Wylie |
རྒྱ་གར་སྐད་དུ། ཤྲཱི་མ་ཧཱ་ཀཱ་ལ་ཨག་ནི་ཛི་ཧྭོ་ནཱ་མ་ཏནྟྲ། བོད་སྐད་དུ། དཔལ་ནག་པོ་ཆེན་པོ་མེ་ལྕེ་ཕྲེང་བ་ཞེས་བྱ་བའི་རྒྱུད། བཅོམ་ལྡན་འདས་དང་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག། ནག་པོ་ཆེན་པོ་དང་ཐབས་ཅིག་པ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་བདག་གི་རྡོ་རྗེ་འཛིན་པའི་རྒྱལ་པོ་ནི། དུར་ཁྲོད་ཆེན་པོ་བསིལ་བའི་ཚལ་རིའི་ཚོགས་དབུས་ན། འཁོར་བྱང་ཆུབ་སེམས་དཔའ་མང་པོ་དང། མཁའ་འགྲོ་དང། ཤ་ཟ་དང། ལྷ་དང། ཀླུ་དང། གནོད་སྦྱིན་དང། དྲི་ཟ་དང། གཤིན་རྗེ་དང། སྲིན་པོའི་ཚོགས་དང་ཐབས་ཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ལ་དཔལ་ནག་པོ་ཆེན་པོས་འདི་སྐད་ཅེས་གསོལ་ཏོ།། ཀྱེ་མ་བཅོམ་ལྡན་ཁྲོ་རྒྱལ་གཙོ།། བདག་གི་ལོ་རྒྱུས་ཇི་ལྟར་ལགས།། བསྟན་པ་བསྲུང་ཚུལ་ཇི་ལྟར་ལགས།། ཕྱི་རབས་རྣལ་འབྱོར་བདུན་གྱིས་སུ། ། རྗེས་སུ་ཞུགས་ནས་བསྒྲུབ་ན་ཇི་ལྟར་ལགས་ཞེས་པས།། བཅོམ་ལྡན་འདས་ཀྱི་བཀའ་སྩལ་པ།། ལེགས་སོ་ལེགས་སོ་ལེགས་ལྡན་ནག་པོ་ཁྱོད།། ཁྱོད་ཀྱི་དོན་ནི་ངས་བཤད་ཀྱིས།། ལེགས་ཤིང་གུས་པའི་ཡིད་ཀྱིས་ཉོན། ། ཞེས་པས། གླེང་གཞི་གླེང་བསླངས་དང་བཅས་པའི་ལེའུ་སྟེ་དང་པའོ།།།། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱོད་སྔོན་དུར་ཁྲོད་གཏུམས་པར་གྲགས་པ་ཞེས་བྱ་བ་ན། ཨ་སུ་རའི་ཤིང་གི་བདག་པོ་དང། དུར་ཁྲོད་ཀྱི་བདག་པོ་དང། རོ་ལངས་དང། མཁའ་འགྲོ་མ་དང། འབྱུང་པོ་དང། ཡི་དྭགས་དང། ཤ་ཟ་དང། འདྲེ་ལ་སོགས་ལ་གནས་པའི་ཕྱོགས་དེ་ན། སྲིན་པོའི་རྒྱལ་པོ་ཡག་ཤ་ཧ་རི་ཞེས་པ། རྫུ་འཕྲུལ་གྱི་མཐུ་དང་ལྡན་ཅིང་བཞུགས་སོ།། སྲིན་པོའི་རྒྱལ་པོ་དེས། རྒྱལ་ཆེན་རིས་བཞིའི་ལྷའི་རྒྱལ་པོའི་བུ་མོ་གཅིག་བརྐུས་ནས། དུར་ཁྲོད་དེར་ཁྲིད་ནས་རང་དབང་མེད་པར་ཆུང་མ་བྱས་སོ། ། དུས་དེ་ནས་ཟླ་བ་བདུན་ལོན་ནས་སྲིན་པོའི་རྒྱལ་པོ་དེ་ཚེའི་དུས་བྱས་ནས་འདས་སོ།། དེར་ལྷའི་བུ་མོ་དེ་ལ་སྲོན་པོའི་བུ་ཞུགས་ཏེ། དེར་ལྷའི་བུ་མོ་དེ་སྲིན་པོའི་ཆུང་མར་གྱུར་པས་སུས་ཀྱང་མ་འདོད་དོ། ། དེར་མོ་གཅིག་པུར་ལུས་པ་ལས་སྲིན་པོའི་ཕྲུ་གུ་སྐྱེས་པར་གྱུར་ཏོ།། དེར་མོའི་བུ་དེ་སྙིང་རྗེ་བར་ཚོར་ནས། རང་གི་ལུས་དེའི་ལྷའི་རྒྱན་ཕོག་སྟེ། ནོར་བུ་རིན་པོ་ཆེ་གཅིག་དང། གླིང་བར་གྱི་ཉ་པ་ལ་ཉ་ཚོང་བྱས་ནས་གསོས་སོ། ། གླིང་བར་གྱི་རྒུན་འབྲུའི་ས་ནས་རྒུན་ཆང་བྱས་སོ།། གླིང་བར་གྱི་སྒོག་བཙོང་བསྙབས་ནས་དེ་རྣམས་ཀྱིས་བུ་གསོས་སོ།། དེ་ལྟར་གསོས་པས་བུ་དེ་ཡང་སྐྱེ་དྲག་ལ་གཟུགས་བཟང་བ་གཅིག་བྱུང་སྟེ། རིང་པོར་མ་ཐོགས་པར་ཚར་བར་གྱུར་རོ།། བུ་དེས་མ་དེ་ལ་སྨྲས་པ། མ་གཅིག་བདག་ལ་ཕ་མེད་དམ་ཞེས་དྲིས་པ་དང། མས་སྨྲས་པ། ཕ་སྲིན་པོ་ཡིན་ཏེ་འདས་སོ།། བུས་སྨྲས་པ། དེ་ལྟར་ཡིན་ན་ང་ཅག་མ་སྨད་སྡུག་པས་རྟེན་མེད་པའི་གནས་འདིར་མི་སྡོད། ། རོ་ལངས་ཀྱིས་བསད་པར་འོངས་པས། དུར་ཁྲོད་འདིའི་ལྷོ་ཕྱོགས་ན་རི་མ་ལ་ཡ་མངོན་པར་འཕགས་པ་ཞེས་བྱ་བ་ལ། དགེ་སློང་བདེ་ལྡན་དཔའ་བོ་ཞེས་བྱ་བ། འཕགས་པ་འཇམ་དཔལ་གྱི་སྤྲུལ་པ་ཡིན་ཏེ། ཤིན་ཏུ་ཉིན་མོ་ཞི་ཞིང་ཉན་ཐོས་ཀྱི་ཆ་ལུགས་སུ་ཞུགས་ནས། ཆོས་ཉིད་རྣམ་པར་དག་པའི་མི་རྟོག་པའི་དོན་སྒོམ་མཚན་མོ་ནི་ལུས་གཅེར་བུར་བྱས་ནས། རུས་པའི་རྒྱན་གྱིས་བརྒྱན་ནས། ། དུར་ཁྲོད་ཁྲག་གི་མཆོད་པ་བཤམས་ནས། འཁོར་མཁའ་འགྲོ་མའི་ཚོགས་བསྡུས་ནས་གླུ་དང་གར་དུ་བཅས་ནས། དཔལ་བདེ་བ་ཆེན་པོའི་མདུན་གྱི་ནམ་མཁར་མཆོད་པ་མངོན་སུམ་དུ་མཛད་ནས། དེའི་དངོས་གྲུབ་རྣམ་པ་སྣ་ཚོགས་ལ་དབང་ཐོབ། རྫུ་འཕྲུལ་གྱི་མཐུ་རྣམ་པ་སྣ་ཚོགས་ལ་མངའ་བརྙེས་པ་ཞིག་བཞུགས་སོ།། ང་ཅག་མ་སྨད་དེའི་དྲུང་དུ་འདོང། དེ་ལ་སྐྱབས་སུ་གསོལ་ལ་དངོས་གྲུབ་ཀྱིས་བཀའ་དོན་ཅིག་ཀྱང་ནོད། དེ་སྐད་ཅེས་སྨྲས་པ་དང། མས་ཀྱང་བུ་ལ་མཉན་ཏེ། དེའི་དྲུང་དུ་བྱོན་ནོ།། དེར་སློབ་དཔོན་ཆེན་པོ་དེའི་སྤྱན་སྔར་འཁོད་དོ།། ལྷའི་བུ་མོ་དེས་རང་གི་ནོར་བུ་སེ་མོ་དོ་ཕོག་ནས་སློབ་དཔོན་དེ་ལ་ཕུལ་ཏེ་ཕྱག་འཚལ་ཞབས་ལ་སྤྱི་བོས་གཏུགས་ནས་འདི་སྐད་ཅེས་སྨྲས་སོ། ། བདག་ལྷའི་བུ་མོ་ལགས་པས། ལས་ཀྱི་དབང་གིས་སྲིན་པོ་ཆུང་མར་གྱུར་ཏེ། སྲིན་པོ་འདས་པར་གྱུར་ནས། བདག་ལ་སྲིན་པོའི་བུ་སྦྲུམ་པར་གྱུར་ཏེ། སྡུག་བསྔལ་མ་ཟད་པར་སྤྱད་ནས། ད་ལྟར་གྱི་བུ་འདི་ལགས་སོ།། ད་བདག་ཅག་མ་སྨད་ལ་མགོན་མ་མཆིས་པས། སློབ་དཔོན་ཆེན་པོ་ཁྱེད་ལ་མགོན་དང་སྐྱབས་ཞུ་ན།། དངོས་གྲུབ་ཀྱི་ཐུགས་རྗེ་གཅིག་ཀྱང་གནང་བར་ཞུ། སློབ་དཔོན་གྱི་ཐུགས་ཀྱིས་གཟུང་བར་ཞུ་ཞེས་གསོལ་བ་དང། སློབ་དཔོན་གྱི་ཐུགས་རྗེས་དགོངས་ཏེ། རྫུ་འཕྲུལ་གྱི་མཐུ་སྣ་ཚོགས་ཀྱི་ཕྱག་ཅེས་པ་མ་སྨད་གཉིས་ཀྱི་སྤྱི་བོར་བཞག་སྟེ། རྫུ་འཕྲུལ་གྱི་མཐུའི་དབང་བསྐུར་ནས། ཆོས་ཉིད་སྐྱེ་བ་མེད་པའི་དོན་བཤད། དེའི་ཚེ་མས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་རྟོགས། བུས་ནི་སྤྲུལ་པའི་སྐུའི་རྫུ་འཕྲུལ་སྣ་ཚོགས་ལ་དབང་བསྒྱུར་བས། གདུག་པ་ཅན་འདུལ་བའི་ལས་ཀྱི་མངའ་བརྙེས། ཕྱག་མང་པོ་དང་ཞབས་དཔག་ཏུ་མེད་པར་སྤྲུལ་ནས། ཕྱག་འགྱུར་ཞིང་ཞབས་བརྡབས་པས་ས་གཞི་དང་རི་རབ་ལྡེག་པར་ནུས་སོ།། དེ་ནས་སློབ་འབངས་འཁོར་དང་བཅས་པ་ལ་དུར་ཁྲོད་ཀྱི་མཁའ་འགྲོ་མ་རྣམས་ཀྱིས་ཉིན་དང་མཚན་དུ་བསྐོར་བ་དང་མཆོད་པ་རྒྱུན་མ་འཆད་པར་མཛད་པ་ལས། སྲིན་པོའི་ཕྲུ་གུ་དེ་ལ་སློབ་དཔོན་གྱིས་གསང་བའི་དབང་ལས་ཀྱི་གཉེར་གཏད་དོ། ། སློབ་དཔོན་བདེ་ལྡན་དཔའ་བོའི་རྒྱལ་ཚབ་ཏུ་བཞག་གོ། སློབ་དཔོན་བདེ་ལྡན་དཔའ་བོ་དང། ལྷའི་བུ་མོ་ཤེས་རབ་ཀྱི་ཕ་རོལ་ཏུ་ཕྱིན་མ་གཉིས་རྡོ་རྗེ་དང་དྲིལ་བུར་འགྱུར་ཏེ། ཆོས་ཀྱི་དབྱིངས་ཀྱི་ཡེ་ཤེས་དང། མེ་ལོང་ལྟ་བུའི་ཡེ་ཤེས་སུ་སངས་རྒྱས་ནས་བཅུ་གསུམ་རྡོ་རྗེ་འཛིན་པའི་ས་ལ་གཤེགས་སུ་གསོལ། བདེ་ལྡན་དཔའ་བོས་ཕྲིན་ལས་ཀྱི་མཛད་སྤྱོད་མཐར་ཕྱིར་ནས་དབྱིངས་ཀྱི་ཡེ་ཤེས་གཉིས་སུ་མེད་པར་སངས་རྒྱས་པའི་ལེའུ་སྟེ་གཉིས་པའོ། །།། དེ་ནས་ཡང་སློབ་དཔོན་ཆེན་པོ་སྐལ་ལྡན་དཔའ་བོའི་དུར་ཁྲོད་ཆེན་པོའི་གནས་ན། སྔོན་གྱི་སློབ་དཔོན་གྱིས་མཛད་པའི་ཕྲིན་ལས་སྣ་ཚོགས་ཐམས་ཅད་ནི་མཛད། འདུལ་བའི་ཕྲིན་ལས་སྣ་ཚོགས་ནི་འདུལ། མཁའ་འགྲོ་མ་རྣམས་ལ་སྔོན་གྱི་གདམས་ངག་རྗེས་སུ་དྲན་པའི་སྒོ་ནས་ཆོས་སྟོན་ཅིང། ཕྲིན་ལས་སྣ་ཚོགས་ཀྱིས་གདུག་པ་འདུལ་བའི་དོན་མཛད་པ་ལས། མཁའ་འགྲོ་མ་རྣམས་ཀྱིས་ཉིན་དང་མཚན་དུ་བསྐོར་བ་བྱེད་ཅིང། མཆོད་པ་བྱེད་དེ་བཞུགས་སོ།། དེའི་ཚེ་མཁའ་འགྲོ་རྣམས་དུར་ཁྲོད་དུ་ཟས་ཚོལ་དུ་གཤེགས་སོ།། སློབ་དཔོན་སྐལ་ལྡན་དཔའ་བོ་གཅིག་པུ་ཉིད་དུར་ཁྲོད་ན་བཞུགས་པ་ལས། རྫུ་འཕྲུལ་གྱི་མཐུ་མངོན་པར་བྱུང་བ་ཞེས་བྱ་བ་སྤྲུལ་པའི་སྐུའི་བརྟུལ་ཞུགས་མཛད་སྟེ། ཕྱག་མང་པོ་དང་ཞབས་མང་པོར་སྤྲུལ་ཏེ།། རྫུ་འཕྲུལ་གྱིས་གར་མཛད་ནས་རི་རབ་གླིང་བཞི་ཐམས་ཅད་ལྡེག་པར་མཛད་དོ། ། དེའི་ཚེ་ལྷའི་བུ་དབང་པོ་བརྒྱ་བྱིན་གྱིས་རི་རབ་ཀྱི་རྩེ་ནས་གཟིགས་སོ།། ལྷའི་དབང་པོ་ཉིད་སྐྱེས་བུ་དེའི་རྫུ་འཕྲུལ་དེ་ལ་ཡ་མཚན་དུ་གྱུར་ཏེ་འདི་སྙམ་དུ་སེམས་སོ། ། མ་གི་ནི་ངས་རི་རབ་ཀྱི་ཁ་ལ་སྤྱན་དྲང་ལྷ་རྣམས་ཀྱི་དམག་དཔོན་བྱས་ལ། ལྷ་མ་ཡིན་དང་འཐབ་པའི་གཡུལ་བཟློག་ན་སྙམ་སྟེ། སྐྱེས་བུ་ཆེན་པོ་དེ་མཁའ་འགྲོ་མ་རྣམས་ཀྱིས་འདུལ་བར་གཟིགས་ནས། མཁའ་འགྲོ་མ་རྣམས་ནི་མི་སྡུག་པའི་གཟུགས་ཅན་ཡིན། ལྷའི་བུ་མོ་ནི་མཛེས་ལ་ཡིད་དུ་འོང་བ་ཡིན། ལྷའི་བུ་མོ་གཅིག་གིས་བྲིད་ལ་དགུག་གོ་སྙམ་ནས། ལྷ་དཔལ་འཆང་གར་ཀཱིརྟི་ཀ་ཏི་གའི་བུ་མོ་ཨུ་མ་ཡང། དབུ་མ་དེ་བ་ཞེས་བྱ་བ་གཟུགས་མཛེས་ཤིང་ལྟ་ན་སྡུག་པ་གཅིག་ཡོད་དེ། དེ་ལ་ལྷ་མོ་ནི་རྒྱན་སྣ་ཚོགས་པས་བརྒྱན་ནས། ལྷའི་དབང་པོ་བརྒྱ་བྱིན་གྱིས་དེ་ལ་འདི་སྐད་ཅེས་བཀའ་བསྒོའོ།། ཁྱོད་སོང་ལ་མ་གི་ན་སྐྱེ་བུ་དཔའ་བོ་རྫུ་འཕྲུལ་ཅན་ཅིག་ཡོད་དེ་ཁུག་ལ་ཤོག་ཅིག། ལྷའི་དམག་དཔོན་བྱས་ལ་ལྷ་མ་ཡིན་གྱི་གཡུལ་ཕམ་པར་བྱའོ།། མ་ཁུགས་བར་དུ་ཁྱོད་རང་མ་འོང་བར་སྡོད་ལ་གསོལ་བ་ཐོབ་ཅིག་ཅེས་བཀའ་བསྒོ་ནས་བཏང་ངོ། ། དེ་སྐད་བྱས་ནས་ལྷའི་བུ་མོ་དེ་དུར་ཁྲོད་ཀྱི་གནས་སུ་དོང་ངོ།། ལྷའི་བུ་མོ་དེས་སྐྱེས་བུ་དེ་ལ་ཕྱག་བྱས་ནས་ཞུས་པ་དང། མཁའ་འགྲོ་མ་བདག་ལྷའི་དབང་པོ་བརྒྱ་བྱིན་གྱིས་མངགས་ནས། སྐྱེས་བུ་ཁྱེད་ལྷའི་མཆོད་གནས་སུ་སྤྱན་འདྲེན་ལགས་ཀྱིས། རི་རབ་ཀྱི་རྩེ་ལ་ལྷ་རྣམས་ཀྱི་དཔོན་པོར་གཤེགས་སུ་གསོལ་ཞེས་ཞུས་པ་དང། མཁའ་འགྲོ་མ་རྣམས་ཀྱིས་མ་གནང་སྟེ། དཔོན་སློབ་བདེ་ལྡན་དཔའ་བོའི་རྒྱལ་ཚབ་ཏུ་བཞུགས་པ་ཡིན། ང་ཡང་མཁའ་འགྲོ་མ་རྣམས་ཀྱི་དཔོན་དུ་གྱུར་པ་ཡིན། དུར་ཁྲོད་ཀྱི་ཚོགས་བདག་ཡིན་པས་རི་རབ་ཀྱི་རྩེ་ལ་གཤེགས་པ་མིན་ཞེས་ཟེར་ནས་མཁའ་འགྲོ་མ་རྣམས་ཀྱིས་མ་གནང་ངོ། ། དེར་ལྷའི་བུ་མོ་དེ་ལྷའི་དབང་པོ་བརྒྱ་བྱིན་གྱིས་མ་ཁུགས་ཀྱི་བར་དུ་མ་འོང་ཞིག་བྱས་པས་མོ་སྐྱེས་བུ་ཆེན་པོ་དེ་ཡི་རྩར་ཆགས་སོ།། དེར་མཁའ་འགྲོ་མ་རྣམས་དུར་ཁྲོད་དུ་སོང་ནས་ཟས་ཚོལ་བའི་བར་དུ། རྟག་ཏུ་བྲིད་ཅིང་མཆོད་པར་བྱས་སོ། ། སློབ་དཔོན་དེའི་ཐུགས་ལ་གཅགས་པར་གྱུར་ཏེ། ལྷའི་བུ་མོ་དེ་ཆུང་མ་བྱས་སོ།། དེ་ཡང་བུ་བུ་མོ་འདི་གཉིས་སྐྱེས་སོ།། བུ་ལ་ནི་རུས་པའི་རྒྱན་ཐོད་པའི་ཕྲེང་བ་བྱས་ཏེ་བརྒྱན་ནོ། ། མཚན་ནི་ལེགས་ལྡན་ཐོད་ཕྲེང་ཅན་དུ་གདགས་སོ།། བུ་མོ་དེ་ལ་དུར་ཁྲོད་ཀྱི་དུང་གི་ཁོག་མ་གཅིག་བཏགས་ཏེ། མིང་ནི་དཔལ་ལྡན་དུང་སྐྱོང་མར་བཏགས་སོ།། བུ་ཚ་མིང་སྲིང་གཉིས་ལ་གླིང་བར་གྱི་ཉ་ཤ་དང། སྒོག་བཙོང་དང། རྒུན་ཆང་དང། ཤ་ཁྲག་རུས་པས་རྐན་ཕབ་སྟེ་གསོས་སོ།། མོས་ཀྱང་ལྷའི་དཀའ་ཐུབ་ཉམས་ཏེ་དུར་ཁྲོད་ཀྱི་ཟས་ཅི་ཟ་བ་ཟོས་སོ།། དེར་མོས་ཡུན་རིང་པོར་ལོན་པ་དང། དེའི་དུས་ན་ལྷ་མ་ཡིན་གྱིས་ལྷའི་ཡུལ་ཕྲོགས་ནས། རིན་ཆེན་སྣ་ལྔའི་གྲོང་ཁྱེར་སུམ་བརྩེགས་སུ་ཡོད་པ་དཔངས་ཅིས་ཀྱང་གཤོག་ཐབས་མེད་པར་སྒོ་ལ་སོགས་པ་དམ་པ་དེས་ལྷའི་ཁང་བཟང་བས་དཔག་ཚད་གཅིག་གིས་མཐོ་བ་བརྩིགས་ཏེ། ལྷའི་ཡུལ་གཏན་ཤོར་ལ་ཁད་པ་ལས། ལྷའི་དབང་པོ་བརྒྱ་བྱིན་གྱིས་རི་རབ་ཀྱི་ཁ་ནས་པི་ཝང་གི་བརྡས་བསྐུལ་ཏེ། ལྷ་དང་ལྷ་མ་ཡིན་འཐབས་པའི་དམག་དཔོན་འགུགས་སུ་བཏང་ན་ཇི་སྲིད་འཁོར་རམ་ཡུལ་ནི་གཏན་ཤོར་ལ་ཁད་ན། བྱ་བས་བསྐུལ་བའི་བརྡའ་བྱུང་བས། མོས་ཐོས་ཏེ་སྐལ་ལྡན་དཔའ་བོ་ལ་བསྐུལ་བ། ཤངྐར་བདེ་བྱེད་སྟོབས་པོ་ཆེ། སྐྱེས་བུ་དཔའ་བོ་ཁྱོད་ལ་ངས། ཇི་སྲིད་དུ་ཞབས་ཏོག་བྱས་ནས་ད་ངའི་ཚིག་ཉན་དགོས་བྱས་ནས། ཤཾ་ཀར་བདེ་བྱེད་ན་རེ། ཇི་ལྟར་བྱ་ཟེར་ཏེ། ང་ལྷའི་དབང་པོས་ཁྱོད་འགུགས་སུ་བཏང་བ་ཡིན་པ་ལ་ཇི་སྲིད་དུ་མ་ཁུགས་ན། ད་ནི་ལྷའི་གནས་སུ་གཤེགས་པ་འཚལ་ཞེས་ཞུས་པ་ལ། དེར་གནང་སྟེ་མཁའ་འགྲོ་མ་རྣམས་ལ་གསང་སྟེ། ཁྱོ་ཤུག་གཉིས་གྲོས་བྱས་ཏེ་ཞག་བདུན་ན་འབྲོས་པར་བྱ་སྟེ། ལྷའི་དབང་པོ་བརྒྱ་བྱིན་ལ་པི་ཝང་གི་བརྡ་མར་བཏང་ནས། ཞག་བདུན་ན་ཤིང་རྟའི་འཁོར་ལོས་སྤྱན་དྲངས་པར་བྱས་སོ། ། དེ་ནས་ལྷའི་དབང་པོས་འཁོར་ལྷ་ཚོགས་མང་པོ་དང་བཅས་ནས་ཤིང་རྟའི་འཁོར་ལོ་མང་པོ་ཁྱེར་ཏེ་དུར་ཁྲོད་དུ་ཕྱིན་ནས།། མཁའ་འགྲོ་མ་རྣམས་དུར་ཁྲོད་དུ་ཟས་འཚོལ་དུ་སོང་བའི་ཤུལ་དུ། སྐལ་ལྡན་དཔའ་བོ་ཞེས་བྱ་བ་དེ་རི་རབ་ཀྱི་རྩེ་ལ་སྤྱན་དྲངས་སོ།། དེར་ལྷ་ཐམས་ཅད་ཀྱིས་ཆོས་བཟང་ལྷའི་མདུན་སར་ཕྱག་བྱས་སོ།། དེ་ནས་ལྷའི་དབང་པོ་བརྒྱ་བྱིན་གྱིས་རྣམ་པར་རྒྱལ་བའི་ཁང་བཟང་དུ་མཆོད་པ་བྱས་སོ། ། དེ་ནས་ལྷའི་དེད་དཔོན་ཉི་ཤུ་རྩ་བརྒྱད་ཀྱིས་ཚལ་ཆེན་པོ་བཞིར་མཆོད་པ་བྱས་སོ།། དེ་ནས་བྱང་ཤར་དུ་ཤིང་ཡོངས་འདུ་ས་བརྟོལ་གྱི་རྩར་ལྷའི་བུ་མོ་བྱེ་བ་ཁྲག་ཁྲིག་གིས་མཆོད་པ་བྱས་སོ། ། དེ་ནས་ལྷོ་ནུབ་ཏུ་རྡོ་ཨ་མོ་ལིའི་སྟེང་དུ་ལྷའི་བུ་བྱེ་བ་ཁྲག་ཁྲིག་གིས་མཆོད་པ་བྱས་སོ།། དེ་ཡང་དང་པོ་དུར་ཁྲོད་ཀྱི་གནས་ནས་ཡབ་ཡུམ་སྲས་དང་བཅས་པ་སྤྱན་དྲངས་པ་ནི། དུར་ཁྲོད་གནས་ན་ལེགས་ལྡན་ཐོད་པའི་ཕྲེང་བ་ཅན། པད་མའི་སྟེང་དུ་ཧཱུཾ་ལས་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། དར་མཐིང་ནག་གི་འཇོལ་བེར་སྐུ་ལ་གསོལ་བ། གསེར་སྐེད་རིན་ཆེན་སྐུ་ལ་བཅིངས་པ། དབུ་སྐྲ་ཁམ་ནག་རལ་པའི་ཐོར་གཙུག་གཅིག་ཏུ་འཁྱིལ་བ། ཁྲོ་གཉེར་སྨིན་མཚམས་སུ་བརྗིད་པ། སྤྱན་གསུམ་སྡང་མིག་ཏུ་གཟིགས་པ། ཞལ་བགྲད་པ། མཆེ་བ་གཙིགས་པ། སྨ་ར་མུན་ལྟར་གཏིབས་པ། ཕྱག་ན་པར་བུ་ནག་པོ་བསྣམས་པ། ཞབས་གཉིས་བརྐྱང་བསྐུམ་ཚུལ་དུ་བཞུགས་པ། འཇིགས་འཇིགས་རྔམ་རྔམ་འདྲ་བ་ལ། རང་གི་གཙོ་བོ་རྒྱན་དུ་འཛིན། ཕེང་ཕེང་གི་སྒྲ་སྒྲོགས་པ། ཨོཾ་མ་ཧཱ་ཀཱ་ལ་རཀྴ་དུ་བེཾ་ནི་ཛཿ་དེ་སྐད་ཧཱུཾ་ཕཊ་སྒྲ་སྒྲོགས་ཤིང། ། འཇིགས་བྱེད་ལྕམ་དྲང་དུང་སྐྱོང་མ།། སྐུ་མདོག་ནག་མོ་ཆར་སྤྲིན་ལ།། རེ་ལྡེག་གོས་གོན་སྟག་ཤམ་གླང་ལྤགས་གོན།། ཤན་ཏི་མཚོན་ཆ་འཛིན་པ་འཇིགས་ཚུལ་ཅན།། སྐལ་ལྡན་དཔའ་བོ་རུ་མཚོན་དཔའ་རྟགས་ལྔ་དང་ཆས། ། ཨུ་མ་དེ་བ་འཇིགས་སུ་གཟི་མདངས་བྱམས།། དེ་འདྲ་དུར་ཁྲོད་གནས་ན་བཞུགས་པ་ལས།། ལྷ་དབང་བརྒྱ་བྱིན་ལ་སོགས་ལྷ་རྣམས་མདུན་གྱིས་གསོལ་བ་ནི། ཧཱུཾ། དད་པ་དང་ནི་དམ་ཚིག་གིས། ། ཚུར་གཤེགས་ཚུར་གཤེགས་མ་ཧཱ་ཀཱ་ལ་ཆེ།། ཚུར་གཤེགས་ཚུལ་བྱོན་དཔལ་ལྡན་མགོན་པོ་ཆེ།། འདིར་གཤེགས་ལྷ་མིན་གཡུལ་རྣམས་བཟློག་ཕྱིར་བྱོན།། དབྱིངས་ནས་བཞེངས་པ་མི་མཁས་ཡང། ། སངས་རྒྱས་བསྟན་པ་བསྲུང་སླད་དུ།། འབར་བའི་སྐུར་སྟོན་འདིར་གཤེགས་མཆོད་པ་བཞེས།། འདིར་གཤེགས་བདག་གི་ལོངས་སྤྱོད་མཆོད་པར་བཞེས།། ནག་པོ་མི་བཟད་འདིར་གཤེགས་མཆོད་པ་བཞེས། ། ཕ་རོལ་ཕྱིན་སྤྱོད་འདིར་གཤེགས་མཆོད་པ་བཞེས།། འབར་བའི་སྐུར་སྟོན་འདིར་གཤེགས་མཆོད་པ་བཞེས།། ལྷ་མིན་གཡུལ་བཟློག་འདིར་གཤེགས་མཆོད་པ་བཞེས།། ལྷ་དམག་དབུགས་འབྱིན་འདིར་གཤེགས་མཆོད་པ་བཞེས། ། དད་པ་དང་ནི་དམ་ཚིག་གིས།། ཚུར་གཤེགས་མ་ཧཱ་ཀཱ་ལ་ཆེ།། གནས་རི་རབ་རྩེར་གཤེགས་བཞུགས་སུ་གསོལ།། བདག་ཅག་གསོལ་འདེབས་འདིར་གཤེགས་མཆོད་པ་བཞེས། ། ཨོཾ་ཤྲཱི་མ་ཧཱ་ཀཱ་ལ་ཛཿཧཱུཾ་བཾ་ཧོཿཧཱུཾ་ཕཊ། ཅེས་པས་ལྷ་རྣམས་ཀྱིས་གདུང་བའི་དབྱངས་བླངས་པས། རང་དབང་མེད་པར་འཁོར་བཅས་བསྐྱོད་དེ་བྱོན་ནོ།། དེ་ནས་རྣམ་པར་རྒྱལ་བའི་ཁང་བཟང་དུ་ལྷའི་དབང་པོ་བརྒྱ་བྱིན་གྱིས། གདན་རིན་པོ་ཆེ་ཉི་ཟླ་པདྨ་དང་ལྡན་པ་ཕུལ་ནས། དར་མཐིང་ནག་གི་གུར་ཕུབ་ནས། འདི་སྐད་ཅེས་གསོལ་ཏོ།། ཧཱུཾ། ཡེ་ཤེས་མཁའ་འགྲོ་སྔོན་པོའི་མདོག་ཏུ་གྱུར།། སྐུ་མདོག་སྔོ་ནག་དབྱར་གྱི་སྤྲིན་ལྟ་བུ། ། དུག་གསུམ་མ་ལུས་མུན་ཁམས་འཇོམས་མཛད་པའི།། མ་ཧཱ་ཀཱ་ལ་ཁྱེད་ཉིད་དགྱེས་ཤིང་བརྟན་པར་བཞུགས།། འདིར་གཤེགས་གདན་ལ་བཞུགས་ནས་ཀྱང།། འཇིག་རྟེན་པ་དང་མཐུན་འཇུག་ཕྱིར། ། ཕྱག་དང་ཞབས་གཉིས་བསིལ་བར་མཛོད།། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཧཱུཾ། ས་མ་ཡ་ཏིཥྛ་ལྷན། ཨཱ་པེ་ཤ་ཡ་ཨ། ཞེས་བཞུགས་སུ་གསོལ་ནས། ལྷ་རྣམས་ཀྱིས་ཕྱག་བྱས་པ། ཧཱུཾ། མཉམ་ཉིད་མཐུ་མངའ་གཏུམ་ཆེན་མེ་ལྟར་འབར། ། མ་རུངས་འཇོམ་མཛད་ལྷ་མིན་དབང་དུ་སྡུད།། མཐར་བྱེད་གཞོན་ནུ་འཇིགས་པའི་གད་རྒྱངས་ཅན།། སྐལ་ལྡན་དཔའ་བོ་ཁྱོད་ལ་ཕྱག་འཚལ་ལོ།། ལྷ་མིན་དམག་ཚོགས་གཡུལ་བཟློག་གཙོ། ། ལྷ་དམག་དཀར་པོ་དབུགས་འབྱིན་པ།། རྡོ་རྗེ་དུར་ཁྲོད་འཁོར་བཅས་ལ།། དང་བའི་སེམས་ཀྱི་ཕྱག་འཚལ་ལོ།། བསོད་ནམས་གཟི་བྱིན་ཁྱོད་ལ་ཕྱག་འཚལ་ལོ།། དྲག་ཤུལ་མཐུ་ཆེན་འཕགས་ལ་ཕྱག་འཚལ་ལོ། ། ཡེ་ཤེས་ཚོགས་རྫོགས་ཁྱེད་ལ་ཕྱག་འཚལ་ལོ།། སྒྲིབ་གཉིས་སྤངས་པ་ཁྱོད་ལ་ཕྱག་འཚལ་ལོ།། ལུང་བསྟན་ཐོབ་རྫོགས་ཁྱོད་ལ་ཕྱག་འཚལ་ལོ།། འཇིག་རྟེན་འདི་ན་གང་ཞིག་གིས།། ཁྱོད་ཀྱིས་མཚན་ནས་བརྗོད་བསྒྲུབས་ན། ། དངོས་གྲུབ་མྱུར་དུ་སྟེར་མཛད་པ།། མི་བསྙེམས་བྱམས་པ་ཁྱེད་ལ་ཕྱག་འཚལ་ལོ།། མ་ཧཱ་ཀཱ་ལ་ཁྱེད་ལ་ཕྱག་འཚལ་ལོ།། ལེགས་ལྡན་ནག་པོ་ཁྱེད་ལ་ཕྱག་འཚལ་ལོ།། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཧཱུཾ་ཕཊ། ཨ་ཏི་པུ་ཧོ། ན་མོ་ཡ། ཞེས་ལྷ་རྣམས་ཀྱིས་ཕྱག་བྱས་པའོ།། དེ་ནས་ལྷའི་དབང་པོ་དང་ལྷའི་དེད་དཔོན་ཆེན་པོ་ཉི་ཤུ་རྩ་བརྒྱད་ཀྱིས་དགའ་བའི་ཚུལ་དུ་ཕྱིའི་མཆོད་པ་ཕུལ་བ། མེ་ཏོག་ཕྲེང་བ་ལ་སོགས་རིན་ཆེན་དབྱིག། མར་མེ་མུན་སེལ་དྲི་ཞིམ་སྤོས་ཀྱི་མཆོག། བདུད་རྩི་ཡོན་ཆབ་འོ་མ་ཀུན་གྱི་གསོས།། སྒྲིབ་སེལ་བཤོས་གཙང་དམ་པ་བདུད་རྩི་སྦྱར།། དྲང་སྲོང་ཤཾ་ཀར་སྐུ་ལ་མཆོད་པ་འབུལ།། ལྷ་མོ་ཨུ་མའི་སྐུ་ལ་མཆོད་པ་འབུམ། ། ལེགས་ལྡན་ནག་པོའི་སྐུ་ལ་མཆོད་པ་འབུལ།། མ་ཧཱ་ཀཱ་ལའི་སྐུ་ལ་མཆོད་པ་འབུལ།། ལྷ་མོ་དུང་སྐྱོང་སྐུ་ལ་མཆོད་པ་འབུལ།། ཨོཾ་མ་ཧཱ་ཀཱ་ལ་རཀྴ་དུ་བེཾ་བེཾ་ནི་ཛ་པཱུ་ཛ་མེ་གྷ་ས་མུ་དྲ་སྥ་ར་ཎ། ཨ་དྷཱུ་པེ། པུཥྤེ། ཨཱ་ལོ་ཀེ། གྷནྡྷེ། ནཻ་བིདྱ། ཤཔྟ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱ་ཧཱུཾ། ཞེས་བརྗོད་པས་མཆོད་དོ།། ཉ་ཤ་ལ་སོགས་པའི་ཚུལ་དུ་དམ་རྫས་ཀྱི་མཆོད་པ་ཕུལ་བ་ནི། ལྕགས་བར་གྱི་ནང་དུ་དཀར་གསུམ་དང། མངར་གསུམ་དང། ལ་དུ་དང། ལ་ཕུག་དང། སྒོག་བཙོང་དང། རྒུན་འབྲུམ་དང། འབྲུ་ཐུག་དང། འབྲས་ཆན་དང། ཁུར་བ་དང། ཤིང་ཐོག་སྣ་ཚོགས་དང། དེ་རྣམས་ལྕགས་བར་གྱི་ནང་དུ་བསགས་ནས། དར་མཐིང་ནག་གིས་ཁ་བཅད་དེ། འདི་སྐད་ཅེས་ལྷ་རྣམས་ཀྱིས་བསྐུལ། མེ་ཏོག་ཕྲེང་བ་ལ་སོགས་རིན་ཆེན་དབྱིག། ལ་དུ་ལ་ཕུག་ལ་སོགས་ཡོད་པ་ནི།། རང་སྦྱིན་འབྲས་བུའི་ཟས་ལ་སོགས། ། ཕྱོགས་བཅུའི་ཆུ་སྐྱེས་ཐང་སྐྱེས་མེ་ཏོག་ལོངས་སྤྱོད་རྒྱན།། རིས་སུ་མ་བཅད་ལོངས་སྤྱོད་རྒྱས་པར་འབུལ།། དཀྱིལ་འཁོར་དམ་པ་མཛེས་པ་དང།། བཤོས་གཙང་མར་མེ་སྤོས་སྣ་ཚོགས།། རྒུན་ཆང་ལ་སོགས་བཏུང་བའི་མཆོག། སྦྲང་རྩི་ལ་སོགས་མངར་བའི་དབྱིག། སྣ་ཚོགས་མཆོད་པ་འདི་དག་བཞེས།། དངོས་སུ་འབྱོར་དང་ཡིད་ཀྱིས་སྤྲུལ།། གཟུགས་དང་སྒྲ་དང་དྲི་རོ་རེག། ཆོས་ལ་སོགས་པའི་མཆོད་པ་ཀུན། ། མགོན་པོ་འཁོར་བཅས་སྐུ་ལ་འབུལ།། ཞེས་པས་ཕུལ་ལོ།། རྩུབ་འགྱུར་ཚལ་དུ་ཆང་གི་མཆོད་པ་དང།། ནང་གི་མཆོད་པ་ཕུལ་བ་ནི།། གཡུ་དྲི་མྱོས་བྱེད་ཆང། སྐྱེ་འགྲོའི་འབྲུ་བཅུད། བདུད་རྩི་བཅུད་ཀྱི་ཟས། སྐྱེམས་འཕངས་ཕུད་ཀྱི་མཆོག། སྐལ་ལྡན་དཔའ་བོ་གསོལ། དྲང་སྲོང་ཤཾ་ཀར་གསོལ། ལེགས་ལྡན་ནག་པོ་གསོལ། ལྷའི་གནོད་སྦྱིན་གསོལ། སྐལ་ལྡན་རིན་ཆེན་གསོལ། དར་ནག་རལ་ག་ཅན་གསོལ། རིག་འཛིན་སྲོག་ཤིང་གསོལ། དུས་གསུམ་སྨན་པ་གསོལ། སྐྱེས་བུ་ཆེན་པོ་གསོལ། ལྷ་མོ་ནག་མོ་གསོལ། འདོད་ཁམས་དབང་སྡུད་གསོལ། ཞེས་མཆོད་པས་མཉེས་པར་གྱུར་ཏོ།། འདིའི་ཚལ་དུ་མཚོན་པས་དགེ་བའི་མཆོད་པ་ཕུལ་ལོ། ། ཡོངས་འདུས་ཀྱི་རྩར་ལྷའི་བུ་མོ་རྣམས་ཀྱིས་མཆོད་པ། ཧཱུཾ་གཤེགས་ཤིག་གཤེགས་ཤིག་གནས་འདིར་གཤེགས།། བུ་ཡི་གནས་མཆོག་དམ་པ་ན།། ཁྱོད་ཀྱི་མཐུན་པའི་དམ་རྫས་ནི།། འབྱོར་པར་ཚོགས་སོ་ཐུགས་དམ་ཅན། ། རྒྱུ་ཤུག་ལ་སོགས་སྤོས་ལྔ་ཐུ་ལུ་ལུ།། ག་པུར་ལ་སོགས་སྨན་ལྔ་སི་ལི་ལི།། འབྲུ་བཅུད་ཆང་གི་ཕུད་ནི་བྲེངས་སེ་བྲེང།། རཀྟ་དམར་གྱི་ཨརྒྷ་ཀྱི་ལི་ལི།། བྷནྡྷ་རུས་པའི་ཚོགས་ནི་ཁྲ་ལ་ལ། ། བདུད་རྩི་རྣམ་ལྔའི་ཚོགས་ནི་ཆི་ལི་ལི།། ཤ་ཆེན་མཱཾ་སའི་ཚོགས་ནི་ཚངས་སེ་ཚང།། མཐུན་པའི་དམ་རྫས་ཚོགས་སོ་གནས་འདིར་བྱོན།། དམ་རྫས་གཏོར་མ་འདི་ལོང་ལ།། ལྷ་མིན་དམག་སྣ་བཟློག་ཏུ་གསོལ། ། བདག་ཅག་རྣམས་ལ་སྐྱབས་ཆེན་མཛོད།། ཨོཾ་མ་ཧཱ་ཀཱ་ལ་རཀྴ་དུ་བོ་ནི་ཛ། མ་ཧཱ་ཀཱ་ལ་རཱུ་པ་མ་ཧཱ་མཱར་ས་ཁཱ་ཧི་ཧོ།། མཱ་ཧཱ་རཀྟ། མ་ཧཱ་ཙིཏྟ། མཱ་ཧཱ་དུ་ཏྲི་ཁཱ་ཧི། ཞེས་མཆོད་དོ།། དེ་ནས་ཨ་མོ་ལི་ཀའི་རྡོ་སྟེང་དུ་ལྷའི་བུ་རྣམས་ཀྱིས་མཆོད་པ་དམ་རྫས་བདུད་རྩི་གཏོར་མ་དམ་རྫས་ཚང་བ་ལ། འདོད་པའི་ཡོན་ཏན་ལྔ་ཡིས་རབ་བརྒྱན་ཅིང།། ཡེ་ཤེས་ལྔ་ཡི་འོད་ཟེར་རྣམ་པར་འཕྲོ།། དབང་པོ་དྲུག་གི་སྤྱོད་ཡུལ་འགྱེད། ། དྲི་ཆེན་དྲི་ཆུའི་ཚོགས་ནི་རྦ་རླབས་འཁྲུགས།། རཀྟ་དམར་གྱི་རང་བཞིན་རྒྱ་མཚོར་འཁྱིལ།། མ་ཧཱ་ཤ་ཡི་རང་བཞིན་སྤྲིན་ལྟར་སྤུངས།། ཀེ་རུས་རུས་པའི་རང་བཞིན་རི་ལྟར་སྤུངས།། དཔལ་ལྡན་ལེགས་ལྡན་ཡབ་སྲས་ཡུམ་དང་བཅས། ། གཙོ་དང་འཁོར་དང་བཅས་པའི་ཐུགས་དམ་བསྐང།། ཞེས་ལྷའི་བུ་རྣམས་ཀྱིས་མཆོད་དོ།། དེ་ནས་ཆོས་བཟང་ལྷའི་མདུན་སར་ལྷ་རྣམས་ཀྱིས་དམག་དཔོན་དུ་མངའ་གསོལ་ཏེ། ལེགས་ལྡན་ནག་པོ་ལྷའི་བུ་རྣམས་ཀྱིས་དམག་དཔོན་དུ་མངའ་གསོལ་བའི་ཕྱིར། དར་ནག་གི་འཇོལ་བེར་ཆེན་པོ་བཀོན། ཨ་ཀ་རུ་ནག་པོའི་དུད་པས་བདུག། ཕྱག་མང་པོར་སྦྲུལ་གྱིས་གདུབ་བུར་བྱས། ཙནྡན་གྱི་བིང་ཆེན་ཕྱག་ཏུ་བསྐུར། མཚོན་ཆ་དང་རུ་མཚོན་མང་པོ་ཐོགས་ཏེ། ལྷ་རྣམས་ཀྱི་དམག་དཔོན་བྱས་སོ།། བུ་མོས་ནི་ལྷའི་བུ་མོ་རྣམས་ཀྱི་དམག་དཔོན་བྱས་སོ།། མ་མོས་ནི་ལྷ་མོ་རྣམས་ཀྱི་དམག་དཔོན་བྱས་སོ།། སྐར་མ་རྒྱལ་གྱི་ཉིན་པར་རྩུབ་འགྱུར་ཚལ་དུ་འདུས་ནས། ལྷ་རྣམས་ཀྱི་དམག་དཔོན་སྐལ་ལྡན་དཔའ་བོ་རྫུ་འཕྲུལ་གྲུབ་པའི་སྲས། མགོན་པོ་ལེགས་ལྡན་ནག་པོ་ཐོད་ཕྲེང་ཅན་ལ་དམག་དཔོན་དུ་མངའ་གསོལ་བ།། ཧཱུཾ། དུས་གསུམ་བདེར་གཤེགས་ཐམས་ཅད་ཀྱིས།། མ་ཧཱ་ཀཱ་ལར་མངའ་གསོལ་བས།། དཔྲལ་བའི་ཁྲོ་གཉེར་གསུམ་དང་ལྡན།། དཀོན་མཆོག་གསུམ་གྱི་མངའ་གསོལ་བས།། ཁྲིམས་ཀྱི་ཆ་ལུགས་གསུམ་དང་ལྡན། ། རིགས་གསུམ་མགོན་པོས་མངའ་གསོལ་བས།། ཞལ་གྱི་ཆ་ལུགས་གསུམ་དང་ལྡན།། རིགས་གསུམ་ཁྲོ་བོས་མངའ་གསོལ་བས།། ཞལ་གྱི་ཁྲོ་གཉེར་གསུམ་དང་ལྡན།། ལྷ་སྲིན་རྣམས་ཀྱིས་མངའ་གསོལ་བས། ། དབུ་སྐྲ་ཁམ་ནག་རལ་པ་ཅན།། རྒྱུ་སྐར་རྣམས་ཀྱིས་མངའ་གསོལ་བས།། སྐུ་སྨད་མེ་ལྕེའི་ལྕགས་ཀྱུས་རྒྱན།། སྲིད་པ་གསུམ་ལ་དབང་བསྒྱུར་བས།། སྐུ་ཡི་ལྟེ་བ་ཟུར་གསུམ་ཟབ།། ཀླུ་ཆེན་བརྒྱད་ཀྱིས་མངའ་གསོལ་བས། ། ཡན་ལག་སྦྲུལ་གྱི་ཆུན་པོས་བརྒྱན།། ས་བདག་རྣམས་ཀྱིས་མངའ་གསོལ་བས།། ན་བཟའ་ཟབ་བེར་མཐིང་ནག་གསོལ།། འཆི་བདག་བདུད་ཀྱིས་མངའ་གསོལ་བས།། ཕྱག་ན་ཙན་དན་བིང་ཆེན་བསྣམས། ། ལྷ་རྣམས་ཀུན་གྱི་མངའ་གསོལ་བས།། བསོ་སྒྲ་ཆེན་པོ་གསུམ་དང་ལྡན།། ལྷ་མིན་གཡུལ་ལས་རྒྱལ་མཛད་ཕྱིར།། ཆ་སྒྲ་ཆེན་པོ་གསུམ་དང་ལྡན།། བྱོལ་སོང་ཀུན་གྱི་མངའ་གསོལ་བས།། མུན་པའི་གཡུ་རུང་སྐུ་ལ་གསོལ། ། ཡི་དྭགས་རྣམས་ཀྱིས་མངའ་གསོལ་བས།། རིན་ཆེན་འབར་བའི་དོ་ཤལ་ཅན།། དམྱལ་བ་རྣམས་ཀྱིས་མངའ་གསོལ་བས།། སྤྱན་ནས་བསྐལ་པའི་མེ་ཆེན་འབར།། ཤངས་ནས་བསྐལ་བའི་རླུང་ནག་འཚུབས། ། ཞལ་ནས་བསྐལ་པའི་ཆུ་ཆེན་འཁྲུགས།། ལྷ་ཡི་དམག་དཔོན་མངའ་གསོལ་ལོ།། ཆོས་སྐྱོང་ཆེན་པོར་མངའ་གསོལ་ལོ།། མགོན་པོ་ཆེན་པོར་མངའ་གསོལ་ལོ།། དཀར་པོའི་དབུགས་འབྱིན་མངའ་གསོལ་ལོ། ། ཞེས་མངའ་གསོལ་ལོ།། དེར་རྒྱལ་བའི་བཀའ་བདེན་པར་བརྗོད་དོ།། དཀོན་མཆོག་གསུམ་ལ་མཉེས་པའི་དཔང་གཟུག་སྟེ།། འདི་སྐད་བརྗོད་དོ།། ཧཱུཾ། མ་ཉེས་མ་མོ་གཟུ་དང་དཔང། ། དཀོན་མཆོག་གསུམ་པོ་གཟུ་དང་དཔང།། དུས་གསུམ་སངས་རྒྱས་གཟུ་དང་དཔང།། དམ་ཆོས་བདུད་རྩི་གཟུ་དང་དཔང།། ཕྱོགས་བཅུའི་དགེ་འདུན་གཟུ་དང་དཔང།། དཀྱིལ་འཁོར་ལྷ་ཚོགས་གཟུ་དང་དཔང། ། ཆོས་སྐྱོང་ལྕམ་དྲལ་གཟུ་དང་དཔང།། ཕྱོགས་སྐྱོང་བཅུ་པོ་གཟུ་དང་དཔང།། ལྷ་སྲིན་སྡེ་བརྒྱད་གཟུ་དང་དཔང།། ཀླུ་ཆེན་བརྒྱད་པོ་གཟུ་དང་དཔང།། རིགས་གཞིའི་ཀླུ་རྒྱལ་གཟུ་དཔང།། ཀླུ་བྲན་འབུམ་སྡེ་གཟུ་དང་དཔང། ། གཉན་ཆེན་འཁོར་བཅས་གཟུ་དང་དཔང།། རིགས་བཞིའི་ས་བདག་གཟུ་དང་དཔང།། སྣང་སྲིད་ལྷ་འདྲེ་གཟུ་དང་དཔང།། བགེགས་རིགས་སྟོང་ཕྲག་བརྒྱད་ཅུ་གཟུ་དང་དཔང།། རྒྱལ་པོ་བཙན་དང་བདུད་དུ་བཅས། ། གཟུ་དང་དཔང་པོར་ཁྱོད་རྣམས་བཞུགས།། ངེད་ཀྱིས་མ་ལན་ཁོང་གིས་ལན།། ངེད་ཀྱིས་མ་ཉེས་ཁོང་གིས་ཉེས།། ལེགས་ཉེས་གཉིས་ཀྱིས་སྟངས་ཆོད་ལ།། ཡོ་གལ་གཉིས་ཀྱི་ཐིག་ཐོབ་ཅིག། ལྷ་མིན་འདི་ལ་ལས་མཛོད་ཅིག། ཅེས་ལྷ་རྣམས་ཀྱིས་བྲོ་བརྡུངས། མཆི་མ་བཏོན་འོ་དོད་བོས་སོ།། ཞེས་པ་མེ་ལྕེ་ཕྲེང་བའི་རྒྱུད་ལས། ལྷ་མིན་འདུས་པའི་མདུན་དུ་ལྷ་རྣམས་ཀྱིས་ལེགས་ལྡན་ནག་པོ་སྤྱན་དྲངས་མཉེས་པར་བྱས་ནས། དམག་དཔོན་དུ་མངའ་གསོལ་བའི་ལེའུ་སྟེ་གསུམ་པའོ།།།། དེ་ནས་ཨོཾ་མ་ཧཱ་ཀཱ་ལ་རཀྴ་དུ་བིཾ་ནི་ཛ། ཨོཾ་ཤྲཱི་མ་ཧཱ་ཀཱ་རཱུ་པ་ཧཱུཾ་ཕཊ། ཅེས་ལྷ་རྣམས་ཀྱིས་གནད་ནས་བསྐུལ་བས། ལེགས་ལྡན་ནག་པོ་ཐོད་ཕྲེང་ཅན་ནི་བྱང་ཕྱོགས་ཀྱི་གནོད་སྦྱིན་ཆེན་པོ་བརྒྱད་ནི་ལྕགས་ཀྱི་བྱ་ཁྲ་བརྒྱད་དུ་སྤྲུལ་ནས་སྔོན་དུ་འགྲོ་ཞིང།། དམ་ཚིག་ཉམས་པའི་ཀླད་པ་རྟོལ་ཅིང་ལྷ་མིན་རྣམས་ཀྱི་གཉེན་པོ་མཛད་པ། ལྷོ་ཕྱོགས་གཤིན་རྗེའི་གཤེད་པོ་བརྒྱད་ནི། སྟག་གཟིག་དོམ་དྲེད་སྤྱང་ཀི་བརྒྱད་དུ་སྤྲུལ་ནས་ཕྱིར་འབྲང་ཞིང་ལྷ་མིན་བརླག་པར་མཛད་དོ།། དེ་ལྟ་བུའི་དཔའ་བོ་དེ་ལྷ་རྣམས་ཀྱིས་བསྐུལ་བ། དང་པོ་ལྷའི་དབང་པོ་བརྒྱ་བྱིན་གྱིས་བསྐུལ་བ་ནི། ཧཱུཾ། བཅོམ་ལྡན་ཕྱག་ན་རྡོ་རྗེས་ནི།། ཁྱོད་ཀྱི་གསང་བའི་མཚན་བཏགས་པ།། རྡོ་རྗེ་རོ་ལངས་དུར་ཁྲོད་བདག། དུར་ཁྲོད་གནས་པར་རབ་ཏུ་མོས།། གསང་བའི་མཚན་ནས་འབོད་དོ་ལྷ་མིན་གཡུལ་རྣམས་བཟློག། འཇམ་དཔལ་དབྱངས་ཀྱིས་མཚན་བཏགས་པ།། ནག་པོ་མནའ་ཟན་རྣམས་ཀྱྀ་གཤེད།། ཤ་ཁྲག་ཟ་ལ་རབ་ཏུ་མོས།། གསང་བའི་མཚན་ནས་འབོད་དོ་ལྷ་མིན་གཡུལ་རྣམས་བཟློག། བཅོལ་ལོ་བཅོལ་ལོ་ལས་བཅོལ་ལོ།། རྡོ་རྗེ་སེམས་དཔས་མཚན་བཏགས་པ།། མཐུ་ཆེན་ལོག་གནོན་རྣམས་ཀྱི་གཤེད།། ལོག་པའི་གང་ཟག་འདུལ་ལ་བརྩོན།། གསང་བའི་མཚན་ནས་འབོད་དོ་ལྷ་མིན་གཡུལ་རྣམས་བཟློག། བཅོལ་ལོ་བཅོལ་བའི་ལས་རྣམས་བཅོལ།། དགེ་བསྙེན་སྲུང་མ་ལས་མཛོད་ཅིག། ལྷ་རྣམས་གནོད་པ་བཟློག་པའི་ལས་མཛོད་ཅིག། ལྷ་དམག་མ་ཧཱ་ཀཱ་ལའི་ཚོགས་ནི་སྤྲིན་ལྟར་གཏིབས་ལ་གཤེགས། ། ལས་ནི་ལྷ་མིན་གནོན་པའི་དུས་ལ་བབ།། སྡིག་ཅན་ལྷ་མིན་སྒྲོལ་བའི་དུས་ལ་བབ།། དཀོན་མཆོག་དབུ་འཕང་སྨོད་པ་འདི།། སངས་རྒྱས་བསྟན་པ་ལྷ་མིན་ཁོང་གི་བཤིགས། ། དགེ་འདུན་འདུ་བའི་སྒོ་ཡང་ཁོང་གི་ཕྲོག། དབང་པོའི་སྐུ་ལ་བསྡོ་བ་འདི།། སྡིག་ཅན་འདིའི་སུ་ཅི་མ་བྱས།། ལས་ངན་སྡིག་ཅན་འདིས་སུ་ཅི་མ་བྱས།། ལས་ངན་སྡིག་ཅན་འཁོར་བའི་སེམས་ཅན་འདི། ། ལྷ་མིན་དམག་དཔུང་བསྒྲལ་བའི་ཞིང་བཅུ་ཡིན་པས་ན།། ཤཱཀྱ་ཐུབ་པའི་བསྟན་པ་ལ།། ལས་ངན་བསྒྲལ་བར་དམ་བཅས་པའི།། སྡིག་ཅན་བསྒྲལ་བར་དམ་བཅས་པ།། ནག་པོ་ཆེན་པོ་མཐུ་བོ་ཆེ།། སྐོམ་དུ་མི་ཁྲག་མངར་མོ་འཐུང། ། ཟས་སུ་མི་ཤ་བཤུལ་མོ་ཟ།། གོས་སུ་མི་ལྤགས་རློན་པ་གོན།། འཁོར་དུ་དུར་ཁྲོད་མ་མོས་བསྐོར།། ལས་ངན་ལྷ་མིན་ད་སྒྲོལ་ཅིག། རྣམ་ཤེས་གཞན་དུ་སྒྱུར་ལ་ཐོང།། སྲོག་དམར་ཧུབ་ཀྱིས་ཐོབ་ལ་ཐོང། ། ལྕགས་ཀྱི་བྱ་ཁྲ་ཆེན་པོར་སྐུ་སྤྲུལ་ལ།། སྡིག་ཅན་འདི་ཡི་ཀླད་པའི་སྤྱི་རྟོལ་ལ།། ཀླད་ཁྲག་དྲོན་མོ་གཞིབ་པའི་དུས་ལ་བབ།། ལྕགས་ཀྱི་ཤ་སྤྱང་ཆེན་པོར་སྐུ་སྤྲུལ་ལ།། ལས་ངན་ལྷ་མིན་སྲོག་པའི་རྩར་ཞུགས་ལ། ། སྲོག་རྩ་དྲོད་མོ་གཞིབ་པའི་དུས་ལ་བབ།། ནག་པོ་ཆེན་པོར་སྐུ་སྤྲུལ་ནས།། སྡིག་ཅན་གསོད་པའི་དུས་ལ་བབ།། ཚེ་མཆོག་གསོལ་བའི་རུས་ལ་བབ།། དཀོན་མཆོག་གསུམ་ལ་སྐྱབས་འགྲོ་བས། ། གཏོར་མ་ཕུལ་ནས་འདི་ཞུས་པས།། སེམས་ཅན་རྣམས་ལ་གནོད་བྱེད་པ།། མགོན་པོ་ནག་པོ་ཁྱོད་ཀྱིས་གསོལ།། ལྷ་མིན་ཤ་ནི་གཅོད་པར་གྱིས།། ཁྲག་ནི་བཅུས་ཏེ་བཏུང་བར་གྱིས།། ཡང་ན་དེ་ཡི་ཕྱི་ནང་གི། ཏིལ་ཙམ་དག་ཏུ་ཤ་ཆོད་ཅིག། དཀར་པོའི་སྲུང་མ་ལས་མཛོད་ཅིག། བཟློག་ཅིག་ལྷ་མིན་གཡུལ་བཟློག་ཅིག། ལྷ་མིན་གདུག་པ་གསད་པའི་ལས་མཛོད་ཅིག། ད་ནས་བཟུང་ནས་སྐྱེས་བུ་ཡིས།། ལྷ་རྣམས་སྲུངས་ཤིང་བསྐྱབ་ཏུ་གསོལ། ། ལྷ་རྒྱལ་གདན་ནས་བསྐྱོད་ད་རེ།། ལྷ་བྲན་མཐའ་ནས་བྲགས་པ་རེ།། ཕོ་བྲང་ངོ་མངས་འགྱུར་ར་རེ།། བསྒྲུབ་ལ་བར་ཆད་ཤོ་ར་རེ།། ལོག་འདྲེན་ལྷ་མིན་དབང་དུ་སོང་ར་རེ།། ལེགས་ལྡན་ནག་པོ་མཐུ་བོ་ཆེ། ། མགོན་པོ་ནག་པོ་ཐུགས་དམ་ཅན།། ལྔ་བརྒྱ་དུས་ཀྱི་ཐ་མ་ལ།། ཤཱཀྱ་ཐུབ་པའི་བསྟན་པ་ལ།། བསྟན་པ་བསྲུང་བར་ཞལ་བཞེས་པ།། དགེ་ལ་སྦྱོར་བའི་གྲོགས་བྱ་ཞེས།། ཉིད་ཀྱིས་ཁས་བླངས་དམ་བཅས་པ། ། བདག་ཅག་ལྷ་ཡི་རིགས་རྣམས་ལ།། མཐུ་དཔུང་འབྱིན་པའི་དུས་ལ་བབ།། ཧཱུཾ། བདེ་ཆེན་འདུ་འབྲལ་མེད་པའི་ཀློང་དཀྱིལ་ནས།། ཡང་དག་སྐུ་གཅིག་བྱུང་བ་ནི།། མཐིང་ནག་མི་སྲུན་འཇིགས་པའི་སྐུ། ། ཉིད་ཀྱི་སྐུ་མདོག་འཇིག་ཤིང་མཐིང་ནག་ཆེན་པོ་ལས།། དབུ་སྐྲ་ཁམ་ནག་ཐོར་ཚུགས་གཅིག་ཏུ་འཁྱིལ།། སྨིན་མ་ནག་པོ་ཁྲོ་གཉེར་བརྗིད་པའི་ཞལ།། སྤྱན་བཟློག་ཞལ་གདངས་མཆེ་བ་རྣོ་གཙིགས་ནས། ། དམ་ཉམས་དགྲ་བགེགས་རྣམས་ཀྱི་སྙིང་རྩ་གཅོད།། ཤངས་ནས་མེ་དང་དུག་གི་ཚུབས་མ་གཏོང།། ཕྱག་གཉིས་ཐབས་དང་ཤེས་རབ་ཟུང་དུ་འབྲེལ།། གཡས་ཀྱི་ཕྱག་ན་ཙནྡན་བིང་ཆེན་བསྣམས། ། གསོར་ཞིང་གསོར་ཞིང་ཀླད་པའི་རྒྱས་སུ་རྒྱོབ།། ཙནྡན་བིང་གི་སྟོད་ཤེད་ནས།། སྤྲུལ་པའིཕོ་ཉ་འབུམ་བཀྱེ་བས།། སྟེང་གི་ལྷ་བདུད་དབང་དུ་སྡུད།། ཙན་དན་བིང་གི་ཞབས་ཤེད་ནས།། སྤྲུལ་པའི་ཕོ་ཉ་འབུམ་བཀྱེ་བས། ། འོག་གི་སྲིན་ཚན་དྲུང་ནས་འབྱིན།། ཙན་དན་བིང་གི་བར་ཤེད་ནས།། སྤྲུལ་པའི་ཕོ་ཉ་འབུམ་བཀྱེ་བས།། བར་གྱི་གྲ་བགེགས་རྡུལ་དུ་རློགས།། སྡིག་ཅན་ལྷ་མིན་རྡུལ་དུ་རློགས།། གཡོན་ནི་ལྕགས་པར་སྐུ་ལ་བརྟེན། ། དར་སེར་སྔོ་བཀྲ་སྐུ་ལ་གསོལ།། གསེར་ཀ་རིན་ཆེན་སྐུ་ལ་བཅིངས།། སྤྱན་གསུམ་སྡང་མིག་གྱེན་དུ་བགྲད་པ་ཡིས།། སྟེང་གི་ལྷ་ཡང་འདར་ཤ་ཤ། སྤྱན་གསུམ་སྡང་མིག་ཐུར་དུ་བགྲད་པ་ཡིས། ། འོག་གི་ཀླུ་ཡང་ཟིལ་གྱིས་གནོན།། སྤྱན་གསུམ་ཕྲེད་ལ་ཕར་བགྲད་པས།། ཕྱོགས་བཞི་མཚམས་བརྒྱད་ཀུན་ནས་ནི།། གནས་པ་ཐམས་ཅད་ཕོ་ཉ་འགྱེད།། ཞབས་གཉིས་བརྐྱང་བསྐུམ་ཚུལ་གྱིས་འབྱུང་པོ་གནོན། ། ཀྱེ། མགོན་པོ་ནག་པོའི་བསྟན་པ་ལ།། འཁྲུགས་པ་ཅན་ལ་འདི་ཡིན་པས།། གལ་ཏེ་རིངས་པར་དྲང་བས་ན།། གདུག་པའི་དགྲ་བོ་འདི་ཉིད་ནི།། ཟུང་ཟུང་སོད་སོད་ཁྱེར་ཁྱེར་ཆིངས།། སྲེགས་སྲེགས་གཏོར་གཏོར་སྒྲོལ་སྒྲོལ་ཆིངས། ། སྐད་ཅིག་གཅིག་གིས་མེད་པར་གྱིས།། ལྷ་མིན་དམག་གི་དཔུང་ཤིག་ཅིག། ཨོཾ་མ་ཧཱ་ཀཱ་ལ་རཀྴ་ས་དུ་བེང་ནརྀ་ཛ། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཧཱུཾ་ཕཊ། བྷྱོ་བྷྱོ་བྷྱོ། ཞེས་མངགས་ཏེ་རྦད་པས། ། ལྷ་མིན་དང་འདྲེས་པའི་ཚལ་དུ་འཐབས་པས། ལྷ་མ་ཡིན་རྣམས་ཀྱི་གཡུལ་བཟློག་ནས། གྲོང་ཁྱེར་སུམ་བརྩེགས་ཀྱི་ནང་གི་རྩེར་བྲོས་སོ།། དེར་གྲོང་ཁྱེར་སུམ་བརྩེགས་དེ་ནི་ཤིན་ཏུ་བརྟན་ལ་ཁྱབ་འཇུག་ཁོའི་མཐུ་བརྟན་པས་ཐབས་མ་རྙེད་དེ། ཡབ་སྐལ་ལྡན་དཔའ་བོ་ཞེས་བྱ་བ་དང། ཤཾ་ཀ་ར་བདེ་བྱེད་ཅེས་བྱ་བ་དེ་ལ། ཅི་ཙུག་བྱས་ན་ཤིག་དྲིས་པས། ཡབ་ན་རེ། ཕྱིའི་རྒྱ་མཚོ་ནས་ཕར་འདས་པའི་ལྕགས་རི་ལ་རྡོ་རྗེ་ཕ་ལམ་ཡོད། དེ་དང་རྒྱ་མཚོའི་ལྦུ་བ་དང་རྡོ་སོལ་ཚོས་བརྒྱབ་ན་ཤིག་སྟེ་འོང་ཟེར་ནས། དེར་ལེགས་ལྡན་གྱིས་ད་སྟེ་ཞག་བདུན་ན་ངས་ཁྱོད་ཀྱི་གྲོང་ཁྱེར་སུམ་བརྩེགས་འཇིག་གོ་ཁྱོད་རང་ཟོན་གྱིས་ཤིག་ཅེས་ཁྱབ་འཇུག་ལ་འཕྲིན་བསྐུར། ། དེར་ལྷ་མིན་རྣམས་ནི་སྡུག[¿¿¿]་བསྔལ་དཔག་ཏུ་མེད་པས་འཇིགས་ནས་ཡོད་ཙ་ན། ལེགས་ལྡན་གྱིས་རྫས་དེ་རྣམས་རྫུ་འཕྲུལ་གྱིས་བླངས་ནས།། ཁ་ཊྭཱཾ་གའི་རྩེ་མོ་ལ་ཕྱར་ནས་ཁང་པ་ལ་བརྒྱབ་པས་རིལ་ལེ་མ་ཞིག་པས། ཁ་ཊྭཱཾ་ག་བརྒྱབ་པས་ཐམས་ཅད་རྡོལ་ཞིང་སོང་ངོ།། དེར་ཡང་དེ་ནི་དེ་འདྲ་བ་མིན་པའི་རིལ་ལེ་འཇིག་པའི་མཚོན་ཡོད་དེ། ད་དུང་ངས་བཟའ་ལྟས་པ་ཙམ་ཡིན་བྱས་ནས། ད་ནི་ཞག་བདུན་ན་འཇིག་གོ་བྱས་པས། དེར་ཞག་བདུན་གྱི་ནང་པར་ཁྱབ་འཇུག་ན་རེ་ཁོའི་མཚོན་ཆ་དེ་ཡ་ཆ་བ་གཅིག་འདུག་པས། ཁོ་ཡིན་ཡང་དོ་ཤི། ད་དེ་བས་ཀྱང་དྲག་པ་ཡོད་ཟེར་བས་མ་བྱུང་བ་ལ་ངས་སྔུན་བསུ་ལ་ཁོ་དང་འཐབས་ཀྱིས། འོན་ཏང་ཁོས་ང་ནི་མི་ཐུབ། ང་ལ་རལ་གྲི་བས་མ་ཆོད་ཡོད། འཁོར་ལོ་ཕོག་འཆི་ཡོད། དུང་སྲིད་པ་གསུམ་དུ་ཐོས་པ་ཡོད།། མདའ་གོ་ཆ་ཅིས་ཀྱང་མི་ཐུབ་པ་རི་བོ་མཆོག་རབ་ཀྱང་ཕིགས་པ་ཡོད། མདུང་ཤུགས་དང་ལྡན་པ་ཡོད་དེ། ལག་ཆ་འདི་ཙམ་པ་ཁོ་ལ་མེད་པས་ཕམ་མི་སྲིད་ཅིང། བརྒྱ་ལ་འཕམ་ན་དུང་ལེན་གསུམ་འབུད་ཀྱིས་དེ་ཙམ་ན་གྲོང་ཁྱེར་སུམ་བརྩེགས་འུ་ཅག་གིས་ཤིག་ཅིག། ཁོང་གིས་བཤིག་ན་དེ་རང་སྙིང་མི་དགའ་འོ་ཟེར་ནས། དཔའ་རྟགས་ལྔ་དང་གཡས་སུ་འཁོར་ལོ་ཁྱེར། གཡོན་དུ་དུང་ཐོག་ཕྱིན་ཙམ་ན། ཁྱབ་འཇུག་གིས་ཕྱིན་པའི་ལམ་དུ་ལེགས་ལྡན་གྱིས།། བྲག་ཤིན་ཏུ་སྲ་བ་རྒྱ་ཆེ་བ་འཕང་མཐོ་བ་སུལ་དང་སེར་ག་མེད་པ་སྐོར་ཐེབས་མེད་པ་གཅིག་གི་རྩར། ཆུ་ཤིན་ཏུ་ཆེ་བ་རབ་མེད་པ་རྦ་དོག་པ་སྐོར་ས་མེད་པ་སྟེ་རྒྱུན་རིང་བ་གཅིག་གི་བར་དུ་ལམ་ཕྲ་མོ་བྲེད་དེ་གཅིག་ལས་མེད་པ་ཞིག་ཏུ་སྤྲུལ་ནས། དེའི་བར་དུ་རྒན་མོ་རྣ་བས་མི་ཐོས་མིག་གིས་མི་གསལ་བ་གཅིག་ཏུ་སྤྲུལ་ནས་བསྡད་ཙམ་ན། ཁྱབ་འཇུག་བྱུང་ནས་རྒན་མོ་ཕར་ཟུར་ཟེར་བ་ལ། རྒན་མོས་ཁྱོད་སུ་ཡིན་བྱས་པས། ང་ཁྱབ་འཇུག་ཡིན་འཇིག་རྟེན་གྱི་ཁམས་ན་ང་མ་ཐོས་པ་ཡང་ཡོད་དམ་ཟེར། ཁྱབ་འཇུག་ཡིན་ན་ཁོ་ལ་དཔའ་རྟགས་ཀྱི་ཕྱག་རྒྱ་རྣམ་པ་ལྔ་ཡོད་དེ། ང་ལ་ཆ་ཡོད་པ་ཡིན་ཏེ། ཁྱོད་ལ་ཅང་ཡོད་དམ་ཁྱོད་ཁྱབ་འཇུག་ཅང་ཡིན་ནམ་བྱས་པས། ཁྱབ་འཇུག་ན་རེ། དཔའ་རྟགས་ཀྱི་ཕྱག་རྒྱ་ལྔ་ང་ལ་ཡོད་ཟེར། ཡོད་ན་དུང་བུས་དང་བྱས་པས། ཁྱབ་འཇུག་གིས་དུང་བུས་པས། རྒན་མོས་ངས་མ་ཐོས་བྱས་པས། དེར་ཁྱབ་འཇུག་ཁོ་ཁྲོས་ནས་དྲག་པོ་གཅིག་པུས་པས། ལེགས་ལྡན་རྒན་མོར་སྤྲུལ་པ་ན་རེ། ཁྱོད་ལ་འདུག་སྟེ་འདུག་སྟེ་ཁྱབ་འཇུག་གི་དུང་མིན་ནམ། ཁྱབ་འཇུག་གི་དུང་ཡིན་ན་ཁོའི་དུང་ཤིན་ཏུ་སྐད་ཆེ་བ་ཡིན། འཇིག་རྟེན་སྲིད་པ་གསུམ་དུ་ཐོས་པ་ཡིན་བྱས་པས། ཁྱབ་འཇུག་ཁོ་ཆུས་མཆུ་སྡོག་གྱིན་ཡིན་ནམ། སྡོག་སྐྱེས་དད་པ་ལོག་ནས་རྣ་ལ་གཏད་ནས་དྲག་པོ་གཅིག་བུས་པས། དེར་དུང་སྐད་ལན་གསུམ་སོང་ནས། དེར་ཁོས་ཕྱིན་ཙ་ན་ལེགས་ལྡན་ཡབ་སྲས་མི་འདུག་ནས་ལོག་ཕྱིན་ཙམ་ན། ལྷ་མིན་གཞན་ཆོས་དུང་ལན་གསུམ་བྱུང་བས་འཕམ་སྙམ་ནས། གྲོང་ཁྱེར་སུམ་བརྩེགས་བཤིག་ནས་དུད་པ་ལོང་དེ་བྱས་འདུག། ཐལ་བ་ཕུང་ངེ་ལ་སོང་བཤིག་ནས་འདུག་སྟེ། དེར་ལྷ་མིན་རྣམས་ལ་བརྟེན་ས་མེད་ནས་བྲོས་ཏེ། རི་རབ་ཀྱི་ཁོང་གསེང་ལ་ཐོན་ནས་རྒྱ་མཚོའི་ནང་དུ་ཀླུ་ལ་སྐྱབས་ཚོལ་ཏེ། དེར་ལྷ་མིན་ཕུང་ཞིང་བརླག་པར་མཛད་དོ།། དེར་ལྷ་ཐམས་ཅད་དགའ་སྟེ། རྣམ་པར་རྒྱལ་བའི་ཁང་བཟང་དུ་ཚོགས་ནས།། སྐྱེས་བུ་ཆེན་པོ་སྐལ་ལྡན་དཔའ་བོ་ཞེས་ཀྱང་བྱ། ཤཾ་ཀ་ར་བདེ་བྱེད་ཅེས་བྱ་བ་དེ་དང། མགོན་པོ་ནག་པོ་མ་ཧཱ་ཀཱ་ལཱ་ཞེས་ཀྱང་བྱ། ལེགས་ལྡན་ནག་པོ་ཐོད་ཕྲེང་ཅན་ཞེས་བྱ་བ་དེ་ཡབ་སྲས་འཁོར་བཅས་ལ། ལྷ་རྣམས་ཀྱི་ལྷ་མ་ཡིན་གྱི་གཡུལ་བཟློག་པའི་གཏང་རག་ནི་མཆོད་པ་ཆེན་པོ་བྱས་ཏེ། སྲས་ལེགས་ལྡན་ལ་ཡབ་སྐལ་ལྡན་དཔའ་བོ་མགུ་སྟེ་བསྟོད་པ། གྲོང་ཁྱེར་སུམ་བརྩེགས་ཐབས་ཀྱི་འཇོམ་པ་ཡི།། མགོན་པོ་ཁྱོད་ལ་བདག་བསྟོད་དོ།། ལྷ་མིན་གཡུལ་ཚོགས་འཕམ་པར་བྱེད། ལྷ་དམག་དཀར་པོ་དབུགས་འབྱིན་པ།། རྫུ་འཕྲུལ་སྣ་ཚོགས་བསམ་མི་ཁྱབ།། མགོན་པོ་ཁྱོད་ལ་བདག་བསྟོད་དོ།། ལྷ་མ་ཡིན་གྱི་གཡུལ་ཆེན་བཅོམ།། ལྷ་ཡི་བརྟུལ་ཞུགས་ལ་གནས་ཏེ། ། བགེགས་རིགས་སྟོང་ཕྲག་བརྒྱད་བཅུ་བཏུལ།། བི་ནཱ་ཡ་ཀའི་ཀླད་ཁྲག་འཐུང།། ལྷ་མིན་གཡུལ་ལས་རབ་རྒྱལ་བ།། མགོན་པོ་ཁྱོད་ལ་བདག་བསྟོད་དོ།། ཞེས་ཡབ་ཀྱིས་བསྟོད་དོ།། ལྷ་རྣམས་ཀྱིས་བསྟོད་པ་ཡང་ཡོད་དོ། ། དེ་སྐད་བསྟོད་པས་མགུ་བར་བྱས་སོ།། གུས་པར་བྱས་སོ།། འདུན་པར་བྱས་སོ།། ཕུ་དུད་དུ་བྱས་སོ།། ཞེས་མེ་ལྕེ་ཕྲེང་བའི་རྒྱུད་ལས། ལྷ་མིན་དཔུང་བཟློག་པའི་ལེའུ་སྟེ་བཞི་པའོ།།།། རྒྱ་གར་སྐད་དུ། མ་ཧཱ་དེ་བ་ག་ན་པ་ཏི། བོད་སྐད་དུ། ལྷ་ཆེན་པོ་ཚོགས་ཀྱི་བདག་པོ། ལྷའི་དེད་དཔོན་ཞེས་བྱ་བར་ལྷ་རྣམས་ཀྱིས་བསྒྲགས་སོ།། དེ་ཡང་ལྷ་རྣམས་ཀྱི་ཡབ་ལྷ་ཆེན་པོར་གྱུར་ནས། ལྷའི་དཀའ་ཐུབ་ལ་གནས་པར་གྱུར་ཏེ། དུར་ཁྲོད་ཀྱི་སྐལ་ལྡན་རི་རབ་ཀྱི་རྩེ་ལ་སྤྱན་དྲངས་ནས།། ལྷ་མ་ཡིན་ཐམས་ཅད་བཏུལ་ཏེ། ལྷའི་དེད་དཔོན་ཆེན་པོ་མངའ་གསོལ་བའི་དུམ་བུ་སྟེ་དང་པོའོ།།།། དེའི་ཚེ་ལྷའི་བུ་ལེགས་ལྡན་ནག་པོ་དེས། སྲིང་མོ་དཔལ་ལྡན་དུང་སྐྱོང་མ་དང་གཉིས། ལྷའི་དཀའ་ཐུབ་ཀྱི་ཟས་དཀར་གསུམ་ཟ་བ་ལ་མི་དགའ་ཞིང། སྔོན་གྱིས་ཕ་མས་རྐན་ཕབ་པའི་དུར་ཁྲོད་ཀྱི་ཤ་ཁྲག་དང། རྒུན་ཆང་དང། སྒོག་བཙོང་ལ་ཡིད་ཆགས་ནས་མིང་སྲིང་གཉིས་གྲོས་བྱས་ནས་དུར་ཁྲོད་དུ་བྲོས་སོ། ། དེར་ལྷ་རྣམས་ཀྱིས་པི་ཝང་གི་བརྡའ་སྙན་པོ་དང། རོལ་མོ་དང་དབྱངས་སྙན་པོསསྤྱན་དྲངས་ཤིང་མཆོད་པ་ལས། ཉ་སྟོང་དུས་དྲུག་ལ་སོགས་ཕོག་རེ་འབྱོན་པར་ཞལ་གྱིས་བཞེས་ཏེ་བཞུགས་སུ་མ་གནང་ངོ། ། སྔོན་གྱི་ཡབ་ལ་མཆོད་པ་ཅི་བྱེད་པ་དེ་བཞིན་དུ་བཀུར་སྟི་དང་རིམ་གྲོ་བྱེད་དོ།། དེའི་ཚེ་སྲིང་མོ་ལྷ་མོ་དུང་སྐྱོང་མ་ཁྲག་རུལ་འདོད་ནས། ཁྲལ་རུལ་གྱི་དྲི་བསྣམས་པས་དེའི་ཕྱོགས་ཐམས་ཅད་དུ་ཕྱིན་པས་སྲིན་པོ་ལང་ཀ་པུ་རངས་ཀྱི་ཕུག་ཏུ་ཕྱིན་ནོ། ། དེར་སྲིན་པོ་ལང་ཀ་མགྲིན་བཅུ་ཁྲག་རུལ་བ་ཟངས་གང་བསྐོལ་བ་དང་འཕྲད་པས། མོས་ཁྲག་བསླངས་པས་ཁྲག་ཕོར་གང་བྱིན་ནོ། ། དེ་འཐུངས་པས་མོས་ཁྲག་གིས་མྱོས་ཏེ་མིག་དམར་པོར་གྱུར་ཏོ།། མོ་མྱོས་ཏི་གཉིད་ལོག་པ་ལས་སྲིན་པོས་རྐང་པ་ལྕགས་སྒྲོག་ཏུ་བཅུག་སྟེ་ཆགས་པ་སྤྱད་དོ།། དེར་མོ་གཉིད་སད་ཙམ་ན་ངའི་ཆུང་མ་བྱའི་འདིར་འདུག་ཟེར་ནས། ཁོ་ཤ་ཁྲག་གི་ཟས་འཚོལ་དུ་སོང་ངོ།། དེར་མོ་ཁོ་ལ་སྙིང་ན་ནས་རྐང་པ་ལྕགས་སྒྲོག་ཏུ་བཅུགས་པས་བྲོས་པའི་ཐབས་ནི་མེད་ནས། གདོས་འགྲོས་བྱེད་ཀྱིན་ཁོའི་ཁྱིམ་དུ་ཕྱིན་པས། ཁོའི་བུ་སྲིན་ཕྲུག་ལྔ་བརྒྱ་ཉིན་མོ་ཞིང་ཤིན་ཏུ་རྩེ་བརྒྱར་བསྙལ་ནས་འདུག། ནུབ་མོ་སྲིན་ཕྲུག་ལྔ་བརྒྱ་མིའི་གཟུགས་སུ་འཇུག་པ་མཐོང། སྲིན་ཟངས་ཁལ་བརྒྱ་ཆུས་འགེངས་པ་ཡང་མཐོང། སྲིན་གྱི་ཟངས་མ་བསྒྲོ་ནས་འདུག་པ་ཡང་མཐོང། སྲིན་གྱི་བོང་བུ་དམར་པོ་རྩཝ་ཟ་བ་ཡང་མཐོང། དེར་མོས་སྲིན་གྱི་རལ་གྲི་བླངས་ཏེ། རྐང་པའི་ལྕགས་སྒྲོག་གི་བར་དུ་བརྒྱབ་ནས་བཅད། སྲིན་ཟངས་ཀྱི་ཆུ་བསྐོལ་ཏེ་སྲིན་ཕྲུག་རྣམས་དེར་བླུགས་ནས་བསད། བོང་བུ་གྭ་དམར་ལ་ཞོན་རལ་གྲི་ཁྱེར་ནས་བྲིས་པས། སྲིན་པོ་བྱུང་ངམ་མ་བྱུང་ཕྱི་མིག་བལྟས་པས་བྱུང་སྟེ་མྱུར་དུ་བྲོས་པས་མོས་མིང་པོའི་གམ་དུ་རྡོལ་བ་དང། སྲིན་པོ་སྲིན་གླང་དམར་པོར་བརྫུས་ཏེ་རྡོལ་བ་དང། སྲིན་པོས་མིང་པོ་ལ་ནེའུ་ལེ་བརྒྱབ་པས། ལེགས་ལྡན་ནག་པོས་ནེའུ་ལེའི་ལྟག་པ་བཅག། སྲིང་མོ་ལྷ་མོ་དུང་སྐྱོང་མའི་རལ་གྲི་མིང་པོས་བླངས་ནས་སྲིན་གླང་གི་མགོ་བོ་བཅད་དོ།། སྲིན་པོ་ལང་ཀ་པུ་རངས་ཀྱི་གྲོང་ཁྱེར་གཏན་ནས་བརླག་པར་བྱས། ། དེར་སྲིང་མོ་ལྷ་མོ་དུང་སྐྱོང་མས། མིང་པོ་ལེགས་ལྡན་ཐོད་ཕྲེང་ཅན་ལ་བསྟོད་པ། ཧཱུཾ། སྲིན་ཡུལ་ལང་ཀ་པུར་རངས་དག་ཏུ་བྱོན།། སྲིན་གྱི་གྲོང་ཁྱེར་བརླག་པར་མཛད། ལང་ཀ་མགྲིན་བཅུའི་མགོ་བཅད་ནས། དཔའ་བོ་ཉིད་ཀྱི་རྒྱན་དུ་བྱས། མགོན་པོ་ཁྱོད་ཀྱི་སྐུ་ལ་ཕྱག་འཚལ་ལོ།། ཞེས་བསྟོད་ནས་སྲིན་པོའི་ཡ་གལ་སྔ་རུ་བྱས། སྲིན་པོའི་མ་གལ་ཕྱི་རུ་བྱས། པགས་པས་སྒ་གཡོགས་བྱས། རྒྱུ་མས་གང་ཐག་གོང་རྨད་བྱས། ནེའུ་ལེ་ནོར་གྱི་རྐྱལ་བུ་བྱས།། རལ་གྲི་སྲིང་མོའི་ཕྱག་མཚན་དུ་བྱས་སོ།། མེ་ལྕེ་ཕྲེང་བའི་རྒྱུད་ལས། ནག་པོ་ཆེན་པོ་ལྕམ་དྲལ་གྱིས་སྲིན་པོ་ཀང་ཀ་མགྲིན་བཅུ་བཏུལ་བའི་ལེའུ་སྟེ་ལྔ་པའོ། །།། ཡང་དེའི་ཚེ་ཚོགས་ཀྱི་བདག་པོ་ལྕམ་དྲལ་གཉིས། དུར་ཁྲོད་ཀྱི་མཁའ་འགྲོ་མ་རྣམས་ཀྱིས་དུར་ཁྲོད་ཀྱི་ཤ་ཁྲག་གིས་ཉིན་མཚན་དུ་མཆོད་པས་དུར་ཁྲོད་ཀྱི་རོ་ཐམས་ཅད་ཟད་པར་འགྱུར་པ་དང། རྒྱ་གར་གྱི་ཡུལ་གྲོང་ཁྱེར་སུམ་བརྩེགས་པའི་མི་རྣམས་ལ་མཁའ་འགྲོ་མ་རྣམས་ཀྱིས་ཁ་རླངས་ཀྱི་དུག་བཏང་བས། མི་ཐམས་ཅད་རིམས་ནད་ཀྱིས་ཤི་བར་གྱུར་ནས་དེ་དག་གི་རོ་ཐམས་ཅད་ཀྱིས་ནག་པོ་ཆེན་པོ་ལྕམ་དྲལ་ལ་མཆོད་པ་བྱས་སོ། ། དེའི་ཚེ་གྲོང་ཁྱེར་སུམ་བརྩེགས་ཀྱི་རྒྱལ་པོ་ཚངས་པས་བྱིན་གྱིས་གནས་ནས་ཕོ་བྲང་གི་སྒོ་གར་ཕྱིར་གཤེགས་ཏེ། བྱ་རྒོད་ཕུང་པོའི་རི་ལ་གཤེགས་ཏེ། བཅོམ་ལྡན་འདས་ཤཱཀྱ་ཐུབ་པ་ལ། གྲོང་ཁྱེར་དུ་ནམ་མཁའི་ནད་དབབ་པ་དེ་བཅད་པར་ཞུ་བ་ཕུལ་བས། བཅོམ་ལྡན་འདས་ཀྱི་དབུའི་གཙུག་ནས། གཙུག་ཏོར་གདུགས་དཀར་མོ་ཅན་བཏོན་ཏེ། དབུ་དང་ཕྱག་ཞབས་ནམ་མཁའི་འོད་ཟེར་དཀར་མོ་དང་བཅས་པས། ཨོཾ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་དྲེ་ཧཱུཾ་ཧཱུཾ། ཞེས་བྱ་བའི་སྒྲ་དང་བཅས་པས་ནག་པོ་ཆེན་པོའི་ཐད་དུ་རྡོ་རྗེ་འཆང་ཆེན་པོ་མངོན་པར་སྤྲུལ་ཏོ།། དེའི་ཚེ་ནག་པོ་ཆེན་པོས་གཟི་བྱིན་མ་བཟོད་དེ། བཅོམ་ལྡན་འདས་ཀྱི་ཐད་དུ་འོང་ནས་ཞབས་ལ་ཕྱག་འཚལ་ཏེ། འཁོར་མང་པོ་དང་བཅས་པ་ཕྱོགས་གཅིག་ཏུ་འཁོད་ནས། བཅོམ་ལྡན་འདས་ལ་གསོལ་པ། བཅོམ་ལྡན་འདས་བདག་ཅག་རྣམས་ལ་བསྐྱབ་ཏུ་གསོལ་ལོ། ། བདག་ལ་མགོན་པོ་མཆིས་པས་ན། དེ་བཞིན་གཤེགས་པས་ཐུགས་རྗེས་གཟུང་དུ་གསོལ། བདག་ཀྱང་ལྷ་དང་མིའི་འཇིག་རྟེན་བདེ་བར་བགྱི་བ་དང། བཅོམ་ལྡན་འདས་ཀྱི་བསྟན་པ་ཡུན་རིང་དུ་གནས་པར་བགྱིད་པའི་སླད་དུ་བདག་གི་རིག་པ་འདི་འབུལ་ན་བཞེས་སུ་གསོལ། ཨོཾ་ཤྲཱྀ་མ་ཧཱ་ཀཱ་ལ་ག་ན་པ་ཏི་བཛྲ་ཡགྴ་དེ་བ་ཧཱུཾ་ཛ་ཞེས་ཕུལ་ནས་བསྟན་པ་བསྲུང་བར་དམ་བཅས་སོ།། གཙུག་ཏོར་གདུགས་དཀར་མོ་ཅན་ཡང་དེ་བཞིན་གཤེགས་པའི་སྤྱི་བོར་ནུབ་པར་གྱུར་ཏོ། ། གྲོང་ཁྱེར་སུམ་བརྩེགས་པའི་མི་ཐམས་ཅད་ཀྱང་རིམས་ནད་ཆད་པར་གྱུར་ཏོ།། དཔལ་ནག་པོ་ཆེན་པོ་ལ། བཅོམ་ལྡན་འདས་ཀྱིས་བསྟན་པ་བསྲུང་བའི་གནང་བ་བྱིན་པའོ། ། མེ་ལྕེ་ཕྲེང་བའི་རྒྱུད་ལས་བཅོམ་ལྡན་འདས་ཀྱིས་དཔའ་མགོན་པོ་ནག་པོ་བཏུལ་ཞིང་དམ་ལ་བཏགས་པའི་ལེའུ་སྟེ་དྲུག་པའོ།།།། མེ་ལྕེ་ཕྲེང་བའི་རྒྱུད་ལས། དཔལ་མགོན་པོ་ནག་པོ་ལྕམ་དྲལ་གྱིས་སྲིན་པོ་བཏུལ་ཞིང་སངས་རྒྱས་ཀྱི་བསྟན་པ་བསྲུང་བར་ཁས་བླངས་པའི་དུམ་བུ་སྟེ་གཉིས་པའོ། ། ནག་པོ་ཆེན་པོའི་རྒྱུད་ཀྱིས་གནས་ཏེ་དང་པོའོ།། གཞན་ཡང་ཡང་དག་བཤད་བྱ་བ།། ཁྱོད་ཀྱི་ལོ་རྒྱུས་དེ་ལྟར་དེ།། བསྟན་པ་བསྲུང་ཚུལ་འདི་ལྟར་ལགས། ། སངས་རྒྱས་ཆོས་དང་དགེ་འདུན་གསུམ།། སྨོད་པར་བྱེད་པ་རླག་པར་བྱེད།། ས་དང་ལམ་ལ་གནས་པ་ཡི།། བྱང་ཆུབ་སེམས་དཔའ་སྲུང་སྐྱབས་ཤིང།། དམ་ཚིག་ལྡན་པ་ཅན་དེ་སྲུང། ། གཞན་ཡང་དབེན་པའི་སྒོ་འཕྲོག་ཆོས་སྒོར་སྨོད།། བསྟན་པ་སྤྱི་དགྲ་གྱུར་པ་དང།། དམ་ཚིག་ཅན་གྱི་རྣལ་འབྱོར་ལ།། སྒོས་ཀྱི་དགྲ་བོ་བྱེད་པ་དང།། ལོག་ལམ་ཞུགས་པ་ཀུན་ཀྱང་སྒྲོལ།། ལེགས་ཉེས་སྟང་གཟུང་དམ་ཚིག་རྗེས་གཅོད་ཅིང། ། སྲིད་པའི་རྩེ་ནས་སོ་ཚུགས་བྱ་ར་གྱིས།། ཞེས་པས་ལེགས་ལྡན་ནག་པོ་མེ་ལྕེ་ཕྲེང་བའི་རྒྱུད་ལས། བསྟན་པ་བསྲུང་ཚུལ་གྱི་ལེའུ་སྟེ་བདུན་པའོ།།།། དུམ་བུ་གསུམ་པ་གཉིས་པའོ། ། དེ་ནས་ཡང་དག་བཤད་བྱ་བ།། ཕྱི་རབས་རྣལ་འབྱོར་རྗེས་ཞུགས་ནས།། བསྒྲུབ་ན་དོན་ནི་གསུམ་དུ་བཤད།། སྤྱི་གཞུང་ཕྲིན་ལས་མན་ངག་དང།། ལོག་ནོན་མན་ངག་རིམ་པ་དང།། ལས་ཚོགས་ཁོལ་བུ་རིམ་པ་གསུམ། ། ཕྱི་རབས་མགོན་པོ་བཀོལ་བར་བྱ།། ཕྲིན་ལས་སྤྱི་གཞུང་དོན་བཅུ་སྟེ།། ཞེས་པས་མེ་ལྕེ་ཕྲེང་བའི་རྒྱུད་ལས། སྤྱི་སྡོམ་ཚིག་གི་ལེའུ་སྟེ་བརྒྱད་པའོ།།།། དེ་ནས་ཡང་དག་བཤད་བྱ་བ། ། དང་པོ་ཁོ་ནར་གནས་བཙལ་པ།། དུར་ཁྲོད་རི་བོ་ཙན་དན་ཚལ།། བྲག་དམར་ཟླ་གམ་དམར་ནག་གམ།། ལྷ་ཁང་ལ་སོགས་ས་ཕྱོགས་སུ།། ས་ནི་བརྟག་ཅིང་བསླང་བ་དང།། གཟུང་དང་སྤང་དང་ཕུར་གདབ་སོགས། ། ས་ཡི་ལས་རྣམས་ཚང་བར་བྱ།། དེ་ནས་གཞན་ཡང་དཀྱིལ་འཁོར་ནི།། མདའ་གང་གྲུ་བཞི་བཅས་པ་ལ།། དབུས་སུ་པདྨ་འདབ་མ་བཞི།། ནག་པོར་བྱས་པ་དེ་ལ་ཡང།། མུ་ཁྱུད་སེར་པོ་གྲུ་ཆད་དམར།། སྒོ་བཞི་དག་དང་ལྡན་པར་བྱ། ། དབུས་སུ་མགོན་པོའི་སྐུ་མཚན་དགོན།། ཤར་དུ་བིང་ཆེན་དབང་བསྐུར་བཞག། ལྷོ་རུ་རྒྱ་སྤོས་དུད་པ་བཏང།། ནུབ་ཏུ་ལྕགས་པར་གཏོར་བླུགས་བཞག། བྱང་དུ་རབས་ཆད་ཐོད་པ་རུ། ། ཐུན་སྣ་ཚང་བར་བླུག་ལ་བཞག། དཀྱིལ་འཁོར་དབུས་མ་ནག་པོ་ལ།། ཟླ་གམ་དཀྱུས་སུ་ཁྲུ་གང་ལ།། དཔངས་སུ་ཁྲུ་གང་ཡོད་པ་ལ།། ཡར་ཕྱེ་མར་ཕྱེད་བར་དག་ཏུ།། མགོན་པོ་ནག་པོའི་དམ་རྫས་ནི།། མིས་མ་ཚོར་བ་སྦས་ལ་བཞག། རབས་ཆད་གྲི་བོའི་ཐོད་པ་ནི།། དུམ་བུ་གཅིག་གམ་ཡང་ན་བཞི།། གང་རྙེད་པ་ཡི་ཐོད་པ་རུ།། འགྲོ་མཆོག་ཙིཏྟ་རྩ་ལག་ཚང།། སྲོག་རྩ་གསུམ་དུ་གཏད་གསུམ་བྱ།། ཆང་ཕུད་ཨ་མྲྀ་ཏ་དང་ཁྲག། ཉ་ཤ་སྒོག་བཙོང་ལ་ཕུག་དང།། དཀར་གསུམ་མངར་གསུམ་བླུག་པ་ནི།། མཐིང་ནག་སྲོག་འཁོར་ཅན་གྱིས་བཅད།། མི་མཐོང་སྦ་བ་མཆོག་ཏུ་བསྔགས།། དཀྱིལ་འཁོར་མདའ་གང་གྲུ་བཞི་ལ།། འཕང་དུ་སོར་བརྒྱད་བྱས་ནས་ནི། ། དབུས་སུ་ཁྲུ་གང་ཟླུམ་པོར་བསྐོར།། དེ་ལ་ཐོད་པའི་ཕྲེང་བ་བཏང།། དབུས་སུ་གྲུ་གསུམ་བྱས་ནས་ནི།། ནང་ནི་རྒྱ་སོལ་ནག་པོས་བྱུག། ཟླ་གམ་དབུས་ནི་དཀར་པོ་བྱ།། ཐ་མར་ཚོན་རྩི་ནག་པོར་བཏང། ། དེ་ཡི་ཐ་མར་རྩང་གིས་བསྐོར།། གདུག་པའི་ཤིང་གི་ཕུར་བུ་ལ།། ཚོན་རྩི་ནག་པོ་བྱུག་བྱས་ལ།། གཟུངས་ཐག་ཐབས་ཀྱི་སྲིན་ལག་ལ།། བཏགས་ཏེ་བཞག་པ་མཆོག་ཏུ་གསུངས།། ཡིད་གཞུངས་ལ་ནི་ཞེ་གནག་པ། ། ཁྲིམས་གཙང་མ་ཡི་ལག་ཏུ་འཇུག། ཕྱི་མ་རྣམས་ཀྱང་འདྲེན་མེད་བཟླས།། ཆུ་རྒྱུན་ལྟ་བུ་བཟླས་པ་བྱ།། ལིངྒ་ཕ་རོལ་ཚུ་རོལ་ས།། མདོ་གསུམ་ཕུང་ས་རླུང་ཁྱེར་ས།། ཚ་བ་གསུམ་དང་དུག་སྐེ་ཚེ།། བསྲེགས་ཏེ་དེ་ལ་གཟུགས་བྱས་ལ། ། སྙིང་གར་བསགས་ལ་གན་རྐྱལ་བཞག། ཅེས་པས་དཀྱིལ་འཁོར་བཅོས་ཤིང་རྫས་བསགས་པའི་ལེའུ་སྟེ་དགུ་པའོ།།།། དེ་ནས་མཚམས་བཅད་པའི་རིམ་པ་ནི། བདེན་པ་བདར་ཏེ་ང་རོ་ཡིས། ། བགེགས་རྣམས་འདི་ན་མི་གནས་བྱ།། བདག་ཉིད་རྡོ་རྗེ་འཛིན་རྒྱལ་བསྐྱེད།། བདག་ཉིད་འོད་ཟེར་གནས་ནས་སུ།། སྤྱན་དྲང་རང་ལ་བསྟིམ་པར་བྱ།། དེ་ནས་གསང་ནས་སྔགས་བརྗོད་པས། ། སྔགས་ལས་འོད་ཟེར་འཕྲོས་པ་ལས།། བདུད་རྩི་འཁྱིལ་པ་དཔག་མེད་ཀྱིས།། བགེགས་རྣམས་མ་ལུས་བསྐྲད་པར་བྱ།། ཨོཾ་བཛྲ་པཱ་ཎི་ཧཱུཾ།། ཞེས་པའི་སྔགས་ཀྱིས་བསྡིགས་པ་ནི།། སྡིགས་མཛུབ་བྱས་ཏེ་ཉུང་དཀར་གཏོར། ། དེ་ནས་བདེན་པའི་བཀའ་བསྒོ་བྱ།། ཞེས་པས་མེ་ལྕེ་ཕྲེང་བའི་རྒྱུད་ལས། མཚམས་བཅད་པའི་ལེའུ་སྟེ་བཅུ་པའོ།།།། དེ་ནས་ཏིང་ངེ་འཛིན་ལ་ཞུགས།། སྟོང་པ་ཉིད་ལ་ཡུན་རིང་བསྒོམ།། ཡེ་སྟོང་ཐོག་མ་མེད་ནས་སྟོང། ། དེ་མ་རྟོགས་ལ་སྙིང་རྗེ་བསྐྱེད།། དེ་ལས་སྐད་ཅིག་ཏིང་འཛིན་གྱིས།། བཛྲ་པཱ་ཎིར་ལངས་པ་ལས།། པདྨ་མཎྜ་ལ་ཞེས་བརྗོད།། པདྨའི་གདན་དུ་གྱུར་ཏེ་ཧཱུཾ།། སྐར་མདའ་བཞིན་དུ་བབ་པར་བསམ། ། ཧཱུཾ་སྥ་ར་ཎ་ཕཊ།། ཅེས་བརྗོད་པས། ཧཱུཾ་ལས་འོད་འཕྲོས་དོན་གཉིས་བྱས།། ཚུར་འདུས་ཙན་དན་པིང་དུ་གྱུར།། ཛཿཧཱུཾ་བཾ་ཧོ།། མ་ཧཱ་ཀཱ་ལ་རཀྴ་དུ་བིང་ནི་ཛ་ཧོ། ཧཱུཾ་ཞེས་མགོན་པོའི་སྐུ་བསྐྱེད་པ།། ཉི་ཤུ་རྩ་གཅིག་བརྗོད་པ་ཡི། ། མ་ཧཱ་ཀཱ་ལ་ཉིད་ཀྱི་སྐུ།། ལྷག་གིས་བྱུང་བ་ཁོ་ན་སྟེ།། སྐུ་མདོག་མཐིང་ནག་ཞལ་གཅིག་པ།། ཕྱག་གཉིས་གསེར་ཀའི་སྐུ་རགས་ཅན།། དབུ་སྐྲ་ཁམ་ནག་རལ་པ་ཐོར་གཙུག་གྱེན་དུ་འཁྱིལ།། ཁྲོ་གཉེར་སྨིན་མཚམས་བར་དུ་བརྗིད། ། སྤྱན་ནི་སྡང་མིག་ཞལ་བགྲད་པ།། མཆེ་གཙིགས་སྨ་རས་གཏིབས་པ་ལ།། ཕྱག་གཡས་ཙན་དན་བིང་ཆེན་བསྣམས།། གཡོས་པ་བར་བུ་སྐུ་ལ་བརྟེན།། ཞབས་གཉིས་བརྐྱང་བསྐུམ་ཚུལ་གྱིས་བཞུགས། ། འཇིགས་འཇིགས་རྔམས་རྔམ་འདྲ་བ་ཡི།། མགོན་པོ་ནག་པོ་དེ་བསྒོམ་བྱ།། ཞེས་པས་ཏིང་ངེ་འཛིན་གྱི་ལེའུ་སྟེ་བཅུ་གཅིག་པའོ།།།། དེ་ནས་སྤྱན་དྲང་བ་འདི་སྐད་དོ།། ཧཱུཾ། དད་པ་དང་ནི་དམ་ཚིག་གིས། ། ཚུར་གཤེགས་ཚུར་གཤེགས་མ་ཧཱ་ཀཱ་ལ་ཆེ།། ཚུར་གཤེགས་ཚུར་སྤྱོན་དཔལ་ལྡན་མགོན་པོ་ཆེ།། འདིར་གཤེགས་གདུགས་པའི་དགྲ་བགེགས་འདུལ་ཕྱིར་བྱོན།། དབྱིངས་ནས་བཞེངས་པ་མི་མངའ་ཡང། ། སངས་རྒྱས་བསྟན་པ་སྲུང་སླད་དུ།། འབར་བའི་སྐུར་སྟོན་འདིར་གཤེགས་མཆོད་པ་བཞེས།། འདིར་གཤེགས་བདག་གི་ལོངས་སྤྱོད་མཆོད་པ་བཞེས།། ནག་པོ་མི་ཟན་འདིར་གཤེགས་མཆོད་པ་བཞེས།། ཕ་རོལ་ཕྱིན་སྤྱོད་འདིར་གཤེགས་མཆོད་པ་བཞེས། ། རིག་འཛིན་སྲུང་མ་འདིར་གཤེགས་མཆོད་པ་བཞེས།། དེད་དཔོན་ཆེན་པོ་འདིར་གཤེགས་མཆོད་པ་བཞེས།། ལྷ་མིན་གཡུལ་བཟློག་འདིར་གཤེགས་མཆོད་པ་བཞེས། ། ལྷ་དམག་དབུགས་འབྱིན་འདིར་གཤེགས་མཆོད་པ་བཞེས།། དད་པ་དང་ནི་དམ་ཚིག་གིས།། ཚུར་གཤེགས་མ་ཧཱ་ཀཱ་ལ་ཆེ།། དཀྱིལ་འཁོར་གསང་བའི་གནས་འདིར་གཤེགས་སུ་གསོལ།། བདག་ཅག་གསོལ་འདེབས་གདུག་པའི་དགྲ་བགེགས་སྒྲོལ། ། ཨོཾ་ཤྲཱི་མ་ཧཱ་ཀཱ་ལ་ཛཿཧཱུཾ་བཾ་ཧོ་ཧཱུཾ་ཕཊ། ཅེས་པས་སྤྱན་དྲངས་པའི་ལེའུ་བཅུ་སྟེ་བཅུ་གཉིས་པའོ།།།། དེ་ནས་ཉམས་མྱོང་བརྟག་བྱ་ལ།། རང་དབང་མེད་པར་སྐྱི་ཟིང་ཞིང། ། འཇིགས་དང་ཡ་ང་ཡོང་བར་བྱེད།། དེ་ཚེ་དར་གྱི་གུར་ཁང་ཕུབ།། སྤོས་དང་གུ་གུལ་བསྲེགས་བྱས་པས།། བགེགས་རྣམས་ཡིན་ན་བྲོས་ནས་འགྲོ།། མགོན་པོ་ཡིན་ན་དམ་ཚིག་ལ།། ཉེ་བར་དགོངས་ནས་བྱོན་པར་བྱེད། ། ཕྱག་རྒྱ་བསྟན་ཅིང་དམ་ཚིག་བསྲེ།། ཆོ་འཕྲུལ་ཅིར་ཡང་སྟོན་ནུས་སོ།། ཉམས་རྟགས་བརྟགས་པའི་ལེའུ་སྟེ་བཅུ་གསུམ་པའོ།།།། དེ་ནས་ཡང་དག་བཤད་བྱ་བ།། ཕྱག་གི་རིམ་པ་འདི་གསུངས་པ། ། ཧཱུཾ། མཉམ་མེད་མཐུ་མངའ་གཏུམ་ཆེན་མེ་ལྟར་འབར།། མ་རུངས་འཇོམ་མཛད་དགྲ་བཤེགས་ཐལ་བར་རློག། མཐའ་བྱེད་གཞོན་ནུ་འཇིགས་པའི་གད་རྒྱངས་ཅན།། སྐལ་ལྡན་དཔའ་བོ་ཁྱོད་ལ་ཕྱག་འཚལ་ལོ། ། ལྷ་མིན་དམག་ཚོགས་གཡུལ་བཟློག་ཅིང།། ལྷ་དམག་དཀར་པོ་དབུགས་འབྱིན་པ།། རྡོ་རྗེ་དུར་ཁྲོད་འཁོར་བཅས་ལ།། དད་པས་སེམས་ཀྱིས་ཕྱག་འཚལ་ལོ།། བསོད་ནམས་གཟི་བྱིན་ཁྱོད་ལ་ཕྱག་འཚལ་ལོ། ། དྲག་ཤུལ་མཐུ་ཆེན་འཕགས་ལ་ཕྱག་འཚལ་ལོ།། ཡེ་ཤེས་ཚོགས་རྫོགས་ཁྱོད་ལ་ཕྱག་འཚལ་ལོ།། སྒྲིབ་གཉིས་སྤངས་པ་ཁྱོད་ལ་ཕྱག་འཚལ་ལོ།། ལུང་བསྟན་ཐོབ་རྫོགས་ཁྱོད་ལ་ཕྱག་འཚལ་ལོ།། འཇིག་རྟེན་འདི་ན་གང་ཞིག་གིས། ། ཁྱོད་ཀྱི་མཚན་ནས་བརྗོད་བསྒྲུབ་ན།། དངོས་གྲུབ་མྱུར་དུ་སྟེར་མཛད་པའི།། མི་བསྙེམས་བྱམས་ལ་ཕྱག་འཚལ་ལོ།། ལེགས་ལྡན་ནག་པོ་ཁྱེད་ལ་ཕྱག་འཚལ་ལོ།། ཨོཾ་མ་ཧཱ་ཀཱ་ལ་ཧཱུཾ་བཾ་ཧཱུཾ་ཕཊ། ཨ་ཏི་པུ་ཧོ། པྲ་ཏི་ཛ་ཧོ།། ས་མ་ཡ་ཧོ། ན་མོ་ཤ་ཡ། ཞེས་པ་མེ་ལྕེ་ཕྲེང་བའི་རྒྱུད་ལས། ཕྱག་འཚལ་བའི་ལེའུ་སྟེ་བཅུ་བཞི་པའོ།།།། དེ་ནས་བཞུགས་སུ་གསོལ་བ་འདི་གསུངས་སོ།། ཧཱུཾ། ཡེ་ཤེས་མཁའ་འགྲོ་སྔོན་པོའི་མདོག་ཏུ་གྱུར། ། སྐུ་མདོག་སྔོ་ནག་དབྱར་གྱི་སྤྲིན་ལྟ་བུ།། དུག་གསུམ་མུན་ཁམས་མ་ལུས་འཇོམས་མཛད་པའི།། མ་ཧཱ་ཀཱ་ལ་ཁྱོད་ཉིད་དགྱེས་ཤིང་བརྟན་པར་བཞུགས།། འདིར་གཤེགས་གདན་ལ་བཞུགས་ནས་ཀྱང། ། འཇིག་རྟེན་པ་དང་མཐུན་འཇུག་ཕྱིར།། ཕྱག་དང་ཞབས་གཉིས་བསིལ་བར་མཛོད།། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཧཱུཾ། ས་མ་ཡ་ཏིཥྛ་ལྷན་ཨཱ་བེ་ཤ་ཡ་ཨ། ཞེས་པ་མེ་ལྕེ་ཕྲེང་བའི་རྒྱུད་ལས། བརྟན་པར་བཞུགས་སུ་གསོལ་བའི་ལེའུ་སྟེ་བཅོ་ལྔ་པའོ། །།། དེ་ནས་ཡང་དག་བཤད་བྱ་བ།། གཤེགས་ཤིག་གཤེགས་ཤིག་གནས་འདིར་གཤེགས།། བུ་ཡི་གནས་མཆོག་དམ་པ་ན།། ཁྱོད་ཀྱི་མཐུན་པའི་དམ་རྫས་ནི།། འབྱོར་པ་ཚོགས་སོ་ཐུགས་དམ་རྫས། ། རྒྱ་ཤུག་ལ་སོགས་སྤོས་ལྔ་ཐུ་ལུ་ལུ།། ག་པུར་ལ་སོགས་སྨན་ལྔ་ཅི་ལི་ལི།། འབྲུ་བཅུད་ཆང་གི་ཕུད་ནི་བྲེངས་སེ་བྲེང།། རཀྟ་དམར་གྱི་རྒྱ་མཚོ་ཀྱྀ་ལི་ལི། བྷནྡྷ་རུས་པའི་ཚོགས་ནི་ཁྲ་ལ་ལ། ། ཤ་ཆེན་བདུད་རྩིའི་ཚོགས་ནི་ཚངས་སེ་ཚང།། མཐུན་པའི་དམ་རྫས་ཚོགས་སོ་གནས་འདིར་བྱོན།། རྒྱན་གྱི་གཏོར་མ་འདི་ལོང་ལ།། བཅོལ་བའི་ལས་རྣམས་གྲུབ་པ་མཛོད།། དེ་ནས་མཆོད་པ་དང་གཏོར་མ་བཤད་པར་བྱའོ། ། ཕྱི་ཡི་མཆོད་པ་འབུལ་བ་ནི།། མེ་ཏོག་ཕྲེང་བ་ལ་སོགས་རིན་ཆེན་དབྱིག། མར་མེ་མུན་སེལ་དྲི་ཞིམ་སྤོས་ཀྱི་མཆོག། བདུད་རྩི་ཡོན་ཆབ་འོ་མ་ཀུན་གྱི་གསོས།། སྒྲིབ་སེལ་བཤོས་གཙང་དམ་པ་བདུད་རྩི་བཅས། ། དྲང་སྲོང་ཤཾ་ཀར་སྐུ་ལ་མཆོད་པ་འབུལ།། ཨུ་མའི་སྐུ་ལ་མཆོད་པ་འབུལ།། ལེགས་ལྡན་ནག་པོའི་སྐུ་ལ་མཆོད་པ་འབུལ།། མ་ཧཱ་ཀཱ་ལའི་སྐུ་ལ་མཆོད་པ་འབུལ།། ལྷ་མོ་དུང་སྐྱོང་སྐུ་ལ་མཆོད་པ་འབུལ། ། ཨོཾ་མ་ཧཱ་ཀཱ་ལ་རཀྴ་དུ་བེཾ་ཤྲི་ཛ། པཱུ་ཛ་མེ་གྷ་སྥ་ར་ཎ་ཨརྒྷཾ། དྷཱུཔེ། པུཥྤེ། ཨཱ་ལོ་ཀེ་གྷནྡྷེ། ནེ་ཝི་དྱ། ཤཔྟ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ། ཨོཾ་ཨཱཿཧཱུཾ། ཞེས་མཆོད་དོ།། དམ་རྫས་ཀྱི་མཆོད་པ་འབུལ་བ་ནི། ལྕགས་བར་གྱི་ནང་དུ་དཀར་གསུམ་དང། མངར་གསུམ་དང། ལ་དུ་དང། སྒོག་བཙོང་དང། རྒུན་འབྲུམ་དང། འབྲུ་ཐུག་དང། འབྲས་ཆན་དང། ཁུར་བ་དང། ཤིང་ཐོགས་སྣ་ཚོགས་རྣམས་བླུགས་པ། དར་མཐིང་ནག་གིས་ཁ་བཅད། དེ་སྐད་བསྐུལ་ལོ།། ཧཱུཾ། མེ་ཏོག་ཕྲེང་བ་ལ་སོགས་རིན་ཆེན་དབྱིག། ལ་དུ་ལ་ཕུག་ལ་སོགས་ཡིད་བཞིན་འབྲས་བུའི་ཟས།། ཕྱོགས་བཅུའི་ཆུ་སྐྱེས་མེ་ཏོག་ལོངས་སྤྱོད་རྒྱན།། རིས་སུ་མ་ཆད་ལོངས་སྤྱོད་རྒྱས་པར་འབུལ། ། དཀྱིལ་འཁོར་མཛེས་པ་དམ་པ་དང།། བཤོས་གཙང་མེ་ཏོག་མར་མེ་སྤོས་སྣ་ཚོགས།། རྒུན་ཆང་ལ་སོགས་བཏུང་བའི་མཆོག། སྦྲང་རྩི་ལ་སོགས་མངར་བའི་དབྱིག། སྣ་ཚོགས་མཆོད་པ་འདི་དག་བཞེས། ། དངོས་འབྱོར་དང་ནི་ཡིད་ཀྱིས་སྤྲུལ།། གཟུགས་དང་སྒྲ་དང་དྲི་རོ་རེག། ཆོས་ལ་སོགས་པའི་མཆོད་པ་ཀུན།། མགོན་པོ་འཁོར་བཅས་སྐུ་ལ་འབུལ།། ཞེས་པས་དབུལ་ལོ།། ནང་གི་མཆོད་པ་དབུལ་བ་ནི། ། གཡུ་དྲི་མྱོས་བྱེད་ཆང། སྐྱེ་འགྲོ་འབྲུའི་བཅུད། བདུད་རྩི་བཅུད་ཀྱི་ཟས། སྐྱེམས་འཕང་ཕུད་ཀྱིས་མཆོད། སྐལ་ལྡན་དཔའ་བོ་གསོལ། དྲང་སྲོང་ཤཾ་ཀར་གསོལ། ལེགས་ལྡན་དཔའ་བོ་གསོལ། ལྷའི་གནོད་སྦྱིན་གསོལ། གསེར་ཀ་རིན་ཆེན་གསོལ། དར་ནག་རལ་ཅན་གསོལ། རིག་འཛིན་སྲོག་ཤིང་གསོལ། དུག་གསུམ་སྨན་པ་གསོལ། སྐྱེས་བུ་ཆེན་པོ་གསོལ། ལྷ་མོ་དུང་སྐྱོང་གསོལ། འདོད་ཁམས་དབང་དུ་གསོལ། ཞེས་མཆོད་པས་མཉེས་པར་འགྱུར་རོ། ། དེ་ནས་བདུད་རྩིའི་མཆོད་པ་འབུལ་བ་ནི། ཧཱུཾ། གཤེགས་ཤིག་གཤེགས་ཤིག་གནས་འདིར་གཤེགས།། བུ་ཡི་གནས་མཆོག་དམ་པ་ནས།། ཁྱོད་ཀྱི་མཐུན་པའི་དམ་རྫས་ནི།། འབྱོར་པ་ཚོགས་སོ་ཐུགས་དམ་ཅན། ། རྒྱ་ཤུག་ལ་སོགས་སྤོས་ལྔ་ཐུ་ལུ་ལུ།། ག་པུར་ལ་སོགས་སྨན་ལྔ་སི་ལི་ལི།། འབྲུ་བཅུད་ཆང་གི་ཕུད་ནི་བྲེངས་སེ་བྲེང།། རཀྟ་དམར་གྱི་ཨརྒྷཾ་ཀྱི་ལི་ལི།། བྷནྡྷ་རུས་པའི་ཚོགས་ནི་ཁྲ་ལ་ལ། ། བདུད་རྩི་རྣམ་ལྔའི་ཚོགས་ནི་ཚངས་སེ་ཚང།། ཤ་ཆེན་མཱང་སའི་ཚོགས་ནི་སྤུངས་སེ་སྤུང།། མཐུན་པའི་དམ་རྫས་ཚོགས་སོ་གནས་འདིར་བྱོན།། དམ་རྫས་གཏོར་མ་འདི་བཞེས་ལ།། སྡིག་ཅན་དགྲ་བོ་འདུལ་དུ་གསོལ། ། བདག་ཅག་རྣམས་ལ་སྐྱབས་ཆེན་མཛོད།། ཨོཾ་མ་ཧཱ་ཀཱ་ལ་རཀྴ་དུ་བེད་ནརྀ་ཛ།། མ་ཧཱའ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་རུ་ཏི་ཁཱ་ཧི། མ་ཧཱ་ཙིཏྟ་ཁཱ་ཧི། ཞེས་མཆོད་དོ།། དམ་རྫས་བདུད་རྩི་དམ་རྫས་ཚང་བ་ལ། ། འདོད་པའི་ཡོན་ཏན་ལྔ་ཡིས་རབ་བརྒྱན་ཅིང།། ཡེ་ཤེས་ལྔ་ཡིས་འོད་ཟེར་རྣམ་པར་འཕྲོ།། དབང་པོ་དྲུག་གི་སྤྱོད་ཡུལ་འགྱེད།། དྲི་ཆེན་དྲི་ཆུའི་ཚོགས་ནི་རྦ་རླབས་འཁྲུག། རཀྟ་དམར་གྱི་རང་བཞིན་རྒྱ་མཚོ་འཁྱིལ། ། མཱཾ་ས་ཤ་ཡི་རང་བཞིན་རི་ལྟར་སྤུངས།། ཀེང་རུས་རུས་པའི་རང་བཞིན་རི་ལྟར་སྤུངས།། དཔལ་ལྡན་ལེགས་ལྡན་ཡབ་སྲས་ཡུམ་དང་བཅས།། གཙོ་དང་འཁོར་དུ་བཅས་པའི་ཐུགས་དམ་བསྐང། ། ཞེས་མཆོད་དོ།། དེ་ནས་ལས་ལ་མངའ་གསོལ་བ་ནི། ཧཱུཾ། དུས་གསུམ་སངས་རྒྱས་ཐམས་ཅད་ཀྱིས།། མ་ཧཱ་ཀཱ་ལར་མངའ་གསོལ་བས།། དཔྲལ་བ་ཁྲོ་གཉེར་གསུམ་དང་ལྡན།། དཀོན་མཆོག་གསུམ་གྱིས་མངའ་གསོལ་བས། ། ཁྲིམས་ཀྱི་ཆ་ལུགས་གསུམ་དང་ལྡན།། རིགས་གསུམ་མགོན་པོས་མངའ་གསོལ་བས།། ཞལ་གྱི་ཆ་ལུགས་གསུམ་དང་ལྡན།། རིགས་གསུམ་ཁྲོ་བོས་མངའ་གསོལ་བས།། ཞལ་གྱི་ཁྲོ་གཉེར་གསུམ་དང་ལྡན། ། ལྷ་སྲིན་རྣམས་ཀྱིས་མངའ་གསོལ་བས།། དབུ་སྐྲ་ཁམ་ནག་རལ་པ་ཅན།། རྒྱུ་སྐར་རྣམས་ཀྱིས་མངའ་གསོལ་བས།། སྐུ་སྨད་མེ་ཡི་ལྕགས་ཀྱུས་བརྒྱན།། སྲིད་པ་གསུམ་ལ་དབང་བསྐུར་བས།། སྐུ་ཡི་ལྟེ་བ་ཟུར་གསུམ་ཟབ། ། ཀླུ་ཆེན་བརྒྱད་ཀྱིས་མངའ་གསོལ་བས།། ཡན་ལག་སྦྲུལ་གྱི་ཆུན་པོས་བརྒྱན།། ས་བདག་རྣམས་གྱིས་མངའ་གསོལ་བས།། ན་བཟའ་ཟ་བེར་མཐིང་ནག་གསོལ།། འཆི་བདག་བདུད་ཀྱིས་མངའ་གསོལ་བས། ། ཕྱག་ན་ཙན་དན་བིང་ཆེན་བསྣམས།། ལྷ་རྣམས་ཀུན་གྱིས་མངའ་གསོལ་བས།། བསྭོ་སྒྲ་ཆེན་པོ་གསུམ་དང་ལྡན།། ལྷ་མིན་གཡུལ་ལས་རྒྱལ་མཛད་ཕྱིར།། ཆ་སྒྲ་ཆེན་པོ་གསུམ་དང་ལྡན།། བྱོལ་སོང་ཀུན་གྱིས་མངའ་གསོལ་བས། ། མུན་པའི་གཡུང་དྲུང་སྐུ་ལ་གསོལ།། ཡི་དྭགས་རྣམས་ཀྱིས་མངའ་གསོལ་བས།། རིན་ཆེན་འབར་བའི་དོ་ཤལ་ཅན།། དམྱལ་བ་རྣམས་ཀྱིས་མངའ་གསོལ་བས།། སྐུ་ལ་བསྐལ་པའི་མེ་ཆེན་འབར། ། ཞལ་ནས་བསྐལ་པའི་ཆུ་ཆེན་འབྲུབ།། ལྷ་ཡི་དམག་དཔོན་མངའ་གསོལ་ལོ།། ཆོས་སྐྱོང་ཆེན་པོར་མངའ་གསོལ་ལོ།། མགོན་པོ་ཆེན་པོར་མངའ་གསོལ་ལོ།། དཀར་པོའི་བསྟན་པ་སྲུང་བར་མངའ་གསོལ་ལོ།། ཞེས་པས་མངའ་གསོལ་ལོ། ། དེང་རྒྱལ་བའི་བཀའ་བདེན་པ་བརྗོད་དོ།། དཀོན་མཆོག་གསུམ་ལ་མ་ཉེས་པའི་དཔང་གཟུག་སྟེ་འདི་སྐད་བརྗོད་དོ།། ཧཱུཾ། མ་ཉེས་མ་གཡོ་གཟུ་དང་དཔང། ། དཀོན་མཆོག་གསུམ་པོ་གཟུ་དང་དཔང།། དུས་གསུམ་སངས་རྒྱས་གཟུ་དང་དཔང།། ཕྱོགས་བཅུའི་དགེ་འདུན་གཟུ་དང་དཔང།། དམ་ཆོས་བདུད་རྩི་གཟུ་དང་དཔང།། དཀྱིལ་འཁོར་ལྷ་ཚོགས་གཟུ་དང་དཔང། ། ཆོས་སྐྱོང་ལྕམ་དྲལ་གཟུ་དང་དཔང།། ཕྱོགས་སྐྱོང་བཅུ་པོ་གཟུ་དང་དཔང།། ལྷ་སྲིན་སྡེ་བརྒྱད་གཟུ་དང་དཔང།། ཀླུ་ཆེན་བརྒྱད་པོ་གཟུ་དང་དཔང།། རིགས་བཞིའི་ཀླུ་རྒྱལ་གཟུ་དང་དཔང། ། ཀླུ་བྲན་འབུམ་སྡེ་གཟུ་དང་དཔང།། གཉན་ཆེན་འཁོར་བཅས་གཟུ་དང་དཔང།། རིགས་བཞིའི་ས་བདག་གཟུ་དང་དཔང།། སྣང་སྲིད་ལྷ་འདྲེ་གཟུ་དང་དཔང། བགེགས་རིགས་སྟོང་ཕྲག་བརྒྱད་ཅུ་གཟུ་དང་དཔང། ། རཱ་ཛ་བཙན་དང་བདུད་དུ་བཅས།། གཟུ་དང་དཔང་པོར་ཁྱེད་རྣམས་བཞུགས།། ང་ཡིས་མ་ལེན་ཁོ་ཡིས་ལེན།། ང་ཡིས་མ་ཉེས་ཁོ་ཡིས་ཉེས།། ལེགས་ཉེས་གཉིས་ཀྱིས་ཐིག་ཐོབ་ཅིག། དགྲ་བོ་གསོད་པའི་ལས་མཛོད་ཅིག། ཅེས་མེ་ལྕེ་ཕྲེང་བའི་རྒྱུད་ལས། གཏོར་མ་དང་མཆོད་པ་ལ་སོགས་པའི་ལེའུ་སྟེ་བཅུ་དྲུག་པའོ།།།། དེ་ནས་བསྐུལ་བ་བསྟན་པར་བྱ་སྟེ།། འདི་སྐད་བསྐུལ་ལོ།། ཧཱུཾ། བཅོམ་ལྡན་ཕྱག་ན་རྡོ་རྗེ་ཡིས།། ཁྱོད་ཀྱི་གསང་བའི་མཚན་བཏགས་པ། ། རྡོ་རྗེ་རོ་ལངས་དུར་ཁྲོད་བདག། དུར་ཁྲོད་གནས་པར་རབ་ཏུ་མོས།། གསང་བའི་མཚན་ནས་འབོད་དོ་དགྲ་བོ་ད་སྒྲོལ་ཅིག། འཇམ་པའི་དབྱངས་ཀྱིས་མཚན་བཏགས་པ།། ནག་པོ་མནལ་ཟན་རྣམས་ཀྱི་གཤེད། ། ཤ་ཁྲག་ཟ་ལ་རབ་ཏུ་མོས།། གསང་བའི་མཚན་ནས་འབོད་དོ་དགྲ་བོ་ད་སྒྲོལ་ཅིག། རྡོ་རྗེ་སེམས་དཔས་མཚན་བཏགས་པ།། མཐུ་ཆེན་ལོག་འདྲེན་རྣམས་ཀྱིས་གཤེད།། ལོག་པའི་གང་ཟག་འདུལ་ལ་བརྩོན། ། གསང་བའི་མཚན་ནས་འབོད་དོ་ད་ཚུར་བྱོན།། བཅོལ་ལོ་བཅོལ་ལོ་ལས་བཅོལ་ལོ།། དགེ་བསྙེན་སྲུང་མ་ལས་མཛོད་ཅིག། སྡིག་ཅན་དགྲ་བོ་སྒྲོལ་བའི་ལས་མཛོད་ཅིག། མ་ཧཱ་ཀ་ལའི་ཚོགས་ནི་སྤྲིན་ལྟར་གཏིབས་ལ་གཤེགས། ། ལས་ངན་དགྲ་བོ་མནན་པའི་དུས་ལ་བབ།། སྡིག་ཅན་དགྲ་བོ་བསྒྲལ་བའི་དུས་ལ་བབ།། དཀོན་མཆོག་དབུ་འཕང་དམ་ཉམས་འདི་ཡི་སྨད།། སངས་རྒྱས་བསྟན་པ་དམ་ཉམས་འདི་ཡིས་བཤིག། དགེ་འདུན་དཀོར་ཡང་དམ་ཉམས་འདི་ཡིས་ཕྲོགས།། སློབ་དཔོན་སྐུ་ལ་འདི་ཡིས་བསྡོས།། སྡིག་ཅན་འདི་ཡིས་ཅི་མ་བྱས།། ལས་ངན་སྡིག་ཅན་འཁོར་བའི་སེམས་ཅན་འདི།། བསྒྲལ་བའི་ཞིང་བཅུ་ཡིན་པས་ན། ། ཤཱཀྱ་ཐུབ་པའི་བསྟན་པ་ལ།། ལས་ངན་བསྒྲལ་བར་དམ་བཅས་པ།། སྡིག་ཅན་བསྒྲལ་བར་དམ་བཅས་པ།། ནག་པོ་ཆེན་པོ་མཐུ་བོ་ཆེ།། སྐོམ་དུ་མི་ཁྲག་མངར་མོ་འཐུང།། ཟས་སུ་མི་ཤ་བཤུལ་མོ་ཟ།། གོས་སུ་མི་ལྤགས་རློན་པ་གོན། ། འཁོར་དུ་དུར་ཁྲོད་མ་མོས་བསྐོར།། ལས་ངན་དགྲ་བོ་ད་སྒྲོལ་ཅིག། རྣམ་ཤེས་གཞན་དུ་སྒྱུར་ལ་ཐོང།། སྲོག་ལ་ཧུབ་ཀྱིས་ཐོབ་ལ་ཤོག། ལྕགས་ཀྱི་བྱ་ཁྲ་ཆེན་པོར་སྐུ་སྤྲུལ་ལ།། སྡིག་ཅན་འདི་ཡི་ཀླད་པའི་སྤྱི་རྟོལ་ལ། ། ཀླད་ཁྲག་དྲོན་མོ་གཞིབ་པའི་དུས་ལ་བབ།། ལྕགས་ཀྱི་ཤ་སྤྱང་ཆེན་པོར་སྐུ་སྤྲུལ་ལ།། ལས་ངན་དགྲ་བོའི་སྲོག་པ་རྩར་ཞུགས་ལ།། སྲོག་རྩ་དྲོན་མོ་གཞིབ་པའི་དུས་ལ་བབ། ། ནག་པོ་ཆེན་པོར་སྐུ་སྤྲུལ་ལ།། ལས་ངན་གསོད་པའི་དུས་ལ་བབ།། སྡིག་ཅན་གསོལ་བའི་དུས་ལ་བབ།། དཀོན་མཆོག་གསུམ་ལ་སྐྱབས་འགྲོ་རྣམས།། གཏོར་མ་ཕུལ་ནས་འདི་ཞུས་པས།། སེམས་ཅན་རྣམས་ལ་གནོད་བྱེད་པ། ། མགོན་པོ་ནག་པོ་ཁྱོད་ཀྱི་གསོལ།། དགྲ་བོའི་ཤ་ནི་མ་ནོངས་པར་གྱིས།། ཁྲག་ནི་བཅུས་ཏེ་བཏུང་བར་གྱིས།། ཡང་ན་དེ་ཡི་ཕྱི་ནང་གི། ཏིལ་ཙམ་དག་ཏུ་ཤ་ཆོད་ཅིག། དཀར་པོའི་སྲུང་མ་ལས་མཛོད་ཅིག། གདུག་པའི་དགྲ་བོ་འདུལ་བའི་ལས་མཛོད་ཅིག། བཟློག་ཅིག་དགྲ་བོ་ད་བཟློག་ཅིག། དེང་ནས་བཟུང་ནས་སྐྱེས་བུ་ཡིས།། བདག་ཅག་བསྲུང་ཞིང་བསྐྱབ་ཏུ་གསོལ།། སློབ་དཔོན་གདན་ནས་བསྐྱོད་ད་རེ།། སློབ་མ་མཐའ་ནས་ཟགས་པ་རེ། ། ཕོ་བྲང་ངོ་མངས་འགྱུར་ར་རེ།། སྒྲུབ་ལ་བར་ཆོད་ཤོར་ར་རེ།། ལེགས་ལྡན་ནག་པོ་མཐུ་བོ་ཆེ།། མགོན་པོ་ནག་པོ་ཐུགས་དམ་ཅན།། ལྔ་བརྒྱ་དུས་ཀྱི་ཐ་མ་ལ།། བདག་ཅག་རྣལ་འབྱོར་ཚོགས་རྣམས་ལ། ། མཐུ་ནུས་འབྱིན་པའི་དུས་ལ་བབ།། ཧཱུཾ། བདེ་ཆེན་འདུ་འབྲལ་མེད་པའི་ཀློང་དཀྱིལ་ནས།། ཡང་དག་སྐུ་གཅིག་བྱུང་བ་ནི།། མཐིང་ནག་མི་སྲུན་འཇིགས་པའི་སྐུ།། ཉིད་ཀྱི་སྐུ་ལ་དར་ནག་བེར་ཆེན་གསོལ། ། དབུ་སྐྲ་ཁམ་ནག་ཐོར་ཚུགས་གཅིག་ཏུ་འཁྱིལ།། སྨིན་མ་ནག་པོ་ཁྲོ་གཉེར་བརྗིད་པའི་ཞལ།། སྤྱན་བཟློག་ཞལ་གདངས་མཆེ་བ་རྣོ་གཙིགས་ནས།། དམ་ཉམས་དགྲ་བགེགས་རྣམས་ཀྱི་སྙིང་རྩ་གཅོད།། ཤངས་ནས་མེ་དང་དུག་གི་འཚུབ་མ་གཏོང། ། ཕྱག་གཉིས་ཐབས་དང་ཤེས་རབ་ཟུང་དུ་འབྲེལ།། གཡས་ཀྱི་ཕྱག་ན་ཙན་དན་བིང་ཆེན་བསྣམས།། གསོར་ཞིང་ཀླད་པའི་རྒྱས་སུ་རྡེག། ཙན་དན་བེང་གི་སྟོད་ཤེད་ནས།། སྤྲུལ་པའི་ཕོ་ཉ་འབུམ་བཀྱེ་བས། ། སྟེང་གི་ལྷ་བདུད་དབང་དུ་སྡུད།། ཙན་དན་བིང་གི་ཞབས་ཤེད་ནས།། སྤྲུལ་པའི་ཕོ་ཉ་འབུམ་བཀྱེ་བས།། འོག་གི་སྲི་བཙན་དྲུངས་ནས་འབྱིན།། ཙན་དན་བེང་གི་བར་ཤེད་ནས།། སྤྲུལ་པའི་ཕོ་ཉ་འབུམ་བཀྱེ་བས། ། བར་གྱི་དགྲ་བགེགས་རྡུལ་དུ་རློགས།། གཡོན་ན་ལྕགས་པར་སྐུ་ལ་བརྟེན།། དར་སེར་སྔོ་ཁྲ་སྐུ་ལ་གསོལ།། གསེར་ཀ་རིན་ཆེན་སྐུ་ལ་བཅིངས།། སྤྱན་གསུམ་སྡང་མིག་གྱེད་དུ་བགྲད་པ་ཡིས། ། སྟེང་གི་ལྷ་ཡང་འདར་ཤ་ཤ། སྤྱན་གསུམ་སྡང་མིག་ཟུར་དུ་བགྲད་པ་ཡིས།། འོག་གི་ཀླུ་ཡང་ཟིལ་གྱིས་གནོན།། སྤྱན་གསུམ་ཕྲེང་ལ་ཕར་བགྲད་པས།། ཕྱོགས་བཞི་མཚམས་བརྒྱད་མདུན་ན་ནི།། གནས་པ་ཐམས་ཅད་ཕོ་ཉར་འགྱེད། ། ཞབས་གཉིས་བརྐྱང་བསྐུམ་ཚུལ་གྱིས་འབྱུང་པོ་གནན།། ཀྱེ། མགོན་པོ་ནག་པོའི་བསྟན་པ་ལ།། འཁྲུགས་པ་ཅན་ནི་འདི་ཡིན་པས།། གལ་ཏེ་རིང་བར་དྲང་བས་ན།། གདུག་པའི་དགྲ་བོ་འདི་ཉིད་ནི། ། བཟུང་བཟུང་སོད་སོད་ཁྱེར་ཁྱེར་ཆིངས།། སྲེག་སྲེག་གཏོར་གཏོར་སྒྲོལ་སྒྲོལ་ཆིངས།། སྐད་ཅིག་གཅིག་གིས་མེད་པར་གྱིས།། གདུག་པའི་དམག་གི་དཔུང་ཤིག་ཅིང།། ཨོཾ་མ་ཧཱ་ཀཱ་ལ་རཀྴ་དུ་བེང་ནརྀ་ཛ། ། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཕཊ། ཧཱུཾ་བྷྱོ་བྷྱོ་བྷྱོ། དད་པ་དང་ནི་དམ་ཚིག་གིས།། ཚུར་གཤེགས་ཚུར་གཤེགས་ལྷ་ཆེན་པོ།། སྲོག་བདུད་ཆེན་པོ་མ་རུངས་པ།། མངོན་ཤེས་རྫུ་འཕྲུལ་སྣ་ཚོགས་སྟོན།། མངོན་ཤེས་རྫུ་འཕྲུལ་ཐབས་གཙོ་བས། ། རྔམ་པའི་ཞལ་གདངས་གཏུམ་པའི་སྐུ།། མཐིང་ནག་མུན་པའི་གཡུང་དྲུང་ན་བཟའ་གསོལ།། ཞལ་གདངས་དུག་གི་ངན་སྐྱུགས་ཆར་དུ་འབེབས།། སྲོག་བདུད་དབུགས་ལ་མངའ་མཛད་པས། ། བདག་ལ་སྡང་བའི་དགྲ་བགེགས་ཀྱི།། སྲོག་དང་དབུགས་ལ་ཁ་རཾ་ཁཱ་ཧི།། སྲོག་བདུད་ཆེན་པོའི་ཐུགས་དམ་དུས་ལ་བབ།། མཚན་ནི་མ་ཧཱ་ཀཱ་ལ་སྟེ།། ལྷ་ཆེན་དཔའ་འབར་བདུད་ཀྱི་གཙོ།། སྲོག་གི་སྙིང་པོས་གནས་ནས་སྤྱན་འདྲེན་གྱིས། ། བཅོལ་བའི་ཕྲིན་ལས་འདི་ལ་རྟགས་ཕྱུང་ཅིག། ཧཱུཾ།། ལྷ་ཆེན་མགོན་པོ་ནག་པོ་ནི།། མངོན་ཤེས་རྫུ་འཕྲུལ་ཐབས་དང་ལྡན།། རིག་པའི་རྒྱལ་པོ་ཐབས་ཀྱི་གཙོ།། ཕྱག་ན་བདུད་ཀྱི་ཁྲམ་བམ་བསྣམས། ། བདུད་སྡེ་སྟོང་གི་གཙོ་བོ་སྟེ།། ཁྲམ་ཐོགས་རྒྱལ་པོ་གཤེགས་སུ་གསོལ།། དྲེད་མོ་དག་གི་སླག་པ་ལ།། སེང་གེ་སྔོན་མོའི་གོང་ལག་ཅན།། ལག་ན་སྙིང་དང་ཁྲམ་ཐོགས་ཤིང།། རྟག་ཏུ་སྲོག་དང་དབུགས་ལ་རྔམས། ། བདུད་མོ་མ་རུང་པ་ཡིས་ནི།། དགྲ་བོའི་སྲོག་དབུགས་སོ་སོར་འབྲལ།། ལྷ་ཆེན་མགོན་པོ་ནག་པོ་ནི།། གནས་འདིར་མ་ལུས་གཤེགས་སུ་གསོལ།། ཧཱུཾ། ལྷ་ཆེན་བཞུགས་པའི་སྐུ་མཁར་ནི།། ཐོད་པ་འབར་བའི་སྐུ་མཁར་ལ། ། རིན་ཆེན་གསེར་གྱི་སྒོ་མོ་གསལ།། མཐིང་ནག་གཡུ་ཡི་སྐས་བཙུགས་ཤིང།། ལྷ་ཆེན་མགོན་པོ་གཤེགས་པ་ཡི།། དམ་ཚིག་ཅན་གྱི་གྲོགས་ལ་བྱོན།། དམ་ཉམས་དགྲ་བོ་རབ་རྒྱུད་ཆོད།། མགོ་ལ་རྔམས་ཤིང་ད་ཚུར་བྱོན། ། བདུད་མོ་ཡུམ་དང་གཉིས་སུ་མེད།། མ་ཆགས་ཐབས་ཀྱིས་རོལ་པ་མཛད།། ལྷ་ཆེན་ལ་སོགས་འཁོར་བཅས་ཀྱིས།། བཅོལ་བའི་ལས་རྣམས་དུས་ལ་བབ།། ལྷ་ཆེན་མགོན་པོ་ད་ཚུར་བྱོན། ། བདུད་པོ་བདུད་མོ་མ་རུངས་པ།། འཁོར་དང་བཅས་པ་ད་ཚུར་བྱོན།། རིན་ཆེན་གསེར་གྱི་ཁྲི་སྟེང་ན།། མི་རོ་རྟ་རོའི་ཁྲི་སྟེང་ན།། ལྷ་ཆེན་བདུད་པོ་འཁོར་དང་བཅས།། ཞལ་ནས་མི་ཤ་རྟ་ཤ་ཙ་ར་ར།། ཆིབས་སུ་དཔའ་བའི་སྟག་མོ་བཅིབས། ། བདུད་ཀྱི་ཞགས་པ་ནག་པོ་དགྲ་ལ་འཕེན།། དགྲ་བོའི་གཡུལ་སོ་རུ་འཇོམས་པ།། དཔའ་བོ་ཁྱོད་ལ་ཕྲིན་ལས་བཅོལ།། བཅོལ་བའི་ཕྲིན་ལས་འགྲུབ་པར་མཛོད།། ཅེས་མེ་ལྕེ་ཕྲེང་བའི་རྒྱུད་ལས། ཕྲིན་ལས་བཅོལ་བསྐུལ་གྱི་ལེའུ་སྟེ་བཅུ་བདུན་པའོ།།།། ཕྲིན་ལས་ཀྱི་དུམ་བུ་སྟེ་བཞི་པའོ།། གནས་གསུམ་པའོ།། དེ་ནས་བསད་པའི་རིམ་པ་ནི།། བེང་ངམ་ཕུར་བས་བསད་པ་དང།། ཐུན་གྱིས་བསད་དང་སྦྱིན་སྲེག་བསད། ། ཟོར་གྱིས་བསད་དང་མནན་པས་བསད།། དྲག་པོའི་སྦྱོར་བ་ལྔ་རུ་བཤད།། དེ་ལ་གདབ་ཀས་བསད་པ་ནི།། དཀྱིལ་འཁོར་བསད་ཁང་ནག་པོ་རུ།། ཕུར་པ་དུག་ཤིང་སེང་ལྡེང་ངམ། ། གླ་བ་སྐྱེར་པ་ཚེར་མ་ཅན།། ཁ་དོག་ནག་པོ་སོར་བརྒྱད་བདུན།། བེང་དང་བཅས་པ་གསོར་ཞིང་གདབ།། ཐོག་ལྕགས་མི་བསད་ལྕགས་དག་ལ།། མགར་བ་མོན་ནམ་ཡུགས་སས་བརྡུངས།། རྣལ་འབྱོར་ཁྲིམས་ལྡན་གཙང་མས་སུ། ། གཟུངས་དང་བཅས་པ་དེ་བཞིན་བྱ།། དམ་ཚིག་གཙང་མ་ཆོས་སྤྱོད་བརྩོན།། སྒོམ་རྒྱུད་ལྡན་པས་བཅང་བྱས་ལ།། ཤ་ཐོད་ནད་ནས་ལིངྒ་ག་དོན།། དགུག་པ་གཞུག་པ་དྲག་པོ་བྱ།། གུ་གུལ་དུད་པས་བདུག་བྱས་ལ། ། བདག་ཉིད་མགོན་པོའི་སྐུར་བསྒོམས་ཏེ།། བེར་ནག་གོན་ལ་སྐྲ་བརྫེས་ལ།། ངོ་ལ་ཁྲག་གིས་སྲེ་མོག་བྱུག། ཞིང་ལྤགས་གོན་ལ་ཕྲེང་ཆེན་བགྲང།། ཐོད་པ་ནག་པོ་རྒྱན་དུ་གོན།། དྲག་པོའི་བརྟུལ་ཞུགས་སྤྱོད་པ་ཡིས། ། བདག་གི་སྙིང་ག་དག་ནས་འོད།། འཕྲོས་པའི་ཁོ་ལ་ཕོག་ནས་སུ།། ཁོ་ཡི་ཡེ་ཤེས་འཁོར་ལོ་ཕྱུང།། བདག་ལ་བསྟིམ་སྟེ་འོད་དུ་ཞུ།། བདག་ནི་གཟི་མདངས་ལྡན་པར་བསམ།། ཡང་ནི་འོད་འཕྲོས་ཁོང་དུ་གནས། ། ལིངྒ་དག་ལ་བསྟིམ་བྱས་ལ།། བདག་གིས་འབོད་རྦད་བསད་གསུམ་སྦྲེལ།། རྒྱུན་མ་ཆད་པར་དྲག་པར་བཟླས།། ཡང་སོང་ཁོ་ཡི་ཁོང་དུ་སོང།། རྡོ་རྗེ་བྱུང་ནས་ཁར་སོང་མྱོས་པར་བསམ། ། ཡང་བརྗོད་ཁྲོ་བོ་དཔག་མེད་ཀྱིས།། ཕུར་པའི་ཆར་ཕབ་བསད་པར་བསམ།། དེ་ནས་བེང་དང་ཕུར་པ་དྲིལ།། དྲག་པོའི་སྤྱོད་པས་གནས་བདུན་གདབ།། ཨོཾ་མ་ཧཱ་ཀཱ་ལ་རཀྴ་དུ་བེང་ན་ཛ།། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཧཱུཾ་ཕཊ། ། ཆེ་གེ་མོ་འདི་ཡ་སོད་སོད། ནག་པོ་ཆེན་པོ་ཤ་རྒྱུད་སྙིང་འདི་ཐོན་ཐོན།། བདུད་པོ་དགྲའི་སྲོག་ལ་ཛ་ཛཿ་ནག་པོ་དགྲའི་བླ་རྩ་ལ་ཡ་ཡ། ནག་པོ་དགྲའི་ཀླད་པའི་རྩ་ལ་ཡ་ཡ།། ནག་པོ་དགྲའི་སྙིང་རྒྱུད་དབུགས་ལ་ཡ་ཡ། ཞེས་ཕུར་པས་གདབ་བོ།། ཕུར་ཁུར་གྲུ་བཞི་རྨས་ས་རུ།། ཉུང་དཀར་ལ་སོགས་དུག་ཁྲག་གིས།། རྫས་རྣམས་ཕུར་པའི་ཤུལ་དུ་གདབ།། དེ་ལྟར་ཕུར་པ་གདབ་པ་ཡང།། མགོན་པོས་དངོས་སུ་གདབ་པར་དམིགས། ། ངེས་པར་འཁོར་ལ་འཚེ་བར་ཐེ་ཚོམ་མེད།། ཡང་ན་ཕུར་པའི་ལས་ཁ་ཡང།། ཕུར་དཔལ་བྱ་ཕོ་འཚའ་ལུ་ཡི།། ཁྲག་གིས་ཞུ་ལུག་བྱུག་བྱས་ལ།། རུས་སྦལ་མགོ་ལ་དགྲ་གཟུགས་བྲི།། ཕུར་གསང་དམིགས་ཏེ་བཏབ་པས་ན། ། མགོ་ལ་ཐོག་འབབ་ཐེ་ཚོམ་མེད།། ཡང་ན་ཕག་པའི་མཚུལ་པ་ལ།། དགྲ་བོའི་གཟུགས་བྲིས་ཕུར་བཏབ་ན།། བརྒྱལ་དང་རེངས་ཏེ་འཆི་བར་འགྱུར།། ཕུར་པ་གདབ་པའི་ལེའུ་སྟེ་བཅོ་བརྒྱད་པའོ། །།། ཐུན་གྱིས་བསད་པ་འདི་ལྟ་སྟེ།། ཐོད་པ་དུམ་བུ་གསུམ་པ་རུ།། ཁྲག་སྣ་ཚོགས་ཚད་བསག་བྱས་ལ།། མི་རྟ་ཁྱི་གསུམ་མེད་མི་རུང།། དུག་སྣ་ཚོགས་ཚད་དེ་བཞིན་དུ།། མཚེ་དང་སྐྱེ་ཚེ་གྲི་ཁྲག་དང། ། ཟིར་ལྕགས་དང་རྡོ་ཕྱེ་དང།། ཚ་བ་གསུམ་བསག་སྔགས་འདི་བཟླས།། ཨོཾ་ཤྲཱི་མ་ཧཱ་ཀཱ་ལ་དབུགས་ནརི་ཧཱུཾ་ཛ། བྷིན་དྷ་བཛྲ་པ་ནི་ཏི་རུ་པ་ན། ཁུག་ལ་ཧཱུཾ་པས་གཅིག། སྲོག་ཀུ་རུ་ཙམ་མཱ་རུ་ཡ་ཛ།། དེ་སྐད་ལིངྒ་དག་ལ་བྲབ། ། ཁང་པའི་རྩ་རུ་གྲུ་གསུམ་བྲུ།། དེ་རུ་ཐོད་པ་སྦ་བར་བྱ།། ཁ་རུ་དུར་ཁྲོད་གཡམ་པ་ལ།། རྡོ་རྗེ་རྒྱ་གྲམ་བྲིས་པས་མནན།། བདག་ཉིད་མགོན་པོའི་ཏིང་འཛིན་གྱིས།། སྙིང་གའི་ཧཱུཾ་ལས་འོད་འཕྲོས་ནས། ། ཁོ་ཡི་ལྷ་བཀུག་བདག་ལ་བསྟིམ།། དཔལ་གཟི་ལྡན་པས་འོད་ཟེར་འཕྲོས།། ཁོ་རང་བཀུག་སྟེ་ཐུན་བྲབ་པས།། མཚོན་ཆའི་ཆར་གྱིས་བསད་པར་བསམ།། ཞེས་མེ་ལྕེ་ཕྲེང་བའི་རྒྱུད་ལས། ཐུན་གྱི་བསད་པའི་ལེའུ་སྟེ་བཅུ་དགུ་པའོ། །།། དེ་ནས་གཞན་ཡང་ཟོར་གྱིས་བསད།། དཀྱིལ་འཁོར་མདའ་གང་གྲུ་བཞི་ལ།། གྲུ་གསུམ་མཐིང་ནག་གཉིས་བརྩེགས་ལ།། ཕྱི་རིམ་ཟླ་གམ་དམར་པོ་སྟེ།། མུ་ཁྱུད་ཐོད་ཕྲེང་དཀར་པོར་ལྡན། ། ཕྱི་མ་ལྕགས་རི་ནག་པོས་བསྐོར།། དེ་དབུས་ལུག་དང་མི་སྙིང་སྦྱང།། སྦྲུལ་ནག་སྙིང་སོགས་དེར་བླུགས་ལ།། ཟུར་གསུམ་དབུས་སུ་གཞག་པར་བྱ།། ཤ་བའི་མགོ་ལ་ལྟས་ངན་གྱི།། སྒྲོ་སྤུ་སྣ་ཚོགས་བརྒྱན་པ་དང། ། བལ་མཚོན་སྣ་ཚོགས་བརྒྱན་པ་དང།། དེ་ཡི་ནང་དུ་ལིངྒ་གཞུག། དགྲ་ཡི་རྒྱུ་ལས་ཕྱེར་བཏགས་ཏེ།། ཡུགས་ས་མོ་ཡི་དྲི་ཆུས་སྦྲུས།། གཟུགས་བྱས་སྙིང་གར་མིང་རུས་གཞུག། མང་དུ་བྱས་ཏེ་ཐོད་པར་སྩལ། ། དཀྱིལ་འཁོར་དབུས་ཀྱི་ཟུར་ལ་བཞག། གྲུ་གསུམ་ནང་མ་ཕུར་པ་དྲུག། དབུས་སུ་ཕུར་པ་གཟུགས་པར་བྱ།། ཟླུམ་པོ་རྩང་གིས་བསྐོར་བྱ་བ།། ཉི་ཤུ་རྩ་གཅིག་བསྣོལ་མར་གཟུག། ཤ་ཐོད་ལིངྒ་གཅིག་ཕྱུང་ལ། ། དབུས་སུ་རབས་ཆད་ཐོད་པར་བསྩལ།། གུ་གུལ་དུད་པ་བཏང་ལ་བཞག། བདག་ཉིད་མགོན་པོའི་སྐུར་བསྒོམ་ལ།། དབྱེ་དང་དགུག་པ་གོང་བཞིན་བྱ།། མཚོན་ཆའི་ཆར་གྱིས་བསད་པར་བསམ།། ཐུགས་དམ་དྲག་ཏུ་བསྐུལ་བར་བྱ། ། ཟོར་གྱི་དྲག་སྔགས་འདིས་བྱའོ།། ཨོཾ་མ་ཧཱ་ཀཱ་ལ་ཡཾ།། ལག་ནི་ཚལ་པ་ཏྲི་བ་ལཾ་ཛ་ཛཿ། མ་ཧཱ་ཀཱ་ལ་ཐུཾ་ལཾ་ཐུཾ་ལཾ་ཐུཾ་རིལ་རྦད་ཕུང་སྙིང་ལ་ཏྲག་རཀྴ་ལ་ཐུཾ་རྦད་ཛ་ཛཿ། ཅེས་པས་ཟོར་ནི་ཕང་བར་བྱ། ། དེ་ལ་བརྒྱ་རྩ་བརྒྱད་བཟླས་པས།། དེ་ནས་དཔང་གཟུགས་ཟོར་འཕང་ངོ།། དྲག་པོའི་གདངས་སྐད་པ་བཏོན་ཏེ་བསྐུལ།། དེ་ནས་གོང་བཞིན་ཁྲག་སྣ་ལ།། དྲག་སྔགས་དེ་དག་བཟླས་བྱས་ནས།། བརྒྱ་རྩ་བརྒྱད་ཀྱིས་གདབ་ལས་བྱ། ། ཞེས་པས་མེ་ལྕེ་ཕྲེང་བའི་རྒྱུད་ལས། ཟོར་གྱི་ལས་ཏེ་ལེའུ་ཉི་ཤུ་པའོ།།།། དེ་ནས་ཡང་དག་བཤད་བྱ་བ།། སྦྱིན་སྲེག་བསད་པ་འདི་ལྟ་སྟེ།། དང་པོ་ཐབ་ཀྱི་བྱ་ཐབས་ནི།། གྲུ་གསུམ་སུམ་བརྩེགས་བྱས་ནས་སུ། ། ནང་དུ་རཾ་ནི་དམར་སེར་ཏེ།། མེ་ཡི་ས་བོན་བྲི་བར་བྱ།། ཁ་ཁྱེར་འོད་མ་རྡོ་རྗེ་བྲི།། བར་མ་ཐོད་པའི་ཕྲེང་བ་བྲི།། སྟེང་མ་དག་ལ་མེ་རི་བྲི།། དེ་ཡི་ལིངྒ་བྲི་བ་ནི།། གྲོ་ག་རས་སམ་ཤིང་ཤུན་ལ། ། རབ་ནི་ཁྲི་ལ་འབྲིང་ནི་སྟོང།། ཐ་མ་བརྒྱ་རུ་དགོད་པར་བྱ།། དེ་ཡི་རྫས་ནི་སྲན་མ་དང།། བྲ་ཡོས་ནས་དང་ཉུང་ནག་དང།། ཏིལ་ནག་མུ་ཟི་མི་ཁྲག་ཁྱི་ཁྲག་དང།། གདུག་པ་ཅན་གྱི་ཤིང་གི་འབྲས་བུ་དང། ། ཚ་བ་གསུམ་དང་བཅས་པ་ནི།། ཕྱེ་མར་བཏགས་ཏེ་ཡུགས་ས་ཡི།། དྲི་ཆུས་སྦྲུས་ཏེ་རིལ་བུ་བྱ།། ལིངྒའི་གྲངས་དང་མཉམ་པར་བསག། དེ་ནས་ཐབ་ཁུང་དག་ཏུ་ནི།། སྐྱེར་པ་གླ་བ་ཤིར་ཤིང་དང།། སེ་བ་ལ་སོགས་གདུག་ཤིང་བརྩིག། མི་རོ་བསྲེགས་པའི་མགལ་དུམ་དང།། དུག་ཤིང་ཚོགས་རྣམས་བསྲེག་པར་བྱ།། དབུས་སུ་ཧོམ་སྦུགས་ཐ་མར་བཙིར།། དེ་ནས་མེ་ཆེན་སྤར་བ་ནི།། རིགས་ངན་ཤན་པས་མེ་བུས་ཏེ། ། དབུས་སུ་མེ་ལྷ་མགོན་པོ་བསྐྱེད།། ཞལ་གཅིག་ཕྱག་གཉིས་བིང་དང་པར་བུ་འཛིན།། འགྱིང་དང་ཁྲོས་དང་རྔམ་པར་བཞུགས།། མེ་ལྷ་དམར་སེར་ཞལ་གཅིག་པ།། ཕྱག་གཉིས་མེ་དང་དབྱུག་པ་འཛིན།། ར་སྐྱེས་གདན་ལ་བརྗིད་པ་དང། ། དམར་ནག་དེ་ལྟར་འཛིན་པ་དང།། དཀར་ནག་དེ་ལྟར་འཛིན་པ་གསུམ།། ཟུར་གསུམ་དུ་ནི་བསྒོམ་པར་བྱ།། སྔོན་གྱི་ཐུགས་དམ་གནད་ནས་བསྐུལ།། སྤྱན་དྲང་བ་དང་ཕྱག་འཚལ་བ། ། བཞུགས་སུ་གསོལ་དང་མཆོད་པ་དང།། བསྟོད་དང་ཕྲིན་ལས་རྫོགས་པར་བྱ།། དེ་ནས་རྫས་རྣམས་འབུལ་བ་ནི།། དགྲ་ཡི་ལིངྒ་རེ་རེ་དང།། རི་ལུ་རེ་རེ་དབུལ་བར་བྱ།། མི་རྐང་ཐོད་ཚོལ་གཟར་བུ་ཡིས།། ཏིལ་མར་ཉུང་དཀར་ཉུང་ནག་དང། ། མི་ཚིལ་དེ་བཞིན་དབུལ་བར་བྱ།། དེ་ཚེ་དྲག་སྔགས་འདི་བཟླས་སོ།། ཨོཾ་མ་ཧཱ་ཀཱ་ལ་རཀྴ་དུ་བིར་ནརྀ་ཛ། བཾ་ཤྲཱི་ཀཱ་ལ་རཱུ་པ་ཧཱུཾ། མ་ཧཱ་ཀཱ་ལ་རྦད་ཤཱ་ཧཱུཾ་རཱུ་པ་ཧཱུཾ། ད་ཧ་ད་ཧ་པ་ཙ་པ་ཙ་དི་ན་མེ་ཀེ་ན་ཧཱུཾ་ཕཊ། ཆེ་གེ་མོའི་མཱཾ་ས་ལ་ཁཱ་ཧི།། ཆེ་གེ་མོའི་གཟུགས་ཕུང་ལྔ་རབ་ཏུ་འུབས་ཁཱའ་ཧི་ཁཱ་ཧི།། ཞེས་པས་འབུལ་ལོ།། དེ་ནས་མེ་ལྷ་བསྟོད་པ་དང།། མགོན་པོ་བསྟོད་དང་ཕྲིན་ལས་བཅོལ།། ཏིང་ངེ་འཛིན་དང་དགུག་གཞུག་གོང་བཞིན་བྱ། ། དམིགས་བྱ་མེ་ཡིས་ཐུལ་བསྲེགས་པས།། རྡུལ་ཕྲན་ཙམ་ཡང་མེད་པར་བསམ།། དེ་ནས་ལྷག་ཆད་བསྐང་བའི་ཕྱིར།། མགོན་པོ་ལ་སོགས་དམ་ཅན་དང།། མགོན་པོ་བདུན་ཅུ་གཉིས་ལ་འབུལ། ། དེ་ནས་ཐལ་བ་ཆ་གསུམ་བགོ། ཆ་གཅིག་དུར་ཁྲོད་ལམ་དུ་མནན།། ཆ་གཅིག་རླུང་ལ་ཕྱར་བར་བྱ།། ཆ་གཅིག་ཆུ་ཆེན་གཞུང་ལ་བསྐུར།། ཞེས་པ་མགོན་པོ་མེ་ལྕེ་ཕྲེང་བའི་རྒྱུད་ལས། སྦྱིན་སྲེག་གི་ལེའུ་སྟེ་ཉེར་གཅིག་པའོ། །།། དེ་ནས་ཡང་དག་བཤད་བྱ་བ།། ཤིང་གཅིག་དྲུང་ངམ་རྒྱ་གྲམ་ལམ།། ལྷ་ཁང་ཐེམ་རྩ་ལ་སོགས་དང།། མགོན་པོ་ཉིད་ཀྱི་ཞབས་འོག་གམ།། མཆོད་རྟེན་ནག་པོ་ལ་སོགས་པ།། ཀླུ་གནས་ངེས་པའི་ཆུ་མིག་གམ། ། མཁར་ཆེན་རླད་ལ་སོགས་པ་རུ།། གྲུ་གསུམ་ཀྲི་དོ་བྲུས་པ་ལ།། དུར་ཁྲོད་སོལ་བས་ནག་པོར་བྱུག། དེ་ནང་དོམ་ནག་མགོ་བོ་དང།། སྤྱང་ཀིའི་མགོ་དང་སྲེ་མོའི་མགོ། ཕག་པ་ནག་པོའི་མགོ་བོ་རྣམས།། དེ་རྣམས་དག་གི་མཆེ་བས་ནི། ། ལིངྒ་དེ་ལ་བཏབ་བྱས་ལ།། རབས་ཆད་གྲི་ཐོད་ནང་དུ་གཞུག། མཛེ་ཕོའི་ཐོད་པས་ཁ་བཅད་ལ།། ཕྱོགས་བཞིར་ལྕགས་ཀྱི་གཟེར་བཞི་གདབ།། སྐུད་པ་སྔོ་དམར་ཤི་སྐྲས་བཀྱིགས། ། གྲུ་གསུམ་དབུས་སུ་ཏྲཾ་བྲིས་ལ།། དེ་རུ་བཅུག་ལ་བསྟིམ་སྟེ་བཞག། དེ་སྟེང་དུར་ཁྲོད་གཡམ་པ་ལ།། དེ་དཀྱིལ་རྡོ་རྗེ་རྒྱ་གྲམ་བྲི།། རྗེས་སུ་མནལ་གཞག་པར་བྱ།། དེའི་སྟེང་དུར་ཁྲོད་རོ་རས་ལ།། འཁོར་ལོ་རྩིབས་བརྒྱད་བྲིས་བྱས་ལ། ། ལྟེ་བ་མགོན་པོའི་གཞལ་ཡས་ཁང།། ལེགས་པར་བསམ་སྟེ་རྩིབས་བརྒྱད་ལ།། མཁའ་འགྲོ་གཤིན་རྗེ་མ་བརྒྱད་བསྐྱེད།། ཕྱི་རིམ་རྩིབས་བཞི་ཕྱོགས་སྐྱོང་བཅུ།། དེ་ཡི་འཁོར་དུ་དཔལ་མགོན་ནི། ། བདུན་ཅུ་རྩ་གཉིས་བསྐྱེད་པར་བྱ།། འཁོར་ལོ་དེ་ཡི་ཕྱོགས་བཞི་དང།། མཚམས་བཞིར་ལཾ་ལས་རི་རབ་བསྐྱེད།། དེས་རྐྱང་མངོན་དུ་མནན་པར་བསམ།། ཆོས་སྐྱོང་བདུན་ཅུར་ཆང་ཕུད་གཏོར།། གཏོར་མ་བཏང་ཞིང་འོ་དོད་འབོད། ། བྲང་བརྡུང་གཡབ་མོས་གདབ་པར་བྱ།། དེ་ནས་ཁྲོ་བོའི་སྟངས་སྟབས་ཀྱིས།། བཅགས་ཤིང་གནན་པར་བྱ་བའོ།། དེ་ནས་དྲག་སྔགས་དེ་དག་བཟླས།། ཨོཾ་སྟྭ་བྷ་རཀྴ་ནན། པཱ་ཤཾ་ཀུ་རུ་ནན། པུཥྟིཾ་ཀུ་རུ་ནན། ཤཱན་ཏིང་ཀུ་རུ་ནན། ཆེ་གེ་མོ་ནན་ཨཱ་བེ་ཤ་མཱ་ར་ཡ་ཕཊ། ཨོཾ་ཤྲཱི་སྟི་ཧྲཱི:ཥྟཱྀ:ནན། ཀཱ་ལ་རཱུ་པ། ཤྲཱི་རཀྴ་ཡེ་ཙཀྲ་ཏྲི་ནན། རུ་རུ་པས་ནན། དེ་སྐད་མནན་གཏད་བཅོལ་གཏམ་བྱ། ། ཞེས་པས་མགོན་པོ་མེ་ལྕེ་ཕྲེང་བའི་རྒྱུད་ལས། མནན་པས་བསད་པའི་ལེའུ་སྟེ་ཉེར་གཉིས་པའོ།།།། བསད་ལས་ལྔའི་ལེའུ་དུམ་བུ་དེ་ལྔ་པའོ།།།། གནས་བཞི་པའོ། །།། དེ་ནས་ཡང་དག་བཤད་བྱ་བ།། ལོག་གནོན་མན་ངག་རིམ་པ་ནི།། ལོག་དང་རྡུགས་དང་སྐྱངས་པ་དང།། འབྱམས་དང་ལས་མ་བཏུབ་པ་དང།། མགོན་པོ་རྦད་པ་ནང་འདོམ་ན།། དེ་ཚེ་མན་ངག་འདི་ལྟར་བྱ། ། མགོན་པོ་ལོག་པར་འགྱུར་བ་ན།། རོ་རས་དག་ལ་མགོན་པོ་བྲི།། སྙིང་གར་ཙ་ཀྲ་རྩིབས་བརྒྱད་ལ།། ཡིག་འབྲུ་དགུ་པ་བྲི་བར་བྱ།། གྲི་ཁྲག་དམེ་པོའི་ཁྲག་དང་ནི།། དུག་དང་རོ་སོལ་སྣགས་ཚས་བྲི།། མུ་ཁྱུད་ནད་མའི་ཡིག་འབྲུ་བཅུ། ། ཐ་མ་ཡིག་གེ་བཅུ་པ་བྲི།། མ་ཡོ་མ་འཁྱོག་མ་ནོར་བྲི།། དེའི་མཐར་མེའི་རྡོ་རྗེས་བསྐོར།། རབ་གནས་བྱས་ཏེ་མདུན་དུ་བཞག། དབུས་ནས་གཟུངས་ཐག་སྣ་ལྔས་གདགས།། རང་གིས་གཟུང་ནས་ཏིང་འཛིན་ནི། ། བདག་ཉིད་ཆོ་གས་ཕྱག་རྡོར་ཏེ།། ཤིན་ཏུ་གཟི་བརྗིད་ལྡན་པར་བསྐྱེད།། མདུན་དུ་གདན་སྟེང་ཧཱུཾ་ནག་ལས།། ལས་ཀྱི་མགོན་པོ་ཚུལ་བཞིན་བསྐྱེད།། དེ་ཡི་སྤྱི་གཙུག་ཡེ་ཤེས་ཀྱི།། མགོན་པོ་གྲི་གུག་བསྣམས་པ་བསྐྱེད། ། འོད་འཕྲོས་གནས་ནས་སྤྱན་དྲངས་ནས།། བསྐྱེད་པ་དེ་ལ་བསྟིམ་པར་བྱ།། དེ་ནས་བདག་ལས་འོད་འཕྲོས་ནས།། དོན་གཉིས་བྱས་ཏེ་སླར་འདུས་པས།། རྡོ་རྗེའི་གུར་དང་ར་བ་དང།། རྡོ་རྗེ་མིག་མངས་རིས་སུ་གྱུར། ། དེ་ཡི་ཕྱི་རིམ་མཚོན་ཆ་ནི།། དཔལ་ཡང་ཕྱིར་བསྟན་མཚོན་ཆ་འཕྲོ།། དེ་ཡི་ཕྱི་རིམ་མེ་ལྕེ་འཕྲོ།། འབར་དང་འཚུབ་པས་གདོན་བཟློག་བསམ།། མདུན་དུ་མགོན་པོའི་སྙིང་ག་ན།། ཧཱུཾ་ནག་གནས་པ་ལྕགས་ཀྱུ་ནི། ། བདག་གི་སྙིང་ག་ནས་འཕྲོས་བཟུང།། དེ་ནས་མཚོན་ཆས་མུ་ཁྱུད་བསྐོར།། དེ་ནས་བར་མ་དེ་ནས་དབུས།། རིམ་པས་དྲག་མིན་བུལ་མིན་བསྐོར།། དམིགས་པ་གཏད་པ་ཉིན་གཅིག་བྱ། ། དེ་ནས་བཅུ་པ་ཟློག་གཤམ་ལ།། དགུ་པ་བཅུ་པ་བཟློག་པ་དྲུག། དག་པར་བྱས་ལ་ཆུ་རྒྱུན་བཞིན།། བར་མ་ཆད་པར་རབ་དམིགས་ལ།། མགོན་པོ་དྲག་ཏུ་འཁོར་བར་བསམ།། བར་སྣང་མཁའ་ཉི་ཤར་བཞིན། ། མགོན་པོ་ཆེན་དང་བདག་ཉིད་ནི།། ཕྱག་ན་རྡོ་རྗེ་འོད་ཟེར་བསྐྱིལ་ཏེ་བཀྱིགས།། དེ་ནས་ཡུན་མི་རུང་བར་བསྐོར།། དེ་ནས་མཆོད་པ་ལས་ལ་བཏང།། ཞེས་པ་མེ་ལྕེ་ཕྲེང་བའི་རྒྱུད་ལས།། ལོག་གནོན་ཡང་བཟློག་ཏུ་བཏང་བའི་ལེའུ་སྟེ་ཉེར་གསུམ་པའོ། །།། དེ་ནས་མགོན་པོ་རྡུགས་ནས་སུ།། ཇི་ལྟར་བྱས་ཀྱང་ཅང་མེད་ན།། དཀྲུག་པའི་རིམ་པ་དེ་ལྟར་བྱ།། བདག་ཉིད་ཕྱག་ན་རྡོ་རྗེ་ཡིས།། བསད་པ་སྔོན་དྲང་རྦད་པར་བྱ། ། འབོད་པ་ཐ་མར་བཟླས་ཤིང་དྲང།། གོས་རྣམས་མགོ་མཇུག་བཟློག་ལ་གོན།། བེང་བཟློག་ཁྱེར་ལ་འཁོར་ལོ་ནི།། གོང་ལྟར་བྲིས་ལ་རབ་གནས་ཅན།། སྔོ་དམར་ཅིང་སྐེད་ཀླད་ལ་བསྐོར།། དགྲ་གཟུགས་དགུ་བྱས་དང་མས་དབུགས། ། ཙཀྲའི་སྟེང་དུ་གཞག་པར་བྱ།། དགྲ་བོས་མགོན་ལ་སྔོ་བར་བསམ།། དེ་ནས་བསྐུལ་བ་ཆེ་གེ་མོ།། ཁྱོད་ལ་བསྔོས་སོ་འདི་སོར་བྱ།། ཅེས་པས་མགོན་པོ་རྔུགས་ན་བསད་པའི་ལེའུ་སྟེ་ཉེར་བཞི་པའོ། །།། མགོན་པོ་ཁོངས་སུ་སྲུང་བ་བྱས།། དེ་ཚེ་སྐྱེངས་པར་གྱུར་པ་ན།། རང་གིས་གོས་ནག་གོན་ནས་སུ།། སྐྲ་རྣམས་ཐོར་ཚུགས་བཅིངས་ནས་སུ།། གདོང་ལ་ཁྲག་གིས་བྱུག་ནས་སུ།། དགྲ་བོའི་ཡུལ་ཕྱོགས་ཁ་བལྟས་ནས། ། ཆང་ཕུད་རཀྟ་གཏོར་བཞིན་དུ།། དྲག་སྔགས་འདི་དག་བཟླས་པར་བྱ།། ཨོཾ་ཤྲཱི་མ་ཧཱ་ཀཱ་ལ་ཡཀྴ་ཀ་ཁ་ཁཱ་ཧི་ཁཱ་ཧཱི།། ཕུད་དེ་ཙ་ཧོ། བཛྲ་ཡཀྴ། མ་ལཱ་བེ་ཏཱ་ལཱི། ཁ་ཁ་ཁཱ་ཧི་ཁཱ་ཧི། ཨོཾ་མ་ཧཱ་ཀཱ་ལ་ཤྲཱི་ཕུར་ཤན་ཏིང་ཕུར་ཕུར་ཏི་ཕུར། མ་ཧཱ་ཀཱ་ལ་བཛྲ་ནི་ཕུར། ད་ཧ་ད་ཧ་ཕུར་སྭཱ་ཧཱ། དེ་སྐད་ཅེས་པས་གཏོར་མ་བཏང།། དེ་ནས་གསོལ་བ་གདབ་པར་བྱ།། ཞེས་པས་མེ་ལྕེ་ཕྲེང་བའི་རྒྱུད་ལས། མགོན་པོ་སྐྱེངས་ན་ངར་གདགས་པའི་ལེའུ་སྟེ་ཉེར་ལྔ་པའོ། །།། དེ་ནས་མགོན་པོ་འབྱམས་པར་གྱུར་པ་ན།། ཁྲོ་ཆུའམ་ནི་ཟེ་ཧི་མ།། བླ་རྡོ་བྱས་པ་དེ་དག་ནི།། བེང་ལ་བཏགས་ཏེ་འབོད་པ་བཟླས།། ཏིང་འཛིན་བསམ་པར་བྱས་ནས་སུ། ། གདུང་བའི་དབྱངས་ཀྱིས་འབོད་པར་བྱ།། སྲོག་གི་འཁོར་ལོ་ལུས་ལ་བཅངས།། ཡང་ན་བིང་དང་བཅས་ནས་སུ།། རང་གི་མལ་སར་གཟུག་པར་བྱ།། མགོན་པོའི་ཟ་ལམ་བསྟན་པར་བྱ།། ཨོཾ་ཤྲཱི་མ་ཧཱ་ཀཱ་ལ་རཀྴ་དུ་བེང་ནར་ཛ། ཛཿཧཱུཾ་བཾ་ཧོཿ། ཆེ་གེ་མོ་ལ་དམིགས་པ་གཏད།། ཅེས་པའི་མེ་ལྕེ་ཕྲེང་བའི་རྒྱུད་ལས། འབྱམས་ན་བརྟོད་པའི་ལེའུ་སྟེ་ཉེར་དྲུག་པའོ།།།། ལས་མ་བཏུབ་ན་ཤི་ས་བསྟན།། དཀྱིལ་འཁོར་ཁྲུ་དོ་སོར་བཞི་བྱ། ། དབུས་སུ་ཟླུམ་པོར་བསྐོར་བྱས་ལ།། ཕྱི་རོལ་སྒོ་བཞི་དགོད་པར་བྱ།། དབུས་སུ་པདྨ་འདབ་བཞི་ལ།། ཡིག་འབྲུ་བཅུ་པ་དགོད་པར་བྱ།། དེ་ལ་མགོན་པོའི་སྐུ་བཞི་དགོད།། རྫས་རྣམས་ཀུན་ཡང་ཚང་བར་དགོད། ། དེ་ནས་ཏིང་འཛིན་གསལ་བ་ཡིས།། སྤྱན་དྲང་ཕྱག་བྱ་མཆོད་པ་དབུལ།། དེ་ནས་བསྟོད་པ་ཚར་བྱས་ནས།། དབུས་ཀྱི་གྲུ་གསུམ་དག་ལ་ནི།། མགོན་པོ་ནག་པོ་རབ་དམིགས་ལ།། ཨེ་ཧྱེ་ཧི་ཛཿཧཱུཾ་བཾ་ཧོཿ།། དེ་ནས་བསྐུལ་བ་འདི་བཏང་ངོ། ། ཧཱུཾ་ལས་ཀྱི་རིགས་མཆོག་དཔའ་ལྡན་གོས་སྔོན་ཅན།། མགོན་པོ་འདུལ་ཕྱིར་སྐུ་མདོག་འཇིགས་ཚུལ་ཅན།། དེ་ཡི་སྟོབས་ཀྱིས་མགོན་པོ་འདུལ་མཛད་པ།། ལས་ཀྱི་རིགས་མཆོག་ཐུགས་དམ་དུས་ལ་བབ། ། ཅེས་པས་ལག་གཡོན་རྟ་མགྲིན་ལ།། གཡས་པས་ཕྱག་ན་རྡོ་རྗེ་བསྒོམ།། ཐལ་མོའི་བར་དུ་སྲོག་འཁོར་ནི།། མག་བཟློག་བཅུག་སྟེ་བསྡམས་བཞིན་དུ།། དྲག་སྔགས་འདི་དག་སྲོག་སྔགས་ནི།། གོ་བཟློག་པ་ལ་གདགས་པར་བྱ། ། ཨོཾ་ནི་ཡཾ་ས་རཾ་ངཾ་རཾ་བཛྲ་པྲ་མརྟ་ཡ་མ་ཧཱ་ཀཱ་ལ་ཤི་ཡོ་ཡོ་ནི་ན། ཏདྱ་ཐཱ་ལཱ+ེ་གི་སྟྭཾ་བྷ་ནི་ནན་སྭཱ་ཧཱ། ཞེས་པས་རྟ་མགྲིན་དང་ཕྱག་ན་རྡོ་རྗེས་གཟེར་བར་བསམ། དེ་ལྟར་སྦྱོར་བ་སྤོགས་བྱས་པས། ། མགོན་པོ་དཀྱིལ་འཁོར་འཇུག་པར་མཁྱེན།། འཁོར་རྣམས་ཤི་ས་བསྟན་མཐོང་སྟེ།། རང་རང་ནུས་པས་ལས་བྱེད་དོ།། མེ་ལྕེ་ཕྲེང་བའི་རྒྱུད་ལས། མགོན་པོ་ཤི་ས་བསྟན་པའི་ལེའུ་སྟེ་ཉེར་བདུན་པའོ། །།། དེ་ནས་གཞན་ཡང་ནང་འགྲས་ནས།། མགོན་པོ་ཐམས་སོ་ཐམས་ཀྱང་ཅད་བྱུང་ནས་སུ།། མགོན་པོ་ནང་རྦད་ཁ་འདོམ་ན།། ཁྱི་ཐོད་ར་ཐོད་ཝ་ཐོད་སྤྱང་ཐོད་བཞིར།། ཁྱི་ཐོད་ཕོ་ལྷའི་དབྲལ་སྔགས་དང། ། ཁོ་ཡི་མིང་རུས་གྲོ་གར་བྲིས།། ནང་དུ་བསྩལ་ཧེ་གུ་གུལ་བདུག། དྲག་པོའི་སྔགས་འདི་བཟླ་བར་བྱ།། ཨོཾ་མ་ཧཱ་ཤིནྟཾ། ཤ་རའི་ཏི་གུ་ས་ར་ན། མ་ཧཱ་ཀཱ་ལ། ཆེ་གེ་མོ་དང་ཕོ་ལྷར་ཕྱེ། སྙིང་དང་གློ་བའི་རྟགས་ཐོང། རུས་པའི་ཁབ་ཀྱིས་གློ་སྙིང་རྩ་བ་མར་ཁུག། ཅེས་རུས་པའི་ཁབ་ཀྱིས་དཀྲུག་ཅིང།། ཕོ་ལྷ་དགྲ་ལྷ་དང་བྲལ་བར་བསྒོམ། ཝ་ཐོད་དུ་ཁོའི་ཡུལ་ལྷ་དང་དབྲལ་བའི་སྔགས། ཁོའི་མིང་བྱང་དག་སྤྲེལ་ཏེ་གཞུག། དྲག་སྔགས་འདི་ཡིས་བྲབ་པར་བྱ། དེའི་ཁཱ་ལས་ཀྲ་བྷིད་ཙི་ན་ཀཾ་ནག་པོ་ནང་མི་དང་ཡུལ་ལྷར་ཕྱེ། དེ་སྐད་གུ་གུལ་དུད་པས་བདུག། ཡུལ་ལྷ་དག་དང་བྲལ་བར་བསམ།། ར་ཐོད་ནང་དུ་རྒྱ་ཤོག་ལ།། ཆེ་གེ་མོ་ཡི་གཟུགས་བྲིས་ལ། མ་ཧཱ་ཀཱ་ལ་དག་དང་བྲལ་བར་བསམ་ལ་སྔགས། ལྷ་མཆོག་ནག་པོ་ཐ་མ་སྔགས་ཀྱིས་བསྐོར་བར། ར་ཐོད་ནང་དུ་བིང་གཟུགས་བཅས་ཏེ་གཞུག། དྲག་སྔགས་འདི་དག་བཟླས་བ་བྱ། ཨོཾ་ཤྲཱི་མ་ཧཱ་ཀཱ་ལ་རཀྴ་དུ་པེ་ཙ་ལེ་ལེ་མུ་ལེ་ཀརྒ་གི་ཀརྨ་མ་ཧཱ་ཀཱ་ལ་ཧཱུཾ་ཕཊ། དེ་སྐད་མ་ཧཱ་ཀཱ་ལ་དང་དབྱེ། ཆེ་གེ་མོ་མཱ་ར་ཡ་རྦད། ཐུཾ་རི་ལི་ལི། སརྦ་ཀརྨ་ཙ་ར་མ་ཡ་རྦད། དུམ་ནི་སྙིང་རྩ་རྦུད། དུ་མ་ནེ་ཙིཏྟ་མཱ་ར་ཡ། སྲོག་སྲོག་ཤཾ་ཤཾ། ཁྱེར་ཁྱེར་མ་ཧཱ་ཀཱ་ལ་ག་ཏ་བི་ཏི་རྦད། ཆེ་གེ་མོ་དང་ལྷ་སྲུངས་སུ་འབྱེད། དུན་ཏིང་པ་ཏྲ་མ་ཧཱ་ཀཱ་ལ་ཧཱུཾ་ཕཊ།། དེ་སྐད་མ་ཧཱ་ཀཱ་ལ་དང་དབྱེ།། སྤྱང་ཐོད་དུ་ནི་རང་གི་ལྷ།། ཀུན་གྱི་སྙིང་པོ་བྲིས་ཏེ་གཞུག། དྲིལ་བ་འདི་དག་གཞུག་པར་བྱ།། ཨོཾ་བྷནྡ་བ་སུ་ད། དེ་བ་ཨཾ་ཀ་བུམ་པ་པྲ་ཏྲ་མུ་ཁི་རཾ་ཛ་ཏི་ཙིཏྟ་མ་རྒྱུད། མ་ཧཱ་ཀཱ་ལ་རཀྴ། ཤ་ཏྲཱུཾ་ནི་མཱ་ར་ཡ་རྦད།། དེ་སྐད་ཐོད་པ་དང་དུ་གྲིལ།། རང་གི་སྒྲུབ་ཁང་ནང་དུ་བཟུང། ། རང་གི་ལུས་ལ་བླ་རྡོར་བཟུང།། སྔགས་ནི་ཐམས་ཅད་བཟླས་པར་བྱ།། བསྲུངས་པ་དེ་བཞིན་གདགས་པར་བྱ།། མིག་སྔར་ལྷ་འདྲེ་བྱུང་ན་བདེན་པ་བདར།། ཕུད་གཏོར་གཏོར་མ་སྦྱིན་པར་བྱ།། དེས་ཀྱང་ཐུབ་པར་མ་བྱུང་ན། ། ཏིང་འཛིན་གསལ་ལ་སྔགས་འདི་བཟླས།། ཨོཾ་མ་ཧཱ་ཀཱ་ལ་སརྦ་དུཥྟཱན་སརྦ་ག་ས་དྲ་ཏ་ན་ཕཊ། ཧྱ་ཧྱ་ཧྱ། བཛྲ་པཱ་ཎི་ཧཱུཾ་ཕཊ། ཨ་ཀྲོ་ཤ་རྦུད། རོ་ཏ་རྟག་ཐུམ་རིལ། བདག་ལ་གནོད་པར་བྱེད་པ་མཱ་ར་ལ་རྦུད་ཧཱུཾ་ཕཊ། དེ་སྐད་བཟླས་ལ་ལམ་རྒྱ་གྲམ་དུ་སོང་ལ། གྲུ་གསུམ་དོང་དུ་བྲུས་བྱས་ལ།། དབུས་སུ་རྡོ་རྗེ་རྒྱ་གྲམ་བྲི།། དེ་ནས་ཐོད་པ་རིམ་གྱིས་གཞུག། དེ་ནས་སྔགས་རྣམས་བཟླས་ཤིང་མནན།། དེ་ཡི་སྟེང་དུ་ཐུན་ཡང་བརྡེག། དུག་གསུམ་དག་གིས་ཁ་བཅད་དོ།། དེ་ནས་དུག་གསུམ་རོ་གཡམ་ལ།། རི་རབ་རྡོ་རྗེ་རྒྱ་གྲམ་བྲིས་ལ་མནན།། དེའི་སྟེང་རྡོ་རྗེའི་བྲོས་རྒྱས་གདབ།། ཅེས་པས་མགོན་པོ་མེ་ལྕེ་ཕྲེང་བའི་རྒྱུད་ལས། མགོན་པོ་ལོག་ན་མནན་པའི་ལེའུ་སྟེ་ཉེར་བརྒྱད་པའོ། །།། ལོག་ནོན་གྱི་དུམ་བུ་སྟེ་དྲུག་པའོ།། གནས་ལྔ་པའོ།།།། དེ་ནས་ལས་ཚོགས་རིམ་པ་བཞིན།། གཏོར་མའི་མན་ངག་དམ་པ་ནི།། བྷནྡྷའམ་ནི་རིན་ཆེན་སྣོད། ། བརྒྱའམ་ལྔ་བཅུའི་བར་དུ་ནི།། ཞི་རྒྱས་དབང་དྲག་གཏོར་མ་བྱ།། ཟླུམ་དང་ཟླ་གམ་གྲུ་བཞི་དང།། གྲུ་གསུམ་ནང་དུ་བཤོས་བུ་བྱ།། དེ་མཐར་ལེབ་བུ་དེ་འདྲས་བསྐོར།། ཤ་ཆེན་ལྔ་དང་ལ་ཕུག་ཆང།། ཁྲག་དང་སྒོག་པ་ཉ་ཤ་དང། ། དཀར་གསུམ་དང་ནི་མངར་གསུམ་དང།། གཏོར་མ་བྱས་ཏེ་དབུལ་བའི་ཕྱིར།། མདུན་དུ་བཞག་ལ་བྱིན་བརླབ་བྱ།། བསྐྱེད་རིམ་གཞུང་དུ་བྱ་བ་ནི།། མདུན་དུ་ཡཾ་ལས་རླུང་གི་དབུས།། ཡཾ་ཡིག་མཚན་ཏེ་དར་གྱིས་སྦར། ། དེ་སྟེང་རཾ་ལས་མེ་དཔུང་སྟེ།། རཾ་ཡཾ་ཁཾ་གིས་བསྲེག་སྦྱང་གཏོར།། དེ་ནས་ཨ་ལས་ཐོད་ནང་དུ།། བདུད་རྩིའི་ལྔ་དང་ཤ་ལྔ་བསམ།། རླུང་གཡོས་མེ་སྤར་ཐོད་པ་ཁོལ།། བེང་གིས་དཀྲུགས་ཏེ་སྦྱངས་པ་ལས། ། ཨོཾ་ཨཱཿཧཱུཾ་གིས་བྱིན་གྱིས་བརླབས།། སྐུ་གསུང་ཐུགས་ཀྱི་རང་བཞིན་ལ།། ཀུན་ཀྱང་ཚིམ་པར་བྱེད་པ་དང།། ཨོཾ་ཙནྜ་མ་ཧཱ་ཀཱ་ལ་བཛྲ་ཤྲཱི་ནི།། ཨི་དམ་བ་ལིང་གྲྀཧྞ་གྲིཧྞ་སྭཱ་ཧཱ། ཡང་ཡང་འབུམ་སྔགས་བཟླས་ཀྱིས་བར། ། པདྨའི་ལག་པར་གྱེན་དུ་བསྟབ།། ཚིམ་སྟེ་དགྲ་ཡི་གནས་སུ་མངག། ཅེས་པས་མགོན་པོ་མེ་ལྕེ་ཕྲེང་བའི་རྒྱུད་ལས། གཏོར་མའི་ལས་ཚོགས་བསྟན་པའི་ལེའུ་སྟེ་ཉེར་དགུ་པའོ། །།། དེ་ནས་ཡང་དག་བཤད་བྱ་བ།། ལས་ཀྱི་བསད་པའི་མན་ངག་ནི།། དུར་ཁྲོད་ལ་སོགས་གནས་དག་ཏུ།། བདག་ཉིད་ཡི་དམ་ཏིང་འཛིན་གྱིས།། དུར་ཁྲོད་རས་ནི་དྲང་བ་ལ།། ཨོཾ་མ་ཧཱ་ཀཱ་ལ་ཆེ་གེ་མོ་མ་ཡ། གྲྀཧྞ་གྲྀཧྞ། བྷནྡ་བྷནྡ་ཧཱུཾ་ཧཱུཾ་ཕཊ་ཕཊ། དེ་སྐད་ཅེས་ནི་དུག་ཆུས་བྲི།། གཟུགས་སོར་བཅུ་དྲུག་བྱས་ནས་སུ།། དེ་ཡི་སྙིང་གར་གཞུག་པར་བྱ།། དེ་ཉིད་མི་གྲིར་ཤི་བ་ཡི།། ཐོད་པ་གཉིས་ཀྱི་བར་དུ་གཞུག། སྐུད་པ་ནག་པོས་རྒྱ་གྲམ་དཀྲི། ། གྲུ་གསུམ་དོང་ནང་རོ་སོལ་བྱུག། དེ་རུ་སེ་ཕུར་གསུམ་བཙུག་ལ།། དེ་ནས་ཐོད་པ་བཙུག་བྱས་ནས།། རིགས་ངན་ཁྱིམ་མམ་བཤན་པའི་ཁྱིམ་ནས་མེ་བླངས་ལ།། དྲི་ཡི་ཚེར་ཅན་མེ་བུས་ལ། ། རླངས་ཕྱིན་པར་ནི་ལན་གསུམ་བསྲོ།། དེ་རང་ཉིད་དུ་དམ་དུ་སྦ།། ཚངས་པའི་ཚེ་དང་ལྡན་ཡང་འཆི།། ཞེས་མགོན་པོ་མེ་ལྕེ་ཕྲེང་བའི་རྒྱུད་ལས། ལས་ཚོགས་ལས་ཀྱིས་བསད་པའི་ལེའུ་སྟེ་སུམ་ཅུ་པའོ། །།། དེ་ནས་ཡང་དག་བཤད་བྱ་བ།། གནོད་བྱེད་དགྲ་བོ་ལྷ་དང་དབྱེ།། ལྷ་ལ་རྣམ་པ་ལྔ་བཤད་དེ།། འཚོ་བར་བྱེད་པ་ཡུལ་ལྷ་ལ།། གུ་གུལ་ནག་པོས་བསྲེག་པར་བྱ།། སྐྱོབ་པར་བྱེད་པ་དགྲ་ལྷ་སྟེ།། རྟ་བོན་ས་ཡི་དུད་པས་བདུག། གྲོགས་བྱེད་པ་ནི་མ་ལྷ་སྟེ།། ཁྱི་ལུད་དག་གིས་བསྐྲད་པར་བྱ།། བསྲུང་བའི་ལྷ་ནི་སྲོག་ལྷ་སྟེ།། ཤ་ཆེན་དག་གིས་སྐྲོད་པར་བྱེད།། འགོ་བར་བྱེད་པ་ཞང་ལྷ་སྟེ།། བུད་མེད་དོར་རྟས་བསྐྲད་པར་བྱ། ། ཅེས་པས་མེ་ལྕེ་ཕྲེང་བའི་རྒྱུད་ལས། ལྷ་དང་དབྱེ་བའི་ལེའུ་སྟེ་སོ་གཅིག་པའོ།།།། གཞན་ཡང་དབྱེ་བའི་ཆོ་ག་ནི།། མི་དང་ལྷ་རུ་དབྱེ་བ་ཡང། ཕོ་དང་མོ་རུ་དབྱེ་ཡང་རུང།། བྱ་རོག་དག་གི་པགས་པ་ལ། ། སྨན་གྱིས་ལྷ་ཡི་མིང་བྱང་བྲི།། འུག་པའི་པགས་པ་དག་ལ་ཡང།། དུག་ཆུས་མི་གཟུགས་མིང་བྱང་བྲི།། བྱ་རོག་ཕོ་རོག་རྐང་གིས་ཏེ།། འུག་པ་འུག་པའི་རྐང་གིས་སྒྲོས།། དེ་བཞིན་སྨྱུག་གུ་བྱས་ནས་ནི།། རྗེས་དང་ས་གཙང་དག་ལ་ཡང། ། བྱ་རོག་འུག་པ་བྱས་ནས་སུ།། གོང་གི་དེ་དག་དེ་རུ་གཞུག། བྱ་རོག་སྤྱང་ཀི་དག་ལ་བསྐྱོན།། འུག་པ་ལུག་ལ་བསྐྱོན་བྱས་ལ།། མགོ་ལ་ཕོ་རོག་འུག་སྒྲོ་གཟུགས།། དབྱེ་བའི་དྲག་སྔགས་ཐུན་བྱ་བ། ། ཁྲོ་བོ་གཉིས་ནི་བསྐུལ་བྱས་ནས།། རི་དྭགས་རྒྱབ་སྤྲད་དག་ལ་ཡང།། དྲག་པོའི་ཁང་པ་ཁྲུ་རེའི་ཚད།། ནང་དུ་དུག་ཁྲག་རོ་སོལ་བྱུག། དེ་རུ་གཉིས་པོ་སོ་སོར་ཕྲལ།། ཁ་སྦུབ་དག་ཏུ་རྒྱ་གྲམ་མནན།། གང་ཡིན་མིང་རུས་ངན་མཚང་ཅན། ། ཕྱིར་ཕྱོགས་པས་ཡིད་འཁྲུག་པར་འགྱུར།། འཐབས་ཏེ་དབྱེ་བར་འགྱུར་བ་ཡིན།། རྟ་ལྤགས་དག་ལ་རྩིབས་བརྒྱད་པ།། དབྱེ་བ་སོལ་བས་མིང་སྤེལ་བྲི།། རྟ་ལྤགས་དག་དང་སྐྱེ་ཤ་དང།། ཁམ་ས་དག་ལ་རྟག་གཟུགས་བྲི། ། སྙིང་གར་འཁོར་ལོ་བཅུག་བྱས་ལ།། མ་ཧེའི་པགས་པར་མ་ཧེའི་གཟུགས།། ལྟ་བར་དབྱེ་སྔགས་ཕྱོགས་ཕྱོགས་བསྐོར།། མ་ཧེའི་ལྕི་བ་ཁམ་ས་ལ།། མ་ཧེ་ཟལ་པོའི་གཟུགས་བྱས་ཏེ། ། འཁོར་ལོ་སྙིང་གར་བཅུག་བྱས་ཏེ།། ཏིང་འཛིན་མི་དང་དབྱེ་བའམ།། ལྷ་དང་དབྱེ་བ་བསམ་ནས་སུ།། དབྱེ་སྔགས་ཐུན་གྱིས་དྲག་པོ་ཡིས།། ཁང་པར་བཅུག་སྟེ་བྲབ་པར་བྱ།། སེང་ལྡེང་ཕུར་བུ་དག་ལ་དབྱེ་སྔགས་ནི། ། ནང་དུ་བསྐོར་ཏེ་ཕྱི་རུ་རྟ་ཡི་ཡང།། སོག་པའི་ཕྲག་ཏུ་གདབ་པར་བྱ།། ལྕགས་ཕུར་དབྱེ་སྔགས་ཕྱིན་ཕྱོགས་བསྐོར།། མ་ཧེ་དག་གི་སོག་ཕྲག་གདབ།། གཡས་པས་བཅད་ཅིང་ཕྱི་ལ་བོར།། གཡོན་པས་དབྱེ་ཞིང་ཕྱི་ལ་བསྐྱུར། ། མི་འཕྲད་དབྱེ་འགྱུར་ཐེ་ཙོམ་མེད།། ཅེས་པས་མགོན་པོ་མེ་ལྕེ་ཕྲེང་བའི་རྒྱུད་ལས། དབྱེ་ལས་ཀྱི་རིམ་པའི་ལེའུ་སྟེ་སོ་གཉིས་པའོ།།།། གཞན་ཡང་བསྐྲད་པར་བྱ་བ་ནི།། གནོད་བྱེད་བསྐྲད་དང་གཞན་ཡང་བསྐྲད། ། རྔ་མོ་དག་གི་པགས་པ་ལ།། དམ་ཚིག་ལྡན་ལ་བརྣག་ཐུབ་བཟོ།། ངང་རིང་བརྟན་པའི་དད་པ་ཡིས།། ལྡོང་རོས་དག་གིས་རྩིབས་བཅུ་གཉིས།། བསྐྲད་པའི་སྔགས་ཀྱིས་བརྒྱན་པ་ལ།། དབུས་སུ་ཁོ་ཉིད་སྐྲོད་ཕྲེང་མཛད། ། རྔ་མོའི་སྟེང་དུ་དེ་བཞིན་བསྐྱོན།། དེ་བཞིན་ལེགས་པར་བྲིས་ནས་སུ།། བདག་གིས་གྲོགས་བྱེད་མགོན་པོ་ནི།། ཁྲོ་བོ་རྡོ་རྗེ་བཞིན་དུ་བསྒོམ།། ཀུན་གྱི་མཆོག་དང་རབ་གྱུར་པ།། རྔ་མོའི་སྟེང་དུ་བཙན་དཀྱིལ་དུ། ། བརྗིད་པའི་འགྱིང་བར་རབ་བཞུགས་ཏེ།། འདོགས་པར་བྱེད་པ་དབྱུག་ཏོར་བཅས།། ཐོགས་ཏེ་བསྐྲད་པའི་སྦྱོར་བ་བྱས།། ཕྱི་རོལ་ཕྱོགས་ཤིང་བལྟས་པ་ལ།། མྱུར་དུ་བསྐྲད་པའི་དྲག་སྔགས་བཟླས། ། དེས་ནི་མྱུར་དུ་གཞན་དུ་འགྲོ།། གང་གནོད་པའམ་གང་གནས་ཀྱི།། ཡུལ་དུ་མནན་པས་འགྲུབ་པར་འགྱུར།། ཞེས་པས་མེ་ལྕེ་ཕྲེང་བའི་རྒྱུད་ལས། བསྐྲད་པ་ལས་ཚོགས་ཀྱི་ལེའུ་སྟེ་སོ་གསུམ་པའོ། །།། དེ་ནས་དབབ་པའི་རིམ་པ་ནི།། བུས་པ་གཙང་མ་ཁྲུས་བྱས་ལ།། དར་དམར་གུར་ཁང་ཐོག་ཏུ་བཞག། མར་མེའི་ཕྲེང་བས་མཐའ་བསྐོར་ལ།། མགོན་པོའི་ཏིང་འཛིན་གསལ་བ་ཡིས།། སྟོང་པའི་ཀློང་དུ་གཞུ་རྒྱུད་གང། ། རྐང་བཙུགས་ཤེས་པ་བསྒྲིམས་བྱས་ལ།། ཨོཾ་མ་ཧཱ་ཀཱ་ལ་རཀྴ་དུ་བེར་ནི་ཛཿཧཱུཾ་བཾ་ཧོཿ།། ཧོཾ་མཾ་ཏིཥྛ་ལྷན་ལྷན། ཅེས་ལྕགས་ཀྱུའི་ཕྱག་རྒྱས་དགུག་ཅིང་བསྟིམ།། འདར་དང་སྔངས་དང་རྒོད་པ་འབྱུང། ། རི་དྭགས་ཚོ་ནག་ཨཱ་ཙ་ར།། མཐོང་ན་ངེས་པར་ཕེབས་པར་འགྱུར།། ཨ་ཀ་རུ་ཡི་དུད་པ་བཏང།། གཏོར་མ་ཆང་དང་ཟས་ཕུད་དེ་བཞིན་བྱ།། ཞེས་པས་མགོན་པོ་མེ་ལྕེ་ཕྲེང་བའི་རྒྱུད་ལས། དབབ་པ་ལས་ཚོགས་ཀྱི་ལེའུ་སྟེ་སོ་བཞི་པའོ། །།། དེ་ནས་བེང་གི་བཅས་དག་ནི།། ཙནྡན་སེང་ལྡིང་ཤིར་ཤིང་དང།། སེང་ལྡིང་མཛོ་མོ་གླ་བ་དང།། རྒྱ་ཤུག་དག་ལ་འདོམ་གང་ངམ།། མདའ་གང་ཚད་དུ་བྱས་པ་ལ།། ལོགས་བརྒྱད་ཆང་ཟུང་རྒྱ་མདུད་གཉིས་ལྡན་པ། ། མགོ་བོར་ནོར་བུ་མེ་འབར་བ།། རྡོ་རྗེ་རྩེ་མོ་ཕུར་པའི་དཔལ།། ཁ་དོག་སྨུག་པོ་ཡང་ན་གནག། ཕྱོགས་བརྒྱད་ལྷ་སྲིན་སྡེ་བརྒྱད་ཀྱི།། སྲོག་སྙིང་དྲག་སྔགས་བཅས་པ་གཞུག། དར་དམར་ཅོད་པན་རྟ་མགྲིན་དང།། ཕྱག་ན་རྡོ་རྗེའི་སྔགས་དང་བཅས་པ་གདགས།། རྒྱ་མདུད་གོང་མར་འབོད་པ་བྲིས།། འོག་མ་རྦད་པ་དེ་བཞིན་ཏེ།། རྩེ་མོ་དབལ་ལ་བསད་པའོ།། ནང་དུ་ལོང་སྟོང་བྲུས་པ་རུ། ། ཁྲོ་ཆུ་ཟེ་ཧི་དག་ལ་ཡང།། ཧཱུཾ་བྲིས་ཧ་དང་བཅས་པ་ཡང།། སྲོག་ཅན་དར་དུ་གྲིལ་བར་བྱ།། ཁོང་སེང་ནང་ན་དེ་བཞིན་གཞུག། ལྕགས་ཕུར་དག་ཀྱང་དེ་བཞིན་ཏེ།། དབང་བསྐུར་བྱིན་བརླབ་ལྡན་པར་བྱ།། ཡང་ན་མི་འབྲལ་ལུས་ལ་བཅང། ། ཡང་ན་བེང་གི་ཁོང་སེང་ནང།། ལེ་བརྒན་སྲོག་འཁོར་ཅན་དུ་བྲི།། དེ་ནང་སྔ་རྡོར་བཅས་པ་བྱ།། བསྒྲུབ་དུས་བཙུགས་ཏེ་གཟུངས་ཐག་གདགས།། རྦད་དུས་དགྲ་ལ་དབལ་བསྟན་དྲིལ། ། བསད་དུས་དྲིལ་ཞིང་གསོར་ཞིང་གདབ།། འགྱང་ནག་ཟིར་ཅིང་མནན་ཅིང་བསྒྲིལ།། ལོག་ན་ཟློག་ཅིང་བསྐོར་ཞིང་ཟློག། འབྱམས་ན་བསྐོར་ཅིང་གཡབ་བཅིང་འབོད།། རྡུགས་ན་བདུད་རྩིས་བཀྲུ་ཞིང་གདབ། ། འཛིན་ཚུལ་བསྐོར་ཚུལ་ཕྱག་རྒྱ་ཡང།། དེ་བཞིན་མཁས་པས་ཤེས་པར་བྱ།། གསོར་ཚུལ་དེ་བཞིན་རྟོགས་པར་བྱ།། ཞེས་པས་མེ་ལྕེ་ཕྲེང་བའི་རྒྱུད་ལས། རྫས་ཀྱི་གཙོ་བོ་བེང་གི་བཅའ་གཞིའི་ལེའུ་སྟེ་སོ་ལྔ་པའོ། །།། དེ་ནས་ལྕགས་པར་རིམ་པ་ནི།། བཀྲ་མི་ཤིས་པའི་རྫས་ལྕགས་སམ།། མི་བསད་མཚོན་གྱི་ལྕགས་དག་ལ།། གྲུ་གསུམ་བྲེ་ཕྱེད་བྲེ་གང་བ།། གང་གྲུབ་ཚད་དུ་བྱས་ནས་སུ།། ནང་དུ་འབོད་རྦད་བསད་གསུམ་པོ། ། གཟོང་རིས་དག་ཏུ་བྱས་པའམ།། ཡང་ན་རྟ་ཡི་ཁྲག་གིས་བྲི།། དབང་དང་བྱིན་གྱིས་བརླབས་པ་དང།། སྒྲུབ་པའི་དུས་སུ་སྔ་དང་བཅད།། དམ་རྫས་བླུག་པ་དེ་བཞིན་བྱ།། འབོད་པའི་དུས་སུ་སྟོབས་དང་བསྐང། ། དབུལ་བའི་སྣོད་དུ་མ་ཆགས་མ་གས་པ།། དེ་བཞིན་བསད་ཚེ་གསད་པར་བྱ། ལོག་ཚེ་འཕྱར་ཏེ་བསྐོར་ཞིང་བཟློག། རྡུགས་ན་སྦུབ་ཅིང་དུ་བས་གཟིར།། འབྱམས་ན་ཙནྡན་ལ་སོགས་དང།། གདུག་པ་ཅན་གྱི་མེ་བུས་ལ། ། ནང་དུ་མི་ཁྲག་མི་ཤ་དང།། ལིངྒ་བླུག་སྟེ་བསྐོལ་ཞིང་གདུ།། མི་རྐང་དག་གིས་འཕྱར་ཞིང་དཀྲུག། བེང་ཡང་དེ་བཞིན་འཕྱར་བྱས་ཏེ།། ཡུན་རིང་བར་ནི་སྔགས་བཟློག་བཟླས།། དེས་ཀྱང་འགྲུབ་པར་མ་གྱུར་ན། ། གོང་གི་རླངས་པས་སྐུ་གཟུགས་དང།། སྲོག་གི་འཁོར་ལོ་བདུག་པར་བྱ།། སྔགས་བཟློག་འཆོལ་བས་ལྡོག་བྱུང་ན།། བདག་ཉིད་ཡི་དམ་ཏིང་འཛིན་གྱིས།། མགོན་པོ་མདུན་དུ་བཀུགས་བྱས་ནས།། དཔག་མེད་དམ་ཚིག་བསྒྲགས་ནས་སུ། ། ཅི་བགྱི་བཀའ་ཉན་ལས་བྱེད་བསམ།། དེས་དུས་ཏིང་འཛིན་དྲག་པོར་བསར།། ཅེས་པས། མགོན་པོ་མེ་ལྕེ་ཕྲེང་བའི་རྒྱུད་ལས། ལྕགས་པར་ནག་པོ་བཅའ་བཞིའི་ལེའུ་སྟེ་སོ་དྲུག་པའོ། །།། དེ་ནས་རྟགས་ཀྱི་རིམ་པ་ནི།། ཉམས་དགའ་བ་དང་སྤྲོ་བ་དང།། གླུ་ལེན་པ་དང་གར་བྱེད་དང།། དར་འཕྱར་བ་དང་འཕན་འཕྱར་དང།། མེ་ལྕེ་ཆེན་པོ་ལྷོབ་པ་དང།། གྲོགས་པོ་དང་ནི་རྡོ་མོན་ཨ་ཙར་དང། ། དོམ་སྟག་སྤྱང་ཀི་འཕར་བ་དང།། བྱ་ཁྲ་འཇུམས་ཤིང་སྐད་འདོན་དང།། འཁོར་ལོ་བསྐོར་དང་སྒྲ་གྲག་དང།། འཐིབ་དང་ཟིལ་དང་སྐྱི་ཟིང་བྱེད།། མེ་འབར་བ་དང་འུར་སྒྲ་དང།། དུ་བ་འཐུལ་དང་དམག་ཚོགས་ལྷགས། ། བུད་མེད་མང་པོ་ལྷགས་པས་ནི།། ཧ་ཧ་ཧི་ཧི་གད་མོ་རྒོད།། བསྭོ་སྒྲ་ཆ་སྒྲ་ཀུར་སྒྲ་སྒྲོགས།། འདི་དག་བོད་པ་གྲུབ་པའི་རྟགས།། བཙད་པོ་མཁན་པོ་ཕ་ཁུ་མེས།། གཙོ་བོ་ཞང་བློན་སློབ་དཔོན་དང། ། ཐོག་དང་སེར་བ་འབྲུག་སྒྲ་དང།། པཎྜི་ཏ་དང་བདག་ལ་ཡང།། བཀའ་ནན་གསོལ་དང་བྱ་ཆེན་ལྡིང།། འདི་དག་དབང་དུ་མ་འདུས་པའོ།། བོད་པའི་དུས་སུ་ཅང་མེད་ཅིང།། དགྲ་ཡིས་གནས་སུ་སྣ་ཚོགས་སྟོན། ། དམག་ཆེན་ཕར་ལ་ཆས་པ་དང།། དོམ་སྟག་ཕང་ལ་འཕྱོ་བ་དང།། དུར་བྱ་ཕ་རོལ་འུག་པ་རྒོད།། གོ་བོ་ཁཱ་དང་ཀང་ཀ་དང།། སྐྱུང་ཀ་ལ་སོགས་ཤ་ཟན་བྱ།། འཕུར་ལྡིང་ཁོ་ཡི་ཡུལ་དུ་བྱེད།། བཤན་པ་གཏུམ་པོ་འཇིགས་ཚུལ་ཅན། ། གིང་ཕོ་དགྲ་ལ་འགྲོ་བ་དང།། འཕར་སྤྱང་དགྲ་ལ་འཇབ་ཅིང་ངུ་བ་དང།། དཔའ་དར་སྒོ་ཁར་བཙུག་པ་དང།། འོད་ལམ་ཕར་ལ་སོད་པ་དང།། ཁང་རྨང་བཤིག་ཅིང་དམག་སྣ་བཙུགས།། གཡབ་མོ་འདེབས་དང་གཡུལ་བསྐོར་བྱེད། ། འདི་དག་རྦད་པ་གྲུབ་པའི་རྟགས།། མུན་པ་འཐིབས་དང་དར་ཤིང་ཆག། རི་དང་ཕ་བོང་ནག་པོ་དང།། བྲག་ལ་སོགས་པ་དག་ལ་རྡུགས།། དམག་བྲངས་དཀའ་དང་ལོག་པ་དང། ། མཚོན་ཆ་ཆག་དང་ཐུན་རྣམས་འཐོར།། ཐུན་ཁྲག་རུལ་དང་སྦྱིན་སྲེག་མེ།། གསོ་དཀའ་འཆི་བར་སླ་བ་དང།། རང་ལ་འཁོར་ཅིང་ཕ་རོལ་ཏུ།། ཅི་ཡང་མེད་ཅིང་ཚུབས་ཚོགས་ཆེ།། དེ་དག་རྡུགས་པའི་རྟགས་སུ་བསྟན། ། དམག་སྣ་ཚུར་ཟུར་དག་ལ་བརྡེག། ཐོག་སེར་ཚུར་ལ་དབབ་པ་དང།། བྱ་གཅན་ཚུར་ལ་ལྡེག་པ་དང།། མེ་ལྕེ་མཚོན་རྩེ་ཚུར་ལ་ལོག་པ་དང།། བཀའ་ཆད་བདག་ལ་གསོལ་བ་དག། མགོན་པོ་ལོག་པར་ཤེས་པར་བྱ། ། ཅི་ཡང་མེད་པར་ཕྱ་སངས་ཁྱེར།། སྙིང་མི་དགའ་ཞིང་ངུ་སྙིང་འདོད།། སྔར་མ་མཐོང་བའི་ཡུལ་དུ་ཕྱིན།། དགྲ་ཡི་བླ་རྟགས་ཅི་ཡང་མེད།། ཚུབས་མ་ནག་པོ་གཞན་ལ་འཚུབས།། ཆུ་བོ་ཆེན་པོ་གཞན་ན་འཕྲུག། གཉིད་ཀྱིས་འཐིབས་ཤིང་བྱིང་རྨུགས་ཆེ།། དེ་དག་འཁྱམས་པའི་རྟགས་སུ་བསྟན།། བསད་པའི་དུས་ཀྱི་རྟགས་དག་ནི།། དངོས་སུ་བཀུག་ཅིང་ཁྲིད་པ་དང།། མདའ་དང་མཚོན་ཆ་བརྒྱབ་པ་དང།། སྙིང་ཕྱུང་བ་དང་དུམ་བུར་བྱས། ། ལིངས་བྱེད་ར་ལུག་ལ་སོགས་པ།། བླ་ཡི་རྣམ་པ་དངོས་སུ་ཁུགས།། འཁུན་དང་རེང་དང་རྗེས་དག་དང།། བཟུང་དང་བཅོམ་དང་བརྒྱལ་བ་དང།། མགོན་མེད་བཀུག་པ་སྒྲུབ་པའི་རྟགས།། ཏིང་འཛིན་མི་གསལ་བྱིང་རྨུགས་འགྲོ། ། སྲོག་ལྷ་དག་གིས་བསྲུངས་པ་ཡིན།། གཡག་དཀར་བྱ་རྒོད་བསྲུངས་པ་ནི།། ཡུལ་ལྷ་དག་གིས་བསྲུངས་པ་ཡིན།། ཞང་བློན་དག་གིས་སྐྱོབ་བྱེད་ན།། ཕོ་ལྷ་དག་གིས་བསྲུངས་པ་ཡིན། ། ཁྲ་དང་སྤྱང་ཀིས་འགེགས་པ་དེ།། དགྲ་ལྷ་དག་གིས་བསྲུངས་པ་ཡིན།། བུད་མེད་ཤ་བས་འགེགས་པ་ན།། མོ་ལྷ་མ་སྨན་བསྲུངས་པ་ཡིན།། ཅི་ཡང་མེད་ན་མགོན་པོ་ཡིན།། གནོད་པ་བྱ་བ་མ་འགྲུབ་ན། ། ཁྱད་སྦྱོར་ཡེ་ཤེས་སེམས་དཔས་བསྲུངས།། དེ་དག་ལྷ་བསྲུངས་རྟགས་སུ་བསྟན།། སྤྱིར་ན་འབོད་རྦད་བསད་གསུམ་ལ།། རྟགས་ཀྱང་རབ་འབྲིང་ཐ་མ་གསུམ།། རབ་ནི་མངོན་སུམ་དག་ཏུ་སྟོན།། འབྲིང་ནི་སྒྲ་རུ་འོང་བར་བྱེད། ། ཐ་མ་རྨི་ལམ་དག་ཏུ་འོང།། འདི་དག་ངེས་པར་འབྱུང་བར་འགྱུར།། སྤྲོ་བ་བསྐྱེད་ཅིང་གཟེངས་བསྟོད་ལ།། ཏིང་འཛིན་གསལ་ཞིང་སྔགས་ཀུན་བགྲང།། འགྲུབ་འགྱུར་འདི་ལ་ཐེ་ཚོམ་མེད།། ཅེས་མགོན་པོ་མེ་ལྕེ་ཕྲེང་བའི་རྒྱུད་ལས། རྟགས་སུ་བསྟན་པའི་ལེའུ་སྟེ་སོ་བདུན་སྟེ་བདུན་པའོ།།།། དེ་ནས་ཡང་དག་བཤད་བྱ་བ།། གྲུབ་སྟེ་དབང་དུ་མ་འདུས་ན།། བཙན་པོ་བྱུང་ན་ལྟག་གནོན་བཏང།། མཁན་པོ་བྱུང་ན་སྤྱི་མཆོད་འབུལ། ། ཕ་ཁུ་མེས་པོ་ཨར་ལ་གཏད།། གཙོ་བོ་དང་བློན་གཟིར་བར་བྱ།། སློབ་དཔོན་བྱུང་ན་གསོལ་བ་གདབ།། ཐོག་སེར་བྱུང་ན་སྲོག་འཁོར་བསྐོར།། མི་འཇིགས་ཆོ་གའི་ཏིང་འཛིན་བྱ།། པཎྜི་ཏ་ལ་བསྐང་བ་བྱ། ། བྱ་ཆེན་ལྡིང་ན་སྲོག་འཁོར་བསྐོར།། རྦོད་དུས་མུན་པ་འཐིབས་པ་ན།། མགོན་པོ་ནག་པོ་འཁྲུགས་པ་ཡིན།། འཁྲུགས་ཆེན་མདོས་ཆེན་གཏང་བར་བྱ།། དར་ཤིང་ཆག་ན་དངོས་གྲུབ་ཉམས།། རི་ནག་བསྟན་ན་བཅོལ་བསྐུལ་བྱ། ། བྲག་ལ་རྡུགས་ན་ཟོར་ཡང་བརྡེག། དམག་དྲང་དཀའ་ན་བསྐང་གསོ་བྱ།། ལོག་ན་རྦད་མནན་ཏེ་རྦད།། མཚོན་ཆ་ཆག་ན་དམ་ཚིག་ཉམས།། བསྐང་ཞིང་བཤགས་པ་དྲག་པོ་བྱ།། ཐུན་རྣམས་འཐོར་ན་ཏིང་འཛིན་ཉམས། ། དམིགས་པ་དྲག་པོ་གསལ་བར་བསྐྱེད།། ཐུན་ཁྲག་རུལ་ན་དེ་བཞིན་དུ།། དམ་ཚིག་དག་ལ་སེལ་བྱུང་ངོ།། བསྐང་བཤགས་དྲག་པོ་བྱ་བར་བཤད།། མ་དག་གང་ལ་དཀའ་བ་ན།། ད་རུང་བཟླས་པ་བསྐྱར་བར་བྱ། ། ཚུར་ལ་འཚུབ་ནི་ཆེ་བ་ན།། རྡུགས་པ་སྣ་སེལ་མདོས་བཏང་ཞིང།། བསྐང་བཤགས་དྲག་པོ་རྒྱ་ཆེར་བྱ།། བདག་ལ་བརྡེག་ན་བཟློག་བསྲུང་བྱ།། ཐོག་སེར་འཁྲུགས་ན་འཁྲུགས་སེལ་བྱ།། བྱ་གཅན་ལོག་ན་རྫས་མ་ཚོགས། ། ད་རུང་རྫས་རྣམས་ཚང་བར་བྱ།། མེ་ལྕེ་མཚོན་རྩེ་ཚུར་བྱུང་ན།། སྲུང་བཟློག་དྲག་པོ་བྱ་བར་གཅེས།། བཀའ་ཆད་བདག་ལ་གསོལ་བ་ན།། ཡང་བཟློག་གནས་དག་བདག་ལ་བྱ།། ཕྱ་སངས་ཁྱེར་ན་བྱིན་ཆེན་དབབ། ། སྙིང་མི་དགའ་ན་བཟླས་འོད་དང།། སྔ་མར་མ་མཐོང་ཡུལ་ཕྱིན་ན།། སྙིང་རྗེ་ཆེན་པོ་ཁོང་ནས་བསྐྱེད།། བླ་རྟགས་མེད་ན་བཅུད་གསུམ་བྱ།། ཚུབ་ནག་འཚུབ་ན་དམ་པ་བོད།། ཆུ་ཆེན་འཁྲུགས་ན་ཟ་ལམ་བསྟན། ། གཉིད་ཀྱིས་འཐིབས་པར་གྱུར་པ་ན།། རྡོ་རྗེ་སྤྱུགས་གླུ་བླང་ཞིང་གཟེངས་བསྟོད་ལ།། མགོན་པོ་བེང་ཆེན་གང་ཡང་བྱ།། བསང་བ་དག་གི་དུས་དག་ཏུ།། སྲོག་ལྷས་བསྲུངས་ན་གུ་གུལ་སྦྱར་མས་བདུག། ཡུལ་ལྷ་བུད་མེད་དོར་རྟས་བདུག། དགྲ་ལྷ་གླང་རོག་རཱ་བསྲེག་འབྲོས།། དགྲ་ལྷ་གསུར་ཆེན་དུད་པས་འབྲོས།། མ་ལྷ་རྟ་བོན་བསྲེགས་པས་འབྲོས།། ཁ་སྦྱོར་མཁས་པས་དབྱེ་བར་བྱ། ། ལྕགས་ཀྱུས་བླངས་པ་བདག་ལ་བསྟིམ།། ཅི་ཡང་མེད་ན་གདམས་ངག་འཆུག། ཡང་ན་རང་གི་དམ་ཚིག་ཉམས།། ཡང་ན་སྲོག་གི་སྙིང་པོ་ཆད།། གཏིང་ནས་བསྒྲུབ་པ་བསྒྲལ་བར་བྱ།། ཞེས་མགོན་པོ་མེ་ལྕེ་ཕྲེང་བའི་རྒྱུད་ལས། ལོག་གནོན་སྤཽགས་པ་བསྟན་པའི་ལེའུ་སྟེ་སུམ་བཅུ་སོ་བརྒྱད་པའོ།།།། གཞན་ཡང་ལྟ་བའི་རིམ་པ་ནི།། ཕྱི་ནང་ཆོས་ཀུན་ངོས་གཟུང་བྲལ།། ཡོད་དང་མེད་པའི་ཕྱོགས་བྲལ་ཅིང།། གཉིས་ཀ་གཉིས་མེད་མཐའ་དང་བྲལ། ། དབུས་ཆེན་བྱ་བར་མི་རྟོག་བྱེད།། ཀུན་ཀྱང་བླ་དགས་དངོས་མེད་པ།། མཚན་མ་མེད་པ་གདོད་ནས་སྟོང།། སྤང་མེད་ཀུན་ཆུབ་ཡི་དག་པ།། སྤྲོས་པ་མེད་པ་འདུས་མ་བྱས།། ཕྱོགས་ཆ་ཀུན་དང་ཡེ་ནས་བྲལ། ། དེ་ལྟར་ཡེ་ནས་ལྟ་བ་ཡིན།། ཡེ་ནས་དེ་ལྟར་གནས་བཞིན་དུ།། དེ་ལྟར་མ་རྟོགས་ལོག་བརྟགས་པས།། གཉིས་བཟུང་མཐར་རྟག་ལོག་ཤེས་ལ།། བསྟན་པ་རྣམས་གསུམ་རྒྱས་མཛད་ནས། ། འགྲོ་བ་འདུལ་ཅིང་དོན་བྱེད་ལ།། བསྟན་པ་འཇིག་པར་བྱེད་པ་ཡི།། བགེགས་དང་འབྱུང་པོ་དགྲ་ཡི་རིགས།། འདུལ་ཕྱིར་སྤྲུལ་པ་ཁྲོ་ཚུལ་ཅན།། སངས་རྒྱས་བསྟན་པའི་མགོན་མཛད་ཅིང།། བདུད་ཀྱི་རིགས་ལ་སྡང་བས་ནག། དེ་ཕྱིར་བསྟན་པ་བསྲུངས་པས་ལེགས།། བསྲུངས་ཚུལ་ལེགས་པར་ལྡན་པས་ལྡན།། ཉོན་མོངས་རིས་ལ་གནོད་པས་ནག། དེ་ཕྱིར་མགོན་ནག་ལེག་ལྡན་ནག། ནག་པོར་སྤྲུལ་ནས་དོན་རྫོགས་སྤྱོད། ། ཅེས་མགོན་པོ་མེ་ལྕེ་ཕྲེང་བའི་རྒྱུད་ལས། ལྟ་སྒོམ་སྤྱོད་པ་གཅིག་ཏུ་དྲིལ་བའི་ལེའུ་སྟེ་སོ་དགུ་པའོ།།།། དེ་ནས་ཡང་དག་བཤད་བྱ་བ།། ཀུན་གྱི་དོན་རྣམས་འགྲུབ་བྱེད་པའི།། སྙིང་པོ་སྔགས་རྣམས་བསྟན་པར་བྱ། ། བསྐྱེད་པ་རྐྱེན་གྱི་སྔགས་རྣམས་དང།། མ་ནོར་རྩ་བ་རྒྱུ་ཡི་སྔགས།། བཟླས་པ་ལས་ཀྱི་སྔགས་སུ་བཤད།། བསྐྱེད་པ་རྐྱེན་སྔགས་ཡི་གེ་ཧཱུཾ།། ཐུགས་སྲོག་མ་ནོར་གནས་པ་ཡིན།། མ་ནོར་རྩ་བ་རྒྱུའི་སྔགས་ནི། ། ཨོཾ་མ་ཧཱ་ཀཱ་ལ་རཀྴ་དུ་བིད་ནི་ཛ། ཨོཾ་ཤྲཱི་མ་ཧཱ་ཀཱ་ལ་རཱུ་པ་ཛ། ཛཿཧཱུཾ་བཾ་ཧོཿཧཱུཾ་ཕཊ། མ་ནོར་རྩ་བ་རྒྱུ་ཡི་སྔགས་སོ།། བཟླས་པ་ལས་ཀྱི་སྔགས་ལ་ནི།། སྤྱན་དྲང་ཕྱག་དག་གདན་འབུལ་བ།། བཞུགས་གསོལ་བསྟིམ་དང་དབང་བསྐུར་དང། ། མཆོད་དང་གཏོར་མ་བཏང་བ་དང།། རྦད་དང་བསད་པ་རྣམས་སུ་བསྟན།། ཛཿཧཱུཾ་བཾ་ཧོཿསྤྱན་དྲངས་པ།། ཏིཥྛ་ལྷན་དང་ཨཱ་བེ་ཤཱ། གཞུག་དང་བསྟིམ་པར་ཤེས་པར་བྱ།། ཨ་ཏི་པུ་ཧོ། པྲ་ཏི་པུ་ཧོ། ས་མ་ཡ་པུ་ཧོ། ཕྱག་བྱ་བའི་སྔགས་སུ་བསྟན།། ཨོཾ་མ་ཧཱ་ཀཱ་ལ་རཀྴ་དུ་བེང་ནི་ཛ། པཱུ་ཛ་མེ་གྷ་ས་མ་ཡེ་སྥ་ར་ཎ་ཨ་ཏ་དྷུ་པེ། པུཥྤེ་ཨཱ་ལོ་ཀེ་གྷནྡྷེ་ནཻ་བིདྱ། ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ། ཨོཾ་ཨཱཿཧཱུཾ། མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་རུ་དྷི་ཁཱ་ཧི། ཤ་ལྔ་བདུད་རྩི་ལྔ་དང་བཅས་པའི་མཆོད་པ་སྣ་ཚོགས་དེ་ཡིས་དབུལ།། ཨོཾ་མ་ཧཱ་ཀཱ་ལ་ཨེ་ཨ་ར་ལི་ཧོ།། ཛཿཧཱུཾ་བཾ་ཧོཿ། བཛྲ་བྷ་གི་ནཱི་བརྡ་མ། ཡོ་གི་ནཱི་ཤྭ་རཱི་ས་མ་ཡ་སྟྭཾ། དྲྀ་ཤྱ་ཧོ། ཨོཾ་ཁ་ཁ་ཁཱ་ཧི། ཨ་ཀཱ་རོ་མུ་ཁཾ། སརྦ་བྷརྨ་ཎཾ་ཨཱདྱ་ནུཏ་པན་ན་ཏཏ་སྭཱ་ཧཱ། གཏོར་མ་འབུལ་བའི་སྔགས་སུ་བསྟན།། ཨོཾ་ཏ་ཐཱ་ག་ཏོཥྞཱི་ཥ་སི་ཏ་པ་ཏྲེ་ཤྲཱི་ཧཱུཾ། མགོན་པོ་གནད་ལ་དབབ་པར་བྱ། ། ཆེ་གེ་མོ་འདི་མཱ་ར་ཡ་སོད་སོད། ནག་པོ་དགྲ་བོའི་ཤ་རུས་སྙིང་འགོ་ཐོན་ཐོན། བདུད་ཕོ་དགྲ་བོའི་སྲོག་ལ་ཛ་ཛ། ནག་པོ་དགྲ་བོའི་གློ་བ་ལ་ཛ་ཛ། ནག་པོ་དགྲ་བོའི་ཀླད་པ་ལ་ཛ་ཛ། ནག་པོ་དགྲ་བོའི་སྙིང་དབུགས་ལ་ཛ་ཛ། ཕུར་པས་བསད་པའི་སྔགས་སུ་བཤད།། ཨོཾ་མ་ཧཱ་ཀཱ་ལ་སྦུགས་དྷྲི་ཧཱུཾ་ཛ། བི་ན་ད་མ་བཛྲ་པཱ་ཎི། ཤྲཱི་ཧཱུཾ་ཡན་ཁུགས་ལ་གཏུབས། སྲོག་ཀུ་རུ་སྟྭམ་མཱ་ར་ཡ་ཛ།། ཐུན་གྱིས་བསད་པའི་སྔགས་སུ་བསྟན། ཨོཾ་མ་ཧཱ་ཀ་ལ་ཡཾ། ལག་ནི་ཚལ་པ་ཏྲཾ་ཡང་ཛ་ཛ། མ་ཧཱ་ཀཱ་ལ་ཐུཾ་ལཾ། ཐུཾ་རིལ་རྦད་པུ་ཧྲཱི་ཛ་ཛ། སྙིང་ལ་ཡ་ཏྲག་ཀྴ་ལ་ཐུཾ་རྦད་ཛ་ཛ། ཟོར་གྱིས་བསད་པའི་སྔགས་སུ་བཤད། མ་ཧཱ་ཀཱ་ལ་ཡ་ཤད་ཧཱུཾ་རཱུ་པ་ཧཱུཾ། ད་ཧ་ད་ཧ། པ་ཙ་པ་ཙ། དི་ན་མི་ཀེ་ན་ཧཱུཾ་ཕཊ། ཆེ་གེ་མོ་མཱཾ་ས་ལ་ཁཱ་ཧི་ཁ་ཧི། ཆེ་གོ་མོའི་གཟུགས་ཕུང་ལྔ་ལ་རིམ་འབུས།། རམ་འུབས་ཁཱ་ཧི་ཁཱ་ཧི། དེ་ནི་སྦྱིན་སྲེག་གི་སྔགས་སུ་བཤད། ཨོཾ་སྟྭཾ་བྷ་ཡ་རཀྴ་ནན། ཝ་ཤང་ཀུ་རུ་ནན། པུཥྟིཾ་ཀུ་རུ་ནན། ཤཱནྟིང་ཀུ་རུ་ནན། ཆེ་གེ་མོ་མཱ་ར་ཡ་ནན། ཨ་བི་ཤྲཱི་མ་ཧཱ་ར་ཡ་ནན། ཕཊ་ཕཊ། ཀཱ་ལ་རཱུ་པ་ཤྲཱི་རུ་པ་རཀྴ་ཡེ་ནན། ཙཀྲ་ཀྲི་ནན།། ད་རུ་བས་ནན། གནན་པ་བྱ་བའི་སྔགས་སུ་བསྟན། ཨོཾ་ཤྲཱི་མ་ཧཱ་ཀཱ་ལ་རཀྴ་ཁ་ཁ་ཁཱ་ཧཱི་ཁཱ་ཧི། བཛྲ་ཡཀྴ་དེ་བ། མ་ཧཱ་བེདྟ་ཁཱ་ཧི་ཁཱ་ཧི་ཁ་ཁ་ཁ། ཨོཾ་མ་ཧཱ་ཀཱ་ལ་ཤྲཱི་ཕུང་ཤན་ཏིང། སྤུར་སྤུར་ཏིང་ཕུར། མ་ཧཱ་ཀཱ་ལ་བཛྲ་ནི་ཕུར། ད་ཧ་ད་ཧ་ཕུར་སྭཱ་ཧཱ། དེ་སྐད་དྲག་ཏུ་བསྟབ་པའི་སྟགས་སུ་བསྟན། ཨོཾ་མ་ཧཱ་ཀཱ་ལ་རཀྴ་དུ་པེས་དྷྲི་ཛཿཧཱུཾ་བཾ་ཧོཿ། འབྱམས་ན་སྟོན་པའི་སྔགས་སུ་བསྟན། ཨོཾ་ནཱི་ལཾ་བྷ་ར། བཛྲ་ཡཀྴ་མ་ཧཱ་ཀཱ་ལ་ཤྲཱི་ཡོ་ན། ཡོ་ཡོ་ནི་དན་ཏདྱ་ཐཱ། ཨོཾ་ཧི་ལི་ཧི་ལི་ཀི་སྟྭཾ་བྷ་ནན་སྭཱ་ཧཱ། མགོན་པོ་གཟིར་བའི་སྔགས་སུ་བཤད། ཨོཾ་མ་ཧཱ་ཀཱ་ལ་ཤཱནྟིཾ། ཤར་ཏི་ཀུ་ར་ས་ན་མ་ཧཱ་ཀཱ་ལ། མི་ཆེ་གེ་མོ་དང་ཐང་ལྷར་ཕྱེ། གློ་དང་གློ་བའི་རྟགས་ཐོན། རུས་པའི་ཁབ་ཀྱིས་གློ་སྙིང་ཟང་མར་ཕུག། ལྷ་དང་ཕྱེ་བའི་སྔགས་སུ་བཤད། རྒྲི་རྒྲི་ཤཾ་ཡཀྴ་དེ་བཾ་ཀཱ་ལ་བ་ཀྲ། གྲིབ་བིན་ཙན་ཀ་མ་བག་སི་ན་མི་དང་ཡུལ་ལྷར་ཕྱི། ཨོཾ་ཤྲཱི་མ་ཧཱ་ཀཱ་ལཱ་རཀ་བེ་ཙ་ལེ་མུ་ལ་རྐ་རྐ་གིང་ཀ་ར་མ་ཧཱ་ཀཱ་ལ་ཧཱུཾ་ཕཊ། ཆེ་གེ་མོ་མཱ་ར་ཡ་ཧཱུཾ་ཕཊ། ཐུཾ་རི་ལི་ལི་སརྦ་ཀཱ་མ་ར་ཙ་ཡ་མཱ་ར་ཡ་རྦད། དུ་མི་ཙ་ལ་མཱ་ར་ཡ་སྲེག་སྲེག་ཤིག་ཤིག་ཁྱེར་ཁྱེར། མ་ཧཱ་ཀཱ་ལ་སི་ཏི་རྦད། ཆེ་གེ་མོ་དང་སུ་ཕྱེ། དུན།། སྒྲི་པྲ་དྲ་མ་ཧཱ་ཀཱ་ལ་ཧཱུཾ་ཕཊ། ཨོཾ་བྷན་དྷ་བ་སུ་དང། དེ་བས་ཡི་ག་རྦུད། སརྦ་བྲད་ཏྲ་མུ་ཏྲི་རཾ་ཛ་ཏ་ལ་རྦུད། མ་ཧཱ་ཀཱ་ལི་རཀྴ་ཤ་ཀུ་རུ་པ་ནི་མཱ་ར་ཡ་རྦད། ཨོཾ་མ་ཧཱ་ཀཱ་ལ་སརྦ་དུཥྟཱན། སརྦ་གས་ཏྲོ་ཏྲ་ན་ཕཊ། ཧྱ་ཧྱ་ཧྱ་བཛྲ་པཱ་ཎི་ཧཱུཾ་ཕཊ། ཨོཾ་ཏྲི་ཤ་དྲུ་རོ་ཏྲ་ཏི། ཐུཾ་རིལ་བདག་ལ་གནོན་པར་བྱེད་པ་མཱ་ར་ཡ་ཧཱུཾ་ཧཱུཾ་ཕཊ། དེ་ནི་མགོན་པོ་ནང་འགྲས་ན་ཕ་རོལ་དང་དབྱེ་བས་སྔགས་སོ། ། ཨོཾ་མ་ཧཱ་ཀཱ་ལ་ཡ། ཆེ་གེ་མོ་མཱ་ར་ཡ་གྲྀཧྞ་གྲྀཧྞ། བྷནྡྷ་བྷནྡྷ་ཧཱུཾ་ཧཱུཾ་ཕཊ་ཕཊ། ལས་ཀྱིས་གསོད་པའི་སྔགས་སུ་བསྟན་པའོ།། ཨོཾ་ཙཎྜ་མ་ཧཱ་ཀཱ་ལ་ཤྲཱི་སྙིང་ཨི་དཾ་གྲྀཧྞ་སྭཱ་ཧཱ། ཞི་ཚུལ་གཏོར་མ་དབུལ་བའོ། ། དེ་ལྟར་གསང་སྔགས་རིམ་པ་ཀུན།། གྲངས་སུ་བཟླས་དང་དུས་སུ་བཟླས།། རྟགས་དང་སྦྱར་ཞིང་བཟླས་པར་བྱ།། དྲག་དང་ཤིན་ཏུ་དྲག་པ་དང།། རིང་དང་ཐུང་བར་བཟླས་པར་བྱ།། བོར་དང་གདགས་དང་གཞུག་པ་དང། ། སྔགས་ཀྱི་མཐའ་བསྒྱུར་མཁས་པར་སྤྱོད།། བཞག་དང་བླང་དོར་གདགས་པ་དང།། དྲིལ་དང་གཏོར་དང་དགབ་པ་དང།། ཟླཽག་དང་ངར་རྣམས་གདགས་པ་དང།། དེ་བཞིན་མཁས་པས་ཆེད་མར་དབང། ། འགྲོ་འོང་སྔགས་ཀྱི་ཚད་མ་ཡིས།། སྔགས་རྣམས་མ་ནོར་གཏན་ལ་དབབ།། བཟློག་དང་དཀྲུག་དང་འཁོར་ལོ་བསྐོར།། འབྲུ་མི་གཞལ་ཅིང་ཐེ་ཚོམ་བསྒྲལ།། ཅེས་པས་མེ་ལྕེ་ཕྲེང་བའི་རྒྱུད་ལས། མགོན་པོ་སྔགས་ཀྱི་ལེའུ་སྟེ་བཞི་བཅུ་ཐམ་པའོ། །།། དེ་ནས་ཡང་དག་བཤད་བྱ་བ།། དམ་མི་བཀྲལ་ཅིང་དཔོན་སློབ་བཀུར།། མཆེད་ལ་བརྩེ་བྱ་བདེ་གཤེགས་བཀའ།། ཁྱད་དུ་མིག་སད་འདའ་མི་བྱ།། སེམས་ཅན་ཀུན་ལ་བྱམས་སེམས་བསྐྱེད། ། བྱང་ཆུབ་སེམས་ནི་མི་སྤང་ཞིང།། ཆོས་རྣམས་ཀུན་ལ་སྨད་མི་བྱ།། མ་སྨིན་པ་ཡི་གང་ཟག་ལ།། མགོན་པོའི་གསང་བ་མི་བསྒྲག་ཅིང།། ཕུང་པོ་ལྷ་ལ་བརྙས་མི་བྱེད།། ཆོས་ཉིད་སོམ་ཉི་མི་ཟ་ཞིང། ། གདུག་པ་ཅན་ལ་བྱམས་མི་བྱ།། མིང་མེད་ཆོས་ལ་མི་བརྟག་ཅིང།། སེམས་ཅན་དད་དང་ལྡན་པ་ཡི།། སེམས་ཀྱི་སུན་ནི་མི་དབྱུང་ཞིང།། མདོར་ན་སེམས་ཆོས་རྣམས་ཀྱིས་ལང།། དམ་ཚིག་རིམ་པ་གང་ཡིན་པ། ། མ་ཉམས་བསྲུང་བ་མཆོག་ཏུ་བསྔགས།། ཤེས་རབ་མི་སྨད་དེ་བཞིན་དུ།། དྲང་དང་ཤེས་པར་བསྒྲུབ་བྱ་ཞིང།། མི་གཡེལ་མི་བཤུག་དམིགས་པ་མིན།། འཁོར་བར་བསྔགས་བསམ་མི་བྱ་ཞིང།། རྟག་པའི་བསམ་པ་ཀུན་ཏུ་སྤང། ། ཞེ་སྡང་མི་བསྐྱེད་སེམས་མི་དཀྲུག། འཁོར་བར་སྒྱུ་མར་རབ་དམིགས་པས།། ཆགས་པ་མེད་པས་གདུག་པ་བསྒྲལ།། སྙིང་རྗེ་ཆེན་པོས་ཀུན་བླང་ཞིང།། སྡང་བ་མེད་པས་གདུག་པ་བསྒྲལ།། སྣང་སྲིད་ལྷ་རུ་རབ་དམིགས་ཏེ། ། ཡེངས་པ་མེད་པས་གདུག་པ་བསྒྲལ།། བསྟན་པ་བསྲུང་བར་རབ་དམིགས་ཏེ།། རང་འདོད་མེད་པས་གདུག་པ་བསྒྲལ།། འོད་གསལ་ཆེན་པོར་རབ་དམིགས་ཏེ།། གཏི་མུག་མེད་བས་གདུག་པ་བསྒྲལ། ། ཁམས་གསུམ་སྐྱོན་དུ་རབ་དམིགས་ཏེ།། ང་རྒྱལ་མེད་པས་གདུག་པ་བསྒྲལ།། འགྲོ་བ་འཁྲུལ་བར་རབ་དམིགས་ཏེ།། ཕྲག་དོག་མེད་པར་གདུག་པ་བསྒྲལ།། ཐིག་ལེ་ཆེན་པོར་རབ་དམིགས་ཏེ། ། སྤྲོས་པ་མེད་མེད་པར་གདུག་པ་བསྒྲལ།། རྫས་རྣམས་ཚང་མར་ཚོགས་བྱ་ཞིང།། སྔགས་རྣམས་ནོར་དུ་མི་རུང་ངོ།། འཁོར་ལོ་འཁྲུགས་པར་མི་བྱ་ཞིང།། ལས་རྣམས་ནོར་དུ་མི་རུང་སྟེ།། རང་རེ་གཞན་ལ་མངོན་མི་བྱ། ། དམ་ཚིག་གཅིག་ལ་སྔགས་མི་བཟླས།། ཁེ་དྲག་འཕྱར་ཀ་སྤངས་བྱས་ལ།། གསང་སྤྱོད་བརྟེན་ཏེ་བསྒྲུབ་པར་བྱ།། ཅེས་པས་མེ་ལྕེ་ཕྲེང་བའི་རྒྱུད་ལས། བསྲུང་བ་མན་ངག་གི་ལེའུ་སྟེ་ཞེ་གཅིག་པའོ།།།། དེ་ནས་ཡང་དག་བཤད་བྱ་བ། ། མགོན་པོ་སྒྲུབ་པའི་མི་རྣམས་ཀྱི།། དམ་ཚིག་ཐུབ་པར་མ་བསྲུངས་ན།། གདོན་དང་ལོག་འདྲེན་སྣ་ཚོགས་བྱུང།། ཚེ་ཐུང་ནད་མང་ནོར་ཡལ་ནས།། ཕྱི་མ་ངན་འགྲོ་དམྱལ་བར་འགྲོ།། ཚེ་འདིར་མི་མཐུན་འབྱུང་པོ་ནི། ། མཚོན་འཁྲུག་ནང་དམེ་ཚ་བའི་ནད།། དུག་དང་ཐོག་དང་ལྕེ་འབབ་དང།། རིམས་དང་མཛེ་དང་ཤ་ཡ་དང།། འབྲུམ་བུ་ཤུ་བ་བལ་ནད་དང།། སེར་བ་མཚོ་ཉམས་གཟི་ཆུང་ཞིང། ། ལོངས་སྤྱོད་ལ་སོགས་ཉམས་པ་དང།། དགྲ་དང་བགེགས་རྣམས་ལངས་པ་དང།། མི་མཐུན་བར་ཆོད་སྣ་ཚོགས་འབྱུང།། གཞན་ཡང་འཁོར་བ་ཡུན་རིང་གནས།། མི་བདེ་སྡུག་བསྔལ་རབ་ཏུ་འཕེལ།། དེ་ཕྱིར་དམ་ལ་གནས་པར་བྱ། ། ཞེས་པས་མེ་ལྕེ་ཕྲེང་བའི་རྒྱུད་ལས། དམ་ཚིག་དང་མི་ལྡན་པའི་རྒྱུད་བཅངས་ནས་བསྒྲུབ་ན། ཉེས་མིག་བསྟན་པའི་ལེའུ་སྟེ་ཞེ་གཉིས་པའོ།།།། དེ་ནས་ཡང་དག་བཤད་བྱ་བ། ། རྒྱུད་འདི་བཅངས་པའི་ཡོན་ཏན་གྱིས།། ཚེ་རིང་དགྲ་རྣམས་རྒྱུན་ཆོད་དེ།། ཟོར་གྱི་ལས་ཀྱིས་དགྲ་རྣམས་ནི།། གཟེར་ནང་གླང་ཐབས་སྨྱོ་འབོག་དང།། རོ་རྒྱབ་འགས་ཤིང་འཆི་བར་འགྱུར།། ཕུར་པ་དག་གིས་བཏབ་པས་ནི། ། ཐོག་འཐབ་ཀླད་གཟེར་མགོ་འགས་དང།། རོ་རྒྱབ་འགས་ཤིང་འཆི་བར་འགྱུར།། གཟེར་དང་རེངས་པས་རླག་པར་བྱེད།། བརྒྱབ་པས་ནད་ཀྱང་དེ་བཞིན་ནོ།། བསྲེགས་པས་བསད་དང་ཐབ་ཀྱིས་ནི། ། རིམས་ནད་ཚ་བའི་ནད་ཀྱིས་འཆི།། མནན་པས་བསད་པའི་ལས་ཀྱིས་ནི།། བྱིང་དང་རྨུགས་པས་མྱོས་ཏེ་འཆི།། དེ་བཞིན་བརྒྱལ་དང་ལྐུགས་པར་བྱེད།། ཐུན་གྱིས་ཚེ་དབང་སྲོག་དང་བྲལ།། དེ་བཞིན་མི་མཐུན་སྦྱོར་བ་ཡིས། ། བགེགས་དང་དགྲ་རྣམས་ཚར་གཅོད་ནས།། བདེ་སྤྱོད་དགེ་སྦྱོར་སྤེལ་བར་བྱེད།། ཕྱི་མར་རིག་འཛིན་གྲལ་དུ་འགྲོ།། ཚེ་དང་བཀྲ་ཤིས་གཟི་བརྗིད་ལྡན།། ནུས་དང་ལྡན་ཞིང་བདེ་བ་ཐོབ།། ཐལ་བའི་དབང་དང་མཐུ་མཉམ་ཞིང། ། བརྟུལ་ཞུགས་དྲག་པོས་བསྟན་པ་སྐྱོང།། འགྲོ་བ་དཀར་པོའི་མགོན་དུ་ཡོད།། ཅེས་པས་མགོན་པོ་མེ་ལྕེ་ཕྲེང་བའི་རྒྱུད་ལས། དམ་ཚིག་ལྡན་པའི་རྒྱུད་འདི་བཅངས་པའི་ཡོན་ཏན་བརྗོད་པའི་ལེའུ་སྟེ་ཞེ་གསུམ་པའོ། །།། དེ་ནས་དཔལ་མགོན་པོ་ནག་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།། ཀྱེ་ཀྱེ་བཅོམ་ལྡན་སངས་རྒྱས་གཙོ།། ལེགས་སོ་ལེགས་སོ་བཅོམ་ལྡན་འདས། ། བདེན་པ་ཉིད་ལ་དགོངས་ནས་ནི།། ཀུན་རྫོབ་བསྟན་པ་སྲུང་དོན་དུ།། ཕྱི་རབས་དོན་དུ་ང་ཡི་རྒྱུད།། བཤད་པ་བཅོམ་ལྡན་ཁྱོད་ལེགས་སོ།། ངས་ཀྱང་དམ་ལ་གནས་ནས་ནི།། རྣལ་འབྱོར་དམ་ལྡན་གྲོགས་བྱའོ། ། ཁྱེད་ཀྱི་བཀའ་ལས་མི་འདའ་བར།། བདག་གིས་བཅོལ་བའི་ལས་སྒྲུབ་བོ།། གལ་ཏེ་དམ་ལ་འདས་པ་ན།། སྒྲུབ་བོ་ཉིད་ཀྱང་རླག་པར་བྱེད།། དེ་ཕྱིར་དམ་ལས་མ་འདའ་ཞིག། ཅེས་པས་མེ་ལྕེ་ཕྲེང་བའི་རྒྱུད་ལས། ཕྱི་རབས་ལ་གཏད་པ་དང།། ཡི་རང་བའི་ལེའུ་སྟེ་ཞེ་བཞི་པའོ།།།། བཅོམ་ལྡན་གཙོ་བོས་བཀའ་སྩལ་པ།། རྒྱུད་འདི་མཚན་ནི་སྨོས་ཏེ་སྤྱད།། སྐྱེས་བུ་ཁྱོད་ཀྱི་མཐུ་རྩལ་དང།། ནུས་པ་རྒྱུད་ལ་ཡོད་པ་ལྡན། ། སྐྱེས་བུ་ཁྱོད་ཀྱི་མཐུ་རྩལ་ནི།། སྲིད་པ་གསུམ་ལ་བྷྱོས་འདེབས་ཤིང།། ཁམས་གསུམ་དབང་དུ་སྡུད་པར་བྱེད།། འདོད་ཁམས་འཁྲུག་ཅིང་ཟིལ་གྱིས་གནོན།། སྟོང་གསུམ་གཞན་དུ་འཕེན་པར་བྱེད།། འབྱུང་པོ་ཀུན་གྱི་རྒྱུན་ལམ་གཅོད། ། རྒྱ་མཚོ་ཆེན་པོ་ཧུབ་ཀྱི་འདེབས།། རི་བོ་ལྟོ་རུ་ཟ་བར་བྱེད།། དགྲ་བགེགས་འབྱུང་པོ་ཚར་གཅོད་ཅིང།། ཁྱོད་ཀྱིས་གད་མོ་བདག་པ་ནི།། གཤེ་བའི་གད་མོས་ལྷ་རྣམས་བརྒྱལ།། བདུད་དང་མུ་སྟེགས་དངངས་པར་བྱེད། ། ཤི་ལ་ཐུག་པར་བརྒྱལ་བར་འགྱུར།། ངོ་མཚར་གད་མོས་དབང་དུ་སྡུད།། མ་མོའི་ཚོགས་རྣམས་ཡིད་ཀྱང་འཕྲོག། ཧཱུཾ་སྒྲས་ཁམས་གསུམ་དབང་དུ་སྡུད།། ཕཊ་ཀྱིས་སྟོང་གསུམ་དུས་གཅིག་སྒྲོལ། ། ཕེཾ་ཕེཾ་ཕེཾ་གྱིས་འཇིག་རྟེན་གཡོ།། གཡོ་བ་ཐམས་ཅད་དབང་དུ་སྡུད།། བེང་གི་སྟོབས་ནི་གློག་དང་འདྲ།། སྟོང་གསུམ་དུས་གཅིག་ཁྱབ་པར་འགྲོ།། མངོན་ཤེས་ལྔ་དང་རབ་ལྡན་ཞིང།། རྫུ་འཕྲུལ་སྣ་ཚོགས་རབ་བསྟན་ནས། ། འགྲོ་བ་ལོག་རྟོག་སྒྲོལ་བར་བྱེད།། མཁའ་འགྲོ་བདུན་གྱི་གཙོ་བོ་སྟེ།། དུར་ཁྲོད་བདུན་གྱི་བདག་པོ་ཡིན།། ལྷ་ཆེན་ཚོགས་ཀྱི་བདག་པོ་སྟེ།། ཞིང་སྐྱོང་དཔའ་བོའི་དམག་དཔོན་བྱེད།། གཤིན་རྗེ་ཀུན་གྱི་རྗེ་བོ་མཛད། ། གནོད་སྦྱིན་ཀུན་ཀྱང་བྲན་དུ་འཁོལ།། དེ་ལྟར་ལྡན་པའི་སདེད་དཔོན་ཁྱེད།། འཁོལ་ཞིང་སྒྲུབ་པར་བྱེད་པ་ཡི།། རྒྱུད་ཀྱི་དོན་ནི་མེ་ལྕེ་ཕྲེང།། མེ་ལྕེ་འདྲ་ཕྱིར་ཀུན་སྲེག་ཅིང།། དམ་ཉམས་སྲོག་རྣམས་ཚིག་པར་བྱེད། ། སྲིད་གསུམ་ཉོན་མོངས་སྲེག་བྱེད་ཅིང།། དེ་དོན་དེ་འདྲ་དུག་དང་འདྲ།། མཚོན་འདྲ་ཕྱིར་ན་ཁྲོ་བོ་སྟེ།། འཇིགས་བྱེད་མེ་འབར་ནག་པོ་ནི།། གསང་ཞིང་བརྗོད་དང་མི་བསྟན་ནོ།། སྤ་ཞིང་བཅངས་ཤིང་སྤྱད་པར་བྱ། ། རང་ཉིད་དམ་ལ་གནས་པར་བྱ།། རང་གི་སྲོག་ལྟར་བྱ་བ་སྟེ།། རང་ཉིད་ཆོས་དང་མི་ལྡན་ན།། སླར་ལ་སྦྲང་བུ་མེར་མཆོང་འདྲ།། རང་སྲོག་འཆད་པར་ཐེ་ཚོམ་མེད།། སློབ་དཔོན་སྐུ་དགྲ་ཆོས་འཁོར་འཇིག། དེ་འདྲའི་ཡུལ་ལ་མ་གཏོགས་པ། ། གཞན་སྲོག་འཆད་པར་ཐེ་ཚོམ་མེད།། སློབ་དཔོན་སྐུ་དགྲ་ཆོས་འཁོར་འཇིག། དེ་འདྲའི་ཡུལ་ལ་མ་གཏོགས་པ།། གཞན་དུ་བྱས་ན་དམ་ཚིག་ཉམས།། ཞེས་པས་མེ་ལྕེ་ཕྲེང་བའི་རྒྱུད་ལས། རྒྱུད་ཡོངས་སུ་གཏད་པའི་ལེའུ་སྟེ་ཞེ་ལྔ་པའོ།།།། དེ་སྐད་ཅེས་བཀའ་སྩལ་པ་དང། འཁོར་རྣམས་རྗེས་སུ་ཡི་རངས་ཏེ་བསྟོད་པ་ཕུལ་ནས། གུས་པས་གཞན་དུ་དེངས་སོ།། མགོན་པོ་མེ་ལྕེ་ཕྲེང་བ་ཞེས་བྱ་བ་ནག་པོ་ཆེན་པོ་དུར་ཁྲོད་བདག་པོའི་རྒྱུད་རྫོགས་སོ། །།། རྒྱ་གར་གྱི་མཁན་པོ་དྷ་ན་སཾ་སྐྲྀ་ཏ་དང། ལོཙྪ་བ་གོར་བཻ་རོ་ཙ་ནས་བསྒྱུར་བའོ།།།།
CLOSE WINDOW