| Wylie |
། ཨཱ་ས་ཨཁ། བཛྲཱ་པཱ་ནཱི་པྲཱ་སཱ་རཱ་ཏཱ་ཎཱ་ཏཱ་འདུ་པྲ་ཡཱ་ནཱ་མཧི། གཡུང་དྲུང་གི་ཀ་བ་བཞི་སྟེང་ན། རིན་པོ་ཆེ་སྣ་ལྔའི་མཆོད་རྟེན་རང་བྱུང་སྟེ། མུ་ཏིག་གི་འཁོར་ལོ་ལ། རིན་པོ་ཆེ་བྱུར་བུའི་རྒྱལ་མཚན་བཙུགས་ནས། གཡུའི་བྱ་ཁུ་བྱུག་སྐད་ལན་གསུམ་སྒྲོགས་པའི་མན་ངག། ཐུན་མོང་མ་ཡིན་པའི་དགོངས་པ་ཁྱད་པར་དུ་འཕགས་པའི་རྒྱུད་བཞི་ལ། མན་ངག་གི་རྒྱན་ལྔས་སྤས་ཏེ། བཤད་རྒྱུད་གསུམ་གྱིས་ཤེས་པའི་མཐའ་བཀྲོལ་ནས། སངས་རྒྱས་ཡེ་ཤེས་ཀྱི་ལུས་ཅན་དུ་རྣམ་པར་གྲོལ་བའི་དུས་ན། ཆོས་ཐམས་ཅད་ལ་མ་རྨོངས་པའི་ཤེས་རབ་ལྷག་པ་རང་བྱུང་དུ་སྐྱེ་བར་འགྱུར་ཏེ། བརྡ་དང་སྒྲ་དང་ལུང་སྟོན་པ་བདེ་བ་ཅན་ལས་ཀྱང་གསུང་རིག་པའི་ཁུ་བྱུག་སྒྲ་སྒྲོགས་པར་འགྱུར་རོ།། ཆོས་ཅན་དང་ཆོས་ཉིད་མི་འགལ་བར་བསྟན་པའི་ལེའུ་སྟེ་བཅུ་གསུམ་པའོ།། རྟསྩགྦ། མྨ་དྷ་ལཾའཧཾ་ས་འདུ་དྷྲཱ་ཧྲཱི་སཱཾ་བྷ་སཾ་བྷ། མ་ཕམ་གི་མཚོ་ལ། གསེར་གྱི་ཉ་མོ་འགྱུ་བའི་མན་ངག། ཤེས་རབ་ཀྱི་བདག་ཉིད་ཏིང་ངེ་འཛིན་གྱི་དབང་དུ་གྱུར་ཏེ། ཐབས་དང་ཤེས་རབ་གཉིས་སུ་མེད་པ་ལས། ཆོས་ཀྱི་དབྱིངས་ཀྱི་ཡེ་ཤེས་རང་བཞིན་གྱིས་གསལ་བའི་དུས་ན། ངང་ཀུན་ཏུ་བཟང་མོ་མཁའ་ཀློང། རྣམ་པར་དག་པའི་ཀློང་ན། ཡིད་རང་བྱུང་གི་ཡེ་ཤེས་ཆེན་པོ། ནམ་མཁའི་མཐོངས་ནས་གསལ་བའི་སྒྲོན་མ་དྲག་པོ་ཤར་བའི་ཚུལ་ཏེ། དེ་ཉིད་རང་བྱུང་རང་ཞི་བར་སྣང་གི་མཐོངས་ན་འབྱུང་བའི་རླུང་བྱུང་བའི་དུས་སུ། འབྱུང་བའི་དང་སྙིགས་དབྱེ་བའི་ཚུལ་དུ་སེམས་དང་ཡེ་ཤེས་འབྱེད་པའི་དུས་སུ། བག་མོ་དང་རེག་པའི་ཚུལ་ཏེ། རྐྱེན་འཇུག་པའི་མཚན་ཉིད་མཁས་པས་བརྟག་གོ། རྟོགས་པའི་ངང་ལ་བཞག་པའི་ལེའུ་སྟེ་བཅུ་བཞི་པའོ།། བྷུང་བྷ་འདུ་མཧ་གྷ་ལཱི་སྭ་འདུ་དྷར་མཱ་ཙཎྜ་ལཱི་དྷརྨ་ཀྷཱ་ཡ་ཤྲཱི་ཉཱ་སཱ་པཱ་རྷི་ཨཱ་ཨཧ། གངས་ཏི་སེའི་ཁ་ནས་ཆུ་བོ་ཆེན་པོ་བཞི་འབབ་པའི་མན་ངག། མན་ངག་གི་བཀའ་ཆེན་པོ་བཞིས་ཆོས་ཐམས་ཅད་ཀྱི་དེ་བཞིན་ཉིད་གཏན་ལ་དབབ་པ་ནི། རིག་པའི་ཆོས་ཀྱི་སྐུ་རྡོ་རྗེ་ཚིག་གསུམ་གྱིས་གཏན་ལ་ཕབ་སྟེ། དཔེ་དོན་རྟགས་དང་གསུམ་གྱིས་མན་ངག་ཐམས་ཅད་ཀྱི་མཐའ་གཅད་ལ། རང་གི་མཚན་ཉིད་ཀྱི་ཡུལ་དུ་གཞག་པ་དང། ཆོས་ཐམས་ཅད་བློའི་ཡུལ་དུ་ཤེས་པར་བྱས་ཏེ། བསྒོམ་བྱའི་ཡུལ་དུ་མི་གནས་པར་བྱ་བ་དང། དགོངས་པ་ཉག་གཅིག་ཡུལ་དུ་སྣང་བའི་དུས་སུ། ཆོས་ཐམས་ཅད་ཀྱིས་མ་བཅིངས་མ་བཀྲོལ་བ་དང། རང་བྱུང་གི་ཡེ་ཤེས་དང་རྟོགས་པའི་ཡེ་ཤེས་མི་ཕྱེད་པའི་དུས་ན། བདག་ཉིད་ཆེན་པོ་མི་གནས་པའི་ཡེ་ཤེས་སུ་མ་སྐྱོལ་དང།། སངས་རྒྱས་ཀྱི་བདེན་པ་མཐོང་བའི་དུས་སུ་ཕྱིར་ལྡོག་པའི་མཐའ་ཡོད་དེ། བདག་གི་དེ་ཁོ་ན་ཉིད་བརྟག་པའི་ཤེས་རབ་ཁོ་ནས་བརྟག་གོ། ལྟ་བ་ཐམས་ཅད་ཀྱི་མདོ། རྒྱུད་ཐམས་ཅད་ཀྱི་ཕྱོགས། སྒྲ་གཅིག་གི་བརྡ་བཅོ་ལྔ་བསྟན་པའི་མན་ངག། རིན་ཆེན་སྤུངས་པའི་མདོ། ཡང་ནས་ཡང་དུ་སྦས་པའི་གཏེར། རྗེའི་བླ་དཔེ་པོ་ཏི་སྨུ་གུ་བསེ་ཁོང་ནག་གི་གླེགས་བམ། དགའ་རབ་རྡོ་རྗེ་རྒྱའི་བཀྲ་ཤིས་ཁྲི་སྒོ་ནས་སྟོན་ནས་ཉིད་ཀྱི་ཐུགས་དམ་དུ་བཅངས་ནས། བཎྜི་ཏ་རིམ་པར་བརྒྱུད་པའི་གཞུང། བི་མ་ལས་རྗེའི་ཕྱག་ཏུ་གཏད་དེ་མཁའ་འགྲོ་མའི་རྒྱས་བཏབ་བོ།། རྗེས་རྟ་ངང་པ་གསེར་སྒོང་ལ། ཟ་ཕུག་སྟན་ཕབ་དངུལ་གྱི་སྒོ་གསེར་གྱི་པ་ཏྲ་ཅན་བཏད་ནས། ཁ་གསེར་དང་ཁ་གཡུ་དར་ཟབ་དང། ཕྲ་མེན་གྱི་སྐྱོགས་སུ་དཀྲུགས་པ་ཕུལ་ཏེ། ཡང་ནས་ཡང་དུ་ཞུས་པ་ལགས་སོ།། སངས་རྒྱས་འདུས་པ་མན་ངག་གི་རྒྱུད་ལེའུ་བཅོ་ལྔ་པ་རྫོགས་སོ། །།། རྒྱ་གར་སྐད་དུ། ཤྲཱི་མཉྫུ་ཏན་ཏྲ་དུ། བོད་སྐད་དུ། འཇམ་དཔལ་འདུས་པའི་རྒྱུད། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། འོག་མིན་དུ་ནི་བཞུགས་ནས་ནི། སངས་རྒྱས་སེམས་ཅན་རྒྱབ་གྱེས་དུས། འཁོར་གྱི་རྡོ་རྗེ་སེམས་དཔའ་ལ། ཡང་ཏི་ནག་པོའི་བསྟན་པ་ཤར། སྡུད་བྱེད་རོ་ལངས་བདེ་བས་བསྡུས།། གླེང་གཞིའི་ལེའུ་སྟེ་དང་པོའོ།། དེ་ནས་རྡོ་རྗེ་སེམས་དཔའ་ཡིས། ། ཀྱེ་སྟོན་པ་ཀུན་ཏུ་བཟང་པོ་ལགས།། རྫོགས་པ་ཆེན་པོའི་དོན་ཆེན་ལ།། དབང་ལ་བསྐུར་བའི་དོན་རྣམས་དང།། ལམ་སྦྱང་བགྲོད་ཚོགས་བསག་པ་དང།། སྒྲིབ་སྦྱང་དམ་ཚིག་དཀྱིལ་འཁོར་དང། ། ལྷ་སྒོམ་སྔགས་བཟླས་ཏིང་འཛིན་དང།། སྦྱིན་དང་ཚུལ་ཁྲིམས་སྨོན་ལམ་དང།། དེ་རྣམས་དོན་ཀྱང་བཤད་དུ་གསོལ།། ཅེས་ཞུས་སོ།། འཇམ་དཔལ་འདུས་པའི་རྒྱུད་ལས། ཞུས་པའི་ལེའུ་སྟེ་གཉིས་པའོ། ། ཀུན་ཏུ་བཟང་པོས་བཀའ་སྩལ་པ།། ཉོན་ཅིག་རྡོ་རྗེ་སེམས་དཔའ་ཆེ།། བླ་མའི་ངག། རིག་པ་གཅེར་བུ་བཟུང་བ་དང།། རིག་པ་གོས་དང་ང་བྲལ་བ་དང།། གཟུང་འཛིན་ཞགས་པ་བཅད་པའོ།། འབྲིང་དང་ཐ་མའི་མན་ངག་གོ། རབ་ཀྱི་དཔེ་ཡང་རྣམ་གསུམ་སྟེ།། རྒྱ་མཚོ་སྦུ་བ་ནམ་མཁའི་སྤྲིན།། ཨུཏྤལ་ཡི་མདོག་བཞིན་ནོ།། ཡང་ན་དཔེ་ཅིག་འདི་ལྟ་སྟེ།། པ་ན་སེའི་འབྲས་བུ་བཞིན།། གཞི་ལས་འདས་པ་མེད་པའོ།། ཞེས་གསུངས་སོ། ། འཇམ་དཔལ་འདུས་པའི་རྒྱུད་ལས། གནས་ལུགས་ལ་ངོ་སྤྲོད་པ་དང་མ་གྲོལ་བ་གྲོལ་བར་བྱ་བའི་ལེའུ་སྟེ་བཅོ་ལྔ་པའོ།། དེ་ནས་རྡོ་རྗེ་སེམས་དཔའ་ཡིས།། བཅོམ་ལྡན་ཀུན་ཏུ་བཟང་པོ་ལ།། ལེགས་སོ་ཞེས་ནི་རབ་བསྟོད་ནས། ། བདག་ཅག་ཤིན་ཏུ་ཡི་རངས་ཏེ།། རྒྱུད་ཆེན་འདི་ལ་མིང་འདོགས་ཞུ།། ཞེས་གསུངས་སོ།། ཀུན་ཏུ་བཟང་པོས་བཀའ་སྩལ་པ།། ངའི་བྱིན་བཤད་རྒྱུད་ཆེན་འདི།། འཇམ་དཔལ་ཡེ་ཤེས་འདུས་པར་ཟུང། ། ཏམས་ཅད་གང་ཡང་མ་ལུས་རྫོགས།། ཐམས་ཅད་འདུས་པའི་རྒྱུད་དུ་ཟུང།། སངས་རྒྱས་རང་འཁྲུངས་བསྟན་པས་ན།། སངས་རྒྱ་འདུས་པའི་རྒྱུད་དུ་ཟུང།། ཡེ་ཤེས་རང་ལ་བསྟན་པས་ན། ། ཡེ་ཤེས་ཁོང་ཤར་རྒྱུད་དུ་ཟུང།། ལྟ་སྒོམ་སྤྱོད་པ་སུན་འདོན་པས།། ལྷུན་གྲུབ་རང་ཆས་རྒྱུད་དུ་ཟུང།། ཞེས་གསུངས་སོ།། ཞུ་བ་པོ་རྡོ་རྗེ་སེམས་དཔས་ཞུས།། བསྡུད་པ་པོ་རོ་ལངས་བདེ་བས་བསྡུས། ། འཇམ་དཔལ་འདུལ་བའི་རྒྱུད་ལས།། མཚན་མའི་ལེའུ་སྟེ་བཅུ་དྲུག་པའོ།། ཡང་ཏི་ནག་པོ་འབྲུ་གཅིག་པ་རྫོགས་སོ།། རྒྱ་གར་སྐད་དུ། ཧྲི་ད་ཡ་ཛྙཱ་ན་ཐུ་ལ་དུ་ཏ་ཏྲ་ཏ་གུ་ཧྱ་ཏན་ཏྲ། བོད་སྐ་དུ། སྙིང་པོ་ཡེ་ཤེས་བཅུད་འདུས་ཐིག་ལེ་གསང་བའི་རྒྱུད། ཐིག་ལེ་ཀ་དག་མཐོང་བརྟོལ་གསང་བའི་ཡེ་ཤེས་ལ་ཕྱག་འཚལ་ལོ།། འདི་སྐད་བདག་གིས་ཅི་ཡང་མ་ཐོས་གང་དུ་ཡང་མ་མཚོན།། བསམ་བརྗོད་དམིགས་ལས་འདས་པ་ཡི། ། མིང་མེད་མཐའ་སྟོངས་དུས་མཐའ་མེད་པ་ན།། ཆོས་དབྱིངས་ཀ་དག་ཀློང་ན།། སྙིང་པོ་སྐྱེ་མེད་མིང་མེད་སྟོན་པ་ཡིས།། ཡེ་ཤེས་གསལ་བའི་འཁོར་ལ་ཐིག་ལེ་གསང་རྒྱུད་བསྟན།། དུས་ཀྱི་རྒྱལ་པོ་ཐོག་མཐའ་མེད་པའི་དུས། ། སྡུད་པ་པོ་ནི་གསལ་དག་ནི་རིན་ཆེན་ནོ།། ཞེས་ཕུན་སུམ་ཚོགས་པའོ།། དེ་ནས་ཡེ་ཤེས་གསལ་བ་ཡིས།། ཐིག་ལེ་གསང་བའི་སྟོན་ལ།། ཕུན་སུམ་ཚོགས་པའི་དོན་ནི་དེ་ལྟར་ན།། གནས་ལུགས་མིང་མེད་ཇི་ལྟར་གནས་པ་ཡིན། ། སྙིང་པོ་བྱ་བའི་རང་བཞིན་གང།། དེ་ལ་ཡེ་ཤེས་གསལ་བའི་ངོ་བོ་ཇི་ལྟར་བཤད།། བཅུད་སྤུངས་ཞེས་ནི་གང་ལ་བགྱི།། ཐིག་ལེའི་ངོ་བོ་ཇི་ལྟར་ལགས།། གསང་བ་ཤེས་པ་གང་ལྟར་ལགས། ། རྒྱུད་ཀྱི་ངོ་བོ་ངེས་ཚིག་ཇི་ལྟར་ལགས།། ཐིག་ལེའི་གནས་ནི་གང་ན་བཞུགས།། ཐིག་ལེའི་འཁོར་ནི་ཅི་ཡིས་བསྐོར།། ཐིག་ལེ་གསང་བའི་རང་བཞིན་གང་ལ་བགྱི།། ཐིག་ལེ་གསང་བའི་རྟོག་ཐབས་གང། ། ཐིག་ལེ་གསང་བའི་དོན་རྟོགས་ན།། རྩོལ་སྒྲུབ་བྱ་བཙལ་མི་འཚལ་ལམ།། དེ་སྐད་ཅེས་ཞུས་པའོ།། ཞེས་གསུངས་སོ།། སྙིང་པོ་ཡེ་ཤེས་ཐིག་ལེ་གསང་བའི་རྒྱུད་ལས།། འཁོར་གྱིས་གླེང་བསླངས་པའི་གླེང་གཞིའི་ལེའུ་སྟེ་དང་པོའོ། །།། དེ་ནས་ཡེ་ཤེས་གསལ་བ་ཡིས།། ཐིག་ལེ་གསང་བའི་སྟོན་པ་ལ།། གནས་ལུགས་མིང་མེད་ཇི་ལྟར་ཡིན།། ཞེས་ཞུས་པ་དང། སྟོན་པས་འཁོར་ལ་བཀའ་སྩལ། ། མིང་མེད་རང་བཞིན་མཚན་བརྗོད་ལས་འདས་ཀྱང།། འཁོར་གྱི་རྟོག་པ་བསལ་བའི་ཕྱིར།། མུན་ཁུང་གསེར་སྒྲོན་ལྟ་བུར་བཤད།། དེ་ལ་གནས་ལུགས་མི་མེད་རང་བཞིན་ནི།། ཐོག་མ་ཐམ་མེད་པའི་དོན། ། མིང་མེད་བློ་འདས་དངོས་པོ་ཅི་ཡང་མེད།། དངོས་མེད་སྣ་ཚོགས་ཀུན་གཞི་བསྐྱོད་པའི་གཞི།། རྣམ་པ་ཀུན་ལྡན་གང་དུ་གྲུབ་པ་མེད།། ལྷུན་གྲུབ་ཕྱོགས་ལྷུང་རྒྱ་ཆད་མེད་པའོ།། རྒྱུ་ཡིས་མ་བསྐྱེད་རྐྱེན་གྱིས་མི་འཇིག་པ། ། གཉིས་སྣང་བརྟགས་ཞེན་མཚོན་པའི་ཚིག་ལས་འདས།། མི་མངོན་མི་སྣང་བསྟན་དུ་དངོས་པོ་མེད།། སྐྱེ་མེད་ཆོས་སྐུའི་མིང་ཡང་ཡོད་མ་ཡིན།། གང་ཡང་མ་གྲུབ་ཅིང་ཡང་མི་སྣང་དུས་ཙམ་ན། ། མ་ཎི་རཏྣ་ས་དུ་མ་ལེ་ཏན་ཏྲ།། བོད་སྐད་དུ།། ནོར་བུ་རིན་པོ་ཆེ་འོད་འབར་བའི་རྒྱུད།། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ།། སྟོན་པ་རྡོ་རྗེ་སེམས་དཔའ་ཡིས།། ཆོས་ཉིད་སྐྱེ་མེད་ཕོ་བྲང་དུ། ། འཁོར་གྱི་རོ་ལངས་བདེ་བ་ལ།། དུས་མཉམ་ཐིག་ལེ་དབྱེར་མེད་དུ།། ཆོས་ཉིད་འོད་གསལ་བསྟན་པའོ།། ནོར་བུ་འོད་འབར་བའི་རྒྱུད་ལས།། ཕུན་སུམ་ཚོགས་པའི་ལེའུ་སྟེ་དང་པོའོ། །།། ཀྱེ་ཧོ་གསང་བའི་མངའ་བདག་ཁྱོད།། ཆོས་རྣམས་སྤྱི་དང་རང་གི་མཚན་ཉིད་དེ།། ཡེ་ཤེས་དབྱེ་བ་མཛད་དུ་གསོལ།། ཞེས་ཞུས་སོ།། གསང་བའི་མངའ་བདག་ཆེན་པོ་དེས།། ཚིག་བཤད་འདི་རྣམས་ཞལ་ནས་ཐོན། ། ཀྱེ་ཧོ་ངས་གསུངས་པ་ལ་སེམས་དཔའ་ཉོན།། སྤྱི་ཡི་ཡེ་ཤེས་རང་གི་མཚན་ཉིད་དང།། ཏིང་འཛིན་དྲུག་དང་མེ་ལོང་དྲུག། བར་དོ་དྲུགདང་ངོ་སྤྲཽད་དྲུག། སྣང་བ་དྲུག་དང་སྲིད་པ་དྲུག། སེམས་དང་ཡེ་ཤེས་དབྱེ་བ་དྲུག། ཡི་གེ་དྲུག་དང་སྒྲ་འགྱུར་དང།། བརྡ་འགྱུར་དྲུག་དང་སྦྱར་ལ་བཤད།། ཅེས་གསུངས་སོ།། ཞུས་པ་དང་ལེན་གྱི་ལེའུ་སྟེ་གཉིས་པའོ།།།། རྡོ་རྗེ་སེམས་དཔའ་བཀའ་སྩལ་པ།། མི་ཡི་བྱང་ཆུབ་སེམས་དཔའ་ཉོན། ། ཡེ་ཤེས་དབྱེ་བ་འདི་ལྟ་སྟེ།། ཆོས་དབྱིངས་མེ་ལོང་ཡེ་ཤེས་དང།། མཉམ་ཉིད་ཀུན་རྟོག་ཡེ་ཤེས་དང།། བྱ་བ་ནན་ཏན་ངོ་བོ་ཉིད་དང་དྲུག། དེ་ནི་སྤྱི་ཡི་བྱེ་བྲག་གོ། སྤྱི་ཡི་གཏན་ལ་ཕེབས་མི་སྲིད། ། རང་གི་མཚན་ཉིད་འདི་ལྟ་སྟེ།། སྙིང་པོ་ཉིད་དང་རང་བྱུང་ཡེ་ཤེས་དང།། རིག་པའི་ཡེ་ཤེས་རང་གིས་རང་རིག་དང།། རྣམ་མཁྱེན་ཐམས་ཅད་མཁྱེན་པའི་ཡེ་ཤེས་དང།། དེས་ནི་ཐིག་ལེས་གཏན་ལ་དབབ། ། གསང་བའི་ཡེ་ཤེས་དེ་ལས་གྲོལ།། ཟང་ཐལ་ཆེན་པོའི་ཡེ་ཤེས་སོ།། ཡེ་ཤེས་ཟང་ཐལ་ཉག་གཅིག་ལ།། དྲུག་ཏུ་འདོད་པས་དོན་མི་མཐོང།། ཡེ་ཤེས་མིག་གཅིག་དྲི་མེད་དུ།། མགོན་པོ་ང་ཡིས་བཤད་པ་ཡིན། ། ཅེས་གསུངས་སོ།། རིན་པོ་ཆེའི་འོད་འབར་བའི་རྒྱུ་ལས་ཡེ་ཤེས་ལ་བཟླས་པའི་ལེའུ་སྟེ་གསུམ་པའོ།།།། འགྲོ་བའི་མགོན་པོས་བཀའ་སྩལ་པ།། མི་ཡི་བོདྷི་ས་ཏྭ་ཉོན།། ཏིང་འཛིན་དྲུག་པའི་དོན་བསྟན་པ། ། ཀུན་ཏུ་མི་འགག་སྣང་བ་ལ།། ངོ་སྤྲོད་ཆེན་པོའི་ཏིང་འཛིན་དང།། སྒོམ་པ་ཡེངས་ས་མེད་པ་ཡིས།། ཁྱུང་ཆེན་རང་འབར་ཏིང་འཛིན་དང།། ཤེས་རབ་ཐོབས་པ་མེད་པ་ཡི།། སེང་གེ་ལྟ་བུའི་ཏིང་འཛིན་དང། ། ཆོས་སྐུ་ཞེ་ལ་འདོད་མེད་པའི།། རིན་ཆེན་རང་འབར་ཏིང་འཛིན་དང།། ཡེ་ཤེས་ཟང་ཐལ་རང་གནས་པས།། ཡེ་ཤེས་རང་འབར་ཏིང་འཛིན་ནོ།། མགོན་པོ་ང་ཡི་ཏིང་འཛིན་ཡིན།། ཞེས་གསུངས་སོ།། རིན་པོ་ཆེ་འོད་འབར་བའི་རྒྱུད་ལས། ། ཏིང་ངེ་འཛིན་རང་ལ་ངོ་སྤྲོད་པའི་ལེའུ་སྟེ་བཞི་པའོ།།།། ཅང་ཤེས་མགོན་པོས་བཀའ་སྩལ་པ།། མི་ཡི་སྒྱུ་མའི་སྤྲུལ་བ་ཉོན།། མེ་ལོང་དྲུག་གི་དོན་བསྟན་ནོ།། ཆོས་ཉིད་གསལ་བའི་མེ་ལོང་དུ། ། འགྲོ་དྲུག་སྤྲུལ་པའི་ངོ་སྤྲོད་བསྟན།། ཆོས་དབྱིངས་རྣམ་དག་མེ་ལོང་དུ།། ལོངས་སྤྱོད་རྫོགས་སྐུའི་ངོ་སྤྲོད་བསྟན།། ཡེ་ཤེས་གསལ་བའི་མེ་ལོང་དུ།། ཆོས་ཀྱི་སྐུ་ཡི་ངོ་སྤྲོད་བསྟན། ། ཐམས་ཅད་གསལ་བའི་མེ་ལོང་དུ།། དུས་བཞི་མཉམ་སྦྱོར་ངོ་སྤྲོད་བསྟན།། ལྷུན་གྲུབ་ཆོས་སྐུའི་མེ་ལོང་དུ།། ཡེ་ཤེས་རང་རྐྱེན་ངོ་སྤྲོད་བསྟན།། ཡེ་ཤེས་རང་གནས་མེ་ལོང་དུ།། སྣ་ཚོགས་རོལ་པའི་ངོ་སྤྲོད་བསྟན། ། ཅང་ཤེས་མགོན་པའི་མེ་ལོང་ཡིན།། རིན་པོ་ཆེ་འོད་འབར་བའི་རྒྱུད་ལས།། མེ་ལོང་དྲུག་པ་སྤྲོད་པའི་ལེའུ་སྟེ་ལྔ་པའོ།།།། མཁྱེན་པའི་རྒྱལ་པོས་བཀའ་སྩལ་པ།། མི་ཡི་སྐྱེས་བུ་ཁྱོད་ཉོན་ཅིག། ཀུན་གཞི་དྲུག་གི་དོན་བསྟན་ན། ། གདོད་ནས་སྣང་བའི་ཀུན་གཞི་ནི།། ཆོས་ཉིད་ཐིག་ལེར་ངོ་སྤྲོད་དོ།། འཁྲུ?ལ་པ་ལམ་གྱི་ཀུན་གཞི་ནི།། ཡེ་ཤེས་ཐིག་ལེ་ངོ་སྤྲད་དོ།། ཡེ་ཤེས་ལྷུན་གྲུབ་ཀུན་གཞི་དེ།། ལྷུན་གྲུབ་ཐིག་ལེ་ངོ་སྤྲད་དོ། ། མཁྱེན་པའི་རྒྱལ་པོ་ཀུན་གཞི་ཡིན།། ཞེས་གསུངས་སོ།། རིན་པོ་ཆེ་འོད་འབར་བའི་རྒྱུད་ལས།། ཀུན་གཞི་དྲུག་ལ་ངོ་སྤྲད་པའི་ལེའུ་སྟེ་དྲུག་པའོ།། ལོངས་སྐུ་སྐྱེས་བུས་བཀའ་སྩལ་པ།། འདོད་པ་མེད་པའི་སེམས་དཔའ་ཉོན། ། ཕུང་པོ་དྲུག་གི་དོན་བསྟན་ནོ།། བག་ཆགས་གཟུགས་ཀྱི་ཕུང་པོ་ལས།། ཚོགས་བརྒྱད་ལྷུག་པའི་ངོ་སྤྲོད་གྱིས།། རྨི་ལམ་སྒྱུ་ལུས་ཕུང་པོ་ལ།། འགྱུར་བ་ཡེ་ཤེས་ངོ་སྤྲོད་གྱིས།། ཏིང་འཛིན་ཉམས་མྱོང་ཕུང་པོ་ལ། འཛིན་པའི་ངང་ལ་ངོ་སྤྲོད་ཀྱིས།། ཕྱི་ནས་ཡེ་ཤེས་ཕུང་པོ་ལ།། ཡེ་ཤེས་རྡུང་ཆེན་ངོ་སྤྲོད་ཀྱིས།། ཆཽས་ཉིད་འོང་གསལ་སྒྱུ་ལུས་ཕུང་པོ་ལ།། རྒྱས་གདབ་ཨ་ཡི་ངོ་སྤྲོད་གྱིས།། སྲིད་པ་སྔོན་བླངས་ཡིད་ཀྱི་ཕུང་པོ་ལ། ། འགག་མེད་རླུང་གི་ངོ་སྤྲོད་གྱིས།། སྐྱེས་བུ་ང་ཡི་ཕུང་པོ་ཡིན།། ཅེས་གསུངས་སོ།། རིན་པོ་ཆེ་འོད་འབར་བའི་རྒྱུད་ལས།། ཕུང་པོ་དྲུག་ལ་ངོ་སྤྲད་པའི་ལེའུ་སྟེ་བདུན་པའོ། །།། སྐྱེལ་བུ་དམ་པས་བཀའ་སྩལ་པ།། ལས་ཀྱིས་སེམས་དཔའ་ཁྱོད་ཉོན་ཅིག། བར་དོ་དྲུག་གི་དོན་བསྟན་ནོ།། རང་བཞིན་བར་དོ་ཞེས་བྱ་བ།། སྣང་བ་གཟུགས་ལ་རྟེན་པ་འདི།། ཐིག་ལེ་གཅིག་ཏུ་ངོ་སྤྲད་དོ། ། ཏིང་འཛིན་བར་དོ་ཞེས་བྱ་བ།། ཡེངས་པ་མེད་པར་ངོ་སྤྲད་དོ།། སྐྱེ་ཤི་བར་དོ་ཞེས་བྱ་བ།། གཉིས་སྣང་མེད་པར་ངོ་སྤྲད་དོ།། སྐད་ཅིག་བར་དོ་ཞེས་བྱ་བ།། ཟང་ཐལ་ཆེན་པོའི་ངོ་སྦྲད་དོ།། ཆོས་ཉིད་བར་དོ་ཞེས་བྱ་བ། ། རང་སྣང་ཆེན་པོར་ངོ་སྤྲད་དོ།། སྲིད་པའི་བར་དོ་ཞེས་བྱ་བ།། རྒྱུ་རྐྱེན་མེད་པར་ངོ་སྤྲད་དོ།། གཉན་པོ་མེད་པར་ངོ་སྤྲད་དོ།། སྐྱེས་བུ་ང་ཡི་བར་དོ་ཡིན།། ཞེས་གསུངས་སོ།། བར་དོ་དྲུག་ལ་ངོ་སྤྲོད་དྲུག་བསྟན་པའི་ལེའུ་སྟེ་བརྒྱད་པའོ། །།། ཆོས་ཀྱི་བདག་པོས་བཀའ་སྩལ་པ།། འགྲོ་བ་འདུལ་བྱེད་ལེགས་པར་ཉོན།། སྣང་བ་དྲུག་དྲུག་གི་དོན་བསྟན་ནོ།། སེམས་ཀྱི་སྣང་བ་རྣམ་གཉིས་ཏེ།། བཟང་སྣང་ངན་སྣང་གཉིས་སུ་སྣང། ། སྣང་བ་མེད་པར་ངོ་སྤྲད་དོ།། ཤེས་རབ་སྣང་བ་གཉིས་ཡིན་ཏེ།། ཕྱི་སྤྲོད་སྣང་དང་ནང་སྤྱོད་སྣང།། རིག་པའི་སྣང་བ་གཉིས་ཉིད་དེ།། བདག་རིག་སྣང་དང་གཞན་རིག་སྣང། ། ལྟ་སྒོམ་སྤྱོད་པ་འབྲས་བུ་ནི།། ཡེ་ཤེས་ཆེན་པོའི་སྣང་བའོ།། ཆོས་ཀྱི་སྐུ་དང་ལོངས་སྐུ་སྣང།། ཡེ་ཤེས་རང་སྣང་ཡིན།། སྣང་བ་མེད་པར་ངོ་སྤྲད་དོ།། དང་པོ་སྲིད་པ་ལྷུན་གྲུབ་སྲིད།། སྟོང་ར་ཆེན་པོར་ངོ་སྤྲོད་དོ། ། བར་དུ་སྲིད་པ་རང་རྩལ་སྲིད།། སྐྱེ་མེད་སྟོང་བར་ངོ་སྤྲད་དོ།། འགྲོ་དྲུག་སྲིད་པ་འགག་མེད་སྲིད།། རོལ་པ་ཆེན་པོར་ངོ་སྤྲད་དོ།། དྲང་དོན་ངེས་དོན་གཉིས་སུ་སྲིད།། ཐིག་ལེ་གཅིག་ཏུ་ངོ་སྤྲད་དོ།། འཁོར་བ་མྱང་འདས་གཉིས་སུ་སྲིད། ། གཉིས་སྣ་མེད་པར་ངོ་སྤྲད་དོ།། ཐ་མ་འབྲས་བུ་འདོད་སྲིད།། ཟང་ཐལ་ཆེན་པོར་ངོ་སྤྲད་དོ།། ཆོས་ཀྱི་བདག་པོའི་སྣང་སྲིད་ཡིན།། ཅེས་གསུངས་སོ།། རིན་པོ་ཆེ་འོད་འབར་བའི་རྒྱུད་ལས། ། སྣང་སྲིད་ངོ་སྤྲོད་ཀྱི་ལེའུ་སྟེ་དགུ་པའོ།།།། སེམས་ཉིད་བདག་པོས་བཀའ་སྩལ་པ།། ཉོན་ཅིག་སེམས་དག་སྐྱེས་བུ་ཁྱོད།། སེམས་ཀྱི་ངོ་བོ་མ་རིག་པ།། རྩལ་ནི་གཉིས་འཛིན་མི་འགག་མ། ། ལས་ནི་འགའ་མི་འགའ་ལ་སྤྱོད། རིག་པའི་ངོ་བོ་ཟང་ཐལ་ལོ།། རྩལ་ནི་ཤེས་རབ་ཆེན་པོ་ཡིན།། ལས་ནི་གཉིས་སུ་མེད་པར་སྤྱོད།། འདུས་མ་བྱས་སུ་ངོ་སྤྲད་དོ།། རྒྱུས་མ་བསྐྱེད་པར་ངོ་སྤྲད་དོ།། སེམས་ཉིད་བདག་པོར་ངཽ་སྤྲ་ད་དོ། ། ཞེས་གསུངས་སོ།། རིན་པོ་ཆེ་འོད་འབར་བའི་རྒྱུ་ལས།། སེམས་དང་རིག་པ་ངོ་སྤྲད་པའི་ལེའུ་སྟེ་བཅུ་པའོ།།།། མགོན་པོ་སེམས་དཔས་བཀའ་སྩལ་པ།། རིག་པའི་སྤྲུལ་པ་ང་ལ་ཉོན། ། ཡི་གེ་དྲུགདང་སྒྲ་འགྱུར་ནི།། མ་ནི་ཡེ་ཤེས་ཡི་གེ་ལ།། སྐྱེད་བྱེད་ཆེན་པོར་ངོ་སྤྲད་དོ།། ཨ་ནི་དབྱིངས་ཀྱི་ཡི་གེ་ལ།། རོལ་པ་ཆེན་པོར་ངོ་སྤྲད་དོ།། ཧ་ནི་གཉིས་མེད་ཡེ་གེ་ལ།། སྣང་བ་ཆེན་པོར་ངོ་སྤྲད་དོ། ། ཤ་ནི་དབྱེར་མེད་ཡི་གེ་ལ།། གཅོད་བྱེད་ཆེན་པོར་ངོ་སྤྲད་དོ།། འ་ནི་རང་སྣང་ཡི་གེ་ལ།། འགག་མེད་ཆེན་པོར་ངོ་སྤྲད་དོ།། ས་ནི་འགྱུར་མེད་ཡི་གེ་ལ།། འགྲོ་དྲུག་འགྱུར་མེད་ངོ་སྤྲད་དོ།། གསལ་བའི་སྒྲ་དང་སྟོང་པའི་སྒྲ། ། འགག་མེད་སྒྲ་དང་འགྱུར་མེད་སྒྲ།། རང་གདངས་སྒྲ་དང་གཉིས་མེད་སྒྲ།། མགོན་པོ་སེམས་དཔའི་སྒྲ་འགྱུར་ཡིན།། ཅེས་གསུངས་སོ།། རིན་པོ་ཆེ་འོད་འབར་བའི་རྒྱུད་ལས།། ཡེ་གེ་སྒྲ་འགྱུར་གྱི་ལེའུ་སྟེ་བཅུ་གཅིག་པའོ། །།། བཛྲ་ས་ཏྭས་བོ་དྷི་ས་ཏྭ་ལ།། བརྡ་འགྱུར་དྲུག་གི་དོན་བསྟན་པ།། ཆོས་ཉིད་བརྡ་དང་རང་གདངས་བརྡ།། རོལ་པའི་བརྡ་དང་གཅོད་པའི་བརྡ།། ཐིག་ལེའི་བརྡ་དང་སྣང་བའི་བརྡ། ། བརྡ་འགྱུར་དྲུག་ལ་ཨ་ཡི་ངོ་སྤྲ་ད་བསྟན།། ཅེས་གསུངས་སོ།། བྱང་ཆུབ་སེམས་དཔའ་མི་ཡི་དགའ་རབ་རྡོ་རྗེ།། བཛྲ་སརྦ་ལ་རིན་པོ་ཆེ་འོང་འབར་བའི་རྒྱུད་ཞུས་པ།། རྫོགས་པར་གསུངས་པས་བྷོ་དྷི་སཏྭ་རྗེས་སུ་ཡི་རང་ངོ། ། སྟོན་པ་རྡོ་རྗེ་སེམས་དཔའ་ལ། ཞུ་བ་པོ་མི་ཡི་བྱང་ཆུབ་སེམས་པས་ཞུས་པ།། རིན་པོ་ཆེ་འོད་འབར་བའི་རྒྱུ་ལས།། ལེའུ་སྟེ་བཅུ་གཉིས་པའོ།། རྫོགས་སོ།།།།
CLOSE WINDOW