| Wylie |
། རྒྱ་གར་གྱི་མཁན་པོ་ཛྙཱ་ན་གརྦྷ་དང། བོད་ཀྱི་དགེ་སློང་བཻ་རོ་ཙ་ནས་བསྒྱུར་ཅིང་གཏན་ལ་ཕབ་པའོ།།།།@#། ། རྒྱ་གར་སྐད་དུ། ཀྲོ་དྷ་ཧཱུཾ་ཀཱ་ར་ཏན་ཏྲ་རཱ་ཛ་ཏནྟྲ། བོད་སྐད་དུ། རྒྱུད་ཀྱི་རྒྱལ་པོ་ཁྲོ་བོ་ཧཱུཾ་ཀཱ་རའི་རྒྱུད། བཅོམ་ལྡན་འདས་དཔལ་ཁྲག་འཐུང་གི་རྒྱལ་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དཔལ་ཁྲག་འཐུང་གི་ཚོགས། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། མཐའ་དང་དབུས་མེད་པའི་དྷརྨ་དྷཱ་ཏུ། ཆོས་ཀྱི་འབྱུང་གནས་གྲུ་གསུམ་ཨེའི་དཀྱིལ་འཁོར་འབྱམས་པའི་གཞལ་ཡས་ཁང་ན། ཡབ་ཡུམ་གཉིས་སུ་མེད་པར་ལྷུན་གྱིས་སྦྱོར་བ་ལ་བཞུགས་ཏེ། འཁོར་མཆེ་བ་ཅན་གྱི་ཚོགས་དང། གཤོག་པ་ཅན་གྱི་ཚོགས་དང། མགོ་བརྙན་གྱི་ཚོགས་མཐའ་དག་གིས་བསྐོར་ཏེ། རང་བཞིན་གྱི་ལྷུན་གྱིས་གྲུབ་པར་བཞུགས་སོ།། དེ་ནས་མགོ་བརྙན་གྱི་ཚོགས་ཀྱིས། བཅོམ་ལྡན་འདས་ཁྲག་འཐུང་གི་རྒྱལ་པོ་ལ། ཕྱི་ནང་གི་མཆོད་པས་མཉེས་པར་བྱས་ནས། འདི་སྐད་ཅེས་གསོལ་ཏོ།། ཨེ་མ་གསང་བའི་དཀྱིལ་འཁོར་ན།། དུས་གསུམ་འདུ་འབྲལ་མེད་པར་བཞུགས། ། གཉིས་མེད་ཡེ་ཤེས་རབ་མཆོག་བསྒྲལ།། དེ་ཡི་སྔགས་རྣམས་གསུངས་ལགས་ན། ཁྲོ་བོ་སོ་སོའི་དཀྱིལ་འཁོར་རྣམས།། བཅོམ་ལྡན་མགོན་པོས་བཤད་དུ་གསོལ།། བཅོམ་ལྡན་བཛྲ་ཀཱི་ལ་ཡས།། ཀརྨ་ཧེ་རུ་ཀ་ཡི་ཚིག་གསན་ནས། ། ཕག་མགོ་སྨིག་བུའི་མགོ་རྣམས་ལ།། གསུང་གིས་འདི་སྐད་བཀའ་སྩལ་ཏོ།། སོ་སོའི་དཀྱིལ་འཁོར་དམ་པ་རྣམས།། ང་ཡིས་བཤད་ཀྱིས་མཉན་པར་གྱིས།། བཅོམ་ལྡན་གཉིས་མེད་གཙོ་ཆེན་གྱི། ། དཀྱིལ་འཁོར་དམ་པ་བསྟན་པ་ནི།། དང་པོ་གཞུང་དང་མཐུན་པ་ཡི།། ས་ཕྱོགས་དེ་དང་དེ་ཉིད་དུ།། རྣལ་འབྱོར་དམ་པ་དེ་གནས་པས།། རང་གི་སྙིང་གར་ཧཱུཾ་བསམས་ལ།། དེ་ལས་འོད་འཕྲོས་སངས་རྒྱས་མཐོང། ། མཆོད་འབུལ་ལ་སོགས་གཞུང་བཞིན་དུ།། དེ་ལ་ཤཱུའུ་ནྱ་ཏཱ་ཡིས་སྦྱངས།། དེ་རྗེས་གཞལ་ཡས་ལ་སོགས་པའི།། རྒྱན་དང་ལྡན་པ་དེ་མཐོང་ནས།། འཁོར་ལོ་རྩིབས་བཞི་མུ་ཁྱུད་བཅས།། གྲུ་ཆད་བཞི་ཡིས་རྣམ་པར་མཛེས། ། ཉི་མ་ཟླ་བའི་གདན་སྟེངས་སུ།། ཧཱུཾ་ཆེན་ཡབ་ཡུམ་འཁོར་ཚོགས་དབབ།། ས་བོན་བཀོད་ལ་གསལ་བར་བརྟག། དྲོད་གཤེར་ལས་སྐྱེས་ཡིན་པར་ནི།། མཁས་པས་བརྟགས་ཏེ་ཤེས་པར་གྱིས།། དེ་ནས་གཙོ་བོའི་སེམས་དེ་ཡིས། ། ཕྱོགས་བཅུའི་སངས་རྒྱས་རྣམས་བཀུག་སྟེ།། བསྟིམ་པས་དབང་ཡང་རྫོགས་པར་ལྡན།། དེ་ལ་ཕྱི་ནང་མཆོད་པས་མཆོད།། གསང་བའི་དོན་དམ་ཡང་དག་སྟེ།། དེ་ཡིས་ལས་རྣམས་བརྩམ་པར་བྱ། ། རྒྱུད་ཀྱི་རྒྱལ་པོ་ཧཱུཾ་ཀ་རའི་རྒྱུད་ལས།། གླེང་གཞིའི་ལེའུ་སྟེ་དང་པོའོ།།།། དེ་ནས་ཡང་འདི་སྐད་གསུངས་ཏེ།། ཧཱུཾ་ཀཱ་ར་ཡི་དཀྱིལ་འཁོར་ནི།། ཟླ་གམ་དམར་པོའི་དཀྱིལ་འཁོར་ལ།། མཛེས་པའི་སྐུ་མཆོག་གསལ་བ་ནི། ། སྔགས་བཟླས་པ་ཡིས་གསལ་བར་གྱུར།། སྐུ་གསུང་ཐུགས་ཀྱི་རྡོ་རྗེ་བསམ།། བཟླས་པའི་ཡིག་འབྲུ་ཡང་དག་དགོད།། ཤེས་རབ་གསལ་བའི་ཡི་གེ་ཡིས།། བུམ་པ་དམར་པོ་འོད་དང་བཅས། ། དེ་ཡི་ཁ་རྒྱན་ཨ་ཤྭ་ཀ། མགུལ་བ་དར་དམར་བཟང་པོས་དཀྲིས།། ཉི་ཁྲི་ཆིག་སྟོང་དྲུག་བརྒྱ་བཟླས།། མཚན་མ་བཟང་པོ་མཐོང་བ་དང།། ལས་ལ་སྦྱར་བར་བྱ་བ་ཡིན།། ཐབས་དང་བཅས་པའི་འོད་ཟེར་གྱིས། ། དང་པོ་གནས་ནས་བསྐུལ་བར་བྱ།། དེ་ཡི་ལས་སྦྱོར་གང་ལ་ཡང།། སེམས་པས་ཡང་ནས་ཡང་དུ་བྱ།། ལུས་ལ་ཙན་དན་དམར་པོ་བྱུག། དགོངས་དང་ཐོ་རངས་སྔགས་མང་བཟླས།། གཡོ་བའི་རྫས་ཀྱི་རྐྱེན་བྱས་ནས། ། ཕུར་གདབ་གསད་པའི་ལས་བྱ་ཞིང། དབང་སྡུད་འགུགས་པའི་ལས་དེ་བཞིན།། བསྒྲུབ་ན་འགྲུབ་པར་གདོན་མི་ཟ།། རྒྱུད་ཀྱི་རྒྱལ་པོ་ཧཱུཾ་ཀཱ་རའི་རྒྱུད་ལས། ལས་ཀྱི་དཀྱིལ་འཁོར་དབྱེ་བའི་ལེའུ་སྟེ་གཉིས་པའོ། །།། དེ་ནས་ཡང་འདི་སྐད་ཅེས་གསུངས་སོ།། སེར་བ་དབབ་པའི་ལས་རྣམས་ནི།། སྦྱོར་བ་སྤྱི་དང་མཐུན་པ་ཡིས།། དཀྱིལ་འཁོར་རྩིབས་བརྒྱད་འཁོར་ལོར་བྲི།། རྫས་ནི་ཡུངས་ཀར་ཁྲག་སྐམ་གུ་གུལ་གསུམ། ཐོད་པ་མཚན་ངན་དུམ་དྲུག་ཏུ།། རྩིབས་བརྒྱད་འཁོར་ལོ་བྲིས་ནས་ནི།། དབུས་སུ་ཨ་ཛི་ཏེ་ཛ་ཡེ་བི་ཛ་ཡེ་ཀ་ཏང་ཀ་དེ་གསུམ་བྲིའོ།། ཟླུམ་པོ་ལ་ནི་ཀཱི་ལ་ཡ་འབྲུ་དགུའོ།། རྩིབས་བརྒྱད་ཕྱོགས་ཀྱི་ཁྲོ་བོ་བརྒྱད། ། ཤར་ལྷོ་ནུབ་བྱང་རྩིབས་མཆན་ལ།། སྟེང་དུ་འོག་གི་སྙིང་པོ་བྲི།། རྩིབས་མཆན་དྲུག་ལ་དུ་ཡང་སྔགས་དྲུག་བྲི།། ཐ་མ་མུ་ཁྱུད་ཟླུམ་པོ་ལ།། ཐོད་པ་དབུས་སུ་བསྡུས་ཡིན་པས།། འབྲུ་དགུ་ཁྲོ་བོའི་ལས་སྔགས་བྲི། ། ཐོད་པ་ཤར་དུ་ཁ་བལྟས་ལ།། ཨོཾ་ལཾ་རྒྱས་པའི་སྔགས་དྲིའོ།། སེང་ལྡེང་ཕུར་བུའི་སྟེང་དུ་ཨོཾ།། རྒྱ་མདུད་ལོགས་ལ་འབྲུ་བརྒྱད་དགོད།། ལྕུམ་གཞོགས་དབལ་ལ་ཁྲོ་བཅུའི་སྔགས།། རྒྱ་མདུད་བར་ལ་ཆུ་སྲིན་ཁ་སྤྲད་བྲི། ། ལོགས་དྲུག་ཟུར་གསུམ་དམ་ཅན་གསུམ་གྱི་སྔགས།། དེ་རྗེས་པདྨའི་ཁྲག་དང་མི་དབང་འབྲས་བུའི་ཤ་ཁྲག་དང། ཁྲག་སྣ་སྙིང་སྣ་ཚོགས་ཚད་དང།། མཚམས་བཅད་བྱིན་དབབ་བཀའ་བཞིན་ནོ། ། ཐོད་པ་དབུས་སུ་ཁ་སྦུབ་ལ།། སེང་ལྡེང་ཕུར་པ་དབུས་སུ་བཀོད།། ཕྱི་མ་རྫས་རྣམས་ཀུན་ལ་དགོད།། ཕྲིན་ལས་གཞུང་བསྲང་འཛབ་ལ་འཇུག། ཐོད་པ་སྣར་མོར་བསམ་བྱས་ལ།། སྟེང་དུ་ཆུ་ཡི་དཀྱིལ་འཁོར་བསམ། ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ། ཧཱུ~ཾ་མ་མ་བ་ཤཾ་ཀུ་རུ་མ་ཏཾ་ཉ་ཀ་ར་ཨི་དཾ་དྷ་ཏི་མ་མ་ཀརྨ་ཤཱི་གྷྲཾ་ཀཱ་ར་ཡ། ཨཱ་བེ་ཤ་ཡ་ཨཱ་བེ་ཤ་ཡ་ཧཱུཾ་ཕཊ། མཱ་ར་སེ་ན་པྲ་མརྡ་ནི་ཧཱུཾ་ཕཊ། དཔྱིད་ཟླ་གསུམ་ལ་བསྙེན་སྔགས་བཟླས། ཁ་བ་ཁུ་འཕང་རླུང་དམར་གསུམ།། དེ་རྣམས་བྱུང་ན་འགྲུབ་པར་འགྱུར།། ཐོད་པ་སྣར་མོར་བསམ་སྟེང་ནས།། ལྷ་རྣམས་བསམས་པས་གཙོ་བོའི་ཐུགས་ལ་གནས།། སྤྲུལ་པ་བྱེ་བ་བསམ་བྱས་ལ། ། ཆུ་བཅོལ་སེར་བ་དཀར་པོ་འབྱུང་བར་བསམ།། ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོའི་ལོ་ཐོག་ལ། ཤི་ཏྲཾ་ཀ་ར་ཀ་ར་ཀ་ར་ཏེ་ཡི་ཨཱ་བེ་ཤ་ཡ་ཨཱ་བེ་ཤ་ཡ་ཧཱུཾ་ཕཊ། ཨོཾ་མཱ་མ་བ་ཤཾ་ཀུ་རུ་མ་ཏཾ་ཉ་ཀ་ར་ཨི་དཾ། དྷ་ཏི་མ་མ་ཀརྨ་ཨ་ཛི་ཏེ། ཨ་པ་ར་ཛི་ཏེ་ཛ་ཡེ་བི་ཛ་ཡེ། ཀ་ཏང་ཀ་ཡེ་མཱ་ར་སེ་ནཱ་པྲ་མར་དྷ་ནི་ཡ་ཧཱུཾ་ཕཊ། ཐོད་པའི་ཁྲག་དང་སྙིང་སྣ་དང།། གུ་གུལ་གསུམ་པོ་ཐོད་པར་བླུག། སེང་ལྡེང་ཕུར་པ་ཡུངས་ཀར་ཕུར་ལ་གདགས། ། རྟགས་ནི་ཐོད་པར་མེ་འབར་རོ།། གོང་མའི་རྟགས་ནི་མ་བྱུང་ན།། སྔགས་དྲུག་དམ་ཅན་དཀྲུགས་ལ་ཡིན།། ཕོ་དང་མོ་ཡི་ལོག་མེན་བཟླས།། རྡོ་རྗེ་གསང་བས་གནད་ལ་དབབ།། དེ་ནས་དཔྱིད་ཟླ་ཐ་ཆུང་ལ། ཁྲག་སྐམ་འབྲས་བུ་གསུམ་པོ་དང།། གཏོར་མ་དུམ་གཅིག་མིང་ཀུན་བསྲེ།། ཐོད་པར་བླུགས་ལ་ཡུལ་དེར་ཕྱིན།། གུ་གུལ་དུད་བཏང་བདེན་པ་བདར།། ཐོད་པ་ཆུ་མིག་ནང་དུ་སྦའོ།། ཕུར་པ་དཀྱིལ་དུ་གདབ་པར་བྱའོ། ། རྫས་སྣ་གསུམ་ཡང་གཏོར་བྱས་ལ།། གར་འབེབས་རི་རྩེ་དེ་ལ་ཕྱིན།། ཕྲག་ལ་ཐབ་བྱ་དཔང་ཡང་གཟུག། སྟོན་ཟླ་གསུམ་ལ་རི་རྩེར་བྱ།། རི་རྩེ་མཐོང་ནས་བསྐུལ་བར་བྱ།། མ་གྲུབ་སྟོན་ཟླ་ར་བ་དགུ། ། འབྲིང་པོ་ཀུན་ལ་རབ་ཏུ་ཤིས།། མ་ཕེབས་ཐ་མ་གཞི་ནས་སྤོགས།། རྒྱུད་ཀྱི་རྒྱལ་པོ་ཧཱུཾ་ཀཱ་རའི་རྒྱུད་ལས། མཁའ་འགྲོ་མས་སེར་བ་དབབ་པའི་ལེའུ་སྟེ་གསུམ་པའོ།།།། དེ་ནས་ཡང་འདི་སྐད་ཅེས་གསུངས་སོ། ། ཕུར་ནི་བྱང་ཆུབ་སེམས་སུ་གཅིག་གྱུར་པ།། པ་ནི་སེམས་ཀྱིས་མ་ཁྱབ་མེད་པ་སྟེ། ཕུར་ནི་རྡོ་རྗེ་གཞོན་ནུ་ཉིད་ལ་བྱ།། པ་ནི་ཁྲོ་བོ་རྣམས་ལ་བྱ་བའོ།། ཕུར་ནི་སྐྱེ་བ་མེད་ལ་བྱ།། པ་ནི་ཐམས་ཅད་འགག་པ་མེད། ། ཕུར་ནི་རིག་པ་བྱང་ཆུབ་སེམས།། པ་ནི་ཐམས་ཅད་དེར་གྲུབ་པས།། ཕུར་ནི་ཐམས་ཅད་བྱང་ཆུབ་སེམས།། པ་ནི་ཐམས་ཅད་ཀུན་ཏུ་ཁྱབ།། ཕུར་ནི་ཐམས་ཅད་གཙོ་བོའི་མཆོག། པ་ནི་ཐམས་ཅད་འཁོར་གྱི་ཚུལ། ། ཕུར་ནི་ཐམས་ཅད་སྐྱེ་བ་མེད།། པ་ནི་རོལ་པ་འགག་པ་མེད།། ཕུར་ནི་བྱང་ཆུབ་སེམས་སུ་གཅིག། པ་ནི་ཐམས་ཅད་དེ་རུ་འགྲུབ།། ཆོས་ཉིད་ཕུར་པ་ཐམས་ཅད་རྒྱུད།། བསྐུལ་བ་ཆོས་ཀྱི་དབྱིངས་ལ་གདབ། ། ཐུགས་རྗེའི་ཕུར་པ་ཉོན་མོངས་ལོག་པར་འཁྱམས་པ་རྣམས་ལ་གདབ།། གསང་བ་བྱང་ཆུབ་སེམས་ཀྱི་ཕུར་པ་ནི།། རྟོག་ཚོག་རྡུང་ཕྱིར་ཡུམ་གྱི་མཁའ་ལ་གདབ།། མཚན་མ་རྫས་ཀྱི་ཕུར་པ་ནི།། བསྒྲལ་ཕྱིར་དགྲ་བགེགས་གཉིས་ལ་གདབ། ། རྒྱུད་ཀྱི་རྒྱལ་པོ་ཁྲོ་བོ་ཧཱུཾ་ཀཱ་རའི་རྒྱུད་ལས། ཕུར་པའི་དོན་བསྟན་པའི་ལེའུ་སྟེ་བཞི་པའོ།།།། དེ་ནས་བཅོམ་ལྡན་ཁྲག་འཐུང་གི་རྒྱལ་པོ་དེས། འཁོར་རྣམས་ལ་འདི་སྐད་ཅེས་གསུངས་སོ། ། དེ་ནས་ཕག་གི་མགོ་ཅན་དང།། སྨིག་བུའི་མགོ་ཅན་ལ་སོགས་པས།། གསོལ་བ་གདབ་པའི་ཕྱིར་འདི་སྐད་དོ།། ཀྱེ་མ་གསང་བ་བདག་ཉིད་གཙོ།། སྐུ་གསུང་ཐུགས་ནི་རབ་ཟབ་པས།། རྒྱ་མཚོ་ལྟ་བུའི་ངང་ཚུལ་ཅན། ། སྐྱེ་མེད་དོན་ལྡན་ཁྱོད་ལ་བསྟོད།། གསང་སྔགས་བདག་པོ་ཁྱོད་ལ་བསྟོད།། ཐེག་པའི་རང་བཞིན་ཁྱོད་ལ་བསྟོད།། ཐམས་ཅད་མངའ་བདག་ཁྱོད་ལ་བསྟོད།། རོལ་པའི་བདག་ཉིད་ཁྱོད་ལ་བསྟོད། ། ཕྲིན་ལས་མངའ་བདག་ཁྱོད་ལ་བསྟོད།། བདུད་འདུལ་ཁྲོ་རྒྱལ་ཁྱོད་ལ་བསྟོད།། དབང་སྡུད་ཆེན་པོ་ཁྱོད་ལ་བསྟོད།། ཟིལ་གནོན་ཆེན་པོ་ཁྱོད་ལ་བསྟོད།། ཅེས་དེ་རྣམས་ཤིན་ཏུ་དགེས་ནས་དགེས་པའི་ང་རོ་བྱུང་སྟེ་དེ་སྐད་ཅེས་བསྟོད་དོ། ། རྒྱུད་ཀྱི་རྒྱལ་པོ་ཁྲོ་བོ་ཧཱུཾ་ཀཱ་རའི་རྒྱུད་ལས། རྒྱུད་གཏད་པའི་ལེའུ་སྟེ་ལྔ་པའོ།།།། རྒྱུད་ཀྱི་རྒྱལ་པོ་ཁྲོ་བོ་ཧཱུཾ་ཀཱ་རའི་རྒྱུད་རྫོགས་སོ།།།། རྒྱ་གར་སྐད་དུ།
CLOSE WINDOW