CLOSE WINDOW

Gpb037.043: རྩོད་པའི་འཁོར་ལོའི་རྒྱུད
Wylie

། ཨེ་མ་དོན་ལ་ཡེ་ནས་ཆགས་སྡང་མེད།། ཆགས་སྡང་ཐམས་ཅད་འཁྲུལ་བའི་བློ།། དེ་བས་ཆགས་སྡང་ཡོད་ཀྱི་བར།། འཁོར་འདས་གཉིས་སུ་ཤེས་པར་གྱིས།། ཞེས་ཆགས་སྡང་གཅོད་པའི་གསང་ཐིགས་བསྟན་པ་སྟེ་བཅུ་བདུན་པའོ། །།། བཅོམ་ལྡན་འདས་ལྷུན་གྲུབ་བྱ་བྲལ་ངང་ལ་ཕྱག་འཚལ་ལོ།། འཇམ་དཔལ་བཤེས་གཉེན་གྱིས་རང་གི་འདོད་པ་ཟད་པའི་ཚིག་དོན་དུ་བརྗོད་པ།། དེས་འཚལ་དེས་འཚལ་དེས་འཚལ་ལོ། ། ཇི་སྲིད་བདག་དང་འཛིན་པ་ཡོད་ཀྱི་བར་དུ་ན།། ཐམས་ཅད་འཆིང་བའི་དངོས་པོར་བདག་གིས་སོ།། ཇི་སྲིད་བདག་གཞན་གཉིས་སུ་མེད་པ་ན།། བྱ་བྲལ་ལྷུན་རྫོགས་ཆོས་སྐུ་ནམ་མཁའ་བཞིན། ། རང་བྱུང་ཡེ་སེས་སྤྲོས་བྲལ་ཡིན་པར་གོ། ཆོས་ཀྱི་སྐུ་ལ་བདག་གཞན་མེད་པ་ལ།། མ་རིག་པ་བདག་དང་གཞན་དུ་འཁྲུལ་པར་གོ། བདག་གཞན་མེད་པས་འཁོར་བ་ཟད་པར་གོ། དེ་རང་ཉིད་ལ་སངས་རྒྱས་གསུང་བར་ངེས། ། དེ་ལས་གཞན་པའི་སངས་རྒྱས་མེད་པར་ངེས།། ལྟ་སྒོམ་འབྲས་བུ་ལ་སོགས་ཐམས་ཅད་ཀྱང།། དེ་རང་ཡིན་ནི་གཞན་ནི་མིན་པར་རིག། དེ་ལས་གཞན་པ་ཐམས་ཅད་གྲོལ་བར་ངེས། ། བྱ་བ་བྲལ་བས་ལྷུན་གྱིས་གྲུབ་པར་ངེས།། གཞན་གྱིས་རྟོགས་མཉམ་བདག་ནི་མི་བགྱིད་དོ།། དེ་མ་རྟོགས་ན་གྲོལ་བ་མེད་པར་ངེས།། དེ་བས་བྱ་བྲལ་རྫོགས་ཆེན་ཆེ་བར་ངེས།། ཡང་དག་དོན་ལ་རྟོགས་འབྲས་སྒྲིབ་པར་གོ། སངས་རྒྱས་སེམས་ཅན་གཉིས་སུ་མེད་པ་ལ།། སངས་རྒྱས་མིང་དུ་བཏགས་པ་ཡིས།། མི་མཁས་པ་དག་བཅིང་བར་ངེས།། སངས་རྒྱས་མེད་པར་བསྟན་ན་ཡང།། མི་མཁས་པ་དག་བཀྲག་པར་ངེས། ། སངས་རྒྱས་སེམས་ཅན་གཉིས་མེད་ལ།། བདག་ནི་ཐེ་ཚོམ་མ་མཆིས་སོ།། བདག་མེད་ཐེ་ཚོམ་སུ་ཡི་ཡིན།། ཡུལ་མེད་ཐེ་ཙོམ་གང་ལ་ཟ།། དེ་བས་སོམ་ཉི་མ་མཆིས་སོ།། བདག་མེད་ཆགས་དང་རྨོངས་པ་འདོད། ། དེ་ལྟར་སུ་འདོད་བདག་དང་བཅས།། དེ་ལྟ་བས་ན་སངས་རྒྱས་དགོངས་པ་ཡིན།། དུག་གི་བུམ་པ་འོ་མའི་ཁ།། ཁྲོ་ཆུའི་ལུས་ལ་བཙན་དུག་སེམས།། རྒྱུན་ཅན་དམྱལ་བའི་རྒྱུ་ཅན་ལ། ནམ་ཡང་སྤྲེལ་བ་བདག་མི་བགྱིད། ། མ་རིག་རྐྱེན་གྱིས་དབང་སོང་ནས།། གལ་ཏེ་འགལ་བར་བསྟན་གྱུར་ན།། བདག་འཇམ་དཔལ་བཤེས་གཉེན་གྱིས་ལུས་ཡང་དུམ་བུར་གྱུར་ཅིག། མགོ་ཡང་ཚལ་བ་སྟོང་དུ་ཁོས་ཤིག། ཟས་སུ་ཁྲོ་ཆུ་སྐོམ་དུ་མེ་མར་དུ་སོང་ཞིག། ཅེས་རང་དམ་རང་གིས་བཅས་ཏེ།། ཆགས་སྡང་ཟད་པའི་གསང་ཐིགས་བསྟན་པ་སྟེ་བཅོ་བརྒྱད་པའོ།། རྫོགས་སོ།། #།། རྒྱ་གར་སྐད་དུ།།།། བོ་དྷི་ཙིཏྟ་དེ་ཤི་ཀ་ཨེ་ཀ་ཤ་མ་ཧཱ་ཀོ་ཤ་ཏནྟྲ་ནཱ་མ། བོད་སྐད་དུ། བྱང་ཆུབ་སེམས་ཕྱོགས་ཆེན་པོ་ནམ་མཁའ་མཛོད་ཀྱི་རྒྱུད་ཅེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། ཆོས་ཀྱི་དབྱིངས་ཀྱི་ཕོ་བྲང་དུ། རིག་པ་ཆོས་ཀྱི་སྐུས། རང་གི་རྩལ་ཤེས་རབ་ལོངས་སྤྱོད་རྫོགས་པའི་སྐུ་རིགས་ལྔའི་བདེ་བར་གཤེགས་པ་རྣམས་ལ། ཏིང་ངེ་འཛིན་གྱིས་བཤད་པ་མེད་པར་བཤད་པའོ། ། དེ་ནས་རིགས་ལྔའི་བདེ་བར་གཤེགས་པ་རྣམས་ཀྱི། འོག་མིན་ལྕང་ལོ་ཅན་གྱི་ཕོ་བྲང་དུ། སངས་རྒྱས་གཞོན་ནུ་མཚན་རབ་ཏུ་ཤེས་པ་ལ། ཏིང་ངེ་འཛིན་གྱིས་བཤད་པ་མེད་པ་བཤད་པའོ། དེ་ནས་བྱང་ཆུབ་ཡིད་འདྲེས་ཀྱི་ཚུལ་དུ། སངས་རྒྱས་གདུགས་དམ་པ་ཉིད་ཀྱི་ཐུགས་ལས་ཕྱུང་སྟེ་ལྗགས་ཀྱི་རྩེ་ལས་སྤྲོས་ནས། རྫོགས་པ་ཆེན་པོ་ནམ་མཁའ་མཛོད་ཀྱི་རྒྱུད།། ཆོས་ཉིད་ནམ་མཁའ་འདི་གསུང་བར་མཛད་དོ། ། དེ་ཡང་བསྐལ་པ་བཟང་པའི་བྱང་ཆུབ་སེམས་དཔའ་འོད་ཟེར་ཞི་བས། བཅོམ་ལྡན་འདས་ལ་གསོལ་པ། ཐུགས་ཡེ་ཤེས་ཀྱི་དཀྱིལ་འཁོར་རང་བྱུང་དུ་འོད་འབར་བ། མཁྱེན་པའི་ཤེས་རབ་ཕྱིར་མི་ལྡོག་པ་དྲུག་དང་ལྡན་པ། སེང་གེ་ལྟ་བུའི་ལྟ་སྟངས་ཅན། གཟི་བྱིན་ཁོང་ནས་འཆར་བ། དཔལ་བདེ་བ་ཆེན་པོ་ལ་ཕྱག་འཚལ་ལོ།། སྐུ་གསུང་རྒྱལ་བའི་དགོངས་པ་མཐར་ཕྱིན་པ།། ཡོན་ཏན་དཔག་མེད་སྐུ་ལ་ཕྱག་འཚལ་འདུད། ། མཐའ་ཡས་མུ་མེད་ཆོས་ཀྱི་དོན་བརྗོད་པ། ཤེས་རབ་མཐར་ཕྱིན་རང་བཞིན་རྣམ་པར་དག། བདེ་ཆེན་འགྱུར་མེད་སྐུ་ལ་ཕྱག་འཚལ་འདུད།། མཉམ་ཉིད་མི་གཡོ་འགྱུར་མེད་ཆོས་ཀྱི་སྐུ། ཐུགས་རྗེའི་འོད་ཟེར་སྤྱན་གསུམ་རྣམ་པར་དག། ཡོན་ཏན་རྒྱས་པ་གསེར་གྱི་མདོག་འདྲ་ལ།། ཉི་མ་སྟོང་གི་འོད་ཟེར་འཕྲོ་བའི་ཚེ།། བྱང་ཆུབ་མྱུ་གུ་སྤྲུལ་པ་གྲངས་མེད་འཕྲོ།། འགྲོ་དོན་མཐར་ཕྱིན་ཁྱོད་ལ་ཕྱག་འཚལ་བསྟོད། ། རྡོ་རྗེ་རྩེ་མོ་ནམ་མཁའི་མཐའ་དང་མཉམ།། རྡོ་རྗེའི་གདན་ནི་ཟབ་ཅིང་གཏིང་དཔག་དཀའ།། རྡོ་རྗེའི་སྐུ་ནི་སྣ་ཚོགས་ཅིར་ཡང་སྟོན།། རྡོ་རྗེའི་གསུང་ནི་རྣམ་པ་ཅིར་ཡང་སྒྲོགས།། རྡོ་རྗེའི་ཐུགས་ནི་འགྱུར་མེད་མྱ་ངན་འདས། ། བདག་འདྲ་དམན་པས་བསྟོད་པར་མི་འོས་ཀྱང།། ཉིད་ཀྱི་ཞལ་མཐོང་གསུང་ཐོས་ཐུགས་མཁྱེན་པས།། འགྲོ་བ་མཐའ་མེད་དྲང་བའི་དོན་སླད་དུ།། ཀུན་བཟང་རྫོགས་ཆེན་སྐུ་ལ་ཕྱག་འཚལ་འདུད། ། ཅེས་དམ་པའི་དབུའི་གཙུག་ཏོར་དུ་བཞག་ནས། བསྐལ་པ་བང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་ཉེ་བར་ཞི་བས། ཡི་དམ་གྱི་ལྷ་ལ་ཕྱག་འཚལ་ཏེ་སྨྲེ་སྔགས་དྲག་ཏུ་བཏོན་ནས་ཡི་དམ་གྱི་ལྷ་ལ་ཕུལ་བས། བཛྲ་ས་མ་ཡ་ཛཱ་ཞེས་མདུན་གྱི་ནམ་མཁའ་ལ་འོད་ཀྱི་སྐུ་སྣང་བ་ཟེར་དང་བཅས་པར་བྱོན་ནས་ལུང་བསྟན་པ།། ལྟ་བ་གཅོད་པར་བྱེད་པ་འདི་ལུང་སྟོན་ཏོ།། ཀྱེ་ཧོ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱོད་རང་གི་འོད་ཟེར་ཉེ་བར་ཞི་བ་ནི། བྱང་ཆུབ་སྙིང་པོ་འབྲི་གུ་ཏ་ཆེན་པོ་བག་ཆགས་ཀྱི་སྦུབས་སུ་ཉེ་བར་ཞི་བས། འབྲི་གུ་ཏའི་སྒྲིབ་ཤིང་དུ་བག་ཆགས་ཉེར་ལེན་གྱི་ཕུང་པོ་འབྱུང་བས། སྣང་བ་སྒྲིབ་ཤིང་དུ་འཆར་གྱིས། ཁྱོད་འདི་ནས་ལྷའི་ཡུལ་ཡངས་པ་ཆེན་པོའི་གྲོང་ཁྱེར་བདེ་བ་ཅན་དང་པད་མོ་ཅན་གྱི་གནས་སུ་སོང་ལ། སངས་རྒྱས་མི་འཁྲུགས་པ་ཞེས་བྱ་བ་བཞུགས་ཀྱི།། དེ་ལ་བརྐྱང་ཕྱག་ཕུལ་ལ་ཞུས་ཤིག། ཡང་དག་པར་རྫོགས་པའི་སངས་རྒྱས་མི་ཕྱེད་པའི་ལྟ་བ་ལུང་སྟོན་པར་འགྱུར་རོ།། ཞེས་ལུང་བསྟན་པས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་ཉེ་བར་ཞི་བས། ལྷའི་ཡུལ་ཡངས་པ་ཆེན་པོ་གྲོང་ཁྱེར་བདེ་བ་ཅན་པདྨོ་བདེ་བ་ཅན་དུ་ཕྱིན་པ་དང། རང་གི་འབྲི་གུ་ཏ་གྱེན་དུ་བགྲེང་པ་དང། བག་ཆགས་ཀྱི་ཕུང་པོ་ཡེ་ཤེས་ཀྱི་དབང་དུ་གྱུར་ཏེ། དེ་མ་ཐག་ཏུ་སངས་རྒྱས་མི་འཁྲུགས་པའི་ཞལ་མཐོང་སྟེ། བརྐྱང་ཕྱག་ཕུལ་ནས་ཐལ་མོ་སྦྱར་ཏེ་གསོལ་བ་བཏབ་པ། ཡི་གེ་དགུ་ལྡན། རྟོགས་པ་དྲུག་ལྡན། རང་ས་བཞི་ལྡན། མཆོངས་ས་ལྔ་ལྡན། ཡེ་ཤེས་ཅིག་ཆོད། སྣང་བ་རང་ལོག། འཇུག་པ་རང་ས། དུས་ཚོད་རྒྱལ་ས། ཆོས་ཆེན་པོ་ཡང་གསང་བ་རྨད་དུ་འབྱུང་བ་བསྟན་དུ་གསོལ་ཞེས་གསོལ་ཏོ།། བཛྲ་ས་མ་ཛཿཞེས་ལུང་བསྟན་པ། ཀྱེ་མ་ཧོ་བྱང་ཆུབ་སེམས་དཔའ་ཉོན་ཅིག། ལྟ་བའི་རྫོང་ལ་གྲུབ་མཐའི་གཏེར་སྦོས་ཤིག། སྤྱོད་པ་རང་བྱུང་གི་རྫོང་ལ་ཡེ་ཤེས་ཐུག་ཕྲད་ཀྱི་གཏེར་སྦོས་ཤིག། གཞིའི་ཐིག་ལེ་བཟང་པོ་ལ།། ལྟ་བའི་ཡི་གེ་དགུ་པ་གཅེས་སོ།། ལམ་གྱི་ཐིག་ལེ་བཟང་པོ་ལ།། བདེ་གཤེགས་ཀྱི་ཉིང་ཁུག་གཅེས་སོ། ། འབྲས་བུའི་ཐིག་ལེ་བཟང་པའི་རྩེ་མོ་ལ།། སྒོམ་ཉམས་དྲུག་པའི་མན་ངག་གཅེས་སོ།། སྨིན་པར་བྱེད་པ་བཟང་པོའི་རྒྱན་ལ།། གསང་བའི་དཀྱིལ་འཁོར་གསུམ་གྱི་བསྡུས་དོན་གཅེས་སོ།། བཟང་པོ་རྒྱན་དང་ལྡན་པ་ལ། ། རྐང་མེད་མཁའ་ལ་འགྲོ་བ་གཅེས་སོ།། ཡེ་ཤེས་ཟང་ཐལ་གྱི་དགོངས་པ་ལ།། ལམ་ལ་བར་ཆད་ཀྱི་སྒྲིབ་པ་མེད་དོ།། བྱང་ཆུབ་ཀྱི་སྙིང་པོ་ལ་སྐྱེ་ཤི་མེད་པས་འཁྲུལ་བའི་བར་དོ་མེད་དོ།། སྐུ་གསུམ་རང་བཞིན་གྱིས་རྣམ་པར་དག་པ་ལ། ལས་དགེ་སྡིག་གིས་ཕན་གནོད་མེད་དོ།། དེ་ནས་བྱང་ཆུབ་སེམས་དཔའ་འོད་ཟེར་ཉེ་བར་ཞི་བས། སངས་རྒྱས་མི་འཁྲུག་པ་ལ་བསྟོད་པ་ཕུལ་ཏེ་ཞུས་པ། ཨེ་མ་ཧོ་སངས་རྒྱས་བདེ་ཆེན་སྐུ། ། ཉོན་མོངས་སྐྱོན་གྱིས་མ་གོས་ཤེས་རབ་གསུང།། མ་ཆགས་སྐྱོན་གྱིས་མ་གོས་སྐུ་མདོག་དཀར།། ཐེག་པ་ཀུན་གྱི་ནང་ནས་ཡངས་ཆེ་བ།། གླང་ཆེན་གཤིབས་པའི་གདན་ལ་སྐྱིལ་མོ་ཀྲུང། ཉམས་ཀྱི་གདམས་ངག་ལྷུག་པ་རིན་པོ་ཆེ་སྒྲོན་མེ་ཞེས་བྱ་བ་ཨ་ཏི་སྤྱི་རྒྱུད་དེ་རྫོགས་སོ།།།། རྒྱ་གར་སྐད་དུ། བེ་ཧཱུ་ཏེ་ཙཀྲ་ཏནྟྲ། བོད་སྐད་དུ། རྩོད་པའི་འཁོར་ལོའི་རྒྱུད། བཅོམ་ལྡན་འདས་རོ་ལངས་བདེ་བ་ལ་ཕྱག་འཚལ་ལོ།། རིན་པོ་ཆེ་རྩོད་པ་སྒྲའི་འཁོར་ལོ། འཇམ་དཔལ་བཤེས་གཉེན་ལ་བཤད་པ།། གནས་ནི་བྱང་ཆུབ་ཤིང་དྲུང་དུ། ། སྟོན་པ་དགའ་རབ་རྡོ་རྗེ་ཡིས།། འཁོར་ནི་པཎྜི་ཏ་ཉིས་བརྒྱ་ལ།། དུས་ནི་རྩོད་པ་སྒྲ་ཡི་དུས།། བསྟན་པ་དྷ་ཧེ་ནའི་འདུ་ཁང་དུ།། རྩོད་པའི་འཁོར་ལོ་འདི་བསྟན་ཏོ།། རྩོད་པའི་གཞི་ལ་གཉིས་སུ་འདུས།། གཞི་ཡི་དོན་ལ་རྩོད་པ་དང། ། ལམ་གྱི་ཆོས་ལ་རྩོད་པའོ།། རྫོགས་པ་ཆེན་པོའི་རྩོད་པ་འདི་གཞི་ཆོས་ཉིད་ཐིག་ལེ་ཉག་གཅིག་ཏུ་དམ་བཅའ།། གཏན་ཚིགས་ཅི་ཡི་ཕྱིར་ཞེ་ན།། གཉིས་སྣང་མེད་པའི་ཕྱིར་ཞེས་བྱ།། གཉིས་སུ་སྣང་བའི་སྐྱོན་གཏོང་ལ། ། ཁྱོད་རང་ལ་གཉིས་སུ་སྣང་ངམ།། ང་ཡི་གྲུབ་མཐའ་ལ་སྐྱོན་གཏོང།། ང་ལ་སྐྱོན་གཏོང་ན།། རིག་པས་གཏོང་ངམ།། ཚད་མའི་གཞལ་བྱས་གཏོང།། རིག་པས་གཏོང་ན།། ཆོས་ཉིད་ཀྱི་རིག་པས་གཏོང་ངམ། ། འཐད་པ་སྒུབ་པའི་རིག་པས་གཏོང་ངམ།། བྱ་བ་བྱེད་པའི་རིག་པས་གཏོང་ངམ།། ལྟོས་པའི་རིག་པས་གཏོང།། ཆོས་ཉིད་ཀྱི་རིག་པས་གཏོང་ཟེར་ན།། ཆོས་དང་ཆོས་ཉིད་རིག་པ་གསུམ་དུ་འདོད་དམ། ། གཅིག་ཏུ་འདོད་དམ།། ཞེས་ཕར་འབྲིའི།། རིག་པའི་རྒྱབ་གནོན་ཕར་ལ་བྱའོ།། གསུམ་དུ་འདོད་ན།། རིག་པ་ལས་ཆོས་བྱུང་ངམ།། ཆོས་ལས་རིག་པ་བྱུང།། ཉིད་ལས་རིག་པ་དང་ཆོས་བྱུང།། དེ་གསུམ་ཁྱོད་རང་ཡིན་ནམ་ལོགས་པ་ཡིན། ། ཞེས་འདྲི་སྟེ། གང་ཡང་ཁས་མི་ལེན་ན།། གོང་དུ་མ་བཅས།། སྭཱ་ཧཱ། ཆོས་ལས་རིག་པ་བྱུང་ཟེར་ན་རྒྱ་ཆད་བ་དང།། ཡུལ་ལས་རིག་པ་བྱུང་བའི་སྐྱོན།། འགལ་ལོ་ཉིད་ལས་རིག་པ་བྱུང་ཟེར་ན། ། རྒྱ་ཆད་པའི་སྐྱོན་བཏང་ངོ།། ཅི་སྟེ་ཟེར་ན། ཉིད་ཀྱི་གོ་བ་འདྲིའོ།། ཉིད་ལ་རྒྱུ་རྐྱེན་ཡོད་ནས་བྱུང་ངམ་མེད་ན་བྱུང་འདྲིའོ།། རྒྱུ་རྐྱེན་ཡོད་ན་ཉིད་མ་ཡིན་པའི་སྐྱོན་འབྱུང་ངོ།། རྒྱུ་རྐྱེན་མེད་ན་མེད་ནས་འབྱུང་ན། ། ནམ་མཁའ་ལ་མེ་གཏོང་བར་འབྱུང་བར་ཐལ་ལོ།། ཅི་སྟེ་གཞི་མེད་པ་ལས་འབྱུང་བའི་ཕྱིར་རོ།། དེ་བས་ཀྱང་འདི་ལྟ་ཕར་འདྲིའོ།། རིག་པ་ཁྱོད་གཉིས་གཅིག་ནས་གཏན་ལ་འབེབས་སམ། ། མི་གཅིག་ཀྱང་གཏན་ལ་འབེབས།། གཅིག་ཟེར་ན་རིག་པས་རིག་པ་གཏན་ལ་འབེབས།། འབེབས་ན་ཐུག་མེད་དུ་ཐལ་ལོ།། རིག་པས་རང་གཏན་ལ་འབེབས་ན་འབྲེལ་མེད་དུ་ཐལ་ལོ།། གཅིག་ལ་འབེབས་མཁན་མེད་པར་ཐལ་ལོ། ། ཐ་དད་ན་འབྲེལ་བ་མེད་དེ་དབབ་ཏུ་མི་འདོད་པར་ཐལ་ལོ།། འབྲེལ་པ་ཡོད་ཟེར་ན།། བདག་ཉིད་གཅིག་གམ་འདྲིའོ།། བདག་ཉིད་གཅིག་ན།། བདག་རིག་པ་གཅིག་གམ། ། རིག་པ་བདག་ཏུ་གཅིག། བདག་རིག་པ་གཅིག་ན།། གོང་སྐྱོན་འོང།། དེ་ལས་བྱུང་བའི་འབྲེལ་བ་ཡོད་ཟེར་ན།། རྒྱ་ཆད་པའི་སྐྱོན་འོང་ངོ།། དེ་ལས་བྱུང་ན་རིག་པ་བདག་ལས་བྱུང་ངམ།། བདག་ལས་རིག་པ་བྱུང། ། བྱུང་བའི་སྐྱོན་འོང།། སྤྲུལ་ཤུགས་ནས་བྱུང་བའི་འབྲེལ་པ་དང་འདྲ་སྟེ།། ལྡོག་ཏུ་མི་འདོད་པའི་སྐྱོན་འོང་སྟེ་རྒྱ་ཆད་པར་ཐལ།། མི་ཤི་བའི་ལུས་ལ་རིག་པ་མི་འབྱུང་བ་དང་འདྲ་སྟེ།། ཕྱིས་དོན་བྱེད་མི་ནུས་པའི་སྐྱོན་འབྱུང་ངོ། ། ཡང་ན་བདག་ཉིད་ལས་རིག་པ་བྱུང་ན་བྱུང་པའི་ནད་ཀས།། འབྲེལ་མེད་དུ་ཐལ་ལོ།། རིག་པ་ལས་བདག་བྱུང་ན།། ཤེས་རིག་རྫས་སུ་ཐལ་ལོ།། རང་གི་ཤེས་པར་བྱ་བ་ནི།། ཐིག་ལེ་ལྷུན་གྲུབ་ཆོས་ཅན་ཞེས་དམ་བཅའ། ། ཅིའི་ཕྱིར་མ་འགགས་རག་ཤར་བའི་ཕྱིར།། ཐིག་ལེ་རྫས་ཡོད་དུ་ཐལ་ཟེར་ན།། ལྷུན་གྲུབ་རྫས་ཡོད་མ་སྤངས་པའི་ཕྱིར།། འཇིག་པར་ཐལ་ཟེར་ན་ལྷུན་གྲུབ་འཇིག་མ་བཀག་ཅེས་བྱ། ། ཁྱོད་ལྷུན་གྲུབ་མིན་ནམ་ཞེས་འདྲི།། ཡིན་ཟེར་ན་འདོད་ཐོག། མིན་ཟེར་ན་མུ་སྟེགས་རྟག་ཆད་དུ་ཐལ་ཞེས་འགལ་ལོ།། སྒྲའི་འཁོར་ལོ་ལས་བརྒལ་བ་དང་པོའོ།།།། འཐད་པ་སྒྲུབ་པས་གཏོར་ཟེར་ནས། ། སྣང་བ་འདི་རང་མི་ཤར་དུ་འཐད་དེ།། འཐད་པས་འོ་ན་འཐད་པས་སྣང་བ་ཤར་མང་དུ་འབྱུང་བར་ཐལ།། བྱ་བ་བྱེད་པའི་རིག་པས་གཏོང་ཟེར་ན།། འཁྲུལ་པའི་ཤེས་པ་ལ་ཐག་བས་སྦྲུལ་གྱི་བྱ་བ་བྱས་ནས་འཁྲུལ་ཏེ། ། རྟན་དུ་སྦྲུལ་གྱི་བྱ་བ་བྱེད་པར་ཐལ།། ལྟོས་པའི་རིག་པས་གཏོང་ཟེར་ན།། འཕང་ལས་ལྟོས་ན་མདུང་རིང།། མདུང་ལས་ལྟོས་ན་མདའ་རྒྱང་རིང་སྟེ།། ངེས་པ་མེད་པར་ཐལ་ལོ།། རྒྱུད་ཀྱི་གཏན་ལ་འབེབས་ཟེར་ན། ། རྒྱུད་རང་ཡིན་ནམ་ལོགས་པ་གཅིག་དྲིའོ།། རང་ཡིན་ཟེར་ན་གཏན་ལ་དབབ་པ་དང་འབེབས་པ་མི་རུང་སྟེ། རལ་གྲི་རལ་གྲི་རང་གིས་སོ་ལ་ཆོད་པ་ཐལ་ལོ།། གཉིས་ཡིན་གོང་དུ་འབྲེལ་རྟག་གོ། དེ་ཡང་ལུང་ཡང་དེ་འགྲོའོ།། མཚོན་པ་གཉིས་པའོ།།།། ཚད་མས་གཏན་ལ་འབེབས་ཟེར་ན། ཚད་མ་དེ་རང་ཡིན་ནམ་མིན་ཅེས་འདྲིའོ།། རང་ཡིན་ཟེར་ན་གཏན་ལ་དབབ་ཏུ་མི་བཏུབ་སྐྱོན་གཏང་སྟེ། ། གསེར་གྱི་སེར་པོ་གཏན་ལ་འབེབས་པ་དང།། སེར་པོས་གསེར་གཏན་ལ་འབེབས་པ་དང་ཅེས་འབྱུང་ངོ།། ཚད་མ་ལོགས་ཅིག་ཡིན་ནོ་ཟེར་ན། ཆོས་ཚད་མ་དང།། དོན་ཚད་མ་དང་འཇལ་བྱའི་ཤེས་པ་ཅིག། གཞལ་བྱའི་ཡུལ་མང་དུ་སྨྲ་ན་འདི་སྐད་བྱའོ།། འུབ་ཀྱི་བསྡུས་ནས་ཡུལ་ལ་འཇལ་ལམ།། ཤེས་པ་ལ་མཇལ།། གཉིས་ཀ་ལ་འཇལ་ཅེས་འདྲི།། ཡུལ་ལ་འཇལ་ན་ཡུལ་ཉམས་སུ་མྱོང་ནས་འཇལ་ལམ། ། མ་མྱོང་ནས་འཇལ།། མ་མྱོང་ནས་འཇལ་ན་མོ་གཤམ་བུ་ཆེ་ཆུང།། རི་བོང་རྭ་རྣོ་རྟུལ་ཀྱང་ཤེས་པར་ཐལ།། ཤེས་སོ་ཟེར་ན་དབང་པོའི་མངོན་སུམ་གྱིས་གསལ།། ཅེས་སྐྱོན་བཏང་ངོ།། ནམས་སུ་མྱོང་ནས་འཇལ་ན། ། ཆུ་བོའི་རོ་མྱོང་ཡང།། ཆུ་བོའི་རོལ་ཚོལ་བ་དང་འདྲ་སྟེ་ཐུག་མེད་དུ་ཐལ་ལོ།། ཤེས་པ་ལ་འཇལ་ན་ཤེས་པ་དངོས་པོ་ཡོད་ནས་འཇལ་ལམ་མེད་ཀྱང་འཇལ།། དངོས་པོ་ཡོད་ཟེར་ན་མངོན་སུམ་གྱིས་གསལ། ། མེད་ནས་འཇལ་ན་རི་བོང་རྭ་ལ་མཐོ་ཚད་གཞལ་དུ་བཏུབ་པར་ཐལ།། ཡོད་རུང་མེད་རུང་འཇལ་ན།། ལུང་དུ་མ་བསྟན་པར་ཐལ་ལོ།། མཚོན་པ་གསུམ་པའོ།།།། དེ་ལྟར་སྒྲོས་བཏགས་ཆམ་ལ་ཕེབས་ནས། ། རང་གི་མཚན་ཉིད་བསྟན་པར་བྱ།། རང་སྣང་དུ་རང་ཤར་བས།། ཡུལ་ལས་གཞལ་དུ་མེད།། རང་བྱུང་ཡེ་ཤེས་ཤར་བས།། ནང་ལ་གཞལ་དུ་མེད།། འདུ་འབྲལ་མེད་པས་ཡུལ་དང་ཡུལ་ཅན་དུ་གཞལ་དུ་མེད། ། ཐམས་ཅད་ཡེ་ནས་རང་སར་གྲོལ་བས་འབྲེལ་བ་རྩིར་མེད།། ཤེས་རིག་གི་ཡུལ་ལས་གྲོལ་བས།། རྒྱུད་ལུང་རིག་པས་གཏན་ལ་དབབ་ས་མེད།། ཅེས་གསུངས་སོ།། མཚན་པ་བཞི་པའོ།།།། ཤེས་པ་འཁྲུལ་ཏེ། ། རྒྱལ་བ་རིགས་ལྔ་འོད་དཀར་དམར་ལྔ་རྟེན་པས་འཁྲུལ།། བསྒྲུབས་པས་གོལ་ཏེ།། རང་སྣ་ཆོས་སྐུ་ལ་བདེ་བ་འདོད་ཅིང་སྒྲུབ་པས་འཁྲུལ།། སྒོམ་པས་རླག། ཡེ་ནས་རང་གསལ་སྒོམས་བས་རང་གསལ་སྟོང་པས་རླག། ཡུལ་ཅན་གྱི་གོལ་ཏེ་སྤང་བླང་གི་ལན་ནོ།། སྣང་བ་སྒྲིབ་གཡོགས་ཀྱི་ཆོད།། སྣང་བ་རང་གསལ་ལ་འབྱུང་བ་ལྟར་མཐོང་བས་ཆོད།། རང་བྱུང་མིན་ཏེ་ཡེ་ཤེས་མེད།། ཆོས་ཉིད་ཡིན་ཏེ་སྐུ་མིན།། སྙིང་པོ་ཡིན་ཏེ་ཡེ་ཤེས་མིན། ། དེ་ལྟར་ཤེས་པ་ནི་རང་བྱུང་ཡིན་ལ་ཡེ་ཤེས་ཡིན།། ཆོས་སྐུ་ཡིན། སྙིང་པོ་ཡིན། ཐིག་ལེ་ཡིན། ཉག་གཅིག་ཡིན། ཞེས་གསུངས་སོ།། འདའ་ཧེ་ནའི་འདུ་ཁང་དུ།། མཁས་པ་འཇམ་དཔལ་བཤེས་གཉེན་ལ་ཐིག་ལེ་ཉག་གཅིག་གྲུབ་མཐའ་བསྟན། ། རྩོལ་བའི་སྒྲའི་འཁོར་ལོ་འདི།། ཆུ་སྲིན་པིར་གྱི་གྲེ་བ་རུ།། རུ་སྦལ་ནག་པོ་འི་ཆུད་པ་བཞིན།། བསྐལ་པ་ཁྲུགས་ཀྱང་ཁར་མ་དབྱུང།། ཞེས་གདམས་སོ། ། རྨོངས་པས་མི་གོ་དྲིས་ལན་ཁོང་དུ་ཆུད།། སྦྱངས་པའི་སྒྲ་དང་སོང་འགྱུར་འབྱུང་བ་དང།། བྱུང་བ་ཅན་དང་སྒྲ་སྐྱོན་རྣམས་བརྒྱུད།། མན་ངག་ཁོང་དུ་བཅས་ཏེ་འགའ་ཙམ་བྲིས་པའོ།། མཚོན་ཆའི་འཁོར་ལོ་དུམ་བུ་བཞི་པ་རྫོགས་སོ། །།། རྒྱ་གར་སྐད་དུ། ཨབྷི་ཥིཉྩ་གུ་རུ་རཏྣ་ཏནྟྲ། བོད་སྐད་དུ། དབང་བསྐུར་བླ་མ་རིན་པོ་ཆེའི་རྒྱུད། བཅོམ་ལྡན་འདས་དཔལ་རྡོ་རྗེ་སེམས་དཔལ་ལ་ཕྱག་འཚལ་ལོ།

CLOSE WINDOW