| Wylie |
།།། མ་མོ་རབ་ཏུ་གསང་བའི་རྒྱུད་རྫོགས་སོ།།།། རྒྱ་གར་སྐད་དུ། ཨེ་གུ་ཧྱ་ཙཀྲ་ཏན་ཏྲ། བོད་སྐད་དུ། དབྱིངས་གསང་བའི་འཁོར་ལོའི་རྒྱུད། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གསང་བ་གསུམ་གྱི་བདག་པོ་ཤིན་ཏུ་འཇིགས་པ་རྒྱན་རྣམ་པ་སྣ་ཚོགས་དང་ལྡན་པ། གསང་བའི་བྷ་ག་ལས་བཞེངས་ཏེ། དྲག་པོ་ཨེའི་གདན་ལ་བཞུགས་པ། གསང་བ་རིགས་ཀྱི་འཁོར་རྣམས་ཀྱིས་བསྐོར་ཏེ་བཞུགས་སོ།། དེའི་ནང་ནས་བཅོམ་ལྡན་འདས་དཔལ་གཤིན་རྗེའི་གཤེད་པོ་གདན་ལས་བཞེངས་ཏེ་སྟོན་པ་ཀུན་ཏུ་བཟང་པོ་ལ་གར་གྱི་མཆོད་པ་ལན་བརྒྱ་ཕྲག་ཕུལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ།། ཀྱེ་མ་བདེ་གཤེགས་བཅོམ་ལྡན་འདས།། གོང་དུ་གསུངས་པའི་རྒྱུད་རྒྱལ་དེར།། རྟེན་གྱི་དཀྱིལ་འཁོར་གསུངས་པ་ལས། ། གསང་བའི་ལས་དེ་མི་འགྲུབ་བམ།། འགྲུབ་ན་གསང་སྔགས་ཇི་ལྟར་ལགས།། མཱ་ར་ཡ་ཡི་ཕྲེང་བ་ལས།། དེ་ལ་བསྙེན་པ་མི་འཚལ་ལམ།། གསད་པའི་དུས་ཚོད་ཇི་ལྟར་ལགས།། ཉ་ཤི་དུས་སུ་བསད་པ་ཡི།། དེ་ཡི་གཏན་ཚིགས་ཇི་ལྟར་ལགས། ། རཀྟའི་ངེས་པ་ཇི་ལྟ་བུ།། ཐོད་པའི་ངེས་པ་ཇི་ལྟར་ལགས།། ཡི་གེ་གྲངས་ཀྱི་ངེས་པ་ཅི།། འདི་ལ་ཚད་མ་མི་འཚལ་ལམ།། འཁོར་ལ་ཞེས་བགྱི་ཇི་ལྟ་བུ།། བཅོམ་ལྡན་འདས་ཀྱིས་དེ་བཤད་འཚལ། ། དེ་ནས་བཅོམ་ལྡན་འདས་དཔལ་མངོན་རྫོགས་རྒྱལ་པོ་གདན་ལས་བཞེངས་ཏེ། སྐུ་གསུང་ཐུགས་ཀྱི་རྡོ་རྗེ་ལས།། སེམས་ཅན་ཉོན་མོངས་སེལ་བའི་སྨན།། དུག་ལྔ་སེལ་བའི་རྩི་མཆོག་ཡིན། ། མ་རིག་སེལ་བའི་སྒྲོན་མེ་མཆོག། དེ་ནི་བདེ་བ་ཆེན་པོ་སྟེ།། མ་འོངས་རྣམས་ཀྱི་དོན་དུ་བཤད།། ལུས་ངག་ཡིད་གསུམ་གུས་པས་ཉོན།། རྟེན་གྱི་དཀྱིལ་འཁོར་གྱིས་བསད་པ།། འདི་ལ་རྣམ་པ་བདུན་དུ་གསུངས། ། དང་པོར་ཨེ་ཡི་གནས་པ་ཡང།། སྐྱེ་མེད་ཆོས་དབྱིངས་ཡི་གེ་ཨེ།། མཱ་ར་ཡ་ཉིད་མཐར་བཞག་པ།། ཛས་འགུགས་བསྙེན་པའི་མཆོག་ཏུ་གསུངས།། གཉིས་པ་ཡི་གེ་ཡཾ་ཡིན་ཏེ།། སྐྱོད་བྱེད་ཡི་གེ་བྷྱོ་ཡིས་བསྐུལ། ། གསུམ་པ་ཡི་གེ་རཾ་ཡིན་ཏེ།། རཾ་གཉིས་བར་དུ་མཱ་ར་ཡ།། སྲེག་བྱེད་མེ་ཡི་འཁོར་ལོ་བསྒོམ།། བཞི་པ་ཡི་གེ་བཾ་ཡིན་ཏེ།། བཾ་གཉིས་བར་དུ་མཱ་ར་ཡ།། འདོད་ཆགས་ཁྲག་གི་དཀྱིལ་འཁོར་བསྒོམ།། ལྔ་པ་ཡི་གེ་སུ་ཡིན་ཏེ། ། སུ་གཉིས་བར་དུ་མཱ་ར་ཡ།། གཏི་མུག་ས་ཡི་དཀྱིལ་འཁོར་བསྒོམ།། དྲུག་པ་ཡི་གེ་ཧཾ་ཡིན་ཏེ།། ཧཾ་གཉིས་བར་དུ་མཱ་ར་ཡ།། འོད་ཀྱི་གོང་བུ་ལྟ་བུར་བསྒོམ།། བདུན་པ་ཡི་གེ་ཕཊ་ཡིན་ཏེ།། ཕཊ་གཉིས་བར་དུ་མཱ་ར་ཡ། ཁྲོ་ཚོགས་ནམ་མཁའི་སྐར་ལྟར་འཁྲུགས།། ཡི་གེ་ནརྀ་ནི་ས་བོན་ཡིན།། གསོད་བྱེད་ཡི་གེ་རྦད་ཀྱང་ཡིན།། ཨེ་བཞག་ཡི་གེ་མཱ་ར་ཡ།། ཐ་མ་ཛ་ཡིས་བསྙེན་པ་ནི།། མཱ་ར་ཡ་ཡི་བསྙེན་པ་ཡིན།། རེ་རེས་ལས་རེ་འགྲུབ་པའི་ཕྱིར། ། སྒྲུབ་པ་ཆེན་པོ་བདུན་དུ་གསུངས།། དབྱིངས་གསང་བའི་འཁོར་ལོའི་རྒྱུད་ལས། རྟེན་དྲག་སྔགས་ཀྱི་སྒྲུབ་ལུགས་བདུན་པའི་ལེའུ་སྟེ་དང་པོ།།།། དེ་ནས་འཇམ་དཔལ་གྱིས་གསོལ་པ།། ཉ་ཞེས་བྱ་བ་ཇི་ལྟ་བུ། ། ཉ་ཡི་གཏན་ཚིགས་ད་བཤད་འཚལ།། བཅོམ་ལྡན་འདས་ཀྱིས་བཀའ་སྩལ་པ།། ཉ་གཉེན་པོ་དོན་གྱི་མདོ་བཞིན་དུ།། རྣལ་འབྱོར་པ་བཀྲ་ཤིས་པར་སྟོང་པ་དང། ལོག་པར་བལྟ་བ་རྣམས་ལ་མཛེ་ནད་དང། རིམས་ནད་སྣ་ཚོགས་བཏང་བ་དང། དེས་ཉ་བསྟན། སྟོང་ནི་རྣལ་འབྱོར་པའི་སེམས་ཀྱི་སྐྱེ་ལུགས་དང། གཟས་པ་པོ་གསོད་པའི་ཐབས་སྟོན་པའི་ཕྱིར་ན། སྟོང་ཞེས་བྱ། རཀྟ་ནི་མཁའ་འགྲོ་ཀུན་གྱི་དམ་རྫས་ཀྱི་མཆོག་ཡིན་པ་དང། ། གཟས་པ་པོ་གང་ཡིན་པ་བསྒྲལ་བའི་ཐབས་དེ་ལས་བྱུང་བའི་ཕྱིར་རཀྟ་བསྟན་ཏོ།། དབྱིངས་གསང་བའི་འཁོར་ལོའི་རྒྱུད་ལས། ཉ་སྟོང་དང་རཀྟ་བསྟན་པའི་ལེའུ་སྟེ་གཉིས་པའོ།།།། ཀྱེ་མ་བདེ་གཤེགས་བཅོམ་ལྡན་འདས། ། ཐོད་པ་རྣམ་པ་དུ་རུ་གསུང།། ཐོད་པའི་ངེས་པ་ད་བཤད་འཚལ།། བཅོམ་ལྡན་འདས་ཀྱིས་བཀའ་སྩལ་པ།། ཐོད་པའི་དེ་ཉིད་བཤད་བྱ་ཡིས།། ལུས་ངག་ཡིད་གསུམ་གུས་པས་ཉོན། ། མནན་ཐོད་དང་ནི་མཆོད་ཐོད་དང།། འཕང་ཐོད་དེ་བཞིན་ལྡིང་ཐོད་དང།། སྤར་ཐོད་ནམ་མཁའ་མཆོད་ཐོད་དང།། ཟློག་ཐོད་འབུབ་ཐོད་མ་ཉམས་ཐོད།། སྨྲ་ཐོད་ཟ་ཐོད་ལ་སོགས་པ།། ཐོད་པ་བཅུ་གསུམ་དག་ཏུ་ངེས། ། ཡི་གེ་ལཾ་བྲིས་རི་རབ་ལྡན།། དབུས་སུ་ནརྀ་དང་མིང་རུས་བཅུག། བྲིས་པ་མནན་པའི་ཐོད་པར་ངེས།། རྫས་དང་མནན་པར་ངེས་པའི་རྫས།། སྦལ་པ་དག་གི་ཤུན་རྣམས་ནི།། སྦྲུལ་གྱི་ཤུན་དུ་ངེས་པ་ཡིན། ། ཚིག་དང་མནན་པར་ངེས་པའི་ཚིག། ནཱ་ག་ཞེས་བྱའི་བོའང་གཞུག། ཏིང་འཛིན་དང་ལྡན་གཤིན་རྗེའི་སྔགས།། ཨ་ཀྲོ་འབྲུ་བདུན་གཉའ་ནོན་ཡིན།། རྡོ་རྗེའི་བཟླས་པ་མི་ནུས་པས།། མནན་ན་ངེས་པར་ནོན་པ་ཡིན། ། དབུས་སུ་བསྒྲུབ་བྱའི་མིང་རུས་དང།། གཉན་དགུ་དག་ལ་གཏད་པར་བྱ།། མནན་ཐོད་མཆོད་ན་གསོ་བར་འགྱུར།། འཕང་ན་བསྒྲུབས་པ་འཆོར་བར་ངེས།། ཀླུ་ལ་བ་དམར་རྭ་རུ་མནན།། གཞན་ཡང་རྟ་ལ་སོགས་པ་ཡིན། ། གཟུགས་ལ་མནན་ན་ངེས་པར་ཕུང།། གཞན་ཡང་མནན་པ་ཐོད་པའི་གྲངས། ཁམ་སའི་ཕུར་པ་བཅུའམ་དགུ་ལས་ཉུང་མི་བྱ།། དེ་དག་མནན་པ་གྲུབ་པའི་རྟགས།། ཀླུ་ལས་མཛེ་ནད་བཅོ་བརྒྱད་འབྱུང། ། བཙན་ལས་གཟེར་ནད་དྲུག་ཏུ་འབྱུང།། ས་བདག་ལས་ནི་ཞ་གྲུམ་སྟེ།། ཡུལ་ལྷས་ཡུལ་ལས་དབྱུང་ལ་སོགས།། དམུ་ལྷས་དམུ་ནད་དགུ་རྣམས་གཏོང།། ལྷ་ལ་སོགས་པ་གཞན་རྣམས་ལ།། བདུན་དང་ལྔ་དང་དྲུག་དང་ཡང། ། བརྒྱད་དང་དགུ་རུ་ཤེས་པར་བྱ།། ཕུང་བྱེད་མནན་ཐོད་བཤད་པའོ།། མཆོད་ཐོད་ནལ་བུ་དྲེད་དང་ཕག། ཞག་གསུམ་ལ་སོགས་གོང་དང་འདྲ།། ཡོངས་སུ་མ་ཉམས་ཐོད་པ་ལ།། དབུས་སུ་གཙོ་བོའི་སྔགས་བྲིས་ལ། !!!!!!ཡི་སྔགས་ཀྱིས་བསྐོར།། རཀྟའི་རྒྱ་མཚོ་མཆོད་པའི་རྫས།། བོད་པའི་རྫས་ནི་སྤོས་ཆེན་ལ།། བསྙེན་པའི་རྫས་ནི་ཨ་མྲྀ་ཏ།། དམ་ཚིག་རྫས་ནི་དམ་ཚིག་བསྲེ།། བསྒོམ་དང་ཏིང་འཛིན་མ་འཁྲུལ་བས། ། མཁའ་འགྲོ་ཐོད་པ་དེ་ལ་མཆོད།། ཡེ་ཤེས་གཤེགས་དང་འབྲེལ་པ་བཞིན།། མཆོད་ཐོད་དྲན་ཏེ་རྟག་ཏུ་མཆོད།། ཟས་ཀྱི་ཕུད་མཆོད་རྟག་ཏུ་དྲན།། བྲན་དང་ཡུལ་འཁོར་སྐྱོབ་པར་བྱེད།། ཅི་འདོད་བསམ་པ་འགྲུབ་པར་བྱེད། ། མཆོད་ཐོད་མནན་ན་མཁའ་འགྲོ་མནན།། སྟོང་གསུམ་སྲིད་པའི་མཁའ་འགྲོ་འཁྲུགས།། བདག་ཉིད་འཁོར་དུ་སྨྱོ་འབོགས་གཏོང།། རིམས་ནད་སྣ་ཚོགས་འབྱུང་བར་འགྱུར།། གཞན་ཡང་མཛེ་ནད་སྣ་ཚོགས་གཏོང། ། འཕང་ན་ལས་མཁན་འཕང་བ་སྟེ།། བོད་པའི་སྔགས་དང་ཚིག་གིས་ཀྱང།། ཏིང་འཛིན་སྦོས་ཀྱང་མི་འཁོར་ཏེ།། བརྟེན་དང་མཆོད་པ་དེ་དང་འདྲ།། འཁོར་གྱི་མ་མོ་གཞན་དུ་འཕྲོས།། ལྷ་ལ་རྒྱབ་ཀྱིས་ཕྱོགས་པའོ། ། ཡུན་དུ་བཟུང་བའི་མཆོད་ཐོད་དང།། རྟག་པར་བཞུགས་དང་རྗེས་སུ་དྲན། མཐུན་པར་ཞུགས་ཀྱང་གཤེགས་བཞུགས་མེད།། ཐོད་པ་བཞི་ལ་མཆོད་པར་གསུངས།། འཕང་ཐོད་རབས་ཆད་ཐོད་པ་རུ། ། དྲག་སྔགས་བྲིས་ཏེ་དེ་བཞག་ནས།། ཏིང་འཛིན་དུག་གི་ན་བུན་འཐིབས།། འཕང་ཐོད་མཆོད་ན་དྲག་སྔགས་དང། ན་བུན་བདག་ལ་ལྡོག་པརབྱེད།། མནན་ན་ན་བུན་ལྷ་འདྲེ་ཡི།། གཉན་དགུ་དག་ལ་མནན་པ་སྟེ། ། གཉེན་དགུའི་རིམས་ནད་བདག་ལ་ལྡོག། མཆལ་ཡང་འཆང་ཆེན་ཁའམ་བྱང་རི་ཁར།། འཕང་ན་དགྲ་ཡི་ཡུལ་ཁམས་སུ།། ནད་ཀྱི་ན་བུན་འཐིབས་པ་དང།། མཚོན་གྱི་སྐལ་པ་འཁྲུགས་པ་དང། ། དུག་གི་ན་བུན་ངེས་པར་འཐིབས།། བྱང་རི་ཁ་ནས་འཕང་པར་ངེས།། དབྱིངས་གསང་བའི་འཁོར་ལོའི་རྒྱུད་ལས། ཐོད་པ་བཤད་པའི་ལེའུ་སྟེ་གསུམ་པའོ།།།། དེ་ནས་འཇམ་དཔལ་གཤེད་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། ཀྱེ་མ་བདེ་གཤེགས་བཅོམ་ལྡན་འདས།། ཡི་གེ་རྩིས་ནི་ཇི་ལྟར་ལགས།། བཅོམ་ལྡན་འདས་ཀྱིས་ད་བཤད་འཚལ།། ཞེས་གསོལ་པས། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་འཇམ་དཔལ་གཤིན་རྗེ་གཤེད།། སྔགས་ཀྱི་དེ་ཉིད་རྣམ་པ་ལྔ།། ཡང་དག་ཉིད་དུ་བཤད་བྱ་ཡི།། བསྙེན་སྔགས་བསྒྲུབ་སྔགས་གསད་པའི་སྔགས།། སྔགས་ཀྱི་ཕྲེང་བ་དུམ་དུམ་འབྲེལ། ཨཱ+ོཾ་ནི་རིགས་ལྔ་སངས་རྒྱས་ཏེ། ། མཱ་ར་ཡ་ཡི་རིགས་པ་དྲང།། ཐ་མར་ཡི་གེ་ཛ་བཞག་པ།། རྟེན་གྱི་ནི་བསྙེན་པའོ།། ཨེ་ནི་ཆོས་ཀྱི་དབྱིངས་ཉིད་དེ།། ཡི་གེ་ཛ་ཡིས་དགུག་བྱས་ནས།། ཡི་གེ་བཞི་ཡིས་རིགས་པ་དྲང།། རྟེན་འབྲེལ་བསྒྲུབ་པའི་བསྙེན་པ་ཡིན། ། མཐར་བྱེད་ལྔ་ནི་ཡི་གེ་ཨོཾ། ཨ་ནི་ཡུམ་ལྔའི་སྙིང་པོ་སྟེ།། ཀྲོ་ནི་ཕྱོགས་བཅུའི་ཁྲོ་བོ་ཡིན།། ཏེ་ནི་སྲས་བཅས་སྙིང་པོ་སྟེ།། ཀ་ནི་གཟུགས་སྐུའི་སྙིང་པོ་ཡིན།། ཧཱུཾ་གིས་ཐམས་ཅད་དབང་དུ་སྡུད། ། ཕཊཿཀྱིས་ལྷ་ཚོགས་སྤྲོ་བ་སྟེ།། འཇམ་དཔལ་རྩ་བའི་བསྙེན་པ་ཡིན།། སྣང་བ་ཤེས་པ་དངོས་པོ་སྟེ།། རང་ལ་ཡོད་པས་གྲུབ་པ་ཡིན།། ཡི་གེ་བྷྱོ་ནི་སྒྲུབ་སྔགས་ཏེ།། རྦད་ནི་གསད་པའི་སྔགས་ཡིན་ཏེ།། ལཾ་ནི་མནན་པའི་སྔགས་ཡིན་ནོ། ། མཱ་ནི་གཤེད་མའི་རྒྱུ་ཡིན་ཏེ།། ར་ནི་གཤེད་མར་བྱེད་པ་ཡིན།། ཡ་ནི་གཤེད་མའི་རྐྱེན་ཡིན་ཏེ།། གཤེད་མའི་ཚོགས་སྤྲོ་ཡི་གེ་ཕཊ།། སྔགས་ཀྱི་ཕྲེང་བ་དུམ་དུམ་འབྲེལ།། ཡེ་ཤེས་ལྔ་དང་ལྷུན་གྱིས་གྲུབ། ། ཡེ་ཤེས་ཕྲེང་བ་དུམ་དུམ་འབྲེལ།། ལས་དང་འཇིག་རྟེན་འཇིག་རྟེན་འདས།། ལས་མཁན་ཕྲེང་བ་དུམ་དུམ་འབྲེལ།། འབྲས་བུ་དང་ནི་ཚོགས་དང་གསུམ།། ལམ་གྱི་ཕྲེང་བ་དུམ་དུམ་འབྲེལ།། ཕྲེང་བ་ཡང་དག་རྣམ་པ་གསུམ། ། དེ་ཉིད་མ་འཁྲུལ་སྤྱད་གྱུར་ན།། ལས་མཁན་མ་ལུས་དབང་དུ་འདུ།། རྒྱུད་ནི་རྣམ་པ་གསུམ་ཡིན་ཏེ།། ལས་ཀྱི་རྒྱུད་ནི་དྲེགས་པ་ཅན།། འབྲས་བུའི་རྒྱུད་ནི་བདེ་གཤེགས་སྐུ།། ལམ་གྱི་རྒྱུད་ནི་གསང་སྔགས་ཀྱི། ། ཡི་གེ་འབྲུ་ལྔ་དེ་ཉིད་ཡིན།། རྟེན་དང་རྟེན་ཅན་རྣམ་གཉིས་ཀྱི།། སྲོག་གི་སྙིང་པོ་མ་ནོར་བར།། དྲང་བས་རྟེན་དང་བཅས་པར་འགུགས།། བསྙེན་སྔགས་མ་ནོར་བདེ་བ་སྐྱེད།། སྒྲུབ་སྔགས་མ་ནོར་ནི་དྲག་སྔགས་ཁྱད་པར་ཅན་བསྟན་པ་སྟེ། དབྱིངས་གསང་བའི་འཁོར་ལོའི་རྒྱུད་ལས། མནན་པ་ལས་ཀྱི་བྱེ་བྲག་བསྟན་པའི་ལེའུ་སྟེ་ལྔ་པའོ།།།། དེ་ནས་འཇམ་དཔལ་སྟན་ལས་བཞེངས་ཏེ། བཅོམ་ལྡན་འདས་ལ་ཕྱག་ལས་ལ་འཛུད། ། བསད་སྔགས་མ་ནོར་མཚོན་དུ་དབབ།། ཨེ་ཡིས་བསྙེན་པ་བགྲངས་པ་ཡིས།། སྐུ་གསུམ་ཐོབ་ཀྱང་མཆི་བར་ངེས།། ཡཾ་གྱི་བསྙེན་པ་བགྲངས་པ་ཡིས།། རིག་པ་རྙེད་ཀྱང་གནས་ནས་འགུགས། ། རཾ་གྱི་བསྙེན་པ་བགྲངས་ནས་ནི།། དྲོད་ལྔ་ཐོབ་ཀྱང་ལུས་སེམས་འབྲལ།། བཾ་གྱི་བསྙེན་པ་བགྲངས་པས་ནི།། སྐུ་ལྔ་ཐོབ་ཀྱང་སྡུག་བསྔལ་མྱོང།། སུ་ཡི་བསྙེན་པ་བགྲངས་ནས་ནི།། ས་རྣམས་ཐོབ་ཀྱང་གསོད་པར་བྱེད། ། ཧཾ་གི་བསྙེན་པ་བགྲངས་པས་ནི།། སྐུ་ལྔ་རྟོགས་ཀྱང་འཇིག་པར་འགྱུར།། ཕཊ་ཀྱི་བསྙེན་པ་བགྲངས་པས་ནི།། ཆེ་བས་ཆེ་བའི་མཐུ་དཔུང་འཇོམས།། འདི་རྣམས་གཅིག་ལས་གང་བྱས་ཀྱང།། ལས་རྣམས་འགྲུབ་པ་གདོན་མི་ཟ། ། དབྱིངས་གསང་བའི་འཁོར་ལོའི་རྒྱུད་ལས། སྔགས་ཀྱི་རྩིས་དང་མཚན་མ་བཤད་པའི་ལེའུ་སྟེ་བཞི་པའོ།།།། དེ་ནས་འཇམ་དཔལ་གཤིན་རྗེའི་གཤེད་གདན་ལས་བཞེངས་ཏེ།། ཀྱེ་མ་བདེ་གཤེགས་བཅོམ་ལྡན་འདས། ། གོང་དུ་གསུངས་པའི་མནན་གཏད་ལ།། ལས་ཀྱི་བྱེ་བྲག་ཇི་ལྟར་བགྱི།། བཅོམ་ལྡན་འདས་ལ་བཀའ་འདྲི་ཞུ།། དེ་སྐད་གསོལ་པ་གསན་ནས་ཀྱང།། བཅོམ་ལྡན་འདས་ཀྱིས་བཀའ་སྩལ་པ། ། ང་ནི་འགྲོ་ལ་ཐུགས་བརྩེའི་ཕྱིར།། ལས་ཀྱི་བྱེ་བྲག་ཐམས་ཅད་ཀུན།། འགྲོ་ལ་བརྩེ་ཕྱིར་ངས་བཤད་ཀྱི།། ལུས་ངག་ཡིད་གསུམ་གུས་པས་ཉོན།། ཨེ་ནི་ཆོས་ཀྱི་དབྱིངས་ཉིད་ཡིན་པ་སྟེ།། གྲུ་གསུམ་ནམ་མཁའི་སྙིང་པོ་ཡིན། ། ནཱ་ག་ཀླུ་ཡི་སྙིང་ནས་འདྲེན།། ཚལ་གྱིས་ཀླུ་རྣམས་སོ་སོར་འབྱེད།། ཐུམ་གྱིས་རིགས་བཞི་ལས་ལ་འཛུད།། རིལ་གྱིས་སོ་སོར་འཛིན་པར་བྱེད།། ནམ་གྱིས་མགོ་ལུས་དབང་དུ་བསྡུས།། ཕུག་གིས་ལས་རྣམས་གདོན་མི་ཟ། ། ཨེ་ནག་ཚལ་ཐུམ་རིལ་ནཾ་ཕུག། ལྕགས་ཀྱི་ཕུར་བུ་སོར་བརྒྱད་པ་གཅིག་གིས་བརྡེག་ཅིང་ཡི་གེ་ཧཾ་བསམ་ལ། མཛེ་ནད་སྣ་ཚོགས་པའི་རིམས་ཀྱིས་བཏབ་ནས་དང། མཚོན་གྲིར་འཆི་བར་འགྱུར་རོ། ། རྨུགས་ཀྱིས་གཟས་པ་སྲོག་ནས་འདྲེན།། ཚལ་གྱིས་ལས་མཁན་གཤེད་མར་བགྱེད།། ཚལ་པ་ངེས་པར་གསོད་པ་ཡིན།། དུམ་དཀྲུག་གཉིས་བརྗོད་མནན་པའི་དོན།། མགོ་ཆག་པ་དང་རྐང་ལག་ཆག་པ་དང། ། ར་རུས་ཆག་པས་འཆི་བར་འགྱུར་རོ།། རྨུགས་ཚལ་ཚལ་པ་དུཾ་དཀྲུག། དུཾ་དཀྲུག། ཟངས་ཀྱི་ཕུར་པ་སོར་བརྒྱད་གཅིག་བརྡེག་ཅིང།། གྱོ་མོ་ལ་འཁོར་ལོ་བྲིས་ལ་གཏུམས་ན། གོང་མའི་ནད་རྣམས་ཀྱིས་བཏབ་ནས་འཆི་བར་འགྱུར་རོ། ། ནཱ་ག་ཞེས་བྱས་ཀླུ་རྣམས་འགུགས།། ཧེ་ཧེ་བཏབ་པའི་སྔགས་ཡིན་ཏེ།། དི་དི་རི་རིས་གཤེད་མར་ལྡང།། རྨུགས་གཤར་གཤེད་མ་བསྐུལ་བའི་སྔགས།། ནཱ་ག་ཧེ་ཧེ་དི་དི་རི་རི་རྨུགས་བཤར། ། བརྒྱ་རྩ་བརྒྱད་བརྒྱབ་ན། དགྲ་བོ་མཛེས་འཛིན་པར་འགྱུར་རོ།། དེ་དག་བྱས་ཏེ།། ཀྱེ་མ་བདེ་གཤེགས་བཅོམ་ལྡན་འདས། མ་འོངས་པ་ཡི་རྣལ་འབྱོར་ལ།། ཐུན་མོང་སྔགས་རྣམས་མི་འཚལ་ལམ།། དེ་ལ་ནན་ཏུར་མི་འཚལ་ལམ། ། བཅོམ་ལྡན་འདས་ཀྱི་ད་བཤད་འཚལ།། བཅོམ་ལྡན་འདས་ཀྱིས་བཀའ་སྩལ་པ།། སྔགས་རྣམས་སྤུ་གྲི་འདྲ་བ་ལ།། ཤིན་ཏུ་བཤད་པར་མི་སྤོབས་ཀྱང།། མ་འོངས་རྣམས་ཀྱི་དོན་ཕྱིར་བཤད། ། ད་ར་རྣམ་ཤེས་སྔགས་ཡིན་ཏེ།། ཐུམ་བྱེར་གྱིས་ནི་གསོད་པར་བྱེད།། ད་ར་ཐུམ་བྱེར་མནན་པ་ཡིན།། ད་ར་ཐུམ་བྱེར་ངར་ཐུམ་བྱེར། ཁྱི་ཁྲག་ར་ཁྲག་མོན་པའི་ཁྲག། གནག་གི་ཁ་སྤུ་གློ་བ་སློ་རྣམས་ལ། ། སྔགས་བཏབ་བཀོལ་ན་གནག་རྣམས་ཕུང།། བསྙེན་བསྒྲུབ་སྔགས་ནི་འབུམ་དུ་བཟླས།། ཟླ་སྐར་བེའུ་རྫི་ཡིན་ཏེ་ཉི་མ་དྲོས་ལ་བྱ།། རྦད་ཐུམ་འཁྲུགས་པའི་སྙིང་པོ་སྟེ།། དེ་ནི་རྣམ་ཤེས་སྙིང་པོར་གསུངས། ། ཅི་རི་གཉིས་འགྱུར་བརྗོད་པར་བྱ།། རི་རི་སྲེག་པའི་སྦྱོར་བ་ཡིན།། སྤ་ར་ན་གྲམ་བསད་སྔགས་ཏེ།། ཐུག་ལུམ་གཉིས་བརྗོད་བསད་སྔགས་ཡིན།། བར་དུ་མུག་བྱེར་གཉིས་བཞག་པ།། རབ་ཏུ་བསད་པའི་གསད་སྔགས་སོ། ། རྦད་ཐུཾ་རྩི་རི་རྩི་རི་རི་སྤ་ར་ན་གྲི་ཐུག་ལུཾ་ཐུག་ལུཾ་མུགས་བྱེར། གཞན་ཡང་ཨོཾ་ནི་ཀུན་གྱི་མགོ་ཡིན་ཏེ། བྲེས་འདི་བུས་ཞེས་རྦད་པ་དང།། ཐུམ་བུ་ཀྲི་ཏ་བསད་པའི་སྔགས།། དུར་གྲི་ཏ་དུང་བསྟབ་པའོ།། འཇིབས་ནི་བསད་པའི་སྔགས་ཡིན་ཏེ། ། རྟ་ལ་སོགས་པའི་རྨི་ཟླུམ་རྣམས།། ཡོངས་ལ་བརྡེག་པར་བསྟན་པ་ཡིན།། ཨོཾ་བྲེ་འདི་བུས་ཐུཾ་སྤུ་གྲི་ཏ་དུང་འཇིབས།། དགྲ་བོ་ཡུལ་ཚན་དང་འགྲས་ན།། གླ་བའི་ཆུ་ལ་ཆུ་བླུགས་ལ། ངན་སྔགས་འདི་བཏབ་ན་ཕུ་ཆུ་སྐམ་མོ། ། ཧེ་ཧེ་དུམ་བུ་ཧཱུཾ་ཡ་ནཱ་ག་དུང་ཞེས་བརྗོད་ནས། ཆུ་ལ་རྒྱབ་ན་ཆུ་མིག་ཐལ་བར་ཐོར་གྱིས་འགྲོའོ།། ནཱ་གས་ཀླུ་ཡི་སྲོག་ནས་འདྲེན།། ཐུམ་བུ་དམོས་པའི་སྔགས་ཡིན་ཏེ།། ཧཱུཾ་ཡ་བསྟབ་པའི་སྔགས་སུ་གསུངས། ། ནཱ་ག་ཐུཾ་བུ་ཧུ་ཡ། སྦས་པའི་གསོབ་ཁྲག་སྣ་ཚོགས་ཀྱིས་བསྐང་བ་ལ། བག་ཟན་གྱི་སྦལ་ལྕོང་བརྒྱད་ཀྱིས་མཐའ་བསྐོར་ལ། སྐར་མ་སྒྱེད་ཡང་གཡེད་གསུམ་ལ་བསྙེན་པ་བཟླས། སྐར་མ་ཁྲུམས་སྨད་ལ་གཏད། ཕག་པའི་ཐོད་པས་ཕག་པའི་སོག་པ་མནན། དགྲ་བོ་ཕོ་རྒྱུད་མཐའ་ཕུང་བར་ངེས་སོ།། ཨོཾ་ནི་རྣམ་པར་སྣང་མཛད་དེ།། རྗེ་ཁྲམ་བཙན་གྱི་སྲོག་སྙིང་སྟེ།། ཝ་ཁྲམ་བཙན་སྲིང་སྲོག་སྙིང་ཡིན།། རྟ་ཁྲམ་བུམ་སྲིའི་སྲོག་སྙིང་ཡིན། ། ཨོཾ་རྗེ་ཁྲམ་ཝ་ཁྲམ་རྟ་ཁྲམ། རབས་ཆད་ཀྱི་ནི་ཐོད་པ་དང། རྟ་ཐོད་དུ་བཅུག་ལ་སྐར་མ་བི་རྫི་ལ་གཏད་ནས། གོང་གསུམ་དུ་བཅུག་ན། དགྲ་བོ་མོ་རྒྱུད་མཐའ་ཕུང་བར་འགྱུར་རོ། ། དབྱིངས་གསང་བ་འཁོར་ལོའི་རྒྱུད་ལས། ལས་ཐུན་མོང་གི་སྔགས་བསྟན་པ་སྟེ་ལེའུ་སྟེ་དྲུག་པའོ།།།། དེ་ནས་དེ་དག་ཐམས་ཅད་ཀྱི།། སྤྱི་ཉིད་བཤད་པ་ལ་ཞུགས་ཏེ།། མཉམ་པ་ཉིད་ལ་གནས་པ་ལས། ། བཅོམ་ལྡན་འདས་ལ་འཇམ་དཔལ་གྱིས་ཞུས་པ། སྤྱི་དང་རང་གི་མཚན་ཉིད་ལས།། སྔགས་ལ་ངེས་པ་དུ་ཞིག་མཆིས།། བཅོམ་ལྡན་འདས་ལ་བཀའ་འདྲི་ཞུ།། བཅོམ་ལྡན་འདས་ཀྱིས་བཀའ་སྩལ་པ།། མ་འོངས་རྣམས་ལ་ཕན་འདགས་ཕྱིར། ། སྔགས་ཀྱི་དེ་ཉིད་བཤད་པར་བྱ།། སྔགས་ཀྱི་མགོ་བོ་ཨོཾ་ཡིན་ཏེ།། བསྙེན་པ་བསྒྲུབ་ན་འབྱུང་བར་ངེས།། རྣམ་པར་སྣང་མཛད་ཡིན་པའི་ཕྱིར།། དྲག་པོའི་ལས་ལ་འདུལ་མི་འགྱུར། ། མགོ་མེད་ཡི་གེ་ཧཱུཾ་གཞུག་བྱ།། ཡེ་ཤེས་ལྔ་དང་ལྡན་མོད་ཀྱང།། ཐུགས་ཉིད་རྡོ་རྗེ་ཡིན་པའི་ཕྱིར། ཁྲོས་པ་དྲག་པོས་འདུལ་བ་བསྟན།། འདུག་ས་གོང་འོག་སྤོ་བ་ཡིན།། ཡེ་ཤེས་རང་སྔགས་གོང་དུའོ།། ལས་མཁན་སྲོག་སྙིང་འོག་དུ་སྟེ། ། བསྙེན་པའི་དུས་ཉིད་འགུགས་པར་བྱེད།། ཡི་གེ་ཛ་ཡིས་ཀུན་ཏུ་འགུགས།། ཉིན་སྲིབ་གཉིས་སུ་དབྱེ་བ་ཡང།། ཞི་རྒྱས་གཉིས་ནི་ཉིན་ཡིན་ཏེ།། གསོ་བའི་ལས་ལ་ཤིས་པས་སོ།། དབང་དྲག་གཉིས་ནི་སྲིབས་ཡིན་ཏེ། ། དྲག་པོའི་ལས་ལ་ཤེས་པས་སྲིབས།། ལས་མཁན་སྣ་ཚོགས་ལས་བྱུང་བ།། ཕྲ་མེན་དགེ་བ་ཞེས་སུ་གསུངས།། ཛྭ་ལ་རཾ་ཞེས་འབྱུང་བ་དང། འདུས་ཏེ་ཧྲཱིས་ཞེས་བྱ་བས་ནི།། ཐོག་དང་ཚ་བའི་ལས་རྣམས་འགྲུབ་པར་བྱེད། ། འདི་ལ་མ་འདྲེས་རྦད་འབྱུང་ལ།། བསད་པའི་ལས་ལ་ཤེས་པ་ཡིན།། གཉིས་གོང་ཕྲོཾ་དང་ཧྲིལ་བཞག་པ། དབབ་པའི་ལས་ལ་ཤིས་པ་ཡིན།། རང་རང་ལས་རྣམས་སྣ་ཚོགས་ལས། ། སྔགས་མཐར་འབྲུ་རེ་གང་འབྱུང་བ།། མཐའ་རྟེན་གཞུག་ཅེས་དེ་ལ་བརྗོད།། ཇི་སྙེད་ལྷ་ཡི་གྲངས་བྱུང་ཡང།། རྣམ་ཤེས་སྙིང་པོ་རེ་རེས་མཚོན།། མང་པོ་གཅིག་ཏུ་སྦོམ་ཞེས་བྱ།། དམ་ཚིག་རྗེས་དྲན་ཇི་སྙེད་ལས། ། སྙིང་པོ་རེ་རེས་གཅིག་ཏུ་དྲིལ།། ཆོལ་བུ་ཀུན་ནས་བཏུས་ཞེས་བརྗོད།། ལས་གསུམ་གཅིག་ཏུ་གང་བཟློག་པ། འུར་བ་གཅིག་ཏུ་དྲིལ་ཞེས་བརྗོད།། འབྱུང་བ་ཚ་གྲངས་གང་འཁྲུགས་པ།། མེ་ཆུ་འགལ་བ་སོགས་ཞེས་བཤད། ། དབྱིངས་གསང་བའི་རྒྱུད་ལས་རྩིས་ཆད་བཤད་པའི་ལེའུ་སྟེ་བདུན་པའོ།།།། ཨེ་མའོ་བཅོམ་ལྡན་གསང་ཆེན་བདག། ཐམས་ཅད་མཁྱེན་རྫོགས་ཕྱག་འཚལ་ལོ།། ཀུན་ཁྱབ་བདེ་ཆེན་གསང་ས་ངགས་དོན། ། ཇི་ལྟར་གསུངས་པའི་བཀའ་ལུང་དེ།། ལུང་གི་ཡི་གེ་མ་འདྲེས་གསལ།། རང་བཞིན་རྒྱུད་ལས་ཚིག་གི་རྒྱུད།། རྟེན་འབྲེལ་ཡི་གེ་སྒྲ་རྟགས་སོ།། བདག་གིས་བསྡུས་ལ་གནས་པར་བགྱི།། འདི་དོན་མ་ལུས་གསུང་བ་རྣམས། ། འཆད་པའི་རྣལ་འབྱོར་དམ་པ་སྟེ།། གསང་བདག་ཉིད་དུ་གནས་པར་བགྱི།། ཇི་ལྟར་ཇི་ལྟའི་སེམས་ཅན་རྣམས།། དེ་ལྟ་དེ་ལྟའི་དོན་རྣམས་ལ།། གནས་ཤིང་དད་པར་བགྱི་ལགས་སོ།། འདི་སྤྱོད་རྣལ་འབྱོར་གང་དག་ཀྱང། ། རྒྱ་རྟགས་ཞེས་ནི་གཟུང་བར་བགྱི།། དེ་ལ་རྒོལ་དང་བར་གཅོད་དང།། གཞན་གྱི་སྡེ་པས་མི་ཚུགས་བགྱིའོ།། བཅོམ་ལྡན་འདས་དགོངས་པ་མཐར་ཕྱིན་ནས། བདེ་བ་ཆེན་པོའི་ངང་ལ་བཞུགས་སོ། ། དབྱིངས་གསང་བའི་འཁོར་ལོའི་རྒྱུད་ལས། ཇི་སྙེད་པ་གཏད་པའི་ལེའུ་སྟེ་བརྒྱད་པའོ།།།། དེ་ནས་འཇམ་དཔལ་གཤིན་རྗེའི་གཤེད་གདན་ལས་བཞེངས་ཏེ། བཅོམ་ལྡན་འདས་ལ་ཕྱག་འཚལ་ཏེ།། འདི་སྐད་ཅེས་གསོལ་ཏོ། ། ཀྱེ་མ་བདེ་གཤེགས་བཅོམ་ལྡན་འདས།། འཁོར་ལོའི་ངེས་པ་ཇི་ལྟ་བུ།། དེ་ཡི་དགོས་པ་ཇི་ལྟ་བུ།། ཡང་དགོས་ཇི་ལྟ་བུ་རུ་བཞེད།། བཅོམ་ལྡན་བདག་ལ་བཀའ་དྲིན་གསུང།། བཅོམ་ལྡན་འདས་ཀྱིས་བཀའ་སྩལ་པ། ། ང་ནི་དུས་གསུམ་ཆ་སྙོམས་འབྱུང།། དུས་གསུམ་ཆ་ཡང་དེ་བཞིན་དེ།། ང་ལས་ཧཱུཾ་གི་སྒྲ་འབྱུང་བས།། ཧ་ཧི་མཚོན་ཆའི་ཚུལ་དུ་འབྱུང།། ཨོཾ་གི་ཁོང་ནས་ཨེ་འབྱུང་བས།། དཀར་པོ་གྲུ་གསུམ་ཆོས་དབྱིངས་སུ། ། གྲུ་གསུམ་མཱ་ར་ཡ་རེ་དགོད།། དཀྱིལ་དུ་རྣམ་ཤེས་སྙིང་པོ་དགོད།། དེ་སྟེང་ཡི་གེ་ཛ་བཞག་པ།། ཆ་མཉམ་པ་ཡི་འཁོར་ལོ་ཡི།། ས་དེར་ཡི་གེ་རྦད་བཞག་པ།། གསོད་བྱེད་དྲག་པོའི་འཁོར་ལོ་ཡིན། ། ས་དེར་ཡི་གེ་བྷྱོ་བཞག་པ།། བསྒྲུབ་པའི་འཁོར་ལོ་ཆེན་པོ་ཡིན།། ཀུན་ལ་དེ་བཞིན་ཤེས་པར་བྱ།། ཧཱུཾ་གི་ཁོང་ནས་ཧཾ་བྱུང་བས།། དྭངས་མའི་འཁོར་ལོ་ཆེན་པོ་སྟེ།། དྭངས་མ་ལྔ་ལ་ཡིག་འབྲུ་ལྔ།། སྐྱེ་བ་མེད་པའི་བྱང་ཆུབ་སེམས། ། འགག་པ་མེད་པས་འཆི་བ་མེད།། མདོར་ན་རྒྱུ་མེད་རང་བཞིན་བསྐོར།། ལྷག་པ་བྱང་སེམས་འཁོར་ལོ་སྟེ།། སྐྱེ་འགག་གཉིས་མེད་གཟུང་འཛིན་བྲལ།། ཐབས་དང་ཤེས་རབ་གཉིས་ལྡན་པ།། ལྔ་དང་བཅུ་ཡི་རང་བཞིན་བསྐོར། ། ཞེས་བརྗོད་དོ།། འདི་ནི་རྫོགས་པའི་འཁོར་ལོ་ཆེན་པོ་ཡིན།། ཧཾ་གི་ཁོངས་ནས་ཡཾ་བྱུང་བས།། མཆོག་མ་གཉིས་དང་ཆང་རྩ་གཉིས།། འཆང་བའི་དཀྱིལ་དུ་འབྲུ་ལ་དགོད།། འདི་ནི་འབྱུང་བ་རླུང་གི་འཁོར་ལོ་ཡིན། ། མེ་ཡི་འཁོར་ལོ་གྲུ་གསུམ་ལ།། ཡི་གེ་ལྔ་དང་རབ་ཏུ་ལྡན།། ཆུ་ཡི་འཁོར་ལོ་ཟླུམ་པོ་སྟེ།། ཡི་གེ་ལྔ་དང་རབ་ཏུ་ལྡན།། ས་ཡི་འཁོར་ལོ་གྲུ་བཞི་ལ།། ཡི་གེ་ལྔ་དང་ལྡན་པ་སྟེ།། ཐམས་ཅད་གོང་བཞིན་ཤེས་པར་བྱ། ། ཡི་གེ་འོད་དུ་ལྡན་པར་བསྒོམ།། ཕཊ་ཀྱིས་སེམས་ཀྱི་རོ་བསད་དེ།། ཏ་ནི་སྲེག་པར་བྱེད་པ་ཡིན།། རྦད་ནི་བདེ་བའི་རོ་བསད་དེ།། ཆོས་ཀྱི་དབྱིངས་སུ་རྟག་པར་བྱའོ།། འཁོར་དང་མྱང་འདས་ཆོས་ཐམས་ཅད། ། བྱང་ཆུབ་སེམས་ཀྱི་འཁྲུལ་འཁོར་བསྐོར།། ཡོངས་སུ་བྱང་ནས་སྣང་བར་འགྱུར།། འདུས་བྱས་རྫས་ཀྱི་འཁོར་ལོ་བསྐོར་བ་མུ་སྟེགས་འཁྲུལ་པའི་ལམ།། དཔེར་ན་མཚོན་རྩེ་གཅིག་པས་བཏབ་ན་འཆོར་མེད་བཞིན། ། སྣང་ལ་རང་བཞིན་མེད་པ་རྩེ་གཅིག་བསྒོམ།། དབྱིངས་གསང་བ་འཁོར་ལོའི་རྒྱུད་ལས། འཁོར་ལོ་རྣམ་པ་གསུམ་བཤད་པའི་ལེའུ་སྟེ་དགུ་པའོ།།།། གསང་སྔགས་ཐམས་ཅད་ཀྱི་སྤྱི་རྒྱ་ཆེན་པོ་རྒྱུད་ཕྱི་མའི་རིམ་པར་གསུངས་པ་རྫོགས་སོ། །།། རྒྱ་གར་སྐད་དུ། ཤྭ་ན་མུ་ཁ་ཀརྨ་རཱཛྙཱི་ཏནྟྲ། བོད་སྐད་དུ། ཕྲ་མེན་སྤྱང་ཀི་ལས་ཀྱི་རྒྱལ་མོའི་རྒྱུད། བཅོམ་ལྡན་འདས་དཔལ་ཀུན་ཏུ་བཟང་པོ་ཧེ་རུ་ཀ་ལ་ཕྱག་འཚལ་ལོ།
CLOSE WINDOW