| Wylie |
། དེ་ཡི་ཀློང་ན་སྙིང་པོ་སྐུ་ལྔ་ཕྱག་རྒྱ་འགག་མེད་གསལ།། ངོ་བོ་ཆོས་སྐུ་གསུང་ཐུགས་རང་བཞིན་ལོངས་སྤྱོད་སྐུ།། ཐུགས་རྗེ་སྤྲུལ་སྐུ་ཐམས་ཅད་འབྱུང་བ་བཞི་མ་འགགས།། བཞི་ལ་གནས་པའི་སྐུ་གསུམ་ཡེ་ཤེས་ཞེས་སུ་བྱ། ། རྒྱུ་ཉིད་དག་པ་ཆོས་སྐུ་འབྲས་བུ་གཟུགས་སྐུ་གཉིས།། རང་གསལ་རྩལ་དུ་གྲུབ་སྟེ་གཞི་གནས་སྐུ་གསུམ་མོ།། སེང་གེ་སྒྲ་ཉི་ཟླ་ཁ་སྦྱོར་ལས།། སྐུ་གསུམ་རང་བཞིན་བཞིའི་ལེའུ་སྟེ་བཅུ་གཉིས་པའོ། །།། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། གཞི་སྐུ་གསུམ་སངས་རྒྱས་ལས། འབྲས་བུ་བཤད་དུ་གསོལ། བཀའ་སྩལ་པ། གཞི་སྐུ་གསུམ་ཡེ་སངས་རྒྱས་པ་ལས།། ཀུན་བཟང་རྟོགས་པའི་སངས་རྒྱས་ནི། ། གཉིས་ལས་མ་འདྲེས་གཅིག་ལས་མི་འབྱེད་པས།། མ་འདྲེས་རྫོགས་པ་ཡེ་ཤེས་རང་ཤར་བས།། བདེ་ཆེན་དབྱིངས་སུ་མངོན་པར་སངས་ཡང་རྒྱས།། སངས་རྒྱས་ངོ་བོ་ངེས་ཚིག་དང།། དབྱེ་བ་མཚན་ཉིད་རྣམ་གྲངས་བསྟན། ། སངས་རྒྱས་ངོ་བོ་དྲི་མེད་ཡེ་ཤེས་ལ།། ངེས་ཚིག་ཉོན་མོངས་སྡུག་བསྔལ་དྲི་དག་ཡེ་ཤེས་རྒྱས།། དབྱེ་བ་ལྷུན་གྲུབ་སངས་རྒྱས་རྟོགས་པ་མངོན་སངས་རྒྱས།། ཐུགས་ཀྱི་དགོངས་པས་ཡེ་ཤེས་ཆོས་འཆད་དོ། ། ལོངས་སྐུ་སྤྲུལ་པའི་སྐུ་ལ་བརྡ་ཡིས་སྟོན།། སྤྲུལ་པ་འགྲོ་བའི་དོན་ཕྱིར་བརྡ་དང་ཚིག་གིས་སྟོན།། དེ་ཡི་ཕྱིར་ན་སྐུ་གསུམ་སྟོན་པ་ཞེས་སུ་བྱ།། རང་རིག་རྟོགས་པའི་ཤེས་རབ་ཀྱིས།། ལོག་པར་རྟོགས་པའི་བདུད་བཅོམ་སྟེ། ། མཁྱེན་པའི་ཡེ་ཤེས་སྟོབས་ལྡན་པས།། བཟུང་འཛིན་མཐའ་ལས་འདས་པ་ནི།། བཅོམ་ལྡན་འདས་ཞེས་བཤད་པ་ཡིན།། མཁྱེན་རྟོགས་བདག་གིས་དཔལ་དང་དོན་སྟོན་གཞན་གྱི་དཔལ། ། ཀུན་ཏུ་དོན་བྱེད་ཀུན་ཏུ་བཟང་པོས་བྱ།། འགྲོ་བའི་མུན་སེལ་སྒྲོན་མས་བྱ།། རང་བྱུང་ཡེ་ཤེས་སྐྱེ་འགག་མེད་པས་འཆི་བདག་བདུད་ཀྱང་བཅོམ།། རང་བྱུང་ཡེ་ཤེས་མཚན་མ་མེད་པས་ཕུང་པོའི་བདུད་ཀྱང་བཅོམ། ། རང་བྱུང་ཡེ་ཤེས་གཉིས་སུ་མེད་པས་ཉོན་མོངས་བདུད་ཀྱང་བཅོམ།། སྐུ་གསུམ་ཡེ་ཤེས་གཟུང་འཛིན་བྲལ།། བྲལ་བས་ལྷ་ཡི་བུ་ཡི་བདུད་ཀྱང་བཅོམ།། ལོངས་སྐུ་འཇའ་ཚོན་སྐུ་ལྔ་གདོས་བཅས་མེད་པས་ཕུང་པོའི་བདུད་ཀྱང་བཅོམ། ། གཟུང་འཛིན་སྐྱོན་བྲལ་ཉོན་མོངས་བདུད་ཀྱང་བཅོམ།། ཡེ་ཤེས་ལུས་ལ་སྐྱེ་ཤི་མེད་པས་འཆི་བདག་བཅོམ།། འོད་གསལ་རང་བྱུང་ལྷ་ཡི་བུ་ཡི་བདུད་ཀྱང་བཅོམ།། སྐུ་གསུམ་ལྡན་ལུགས་བསྟན་པ་ནི། ། ཆོས་སྐུ་ཡོན་ཏན་སྒོ་ཡངས་པས།། ཡེ་ཤེས་ལྔ་དང་སྐུ་གཉིས་ལྡན།། ལོངས་སྐུ་མཚན་དང་དཔེ་བྱད་ལྡན།། དགོངས་པ་འོད་གསལ་ཡེ་ཤེས་ལྡན།། མངོན་པར་ཤེས་པའི་ཆོས་དྲུག་ལྡན།། སྤྲུལ་སྐུ་ཐུགས་རྗེ་རྫུ་འཕྲུལ་ལྡན། ། སྐུ་གསུམ་འདས་ལུགས་བསྟན་པ་ནི།། ཆོས་སྐུ་མཐའ་རྣམས་ཀུན་ལས་འདས།། ལོངས་སྐུ་གཟུང་འཛིན་འཁོར་བ་འདས།། སྤྲུལ་སྐུ་ཤེས་རབ་ཐབས་ལྡན་པ།། འཁོར་འདས་གཉིས་ཀྱི་མཐའ་ལས་འདས། ། སྐུ་གསུམ་རྒྱས་པ་བསྟན་པ་ནི།། ཆོས་སྐུ་མཚན་མ་གཉིས་སྣང་སངས།། རང་རིག་གསལ་བ་གཉིས་མེད་ཡེ་ཤེས་རྒྱས།། ལོངས་སྐུ་འཁོར་བའི་ཆོས་ཅན་སངས།། ཐམས་ཅད་མཁྱེན་པའི་ཆེ་བའི་ཡེ་ཤེས་ཡོན་ཏན་རྒྱས། ། སྤྲུལ་སྐུ་མ་རིག་འཁོར་བར་རང་རྒྱུད་སངས།། ཤེས་རབ་ཐབས་དང་ཐུགས་རྗེ་རྒྱས།། སྐུ་གསུམ་དྲི་མ་དག་ལུགས་ནི།། ཆོས་སྐུ་ངོ་བོ་དྲི་མ་དག། ལོངས་སྐུ་རེག་བྱ་དྲི་མ་རྣམ་པར་དག། སྤྲུལ་སྐུ་ཉོན་མོངས་དྲི་མ་རྣམ་པར་དག། ཅེས་སེང་གེ་སྒྲ་དགོངས་པ་ཉི་ཟླ་ཁ་སྦྱོར་རྒྱུད་ལས། འབྲས་བུ་སྐུ་གསུམ་བཤད་པ་དང་གཞི་འབྲས་ཁྱད་པར་ལེའུ་སྟེ་བཅུ་གསུམ་པའོ།།།། ཀྱེ་ཀྱེ་བཅོམ་ལྡན་ཐུགས་རྗེ་ཐབས་ཀྱི་བདག། སྐུ་གསུམ་ཚོམ་བུ་བཞུགས་ལུགས་བཤད་དུ་གསོལ། བཀའ་སྩལ་པ། ཆོས་སྐུ་གཞི་སྣང་ཆེན་པོ་ནི།། ཆོས་ཉིད་འོད་གསལ་ཡེ་ཤེས་སྐུ།། དེ་ཉིད་ཕྱི་ནང་མེད་པར་གསལ།། རིག་པ་ཕྱི་ནང་མེད་པར་ཁྱབ། ། བདལ་བ་ཕྱོགས་རིས་མེད་པར་ཤར།། གཉིས་མེད་ཆོས་ཉིད་རྡོ་རྗེའི་སྐུ།། རང་གསལ་འཛིན་མེད་ཐུགས་རིག་པ།། དེ་ལ་མཁྱེན་པ་མ་འགགས་པ།། རང་རིག་ཆོས་ཉིད་ཡེ་ཤེས་གདངས་ཤར་བ། ། ཡུམ་གྱི་རང་བཞིན་ཤེས་རབ་ཡེ་ཤེས་སྤྱན་གྱི་བུམ་པ་ལྔ།། སྣང་བ་དངོས་མེད་ནམ་མཁའ་འཇའ་ཚོན་བཞིན།། དེ་ཡི་ནང་ན་སྐུ་གཅིག་སྐུ་ལྔར་གསལ།། གསལ་ལ་རྟོག་མེད་བུམ་པའི་མར་མེ་འདྲ།། སྐུ་གསུམ་ནང་གསལ་འདུ་འབྲལ་མེད་པའི་གནས། ། རིག་པའི་འོད་གསལ་ཐུགས་ཉིད་ཟང་ཐལ་བས།། སྐུ་གཉིས་ཡུལ་དུ་མི་སྣང་ཡོན་ཏན་རྩལ་མ་འགགས།། འདུ་འབྲལ་མེད་པའི་སྐུ་གསུམ་སྙིང་པོ་ལ།། སྐུ་གཉིས་མི་འགག་ཡོད་པའི་མེད་པ་སྟེ། ། ཆོས་སྐུ་མི་འགྱུར་མེད་པའི་ཡོད་པ་ནི།། འཁར་གཞོང་བཅུད་དང་མེ་ལོང་གཟུགས་བརྙན་བཞིན།། སྣང་ལ་རང་བཞིན་མེད་པས་མཚན་མའི་སྐྱོན་དང་བྲལ།། མི་སྣང་རང་བཞིན་ཡོད་པ་ཆད་པའི་མཐའ་ལས་འདས། ། ཆོས་ཉིད་དག་པའི་སྣང་བ་ལ།། ཀུན་ཏུ་བཟང་པོ་བཟང་མོའི་ངང།། རང་ལ་ཤེས་རབ་སྐུ་ལྔ་སྣང།། མཚན་མ་གདོས་བཅས་སྐུ་མ་ཡིན།། ཡེ་ཤེས་རང་སྣང་ཆེན་པོ་ཆོས་ཀྱི་སྐུ།། མཚན་མ་གཞན་སྣང་རྟོགས་པ་མེད། ། ཤེས་རབ་སྐུ་ལྔ་བསྟན་པ་ནི།། རང་ཤར་རང་གསལ་ངོ་བོ་ལ།། ཐམས་ཅད་འཆར་ཞིང་སྣང་བའི་ཕྱིར།། ཀུན་བཟང་སྣང་བ་ཆེན་པོས་བྱ།། རང་ལ་སྐུ་མི་སྣང་བ་ཀུན་བཟང་ཡུམ་གྱི་ཀློང་ཞེས་བྱ། ། ཆོས་སྐུ་དངོས་མེད་ཟང་ཐལ་ལ།། གཞན་སྣང་མེད་པས་གདོས་བཅས་འདས།། རྣམ་དག་ཆོས་དབྱིངས་བཀོད་པ་ཡིས།། ཆོས་ཉིད་སྐུ་གསུམ་དབྱེར་མེད་ཀློང།། ཡེ་ཤེས་རང་གདངས་བུམ་པ་ལྔ། ། མ་འགགས་གསལ་བ་མྱུ་གུ་གནས།། ཆོས་དབྱིངས་དག་པ་རིག་པའི་སྐུ།། ཁ་དོག་སྣ་ཚོགས་འབར་བར་བཞུགས།། རྩལ་གྱི་འོད་ཟེར་དག་སྣང་བ།། མཐིང་ཁ་དཀར་སེར་དམར་དང་ལྗང། ། མ་འདྲེས་གསལ་བའི་ཡེ་ཤེས་རྫོགས།། དེ་ལྔ་ནང་ན་སྐུ་ལྔ་ལྷུན་གྱིས་གྲུབ།། ཕྱོགས་བཞི་དབུས་དང་ལྔར་གནས་པ་སྟེ།། དབུས་ནི་ཀུན་སྣང་ཡེ་ཤེས་ལ།། བཞི་པོ་རྣམ་སྣང་ཀུན་ཏུ་ཞལ།། ཁ་དོག་སྣ་ཚོགས་འབར་བའི་སྐུ། ། ཡེ་ཤེས་སྒོ་ལྔ་ཟང་ཐལ་མ།། སྣང་དུ་ཡོད་ལ་རེག་ཏུ་མེད།། རྟག་ཆད་མཐའ་ལས་འདས་པའི་གཞི།། སྒྲིབ་མེད་གདངས་གསལ་སྤྱན་མངའ་ཞིང།། ཐོགས་མེད་རང་བྱུང་ཤུགས་ཀྱི་མཛེས།། སྐྱོན་བྲལ་རྣམ་དག་ལྗགས་དང་ལྡན། ། འགག་མེད་རང་དངས་སྙན་གྱིས་བརྒྱན།། སྤྲོས་མེད་རང་གསལ་ཡེ་ཤེས་སྐུ།། ཕྱག་ནི་མཉམ་གཞག་ཞི་བའི་ངང།། ཁ་དོག་ལྔ་ཡི་བདག་ཉིད་འཛིན།། གདན་གསུམ་ངང་ལ་ཡོངས་སུ་རྫོགས། ། ཐབས་དང་ཤེས་རབ་ཡབ་ཡུམ་ཚུལ།། གདུལ་བྱ་རིགས་ལྔ་སངས་རྒྱས་ཏེ།། དག་ཅིང་གསལ་བའི་མེ་ལོང་ལ།། བྱད་ཀྱི་རྣམ་པ་གསལ་བ་ལྟར།། མཚན་རྫོགས་རྡོ་རྗེ་འཆང་ཆེན་ནི།། མི་བསྐྱོད་རིན་ཆེན་འབྱུང་ལྡན་དང། ། སྣང་བ་མཐའ་ཡས་དོན་གྲུབ་ཤར།། རང་རང་ཕྱག་མཚན་ཐུགས་ལས་གབ།། དབྱེར་མེད་རྡོ་རྗེ་སྐྱིལ་ཀྲུང་བཞུགས།། ཡེ་ཤེས་ལྔ་ཡི་སྦུབས་ན་གསལ།། རང་རང་སོ་སོའི་ཆོས་ཉིད་ལ།། ལྔ་པ་སོ་སོ་སྦུབས་ན་གནས། ། རེ་རེ་ལ་ཡང་བཞི་བཞིས་བསྐོར།། ཡེ་ཤེས་ལྔ་རྫོགས་རྩལ་གྱི་མཚན་ཉིད་འཛིན།། གཉིས་མེད་ཡུམ་ལྔ་ལུས་དང་གྲིབ་མ་བཞིན།། རང་བྱུང་རང་སྣང་རང་གིས་མཁྱེན།། རང་སྣང་རྩེ་གཅིག་འབྱེད་པ་མེད། ། སེང་གེ་སྒྲ་ལས། ཆོས་སྐུ་བཞུགས་ཚུལ་བསྟན་པའི་ལེའུ་སྟེ་བཅུ་བཞི་པའོ།།།། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། ལོངས་སྐུ་བཞུགས་ཚུལ་གསུང་དུ་གསོལ།། བཀའ་སྩལ་པ། སྐུ་གཅིག་སྐུ་ལྔར་ཤར་བས་རྣམ་པར་སྣང་མཛད་ལ། ། དེ་ལས་འགྱུར་བ་མེད་པས་མི་བསྐྱོད་པ།། ཡོན་ཏན་ཕྱོགས་མེད་རང་བྱུང་རིན་འབྱུང་བྱ།། དྲི་མས་མ་གོས་ཐུགས་རྗེ་འོད་དཔག་མེད།། གང་ལ་ཐོགས་མེད་གྲུབ་པས་འཕྲིན་ལས་གྲུབ་པའི་སྐུ། ། ཤེས་རབ་སྐུ་ལྔའི་རང་བཞིན་ནི།། རིག་པ་གཅིག་གི་ངོ་བོ་ལ།། ཐམས་ཅད་འཆར་བར་སྣང་བས་རྣམ་སྣང་ཆེན་པོ་བྱ།། ཡོན་ཏན་མི་འགག་རིན་འབྱུང་ཆེན་པོ་བྱ།། ཐུགས་རྗེ་སྟོབས་ལྡན་འོད་དཔག་མེད། ། ཤེས་བྱ་ཐོགས་མེད་དོན་གྲུབ་ཆེན་པོ་བྱ།། དེ་དོན་རང་བྱུང་འགྱུར་མེད་མི་སྐྱོད་ཆེ།། འགག་མེད་དབྱེར་མེད་རིག་པ་ཤེས་རབ་ཐུགས་ལྡན་ནོ།། ཡོན་ཏན་ཀུན་བརྒྱན་རབ་ཏུ་ངང་ལ་གཅོད།། རྣམ་སྣང་ཐུགས་ཀྱི་རང་བཞིན་འཁོར་ལོ་རྩིབས་བརྒྱད་དོ། ། སྐུ་ལྔ་ཡེ་ཤེས་ལྔ་ལྡན་མི་འགྱུར་མི་ཕྱེད་པས།། མ་བསྐྱོད་ཐུགས་ཀྱི་རང་བཞིན་རྡོ་རྗེ་རྩེ་ལྔར་གནས།། ངོ་བོ་མི་འགྱུར་རང་བཞིན་མི་འགག་ཡོན་ཏན་རང་ལ་འབྱུང། ། རིན་འབྱུང་ཐུགས་ཀྱི་རང་བཞིན་ནོར་བུ་རིན་ཆེན་གནས།། རང་གི་ངོ་བོ་དྲི་མེད་རྣམ་དག་པས།། འོད་དཔག་མེད་པའི་ཐུགས་ནི་པདྨར་གནས།། ཐུགས་ཀྱི་རང་བཞིན་དགོངས་པ་མཐའ་བཞི་འདས། ། ཚད་མེད་ཡེ་ཤེས་འཕྲིན་ལས་བཞི་རྫོགས་པས།། དོན་གྲུབ་ཐུགས་ཀྱི་རང་བཞིན་རྡོ་རྗེ་རྒྱ་གྲམ་གནས།། ཡུམ་ནི་ཡེ་ཤེས་དབྱིངས་ཀྱི་ཆ།། སྐུ་མདོག་ཕྱག་མཚན་ཡབ་དང་མཐུན།། གཉིས་མེད་ཡེ་ཤེས་འོད་དུ་གསལ། ། མ་བཅོས་རང་བཞིན་ཡོངས་ཁྱབ་པས།། ཡུམ་གྱུར་ཀུན་ཏུ་བཟང་མོ་བྱ།། རང་བཞིན་མི་འགྱུར་འགག་མེད་ལ།། ཡུམ་གྱུར་སངས་རྒྱས་སྤྱན་ཞེས་བྱ།། ཡོན་ཏན་དོན་སྡུད་མཉམ་སྦྱོར་བས།། ཡུམ་གྱུར་མཱ་མ་ཀི་ཞེས་བྱ། ། ཡོན་ཏན་ཀུན་སྨིན་འོད་ཀྱི་གདངས་ལྡན་མ།། ཡུམ་གྱུར་གོས་དཀར་མོ་ཡི་དོན་དུ་བཤད།། རང་བཞིན་སྐྱོན་མེད་མི་ལྡོག་གནས་སུ་སྒྲོལ།། རླུང་ཉིད་དམ་ཚིག་སྒྲོལ་མའི་དོན་དུ་བཤད།། སྐུ་གསུམ་ཀུན་ཏུ་འོད་ཀྱི་ས་ལ་ཡེ་ཉིད་སྙིང་པོར་གནས། ། ས་ཡི་སྙིང་པོ་ཞེས་སུ་བཤད་པ་ཡིན།། སྐུ་གསུམ་ཀུན་ཏུ་ཁྱབ་པས་སེམས་དཔའ་ཀུན་བཟང་བྱ།། སྐུ་དེ་དོན་རང་ལ་གཟིགས་པས་སྤྱན་རས་གཟིགས།། སྐུ་གསུམ་ཕྱག་རྒྱ་སྐྱེ་འཇིག་མེད་པ་ཕྱག་ན་རྡོ་རྗེ་དོན། ། སྐུ་གསུམ་འགྲོ་ལ་སྙིང་རྗེ་ཁྱབ་པ་བྱམས་པའི་དོན།། སྐུ་གསུམ་རིག་སྟོང་དབྱེར་མེད་ནམ་མཁའི་སྙིང་པོས་དོན།། སྐུ་གསུམ་མཁྱེན་པར་གསོལ་བ་འཇམ་དཔལ་དོན། ། སྐུ་གསུམ་ཡེ་ཉིད་དག་པས་སྒྲིབ་སེལ་དོན།། སྐུ་གསུམ་ཡེ་ཤེས་སྐུར་སྣང་གཟུགས་ཉིད་སེམས།། སྐུ་གསུམ་ཚུལ་ཁྲིམས་དྲི་ལྡན་མ་ལེ་དྲི།། སྐུ་གསུམ་ཤེས་རབ་རོ་ལྡན་ནིརྟི་རོ།། སྐུ་གསུམ་སྒྲ་ལྡན་གཱི་རྟི་སྒྲ། ། སྐུ་གསུམ་དྲི་ལྡན་དྷཱུ་པེ་མ།། སྐུ་གསུམ་བདེ་བའི་མདངས་ལྡན་པུཥྤེ་མ།། སྐུ་གསུམ་འོད་གསལ་དར་ཤར་ཨཱ་ལོ་ཀེ།། སྐུ་གསུམ་ཏིང་འཛིན་རྒྱུན་འབབ་གནྡྷེ་མ།། སྐྱོན་གྱིས་མ་གོས་ཡེ་ཤེས་བཞི་ཡི་དོན།། ས་སྙིང་དཀར་པོ་རིན་ཆེན་མྱུ་གུར་གནས། ། དྲི་མེད་རང་ལ་རྫོགས་པས་འགྱུར་བ་མེད།། ཀུན་བཟང་མཐིང་སྐྱ་ཐུགས་ཀྱི་རང་བཞིན་རིན་ཆེན་སྙེ་མར་གནས།། ཡེ་ཤེས་དབང་ཐོབ་ཉོན་མོངས་སྐྱོན་དང་བྲལ།། སྤྱན་རས་དམར་སྐྱ་ཐུགས་ཀྱི་རང་བཞིན་པདྨ་དཀར། ། འཕྲིན་ལས་བྱ་རྫོགས་འདུ་འབྲལ་མེད།། ཕྱག་ན་རྡོ་རྗེ་ལྗང་ནག་ཐུགས་ཀྱི་རང་བཞིན་རྒྱ་གྲམ་གནས།། འདོད་པའི་སྐྱོན་བྲལ་ཐུགས་རྗེ་འཛིན།། བྱམས་པ་དཀར་དམར་ཀླུ་ཤིང་མགོ་ལྡོགས་སོ། ། གཟུང་འཛིན་རྣམ་གཅོད་རྟོག་པ་སེལ།། ནམ་སྙིང་མཐིང་སྐྱ་ཐུགས་ཀྱི་རལ་གྲི་གནས།། ཤེས་རབ་རང་གྲོལ་ཡེ་ཤེས་རྒྱས།། འཇམ་དཔལ་དམར་སེར་ཐུགས་ཀྱི་རང་བཞིན་ཨུཏྤལ་ལོ། ། སྒྲིབ་པ་རྣམ་དག་ཡེ་ཤེས་ཐོགས་པ་མེད།། སྒྲིབ་སེལ་མཐིང་ཁ་ཐུགས་ཀྱི་རང་བཞིན་པོ་ཏི་གནས།། ལཱ་སྱེ་དཀར་མོ་ཁུ་ཚུར་བགྱིང།། གཟུགས་ཀྱི་རྣམ་དག་ངོ་བོར་ཤར།། མཱ་ལེ་སྔོན་མོ་སྤོས་མེ་མ།། དྲི་ཡི་རྣམ་དག་ངོ་བོར་ཤར། ། ནི་རྟི་དམར་མོ་འཕྲེང་བ་མ།། རོ་ཡི་རྣམ་དག་ངོ་བོར་ཤར།། གིརྟི་ལྗང་ཁུ་བསིལ་ཁ་མ།། སྒྲ་ཡི་རྣམ་དག་ངོ་བོར་ཤར།། པུཥྤེ་མེ་ཏོག་དུས་འདས་ངོ་བོར་ཤར།། ཨཱ་ལོ་ཀེ་མར་མེ་ལྟ་ངོ་བོར་ཤར། ། གནྡྷེ་ཕྱིས་འབྱུང་ཡེ་ཤེས་རྣམ་དག་ངོ་བོར་ཤར།། སྐུ་གསུམ་སྐྱེ་འགག་མེད་པ་རང་བཞིན་ལྷུན་གྱིས་གྲུབ།། བདེ་ཆེན་སྐྱེ་འཇིག་མེད་པ་བདེ་བ་ཚེ་འཕེལ་མ།། རྣམ་དག་ཡུལ་བརྒྱད་རྟོག་པར་ཤར་བ་ཟ་བྱེད་པ། ། སྐུ་གསུམ་ཡེ་ཤེས་རྟོག་པ་ཟད་པར་བྱེད་པས་བདེ་བ་ཟད་བྱེད་མ།། སྐུ་གསུམ་ཡེ་ཤེས་ཀློང་དུ་འཁོར་བ་ཐིམ་པས་རྣམ་རྟོག་མགོ་རྨོངས་པས།། དེ་ཕྱིར་བདེ་བའི་ཡེ་ཤེས་རྨོངས་བྱེད་མ།། འཁོར་འདས་ཡེ་ཤེས་སྐུ་གསུམ་ངང་དུ་རྒྱས་ཐེབས་པས། ། དེ་ཕྱིར་བདེ་བའི་ཡེ་ཤེས་རྒྱས་འདེབས་མའོ།། ཐམས་ཅད་རིག་པ་རྩལ་གྱི་རོལ་པ་རྣམ་དག་བསྟན་པའི་དོན།། སེང་གེ་སྒྲའི་དགོངས་པ་ཉི་ཟླ་ཁ་སྦྱོར་ལས།། ལོངས་སྐུ་ངེས་དོན་བཞུགས་ཚུལ་གྱི་ལེའུ་སྟེ་བཅོ་ལྔ་པའོ། །།། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། ཚོམ་བུ་དཀྱིལ་འཁོར་གསུང་དུ་གསོལ།། བཀའ་སྩལ་པ། བཅོམ་ལྡན་རྡོ་རྗེ་མི་བསྐྱོད་ལ།། ས་སྙིང་བྱམས་པ་གཡས་དང་གཡོན། ། ཐུགས་རྗེ་ཐབས་ཀྱི་སྐུ་རུ་ཤར།། ཡུམ་ཆེན་སངས་རྒྱས་སྤྱན་དག་ལ།། ལཱ་སྱེ་དྷཱུ་པེ་གཡས་དང་གཡོན།། ཐབས་དང་ཤེས་རབ་ཆ་འཛིན་པས།། རེ་རེ་ལ་ཡང་གཉིས་གཉིས་སྣང།། ཚོམ་བུ་དཀྱིལ་འཁོར་གཅིག་ཏུ་གསལ། ། བཅོམ་ལྡན་རིན་ཆེན་འབྱུང་ལྡན་ལ།། ཀུན་བཟང་ནམ་སྙིང་གཡས་དང་གཡོན།། ཡུམ་ཆེན་མཱ་མ་ཀི་དག་ལ།། མཱ་ལེ་དྷཱུ་པེ་གཡས་དང་གཡོན།། ཚོམ་བུ་དཀྱིལ་འཁོར་གཅིག་ཏུ་གསལ།། བཅོམ་ལྡན་སྣང་བ་མཐའ་ཡས་ལ། ། སྤྱན་རས་འཇམ་དཔལ་གཡས་དང་གཡོན།། ཡུམ་ཆེན་ན་བཟའ་གོས་དཀར་ལ།། ནིརྟི་ཨཱ་ལོ་གཡས་དང་གཡོན།། ཚོམ་བུ་དཀྱིལ་འཁོར་གཅིག་ཏུ་གསལ།། བཅོམ་ལྡན་དོན་ཡོད་གྲུབ་པ་ལ། ། ཕྱག་རྡོར་སྒྲིབ་སེལ་གཡས་དང་གཡོན།། ཡུམ་ཆེན་དམ་ཚིག་སྒྲོལ་མ་ལ།། གིརྟི་གནྡྷེ་གཡས་དང་གཡོན།། ཚོམ་བུ་དཀྱིལ་འཁོར་གཅིག་ཏུ་གསལ།། ཡབ་རྣམས་ཀུན་ཏུ་བཟང་པོ་ལ།། ཡུམ་རྣམས་ཀུན་ཏུ་བཟང་མོའི་ངང། ། དེ་ཕྱིར་ཀུན་བཟང་ཚོམ་བུ་གཅིག་ཏུ་གསལ།། ཕྱིན་ཅི་ལོག་བཞི་འདས་པ་ཚད་མེད་སྒོ་བ་བཞི།། ཡོན་ཏན་སྟོབས་མ་འགགས་པ་སུམ་ཅུ་རྩ་དྲུག་ནི།། ཡེ་ཤེས་ལྔ་ལྡན་འོད་ལྔ་ཕོ་བྲང་བཞུགས། ། ལོངས་སྐུ་ལྕགས་ཀྱི་ཟེར་ལ་གསུང་ཤར་བ།། ཡི་གེ་དྲུག་པའི་འཁོར་ལོ་ལས།། ཐུབ་དྲུག་ཐབས་མ་འགགས་པ་བཞི་བཅུ་རྩ་གཉིས་སོ།། མཚན་དང་དཔེ་བྱད་ལྷུན་མཉམ་སྐུ་ལ་རྫོགས།། ཐུགས་རྗེ་མཛད་སྤྱོད་རྒྱན་དང་རོལ་པར་ཤར། ། རྣམ་རྟོག་མི་མངའ་ཐམས་ཅད་ས་ལེ་མཁྱེན།། ཡེ་ཤེས་ལུས་ཅན་ཆོས་ཀྱི་སྤྱན་མངའ་བ།། རྫོགས་པའི་སངས་རྒྱས་དྲུག་པ་རྡོ་རྗེ་འཆང།། སངས་རྒྱས་འདུས་པ་རེ་ལྔ་ཐིག་ལེ་སྐུ། ། མ་འགགས་རང་བྱུང་གསུང་མི་འགྱུར།། ལྗགས་ཀྱི་པདྨོ་ཡི་གེ་དྲུག་འགྱུར་ལ།། ཐུགས་རྗེ་སྤྲུལ་སྐུ་འཆར་བའི་སྒོ་མ་འགགས།། དེ་ལས་ཤེས་རབ་ཡེ་ཤེས་ཟེར་འཕྲོ་བ།། ཐབས་མ་འགགས་པ་ཐུགས་རྗེ་སྤྲུལ་སྐུར་གསལ། ། སེང་གེ་སྒྲ་ཉི་ཟླ་ཁ་སྦྱོར་ལས། ལོངས་སྐུ་ཚོམ་བུ་འཕྲོ་བའི་ལེའུ་སྟེ་བཅུ་དྲུག་པའོ།།།། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། གནས་དང་གདན་རྣམས་གསུང་དུ་གསོལ། ། བཀའ་སྩལ་པ། གནས་མེད་གནས་མཆོག་ཆོས་དབྱིངས་རྣམ་དག་ན།། མ་བྲིས་འོད་གསལ་དཀྱིལ་འཁོར་ཡང་དག་གསང་བའི་མཆོག། བཞུགས་ནས་ལྷུན་གྲུབ་མ་ཡི་ཕོ་བྲང་ངོ།། དེ་ལ་བཞུགས་པ་གདན་གྱི་ཁྱད་པར་ནི། ། རྟགས་དང་ཁྱད་པར་ཆོས་ཉིད་གདན།། རྟགས་ལ་རྣམ་པ་ལྔར་བཤད་པ།། སྐུ་གསུམ་འདུ་འབྲལ་མེད་པའི་རྩལ་རྫོགས་ཏེ།། རྣམ་སྣང་རྩལ་གསུམ་རྫོགས་པ་སེང་གེའི་གདན།། སྐུ་གསུམ་ཆོས་ཉིད་ངང་དུ་མི་འགྱུར་རྟགས། ། མི་བསྐྱོད་གདན་དུ་གླང་ཆེན་མི་བསྐྱོད་ཁྲི།། ཆོས་སྐུ་ཆོས་ཉིད་ངང་ལ་སྐུ་གཉིས་ཐུགས་རྗེ་སྐྱོད་པའི་རྟགས།། རང་བྱུང་ཤུགས་འཆང་སྐྱོད་པ་རྟ་མཆོག་གདན།། སྐུ་གསུམ་འོད་ལ་ཐུགས་རྗེ་འགྲོ་བའི་དོན་བྱེད་པ། ། མཐའ་ཡས་མཛེས་པ་རྨ་བྱ་འོད་ཀྱི་གདན།། སྐུ་གསུམ་རྫུ་འཕྲུལ་སྟོབས་ཀྱིས་འཕྲིན་ལས་ཐོགས་མེད་མཛད།། དོན་གྲུབ་མཁའ་ལྡིང་ཐོགས་མེད་གདན་ལ་བཞུགས་པའོ།། ཤེས་རབ་འགྱུར་བ་མེད་པའི་ཆོས་ཉིད་ལས། ། ཐབས་ལ་འགགས་པ་མེད་པའི་ཡེ་ཤེས་གསལ།། གཉིས་མེད་སྐུ་དང་ཡེ་ཤེས་གསལ་བའི་རྟགས་སུ་ཉི་ཟླའི་གདན།། རིག་པའི་ཡེ་ཤེས་རང་རིག་ཁོ་ནར་ཤར་བས་དྲི་མ་མེད། ། དེ་དོན་མཚོན་པ་པདྨའི་གདན།། སྐྱོན་བྲལ་བ་ཡི་དོན་དུ་མཚོན།། ཞེས་གསུངས། སེང་གེ་སྒྲ་ཉི་ཟླ་ཁ་སྦྱོར་ལས། གནས་དང་གདན་གྱི་ཁྱད་པར་གྱི་ལེའུ་སྟེ་བཅུ་བདུན་པའོ།།།། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། ལོངས་སྐུ་བཞུགས་རོལ་དེ་ལྟར་ན།། སྤྲུལ་པའི་སྐུ་ཡི་ཞིང་ཁམས་འདིར།། སྟོན་པ་བྱོན་ལུགས་ཇི་ལྟར་ལགས།། བཀའ་སྩལ་པ། རྡོ་རྗེ་འཛིན་པ་ལེགས་པར་ཉོན་ཅིག་ཆོས་སྐུ་འོད་འགྱུར་རྩལ་གྱི་རོལ་པ་ནི། ། ལོངས་སྐུ་ཟེར་འོད་བཞི་བཅུ་རྩ་གཉིས་ཤར།། དེ་ཡི་གསུང་གི་རོལ་པ་ཡི་གེ་དྲུག། འ་ཨ་མ་ཤ་ས་ཧ་དྲུག། དེ་ལས་ང་སོགས་སྤྲུལ་སྐུར་ཤར་བ་ནི།། འདུལ་བྱ་དྲུག་ལ་སོ་སོར་འཚམ་པར་འཆད།། སྟོན་པ་བྱོན་གཞི་དེ་ལྟར་ན། ། འགྲོ་དྲུག་སྐྱེ་བ་མཐུན་པ་རུ།། སྐུ་ཡི་འཁྲུལ་རྟེན་གང་གིས་བགྱིས།། རྟོགས་པའི་ཤེས་རབ་ཇི་ལྟར་སྐྱེས།། ཐུགས་རྗེ་ཡིག་འབྲུ་ཇི་ལྟར་སྤྲོ།། ཞེས་སོ།། ལོངས་སྐུ་ལྗགས་ཀྱི་འཁོར་ལོ་ལས། ། གསུང་གི་ངོ་བོ་ཤེས་རབ་ཡེ་ཤེས་ཤར།། རང་བྱུང་ཀུན་གཞི་ཡི་གེ་མ།། སྐྱེ་མེད་གཞི་ཡང་ཡི་གེ་ཨ།། འགག་མེད་ཡི་གེ་ཧ་དང་འ།། འཛིན་བྱེད་ཡི་གེ་ས་འཕྲོས་ནས།། ཕ་དང་མ་ལ་བརྟེན་པར་བྱ།། བུང་བ་མེ་ཏོག་འཇིབ་པ་ལྟར། ། ཨུ་དུམ་འབར་བའི་མེ་ཏོག་ལ།། རིག་པའི་ཡེ་ཤེས་ཡས་ཞུགས་རྫུས་ནས་སྐྱེས།། ཡང་བཀའ་སྩལ་པ། རྡོ་རྗེ་འཛིན་པ་ངེས་པར་ཉོན།། ངས་ལེན་མ་མྱོང་བ་ཡི་ལུས་གཉིས་བླངས། ། ཆོས་སྐུ་ངོ་བོ་ཉིད་ལས་ནི།། ལོངས་སྐུ་སྤྲུལ་སྐུ་གཉིས་བླངས་སོ།། མཐོང་མ་མྱོང་བའི་ཡུལ་གཉིས་མཐོང།། སྤྱིར་འགྲོ་དྲུག་སྤྲུལ་པའི་ཞིང་ཁམས་དང།། ནང་ཚོམ་བུ་ལྔ་ཡི་ལོངས་སྐུ་མཐོང།། ཤེས་མ་མྱོང་བའི་གཏམ་གཉིས་ཤེས། ། བསོད་ནམས་ཚོགས་དང་ཡེ་ཤེས་སོ།། ངས་བརྗོད་མ་མྱོང་བ་ཡི་ཚིག་གཉིས་བཤད།། བཀྲི་དྲང་ཐེག་པའི་ཆོས་དང་སྙིང་པོའི་དོན་བཤད་དོ།། དེ་ཚེ་རྟོགས་པའི་ཤེས་རབ་རང་ཤར་སྐྱེས། ། ང་ཡི་ཆོས་སྐུ་རྣམ་དག་པས།། ཐམས་ཅད་མཁྱེན་པའི་ཡེ་ཤེས་ཤར།། ལོངས་སྐུ་མ་བསྐྱེད་ལྷུན་རྫོགས་པས།། རྣམ་པ་ཐམས་ཅད་མཁྱེན་པའི་དོན།། རང་རིག་ཤེས་པས་ཡེ་ནས་རང་ལ་ཤར།། ཐམས་ཅད་སྤྲུལ་པའི་སྐུ་ཡིན་པས། ། ཆོས་རྣམས་རང་བྱུང་ཆེན་པོར་ཤར།། འགྲོ་དྲུག་སེམས་ཅན་ཐམས་ཅད་ཀྱང།། དང་པོ་ཆོས་སྐུ་ཟེར་ལས་འཁྲུལ།། བར་དུ་སྐུ་གསུམ་ངང་དུ་གནས།། ཐ་མ་ཐིམ་ཡང་ཆོས་ཉིད་ངང་དུ་ཐིམ། ། སྐལ་མེད་ལས་མ་དག་པའི་སེམས་ཅན་རྣམས།། སྤྱན་གསུམ་རྣམ་དག་རང་གསལ་ངོ་མ་ཤེས།། སྐལ་ལྡན་སྐུ་གསུམ་རང་ཆས་གནས་པ་ལ།། རྟོགས་པས་སྒོ་གསུམ་རང་ཤར་རང་སར་གྲོལ།། དུས་གསུམ་རང་གྲོལ་མཁྱེན་པའི་ཡེ་ཤེས་འཆར། ། བུམ་པ་ནང་གི་མར་མེ་གསལ་བ་བཞིན།། འགྱུར་མེད་སྐུ་གསུམ་རང་ས་དུས་དེར་ཟིན།། རབ་ཀྱི་རྫོགས་ལྡན་དགོངས་པ་ཚེ་འདིར་ཆོད།། འབྲིང་གིས་ལྔ་ལྡན་ཡེ་ཤེས་བར་དོར་ཆོད། ། སྐུ་གཉིས་ཆོས་སྐུའི་ཀློང་དུ་རྫོགས་ལྡན་ཆེན་པོ་ཆོད།། སེང་གེ་སྒྲ་ཡི་དགོངས་པ་ཉི་ཟླ་ཁ་སྦྱོར་ལས། སྤྲུལ་སྐུ་རྣམ་པར་བྱེ་བྲག་ཚུལ་བསྟན་པའི་ལེའུ་སྟེ་བཅོ་བརྒྱད་པའོ།།།། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། སྐུ་གསུམ་ཡེ་ཤེས་འཆར་ལུགས་གསུང་དུ་གསོལ།། བཀའ་སྩལ་པ། རང་འབྱུང་ཡེ་ཤེས་ཆེན་པོ་འདི།། ཡིན་མིན་དབྱེ་བ་ངས་བཤད་ཀྱིས།། རྡོ་རྗེ་འཛིན་པ་ངེས་པར་ཉོན།། ཡེ་ཤེས་མ་ཡིན་རང་བྱུང་དེ། ། སེམས་ཅན་ཀུན་ལ་ཡོད་མོད་ཀྱང།། མ་རྟོགས་ཕྱིར་ན་ཡེ་ཤེས་མིན།། མིག་མཁན་མེད་པའི་ལོང་པ་འདྲ།། རང་བྱུང་མེད་པའི་ཡེ་ཤེས་དེས།། གནས་འགྱུར་ཡེ་ཤེས་ལྔ་འདོད་པ།། རྐྱེན་གྱིས་འབྱུང་ཕྱིར་ཡེ་ཤེས་མིན། ། རྒྱུད་ལ་བསེ་རུ་ཟིན་པ་འདྲ།། རང་བྱུང་ཡེ་ཤེས་ཡེ་ནས་ཡིན་པ་ནི།། ཤེས་རབ་ལྷག་མཐོང་རང་བྱུང་ཤར།། ཡེ་ནས་གནས་པའི་རང་བྱུང་དེ།། ལུང་ལྡན་རྐྱེན་གྱིས་རྟོགས་པའི་ཕྱིར།། རང་ཤར་ཡེ་ཤེས་འཇོམས་པ་ནི། ། མར་གྱི་ཡང་ཞུན་ལྟ་བུ་སྟེ།། ཉི་མ་སྤྲིན་དང་བྲལ་བ་འདྲ།། ཡེ་ནི་འོད་གསལ་རང་བཞིན་ལ།། ཤེས་ནི་རིག་པ་འགག་པ་མེད།། ཡེ་ཤེས་དོན་དུ་དེ་བཤད་དོ།། ཡེ་ཤེས་ངོ་བོ་ངེས་ཚིག་དང།། དབྱེ་བ་རྣམ་གྲངས་བཅས་པ་དང། ། མཚོན་པའི་དཔེ་དང་སྦྱར་བཤད་པ།། ཡེ་ཤེས་ངོ་བོ་སྙིང་པོ་འོད་གསལ་བ།། མི་རྟོག་རང་བཞིན་རྣམ་དག་པས།། གཞི་གནས་ཡེ་ཤེས་རང་བྱུང་འོད་གསལ་ལོ།། སྐུ་དང་སྦྱར་ན་ཆོས་སྐུ་ཟང་ཐལ་སྐུ། ། རིག་པ་སྦྱར་ན་ངོ་བོ་ཉིད་ཡིན་ཏེ།། འདུག་ཚུལ་སྦྱར་ན་རང་གསལ་འོད།། སྣ་ཚོགས་འོད་འབར་མཚན་འཛིན་པ།། རང་བཞིན་ལྷུན་གྲུབ་རྟག་ཆད་འདས།། ཕྱི་ནང་མེད་པ་ཟང་ཐལ་འོད། ། སྙིང་པོར་འབྱུང་བ་ཡེ་ཤེས་དོན་དུ་བཤད།། ཡེ་ཤེས་ཞེས་པ་ཡེ་ཉིད་རང་གི་དོན།། དེ་ཉིད་ཤེས་པ་ཚིག་གི་དོན་བཤད་པ།། དེ་ཡི་དབྱེ་བ་བསྟན་པ་ནི།། རིག་པ་རང་དག་ཟང་ཐལ་འོད་གསལ་ལ།། གཞི་གནས་འབྱུང་རུང་ཡེ་ཤེས་ཆེན་པོས་བྱ། ། དེ་ཉིད་སྟོང་པས་ཆོས་དབྱིངས་ཡེ་ཤེས་སོ།། འགག་མེད་གསལ་བས་མེ་ལོང་ལྟ་བུ་ཡིན།། རིག་སྟོང་དབྱེར་མེད་མཉམ་ཉིད་ཡེ་ཤེས་དོན།། གཉིས་མེད་སྐུ་གསུམ་སོ་སོར་རྟོག་པའི་ཡེ་ཤེས་སོ། ། རིག་པའི་ཡེ་ཤེས་ཐོགས་མེད་བྱ་བ་གྲུབ།། དེ་ལྟར་སོ་སོར་བསྟན་ཡང་གདོས་བཅས་མེད།། མི་གནས་ཡེ་ཤེས་བྱ་བར་བསྟན་པ་ཡིན།། དེ་ལྟར་ཤེས་ཤིང་རང་ལ་རང་རིག་པ།། རིག་པའི་ཡེ་ཤེས་སུ་ནི་བསྟན་པ་ཡིན། ། འབྱེད་པ་མེད་པས་རང་བྱུང་ཡེ་ཤེས་སོ།། དེ་དོན་མི་འདའ་འདའ་ཀ་ཐུགས་ཀྱི་ཡེ་ཤེས་སོ།། གཞི་གནས་ཡེ་ཤེས་དཔེ་ནི་ས་གཞི་ལྟར།། ཆོས་དབྱིངས་ཡེ་ཤེས་དཔེ་ནི་ནམ་མཁའ་ལྟར། ། མེ་ལོང་ཡེ་ཤེས་དཔེ་ནི་མེ་ལོང་གཡའ་དག་ལྟར།། སོ་སོར་རྟོག་པ་རྒྱ་མཚོའི་གཟའ་སྐར་ལྟར།། བྱ་བ་གྲུབ་པའི་ཡེ་ཤེས་དཔེ་ནི་ཉི་མའི་སྙིང་པོ་ལྟར།། མི་གནས་ཡེ་ཤེས་དེ་ནི་ཆུ་ཟླ་ལྟར།། རང་རིག་ཡེ་ཤེས་མན་ཤེལ་ལྟ་བུ་སྟེ། ། འདའ་ཀ་ཡེ་ཤེས་དཔེ་ནི་རྒྱལ་པོའི་བཀའ་ཁྲིམས་འདྲ།། ཐམས་ཅད་འབྱུང་བ་གཞི་ཉིད་ཡེ་ཤེས་ཡིན།། ལྟོས་མེད་སྟོང་པ་ཆོས་དབྱིངས་ཡེ་ཤེས་ཡིན།། འགག་མེད་གསལ་བས་མེ་ལོང་ལྟ་བུས་བྱ། ། གཉིས་མེད་སྦྱོར་བྱེད་མཉམ་ཉིད་ཡེ་ཤེས་ཡིན།། མ་འདྲེས་རྫོགས་པར་སོ་སོར་རྟོགས་པར་བྱེད།། ཐོགས་པ་མེད་པར་བྱེད་པས་བྱ་བ་གྲུབ།། མཐའ་བྲལ་བརྗོད་པས་མི་གནས་ཡེ་ཤེས་སོ།། རང་གིས་རང་རིག་རང་ཤར་ཡེ་ཤེས་སོ། ། འགྱུར་མེད་འདུས་མ་བྱས་པ་རང་བྱུང་ཡེ་ཤེས་ལ།། དོན་ལ་མི་འདར་བྱེད་པ་འདའ་ཀ་ཐུགས་ཡེ་ཤེས་ལ།། ཆོས་སྐུ་ཐིག་ལེ་རིག་པའི་རྩལ་སྣང་བ།། ཐ་དད་དང་འོད་ཟེར་དུ་གསལ་བ་ནི། ། རིག་དང་དངོས་མེད་ཟང་ཐལ་དང།། འགག་མེད་དབྱེར་མེད་ཐོགས་པ་མེད་པ་ལ།། ཡེ་ཤེས་ལྔ་ཡི་མཚན་ཉིད་དེ་ལྔས་བཟུང།། དབྱིངས་དང་ཡེ་ཤེས་གཉིས་ནི་རང་གདངས་སྟོང་པའི་ངང།། ཆོས་དབྱིངས་ཡེ་ཤེས་སྟོང་པའི་ངང་ནི་མཐིང་ཁར་གསལ། ། མེ་ལོང་ཡེ་ཤེས་འགག་མེད་ངང་ནི་དཀར་པོར་གསལ།། མཉམ་ཉིད་ཡེ་ཤེས་དབྱེར་མེད་ངང་ནི་སེར་པོར་སྣང།། སོ་སོར་རྟོག་པར་མ་རིག་ངང་ནི་དམར་པོར་སྣང།། བྱ་གྲུབ་ཡེ་ཤེས་ཐོགས་མེད་པ་ནི་ལྗང་ཁུར་གསལ། ། དེ་རྣམས་ཆོས་ཉིད་ངང་ནི་ངོ་བོ་ཡེ་ཤེས་གསལ།། སྐུ་གསུམ་རང་རིག་ཡེ་ཤེས་གསལ་བའི་ལམ།། མ་བསྒྲིབས་ཟེར་འོད་འགག་པ་མེད།། ཡེ་ཤེས་རང་སྣང་གསལ་བའི་ལམ་ཞེས་བྱ། ། ཡེ་ཤེས་ངོ་བོ་འོད་གསལ་ལ།། ཡེ་ཤེས་ཡོན་ཏན་སྒྲིབ་མེད་རིག་པའི་གདངས།། ཡེ་ཤེས་མཁྱེན་ཤར་ཐོགས་པ་མེད།། འབྲས་བུ་སྒྲིབ་མེད་གདངས་ཀྱི་ངང།། སྐུ་གསུམ་རོལ་པ་ཟེར་བརྡ་ལས། ། ཕྱོགས་མེད་རང་གྲོལ་མྱ་ངན་འདས།། མ་རིག་དུས་ཟད་ལས་ཟད་འདས།། འཁོར་བ་ཚེ་ཟད་མཁྱེན་གསུམ་ཐོབ་ཅེས་བྱ།། རྟོགས་པ་སྐུ་དང་ཡེ་ཤེས་ཐོབ།། ཡེ་ཤེས་དོན་ནི་འོད་ཤར་གསལ།། སྒྲིབ་མེད་གསལ་འཚེར་རང་བཞིན་ཟེར་ལ་རོལ། ། རྟོགས་པའི་གང་ཟག་སྐལ་ལྡན་གྱིས།། སྣང་སྲིད་ཡེ་ཤེས་འོད་དུ་འབར།། འཁོར་བ་བྱ་བའི་མིང་ཡང་མེད།། ཁམས་གསུམ་ཉོན་མོངས་གཏན་ནས་ཟད།། རིགས་ལྔའི་སངས་རྒྱས་དོན་དང་ཕྲད།། སྐུ་གསུམ་ཡོན་ཏན་འཕྲིན་ལས་ཀྱང། ། བསམ་ལས་འདས་ཏེ་ཐ་སྙན་ཙམ།། རྟོགས་པ་ཙམ་ལས་གདགས་པ་ལས།། ཕྱོགས་དང་རིས་སུ་ཆད་པ་ནི།། ཀུན་བཟང་ཡོད་པར་མི་གསུང་ངོ།། དེ་འདྲའི་རྟགས་དང་ལྡན་པ་ལ། ། ལམ་དང་ཆ་རྐྱེན་ལྡན་པར་ནི།། རྡོ་རྗེ་སེམས་དཔས་གསུངས་པ་ཡིན།། དོན་དང་ལྡན་པའི་སྐྱེས་བུ་ནི།། དཀོན་མཆོག་གསུམ་ཡང་ངང་དུ་གྲོལ།། འགྲོ་བའི་སྲོག་ཀྱང་ངང་དུ་གཅོད།། དགེ་སྡིག་གཉིས་ཀྱང་ངང་དུ་སྙོམས། ། རིག་ཀུན་ངང་དུ་རླག་པར་བྱེད།། རིག་པའི་རྒྱུན་ཡང་ངང་དུ་གཅོད།། འཁོར་འདས་ངང་ཡང་ངང་གིས་གཅོད།། བློ་ཡི་ཆོས་ཀུན་ཟད་པ་ན།། དོན་དང་ལྡན་དེ་ཆ་རྐྱེན་ཚང།། ཁྱོད་ཀྱི་དེ་ལྡན་ཤེས་པར་གྱིས། ། མདོར་ན་འདི་ཡི་ཆ་རྐྱེན་དུ།། མ་གྱུར་མི་འགྱུར་མི་སྲིད་དེ།། སྐལ་ལྡན་བརྒྱལ་འགའ་ཡིས་རྟོགས།། ཀུན་གྱི་ཐུན་མོང་མ་ཡིན་པས།། རྒྱ་མཚོའི་གཏིང་གི་ཕ་བོང་བཞིན།། སྲིད་པ་འཁྲུགས་ཀྱང་ཁར་མི་དབྱུང། ། གལ་ཏེ་འདུལ་བའི་དུས་མཐོང་ན།། ཟླ་བ་རེ་ཞིང་ཚིགས་བཅད་རེ།། རིམ་གྱིས་སྣོད་དང་སྦྱར་ལ་བསྟན།། དེ་ལས་གཞན་དུ་བློ་དམན་གྱིས།། འདོད་པ་ཅུང་ཟད་རང་དོན་དུ།། སྤེལ་ན་གཉིས་ཀ་དམྱལ་བར་འགྲོ། གལ་ཏེ་བརྒྱ་ལ་ཐར་གྱུར་ན།། རུ་དྲ་སྡེ་གསུམ་དག་ཏུ་སྐྱེ།། དེ་ནས་འཕགས་པའི་ཐུགས་རྗེས་བསྐུལ།། སྔོན་གྱི་དམ་ཚིག་རྗེས་སུ་དྲན།། སྡོད་ཀྱི་གསང་སྔགས་དོན་ལ་འཇུག། གསང་སྔགས་བཀའ་མགོ་ལོག་པ་ཡིས། ། ཉོན་མོངས་དུག་གསུམ་རང་དགར་སྤྱད།། བསྐལ་པ་སྟོང་ཕྲག་བཅུ་གཉིས་སུ།། རྡོ་རྗེ་དམྱལ་བའི་སྡུག་བསྔལ་མྱོང།། དེ་ནས་དེ་ལས་ཐར་པ་ན།། མ་ཏྲང་ཁ་ཏྲཾ་ཨ་ཀར་ཤ།། མགོ་བོ་བརྒྱ་ལ་ལུས་གཅིག་གམ། ། ལུས་པོ་བརྒྱ་ལ་མགོ་གཅིག་གམ།། མཐུ་དང་རྫུན་འཕྲུལ་བསམ་མི་ཁྱབ།། ཚངས་པའི་འཇིག་རྟེན་མན་ཆོད་དུ།། ཀུན་ལ་གནོད་ཅིང་འཚེ་བར་བྱེད།། དེ་ནས་བཛྲ་ཧེ་རུ་ཀས།། ཤིན་ཏུ་གདུག་ཅིང་གཏུམ་པ་ལས། ། ཞི་བས་ཕན་པར་མི་འགྱུར་ཏེ།། ཤེས་རབ་ཐབས་ཀྱི་ངོ་བོ་ཡིས།། ཁྲོ་བོར་དེ་བཞིན་གཤེགས་ཀུན་མཛད།། དུས་དེར་སྔོན་གྱི་དམ་ཚིག་དྲན།། འཁོར་དང་བཅས་པ་ཞི་བར་འགྱུར།། རང་བཞིན་ཆོས་ཉིད་མ་རྟོགས་པར། ། སྒྲ་ཕྱིར་འབྲངས་པའི་ཉེས་པའོ།། དེ་བས་གོང་གི་དོན་ལ་ལྟོས།། ཞེས་ལམ་གྱི་ཆ་རྐྱེན་ཡི་གེའི་ལེའུ་སྟེ་བཅུ་བདུན་པའོ།།།། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ།། ཡེ་ནས་ལྷུན་གྱིས་གྲུབ་པའི་འབྲས་བུ་ལས། ། ཡུན་དང་གྲུབ་ཚུལ་བསྟན་པར་མི་འོས་ཀྱང།། རྟོགས་པ་བསྟན་པའི་ནུས་པ་འདི་ལྟར་མོད།། ཐོགས་མེད་དུས་སུ་གྲུབ་པའི་འབྲས་བུ་ལ།། རྟོགས་ལྡན་ཡེ་ཤེས་གང་ཟག་གཞི་རུ་གསུངས། ། ཡང་རབ་རབ་དང་འབྲིང་དང་ཐ་མ་བཞིས།། ཡང་རབ་ཕུང་པོ་ལྷག་མ་མི་ལུས་དེ།། གཟུང་འཛིན་དབེན་པའི་རྟོགས་པ་བརྟན་པ་ཡིས།། བདག་གཞན་མཉམ་པོར་ངང་གིས་ངང་གི་ནི། ། ཆོས་སྐུ་མཉམ་ཉིད་ངང་དུ་བན་བུན་ལ།། བདག་གཞན་སྣང་སྲིད་ཐམས་ཅད་ཆོས་སྐུར་བུན་གྱིས་བུན།། འབྱུང་བ་ལྔ་ལ་སོགས་པ་ལྷག་གིས་ཤར།། ཡང་རབ་འབྲས་བུ་དེ་ལྟར་དེ་ཡིས་འགྲུབ།། རབ་ཀྱིས་ཐུན་མོང་མ་ཡིན་གཉིས་མེད་དེ། ། རྟོགས་ནས་ངང་གིས་གཟུང་འཛིན་ངང་དུ་དུལ།། ལེ་ལོ་ཕྲ་མོ་སྣང་བ་མ་འགྱུར་ཡང།། འཆི་བའི་སྲིད་པས་རང་གིས་གྲོས་བྱས་ནས།། ས་ཆུ་མེ་རླུང་རྣམ་ཤེས་རབ་གསལ་དང།། གཉིས་མེད་ངང་དུ་རིམ་གྱིས་ཐིམ་གྱུར་ནས། ། ལྷུན་གྲུབ་ནམ་མཁའི་དགོས་པ་ལྷག་གིས་འཆར།། རང་གི་ངོ་བོ་འགྱུར་བ་མེད་པ་ཡང།། རབ་ཀྱི་འབྲས་བུ་ཐ་སྙད་དེ་ལ་གདགས།། འབྲིང་གི་ཟླ་བྲལ་དོན་ཚད་གཅིག་ཏུ་རྟོགས་ན་ནི། ། ཐ་དད་འཁྲུལ་པར་ངེས་པ་སྐྱེས་ནས་ནི།། འཁྲུལ་པ་འཁྲུལ་པར་ངེས་པའི་མཐུ་སྟོབས་ཀྱིས།། བར་མ་དོ་ལ་བར་དོའི་ཤེས་པ་འབྱུང།། བར་དོར་བར་དོའི་ཤེས་པ་བྱུང་ཙམ་ན།། རང་གི་དགོངས་པ་ནམ་མཁའ་ལྟ་བུ་དྲན། ། དྲན་ནས་དེ་ཡི་ངང་ལ་གནས་པ་ལས།། གཟུང་འཛིན་བྱེད་པས་སྐྱེ་བ་ལེན་པར་ནི།། རྡོ་རྗེ་སེམས་དཔས་གསུངས་པ་མ་ཡིན་ནོ།། ཐ་མ་འདི་ཡི་དོན་ལ་ཞུགས་ནས་ནི།། རྟོགས་ཀྱང་བསྟན་པར་བྱ་བ་བསྐལ་མེད་དེ། ། འཇིག་རྟེན་འདི་ཡི་ཟང་ཟིང་འཁྲུལ་པ་ལ།། སླུ་བྱེད་དམ་པ་ཡིན་པར་མ་གཟུང་སྟེ།། འདོད་པ་ཡོད་པས་སྐྱེ་བ་ཕྱི་མ་ལེན།། མོས་པའི་སྟོབས་ཀྱི་མི་ལུས་བླངས་ནས་ཀྱང།། བླ་མེད་ཐེག་མཆོག་འདི་དང་ཕྲད་གྱུར་ནས། ། དེ་ལ་ཕུང་པོ་མ་ལུས་སངས་རྒྱས་པར།། རྡོ་རྗེ་སེམས་དཔའི་ཞལ་ནས་གསུངས་གྱུར་ཡང།། ཁྱོད་ཀྱི་དེ་ལ་རེ་བ་སྐྱེ་གྱུར་ན།། མངོན་ཤེས་གཞན་ཡང་བར་ཆད་འཁོར་བའི་རྒྱུ།། དེ་བས་ཁྱོད་ཀྱི་འདི་ལྟར་ཤེས་པར་གྱིས། ། ཐེག་པའི་རྒྱལ་པོ་བྱ་བ་བྲལ་བའི་ཐབས།། བཀའ་ཡི་ཡང་སྙིང་བྱ་བྲལ་ཤེས་རབ་འདི།། ཐབས་དང་ཤེས་རབ་ཟུང་འབྲེལ་སངས་རྒྱས་ཐུགས།། རྒྱུ་འབྲས་འདས་པའི་ཆོས་སུ་སེམས་དཔས་གསུངས། ། བྱ་བ་བྲལ་བའི་ཆོས་སུ་རྡོ་རྗེ་སེམས་དཔས་གསུངས།། སྐྱེ་བ་ཕྱིས་མི་ལེན་པའི་ཆོས།། ཡིན་པར་ཀུན་བཟང་རྡོ་རྗེ་སེམས་དཔས་གསུངས།། དེ་བས་འདི་ལ་མ་ཡེངས་ཕྱི་མར་རེ་ཐག་ཆོད། ། དཀའ་ཁྱོད་ཞུ་བར་དཔའ་བར་བློ་དང་ལྡན་འདྲ་ཡང།། གཡེང་བའི་དབང་གིས་དོན་ལ་མི་གནས་ན།། བར་དུ་སྐྱེ་རྒ་ན་འཆི་ལ་སོགས་ཀྱིས།། བསྟན་དུ་ཁྱོད་ནི་གྱུར་ཏ་རེ།། སྣོད་མེད་འགའ་ལ་ཁྱོད་ཀྱིས་བསྟན་ན་ནི། ། ཀུན་བཟང་རྡོ་རྗེ་སེམས་དཔའི་བཀའ་ཡང་ཁྱོད་ཀྱིས་བསླུས།། ང་ཡི་བཀའ་ལས་འགལ་ཏེ་འདས་གྱུར་ན།། སྣང་བ་འདི་དག་ཐམས་ཅད་མེར་གྱུར་ནས།། ནམ་མཁའ་གནས་ཀྱི་བར་དུ་ཁྱོད་ཉིད་སྲེག། སྣང་སྲིད་ཀུན་ཡང་ཁྱོད་ཀྱི་གཤེད་མར་འགྱུར།། ཆོས་སྐྱོང་སྲུང་མ་ལ་སོགས་ཐམས་ཅད་ཀྱིས།། ཁྱོད་ལ་མི་བཟང་པ་ཡི་ཆད་པས་གཅོད།། ཐར་པའི་དུས་མེད་འོ་དོད་ཆེན་པོ་འབོད།། དེ་འདྲའི་རྣམ་སྨིན་ས་ལ་མི་སྨིན་པར། ། རང་ལ་སྨིན་ཏེ་འོང་བར་གོ་བར་གྱིས།། ཁྱོད་ཀྱིས་ང་ཡི་བཀའ་ལས་མ་འདས་ན།། རང་གི་ཡི་དམ་ཆོས་ཉིད་མི་གཏོང་ཞིང།། ཀུན་བཟང་རྡོ་རྗེ་སེམས་དཔའི་དགོངས་པ་འདི།། སྣོད་ངན་དམ་ཉམས་ཀུན་ལ་མི་སྤེལ་ཏེ། ། དད་པ་རི་རབ་ལྟ་བུར་མི་འགྱུར་ཞིང།། བརྩོན་འགྲུས་ཆུ་དང་རླན་བཞིན་མི་འབྲལ་ཞིང།། བཟོད་པ་ས་རྡོ་ཆུ་བུར་ཐོབ་པ་ལ།། མ་བཞག་ནན་ཏན་བྱས་ལ་འགའ་ཙམ་ལས།། གཞན་ལ་མ་སྤེལ་རྟེན་གྱི་ཚུལ་དུ་སྦྱིན། ། ཁྱོད་ཀྱིས་ང་ཡི་བཀའ་ལས་མ་འདས་ན།། རྡོ་རྗེ་མཁའ་འགྲོ་ལ་སོགས་ཕྱི་ནང་བསྲུངས་མས་ཀྱང།། ལུས་དང་གྲིབ་མ་བཞིན་དུ་འགྲོགས་ལ་བར་ཆད་ཞི་བར་མཛོད།། དཀོན་མཆོག་གསུམ་གྱི་བྱིན་རླབས་ཐུགས་རྗེ་ཆར་བཞིན་ཕོབ། ། བདག་གི་སྨོན་ལམ་མཐུ་ཡང་ངན་སྔགས་བཞིན།། རྣོ་བས་ཁྱོད་ཉིད་རྡོ་རྗེ་སེམས་དཔར་ཚེ་འདིར་གསུངས།། ཞེས་ཡུན་ནི་ཇི་སྲིད་ཀྱིས་འགྲུབ་པའི་ཡི་གེའི་ལེའུ་སྟེ་བཅོ་བརྒྱད་པའོ། །།། དེ་ནས་འཇམ་དཔལ་བཤེས་གཉེན་ཁྱེའུ་སྣང་བ་བསམ་གྱིས་མི་ཁྱབ་པ་དེ་ཡིད་རབ་ཏུ་དངས་ཏེ།། ཕ་ཧཱ་སུ་ཀ་ཧོ་ནི།། ཨོཾ་མཱ་ཨེ་མ།། རྡོ་རྗེ་སེམས་དཔའི་སྐུ་མཆོག་འགྲོ་དཔལ་ཐུགས་དཀྱིལ་ནས་བདུད་རྩི་ཆུ་རྒྱུན་བྱང་སེམས་བཅོ་བརྒྱད་འབབ། ། ཉོན་མོངས་ཀོ་སྐམ་དག་གི་ཐ་བ་ལ།། མི་བངས་སྐམས་མེད་འགྲོ་ཀུན་གྲོལ་མཉམ་སེམས།། བྱང་སེམས་གབ་པ་ཞུས་པའི་ཡི་གེ་འདི།། བདག་གི་བློ་བའི་དཀྱིལ་དུ་ས་མ་ཡ། ། བདེ་གཤེགས་བྱིན་རླབས་མ་ལུས་དུས་འདིར་བདག་ལ་འདུས།། འགྲོ་བའི་དུག་ཆེན་སེལ་མཛད་སྨན་ཆེན་མགོན་པོ་སེམས་དཔས་གསུངས།། སྐལ་ལྡན་འགྲོ་བ་གྲོལ་བར་ཐེ་ཚོམ་མེད།། ཀུན་ཏུ་བཟང་པོའི་ཞལ་ཡང་དུས་འདིར་མཐོང། ། རྡོ་རྗེ་སེམས་དཔའི་ཞལ་ཡང་དུས་འདིར་མཐོང།། རིགས་གསུམ་མགོན་པོའི་ཞལ་ཡང་དེ་རིང་མཐོང།། བདེ་གཤེགས་ཐུགས་ཀྱི་ཉི་མ་ད་ལྟར་ཤར། ཁམས་གསུམ་འཁོར་པའི་མུན་པ་ད་ནང་སངས། ། འཁོར་འདས་གཉིས་ཀྱི་ཟམ་པ་དེ་རིང་ཚུགས།། ཁམས་གསུམ་དུག་གསུམ་ནང་ནས་སྐྱས་ཆེན་འདེབས།། ཟག་པ་ཟད་ཅིང་བྱ་བ་དེ་རིང་བྱས།། དེ་རིང་འཁོར་བའི་གདོས་དང་བྲལ། ། རྡོ་རྗེ་སེམས་དཔའི་ཐུགས་ཀྱི་ཐིགས་པ་འདི།། བདག་གིས་དམ་པ་ཉིད་དུ་གཟུང་བར་བྱ།། མགོན་པོ་ཁྱོད་ཀྱི་བཀའ་ལས་བདག་མི་འདའ།། རྡོ་རྗེ་སེམས་དཔའི་བཀའ་ལས་བདག་མི་འདའ།། མཁའ་འགྲོ་དམ་ཅན་བཀའ་ལས་བདག་མི་འདའ། ། རྡོ་རྗེ་སེམས་དཔའ་ཁྱོད་ཀྱི་བཀའ་སྩལ་ཚུལ་བཞིན་བགྱི།། ཐུགས་རྗེ་ཅན་གྱི་བཀའ་བཞིན་བདག་བགྱིད་དོ།། དཀོན་མཆོག་གསུམ་གྱི་བཀའ་མི་སླུ།། ཉི་ཟླ་ས་ལ་ལྟུང་བ་སྲིད་དུ་རུང། ། སེམས་དཔའ་ཁྱོད་ཀྱི་བཀའ་ལས་འདའ་མི་སྲིད།། ཁྱོད་ཀྱི་བཀའ་དྲིན་ཡལ་བར་བདག་མི་གཏོང།། དེ་བཞིན་གཤེགས་པའི་དགོངས་པའི་ཡང་སྙིང་འདི།། དམ་ཉམས་སྡིག་ཅན་ཀུན་གྱི་ལག་ཏུ་བདག་མི་གཏོང། ། འཇིག་རྟེན་གཡེང་བའི་ལག་ཏུ་བདག་མི་གཏོང།། དེ་བཞིན་གཤེགས་པ་ཀུན་གྱི་བྱིན་རླབས་དང།། མགོན་པོ་སེམས་དཔའ་ཁྱོད་ཀྱི་བྱིན་རླབས་ཀྱིས།། བདག་ཉིད་འཁྲུལ་པའི་དབང་དུ་མ་གྱུར་ཅིག། མཐུ་དང་རྫུ་འཕྲུལ་དབང་དུ་མ་གྱུར་ཅིག། བར་ཆོད་བདུད་ཀྱི་དབང་དུ་མ་འགྲོ་ཞིག། སྲིད་པའི་འཚོ་ལས་འགྲོ་བ་འདོན་པར་ཤོག། རྫོགས་སོ།།།། རྒྱ་གར་གྱི་མཁན་པོ་བི་མ་ལ་མི་ཏྲ་དང།། ཞུ་ཆེན་གྱི་ལོ་ཙ་བ་དྲན་པའི་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་ནས། ། ཉང་ཏིང་འཛིན་ལ་གདམས།། དེས་སྦ་མོ་རྒྱ་ལེ་མཚོ་ལ་གདམས།། དེས་སྦ་བློ་གྲོས་དབང་ཕྱུག་ལ་གདམས།། དེས་འབྲོམ་ཡེ་ཤེས་བླ་མ་ལ་གདམས། ། དེས་སྲས་རྒྱལ་བའི་ཤེས་རབ་ལ་གདམས།། དེས་ཞང་དར་མ་ཡེ་ཤེས་ལ་གདམས།། དེས་ཤངས་པ་ལྕེ་ཆུང་བ་ཡེ་ཤེས་རྒྱལ་མཚན་ལ་གདམས།། དེས་ཤུད་ཀྱེ་སྟོན་པ་མི་འཇིགས་ལ་གདམས། ། དེས་སྔོན་སྟོག་རྒྱལ་མཚན་ལ་གདམས།། དེས་ལྕེ་སྟོན་རྡོ་རྗེ་གཟུངས་ལ་གདམས་སོ།། སྙན་རྒྱུད་ངེས་པའི་ལྡེ་མིག། པོ་ཏི་སེ་རུ་མཐིང་ཤོག་ཅན་གྱི་རྒྱུད་རྫོགས་སོ།།།། མ་།།། རྒྱ་གར་སྐད་དུ།། ཏིལ་སི་ཏ་པེ་དུ་དིའུ་ར་ན་ཏན་ཏྲ་ནཱ་མ།། བོད་སྐད་དུ།། བསྐལ་བ་དུམ་བུ་འབར་བ་སྒྲོན་མ་སྣང་བའི་རྒྱུད་ཅེས་བྱ་བ།། དཔལ་ཀུན་ཏུ་བཟང་པོ་བདེ་བ་རང་རིག་པའི་རྒྱལ་པོ་ཆོས་ལས་འདས་པའི་སྐུ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པའི་དུས་གཅིག་ན།། བཅོམ་ལྡན་འདས་ཏིང་ངེ་འཛིན་སྒྲོན་མ་འབར་བ་ཞེས་བྱ་བ་ལས་བཞེངས་ཏེ།། གསང་བའི་བདག་པོ་རྡོ་རྗེ་སེམས་དཔའ་དང་ཐབས་ཅིག་པའི་བྱང་ཆུབ་སེམས་དཔའ་རྣམས་ལ་སོགས་པ། ། ལག་ན་རྡོ་རྗེ་དང།། རྡོ་རྗེ་འདུས་པ་དང།། རྡོ་རྗེ་ཀུན་དུ་བཟང་པོ་རྣམས་ལ་བཀའ་སྩལ་པ།། རང་བཞིན་གྱིས་རྣམ་པར་དག་པ་ལྷུན་གྱིས་གྲུབ་པའི་གནས་འདི་ཉིད་ན། ། བྱ་སྣ་ཚོགས་སྐད་སྙན་པ་སྣ་ཚོགས་སྒྲོག་པ།། ཉམས་དགའ་བའི་ཕྱོགས་འདིར་རང་བསྐལ་བ་དུམ་བུའི་རྒྱུད་བཤད་པར་བྱའོ།། ཞེས་གསུངས་པ་དང། ། གསང་བའི་བདག་པོ་ལ་སོགས་པ་རྣམས་ཤིན་ཏུ་ཡི་རང་སྟེ།། སུས་མོ་གཡས་པའི་ལྷ་ངས་ལ་གཙུགས་ཏེ་ཕྱགས་འཚལ་ནས།། ལེགས་སོ་ལེགས་སོ་བཅོམ་ལྡན་འདས།། བདག་ཅག་མཁའ་འགྲོ་མ་རྣམས་དང། ། ས་ལ་གནས་པའི་བྱང་ཆུབ་སེམས་དཔའ་ལ།། བདག་ཅག་གྲོལ་བར་བྱ་བའི་ཕྱིར།། བསྐལ་བ་དུམ་བུ་བཤད་པར་ཞུ།། ཞེས་ཞུས་པས།། ངས་གསུངས་པ་ལ་མ་སྐྲག་པར།། རབ་ཏུ་ལེགས་པར་ཡིད་ལ་ཟུང། ། ཞེས་གསུངས་སོ།། གླེང་གཞིའི་ལེའུ་སྟེ་དང་པོའོ།།།། དེ་ནས་ཀུན་ཏུ་བཟང་པོ་ཡིས།། གསང་བདག་རྡོ་རྗེ་སེམས་དཔའ་རྣམས།། ཐོག་མཐའ་མེད་པའི་ལྷུན་གྲུབ་ལ།། རྒྱ་ཆད་ཕྱོགས་ལྷུང་མེད་པའི་དབྱིངས། ། ཀུན་གྱི་མཉམ་ཉིད་ཡིན་པ་ལ།། ལྷུན་གྲུབ་འགག་མེད་རླུང་ཆེན་གྱིས།། སྲིད་པ་འཕྲུལ་གྱི་མེ་ལོང་མཐོང།། སྣང་སྲིད་གསལ་བའི་མེ་ལོང་དུ།། ང་ཉིད་མཉམ་བཞག་ཕྱག་རྒྱས་བཏབ།། རང་གྲོལ་རང་ཤར་གྱི་བདག་པོ་ཡིན། ། ཕྱོགས་ལྷུང་མེད་པའི་ཤེས་རབ་དང།། གཉིས་སུ་མེད་པའི་ཤེས་རབ་དང།། བདག་འཛིན་མེད་པའི་ཤེས་རབ་ཀྱིས།། རང་གྲོལ་ཉིད་ཀྱི་དགོངས་པ་ཐོབ།། ཅེས་གསུངས་སོ།། བསྐལ་པ་དུམ་བུའི་རྒྱུད་ལས། ། ཀུན་ཏུ་བཟང་པོ་རང་གྲོལ་གྱི་ལེའུ་སྟེ་གཉིས་པའོ།།།། དེ་ནས་ཡང་ཐིག་ལེ་ཆོས་མེན་གྱི་ཀློང་བྱ་བཙལ་དང་བྲལ་བའི་ངང་ནས།། རྡོ་རྗེ་སེམས་དཔའ་ལ་སོགས་པ་ལ་བཀའ་སྩལ་པ། ། ཀྱེ་ཀྱེ་གསང་བའི་བདག་པོ་ཉོན་ཅིག། ཞེ་སྡང་དྲག་པོའི་ལས་ཀྱི་འབྲས་བུ་ནི།། མཚམས་མེད་ལྔ་སྤྱད་མི་དགེ་བཅུ་སྤྱད་པས།། ཚ་གྲང་བརྒྱད་གཉིས་ཉི་ཚེ་ཉེ་འཁོར་ཏེ།། ལས་ཀྱི་འབྲས་བུ་དམྱལ་བའི་ཁ་བརྒྱུད་ལས། ། དམ་ཚིག་ཉམས་པའི་རྡོ་རྗེ་དམྱལ་བ་རྣམས།། དམྱལ་དཔོན་ཆོས་ཀྱི་རྒྱལ་པོས་སྐྱོབ་བམ་ཅི།། གལ་ཏེ་མི་སྐྱོབ་ཐུབ་པར་ཅི་ལ་གྲགས།། སྐྱོབ་ན་དམྱལ་བའི་འབྲས་བུ་ཚ་གྲང་རྫུན།། མེ་ཉིད་ཆུར་གྲུབ་ཁྲོ་ཆུ་ཞུན་མ་དང། ། ཆུ་ཉིད་མེར་གྱུར་གྲང་བའི་ཆུ་རྣམས་དང།། རླུང་ཉིད་བྲག་གྱུར་རྡོ་རྗེ་རྒྱ་གྲམ་རྣམས།། རང་སྣང་རྐྱེན་གྱིས་བསྒྲིབས་པས་དམྱལ་བར་སྣང།། རང་སྣང་དག་པའི་རྡོ་རྗེ་སེམས་དཔའ་ལ། ། དམྱལ་བའི་མེ་ཆུ་ཞིང་ཁམས་རྣམ་དག་ཡིན།། འཛིན་པ་རྣམ་དག་ཚ་གྲང་གནས་ནས་དྲང་མི་དགོས།། ཆོས་སྐུ་ཐུག་ཕྲད་སྐྱེས་པས་མྱོང་མཐོང་རྣམ་པར་དག། དེས་ན་དེ་ཡི་དམྱལ་དཔོན་ཐུབ་པ་ཡིན།། རང་གྲོལ་རང་སྣང་ཤར་ནས་ཐུབ་པའི་རྒྱལ་པོ་ཡིན།། ཅེས་གསུངས་སོ།། བསྐལ་པ་དུམ་བུའི་རྒྱུད་ལས།། དམྱལ་བའི་གནས་ན་ཐིག་ལེ་ཆོས་མིན་དུ་བསྟན་པའི་ལེའུ་སྟེ་གསུམ་པའོ།།།། ཡང་ཐིག་ལེ་ཆོས་མིན་གྱི་ཀློང་ནས། ། གསང་བའི་བདག་པོ་ལ་བཀའ་སྩལ་པ།། ཀྱེ་གསང་བདག་རྡོ་རྗེ་སེམས་དཔའ་ཉོན།། འདོད་ཆགས་དྲག་པོ་ལས་ཀྱིས་མཚམས་མེད་སྤྱད།། སེར་སྣས་བཅིངས་ཏེ་མི་དགེ་བཅུ་ཡང་སྤྱད།། སྤྱད་པའི་འབྲས་བུ་ཡི་དྭགས་རྣམ་གསུམ་དུ། ། མྱོང་བ་རྒྱུ་མཐུན་འབྲས་བུ་སོ་སོར་སྨིན།། ཕྱི་ཡི་སྒྲིབ་པ་ནང་གི་སྒྲིབ་པ་དང།། གཉིས་ཀའི་སྒྲིབ་པ་རབ་ཏུ་གདུངས་པ་ལ། ཁ་འབར་རྒྱལ་མོས་སྐྱོབ་བམ་ཅི།། སྐྱོབ་ན་སྒྲིབ་པས་མནར་བ་ག་ལ་སྲིད། ། མི་སྐྱོབ་ཐུབ་པར་གདགས་པའི་རྒྱུ་མཚན་ཅི།། སྣང་བ་རང་སར་དག་ན་ཐུབ་པའི་ཐུགས་རྗེ་རྫུན།། མོས་པས་དྲང་ཕྱིར་ཐུབ་པ་ཙམ་དུ་བཏགས།། རང་གྲོལ་རང་ཤར་ཤེས་ཙམ་ན།། ཡི་དྭགས་གནས་ན་བདེ་ཆེན་ཐིག་ལེར་འབར། ། འབར་བའི་རྒྱལ་པོ་འདི་ལ་གྲོལ་དང་མ་གྲོལ་མེད།། ཐིག་ལེ་ཆོས་མིན་སྐུ་སྒྲིབ་པ་ཡེ་ནས་དག། མྱོང་བའི་རྒྱུ་འཐུན་འབྲས་བུ་གདོད་ནས་རྣམ་པར་དག། རྒྱ་ཆད་ཕྱོགས་སུ་མ་ལྷུང་ཐིག་ལེ་ཆོས་མེན་སྐུ། ། རང་བྱུང་གདོད་ནས་དག་པས་བཙལ་བའི་བློ་ལས་འདས།། ངོ་བོ་རང་སར་གྲོལ་བས་སྒྲིབ་པ་ག་ལ་ཡོད།། གདོད་ནས་རང་བྱུང་རྫུན་མིན་རྣམ་དག་རྫུན།། ཅེས་གསུངས་སོ།། བསྐལ་བ་དུམ་བུའི་རྒྱུད་ལས། ། ཡི་དགས་རང་བྱུང་གདོད་ནས་དག་པའི་ལེའུ་སྟེ་བཞི་པའོ།།།། དེ་ནས་ཡང་ཐིག་ལེ་ཆོས་མིན་གྱི་ཀློང་ནས་བཀའ་སྩལ་པ།། གསང་བའི་བདག་པོས་ལེགས་པར་ཟུང་ཞིག་གཏི་མུག་མི་རིག་དབང་གི་ནི། ། ལས་ཀྱི་འབྲས་བུ་བྱོལ་སོང་རིགས་བཞི་འཁྲུལ། ངམ་འགྲོག་གཅོང་རོང་ཟབ་མོའི་གཡང་ས་དག་ཏུ་བཟུང་བ་ཡང།། གཏི་མུག་དབང་གིས་དེ་ལྟར་མཐོང་བ་ཡིན།། གླང་མགོའི་ཐུགས་རྗེས་མི་གཏོང་སྟེ།། རང་སྣང་རྣམ་དག་ཡེ་ཤེས་འོད་ལྡན་པའི། ། བྱོལ་སོང་ཙམ་དུ་མིང་དུ་བཏགས་པ་ལས།། དེ་ནས་བྱོལ་སོང་རྒྱུད་དུ་འགྲུབ་པ་མེད།། ཐིག་ལེ་ཆོས་མེན་ཡེ་ཤེས་ཟང་ཐལ་ཡིན།། སྣང་སྲིད་རང་བྱུང་སྐྱེ་འགག་གདོད་ནས་དག། ནམ་མཁའ་བཞིན་དུ་མཐའ་དབུས་གྲུབ་པ་མེད།། རྒྱ་ཆད་ཕྱོགས་སུ་མ་ལྷུང་དོན་གཅིག་མ་རྟོགས་ན།། བློ་ཆུང་ཕྱོགས་རྟོགས་མཁན་པོ་དེ།། དམ་པར་ཞན་ནས་བདུད་དུ་སོང་བར་འཆིའོ།། ཞེས་གསུངས་སོ། ། བསྐལ་བ་དུམ་བུ་འབར་བའི་རྒྱུད་ལས།། བྱོལ་སོང་རང་དག་གི་ལེའུ་སྟེ་ལྔ་པའོ།།།། ཡང་ཐིག་ལེ་ཆོས་མེན་གྱི་ཀློང་ནས་བཀའ་སྩལ་པ།། གསང་བའི་བདག་པོ་ཉོན་ཅིག། ང་རྒྱལ་རང་རྒྱུད་དྲག་པོས་རྒྱ་བྱས་ནས། ། མ་རིག་གླིང་བཞིར་བཅད་ཀྱིན་ཕྱེ་བ་ཡང།། བཅོམ་ལྡན་ཐུབ་པའི་སྐུ་ཡི་ཐུགས་རྗེ་དེ།། འགའ་ཙམ་འདྲོངས་སམ་ཐམས་ཅད་ཡོངས་མི་འདྲོངས།། འདྲེན་པའི་ཐུབ་པས་འདྲོངས་སུ་དུས་དང། ། གནས་སྐབས་འགའ།། དུས་ལ་བབ་ཀྱང་རང་གྲོལ་མ་ཤེས་ན།། གནས་སྐབས་ཙམ་གྱི་འབྲས་བུ་སངས་མི་རྒྱ།། འདྲེན་པའི་ཐར་པར་འབྲས་བུ་འཁོར་བར་འཁྱམས།། རིག་པས་བཅུན་པའི་གདམས་པའི་ཞལ་ཆེམས་ནི། ། རྒྱུད་པ་མང་དུ་གདམས་ཏེ་གོ་བ་དཀའ།། སྣོད་ངན་ཞབས་རྡོལ་ལ་སོགས་ལ།། རྣ་བར་འགའ་ཙམ་བླུགས་པའི་འབྲས་བུ་ཡིས།། ཕྱི་མར་སྤྲུལ་སྐུ་ཐོབ་ནས་སངས་རྒྱས་པ།། ཐབས་ཀྱིས་སྤྱོད་པས་བསྟུན་གྱིན་བཀྲི་བར་བྱ། ། ཚོགས་གཉིས་མ་རྫོགས་སྒྲིབ་གཉིས་མ་སྦྱངས་ཀྱང།། རྡོ་རྗེ་ལྟ་བུའི་ཏིང་འཛིན་ཐོབ་པར་འགྱུར།། རིག་པ་སྐྱང་སྒོམ་སྣང་བ་སྟོང་མི་བསྒོམ།། དངོས་པོ་སྒོམ་པས་འདུས་བྱས་ཟང་ཀ་མ། ། མེད་པ་མི་སྒོམ་ཡིད་སྨོན་བློ་ཡི་ཆོས།། རང་རྒྱུད་དག་ཏུ་མི་འཆོར་ཡེ་ཤེས་བལྟས་བས་གྲོལ།། གླིང་བཞི་མི་རིགས་ཀློང་ལ་ཐིག་ལེར་བདལ།། རེ་དོགས་གཟུང་འཛིན་མཚན་མ་མེད།། རྒྱ་ཆད་ཕྱོགས་སུ་མ་ལྷུང་ལྷུན་གྲུབ་འགག་མེད་ཡིན། ། ཡིན་པར་ངས་མ་ཤེས་པས་རྒྱལ་པོ་རྐང་འཁྱམས་འདྲ།། འདྲ་བ་ངོས་མ་ཟིན་འཁོར་བར་འཁྱམས།། སྤྲུལ་སྐུ་ཐུག་ཕྲད་འདི་ལ་སྒོམ་དུ་གདོད་ནས་མེད།། ཅེས་གསུངས་སོ།། བསྐལ་པ་དུམ་བུའི་རྒྱུད་ལས། ། གླིང་བཞི་མི་རིགས་ཡེ་གྲོལ་དུ་བསྟན་པའི་ལེའུ་སྟེ་དྲུག་པའོ།།།། ཡང་བཀའ་སྩལ་པ།། གསང་བའི་བདག་པོ་ཉིན་ཅིག། ཁོང་ཁྲོ་དྲང་ཐད་དྲག་པོའི་འབྲས་བུ་ཡིས།། ལྷ་མ་ཡིན་དང་དཔག་བསམ་ལྗོན་པ་རྣམས། ། འཐབ་རྩོད་བཞིར་གྱུར་འཕམ་རྒྱལ་སྣ་ཚོགས་ཀྱང།། ཐིག་ལེ་ཆོས་མེན་ཀློང་ནས་བདེ་ལ་ཡངས།། འཐབ་རྩོད་རང་གྲོལ་ཐིག་ལེ་ཡེ་ཤེས་གསལ།། ཏིལ་གྱི་གང་བུ་བཞིན་དུ་ཡེ་ནས་བར་མཚམས་མེད། ། རིག་པ་རང་གྲོལ་མཚན་མའི་བློ་ལས་འདས།། ཡེ་ཤེས་ཁོང་གསལ་མཚན་མ་རང་སར་གྲོལ།། ཐིག་ལེ་ཕྱི་ནང་མེད་པར་ཡ་མཚན་ཆེ།། སྲོག་གི་སེ་དར་དྲག་པོའི་སྤུ་གྲི་འབར་བ་དེ།། ཙན་ད་ལོག་སྤྱོད་ཅན་གྱིས་བདག་གསོད་གཞན་སྒྲོ་ལྟར། ། འཁོར་བའི་དྲས་ཐག་བཅད་ནས་གཞན་བསྒྲལ་ཏེ།། མཚན་མ་རང་སར་སྒྲོལ་བས་གཞན་ཡང་བསྒྲལ།། ཅེས་གསུངས་སོ།། བསྐལ་བ་དུམ་བུའི་རྒྱུད་ལས།། ལྷ་མ་ཡིན་ཡེ་ནས་རང་གྲོལ་བའི་ལེའུ་སྟེ་བདུན་པའོ། །།། ཡང་བཀའ་སྩལ་པ།། ཉོན་ཅིག་གསང་བའི་བདག་པོ་ཁྱོད།། ཕྲག་དོག་དྲག་པོའི་ལས་ཀྱི་འབྲས་བུ་ཡིས།། ལྷ་ཡི་གནས་སུ་འབྲས་བུར་འཁྲུལ་བ་ནི། ། འདོད་ཁམས་གཟུགས་ཁམས་གཟུགས་མེད་ཁམས་གསུམ་མོ།། དབང་པོ་བརྒྱ་བྱིན་ཐུབ་པའི་སྤྲུལ་སྐུ་དེ།། ལྷ་ཡི་ལྟུང་བ་མ་འདྲོངས་ཐུགས་རྗེ་རྫུན།། ཐམས་ཅད་འདྲོངས་པར་ངས་མ་མཐོང་སྟེ་དེ་བས་ལྟུང་བ་མང། ། དེ་ཡི་ཐུགས་རྗེ་བདེན་ན་ཐམས་ཅད་འདྲོངས།། འགའ་ཙམ་འདྲོངས་པ་འདྲ་བ་མཁར་ཆེ་སྟེགས་པར་འགྱུར།། ཐམས་ཅད་འདྲོངས་ཐུབ་པའི་ཐུགས་རྗེ་རྫུན།། ཐུག་རྗེ་དབྲི་བཀོལ་ཡེ་ནས་མེད་པ་ལ། ། ཕྱོགས་རྟོགས་ཙམ་དུ་རང་གིས་བཟུང་བ་ཡིན།། ཐིག་ལེ་ཆོས་མེན་ཀློང་ནས་འགྲོ་དྲུག་ཡངས་ཀྱང་ཡངས།། རང་རྒྱུད་འཛིན་པ་ཙམ་ལ་སྲིད་གསུམ་དོག་ཀྱང་དོག། ཐིག་ལེ་ཆེན་པོའི་རིགས་ལ་ཡེ་ནས་ཡངས་ཀྱང་ཡངས། ། བློ་ཆུང་སྨན་པ་རྣམས་ལ་སེམས་འཛིན་ཙམ་ཡང་དོག། རང་གྲོལ་རང་ཤར་ཤེས་ན་སྲིད་གསུམ་གདོད་ནས་དག། སེམས་འཛིན་ཕྲ་མོ་རྩོམ་པ་ནི།། སངས་རྒྱས་ཐུགས་རྗེ་ཕྱོགས་མེད་དོག། འཛིན་པ་མ་འགགས་སངས་རྒྱས་ཐུགས་རྗེ་ཡིན། ། རོལ་པ་མ་འགགས་སངས་རྒྱས་རྒྱན་དུ་ཤར།། སྣང་བ་མ་འགགས་སྣང་སྲིད་ཐིག་ལེར་བདལ།། ཁྱབ་གདལ་ཀློང་ན་ཡེ་ཤེས་ཡངས་ཀྱང་ཡངས།། རྒྱ་མ་ཆད་ཅིང་ཕྱོགས་སུ་མ་ལྷུང་བས། ། སངས་རྒྱས་ཐུགས་རྗེ་དམྱལ་བའི་ཚེར་ལྷང་ནས།། འདོད་འཇོའི་བ་ལ་དབྱེ་བ་ཡེ་ནས་མེད།། ཐུན་དུ་བཅུག་ལ་སྒོམ་དུ་ཡེ་ནས་མེད།། འཛིན་པ་མི་འགེགས་ཐུགས་རྗེ་ཡིན།། ཐུགས་རྗེ་འགེགས་ན་ཡེ་ཤེས་རྒྱུད་གཅོད་དམ། ། རང་ལ་རྩལ་དུ་རང་བྱུང་འགག་པར་གསུངས།། དབྱེར་མེད་སྒྲུབ་ཏུ་གཉིས་སྣང་ཁ་རུ་འཆོར།། སངས་རྒྱས་ཡིད་སྨོན་བྱེད་ན་ཡེ་ནས་རང་ཆས་རྫུན།། ཅེས་གསུངས་སོ།། བསྐལ་བ་དུམ་བུ་འབར་བའི་རྒྱུད་ལས། ། འགྲོ་དྲུག་རང་སར་གྲོལ་པའི་ལེའུ་སྟེ་བརྒྱད་པའོ།།།། དེ་ནས་ཡང་བཅོམ་ལྡན་འདས་ཀྱིས།། གསང་བའི་བདག་པོ་ལ་བཀའ་སྩལ་པ།། ཀྱེ་གསང་བའི་བདག་པོ་ཉོན་ཅིག། སྣང་བའི་གདམས་པ་བསྟན་གྱིས་ཞེས་གསུངས་ཏེ། ། ཉིད་ཀྱིས་བཀའ་སྩལ་དུ་གསོལ་ཅེས་ཞུས་པས།། བཀའ་སྩལ་པ།། འགྲོ་བ་རིགས་དྲུག་མུ་སྟེགས་རྟག་ཆད་དང།། ཐེག་པ་རིམ་བརྒྱད་དག་ལ་འཇིག་རྟེན་པའོ།། སྣང་བ་བསྡུས་པ་རྣམ་པ་བཞི་ཡིན་ཏེ། ། འགྲོ་བ་རིགས་དྲུག་དག་གི་སྣང་བ་ནི།། ཐུགས་རྗེ་སྐུ་གསུམ་སྤྲུལ་པའི་རང་སྣང་ལ།། ལོག་པར་མཐོང་བས་ངན་འགྲོ་བདེ་འགྲོ་ཡི།། སྣང་བ་དྲུག་ཏུ་ཕྱེ་ཡང་རང་སྣང་རྣམ་དག་ཆོས་སྐུ་ཡི། ། བྱིན་བརླབས་དབྲི་བཀོལ་མེད་པར་མ་ཤེས་ན།། འགྲོ་དྲུག་རང་གྲོལ་འོང་བའི་དུས་མི་མཆི།། མུ་སྟེགས་རྟག་ཆད་ལྟ་བའི་སྣང་བ་དེ།། རང་སྣང་དབྱེར་མེད་མ་ཤར་ན།། རྟག་ཆད་སྣང་བ་ལོག་ནས་འཁོར་བར་འཁྱམ། ། ཀུན་བརྟགས་རིམ་དགུའི་སྣང་བ་སོ་སོར་འབྱེད།། བློ་ཆུང་སྣང་བ་ཕྱོགས་མེད་མ་རྟོགས་ན།། ཡང་དག་རང་སར་གྲོལ་བའི་དུས་མི་མཆི།། ཀུན་བརྟགས་ལྷ་ཡི་སྣང་བ་སྒྱུ་མ་ཙམ།། སྒྱུ་མ་རང་གྲོལ་རང་ཤར་མ་ཤེས་ན། ། བདེ་ཆེན་རང་སྣང་དག་པའི་དུས་མི་མཆི།། གསང་བའི་བདག་པོ་ཉོན་ཅིག། འགྱུ་བ་ཕྱོགས་མེད་ཡི་གེ་འབྲི་བ་ལ།། ཀློག་མཁན་མ་བྱེད་མཁྱེན་པ་སྐྱུངས།། རང་སྣང་གདངས་ཤོག་གསལ་བ་ལ། ། འགྱུ་བའི་ཡི་གེ་འབུར་དུ་བཀོད་པ་འདི།། རྡོ་རྗེ་སེམས་དཔའ་ཁྱོད་ཀྱིས་ཀྱང་བཤིག་པར་དཀའ་འོ།། དོན་འགྱུར་བ་མེད་པའི་རང་སྣང་ལ།། ཤེས་རབ་རྩལ་གྱིས་གཟོ་བྱས་སྣང་བ་དེ།། ང་ཀུན་ཏུ་བཟང་པོས་རྙེད་པར་དཀའ། ། དུས་གསུམ་འགྱུར་བ་མེད་པའི་ཡེ་ཤེས་དེ།། རང་རིག་བློ་བུ་རྐུན་མས་ཁྱེར་བ་ནི།། ཕྱ་ཧེ་ལེས་སྤྱད་གཏིང་ཡང་མི་རྙེད་དོ།། རྟག་ཏུ་འགྲོགས་པའི་རང་རིག་དེ།། དཔྲལ་ཆུང་གི་ཆུ་བོའི་རྦ་ལ་གཡེངས་བ་མཚོར་ན། ། རྟག་ཏུ་ལྟ་སྒོམ་བྱས་ཀྱང་སླུ་སྟེ་མཆིའོ།། རིགས་ཀྱི་བུ་ཉོན་ཅིག། གོ་བར་དཀའ་བའི་ཚིག་དོན་དེ།། ཟབ་མོའི་སྒྲ་རུ་བརྗོད་པས་བཅས།། ཕྱོགས་སུ་ལྷུང་ཞིང་རྒྱ་ཡང་ཆད།། དབྲི་བཀོལ་མེད་པའི་ཡེ་ཤེས་ལ། ། ལྟ་སྒོམ་སྤྱོད་པའི་ལྷད་ཀྱིས་བསླད།། ཤེས་བྱ་གཤིས་ཀྱི་འདུག་ཚུལ་ལ།། ཕྱོགས་རེ་ཙམ་ལ་རྟེན་བྱས་ནས།། ཡེ་ཤེས་སྐྱེས་སོ་ཟེར་བ་རྒོད་རེ་བྲོ།། སྐྱེས་པ་འགག་པས་ཡེ་ཤེས་འདུས་བྱས་ལ།། རང་སྣང་ཁྱབ་གདལ་ཕྱོགས་ལྷུང་མེད་པ་ལ། ། ཉམས་མྱོང་ཤར་རོ་ཟེར་བ་རྒོད་རེ་བྲོ།། ཤར་བ་ནུབ་པས་ཉམས་མྱོང་འདུས་བྱས་ཐལ།། གཉེན་པོ་སྒོམས་པས་འབྲས་བུ་ཐོབ་ཅེར་ཟེར་བ་དེ།། གཉེན་པོ་ཐུག་མེད་འབྲས་བུ་འདུས་བྱས་འགྱུར། ། རྒྱུ་འབྲས་རོ་མཉམ་ཡེ་ཤེས་ཆོས་ཀྱི་སྐུ།། རྟོག་སྤྱོད་ཡུལ་ལས་འདས་པའི་དགོངས་པ་ནི།། ཀུན་ཏུ་བཟང་པོའི་དགོངས་པ་སྟེ།། རང་སྣང་ཡེ་ཤེས་འབའ་ཞིག་གོ།། ཞེས་གསུངས་སོ།། བསྐལ་བ་དུམ་བུའི་རྒྱུད་ལས། ། སྣང་བ་ཐམས་ཅད་རང་སྣང་དུ་བསྟན་པའི་ལེའུ་སྟེ་དགུ་པའོ།།།། དེ་ནས་གསང་བའི་བདག་པོས་ཞུས་པ།། སྣང་འཛིན་གཉིས་ལ་ངོ་སྤྱད་བསྟན་དུ་གསོལ།། ཞེས་ཞུས་པས།། ཐིག་ལེ་ཡངས་པའི་ཀློང་ཉིད་ནས་བཀའ་སྩལ་པ། ། ཐུན་མོང་མ་ཡིན་པ་ཡི་ཆོས་འདི་ནི།། བརྒྱུད་པའི་བརྡ་དེ་དག་གིས་མཚོན་པ་ནི།། སྣང་བའི་བརྡ་ནི་རྣམ་པ་བཞི།། རང་སྣང་རང་གྲོལ་གསལ་བའི་མེ་ལོང་བས་ཀྱང་གསལ་བ་འདི། ། འཛིན་པ་སོ་སོར་མཐོང་བ་འདི།། ཇི་ལྟ་བུར་ཀྱང་སྣང་བ་འདི།། མ་ངེས་ཁ་དོག་དཀར་དམར་གྱིས།། བར་མ་དོ་ལ་སྣང་བ་འགྱུར།། སྣང་འདོད་རྩོལ་བའི་ནད་ཀྱིས་འཛིན།། སྣང་བ་འགྱུར་བས་ལུས་སེམས་འགྱུར། ། རང་སྣང་ལོག་པའི་ངོ་སྤྲོད་འདི།། ད་ལྟ་ཆོས་ཐོབ་སྣང་བའི་ཞགས་པ་ལ།། འཛིན་པའི་རྟོད་ཕུར་མ་ཆོད་ཀྱིས།། གནས་ལུགས་ཁྱབ་གདལ་ཆེན་པོ་ལ། ཁུངས་འབྱིན་པ་ནི་ཕུང་བར་མཆིའོ།། སྒོམ་པ་འབྱམས་དང་ལྟེངས་པ་དང། ། གུག་པ་དང་ནི་རྨུགས་དང་འཕྲོ།། འགྱུ་བ་ཡིག་ནག་མ་ལྷོགས་ན།། བར་མ་དོ་རུ་ཡི་གེ་འདྲི།། འདྲི་མཁན་བཙོན་དུ་མ་གཟུང་ན།། ཇི་ཙམ་སྒོམས་ཀྱང་སྡུག་བསྔལ་རྒྱུ།། འབྱམས་ལྟེང་གུག་པར་བྱེད་པ་ནི། ། གང་དུ་མི་འཆོར་ཡི་གེ་ལྟོས།། རྨུགས་དང་འཕྲོ་བ་སྒོམ་པ་ནི།། བློ་ཆུང་ཀུན་གྱི་ཐུན་སྒོམ་ཡིན།། ཞེན་པ་ཆེར་གྱིས་རང་མཐོང་ཆེ་བར་གྱིས།། རྨུགས་ན་གསལ་ལ་འཕྲོ་ན་སྐྱེ།། ཞེས་གསུངས་སོ། ། བསྐལ་བ་དུམ་བུའི་རྒྱུད་ལས།། འགྲོ་དྲུག་གི་སྣང་བ་ལོག་ལ་རང་སྣང་གི་རྒྱས་བཏབ་པ་དང།། འཛིན་པ་རང་གྲོལ་དུ་བཏང་བའི་ལེའུ་སྟེ་བཅུ་པའོ།།།། དེ་ནས་ཡང་བཀའ་སྩལ་པ།། སྣང་བའི་བརྡ་ལ་ངོ་སྤྲོད་དེ། ། འགྱུ་བའི་སྣང་བ་སྣ་ཚོགས་ལས།། མ་བྱས་པ་ཡི་འབྲས་བུ་ལ།། མ་བྱས་པའི་དགོངས་པ་སྟོན་ཏེ།། མི་འགྱུར་བ་ཡི་དོན་སྟོན་ནོ།། དེ་ཡང་དཔེ་ངོ་སྤྲོད་ཀྱིས་དོན་མཚོན་ཏེ།། ཐོག་མ་མན་ཤེལ་བཞིར་བཞག་ནས། ། ཆོས་ལྔ་དག་དང་ལྡན་པ་ནི།། གསལ་བ་སྟོང་པ་ཐོགས་པ་མེད།། འགག་མེད་མི་འགྱུར་བ་དང་ལྔ།། ཆོས་མེན་རྒྱུ་རྐྱེན་མེད་པ་ཡིས།། གཉེན་པོ་གང་གིས་མི་ཆོམས་ཏེ།། སངས་རྒྱས་མ་བྱས་སེམས་ཅན་གྱིས་མ་བཅོས། ། བྱེད་པས་མ་བྱས་ཡེ་ནས་ལྷུན་གྲུབ་ལ།། རྒྱུད་ལ་མ་བྱུང་ལུང་གིས་ཀྱང་མ་མཚོན།། མན་ངག་གཏན་ལ་མ་ཕབ་རིགས་ལྔས་ལུང་མ་བསྟན།། དངོས་པོའི་གནས་ལུགས་ཤེས་བྱའི་གཤིས་སུ་གྲུབ། ། དེ་ནི་རྟགས་ཡིན་དོན་ནི་འདི་ལྟ་སྟེ།། རིག་པ་ཆོས་མེན་ཡེ་ཤེས་རྒྱུ་རྐྱེན་མེད།། བྱེད་པས་མ་བྱས་ཡེ་ནས་ལྷུན་གྱིས་གྲུབ།། དཔེ་དང་ལྡན་པའི་རྟགས་རྣམས་ཡེ་ནས་ཡིན།། ཡིན་པར་ཤེས་པས་སངས་རྒྱས་ཐོབ་དུ་མེད། ། དེ་ཕྱིར་འབྲས་བུ་ཡེ་ནས་རང་གྲོལ་ཡིན།། བློ་དངོས་ཤན་འབྱེད་ཡེ་ཤེས་ཟང་མ་ཡིན།། བློ་དངོས་ཤན་མ་ཕྱེད་ན་འཁོར་བ་ཟང་ཁ་བརྒྱུད།། རང་སྣང་ཐིག་ལེ་ཡིན་པར་མཤེས་ན།། སྣང་བ་སྟོང་སྒོམ་བྱས་པས་སྐྱེ་མཆེད་མུ་བཞི་ལས། ། ནམ་མཁའ་མཐའ་ཡས་སྐྱེ་མཆེད་ལྷ་རུ་གོལ།། འགྱུར་བ་རིག་པའི་རྩལ་དུ་མ་ཤེས་ན།། འགྱུ་བ་རྐྱང་སྒོམ་བྱས་པའི་འབྲས་བུ་ནི།། ཅི་ཡང་མེད་པའི་སྐྱེ་མཆེད་གོལ་བ་ཡིན། ། ཅེས་གསུངས་སོ།། བསྐལ་བ་དུམ་བུའི་རྒྱུད་ལས།། བློ་དངོས་ཤན་འབྱེད་ཀྱི་ལེའུ་སྟེ་བཅུ་གཅིག་པའོ།།།། དེ་ནས་ཡང་བཀའ་སྩལ་པ།། དངོས་པོའི་རྟགས་སུ་རྟགས་ཀྱི་ཡི་གེ་བྱུང།། རང་བྱུང་སྣང་སྲིད་གསལ་བའི་མེ་ལོང་འདི། ། མཚོན་གང་ཙམ་ལས་མ་རྟོགས་པ།། དེ་མན་ཟླ་ཡང་ཆུ་བུར་བློ་ཡི་ཆོས།། བློ་དངོས་བར་ན་སྣང་བ་འགག་མེད་འཆར།། ངོ་བོ་ཐིག་ལེ་ཆོས་མེན་ཡེ་ཤེས་དེ།། རྒྱུ་རྐྱེན་ལ་སོགས་དེ་དག་གོང་དང་འདྲ། ། དེ་ཡང་རྟགས་ཡིན་དོན་དུ་འབྲེལ་བས་ན།། རྩ་ཡི་རྒྱལ་པོ་ཤེལ་གྱི་སྦུ་གུ་ཅན།། ཚེ་རབས་ཐོག་མ་མེད་པ་ནས།། ཚེ་ལྟའི་རྟེན་དང་གཞི་མ་བྱེད།། དེ་ནང་འོད་ཀྱི་སྒྲོན་མ་ལྔ། མུ་ཏིག་ཚར་ལ་བརྒྱུས་པ་འདྲ་བ་དེ། ། ཚེ་ཡི་རྟ་ནི་འགྱུར་བ་ཡིན།། སྙིང་ནས་ལོངས་སྤྱོད་འཁོར་ལོ་འབྲེལ་བ་ཡིན།། དེ་ནས་འཇུངས་པའི་ནང་དུ་སོང་ནས་ནི།། བདེ་ཆེན་གཞལ་ཡས་ཁང་ན་ཀ་བ་བཙུགས་པ་འདྲ།། གདུང་མ་ལྟ་བུར་མཛོད་པུའི་བུ་གར་བྱུང། ། སུས་ཀྱང་མི་ཁེགས་རང་བྱུང་རྟགས་སུ་གསལ།། རྨི་ལམ་གྲོང་ཁྱེར་རྣམ་ཤེས་གྲོང་ཁ་ཡིན།། དུས་གསུམ་ཉིད་ཀྱི་གདམས་ངག་ཤིན་ཏུ་གཅེས།། བར་མ་དོ་རུ་གདོན་མི་ཟ་སྟེ་དཔའ་བོ་ཡིན། ། ཀ་བའི་མགོ་ལ་ཉི་ཟླ་གཉིས་ཡོད་པ།། བདེ་གསལ་སྟོང་པའི་སྐར་ཁུང་ནང་དུ་ནི།། གསེར་གྱི་སླངས་པ་ལྟ་བུ་ནི་དབུགས་མེད་པ།། ཡེ་ཤེས་འགག་པ་མེད་པའི་རྟགས་ཡིན་ཏེ།། རབ་ཀྱི་གསང་ལམ་ཡིན་པར་ཤེས་པར་བྱ། ། གཞུང་པ་མགོ་ནས་རྩ་ཡི་བ་ཐག་ཙམ།། གཉིས་སུ་གྱེས་ཏེ་མཐིལ་གྱི་མེ་ལོང་གཉིས་སུ་ཤར།། ཤེས་རབ་འགག་པ་མེད་པའི་མེ་ལོང་ཡིན།། ཕར་ལ་ལྟ་མི་དགོས་ཏེ་རང་ལ་བལྟས་པས་ཆོག། གསལ་བཟང་ཐལ་འདིལ་ལྟ་ཤེས་ན།། འབྲིང་དང་ཐ་མའི་གསང་སྒོ་ཡིན་པར་ཤེས།། གདུང་མ་ལ་ཡང་མགོ་བོ་བསྣོལ་མར་བྱུང།། མནར་མེད་སྐྱེ་བ་བདུད་སྒོ་དག་ནས་འབྱུང།། དེ་ཡང་རྩ་ཡི་རྟེན་གྱི་གསང་ལམ་ཡིན། ། སྲོག་གཅོད་བདུད་པོ་ལེགས་ན་མེད་དེ་རང་ཆས་གནས།། འཆི་བའི་སྲོག་རྟེན་བྱ་བ་དེ་ན་ཡོད།། དེ་ནི་འཆི་འབྲས་དྲག་ཏུ་རླན་པས་འཆད།། དེ་ཆད་བདུད་དུ་བྱུང་བས་ན།། འཆི་བདག་བདུད་དུ་བྱུང་བ་ཡིན་ཏེ། ། གསོད་བྱེད་གཞན་ན་མེད།། མཛོད་པུའི་ཐུགས་རྗེ་འགག་མེད་རང་ཤར་ལས།། བདག་འཛིན་མེད་དང་གཉིས་སྣང་མེད།། ཕྱོགས་ལྷུང་མེད་པའི་ཤེས་རབ་ཆེན་པོ་ཡིས།། དུས་གསུམ་གཅིག་ཏུ་བསྟན་པ་ནི། ། དབང་པོ་རབ་མགོ་གསང་བ་ཡིན་པར་ཤེས།། ལམ་ནི་རྟགས་ཀྱི་གསང་ལམ་རྩ་ཡི་ནང།། དོན་གྱི་གསང་ལམ་འགྱུ་བའི་ཡིག་ནག་ཡིན།། ཞེན་པའི་སྒོམ་པ་ཆགས་སྡང་ཁ་རུ་ཤོར།། སེམས་དང་འགྱུར་བ་ཡིན་པས་བློ་དངོས་འབྲེལ་པ་མེད། ། དབུགས་མེད་ཟང་ཐལ་ཐོགས་པ་མེད་པ་ཡིན།། ཐམས་ཅད་ཀུན་ལ་འཇུག་པས་གསང་ལམ་ཆེན་པོ།། དོན་གྱི་གསང་སྒོ་དབྱེ་བ་དང།། རྟགས་ཀྱི་གསང་སྒོ་མཚོན་པ་དང།། ངེས་པའི་གསང་སྒོ་རྙེད་པ་ནི། ། རྒྱལ་པོ་རྒྱལ་ས་བཟུང་བ་འདྲ།། འགྱུ་བའི་ཡི་གེ་ལྟ་ཤེས་ན།། རུས་སྦལ་འཁར་གཞོང་བཅུག་པ་འདྲ།། འགྱུ་བའི་ཡི་གེ་ཀློག་ཤེས་ན།། དབུལ་པོས་རིན་ཆེན་གཏེར་རྙེད་འདྲ།། འགྱུ་བའི་ལོག་རྟོག་སེལ་བ་ན། ། ཡིད་བཞིན་ནོར་བུ་རྙེད་པ་འདྲ།། འགྱུ་བ་མ་ཤེས་སེམས་སྒོམ་རྩོམ།། རྟ་རྒྱགས་སྒྲོག་ཏུ་བཅུག་པ་འདྲ།། ཞེས་གསུངས་སོ།། བསྐལ་པ་དུམ་བུའི་རྒྱུད་ལས།། ངོ་སྤྲོད་བརྗོད་པའི་ལེའུ་སྟེ་བཅུ་གཉིས་པའོ། །།། དེ་ནས་ཡང་བཀའ་སྩལ་པ།། རྩ་ལ་རྩ་རྒྱུད་རྣམ་གཉིས་ཏེ།། སྟོད་ཀྱི་རྩ་དང་སྨད་ཀྱི་རྩ།། རྣམ་པ་གཉིས་སུ་ཤེས་པར་བྱ།། སྨད་ཀྱི་རྩ་རྣམས་ཐམས་ཅད་ཀྱང།། སྲོག་པ་རྩ་རུ་འདུས་པ་སྟེ།། དབུགས་མེད་རྒྱུ་སྟེ་གཏི་མུག་རྩ། ། ལྟེ་བ་སྤྲུལ་པའི་འཁོར་ལོ་ལ།། དྲུག་ཅུ་རྩ་བཞིར་གྱེས་པ་ཡང།། དབུས་ན་གཏི་མུག་འབྱེད་མེད་རྩ།། ཞེ་སྡང་འདོད་ཆགས་མཐའ་རྟེན་ཅན།། གཡས་ཀྱི་ཕྱོགས་ནས་ཞེ་སྡང་རྩ། ། སུམ་ཅུ་རྩ་གཉིས་རྒྱུ་བའོ།། གཡོན་གྱི་ཕྱོགས་ནས་འདོད་ཆགས་རྩ།། སུམ་ཅུ་རྩ་གཉིས་རྒྱུ་བ་ནས།། དྲུག་ཅུ་རྩ་བཞིར་བཤད་པ་ཡིན།། དེ་གསུམ་གཙོ་བོ་དྷུ་ཏི་ཡིན།། སྲོག་པ་རྩ་ཡི་ནང་དུ་ནི།། དབུགས་མེད་འགྱུ་བའི་རྟག་པོ་བྱེད། ། རྩ་རྣམས་ཐམས་ཅད་འཕར་བ་ཡང།། དབུགས་མེད་རྒྱུ་བ་འཕར་བ་ཡིན།། གསང་བའི་གནས་ན་རྩ་གནས་པ།། འདོད་ཆགས་ཞེ་སྡང་རྩ་རྟ་ཕོལ།། བདེ་བ་སྟོང་པའི་མི་ཕོ་ཞོན།། ཉམས་ལ་ཆགས་ན་རྟ་དང་བྲལ། ། འཕྱེ་བོ་རྟ་དང་བྲལ་བ་ཡིས།། རྟ་ཡི་ཞེན་པ་འདུད་པ་གྲོལ།། ཅེས་གསུངས་སོ།། བསྐལ་པ་དུམ་བུའི་རྒྱུད་ལས།། སྨད་ཀྱི་རྩ་རྒྱུད་མདོར་བསྟན་པའི་ལེའུ་སྟེ་བཅུ་གསུམ་པའོ།།།། དེ་ནས་ཡང་བཀའ་སྩལ་པ། ། གསང་བའི་བདག་པོ་ལེགས་པར་ཉོན་ཅིག། སྟོད་ཀྱི་རྩ་རྒྱུད་བཤད་པར་བྱ།། སྟོད་ཀྱི་རྩ་རྣམས་ཐམས་ཅད་ཀྱང།། ཤེས་རབ་འགག་པ་མེད་པའི་རྩ།། རྩ་ཡི་རྒྱལ་པོ་ཤེལ་གྱི་སྦུ་གུ་ཅན།། ཤེས་རབ་འགག་པ་མེད་པའི་རྩ། ། སྙིང་ནས་གྱེན་དུ་འབྲེལ་བ་ཡང།། ཐམས་ཅད་འགག་མེད་ཤེས་རབ་རྣམ་གསུམ་རྩ།། གཡས་ན་མྱུར་བའི་རྩ་གནས་ཏེ།། གཡོན་ན་ཐོགས་པ་མེད་པའི་རྩ།། དབུས་ན་ཟབ་པའི་རྩ་གནས་ཏེ། ། འགྱུ་བ་འགག་མེད་ཐོགས་མེད་རྩ།། བསྣོལ་མར་འགྲོ་འོང་འཕེལ་འགྲིབ་བྱེད་པ་ཡི།། རུས་སྦལ་འཁར་གཞོང་བཅུག་གི་གདམས་ངག་མང་ཤེས་ན།། རྟག་ཏུ་སྒོམས་ཀྱང་བདེ་བའི་ནད་ཀྱིས་འཛིན། ། མགྲིན་པ་ལོངས་སྤྱོད་རྩ་ལ་རྣམ་པ་བཅུ་དྲུག་ཡོད།། འོད་གསལ་ཟུང་འཇུག་གཉིས་མེད་གསུམ་དུ་འདུས།། སྤྱི་བོ་བདེ་བ་ཆེན་པོའི་རྩ་ནི་སུམ་ཅུ་སོ་གཉིས་ཏེ།། དེ་ཡང་འོད་གསལ་ཟུང་འཇུག་གཉིས་མེད་གསུམ་དུ་འདུས། ། ཞེས་གསུངས་སོ།། བསྐལ་པ་དུམ་བུའི་རྒྱུད་ལས།། སྟོད་ཀྱི་རྩ་རྣམས་འདུས་པའི་ལེའུ་སྟེ་བཅུ་བཞི་པའོ།།།། དེ་ནས་ཡང་བཀའ་སྩལ་པ།། རང་སྣང་རང་རྒྱུད་བསམ་གྱིས་མི་ཁྱབ་སྟེ།། གཞི་ལ་ལྷུན་གྲུབ་རྩ་ཡི་གནད་གཅོད་པ། ། ཐོགས་པ་མེད་པའི་སྣང་བ་རྒྱས་པ་ཡིན།། ཐིག་ལེའི་སྣང་བ་བསམ་གྱིས་མི་ཁྱབ་སྟེ།། རང་གསལ་ཡན་ལག་འགག་མེད་རྒྱས་པ་ཡིན།། རླུང་གི་སྣང་བ་བསམ་གྱིས་མི་ཁྱབ་སྟེ། ། འགག་མེད་རང་སྣང་ཡན་ལག་གཡོས་པ་ཡིས།། ལམ་གྱི་དུས་སུ་རྩ་རྒྱུད་ཐིག་ལེ་རླུང།། སྟོད་རྒྱུད་སྨད་རྒྱུད་གཉིས་སུ་ཕྱེ་བ་ཙམ།། འབྲས་བུའི་དུས་སུ་སྐུ་གསུམ་ལྷུན་གྱིས་གྲུབ།། རང་གྲོལ་ཞེན་འདོད་མེད་པ་འདི་རང་ཡིན། ། ཅེས་གསུངས་སོ།། བསྐལ་པ་དུམ་བུའི་རྒྱུད་ལས།། གཞི་ལམ་འབྲས་བུ་ལྷུན་གྲུབ་ཀྱི་ལེའུ་སྟེ་བཅོ་ལྔ་པའོ།།།། དེ་ནས་གསང་བའི་བདག་པོ་དེ་སྟན་ལས་ལངས་ཏེ།། ཕྱག་བཙལ་ཏེ་བསྐོར་བ་བྱས་ནས། ། མདུན་དྲང་པོར་འཁོད་པ་དང།། ཀྱེ་བཅོམ་ལྡན་འདས་བདག་མཁའ་འགྲོ་མ་རྣམས་ལ་བཀའ་སྩལ་པའི།། རྒྱུད་འདི་ལ་ཇི་ལྟར་གདགས་པར་བགྱི།། ཞེས་ཞུས་པས།། ཐམས་ཅད་དུམ་བུར་སྟོན་པས་ན། ། བསྐལ་པ་དུམ་བུའི་རྒྱུད་དུ་ཟུང།། དུམ་བུ་ཡེ་ཤེས་རབ་འབར་བས།། དུམ་བུ་འབར་བའི་རྒྱུད་དུ་ཟུང།། ངོ་སྤྲོད་དངོས་སུ་འབྱིན་པས།། ཐིག་ལེ་རྗེན་སྟོན་རྒྱུད་དུ་ཟུང།། ཞེས་བཀའ་སྩལ་པ། ། གསང་བའི་བདག་པོ་རྗེས་སུ་ཡི་རང་ངོ།། རྒྱུད་ཀྱི་རྒྱལ་པོ་བསྐལ་བ་དུམ་བུ་འབར་བའི་རྒྱུད།། མཁའ་འགྲོ་མའི་ལག་ནས་བྱུང་བ་རྫོགས་སོ།།།། རྒྱ་གར་སྐད་དུ།། རད་ན་བི་ཤ་ཏིག་སྣ་ཏན་ཏྲ།
CLOSE WINDOW