| Wylie |
རྒྱ་གར་སྐད་དུ། ཤྲཱི་དེ་བཱི་ཀཱི་ལཱི་ཙིཏྟ་སུ་དྷ་ན་གུ་ཧྱ་ཏནྟྲ། བོད་སྐད་དུ། དཔལ་ལྷ་མོ་ནག་མོའི་ཐུགས་ཀྱི་སྲོག་སྒྲུབ་གསང་བའི་རྒྱུད། བཅོམ་ལྡན་འདས་རྡོ་རྗེ་ཧེ་རུ་ཀ་ལ་ཕྱག་འཚལ་ལོ།། འདི་སྐད་བདག་གི་ཐོས་པའི་དུས་གཅིག་ན། ། བཅོམ་ལྡན་འདས་རྡོ་རྗེ་འཆང་ཆེན་པོ་སྲས་དང་འཁོར་དུ་བཅས་པ་རྣམས་བཙུན་མོའི་བྷ་གའི་ཀློང་རྣམ་པར་དག་པ་ལ་ཞུགས་སོ།། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བའི་བདག་པོ་དཔལ་ཕྱག་ན་རྡོ་རྗེ་དང་གཞན་ཡང་བདུད་ཀྱི་མ་གཤིན་རྗེའི་སྲིང་མོ་དཔལ་ལྷ་མོ་ཞེས་བྱ་བས། རང་བཞིན་གྱི་དཀྱིལ་འཁོར་མཐོང་ཞིང། འདས་པའི་དེ་བཞིན་གཤེགས་པ་རྣམས་ཀྱི་ཐད་དུ་དམ་བཅས་པ། ད་ལྟར་དེ་བཞིན་གཤེགས་པ་ཤཱཀྱ་ཐུབ་པའི་བསྟན་པ་བསྲུང་བའི་སྨོན་ལམ་བཏབ་པ། དུས་ཕྱི་མ་ལ་སངས་རྒྱས་ཀྱི་ས་ལ་སྨིན་ཅིང་ལུང་བསྟན་པའི་སྨོན་ལམ་ཅན་དང། ཐབས་ཅིག་ཏུ་བཞུགས་སོ། ། གཞན་ཡང་རང་བཞིན་གྱི་དཀྱིལ་འཁོར་མ་མཐོང་བ་རྣམས་ནི་བརྒྱ་བྱིན་དང། གཤིན་རྗེ་དང། སྲིན་པོ་དང། ཤ་ཟ་དང། གནོད་སྦྱིན་དང། མ་མོ་ནག་མོ་དང། ལྟོ་འཕྱེ་དང། གྲུལ་བུམ་དང། དྲི་ཟ་དང། མིའམ་ཅི་དང། ལྷ་མ་ཡིན་དང། མཁའ་ལྡིང་དང། མ་མོ་དང། མཁའ་འགྲོ་མ་དང། མཁའ་འགྲོ་མའི་བདག་པོ་དཔལ་ནག་པོ་ཆེན་པོ་དང་ཐབས་ཅིག་ཏུ་བཞུགས་སོ།། དེའི་ཚེ་དེའི་དུས་ན། གསང་བའི་བདག་པོ་ཕྱག་ན་རྡོ་རྗེ་སྟན་ལས་ལངས་ནས། རང་བཞིན་གྱི་དཀྱིལ་འཁོར་མ་མཐོང་བ་རྣམས་ལ་འདི་སྐད་དུ། བརྒྱ་བྱིན་ལ་སོགས་པ་ཁྱེད་རྣམས་ཀྱི་དེ་བཞིན་གཤེགས་པ་སྲས་དང་འཁོར་དུ་བཅས་པ་རྣམས་ལ་ཕྱག་འཚལ་བ་དང། མཆོད་པ་དང། སྐྱབས་སུ་འགྲོ་བ་དང། རྣམ་པར་དཀར་བའི་ཕྱོགས་ལ་དད་པར་གྱིས་ཤིག་ཅེས་སྨྲས་པ་དང། བརྒྱ་བྱིན་ལ་སོགས་པ་རྣམས་ཀྱིས་ཕྱོགས་བཅུའི་སངས་རྒྱས་ཀྱི་མཚན་ནས་བརྗོད་ཅིང་ཕྱག་འཚལ་བ་དང། སྐྱབས་སུ་འགྲོ་བ་དང། དཀར་པོའི་ཕྱོགས་ལ་དད་པ་དང་མོས་པ་བྱ་སྟེ། ཐལ་མོ་སྦྱར་ནས་ཐབས་ཅིག་ཏུ་འགྲིགས་པར་བྱས་ཏེ། འདི་སྐད་དུ་སངས་རྒྱས་ཀྱི་ཆོས་འཇིག་རྟེན་དུ་ཡུང་རིང་བར་གནས་ཤིང། རྒྱས་པར་བྱ་བའི་སླད་དུ་བདག་ཅག་རྣམས་ཀྱིས། དེ་བཞིན་གཤེགས་པ་རྣམས་ལ་ཕྱག་འཚལ་བ་དང། མཆོད་པ་དང་སྐྱབས་སུ་འགྲོ་བ་དང། དད་པ་དང། མོས་པ་དང། ཡིད་ལ་བྱ་བའི་བྱིན་རླབས་ཀྱིས་དེ་བཞིན་གཤེགས་པ་སྲས་དང་འཁོར་དུ་བཅས་པ་རྣམས་བདག་གི་མངོན་དུ་སྣང་བར་གྱུར་ཅིག། ཅེས་སྨོན་ལམ་བཏབ་པ་དང། དེའི་མོད་ལ་དེ་བཞིན་གཤེགས་པ་སྲས་དང་འཁོར་དུ་བཅས་པ་རྣམས་མངོན་དུ་སྣང་བར་གྱུར་ཏོ། ། དེ་ནས་བརྒྱ་བྱིན་ལ་སོགས་པ་དགའ་བ་དང་སྤྲོ་བ་སྐྱེས་ནས་ལྷའི་མེ་ཏོག་མན་ད་ར་བ་ལ་སོགས་པ་རྣམས་ཀྱིས་མཆོད་ཅིང་རྒྱན་གྱི་ཆར་ཆེན་པོ་མངོན་པར་ཕབ་བོ། ། དེ་ནས་གསང་བའི་བདག་པོ་ཕྱག་ན་རྡོ་རྗེས་འདི་སྐད་ཅེས་སྨྲས་སོ།། བརྒྱ་བྱིན་ལ་སོགས་པ་ཁྱེད་རྣམས་ཀྱིས་སངས་རྒྱས་ཀྱི་བསྟན་པ་བསྲུང་བའི་ཕྱིར། དཔལ་ལྷ་མོ་ནག་མོ་ལ་ཞུས་ཤིང་ཅེས་སྨྲས་པ་དང། བརྒྱ་བྱིན་ལ་སོགས་པའི་འཇིག་རྟེན་པའི་འཁོར་རྣམས་ཀྱིས་དཔལ་ལྷ་མོ་ནག་མོ་ལ་མཆོད་པ་དང། བསྟོད་པ་བྱས་ཏེ་འདི་སྐད་དུ་ཁྱོད་ཀྱིས་བསྟན་པ་བསྲུང་དུ་གསོལ། ཞེས་སྨྲས་པ་དང། དཔལ་ལྷ་མོ་ནག་མོས་སྨྲས་པ་བསྟན་པ་ཞེས་བྱ་བ་ནི་གང་བསྲུང་བ་ཞེས་བྱ་བ་ནི་ཇི་ལྟ་བུ། མ་བསྲུངས་ན་ཅི་སྐྱོན་ཞེས་སྨྲས་པ་དང། བསྟན་པ་ཞེས་བྱ་བ་ནི་མདོ་སྡེ་འདུལ་བ་མངོན་པ་སྟེ། རྒྱལ་བའི་བཀའ་སྡེ་སྣོད་དུ་གྱུར་པ་མཐའ་དག་གོ། སྲུང་བ་ཞེས་བྱ་བ་ནི་འཇིག་རྟེན་དུ་ཡུན་རིང་དུ་གནས་པའོ།། འཆང་བ་དང་ཉན་པ་དང། སྒོམ་པ་དང། འཛིན་པ་དང། ཀློག་པ་དང། ཀུན་ཆུབ་པར་བྱེད་པ་དང། ཚུལ་བཞིན་དུ་ཡིད་ལ་བྱེད་པ་རྣམས་ལ། གནོད་པ་བསྒྲལ་ཞིང་ཚར་གཅོད་པའོ།། འཆང་བ་ལ་སོགས་པ་བསྲུང་ཞིང་བསྐྱབ་པ་དང། འཁོར་དང་ལོངས་སྤྱོད་འཕེལ་ཞིང་རྒྱས་པར་བྱ་བ་དང། མ་བསྲུངས་ན་དཀོན་མཆོག་གསུམ་པོ་བཀའ་མི་གཉན།། མི་དང་མི་མ་ཡིན་པས་བར་དུ་གཅོད་ཅིང་དེའི་དབང་གིས། སངས་རྒྱས་ཀྱི་བསྟན་པ་འཇིག་རྟེན་དུ་ཡུན་རིང་དུ་གནས་པར་མི་འགྱུར་རོ་ཞེས་སྨྲས་པ་དང། དཔལ་ལྷ་མོ་ནག་མོ་རང་བཞིན་གྱི་སྟན་ལས་ལངས་ནས། བཅོམ་ལྡན་འདས་ལ་ལན་བརྒྱ་ཕྲག་སྟོང་དུ་བསྐོར་བ་བྱས་ཏེ་ཕྱག་འཚལ་ནས་ཐལ་མོ་སྙིང་གར་སྦྱར་ནས་འདི་སྐད་ཅེས་ཞུས་སོ། ། བཅོམ་ལྡན་འདས་བདེ་བར་གཤེགས་པ་བདག་གིས་སངས་རྒྱས་ཀྱི་བསྟན་པ་བསྲུང་བ་དང། དམ་པའི་ཆོས་མཉན་པར་བྱ་བ་དང། ཡང་དག་པའི་དགེ་འདུན་བསྲུང་ཞིང་བསྐྱབ་པར་བགྱི་བའི་སླད་དུ། བཅོམ་ལྡན་འདས་ཀྱིས་བདག་ལ་དབང་བསྐུར་དུ་གསོལ། བྱིན་གྱིས་བརླབ་ཏུ་གསོལ་ཞེས་གསོལ་བ་དང། བཅོམ་ལྡན་འདས་ཀྱིས་སྒྲོལ་བའི་ཡུམ་དུ་བྱིན་གྱིས་བརླབས་ཏེ། ཡང་དག་པའི་མཐུ་དང་ལྡན་པར་བྱ་བའི་ཕྱིར། ཞིང་ཆེན་པོའི་གཡང་གཞི་དང། བདུད་དང་སྲིན་པོ་ལས་རྒྱལ་བར་བྱ་བའི་ཕྱིར། གཡུལ་དུ་མཚོན་གྱིས་བསད་པའི་མགོ་ཕྲེང་དང་ཐམས་ཅད་བསྒྲལ་ཞིང་བསད་ཀྱང་བག་ཆགས་ཀྱིས་མི་གོས་པར་བྱ་བའི་ཕྱིར། རེ་ལྡེ་ནག་པོའི་གོས་དང། སྨན་མོ་ཐམས་ཅད་ཟིལ་གྱིས་གནན་པའི་ཕྱིར། སྙན་ཆ་གཡས་པ་སེང་གེ་དང། ཀླུ་གནད་ལ་དབབ་པའི་ཕྱིར། སྙན་ཆ་གཡོན་སྦྲུལ་གྱི་གདེངས་ཀ་དང། ཁམས་གསུམ་གྱི་སེམས་ཅན་ཐམས་ཅད་ཀྱི་ཚེ་སྲོག་དབང་དུ་བསྡུ་བའི་ཕྱིར། ལག་གཡས་སུ་ཁ་ཊྭཱཾ་ག་རྩེ་གསུམ། འགལ་བ་རྩད་ནས་གཅད་པའི་ཕྱིར། འོག་མར་ལྕགས་ཀྱི་ཕུར་པ་དང། སྲིད་གསུམ་ཉེས་ལེགས་དང་རྣལ་འབྱོར་བྱ་ར་མཛད་པའི་ཕྱིར། འཕྲུལ་གྱི་མེ་ལོང་དང་དམ་ཉམས་གནས་ནས་དགུག་པའི་ཕྱིར། སྦྲུལ་གྱི་ཞགས་པ་རྣམས་ཀྱིས་དབང་བསྐུར་རོ། ། དེའི་ཚེ་འཁོར་བརྒྱ་བྱིན་ལ་སོགས་པ་རྣམས་འཇིགས་ཤིང་སྐྲག་པར་གྱུར་ཏོ།། བཅོམ་ལྡན་འདས་ཀྱིས་མིང་གིས་དབང་བསྐུར་བ་ནི། ཨཱརྱ་རེ་མ་ཏིའོ།། སངས་རྒྱས་ཀྱི་བསྟན་པ་སྲུངས་ཤིག་པར་གཉེར་གཏད་དོ། ། དཔལ་ཆེན་པོའི་སྤྱན་སྔར་ལྷ་མོ་རེ་མ་ཏིས་རང་གི་སྙིང་པོ་ཕུལ་བ། ཏྲག་རཀྴ་མ་ཧི་དུན་བྷྱོ། མ་ཧཱ་ཡཀྴ་མིཀྞ་ནག་མོ་དུན་བྷྱོ་ཞེས་བསྙེན་པའི་སྙིང་པོ་དང། གཞན་ཡང་མ་མ་ཏྲག་རཀྴ་རེ་མ་ཏི་སྙིང་ཁ་རག་ཙིཏྟ་ཙ་པ་ལ་ཨ་ཤུག་མེ་བྷྱོ་ཛཿཞེས་བྱ་བ་རྩ་བའི་སྙིང་པོའོ། ། གཞན་ཡང་རག་མོ་རག་མོ་མ་མ་དུན་ཏིང། ཧེར་མ་ཧེད་བྷྱོ་ཞེས་བསྒྲུབ་པའི་སྙིང་པོ་དང། བཛྲ་ཀུ་རུན་རྦད། སྙིང་ཁྲག་ཚལ་པ་རྦད། གཏུབས་ཙིཏྟ་རྦད། མྱོགས་རྨུགས་རྦད། སྙིང་ཁྲག་ཁ་ལ་རྦད། ཚལ་བུ་སེ་ན་སྲིན་དུ་ཧུར་སྲོག་ལ་ཡ་རྦད། མ་མ་ར་མོ་ཆེ་གེ་མོའི་སྙིང་ལ་ཛ་ཛ། ནག་མོ་ཧར་ཧུར་མ་ཧ་ཆོ་ཆོ། ཨུ་རག་མེ་ཤ་མ་ར་ཁ་ཁ་ཧ་ཧ་ཏྲ་ཏ་ཏི་ཛ། ཆེ་གེ་མོའི་སྙིང་ལ་བྷྱོ། རེ་མ་ཏི་བ་ཤ་ཙ་པ་ལ་ཤ་ཙ་པ་ལ་ཛ་ཛ། དུན་དུན་རཀྴ་རཀྴ། མུ་རུ་ལུ་རུ་ལུ་རུ་ལུ་བྷྱོ། ཆེ་གེ་མོ་མཱ་ར་ཡ་ཕཊ། ཅེས་ལས་ལ་སྦྱོར་བའི་གསད་པའི་སྔགས་རྣམས་ཕུལ་ལོ།། ལྷ་མོ་དེས་སངས་རྒྱས་ཀྱི་བསྟན་པ་བསྲུང་བར་ཁས་བླངས་ཏེ་འདི་སྐད་དུ། བཅོམ་ལྡན་འདས་བདག་གི་སངས་རྒྱས་ཀྱི་བསྟན་པ་རིན་པོ་ཆེ་ལྟ་བུ་མངོན་པ་ལ་སོགས་པའི་སྡེ་སྣོད་གསུམ་ལ་གང་ཞིག་མོས་ཤིང་དད་པས་ཡིད་དྭངས་པའི་གང་ཟག་དེ་ལ་སྲུང་ཞིང་བསྐྱབ་པར་བགྱིའོ། ། གང་ཞིག་འཆད་པ་དང། ཉན་པ་དང། ཀུན་ཆུབ་པར་བྱེད་པ་དང། ཚུལ་བཞིན་ཡིད་ལ་བྱེད་པ་དེའི་སྦྱོར་བ་ངན་པ་བསལ་བར་བགྱིའོ།། གང་སྒོམ་པ་དང་སྒྲུབ་པ་ཉམས་སུ་ལེན་པ་དེ་དག་གི་གིང་དང་ཕོ་ཉ་དུས་རྟག་ཏུ་བགྱིའོ། ། དེ་ལྟར་བདག་གིས་དམ་བཅས་པ་ལྟ་མ་བགྱིས་ན་བདག་གིས་ད་ལྟར་ཉིད་དུ་བཅོམ་ལྡན་འདས་བསླུས་པ་ལགས་སོ།། དེའི་དབང་གིས་རང་གི་སྲོག་གི་སྙིང་པོར་མེ་འབར་ནས་ལུས་སྲོག་ཐལ་བ་བཞིན་དུ་ཚིག་པར་གྱུར་ཏེ། ། མནར་མེད་པའི་སེམས་ཅན་དམྱལ་བ་ཆེན་པོར་གྱུར་ཅིག་ཅེས་སྨོན་ལམ་བཏབ་ཅིང་མནའ་བོར་རོ།། དེ་ནས་དཔལ་ལྷ་མོ་ནག་མོ་དེས་དབང་དང་བྱིན་རླབས་ཐོབ་ཅིང་དམ་ཚིག་ཅན་དུ་གྱུར་པའི་ཚེ་བརྒྱ་བྱིན་ལ་སོགས་པའི་འཁོར་རྣམས་ཀྱིས་རང་རང་གི་རྒྱན་དང་ལག་ཆ་ཕུལ་ཏེ། དེ་ལྟར་བརྒྱ་བྱིན་གྱིས་རྡོ་རྗེ་ཕུལ་ལོ།། ཚངས་པས་རྨ་བྱའི་རྒྱལ་མཚན་ཕུལ་ལོ། ཁྱབ་འཇུག་གིས་ཉི་ཟླའི་རྒྱལ་མཚན་ཕུལ་ལོ།། རྣམ་ཐོས་ཀྱི་བུས་སེང་གེའི་རྒྱལ་མཚན་དང། ནམ་མཁའི་ལྷ་སྲིན་རྣམས་ཀྱིས་དྲིལ་བུ་དང།། ཀླུའི་རྒྱལ་པོ་རྣམས་ཀྱིས་སྦྲུལ་གྱིས་གདེངས་ཀ་དང། ས་བདག་པ་ཏ་ལིས་སྟག་གི་རྒྱལ་མཚན་དང། སྲིན་པོ་དང་ཤ་ཟ་རྣམས་ཀྱིས་ཐོད་པའི་ཕྲེང་བ་དང། ཁྲག་དང་ཞག་གི་ཡོ་བྱད་དང། བདུད་ཡབ་རྗེས་ཁྲམ་བམ་དང། བཙན་གྱི་འུས་ཤོ་རྡེ་དང། འཁོར་མ་མོས་ནད་ཀྱི་རྐྱལ་པ་དང། དེ་ལྟར་འཁོར་རྣམས་ཀྱིས་རང་རང་གི་རྒྱན་དང་ཡོ་བྱད་ལག་ཆ་ལ་སོགས་པ་ཕུལ་ཏེ་བསྟོད་པ་རྣམས་ཀྱིས་ཀྱང་བསྟོད་དོ།། ལྷ་མོ་དེ་ཡང་སྲིད་པ་གསུམ་ན་འགྲན་གྱི་དོ་མེད་པར་གྱུར་ཏོ། ། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་གླེང་གཞིའི་ལེའུ་སྟེ་དང་པོའོ།།།། དེ་ནས་གསང་བའི་བདག་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས་བདེ་བར་གཤེགས་པ་སངས་རྒྱས་ཀྱི་བསྟན་པ་ཡུན་རིང་དུ་གནས་པར་བྱ་བའི་ཆེད་དུ། དཔལ་ལྷ་མོའི་ཏིང་འཛིན་དང། སྤྱན་དྲང་ཞིང་མཆོད་པའི་སྔགས་དང། དེའི་རྟེན་གཟུགས་བརྙན་བསྟན་པ་དང། བོད་པ་དང། རྦད་པ་དང། གསད་པ་དང། རྒྱུད་ཀྱི་སྔགས་བཏུ་བ་དང། བསྒྲུབ་པའི་དཀྱིལ་འཁོར་དང། བསྒྲུབས་པའི་རྫས་དང། ཕུར་པ་གདབ་པའི་སྔགས་དང། མཚོན་གྱིས་གཏུབ་ཅིང་སྦྱིན་བསྲེག་བྱ་བ་དང། ཐུན་ཟོར་འཕང་བ་དང། གནན་པ་བྱ་བ་དང། སེར་བ་དབབ་པའི་ཐབས་བསྟན་དུ་གསོལ་བ་དང། བཅོམ་ལྡན་འདས་ཀྱིས་བཀའ་སྩལ་པ་དང། གསང་བའི་བདག་པོ་ལྷ་མོའི་ཏིང་ངེ་འཛིན་ནི། ཡཾ་སྥ་ར་ཎ་རཾ་ཨགྣེ་ཛྭ་ལ་རཾ་ཞེས་མེ་རླུང་གི་དབུས་སུ་ཐོད་པའི་གཞལ་ཡས་ཁང་བསྐྱེད་པ་ནི། བྷྲཱུཾ་བི་ཤྭ་བི་ཤུདྡྷ་ཀ་པཱ་ལ་ཧཱུཾ། དེའི་ནང་དུ་གྷོ་ར་ཏི་ག་ར་པ་ཏ་ཧཱུཾ་ཞེས་པས་ལྕགས་ཀྱི་དྲེའུ་རྟ་བསྐྱེད་དོ།། དེའི་གོང་དུ་ཡི་གེ་མའི་འཕྲོ་འདུ་ལ་ཨོཾ་ནག་མོ་དུནྟིང་ལཾ་དུནྟིང་བྷྱོ་ཞེས་པས་ལྷ་མོ་ནག་མོ་ནི། སྐུ་མདོག་མཐིང་ནག་རལ་པ་གཡས་ནས་གཡོན་དུ་འཁྱིལ་བ། ཞལ་གདངས་ཞིང་མཆེ་བ་གཙིགས་པ། སྤྱན་རྩ་དམར་ལ་ལྡང་མིག་བགྲད་པ། ཞིང་ཆེན་གྱི་གཡང་གཞི་དང། སྟག་གི་ཤམ་བུ་དང། སྦྲུལ་གྱི་སྐེ་རགས་དང། ཐོད་པའི་ཕྲེང་བ་དང། ཕྱག་གཡས་གཉིས་ན་ཁ་ཊྭཱཾ་དང་ཕུར་པ། གཡོན་གཉིས་ན་མེ་ལོང་དང་སྦྲུལ་ཞགས་བསྣམས་པ། ནད་ཀྱི་རྐྱལ་པ་མཆན་ན་སྦེད་པ། ཁྲམ་བམ་རྒྱབ་ཏུ་ཁུར་ཤོ་རྡེ་མདུན་ན་འཐོར་བ། ཚོན་གྱི་གྲུ་གུ་རྐྱོང་ཞིང་འཐུལ་བ། འཁོར་ནག་མོ་འབུམ་སྡེ་དང་བཅས་པ་གསལ་བར་བསྒོམ་པར་བྱའོ།། ལྷ་མོ་ཙིཏྟ་སྲོག་གསང་བའི་རྐྱལ་བུ་ལས། སྐུ་བསྐྱེད་པའི་ཏིང་ངེ་འཛིན་གྱི་ལེའུ་སྟེ་གཉིས་པའོ། །།། དེ་ནས་ཡང་བཅོམ་ལྡན་འདས་ཀྱིས་སྤྱན་དྲང་ཞིང་མཆོད་པའི་སྔགས་འདི་གསུངས་སོ།། བདག་ཉིད་གདེང་དང་ལྡན་པ་ཡིས།། ལྕགས་ཀྱུའི་ཕྱག་རྒྱས་སྤྱན་དྲངས་ཏེ།། བཞུགས་གསོལ་གཏོར་མ་བསྟབ་པར་བྱའོ། ། ཨོཾ་ནག་མོ་དནྟིང་ལཾ་མ་མ་དུན་བྷྱོ། ཛཿཧཱུཾ་བཾ་ཧོཿ་ནག་མོ་དུན་བྷྱོ་བྷྱོ། ཨོཾ་ཨཱཿཧཱུཾ་ས་མ་ཡ་ཨེ་ཧྱེ་ཧི་ཛ། ཨ་ར་ལི་ཧྲིཾ་ཧྲིཾ། རཀྴ་མ་ཧི་ཀུ་ལ་པདྨ་ས་མ་ཡ་ཏིཥྛ་ལྷན། མ་མ་ནག་མོ་སེན་ཏ་སེན་ཏ་ཀུ་ལ་ཀུ་ལ། ཧ་ཧ་ཧ། མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། པཉྩ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། བྷུན་ཛ་ཧོ། པི་བ་ཏོ་ས་མ་ཡ་སྭཱ་ཧཱ། ཞེས་སྤྱན་དྲངས་ཤིང་གཉིས་སུ་མེད་པར་བསྟིམ་ལ་གཏོར་མ་དབུལ་བར་བྱའོ། ། དཔལ་ལྷ་མོ་ཙིཏྟ་གསང་བའི་རྒྱུད་ལས། སྤྱན་དྲངས་ཤིང་བཞུགས་སུ་གསོལ་བ་དང་མཆོད་སྔགས་ཀྱི་ལེའུ་སྟེ་གསུམ་པའོ།།།། དེ་ནས་བཅོམ་ལྡན་འདས་ཀྱིས་བསྙེན་པའི་རྟེན་གྱི་གཟུགས་བརྙན་འདི་གསུངས་སོ། ། དམིགས་པའི་རྟེན་གྱི་གཟུགས་བརྙན་ནི།། འདྲི་མཁན་གསང་ཐུབ་དམ་ཚིག་ཅན།། དབེན་པའི་གནས་སུ་སོང་ནས་ནི།། དུར་ཁྲོད་རས་ལ་མ་མོའི་སྐུ།། ཚོན་གྱིས་ལེགས་པར་བྲི་བར་བྱ། ། མཐིང་ནག་ཞལ་གཅིག་ཕྱག་བཞི་པ།། ཞལ་བགྲད་མཆེ་གཙིགས་སྤྱན་རྩ་དམར།། ཞིང་གི་གོ་ཟུ་སྟག་ཤམ་ཅན།། སྦྲུལ་གྱི་སྐ་རགས་ཐོད་ཕྲེང་ཅན།། རྩ་བའི་ཕྱག་ནི་གཡས་གཡོན་ན།། ཁ་ཊྭཱཾ་མེ་ལོང་བསྣམས་པའོ། ། གཡས་གཡོན་གཉིས་ཀྱི་འོག་མ་ན།། ལྕགས་ཕུར་འདྲིལ་ཞིང་སྦྲུལ་ཞགས་འཕེན།། དྲེའུའི་སྟན་ལ་ཁྲོས་པའི་གཟུགས།། དུར་ཁྲོད་ཆེན་པོའི་དབུས་གནས་པ།། བྲིས་ནས་དབང་བསྐུར་མཆོད་པ་འབུལ། ། བསྙེན་པའི་སྔགས་ནི་སུམ་འབུམ་བཟླས།། ཞེས་གསུངས་སོ།། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས། གཟུགས་བརྙན་བསྟན་པའི་ལེའུ་སྟེ་བཞི་པའོ།།།། དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས། གསང་སྔགས་འདི་དག་བྱིན་གྱིས་བརླབ་ཅིང་བཏུ་བ་མཛད་དོ།། ཐོག་མར་ཡི་གེ་ཐམས་ཅད་ནི།། དམིགས་མེད་བརྗོད་མེད་བསམ་དང་བྲལ།། སྒྲ་ཡི་རྣམ་པ་ག་ལ་ཡོག། དམིགས་མེད་གདོད་ནས་རྣམ་པར་དག། དོན་དམ་ཡི་གེ་ཨ་ཞེས་བྱ།། སེམས་ཅན་ལས་དང་སྨོན་ལམ་གྱིས།། སྟོབས་ལས་ཀུན་རྫོབ་ཡི་གེ་བྱུང།། ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ་ཀ་ཁ་ག་གྷ་ང། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། ཕ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། དེ་ལས་བྱུང་བའི་སྔགས་རྣམས་ནི།། མ་ནོར་གསལ་བ་འདི་ལྟ་སྟེ།། དང་པོར་བཞི་པའི་དང་པོར་གཞག། དེ་ལ་དྲུག་པའི་གཉིས་པས་འོག་ཏུ་བརྒྱན། ། དང་པོའི་གསུམ་པས་མཛེས་པར་བྱའོ།། དེ་འོག་དྲུག་པའི་གཉིས་པ་བཞག། དང་པོའི་སུམ་པ་དེ་ལ་སྦྱིན།། དེ་འོག་བདུན་པའི་དང་པོ་གཞག། དེ་འོག་ལྔ་པའི་ལྔ་པ་གཞག། དེ་འོག་བདུན་པའི་བཞི་པ་གཞག། དབྱངས་ཀྱི་གསུམ་པས་སྟེང་ནས་དབབ།། དེ་འོག་བཞི་པའི་གསུམ་པ་ལ།། དབྱངས་ཀྱི་ལྔ་པས་འོག་ནས་བརྒྱན།། དེ་ལ་བཞི་པའི་ལྔ་པས་མཛེས།། དེ་འོག་ལྔ་པའི་བཞི་པ་གཞག། དེ་ལ་ཡ་སྟ་བརྒྱན་པར་བྱ། ། དབྱངས་ཀྱི་བཅུ་གསུམ་གོང་ནས་དབབ།། དེ་འོག་ལྔ་པའི་ལྔ་པ་གཞག། དེ་འོག་བདུན་པའི་བཞི་པ་གཞག། དེ་ལ་དབྱངས་ཀྱི་གཉིས་པས་བརྒྱན།། དེ་འོག་དྲུག་པའི་དང་པོ་གཞག། དང་པོའི་གསུམ་པས་མཛེས་པར་བྱ། ། དེ་འོག་བདུན་པའི་དང་པོ་གཞག། དེ་འོག་བཞི་པའི་དང་པོ་གཞག། དབྱངས་ཀྱི་གསུམ་པས་སྟོང་ནས་དགབ།། དེ་ལ་དང་པོའི་གསུམ་པས་མཛེས།། དེ་འོག་བདུན་པའི་གསུམ་པ་གཞག། བཞི་པའི་ལྔ་པས་འོག་ཏུ་བརྒྱན།། དེ་འོག་བཞི་པའི་ལྔ་པ་གཞག། དང་པོའི་གསུམ་པ་དེ་ལ་སྦྱིན།། དེ་འོག་ལྔ་པའི་ལྔ་པ་གཞག། དབྱངས་ཀྱི་བཅུ་གསུམ་སྟེང་ནས་དགབ།། དེ་འོག་བཞི་པའི་གསུམ་པ་གཞག། དབྱངས་ཀྱི་ལྔ་པས་འོག་ཏུ་བརྒྱན།། དེ་ལ་བཞི་པའི་ལྔ་པས་མཛེས།། དེ་ལ་ཡ་སྟས་བརྒྱན་པར་བྱ།། དབྱངས་ཀྱི་བཅུ་བཞིས་སྟེང་དུ་བརྒྱན།། མི་འགྱུར་བཅུ་བདུན་རྩེགས་དང་བཅས།། སྙིང་ནས་འདྲེན་པའི་སྲོག་སྔགས་ཡིན། ། ལྔ་པའི་ལྔ་པ་ལན་གཉིས་གཞག། དེ་འོག་བཞི་པའི་དང་པོ་ལ།། དྲུག་པའི་གསུམ་པ་བརྒྱན་ལྡན་ཞིང།། དང་པོའི་གསུམ་པ་དེ་རུ་སྦྱར།། དྲུག་པ་ཡི་ནི་གསུམ་པ་དང།། དང་པོའི་གསུམ་པ་སྦྱར་ནས་སུ། ། དེ་མཐར་བདུན་པའི་དང་པོ་གཞག། དྲུག་པའི་གསུམ་པ་བཅུ་གཅིག་བརྒྱན།། དེ་འོག་ལྔ་པའི་ལྔ་པ་གཞག། བཞི་པའི་དང་པོ་དབྱངས་གསུམ་བརྒྱན།། བདུན་པ་ཡི་ནི་གསུམ་པ་ལ།། གཉིས་པའི་ལྔ་པས་བརྒྱན་ལྡན་ཞིང། ། དབྱངས་ཀྱི་གསུམ་པའི་རྒྱན་གྱིས་མཛེས།། དེ་འོག་དང་པོའི་ལྔ་པ་སྦྱིན།། དེ་འོག་དང་པོའི་གཉིས་པ་གཞག། དྲུག་པ་ཡི་ནི་གསུམ་པ་དང།། དང་པོ་ཡི་ནི་གསུམ་པ་སྦྱར།། གཉིས་པའི་དང་པོ་དབྱངས་གསུམ་བརྒྱན། ། དེ་མཐར་བཞི་པའི་དང་པོ་གཞག། དེ་མཐར་གཉིས་པའི་དང་པོ་ལ།། ལྔ་པའི་དང་པོ་སོ་སོར་གཞག། དེ་འོག་དྲུག་པའི་བཞི་པ་གཞག། དེ་འོག་དབྱངས་ཀྱི་དང་པོ་ཉིད།། དེ་འོག་བདུན་པའི་དང་པོ་ལ། ། དབྱངས་ཀྱི་ལྔ་པའི་རྒྱན་ལྡན་ཞིང།། དང་པོའི་གསུམ་པ་དེ་ལ་སྦྱིན།། ལྔ་པ་ཡི་ནི་ལྔ་པ་ལ།། དབྱངས་ཡིག་བཅུ་གཅིག་རྒྱན་ལྡན་ཞིང།། ལྔ་པ་ཡི་ནི་བཞི་པ་ལ།། འོག་ནས་དྲུག་པའི་དང་པོས་མཛེས། ། དབྱངས་ཡིག་བཅུ་གསུམ་རྒྱན་ལྡན་ཞིང།། གཉིས་པ་ཡི་ནི་གསུམ་པ་ལ།། དབྱངས་ཀྱི་གཉིས་པའི་རྒྱན་ལྡན་པ།། སྔགས་ཀྱི་མཐར་རུ་གཞག་པར་བྱ།། འདི་ནི་རྩ་བའི་སྙིང་པོ་སྟེ།། རང་དབང་མེད་པར་སྲོག་ནས་འདྲེན། ། དེ་ནས་རྒྱུད་འདི་སྦས་པའི་མཐུས།། ཙིཏྟ་གསང་བ་རྒྱལ་བུའི་རྒྱུད།། སྔགས་འདི་འབུམ་ཕྲག་གསུམ་གྱིས་ནི།། འདོད་པའི་ལས་འདི་འགྲུབ་པར་འགྱུར།། དང་པོ་དྲུག་པའི་གསུམ་པ་གཞག། དེ་ལ་དང་པོའི་གསུམ་པས་མཛེས། ། དེ་འོག་ལྔ་པའི་ལྔ་པ་གཞག། དབྱངས་ཀྱི་བཅུ་གསུམ་སྟེང་ནས་བརྒྱན།། དེ་འོག་དྲུག་པའི་གསུམ་པ་གཞག། དང་པོའི་གསུམ་པས་དེ་ལ་མཛེས།། དེ་འོག་ལྔ་པའི་ལྔ་པ་ནི།། ཚེག་དང་བཅས་ལ་གཉིས་སུ་གཞག། དེ་འོག་བཞི་པའི་གསུམ་པ་གཞག། དབྱངས་ཀྱི་ལྔ་པས་འོག་ཏུ་བརྒྱན།། བཞི་པའི་ལྔ་པས་དེ་ལ་མཛེས།། དེ་འོག་བཞི་པའི་དང་པོ་གཞག། དབྱངས་ཀྱི་བདུན་པས་སྟེང་ནས་བརྒྱན། ། དང་པོའི་ལྔ་པའི་འགྲམ་དུ་མཛེས།། དེ་འོག་བདུན་པའི་བཞི་པ་གཞག། དབྱངས་ཀྱི་བཅུ་གཅིག་སྟེང་ནས་བརྒྱན།། དྲུག་པའི་གསུམ་པ་དེ་ལ་སྦྱིན།། དེ་འོག་ལྔ་པའི་ལྔ་པ་གཞག། དེ་འོག་བདུན་པའི་པའི་བཞི་གཞག། དབྱངས་ཀྱི་བཅུ་གཉིས་སྟེང་ནས་དགབ།། བཞི་པ་གསུམ་པ་དེ་ལ་མཛེས།། དེ་འོག་ལྔ་པའི་བཞི་པ་གཞག། ཡ་ཏས་མཛེས་པར་བརྒྱན་བྱས་ལ།། དབྱངས་ཀྱི་བཅུ་པས་སྟེང་ནས་དབབ།། སྒྲུབ་སྔགས་ཚེག་བར་བཅུ་གཉིས་པ། ། ཡང་གསུང་ཐུགས་ཀྱི་རྒྱུད་ལས་བྱུང།། ཤིན་ཏུ་ནུབ་ཀྱི་དུས་སུ་བཟླས།། དང་པོར་ལྔ་པའི་གསུམ་པ་གཞག། དེ་ལ་གཉིས་པའི་གསུམ་པས་མཛེས།། དྲུག་པའི་གསུམ་པ་ཤམ་དུ་མཛེས། ། དེ་འོག་དང་པོའི་དང་པོ་གཞག། དབྱངས་ཀྱི་དྲུག་པས་འོག་ཏུ་བརྒྱན།། དེ་འོག་དྲུག་པའི་གསུམ་པ་ལ།། དབྱངས་ཀྱི་དྲུག་པས་འོག་ཏུ་མཛེས།། དེ་འོག་བཞི་པའི་ལྔ་པ་གཞག། དེ་འོག་དྲུག་པའི་གསུམ་པ་གཞག། འོག་ཏུ་ལྔ་པའི་གསུམ་པའོ།། དེ་ལ་བཞི་པའི་གསུམ་པས་མཛེས།། རྟེན་ལྔ་སྤྱི་ནས་དེ་ཡིས་འཇོམས།། དེ་འོག་བདུན་པའི་གསུམ་པ་གཞག། དེ་ལ་གཉིས་པའི་ལྔ་པས་བརྒྱན།། དབྱངས་ཀྱི་གསུམ་པས་སྟེང་ནས་དགབ། ། དེ་ལ་དང་པོའི་ལྔ་པ་སྦྱིན།། དེ་འོག་དང་པོའི་གཉིས་པ་གཞག། དྲུག་པའི་གསུམ་པས་འོག་ཏུ་བརྒྱན།། དང་པོའི་གསུམ་པ་དེ་ལ་མཛེས།། དེ་འོག་གཉིས་པའི་གཉིས་པ་གཞག། དེ་ལ་དྲུག་པའི་ལྔ་པ་མཛེས། ། དེ་འོག་ལྔ་པའི་དང་པོ་གཞག། དེ་འོག་དྲུག་པའི་གསུམ་པ་གཞག། ལྔ་པའི་གསུམ་པས་འོག་ཏུ་བརྒྱན།། དེ་ལ་བཞི་པའི་གསུམ་པས་མཛེས།། སྙིང་ཁྲག་རྩད་ནས་དེ་ཡིས་འཁྲུག། དེ་འོག་དྲུག་པའི་གསུམ་པ་གཞག། བཞི་ཡི་དང་པོ་ལུས་ལ་མཛེས།། དབྱངས་ཀྱི་ལྔ་པས་བཤམ་དུ་བརྒྱན།། དེ་ལ་ལྔ་པའི་གསུམ་པ་དང།། བདུན་པ་ཡི་ནི་གསུམ་པ་བསག། དེ་འོག་གཉིས་པའི་དང་པོ་གཞག། དབྱངས་ཀྱི་གསུམ་པའི་དང་པོ་གཞག། དབྱངས་ཀྱི་གསུམ་པས་སྟེང་ནས་དགབ།། དེ་འོག་བཞི་པའི་དང་པོ་གཞག། དེ་འོག་དྲུག་པའི་གསུམ་པ་གཞག། ལྔ་པའི་གསུམ་པས་འོག་ཏུ་བརྒྱན།། གསུམ་པོའི་གསུམ་པ་དེ་ལ་མཛེས།། དེ་ཉིད་ཙིཏྟ་གཏུབ་པའོ། ། དང་པོར་ལྔ་པའི་ལྔ་པ་གཞག། དེ་ལ་ཡ་ཏས་མཛེས་པར་བྱའོ།། དང་པོའི་གསུམ་དང་བདུན་པ་ཡིས།། གསུམ་པས་དེ་ལ་མཛེས་པར་བྱ།། དབྱངས་ཀྱི་བཅུ་གསུམ་སྟེང་ནས་དགབ།། དེ་འོག་དྲུག་པའི་གསུམ་པ་གཞག། འོག་ཏུ་ལྔ་པའི་ལྔ་པས་བརྒྱན།། དབྱངས་ཀྱི་ལྔ་པས་འོག་ཏུ་བརྒྱན།། དང་པོའི་གསུམ་དང་བདུན་པས་མཛེས།། དེ་འོག་དྲུག་པའི་གསུམ་པ་གཞག། དེ་ལ་ལྔ་པའི་གསུམ་པ་སྦྱིན།། དེ་ལ་བཞི་པའི་གསུམ་པས་མཛེས། ། མྱོས་སུ་གཞུག་པའི་དྲག་སྔགས་སོ།། དེ་འོག་བདུན་པའི་གསུམ་པ་གཞག། དེ་ལ་གཉིས་པའི་ལྔ་པས་བརྒྱན།། དེ་ལ་དང་པོའི་ལྔ་པས་མཛེས།། དབྱངས་ཀྱི་བཞི་པས་སྟེང་ནས་དགབ། ། དེ་འོག་དང་པོའི་གཉིས་པ་གཞག། དྲུག་པའི་གསུམ་པས་འོག་ཏུ་བརྒྱན།། དེ་ལ་དང་པོའི་གསུམ་པས་མཛེས།། དེ་འོག་དང་པོའི་གཉིས་པ་གཞག། དེ་འོག་དྲུག་པའི་བཞི་པ་གཞག། དེ་འོག་དྲུག་པའི་གསུམ་པ་གཞག། དེ་ལ་ལྔ་པའི་གསུམ་པས་བརྒྱན།། དེ་ལ་བཞི་པའི་གསུམ་པས་མཛེས།། སྲོག་དང་བྲལ་བའི་དྲག་སྔགས་སོ།། དེ་འོག་གཉིས་པའི་གཉིས་པ་གཞག། དེ་ལ་དྲུག་པའི་བཞི་པས་མཛེས།། དེ་འོག་ལྔ་པའི་གསུམ་པ་གཞག། དབྱངས་ཀྱི་ལྔ་པས་འོག་ཏུ་བརྒྱན།། དེ་འོག་བདུན་པའི་གསུམ་པ་གཞག། དེ་ལ་དབྱངས་ཀྱི་བཅུ་གཉིས་བརྒྱན།། དེ་འོག་བཞི་པའི་ལྔ་པ་གཞག། དེ་འོག་བདུན་པའི་གསུམ་པ་གཞག། དབྱངས་ཀྱི་གསུམ་པས་སྟེང་ནས་དགབ།། བཞི་པ་ལྔ་པས་དེ་ལ་མཛེས།། དེ་འོག་གསུམ་པའི་གསུམ་པ་གཞག། དབྱངས་ཀྱི་ལྔ་པས་འོག་ཏུ་བརྒྱན།། དེ་འོག་དྲུག་པའི་གསུམ་པ་གཞག། དེ་ལ་ལྔ་པའི་གསུམ་པའི་[[]པས་[]]བརྒྱན། ། དེ་ལ་གསུམ་པའི་གསུམ་པས་མཛེས།། ལུས་ཀུན་གཏུབ་པའི་དྲག་སྔགས་སོ།། དེ་འོག་དྲུག་པའི་དང་པོ་གཞག། དབྱངས་ཀྱི་ལྔ་པས་འོག་ཏུ་བརྒྱན།། དེ་ལ་དྲུག་པའི་གསུམ་པ་སྦྱིན། ། དེ་འོག་གསུམ་པའི་གཉིས་པ་གཞག། དབྱངས་ཀྱི་དྲུག་པས་འོག་ཏུ་བརྒྱན།། ལྔ་པ་ཡི་ནི་ལྔ་པ་དང།། བདུན་པའི་གསུམ་པས་བརྩེགས་ལ་མཛེས།། དེ་འོག་བདུན་པའི་གསུམ་པ་གཞག། དྲུག་པའི་གསུམ་པ་འོག་ཏུ་བརྒྱན། ། དབྱངས་ཀྱི་བཅུ་གསུམ་སྟེང་ནས་དགབ།། དང་པོའི་གསུམ་པ་དེ་ལ་མཛེས།། དེ་འོག་བཞི་པའི་བཞི་པ་གཞག། དེ་འོག་བཞི་པའི་དང་པོ་གཞག། དེ་འོག་གསུམ་པའི་གསུམ་པ་གཞག། ལྔ་པའི་གསུམ་པས་འོག་ཏུ་བརྒྱན། ། དེ་ལ་གསུམ་པའི་གསུམ་པས་མཛེས།། མཚོན་གྱིས་གཏུབ་པའི་དྲག་སྔགས་སོ།། ལྔ་པའི་ལྔ་པ་ལན་གཉིས་བརྗོད།། དྲུག་པ་ཡིན་ནི་གསུམ་པ་གཞག། དང་པོ་ཡི་ནི་གསུམ་པ་སྦྱར།། ལྔ་པ་ཡི་ནི་ལྔ་པ་ལ། ། དབྱངས་ཡིག་བཅུ་གསུམ་རྒྱན་གྱིས་མཛེས།། ཆེ་གེ་མོ་ཡི་སྙིང་ལ་ནི།། གཉིས་པའི་གསུམ་པ་ལན་གཉིས་བརྗོད།། དེ་ལ་དབྱངས་ཡིག་རྒྱན་གྱིས་བརྒྱན།། དེ་འོག་བཞི་པའི་ལྔ་པ་ལ།། དང་པོ་ཡི་ནི་གསུམ་པ་སྦྱར། ། ལྔ་པ་ཡི་ནི་ལྔ་པ་ལ།། དབྱངས་ཡིག་བཅུ་གསུམ་རྒྱན་གྱིས་མཛེས།། བདུན་པ་ཡི་ནི་བཞི་པ་ལ།། དྲུག་པ་ཡི་ནི་གསུམ་སྦྱར་གཉིས།། བདུན་པའི་བཞི་པའི་འོག་མ་ལ།། དབྱངས་ཡིག་ལྔ་ཡི་རྒྱན་གྱིས་བརྒྱན། ། ལྔ་པའི་ལྔ་དང་བདུན་པའི་བཞི།། དྲུག་པའི་བཞི་ལ་སོ་སོར་གཞག། ཆོ་ཆོ་ཞེས་ནི་རྦད་པར་བྱ།། དེ་འོག་དབྱངས་ཡིག་ལྔ་པ་དང།། དྲུག་པ་ཡི་ནི་གསུམ་པར་སྦྱར།། དང་པོའི་དང་པོ་དེ་མཐའ་གཞག། དེ་འོག་ལྔ་པའི་ལྔ་པ་དང།། དྲུག་པའི་གསུམ་པ་སོ་སོར་གཞག། དང་པོའི་གཉིས་པ་ལན་གཉིས་དང།། བདུན་པའི་བཞི་པ་ལན་གཉིས་བརྗོད།། བཞི་པའི་དང་པོ་ལན་གསུམ་གཞག། དྲུག་པའི་གཉིས་པས་དང་པོར་བརྒྱན། ། ཐ་མ་དབྱངས་ཡིག་གསུམ་པས་བརྒྱན།། གཉིས་པ་ཡི་ནི་གསུམ་པ་ལ།། དབྱངས་ཡིག་གཉིས་པའི་རྒྱན་གྱིས་མཛེས།། ལན་གཉིས་དག་ཏུ་བརྗོད་པར་བྱ།། དེ་རྗེས་མིང་སྨོས་སྙིང་ལ་བྷྱོ། ། འདི་ནི་བརྗོད་པའི་སྙིང་པོ་ཡིས།། འབུམ་ཕྲག་གསུམ་གྱིས་འགྲུབ་པར་འགྱུར།། དྲུག་པ་ཡི་ནི་གསུམ་པ་ལ།། དབྱངས་ཡིག་བཅུ་གཅིག་རྒྱན་དང་ལྡན།། དེ་འོག་ལྔ་པའི་ལྔ་པ་གཞག། བཞི་པའི་དང་པོ་དབྱངས་གསུམ་བརྒྱན། ། ལྔ་པ་ཡི་ནི་དང་པོ་ལ།། བདུན་པ་ཡི་ནི་དང་པོ་ལ།། གཉིས་པ་ཡི་ནི་དང་པོ་གསུམ།། རིམ་བཞིན་སོ་སོར་གཞག་པ་ནི།། ལན་གཉིས་དག་ཏུ་བརྗོད་པར་བྱ།། དེ་འོག་ལྔ་པའི་དང་པོ་དང། ། དྲུག་པ་བཞི་པ་སོ་སོར་གཞག། གཉིས་པ་ཡི་ནི་གསུམ་པ་ལ།། དབྱངས་ཡིག་གཉིས་པའི་རྒྱན་གྱིས་མཛེས།། ལན་གཉིས་དག་ཏུ་བརྗོད་པར་བྱ།། བཞི་པ་ཡི་ནི་གསུམ་པ་ལ།། དབྱངས་ཡིག་ལྔ་པའི་རྒྱན་ལྡན་ཞིང། ། བཞི་པའི་ལྔ་པ་དེ་རུ་སྦྱར།། དེ་ཉིད་ལན་གཉིས་བརྗོད་པར་བྱ།། དྲུག་པ་ཡི་ནི་གསུམ་པ་དང།། དང་པོ་ཡི་ནི་གསུམ་པར་སྦྱར།། དེ་འོག་བདུན་པའི་དང་པོ་གཞག། དེ་དག་ལན་གཉིས་བརྗོད་པར་བྱ། ། དེ་འོག་ལྔ་པའི་ལྔ་པ་ལ།། དབྱངས་ལྔ་རྒྱན་གྱིས་འོག་ཏུ་ལེགས།། བཞི་པ་ཡི་ནི་དང་པོ་ལ།། དྲུག་པ་ཡི་ནི་རྒྱན་གྱིས་མཛེས།། དྲུག་པའི་གསུམ་དང་བཞི་པ་ལ།། དབྱངས་ལྔའི་རྒྱན་གྱིས་འོག་དུ་སྤྲས།། དེ་དག་ལན་གཉིས་བརྗོད་པར་བྱའོ། ། ལྔ་པ་ཡི་ནི་བཞི་པ་ལ།། དབྱངས་ཡིག་བཅུ་གསུམ་རྒྱན་གྱིས་མཛེས།། འདི་ནི་སྙིང་པོ་གསང་སྔགས་ཏེ།། དེ་རྗེས་མིང་སྨོས་རལ་གྲི་མེ།། འཐོར་བྱེད་རླུང་གི་ས་བོན་རྗེ།། གསོད་བྱེད་ཡི་གེ་ཕཊ་གཉིས་བརྗོད། ། འབུམ་ཕྲག་གཅིག་གིས་གསོད་པར་ངེས།། བཞི་པའི་དང་པོ་གྲུ་གསུམ་སྒྲ།། དེ་རུ་དང་པོའི་གསུམ་པ་གཞག། གྲུབ་གསུམ་དང་པོ་གསུམ་སྦྱར་ཞེས།། བདུན་པའི་དང་པོ་གཞག་པར་བྱ། ། དེ་རྗེས་ལྔ་པའི་ལྔ་པ་གཞག། དེ་རྗེས་དབྱངས་ཡིག་དབྱངས་གསུམ་བརྒྱན།། བཞི་གསུམ་དབྱངས་གསུམ་ལྔ་པའི་བརྒྱན།། དེ་ལ་བཞི་པའི་ལྔ་པ་སྦྱིན།། ལྔ་པ་ཡི་ནི་བཞི་པ་ལ།། དབྱངས་ཡིག་བཅུ་གསུམ་རྒྱན་གྱིས་མཛེས། ། འོག་ནས་དྲུག་པའི་དང་པོས་བརྒྱན།། དེ་འོག་ལྔ་པའི་ལྔ་པ་གཞག། དེ་འོག་བདུན་པའི་བཞི་པའོ།། དེ་འོག་དྲུག་པའི་དང་པོ་ལ།། དང་པོའི་གསུམ་པ་སྦྱར་བས་མཛེས།། བདུན་པའི་དང་པོ་གཞག་པར་བྱ། ། བཞི་པའི་དང་པོ་དབྱངས་གསུམ་བརྒྱན།། དེ་ལ་དང་པོའི་གསུམ་པ་སྦྱར།། བདུན་པ་ཡི་ནི་གཉིས་པ་ལ།། བཞི་པ་ཡི་ནི་ལྔས་པས་བརྒྱན།། བཞི་པའི་ལྔ་པ་དེ་ཉིད་ལ།། དང་པོ་ཡི་ནི་གསུམ་པ་སྦྱར།། ལྔ་པ་ཡི་ནི་ལྔ་པ་ལ། ། དབྱངས་ཡིག་བཅུ་གསུམ་རྒྱན་གྱི་མཛེས།། བཞི་གསུམ་དབྱངས་ཡིག་ལྔ་ཡིས་བརྒྱན།། དེ་ལ་བཞི་པའི་ལྔ་པ་སྦྱིན།། ལྔ་པ་ཡི་ནི་བཞི་པ་ལ།། འོག་ཏུ་དྲུག་པ་དང་པོ་སྦྱིན།། དབྱངས་ཡིག་བཅུ་གསུམ་རྒྱན་ལྡན་པའོ། ། འདི་ནི་རྒྱུད་ཀྱི་སྙིང་པོ་སྟེ།། རྟག་པར་བཟླས་ཤིང་གཏོར་མ་སྦྱིན།། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་སྙིང་པོ་སྔགས་ཀྱི་བཏུ་ཐབས་བསྟན་པའི་ལེའུ་སྟེ་ལྔ་པའོ། །།། དེ་ནས་བཅོམ་ལྡན་འདས་ཀྱིས། སྒྲུབ་པའི་དཀྱིལ་འཁོར་འདི་གསུངས་སོ།། མཎྜལ་གྲུ་བཞི་ལྡན་པ་ལ།། ཚོན་རྩི་སེར་པོས་བརྒྱན་པའི་ཚུལ།། དེ་ཡི་དཀྱིལ་འཁོར་གྲུ་གསུམ་ནི།། དུར་ཁྲོད་སོལ་བས་ནག་པོར་བྱུག། དྲག་པོའི་དཀྱིལ་འཁོར་ཞེས་སུ་འདོད།། དེ་ཡི་དཀྱིལ་དུ་ཟླུམ་པོ་ནི།། མུ་ཁྱུད་ཞི་བའི་ཚུལ་དུ་དཀར།། དེ་ཡི་དཀྱིལ་དུ་གྲུ་གསུམ་ནི།། ནག་པོ་ཆོས་ཀྱི་དབྱིངས་ཀྱི་རྟགས།། ཟླ་གམ་རྣམ་གསུམ་དབང་གི་རྟགས། ། དེ་ཡི་བསྒྲུབ་རྫས་བཤད་བྱ་བ།། རྗེ་རིགས་བྷནྡྷ་མཚན་ལྡན་ཞིང།། ལྕང་ལོ་ཅན་དུ་གསོག་པ་ནི།། བདུད་རྩི་རཀྟ་གི་ཧང་དང།། ག་པུར་ཤ་ཆེན་ཚིལ་ཆེན་དང།། ནལ་བུའི་སྙིང་དང་འབྲས་བུ་དང། ། ཛ་གད་ཕུད་ཀྱི་བསྐང་ལ་གཞག། དེ་དང་འདྲ་བའི་བྷནྡྷ་ལ།། ལྷ་མོའི་སྙིང་པོས་བརྒྱན་བྱས་ཏེ།། དཀྱིལ་འཁོར་དབུས་སུ་ཁ་སྤྲད་དེ།། རྟགས་དང་མཚན་མ་བྱུང་བ་དང།། དངོས་གྲུབ་བླང་ཞིང་དམ་ཚིག་བསྲེ། ། ཤ་ཆེན་སྤོས་དང་ཚིལ་ཆེན་མེ།། དུག་ལས་བྱུང་བའི་མེ་ཏོག་དང།། རཀྟའི་གསང་ནན་ཕུད་དང་བཅས།། ཐོད་པ་ལྟག་སྤྲོད་རྔ་ཆེན་སྒྲ།། བྷནྡྷའི་ཆ་ལང་རྐང་གི་དུང།། ཤུན་ཆེན་རྒྱལ་མཚན་དར་ནག་གདུགས། ། མི་རོའི་ལག་པའི་གཡབ་མོར་བཅས།། བསྒྲུབ་པའི་རྫས་སུ་བསག་པར་བྱ། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་བསྒྲུབ་པའི་དཀྱིལ་འཁོར་བྲི་ཞིང་རྫས་དགོད་པའི་ལེའུ་སྟེ་དྲུག་པའོ། །།། དེ་ནས་བཅོམ་ལྡན་འདས་ཀྱིས་ལས་ཀྱི་དཀྱིལ་འཁོར་བཅའ་གཞི་དང། དུར་ཁྲོད་ཀྱི་རྫས་གསོག་པ་འདི་གསུངས་སོ།། གྲུ་གསུམ་སུམ་བརྩེགས་ནང་དུ་བྲུ།། ཆོས་བཟངས་ལྟ་བུའི་བང་རིམ་གྱི། ། ནང་དུ་དུར་ཁྲོད་སོལ་བས་བྱུག། ཟླ་གམ་རྣམ་གསུམ་དམར་པོར་བྱ།། མུ་ཁྱུད་དཀར་པོ་གྲུ་བཞི་སེར།། མཐའ་མ་མེ་ཡི་ཕྲེང་བར་བཅས།། གྲུ་གསུམ་བང་རིམ་དང་པོ་ལ།། ཐོད་པ་ཡི་ནི་ཕྲེང་བ་བཏགས། ། གཉིས་པར་རལ་གྲི་གསུམ་པར་མདའ།། བྱིན་གྱིས་བརླབ་ཅིང་དགོད་པར་བྱ།། ནང་དུ་ཡུགས་སའི་ཞབས་མ་གདིངས།། དྲི་མ་དྲུག་ལ་དམིགས་པའི་གཟུགས།། མཚན་ཉིད་ཐམས་ཅད་ཡོངས་སུ་རྫོགས། ། ཚ་བ་གསུམ་གྱི་ཁུ་བས་བྱུག། མིང་དང་རུས་བཅས་ནང་དུ་གཞུག། ཐོད་པ་རབ་ཏུ་མཚན་ངན་པར།། ར་དང་རྟ་དང་ཁྱི་ཡི་ཁྲག། ཕག་གི་ཁྲག་དང་སྤྱང་དུག་བྱུག། ལྕགས་ཕུར་དུག་གིས་བྱུགས་པ་བདུན། ། རྩེ་མོ་གནམ་བསྟན་ནང་དུ་གཟུག། མེ་འབར་རྟགས་བྱུང་ཕུར་བུས་གདབ།། རྦད་པའི་སྔགས་ཀྱིས་བསྒྲུབ་པར་བྱའོ།། གཞན་ཡང་དམ་རྫས་ཚང་བ་ཡི།། གཏོར་མ་ཟླ་གམ་གཅིག་ལ་གཞག། དུག་དང་ལན་ཚྭ་སྐྱེ་ཚེ་གསུམ།། ཆང་དང་མར་ནག་དྷ་དུ་ར།། རིམས་ནད་དག་གིས་བཏབ་པའི་ཁྲག། ཐལ་ཆེན་ཁྲག་དང་ཐོད་པར་སྦྱར།། ཟླ་གམ་གཅིག་ལ་གཞག་པར་བྱ། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་རྫས་བསག་པའི་ལེའུ་སྟེ་བདུན་པའོ། །།། དེ་ནས་བཅོམ་ལྡན་འདས་ཀྱིས་ཕུར་པ་བཏབ་ལ་མཚོན་གྱིས་གཏུབ་ཅིང་སྦྱིན་བསྲེག་བྱ་བ་དང། ཐུན་ཟོར་འཕང་བ་དང། གནན་པའི་ལས་འདི་གསུངས་སོ། ། ལས་ཀྱི་དཀྱིལ་འཁོར་རྫས་རྣམས་ལ།། རྦད་པའི་སྔགས་ཀྱིས་བསྣུན་ཅིང་བསྐུལ།། མེ་འབར་རྟགས་མཐོང་ཕུར་པས་གདབ།། བཛྲ་ཀུ་རུ་ན་རྦད། སྙིང་ཁྲག་ཚལ་པ་རྦད། གཏུབས་ཙིཏྟ་རྦད། མྱགས་རྨུགས་རྦད། སྙིང་ཁྲག་ཁ་ལ་རྦད། ཚལ་བུ་ས་སིན་དུ་རྦད། ཧུར་ཐུམས་སྲོག་ལ་ཡ་རྦད། དེ་ནས་མཚོན་གྱིས་གཏུབ་པར་བྱ།། ལས་ཀྱི་དཀྱིལ་འཁོར་དབུས་ཉིད་དུ།། དུག་ཤིང་གདུག་པའི་ཤིང་བུ་ལ།། རིགས་ངན་ཁྱིམ་ནས་བླངས་པའི་མེས། ། སྤར་ལ་ལིངྒ་སྲེག་པ་ནི།། དུར་ཁྲོད་ཤིང་ལ་ཡམ་ཤིང་ནི།། ཟུར་གསུམ་ལོགས་ལ་ཁྲག་ཆེན་པོས།། མིང་རུས་བྲིས་པ་རེ་རེ་དང།། ལིངྒ་དུམ་བུ་རེ་རེ་དང།། དུག་དང་སྐྱེ་ཚེ་ལ་སོགས་རྫས། ། སྔགས་ཤིང་སྲེག་པའི་ལས་བྱས་ན།། མྱུར་དུ་རིམས་ཀྱིས་འདེབས་པར་འགྱུར།། མ་མ་སརྦ་ཤ་ཏྲུཾ་མཱ་ར་ཡ། ཨ་མུ་ཀཾ་ད་ཧ་ད་ཧ། པ་ཙ་པ་ཙ་བྷཥྨི་ཀུ་རུ། ཧཱུཾ་ཧཱུཾ། ཕཊ་ཕཊ། སྭཱ་ཧཱ། བརྒྱ་རྩ་བརྒྱད་ཀྱིས་འགྲུབ་པར་འགྱུར། ། དེ་ནས་བསྲེག་པའི་ཐལ་བ་དང།། མིང་བྱང་ལྷན་ཅིག་ཞབས་མས་གྲིལ།། དུར་ཁྲོད་དབུས་སུ་གནན་ཅིང་གཏད།། མཚན་ངན་བྷནྡྷའི་ཁྲག་དུག་དང།། ཐུན་སྔགས་བཟླས་ཤིང་ཟོར་དུ་འཕང།། རག་མོ་ཐང་མུ་ལེ་ཐང། མུ་ལེ་རྦད། རྩ་ཐང་རྩ་ཐང།། མུ་ལེ་རྦད་རྦད། མུཾ་སྣི་མུཾ་སྣི་ནན་ན་ཎ། རག་མོ་ནི་རིག་མོ་ནི་ཁ་ལོ་རྦད་རྦད། དུག་སྣི་རྦད་རྦད་རྦད། ཁྱི་ཁ་ལོ་ཁྱི་ཁ་ལོ་རྦད་རྦད། ཙིཏྟ་ཙིཏྟ་རྦད་རྦད། ནིརྟི་ནིརྟི། མུགས་མུགས། ཐུམ་ཐུམ་སུམ་ཏྲི་ཧ་རྦད། ཐུམ་ཐུམ་རྦད། མོག་མོག་རྦད། ཆེ་གེ་མོ་ལིང་རྦད། ས་མ་ཡ་ཛ་ཛ་ཞེས་པས་ཐུན་འཕང།། གྲངས་ནི་སྟོང་རྩ་བརྒྱད་དོ།། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་དྲག་པོ་སྒྲུབ་པའི་ལེའུ་སྟེ་བརྒྱད་པའོ། །།། དེ་ནས་ཡང་བཅོམ་ལྡན་འདས་ཀྱིས་སེར་བ་དབབ་པའི་ལས་འདི་གསུངས་སོ།། ཤ་སྣ་ཁྲག་སྣ་སྙིང་སྣ་དང།། ནལ་བུའི་སྙིང་དང་ལོ་ཟླའི་མིང།། ནལ་བུའི་ཐོད་པར་སྔགས་ཀྱིས་གྲུབ། ། མ་མ་རུ་ལུ་རུ་ལུ་ས་མ་ཡ་སྟྭཾ། ཛ་ལང་དུམ་དུ། ཨ་ཀ་ཤ་ཡ། ཏྲག་རཀྴ་ཕྲོམ། སུམ་འབུམ་རྫོགས་དང་ལས་ལ་སྦྱོར།། གཏོར་མ་གཏང་ཞིང་སྔགས་ཀྱིས་བསྐུལ།། ཐུན་རྫས་གསུམ་དུ་བགོས་ནས་སུ། ། གཅིག་གི་ཡུལ་སའི་རྟེན་ལ་གནན།། གཅིག་ནི་ཐབས་བྱ་ཟོར་དུ་འཕང།། གཅིག་ནི་ཕྱིས་ཀྱི་གཏའ་དམར་གཞུག། དྲག་པོ་རྒྱུ་བའི་དུས་ཆེན་ལ།། ཤུན་ཆེན་བརྡབ་ཅིང་འོ་དོད་འབོད།། དེས་ནི་ལས་རྣམས་ཆུད་མི་ཟའོ། ། ཞེས་གསུངས་པ་དང། འཁོར་ཐམས་ཅད་རབ་ཏུ་དགའ་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས། སེར་བ་དབབ་བའི་ལེའུ་སྟེ་དགུ་པའོ།།།། དེ་ནས་ཡང་བཅོམ་ལྡན་འདས་ཀྱི་ལྷ་མོའི་ཕྲིན་ལས་འདི་གསུངས་སོ།། སྣང་མེད་དབྱིངས་ཀྱི་རང་བཞིན་ནི།། དམིགས་མེད་དབྱིངས་ཀྱི་ངང་དུ་གསལ། ཁྱབ་གདལ་འོད་ཆེན་རྫོགས་པར་ལྡན། ། མ་ཧཱ་ཤཱུ་ནྱ་ཏཱ་མཎྜལ་ཧཱུཾ། རིག་པ་ཡེ་ཤེས་བདེ་ཆེན་མཁའ།། ཀུན་སྣང་སྣང་སྲིད་ཁྱབ་པར་གསལ།། གཉིས་མེད་ལྷུན་གྱིས་གྲུབ་པའི་མཆོག། དྷརྨ་དྷཱ་ཏུ་མཎྜལ་ཧཱུཾ།། གཉིས་སུ་མེད་པའི་མཁའ་དབྱིངས་ལས། ། བྱང་ཆུབ་སེམས་ཀྱི་སྤྲིན་ཚོགས་གཏིབས།། བདེ་མཆོག་ཡིད་བཞིན་ཆར་དུ་འབེབས།། ཐམས་ཅད་མ་ལུས་བསྐྱེད་པའི་རྒྱུ།། ཏྲཱཾཿ། རིན་ཆེན་འབར་བའི་འོད་ཟེར་ལས།། དབང་ཆེན་དཀྱིལ་འཁོར་འབྱུང་བའི་རྒྱུ། ། ཨེ་ཡཾ་རཾ་སུཾ་ལཾ་བྷྲཱུཾ། གྲུ་གསུམ་མཐིང་ནག་འབར་བའི་ནམ་མཁའ་ལ།། འཐོར་བྱེད་རླུང་ནག་ཚོགས་ནི་རྒྱ་གྲམ་གཏམས།། ཆགས་པ་རཀྟའི་ཚོགས་ནི་རྦ་ཀློང་འཁྱིལ།། ཞིང་ཆེན་གཏམས་པའི་ཚོགས་ནི་མཐའ་དབུས་བརྡལ། ། ཀེང་རུས་འབར་བའི་རི་རབ་མི་བཟད་པ།། དེ་སྟེང་རྡོ་རྗེ་རྒྱ་གྲམ་གཅལ་བཀྲམ་སྟེ།། སྣ་ཚོགས་དག་པའི་སྣང་བ་འདི་བརྗོད་དོ།། བྷྲཱུཾ་བྷནྡྷ་ཙཀྲ་ཧ་ལ་ཧ་ལ་ཧཱུཾ། མི་བཟད་མཐིང་ནག་འབར་བའི་གཞལ་ཡས་ནི། ། ཆུ་སྲིན་བྱེ་བ་ས་ཡའི་ཐོད་པ་ལ།། མི་བཟད་དུར་ཁྲོད་འབར་བའི་རྩིག་རྨང་བྱས།། ཐོད་སྐམ་དགུ་ཡི་རྩིག་པ་མཁར་དུ་བརྩིག། གནམ་ལྕགས་ཨུརྨོ་འབར་བའི་གཟེར་གྱིས་བཏབ།། རིན་ཆེན་མཆོག་གི་ཟུར་བཞི་མཛེས་པར་བརྒྱན། ། གཡུ་འོད་སྔོན་པོ་འབར་བའི་ཁ་བད་ཅན།། མུ་ཁྱུད་གནམ་ལྕགས་འབར་བའི་རི་ཡིས་བསྐོར།། སུམ་བ་སུམ་བ་བྷནྡྷ་རཀྴ་ཏི་ར་བཾ།། མཐིང་ནག་འབར་བའི་དཀྱིལ་འཁོར་ན། ། ཞིང་ཆེན་ཞིང་ཆུང་བཅལ་དུ་བཀྲམ།། མཆོག་ཆེན་མཆོག་ཕྲན་གདན་དུ་གཏིང།། ཐེ་བྲག་དགུ་བརྒྱའི་གབ་ཙེ་ལ།། ལྷ་སྲིན་ཀུན་ཀྱང་གདན་དུ་བཏིང།། ནརྀ་སྟི་ར་བཾ། ཡཀྵ་སྟི་ར་བཾ། དེ་བ་ཏི་ཏ་བཾ། རུ་དྲ་མཎྜལ་ཧཱུཾ། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས། གཞལ་ཡས་ཁང་གདན་དང་བཅས་པ་བསྒོམ་པའི་ལེའུ་སྟེ་བཅུ་པའོ།།།། དེ་ནས་ཡང་བཅོམ་ལྡན་འདས་ཀྱི་ལྷ་མོ་སྐུ་བསྐྱེད་ཅིང་སྤྱན་དྲངས་པ་འདི་གསུངས་སོ། ། ཨོཾ་ནག་མོ་ཏི་ལིང་མ་མ་དུན་ཏིང་བྷྱོ། ཧཱུཾ་བྷྱོ། ཡི་གེ་མ་ལས་བསྐྱེད་པའི་ལྷ་མོ་ནི།། མཐིང་ནག་ཞལ་གཅིག་ཕྱག་བཞི་སྲིན་མོའི་ཚུལ།། རལ་པའི་ཐོར་ཚུགས་གསེར་དང་བྱེ་རུས་བརྒྱན།། དུས་བཞིའི་མ་མོ་བཞི་ལ་སྐུ་ལས་འཆར། ། ཞིང་ཆེན་གཡང་གཞི་སྟག་ལྤགས་སྦྲུལ་གྱིས་བརྒྱན།། འཁོར་དུ་མི་བཟད་ནག་མོ་སྟོང་གིས་བསྐོར།། མཐིང་ནག་དྲེའུ་ཞོན་འཇིགས་པའི་སྐུ་མདོག་གསལ།། ཧཱུཾ་བྷྱོ། དུར་ཁྲོད་གསང་བ་དབྱིངས་ཀྱི་དཀྱིལ་འཁོར་ནས།། ལྷ་མོ་ཆེན་མོ་མཐུ་མོ་ཆེ།། དད་པ་དང་ནི་དམ་ཚིག་གིས།། ཚུར་གཤེགས་ཚུལ་སྤྱོན་འཁོར་དང་བཅས།། རྣལ་འབྱོར་དམ་ལ་གདུང་བའི་ཚེ།། མཆི་མ་ཐུལ་ཐུལ་ད་ཚུར་སྤྱོན། ། ཉི་མ་བྱང་ཤར་ཕ་ཀི་ན།། བྲག་དང་ཆུ་འཐབས་མར་འདས་ན།། མཚོ་མུ་ལེ་གཏིང་གི་ནང་ཤེད་ནས།། མ་གཅིག་དཔལ་ལྡན་རེ་མ་ཏི།། ནག་མོ་སྟོང་གི་འཁོར་དང་བཅས།། ཐུགས་དམ་དབང་གིས་སྤྱན་འདྲེན་ན། ། སྒྲུབ་མཆོག་བསྐྱབ་ཕྱིར་གཤེགས་སུ་གསོལ།། སྔོན་ཚེ་དཔལ་ཆེན་ཧེ་རུ་ཀའི།། སྤྱན་སྔར་ཇི་ལྟར་དམ་བཅས་པ།། མ་རུ་ཙེ་ཡི་སྒོ་འགྲམ་དུ། ཁས་བླངས་དམ་བཅས་བདག་བསྐུལ་གྱིས།། དམ་ཚིག་བཞིན་དུ་གཤེགས་སུ་གསོལ། ། ཨོཾ་ནག་མོ་ཏིང་ལ་མ་མ་དུན་བྷྱོ་ཛཿཧཱུཾ་བཾ་ཧོཿ་ནག་མོ་དུན་བྷྱོ། དཔལ་ལྷ་མོ་ཙིཏྟ་སྲོག་རྐྱལ་བུའི་རྒྱུད་ལས། སྐུ་བསྐྱེད་དང་སྤྱན་དྲང་བའི་ལེའུ་སྟེ་བཅུ་གཅིག་པའོ།།།། དེ་ནས་ཡང་བཅོམ་ལྡན་འདས་ཀྱིས། ལྷ་མོ་ནག་མོ་ལ་ཕྱག་འཚལ་ཞིང་བརྟན་པར་བཞུགས་པ་འདི་གསུངས་སོ།། མི་མངོན་མཁའ་དབྱིངས་དག་པ་ནས།། ཡང་དག་སྐུ་གཅིག་བྱུང་བ་ནི།། སྐུ་གཅིག་མ་ལས་སྤྲུལ་པ་དྲུག། སྤྲུལ་དྲུག་མ་ལ་བཀའ་ཉན་སྟོང། ། བཀའ་ཉན་རེ་ལ་ཕྱག་བརྙན་འབུམ།། སྣང་སྲིད་བདག་ལ་ཕྱག་འཚལ་ལོ།། དེ་ཕྱིར་ཞིང་ཀུན་དྲོད་འབེབས་མ།། འཚུམས་མ་ཀུན་གྱི་སྣ་འདྲེན་ཅིང།། ཆུ་བོ་ཀུན་གྱི་གཞུང་བྱེད་མ།། ནག་མོ་གཙོ་ལ་ཕྱག་འཚལ་ལོ། ། དབྱར་ཞིང་ནམ་མཁའི་ཁམས་ནས་རྒྱུ།། འབྲུག་དང་གློག་གི་བདག་མོ་མཛད།། ཐོག་དང་བུ་ཡུག་འཕེབས་མཛད་མ།། གློག་མ་སྲིན་ལ་ཕྱག་འཚལ་ལོ།། སྟོན་ཞིང་འབྲས་བུ་སྨིན་མཛད་ཅིང། ། སྤང་པོ་དེ་ནི་ཁ་སེར་ལ།། འབྲས་བུ་ལོ་ཐོག་བཅུད་ལེན་མ།། མི་རྣམས་ཀུན་གྱི་དཔལ་འཕྲོག་མ།། ཀློང་དགུ་མ་ལ་ཕྱག་འཚལ་ལོ།། དགུན་ཞིང་རྒྱ་མཚོའི་གཏིང་ན་བཞུགས། ཁམས་གསུམ་ཀུན་ལ་རྒྱས་འདེབས་མ། ། ཀླུ་བྲན་ཀུན་གྱི་དགྱེས་སྡེ་མོ།། གློག་འགྱུ་མ་ལ་ཕྱག་འཚལ་ལོ།། རག་མོ་རག་མོ་མ་དུནྟིང་ན་མ་ཧཱ་ཡ་ཧི། དཔལ་ལྡན་ལྷ་མོ་རེ་མ་ཏི།། མི་བཟད་ནག་མོ་འཁོར་དང་བཅས།། བྱང་ཤར་མཚམས་ནས་སྤྱན་འདྲེན་གྱིས། ། ཕྲིན་ལས་མཛད་ཅིང་བརྟན་པར་བཞུགས།། རཀྴ་མ་ཧི་ཀུ་ལ་པདྨ་ས་མ་ཡ་ཏིཥྛ་ལྷན། དཔལ་ལྷ་མོ་ཙིཏྟ་གསང་བའི་སྲོག་ལས་ཀྱི་རྐྱལ་བུའི་རྒྱུད་ལས། ཕྱག་འཚལ་བ་དང། བརྟན་པར་བཞུགས་སུ་གསོལ་བའི་ལེའུ་སྟེ་བཅུ་གཉིས་པའོ། །།། ཡང་བཅོམ་ལྡན་འདས་ཀྱི་དཔལ་ལྷ་མོ་ལ། གར་དང་ཐུགས་དམ་བསྐང་བའི་ལས་འདི་གསུངས་སོ།། གཡས་གཡོན་ཐབས་དང་ཤེས་རབ་སྟེ།། ལྷ་མོ་ཉིད་ཀྱི་ཕྱག་རྒྱ་ནི། ། ཞལ་གཅིག་ཕྱག་བཞི་འཇིགས་པའི་གཟུགས།། གཡས་གཉིས་ཁ་ཊྭཱཾ་ཕུར་བུས་འདེབས།། གཡོན་གཉིས་མེ་ལོང་སྦྲུལ་ཞགས་བསྣམས།། ཕྱག་རྒྱ་གར་གྱི་མཆོད་པ་བཞེས། ། དགྲ་བགེགས་དབང་སྡུད་དམ་སྐོང་ཕྲིན་ལས་མཛོད།། མ་མོ་སྟོང་གི་ཕྱག་རྒྱ་ནི།། ཀུན་ཀྱང་མི་བཟད་ནག་མོའི་ཚོགས།། གཡས་པ་ཁྲག་གི་ཟོར་འཕེན་ཅིང།། གཡོན་པ་ཞིང་གི་གཡབ་མོ་ཐོགས།། ཕྱག་རྒྱ་གར་གྱི་མཆོད་པ་བཞེས། ། དགྲ་བགེགས་དབང་སྡུད་ཐུགས་དམ་དངོས་གྲུབ་སྩོལ།། རག་མོ་མ་ཧཱ་མུ་དྲ་ཧོ། རང་བྱུང་གདོད་ནས་དག་པའི་དམ་རྫས་ལྔ།། གདོད་ནས་དག་པའི་དམ་རྫས་བདུད་རྩི་མཆོག། རྩ་བ་བརྒྱད་ལ་ལོ་མ་སྟོང། ། སངས་རྒྱས་སྟོང་གི་དངོས་གྲུབ་ལེན།། དམར་ཆེན་མཚོ་དང་མཱཾ་ས་དྲི།། ག་བུར་ཤེལ་ཀྱི་སྤོས་ཕོར་དྲི།། སངས་རྒྱས་སྟོང་གི་ཐུགས་དམ་སྟེ།། རྣལ་འབྱོར་ཡོངས་ཀྱི་དམ་ཚིག་གོ། དམ་ཚིག་སྦྱིན་པ་ཆེན་པོ་འདི། ། སྦྱིན་ནོ་བསྟབ་བོ་གསོལ་ལོ་བསྐུལ།། གདུང་བའི་ལྷ་མོ་མཐུ་མོ་ཆེ།། དུས་ལ་རུབ་ཅིང་དམ་ལ་འཕྲེང།། དབང་ཕྱུག་ཆེན་མོ་ཀུན་གྱི་སྲིད།། རྣལ་འབྱོར་ཡོངས་ཀྱི་མ་གཅིག་མ།། མཚན་བཟང་ནག་མོ་རེ་མ་ཏི། ། རྣམ་དག་བདུད་རྩི་དམ་རྫས་མཆོད་པ་འབུལ།། ཐུགས་རྗེ་ཆེ་དགོངས་དབང་དང་དངོས་གྲུབ་སྩོལ།། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དམ་རྫས་བདུད་རྩི་འབར་བའི་མཆོད་པ་འདི།། མ་ཚོགས་ནག་མོ་སྟོང་གི་འཁོར་བཅས་ལ། ། རྣམ་དག་བདུད་རྩི་དམ་རྫས་མཉེས་མཆོད་འབུལ།། ཐུགས་རྗེ་ཆེ་དགོངས་དབང་དང་དངོས་གྲུབ་སྩོལ།། རྡོ་རྗེ་དྲི་ཆུ་བདུད་རྩི་མཆོག། པཉྩ་ཤ་མྲྀ་ཏ་དང་སྦྱར།། དམ་ཚིག་སྙིང་གི་ཁྲག་ཆེན་པོ། ། བསྲེ་བའི་མཆོག་སྟེ་སྲོག་གི་སྙིང།། སྙིང་དང་སྙིང་གི་གྲོགས་མོར་བྱའོ།། མ་ཧཱ་ཀུ་རུ་ས་མ་ཡ། མ་ཧཱ་པཉྩ་ས་མ་ཡ། མ་ཧཱ་ཨ་མྲྀ་ཏ་ས་མ་ཡ། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས། གར་དང་ཐུགས་དམ་བསྐང་བའི་ལེའུ་སྟེ་བཅུ་གསུམ་པའོ། །།། དེ་ནས་ཡང་བཅོམ་ལྡན་འདས་ཀྱིས་དཔལ་ལྷ་མོ་ལ་དུག་གསུམ་ཤ་ཁྲག་གི་མཆོད་པ་འདི་གསུངས་སོ།། མཐིང་ནག་འཇིགས་པའི་རྒྱལ་མོ་གཤེགས་སུ་གསོལ། ། ནག་མོ་མི་བཟད་རྒྱལ་མོ་གཤེགས་སུ་གསོལ།། ཕྱག་བརྙན་གྲུབ་འཛིན་རྒྱལ་མོ་གཤེགས་སུ་གསོལ།། མདོག་བཟང་ནག་མོ་མཐུ་ཆེན་རྒྱལ་མོ་གཤེགས་སུ་གསོལ།། ཨེ་ཧྱེ་ཧི་ཚུར་གཤེགས་འཁོར་དང་བཅས། ། ཛཿཧཱུཾ་བཾ་ཧོཿསྤྱན་འདྲེན་གཤེགས་སུ་གསོལ།། མ་གཅིག་ཆེན་མོ་འདིར་སྤྱོན་ཤ་ལ་སྤྱོན།། དགྲ་བགེགས་འབྱུང་པོའི་ཤ་འདི་ཟན་པས་ཞིམ།། མ་གཅིག་ཆེན་མོ་འདིར་སྤྱོན་ཁྲག་ལ་སྤྱོན།། དགྲ་བགེགས་འབྱུང་པོའི་ཁྲག་འདི་ཆང་བས་ཞིམ། ། མ་གཅིག་ཆེན་མོ་འདིར་སྤྱོན་རུས་ལ་སྤྱོན།། དགྲ་བགེགས་འབྱུང་པོའི་རུས་པ་མར་བས་ཞིམ།། འབྱུང་པོའི་ཤ་ཁྲག་རུས་པ་འདི་གསོལ་ལ།། བདག་གིས་མངགས་པའི་ལས་འདི་མཐར་ཕྱུང་ཞིག། གསུར་ཆེན་ཤ་ལ་རོལ་ཏེ་གཤེགས་སུ་གསོལ།། དམར་ཆེན་ཁྲག་ལ་རོལ་ཏེ་མཆོད་པར་བཞེས།། རུས་ཆེན་རྐང་ལ་རོལ་ཏེ་མཆོད་པར་བཞེས།། ཤ་རུས་དམ་རྫས་བདུད་རྩི་འདི་གསོལ་ལ། ། བདག་གིས་མངགས་པའི་ལས་འདི་གྲུབ་པར་མཛོད།། ད་ནི་བུ་གཅིག་སྤུ་གུ་མ་ཉམས་སེམས།། འབྲས་བུ་མི་དབང་སྨིན་པའི་མཚལ་ཐིག་འདི།། མ་ལ་འབུལ་ལོ་ཟོ་འོ་མ་གཅིག་མ།། མ་དག་བསྟན་པའི་དམ་རྫས་འདི་གསོལ་ལ། ། ད་ལྟ་ཉིད་དུ་དགྲ་ལ་རྟགས་ཕྱུང་ཞིག། མ་མ་ནག་མོ་པེ་ཏ་ལི། ཀུ་ལུ་ཀུ་ལུ་ཧ་ཏ། ས་མ་ཡ་ཁཱ་ཧི་རཀྟ་ཁཱ་ཧི། པཉྩ་ཨ་མྲྀ་ཏ་ཁཱ་ཧི། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས། ཤ་ཁྲག་གི་མཆོད་པའི་ལེའུ་སྟེ་བཅུ་བཞི་པའོ། །།། དེ་ནས་ཡང་བཅོམ་ལྡན་འདས་ཀྱིས་དཔལ་ལྷ་མོ་ལ་ཕྲིན་ལས་བཅོལ་བའི་ལས་འདི་གསུངས་སོ།། ཧཱུཾ་ཧོ་སྔོན་ཡུང་པོ་མ་ལོན་པའི་དུས་ལ། དུར་ཁྲོད་རོ་ཐང་ནག་པོའི་གྲོང་ཁྱེར་མ་རུ་ཙེ་ཡི་སྒོ་འགྲམ་དུ། ། གཤིན་རྗེའི་ཡུམ་གཅིག་བདུད་ཀྱི་ལྕམ་མོ་རེ་མ་ཏི་ཡུམ་ཆེན་ཨེ་ཀ་ཛ་ཊིའི་དངོས་གྲུབ་བསྒྲུབས་ནས་ཞབས་ལ་སྤྱི་བོས་ཕྱག་འཚལ་ཏེ། ལྷའི་ངག་སྙན་པ་དང་ཚིག་བདེན་པ་དང། ཉིད་ཀྱི་སྲོག་གི་སྙིང་པོ་མདོངས་གསོལ་དུ་ཕུལ་ནས་ཕྱི་རབས་སྔགས་འཆང་གི་སྲུང་མར་ཞལ་གྱིས་བཞེས་ཏེ།། བདག་ལ་བསྟོད་པ་དང། མཆོད་པ་དང། ཡི་དམ་དུ་བྱེད་པ་རྣམས་ཀྱི་རྐྱེན་བཟློག་པ་དང། སྐུ་དགྲ་གདུལ་བ་དང། དེ་ཡིས་བཀའ་ཅི་སྩོལ་བའི་དངོས་གྲུབ་སྦྱིན་ནོ་ཞེས། ཁས་བླངས་དམ་བཅས་པའི་དམ་ཚིག་ལས་མི་འདའ་བར་བྱ་བ་དང། ཁྱོད་ཀྱི་སྐུ་ཡི་ཁྱད་པར་བསྟན་པ་དང། ཁྱོད་ཀྱི་སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། ཁྱད་པར་དུ་ཡང་བདག་གི་དགྲ་བོ་ཆེ་གེ་མོ་འདི། སྔོན་ལས་ཀྱི་རྣམ་པར་སྨིན་པ་ལ་མ་གཞག་གཞན་གྱིས་གནོད་པའི་སྦྱོར་བ་ལ་མ་ལྟོས། དུས་ད་ལྟ་ཉིད་དུ་རྟགས་རྣམ་པ་སྣ་ཚོགས་བསྟན་དུ་གསོལ། ། ཧཱུཾ་ཧོ། དཔལ་ལྷ་མོ་ཁྱེད་ལ་བརྣག་པའི་ལས་བཅོལ་བ་ནི། དཀོན་མཆོག་གསུམ་གྱི་སྤྱི་དགྲ་རྣལ་འབྱོར་གྱི་སྒོས་དགྲ། སངས་རྒྱས་ཀྱི་བསྟན་པ་བཤིག་པ། དཀོན་མཆོག་གི་དབུ་འཕང་སྨོད་པ། ཆོས་འཁོར་རྩེ་ནས་འཇོམས་པ་མི་ཐུབ་ཐུབ་ཟེར་བ། མི་ཆོད་ཆོད་ཟེར་བ། ཁ་དྲག་སྨྲ་བ། བསྟན་པ་གཤིག་པ། ཡ་ག་ཟེར་བ། དཀོར་ལ་རློམ་པ་བྱང་དམར་ལ་བཏབ་པའི་དགྲ་བོ་ཆེ་གེ་མོ་འདི་ལས་ཀྱི་རླུང་དམར་གྱིས་རྒྱབ་ནས་ཕུལ་ཅིག་འཇིགས་པའི་མུན་པས་མདུན་ནས་སུས་ཤིག་མི་བཟོད་པའི་འོ་དོད་འབོད་དུ་ཆུག་ཅིག་རྟགས་དང་མཚན་མ་མྱུར་དུ་སྟོན་ཅིག་ཁ་ནས་ཁྲག་སྐྱུག་ཏུ་ཆུག་ཅིག། སྣ་ནས་ཆུ་སེར་འཛག་ཏུ་ཆུག་ཅིག་ལུས་ལ་ཚ་བའི་མེ་འབར་ཏུ་ཆུག་ཅིག་ལུས་ངག་ཐལ་བའི་རྡུལ་དུ་རློག་པར་མཛད་དུ་གསོལ། ། ཧཱུཾ་ཧོ།། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་ཕྲིན་ལས་བཅོལ་བའི་ལེའུ་སྟེ་བཅོ་ལྔ་པའོ།།།། དེ་ནས་ཡང་བཅོམ་ལྡན་འདས་ཀྱི་བསྒྲུབ་པའི་བྱིན་རླབས་བསྐྱེད་པའི་ཕྱིར། དབང་གི་རིམ་པ་འདི་གསུངས་སོ།། ཧཱུཾ་ཞེས་ཡི་དམ་ལྷ་རུ་སྒྲུབ་པ་པོ་བསྐྱེད་ལ། སློབ་དཔོན་གྱིས་ལྷ་མོའི་སྐུ་ལག་ཏུ་བླངས་ལ། སྐད་ཅིག་མས་ལྷ་མོར་བསྐྱེད་ལ། ཧཱུཾ་གྲུ་གསུམ་འདེགས་པའི་དཀྱིལ་འཁོར་དུ།། འཛབ་སྤོགས་བསྙེན་ཚད་དུས་ཉིད་དུ།། ལྷ་མོའི་སྐུ་ཡི་དབང་བསྐུར་བས།། མི་ཉམས་པ་ཡིས་ལས་འདི་ལ།། བརྩམས་ནས་ཐམས་ཅད་མཐར་ཕྱིར་ཤོག། བྱིན་རླབས་དབང་མཆོག་ཐོབ་པར་ཤོག། མ་མ་རག་མོ་ཨ་བྷི་ཥིཉྩ་ཧཱུཾ་ཨ། རིགས་ཀྱི་བུ་ཁྱོད་ལ་བསྙེན་བསྒྲུབ་ཀྱི་དབང་བསྐུར་བས། སངས་རྒྱས་ཀྱི་བསྟན་པ་བསྲུང་ཞིང་མཐུ་རྩལ་མཆོག་དང་ལྡན་ཞིང། དགྲ་འདུལ་ཞིང་བགེགས་འཇོམས་པའི་དབང་ཐོབ་པར་ཤོག་ཅིག་ཡང་གུ་རུས་ཐོད་རྔ་ཐོགས་ལ།། སྲིད་པ་གསུམ་དུ་སྒྲོགས་པ་ཡི།། མཛུབ་ངོ་གཉིས་པའི་ཐོད་རྔ་འདིས།། རིགས་ལྡན་ཁྱོད་ལ་དབང་བསྐུར་བས། ། གསུང་དབྱངས་ཡན་ལག་དྲུག་ཅུ་ཡི།། ལྷ་མོའི་གསུང་དབྱངས་ཐོབ་པར་ཤོག། གི་རྟི་ཨ་བྷི་ཥིཉྩ་ཧཱུཾ་ཨ། རིགས་ཀྱི་བུ་ཁྱོད་ལ་རྔ་ཆུང་གི་དབང་ཐོབ་པར་གྱུར་ཅིག། གུ་རུས་ལྕགས་ཕུར་ཐོགས་ལ། ཏིང་འཛིན་ཧཱུཾ་དུ་བྱིན་གྱིས་རླབས་པ་ཡིས། ། གྲོལ་བྱེད་ལྕགས་ཕུར་དཔལ་ལྡན་འདི།། སྐུ་གསུང་ཐུགས་ལས་རབ་སྤྲུལ་པའི།། རིགས་ལྡན་ཁྱོད་ལ་དབང་བསྐུར་བས།། དམ་ཉམས་སྒྲོལ་གིང་བྱེད་པར་ཤོག། བཛྲ་ཀཱི་ལི་ཀཱི་ལ་ཡ་ཨ་བྷི་ཥིཉྩ་ཧཱུཾ་ཨ། རིགས་ལྡན་ཁྱོད་ལ་ལྕགས་ཕུར་གྱི་དབང་བསྐུར་བས།། དམ་ཉམས་མྱུར་དུ་བསྒྲལ་བའི་དབང་ཐོབ་པར་གྱུར་ཅིག་གུ་རུས་ཐོད་ཕྲེང་ཐོགས་ལ། ཟུར་གསུམ་འདེབས་པའི་དཀྱིལ་འཁོར་དུ། ། སྐུ་གསུམ་རྒྱན་ནི་མ་ཉམས་པའི།། ཐོད་པའི་ཕྲེང་བས་དབང་བསྐུར་བས།། མི་བརྗེད་གཟུངས་ནི་ཐོབ་པར་ཤོག། བཛྲ་མཱ་ལེ་ཨ་བྷི་ཥིཉྩ་ཨ། རིགས་ཀྱི་བུ་ཁྱོད་ལ་ཐོད་ཕྲེང་གི་དབང་བསྐུར་བས།། ནུས་པའི་དབང་ཐོབ་པར་གྱུར་ཅིག་གུ་རུས་ཡུངས་ཀར་ཐོགས་ལ། ། སྒྲུབ་པའི་རྫས་སུ་བྱིན་བརླབས་པའི།། སྒྲོལ་བ་ཁྲོ་བོའི་བསྒྲུབ་པ་སྟེ།། ཡུངས་ཀར་རྒྱལ་པོས་དབང་བསྐུར་བས།། དགྲ་བགེགས་སྒྲོལ་བའི་དབང་ཐོབ་ཤོག། བཛྲ་ཀྲོ་དྷ་ཨ་བྷི་ཥིཉྩ་ཧཱུཾ། རིགས་ཀྱི་བུ་ཁྱོད་ལ་ཡུངས་དཀར་རྒྱལ་པོའི་དབང་བསྐུར་བས། དགྲ་བགེགས་སྒྲོལ་བར་བྱེད་པའི་དབང་ཐོབ་པར་གྱུར་ཅིག་འདོད་ཡོན་ལྔ་ལྡན་ཁྱད་པར་གཏོར་མ་འདི།། རིགས་ལྡན་ཁྱོད་ལ་དབང་བསྐུར་བས། ། རང་བྱུང་དཔལ་གྱི་ལྷ་མོ་ཡིས།། ནུས་པ་རྫོགས་པའི་དབང་ཐོབ་ཤོག། བ་ལིཾ་ཏ་ཨ་བྷི་ཥིཉྩ་ཧཱུཾ་ཨ། དཔལ་ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་ནུས་པ་དབང་གི་ལེའུ་སྟེ་བཅུ་དྲུག་པའོ། །།། དེས་ནས་ཡང་བཅོམ་ལྡན་འདས་ཀྱིས། ཟོར་དྲུག་ཐུན་དང་བདུན་པོ་འདི་གསུངས་སོ།། སྙིང་ཟོར་ལུག་ནག་སྙིང་ལ་ནི།། ཡུངས་དཀར་བྲབ་ཅིང་དེ་ཕྱོགས་འཕང།། ཐོད་ཟོར་རབས་ཆད་ཐོད་པ་རུ། ཁྲག་སྣ་བླུགས་ལ་དེ་ཕྱོགས་འཕང།། བྱ་ཟོར་བྱ་ནག་ལུག་ལ་མངགས།། བྲབ་ཅིང་དེ་ཕྱོགས་ཕུར་བར་བྱ།། མདའ་ཟོར་འུག་པ་ཕོ་རོག་སྒྲོས་བསྒྲོན་ལ།། དུག་ཤིང་མདེའུ་བཅུག་ལ་འཕང། ། སྒོང་ཟོར་བྱ་ནག་སྒོ་ང་བུ།། ཐུན་བྲབ་དེ་ཕྱོགས་འཕང་བར་བྱ།། ཐུན་ནི་ཡུངས་ཀར་སྣ་ཚོགས་ཐུན་སྣས་བྲབ་པར་བྱའོ།། ལྷ་མོ་ཙིཏྟ་གསང་བའི་སྲོག་རྐྱལ་བུའི་རྒྱུད་ལས་ཐུན་ཟོར་གྱི་ལེའུ་སྟེ་བཅུ་བདུན་པའོ། །།། དེ་ནས་འཁོར་ན་གནས་པའི་ལྷ་མོ་དང།། ཀླུ་མོ་དང། བདུད་མོ་དང། སྲིན་མོ་དང། བདུད་དང། མགོན་པོ་དང། གནོད་སྦྱིན་དང། གཟའ་དང། སྒྲོལ་གིང་རྣམས་ཀྱིས་བསྟན་པ་བསྲུང་བར་དམ་བཅས་ནས། བཅོམ་ལྡན་འདས་ཀྱིས་གཞག་པའི་གནས་སུ་འདུག་ནས་སྒྲོལ་བའི་གིང་དུ་ཁས་བླངས་སོ།། ཙིཏྟ་གསང་བའི་སྲོག་རྐྱལ་བུའི་རྒྱུད་ལས་དམ་བཅས་པའི་ལེའུ་སྟེ་བཅོ་བརྒྱད་པའོ།།།། ཙིཏྟ་གསང་བའི་རྒྱུད་རྫོགས་སོ། །།། རྒྱ་གར་སྐད་དུ། ཙིཏྟ་སྙིང་ཁོལ། བོད་སྐད་དུ། སྙིང་ཐིག་བཀོལ་བའི་རྒྱུད། དེ་ནས་འཇིག་བྱེད་ཧེ་རུ་ཀས།། སྙིང་ཐིག་རྒྱུད་འདི་བཞག་པ་སྟེ།། འུག་པའི་གདོང་ཅན་ཞེས་སུ་གྲགས།
CLOSE WINDOW