| Wylie |
ཤྲི་ཨཱ་ཡུཿཔ་ཏི་ར་ཀཱ་ལ་ཏནྟྲ། ཨེ་མནྟ་ཏྭ་ཏ་ཛི་བིན་རཱ་ག་ཀ་སོ་རི་ནཱ་མ། བོད་སྐད་དུ། དཔལ་ཚེ་བདག་ནག་པོའི་རྒྱུད། དྲག་སྔགས་ཀྱི་དེ་ཁོ་ན་སྲོག་དམར་ལེན་གྱི་སྤུ་གྲི་ཞེས་བྱ་བ། དཔལ་ཚེ་བདག་ནག་པོ་བདེ་བ་ཆེན་པོ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཆོས་ཉིད་ཀྱི་ཕོ་བྲང་ན། ཁྱབ་གདལ་ཆེན་པོའི་གནས་ཞེ་སྡང་ཆེན་པོ་རྣམ་པར་དག་པའི་གཞལ་ཡས་ན། འཁོར་དུ་མ་འདུས་པའི་ནང་ནས། རྡོ་རྗེ་ཡོངས་སུ་འཛིན་པ་དང། བདེ་བའི་ཡེ་ཤེས་ཅན་དང། བགྲོད་པ་ཕྱིན་ཅི་མ་ལོག་པ་དང། ལམ་ཉེ་བར་འཛིན་པ་དང། གར་དགུའི་ཆོས་ཀྱི་ཕྱག་རྒྱ་འབར་བའི་རྣམ་པ་དང། ལམ་ལས་གོལ་བའི་རྫུ་འཕྲུལ་ཅན་རྣམས་དང་ཐབས་ཅིག་ཏུ་ཞེ་སྡང་ཆེན་པོ་འདུལ་བའི་ཏིང་ངེ་འཛིན་ལ་རྔམ་པར་བཞུགས་སོ།། དེ་ནས་འཇིག་རྟེན་གསུམ་གྱི་ཕྱོགས་བཅུ་གཡོས་པར་གྱུར་ཏེ། འཁོར་རྣམས་རྒྱལ་བ་རྒྱ་མཚོའི་ཚོགས། འཇིགས་ཤིང་སྐྲག་ནས་བརྒྱལ་ལ་ཁད་དོ།། འཁོར་དེའི་ནང་ནས་རིག་པའི་སྟོབས་ཅན་ལོངས་ཏེ་གསོལ་པ།། བཅོམ་ལྡན་འདས་འདུས་པའི་ཚོགས་རྣམས་འཁོར་དུ་མཆི། འཁོར་ལ་ཐུགས་རྗེ་མ་ཆུང་མཛོད། ། མགོ་ལུས་སྙིང་ཡང་འགས་པ་སྙམ།། གདུང་བའི་ཤུགས་ཀྱིས་ཉེ་བར་མཛོད།། ཅེས་གསོལ་ཏོ།། དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ་དགྱེས་པའི་ང་རོ་འདི་སྟོན་ཏོ། སྔགས་སོར་བཞག། ཨ་ཨེ་ཧ་ཧ་ཡཱ་ག་ཤ་དེ་པ་ཏི་སུ་མ་ར་རཾ་རཾ་ཞེས་བསྒྲགས་སོ།། འཁོར་ཐམས་ཅད་རང་རང་གི་ཡིད་རང་བཞིན་གྱི་མེ་རུ་འབར་ནས་ཚིག་ཅིང་བརླག་ལ་ཁད་དོ།། དེ་ནས་བཅོམ་ལྡན་འདས་ཀྱིས་འཁོར་དེ་དག་གི་རང་རང་གི་རང་བཞིན་མཐོང་ངོ། བཅོམ་ལྡན་འདས་དཔལ་ཁྲག་འཐུང་གི་རྒྱལ་པོ་ཚེ་བདག་ནག་པོས། ཉིད་ཀྱི་སྲོག་གི་སྙིང་པོ་དེ་ཁོ་ན་ཉིད་ཡང་ནས་ཡང་དུ་རྣམ་པར་བསྒྲགས་སོ།། ཨེ་ཨེ་ཨེ་ཨེ་ཞེས་བརྗོད་པས་ཆོས་ཐམས་ཅད་རང་བཞིན་མེད་པ་མ་སྐྱེས་པ། ། འདུས་མ་བྱས་པ། ནམ་མཁའ་ལྟ་བུར་རང་གྲོལ་པའོ།། དེ་ལ་ཆོས་ཐམས་ཅད་འབྱུང་ཞིང་ཡེ་ཤེས་རང་ལ་གནས་སོ།། དེ་ལ་ཆོས་ཐམས་ཅད་དྲག་པོའི་གཏུམ་རྔམ་འབར་བས་ཡེ་ཤེས་ཐིག་ལེའི་ངང་དུ་རང་བཅོམ་མོ། ། དེ་ལ་ཆོས་ཐམས་ཅད་ཞེ་སྡང་འབར་བའི་མེ་ཡིས་རྟོག་འཛིན་ཐམས་ཅད་བསྲེགས་ཏེ་རང་སྐམ་ནས་ཡེ་ཤེས་རང་གསལ་ལོ།། དེ་ལས་འཁོར་ཐམས་ཅད་ཡེ་ཤེས་སྐྱེས་ཏེ་རང་རང་གི་སྲོག་གི་སྙིང་པོ་ཐམས་ཅད་མདོངས་གསོལ་དུ་ཕུལ་ལོ། ། དེ་ལ་ཐུགས་ཀྱི་སྤྲུལ་པ་ཚེ་བདག་ནག་པོ་མགོ་དགུ་པ་ཡིས། ཀ་ཞེས་ཞེས་རྔམ་པར་བསྒྲགས་པས་ཕྲིན་ལས་ཐམས་ཅད་ལྷུན་གྱིས་གྲུབ་ཅིང་ཡོངས་སུ་རྫོགས་པར་གྱུར་ཏོ། དེ་ནས་ཡུམ་གསོད་བྱེད་ཀྱི་རྒྱལ་མོས་མྱགས་ཤེས་ཕུལ་བས། ལོག་པའི་སྲོག་དབང་དུ་འདུས་ནས་ཡེ་ཤེས་ཀྱི་ཐིག་ལེར་གསལ་བའོ།། ཕྱག་ན་རྡོ་རྗེས་རྔུབས་ཤེས་ཕུལ་བས་ཡེ་ཤེས་ཆེན་པོའི་མེས་ཁྲག་དང་བག་ཆགས་བསྐམས་ནས་ཕྱག་རྒྱ་བརྟན་པར་རང་གསལ་བའོ། ། རུས་སྦལ་གྱི་རྒྱལ་པོས་མུགས་ཤེས་བསྒྲགས་པས། འགྲོ་བ་རྨོངས་པའི་སྲོག་བསྡུས་ཏེ། བླ་དང་ཚེ་སྲོག་བཅངས་ཏེ་ཆོས་ཉིད་དུ་རང་གྲོལ་བའོ།། ཡ་མ་རཱ་ཙ་ས་ཡ་ཞེས་པས། རང་གི་ལས་ཀྱི་རླུང་གིས་ལྷ་དང་ལུས་སྲོག་ཕྲོགས་ནས། ཡེ་ཤེས་བླ་མའི་སར་བགྲོད་པའོ།། བྱ་ཁྱུང་གི་རྒྱལ་པོས་ཤག་ཅེས་པས། གདུག་པའི་དུག་རླངས་ཐམས་ཅད་བཅོམ་ནས། ཉེ་བར་བགྲོད་པ་ཐོབ་པའོ།། ལས་ཀྱི་ཚེ་བདག་ནག་པོས་དུན་ཞེས་ཕུལ་བས། སྲིད་པའི་སྲོག་རྟེན་ཞི་ནས་འོད་དམར་ནག་འཐིབས་པ་ཕྲོགས་ནས། ཀུན་ཏུ་བཟང་པོ་བདེ་བ་ཆེན་པོར་རང་གྲོལ་བའོ། ། དེ་ནས་མོན་པ་སེང་གེའི་མགོ་ཅན་གྱིས། སྲོག་ལ་བཾ་རཾ་ཁ་ཐུམ་ཡཾ་ཡཾ་རྦད། ཅེས་ཕུལ་བས། སྲོག་གི་རྟེན་གཞི་གཅོད་པར་འགྱུར་རོ།། དེ་ནས་མོན་པ་སྟག་གི་མགོ་ཅན་གྱིས། སྲོག་ལ་ཧྲིལ་མྱགས་ཐུམ་ཤག་རྦད། ཅེས་ཕུལ་བས། དྭངས་མ་བཞི་ཡིས་རང་རང་གཅོད་པར་གྱུར་ཏོ།། མོན་པ་དྲེད་ཀྱི་མགོ་ཅན་གྱིས། སྲོག་ལ་གཟིར་ཐུམས་རཾ་ཐུན་རྦད། ཅེས་ཕུལ་བས། སྲོག་གི་དྭངས་སྙིགས་ཕྱེད་པ་གྱུར་ཏོ། མོན་པ་ཁྱུང་གི་མགོ་ཅན་གྱིས། སྲོག་ལ་མཱ་ར་ཡ་ཐུན་རྦད། ཅེས་ཕུལ་བས། སྲོག་གི་བླ་མཚོ་བསྐམས་པར་གྱུར་ཏོ།། བདུད་ཀྱི་སྲོག་གཤེད་ཆེན་པོ་བཞིས། སྲོག་ལ་ཧྲི་ཤག་རྦད། ཙིཏྟ་བྲེང་ཤག་ཛ། སྲོག་ལ་ཐུན་རྨུགས་ཙིཏྟ་བྲེང་ཤག་ཛ། བྱེར་ཧུར་ཐུམས་ཛ། སྲོག་ལ་ཐུན་གཟེར་ཤག་རྦད། ཙིཏྟ་བྲེང་ཤག་ཛ། ཞེས་ཕུལ་བས། ཚོགས་དྲུག་རྟེན་ལས་འཕོས་པར་གྱུར་ཏོ།། དེ་ནས་སྲིད་པའི་ལྷ་གདོན་དྲག་པོ་རྣམས་ཀྱིས། སྲོག་ལ་མཱ་ར་ཡ་རྦད། ཙིཏྟ་བྲེང་ཤག་ཐུམས་ཛ། ཞེས་ཕུལ་བས། ཚོགས་བརྒྱད་སྒོ་འགགས་པར་འགྱུར་རོ། དེ་ནས་རྨུའི་རྒྱལ་པོས། སྲོག་ལ་ཧུར་ཐུམ་རྦད། ཙིཏྟ་བྲེང་ཤག་ཛ། ཞེས་ཕུལ་བས། བསོད་ནམས་ཆེ་བའི་ལུས་སྲོག་དང་བྲལ་བར་གྱུར་ཏོ།། དེ་ནས་བཙན་གྱི་རྒྱལ་པོ་རྣམས་ཀྱིས། སྲོག་ལ་ཐུམས་ཤག་རྦད། ཙིཏྟ་ཧུར་བྲེང་ཛ། ཞེས་ཕུལ་བས། ལུས་ཀྱི་འབྱུང་བ་དཀྲུགས་ཏེ་འཕོ་བར་གྱུར་ཏོ།། དེ་ནས་རྒྱལ་པོ་སྡེ་བཞིས་སྲོག་ལ་བྲེང་བྲེང་རྦད། ནི་སྲོག་ཏུམ་ཏུམ་རྦད། ཁཾ་ཤག་རྩ་ལ་རྦད། སྲོག་ལ་མྱོགས་རྦད། ཁྱེར་བྱུང་མུགས། ཏི་ལིང་ཤག་ལིང་ཛ། ཞེས་ཕུལ་བས། རྒྱུ་བདུན་གེགས་སུ་སྐྱེས་པར་གྱུར་ཏོ།། དེ་ནས་བདུད་ཀྱི་རྐྱ་དམག་འབུམ་སྡེས། སྲོག་རྩ་ཁྲག་ཏིང་སྙིང་ཕྱུང་ཐུམས་རིལ་རཾ་ཤག་རྦད། ནི་སྲོག་ཧུར་ཐུམས་ཛ། ཞེས་ཕུལ་བས་ནང་ཁྲོལ་སྨད་ལྔ་གཏུབས་པར་གྱུར་ཏོ།། དེ་ནས་སྲིན་པོ་ཕོ་མོས། ཨེ་བཾ་རཾ་ཁྲཾ་ཤིག་ཙིཏྟ་རྔུབས། དགྲ་བོའི་སྲོག་ལ་ཐུན་རྨུགས་ལིང་ཤག་རྦད། ཅེས་ཕུལ་བས། བླ་དང་རྣམ་ཤེས་གགས་[[]འགག་[]]པས་འཕོའོ།། དེ་ནས་མ་མོའི་ཚོགས་འབུམ་སྡེས། སྲོག་ལ་ཧུར་ལོང་རྦད། ཙིཏྟ་ཁྲག་ཐིབས། ཧུར་ཐུམས་ཛ། ཞེས་ཕུལ་བས། རྣམ་ཤེས་རྟེན་ལས་འཕོ་བར་གྱུར་ཏོ།། ཡང་མ་མོ་རྣམས་ཀྱིས། སྲོག་ལ་བཾ་རིལ་རཾ་ཤག་རྦད། ཙིཏྟ་བྱེར་ཐུམ་ཧུར་ཐུམས་ཛ། ཞེས་ཕུལ་བས་རིམས་དལ་ཡམས་ཀྱི་ནད་འབེབས་པར་གྱུར་ཏོ།། དེ་ནས་གདུག་པ་གསུམ་གྱི་ཚོགས་ཀྱིས། སྲོག་ལ་བཾ་རིལ་རཾ་ཤག་རྦད། ཙིཏྟ་བྲེང་ཧུར་ཐུམས་ཛ། ཞེས་ཕུལ་བས། གདུག་པའི་སྤུ་གྲིས་ལུས་སྲོག་གཅོད་པར་གྱུར་ཏོ།། དེ་ནས་སྡེ་བརྒྱད་གཟའ་དང་ལྷ་སྲིན་གྱིས། ཕྲོཾ་ཕྲོཾ། ཤར་ཤར། ཧྲིལ་ནཱ་ག་སྙིང་གཟེར། རྦུད་ཡཾ་ཐུན་ཡཾ་ཧྲིལ་ཤག་བྷྱོ།། ཞེས་ཕུལ་བས་སྲོག་དབུགས་དང་ལོ་ཏོག་རྩི་བཅུད་ཐམས་ཅད་བཅད་དེ་འཕོ་བའོ།། དེ་ནས་སྟོབས་ཅན་རྣམས་ཀྱི་མཐུ་དྲིལ་ཏེ། སྲོག་ལ་རྦད་ཐུམ་རིལ་རྦད། རྩ་ཁྲག་ཙིཏྟ་ཕྱུང། ནརྀ་སྲོག་ཧུར་ཐུམས་ཛ། ཞེས་ཕུལ་བས། རྩ་དང་སྲོག་ཟུངས་བཅད་དེ་འཕོ་བའོ།། དྲེགས་པ་ཅན་ཐམས་ཅད་ཀྱི་མཐུ་སྟོབས་དྲིལ་ཏེ། སྙིང་གཟེར་སྦུར་ནན་ཧ་ལ་ཧ་ལ་ཙ་མ་རི་ཕྱུང། ཨེ་ཧུར་ཐུམས་ཛ། ཁམས་ཤག་རྦད། ཅེས་ཕུལ་བས། རང་གི་མཐུས་གཟིར་བ་དང། དུག་དབྱུང་བ་དང། སྲོག་དབྲོག་པ་དང། སྦྱོར་བ་བཅད་པའོ།། དེ་ནས་འཁོར་དེ་དག་རབ་ཏུ་འདུས་ནས། དགྱེས་པའི་མདངས་རྙེད་པར་འགྱུར་རོ། ། དེ་ནས་བཅོམ་ལྡན་འདས་ཁྲག་འཐུང་གི་རྒྱལ་པོ་དེས། ཨེ་ཧེ་ཧེ་ཧེ་ཨེ་ཧུར་ཐུམས་ཛ། ཞེས་སྒྲ་བསྒྲགས་པས། ཉེ་བར་ལས་ལ་བརྩོན་པའི་ཚུལ་གྱིས་རང་རང་གི་ཤེས་པའི་རྒྱུད་ལ་འདུས་ཏེ་ཐིམ་པས། བདུད་དང་གཤེད་རང་གི་རྒྱུད་ལས་ལྡང་ཞིང། རང་གཅོད་ཀྱི་མཚོན་ཆ་བསྐུལ་བས། རྩ་དང་སྲོག་ཟུངས་རང་གཤེད་གཅོད་ཅིང། ཁྲག་དང་བག་ཆགས་རང་སྐྱེས་ཏེ། ཐོད་པར་སྙིང་པོ་དང་སྲོག་སྡུད་པའོ། ། དཔལ་ཚེ་བདག་ནག་པོ་སྲོག་དམར་ལེན་གྱི་རྒྱུད་ལས། གླེང་གཞི་རྩ་བའི་ལེའུ་སྟེ་དང་པོའོ།།།། དེ་ནས་འཁོར་རྡོ་རྗེ་སྙིང་པོས་བཅོམ་ལྡན་འདས་ལ་གསོལ་པ། རྒྱལ་བ་ཀུན་གྱི་རང་བཞིན་དངོས། ། གསང་སྔགས་ངོ་བོ་དེ་ཉིད་ལགས།། འཇིག་རྟེན་འདས་དང་འཇིག་རྟེན་པའི།། དྲེགས་པའི་མཐུ་རྩལ་ལྡན་པ་ཀུན།། སྲོག་སྙིང་དབུལ་ཞིང་ལས་ལ་གཉེར།། བཀའ་བཞིན་ཉེ་བ་ཇི་ལྟ་བུ།། ལྷུན་གྲུབ་ཟིལ་གནོན་ཕྱག་རྒྱ་བསྟན། ། གཉེན་པོ་གང་ཕྱིར་བརྗིད་པའི་སྐུ།། དྲག་པོས་གདུལ་བྱ་གང་ལགས་པ།། འཁོར་ལ་རྒྱས་པར་བཤད་དུ་གསོལ།། ཞེས་གསོལ་པས། བཅོམ་ལྡན་འདས་ཀྱིས་དྲི་བ་གསུམ་གྱི་དོན་རྒྱས་པར་བཤད་དོ། ། བསྐལ་པ་རྫོགས་ལྡན་བྱ་བ་ལ།། རིགས་ལས་གོལ་བའི་ཁྲོ་བོ་ལ།། ནག་པོ་འཐོམ་བྱེད་བདུད་ཀྱི་གཙོ།། སྲིད་པའི་མངའ་བདག་ཁྲག་སྐྱུགས་གཅོད།། རྩུབ་ཁྲོ་སྲོག་གཅོད་གིང་གི་གཙོ།། ཞེ་སྡང་གདུག་པ་གདུག་ཁྲོའི་གཙོ། ། ཕུང་བྱེད་ནག་པོ་ཚེ་ཡི་བདག། འབྱུང་བ་བཞི་ཡི་རྔམ་འོག་ན།། བརྒྱད་གཉིས་དྲུག་གཉིས་བཞི་དབུས་ན།། ལུས་ཆེན་ཡན་ལག་རགས་ལ་རྔམ།། སྐྲ་དང་ཁ་སྤུ་ཨག་ཚོམ་རྩུབ།། སྟོད་སྨད་སྲིན་པའི་རློན་གྱི་ཤུན། ། མགོ་དང་སྙིང་གི་ཕྲེང་བས་བརྒྱན།། མཚོན་ཆ་མེ་རླུང་དུག་གི་མཚོན།། ཐོགས་ནས་རྣམ་བཞིའི་འཁོར་ལ་འཚེ། མྱུར་དུ་གསོད་ཅིང་ཤ་རློན་ཟ།། མངལ་དུ་འཚུབ་ཅིང་རཀྟ་འཛག། ཐོད་རུས་འབྲུ་མར་དཀྲུགས་ཤིང་འཐུངས། དེད་དཔོན་བཞི་ཡི་འཁོར་ལ་རྦོད།། ཆགས་པའི་རྒྱ་མཚོ་མྱོས་པར་བྱེད།། གདུག་པའི་མེ་ཡིས་རང་རྒྱུད་བསྲེག། དེ་ལྟ་བུ་ཡི་སྡེ་བཞིའི་གཙོ།། རཱུ་ཏྲ་ནག་པོ་ཚེ་ཡི་བདག། དེ་ཡི་བསྟན་པ་གཏིང་ནས་དཀྲུགས། ། རྣམ་བཞིའི་འཁོར་ལ་འཚེ་བར་བྱེད།། འགྲོ་བ་མ་ལུས་བསྡུས་ཤིང་གསོད།། དེ་ཡང་ཇི་ལྟ་བུ་ཞེ་ན།། བདེ་བའི་དབང་ཕྱུག་དེད་དཔོན་ཞེས།། རིགས་ཀྱི་བདག་པོར་གྲགས་པ་ཅིག། གསང་སྔགས་དེ་ཉིད་རིས་སུ་ཕྱེ། ། བརྡའ་དོན་མ་གྲོལ་ལྷུག་པར་སྤྱད།། བགྲོད་པ་མ་ཐོབ་དཔེ་ལས་མཚོན།། རང་ཉམས་མ་རྙེད་བརྐམ་ཆགས་སྤྱད།། རིགས་ངན་མོ་ལ་གྲོགས་སུ་སྤྱོད།། ཤ་ཆེན་ཀེང་རུས་རྒྱན་ལ་རོལ།། གསང་སྔགས་བཀའ་བསྒོ་ལོག་པ་ཡིས། ། དུས་མ་ཡིན་པར་ཚེ་འཕོས་ནས།། ན་རག་རྡོ་རྗེ་དམྱལ་བར་ལྟུང།། བཞི་བརྒྱ་མཐའ་རུ་སྡུག་བསྔལ་མྱོང།། ཆད་ལས་རྒལ་ཏེ་བདེ་བས་བྲེལ།། བསྐལ་པ་བཞི་ནས་བརྒྱད་གཉིས་འཁོར། ། ཚ་གྲང་གནས་ནས་བསྐལ་པ་བཞིར།། འཁོར་ཞིང་སྡུག་བསྔལ་ཟད་མཐའ་རུ།། ཉི་ཚེ་ཉེ་འཁོར་ཁ་འཁོར་ནས།། བསྐལ་པ་གཉིས་སུ་སྡུག་ཅིང་འཁྱམས།། དེ་མཐར་ཕྱི་ནང་སྒྲིབ་པའི་གནས།། གཟུགས་ཆེ་སྐེ་དང་ཡན་ལག་ཕྲ། ། རྣག་ཁྲག་ངན་སྐྱུགས་ལྕགས་ཐུམ་མིད།། བསྐལ་པ་གཅིག་ཏུ་སྡུག་ཅིང་འཁྱམས།། དེ་མཐར་རྫུ་འཕྲུལ་དྲག་པོའི་གནས།། ལྕགས་མཁར་བཅུ་གཉིས་བརྒྱད་གཉིས་འོབས།། ཐོད་མཁར་བཞི་དབུས་ཤ་ཁྲག་ཟ། ། རྔམ་པའི་ང་རོས་འཁོར་རྣམས་མངགས།། དེ་ལྟར་རྣམ་སྨིན་མང་བསགས་པས།། གནས་སུ་རཱུ་ཏྲ་ནག་པོར་སྨིན།། དེ་ཡིས་འཇིག་རྟེན་ཕུང་བྱེད་ན།། རྒྱལ་བ་ཀུན་གྱི་ཐུགས་རྒྱུད་ནས། ། བྱིན་རླབས་མཐུ་རྩལ་སྟོབས་འགྲན་ཏེ།། ནག་པོ་དེ་ཉིད་འདུལ་བའི་ཕྱིར།། སངས་རྒྱས་ཆོ་འཕྲུལ་སྣ་ཚོགས་མཛད།། སྟོང་པའི་རང་བཞིན་དེ་སྟོང་ཀྱང།། སྟོང་པས་ནག་པོ་སྡེ་མ་སྟོངས།། སངས་རྒྱས་རྡུལ་སྙེད་ཞིང་ཁམས་འདོད། ། ནག་པོའི་ཤ་ཁྲག་རྔམ་ཞིང་རོལ།། དེས་མ་བསྐྱོད་ཕྱིར་སྟོབས་ཆེན་གསུམ།། ཡ་མ་བཛྲ་ཧ་ལའི་སྐུ།། རང་རང་ལག་ཆ་ཆ་བྱད་འཁོར།། སྔགས་ཚིག་དྲག་པོ་རྔམ་བཟླས་ནས།། ནག་པོ་ཚེ་ཡི་བདག་པོ་ལ། ། ལུས་ངག་སྐོང་ཕྱིར་མེ་རླུང་སྦྲུལ།། ནད་དང་མཚོན་ཆའི་ཆར་ཕབ་ནས།། ནག་པོ་འཁོར་བཅས་དགའ་མགུ་ནས།། ཤ་ཁྲག་རོ་དང་བདུད་རྩིར་འགྱུར།། མངའ་བརྙེས་སྡེ་ལས་རྒྱལ་ལ་ཁད།། དེས་མ་ཐུལ་ནས་ཁྲོ་བོར་བྱ། ཁྲོ་བོ་སྨེ་བ་བརྩེགས་པ་ཡིས།། རྡོ་རྗེ་སྲིན་པོ་འཁོར་དང་བཅས།། ནག་པོ་བསྒྲལ་ལ་བཟའ་བར་རྔམས།། གསང་སྔགས་གདུག་པའི་ང་རོར་བཏོན།། ཡེ་ཤེས་མེ་ཡིས་སྲས་མཆོག་སྤྲུལ།། ཚེ་བདག་དྲག་པོ་གཤིན་རྗེ་ཡིས། ། ཀཱི་ལ་ཙིཏྟའི་དཀྱིལ་དུ་བཟའ།། བཏབ་པས་སྨེ་བརྩེགས་དེ་ཉིད་རྒྱལ།། རྡོ་རྗེ་སྲིན་པོའི་འཁོར་བརླགས་ནས།། ནག་པོ་དྲེགས་པའི་ཚེ་བཀྲག་ཕྲོགས།། སངས་རྒྱས་རྫུ་འཕྲུལ་ཞི་བར་བྱས། ། དེས་མ་ཐུལ་ཏེ་དགོངས་པ་བསྡུས།། གསང་སྔགས་ངོ་བོ་དེ་ཁོ་ན།། དྭངས་མ་ཆེན་པོ་ལྔ་ཡི་དངོས།། ཡེ་ཤེས་ལྔ་ཉིད་དེ་རྟོགས་པའི།། རིགས་ལྔའི་གཙོ་བོ་སྤྱི་ཡི་གཟུགས།། ཀ་ལ་མཐིང་ནག་བརྗིད་པའི་སྐུ། ། ཟིལ་གནོན་ཕྱག་རྒྱ་ཆེན་པོ་ཉིད།། སྟོང་ཉིད་མ་སྐྱེས་འགག་མེད་པའི།། ལྷུན་གྲུབ་ཡེ་ཤེས་ཐམས་ཅད་མཁྱེན།། ལྷུན་པོ་རི་རབ་བརྟན་ལྟར་བརྗིད།། རྣམ་པར་དབུ་གསུམ་སྐུ་གསུང་ཐུགས།། རྒྱུད་དྲུག་འཁོར་བ་བསྒྲལ་བའི་རྟགས། ། ཕ་རོལ་ཕྱིན་ཕྱག་ཡེ་ཤེས་དྲུག། སྐྱེ་བ་རྣམ་བཞི་དག་པའི་རྟགས།། ཚད་མེད་ཞབས་བཞི་རྫུ་འཕྲུལ་རྐང།། སྲ་བྱེད་བརྟན་པས་ཐམས་ཅད་གནོན།། མཉེན་བྱེད་བསྐྱིལ་ཞིང་སྡུད་པའི་དབང། ། གསལ་བྱེད་ཁྲག་ཆུ་བག་ཆགས་བསྲེགས།། གཡེང་བྱེད་རྐྱེན་མེད་རང་ཤུགས་ལྡན།། སྣང་བྱེད་གོ་འབྱེད་ཁེབས་འོག་ཆུད།། རྒྱུ་རྐྱེན་ཐབས་ལ་རག་མ་ལུས།། བདེ་བ་ཆོས་སྐུ་སྟོང་བདག་མེད།། སྟོང་ལས་ཀུན་སྐྱེས་བསམ་དཔག་དཀའ། ། ནག་པོ་འདུལ་ཕྱིར་སྣ་ཚོགས་སྤྲུལ།། ཡ་མ་བཛྲ་ཁྱམས་ཁང་ཁྱུང།། དེ་བཞིན་གཉིས་ལྡན་སེང་གེ་སྟག། གདུག་པའི་ཡེ་ཤེས་ཁྲོ་ཆུང་འབར།། ཚུལ་དགུ་ཆས་དགུ་རྒྱན་དགུ་དང། ། གར་དགུ་སྟབས་དགུ་རྔམ་སྒྲ་དགུ།། ཐོད་སྦྲུལ་རིན་པོ་ཆེ་ལ་སོགས།། གསོད་བྱེད་ཁྲག་སྐྱུག་ཚོགས་ཀུན་གནོན།། འཁོར་ལོ་རལ་གྲི་རྡོ་རྗེ་འཕེན།། བེ་ཅོན་གཏུན་ཤིང་སྡིགས་འཛུབ་བརྡེག། ནག་པོ་གེལ་པ་བསྒྱེལ་ཏེ་མནན།། ཕྱི་ནང་གཤེད་འཁོར་འཆི་བདག་ཚོགས།། ཡང་སྤྲུལ་དྲུག་ཁྲི་དྲུག་སྟོང་བཅས།། རྔམ་ཞིང་དྲེགས་པའི་འགྱིང་སྟབས་ཀྱིས།། ནག་པོ་འཁོར་བཅས་གདན་དུ་བཏིང།། ནག་པོ་བརྒྱལ་སངས་འདར་ཞིང་སླེབ། ། ཟིལ་གནོན་ཕྱག་རྒྱའི་གདན་དུ་གསོལ།། འཁོར་རྣམས་དབང་བསྡུས་མདངས་དང་ཕྲལ།། འཁོར་དུ་ལས་ཀྱི་སྒྲིབ་པ་སྦྱངས།། སྣམ་ནས་སླར་བཏོན་བྲན་ཁོལ་བསྐོས།། སྲོག་གི་སྙིང་པོ་རང་དབང་བསྡུས། ། ནག་པོས་རྔམ་པའི་སྨེ་ཇགས་བཏོན།། བདག་ཅག་རྒྱལ་བའི་འཁོར་ལགས་ཀྱིས།། འཁོར་ལ་ཐུགས་རྗེ་མ་ཆུང་མཛོད།། བཀའ་ལ་ཐོགས་ཤིག་བཀའ་བཞིན་འགྱིད།། ཅི་བཅོལ་ལས་རྣམས་བཀའ་བཞིན་ཉན། ། ཞེས་གསོལ་ཏོ།། དེ་ཕྱིར་རྒྱུད་འདི་དྲག་ཇགས་བཤད།། ཅེས་འཁོར་ལ་རྒྱས་པར་གསུངས་སོ།། དྲགས་སྔགས་ཀྱི་དེ་ཁོ་ན་ཉིད་སྲོག་དམར་ལེན་སྤུ་གྲི་ལས་དྲེགས་པ་ཅན་བཏུལ་བའི་ལེའུ་སྟེ་གཉིས་པའོ། །། དེ་ནས་འཁོར་གྱི་ནང་ནས་རྡོ་རྗེ་འཛིན་པ་སྟན་ལས་ལངས་ནས། བཅོམ་ལྡན་འདས་ལ་གསོལ་པ། ཀྱེ་ཧོ་བཅོམ་ལྡན་ཁྲག་འཐུང་དཔལ།། ལས་རྣམས་ཀུན་གྱི་རྩ་བ་རུ།། བརྣག་པའི་རྒྱལ་པོ་དམར་ལེན་ལ། ། རྩ་བ་དག་དང་མན་ངག་གི། ལས་ཀྱི་རྣམ་གྲངས་བཤད་དུ་གསོལ།། ཞེས་གསོལ་པས།། བཅོམ་ལྡན་འདས་ཀྱིས་སྙིང་པོ་དོན་གྱི་མན་ངག་རྒྱས་པ་བཤད་དོ།། དམར་ལེན་དོན་གྱི་མན་ངག་ལས། ། རྩ་བ་རྣམ་པ་གཉིས་སུ་བཤད།། ཐུན་མོང་དང་ནི་ཁྱད་པར་རོ།། ཐུན་མོང་སྦྱོར་བ་རྣམ་པ་ལྔ།། འབྲུ་བཞིའི་སྦྱོར་བ་དྲུག་གཉིས་བཞི།། ཀུན་འབྱུང་རྩ་བ་བརྒྱད་གཉིས་གཅིག། གབ་པའི་སྦྱོར་བ་བཞི་གཉིས་ལྡན། ། གསད་གཟིར་གནན་གཟིར་བསྲུང་དང་དབབ།། བསྲེག་དང་སྲོག་དབྲོག་དབྲལ་བར་ཤིས།། ཡན་ལག་སྡིག་པའི་ཕག་མོ་གཉིས།། སྐྱེ་བ་རླུང་བཤིག་རང་བདུད་འཕེལ།། རྣལ་མར་སྤོག་དང་ཚེར་སྤོགས་དཀྲུག། འཕོ་ཚུལ་གཉིས་ལྡན་བདེ་བ་གཅིག། ཡེ་ཤེས་རིག་པ་རང་རྩལ་བགྲོད།། ཀུན་གྱི་མཐའ་རུ་འབྱུང་བ་དཀྲུག། ཐུན་མོང་ཕུང་བྱེད་སྡིག་པ་འཇོམས།། འབྱུང་བ་གནམ་བསྟན་གཉིས་ལྡན་པ།། མ་སྦྱངས་དག་པའི་ཚུལ་དུ་བགྲོད། ཁྱད་པར་ལས་རིམ་གསུམ་གཉིས་གཅིག། ཕྱེ་བའི་རིམ་པ་བདེ་དང་ལྡན། ཁྱབ་གསལ་སྤོགས་མེད་བདེ་དང་ལྡན།། སྙིང་པོ་མཆོག་གི་རྩ་བར་གསུངས།། གཉེན་པོས་འཕེན་ཅིང་གཅོད་པར་བསྐུལ། ། སྤུ་གྲིའི་ལས་སུ་གཅོད་ཅིང་སྡུད།། རང་གྲུབ་བདུད་གཤེད་འཆི་བདག་ལྡང།། རང་གསལ་བསྐུལ་བས་ཡ་ཡིས་བསྐྱོད།། ཐུགས་རྗེ་ཤུགས་སྒྲོལ་ཐར་པའི་ལམ།། བདེ་བའི་ཡེ་ཤེས་རང་ཉིད་ལྡན། ། ཕྱག་རྒྱ་རང་གསལ་བགྲོད་ཐོབ་མེད།། འགག་མེད་སྙིང་པོ་མཆོག་ཉིད་གསལ།། བདེན་པ་གཉིས་མེད་ཆོས་སྐུར་གཅིག། ཐམས་ཅད་འཇོམས་སྒྲོལ་བདེ་ཆེན་ཉིད།། ཉིད་ལས་གཞན་དུ་བཙལ་ཡང་མེད། ། གསེར་བུག་སྙིང་པོ་རང་བསྟན་ཡིན།། ཀུན་ཐུབ་སྙིང་པོ་ལས་དབང་འཇོམས།། སྲོག་ཅེས་བྱ་བ་འཕོ་བར་བྱེད།། གཉིས་མེད་རིག་པ་ལྷ་རུ་གསལ།། སྲིན་མོ་ལས་ཀྱི་མཐའ་རུ་འཕོ།། སྦྱོར་བ་ལྷན་ཅིག་ལྔའམ་གསུམ། ། རྒྱལ་བའི་བཀའ་ཐུབ་རྒྱལ་མཐེབ་མངག། རང་ཉིད་ཆེ་བའི་གནས་ལ་གནས།། ལོ་ཐོག་གཞོམ་པའི་ལས་གསུམ་གྱིས།། འབྲས་བུ་མེད་པར་འཆང་སྒྲོལ་བགྲོད།། བསྲུང་བའི་རྒྱལ་པོ་གཅིག་ཏུ་དྲིལ། ། ཉེ་བའི་དབང་པོ་རང་གནས་གཟིར།། དུག་དང་སྦྱོར་བ་བྱད་གཞུག་འབྱིན།། ལས་དང་སྦྱོར་བ་གཤོག་ཅིང་གཅོད།། ཙིཏྟའི་དཀྱིལ་ནས་རྣམ་ཤེས་འཕྲོག། ལུས་མེད་དབང་པོ་ཡིད་ཀྱིས་འཇོམས།། དེ་མེད་སྦྱོར་བ་ཡུག་པ་བརྐྱང། ། རང་གཤེད་རང་བདུད་རང་ལ་ལྡང།། རང་རྒྱུད་རང་གནས་གསུམ་གཉིས་གཅིག། གནས་དང་སློང་དང་རྐྱེན་དང་གཅོད།། འཕོ་དང་བགྲོད་དང་སྲོག་སྡུད་བཅས།། ལས་དེ་ཆོས་ཉིད་རང་གྲོལ་ཡིན། ། མཐའ་རུ་ལྷུན་གྲུབ་བསྲེག་དང་སྦྱར།། ནམ་མཁའ་བར་སྣང་ས་གཞི་ལ།། བསྲེག་མནན་གཅོད་པའི་འཁོར་ལོ་བཅའ།། མངག་དང་གཟིར་དང་བསྟབ་དང་དབུལ།། ལས་གཉེར་གཏད་མཐར་ཟོར་དང་མནན། ། རང་གི་ཡེ་ཤེས་གསལ་ཞིང་འབར།། མེ་དང་ཚ་བ་བསྲེག་ཅིང་བདོ།། སྦྱོར་བ་མངོན་དུ་གསད་དང་འཕོ།། དཀར་ནག་ལས་དེ་གབ་སྦས་གསང།། ལས་ཚོགས་རྒྱས་པ་ལྷུན་གྱིས་གྲུབ།། རྒྱུད་ཀྱི་རང་བཞིན་བདུན་ནམ་གཅིག། སྐུ་དང་གསུང་དང་ཐུགས་ཀྱི་རྒྱུད།། བལྟ་སྤྱོད་འཁོར་ལོ་དམ་ཚིག་དབང།། ལས་རིམ་སྦྱོར་བ་འབྲེལ་བཅས་ཡིན།། གཞི་ལམ་འབྲས་བུ་ལྷུན་གྲུབ་གཅིག། ཕྱི་ནང་གསང་བ་བཤད་པའི་མཐའ། ། ཀུན་འདུས་རིག་པའི་མཚོན་ཆར་བཤད།། སྲོག་དམར་ལེན་སྤུ་གྲིའི་རྒྱུད་ལས། དངོས་གཞི་བསྟན་པའི་ལེའུ་སྟེ་གསུམ་པའོ།།།། དེ་ནས་བཅོམ་ལྡན་འདས་ཁྲག་འཐུང་གི་རྒྱལ་པོ་དེས་རྒྱུད་ཀྱི་དོན་འདི་རྒྱས་པར་བཤད་དོ། ། མ་བྱུང་མ་སྐྱེས་ཡེ་ཤེས་སྐུ།། འགག་མེད་བདེ་ཆེན་ཁྱབ་གསལ་སྐུ།། ལྷུན་གྲུབ་སྤྲོས་བྲལ་ཕྱག་རྒྱའི་སྐུ། ཁྱབ་གདལ་ཐིག་ལེ་ཉག་གཅིག་སྐུ།། མ་འགགས་ཀུན་གསལ་སྤང་བླང་མེད། ། སྣ་ཚོགས་རོལ་པ་བྱ་བཙལ་བྲལ།། ནམ་མཁའ་ཡོངས་ལ་མདུང་བསྐོར་བ།། སངས་རྒྱས་མཛད་པ་ཁོ་ཐག་ཆད།། གནས་པ་རང་རྒྱུད་དྲུག་དང་ལྡན།། སུམ་ཅུ་གཉིས་རྩིབས་བདེ་ཆེན་གནས།། འབྲུ་བཞི་ཡན་ལག་འཕོ་དང་བཅས། ། འབྲུ་དྲུག་ལོངས་སྤྱོད་གསལ་དག་འབར།། བརྒྱད་དབུས་བཞི་ལྡན་ཆོས་འཁོར་ལོ།། ལམ་ཉིད་དོན་ལྡན་འབྲས་བུར་སྨིན།། བཅུ་དྲུག་བཞི་ལྡན་སྤྲུལ་པའི་གནས།། བཞི་རྩིབས་གསལ་བ་རྫོང་ལ་གནས། ། དྲུག་རྩིབས་འཁོར་ལོ་མདོ་གསུམ་འཛིན།། རང་བདུད་རང་གཤེད་མཉམ་པའི་དོན།། བདེ་བའི་རྒྱལ་པོ་རང་གསལ་ཡིན།། སྤྱོད་པ་ལས་ཀྱི་འཁོར་ལོ་མཚོན།། ལྔ་བརྒྱད་ཕྲལ་ནས་སུམ་ཅུ་གཉིས། ། དེ་དག་རང་རྒྱུད་གནས་པ་ཡིན།། གནས་པའི་འཁོར་ལོ་ཐོད་པར་བཅའ།། ཐོད་པར་སྙིང་པོ་བཅུད་སྡུད་བྱེད།། ལས་དང་སྲོག་དང་བླ་སྡུད་ལ། ཁྱམས་ཁང་གཤེད་ཀྱི་གསང་མཛོད་ཡིན།། རིག་པ་སྲོག་ཏུ་བགྲོད་བྱས་ལ། ། དཔའ་བོ་གྲི་མོ་ལང་ཚོ་ལ།། སྦྱངས་པ་གསུམ་དང་ལྷ་བགོད་ལ།། སྔགས་ཀྱི་དྲོད་ལྡན་བརྟུལ་ཞུགས་བླང།། དེ་བཞིན་རྒྱལ་རིགས་ཉིད་ལ་བསྔགས།། བཅུ་གཉིས་བཅུ་དྲུག་བར་ལ་བརྟག། གོང་བཞིན་བརྟགས་ལ་བརྟུལ་ཞུགས་བླང། ། རྐྱེན་གསུམ་རང་རྒྱུད་དྲུག་བཀོད་ལ།། སྦྱང་བསྲེགས་དབབ་བསྐྱིལ་ཐིག་ལེར་གསལ།། སྨེ་བ་དོན་དང་མཉམ་སྦྱར་ལ།། བརྟུལ་ཞུགས་རྣམ་གསུམ་ལོངས་སྤྱོད་ལྡན།། སྐྱེ་བ་མེད་པའི་དབྱིངས་སུ་སྒྲོལ། ། སྤྱི་དང་ཁྱད་པར་ཡན་ལག་གསུམ།། བསྲུང་དང་མ་བསྲུངས་བདེ་དང་སྡུག། བདེ་ཆེན་ན་རག་དོང་སྤྲུག་གི། ལས་ཀྱི་རིམ་པ་འདི་ལྟ་སྟེ།། རྩ་བ་ཀུན་འབྱུང་འཁོར་ལོ་ནི།། གསང་ཆེན་མཆོག་ཏུ་དྲིལ་བའོ། ། ཡང་གསང་སྦྱོར་བ་དྲུག་གཉིས་ལྔ། གོལ་དང་སྨིན་པའི་ལས་ཀྱང།། བརྡ་དོན་དྲིལ་བ་མ་ཡིན་པས།། ཧ་ལ་ནག་པོ་སྦྲུལ་འཛིན་ལྟར།། སྦྱོར་བ་བཅུ་བདུན་དག་དང་ལྡན།། དོན་གཉིས་མངོན་དུ་སྤྱོད་པ་ཡིས། ། བླ་ཆེན་སྤྲུལ་པ་ཡང་སྤྲུལ་ཆགས།། རྟགས་མེད་ཀུན་འབྱུང་དྲུག་དང་ལྡན།། འབྲས་བུ་འཇོམས་པའི་ལས་བཞི་ཡིན།། ཆུ་དྲིལ་ཟོར་འཕང་དུ་བས་གཟིར།། ཆུ་རྒོད་གནམ་ཐོག་རི་ལྟར་འབེབས།། དམར་ལེན་སྔགས་ཀྱི་མཐུ་བསྡུས་ནས། ། ལས་ཀྱི་འཁྲུལ་འཁོར་མཚོན་ཆར་འབེབས།། སྙིང་པོ་ཀུན་གྱི་མཐུ་དྲིལ་ནས།། འབྲུ་བརྒྱད་དམོད་པའི་ལུས་དང་སྦྱར།། རིགས་སོགས་ལས་དབང་གནོད་པའི་གདོན།། སྔགས་ཀྱི་བརྡེག་པ་དྲུག་དང་ལྡན། ། ལྟར་འཇུག་ཕྱིར་འབྱུང་ཞེན་པ་ཞེ་སྡང་གཞི་ཡང་བཞི།། ཀུན་འབྱུང་རྟག་མེད་ཁོང་ནས་ལྡན།། གང་རུང་མཚོན་ཆ་ཁ་སྦྱར་བཅའ།། བརྗོད་པ་སྐབས་དང་སྦྱར་ལ་སྤྱད།། འོག་ལ་རྗེས་གཅོད་བསྲེག་པ་བརྡེག། ཀུན་འཇོམས་སྦྱོར་བའི་རྒྱལ་པོ་ཡིན།། གྲུ་བཞི་ཆ་མཉམ་རུས་སྦལ་ལྟོར།། ཡེ་ཤེས་ལྔ་ཡི་ཐིག་དྲངས་ལ།། མགོ་དང་མཇུག་མར་ཐིག་རྐང་གདབ།། དེ་བཞིན་ལྟོ་གཉིས་ཐིག་རྐང་དྲང།། ཐིག་བཞི་རྒྱ་གྲམ་ལེགས་པར་གདབ། ། ལྟོ་བར་འཁོར་ལོ་བཅུ་གཉིས་བཅའ།། ཐིག་བསྐོར་རིམ་པ་གསུམ་དུ་བསྐོར།། དབུས་སུ་གྲུ་གསུམ་རྒྱ་གྲམ་ལྡན།། བྱང་ཁོག་སྟོད་ཀྱི་འཁོར་ལོ་གཉིས།། རྩིབས་བཅུར་བླ་ཆེན་སྤྲུལ་པའི་སྔགས། ། གཡས་པའི་རྩིབས་ཆེན་བཅུ་བཞི་ལ།། ཡང་སྤྲུལ་འཇོམས་པའི་སྤུ་གྲི་གནས། གཡོན་པའི་རྩིབས་ཆེན་བཅུ་བཞི་ལ།། ཆགས་སྡང་འཇོམས་པའི་སྤུ་གྲི་གནས།། དེ་བཞིན་བསྐྱེད་པའི་འཁྲུལ་མིག་བཞིར། ། བཅུ་གཉིས་རྩིབས་འགྱུར་རྟགས་མེད་དང།། ཀུན་འབྱུང་སྔགས་ཀྱི་གཅོད་པ་དགོད།། དེ་ཡིས་བསད་པ་མཆོག་ལ་སྦྱར།། གཡས་གཡོན་བབ་ལྔའི་བཅོ་ལྔའི་རྩིབས་ཀྱང་རྟགས་བདུན་ལ།། སྲུང་བའི་རྟགས་མེད་ཀུན་འབྱུང་བཀོད། ། ལྟེ་བ་སྨད་ཀྱི་འཁོར་ལོ་བཞིར།། རྩིབས་བདུན་དེ་བཞིན་རྩིབས་དགུ་བཅུ།། བཅུ་གཅིག་རྩིབས་དང་ལྡན་པ་ལ།། མི་འཁོར་འཁོར་འཇུག་དེན་པ་ལ།། བརྡེག་པའི་དྲག་སྔགས་ཚན་རེ་གནས། ། ཡན་ལག་ལོ་ཏོག་འཇོམས་པ་བཞི།། ཀུན་ལ་རྒྱ་གྲམ་རྩ་བའི་སྔགས།། ལག་གཡས་བཅུ་དྲུག་སྤོགས་དང་གཟིར།། ལག་གཡོན་རྩིབས་དགུ་གཟིར་བའི་སྔགས།། རྐང་གཡས་རྩིབས་བཅུ་ཐབས་ཀྱི་སྔགས། ། རྐང་གཡོན་བཅོ་བརྒྱད་དུ་སལ་འཇོམས།། ཆུ་རྒོད་འཁྱགས་པ་རི་ལྟར་འབེབས།། འོག་ལ་རྗེས་གཅོད་འཁོར་ལོ་བསྲེག། རྒྱ་གྲམ་ཡང་ལོག་བཅུ་གཉིས་ལ།། རྩ་བ་བརྒྱད་དང་བཅུ་གཉིས་བསྲེག། གདུག་པའི་སྔགས་དང་རྫས་བསྲེག་ལྡན། ། བླ་ཆེན་བཞི་དང་ཆགས་ལྡང་བཞི།། མི་མཐུན་འཁོར་ལོ་ཁ་སྦྱར་བསྔགས།། སྤྲུལ་པ་ཡང་སྤྲུལ་ཁ་སྦྱོར་བརྡེག། ཀུན་འབྱུང་རྟགས་མེད་དེ་བཞིན་བསྡེབས།། རུས་སྦལ་ལྟོ་བར་བསད་ལ་སྦྱར། ། ཆུ་དྲིལ་གཟིར་བའི་འཁོར་ལོ་སྦྱར།། ཟོར་དང་དུ་བ་ཁ་སྦྱོར་ལ།། དབབ་དང་བསྲུང་བ་རུས་སྦལ་ཡང།། དེ་ནས་བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་ལས། ཀུན་འབྱུང་རྩ་བའི་སྔགས་འདི་བཏོན་ཏོ། ། སྲོག་ལ་ཧྲི་ཤག་རྦད།། ཙིཏྟ་བྲེང་ཤག་ཛ། སྲོག་ལ་ཐུན་རྨུགས་རྦད། དགྲ་བོའི་སྲོག་ལ་ཐུན་ཤག་རྦད། ནརྀ་ཙིཏྟ་བྲེང་བྲེང་ཧུར་ཐུམས་ཛ། སྲོག་ལ་ཐུན་གཟིར་ཤག་རྦད། ཙིཏྟ་བྲེང་ཤག་ཛ། སྲོག་ལ་ཡཾ་ཡཾ་རྦད། ནརྀ་ཙིཏྟ་བྲེང་ཤག་ཛ། སྲོག་ལ་མཱ་ར་ཡ་རྦད། ནརྀ་ཙིཏྟ་ཧུར་བྲེང་ཛ། ཙིཏྟ་གཟིར་ནན། སྲོག་ལ་མྱོགས་རྩལ་རྦད། ཡཾ་ཡཾ་ཧུར་ཙིཏྟ་ཁམ་ཤག་རྩ་ལ་མྱགས་ཧབ་ཏང་ཧབ་ཏང་རོ་མྱགས་ཛ། ཀྲིང་ཀྲིང་ཧི་ནན། ཡལ་ཡལ་ཙིཏྟ་རྦད། ཧ་ལ་ཧ་ལ་ཙ་མ་རི་ཁམ་ཤག་རྦད། ཧ་ལ་ཧ་ལ་ཡཾ་ཡཾ་ཙིཏྟ་བྲེང་བྲེང་དུན་དུན་ཛ། དེ་བ་ཛ་དུན་ས། ནཱ་ག་སྙིང་གཟེར་ཐུན་ཕྲོཾ་ཕྲོཾ། ཧྲིལ་ཧྲིལ། ཤར་ཤར་ཕོབ། ནཱ་ག་ཛ་ཡཾ། སྙིང་གཟེར་ཤར་ཕྲོཾ་ཕོབ། ཛ་ཡཾ་ཕྲོཾ་ཤར་ཧྲིལ་ཁཾ་ཤར་ཧྲིལ་ཕོབ། ནཱ་ག་ཨུ་ནན་ཛ་ཡཾ་ཕོབ་ཡ་ཧྲི་ད་ཡ་ཕོབ། ར་མི་ཙིཏྟ་ཁཾ་ཤག་སྲོག་ལ་ཧུར་ཐུམས་ཡཾ་ཁཾ་ཤག་རཾ་ཐུན་ཙིཏྟ་རཾ། ངེས་པའི་དོན་དང་ལྡན་པའི་གདེང།། ཉམས་རྟགས་ཕྱི་སྟེ་སྤྱོད་ཡུལ་མིན། ། དེ་ཡི་ལས་ཐིག་རྫོགས་པར་བཤད། རརྒབྲཊཀཿ། དེ་ནས་བཅོམ་ལྡན་འདས་ཀྱིས་གབ་པ་ཐུགས་ཀྱི་ལས་འདི་བཤད་དོ།། དམར་ལེན་སྔགས་ཀྱི་དམོད་པ་ལ།། དགུ་གསུམ་གང་རུང་ཐོད་པ་བྱ།། འཁོར་ལོ་རིམ་པ་བཞིན་དུ་བསྐོར། ། དབུས་ཀྱི་འཁོར་ཡུག་ཕོ་བྲང་དུ།། བདེ་བའི་རྒྱལ་པོ་ནམ་འཁའི་འབྲུ།། ཕྱི་རིམ་བར་ཁྱམས་འཁོར་ལོ་བརྒྱད།། མུ་ཁྱུད་རིམ་པ་གསུམ་དུ་བསྐོར།། ཀུན་གྱི་དབུས་སུ་རྒྱ་གྲམ་ལྡན།། ཕྲལ་ལ་རྩ་བའི་འབྲུ་བརྒྱད་དགོད། ། གཉིས་པ་ས་ཁམས་དྲུག་གཉིས་རྩིབས།། མནན་པ་སྟོབས་ཀྱི་འབྲུ་ཡི་དགང།། མེ་ཁམས་དེ་བཞིན་བསྲེག་པས་དགང།། ཆུ་ཁམས་དེ་བཞིན་ལོ་ཏོག་འཇོམས།། རླུང་ཁམས་བཅུ་གཉིས་བསད་ལ་ཤིས། ། འདེགས་དང་དྲོད་མཚམས་ཐམས་ཅད་གཟིར།། གཡེང་དང་དྲོད་མཚམས་འབྲས་བུ་སྲུན།། དྲོད་དང་ཆུ་མཚམས་རྣམ་ཤེས་ཕྲོགས།། གཡེང་དང་འདེགས་མཚམས་གདུག་པ་གཟིར། ། ཀུན་ཀྱང་རུས་སྦལ་ཁ་སྦྱར་ལ།། ལྔ་ན་ལས་རྫོགས་གདུག་པར་གཏད།། དེ་ནས་བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་ལས། དྲག་སྔགས་འདི་བཏོན་ཏོ།། ཨེ་མྱགས་ཡ་རྔུབས་མུག་ཤག་ཀ་དུན། དགྲ་བོའི་སྲོག་ལ་མཱ་ར་ཡ་རྦད། ནརྀ་ཧུར་ཐུམས་ཛ། དགྲ་བོའི་སྲོག་ལ་ཐུན་གཟིར་སྦུར་ནན།། དགྲ་བོའི་སྲོག་ལ་རཾ་ཐུན་ཙིཏྟ་རྦད། ཁ་རཾ་ཛྭ་ལ་རཾ། ནཱ་ག་ཨུ་ནན་སྙིང་གཟེར་ཕྲོམ་ཤག་ཁམ་ཧྲིལ་ཕོབ་ཡཱ། སརྦ་ཨུ་ནན། ཐུམ་རིལ་སྦུར་ནན་ཤ་ཏྲུཾ་འདྲིད་ཕྱུང་རྦད། སརྦ་ཤ་ཏྲུཾ་སྟམྦྷ་ཡ་ན་ཤ་ཡ་ནན་རྦད། ཙིཏྟ་བྲེང་བྲེང་རྩ་ལ་དུན་དུན། སྲོག་ཧུར་ཐུམས་ཛ། ས་ནཱ་ག་ཧ་ལ་ཧ་ལ་ཡཾ་ཡཾ་སྙིང་གཟེར་སྦུར་ནན། ཕྲལ་ལ་ལས་ཀྱི་སྐབས་སུ་བཅའ། ། དམན་པ་ལས་ཀྱི་སྦྱར་བ་བཤད།། གཞན་ཡང་ཡན་ལག་ལས་གསུངས་པ།། རྣོ་མྱུར་ཕོ་མོའི་ལྟོ་བ་རུ།། ཡེ་ཤེས་ཐིག་ལེའི་ངང་ལས་འཆར།། འཕེན་དང་སླཽང་བ་དབུགས་ཀྱི་རྟ།། མཚོན་ཆ་མུ་ཁྱུད་ལྔ་དང་ལྡན། ། དབུས་སུ་གྲུ་གསུམ་རྒྱ་གྲམ་ཕྱི།། བཅུ་གཉིས་རྩིབས་བསྣོལ་བར་ཁྱམས་ཟླུམ།། དབུས་སུ་གྲུ་གསུམ་བརྣག་པ་བསྟན།། གཉིས་པ་རྒྱ་གྲམ་རྩ་བའི་སྔགས།། བཅུ་གཉིས་ཕྱི་ནང་གསད་པའི་འབྲུ། ། བར་འཁྱམས་ལྟོ་སྦྱོར་སྒྲུབ་པའི་སྔགས།། ཁ་སྦྱོར་བཅས་ལ་དོང་རྩར་མནན།། སྔགས་ཀྱི་ཡན་ལག་སྤོགས་པ་ཡིན།། གདུག་པའི་ཀླུ་ལ་གཏད་པར་བྱ།། དགྲ་བོའི་སྲོག་ལ་ཧུར་ཐུམས་རྦད། ཙིཏྟ་བྲེང་ཤག་ཛ། ། ཛ་ཤག་བྲེང་ཏ་ཙི་ཏ་ཐུམས་ཧུར་དགྲ་བོའི་སྲོག་རྦད། དགྲ་བོའི་སྲོག་ལ་ཐུམས་ཙིཏྟ་ཧུར་བྲེང་ཛ་ཤག་རྦད། བརྣག་པ་རྣོ་མྱུར་སྟོབས་དཔག་མེད།། ཡན་ལག་རྣོ་དབལ་མཚོན་ཆ་ཡིན།། གཞན་ཡང་ཕུང་བྱེད་སྡིག་པའི་ལས། ། ལས་ཀྱི་རིམ་པ་སྔར་བཞིན་ལས།། ཁྱད་པར་ལྷ་སྲིན་དཀྲུག་པའི་ལས།། སྡིག་པ་ཆེན་པོའི་ལྟོ་བ་རུ།། མུ་ཁྱུད་རིམ་པ་ལྔ་དང་ལྡན།། རྒྱ་གྲམ་བཅུ་གཉིས་རྩིབས་དང་ཁྱམས།། ལྷ་སྲིན་ལྟོ་དཀྲུག་ལས་ཀྱི་མཆོག། རྩ་བའི་སྔགས་དང་སྤུ་གྲི་དགོད།། ཁ་སྦྱོར་དུག་ཆུ་ཚ་བར་ལྡན།། སྔགས་བཟླས་གདུག་པའི་ཀླུ་ལ་གཏད།། དྲག་སྔགས་སྦྱོར་བ་དྲིལ་བ་བརྡེག། ཡ་རྔུབས་ཨེ་ཤག་དུན་མྱགས་ཀ་རྨུགས།། དགྲ་བོའི་སྲོག་ལ་ཤག་བྲེང་ཛ། ཙིཏྟ་ཧུར་ཐུམས་རྦད། སྦྱོར་བ་གང་བརྩམ་མཐའ་རུ་བསྔགས།། སྤོགས་པ་དྲག་པོའི་ལས་སུ་བཤད།། འབྲུ་བཞི་ལས་ཀྱི་རིམ་པ་ནི།། དུར་ཁྲོད་དབེན་པའི་བདེ་གནས་སུ།། རང་སེམས་དབེན་པའི་མཚམས་བཅད་ལ། ། དུར་ཁྲོད་རྒྱུ་ལ་ཐོད་པ་བྱ།། མུ་ཁྱུད་བཞི་དང་ལྡན་པར་བསྐོར།། ལྟེ་བ་གྲུ་གསུམ་མཱ་ར་ནརྀ།། གཉིས་པ་རྡོ་རྗེ་རྒྱ་གྲམ་ལ།། ཡེ་ཤེས་སྤྲུལ་པ་ལས་བདག་ཡུམ།། གསང་བའི་སྙིང་པོ་འབྲུ་བཞི་དགོད། ། གསུམ་པ་འཁོར་ལོ་རྩིབས་བརྒྱད་ལ།། མཚན་མ་གཅོད་པའི་སྤུ་གྲི་དགོད།། ཕྱི་ཡི་རྩིབས་བཅུའི་རྩེ་མོ་ན།། ཉི་མ་གཅོད་པའི་འབྲུ་བཅུ་དགོད།། མཚོན་ཆ་བསྣོལ་མའི་བར་དུ་མིང།། སྲིད་པའི་རུས་སྦལ་ལྟོ་བར་བཅའ། ། སྔགས་བཟླས་ཀླུ་ལ་གནོད་པ་མནན།། དེ་ནས་བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་དྲིལ་བ་འདི་བཏོན་ཏོ།། ཨེ་དུན་ཀ་ཡཾ་དགྲ་བོའི་སྲོག་ལ་བྲེང་བྲེང་རྦད། ནརྀ་སྲོག་ལ་དུན་དུན་རྦད། ཁཾ་ཤག་རྩ་ལ་རྦད། སྲོག་ལ་མྱོགས་རྦད། ཁྱེར་ཕྱུང་མུག་ཏི་ལིང་ཤག་ལིང་ཛ། ཉིན་གསུམ་མཚན་གསུམ་སྦྱོར་བ་བརྩམ།། འབྲུ་བཞི་རྩ་བཞི་གཅོད་པར་བཤད།། གཞན་ཡང་ལོག་ཏོག་གཞོམ་པ་ནི། ། ལྟ་ཟོར་གཟིར་གསུམ་དྲིལ་ལ་དབབ།། གཅན་ཟན་དར་མའི་ཐོད་པ་ལ།། གདུག་པ་གསུམ་གྱི་ཁྲག་གིས་བསྐུ།། ཁྲག་གསུམ་དུག་སྣ་སྔོ་སྣར་བཅས།། སྦྱོར་བ་སྦལ་པའི་གསོབ་ཏུ་བཅའ།། ཡུལ་དབུས་གདུག་པའི་རྟེན་ལ་གཞུག། བཅོ་ལྔ་དགུ་གསུམ་བཞི་ལ་བརྩམ།། མདུང་གང་དམར་ཐག་ས་སྲོས་དབབ།། ལྷ་སྲིན་འབྱུང་བ་དཀྲུགས་ལ་དབབ།། ཨེ་ཡཾ་ཀ་དུན་སྲོག་གཟིར་ཏྲིག་ནན། རཾ་ཤར་ཡཾ་ཕོབ་དྲིལ་ཕྲོཾ་བྷྱོ། སྤོགས་པ་མེད་པའི་ལས་སུ་བཤད།། གཞན་ཡང་ཐོག་རྒོད་དྲག་པོའི་ལས།། ཉེ་བར་གནམ་ཐོག་དྲིལ་འབེབས་པ།། འུག་སྒོང་སྦྲུལ་ཤུན་མིང་བཅས་དང།། གསེར་སོགས་རྒོད་སྙིང་མདའ་དང་དར།། མེ་ལོང་གྲི་རྒོད་ཐོད་སྦོས་སྨན། ། སུམ་བསྒྲིལ་དྲག་པོ་གཅིག་བསྡེབས་པས།། གཞུང་འཕེན་གནད་འཕེན་གནད་ལ་དབབ།། འབུམ་ཕྲག་བཟླས་ལ་བརྒྱ་བར་བསྟིམ།། གོང་གི་དུས་ཚོད་ཉེར་བར་འཕང།། གནམ་ཐོག་ཆེན་པོའི་ལས་ཀྱི་མཆོག། ཀ་ཡཾ་ཨེ་དུན་ཕྲོཾ་ཤར་སིང་བཀྲོལ། དྲལ་ཆེམས་ཡཾ་རཾ་ཁས་བྷྱོ་མཱ་ར་ཡ་རྦད།། བདེ་བའི་རྒྱལ་པོ་སྦྱོར་བའི་མཆོག། རིག་པའི་ཀློང་ནས་འཕེན་ཅིང་འཇོམས།། གཞན་ཡང་ལྟས་ངན་དབབ་པའི་ལས། ། བྱ་དང་གཅན་གཟན་ཐོད་ཆེན་ལ།། ལྟས་ངན་ཁྲག་གིས་ཁ་མིག་བྱ།། བརྣག་པའི་མཁར་དང་མིང་རུས་བྲིས།། བདུན་ཁྲི་བདུན་སྟོང་བསྐོར་རེ་ཐུན།། ཚེས་དང་ཟ་མ་སྐར་མ་ནི།། ནག་པོ་སྨེ་བ་གཅིག་ལ་གཏད། ། ཐེམ་འོག་འགྲམ་བྲེས་ལམ་དུ་མནན།། དགྲ་བོ་སརྦ་ཡེངས་དུམ་ལིང། ཧབ་ཕོབ་ནན།། དྲག་སྔགས་ལས་ཀྱི་རྒྱལ་པོ་མངག། གཞན་ཡང་སྲུང་བའི་ལས་འདི་གསུངས།། དུར་ཁྲོད་རས་སམ་ཤོག་གུ་ལ། ། སྦྱོར་བ་ལྔ་དང་ཚ་བ་དུག། ལས་ཀྱི་འཁོར་ལོ་མུ་ཁྱུད་བཞི།། དབུས་སུ་གྲུ་གསུམ་ཟླ་གམ་གསུམ།། ཕྱི་རིམ་རྒྱ་གྲམ་རྭ་བཞིན་ལྡན།། ཡང་ལོགས་མུ་ཁྱུད་ཟླུམ་པོ་ཆུ།། ཐ་མ་རྩིབས་ཆེན་བཅུ་གཉིས་ལྡན།། སྲིད་པའི་ཁྱམས་ཁང་ལྟོ་བར་བཅའ། ། གནས་ཤིང་དགོད་པ་འདི་ལྟ་སྟེ།། གྲུ་གསུམ་གང་འདོད་སྙིང་པོ་མིང།། ཟླ་གམ་གསུམ་ལ་སྟོང་པའི་མིང།། རྒྱ་གྲམ་རྩ་བའི་འབྲུ་བཞི་དགོད།། མུ་ཁྱུད་རྦོད་གཏོང་གདུག་པའི་མིང། ། བཅུ་གཉིས་རྩིབས་ལ་སྤུ་གྲི་སྦྱར། ཁ་སྦྱར་དར་དང་སྔོན་དམར་བསྡམ།། དུར་མ་གྲུ་གསུམ་ལིངྒ་མནག། ཕྱག་རྒྱ་ཟིལ་གནོན་གསལ་བྱས་ལ།། ཞག་ལྔ་བསྐུལ་ཞིང་མཆོག་ཕུར་གདབ།། ནད་པ་བདུག་ལ་ཕྱིང་པས་དགབ། ། ཐོན་ནས་བཀའ་རྟེན་གཉན་སར་མནན།། གནོད་པ་ཀུན་གྱི་སྦྱོར་བ་གཅོད།། དྲག་སྔགས་སྦྱོར་བ་ལས་ཚོགས་བརྒྱད།། སརྦ་ཙིཏྟ་རོ་མྱགས་ཁ་ཐམ། འདྲིད་ཕྱུང་ཤག་རྦད་སྲོག་ལ་བྲེང་ཤག་དུན། དུན་ཨེ་རཾ་ཧུར་ཐུམ་ཛཿཛཿ་ས་ནཱ་ག་སྙིང་གཟེར་སྦུར་ནན། ཁཾ་ཤག་རྩ་ལ་རྦད་ས་ནཱ་ག་ཛཿ་ས་ནཱ་ག་ཐུམ། ས་ནཱ་ག་རྦད། ས་ནཱ་ག་ཙིཏྟ་རོ་མྱགས་ཁ་ཐུམས། འདྲིད་ཕྱུང་ཤག་རྦད། སྲོག་ལ་ཧུར་ཐུམས་རྦད། ཁཾ་ཛྭ་ལ་རཾ། ཨ་རྦ་ཤ་ཏྲུཾ་ནན། འདྲིད་ཡཾ་བཟློག་སྦུར་ནན་ཏྲིག་ནན། ཨེ་ཀ་ཡཾ་ཤིག་འདྲིད་ཕྱུང། ཁཾ་ཤག་ཏྲིག་ནན། སྦུར་ནན། སརྦ་ཤ་ཏྲུཾ་སྟམྦྷ་ཡ་ན་ཤ་ཡ་ནན་ཕཊ། ལས་རྣམས་རྒྱས་པའི་རིམ་པ་ནི།། ཆེ་བ་དྲིལ་བའི་ལས་ཚོགས་འདི། ། ཐུན་མོང་སྤྱོད་པའི་ལས་སུ་བཤད།། སྲོག་དམར་ལེན་སྤུ་གྲིའི་རྒྱུད་ལས་ཐུན་མོང་གི་ལས་བཤད་པའི་ལེའུ་སྟེ་བཞི་པའོ།།།། དེ་ནས་བཅོམ་ལྡན་འདས་ཀྱིས་ཁྱད་པར་གྱི་སྦྱོར་བའི་ལས་འདི་གསུངས་སོ། ། བརྡའ་དོན་ཐབས་ཀྱིས་དགྲོལ་བའི་ལས།། བ་དང་འོ་མ་ཞོ་དང་མར།། ཞུན་མར་སྣུམ་གྱི་སྙིང་པོ་བཅུད།། སྙིང་པོ་ལ་སོགས་བཞི་གཉིས་ལྡན།། ཡེངས་མེད་བསྟན་པ་བགྲོད་པའི་སྟོབས། ། དམར་ལེན་སྔགས་ཀྱི་སྙིང་ཕྱུང་ཡིན།། གོང་མཐུན་རྒྱུ་ལས་འཁོར་ལོ་བཅའ།། དཔའ་བརྟུལ་དྲག་པོའི་སྟོབས་ཀྱིས་སྤྱད།། གདུག་བྱེད་ཕག་མོའི་ལྟོ་བ་རུ།། སྲིད་པའི་ཁྱམས་ཁང་སྲོག་སྡུད་བཅའ། ཁྱམས་ཁང་ལྟོ་ན་བརྣག་པའི་གཟུགས། ། སྤྱི་གཙུག་སྙིང་གར་མཚོན་ཆ་བཅའ།། མུ་ཁྱུད་བཞི་དབུས་མིང་རུས་བྲི།། ཕྱི་རིམ་རྒྱ་གྲམ་རྩ་བའི་སྔགས།། ཡང་ལོགས་བཅུ་གཉིས་སྤུ་གྲི་མཚོན།། མུ་ཁྱུད་མིང་རུས་ལྟོ་སྦྱར་བསད། ། རུས་སྦལ་ལྟོ་ན་མཚོན་ཆའི་རྩིབས།། རྩེ་མོ་ནང་བསྟན་སྤུ་གྲི་བཟློག། ཕག་མོའི་ལུས་ལ་མནན་པའི་སྔགས།། འབྲུ་བཞི་སྲོག་དང་ཨ་མུ་ཀ། བསྐྱོད་པའི་ཡན་ལག་དབུགས་ལ་ཞོན།། དོན་གཉིས་བསྡུས་ལ་སྦྱོར་བ་བྱ། ཁ་སྦྱོར་དུར་མ་བརྣག་པའི་གཟུགས།། རྒྱུ་རྐྱེན་དྲུག་ཅུས་བྱས་ཀྱང་ཙོག་པུར་བཞག། སྙིང་གར་མཆོག་ཕུར་ཡ་མས་གདབ།། བསྒོམ་བསྐུལ་དྲག་སྔགས་བསྣོལ་མར་བརྡེག། རབ་ཀྱི་རྐང་ཐོན་བསྣོལ་མར་གཅོད། ། འབྲིང་གི་བཅུ་བར་བསྣོལ་མར་བརྡེག། དམན་པས་བརྒྱ་བར་བསྣོལ་མར་གཅོད།། དུག་ལྔ་སྐུ་ལྔ་ཡེ་ཤེས་ལྔ།། གསང་ལམ་སྒོ་དགུ་རྩ་ལམ་འསྔུག། བདེ་བའི་ཡེ་ཤེས་རང་ལ་གསལ།། འཕོ་བ་གསུམ་གྱི་བརྡ་དང་སྦྱར། ། དམར་ནག་རྟོག་པའི་ཁྲག་དཀྱིལ་ནས།། བསྡུ་བའི་ཡི་གེ་གསུམ་གྱིས་འཕྲོག། ཙ་ནའི་འབྲས་བུས་རྟེན་ལ་ཐིམ།། ཐོད་པར་སྙིང་པོ་བཅུད་སྡུད་བྱ།། ཀླུ་ལ་བཅུད་པར་འགྲན་ཟླར་གཏད། ། གཞན་དུ་བཅུད་དང་སྤུ་གྲི་སྦྱར།། ཡི་གེ་བྱིན་ཅན་སྟེང་དུ་བརྟག་བཏབ་ཀྱང།། ཕྱག་རྒྱ་ཆོས་སྐུ་སྤྲུལ་བསམ་ཡས།། ཐོབ་ཅིང་བགྲོད་པ་སྔགས་ཀྱི་སྟོབས།། དེ་ནས་བཅོམ་ལྡན་འདས་ཉིད་ཀྱི།། སྐུ་གསུང་ཐུགས་རྡོ་རྗེ་ལས། མཆོག་གི་དྲག་སྔགས་འདི་བཏོན་ཏོ།། སྲོག་ལ་རྩ་ཁྲག་སྙིང་ཐུམས་རིལ་ནན་རི་ཤག་རྦད། ནརྀ་སྲོག་ཧུར་ཐུམས་ཛ། བསད་པའི་སྦྱོར་བ་དྲག་པོའི་ལས།། ཉེ་བར་གཅིག་དྲིལ་བསྡེབ་པའོ། ། གཞན་ཡང་གབ་སྦས་བརྣག་པའི་ལས།། རྒྱལ་བློན་སྟོབས་ཅན་ཡུལ་སྲུང་ལ།། རྟེན་གྱི་གཟུགས་བརྙན་རྒྱ་ཤོག་ལ།། ཕག་མོ་དང་ནི་སྡིག་པའི་ལྟོ་བ་རུ།། མུ་ཁྱུད་རིམ་པ་བཞི་བཞིར་བསྐོར།། དབུས་སུ་ལིངྒ་ལུས་ལ་བཅའ། ། ནརྀ་དང་རྒྱ་གྲམ་རྩིབས་བཅུ་དྲུག། རྩ་བ་སྤུ་གྲི་མིང་རུས་ཁམས།། འཆས་ལ་ལིངྒའི་སྟེང་དུ་བརྣག། ཉིན་ཞག་ཕྲུགས་གཅིག་གསུམ་དུ་བརྣག། མཚོན་ཆའི་བརྡེག་ཐབས་སྔ་མ་བཞིན།། རྔམ་ཚིག་ལུས་བསྐྱོད་ལུ་མར་གཏད། ། དྲག་སྔགས་སྦྱོར་བ་འདི་ལྟ་སྟེ།། དགྲ་བོའི་སྲོག་ལ་ཧུར་ལོང་རྦད།། ནརྀ་རྩ་ཁྲག་ཐིབས་ཧུར་ཐུམས་ཛ།། མིང་དང་གཟུགས་ཀྱིས་རིམས་དལ་འབེབས།། རྒྱལ་བའི་ཡེ་ཤེས་བརྣག་རྣམ་མང་ཡང་པར་བཤད། ། གཞན་ཡང་མཛེ་རིམས་དབབ་པའི་ལས།། སྦལ་པའི་ལྟོ་བར་བརྣག་པའི་གཟུགས།། སྙིང་གར་ནརྀ་ཛ་ཡ་མཱ་ར་ཡ་རྦད།། བཀོད་ལ་མཛེ་ཅན་ཁྲག་གིས་བསྐུ།། དཀར་ནག་གདུག་པ་ལྟོ་སྦྱར་ལ།། སྡིག་པ་ཕག་མོའི་ལྟོ་བ་རུ། ། མུ་ཁྱུད་བཞི་བཞི་རྒྱ་གྲམ་རྩིབས།། གོང་བཞིན་བཀོད་ལ་ཁ་སྦྱར་བཅའ།། ཀླུ་ནག་སྡིག་པའི་སྙིང་གར་གཏད།། དྲག་སྔགས་འབུམ་ཚོ་དགུ་རུ་སྦྱར།། དེ་ཡིས་མཛེ་རིམས་ཡམས་སུ་འབབས།། ཐོད་པ་མཛེ་ཅན་དམར་ཆོད་ལ། ། སྤོས་ཆེན་གུ་གུལ་བདུད་རྩིས་བསང།། དྲག་སྔགས་སྦྱོར་བ་གཉིས་སུ་བསྡེབ།། ཨེ་ག་ཙ་ཐུན་ཁྲག་ཡཾ་རྔུབས་ཤིག་སྲོག་ལ་བཾ་རིལ་རཾ་ཤག་རྦད། ཛ་ནཱ་ག་ཛི་ལ་བཾ་ཧུར་ཐུམས་ཛ། ནརྀ་ཛྭ་ལ་ཛི་བཾ་ཙིཏྟ་ཁས། ནཱ་ག་རཾ་བཾ་ནན། ཛྭ་ལ་འབར་བའི་ལས་སུ་བཤད།། གཞན་ཡང་ལོ་ཏོག་འཇོམས་པའི་ལས།། ཉེ་བར་སྤོགས་མེད་གཅིག་ཏུ་དྲིལ།། སྡེ་བརྒྱད་ཀུན་གྱི་མཐུ་བསྡུས་ནས།། ཐོད་པ་གསུམ་ལ་མིང་གཟུགས་ཡུལ། ། སྦྱོར་བ་བསྡུས་ལ་གཏའ་མ་གཞུག་ཁྲག་དང་ཕུར་པ་མོན་ཐོད་དུ།། སྔགས་བསྟིམ་འབུམ་རྫོགས་དབབ་པ་བརྩམ།། དུག་ཁྲག་བྱ་ཕག་གསུར་ཆེན་བྲུན།། དུ་བས་གཟུགས་གཟིར་ལྕགས་ཕུར་གདབ།། རང་ཉིད་ཕྱག་རྒྱ་ཟིལ་གནོན་བསྒོམ། ། དྲག་སྔགས་སྦྱོར་བ་དྲིལ་ལ་བརྡེག། ཨེ་ཀ་ཡ་རྔུབས་ཤག་མུགས་རུ་མྱགས། ཕྲོམ་ཕྲོཾ་ཤར་ཤར། ཧྲི་ནཱ་ག་སྙིང་གཟེར་སྦུར་ཡཾ་ཐུན་ཡ་ཤག་ཧྲིལ་བྷྱོ། ཁྱད་པར་གདུག་པའི་རྟེན་ལ་གཟིར། ། ལྷ་བཙན་བསྟན་ལ་ཐེ་བྲང་གཟིར།། འཇིག་རྟེན་ལོག་རྟོག་འཇོམས་པར་བཤད།། སྲོག་དམར་ལེན་གྱི་རྒྱུད་ལས། ཁྱད་པར་གྱི་ལེའུ་སྟེ་ལྔ་པའོ།།།།།། དེ་ནས་བཅོམ་ལྡན་འདས་ཀྱིས་སྙིང་པོ་མཆོག་ཉེ་བར་དྲིལ་བ་འདི་གསུངས་སོ། ། འཇིག་རྟེན་དྲེགས་པའི་མཐུ་བསྡུས་ནས།། ནག་པོ་བདེ་བའི་འབྲུ་ལ་དྲིལ།། རྣོ་དབལ་མཚོན་ཆའི་རྒྱལ་པོར་བཅའ།། སྔགས་ཀྱི་ལུས་ལ་སྤུ་གྲི་གདགས། ། རང་གནད་ཕྱག་རྒྱ་འཇིག་ཅིང་འཕོ།། སྔགས་པ་བོན་པོ་རིགས་མེད་ལ།། རང་བདུད་ཕྱག་ཆ་རང་བདུད་འབེབས།། དེ་ཡི་སྦྱོར་བ་རྒྱས་པ་ནི།། ཆོས་སྐུ་བདེ་བའི་རང་བཞིན་ལས།། བདེ་བའི་ཡེ་ཤེས་རང་ཤར་བ། ། བདེ་བའི་ཐིག་ལེ་མཉམ་པར་རྫོགས།། གནས་པའི་འཁོར་ལོ་བདེ་བས་འདེགས།། བདེ་བ་ཆེན་པོས་འཁྲུལ་པ་འཇོམས།། དགེ་བཅུ་མ་ཡེངས་མཚན་བརྗོད་པ།། བདུད་དང་གཤེད་མ་རླུང་ལས་བསླང། ། གཟུགས་བརྙན་འཁོར་ལོ་མ་ཡིན་ཏེ།། གང་ཡིན་སྙིང་གི་འཁོར་ལོ་ལ།། དྭངས་མ་བཞི་ལ་གསང་གཤེད་བཞི།། རྩ་ཕྲན་བརྒྱད་ལ་ཕྱི་ནང་གཤེད།། མདུད་པ་བཞི་ལ་མཚོན་ཆའི་དབལ།། རྩ་ཕྲན་ཡང་ལོགས་འཆི་བདག་བདུད། ། རྩ་སྒོ་གཞན་ཚོགས་བྷྱོ་རྦད་ནན།། འདུས་པ་གསུམ་ལ་ཡབ་ཡུམ་ཨེ།། དཀར་ནག་ཆགས་པ་རྟེན་གཞིའི་འབྲུ།། བསྐུལ་བས་རང་རྒྱུད་གཤེད་དུ་ལྡང།། མ་ཡི་ཁོང་ནས་རྣམ་ཤེས་འཕྲོག། འབྲུ་གསུམ་ལྕགས་སྡེར་འཛིངས་པའི་ཚུལ།། རྩ་དང་སྲོག་བཅད་ལུས་སྲོག་དབྱེ།། ཙིཏྟའི་དཀྱིལ་ནས་འབྲུ་གཅིག་སྡུད་ཀྱང་འཕྲོག་ཅིང་སྡུད།། དེ་ཡིས་རང་གཤེད་རང་ལ་འབེབས།། དེ་བཞིན་ལུས་ཀྱི་འཁོར་ལོ་ལ། ། ཕུང་པོ་ལྔ་ལ་སྲོག་བདུད་གཤེད།། གཙོ་བོ་གསང་བའི་གཤེད་བཞི་ལྡང།། རྣམ་ཤེས་ཚོགས་བརྒྱད་ཕྱི་ནང་གཤེད།། ཡུལ་བརྒྱད་དེ་བཞིན་གཤེད་མོ་བརྒྱད།། བཟླས་པའི་རྐྱེན་གྱི་རྒྱུད་ལས་ལྡང།། སྐྱེ་མཆེད་བཅུ་གཉིས་འཆི་བདག་བདུད། ཁམས་ཆེན་བཅོ་བརྒྱད་སྒྲོལ་གིང་བདུད།། ཡན་ལག་བཞི་ལ་བླ་རྐུན་བཞི།། སོ་དང་སྒལ་ཚིགས་ཤ་ཟའི་ཚོགས།། བཟླས་པའི་རྟ་བསྐྱོད་ཡི་གེ་བསྐུལ།། རང་གི་བདུད་པོ་རང་ལ་དབབ། ། གཤེད་རྒྱུད་ཕྱི་ཡི་བདུད་དུ་དབབ།། བྷྱོ་བཞི་གནད་ཀྱིས་གང་བསྒྲུབ་པའི།། མཁའ་འགྲོ་གཞན་ཚོགས་གཟན་ལ་འབེབས།། ཕྱི་རྒྱུད་བདུད་ཀྱི་འཁོར་ལོ་བཤད།། དེ་བཞིན་གཟུགས་བརྙན་འཁོར་ལོ་ཡང། ། ཞེ་སྡང་སྡིག་པའི་ལྟོ་བ་དང།། ཕྲག་དོག་བསེ་ཡི་སྦལ་པ་ལ།། ལྟོར་བར་སྔགས་པའི་གཟུགས་བྲིས་ལ།། སྙིང་གར་མུ་ཁྱུད་བཞི་རུ་བསྐོར།། རྒྱ་གྲམ་བཞི་དང་རྩིབས་བཅུ་དྲུག། མཚོན་ཆ་ཕྱི་ནང་བརྩེ་སྤྲད་ལ། ། མིང་རུས་སྙིང་པོ་རྟེན་ལ་བརྡེག། གཤིན་རྗེ་ལ་སོགས་གང་འགྲུབ་པའི།། རྣམ་ཤེས་འབྲུ་རེ་དབུས་སུ་འཕོ་ཕོབ་ཀྱང།། མཆོད་རྟེན་ནག་པོའི་འོག་ཏུ་གནན།། ལས་འདི་གུ་ཧྱ་ཨ་ཏི་རྒྱ།། དེ་ནས་བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་ལས་རང་གཤེད་སྐུལ་བའི་དྲག་སྔགས་འདི་བཏོན་ཏོ། ། སྲོག་ལ་རྦད། ཐུམས་རིལ་རྦད། རྩ་ཁྲག་ཙིཏྟ་ཕྱུང། ནརྀ་སྲོག་ལ་ཧུར་ཐུམས་ཛ། བོད་པ་དངོས་ཨ་མུ་ཀ། རྣམ་ཤེས་འབྲུ་རེ་དབུས་སུ་དགོད།
CLOSE WINDOW