CLOSE WINDOW

Gpb034.003:
Wylie

།།། བཅོམ་ལྡན་འདས་དཔལ་བདེ་བ་ཆེན་པོའི་སྙིང་པོ་ལ་ཕྱག་འཚལ་ལོ།། བྱང་ཆུབ་སེམས་ནི་ངེས་པ་ལས།། ཡང་དག་སྙིང་པོ་གསལ་བ་ནི།། ཐམས་ཅད་མ་ལུས་གདལ་བ་དང། ། ཀུན་ནས་ཡོངས་སུ་ཟླུམ་པ་ནི།། ཕྱི་དང་ནང་གི་ཆོས་རྣམས་ཀུན།། རྒྱུ་འབྲས་ཁྱད་པར་བརྡལ་བ་ཡང།། བྱ་བྱེད་ཡུལ་ལས་འདས་པ་ཡི།། ཡང་དག་གི་སྙིང་པོ་བདེ་བའི་ཀློང།། བདག་གཞན་ཕྱོགས་ལས་འདས་པའི་ཕྱིར། ། བསྟན་ཅིང་ཐོས་པའི་ཡུལ་མེད་དེ།། ཐ་སྙད་མེད་པའི་བྱང་ཆུབ་སེམས།། སྙིང་པོ་ཡང་དག་ཐིག་ལེ་ཧོ།། སྣང་དང་སྲིད་དང་ཆོས་རྣམས་ཀུན།། ཡང་དག་བཅོས་སུ་མེད་པ་ནི།། དུས་གསུམ་རྟོག་པ་མེད་པའི་ཕྱིར། ། ཀུན་བཟང་ཐིག་ལེ་བདེ་བའི་ཕྱིར།། མ་སྐྱེས་དག་པས་བདེ་བའི་དབྱིངས།། མ་འགགས་གསལ་བའི་བདག་ཉིད་ཀློང།། འདུ་འབྲལ་མེད་པའི་ཐིག་ལེའི་ཀློང།། ངེས་པས་གཞན་དུ་མི་རྩོལ་བའོ། ། མི་འདུ་ཡེ་ནས་དག་པ་ལ། མི་འབྲལ་མངོན་དུ་གསལ་བ་ནི།། ཐམས་ཅད་ཁྱབ་པས་བརྡལ་བ་ཡང།། མི་གཡོ་ངེས་པའི་ཐིག་ལེ་དབྱིངས།། དོན་དམ་བདེན་པའི་ཐིག་ལེ་ནི།། དངོས་པོ་ཕྱོགས་ལས་འདས་པའི་ཕྱིར། ། གཟུང་དུ་མེད་པའི་བྱང་ཆུབ་ལ།། ལྷག་པར་གནས་པར་མི་བྱེད་དོ།། མི་རྟོག་རྟོག་ལས་འདས་པ་ལ།། མི་འགྱུར་གསལ་བར་གནས་པ་ནི།། མ་བཅོས་ཇི་བཞིན་བདེ་བ་སྟེ།། ཀུན་བཟང་ཐིག་ལེ་ཆེན་པོའི་དབྱིངས། ། དུས་གསུམ་སྲིད་གསུམ་སྒོ་གསུམ་པོ།། རྣམ་ཤེས་རྩ་བ་གསུམ་པོ་ཡང།། སྐུ་གསུམ་རང་དབང་ལྷུན་གྲུབ་པས།། མངོན་སུམ་ཐིག་ལེ་བདེ་བའི་དབྱིངས། ཁ་དོག་དབྱིབས་ལ་མི་གནས་ཤིས།། འབྱུང་འཇུག་ཐབས་ལ་གནས་པ་ནི། ། ལས་དང་དུས་ཀྱིས་མི་བཅོས་ཏེ།། ཡང་དག་ཐིག་ལེ་བདེ་བའི་ཀློང།། ཐམས་ཅད་ངང་གིས་དག་པ་ལ།། ཡིད་ཀྱི་རྣམ་ཤེས་འོད་འབར་བ།། དུས་གསུམ་ཕྱི་ནང་མེད་པའི་ཕྱིར།། རང་བྱུང་བདེ་བའི་ཐིག་ལེ་ཡིན། ། སངས་རྒྱས་ཀུན་གྱི་རྒྱལ་པོ་ཡིན།། དེ་ཉིད་ཡིན་པར་ངེས་པའི་ཕྱིར།། སྙིང་པོ་ངེས་པའི་ཐིག་ལེ་ལས།། གཞན་དུ་རྒྱལ་བས་ཆོས་མི་བཙལ།། འདི་ལས་གཞན་པའི་ཆོས་མེད་པས། ། སྨོན་བར་བྱ་བའི་ཡུལ་མེད་དེ།། གང་ཞིག་བློ་ལ་གསལ་བ་ནི།། ཀུན་ཏུ་བཟང་པོའི་འབྲས་བུའི་དོད།། དྲན་པའི་གཞི་དང་བརྟགས་པའི་ལྷ།། མ་ལུས་འདི་ན་རྫོགས་པ་ལ།། གང་གིས་བཅོས་སུ་མེད་པ་ནི། ། བྱང་ཆུབ་ཆེན་པོར་ངེས་པས་ཏིག། ལས་དང་སྡུག་བསྔལ་མང་པོ་ཡིས།། བདེ་བའི་དོན་ལས་ཉམས་པ་ལ།། སྙིང་པོའི་དོན་ལས་འོད་བྱུང་སྟེ།། མངོན་སུམ་ཐིག་ལེ་བདེ་བས་ཆེ།། བགྲོད་དུ་མེད་པའི་ཐིག་ལེ་ནི། ། ཡང་དག་ངེས་པའི་ལམ་དུ་བདེ།། དམིགས་སུ་མེད་པའི་སྙིང་པོ་ནི།། ཇི་བཞིན་གསལ་བས་ཐིག་ལེ་ཆེ།། གཟའ་གཏད་ཕྱོགས་ལས་འདས་པ་ནི།། བསྒོམ་དུ་མེད་པའི་བྱང་ཆུབ་སེམས།། མངོན་སུམ་ཐིག་ལེ་བདེ་བ་ལ། ། བསྒོམས་པས་རྙེད་པར་ག་ལ་འགྱུར།། མ་རིག་དུག་གསུམ་རྨོངས་པ་ཡིས།། རྒྱུ་འབྲས་ཕྱོགས་ལས་འདས་པ་ཡང།། ཡང་དག་ལྟ་བར་བྲལ་བ་ནི།། ཕྱལ་བར་གཞག་པ་མ་ཡིན་ཞིང།། བཀག་སྟེ་ཞི་བས་ནུས་པ་དང། ། གཞིག་སྟེ་སྟོང་པས་སྤོང་བ་དང།། སྟོང་པའི་ཡུལ་ལ་འཛིན་པ་ཡིས།། བསམ་གཏན་ཆད་པའི་མི་གནས་ཏེ།། དག་པས་དག་པ་བཙལ་བའི་ཕྱིར།། ལྷ་ལ་ལྷ་ཡི་དམིགས་པ་ཡང།། འགྱུར་བ་མེད་པའི་ཐིག་ལེ་ལ། ། གཟའ་གཏད་དུ་ཕྱོགས་སུ་མི་གནས་པའོ།། འབྲས་བུས་འབྲས་བུ་རྙེད་འདོད་པས།། ཤེས་རབ་ཐབས་སུ་རོལ་པ་ཡང།། འགྱུར་བ་མེད་པའི་ཐིག་ལ།། རྩོལ་སྒྲུབ་ཕྱོགས་སུ་མི་གནས་པའོ།། ནམ་མཁའ་ནམ་མཁའ་མཐོང་འདོད་པས། ། དབྱིངས་དང་ཡེ་ཤེས་རོལ་པ་ཡང།། གསལ་པའི་ཐིག་ལེའི་ངོ་བོ་ཉིད།། ཐ་སྙད་ཕྱོགས་སུ་མི་གནས་པས།། ཀུན་ཏུ་བཟང་མོའི་མཁའ་དབྱིངས་ལས།། ཀུན་བཟང་རོལ་པའི་བྱེད་པ་པོས། ། སངས་རྒྱས་དཀྱིལ་འཁོར་མ་ལུས་པ།། བྱ་བ་མེད་པར་གསལ་བ་པོ།། མ་སྐྱེས་ཆོས་ཉིད་ཐིག་ལེ་ནི།། མ་འགགས་དབྱིངས་ཀྱི་ཐིག་ལེར་བདེ།། མངོན་པར་དག་པའི་ཐིག་ལེ་ནི།། གསལ་བས་ཡེ་ཤེས་ཐིག་ལེར་བདེ། ། རོལ་པ་ཀུན་བཟང་ཐིག་ལེ་ནི།། མི་རྩོལ་ལྷུན་གྱིས་གྲུབ་པས་བདེ།། ཐིག་ལེ་དྲུག་གི་མཁའ་ཀློང་ན།། ཐིག་ལེ་དགུ་ཡི་འོད་གསལ་ཞིང།། ཐིག་ཕྲན་སུམ་ཅུ་རྩ་དྲུག་གིས།། ཐམས་ཅད་གསལ་བར་བཀྲ་བ་ཡང། ། དུས་གསུམ་འགྱུར་བ་མེད་པའི་དབྱིངས།། མན་ངག་རྒྱལ་པོ་དགོངས་པ་སྟེ།། མངོན་སུམ་སངས་རྒྱས་ཆེ་བའི་གཟེར།། བདག་ཉིད་ཆེ་བས་བཏབ་པའོ།། ཆོས་ཉིད་གཞན་ན་མེད་པའི་གཟེར། ། བྱང་ཆུབ་སེམས་ཀྱིས་བཏབ་བའོ།། དུས་གསུམ་འབད་རྩོལ་མེད་པའི་གཟེར།། ལྷུན་གྱིས་གྲུབ་པས་བཏབ་པའོ།། ཆེ་བ་ལྔ་ཡི་མཛོད་བརྟོལ་ནས།། སྦས་པ་གསུམ་གྱི་གཏེར་རྙེད་ནས།། མངོན་སུམ་རང་དབང་ཐོབ་པ་ཡིས། ། ཐམས་ཅད་ཟིལ་གྱིས་གནོན་པ་ཡང།། གཟེར་བུ་ཉི་ཤུ་རྩ་ལྔ་སྟེ།། མི་འགྱུར་མངོན་དུ་ཤར་བ་ཡང།། ཀུན་ལ་ཁྱབ་ཅིང་ཐམས་ཅད་སྣུམ།། ངོ་བོ་ཉིད་ནི་དབྱེར་མེད་ཀྱང།། འཁྲུལ་པ་རྣམས་ལ་མི་སྣང་བས། ། ཡང་གསང་ཐུགས་ཀྱི་གཏེར་ཆེན་འདི།། ཕལ་ལ་སྤྲོ་བར་མ་གསུངས་སོ།། བྱང་ཆུབ་ཀྱི་སེམས་མི་འགྱུར་བའི་ཐིག་ལེ་ཏིག་རྫོགས་སོ།།།།@#། ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། ། ཆུ་བོ་ལྟ་བུར་མ་ཡེངས་བསྒོམ།། མི་བརྟན་ཡལ་བའི་གང་ཟག་གིས།། མཐོང་ནས་རིག་པའི་ཉམས་མྱོང་ལ།། རི་གཟར་དྲག་པོའི་འབབ་ཆུ་ལྟར།། རྩེ་གཅིག་གནས་པའི་མན་ངག་གིས།། ཇི་སྙེད་ཉམས་མྱོང་ངོ་བོར་སྡུད། ། རིགས་ངན་ལོག་པའི་སློབ་དཔོན་ནི།། རྒྱལ་བའི་བཀའ་བརྒྱུད་མི་ཤེས་ཤིང།། རྣ་བརྒྱུད་བདུད་རྩི་བྲལ་བ་དང།། སྤྱི་བླུགས་དབང་དོན་མ་ཐོབ་པར།། ང་རྒྱལ་དྲེགས་པའི་འདུ་ཤེས་ཀྱིས།། རྫོགས་ཆེན་དོན་ལ་གང་སྤྱོད་པ། ། དམུས་ལོང་ལམ་སྣ་འདྲེན་པ་ལྟར།། བསྐལ་པ་ནམ་མཁའ་ཟད་པའི་བར།། བདག་ཉིད་བདེར་ཡང་མི་ནུས་ན།། གཞན་དག་གྲོལ་པར་ཇི་ལྟར་འགྱུར།། དེ་བས་ལོག་པའི་བླ་མ་ནི།། ཕྲད་པས་ལོག་པའི་ལམ་སྟོན་ཅིང། ། འགྲོགས་པས་འཁོར་བའི་མཚན་མ་འཕེལ།། དབང་དང་མན་ངག་བྱིན་པའི་མཐུས།། སྡུག་བསྔལ་བརྐམ་ཆགས་དྲག་པོ་སྐྱེ།། དྲན་པས་ཡིད་སྐྱོའི་འདུ་ཤེས་འབྱུང།། འདི་ལྟ་བུ་ཡི་སློབ་དཔོན་ནི། ། རྨི་ལམ་དུ་ཡང་མི་བསམ་ན།། ལོངས་སྤྱོད་དབུལ་ཞིང་བཀུར་བ་དང།། མངོན་དུ་ཕྲད་པ་སྨོས་ཅི་དགོས།། ཞེས་གསུངས་སོ།། ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལས།། རྣ་བརྒྱུད་ཚིག་གསུམ་གྱི་ལེའུ་སྟེ་ང་བཞི་པའོ། །།། དེ་ནས་ཡང་སེམས་དཔའ་རྡོ་རྗེ་དམ་པ་ལ་འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ།། དུས་གསུམ་རྒྱལ་བ་ཐམས་ཅད་ཀྱི།། རྡོ་རྗེ་རིག་པ་སྙིང་པོའི་ངང། ། བསྒྲུབ་ཅིང་འབད་རྩོལ་བྲལ་བ་ཉིད།། སངས་རྒྱས་ཀུན་གྱི་སྙིང་པོ་ཆེ།། མ་ལུས་ཀུན་འདུས་རིག་པའི་གཏེར།། མགོན་པོ་ཁྱོད་ལ་གསོལ་བ་ནི།། རྡོ་རྗེའི་དོན་ནི་ཇི་ལྟར་ལགས།། སྙིང་པོ་ཞེས་པའི་དོན་ཅི་ཞིག། གཏན་ལ་དབབ་ཚུལ་ཇི་ལྟ་བུ།། ཕེབས་ན་གནས་ཚུལ་དོན་ཅི་ཞིག། མ་འོངས་སྐལ་ལྡན་དོན་གྱི་ཕྱིར།། བདག་ཅག་རྣམས་ལ་ལེགས་པར་གསུངས།། ཞེས་གསོལ་ཏོ།། དེ་ནས་གསང་བའི་བདག་པོ་ཕྱག་ན་རྡོ་རྗེས་འདི་སྐད་ཅེས་བཀའ་སྩལ་ཏོ། ། དུས་གསུམ་སངས་རྒྱས་ཐམས་ཅད་ཀྱི།། དགོངས་པའི་རིག་པ་སྐྱེ་བ་མེད།། གདོད་ནས་རང་བྱུང་སྙིང་པོ་སྟེ།། མི་ཕྱེད་རྡོ་རྗེ་ཞེས་སུ་བཤད།། མ་བཅོས་རང་བྱུང་ཡེ་ཤེས་ནི། ། མཚོན་པ་རྡོ་རྗེ་གསུམ་ལས་བྱུང།། ཆོས་ཉིད་མ་བཅོས་རྡོ་རྗེ་ནི།། གྲུབ་ནས་འཇིག་པའི་དུས་མེད་དོ།། སྐྱེ་མེད་རིགས་ལྡན་རྡོ་རྗེ་ནི།། རྡོ་རྗེས་རྒྱས་ཐེབས་བླ་ཡིས།། སྣང་སྲིད་རིག་པ་རྡོ་རྗེ་རུ།། མཚོན་པ་རྡོ་རྗེས་གཏན་ལ་ཕབ། ། རང་བྱུང་རིག་པའི་རྡོ་རྗེ་ནི།། རྒྱུ་རྐྱེན་བྲལ་བས་སྐྱེ་བ་མེད།། གཉེན་པོ་བྲལ་བས་འཇིག་པ་མེད།། བསམ་བྲལ་རིག་པ་ཅིར་མི་དགོངས།། གཉིས་མེད་ཡེ་ཤེས་རྡོ་རྗེ་ནི།། སྟོང་ཉིད་ནམ་མཁའི་དོན་རྟོགས་པས། ། སྣང་སྲིད་བདེ་ཆེན་རྡོ་རྗེ་ཉིད།། མ་བཅོས་རོ་གཅིག་ཁྱད་པར་མེད།། རྡོ་རྗེ་རང་བྱུང་སྙིང་པོ་ཅན།། མ་ལུས་ཀུན་འདུས་གཉིས་སུ་མེད།། བདེ་ཆེན་ཀློང་གི་འོད་བརྡལ་བས།། ཕྱོགས་རིས་མེད་པར་ཁྱབ་པར་གནས། ། རང་བྱུང་རྫོགས་པའི་སྙིང་པོ་ན།། མ་ལུས་འདུས་པའི་སྙིང་པོ་སྟེ།། ཐིག་ལེ་ཕྱོགས་མེད་ནམ་མཁའི་ཀློང།། ཕྱོགས་མེད་བདེ་བ་ཆེན་པོར་གནས།། མི་ཕྱེད་པ་དང་འཇོམས་པ་དང།། གཉེན་པོ་མེད་དང་མི་འཇིག་དང། ། རྟག་པ་ཆེན་པོ་ཉིད་ཀྱི་ཕྱིར།། རྡོ་རྗེ་ཞེས་ནི་བརྗོད་པ་ཡིན།། མ་ལུས་ཆོས་རྣམས་ཐམས་ཅད་ཀུན།། འདུ་ཞིང་འབྱུང་བའི་སྙིང་པོ་སྟེ།། དངོས་རྣམས་ཀུན་གྱི་དེ་ཉིད་དོན།། མ་ལུས་འབྱུང་བའི་སྙིང་པོ་ཡིན། ། མ་ལུས་འདུས་པའི་ངོ་བོ་ནི།། རིག་པ་སྐྱེ་མེད་སྙིང་པོ་སྟེ།། རེ་དོགས་གསལ་བའི་ཡུལ་འདས་པ།། སངས་རྒྱས་སེམས་ཅན་མཉམ་དུ་གནས།། མ་བཅོས་རིག་པ་ཡེ་ཤེས་ནི།། སྒྲོ་སྐུར་འདས་པའི་སྙིང་པོ་སྟེ། ། མ་ལུས་ཀུན་འདུས་སྙིང་པོ་ཅན།། ཐ་དད་གཞན་པའི་རྣམ་པ་མེད།། མ་ལུས་རང་བྱུང་སྙིང་པོ་ཉིད།། དམན་པ་རྣམས་ཀྱི་ཡུལ་མིན་པས།། དུས་གསུམ་སངས་རྒྱས་མ་ལུས་ལ།། རེ་དོགས་བཅད་པའི་བསྟན་པ་ཉིད། ། དགོངས་པས་ཕྱོགས་རིས་མེད་པར་བསྟན།། སྐད་ཅིག་ཙམ་གྱིས་རྫོགས་སངས་རྒྱས།། རེ་དོགས་བཅད་པས་ལྷུན་གྱིས་གྲུབ།། རིག་པ་ལོངས་སྤྱོད་རྫོགས་པ་དེས།། ས་བཅུའི་དབང་ཕྱུག་རྣལ་འབྱོར་ལ། ། དགོངས་པ་ཆོས་ཉིད་བདེ་ཆེན་བཤད།། ཏིང་འཛིན་རིག་པའི་གདེང་གིས་གོ། མ་བགྲོད་སངས་རྒྱས་ས་ལ་གནས།། དུས་གཅིག་སངས་རྒྱས་ས་ལ་བཞག། སྟོན་པ་སྤྲུལ་པའི་སྐུ་ཡིས་ནི།། མངོན་དུ་བསྟན་པའི་སྐལ་མེད་ལ། ། བརྗོད་པའི་ཚིག་གི་ལྡེ་མིག་གིས།། མ་བཅོས་དོན་ལ་བརྒྱུད་དེ་བསྟན།། རང་བྱུང་བྱང་ཆུབ་སྙིང་པོའི་ལུས།། ཕྱོགས་མེད་ཉི་མའི་སྙིང་པོ་ལྟར།། གསལ་ནས་བར་ཆད་མེད་པའི་ལ།། མངོན་དུ་སྐུ་གསུམ་བསྟན་པ་ལྟར། ། མ་འོངས་སྐལ་ལྡན་རྣལ་འབྱོར་ལ།། བརྒྱུད་པ་གསུམ་གྱིས་ཤེས་པར་བྱ།། སྐལ་ལྡན་དབང་པོའི་ཁྱད་པར་གྱིས།། དགོངས་པས་བྱིན་གྱིས་བརླབས་པ་དང།། མ་རིག་མཉམ་ཉིད་སེམས་ལ་སྣང། ། རྣ་བརྒྱུད་གསང་བའི་འཕུལ་ཚིག་གིས།། རྣ་ལམ་མ་བཅོས་དོན་ལ་སྦྱར།། མ་ནོར་དམ་པའི་རིགས་ཅན་ལ།། མ་བཅོས་དགོངས་པ་གཏན་ལ་ཕབ།། གསང་དོན་ཐབས་ཀྱིས་ངེས་རྟོགས་ནས། ། རིག་པ་ཉམས་ཀྱི་གོམས་ཚད་ཀྱིས།། མ་ལུས་དྲན་རིག་ཉམས་སུ་འབར།། མ་བཅོས་བཏང་བཟུང་མེད་པའི་སེམས།། རིན་ཆེན་གླིང་ལ་བགྲོད་པའམ།། རྒྱ་མཚོའི་སྙིང་པོར་གནས་པ་ལྟར།། སྣ་ཚོགས་ཞེན་པ་རང་ལོག་ནས། ། རང་བཞིན་སྣ་ཚོགས་དྲི་དག་ལ།། ཡེ་ཤེས་གསལ་བའི་རང་བྱུང་སེམས།། མུ་ཁ་རོ་ཡི་དཀྱིལ་འཁོར་ལ།། བདུད་རྩི་ཐིགས་པ་ལྕེ་ལ་ཞོག། གསལ་བའི་རེག་བྱའི་བདེ་བ་ལ།། གངས་རི་རྩེ་ནས་བསྙིལ་བར་བྱ། ། ཀུན་འདུས་ཆོས་ཀྱི་དཀྱིལ་འཁོར་ལ།། རྒྱལ་པོ་བཙོན་དུ་གཟུང་བར་བྱ།། དེ་ལྟར་ཚོགས་དྲུག་གྲོལ་བ་ཡིས།། ཤིང་རྟའི་གཟེར་མགོ་གཅད་པར་བྱ།། ཞེས་བཀའ་སྩལ་ཏོ།། གསལ་བ་མཐའ་དང་མཉམ་པ་ལས། ཡེ་ཤེས་ས་གཅིག་གི་ལེའུ་སྟེ་བཅུ་བཞི་པའོ།།།། དེ་ནས་སྤྲུལ་པ་ལྷ་ཡི་བུས།། གསང་བདག་རྡོ་རྗེ་འཛིན་པ་ལ།། མཐར་ཕྱིན་སྐུ་གསུམ་བཤད་དུ་གསོལ།། ཞེས་ཞུས་པ་དང། གསང་བའི་བདག་པོས་བཀའ་སྩལ་པ། ། སྣང་བ་མ་བཅོས་ཆོས་ཀྱི་སྐུ།། རིག་པ་མ་སྦྱངས་ལོངས་སྤྱོད་རྫོགས།། ཐུགས་རྗེ་སྤྲུལ་བའི་སྐུ་རུ་ཤར།། ཆོས་སྐུས་ནམ་མཁའི་ཁམས་ཀུན་ཁྱབ།། ཞིང་ཁམས་སྣང་སྲིད་ཐམས་ཅད་དང།། དུས་གསུམ་སངས་རྒྱས་ཐམས་ཅད་དང། ཁམས་གསུམ་སེམས་ཅན་ཐམས་ཅད་ཀུན།། ཆོས་སྐུ་མ་བཅོས་འཁོར་དུ་འདུས།། ཆོས་སྐུ་དངོས་མེད་ཡེ་ཤེས་ཉིད།། བློ་ལས་གྲོལ་ཏེ་བསམ་དུ་མེད།། བརྗོད་པའི་ཐ་སྙད་ཀུན་དང་བྲལ། ། མི་འགྱུར་རྡོ་རྗེ་ནམ་མཁའ་འདྲ།། ལོངས་སྤྱོད་རང་རིག་ཡེ་ཤེས་ཏེ།། གཟུགས་ཀྱི་སྐུ་རུ་ཤར་བ་ནི།། མཚན་དང་དཔེ་བྱད་སྦྲས་པ་ལ།། སྣང་ལ་རང་བཞིན་མེད་པའི་ལུས།། མེ་ལོང་ནང་གི་གཟུགས་བརྙན་བཞིན། ། ཡེ་ཤེས་སྒྱུ་མར་སྣང་བའོ།། ལོངས་སྤྱོད་རྫོགས་པའི་ཞིང་ཁམས་ནི།། འདོད་པའི་ལོངས་སྤྱོད་ཐམས་ཅད་ལ།། སྤྱོད་ཀྱང་མ་ཆགས་ལོངས་སྤྱོད་ཡིན།། དེ་བཞིན་མེ་ཏོག་རྒྱན་པའོ།། འཁོར་ནི་བྱང་ཆུབ་སེམས་དཔའི་འཁོར། ། ཚིགས་དང་ཡི་གེར་མི་བརྗོད་ཀྱང།། བརྡ་ཡིས་ཆོས་རྣམས་འཇལ་བར་སྟོན།། ཏིང་འཛིན་རིག་པའི་གདེང་གིས་གོ། ཐུགས་རྗེས་ཡེ་ཤེས་སྤྲུལ་པའི་སྐུ།། གདུལ་བྱ་གང་དང་གང་འདུལ་ལ། ། དེ་དང་དེ་ཡི་སྐུ་སྤྲུལ་པ།། ཐུབ་དྲུག་ངོ་བོ་ཤཱཀྱ་ཐུབ།། ཞིང་ཁམས་སྟོང་གསུམ་མི་མཇེད་ལ།། གདུལ་བྱ་འགྲོ་བ་དྲུག་འདུལ་ཏེ།། འཁོར་ནི་རང་སྣང་རྣམ་བཞི་ལ།། བསྟན་པ་སྡེ་སྣོད་གསུམ་དུ་འཆད། ། ཅེས་གསུངས་སོ།། གསལ་བ་མཐའ་དང་མཉམ་པ་ལས། སྐུ་གསུམ་བསྟན་པའི་ལེའུ་སྟེ་བཅོ་ལྔ་པའོ།།།། དེ་ནས་སེམས་ལྷག་ལྷ་ཡི་བུས།། གསང་བདག་ཆེ་ལ་འདི་སྐད་གསོལ།། བཅོམ་ལྡན་ཐུགས་ཀྱི་དཀྱིལ་འཁོར་ནས། ། ཡེ་ཤེས་རོལ་པ་བཤད་དུ་གསོལ།། གསང་བའི་བདག་པོས་བཀའ་སྩལ་པ།། ཡེ་ཤེས་གསང་བ་སྙིང་པོའི་དོན།། ཀུན་འདས་ཡེ་ཤེས་དག་པའི་འོད།། ཐུགས་རྗེ་ཡེ་ཤེས་ཕྱོགས་མེད་ཤར། ། ཡེ་ཤེས་མེ་ལོང་གཡའ་དག་ལ།། མ་བཅོས་གཟུགས་བརྙན་རང་ཤར་བས།། གསལ་འགྲིབ་མེད་པར་ཟང་ཐལ་ནི།། མེ་ལོང་ལྟ་བུའི་ཡེ་ཤེས་སོ།། སྣང་སྲིད་བྱང་ཆུབ་སེམས་སུ་གསལ།། རང་སར་མཉམ་པས་ཕྱོགས་བཅུར་བརྡལ། ། འགྲོ་འོང་མེད་པས་དབྱིངས་སུ་ཐིམ།། མཉམ་པ་ཉིད་ཀྱི་ཡེ་ཤེས་སོ།། རང་གསལ་རིག་པའི་ཡེ་ཤེས་ཐུགས།། མ་འདྲེས་ཡོངས་རྫོགས་ཀུན་ཏུ་བཟང།། སོ་སོར་མི་རྟོག་ཡེ་ཤེས་ཉིད།། མ་འདྲེས་གསལ་བའི་ཡེ་ཤེས་སོ། ། མི་འདའ་ཕྱག་རྒྱ་ཆེན་པོ་ལ།། རང་བྱུང་མཛད་པ་ཅིར་ཡང་འཆར།། གདུལ་བྱའི་བྱ་བ་ཀུན་སྒྲུབ་པས།། བྱ་བ་སྒྲུབ་པའི་ཡེ་ཤེས་སོ།། མ་བཅོས་དབྱིངས་ཀྱི་ཆོས་ཉིད་ནི།། འཛིན་རྟོག་རིག་པའི་ཆོས་མེད་པས། ། སེམས་ཀྱི་དཀྱིལ་འཁོར་འོད་གསལ་ཏེ།། སྟོང་པ་ཉིད་ཀྱི་ཡེ་ཤེས་སོ།། རང་གསལ་ཤེས་པ་མ་བཅོས་པས།། དོན་དེ་ཤེས་པས་ཡེ་ཤེས་ཡིན།། ཆོས་ཉིད་ཀར་དག་འོད་གསལ་སེམས། ། དོན་དེ་རྟོག་ན་ཡེ་ཤེས་ཡིན།། མ་འགགས་རང་རིག་འགྱུར་མེད་སེམས།། རང་བྱུང་ཡེ་ཤེས་ལྷུན་གྱིས་གྲུབ།། དེ་དོན་རྟོགས་པའི་རྣལ་འབྱོར་བ།། ཡེ་ཤེས་ཆེན་པོའི་ཀློང་ན་འཕྱོ།། ཐིག་ལེ་དྲུག་འདུས་ཉག་གཅིག་ལ། ། ཆེ་བ་ལྔ་དང་འདོད་ནས་ལྡན།། འདི་དོན་ཤེས་ན་ཡེ་ཤེས་ཡིན།། རྟོགས་པའི་ཀློང་ཆེན་རབ་འབྱམ་ནི།། ཀློང་ཆེན་དགུ་ཡི་ཀློང་ན་འཕྱོ།། འདི་རུ་མ་འདུས་གང་ཡང་མེད།། ཀུན་བྱེད་ཀུན་བཟང་བརྩོན་པའི་སྐུ། ། སྐབས་སྦྱོར་ཡི་གེ་ཚུལ་ཅིག་ཀློང།། འོད་གསལ་མེ་ལོང་རྒྱ་མཚོ་ཀློང།། ཀློང་དགུ་འདས་པའི་རྒྱ་མཚོ་ཡིས།། མ་རྟོགས་པ་ལ་ཚིག་སྒོ་ནས།། ཡེ་ཤེས་གསང་བར་བཤད་པ་ཡིན།། ཞེས་བཀའ་སྩལ་ཏོ། ། གསལ་བ་མཐའ་དང་མཉམ་པ་ལས། ཡེ་ཤེས་ཀྱི་ལེའུ་སྟེ་བཅུ་དྲུག་པའོ།།།། དེ་ནས་སེམས་དག་ལྟ་ཡི་བུས།། གསང་བའི་བདག་པོ་བཅོམ་ལྡན་ལ།། ལུང་བསྟན་རྡོ་རྗེར་བཤད་དུ་གསོལ།། གསང་བའི་བདག་པོས་བཀའ་སྩལ་པ། ། ཉོན་ཅིག་ཀུན་དགའ་སྙིང་པོ་ཁྱོད།། ལེགས་པར་ཉོན་ལ་ཡིད་ལ་ཟུང།། ཡེ་ཤེས་གསང་བ་དམ་པ་འདི།། འདས་པའི་དུས་ན་སྔོན་བྱུང་བ།། སངས་རྒྱས་མངོན་རྫོགས་རྒྱལ་པ་ཡིས། ། ཐུགས་ཀྱི་རྒྱལ་སྲས་བདུན་ལ་གཏད།། དེ་དག་རིག་པར་མཐར་ཕྱིན་ནས།། དེ་བཞིན་རྩོལ་བྲལ་ཆོས་ལ་བཀོད།། རྡོ་རྗེ་འཛིན་པའི་སྡེ་དཔོན་གྱིས།། སེམས་ཉིད་རིག་པའི་ཐེག་པ་རྟོགས།། ལྷ་གནས་གསུམ་དུ་གྲགས་འགྱུར་ནས། ། ཡང་སྤྲུལ་རྒྱལ་སྲས་ཁྱོད་ཀྱིས་སུ།། འཛམ་གླིང་དབུས་སུ་རྒྱས་པར་གྱིས།། རྒྱལ་འཐེབ་གསང་བའི་སྣོད་ལྡན་ལ།། རྣ་བརྒྱུད་རིག་པ་གསང་བའི་རྒྱུད།། ཐུགས་རྗེས་སྤྲུལ་པའི་སྒོ་ནས་སྟོན།

CLOSE WINDOW