| Wylie |
མ་ཧཱ་ཨ་མྲྀ་ཏ་དྷརྨ་ཏཱ་གུ་ཧྱ་ཏནྟྲ་ནཱ་མ། བོད་སྐད་དུ། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ཅེས་བྱ་བ། བཅོམ་ལྡན་འདས་ཀུན་ཏུ་བཟང་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་སངས་རྒྱས་ཐམས་ཅད་ཀྱི་ངོ་བོ་ཉིད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མ་ལུས་པའི་བདག་པོ་དེ་ནི། རྣལ་འབྱོར་གྱི་དབང་ཕྱུག་ཆེན་པོ་རྣམས་དང། རྡོ་རྗེ་ཡིད་བཞིན་ནོར་བུའི་བཙུན་མོའི་བྷ་ག་ལ་སྙོམས་པར་ཞུགས་ནས། ཁམས་གསུམ་པའི་སེམས་ཅན་མ་ལུས་པའི་ཕུང་ཁམས་བདུད་རྩི་ཆེན་པོར་རང་བྱུང་བའི་ཏིང་ངེ་འཛིན་ལ་སྙོམས་པར་བཞུགས་སོ།། དེ་ནས་རྡོ་རྗེ་ཆོས་རང་གི་གདན་ལས་བཞེངས་ནས། འདི་སྐད་ཅེས་གསོལ་བ་གདབ་བོ།། གཙང་མའི་ཟས་ལ་སྤྱོད་པ་ཡི།། ལྷ་དང་བྲམ་ཟེ་ཀླུ་དང་བཅས།། རང་སྐལ་འབྲུ་སོགས་ཟ་བ་ཡི།། གླིང་བཞི་སེམས་ཅན་མི་དང་བཅས།། ལས་ངན་སྐྱུགས་པ་སྤྱོད་པ་ཡི། ། དུད་འགྲོ་ཡི་དྭགས་དམྱལ་བར་བཅས།། རང་བྱུང་བདུད་རྩི་མ་རྟོགས་པའི།། མཚན་ཉིད་སྡེ་གསུམ་ཀྲི་ཡོག་གསུམ།། ལས་ངན་འགྲོ་བ་འདུལ་བ་དང།། སྐལ་ངན་ཐེག་པ་དྲང་བའི་ཕྱིར། ། རང་བྱུང་བདུད་རྩི་ཆེན་པོའི་དོན།། ཆོས་ཀྱི་འཁོར་ལོ་བསྐོར་དུ་གསོལ།། ཞེས་ཞུས་པས་རང་གི་གདན་ལ་བཞུགས་སོ།། དེནས་བཅོམ་ལྡན་འདས་ཀྱིས་སེང་གེ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་དཀྱིལ་འཁོར་ལ་སྤྱན་གྱི་ལྟ་སྟངས་ཀྱིས་གཟིགས་ནས། འདི་སྐད་ཅེས་གསུངས་སོ།། སེམས་ཅན་ཉོན་མོངས་སྣང་བ་ལ།། རྩ་བ་དུག་གསུམ་ལས་བྱུང་བའི།། ཉོན་མོངས་རྣམ་པར་ཤར་བ་ལྔ། ། བརྒྱད་ཁྲི་བཞི་སྟོང་རྣམ་གྲངས་སྣང།། རྣལ་འབྱོར་ཉམས་ཀྱི་སྣང་བ་ལ།། མཚན་ཉིད་ཕྱི་པས་མ་རྟོགས་ཀྱང།། བདུད་རྩི་རྣམ་པ་ལྔ་པོ་ལས།། ཁམས་ཀྱི་འདུ་ལུགས་གསུམ་དུ་སྣང།། བདེ་བར་གཤེགས་པ་དུས་གསུམ་གྱི། ། སངས་རྒྱས་རྣམས་ལ་སྐུ་གསུང་ཐུགས།། མི་ཟད་རྒྱན་གྱི་འཁོར་ལོར་སྣང།། སྣང་བ་གསུམ་ལས་བྱུང་བ་ཡི།། རང་བྱུང་བདུད་རྩི་སྒྲུབ་པའི་ཐབས།། ཁྱེད་ལ་བཤད་ཀྱི་ལེགས་པར་ཉོན། ། སེམས་ཅན་ཉོན་མོངས་སྣང་བ་ལ།། རྡུལ་ཚོན་དཀྱིལ་འཁོར་ཆེན་པོ་རུ།། རིག་འཛིན་སྨན་བསྒྲུབ་བཤད་པར་བྱ།། རྣལ་འབྱོར་ཉམས་ཀྱི་སྣང་བ་ལ།། ཕུང་པོ་དག་ལ་བརྟེན་བྱས་པའི།། རང་བྱུང་འདུད་རྩི་བསྒྲུབ་པར་བཤད། ། བདེ་བར་གཤེགས་པའི་སྣང་བ་ལ།། རིགས་བརྒྱ་རིགས་ལྔ་རིགས་གཅིག་དང།། བདུད་རྩི་གོང་བུ་ཆེ་མཆོག་གི། ཡེ་ཤེས་ལྷ་ཡི་དཀྱིལ་འཁོར་བཤད།། ལྟ་བ་ཐམས་ཅད་གདེང་དུ་བྱ།། སྤྱོད་པའི་ལ་ཡང་རབ་དོར་ནས། ། བསྒྲུབ་པས་ཉམས་སུ་བླངས་ནས་ནི།། དམ་ཚིག་ཞིང་ས་གཤིན་པོ་ལ།། བསྙེན་བསྒྲུབ་ས་བོན་རབ་བཏབ་ནས།། རིམ་པ་དབང་གིས་བགྲོད་བྱས་པས།། འབྲས་བུ་ལོ་ཐོག་སྨིན་པར་བྱས། ། རབ་འབྲིང་ཐ་མའི་རྣལ་འབྱོར་པ།། ལས་དང་སྐལ་པར་རབ་ལྡན་པས།། བསྒྲུབས་ན་ཀུན་གྱིས་འགྲུབ་པར་འགྱུར།། བདུད་རྩི་ཡོན་ཏན་བསྒྲུབ་པ་འདི།། མ་འོངས་རྣལ་འབྱོར་གྲོལ་ཕྱིར་བཤད། ། ཅེས་གསུངས་སོ།། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལས། གླེང་གཞི་དང་གླེང་བསླང་པའི་ལེའུ་སྟེ་དང་པོའོ།།།། དེ་ནས་བཅོམ་ལྡན་འདས་ཀྱིས་བསྒྲུབ་པ་ཐམས་ཅད་ཀྱི་གཞི་ཕུན་སུམ་ཚོགས་པ་འདི་གསུངས་སོ། ། སྟོན་པ་བློ་ཡངས་ཁུ་འཕྲིག་ཆུང།། ཕྱི་ནང་རྒྱུད་ལ་མཁས་པར་སྦྱངས།། བདེ་གཤེགས་ཐུགས་ཀྱི་ཉིང་ཁུ་རྟོགས།། མི་འགྱུར་སྤྱོད་ལམ་མཁའ་ལྟར་ཡངས།། དགྱེས་པ་སྐོང་པ་ཡུམ་གྱི་རིགས། ། མཆོད་སྟོབས་གསང་བའི་ཕྱག་ཚངས་པ།། བླ་མའི་ཐུགས་དང་འཐད་པ་དང།། རྡུལ་ཕྱག་ཕྱི་ནང་མཚམས་མཁན་དང།། ཉུང་ཡང་ལྔ་ལ་སོགས་པ་ཡི།། ཡབ་ཡུམ་ཐབས་དང་ཤེས་རབ་ལྡན།། མཆེད་ལྕམ་རྡོ་རྗེ་ལུ་གུ་རྒྱུད། ། གདུང་བཞི་རང་གི་མིག་ལྟར་འཕངས།། སྐྱེ་བོ་ཡ་ག་ཅན་དག་དང།། མི་ནག་ཉན་ཐོས་སྐལ་མེད་སྤང།། དབེན་ཞིང་ཉམས་དགའ་སྤགས་པའི་གནས།། རྩི་སྨན་ཤིང་དང་ནགས་ཚལ་དག། བཙལ་ནས་བསྒྲུབ་པ་རྩམ་པར་བྱ། ། ས་བདག་འཁོར་དང་བཅས་པ་ལ།། རྒྱན་དང་བཅས་པའི་གཏོར་མ་གཏང།། བསླང་དང་སྦྱང་དང་བྱིན་གྱིས་བརླབ།། ཟླ་བ་སྟོན་ཟླ་འབྲིང་པོ་དང།། དཔྱིད་ཟླ་འབྲིང་པོ་དག་ལ་བྱ། ། ཚེས་གྲངས་ཡར་གྱི་བརྒྱད་ལ་བརྩམ།། བསོད་ནམས་ཚོགས་ཀྱང་རྫོགས་པར་འགྱུར།། བཅོ་ལྔའི་དུས་ལ་དངོས་གྲུབ་བླང།། ཟླ་རྒྱས་ཡེ་ཤེས་ཚོགས་ཆེན་རྫོགས།། འཚོ་བ་ཟས་དང་དུག་འཇོམས་སྨན།། མཆོད་པའི་རྫས་དང་སྒྲུབ་པའི་རྫས། ། འཕགས་པ་མཆོད་ཅིང་གཏོར་མ་གཏང།། མགྲོན་བཞི་མཉེས་པར་བྱ་ཕྱིར་རོ།། སྦྱིན་སྲེག་ཚ་ཚས་སྒྲིབ་པ་སྦྱོང།། བསོད་ནམས་བསྐྱེད་ཅིང་བསྲུང་བའི་ཕྱིར།། བགེགས་རིགས་སྟོང་ཕྲག་བརྒྱད་ཅུ་ལ། ། གཏོར་མ་གསེར་སྐྱེམས་གཏང་བར་བྱ།། ཕྱོགས་བཞིར་ཐོ་བཞི་བཙུགས་ནས་ཀྱང།། རྒྱལ་པོ་ཆེན་པོ་སྡེ་བཞི་ལ།། ཕྱི་མཚམས་བཅད་པའི་ཕྲིན་ལས་བཅོལ།། སྤྱན་དྲང་ཕྱག་འཚལ་མཆོད་པ་འབུལ། ། ཕྲིན་ལས་བཅོལ་ལ་གསོལ་བྱང་གདགས།། ཕུར་པ་དར་ཀྱི་ཅོད་པན་ཅན།། ཁྲོ་བོ་བཅུ་རུ་བྱིན་བརླབས་ནས།། ཕྱོགས་བཞི་མཚམས་དང་སྟེང་འོག་བཅུར།། རིམ་པ་བཞིན་དུ་གནས་པར་བྱ།། དུར་ཁྲོད་གནས་རྣམས་རང་བསྲུང་བར། ། དམ་སྲི་མི་གཡོ་མགོན་པོས་མནན།། བར་ཆད་དངོས་གྲུབ་བསྲུང་དོན་དུ།། སྒོ་བྱང་བདུད་རྩི་གཤིན་རྗེའི་གཤེད།། མ་ཏྲཾ་ལྟ་དཔྱོད་གནན་པའི་ཕྱིར།། དཔལ་ཆེན་ཁྲག་འཐུང་འབར་བས་བསྒྲལ། ། ལྷ་དང་དཀྱིལ་འཁོར་སློབ་མ་རྣམས།། སྟ་གོན་ལ་ནི་གནས་པའི་ཕྱིར།། མ་འདྲེས་པ་ཡི་མཆོད་ཕྱེ་ལ།། ཞི་ཁྲོ་དཀྱིལ་འཁོར་མཆོད་བྱས་ནས།། མཉེན་ནས་མཁའ་འགྲོ་དཔང་པོར་གཞག། དེ་ནས་སྨན་གྱི་རྫས་མཆོག་གིས། ། དམ་ཚིག་བསྣན་ཞིང་བསྐྱར་བར་བྱ།། དེ་ནས་སྔགས་པས་ཐོད་པའི་ནང།། དམ་ཆུ་བྱིན་གྱིས་བརླབ་པར་བྱ།། ར་བ་དྲ་བ་གུར་བཅས་པས།། དེ་ལུས་བར་ཆད་བསྐྲད་པར་བྱེད། ། ཡོལ་ནང་རྡོ་རྗེ་ཟམ་པ་ལ།། སློབ་མ་དག་ཀྱང་དྲང་བར་བྱ།། མཐའ་ཡས་སེམས་ནི་རབ་རྨོངས་པས།། ཐེག་པ་ཆེན་པོར་དེས་སེམས་བསྐྱེད།། རྡོ་རྗེ་སློབ་དཔོན་བླ་མ་ལ།། བྱིན་གྱིས་རློབ་པར་ཞུས་ནས་ནི། ། བླ་མས་བུ་རྣམས་ལུས་ངག་ཡིད།། སྐུ་གསུང་ཐུགས་སུ་བྱིན་གྱིས་བརླབ།། ཡི་དམ་ལྷ་མཆོག་མི་སྤང་ཕྱིར།། ལུས་ངག་དང་བས་ཕྱག་འཚལ་ནས།། ཚེ་རབས་ཐོག་མ་མེད་པ་ནས།། བསགས་པའི་ཉེས་པ་བཤགས་པར་བྱ། ། མ་རིག་མུན་པ་མདོངས་པ་ཡི།། སྤྱན་ཡང་དབྱེ་བར་ཞུ་བ་ཞུས།། སློབ་དཔོན་གྱིས་ནི་གནང་ནས་ནི།། དེ་ནས་སྤྱན་དྲང་དབྱེ་བར་བྱ།། མཐོང་བའི་ཡི་དམ་པྲ་བརྟག་པ།། ལྷ་ལ་མེ་ཏོག་རབ་གཏོར་འབུལ། ། བླ་མས་མེ་ཏོག་ལྷར་བཅས་པ།། སློབ་མ་དག་ལ་བསྟིམ་པར་བྱ།། ལྷ་ལ་བདུད་རྩི་ལ་སོགས་པ།། མཆོད་པས་ཀྱང་ནི་རབ་ཏུ་མཆོད།། རྩ་བ་ཡན་ལག་བཅས་པ་ཡི།། དམ་ཚིག་སྡོམ་པ་དཔོག་པར་བྱ། ། འདྲེས་པའི་ཆོས་དང་མ་འདྲེས་པ།། དམ་ཚིག་གཉིས་སུ་མེད་པར་བསྲེ།། བསྐལ་པར་སྲོག་ལ་བབ་གྱུར་ཀྱང།། མི་གཏོང་བསྲུང་བར་དམ་ཡང་བདར།། རང་གི་ཡི་དམ་གང་ཡིན་ལྷ།། བླ་མ་ལ་ཡང་འབོག་པར་ཞུས། ། གནང་བྱས་སྐུ་མདོག་ཕྱག་མཚན་བཅས།། ཕྱག་རྒྱ་ཆེན་པོར་འབོག་པར་བྱ།། སློབ་མ་ལས་དང་སྐལ་ལྡན་རྣམས།། སྐུ་གསུང་ཐུགས་ཀྱི་དངོས་གྲུབ་སྦྱིན།། དེ་ལ་ཕྲེང་བ་རབ་གཏད་ནས།། འཛབ་ཀྱི་སྙིང་པོ་འདྲེན་དུ་གཞུག། སྔགས་ཀྱི་རྡོ་རྗེའི་གྲལ་ཆེན་ལས།། རིམ་པ་ཡང་དག་གནས་པར་བྱ།། སློབ་མ་དམ་པར་གྱུར་པ་རྣམས།། བླ་མ་རིན་ཆེན་ལྟ་བུ་ལ།། ཛ་གད་གཏང་རག་རབ་ཏུ་གཏང།། དཀྱིལ་འཁོར་འདོམ་གང་གྲུ་བཞི་པ། ། འཕང་དུ་ཆག་གང་ཡོད་པར་བྱ།། དང་པོ་དག་པར་བྱ་བའི་ཕྱིར།། བདུད་རྩི་ལྔ་ཡི་ཆག་ཆག་གདབ།། ཨོཾ་སརྦ་པཉྩ་ཨ་མྲྀ་ཏ་མ་དྷ་ལ་ཧཱུ~ཾ། དེ་ནས་བྱིན་དང་ལྡན་པའི་ཕྱིར།། ནང་གི་དམ་རྫས་ཆག་ཆག་གདབ། ། ཨོཾ་གུ་ཧྱ་ཨ་ཀྲ་མ་མ་དྷ་ལ་ཧཱུ~ཾ། མཁས་པ་རྡོ་རྗེ་སློབ་དཔོན་གྱིས།། བ་སུ་ཏ་ཡི་རྒྱུ་ཞགས་ལ།། གཟུང་མའི་ལག་ཏུ་བྱིན་བརླབས་ནས།། གསང་བའི་དཀྱིལ་འཁོར་ཐིག་གདབ་པ།། ལྷག་པ་བྱང་ཆུབ་སེམས་ཀྱི་ཐིག། ཡུམ་གྱི་མཁའ་ལ་བདེ་སྟོང་འཁྱིལ།། རིག་པ་ཡེ་ཤེས་ལྔ་ཡི་ཐིག། སྲད་བུ་ཡེ་ཤེས་ལྔ་དང་ལྡན།། མཚོན་པ་གཟུགས་བརྙན་རྡུལ་ཚོན་ཐིག། ཆ་ཆེན་ཆ་ཕྲན་རྣམ་པར་དབྱེ།། ཨོཾ་མ་ཧཱ་དྷཱ་ཏུ་ཛྙཱ་ན་གུ་ཧྱ་ཨ་ཀྲ་མ་མ་དྷ་ལ་ཧཱུ~ཾ། མཐའ་གཉིས་མ་སྤྲོས་ཀུན་ནས་ཟླུམ།། ཆོས་དབྱིངས་སྐྱེ་མེད་གྲུ་བཞིར་རྒྱས།། ཚད་མེད་སྒོ་དང་རབ་ལྡན་པའོ།། ལིང་ཚེ་དགུ་ཡི་དཀྱིལ་འཁོར་དེར།། སྣོད་ནི་བཞི་འམ་བརྒྱད་གཞག་ལ།། ཆ་ཡི་གྲངས་དང་མཉམ་སྟེ་བགོ། ཞེས་གསུངས་སོ།། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལས། སྟ་གོན་དུ་བྱ་བའི་ལེའུ་སྟེ་གཉིས་པའོ།།།། དེ་ནས་བཅོམ་ལྡན་འདས་ཀྱིས། སྨན་ར་སཱ་ཡ་ནའི་སྒྲུབ་ཐབས་འདི་གསུངས་སོ། ། ཤུ་ཏི་ཡ་བཀྵ་ར་དང།། རུ་ཏ་ཤིང་མངར་པི་པི་ལིང།། ཀྱི་ལྕེ་བ་དང་ཆ་བསྙམས་སྟེ།། ཕྱེ་མ་གའུ་ཁ་སྦྱར་ནང།། བཅུག་ནས་གཟུངས་ཐག་བཏག་བྱས་ནས།། སྔགས་འདི་བརྒྱ་རྩ་བརྒྱད་བཟླས་སོ། ། ཨོཾ་ཀ་ལི་ཀ་ལི་མ་ཧཱ་ཀ་ལི། མན་པ་ཤོ་ནི་དྷ་བྷོ་ཛ་ནི། ཧ་ན་ཤུ་ལ་ཏྲི་ཤུ་ལེ་ན། བདག་གི་ནད་ཞི་ནས་ཚེ་རིང་བར་གྱུར་ཅིག་སྭཱ་ཧཱ། ཕྱེ་མ་ཆུ་དྲོད་སྦྱར་འཐུངས་ན།། རླུང་ལས་གྱུར་པའི་ཟུག་གཟེར་དང། ། སྐྲན་དང་ཁྲག་འཁྲུ་ན་བ་དང།། དབུགས་མི་བདེ་དང་སྙིང་ན་དང།། མྱོས་དང་དྲོན་ཆུང་ལྟོ་སྦོས་པ། ཁ་ཟས་མི་འཇུ་ཁོང་མི་བདེ།། སྲིན་བུའི་ནད་དང་ཆམ་པ་དང།། ཤུ་བ་ཐོར་བུ་གཡེན་པ་དང།། དྲེགས་ནད་མི་སེར་ཁྲག་རྒྱས་དང། ། ལྐོག་མ་སྐྲངས་དང་ཆུ་སོའི་ནད།། མཆིན་པ་དང་ནི་མཚེར་པ་དང།། ཀླད་པ་གཞོགས་ཕྱེད་ན་བ་དང།། མིག་གི་ནད་དོ་ཅོག་རྣམས་སེལ།། སྐབས་སུ་བསྟན་པས་དེ་ལྟར་འགྲུབ།། རྟག་ཏུ་གཏང་བར་གྱུར་པ་ན། ། སྤྱི་ཐེར་སྐྲ་ཡང་སྐྱེ་བར་བྱེད།། སྐྲ་ནག་གྱུར་ཅིང་བཞིན་ཡང་མཛེས།། སྐྲ་དཀར་གཉེར་མ་མེད་པ་སྟེ།། རྒས་སྲ་ཚེ་ཡང་རིང་བར་འགྱུར།། བཅུད་ལེན་ར་སཱ་ཡ་ནར་འགྱུར།། བཅོམ་ལྡན་བདུད་རྩི་རྒྱལ་པོ་ཡིས། ། ཕྱེ་མ་སྨན་གྱི་རྒྱལ་པོ་འདི།། བྲམ་ཟེ་གཞོན་ནུའི་སྤྲིན་ལ་གསུངས།། དེ་ནས་སྲིན་བུའི་སྣང་བ་དེ།། བ་སྦྲུ་བ་ཡི་རྩ་བ་དང།། ཨ་རུ་ར་དང་སླེ་ཏྲེས་དང།། སྐྱེར་པའི་རྩ་བ་ཆ་བསྙམས་བསྐོལ།། བཞི་ཆ་ལུས་པའི་ནང་དུ་ནི། ། གུ་གུལ་མཉེས་ཏེ་བསགས་པ་ཡི། ཁུ་བ་སྔགས་ཀྱིས་བཏབ་འཐུང་ན།། འོར་དང་སྐྱ་སྦབ་དམུ་རྫིངས་ནད།། བད་ཀན་ལས་གྱུར་པ་ཡི་ནད།། སྐྲངས་པའི་ནད་རྣམས་སེལ་བ་སྟེ།། ནམ་ཚོང་ཡན་ལག་ནད་ལ་ཕན། ། ཨོཾ་ཧཱུ~ཾ་ཕྲི་ཧཱུ~ཾ་ཤུ་ཀྵེ་ཕུ་སྭཱ་ཧཱ། སྔགས་དེ་བཏབ་ནས་ཆུ་སྦྱར་བླུད།། སྡུད་ཅིང་མ་ཞུའི་ནད་ཞི་བྱེད།། བཅོམ་ལྡན་འདས་ཀྱི་ཁུ་བའི་སྨན།། བསྒྲུབ་པའི་མན་ངག་ཆོ་ག་འདི།། དྲང་སྲོང་རིན་པོ་ཆེ་ལ་བཤད། ཁ་རུ་ཚ་དང་གོ་སྙོད་དང།། ན་ལེ་ཤམ་དང་ཤ་ཁ་ར།། སྦྲང་རྩི་སྦྱར་བའི་ལྡེ་གུ་སྦྱིན།། སྐྱུགས་པའི་ནད་རྣམས་ཞི་བར་བྱེད།། ཤིང་ཚ་སུག་སྨེལ་སྐྱུ་རུ་དང།། བཅའ་སྒ་ཙནྡན་མ་ནུ་དང།། ཛི་ཙན་ཏི་དང་གླ་སྒང་དང། ། བ་ལ་དང་ནི་ཧ་སྟི་རྣམས།། ཆ་བསྙམ་ཀ་ར་བརྒྱད་འགྱུར་གྱི།། ལྡེ་གུ་བྱིན་ན་སྐྱིགས་བུའི་ནད།། དབུགས་མི་བདེ་བ་ཞི་བར་བྱེད།། སྔགས་འདི་བཏབས་ནས་སྨན་ལ་བསྒྲུབ།། གྲོ་བ་ལ་བྲིས་མགུལ་དུ་བཏགས། ། སྐྱུགས་པའི་ནད་རྣམས་ཞི་བར་བྱེད།། ཨོཾ་ཧེ་རུ་ཀ་ཛ་ལི་ཏི་ཏ་ཛེ་ཧེ་ཧཱུ~ཾ་ཕཊ་སྭཱ་ཧཱ། བཅོམ་ལྡན་འདས་ཀྱིས་དྲང་སྲོང་ནི།། གོའུ་ཏ་མ་ལ་བཤད་པ་ཡིན།། ལྡེ་གུ་བསྒྲུབ་པའི་ཆོ་གའོ།། བྱི་ཏང་ཀ་ཡི་ས་བོན་དང། ། སྐྱུ་རུ་ར་དང་ཨ་རུ་ར།། འབྲས་བུ་གསུམ་ལ་སྲང་རེ་སྟེ།། དུར་བྱིད་སྲང་གསུམ་ཕྱེ་མ་ནི།། བུར་སྲང་བཅུ་གཉིས་བསྐོལ་ནང་དུ།། རིལ་བུ་གྲངས་ནི་སུམ་ཅུ་བྱ།། སུམ་ཅུ་ཟླ་བ་རེ་རེ་བཟའ།། མཛེ་ནད་ཤ་བཀྲ་དབུགས་མི་བདེ། ། ལུད་པ་དམུ་རྫིངས་གཞོང་འབྲུམ་དང།། གཅིན་ནད་མཚེར་ནད་འཐོར་བུའི་ནད།། སྐྲན་ནད་རྣམས་ལ་བཤལ་གྱིས་འཇོམས།། ཨ་རུ་ར་དང་བུ་རམ་དང།། ཆ་བསྙམ་སྦྲང་རྩི་སྦྱར་བ་ཡིས། ། འཁྲུ་བར་བྱེད་དེ་བཅུད་ལེན་བསྔགས།། ཨོཾ་མོ་ཙ་ནི་བི་མ་ཀྵ་ནི་སིདྡྷི་ཀ་ར་ཀ་ར། ཕུ་རུ་ཕུ་རུ་ཕུ་རུ་སྭཱ་ཧཱ། བཅོམ་ལྡན་འདས་ཀྱིས་བཀྲུ་བའི་སྨན།། དྲང་སྲོང་གཞོན་ནུ་སྲེད་ལ་བཤད།། རི་ལུ་སྨན་གྱི་སྒྲུབ་པའོ། ། ཚྭ་བ་གསུམ་དང་སེར་པོ་གཉིས།། ནས་ཚིག་སྤྲུས་པའི་ཐལ་པ་དང།། བ་རུ་ར་ཡི་ཤིང་རྩ་དང།། བྱི་ཤ་ལ་དང་ཙི་ཏྲ་ཀ། ཀ་ར་བཱི་ར་རྒྱམ་ཚྭ་དང།། ཁྱིམ་གྱི་དུད་པ་ཡུངས་ཀར་དང།། ཨརྒའི་ལོ་མ་བཅའ་སྒ་དང། ། ཕ་ལ་ཏ་ཀ་མུ་ཟི་དང།། ལྡོང་རོས་དང་ནི་ཤྲཱི་ཁཎྜ།། བ་ལ་སོ་མ་ར་ཛ་རྣམས།། ཆ་བསྙམ་ཕྱེ་མ་ཞིབ་བར་བཏགས།། བ་ཡི་གཅིན་དང་སྦྱར་བསྐུས་ནས།། སྲོག་ཆགས་ལུ་གུར་རག་རིའི་དུག། སྲིན་བུའི་དུག་དག་མ་རུངས་རྨ། ། ཟ་ཁུའི་ནད་དང་མེ་དབལ་དང།། མཚན་པར་རྡོལ་དང་འབྲས་ཀྱི་ནད།། མཛེད་ནད་བཅོ་བརྒྱད་དག་ལ་ཡང།། བསྐུས་པ་ཙམ་གྱིས་ནུས་པ་ནི།། ཤིང་ལ་ཐོག་གིས་བརྒྱབ་པ་འདྲ།། ཨོཾ་ཨ་མྲྀ་ཏ་རོ་ག་པྲ་ཤཱ་མ་ན་ཡེ་སྭཱ་ཧཱ། བཅོམ་ལྡན་འདས་ཀྱིས་དྲང་སྲོང་མཆོག། འགྲོ་སྐྱབས་ལ་ནི་བྱུག་པ་བཤད།། བ་གླང་རྭ་དང་ཤིང་ཀུན་དང།། སྦྲུལ་གྱི་པགས་པ་པོ་སོ་ཆ།། རས་བལ་ས་བོན་མི་ཡི་སྐྲ།། ནས་ཀྱི་ཕུབ་མ་བྲྀ་ཧ་ཏི། ། སེར་པོ་རྣམ་གཉིས་ན་ལེ་ཤམ།། རྨ་བྱའི་སྒྲོ་དང་ཤུན་པ་དང།། ལྷ་ལ་ཕུལ་བའི་མེ་ཏོག་དང།། བ་ལ་སེར་མོ་ལྷན་ཅིག་སྦྱར།། ཡན་ལག་དྲུག་ཅུ་དུད་པ་འདི།། གང་ལ་བདུད་པར་གྱུར་པ་ལ།། རིམས་ནད་ཐམས་ཅད་མེད་པ་དང། ། ཡི་དྭགས་གྲུལ་བུམ་ལུས་སྲུལ་པོ།། ཤ་ཟ་གནོད་སྦྱིན་སྲིན་པོ་རྣམས།། གདོན་གྱིས་ཟིན་པ་གྲོལ་བར་བྱེད།། ཨོཾ་ན་མཿཙནྡྷ་ཀྲོདྷ་ཡ་ཀུན་དྷ་ཀུན་དྷ། མུ་ཀུན་དྷ་ཀུན་དྷ། ཙནྡྷ་བུ་ཏ་ས་མ་ཡེ་སྭཱ་ཧཱ། བཅོམ་ལྡན་འདས་ཀྱིས་དྲང་སྲོང་ནི།། རྩིབས་ཀྱི་མུ་ཁྱུད་འཛིན་པ་ལ།། དུད་པས་སྲུང་བའི་ཆོ་གའོ།། དངུལ་རྡོ་ལྕགས་རྡོ་བྲགས་ཞུན་རྣམས།། མར་དང་སྦྱར་ནས་བྱིན་གྱུར་ན།། བུད་མེད་པདྨ་རཀྟ་ནི།། དུས་མིན་འབྱུང་བ་སེལ་བར་བྱེད། ། ཨོཾ་ན་མོ་ལོ་ཧི་ཧ་ར་སིང་ག་ལ་ཡ། མ་ཏི་ག་ར་ཛཿ། ཡ་རི་ཡ་རི་ནཾ། རུ་ཏི་བི། པྲཾ་བཾ། པྲ་བ་ག་ཀྵ་མི། ཏུ་རུ་ཏུ་རུ། ལ་གྷུ་ལ་གྷུ། ཏི་ལི་ཏི་ལི། ཙི་ལི་ཙི་ལི། མི་ལི་མི་ལི་སྭཱ་ཧཱ། སྔགས་འདི་སྐུད་པ་དམར་པོ་ལ། ། བཟླས་ཏེ་མདུད་པ་གསུམ་བོར་ལ།། རྐང་པ་གཡས་པའི་མཐེ་བོང་བཅིང།། ཟླ་མཚན་དུས་མིན་འབྱུང་ལ་ཕན།། ཤིང་གི་ལྷ་མོ་འོད་འཆང་མས།། སེམས་ཅན་རྣམ་པའི་དོན་དུ་གསུངས།། བཅོམ་ལྡན་འདས་ལ་རིག་པ་ཕུལ། ། རྒྱ་སྐྱེགས་ཤིང་གི་ས་བོན་དང།། ཤལ་མ་ལི་ཡི་མེ་ཏོག་གཉིས།། ལྷན་ཅིག་འཐུང་ན་བུ་འགགས་སེལ།། རི་བོང་ཁྲག་དང་རྟ་ཁྲག་བླུད།། བུ་ཡང་བདེ་བར་འབྱུང་བར་འགྱུར། ། ཨོཾ་ན་མོ་རུ་ཏྲ་ཨ་པ་ན་ན་མ་ཏྲི་ན་ཏོ་པ་ཏི་རྔམ་པ་རྔམ་པ་བ་ནི་མུ་ཙ། ཨིན་ཏྲི་ཡ་ག་ཏྲ་ནི། བི་ཤ་བ་ལྷ་བྷ་པ་རུ། གར་པོ་ནི་འདི་ཞེས་བྱ་བ་ལ་སྭཱ་ཧཱ། སྔགས་འདི་སྐུད་པ་དཀར་པོ་ལ།། ཉི་ཤུ་རྩ་གཅིག་བཟླས་བྱས་ནས། ། མདུད་པ་ཉི་ཤུ་རྩ་གཅིག་བོར།། བུད་མེད་བུ་འགགས་མགུལ་དུ་གདགས།། བུ་ཡང་བདེ་བར་འབྱུང་བར་འགྱུར།། སྨན་གྱི་ལྷ་མོ་ནོར་རྒྱུན་མས།། རང་གི་རིག་པ་བཅོམ་ལྡན་ལ།། སེམས་ཅན་དོན་དུ་ཕུལ་བ་ནི། ། སྦྲུལ་གྱི་པགས་པ་རྒྱ་རུ་དང།། ཁྱི་ཡི་མཚན་མ་ཁོང་དུ་གཏང།། སྐྱེས་པའི་ལིངྒའི་ཚོད་མ་གཏང།། སྔགས་འདི་གྲོ་ག་དག་ལ་བྲི།། གང་གི་སྤྱི་བོར་བཏགས་པ་ཡིས།། བུ་ཡང་མྱུར་དུ་འབྱུང་བར་འགྱུར།། བུ་རོག་ཀྱང་ནི་དེ་བཞིན་འབྱུང། ། ཨོཾ་ཀ་ས་བི་ཀ་ས་མ་ཧཱ་ཀ་ས་སྭཱ་ཧཱ། རྩི་ཡི་ལྷ་མོ་གྲུབ་པ་ཡི། བློ་གྲོས་མས་ནི་བཅོམ་ལྡན་ལ།། རང་གི་རིག་པ་འགྲོ་དོན་ཕུལ།། བུད་མེད་ཟླ་མཚན་དང་ལྡན་ཞིང།། ཁྲུས་བྱེད་པ་ཡི་དུས་སུ་ནི། ། གླང་གཅིན་སྲང་ནི་སུམ་ཅུ་གཉིས།། ཏིལ་མར་སྲང་བརྒྱད་བསྐོལ་བྱས་པའི།། མར་ལུས་པ་དེ་བྱིན་པ་ན།། མོ་གཤམ་བུ་ཡང་བཙའ་བར་འགྱུར།། མ་ཧེའི་མར་གསར་སྲང་གསུམ་དང།། ར་ཆུ་སྦྱར་ནས་བུད་མེད་བླུད།། བུ་མེད་པ་ཡང་སྐྱེ་བར་འགྱུར། ། ཨ་ཤྭ་ཀནྡྷ་བསྐོལ་བ་ཡི།། ཁུ་བ་དར་བ་མར་ཡང་བསྐོལ།། མ་ལུས་པ་དེ་བུད་མེད་ནི།། ཟླ་མཚན་ལྡན་པའི་དུས་འཐུང་ནས།། དེ་ཡི་འོག་ཏུ་སྦྱོར་བ་བྱ།། དེ་ཀྱང་བུ་ཡང་འཛིན་པར་འགྱུར། ། རྒྱ་སྐྱེགས་ལོ་མ་བསྡུས་པ་དང།། རྟ་ཁྲག་སྦྱར་ཏེ་བླུད་པ་ན།། ལེན་སྟོང་བར་དུ་མངལ་འཛིན་འགྱུར།། ཨོཾ་ཤཾ་ཁཾ་ནི་ཤུདྡྷེ་ཕུ་སྭཱ་ཧཱ། ནགས་ཀྱི་ལྷ་མོ་རྨ་བྱའི་མགྲིན།། རང་གི་རིག་པ་དམ་པ་འདི། ། བཅོམ་ལྡན་འདས་ལ་ཕུལ་བའོ།། ཞེས་གསུངས་སོ།། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལས། སེམས་ཅན་ཉོན་མོངས་པའི་སྣང་བ་ལ། སྨན་ར་སཱ་ཡ་ན་བརྒྱུད་པའི་བསྒྲུབ་པ་སྟེ་ལེའུ་གསུམ་པའོ། །།། དེ་ནས་བཅོམ་ལྡན་འདས་ཀྱིས་རང་བྱུང་བདུད་རྩི་ཆེན་པོ་སྒྲུབ་པ་ལས། རྣལ་འབྱོར་དབང་ཕྱུག་ཆེན་པོ་རྣམས་ལ། རྣལ་འབྱོར་པ་ཉམས་ཀྱི་སྣང་བ་སྟོན་པ་ཞེས་བྱ་བ་འདི་དག་ཆེད་དུ་བརྗོད་དེ་གསུངས་སོ། ། དཀྱིལ་འཁོར་ལེའུ་ཚེ་དགུ་པ་ལ།། རྩིབས་ནི་བཅུ་དྲུག་བཀོད་བྱས་ནས།། བར་ཁྱམས་སྒོ་བཞི་བཅས་པ་ལ།། རྟ་བབས་རྡོ་རྗེ་མེ་རི་བཅས།། རྩ་བ་འབྲས་བུ་སྡོང་པོ་དང།། ཡུ་བ་ཤུན་ལྤགས་ལོ་མ་དང། ། མེ་ཏོག་སྙིང་པོར་བཅས་པ་ནི།། ཕྱི་ཡི་རྩ་བ་བརྒྱད་དུ་སྐྱེས།། ལུས་པོར་པགས་པ་ཡན་ལག་དང།། རྩ་བ་མེ་ཏོག་འབྲས་བུ་དང།། སྙིང་པོ་ལོ་མ་རྣམ་པ་བརྒྱད།། མཆོག་ཆེན་མི་ལུས་གཅིག་ལ་ཚང།། འབྲས་བུ་རྣམ་ལྔ་བསྒྲལ་བ་ཡི། ། དབང་པོ་རྣམ་ལྔའི་བཅུད་ལྔ་དང།། སེམས་བཅུད་གོ་རོ་ཙ་ན་ལྔ།། མཱཾ་སའི་བཅུད་ནི་ཚིལ་བུ་ལྔ།། ཆུ་བཅུད་དྲི་ཆུ་རྣམ་པ་ལྔ།། རུས་པའི་བཅུད་ཀྱང་རྐང་མར་ལྔ།། ལུས་པོ་སྙིང་དང་ཁྲག་གི་ཁྲག། གསང་བའི་རྩ་བ་རྣམ་པ་བརྒྱད།། ཡབ་ཀྱི་རྒྱུ་བཞི་གནས་པ་དག། ཡུམ་གྱི་གནས་བཞི་གསང་བའོ།། ཀུན་གཞི་བྱང་ཆུབ་སེམས་ལས་ནི།། མ་གཡོས་བཞིན་དུ་འབྲས་བུ་ནི།། རྣམ་པར་ཤེས་པའི་ཚོགས་བརྒྱད་གསལ། ། དེ་ནི་དོན་དམ་རྩ་བ་ཡིན།། དཀྱིལ་འཁོར་དབུས་སུ་གཞག་པའི་རྫས།། ཡེ་ཤེས་ལྔ་ལྡན་ཀ་པཱ་ལར།། ཡབ་ཡུམ་དྲང་སྲོང་རྒྱུ་བསྒྲལ་ཞིང།། རང་ཤི་ཕག་ཉ་ཕུག་རོན་བརྒྱད།། ཨ་བར་ཛི་ཏ་དུ་རུ་ཀ། དཀར་ནག་དབུས་སུ་གཞག་པའི་རྫས།། དེ་ཡི་ཤར་དུ་གཞག་པ་ཡང།། སྐུ་གསུང་ཐུགས་ལྡན་ཀ་པཱ་ལར།། ཀླད་གཞུང་བེ་ར་ཤ་རྟ་རིལ།། མཆིན་སྣོད་བྷ་ག་རྒྱུད་ཀྱི་ལམ།། ག་པུར་ཅུ་གང་ཐལ་ཀར་གདུང། ། དཀྱིལ་འཁོར་དེ་ཡི་ལྷོ་ཕྱོགས་སུ།། ཡིད་བཞིན་གཏེར་ལྡན་ཀ་པཱ་ལར།། ལྕེ་སྙིང་མཁའ་མ་གཞང་དང་བཞི།། ཀ་བཞི་ཕྱི་ནང་གསང་བ་བརྒྱད།། ཙ་ཏྲི་ཀ་ཀོ་གླ་གོང་སྙིང།། རྩ་བ་སྐྱོབས་དང་བཅས་པར་གནས། ། ནུབ་དུ་དམ་རྫས་དགོད་པ་ནི། ཁམས་གསུམ་ཡོངས་སྒྲོལ་ཀ་པཱ་ལར།། རྒྱུ་ལྔ་ཡབ་ཡུམ་བྱ་བར་རིགས།། ཙནྜན་ལི་ཤི་རྒུན་འབྲུམ་ལྔར།། བྱང་གི་ཕྱོགས་སུ་དགོད་པ་ནི།། ཆོ་འཕྲུལ་རྟགས་འབྱིན་ཀ་པཱ་ལར། ། རྒྱུད་ལྔའི་མཁྲིས་པ་ཡབ་ཡུམ་ཆུ།། འོ་ག་བྲག་ཅོང་གུར་གུམ་ལྕེ།། རྒྱུ་ནི་རང་ལས་བྱུང་བ་ལྔ།། རྣམ་གྲངས་ཆ་ཡང་མཐུན་པ་ལྔ།། རིགས་ནི་རྣམ་པར་ངེས་པ་ལྔ།། འབྲས་བུ་གཞན་དུ་མི་འགྱུར་ལྔ།། གཞི་ལས་རྩ་བ་ལྔ་གྱུར་པས། ། བྷནྡྷ་ལྔ་ཡི་ནང་དུ་སྩལ།། འབྲས་བུ་ཆེན་པོ་ལྔ་བསྒྲལ་བ།། ཨ་ཀ་རུ་ནི་དབུས་སུ་སྟེ།། པ་ན་སེ་ནི་ཤར་ཉིད་ལ།། ལྷོ་རུ་ཨ་འབྲས་ཞེས་བྱ་སྟེ།། ནུབ་ཏུ་རྒུན་འབྲུ་གཞག་པར་བྱ།། བྱང་དུ་ན་ལེ་དགེ་རྒྱས་སོ། ། དེ་ལ་སོགས་པ་ཚོགས་ཚད་དེ།། ཡན་ལག་སྟོང་དུ་བསག་པར་བྱ།། དབུས་སུ་མི་འགྱུར་གཡུང་དྲུང་ལྷ།། ཤར་ལྷོ་མི་ཤིགས་མཛོད་ལྡན་ཏེ།། ལྷོ་ནུབ་སྲིད་པ་ཡོངས་སྒྲོལ་ལ།། ནུབ་བྱང་དུག་གསུམ་གཏན་སྤྲུག་སྟེ། ། བྱང་ཤར་མཚན་མ་སྤྲོས་བྲལ་མ།། དེ་ལྔའི་ནང་དུ་བླུགས་པའི་སྨན།། རྒྱུ་ལྔ་བྱ་ཀ་བམ་དང་བཅས།། ཅུ་གང་འདམ་བུ་གི་ཧང་དབུས།། ལུག་མིན་ལེའུ་མིག་གདུང་བཞི་ཤར།། རྣ་ལྕེ་ཤ་སྣ་ལྷོ་རུ་བསོག། ས་རྩི་ཤིང་དང་མེ་ཏོག་ནུབ། ། དེ་བཞིན་སྲོག་དང་གནམ་ཆུ་སོགས།། བྱང་དུ་ཆུ་རྣམས་ཐམས་ཅད་དོ།། ཤར་ལྷོ་མཚམས་ཀྱི་གྲུ་ཆད་ལ།། ཡོན་ཏན་ཚོགས་རྫོགས་ཀ་པཱ་ལར།། ཛ་གད་གར་ཆད་སྣ་ཚོགས་ཉིད།། ལྷོ་ནུབ་མཚམས་ཀྱི་གྲུ་ཆད་ལ། ། འོ་མ་སྣ་ཚོགས་སྦྱར་བ་ཡང།། བཀྲ་ཤིས་མཚན་ལྡན་ཀ་པཱ་ལར།། ནུབ་བྱང་མཚམས་ཀྱི་གྲུ་ཆད་ལ།། མི་འགྱུར་སྲ་མཁྲེགས་ཀ་པཱ་ལར།། རིན་ཆེན་སྣ་ཚོགས་བདར་བ་དང།། བྱང་ཤར་མཚམས་ཀྱི་གྲུ་ཆད་ལ། ། ཨཱ་ཡུ་དཔལ་ལྡན་ཀ་པཱ་ལར།། སྣ་ཚོགས་ཆུ་རྣམས་གཞག་པར་བྱ།། སྒོ་བཞིར་ཡུམ་ཆེན་དུང་ཆེན་ནི།། ཤར་དུ་དུང་ཅན་རྡོ་རྗེའི་རིགས།། ལྷོ་རུ་བན་གླང་རིན་པོ་ཆེ།། ནུབ་ཏུ་པད་ཅན་པདྨའི་རིགས། ། ལས་རིགས་བྱང་དུ་རི་མོ་ཅན།། བྲག་ཞུན་བདུན་དག་ལུག་མིག་གསུམ།། ཨ་རུ་ར་ནི་རིགས་ཀྱང་བདུན།། དབང་པོ་ལག་པ་རྣམ་པ་གསུམ།། ཤིང་ཐོག་ཐམས་ཅད་ཚང་བར་བྱ།། སྨན་གྱི་རིག་འཛིན་ཚངས་པ་སོགས། ། དྲང་སྲོང་རྣམས་ནི་སྤྱན་དྲངས་ལ།། གཙང་མ་ཟ་བའི་སེམས་ཅན་རྣམས།། རྟོག་བཟློག་ཡང་དག་ལྟ་ལ་གཟུང།། རིགས་རྣམས་སོ་སོར་བཀོད་བྱས་ནས།། ལྷ་མོ་བཞི་ཡི་བྱིན་གྱིས་བརླབ། ། རིགས་ལྔའི་སྔགས་ཀྱིས་བརྟན་པར་བྱས།། ཕྱོགས་བཞི་དབུས་དང་ལྔར་གཞག་གོ། སྨན་རྣམས་མ་ལུས་ཐམས་ཅད་ཀྱང།། རང་བཞིན་གཉིས་སུ་མེད་པས་ན།། རིགས་རྣམས་ཐ་དད་མ་ཡིན་པས།། དབྱེ་བ་མེད་པར་དགོད་པར་བྱ། ། དཀྱིལ་འཁོར་རྒྱན་རྣམས་དགོད་པ་ནི།། དར་གྱི་ཡོལ་བ་རིགས་ལྔའི་རྒྱན།། ཚོན་སྐུད་རིགས་ཀྱྀ་ཡུམ་ལྔ་ལ།། ནང་གི་སེམས་དཔའ་མདའ་དང་ནི།། མེ་ལོང་ནང་གི་སེམས་མ་སྟེ།། རལ་གྲི་ཕྱི་ཡི་སེམས་དཔའ་ལ། ། དར་སྣ་ཕྱི་ཡི་སེམས་མ་ཉིད།། ཕུར་པ་བསྒོ་བ་ཡབ་ཡུམ་བརྒྱད།། བཟེད་ཕོར་ལ་སོགས་བྷནྡྷ་དང།། མཆོད་རྫས་རྣམས་ཀྱིས་རབ་མཛེས་ཤིང།། བརྡ་སྒོ་དབྱེ་ལ་བརྡ་ཕྱག་འཚལ། ། མཆོད་པ་བྱིན་དབབ་གུ་གུལ་བདུག། དེ་ནས་རྡོ་རྗེ་སློབ་དཔོན་གྱིས།། ཛ་གད་བྷནྡྷ་འབར་བ་དེ།། དཔའ་བོ་འབྲུ་ལྔ་ལུས་ཁམས་ཀྱི།། བདུད་རྩི་ལྔ་རུ་བྱིན་གྱིས་བརླབ།། ལས་རྣམས་བསྐོས་ལ་གདབ་པ་ཡང། ། སློབ་དཔོན་སྟོན་པའི་སྒྲོན་མར་གདབ།། ཡུམ་ནི་ཀུན་ཏུ་བཟང་མོ་ལ།། རྒྱལ་པོ་རྡོ་རྗེ་རིན་ཆེན་དང།། པདྨ་ལས་ཀྱི་རིགས་སུ་བྱ།། ཡུམ་བཞི་ཡངས་པའི་སྤྱན་ཆེན་དང།། རིན་ཆེན་པདྨ་ལས་སུ་བྱ། ། རྒྱལ་ཐེབས་བཞི་ཡང་རིགས་བཞིར་གནས།། ཡེ་ཤེས་སྤྱན་དང་དུས་ཚོད་དྲོ།། ཕྱི་དང་ནང་གི་མཚམས་མཁན་དང།། འཛིན་གིང་སྟོབ་གིང་སྒྲོལ་གིང་དང།། གསང་བའི་ཕྱག་ཚངས་ཕུད་ཟས་རྒྱན།། མཆེད་ལྕམ་བྱ་རོག་མངའ་གསོལ་བྱ། ། རྣལ་འབྱོར་དབང་ཕྱུག་ཆེན་པོ་ལ།། དཔལ་གྱི་ཆས་བརྒྱད་མངའ་གསོལ་ནས།། འཁོར་གྱི་མཆེད་དང་ལྕམ་དྲལ་ལ།། ཁྲག་ཞག་ཐལ་བའི་རྟགས་བཏབ་པས།། དཔའ་བོ་དཔའ་མོར་འགྱུར་བ་ཡིན། ། ཆས་དང་མི་ལྡན་རྟགས་མེད་ན།། མ་མོ་མཁའ་འགྲོ་དམ་ཅན་གྱིས།། བསྒྲུབ་མཆོག་ཡིན་པར་ངོ་མི་ཤེས།། དེ་ནས་བཅོམ་ལྡན་འདས་ཀྱིས་འཁོར་རྣམས་ལ་འདི་སྐད་ཅེས་བཀའ་སྩལ་ཏོ།། བདུད་རྩི་ཕྱེ་མ་བསྒྲུབ་པ་ཡི། ། རྣལ་འབྱོར་དཀྱིལ་འཁོར་རྣམ་པ་གསུམ།། ཁྲོལ་བུའི་བསྙེན་པས་དག་པར་སྤྱད།། བཏག་བཙག་གཞལ་བ་ལུགས་བཞིན་བྱེད།། གོང་བུར་བྱས་ཏེ་དབུས་སུ་གཞག། དཀྱིལ་འཁོར་ཆེན་པོར་མངའ་གསོལ་ལོ། ། དམ་པ་རིག་བརྒྱས་སྦྱངས་བྱས་ནས།། རྣམ་སྣང་མི་བསྐྱོད་མཐའ་ཡས་དང།། རིན་འབྱུང་ལས་དང་ཡུམ་དུ་བཅས།། སེམས་དཔའ་རྒྱལ་པོ་ཆགས་པ་ལེགས།། རིན་བརྗིད་རྒྱལ་མཚན་བཞད་པ་དང། ། ཆོས་དང་རྣོན་པོ་འཁོར་ལོ་སྤྲ།། ལས་སྲུང་གནོད་སྦྱིན་ཁུ་ཚུར་དང།། དབྱངས་ཅན་མཱ་མ་གོས་དཀར་སྒྲོལ།། སྒེག་མོ་སྤོས་དང་ལྕགས་ཀྱུ་ཐུབ།། ཕྲེང་བ་མེ་ཏོག་ཞགས་པ་ཁྲོ།། གླུ་དང་མར་མེ་ལྕགས་སྒྲོག་རོ། ། གར་དང་དྲི་ཆབ་དྲིལ་བུ་ཟ།། སྟོབས་དང་གཤིན་རྗེ་རྟ་མགྲིན་བདུད།། འགུགས་འཆིང་སྡོམ་དང་དགྱེས་པ་བསྐྱེད།། སྤྱན་དྲངས་མཆོད་བསྟོད་བདུད་རྩིར་བཞུ།། ལྷ་ཚོགས་མང་པོས་བྱིན་གྱིས་བརླབས།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ར་སཱ་ཡ་ན་ཏ་ན་ཛ་ཡ་གུ་ཧྱ་སིདྡྷི་ཧཱུ~ཾ་ཧྲཱིཿཐ། ཡེ་ཤེས་ལྔ་དང་སྐུ་གསུང་ཐུགས།། ཐམས་ཅད་བདུད་རྩི་ཆེན་པོར་གནས།། དེ་ཉིད་རིགས་ནི་རྣམ་པ་ལྔ།། བདུད་རྩི་རྣམ་པ་ལྔ་ཡི་ནང།། དཔའ་བོ་འབྲུ་ལྔ་བསམ་པར་བྱ། ། ཙིཏྟའི་དཀྱིལ་འཁོར་སྣོད་དུ་གསལ།། ཁམས་ཀྱི་བདུད་རྩི་ལྷ་ཡི་སྐུ།། ཨོཾ་ཧཱུ~ཾ་ཨཱཾ་སྭཱ་ཧཱ་རྣམས་སྔགས། རླུང་གིས་སྤྲོ་ཞིང་བསྡུ་བ་དང།། ལུས་ཁམས་བདུད་རྩི་སྲོག་རྩོལ་བསྐྱོན། ཨོཾ་ཨཱ:ཧཱུ~ཾ་སྭཱ་ཧཱ། དཀར་དམར་སེར་དང་མཐིང་ག་ལྗང།། བདུད་རྩི་རྣམ་པ་ལྔ་པོ་ལས།། གསུང་གི་ཡིག་འབྲུ་སྦྱངས་ནས་ནི།། ཕྱག་མཚན་སྐུ་དང་ཡེ་ཤེས་ལྔ།། སྤྲོས་པས་སྒྲིབ་སྦྱངས་ཐུགས་དམ་བསྐུལ།། འདུད་པས་དུག་བཅོམ་བདུད་རྩིར་གསལ། ། རིགས་ལྔ་སངས་རྒྱས་འཁོར་དང་བཅས།། བསྟོད་ནས་མཉེས་པར་རབ་སྦྱང་ངོ།། ཨོཾ་ཨཱཿ་ཧཱུ~ཾ་སརྦ་པཉྩ་ཨ་མྲྀ་ཏ་བཛྲ་ཨ་ཀྵོ་བྷྱཿ། མུཾ་དྷཱ་ཧྭཱི་ཤཱ་རཱི་ཏིཥྛ་ས་མ་ཡ་ཧཱུ~ཾ་ཧྲཱིཿཐ། ཞེས་བྱང་ཆུབ་སེམས་སུ་སྦྱང་ངོ། ། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་བྷཱུདྡྷ་བཻ་རོ་ཙ་ན་ཨོཾ་ལཾ་དྭེ་ཥ་ར་ཏི་ས་མ་ཡ་སྟྭཾ་ཧཱུ~ཾ་ཧྲཱིཿཐ། ཞེས་བདུད་རྩི་དྲི་ཆེན་སྦྱང་བའོ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་རཏྣ་སཾ་བྷ་བ་ཏྲཱཾ།། མཾ་མོ་ཧ་ར་ཏི་ས་མ་ཡ་སྟྭཾ། ཧཱུ~ཾ་ཧྲཱིཿཐ་ཞེས་མ་ཧཱ་མཱཾ་ས་སྦྱང་ངོ། ། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཨ་མི་དྷེ་ཝ་ཧྲཱིཿ། པྱཾ་རཱ་ག་ར་ཏི་ས་མ་ཡ་སྟྭཾ། ཧཱུ~ཾ་ཧྲཱིཿཐ་ཞེས་པདྨ་རཀྟ་སྦྱང་ངོ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཨ་མོ་གྷ་སིདྡྷི་ཨ། ཏཱཾ་བཛྲ་ར་ཏི་ས་མ་ཡ་སྟྭཾ་ཧཱུ~ཾ་ཧྲཱིཿཐ། ཞེས་དྲི་ཆུ་སྦྱང་བར་བྱའོ། ། རྣམ་སྣང་ཆོས་ཀྱི་དབྱིངས་ཉིད་དེ།། རྡོ་རྗེ་ཡེ་ཤེས་མེ་ལོང་ལས།། རིན་ཆེན་མཉམ་པ་ཉིད་ཡིན་ཏེ།། པདྨ་སོ་སོར་ཀུན་ཏུ་རྟོགས།། ལས་རབ་བྱ་བ་གྲུབ་པ་ཉིད།། ཡེ་ཤེས་ལྔ་ཡི་འཛབ་དབྱངས་བསྟོད།། དེ་ནས་གསང་ཆེན་རིགས་གཅིག་ནི། ། ཆོས་རྣམས་ཐུགས་སུ་འདུས་པས་ནས།། སྣང་སྲིད་འཁོར་འདས་བྱང་ཆུབ་སེམས།། ལྷ་རྣམས་ཐུགས་སུ་འདུས་པས་ནས།། རྡོ་རྗེ་སེམས་དཔའ་ཉིད་དུ་བརྟགས།། རིགས་རྣམས་ཐམས་ཅད་དབྱེར་མེད་པས། ། རྡོ་རྗེ་སེམས་དཔའི་ཏིང་འཛིན་གྱིས།། གསང་སྔགས་དགུ་པ་འཛབ་ཏུ་བཟླས།། ཉམས་ནི་སེམས་ལ་འཆར་བ་ཡིན།། གར་ནི་ལུས་ལ་འཆར་བ་སྟེ།། སྔགས་ཀྱང་ངག་ཏུ་འཆར་བ་ལ། ། མཐོང་སྣང་ཡུལ་ལ་རབ་ཏུ་འཆར།། བག་ཆགས་དག་ནི་རྨི་ལམ་རྨི།། ཨོཾ་བཛྲ་ཙིཏྟ་ས་མ་ཡ་ཧཱུ~ཾ་ཧྲཱིཿཐ།། སྙིང་པོ་འབུམ་དུ་བཟླས་པར་བྱ།། ཡང་ན་བརྒྱ་རྩ་བརྒྱད་དུ་བཟླས།། དེ་ནས་སྨན་རྣམས་མ་ལུས་པ། ། རྟགས་ལྡན་ཆེ་བའི་ཡོན་ཏན་ཡང།། རྣལ་འབྱོར་ཀུན་གྱིས་ངོས་ངོས་ནས།། དབྱངས་དང་བཅས་པར་བརྗོད་པར་བྱ།། རྩ་བའི་དཀྱིལ་འཁོར་ཐམས་ཅད་ཀུན།། མ་ལུས་དབུས་སུ་རབ་བསྡུས་ནས། ། གཡང་གཞི་ཆེ་ཆུང་བསྣོལ་མའི་ཁར།། རྩིབས་བརྒྱད་ཟླ་གམ་དམར་པོ་ལ།། གཏན་གཏུན་ཐབས་དང་ཤེས་རབ་ཀྱི།། རྣམ་རྟོག་མཚན་མ་ཐམས་ཅད་ཀུན།། སྨན་དང་རྫས་སུ་འཐག་པར་བྱའོ།། ཉོན་མོངས་པ་ཡི་རྟོག་པ་དང། ། སྡང་དགྲ་གནོད་བགེགས་བཏག་པར་བྱ།། དར་འཛིན་རྣམ་པར་རྟོག་པ་རྣམས།། མཚན་མ་མེད་པའི་ངང་དུ་བཏགས།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཏ་ན་ཧ་ན་ཧཱུ~ཾ། ད་ཧ་ད་ཧ་ཧཱུ~ཾ། པ་ཙ་པ་ཙ་ཧཱུ~ཾ། བནྡྷ་བནྡྷ་ཧཱུ~ཾ། ཧུ་ལུ་ཧུ་ལུ་ཧཱུ~ཾ། ཏིཥྛ་ཏིཥྛ་ཧཱུ~ཾ། ཙྪིནྡྷ་ཙྪིནྡྷ་ཧཱུ~ཾ་ཧྲཱིཿཐ། འཁར་གཞོང་རིན་ཆེན་གཞོང་པ་རུ།། ཐབས་ཀྱིས་སྙིང་རྗེ་ཆེན་པོ་བླུགས།། ཤེས་རབ་སྟོང་པའི་ཚགས་མ་ལ།། ཐབས་ཤེས་སྤྱོད་པ་ཞིང་མོས་བཙག། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཀ་མ་ལ་ཀུནྡྷ་ལི། བྷནྡྷ་སིདྡྷི་ཧཱུ~ཾ་ཧྲཱིཿཐ། བསྒོམ་པའི་དོན་ལྡན་བསྲེ་བ་ཡང།། ཆང་དང་འོ་མ་རིན་ཆེན་ཆུ།། སྤྲེངས་ནས་ཤ་རྟ་རིལ་གྱིས་དཀྲུག། ཡབ་ཀྱིས་བླུགས་ལ་ཡུམ་གྱིས་བསྲེས།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཀྲོདྷཱི་ཤྭ་རཱི་སཾ་ཤོདྷ་ཡ་ཧཱུ~ཾ་ཧྲཱིཿ། ཞེས་ཆང་སྣ་ཚོགས་པས་སྦྱང་ངོ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་བཾ་དཾ་སཾ་ཤོདྷ་ཡཧཱུ~ཾ་ཧྲཱིཿཐ། ཞེས་འོ་མ་སྣ་ཚོགས་སྤྲེངས་ཤིང་གོན་བན་དུ་བསྲེ་བའོ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་རཏྣ་ཙིཏེ་ཧཱུ~ཾ་ཧྲཱིཿཐ། ཞེས་རིན་པོ་ཆེ་སྣ་ཚོགས་བདར་ལ་བླུག་གོ། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་བི་ཤུདྡྷ་ཀུནྡྷ་ལི་ཧཱུ~ཾ་ཧྲཱིཿཐ། ཞེས་ཆུ་སྣ་ཚོགས་པས་སྤྲེང་ངོ།། འབྲས་བུ་སྐུ་དང་ཡེ་ཤེས་སུ།། ཐམས་ཅད་རོ་གཅིག་གྱུར་པས་ནས། ། ཡབ་ཡུམ་པདྨ་རྡོ་རྗེའི་མཁར།། གཉིས་མེད་གཅིག་ཏུ་སྦྲེལ་བར་བྱ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་མུ་ས་ལ་མུ་ས་ལ་ཨོཾ་ཧཱུཾ་ཐ། ཞེས་གཉིས་སུ་མེད་པར་སྦྱང་བར་བྱའོ།། དེ་ནས་གོང་བུར་རབ་བྱས་ནས།། དར་རས་གཙང་མའི་ནད་དུ་དྲིལ། ། ཕྱོགས་བཞི་མཚམས་ནི་བརྒྱད་དུ་ཡང།། རྟ་མགྲིན་ཕྱག་རྒྱ་རྒྱ་གྲམ་གདབ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཧ་ཡ་གྲཱི་ཝ་ལུ་ཧུ་ལུ་ཧཱུ~ཾ་ཧྲཱིཿཐ། དེ་ལྟར་རྒྱས་བཏབ་ཚད་གཞག་ཕྱིར།། ལེགས་པར་སྲང་ལ་གཞལ་བར་བྱ། ། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཧོ་པ་ཡ་བི་ཤུདྡྷེ་ཧཱུ~ཾཧྲཱིཿཐ། ཐབས་དང་ཤེས་རབ་ཕོ་མོ་ཡི།། ཐོད་པ་ཁ་སྦྱར་བར་དུ་སྩལ།། རིགས་ལྔ་རྫོགས་པའི་སངས་རྒྱས་བཞུགས།། སྤོས་ཀྱི་རྒྱལ་པོའི་དུད་པ་བདུག། ཞི་བ་ལས་ནི་ཁྲོ་བོར་གྱུར།། དུར་ཁྲོད་ཆེན་པོའི་གནས་སུ་བྱ།། ལོངས་སྤྱོད་ཤ་ཁྲག་ཚོགས་སུ་རོལ།། ཁྲོ་བོ་དུར་ཁྲོད་གནས་ལ་དགྱེས།། དུར་ཁྲོད་ཚོན་གྱིས་རབ་བྲིས་པ།། དབུས་ནས་ལེའུ་ཚེ་དགུ་པ་ལ། ། གདན་ལ་པདྨ་འདབ་མ་བརྒྱད།། འཁོར་ལོ་རྩིབས་བརྒྱད་རྩི་མོ་ལ།། ནོར་བུ་རིན་ཆེན་ཟུར་བརྒྱད་བྲི།། མུ་ཁྱུད་བར་ཁྱམས་སྒོ་བཞི་པ།། རྟ་བབས་མཆོད་རྟེན་བརྒྱད་དང་ལྡན།། འདེགས་པའི་སྟོངས་ལྡན་ཀ་བ་བརྒྱད། ། ཡུལ་ལ་མ་རྨོངས་རྩིབས་བརྒྱད་དང།། གདན་ལ་སྐྱོན་མེད་པདྨ་བརྒྱད།། ཡོན་ཏན་མི་ཟད་རིན་ཆེན་བརྒྱད།། མཐའ་གཉིས་མ་སྤྲོས་མུ་ཁྱུད་ཟླུམ།། ཡེ་ཤེས་གྲུ་ཆད་བརྡལ་ཁྱབ་ཁྱམས། ། མཆོད་རྣམས་རྟེན་གྱུར་མཆོད་རྟེན་བརྒྱད།། དུར་ཁྲོད་བརྒྱད་ཀྱིས་མཐའ་བསྐོར་བས།། གསང་བ་མཆོག་གི་དཀྱིལ་འཁོར་ཡིན།། བདུད་རྩི་བུམ་པ་ཡུམ་དང་ནི།། བླ་མས་ཕྱག་ཏུ་བཞེས་ནས་ནི།། མཚམས་བཅད་ཁྲོ་བོར་བ་གུ་ར། ། སྲུང་བའི་འཁོར་ལོ་རབ་ཏུ་བསྒོམ།། དབུས་ཀྱི་གཙོ་བོ་མངའ་གསོལ་ཏེ།། དུར་ཁྲོད་གནས་ན་བཞུགས་ནས་ནི།། འགྲོ་བའི་དོན་ཡང་རབ་མཛད་པར།། དགྱེས་པར་བཞུགས་སུ་གསོལ་བྱའོ། ། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་མ་ཧཱ་ཤཱི་ཧེ་རུ་ཀ། མ་ཧཱ་ཀྲོདྡྷི་ཤྭ་རཱི་སྟྭཾ། ས་མ་ཡ་ཏིཥྛ་ལྷན། སྐོར་བ་ལན་གསུམ་བསྐོར་བྱས་ནས།། རྡོ་རྗེའི་བྲོ་ནི་ཤར་དུ་བརྡུང།། རིན་ཆེན་ལྷོ་ལ་པདྨ་ནུབ།། ལས་ཀྱི་བྲོ་ནི་བྱང་ཉིད་དོ། ། དེ་ནས་མཚམས་བཅད་བསྲུང་བ་དང།། མཆོད་པ་བྱིན་གྱིས་བརླབ་པར་བྱ།། ལུས་ངག་ཡིད་ཀྱི་ཉེས་བྱས་སྦྱངས།། བརྡ་སྒོ་བརྡ་ཕྱག་བྱིན་ཆེན་དབབ།། གདོད་ནས་མ་སྐྱེས་རྣམ་དག་ཆོས་ཉིད་ནི།། ཅིར་ཡང་མི་དམིགས་སྟོང་པའི་རང་བཞིན་ཏེ། ། བླང་དོར་མེད་པའི་དོན་ལ་མ་གཡོས་པར།། མཉམ་པ་ཆེན་པོའི་ངང་དུ་བསྒོམ་པར་བྱ།། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་སྭ་བྷཱ་ཝ་ཨཱཏྨ་ཀོུ྅་ཧཾ། ཆོས་རྣམས་ཐམས་ཅད་གདོད་ནས་དག་པ་ལ། ། སེམས་ཀྱི་རང་བཞིན་ཀུན་ལ་ཁྱབ་པར་བརྡལ།། ཐམས་ཅད་འབྱུང་བའི་ཡེ་ཤེས་ཆེན་པོ་སྟེ།། སེམས་དང་ཡེ་ཤེས་ཀུན་ལ་ཅིར་ཡང་སྣང།། ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོུ྅ཧཾ།། བྱང་ཆུབ་སེམས་ནི་ཧཱུ~ཾ་གི་རང་བཞིན་ཏེ། ། ཧཱུ~ཾ་ཉིད་གདོད་ནས་དག་པའི་སྐུ་རུ་གསལ།། མངོན་གསུམ་གྱུར་པ་ཐམས་ཅད་འབྱུང་བའི་རྒྱུ།། གསང་ཆེན་ཡུམ་ལྔ་གསང་མཆོག་དཀྱིལ་འཁོར་གསལ།། ཨེ་ཡཾ་རཾ་ར་བཾ་ཀེཾ་བྷཱུཾ། ཨེ་ལས་ཡེ་ཤེས་ནམ་མཁའི་དཀྱིལ་འཁོར་ནི། ། དངོས་དང་མཚན་ཉིད་ཐམས་ཅད་མི་དམིགས་པ།། ཆོས་ཀུན་ཡེ་ནས་དག་པའི་ངང་ཉིད་ནི།། མཐའ་དང་དབུས་མེད་ནམ་མཁའི་མཐའ་དང་མཉམ།། ཨེ་ཨཱ་ཀ་ཤ་མཎྜལ་ཧཱུ~ཾ། ཡཾ་ལས་ཡེ་ཤེས་འཐོར་རླུང་ཆེན་པོ་ནི། ། བག་ཆགས་སྡུག་བསྔལ་ཡེ་ཤེས་རླུང་གིས་བསྐྱོད།། དེ་ལས་དབྱིངས་ཕྱུག་དབྱིངས་སུ་མཉམ་སྦྱར་ནས།། ཡཾ་ལས་རླུང་གི་དཀྱིལ་འཁོར་བསྐྱེད་པར་བྱ།། ཡཾ་ཀརྨ་རཀྴ་ཧཱུ~ཾ། རཾ་ལས་མེ་ཡི་དཀྱིལ་འཁོར་ཆེན་པོ་ནི། ། དངོས་པོ་སྣང་བའི་བག་ཆགས་སྡུག་བསྔལ་བསྲེག། རིན་ཆེན་དབྱིངས་ཕྱུག་མཁའ་དང་མཉམ་སྦྱར་ནས།། རཾ་ལས་མེ་ཡི་དཀྱིལ་འཁོར་བསྐྱེད་པར་བྱ།། རཾ་ཛྭ་ལ་མཎྜལ་ཧཱུ~ཾ། ར་ལས་ཡེ་ཤེས་ཁྲག་གི་དཀྱིལ་འཁོར་ནི། ། འདོད་ཆགས་འཁོར་བའི་སྡུག་བསྔལ་གཏན་སྦྱངས་ཏེ།། པདྨ་དབྱིངས་ཕྱུག་མཁའ་དག་མཉམ་སྦྱར་ནས།། ར་ལས་རཀྟའི་དཀྱིལ་འཁོར་བསྐྱེད་པར་བྱ།། ར་རཀྟ་མཎྜལ་ཧཱུ~ཾ། བཾ་ལས་ཞིང་ཆེན་གཏམས་པའི་ས་གཞི་ནི།། ཟད་མེད་གཏེར་ཆེན་རྡོ་རྗེ་རྒྱ་གྲམ་གཏམས།། སངས་རྒྱས་དབྱིངས་ཕྱུག་མཁའ་དང་མཉམ་སྦྱར་ནས།། བཾ་ལས་ཞིང་ཆེན་ས་གཞི་བསྐྱེད་པར་བྱ།། བཾ་ཏི་ར་མཎྜལ་ཧཱུ~ཾ། ཀུན་ཏུ་བཟང་མོ་ཡུམ་གྱི་མཁའ་ཀློང་ནས།། མི་འགྱུར་མི་ཤིགས་རྡོ་རྗེ་བརྟན་པའི་སྐུ།། སྲིད་གསུམ་འདེགས་བྱེད་བྱ་ར་ནན་ཏན་ཏེ།། ཡེ་ཤེས་བཞིར་གྱུར་རང་བཞིན་ཀུན་ལ་ཁྱབ།། རཀྟའི་རྒྱ་མཚོ་ཡུམ་གྱི་མཁའ་ཀློང་ནས། ། ཐམས་ཅད་སྐྱེད་བྱེད་ཡུམ་གྱི་བྱང་ཆུབ་སེམས།། དུས་གསུམ་འདུ་འབྲལ་མེད་པར་ཆགས་པའི་ཀློང།། རང་བཞིན་རྣམ་དག་པདྨ་རཱ་གའི་ཀློང།། ཀེཾ་རུས་རི་རབ་རྡོ་རྗེ་བྲག་སྟེངས་ན།། དྲེགས་པ་བསྒྲལ་ནས་ཞེ་སྡང་ཕུང་པོ་བཤིག། ཆགས་མེད་རཀྟའི་དཀྱིལ་འཁོར་རང་བྱུང་བ།། བཅོམ་ལྡན་དཔལ་ཆེན་ཡབ་ཡུམ་བཞུགས་པའི་གནས།། བྷྲཱུཾ་ལས་བསྐྱེད་པ་འབར་བའི་གཞལ་ཡས་ཁང།། ཕྱོགས་བཅུ་ཀུན་ཏུ་རྒྱ་ཡོངས་མ་ཆད་པའི། ། ཕྱི་དང་ནང་མེད་ཡེ་ཤེས་གསལ་བའི་ངང།། རང་བཞིན་ལྷུན་གྱིས་གྲུབ་པའི་བཞུགས་གནས་སོ།། ཨོཾ་གུ་ཡ་ཨ་ཀྲ་མ་དྷ་ལ་ཧཱུ~ཾ། གུ་ཡ་གསང་ཆེན་བྱང་ཆུབ་སེམས་ཀྱི་ཐིག། རང་བཞིན་རྣམ་པར་དག་པའི་དཀྱིལ་འཁོར་ལ། ། གཉིས་མེད་བྱང་ཆུབ་སེམས་ཀྱི་ཐིག་བཏབ་པས།། མཎྜལ་བརྒྱད་པ་མཐའ་དབུས་མེད་པར་གསལ།། མཐའ་གཉིས་མ་སྤྲོས་ལྟེ་བ་ཟླུམ་པོ་ལ།། ལྟེ་དབུས་ཐིག་བཞི་བཏབ་པས་ལེའུ་ཚེ་དགུ། ། དབུས་སུ་དབང་ཆེན་ཟླ་གམ་དམར་པོ་ལ།། འཇིགས་བྱེད་མཐིང་ནག་གྲུ་གསུམ་འབར་བས་བརྒྱན།། ཆགས་མེད་པདྨ་འདབ་བརྒྱད་བརྡལ་བ་ལ།། ཡེ་ཤེས་བརྒྱད་སྤྲོས་འཁོར་ལོ་རྩིབས་བརྒྱད་པ།། རིན་ཆེན་ཟུར་བརྒྱད་ཡོན་ཏན་སྣ་ཚོགས་འཕྲོ། ། མི་འགྱུར་མི་ཤིགས་རྡོ་རྗེའི་ར་བས་བསྐོར།། འབར་འཕྲོ་ཐུགས་རྗེའི་འོད་ཟེར་མང་པོ་འཁྲུགས།། ཡེཤེས་བཞི་ལྡན་གྲུ་ཆད་བཞི་ཡིས་བརྒྱན།། འབར་བ་ཆེན་པོའི་བར་ཁྱམས་རབ་ཏུ་མཛེས། ། ཡེ་ཤེས་སྒོ་བཞི་རྟ་བབས་བརྒྱད་དང་ལྡན།། བྷནྡྷ་སྐམ་རློན་མང་པོའི་རྩིགས་པ་ལ།། གནམ་ལྕགས་ངུར་མོ་འབར་བའི་གཟེར་གྱིས་བཏབ།། ཞིང་ཆེན་ཕོ་མོ་བསྣོལ་བའི་ཀ་གདུང་ལ།། ཞིང་ཕྲན་མང་པོ་གཏམས་པའི་གྲལ་ཕྱམ་བཏང། ། ཞིང་ཆེན་གཡང་གཞི་བླ་རེ་འཕན་གདུག་དང།། བྷནྡྷའི་ཕོ་ལོང་སྦྲུལ་ནག་ཆུན་པོ་དང།། ཉི་ཟླ་གཟའ་སྐར་མང་པོའི་ཚོགས་ཀྱིས་བརྒྱན།། ཁམས་གསུམ་ཀུན་ཏུ་གསང་བའི་དཀྱིལ་འཁོར་ཁྱབ། ། བྷྲཱུཾ་གུ་ཡ་མཎྜ་ལ་བྷྲཱུཾ། ནོར་བུ་མུ་ཏིག་གཅལ་དུ་ལེགས་པར་བཀྲམ།། ཨསྨ་གར་བྷའི་འོད་ཀྱིས་ཕྱོགས་བཅུར་འཕྲིགས།། ནོར་བུ་རིན་པོ་ཆེ་ཡི་བྲག་ཏུ་གཏམས།། རྡོ་རྗེ་རྩེ་གཅིག་རྩེ་གསུམ་རྩེ་ལྔ་དང། ། མ་ནི་ཤེས་རབ་འདུ་བྲལ་མེད་པའི་ངང།། དབྱིངས་ཀྱི་ཐུགས་རྗེས་མཐའ་དབུས་མེད་པར་ཁྱབ།། ཉི་མའི་མཎྜལ་གདན་གྱི་ཁྱད་པར་ནི།། སྣང་བ་མ་འགགས་ཡོངས་ལ་ཁྱབ་པར་བསྒོམ།། མ་སཱུརྱ་མཎྜ་ལ་ཧཱུ~ཾ། ཨ་ནི་མ་སྐྱེས་ཐབས་ཀྱི་རངབཞིན་ཏེ།། རིག་པ་བྱང་ཆུབ་སེམས་ཀྱི་ཐིག་ལེ་ཆེ།། ཟླ་བའི་དཀྱིལ་འཁོར་མཉམ་པར་རབ་སྣང་བ།། མཐའ་དབུས་མེད་པར་གདོད་ནས་དག་པར་བསྒོམ།། ཨ་ཙནྜ་མཎྜ་ལ་ཧཱུ~ཾ། བཾ་ནི་ཆགས་མེད་པདྨ་དམར་པོའི་མདོག། འདོད་ཆགས་ཐམས་ཅད་དབང་བསྡུས་ཡུམ་གྱི་མཁའ།། པདྨའི་གེ་སར་ཆོས་ཀྱི་དབུ་འཕང་ནས།། ཇི་ལྟར་འབྱུང་བར་འགྱུར་བའི་མཎྜལ་བསྒོམ།། པཾ་པདྨ་མཎྜ་ལ་ཧཱུ~ཾ། ཧཱུ~ཾ་སྥ་ར་ན་ཕཊ། སཾ་ཧ་ར་ཎ་ཧཱུ~ཾ། བཛྲ་ཤྲཱི་ཧེ་རུ་ཀ་བཛྲ་ཀཱ་ཡ། བཛྲ་ཀྲོདྷཱི་ཤྭ་རཱི་སྟྭཾ། བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ། སྐུ་མདོག་མཐིང་ག་འཇིགས་བྱེད་རྒྱན་གྱིས་བརྒྱན།། ཞལ་གཅིག་ཕྱག་གཉིས་རྡོ་རྗེ་བྷན་དྷར་དཀྲུག། ཞབས་གཉིས་བརྐྱང་བསྐུམ་ཉི་ཟླའི་གདན་ལ་བཞུགས།། ཨོཾ་ཨཱཿཧཱུ~ཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོུ྅ཧཾ། སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོུ྅ཧཾ། སརྦ་ཏ་ཐཱ་ག་ཏཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོུ྅ཧཾ། སརྦ་ཏ་ཐ་ག་རཏྣ་གུ་ཡ་བཛྲ་སྭ་བྷཱ་ཝ་ཨཱཏྨ་ཀོུ྅ཧཾ། སརྦ་ཏ་ཐ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོཉཧཾ། བྱོལ་སོང་གཙོ་བོ་བརྒྱད་ཀྱི་གདན་སྟེང་ན།། འཇིགས་བྱེད་ཆེན་པོ་ཁྲོ་བོ་ཆེན་པོ་བཅུ།། ཧཱུ~ཾ་ཆེན་སྔཽ་སྐྱ་རྡོ་རྗེ་ཉི་ཟླ་བསྣམས། ། རྣམ་པར་རྒྱལ་བ་རྡོ་རྗེ་སྟི་ར་དཀར།། དབྱུག་པ་ལྗང་སྔོན་དབྱུག་ཏོ་མེ་ལྷ་འཛིན།། གཤིན་རྗེ་མཐིང་ནག་རིན་ཆེན་གྲུལ་བུམ་བསྣམས།། མི་གཡོ་སྨུག་ནག་རལ་གྲི་སྲིན་པོ་ཐོགས།། རྟ་མགྲིན་དམར་པོ་སྦྲུལ་ཞགས་ཁྱུང་ཆེན་གཤོག། མི་ཐུབ་དམར་སྐྱ་བ་དན་རླུང་ལྷ་འཛིན།། བདུད་རྩི་ལྗང་ནག་རྒྱ་གྲམ་གནོད་སྦྱིན་བསྣམས།། ཁམས་གསུམ་སེར་ལྗང་ནེའུ་ལེ་བགེགས་ཆེན་བཟུང།། སྟོབས་ཆེན་དུད་ཀ་ཐོང་གཤོལ་གཏུན་ཤིང་བསྣམས། ། བཛྲ་མ་ཧཱ་ཀྲོ་དྷ་ཧཱུ~ཾ་ཀཱ་ར་ཧཱུ~ཾ། བཛྲ་མ་ཧཱ་ཀྲོ་དྷ་བི་ཛ་ཡ་ཧཱུ~ཾ། བཛྲ་མ་ཧཱ་ཀྲོ་དྷ་ནཱི་ལ་དཎྜ་ཧཱུ~ཾ། བཛྲ་མ་ཧཱ་ཀྲོ་དྷ་ཡ་མཱནྟ་ཀ་ཧཱུ~ཾ། བཛྲ་ཀྲོདྷ་ཨཱརྱ་ཨ་ཙ་ལ་ཧཱུ~ཾ། བཛྲ་མ་ཧཱ་ཀྲོ་དྷ་ཧ་ཡ་གྲཱི་བ་ཧཱུ~ཾ། བཛྲ་མ་ཧཱ་ཀྲོ་དྷ་ཨ་པ་རཱ་ཛི་ཏ་ཧཱུ~ཾ། བཛྲ་མ་ཧཱ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུ~ཾ། བཛྲ་མ་ཧཱ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུ~ཾ། བཛྲ་མ་ཧཱ་ཀྲོ་དྷ་མ་ཧཱ་བ་ལ་ཧཱུ~ཾ། ཨོཾ་བུདྡྷ་ཤྲཱི་ཧེ་རུ་ཀ། བཛྲ་ཤྲཱི་ཧེ་རུ་ཀ། རཏྣ་ཤྲཱི་ཧེ་རུ་ཀ། པདྨ་ཤྲཱི་ཧེ་རུ་ཀ། ཀརྨ་ཤྲཱི་ཧེ་རུ་ཀ། བི་ཤྭ་ས་ནུ་ཤྲཱིཧེ་རུ་ཀ། གུ་ཧྱ་ས་མ་ཡ་ཤྲཱི་ཧེ་རུ་ཀ། ཡཀྴ་ཤྲཱི་ཧེ་རུ་ཀ་རཀྴཤྲཱི་ཧེ་རུ་ཀ། རང་བྱུང་ཁྲོ་རྒྱལ་བཅུ་ཡི་དབུ་སྟེངས་སུ།། ཁྲག་འཐུང་ཆེན་པོ་ཀློང་དགུ་ཧེ་རུ་ཀ། ཡེ་ཤེས་ཆེན་པོ་དགུ་རྣམས་ལྷུན་གྲུབ་པ། ། བཅོམ་ལྡན་ཁྲག་འཐུང་བུདྡྷ་ཆེན་པོ་ནི།། དབུ་གསུམ་གཡས་སེར་གཡོན་དམར་དབུས་མ་སྨུག། ཕྱག་དྲུག་འཁོར་ལོ་དགྲ་སྟྭ་ཞགས་པ་གཡས།། བྷནྡྷ་རྔེའུ་ཆུང་ཁ་ཊཱཾ་གཡོན་ན་བསྣམས།། བཅོམ་ལྡན་ཁྲག་འཐུང་རྡོ་རྗེ་ཆེན་པོ་ནི། ། དབུ་གསུམ་གཡས་དཀར་གཡོན་དམར་མཐིང་ནག་སྐུ།། ཕྱག་དྲུག་རྡོ་རྗེ་ཁ་ཊཱཾ་སྟི་ར་གཡས།། དུང་དམར་རྒྱུ་ཞགས་ཞིང་ཆེན་ཁྱུང་གི་ཁྲ།། བཅོམ་ལྡན་ཁྲག་འཐུང་རིན་ཆེན་ཆེན་པོ་ནི། ། དབུ་གསུམ་སྔོ་ནག་སེར་དང་དམར་བའི་ཞལ།། རིན་ཆེན་གཤོལ་དང་གཏུན་ཤིང་དབྱུག་ཐོག་གཡས།། བྷནྡྷ་དགྲ་སྟྭ་གཏུན་ཤིང་རྔེའུ་ཆུང་གཡོན།། བཅོམ་ལྡན་པདྨ་ཁྲགའཐུང་ཆེན་པོ་ནི།། དབུ་གསུམ་དམར་ནག་སྔོ་དང་ལྗང་དཀར་ཞལ། ། གཡས་པ་པདྨ་རྔེའུ་ཆུང་སྤུ་གྲི་བསྣམས།། བྷནྡྷ་ཁ་ཊཱཾ་ཐོད་ཕྲེང་གཡོན་པ་ན།། བཅོམ་ལྡན་ལས་རབ་ཁྲག་འཐུང་ཆེན་པོ་ནི།། དབུ་གསུམ་ལྗང་ནག་དམར་སེར་དཀར་བའི་ཞལ།། རྒྱ་གྲམ་རལ་གྲི་ཞགས་པ་རྔེའུ་ཆུང་གཡས། ། བྷནྡྷ་རྔེའུ་ཆུང་དྲིལ་བུ་ཁ་ཊཱཾ་དབྱུག། བཅོམ་ལྡན་ཁྲག་འཐུང་སྣ་ཚོགས་ཆེན་པོ་ནི།། ཞལ་གསུམ་དཀར་པོ་གཡས་མཐིང་གཡོན་པ་དཀར།། ཕྱག་དྲུག་གྲི་གུག་རྡོ་རྗེ་ཁ་ཊཱཾ་གཡས། ། ཐོད་པ་དྲིལ་བུ་རྔེའུ་ཆུང་གཡོན་ན་བསྣམས།། བཅོམ་ལྡན་ཁྲག་འཐུང་གསང་བ་ཆེན་པོ་ནི།། ཞལ་གསུམ་གཡས་དཀར་གཡོན་དམར་དབུས་མ་སེར།། གྲི་གུག་རིན་ཆེན་བེ་ཅོན་གཡས་པ་ན།། ཐོད་པ་དྲིལ་བུ་ཅང་ཏེའུ་གཡོན་ན་བསྣམས། ། བཅོམ་ལྡན་ཁྲག་འཐུང་གནོད་སྦྱིན་ཆེན་པོ་ནི།། ཞལ་གསུམ་དམར་པོ་གཡས་མཐིང་གཡོན་པ་སྔོ།། གྲི་གུག་པདྨ་དགྲ་སྟྭ་གཡས་པ་ན།། ཐོད་པ་དྲིལ་བུ་ཌཱ་མ་རུ་ནི་གཡོན།། བཅོམ་ལྡན་ཁྲག་འཐུང་སྲིན་པོ་ཆེན་པོ་ནི། ། ཞལ་གསུམ་ལྗང་གུ་གཡས་དཀར་གཡོན་དམར་བ།། གྲི་གུག་རྒྱ་གྲམ་རལ་གྲི་གཡས་པ་ན།། ཐོད་པ་དྲིལ་བུ་རྔེའུ་ཆུང་གཡོན་པ་ན།། མི་གནས་ཡེ་ཤེས་ཆེན་པོའི་ཀློང་དཀྱིལ་དུ། ། སྐུ་གདུང་འབར་བའི་དཀྱིལ་འཁོར་ལྷུན་གྱིས་གྲུབ།། མུཾ་ཕཊ་ཀྲོདྡྷི་ཤྭ་རཱི་ས་མ་ཡ་སྟཾ།། ཡེ་ཤེས་ཁྲག་འཐུང་དགུ་ཡི་དབུ་སྟེང་དུ།། མཁའ་མཉམ་ཀློང་གི་དཀྱིལ་འཁོར་གནམ་ཞལ་མ།། དབུ་དགུ་ཕྱག་ཀྱང་བཅོ་བརྒྱད་ཞབས་ཀྱང་བརྒྱད། ། གཡས་གཡོན་དང་པོ་རྡོ་རྗེ་དུང་དམར་དགུག་ཅིང་གསོལ།། གཡས་བརྒྱད་ཀཽ་རི་ཆོས་ཉིད་བདུད་རྩིར་སྦྱོར།། གཡོན་བརྒྱད་ཕྲ་མེན་འཁོར་བ་བདུད་རྩིར་སྦྱོར།། བྷ་གའི་ཀློང་དུ་རྡོ་རྗེའི་སྨིན་མཚམས་ནུབ། ། ཡེ་ཤེས་དགུ་རྣམས་དབྱིངས་ཀྱི་བྷ་གར་ཐིམ།། ཧཱུ~ཾ་བཛྲ་མ་ཧཱ་ཤྲཱི་ཧེ་རུ་ཀ་ཧཱུ~ཾ་མ་ཧཱ་ཛྭ་ལ་རཾ།། གསང་བ་ཡུམ་གྱི་དབུ་སྟེང་གནས་བཞུགས་པ།། འཆི་མེད་རྡོ་རྗེ་ཆེ་མཆོག་ཧེ་རུ་ཀ། དབུ་ནི་ཉི་ཤུ་རྩ་གཅིག་འབར། ། མར་མེའི་རྒྱལ་པོ་རིན་ཆེན་གཙུག་ཕུད་དང།། ཚེ་དཔག་མེད་དང་རྣམ་པར་གཟིགས་པ་དང།། རིན་ཆེན་མང་དང་གཙུག་ཏོར་ཤཱཀྱ་ཐུབ།། གསེར་ཕྱེ་དྲི་བྲལ་སྣང་བ་དཔག་མེད་དང།། ཉི་མའི་དཀྱིལ་འཁོར་སྤོབས་པ་བརྩེགས་པ་དང། ། སེང་གེ་འབུམ་གཟིགས་སེང་གེ་རྣམ་པར་རོལ།། ཡོན་ཏན་ཀུན་འོད་རི་ཡི་རྒྱལ་པོ་དང།། བྱམས་པ་ཀུན་གཟིགས་ཀུན་ནས་འོད་ཟེར་དང།། དཔལ་བརྩེགས་རྒྱལ་པོ་རྡོ་རྗེ་རྣམ་པར་གནོན། ། རྣམ་དག་སྐུ་དང་སཱ་ལའི་རྒྱལ་པོ་བཞུགས།། འཁོར་ལ་མཆོད་རྟེན་རིན་ཆེན་རྒྱལ་མཚན་བཅུ།། བཞི་བཅུ་རྩ་གཉིས་ཕྱག་མཚན་བསྣམས་པ་ནི།། སངས་རྒྱས་བཞི་བཅུ་རྩ་གཉིས་བདུད་རྩི་མཆོད། ། ཞབས་བརྒྱད་རྡོ་རྗེ་ཡུམ་གྱི་བྷ་གར་འཇིབ།། གནམ་ཞལ་བདུད་རྩི་འོ་མ་བཅུད་ཀྱིས་འབེབས།། དཀྱིལ་འཁོར་བར་ཁྱམས་དྲང་སྲོང་ཉི་ཤུ་གཅིག། སྒོ་བཞི་ལྷ་མོ་སྨན་གྱི་སྲུང་མ་བཞི།། ཀླུ་བདག་རྟ་མགྲིན་མེ་རླུང་ཐོད་པ་སྟེ། ། མི་ཐུབ་རོ་ལངས་ཟ་བྱེད་རྒྱས་འདེབས་མ།། སྟེང་འོག་ཧཱུ~ཾ་དང་སྟོབས་ཆེན་ཁྲོ་བོ་བསྲུངས།། བདུད་རྩི་སྨན་གྱི་ཕོ་བྲང་སྲུང་མར་བཞུགས།། ཡེ་ཤེས་དཀྱིལ་འཁོར་སྤྱན་དྲངས་བཞུགས་སུ་གསོལ། ། ཕྱག་མཚན་བདུད་རྩི་རཀྟ་གཏོར་མ་འབུལ།། ཐུགས་དམ་བསྐུལ་བསྟོད་གསང་བའི་གླུ་དབྱངས་བླངས།། རོལ་མོའི་སྒྲ་དང་དྲི་སྟབས་གར་གྱིས་བརྗིད།། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས།། ཆོས་སྐུ་སྐྱེ་བ་མེད་པའི་དབྱིངས་ཉིད་ལས། ། ལོངས་སྐུ་ཡེ་ཤེས་སྒྱུ་མའི་སྐུར་སྣང་བ།། བདུད་རྩི་ཡོན་ཏན་ལྷ་ཚོགས་སྤྱན་འདྲེན་པ།། དུས་གསུམ་སངས་རྒྱས་སྐུ་ཡི་རྒྱན་དུ་བཞུགས།། མ་མོ་མཁའ་འགྲོ་ཕྱག་མཚན་སྤྲུལ་པ་འགྱེད། ། འབར་བའི་གར་དགུས་གདུལ་བྱ་སོ་སོར་འདུལ།། ཆེ་མཆོག་ཧེ་རུ་སྤྱན་འདྲེན་གཤེགས་སུ་གསོལ།། སྤྱན་གྱི་ལྟ་སྟངས་མཁའ་འགྲོ་དབང་དུ་སྡུད།། གནས་ཡུལ་མ་མོ་ཕྱག་མཚན་ཕོ་ཉ་མཛད།། བྷ་ག་བདེ་སྟོང་ཀློང་ནས་ཁྲག་འཐུང་འཆང། ། ཁྲོ་མོ་དབྱིངས་ཕྱུག་སྤྱན་འདྲེན་གཤེགས་སུ་གསོལ།། སྐུ་ནི་ཀློང་དགུ་ཁྲག་འཐུང་འབར་བའི་སྐུ།། གསུང་གི་སྒྲ་དབྱངས་རྨད་བྱུང་གསང་སྔགས་འཆང།། ཐུགས་ནི་ཡེ་ཤེས་ཆེན་པོ་གསལ་བའི་ངང། ། དགུ་ཀློང་ཧེ་རུ་ཀ་རྣམས་གཤེགས་སུ་གསོལ།། བདུད་རྩི་སྨན་གྱི་ཕོ་བྲང་རྟ་མགྲིན་སྐུ།། གསང་བའི་ཡུམ་བཞིའི་མཁའ་ལ་སྦྱོར་བ་མཛད།། ཧཱུ~ཾ་མཛད་སྟོབས་ཆེན་མེ་རླུང་ལས་ཀྱིས་སྦྱོར།། རྟ་མགྲིན་དབང་གི་དཀྱིལ་འཁོར་གཤེགས་སུ་གསོལ། ། མི་དགེ་བཅུ་སྨིན་ཕྱོགས་སྐྱོང་རྣམ་པར་འདུལ།། དགེ་བཅུ་མཐོ་རིས་ཐར་པའི་ལམ་ཡང་སྟོན།། རང་བྱུང་དཀྱིལ་འཁོར་མ་ལུས་སྲུང་མཛད་པའི།། མཐར་ཕྱིན་ཁྲོ་རྒྱལ་རྣམས་ཀྱང་གཤེགས་སུ་གསོལ། ། ཨོཾ་ཨེ་ཧྱེ་ཧི་བྷ་ག་ཝཱན། མ་ཧཱ་ཀ་རུ་ཀ་ཎི་ཀཱ་ཛཿཧཱུ~ཾ་བཾ་ཧོཿ། བྱཽལ་སོང་གཙོ་བོ་བརྒྱད་ཀྱི་ཁྲི་སྟེང་དུ།། སྟོང་གསུམ་ཁྲོ་བོའི་དཀྱིལ་འཁོར་བཞུགས་སུ་གསོལ།། ཏ་ཀྲྀཏ་ཁྲོ་བོ་བརྒྱད་ཀྱི་དབུ་སྟེང་དུ། ། སྐུ་གདུང་འབར་བའི་དཀྱིལ་འཁོར་བཞུགས་སུ་གསོལ།། ཀློང་དགུ་ཧེ་རུ་ཀ་ཡི་དབུ་སྟེང་དུ།། མཁའ་མཉམ་ཀློང་གི་དཀྱིལ་འཁོར་བཞུགས་སུ་གསོལ།། ཁྲོ་མོ་དབྱིངས་ཕྱུག་མ་ཡི་དབུ་སྟེང་དུ།། འཆི་མེད་རྡོ་རྗེ་དཀྱིལ་འཁོར་བཞུགས་སུ་གསོལ། ། ཨོཾ་མ་ཧཱ་མཎྜ་ལ་ཀཱ་ཡ་བཱའ་ཀ་ཙིཏྟ་ཏིཥྛ་ལྷན། དུར་ཁྲོད་གསང་བ་མཆོག་གི་དཀྱིལ་འཁོར་དུ།། བདུད་རྩི་སྨན་གྱི་དཀྱིལ་འཁོར་འཁོར་ལོའི་ལྷ།། ཁྲོ་རྒྱལ་བགེགས་དཔུང་འཇོམས་ལ་ཕྱག་འཚལ་ལོ། ། ཁྲག་འཐུང་ཡེ་ཤེས་ཀློང་དགུ་ཕྱག་འཚལ་ལོ།། མཁའ་སྤྱོད་དབང་སྡུད་ཡུམ་ལ་ཕྱག་འཚལ་ལོ།། འཆི་མེད་རྡོ་རྗེའི་སྐུ་ལ་ཕྱག་འཚལ་ལོ།། ཨ་ཏི་པུ་ཧོ།། པྲ་ཏཱིཙྪ་ཧོ།། ཨ་ལ་ལ་ཧོ། ཁྲག་འཐུང་རྒྱལ་པོ་གར་ལ་དགྱེས།། གཡས་སུ་ཐབས་གསུམ་བསྐྱོད་བྱས་པས།། ཞེ་སྡང་རྩད་བཅད་ཐུགས་མཆོག་སྒྲོལ།། གཡོན་དུ་ཐབས་གསུམ་བསྐྱོད་བྱས་པས།། འདོད་ཆགས་རྩ་བཅད་གསུང་མཆོག་སྒྲོལ། ། དབུས་སུ་ཐབས་གསུམ་བསྐྱོད་བྱས་པས།། གཏི་མུག་རྩད་བཅད་སྐུ་མཆོག་སྒྲོལ།། གཡས་གཡོན་ཐབས་དང་ཤེས་རབ་སྟེ།། སྦྱར་བས་ཕྱག་རྒྱ་འབྱུང་བའི་རྒྱུ།། ཁྲོ་བདག་ཆེན་པོའི་ཕྱག་རྒྱ་ནི།། སྨུག་ནག་ཅིར་ཡང་འགྱུར་བའི་སྐུ། ། ཉི་ཤུ་རྩ་གཅིག་དབུ་དང་ལྡན།། བཞི་བཅུ་རྩ་གཉིས་ཕྱག་མཚན་ནི།། གཡས་གཡོན་དང་པོའི་ཕྱག་གཉིས་ནི།། ཀུན་བཟང་ཐབས་དང་ཤེས་རབ་བསྣམས།། དེ་འོག་གཡས་གཡོན་བཅུ་པོ་ནི། ། རིགས་ལྔ་ཐབས་དང་ཤེས་རབ་བསྣམས།། དེ་འོག་གཡས་གཡོན་བཅུ་པོ་ནི།། ནང་གི་སེམས་དཔའ་ཡབ་ཡུམ་བསྣམས།། དེ་འོག་གཡས་གཡོན་བརྒྱད་པོ་ནི།། ནང་གི་སེམས་དཔའ་ཡབ་ཡུམ་བསྣམས།། དེ་འོག་གཡས་གཡོན་བརྒྱད་པོ་ནི། ། ཕྱི་ཡི་སེམས་དཔའ་ཡབ་ཡུམ་བསྣམས།། དེ་འོག་གཡས་གཡོན་བརྒྱད་པོ་ན།། རྣམ་ཐར་སྒོ་བ་ཡབ་ཡུམ་བསྣམས།། དེ་འོག་གཡས་གཡོན་དྲུག་པོ་ན།། རིགས་དྲུག་འདུལ་བྱེད་ཐུབ་དྲུག་བསྣམས། ། ཞབས་བརྒྱད་ཁྲོ་མོའི་དབུ་བརྒྱད་མནན།། གསང་ཡུམ་ཐབས་དང་ཤེས་རབ་སྦྱོར།། གནམ་ཞལ་ཁྲོ་མོའི་ཕྱག་རྒྱ་ནི།། སྐུ་མདོག་སྨུག་ནག་དབུ་དགུ་ལ།། བཅོ་བརྒྱད་ཕྱག་ནི་དང་པོ་ན།། རྡོ་རྗེ་དུང་དམར་དཀྲུག་ཅིང་གསོལ། ། གཡས་བརྒྱད་ཀཽ་རཱི་མ་བརྒྱད་བསྣམས།། གཡོན་བརྒྱད་ཕྲ་མེན་མ་བརྒྱད་བསྣམས།། ཞབས་བརྒྱད་ཁྲག་འཐུང་དཔུང་སྟེང་བརྫིས།། ཕྱག་རྒྱའི་མཆོད་པ་བཞེས་སུ་གསོལ།། བཛྲ་ཧེ་རུ་ཀ་ཡི་ཕྱག་རྒྱ་ནི། ། གཡས་དཀར་གཡོན་དམར་དབུས་མཐིང་ཞལ།། རྡོ་རྗེ་ཞིང་དབྱུག་ཁ་ཊྭཱཾཾ་གཡས།། བྷནྡྷ་ཞིང་ཆེན་རྒྱུ་ཞགས་ཁྲ།། བྷུདྡྷ་ཧེ་རུ་ཀ་ཡི་ཕྱག་རྒྱ་ནི།། དཀར་སེར་དམར་སྔོ་དབུས་སྨུག་ཞལ།། འཁོར་ལོ་དགྲ་སྟྭ་ཞགས་པ་གཡས། ། བྷནྡྷ་རྔེའུ་ཆུང་ཁ་ཊྭཱཾ་གཡོན།། རཏྣ་ཧེ་རུ་ཀ་ཡི་ཕྱག་རྒྱ་ནི།། གཡས་སེར་གཡོན་དམར་དབུས་མ་སེར།། རིན་ཆེན་གཤོལ་དབྱུག་གཏུན་ཤིང་གཡས།། བྷནྡྷ་དགྲ་སྟྭ་གཏུན་ཤིང་གཡོན།། པདྨ་ཧེ་རུའི་ཕྱག་རྒྱ་ནི། ། དཀར་སྔོ་སྔོ་ལྗང་དབུས་མ་དམར།། པདྨ་རྔེའུ་ཆུང་རལ་གྲི་གཡས།། བྷནྡྷ་ཁ་ཊྭཱཾ་གསེར་ཐོད་ཕྲེང།། ཀརྨ་ཧེ་རུ་ཀ་ཡི་ཕྱག་རྒྱ་ནི།། དཀར་དམར་སེར་དཀར་ལྗང་ནག་དབུས།། རྒྱ་གྲམ་རལ་གྲི་ཞགས་པ་རྔ། ། བྷནྡྷ་ཐོད་རྔ་ཁ་ཊྭཱཾ་དྲིལ།། བི་ཤྭ་ས་ནུ་ཧེ་རུ་ཀ། གཡས་མཐིང་དབུས་དཀར་གཡོན་པ་དམར།། གྲི་ཁུག་རྡོ་རྗེ་ཁ་ཊྭཱཾ་གཡས།། ཐོད་པ་དྲིལ་བུ་རྔེའུ་ཆུང་གཡོན།། དམ་ཚིག་བསྲུང་བའི་ཧེ་རུ་ཀ། གཡས་དཀར་གཡོན་དམར་དབུས་མ་སེར། ། གྲི་གུག་རིན་ཆེན་བེ་ཅོན་གཡས།། ཐོད་པ་དྲིལ་བུ་ཅང་ཏེའུ་གཡོན།། གནོད་སྦྱིན་ཁྲག་འཐུང་ཕྱག་རྒྱ་ནི།། གཡས་མཐིང་གཡོན་སྔོ་དབུས་མ་དམར།། གྲི་གུག་པདྨ་དགྲ་སྟྭ་གཡས། ། ཐོད་པ་འདྲིལ་བུ་ཌཱ་མ་རུ།། སྲིན་པོ་ཁྲག་འཐུང་ཕྱག་རྒྱ་ནི།། གཡས་སེར་གཡོན་དམར་དབུས་མ་ལྗང།། གྲི་གུག་རྒྱ་གྲམ་རལ་གྲི་གཡས།། ཐོད་པ་དྲིལ་བུ་རྔེའུ་ཆུང་གཡོན།། འབར་བའི་གདན་ལ་བཞེངས་ནས་ཀྱང། ། ཕྱག་རྒྱ་གར་གྱི་མཆོད་པ་བཞེས།། ཧཱུ~ཾ་མཛད་སྔོ་སྐྱ་འབར་བ་ལ།། རྡོ་རྗེ་རྩེ་མོ་འཁོར་ལོའི་མཚོན།། གཡོན་པ་ཉི་ཟླའི་རྐང་པ་གཟུང།། རྣམ་པར་རྒྱལ་བ་སྐུ་མདོག་དཀར།། རྡོ་རྗེ་གཡས་ལ་ཏི་ར་གཡོན། ། དབྱུག་པ་སྔོན་པོ་ལྗང་སྔོན་སྐུ།། གཡས་ཀྱི་དབྱུག་ཏོ་མེ་དཔུང་འབར།། གཡོན་པ་མེ་ལྷའི་རྐང་པ་བཟུང།། གཤིན་རྗེ་མཐིང་ནག་རིན་ཆེན་དབྱུག། གཡོན་པ་གྲུལ་བུམ་རྐང་པ་བཟུང།། མི་གཡོ་སྨུག་ནག་རལ་གྲི་གཡས། ། གཡོན་པ་སྲིན་པོ་དབྱུག་པ་འཆང།། རྟ་མགྲིན་དམར་པོ་བྱི་རུའི་མདངས།། གཡས་པ་རི་རབ་ཏི་ར་སྦྲུལ་གྱིས་དཀྲིས།། གཡོན་པ་ཁྱུང་ཆེན་གཤོག་པ་རྡེབ།། གཞན་གྱིས་མི་ཐུབ་དམར་སྐྱའི་མདོག། གཡས་པ་རླུང་གཡབ་མི་མགོས་བརྒྱན།། གཡོན་པ་རླུང་ལྷའི་ཞབས་ནས་བཟུང།། བདུད་རྩི་ལྗང་ནག་རྒྱ་གྲམ་གཡས།། གཡོན་པ་གནོད་སྦྱིན་དབྱུག་ཏོ་འཕྱར།། ཁམས་གསུམ་རྣམ་རྒྱལ་སེར་ལྗང་གུ།། ནེའུ་ལེ་གཡས་པ་བགེགས་ཆེན་གཡོན། ། འབར་བའི་གདན་ལ་བཞེངས་ནས་ཀྱང།། ཕྱག་རྒྱ་གར་གྱི་མཆོད་པ་བཞེས།། རང་བྱུང་གདོད་ནས་རྣམ་པར་དག། དམ་རྫས་བདུད་རྩི་ཆེན་པོ་ནི།། འཆི་མེད་དཀྱིལ་འཁོར་ཆེ་མཆོག་དང། ། མཁའ་མཉམ་དཀྱིལ་འཁོར་གནམ་ཞལ་མ།། སྐུ་གདུང་དཀྱིལ་འཁོར་དགུ་ཀློང་ནས།། མཐར་བྱེད་དཀྱིལ་འཁོར་ཁྲོ་རྒྱལ་བཅུ།། བདུད་རྩིའི་དཀྱིལ་འཁོར་རྟ་མགྲིན་དབང།། མཆོད་པར་འབུལ་ལོ་ཁ་རཾ་ཁཱ་ཧི། དམ་རྫས་བདུད་རྩི་ལྔ་སྦྱར་བའི།། ཡིད་བཞིན་རིན་ཆེན་ཀ་པཱ་ལ།། འབྲུ་གསུམ་འཐུང་བས་སྐུ་གསུང་ཐུགས།། མི་ཟད་རྒྱན་གྱི་དངོས་གྲུབ་ཐོབ།། ཨོཾ་ཨཱཿཧཱུ~ཾ་ཀཱ་ཡ་བཱ་ཀ་ཙིཏྟ་སིདྡྷི་ཧཱུ~ཾ། ཨ་ཧོ་སུ་ཁ་དྷརྨ་ཀཱ་ཡ་སིདྡྷི་ཧཱུ~ཾ། དེ་ནས་བཅོམ་ལྡན་ཆེ་མཆོག་ཧེ་རུ་ཀ་ལ། རིགས་འཛིན་རྣམས་ཀྱིས་བསྟོད་པ། དུར་ཁྲོད་འབར་བ་ཀློང་གི་དཀྱིལ་འཁོར་ནས།། ཤིན་ཏུ་མི་བཟད་འབར་བའི་སྐུར་སྟོན་ཅིང།། ཡང་སངས་རྒྱས་པའི་ཆེ་མཆོག་ཧེ་རུ་ཀ། སྐུ་མདོག་མཐིང་ནག་ཆོས་ཉིད་མི་འགྱུར་རྟགས།། ཉི་ཤུ་རྩ་གཅིག་ས་རྣམས་ལྷུན་གྱིས་གྲུབ།། ཁྲོ་རྒྱལ་ཡེ་ཤེས་དབུ་ནི་སྟོབས་པོ་ཆེ།། དང་པོ་རབ་ཏུ་དགའ་བའི་ས་དང་སྦྱོར།། བདུད་འདུལ་ཡེ་ཤེས་དབུ་ནི་ཁམས་གསུམ་རྒྱལ། ། གཉིས་པ་དྲི་མ་མེད་པའི་ས་དང་སྦྱོར།། རྟོག་འཇོམས་ཡེ་ཤེས་དབུ་ནི་བདུད་རྩི་འཁྱིལ།། གསུམ་པ་འོད་དུ་འཕྲོ་བའི་ས་དང་སྦྱོར།། སྤྲུལ་སྐུ་ཡེ་ཤེས་དབུ་ནི་གཞན་མི་ཐུབ།། བཞི་པ་འོད་བྱེད་པ་ཡི་ས་དང་སྦྱོར། ། ཟིལ་གནོན་ཡེ་ཤེས་དབུ་ནི་རྟ་མགྲིན་དཔལ།། ལྔ་པ་སྦྱང་བར་དཀའ་བའི་ས་དང་སྦྱོར།། རྣམ་དག་ཡེ་ཤེས་དབུ་ནི་མི་གཡོ་མགོན།། དྲུག་པ་ཀློང་དུ་གྱུར་པའི་ས་དང་སྦྱོར། ། ཐབས་མཁས་ཐུགས་རྗེའི་དབུ་ནི་གཤིན་རྗེའི་གཤེད།། བདུན་པ་རིང་དུ་སོང་བའི་ས་དང་སྦྱོར།། རྟོགས་ལྡན་ཡེ་ཤེས་དབུ་ནི་དབྱུག་སྔོན་ཅན།། བརྒྱད་པ་མི་གཡོ་བ་ཡི་ས་དང་སྦྱོར།། མཁྱེན་གསལ་ཡེ་ཤེས་དབུ་ནི་རྣམ་པར་རྒྱལ། ། དགུ་པ་ལེགས་པའི་བློ་གྲོས་ས་དང་སྦྱོར།། བརྗིད་གནོན་ཡེ་ཤེས་དབུ་ནི་ཧཱུ~ཾ་ཀ་ར།། བཅུ་པ་ཆོས་ཀྱི་སྤྲིན་གྱི་ས་དང་སྦྱོར།། མངོན་སངས་ཡེ་ཤེས་ཡཀྴ་ཧེ་རུ་ཀ། བཅུ་གཅིག་ཀུན་ཏུ་འོད་ཀྱི་ས་དང་སྦྱོར། ། ཀུན་མཁྱེན་ཡེ་ཤེས་བི་ཤྭ་ཧེ་རུ་ཀ། མ་ཆགས་པདྨ་ཅན་གྱི་ས་དང་སྦྱོར།། བྱམས་མགོན་ཡེ་ཤེས་ས་ནུ་ཧེ་རུ་ཀ། ཡི་གེ་འཁོར་ལོ་ཚོགས་ཆེན་ས་དང་སྦྱོར།། རྔམ་བརྗིད་ཡེ་ཤེས་རཀྴ་ཧེ་རུ་ཀ། སྐྱེ་མེད་རྡོ་རྗེ་འཛིན་གྱི་ས་དང་སྦྱོར། ། དཔའ་བརྗིད་ཡེ་ཤེས་ཀརྨ་ཧེ་རུ་ཀ། རྣམ་དག་སྟུག་པོ་བཀོད་པའི་ས་དང་སྦྱོར།། སྐྱོན་སེལ་ཡེ་ཤེས་པདྨ་ཧེ་རུ་ཀ། ཆགས་མེད་འཐུག་པོ་བཀོད་པའི་ས་དང་སྦྱོང།། སྒྲིབ་སེལ་ཡེ་ཤེས་རཏྣ་ཧེ་རུ་ཀ། མཚན་རྫོགས་རྡོ་རྗེ་འཆང་གི་ས་དང་སྦྱོར།། འབར་འཕྲོ་ཡེ་ཤེས་བྷུདྡྷ་ཧེ་རུ་ཀ། ཆོས་ཉིད་བདེ་བ་ཆེན་པོའི་ས་དང་སྦྱོར།། རྟོགས་ལྡན་ཡེ་ཤེས་བཛྲ་ཧེ་རུ་ཀ། མ་སྤངས་ཡེ་ཤེས་བླ་མའི་ས་དང་སྦྱོར།། ལྷུན་རྫོགས་ཡེ་ཤེས་དཔལ་ཆེན་ཧེ་རུ་ཀ། ཀུན་བཟང་དབྱེ་བ་མེད་པའི་ས་དང་སྦྱོར།། ཟ་བྱེད་ཆོས་ནི་ཆོས་མཆོག་ཧེ་རུ་ཀ། ལྷུན་གྲུབ་ཡོངས་སུ་རྫོགས་པའི་ས་དང་སྦྱོར།། ཡེ་ཤེས་ཚོགས་ཆེན་རྫོགས་ལ་ཕྱག་འཚལ་བསྟོད། ། ཡང་གསང་རྒྱས་པའི་ཆེ་མཆོག་ཧེ་རུ་ཀ། བཞི་བཅུ་རྩ་གཉིས་ཕྱག་མཚན་མངོན་སངས་རྒྱས།། བཞི་བཅུ་རྩ་གཉིས་གཡས་ཀྱི་དང་པོ་ན།། བྱེད་པ་ཡིད་བཞིན་ཀུན་བཟང་རྡོ་རྗེ་བསྣམས།། བཞི་བཅུ་རྩ་གཉིས་གཡོན་གྱི་དང་པོ་ནི། ། ཀུན་བཟང་བྱ་བ་མཉམ་གཞག་པདྨ་འཕྲོ།། བཞི་བཅུ་རྩ་གཉིས་གཡས་ཀྱི་དང་འོག་ན།། རྣམ་པར་སྣང་མཛད་ཆོས་ཀྱི་འཁོར་ལོ་བསྣམས།། བཞི་བཅུ་རྩ་གཉིས་གཡོན་གྱི་འོག་མ་ན།། སྐྱེད་མཛད་སངས་རྒྱས་སྤྱན་ནི་ཐོར་ཚུགས་བསྣམས། ། བཞི་བཅུ་རྩ་གཉིས་གཡས་ཀྱི་གསུམ་པ་ན།། རྡོ་རྗེ་སེམས་དཔའ་མི་བསྐྱོད་རྡོ་རྗེ་བསྣམས།། བཞི་བཅུ་རྩ་གཉིས་གཡོན་གྱི་གསུམ་པ་ན།། ཀུན་ཏུ་བཟང་པོ་མཐར་སྟོང་དྲིལ་བུ་བསྣམས། ། བཞི་བཅུ་རྩ་གཉིས་གཡས་ཀྱི་བཞི་པ་ན།། རིན་ཆེན་འབྱུང་ལྡན་མཆོད་སྦྱིན་རེ་སྐོང་བསྣམས།། བཞི་བཅུ་རྩ་གཉིས་གཡོན་གྱི་བཞི་པ་ན།། མཱ་མ་ཀཱི་ནི་སྡུད་བྱེད་རྡོ་རྗེ་བསྣམས།། བཞི་བཅུ་རྩ་གཉིས་གཡས་ཀྱི་ལྔ་པ་ན། ། སྣང་བ་མཐའ་ཡས་དབང་སྡུས་པདྨ་བསྣམས།། བཞི་བཅུ་རྩ་གཉིས་གཡོན་གྱི་ལྔ་པ་ན།། གོས་དཀར་མོ་ནི་སྲེག་བྱེད་ཞུན་མར་བསྣམས།། བཞི་བཅུ་རྩ་གཉིས་གཡས་ཀྱི་དྲུག་པ་ན།། དོན་ཡོད་གྲུབ་པ་རྡོ་རྗེ་རྒྱ་གྲམ་བསྣམས། ། བཞི་བཅུ་རྩ་གཉིས་གཡོན་གྱི་དྲུག་པ་ན།། དམ་ཚིག་སྒྲོལ་མ་སྐྱོང་མཛད་ཨུཏྤལ་བསྣམས།། བཞི་བཅུ་རྩ་གཉིས་གཡས་ཀྱི་བདུན་པ་ན།། ས་ཡི་སྙིང་པོ་རིན་ཆེན་མྱུ་གུ་བསྣམས། ། བཞི་བཅུ་རྩ་གཉིས་གཡོན་གྱི་བདུན་པ་ན།། ལཱ་སྱ་དཀར་མོ་མེ་ལོང་རྒྱ་གྲམ་བསྣམས།། བཞི་བཅུ་རྩ་གཉིས་གཡས་ཀྱི་བརྒྱད་པ་ན།། ནམ་མཁའི་སྙིང་པོ་གཅོད་བྱེད་རལ་གྲི་བསྣམས།། བཞི་བཅུ་རྩ་གཉིས་གཡོན་གྱི་བརྒྱད་པ་ན། ། མཱ་ལེ་སྔོན་མོ་རིན་ཆེན་ཕྲེང་བ་བསྣམས།། བཞི་བཅུ་རྩ་གཉིས་གཡས་ཀྱི་དགུ་པ་ན།། སྤྱན་རས་གཟིགས་དབང་མ་ཆགས་པདྨ་བསྣམས།། བཞི་བཅུ་རྩ་གཉིས་གཡོན་གྱི་དགུ་པ་ན། ། གཱིརྟི་དམར་པོ་པི་ཝང་རྒྱུད་མངས་བསྣམས།། བཞི་བཅུ་རྩ་གཉིས་གཡས་ཀྱི་བཅུ་པ་ན།། ཕྱག་ན་རྡོ་རྗེ་འཇོམས་བྱེད་རྡོ་རྗེ་བསྣམས།། བཞི་བཅུ་རྩ་གཉིས་གཡོན་གྱི་བཅུ་པ་ན།། ནཱིརྟི་ལྗང་གུ་གར་གྱི་ཅོད་པན་བསྣམས། ། བཞི་བཅུ་རྩ་གཉིས་གཡས་ཀྱི་བཅུ་གཅིག་ན།། བྱམས་པ་ཆེན་པོ་བདུད་རྩི་གུནྡྷེ་བསྣམས།། བཞི་བཅུ་རྩ་གཉིས་གཡོན་གྱི་བཅུ་གཅིག་ན།། བདུག་པའི་སྤྲིན་འཕྲོ་མས་ནི་སྤོས་མེ་བསྣམས།། བཞི་བཅུ་རྩ་གཉིས་གཡས་ཀྱི་བཅུ་གཉིས་ན། ། སྒྲིབ་པ་རྣམ་སེལ་ཀླུ་ཤིང་ལོ་མ་བསྣམས།། བཞི་བཅུ་རྩ་གཉིས་གཡོན་གྱི་བཅུ་གཉིས་ན།། དགའ་བའི་མདངས་ལྡན་མས་ནི་མེ་ཏོག་བསྣམས།། བཞི་བཅུ་རྩ་གཉིས་གཡས་ཀྱི་བཅུ་གསུམ་ན། ། ཀུན་ཏུ་བཟང་པོ་རིན་ཆེན་སྙེ་མ་བསྣམས།། བཞི་བཅུ་རྩ་གཉིས་གཡོན་གྱི་བཅུ་གསུམ་ན།། གསལ་བའི་འོད་ལྡན་མས་ནི་ཞུ་མར་བསྣམས།། བཞི་བཅུ་རྩ་གཉིས་གཡས་ཀྱི་བཅུ་བཞི་ན།། འཇམ་དཔལ་གཞོན་ནུ་ཨུཏྤལ་མཐིང་ག་བསྣམས། ། བཞི་བཅུ་རྩ་གཉིས་གཡོན་གྱི་བཅུ་བཞི་ན།། རྟོག་བྲལ་དགྱེས་མཛད་མས་ནི་དྲི་ཆབ་བསྣམས།། བཞི་བཅུ་རྩ་གཉིས་གཡས་ཀྱི་བཅོ་ལྔ་ན།། བགེགས་ཆེན་མཐར་བྱེད་རྡུང་བྱེད་ཐོ་བ་བསྣམས། ། བཞི་བཅུ་རྩ་གཉིས་གཡོན་གྱི་བཅོ་ལྔ་ན།། ཐུགས་དམ་སྐུལ་བྱེད་མ་ནི་ལྕགས་ཀྱུ་བསྣམས།། བཞི་བཅུ་རྩ་གཉིས་གཡས་ཀྱི་བཅུ་དྲུག་ན།། གཤིན་རྗེ་མཐར་བྱེད་ཚོགས་ཀྱི་དབྱུག་ཏོ་བསྣམས། ། བཞི་བཅུ་རྩ་གཉིས་གཡོན་ཀྱི་བཅུ་དྲུག་ན།། གནས་ནས་སྐྱོད་མཛད་མ་ནི་ཞགས་པ་བསྣམས།། བཞི་བཅུ་རྩ་གཉིས་གཡས་ཀྱི་བཅུ་བདུན་ན།། པདྨ་མཐར་བྱེད་དགུག་པའི་སྦྲུལ་ཞགས་བསྣམས།། བཞི་བཅུ་རྩ་གཉིས་གཡོན་གྱི་བཅུ་བདུན་ན། ། རྟོག་བྲལ་ཞུགས་མཛད་མ་ནི་ལྕགས་སྒྲོག་བསྣམས།། བཞི་བཅུ་རྩ་གཉིས་གཡས་ཀྱི་བཅོ་བརྒྱད་ན།། ཤེས་རབ་མཐར་བྱེད་གཅོད་མཛད་རལ་གྲི་བསྣམས།། བཞི་བཅུ་རྩ་གཉིས་གཡོན་གྱི་བཅོ་བརྒྱད་ན། ། ཚངས་པའི་གསུང་སྒྲོག་མ་ནི་དྲིལ་བུ་བསྣམས།། བཞི་བཅུ་རྩ་གཉིས་གཡས་ཀྱི་བཅུ་དགུ་ན།། ལྷ་ཡི་ཐུབ་པ་པི་ཝང་རྒྱུད་འདྲེན་བསྣམས།། བཞི་བཅུ་རྩ་གཉིས་གཡོན་གྱི་བཅུ་དགུ་ན། ། བྱོལ་སོང་ཐུབ་པ་འཆད་པའི་པོ་ཏི་བསྣམས།། བཞི་བཅུ་རྩ་གཉིས་གཡས་ཀྱི་ཉི་ཤུ་ན།། ལྷ་མིན་ཐུབ་པ་ཐགས་བཟང་གོ་ཆ་བསྣམས།། བཞི་བཅུ་རྩ་གཉིས་གཡོན་གྱི་ཉི་ཤུ་ན།། ཡི་དྭགས་ཐུབ་པ་རིན་ཆེན་སྒྲོམ་བུ་བསྣམས། ། བཞི་བཅུ་རྩ་གཉིས་གཡས་ཀྱི་ཐ་མ་ན།། མི་ཡི་ཐུབ་པ་གསེལ་བྱེད་པར་བུ་བསྣམས།། བཞི་བཅུ་རྩ་གཉིས་གཡོན་གྱི་ཐ་མ་ན།། དམྱལ་བའི་ཐུབ་པ་མེ་ཆུ་བསིལ་དྲོད་བསྣམས།། ཐབས་དང་ཤེས་རབ་གཉིས་སུ་མེད་པ་ལས། ། དབྱིངས་ལ་ཡེ་ཤེས་ཚེ་ལ་མངའ་བརྙེས་པའི།། བདུད་རྩི་འཁྱིལ་བའི་སྐུ་ལ་ཕྱག་འཚལ་སྟོད།། ཧཱུ~ཾ། ཡང་སངས་རྒྱས་པའི་ཆེ་མཆོག་ཧེ་རུ་ཀ། ཏིང་འཛིན་ཞབས་བརྒྱད་ཁྲོ་མོའི་དབུ་བརྒྱད་མནན། ། རིག་པ་ཡུམ་ལ་སྦྱར་བའི་དབྱིངས་ལ་སྦྱོར།། ཞབས་བརྒྱད་གཡས་ཀྱི་དང་པོ་བགྲད་པ་ནི།། ཐིག་ལེ་ཆེན་པོའི་ཏིང་འཛིན་ཆེན་པོ་དང།། ཆགས་པ་མེད་པས་མཆོག་གི་དབྱིངས་དང་སྦྱོར།། ཞབས་བརྒྱད་གཡས་ཀྱི་གཉིས་པ་བགྲད་པས་ནི། ། བདེ་བ་ཆེན་པོའི་ཏིང་འཛིན་ཆེན་པོ་དང།། ཀློང་དུ་གྱུར་པ་ཆོས་ཀྱི་དབྱིངས་དང་སྦྱོར།། ཞབས་བརྒྱད་གཡས་ཀྱི་གསུམ་པ་བགྲད་པས་ནི།། རྡོ་རྗེ་ལྟ་བའི་ཏིང་འཛིན་ཆེན་པོ་དང། ། འགྱུར་བ་མེད་པ་ཆོས་ཀྱི་དབྱིངས་དང་སྦྱོར།། ཞབས་བརྒྱད་གཡས་ཀྱི་ཐ་མ་བགྲད་པས་ནི།། ཐམས་ཅད་འབྱུང་བའི་ཏིང་འཛིན་ཆེན་པོ་དང།། ཟག་པ་མེད་པའི་ཆོས་ཀྱི་དབྱིངས་དང་སྦྱོར།། ཞབས་བརྒྱད་གཡོན་གྱི་དང་པོ་བགྲད་པས་ནི། ། ཆགས་པ་མེད་པའི་ཏིང་འཛིན་ཆེན་པོ་དང།། ཡེ་ནས་དག་པའི་ཆོས་ཀྱི་དབྱིངས་དང་སྦྱོར།། ཞབས་བརྒྱད་གཡོན་གྱི་གཉིས་པ་བགྲད་པས་ནི།། འདའ་བར་དཀའ་བའི་ཏིང་འཛིན་ཆེན་པོ་ནི། ། གཏོང་བ་མེད་པའི་ཆོས་ཀྱི་དབྱིངས་དང་སྦྱོར།། ཞབས་བརྒྱད་གཡོན་གྱི་གསུམ་པ་བགྲད་པས་ནི།། དམིགས་པ་མེད་པའི་ཏིང་འཛིན་ཆེན་པོ་ནི།། རང་བཞིན་མེད་པའི་ཆོས་ཀྱི་དབྱིངས་དང་སྦྱོར། ། ཞབས་བརྒྱད་གཡོན་གྱི་ཐ་མས་བགྲད་པས་ནི།། སྐྱེ་ཤི་མེད་པའི་ཏིང་འཛིན་ཆེན་པོ་དང།། འདུ་འབྲལ་མེད་པའི་ཆོས་ཀྱི་དབྱིངས་དང་སྦྱོར།། གསང་བའི་ཞལ་དུ་རྡོ་རྗེ་ཕྱེད་ནུབ་པས།། ཀུན་ཏུ་བཟང་མོའི་ཏིང་འཛིན་ཆེན་པོ་དང། ། ཁྱབ་གདལ་ཆེན་པོའི་ཆོས་ཀྱི་དབྱིངས་དང་སྦྱོར།། ཀུན་ཏུ་བཟང་མོའི་བྱང་སེམས་ཐིག་ལེར་ཞུ།། འཆི་མེད་རྡོ་རྗེའི་དཀྱིལ་འཁོར་དེ་མིན་ནམ།། ཆེ་མཆོག་ཧེ་རུ་ཀ་ལ་ཕྱག་འཚལ་སྟོད། ། འཇིགས་བྱེད་ཆེན་པོའི་འབར་བའི་ཞབས་འོག་ནས།། ཤིན་ཏུ་རྔམ་པའི་ཁྲོ་མོ་གནམ་ཞལ་མ།། སྐུ་མདོག་དུད་ཁ་སྣ་ཚོགས་ཅིར་ཡང་བསྟོན།། དབུ་དགུ་ཆོས་དབྱིངས་ཡེ་ཤེས་དགུ་དང་སྦྱོར།། སྟོང་པ་བཅོ་བརྒྱད་ཕྱག་ནི་རྟག་ཆད་སྒྲོལ། ། ཀློང་དགུའི་ཞབས་ནི་ཁྲག་འཐུང་དགུ་དང་རོལ།། ཞབས་བརྒྱད་གཡས་ཀྱི་དང་པོ་གདེངས་པ་ནི།། སྤང་བ་མེད་པའི་བྷ་ག་ཆེན་པོ་དང།། ཐིག་ལེ་ཆེན་པོ་བྱང་ཆུབ་སེམས་དང་སྦྱོར། ། ཞབས་བརྒྱད་གཡས་ཀྱི་གཉིས་པ་གདེངས་པ་ནི།། ཀློང་ཆེན་དགུ་པའི་གསང་བའི་བྷ་ག་དང།། བདེ་བ་ཆེན་པོ་བྱང་ཆུབ་སེམས་དང་སྦྱོར།། ཞབས་བརྒྱད་གཡས་ཀྱི་གསུམ་པ་གདེངས་པ་ནི། ། འགྱུར་བ་མེད་པའི་གསང་བའི་བྷ་ག་དང།། རྡོ་རྗེ་ལྟ་བུའི་བྱང་ཆུབ་སེམས་དང་སྦྱོར།། ཞབས་བརྒྱད་གཡས་ཀྱི་ཐ་མ་གདེངས་པ་ནི།། ཟད་པ་མེད་པའི་གསང་བའི་བྷ་ག་དང།། ཐམས་ཅད་འབྱུང་བའི་བྱང་ཆུབ་སེམས་དང་སྦྱོར། ། ཞབས་བརྒྱད་གཡོན་གྱི་དང་པོ་གདེངས་པ་ནི།། གདོད་ནས་དག་པའི་གསང་བའི་བྷ་ག་ལ།། ཆགས་པ་མེད་པའི་བྱང་ཆུབ་སེམས་དང་སྦྱོར།། ཞབས་བརྒྱད་གཡོན་གྱི་གཉིས་པ་གདེངས་པ་ནི། ། སྟོང་པ་ཆེན་པོ་གསང་བའི་བྷ་ག་དང།། འདའ་བར་དཀའ་བའི་བྱང་ཆུབ་སེམས་དང་སྦྱོར།། ཞབས་བརྒྱད་གཡོན་གྱི་གསུམ་པ་གདེངས་པ་ནི།། རང་བཞིན་མེད་པའི་གསང་བའི་བྷ་ག་དང།། དམིགས་པ་མེད་པའི་བྱང་ཆུབ་སེམས་དང་སྦྱོར། ། ཞབས་བརྒྱད་གཡོན་གྱི་ཐ་མ་གདེངས་པ་ནི།། འདུ་འབྲལ་མེད་པ་གསང་བའི་བྷ་ག་དང།། སྐྱེ་ཤི་མེད་པའི་བྱང་ཆུབ་སེམས་དང་སྦྱོར།། གསང་བ་བྷ་ག་པདྨའི་ཀློང་དཀྱིལ་ན། ། གསང་བའི་རྡོ་རྗེ་གསང་བའི་དབྱིངས་སུ་ནུབ།། བརྡལ་ཁྱབ་ཆེན་པོ་གསང་བའི་ཡུམ། ལྷུན་གྱིས་གྲུབ་པའི་བྱང་ཆུབ་སེམས་དང་སྦྱོར།། བདེ་བ་བྱང་ཆུབ་སེམས་ནི་ཐིག་ལེར་ཞུ།། མཁའ་མཉམ་ཀློང་གི་དཀྱིལ་འཁོར་དེ་མིན་ནམ། ། ས་ནུ་ཀྲོ་ཏི་རྒྱལ་ལ་ཕྱག་འཚལ་བསྟོད།། ཤིན་ཏུ་འབར་བའི་ཁྲོ་མོའི་ཞབས་འོག་ནས།། ཁྲག་འཐུང་ཆེན་པོ་ཀློང་དགུ་ཧེ་རུ་ཀ། དབུ་གསུམ་ཕྱག་དྲུག་ཞབས་བཞི་བརྐྱང་བསྐུམ་མནན།། འཇིག་རྟེན་དྲེགས་པའི་ཁྱོ་ཤུག་དབང་ཕྱུག་དང། ། མྱ་ངན་འདས་པའི་ཁྲོ་བཅུ་ཞབས་ཀྱིས་གནོན།། ཐུགས་ཀྱི་གདུང་འཚོབ་བཛྲ་ཧེ་རུ་ཀ། རྡོ་རྗེ་དབྱིང་ཕྱུག་མཁའ་ཀློང་དག་པ་ན།། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད། ། བྱང་ཆུབ་སེམས་ནི་དངུལ་ཞུན་རིན་པོ་ཆེ།། མེ་ལོང་ལྟ་བུའི་ཡེ་ཤེས་དེ་མིན་ནམ།། རྡོ་རྗེ་ལྟ་བུའི་སྐུ་ལ་ཕྱག་འཚལ་བསྟོད།། སྐུ་ཡི་གདུང་འཚོབ་བུདྡྷ་ཧེ་རུ་ཀ། མཁའ་ལ་དབྱིངས་ཕྱུག་མཁའ་ཀློང་དག་པས་ན། ། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད།། བྱང་ཆུབ་སེམས་ནི་གསེར་མདོག་རིན་པོ་ཆེ།། ཆོས་ཀྱི་དབྱིངས་ཀྱི་ཡེ་ཤེས་དེ་མིན་ནམ།། འབྱུང་གནས་ཆེན་པོའི་སྐུ་ལ་ཕྱག་འཚལ་བསྟོད།། ཡོན་ཏན་གདུང་འཚོབ་རཏྣ་ཧེ་རུ་ཀ། རིན་ཆེན་དབྱིངས་ཕྱུག་མཁའ་ཀློང་དག་པས་ན།། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད།། བྱང་ཆུབ་སེམས་ནི་བཻ་ཌཱུརླ་ཡི་མདོག། མཉམ་པ་ཉིད་ཀྱི་ཡེ་ཤེས་དེ་མིན་ནམ། ། ལོངས་སྤྱོད་རྫོགས་པའི་སྐུ་ལ་ཕྱག་འཚལ་བསྟོད།། གསུང་གི་གདུང་འཚོབ་པདྨ་ཧེ་རུ་ཀ། པདྨ་དབྱིངས་ཕྱུག་མཁའ་ཀློང་དག་པས་ན།། ཐབས་དང་ཤེས་རབ་འདུ་འབྲལ་ཡོངས་ཀྱི་མེད།། བྱང་ཆུབ་སེམས་ནི་པདྨ་རཱ་གའི་མདོག། སོ་སོར་རྟོག་པའི་ཡེ་ཤེས་དེ་མིན་ནམ།། མངོན་པར་བྱང་ཆུབ་སྐུ་ལ་ཕྱག་འཚལ་བསྟོད།། ཕྲིན་ལས་གདུང་འཚོབ་ཀརྨ་ཧེ་རུ་ཀ། ལས་ཀྱི་དབྱིངས་ཕྱུག་མཁའ་ཀློང་དག་པས་ན། ། ཐབས་དང་ཤེས་རབ་འདུལ་འབྲལ་ཡོངས་ཀྱིས་མེད།། བྱང་ཆུབ་སེམས་ནི་ཨིནྡྲ་ནཱི་ལའི་མདོག། བྱ་བ་ནན་ཏན་ཡེ་ཤེས་དེ་མིན་ནམ།། སྤྲུལ་པ་མཐར་ཕྱིན་སྐུ་ལ་ཕྱག་འཚལ་བསྟོད།། རྣམ་ཤེས་མཐར་ཕྱིན་བི་ཤྭ་ཧེ་རུ་ཀ། བདེ་བ་ཟག་བྱེད་མཁའ་ཀློང་དག་པས་ན།། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད།། འདའ་དཀའ་ཐུགས་ཀྱི་ཡེ་ཤེས་དེ་མིན་ནམ།། དམིགས་མེད་ཆོས་ཀྱི་སྐུ་ལ་ཕྱག་འཚལ་བསྟོད།། གནོད་སེལ་མཐར་ཕྱིན་དམ་ཚིག་ཧེ་རུ་ཀ། བདེ་བ་ཚེ་འཕེལ་མཁའ་ཀློང་དག་པས་ན།། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད།། དབྱིངས་སུ་འགྲོ་བའི་ཡེ་ཤེས་དེ་མིན་ནམ།། ངོ་བོ་ཉིད་ཀྱི་སྐུ་ལ་ཕྱག་འཚལ་བསྟོད། ། སྦྱོར་བ་མཐར་ཕྱིན་ཡཀྴ་ཧེ་རུ་ཀ། བདེ་བ་རྒྱས་འདེབས་མཁའ་ཀློང་དག་པས་ན།། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད།། ཀློང་དུ་གྱུར་པའི་ཡེ་ཤེས་དེ་མིན་ནམ།། བདེ་བ་ཆེན་པོའི་སྐུ་ལ་ཕྱག་འཚལ་བསྟོད། སྒྲོལ་བ་མཐར་ཕྱིན་རཀྴ་ཧེ་རུ་ཀ། བདེ་བ་རྨོངས་བྱེད་མཁའ་ཀློང་དག་པས་ན།། ཐབས་དང་ཤེས་རབ་འདུ་འབྲལ་ཡོངས་ཀྱིས་མེད།། སྟོང་པ་ཉིད་ཀྱི་ཡེ་ཤེས་དེ་མིན་ནམ།། ལྷུན་གྱིས་གྲུབ་པའི་སྐུ་ལ་ཕྱག་འཚལ་བསྟོད། ། སྐུ་གདུང་འབར་བའི་དཀྱིལ་འཁོར་དེ་མིན་ནམ།། ཀློང་དགུ་ཧེ་རུ་ཀ་ལ་ཕྱག་འཚལ་བསྟོད།། སྐུ་གདུང་འབར་བའི་ཁྲོ་བོའི་ཞབས་འོག་ནས།། ཧཱུ~ཾ་མཛད་འདོད་ཆགས་རྒྱལ་པོ་ཉི་ཟླ་འདུལ།། རྣམ་རྒྱལ་མ་བྱིན་ལེན་པའི་དྲི་ཟ་འདུལ། ། དབྱུག་སྔོན་མེ་ལྷ་ལོག་པར་ལྟ་བ་འདུལ།། གཤིན་རྗེ་སྲོག་གཅོད་གྲུལ་བུམ་འཆི་བདག་འདུལ།། མི་གཡོ་ངག་འཆལ་སྨྲ་བའི་སྲིན་པོ་འདུལ།། རྟ་མགྲིན་ཕྲ་མ་སྐྱེལ་བའི་ཀླུ་རྣམས་འདུལ། ། མི་ཐུབ་རྫུན་དུ་སྨྲ་བའི་རླུང་ལྷ་འདུལ།། བདུད་རྩི་ཚིག་རྩུབ་སྨྲ་བའི་གནོད་སྦྱིན་འདུལ།། ཁམས་གསུམ་གནོད་སེམས་ཅན་གྱི་བགེགས་རྣམས་འདུལ།། སྟོབས་ཆེན་བརྣབ་སེམས་ཅན་གྱི་ས་བདག་འདུལ། ། མཐར་བྱེད་ཁྲོ་རྒྱལ་བཅུ་པོ་དེ་མིན་ནམ།། སྟོང་གསུམ་ཁྲོ་བོའི་སྐུ་ལ་ཕྱག་འཚལ་བསྟོད།། ཡང་སངས་རྒྱས་པའི་ཆེ་མཆོག་ཧེ་རུ་ཀ། མི་གནས་མྱ་ངན་འདས་པའི་ཀློང་ན་བཞུགས།། འཇིགས་བྱེད་ཆེན་པོ་འབར་བའི་ཆ་ལུགས་ནི། ། དབུ་སྐྲ་ཁམ་ནག་གྱེན་དུ་འཁྱིལ་པ་ནི།། སྲིད་པ་གསུམ་ལས་རྣམ་པར་རྒྱལ་བས་ན།། འབྲས་བུ་སྐུ་གསུང་ཐུགས་ནི་ལྷུན་གྱིས་གྲུབ།། སྨིན་མཚམས་ཁྲོ་གཉེར་གློག་སྟོང་འགྱུ་བ་ནི།། མ་རིག་རྨོངས་པའི་འཁོར་བའི་མུན་ཁུང་དུ། ། ཐུགས་རྗེ་ཆེན་པོ་ཡེ་ཤེས་གློག་འགྱུ་བའོ།། འབར་བའི་སྤྱན་བགྲད་བྱམས་མགོན་ཡེ་རེ་གཟིགས།། གཡས་ཀྱི་རྩ་གཅིག་སྡང་མིག་ཞེ་ལ་གནན།། འཁོར་བའི་སྡུག་བསྔལ་ཞེ་ལ་མནན་ཏེ་གཟིགས། ། གཡོན་གྱི་རྩ་གཅིག་ཟུང་མིག་བཟློག་སྟེ་གཟིགས།། ངན་སོང་གསུམ་གྱི་སྡུག་བསྔལ་ཕྱགས་མས་འདེབས།། དབུས་ཀྱི་རྩ་གཅིག་དབུས་སུ་ཡེ་རེ་གཟིགས།། འགྱུར་མེད་ཆོས་ཀྱི་དབྱིངས་ལས་མ་གཡོས་པའོ། ། ཤངས་ནས་བསྐལ་པའི་རླུང་དམར་ལྡང་བས་ནི།། འཁོར་བའི་གཡུལ་ལས་རྒྱལ་ཏེ་མྱ་ངན་འདས།། གསལ་ལ་མ་ཆགས་ཡེ་ཤེས་ཉི་ཟླའི་སྙན།། ཉོན་མོངས་ཚ་བས་གདུང་བའི་སྡུག་བསྔལ་བསལ། ། སྒྲ་ཉིད་རང་བཞིན་མེད་དེ་སྒྲ་མཐར་སྟོང།། རྔམ་པའི་ཞལ་གདངས་དབྱིངས་ཀྱི་ཞལ་ཧོམ་དུ།། ཁམས་གསུམ་འཁོར་བའི་སྡུག་བསྔལ་རིལ་མིད་མཛད།། ཏིང་འཛིན་རྣོ་དབལ་མཆེ་བ་ཟང་ཡག་གཙིགས། ། སྐྱེ་ཤི་རྩད་གཅོད་མྱ་ངན་འདས་པར་སྦྱོར།། ལེ་བརྒན་ལྗགས་ཀྱིས་ཐོག་དག་བུ་ཡུག་འབེབས།། རྒྱུ་དྲུག་འཁོར་བའི་སྐམ་གློག་ཐུགས་རྗེའི་སྦུབས།། བ་སྤུ་ཐུ་ལུམ་རྩེ་ལ་མེ་འབར་ཏེ།། རྩ་ནས་ཁྲག་འབབ་ཁོལ་མར་འཁྲུགས་པ་ལ། ། མ་ཚོགས་འབུམ་གྱི་རྒྱལ་མོ་གནས་པའོ།། རྡོ་རྗེ་སྡེར་མོ་ལྕགས་ཀྱུ་འཛིངས་པ་ཡིས།། སྐྱེ་དགུ་རྩད་གཅོད་ཐེག་དགུའི་ས་ལ་བཀོད།། རིན་ཆེན་གཤོག་པ་འཇིག་རྟེན་ཡོགས་པར་བཀབ། ། རིགས་འཛིན་མང་པོ་སྐུ་ཡི་དཔུང་གཉེན་མཛད། ཧཱུ~ཾ། ཡང་སངས་རྒྱས་པའི་ཆེ་མཆོག་ཧེ་རུ་ཀ། དུར་ཁྲོད་ཆེན་པོ་འབར་བའི་ཀློང་ན་བཞུགས།། སྐུ་སྟོད་ཚངས་པའི་གཡང་གཞི་གསོལ་བ་ནི།། འཁོར་བ་ཞིང་གི་ལོག་རྟོག་ཚར་བཅད་ནས། ། འབྲས་བུ་ལོངས་སྤྱོད་རྫོགས་པའི་སྐུ་ནི་བརྙེས་པའོ།། སྐུ་སྨད་སྟག་གི་ཤམ་ཐབས་གསོལ་བ་ནི།། དཔའ་བོ་ཆེན་པོ་ཆས་སུ་ཞུགས་པའི་རྟགས།། ཕྲིན་ལས་རྣམ་བཞིས་འགྲོ་དོན་མཐར་ཕྱིན་པའི། ། འབྲས་བུ་སྤྲུལ་པ་ཆེན་པོའི་སྐུ་བརྙེས་པའོ།། གླང་ཆེན་ཀོ་རློན་ན་བཟའ་གསོལ་བ་ནི།། ཆོས་ཀྱི་དབྱིངས་ཀྱི་ངང་ལས་མ་གཡོས་པར།། འབར་བའི་གར་དགུས་ཅིར་ཡང་ཐོགས་མེད་པས།། འབྲས་བུ་ཆོས་ཀྱི་སྐུ་ཉིད་བརྙེས་པའོ། ། ཐོད་པ་མང་པོས་སྐུ་ལ་བརྒྱན་པ་ནི།། དུས་གསུམ་སངས་རྒྱས་བསྙེན་བཀུར་འབུལ་བའི་ཕྱིར།། གཏི་མུག་རྨོངས་པའི་མུན་པ་ཀུན་བསལ་ནས།། འབྲས་བུ་ངོ་བོ་ཉིད་ཀྱི་སྐུ་བརྙེས་པའོ། ། སྦྲུལ་ནག་སྟོང་གི་ཆུན་པོས་བརྒྱན་པ་ནི།། གདུག་པའི་ཀླུ་རིགས་དབང་དུ་ཀུན་བསྡུས་ནས།། ཞེ་སྡང་འཁོར་བ་རྩད་ནས་བཅད་ནས་ཀྱང།། འབྲས་བུ་རྡོ་རྗེ་ལྟ་བུའི་སྐུ་བརྙེས་པའོ། བྲོ་དྷ་ཡང། ཀྲོ་ཐ་ཨན་ཛ་ཐལ་ཆེན་ཚོམ་བུས་བརྒྱན། ། དོན་དམ་གཉིས་མེད་ངེས་པའི་དོན་རྟོགས་པས།། ཕྲག་དོག་ས་ཡི་དྲུངས་ནས་ཕྱུང་ནས་ནི།། འབྲས་བུ་བདེ་བ་ཆེན་པོའི་སྐུ་བརྙེས་པའོ།། ཁྲག་དང་ཞག་གི་ཐིག་ལེས་བརྒྱན་པ་ནི།། མ་མོ་མཁའ་འགྲོ་འབངས་སུ་འཁོལ་བྱས་ནས། ། འདོད་ཆགས་ཁྲག་གི་རྒྱ་མཚོ་སྐེམས་ནས་ཀྱང།། འདོད་ཆགས་འཁྲུགས་པ་དྲུངས་ནས་ཕྱུང་ནས་ནི།། འབྲས་བུ་མངོན་པར་བྱང་ཆུབ་སྐུ་བརྙེས་པའོ།། བསྐལ་པའི་མེ་དཔུང་ཀློང་ན་བཞུགས་པ་ནི། ། དོན་དམ་གཉིས་མེད་དབྱིངས་སུ་རྟོགས་པའི་ཕྱིར།། ཡེ་ཤེས་ལྔ་ལྡན་སྐུ་གསུམ་ལྷུན་གྱིས་གྲུབ།། ང་རྒྱལ་དྲག་པོའི་ཕུང་པོ་བཅོམ་ནས་ནི།། འབྲས་བུ་ཡེ་ཤེས་ཆེན་པོའི་སྐུ་བརྙེས་པའོ། ། མཛད་པ་སངས་རྒྱས་སྐུ་ལ་ཕྱག་འཚལ་བསྟོད།། བདུད་རྩི་ཉིད་ནི་རིགས་ཡུམ་གྱིས།། ལེགས་པར་ཕྱོགས་ནས་འདུད་བྱས་ནས།། གཙོ་བོ་ལ་ནི་མངའ་གསོལ་བྱ།། རིགས་ལྔ་རྩ་བའི་དཀྱིལ་འཁོར་ཉིད། ། བདག་ཉིད་ཆེ་མཆོག་ཐུགས་ཀ་ནས།། རིན་ཆེན་སྨུག་པོའི་གཞལ་ཡས་ཁང།། ཐུགས་ཀྱི་བསྙེན་པ་རྡོ་རྗེ་སེམས།། གསུང་གི་བསྙེན་པ་སྣང་མཐའ་ཡས།། ཐུགས་བསྙེན་བྷུདྷ་ཧེ་རུ་ཀ། སྐུ་དང་གསུང་དང་ཐུགས་བསྒོམ་པ། ། བསྙེན་པ་ཉེ་བསྙེན་བསྙེན་པ་ཆེ།། ཕྱོགས་བཞི་གཟུངས་ཐག་བླ་མས་གཟུང།། གཡོན་ཀྱང་མཐེབ་སྲིན་རྡོ་རྗེ་གཟུངས།། གཡས་པའི་ཕྲེང་བ་རྒྱ་ལ་གཏད།། གཡོ་འགུལ་མེད་པར་བགྲང་པར་བྱ། ། འཛབ་ནི་དབྱངས་ཀྱིས་བསྟོད་བྱས་ནས།། དགུ་པའི་དབྱངས་ལ་བཟླས་པ་བྱ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཧཱུ~ཾ་ཧྲཱིཿཐ།། སྐུ་གསུང་ཐུགས་ཀྱིས་འཕྲོ་འདུ་ཡིས།། ལུས་ངག་ཡིད་གསུམ་སྒྲིབ་དག་ནས།། ཡུམ་གྱི་མཁའ་ལ་བསྒྲུབ་པ་བྱ། ། ཡུལ་གྱི་མཁའ་ནས་ཕྱིར་སྤྲོས་པས།། སྣོད་བཅུད་བདུད་རྩི་སླར་འདུས་ནས།། ཉེ་བའི་བསྙེན་པ་བྱས་ནས་ནི།། བདག་རྫས་དག་པ་སྒྲུབ་ཆེན་ཐིམ།། ཞེས་གསུངས་སོ།། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལས། ཆེ་མཆོག་རྩ་བ་སྦྱང་བ་སྟེ་ལེའུ་བཞི་པའོ།།།། དེ་ནས་བཅོམ་ལྡན་འདས་ཀྱིས་འགྲོ་བའི་དོན་དུ་འདི་གསུངས་སོ།། སྦྱོར་སྒྲོལ་གཉིས་ཀྱིས་མཆོད་པ་ཡིས།། རྒྱལ་བ་མཉེས་ཤིང་ཐུགས་དམ་བསྐང། ། བར་གཅོད་བྱེད་པའི་ཉམས་ལེན་ལ།། དུས་ཚོད་ཤེས་ཤིང་བཟློག་པར་བྱ།། རཀྴ་རཱུ་ཏྲ་ཡཀྴ་ཚལ་པ་ཧ་ན་ཧ་ན་ཧཱུ~ཾ་ཕཊ། བསྒྲུབ་ཀྱང་རྟགས་མེད་སྟོར་བ་ན།། ཨ་ནརྀ་སུ་ཏྲི་པྲེ་དུ་ཛ།། རིགས་དྲུག་སྲོག་དྲང་བོ་བརྡུང་བསྐོར། ། དུས་ཚོད་གང་ལ་སྟོར་བ་དགུག། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཧ་ཡ་གྲཱི་ཝ་ཧུ་ལུ་ཧུ་ལུ་བྷནྡྷ་བྷནྡྷ་ཨཱའ་ཡུཿཥེ་ཧཱུ~ཾ་ཧྲཱིཿཐ།། སྲོད་གུང་འཇིང་དང་ཐོ་རངས་དྲོས།། དུས་དེར་སྟོར་ན་བཙལ་བྱས་ལ། ། དགུག་འདྲེན་དྲག་ཏུ་བྱས་ནས་ནི།། འཛབ་བགྲང་ཆེ་བའི་ཡོན་ཏན་བརྗོད།། སློབ་དཔོན་དགུག་པའི་འཛབ་བགྲང་ཞིང།། རྒྱལ་པོ་བཞི་ཡིས་ཁྲོ་བོ་བཞི།། དཀྱིལ་འཁོར་ལྔ་ལ་འཛབ་བསྐུལ་བྱ།། བར་བར་དག་ཏུ་བཤགས་པ་བྱ། ། དགུ་པའི་འཛབ་ནི་བགྲང་ནས་ནི།། ཆེ་བའི་ཡོན་ཏན་བརྗོད་པར་བྱ།། ཨོཾ་ལས་ཡེ་ཤེས་འོད་བྱུང་ཞིང།། ཨཱཿཡིས་མེས་བསེགས་ཐལ་བར་རློག། ཧཱུ~ཾ་གིས་བདུད་རྩི་རྣམ་པར་དག། སརྦས་ཐམས་ཅད་དབང་དུ་སྡུད། ། པཉྩས་རྣམ་ལྔ་མངོན་སངས་རྒྱས།། ཨ་ནི་སྐྱེ་མེད་ཆོས་ཀྱི་དབྱིངས།། མྲྀ་ནི་བདུད་རྩི་རྣམ་པར་དག། ཏས་ནི་འཁོར་བ་སྟོངས་པར་བྱེད།། ཧཱུ~ཾ་ནི་ཐུགས་ཀྱི་ས་བོན་ཏེ།། ཧྲིཿནི་བག་ཆགས་དབང་དུ་སྡུད། ། ཐ་ནི་སྐྱེ་ཤི་མེད་པའོ།། རྟགས་ཀྱང་འོད་དུད་འཕེལ་སྒྲ་དྲི།། ཡ་མཚན་བྱུང་ཡང་བསྐྱོད་མི་བྱ།། དེ་ནས་བདུད་རྩི་བསྐྱིལ་བར་བྱ།། སོ་སོའི་མཁའ་ལ་བསྐྱིལ་བའི་སྔགས།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཀུཎྜ་ལི་ཧཱུ~ཾ་ཧྲཱིཿཐ། ཤིང་དང་སྨན་དང་རྩི་དང་ནགས།། སྨན་གྱི་སྲུང་མ་བསྐུལ་བར་བྱ།། དེ་ནས་བདུད་རྩི་དབབ་པ་ཡང།། ལྷ་མོ་བརྒྱད་ཀྱི་དུར་ཁྲོད་སྦྱང།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་མེ་པྲ་བེ་ཤ་ཡ་ཕེཾ་ཕེཾ་ཧཱུ~ཾ་ཧྲཱིཿཐ། དེ་ནས་བདུད་རྩི་དབང་དུ་བྱ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཧ་ཡ་གྲཱི་ཝ་ཧྲཱིཿ། རུ་ལུ་རུ་ལུ་ཧྲཱིཿ། པདྨ་པདྨ་ཧྲཱིཿ། བྷནྡྷ་བྷནྡྷ་ཧཱུ~ཾ་ཧྲཱིཿཐ། རྡོ་རྗེ་འཁོར་ལོ་རིན་ཆེན་དང།། པདྨ་ལས་ཀྱི་དབང་དུ་བྱ།། རྟགས་དང་མཚན་མ་བསྟན་པ་དང། ། དཀྱིལ་འཁོར་ཞུགས་པའི་ལྷ་རྣམས་ལ།། འཛབ་དང་སྙིང་པོ་རྐང་ཐོན་དབུལ།། སྟོང་ཚིགས་མཆོད་པ་འབུལ་ནས་ནི།། དེ་ཚེ་མྱུར་དུ་དངོས་གྲུབ་བླང།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་མཉྫུ་ཤྲཱི་བྱཱ་བ་ལོ་ཀི་ཏེ། སིདྡྷི་སིདྡྷི་ཧཱུ~ཾ་ཧྲཱིཿཐ། རིག་འཛིན་རྟ་མགྲིན་ཆེ་མཆོག་དང།། མཁའ་མཉམ་སྐུ་གདུང་འབྱུང་ལྔ་ཡུམ།། བདུད་རྩི་དབང་ཆེན་ཀུན་འདུས་ནས།། ཆེ་མཆོག་སྐུ་གསུང་ཐུགས་ཡོན་ལས།། དངོས་གྲུབ་དཀྱིལ་འཁོར་ཞལ་བསྒྱུར་ནས། ། མཚན་མ་རྫས་ལ་བླང་བར་བྱའོ།། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཨཱ་ཡུཿཕ་ལ་གུ་ཧྱེ་སིདྡྷི་ཧཱུ~ཾ་ཧྲཱིཿཐ།། ཨོཾ་བོ་དྷི་ཙིཏྟ་ཀཱ་ཡ་ཝཱཀ་ཙིཏྟ་ས་མ་ཡ་སྟྭཾ། སློབ་དཔོན་རིག་པའི་མེ་ཏོག་དོར།། སྨན་གྱི་དཀྱིལ་འཁོར་བདག་ལ་བསྟིམ། ། རྒྱལ་པོ་བླ་མ་མངའ་གསོལ་ལ།། མཆེད་ཀྱིས་ཕྲེང་བ་དབུལ་བ་དང།། སློབ་མ་འཇུག་ཅིང་ཞུ་དབང་ནོད།། ཕོ་བྲང་སྤྱིར་བཞག་དབང་བསྐུར་ལ།། ཚེ་ཡི་དབང་ཡང་བསྐུར་བར་བྱ།། ཐོབ་དང་མི་ཐོབ་རྣམ་པར་བརྟག། ཨོཾ་ཨཱཿཧཱུ~ཾ་སརྦ་པཉྩ་ཨ་མྲྀ་ཏ་ཨ་བྷི་ཥིཉྩ་ཧཱུ~ཾ་ཧྲཱིཿཐ། ཨོཾ་ཨཱཿཧཱུ~ཾ་སྭཱ་ཧཱ། ཨཱ་ཡུཿཐ་ལ་གུ་ཧྱ་ཨ་བྷི་ཥིཉྩ་ཧཱུ~ཾ། ཕུང་པོ་ཁམས་དང་སྐྱེ་མཆེད་ཀྱང།། ཡེ་ནས་སངས་རྒྱས་དགོངས་པ་ཡིན།། རང་རིག་སེམས་སུ་རྟོགས་གྱུར་ན། ། སྤྱོད་ཡུལ་གང་བལྟས་རང་སེམས་གསལ།། རྟོག་པ་ལྷ་རུ་ཤེས་གྱུར་ན།། ལྷ་དང་འདུ་འབྲལ་ཡེ་ནས་མེད།། རྣམ་རྟོག་ཆོས་ཉིད་གསལ་གྱུར་ན།། དགྲ་བགེགས་ཚར་བཅད་བྱ་མི་དགོས།། ཡེ་འབྱམས་ཀློང་གི་དབང་རྫོགས་ན། ། རྟགས་ཀྱི་ཕྱག་རྒྱ་བསྒྲུབ་མི་དགོས།། ཕྲིན་ལས་བྱ་བཙལ་ཡེ་འདས་ན།། བསྒོམ་བསྒྲུབ་འབད་རྩོལ་མིང་ཡང་མེད།། འདི་ལྟར་རྟོགས་པའི་གདེང་གྱུར་ན།། བསྒྲུབས་ཀྱང་སྐྱོན་མེད་འགལ་བ་མེད། ། མ་བསྒྲུབས་སྐྱོན་མེད་ལྷུན་གྱིས་གྲུབ།། བསམ་མེད་ཆོས་སྐུ་ནམ་མཁའ་འདྲ།། བསྒོམ་མེད་རང་བྱུང་ཀློང་ནས་ཤར།། ཡེ་ནས་བྱང་ཆུབ་སེམས་རྟོགས་ན།། འདུ་འཛི་བྱིས་རྩེད་ཅི་ཞིག་བྱ།། ཐབས་མཁས་རོལ་པའི་ཏིང་འཛིན་ལ། ། ཚི་ཆད་སྒོམ་སྒྲུབ་ཅི་ཞིག་བྱ།། སྣོད་བཅུད་ཐིག་ལེར་སངས་རྒྱས་ན།། གཞན་ནས་བཙལ་ཞིང་སྨོན་པ་མེད།། རྟོགས་པ་ཀློང་དུ་སུས་འདྲིལ་བ།། མི་ཞེས་བྱ་བ་སངས་རྒྱས་ཡིན།། བཅོམ་ལྡན་འདས་ཀྱང་གུད་ན་མེད།། བརྟན་གཡོའི་དཀྱིལ་འཁོར་ཕྱག་རྒྱ་རྫོགས།། རྟོག་འཛིན་སྒྲ་མཐའ་ཏིང་འཛིན་སྔགས།། འདི་ལྟར་སྤྱོད་པའི་རྣལ་འབྱོར་ནི།། འཁོར་འདས་ཡོངས་རྫོགས་བརྡལ་བའི་ས། ། སྐུ་ལྔ་དབྱེར་མེད་དགོངས་པ་ཡིན།། ཀུན་བཟང་ཐུགས་ཀྱི་ཉིང་ཁུ་ཡིན།། རྒྱུན་དུ་བསྒོམས་ཤིང་བསྒྲུབ་བྱས་ནས།། སི་ཧླ་འབྱོངས་ན་སེམས་དག་ཡུས།། མཐོང་སྣང་རྨི་ལམ་གང་དུ་ཡང།། སྟོང་གསུམ་ཉི་མས་གང་བར་མཐོང། ། ག་པུར་ཟླ་བས་གང་བ་སྟེ།། མཱཾ་ས་དུར་ཁྲོད་གནས་ཆེན་ན།། ཁྲག་འཐུང་བཞུགས་པར་གསལ་བ་དང།། རཀྟ་ཁྲག་དང་དྲི་ཆུར་བཅས།། བདེ་གཤེགས་རིགས་ལྔར་མཐོང་བར་འགྱུར།། ས་ནི་དྲི་ཆེན་ཆུ་ལ་ཐིམ། ། ཆུ་ནི་དྲི་ཆུ་མེ་ལ་ཐིམ།། མེ་ནི་རཀྟ་རླུང་ལ་ཐིམ།། རླུང་ནི་ཤ་ཆེན་ནམ་མཁར་ཐིམ།། ནམ་མཁའ་བྱང་སེམས་ཆོས་ཀྱི་སྐུ།། བདུད་རྩི་སྣ་ལྔར་སངས་རྒྱས་སོ།། སྐུ་ནི་ཡི་དམ་བླ་མ་མཆེད།། གསུང་ནི་སྙིང་པོ་ཕྱག་རྒྱ་བཞི། ། ཐུགས་ནི་གསང་བའི་མན་ངག་ཡིན།། བརྫུན་སྨྲ་ངག་བརླང་སྦྱོར་དང་སྒྲོལ།། བདུད་རྩི་ལྔ་ནི་དང་དུ་བླང།། ཉོན་མོངས་མི་སྤང་ཡེ་ཤེས་ཡིན།། རིགས་ལྔར་ཤེས་ན་ཀུན་བསྒྲུབ་པས།། རྡོ་རྗེ་རྒྱལ་པོས་རྒྱ་བཅག་ལ། ། སློབ་དཔོན་འཛབ་བཟླས་ཁ་ཕྱེ་ནས།། ཡུམ་གྱི་ཡ་མཚན་ཆེ་བར་བརྗོད།། བདུད་རྩི་ཕོ་བྲང་ནས་དབྱུང་ངོ།། ལྷག་མ་བསྐྱང་ནས་གཏོར་མ་གཏང།། གཏེར་དུ་སྦ་དང་སྦྱིན་བསྲེག་བྱ། ། མཁའ་འགྲོ་སྐྱོང་ལ་ལས་ཟླ་བཟླས།། གཏོར་མ་མཐར་དུ་དབྱུང་བར་བྱ།། ལྷག་ཆད་བཤགས་ཏེ་དག་པར་བྱ།། ཚིག་གིས་མཆེད་ཟླ་ངན་པ་བཤགས།། གཅིག་ལ་གཅིག་ནི་ཚང་བར་བྱ།། དཀྱིལ་འཁོར་བསྡུས་ལ་ཡེ་ཤེས་གཤེགས། ། རང་ཡུལ་ཞིག་དག་བཅས་པ་དང།། བུ་དང་ཆུང་མ་ལ་སོགས་ཏེ།། རང་ལུས་ཕུལ་ལ་ཡོན་གྱིས་བསླུ།། ཅི་འབྱོར་བླ་མ་མཉེས་པར་བྱ།། དེ་ལྟར་བསྒོམས་ཤིང་བསྒྲུབ་པ་ཡིས།། སྐུ་ཡི་གསང་བ་བསམ་མི་ཁྱབ། ། ཆོས་སྐུ་དྲི་མ་མེད་པ་ཐོབ།། སྐུ་ནི་ཐམས་ཅད་དེ་ལས་འབྱུང།། གཟུགས་སྐུ་གཉིས་སུ་སྣང་བའོ།། གསུང་གི་གསང་བ་བསམ་མི་ཁྱབ།། བརྗོད་མེད་དོན་གྱི་གསུང་དང་ལྡན། ། གསུང་ནི་ཐམས་ཅད་དེ་ལས་བྱུང།། གསུང་དབྱངས་ཡན་ལག་དྲུག་ཅུར་སྒྲོགས།། ཐུགས་ཀྱི་གསང་བ་བསམ་མི་ཁྱབ།། སྐྱེ་མེད་དགོངས་པ་དབྱིངས་ན་གསལ།། ཐུགས་ནི་ཐམས་ཅད་དེ་ལས་བྱུང།། ཡེ་ཤེས་རྣམ་གྲངས་བསམ་ལས་འདས། ། སྐུ་དང་གསུང་དང་ཐུགས་དང་གསུམ།། མི་ཟད་རྒྱན་གྱི་འཁོར་ལོ་གསལ།། རྟགས་སུ་དབུ་ཡི་གཙུག་ཏོར་བརྟན།། རིགས་ལྔའི་སངས་རྒྱས་བདུད་རྩི་ཉིད།། རང་ཞལ་རང་གི་ལུས་ལ་མཐོང། ། རྩ་དབྱིངས་དུང་ཆེན་གཡས་སུ་འཁྱིལ།། ལུས་ཁམས་བདུད་རྩི་སྤྱི་གཙུག་འཐོན།། གསང་བའི་རིང་བསྲེལ་ཆེན་པོར་གནས།། རླུང་གི་འོད་ཟེར་ཚངས་བུག་འཕྲོ།། ཞེས་གསུངས་སོ།། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལས། འབྲས་བུ་མཐར་ཕྱིན་པའི་ལེའུ་སྟེ་ལྔ་པའོ།།།། དེ་ནས་འཁོར་རྣམས་ཀྱིས་སྟོན་པ་ལ་མཆོད་པ་མང་པོས་མཆོད་ནས་འདི་སྐད་བརྗོད་ཅིང་བསྟོད་དོ། ། ཕུན་སུམ་ཚོགས་པས་གཞི་བཅས་ནས།། ཆོ་ག་ལྔ་ཡི་ལས་གཞུང་བསྲང།། དཀྱིལ་འཁོར་གསུམ་གྱིས་རྟོག་པ་སྦྱངས།། གཅེས་པ་བཞི་ཡིས་མཐའ་བསྡུས་ནས།། འཁོར་འདས་བདུད་རྩིར་སྦྱོར་མཛད་པ། ། སྟོན་པ་ཁྱེད་ལ་ཕྱག་འཚལ་ལོ།། ཕྱི་ཡི་སྨན་བསྒྲུབ་ཆེན་པོ་ཡིས།། སེམས་ཅན་ཉོན་མོངས་སྣང་བ་སྦྱང།། ནང་གི་བདུད་རྩི་བསྒྲུབ་པ་ཡིས།། རྣལ་འབྱོར་ཉམས་ཀྱི་སྣང་བ་ཤར།། འབྲས་བུ་བདེ་གཤེགས་སྣང་བ་ལ། ། མི་ཟད་རྒྱུན་གྱི་འཁོར་ལོར་གྲུབ།། སྣང་བ་གསུམ་གྱི་རྒྱུན་ཆད་པ།། སྟོན་པ་བདེ་གཤེགས་ཁྱོད་ཕྱག་འཚལ།། ཞེས་བསྟོད་ནས་འཁོར་རྣམས་སྟོན་པས་གསུངས་པ་ལ་རྗེས་སུ་ཡི་རངས་པར་གྱུར་ཏོ། ། དེ་ནས་སྟོན་འཁོར་རྣམས་ཆོས་ཀྱི་དབྱིངས་སུ་ཐིམ་ནས། གསང་བའི་རྒྱུད་ཆེན་པོ་འདི་ཨུ་རྒྱན་གྱི་ཡུལ་དུ་དཔལ་དུ་བ་ལྟ་བུའི་མཆོད་རྟེན་གྱི་ནང་དུ་བཞུགས་སོ། དེ་ནས་གསང་བའི་བདག་པོ་འགྲོ་བ་ལ་སྤྲོས་ཏེ། བདུད་རྩི་ཆེན་པོ་ཆོས་ཉིད་གསང་བའི་རྒྱུད་ལས་རྗེས་སུ་ཡི་རང་བའི་ལེའུ་སྟེ་དྲུག་པའོ།།།། བདུད་རྩི་ཆེན་པོ་ཆོས་ཉིད་གསང་བའི་རྒྱུད་རྫོགས་སོ།།།། རྒྱ་གར་གྱི་མཁན་པོ་བི་མ་ལ་མི་ཏྲ་དང། བོད་ཀྱི་ལོཙྪ་བ་གཉགས་ཛྙཱ་ན་ཀུ་མ་རས་བསྒྱུར་བའོ།།།། རྒྱ་གར་སྐད་དུ། ཨ་མྲྀ་ཏ་ཀུཎྜ་ལི་ཨ་མ་ར་ཨཱ་ཡུཿཏནྟྲ་ནཱ་མ། བོད་སྐད་དུ། བདུད་རྩི་འཁྱིལ་པ་འཆི་མེད་ཚེའི་རྒྱུད་ཅེས་བྱ་བ།
CLOSE WINDOW