| Wylie |
།།། རྒྱ་གར་སྐད་དུ། སརྦ་བུདྡྷ་ས་མ་ཡོ་ག་ཏནྟྲ་རཱ་ཛ་ནཱ་མ། བོད་སྐད་དུ་སངས་རྒྱས་ཐམས་ཅད་མཉམ་པར་སྦྱོར་བ་ཞེས་བྱ་བ་རྒྱུད་ཀྱི་རྒྱལ་པོ། ། བཅོམ་ལྡན་འདས་ཡེ་ཤེས་དབུགས་འབྱིན་གྱི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ།། འདི་སྐད་བདག་གིས་གོ་བ་ཉིད་ཀྱི་ཐོས་པའི་དུས་ན། དུས་གསུམ་སངས་རྒྱས་འདུས་པའི་སྐུ། ། སྣ་ཚོགས་སྣང་བ་གཅིག་པུ་ཉིད།། འདི་ནི་རང་བྱུང་བཅོམ་ལྡན་འདས།། གཅིག་པུ་རབ་ཏུ་ཆེ་བའི་ལྷ།། རྨོངས་པ་གདུང་བ་སེལ་བའི་འོད།། རང་རིག་དཀྱིལ་འཁོར་འོད་གསལ་ཞིང།། བརྗིད་མདངས་གཟི་ཆེན་རབ་ཏུ་ཆེ། ། རྡོ་རྗེ་སེམས་དཔའ་བདེ་བའི་མཆོག། དཔལ་ལྡན་དགྱེས་པ་ཡེ་ཤེས་སྐུ།། ངོ་བོ་ཉིད་ལས་མ་གཡོས་བཞིན།། གཅིག་ནི་ཀུན་ཏུ་སྣང་བ་དེ།། སེམས་དཔའ་སངས་རྒྱས་ཀུན་གྱི་དངོས། ། སོ་སོར་རང་རིག་འདུས་པའི་དཔལ།། སྐུ་དང་གསུང་དང་ཐུགས་དང་སྐུ།། ཡོན་ཏན་ཕྲིན་ལས་ཕྱོགས་དུས་ཀུན།། མ་ལུས་མི་ལུས་ལུས་མེད་གནས།། འོག་མིན་རང་བྱུང་ཆོས་ཀྱི་དབྱིངས།། གསང་བ་མཆོག་གི་དགྱེས་པ་ན། ། དུས་གསུམ་བདག་པོ་རྡོ་རྗེ་འཆང།། རྣམ་པར་ཐར་པའི་དབུ་མངའ་ཞིང།། ཕ་རོལ་ཕྱིན་དྲུག་ཕྱག་རྒྱ་འབར།། བརྟུལ་ཞུགས་མཉམ་ཉིད་སྐྱིལ་མོ་ཀྲུང།། ཡེ་ཤེས་སྐུ་ནི་ཟང་ཐལ་ཞལ།། གཏི་མུག་གདུང་དང་ཞེ་སྡང་གདུང། ། ཤིན་ཏུ་གདུག་པ་འདུལ་བའི་གདུང།། སེར་སྣའི་གདུང་དང་འདོད་ཆགས་གདུང།། ཕྲག་དོག་གདུང་དང་ཤིན་ཏུ་སྤྲོ།། སྤྲིན་ཕུང་འཁྲིགས་པའི་དམ་ཚིག་ཅན།། ཐམས་ཅད་བདག་ཉིད་རྟག་ཏུ་བཞུགས། ། ཡང་དག་བསྒྲུབ་པ་གཅིག་པུ་ཉིད།། སངས་རྒྱས་བདེ་ཆེན་ཀུན་འདུས་པ།། མཁའ་འགྲོ་སྒྱུ་མ་བདེ་མཆོག་བདེ།། སངས་རྒྱས་ཐམས་ཅད་མཉམ་སྦྱོར་བ།། རྣལ་འབྱོར་ཟབ་མོ་སྐུ་གསུམ་རྫོགས། ། དམ་ཚིག་ལས་དང་ཆོས་དང་ནི།། སྐུ་ཉིད་ཕྱག་རྒྱ་ཆེན་པོ་སྟེ།། དགའ་དང་མཆོག་དགའ་དགའ་བ་དང།། ལྷན་ཅིག་སྐྱེས་དགའི་རང་བཞིན་ཅན།། སྒྱུ་མ་ཆེན་པོ་ཆོས་ཀྱི་སྐུ།། གསང་བ་ཤེས་རབ་བདེ་ཆེན་པོ། ། བསྟན་པར་བཞེད་ནས་དཀྱིལ་འཁོར་སྤྲོ།། སྟོང་པ་ཡེ་ཤེས་རབ་སྣང་བ།། ཚོགས་པའི་དུས་ན་རྣམ་པར་དག། དེ་ནས་ཉིད་ཀྱི་བདེ་འབྱིན་མས།། གླུ་ཡི་རྣམ་པར་བསྐུལ་མཛད་དོ།། མི་འདའ་སྟོང་ཉིད་གར་གྱི་བདག། གཡར་དམ་སྙིང་པོ་དངོས་གྲུབ་མཛོད།། དམ་ཚིག་ཆེན་པོ་ངོ་བོ་ཉིད།། ཡེ་ཤེས་ཅན་དུ་གྲུབ་པར་མཛོད།། ཧོ། ཨེ་མ་ངོ་མཚར་ཡ་མཚན་ཅན།། རིག་པའི་རྣམ་པ་སྟོང་ཉིད་ཐུགས།། ཡེ་ཤེས་རོལ་པ་རྣམ་པར་རོལ། ། རོལ་པའི་ངང་ནས་དམ་ཚིག་འབྱིན།། པདྨ་རྒྱས་པར་གར་མཛད་དེ།། རིག་པ་ཉིད་དུ་མཇལ་བར་བྱེད།། ཅེས་དེ་བཞིན་གཤེགས་པ་ཉིད་ལ་ཆེད་དུ་གླེང་ངོ།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། ། རྒྱུད་འབྱུང་བའི་གཞི་རྣམ་པར་བཀོད་པ་སྟེ། རྟོག་པ་དང་པོའོ།།།། དེ་ནས་དེ་བཞིན་གཤེགས་པ་ཐམས་ཅད་ཀྱིས་གསང་བ་བཀའ་བགྲོས་པ་ཞེས་བྱ་བའི། སྤྲུལ་པ་རྣམ་པར་ཕྱུང་སྟེ་འདུལ་བར་དགོངས་ནས། ཐུགས་རྗེས་སྤྲོ་བ་འདི་གསུངས་སོ།། རིག་པ་ཉིད་ལས་སྐྱེས་པའི་ཕྱིར།། སྐུ་གསུམ་ཡོན་ཏན་ཕྲིན་ལས་ཐུགས།། རིག་པ་ཤེས་པ་རྣམ་དྲུག་ཆེ།། ཆོས་ཉིད་ངང་དུ་ཡེ་ཤེས་གནས།། མི་སྐྱེའི་ཆོས་ཅན་སྐྱེ་ཚུལ་སྟོན། ། ཐབས་དང་ཤེས་རབ་མཉམ་སྦྱོར་མཛད།། དུག་ལྔ་ཡེ་ཤེས་ལྔ་ཡིས་འཇོམས།། ཅི་ཡང་མི་གསུང་མཉམ་པར་གནས།། འཁོར་བ་ཕྱུང་ནས་སྐམ་སར་འདོན།། དབྱིངས་ལ་ཡེ་ཤེས་རོལ་རྩེད་མཛད། ། ནམ་མཁའ་ལྟ་བུར་སྣ་ཚོགས་སྟོན།། བདུད་རྩི་དམ་པའི་ཆུ་བོ་འབེབས།། མ་རིག་སེལ་བའི་སྒྲོན་མེ་མཛད།། འཁོར་བའི་ནང་ནས་བྱུང་ཚུལ་སྟོན།། རྡོ་རྗེའི་གདན་ལ་རྡོ་རྗེ་འཇོག། བྱེ་བ་ཕྲག་ཁྲིག་གདུལ་བྱ་ལ། དེ་དང་མཐུན་པར་སྦྲུལ་པ་འགྱེད།། དཔའ་བོར་མོས་ལ་དཔའ་བོ་དང།། དཔའ་མོར་མོས་ལ་དཔའ་མོ་དང།། མཐུན་བྱས་མཐུན་པས་དོན་མཛད་པ།། པདྨ་འདམ་སྐྱེས་སྐྱོན་མ་གོས།། འཇའ་ཚོན་འདྲ་སྟེ་དངོས་མེད་གསལ། ། ཞེས་གསུངས་སོ།། དེ་ནས་གདུལ་བྱ་གདུལ་དཀའ་བ་དག་དབུགས་དབྱུང་བའི་ཕྱིར། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དགོངས་པ་དམ་པ་གསང་བ་བ་ཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། ། མཐུན་བྱས་སྐུ་ཡི་དོན་མཛད་པ།། རིགས་དྲུག་དམ་ཚིག་ལས་སྦྱང་ཕྱིར།། ཡེ་ཤེས་ངང་ལས་དམ་ཚིག་ཆེན་པོས་བསྐུལ།། བདེ་གཤེགས་ཐམས་ཅད་རྣམ་པར་བཀའ་བགྲོས་མཛད། ། དེ་ནས་དེ་བཞིན་གཤེགས་པ་རྣམས་ཀྱིས་རྡོ་རྗེ་ཞེ་སྡང་ཆེན་པོ་ལ་བསྐུལ་བ།། རྗེས་སུ་ཆགས་པ་རྣམ་མང་པདྨོ་རྣམ་དག་པ།། མཆོད་པ་གསལ་བར་རྗེས་སུ་མཆོད་བྱས་ནས།། མཆོག་ཏུ་རྟག་པའི་རྣལ་འབྱོར་བདེ་བས་བདེ་བ་གྲུབ་པར་མཛོད། བདེ་མཆོག་དམ་ཚིག་ཉིད། མཆོག་ཏུ་བདེ་བའི་རྣལ་འབྱོར་ཤིན་ཏུ་སྐལ་བཟང་མཆོག་མཉེས་པ།། རང་གི་དམ་ཚིག་སྐྱོན་མེད་པར་རོལ་ཅིག། ཧོ་ཨེ་མ་ཧོ། བདེ་མཆོག་བདེ་དྲོངས་རྣམ་པར་སྤྲུལ། ། ཛཿཧཱུཾ་བཾ་ཧོཿཧཱུཾ་གནང་བར་མཛོད།། ཨ་ལ་ལ་ཧོ།། དེ་ནས་དེ་བཞིན་གཤེགས་པ་རྣམས་ཀྱིས་འཁོར་གཏི་མུག་ཆེན་པོ་ལ་བསྐུལ་བ། ཨེ་མ་ཧོ།། མཆོག་ཏུ་གསང་བའི་དམ་ཚིག་ཡིན་པའི་ཕྱིར། ། རབ་ཏུ་གསང་བའི་ལྷ་མོ་མཆོག་རྣམས་སོ།། འགྲོ་བའི་རྒྱུན་ནི་རྣམ་པ་སྣ་ཚོགས་འདུལ་བ་རབ་གསལ་མཁྱེན།། དམ་ཚིག་ཐམས་ཅད་དངོས་པོའི་བརྟན་གཡོ་ཀུན་གྱི་ངོ་བོར་འགྱུར།། རྒྱལ་བ་ཀུན་གྱི་བདག་ཉིད་རྣལ་འབྱོར་བདེ་བའི་མཁའ་འགྲོ་སྒྱུ་མ་རྣམ་སྤྲུལ་ཧོ། ། ཀྱེ་མ་དམ་པ་རྟག་པའི་དངོས་གྲུབ་ཆེན་པོ་རབ་ཏུ་བསྒྲུབ་པ་སྟོན།། ཨེ་མ་ཧོ།། བདེ་མཆོག་བདེ་དྲོངས་རྣམ་པར་སྤྲུལ།། ཧཱུཾ་རྣམ་པར་སྣང་མཛད་ཨ་ལ་ལ་ཧོ། ། ཛཿཧཱུཾ་བཾ་ཧོཿ། དེ་ནས་དེ་བཞིན་གཤེགས་པ་རྣམས་ཀྱིས་ཤིན་ཏུ་ཁྲོ་གཏུམ་གདུག་པ་ཆེན་པོ་ལ་བསྐུལ་བ། རྣམ་པ་མང་པོ་ཁྲོ་བོའི་རྒྱུད་ཀྱིས་སེམས་ཅན་མ་ལུས་པ།། ལུས་པ་མེད་པར་ཐུགས་རྗེའི་ཐུགས་ཀྱིས་འདུལ་མཁས་པ། ། དེ་བཞིན་གཤེགས་པ་ཀུན་གྱི་སྒྱུ་མ་ཡི།། བདེ་མཆོག་སྒྱུ་མ་ཐམས་ཅད་རྣམ་སྤྲུལ་རྣམ་པར་སྤྲུལ།། རུ་ལུ་རུ་ལུ་ཧཱུཾ་བྷྱོ་ཧཱུཾ། དེ་ནས་དེ་བཞིན་གཤེགས་པ་རྣམས་ཀྱིས་རིན་ཆེན་སེར་སྣ་ཆེན་པོ་ལ་བསྐུལ་བ། ། རྣམ་པ་མང་པོ་རབ་ཏུ་དགའ་བའི་རྒྱུད་ཀྱི་སེམས་ཅན་ལ།། མ་ལུས་ལུས་པ་མེད་པར་འདུལ་མཁས་པ།། དེ་བཞིན་གཤེགས་པ་ཀུན་གྱི་སྒྱུ་མ་ལ།། སྒྱུ་མ་བདེ་མཆོག་སྒྱུ་མས་རྣམ་སྤྲུལ་རྣམ་པར་སྤྲུལ། ། ཧཱུཾ་ཧཱུཾ་ཧཱུཾ། དེ་ནས་དེ་བཞིན་གཤེགས་པ་ཐམས་ཅད་རྣམས་ཀྱིས་པདྨ་འདོད་ཆགས་ཆེན་པོ་ལ་བསྐུལ་བ། རྣམ་པ་མང་པོ་འདོད་ཆགས་རྒྱུད་ཀྱི་སེམས་ཅན་ལ།། མ་ལུས་ལུས་པ་མེད་པས་འདུལ་མཁས་པའི། ། དེ་བཞིན་གཤེགས་པ་ཀུན་གྱི་སྒྱུ་མ་ཡི།། བདེ་མཆོག་སྒྱུ་མས་ཐམས་ཅད་རྣམ་པར་སྤྲུལ།། ཏེ་ན་ཏེ་ཏེ་ཧཱུཾ། དེ་ནས་དེ་བཞིན་གཤེགས་པ་རྣམས་ཀྱིས་ཕྲག་དོག་རྒྱ་གྲམ་ཆེན་པོ་ལ་བསྐུལ་བ།། རྣམ་པ་མང་པོས་སྲོག་གི་རྒྱུད་ཀྱིས་སེམས་ཅན་ལ། ། མ་ལུས་ལུས་པ་མེད་པ་འདུལ་མཁས་པ།། དེ་བཞིན་གཤེགས་པ་ཀུན་གྱི་སྒྱུ་མ་ཡི།། བདེ་མཆོག་སྒྱུ་མས་རྣམ་སྤྲུལ་རྣམ་པར་སྤྲུལ།། ཧཱུཾ་བི་ཤྭ་བི་ཤྱ་ཧཱུཾ། དེ་ནས་བཅོམ་ལྡན་འདས་འགྲོ་དྲུག་སྦྱོང་བའི་རྒྱལ་པོ་རྣམས་སྐུ་རྣམ་པར་སྤྲུལ་ཅིང་ཕྱུང་བ། ། འདས་པའི་དུས་ན་སྔོན་བྱུང་བ།། བདག་ཉིད་ཆེན་པོ་རྟག་པ་ཡིས།། དེ་བཞིན་གཤེགས་པའི་གསུང་རབ་ལ།། འགྲོ་བའི་ཚུལ་དུ་སྔོན་བྱུང་བ།། དེ་ཚེ་སེམས་ཅན་ཐམས་ཅད་ནི། ། མངོན་པར་ཞེན་ཅིང་ལྟུང་བར་གྱུར།། དེ་བཞིན་གཤེགས་པའི་རྣམ་སྤྲུལ་གྱིས།། ཆོ་ག་སྣ་ཚོགས་འདོད་རྣམས་ལ།། ལས་ཀྱི་སྦྱོར་བ་སྣ་ཚོགས་ཀྱིས།། སངས་རྒྱས་རྡོ་རྗེ་འཛིན་ལ་སོགས། ། འདུལ་བའི་ཕྱིར་ན་སྤྲུལ་པ་ཡིན།། སངས་རྒྱས་ལ་སོགས་བརྟན་གཡོ་ཀུན།། ཀུན་གྱི་དངོས་པོར་འདི་འགྱུར་རོ།། སངས་རྒྱས་ཐམས་ཅད་མཉམ་སྦྱོར་བ།། མཁའ་འགྲོ་སྒྱུ་མ་བདེ་བའི་མཆོག། སྒྱུ་མ་སྦྱོར་བ་འདི་ཡིས་ནི། ། རྣམ་པ་སྣ་ཚོགས་ཀུན་གྱི་མཆོག། སེམས་ཅན་ཀུན་གྱི་དོན་མཆོག་རྣམས།། སངས་རྒྱས་མཛད་པའི་འདུལ་བས་འགྲུབ།། ཅེས་དཔལ་རྡོ་རྗེ་སེམས་དཔས་དབུགས་ཕྱུང་བའོ།། འདས་པའི་དུས་ན་སྔོན་བྱུང་བ། ། བདག་ཉིད་ཆེན་པོ་རྟག་པ་ཡིས།། དེ་བཞིན་གཤེགས་པའི་གསུང་རབ་ལ།། འགྲོ་བའི་ཚུལ་དུ་སྔོན་བྱུང་བ།། དེ་ཚེ་སེམས་ཅན་ཐམས་ཅད་ནི།། ཤིན་ཏུ་སྟོང་པ་ཉིད་ལ་བརྩོན།། འགོག་པའི་ཆོས་ཉིད་ལ་སྦྱོར་བས། ། འགོག་ཤིང་ཡོངས་སུ་མྱ་ངན་འདས།། རྣལ་འབྱོར་དེ་ཉིད་བཅོམ་ལྡན་འདས།། རྡོ་རྗེ་སེམས་དཔའ་དེ་བཞིན་གཤེགས།། འགྲོ་བ་ཐམས་ཅད་རྣམ་སྦྱང་ཕྱིར།། སངས་རྒྱས་སྤྲུལ་པ་ཀུན་ཏུ་འགྱེད།། སྟོང་པ་མ་ཡིན་མི་སྟོང་མིན། ། དབུ་མར་ཡང་ནི་མི་དམིགས་ཏེ།། ཤེས་རབ་ཕ་རོལ་ཕྱིན་སྦྱོར་བ།། ཐབས་ཀྱི་སྙིང་རྗེའི་བདག་ཉིད་རྣམས།། དེ་བས་དེ་ནི་སྙིང་རྗེའི་ཐབས།། ཤེས་རབ་ཕ་རོལ་ཕྱིན་པར་གསལ། ། རྟོག་པ་མེད་པའི་ཆོས་རྣམས་ལས།། སེམས་ཅན་དོན་དུ་ཡང་རྟོག་པ།། རྣམ་པར་མི་རྟོག་ལ་མོས་པས།། ཐམས་ཅད་རྟོག་པས་རྟག་པར་བྱ།། ཞེས་རྣམ་པར་སྣང་མཛད་ཀྱིས་དབུགས་ཕྱུང་བའོ།། འདས་པའི་དུས་ན་སྔོན་བྱུང་ན། ། བདག་ཉིད་ཆེན་པོ་རྟག་པ་ཡིས།། དེ་བཞིན་གཤེགས་པའི་གསུང་རབ་ལ།། འགྲོ་བའི་ཚུལ་དུ་སྔོན་བྱུང་བ།། དེ་ཚེ་སེམས་ཅན་ཐམས་ཅད་ཀུན།། ཤིན་ཏུ་ཁྲོ་གཏུམ་གདུག་པར་གྱུར།། ཤིན་ཏུ་གདུག་ཅིང་ཁྲོས་པ་ཡིས། ། འོ་དོད་འབོད་ཅིང་ལྟུང་བར་གྱུར།། ཤིན་ཏུ་གདུག་ཅིང་ཁྲོ་བ་ལ།། ཞི་བས་ཕན་པར་མི་འགྱུར་ཏེ།། ཤེས་རབ་ཐབས་ཀྱི་རྣལ་འབྱོར་པས།། ཁྲོ་བོར་དེ་བཞིན་གཤེགས་ཀུན་མཛད།། ཁྲོ་བོའི་ཚུལ་ཅན་ཁྲོས་པས་ཀྱང། ། འཇིག་རྟེན་གསུམ་དག་བསྲེག་བྱེད་ན།། སངས་རྒྱས་ཐམས་ཅད་ཁྲོས་པ་ཡིས།། ཁམས་གསུམ་མ་ལུས་སྨོས་ཅི་དགོས།། རྡོ་རྗེ་སེམས་དཔའ་དེ་བཞིན་གཤེགས།། དམ་ཚིག་ལ་སྡང་རྣམ་སྦྱང་ཕྱིར། ། དུར་ཁྲོད་གར་གྱི་ཕྱག་རྒྱ་གསལ།། ཐར་པ་ནག་པོ་དྲེགས་ལྡན་དང།། ཚངས་ཆེན་འཇུག་སེལ་ལྷ་ཆེན་དང།། གུ་ལང་དབང་ཆེན་ཉེ་དབང་བཅས།། ཉི་ཟླ་གཤིན་རྗེ་ཚངས་པ་རྣམས།། བསྒྲལ་ནས་ཐལ་བ་རྡུལ་དུ་བཤིག། རྡོ་རྗེ་ཁ་ཊྭཱཾ་དྲིལ་བསིལ་ཤིང།། ཐལ་བར་གྱུར་པ་འཚོ་བར་བྱས།། སེམས་ཅན་ཁམས་ནི་རྣམ་སྦྱངས་ནས།། དག་པའི་སངས་རྒྱས་ཞིང་རྣམས་སུ།། སངས་རྒྱས་བྱང་ཆུབ་དག་ལ་བཀོད། ། རྡོ་རྗེ་འདོད་ཁྲོ་ལ་སོགས་ཀྱི།། རྟོག་པ་བླ་མེད་ཐམས་ཅད་ནི།། ནམ་མཁའི་དབྱིངས་ཀྱི་མཁའ་ཀླས་པའི།། སེམས་ཅན་ཁམས་ནི་རྣམ་པར་སྦྱངས།། ཞེས་ཧེ་རུ་ཀས་དབུགས་ཕྱུང་བའོ།། འདས་པའི་དུས་ན་སྔོན་བྱུང་བ། ། བདག་ཉིད་ཆེན་པོ་རྟག་པ་ཡི།། དེ་བཞིན་གཤེགས་པའི་གསུང་རབ་ལ།། འགྲོ་བའི་ཚུལ་དུ་སྔོན་བྱུང་བ།། དེ་ཚེ་སེམས་ཅན་ཐམས་ཅད་ནི།། ལོག་པར་བལྟ་ལ་གནས་པར་གྱུར།། ལྟ་བ་ཤིན་ཏུ་ངན་པ་ཡིས། ། འོ་དོད་འབོད་པ་ཆེན་པོར་གྱུར།། རྣལ་འབྱོར་དེ་ཉིད་བཅོམ་ལྡན་འདས།། བྱང་ཆུབ་སེམས་ནི་རྣམ་སྦྱང་ཕྱིར།། ཆགས་པའི་པདྨོ་རྡོ་རྗེ་ཆོས།། ཧེ་རུ་ཀར་གནས་ཉེས་སྐྱོན་བྲལ།། ཁམས་གསུམ་ཉེས་སྦྱངས་སྤྱན་རས་གཟིགས། ། པདྨ་གར་དབང་ཕྱག་རྒྱར་གསལ།། འདོད་ཆགས་ཐམས་ཅད་དག་པ་ན།། པདྨར་སྦྱོར་བའི་འདོད་ཆགས་ཀྱིས།། འདུལ་བར་གསལ་བས་དོན་ལ་སྦྱོར།། པདྨ་གར་གྱི་དབང་ཕྱུག་གིས།། ནམ་མཁའི་མཐའ་ཀླས་རྟོག་པ་རྣམས། ། སེམས་ཅན་ཁམས་རྣམས་སྦྱང་བའི་ཕྱིར།། ཆགས་པའི་དོན་གྱིས་རྣམ་པར་སྦྱང།། ཞེས་པདྨ་གར་གྱི་དབང་ཕྱུག་གིས་དབུགས་ཕྱུང་བའོ།། འདས་པའི་དུས་ན་སྔོན་ཕྱུང་བ།། བདག་ཉིད་ཆེན་པོ་རྟག་པ་ཡི། ། དེ་བཞིན་གཤེགས་པའི་གསུང་རབ་ལ།། འགྲོ་བའི་ཚུལ་དུ་སྔོན་བྱུང་བ།། དེ་ཚེ་སེམས་ཅན་ཐམས་ཅད་ནི།། ཤིན་ཏུ་གདུག་ཅིང་བརྐམ་པར་གྱུར།། བརྡུངས་ཤིང་བརྐམ་པས་ཡི་དྭགས་ལྟུང། ། དེ་ནས་འཕོས་ནས་དབུལ་པོར་སྐྱེས།། དེ་ཡི་སྐྱོན་གྱིས་གསོད་པར་བྱེད།། ཤིན་ཏུ་གདུག་པ་སྦྱང་བའི་ཕྱིར།། རྣལ་འབྱོར་དེ་ཉིད་བཅོམ་ལྡན་འདས།། དམ་པའི་དོན་ཆེན་ཉི་མ་བྱུང།། ནམ་མཁའི་སྙིང་པོའི་རིན་ཆེན་གྱི། ། རེ་བ་ཀུན་ཡང་ཡོངས་རྫོགས་མཛད།། ཁྲོ་གཏུམ་ཞི་བས་མི་འདུལ་ཕྱིར།། ཤེས་རབ་ཐབས་ཀྱི་རྣལ་འབྱོར་པ།། རྡོ་རྗེ་ཉི་མའི་ཕྱག་རྒྱར་གསལ།། འཇིག་རྟེན་གསུམ་སོགས་རྟོག་པ་ཀུན།། སྦྱངས་ནས་ཡོན་ཏན་རྒྱས་ཤིང་འཕེལ། ། རྡོ་རྗེ་ཉི་མས་དབུགས་ཕྱུང་བའོ།། འདས་པའི་དུས་ན་སྔོན་བྱུང་བ།། བདག་ཉིད་ཆེན་པོ་རྟག་པ་ཡི།། དེ་བཞིན་གཤེགས་པའི་གསུང་རབ་ལ།། འགྲོ་བའི་ཚུལ་དུ་སྔོན་བྱུང་བ།། དེ་ཚེ་སེམས་ཅན་ཐམས་ཅད་ནི། ། བརྩོན་འགྲུས་ཤིན་ཏུ་ཆུང་བར་གྱུར།། ཤིན་ཏུ་བརྩོན་འགྲུས་ཆུང་བ་ཡིས།། མནར་མེད་པ་ཡི་དམྱལ་བར་ལྟུང།། རྣལ་འབྱོར་དེ་ནི་བཅོམ་ལྡན་འདས།། རྡོ་རྗེ་སེམས་དཔའ་དེ་བཞིན་གཤེགས། ། དྲག་ཤུལ་སྦྱོར་བའི་ཚུལ་དག་ཏུ།། རྟ་མཆོག་དཔལ་དུ་རྣམ་པར་སྣང།། ཤིན་ཏུ་ཁྲོ་ཤིང་གཏུམ་པ་ལ།། ཞི་བས་ཕན་པར་མི་འགྱུར་ཏེ།། ཁྲོ་བོ་དེ་བཞིན་གཤེགས་པ་ཡིས།། སྡིག་མེད་སྟོབས་ཀྱིས་ངོ་མཐོན་དུ། ། དྲེགས་པ་པོ་ནི་མནན་ནས་སུ།། དེ་ཚེ་ཡུམ་རྣམས་རང་གིས་སྤྱད།། ཞི་རྒྱས་དབང་དྲག་ལྷུན་གྲུབ་ཀྱིས།། རྟ་མཆོག་རྣམ་པར་འཕྲུལ་པ་ཡིས།། མ་ལུས་ལུས་པ་མེད་པ་ཡི།། སེམས་ཅན་རྣམས་ཀྱི་དོན་ཡང་བྱེད། ། རྟ་མཆོག་དཔལ་གྱི་རྒྱལ་པོ་ཡིས།། ནམ་མཁའི་དབྱིངས་ཀྱི་མཐའ་དོན་བསྒྲུབས།། ཞེས་དཔལ་རྟ་མཆོག་གིས་དབུགས་ཕྱུང་བའོ།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས།། རིགས་དྲུག་གི་འགྲོ་བ་ལ་སྤྲུལ་པ་རོལ་པའི་ལོ་རྒྱུས་བཀོད་པའི་རྟོག་པ་སྟེ་ལེའུ་གཉིས་པའོ། །།། དེ་ནས་དེ་བཞིན་གཤེགས་པ་ཐམས་ཅད་ཀྱི་གསུང་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་འདུས་པ་ལས་འདི་དག་ཕྱུང་ངོ། ། ཨཱ+ོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོུ྅ཧཾ། དྷརྨ་དྷྭ་ཏུ་བཛྲ་སྭ་བྷཱ་ཝ་ཨཱཏྨ་ཀོུ྅ཧཾ། ཧཱུཾ་ཙིཏྟ་པྲ་བེ་སྥ་ར་ཎ་ཕཊ། ཨེ་ཨཱ་ཀ་ཤ་མཎྜ་ལ། ཡཾ་ཀརྨ་རཀྵ་ཧཾ། བཾ་མཱ་མ་ཀི་རི། སུ་རུ་མེ་སུཾ་ལཾ་ཏིཥྛ་མཎྜ་ལ། རཾ་ཛྙཱ་ནྱྀ་མཎྜ་ལ། རག་ཏ་མཱཾ་ས་ཀེཾ་རཾ་བྷྲཱུཾ་ཙཀྲ་མཎྜ་ལ། བྷྲཱུཾ་བཛྲ་མཎྜ་ལ། བྷྲཱུཾ་རཏྣ་མཎྜ་ལ། བྷྲཱུཾ་པདྨ་མཎྜ་ལ། བྷྲུཾ་བཛྲ་བི་ཤྭ་མཎྜ་ལ། བྷྲཱུཾ་ཨེ་མཎྜ་ལ། ཀ་ཁ་ག་གྷ་ང། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿཧཱུཾ། ཨཱ+ོཾ་ཧེ་ཧྲཱིཿཏྲཱཾ་ཨཱ། སྔགས་རྣམས་སོར་བཞག། ཨོཾ་མ་ཧཱ་སུ་ཁ་བཛྲ་ས་ཏྭ་ཨ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཛ་བཛྲ་དྲྀཥྟི་སྭ་ཡེ་ཀ་མཊྚ། ཧཱུཾ་བཛྲ་ཀི་ལི་ཀི་ལི་ཧཱུཾ། བཾ་བཛྲི་ནི་རྨ་ར་ར་ཏ་ཧོཿ། བཛྲ་ཀཱ་ལེ་ཤྭ་རི་ཏྲི། ཨཱ+ོཾ་ཨཱཿམ་དྷུ་བཛྲེ་གྷུཾ་གྷུཾ། ཨཱ+ོཾ་བཛྲ་མེ་གྷ་ག་གྷུ་ལུ་གྷུ་ལུ་བྷྲཱུཾ། ཨཱ+ོཾ་ཧ་ཤ་ར་སྟ་བཛྲེ་ནི་ཨི་ཨི། ཨོཾ་ཁཾ་བཛྲ་ཤི་ཤི་རི་ཧཱུཾ་ཧཱུཾ། ཨཱ+ོཾ་བྷུ་ཁཾ་ཨོཾ་བཛྲ་སར་ཤཾ། ཨཱ+ོཾ་བཛྲ་ར་ཏཱ་རཾ། ཨཱ+ོཾ་བཛྲ་དྷརྨཱ་བཾ། ཨཱ+ོཾ་བཛྲ་ཀརྨ་ཐཾ། ཧཾ་སརྦ་བཛྲ་ཚེ་བཛྲ་ཏ་ཏྲེ། ཏྲཾ་བཛྲ་པཱ་དཾ། དྷཾ་བེ་ཤ་བཛྲ། ཨཱ+ོཾ་ཧེ་རུ་ཀ་བཛྲ་ས་མ་ཡཱ་ཧི། སརྦ་དུཥྟ་ས་མ་ཡ་མུ་དྲ་པྲ་བྷཉྫ་ཀ་ཧཱུཾ་ཕཊ། ཨཱ+ོཾ་བཛྲ་གུ་ཧྱ་སིདྡྷི་པ་ར་མ་ཡོ་གཱི་ཤ་རི་ཧྲཱི་ཧཱུཾ་ཧཱུཾ། བཛྲ་ཙཾ་རེ་ཤྭ་རི་ཁ་ཌཾ་གི་མ་ཧི། བཛྲ་ཀ་པ་ལཱ་མ་ཀུ་ཌེ་རུ་ལུ་རུ་ལུ་ཧི་ན། ཧཱུཾ་བཛྲ་ན་ད་ལ་ནི་ཛ་ཛྷི། ཨཱ+ོཾ་བཛྲ་ས་ཏྭ་ཀེ་ཛི་ཧཱུཾ་བཛྲ་པྲ་ཧ་ར་ཎ་མ་དྷ། ཨཾ་བཛྲ་ཤུ་ལཱི་གྲ་བྷི་དྷ་ཧཱུཾ་ཕཊ། ཧཱུཾ་བཛྲ་ཡོ་ཤེ་ཙིནྡྷ་མ་ཎ། ཧཱུཾ་བཛྲ་མེ་ལ་ད་ཤེ་མ་ཌ། ཧེ་བཛྲ་ར་ཏི་པཾ། པ་མ་ཧཱ་ར་ཏ་བཛྲི་ཧོ། ཨོཾ་བཛྲ་ལོ་ཙ་ན་ཡཾ། རཾ་མ་ཧཱ་ཤྭི་བཛྲ་ཧི། ཨོཾ་སིདྷྱ་བྷུ་སིདྷྱ་བྷ་བ་སི་དྷྱ། མ་ཧཱ་བཛྲ་རཏྣ་བ་བ་ཌ་ཌ་རཾ། བཛྲ་སཏྭ་ཛཿ་བཛྲ་རཏྣ་ཧཱུཾ། བཛྲ་དྷརྨ་བཾ། བཛྲ་ཀརྨ་ཧོཿ། ཨོཾ་པྲི་ཏི་བཛྲ་ནི་མ་ཌ་ས། ཨོཾ་བཛྲ་པྲི་ཏི་ཧྲི།། ཨོཾ་བཛྲ་ཙི་ཧྲ་མ་ནི་ཧོ།། ཨོཾ་བཛྲ་མ་ཧཱ་མ་ཧོ་ཧུཾ། ཨོཾ་སྭ་བྷཱ་ཝ་ཤདྡྷ་པདྨ་ན་ཏེ་བ་ཤ་ཧྲཱིཿ་ཨོཾ་སརྦ་ཏ་ཀ་གཱ་ར་པདྨ་ཛྫ་ཧཱུཾ། བཛྲ་པདྨི། ཧི་པདྨི་པདྨི་བཾ། ཧོ་པདྨ་ཎི་ར་ཛ། ཧཱུཾ་པདྨ་ཙཾ་དེ་ཤྭ་རི་ཧཱུཾ་ཕཊ། ཧེ་མ་ཧཱ་བི་ཤཱ་པདྨ་མུ་ཏེ་སིདྡྷི་ཧཱུཾ་ཕཊ། ཧྲཱིཿཔདྨི་པདྨི་ཧཱུཾ་ཨཾ། ཧོ་པདྨི་བི་ཤྭ་ཀི་མ་ཀྲ་མ་ཧཱུཾ་ཛ། ཨོཾ་སུམྦྷ་ནི་སུམྦྷ་ནི་ཧཱུཾ། ཨོཾ་བི་ཤྭ་བཛྲེ་དྷརྨཱ་བཛྲཱི། ཨོཾ་བི་ཤྭ་བཛྲ་སཏྭ་ཧ། ཨོཾ་ཧེ་ར་ཏི་བཛྲ་བི་ལཱ་སི་ནི་དྲ་ཌ། ཧེ་ར་ཏི་བཛྲ་གི་ཏེ་ཏེ་ཏེ་ཏེ། ཧེ་ར་ཏི་བཛྲ་ཧཱ་སེ་ཧ་ཧ་བཾ། ཧེ་ར་ཏི་བཛྲ་ནརྀ་ཏྱེ་པི་བ་བེ་བ་དྷ། ཨོཾ་ཤཱནྟི་གྲཱི་བ་ཧཱུཾ། ཨ་བཛྲ་པུཥྤེ། ཨ་བཛྲ་དྷཱུ་པེ། ཨ་བཛྲ་ཨཱ་ལོ་ཀེ། ཨ་བཛྲ་གནྡྷེ། ཨཱ+ོཾ་ཧ་ཡ་གྲཱི་བ་སྤུཥྟི་ཧཱུཾ། གཱིརྟི་ཧྲཱིཿ། ལཱ་སྱེ་ཧཱུཾ། མཱ་ལེ་ཏྲཾ། ནརྀ་ཏྱེ་ཨཱ། ཨཱ+ོཾ་ཧུ་ལུ་གྲཱི་བ་བ་ཤཾ་ཧཱུཾ། རུ་པ་ཧཱུཾ། ཧེ་ར་ཏི་ཧཱུཾ། ཛི་བི་ཧཱུཾ། ཙི་པི་ཏི་ཧཱུཾ། ཨཾ་ཨེ་མ་ར་ཧུ་ལུ་ཧཱུཾ། ཨཱ+ོཾ་བཛྲ་ཨཾ་ཀུ་ཤ་ཛཿ་ཨཱ+ོཾ་བཛྲ་པཱ་ཤ་ཧཱུཾ། ཨཱ+ོཾ་བཛྲ་སྥོ་ཊ་བཾ། ཨཱ+ོཾ་གྷཎྜེ་ཧོཿ།། ཨཱ+ོཾ་པ་ན་སེཾ། སེ་ནུ་རུ་སུ་ཏ།། ཏི་ཕུ་ས་ར་མུ།། ཏ་ཐཱ་ག་ཏ་སིདྡྷི་བུ། སརྦ་སི་ཏི་བུ་ས་མ་ཡོ་ཏ་མུ།། མ་ཧཱ་སུ་ཁ་སི་ཏི་བུ།། ཞེས་དེ་བཞིན་གཤེགས་པ་ཐམས་ཅད་ཀྱིས་གསུངས་པས། སྟོང་གསུམ་ཐམས་ཅད་སྐུས་གང། རབ་ཏུ་གང། ཀུན་ཏུ་གང་ངོ།། དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུའི་སྙིང་པོ་ཞེས་བྱ་བ་འདི་ཕྱུང་ངོ།། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ། ཞེས་གསུངས་པས་ཞི་བའི་ཚོགས་ཐམས་ཅད་དགྱེས་པར་གྱུར་ཏོ། ། དེ་ནས་དེ་བཞིན་གཤེགས་པ་ཐམས་ཅད་ཀྱི་གསུང་གི་སྙིང་པོ་འདི་ཕྱུང་ངོ།། ཨོཾ་ཧྲཱིཿཧ་ཧ་ཧཱུ~ཾ་ཧཱུཾ་ཕཊ། ཅེས་གསུངས་པས་གསུང་གི་ཚོགས་ཐམས་ཅད་དགྱེས་པར་གྱུར་ཏོ། ། དེ་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་འདི་ཕྱུང་ངོ།། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་གསུངས་པས་ཁྲོ་བོའི་ཚོགས་ཐམས་ཅད་དགྱེས་པར་གྱུར་ཏོ།། དེ་ནས་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་གྱི་སྙིང་པོ་འདི་ཕྱུང་ངོ། ། ཨོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཐཱ། ཞེས་གསུངས་པས་ཡོན་ཏན་གྱིས་རབ་ཏུ་གང་ངོ།། དེ་ནས་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་སྙིང་པོ་འདི་ཕྱུང་ངོ། ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲིཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་ཝཱན། བིདྱཱ་རཱ་ཛ་ཧཱུཾ་ཕཊ། ཅེས་གསུངས་པས་ཕྲིན་ལས་ཡོངས་སུ་གྲུབ་བོ།། དེ་ནས་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་གསང་བ་ཞེས་བྱ་བ་འདི་གསུངས་སོ། ། ཛཿཧཱུཾ་བཾ་ཧོཿ། ཨེ་ཧྱེ་ཧི་བྷ་ག་ཝཱན། མ་ཧཱ་ཀ་རུ་ཎི་ཀ། དྲྀ་ཤྱ་ཧོ། ས་མ་ཡ་ཧོ། ས་མ་ལ་སྟྭཾ།། ཨོཾ་སརྦ་ཏ་ཐཱ་ག་ཏ་ཚ་ཡ་ཏིཥྛ་ལྷན། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི། ཨོཾ་ན་མ་ཏེ་ཧཱུཾ། ན་མ་མེ་ཧཱུཾ། ན་མོ་ན་མཿཧཱུཾ། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་ཨོཾ་ཨཱཿཧཱུཾ་སྭཱ་ཧཱ། མ་སརྦ་ཏ་ཐཱ་ག་ཏ་ཨ་བྷི་ཥེ་ག་ཏ་ས་མ་ཡ་ཤྲི་ཡེ་ཧཱུཾ། ཨོཾ་སརྦ་ཏ་ཐཱ་ག་ཏ་ཨུ་གཏ་བྷི་ཥིཉྩ་མེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་ཧཱུཾ། ཨེ་ཨཱ་ར་ལི་ཧྲཱིཾ། ཛཿཧཱུཾ་བཾ་ཧོཿ། བཛྲ་ཌཱཀྐི་ནི་ས་མ་ཡ་ཧཾ་དྲྀ་ཤྱ་ཧོ།། ཨོཾ་བཛྲ་ཌཱཀྐི་ནི་ཨི་དཾ་བ་ལིཾ་གྲྀཧྞནྟུ་ས་མ་ཡ་རཀྵནྟུ། ཨོཾ་བུདྡྷ་ཌཱཀྐི་ནི་ཨི་དཾ་བ་ལིཾ་ཏ་གྲྀཧྞནྟུ་ས་མ་ཡ་རཀྵནྟུ། ཨོཾ་རཏྣ་ཌཱཀྐི་ནི་ཨི་དཾ་བ་ལིཾ་གྲྀཧྞནྟུ་ས་མ་ཡ་རཀྵནྟུ། ཨོཾ་བྷནྡྷ་ཡ་བྷནྡྷ་ཡ། ཚར་གཉིས་འདུག་དོ་ཤ་ཡ་དོ་ཤ་ཡ། མོ་ཧ་ཡ་མོ་ཧ་ཡ། སརྦ་ཌཱཀྐི་ནི་ཨེ་ཨཱ་ར་ལི་ཧྲཱི།། ཨོཾ་པདྨ་ཌཱཀྐི་ནི་ཨི་དཾ་བ་ལིཾ་གྲྀཧྞནྟུ། ས་མ་ཡ་རཀྵནྟུ། ། ཨོཾ་ཀརྨ་ཌཱཀྐི་ནི་ཨི་དཾ་བ་ལིཾ་གྲྀཧྞནྟུ་ས་མ་ཡ་རཀྵནྟུ། ཨོཾ་སརྦ་ཌཱཀྐི་ནི་ཨི་དཾ་བ་ལིཾ་གྲྀཧྞནྟུ་ས་མ་ཡ་རཀྵནྟུ། ཨོཾ་ཤྨ་ཤ་ན་ཌཱཀྐི་ནི་ཨི་དཾ་བ་ལིཾ་གྲྀཧྞཏྟུ་ས་མ་ཡ་རཀྵནྟུ། ཞེས་གསུངས་པས་ཐམས་ཅད་མཉེས་པར་གྱུར་ཏོ། ། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས་གསུང་གི་འཁོར་ལོའི་རྟོག་པ་སྟེ་ལེའུ་གསུམ་པའོ།།།། དེ་ནས་དེ་བཞིན་གཤེགས་པ་རྣམས་ཀྱིས་འདི་གསུངས་སོ།། སངས་རྒྱས་འདི་ཚེ་བསྒྲུབ་བྱའི་ཕྱིར། སྐུ་གསུམ་པ་ལ་གོམས་པར་བྱ། ། དང་པོ་ཆོས་ཀྱི་དབྱིངས་ཉིད་ལས།། དམིགས་པ་མེད་པའི་དོན་གྱིས་བསྒོམ།། བསྒྲུབ་མེད་ཡུམ་གྱི་བྷ་ག་ལ།། བརྗོད་མེད་སེམས་ཀྱི་ངང་དུ་གསལ།། ཆོས་ཀྱི་དབྱིངས་ཀྱི་ཡེ་ཤེས་ཀྱིས། ། ཐམས་ཅད་ཀུན་ལ་ཁྱབ་པར་བྱ།། རྩོལ་མེད་མ་བསྒྲུབས་ཇི་ལྟར་ལས།། ཀུན་སྣང་ནམ་མཁའི་ངང་ཉིད་འབྱུང།། མེད་པའི་རྒྱུ་ལས་མངོན་གསལ་བ།། སེམས་ཀྱི་རང་བཞིན་ཡེ་ཤེས་གསལ།། དམ་པའི་ཡི་གེ་ཨོཾ་ལས་ནི། ། ཡེ་ཤེས་སེམས་དཔའ་གསལ་བར་ཤར།། འབྱུང་ལྔའི་དམ་པ་རིན་ཆེན་དབྱིངས།། སྟོང་གསལ་གཡོ་ཞིང་སྡུད་པའི་ཆུ།། སྲ་མཁྲེགས་སྲེག་བྱེད་འབར་བའི་མེ།། བྷྲཱུཾ། ཅིར་ཡང་འགྱུར་བའི་ཡིག་འབྲུ་བསམ། ། བཞུགས་གནས་འབར་བ་ཆོས་ཀྱི་དབྱིངས།། ཡེ་ཤེས་དྲུག་གི་གཞལ་ཡས་ཁང།། རང་གནས་མཛེས་པའི་དབྱིངས་དང་ལྡན།། ཧཱུཾ་འབར་སྒེག་པའི་ཉམས་ཅན་ཞལ།། རྡོ་རྗེ་ཁ་ཊྭཱཾ་དྲིལ་བུ་འཁྲོལ།། ཐབས་དང་ཤེས་རབ་མདའ་གཞུ་འཛིན། ། མཐིང་ག་མཚན་དང་དཔེ་བྱད་རྫོགས།། བདེ་མཆོག་དཀར་མོ་ཛ་ལས་སྐྱེས།། ཐབས་དང་ཤེས་རབ་མདའ་གཞུ་འཛིན།། ཧཱུཾ་སྐྱེས་གསེར་མདོག་ཨེ་མ་བདེ།། འཁྱུག་འགྱིང་རྡོ་རྗེ་རིན་ཆེན་བསྣམས། ། བཾ་སྣང་མཛད་དམར་པོ་རྡོ་རྗེ་ཐོད།། ཐབས་ཀྱི་ཁ་ཊཱཾ་རབ་ཏུ་འཁྲོལ།། ཧོ་སྐྱེས་ལྗང་གུ་སློབ་མ་མོ།། འཁྱུད་ཅིང་བདུད་རྩིར་རབ་ཏུ་གསོལ།། ཤར་ཕྱོགས་རིམ་བཞིན་བྱང་དུ་འཁོར། ། ཨོཾ་སངས་རྒྱས་བྱང་ཆུབ་དཀར་མོ་ཆེ།། དུས་གཅིག་ཚངས་མགོ་མདའ་གཞུ་འཕེན།། བྷྲཱུཾ། ཆོས་ཀྱི་འཁོར་ལོ་དཀར་སེར་མ།། དམར་སྐྱ་རྣམ་རྒྱལ་ཧ་ལས་བྱུང།། ཏྲི་ཤུལ་རྡོ་རྗེ་གསུམ་ལྔ་འཛིན།། ཁཾ། འདོད་པའི་དབང་མོ་ལྗང་གུ་ཞལ། ། དཔག་བསམ་ལྕུག་མ་རླུང་གིས་བསྐྱོད།། ཤར་ལྷོ་ནུབ་བྱང་རིམ་སྐྱེས་སོ།། རྡོ་རྗེ་འཛིན་རྒྱལ་འཁོར་ལོ་ཆེ།། དཀར་འབར་སྣང་མཛད་དགེ་སློང་ཅན།། ཆོས་ཀྱི་འཁོར་ལོ་གླེགས་བམ་དང། ། འཁར་གསིལ་ལྷུང་བཟེད་མཚན་དཔེར་ལྡན།། ཀྵཾ། སྔོ་སང་སངས་རྒྱས་བྱང་ཆུབ་མ།། རྡོ་རྗེ་ལྕེ་ཡི་རྣམ་པར་བསྒོམ།། རཾ། དཔའ་མོ་གསེར་མདོག་ཆ་ལང་འཁྲོལ།། ཏྲཾ། ཀུན་བཟང་དམར་མོ་རིན་ཆེན་འཛིན། ། དཾ། མི་བཟད་ལྗང་གུ་དུང་འཛིན་མ།། དབུས་ཀྱི་འཁོར་ལོ་ཤར་ནས་འཁོད།། ཀྵཾ། སྤྲིན་ཆེན་དམར་མོ་སྤྲིན་ཆེན་འབེབས།། དཾ། ནམ་མཁའི་སྤྱན་མ་པདྨ་དཀར།། ཧཾ། སངས་རྒྱས་དབྱངས་མ་སེར་མོ་ཞགས། ། ཚ་སྐྱེས་དབང་མོ་པདྨ་ལྗང།། དཀྱིལ་འཁོར་རེའུ་མིག་ཕྱོགས་བཞིར་རྫོགས།། དེ་བཞིན་གཤེགས་མཛད་ཀུན་དུ་འཁྲིལ།། ཧི་སྐྱེས་ཧེ་རུ་མཐིང་གའི་སྐུ།། གཡས་པ་ཞི་ལ་གཡོན་པ་ཆགས།། རྨོངས་བྱེད་ཞལ་ནི་རྒྱབ་ན་འབྱུང། ། རྡོ་རྗེ་ཁ་ཊྭཱཾ་དྲིལ་བུ་འཁྲོལ།། གཡང་གཞི་འཇིགས་བྱེད་པགས་པ་བརྡེག། མདའ་གཞུ་ཐོད་པ་སྙིང་ཁྲག་བཀང།། གར་གྱི་ཉམས་དགུ་འགྱིང་བའི་ཞལ།། ཧྲཱིཿ། དཀར་མོ་མདའ་འཛིན་ཀོའུ་རཱི་མ། ། ཧི་སྐྱེས་ཙོའུ་རཱི་དམར་མོ་ཞལ།། ལྕགས་ཀྱུ་ཁ་ཊྭཱཾ་ཆོས་འཁོར་བརྒྱད།། ཛིཿ། བེ་ཏ་བ་དན་ཁམ་ཕོར་དཀར།། ཛིཿ། པྲ་མོ་དམར་མོ་ཕྱག་བཞི་མ།། རྡོ་རྗེ་ཁམ་ཕོར་འཁོར་ལོ་འདེགས།། ཛི། པུཀྐ་སྣ་ཚོགས་ལྕུག་མ་འཛིན། ། ཧཱུཾ། ཙཎྜ་ནག་མོ་རྡོ་རྗེ་འཕེན།། བ་དན་ཏྲི་ཤུལ་རབ་ཏུ་ཁྲོས།། ཏ། གྷསྨ་ནག་མོ་རལ་གྲི་མེ།། ཧཱུཾ། སྨེ་ཤ་སྔོན་མོ་ཐོད་ཁྲག་གསོལ།། རྡོ་རྗེ་ཁ་ཊཱཾ་ཐོད་པ་ཞགས།། འགྱིང་མཛེས་ཁྲོ་བས་ཕྱོགས་སུ་འཁོད།། ཧ། དཀར་མོ་མཚོན་ཆ་མདའ་གཞུ་དཀར།། བཾ། སེར་མོ་ཁ་ཊྭཱཾ་དྲིལ་བུ་འཁྲོལ།། ཡཾ། དམར་སེར་འཁོར་ལོ་རྩིབས་བརྒྱད་བསྐོར།། རཾ། སྣ་ཚོགས་ལྗང་གུ་བ་དན་འཛིན།། འདི་དག་འཁྱུད་ཚུལ་མདུན་ནས་འཁོད།། ཧེ་རུ་ཀ་ཡི་ཟླ་གམ་རྫོགས། ། ཏྲཾ། ཉི་མ་སེར་པོ་མདའ་གྲི་གཡས།། གཞུ་པད་ཉི་མ་རྡོ་རྗེས་མཚན།། ཨཱཾ། དབང་བསྐུར་དཀར་མོ་དབུ་རྒྱན་འཛིན།། ཧྲཱིཿ། གསེར་ལྡན་སེར་མོ་རིན་ཆེན་སྒྲོམ།། ཧོཿ། རྒྱལ་མཚན་དམར་མོ་རིན་ཆེན་རྒྱལ། ། ཧཾ། མཆོད་ཆེན་ལྗང་གུ་རིན་ཆེན་སྣོད།། གཙོ་ལ་འཁོར་ཞིང་ཕྱོགས་བཞིར་གནས།། ཛ། མདའ་འཛིན་དམར་སེར་མདའ་གཞུ་ཅན།། ཧཱུཾ། སྔོན་མོ་ཁ་ཊྭཱཾ་རལ་གྲི་འཛིན།། ཝ། དམར་སེར་ཉི་མའི་དཀྱིལ་འཁོར་ཅན། ། རྡོ་རྗེ་ལྗང་སེར་མཆོད་སྡོང་ཅན།། རྡོ་རྗེ་ཉི་མ་རིན་ཆེན་རྫོགས།། ཧྲཱིཿ། གར་དབང་དམར་པོ་པདྨ་འཛིན།། ཞལ་གཅིག་ཕྱག་གཉིས་རྣམ་པར་མཛེས།། ཡང་ན་རྡོ་རྗེ་དྲིལ་མཚན་པ། ། ཉི་ཤུ་གཅིག་དང་ལྔ་བཅུ་གཉིས།། ཛཿ། རྣམ་གཟིགས་དཀར་པོ་པདྨ་འབྱེད།། ཧཱུཾ། སྒྲོལ་མ་དམར་སྐྱ་ཨུཏྤལ་སྐུ།། ཝཾ། ས་འཛིན་དཀར་མོ་འཁོར་ལོ་འཛིན།། ཧོཿ། ཁྲོ་གཉེར་རྡོ་རྗེ་ཨུཏྤལ་ལྗང།། ཧཱུཾ། གཏུམ་པོ་པདྨ་རྡོ་རྗེ་མཐིང། ། ཧེ། སྣ་ཚོགས་པདྨ་འཁོར་ལོ་སྔོ། ཨཱཿ། པདྨ་ཆུ་སྲིན་རྒྱལ་མཚན་དཀར།། ཧོ། པདྨ་ལྗང་གུ་པདྨ་བསྒྲུབ།། ཕྱེད་ཕྱེད་ཕྱི་ནང་རེའུ་མིག་རྫོགས།། པདྨ་གར་དབང་ཆུ་སྐྱེས་རྫོགས།། ཨཱཿ། ལྗང་སེར་རྟ་མཆོག་རྟ་གདོང་ལྗང། ། བ་དན་གསུམ་པ་སྣ་ཚོགས་ཐུགས།། རལ་གྲི་མདའ་ནི་བཞི་པར་འཆང།། སྣ་ཚོགས་པདྨ་མདུང་རྩེ་གསུམ།། བེ་ཅོན་གཞུ་ནི་བཞི་པར་འཛིན།། འགྱིང་བརྗིད་གར་གྱི་སྐུར་ལྡན་དགྱེས།། ཛི། སྣ་ཚོགས་པདྨ་དཀར་ལྗང་གཡས།། ཧ། སྔོ་ལྗང་རྡོ་རྗེ་སྣ་ཚོགས་གཡས།། ལས་བཞི་རྟ་མཆོག་རིམ་པར་སྦྱར།། རྒྱ་གྲམ་རྟ་ཡི་འཁོར་ལོར་རྫོགས།། ཧཱུཾ་སྐྱེས་དཀར་པོ་རྟ་ཞལ་འགུགས།། ཨ་སྐྱེས་སྔོན་མོ་གླིང་བུ་འབུད། ། ཏཾ། སེར་མོ་རྡོ་རྗེ་པི་ཝང་འདྲེན།། བཾ། རྔ་ཆེན་དམར་མོ་རྔ་རིངས་བརྡུངས།། ཛྷཾ། རྫ་ལྔ་ལྗང་གུ་རྡོ་རྗེ་མཚོན།། ཟླུམ་ཞིང་འཁྱིལ་ནས་གྲཝ་ལ་རྫོགས།། ཛྷ་སྐྱེས་སེར་པོ་རྟ་ཞལ་ཞགས།། ཨ། དམར་སེར་རྡོ་རྗེ་མེ་ཏོག་སྣོད། ། སྤོས་སྣོད་དཀར་མོ་ཨ་སྐྱེས་མ།། ཨཱཿ། དམར་སྐྱ་མར་མེ་བ་དན་འཛིན།། ཨ། གྷནྡྷེ་ལྗང་གུ་དུང་ཆོས་འཛིན།། མཆོད་པའི་དཀྱིལ་འཁོར་ཐིག་ལེ་རྫོགས།། བཾ་སྐྱེས་དམར་མོ་རྟ་ཞལ་ལྕགས།། ཧཱུཾ་སྐྱེས་དཀར་མོ་ལ་སོགས་གཟུགས། ། མཱ་ལེ་ཕྲེང་བ་ཏྲཾ་སྐྱེས་སྔོ།། གཱིརྟི་དམར་མོ་གླུ་ལེན་ཧྲཱིཿ་ཨ་སྐྱེས་ནཱིརྟི་ལྗང་གུ་གར།། དབང་མཆོག་རྒྱལ་པོ་གྲཝ་ལ་རྫོགས།། ཧཱུཾ་སྐྱེས་བྱུང་བ་ལྗང་གུ་དྲིལ།། རུ་སྐྱེས་དཀར་མོ་མེ་ལོང་གཟུགས། ། ཧི་སྐྱེས་སེར་མོ་དྲི་སྣོད་མ།། ཛི་སྐྱེས་དམར་མོ་དྲི་བསུང་སྣོད།། ཙི་སྐྱེས་ལྗང་གུ་ཞལ་ཟས་སོ།། དཀྱིལ་འཁོར་ཨེ་ཡི་འཁོར་ལོ་རྫོགས།། དཀར་མོ་རྟ་གདོང་ལྕགས་ཀྱུ་ཤར།། ཛཿལས་བྱུང་བས་འགུགས་བྱེད་བྱམས། ། ཕག་གདོང་ནག་མོ་ཞགས་ཐོག་ལྷོ།། ཧཱུཾ་ལས་སྐྱེས་པ་སྙིང་རྗེ་བདག། སེང་དམར་ཐབས་ཤེས་ལྕགས་སྒྲོག་ནུབ།། བཾ་ལས་བྱུང་བ་དགའ་བ་དམར།། ལྗང་གུ་ཐལ་བྱེད་སྤྱང་དྲིལ་བྱང།། ཧོཿལས་སྐྱེས་པ་བཏང་སྙོམས་ལས། ། རིག་པ་ལས་སྐྱེས་ཡེ་དག་ཕྱིར།། རྫོགས་ཆེན་རྣལ་འབྱོར་དུས་གཅིག་རྫོགས།། ཀུན་ཏུ་དམིགས་ལ་རིག་པར་ལྡན།། གཏི་མུག་ཅན་ལ་གཏི་མུག་སྟེ།། ཞེ་སྡང་ཅན་ལ་ཞེ་ཡང་སྡང།། གདུག་པ་ཁྲོ་གཏུམ་འདོད་པ་བཞིན། ། སེར་སྣ་ཅན་ལ་སེར་སྣས་བསྡམས།། འདོད་ཆགས་ཅན་ལ་འདོད་ཆགས་སྦྱོར།། ཕྲག་དོག་ལ་ཡང་ཕྲག་དོག་གོ། འདུལ་ཕྱིར་རིགས་སུ་བསྡུས་པ་དང།། བྱེ་བྲག་རྣམས་ལ་བྱེ་བྲག་སྟོན། ། རྒྱལ་བ་རྫོགས་པའི་དཀྱིལ་འཁོར་ལ།། བསམ་ཡས་འདོད་པ་ཀུན་སྟེར་ཕྱིར།། རིག་པའི་སྤྲུལ་པ་རྒྱ་ཆེན་མཆོད།། གདུང་བའི་གླུ་དང་མཛེས་པའི་གར།། རོལ་མོ་ལས་ཀྱི་ཀརྨས་དབུལ།། ཞེས་གསུངས་སོ། ། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། ལྷ་རྣམ་པར་བཀོད་པའི་ལེའུ་སྟེ་རྟོག་པ་བཞི་པའོ།།།། དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡོན་ཏན་ཕྲིན་ལས་ཀྱི་དཀྱིལ་འཁོར་ཐམས་ཅད་ཡོངས་སུ་མཉེས་པར་བྱེད་པ་ཀུན་ཏུ་རྣམ་པར་སྤྲུལ་པའི་རོལ་པ་ཆེན་པོ་རོལ་མོའི་རྒྱན་ཞེས་བྱ་བ་འདི་གསུངས་སོ། ། རིག་པ་རིག་པ་ཉིད་ལ་གནས།། དེ་ཕྱིར་རིག་པ་རིག་པའི་སྤྲུལ་པ་སྟེ། ། དམིགས་མེད་མཁའ་ལྟར་དག་པས་ཁྱབ་པའི་སྐུ།། སྤྱན་དྲངས་གཤེགས་སུ་གསོལ་བར་མི་དམིགས་ཀྱང།། ཐུགས་རྗེའི་ངང་ཆེན་ཆོས་སྐུ་དག་པ་ལས།། ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། ། བསྙེངས་པ་མི་མངའ་སྟོབས་བཅུའི་ཤུགས་མངའ་བ།། མ་འདྲེས་སངས་རྒྱས་ཆོས་རྣམས་རབ་ཏུ་རྫོགས།། དཔལ་ཆེན་ལོངས་སྤྱོད་རྫོགས་པའི་སྐུ།། རྔམས་པའི་ཞལ་ནས་འབྲུག་སྒྲོག་ཅིང།། སེང་གེའི་ང་རོས་ཀྱང་ནི་བསྐྱོད་དུ་མེད། ། གདུག་པའི་ཚོགས་རྣམས་ཟིལ་གྱིས་གནོན་མཛད་པ།། བཅོམ་ལྡན་འགྲོ་ལ་བརྩེ་སླད་གཤེགས་སུ་གསོལ།། མཁའ་འགྲོ་ཀུན་དང་ཐབས་ཅིག་གཤེགས་སུ་གསོལ།། སྒྱུ་མ་གར་གྱི་རོལ་པས་འདྲེན། ། རིག་པ་ཉིད་ལ་ཡེ་ཤེས་འཇུག། མཐུ་ལྡན་ནུས་པ་རྟོག་པ་སེལ།། མཆོད་པའི་རྣམ་པ་ཐམས་ཅད་ལ།། མཱཾ་ས་ཆུ་དང་ཟིལ་པ་དང།། གྲུབ་པ་བཞི་ཡིས་རབ་བརྒྱན་པ།། ཏིང་འཛིན་མཐུ་དང་ངོ་བོས་གྲུབ། ། སངས་རྒྱས་རྣམས་ལ་ཙན་དན་སྤྲོས།། རྡོ་རྗེ་ཅན་ལ་གུར་གུམ་ཡིན།། སྤྱན་རས་གཟིགས་ལ་ཙན་དན་དམར།། ག་བུར་རྡོ་རྗེ་ཉི་མ་ལ།། མེ་ཏོག་ཀུན་དང་བདུག་པ་ཀུན།། དེ་བཞིན་མར་མེ་ཐམས་ཅད་དང། ། སྤོས་རྣམས་ཐམས་ཅད་ཇི་སྙེད་པ།། རྡོ་རྗེ་འཆང་ལ་དབུལ་དུ་རུང།། སྨིན་དང་གཡོ་བའི་དཀྱིལ་འཁོར་དུ།། ཡག་ཤ་འབར་བའི་མགོ་ཐོད་བཞག། རང་བྱུང་བི་མུ་མ་ར་ཤུ།། གོ་ཀུ་ད་དང་ཧ་ནའི་རྒྱན།། ཧཱུཾ་བྷྲཱཾ་ཨཱཾ་ཛྲིཾ་ཁཾ་ཞེས་པ། ། དབུས་ཤར་ལྷོ་ནུབ་བྱང་དུ་གནས།། ཡེ་ཤེས་འོད་ལྔ་ཁ་དོག་འབར།། དག་ཤུར་སྤེལ་བས་ཁ་དོག་དྲིལ།། ཧྲཱིཿལས་བྱུང་བ་ཡེ་ཤེས་མེ།། སྟོང་ཉིད་རྡོ་རྗེ་ཁོང་སེང་ཅན།། ཁམས་གསུམ་ཚེ་འཛིན་རྒྱ་མཚོར་འཁྱིལ། ། སངས་རྒྱས་སྤྲིན་ཚོགས་སྦྱིན་པས་བསྟིམ།། ལུས་ངག་མཐུ་ལྡན་ནུས་པ་ཆེ།། བགེགས་རྣམས་འཇོམས་པས་མཚམས་ཀྱི་མཆོག། ཤངས་ཀྱི་འོད་ཟེར་རླུང་སྒྲོམ་ནས།། འཁྱིལ་ཞིང་སྤྲོ་བ་གསལ་བྱེད་དབྱངས། ། ཀེང་ཞེས་རུས་སྦལ་ཁ་འདྲ་བ།། ཁ་ནི་བུམ་པ་འབབ་པ་སྟེ།། ག་ནི་བསེ་ཡི་ཁ་དང་མཚུངས།། གྷ་ནི་བུམ་པ་ལྟ་བུ་སྟེ།། ང་ནི་ཀང་ཀ་ཉིད་དང་འདྲ།། ཙ་ནི་ཙ་ཤ་ཉིད་དང་མཚུངས།། ཚ་ནི་གདུགས་ཀྱི་སྦ་བ་འདྲ། ། ཛ་ནི་རྔ་མོའི་མགོ་བོ་བཞིན།། ཛྷ་ནི་རྔ་ཆེན་གཟུགས་ལྟ་བུ།། ཊ་ནི་སྐེད་ཉག་ལྟ་བུ་སྟེ།། ཋ་ནི་པུ་ཤུད་འགྲོ་བ་འདྲ།། ཌ་ནི་ཐི་བའི་ཁ་ཉིད་སྟེ།། ཌཱ་ནི་མཁའ་འགྲོ་ཉིད་དུ་གོ། ཎ་ནི་སྦྱིན་བདག་དང་འདྲ་བ། ། ཏ་ནི་སྡང་དང་འདྲ་བ་སྟེ།། ཕ་ཝང་ཁ་འདྲ་ཡི་གེ་ཐ།། ད་ནི་མཆེ་བ་ཅན་དང་མཚུངས།། དྷ་ཉིད་གཞུ་ཡི་ངོ་བོ་ཉིད།། ན་ནི་མ་ཧེའི་ཁ་འདྲ་བ།། རི་སྐེགས་འགྲོས་ནི་པ་ཞེས་བྱ།། ཕ་ནི་ཁྲུང་ཁྲུང་མགོ་དང་མཚུངས། ། འདམ་བྱ་བ་སྟེ་སྐྱེ་ག་བྷ།། མ་ནི་སྤྲེའུའི་ཚུལ་པའི་གཟུགས།། ཕུག་རོན་ངུར་པ་ཡ་དང་ར།། ཁུ་བྱུག་བྱ་རོག་ལ་དང་ཝ།། ཤ་ཥ་རི་བོང་ཞི་བའི་སྤྱན།། ས་ཧ་སྤྱང་ཀུ་འཕྲོག་མ་དང།། ཀྵ་ནི་སྲིན་བུའི་ཁ་ལྟ་བུ། ། དེ་རྣམས་ཁ་དང་འགྲོས་ཀྱིས་དབྱིབས།། མཚོན་པས་ཕྲིན་ལས་རྣམ་བཞི་བསྡུས།། ཨ་ནི་ཁྱིམ་བྱའི་མགོ་བོའི་གཟུགས།། ཨཱ་ཉིད་དེ་དང་ཅུང་ཟད་འདྲ།། ཨི་ནི་གླང་ཆེན་སྣ་ལྟ་བུ།། ཨཱི་ནི་དབང་ཕྱུག་ཆེན་པོ་འདྲ། ། ཨུ་ནི་རྔ་མོའི་མགོ་བོ་བཞིན།། ཨཱུ་ནི་ཤ་བའི་ཁ་འདྲ་བ།། རྀ་ནི་རི་བོང་མགོ་བོ་འདྲ།། ཡི་གེ་རཱྀ་ནི་སེང་མགོ་བཞིན།། ཡི་གེ་ལྀ་ནི་གླང་ཆེན་ལ།། ལཱྀ་ནི་དབང་ལྡན་ཞལ་དང་མཚུངས།། ཨེ་ནི་མ་ཧེའི་ཁ་འདྲ་བ། ། ཨཻ་ནི་རྨ་བྱའི་ཁ་དང་མཚུངས།། ཨོ་ནི་བྱི་ལའི་ཁ་དང་མཚུངས།། ཨཽ་ནི་ཁྱིམ་བྱའི་ཁ་བཞིན་ནོ།། ཨཾ་ནི་ཆུ་སྲིན་མགོ་བོ་འདྲ།། ཚེག་དྲག་ཨཿནི་རྟ་མགོ་བཞིན།། སྤྱིར་ན་བསམ་ཡས་དབྱིབས་གསུངས་པ།། རང་བཞིན་ཉིད་ཀྱིས་རྣམ་བཞིར་འདུས། ། ཐབས་དང་ཤེས་རབ་འཐབ་པ་ཡིས།། རིང་ཐུང་གར་དང་ལྕོང་དུ་འབྱུང།། དེ་ཉིད་སྒྲ་ཡི་འབྱུང་གནས་སུ།། ཧ་བ་ལྔར་ཀ་སོར་རྒ་རྟ།། ཤ་ར་པ་དང་གར་ར་པ།། བྲེང་ངེ་བ་དང་དུང་ངེ་བ། ། བང་གེ་དེའུ་དང་ཅང་ཀ་དེའུ།། དེ་བཞིན་གཤེགས་དང་རྡོ་རྗེ་འཛིན།། རྡོ་རྗེ་ཧེ་རུ་ཉི་མ་དང།། པདྨ་གར་དང་རྟ་མཆོག་དཔལ།། ཚངས་པའི་དབྱངས་ཀྱིས་འདྲེན་པ་དང།། མཁུན་ཅིང་གདུངས་པའི་སྒྲ་འབྱིན་ཅིང། ། རྡོ་རྗེ་སྲིན་པོའི་ངུར་སྒྲ་འདོན།། རྡོ་རྗེ་དྲག་པོ་གད་མོ་ཆེ།། འཁུར་བ་དབུགས་ཀྱི་རླུང་འབྱིན་ཅིང།། འབྲུག་གི་སྒྲ་ལྟར་ཟབ་པ་ཡིས།། རུ་ལུ་རུ་ལུའི་སྒྲ་ཕྱུང་ནས།། གླུ་དྲུག་བླངས་པས་དོན་དྲུག་རྫོགས། ། ཡོན་ཏན་རྣམ་བཅུ་རེ་རེར་ལྡན།། གསུང་དབྱངས་ཡན་ལག་དྲུག་ཅུ་ཡིས།། འགྲོ་དྲུག་རིགས་དང་བྱེ་བྲག་ལ།། དཀྱིལ་འཁོར་འདུལ་ཞིང་དོན་མཛད་པ།། སྒྲ་ཡི་བྱེ་བྲག་ཇི་སྙེད་པ།། རོལ་མོའི་སྒྲ་ལས་འབྱུང་བ་ནི། ། སྙིང་པོ་ཕྱག་རྒྱ་སྔགས་རིགས་དང།། རིགས་པའི་སྒྲ་ནི་ངང་གིས་འབྱུང།། ཛཿཧཱུཾ་བཾ་ཧོཿ། དུང་རྟ་མད་ར་རྨ་ར་ཏད་ར། རུ་ལུ་རུ་ལུ། པྲ་པིརྱ་ཏ་ཀི་ཧཱུ་ཛཿ། ཀི་ནི་དུ་ནི་ཧཱུཾ་དྲུཾ། ཏ་ཀི་ཧཱུཾ་ཛཿ། ཧུ་ལུ་ཧུ་ལུ། ཨ་ལ་ལ་ཧོ། ཤུདྡྷ་སིདྡྷ་ར་རི་ཤ་ཡ། སརྦ་ན་ཏ་གྷེ་ན་གེ། ཏ་ཏ་གེ་གེ། ཏ་ཏ་གྷེ་གྷེ། ཏ་གེཾ་གེཾ། ཏ་གྷེ་ཏ་གྷེ། གྷེ་གྷེ་ཏ་ཏ་གེ་ཏ་གྷེ་ཧེ་ན། དོན་ཧ་ཀི་ཧཱུཾ་ཛ། གྷེ་ཏ་གྷེ། དོན་ཏ་ཀི་ཧཱུཾ་ཛ། དྲན་ཨ་ལ་ལ་ཧོ། རུ་ཏ་མ་ཏ། ཐལ་མོ་བརྡབ་པའི་རྟག་པའོ། ། ཏ་གྷེ་གྷེ། ཏ་གྷེ་གྷེ། ཏ་གྷེ་ཏ་གྷེ་ན། ཏ་གྷེ་ན་ཏ་གྷེ་ན། གྷེན་གྷེན། རྒྱུན་གྱི་རྡའོ།། ཨཾ་ཨཾ་ཨཾ། ཧཾ་ཧཾ་ཧཾ། བཾ་བཾ་བཾ། དྷཾ་དྷཾ་དྷཾ། དམ་ཚིག་གསུང་བ་ལྔའོ།། དེ་ཀོང་དེ་ཀོང་དེ་ཀོང་ཏེ་བཛྲ། བཛྲ་ཕྱེ་ཕྱར་ཀོང། ཀོཾ་ཀོཾ་ཀོཾ། ཧཱུཾ་བྷྱོ་ཧཱུཾ་བྷྱོ། ཧཱུཾ་བྷྱོ་ཧཱུཾ་བྷྱོ། རུ་ལུ་རུ་ལུ་ཧཱུཾ་བྷྱོ། དྷྱེ་ཀོཾ་ཀོཾ་གོང་གོང། དེ་གོཾ་གོཾ་གོཾ་དཔལ་ཧེ་རུ་ཀའི་རྡའི་ཕྱག་རྒྱའོ།། པདྨ་བྷནྡྷ་དིང། པདྨ་བྷནྡྷ་ཏྲིང།། པདྨ་པདྨ་ཏྲིང། དཔལ་པདྨ་ཐལ་མོ་བརྡབ་པའི་རྡའོ། ། ཏྲཾ་ཏྲཾ་ཏྲཾ་ཏྲཾ། བ་བ་བ་བ། བ་བ་བ་བ། ཊ་ཊ་ཊ། ཊ་ཊ་ཊ་ཊ། ཏྲ་ཏྲ་ཏྲ་ཏྲ་ཏྲནྟ་ཏེ། ཌ་དུ་ར་ཏྲ་རུད་ཏྲ་ཏྲ། རྒྱལ་པོའི་རྡའོ། ཏ་ཀི་ཧཱུཾ་ཛ་ཏ་ཀི་ཧཱུཾ་ཛ། སྙེམས་པའི་འགྲོས་སོ།། ཏྲཾ་ཏྲཾ་ཏྲཾ་ཏྲཾ་ཏྲ་ཏྲ་ཏྲ། མྱུར་ཞིང་རབ་ཏུ་མྱུར་བའོ། ། བ་ཏ་བ་ཏ་ཏུ་ཏུན་ཏ་ཊ་པ་ཊ། ཏ་ཊ་ཏ་བ་ཏ་བ་རུ་འུན་ཏ་ཊ་བ་ཏ། ཏ་ཊ་བེ་ཏ་བ་ཧེ་དོན། དཔལ་རྣམ་པར་རོལ་པའོ།། བ་ཏ་བ་ཏ་བ་ཏ་ཕཊ་ཏྲ་ཊ། ཤིན་ཏུ་མྱུར་བའི་རྡའི་ཕྱག་རྒྱ་ཤེས་པ་སྟེ།། སིལ་སྙན་གྱི་ཕྱག་རྒྱ་ཤེས་པའོ། ། སིལ་སྙན་དོན་ལ་བྲག་ཆའི་སྒྲ།། རང་བཞིན་མེད་པར་གསན་ཞུགས་པ།། སེམས་ཅན་དོན་ཕྱིར་ནན་ཏན་མཆོག་བསྐྱེད་ཅིང།། ཡེ་ཤེས་ཐུགས་རྗེས་བདག་ལ་དགོངས་ནས་ཀྱང།། ཡེ་ཤེས་ངང་དུ་མི་གཉིས་གཅིག་པས་ན། ། འདུ་འབྲལ་མེད་པའི་ངང་གསལ་ཆོས་ཉིད་དུ།། མི་གཉིས་དོན་ཕྱིར་མཆོག་གི་དངོས་གྲུབ་རྣམས།། བདག་ལ་སྩོལ་ཅིང་བརྟན་པར་བཞུགས་སུ་གསོལ།། གླུ་ཡི་ཕྱག་རྒྱ་འདི་དག་གིས།། གླུ་ཡི་ཕྱག་རྒྱ་གར་བྱའོ། ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང།། བྱམས་དང་སྙིང་རྗེ་དགྲ་ཟུན་མི་མངའ་ཡང།། གདུག་པ་འདུལ་ཕྱིར་དུས་ལ་མི་འདའ་བས།། མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། ། ཁྲོས་པས་ལོངས་སྤྱོད་མཛད་ལ་ཕྱག་འཚལ་ལོ།། རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ།། འདོད་པའི་ཡོན་ཏན་ལྔ་དང་རིན་ཆེན་བདུན།། མ་རྨོངས་རྨོངས་པ་ཀུན་གྲོལ་རྒྱལ་བའི་གནས།། རབ་ཏུ་དགའ་བའི་བདག་ལ་ཕྱག་འཚལ་ལོ། ། དགའ་རབ་མཛོད་ཅིག་དམ་ཚིག་དམ་པ་གྲུབ།། སྒྱུ་མ་ཉིད་ལ་སྒྱུ་མ་སྤྱོད།། སྒྱུ་མ་ཆེན་པོ་རིགས་ཀྱི་ཡུམ།། སྒྱུ་མས་སྒྱུ་མ་དགའ་མཛད་མ།། ཙནྡན་དཀར་དམར་ཉི་ཟླའི་སྐད།། པདྨ་རྡོ་རྗེ་ཐབས་ལས་བྱུང། ། དགའ་དང་མཆོག་ཏུ་དགའ་དང་བྲལ།། སྐྱེས་པ་ལྷན་ཅིག་དགའ་བའི་རོ།། རང་བཞིན་དངོས་པོ་རྣམ་གཉིས་ཀྱིས།། མྱུར་དུ་དངོས་གྲུབ་སྐྱེད་བྱེད་དེ།། འཕྲལ་དུ་ཡིད་ཆེས་བྱེད་པ་ཡིན།། ཡིད་ནི་ནང་དུ་ཆུད་པ་ཡིས། ། འདོད་པའི་དངོས་གྲུབ་བསྒོམ་པར་བྱ།། རང་རྫས་ཐིག་ལེ་ཕྱིར་ཕྱུང་ནས།། སངས་རྒྱས་བྱང་ཆུབ་སེམས་དཔའ་མཆོད།། ཧེ་ནི་བདེ་ཆེན་ལས་བྱུང་བ།། རུ་ནི་རིན་ཆེན་ཆགས་དང་བྲལ།། ཀ་ནི་རབ་ཏུ་རྨོངས་པ་སྤངས། ། ཧེ་རུ་ཀ་སོགས་དགྱེས་མཆོད་རོལ།། སྐྱེ་བ་བདུན་པ་དག་པའི་ཞིང།། ཞིང་བཅུ་བསྒྲལ་བ་བསྟན་པའི་དགྲ།། ངན་སོང་གསུམ་ནི་སྙིང་རྗེའི་གནས།། ཏིང་འཛིན་བརྟན་ཐོབ་རྣལ་འབྱོར་པས། ། ཐུགས་རྗེའི་དམ་ཚིགས་སྙིང་རྗེས་བཟུང།། ལོངས་སྤྱོད་ཕུང་པོ་ཚོགས་ལ་རོལ།། དག་པ་འོད་གསལ་ཆོས་སྐུར་སྦྱོར།། འོག་མིན་བྷ་ག་ལིངྒར་བཏབ།། བསོད་ནམས་ཡེ་ཤེས་ཚོགས་འགྱུར་བ། ། གསང་བའི་དམ་ཚིག་མི་བཅག་ཕྱིར།། དངོས་གྲུབ་སྙིང་རྗེ་མཆོད་པས་རོལ།། གཟུགས་མེད་དང་ནི་གཟུགས་སྣང་བ།། གཟུགས་ཀྱི་མཐའ་ནི་རྣམ་པར་རིག། སྒྲ་མེད་སྒྲ་ནི་བྲག་ཆའི་སྒྲ།། རིག་སྟོང་སྒྲ་ནི་ཆོས་ཉིད་གསུང། ། དྲི་མེད་དྲི་བྲལ་སྟོང་པའི་དྲི།། རང་བཞིན་སྦྱོར་བ་སྣ་ཡི་ཡུལ།། མྱོང་བ་མེད་པ་མྱོང་བའི་རོ།། མེད་པར་མྱོང་བ་བདུད་རྩིའི་ཆུ།། རེག་མེད་རེག་ན་བདེ་འཇམ་ཞིང།། རེག་པ་བཞི་བསྡུས་ལུས་ཀྱི་གནས། ། ཆོས་མེད་ཆོས་ཏེ་ཆོས་ཀྱི་མཆོག། ཡོད་མེད་འཁོར་འདས་བསྡུས་པའི་ཆོས།། ཀུན་ཏུ་བཟང་པོའི་སྤྱོད་ཡུལ་ལ།། ཡུམ་གྱི་བྷ་ག་ཆོས་ཀྱི་དབྱིངས།། དམ་ཚིག་དྲི་མེད་ཡོན་ཏན་དྲུག། ཐུགས་དམ་བཞིན་དུ་ལོངས་སྤྱོད་རོལ། ། ཞེས་གསུངས་སོ།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། མཆོད་པའི་སྤྲིན་རྣམ་པར་བཀོད་པའི་ཕྱག་རྒྱའི་ལེའུ་སྟེ་རྟོག་པ་ལྔ་པའོ།།།། དེ་ནས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཀུན་ཏུ་འགྲོ་བ་ཞེས་བྱ་བ་འདི་གསུཔུངས་སོ། ། སྐལ་བཟང་བསྒོམ་པའི་རྣལ་འབྱོར་པ།། མཆོད་རྟེན་དབེན་གནས་སྐྱེད་མོས་ཚལ།། གཙུག་ལག་ཀུན་དགའ་ར་བ་རུ།། སེམས་དཔའ་རྡོ་རྗེ་དཔའ་བོ་བསྒྲུབ། ། དགོན་པ་མཆོད་རྟེན་གཙུག་ལག་ཁང།། དེར་ནི་རྣམ་པར་སྣང་མཛད་བསྒོམ།། རྒྱལ་པོའི་ཕོ་བྲང་པདྨའི་ཚལ།། རྡོ་རྗེ་ཉི་མ་རབ་ཏུ་བསྒོམ།། པདྨའི་ཚལ་ལམ་ཆུ་འདབ་ཏུ།། པདྨ་འཛིན་པ་རབ་ཏུ་བསྒྲུབ། ། སྣ་ཚོགས་མཁར་རམ་མཆུ་བོའི་འགྲམ།། རྒྱལ་ཁམས་གཞན་དུ་རྟ་མཆོག་བསྒྲུབ།། དུར་ཁྲོད་ལྷ་རྟེན་མ་མོའི་གནས།། ཧེ་རུ་ཀ་ནི་རབ་ཏུ་ཤིས།། ཉམས་དགའ་ཡིད་འོང་བསམ་གཏན་འཕེལ།། པདྨ་འཁོར་ལོ་རྣམ་པའི་དབྱིབས། ། སྐྱོན་རྣམས་བྲལ་ཞིང་ཡོན་ཏན་ལྡན།། ཚོམ་བུ་རྒྱས་པ་བསྒྲུབ་པར་ཤིས།། ཤིས་པའི་འཁོར་རྫས་དུས་འཛོམ་ན།། ཕུན་སུམ་ཚོགས་པ་རབ་ཏུ་གཅེས།། མཐོ་དམན་གསེག་མ་གྱོ་མོག་དང། ། ཚྭ་སྒོ་ཤིང་དུམ་རོ་ལྔ་བྲལ།། བླང་བརྟག་བཟུང་དང་སྦྱར་བ་དང།། བསྐྲད་བསྲུང་སྦྱོར་བས་ཆོ་ག་རྫོགས།། ཉིས་འགྱུར་དཀྱིལ་འཁོར་ཚད་ཡིན་ཏེ།། མཛེས་ཤིང་འཚམས་པ་རབ་ཏུ་ཤིས།། སེམས་དཔའི་སྐྱིལ་ཀྲུང་ལ་གནས་ནས། ། རྡོ་རྗེ་སེམས་དཔའི་གར་བྱས་ཏེ།། སྔགས་དང་ཕྱག་རྒྱ་ལྡན་པ་ཡིས།། བགེགས་རྣམས་ཐམས་ཅད་གཞིག་པར་བྱ།། རྡོ་རྗེ་པུས་མོ་གཉིས་བཅིངས་ཏེ།། རྡོ་རྗེ་སྐྱིལ་མོ་ཀྲུང་བཅས་ནས།། བདག་ཉིད་སྟན་ལ་འདུག་ནས་ནི། ། བགེགས་རྣམས་ཐམས་ཅད་གཞིག་པར་བྱ།། དྲག་ཤུལ་ཅན་ལ་དྲག་ཤུལ་སྦྱོར།། ཞལ་བཞི་པ་ལ་ཕྱག་བཞི་པ།། ཞབས་བཞི་པ་ལ་རྨིག་པ་བཞི།། རྟ་མགྲིན་རྒྱལ་པོ་བགེགས་རྣམས་འཇོམས། ། པདྨའི་སྐྱིལ་ཀྲུང་བཅས་ནས་ནི།། ལག་པ་པདྨ་བསྐོར་བ་དང།། སྔགས་དང་ཕྱག་རྒྱ་ལྡན་པ་ཡིས།། བགེགས་རྣམས་ཐམས་ཅད་གཞིག་པར་བྱེད།། རྡོ་རྗེ་ཉི་མ་གཡོན་བརྐྱང་བས།། རྒྱས་བཏབ་རྨོངས་བྱས་ཐལ་བར་བྱས། ། ཁམས་གསུམ་པ་ཡང་འཚོ་བར་བྱེད།། བགེགས་རྣམས་ཐམས་ཅད་གཞིག་པར་བྱ།། ཧེ་རུ་ཀ་ནི་རྡོ་རྗེའི་འགྲོས།། གདུག་པ་ཐམས་ཅད་སྤ་ཡང་བཀོང།། རྡོ་རྗེ་སེམས་དཔའ་སྒེག་པ་སྟེ། ། དཔའ་ལ་དཔའ་བོ་དེ་བཞིན་གཤེགས།། རྡོ་རྗེ་འཛིན་པ་སྙིང་རྗེའི་བདག། རྒོད་པ་འཇིག་རྟེན་དབང་ཕྱུག་མཆོག། རྡོ་རྗེ་ཉི་མ་ཁྲོ་བོའི་ཉམས།། རྟ་མཆོག་དྲེགས་པ་འཇིགས་པར་བྱེད།། ཤཱཀྱ་ཐུབ་པ་མི་སྡུག་པས། ། ངོ་མཚར་ལ་ནི་ཨ་ལ་ལ།། རབ་ཏུ་ཞི་བ་སངས་རྒྱས་སོ།། འཁྲུལ་འཁོར་འཕང་བ་མདའ་དང་ནི།། མ་འཕངས་རལ་གྲིའི་ཕྱག་རྒྱ་དང།། ལག་པས་འཕངས་པ་མདུང་ཐུང་སོགས།། འཕངས་ནས་སླར་བཟུང་ཞགས་པ་དང། ། རྐང་པ་གྱད་ཀྱི་སྟོབས་འགྱེད་པས།། རྐང་པ་གཤིབས་པས་ས་གནོན་ཅིང།། རྐང་པ་བསྒྱཻད་པས་ས་མནན་ལ།། དཀྱིལ་འཁོར་གྲུ་བཞི་མནན་པ་དང། བརྐྱང་བསྐུམ་ཚུལ་གྱིས་གནས་གསུམ་མནན། ། དབྱིབས་ཀྱི་ཕྱག་རྒྱ་ཤེས་པར་བྱ།། མི་ལྷོད་པ་ལ་སྲན་གཟུགས་དང།། མཉེས་ཞིང་ཡན་ལག་བསྟན་པ་དང།། རྒྱ་ཆེར་ས་བཞི་རྣམ་པར་དག། ལུས་ཀྱི་ཕྱག་རྒྱ་བདེ་བླག་ཅན།། རྐང་པ་མནན་ཅིང་རྨིག་པ་མནན། ། མདའ་གཞུ་འདྲེན་པའི་ཕྱག་རྒྱ་ཡིས།། ཁམས་གསུམ་རྒྱལ་སྲིད་ཆེན་པོ་དག། རྣམ་པར་བཏུལ་ནས་དགའ་བར་སྤྱོད།། ཉུང་དཀར་གུ་གུལ་རྫས་དག་དང།། རྒྱལ་ཆེན་མངའ་གསོལ་ཕྱོགས་སྐྱོང་མནན།། ཁྲོ་བཅུ་བཀོད་དེ་དམ་སྲི་མནན། ། ཆོས་རྒྱལ་མངའ་གསོལ་སྒོ་བྱང་གདགས།། བགེགས་དང་ལན་ཆགས་སྦྱིན་པ་དགྱེ།། ས་ཡི་རི་མོ་བྱ་བ་དང།། དུར་ཁྲོད་ཐལ་བའི་རི་མོ་བྱ།། དཀྱིལ་འཁོར་སྣ་ཚོགས་དྲིས་བྱུགས་ཏེ། ། མེ་ཏོག་དྲི་ནི་ལྷ་གྲངས་མཐུན།། མཆོད་སོགས་ལྷ་ཡི་ལྷག་པར་གནས།། སྒྲུབ་པའི་བུམ་པ་ལྷ་གྲངས་མཉམ།། གང་བའི་བུམ་པ་དག་དང་ནི།། ཐམས་ཅད་ལས་ཀྱི་བུམ་པ་དང།། རྣམ་པར་རྒྱལ་བའི་བུམ་པའོ། ། སྦྱངས་ནས་བསངས་ཏེ་གཞལ་ཡས་ཁང།། བསྐྱེད་དྲང་བསྟིམ་མཆོད་བསྟོད་པ་དང།། བསྙེན་པ་ཉེ་བའི་བསྙེན་པ་དང།། བསྒྲུབ་པ་བསྒྲུབ་པ་ཆེན་པོ་བཞི།། དཀྱིལ་འཁོར་རབ་ཏུ་བསྒྲུབ་པར་བྱ།། གཙོ་དང་འཁོར་གྱི་བསྙེན་པ་བསྐྱར། ། སྦྱིན་བསྲེག་བྱ་ཞིང་ལས་སྒྲིབ་བཤགས།། སྐལ་ལྡན་བུ་མཆོག་ལ་སོགས་པ།། རྟགས་གདབ་དམ་ཚིག་བསྲེ་བསྣན་བྱ།། སེམས་བསྐྱེད་སྡོམ་པ་བཟུང་བ་དང།། བདུན་པོ་རྣམ་དག་སྤྲོ་བ་བསྐྱེད། ། སྐུ་གསུང་ཐུགས་སུ་བྱིན་བརླབས་ཤིང།། རྡོ་རྗེའི་ཁུ་ཚུར་གནས་གསུམ་གཏུག། སྤྱི་བོས་བདུན་དམིགས་སྙིང་མཆོད་དབུལ།། མཎྜལ་པདྨ་འདབ་བརྒྱད་ལ།། རྣམ་ལྔ་བ་ཀོ་ཙམ་བྱུགས་ཏེ།། ཨུ་དུམ་ཝ་ར་ལས་བྱས་པ། ། སྡིག་སྤངས་བཅུ་གཉིས་མེ་ཏོག་ཐོད།། དོར་ཏེ་པྲ་བརྟགས་སྲུང་སྐུད་གདགས།། དག་པའི་སྔགས་ཀྱི་ཁྱོད་ཆུས་བཀྲུ།། རིགས་ལྔར་ཀུ་ཤ་རྨི་ལམ་བརྟགས།། ཞི་བ་རྒྱས་པ་དབང་དྲག་དང། ། རྫས་དང་མཆོད་པའི་རིམ་པ་ཡིས།། ངན་པའི་ལྟས་ལ་བསྲེགས་སྦྱངས་ཤིང།། སར་བའི་རྒྱུ་ལས་ཁ་བསྒྱུར་ཏེ།། ལྔའམ་ཉི་ཤུའི་ཁ་དོག་ཅན།། རྡོ་རྗེ་རྒྱུན་ཐག་ལ་སོགས་པ།། གསང་བའི་སྔགས་ཀྱིས་བསྒྲིལ་ནས་ནི། ། མཚན་ལྡན་མཛེས་མ་ལྷར་གསལ་ནས།། ཛཿཛཿཞེས་ནི་གཏད་པར་བྱ།། ནམ་མཁའ་གང་བའི་བདེ་གཤེགས་རྣམས།། ཁྱེད་ཀྱི་འགྲོ་དོན་མཛད་དུས་ལགས།། ཐིག་གི་སྒྲ་འདིས་བསྐུལ་ནས་ཀྱང།། དེ་རྣམས་འདིར་ནི་གཤེགས་སུ་གསོལ། ། གསང་བའི་སྔགས་དང་ཕྱག་རྒྱས་དང།། དཀྱིལ་འཁོར་ཐིག་གདབ་ཤེས་རབ་ཅན།། ཕྱོགས་ཀུན་མཉམ་པ་ཉིད་དམིགས་ནས།། ཤར་ལྷོ་ནུབ་བྱང་ཕྱོགས་རྣམས་སུ།། ཐིག་བཞི་བཏབ་པས་དཀྱིལ་འཁོར་དགུ། ། དཀྱིལ་འཁོར་ཟླུམ་པོ་སངས་རྒྱས་ཀྱི།། འདུས་པའི་བདག་པོ་འཁོར་ལོ་ཅན།། རྡོ་རྗེ་ཅན་གྱི་ཟླ་གམ་དགུ།། པདྨ་དབང་གི་ཆུ་སྐྱེས་བརྒྱད།། རྡོ་རྗེ་ཉི་མ་རིན་ཆེན་དབྱིབས།། སྣ་ཚོགས་རྡོ་རྗེ་རྒྱ་གྲམ་ཅན། ། རྟ་ཡི་རྒྱལ་པོ་ཡང་དག་གནས།། ཇི་སྲིད་འདོད་པ་ཅི་འབྱོར་བ།། ཇི་ལྟར་དུས་དང་ཅི་བདེ་བའི།། དཀྱིལ་འཁོར་ཀུན་ཏུ་གནས་པ་དཔལ།། ཕྲིན་ལས་ཀརྨའི་རིགས་ཡིན་ཕྱིར།། རྟ་མཆོག་ཕྱག་རྒྱ་ཅིར་ཡང་གསལ། ། མཚམས་བཞི་ལས་བཞི་དཀྱིལ་འཁོར་དུ།། ལས་བཞིའི་རིགས་ཀྱི་རྒྱལ་པོ་ལ།། ལྷ་མོ་བཅུ་དྲུག་འཁོར་ལོ་ཆེ།། རྟ་བབས་བརྒྱད་ལྡན་ཏྭ་ར་ན།། མཛེས་པའི་རྒྱན་བཞི་འདེབས་པའི་ཚུལ། ། ཕྱོགས་མཚམས་སྟེང་འོག་མཉམ་གནས་པས།། དུར་ཁྲོད་བརྒྱད་ཀྱིས་ཡོངས་སུ་བསྐོར།། མ་མོ་བརྒྱད་དང་ལྷ་ཆེན་བརྒྱད།། ཞིང་སྐྱོང་ཤིང་དང་ཀླུ་ཆེན་བརྒྱད།། ཤཱཀྱ་ཐུབ་མཛད་མཐར་ཕྱིན་ཅིང།། མཆོད་རྟེན་བརྒྱད་ནི་བསྒོམ་ཚུལ་མཛད། ། ཡེ་ཤེས་མེ་བརྒྱད་རབ་ཏུ་འབར།། བྱམས་པའི་ཆུ་ཆེན་བརྒྱད་འབབ་ཅིང།། སྙིང་རྗེའི་བྲག་བརྒྱད་མཛེས་པར་བརྩེགས།། དགའ་བའི་སྤྲིན་བརྒྱད་ཀུན་ཏུ་འཐིབས།། བཏང་སྙོམས་རླུང་བརྒྱད་རབ་ཏུ་འབུད། ། ཕྱོགས་སྐྱོང་བཅུ་ནི་རབ་ཏུ་གནས།། རབ་འབྲིང་ཐ་མའི་ཚོན་ཕྱེ་ལ།། སྔགས་ཀྱིས་བྱིན་རླབས་པྲ་བརྟགས་ཏེ།། རིགས་ཀྱི་མདོག་ལ་གནས་འགྱུར་ཚོན།། ཚོམ་བུ་དགུ་པའི་དཀྱིལ་འཁོར་ནི། ། རིགས་བསྡུས་ཆེན་པོར་བྲི་བ་དང།། གདུལ་བྱ་འདུལ་ཕྱིར་རེ་རེ་བཞེངས།། རབ་གནས་རྫོགས་པའི་དཀྱིལ་འཁོར་དང།། སྐུ་གསུང་ཐུགས་ཀྱི་ཕྱག་རྒྱ་དང།། འབྱོར་པའི་ལོངས་སྤྱོད་གང་ཡིན་པ།། རྒྱན་དང་མཚོན་ཆ་རིག་པས་སྦྱར། ། སློབ་དཔོན་ཞུགས་ནས་སློབ་མ་འཇུག། གངས་ལ་བབས་པའི་རིགས་ཀྱི་ལྷ།། སྤྱན་དབྱེ་གསང་བའི་དཀྱིལ་འཁོར་ལྟོས།། རིགས་དང་སྦྱར་ནས་དབང་ཡང་རྫོགས།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། དཀྱིལ་འཁོར་རྣལ་འབྱོར་སྤྲོས་པའི་ལེའུ་སྟེ་དྲུག་པའོ།།།། དེ་ནས་དེ་བཞིན་གཤེགས་པ་ཐམས་ཅད་ཀྱིས་གསང་བ་སྦྱིན་པ་ཞེས་བྱ་བ་འདི་གསུངས་སོ།། ལུས་ཀྱི་དཀྱིལ་འཁོར་གྲུ་བཞི་ལ། ། རྡོ་རྗེ་མཆུ་དང་རྡོ་རྗེ་བཅས།། མཚོན་ཅན་པོ་དག་བསྒྲུབ་པ་ནི།། མཐུ་ཡིས་རབ་ཏུ་གྲུབ་པ་སྟེ།། པདྨའི་སྣོད་ཀྱི་ནང་དུ་གཞུག། ཆགས་པ་ཆེན་པོ་བཅོམ་ལྡན་འདས།། རྡོ་རྗེ་སེམས་དཔའ་དེ་བཞིན་གཤེགས། ། སངས་རྒྱས་ཀུན་གྱི་རྡོ་རྗེའི་ཐུགས།། དམ་ཚིག་འདི་ནི་འདའ་བར་དཀའ།། དེ་ཡི་མཚལ་དང་ཁུ་བ་དང།། མཚལ་ཆེན་པོ་ཡི་བསྒྲུབ་པ་དག། ཆགས་པ་ཆེན་པོ་ལས་བྱུང་བས།། དམར་ཆེན་པོ་ཞེས་བྱ་བར་བཤད། ། དམར་ཆེན་པོ་དང་ག་བུར་བཅས།། ཙནྡན་དམར་པོ་སྦྱར་བ་དག། ཚོགས་ཀྱི་དབུས་སུ་བཞག་པ་ནི།། ར་ས་ཡ་ན་ཀུན་སློང་བས།། རང་གི་ལྷ་ཡི་སྦྱོར་ལྡན་པས།། སྲིན་ལག་མཐེ་བོའི་རྩེ་མོ་ཡིས།། ཞིམ་པའི་བཏུང་བ་བཞིན་མྱངས་ན། ། རྟག་པ་ཡི་ནི་དངོས་གྲུབ་ཐོབ།། བྷ་ག་པདྨའི་དཀྱིལ་འཁོར་དུ།། སྐལ་ལྡན་གསོལ་བཏབ་དམ་ཚིག་སྦྱིན།། དེ་ནས་ཁྲུས་བྱས་དྲིས་ལུས་བྱུག། ཅི་འབྱོར་བ་ཡི་གོས་དང་རྒྱན།། སྣ་ཚོགས་གོས་དག་བགོས་ནས་ནི། ། ཁ་དྲི་ཞིམ་པའི་མེ་ཏོག་ཕྲེང།། སྣ་ཚོགས་སྐལ་པ་བཟང་པོ་ཅན།། སློབ་མ་དལ་གྱིས་དལ་གྱིས་སུ།། གོས་དག་བཀབ་པའི་སྦྱོར་བ་ཡིས།། བདག་གི་འབྱུང་བ་བསྐུལ་བར་བྱ།། རྫོགས་པའི་སངས་རྒྱས་ཉི་ཟླ་རྣམས། ། ཤར་བ་དག་ནི་མཐོང་བ་ཡིས།། སྡིག་པ་ཀུན་ལས་གྲོལ་འགྱུར་ཞིང།། བསོད་ནམས་ཐམས་ཅད་འགྲུབ་པར་འགྱུར།། རྣལ་འབྱོར་བདེ་ཆེན་དབང་འདོད་པ།། ཆོས་ཀྱི་དབྱིངས་ཀྱི་དཀྱིལ་འཁོར་དུ། ། རིམ་དང་ཅིག་ཆར་འཇུག་པ་ཡིས།། དེ་ཉིད་ཡང་དག་བསྒོམ་པ་ནི།། རིག་པ་རང་བཞིན་འོད་གསལ་བ།། དངོས་མེད་རྟོག་པའི་བག་ཆགས་དག། སྒྱུ་མ་མེ་ལོང་གཟུགས་བརྙན་འདྲ།། སྒྱུ་མས་སྒྱུ་མ་སྟོང་པས་ན། ། སྒྱུ་མའི་རང་བཞིན་མི་དམིགས་ཕྱིར།། ཆོས་ཀྱི་སྐུ་འདིར་ཤེས་པར་གྱིས།། ཇི་ལྟར་ནམ་མཁའ་དྭངས་པ་ལ།། རང་བཞིན་མེད་ལྟར་རང་སེམས་ཞོག། འོད་གསལ་ཆོས་སྐུ་རྟོག་མེད་ལ།། བསླད་པས་དྲི་མས་གོས་འགྱུར་ཕྱིར། ། མ་བསླད་བུ་གཅིག་རང་སར་ཞོག། བརྗིད་པ་ཆེན་པོའི་ཁྲི་སྟེང་ན།། སྐལ་ལྡན་ཆེན་པོ་བཞག་ནས་ནི།། གདུགས་དང་རྒྱལ་མཚན་བ་དན་དང།། རོལ་མོ་རྣམས་ཀྱིས་རྣམ་བརྒྱན་ནས།། བདུད་རྩི་རྣམ་རྒྱལ་བུམ་པའི་ཆུ། ། རིགས་ཀྱི་ཅོད་པན་མཛེས་པར་བཅིང།། ཁམས་གསུམ་ཀུན་གྱིས་ཕྱག་བྱས་པ།། གསང་བ་གསུམ་གྱི་གནས་ལས་བྱུང།། དབང་བསྐུར་བ་ཡི་རྡོ་རྗེ་ཆེ།། མི་ལྡོག་པ་ཡི་དབང་བསྐུར་རོ།། སྐུ་དབང་མདའ་གཞུ་གཏད་པ་དང། ། ཤེས་རབ་དྲིལ་བུ་གསུང་གི་དབང།། ཐུགས་ཀྱི་དབང་དུ་མེ་ལོང་བརྟན།། ཡོན་ཏན་ཡངས་པ་མིག་ཐུར་དབང།། ཕྲིན་ལས་བརྟུལ་ཞུགས་ཆེན་པོའི་དབང། ། གདམས་ངག་འདེབས་པ་ཚིག་གི་དབང།། གསང་བའི་མཚན་རྟགས་མིང་གི་དབང།། ཉན་དང་འཆད་དང་བསྒྲུབ་པ་དང།། ཕྲིན་ལས་དབང་རྣམས་རྫོགས་པར་བསྐུར།། འཁོར་ལོ་རྐང་པར་བཞག་བྱས་ནས། ། ལག་པ་གཡས་པར་དུང་སྦྱིན་ཏེ།། གཡོན་པར་ལྕེ་ནི་སྦྱིན་པར་བྱ།། འཇིག་རྟེན་ཀུན་ལ་ཐམས་ཅད་དུ།། སེམས་ཅན་ཀུན་ལ་ཕན་པའི་ཕྱིར།། ཇི་ལྟར་སྣ་ཚོགས་འདུལ་གྱུར་པ།། རྡོ་རྗེའི་འཁོར་ལོ་རབ་ཏུ་བསྐོར། ། ཁྲོ་བོའི་འཁོར་ལོ་རབ་ཏུ་བསྐོར།། ནོར་བུའི་འཁོར་ལོ་རབ་ཏུ་བསྐོར།། པདྨའི་འཁོར་ལོ་རབ་ཏུ་བསྐོར།། སྣ་ཚོགས་འཁོར་ལོ་རབ་ཏུ་བསྐོར།། བྱ་སྤྱོད་རྣལ་འབྱོར་རྒྱུད་རྣམས་ལ།། འཁོར་ལོ་རབ་ཏུ་བསྐོར་བ་དང། བླ་མེད་རྣལ་འབྱོར་ཆེན་པོ་ལ།། མ་ཧཱ་ཨ་ནུ་ཨ་ཏི་ལ།། བློ་དང་མཐུན་སྦྱར་འཁོར་ལོ་བསྐོར།། འགྲོ་དྲུག་སེམས་ཅན་དབྱུངས་ཕྱུང་ཞིག། དྲི་ལྡན་ཡེ་ཤེས་མཉེས་བྱའི་ཕྱིར།། གང་ལ་ཡོངས་སུ་བཏང་དཀའ་བ། ། གང་ཡིན་དེ་ནི་མཆོག་ཏུ་བཤད།། གང་དང་གང་ལ་ཡིད་འོང་མཆོག། དེ་དང་དེ་ནི་བླ་མར་དབུལ།། ཡང་ན་ཤིན་ཏུ་ཁྱད་པར་ཅན།། བླ་མའི་སེམས་ལ་དགོས་པ་གང།། དེ་དབུལ་ཡང་ན་ཞོ་ཤ་དབུལ།། དངོས་པོ་ཆུང་ལ་མཉེས་པ་མཆོག། རྡོ་རྗེ་སེམས་དཔའི་ཡོན་དབུལ་བའོ།། བུ་མོ་ཤིན་ཏུ་བརྒྱན་པའམ།། དེ་བཞིན་ཆུང་མ་སྡུག་པ་གང།། ཕུལ་ནས་ཡོན་གྱིས་བསླུ་བ་ཡིན།། སངས་རྒྱས་བྱང་ཆུབ་མཆོག་ཡིན་ནོ།། རྡོ་རྗེ་རིགས་ལ་བདག་ཉིད་དབུལ། ། སླར་ཡང་རིན་གྱིས་བསླུ་བར་བྱ།། རྡོ་རྗེ་འཛིན་པ་དཔལ་སྦྱོར་བའི།། འབུལ་བ་ཡོན་གྱི་མཆོག་ཡིན་ནོ།། མུ་ཏིག་བཟང་པོ་ནོར་བུ་དང།། ཤིན་ཏུ་དཀར་བའི་རས་ཟུང་དང།། དེ་བཞིན་རྟ་ནི་དཀར་པོ་དག། པདྨ་ཅན་གྱི་ཡོན་མཆོག་ཡིན།། རྒྱལ་རིགས་ལོངས་སྤྱོད་གཏེར་རྣམས་དང།། གོས་དང་རྒྱན་གྱི་ཚོགས་རྣམས་དང།། དེ་བཞིན་མཆོད་པ་ཐམས་ཅད་ནི།། རྡོ་རྗེ་ཉི་མའི་ཡོན་ཡིན་ནོ།། ཤིན་ཏུ་བརྒྱན་པའི་རྟ་དག་དང། ། གླང་པོ་ཤིན་ཏུ་བརྒྱན་པ་ཡང།། ཤིང་རྟ་རིན་ཆེན་གང་བ་དང།། རྟ་དག་རྟ་མཆོག་ཡོན་ཡིན་ནོ།། བླ་མ་མཉེས་པར་གང་བྱས་པ།། དེ་ནི་ཆུང་ཡང་མཆོག་ཡིན་ཏེ།། ཆེ་སྟེ་རིན་ཆེན་རི་རབ་ཙམ། ། ཆུང་སྟེ་ཁབ་སྐུད་ཡན་ཆད་ལ།། བླ་མ་མཉེས་པ་གང་འབུལ་བ།། དཀྱིལ་འཁོར་དགུ་ཡི་ཡོན་ཡིན་ནོ།། རྒྱུད་ཀྱི་རྒྱལ་པོ་སངས་རྒྱས་མཉམ་པར་སྦྱོར་བ་ལས། དབང་བསྐུར་ཕྱག་རྒྱའི་ལེའུ་སྟེ་རྟོག་པ་བདུན་པའོ། །།། དེ་ནས་ཐབས་ཡོད་པར་བྱིན་གྱིས་བརླབས་པ་ཞེས་བྱ་བ་འདི་གསུངས་སོ།། བླ་མེད་གསང་ཞུགས་སྐལ་བཟང་པོ།། ཇི་ལྟར་རྒྱུད་འཕེལ་གྲུབ་འཛིན་པ།། རྩ་བ་སྐུ་གསུང་ཐུགས་རྣམས་བསྲུང།། དུས་བཞིར་རིགས་དྲུག་སྐུར་བསྒོམ་ཞིང། ། གསང་སྔགས་ཕྲེང་བ་ངག་ལ་འཆང།། རྫོགས་པའི་རིམ་པ་སྒོམ་བྱེད་པ།། སྦྱོར་ལམ་ཀུན་ལས་ཉམས་པ་མེད།། ཞིང་དང་སྔགས་དང་ལས་སྐྱེས་མ།། མཚན་བཟང་གང་ཡིན་བདེ་བ་སྐྱེ། ། དམ་ཚིག་གསང་བ་ཀུན་ཏུ་བསྲུང།། ཞིང་བཅུའི་ཚོགས་ལ་གནས་སྤོར་ཅིང།། འགལ་བ་དག་ལ་མཚོན་ཆའི་ཆར།། ཕབ་ནས་བདེ་བར་གཤེགས་ལ་འབུལ།། ཡུམ་དྲུག་དམ་ཚིག་ལ་གནས་ཕྱིར། ། དམ་ཚིག་དམ་པ་སྔགས་ཀྱི་སྒྲ།། ན་མོ་ཤྟུ་སརྦ་བྷུདྡྷེ་བྷྱཿ།། ཞེས་པའི་ཕྱག་རྒྱ་ལ་གནས་ན།། ལས་དང་མཆོད་པ་མ་ལུས་པ།། ལུས་པ་མེད་པ་ཐམས་ཅད་འགྲུབ།། རབ་བྱུང་རྣམས་ཀྱི་གྲུབ་པ་ཀུན། ། ཆོས་དབྱིངས་མཉམ་དང་མི་མཉམ་པ།། ནམ་མཁའ་དབྱིངས་ཀྱི་མཐའ་ཀླས་པའི།། ལན་གཅིག་བརྗོད་པས་འགྲུབ་པའི་ཕྱིར།། དམ་ཚིག་ཆོས་ཀྱི་ཕྱག་རྒྱ་འདིས།། གང་དག་བྱས་པར་མ་གྱུར་ཅིག། སྤེལ་བ་དག་ཀྱང་མ་གྱུར་ཅིག། དམ་པ་རྒྱ་ཆེན་དེ་དག་མེད།། ཨོཾ་རུ་རུ་སྦུ་རུ་ཛྭ་ལ་ཏིཥྛ་སིདྡྷ་ལོ་ཙ་ན་སརྦ་ཨརྠ་སཱ་དྷ་ནི་སྭཱ་ཧཱ། ཆོས་ཀྱི་ཕྱག་རྒྱ་མཆོག་འདི་ནི།། སེམས་ཅན་ཐམས་ཅད་བྱ་བྱེད་པ།། སྟོབས་ཀྱིས་མྱུར་དུ་བཀུག་ནས་ནི། ། བྲན་བཞིན་དེ་ནི་བྱེད་དུ་འཇུག། དྷུ་པ་བྷ་ག་ཏ་མ་ཧཱ་དེ་བི་ཧི་རི་མི་རི་ནི་ཤྲེ་ཡ། ཆོས་ཀྱི་དམ་པ་ཕྱག་རྒྱ་འདི།། འདོད་པ་བདེ་བ་ཀུན་སྦྱིན་པའོ།། ཨཱ+ོཾ་ཏཱ་རེ་ཏུ་ཏཱ་རེ་ཏུ་རེ་སྭཱ་ཧཱ། ཆོས་ཀྱི་ཕྱག་རྒྱ་ལ་གནས་པ། ། སངས་རྒྱས་བྱང་ཆུབ་རབ་བསྒྲུབ་ནས།། བུད་མེད་གཞན་ལྟ་ཅི་ཞིག་སྨོས།། ཏྲཾ་བ་བ་ཏ་ཏ་ཊ་ཊ་ཊ། རེ་བ་ཐམས་ཅད་ཀུན་རྫོགས་པ།། ཆོས་ཀྱི་ཕྱག་རྒྱ་དམ་པ་འདི།། རེ་བ་ཐམས་ཅད་རྫོགས་བྱེད་པའོ།། ཤྲཱི་བཛྲ་པདྨ་བ་ཏ་བ་མུ་ཁ་ཡོ་གཱི་ཤྭ་རི་ཧི་ཧི་ཧི་ཧི་ཧི། ཆོས་ཀྱི་ཕྱག་རྒྱ་དམ་པ་འདི།། འཇིག་རྟེན་ཐམས་ཅད་རབ་ཏུ་འཇིག། འདི་རྣམས་དམ་ཚིག་མཆོག་ཡིན་ཏེ།། ཆོས་ཀྱི་ཕྱག་རྒྱ་ཤེས་པའོ།། ཞེ་སྡང་ཆེན་པོས་ཞེ་སྡང་བ། ། གཏི་མུག་ཆེན་པོས་གཏི་མུག་ཆེ།། ང་རྒྱལ་ང་རྒྱལ་དག་ལ་གནས།། འདོད་ཆགས་ཅན་ལ་འདོད་ཆགས་སྦྱོར།། དེ་བཞིན་ཕྲག་དོག་ཕྲག་དོག་ཉིད།། ཁོང་ཁྲོ་རབ་ཏུ་གཏུམ་གདུག་ཅན།། དྲག་པོ་འཇིགས་བྱེད་འཇིགས་པར་བྱེད། ། རིགས་ཀྱི་དམ་ཚིག་ཆེན་པོ་ནི།། རིགས་དྲུག་འགྲོ་དྲུག་ཐབས་ཀྱིས་འདུལ།། དམ་ཚིག་རྣམ་པ་ཅིར་སྣང་ཡང།། ཆོས་ཉིད་ངང་ལས་མ་ཡེངས་པར།། རྩ་བ་ཡན་ལག་མི་འདའ་བར།། གྲུབ་པ་ཐམས་ཅད་ཡོངས་སུ་རྫོགས། ། སློབ་དཔོན་ལ་ནི་རྟག་ཏུ་གུས།། མཆེད་ལ་གདུང་ཞིང་གསང་བ་ཐུབ།། སྔགས་དང་ཕྱག་རྒྱ་རྒྱུན་མི་གཅད།། རིག་པ་ཉིད་དེ་སྐྱེས་པའོ།། ཞེས་གསུངས་པའོ།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། ཐམས་ཅད་ཡོད་པ་དམ་ཚིག་གི་ལེའུ་སྟེ་རྟོག་པ་བརྒྱད་པའོ།།།། དེ་ནས་དེ་བཞིན་གཤེགས་པ་རྣམས་ཀྱིས་སྣ་ཚོགས་རབ་ཏུ་གསལ་བ་ཞེས་བྱ་བ་འདི་གསུངས་སོ།། འགྲོ་བའི་འཁོར་ལོ་མཆོད་པ་ནི། ། ཡོངས་གྲུབ་འདོད་ཡོན་ལྷ་སྐུར་གསལ།། གཞན་ཡང་འདོད་ཡོན་ལྷ་མོར་བཅས།། རིགས་དྲུག་ལྷ་ཚོགས་རྣམ་པར་མཆོད།། འདུག་པའི་འཁོར་ལོ་བསྒོམ་པ་ནི།། དཔྲལ་བ་མགྲིན་པ་སྙིང་ག་སྤྱི། ། ལྟེ་བ་ལྐོག་མ་གསང་བ་རུ།། རྣལ་འབྱོར་འཁོར་ལོ་དྲུག་བསྒོམ་སྟེ།། ལག་པ་གཟར་བུ་རྣམ་གཉིས་ཀྱིས།། ལུས་ཀྱི་དཀྱིལ་འཁོར་མཆོད་ནས་ནི།། ཡེ་ཤེས་མེས་ནི་བག་ཆགས་བསྲེག། ཐལ་བ་བཤང་ལམ་ལས་ཕྱུང་བ། ། ནང་གི་སྦྱིན་སྲེག་མཆོད་པའོ།། ཕྲིན་ལས་འཁོར་ལོ་བསྒོམ་པ་ནི།། དགེ་དང་མི་དགེ་ལུང་མ་བསྟན།། ལུས་ངག་སྤྱོད་པ་རྣམ་དག་པ།། འོད་གསལ་ཆོས་སྐུ་བསྒོམ་པར་བྱ།། ཕྲིན་ལས་སྒྲིབ་དག་མཆོད་པའོ། ། ཉམས་ཆགས་སྐོང་བའི་འཁོར་ལོ་བསྐོར་བ་ནི།། རིགས་དྲུག་ལྷ་ཡི་ཐུགས་ཀ་རུ།། རྟ་མཆོག་འཁོར་ལོ་ཉིད་བསྒོམས་ནས།། དེ་ལ་དབང་ལྔ་བསྐུར་བྱས་ན།། ཉམས་པ་དག་པར་བྱེད་པ་སྟེ།། དམ་ཚིག་ཉམས་པ་དབང་བསྐུར་མཆོད་པའོ། ། རྟོག་པ་འཁྲུལ་པའི་འཁོར་ལོ་བསྒོམ་པ་ནི།། རྣམ་རྟོག་ཤས་ཆེའི་རྣལ་འབྱོར་པས།། ཁྲུས་ཀྱི་འཁོར་ལོ་བསྒོམ་པ་སྟེ།། རིགས་དྲུག་མདུན་དུ་འཁོར་ལོ་དྲུག། བུམ་པ་དྲུག་ནི་རྫས་དང་ལྡན། ། ལྷ་བསྒོམས་སྔགས་ནི་གྲངས་རྫོགས་ནས།། བཀྲུས་པས་འདག་པའི་མཆོད་པའོ།། ལེ་ལོ་གཞོམ་པའི་འཁོར་ལོ་ནི།། ལེ་ལོ་ཤས་ཆེའི་རྣལ་འབྱོར་པས།། རྒྱུན་ཆད་མེད་པ་ཐུན་བཞི་རུ།། ལྷ་ཡི་འཁོར་ལོ་སྤྲོ་བསྡུ་བསྒོམ། ། ལྡང་བ་སྤྲུལ་པའི་སྐུ་ཡིན་སྟེ།། རྨི་ལམ་ལོངས་སྤྱོད་རྫོགས་པའི་སྐུ།། གཉིད་ལོག་ཆོས་སྐུར་བསྒོམ་པར་བྱ།། ལེ་ལོ་འཇོམས་པའི་མཆོད་པའོ།། ཡིད་སྐྱོ་གསང་བའི་འཁོར་ལོ་ནི།། ཡིད་ནི་སྐྱོ་བའི་རྣལ་འབྱོར་པས། ། རྒྱུན་དུ་ལྷ་ཡི་རྣལ་འབྱོར་གོམས།། དང་པོའི་ལས་ཀྱི་རྣལ་འབྱོར་པས།། གྲངས་དུས་མཚན་མའི་བསྙེན་པ་སྐྱོལ།། ཡིད་སྐྱོ་བསེང་བའི་མཆོད་པའོ།། མི་བརྟན་པ་ཡི་འཁོར་ལོ་ནི།། མཚན་མ་ཐོབ་པའི་རྣལ་འབྱོར་པས། ། མཚན་མ་བརྟན་པར་བསྒོམ་པར་བྱ།། བརྟན་པ་ཐོབ་པའི་མཆོད་པའོ།། བརྟན་པ་ཡང་དག་སྦྱོར་བའི་འཁོར་ལོ་ནི།། མཚན་ཐོབ་མངོན་ཤེས་སྐྱེས་པའི་རྣལ་འབྱོར་པས།། མཆོག་གི་དངོས་གྲུབ་ཡང་དག་ཡེ་ཤེས་བསྒོམ། ། ཡང་དག་དབང་བར་བསྒོམ་པའི་མཆོད་པའོ།། འདི་ལྟར་གནས་པའི་རྣལ་འབྱོར་གང་ཡིན་པ།། རབ་ནི་སྐུ་ལྔ་ལྷུན་གྲུབ་ཐོབ།། འབྲིང་ནི་རིག་འཛིན་རྣམ་བཞིའི་ལུས།། ཐ་མ་ལྷ་མིའི་མཚན་རྫོགས་པ། ། འགྲུབ་པར་འགྱུར་བ་གདོན་མི་ཟ།། ཞེས་གསུངས་སོ།། དེ་ནས་དེ་བཞིན་གཤེགས་པ་ཐམས་ཅད་ཀྱིས་འདི་གསུངས་སོ།། རང་གི་ལྷ་ཡི་རྣལ་འབྱོར་པས།། གདོང་རྒྱན་གོན་ཏེ་བསྒྲུབ་པ་ནི། ། གསང་སྔགས་བརྗོད་ན་འགྲུབ་པ་སྟེ།། ཨོཾ་ཊཱཾ་ཀི་ཧཱུཾ་ཛ། ལྷར་གསལ་ཉིན་རེ་དེ་བརྗོད་ན།། རྡོ་རྗེ་སེམས་དཔའི་དངོས་གྲུབ་ཐོབ།། རྡོ་རྗེ་མཁའ་འགྲོའི་དངོས་གྲུབ་ནི།། བདེ་མཆོག་མ་ཡི་ཏིང་འཛིན་གྱིས།། ཙྪིར་བཟླས་བསྒྲུབ་བྱའི་སྙིང་གཅོད་འགྱུར། ། རྡོ་རྗེ་མཁའ་འགྲོའི་རྣལ་འབྱོར་གྱིས།། ཙི་གིས་བསྒྲུབ་བྱའི་སྙིང་བཅད་ནས།། ཨོཾ་ཙྪི་དཾ་ཙྪི་དཾ་ཧཱུཾ་ཕཊ། བཟླས་ན་བསྒྲུབ་བྱ་གང་ཡིན་པ།། མ་ཤིའི་བར་དུ་འགུགས་པར་བྱེད། ། ཁྲག་འཐུང་ཆེན་པོ་སྨེ་ཤ་ནི།། བསྒོམས་ཏེ་འདི་ཉིད་ངག་ཏུ་བརྗོད། ཨོཾ་ཤུཥྐི་མུ། བཟླས་ན་མཁའ་འགྲོ་ཐམས་ཅད་འགྲུབ།། བྱིན་རླབས་མངོན་སུམ་ལམ་མཁས་པ།། རྣལ་འབྱོར་ཅན་གྱི་སྒྲུབ་པ་པོས། ། ཨོཾ་ཌཱཀྐི་ནི་ཧཱུཾ་ཛ། བཟླས་ན་ཉེས་པ་ཀུན་ལས་གྲོལ།། རིགས་དྲུག་བསྒོམ་པའི་རྣལ་འབྱོར་པས།། དགེ་བའི་བརྟུལ་ཞུགས་བྱས་ནས་ནི།། སྭོ་བསྡམས་ལྕེ་རྩེ་རྐན་གཏད་ནས།། ཨོཾ་ཨཱཿཧཱུཾ་ཞེས་བརྗོད་ན།། རྡོ་རྗེའི་བཟླས་པ་དེ་ཡིས་ནི། ། རྒྱལ་བ་ཀུན་གྱི་སྐུ་གསུང་ཐུགས།། ཐིག་ལེ་སྟོང་པ་ཡི་གེ་གསུམ།། ཀུན་དང་མཐུན་པ་དེ་ཉིད་ཐོབ།། བཞེངས་བཞུགས་སྤྱོད་ལམ་ཐམས་ཅད་དུ།། ཧཱུཾ་ལས་བྱུང་བའི་ཧེ་རུ་ཀ། མཐིང་ནག་ཞལ་གཅིག་ཕྱག་བཞི་པ། ། སྟོང་ཉིད་རྡོ་རྗེ་ཐབས་ཀྱི་མདའ།། སྐུ་ཡི་ཁ་ཊྭཱཾ་ཤེས་རབ་གཞུ།། རང་གི་ཕྱག་ཏུ་རྣམ་པར་འཛིན།། ཀོའུ་རི་ལ་སོགས་མ་མོ་བརྒྱད།། ཟླ་གམ་དགུ་པའི་དཀྱིལ་འཁོར་མཆོག། འབྲུ་བརྒྱད་བསྙེན་པ་ངག་ཏུ་བརྗོད། ། སྔགས་འདིས་ཡོངས་རྫོགས་ཆུ་བུར་བ།། ཨཱ+ོཾ་བཛྲ་ཤྲཱྀ་ཧེ་རུ་ཀ་མ་དྷ་སརྦ་དུཥྟན།། སྐུར་གསལ་རྣལ་འབྱོར་དེ་ཉིད་ལ།། བཀའ་ཉན་གོ་བསྒོས་བཅིངས་པ་ན།། བགེགས་ཀྱི་སྦྱོར་བ་ཀུན་དང་བྲལ། ། ཀཾ་ལས་རྡོ་རྗེ་གོ་ཁྲབ་སྟེ།། ཧཾ་ཞེས་རྡོ་རྗེ་རྒྱུན་ཐག་བསྡམས།། ཨཱ+ོཾ་ལས་རིན་ཆེན་ཧཱུཾ་རིན་ཆེན།། ཐག་གཉིས་མཛུབ་གུ་ལ་བཅིང་ངོ།། རཏྣ་མཱ་ལེ་ཨ་བྷི་ཥཱིཉྩ། རིན་ཆེན་ཕྲེང་བས་བཅིང་བ་དང། པ་ཊ་ལཾ། དར་དཔྱངས་དཀར་པོ་གཡས་སུ་འཕུར། ། ཨ་བྷི་ཥིཉྩ་ལཾ། དར་དཔྱངས་དམར་པོ་གཡོན་དུ་འཕུར་བའོ།། དུར་ཁྲོད་ཐོད་པའི་ཁང་པ་རུ།། ཧཱུཾ་ཡིག་རྡོ་རྗེ་ཡོངས་གྱུར་པས།། ཨོཾ་ཤྲཱི་ཧེ་རུ་ཀ་ཧཱུཾ་ཞེས་པ། བརྗོད་འགྱིང་ནག་པོ་རྡོ་རྗེ་འཕྱར། ། དུང་དམར་བ་དན་ཁ་ཊྭཱཾ་བཅས།། ཨཱ+ོཾ་བཛྲ་ཧེ་རུ་ཀ་ཀྵ་པ་རུ་ལུ་རུ་ལུ་ཧཱུཾ་བྷྱོ་ཧཱུཾ། གསང་སྔགས་འདི་ལ་གནས་གྱུར་ན།། ད་ལྟ་ཉིད་དུ་སངས་རྒྱས་པའོ།། ཞེས་གསུངས་སོ།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། ལས་སྣ་ཚོགས་པར་ལས་ཀྱི་ཕྲེང་བའི་ལེའུ་སྟེ་རྟོག་པ་དགུ་པའོ།།།། དེ་ནས་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཡོངས་སུ་བརྗོད་པ་ཞེས་བྱ་བ་འདི་གསུངས་སོ།། ཨོཾ་མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད།། ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ།། དྲི་མེད་མི་གཡོ་མཉམ་ཉིད་དམ་པའི་མཆོག་ཆོས་ཅན། ། ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ།། དཔེ་ནི་ནམ་མཁའ་ལ་ཡང་ཀུན་ཏུ་ཡོད་པ་མིན།། དངོས་གྲུབ་མཐའ་ཡས་མཉམ་མེད་དཔེ་དང་བྲལ་བའི་རྣམས།། སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང།། སྨོན་ལམ་འགྲུབ་པ་འགག་པ་མེད་པའི་ཆོས་ཉིད་ཅན།། འགྲོ་བའི་དོན་གྲུབ་རབ་ཏུ་བརྩོན་པ་མཐའ་ཡས་པ། ། ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང།། ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི།། བདེ་བར་གཤེགས་པའི་གོ་འཕང་དམ་པ་ཤིན་ཏུ་མཉེས་གྱུར་ཀྱང།། ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། ། ཐུགས་རྗེའི་སྤྱོད་པ་མི་གཡོ་འགག་པར་ཡང་མི་འགྱུར།། ཨེ་མ་ཧོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན།། མཆོག་སྦྱིན་རྣམས་ཀྱི་ནང་ན་གོ་འཕང་མཆོག་མཉེས་པས།། ཁམས་གསུམ་ཀུན་ལ་དངོས་གྲུབ་མཆོག་སྩོལ་མཛད་པ་ཡི། ། མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ།། དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ།། ཞེས་གསུངས་སོ།། དེ་ནས་དེ་བཞིན་གཤེགས་པ་ཐམས་ཅད་ཀྱིས་ཤིན་ཏུ་གདུག་པ་འདུལ་བའི་ཚོགས་རྣམས་ལ་ཡོན་ཏན་བསྔགས་པ་འདི་གསུངས་སོ། ། སྒེག་པ་དཔའ་བ་འཇིག་སུ་རུངས་པ་དང།། རྒོད་དང་གཤེ་དང་རྔམས་པའི་ང་རོ་དང།། སྙིང་རྗེ་རྔམ་དང་ངོ་མཚར་ཆེན་པོ་དང། ། སྐུ་ཡི་དངོས་པོ་ཤིན་ཏུ་འགྱུར་བའི་གར།། དུར་ཁྲོད་རུས་པའི་རྒྱན་རྣམས་རབ་ཏུ་མཛད།། ཐེག་མཆོག་གླང་ཆེན་ཀོ་བ་བརྗིད་དང་ལྡན།། ཐབས་མཁས་ཞིང་ཆེན་པགས་པ་མཛེས་པའི་རྒྱན། ། འཇོ་སྒེག་སྟག་གི་པགས་པ་ཆོས་ཉིད་རྒྱན།། རཀྟ་ཐལ་ཆེན་ཞག་གི་མི་སྲིན་དབང་དུ་སྡུད།། བདུད་དང་སྲེན་པོ་ཚར་གཅོད་རཱུ་ཏྲ་སྒྲོལ།། དཔའ་རྟགས་མཚོན་ཆ་ཐབས་ཀྱི་ཡེ་ཤེས་མེ།། བདུད་ཀྱི་བདུད་འཇོམས་བདུད་དཔུང་ཐལ་བར་རློག། དྲག་པོ་དྲག་ཆེན་དྲག་རྒྱལ་ཧེ་རུ་ཀ། མཚན་དཔེས་རྒྱན་ལྡན་འགྲོ་བའི་དོན་མཛད་པ།། སྐུ་ཡི་གར་མཛད་གསང་སྒོར་འགྲོ་བ་འཇུག། ཏུག་ཆོམ་འབྲུག་སྒྲ་སྟང་ཁམས་བགེགས་ས་སྒྲོགས། ། གད་རྒྱངས་གད་མོས་གསང་བའི་བཤུགས་གླུ་ལེན།། རྟག་ཆད་མུ་སྟེགས་འགོག་པ་ཉན་ཐོས་བུ།། དམན་པའི་ཐེག་པ་ལོག་ལྟ་འབྱུང་པོ་འདུལ།། སེང་གེའི་ང་རོས་གཅན་གཟན་གདུག་པ་འདུལ།། ཚངས་པའི་དབྱངས་ཀྱིས་སྐལ་ལྡན་རྣལ་འབྱོར་སྐྱོང། ། ཆོས་འཆད་ལོག་ལྟ་ཚར་གཅོད་བདུད་དྲེགས་འདུལ།། ངན་སོང་སྟོངས་མཛད་ཐར་པའི་ལམ་ལ་འགོད།། ཐུགས་རྗེས་འདྲེན་པ་སྙིང་རྗེའི་རྒྱུན་ཐག་ཅན།། སྨོན་འཇུག་སེམས་ལྔ་བསྐྱེད་ཅིང་ཉོན་མོངས་འདུལ། ། ཞི་དེས་བྱམས་པའི་གསང་བ་ཀུན་ལ་སྒྲོགས།། འདུལ་སྤྲུལ་མ་ངེས་ངེས་པའི་སྐུར་སྟོན་ཅིང།། ངོ་མཚར་གཟུགས་སྣང་ཁང་སྟོང་ནམ་མཁའི་འཇའ།། སེམས་ཅན་དོན་མཛད་འདུལ་སྒོ་ཉོན་མོངས་ཞི། ། རིག་པའི་རྒྱལ་པོ་བླ་མེད་ཧེ་རུ་ཀ། རིག་འཛིན་རྣལ་འབྱོར་དངོས་གྲུབ་མཆོག་སྩོལ་མཛད།། རྣམ་དག་སྐུ་ལྔ་འཇིགས་པས་ནམ་མཁའ་འདྲ།། ཤ་དང་ཁྲག་མེད་སྟོང་པ་ཡེ་ཤེས་སྐུ། ། གདོས་བཅས་དུག་འཇོམས་དཔའ་བོ་འཇིགས་པ་བྲལ།། སྐུ་གསུང་ལྷུན་གྲུབ་བརྡལ་བ་ཐིག་ལེ་ཆེ།། སྣང་སྟོང་དབྱེར་མེད་ཤེས་རབ་ཐབས་ལྡན་སྐུ།། འཁོར་དང་མྱ་ངན་འདས་པ་རྫོགས་པར་རོལ། ། རྒྱུད་ཀྱི་རྒྱལ་པོ་ཆེན་པོ་སངས་རྒྱས་མཉམ་སྦྱོར་ལས།། ཡོན་ཏན་ཡོངས་སུ་བརྗོད་པའི་ལེའུ་སྟེ་རྟོག་པ་བཅུ་པའོ།།།། དེ་ནས་དེ་བཞིན་གཤེགས་པ་སྲས་སངས་རྒྱས་བྱང་ཆུབ་སྐལ་ལྡན་མ་དང། ཞལ་བཟང་མ་དང། ཀུན་བཟང་མ་དང།། མི་བཟང་མ་དང། སྤྲིན་ཆེན་མ་དང། ནམ་མཁའ་སྤྱན་མ་དང། སངས་རྒྱས་དབྱངས་མ་དང། དབང་མོ་དང། བདེ་མཆོག་མ་དང། ཨེ་མ་བདེ་བ་དང། སྒྲོལ་མ་དང། ཟླ་བ་མོ་དང། སངས་རྒྱས་བྱང་ཆུབ་མ་དང། ཆོས་ཀྱི་འཁོར་ལོ་མ་དང། ཀུན་བཟང་མ་དང། ཀཽ་རི་མ་དང། ཙཽ་རི་དང། ཕྲ་མོ་ཧ་དང། བེ་ཏཱ་ལི་དང། པུཀྐ་སི་དང། གྷསྨ་རི་དང། ཙནྡྷ་ལི་དང། སྨ་ཤ་ནི་དང། མདའ་འཛིན་མ་དང། ཁ་ཊྭཱཾ་འཛིན་མ་དང། འཁོར་ལོ་འཛིན་མ་དང། སྣ་ཚོགས་བ་དན་འཛིན་མ་དང། དབང་སྐུར་མ་དང། གཏེར་ལྡན་མ་དང། རྒྱལ་མཚན་མཆོག་དང། མཆོད་རྟེན་མ་དང། མདའ་གཞུ་འཛིན་མ་དང། རལ་གྲི་འཛིན་མ་དང། ཉི་མ་འཛིན་མ་དང། སྦྱིན་སྲེག་མ་དང། རྣམ་གཟིགས་མ་དང། སྒྲོལ་མ་རི་མི་དང།། ས་འཛིན་མ་དང། ཁྲོ་གཉེར་མ་དང། གཏུམ་པའི་དབང་ཕྱུག་མ་དང། སྣ་ཚོགས་པདྨ་དང། པདྨའི་ན་བཟའ་མ་དང། འདོད་པའི་དབང་མོ་དང། སྣ་ཚོགས་པདྨ་རྒྱ་གྲམ་མ་དང། སྣ་ཚོགས་རྡོ་རྗེ་མ་དང། གླིང་བུ་མ་དང། བི་ཝང་མ་དང། རྔ་ཆེན་མ་དང། རྫ་རྔ་མ་དང། མེ་ཏོག་མ་དང། བདུག་པ་མ་དང། མར་མེ་མ་དང། དྲི་ཆབ་མ་དང། ལ་སྱཱ+ེ་མ་དང། མཱ་ལེ་མ་དང། གཱིརྟི་མ་དང། ནཱིརྟི་མ་དང། གཟུགས་རྡོ་རྗེ་མ་དང། སྒྲ་རྡོ་རྗེ་མ་དང། དྲི་རྡོ་རྗེ་མ་དང། རོ་རྡོ་རྗེ་མ་དང། ལྕགས་ཀྱུ་འཛིན་མ་དང། ཞགས་པ་འཛིན་མ་དང། ལྕགས་སྒྲོག་འཛིན་མ་དང། དྲིལ་བུ་འཛིན་མ་དང། གཞན་ཡང་དཔའ་བོ་ཐམས་ཅད་དང།། དཔའ་མོ་ཐམས་ཅད་དང།། རིག་འཛིན་ཐམས་ཅད་དང།། བྱང་ཆུབ་སེམས་དཔའི་རིགས་སུ་གྱུར་པ་ཐམས་ཅད་དང། གསང་བའི་རིགས་སུ་གྱུར་པ་ཐམས་ཅད་ཀྱིས།། མཉེས་པ་ཆེན་པོའི་མཆོད་པས་མཆོད་དོ།། རྟོག་པའི་རྒྱལ་པོ་ཉིད་ལ་རྗེས་སུ་ཡི་རང་བར་མཛད་པའི་ཕྱིར། ཉིད་ལ་ཉིད་སྣང་ངོ།། ཉིད་ལ་ཉིད་སྤྱོད་དོ།། ཉིད་ལ་ཉིད་གནས་སོ། ། ཉིད་ལ་ཉིད་སྡུད་དོ།། ཉིད་ལ་ཉིད་སྤེལ་ལོ།། ཉིད་ལ་ཉིད་སྒྲོགས་སོ།། ཡོངས་སུ་སྤྲོའོ།། ཤིན་ཏུ་སྤྲོའོ།། ཡོངས་སུ་ཤིན་ཏུ་སྤྲོའོ།། སྤྲོ་བ་དེ་ཉིད་དབྱེར་མེད་པར་གྱུར་ཏེ། གཞི་འདུས་པའི་རྒྱུད་བསྟན་ཏོ། ། ལམ་སྤྲོས་པའི་རྒྱུད་དུ་སྟོན་ཏོ།། འབྲས་བུ་ཡོངས་སུ་འདུས་པའི་རྒྱུད་དུ་སྟོན་ཏོ།། མང་དུ་བསྐྱེད་པའི་རྒྱུད་དུ་བསྟན་ཏོ།། ཉུང་དུ་སྡུད་པའི་རྒྱུད་དུ་བསྟན་ཏོ།། ཡོངས་སུ་འདུས་པ་རྩ་བར་བསྟན་ཏོ།། ཡོངས་སུ་བཀོད་པ་བཤད་པར་བསྟན་ཏོ། ། ལྐོག་ཏུ་གྱུར་པར་སྟོན་པ་ཁ་སྐོང་བསྟན་ཏོ།། མདུད་པ་དགྲོལ་བར་དཀའ་བ་གཅོད་པར་བསྟན་ཏོ།། དེས་དེ་བཞིན་དུ་གསུངས་སོ།། དེ་ནས་དེ་བཞིན་དུ་མཁྱེན་ཏོ། ། དེ་རྣམས་དེ་བཞིན་དུ་ཡི་རང་བར་གྱུར་ཏོ།། མངོན་པར་འདུད་པར་གྱུར་ཏོ།། དེ་ཉིད་དེ་བཞིན་དུ་གྱུར་ཏོ།། དེ་ཉིད་དེ་བཞིན་སྡུད་དོ།། དེ་ཉིད་དེ་བཞིན་བསྡུས་ནས་དེ་བཞིན་དུ་གསུངས་སོ།། ཡོངས་སུ་གསུངས་སོ། ། རྣམ་པར་གསུངས་སོ།། དེ་ཉིད་གསུངས་པ་བཞིན་འཛིན། ཡོངས་སུ་འཛིན་ཏོ།། རྣམ་པར་འཛིན་ཏོ།། རྒྱུད་ཀྱི་རྒྱལ་པོ་སངས་རྒྱས་མཉམ་སྦྱོར་ལས། ཡོངས་སུ་བཀོད་པའི་རྟོག་པ་ལ་རྗེས་སུ་ཡི་རང་ཞིང་བསྟན་པ་གཏད་པའི་ལེའུ་སྟེ་རྟོག་པ་བཅུ་གཅིག་པའོ། །།། སྡུད་པའི་རྒྱུད་དམ་པ་གསང་ཆེན་གྱི་རྟོག་པ། སངས་རྒྱས་ཐམས་ཅད་དང་མཉམ་པར་སྦྱོར་བ་ཞེས་བྱ་བ། མཁའ་འགྲོ་སྒྱུ་མ་བདེ་མཆོག། དུས་གསུམ་སངས་རྒྱས་ཐམས་ཅད་ཀྱི་སྐུ་འདུས་པ་ཆེན་པོའི་རང་བཞིན་སངས་རྒྱས་མཉམ་སྦྱོར་གྱི་རྒྱུད་རྫོགས་སོ། ། རྒྱ་གར་གྱི་པཎྜི་ཏ་གྷུ་ཧྱ་གསང་བ་དང། བོད་ཀྱི་ལོ་ཙྪ་བ་འབྲོག་མི་དཔལ་གྱི་ཡེ་ཤེས་ཀྱིས་བལ་ཡུལ་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །།།
CLOSE WINDOW