙམ་ན།། རིག་པའི་ཡེ་ཤེས་གཞུ་བདུངས་ནས།། ཤེས་རབ་མདའ་ལྔ་སྟོང་ལ་རྒྱུས།། མདའ་གཅིག་ནམ་མཁའི་མཐོངས་སུ་འཕེན།། ནམ་མཁའི་མཐའ་ལ་ཐུག་པ་མེད། ། ཕ་ནི་ཐབས་མཆོག་དཔག་ཏུ་མེད།། སྐྱེ་འགག་མེད་པའི་ཡེ་ཤེས་ཡིན།། མདའ་གཅིག་རྒྱ་མཚོའི་གཏིང་དུ་འཕེན།། ཟབ་ཅིང་གཏིང་དཔག་དཀའ་བའི་དབྱིངས།། མ་ནི་ཤེས་རབ་བརྗོད་ལས་འདས། ། འགྱུར་བ་མེད་པའི་ཆོས་ཉིད་ཡིན།། མདའ་གཅིག་ཉི་ཟླའི་བར་དུ་འཕེན།། ཉི་ཟླ་གཉིས་ཀྱིས་བརྗིད་མཉམ་པས་ཐབས་དང་ཤེས་རབ་ཟུང་དུ་འབྲེལ།། མདའ་གཅིག་འགྲོ་དྲུག་ཡོངས་ལ་འཕེན། ། འགྲོ་དྲུག་སྲང་ལ་བཏབ་ཙམ་ན།། འགྲོ་དྲུག་སྲང་ལ་མཐོ་དམན་མེད།། རང་བྱུང་བདེ་བའི་དབྱིངས་སུ་བསྐུལ།། མདའ་གཅིག་འཇིག་རྟེན་ཁམས་སུ་འཕེན།། ཡེ་ཤེས་སྣང་བས་རང་ལོག་ཡིན།། བདེ་གསལ་ཆེན་པོའི་ས་ལ་བཀོད། ། གོམས་པ་ལྔ་ཡིས་ཕ་རོལ་ཕྱིན།། འཁྲུལ་སྣང་འདི་ལ་འགོམས་མཆོངས་བྱེད།། དག་པའི་སྣང་བ་ཡོད་པའི་ཕྱིར།། སེམས་ཅན་འདི་ལ་འགོམས་མཆོངས་བྱེད།། སངས་རྒྱས་དམ་པ་ཡོད་པའི་ཕྱིར། ། ལྷ་རྣམས་ཀུན་ལ་འགོམས་འཆོངས་བྱེད།། འཕགས་པའི་དང་པོ་ཡོད་པའི་ཕྱིར།། བྱང་ཆུབ་སེམས་ལ་འགོམས་མཆོངས་བྱེད།། ལྷུན་གྲུབ་ཡེ་ཤེས་ཡོད་པའི་ཕྱིར།། དམ་པའི་ཆོས་ལ་འགོམས་མཆོངས་བྱེད། ། ཆོས་ལས་འདས་པ་ཡོད་པའི་ཕྱིར།། སྐད་ཅིག་གོམས་པ་ལྔ་རྫོགས་པས།། ཡུལ་ནི་རྣམ་པར་དགའ་བའི་ཞིང།། མཁར་ནི་འགྱུར་བ་མེད་པའི་མཁར།། གྲོགས་ནི་འདུ་འབྲལ་མེད་པའི་གྲོགས།། གདན་ནི་ཕོ་འགྱུར་མེད་པའི་གདན། ། གོས་ནི་དངས་མ་ལྔ་ཡི་གོས།། ཟས་ནི་ཟག་མེད་ཏིང་འཛིན་ཟས།། སྐུ་ནི་ཤེས་རབ་འགྱུར་མེད་སྐུ།། རྡོ་རྗེ་རྒྱ་གྲམ་ཁྲི་སྟེངས་ནས།། དཔའ་བོ་ཆེན་པོ་བདག་ཉིད་སྐུ།། མཚན་མའི་གཟུགས་མེད་གཟུགས་ཀྱི་སྐུ། ། ངོ་མཚར་རྨད་བྱུང་རོལ་པའི་ཐུགས།། སྨྲ་བསམ་བརྗོད་མེད་ཤེས་རབ་གསུང། རྟོགས་པའི་ཡེ་ཤེས་སྐད་ཅིག་རྫོགས།། ཞེས་སེམས་ཕྱོགས་ཆེན་པོ་ནམ་མཁའ་མཛོད་ཀྱི་རྒྱུད་ལས། མཆོངས་པ་ལྔའི་མན་ངག་བསྟན་པའི་ལེའུ་སྟེ་དགུ་པའོ།།།། དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས།། སྒོམ་ཉམས་དྲུག་པའི་མན་ངག་འདི་གསུངས་སོ།། ས་མ་ཨ་ཏི་བི་ཙ་ར། བཛྲ་ན་མ་ཎི་བི་ཧུ་རུ་རུ། སྟོང་པ་ཆེན་པོའི་ཡེ་ཤེས་སྐུའི་བདག་ཉིད་གསང་བ་ཡང་ཁོལ་དུ་བྱུང་བ། བདག་དང་བཅས་པའི་དཔལ་རྡོ་རྗེ་སེམས་དཔས། ཐུགས་ཀྱི་མན་ངག་ཟབ་མོ་བསྟན་པ།། དག་པ་ཆོས་ཀྱི་སྐུ་ནི་མ་བསྒྲིབས་ཡོངས་སུ་གསལ། ། ཤེས་རབ་རིག་པའི་སྐུ་ནི་ཟབ་ཅིང་གཏིང་དཔག་དཀའ།། རང་བྱུང་ཐུགས་རྗེའི་སྐུ་ནི་མཚན་དང་དཔེ་བྱད་ལྡན།། ཐུགས་རྗེ་འོད་ཟེར་སྐུ་ནི་འགྲོ་བ་ཀུན་ལ་སྣང།། རྒྱུ་རིག་པ་ཆོས་ཀྱི་སྐུ། འབྲས་བུ་སྐུ་དང་ཡེ་ཤེ་མེ་ལོང་དང་བྱད་ཀྱི་ཚུལ་དུ། རྒྱུ་ཆོས་ཀྱི་སྐུ་ལ་ཤར་བས་རྒྱུ་འབྲས་བུར་སྨིན་ནོ།། དེ་ནས་ཡང་རྒྱུའི་དུས་ན་འབྲས་བུ་ལྷུན་གྱིས་རྫོགས་འབྲས་བུ་རྒྱུའི་ངང་དུ་ཤར་ཏེ། རྒྱུ་དང་འབྲས་བུ་ཐ་མི་དད་པ་ཞེས་བྱའོ། ། དེ་ཡང་རང་གི་རྒྱུད་ལ་སྦྱར་ན།། ཆོས་ཉིད་དགའ་བའི་ས་ནས་རང་ཤེས་རིག་གི་རྒྱལ་པོ་རྡོ་རྗེ་ཀུན་ཏུ་བཟང་པོ། ངང་གི་གཡོ་བར་ཡོངས་ཀྱིས་འོད་གསལ་བར་བཞུགས་པ་ནི། རྒྱུ་རྡོ་རྗེ་དབྱིངས་ཀྱི་དཀྱིལ་འཁོར་མ་བཙལ་ལྷུན་གྱིས་རྫོགས། ། འབྲས་བུ་ཡེ་ཤེས་ཀྱི་དཀྱིལ་འཁོར་མ་བསྒྲིབས་པར་ཡོངས་སུ་གསལ།། ཐུགས་རྗེ་བྱེད་པ་མེད་པའི་ཤེས་རབ་ཀུན་ལ་སྙོམས་སོ།། མི་ནུབ་རྒྱལ་མཚན་ལྟ་བ་ནམ་མཁའི་རྒྱལ་བོ། རང་རིག་རྒྱལ་པོ་གྲུབ་མཐའི་གཏེར་དུ་བཞག་པ། སེམས་ཀྱི་གཏེར་དུ་དགོངས་པའི་གནས་བསྟན་པ། སྙིང་པོའི་ཡང་སྙིང་རིན་པོ་ཆེ་གསང་བའི་སྦུབས་བསྟན་པ། འབྲས་བུ་རིན་པོ་ཆེ་ལྷུན་གྱིས་གྲུབ་པར་བསྟན་པ། དེའི་སྐྱོན་དང་ཡོན་ཏན་བསྟན་པ་དང། མན་ངག་གིས་ཡིད་ཆེས་པར་བསྟན་པའོ།། དང་པོ་ལྟ་བ་རང་གི་ངོ་བོར་བསྟན་པ་ནི། འོག་མིན་གྱི་གནས་ཆོས་ཀྱི་དབྱིངས་ཀྱི་ཕོ་བྲང་ན། རིན་པོ་ཆེ་གསང་བའི་ཕོ་བྲང་ན། རིན་པོ་ཆེ་གསང་བའི་སྦུབས་ཕྱི་ནང་མེད་པར་གསལ་བའི་དང་ན། རང་ཤེས་རིག་གི་རྒྱལ་པོ་རྡོ་རྗེ་ཀུན་ཏུ་བཟང་པོ། ངང་གིས་མི་གཡོ་བ་ཡོང་གི་འོད་གསལ་བ། རྒྱུ་རྡོ་རྗེ་དབྱིངས་ཀྱི་དཀྱིལ་འཁོར་རང་རྫོགས།། རྒྱུ་འབྲས་བུར་སྨིན་པ་ཡེ་ཤེས་ཀྱི་དཀྱིལ་འཁོར་རང་ཤར། ཐུགས་རྗེ་འབྱེད་པ་མེད་པའི་ཤེས་རབ་རང་བྱུང་བ་ནི། རྒྱུ་རང་བྱུང་གི་ཡེ་ཤེས་ཞེས་བྱ་བའོ།། སྐུ་གསུམ་ཡེ་ཤེས་གསུམ་བརྩེགས་ཀྱི་དགོངས་པ་ཡས་བབས་པ། ཆོས་ཉིད་སྣང་བ་གསུམ་གྱི་ཞིང་ཁམས་མས་ཆགས་པའི་ཕྱིར། ཐེག་པ་ཆེན་པོ་སྣང་སྲིད་གཞི་བཞག་དང། གཞི་བཞེངས་སུ་བསྟན་པ་ནི། མི་ནུབ་རྒྱལ་མཚན་ལྟ་བ་ནམ་མཁའ་རྒྱལ་པོ་ཞེས་བྱའོ། ། འགག་པ་མེད་པའི་ལྟ་བ་ཉིད་ནམ་མཁའ་དང་ཉི་མའི་ཚུལ་དུ་བཞུགས་སོ།། གྲུབ་མཐའི་གཏེར་དུ་བཞག་པ་ནི། རང་གི་རྒྱུད་ལ་སྦྱར་ཏེ་བསྟན་ན་ལྟ་བ་རིན་པོ་ཆེའི་གཏེར།། སྙིང་པོ་ཡེ་ཤེས་སྒྲོན་མའི་མཆོག། བདེར་གཤེགས་རྣམས་ཀྱི་ཡེ་ཤེས་སྐུ། རྒྱལ་བ་རྣམས་ཀྱི་གཏེར་དུ་བཞག། ཅེས་སེམས་ཀྱི་གཏེར་དུ་སྙིང་པོ་ཡེ་ཤེས་ཀྱི་སྐུ་བཞག་གོ། དེ་ཡང་མཉམ་བཞག་གི་དུས་སུ། འབྲས་བུ་ཡེ་ཤེས་ཀྱི་དཀྱིལ་འཁོར་ཉིད། རྒྱུ་རྡོ་རྗེ་དབྱིངས་ཀྱི་དཀྱིལ་འཁོར་ལ། ཁ་ནང་དུ་བལྟས་པའི་དུས་སུ། མཉམ་པ་ཉིད་གཉིས་སུ་མེད་པའི་དགོངས་པ་ཞེས་བྱ་སྟེ། ངང་ཀུན་ཏུ་བཟང་པོ་མ་བཅོས་པར་བཞག། དེའི་དུས་སུ་མིག་གི་ཡུལ་འགྱུར་བཟློག་པའི་མན་ངག་གིས་བཅོས་པས་ཤེས་པ་བསྟན་པར་འགྱུར་རོ། ། ཡང་ཡིད་རྟོག་པའི་རྗེས་སུ་འབྲངས་ནས། ཡིད་ཀྱི་ཡུལ་འགྱུར་བ་བཅད་པས། རྣམ་རྟོག་རྒྱུན་གཅོད་པར་བྱེད་དོ།། ཡང་རྒྱུ་རྡོ་རྗེ་དབྱིངས་ཀྱི་དཀྱིལ་འཁོར་ཉིད། ། འབྲས་བུ་ཡེ་ཤེས་ཀྱི་དཀྱིལ་འཁོར་ལ་ཁ་ཕྱིར་བལྟས་པའི་དུས་སུ་སྣང་བ་རྒྱས་འདེབས།། མཚན་མ་ཟིལ་གྱིས་གནོན་ཏེ།། ཐུགས་རྗེ་འབྱེད་པ་མེད་པའི་ཤེས་རབ་ཀུན་ལ་སྙོམས་སོ།། སྒོམ་པའི་གནས་བསྟན་པ་ནི། འདིར་མཚན་མའི་གནས་ཅིག་སྟོན་ཏེ། རྟོགས་པ་དང་ལྡན་པ་རྣམས་སོ།། རྩ་བ་རང་གི་རིག་པ་འགྱུར་བ་མེད་པའི་ཡེ་ཤེས་དེ། ཀུན་གཞི་སེམས་ཀྱི་བྲག་ཕུག་ཙིཏྟའི་གཞལ་ཡས་ཁང་དུ་སྒོམ་པར་བསྟན་པའོ། ། སྒོམ་པའི་དམིགས་པ་བསྟན་པ་ནི། སྒོ་ང་དཀར་པོ་ཁ་ནང་དུ་བསྟན་པའི་དུས་ན། ཡེ་ཤེས་སེམས་པའི་སྙིང་པོའི་དཀར་པོ་དང་བཅས་པར་བསྒོམ་པ་ནི། སྐུ་གསུང་ཐུགས་ཕྱག་རྒྱའི་དཀྱིལ་འཁོར་བཅས་པར་སྒོམ་པ་དེ་ནི་སྐུ་རྡོ་རྗེ་ཡིན། འབྲས་བུ་ཡེ་ཤེས་ཀྱི་དཀྱིལ་འཁོར་ཉིད་རྒྱུ་རྡོ་རྗེ་དབྱིངས་ཀྱི་དཀྱིལ་འཁོར་ལ་ཁ་ནང་དུ་བསྟན་པའི་དུས་ན། སྙིང་པོ་བྱང་ཆུབ་ཀྱི་སྐུ་གསལ་བ་རྣམ་པ་གསུམ་དང་ལྡན་པར་བཞུགས་པ་ནི། སངས་རྒྱས་ཐམས་ཅད་དང་མི་ཕྱེད་པར་བཞུགས་པའི་དགོངས་པའོ།། ཡང་རྒྱུ་རྡོ་རྗེ་དབྱིངས་ཀྱི་དཀྱིལ་འཁོར་ཉིད་འབྲས་བུ་ཡེ་ཤེས་ཀྱི་དཀྱིལ་འཁོར་ལ་ཁ་ཕྱིར་བལྟས་པའི་དུས་ན། ཐུགས་རྗེ་འབྱེད་པ་མེད་པའི་ཤེས་རབ་ཀུན་ལ་ཁྱབ་དེ། ། ནམ་མཁའི་མཐོངས་ནས་ཉི་མའི་སྙིང་པོ་ཤར་བ་ལྟ་བུའོ།། དེ་ལ་ཐུགས་རྗེ་ཡོན་ཏན་དུ་འབྱོང་བར་བསྟན་པ་ནི། ཐུགས་རྗེ་འབྱུང་བའི་སྒོ་བཞི། འཆར་སྒོ་གསུམ་ནས་འཆར་ཏེ། ཐུགས་རྗེ་འབྱུང་བའི་སྒོ་བཞི་ནི། སྙིང་པོ་བྱང་ཆུབ་མཆོག་གི་སྐུ་ལ་མཉམ་པར་བཞག་པའི་ཚེ། ཤེས་རབ་འགག་པ་མེད་པར་ཤར་བ་ནི། ཡོན་ཏན་རིན་པོ་ཆེ་མ་རྫོགས་པའི་རྩལ་རང་སྣང་བ་ནི། སྤྲུལ་སྐུ་རིན་ཆེན་འབྱུང་ལྡན་གྱི་སྐུ་དང་ཡེ་ཤེས་ལ་སྣང་ངོ། ། ཡང་དག་པར་རྫོགས་པའི་སངས་རྒྱས་ཀྱི་ཞིང་ཁམས་ནས། མ་ཐ་དམྱལ་བའི་འཇིག་ཚོགས་ཡན་ཆད། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་འཁོར་བུ་དང། ཀུན་ཁྱབ་དང། སྤངས་ཐོན་དང། ཉེ་རིང་མེད་པར་སྣང་བ་ནི། འོད་དཔག་ཏུ་མེད་པའི་ཞིང་ཁམས་ཏེ། སྣང་བ་མཐའ་ཡས་ཀྱི་སྐུ་དང་ཡེ་ཤེས་ལ་སྣང་བའོ།། བགྲོད་པ་མེད་པར་ལྷུན་གྱིས་གྲུབ་པའི་ས་རྣམས་ནོན་པ་ནི། དོན་གྲུབ་ཆེན་པོའི་ཞིང་ཁམས་ཏེ། དོན་ཡོད་གྲུབ་པའི་སྐུ་དང་ཡེ་ཤེས་ལ་སྣང་བའོ།། རང་ཤེས་རིག་གི་རྒྱལ་པོ་རྡོ་རྗེ་ཀུན་ཏུ་བཟང་པོ། དུས་གསུམ་དུ་ཕོ་འགྱུར་མེད་པར་བཞུགས་པ་ལ། ལས་ཀྱིས་སྒྲིབ་ཏུ་མེད། ཐུགས་རྗེས་སྐྱབ་ཏུ་མེད། བདུད་དང་མུ་སྟེགས་ཀྱིས་བར་དུ་བཅད་དུ་མེད། ཕྱ་དང་དབང་ཕྱུག་གིས་གྲོགས་བྱར་མེད། དེ་ནི་མི་བསྐྱོད་པའི་ཞིང་ཁམས་དེ། རྡོ་རྗེ་སེམས་དཔའི་སྐུ་དང་ཡེ་ཤེས་ལ་སྣང་བའོ། ། ཐམས་ཅད་འབྱུང་བའི་གཞིར་རང་བྱུང་བ་ནི། སྙིང་པོ་ལྔ་དང་དྭངས་མ་ལྔ་ལས་ཐམས་ཅད་འབྱུང་བའི་ཕྱིར་རང་བྱུང་བའོ།། ཐམས་ཅད་སྨིན་པར་བྱེད་པ་ནི། སྐུ་ཡོད་པ་ལས་ཡེ་ཤེས་འཆར། ཡེ་ཤེས་ཐུགས་རྗེ་ཆེ་བའི་སྟོབས་ཀྱིས་དགོངས་པ་ལ་མཉམ་པར་བཞག་པའི་དུས་སུ། ཉམས་སུ་མྱོང་བའི་ཤེས་རབ་ཁྱད་པར་ཅན་རང་གི་རྒྱུད་ལ་སྐྱེ་བར་འགྱུར་རོ།། དེའི་འཆར་སྒོ་གསུམ་ལ། རྒྱུ་ལས་འབྲས་བུ་ཁ་ནང་དུ་བལྟས་པའི་དུས་ན། །།། ཨྠི+ྀ། རྒྱ་གར་སྐད་དུ། དེ་ཝཱི་མ་རི་ཙྱཻ་ཏ་ཏནྟྲ། བོད་སྐད་དུ། ལྷ་མོ་འོད་ཟེར་ཅན་གྱི་རྒྱུད། བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་གསུམ་ཡེ་ཤེས་ལྔའི་བདག་ཉིད་དུ་སྣང་བ། བྱང་ཆུབ་སེམས་ཀྱི་ལྷ་མོ་གསལ་བའི་སྒྲོན་མ་མར་མེ་མཛད་གཙུག་གི་རྒྱན་གཅིག་མ་ལ་ཕྱག་འཚལ་ལོ།། ཆོས་ཀྱི་སྐུ་མཚན་མའི་ཡུལ་ལས་འདས་ཀྱང། གཟུགས་ཀྱི་སྐུ་མངོན་པར་སྣང་བས། སངས་རྒྱས་ཀྱི་བདེན་པ་མཐོང་བར་བྱེད་པ། ལྷ་མོ་འོད་ཟེར་ཅན་གྱི་རྒྱུད་འདི་གྲོལ་བར་བྱའོ།། རིགས་དྲུག་གི་སེམས་ཅན་ལ་ཆོས་ཀྱི་སྐུ་རང་བཞིན་གྱི་གསལ་བ་ལྔ་ཡོད་དེ། དེ་ཡང་ཡང་དག་པར་རྫོགས་པའི་སངས་རྒྱས་ལ་འོད་དཔག་ཏུ་མེད་པར་གནས་སོ། ། བྱང་ཆུབ་སེམས་དཔའ་རྣམས་ལ་དཔག་ཏུ་ཡོད་པར་གནས་སོ།། ལྷ་རྣམས་ལ་གཞལ་དུ་ཡོད་པར་གནས་སོ།། མི་རྣམས་ལ་མཚོན་དུ་ཡོད་པར་གནས་སོ།། ངན་སོང་གསུམ་ལས་སེམས་རང་གསལ་བ་ཙམ་དུ་གནས་སོ། ། མཛོད་བུའི་འོད་ཟེར་མ་འགགས་མཁྱེན་མངའ་བ།། མགོན་པོ་སྤྱན་རས་གཟིགས་ལ་ཕྱག་འཚལ་ལོ།། ལྷ་མོ་འོད་ཟེར་ཅན་གྱི་རྒྱུད་འདི་ལ་ལེའུ་གསུམ་གྱིས་བསྟན་ཏེ། ལེའུ་དང་པོ་ཆོས་ཀྱི་སྐུ་ལ་འོད་ཟེར་འབྱུང་བར་བསྟན་པ་དང། ལེའུ་གཉིས་པ་འོད་ཟེར་རྣམ་པར་དག་པར་བསྟན་པ་དང། ལེའུ་གསུམ་པ་སེམས་ཅན་ཐམས་ཅད་ལ་མཚོན་པའི་ཡེ་ཤེས་འོད་རང་ཆས་སུ་བསྟན་པ་དང། གསུམ་གྱིས་བསྟན་ཏོ།། དེ་ནས་རྒྱུད་དག་པའི་རྡོ་རྗེ་འཆང་ཆེན་པོས་མཛོད་སྤུའི་བུ་ག་ནས་འོད་ཟེར་ལྔ་བཀྱེ་བས་འཇིག་རྟེན་གྱི་ཁམས་སྣང་བར་བྱས་ཏེ། འོད་ཟེར་དེའི་བྱིན་གྱིས་བརླབས་ལས། སངས་རྒྱས་བདེ་ལྡན་མགོན་པོ་སྤྱན་རས་གཟིགས་ཞེས་བྱ་བ། སྐུ་མདོག་དཀར་པོ་འོད་ཟེར་གྱི་འཕྲེང་བས་སྐོར་བ། ཕྱག་གཡས་པ་སྐྱབས་སྦྱིན་གྱི་ཕྱག་རྒྱ་དང་ལྡན་པ། གཡོན་པ་པུས་མོ་ལ་རྟེན་པ། པདྨའི་གདན་ལ་བཞུགས་པ་གཅིག་རང་བྱུང་དུ་མདུན་དུ་ལྷག་སྟེ། ཀྱེ་ཀྱེ་ཐུགས་རྗེ་ཆེན་པོ་སེམས་ཅན་གྱི་ཉོན་མོངས་པའི་དུག་ལྔ་གདུལ་དུ་གསོལ། མཛོད་སྤུའི་བུ་ག་ནས་འོད་ཟེར་རྣམ་པ་ལྔ་འཕྲོས་ནས་འཇིག་རྟེན་གྱི་ཁམས་སྣང་བར་མཛད་ན། བདག་གིས་སེམས་ཅན་གྱི་དོན་དུ་འོད་ཟེར་ལྔ་མི་སྤྲོ་བ་ཅི་སྟེ། ཡང་དག་པར་རྫོགས་པའི་སངས་རྒྱས་ལ་སྐུ་རྣམ་པར་དག་པའི་འོད་ལྔ་འཕྲོས་པ་འདི་ཅིའི་རྒྱུ་ཅིའི་རྐྱེན། ཆོས་ཀྱི་སྐུ་ནི་རང་བཞིན་གྱི་སྟོང་ན། གཟུགས་ཀྱི་སྐུ་ཡེ་ཤེས་སྒྱུ་མའི་ལུས་སུ་འབྱུང་བ་འདི་ཇི་ལྟ་བུ་ལགས། ཞེས་ཞུ་བ་ཞུས་ཏེ། དེ་ནས་བཅོམ་ལྡན་འདས་ཏིང་ངེ་འཛིན་ལས་བཞེངས་ཏེ། ཞལ་འཛུམ་པ་མཛད་ནས་ལྗགས་ཀྱི་པདྨོ་ལས་འོད་ཟེར་ལྔ་སྤྲོས་ཏེ། བྱང་ཆུབ་སེམས་དཔའ་ཆེན་པོ་ཁྱོད་ཀྱིས་དྲི་བ་གསུམ་དྲིས་པ་དེ་ལེགས་སོ།། ཡང་དག་པར་རྫོགས་པའི་སངས་རྒྱས་ལ་སྐུ་རྣམ་པར་དག་པ་ཡེ་ཤེས་སྒྱུ་མ་ལྟ་བུའི་སྐུ་འབྱུང་བ་ནི། ཡེ་ཤེས་ལྔའི་རྩལ་མ་འགགས་པར་འཆར་ཏེ། དེ་ཡང་ཤེས་རབ་འགག་པ་མེད་པ་སྟོང་པ། ཡེ་ཤེས་ཀྱི་སྙིང་པོར་གསལ་བ་དང། ཤེས་རབ་མི་གཡོ་བ་མཉམ་པ་ཉིད་དུ་གནས་པ་དང། ཤེས་རབ་རྒྱུན་མི་འཆད་པ་བྱེ་བྲག་ཐ་དད་དུ་ཤེས་པ་དང། ཤེས་རབ་ཟག་པ་མེད་པ་ལྷུན་གྱིས་གྲུབ་པ་དང། ཤེས་རབ་འགྱུར་བ་མེད་པ་རང་བཞིན་རྣམ་པར་དག་པ་དང་ལྔ་བྱ་བཙལ་མེད་པའི་བདག། སངས་རྒྱས་ཀུན་གྱི་རང་ལུས་ཡིན། ། གཅིག་པུ་རབ་ཏུ་ཆེ་བའི་ལྷ།། ནམ་མཁའ་ཉི་མའི་ཚུལ་དུ་གནས།། རྡོ་རྗེ་ལྟ་བུའི་ཏིང་འཛིན་ལ།། འདུ་འབྲལ་མེད་པར་རྟག་པར་བཞུགས།། ཞེས་བཀའ་སྩལ་པས། མགོན་པོ་སྤྱན་རས་གཟིགས་ཉིད་ཡེ་ཤེས་ཀྱི་སྣང་བར་གང་རྒྱས་ཏེ་འོད་ཟེར་ལྔ་ཕྱོགས་བཅུར་ཁྱབ་པར་ཤར་ཏོ། ། ཞེས་དྲི་བ་དྲིས་པ་གསུང་པས་མགོན་པོ་སྤྱན་རས་གཟིགས་ཀྱི་བདེན་པ་མཐོང་ངོ།། དོན་ཐུགས་སུ་ཆུད་དོ། ཞེས་ལྷ་མོ་འོད་ཟེར་ཅན་གྱི་རྒྱུད་ལས། ཆོས་ཀྱི་སྐུ་ལ་འོད་ཟེར་འབྱུང་བར་བསྟན་པའི་ལེའུ་སྟེ་དང་པོའོ།།།། དེ་ནས་བྱང་ཆུབ་སེམས་དཔའ་ཆེན་པོས་རྡོ་རྗེ་འཛིན་གྱི་མདུན་དུ་བཀའ་ནོད་པའི་ཚུལ་དུ་ཐལ་མོ་སྦྱར་ནས། ཐུགས་རྗེ་ཆེན་པོ་ཡང་དག་པར་རྫོགས་པའི་སངས་རྒྱས་ཀྱི་ངོ་བོ་དང། རང་བཞིན་ནི་དཔག་པའི་མཐའ་ལས་འདས་ན། ཐུགས་རྗེ་སྤྲུལ་པའི་སྐུ་འོད་ཟེར་དུ་སྣང་བའི་ཚུལ་དུ་བདེན་ནམ། འོན་ཏེ་སྣང་ཚུལ་དཔག་པ་ལས་འདས། དཔག་པ་ལས་འདས་ན་ཐུགས་རྗེའི་ཚུལ་དུ་བྱུང་བ་འགག་གམ་མི་འགག། དེ་བདག་གིས་མ་ཤེས་མ་འཚལ་ཏོ།། ཇི་ལྟར་ལགས་བཅོམ་ལྡན་འདས་ཀྱིས་བསྟན་དུ་གསོལ། ཅེས་དྲི་བ་དྲིས་སོ།། དེ་ནས་ཡང་བཅོམ་ལྡན་འདས་མཉམ་པའི་ཏིང་ངེ་འཛིན་ལས་བཞེངས་ནས། ཞལ་འཛུམ་པ་མཛད་ནས་བྲི་ཀུ་ཏ་གྱེན་དུ་འགྲེང་སྟེ། ལྗགས་ཀྱི་པདྨོ་ལས་འོད་ཟེར་ལྔ་སྤྲོས་ནས། བྱང་ཆུབ་སེམས་དཔའ་ཁྱོད་ཉོན་ཅིག། སྔོན་བྱུང་གི་དུས་ན། ང་མ་འོངས་པའི་སྔོན་རོལ་ན་ཐོག་མའི་སངས་རྒྱས་འོད་མི་འགྱུར། རང་བྱུང་གི་གཞལ་ཡས་ཁང་ཆེན་པོ་དང་འདུ་འབྲལ་མེད་པར་བཞུགས་པ། སྙིང་པོ་བྱང་ཆུབ་ན་བཞུགས་པ། སྙིང་པོ་བྱང་ཆུབ་ན་བཞུགས་པའི་སྐུ། འོད་ཟེར་གྱི་ཕུང་པོར་གཞི་ནས་གནས་ཏེ། འགོག་པ་མེད་ཀྱང། འོད་ཟེར་གྱི་ཕུང་པོ་དེ་ཉིད་རྟག་པ་ཡང་མ་ཡིན། མི་རྟག་པ་ཡང་མ་ཡིན། ཅི་སྟེ་འོད་ཉིད་ཆོས་ཀྱི་སྐུ་ལས་འབྱུང་བའི་ཕྱིར། ཆོས་སྐུ་དེ་ཉིད་ཡང་དག་པར་ཡོད་པ་ཡང་མ་ཡིན། མེད་པ་ཡང་མ་ཡིན་ནོ།། དེ་བཞིན་དུ་འོད་ཟེར་གྱི་ཕུང་པོ་དེ་སྣང་བ་ཡང་མ་ཡིན། མི་སྣང་བ་ཡང་མ་ཡིན་ཏེ། སྣང་བ་དང་མི་སྣང་བའི་མཐའ་ལས་འདས་པའོ།། དེ་ཅིའི་ཕྱིར་ཞེ་ན། འོད་ཟེར་དེ་ལ་རང་བཞིན་མེད་པས་ནམ་མཁའི་མཐའ་དང་མཉམ་ལ། འོད་དེ་མ་འདྲེས་ལ་ཡོངས་སུ་རྫོགས་པར་གནས་པས། དཔེར་ན་ནམ་མཁའ་དང་རི་མོའི་ཚུལ་དུ་གནས་སོ།། དེའི་ཕྱིར་བྱང་ཆུབ་ཉིད་སྙིང་པོའི་རང་བཞིན་དུ་འོད་དུ་གསལ། སྙིང་པོ་རྣམ་དག་ཡེ་ཤེས་འོད་གསལ་ཅེས་གསུངས་སོ།། དེ་ཡང་ཐུགས་རྗེ་འབྱུང་བའི་དུས་སུ་སྒོ་ཐམས་ཅད་ནས་འོད་ཟེར་ལྔ་ལྔ་འབྱུང་སྟེ། སེམས་ཅན་ལ་བསྟན་པའི་སྙིང་པོ་རེ་རེ་འབྱུང་ངོ། ། ཀྱེ་སེམས་དཔའ་ཆེན་པོ་ངས་སེམས་ཅན་གྱི་དོན་དུ་སྐུ་གསུམ་གྱི་ཐུགས་རྗེ་བསམ་གྱིས་མི་ཁྱབ་པར་བསྟན་ཀྱང། དོན་བརྗོད་པ་ལས་འདས་པའི་ཆོས་སངས་རྒྱས་མེད་པའི་ཀློང་དུ་ལ་བཟླས་ན། བསྐྱེད་རྫོགས་རྣམ་པ་གསུམ་དུ་འདུ་བྲལ་མེད་པར་མ་བསྟན་ན། སངས་རྒྱས་ཀྱང་ཐུགས་རྗེ་འབྱུང་བའི་སྒོ་འགགས་པས། དཔེར་ན་ཨུ་དུམ་བ་རའི་མེ་ཏོག་གི་ཚུལ་དུ་བསྟན་ཏོ།། སྐུ་དེ་ལྟར་བསྟན་ཀྱང་བསྡུ་བ་གཅིག་ཏུ་མ་བསྡུས་ན། ཆོས་ཐམས་ཅད་ཀྱི་མདོ་མི་འདུས་ཏེ། དེའི་ཕྱིར་རིགས་ལྔ་འབྱེད་པར་འདས། སྐུ་ལྔ་ངོ་བོ་ཉིད་ཀྱི་སྐུར་འདས། ཡུམ་ལྔ་མཁའ་འགྲོ་ཀློང་རྣམ་པར་དག་པར་འདས། ཡེ་ཤེས་ལྔ་མི་གནས་པའི་ཡེ་ཤེས་ཆེན་པོར་འདས། ཕྱི་ནང་གི་འབྱུང་བ་ལྔ་ནམ་མཁའ་ཆེན་པོར་འདས། འོད་ལྔ་རང་བྱུང་གི་འོད་ཆེན་པོར་འདས། ཟེར་ལྔ་ཐུགས་རྗེའི་རྩལ་དུ་འདས། རྒྱུད་ཐམས་ཅད་ཀུན་ཏུ་བཟང་པོ་རྩ་བའི་རྒྱུད་ཆེན་པོ་ཡི་གེ་མེད་པའི་རྒྱུད་དུ་འདས། ལུང་ཐམས་ཅད་སྙིང་པོ་བྱང་ཆུབ་སེམས་སུ་འདས། མན་ངག་ཐམས་ཅད་བྱ་བཙལ་མེད་པར་འདས། དེ་དག་ཐམས་ཅད་ཀྱང་ཆོས་ཡིན་ཏེ། ཆོས་ཐམས་ཅད་རྣམ་པར་གྲོལ་བའི་ཡེ་ཤེས་ཀྱི་ཀློང་དུ་འདས། སངས་རྒྱས་ཐམས་ཅད་སངས་རྒྱས་མེད་པའི་ཀློང་དུ་འདས་སོ།། འདས་ཞེས་བྱ་བའི་ཚིག་དེ་དག་ཐམས་ཅད་ཀྱང། ཆོས་ཀྱི་རྒྱན་དུ་སྤྲོས་པ་ཡིན་ཏེ། དེ་ཙམ་ལས་ཀྱང་འདས་ན། རིགས་ཀྱི་བུ་ཆོས་ཐམས་ཅད་ནི་ཚིག་གི་བླ་དགས་སོ།། རིགས་ཀྱི་བུ་བྱང་ཆུབ་ཀྱི་སྙིང་པོ་ལ་སྙིང་པོ་ཡོད་མེད་ཀྱི་མཐའ་ལས་འདས་སོ།། སྐུ་གསུམ་དུ་གནང་བར་བསྟན་པ་ཡང།། དངོས་པོ་མེད་པར་རང་བཞིན་གྱི་རྩལ་ཤེས་བྱ་ལ་མ་རྨོངས་པའོ། ། གང་གིས་གང་ལ་དྲིས་པ་དེ། དེ་ཡིས་དེ་ལ་དེ་བསྟན་པ།། དེ་ཡི་རྣམ་པར་གྲོལ་བའོ།། དེ་ཐོབ་དེ་མཐོང་དེ་མི་གནས།། དེ་གྲོལ་དེ་ཡི་ཐམས་ཅད་ཤེས།། དེ་མེད་པར་ཡང་དེའི་འབྱུང་ངོ། ། ཞེས་ལྷ་མོ་འོད་ཟེར་ཅན་གྱི་རྒྱུད་ལས། འོད་ཟེར་རྣམ་པར་དག་པར་བསྟན་པའི་ལེའུ་སྟེ་གཉིས་པའོ།།།། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་དག་པར་རྫོགས་པའི་སངས་རྒྱས་ལ། སྒྱུ་མ་ལྟ་བུའི་སྐུ་དང་ཐུགས་རྗེའི་འོད་ཟེར་འབྱུང་བ་ལགས་ན་ཁམས་གསུམ་གྱི་སེམས་ཅན་ལ་འོད་ཟེར་ཇི་ལྟར་གནས། སྙིང་པོ་བྱང་ཆུབ་ཀྱི་སེམས་སུ་ནི་གཅིག་ན། འོད་ཟེར་མེད་ན་ཐུགས་རྗེའི་རྒྱུན་ཐག་མ་ཆད་དམ། ཡོད་ན་ཇི་ལྟར་གནས་བསྟན་དུ་གསོལ། བཤད་དུ་གསོལ། ཞེས་ཞུས་ཏེ། དེ་ནས་ཡང་བཅོམ་ལྡན་འདས་འོད་ཟེར་གྱི་ཕུང་པོ་ལྔའི་ཏིང་ངེ་འཛིན་ལས་བཞེངས་ཏེ། རིགས་ཀྱི་བུ་སྙིང་པོ་བྱང་ཆུབ་ཀྱི་སྐུ་དྲི་མ་མེད་པའི་ཡེ་ཤེས་སོ་སོ་མ་ཡིན་ཐ་མི་དད་པས། འགྲོ་བ་ཡོངས་ལ་ཁྱབ་པའི་ཕྱིར། དེ་བཞིན་གཤེགས་པ་ལལ་སྟོབས་དང་མི་འཇིགས་པ་ཇི་ལྟར་གནས་པ་དེ་བཞིན་དུ་འགྲོ་བ་ཡོངས་ལ་ཁྱབ་སྟེ། དཔེར་ན་སྐྱེས་བུའི་བྱད་རང་ལ་ཡོད་ཀྱང་མེ་ལོང་མ་བསྟན་པར་རང་གི་བཞིན་མི་མཐོང་བ་དེ་བཞིན་དུ། སྟོབས་དང་མི་འཇིགས་པ་ཡོད་ཀྱང་སེང་གེའི་བུ་མའི་མངལ་དུ་བཙས་པ་བཞིན་འདོན་མ་ནུས་ཏེ། ཡེ་ཤེས་སྣང་བའི་བག་ལ་ཞ་བས། ཐབས་མཁས་པས་བསྟན་པར་བྱའོ།། ཁྱོད་ཉོན་ཅིག། བྱང་ཆུབ་སེམས་དཔའ་དཔག་ཏུ་ཡོད་པའི་འོད་ཟེར་ལྔ་རང་ཆས་སུ་གནས་ཏེ། ཤེས་བྱའི་སྒྲིབ་པ་ཤེས་རབ་ཀྱི་དཔག་ཏུ་ཡོད་དོ།། ལྷ་རྣམས་ལ་གཞལ་དུ་ཡོད་པའི་འོད་ལྔ་རང་ཆས་སུ་གནས་ཏེ། དེ་ཡང་མོས་པའི་སྤྱོད་པའི་བསོད་ནམས་ལས་གྲུབ་པས་མངོན་དུ་སྣང་བའོ།། མི་རྣམས་ལ་མཚོན་དུ་ཡོད་པའི་འོད་ལྔ་རང་ཆས་སུ་གྲུབ་པས། དེ་ཡང་ཤེས་རབ་ཟབ་མོ་བསྟན་དཀའ་བ། ། ཟག་མེད་ཀྱི་སྙིང་པོ་བྱང་ཆུབ་སེམས།། མཚོན་གང་འོད་ཀྱི་དཀྱིལ་འཁོར།། སྙིང་པོ་བྱང་ཆུབ་སེམས་ཀྱི་སྐུ།། ཟབ་ཅིང་ཆ་ཕྲ་འགག་མེད་རང་བཞིན་གསལ།། ཞེས་འབྱུང་སྟེ། སེང་ཕྲུག་མ་དང་བྲལ་ནས་འཕྱོ་བ་ལྟར། ། བདག་དང་བྲལ་བས་ཡེ་ཤེས་དབྱིངས་ན་གསལ།། ཞེས་གསུངས་སོ།། ངན་སོང་གསུམ་ལ་རང་བྱུང་གི་ཡེ་ཤེས་ཡོད་ཀྱང་འབྱིན་མི་ནུས་ཏེ། ཤེས་པ་རང་གསལ་བ་ཙམ་མཐུན་པའི་ལམ་སྣང་སྟེ། བསོད་ནམས་ཀྱི་སྟོབས་ཆུང་བས་བདེན་པ་ལ་སྤྱོད་མ་ནུས་སོ།། ཀྱེ་སེམས་དཔའ་ཆེན་པོ་སངས་རྒྱས་ཐམས་ཅད་ལ་ཟག་མེད་ཀྱི་ཡེ་ཤེས་ནམ་མཁའ་དང་ཉི་མའི་ཚུལ་དུ་གནས་སོ།། རྟོག་པའི་མཐའ་ཤེས་རབ་རང་བཞིན་མེད་པས་ཤེས་པར་བྱའོ། ། ཐུགས་རྗེའི་བྱེ་བྲག་ཆུ་བོ་གངྒཱའི་རྒྱུན་བཞིན་མི་འཆད་པ་ཉི་མའི་ཟེར་ལྟ་བུར་ཤེས་པར་བྱའོ།། སེམས་ཅན་ལ་ཁྱབ་པའི་ཉི་མའི་འོད་བཞིན་ཁྱབ་པས་བདེ་ལྡན་ཕུན་སུམ་ཚོགས་སོ། ། ཞེས་སངས་རྒྱས་ལ་འོད་ཟེར་འབྱུང་བ་དང། སེམས་ཅན་ལ་འོད་ཟེར་འབྱུང་བ་བསྟན་པ། སྟོན་པ་རྡོ་རྗེ་སེམས་དཔས་བསྟན། ཞུ་བ་སྤྱན་རས་གཟིགས་ཀྱིས་ཞུས། སྡུད་པ་དགའ་རབ་རྡོ་རྗེས་བསྡུས་སོ། ཞེས་ལྷ་མོ་འོད་ཟེར་ཅན་གྱི་རྒྱུད་ལས། སངས་རྒྱས་ཡེ་ཤེས་ལུས་ཅན་དུ་བསྟན་པའི་ལེའུ་སྟེ་གསུམ་པའོ།།།། རྒྱ་གར་སློབ་དཔོན་བི་མ་ལ་མི་ཏྲ་དང། བོད་ཀྱི་ལོ་ཙཱ་བ་སྐ་ཅོག་གསུམ་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ལྷ་མོ་འོད་ཟེར་ཅན་གྱི་རྒྱུད་རྫོགས་སོ།།།།
CLOSE WINDOW