བོད་ཀྱི་ལོཙྪ་བ་གཉགས་ཛྙཱ་ན་ཀུ་མ་རས་བསྒྱུར་བའོ།།།། རྒྱ་གར་སྐད་དུ། ཨ་མྲྀ་ཏ་ཀུཎྜ་ལི་ཨ་མ་ར་ཨཱ་ཡུཿཏནྟྲ་ནཱ་མ། བོད་སྐད་དུ། བདུད་རྩི་འཁྱིལ་པ་འཆི་མེད་ཚེའི་རྒྱུད་ཅེས་བྱ་བ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཚེ་དཔག་ཏུ་མེད་པ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཚེ་དང་ཡེ་ཤེས་དཔག་ཏུ་མེད་པ་སྐུ་དང་བསོད་ནམས་ཀྱི་ཚོགས་ཐམས་ཅད་ལ་ལོངས་སྤྱོད་པའི་བདག་པོ་ཆེན་པོ་དེ་ནི་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང། གསུང་དང། ཐུགས་རྡོ་རྗེ་སྙིང་པོ་རྡོ་རྗེ་བཙུན་མོའི་པདྨ་ལ་བཞུགས་སོ། ། དེ་ཉིད་ལ་སོགས་པ་རིགས་ལྔའི་སངས་རྒྱས་རྣམས་དང་དུས་གསུམ་གྱི་དེ་བཞིན་གཤེགས་པ་རྣམས་དང། ས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་པ་རྣམས་དང། ཐབས་ཅིག་ཏུ་བཞུགས་སོ།། དེའི་ཚེ་དེའི་དུས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཆོས་རང་གི་སྟན་ལས་བཞེངས་ནས་ཁམས་གསུམ་གྱི་སེམས་ཅན་མ་ལུས་པ་རྣམས་ལ་ཐུགས་རྗེ་ཆེན་པོས་གཟིགས་ཏེ། འདི་སྐད་ཅེས་གསོལ་བ་འདེབས་སོ།། བཅོམ་ལྡན་མགོན་པོ་ཚེ་དཔག་མེད།། སྲིད་པ་གསུམ་གྱི་སེམས་ཅན་རྣམས།། ཚེ་ནི་ཉམས་བྱེད་རྒྱུ་དང་རྐྱེན།། ཚེ་ཉམས་གྱུར་པའི་རྟགས་དང་ནི། ། ཚེ་ཆོག་མཁན་པོའི་མཚན་ཉིད་དང།། ཚེ་ཡི་ཆོ་ག་བྱ་ཐབས་རྣམས།། བཅོམ་ལྡན་འདས་ཀྱིས་བཤད་དུ་གསོལ།། ཞེས་ཞུས་པ་དང། དེ་ནས་བཅོམ་ལྡན་འདས་ཀྱིས་བཀའ་སྩལ་པ། དམ་ཅན་ཡི་ཆད་སྔགས་པས་སེམས་དཀྲུགས་པ་དང། ། ཞེ་སྡང་དྲག་པོའི་རྦོད་སྟོང་བབས་པ་དང།། རྩ་བ་སྐུ་གསུང་ཐུགས་ཀྱི་དམ་ཉམས་དང།། གནས་མེད་གནས་བཅས་གྱུར་པ་འདི་རྣམས་ནི།། ཚེ་སྲོག་ཉམས་པར་བྱེད་པའི་རྒྱུ་ཡིན་ནོ། ། ཚེ་ཡར་དབུགས་སྔངས་བགེགས་ཀྱི་དབང་དུ་གྱུར།། ཚེ་སྲོག་ཉམས་པར་བྱེད་པའི་རྐྱེན་ཡིན་ནོ།། འཁར་ལ་ཁྲོ་ཞིང་ངུ་སྐད་འབྱིན་པ་དང།། བཞིན་འགྱུར་སྤྱོད་ལམ་འཆལ་བར་གྱུར་པར་སྤྱོད། ། སློབ་དཔོན་འཚོ་བྱེད་དུས་ལས་གཡེལ་བ་དང།། ཁ་ཟས་དག་ཀྱང་ཡི་གར་མི་འོང་རྣམས།། འགྲོ་བ་གང་ལ་འདི་དང་ལྡན་གྱུར་ན།། དེ་ནི་ཚེ་ཉམས་པ་ཡི་རྟགས་ཡིན་ནོ།། ཚེ་ཆོག་བྱེད་པའི་སློབ་དཔོན་མཚན་ཉིད་གསུམ། ། ཏིང་འཛིན་ཕྲ་མོ་ལས་སུ་རུང་བ་དང།། རྒྱུད་ཀྱི་དོན་ལ་མཁས་ཤིང་དབང་ཐོབ་པ།། མཐུ་བྱིན་ཆེ་ཞིང་དམ་ཅན་ཉེ་བ་གསུམ།། འདི་གསུམ་གང་གིས་བཀུག་ཀྱང་ཁུག་པར་འགྱུར།། མི་མཆོག་བླ་མ་དེ་ལ་ཚེ་བསྲུང་ཞུ། ། ཚེ་མཆོག་བྱ་བའི་ཐབས་ཀྱི་རིམ་པ་ནི།། བཅུད་ལེན་སྨན་གྱིས་ཚེ་རྣམས་བསྲིང་བ་དང།། ཡི་དམ་སྔགས་ཀྱིས་ཚེ་སོགས་འགུགས་པ་དང།། བཟའ་བཏུང་ལོངས་སྤྱོད་ཚེ་ཡི་ཆོ་ག་དང། ། ལོངས་སྤྱོད་ཚོགས་ཀྱི་ཚེ་བསྒྲུབ་ཆེན་པོ་དང།། གསང་བ་དག་པའི་རྫས་ལ་ཚེ་བསྒྲུབ་ཅིང།། མཁའ་དབྱིངས་དག་པའི་ཡུམ་ལ་ཚེ་བསྒྲུབ་བྱ།། འདི་རྣམས་གང་གིས་ཚེ་སྲོག་ཉམས་པ་འཚོ།། ཞེས་གསུངས་སོ། ། བདུད་རྩི་འཁྱིལ་བ་འཆི་མེད་ཚེའི་རྒྱུད་ལས། གླེང་གཞི་དང་གླེང་བསླང་བའི་ལེའུ་སྟེ་དང་པོའོ།།།། དེ་ནས་བཅོམ་ལྡན་འདས་ཀྱིས་ཚེ་ཉམས་པར་བྱེད་པའི་རྒྱུ་རྐྱེན་འདི་གསུངས་སོ།། ཕྱི་དང་ནང་དང་གསང་བའི་དམ་ཅན་རྣམས། ། ལོ་དང་ཟླ་བར་མཆོད་པའི་དམ་བཅའ་རྣམས།། པྲ་ཏི་ཧ་ན་དུས་ཀྱི་མཆོད་པ་ཆག། ཆོས་སྐྱོང་སྲུང་མ་མ་ལུས་ཡི་ཆད་ནས།། ཆོ་འཕྲུལ་མི་སྡུག་སྟོན་པས་ཡིད་ཀྱང་དངངས།། དཀོན་མཆོག་སྲི་ཞུ་འཁོར་དང་བཅས་པ་དང། ། ཡོན་ཏན་མགྲོན་གྱི་དཔལ་ལྡན་མགོན་པོ་དང།། ལན་ཆགས་སྙོགས་པའི་བགེགས་རིགས་སྡེ་བརྒྱད་དང།། སྙིང་རྗེའི་མགྲོན་གྱུར་རིགས་དྲུག་སེམས་ཅན་ལ།། མཆོད་སྦྱིན་མ་བཏང་བསྲུང་མ་མ་དགྱེས་པས། ། རང་སེམས་འཁྲུལ་པས་ལུས་ངག་སེམས་ནད་ལྡང།། དགེ་འདུན་རྣམ་གཉིས་ལོངས་སྤྱོད་སྲོག་ལ་རྒོལ།། དམ་ཅན་སྲུང་མ་ལྷ་སྲིན་མ་ལུས་རྣམས།། བསྒྲལ་བའི་ཞིང་མིན་དེ་ལ་རྦད་བྱས་པས། ། དུས་མིན་འཆི་བར་བྱེད་པའི་བར་ཆད་ཡིན།། ཡི་དམ་རང་གི་སྲོག་ལྟར་ཁུར་བ་དང།། ལུས་ངག་ཡིད་ཀྱིས་བླ་མ་མཆོད་ཞབས་འདེགས།། སྔགས་དང་ཕྱག་རྒྱ་བར་དུ་མི་གཅོད་ཅིང།། གསང་བའི་མན་ངག་སྣོད་ངན་མི་སྤེལ་ལ། ། སྦྱོར་སྒྲོལ་ལ་སོགས་སྤྱད་པར་བྱ་བ་དང།། བདུད་རྩི་རྣམ་ལྔ་དང་དུ་ལེན་བྱེད་ཅིང།། ཉོན་མོངས་ཡེ་ཤེས་ཡེ་ནས་མི་སྤངས་ཏེ།། རིགས་ལྔ་བསྒྲུབ་པར་དམ་བཅས་དེ་རྣམས་དོར། ། དེ་དག་ཚེ་སྲོག་ཉམས་པར་བྱེད་པས་ན།། འདི་བཞིན་སྐྱེས་བུས་མ་བྱེད་རྣལ་འབྱོར་ཚོགས།། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེ་ཉམས་པར་བྱེད་པའི་རྒྱུ་བསྟན་པའི་ལེའུ་སྟེ་གཉིས་པའོ། །།། དེ་ནས་བཅོམ་ལྡན་འདས་ཀྱིས་ཚེ་ཉམས་པའི་རྟགས་འདི་གསུངས་སོ།། གང་ཞིག་བགེགས་ཀྱི་དབང་དུ་གྱུར་པས་ནི།། ཕ་མས་བསྡུས་པའི་སྤུན་ཟླ་སྲིང་མོ་དང།། ལུས་ལས་ཆད་པའི་བུ་དང་བུ་མོ་དང། ། སྲིད་པས་འབྲེལ་བའི་བུད་མེད་གཟུངས་མ་དང།། དུས་ཀྱིས་བསྡུས་པའི་ཕ་ཚན་མེས་པོ་སོགས།། ལུས་ངག་ཡིད་ཀྱི་ཁྲོ་བར་བྱེད་པ་དང།། སྔོན་ལས་མི་ཤེས་སྔོན་ལས་རྗོད་བྱེད་ཅིང།། དེ་ལྟའི་སྤྱོད་པ་ཅུང་ཟད་དཀའ་བར་བལྟ། ། ཕྱི་མ་གར་སྐྱེ་འབྲས་བུ་མི་ཤེས་པར།། ད་ལྟའི་ལུས་འདི་འདོར་བར་སྡུག་སྐད་འབྱིན།། ལུས་ཀྱི་མདོག་ཉམས་དངས་མ་བྲོས་པ་དང།། བྱད་ཀྱི་བཞིན་འགྱུར་བཀྲག་མདངས་ཤོར་ནས་ནི། ། ངག་གིས་ཚིག་ངན་སྨྲ་ལ་དགའ་བར་བྱེད།། ལུས་ཀྱི་སྤྱོད་ལམ་དྲན་པ་མི་གསལ་ཏེ།། འདུ་བའི་ནད་ཀྱིས་ལུས་ལ་ཟིན་པ་ན།། འཚོ་བྱེད་སྨན་པ་དུས་སུ་མི་ཁུགས་ཤིང།། བླ་མ་བསོད་ནམས་ཆེ་བ་གཞན་དུ་ཤོར། ། ལུས་ཀྱི་སྟོབས་མེད་ཁ་ཟས་ཡིད་མི་འོང།། ཕོ་བའི་མེ་དྲོད་ཉམས་པས་འཇུ་སྟོབས་ཞན།། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེ་ཉམས་པའི་རྟགས་བསྟན་པའིལེའུ་སྟེ་གསུམ་པའོ། །།། དེ་ནས་བཅོམ་ལྡན་འདས་ཀྱིས་ཚེ་མཆོག་བྱེད་པའི་སློབ་དཔོན་གྱི་མཚན་ཉིད་བསྟན་པ་འདི་གསུངས་སོ།། ཡི་དམ་གསལ་ཞིང་བསྙེན་པ་ཐེངས་པ་ཡིས།། དྲོད་རྟགས་ཕྲ་མོའི་ནུས་པ་སྟོན་པ་དང། ། དམིགས་མེད་དེ་བཞིན་ཉིད་ལ་བློ་གཏད་པས།། སྟོང་ཉིད་ཕྲ་མོ་རྒྱུད་ལ་ཤར་བ་དང།། རྒྱུད་དོན་ཐུགས་ལ་གསལ་བར་མཁྱེན་པ་ཡིས།། ཆོ་གའི་ཡན་ལག་ཀུན་ལ་མཁས་པ་དང།། བུམ་དབང་ལུས་ལ་ཐོབ་པས་བྱིན་དང་ལྡན། ། ལུས་ཀྱི་རྩ་རྣམས་བསྐྱེད་རིམ་ལྷ་སྐུར་ཤེས།། གསང་དབང་ངག་ལ་བསྐུར་བས་སྔགས་དང་ལྡན།། བཟླས་པའི་ཐབས་ལ་ཤིན་ཏུ་གུས་པ་དང།། ཤེས་རབ་ཡོ་བྱད་ཡིད་ལ་གནས་པ་ཡིས། ། ཁམས་ཀྱི་བདུད་རྩི་ལྷན་སྐྱེས་ཡེ་ཤེས་མྱོང།། བདེ་ཆེན་དབང་གི་སྙིང་པོ་རླུང་ལ་གོམས།། གཟུངས་མའི་མཁའ་ནས་བྱང་སེམས་རང་ལ་སྡུད།། ལུས་ངག་ཡིད་རྣམས་དག་ཕྱིར་དབང་རྣམས་ཐོབ།། དབང་རྫོགས་རྒྱུད་མཁྱེན་ཡན་ལག་ལྡན་པ་ཡིས། ། མཐུ་དང་བྱིན་བརླབས་ངང་གིས་ཆེ་བ་ཡིན།། ཉི་མ་གང་དུ་ཤར་བར་མུན་པ་སེལ།། ཡོན་ཏན་དེ་ལྡན་དམ་ཅན་སྲུང་མ་ཉེ།། འདི་ལྡན་བླ་མའི་མཚན་ཉིད་ཡོད་པ་དེ།། ཕྱི་ཡི་བླ་མས་སྒྲོ་འདོགས་ཡོངས་སུ་གཅོད། ། ནང་གི་བླ་མས་རང་བྱུང་ཡེ་ཤེས་ཤར།། གསང་བའི་བླ་མས་ལྷན་ཅིག་སྐྱེས་པ་སྟོན།། དེ་ཉིད་བླ་མའི་ཆོས་རྣམས་ཤིན་ཏུ་དག། འདི་ཡིས་ཚེ་རྣམས་ཁུག་པར་ཐེ་ཚོམ་བྲལ། ། གང་ཉམས་སྐྱེས་བུས་བརྩོན་འགྲུས་རབ་བསྐྱེད་ནས།། བླ་མ་འདི་ལ་ཚེ་ཆོག་མྱུར་དུ་ཞུས།། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེ་ཆོག་བྱེད་པའི་མཁན་པོ་བླ་མ་བསྟན་པའི་ལེའུ་སྟེ་བཞི་པའོ། །།། དེ་ནས་བཅོམ་ལྡན་འདས་ཀྱིས་བཅུད་ལེན་སྨན་གྱིས་ཚེ་བསྲིང་བ་གསུངས་སོ།། གང་ཞིག་བཅུད་ལེན་སྨན་གྱིས་ཚེ་རྣམས་བསྲིང།། ཤིང་གི་འབྲས་བུ་དག་ལ་བསྟན་པ་དང། ། རྡོ་ཡི་བཅུད་ལ་བསྟེན་ནས་བླང་བྱ་དང།། རྩི་ཡི་རྩ་བ་རྣམས་སུ་སྦྱར་བ་དང།། ཤ་ཡི་རིགས་ཀྱིས་རོ་རྣམས་སྲ་བྱ་ཞིང།། ས་ཡི་ཞགས་རྣམས་ཟས་སུ་ཟ་བྱེད་ཅིང།། ཆུ་ཡི་རིགས་རྣམས་སྐོམ་དུ་བཏུང་བར་བྱ། ། འབྱུང་བའི་རོ་རྣམས་ལྡན་པ་ཨ་རུ་ར།། ནུས་པའི་བཅུད་ལྡན་སྨན་མཆོག་བ་རུ་ར།། ཚ་བའི་ནད་སེལ་གྲང་འཇོམས་སྐྱུ་རུ་ར།། རྒྱ་མ་ལྔ་བཅུ་ཆུ་ཡི་ནང་དུ་སྤང།། ཁུ་བ་བཙག་ནས་འབྲི་མར་བཟང་པོ་དང།། འོ་མ་ཆུ་དང་བཅས་ནས་བསྡུས་པ་ཡི། ། སྨན་མར་བསྟེན་པས་སྐྲ་དཀར་གཉེར་མ་མེད་པ་དང།། ཚེ་རིང་ལུས་ནི་ཤིན་ཏུ་བདེ་བར་བྱེད།། འདུ་བའི་ནད་ཀྱིས་མི་འཇིག་ཚེ་ཡང་བརྟན།། འབྲས་བུ་གསུམ་གྱི་བཅུད་ལེན་མི་རྣམས་སྤྱོད། ། ཅོང་ཞི་མེ་ཡིས་བཞུས་པའི་ཕྱེ་མ་དང།། བྲག་ཞུན་ཆུ་ཡིས་བཞུར་བའི་ཁུ་བ་དང།། བུ་རམ་སྦྱར་ལ་རྟག་ཏུ་ཟས་སུ་བཟའ།། ནད་རྣམས་འཇོམས་ཤིང་རྒས་ཁ་ཤིན་ཏུ་སྲ།། རམ་ཉེ་ཉེ་ཤིང་ར་ཤག་རྩ་བ་དང། ། ཀ་ཤྭ་ཀན་དྷཱི་རྩ་བ་གཟེ་མ་དང།། ལྕ་བའི་རྩ་བ་རྣམས་ནི་ཆ་བསྙམས་ཏེ།། མར་དང་འོ་མ་ཆུར་སྦྱར་ཚོགས་པར་བྱ།། མར་གྱིས་བཅུད་འཕེལ་འོ་མས་སྣ་རིང་ངོ།། ཆུ་ཡིས་སྣ་མི་ཚིག་སྟེ་ཁོང་ཚོས་སོ། ། དཀྲུགས་པས་འཇུ་སླ་མཁས་པས་སྦྱར་བར་བྱ།། རྩ་བ་ལྔ་ཡི་སྨན་མར་ནད་རྣམས་སེལ།། རྒས་སྲ་ལུས་ཀྱི་ཉམས་སྟོབས་བཅུད་མདངས་འཕེལ།། ཚེ་སྲོག་བརྟན་པར་བྱེད་དེ་ཉམས་སུ་བླང།། ད་བྱིང་རྩངས་པ་སྦལ་པ་མཆིལ་པའི་ཤ། སྦྲུལ་གྱི་ཤ་དང་དབང་པོ་ལག་པ་དང།། བུ་རམ་སྦྲང་རྩི་ཅོང་ཞི་རབ་སྦྱར་ཟོས།། རྒས་པ་རོ་སྲ་ལུས་ཀྱི་ཟུངས་རྣམས་རྒྱས།། མིག་རྣོ་གཞོན་པའི་ལུས་དང་འདྲ་བར་བྱེད།། ཚེ་ཆོག་ཡིན་ཕྱིར་དང་དུ་བླང་བར་བྱ། ། ས་ཡི་ཞག་རྣམས་ཟས་སུ་ཟ་བྱེད་ན།། དང་པོ་ས་བདག་ཀླུ་གཉན་མེད་ས་ནས།། སྦྱིན་ལ་བཟང་ཞིང་སྣུམ་པའི་ས་རིགས་ནས།། གཏོར་མ་བྱིན་ལ་ཡི་དྭགས་སོགས་ལ་བསླང།། བདག་པོར་སྣང་བ་རྣམས་ལ་ཞུ་བར་བྱ། ། ཆང་ངམ་ཆུ་ལ་སྦྱར་ཏེ་བཏུང་བ་ཡང།། ཁྲོ་བོ་དཀར་པོ་རལ་གྲི་ཐོད་པ་འཛིན།། བསྒཽམ་ནས་བདུད་རྩིར་བྱིན་བརླབ་བཟའ་བར་བྱ།། ལོག་ན་བུལ་ཏོག་ས་ཞག་བསྲེས་ལ་བཟའ།། ཆང་ཞིམ་ལྟོ་རུ་བཏུང་བར་བྱ་བ་ཡིན། ། ས་ཡི་ལྷ་མོ་ཚེ་ཡི་བདག་མོ་ཡི།། བསྒྲུབ་པའི་མན་ངག་ཚེ་ཡི་ཆོ་གར་བསྲུང།། ཆུ་ཡི་རིགས་རྣམས་སྐོམ་དུ་བཏུང་བ་ཡིན།། དང་པོ་ནས་གདུས་ཚ་བ་བཏུང་བར་བྱ།། ཁམ་ལོག་བྱུང་ན་བུ་རམ་མུར་བར་བྱ། ། དེ་ནས་ཚ་མེད་པ་ཡི་ཆུ་བཟང་ལ།། བསྐོལ་གྲང་བྱས་ཏེ་མང་དུ་འཐུང་བ་ཡིས།། སྲིན་གྱི་རིགས་རྣམས་ཕྱི་རུ་འཐོན་པ་དང།། ཁམ་ལོག་བྱུང་ན་རུས་ཁུ་བཟང་པོ་གཏང།། འབྱོངས་པར་གྱུར་ནས་རྟག་ཏུ་ཆུ་གྲང་བཏུང། ། འདིས་ནི་ས་བདག་ཀླུ་གཉན་མ་ལུས་པའི།། ཚེ་ཡི་བར་ཆད་སེལ་བར་བྱེད་པ་ཡིན།། ཆུ་གོམས་བཟང་པོ་རྣལ་འབྱོར་པ་ཡིས་བྱ།། དེ་ལ་བཅུད་ལེན་རིགས་ཀྱི་སྔགས་འདི་གསུངས། ། ཨོཾ་ཨཱཿམི་དེ་ཝ་ཧྲཱིཿ། སརྦ་པཉྩ་ཨ་མྲྀ་ཏ་ཧཱུ~ཾ་ཧྲཱིཿ། ཨཱ་ཡུཛྙཱ་ན་པུཎྱེ་སྭཱ་ཧཱ། བདུད་རྩིར་འཁྱིལ་བ་འཆི་མེད་ཚེའི་རྒྱུད་ལས། བཅུད་ལེན་སྨན་གྱིས་ཚེ་བསྲིང་བའི་ལེའུ་སྟེ་ལྔ་པའོ།།།། དེ་ནས་བཅོམ་ལྡན་འདས་ཀྱིས་ཡི་དམ་སྔགས་ཀྱིས་ཚེ་སྲོག་འགུགས་པ་འདི་གསུངས་སོ། ། ཚེ་སྲོག་བརྟན་པའི་ཡི་དམ་སྔགས་བསྒྲུབ་འདི།། ཚེ་བསྲིང་ནད་སེལ་རྒྱལ་པོ་ཡིན་པར་གསུངས།། དང་པོ་ཚེ་སྲོག་རྟེན་བྱེད་སྟོང་ཉིད་ལས།། ཚེ་དཔག་མེད་པ་མདོག་དཀར་རང་ཉིད་བསམ། ། གཡས་པ་ས་གནོན་གཡོན་པ་མཉམ་བཞག་སྟེང།། ཚེ་ཡི་བུམ་པ་རབ་ཏུ་བཞག་པ་ལ།། ཡི་གེ་ནརྀ་ནི་ཚེ་ཡི་རང་བཞིན་ཅན།། འོད་འཕྲོས་བཀུག་ནས་རང་ལ་བསྟིམ་པར་བྱ། ། ན་མོ་བྷ་ག་ཝཱ་ཏེ། ཨ་པ་རི་མི་ཏ་ཨཱ་ཡུར་ཛྙཱ་ན་སུ་བི་ནིཥྩིཏྟ་ཏེ་ཛོ་རཱ་ཛཱ་ཡ། ཏ་ཐཱ་ག་ཏ་ཡ། ཨར་ཧ་ཏི་སམྱཀྶཾ་བུདྡྷ་ཡ། ཏདྱ་ཐཱ། ཨཱ+ོཾ་སརྦ་སཾ་སྐ་ར་པ་རི་ཤུདྷ་དྷརྨ་ཏེ་ག་ག་ན་ས་མུད་ག་ཏེ། སྭ་བྷ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ། ཞག་རེ་ལ་ནི་བརྒྱ་རྩ་བཟླས།། ཚེ་སྲོག་བར་ཆད་མེད་པར་འགྱུར།། ཚེ་རིང་ནད་སེལ་ཐུགས་དམ་ནི།། ནངས་པར་ཉི་མ་ཤར་བའི་དུས།། ཤར་གྱི་ཕྱོགས་སུ་བལྟས་ལ།། ནམ་མཁའ་ཟླ་བའི་དཀྱིལ་འཁོར་ལ། ། ཚེ་དཔག་མེད་པ་མདོག་དཀར་ཞིང།། ཕྱག་གི་བདུད་རྩི་ལྷུང་བཟེད་ནས།། འཆི་མེད་བདུད་རྩི་འགྲོ་སྦྱིན་བཏང།། གསིལ་བྱེད་ཁ་བཅད་སྐྱིལ་ཀྲུང་བཞུགས།། བདག་གིས་མཆོད་དེ་གསོལ་བ་གདབ། ། ཧཱུ~ཾ་ཤར་ཕྱོགས་མངོན་པར་དགའ་བ་ན།། ཚེ་དང་ཡེ་ཤེས་བདག་པོ་ཁྱེད།། བདུད་རྩིའི་ལྷུང་བཟེད་ཁ་ཕྱེད་ནས།། གསིལ་བྱེད་འབར་བ་རིན་ཆེན་ནས།། བདེན་པ་བཞི་རྟོགས་ཆུ་བོ་ཕོབ།། བདག་ལ་ཚེ་དབང་བསྐུར་དུ་གསོལ། ། ཚེ་དང་བསོད་ནམས་རྒྱས་པར་མཛོད།། དུས་འདིར་བདག་ལ་བདུད་རྩི་ཕོབ།། ཅེས་པ་སྣ་ཡི་རླུང་གིས་ནི།། བདུད་རྩི་གསིལ་བྱེད་ལས་དྲངས་ནས།། བདག་ལ་འབེབས་པའི་གསང་སྔགས་འདི། ། བརྒྱ་དང་རྩ་བརྒྱད་བཟླས་པར་བྱའོ།། ཧཱུ~ཾ་སུ་སོ་ས་ར་ཧ་ཀ་རིར་ཤ་རེ་ཧཱུ~ཾ་ཕཊ། འདུ་བ་བཞི་ཡི་ནད་རྣམས་དང།། བགེགས་རིགས་སྟོང་ཕྲག་བརྒྱད་ཅུའི་གདོན།། ཐམས་ཅད་མ་ལུས་སེལ་བར་བྱེད།། དེ་ཕྱིར་རང་གི་དྲི་ཆུ་ནི། ། ཁྱོར་བར་བླུགས་ལ་སྔགས་བཏབ་བཏུང།། ཨོཾ་ཨ་མ་ར་ཎ་ཛཱི་ཝན་ཏི་སྭཱ་ཧཱ། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཡི་དམ་སྔགས་ཀྱིས་ཚེ་བརྟན་པའི་ལེའུ་སྟེ་དྲུག་པའོ། །།། དེ་ནས་བཅོམ་ལྡན་འདས་ཀྱིས་བཟའ་བཏུང་ལོངས་སྤྱོད་ཚེའི་ཆོ་ག་འདི་གསུངས་སོ།། ཉིན་གཅིག་པ་དང་གཞན་གྱིས་ཁ་སྐོངས་ལ།། བཟའ་བཏུང་ལོངས་སྤྱོད་ཚེ་ཆོག་ཡིན།། ཉིན་གཅིག་པ་ཡི་ཚེ་ཡི་ཆོ་གའི་གཞུང། ། པདྨ་འདབ་བརྒྱད་དཀྱིལ་འཁོར་བཞེངས་སུ་གསོལ།། ཚེ་བུམ་བྱིན་བརླབས་མཚམས་བཅད་ཅིང།། ཚེ་སྐྱེམས་བལྟམ་ཞིང་ཚེ་འབྲས་བསྩལ།། དཀྱིལ་འཁོར་དབུས་སུ་བཞུགས་སུ་གསོལ། ། བྷྲཱུཾ་ལས་བུམ་པ་གཞལ་ཡས་ཁང།། མ་ལས་ཉི་མའི་དཀྱིལ་འཁོར་དང།། ཨ་ལས་ཟླ་བའི་དཀྱིལ་འཁོར་བསྒོམ།། ཨ་ཡིག་འཕྲོ་འདུས་སྔ་བརྗོད་ལ།། བཅོམ་ལྡན་མགོན་པོ་ཚེ་དཔག་མེད།། ཞལ་གསུམ་ཕྱག་ནི་དྲུག་པ་སྟེ། ། གཡས་དཀར་གཡོན་སྔོ་དབུས་དམར་བ།། པདྨ་རྡོ་རྗེ་རིན་ཆེན་གཡས།། དྲིལ་བུ་འཁོར་ལོ་རལ་གྲི་གཡོན།། ཐུགས་ཀར་ཧྲཱིཿདམར་རྟ་མགྲིན་སྐུ།། ཞལ་གསུམ་ཕྱག་དྲུག་སྐུ་མདོག་དམར། ། གཡས་གཡོན་རྡོ་རྗེ་པདྨ་བསྣམས།། མཐའ་གཉིས་མདའ་གཞུ་རྣམ་པར་འཛིན།། དཀར་ལ་དམར་དང་སྔོ་བའི་ཞལ།། ཁམས་གསུམ་དབང་དུ་བསྡུས་པའོ།། བྷྲཱུཾ་བཛྲ་པདྨ་བི་ཤྭ་བྷྲཱུཾ། མ་སཱུརྱ་མཎྜ་ལ་བྷྲཱུཾ། ཨ་ཙནྡྲ་མཎྜལ་ཨ། པཾ་པདྨ་མཎྜལ་པཾ། སྥ་ར་ཎ་ཕཊ། སཾ་ཧ་ར་ཎ་ཧཱུ~ཾ། ཏིཥྛ་བཛྲ། ཨོཾ་ཨཱཿཧཱུ~ཾ། ཡུམ་ཆེན་གོས་དཀར་སྐུ་ལ་འཁྲིལ།། དེ་བཞིན་རྡོ་རྗེ་རིན་ཆེན་དང།། ལས་མཆོག་ཡུམ་ཆེན་པདྨ་ལ།། ཕོ་ཉ་བཞི་དང་སྒོ་མ་བཞི། ། ཞིང་ཁམས་སྒོ་ལ་བསྒོམ་པར་བྱ།། ཚེ་བསྐྱེད་པ་ལ་རྣམ་པ་གཉིས།། ཞི་བ་ཡེ་ཤེས་ཚེ་དང་ནི།། རོལ་པ་ཁྲོ་བོའི་ཚེ་བསྐྱེད་དོ།། ཚེ་འགུགས་པ་ལ་རྣམ་པ་གཉིས།། འབྱུང་བ་ཆེན་པོ་ལྔ་ཡི་ཚེ།། འབྲས་བུ་བྱང་ཆུབ་སེམས་ཀྱི་ཚེ། ། བསྟིམ་པ་ལུས་ཀྱི་གནས་ལྔ་རུ།། སྐུ་གསུང་ཐུགས་དང་ཡོན་ཏན་དང།། ཕྲིན་ལས་ལྔ་ཡིས་ཚེ་བསྟིམ་མོ།། ཧཱུ~ཾ་ནུབ་ཕྱོགས་པདྨ་དབང་གི་ཞིང་ཁམས་ན།། བཅོམ་ལྡན་མགོན་པོ་གསུང་མཆོག་ཚེ་དཔག་མེད། ། ཐུགས་ཀྱི་ཟླ་གམ་ཤེལ་གྱི་གའུ་ནས།། བྱང་ཆུབ་སེམས་ཀྱི་ཚེ་མཆོག་ཨཱ་ཡུ་དམར་པོ་ནི།། རྩེ་གཅིག་བདག་གིས་བསྒྲུབ་པའི་ཚེ་ལགས་ན།། བྱིན་གྱིས་བརློབས་ཤིང་ཚེ་ཡི་དངོས་གྲུབ་སྩལ་དུ་གསོལ། ། ཨོཾ་བྷྲཱུཾ་བྷུདྡྷ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་བྷྲཱུཾ་བཛྲ་ཨཱ་ཡུ་ཥེ་ཧཱུ~ཾ་ཨ། སྭཱ་བྷྲཱུཾ་རཏྣ་ཨཱ་ཡུ་ཥེ་ཧཱུ~ཾ་ཨ། ཨཱཾ་བྷྲཱུཾ་པདྨ་ཨཱ་ཡུ་ཥེ་ཧཱུ~ཾ་ཨ། ཧཱ་བྷྲཱུཾ་ཀརྨ་ཨཱ་ཡུ་ཥེ་ཧཱུ~ཾ་ཨཱ། ཧཱུ~ཾ་པདྨ་གེ་སར་སྟོང་ལྡན་པའི།། དབུས་ཀྱི་རཱ་ག་དམར་པོ་འོད་ཀྱི་དཀྱིལ་འཁོར་ནས། ། བཅོམ་ལྡན་སྐུ་མཆོག་མགོན་པོ་རྣམ་སྣང་མཛད།། ཐུགས་ཀའི་དཔལ་བེའུ་ཟླ་གསང་གའུ་ནས།། ཨོཾ་དཀར་གསལ་བའི་འཕྲོ་འདུ་ལས།། ཆོས་ཀྱི་དབྱིངས་ཀྱི་ཡེ་ཤེས་ཀྱིས།། འཇིག་རྟེན་དྲུག་གི་ཕྱོགས་བཅུ་ནས། ། གཏི་མུག་ཆེན་པོའི་དུག་བཅོམ་སྟེ།། གུ་ཧྱ་གསང་བའི་བྱང་ཆུབ་སེམས།། རྡོ་རྗེའི་ཚེ་རུ་རབ་ཏུ་བསྒོམ།། ཧཱུ~ཾ་བྷྲཱུཾ་བུདྡྷ་ཨཱ་ཡུ་ཥེ་ཧཱུ~ཾ་ཨཱཿ། ཧཱུ~ཾ་པདྨ་གེ་སར་སྟོང་ལྡན་པའི།། ཤར་ཕྱོགས་ཡེ་ཤེས་ཆེན་པོའི་དཀྱིལ་འཁོར་ནས། ། བཅོམ་ལྡན་ཐུགས་མཆོག་མགོན་པོ་རྡོ་རྗེ་སེམས།། ཐུགས་ཀའྀ་དཔལ་བེའུ་ཟླ་གསང་གའུ་ནས། ཧཱུ~ཾ་སྔོན་གསལ་བའི་འཕྲོ་འདུ་ལས།། མེ་ལོང་ལྟ་བུའི་ཡེ་ཤེས་ཀྱིས།། འཇིག་རྟེན་དྲུག་གི་ཕྱོགས་བཅུ་ནས། ། ཞེ་སྡང་ཆེན་པོའི་དུག་བཅོམ་སྟེ།། གུ་ཧྱ་གསང་བའི་བྱང་ཆུབ་སེམས།། རྡོ་རྗེའི་ཚེ་རུ་རབ་ཏུ་བསྒོམ།། ཧཱུ~ཾ་བྷྲཱུཾ་བཛྲ་ཨཱ་ཡུ་ཥེ་ཧཱུ~ཾ་ཨཱ:།། ཧཱུ~ཾ་པདྨ་གེ་སར་སྟོང་ལྡན་པའི།། ལྷོ་ཕྱོགས་ཡེ་ཤེས་ཆེན་པོའི་དཀྱིལ་འཁོར་ནས། ། བཅོམ་ལྡན་ཡོན་ཏན་མགོན་པོ་རིན་ཆེན་འབྱུང།། ཐུགས་ཀའི་དཔལ་བེའུ་ཟླ་གསང་གའུ་ནས།། སྭཱ་སེར་གསལ་བའི་འཕྲོ་འདུལ་ལས།། མཉམ་པ་ཉིད་ཀྱི་ཡེ་ཤེས་ཀྱིས།། འཇིག་རྟེན་དྲུག་གི་ཕྱོགས་བཅུ་ནས། ། ང་རྒྱལ་ཆེན་པོ་དུག་བཅོམ་སྟེ།། གུ་ཧྱ་གསང་བའི་བྱང་ཆུབ་སེམས།། རྡོ་རྗེའི་ཚེ་རུ་རབ་ཏུ་བསྒོམ།། སྭཱ་བྷྲཱུཾ་རཏྣ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་པདྨ་གེ་སར་སྟོང་ལྡན་པའི།། ནུབ་ཕྱོགས་ཡེ་ཤེས་ཆེན་པོའི་དཀྱིལ་འཁོར་ནས། ། བཅོམ་ལྡན་གསུང་མཆོག་མགོན་པོ་ཚེ་དཔག་མེད།། ཐུགས་ཀའི་དཔལ་བེའུ་ཟླ་གསང་གའུ་ནས།། ཨཱཾ་དམར་གསལ་བའི་འཕྲོ་འདུ་ལས།། སོ་སོར་རྟོག་པའི་ཡེ་ཤེས་ཀྱིས།། འཇིག་རྟེན་དྲུག་གི་ཕྱོགས་བཅུ་ནས། ། འདོད་ཆགས་ཆེན་པོའི་དུག་བཅོམ་སྟེ།། གུ་ཧྱ་གསང་བའི་བྱང་ཆུབ་སེམས།། རྡོ་རྗེའི་ཚེ་རུ་རབ་ཏུ་བསྒོམ།། ཨཱཾ་བྷྲཱུཾ་པདྨ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་པདྨ་གེ་སར་སྟོང་ལྡན་པའི།། བྱང་ཕྱོགས་ཡེ་ཤེས་ཆེན་པོའི་དཀྱིལ་འཁོར་ནས། ། བཅོམ་ལྡན་ཕྲིན་ལས་མགོན་པོ་དོན་ཡོད་གྲུབ།། ཐུགས་ཀའི་དཔལ་བེའུ་ཟླ་གསང་གའུ་ནས།། ཧཱ་ལྗང་གསལ་བའི་འཕྲོ་འདུ་ལས།། བྱ་བ་ནན་ཏན་ཡེ་ཤེས་ཀྱིས།། འཇྀག་རྟེན་དྲུག་གི་ཕྱོགས་བཅུ་ནས། ། ཕྲག་དོག་ཆེན་པོའི་དུག་བཅོམ་སྟེ།། གུ་ཧྱ་གསང་བའི་བྱང་ཆུབ་སེམས།། རྡོ་རྗེའི་ཚེ་རུ་རབ་ཏུ་བསྒོམ།། ཧཱ་བྷྲཱུཾ་ཀརྨ་ཨཱ་ཡུ་ཥེ་ཧཱུ~ཾ་ཨཱ། ཧཱུ~ཾ་འབྱུང་བ་ཤ་ཡི་ཁམས་ནས་ཚེ་ཉམས་ན།། ས་ཡི་ཁམས་ནས་དགུག་པར་བྱ། ། དུས་གསུམ་རྒྱལ་བའི་ཡུམ་མཆོག་སངས་རྒྱས་སྤྱན།། འཇིག་རྟེན་དྲུག་གི་ཕྱོགས་བཅུ་ནས།། འབྱུང་བ་ས་ཡི་ཁམས་རྣམས་ཀུན།། གསང་བའི་ཚེ་རུ་བྱིན་བརླབས་ནས།། ཤ་ཡི་ཁམས་སུ་བསྟིམ་པར་བྱ། ། ལཱཾ་བྷྲཱུཾ་བཛྲ་ཨཱ་ཡུ་ཥེ་ཧཱུ~ཾ་ཨཱ། ཧཱུ~ཾ་འབྱུང་བ་ཁྲག་གི་ཁམས་ནས་ཚེ་ཉམས་ན།། ཆུ་ཡི་ཁམས་ནས་དགུག་པར་བྱ།། དུས་གསུམ་རྒྱལ་བའི་ཡུམ་མཆོག་མཱ་མ་ཀཱི།། འཇིག་རྟེན་དྲུག་གི་ཕྱོགས་བཅུ་ནས།། འབྱུང་བ་ཆུ་ཡི་ཁམས་རྣམས་ཀུན། ། གསང་བའི་ཚེ་རུ་བྱིན་བརླབས་ནས།། ཁྲག་གི་ཁམས་སུ་བསྟིམ་པར་བྱ།། མཱཾ་བྷྲཱུཾ་རཏྣ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་འབྱུང་བ་དྲོད་ཀྱི་ཁམས་ནས་ཚེ་ཉམས་ན།། མེ་ཡི་ཁམས་ནས་དགུག་པར་བྱ།། དུས་གསུམ་རྒྱལ་བའི་ཡུམ་མཆོག་ན་བཟའ་དཀར། ། འཇིག་རྟེན་དྲུག་གི་ཕྱོགས་བཅུ་ནས།། འབྱུང་བ་མེ་ཡི་ཁམས་རྣམས་ཀུན།། གསང་བའི་ཚེ་རུ་བྱིན་བརླབས་ནས།། དྲོད་ཀྱི་ཁམས་སུ་བསྟིམས་པར་བྱ། ། པཱཾ་བྷྲཱུཾ་པདྨ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་འབྱུང་བ་དབུགས་ཀྱི་ཁམས་ནས་ཚེ་ཉམས་ན།། རླུང་གི་ཁམས་ནས་དགུག་པར་བྱ།། དུས་གསུམ་རྒྱལ་བའི་ཡུམ་མཆོག་དམ་ཚིག་སྒྲོལ།། འཇིག་རྟེན་དྲུག་གི་ཕྱོགས་བཅུ་ནས། ། འབྱུང་བ་རླུང་གི་ཁམས་རྣམས་ཀུན།། གསང་བའི་ཚེ་རུ་བྱིན་བརླབས་ནས།། དབུགས་ཀྱི་ཁམས་སུ་བསྟིམ་པར་བྱ།། ཏཱཾ་བྷྲཱུཾ་ཀརྨ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་རྣམས་ཤེས་ཡིད་ཀྱི་ཁམས་ནས་ཚེ་ཉམས་ན།། ནམ་མཁའི་ཁམས་ནས་དགུག་པར་བྱ། ། དུས་གསུམ་རྒྱལ་བའི་ཡུམ་མཆོག་ཀུན་ཏུ་བཟང།། འཇིག་རྟེན་དྲུག་གི་ཕྱོགས་བཅུ་ནས།། འབྱུང་བ་ནམ་མཁའི་ཁམས་རྣམས་ཀུན།། གསང་བའི་ཚེ་རུ་བྱིན་བརླབས་ཏེ།། སེམས་ཀྱི་ཁམས་སུ་བསྟིམ་པར་བྱ། ། མཱུཾ་བྷྲཱུཾ་བྷུདྡྷ་ཨཱ་ཡུ་ཥེ་ཧཱུ~ཾ་ཨ། ཧཱུ~ཾ་ཤར་ཕྱོགས་དཀར་མོ་ཤེལ་གྱི་ཞིང་ཁམས་ནས།། དཀར་མོ་མགྱོགས་མ་ཞི་བྱེད་འོད་འཕྲོའི་ཚོགས།། ཕྱག་ན་ཚེ་ཡི་གཡབ་དར་དཀར་པོ་བསྣམས།། ཚེ་དང་ཡེ་ཤེས་འགུགས་པའི་ལས་མཛད་མ། ། དཔལ་དང་གཟི་བརྗིད་འདྲེན་པའི་ལས་མཛོད་ཅིག། ཤར་ཕྱོགས་དྲི་ཟའི་ལག་ནས་ཚེ་དྲོངས་ལ།། རྡོ་རྗེའི་ཚེ་མཆོག་འགུགས་པའི་ལས་མཛོད་ཅིག། བཛྲ་ཨཱ་ཡུ་ཥེ་ཨཾ་ཀུ་ཤ་ཛ། ཧཱུ~ཾ་ལྷོ་ཕྱོགས་བཻ་ཌཱུརྱ་ཡི་ཞིང་ཁམས་ནས།། སྔོན་མོ་མགྱོགས་མ་ཞི་བྱེད་འོད་འཕྲོའི་ཚོགས།། ཕྱག་ན་ཚེ་ཡི་གཡབ་དར་སྔོན་པོ་བསྣམས།། ཚེ་དང་ཡེ་ཤེས་འགུགས་པའི་ལས་མཛད་མ།། དཔལ་དང་གཟི་བརྗིད་འདྲེན་པའི་ལས་མཛོད་ཅིག། ལྷོ་ཕྱོགས་གཤིན་རྗེའི་ལག་ནས་ཚེ་དྲོངས་ལ།། རིན་ཆེན་ཚེ་མཆོག་འགུགས་པའི་ལས་མཛོད་ཅིག། རཏྣ་ཨཱ་ཡུ་ཥེ་པཱ་ཤ་ཧཱུ~ཾ། ཧཱུ~ཾ་ནུབ་ཕྱོགས་པདྨ་རཱ་གའི་ཞིང་ཁམས་ནས།། དམར་མོ་མགྱོགས་མ་དབང་བྱེད་འོད་འཕྲོའི་ཚོགས། ། ཕྱག་ན་ཚེ་ཡི་གཡབ་དར་དམར་པོ་བསྣམས།། ཚེ་དང་ཡེ་ཤེས་འགུགས་པའི་ལས་མཛད་མ།། དཔལ་དང་གཟི་བརྗིད་འདྲེན་པའི་ལས་མཛོད་ཅིག། ནུབ་ཕྱོགས་ཀླུ་དབང་ལག་ནས་ཚེ་དྲོངས་ལ། ། པདྨའི་ཚེ་མཆོག་འགུགས་པའི་ལས་མཛོད་ཅིག། པདྨ་ཨཱ་ཡུ་ཥེ་སྥོ་ཊ་བཾ། ཧཱུ~ཾ་བྱང་ཕྱོགས་ཨིནྡྲ་ནཱི་ལའི་ཞིང་ཁམས་ནས།། ལྗང་གུ་མགྱོགས་མ་དྲག་བྱེད་འོད་འཕྲོའི་ཚོགས།། ཕྱག་ན་ཚེ་ཡི་གཡབ་དར་ལྗང་གུ་བསྣམས། ། ཚེ་དང་ཡེ་ཤེས་འགུགས་པའི་ལས་མཛད་མ།། དཔལ་དང་གཟི་བརྗིད་འདྲེན་པའི་ལས་མཛོད་ཅིག། བྱང་ཕྱོགས་གནོད་སྦྱིན་ལག་ནས་ཚེ་དྲོངས་ལ།། ལས་ཀྱི་ཚེ་མཆོག་འགུགས་པའི་ལས་མཛོད་ཅིག། ཀརྨ་ཨཱ་ཡུ་ཥེ་གྷཎྜེ་ཧོཿ། ཧཱུ~ཾ་ཁམས་གསུམ་གནས་ན་ཚེ་འགུགས་མ།། རྡོ་རྗེ་ལྷ་མོ་ལྕགས་ཀྱུ་མ།། ག་པུར་ཤེལ་གྱི་མདོག་འདྲ་བ།། ཕྱག་ན་ཚེ་ཡི་བུམ་པ་བསྣམས།། གཅིག་ལས་བྱེ་བ་འབུམ་དུ་སྤྲུལ།། ཡང་སྤྲུལ་ལྷ་མོ་མང་པོ་ཡིས། ། དྲོངས་ཤིག་རྡོ་རྗེའི་ཚེ་དྲོངས་ཤིག། ཁཎྜ་རོ་ཧཱི་ཛ་ཛཿ། ཧཱུ~ཾ་སྲིད་གསུམ་གནས་ནས་ཚེ་འགུགས་མ།། རིན་ཆེན་ལྷ་མོ་ཞགས་པ་མ།། བཻཌཱུརྱ་ཡི་མདོག་འདྲ་མ།། ཕྱག་ན་རིན་ཆེན་བུམ་པ་བསྣམས། ། གཅིག་ལས་བྱེ་བ་འབུམ་དུ་སྤྲུལ།། ཡང་སྤྲུལ་ལྷ་མོ་མང་པོ་ཡིས།། དྲོངས་ཤིག་རིན་ཆེན་ཚེ་དྲོངས་ཤིག། དུ་སི་ནི་ཧཱུ~ཾ་ཧཱུ~ཾ། ཧཱུ~ཾ་སྟོང་གསུམ་གནས་ནས་ཚེ་འགུགས་མ།། པདྨའི་ལྷ་མོ་ལྕགས་སྒྲོག་མ། ། པདྨ་རཱ་གའི་མདོག་འདྲ་མ། ཕྱག་ན་པདྨའི་བུམ་པ་བསྣམས།། གཅིག་ལས་བྱེ་བ་འབུམ་དུ་སྤྲུལ།། ཡང་སྤྲུལ་ལྷ་མོ་མང་པོ་ཡིས།། དྲོངས་ཤིག་པདྨའི་ཚེ་དྲོངས་ཤིག། དྷཱཀྐི་ནི་བཾ་བཾ། ཧཱུ~ཾ་འཇིག་རྟེན་གསུམ་ན་ཚེ་འགུགགས་མ། ། ལས་ཀྱི་ལྷ་མོ་དྲིལ་བུ་མ།། ཨིནྡྲ་ནཱི་ལའི་མདོག་འདྲ་མ།། ཕྱག་ན་ཟླ་བའི་དྲིལ་བུ་བསྣམས།། གཅིག་ལས་བྱེ་བ་འབུམ་དུ་སྤྲུལ།། ཡང་སྦྲུལ་ལྷ་མོ་མང་པོ་ཡིས།། དྲོངས་ཤིག་ལས་ཀྱི་ཚེ་དྲོངས་ཤིག། ས་མ་ཡ་ཧོ་ཧོཿ། ཨོཾ་བཛྲ་ཨཾ་ཀུ་ཤ་ཛཿ། བཛྲ་པཱ་ཤ་ཧཱུ~ཾ། བཛྲ་སྥོ་ཊ་བཾ། བཛྲ་གྷཎྜེ་ཧོཿ། ཧཱུ~ཾ་ཆོས་ལས་མངའ་མཛད་པདྨའི་རྒྱལ།། གཅིག་ནས་དབང་བསྐུར་བཅོམ་ལྡན་འདས།། ཕུང་པོ་ལྔ་ཡི་ཚེ་ཉམས་ན།། ཕྱག་རྒྱ་ཆེན་པོ་ཡབ་ཀྱི་ཁུག། འབྱུང་བ་ལྔ་ཡི་ཚེ་ཉམས་ན།། ཤེས་རབ་ལྷ་མོ་ཡུམ་གྱི་ཁུག། ཁམས་དང་སྐྱེ་མཆེད་ཚེ་ཉམས་ན།། བྱང་ཆུབ་སེམས་དཔའི་འཁོར་གྱིས་ཁུག། ཧཱུ~ཾ་རྡོ་རྗེ་ཁྱུང་གི་གཤོག་རླབས་ལ།། རྒྱ་མཚོ་ཆེན་པོའི་གཏིང་ནས་དཀྲུགས། ། གནམ་ལྕགས་ཐོག་གི་ཆར་ཕོབ་ལ།། སྲིད་པའི་རི་བོ་རྨང་ནས་ཤིག། རྡོ་རྗེ་མཚོན་ཆའི་ཆར་ཕོབ་ལ།། བར་ཆོད་འབྱུང་པོ་རྡུལ་དུ་རློག། ཛཿཧཱུ~ཾ་བཾ་ཧོཿ། ཏཱིཀྵྞ་མུཀྟ་བཛྲ་ཨཱ་ཡུ་ཥེ་ཨཱ། དེ་ནས་ཚེ་བུམ་ལག་ཏུ་གཏད། ། ཧཱུ~ཾ་ནམ་མཁའི་ཁམས་ནས་མ་གཅིག་ཚེ་འཛིན་མ།། དེ་བཞིན་རིགས་ཀྱི་ཡུམ་སྟེ་ཚེ་འཛིན་མ།། སྐུ་མདོག་བཙོ་མ་གསེར་གྱི་མདོག་འདྲ་མ།། ཕྱག་ན་གསེར་གྱི་བུམ་པ་བསྣམས།། ཡོན་བདག་ཚེ་དང་བདུད་རྩིས་བལྟམས་ནས་ཀྱང། ། འཁོར་ལོ་རྩིབས་བརྒྱད་འབར་བའི་རྒྱས་འདེབས་ཤིང།། ཚེ་འདི་བཅོལ་ལོ་ཚེ་དང་སྲོག་གཉིས་བརྟན།། ཚེ་ཟུངས་སྲོག་སྐྱོབས་དབང་བསྐུར་བྱིན་གྱིས་རློབས།། དྷཱ་ཏྭཱི་ཤྭ་རཱི་ཚེ་བྷྲཱུཾ། ཧཱུ~ཾ་ཤར་གྱི་ཕྱོགས་ནས་མ་གཅིག་ཚེ་འཛིན་མ།། རྡོ་རྗེ་རིགས་ཀྱི་ཡུམ་སྟེ་སངས་རྒྱས་སྤྱན།། སྐུ་མདོག་ག་པུར་ཤེལ་གྱི་མདོག་འདྲ་མ།། ཕྱག་ན་རིན་ཆེན་ཤེལ་དཀར་བུམ་པ་བསྣམས།། ཡོན་བདག་ཚེ་དང་བདུད་རྩིས་བལྟམས་ནས་ཀྱང། ། རྡོ་རྗེ་རྩེ་ལྔ་འབར་བའི་རྒྱས་འདེབས་ཤིང།། ཚེ་འདི་བཅོལ་ལོ་ཚེ་དང་སྲོག་གཉིས་བརྟན།། ཚེ་ཟུངས་སྲོག་སྐྱོབས་དབང་བསྐུར་བྱིན་གྱིས་རློབས།། དྲི་ཥར་ཏི་ཚེ་བྷྲཱུཾ། ཧཱུ~ཾ་ལྷོ་ཡི་ཕྱོགས་ནས་མ་གཅིག་ཚེ་འཛིན་མ། ། རིན་ཆེན་རིགས་ཀྱི་ཡུམ་སྟེ་མཱ་མ་ཀཱི།། སྐུ་མདོག་བཻཌཱུརྱ་ཡི་མདོག་འདྲ་མ།། ཕྱག་ན་བཻཌཱུརྱ་ཡི་བུམ་པ་བསྣམས།། ཡོན་བདག་ཚེ་དང་བདུད་རྩི་བལྟམས་ནས་ཀྱང།། རིན་ཆེན་ཟུར་བརྒྱད་འབར་བའི་རྒྱས་འདེབས་ཤིང། ། ཚེ་འདི་བཅོལ་ལོ་ཚེ་དང་སྲོག་གཉིས་བརྟན།། ཚེ་ཟུངས་སྲོག་སྐྱོབས་དབང་བསྐུར་བྱིན་གྱིས་རློབས།། མོ་ཧ་ར་ཏི་ཚེ་བྷྲཱུཾ། ཧཱུ~ཾ་ནུབ་ཀྱི་ཕྱོགས་ནས་མ་གཅིག་ཚེ་འཛིན་མ། ། པདྨ་རིགས་ཀྱི་ཡུམ་སྟེ་ན་བཟའ་དཀར།། སྐུ་མདོག་པདྨ་རཱ་གའི་མདོག་འདྲ་མ།། ཕྱག་ན་པདྨ་རཱ་གའི་བུམ་པ་བསྣམས།། ཡོན་བདག་ཚེ་དང་བདུད་རྩིས་བལྟམས་ནས་ཀྱང།། པདྨ་འདབ་བརྒྱད་འབར་བའི་རྒྱས་འདེབས་ཤིང། ། ཚེ་འདི་བཅོལ་ལོ་ཚེ་དང་སྲོག་འདི་བརྟན།། ཚེ་ཟུངས་སྲོག་སྐྱོབས་དབང་བསྐུར་བྱིན་གྱིས་རློབས།། རཱ་ག་ར་ཏི་ཚེ་བྷྲཱུཾ། ཧཱུ~ཾ་བྱང་གི་ཕྱོགས་ནས་མ་གཅིག་ཚེ་འཛིན་མ།། ལས་ཀྱི་རིགས་ཀྱི་ཡུམ་སྟེ་དམ་ཚིག་སྒྲོལ། ། སྐུ་མདོག་ཨིནྡྲ་ནཱི་ལའི་མདོག་འདྲ་མ།། ཕྱག་ན་ཨིནྡྲ་ནཱི་ལའི་བུམ་པ་བསྣམས།། ཡོན་བདག་ཚེ་དང་བདུད་རྩིས་བལྟམས་ནས་ཀྱང།། རྡོ་རྗེ་རྒྱ་གྲམ་འབར་བའི་རྒྱས་འདེབས་ཤིང།། ཚེ་འདི་བཅོལ་ལོ་ཚེ་དང་སྲོག་འདི་བརྟན། ། ཚེ་ཟུངས་སྲོག་སྐྱོབས་དབང་བསྐུར་བྱིན་གྱིས་རློབས།། ཏཱཾ་བཛྲ་རཱ་ཏི་ཚེ་བྷྲཱུཾ། ཧཱུ~ཾ་སྤྱི་གཙུག་ཟླ་བའི་དཀྱིལ་འཁོར་ནས།། བཅོམ་ལྡན་རྣམ་པར་སྣང་མཛད་བཞུགས།། ཀུན་བཟང་མོ་དང་གཉིས་མེད་པའི། ། དེ་ཡི་མཐུ་དང་བྱིན་རླབས་ཀྱིས།། ཚེ་འདི་རབ་ཏུ་བརྟན་གྱུར་ཅིག། དབང་ཡང་རབ་ཏུ་ཐོབ་གྱུར་ཅིག། སྲོག་ཀྱང་རབ་ཏུ་བརྟན་འགྱུར་ཅིག། ཚེ་དབང་ཕུན་སུམ་ཚོགས་གྱུར་ཅིག། ཨཱ~ཾ་པདྨ་ཨ་བྷི་ཥིཉྩ་ཨཱཾ། ཧཱུ~ཾ་ཐུགས་ཀར་ཉི་མའི་དཀྱིལ་འཁོར་ན།། བཅོམ་ལྡན་རྡོ་རྗེ་སེམས་དཔའ་བཞུགས།། སངས་རྒྱས་སྤྱན་དང་གཉིས་སུ་མེད།། དེ་ཡི་མཐུ་དང་བྱིན་རླབས་ཀྱིས།། ཚེ་འདི་རབ་ཏུ་བརྟན་གྱུར་ཅིག། དབང་ཡང་རབ་ཏུ་ཐོབ་གྱུར་ཅིག། སྲོག་ཀྱང་རབ་ཏུ་བརྟན་གྱུར་ཅིག། ཚེ་དབང་ཕུན་སུམ་ཚོགས་གྱུར་ཅིག། ཧཱུ~ཾ་བཛྲ་ཨ་བྷི་ཥིཉྩ་ཧཱུ~ཾ། ཧཱུ~ཾ་ལྟེ་བ་རིན་ཆེན་ཟུར་བརྒྱད་ལ།། བཅོམ་ལྡན་རིན་ཆེན་འབྱུང་ལྡན་བཞུགས།། མཱ་མ་ཀཱི་དང་གཉིས་སུ་མེད། ། དེ་ཡི་མཐུ་དང་བྱིན་རླབས་ཀྱིས།། ཚེ་འདི་རབ་ཏུ་བརྟན་གྱུར་ཅིག། དབང་ཡང་རབ་ཏུ་ཐོབ་གྱུར་ཅིག། སྲོག་ཀྱང་རབ་ཏུ་བརྟན་གྱུར་ཅིག། ཚེ་དབང་ཕུན་སུམ་ཚོགས་གྱུར་ཅིག། སྭཱ་རཏྣ་ཨ་བྷི་ཥིཉྩ་ཏྲཱཾ། གསང་བ་རྡོ་རྗེ་རལ་གྲི་ལ།། བཅོམ་ལྡན་དོན་ཡོད་གྲུབ་པ་བཞུགས།། དམ་ཚིག་སྒྲོལ་དང་གཉིས་སུ་མེད།། དེ་ཡི་མཐུ་དང་བྱིན་རླབས་ཀྱིས།། ཚེ་འདི་རབ་ཏུ་བརྟན་གྱུར་ཅིག། དབང་ཡང་རབ་ཏུ་ཐོབ་གྱུར་ཅིག། སྲོག་ཀྱང་རབ་ཏུ་བརྟན་འགྱུར་ཅིག། ཚེ་དབང་ཕུན་སུམ་ཚོགས་གྱུར་ཅིག། ཧཱ་ཀརྨ་ཨ་བྷི་ཥིཉྩ་ཨཱ། ཧཱུ~ཾ་བསྐྱེད་པས་མི་ནུབ་རྒྱལ་མཚན་ཏེ།། བཅིངས་པས་འབྲལ་མེད་ལུ་གུ་རྒྱུད།། བརྟན་པས་མི་གཡོ་རི་རབ་ལྷུན་པོ་སྟེ། ། སྤྲོས་པ་མེད་པས་ཁམས་གསུམ་བཀྲག་དང་ལྡན།། སྐལ་ལྡན་ཚེ་ཡི་དངོས་གྲུབ་སྩལ་དུ་གསོལ།། མི་ནུབ་རྒྱལ་མཚན་ཚེ་ནི་སྤྱི་བོའི་གཙུག་ཏུ་བསྟིམ།། ལྗགས་སྟེང་པདྨའི་ཚེ་ནི་ཞལ་གྱི་ནང་དུ་བསྟིམ།། སྐྱེ་ཤི་མེད་པའི་ཚེ་ནི་ཐུགས་ཀྱི་དཀྱིལ་དུ་བསྟིམ། ། འཆི་མེད་རྡོ་རྗེའི་ཚེ་ནི་ཁོག་པའི་དབུགས་ལ་བསྟིམ།། འདུ་འབྲལ་མེད་པའི་ཚེ་ནི་ལྟེ་བའི་དཀྱིལ་དུ་བསྟིམ།། མི་འགྱུར་གཡུང་དྲུང་ཚེ་ནི་དཔྲལ་བའི་དབྱིངས་སུ་བསྟིམ། ། མི་ལྡོག་རྡོ་རྗེ་ཚེ་ནི་རྐང་པའི་མཐིལ་དུ་བསྟིམ།། ཚེ་འདི་ས་ལ་ཉམས་ན་ཟན་ལ་བསྟིམ།། ཆུ་ལ་ཉམས་ན་ཆང་ལ་བསྟིམ།། རྡོ་ལ་ཉམས་ན་སྣོད་ལ་བསྟིམ།། མེ་ལ་ཉམས་ན་དྲོད་ལ་བསྟིམ།། ཤིང་ལ་ཉམས་ན་མདའ་ལ་བསྟིམ། ། རུས་ལ་ཉམས་ན་མདེའུ་ལ་བསྟིམ།། རླུང་ལ་ཉམས་ན་སྒྲོ་ལ་བསྟིམ།། མདངས་ལ་ཉམས་ན་དར་ལ་བསྟིམ།། སྐྱུག་མ་སྐུ་ཡི་ཕྱག་རྒྱ་ངང་སྲིང་ལ།། མདའ་ལྟོང་གསུང་གི་ཕྱག་རྒྱར་དཔང་སྟོད་ཅིག། མདེའུ་ཚེ་ཐུགས་ཀྱི་ཕྱག་རྒྱར་ངར་ཐོབ་ཅིག། འཆི་མེད་ཚེ་ཡི་དངོས་གྲུབ་སྩལ་དུ་གསོལ།། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནཱ་སརྦ་ཨརྠ་སཱའ་དྷ་ན་བཛྲ་ཨཱ་ཡུ་ཥེ་ཧཱུ~ཾ་ཨཱ།། ཧཱུ~ཾ་གཅིག་པ་རྩེ་གཅིག་ཐུགས་ཀྱི་རྒྱ། ། གཉིས་པ་ཐབས་དང་ཤེས་རབ་རྒྱ།། གསུམ་པ་སྐུ་གསུང་ཐུགས་ཀྱི་རྒྱ།། བཞི་པ་གར་མཁན་མཆོག་གི་རྒྱ།། ལྔ་པ་ཡེ་ཤེས་ལྔ་ཡི་རྒྱ།། དྲུག་པ་རྟ་མཆོག་དབང་གི་རྒྱ།། བདུན་པ་ཆོས་ཀྱི་དབྱིངས་ཀྱི་རྒྱ།། ཆོས་ཀྱི་དབྱིངས་སུ་ཚེ་སྦས་པས། ། དུས་གསུམ་སངས་རྒྱས་དགྲར་ལངས་ཀྱང།། དེ་ལ་གཟུང་ཞིང་བརྟག་ཏུ་མེད།། དེ་ལ་གསད་ཅིང་གཟུང་དུ་མེད།། དེ་ལ་དབྲི་ཞིང་བསྐོལ་དུ་མེད།། གཟུགས་མེད་ལྷ་མོ་བཞི་ཡི་རྒྱས་འདེབས་སོ། ། འདི་ལ་ཚེ་ཡི་དཔལ་བསྐྱེད་དོ།། འདི་ལ་སྲོག་གི་མདངས་གསོལ་ལོ།། ཚེ་དབང་གསོལ་ཅིག་སྲོག་ཀྱང་ཐོབ།། དབང་ཆེན་སྐུར་ལ་བྱིན་ཕོབ་ཅིག། ཨཱ་ཡུརྫྙཱ་ན་བྷྲཱུཾ་བྷྲཱུཾ། དེ་ནས་སྨོན་ལམ་གདབ་པ་ནི།། ན་མོ། དུས་གསུམ་རྒྱལ་བ་ཀུན་གྱི་དབང་བསྐུར་བའི།། བཅོམ་ལྡན་མགོན་པོ་ཚེ་དཔག་མེད།། སྐུ་གསུང་ཐུགས་ཀྱི་བྱིན་བརླབས་བུམ་པ་འདི།། རིན་ཆེན་གཞལ་ཡས་ཁང་ལ་གྲུབ་པར་ཤོག། རྒྱལ་བ་ཡབ་ཡུམ་རྣམས་ཀྱིས་བྱིན་གྱིས་བརླབས་པ་ཡི། ། ཡེ་ཤེས་ལྔ་ཡི་བྱིན་བརླབས་ཚེ་བུམ་འདི།། སྐྱེ་མེད་སྐུ་གསུང་ཐུགས་སུ་གྲུབ་པར་ཤོག། བཀྲ་ཤིས་ལྷ་མོ་རྣམས་ཀྱིས་བྱིན་བརླབས་པས།། བཀྲ་ཤིས་རྫས་བརྒྱད་དངོས་སུ་ཚང་བར་ཤོག། ཐུགས་ཀྱི་དཔལ་བེའུ་ལྟ་བུར་བྱིན་བརླབས་པས།། སྐྱེ་མེད་ཡེ་ཤེས་ལྟ་བུར་གྲུབ་པར་ཤོག། ཕྱག་མཚན་རྡོ་རྗེ་ལྟ་བུར་བྱིན་བརླབས་པས།། འཆི་མེད་རྡོ་རྗེ་ལྟ་བུར་གྲུབ་པར་ཤོག། བླ་མེད་སྐུ་གསུང་ཐུགས་སུ་བྱིན་བརླབས་པས། ། མི་འགྱུར་གཡུང་དྲུང་ལྟ་བུར་ཐོབ་པར་ཤོག། སྐྱེ་མེད་བྱང་ཆུབ་སེམས་སུ་བྱིན་བརླབས་པས།། མི་ནུབ་རྒྱལ་མཚན་ལྟ་བུར་འགྲུབ་པར་ཤོག། ཚེ་བུམ་གཞལ་ཡས་ཁང་དུ་བྱིན་བརླབས་པས། ། བདེ་ཆེན་གཞལ་ཡས་ཁང་དུ་གྲུབ་པར་ཤོག། ཕྱག་རྒྱ་ཆེན་པོ་རྣམས་ཀྱིས་བྱིན་བརླབས་པས།། ཡེ་ཤེས་ལྷ་ཚོགས་ཕྱག་རྒྱར་གསལ་བར་ཤོག། ཚེ་འབྲས་རྡོ་རྗེའི་སྙིང་པོར་བྱིན་བརླབས་པས།། འགྱུར་བ་མེད་པར་ལྷུན་གྱིས་གྲུབ་པར་ཤོག། དགེ་བའི་བཤེས་གཉེན་རྣམས་ཀྱིས་བྱིན་བརླབས་པས།། ཡེ་ཤེས་ལྷ་རྣམས་མཐུ་དང་ལྡན་པར་ཤོག། ཁམས་གསུམ་འགྲོ་བའི་ཕྲིན་ལས་རྫོགས་མཛད་པའི།། འབྲས་བུ་སྐུ་གསུང་ཐུགས་སུ་གྲུབ་པར་ཤོག། འབྱུང་བ་ཡེ་ཤེས་ལྔ་རུ་བྱིན་བརླབས་པས།། འདུ་འབྲལ་མེད་པར་ལྷུན་གྱིས་གྲུབ་པར་ཤོག། ཚེ་བུམ་གང་ཞིག་རྒྱས་པ་བཞིན།། བདག་ཅག་རྒྱུ་སྦྱོར་ཡོན་བདག་གི། ཚེ་དང་བསོད་ནམས་དབང་ཐང་དང། ། ལོངས་སྤྱོད་རྒྱས་ཤིང་གང་གྱུར་ཅིག། ཚེ་བུམ་དབང་བསྐུར་བྱིན་བརླབས་པས།། བདག་ཅག་རྒྱུ་འབྱོར་ལུས་ངག་ཡིད།། བདེ་གཤེགས་སྐུ་གསུང་ཐུགས་སུ་གྲུབ་པར་ཤོག། འབྲས་བུ་གཉེན་དང་བྲན་འཁོར་རྣམས། ། ཕོ་མོ་ཚེ་རིང་ནད་མེད་ཤོག། བུམ་པ་འདི་ཡི་ལོངས་སྤྱོད་རྣམས།། སྤྱད་ནས་ཟད་ཅིང་སྟོངས་པ་བཞིན།། རྒྱུ་འབྱོར་ཡོན་གྱི་བདག་པོ་ཡི།། ཚེ་དང་བསོད་ནམས་དབང་ཐང་ལ།། གནོད་བྱེད་བར་དུ་གཅོད་པ་ཡི། ། བགེགས་དང་ལོག་འདྲེན་ཟད་སྟོངས་ཤོག། ཨོཾ་ཨཱ་ཡུརྫྙཱ་ན་བིནྡུ་བྷྲཱུཾ་རུ་རུ་སྤུ་རུ་ཛྭ་ལ་ཏིཥྛ་སིདྡྷི་ལོ་ཙ་ནཱ། སརྦ་ཨརྠ་སཱ་དྷ་ནི་ཚེ་བྷྲཱུཾ་གཡུ་བྷྲཱུཾ་གཡུ་ཚེ་བྷྲཱུ།ུ0f7ེ་བཛྲ་ཨཱ་ཡུ་ཥེ་ཧཱུ~ཾ་ཨ། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེའི་ཆོ་ག་ཉིན་གཅིག་པའི་བྱ་ཐབས་ཀྱི་ལེའུ་སྟེ་བདུན་པའོ།།།། དེ་ནས་ཡང་བཅོམ་ལྡན་འདས་ཀྱིས། ཁ་སྐོང་ཚེའི་ཆོ་ག་འདི་གསུངས་སོ།། སྣོད་བཟང་ནང་དུ་ཚེ་འབྲས་བཟང་པོ་དང། ། ཚེ་ཆང་བལྟམ་ནས་ཚེ་ཡི་བར་ཆོད་བསྲུང།། ལུས་སེམས་མཉམ་བཞག་རིག་པའི་རྣལ་འབྱོར་ལ།། དེ་བཞིན་ཀུན་ཏུ་སྣང་དང་རྒྱུ་ཡི་གསུམ།། འཕྲོ་འདུས་བྷྲཱུཾ་ལས་གཞལ་ཡས་ཁང།། པདྨ་འདབ་བཞི་སྒོ་དང་བཅས། ། རིན་ཆེན་ཁྲི་དང་རྨ་བྱ་ཉི་ཟླ་པད།། སྔགས་ལས་བསྐྱེད་པའི་སྣང་མཐའ་མདོག་དམར་བ།། གཡས་པ་པདྨའི་སྡོང་པོ་ཐུགས་ཀར་འཛིན།། གཡོན་པ་པདྨའི་སྡོང་པོ་སྐུ་ལ་བརྟེན།། ཐུགས་ཀྱི་དཔལ་བེའུ་སྔགས་དང་བཅས། ། མ་ཆགས་མཁའ་དབྱིངས་དག་པའི་ཡུམ་དང་འཁྲིལ།། ཐུགས་ཀར་རྒྱ་གྲམ་ཉི་ཟླའི་གའུ་ནང།། ནརྀ་དང་ཨཱ་ཡུཿགསང་བའི་སྔགས་དང་ལྡན།། ཨོཾ་ཤཱུནྱཱ་ཏཱཛྙཱ་ན་ཨཱ། ཨོཾ་དྷརྨ་ནི་ཨ། ཨོཾ་ཙིཏྟ་ཧྲཱིཿབྷྲཱུཾརཏྣ་བྷྲཱུཾ། ཨོཾ་བཛྲ་དྷརྨ་ཧྲཱིཿ། ཨཱདྱ་ནུད་པན་ན། མཱཾ་མོ་ཧ་ར་ཏི་ཛ། བཛྲ་དྷརྨ་ཧྲཱི། ནརྀ་ཨཱ་ཡུརྫྙཱ་ན་བི་ན་དུ་བྷྲཱུཾ། ཧཱུ~ཾ་བཅོམ་ལྡན་མགོན་པོ་བྱམས་ལྡན་ཚེ་དཔག་མེད།། མཁའ་དང་མཉམ་པའི་སྐུ་མངའ་བ།། མཉམ་ཉིད་སྐུ་མཆོག་དེ་ལ་ཕྱག་འཚལ་ལོ། ། གསུང་རབ་དམ་པ་སྤྲོས་དང་བྲལ།། ཡི་གེ་མེད་ཅིང་སྒྲ་སྤངས་པ།། མཉམ་ཉིད་གསུང་མཆོག་དེ་ལ་ཕྱག་འཚལ་ལོ།། ཡང་དག་རྡོ་རྗེའི་ཐུགས་འཆང་བ།། ཚེ་དཔག་མེད་ཀྱི་དངོས་གྲུབ་སྩོལ་མཛད་པ། ། མཉམ་ཉིད་ཐུགས་མཆོག་དེ་ལ་ཕྱག་འཚལ་ལོ།། དེ་ནས་བདག་གཞན་ཚེ་ཉམས་ཀྱིས།། ཡི་གེའི་སྤྲུལ་པ་བཏང་བྱས་ནས།། རི་རབ་རྩེ་ན་གནས་པ་ཡི།། ལྷ་ཡི་བུ་ཡི་ཚེ་ཚད་ནི།། བརྒྱ་ཁྲི་བཞི་སྟོང་ཐུབ་པའི་ཚེ། ། རྒྱ་མཚོའི་གཏིང་ན་གནས་པའི་ཚེ།། དམྱལ་བའི་ཀླད་རྒྱས་སྦས་པའི་ཚེ།། གླིང་བཞི་མི་ཡི་ཚེ་རྣམས་ཀུན།། ཨ་ནརྀ་སུ་ཏྲི་པྲེ་དུས་ཚེ་ཕྲོགས་ནས།། མུག་ཏ་ཧོ་ཡིས་དྲལ་བྱས་ནས།། ཛྙཱ་ན་ཙཀྲས་ཁ་ཕྱེས་ནས། ། ཨཱ་ཀརྵ་ཡ་བཟླས་བརྗོད་པས།། ལྕགས་ཀྱུ་མ་ཡིས་དྲངས་ནས་ནི།། ཨ་བི་ཤ་སཾ་ཧ་ར་ཎ་ཧཱུ~ཾ། ཞེས་བརྗོད་ཅིང་གཙོ་བོ་བྱང་ཆུབ་སེམས།། བཛྲ་སྤོཊ་བཾ་གྱིས་བཅིངས།། ཨོཾ་བྷ་ག་ཝཱ་ཏི་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནཱ། སརྦ་ཨརྠ་སཱ་དྷ་ན་སྭཱ་ཧཱ། བཅོམ་ལྡན་མགོན་པོ་ཚེ་དཔག་མེད།། མཁའ་དང་མཉམ་པའི་སྐུ་མངའ་བ།། མཉམ་ཉིད་སྐུ་ལ་ཕྱག་འཚལ་ལོ།། མཁའ་དང་མཉམ་པའི་ཚེ་གསོལ་ཅིག། བཅོམ་ལྡན་མགོན་པོ་ཚེ་དཔག་མེད། ། སྒྲིབ་པའི་དྲི་མ་ཕྱིར་བསལ་ཏེ།། རྡོ་རྗེ་གསུང་བ་གསང་བའི་ཚེ།། རྫོགས་པའི་གསུང་ལ་ཕྱག་འཚལ་ལོ།། མཁའ་དང་མཉམ་པའི་ཚེ་གསོལ་ཅིག། བཅོམ་ལྡན་མགོན་པོ་ཚེ་དཔག་མེད། ། སྒྲིབ་པའི་དྲི་མ་ཕྱིར་བསལ་ཏེ།། རྡོ་རྗེ་ཐུགས་ཏེ་ཐུགས་འཆང་བ།། རྫོགས་པའི་ཐུགས་ལ་ཕྱག་འཚལ་ལོ།། མཁའ་དང་མཉམ་པའི་ཚེ་གསོལ་ཅིག། ཨོཾ་ཨཱ་ཡུརྫྙཱ་ན་ཚེ་བྷྲཱུཾ། རྡོ་རྗེ་ཆོས་ནི་གཙོར་གཟུང་བའི།། ཧྲཱིཿ་ལས་འོད་འཕྲོས་འོག་མིན་གནས། ། ཡུམ་ནི་ཨ་ར་མཱ་མ་ཀཱི།། མགོན་པོ་དམར་སེར་ཞལ་གཅིག་པ།། ཕྱག་བཞི་གཡས་ཀྱི་དང་པོ་ན།། ཨ་ཀྵོ་མན་དྷ་རི་བསྣམས་ཏེ།། གཡོན་པའི་ཕྱག་ནི་སྐྱབས་སྦྱིན་ཏེ།། མཐའ་གཉིས་བདུད་རྩིའི་བུམ་པ་བསྣམས། ། མཐེ་བོང་ཕྲག་ནས་བདུད་རྩི་འཛག། ཡུམ་ནི་ཞལ་གཅིག་ཕྱག་གཉིས་པ།། གཡས་ཀྱི་ལྕགས་ཀྱུས་ཚེ་དྲོངས་ཏེ།། གཡོན་གྱི་བུམ་པའི་ནང་དུ་བསགས།། ཤར་ཕྱོགས་ཟླ་འོད་ཞིང་ཁམས་ནས། ། དཀར་མོ་སྤྱན་ཕྲག་རིགས་ཀྱི་ཡུམ།། ཕྱག་ན་ཚེ་དར་དཀར་པོ་བསྣམས།། འགྲོ་བ་ཡོངས་ཀྱི་ཚེ་ལ་མངའ་མཛད་མ།། རྡོ་རྗེ་ཚེ་མཆོག་དགུགས་པའི་ལས་མཛོད་ཅིག། ལྷོ་ཕྱོགས་རིན་ཆེན་ཞིང་ཁམས་ནས། ། སེར་མོ་སྤྱན་ཕྲག་རིགས་ཀྱི་ཡུམ།། ཕྱག་ན་ཚེ་དར་སེར་པོ་བསྣམས།། འགྲོ་བ་ཡོངས་ཀྱི་ཚེ་ལ་མངའ་མཛད་མ།། རྡོ་རྗེ་ཚེ་མཆོག་འགུགས་པས་ལས་མཛོད་ཅིག། ནུབ་ཕྱོགས་པདྨའི་ཞིང་ཁམས་ནས། ། དམར་མོ་སྤྱན་ཕྲག་རིགས་ཀྱི་ཡུམ།། ཕྱག་ན་ཚེ་དར་དམར་པོ་བསྣམས།། འགྲོ་བ་ཡོངས་ཀྱི་ཚེ་ལ་མངའ་མཛད་མ།། རྡོ་རྗེ་ཚེ་མཆོག་འགུགས་པའི་ལས་མཛོད་ཅིག། བྱང་ཕྱོགས་ལས་ཀྱི་ཞིང་ཁམས་ནས། ། ལྗང་གུ་སྤྱན་ཕྲག་རིགས་ཀྱི་ཡུམ།། ཕྱག་ན་ཚེ་དར་ལྗང་གུ་བསྣམས།། འགྲོ་བ་ཡོངས་ཀྱི་ཚེ་ཡི་ལས་མཛད་མ།། རྡོ་རྗེ་ཚེ་མཆོག་འགུགས་པའི་ལས་མཛོད་ཅིག། ཕོ་ཉས་ཚེ་རྣམས་དྲོངས་ནས་ནི།། ཡབ་ཡུམ་ཐུགས་ལ་བསྟིམ་པར་བྱ། ། ས་མ་ཡ་ཧོ། ས་མ་ཡ་སྟྭཾ། རཱ་གོུ྅ཧཾ། རཱ་ག་ཡཱ་མི། མཁའ་ནས་འོད་ཟེར་འཕྲོས་པ་ཡིས།། རི་རབ་རྩེ་ནས་གླིང་གཞིའི་གནས།། རྒྱ་མཚོའི་གཏིང་ན་གནས་པ་སོགས།། སླར་འདུས་ཡུམ་གྱི་བྷ་གར་ཐིམ། ། གྱེན་དུ་དྲངས་ལ་བདག་ལུས་རྒྱས།། ཨོཾ་པུཎྱེ་པུཎྱེ། མ་ཧཱ་པུཎྱེ། ཨཱ་ཡུཿཔུཎྱེ། ཨ་པ་ར་མི་ཏ་ཨཱ་ཡུརྫྙཱ་ན་སམྦྷ་རོ་པ་ཙི་ཏེ་སྭཱ་ཧཱ།། ཨོཾ་བྷྲཱུཾ། ཧཱུ~ཾ་བྷྲཱུཾ། ཏྲཾ་བྷྲཱུཾ། ཧྲཱི་བྷྲཱུཾ། ཧཱ་བྷྲཱུཾ། བཛྲ་ཨཱ་ཡུ་ཥེ་ཧཱུ~ཾ་ཨཱ། ཧཱུ~ཾ་རི་རབ་རྩེ་ནས་མཐུ་བསྟན་ཞིང།། ལྷ་ཀླུ་གནོད་སྦྱིན་རྡུལ་ཕབ་སྟེ།། འབྱུང་བ་རྣམས་ལ་མངའ་མཛད་མ།། སྒེག་མོ་དེ་ནི་ཡིད་འཕྲོག་མ།། ཐང་གཅིག་ཡུད་ཙམ་དགོངས་པ་ནི།། པདྨའི་གདན་ལ་གཞལ་ཡས་ཁང། ། གཙོ་བོ་རྣམས་ལ་མཆོད་པའི་ཕྱིར།། དགའ་བའི་མདངས་ཀྱིས་གཤེགས་སུ་གསོལ།། ཉི་འོད་དཀར་པོའི་གཞལ་ཡས་ནས།། མཐིང་ག་སྤྱན་ཕྲག་རིགས་ཀྱི་ཡུམ།། རྡོ་རྗེ་ཆེན་མོ་ཡིད་འཕྲོག་མ།། གཙོ་བོ་རྣམས་ལ་མཆོད་པའི་ཕྱིར། ། རྡོ་རྗེ་འཁོར་དང་གཤེགས་སུ་གསོལ།། བཻཌཱུར་སྔོན་པོའི་ཞིང་ཁམས་ནས།། མཐིང་ག་སྤྱན་ཕྲག་རིགས་ཀྱི་ཡུམ།། རིན་ཆེན་གཙོ་མོ་ཡིད་འཕྲོག་མ།། གཙོ་བོ་རྣམས་ལ་མཆོད་པའི་ཕྱིར། ། རིན་ཆེན་འཁོར་བཅས་གཤེགས་སུ་གསོལ།། པདྨ་དམར་པོའི་དཀྱིལ་འཁོར་ནས།། དམར་མོ་སྤྱན་ཕྲག་རིགས་ཀྱི་ཡུམ།། ཐང་གཅིག་ཡུད་ཙམ་མངགས་ནས་ཀྱང།། པདྨའི་གདན་ལ་གཞལ་ཡས་ཁང།། མུན་ཛ་ལིང་ག་རལ་ག་ཅན། ། གཙོ་བོ་རྣམས་ལ་མཆོད་པའི་ཕྱིར།། འདུལ་སྐལ་བཞིན་དུ་གཤེགས་སུ་གསོལ།། ཟླ་འོད་ལྗང་གུའི་དཀྱིལ་འཁོར་ནས།། ལྗང་གུ་སྤྱན་ཕྲག་རིགས་ཀྱི་ཡུམ།། ཐང་གཅིག་ཡུད་ཙམ་མངགས་ནས་ཀྱང། ། པདྨའི་གདན་ལ་གཞལ་ཡས་ཁང།། མུན་ཛ་ལིང་གི་རལ་ག་ཅན།། གཙོ་བོ་རྣམས་ལ་མཆོད་པའི་ཕྱིར།། ཚེ་ཡི་ལྷ་མོ་གཤེགས་སུ་གསོལ།། ཨོཾ་བྷྲཱུཾ་ཨཱ་ཡུརྫྙཱ་ན་ཨ་བིནྡྷུ་བྷྲཱུཾ་ཛྙཱ་ན་ཨ་བ་ལོ་ཀི་ཏེ། ས་མནྟ་སྥ་ར་ཎ། རསྨི་བྷ་ཝ་ཏི། ཨཱ་ཡུརྫྙཱ་ན། དུ་རུ་དུ་རུ་ཧྲྀ་ད་ཡ་ཧཱུ~ཾ་བྷྲཱུཾ། ཨོཾ་བྷྲཱུཾ། ཧཱུ~ཾ་བྷྲཱུཾ། ཏྲཱཾ་བྷྲཱུཾ། ཧྲཱི་བྷྲཱུཾ། ཧཱའ་བྷྲཱུཾ། ནརྀ་བྷྲཱུཾ། རྡོ་རྗེ་ཚེ་མཆོག་འགུགས་པའི་ཕོ་ཉ་ནི།། ཡེ་ཤེས་སྐར་ལྟར་འཁྲུགས་པའི་དཀྱིལ་འཁོར་ནས།། ཐུགས་རྗེ་ལྕགས་ཀྱུའི་འོད་ཟེར་འཕྲོས་པ་ཡིས། ། ཤར་ཕྱོགས་དྲི་ཟའི་འཇིག་རྟེན་མགོན་མཛོད་ཅིག། སྐུ་ལུས་དམར་པོ་བརྒྱ་བྱིན་བཞུགས་པ་ལ།། ལག་པ་ལྕགས་ཀྱུ་དམར་པོ་ཐོགས་པ་ནི།། བརྒྱ་བྱིན་འཁོར་བཅས་ལག་ནས་ཚེ་ཁུ་གཅིག། ཨིནྡྲ་ཡ་ཚེ་བྷྲཱུཾ་བྷྲཱུཾ། དྲང་སྲོང་མེ་ལྷའི་ལག་ནས་ཚེ་འགུགས་མ།། རྡོ་རྗེ་ཤང་ལང་ལག་ན་འཕྱར་བའི་མཆོག་ཁ་དོག་དམར་སེར་ལས་ནི་ཚེ་ཁུག་ཅིག། ཧྲིཿགྣ་ཡེ་བྷྲཱུཾ་བྷྲཱུཾ། གྲུལ་བུམ་འཇིག་རྟེན་གཤིན་རྗེའི་བདུད་སྤྲུལ་ནས། ། དཔའ་མགྱོགས་ཤུགས་ཀྱིས་རྒྱུགས་པའི་ཕོ་ཉ་ནི།། སྔོན་མོ་མགྱོགས་ལྡན་རིན་ཆེན་ཞགས་པ་མ།། གདུག་པ་གཤིན་རྗེའི་ལག་ནས་ཚེ་དྲོངས་ཤིག། ཡ་མ་ཡེ་ཚེ་བྷྲཱུཾ་བྷྲཱུཾ། སྲིན་པོ་གདན་འབྲལ་ལག་ནས་ཚེ་འགུགས་མ། ། སྐུ་མདོག་སེར་སྐྱ་ཉི་མ་བུ་དོན་རིགས།། རྡོ་རྗེ་ཅོད་པན་མང་པོ་གཤིབས་ནས་ནི།། སྲིན་པོ་ཁང་བུ་རྡུལ་དུ་འཇོམས་པའི་ཚེ།། དབྱར་གྱི་སྤྲིན་ཕུང་འཁྲིགས་པའི་ཁྲོ་གཉེར་འདྲ།། ཞེས་སྡང་སྲིན་པོའི་ལག་ནས་ཚེ་ཁུག་ཅིག། ནི་རི་ཏི་ཡེ་ཚེ་བྷྲཱུཾ་བྷྲཱུཾ། ནུབ་ཕྱོགས་ཀླུ་ཡི་འཇིག་རྟེན་རབ་འབྱམས་ནས།། འགྲོ་བའི་ཚེ་སྲོག་སྡུད་མ་ཀླུ་ཡི་རིགས།། ཁ་དོག་མེ་ལྟར་འབར་བའི་མདོག་ཅན་ནི།། ཐུགས་རྗེས་ཀློག་བྱེད་མཁོར་ལོ་བསྣམས་པ་ནི། ། ཀླུ་ཡི་གནས་ནས་ཚེ་དྲོངས་ཕོ་ཉ་ཚེ་མཆོག་མ།། ནཱ་ག་བ་རུ་ཎ་ཡེ་ཚེ་བྷྲཱུཾ་བྷྲཱུཾ།། རླུང་ལྷ་ཕྱོགས་སྐྱོང་ལ་གནས་ཚེ་འགུགས་མ།། ཁྲོ་མོ་སྐུ་མདོག་སྔོ་སྐྱ་ཐལ་བའི་མདོག། རྡོ་རྗེ་རྒྱལ་མཚན་ལག་ན་འཕྱར་བའི་མཆོག། རླུང་ལྷའི་ཁྱིམ་ནི་རྡུལ་དུ་བརླག་ནས་ཀྱང།། རླུང་ལྷ་འཁོར་བཅས་ལག་ནས་ཚེ་དྲོངས་ཤིག། བཱ་ཡ་བེ་ཚེ་བྷྲཱུཾ་བྷྲཱུཾ། བྱང་ཕྱོགས་གནོད་སྦྱིན་ལག་ནས་ཚེ་འགུགས་མ།། ཁ་དོག་ལྗང་གུ་འབར་བའི་སྐུ་མདོག་ལ། ། རལ་གྲི་ཨུཏྤལ་འདྲ་དྲངས་ནས་ཀྱང།། གནོད་སྦྱིན་འཁོར་བཅས་ལག་ནས་ཚེ་དྲོངས་ཤིག། ཀུ་བེ་རཱ་བ་ཚེ་བྷྲཱུཾ་བྷྲཱུཾ། བགེགས་ཀྱི་རྒྱལ་པོའི་ལག་ནས་ཚེ་འགུགས་མ།། མདོག་ལྡན་སྣ་ཚོགས་ཁ་དོག་ལྗང་གུའི་རིགས། ། དབུ་མང་སྤྱན་ཅན་རྫུ་འཕྲུལ་གདུག་པའི་ཕྱག། རིན་ཆེན་མཚོན་ཆ་སྣ་ཚོགས་དྲིལ་ནས་ནི།། བགེགས་ཀྱི་ཁྱིམ་རྣམས་ཐལ་བར་བརླག་ནས་ཀྱང།། བི་ནཱ་ཡ་གའི་ལག་ནས་ཚེ་ཁུག་ཅིག། བི་ནཱ་ཡ་ཀཱ་ནཱན་ཚེ་བྷྲཱུཾ་བྷྲཱུཾ། ཉི་ཟླ་གཟའ་སྐར་ལག་ནས་ཚེ་འགུགས་མ།། ཁ་དོག་དམར་ལྗང་ཉི་ཟླའི་འཁོར་ལོ་འཕེན།། ཉི་མའི་ཁྱིམ་དང་ཟླ་བའི་གནས་རྣམས་དང།། ཉི་ཟླ་གཟའ་སྐར་ལག་ནས་ཚེ་ཁུག་ཅིག། སཱུརྱ་ཙནྡྲ་ཡ་ཚེ་བྷྲཱུཾ་བྷྲཱུཾ། ས་འོག་ས་འཛིན་ལག་ནས་ཚེ་འགུགས་མ།། ཡེ་ཤེས་ཏིང་འཛིན་ལྷག་པའི་སྤུ་གྲི་ཡིས།། ཕྱག་མཚན་སྤུ་གྲི་བསྣམས་པས་ཚེ་ཁུག་ཅིག། ནཱ་ག་པྲ་ཝེ་ཤཱ་ཡ་ཚེ་བྷྲཱུཾ་བྷྲཱུཾ། མུཀྟ་ཧོ་ཡིས་བཤིག་པས་རྡོ་རྗེ་གྱུར། ། རྡོ་རྗེ་ཉི་ཟླ་རྒྱ་གྲམ་གྱིས།། ནརྀ་ལ་བསྟིམ་ནས་སྦ་བར་བྱའོ།། ཨོཾ་པདྨཱནྟ་ཀྲྀ་ཏ་ཧྱ་གྲཱི་ཝ་ཨེ་ཀ་ཛ་ཏི་ཧུ་ལུ་ཧུ་ལུ་ཧཱུ~ཾ་བྷྱོ་ཧཱུ~ཾ། ཏ་ཀྲྀཏ་དམར་པོ་ཞལ་གཅིག་ཕྱག་གཉིས་པ།། ཀརྨ་རྒྱ་གྲམ་བསྣམས་ནས་ཡུམ་དང་འཁྲིལ། ། ཨ་ཀ་ཙ་ཏི་ཁ་ཊྭཱཾ་ཐོད་པ་བསྣམས།། ཐུགས་ཀར་ཚེ་དབང་བསྡུས་ནས་བསྲུང་བ་ཡིས།། སྟོང་པའི་དབྱིངས་སུ་ཚེ་སྦས་ནས།། ཆོས་ཀྱི་དབྱིངས་ནས་ཡེ་ཤེས་གསལ།། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེ་གཞན་གྱི་ཁ་སྐོང་གི་ལེའུ་སྟེ་བརྒྱད་པའོ།།།། དེ་ནས་བཅོམ་ལྡན་འདས་ཀྱིས་ཚེའི་ཆོ་ག་ཀུན་ལ་འགྲོ་བ་འདི་གསུངས་སོ།། ཚེ་བསྒྲུབ་ཁ་བསྐང་ཉིན་ཅིག་པའམ།། གང་ཡང་རུང་བའི་བྱ་བ་ནི། ། བུམ་པ་ཆང་བཀང་ཚེ་ཟན་བཅའ།། མདའ་དར་དམར་པོ་མེ་ལོང་ཐོགས།། རིགས་ལྔ་སོ་སོའི་སྙིང་པོའམ།། སྤྱི་བསྡུས་བགྲངས་ལ་ཚེ་བུམ་བསྟིམ།། དེ་ནས་ཚེ་ནི་དགུག་པར་བྱ།། ཨོཾ་པུཎྱེ་པུཎྱེ། མ་ཧཱ་པུཎྱེ། ཨ་པ་རི་མི་ཏ་ཨཱ་ཡུརྫྙཱན། སམྦྷ་རོ་པ་ཙི་ཏ་སྭཱ་ཧཱ། ཧཱུ~ཾ་བཅོམ་ལྡན་མགོན་པོ་ཚེ་དཔག་མེད།། སྒྲིབ་པའི་དྲི་མ་མ་ལུས་སེལ།། མཁའ་དང་མཉམ་པའི་སྐུ་མངའ་བ།། མཉམ་ཉིད་སྐུ་ལ་ཕྱག་འཚལ་ལོ།། བཅོམ་ལྡན་མགོན་པོ་ཚེ་དཔག་མེད། ། གསུང་མཆོག་རྣམ་པར་དག་པའི་གསུང།། མཉམ་ཉིད་གསུང་ལ་ཕྱག་འཚལ་ལོ།། བཅོམ་ལྡན་མགོན་པོ་ཚེ་དཔག་མེད།། ཐུགས་མཆོག་རྣམ་པར་མི་རྟོག་ཐུགས།། མཁའ་དང་མཉམ་པའི་ཐུགས་མངའ་བ། ། མཉམ་ཉིད་ཐུགས་ལ་ཕྱག་འཚལ་ལོ།། ཨོཾ་བྷུ་དྡྷ་ལོ་ཙ་ནཱ་ཨཱ་ཡུ་ཥེ་ཨོཾ། བཛྲ་ལོ་ཙ་ནཱ་ཡུ་ཥེ་ཧཱུ~ཾ། རཏྣ་ལོ་ཙ་ནཱ་ཨཱ་ཡུ་ཥེ་སྭ། པདྨ་ལོ་ཙ་ནཱ་ཨཱ་ཡུ་ཥེ་ཧྲཱིཿ། ཀརྨ་ལོ་ཙ་ནཱ་ཨཱ་ཡུ་ཥེ་ཨཱ། ཧཱུ~ཾ་ནམ་མཁའི་དབྱིངས་ཕྱུག་མ་ནི་ཡེ་ནས་རྣམ་པར་དག། རྡོ་རྗེ་དབྱིངས་ཕྱུག་མ་ནི་ཡེ་ནས་སྐྱེ་ཤི་མེད།། རིན་ཆེན་དབྱིངས་ཕྱུག་མ་ནི་དགོས་འདོད་རེ་བ་སྐོངས།། པདྨ་དབྱིངས་ཕྱུག་མ་ནི་འཛིན་མེད་ཆགས་དང་བྲལ།། ལས་ཀྱི་དབྱིངས་ཕྱུག་མ་ནི་མངོན་སྤྱོད་ཕྲིན་ལས་མཛོད། ། དབྱིངས་ཕྱུག་ཆེན་མོ་ལྔ་རྣམས་ཀྱིས།། རྡོ་རྗེ་ཚེ་ཡི་དངོས་གྲུབ་སྩོལ།། ཨོཾ་བཛྲ་ཨཱ་ཡུ་ཥེ་ཨ། ཧཱུ~ཾ་ཤར་གྱི་ཕྱོགས་ནས་ཚེ་འགུགས་མ།། གསང་བའི་ལྷ་མོ་རྒྱས་འདེབས་མ། ། རིགས་ཀྱི་ལྷ་མོ་སངས་རྒྱས་སྤྱན།། ཕྱག་རྒྱའི་ལྷ་མོ་ལཱ་སྱ་མ།། མཆོད་པའི་ལྷ་མོ་དྷཱུ་པེ་མ།། འགུགས་པའི་ལྷ་མོ་ལྕགས་ཀྱུ་མ།། ཚེ་བདག་ཆེན་མོ་ཁྱེད་རྣམས་ཀྱིས།། ཤར་ཕྱོགས་དྲི་ཟའི་ལག་ནས་ཚེ་དྲོངས་ལ། ། ཤར་ལྷོ་མེ་ལྷའི་ལག་ནས་དཔལ་སྐྱོབས་ཤིག། བཛྲ་ཨཾ་ཀུ་ཤ་ཛཿ། ལྷོ་ཡི་ཕྱོགས་ནས་ཚེ་འགུགས་མ།། གསང་བའི་ལྷ་མོ་ཟ་བྱེད་མ།། རིགས་ཀྱི་ལྷ་མོ་མཱ་མ་ཀཱི། ཕྱག་རྒྱའི་ལྷ་མོ་མཱ་ལེ་མ།། མཆོད་པའི་ལྷ་མོ་པུཥྤེ་མ། ། འཆིང་བའི་ལྷ་མོ་ཞགས་པ་མ།། ཚེ་བདག་ཆེན་མོ་ཁྱེད་རྣམས་ཀྱིས།། ལྷོ་ཕྱོགས་གཤིན་རྗེའི་ལག་ན་ཚེ་དྲོངས་ཤིག། ལྷོ་ནུབ་སྲིན་པོའི་ལག་ནས་དཔལ་སྐྱོབས་ཤིག། རཏྣ་པཱ་ཤ་ཧཱུ~ཾ། ནུབ་ཀྱི་ཕྱོགས་ནས་ཚེ་འགུགས་མ། ། གསང་བའི་ལྷ་མོ་ཚེ་འཕེལ་མ།། རིགས་ཀྱི་ལྷ་མོ་གོས་དཀར་མོ།། ཕྱག་རྒྱའི་ལྷ་མོ་གཱིརྟི་མ།། མཆོད་པའི་ལྷ་མོ་ཨཱ་ལོ་ཀེ།། སྡོམ་པའི་ལྷ་མོ་ལྕགས་སྒྲོག་མ།། ཚེ་བདག་ཆེན་མོ་ཁྱེད་རྣམས་ཀྱིས། ། ནུབ་ཕྱོགས་ཀླུ་དབང་ལག་ནས་ཚེ་དྲོངས་ལ།། ནུབ་བྱང་རླུང་ལྷའི་ལག་ནས་དཔལ་སྐྱོབས་ཤིག། པདྨ་སྥོཊ་བཾ། བྱང་གི་ཕྱོགས་ནས་ཚེ་འགུགས་མ།། གསང་བའི་ལྷ་མོ་རྨོངས་བྱེད་མ།། རིགས་ཀྱི་ལྷ་མོ་དམ་ཚིག་སྒྲོལ། ། ཕྱག་རྒྱའི་ལྷ་མོ་ནཱིརྟི་མ།། མཆོད་པའི་ལྷ་མོ་གྷནྡྷེ་མ།། འབེབས་པའི་ལྷ་མོ་དྲིལ་བུ་མ།། ཚེ་བདག་ཆེན་མོ་ཁྱེད་རྣམས་ཀྱིས།། བྱང་ཕྱོགས་གནོད་སྦྱིན་ལག་ནས་ཚེ་དྲོངས་ལ།། བྱང་ཤར་དབང་ལྡན་ལག་ནས་དཔལ་སྐྱོབས་ཤིག། ཀརྨ་གྷཎྜེ་ཧོ། དེ་ནས་ཚེ་གཞན་དུ་ཡར་བ་དང། འཐོར་བ་དང། ལྡེག་པ་རྣམས་བཀུག་ནས་བུམ་པར་བསྟིམ་པ་ནི། ཧཱུ~ཾ་ཨཱ་ཡུརྫྙཱ་ན་ཚེ་ཡི་མཆོག། ས་ལ་ཉམས་ན་གསེར་ལ་བསྡུ།། ཆུ་ལ་ཉམས་ན་ཆང་ལ་བསྡུ། ། ཤིང་ལ་ཉམས་ན་མར་ལ་བསྡུ།། རྩི་ལ་ཉམས་ན་སྦྲང་ལ་བསྡུ།། འབྲུ་ལ་ཉམས་ན་ཏིལ་ལ་བསྡུ།། འབྲུ་སྣ་སྙིང་པོ་སྣ་ལྔ་ཡིས།། སྣ་ལྔ་དག་ཏུ་བྱིན་གྱིས་རློབས།། རྣལ་འབྱོར་ཚེ་ལ་བར་ཆད་མེད། ། རྡོ་རྗེ་ཚེ་ཡི་དབང་བསྐུར་ཏེ།། ཇི་སྙེད་སངས་རྒྱས་ཐམས་ཅད་ཀྱི།། ནམ་མཁའ་གསང་བ་གསུམ་ལས་བྱུང།། ནམ་མཁའི་རིགས་ཀྱི་དབང་བསྐུར་བས།། དབང་བསྐུར་ཆེན་པོ་དམ་པ་སྦྱིན།། ཨོཾ་བྷུདྡྷ་ཀཱ་ལ་ཤ་ཨོཾ། བུདྡྷ་ལོ་ཅན་ཨ་བྷི་ཥིཉྩ་ཨཱ+ོཾ། ཇི་སྙེད་སངས་རྒྱས་ཐམས་ཅད་ཀྱིས།། རྡོ་རྗེ་གསང་བ་གསུམ་ལས་བྱུང།། རྡོ་རྗེ་རིགས་ཀྱི་དབང་བསྐུར་བས།། དབང་བསྐུར་ཆེན་པོ་དམ་པ་སྦྱིན།། ཧཱུ~ཾ་བཛྲ་ཀཱ་ལ་ཤ་ཧཱུ~ཾ། བཛྲ་ལོ་ཙ་ན་ཨ་བྷི་ཥིཉྩ་ཧཱུ~ཾ། ཇི་སྙེད་སངས་རྒྱས་ཐམས་ཅད་ཀྱི།། རིན་ཆེན་གསང་བ་གསུམ་ལས་བྱུང།། རིན་ཆེན་རིགས་ཀྱི་དབང་བསྐུར་བས།། དབང་བསྐུར་ཆེན་པོ་དམ་པ་སྦྱིན།། སྭཱ་རཏྣ་ཀཱ་ལ་ཤ་སྭ། རཏྣ་ལོ་ཙ་ན་ཨ་བྷི་ཥིཉྩ་ཏྲཱཾ། ཇི་སྙེད་སངས་རྒྱས་ཐམས་ཅད་ཀྱི།། པདྨ་གསང་བ་གསུམ་ལས་བྱུང།། པདྨ་རིགས་ཀྱི་དབང་བསྐུར་བས།། དབང་མཆོག་ཆེན་པོ་དམ་པ་སྦྱིན།། ཨཾ་པདྨ་ཀཱ་ལ་ཤ་ཧྲི། པདྨ་ལོ་ཙ་ན་ཨ་བྷི་ཥིཉྩ་ཧྲི། ཇི་སྙེད་སངས་རྒྱས་ཐམས་ཅད་ཀྱི། ། ལས་རབ་གསང་བ་གསུམ་ལས་བྱུང།། ལས་ཀྱི་རིགས་ཀྱི་དབང་བསྐུར་བས།། དབང་མཆོག་ཆེན་པོ་དམ་པ་སྦྱིན།། ཧ་ཀརྨ་ཀ་ལ་ཤ། ཧ་ཀརྨ་ལོ་ཙ་ན་ཨ་བྷི་ཥིཉྩ་ཨ། ཞེས་གསུངས་སོ། ། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེ་བསྒྲུབ་ཆེན་པོ་བྱེད་རུང། ཁ་སྐོང་བྱེད་རུང། ཚེ་ཆོག་ཉིན་གཅིག་པ་བྱེད་རུང། གང་དགོས་སུ་བསྟན་པའི་ལེའུ་སྟེ་དགུ་པའོ།།།། དེ་ནས་བཅོམ་ལྡན་འདས་ཀྱིས་ལོངས་སྤྱོད་ཚོགས་ཀྱི་སྒྲུབ་པ་འདི་གསུངས་སོ། ། ལོངས་སྤྱོད་བསྒྲུབ་པའི་གཞི་ཆེན་ནི།། གསང་བ་དག་པའི་དཀྱིལ་འཁོར་ཡིན།། ལོངས་སྤྱོད་རྒྱུ་རྟགས་ཕུན་སུམ་ཚོགས།། དཀྱིལ་འཁོར་ཚེ་བཅས་བཀོད་པ་དང། ། གཞལ་ཡས་ཁང་དང་ཚེ་བསྐྱེད་དང།། སྤྱན་དྲང་དང་ནི་བསྟིམ་པ་དང།། ཚེ་ཡི་རང་བཞིན་འགུགས་པའི་ཐབས།། ཚེ་བཅིངས་བཟླས་བརྗོད་ཚེ་བརླན་དང།། དབང་བསྐུར་སྡོམ་དང་སྦ་བར་བྱ།། དམ་བཅའ་དོར་ན་བགེགས་དབང་འགྱུར། ། དགྲ་དབང་འགྱུར་དང་མཁའ་འགྲོས་གཙེས།། རྦོད་གཏོང་ཁར་བབ་དུས་མིན་འགྲོ།། ཚེ་ཉམས་པ་ཡི་རྒྱུ་རུ་བཤད།། གཟི་བརྗིད་མེ་དང་ལུས་ཉམས་བྲལ།། མདོག་སྐྱ་བྱ་བ་དོར་བ་དང། ། ཡིད་མི་བདེ་དང་བརྗིད་སྟོབས་མེད།། ཚེ་ཉམས་པ་ཡི་རྟགས་སུ་བཤད།། སྟོན་པ་རྒྱུ་དང་མན་ངག་མཁས།། གནས་ནི་བཀྲ་ཤིས་ཉམས་ཀྱང་དགའ།། ཡུམ་དང་ཀརྨ་གིང་གི་འཁོར།། ཡོ་བྱད་རྫས་རྣམས་ཚོགས་པ་དང། ། བཀྲ་ཤིས་དུས་ལ་འཇུག་པར་བྱ།། ཕྱི་མཚམས་དང་ནི་ཕྱི་བཤགས་དང།། ནང་མཚམས་དང་ནི་ཁ་སྐོང་བྱ།། དམ་སྲི་མནན་དང་སྒོ་བྱང་གདགས།། མ་ཏྲཾ་མནན་ཅིང་རྡོ་རྗེའི་འགྲོས།། མཚོན་ཆ་ཁྲོ་བོ་ཁྲག་འཐུང་རོལ། ། བདག་གི་ཚེ་ཡི་སྔོན་འགྲོར་བཤད།། དཀྱིལ་འཁོར་ཐིག་བཞི་ལིང་ཚེ་དགུ།། པདྨ་འདབ་བརྒྱད་གྲུ་ཆད་བཞི།། སྒོ་དང་བཅས་པ་བྲི་བར་བྱ།། དབུས་སུ་ཤེལ་གྱི་བུམ་པར་ནི།། དམར་སེར་བ་ཡི་འོ་མ་དང། ། ཅོང་ཞི་དཀར་པོ་རྣམ་གསུམ་དང།། དཀར་དང་མངར་གསུམ་འཆི་མེད་སྨན།། བྱང་ཆུབ་སེམས་སོགས་གཞག་པར་བྱ།། མུ་གེ་སེལ་བའི་འབྲུ་ལྔ་དང།། འདུ་བ་སེལ་བའི་སྨན་ལྔ་དང། ། ནོར་གྱི་དབྱིག་ལྡན་རིན་ཆེན་ལྔ།། སྙིང་པོ་ལྔ་དང་དྲི་ལྔ་བཤམས།། ཚེ་འབྲས་རྒྱ་གྲམ་རྒྱས་བཏབ་ནས།། མདའ་དང་བཅས་པ་བཞག་པ་ནི།། ལྷ་ཡི་གྲངས་དང་མཉམ་པར་བྱ།། མཆོད་པ་མང་པོས་ཡོངས་སུ་བསྐོར། ། རྟགས་གདབ་ལས་ནི་བསྐོས་ལ་གདབ།། རྟགས་དང་བྱིན་དབབ་བསྐང་བ་ལ།། ཏིང་འཛིན་གསུམ་ལས་བྱུང་བ་ཡི།། འབྱུང་བ་རིམ་བརྩེགས་གཞལ་ཡས་གདན།། དབུས་སུ་ཚེ་དཔག་མེད་པ་ཡབ་ཡུམ་གཉིས། ། ཕྱོགས་བཞིར་རིགས་ཀྱི་ཡུམ་བཞི་ལ།། མཚམས་སུ་གསང་བའི་ཡུམ་བཞི་ཉིད།། པདྨ་བརྒྱད་ལ་ལྷ་མོ་བརྒྱད།། སྒོ་བཞི་སྒོ་མ་བཀོད་ནས་ནི།། སྤྱན་དྲངས་པ་ཡི་རིམ་པ་བྱ།། ཚེ་ཡི་རང་བཞིན་ཡུམ་གྱི་མཁའ། ། རྡོ་རྗེ་རྒྱ་གྲམ་ཉི་ཟླའི་སྟེང།། རྒྱ་གྲམ་ལྟེ་བ་ནརྀ་བཅས་པ།། ཨཱ་ཡུརྫྙཱ་ན་བིན་དུ་བྷྲཱུཾ།། ཤིན་ཏུ་གསལ་བར་ཤེས་པར་བྱའོ།། ཧཱུ~ཾ་པདྨ་སྟོང་ལྡན་དབུས་ཀྱི་ཕོ་བྲང་ནས།། བཅོམ་ལྡན་གསུང་མཆོག་མགོན་པོ་ཚེ་དཔག་མེད། ། ཐུགས་ཀའི་དཔལ་བེའུ་ཟླ་གསང་གའུ་ནས།། རྣལ་འབྱོར་བྱང་ཆུབ་སེམས་ཀྱི་ཨཱ་ཡུཿདམར་པོ་འདི།། རྩེ་གཅིག་བདག་གིས་བསྒྲུབས་པའི་ཚེ་ལགས་ཀྱི།། བདག་ལ་བྱིན་གྱིས་རློབས་ཤིང་གཤེགས་སུ་གསོལ། ། ཤར་ཕྱོགས་མངོན་པར་དགའ་བའི་ཞིང་ཁམས་ནས།། རྡོ་རྗེ་རིགས་ཀྱི་ཡུམ་ཆེན་དབྱིངས་ཕྱུག་མ།། ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས།། རིན་ཆེན་རིགས་ཀྱི་ཡུམ་ཆེན་མཱ་མ་ཀཱི།། ནུབ་ཕྱོགས་བདེ་བ་ཅན་གྱི་ཞིང་ཁམས་ནས། ། པདྨ་རིགས་ཀྱི་ཡུམ་ཆེན་ན་བཟའ་དཀར།། བྱང་ཕྱོགས་རྣམ་དག་བཀོད་པའི་ཞིང་ཁམས་ནས།། ལས་ཀྱི་རིགས་ཀྱི་ཡུམ་ཆེན་དམ་ཚིག་སྒྲོལ།། དབུས་ཕྱོགས་བྱང་ཆུབ་སྙིང་པོའི་ཞིང་ཁམས་ནས། ། དེ་བཞིན་རིགས་ཀྱི་ཡུམ་ཆེན་སངས་རྒྱས་སྤྱན།། བདེ་བ་རྒྱས་འདེབས་རེག་པ་སྲ་བའི་ས།། བདེ་བ་ཚེ་འཕེལ་དེ་ནི་གཤེར་བའི་ཆུ།། བདེ་བ་ཟ་བྱེད་དེ་ནི་དྲོ་བའི་མེ།། བདེ་བ་རྨོངས་བྱེད་དེ་ནི་གཡོ་བའི་རླུང། ། ཐིག་ལེ་ནམ་མཁའ་བདེ་སྟོང་འབེབས་མཛད་མ།། རྡོ་རྗེ་ཚེ་ཡི་དངོས་གྲུབ་སྩལ་དུ་གསོལ།། རྡོ་རྗེ་སྒེག་མོ་དགའ་བའི་ཡེ་ཤེས་རོལ།། རིན་ཆེན་ཕྲེང་བ་མ་ནི་མཆོག་དགའ་ཉིད།། པདྨ་ཀླུ་ལེན་དགའ་བྲལ་ཡེ་ཤེས་སྦྱོང། ། ལས་ཀྱི་ཀརྨ་ལྷན་སྐྱེས་ཡེ་ཤེས་སྤྱོད།། རྡོ་རྗེ་བདུག་པ་མ་ནི་ཐིག་ལེ་གཡོ།། རིན་ཆེན་མེ་ཏོག་མ་ནི་ཐིག་ལེ་འབར།། པདྨ་མར་མེ་མ་ནི་ཐིག་ལེའི་འབེབས།། ལས་ཀྱི་དྲི་ཆབ་མ་ནི་ཐིག་ལེ་བརྟེན།། བྱམས་པའི་ལྕགས་ཀྱུ་མས་ནི་ཞི་བས་འགུགས། ། སྙིང་རྗེ་ཞགས་པ་མས་ནི་རྒྱས་པས་འཆིང།། དགའ་བའི་ལྕགས་སྒྲོག་མས་ནི་དབང་དུ་སྡུད།། བཏང་སྙོམས་དྲིལ་བུ་མས་ནི་དྲག་པོས་འབེབས།། ལྷ་མོ་ཉི་ཤུའི་ཐུགས་ཀྱི་དཔལ་བེའུ་ནས། ། རྣལ་འབྱོར་བྱང་ཆུབ་སེམས་ཀྱི་ཨཱ་ཡུཿདམར་པོ་འདི།། རྩེ་གཅིག་བདག་གི་བསྒྲུབས་པའི་ཚེ་ལགས་ཀྱི།། བདག་ལ་བྱིན་གྱིས་རློབས་ཤིང་གཤེགས་སུ་གསོལ།། ཨཱ་ཡུརྫྙཱ་ན་ས་མ་ཡ་ཛ། ཛཿཧཱུ~ཾ་བཾ་ཧོཿ། བཅོམ་ལྡན་མགོན་པོ་སྣང་མཐའ་ཚེ་དཔག་མེད།། སྐུ་མདོག་དམར་པོ་གཟི་བརྗིད་འབར།། ཕྱག་མཚན་པདྨ་འདབ་བརྒྱད་བསྣམས།། ཕྱག་མཚན་པདྨ་འདབ་བརྒྱད་ཀྱིས།། ཕྱོགས་བཅུ་ནམ་མཁའ་གང་བའི་བགེགས་བཅོམ་ནས། ། བཅོམ་ལྡན་དེང་འདིར་ཚེ་ཡི་དངོས་གྲུབ་སྩོལ།། འགྲོ་བ་ཡོངས་ཀྱི་ཚེ་ལ་མངའ་མཛད་ཀྱང།། འགྲོ་བ་ཡོངས་ཀྱི་ཚེ་ནི་མི་འགུགས་ཀྱིས།། བདག་ཅག་རྣལ་འབྱོར་མཆེད་ལྕམ་འཁོར་བཅས་ཀྱི། ། ཚེ་ལ་ཉམས་པ་མཆིས་ན་གསོ་རུ་གསོལ།། ཚེ་ལ་ཡོ་བ་མཆིས་ན་བསྲང་དུ་གསོལ།། ཚེ་ལ་ཡ་རབ་མཆིས་ན་དགུག་ཏུ་གསོལ།། ཚེ་ལ་ཆད་པ་མཆིས་ན་རྡོ་རྗེའི་མདུད་པ་མཛད་དུ་གསོལ།། ཤར་ཕྱོགས་དྲི་ཟའི་ལག་ནས་ཚེ་ཁུག་ལ། ། ཤར་ལྷོའི་མེ་ལྷའི་ལག་ནས་དྲོད་ཕྱུང་ཞིག། ལྷོ་ཕྱོགས་གཤིན་རྗེའི་ལག་ནས་སྲོག་སྐྱོབས་ལ།། ལྷོ་ནུབ་སྲིན་པོའི་ལག་ནས་ཤ་རྣམས་ཁུག། ནུབ་ཕྱོགས་ཀླུ་ཡི་ལག་ནས་དཔལ་ཕྲོག་ལ། ། ནུབ་བྱང་རླུང་ལྷའི་ལག་ནས་དབུགས་ཕྲོག་ཅིག། བྱང་ཕྱོགས་གནོད་སྦྱིན་ལག་ནས་ལོངས་སྤྱོད་ཁུག། བྱང་ཤར་དབང་ལྡན་ལག་ནས་ཟུངས་ཁྲག་དྲོངས།། སྟེང་ཕྱོགས་ཉི་ཟླའི་ལག་ནས་མདངས་ཕྲོག་ལ། ། འོག་ཕྱོགས་ས་བདག་ལག་ནས་གཟི་བརྗིད་ཁུག། ལྷ་དབང་བརྒྱ་བྱིན་ལག་ནས་སྲོག་ཁུག་ལ།། མ་ཡམས་དམུ་སྲིན་ལག་ནས་ཚེ་དྲོངས་ཤིག། བཙན་འདྲེ་བཙུན་འདྲེའི་ལག་ནས་ལོངས་སྤྱོད་ཁུག། ཐེའུ་རང་འགོང་པོའི་ལག་ནས་སྲོག་སྐྱོབས་ཤིག། ཡུལ་བདག་མ་སྲིན་ལ་གནས་དཔལ་ཁུག་ཅིག། ཚེ་ཁུག་སྲོག་སྐྱོབས་བཅོལ་པའི་ཕྲིན་ལས་མཛོད།། ཨོཾ་ཨཱ་ཡུརྫྙཱ་ན་ཚེ་བྷྲཱུཾ། སྲ་བྱེད་ས་ལ་དབང་བྱེད་སངས་རྒྱས་སྤྱན།། མཉེན་སྡུད་ཆུ་ལ་དབང་བྱེད་མཱ་མ་ཀཱི། ། སྲེག་བྱེད་མེ་ཡི་ཀུན་སྤྱོད་གོས་དཀར་མོ།། གཡོ་བྱེད་རླུང་གི་འགུགས་བྱེད་དམ་ཚིག་སྒྲོལ།། ཀུན་ཤོངས་གོ་འབྱེད་ནམ་མཁའི་དབྱིངས་ཕྱུག་མ།། རྡོ་རྗེ་སྒེག་མོ་བདེ་བའི་ཉམས་ལ་སྤྱོད། ། རིན་ཆེན་ཕྲེང་བ་བདེ་བ་མི་བརྗེད་འཛིན།། པདྨ་དབྱངས་མཁན་བདེ་བའི་ཉམས་ལ་རོལ།། ལས་ཀྱི་གར་མཁན་བདེ་བའི་འབེབས་པའོ།། བདེ་བ་རྒྱས་འདེབས་ཞི་བའི་ཉམས་དང་ལྡན།། བདེ་བ་ཚེ་འཕེལ་རྒྱས་ལས་བརྗིད་པར་ལྡན། ། བདེ་བ་ཟ་བྱེད་རང་གི་ལུས་ལ་འབར།། བདེ་བ་རྨོངས་བྱེད་རྣམ་པར་རྟོག་པ་འཇོམས།། བྱང་ཆུབ་སེསམ་ཀྱི་དུད་པའི་སྤྲིན་དུ་འཁྲིགས།། རིན་ཆེན་འཛེས་པའི་མེ་ཏོག་ཡབ་ལ་འབུལ། ། མར་མེ་འོད་གསལ་ཡབ་ཡུམ་འདུ་འབྲལ་མེད།། ཐིག་ལེ་བདུད་རྩི་ཡུམ་གྱི་བྷ་གར་འབེབས།། ལྕགས་ཀྱུས་དྲང་པས་ཉམས་ནི་སེམས་ལ་འཆར།། ཞགས་པས་བཅིངས་པས་བདེ་བ་ལུས་ལ་འབར། ། ལྕགས་སྒྲོག་སྡོམ་པས་མཐོང་སྣང་ལུས་ལ་སྐྱེས།། དྲིལ་བུས་སྒེག་པས་གསུང་ནི་སྔགས་སུ་འཆར།། ལས་བཞིའི་ཕྲིན་ལས་བག་ཆགས་སེམས་ལ་སྨིན།། ཚེ་ལ་དབང་མཛད་ལྷ་མོ་ཉི་ཤུ་ཡིས།། ཚེ་ཁུག་ཚེ་དྲོངས་གསང་བའི་ཕྲིན་ལས་མཛོད།། ཨོཾ་བཛྲ་མུག་ཏ་ཧོ། ཤར་གྱི་ཕྱོགས་ནས་ཚེ་འདྲེན་སྲོག་འགུགས་མ།། བྱམས་པའི་རང་བཞིན་ལྕགས་ཀྱུ་མ།། ཕྱག་གཡས་ཟླ་བའི་དཀྱིལ་འཁོར་བསྣམས།། སྐུ་མདོག་དཀར་པོ་འོད་དང་ལྡན། ། ཕྱག་གཡོན་ཉི་མའི་དཀྱིལ་འཁོར་བསྣམས།། པུཥྤ་རཱ་གའི་འོད་ཟེར་འཕྲོ།། ཕྱག་གཡས་ཟླ་བའི་དཀྱིལ་སྟེང་ན།། ཐབས་ཀྱི་ཚེ་འཛིན་བུམ་པ་བསྣམས།། ཕྱག་གཡོན་ཉི་མའི་དཀྱིལ་སྟེང་ན། ། ཤེས་རབ་འགུགས་པའི་ལྕགས་ཀྱུས་འདྲེན།། འགྲོ་ཀུན་ཚེ་ལ་མངའ་བརྙེས་མ།། ཚེ་ཁུག་སྲོག་སྐྱོབས་གསང་བའི་ཕྲིན་ལས་མཛོད།། བཛྲ་ཨངྐུ་ཤ་ཛ། ལྷོ་ཡི་ཕྱོགས་ནས་སྲོག་སྐྱོབས་ཚེ་འགུགས་མ།། སྙིང་རྗེའི་རང་བཞིན་ལྷ་མོ་ཞགས་པ་མ། ། སྐུ་མདོག་སྔོན་མོ་འབར་བ་ལ།། ཨིནྡྲ་ནཱི་ལའི་འོད་ཟེར་འཕྲོ།། ཕྱག་གཡས་ཟླ་བའི་གཞལ་ཡས་ནས།། ཤེས་རབ་ཚེ་ཡི་བུམ་པ་བསྣམས།། ཕྱག་གཡོན་ཉི་མའི་དཀྱིལ་འཁོར་ནས། ། ཐབས་ཀྱི་ཚེ་འཆིང་ཞགས་པ་བསྣམས།། འགྲོ་ཀུན་ཚེ་སྲོག་སྡུད་མཛད་མ།། རྣལ་འབྱོར་ཚེ་ཡི་ལས་མཛོད་ཅིག། པཱ་ཤ་ཧཱུ~ཾ། ནུབ་ཀྱི་ཕྱོགས་ནས་སྲོག་སྐྱོབས་ཚེ་འགུགས་མ།། དགའ་བས་དབང་མཛད་ལྷ་མོ་ལྕགས་སྒྲོག་མ། ། སྐུ་མདོག་དམར་པོ་འབར་བ་ལ།། པདྨ་འབར་བའི་འོད་ཟེར་འཕྲོ།། ཕྱག་གཡས་ཟླ་བའི་དཀྱིལ་འཁོར་ནས།། ཤེས་རབ་སྟོང་པའི་ཚེ་འཛིན་མ།། ཕྱག་གཡོན་ཉི་མའི་དཀྱིལ་སྟེང་ན།། ཐབས་ཀྱི་ལྕགས་སྒྲོག་སྙིང་རྗེ་ཅན། ། ཁམས་གསུམ་ཚེ་སྲོག་མངའ་མཛད་མ།། རྣལ་འབྱོར་ཚེ་ལ་ལོངས་སྤྱོད་ཀུན།། ཁུག་ཅིག་དྲོངས་ཤིག་བརྟན་པར་མཛོད།། སྥོ་ཊ་བཾ། བྱང་གི་ཕྱོགས་ནས་སྲོག་སྐྱོབས་ཚེ་འགུགས་མ། ། བཏང་སྙོམས་རང་བཞིན་ལྷ་མོ་དྲིལ་བུ་མ།། སྐུ་མདོག་ལྗང་གུ་འབར་བ་ལ།། མ་ར་ཀ་ཏའི་འོད་འཕྲོ་མ།། ཕྱག་གཡས་ཟླ་བའི་དཀྱིལ་འཁོར་ན།། ཀུན་གྱི་ཚེ་འཛིན་བུམ་པ་བསྣམས།། ཕྱག་གཡོན་ཉི་མའི་དཀྱིལ་འཁོར་ན། ། ཀུན་གྱི་ཚེ་དགྱེས་དྲིལ་བུ་འཁྲོལ།། འགྲོ་ཀུན་ཚེ་ལ་མངའ་མཛད་ཀྱང།། འགྲོ་ཀུན་ཚེ་ནི་མི་འགུགས་ཀྱང།། རྣལ་འབྱོར་བདག་ཅག་འཁོར་བཅས་ཀྱི།། ཚེ་ཁུག་སྲོག་སྐྱོབ་ཕྲིན་ལས་མཛོད།། གྷཎྜེ་ཧོཿ། ། འཕྲོ་འདུ་འོད་ཀྱིས་བཀུག་བྱས་ནས།། མ་ལུས་བུམ་པའི་བཅུད་ལ་བསྡུ།། དེ་ནས་རྡོ་རྗེའི་ཚེ་བཅིངས་པ།། བཛྲ་སྥོ་ཊ་བཾ་ཞེས་པས།། ཉི་ཟླ་གའུ་རྡོ་རྗེའི་འཛིན།། ལྕགས་སྒྲོ་དག་གིས་བཅིང་བར་བྱ།། རང་ཉིད་ལྷར་གསལ་སྣ་བུག་ནས། ། རླུང་གི་འོད་ཀྱི་འཕྲོ་འདུ་བྱ།། ཨོཾ་བཛྲ་ཨཱ་ཡུ་ཥེ་ཧཱུཾ་ཨཱ། དེ་བས་འགྲོ་དྲུག་ཐམས་ཅད་ཀྱི།། ཚེ་དང་གཟི་བརྗིད་ཀུན་ཕྲོགས་ནས།། ཟ་མ་ཏོག་ཏུ་བསྡུས་ནས་ནི།། ཚེ་ཡི་རིགས་འཛིན་རྣམས་ལ་བསྟིམ། ། དཔའ་བོ་འབྲུ་ལྔ་གསལ་བ་ཡིས།། ཚེ་ཡི་དབང་ནི་བསྐུར་བར་གྱུར།། ཨོཾ་ཕུང་པོ་ལྷ་ཡི་དཀྱིལ་འཁོར་དུ།། རྒྱལ་བ་རིགས་ལྔའི་རང་བཞིན་ལས།། འབྱུང་ལྔ་ཡུམ་གྱི་གཟུགས་སུ་བཅས།། ཁྱོད་ལ་བསྐུར་བས་ཚེ་ཡི་དབང། ། རྡོ་རྗེ་ཚེ་དབང་ཐོབ་གྱུར་ཅིག། ཀཱ་ལ་ཤ་བཀྵ་ཨ་བྷི་ཥིཉྩ། ཨོཾཿཧཱུ~ཾཿཏྲཾཿཧྲཱིཿཿནརྀཿ། དེ་ནས་སློབ་མའི་སྙིང་གའི་ནརྀ་ལ་ཚེ་བསྟིམ་སྟེ།། རང་ལུས་གཟི་བརྗིད་འབར་ཏེ་འོད་དང་ལྡན།། ཁམས་ཀྱི་བདུད་རྩི་རྒྱས་པར་གྱུར། ། ཚེ་ཡི་རང་བཞིན་ཡི་གེ་ནརྀ།། སྐྱེ་མཆེད་ཨ་རུ་རབ་ཏུ་གནས།། ཅིས་ཀྱང་མི་ཚུགས་མི་ཤིགས་པའི།། སྟོང་པའི་གོ་ཆ་བླ་ན་མེད།། ཆོས་ཀྱི་དབྱིངས་སུ་སྦས་ནས་ནི།། སངས་རྒྱས་ཀྱིས་ཀྱང་མི་གཟིགས་སོ། ། དེ་ནས་གཏོར་མ་གཏང་བར་བྱ།། ལྷག་ཆད་ཁ་བསྐངས་ནས། སྤྱོད་ལམ་ལེགས་པར་གནས་པར་བྱའོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། ཚེ་བསྒྲུབས་པ་ཆེན་པོའི་ལེའུ་སྟེ་བཅུ་པའོ། །།། དེ་ནས་བཅོམ་ལྡན་འདས་ཀྱིས། གསང་བ་དག་པའི་དཀྱིལ་འཁོར་དུ་ཚེ་བསྒྲུབ་པ་འདི་གསུངས་སོ།། བདེ་བའི་གནས་སུ་དཀྱིལ་འཁོར་ནི།། འཁོར་ལོ་རྩིབས་བརྒྱད་གྲུ་ཆད་སྒོ།། དབུས་ན་མགོན་པོ་ཚེ་དཔག་མེད། ། ཤར་ན་མི་བསྐྱོད་ལྷོར་རིན་འབྱུང།། ནུབ་ན་སྣང་མཐའ་བྱང་དོན་གྲུབ།། ས་ཡི་སྙིང་པོ་རྡོ་རྗེ་སེམས།། ནམ་མཁའི་སྙིང་པོ་རིན་ཆེན་སེམས།། སྤྱན་རས་གཟིགས་ནི་པདྨ་སེམས།། ལས་ཀྱི་སེམས་དཔའ་ཕྱག་རྡོར་ཡིན། ། སྒོ་བཞི་གཤིན་རྗེ་སྟོབས་ཆེན་དང།། རྟ་མགྲིན་བདུད་རྩི་འཁྱིལ་པ་གནས།། ཚེ་བུམ་ཆང་དང་ཚེ་འབྲས་བཅའ།། མདའ་དང་དར་བཅས་མཆོད་རྫས་རྣམས།། དཀྱིལ་འཁོར་དུ་ནི་མཛེས་པར་བཤམ། ། བདེ་གཤེགས་བསྐྱེད་ཅིག་སྤྱན་དྲངས་བསྟིམ།། མཆོད་ནས་ཚེ་ཡི་དངོས་གྲུབ་བསྒྲུབ།། ཨོཾ་རུ་རུ་སྥུ་རུ་ཛྭ་ལ་ཏིཥྭ་སིདྡྷི་ལོ་ཙ་ནི་སརྦ་སཱ་ཨརྠ་དྷ་ན་ཨཱ་ཡུརྫྙཱ་ན་བིན་དུ་བྷྲཱུཾ། ཨ་པ་རི་མི་ཏ་ཚེ་བྷྲཱུཾ། ཧཱུ~ཾ་དབུས་ཀྱི་མགོན་པོ་ཚེ་དཔག་མེད། ། ཡབ་ཡུམ་ཐུགས་ཀྱི་གའུ་ནས།། ཨཱ་ཡུཿདམར་པོ་རང་བྱུང་ནས།། དོན་གྲུབ་ཐུགས་རྒྱུད་རང་བཞིན་བཀུག། རྫས་ལ་བསྟིམ་ཞིང་བསྒྲུབ་པར་བྱ།། བྱང་ཕྱོགས་ནུབ་ཕྱོགས་པདྨ་དབང་གི་དཀྱིལ་འཁོར་ནས། ། བཅོམ་ལྡན་བྱམས་མགོན་ཚེ་དཔག་མེད།། ཐུགས་ཀྱི་དཀྱིལ་འཁོར་ཟླ་གསང་གའུ་ནས།། བྱང་ཆུབ་སེམས་ཀྱི་ཨཱ་ཡུཿདམར་པོ་འདི།། རྩེ་གཅིག་དབང་གིས་བསྒྲུབས་པའི་ཚེ་ལགས་ན།། བྱིན་གྱིས་བརླབས་ཤིང་བདག་ལ་དངོས་གྲུབ་སྩོལ། ། རིགས་ཀྱི་རྒྱལ་བ་ཡབ་ཡུམ་རྣམས།། ཚུལ་མཆོག་འདི་ཡིས་ཤེས་པར་བྱ།། ཚེ་ཡི་ཕོ་ཉ་བཏང་ནས་ཀྱང།། སྲིད་གསུམ་གནས་ནས་ཚེ་སྲོག་ནི།། ཡི་གེ་ནརྀ་རུ་བསྡུས་བྱས་ནས། ། བྱང་སེམས་བདེ་བ་ཆེན་པོ་ཡི། ཀུན་གཞིའི་རྣམ་པར་ཤེས་པ་ཉིད།། ཨཱ་ཡུཿདམར་པོ་ཤེས་པར་བྱ།། སྐྱེ་བ་མེད་པའི་སེམས་ཉིད་འདི།། འཆི་མེད་རྡོ་རྗེ་ཞེས་བྱ་སྟེ།། མི་འགྱུར་གཡུང་དྲུང་ཡེ་བརྡལ་ཆེ།། མི་ནུབ་ཡེ་ཤེས་རྒྱལ་མཚན་ཡིན། ། དེ་ལྟ་བུ་ཡི་དངོས་གྲུབ་ནི།། རྣལ་འབྱོར་བདག་གིས་བླང་བར་བྱ།། མཆེད་དང་ལྕམ་དྲལ་སློབ་མ་རྣམས།། ཚེ་ཡི་བུམ་པས་དབང་བསྐུར་ནས།། ཚེ་ཡི་རང་བཞིན་གནས་ཤེས་པ། ། དཔའ་བོ་འབྲུ་ལྔས་དབང་བསྟིམ་བྱ།། མཁའ་འགྲོ་ཆོས་སྐྱོང་གཏོར་མ་གཏང།། གཏེར་སྦ་དགེ་སྔོ་དཀྱིལ་འཁོར་བསྡུ།། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། གསང་བ་དག་པའི་དཀྱིལ་འཁོར་དུ་ཚེ་བསྒྲུབ་པའི་ལེའུ་སྟེ་བཅུ་གཅིག་པའོ། །།། དེ་ནས་བཅོམ་ལྡན་འདས་ཀྱིས། གསང་བ་དག་པའི་རྫས་ལ་ཚེ་བསྒྲུབ་པ་འདི་གསུངས་སོ།། བཀྲ་ཤིས་དག་པའི་རྫས་བཙལ་ཏེ།། མདོ་སྡེ་ཟངས་གཞོང་འཁར་སྡེར་དུ། ། ཀྲྀ་ཡ་ཉ་ཕྱིས་དུང་ཆོས་ལ།། མ་ཧཱ་སྐྱེ་བ་བདུན་པའི་རོ།། བྱ་རྒོད་རྐང་གི་སྦུབས་བལྟས་ཏེ།། ཞུན་ཆེན་མར་མེར་གཟུགས་བདུན་པ།། སྐྲ་ཁམ་ཤེལ་མིག་དཔྲལ་དབྱིབས་ཆེ།། སྨེ་བདུན་བ་སྤུ་ཟང་ཐལ་བྱུང། ། དུང་སོ་འཁོར་བར་ཡོད་པ་ཡིས།། ཚེ་སྐྱེམས་ཚེ་འབྲས་གཟུངས་ཐག་བཟུང།། སྣོད་ནི་གཞལ་ཡས་ཁང་གྱུར་ནས།། ཚེ་སྐྱེམས་སིདྡྷ་ལོ་ཙ་ནཱི།། ལྗང་སེར་གཞལ་གཅིག་ཕྱག་བཞི་མ།། ཚེ་དར་གྲི་གུག་གཡས་པ་ན། ། བདུད་རྩི་བུམ་པ་རྒྱ་གྲམ་གཡོན།། དེ་ཡི་མཁའ་དབྱིངས་ཚེ་དཔག་མེད།། དམར་པོ་གཞལ་གཅིག་ཕྱག་བཞི་པ།། རིན་ཆེན་ཕྲེང་བ་ཟ་མ་ཏོག། ཤེལ་ཕྲེང་ནེའུ་ལེའི་རྐྱལ་པ་གཡོན།། དེ་འཁོར་རིགས་ཀྱི་ཡུམ་ཆེན་ལྔ། ། རིགས་མདོག་ཡུམ་ཆེན་ལྔ་ནི་ཕྱག་མཚན་རིགས།། མིག་ལ་རྒྱས་འདེབས་ལྕགས་ཀྱུ་དཀར།། རྣ་བར་རྨོངས་བྱེད་ཞགས་པ་སྔོ།། སྣ་ལ་ཚེ་འཕེལ་ལྕགས་སྒྲོག་དམར།། ལྕེ་ལ་ཟ་བྱེད་དྲིལ་བུ་ལྗང། ། ཚེ་བསྲུང་པདྨ་ཀུནྡྷ་ལི།། དམར་པོ་པདྨ་རྒྱ་གྲམ་བསྣམས།། ཨཱ་ཡུཿཚེ་བྷྲཱུཾ་ཛྙཱ་ན་ཚེ་བྷྲཱུཾ་བིན་དུ་བྷྲཱུཾ། ཨ་པ་ར་མི་ཏ་ཚེ་བྷྲཱུཾ། ཆག་པའི་རྡོ་རྗེ་བདག་ཉིད་ཆེ།། པདྨ་རྒྱལ་པོ་ཀུན་དྷ་ལི།། སྤྲུལ་པའི་ཁྲོ་བོ་གྲངས་མེད་པས། ། ཚེ་ལ་གནོད་པའི་བགེགས་རྣམས་ཀུན།། དེ་ཡི་གཟུགས་བཅོམ་ཕ་རོལ་དུ།། སོང་ཞིང་ཚེ་ལ་གནོད་བྱེད་བསྐྲད།། བྷནྡྷ་ཊ་ཋ་ཕཊ། ཚེ་ལ་དབང་བསྐུར་བསྟིམ་པ་དང།། སྦས་ནས་རྒྱས་བཏབ་སྨོན་ལམ་གདབ། ། ཐོད་པ་ལོངས་སྤྱོད་གཏེར་དུ་བཅངས།། ཤ་རྣམས་སུ་ཡིས་ཟོས་པས་ནི།། ཐུན་མོང་དངོས་གྲུབ་ཐོབ་པར་འགྱུར།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། གསང་བ་དག་པའི་རྫས་ལས། ཚེ་བསྒྲུབ་པའི་ལེའུ་སྟེ་བཅུ་གཉིས་པའོ། །།། དེ་ནས་བཅོམ་ལྡན་འདས་ཀྱིས། མཁའ་དབྱིངས་རྣམ་པར་དག་པའི་ཡུམ་ལ་ཚེ་བསྒྲུབ་པའི་ཆོ་ག་འདི་གསུངས་སོ།། དབེན་པའི་གནས་སུ་ཕྱིན་ནས་ནི།། པདྨ་ཅན་ནམ་དུང་ཅན་ནམ། ། བ་གླང་འདྲའམ་རི་དྭགས་འདྲ།། མཚན་དང་ལྡན་པའི་གཟུངས་མ་ལ།། དཔའ་བོ་འབྲུ་ལྔ་ལུས་ལ་བཀོད།། རིགས་ལྔ་ཡེ་ཤེས་ལྔར་བྱིན་བརླབས།། ཡབ་ཡུམ་མཁའ་གསང་བསྣོལ་བས་ནི།། རྡོ་རྗེ་པདྨར་བྱིན་བརླབས་ནས། ། བདེ་མཆོག་བདེ་བྲལ་བདེ་བ་དང།། ལྷན་སྐྱེས་ཁུ་བ་འཕྲོ་འདུ་ལས།། ཧྲཱིཿལས་རྟ་མགྲིན་ཁྲོ་བོ་དམར།། ཞལ་གསུམ་པ་ལ་ཕྱག་དྲུག་པ།། སྔགས་འཆང་རྒྱལ་པོ་གང་གནས་པ། ། ཕྱག་རྒྱའི་བདག་ཉིད་དེ་ལ་གནས།། ཕྱག་རྒྱ་ཆེན་པོའི་དཀྱིལ་འཁོར་ན།། སྨ་ཤ་ནག་མོ་དོན་སྙིང་ཟ།། དེ་ཡི་ཡང་གསང་ཐུགས་དཀྱིལ་ནས།། གསུང་གི་རྒྱལ་པོ་རྟ་མཆོག་དཔལ།། ཕྱག་མཚན་ཕྱག་ན་འབྲུག་དྲུག་བསྣམས། ། འབྲུག་དཀར་འབྲུག་སྔོན་འབྲུག་ལྗང་དང།། འབྲུག་སེར་འབྲུག་དམར་འབྲུག་ནག་བསྣམས།། འབྲུག་གི་ཁ་ནས་གློག་འབྱིན་ཅིང།། གློག་གི་ཁ་ནས་ཐོག་འབེབས་ལ།། གནོད་སྦྱིན་དམར་པོའི་ཀླད་པ་འགེམས། ། དེ་ཡིས་སེམས་ཀྱི་དལ་བསྣམས་ནས།། དྲོངས་ཤིག་དྲོངས་ཤིག་ཚེ་དྲོངས་ཤིག། རྡོ་རྗེ་ཚེ་ཡི་དངོས་གྲུབ་སྩོལ།། ཨོཾ་ཨཱ་ཡུརྫྙཱ་ན་ཚེ་བྷྲཱུཾ། དགའ་བ་བཞི་དང་ལྡན་པ་ཡི།། བསྙེན་བསྒྲུབ་རྣམ་བཞི་བསྒྲུབ་པ་ཡིས། ། ཁུ་བ་འཐུང་ན་ནད་མེད་ཅིང།། དེ་ཡི་ཚེ་ཡང་ལྷ་དང་མཉམ།། དབང་གི་མཆོག་ཏུ་དེ་འགྱུར་རོ།། སྒྲུབ་པ་པོ་ཡི་ཐུགས་གནས་བསྟིམ།། ཞེས་གསུངས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། གསང་བ་མཁའ་དབྱིངས་ལ་ཚེ་བསྒྲུབ་པའི་ལེའུ་སྟེ་བཅུ་གསུམ་པའོ། །།། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཆོས་ཀྱིས། མཆོད་པ་དེ་ཁོ་ན་ཉིད་ཀྱིས་མཆོད་ནས། འདི་སྐད་ཅེས་གསོལ་ཏོ། ། སངས་རྒྱས་བདེ་བ་ཆེན་པོའི་ཐུགས།། འགྲོ་བ་ཀུན་ལ་ཀུན་གཞི་ཡིད།། རྣལ་འབྱོར་ཨཱ་ཡུཿའི་ཚེ་རྣམས་བསྒྲུབ།། དམ་རྫས་བྱང་སེམས་དཀར་དམར་ལེན།། འདི་ཡི་ཚེ་དང་སྲོག་བརྟེན་ནས།། མགོན་པོ་ཁྱེད་ལ་རྗེས་ཡི་རང། ། ཞེས་གསོལ་ཏོ།། དེ་ནས་བཅོམ་ལྡན་འདས་ཀྱིས་འདི་གསུངས་སོ།། འགྱུར་མེད་ཚེ་ཡི་དངོས་གྲུབ་རྒྱུད།། རྡོ་རྗེ་ཆོས་ཀྱིས་ཟུང་ལ་མཁའ་འགྲོས་སྲུངས།། ཆོས་ཀྱི་སྤྱན་ལྡན་སྤྱོད་པས་འགྲོ་དོན་མཛད། ། མི་ནུབ་བསྟན་པ་རྒྱས་པར་ཁྱེད་ཀྱིས་སྤྱོད།། ཅེས་གསུངས་སོ།། སྟོན་པ་དང་འཁོར་རྣམས་ཆོས་ཉིད་ཀྱི་ངང་དུ་ཐིམ་སྟེ་ཆོས་སྐུར་བཞུགས་སོ།། བདུད་རྩི་འཁྱིལ་པ་འཆི་མེད་ཚེའི་རྒྱུད་ལས། རྒྱུད་གཏད་པའི་ལེའུ་སྟེ་བཅུ་བཞི་པའོ། ། བདུད་རྩི་འཁྱིལ་པ་འཆི་མེད་ཚེའི་རྒྱུད་ཅེས་བྱ་བ་རྫོགས་སོ།།།། རྒྱ་གར་གྱི་མཁན་པོ་པཎྜིཏ་བི་མ་ལ་མི་ཏྲ་ལ། བོད་ཀྱི་ལོཙྪ་བ་མཇིང་གསལ་འབར་གྱི་ཞུས་ཏེ་བསྒྱུར་ནས་གཏན་ལ་ཕབ་པའོ། །།།

CLOSE WINDOW