| Wylie |
། རང་བྱུང་ཡེ་ཤེས་མཚན་ཉིད་གསལ།། མི་བསམ་གྱི་ནར་བཞག་པའོ།། བསམ་གྱིས་མི་ཁྱབ་ཡེ་ཤེས་མཐོང།། རང་བྱུང་རྫོགས་པའི་ལྟ་བ་ནི།། མཐའ་གསུམ་བྲལ་ལོ་ཡེ་སངས་རྒྱས།། རྩོལ་བྲལ་དབུ་མ་དྲང་པོའི་ལམ། ། འཆིང་བྲལ་ལྟ་བ་གཟའ་གཏད་མེད།། རིན་ཆེན་མཐའ་མཉམ་ཀུན་བཟང་འདིས།། རང་སེམས་གཉིས་མེད་རྟོགས་པར་གྱིས།། བཏང་སྙོམས་ལྟ་བ་བླང་དོར་མེད། ཁྱུང་ཆེན་མཁའ་ལ་ལྡིངས་པ་བཞིན། ། སྤྲོ་བསྡུ་གཉིས་མེད་བདག་གཞན་བྲལ།། རང་བཞིན་གནས་པས་དེ་འདོད་བྲལ།། སྤྱོད་ཡུལ་མ་ལུས་སེམས་སུ་ཤེས།། སྣ་ཚོགས་འཁོར་བའི་རང་བཞིན་དང།། ཡེ་ནས་རང་བཞིན་གཉིས་སུ་མེད།། ཉིད་ལ་གཞན་སེམས་གྲུབ་པ་མེད། ། རིག་པ་ཅི་ཡང་མ་ཡིན་པ།། འདོད་པའི་བསམ་པ་ཀུན་དང་བྲལ།། ཤེས་པ་མཐའ་བྲལ་སོང་པ་ཉིད།། ཡེ་ཤེས་འོད་གསལ་རང་གནས་པ།། རོལ་བ་སྣང་ཡང་གྲུབ་པ་མེད།། སྒྱུ་མའི་ཡེ་ཤེས་རྩལ་དུ་འཕྲོ། ། མ་བཅོས་སྒྱུ་མ་ལྷུན་གྲུབ་ལ།། འཛིན་པའི་སེམས་དང་ངོས་གཟུང་མེད།། ཡེ་ཤེས་རྒྱལ་པོ་རྣམ་པར་དག། འཛིན་པའི་སེམས་བྲལ་རིག་པར་གསལ།། སེམས་ཉིད་ནམ་མཁའི་ལྟ་བ་ལ།། ནམ་མཁའ་བསམ་དུ་མེད་པ་བཞིན། ། ཡེ་ཤེས་བསམ་དུ་མེད་པ་ཡིན།། ཅིར་ཡང་མི་དགོངས་རང་བཞག་པ།། དུས་གསུམ་སངས་རྒྱས་ལྟ་བའོ།། ལྟ་མེད་རང་བཞག་ལྟ་བ་ནི།། དུས་གསུམ་གང་ཡང་མ་ཡིན་ཏེ།། འགྱུར་མེད་དབྱིངས་ཀྱི་ལྟ་བ་ཡིན། ། འདོད་པ་བྱ་བ་གང་ཡང་མེད།། ངོ་བོ་ཉིད་ལ་ཡང་དོགས་མེད།། སེམས་ཉིད་དྲི་མ་ཀར་དག་པ།། འགྱུར་མེད་རིན་ཆེན་གསེར་བཞིན་ནོ།། འཛིན་པའི་རླུང་གི་གཡོ་གྱུར་ཀྱང།། རིག་པའི་ངོ་བོ་འགྱུར་བ་མེད། ། རྒྱ་མཚོ་སྣང་བ་ཆེན་པོ་བཞིན།། ཕྱི་ནང་མི་མངའ་ཡེ་ཤེས་གསལ།། མཐའ་དབུས་མི་མངའ་ཕྱོགས་དང་བྲལ།། ཡེ་ཤེས་སེམས་ཉིད་ལྟ་བ་ལ།། རྒྱུ་དང་རྐྱེན་གྱིས་བཙལ་བ་མེད།། རྡོ་རྗེ་ཉིད་འདྲ་འཇིགས་པ་མེད། ། ཉི་མ་རིན་ཆེན་འབར་བ་ལྟར།། རང་གསལ་རྣམ་པར་རྟོག་དང་བྲལ།། འཁོར་བ་ཉིད་ན་ཡེ་སངས་རྒྱས།། རང་སེམས་རིག་པ་གང་ཡང་རུང།། བསམ་དང་བྲལ་བའི་རིག་པ་ཉིད།། ཆོས་དང་ཆོས་ཅན་གང་ཡང་མེད། ། ཡེ་ཤེས་ནམ་མཁའི་མཐའ་དང་མཉམ།། རྟག་པ་མ་ཡིན་མི་རྟག་མེད།། ཤེས་པ་འགག་པའི་འདོད་པ་མེན།། བྱ་བྱེད་མི་རྩོལ་རང་བཞིན་དག། དབུ་མ་ཆེན་པོ་དྲང་པོའི་སེམས།། ཕྱོགས་ཀྱི་ཡུལ་ལ་འཇིག་པ་མེད། ། སེམས་ཉིད་ཡུལ་ལ་གང་འཇུག་ན།། འཛིན་པའི་ཕྱོགས་ཆ་འདོད་པ་ཉིད།། དབུ་མའི་སེམས་དང་མི་ལྡན་པ།། བག་ཆགས་འཛིན་པའི་སེམས་ཀྱིས་དཀྲུགས།། བསམ་མེད་རིག་པ་བརྗོད་མེད་འདི། ། ཐ་སྙད་མིང་ལ་མི་གནས་ཏེ།། གདུལ་བྱ་དམན་པའི་སེམས་དག་ལ།། ཐ་སྙད་སྒྲ་ཡིས་འཁོར་ལོ་བསྟན།། སྣང་སྲིད་སྣང་བ་སྣ་ཚོགས་པ།། སྐུ་གསུང་ཐུགས་ལས་མ་གཡོས་ཏེ།། དྲན་རྟོགས་ཏིང་འཛིན་རིག་པ་ཐུགས། ། ནམ་མཁའ་ལྟ་བུར་མི་ཟད་པ།། བདེ་ཆེན་རིག་པ་སེམས་ཀྱི་བརྒྱན།། རྣམ་པར་རྟོག་པའི་སྒྲོ་འདོགས་གཅོད།། འོད་གསལ་རིག་པའི་འཁོར་ལོ་ཡིན།། ལུས་ཅན་རྣམས་ཀྱི་སྒྲ་རྣམས་ནི། ། སྔགས་ཀྱི་གསུངས་དུ་བསྒྲགས་པ་ཡིན།། སྣང་སྟོང་གཉིས་མེད་རིག་པ་གསུང། ཁ་དོག་དབྱིབས་སུ་གང་སྣང་བ།། སྐུ་མདོག་རྒྱན་གྱི་འཁོར་ལོར་ཟབ།། རྡོ་རྗེ་ལྟ་བུར་དབྱེར་མེད་པས།། སེམས་ཀྱི་རང་བཞིན་ཀུན་ཏུ་བཟང། ། སྐུ་གསུམ་རྫོགས་པའི་བདེ་བ་ཆེ།། བསམ་མེད་རང་གཞན་ཉིད་ཀྱིས་གོ། རིག་པ་མཆོག་ལྡན་ཀུན་ཏུ་བཟང།། བཀའ་ཡི་འཁོར་ལོ་འབུམ་ཕྲག་ཡས།། ཏིང་འཛིན་མི་རྟོག་རང་བཞིན་གསལ།། རང་རིག་རྡོ་རྗེ་འགྱུར་མེད་ལུང། ། མཐའ་དང་མཉམ་པའི་ལུང་གིས་ནི།། ཐམས་ཅད་ཡེ་ཤེས་ངོ་བོར་གསལ།། ཞེན་པའི་སྒྲོ་སྐུར་མ་ལུས་པའི།། ཡེ་ཤེས་རིག་པའི་འཁོར་ལོས་གཅོད།། དྲན་གསལ་རིག་པར་སྣང་བ་ལ། ། གང་ལྡན་གསལ་བའི་རིགས་པ་མཐོང།། རང་རིག་རྫོགས་པའི་ཡེ་ཤེས་ལ།། དངོས་སུ་གྲུབ་པ་གང་ཡང་མེད།། རྟོག་པའི་མཐུ་ཡིས་ཅིར་མཐོང་ཡང།། མེ་ལོང་དངས་བའི་བསྙེན་མ་ལྟར།། རྡོ་རྗེ་གསང་བའི་གདམས་པ་ཡིས། ། རིག་པའི་ཡེ་ཤེས་ཀུན་ཏུ་བཟང།། ཡི་གེ་མེད་པའི་དོན་དུ་མཐོང།། རང་གསལ་རྗེས་སུ་རང་བཞག་ན།། ཡེ་ཤེས་གསང་བ་རྗེས་སུ་དཔགས།། རང་རིག་འབྲེལ་བ་ཉིད་ལ་གསལ།། ཡེ་གསལ་རིག་པའི་འཁོར་ལོ་ལ། ། དད་པའི་བློ་ཡིས་གང་རྩོལ་པ།། རང་འདོད་ཐེག་པའི་ཁྱད་པར་ནི།། གསང་བའི་དོན་ལ་མ་ལུས་སྟོན།། འདོད་པའི་སྟོབས་ཀྱིས་འཕངས་ནས་རྩོལ།། རང་གསལ་འཁོར་ལོའི་དོན་དང་འགལ། ། འདོད་རྒྱུད་གསལ་བའི་ཡེ་ཤེས་ཀྱང། རྩོལ་བ་ཉིད་ལས་འདའ་བ་མེད།། རྫོགས་པའི་ཡེ་ཤེས་བདེ་ཆེན་ནི།། རང་བཞག་རིག་པའི་འཁོར་ལོར་དག། རྣམ་དག་རང་བྱུང་འོད་གསལ་བ།། བློ་བུར་དྲི་མ་ངང་གིས་དག། རྣམ་པར་རྟོག་པའི་སེམས་ཉིད་ནི།། རང་བཞིན་མ་ཡིན་རྐྱེན་གྱིས་སྣང།། རང་བཞིན་ངོ་བོ་གང་དག་ནི།། བློ་བུར་རྐྱེན་ལ་རག་ལས་མིན།། རང་གསལ་རིག་པའི་རང་བཞིན་དང།། འཁོར་བ་རྟོགས་པའི་རང་བཞིན་གཅིག། གང་ལའང་སྤངས་བྱ་མ་ཡིན་ཏེ།། གང་གི་རྣམ་པ་དེ་གང་ཡིན།། དེ་བཞིན་འགྱུར་བ་དེ་བཞིན་ཏེ།། སེམས་ནི་ཇི་བཞིན་མཉམ་པ་ཉིད།། སངས་རྒྱས་ཐུགས་ཀྱི་རྣལ་འབྱོར་རོ།། ཡང་དག་ལམ་ལ་ཡི་གེ་མེད། ། སྙིང་པོ་ཉིད་དུ་བདག་འཇུག་པས།། ཐོབ་པ་མེད་ཅིང་སྤངས་པ་མེད།། རིག་པའི་ཐུགས་ལ་གསལ་བར་སྣང།། བྱང་ཆུབ་སེམས་ཀྱི་ཡེ་ཤེས་ནི།། རྣམ་ཤེས་དམིགས་པའི་ཡུལ་ལས་འདས། ། རིག་པའི་འོད་གསལ་གཟུང་འཛིན་མེད།། བྱང་ཆུབ་སྙིང་པོར་བཞུགས་པའི་ཚེ།། ངོ་བོ་ཉིད་ནི་དམིགས་སུ་མེད།། ཡེ་ཤེས་ཀུན་བཟང་རྣམ་པར་དག། འབར་བའི་ཏིང་འཛིན་ངོ་མཚར་ཆེ།། རང་གསལ་རིག་པ་ཅིར་མི་དགོངས། ། བདེ་གཤེགས་འཁོར་ལོ་ངོ་བོ་ནི།། མི་འགྱུར་འཇོམས་པའི་རྡོ་རྗེ་འཆང།། ཀུན་འབྱུང་རིན་ཆེན་ལྟ་བུ་འདི།། སྐྱོན་མེད་པདྨའི་རང་བཞིན་དག། འདུ་བྱེད་ལས་ཀྱི་རྡོ་རྗེ་འཆང།། འདུལ་མཛད་ཏིང་འཛིན་འབུམ་ཕྲག་ཡས། ། བསམ་བྲལ་ཏིང་འཛིན་འོད་གསལ་སེམས།། ཐབས་ཀྱི་སྒྲིབ་པ་མ་ལུས་ཡིན།། རྩ་བ་མི་གཡོ་ཐིག་ལེ་བྱང་ཆུབ་སེམས།། རང་བྱུང་ཡོངས་རྫོགས་སྟོན་པའི་ངོ་བོ་ཉིད།། རང་རིག་རྫོགས་པ་མཆོག་གི་སྐུ། ། སྣ་ཚོགས་འདྲེན་པ་མཆོག་གི་སྐུ།། རང་བྱུང་རིག་པ་མཆོག་གི་བསྟན་པ་ནི།། བརྗོད་མེད་ཀུན་ལ་རང་བཞིན་སྟོན།། རྣམ་དག་རིན་ཆེན་ལྟ་བུར་གསུངས།། མི་གཡོ་ཐིག་ལེ་ཉིད་དུ་གསལ།། ཡི་གེ་ཐ་སྙད་ཀུན་དང་བྲལ། ། དེ་ཉིད་རང་སྣང་དོན་དུ་བཤད།། སྣ་ཚོགས་སྣང་བའི་རང་བཞིན་དག། རང་རིག་ངེས་དོན་ཉིད་དུ་བསྟན།། རྣམ་བཤད་རང་བྱུང་བསྟན་པའི་མཆོག། རང་སྣང་གསལ་བའི་རང་བཞིན་གྱིས།། དེ་འཁོར་བསམ་པ་ཇི་བཞིན་བསྟན། ། བསྟན་པའི་ཡན་ལག་འབུམ་ཕྲག་ཡས།། རང་བྱུང་དག་པ་ཤུགས་ཀྱིས་འབྱུང།། འདོད་རྩོལ་བློ་ལ་དྲང་བ་དང།། ཐུགས་ཀྱི་དགོངས་པ་ངེས་པའི་དོན།། གདུལ་བྱ་རབ་འབྲིང་དོན་དུ་བཤད། བཅང་བར་བྱ། འདྲིས་པར་བྱ། བལྟ་བར་བྱ། ཉམས་སུ་བླང་བར་བྱ། སྦྱང་བར་བྱ། དམ་མེད་ལ་བྱིན་ན་རང་གི་ཉམས་འགྲིབ་པས་སྦ་བར་བྱའོ། ཞེས་བཀའ་སྩལ་པ་དང། རྡོ་རྗེ་སེམས་དཔའ་ལ་སོགས་པ་རྣམས་རྗེས་སུ་ཡི་རང་བར་གྱུར་ཏོ། ། རྒྱུད་གཟུང་བའི་ལེའུ་སྟེ་ལྔ་པའོ།།།། རྫོགས་པ་ཆེན་པོ་བར་དོ་གསང་བའི་རྒྱུད་ཅེས་བྱ་བ་རྫོགས་སོ།།།། གུ་རུ་ཤྲཱི་སིང་ཧ་བ་ཏས་རྡོ་རྗེ་ཡང་དབང་གཏེར་ལ་དུར་ཁྲོད་གསང་ལུང་དུ་གནང་བའོ། །།། རྒྱ་གར་སྐད་དུ། བར་དོ་གྷུ་ཧྱེ་ཏནྟྲ་ནཱ་མ། བོད་སྐད་དུ། བར་དོ་གསང་བ་ཕྱི་མའི་རྒྱུད་ཅེས་བྱ་བ། དཔལ་རྡོ་རྗེ་སེམས་དཔའ་ཕྱག་འཚལ་ལོ།། དེ་ནས་བཅོམ་ལྡན་དཔལ་ཀུན་ཏུ་བཟང་པོ་ལ། རྡོ་རྗེ་སེམས་དཔས་གསོལ་བ། བཅོམ་ལྡན་འདས་རྡོ་རྗེ་ཀུན་ཏུ་བཟང།། བར་དོ་ལ་སོགས་གསུངས་པ་ཡིས།། རྣལ་འབྱོར་པ་ཉིད་སངས་རྒྱས་པའི།། དུས་སའི་རིམ་པ་བཤད་དུ་གསོལ། ། ཞེས་ཞུས་པས། རྒྱལ་བ་ཀུན་ཏུ་བཟང་པོས་བཀའ་སྩལ་པ། རྡོ་རྗེ་སེམས་དཔའ་ཉོན་ཅིག། སྤྱིར་གང་ཟག་རྣལ་འབྱོར་པ་ཉིད་སངས་རྒྱ་བ་ལ་དུས་རྣམ་པ་གསུམ་སྟེ། ཚེ་འདི་ལ་སངས་རྒྱ་བ་ལ་ལུས་སྦྱང་བ་གནད་ཆེ་པས། ལུས་སྦྱང་བ་ལ་བཅུད་ལེན་གྱི་གདམས་ངག་བསྟན་པ་དང། བར་དོར་སངས་རྒྱ་བ་ལ་བླ་མའི་གདམས་ངག་དྲན་པ་གནད་ཆེ་བས་འཕོ་བའི་གདམས་ངག་བསྟན་པ་དང། ལན་གྲངས་བརྒྱུད་ནས་སངས་རྒྱ་བ་ལ་དམ་ཚིག་དང་ལྡན་པ་གལ་ཆེ་བས། དམ་ཚིག་དང། སྡོམ་པ་དང། བསམ་པ་བཟང་པོ་ལ་གནས་པར་བྱའོ།། ཞེས་བཀའ་སྩལ་པས། རྡོ་རྗེ་སེམས་དཔས་ཡང་གསོལ་པ། བཅོམ་ལྡན་རྡོ་རྗེ་འཆང་ཆེན་ཉིད། ། བཅུད་ལེན་གདམས་ངག་བཤད་དུ་གསོལ།། ཞེས་གསོལ་བས། བཅོམ་ལྡན་འདས་དཔལ་ཀུན་ཏུ་བཟང་པོས། རྡོ་རྗེ་སེམས་དཔའ་ལ་བཀའ་སྩལ་པ། བཅུད་ལེན་གདམས་ངག་བསྙན་པ་ནི། ། དངས་མ་ལྔ་ཡི་ཚེ་སྒྲུབ་སྟེ།། ས་ཡི་དངས་མ་ཤ་ཡིས་གསོས།། རྡོ་ཡི་དངས་མ་རུས་པའི་གསོས།། ཤིང་གི་དངས་མ་སྟོབས་ཀྱི་གསོས།། རྩི་ཡི་དངས་མ་བཅུད་ཀྱི་གསོས།། མེ་ཏོག་དངས་མ་བཀྲག་གིས་གསོས། ། དགུན་ཡང་མི་སྐམ་བདུད་རྩི་བཞི།། འདི་དགུ་ལྡན་པར་གསོགས་བྱས་ལ།། རིགས་ལྔ་དག་གི་བརྒྱ་ཡིས་གདབ།། ཨོཾ་བཛྲ་ས་ཏྭ་ཧཱུཾ། བཻ་རོ་ཙ་ན་ཨོཾ། རད་ན་སྭ་བྷ་བ་ཏྲཾ། ཨ་མི་དེ་བ་ཧྲི། ཀརྨ་བཛྲ་ཨ། ཨ་ཡུ་ཕ་ལ་སི་དྷི་བྷྲུཾ། བྱང་ཆུབ་ཀྱི་སེམས་སྤྲོ་བསྡུ་བྱ། འདི་ཟོས་ཡོན་ཏན་བརྗོད་མི་ལང།། བཅུ་ཐུབ་པ་ཡངས་བརྒྱ་ཚེ་འགྱུར།། འཆི་བ་དྲུག་ནི་བསླུ་བར་བྱེད།། བརྒྱད་ཅུ་ལོན་པ་དྲུག་ཅུ་ལྟར།། སེང་གེ་གླང་ཆེན་རྨ་བྱ་ཁྱུང། ། བཀྲག་མདངས་མེ་ཏོག་པདྨ་བཞིན།། སྔགས་འཆང་རིགས་འཛིན་ཀུན་གྱིས་རློབས།། མ་མོ་མཁའ་འགྲོས་སྡོངས་གྲོགས་བྱེད།། བདུད་རྩི་འདི་ཡོན་ཏན་གྱིས།། ཚེ་ལ་དབང་བའི་རིགས་འཛིན་འགྲུབ། ། ཅེས་གསུངས་སོ།། བཅུད་ལེན་བསྟན་པའི་ལེའུ་སྟེ་དང་པོའི་སྐབས་སོ།།།། དེ་ནས་གཞན་ཡང་བཀའ་སྩལ་པ།། འཕོ་བའི་རྒྱུད་དག་རྒྱུད་ལྔར་བསྟན།། དྲན་པས་སངས་རྒྱའི་གདམ་ངག་ནི།། རྩོལ་མེད་འཕོ་བའི་དོན་བསྟན་པ། ། འགྲོ་བ་རིགས་དྲུག་སེམས་ཅན་ལ།། ཡེ་ཤེས་རེ་རེའི་ཆ་ཡོད་དེ།། འགྲོ་བ་མི་ལ་ཡེ་ཤེས་ལྔ།། འདུས་པའི་ཆ་ནི་ཡོད་པས་ན།། འཛམ་གླིང་ལས་ཀྱི་ས་པ་ཡིན།། དེ་ལ་སངས་རྒྱས་བསྟན་ཚང་བས། ། དྲན་པ་སངས་རྒྱའི་གདམས་ངག་དོན།། འཆི་ཁར་དྲན་པས་སྐྱེལ་མའི་ཚུལ།། དབུགས་ཆད་ཡེ་ཤེས་འབྱུང་བ་ནི། བསུ་མའི་ཚུལ་དུ་ཕྲད་པ་ཡིན།། ཐ་མ་ཞིང་ཁམས་འཕོ་བ་ལ།། དམ་ཚིག་སྡོམ་པ་དྲན་པར་བྱ། ། དེ་ཡི་ངང་ལ་བསམ་པ་ནི།། བཟང་པོའི་ངང་དུ་འགྲོ་བར་བྱ།། ཞེས་བཀའ་སྩལ་པ་དང། རྡོ་རྗེ་སེམས་དཔའ་ལ་ཡང་བོས་ནས་བཀའ་སྩལ་པ། རྡོ་རྗེ་སེམས་དཔའ་རྒྱུད་འདི་ནི་ཤིན་ཏུ་གསང་བའི་རྒྱུད་ཅེས་བྱ་བ་ཡིན་ཏེ། བར་དོ་གསང་བའི་རྒྱུད་ཕྱི་མ་ཞེས་བྱ་བར་ཟུང་ཤིག། ཅེས་གསུངས་སོ།། རྒྱུད་གཟུང་བའི་ལེའུ་ཡི་སྐབས་ཏེ་གཉིས་པའོ།།།། བར་དོ་གསང་བའི་རྒྱུད་ཕྱི་མ་ཞེས་བྱ་བ་རྫོགས་སོ།།།། རྒྱ་གར་སྐད་དུ། སན་ཏི་མ་ཧཱ་བོ་དྷི་ཙི་ཏ་རད་ན་ཨུ་བ་དྷེ་ཤ་གུ་ཧྱ་ནཱ་མ་ཏནྟྲ། བོད་སྐད་དུ། རྫོགས་པ་ཆེན་པོ་བྱང་ཆུབ་ཀྱི་སེམས་རིན་པོ་ཆེ་སྤུངས་པ་གསང་བ་མན་ངག་གི་རྒྱུད་ཅེས་བྱ་བ། བཅོམ་ལྡན་འདས་དཔལ་ཀུན་ཏུ་བཟང་པོ་ལྷུན་གྲུབ་བདེ་བ་ཆེན་པོ་བྱང་ཆུབ་ཀྱི་སེམས་ལ་ཕྱག་འཚལ་ལོ། ། འདི་སྐད་བཤད་པའི་དུས་གཅིག་ན། འོག་མིན་གྱི་གནས་ཆོས་ཀྱི་དབྱིངས་ཀྱི་ཕོ་བྲང། ཡུམ་གྱི་མཁའ་གློང་ཡངས་པའི་གནས་རྒྱ་ཡོངས་སུ་མ་ཆད་པར་བདལ་བ་ན། བཅོམ་ལྡན་འདས་དཔལ་ཀུན་ཏུ་བཟང་པོ་གསང་བ་མཆོག་གི་བདག་པོ་ཉིད། རིགས་ལྔའི་སངས་རྒྱས་ལ་སོགས་པ་སངས་རྒྱས་དང་སེམས་ཅན་འབྱེད་པ་མེད་པའི་འཁོར་གྱིས་བསྐོར་ཏེ། བྱང་ཆུབ་ཀྱི་སེམས་རང་བྱུང་གི་ཡེ་ཤེས་ཀྱི་དོན་ལ་གནས་ཤིང། དུས་གསུམ་ཇི་བཞིན་པ་ཉིད་དུ་བཞུགས་སོ།། དེ་ནས་དཔལ་རྡོ་རྗེ་སེམས་དཔའ་ལ་སོགས་པ་འདུས་པའི་འཁོར་རྣམས་དད་པའི་སེམས་ཀྱིས་བཏུད་ནས་འཛུམས་པའི་མདངས་ཕྱུང་སྟེ། བཅོམ་ལྡན་འདས་ཀྱི་དྲུང་དུ་ཅི་ཡང་མི་སྨྲ་བར་འཁོད་པར་གྱུར་ཏོ།། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་ཉིད་ཀྱིས། དེ་དག་འཁོད་པར་མཁྱེན་ནས་བཀའ་སྩལ་པ། ཀྱེ་སེམས་དཔའ་ཆེན་པོ་ཉོན་ཅིག། ཁྱེད་ལ་སོགས་པའི་འཁོར་རྣམས་ཀུན།། དད་པའི་སེམས་ཀྱིས་རབ་བཏུད་ཅིང།། འཛུམ་པའི་མདངས་ཀྱིས་འཁོད་པ་དེ།། འདོད་པའི་དོན་ནི་དྲིས་གསོལ་ཅིག། ཅེས་བཀའ་སྩལ་ཏོ།། དེ་ནས་དཔལ་རྡོ་རྗེ་སེམས་དཔས་འཁོར་གྱི་ནང་ནས་ལངས་ཏེ། བཅོམ་ལྡན་འདས་ལ་འདི་སྐད་བཅས་གསོལ་ཏོ།། ཀྱེ་ཀྱེ་བཅོམ་ལྡན་འདས་དཔལ་ཀུན་ཏུ་བཟང་པོ། གསང་བའི་བདག་པོ་ཡེ་ཤེས་སྐུ།། ཆོས་ཉིད་བྱང་ཆུབ་སེམས་ཀྱི་དོན།། བདག་ཅག་རྣམས་ལ་བཤད་དུ་གསོལ།། ཞེས་ཞུས་པས། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས་བཀའ་སྩལ་པ། ཀྱེ་སེམས་དཔའ་ཆེན་པོ་ཁྱེད་རྣམས་ལེགས་པར་ཉོན་ཅིག། ཆོས་ཉིད་དོན་གྱི་ངོ་བོ་དེ།། ཚིག་དང་ཡི་གེ་ལས་འདས་ཤིང།། བརྗོད་ཅིང་བསྟན་དུ་མི་བཏུབ་ཀྱང།། མཐུན་པའི་ཚིག་གིས་མ་མཚོན་ན།། དོན་གྱི་ངོ་བོ་རྟོགས་མི་འགྱུར། ། དེ་ཕྱིར་ཆོས་རྣམས་བརྡར་བསྟན་གྱི།། དཔེར་ན་མེ་ཉིད་འདོད་པས་ཀྱང།། མེ་འདོད་ཚིག་ཏུ་མ་བརྗོད་ན།། མེ་དང་ཕྲད་པ་ཤིན་ཏུ་དཀའ།། མེ་འདོད་ཚིག་ཏུ་བརྗོད་པ་ནི།། མེ་དང་ཕྲད་པར་འགྱུར་བ་བཞིན། ། དེ་ལྟར་ཆོས་ཉིད་རྟོགས་འདོད་པས།། རང་བཞིན་མེད་པའི་ཆོས་ཉིད་ལ།། རང་བཞིན་མེད་པས་མཚོན་ཏེ་བསྟན།། བརྗོད་དུ་མེད་པའི་ཆོས་ཉིད་ལ།། བརྗོད་མེད་ཚིག་གིས་མཚོན་ཏེ་བསྟན།། ཅེས་གསུངས་སོ། ། རྫོགས་པ་ཆེན་པོ་བྱང་ཆུབ་ཀྱི་སེམས་རིན་པོ་ཆེ་སྤུངས་པ་མན་ངག་གི་རྒྱུད་ལས། གླེང་གཞི་དང་གླེང་བླང་བའི་ལེའུ་སྟེ་དང་པོའོ།།།། དེ་ནས་དཔལ་རྡོ་རྗེ་སེམས་དཔས་འདི་སྐད་ཅེས་གསོལ་པ། རྒྱ་གར་སྐད་དུ། ཙིཏྟ་པ་ཐི་ཀ་མ་ཧཱ་ཀོ་ཤ་ནཱ་མ། བོད་སྐད་དུ། སེམས་ཕྱོགས་ཆེན་པོའི་མཛོད་ཅེས་བྱ་བ། ཐོག་མ་ཐུགས་རྗེ་ཆེན་པོ་རིན་ཆེན་གསལ་བའི་སྦུབས་ན་བཞུགས་ཙམ་ན། ས་བོན་ནི་སྨིན་ལ་འབྲས་བུ་ནི་མ་སྨིན་པ་བཞུགས་ཏེ། ངོ་བོ་རང་བཞིན་ཐུགས་རྗེ་ཙམ་གཅིག་ཏུ་གནས་ཏེ། དེ་ནས་ཐུགས་རྗེ་ཆེན་པོ་དེ་མེ་ཏོག་གི་སྦུབས་སུ་བཞུགས་པའི་དུས་སུ། ཕྱི་སྤྲུལ་པའི་སྐུར་སྨིན་པ་དང། ནང་ཡེ་ཤེས་ཀྱི་དཀྱིལ་འཁོར་དུ་སྨིན་པ་དང། ཐུགས་ཤེས་རབ་ཡོངས་སུ་རྒྱས་པ་གསུམ་དུས་མཚུངས་པས། ཐུགས་རྗེ་ཆེན་པོ་དེ་ཡི་ཐུགས་ཀ་ནས། ཡེ་ཤེས་ཀྱི་འོད་ཟེར་སྤྲོས་ཏེ། བར་དེར་མི་མཇེད་ཀྱི་འཇིག་རྟེན་གྱི་ཁམས་རང་བཞིན་གྱིས་ཆགས་སོ། ། དེ་ནས་ཐུགས་རྗེ་ཆེན་པོས་ལྷོ་ཕྱོགས་བདེ་ལྡན་ཡིད་འདྲེས་ཀྱི་ཚལ་དུ་བྱོན་ནས། ཉིད་ཀྱི་མཛོད་བུའི་བུ་ག་ནས་ཡེ་ཤེས་ཀྱི་སྤྱན་ཕྱེ་སྟེ། དེའི་འོད་ཟེར་ལས་སངས་རྒྱས་དམ་པའི་དཔལ་གཞི་སྒྱུ་མ་ལྟ་བུའི་སྐུར་སྤྲུལ་ནས། བྱང་ཆུབ་སེམས་དཔའ་རོ་ལངས་བདེ་བ་ལ་དམ་པའི་དཔལ་གྱིས་ལུང་བཞི་བསྟན་ཏེ། དེ་དང་པོ་རིན་པོ་ཆེ་གསང་བའི་སྦུབས་ཆེན་པོ་བསྟན། དེ་ནས་ནང་སྒོ་ཆེན་པོ་བཞི་ཕྱེ་སྟེ་བསྟན། དེ་ནས་བར་གྱི་སྒོ་བཞི་ཕྱེ་སྟེ་སྒོ་བརྒྱད་གཅིག་ཏུ་བསྒྲིགས། དེ་ནས་ཕྱི་སྒོ་ཟབ་མོ་ཀློང་ནས་ཕྱེ་སྟེ་ཐུགས་རྗེས་སེམས་ཅན་གྱི་དོན་བྱས་སོ།། དམ་པའི་སྐྱེས་བུ་བཞིས་སྨྲས་པ། ཨེ་མཧོ།། གསང་བ་རྨད་དུ་བྱུང་བའི་ཆོས། ། བརྗོད་པ་ཀུན་ལས་རབ་ཏུ་འདས།། བརྗོད་མེད་དེ་ཉིད་སྣ་ཚོགས་པའོ།། ངོ་བོ་འགགས་མེད་ཡོངས་སུ་གྲགས།། ཞེས་གསུངས་སོ།། ཨཱརྱ་པ་ལོ་ཞེས་བརྗོད་དོ།། ཨེ་མའོ།། རྡོ་རྗེ་ཕུང་པོའི་ཡན་ལག་ཀྱང། ། རྫོགས་པའི་སངས་རྒྱས་ལྔ་རུ་གྲགས།། ཞེས་གསུངས་སོ།། ཨེ་མཧོ།། རྡུལ་གཅིག་སྟེང་ན་རྡུལ་སྙེད་པས།། ཕྱག་རྒྱའི་དཀྱིལ་འཁོར་གསལ་འཕྲོ་ཐིམ།། དེ་ཉིད་དག་པའི་རང་བཞིན་པས།། ངོ་མཚར་བཞི་བཅུ་རྩ་གཉིས་འགྲུབ། ། ཨ་ཧོ་སུ་ཁ་ཨེ་མ་ཧོ། ཆོས་མིན་ཡེ་ཤེས་རང་བྱུང་བས།། ཆོས་ཀུན་ཁོང་ནས་བརྡ་བར་བྱའོ།། ཀྱེ་ཧོ་ཀྱེ་ཧོ། ཨཱ་ལི་ཀཱ་ལི། ཡན་ལག་མེད་པའི་རྡོ་རྗེ། ཐབས་ཆེ་བ་ངོ་མཚར་ཏོ། སངས་རྒྱས་ཉིད་ཀྱི་སྐད་ཟབ་མོའི་ཀློང་ནས་ཟབ་མོའི་ཚིག་བརྗོད་པས། ། དོན་དམ་འགྱུར་མེད་སྙིང་པོ་ལྷུན་གྱིས་གྲུབ།། ཆོས་འབྱུང་སྤྱི་ཁོག་ཆེན་པོའི་དོན།། བྱིན་གྱིས་བརླབས་ཀྱིས་བཤད་པ་ལས།། སངས་རྒྱས་ཉིད་ལ་ཡི་གེ་མེད། ། དམ་པའི་སྐྱེས་བུ་བདག་ཕྱག་འཚལ།། ཞེས་སེམས་དཔས་གསོལ་ཏོ།། ངོ་མཚར་ཏོ།། སྒོ་བརྒྱད་བསྒྲིགས་པས་སྒོ་གཅིག་ཉིད་ལ་གནང། དབུས་ཆོས་འབྱུང་ཆེན་པོ་ལས་ཐུགས་རྗེ་རང་འབྱུང་གི་སྒོ་བཞི་ཕྱིར་བསྟན་ཏེ། རིག་པ་རང་ཤར་གྱི་དགོངས་པ་མེ་ལོང་དང་སྣང་བ་ལྟར་རང་ཤར་རོ།། ཐུགས་རྗེ་ཆོས་ཀྱི་སྒོ་བཞི་ནང་དུ་བསྟན་ཏེ། མཚོན་བྱེད་ཚིག་གི་སྒྲོན་མེ་དང། མཚོན་བྱ་དོན་གྱི་གཞི་མ་གཉིས་ཐ་མི་དད་པར་ཚིགས་མ་སྦྱར་ཏེ་གཞག་གོ། དེ་ཡང་མན་ངག་གི་ཀློང་བརྟོལ་བ་ནི།། གནས་ལུགས་རྣམ་པ་དྲུག་གིས་དཀྱུས་ཀྱི་ས་བཅད་ནས། སངས་རྒྱས་མཉམ་སྦྱོར་གྱི་དགོངས་པས་དོན་དང་མན་ངག་ལ་སྦྱར་ཞིང། དེ་ནས་དམ་པའི་སྐྱེས་བུ་བཞིས་ཆོས་ཀྱི་མཐར་གཏུགས་པའོ། ཁ་སྦྱོར་བར་ན་བདེ་གནས་པ། ཨོཾ་གྱུར་སྔགས་ཀྱི་སྡོང་པོ་ལ།། ཡན་ལག་མེད་པའི་རྡོ་རྗེ་བཤད།། ཅེས་སངས་རྒྱས་ཉིད་ཀྱི་བཀའ་འོ།། ཆོས་སྐུ་རང་བྱུང་འོད་གསལ་བས། ། ཉི་མའི་སྙིང་པོ་བཞིན་དུ་གནས།། ས་བོན་ཟླ་བ་རྒྱས་འདྲ་བ།། ཏིལ་འབྲུ་ཟེར་གྱི་སྦུ་ཐག་ཙམ།། མི་གསལ་གསལ་བའི་བདག་ཉིད་ཅན།། ཐུགས་ཀྱི་ཡི་གེ་འབྲུ་གཅིག་པུ།། ཆོས་རྣམས་ཀུན་གྱི་རྩ་བ་སྟེ། ། ཆོས་རྣམས་ཀུན་གྱིས་ང་མ་མཐོང།། དཔེར་ན་མིག་གི་སྒྲོན་མེ་ལ།། ལིང་ཏོག་སྤྲིན་གྱིས་བསྒྲིབས་པ་བཞིན།། ང་ཡི་སྒྲིབ་ཤིང་ཆོས་ཡིན་ནོ།། ཡེ་ཤེས་ལྷུན་རྫོགས་ཆེན་པོའི་སྐུ།། གསལ་འཚེར་ལྷུན་སྡུག་གཟི་བྱིན་ལྡན། ། སྣ་ཚོགས་འོད་ཟེར་འཕྲོ་བ་ཡིས།། ཁམས་གསུམ་པ་ཡང་ཡང་དག་སྒྲོལ།། ཤེས་བྱའི་དབྱིངས་ན་འོད་གསལ་བ།། གསེར་གྱི་ཡི་གེ་འབྲུ་གཅིག་པུ།། གཞི་རྩ་མེད་ལས་ཡིག་འབྲུར་གསལ།། མེ་ལོང་ནང་གི་གཟུགས་སྣང་འདྲ། ། གཞི་ལྷུན་གྲུབ་ཀྱི་སྙིང་པོར་རང་བྱུང།། ཡོན་ཏན་ཡེ་ཤེས་དཀྱིལ་འཁོར་དུ་རང་ཤར།། འབྲས་བུ་སྤྱི་སྤྱོད་ཀྱི་ཡེ་ཤེས་སུ་རང་རྫོགས་སོ།། རྡོ་རྗེ་མགོན་པོ་ཐུགས་ཀྱི་མཆོག། རྒྱུ་གཅིག་པ་ཉིད་སྣ་ཚོགས་ཏེ། ། ཀུན་འབྱུང་རྒྱུ་ཡི་ཡེ་ཤེས་ཡིན།། མ་བཅོས་རང་བྱུང་དབྱིངས་ཉིད་ན།། ཡིག་འབྲུ་གཅིག་གི་ཡན་ལག་ལས།། ཐམས་ཅད་རྒྱས་པར་བསྟན་པ་ནི།། དམ་པའི་སྐྱེས་བུ་དམ་པ་བཞིན།། སངས་རྒྱས་ཀུན་གྱི་ངོ་བོར་ཤར། ། སྐུ་གསུམ་རང་ལུགས་རྙོག་པ་མེད།། འཛིན་མེད་ཤེས་རབ་ལྕགས་ཀྱུ་ཡིས།། ནམ་མཁའ་ལས་བྱུང་ནམ་མཁའ་འཛིན།། ནམ་མཁས་ནམ་མཁའ་ཟིན་གྱུར་ན།། ནམ་མཁའི་མཁའ་འདྲ་བདེ་བར་གནས། ། ང་ལུས་མེད་པའི་སྔོན་རོལ་ན།། བདག་གིས་བདག་ཉིད་ཆེན་པོ་ལྟ།། བདག་གིས་བདག་ཉིད་དེ་མཐོང་ན།། བདག་མེད་སྐུ་གསུམ་ཤེས་རབ་མཐོང།། ཤེས་རབ་རང་བཞིན་གསུམ་ལྡན་པས།། ལྟར་མེད་དོན་ལ་ཡང་དག་བལྟ། ། ཀྱེ་སེམས་དཔའ་ཆེན་པོ་ལེགས་པར་ཉོན་ཅིག། ཨེ་མའོ།། བདེ་གཤེགས་བཅོམ་ལྡན་འདས།། སངས་རྒྱས་ཀུན་གྱི་ཡེ་ཤེས་སྐུ།། རྟོགས་པར་བཀའ་བ་སྙིང་པོའི་དོན།། རབ་ཏུ་མི་རྟོགས་གནས་མེད་པའོ། ། ཞེས་གསུངས་སོ།། ཨེ་མཧོ།། ཡེ་ནས་རྙོག་པ་མེད་པའི་སྐུ།། བསྒོམས་པས་མི་ཟིན་ཆུ་ཟླ་འདྲ།། རྟོག་པ་མེད་པ་སྒོམ་པའི་མཆོག། ཅེས་གསུངས་སོ།། ཨེ་མའོ།། མི་གནས་ཡེ་ཤེས་དངོས་རྟོག་མཐའ་དང་བྲལ། ། ཕྱོགས་ལྷུང་མེད་པའི་ཤེས་རབ་ཁོང་ན་གསལ།། སྐུ་གཅིག་ཡིག་འབྲུ་མ་ཉམས་སོ་སོར་མཁྱེན།། རང་གི་ཤེས་རབ་སྣ་ཚོགས་སྤྲུལ་པའི་སྐུ།། དེ་ལྟར་རྟོགས་པའི་སྐྱེས་བུས་ཐམས་ཅད་མཁྱེན། ། མཚན་མོའི་ཡུལ་བཟུང་ཅི་དགར་བསྒོམས་ཀྱང་འགྲུབ།། ཅེས་གསུངས་སོ།། ཨེ་མའོ།། ཆོས་སྐུ་གཅིག་ལས་སོ་སོར་དོན་བརྗོད་ཀྱང།། རང་རིག་རྒྱལ་པོ་གདོད་ནས་ཆེ་སྟེ་འཕགས།། ཏིང་འཛིན་རྩེ་གཅིག་ཡིད་དམ་དོན་བརྗོད་ཀྱང། ། རྟོག་པ་མེད་པར་རྒྱལ་བ་མྱ་ངན་ཡོངས་མི་འདའ།། ཞེས་གསུངས་ནས། དམ་པའི་སྐྱེས་བུ་བཞི་སྐྱེ་མེད་ཀྱི་དབྱིངས་སུ་གཤེགས་སོ།། སྒོ་བཞི་ལྡེ་མིག་དང་སྦྱར་ཏེ་བཤད་པའོ།། སྒོ་བརྒྱད་ནང་དུ་སྦྱོར་བ་ནི། ། སངས་རྒྱས་ཀུན་གྱི་དགོངས་པ་ཡིན།། སྒོ་གཅིག་ཕྱིར་ལ་བསྟན་པ་ནི།། རོ་ལངས་བདེ་བ་བདག་ཉིད་ཀྱིས།། རྒྱུ་འབྲས་གཉིས་ཀྱི་དོན་གྱི་ཕྱིར།། འཁོར་ལོ་ཕྱི་ནང་གཉིས་སུ་བསྐོར། ། ཅེས་གསུངས་སོ།། ཆོས་འབྱུང་ཆེན་མོ་ཞེས་ཀྱང་བྱ།། གསང་སྔགས་ཀྱི་སྤྱི་ཁོག་ཆེན་མོ་ཆོས་ཐམས་ཅད་ཀྱི་གུང་ཤིང་ལྟ་བུ། ཡན་ལག་མེད་པའི་རྡོ་རྗེས་བཤད་པ། བཅོམ་ལྡན་འདས་བདག་ཅག་གིས་ལུང་བསྟན་པ་འདིས་བཅོམ་ལྡན་འདས་ལ་མངོན་པར་བསྟོད་དོ། ། ཐིག་ལེ་གསང་སྐོར་གྱི་མཛོད་ཀྱི་རྩ་རྒྱུད་རྫོགས་སོ།།།། རྒྱ་གར་སྐད་དུ། བུདྡྷ་སརྦ་ས་མི་ཏི་མང་ལ་ཨཱ་ཏ། ཛྙ་ན་ཨ་ལོ་ཀེ་མ་ཧཱ་ཏན་ཏྲ་ནཱ་མ།
CLOSE WINDOW