| Wylie |
རྒྱ་གར་སྐད་དུ། པྲཏྻཾ་གི་ར་མ་ཧཱ་བ་ལ་ཧ་ཡ་གྲཱི་ཝ་ཏནྟྲ་ནཱ་མ། བོད་སྐད་དུ། ཕྱིར་བཟློག་པ་སྟོབས་ཆེན་རྟ་མགྲིན་གྱི་རྒྱུད་ཅེས་བྱ་བ། ཐུགས་རྗེ་ཆེན་པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་བདུད་ཐམས་ཅད་རྡོ་རྗེ་དང་འཁོར་ལོས་རྣམ་པར་འཇོམས་པའི་ཏིང་ངེ་འཛིན་ལ་རི་བོ་ཏ་ལའི་སྤོ་ལ་ཁྲོ་བོའི་རྒྱལ་པོ་བདུད་ལས་རྣམ་པར་རྒྱལ་བ་ལ་སོགས་པ་དང་ཐབས་ཅིག་ཏུ་སྙོམས་པར་ཞུགས་ཏེ། ། ཁྲོ་བོའི་རྒྱལ་པོ་རྟ་མཆོག་ལ། གང་དག་བདུད་ལ་སོགས་པས་གཙེས་པ་རྣམས་ལ་ཐུགས་རྗེས་སྐྱོབས་ཤིག་ཅེས་བཀའ་སྩལ་ཏོ།། རྟ་མཆོག་གིས་གསོལ་པ། ། ཇི་ལྟར་བསྐྱབ་པ་དང་བསྲུང་བ་བཅོམ་ལྡན་འདས་ཀྱིས་བཤད་དུ་གསོལ།། བཅོམ་ལྡན་འདས་ཀྱིས་བཀའ་སྩལ་པ།། ལེགས་ལོ་ལེགས་སོ་རྟ་མཆོག་རྒྱལ།། ཐུགས་རྗེའི་བདག་པོ་སྟོབས་པོ་ཆེ། ། རིགས་པའི་རྒྱལ་པོ་གསང་སྔགས་འཆང།། མདོག་དམར་བྱུ་རུའི་མདོག་ལྟ་བུ།། ཁྱོད་ལ་བཤད་ཀྱིས་ལེགས་པར་ཉོན།། དེ་ནས་ཁྲོ་བོ་བདུད་ལས་རྒྱལ་བ་ལ་སོགས་པས་གཡས་ནས་འགྱིང་བའི་ཚུལ་གྱིས་རྟ་མཆོག་ལ་བསྟོད་པ། རྟ་མཆོག་རྒྱལ་པོ་རིགས་སྔགས་འཆང།། ཐུགས་རྗེའི་བདག་པོ་སྟོབས་པོ་ཆེ།། སངས་རྒྱས་ཀུན་གྱིས་བྱིན་གྱིས་བརླབས།། རིག་པའི་རྒྱལ་པོ་གང་གསུངས་པ།། ཡེ་ཤེས་ཁྲོ་བོ་ཁྱོད་ཀྱིས་ཟུང། ། དེ་ནས་རྟ་མཆོག་རྒྱལ་པོ་སྟན་ལས་ལངས་ཏེ།། དེ་ལྟར་བགྱིའོ་ཞེས་གསོལ་ནས།། འཁོར་ཁྲོ་བོ་དང་ཁྲོ་མོ་ལ་སོགས་པས་མེ་ཏོག་དང། བདུག་པ་དང། ཡོན་ཆབ་ལ་སོགས་པ་དང། གདུགས་དང་རྒྱལ་མཚན་ལ་སོགས་པ་ཐོགས་ཏེ། བཅོམ་ལྡན་འདས་ལ་བསྐོར་བ་ལན་གསུམ་བྱས་ནས། གཞི་དེ་ཉིད་དུ་བཅོམ་ལྡན་འདས་ལ་བལྟ་བའི་ཚུལ་གྱིས་གནས་སོ།། ཁྲོ་བོའི་རྒྱལ་པོ་རྟ་མཆོག་གིས་སྤྱན་མི་འཛུམ་པར་བཅོམ་ལྡན་འདས་ལ་གཟིགས་ནས་བཞུགས་སོ། ། བཅོམ་ལྡན་འདས་ཀྱི་སྐུའི་ཕྱོགས་ཐམས་ཅད་ནས་འོད་ཟེར་དཔག་ཏུ་མེད་པ་སྤྲོས་པས་བགེགས་ཀྱི་ཚོགས་ཐམས་ཅད་བསྐྲད་ཅིང་དངངས་པར་གྱུར་ཏོ།། སའི་ཕྱོགས་ཐམས་ཅད་ཀྱང་གཡོས་རབ་ཏུ་གཡོས། འགུལ་རབ་ཏུ་འགུལ། ལྡེག་རབ་ཏུ་ལྡེག། འུར་རབ་ཏུ་འུར། ཆེམ་ཆེམ་རབ་ཏུ་ཆེམ་ཆེམ། དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བར་གྱུར་ཏོ།། རྟ་མཆོག་གི་རྒྱུད་ལས་གླེང་གཞིའི་ལེའུ་སྟེ་དང་པོའོ། །།། དེ་ནས་བཅོམ་ལྡན་འདས་ཀྱིས་བཀའ་སྩལ་པ།། རྟ་མཆོག་རྒྱལ་པོ་ཐུགས་རྗེ་ཅན།། གསང་བའི་བདག་པོ་ཁྱོད་ཀྱིས་ཟུང།། ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུ~ཾ་ཕཊ། ལས་རྣམས་ཐམས་ཅད་གྲུབ་པ་དང། སྡིག་པ་ཐམས་ཅད་ཞི་བར་བྱེད།། ཨོཾ་ནཱ་ག་ར་ཙ་མཱ་ར་ཡ་རྦད། ནཱ་ག་ར་ཙ་མཱ་ར་ཡ་སོད་སོད། ནཱ་ག་ཧ་ལ་ཧ་ལ། ནཱ་ག་ཆོད་ཆོད། ནཱ་ག་ཁོས་ཁོས། ནཱ་ག་མགོ་ལ་ནན། ནཱ་ག་ཤིག། ནཱ་ག་བྱིང་བྱིང། ནཱ་ག་ཟློག་ཟློག་ནཱ་ག་ཐུམས། ནཱ་ག་ཙིཏྟ་ཟུར། ནཱ་ག་ཙིཏྟ་ཤིག་ཙིཏྟ་ཁོས། ཙིཏྟ་ཕྲོག་ཕྲོག་ཧ་ས་ཧ་ས། པ་ཙ་པ་ཙ། ཙྪིནྡ་ཙྪིནྡ། བྷིནྡ་བིནྡ། སརྦ་ཤ་ཏྲུཾ་ཆོད་ཆོད། ཙིཏྟ་ཤིག་ཤིག་ཙིཏྟ་རཾ་རཾ། ཙིཏྟ་མྱོང་མྱོང། ཙིཏྟ་རྨུགས་རྨུགས། ཤ་ཏྲུཾ་རྦད་རྦད། ཁོས་ཁོས། ཟློག་ཟློག་བྷྱོ་བྷྱོ། ཧཱུ~ཾ་ཧཱུ~ཾ། བྷྱོ་བྷྱོ། ཕཊ་ཕཊ། བྷྱོ་བྷྱོ། བཛྲ་ཀྲོ་དྷ་ཟློག་ཟློག་ཧ་ཡ་གྲཱི་བ་ཟློག་ཟློག་མ་ཧཱ་ཀ་རུ་ཎ་ཟློག་ཟློག་བོ་དྷི་སྥ་ར་ཎ་ཟློག་ཟློག་ཙཎྜ་ཀྲོ་དྷ་ནི་ཟློག་ཟློག། བཛྲ་ཀྲོ་དྷ་མཱ་ར་ཡ་ཧཱུ~ཾ་ཕཊ། མཱ་ར་ཡ་རཀྟ་རྡུབས་རྡུབས། ཨོཾ་བཛྲ་ཀྲོ་དྷ་ཟློག་ཟློག། བྷྱོ་བྷྱོ། ཤིག་ཤིག། ཟློག་བྱེར་ཟློག་བྱེར། ཙིཏྟ་མགོ་ལ་ནན། ཧཱུ~ཾ་ཧཱུ~ཾ་ཧཱུ~ཾ། ཕཊ་ཕཊ་ཕཊ། ཕྱིར་ཟློག་པ་སྟོབས་ཆེན་རྣམ་པར་གནོན་པ་ཞེས་བྱ་བ་དགྲ་ཐམས་ཅད་དང།། གཤེད་བྱེད་ཐམས་ཅད་དང།། བྱད་སྟེམས་ཐམས་ཅད་དང།། རོ་ལངས་ཐམས་ཅད་དང།། བཀྲ་མི་ཤིས་པ་ཐམས་ཅད་དང་རྒྱལ་པོའི་འཇིགས་པ་དང། ། མེ་དང་ཆུའི་འཇིགས་པ་དང། ཁྲོ་བོའི་འཇིགས་པ་དང། ཡི་དྭགས་དང། ཤ་ཟ་དང། གྲུལ་བུམ་དང། གྲིབ་གནོན་དང། བརྗེད་བྱེད་དང། ཀླུའི་འཇིགས་པ་དང། སྦྱིན་སྲེག་བྱེད་པ་དང། བྱེད་དུ་འཇུག་པ་དང། བྱེད་པ་ལ་རྗེས་སུ་ཡི་རང་བ་དང། གང་དག་འཁྲུལ་འཁོར་བྱེད་པ་ཐམས་ཅད་བཟློག་པར་བགྱིའོ།། གང་དག་བདག་ལ་མི་ཕན་པར་འདོད་པ་ཐམས་ཅད་རྨུགས་པར་བགྱིའོ།། རེངས་པར་བགྱིའོ། ། འཁྲུལ་པར་བགྱིའོ།། འབྱུང་པོ་ཐམས་ཅད་དང། གནོད་པ་ཐམས་ཅད་དང། ནད་ཐམས་ཅད་དང། སྦྱིན་སྲེག་ཏུ་བྱེད་པ་ཐམས་ཅད་དུ་བྱེད་པོ་ཐམས་ཅད་ར་རོ་བར་བགྱིའོ།། ཚིག་པར་བགྱིའོ།། ཨོཾ་བཛྲ་ཀྲོ་དྷ་ནན་ནན། ཤི་གྷྲཾ་ཀ་ར་ཡ་ནན་ནན་སྥོ་ཊ་ཡ་སྥོ་ཊ་ཡ་སྥུ་ཊ་ཡ་སྥུ་ཊ་ཡ་ཀྲོ་ཏ་ནན་ནན། སརྦ་ཤ་ཏྲུཾ་དེ་བ་ནན་ནན། སརྦ་མོ་ཧ་ཏི་མོ་ཧ་ཏི་ཧཱུ~ཾ་ཧཱུ~ཾ་ནན་ནན། ཕཊ་ཕཊ། གང་དག་བདག་ལ་གནོད་པར་སེམས་པ་ཐམས་ཅད་ཀྱི་ལྷ་ཐམས་ཅད་མནན་པར་བགྱིའོ། ། དགྲ་ཐམས་ཅད་གྱི་མིག་བཅིང་ངོ།། རྣ་བ་བཅིང་ངོ།། སྣ་བཅིང་ངོ།། མནན་པར་བགྱིའོ།། ལུས་བཅིང་ངོ། ཡིད་བཅིང་ངོ།། ཡན་ལག་དང་ཉིད་ལག་བཅིང་ངོ། ། རྡོ་རྗེ་ཁྲོ་བོས་ཆིངས་ཤིག་ཆིངས་ཤིག་རྣམ་པར་ནོན་ཅིག་ཀུན་ཏུ་ནོན་ཅིག། རེངས་པར་གྱིས་ཤིག། མནན་པར་བགྱིའོ།། ནཱ་ག་འདུས་འདུས། ནཱ་ག་ཤོ་འདུས་འདུས། ཧི་ལི་ཧི་ལི། འདུས་ནཱ་ག་འདུས། ཀླུ་ཆེན་པོའི་སྲོག་སྙིང་སྟེ། གནད་ལ་བོར་བའི་སྙིང་པོའོ།། བལ་པོ་སེའུའི་ལྕུག་མའམ། སྨྱག་ཤད་དག་གི་ལྕུག་མས་ལུས་བྲབ། དེ་ནི་ཀླུ་བཟློག་པའི་ཆོ་གའོ།། སྲུང་བའི་སྦགས་བཛྲ་ཀྲོ་དྷ་རཀྵ་རཀྵ། བཛྲ་ཀཱ་ཝཱ་ཙི་རཀྵ་རཀྵ་བཛྲ་ཀྲོ་དྷ་རཀྵ་རཀྵ། བཛྲ་ཀཱ་ཝཱ་ཙི་རཀྵ་རཀྵ་བཛྲ་ཙན་དྷ་རཀྵ་རཀྵ། སརྦ་བུདྡྷ་ན་རཀྵ་རཀྵ། བཛྲ་པཱ་ནི་རཀྵ་རཀྵ། བོ་དྷི་ས་ཏྭ་ནི་རཀྵ་རཀྵ། ཧཱུ~ཾ་ཧཱུ~ཾ་ཧཱུ~ཾ། རཀྵ་རཀྵ། ཧཱུ~ཾ་ཧཱུ~ཾ། ཕཊ་ཕཊ། དགྲ་དང་བགེགས་ཐམས་ཅད་བསྲུང་བར་བགྱིའོ།། གང་གིས་བསྲུངས་ན་རྡོ་རྗེ་ཁྲོ་བོས་བསྲུང་བར་བགྱིའོ།། སངས་རྒྱས་རིགས་ལྔ་ལ་སོགས་པ་ཐམས་ཅད་ཀྱིས་བསྲུང་བར་བགྱིའོ། ། ཕྱག་ན་རྡོ་རྗེ་གཏུམ་པོས་བསྲུང་བར་བགྱིའོ།། བྱང་ཆུབ་སེམས་དཔའ་རྣམས་ཀྱིས་བསྲུང་བར་བགྱིའོ།། ཕྱག་ན་རྡོ་རྗེ་ཞི་བ་མང་པོས་སྲུངས་ཤིག་རྡོ་རྗེའི་ལུས་སུ་སྲུངས་ཤིག་བྱད་ལས་གྲོལ་ནས་ཚུར་མི་ཚུགས་པར་ཕར་འཇོམས་པ་རྡོ་རྗེའི་ལུས་སུ་བྱིན་གྱིས་བརླབ་པར་བགྱིའོ། ། ཨོཾ་ཨཱཿཧཱུ~ཾ། ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨདྱཱ་ནུ་ཏྤནྣ་ཏྭ་ཏ་ཨོཾ་ཨཱཿཧཱུ~ཾ་སྭཱ་ཧཱ། སྔགས་དེ་ཐམས་ཅད་བདུན་ནམ་ཉི་ཤུ་རྩ་གཅིག་གམ། རབ་ཀྱིས་བརྒྱ་ནི་རྩ་བརྒྱད་བཟླས་བྱས་ལ། མཆོད་སྦྱིན་གྱི་ཕྱག་རྒྱ་བཅས་ལ། བདག་གི་སྲུང་མ་གཏོར་མའི་ཕུད་ཀྱིས་མཆོད། རང་ལ་བྱད་བྱེད་པའི་སྲུང་མ་བོས་ནས་ནི། གཏོར་མ་ཤིན་ཏུ་རྒྱ་ཆེར་བཏང་དེ། དེའམ་གང་ལ་བདག་ལ་གནོད་སེམས་དང་ལྡན་བདེ་དག་ལ་ཕྱིར་ལ་དུག་གི་རང་བཞིན་དེ་བཞིན་འགྱུར། གང་དག་བདག་ལ་ཕན་སེམས་པ།། དེ་དག་གཏོར་མ་དེ་བདུན་རྩིས་བདེ་བར་འགྱུར། ། གནོད་སེམས་འབྱུང་པོ་གང་ཡིན་པ།། དེ་དག་མེ་ཡི་གཏོར་མའི་མེ་ཡིས་བསྲེག་པར་བགྱི།། དགྲ་བགེགས་ཀྱི་ཕྱོགས་སུ་ཟོར་ལྟར་འཕངས་པས་དགྲ་བགེགས་ཕུང་བ་འགྱུར། ། དཔལ་རྟ་མཆོག་གི་རྒྱུད་ལས། སྔགས་དང་གཏོར་མའི་ལེའུ་སྟེ་གཉིས་པའོ།།།། དེ་ནས་ཡང་དག་བཤད་བྱ་བ།། རྟ་མཆོག་རྒྱལ་པོའི་སྲུང་བའི་ཐབས།། མཆོག་ཏུ་བཤད་ཀྱི་རྟ་མཆོག་དཔལ། ། ཁྱོད་ཀྱིས་ལེགས་པར་མ་ནོར་ཟུང།། སྐྱ་རངས་ཤར་བའི་དུས་དག་ཏུ།། བདག་བསྐྱེད་ཁྲོ་བོ་རྟ་མགྲིན་དམར།། ཞལ་གཅིག་པ་ལ་ཕྱག་གཉིས་པ།། གཡས་པ་ཐོད་དབྱུག་གཡོན་པ་ནི། ། སྡིགས་མཛུབ་བསྡིག་པ་མཛད་པའི་ཚུལ།། སྐུ་ལ་སྦྲུལ་དང་སྟག་གིས་བརྒྱན།། ཞབས་གཉིས་གཡོན་བརྐྱང་གཡས་བསྐུམ་ནས།། སྣ་ཚོགས་པདྨ་ཉི་མ་ཡི།། གདན་བཞུགས་ཐུགས་ཀར་གནས་པ་ནི། ། ཨ་དང་མ་ལས་ཟླ་བ་དང།། ཉི་མ་དཀར་དང་སེར་པོ་བསམ།། ཟླ་བའི་དབྱིབས་ནི་མཐའ་སྐོར་ཅན།། ཉི་མའི་དབྱིབས་ནི་དཀྱིལ་བུག་ཅན།། དེ་ཉིད་ཀྱི་བར་དུ་ངོ་བོ་ཡི་གེ་ཨ་སྟེ། ས་བོན་ལས་ཐོད་པ་ལས་རྩ་བའི་རིག་པའི་སྔགས་ངག་ཏུ་བརྗོད་པས་རྟག་མཆོག་ཏུ་བསམ། གནོད་བྱེད་སྐད་བསྒྲགས་པས་བསྲེག། ཀ་པཱ་ལ་དང་བསེ་ཡི་སྣོད།། ཁ་སྦྱོར་རྡོ་རྗེའི་དྲ་བ་ཅན།། ཕྱོགས་བཞིར་ལྕགས་ཀྱུ་བདུན་བདུན་བསམ། ། བུམ་པ་བཟང་པོའི་ཁ་རྒྱན་ཅན།། པདྨའི་དཔག་བསམ་ཤིང་དུ་བསམ།། ལྟེ་བར་རིག་པའི་རྒྱལ་པོ་དང།། འདབ་བཞིར་ཁྲོ་བོ་ཕྱོགས་དང་མཐུན།། མཚམས་བཞི་འཆོལ་བའི་ཕྱག་མཚན་དང། ། སྐུ་མདོག་སྣ་ཚོགས་གཙོ་ལ་ཕྱོགས།། རྡོ་རྗེའི་ས་གཞི་གཅིག་པ་དང།། ར་བ་དྲ་བ་གདུགས་ཀྱང་དབུབ།། མཚོན་ཆ་མེ་རི་འཁོར་ལོ་བསྒོམ།། བྱད་བྱེད་རྣམ་ལ་སྐྲག་མི་དགོས། ། དཔལ་རྟ་མཆོག་གི་རྒྱུད་ལས། སྲུང་བའི་འཁོར་ལོ་བསྡོམ་པའི་ལེའུ་སྟེ་གསུམ་པའོ།།།། དེ་ནས་ཡང་དག་བཤད་བྱ་བ།། ཐུགས་རྗེའི་བདག་པོ་ལེགས་པར་ཉོན། ། ཟློག་པའི་འཁོར་ལོ་གང་འདོད་པ།། བདེ་བའི་སྟན་ལ་གནས་ནས་ནི།། བྱ་ལ་མ་ཁམས་སུ་ཡཾ་དང་བཾ།། ལཾ་དང་རཾ་ལས་འབྱུང་བ་ཡི།། འཁོར་ལོ་རྣམ་པར་བསྒོམ་པར་བྱ།། བྷྲཱུཾལས་འཁོར་ལོ་རྩིབས་བརྒྱད་པ། ། རྩིབས་སྟེང་རྡོ་རྗེའི་གཞལ་ཡས་ཁང།། རྟ་མཆོག་ཞལ་གཉིས་ཕྱག་བཞི་པ།། མདའ་གཞུ་འགེངས་ཤིང་རྟ་སྐད་སྒྲོག། ཕྱོགས་བཞིར་རིགས་ཀྱི་ཁྲོ་བོ་བསམ།། ཤར་གྱི་འཁོར་ལོའི་རྩིབས་ལ་ནི། ། བདུད་ལས་རྒྱལ་བྱེད་མདོག་དཀར་བ།། ཞལ་གཅིག་ཕྱག་གཉིས་རྡོ་རྗེ་འཕྱང།། སྡིགས་མཛུབ་གཡོན་པས་བགེགས་རྣམས་བསྲེག། ལྷོ་རུ་ཁྲོ་བོ་གཟི་བརྗིད་འབར།། མདོག་སེར་ཧ་ཧའི་སྒྲ་སྒྲོག་པ། ། རྡོ་རྗེ་བྱུག་ཐོ་གཡས་དང་གཡོན།། ནུབ་ཏུ་རྔམ་པའི་སྒྲ་སྒྲོག་པ།། རྡོ་རྗེ་གཡས་འཛིན་སྦྲུལ་ཞགས་གཡོན།། འཛིན་པས་ཀླུ་རྣམས་དབང་དུ་སྡུད།། བྱང་གི་འཁོར་ལོའི་རྩིབས་ལ་ནི། ། བདུད་རྩི་འཁྱིལ་པ་སྐུ་མདོག་ལྗང།། རྡོ་རྗེ་བེ་ཅོན་གཡས་དང་གཡོན།། ཐམས་ཅད་ཞབས་གཉིས་གཡས་དང་གཡོན།། བསྐུམ་དང་བརྐྱང་བའི་ཚུལ་དུ་བཞུགས།། སྦྲུལ་དང་སྟག་གིས་རབ་ཏུ་བརྒྱན། ། མཚམས་བཞིར་སྣ་ཚོགས་འཇིགས་པ་བསྒོམ།། བསྲུང་བྱ་གང་འདོད་རྡོ་རྗེའི་ནང།། བསྒོམ་ལ་དྲག་པོ་ཡི་ནི་སྔགས།། མགྲིན་གཅིག་ཏུ་ནི་བརྗོད་པར་བསམ།། རྩིབས་ཀྱི་སོ་ཡིས་ཐམས་ཅད་གཅོད། ། ཁྲོ་བོ་རྣམས་ཀྱང་དགྱེས་པའི་ཚུལ།། ཆོད་ཅིག་གཏུབས་ཤིག་ལེགས་པར་གཏུབས།། མེ་ཡིས་བསྲེགས་ཤིང་རྡུལ་དུ་རློགས།། ཤོག་གུའམ་གྲོ་ག་དག་ལ་ནི།། ཟ་བྱེད་གནོད་པའི་གཟུགས་བྲིས་ལ། ། ཁྲུ་གང་ཙམ་གྱི་ཚད་ཉིད་ལ།། དུག་དང་ཁྲག་གིས་བྲིས་ལ་ནི།། ཁ་ལ་རྡོ་རྗེ་རྒྱ་གྲམ་དགོད།། ལུས་ཀྱི་སྟེང་དུ་ལམ་ལས་ནི།། གླིང་བཞི་རི་རབ་ལེགས་པར་དགོད།། མགོ་ལ་རྟ་མཆོག་ཡན་ལག་ལ། ། ཧཱུ~ཾ་བཞི་རྡོ་རྗེ་འགྲེང་བུ་གཉིས།། དཔུང་པ་གཡས་དང་གཡོན་དུ་དགོད།། ལུ་གུ་རྒྱུད་ཀྱིས་དམ་པར་བཅིངས།། མི་སྩོགས་རྣམས་ལ་ཧཱུ~ཾ་ཡང་བྲི།། དགུག་དང་གཞུག་པ་དང་པོར་བྱ། ། གྲུ་གསུམ་ནང་དུ་རྡོ་རྗེས་མནན།། དྲག་པོའི་སྔགས་བརྗོད་ནོན་པར་འགྱུར།། གང་དག་བསྲུང་བའི་གོ་ཆ་བགོ།། ཞལ་གཉིས་ཕྱག་དྲུག་རྟ་མཆོག་ལ།། གོང་དུ་བཞི་བྱུང།། ལྗང་ཞུར་ལེ་བརྒྱན་མདོག་འདྲ་བ། ། མཆེ་བ་གཙིགས་ཤིང་ཕྱག་རྒྱ་ནི།། རྡོ་རྗེ་རྩེ་ལྔའི་ཕྱག་རྒྱ་འཆིང།། ཧཱུ~ཾ་ལས་འོད་འཕྲོས་ལོག་པར་འདྲེན།། རྡོ་རྗེའི་ཆར་ཕབ་སྐུ་ལ་བསྟིམ།། དྲག་པོའི་སྔགས་བརྗོད་ལེགས་པར་བསྲུང། ། རྡོ་རྗེ་ཁྲོ་བོ་གཏུམ་པོ་ཆེ།། ཕྱག་ན་རྡོ་རྗེ་འཇིགས་པའི་སྐུ།། རིན་ཆེན་གསུམ་གྱིས་བསྲུང་བར་བྱ།། དཔལ་རྟ་མཆོག་གི་རྒྱུད་ལས།། བཟློག་པ་དང་གོ་ཆའི་ལེའུ་སྟེ་བཞི་པའོ།།།། དེ་ནས་ཆོ་ག་ཡང་དག་མཆོག། བཤད་ཀྱིས་རིག་པའི་རྒྱལ་པོ་ཟུང།། རིག་པའི་རྒྱལ་པོ་འབུམ་དུ་བཟླས།། དྲག་པོའི་སྔགས་རྒོད་རྒྱུན་ཏུ་བསྙེན།། ལས་ལ་སྦྱར་བ་བརྟག་པར་གྱིས།། རྒྱལ་པོ་བཟློག་ན་རཱ་ཙ་དང། ། ཡཀྴ་གནོད་སྦྱིན་ནཱ་ག་ཀླུ།། ཕྱི་ལ་གནོད་བྱེད་ལེགས་པར་བརྟག། མི་ཚིག་མ་འདྲེས་གསལ་བའི་མཆོག། གསང་བ་ཀུན་ཏུ་ཟླ་བར་བགྱིས།། གཞན་ཡང་དག་བཤད་བྱ་བ།། སྲུང་བྱེད་རྣམ་རྒྱལ་ཨ་རུ་ར། ། བཅངས་སམ་ལུས་ལ་བསྟེན་པ་ཡིས།། མར་མེའི་སྣང་བས་མུན་སེལ་ལྟར།། ཕྱོགས་སུ་གནས་པ་མི་འགྱུར་ཏེ།། དོན་ཀུན་འགྲུབ་བྱེད་ནོར་བུ་དང།། དེ་བཞིན་ཚེ་སྲིད་ནོར་བུ་དང། ། རིན་ཆེན་སྣ་ཚོགས་བཅངས་པ་ཡིས།། ཉི་ཤར་གྲིབ་མ་མི་གནས་ལྟར།། བགེགས་ཀྱིས་རྙེད་པར་མི་འགྱུར་རོ།། དགྲ་བཅོམ་བྱང་ཆུབ་སེམས་དཔའ་དང།། དེ་བཞིན་རྣལ་འབྱོར་གྲུབ་པའི་གདུང། ། མཆོད་ཅིང་བཅངས་པ་ཙམ་གྱིས་ནི།། ཞེ་སྡང་ཞི་ནས་མཆོད་བྱེད་འགྱུར།། ལྔ་བརྒྱ་སྟོང་དུ་ལོན་པ་ཡིས།། སྔགས་བཏབ་བསྐུས་ན་དཔག་ཚད་བརྒྱར།། གནོད་པ་ཐམས་ཅད་འབྲོས་པར་འགྱུར། ། དུག་དགྲའི་སྒྲོ་རྩ་སྙིང་དང་ནི།། སྨྱག་ཤང་ལྕུགས་མའི་བཅིངས་པ་ཡིས།། ཀླུ་ཡི་བཟུང་ན་བཏང་ནས་ཀྱང།། དེ་དག་ཕྱིར་ལ་འབྲོས་པར་འགྱུར།། ག་བུར་ཛཱ་ཏི་ཙནྡན་དང།། གླ་རྩི་གུ་གུལ་དྲི་ལྔ་ནི། ། བཅངས་པས་རབ་ཏུ་བྱེ་བར་འགྱུར།། གུ་གུལ་ནག་དང་དྲི་སྣ་ཚོགས།། བདུགས་ཤིང་བསྲེག་པས་ཀླད་པ་འགས།། དྲི་ལྔ་འཐུངས་པས་ནང་གི་དུག། ཆུས་བཤལ་སྣོད་བཞིན་སེལ་བར་འགྱུར། ། གུ་གུལ་གླ་རྩི་ལུས་བྱུགས་པས།། མེ་ལྕེས་སྦྲང་བུ་བསྲེགས་པ་ལྟར།། ཐམས་ཅད་མྱུར་དུ་འབྲོས་པར་འགྱུར།། རིག་པའི་རྒྱལ་པོ་གསང་སྔགས་འཆང།། སྔགས་དང་ཕྱག་རྒྱ་རྟེན་འབྲེལ་གྱིས། ། ནུས་པ་བསམ་གྱིས་མི་ཁྱབ་པས།། འབད་པར་བྱ་ཞིང་བརྩོན་པར་གྱིས།། དཔལ་རྟ་མགྲིན་གྱི་རྒྱུད་ལས།། རྫས་ཀྱི་བསྲུང་བའི་ལེའུ་སྟེ་ལྔ་པའོ།།།། དེ་ནས་རིག་པའི་རྒྱལ་པོ་རྟ་མཆོག་སྟན་ལས་ལངས་ཏེ། ། ཁྲོ་བོའི་སྟངས་སྟབས་ཀྱིས་བཅོམ་ལྡན་འདས་ལ་བསྟོད་པ།། སྟོན་པའི་རྒྱལ་པོ་རིགས་སྔགས་འཆང།། བགེགས་རིགས་སྟོང་ཕྲག་འཇོམས་མཛད་པ།། ཐབས་དང་ཤེས་རབ་གཉིས་ཀྱི་ནི། ། ཉོན་མོངས་སྡུག་བསྔལ་འཇོམས་མཛད་པ།། རིག་པའི་རྒྱལ་པོར་ཕྱག་འཚལ་བསྟོད།། རྡོ་རྗེའི་ར་བ་དྲ་བ་ཡིས།། བགེགས་དང་ལོག་འདྲེན་ཐམས་ཅད་བསྲུང།། རྡོ་རྗེ་འཁོར་ལོའི་སྦྱོར་བ་ཡིས། ། ཐམས་ཅད་བཟློག་ཅིང་མེད་པར་བྱེད།། འཁོར་ལོའི་བདག་པོར་ཕྱག་འཚལ་བསྟོད།། དེ་སྐད་ཅེས་གསོལ་བ་དང།། བཅོམ་ལྡན་འདས་ཀྱང་ཞལ་འཛུམ་པ་དང་བཅས་པ་བཞུགས་སོ། ། དེ་ནས་ཁྲོ་བོའི་རྒྱལ་པོ་བདུད་ལས་རྒྱལ་བ་ལ་སོགས་པ་ཐམས་ཅད་དང།། ཁྲོ་བོའི་རྒྱལ་པོ་རྟ་མཆོག་དང། ལྷ་དང་མི་ལ་སོགས་པ་ཐམས་ཅད་ཡི་རངས་ཏེ།། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། དཔལ་རྟ་མཆོག་གི་རྒྱུད་ལས་བསྟོད་པའི་ལེའུ་སྟེ་དྲུག་པའོ།།
CLOSE WINDOW