| Wylie |
རྒྱ་གར་སྐད་དུ། སརྦ་ཏ་ཐཱ་ག་ཏ་ཙིཏྟ་གུ་ཧྱ་ཛྙཱ་ན་ཨ་རྠ་ག་རྦྷ་ཀྲོ་དྷ་བཛྲ་ཀུ་ལ་ཏནྟྲ་པིཎྜཱརྠ་བིདྱཱི་ཡོ་ག་སདྡྷི་ན་མ་མ་ཧཱ་ཡཱ་ན་སཱུ་ཏྲ?། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་དོན་གྱི་སྙིང་པོ་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་རྣལ་འབྱོར་གྲུབ་པའི་རྒྱུད་ཅེས་བྱ་བ་ཐེག་པ་ཆེན་པོའི་མདོ། བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་དཔལ་ཀུན་དུ་བཟང་པོ་རྡོ་རྗེ་སང་ཧེ་རུ་ཀ་གསང་བ་མཆོག་གི་བདག་པོ་བྱིན་གྱིས་བརླབས་ཀྱི་དབང་ཕྱུགམི་ཟད་མཛོད་ཀྱི་བཀོད་པ། ཆེ་བའི་དོན་ལ་དམ་པའི་སྤྱོད་པས་བསྐྱོད་པ་དེ། རྨད་དུ་བྱུང་བའི་དོན་འདི་ཉིད་བཤད་པའི་གནས་གསང་བའི་ཡང་གསང་བ་ཀུན་གཞི་ཆོས་ཀྱི་དབྱིངས་ཀྱི་ཕོ་བྲང་ཐིག་ལེ་བདལ་བའི་ཀློང། ཡེ་འབྱམ་རྨད་དུ་གྲགས་པའི་གཞལ་ཡས་རྒྱ་ཕྱོགས་སུ་ཡོགས་སུ་མ་ཆད་པ། ཆོས་ཉིད་ཀྱི་ནམ་མཁའ་ལས་ཆོ་འཕྲུལ་གྱི་སྤྲིན་ཀུན་དུ་འཐིབས་པ་བྱང་ཆུབ་ཀྱི་ཆར་མངོན་པར་འབབ་པ། ཉོན་མོངས་པའི་གདུང་བ་བངས་པར་གྱུར་པ། ཡེ་ཤེས་ཀྱི་མྱུ་གུ་མངོན་པར་བསྐྱེད་པ་མཐའ་དང་དབུས་མེད་པ། རྩེ་མོ་ཀུན་དུ་རྒྱ་མཉམ་པ། རིན་པོ་ཆེའི་རྒྱལ་པོས་རྣམ་པར་བརྒྱན་པ། མི་ཏིག་གི་ལྕང་ལོ་དང། ཆུན་འཕྱང་དང། ལྔ་ལྡིས་མཛེས་པ། ཉི་མ་ཆེན་པོས་གསལ་བཏབ་པ། ཟླ་བ་ཆེན་པོས་ཕྲ་བཀོད་པ། སྐར་མ་དང་ཤིན་ཏུ་སྐར་མ་དག་གིས་བཟེར་སྤྲས་པ། རྡོ་རྗེ་རིན་པོ་ཆེའོ་འོད་སྣང་བས་ཀུན་དུ་མདངས་ཕྱུང་བའི་མཁའ་ལ། རླུང་ནག་གི་ཕུང་པོ་རྒྱ་ཡོངས་སུ་མ་ཆད་པ་མཉམ་པ། ཁྲག་གི་ཕུང་པོ་དབའ་ཀློང་དུ་འཁྲུག་པ། རྒྱ་ཕྱོགས་སུ་ཡོངས་སུ་མ་ཆད་པ། མ་ཏང་གི་གནས་དང། པིས་མ་འབུར་འཕང་བར་ཆགས་པ། རུས་པ་ཕུང་པོ་རྒྱ་ཀུན་དུ་མཉམ་པའི་གཞི་ལ་འབར་བའི་གཞལ་ཡས་ཁང་འོད་ཟེར་ཀུན་ཏུ་འཕྲོ་བ། ག་བུ་ཅུང་བརྩེགས་པའི་རྩིག་པ་ལ། གནམ་ལྕགས་ཀྱི་གཟེར་ཏ་ལེ་བར་བཏབ་པ། རྩིབས་ཀུན་དུ་ཉི་མ་དང་ཟླ་བ་རངས་པ་དང་མ་རངས་པ་འཕྱོ་བ། ཉ་ཆེན་པོའི་ཀ་གདུང་ལ་ཉ་ཕྲན་དྲལ་དྲབ་གཏམས་པ། ཟླ་བའི་ཀ་རྟེན་དང། ཉི་མའི་ཀ་ལོ་དང། སྦྲུལ་ཆུན་གྱི་ཀ་རྒྱན་ལ་སོགས་པ། ཧཱུ~ཾ་གི་ཐོག་དང། མེའི་ཆར་མངོན་པར་འབབ་པ། ཆོས་ཉིད་ཀྱི་བླ་རེས་རྣམ་པར་བརྒྱན་པ། ཡེ་ཤེས་ཀྱི་ལྡ་ལྡིས་མངོན་པར་བྲེས་པ། རྡོ་རྗེའི་རྒྱན་དང་འཕན་གྱིས་བཀླུབས་པ། སྦྲུལ་ནག་གི་ཟ་ར་ཚགས་དང། སྤྲིན་ནག་གི་གྲིབ་སོ་ལྟ་བུས་གཞོལ་བའི་བར་བར་ཐམས་ཅད་ན་རིན་པོ་ཆེ་དང། མུ་ཏིག་དང། མེ་ཏོག་གིས་མཛེས་པ། འཁོར་བའི་མཎྜལ་ཡོ་བཀྲམ་ལ་བམ་རིལ་ཆེ་ཆུང་དང། ཁོག་སྐམ་སྟོད་སྨད་དང། ཡན་ལག་རིང་ཐུང་དང། དབང་པོའི་ཕྲེང་བ་དང། རྡོ་རྗེས་ཀུན་དུ་སྤྲས་པ། སྒོ་དགུས་ཀུན་དུ་གསལ་བར་གྱུར་པའི་གནས་ན་རྡོ་རྗེ་རྒྱལ་ཚབ་ཅེས་བྱ་བའི་ཞེས་སྡང་རྡོ་རྗེ་དང། རྡོ་རྗེ་གོ་ཕུད་ཞེས་བྱ་བའི་ང་རྒྱལ་རིན་ཆེན་དང། རྡོ་རྗེ་གིང་ཞེས་བྱ་བའི་འདོད་ཆགས་པདྨོ་དང། རྡོ་རྗེ་ཀརྨ་ཞེས་བྱ་བའི་ཕྲག་དོག་སྣ་ཚོགས་དང། རྡོ་རྗེ་བྱ་རོག་ཅེས་བྱ་བའི་དྲོད་ཀྱི་རྟགས་འཛིན་དང། རྡོ་རྗེ་དུས་མཚམས་ཞེས་བྱ་བའི་མཐུན་འཇུག་གི་བཀའ་སྡོད་དང། རྡོ་རྗེ་སྤུན་ཐམས་ཅད་དང། རྡོ་རྗེ་མིང་ཐམས་ཅད་དང། རྡོ་རྗེ་རིག་འཛིན་ཐམས་ཅད་དང། རྡོ་རྗེ་ལུས་ཐམས་ཅད་དང། རྡོ་རྗེ་རྣལ་འབྱོར་ཐམས་ཅད་དང། རྡོ་རྗེ་ངག་ཐམས་ཅད་དང། རྡོ་རྗེ་ལས་ཐམས་ཅད་དང། རྡོ་རྗེ་ཡིད་ཐམས་ཅད་དང། རྡོ་རྗེ་མ་ཐམས་ཅད་དང། རྡོ་རྗེ་གིང་ཐམས་ཅད་དང། རྡོ་རྗེ་མཁའ་འགྲོ་ཐམས་ཅད་དང། རྡོ་རྗེ་ཤུགས་ཀྱིས་འགྲོ་བ་ཐམས་ཅད་དང། རྡོ་རྗེ་ཕྲ་མེན་མ་ཐམས་ཅད་དང། རྡོ་རྗེ་ཀུན་ཏུ་འབར་མ་ཐམས་ཅད་དང། རྡོ་རྗེ་གནོད་སྦྱིན་ཐམས་ཅད་དང། རྡོ་རྗེ་སྲིན་མོ་ཐམས་ཅད་དང། རྡོ་རྗེ་སླས་དང། བྱི་མོ་དང། བྲན་མོ་ལ་སོགས་པ་བུད་མེད་ཐམས་ཅད་དང། རྡོ་རྗེ་མངག་པ་ལ་སོགས་པའི་རྡོ་རྗེ་ཁྲོ་བོ་ཐམས་ཅད་འདུ་བར་གྱུར་པ། རྡོ་རྗེ་རིགས་ཀྱི་སངས་རྒྱས་ཐམས་ཅད་དང། འགྱིང་བག་གི་ཚུལ་གྱིས་བསྙེངས་པ་མི་མངའ་བར་རྡོ་རྗེའི་གནད་ལ་འཁོར་མང་པོ་དང་ཐབས་ཅིག་ཏུ་བཞུགས་པ་ནི་འདི་ལྟ་སྟེ། ཆོ་འཕྲུལ་ཆེན་པོ་ནམ་མཁའི་དབང་ཕྱུག་ཅེས་བྱ་བའི་སངས་རྒྱས་དང། ཆོ་འཕྲུལ་ཆེན་པོ་རྣམ་གྲོལ་སྦྱིན་པ་ཞེས་བྱ་བའི་སངས་རྒྱས་དང། ཆོ་འཕྲུལ་ཆེན་པོ་རྣམ་གྲོལ་སྒྲོགས་པ་ཞེས་བྱ་བའི་སངས་རྒྱས་དང། ཆོ་འཕྲུལ་ཆེན་པོ་ཐམས་ཅད་གྲུབ་པ་ཞེས་བྱ་བའི་སངས་རྒྱས་དང། ནམ་མཁའི་བུ་མོ་དབང་མོ་ཞེས་བྱ་བའི་རྣལ་འབྱོར་མ་ཆེན་མོ་དང། ནམ་མཁའི་བུ་མོ་དགའ་སྡུད་མ་ཞེས་བྱ་བའི་རྣལ་འབྱོར་མ་ཆེན་མོ་དང། ནམ་མཁའི་བུ་མོ་རྣམ་པར་གདུང་མ་ཞེས་བྱ་བའི་རྣལ་འབྱོར་མ་ཆེན་མོ་དང། ནམ་མཁའི་བུ་མོ་སྒྲོལ་མ་ཞེས་བྱ་བའི་རྣལ་འབྱོར་མ་ཆེ་མོ་ལ་སོགས་ཏེ། ཤིན་ཏུ་གསང་བ་ཆེན་པོའི་འཁོར་དང། གཞན་ཡང་དམ་ཚིག་ཆེན་པོའི་འཁོར་འདི་ལྟ་སྟེ། དམ་ཚིག་ཆེན་པོ་རྡོ་རྗེའི་སྙིང་པོ་ཞེས་བྱ་བའི་སངས་རྒྱས་དང། དམ་ཚིག་ཆེན་པོ་ནོར་བུའི་སྙིང་པོ་ཞེས་བྱ་བའི་སངས་རྒྱས་དང། དམ་ཚིག་ཆེན་པོ་པདྨའི་སྙིང་པོ་ཞེས་བྱ་བའི་སངས་རྒྱས་དང། དམ་ཚིག་ཆེན་པོ་བཀོད་པའི་སྙིང་པོ་ཞེས་བྱ་བའི་སངས་རྒྱས་དང། དམ་ཚིག་ཆེན་མོ་རྡོ་རྗེ་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། དམ་ཚིག་ཆེན་མོ་ནོར་བུའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། དམ་ཚིག་ཆེན་མོ་པདྨའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། དམ་ཚིག་ཆེན་མོ་རྒྱན་གྱི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་ལ་སོགས་ཏེ། ཤིན་ཏུ་མི་འདའ་བ་ཆེན་པོའི་འཁོར་དང། གཞན་ཡང་ཚད་མེད་པའི་འཁོར་འདི་ལྟ་སྟེ། གསང་བ་ཆེན་པོ་བྱམས་པའི་སྙིང་པོ་ཞེས་བྱ་བའི་སངས་རྒྱས་དང། གསང་བ་ཆེན་པོ་སྙིང་རྗེའི་སྙིང་པོ་ཞེས་བྱ་བའི་སངས་རྒྱས་དང། གསང་བ་ཆེན་པོ་དགའ་བའི་སྙིང་པོ་ཞེས་བྱ་བའི་སངས་རྒྱས་དང། གསང་བ་ཆེན་པོ་བཏང་སྙོམས་ཀྱི་སྙིང་པོ་ཞེས་བྱ་བའི་སངས་རྒྱས་དང། གསང་བ་ཆེན་པོ་བདེ་བའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། གསང་བ་ཆེན་མོ་འཇོམས་བྱེད་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། གསང་བ་ཆེན་མོ་དགའ་བའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། གསང་བ་ཆེན་མོ་ཁྱབ་པའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང། ཤིན་ཏུ་ཚད་མེད་པའི་ཁོར་དང། གཞན་ཡང་རོལ་པ་ཆེན་པོའི་འཁོར་འདི་ལྟ་སྟེ། རོལ་པ་ཆེན་པོའི་སངས་རྒྱས་ཡཀྵ་ཧེ་རུ་ཀ་ཞེས་བྱ་བ་དང། རོལ་པ་ཆེན་པོའི་སངས་རྒྱས་རཀྵ་ཧེ་རུ་ཀ་ཞེས་བྱ་བ་དང། རོལ་པ་ཆེན་པོའི་སངས་རྒྱས་བི་ཤྭ་ཧེ་རུ་ཀ་ཞེས་བྱ་བ་དང། རོལ་པ་ཆེན་མོའི་རྣལ་འབྱོར་མ་ཡཀྵ་ཤོ་རི་ཀ་ཞེས་བྱ་བ་དང། རོལ་པ་ཆེན་མོའི་རྣལ་འབྱོར་མ་རཀྵ་ཤོ་རི་ཀ་ཞེས་བྱ་བ་དང། རོལ་པ་ཆེན་མོའི་རྣལ་འབྱོར་མ་བྷིག་ཤ་ཤོ་རི་ཀ་ཞེས་བྱ་བ་དང། རོལ་པ་ཆེན་མོའི་རྣལ་འབྱོར་མ་བི་ཤྭ་ཤོ་ར་ཀ་ཞེས་བྱ་བ་དང། ཤིན་ཏུ་རོལ་པ་ཆེན་པོའི་འཁོར་དང། གཞན་ཡང་འཇིགས་བྱེད་ཆེན་པོའི་འཁོར་འདི་ལྟ་སྟེ། འཇིགས་བྱེད་ཆེན་པོའི་སངས་རྒྱས་ཏེ་ཤ་ཧེ་རུ་ཀ་ཞེས་བྱ་བ་དང། འཇིགས་བྱེད་ཆེན་པོའི་སངས་རྒྱས་ཀེ་ཤ་ཧེ་རུ་ཀ་ཞེས་བྱ་བ་དང། འཇིགས་བྱེད་ཆེན་པོའི་སངས་རྒྱས་པ་ཤ་ཧེ་རུ་ཀ་ཞེས་བྱ་བ་དང། འཇིགས་བྱེད་ཆེན་པོའི་སངས་རྒྱས་བི་ཤྭ་ཧེ་རུ་ཀ་ཞེས་བྱ་བ་དང། འཇིགས་བྱེད་ཆེན་མོའི་རྣལ་འབྱོར་མ་ཏེ་ཤ་ཤོ་རི་ཀ་ཞེས་བྱ་བ་དང། འཇིགས་བྱེད་ཆེན་མོའི་རྣལ་འབྱོར་མ་ཀེ་ཤྭ་ཤོ་རི་ཀ་ཞེས་བྱ་བ་དང། འཇིགས་བྱེད་ཆེན་མོའོ་རྣལ་འབྱོར་མ་པེ་ཤྭ་ཤོ་རི་ཀ་ཞེས་བྱ་བ་དང། འཇིགས་བྱེད་ཆེན་མོའི་རྣལ་འབྱོར་མ་བི་ཤྭ་ཤོ་རི་ཀ་ཞེས་བྱ་བ་ལ་སོགས་པ་ཤིན་ཏུ་འཇིགས་བྱེད་ཆེན་པོའི་འཁོར་དང་གཞན་ཡང་འཇོམས་བྱེད་ཆེན་པོའི་འཁོར་འདི་ལྟ་སྟེ། འཇོམས་བྱེད་ཆེན་པོའི་སངས་རྒྱས་ཏྲག་ཤ་ཧེ་རུ་ཀ་ཞེས་བྱ་བ་དང། འཇོམས་བྱེད་ཆེན་པོའི་སངས་རྒྱས་ཧྲི་ཤ་ཧེ་རུ་ཀ་ཞེས་བྱ་བ་དང། འཇོམས་བྱེད་ཆེན་པོའི་སངས་རྒྱས་ཀ་ཤ་ཧེ་རུ་ཀ་ཞེས་བྱ་བ་དང། འཇོམས་བྱེད་ཆེན་པོའི་སངས་རྒྱས་བག་ཤ་ཧེ་རུ་ཀ་ཞེས་བྱ་བ་དང། འཇོམས་བྱེད་ཆེན་མོའི་རྣལ་འབྱོར་མ་ཏྲག་ཤ་ཤོ་རི་ཀ་ཞེས་བྱ་བ་དང། འཇོམས་བྱེད་ཆེན་མོའི་རྣལ་འབྱོར་མ་ཏྲི་ཤ་ཤོ་རི་ཀ་ཞེས་བྱ་བ་དང། འཇོམས་བྱེད་ཆེན་མོའི་རྣལ་འབྱོར་མ་ཀ་ཤ་ཤོ་རི་ཀ་ཞེས་བྱ་བ་དང། འཇོམས་བྱེད་ཆེན་མོའི་རྣལ་འབྱོར་མ་བག་ཤ་ཤོ་རི་ཀ་ལ་སོགས་ཏེ། ཤིན་ཏུ་འཇོམས་བྱེད་ཆེན་པོའི་འཁོར་དང། གཞན་ཡང་ཟ་བྱེད་ཆེན་པོའི་འཁོར་འདི་ལྟ་སྟེ། ཟ་བྱེད་ཆེན་པོའི་སངས་རྒྱས་རུ་ཏི་ཧེ་རུ་ཀ་ཞེས་བྱ་བ་དང། ཟ་བྱེད་ཆེན་པོའི་སངས་རྒྱས་རག་ཏི་ཧེ་རུ་ཀ་ཞེས་བྱ་བ་དང། ཟ་བྱེད་ཆེན་པོའི་སངས་རྒྱས་ཁ་ཧི་ཧེ་རུ་ཀ་ཞེས་བྱ་བ་དང།། ཟ་བྱེད་ཆེན་པོའི་སངས་རྒྱས་ས་ཧ་ཧེ་རུ་ཀ་ཞེས་བྱ་བ་དང། ཟ་བྱེད་ཆེན་མོའི་རྣལ་འབྱོར་མ་རུ་ཏི།། ཤོ་རི་ཀ་ཞེས་བྱ་བ་དང། ཟ་བྱེད་ཆེན་མོའི་རྣལ་འབྱོར་མ་ཏག་ཏི་ཤོ་རི་ཀ་ཞེས་བྱ་བ་དང། ཟ་བྱེད་ཆེན་མོའི་རྣལ་འབྱོར་མ་ཁ་ཧི་ཤོ་རི་ཀ་ཞེས་བྱ་བ་དང། ཟ་བྱེད་ཆེན་མོའི་རྣལ་འབྱོར་མ་ས་ཧ་ཤོ་རི་ཀ་ཞེས་བྱ་བ་ལ་སོགས་པ་རྣལ་འབྱོར་མའི་འཁོར་རབ་ཏུ་མང་ཞིང་བསམ་གྱིས་མི་ཁྱབ་པའི་ཧེ་རུ་ཀ་མཐའ་ཡས་པ་ཤ་སྟག་རྣམས་དང། གཞན་ཡང་གསང་བའི་བུ་མོའི་འཁོར་འདི་ལྟ་སྟེ། གསང་བའི་བུ་མོ་དཀར་མོ་ཞེས་བྱ་བ་དང། གསང་བའི་བུ་མོ་རྐུམ་མོ་ཞེས་བྱ་བ་དང། གསང་བའི་བུ་མོ་རྨོངས་མོ་ཞེས་བྱ་བ་དང། གསང་བའི་བུ་མོ་རོ་ལངས་མ་ཞེས་བྱ་བ་དང། གསང་བའི་བུ་མོ་ལྦོས་མོ་ཞེས་བྱ་བ་དང། གསང་བའི་བུ་མོ་གཏུམ་མོ་ཞེས་བྱ་བ་དང། གསང་བའི་བུ་མོ་སྨེ་ཤ་ཅན་ཞེས་བྱ་བ་དང། གསང་བའི་བུ་མོ་མ་ཚོགས་མ་ཞེས་བྱ་བ་ལ་སོགས་པ་ཤིན་ཏུ་གསང་བའི་བུ་མོའི་འཁོར་བསམ་གྱིས་མི་ཁྱབ་པ་དང། གཞན་ཡང་དགའ་བའི་བུ་མོའི་འཁོར་འདི་ལྟ་སྟེ། དགའ་བའི་བུ་མོ་སེང་གདོང་མ་ཞེས་བྱ་བ་དང། དགའ་བའི་བུ་མོ་བྱ་རྒོད་གདོང་མ་ཞེས་བྱ་བ་དང། དགའ་བའི་བུ་མོ་སྟག་གདོང་མ་ཞེས་བྱ་བ་དང། དགའ་བའི་བུ་མོ་ཝ་གདོང་མ་ཞེས་བྱ་བ་དང། དགའ་བའི་བུ་མོ་ཁྱི་གདོང་མ་ཞེས་བྱ་བ་དང། དགའ་བའི་བུ་མོ་དུར་བྱ་གདོང་མ་ཞེས་བྱ་བ་དང། དགའ་བའི་བུ་མོ་ཁྭ་གདོང་མ་ཞེས་བྱ་བ་དང། དགའ་བའི་བུ་མོ་མུན་གདོང་མ་ཞེས་བྱ་བ་ལ་སོགས་པ་ཤིན་ཏུ་དགའ་བའི་བུ་མོའོ་འཁོར་བསམ་གྱིས་མི་ཁྱབ་པ་དང། གཞན་ཡང་ཤིན་ཏུ་གུས་པའི་བུ་མོའི་འཁོར་འདི་ལྟ་སྟེ། ཤིན་ཏུ་གུས་པའི་བུ་མོ་རྟ་གདོང་མ་ཞེས་བྱ་བ་དང། ཤིན་ཏུ་གུས་པའི་བུ་མོ་ཕག་གདོང་མ་ཞེས་བྱ་བ་དང། ཤིན་ཏུ་གུས་པའི་བུ་མོ་སྤྲེའུ་གདོང་མ་ཞེས་བྱ་བ་དང། ཤུན་ཏུ་གུས་པའི་བུ་མོ་ཐལ་བྱེད་མ་ལ་སོགས་པ་ཤིན་ཏུ་གུས་པའི་བུ་མོའི་འཁོར་དང། གཞན་ཡང་ཤིན་ཏུ་གསོད་པ་ཆེན་པོའི་སྲས་ཀྱི་འཁོར་ལ་འདི་ལྟ་སྟེ། ཤིན་ཏུ་གསོད་པ་ཆེན་པོ་དཔལ་སྟག་གི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་གཡག་གི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་ཤ་བའི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་གཟིག་གི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་རྟའི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་སྤྱང་ཀའི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་སེང་གེའི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་དོམ་གྱི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་ཕག་གི་མགྲིན་ཞེས་བྱ་བ་དང། ཤིན་ཏུ་གསོད་པ་ཆེན་པོ་དཔལ་དྲེད་མོའི་མགྲིན་ཞེས་བྱ་བ་དང། ཤན་ཏུ་གསོད་མ་ཆེན་མོ་རྡོ་རྗེ་གསོད་མ་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་དུར་ཁྲོད་ཅེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་གཏུན་ཁུང་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་གཏུམ་མོ་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་འདམ་སྙེམས་མ་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་སྒྲ་འབྱིན་མ་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་ཟ་བྱེད་མ་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་འདྲེན་མ་ཞེས་བྱ་བ་དང། ཤིན་ཏུ་གསོད་མ་ཆེན་མོ་རྡོ་རྗེ་སྤོར་མ་ཞེས་བྱ་བ་དང། ཤིན་ཏུ་གསོད་མ་ཆེན་མོའི་འཁོར་རབ་ཏུ་མང་པོ་རྣམས་དང། དེ་དག་ལ་སོགས་ཏེ་རྡུལ་ཕྲ་རབ་སྙེད་དང་ཐབས་ཅིག་གོ། ཡུམ་རྡོ་རྗེ་ཀུན་ཏུ་བཟང་མོ་ས་ང་ཤོ་རི་ཀས་ཀྱང་ཉིད་ཀྱི་སྐུ་ལ་རྣམ་པར་འཁྲིལ་ཏེ། མདུན་གྱིས་བལྟས་ནས་ཐབས་ཅིག་གོ། དེ་ན་ཨས་བཅོམ་ལྡན་འདས་གསང་བ་མཆོག་གི་བདག་པོ་དེས་ཆོས་ཐམས་ཅད་དགོངས་པ་མཉམ་པ་ཉིད་ལ་ཤར་བར་མཁྱེན་ནས་སྐུ་མཉམ་པ་ཉིད་མི་དམིགས་པ་ཞེས་བྱ་བའི་ངང་ལ་སྙོམས་པར་ཞུགས་སོ། ། གསུང་མཉམ་པ་ཉིད་མི་དམིགས་པ་ཞེས་བྱ་བའི་ངག་ལ་རྣམ་པར་ཞུགས་སོ།། ཐུགས་མཉམ་པ་ཉིད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་ཏེ། འཇུག་པའམ། ལྡོག་པའམ། རྣམ་པར་ལྡོག་པ་མི་དམིགས་སོ། ། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་དབྱིངས་ཀྱི་ངང་ལ་མི་གཡོ་བར་བརྣལ་བཞིན་དུ་ཡུམ་རྡོ་རྗེ་ཀུན་ཏུ་བཟང་མོས་སྟོང་པ་ཉིད་ཀྱི་གླུ་འདི་བླངས་ཏེ་རྣམ་པར་བསྐུལ་ཏོ། ། ཡོད་མེད་སྟོང་པ་ཤིན་ཏུ་རྣལ་འབྱོར་མཐུས། ནམ་མཁའ་བཞིན་ལས་དམ་ཚིག་ཉེ་བར་གཤེགས། ཡེ་ཤེས་རྒྱ་མཚོ་རྣམ་པར་གྲོལ་བའི་ཀློང། མི་གནས་མི་དམིགས་ནམ་མཁའི་དབྱིངས་ནས་བཞེངས། ཞེས་བསྐུལ་ནས། བཅོམ་ལྡན་འདས་གསང་བ་མཆོག་གི་བདག་པོ་དེས་ཆོས་ཐམས་ཅད་བྱང་ཆུབ་སེམས་ལ་ཤར་བར་མཁྱེན་ནས་སྟོང་པ་ཉིད་ཀྱི་ངང་ལས་རྡོ་རྗེའི་སྐུ་མངོན་དུ་ཕྱུང་སྟེ། དཔེར་ན་ནམ་མཁའ་དང་བ་ལས་ཟླ་བ་དྲི་མ་མེད་པར་ཤར་བ་ལྟ་བུའོ། ། དེ་ནས་ཡུམ་ས་ང་ཤོ་རི་ཀ་ལ་གཟིགས་ཏེ། འཛུམ་པ་རྣམ་པར་མཛད་དོ།། དཔེར་ན་ཉི་མ་སྟོང་ལས་འོད་ཀྱི་ཟེར་བཀྱེ་པ་ལྟ་བུའོ།། དེ་ནས་འོད་ཀྱི་ཟེར་དེ་དག་ལས་བྱང་ཆུབ་ཀྱི་སྤྲིན་མངོན་པར་འཁྲིགས་ཏེ། རོལ་པའི་ཆར་མངོན་པར་ཕབ་པས་རོལ་པ་སྣ་ཚོགས་གྱི་འབྲུག་དང། རོལ་པ་སྣ་ཚོགས་ཀྱི་གློག་དང། རོལ་པ་སྣ་ཚོགས་ཀྱི་མཆོད་པ་དང། རོལ་པ་སྣ་ཚོགས་ཀྱི་གྲུ་དང། རོལ་པ་སྣ་ཚོགས་ཀྱི་གར་དང། རོལ་པ་སྣ་ཚོགས་ཀྱི་རྔ་དང། དུང་དང་ཀེར་ཀོར་དང་གླིང་བུ་དང་རོལ་པ་སྣ་ཚོགས་ཀྱི་རྒྱན་དང། རོལ་པ་སྣ་ཚོགས་ཀྱི་སྒེག་པ་དང་སྟེག་པ་དང། འཁྱུད་པ་དང་སྟེང་བ་དང། སྦྱོར་བ་དང་བསྟིམ་པ་དང་མཉེས་པ་དང། རོལ་པ་སྣ་ཚོགས་ཀྱིས་གསོལ་བ་དང་མྱང་བ་དང། འཆའ་བ་དང་བདེ་བ་དང། སྤྲོ་བ་དང། འཇོ་བ་དང། འཇུག་པ་དང། རོལ་པ་སྣ་ཚོགས་ཀྱི་དགའ་བ་ཆེན་པོ་ལ་འཇུག་པ་རྣམ་པར་མཛད་དོ། ། དེ་ནས་ཡུམ་ཀུན་ཏུ་བཟང་མོ་དེས་སྤྱན་ཟིམ་བག་གིས་རྣམ་པར་འདུད་པའི་ཚུལ་དུ་བཅོམ་ལྡན་འདས་གསང་བ་མཆོག་གི་བདག་པོ་ལ་རྣམ་པར་བལྟས་ཏེ། རྣལ་འབྱོར་སྦྱོར་བའི་ཕྱག་ལུས་ཀུན་དུ་ས་ལ་བརྡབས་ནས་རོལ་པ་ཆེན་པོའི་གླུ་འདིས་གསོལ་བ་བཏབ་བོ། ། ཚོགས་ཆེན་གཉིས་རྫོགས་ཐུགས་དམ་དབྱིངས་ཀྱི་ལྷ།། ལོངས་སྤྱོད་རྫོགས་མཛད་རོལ་པ་ཆེན་པོའི་སྐུ།། རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག། ཐབས་ཀྱི་རོལ་པས་བདེ་ཆེན་དབྱིངས་ནས་བཞེངས། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་གླུ་དེས་བསྐུལ་བར་ཐུགས་སུ་ཆུད་ནས། བདེ་བ་ཆེན་པོའི་ངང་དེ་ནས་ཆོ་འཕྲུལ་ཆེན་པོ་རྣམ་པར་བཞེངས་ཏེ། རྣམ་པར་འགྱིང་བ་དང། རྣམ་པར་བརྗིད་པ་དང། གར་གྱི་ཕྱག་རྒྱ་ཆེན་པོ་དང། རྣམ་པར་བཤད་པ་སྣ་ཚོགས་དང། ཞབས་ཀྱི་བརྐྱང་བསྐུམ་དང། སྐུའི་འགྱུར་བག་དང། སྨིན་རིས་ཀྱི་འབྲི་ཀུ་ཏ་བསྒྱུར་བ་དང། སྤྲུལ་པའི་འོད་ཟེར་གྱིས་ནམ་མཁའ་ཐམས་ཅད་ཀུན་ཏུ་ཁྱབ་པར་མཛད་དོ།། དེ་ནས་ཐམས་ཅད་དང་ཐམས་ཅད་ལ་མཚན་མ་དང། རྣམ་པ་དང། ཡོད་པ་དང། མེད་པ་ཐམས་ཅད་ལ་གསང་བ་མཆོག་གི་བདག་པོ་དེས་ཀུན་ལ་ཁྱབ་པར་མཛད་དེ། དེ་དག་གི་རང་བཞིན་དུ་རྣམ་པར་གནས་སོ།། དེ་ནས་རྡོ་རྗེ་ཀུན་ཏུ་བཟང་མོ་དེ་ངོ་མཚར་དུ་གྱུར་ཏེ། ཡང་རྣལ་འབྱོར་པའི་ཕྱག་ལུས་ཀུན་དུ་ས་ལ་བརྡབས་ཏེ། ཆོ་འཕྲུལ་འབྱུང་བའི་གླུ་འདིས་གསོལ་བ་བཏབ་བོ།། ཡེ་ཤེས་སྒྱུ་མས་རྣམ་པར་རོལ་པའི་སྐུ།། ཐབས་དང་ཤེས་རབ་ཆེ་ལ་མངའ་བརྙེས་པའི།། འཕགས་རྗེ་སྤྲུལ་པ་མང་པོ་འབྱུང་བའི་གནས།། བདེ་གཤེགས་བདེ་བར་གཤེགས་མཛད་བཞེངས་སུ་གསོལ། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་རྡོ་རྗེ་རོལ་པའི་དེ་ཁོ་ན་ཉིད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཅང་མི་གསུང་བར་བཞུགས་སོ། ། དེ་ནས་ཡུམ་རྡོ་རྗེ་ཀུན་དུ་བཟང་མོ་དང། དམ་ཚིག་ཆེན་པོ་རྡོ་རྗེ་སེམས་དཔའ་ལ་སོགས་པ་འཁོར་ཤིན་ཏུ་མང་པོ་རྣམས་ངོ་མཚར་དུ་གྱུར་ཏེ། དེ་དག་ཐམས་ཅད་མགྲིན་གཅིག་ཏུ་རྡོ་རྗེ་རོལ་པ་དེ་ཁོ་ནའི་གླུ་འདིས་བསྐུལ་ཏེ་གསོལ་བ་བཏབ་བོ། ། ཨེ་མའོ།། ཡིད་བཞིན་སྐུ་མཆོག་ནམ་མཁའ་ལྟ་བུ་ལས།། ཁྱབ་པའི་བྱིན་བརླབས་རྡོ་རྗེ་གར་མཛད་ཅིང།། གཟི་བརྗིད་སྤྲིན་དཔུང་རོལ་པས་བསྒྱིངས་པའི་སྐུ། ། ཐོགས་མེད་རྡོ་རྗེ་རོལ་པའི་ཆོ་འཕྲུལ་སྟོན།། ཨེ་མའོ།། ཡིད་བཞིན་གསུང་མཆོག་སྒྲ་བརྙན་ལྟ་བུ་ལས།། སྙན་པའི་བྱིན་བརླབས་རྡོ་རྗེ་བརྗོད་མཛད་ཅིང།། ཡན་ལག་རྒྱ་མཚོ་མི་ཟད་བཀོད་པའི་གསུང།། སེངྒེ་སྒྲ་ཡིས་གསང་སྔགས་རྒྱ་མཚོ་སྟོན། ། ཨེ་མའོ།། ཡེ་ཤེས་སྙིང་པོ་ཉི་མ་ལྟ་བུ་ལས།། ཡེ་ཤེས་བྱིན་བརླབས་རྡོ་རྗེ་བདེ་མཛད་ཅིང།། ཐིག་ལེ་སྤྲོས་བྲལ་རྣམ་པར་མི་རྟོག་ཐུགས།། རྣམ་གྲོལ་དེ་ཉིད་ངེས་པའི་ཆོ་འཕྲུལ་སྟོན། ། མི་ཤེས་བླུན་རྨོངས་འདམ་བྱིང་འགྲོ་བ་རྣམས། སྡུག་བསྔལ་རྒྱ་མཚོས་བཅིངས་པ་ཐབས་ཀྱིས་ཁྲོལ།། མ་རིག་མུན་པས་ལྡོངས་པའི་དོན་གྱིས་ཕྱེ།། འཁོར་བའི་རྒྱ་མཚོ་རོལ་པའི་གྲུ་ཡིས་སྒྲོལ།། དེ་བཞིན་གཤེགས་པ་ཀུན་གྱི་ཐུགས་ཆེན་པོ། ། ཡེ་ཤེས་དོན་གྱི་སྙིང་པོ་མཆོག་དང་ལྡན།། རྣལ་འབྱོར་ཐེག་ཆེན་རྡོ་རྗེ་ཀུན་འདུས་རྒྱུད།། འདུས་པའི་ཚོགས་ལ་རྒྱ་ཆེར་བཤད་དུ་གསོལ།། ཨ་ལ་ལ་ཧོ་ཞེས་ངེས་པར་བཏུང་དེ་གསོལ་བ་བཏབ་བོ། ། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་རྡོ་རྗེ་རོལ་པ་དེ་ཁོ་ན་ཉིད་ཀྱི་གླུ་དེས་གསོལ་བ་བཏབ་པ་མཁྱེན་ནས་འཁོར་ཐམས་ཅད་ལ་རྣམ་པར་གཟིགས་ཏེ་འཛུམ་པ་མཛད་དོ། ། འཛུམ་པ་མཛད་པས་ཐུགས་རྣམ་པར་དག་པའི་ཀློང་ནས་རིག་པའི་ཉི་མ་བརྗོད་ཀྱིས་མི་ལང་བའི་ཡང་མི་ལང་བའི་འོད་ཟེར་དང་བཅས་པ་འབྱམས་ཀླས་པ་ཁྱབ་བཤད་པར་མཛད་དོ།། འོད་ཟེར་དེ་དག་རེ་རེ་ལས་རྡོ་རྗེ་ཧེ་རུ་ཀ་རབ་ཏུ་མང་བའི་ཚོགས་བཤད་པར་མཛད་དོ། ། དེ་དག་རེ་རེ་ལས་ཀྱང་སངས་རྒྱས་འབུམ་ཕྲག་འཁོར་སོ་སོའི་ཞབས་འབྲིང་བཅས་པ་ལྷུན་གྱིས་གྲུབ་པར་མཛད་དོ།། དེ་དག་ལས་རིག་པའི་ཉི་མའི་ཆར་མངོན་པར་ཕབ་པས་མུན་པའི་ཀློང་ཐམས་ཅད་གསལ་བར་མཛད་དོ། ། རིག་པའི་ཆོས་ཀྱི་འབྲུག་སྒྲ་དང། རིག་པའི་ཆོས་ཀྱི་ཆར་དང། རིག་པའི་ཆོས་ཀྱི་གླུ་སྣ་ཚོགས་དང། གར་སྣ་ཚོགས་དང། རིག་པའི་ཆོས་ཀྱི་མཆོད་པ་སྣ་ཚོགས་བྱུང་སྟེ། འབྱམ་ཀླས་པའི་ནམ་མཁའ་ལ་སྒྲ་སྣ་ཚོགས་ཕན་ཚུན་དང། ཡན་མན་དང། སྣརེལ་ཞི་ལ་སོགས་པ་ཐམས་ཅད་དུ་ཁྱབ་པར་ལིང་ལོང་ཕྱད་པར་བྱུང་ངོ།། མཆོད་པའི་ཆར་ཡང་མངོན་པར་ཕབ། རྨད་དུ་བྱུང་བའི་སྐུ་བསམ་གྱིས་མི་ཁྱད་པ་ཡང་ལིང་ལོང་ཕྱད་རྨད་དུ་བྱུང་པའི་ཐུགས་ཀྱང་ལྷང་ངེའོ།། རྨད་དུ་བྱུང་བའི་གསུང་བསམ་གྱིས་མི་ཁྱབ་པ་ཡང་ཨ་ལ་ལ་ཧོ་ཞེས་སྒྲ་སྒྲོགས། སངས་རྒྱས་འབུམ་ཕྲག་ཀྱང་གསུང་དབྱངས་བསམ་གྱིས་མི་ཁྱབ་པའི་སྒྲ་གཅིག་ཏུ། ཨེ་མའོ་རྨད་དུ་བྱུང་རོལ་པའི་ཆོས་ཀྱི་དོན་བྱུང་ངོ་ཞེས་སྒྲོགས། འཁོར་འབུམ་ཕྲག་དང་གདུལ་བྱ་སྣ་ཚོགས་སྤོ་པའི་ངོ་མཚར་སྐྱེད། རིག་པའི་རྩལ་སྦྱངས་དོན་གྱི་ཆེ་བ་ཕྱུང། ངམ་ཞིང་ངོ་མཚར་བར་གྱུར་ཏེ་ཐམས་ཅད་ཉེ་བར་གནས་སོ།། དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེས་འཁོར་རྣམ་པར་སྦྱོར་བའི་རྡོ་རྗེ་རྒྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། སྙོམས་པར་ཞུགས་ནས། རྡོ་རྗེ་སྔགས་ཀྱི་ཚིག་འདི་གསུངས་སོ།། ཧཱུ~ཾ་ཧཱུ~ཾ་ཧཱུ~ཾ་རྡོ་རྗེ་འདུ་བར་བསྡུས་པ་ཡི།། དམ་ཚིག་ཆེན་པོའི་རིག་འཛིན་རྣམས།། བླ་འོག་རིམ་པ་ཇི་བཞིན་དུ། ། རྡོ་རྗེ་གསང་བའི་གྲལ་འཁོད་དེ།། རིགས་མ་ཡིན་པར་རིགས་མིན་འགྱུར།། སྐལ་བ་བཟང་པོའི་དམ་ཚིག་འདི།། སྐལ་བ་ངན་ལ་འབབ་མི་འགྱུར།། དེ་ལས་འདས་ན་དི་རླག་བྱེད།། ཧཱུ~ཾ་ཀྲོ་དྷ་ཛྭ་ལ་ས་མ་ཡ། རཀྵ་ཛྭ་ལ་ས་མ་ཡ། ཡཀྵ་ཛྭ་ལ་ས་མ་ཡ། ཙིཏྟ་ཛྭ་ལ་ས་མ་ཡ་ཞེས་གསུངས་པ་ཙམ་གྱིས་ཞལ་ལྗགས་ཀྱི་དབང་པོ་འོད་མེ་དཔུང་ཆེན་པོ་ལས་ཁྲོ་བོ་འོད་ཀྱི་ཕྲེང་བ་འབར་བ་དང། སྲིན་པོ་འོད་ཀྱི་ཕྲེང་བ་འབར་བ་དང། གནོད་སྦྱིན་འོད་ཀྱི་ཕྲེང་བ་འཁྲུག་པ་དང། ཟ་བྱེད་འོད་ཀྱི་ཕྲེང་བ་འབར་བ་བརྒྱུད་མར་བྱུང་བས་རུ་ཏྲ་ཅན་དང། བདུད་དང། སྲིན་མོ་དང། གནོད་སྦྱིན་དང། སྲིན་པོ་དང། འཇུག་སྲེད་དང། སྲེད་མེད་དང། དབང་ཕྱུག་དང། སྟོབས་ལྡན་དང། སྤྲེའུ་དང། ར་དང། ལུ་འདེ་དང། སྦྲང་མ་དང། བྱ་རོག་དང། མེ་ཁྱེར་དང། འཁོར་བ་དང། ཆུ་དང། ས་དང། ནམ་མཁའ་དང། མེ་དང། སྒྲ་དང། བསམ་ངན་ལ་སོགས་པ་བརླག་སྟེ། མི་གནས་པར་གྱུར་ཅིང་རྨད་དུ་བྱུང་བ་ཉིད་དུ་མཛད་དོ།། དེ་ནས་འོད་ཟེར་དེ་དག་མཁའ་ལ་འཁྱིལ་བ་དང། འཁོར་མང་པོ་དག་ཤིན་ཏུ་སྐྲ་སྟེ་གསོལ་བ་བཏབ་པ། ཨེ་མའོ། ཨེ་མ་བདག་ཅག་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ་པ་ལས། བཅོམ་ལྡན་འདས་གསང་བ་མཆོག་གི་བདག་པོ་དེས་ཞལ་གྱི་མདངས་ཕྱུང་སྟེ། འོད་ཟེར་དེ་དག་ཡེ་ཤེས་ཀྱི་འོད་ཞི་ཞིང་འཁྱིལ་བ་དང། མཛེས་ཤིང་བདེ་བ་དང་ལྡན་པས་ཐམས་ཅད་རངས་པར་བྱས་པས་སྣོད་རུང་བར་རྣམ་པར་སྦྱངས་ནས་འོད་དེ་དག་འོད་ཀྱི་གནས་སུ་ཐིམ་པར་གྱུར་ཏོ།། དེ་ནས་བཅོམ་ལྡན་འདས་གསང་བ་མཆོག་གི་བདག་གི་བདག་པོ་དེས་མི་གནས་པའི་ཡེ་ཤེས་ཆེན་པོའི་ཀློང་ནས་ངེས་པར་བཞེངས་ནས་སེངྒེ་རྣམ་པར་རྒྱལ་བའི་སྒྲ་ལྟ་བུས་དོན་གྱི་བཀོད་པ། གསང་བའི་ངེས་པ། རྒྱུད་ཀྱི་འགྲེལ་བ། རྟགས་ཀྱི་རོལ་པ། རྡོ་རྗེ་རྣམ་པར་བསྒྱིངས་པའི་གཞུང་ཆེན་པོ་སྒྲ་འདིས་བཤད་དོ།། ཨ་ཨོ་ཨོཾ། ས་མ་ཡ། ཨ་དྷི། གུ་ཧྱ། པུ་ཏི་ཨ་ཧོ་ཀུ་ལ་མ་ཏོང་བྱིད་ཏ་པ་དྲ་ཨ་མོ་གྷ་ཨཱི་ཤྭ་ར་ས་ཡ་ན། གུ་ཏི་ཨ་ལ་ལ་ཧོ་ཞེས་ཅང་མི་གསུངས་ངོ། ། ཀུན་ཏུ་མི་གསུང། རབ་ཏུ་མི་གསུང། གསུངས་པ་མི་འགོག་འགོག་པ་མ་ཡིན། མ་གསུང་པ་ཉིད་ན་རྒྱ་ཆེར་བཤད་པའི་ངོ་བོར་བཞུགས་སོ།། རྣམ་པར་བཞུགས་ནས་དམ་ཚིག་ཆེན་པོ་རྡོ་རྗེ་སེམས་དཔའ་ལ་ཞལ་གཟིགས་ཏེ། འཛུམ་པས་བསྐུལ་བ་རྣམ་པར་མཛད་དོ།། དེ་ནས་དམ་ཚིག་ཆེན་པོ་རྡོ་རྗེ་སེམས་དཔའ་དེས་བསྐུལ་བར་རྣམ་པར་རིག་ནས་རང་གི་སྟན་ལས་ལངས་ནས། རང་གི་མཚན་མ་གནས་ལྔར་རེག་པར་བྱས་ནས་ལྕེ་པདྨའི་སྟེང་དུ་བཞག་ནས། ལུས་ས་ལ་བརྡབས་པའི་ཕྱག་རྣལ་འབྱོར་གྱི་ལུགས་སུ་བྱས་ནས། སེངྒེའི་ལྟ་སྟངས་ཀྱིས་བྱས་ནས་སྟོན་པའི་ཞལ་དུ་བལྟས་ཏེ། རྡོ་རྗེ་རྒྱལ་པོ་ཚོགས་བདག་དགོངས་སུ་གསོལ། ། ཆོས་ཀྱི་རྒྱལ་པོ་མི་གཡོ་རྒྱལ་ཚུལ་མཛད།། རྒྱལ་མཆོག་རྒྱལ་པོ་ཆོས་ཀྱི་རྒྱལ་པོའི་མཐུས།། འདུས་པའི་ཚོགས་ལ་རྒྱ་ཆེར་བཤད་དུ་གསོལ།། ཨ་ལ་ལ་ཧོ་ཞེས་གསོལ་བ་བཏབ་པ་ལས། བཅོམ་ལྡན་འདས་གསང་བ་མཆོག་གི་བདག་པོ་དེས་རྡོ་རྗེ་ལས་ཀྱི་བཀའ་བ་དེ་བྱིན་གྱིས་བརླབ་པའི་ཕྱིར་རྡོ་རྗེ་རྣམ་པར་སྤྲོ་བ་ཞེས་བྱའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། ། བཛྲ་ཀརྨ་ཙཀྲ་ས་ཏྭ་ར~ཾ། ཞེས་གསུངས་ཏེ། རྡོ་རྗེ་རྒྱ་གྲམ་གྱི་འཁོར་ལོ་གཅིག་སེམས་དཔའ་རྡོ་རྗེའི་ལག་ཏུ་བབས་པར་གྱུར་ནས་ལས་ཀྱི་རྡོ་རྗེའི་དབང་ཐོབ་པར་གྱུར་ཏེ། རྣམ་པར་རོལ་པ་ཆེན་པོ་ཤིན་ཏུ་བླ་བཀྱལ་བའི་སྤོབས་པ་ཅན་དུ་གྱུར་ཏོ། ། བྱིན་གྱིས་བརླབས་ནས་ཀུན་ཏུ་མི་གཟོ་བ་རབ་ཏུ་བག་དང་ལྡན་པར་ཆེན་པོར་གྱུར་ཏོ།། དེ་ནས་སེམས་དཔའ་རྡོ་རྗེ་ངེས་ལས་ཀྱི་མཚན་མ་དེ་ལག་ཏུ་བླངས་ཏེ། སྟབས་སྣ་ཚོགས་དང། གར་དང། གླུ་སྣ་ཚོགས་རྡོ་རྗེ་ཚིག་ཏུ་ལེན་ཅིང་རྡོ་རྗེ་རྒྱ་གྲམ་ལས་ཀྱི་འཁོར་ལོ་དེ་ལན་རྣམ་པ་བཅུ་གཉིས་སུ་བསྐོར་ནས་གྲངས་གཉིས་དང་ལྔ་བསྒྱུར་བས། ཞིང་ཁམས་མཐའ་དག་རྣམ་པར་གཡོས་ཏེ། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག། རབ་ཏུ་ལྡེགཀུན་ཏུ་རབ་ཏུ་ལྡེགའཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། འུར་རབ་ཏུ་འུར། ཀུན་དུ་རབ་ཏུ་འུར། ཆེམ་རབ་ཏུ་ཆེམ། ཀུན་དུ་རབ་ཏུ་ཆེམ་པར་གྱུར་ཏེ། ཞིང་ཁམས་ཐམས་ཅད་ནི་གསང་བའི་དཀྱིལ་འཁོར་ཤ་སྟག་ཏུ་གྱུར། བཅུད་ཡུལ་ཐམས་ཅད་ནི་ཕྱག་རྒྱ་ཆེན་པོར་གྱུར། རྣམ་པར་རྔམ་པའི་ཚུལ་གྱིས་སྟོན་པའི་མདུན་ལོགས་སུ་སེངྒེ་རྡོ་རྗེས་མཚན་མའི་གདན་ལ་འགྱིང་བག་གི་ཚུལ་གྱིས་རྣམ་པར་གནས་སོ། ། དེ་ནས་འདུས་པའི་འཁོར་ཚོགས་ཕལ་མོ་ཆེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ཨེ་མ་བཅོམ་ལྡན་འདས་སེམས་དཔའ་རྡོ་རྗེ་འདི་ནི་འདི་ལྟར་མཐུ་ཆེ་བ། འདི་ལྟར་བྱིན་རླབས་ཆེ་བ། འདིར་ལྟར་རྒྱ་ཆེ་བ། འདི་ལྟར་མཁས་པ། འདི་ལྟར་གསལ་ཞིང་ཟབ་པ་ནི་བཅོམ་ལྡན་འདས་ཀྱི་ཐུགས་ལས་སྐྱེས་པ་ལགས་སོ། ། ཞེས་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་བ། འདུས་པ་ཆེན་པོའི་ཚོགས་སེམས་དཔའ་རྡོ་རྗེ་འདི་ནི་བྱང་ཆུབ་སེམས་ཐམས་ཅད་ཀྱི་ཕྱི་མོ།། སྙིང་རྗེ་ཐམས་ཅད་ཀྱི་བདག་པོ། ། སངས་རྒྱས་ཐམས་ཅད་ཀྱི་རྗེ་བཙུན།། བྱང་ཆུབ་སེམས་དཔའ་རིག་པ་འཛིན་པ་ཐམས་ཅད་ཀྱི་ཡབ།། རྣལ་འབྱོར་པ་ཐམས་ཅད་ཀྱི་མེས་ཆེན་པོ།། མྱ་ངན་ལས་འདས་པ་ཐམས་ཅད་ཀྱི་དེད་དཔོན། བདུད་ཐམས་ཅད་ཀྱི་ཡང་བདུད་ཆེན་པོ།། ཆོས་ཐམས་ཅད་ཀྱི་མཛོད།། ཡེ་ཤེས་ཐམས་ཅད་ཀྱི་འབྱུང་གནས་ཆེན་པོར་གྱུར་པ་ཡིན་ནོ།། དེ་ཅིའི་ཕྱིར་ཞེ་ན། ཐོག་མ་དང་ཐ་མ་མེད་པ་མཉམ་པའི་དུས། ཕ་མཐའ་ལས་ཀྱང་ཕ་མཐའ། དཔག་ཏུ་མེད་ཅིང་བསམ་དུ་མེད་པ། འབྱམ་ཀླས་པའི་དུས་ནས་བྱ་བ་བྱས་ཤིང་བྱེད་པ་བྱས་པ། མངོན་པར་རྫོགས་པར་སངས་རྒྱས་པ་ཡིན་ཏེ། ཆོས་ཐམས་ཅད་ཀྱི་རང་བཞིན་དུ་སྦྱོང་ཞིང་གནས་པས་ན། རྒྱལ་བ་ཐམས་ཅད་ཀྱི་ཐུགས་ལས་སྐྱེས་ཤིང་ཐམས་ཅད་ཀྱི་ཡབ་ཏུ་གྱུར་པ་ཡིན་ཏེ། དེ་འདྲའོ་ཞེས་བཀའ་སྩལ་པ་ལས་འདུས་པའི་འཁོར་ཐམས་ཅད་ངོ་མཚར་དུ་གྱུར་ཏེ། བཅོམ་ལྡན་འདས་འདིས་ནི་འདི་ལྟར་ངོ་མཚར་ལགས་སོ། ། བདེ་བར་གཤེགས་པ་འདི་ངོ་མཚར་ལགས་སོ།། སེམས་དཔའ་རྡོ་རྗེ་དམ་པ་ལ་ལོགས་སུ་བཏུད་དེ་ལུས་ས་ལ་བརྡབས་པའི་ཕྱག་རྣལ་འབྱོར་ལུགས་སུ་བྱས་ཏེ། རྨད་དུ་བྱུང་བའི་མེ་ཏོག་དང། ཚོགས་ཀྱི་མཆོད་པ་སྣ་ཚོགས་བྱས་ཏེ། འདི་ལྟར་རྨད་བྱུང་ངོ་མཚར་ཁྱོད།། སངས་རྒྱས་ཐུགས་ལས་རྒྱལ་སྐྱེས་པ།། ཅི་ལྟར་ཞིང་འདིར་སྣང་ཞིག་གུ།། རྣལ་འབྱོར་ཡབ་གྱུར་རྒྱལ་བའི་སྲས།། ངོ་མཚར་ཁྱོད་ཀྱིས་སྤྱོད་པས་ན། ། བཀའ་ཡི་འཁོར་ལོ་རབ་བསྐོར་བ།། སྒྲུབ་པའི་ལམ་མཆོག་དམ་པ་དག། ཚིག་གིས་མཚོན་དེ་གསལ་བར་མཛོད།། ཨ་ལ་ལ་ཧོ་ཞེས་གསོལ་བ་བཏབ་བོ།། དེ་ནས་དམ་པ་རྡོ་རྗེས་རྡོ་རྗེ་བསྐོར་ཏེ་བསྐྱུར་ནས་བརྗིད་བག་ཏུ་ཚིག་ཏུ་མཚོན་ཏེ་སྨྲས་པ། ཨོཾ་ཨཱཿ~ཾཧཱུ~ཾ། ཨ་ལ་ལ་ཧོ།། རྒྱལ་བའི་སྲས་བོས་ཅང་མི་གསུང།། མི་གསུང་བས་ནི་རྒྱ་ཆེར་བཤད།། བཤད་དུ་མེད་པའི་ཆོས་འདི་ནི།། རྒྱལ་བ་རྣམས་ཀྱིས་མ་བཤད་དེ། ། དེ་ལྟར་སྟོན་པའི་རྒྱལ་མཆོག་ཀྱང།། རྣམ་པར་བརྗོད་པར་མི་བཞེད་དེ།། རྒྱལ་ཆེར་བཤད་པར་དགོངས་པའོ།། སྐྱེ་བ་མེད་པའི་ཆོས་རྣམས་ནི།། མ་སྐྱེས་བར་ཡང་སྙིང་པོར་བཞེད།། སྙིང་པོའི་དོན་དུ་གང་གྱུར་པ། ། ཚིག་ཏུ་སྨྲ་བ་ལེགས་མ་ཡིན།། སྤྲོས་པ་ཉིད་ན་གོལ་བ་ཞེས།། རྒྱལ་བ་རྣམས་ཀྱིས་ཡང་དག་བཤད།། དེ་བས་རྡོ་རྗེ་རྒྱལ་པོ་ཉིད།། བཀའ་མ་སྩལ་བར་དགོངས་པའོ།། དགོངས་པའི་དོན་རྣམས་གང་འབྱིན་པ། ། ཇི་ལྟར་མེ་ལོང་གཟུགས་བརྙན་ལྟར།། དགོངས་དོན་རིག་ལ་སྣང་གྱུར་པ།། མ་སྐྱེས་སྙིང་པོའི་དོན་གྱིས་ན།། ཚིག་ཏུ་སྤྲོས་པར་མ་ཡིན་ནའང།། མཚན་མ་ཚིག་གི་རྣལ་འབྱོར་པ།། ཚིག་ལ་ཞིབ་ཅིང་དོན་ལ་རྩིར། ། ཚིག་ཕྱིར་བློ་འབྲང་རྩལ་ཞན་རྣམས།། བཀྲ་ཕྱིར་བསམ་པར་རངས་བྱ་བ།། མི་དམིགས་པ་ལས་དམིགས་པ་ཡི།། ཆོ་འཕྲུལ་ཚིག་གིས་མཚོན་པ་ནི།། བདེར་གཤེགས་རྒྱལ་བ་ཀུན་གྱི་ཐུགས།། གསང་བ་དེ་ཉིད་སྙིང་པོའི་དོན། ། མཉམ་ཉིད་བྱང་ཆུབ་ཐེག་ཆེན་པོ།། གསལ་བར་བཀོད་དེ་ངེས་བརྗོད་ཀྱིས།། རྒྱ་ཆེན་འདུས་པའི་ཆོས་རྣམས་ཉོན།། ང་ནི་དུས་གསུམ་བཞུགས་པ་ཡི།། རྒྱལ་བ་ཀུན་ཀྱི་སྙིང་པོ་སྟེ། སྟོང་པར་སྤས་པའི་དོན་འདི་ལ། ། དཔེས་མཚོན་ཚིག་གི་ལྡེ་མིག་གིས།། མཉམ་པ་ཉིད་རིག་པའི་སྒོ་དབྱེ་བྱས།། སྦས་པའི་དོན་འབྱིན་གསལ་བྱེད་པ།། སཱ་ལུ་ཕུབ་ཁྲོད་སྣང་མེ་བཞིན།། བསལ་བཏེག་སྣང་རྙེད་ས་ལེར་འདུག། ཟབ་མོར་སྤྱོད་པ་ལ་མོས་པས།། གང་ཞིག་དོན་ལ་འདྲིས་པ་ཡི།། གསང་སྔགས་སྤྱོད་པའི་རང་བཞིན་ནི།། མཐུན་པའི་དམིགས་བཅུ་དཔེར་བཞག་སྟེ།། རྣལ་འབྱོར་ཅན་གྱིས་ཤེས་པར་བྱ།། སྒྱུ་མ་སྨིག་རྒྱུ་རྨི་ལམ་དང། གཟུགས་བརྙན་དྲི་ཟ་གྲོང་ཁྱེར་དང།། བྲག་ཅ་ཆུ་ཟླ་མིག་ཡོར་དང།། ཆུ་བུར་འཁྲུལ་དང་མགལ་མེར་སྣང།། སྒྲུབ་དང་གསང་སྔགས་སྤྱོད་པ་དང།། གྲུབ་པ་དང་ནི་གནས་དག་དང།། བཟླས་པའི་སྒྲ་དང་ཕྱག་རྒྱར་རྟོག། ཏིང་འཛིན་ལྟ་བ་ཆོ་འཕྲུལ་བརྟག། ཇི་ལྟར་སྒྱུ་མའི་མཚན་ཉིད་ནི།། སྐྱེས་བུ་དག་གི་རྩོལ་བ་དང།། སྨན་དང་སྔགས་ཀྱི་སྦྱོར་བ་ལས།། དབང་པོ་ཡིད་འཕྲོག་ཅིར་སྣང་ཡང།། དེ་ལ་འགྲོ་འོང་ག་ལ་ཡོད། ། དེ་ལྟར་སྒྲུབ་པའི་མཚན་ཉིད་ཀྱང།། ཡིག་འབྲུ་རྫས་ཀྱི་སྦྱོར་བ་ལས།། གྲུབ་པར་སྣང་ཡང་རང་བཞིན་མེད།། ཇི་ལྟར་སྨིག་རྒྱུའི་མཚན་ཉིད་ནི།། ཞིང་པའི་དུས་ཀྱི་ཟླ་བ་ལ།། དྲོད་དང་ཉི་མའི་སྦྱོར་བ་ལས། ། བྱིས་པ་གདུངས་པའི་རང་བཞིན་གྱིས།། ཆུ་ཡི་འདུ་ཤེས་ཅི་བསྐྱེད་ཀྱང།། ཚིམ་པའི་རྒྱུད་ནི་ག་ལ་འགྱུར།། གསང་སྔགས་མིང་གི་ཁྱད་པར་ཡང།། རང་བཞིན་མི་དམིགས་སྟོང་པ་ལ།། མཚན་མའི་ཐ་སྙད་མིང་དུ་བཏགས། ། དེ་ཉིད་སྟོང་པས་མིང་མི་དམིགས།། དཔེར་ན་རྨི་ལམ་རང་བཞིན་ནི།། སྐྱེས་བུ་གཉིད་ཀྱི་དབང་གྱུར་ན།། ཐང་ཅིག་སྐད་ཅིག་ཡུད་ཙམ་དང། ལོ་ལ་ལོགས་པ་དེ་བཞིན་དུ།། བདེ་དང་སྡུག་བསྔལ་དེ་བཞིན་མྱོང། ། སངས་ནས་ཅི་ཡང་མི་དམིགས་ལྟར།། དེ་བཞིན་སྔགས་ཀྱི་སྤྱོད་པ་དག། སྟོང་མ་ཉིད་ཀྱི་རང་བཞིན་ལ།། སྤྱོད་པའི་རྣམ་པ་ཅིར་སྣང་ཡང།། བརྟགས་ན་དམིགས་པ་ཀུན་དང་བྲལ། ། གཟུགས་བརྙན་སྣང་བའི་མཚན་ཉིད་ནི།། དཔེར་ན་གདོང་དང་མེ་ལོང་ལས།། བརྟེན་ནས་བཞིན་གྱི་གཟུགས་བྱུང་ཡང།། རེག་པར་གྱུར་པ་ག་ལ་ཡོད།། དེ་བཞིན་སྔགས་ཀྱི་དངོས་གྲུབ་ཀྱང།། སྒྲུབ་དང་ཏིང་འཛིན་ཡོ་བྱད་ལས། ། བརྟེན་ནས་དངོས་གྲུབ་ཚུལ་བྱུང་ཡང།། གསོལ་ཐོབ་དམིགས་པ་ལ་ག་ཡོད།། དྲི་ཟ་གནས་པའི་རང་བཞིན་ནི།། མཁའ་འམ་ཡིད་ཀྱི་མཁའ་ངོས་ལ།། དྲི་ཟའི་གཟུགས་ནི་གར་བྱུང་ཡང། ། གྲོང་ཁྱེར་དེ་ཡང་དེ་ནས་བྱུང།། བྱུང་ནས་དེ་ཡང་མི་རྟག་ལྟར།། གསང་སྔགས་གྲུབ་པའི་གནས་དག་ཀྱང།། ཆོས་སམ་ཡིད་ཀྱི་མཁའ་ངོས་ལ།། རྣལ་འབྱོར་གསང་བདག་གང་བསྐྱེད་པར།། དེ་ཉིད་གནས་པའི་གཞལ་མེད་ཁང། ། བྱུང་ཡང་དེ་ལ་གནས་མི་འགྱུར།། བྲག་ཅ་གྲགས་པའི་མཚན་མ་ནི།། དཔེར་ན་ངོས་ལ་སྒྲས་རྐྱེན་པས། ཅི་བཞིན་སྒྲ་ལྟར་བྲག་ཅ་འབྱུང།། བྱུང་ཡང་སྒྲར་ཐོས་དམིགས་པ་མེད།། དེ་བཞིན་སྔགས་ཚིག་བཟླས་པའི་སྒྲ། ། དཔེར་ན་མེད་ལས་ཡོད་བརྟགས་པའི།། མཚན་མ་ལ་བརྟེན་སྟོང་པའི་སྒྲ།། བརྗོད་པ་ཙམ་དུ་བསྟན་པར་ཟད།། ཇི་ལྟར་ཆུ་ཡི་ཟླ་བ་ནི།། སྒྲིབ་མེད་མཁའ་ལས་ཟླ་ཤར་བ། གཟུགས་བརྙན་དང་བའི་ཆུ་ནང་སྣང། ། སྣང་ཡང་གཟུང་བའི་རྟོག་མེད་པ།། དེ་བཞིན་གཟུགས་སྣང་ཕྱག་རྒྱ་ཡང།། སེམས་ཀྱི་མཁའ་ལས་སྐུར་གསལ་བ།། ཕྱག་རྒྱ་རིག་འཛིན་ངོ་ལ་སྣང།། དེ་ལྟར་སྣང་ཡང་འཛིན་རྟོག་བྲལ། ། ཇི་ལྟར་ཆར་གྱི་རྒྱུན་བཞིན་དུ།། ཆུ་ལས་ཆུ་བུར་རྣམ་པར་འགྱུར།། དེ་ཡང་གཅིག་གི་རྣམ་པ་ལས།། མང་པོའི་རྣམ་གྲངས་དུ་མ་འབྱུང།། སྡུད་ཅིང་ཕྱིར་ཡང་དུམ་བུར་འཆད།། དེ་བཞིན་རྣལ་འབྱོར་སྒྲུབ་པ་ཡི། ། ཏིང་འཛིན་རྣམ་པ་མང་པོར་འདོད།། འཁྲུལ་པ་སྣང་བའི་རང་བཞིན་ནི།། སྤྲོས་བྲལ་དངོས་པོ་སྟོང་པ་ལས།། སྲོག་དང་ཤེད་ཅན་བྱེད་པ་པོ།། སེམས་ཅན་པ་ལ་སོགས་པར་སྣང།། མིག་ནད་ངོ་ལ་རྫས་ལྟར་སྣང། ། འཁྲུལ་པ་ཁོ་ན་སྣང་བར་ཟད།། དེ་བཞིན་སྔགས་ཀྱི་ལྟ་བ་ཡང།། ཆོ་འཕྲུལ་མང་པོ་ཅིར་འཕྲུལ་བ། སྣང་བ་མེད་པའི་རང་བཞིན་ལ།། འཁྲུལ་པ་སྣ་ཚོགས་སྣང་བར་ཟད།། རྣལ་འབྱོར་ཅན་གྱིས་དེ་ལྟར་ལྟ། ། ཇི་ལྟར་མགལ་མེའི་རང་བཞིན་ནི།། གང་དག་ལག་ན་མགལ་མེད་ཐོགས།། བསྐོར་ན་འཁོར་ལོའི་རྒྱུན་ལྟར་སྣང།། དེ་ལ་འཁོར་ལོའི་རང་བཞིན་མེད།། དེ་བཞིན་སྔགས་ཀྱི་ཆོ་འཕྲུལ་ཡང།། མི་མཉམ་མཉམ་པའི་རང་བཞིན་ལས། ། ཇི་ལྟར་དམིགས་པའི་དོན་འབྱུང་སྟེ།། ཆོ་འཕྲུལ་སྣ་ཚོགས་རྒྱུན་མི་འཆད།། དེ་ཕྱིར་མཚན་མའི་ཆོས་ཐམས་ཅད།། མཚན་མེད་ངང་དུ་གཅིག་པས་ན།། རྟོག་པའི་བག་ཆགས་ཅི་འབྱུང་ཡང། ། ཆོས་ཀུན་དབྱིངས་སུ་གཅིག་པའི་ཕྱིར།། རྟོག་འཇུག་སྤྲོས་པའི་མཚན་མ་ཀུན།། མ་བྱུང་མ་སྐྱེས་དབྱིངས་ཉིད་ལ།། གཡོས་པ་མེད་ཅིང་ཆོ་འཕྲུལ་འབྱུང།། ཡོན་ཏན་སྣ་ཚོགས་ཆེར་འབྱུང་བའི།། གཏེར་གྱི་དབྱིག་འདི་གང་མཐོང་བ། ། སངས་རྒྱས་ཀུན་གྱི་ཡོན་ཏན་ཡང།། སྐད་ཅིག་གཅིག་ལ་དེ་ལ་འདུས།། དེ་བས་ཡིད་བཞིན་རིན་ཆེན་འདི།། ལྡོག་པ་མེད་པས་དང་དུ་བླང།། དོན་དམ་ཡང་དག་གཏེར་གྱི་མཆོད། ། རྣལ་འབྱོར་ཀུན་གྱི་ནོར་མཆོག་སྟེ།། གང་རྟོགས་དེ་འཐོབ་གཅིག་པུ་ཉིད།། འབྲེལ་མེད་གཞན་གྱིས་ཐོབ་པར་དཀའ།། བདག་མེད་གཉིས་བྲལ་བདེ་ཆེན་ཀློང།། སངས་རྒྱས་ཀུན་གྱི་བདེ་བ་ཆེ།། ཡེ་ནས་ལྷུན་གྲུབ་འདུས་མ་བྱས། ། ཐིག་ལེ་ཆོས་ཉིད་ཡེ་འབྱམ་པས། ཀུན་ཁྱབ་བདལ་བས་སྙིང་པོར་འདུས།། མི་དམིགས་སྤྲོས་བྲལ་བྱང་ཆུབ་སེམས།། ཟབ་མོར་སྣང་བའི་ངེས་དོན་འདི།། མཁའ་ལ་མདུད་འདྲར་གཏིང་དཔག་དཀའ། ། རྣལ་འབྱོར་དམིགས་ལྡན་བློ་ཆུང་ཞིང།། གང་ཞིག་རྩལ་ཞན་དེ་རྟོག་པ།། གཡོར་མོའི་ཚུལ་དུ་བདག་བརྟག་པ།། བརྟགས་ཀྱང་རྟོགས་པར་མི་འགྱུར་རོ།། དཔེར་ན་ཉི་མའི་སྙིང་པོ་ལ།། མིག་གི་དབང་པོས་རབ་བརྟགས་ན། ། དེ་བརྟགས་དོན་དེ་མི་རྟོགས་ཀྱི།། འོད་ཀྱི་ཟེར་གྱིས་མི་རྫི་འགྱུར།། དེ་འདྲར་བྱིས་པའི་རང་བཞིན་གྱིས།། ཟབ་མོའི་དོན་ལ་ཅིར་བརྟགས་ཀྱང།། ཡང་དག་དོན་དེ་མི་མཐོང་གི། བློ་ཞན་བྱིས་པ་ག་ཆད་བརྒྱལ། ། བརྟག་ཏུ་མེད་པའི་ཆོས་རྣམས་ནི།། རྟོག་པ་ཅན་གྱི་མི་རྟོགས་ཏེ།། གང་ཞིག་དེ་དོན་མི་རྟོགས་ཕྱིར།། གཡང་ས་ལྟུང་བ་ཅི་ཆ་ཡོད།། གདོད་ནས་མ་ཐོས་ཤིན་ཏུ་དགེ། བསམ་དང་བྲལ་བས་དེ་བཞིན་གཞག། མི་བརྟགས་བཞག་པའི་ཆོས་འདི་གང།། བྱིས་པ་རྣམས་ལ་ངས་མ་བསྟན།། བསྟན་ཀྱང་གོ་བར་མི་འགྱུར་ཏེ།། བསྟན་དུ་མེད་ཅིང་གོ་བར་དཀའ།། ཚིག་གིས་བརྗོད་པ་ཀུན་དང་བྲལ།། འདི་ཞེས་བསྟན་དུ་ག་ལ་ཡོད། ། མེད་པས་བསྟན་པའི་དམིགས་མི་ཕྱེད།། མི་དམིགས་ཆོས་ལ་བློ་སྦྱངས་ཤིང།། ཡིད་ཀྱི་མེ་ལོང་གསལ་བྱས་ན།། ནམ་མཁའ་དག་ལ་རབ་བརྟགས་ན།། སྣང་བ་མེད་པའི་རང་བཞིན་ནི། ། ནམ་མཁའ་ལྟ་བུར་དེ་ཉིད་འགྱུར།། ཆོ་ཉིད་ནམ་མཁའ་ལྟ་བུ་སྟེ།། ནམ་མཁའ་ལ་ཡང་མཚན་ཉིད་མེད།། ནམ་མཁའ་གང་མིང་རྗོད་བྱེད་པ།། བརྗོད་པ་དེ་ཉིད་དངོས་པོ་སྟེ།། དངོས་པོ་དེ་ཡི་མིང་བརྗོད་ཀྱང། ། ནམ་མཁའ་དེ་ལ་འགགས་མི་འགྱུར།། དེ་བཞིན་མི་རྟོགས་རྗོད་བྱེད་པ།། བརྗོད་པ་དེ་ཉིད་རྣམ་རྟོག་སྟེ།། རྣམ་རྟོག་དེ་ཡི་མིང་བརྗོད་ཀྱང།། མི་རྟོག་དེ་ལ་འགག་མི་འགྱུར།། དེ་འདྲར་སེམས་ཀྱང་དེ་ལྟར་བལྟ། ། སེམས་ཉིད་གཞན་དུ་མ་གྲུབ་སྟེ།། དེ་བཞིན་ཆོས་ཀྱང་གྲུབ་མ་ཡིན།། སེམས་དང་ཆོས་ཉིད་གཉིས་མེད་དེ།། སེམས་ཉིད་གང་ཡིན་ཆོས་ཉིད་དེ།། ཆོས་ཉིད་ཀྱང་ནི་དེ་བཞིན་ནོ།། ཆོས་སེམས་གཉིས་མེད་ལྡན་གྱུར་པ། ། བླ་མེད་བྱང་ཆུབ་ཆེན་པོར་བཤད།། སེམས་ནི་ནམ་མཁའ་ལྟ་བུར་སྟེ། རྣམ་པར་རྟོག་བྲལ་གང་མི་རྟོགས།། དེ་བཞིན་ས་གཞི་ཆེན་པོ་ལྟར།། བླ་མེད་བྱང་ཆུབ་མྱུ་གུ་སྐྱེད།། མེ་ཡི་རང་བཞིན་ལྟར་སྣང་བས། ། རྨོངས་པའི་བུད་ཤིང་སྲེག་པར་བྱེད།། རླུང་གི་རང་བཞིན་ཡིན་པས་ན།། མི་ཤེས་པ་ཡི་རྡུལ་ཀུན་སེལ།། ཆུ་ཡི་རང་བཞིན་ཡིན་པས་ན།། ཉོན་མོངས་གདུང་བ་ཀུན་སིམ་བྱེད།། སྨན་གྱི་རང་བཞིན་ཡིན་པས་ན། ། འཁོར་བའི་གཅོང་རྙིང་རྣམ་པར་འབྱིན།། དེ་ལྟར་རྩི་ཡི་རང་བཞིན་པས།། འཚོ་བ་རྣམས་ཀྱི་གསོས་སུ་འབབ།། དེ་བཞིན་རྣོ་དཔལ་རང་བཞིན་པས།། སྡུག་བསྔལ་རྒྱ་མཚོ་རྣམ་པར་གཅོད།། ཉི་མ་ལྟ་བུར་སྣང་བ་ཡིས། ། མུན་ཁང་སྣང་སྟོན་སེལ་བར་བྱེད།། རི་རབ་ལྟ་བུའི་རང་བཞིན་པས།། བརྟན་པོ་མི་འགྱུར་གཡོ་བ་མེད།། རྒྱ་མཚོ་ལྟ་བུའི་རང་བཞིན་པས།། མི་གཡོ་པ་ལ་བྱིན་བརླབས་ཆེ།། སེམས་ནི་འདི་ལྟར་ཆོ་འཕྲུལ་བས། ། དེ་ཕྱིར་འཁོར་དང་མྱ་ངན་འདས།། གཉིས་སུ་སྣང་བ་མ་ཡིན་ཏེ།། སེམས་ཀྱི་རང་བཞིན་བཟང་ངན་ལས།། གཉིས་ཀྱི་འདུ་ཤེས་ཕྱེ་སྟེ་བསྟན།། སེམས་ལས་ཡང་དག་ཡེ་ཤེས་འབྱུང།། དེ་བཞིན་བདེ་དང་སྡུག་བསྔལ་འབྱུང། ། ཆོས་དང་སངས་རྒྱས་ཡེ་ཤེས་འབྱུང།། དགེ་འདུན་ཡང་ནི་དེ་བཞིན་ནོ།། འདི་ལས་ཕ་རོལ་ཕྱིན་ཚོགས་དང།། བྱང་ཆུབ་དང་ནི་པདྨོ་འབྱུང།། འདི་ལས་རྡོ་རྗེ་སེམས་དཔའ་དང། དྲི་མེད་རིན་ཆེན་དཔའ་སྦྱིན་འབྱུང། ། དེ་བཞིན་རྡོ་རྗེ་དཔག་མེད་དང།། སྣ་ཚོགས་རྒྱལ་བ་འདི་ལས་འབྱུང།། འདི་ལས་ཕྱག་རྒྱ་སྣ་ཚོགས་དང།། རིག་པའི་སྙིང་པོ་ཐམས་ཅད་འབྱུང།། འདི་ལས་འདོད་ཆགས་ཞེ་སྡང་དང། ། སྡུག་བསྔལ་ང་རྒྱལ་ཕྲག་དོག་འབྱུང།། གཏི་མུག་དག་ཀྱང་དེ་བཞིན་ཏེ།། འདི་ལས་ཁམས་གསུམ་ཐམས་ཅད་དང།། སྐྱེས་བ་བུད་མེད་མ་ནིང་འབྱུང།། འདི་ལས་འདོད་དང་འདོད་གཟིར་དང།། ཉོན་མོངས་གདུང་འདོད་ཆགས་པ་འབྱུང། ། རི་དང་སྐྱེ་བོ་དེ་བཞིན་དུ།། ནམ་མཁའ་དང་ནི་རླུང་དག་དང།། སྲེག་པའི་མེ་ནི་རབ་ཏུ་འབྱུང།། འདི་ལས་ས་དང་ཆུ་དང་ནི།། རྡོ་དང་ས་བོན་མྱུ་གུ་འབྱུང།། དེ་བཞིན་གློག་དང་སྐར་མ་དང། ། ཉི་མ་ཟླ་བ་སྤྲིན་རྣམས་འབྱུང།། དེ་བཞིན་སྤྱོད་དང་མི་སྤྱོད་ཀུན།། ཐམས་ཅད་ཐམས་ཅད་འབྱུང་བར་འགྱུར།། དཔེར་ན་ནམ་མཁའི་རང་བཞིན་ལས།། སྤྲིན་དང་ན་བུན་ཁུག་རླངས་དང།། ཟླ་བ་ཉི་མ་སྐར་ཚོགས་དག། སྣང་ཡང་ནམ་མཁའ་བཞིན་དུ་གནས།། དེ་བཞིན་སེམས་ཀྱི་ནམ་མཁའ་ལས།། མཚན་མའི་ཆོ་འཕྲུལ་ཅི་བྱུང་ཡང།། ཆོས་ཉིད་ནམ་མཁའ་བཞི་གནས་པར།། རྣལ་འབྱོར་ཅན་གྱིས་བལྟ་བར་བྱ། ། དེ་ལྟ་བུ་ཡི་སེམས་ཉིད་ནི།། རྟོགས་དང་མ་རྟོགས་རང་བཞིན་ལ།། ལྟ་བའི་ཁྱད་པར་སོ་སོར་བལྟ།། རྟོག་པ་ཅན་གྱི་ངོ་ག་ལ།། རྟོག་པ་ཁྲུལ་བའི་ངོ་བོར་སྣང།། ཀུན་ཏུ་ཉེར་འཇོག་ལམ་ཚོར་ལ། ། ཀུན་ཏུ་རྡུལ་གྱི་ཕུང་པོ་སྣང།། ཚོགས་སྤྱོད་སྙིང་རྗེ་ཉེར་འཇོག་ལ།། ཐམས་ཅད་སྒྱུ་མའི་རང་བཞིན་ལྟར།། དེ་ཉིད་མཉམ་པར་ཤེས་གནས་ན།། ནམ་མཁའི་རང་བཞིན་མཐོང་བར་གནས།། ཡེ་ཤེས་རང་སྣང་ནམ་མཁའ་ལ། ། ནམ་མཁའ་ཉིད་དུ་སྣང་བར་ཟད།། བརྗོད་བྲལ་མཐོང་མེད་དམིགས་དང་བྲལ།། མཐོང་བ་མེད་པའི་དོན་འདི་ནི།། སྔོན་གྱི་རྒྱལ་བ་རྣམས་ཀྱིས་བཤད།། བདེ་གཤེགས་སྙིང་པོ་བྱང་ཆུབ་ལ། ། དགོངས་པ་འདི་ལས་གང་མི་མངའ།། ལྟ་བ་དེ་དང་ལྡན་བཞིན་དུ།། དམ་ཚིག་ནམ་མཁའ་ལྟ་བུ་ལ།། བསྲུང་དང་མི་བསྲུང་ཕྱོགས་དང་བྲལ།། འདིའོ་ཞེས་ནི་བསྲུང་དུ་མེད།། བསྲུང་བའི་རྣམ་གྲངས་ཇི་སྙེད་ཅིག། དུས་གསུམ་རྒྱལ་བས་གསུངས་མོད་ཀྱང།། བསྲུང་བའི་མདོ་ནི་གཅིག་ཏུ་འདུས།། ནམ་མཁའ་ལྟ་བུའི་རྣལ་འབྱོར་པས།། ནམ་མཁའ་འདྲ་བའི་དམ་ཚིག་བསྲུང།། དེ་ཡང་བསྲུང་དུ་མེད་ན་བདེ།། གཞན་པ་ཐེག་པ་ཆུང་བ་རྣམས། ། བསྲུང་བའི་མཚམས་དག་བསྲུང་ནས་ནི།། སྐྱོན་ཡོན་ཆོས་ལ་བླང་དོར་བྱེད།། བསྲུང་དང་བྲལ་བའི་ཆོས་རྣམས་ནི།། བསྲུང་དུ་མེད་པས་དེ་བཞིན་གཞག། དེ་བཞིན་པ་ཡི་དམ་ཚིག་ལ།། ཇི་བཞིན་པ་ཡི་བློ་གཞག་སྟེ། ། བརྗེད་པ་མེད་པའི་སེམས་ཉིད་ཀྱིས།། བསྲུང་བ་མེད་པའི་ངང་དུ་བསྡམ།། བསྲུང་མེད་ནམ་མཁའི་དམ་ཚིག་འདི། ཇི་ལྟར་གྲགས་པའི་རང་བཞིན་ལ།། སྡོམ་དང་ཚུལ་ཁྲིམས་སོ་སོར་སྣང། ། བྱིས་པ་རྣམས་ནི་ཐ་ཚིག་སྡོམ།། བདེན་གཉིས་རྒྱུ་ལ་སྟོན་པར་གྲགས།། བླ་མེད་མཆོག་ལ་དམ་ཚིག་སྤྱོད།། གཅིག་གི་དོན་ལས་མ་གཡོས་ཀྱང།། འདུལ་དབང་ངོ་ལ་སོ་སོར་གྲགས། ཁོ་ན་ཉིད་ལྡན་དམ་ཚིག་མཆོག། དེ་དག་གང་ལྡན་དམ་པ་སྟེ།། དེ་ལས་འདས་ན་འཆིག་པར་འགྱུར།། དེ་ཕྱིར་དམ་ཚིག་ཆེན་པོ་ནི།། ནམ་མཁའ་འདྲ་བར་དཔའ་བོས་བཤད།། རྒྱལ་བ་དཔའ་བོ་ཐམས་ཅད་ལ།། དམ་ཚིག་འདི་ལས་ཡོང་མི་མངའ། ། སྤྱོད་པ་དག་གི་ཁྱད་པར་ཡང།། ཆོས་ཉིད་བྱ་བཙལ་ཀུན་བྲལ་ལ།། བསྒྲུབ་པར་སྒྲུབ་པའི་དམིགས་པ་མེད།། འཁྲུལ་པ་གཅོད་པའི་སྐྱེ་བོ་དག། དམིགས་མེད་བྱང་ཆུབ་བདེ་ཆེན་ལ།། སྡུག་བསྔལ་རྩོལ་སེམས་བཅུག་པས་ནོར། ། བྱ་བ་མེད་པའི་ཆོས་ཉིད་ལ།། ཉོན་མོངས་བྱ་མེད་སྤྱད་པས་ཁྲུལ།། རང་བྱུང་ལྷུན་གྲུབ་གནས་བཞིན་དུ།། བྱིས་པའི་སྤྱོད་པས་ཅི་བཙལ་དགོས།། གང་ཞིང་འདོད་དེ་ཅི་ཞིག་སྒྲུབ། ། ཅི་སྤྱད་ཅི་བསྒྲུབས་ཅི་བཙལ་ཡང།། སྡུག་བསྔལ་ཉིད་དེ་བྱང་ཆུབ་མེད།། དམྱལ་བ་སངས་རྒྱས་ཆེན་པོ་ལ།། སྡུག་བསྔལ་བྱང་ཆུབ་ལམ་ཉིད་དེ།། ཉན་ཐོས་རང་རྒྱལ་ས་གཉིས་དང།། ཐེག་པའི་ཁྱད་པར་ཅི་བསྟན་པ། ། བྱེད་རྩོལ་བཅས་པ་ཐམས་ཅད་འཁྲུལ།། བླ་མེད་བྱང་ཆུབ་གེགས་སུ་ཆེད།། གང་ཞིག་བཙལ་མེད་བདེ་ཆེན་དོན།། སེམས་ཀྱི་ཀློང་འདིས་མ་མཐོང་ན།། སྒྲུབ་དང་རྩོལ་བ་ཅི་སྤྱད་ཀྱང། ། བྱིས་པ་དོན་མེད་གྱི་ན་འཁྱམ།། བཙམ་མེད་དུ་པའི་རང་བཞིན་ལ།། རྩོལ་བའི་སྤྱོད་པས་ཅི་ཞིག་བྱ།། འཛིན་པ་མེད་པའི་ཆོས་ཉིད་ལ།། ཚིག་འཛིན་ནོར་བའི་རྩོལ་བྱར་མེད།། བགྲོད་དུ་མེད་པའི་ཆོས་ཉིད་ལ། ། བགྲོད་པའི་དཀྱིལ་འཁོར་མིང་དང་བྲལ། བསམ་དུ་མེད་པའི་ཆོས་ཉིད་ལ།། རྟོག་སེམས་བསམ་པའི་དམིགས་དང་བྲལ།། བཙལ་མེད་པ་ཡི་ཆོས་ཉིད་ལ།། བཙལ་མེད་ཡེ་ནས་ལྷུན་གྱིས་གྲུབ།། མཐའ་དབུས་མེད་པས་གདལ་བ་ཆེ། ། ཕྱི་ནང་མེད་པས་ཡེ་གསལ་ཁྱབ།། སྐྱོན་ཡོན་མེད་པར་ལྷུན་གྱིས་རྫོགས།། བསྒྲུབ་དུ་མེད་པས་བཙལ་སེམས་བྲལ།། གཟུང་དུ་མེད་པས་དམིགས་དང་བྲལ།། ཐམས་ཅད་མཁྱེན་པས་བྱིན་བརླབས་ཆེ། ། གདོད་ནས་བྱང་ཆུབ་སྙིང་པོར་གནས།། སྤྱོད་པའི་ཁྱད་པར་འདི་ལྟར་བུ།། དེས་ན་གཅིག་ལས་མེད་བཞིན་དུ།། སྤྱོད་མཐུན་རྩོལ་བའི་རང་བཞིན་ལ།། རྣམ་རྟོག་སྤྱོད་པ་སོ་སོར་སྣང།། འཁྲུལ་པ་ཐམས་ཅད་འཁོར་བར་སྤྱོད། ། རྒྱུ་འབྲས་མི་སླུ་བདེན་དོན་སྤྱོད།། མི་དམིགས་པ་ལ་ནམ་མཁར་སྤྱོད།། དེ་ལྟར་སྤྱོད་ལ་ཀུན་སྤྱོད་ཀྱང།། དམ་པའི་དོན་དེ་སྤྱོད་མཆོག་ཉིད།། དམ་པར་གྱུར་པ་ཐམས་ཅད་ལ།། དམ་པའི་སྤྱོད་པ་དེ་ལས་མེད། ། སྐྱེས་བུ་མཆོག་གིས་དེ་སྐད་བཤད།། ཐེ་ཚོམ་མེད་པར་ཤེས་པར་གྱིས།། མ་བཅོས་བྱང་ཆུབ་དེ་བཞིན་ཉིད།། བསྒོམ་དུ་མེད་པའི་ཆོས་ཉིད་ལ།། བསྒོམ་པ་དམིགས་སུ་མེད་པ་སྟེ།། ཏིང་འཛིན་ཞེས་ནི་གདགས་སུ་མེད། ། བསྒོམས་ཀྱང་རྙེད་པ་མ་ཡིན་ལ།། དེ་བཞིན་མ་བསྒོམས་སྟོར་བ་མེད།། བསྒོམ་ཆོས་སྣ་ཚོགས་ཅིར་སྣང་ཡང།། བསྒོམས་ནས་དེ་ཡི་ངག་མི་གནས།། དེ་བས་བྱིས་པའི་སྤྱོད་ཡུལ་ཡིན། ། དཔེར་ན་བྱིས་པའི་རང་བཞིན་གྱིས།། ས་ལ་སོགས་པ་གཟུགས་སྣ་ཚོགས།། མཛེས་པར་བྱས་ནས་སྐད་ཅིག་མཐོང།། མཐོང་བ་ཉིད་ན་མ་གྲུབ་སྟེ།། སྐད་ཅིག་ཁོ་ནས་ཞིག་གྱུར་ནས།། ས་ལ་སོགས་པའི་རྡུལ་དུ་སྣང། ། དེ་བཞིན་རྣལ་འབྱོར་བྱིས་པ་ཡིས།། གཟུགས་ལ་སོགས་པ་སྣ་ཚོགས་བསྒོམ།། སེམས་ཀྱི་བྱེ་བྲག་སྐད་ཅིག་ལ།། ཡིད་ཀྱི་རྒྱུ་བ་སྣ་ཚོགས་འབྱུང།། བྱུང་བ་བཞིན་དུ་དེ་མ་གྲུབ།། སེམས་ཀྱི་སྐད་ཅིག་དྲན་པ་ལ། ། ཡིད་ཀྱི་དམིགས་པ་རྒྱུན་ཆད་ནས།། བྱུང་ཚོར་ཆད་པའི་མཐའ་སྤངས་ཏེ།། ཆོས་རྣམས་ནམ་མཁའ་ལྟ་བུར་ནི།། བརྗོད་མེད་རྒྱུན་མི་འཆད་པར་དམིགས།། དེ་དོན་ཕྱིན་ཅི་མ་ལོག་པར།། བརྗེད་མེད་ཏིང་འཛིན་སྒོམ་པའི་མཆོག། ཅི་ཕྱིར་ཆོས་ཀྱི་དབྱིངས་ཉིད་ནི།། ནམ་མཁའ་ལྟ་བུར་འདུས་མ་བྱས།། བསམ་དུ་མེད་པས་ནམ་མཁའ་འདྲ།། བརྗོད་དུ་མེད་པས་གཟུགས་དང་བྲལ།། ཀུན་གཞི་ཀུན་ཏུ་ནམ་མཁའ་ལ། ། ཡིད་ནི་མཁའ་ལ་ཉི་ཤར་འདྲ།། རྣམ་ཤེས་ཉོན་མོངས་སྤྲིན་གྱིས་ཁེབས།། འདུ་བྱ་རླུང་གིས་ཀུན་བསྐྱོད་དེ། གསལ་དང་བྱུང་འཇུག་སངས་དང་འགག། རྣམ་ཤེས་མཚན་མའི་རྟོག་པ་ཡིས།། ཀུན་གཞི་ནམ་མཁའ་མཐོང་མི་སྟེར། ། ཀུན་གཞི་མཐོང་ཉིད་ཆོས་སྐུ་སྟེ།། འདི་དོན་ནམ་མཁའ་མ་བརྗེད་པ།། ཏིང་འཛིན་ཆེན་པོ་རྒྱུན་མི་འཆད།། གང་ཞིག་འདི་དོན་ཡིད་འཆང་བ།། གཟུགས་ཀྱི་དངོས་པོ་ཅི་སྣང་ཡང། ། སེམས་ནི་ཡེ་ནས་མྱ་ངན་འདས།། བདེ་ཆེན་སངས་རྒྱས་ཐམས་ཅད་ལ།། དགོངས་པ་འདི་ལས་ཡོང་མི་མངའ།། སྣང་བ་མེད་པའི་ནམ་མཁའ་འདི།། ཏིང་འཛིན་ཆེན་པོར་གནས་བཞིན་དུ།། འདི་ལས་གླགས་ཏེ་ཅི་ཞིག་ཚོལ། ། རྒྱལ་བས་བཙལ་ཀྱང་ཡོང་མི་རྙེད།། འདིས་ལ་གཞན་དུ་གང་ཚོལ་བ།། བཙལ་བ་ཉིད་ན་ཚི་ཆད་འགྱུར།། གཞན་ནམ་དམན་པའི་སྒོ་རྣམས་ནི།། ཏིང་འཛིན་མེད་པའི་ཆོས་ཉིད་ལ།། འཛིན་པའི་ཏིང་འཛིན་བཅུག་པས་ནོར། ། དེ་དག་ལ་ནི་གང་སྤྱོད་རྣམས།། ཐེན་ཚེར་མིག་ནི་ནམ་མཁའ་ལ།། ཕྲ་རབ་ཐེན་ཐག་འཛུད་པ་ལྟར།། བྱིས་པ་ལས་གང་བྱེད་པ་དེ།། ཤེད་ཅན་དག་གིས་བྱར་མི་རུང།། ཤེད་ཅན་སྤྱོད་པའི་ནམ་མཁའ་དེ། ། ཐེན་ཚེར་ནམ་མཁར་ཤོང་མི་འགྱུར།། དེས་བས་གཞན་ལ་བསྟན་པ་མིན།། བསྟན་ན་བྱིས་པ་ག་ཆད་འགྱུར།། ཆོས་ཉིད་ནམ་མཁའ་ལྟ་བུའི་དངོས།། གསལ་བར་འོད་སྟོང་ཉི་མས་འགྲུབ། ། བྱིན་བརླབས་འོད་ཀྱི་ཟེར་ཕྲེང་ཙམ།། སྒྱུ་མ་ལྟར་སྣང་མཚན་མར་ཐོབ།། མི་གཡོ་མཚན་མེད་རང་བཞིན་དངོས།། སྐྱེ་མེད་སེམས་ཀྱིས་མ་མཐོང་བ།། བྱིས་པ་འདྲིད་པའི་རྩེད་མོར་སྣང།། དངོས་གྲུབ་ཆེན་པོའི་སེམས་ཉིད་དེ། ། ཡིད་བཞིན་འབྱུང་བར་རིན་པོ་ཆེ།། ཇི་ལྟར་དམིགས་ཤིང་བསྒྱུར་བར་འགྱུར།། གྲུབ་པ་དོན་ཆེན་ཐམས་ཅད་རྫོགས།། སེམས་ཀྱིས་སེམས་ཀྱི་ཚུལ་མཐོང་ན།། དངོས་གྲུབ་ཅེས་དེ་དག་ལས་འོང། ། གང་གིས་སྩོལ་ཏེ་སུ་ཡིས་བླང།། སྩལ་དང་སྩོལ་བར་བྱེད་མི་དམིགས།། དཔེར་ན་ཆུ་དང་མེ་ལོང་དང།། མཁའ་དང་རལ་གྲི་ཤེལ་ལ་སོགས།། གསལ་བར་བྱེད་པའི་རང་བཞིན་ལ།། རྙོག་མེད་ལ་སོགས་བལྟས་གསལ་བ། ། ཆུ་ལ་སོགས་པའི་རང་བཞིན་ཡིན།། དེ་ལ་ངོ་མཚར་ཆེ་མི་འབྱུང།། སེམས་ཀྱི་ཆུ་གསལ་ནམ་མཁའ་ལ།། ཉོན་མོངས་སྤྲིན་གྱིས་རྙོག་མེད་ན།། དངོས་གྲུབ་ཉི་ཟླ་སྐར་ཚོགས་བཀྲམ།། སྒྲིབ་མེད་བྱིན་བརླབས་ངང་གིས་འཚར། ། ཀུན་གཞི་ནམ་མཁའི་སྙིང་པོ་དེ། ཉོན་མོངས་སྤྲིན་གྱིས་གཏིང་སྤུངས་པ།། ཤེས་རབ་རླུང་གིས་མ་གཏོར་བར།། ག་ཞ་མཁན་གྱི་སྤྱོ་འདྲི་ཡིས།། སྒྲིབ་བསལ་ཆོས་ཉིད་གསལ་འདོད་པ། ། ཇི་ལྟར་ཆུས་གཤེར་བྱིས་པ་དག། ཉི་མ་སྤྲིན་ལྡན་གྲིབ་མ་ཡིས།། ཤིན་ཏུ་བསྒྲིགས་པར་གྱུར་པ་ན།། སྤྲིན་ཆེན་འདུས་པའི་ཕུང་པོ་ལ། ཁ་ཡི་དབུགས་ཀྱིས་བུས་བྱས་ན།། སྤྲིན་གསལ་ཉི་འོད་གསལ་འདོད་འདྲ། ། དེ་ཕྱིར་རྣལ་འབྱོར་དབང་ཕྱུག་གིས།། སེམས་ཉིད་དོན་ལ་རྣམ་བརྟགས་ཏེ།། ཀུན་གཞི་རྩ་བ་ཤེས་པར་བྱ།། སེམས་ཉིད་དེ་ལ་བལྟས་གསལ་བ།། རྩ་བ་དང་ནི་གང་ལྡན་པ།། དུས་དང་ཚིགས་དང་ལོར་གྱུར་ཡང། ། ཡལ་ག་ལོ་འདབ་འབྲས་བུར་བསྐྲུན།། རྩ་བའི་ས་བོན་མེད་མི་འགྱུར།། ཅི་ལྟར་སྦྱོར་བའི་རྣལ་འབྱོར་རྣམས།། ནན་གྱིས་མཚན་པའི་དངོས་གྲུབ་དག། བྱིས་པའི་སེམས་ཀྱིས་བླང་འདོད་ན། དེ་ཡང་མཚན་མས་དེ་རངས་འགྱུར། དཔེར་ན་མེ་ཡི་རང་བཞིན་དགས་དང་ནགས་ཚལ་སྲེག་བྱེད་པ། རྒྱུ་རྣམས་ཚོགས་པའི་བདེན་པ་ལས། མེད་ལས་ཡོད་པའི་བདེན་པར་སྣང། དེ་ལྟར་མཚན་མའི་རྣལ་འབྱོར་ཡང། མཚན་མའི་ཆོ་འཕྲུལ་ཐོབ་འདོད་པ།། མཚན་མའི་རྒྱུ་རྣམས་ཚོགས་པ་ལས།། མཚན་མ་རངས་པའི་མཚན་མར་སྣང།། ཤིན་ཏུ་སྐར་མ་རྒྱན་རྣམས་ལ།། བྱང་ཆུབ་སྤྱོད་པ་ཆེར་སྤྱོད་པའི།། དམ་པའི་དོན་ལ་ཆེར་དམིགས་པས། ། གསང་མཆོག་རིག་པའི་དངོས་གྲུབ་མྱུར།། མཚན་མར་མི་རྟོག་རང་བཞིན་གྱིས།། ཟབ་མོ་དོན་ཆེན་གོ་བ་ནི།། ངེས་པའི་དོན་གྱིས་ཐག་གཅད་དེ།། མཉམ་པའི་དོན་ལ་ཡིད་ཆེས་བྱ།། ཇི་ལྟར་མཁའ་ལ་ཚིག་ཙམ་དུ། ། ངང་དུ་བརྗོད་པས་རྗོད་བྱེད་ཀྱི།། བརྗོད་པའི་ཐ་སྙད་དང་བྲལ་བས།། ཇི་ལྟར་འཁྲིགས་ཀྱི་སྨིག་རྒྱུ་དག། སྣང་བ་ཉིད་ན་མེད་པ་ལྟར།། ཆོས་སོ་ཅོག་གི་རང་བཞིན་གསལ།། གསལ་བ་ཉིད་ན་དེ་མི་དམིགས། ། ཐབས་ཆེན་གཏིང་ཟབ་ཤེས་རབ་ལམ།། སྤྲོས་བྲལ་མཚན་མའི་འཕྲང་ལས་འདས།། གཏོས་ཆེས་ཡངས་པས་ལམ་གཉིས་བྲལ།། དབུས་མཐའ་མི་དམིགས་མཉམ་པའི་ལམ།། གཅིག་ཏུ་མཉམ་པར་ཆུད་ནས་ནི། ། ཡུལ་མེད་ཚོལ་བའི་སེམས་བྲལ་དེ།། བླང་དོར་གཉིས་ཀྱི་མཐའ་སྤངས་ནས། གནས་པ་མེད་པའི་ཚུལ་གྱིས་གནས།། ཆོས་ཉིད་དབྱིངས་སུ་རོ་གཅིག་ཕྱིར།། ཤེས་དང་ཤེས་བྱ་གཉིས་མེད་དེ། ཡེ་ནས་ཤེས་ཉིད་ཆོས་ཤེས་ན། ། ཆོས་ཉིད་གཞན་ནས་བཙལ་ཅི་དགོས།། དཔེར་ན་སྒྱུ་མའི་བདེ་སྡུག་ཀྱང། བསལ་ནས་གཉི་ག་མི་དམིགས་ལྟར།། འཁོར་བ་འགྱུར་བའི་བདེ་སྡུག་ཀྱང།། མཉམ་པར་རང་བཞིན་དོན་གྱིས་མཉམ། ། ཇི་ལྟར་དུས་རྣམས་ཐམས་ཅད་དག། མཉམ་པ་ཉིད་དུ་རྟོགས་ནས་ནི།། སྒྲོས་ཚིག་རྗེས་སུ་མ་འབྲངས་ན།། མཉམ་འགྱུར་དུས་རྣམས་ག་ལ་དམིགས།། མཁའ་ལ་ངང་གིས་གཟུགས་མེད་ཕྱིར། ། དམིགས་སུ་ཟིན་པར་མི་འགྱུར་བཞིན།། སེམས་ཀྱིས་མ་སྐྱེས་དོན་མི་དཔོགས།། སྐྱོན་དང་ཡོན་ཏན་གཉིས་འབྱེད་པ།། རྟོགས་ནས་གཉིས་ཀྱི་དོན་སྤངས་ཏེ།། རང་བཞིན་མཉམ་པར་དོན་བཞག་ན།། བསྒོམ་ཞེས་མིང་དུ་བརྗོད་པར་ཟད། ། གཉིས་སུ་ལྟ་བ་མ་སྐྱེས་ཕྱིར།། གཉིས་ཀྱིས་འདུ་ཤེས་ཅི་བྱུང་ཡང།། རང་བྱུང་ཞི་བ་མ་བཀག་ཆོས།། ཡེ་ནས་མ་བཅོས་དོན་གྱིས་གསལ།། མ་སྐྱེས་རྣམ་དག་བྱང་ཆུབ་སེམས། ། མི་གནས་ཡེ་ཤེས་ཐུགས་དང་མཉམ།། རིག་དང་མ་རིག་ཁྱད་པར་ལས།། འཁོར་འདས་རྟེན་དང་འབྲེལ་བར་སྣང།། རྣམ་རྟོག་མེད་ཕྱིར་ཞི་བ་མེད།། འཛིན་པར་མ་ཡིན་སྤྲོས་བྲལ་མིན།། དྲང་བའི་དོན་བསྟན་མ་གཏོགས་པར། ། དོན་ལ་ཚིག་གིས་བརྗོད་དུ་མེད།། སྣང་ཡང་མེད་པའི་རང་བཞིན་ལ།། ཤེས་བློ་ཡོད་པའི་སེམས་མི་འབྱུང།། མཉམ་ཉིད་སྟོང་པའི་དོན་འདི་ལ།། དོན་ལྡན་སྟོང་པའི་སྒྲོ་མི་འདོགས། ། མ་བཅོས་རང་བཞིན་ཞི་བ་ཡི།། མཚན་མའི་རྟོག་བྲལ་ཤེས་ལྡན་པས།། མེད་དོ་ཙམ་དུའང་མི་དམིགས་ན།། བྱུང་ཚོར་འཛིན་པར་ག་ལ་འགྱུར།། ཐམས་ཅད་མི་གནས་བྱང་ཆུབ་པས།། བཙལ་ནས་གྲུབ་པ་མ་ཡིན་ཡང། ། སྒྱུ་མ་སངས་ནས་འཁྲུལ་བྲལ་བཞིན།། སྤྲོས་བྲལ་ཡེ་ཤེས་སྙིང་པོར་གནས།། འཁོར་བར་རྟོགས་པ་དུག་ཡིན་ཏེ།། འཁོར་བའི་སྡུག་བསྔལ་མི་ཤེས་ན།། དུག་འཐུངས་བདེ་བ་ག་ལས་འོང། ། སྦྱར་ལེགས་དུག་ཉིད་སྨན་དུ་འགྱུར།། འཁོར་བའི་ལས་རྣམས་དེ་ལྟར་སྣང།། འཁྲུལ་སྣང་དུག་གཟེར་བཟོད་དཀའ་ལྟར།། མ་རིག་འཁོར་བའི་སྡུག་བསྔལ་སྣང།། རྨི་ལམ་སྒྱུ་འཕྲུལ་མི་ཟད་པས།། ཤིན་ཏུ་ཉམ་ཐག་གདུངས་པའི་ཚེ། ། འཆི་བདག་བདུད་ཀྱིས་ཟིན་འདྲ་ལ།། མགོན་བཙུན་གཞན་གྱིས་མི་ཕན་ཏེ།། བདུད་སེལ་རྩི་དང་འདྲ་བར་ནི།། ཡང་དག་ལམ་མཆོག་རྟོག་པར་བྱ།། དུག་ནད་སྨྱོ་སངས་འབྱང་བ་ལ། ། སྐད་ཅིག་མ་ལ་མི་བཟོད་ཅིང།། སྨན་དང་སྨན་པའི་སྩོལ་བསྒྲུབས་པ།། སངས་ནས་དེ་དག་མི་དམིགས་ལྟར།། འཁོར་བ་མི་དམིགས་འཁྲུལ་པ་ལ།། རྨི་ལམ་ནས་སེལ་རྩོལ་སྒྲུབ་ལྟར།། སྒྲུབ་དང་ཏིང་འཛིན་རྩོལ་བྱེད་ཀྱང། ། འཁོར་བ་སྟོང་རྟོགས་ཉིད་བྱང་ཆུབ།། སྒྱུ་མ་རྒྱུ་འབྲས་མི་སླུ་བཞིན།། བླུན་རྨོངས་ངོ་ལ་དེ་ལྟར་སྣང།། མཉམ་ཉིད་རིག་པའི་རྩལ་ཅན་དག། འཁོར་བ་འཁྲུལ་བའི་ཚིག་ཙམ་དུ།། མ་ནོར་ལམ་རིག་བློ་ལ་གསལ། ། དེ་ལ་རྩོལ་ཐོབ་རློམ་སེམས་མེད།། སེམས་ཉིད་དོན་དང་མ་མཉམ་ན།། ཚིག་གིས་མཉམ་པས་དོན་མི་དཔོགས།། འཁྲུལ་འཁོར་མཉམ་ལས་མ་གཡོས་ཀྱང།། ལོག་རྟོགས་སྒྱུ་མའི་ཚུལ་ཙམ་སྣང། ། སེམས་ཉིད་ཡེ་སངས་རྒྱས་རིག་ནས།། རིག་པའི་དོན་ལ་བརྩོན་སྦྱོར་ཞིང། རང་འབྱུང་ཡོན་ཏན་རྩལ་སྡུད་པ།། འཁྲུལ་པར་འབྲེལ་པ་ག་ལ་ཡིན།། བྱང་ཆུབ་སེམས་ལྡན་བསམ་རྫོགས་ནས།། ཡེ་ཤེས་མཆོག་ལྡན་མཉམ་ཉིད་སྐུ། ། ཏིང་འཛིན་ཆོག་ལྡན་བླ་མའི་དབང།། དགེ་བསགས་མཆོག་ལྡན་ལུས་སྤྱོད་པའི།། བསོད་ནམས་མཆོག་ལྡན་གཟུགས་ཀྱི་སྐུ།། རྣམ་སྨིན་ཚུལ་གྱིས་འགྲུབ་མི་ལྟ།། བཙལ་ནས་ཐོབ་པར་མི་བྱེད་དེ། ། རྒྱུ་ཡི་དུས་ཉིད་འབྲས་བུའི་མཆོགདཔྱོད་པའི་སེམ་ཉིད་ཏིང་འཛིན་ནི།། སེམས་ཅན་དུས་མ་དོན་ལ་སྤྱོད།། ལྷུན་གྲུབ་ས་ལ་བགྲོད་མི་བྱེད།། འཁོར་བའི་ས་ཤེས་བདེ་ལྡན་གནས།། མི་གནས་འཁོར་བའི་སྡུག་བསྔལ་ཡང། ། བྱང་ཆུབ་འཁོར་བའི་ལམ་དང་འབྲེལ།། སྒྱུ་མའི་མཚན་ཉིད་མ་བཀལ་ཚུལ།། རང་བྱུང་རྟོག་བྲལ་གཅིག་ཏུ་མཉམ།། མཉམ་པ་ཉིད་ཀྱི་དོན་བཙན་པར།། ཆོས་ཉིད་ལ་ཡང་ཆོས་ཉིད་གསལ། ། མཉན་པར་མཉམ་ཞེས་ཚིག་བརྗོད་ཀྱང།། མཉམ་པའི་དོན་དང་མཐུན་མི་འགྱུར།། བྱང་ཆུབ་དེ་ཡང་མི་དམིགས་ཏེ།། མི་གནས་ཞེས་ནི་གང་བརྗོད་ཅིང།། གནས་དང་དམིགས་པའི་གནས་འཛིན་པ། ། གཟུང་འཛིན་ཞེས་ནི་དེ་ལ་བྱ།། སྒྱུ་འདྲར་བྱང་ཆུབ་སེམས་མེད་ན།། དངོས་བྲལ་ཡུལ་མེད་སྟོང་པ་དག། མཁའ་ལ་རང་བཞིན་མི་གནས་ཞེས།། བསྟན་པ་དེ་ནི་ཡོད་མ་ཡིན།། བསམ་གཏན་ལུས་ནི་གཙོར་བྱེད་དང། ། གནས་དེ་ལུས་ཀྱི་ཕྱག་རྒྱ་ཀུན།། མཚན་མར་མངོན་པར་ཞེན་ལས་བྱུང།། མཚན་མེད་སེམས་ལས་བྱ་བཙལ་མེད།། སྨིག་རྒྱུ་བཞིན་དུ་ལུས་རེད་ན།། གནས་དང་ཕྱག་རྒྱར་དམིགས་པ་མེད།། བྱེད་སྤྱོད་ཆེད་དུ་སྟོན་བྱེད་ཅིང། བྱ་མེད་བྱ་བའི་དམིགས་པའང་མེད།། དེ་ཉིད་མ་སྐྱེས་གཞི་མེད་པས།། གནས་བདེར་ལུས་བཅོས་ཁ་ན་མེད།། ཞེན་པར་འཆོས་ལམ་སྤྱོད་བྱེད་པ།། དེ་ཉིད་གཟུང་འཛིན་རྣམ་རྟོག་སྟེ།། བསམ་གཏན་ལུས་དབེན་དབེན་མ་ཡིན། ། མཁའ་ལ་སེམས་དབེན་དབེན་པའི་མཆོག། སེམས་ཉིད་དབེན་པའི་གནས་ཡིན་ཏེ།། འདི་ནི་རྣལ་འབྱོར་སྤྱོད་མཆོག་གནས།། བླ་གབ་རི་ཕུག་གཞལ་མེད་མིན།། སེམས་ཉིད་དཔག་ཡས་གཞལ་མེད་མཆོག། འདི་ནི་རྨད་བྱུང་ནོར་བུའི་གཞལ།། ཕྱི་དང་ནང་མེད་ཀུན་དུ་ནང། འདུ་བར་འདུས་པའི་ཚོགས་མ་ཡིན།། སེམས་ལས་ཡེ་ཤེས་ཚོགས་འདུས་མཆོག། ཆོས་ཀུན་འདུས་པས་ལུས་པ་མེད། ། དཔག་མེད་རྒྱལ་བ་མཉེས་པའི་ཚོགས།། ཀུན་རྫོབ་འབྱོར་པ་ཡོ་བྱད་མིན།། སེམས་ཉིད་འབྱོར་པ་རྫས་དང་ལྡན།། ལྷག་པའི་རྫས་མཆོག་འདི་ཤེས་ན།། བསྒྲུབ་འགྲུབ་འདི་ལ་ཐེ་ཚོམ་མེད།། སྒོམ་པར་བྱེད་པ་སྒོམ་པ་མིན། ། བསམ་བྱ་དམིགས་སུ་མེད་པ་སྟེ།། འདི་ལྟར་སེམས་ཀྱི་གསང་སྒོམ་པ།། དོན་ལ་སེམས་སྒོམ་ཏིང་འཛིན་མཆོག། བསྲུང་ཞེས་བསྲུང་བར་བྱ་མི་དམིགས། སྟོང་པར་སྦས་པའི་སེམས་ཉིད་དེ།། མཚན་མར་འདས་ནས་ཚིག་ཤེས་ན། ། བསྲུང་པའི་གསང་བ་དམ་པའོ།། ཚིག་ཏུ་མཉམ་བརྗོད་མཉམ་མི་དམིགས།། སེམས་ཉིད་རང་དག་མཉམ་པ་ལས།། མཉམ་པའི་དོན་ཉིད་ལྷག་པར་མེད།། འདི་དོན་མཉམ་ཤེས་མཉམ་པའི་དོན། ། བརྟུལ་ཞུགས་སྤྱོད་པ་སྤྱོད་མིན་ཏེ།། སེམས་ལ་སེམས་གཞོལ་རོལ་སྤྱོད་པ།། ཐབས་ཆེ་ཡངས་པ་སྤྱོད་པའི་མཆོག། བྱང་ཆུབ་དོན་གྱི་ཕྱི་མོ་རུ།། སེམས་ཀྱི་ཕྱིར་མོར་ཡེ་གནས་པས།། གསོལ་ཐོབ་མཚན་མའི་མིད་མི་དམིགས། ། དངོས་གྲུབ་ཆེན་པོ་རྒྱུན་མི་འཆད།། དེ་ལྟར་སེམས་ཀྱིས་སེམས་མཐོང་ན།། ཡེ་ཤེས་ཀྱིས་ནི་ཆོས་ཉིད་མཐོང།། དུས་ཀུན་དུ་ནི་སྐྱེ་འགག་མེད།། སྔོན་མ་མཐོང་བའི་དོན་མཐོང་འགྱུར། ། དེ་ཡང་དངོས་པོ་ཅང་མི་མཐོང།། ཐམས་ཅད་རང་བཞིན་མེད་པ་ཞིག། བློ་ལ་འགྱུས་པ་ཁོ་ནར་ཟད།། དེ་ལྟ་བུ་ཡི་དོན་མཐོང་ན།། མཚན་མར་མཐོང་བ་ཅི་ཡང་མེད།། སྒྱུ་མ་ཙམ་དུ་ཚུལ་ཤེས་ནས། ། ནམ་མཁའ་མཉམ་པའི་དོན་སྣང་འགྱུར།། ཁ་ཅིག་དག་ནི་དེ་དོན་ལ།། མཐོང་བ་ཅི་ཡང་མེད་འགྱུར་ན།། སྣང་བ་ཞེས་ནི་ཅི་ཕྱིར་གདགས།། མེད་པའི་དོན་དང་འགལ་འགྱུར་ཞེས།། ཐེ་ཚོམ་ཟ་འགྱུར་དེ་དག་ལ། ། མཐོང་བ་མེད་པའི་དོན་དེ་ཉིད།། ཡིད་ཀྱི་ངོ་ལ་སྣང་འགྱུར་ན།། སྣང་ཞེས་དེ་ཕྱིར་བརྗོད་པར་བྱ།། དེ་བས་འཁྲུལ་པ་མ་ཟད་པར།། ནམ་མཁའ་མཐོང་བ་མེད་པ་དེ།། དེ་ཉིད་ཡིད་ལ་སྣང་འགྱུར་ཡང། ། གཟུགས་ལ་སྣང་བར་འགྱུར་བ་མིན།། སེམས་ཉིད་བདེན་པར་མ་མཐོང་ན།། ཡིད་ལ་མཚན་མེད་དོན་གསལ་དང། མཚན་མ་འཁྲུལ་པར་རྒྱུ་བ་གཉིས།། འདྲེན་མར་རྒྱུ་བྱེད་འབྲལ་འགྱུར་མིན།། དེ་ཉིད་བདེན་པར་མཐོང་འགྱུར་ན། ། དེ་ནས་དེ་མ་ཐག་ཏུ་ཡང།། ཡིད་ཀྱི་རྒྱུ་བ་རྒྱུན་ཆད་ནས།། སྔར་འཁྲུལ་མཚན་མའི་ཆོས་བྲལ་ཏེ།། དེ་ནི་བདེན་པ་མཐོང་བ་ཡིན།། དེ་བས་འདུས་པ་ཆེན་པོའི་ཚོགས།། སེམས་ནི་ཡང་དག་ལམ་ཉིད་དེ། ། མཁའ་ལ་བྱ་ལམ་རྗེས་མེད་བཞིན།། གོལ་མེད་ལམ་ཞེས་འདྲེན་པར་བཤད།། དེ་ལྟར་བཤད་པའི་ལམ་དེ་ཡང།། ཀུན་གྱིས་རྟོགས་པར་བྱ་བའི་ཕྱིར།། ཚིག་ཏུ་མཚོན་ཏེ་བཤད་མོད་ཀྱང། ། དམིགས་མེད་ཚིག་གི་ཡུལ་བྲལ་བ།། དེ་ཡི་རང་བཞིན་དེ་ཡིན་ན།། རང་བཞིན་གཞི་ལས་མཚན་མར་གཡོས།། དེ་ལ་མིང་མེད་མིང་བཏགས་རྒྱུས།། ཡིན་དང་མ་ཡིན་ཐེ་ཚོམ་སྐྱེས།། དེ་ལས་རྩོད་པའི་གཞིར་གྱུར་ཏེ། ། དེ་བསལ་དོན་ཕྱིར་མཚན་མ་ཡི།། ཚིག་གི་ཚོགས་ཀྱི་རྣམ་གྲངས་ལས། སྒོ་མོ་དཔག་ཏུ་མེད་པར་བཤད།། དེ་ཡིས་ངེས་དོན་རྗེས་བཅད་པ།། ཐུགས་ཀྱི་ཀློང་ནས་བཏོན་པ་ཡི།། ཚིག་གི་སྒྲོན་མས་དོན་བཙལ་བ། ། ལམ་ཉིད་ཇི་ལྟར་ཡིན་ཞེ་ན།། དྲན་བྱུང་རྗེས་སུ་འབྲེངས་ན་ནི།། འཁོར་བའི་གནས་སུ་འཁོར་བར་འགྱུར།། དྲན་འབྱུང་གཡོ་བ་ཅི་བཀག་པ།། དེ་དག་འགོག་པ་ཉིད་དུ་འགྱུར།། དྲན་བྱུང་མེད་པ་བླུན་པ་ནི། ། མི་སྟེགས་ཅན་ལམ་མུན་པར་འགྱུར།། འདི་ཞེས་སེམས་སུ་གཅིག་བཟུང་ན།། མཚན་མ་རྟོག་པའི་རི་བོ་ཡིན།། སྔ་ཕྱི་མེད་ཅེས་ཕྱང་བཅད་ན།། མེད་དེ་ཆད་པའི་མུ་ཅན་ཡིན།། གཞི་ཡི་དོན་ལས་ཡུད་ཙམ་ཞིག། ཅིར་གཡོས་སྐྱེ་འགག་བྱུང་བ་དེ། རྣམ་གྲངས་ལམ་དེ་འཕེལ་འབྱུར་གྱི།། ལམ་གྱི་ཆོས་ཉིད་ག་ལ་འགྱུར།། དཔེར་ན་འགྲོ་གང་བྱིས་པ་དག། གྲིབ་མ་སྤངས་ནས་རྣམ་དག་ཚོལ།། ཡང་ལས་བྱུང་བའི་རང་བཞིན་གྱིས། ། བཙལ་ན་གྲིབ་མེད་དག་མི་རྙེད།། དོན་ཉིད་ཡེ་ནས་གནས་གཞིན་དུ།། སེམས་ཉིད་སྡུག་བསྔལ་སྣ་ཚོགས་ཀྱིས།། ཤ་ཐང་བར་ནི་དོན་ཚོལ་པ།། དོན་མེད་བདུད་ཀྱི་ལས་ཡིན་ནོ།། དོན་ལ་ཚིག་ཏུ་བརྗོད་པ་ནི། ། ནམ་མཁའ་དག་ལ་རྩོད་པ་འདྲ།། ཚིག་ཏུ་སྨན་དང་དཔྱད་བཤད་ཀྱང།། ནད་པའི་ཚོགས་ལ་མི་ཕན་ནོ།། སེམས་ཉིད་དོན་དུ་མ་ཤེས་ན།། ཚིག་ཏུ་དོན་རྗོད་དོན་མི་རྟོགས།། འཁོར་བ་སྤངས་ནས་འདས་ཚོལ་བ། ། གཟུགས་བཏང་ནས་ནི་གྲིབ་ཚོལ་འདྲ།། ལམ་ཉི་ཇི་ལྟར་ཡིན་ཞེ་ན།། མ་རིག་ཡེ་ཤེས་ཐ་དད་མིན།། མ་རྟོགས་རྟོགས་པ་ལམ་དུ་གཅིག། སེམས་འདི་སྣ་ཚོགས་པར་སྣང་བས།། སྣ་ཚོགས་སེམས་སུ་གཅིག་པ་ཡིན། ། དཔེར་ན་གསེར་དུ་གཅིག་པ་ལས།། དབྱིབས་དང་གཟུགས་ནི་ཐ་དད་པར།། བྱིས་པ་སོ་སོའི་མིང་དུ་གྲགས།། གྲགས་ཀྱང་སེར་གྱི་ངོ་བོར་གཅིག། དེ་བཞིན་སེམས་ཀྱི་རང་བཞིན་ལ།། འཁྲུལ་དང་མ་འཁྲུལ་ཁྱད་པར་གྱིས། ། ཇི་ལྟར་བལྟས་དགུ་དེར་སྡང་ཡང།། སྣང་ཡང་སེམས་ལས་གཞན་མི་དམིགས།། སྒྲོན་མར་འབར་བའི་རིན་ཆེན་ནི།། གལ་ཏེ་ངན་ཁུང་སྦས་གྱུར་ཀྱང།། དེ་ཉིད་ཡོན་ཏན་རང་སྣང་བས། ། འོད་ནི་མཁའ་ལ་གསལ་བར་འགྱུར།། དེ་བཞིན་སེམས་ཉིད་རིན་ཆེན་སྒྲོན།། ལུས་ངག་འཁོར་བར་བྱིང་གྱུར་ཀྱང།། རང་བྱུང་རང་ཞི་རང་སྣང་བས།། ཤེས་རབ་ཆོས་ཉིད་མཁའ་ལ་གསལ།། སེམས་ཉིད་ནམ་མཁའ་འདྲར་མཚུངས་ཏེ། ། ཀུན་ཁྱབ་སྟོང་གསལ་སྣ་ཚོགས་འབྱུང།། བྱུང་ཚོར་གཡོ་འགོག་ཐམས་ཅད་ཀྱང།། རང་བཞིན་གྱིས་འབྱུང་ངང་གིས་ཞི།། མདོར་ན་ཇི་ལྟར་བརྟགས་བསམ་བཞིན།། འགྱུར་བས་ཐམས་ཅད་ངོ་བོར་སྣང། ། མ་བཅོས་གཡོ་བ་མེད་ཉིད་ལ།། སྣ་ཚོགས་རྒྱུ་འབྱུང་མི་སྐྱོན་ཞིང།། ཆོ་འཕྲུལ་མི་འགག་ཉམ་ང་མེད།། ཅི་བཞིན་ནམ་མཁའི་རང་བཞིན་ལ།། བློ་བཞག་མ་གཡེངས་ཁོ་ནར་ཟད།། དེ་ནི་སྐྱེས་མཆོག་དོན་པོ་ཆེ། ། དེ་སེམས་དུས་གསུམ་ཐམས་ཅད་ཀྱི།། སངས་རྒྱས་འབྱུང་བའི་ངོ་བོ་ཡིན།། དེ་ལྟའི་དོན་ལ་རིང་ཞིག་ནས།། ཤེས་ཤིང་འདྲིས་པར་གྱུར་པ་ན།། ངེས་དོན་མཐོང་བའི་ཉམས་དྲོད་ནི།། དོན་དང་མཇལ་བའི་རྟགས་ཆེན་ཡང། ། མན་ངག་ལུང་གིས་བརྒྱད་འཆར་ཏེ།། ངེས་པར་དོན་གསུམ་མྱོང་བར་འགྱུར།། དེ་དག་ཐོག་ཏུ་ཕེབས་པ་ཡི།། དྲོད་ཆེན་རྟགསས་སུ་བསྟན་པ་ཡིན།། དེ་ཡི་ཞར་ལས་བྱུང་པའི་དྲོད། ། འཁོར་བའི་ཆོས་ལ་སྙིང་རྗེ་ཡི།། བྱང་ཆུབ་སེམས་ཀྱང་སྐྱེ་བར་འགྱུར།། མཚན་མ་རྟོགས་པའི་ཆོས་རྣམས་ལ།། ཡིད་མི་ཤེས་པའི་འདུ་ཤེས་སྐྱེ།། ཆོས་རྣམས་འདི་ལྟར་ཡིན་པ་ལས།། འདི་ལྟར་འཁྲུལ་པ་ངོ་མཚར་ཆེ། ། ཡ་མཚན་དཔྱོད་པའི་འདུ་ཤེས་འབྱུང།། འདི་དོན་མ་ཤེས་འགྲོ་བ་རྣམས།། རྩོལ་སྒྲུབ་དཀའ་བའི་ཐབས་ཆེན་གྱིས།། ཡང་དག་དོན་ཚོལ་ལམ་རེ་རིང།། བསགས་པའི་འབྲས་བུ་ཡོད་འགྱུར་ཡང།། དོན་དེ་མཐོང་བར་ཡོང་མི་ནུས། ། དེ་འདྲའི་འདུ་ཤེས་འབྱུང་བར་འགྱུར།། དེ་ལྟར་ཤེས་པའི་ཉམས་དྲོད་ནི། སྐལ་དང་ལྡན་པའི་སྐྱེས་བུ་གང།། རྒྱུད་འགྲོས་ཚིག་གིས་མ་བཀྲོལ་བར།། སེམས་ལས་ཆོས་བྱུང་འབུམ་ཕྲག་ཡས། ། སྨྲ་བའི་སྒོ་མོར་ཐམས་ཅད་གསལ།། དོན་ལ་ངེས་པའི་གཏན་ཚིགས་དག། ཚིག་ཏུ་མཚོན་ཏེ་འབྱིན་པར་ནུས།། དེ་ནི་ཆོས་སྐུ་མཉམ་ཉིད་དང།། དབྱེར་མེད་གཉིས་སུ་མེད་པ་ཡིན།། རྟེན་པའི་གསུང་ཐུགས་སྐུ་བརྙན་དང། ། དེ་ནི་མཚུངས་པ་ཡོང་མིན་ནོ།། ཞི་ལུས་མཐར་འགོག་སྐྱོན་གཉིས་དང། དེ་ནི་མཚུངས་པ་ཡོད་མ་ཡིན།། ས་ལ་སློབ་པའི་སེམས་དཔའ་དང། དེ་ཡང་མི་མཚུངས་རྒྱལ་བས་གསུངས། ། རིག་འཛིན་དྲང་སྲོང་དོན་དཔྱོད་དང། ལུས་འདྲ་སེམས་ནི་ཡོང་མི་མཚུངས།། དེ་ཕྱིར་རྣམ་དག་ལམ་ཆེན་ནི།། སེམས་ཀྱི་གསང་འདི་ཡིན་པས་ན།། སྐལ་ལྡན་འདུས་པ་ཆེན་པོའི་ཚོགས། ལམ་འདི་ཤེས་པར་བྱ་བ་ལས། ། བཙལ་བར་བྱ་བའི་རྒྱུ་མེད་དེ།། ལམ་འདི་ཤེས་པ་དེ་ཉིད་ཀྱིས།། དཀའ་བའི་རྩོལ་སྒྲུབ་མ་བྱས་པར།། ཐམས་ཅད་ཐམས་ཅད་གྲུབ་པར་འགྱུར།། འདུས་པ་ཆེན་པོའི་ཚོགས་དེ་བས་ན་སེམས་འདི་ནི་ལམ་ཞེས་བྱའོ། ། འཁོར་བ་ཞེས་བྱའོ།། སེམས་ཅན་ཞེས་བྱའོ།། གྲུ་ཞེས་བྱའོ།། བགྲོད་པ་ཞེས་བྱའོ།། བྱང་ཆུབ་ཅེས་བྱའོ།། སེམས་ཞེས་བྱའོ།། ཤེས་རབ་ཅེས་བྱའོ།། ཏིང་ངེ་འཛིན་ཅེས་བྱའོ།། གནས་ཞེས་བྱའོ། ། རབ་ཅེས་བྱའོ།། མཆོག་ཅེས་བྱའོ།། ཕུལ་ཞེས་བྱའོ།། བླ་ན་མེད་པ་ཞེས་བྱའོ།། ཟབ་པ་ཞེས་བྱའོ། གསང་བ་ཞེས་བྱའོ།། གཏིང་པ་དཔག་དཀའ་བ་ཞེས་བྱའོ།། ཆོས་ཞེས་བྱའོ།། བྱང་ཆུབ་སེམས་དཔའ་ཞེས་བྱའོ། ། སངས་རྒྱས་ཞེས་བྱའོ།། དེ་ཅིའི་ཕྱིར་ཞེས་ན།། འཇུག་པའི་ཕྱིར་ནི་ལམ་མོ།། འཁྲུལ་པའི་ཕྱིར་ནི་འཁོར་བའོ།། མ་ཤེས་པའི་ཕྱིར་ནི་སེམས་ཅན་ནོ།། སྒྲོལ་བའི་ཕྱིར་ནི་གྲུའོ།། བསྐྱོད་པའི་ཕྱིར་ནི་བགྲོད་པའོ། ། བདེ་བའི་ཕྱིར་ནི་བྱང་ཆུབ་བོ།། དྲན་པ་ངེས་པའི་ཕྱིར་ནི་སེམས་སོ།། མཁས་པའི་ཕྱིར་ནི་ཤེས་རབ་བོ།། གསལ་བའི་ཕྱིར་ནི་ཏིང་ངེ་འཛིན་ཏོ།། ཕྱིན་པའི་ཕྱིར་ནི་གནས་སོ།། ཟླ་མེད་པའི་ཕྱིར་ནི་རབ་བོ།། ངོ་མཚར་བའི་ཕྱིར་ནི་མཆོག་གོ། འཕགས་པའི་ཕྱིར་ནི་ཕུལ་ལོ།། དབང་བྱེད་པ་མེད་པའི་ཕྱིར་ནི་བླ་ན་མེད་པའོ།། གཏིང་རིང་པའི་ཕྱིར་ནི་ཟབ་པའོ།། གབ་པའི་ཕྱིར་ནི་གསང་བའོ།། ཕྲ་བའི་ཕྱིར་ནི་གཏིང་དཔག་དཀའ་བའོ། ། ཀུན་འབྱུང་པའི་ཕྱིར་ནི་ཆོས་སོ།། ས་ནོན་པའི་ཕྱིར་ནི་བྱང་ཆུབ་སེམས་དཔའོ།། མཐར་ཕྱིན་པའི་ཕྱིར་ནི་སངས་རྒྱས་ཏེ།། སེམས་དཔའ་ཆེན་པོ་དེའི་ཕྱིར་ན་རྣལ་འབྱོར་གྱི་ལམ་འདི་ཤེས་པར་བྱ་སྟེ། ། ལམ་འདི་ནི་ཆོས་ཐམས་ཅད་ཀྱི་གཞིའོ།། སངས་རྒྱས་ཐམས་ཅད་ཀྱི་ཡུམ་མོ།། དེ་ཅིའི་ཕྱིར་ཞེ་ན།། ཆོས་ཐམས་ཅད་འདི་ལས་འབྱུང་པའི་ཕྱིར་ན་གཞིའོ།། མཐར་ཕྱིན་པའི་སངས་རྒྱས་ཀྱི་ལམ་འདི་ནས་གཤེགས་པར་གྱུར་རོ། ། ད་ལྟར་སྟོང་པ་ཉིད་ཀྱང་ལམ་འདི་ནས་གཤེགས་པ་སྟེ། དེའི་ཕྱིར་ལམ་འདི་ཤེས་པར་བྱའོ།། དེ་ལྟར་ན་དེའི་ཕྱིར་ལམ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཡབ་ཅེས་ཀྱང་བྱའོ། ། དེ་བཞིན་དུ་ཡུམ་ཞེས་ཀྱང་བྱ་བ་དང། སྲས་ཤེས་བྱ་བ་དང། བདག་པོ་ཞེས་བྱ་བ་དང། གདུང་ཞེས་བྱ་བ་དང། སྲོག་ཅེས་བྱ་བ་དང། ནོར་ཞེས་བྱ་བ་དང། བྲན་ཞེས་བྱ་བ་དང། སྐུ་ཞེས་བྱ་བ་དང། གསུང་ཞེས་བྱ་བ་དང། ཐུགས་ཞེས་བྱ་བ་དང། ཡོན་ཏན་ཞེས་བྱ་བ་དང། ཕྲིན་ལས་ཆེན་པོ་ཞེས་བྱ་བའོ།། དེ་ཅིའི་ཕྱིར་ཞེས་ན། ཐབས་ཆེན་པོ་དང། ཤེས་རབ་ཆེན་པོ་དང། བྱང་ཆུབ་ཆེན་པོ་དང། དབང་ཆེན་པོ་དང། དེ་བཞིན་ཉིད་དང། འདའ་བར་དཀའ་བ་དང། ཆོས་ཉིད་ལ་ཟད་མི་ཤེས་པ་དང། སྙིང་རྗེ་ཆེན་པོ་དང། རྣམ་པར་བརྗིད་པ་དང། སྣ་ཚོགས་སུ་སྟོན་པ་དང། ཐམས་ཅད་དུ་མཁྱེན་པ་དང། ཅིར་ཡང་འབྱུང་བ་དང། མཛད་པ་སྣ་ཚོགས་པའི་ཕྱིར་དེ་དག་ནི་དེ་ལྟར་ཡིན་པར་ཤེས་པར་བྱའོ།། དེའི་ཕྱིར་ཡང་ལམ་འདི་ཡོངས་སུ་ཤེས་པར་བྱའོ།། དེ་བཞིན་དུ་འདོད་པ་ཆེན་པོ་ཞེས་ཀྱང་བྱའོ།། འཚོ་བ་ཆེན་པོ་ཞེས་བྱ་བ་དང། ལོངས་སྤྱོད་ཆེན་པོ་ཞེས་བྱ་བ་དང། ཡོ་བྱད་ཆེན་པོ་ཞེས་བྱ་བ་དང། རྒྱུ་ཞེས་བྱ་བ་དང། རྐྱེན་ཞེས་བྱ་བ་དང། འབྲས་བུ་ཞེས་བྱ་བ་དང། སྤྱོད་པ་ཞེས་བྱ་བ་དང། ཆོ་འཕྲུལ་ཞེས་བྱ་བ་དང། ཕྱག་རྒྱ་ཞེས་བྱ་བ་དང། བསྙེན་པ་ཞེས་བྱ་བ་དང། ཉེ་བའི་བསྙེན་པ་ཞེས་བྱ་བ་དང། སྒྲུབ་པ་ཞེས་བྱ་བ་དང། སྒྲུབ་པ་ཆེན་པོ་ཞེས་བྱ་ཞེས་བྱ་བ་དང། ཚོགས་ཆེན་པོ་ཞེས་བྱ་བ་དང། ཀུན་དུ་རྫོགས་པ་ཞེས་བྱའོ།། དེ་ཅིའི་ཕྱིར་ཞེ་ན། ཡུལ་ལ་འདོད་པ་སྣ་ཚོགས་པ་དང། དམིགས་པས་འཚོ་བ་དང། འཇོལ་ཉོག་ཏུ་སྤྱོད་པ་དང། དགོས་པ་སྒྲུབ་པ་དང། འབྲས་བུར་བྱེད་པ་དང། ཀུན་དུ་ལོག་པ་དང། དོན་གྲུབ་པ་དང། སྨིན་པར་བསགས་པ་དང། རང་བཞིན་དུ་གྱུར་པ་དང། བྱ་བ་བྱེད་པ་དང། སྣ་ཚོགས་སུ་འབྱུང་བ་དང། མཚན་མར་བསྟན་པ་དང། རྣམ་པར་འདུད་པ་དང། ཤིན་ཏུ་མཛད་པ་དང། འདོད་པ་བྱེད་པ་དང། ལྷག་པར་འདོད་པ་དང། ཀུན་དུ་འབྱོར་པ་དང། ལྷུན་གྱིས་གྲུབ་པའི་ཕྱིར་ཡོངས་སུ་ཤེས་པར་བྱའོ།། གཞན་ཡང་འདུས་པ་ཆེན་པོའི་ཚོགས་འདི་ལ་ནི་ཐམས་ཅད་ཡོད་དེ།། ཆོས་ཐམས་ཅད་ནི་རྣལ་འབྱོར་རྣམས་པ་གསུམ་དུ་འདུས་པར་ཤེས་པར་བྱའོ། ། གསུམ་གང་ཞེ་ན།། རྒྱུའི་རྣལ་འབྱོར་དང། རྐྱེན་གྱི་རྣལ་འབྱོར་དང། འབྲས་བུའི་རྣལ་འབྱོར་རྣམ་པ་གསུམ་ཡང་འདི་ཉིད་ཡིན་ཞིང་འདི་ལས་འབྱུང་བར་ཤེས་པར་བྱ་སྟེ། དེ་ཡང་ཇི་ལྟར་ཞེ་ན།། རྒྱུ་ནི་འཁྲུལ་པ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། ། དེ་བཞན་དུ་མཚན་མ་གཉིས་དང། རྟོག་པ་གསུམ་དང། ལོག་པ་བཞི་དང། ཉོན་མོངས་པ་ལྔ་དང། ཕུང་པོ་ལྔ་དང། དབང་པོ་ལྔ་དང། རྒྱུ་དྲུག་དང། རྐྱེན་བཅུ་གཉིས་དང། སྐྱེ་བ་བཅུ་གཉིས་དང། རང་བཞན་བཅོ་བརྒྱད་དང། སྤྱོད་པ་བཅུ་གཅིག་དང། སྨིན་པ་བཞི་དང། ལམ་ལྔ་དང། གནས་དྲུག་དང། མུ་གསུམ་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། ། དེ་ཅིའི་ཕྱིར་ཞེ་ན། འདོད་པའི་འབྲས་བུའི་གཞིར་གྱུར་པའི་ཕྱིར་ཏེ། ལམ་དེ་ཉིད་མ་རིག་པའི་ཕྱིར་འཁྲུལ་བ་ཞེས་བྱའོ།། ཡུལ་དང་གཉིས་སུ་གྱུར་པའི་ཕྱིར་ན་མཚན་མ་ཞེས་བྱའོ། དུས་གསུམ་དངོས་པོར་རྟོག་པའི་ཕྱིར་རྟོག་པ་ཞེས་བྱའོ།། ངེས་པ་ལས་ལོག་པའི་ཕྱིར་དོན་ལས་གོལ་བ་དང། མཉམ་པ་ལས་གོལ་བར་དང་ཕྱོགས་ལས་གོལ་བ་དང་གཞི་ལས་གོལ་བའི་ཕྱིར་ལོག་པ་ཞེས་བྱའོ། ། རྒྱུ་འབྲས་ཀུན་ནས་ཉོན་མོངས་པའི་ཕྱིར་མུན་པས་འཐིབས་པ་དང། སྲེད་པས་གདུངས་པ་དང། སྡོང་པོས་ནོན་པ་དང། མི་ཕྱེད་པས་འཐས་པ་དང། ཀུན་ནས་འཁྲུགས་པའི་ཕྱིར་ཉོན་མོངས་པ་ཞེས་བྱའོ། ། ཀུན་ནས་འདུས་པའི་ཕྱིར་རྒྱུ་འདུས་པ་དང། རྐྱེན་དུ་ཚོར་བ་དང། མཚན་མར་ཤེས་པ་དང། ཐམས་ཅད་ནས་བྱེད་པ་དང། རྣམ་པར་རིག་པའི་ཕྱིར་ཕུང་པོ་ཞེས་བྱའོ།། སྒོར་གསལ་ཞིང་ཡུལ་ལ་དབང་དང་བྱེད་པའི་ཕྱིར་མཐོང་བར་དབང་བ་དང། ཐོས་པར་དབང་བ་དང། ཚོར་བ་དབང་བ་དང། མྱོང་བར་དབང་བ་དང། རེག་པར་དབང་བའི་ཕྱིར་དབང་པོ་ཞེས་བྱའོ།། འབྲས་བུར་བྱེད་པའི་ཕྱིར་འཛིན་པར་དབང་བ་དང། མཉེན་པར་བྱེད་པ་དང། ཆགས་པར་བྱེད་པ་དང། གཡོ་བར་འབུད་པ་དང། སྐྱེད་པར་གསལ་བ་དང། དུས་སུ་རེད་པའི་ཕྱིར་རྒྱུ་ཞེས་བྱའོ།། རྐྱེན་དུ་འབྲེལ་བའི་ཕྱིར་ས་བོན་དང། རྩ་བ་དང། མྱུ་གུ་དང། ལྡུམ་བུ་དང། ཡལ་ག་དང། སྡོང་པོ་དང། འདབ་མ་དང། མེ་ཏོག་དང། འབྲས་བུ་དང། སྙིང་པོ་དང། སྐམས་པའི་ཕྱིར་རྐྱེན་ཞེས་བྱའོ། མཚན་མ་སྐྱེ་བའི་ཕྱིར་མཐོང་བ་སྐྱེ་བ་དང། སྣང་བ་དང། ཐོས་པ་དང། སྒྲ་བརྙན་དང། ཚོར་བ་དང། དྲི་དང། མྱང་བ་དང། རོ་དང། རེག་པ་དང། ཤེས་པ་དང། ཆོས་སྐྱེ་བའི་ཕྱིར་སྐྱེ་བ་ཞེས་བྱའོ།། མཚན་མའི་ཆོས་ཉིད་ཅན་གྱི་ཕྱིར། མཐོང་བའི་ཆོས་ཉིད་དང། སྣང་བའི་ཆོས་དང། ལྷང་ངེ་བའི་ཆོས་དང། ཐོས་པའི་ཆོས་དང། གྲགས་པའི་ཆོས་དང། གསལ་བའི་ཆོས་དང། ཚོར་བའི་ཆོས་དང། དྲིའི་ཆོས་དང། ཚིམ་པའི་ཆོས་དང། མྱང་བའི་ཆོས་དང། རོའི་ཆོས་དང། བྲོ་བའི་ཆོས་དང། རེག་པའི་ཆོས་དང། རེག་བྱའི་ཆོས་དང། ངེས་པའི་ཆོས་དང། ཤེས་པའི་ཆོས་དང། ཆོས་ཀྱི་ཆོས་དང། རྟོགས་པའི་ཆོས་ཉིད་འཛིན་པའི་ཕྱིར་ཆོས་ཉིད་ཅེས་བྱའོ།། མཚན་མར་སྤྱོད་པའི་ཕྱིར་འདུ་ཤེས་སྒྱུར་བའི་སྤྱོད་པ་དང། དབང་དུ་སྤྱོད་པའི་སྤྱོད་པ་དང། རྣམ་པར་གཡོ་བའི་སྤྱོད་པ་དང། སྒྲོས་སུ་འདོགས་པའི་སྤྱོད་པ་དང། ཟླ་ལས་གལ་བའི་སྤྱོད་པ་དང། ཀུན་དུ་འཚིག་པའི་སྤྱོད་པ་དང། བླ་བཀྱལ་འཚལ་བའི་སྤྱོད་པ་དང། ཆགས་པ་འཛིན་པའི་སྤྱོད་པ་དང། ཀུན་དུ་བདུད་ཀྱི་སྤྱོད་པ་དང། ཕྱིན་ཅི་ལོག་པའི་སྤྱོད་པ་དང། གཉིས་ལ་བརྟེན་པར་སྤྱོད་པའི་ཕྱིར་སྤྱོད་པ་ཞེས་བྱའོ།། འབྲས་བུར་སྨིན་པའི་ཕྱིར་རྫོགས་པར་སྨིན་པ་དང། ། རིམ་པར་སྨིན་པ་དང།། གློ་བུར་དུ་སྨིན་པར་དང། བསྒྱུར་ཏེ་སྨིན་པའི་ཕྱིར་སྨིན་པ་ཞེས་བྱའོ།། བགྲོད་པར་བྱེད་པའི་ཕྱིར་གདུང་བའི་ལམ་དང། འགོག་པའི་ལམ་དང། མུན་པའི་ལམ་དང། འདམ་གྱི་ལམ་དང། ཡང་བའི་ཕྱིར་ལམ་ཞེས་བྱའོ།། བརྟེན་པར་བྱེད་པའི་ཕྱིར་བཟོད་ལྡན་གྱི་གནས་དང། ཡིད་ལྡན་གྱི་གནས་དང། མཉམ་ལྡན་གྱི་གནས་དང། འདོད་ལྡན་གྱི་གནས་དང། རྩོད་ལྡན་གྱི་གནས་དང། དགའ་ལྡན་ལ་གནས་པའི་ཕྱིར་གནས་ཞེས་བྱའོ།། བདེ་བའི་མུ་ལ་བཟུང་པའི་ཕྱིར་ངོ་བོ་ཉིད་ཀྱི་མུ་དང། བྱེད་པ་དང་དབང་ཕྱུག་གི་མུ་བཟུང་བའི་ཕྱིར་མི་ཞེས་བྱའོ།། འདུས་པ་ཆེན་པོའི་ཚིགས་རྐྱེན་གྱི་རྣལ་འབྱོར་ནི་འདི་ལྟ་སྟེ། ཤེས་པ་གཅིག་ཤེས་ཏེ་ཆུབ་པར་འདོད་པས་ཀྱང། ལམ་འདི་ཤེས་པར་བྱའོ།། དེ་བཞིན་དུ་དོན་གཉིས་དང། ཚུལ་གསུམ་དང། ཐབས་བཞི་དང། ཆོས་ལྔ་དང། རིགས་དྲུག་དང། མཛད་པ་ཆེན་པོ་བཅུ་གཉིས་དང། ཆོ་འཕྲུལ་ཆེན་པོ་བཅུ་གཉིས་དང། ཡེ་ཤེས་བཅོ་བརྒྱད་དང། སའི་ཁྱད་པར་བཅུ་གཅིག་དང། སྐུ་བཞི་དང། ལམ་ལྔ་དང། འབྲས་བུ་ཆེན་པོ་དྲུག་དང། བྱང་ཆུབ་ཆེན་པོ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། ། དེ་ཅིའི་ཕྱིར་ཞེ་ན། རང་རྐྱེན་ཙམ་དུ་སྤྱོད་ཅིང་འབྲས་བུའི་རྐྱེན་དུ་འགྱུར་བའི་ཕྱིར་ཏེ།། ལམ་དེ་ཉིད་མ་ནོར་བར་ཤེས་པའི་ཕྱིར་དེ་ཤེས་པ་གཅིག་ཤེས་བྱའོ།། བདེན་པ་གཉིས་སུ་སྣང་བའི་ཕྱིར་དོན་གཉིས་པ་ཞེས་བྱའོ། ། མཚན་ཉིད་གསུམ་གྱིས་སྦྱོར་བའི་ཕྱིར་ཀུན་བརྟགས་མཐུན་པ་ལ་ཡོད་པའི་ཚུལ་དང། གཞན་དབང་མི་མཐུན་པ་ལ་མེད་པའི་ཚུལ་དང། རྗེས་སུ་དཔག་པ་གཉི་ག་མ་ཡིན་པའི་ཕྱིར་ཚུལ་ཞེས་བྱའོ། ། མཁས་པས་ཟིན་པའི་ཕྱིར་ཁད་ཀྱིས་འཇུག་པའི་ཐབས་དང། རྐྱེན་ལ་སྦྱོར་བའི་ཐབས་དང། མངོན་པར་འཇུག་པའི་ཐབས་དང་ཐམས་ཅད་རྫོགས་པའི་ཕྱིར་ཐབས་ཞེས་བྱའོ། ། རང་བཞིན་ལ་གནས་པའི་ཕྱིར་རྒྱུའི་ཆོས་དང། ལམ་གྱི་ཆོས་དང། རྟོགས་པའི་ཆོས་དང། འབྲས་བུའོ་ཆོས་ལ་གནས་པའི་ཕྱིར་ཆོས་ཞེས་བྱའོ།། ཕྱིས་འབྱུང་བར་ཤེས་པའི་ཕྱིར་རྒྱུའི་དྲན་པ་དང། འབྲས་བུའི་དྲན་པ་དང། སྒྲའི་དྲན་པ་དང། སྦྱོར་བའི་དྲན་པ་དང། གནས་ཀྱི་དྲན་པ་དང། མངོན་སུམ་པའི་དྲན་པ་དང། རིག་པའི་ཕྱིར་རིག་པ་དྲུག་ཅེས་བྱའོ།། གཞན་གྱི་དོན་དུ་མཛད་ཅིང་འགྲོ་བའི་དོན་ལ་འཇུག་པའི་ཕྱིར་ངོ་བོའི་ཚུལ་དང། བལྟམས་པའི་ཚུལ་དང། རོལ་པའི་ཚུལ་དང། མངའ་དབང་ཆེན་པོའི་ཚུལ་དང། ཐར་པར་གྱུར་པའི་ཚུལ་དང། དཀའ་ཐུབ་ཆེན་པོའི་ཚུལ་དང། སངས་རྒྱས་པ་དང་བདུད་བཏུལ་བ་དང་འཁོར་ལོ་བསྐོར་བ་དང། བདུད་བཏུལ་བའི་ཚུལ་དང། ཆོས་འཕྲུལ་སྟོན་པའི་ཚུལ་དང།། མྱ་ངན་ལས་འདས་པའི་ཚུལ་གྱིས་ཕྱིར་མཛད་པ་ཆེན་པོ་ཞེས་བྱའོ།། སྣ་ཚོགས་སུ་འཕྲུལ་བའི་ཕྱིར། ཏིང་ངེ་འཛིན་གྱི་ཆོ་འཕྲུལ་དང། སྣང་བི་ཆོ་འཕྲུལ་དང། རྫུ་འཕྲུལ་གྱི་ཆོ་འཕྲུལ་དང། ཀུན་རྗོད་པའི་ཆོ་འཕྲུལ་དང། རྗེས་སུ་བསྟན་པའི་ཆོ་འཕྲུལ་དང། བསམ་གཏན་གྱི་ཆོ་འཕྲུལ་དང། བྱིན་བརླབས་ཀྱི་ཆོ་འཕྲུལ་དང། སྐྱེ་བའི་ཆོ་འཕྲུལ་དང། སྟོབས་ཀྱི་ཆོ་འཕྲུལ་དང། ཡོན་ཏན་གྱི་ཆོ་འཕྲུལ་དང། འབྲས་བུའོ་ཆོ་འཕྲུལ་དང། དེའི་ཕྱིར་ཆོ་འཕྲུལ་ཞེས་བྱའོ།། ཕྱི་ནང་གི་ཆོས་ཐམས་ཅད་ཤེས་པའི་ཕྱིར་ནང་གི་ཆོས་ཐམས་ཅད་ཤེས་པ་དང། ཕྱིའི་ཆོས་ཐམས་ཅད་ཤེས་པའི་ཡེ་ཤེས་དང། ཕྱི་ནང་གི་ཆོས་ཐམས་ཅད་ཤེས་པའི་ཡེ་ཤེས་དང། སྟོང་པའི་ཆོས་ཐམས་ཅད་ཤེས་པའི་ཡེ་ཤེས་དང། དོན་དམ་པའི་ཆོས་ཉིད་ཤེས་པའི་ཡེ་ཤེས་དང། འདུས་བྱས་ཀྱི་ཆོས་ཐམས་ཅད་ཤེས་པའི་ཡེ་ཤེས་དང།། མཐའ་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང། དུས་གསུམ་གྱི་ཆོས་ཐམས་ཅད་ཤེས་པའི་ཡེ་ཤེས་དང། བླང་དོར་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང། རང་བཞིན་གྱི་ཆོས་ཐམས་ཅད་ཤེས་པའི་ཡེ་ཤེས་དང། ཆོས་ཅན་གྱི་ཆོས་ཐམས་ཅད་ཤེས་པའི་ཡེ་ཤེས་དང། མཚན་ཉིད་འཛིན་པའི་ཆོས་ཐམས་ཅད་ཤེས་པའི་ཡེ་ཤེས་དང། དམིགས་པ་མེད་པའི་ཆོས་ཐམས་ཅད་ཤེས་པའི་ཡེ་ཤེས་དང། མཚན་མར་མི་རྟོགས་པའི་ཆོས་ཐམས་ཅད་ཤེས་པའི་ཡེ་ཤེས་དང། ངོ་བོ་ཉིད་ཀྱི་ཆོས་ཐམས་ཅད་ཤེས་པའི་ཡེ་ཤེས་དང། དངོས་པོ་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང། བརྟེན་ཏེ་གནས་པའི་ཕྱིར་མི་གོས་པའི་རིག་པ་དང། མི་ཉམས་པར་རིག་པ་དང། མི་སྒྲིབ་པར་རིག་པ་དང། རྫོགས་པར་རིག་པ་དང། མ་གཡོས་པར་རིག་པ་དང། མཉམ་པ་ཉིད་དུ་རིག་པ་དང། གཉིས་སུ་མེད་པར་རིག་པ་དང། ཡོངས་སུ་དག་པར་རིག་པ་དང། ཀུན་དུ་ལེགས་པར་རིག་པ་དང། དེ་མ་ཐག་པར་རིག་པ་དང། རྫོགས་པར་ཆུབ་པའི་རིག་པ་ལ་བརྟེན་པའི་ཕྱིར་ས་ཞེས་བྱའོ། ། ཀུན་ཏུ་བརྗོད་ཅིང་ངོ་བོ་ཉིད་དུ་གནས་པའི་ཕྱིར་ངོ་བོ་ཉིད་དང། ཆོས་ཉིད་དང།། རྫོགས་ལོངས་སྤྱོད་པ་དང། འདྲེན་པར་སྤྲུལ་པའི་ཕྱིར་སྐུ་ཞེས་བྱའོ།། བགྲོད་ཅིང་འཇུག་པའི་ཕྱིར་ཚོགས་དང། སྦྱོར་བ་དང་མཐོང་བ་དང། བསྒོམ་པ་དང། མཐའ་ཟད་དུ་ཕྱིན་པའི་ཕྱིར་ལམ་ཞེས་བྱའོ།། རྒྱུ་ལ་དོན་ཡོན་པའི་ཕྱིར་གཅིག་ཏུ་རྫོགས་པ་དང། ཐམས་ཅད་དུ་མཁྱེན་པ་དང། ཡོངས་སུ་ཁྱབ་པ་དང། ཚཽགས་སུ་འབྱུང་བ་དང། ཀུན་དུ་དབང་བ་དང། དགོས་པ་ཚང་བའི་ཕྱིར་འབྲས་བུ་ཞེས་བྱའོ།། མངོན་པར་རྫོགས་པའི་ཕྱིར་བྱང་ཆུབ་ཆེན་པོ་ཞེས་བྱའོ།། འདུས་པ་ཆེན་པོའི་ཚོགས་འབྲས་བུའི་རྣལ་འབྱོར་ནི་འདི་ལྟ་སྟེ། མ་ནོར་བ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཤེས་པར་བྱའོ། ། དེ་བཞིན་དུ་ངེས་པ་གཉིས་དང། ཡོན་ཏན་གསུམ་དང། དགོངས་པ་བཞི་དང། ཆེན་པོ་ལྔ་དང། ཚོགས་པ་དྲུག་དང། འབྱུང་ཚུལ་བཅུ་གཉིས་དང། ཏིང་ངེ་འཛིན་བཅུ་གཉིས་དང། ཡེ་ཤེས་ཆེན་པོ་བཅོ་བརྒྱད་དང། རྣལ་འབྱོར་ཆེན་པོ་བཅུ་གཅིག་དང། སྒྲུབ་པ་ཆེ་ན་པོ་བཞི་དང། སྦྱོར་བ་ལྔ་དང། དངོས་གྲུབ་ཆེན་པོ་དྲུག་དང། རྫོགས་པ་ཆེན་པོ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཤེས་པར་བྱའོ།། དེ་ཅིའི་ཕྱིར་ཞེ་ན། རྒྱུ་ཉིད་འབྲས་བུར་གྲུབ་པའི་ཕྱིར་གཏན་ལ་ཕེབས་པས་མ་ནོར་བ་ཞེས་བྱའོ།། ཐེ་ཚོམ་མི་ཟ་བའི་ཕྱིར་ཐབས་ཀྱིས་ངེས་པ་དང། ཤེས་རབ་གྱིས་ངེས་པས་ངེས་པ་ཞེས་བྱའོ།། འདོད་པ་འབྱུང་བའི་ཕྱིར་ཡང་ཡོངས་སུ་ཁྱབ་པ་དང། རླབས་སུ་ཆེ་བའི་ཡོན་ཏན་དང།། རྩིས་ལས་འདས་པའི་ཕྱིར་ཡོན་ཏན་ཞེས་བྱའོ།། ཐབས་ཀྱིས་ལྡེམ་པོར་དགོངས་པའི་ཕྱིར་མཉམ་པ་ཉིད་ལ་དགོངས་པ་དང། ། མཚན་ཉིད་ཀྱི་ཕྱིར་དུས་གཞན་ལ་དགོངས་པ་དང། གཉེན་པོའི་ཕྱིར་གྲངས་གཞན་ལ་དགོངས་པ་དང། བསྒྱུར་བའི་ཕྱིར་དོན་གཞན་ལ་དགོངས་པས་ན་གོངས་པ་ཞེས་བྱའོ། ། ལྷག་པར་འཕགས་པའི་ཕྱིར་མངོན་པ་དང། བདག་ཉིད་ཆེན་པོ་དང། དེ་ཡིན་པ་དང། ཐམས་ཅད་དུ་ཆེ་བ་དང། ཀུན་དུ་རྫོགས་པའི་ཕྱིར་ཆེན་པོ་ཞེས་བྱའོ།། ཀུན་ནས་ཚང་བའི་ཕྱིར། མཉམ་པ་ཆེན་པོ་དང། འབྱོར་པ་ཆེན་པོ་དང། འདུས་པ་ཆེན་པོ་དང། རིག་པ་ཆེན་པོ་དང། དབང་ཆེན་པོ་དང། འདྲེས་པ་ཆེན་པོའི་ཕྱིར་ཚོགས་ཞེས་བྱའོ།། གཞན་གྱི་དོན་དུ་འབྱུང་ཞིང་འགྲོ་བའི་ཚུལ་དང་མཐུན་པའི་ཕྱིར་གནས་སུ་བསྐྱོད་པ་དང། མཉམ་པར་གྱུར་པ་དང། མཛེས་པར་གཤེགས་པ་དང། སྤྲོ་བར་སྤྱོད་པ་དང། གསང་བར་སྦྱོར་བ་དང། མཚན་མ་བཅོམ་པ་དང། མཛད་པ་མེད་པ་དང། སེངྒེའི་གསུང་སྒྲ་དང། ངེས་པར་རྫོགས་པ་དང། ཚོམ་ངམ་ཆེན་པོ་སྤྲུལ་པ་མཛད་པ་དང། ཡོངས་སུ་དག་པའི་ཕྱིར་འབྱུང་ཚུལ་ཆེན་པོ་ཞེས་བྱའོ།། གསལ་ཞིང་མི་གཏོང་བའི་ཕྱིར་སེམས་ཀྱི་སྤྱོད་པ་སྟེ།། རྣམ་དག་དབྱིངས་ཀྱི་ཏིང་ངེ་འཛིན་དང། ། སྣང་གསལ་ཡེལ་འཕྱོའི་ཏིང་ངེ་འཛིན་དང།། མི་ཟད་མཛོད་ཀྱི་ཏིང་ངེ་འཛིན་དང།། མངོན་པར་རྟོགས་པའི་ཏིང་ངེ་འཛིན་དང།། ཐམས་ཅད་རྫོགས་པའི་ཏིང་ངེ་འཛིན་དང། འབྱུང་ཆེན་སྤྲུལ་པའི་ཏིང་ངེ་འཛིན་དང། ། དབང་བསྒྱུར་ཐབས་ཀྱི་ཏིང་ངེ་འཛིན་དང།། རྩེ་གཅིག་འཕྲོས་པའི་ཏིང་ངེ་འཛིན་དང།། ཚོགས་ཆེན་རྫོགས་པའི་ཏིང་ངེ་འཛིན་དང།། རིན་ཆེན་མྱུ་གུའི་ཏིང་ངེ་འཛིན་དང།། དུག་འཇོམས་སྨན་གྱི་ཏིང་ངེ་འཛིན་དང། བྱ་བ་བྱེད་པའི་ཏིང་ངེ་འཛིན་གྱི་ཕྱིར་ཏིང་ངེ་འཛིན་ཅེས་བྱའོ།། སྟོང་པ་ཉིད་ཀྱི་ཡེ་ཤེས་དང་རྒྱུའི་ཡེ་ཤེས་དང།། ཐམས་ཅད་འབྱུང་བའི་ཡེ་ཤེས་དང།། ཡི་གེ་ཡེ་ཤེས་དང། ཕྱག་རྒྱའི་ཡེ་ཤེས་དང། སྤྲུལ་པའི་ཡེ་ཤེས་དང། ཅིར་ཡང་མཛད་པའི་ཡེ་ཤེས་དང།། མེ་ལོང་ལྟ་བུའི་ཡེ་ཤེས་དང། ནམ་མཁའ་ལྟ་བུའི་ཡེ་ཤེས་དང།། སྒྱུ་མ་ལྟ་བུའི་ཡེ་ཤེས་དང།། རིན་པོ་ཆེ་ལྟ་བུའི་ཡེ་ཤེས་དང། ། ཉི་མ་ལྟ་བུའི་ཡེ་ཤེས་དང།། སྣང་སྟོང་གསལ་བའི་ཡེ་ཤེས་དང།། མཉམ་པ་ཉིད་ཀྱི་ཡེ་ཤེས་དང།། སོ་སོར་རྟོག་པའི་ཡེ་ཤེས་དང།། བྱ་བ་ནན་ཏན་གྱི་ཡེ་ཤེས་དང།། ཆོས་ཀྱི་དབྱིངས་ཀྱི་ཡེ་ཤེས་སུ་གསལ་བའི་ཕྱིར་ཡེ་ཤེས་ཆེན་པོ་ཞེས་བྱའོ། ། འདུན་པ་སེམས་པའི་རྣལ་འབྱོར་དང།། བཀའ་སྡོད་ལས་ཀྱི་རྣལ་འབྱོར་དང། རིགས་ཆེན་འབྱེད་པའི་རྣལ་འབྱོར་དང།། རྟགས་ཀྱི་རྣལ་འབྱོར་དང། གསང་སྒོ་ལུང་གི་རྣལ་འབྱོར་དང། ། སྤྱོད་པ་རྒྱུན་གྱི་རྣལ་འབྱོར་དང།། མཚན་མ་རྟགས་ཀྱི་རྣལ་འབྱོར་དང། ལུང་ཆེན་ཐོབ་པའི་རྣལ་འབྱོར་དང།། རིག་པ་འཛིན་པའི་རྣལ་འབྱོར་དང།། རྩལ་ཆེན་སྦྱོང་བའི་རྣལ་འབྱོར་དང། ། ཡོངས་སུ་རྫོགས་པའི་རྣལ་འབྱོར་དང།། ལྷུན་གྱིས་གྲུབ་པའི་རྣལ་འབྱོར་དུ་གནས་པའི་ཕྱིར་རྣལ་འབྱོར་ཞེས་བྱའོ།། མཉམ་པ་ཉིད་དུ་གྲུབ་པ་དང། བདེ་བ་ཆེན་པོ་གྲུབ་པ་དང། ཡོངས་སུ་རྫོགས་པར་གྲུབ་པ་དང། ཐམས་ཅད་ལྷུན་གྱིས་གྲུབ་པའི་ཕྱིར་གྲུབ་པ་ཆེན་པོ་ཞེས་བྱའོ།། རྒྱུ་དང་འབྲས་བུར་སྦྱོར་བ་དང། ཐབས་དང་ཤེས་རབ་ཏུ་སྦྱོར་བ་དང། དབྱིངས་དང་ཡེ་ཤེས་སུ་སྦྱོར་བ་དང། སེམས་དང་ཆོས་སུ་སྦྱོར་བ་དང། ། ལས་དང་ཐུགས་རྗེར་སྦྱོར་བས་སྦྱོར་བ་ཆེན་པོ་ཞེས་བྱའོ།། སྲིད་པ་རྒྱ་མཚོ་དབྱིངས་སུ་ཚིམ་པར་གྲུབ་པ་དང། འཁོར་བ་རྒྱ་མཚོ་བདག་གིར་གྲུབ་པར་གྱུར་པ་དང། བདག་ཉིད་ཆེན་པོ་ལྷུན་གྱིས་གྲུབ་པར་གྱུར་པ་དང། དམིགས་པ་གང་ཡིན་པ་དེ་བཞིན་གྲུབ་པར་གྱུར་པ་དང། ཆོ་འཕྲུལ་རྫུ་འཕྲུལ་ཐོགས་པ་མེད་པར་གྲུབ་པ་དང།། དོན་དམ་བཅུད་ཀྱི་རྣམ་ཤེས་རྒྱས་པར་གྲུབ་པའི་ཕྱིར་དངོས་གྲུབ་ཆེན་པོ་ཞེས་བྱའོ། ། རྣམ་གྲངས་ཐམས་ཅད་བྱང་ཆུབ་ཀྱི་སེམས་བདེ་བ་ཆེན་པོར་རྫོགས་པར་གྲུབ་པའི་ཕྱིར་རྫོགས་པ་ཆེན་པོ་གཅིག་ཅེས་བྱའོ།། གཞན་ཡང་འདུས་པ་ཆེན་པོའི་ཚོགས་སའི་ཁྱད་པར་ཆེན་པོ་བཅུ་གཅིག་ནོན་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ་གང་ཞེ་ན། འགྱུར་དབང་མ་ངེས་པའི་ས་དང། བརྟེན་པ་གཞིའི་ས་དང། གལ་ཆེན་སྦྱོར་བའི་ས་དང། མི་ལྡོག་གནས་པའི་ས་དང། བསླབ་པ་རྒྱུན་གྱི་ས་དང། ཆོ་འཕྲུལ་སྤྲུལ་པའི་ས་དང། བསྟེན་པས་ཁྱད་པར་དུ་འགྲོ་བའི་ས་དང། དམིགས་པས་འབྲས་བུ་སྐྱེ་བའི་ས་དང། གནས་པས་མི་འགྱུར་བའི་ས་དང། བདལ་བ་ཆོས་ཉིད་ཀྱི་ས་དང། རྫོགས་པ་སྦྱིར་ཆིབས་ཀྱི་ས་སྟེ། ས་འདི་དག་ནོན་པར་འདོད་པས་ཀྱང་ལམ་འདི་ལ་བསླབ་པར་བྱའོ།། གཞན་ཡང་འདུས་པ་ཆེན་པོའི་ཚོགས་འདི་ལྟ་སྟེ། རྣལ་འབྱོར་བསླབ་པའི་མཐའ་བཅུ་ཆིབ་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ། གང་ཞེ་ན་གཞི་དམ་ཚིག་འདིས་བཟུང་པར་བསླབ་པ་དང། རྒྱུད་ཐོས་པས་དགྲོལ་བར་བསླབ་པ་དང། ཕུལ་དུ་མཁས་པར་དབྱུང་བར་བསླབ་པ་དང། སྒོ་ཀུན་ནས་སྡུད་པར་བསླབ་པ་དང་རིམ་པ་དབང་གིས་བགྲོད་པར་བསླབ་པ་དང། ལ་སྤྱོད་པས་དོར་བར་བསླབ་པ་དང། ཐག་ལྟ་བས་གཅད་པར་བསླབ་པ་དང། ཉམས་སུ་ཏིང་ངེ་འཛིན་གྱིས་བླང་བར་བསླབ་པ་དང། དོན་མན་ངག་གིས་བསྒྲུབ་པར་བསླབ་པ་དང། མདོ་གཅིག་ཏུ་བསྡུ་བར་བསླབ་པའོ།། འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། ཡོན་ཏན་གྱི་ཆེ་བ་སྒོམ་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ། གང་ཞེ་ན། ཆེ་བ་ཉི་ཤུ་དང། རོལ་པ་ཉི་ཤུ་དང། ཆོ་འཕྲུལ་ཉི་ཤུ་དང། རྡོམ་པ་ཉི་ཤུ་དང། བརྗིད་པ་ཆེན་པོ་ཉི་ཤུ་དང། ཏོག་ཆེན་པོའི་ནོར་བུའོ། གཞན་ཡང་འདུས་པ་ཆེན་པོའི་ཚོགས་འདི་ལྟ་སྟེ། རྨད་དུ་བྱུང་བའི་མཐུ་ཆེན་པོ་ཉི་ཤུ་ཐོབ་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ། དེ་ཡང་གང་ཞེ་ན། འཇིག་རྟེན་ཆེན་པོ་དྲུག་འཕང་བར་འདོད་པ་དང། ཆུའི་ཕུང་པོ་ཆེན་པོ་རྔུབས་ཏེ་བསྐམ་པར་འདོད་པ་དང། རླུང་གི་བསྐལ་བ་བཅིང་བར་འདོད་པ་དང། ཉི་མའི་དཀྱིལ་འཁོར་འབུམ་དགྱེ་བར་འདོད་པ་དང། བསྲེག་པའི་བསྐལ་པ་ཆེན་པོ་གསུམ་གཞྀ་ལ་བར་འདོད་པ་དང། ནམ་མཁའ་ཐམས་ཅད་བ་སྤུ་གཅིག་གིས་དགང་བར་འདོད་པ་དང། བ་སྤུ་གཅིག་ལས་སངས་རྒྱས་བྱེ་བ་དགྱེ་པར་འདོད་པ་དང། ། སངས་རྒྱས་བྱེ་བ་བ་སྤུ་གཅིག་གྀ་ནང་དུ་ཤོང་བར་འདོད་པ་དང། འཁོར་བ་ཐམས་ཅད་བ་སྤུ་གཅིག་ཏུ་རྔུབ་པར་འདོད་པ་དང། བ་སྤུ་གཅིག་གིས་འཁོར་བ་ཐམས་ཅད་ལ་ཁྱབ་པར་འདོད་པ་དང། བསྐལ་པའི་འཁོར་ལོ་ཆེན་པོ་རིང་དུ་བསྲུབ་པར་འདོད་པ་དང། ཐུང་དུ་བསྲབ་པར་འདོད་པ་དང། དུས་ཀྱི་འཁོར་ལོ་ཆེན་པོ་མཉམ་པར་བསྐོར་བར་འདོད་པ་དང། འཁྲུག་པར་བསྐོར་བར་འདོད་པ་དང། ལས་ཀྱི་འཁོར་ལོ་ཆེན་པོ་རྒྱུན་དུ་བསྐོར་བར་འདོད་པ་དང། རྒྱུན་གཅད་པར་འདོད་པ་དང། སྲིད་པའི་འཁོར་ལོ་བཟློག་པར་འདོད་པ་དང་ལུགས་སུ་བསྐོར་བར་འདོད་པ་དང། སྡུག་བསྔལ་གྱི་འཁོར་ལོ་ཆེན་པོ་རྒྱུན་གཅད་པར་འདོད་པ་དང། དམྱལ་བའི་འཁོར་ལོ་ཆེན་པོ་དོང་སྤྲུགས་པར་འདོད་པས་ཀྱང་ལམ་འདི་ལ་བསླབ་པར་བྱའོ།། འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། རྣལ་འབྱོར་རྟོགས་པའི་རི་བོ་བརྒྱད་ཅུ་རྩ་གཅིག་གཞིལ་པར་འདོད་པས་ཀྱང་ལམ་འདི་ལ་བསླབ་བར་བྱ་སྟེ། དངོས་གཞིའི་རྟོག་པ་དགུ་དང། མཚན་མའི་རྟོག་པ་དགུ་དང། རྟགས་ཀྱི་རྟོག་པ་དགུ་དང། རྐྱེན་གྱི་རྟོག་པ་དགུ་དང། ལས་ཀྱི་རྟོག་པ་དགུ་དང། སྤྱོད་པའི་རྟོག་པ་དགུ་དང། བསྐྱོད་པའི་རྟོག་པ་དགུ་དང། ཞེན་པའི་རྟོག་པ་དགུ་དང། མངོན་པར་རྟོག་པ་དགུའོ།། འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། ལྟུང་པའི་སྒོ་དགུ་ཤེས་པས་ཀྱང་ལམ་འདི་ལ་བསླབ་པར་བྱ་སྟེ། དེ་ཡང་གང་ཞེ་ན། བདུད་ཆེན་པོའི་རིས་སུ་ལྟུང་པའི་སྒོ་དང། མུ་སྟེགས་ཀྱི་ཁམས་སུ་ལྟུང་བའི་སྒོ་དང། སྲིན་པོའི་ཁམས་སུ་ལྟུང་པའི་སྒོ་དང། གནོད་སྦྱིན་གྱི་རིས་སུ་ལྟུང་པའི་སྒོ་དང། རུ་དྲ་ཆེན་པོར་ལྟུང་པའི་སྒོ་དང། བགེགས་ཆེན་པོར་ལྟུང་པའི་སྒོ་དང། ལྷ་ཆེན་པོའི་རིས་སུ་ལྟུང་པའི་སྒོ་དང། ཤོ་གམ་གཅན་ཆེན་གྱི་རིས་རུ་ལྟུང་པའི་སྒོ་དང། དམྱལ་བ་ཆེན་པོ་ལྟུང་པའི་སྒོའོ། ། འདུས་པ་ཆེན་པོ་ཚོགས་གཞན་ཡང་འདི་ལྟ་སྟེ། ལམ་འདི་ཤེས་པར་འདོད་ན་སངས་རྒྱས་ཀྱི་ཆོས་ཤེས་པར་བྱའོ།། ཇི་ལྟ་ཅི་ལྟར་སངས་རྒྱས་ཀྱི་ཆོས་རྣམས་ནི་རྟག་པར་ཡང་བལྟའོ།། ཆད་པར་ཡང་ལྟའོ། ། སྐྱེ་བར་སྣང་ངོ།། དམིགས་པར་ཡོད་དོ།། སངས་རྒྱས་ཀྱི་ཆོས་འདི་ནི་འདོད་ཆགས་དང་བཅས་པའོ།། ཞེས་སྡང་དང་བཅས་པའོ། གཏི་མུག་དང་བཅས་པའོ།། ང་རྒྱལ་དང་བཅས་པའོ།། ཕྲག་དོག་དང་བཅས་པའོ། ། མཚམས་མེད་པ་ལྔ་དང་བཅས་པའོ།། དེ་དང་ཉེ་བར་ལྔ་དང་བཅས་པའོ།། ལྕི་བ་བཞི་དང་བཅས་པའོ།། ལོག་པ་བརྒྱད་དང་ཡང་བཅས་པའོ།། གཞན་ཡང་འདུས་པ་ཆེན་པོའི་ཚོགས་འདི་ལྟ་སྟེ།། སྲོག་གཅོད་པ་དང་བཅས་པའོ། ། མ་བྱིན་པར་ལེན་པ་དང་བཅས་པའོ།། འདོད་པས་ལོག་པར་གཡེམ་པ་དང་བཅས་པའོ། བརྫུན་དང་བཅས་པའོ།། ཕྲ་མ་དང་བཅས་པའོ།། ངག་རྩུབ་མོ་དང་བཅས་པའོ།། ཚིག་ཁྱལ་བ་དང་བཅས་པའོ། ། བརྣབ་སེམས་དང་བཅས་པའོ། གནོད་སེམས་དང་བཅས་པའོ།། ལོག་པར་ལྟ་བ་དང་བཅས་པའོ།། འདུས་པ་ཆེན་པོའི་ཚོགས་དེ་བས་ན། སངས་རྒྱས་ཀྱི་ཆོས་དེ་རྣམས་ལ་སྤྱོད་པར་འདོད་པས་ལམ་འདི་ལ་བསླབ་པར་བྱའོ། ། ཤེས་པར་བྱའོ།། གོམས་པར་བྱའོ།། ཀློང་དུ་གྱུར་པར་གྱིས་ཤིག་ཅེས་སེམས་དཔའ་རྡོ་རྗེ་དམ་པས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་རང་བཞིན་གྱི་ལེའུ་སྟེ་དང་པཽའོ། །།། དེ་ནས་འཁོར་དེར་འདུས་པར་གྱུར་པའི་འདུས་པ་ཕལ་མོ་ཆེའི་ཚོགས་ཀྱིས་རྨད་བྱུང་གི་ཕྱག་རྣལ་འབྱོར་ལུགས་སུ་བྱས་ནས། སེམས་དཔའ་རྡོ་རྗེ་དམ་པ་ལ་འདི་སྐད་ཅེས་གསོལ་ཏོ། ། སེམས་དཔའ་ཆེན་པོ་སྨྲ་བའི་སེངྒེ་ཁྱོད་ལ་བདག་ཅག་ཤིན་ཏུ་ཞུ་བར་སྤོབས་ན་གནང་བའི་སྐབས་དབྱེ་བར་གསོལ། དེ་སྐད་ཅེས་གསོལ་བ་དང། སྨྲ་བའི་སེངྒེ་དེས་འདི་སྐད་ཅེས་བཀའ་སྩལ་ཏོ། ། འདུས་པ་ཆེན་པོའི་ཚོགས་ཇི་ལྟར་ཞུ་བའི་དོན་གནང་གིས་ཀུན་དུ་སྤོབས་པ་སྐྱེད་ལ་ཞུ་བའི་དོན་གསོལ་ཅིགདེ་སྐད་ཅེ་བཀའ་སྩལ་པ་དང། འདུས་པ་ཆེན་པོའི་ཚོགས་ཀྱིས་ཨ་ལ་ལ་ཧོ་ཞེས་གསོལ་ཏོ། ། སྨྲ་བའི་སེངྒེ་ཆེན་པོ་ཁྱོད་ཀྱིས་རྒྱལ་ཆེར་བཤད་པའི་རྣལ་འབྱོར་རང་བཞིན་ཆེན་པོའི་དོན་གྱི་རྗེས་སུ་བདག་ཅག་འཇུག་པར་འཚལ་ན། འདི་ལ་འཇུག་པའི་སྒོ་དུ་མཆི། ཐབས་ཇི་ལྟར་ལགས། ལམ་གང་ལྟར་བ་དེ། ། སེམས་དཔའ་ཆེན་པོ་འདིའི་དོན་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་བ་དང། སྨྲ་བའི་སེངྒེས་བཀའ་སྩལ་པ། གྲོགས་པོ་དག་ལེགས་སོ་ཤིན་ཏུ་ལེགས་སོ།། ངེས་པར་ལེགས་སོ།། ཁྱེད་ཀྱིས་ཞུས་པའི་དོན་འདི་རྣམས་ངོ་མཚར་ཆེ་སྟེ། ཆོས་ཐམས་ཅད་ལ་འཇུག་པའི་སྒོ་གསལ་ཞིང་རྒྱ་ཆེ་བར་བྱེད་དེ། རྣ་ལྷོགས་ལ་གུས་པར་ཉོན་ཅིག་གསལ་བར་བཤད་པར་བྱའོ།། དེ་ནས་འཁོར་གྱི་ནང་དུ་སེངྒེའི་གསུང་སྒྲ་ཡིས་ཆོས་རྣམས་ཀྱི་སྒོ་འབྱེད་པ་འདི་གསལ་བར་བཤད་པར་བྱའོ། ། སངས་རྒྱས་ཀྱི་ཆོས་ཀྱི་སྒོ་མོ་འདི།། གྲངས་མང་བསམ་གྱིས་མི་ཁྱབ་ཀྱང། མདོ་རུ་བསྡུས་ན་གསུམ་དུ་གསལ།། རྩོལ་བས་འཇུག་པའི་སྒོ་མོ་དང། ། གྲུབ་པར་ཐབས་ཀྱི་སྒོ་མོ་དང།། མཐར་ཕྱིན་འབྲས་བུའི་སྒོ་མོའོ།། དང་པོ་ལ་ཡང་གསུམ་ཡོད་དེ།། མཚན་ཉིད་ཐབས་ཀྱི་སྒོ་མོ་དང།། ཐུབ་པའི་རིགས་ཀྱི་འཇུག་སྒོ་དང།། གྲུབ་པ་ལུང་གི་གསང་སྒོའོ། ། དེ་དག་སྒོ་མོ་རེ་རེ་ལའང།། གསུམ་གསུམ་ཡོད་པར་འདྲེན་པར་བཤད།། གཉིས་པའི་སྒོ་ལའང་གསུམ་ཡོད་དེ།། ཤེས་རབ་རྟོགས་པའི་སྒོ་མོ་དང།། ཏིང་འཛིན་གོམས་པའི་སྒོ་མོ་དང།། སྨོན་ལམ་གྲུབ་པའི་སྒོ་མོར་གསལ། ། ཐ་མ་མཐར་ཕྱིན་སྒོ་མོ་ལ།། རྣམ་ཐར་སུམ་གྱི་སྒོ་ཞེས་བཤད།། འཇུག་པའི་ལམ་ལའང་འདི་ལྟ་སྟེ།། དམ་པ་གསུམ་དུ་གསལ་བར་བཤད།། འདྲེན་པ་ཆེན་པོའི་སྡེ་སྣོད་དང།། ཐུབ་པ་ཆེན་པོའི་འཇུག་སྒོ་དང། ། དམ་པ་ཆེན་པོའི་མཛོད་གསུམ་མོ།། འཇུག་པའི་ཐབས་ཀྱང་འདི་ལྟ་སྟེ།། ཐབས་ལས་ཐབས་བྱུང་ཐབས་གསུམ་སྟེ།། དོན་དང་ཡི་གེ་ཏིང་འཛིན་གྱིས།། རྗེས་སུ་གང་གིས་བརྟག་བྱས་ན།། འཇུག་པའི་ཐབས་ཀྱི་དམ་པའོ། ། དོན་གྱི་རྗེས་སུ་འཇུག་པ་ཡང།། དོན་ནི་ཆོས་ཉིད་སྙིང་པོ་ལ།། རྗེས་སུ་འཇུག་པའི་སེམས་ཡིན་ཏེ།། སེམས་ཉིད་ཆོས་ལ་སྦྱོར་བའི་སྐབས།། རྣམ་པ་བཅུ་ཞེས་འདྲེན་པས་བཤད།། བཅུ་ཉིད་གང་དང་གང་ཞེ་ན། ། འདུན་པ་སྐྱེ་བའི་གནས་སྐབས་དང། རྩོལ་བ་སྦྱོར་བའི་གནས་སྐབས་དང།། བསླབ་ལ་འཇུག་པའི་གནས་སྐབས་དང།། འདུ་ཤེས་འགྱུར་བའི་གནས་སྐབས་དང།། སྦྱོར་ཆེན་ལ་འཇུག་གནས་སྐབས་དང། ། རོ་ཉིད་ཚོར་བའི་གནས་སྐབས་དང།། ཡུལ་ལ་འཇུག་པའི་གནས་སྐབས་དང།། རྟོག་ཆེན་ཉིད་ལ་ཕེབས་སྐབས་དང།། དེ་ཉིད་གདེང་དུ་གྱུར་པའི་སྐབས།། ལས་སུ་རུང་བའི་སྐབས་དང་བཅུ། ། བཅུ་པོ་དེ་དག་རེ་རེ་ཡི།། སྐབས་སུ་སེམས་དང་ཆོས་ཕྲད་པས།། རིག་པ་བྱང་ཆུབ་སེམས་རེ་འབྱུང།། བྱང་ཆུབ་སེམས་ནི་གང་ཞེ་ན།། འདི་ཡི་གྲངས་ཀྱང་རྣམ་པ་བཅུ།། གཡོ་བ་བྱང་ཆུབ་སེམས་ཉིད་དང། ། དེ་བཞིན་སྨོན་པ་བྱང་ཆུབ་སེམས།། ལྡང་བ་བྱང་ཆུབ་ཆེན་པོའི་སེམས།། དེ་བཞིན་སྦྱོར་བ་བྱང་ཆུབ་སེམས།། འཇུག་པའི་སེམས་དང་དགེ་བའི་སེམས།། མི་འགྱུར་བ་དང་རིག་པ་དང།། གནས་པ་དང་རྫོགས་པའོ། ། བྱང་ཆུབ་སེམས་ཞེས་གྲགས་པས་ན།། སེམས་བཅུ་དག་ཏུ་རྒྱལ་བས་བཤད།། བྱང་ཆུབ་སེམས་ཀྱི་རང་བཞིན་དེ།། སྐབས་བཅུ་དག་ཏུ་སྦྱོར་བས་ན།། གཟུགས་བརྙན་ཆོས་ཉིད་ངོ་ལ་སྣང། ། གཟུགས་བརྙན་རང་བཞིན་ཅི་ལྟར་སྣང།། ཕྲ་མོ་ཙམ་གྱི་སྐར་མ་དང།། དེ་བཞིན་སྐར་མ་ཐ་མལ་པ།། སྐར་མ་ཆེན་པོ་དག་དང་ནི།། ཟླ་བ་ཚེས་གཅིག་རྣམ་པ་དང།། གཉིས་དང་གསུམ་དང་བཞི་དང་ལྔ། ། བརྒྱད་དང་བཅུ་དྲུག་རྣམ་པ་ཡི།། གཟུགས་བརྙན་དག་ཏུ་སྣང་བ་སྟེ།། དངོས་པོར་སྣང་བ་ཅང་མ་ཡིན།། ཆུ་ཟླ་ལྟ་བུར་གཟུང་དུ་མེད།། སེམས་ཀྱི་གཟུགས་བརྙན་སྣང་བ་དང།། ཆོས་ཉིད་གསལ་བའི་ཉི་མ་གཉིས། ། ཡུལ་དང་དབང་པོའི་ཚུལ་ལྟ་བུར།། དབྱིངས་དང་ཡེ་ཤེས་རང་བཞིན་གསལ།། འདི་ནི་རྣལ་འབྱོར་སྦྱོར་བའི་ལམ།། བགྲོད་པར་བྱེད་པའི་ཐབས་ཆེན་ཡིན།། ལམ་འདི་གོམས་པར་བསླབ་བྱ་ན།། རྣལ་འབྱོར་བསླབ་པར་བྱ་བའི་མཐའ། ། གནས་བཅུ་དག་ཀྱང་འདི་ལྟ་སྟེ།། ཇི་ལྟར་ས་གཞི་གཤིན་པ་ལ།། བརྟེན་ནས་ས་བོན་བཏབ་པ་ལས།། འབྲས་བུར་སྨིན་པར་གྱུར་པ་ཡིས།། འཚོ་བ་བྱེད་པའི་སྲོག་འཛིན་ལྟར། ། ཆོས་ཉིད་ཀུན་གྱི་གཞིར་གྱུར་པའི།། དམ་ཚིག་འདི་ལ་བརྟེན་ནས་ནི།། དངོས་གྲུབ་ལོ་ཏོག་སྨིན་པ་ཡིས།། དགེ་བའི་སྲོག་འཛིན་དམ་པའོ།། བསླབ་པ་འདི་ཡི་དམ་ཚིག་སྟེ།། བསླབ་པ་ཀུན་གྱི་གཞི་འཛིན་དུ། ། གོམས་པར་བྱ་བ་རབ་ཏུ་གཅེས།། ཇི་ལྟར་ཅང་ཤེས་གྱི་ལིང་དག། སྡོམ་བྱེད་སྒྲོག་གིས་བཅིངས་གྱུར་པ།། བཀྲོལ་བྱས་བདེ་བླག་བྱང་འགྱུར་ན།། ཅི་ལའང་ཐོགས་མེད་འགྲོ་བ་ལྟར།། སེམས་ཀྱི་ཅང་ཤེས་དབང་པོ་འདི། ། མི་ཤེས་བཅིངས་པས་བཅིངས་གྱུར་པ།། རྣམ་གྲོལ་ཐོས་པའི་སྒོ་མོ་ཡིས།། ཤེས་རྒྱུད་ཀུན་གྲོལ་ཐོགས་མེད་འགྲོ།། འདི་ནི་མི་ཤེས་རྒྱུད་འགྲོལ་བའི།། བཅིངས་བར་བྱ་བ་འགྲོ་བ་སྟེ།། རྒྱུད་ནས་དགྲོལ་བའི་བསླབ་པ་རུ། ། གོམས་པར་བྱ་བ་རབ་ཏུ་གཅེས།། ཇི་ལྟར་རི་མཐོ་རྩེ་མོ་ལ།། སྒྱིད་མི་ལུག་པར་བརྩོན་འཛེགས་ན།། མཐོ་སར་ཕྱིན་ཅིང་རྩེ་ནོན་པས།། ཡུལ་ཁམས་རྟོགས་ཤིང་ལམ་ལ་མཁས།། དེ་བཞིན་ཤེས་རབ་མཐོན་རི་ལ། སྒྱིད་མི་ལུག་པར་མཉན་བསམས་ན།། ཀུན་གྱི་ཕུལ་དུ་ཤེས་རབ་ཕྱིན།། མཁས་པའི་ཡེ་ཤེས་ཚད་མེད་དོ།། དོན་ལ་མཁས་པར་བྱ་བ་དེ།། ཕུལ་དུ་དབྱུང་བའི་བསླབ་པ་སྟེ།། ཤེས་རབ་ཆེན་པོ་འདི་དག་ལ། ། གོམས་པར་བྱ་བ་རབ་ཏུ་གཅེས།། དཔེར་ན་བུང་བ་ཁོང་ཚོལ་བ།། ཀུན་ཏུ་འཇུག་ཅིང་བྱུང་ནས་ནི།། རང་གི་འཛུལ་ཁུང་གང་ཡིན་པར།། ངེས་པར་འཇུག་ཅིང་གནས་པ་ལྟར།། རྣལ་འབྱོར་དོན་གྱི་རྗེས་ཚོལ་བ། ། སྤྱོད་སྒོ་ཅི་ཡོད་བསྟུན་ཏེ་བསྡུ།། བལྟ་སྒོར་འཇུར་ཅིང་བརྟགས་བསྡུར་ན།། མ་ནོར་ངེས་པའི་དབུ་མ་ལ།། ཆོས་ཉིད་དོན་གྱི་རྗེས་བཅད་ཕྱིར།། གོ་མོ་ཀུན་ནས་བསྡུར་བ་ཡི།། བསླབ་པར་བྱ་བའི་མཐའ་ཡིན་ཏེ། ། གོམས་པར་བྱ་བ་རབ་ཏུ་གཅེས།། ཇི་ལྟར་རྒྱལ་རིགས་རྒྱུད་བྱུང་བ།། མང་པོའི་དབང་པོར་དཔོན་བཏབས་ཏེ།། འཁོར་ལོ་ལ་སོགས་རིན་ཆེན་གྱིས།། ཀུན་ལ་དབང་སྒྱུར་ཐོབ་པ་ལྟར།། དེ་བཞིན་རྣལ་འབྱོར་རྒྱུད་བྱུང་བ། ། ཆོས་ཀྱི་དབང་པོར་དཔོན་བསྟབས་ཏེ།། ཕྱག་རྒྱ་ལ་སོགས་རྟགས་ཆེན་གྱིས།། རིམ་པར་ཀུན་གྱི་ཐོག་མར་འགྲོ།། འདི་ནི་དབང་གི་ཁྱབ་པར་ཏེ། ས་ལ་རིམ་པར་འབྱུང་བ་ཡི།། རྩལ་གྱིས་བགྲོད་ཅིང་བསླབ་པའི་མཐའ། ། གོམས་པར་བྱ་བ་རབ་ཏུ་གཅེས།། ཇི་ལྟར་གླང་པོ་ཆུར་འཇུག་པ།། ཚམ་ཚོམ་ཆགས་ཐོགས་ཡོང་མེད་པར།། དགའ་བའི་ལོངས་སྤྱོད་བྲོད་ཚུལ་གྱིས།། མི་ལྡོག་ཕ་རོལ་ཕྱིན་པ་ལྟར། ། རྣལ་འབྱོར་ངེས་པར་སྤྱོད་པའི་བློ།། བརྟུལ་ཞུགས་རྒྱ་མཚོའི་ཆུར་འཇུག་པ།། རྩལ་ཆེན་སྦྱོང་བའི་བྲོད་ཚུལ་གྱིས།། ཆགས་ཐོགས་མེད་པར་དོར་བའོ།། བསླབ་པར་བྱ་བའི་མཐའ་ཡིན་ནོ།། སྤྱོད་པའི་བསླབ་པར་དམ་པ་ནི། ། གོམས་པར་བྱ་བ་རབ་ཏུ་གཅེས།། ཇི་ལྟར་ཁྱུང་ཆེན་མཁའ་ལྡིང་བ།། གཤོག་པའི་རྩལ་གྱིས་ནམ་འཕང་གཅོད།། ངམ་གྲོག་ཆུ་ཀླུང་མཐའ་ཡས་ཀྱང།། གཤོག་རླབས་འོག་ཏུ་ཀུན་ཆུད་ལྟར།། རྣལ་འབྱོར་མཉམ་ཉིད་མཁའ་ལྡིང་བ། ། ཐེག་པའི་སྤྱོད་སྒོ་མཐའ་ཡས་ཀྱང།། མཉམ་པ་ཆེན་པོའི་དོན་གྱིས་ནི།། ལྟ་འཕང་བརླབས་ཀྱིས་ཐག་བཅད་པའོ།། འདི་ནི་རེ་དང་དོགས་པ་ཡི།། ཐེ་ཚོམ་གཅོད་པའི་ལྟ་བ་སྟེ། ། དོན་ལ་སེམས་ཀྱིས་བལྟ་བ་སྟེ།། བསླབ་པ་འདི་དག་གོམས་པ་གཅེས།། དཔེར་ན་རྒྱ་མཚོར་ནོར་ལེན་མི།། སྦྲུལ་དང་ཆུ་སྲིན་སྦྲང་མ་ལས།། སོགས་པ་གདུག་པའི་སྡུག་བསྔལ་ཀུན།། དཀའ་བ་ཉམས་སུ་བླངས་ནས་འགྲུབ། ། དེ་བཞིན་རྣལ་འབྱོར་བདེ་ཚོལ་བ།། རྣམ་རྟོག་བྱིང་རྨུགས་ཕྱར་གཡེང་དགྲ།། གཞོམ་པར་དཀའ་བའི་ལས་འདི་དག། ཉམས་སུ་བླངས་ན་བདེ་ཐོབ་རྙེད།། འདི་ནི་ཏིང་འཛིན་དམ་པ་ཡི།། ཉམས་སུ་བླངས་པའི་བསླབ་པ་སྟེ། ། སེམས་ཀྱི་གོམས་པར་བྱ་བའི་ལས།། འདྲིས་པར་བྱ་བ་རབ་ཏུ་གཅེས།། ཇི་ལྟར་མུན་པར་དུག་དང་རྫས།། སྨན་སྣང་གསེར་དུ་ཨུ0f84བསྒྱུར་བས་ན།། འགྱུར་རྩི་མན་ངག་མེད་པའི་མིས།། དཀའ་བའི་ལས་ཆེན་སྣ་ཚོགས་པས། ། སྡུག་བསྔལ་སྤྱད་ཀྱང་མི་འགྲུབ་སྟེ། སུ་ཞིག་མན་ངག་ལྡན་པའི་མིས།། ཚིགས་མེད་གྱི་ནའི་ཚུལ་གྱིས་ན།། བསྒྱུར་བས་སྨན་སྣང་གསེར་འགྱུར་ལྟར།། རྣལ་འབྱོར་ཆེན་པོའི་དོན་སྒྲུབ་པ། ། ཀུན་གཞི་གནས་འགྱུར་མན་ངག་དང།། གང་དག་མི་ལྡན་པས་ཀྱང་ནི།། དཀའ་བ་སྤྱད་ཀྱང་འགྲུབ་པ་མིན།། སེམས་ཀྱི་གསང་འདི་སུས་མཐོང་བ།། དེ་དག་མན་ངག་ལྡན་པ་སྟེ།། འདོད་པའི་དོན་མཆོག་གང་ཡིན་པ། ། དེ་དག་ཚེགས་མེད་ཀྱི་ནས་འགྲུབ།། དོན་རྣམས་སྒྲུབ་པར་གང་བྱེད་པ།། མན་ངག་ཅན་གྱིས་འགྲུབ་པའི་ཕྱིར།། དོན་རྣམས་འགྲུབ་པར་འགྱུར་བ་ཡི།། བསླབ་པ་འདི་དག་རབ་ཏུ་གཅེས།། དཔེར་ན་ཀུན་དུ་རྒྱུ་བའི་མི། ། འདོད་པའི་ཡུལ་དུ་འགྲོ་བྱེད་ན།། ཡུལ་གྱི་རྣམས་པ་མཐའ་ཡས་ཀྱང།། བགྲོད་པའི་ལམ་གནས་གཅིག་ལས་མེད།། དེ་བཞིན་བསམ་གྱིས་མི་ཁྱབ་པའི།། བརྒྱད་ཁྲི་བཞི་སྟོང་ཆོས་བསྟན་ཀྱང། ། བཀྲི་ཞིང་དྲང་བའི་ཚིག་ཡིན་ཏེ།། བསམ་པའི་ཡུལ་ནི་གཅིག་པའོ།། དོན་རྣམས་གཅིག་ཏུ་སྡུད་པ་ཡི།། བསླབ་པར་བྱ་བ་དམ་པ་སྟེ། ངེས་པར་གཅིག་ལས་མེད་པའི་ཕྱིར།། འདི་དག་གོམས་པར་བྱ་བ་ཡིན། ། བསླབ་པ་འདི་ལ་གོམས་གྱུར་ན།། ལོབས་པའི་ཡོན་ཏན་མཐའ་ཡས་ཏེ།། ལོགས་པས་ལམ་ལ་མཁས་པར་འགྱུར།། སྔགས་ཀྱི་ཡོན་ཏན་ཆེན་པོ་ཡང།། རྨད་དུ་བྱུང་བ་ཐོབ་པར་འགྱུར།། གསང་སྔགས་ཆེན་པོའི་ཁྱད་པར་ནི། ། ཐམས་ཅད་ཐམས་ཅད་བྱའོ་ཅོག། བྱིན་གྱི་རླབས་ཀྱི་སྤྱོད་པའམ།། དབང་སྒྱུར་ཐབས་ཀྱི་སྤྱོད་པ་སྟེ།། དཔེར་ན་ནམ་མཁའ་རྒྱ་མཚོའམ།། ཇི་ལྟར་མེ་དཔུང་རྒྱལ་པོ་འདྲ།། དེ་ཡང་དེ་ཡུལ་ཆེན་ཆུང་གི། ཁྱད་པར་ཉིད་ཀྱིས་བརླབས་པ་ཡིན།། རྒྱལ་པོ་དེ་ཡང་ཁྱད་པར་གྱིས།། དབང་སྒྱུར་བྱ་བའི་ཁམས་རྣམས་ལ།། ཆེ་ཆུང་རིམ་པ་ཡོད་པ་ཡིན།། རྣལ་འབྱོར་སྔགས་ཚུལ་དེ་ལྟར་སྣང།། ཐབས་ཆེན་སྤྱོད་ལ་འཇུག་པ་ཡང། ། བབ་ཆོད་ཐད་དུ་འཇུག་པ་སྟེ། དཔེར་ན་གླང་ཆེན་ཆུར་འཇུག་པ།། རབ་དང་གླང་ཆེན་བབ་མི་བབ།། དེ་ཡང་རྩལ་སྒྱིད་དྲག་ཞན་གྱིས།། ལ་ལ་ཐད་དུ་གཅོད་པ་ལ།། ལ་ལ་བསེགས་སུ་འགྲོ་བ་ཡིན།། ལ་ལ་ཆུང་ཞིང་བཤད་ཐབས་འགྲོ། ། དེ་ལྟར་རྣལ་འབྱོར་རྒྱུ་ཉིད་ན། འབྲས་བུའི་དོན་ལ་བབ་ཆོད་ཀྱང།། རྩལ་འཕང་མཐོ་དམན་ཁྱད་པར་གྱིས།། ཇི་ལྟར་ནུས་ཚད་དེར་སྣང་ཕྱིར།། ས་དང་གནས་སྐབས་ཡེ་ཤེས་དང། ། སྒྲིབ་དང་གོལ་ས་རྟོག་པ་དང།། སྤྱོད་དང་དམ་ཚིག་ཏིང་འཛིན་དང།། དུས་དང་དངོས་གྲུབ་མཐར་ཕྱིར་དང།། ལྟ་བའི་ཁྱད་པར་གནས་གྱུར་རྣམས།། ཐམས་ཅད་གཅིག་ལས་མེད་ན་ཡང།། གྲངས་དང་དབྱེ་བའི་བྱེ་བྲག་རྣམས། ། སྣོད་ཀྱི་རྩ་དང་སྤྱར་ནས་ནི།། ཆོས་རྣམས་ཀུན་གཞིར་གཅིག་པ་ལ།། ཀུན་གཞི་གནས་འགྱུར་རྣམ་པ་ལྔས།། བྱེ་བྲག་ལམ་གྱི་ཆོས་སུ་སྣང།། གཞི་ཉིད་རྒྱུ་ཡི་ཀུན་གཞི་དང། སྦྱོར་བ་འདུན་པའི་ཀུན་གཞི་དང། ། སྣང་བ་དོན་གྱི་ཀུན་གཞི་དང། འགྱུར་བ་མེད་པའི་ཀུན་གཞི་དང།། བཙལ་མེད་གནས་པའི་ཀུན་གཞི་ལྔ།། སྐབས་ལྔ་དག་ཏུ་གནས་འགྱུར་བས། ས་ཡི་ཁྱད་པར་བགྲོད་པ་ཡིན།། དེ་ཡང་གཉིས་ཀྱི་ཆོས་འདི་དག། ཀུན་ཀྱང་ཡོངས་ཀྱིས་རྣལ་འབྱོར་དང། འགྲོ་དོན་གསུམ་གྱིས་འགྲོ་བ་སྟེ།། དགེ་དོན་དང་ནི་སྒྲུབ་པ་པོ།། རིག་འཛིན་ཞེས་ནི་རྫོགས་པ་ཡིན།། དེས་ན་རྩལ་གྱི་ཁྱད་པར་གྱིས།། དང་པོ་ལས་ཀྱི་རྣལ་འབྱོར་ལ། ། སོགས་པའི་རྣལ་འབྱོར་ཆུང་ངུ་རྣམས།། རང་རང་རྩ་བ་བོར་ནས་ནི།། རྩལ་ཆེན་རྫོགས་པའི་རྣལ་འབྱོར་ལ།། སོགས་པའི་རྣལ་འབྱོར་ཆེན་པོའི་ཚུལ།། སྤྱོད་པ་བྱེད་དང་དོན་འདོད་པ།། སྦལ་བུས་མཁའ་ལྡིང་ལས་སྤྱད་ཀྱང། ། བཙལ་བའི་ཡུལ་ནི་ཆད་པ་ཡིན། ནོར་བུ་ལས་ཀྱིས་འཕང་དམས་པ།། རང་སྐལ་འཚོ་བའི་ཆེད་བོར་ནས།། རྒྱལ་པོ་ཐབས་ཀྱིས་འཕང་མཐོ་བའི།། ལོངས་སྤྱོད་ཆེ་ལ་དམིགས་བཅས་ཀྱང། ། དེ་དག་མི་འཐོབ་འཚོ་བྲལ་བཞིན།། སྐལ་ལྡན་ཅན་གྱི་དོན་འདི་དག། སྐལ་ཞན་དག་གིས་འགྲུབ་པར་དཀའོ།། སྣ་ཚོགས་གཏེར་གྱི་ཁང་པ་དག། རྒྱལ་པོའི་མཛོད་དུ་གྱུར་པས་ན།། སྤྱོད་སྒོ་འཇུག་པ་ཐམས་ཅད་ཀྱང། ། དཀའ་ཐུབ་ཕྱི་ནང་ཁྱད་པར་གྱིས།། རིན་ཆེན་སྣ་དགུའི་རིམ་པ་དག། སོ་སོའི་ལས་ཐབས་མཐོ་དམན་གྱིས།། ཡུལ་དེ་གཅིག་ལས་མེད་ན་ཡང།། ཡིག་ཚང་སྒོ་དགུ་སོ་སོར་སྤྱོད།། རྒྱལ་པོར་གྱུར་ན་དེ་ཀུན་ལ། ། དབང་བསྐུར་བྱེད་པའི་བདག་པོ་ཡིན།། མི་གནས་ཆོས་ཀྱི་དབྱིངས་ཉིད་དག། བལྟ་བའི་ཡུལ་དུ་གྱུར་པ་ན།། རིག་པ་རྩལ་གྱི་ཁྱད་པར་གྱིས།། བལྟ་ཡུལ་གཅིག་ལས་མེད་ན་ཡང།། སོ་སོ་འཇུག་སྒོ་ཀུན་ནས་སྤྱོད། ། དབྱིངས་ཀྱི་རང་བཞིན་གཅིག་པ་ལ།། རྩལ་འཕང་མཐོ་དམན་ཁྱད་པར་གྱིས།། སྐས་ཀྱི་གདང་བུ་རྩི་བ་ལྟར།། ས་དང་ཐེག་པའི་ཁྱད་པར་དུ།། མཐོ་དམན་རིམ་པར་སྣང་བ་ཡིན།། མཉམ་པར་གྱུར་པའི་གཞི་གཅིག་ལ། ། མཐུན་དང་མི་མཐུན་དོན་གྱིས་ནི།། དཔེར་ན་ཁང་པ་སྒོ་མངས་བཞིན།། ས་དང་ཐེག་པ་སོ་སོའི་སྒོ།། མི་མཐུན་སོ་སོར་སྣང་བ་ཡིན།། སོ་སོའི་ཐེག་པའི་སྒོ་རྣམས་ལ། འཇུག་པ་ལ་སོགས་མ་སྦྱངས་ཀྱང། ། ཀུན་གྱི་རྩ་བ་འདིར་བཅད་པས།། གཅིག་སྟེ་ཐ་དད་ཡོངས་ཀྱིས་མེད།། དེ་ནི་རི་དང་ལྷུན་པོའམ།། ཀུན་ཏུ་རྒྱུ་དང་གཞོན་ནུ་ལྟར།། མཐོང་ཐོས་སྟོན་པའི་ཁྱད་པར་ནི།། དོན་གྱིས་དེ་ལྟར་ཡོད་པ་ཡིན། ། དེས་ན་ཆོས་རྣམས་ཐམས་ཅད་ཀྱི།། རྩ་བའི་སེམས་འདི་ཡིན་པས་ན།། ནམ་མཁའ་ལྟ་བུའི་དཔེས་མཚོན་ཏེ།། ཀུན་གྱི་རྩ་བ་ཤེས་པར་བྱ།། འདི་ལྟར་ཤེས་པའི་རྣལ་འབྱོར་པ།། ལམ་གྱི་ཐབས་ལ་མཁས་པ་སྟེ། ། ལམ་སྟོར་ལམ་བཙལ་ལམ་རྙེད་པས། ཉེ་ལམ་བདེ་རྙེད་གྲུབ་པའོ།། རྙེད་པའི་ལམ་ཉིད་གང་ཞེ་ན།། རྣལ་འབྱོར་སྤྱོད་པའི་ས་ཡིན་ཏེ།། ས་བཅུ་རིམ་གྱིས་བགྲོད་པའི་ཕྱིར།། ས་ཡི་ཁྱད་པར་བཤད་པར་བྱ། ། འདི་ཡི་གནས་འཛིན་སྤྱོད་པའི་ས།། རྣམ་པ་བཅུ་ཕྲག་གཅིག་གི་རྫོགས།། འགྱུར་དབང་མ་ངེས་ས་འདི་ལ།། བཅོས་མ་ཕྲ་མེན་སྤྱོད་པ་དང།། ཚུལ་རྟགས་འཛིན་དང་མོས་པ་དང། དགེ་ལ་འདུན་པའི་རྣལ་འབྱོར་ལྔ། ། འཇུག་ལྡོག་ལྟུང་དང་བཅས་པ་ཡིས། ཀུན་དུ་འཁོར་ཞིང་མ་ངེས་པའོ།། འདུན་པ་སེམས་པའི་རྣལ་འབྱོར་པ།། གནས་ཤིང་སྤྱོད་པའི་ས་ཞེས་བྱ།། བསྟེན་པ་གཞི་ཡི་ས་འདི་ལ། དང་པོ་ལས་ཅན་རྣལ་འབྱོར་དང། བསླབ་པ་སྦྱོང་དང་ངེས་པ་ལ།། དག་དང་མ་དག་གིས་སྤྱོད་པའོ།། བཀའ་སྡོད་ལས་ཀྱི་དང་པོ་པ།། གནས་ཤིང་སྤྱོད་པའི་ས་ཞེས་བཤད།། གལ་ཆེན་སྤྱོད་པའི་ས་འདི་ལ།། གནས་ཤིང་སྤྱོད་པའི་ས་ཡིན་ཏེ། ། རིགས་ཆེན་འབྱེད་པའི་རྣལ་འབྱོར་ཉིད།། དགེ་དང་མི་དགེའི་ལས་རྣམས་ཀུན།། གཅོད་སྦྱོང་སྦྱོར་བའི་ཚུལ་ཉིད་ཀྱིས།། ལེགས་ཉེས་སྟོབས་ཆེན་བྱེད་པའོ།། བསླབ་པ་རྒྱུན་གྱི་ས་འདི་ལ།། གཡོ་དང་ཐོབ་དང་བརྟན་པའི་དྲོད། ། དེ་བཞིན་རྟགས་ཆེན་གཡོ་བ་དང།། ཐོབ་པ་ཉིད་དང་བརྟན་པ་ཡི།། རྣལ་འབྱོར་རྣམ་པ་དྲུག་པོ་དག། བསླབ་འི་གནས་བཅུ་མཐར་འབྱིན་ཅིང།། ཇི་ལྟར་ཟླ་བ་ཡར་གསལ་བཞིན། ། བསླབ་པའི་ཡེ་ཤེས་འཕེལ་འགྱུར་ཏེ།། དོན་ལ་མི་སྐྲག་ངོ་མཚར་སྐྱེ།། དཔྱོད་སེམས་འཇུག་པའི་ཤེས་པ་དེས།། ངན་སོང་མི་ལྡོག་དགོན་པར་འཇུག། བར་ཆད་དག་ཀྱང་དེ་ལ་བྱུང།། གསང་སྒོ་ལུང་གི་རྣལ་འབྱོར་དང། སྤྱོད་པ་རྒྱུན་གྱི་རྣལ་འབྱོར་དང།། མཚན་མ་རྟགས་ཀྱི་རྣལ་འབྱོར་གསུམ།། གནས་ཤིང་སྤྱོད་པའི་ས་ཞེས་བཤད།། བསོད་ནམས་གཏེར་གྱིས་འདི་ལ།། སྤྱོད་པའི་རྒྱུན་གྱི་རྣལ་འབྱོར་ཉིད།། མོས་པ་དག་ཅིང་འདུན་པའི་གནས། ། རྩལ་ཅན་བློ་ཡི་བསྟི་གནས་ས།། བསླབ་པའི་མཐའ་བཅུ་སྤྱིར་ཆིབ་པའོ།། བསྟེན་པས་ཁྱད་པར་འགྲོ་འདི་ལ།། དབུགས་ཆེན་ཕྱིན་པའི་རྣལ་འབྱོར་དང།། རིགས་ཆེན་འཛིན་དང་མཉམ་རྫོགས་ཆེ། ། ངེས་པར་སྤྱོད་དང་རྩལ་ཆེན་སྦྱོང།། ཡུལ་ལ་འཇུག་དང་རིག་པར་སྦྱོར།། བདུན་ཉིད་རྫོགས་པར་འགྲོ་བ་སྟེ།། བསླབ་པའི་རྒྱུ་འབྲས་འདི་བཅུ་ལ།། གོམས་པར་བྱེད་པའི་ཚུལ་དུ་སྦྱོར།། ངལ་བསོ་བ་ལ་ཐམས་ཅད་མཐོང། ། མི་ལྡོག་ས་ལ་གོམས་བྱར་མེད།། འདི་དག་སྦྱོར་བ་གཞི་གཅིག་ཀྱང།། སོ་སོ་ཐུན་མོང་མ་ཡིན་པའི།། སྒྲིབ་ལ་ས་ཞེས་རྩི་བྱེད་ཅིང།། ཡེ་ཤེས་རེ་རེ་འཆར་བའོ།། དེས་ན་བསླབ་པའི་མཐའ་གཅིག་ལ། ། མི་ལྡོག་ལ་སོགས་རྫོགས་ཆེན་རྣམས། མཉམ་པ་ལ་བཞག་རེ་རེ་ལ། ཡེ་ཤེས་རེ་རེ་འཆར་བ་སྟེ།། ཐ་མ་རང་བྱུང་ཉིད་ཀྱི་རྫོགས།། མཐར་ཕྱིན་པ་དང་ཐོབ་པ་དང།། མི་ལྡོག་རྣམས་ལ་རིམ་པ་བཞིན། ། རྨི་ལམ་དག་དང་སྒྲ་བརྙན་དང།། མངོན་སུམ་ངེས་པ་ཅི་རིགས་པར།། རྣལ་འབྱོར་རྡོ་རྗེ་གྲལ་སྐོ་བ།། རྡོ་རྗེ་རྡོ་རྗེ་ཆེ་གེ་མོ།། ཞེས་ནི་ཉིད་དང་ས་ཁམས་དང།། ཞིང་ཁམས་ཀུན་དུ་བསྒྲགས་བྱས་ནས། ། རྣལ་འབྱོར་ལུང་རབ་སྟོན་པའོ།། དམིགས་པའི་འབྲས་བུ་སྐྱེ་འདི་ལ།། གྲུབ་པའི་རྣལ་འབྱོར་རྣལ་འབྱོར་ཆེ།། ངེས་པར་འབྱུང་བའི་རྣལ་འབྱོར་གསུམ།། རྒྱལ་བའི་ཐུགས་ལས་རྒྱལ་སྐྱེས་ཤིང།། རྒྱལ་བའི་སྲས་པོ་གདུང་འཚོབ་པ། ། ཁྱད་པར་རྩལ་འཕང་ཀུན་རྫོགས་ཤིང།། ཏིང་ངེ་འཛིན་གྱི་སྦྱོར་བའོ།། གནས་པས་མི་འགྱུར་ས་འདི་ལ།། ཚོགས་ཆེན་འདུས་དང་རྩ་ཆེན་རྫོགས།། གསུམ་དུ་རྫོགས་པར་ཤེས་བྱ་སྟེ། ། ཕྱག་རྒྱ་ཆེན་པོ་སྒྱུ་མ་ཡིན།། འཁོར་ལོ་སྒྱུར་བའི་རྒྱལ་ཆེན་པོ།། མཐོང་བའི་གནས་ནས་བཅུ་དྲུག་པ།། རྫོགས་པའི་གནས་ན་ལོངས་པའོ།། བདལ་བ་ཆོས་ཉིད་ས་འདི་ལ།། རོལ་པ་རྒྱན་གྱི་རྣལ་འབྱོར་དང། དེ་བ་ཆེ་དང་ཐིག་ལེར་རྫོགས། ། གསུམ་ཉིད་དུ་ནི་རྫོགས་པ་ལ།། ཡུལ་དོན་ཡེ་ཤེས་དེ་སྦྱར་བ།། ཤེས་པར་བྱས་པས་ཐམས་ཅད་རྫོགས།། སྒྱུ་མའང་སྒྱུ་མ་ཡིན་སྤྱོད་ལ།། རྫོགས་པ་སྤྱིར་ཆིང་ས་འདི་ནི། ། བཅུ་ཡི་ཐ་མ་དང་པོ་ལས།། མཐར་རྫོགས་ཀུན་གྱི་ཐོག་ཡིན་ཏེ།། ཀློང་ཡངས་ནམ་མཁའི་སྙིང་པོ་ལ། སྤྲིན་མེད་ཉི་མ་འབུམ་གྱིས་བདལ།། ཅིར་སྣང་ཅི་ཡང་མ་ཡིན་པ།། མི་སྐྱེས་མི་འགག་ངོ་བོ་ལ།། ཅི་ལྟར་བལྟས་དགུ་དེར་སྣང་བ། ། ཐེག་མཆོག་སྤྱི་རྒྱའི་རླབས་ཀྱིས་བཅད།། དེ་ཡང་ལྟ་བའི་ཁྱད་པར་གྱིས།། བདག་ཉིད་ཆེན་པོའི་རྣལ་འབྱོར་དང། ལྷུན་གྱིས་གྲུབ་དང་ཀློང་ཡངས་ཆུབ།། གསུམ་རྫོགས་རང་བྱུང་བདལ་བའོ། ། འདི་ནི་རྣལ་འབྱོར་སྤྱོད་པའི་ལམ།། རྣལ་འབྱོར་ཅན་གྱིས་བགྲོད་པར་བྱ།། གཞན་ཡང་འདུས་པའི་རྣལ་འབྱོར་རྣམས།། དོན་གྱི་རྗེས་ནི་ཚོལ་འདོད་ན།། ཚིག་འགའ་ཐོས་པ་ཙམ་གྱིས་ནི།། ཆོག་པའི་འདུ་ཤེས་མ་སྐྱེས་ཅིག། ཁྱེད་ཀུན་རྣལ་འབྱོར་ཡིན་མོད་ཀྱི།། ཡང་དག་དོན་ལ་རྣལ་མི་འབྱོར།། སྤྱོད་པ་འགྱུར་བར་བྱེད་མོད་ཀྱི།། ཡང་དག་དོན་དུ་ཡོང་མ་འགྱུར།། ཆགས་སྡང་ལས་ལ་ཞེན་མོད་ཀྱི།། དམ་པའི་དོན་ལ་ཡོང་མ་ཞེན། ། ལོངས་སྤྱོད་རྒྱ་ཆེར་སྦྱེད་མོད་ཀྱི།། ཆོས་ཉིད་དོན་གྱི་རོ་མ་ཚོར།། བདག་མེད་ཕྱོགས་བྲལ་ཟེར་མོད་ཀྱི།། ཉོན་མོངས་ལྔ་དང་ཡོང་མ་བྲལ།། བརྟུལ་ཞུགས་རྟོགས་པ་ཆོམས་མོད་ཀྱང།། གཟུང་འཛིན་རྟོག་པ་ཡོང་མ་ཆོམས། ། དེ་བས་འདུས་པའི་རྣལ་འབྱོར་རྣམས།། ཐོས་པ་ཚིག་གི་སྒྲོན་མ་ཡིས།། ཡང་དག་དོན་གྱི་གསེར་བཙལ་ན།། རྟོགས་འདོད་སྤྲེའུ་འདི་བཟུང་ནས་ཀྱང།། རྐུན་མོ་བྱི་ལ་བཏགས་བྱས་ཏེ། ། གསེ་ཁུང་སྐར་ཁུང་ཀུན་དགག་ཅིང།། ཁང་སྟོང་ཕང་ཕུང་བཤིག་ནས་ནི།། རྒྱལ་པོའི་དཀོར་མཛོད་ཁ་ཕྱེ་ན།། དེ་དག་རྟག་ཏུ་སངས་རྒྱས་ཡིན།། ཡང་དག་དོན་གྱི་ལམ་ཚོན་ན།། རྟོག་པའི་སྐྱོན་ལྔ་སྤང་བར་བྱ། ། རྟོག་པ་རགས་པའི་རི་བོ་དང།། མཚན་མ་རྒྱུ་བ་ཚོར་བ་དང། བྱུང་ཚོར་སྐྱོན་ལྔ་བསལ་བར་བྱ།། རྟོག་པ་ལ་ཡང་གཉིས་ཡོད་དེ།། རགས་དང་ཕྲ་བར་སྣང་བ་ཡིན།། དེ་བཞིན་མཚན་མ་ཆེ་ཆུང་གཉིས།། རྒྱུ་བ་རིང་པོ་ཐུང་ངུ་གཉིས། ། དེ་བཞིན་ཚོར་བ་གསལ་མི་གསལ།། བྱུང་ཚོར་གཉིས་སུ་སྣང་བ་ཡང།། མྱུར་པ་དང་ནི་བུལ་བའོ།། འདི་ནི་དོན་ལ་སྒྲིབ་པ་ཡི།། རྟོག་པ་ཆེན་པོའི་གེགས་ཆེན་ཡིན།། ཅི་ཕྱིར་དོན་དེ་མི་མཐོང་ཕྱིར། ། མུན་པ་དང་ནི་འཁྲིགས་པ་དང། ཀུན་དུ་འཐིབས་དང་སྤྲིན་ཕུང་དང།། ན་བུན་ལྟ་བུར་བསྒྲིབས་པ་ཡིས།། ཡང་དག་མི་གསལ་མཐོང་མི་འགྱུར།། འདི་ཡང་བྱེ་བྲག་བཅུ་གཉིས་ཏེ།། མུན་པ་མིན་ནག་ཆེན་པོ་དང། ཀུན་ནས་འཐིབས་པ་ལྟ་བུ་དང།། ཀུན་དུ་འཁྲིགས་དང་བསྒྲིབས་པ་དང།། འཐིབས་པ་ཆེན་པོ་ཆུང་ངུ་གཉིས།། སྤྲིན་ཆེན་འཐིབས་དང་འལ་འོལ་དང། ན་བུན་གཏམས་དང་བན་བུན་གྱིས།། གནས་ངན་གསུམ་དང་མིའི་གནས་དང། ། འདོད་ཁམས་བཞི་ཡི་ལྷ་གནས་དང།། གཟུགས་ཀྱི་ཁམས་དང་གཟུགས་མེད་ཁམས། ཉན་ཐོས་རང་རྒྱལ་གནས་སུ་ལྟུང།། ལྟུང་བར་འགྱུར་བའི་སྐྱོན་ཆེན་ནི།། མཚན་མའི་གཡེང་བ་རྣམ་དྲུག་ཡིན། ། རང་བཞིན་ཡུལ་ལ་གཡེང་བ་དང།། དེ་བཞིན་ཕྱི་རོལ་གཡེང་བ་དང། ནང་དང་མཚན་མའི་གཡེང་བ་དང།། ཡིད་ལ་བྱེད་དང་གནས་ངན་ལེན།། འདི་དག་ཏུ་རབ་ཏུ་གསལ་བར་བྱ། ། བསལ་ནས་དོན་ལ་མཉམ་བཞག་ཆེ།། མཉམ་པའི་དོན་ལ་སྒྲིབ་པའི་སྐྱོན།། རྣམ་པར་ལྔ་འབྱུང་འདི་ལྟ་སྟེ།། བྱུང་ཚོར་དབང་གིས་གཡེང་བ་དང། བྱིང་རྨུགས་དབང་གིས་འཐིབས་པ་དང།། འཛིན་ཆགས་དབང་གིས་འགོག་པ་དང། ཐེར་ཟུག་དབང་གིས་རྟོག་པ་དང། ཕྱལ་བའི་དབང་གིས་མེད་པ་སྟེ།། འདི་ནི་མཉམ་པའི་སྐྱོན་ཡིན་ནོ།། སྐྱོན་ཆེན་དེ་དག་གླན་པའི་ཆོས།། སེམས་ཀྱི་ལོན་འདི་རྒྱལ་བས་བཤད། ། འདུས་པ་ཆེན་པོའི་རྣལ་འབྱོར་པ།། རྣམ་པར་མི་རྟོག་དོན་ཚོན་ན།། གཅིག་པུ་དབེན་པའི་ས་བཟུང་སྟེ།། ཚད་མ་གསུམ་དང་ལྡན་པའི་བློས།། རྣམ་པར་རྟོག་པའི་རྗེས་གཅད་པ།། ཡོད་མེད་སྔོན་ཐོག་ག་ལས་བྱུང། ། བརྟགས་པས་རྟོག་པ་ལྟས་ལས་བྱུང།། རྟོག་པ་སྒྱུ་མར་རབ་ཤེས་ན།། རྟོག་པའི་རི་བོ་ཞི་བར་འགྱུར།། དེས་ནི་གནས་ངན་གསུམ་མི་ལྟུང།། རྟོག་པ་གང་ནས་བྱུང་ཞེ་ན།། མཚན་མའི་ཆོས་ལས་བྱུང་བ་ཡིན། ། མཚན་མར་སྒྱུར་མར་རབ་ཤེས་ན།། མཚན་མའི་ཆོས་རྣམས་ཞི་བར་འགྱུར།། དེ་ནི་འདོད་ཁམས་ཐ་མར་མིན།། མཚན་མ་གང་ལས་བྱུང་ཞེ་ན།། དྲན་པ་རྒྱུ་བ་དག་ལས་བྱུང།། དྲན་པ་སྐྱོན་དུ་ཤེས་གྱུར་ན། ། རྒྱུ་བའི་སྐྱོན་རྣམས་སེལ་བར་བྱེད།། མཐུ་དེས་འདོད་ཁམས་གཉིས་པར་མིན།། རྒྱུ་བ་གང་ལས་བྱུང་ཞེ་ན།། ཚོར་བ་དག་ལས་བྱུང་བ་ཡིན།། དག་ཅིང་སྐྱེ་བར་བྱ་བ་མེད།། ཚོར་བ་སྒྱུ་མར་ཤེས་གྱུར་ན།། སྐྱོན་གྱི་ཚོར་བ་སེལ་བར་བྱེད། ། འདོད་ཁམས་གསུམ་པར་ལྟུང་མི་འགྱུར།། ཚོར་བ་གང་ལས་བྱུང་ཞེ་ན།། བྱུང་ཚོར་ཕྱི་ནང་དག་ལས་བྱུང།། དག་ཅིང་སྐྱེ་བར་བྱ་བ་མེད།། དེ་ཉིད་སྐྱོན་དུ་ཤེས་འགྱུར་ན།། དེ་ལྟར་ཤེས་པའི་མཐུ་ཡིས་ནི། ། འདོད་ཁམས་བཞི་པར་མི་ལྟུང་ངོ།། བྱུང་ཚོར་གང་ལས་བྱུང་ཞེ་ན།། སེམས་ཀྱི་ཆོས་ལས་བྱུང་བ་སྟེ།། སེམས་ཉིད་སྒྱུར་མར་རབ་ཤེས་ན།། སེམས་ཀྱི་ཆོས་རྣམས་ཞི་བར་འགྱུར།། ཕུང་པོ་གཟུགས་བརྙན་འདྲ་བ་ལ། ། སེམས་ཉིད་སྨིག་རྒྱུ་ལྟ་བུ་ཡིན།། ཡོད་མེད་གཉིས་ཀྱི་མཐའ་ལས་གྲོལ།། དེ་ལྟར་ཤེས་པའི་རྣལ་འབྱོར་པ།། འདོད་ཁམས་ལྔ་པར་ལྟུང་མི་འགྱུར།། སེམས་ཉིད་ཡོད་པའི་དངོས་པོ་འམ།། མེད་ཅེས་བྱ་བར་མི་ལྟ་བར། ། མུ་སྟེགས་ཅན་དུ་ལྟུང་མི་འགྱུར།། བྱིང་རྨུགས་ཅན་དུ་མ་གྱུར་པས། འདུ་ཤེས་མེད་པར་ལྟུང་མི་འགྱུར།། འདུ་ཤེས་རྗེས་སུ་མ་འབྲངས་པ།། སེམས་ཅན་གནས་སུ་དེ་མི་འཁོར།། ཀུན་གཞིའི་དོན་ལ་གོམས་པས་ནི། ། ཉན་ཐོས་གནས་སུ་དེ་མི་ལྟུང།། སྟོང་ཞིང་ཞི་བར་མི་བྱེད་པས།། རང་རྒྱལ་ལྟ་བར་དེ་མི་ལྟུང།། རྣམ་དག་སྟོང་པར་མི་བྱེད་པས།། བྱང་ཆུབ་སྤྱོད་པར་ལྟུང་མ་ཡིན།། མཉམ་ཉིད་སྟོང་པའི་དོན་དག་ལ། སོ་སོ་ཐ་དད་མི་འབྱེད་པས། ས་ཡི་རིམ་པ་མི་ལྟུང་ཞིང།། རིམ་གྱིས་སྦྱང་ཞིང་འཕར་བ་མེད།། ཡང་དག་དོན་གྱི་རང་བཞིན་ནི།། ཅི་ལ་མི་གནས་མི་ལེན་ཅིང།། ཅིང་ཡང་མི་མཐོང་ཐོས་པ་མེད། ། ཅིར་ཡང་མི་བྱེད་བྱེད་དང་བྲལ།། ཅི་ཡང་ཐོས་པ་རྡུལ་ཙམ་མེད།། ཅིར་ཡང་སྣང་བ་མེད་པ་དེ།། དེ་ནི་སྣང་བ་དམ་པ་ཡིན།། བསམ་དུ་མེད་པའི་ཆོས་ཉིད་ནི།། བསམ་དུ་མེད་པས་དེ་བཞིན་གཞག། རང་བཞིན་མེད་པའི་ཆོས་ཉིད་ལ། ། སེམས་ཀྱི་གྱིན་ད་སྐད་ཅིག་མས། མི་གཡོ་རྒྱུན་ཏུ་དྲན་པར་བྱ།། དེ་ལྟར་དོན་ལ་མཉམ་བཞག་ན།། རྟགས་ཀྱི་ཚོར་བ་འདི་ལྟར་འགྱུར།། དྲོད་དང་རྟགས་དང་ཆོ་འཕྲུལ་དང།། མངོན་ཤེས་དང་ནི་ཡེ་ཤེས་འབྱུང། ། དྲོ་ནི་གཡོ་དང་ཐོབ་པ་དང། རྟགས་ནི་བྱུང་དང་བརྟན་པ་དང། ཆོ་འཕྲུལ་བྱུང་དང་རྫོགས་པ་དང།། རིག་པ་ཕྲ་མོ་ཐམས་ཅད་གསལ།། དེས་ནི་དོན་རྣམས་རྫོགས་པ་ཡིན།། དཔེར་ན་མུན་པ་སངས་པ་དང། ། སྣང་བ་བྱུང་དང་ནམ་མཁའ་དང། ཀུན་ཏུ་མཐོང་དང་ཐམས་ཅད་གསལ། དེ་ལྟར་ཤེས་པའི་མཐུ་ཡིས་ནི།། བག་ཆགས་མུན་པ་ཀུན་བསལ་ཏེ།། ཇི་ལྟར་རླུང་གིས་སྤྲིན་ཕྱགས་ལྟར།། སྐད་ཅིག་ཙམ་གྱི་ཏིང་འཛིན་གྱིས། ། སྒྲིབ་པའི་ཕུང་པོ་འཕྱག་པར་འགྱུར།། ཇི་ལྟར་མར་མེས་མུན་བསལ་ན།། མུན་ཉིད་སྣང་བར་འགྱུར་བ་བཞིན།། སྐད་ཅིག་མ་ཡི་དོན་རིག་པས། སྔོན་ནས་བསགས་པའི་མུན་པ་སེལ། ། དེ་ལྟར་རིག་པའི་སྐྱེས་བུ་ནི།། དོན་ལ་རིག་པའི་སྒོ་ཕྱེ་ཞིང།། ཆོས་ཀྱི་མིག་དང་དེ་ལྡན་པས།། མཐོང་ཐོས་ཚིག་ལེའུ་ཚིག་བཞིར་བསྡེབས།། ས་པ་ཡིན་པས་དོན་ལ་སྦྱོད།། ཆོས་ཀྱི་མིག་དང་མ་ལྡན་ན།། མི་མཐའ་ཡས་པའི་ཚིག་རྣམས་ཀྱིས། ། དོན་གྱི་ཐ་སྙད་ཅི་བརྗོད་ཀྱང།། ནོར་མ་ནོར་གྱི་དོན་མི་དཔོགས། ཚིག་ཕྱིར་བློ་འབྲངས་དམུ་རྒོད་དེ།། བསླབ་པའི་ས་དང་ལམ་པ་ཡིན།། ཚིག་དོན་འབུམ་ཕྲག་ཅི་བརྗོད་ཀྱང། ། གཞན་ལ་སྟོན་པར་མ་བྱེད་ཅིག། བསྟན་ན་རྡོ་རྗེ་བཀའ་རྐུན་དེ།། དམྱལ་བ་རྡོ་རྗེར་དེ་ལྟུང་འགྱུར།། གང་དག་ཚུལ་ཆོས་མཁན་དག་གི། དོན་ལ་བློ་ཤེད་མ་བྱེ་བར།། ཚིག་དང་ཡི་གེས་ཁྲིས་ནས་ནི།། མི་ཤེས་བཞིན་དུ་ཆོས་བསྟན་ན། ། སེམས་ཅན་ཐམས་ཅད་སྲོག་ཕྲོགས་པས།། མི་ཤེས་ཆོས་སྟོན་དེ་བས་ལྕི།། དེ་བས་མཉམ་པའི་དོན་འདི་ལ།། བསྟུན་ཏེ་ཅིག་ཅར་འཇུག་ཤེས་ན།། བསྒོམ་པའི་ཡུན་ནི་རིང་ཐུང་དང།། ལས་འཕྲོ་ཡོད་དང་མེད་པ་དང། ནམ་གྲུབ་སྙམ་པའི་ཁར་མ་ལུས།། མཉམ་པའི་དོན་ལ་མཉམ་བཞག་ན།། དེ་མ་ཐག་ཏུ་རིག་པ་འཆར།། མཉམ་པའི་དོན་ལས་མ་གཡོས་ན།། གཟུགས་ཁམས་གནས་སུ་དེ་མི་ལྟུང།། མཉམ་པ་ཉིད་ལ་མ་ཆགས་ན།། གཟུགས་མེད་ཁམས་སུ་ལྟུང་མི་འགྱུར།། མཉམ་ཉིད་མངོན་དུ་གྱུར་པས་ན།། ཉན་ཐོས་གནས་སུ་དེ་མི་ལྟུང།། ཅི་ཡང་མེད་པའི་དོན་མཐོང་ན།། སངས་རྒྱས་ཞེས་ནི་དེ་ལ་བྱ། ། དེས་ནི་ཏིང་འཛིན་ཁྱད་པར་འདི།། རྣལ་འབྱོར་ཅན་གྱིས་འདྲིས་པར་བསྒོམ།། ཐམས་ཅད་མི་རྟོགས་སྐྱེ་མེད་ཅིང།། རྟོག་པའི་མཐའ་སྤངས་ནམ་མཁའི་དབྱིངས།། ཇི་བཞིན་མི་གཡོ་མཉམ་པ་ཉིད། ། མཚན་མའི་རྟོག་པ་ཡུམ་ལས་འདས།། ཡུལ་མེད་ནམ་མཁའི་རང་བཞིན་ལས།། སྙིང་རྗེ་ཆེན་པོའི་བྱང་ཆུབ་སེམས།། ཉི་མ་སྟོང་གི་དཀྱིལ་འཁོར་ཤར།། མཚན་མའི་ཆོས་རྣམས་ཀུན་ལ་ཁྱབ།། ཉི་མ་འབར་བ་སྙིང་པོ་ལས། ། འོད་ཟེར་ཡིག་འབྲུའི་མཆོག་ཏུ་གསལ།། ཐམས་ཅད་འབྱུང་བའི་ཡི་གེ་ཨ།། ཅིར་ཡང་འགྱུར་བའི་རང་བཞིན་ལས། སྤྲུལ་པའི་ཆོ་འཕྲུལ་ཐམས་ཅད་འབྱུང།། དེ་ཡང་རྩལ་གྱི་ཁྱད་པར་ལས། ། དབུགས་ཀྱི་ཡུལ་དང་ཚོར་བ་དང།། ཐོས་དང་མཐོང་བ་ལ་སོགས་ཏེ།། སེམས་ཀྱི་ཡུལ་དང་ནམ་མཁའི་དབྱིངས།། ཆོས་ཀྱི་དབྱིངས་ཀྱི་མཐས་ཀླས་པར།། རང་བཞིན་ཡི་གེ་བསྒྱུར་ཡི་གེ། ཡན་ལག་ཡི་གེ་སོ་སོ་ཡི། ། རྩ་བ་ལ་སོགས་གཞི་གཅིག་བཅས།། འཕྲོ་འདུ་ཚད་ཀྱང་ཕྱག་རྒྱ་ཡི།། ཚོམ་བུའི་གྲངས་ཀྱང་དེ་བཞིན་ནོ།། འདི་ནི་དང་པོའི་འཇུག་རིམས་ཏེ།། མཐར་གྱིས་འདྲིས་ཤིང་གོམས་བྱེདཔའོ།། ཡི་གེའི་ཡེ་ཤེས་ལས་སྐྲུན་ཏེ། ། དོན་བྱེད་པ་དང་ཕྱག་རྒྱར་སྐྱེད།། རྒྱ་མཚོ་གནོན་དང་ནམ་མཁའི་སྐས།། རླུང་བཅིང་བ་དང་རྒྱུན་བཟློག་དང།། བསྲེག་པའི་བསྐལ་བ་གཞིལ་བ་དང། ཉི་ཟླའི་ཞོན་དང་འཇིག་རྟེན་འཕང།། ས་ལ་འཛུལ་དང་རི་རབ་འདེབས། ། སྟོངས་གསུམ་ཡུངས་འབྲུར་འཇུག་ཚུལ་དང།། གཞིག་དང་སྤང་བ་ལ་སོགས་ཏེ།། བསམ་བྱ་བསམ་གྱིས་མི་ཁྱབ་པ།། གོམས་པར་ལས་སུ་རུང་བ་ཡི།། རྣལ་འབྱོར་རྩ་ཆེན་སྦྱོང་བར་ཟད། ། བཟླས་པ་མཐར་ཕྱིན་གྲུབ་པ་དང།། བཅིང་བ་ཡོངས་སུ་རྫོགས་པ་དང།། བསམ་པ་ལས་སུ་རུང་བ་དང།། དོན་མཐོང་བ་དང་ཚིག་གྲུབ་པ།། བྱ་བ་ཡོངས་སུ་དག་པ་དང།། དོན་གཅིག་ཡུལ་ལ་སོ་སོར་སྣང། ། དེས་ན་ཏིང་འཛིན་ཁྱད་པར་ཡང།། དབྱིངས་ཉིད་གཅིག་ལ་སྒོམ་མོད་ཀྱི།། རྣལ་འབྱོར་རྩལ་གྱི་ཁྱད་པར་གྱིས།། བསམ་པའི་ཡུལ་ནི་སྣ་ཚོགས་ཏེ།། དང་པོའི་ས་ལ་གནས་པ་ཡི།། བརྩམ་པ་ལས་ཀྱི་རྣལ་འབྱོར་པ། ། འདུན་པ་སེམས་པའི་རྣལ་འབྱོར་ལས།། སོགས་པའི་རྣལ་འབྱོར་རྣམ་དྲུག་པོ།། ཤེས་རབ་རྩལ་གྱི་འཕང་དམས་པས།། ཏིངའཛིན་རྩལ་ཡང་ཆུང་བ་སྟེ།། དོན་ལ་མཐོང་བར་མི་འགྱུར་ཏེ།། རང་གི་མོས་པའི་ལྷ་སྒོམ་ན། ། ལྷ་ཡིས་ས་བོན་གང་ཡིན་པ། ཁ་དོག་ཚོན་གྱིས་ཕྱེ་ནས་ནི།། སྣ་ཡི་དབུགས་ལ་རྒྱུ་བྱས་ཏེ།། དབུགས་ཀྱི་ཡུལ་དུ་གྱུར་ཚད་དུ།། ཟུང་བསྒྲིལ་ཕར་འགྲོ་གསལ་བ་ལས།། འཕྲོ་འདུའི་གནས་སུ་བསྐྱེད་པར་བྱ། ། རང་གི་ཆགས་ཚད་དང་སྦྱར་བའི།། སྐུ་ཡིཁྱོན་ཡང་དེ་ཙམ་མོ།། གཉིས་པའི་ས་ལ་གནས་པ་ཡི།། བཀའ་སྡོད་ལས་ཀྱི་རྣལ་འབྱོར་ལས།། སོགས་པའི་རྣལ་འབྱོར་རྣམ་བཞི་པོ།། ཏིང་འཛིན་རྩལ་གྱི་ཁྱད་པར་ནི། ། ས་བོན་རང་བཞིན་ཡི་གེ་ལ།། འོད་ཟེར་འབར་བར་བཅས་པ་དེ།། དྲི་བྱུང་ཡུལ་ནི་ཚུན་ཆད་དུ།། འཕྲོ་འདུ་གསལ་བར་བསྐྱེད་པ་ལས།། རང་གི་ཆག་ཚད་གཉིས་བསྒྱུར་བའི།། སྐུ་ཡི་ཁྱོན་ཡང་དེ་ཙམ་མོ། ། གསུམ་པའི་ས་ལ་གནས་པ་ཡི།། རྣལ་འབྱོར་ལུང་གི་བཀའ་བསྒོ་ལས།། སོགས་པའི་རྣལ་འབྱོར་རྣམ་གསུམ་མོ།། དམིགས་པའི་ཏིང་འཛིན་འདི་ལྟར་འདོད།། ལྷ་ཡི་ས་བོན་གང་ཡིན་པ།། རང་བཞིན་ཡི་གེར་བསྒྱུར་བྱས་ཏེ། ། འོད་ཟེར་འབར་དང་བཅས་པ་ཡིས།། ཐོས་པའི་ཡུལ་ནི་ཚུན་ཆད་དུ།། འཕྲཽ་འདུ་གསལ་བར་བྱས་པ་ལས།། རང་གི་ཆག་ཚད་བཞི་བསྒྱུར་ཙམ།། སྐུ་ཡི་ཁྱོན་ཡང་དེ་ཙམ་མོ།། དེ་བཞིན་རྣལ་འབྱོར་རིམ་པ་བཞིན། ། ལྷ་ཡི་ཁྱད་པར་གང་ཡིན་པ།། ཡི་གེའི་རིམ་པ་བཞིན་བྱས་ནས། འཕྲོ་འདུའི་ཚད་ཀྱང་དེ་བཞིན་ཏེ།། རིམ་པ་བཞིན་དུ་སྦྱར་ནས་ཀྱང།། འཕྲོ་འདུ་གསལ་བར་གྱུར་པ་དང།། སེམས་ཀྱི་ལྕོགས་ཚད་ཚུན་ཆད་དུ། ། སྐུ་ཡི་ཁྱོན་གྱི་ཁྱད་པར་ཡང།། ཆོས་ཀྱི་དབྱིངས་ཀྱི་མཐས་ཀླས་པར།། སྐུ་ཡི་ཁྱོན་གྱིས་གང་བར་བསྒོམ།། གཞན་ཡང་འདུས་པའི་རྣལ་འབྱོར་རྣམས།། ཡི་གེའི་རྗེས་སུ་དོན་དཔགས་ན།། ཡི་གེས་དོན་རྣམས་སྟོན་པར་འགྱུར། ། ཅི་ཕྱིར་དོན་ཉིད་ཡི་གེར་སྣང།། དབྱིངས་ལས་ཨ་བྱུང་ཨ་ལས་ནི།། ཡི་གེའི་ཚོགས་བྱུང་སྣ་ཚོགས་འཕྲོས།། ཨ་ནི་རང་བཞིན་ཡི་གེ་སྟཻ།། རྟེན་དང་བྲལ་བས་རྒྱུ་རྐྱེན་མེད།། ཀུན་ལ་ཁྱབ་པས་ནམ་མཁའ་འདྲ། ། ཨ་ནི་ཆོས་ཉིད་ཆོ་འཕྲུལ་ཏེ།། ཆོས་ཉིད་ཟབ་མོའི་ངང་ལས་ནི།། ཆོ་འཕྲུལ་ཡི་གེ་ཨ་བྱུང་བས།། ཨས་ནི་ཆོས་ཉིད་མཚོན་པར་བྱེད།། ཨ་ལས་ཡིག་འབྲུའི་ཚོགས་འཕྲོས་ཏེ།། ཚིག་ཚོགས་བསྟན་པ་རྒྱ་ཚོར་གྲགས། ཡི་གེ་སྒྲ་སྐད་ཀུན་བཟུང་སྟེ།། སྣ་ཚོགས་ཡི་གེའི་སྐད་དུ་བསྒྱུར།། ཡིག་འབྲུ་ཡན་ལག་མང་པོ་རྣམས།། རང་བཞིན་ཨ་ཡི་ངང་དུ་འདུས།། ཐུགས་ཀྱི་ཀློང་ནས་ཨ་བྱུང་བས།། ཨ་ཡི་འོད་ཟེར་འཕྲོ་འདུ་ལས། ། མགུར་གྱི་གསང་བར་ཤར་བ་ལས།། གསུངས་སྒྲ་ཡི་གེ་ལྔར་འཕྲོས་པ།། ཨ། ཀ་ཁ་ག་གྷ་ང།། དེ་ནས་ཨ་ཡི་འོད་ཟེར་དེ།། ལྗགས་ཀྱི་ཟླ་གམ་པདྨར་འཕྲོས།། ལྗགས་ཀྱི་མཐིལ་དུ་འཁྱིལ་བ་ལས། ། འོད་ཟེར་ཡིག་འབྲུ་ལྔར་ཤར་བ།། ཙ་ཚ་ཛ་ཛྷ་ཉ། དེ་ནས་ཨ་ཡི་འོད་ཟེར་དེ།། ལྗགས་ཀྱི་རྩེ་ལ་འཕྲོས་པ་ལས།། འོད་ཟེར་ཡིག་འབྲུ་བཅུར་ཤར་བ།། ཊ་ཋ་ཌ་ཌྷ་ཎ། ཏ་ཐ་ད་དྷ་ན།། དེ་ནས་ཨ་ཡི་འོད་ཟེར་དེ། ། ཞལ་གྱི་སྒོ་ནས་འཕྲོས་པ་ལས།། ཆོ་འཕྲུལ་ཡི་གེ་ལྔ་ཤར་བ།། པ་ཕ་བ་བྷ་མ།། དེ་ནས་ཨ་ཡི་འོད་ཟེར་དེ།། ཕྱི་རོལ་ཡུལ་དུ་འཕྲོས་པ་ལས།། ཆོ་འཕྲུལ་ཡི་གེ་སྣ་ཚོགས་འཕྲོས།། ཡ་ཝ་ར་ལ་ཤ་ཥ་ས་ཧ་ཀྵ། ། ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨ~ཾ་ཨཿ། ཨ་ལས་ཆོ་འཕྲུལ་འོད་འཕྲོས་བས།། ཡི་གེའི་ཕྲེང་བ་ཚོགས་བྱུང་སྟེ།། ཡི་གེའི་ཡན་ལག་ཡེ་ཤེས་ལ།། སངས་རྒྱས་སྐུ་ཡིས་ས་བོན་བྱུང།། དཔག་ཏུ་མེད་པའི་རྒྱལ་བ་རྣམས། ། སྐུ་དང་གསུང་ཐུགས་སྤྲུལ་པའི་ཚོགས།། ཕྱག་རྒྱ་སྣ་ཚོགས་མཛེས་པ་སྣང།། དེས་ན་ཡི་གེའི་རང་བཞིན་ནི།། རྒྱལ་བའི་སྐུ་ཉིད་ཡིན་པར་བཤད།། ཨ་ནི་ཐུགས་ཀྱི་ས་བོན་ཏེ།། ཀ་ལ་སོགས་པ་དང་པོ་ལྔ། ། མགུར་གྱི་གསང་བའི་རང་བཞིན་ཡིན།། གཉིས་པ་ཙ་ལ་སོགས་པ་ལྔ།། ཟླ་གམ་ལྗགས་ཀྱི་རང་བཞིན་ཡིན།། གསུམ་པ་ཊ་ལ་སོགས་པ་བཅུ།། ལྗགས་ཀྱི་རྩེ་མོའི་རང་བཞིན་ཡིན།། བཞི་པ་པ་ལ་སོགས་པ་ལྔ། ། ཞལ་གྱི་སྒྲོས་ལས་བྱུང་བར་བཤད།། ལྔ་པ་ཡ་ལ་སོགས་པ་ཡི།། བཅུ་ཚན་གཉིས་ཀྱི་ཡི་གེ་དག། སྐུ་ལས་འཕྲོས་པར་རབ་ཏུ་བཤད།། ཞབས་ཀྱིས་འཁོར་ལོའི་འོད་ཟེར་ལས།། སྒྲིབ་པ་སྲེགས་པའི་ཡིག་འབྲུ་ཧ། ། གསང་བའི་མཁའ་ཡི་འོད་ཟེར་ལས།། ཆོ་འཕྲུལ་འབྱུང་བའི་ཡི་འབྲུ་ཀྵ།། སྐུ་ཡི་ཁྲུན་ཚད་ལྟེ་བ་ལས།། འདོད་པ་འབྱུང་བའི་ཡིག་འབྲུ་ཧྭ།། ཐུགས་ཀར་འཁྱིལ་བའི་དཔལ་བེའུ་ལས།། མཚན་མ་དག་པའི་ཡིག་འབྲུ་ཤ། ཕྱག་གི་འཁོར་ལོའི་འོད་ཟེར་ལས།། ཆོ་འཕྲུལ་སྟོན་པའི་ཡིག་འབྲུ་ཤུ།། སྐྱེས་བུ་ཆེན་པོའི་དཔུང་པ་ལས།། རྟོག་པ་འཇོམས་པའི་ཡིག་འབྲུ་ལ།། སྐྱེས་བུ་ཆེན་པོའི་སྟ་ཟུར་ལས།། འདོད་ཆགས་སྲེག་པའི་ཡི་གེ་ར། ། སྐྱེས་བུ་ཆེན་པོའི་དཀུ་སྐབས་ལས།། གཏི་མུག་སེལ་བའི་ཡི་གེ་ཝ།། སྐྱེས་བུ་ཆེན་པོའི་བྱིན་པ་ལས།། འཁོར་བ་གནོན་པའི་ཡི་འབྲུ་ཡ།། སྐྱེས་བུ་ཆེན་པོའི་སྤྱན་གཉིས་ལས།། རང་བཞིན་ཡི་གེ་ཨི་གཉིས་ཤར། ། སྐྱེས་བུ་ཆེན་པོའི་སྙན་གཉིས་ལས།། རང་བཞིན་ཡི་གེ་ཨུ་གཉིས་ཤར།། སྐྱེ་བུ་ཆེན་པོའི་ཤངས་གཉིས་ལས།། རང་བཞིན་ཡི་གེ་ཨེ་གཉིས་ཤར།། སྐྱེ་བུ་ཆེན་པོའི་ཚེམས་གཉིས་ལས།། རང་བཞིན་ཡི་གེ་ཨོ་གཉིས་ཤར། ། སྐྱེ་བུ་ཆེན་པོའི་སྤྱི་གཙུག་ནས།། རྒྱལ་བའི་ས་བོན་ཨ~ཾ་དུ་ཤར།། དེས་ན་ཡིག་འབྲུའི་ཡན་ལག་ཀུན།། རྒྱལ་བ་རྒྱ་མཚོའི་སྐུ་གསུང་ཐུགས།། ཨོཾ་ནི་སྐུ་ཡི་རང་བཞིན་ཏེ།། ཨཱཿནི་ཐུགས་ཀྱི་མཚན་ཉིད་དོ། ། ཡི་གེའི་ཕྲེང་བ་མང་པོ་ཀུན།། གསུང་བརྗོད་གསུང་གི་རང་བཞིན་ནོ།། ཨཱཿནི་ཆོས་སྐུའི་རང་བཞིན་ཏེ།། ཨོཾ་ནི་ལོངས་སྤྱོད་རྫོགས་པའི་སྐུ།། ཡིག་འབྲུ་འབར་བའི་ཕྲེང་བ་རྣམས།། སྤྲུལ་པའི་འདྲེན་པའི་སྐུ་ཞེས་བཤད། ། ཨ་ནི་ཆོས་ཀྱི་དབྱིངས་ཡིན་ཏེ།། ཨོཾཾ་ནི་རིག་པའི་ཡེ་ཤེས་ཡིན།། ཡིག་འབྲུ་འབར་བའི་ཕྲེང་བ་རྣམས།། ཆོས་དང་ཆོས་ཉིད་རང་བཞིན་ཡིན།། ཨ་ནི་བརྗོད་པའི་རྒྱུ་ཡིན་ཏེ།། ཨོཾ་ནི་ཚིག་ཚོགས་འབྱུང་བའི་རྒྱུ། ། ཚིགས་གི་ཚོགས་ཉིད་ཡི་གེ་ཡིན།། ཡི་གེ་རིང་བའི་ཚིག་གི་མཛོད།། ཡི་གེ་འོད་ཟེར་འབར་འཕྲོས་པས།། ཆོས་དང་ཆོས་མ་ཡིན་པ་རྣམས།། ངག་གི་དབང་པོ་ཁ་ཕྱེ་སྟེ།། དོན་དང་ཚིག་ཏུ་རྒྱས་པར་འགྱུར།། སྒྲ་སྐད་ཀུན་གྱིས་བསྡུས་པའི་ཚོགས། ཡིག་འབྲུ་ཕྲེང་བའི་ངང་དུ་རྫོགས།། ཚིག་དང་ཡིག་འབྲུ་ཐམས་ཅད་ཀུན།། ཨ~ཾ་གྱི་རང་བཞིན་ངང་དུ་རྫོགས།། ཨ~ཾ་གྱི་ཆོ་འཕྲུལ་ཐམས་ཅད་ཀུན།། ཨ་ཡི་རང་བཞིན་དབྱིངས་སུ་ཞི། ། ཨ་ནི་ཡིག་འབྲུ་ཀུན་གྱི་གཏེར།། ཨ་ཉིད་ཆོས་ཀྱི་དབྱིངས་སུ་ཐིམ།། དེ་ནས་རྒྱལ་བ་སངས་རྒྱས་རྣམས། སྐུ་དང་གསུང་ཐུགས་རྡོ་རྗེ་དེ།། འདུལ་བའི་དབང་གི་ཁྱད་པར་གྱིས།། ཅིར་ཡང་འགྱུར་ཞིང་ཅིར་ཡང་སྣང། ། ས་དང་ནམ་མཁའ་མེད་དང་རླུང།། ཆུ་ལ་སོགས་པའི་རྫས་རྣམས་ཀྱིས།། འདུལ་བའི་འགྲོ་བ་དེ་རྣམས་ལ།། ས་དང་ནམ་མཁའ་ལ་སོགས་པའི།། ཆུ་དང་རླུང་གི་ངོ་བོར་སྣང།། གང་དག་སྐུ་ཡིས་འདུལ་བའི་ཚེ། ། སྐུ་དང་གཟུགས་བརྙན་རིང་བསྲེལ་དང།། རྟེན་ལ་སོགས་པ་ཐ་དད་པར།། འཇིག་རྟེན་ཀུན་ཏུ་སྟོན་པར་འགྱུར།། གསུང་གིས་འདུལ་བའི་དུས་བྱུང་ན།། དབྱངས་ཀྱི་ཡན་ལག་དྲུག་ཅུ་ལས།། སོགས་པའི་སྒྲ་སྐད་སྣ་ཚོགས་དང། ། ཡི་གེའི་གཟུགས་སུ་བསྟན་ནས་ནི།། འཁོར་བའི་ཁམས་སུ་སྣང་བར་བྱེད།། ཅིའི་ཕྱིར་ཞེ་ན་ཡི་གེ་ནི།། དེ་བཞིན་གཤེགས་པ་ཉིད་ཡིན་ཏེ།། དེ་བཞིན་གཤེགས་པའི་རང་བཞིན་ཏེ། ། ཐུགས་རྗེའི་རང་བཞིན་ཡིན་པས་ན།། ཐབས་ཀྱི་བྱེ་བྲག་སྣ་ཚོགས་ཀྱིས།། ཐམས་ཅད་གྲོལ་བར་མཛད་པའོ།། དེ་བཞིན་ཡི་གེའི་ཚོགས་འདི་ཡང།། ཡན་ལག་སྦྱོར་སྡུད་སྣང་ཚོས་ཀྱིས།། ཐམས་ཅད་ཚིག་ཏུ་གོ་བར་བྱེད། ། ཡི་གེ་རང་བཞིན་ཡེ་ཤེས་ནི། སོ་སོའི་དོན་རྣམས་བཤད་པར་བྱ།། ཨ་ནི་མ་སྐྱེས་ཡེ་ཤེས་ཡིན།། རང་བཞིན་ཐམས་ཅད་སྟོང་པར་སྟོན།། ཀ་ནི་བྱ་བའི་ཡེ་ཤེས་ཏེ།། ལམ་གྱི་ཐམས་ཅད་གྲོལ་བར་སྟོན། ། ཁ་ནི་ཁྱབ་པར་བྱེད་པའི་སྒོ།། མི་དམིགས་ཐམས་ཅད་གྲོལ་བར་སྟོན།། ག་ནི་དོན་དུ་གྱུར་པའི་སྒོ།། ཡུལ་མེད་ཐམས་ཅད་གྲོལ་བར་སྟོན།། གྷ་ནི་གནས་པའི་སྒོ་ཡིན་ཏེ།། གཅིག་ཏུ་མ་ངེས་གྲོལ་བར་སྟོན། ། ང་ནི་འཛིན་པ་མེད་པའི་སྒོ།། འཛིན་བྲལ་ཐམས་ཅད་གྲོལ་བ་སྟོན།། ཙ་ནི་འགག་པ་མེད་པའི་སྒོ།། ཅིར་ཡང་སྣང་བས་ཐམས་ཅད་གྲོལ།། ཚ་ནི་འདའ་བ་མེད་པའི་སྒོ། འབྲལ་བ་མེད་པས་ཐམས་ཅད་གྲོལ། ། ཛ་ནི་མ་བྱུང་བ་ཡི་སྒོ།། མི་གནས་པས་ནི་ཐམས་ཅད་གྲོལ།། ཛྷཱ་ནི་རྙོག་མ་བྲལ་བའི་སྒོ།། དྲི་མ་དག་པས་ཐམས་ཅད་གྲོལ།། ཉ་ནི་སྤྱོད་དང་བྲལ་བའི་སྒོ།། བྱ་བ་མེད་པས་ཐམས་ཅད་གྲོལ།། ཊ་ནི་ང་རྒྱལ་མེད་པའི་སྒོ། ། རི་བོ་མེད་པས་ཐམས་ཅད་གྲོལ།། ཋ་ནི་སྒྱུ་རྩལ་མེད་པའི་སྒོ།། བྱེད་པ་མེད་པས་ཐམས་ཅད་གྲོལ།། ཌ་ནི་འདྲེས་པ་མེད་པའི་སྒོ།། རྩོད་པ་མེད་པས་ཐམས་ཅད་གྲོལ།། ཌྷ་ནི་སླུ་བ་མེད་པའི་སྒོ།། སྒྱུ་མ་ཐམས་ཅད་གྲོལ་བར་བྱེད། ། ཎ་ནི་ཡུལ་དང་བྲལ་བའི་སྒོ།། འཛིན་པ་མེད་པས་ཐམས་ཅད་གྲོལ།། ཏ་ནི་ཐ་སྙད་མེད་པའི་སྒོ།། བརྗོད་པ་མེད་པས་ཐམས་ཅད་གྲོལ།། ཐ་ནི་རྟེན་དང་བྲལ་བའི་སྒོ།། གནས་པ་མེད་པས་ཐམས་ཅད་གྲོལ། ། ད་ནི་གཏོང་དང་བྲལ་བའི་སྒོ།། ལེན་པ་མེད་པས་ཐམས་ཅད་གྲོལ།། དྷ་ནི་རང་བཞིན་མེད་པའི་སྒོ།། མཚན་ཉིད་མེད་པས་ཐམས་ཅད་གྲོལ།། ན་ནི་ཡུལ་དང་བྲལ་བའི་སྒོ། ། འཛིན་པ་མེད་པས་ཐམས་ཅད་གྲོལ།། པ་ནི་ངེས་པར་འབྱུང་བའི་སྒོ།། འགག་པ་མེད་པས་ཐམས་ཅད་གྲོལ།། ཕ་ནི་དངོས་པོ་མེད་པའི་སྒོ།། ཅི་ཡང་མེད་པས་ཐམས་ཅད་གྲོལ།། བ་ནི་བརྗོད་པ་མེད་པའི་སྒོ། ། བརྗོད་པ་མེད་པས་ཐམས་ཅད་གྲོལ།། བྷ་ནི་རྡུལ་དང་བྲལ་བའི་སྒོ།། རྟོག་པ་མེད་པས་ཐམས་ཅད་གྲོལ།། མ་ནི་ཆགས་པ་མེད་པའི་སྒོ།། རྟག་པ་མེད་པས་ཐམས་ཅད་གྲོལ།། ཡ་ནི་ཆགས་པ་མེད་པའི་སྒོ། ། གོས་པ་མེད་པས་ཐས་ཅད་གྲོལ།། ཝ་ནི་རྒྱུ་རྐྱེན་མེད་པའི་སྒོ།། འབྲས་བུ་མེད་པས་ཐམས་ཅད་གྲོལ།། ར་ནི་རྐྱེན་དང་བྲལ་བའི་སྒོ།། དོར་བ་མེད་པས་ཐམས་ཅད་གྲོལ།། ལ་ནི་བླང་བ་མེད་པའི་སྒོ།། ཡོན་ཏན་མེད་པས་ཐམས་ཅད་གྲོལ། ། ཤ་ནི་སྤྲོས་པ་མེད་པའི་སྒོ།། ཞི་བས་ཐམས་ཅད་གྲོལ་བར་བྱེད།། ཥ་ནི་ཁུར་དང་བྲལ་བའི་སྒོ།། ལྕི་བ་མེད་པས་ཐམས་ཅད་གྲོལ།། ས་ནི་ཡང་དག་གསང་བའི་སྒོ།། ངེས་པས་ཐམས་ཅད་གྲོལ་བར་བྱེད། ། ཧ་ནི་རྒྱུ་དང་བྲལ་བའི་སྒོ།། རྐྱེན་དང་བྲལ་བས་གྲོལ་བར་བྱེད།། ཨ་ནི་ཁམས་དང་བྲལ་བའི་སྒོ།། མཚན་ཉིད་མེད་པས་གྲོལ་བར་བྱེད།། ཨི་ནི་མཐོང་བ་མེད་པའི་སྒོ།། གཟུགས་དང་བྲལ་བས་ཐམས་ཅད་གྲོལ། ། ཨུ་ནི་ཐོས་པ་མེད་པའི་སྒོ།། སྒྲ་དང་བྲལ་བས་ཐམས་ཅད་གྲོལ།། ཨེ་ནི་ཚོར་བ་མེད་པའི་སྒོ།། དྲི་དང་བྲལ་བས་གྲོལ་བར་བྱེད།། ཨོ་ནི་ཚོར་བ་མེད་པའི་སྒོ།། རེག་དག་བྲལ་བས་ཐམས་ཅད་གྲོལ། ཨཾ་ནི་ཆོ་འཕྲུལ་བྱུང་བའི་སྒོ།། ཅིར་ཡང་སྣང་བས་ཐམས་ཅད་གྲོལ། མྱ་ངན་འདས་དག་འཁོར་བའི་ཆོས།། ཡོད་མཐོང་སྣང་གྲགས་ཆོས་ཐམས་ཅད།། ཡི་གེའི་ཚོགས་སུ་མངོན་སངས་རྒྱས།། ཡེ་གེར་མ་གྱུར་གང་ཡང་མེད་ལ། ། ཆོས་ཉིད་སྙིང་པོའི་ཉི་མ་ལ།། འོད་ཟེར་ཡིག་འབྲུའི་ཚོགས་སུ་འབར།། ཆོས་ཉིད་ནམ་མཁའ་ལྟ་བུ་ལ།། ཡིག་འབྲུ་སྣ་ཚོགས་ཕྲ་བཀོད་པ།། དུས་གསུམ་རྒྱལ་བའི་དཀྱིལ་འཁོར་རྫོགས།། ཉི་མ་འབར་བའི་འོད་ཟེར་ལས། ། འོད་ཀྱི་འབར་བའི་རྡོ་རྗེ་འབར།། ཡི་གེ་ཨོཾ་གི་འོད་འཕྲོས།། རྡོ་རྗེ་སྙིང་པོའི་ས་བོན་ཞེས།། རྡོ་རྗེ་རིགས་ཀྱི་ཞིང་དུ་གྲགས།། ཉི་མའི་འོད་ཟེར་རིན་ཆེན་ལས།། ཡིག་འབྲུ་འོད་ཀྱི་ས་འཕྲོས་པས། ། རིན་ཆེན་སྙིང་པོའི་ས་བོན་ཞེས།། རིན་ཆེན་རིགས་ཀྱི་ཞིང་དུ་གྲགས།། ཉི་མ་པདྨོ་འབར་འཕྲོས་པས།། ཆོ་འཕྲུལ་ཡི་གེའི་ཨ~ཾ་དུ་འབར།། པདྨ་རིགས་ཀྱི་ཞིང་དུ་གྲགས།། སྣ་ཚོགས་ཉི་མའི་འོད་འཕྲོས་པས། ཆོ་འཕྲུལ་ཡི་གེ་ཧར་གསལ་བས།། སྣ་ཚོགས་ཉིང་པོའི་ས་བོན་ཏེ།། ལས་ཀྱི་རིགས་ཀྱི་ཞིང་དུ་གྲགས།། དུས་གསུམ་རྒྱལ་བ་ཐམས་ཅད་ཀྱི།། ཐུགས་ནི་རྡོ་རྗེ་ཡེ་ཤེས་ཡིན།། ཡེ་ཤེས་དམ་པས་སྤྲུལ་པ་ཡི། ། རྒྱལ་བ་དཔག་ཏུ་མེད་པ་ལ།། རྡོ་རྗེ་རིགས་ཞེས་བྱ་བར་བཤད།། ཡོན་ཏན་ཡེ་ཤེས་རིན་ཆེན་ཡིན།། རིན་ཆེན་དེ་ལས་སྤྲུལ་པ་ཡི།། རྒྱལ་པ་དཔག་ཏུ་མེད་པ་ལ། རིན་ཆེན་རིགས་ཞེས་བྱ་བར་བཤད། ། གསུང་གི་ཡི་ཤེས་པདྨ་སྟེ།། པདྨ་ཡེ་ཤེས་ལས་སྤྲུལ་པའི། རྒྱལ་བ་དཔག་ཏུ་མེད་པ་ལ། པདྨོ་རིགས་ཀྱི་ཞིང་དུ་གྲགས།། ཕྲིན་ལས་བྱ་བ་སྣ་ཚོགས་ཏེ།། སྣ་ཚོགས་ཡེ་ཤེས་སྤྲུལ་པ་ཡི།། རྒྱལ་བ་དཔག་ཏུ་མེད་པ་ལ། ལས་ཀྱི་རིགས་ཞེས་བྱ་བར་བཤད།། སྐུ་ནི་མ་བཅོས་དེ་བཞིན་ཉིད།། དེ་བཞིན་ཉིད་ཀྱི་ཡེ་ཤེས་ལ།། སྤྲུལ་པ་རྒྱལ་བ་དཔག་མེད་ལ།། དེ་བཞིན་རིགས་ཞེས་བྱ་བར་བཤད།། དེ་བས་རིགས་ཀྱི་གཏན་ཚིགས་ནི། ། མ་བཅོས་སྐུ་ནི་དེ་བཞིན་ཉིད།། མི་འགྱུར་རིགས་ནི་རྡོ་རྗེ་རིགས།། ཡོན་ཏན་ཀུན་འབྱུང་རིན་ཆེན་རིགས།། ཆགས་མེད་གསུང་གི་པདྨའི་རིགས།། བྱ་བ་བྱེད་པ་ལས་ཀྱི་རིགས།། སྐུ་ཡི་སྤྲུལ་པ་ཐམས་ཅད་ནི། ། དེ་བཞིན་རིགས་ཀྱི་གདུང་བརྒྱུད་འཛིན།། ཐུགས་ལས་སྤྲུལ་པའི་སངས་རྒྱས་ནི།། རྡོ་རྗེ་རིགས་ཀྱི་གདུང་རྒྱུད་འཛིན།། ཡོན་ཏན་ཡུལ་གྱི་སངས་རྒྱས་རྣམས།། རིན་ཆེན་རིགས་ཀྱི་གདུང་རྒྱུ་འཛིན། གསུང་ལས་སྤྲུལ་པའི་སངས་རྒྱས་རྣམས། ། པདྨ་རིགས་ཀྱི་གདུང་རྒྱུད་འཛིན།། མཛད་པ་སྤྲུལ་པའི་སངས་རྒྱས་རྣམས།། ཕྲིན་ལས་རིགས་ཀྱི་གདུང་རྒྱུད་འཛིན།། ཅི་ཕྱིར་རིགས་ཞེས་བྱ་ཞེ་ན།། དང་པོ་དེ་ལས་བྱུང་བ་དང། ། བར་དུ་དེ་ཡི་བྱ་བ་བྱེད།། ཐ་མར་དེ་ཡི་རྒྱུད་འཛིན་ཕྱིར།། དེ་ཕྱིར་རིགས་ཞེས་གྲགས་པ་ཡིན།། དཔེར་ན་མེ་དང་ཆུ་དག་དང།། ནམ་མཁའ་དང་ནི་ས་དག་ལ། གནས་པའི་སེམས་ཅན་མཐའ་དག་ཀུན། ། གནས་རྒྱུན་ཉིད་ཀྱི་མིང་འཛིན་དེ།། མེ་ལ་གནས་པའི་སེམས་ཅན་ལ།། མི་ཡི་ཡི་དྭགས་མ་ཞེས་ཟེར།། ཆུ་ལ་གནས་པའི་སེམས་ཅན་ལ།། ཆུ་སྲིན་ཏྭ་ར་ན་ཞེས་ཟེར།། ཅི་ཕྱིར་ལྔ་ཞེས་བྱ་ཞེ་ན།། རྒྱལ་བ་སངས་རྒྱས་ཐམས་ཅད་ལ། ། སྐུ་དང་གསུང་ཐུགས་ཡོན་ཏན་དང། མཛད་པ་ཕྲིན་ལས་ཉིད་དང་ལྔ།། རིག་པ་ལྔ་དང་ལྔ་ཉིད་དུ།། ཐམས་ཅད་ཀུན་ཏུ་གསལ་བར་སྣང།། དེས་ན་ལྔ་ཞེས་ངེས་པར་བཤད།། ཅི་ཕྱིར་ཞེ་ན་སངས་རྒྱས་ཀུན། ། ལྔ་པོ་དེ་ལས་མ་གཏོགས་པ།། གཞན་ལས་བྱུང་ཞིང་གཞན་ན་མེད།། སངས་རྒྱས་མཚན་གྱི་ཁྱད་པར་ཡང།། མཚན་མེད་པ་ལས་མཚན་བཏགས་པ།། ཐམས་ཅད་ལྔ་པོ་ཉིད་ལས་བཏགས། ། མཚན་གྱི་བྱེ་བྲག་ཐམས་ཅད་ཀུན།། ཐ་སྙད་ཙམ་དུ་གདགས་པར་ཟད།། རིགས་མེད་པ་ལས་རིགས་སྨོས་པ།། འདུལ་བའི་དབང་དུ་ལྡར་སྣང་ཡང།། དྲང་པའི་དོན་ཏེ་དངོས་གཞི་མེད།། ཅི་ཡང་མེད་ལས་ཅི་སྣང་བ། ། མཁའ་ལ་འཇའ་ཚོན་བྱུང་བ་འདྲ།། ཆོས་ཀུན་ནམ་མཁའ་འདྲ་བ་ཞེས།། གསང་བ་མཆོག་གི་བདག་པོས་བཤད།། མཉམ་དང་མི་མཉམ་མཉམ་པ་ཡིན།། སངས་རྒྱས་མེད་ཅིང་སེམས་ཅན་མེད། ། འཁོར་བ་མེད་ཅིང་ཆོས་ཉིད་མེད།། དམིགས་པ་མེད་དེ་མི་དམིགས་མེད།། དེ་ལྟར་ཤེས་པ་མཁས་པ་ཡིན།། རིག་དང་མ་རིགས་ཚུལ་གཅིག་སྟེ།། དེ་ལྟར་ཤེས་པ་རྒྱལ་བ་ཡིན། སེམས་ཅན་རང་བཞིན་སངས་རྒྱས་ཉིད། ། སངས་རྒྱས་རང་བཞིན་སེམས་ཅན་ཏེ།། སེམས་ཅན་སངས་རྒྱས་གཅིག་པ་ཡིན།། དེ་ལྟར་ཤེས་པ་རྒྱལ་བའི་སྲས།། བྱང་ཆུབ་ཕྱིར་ནི་གང་མ་བརྙེས།། མ་བརྙེས་གང་ཡང་དེ་མ་བརྙེས། ། བརྙེས་པ་མེད་པའི་དོན་མཐོང་ན།། དེ་ནི་བརྙེས་པའི་མཆོག་ཡིན་ནོ།། གཞན་ཡང་དུས་པའི་རྣལ་འབྱོར་རྣམས།། ལམ་གྱི་ངོ་བོ་ཚོལ་འདོད་ན།། ལམ་གྱི་རྟགས་ཉིད་དཔེས་མཚོན་ཏེ།། ལམ་གྱི་དོན་ལ་གོམས་པར་བྱ། ། མི་གནས་མིག་ལྡན་སྒྲོན་མ་ཡིས།། ལམ་གྱི་རྒྱུ་ལ་མཁས་པར་བྱ།། བག་ཆགས་རྟོགས་པའི་མཚན་མ་རྣམས།། སྣ་ཚོགས་དངོས་པོར་སྣང་མོད་ཀྱང།། ནམ་མཁའ་དག་ལ་སྨིན་རྒྱུ་འདྲ།། དེ་ཡང་གཏན་ཚིགས་ངེས་པ་ཡི། ། དཔེ་ཡིས་མཚོན་ཏེ་རྟོགས་བྱ་ན།། མཁའ་ལ་སྤྲིན་ཕུང་འཇའ་ཚོན་དང།། ཆར་ལ་སོགས་པའི་རྒྱུན་སྣང་ཡང།། ནམ་མཁའ་ཆོ་འཕྲུལ་གཅིག་ཏུ་ཟད།། རྟག་ཏུ་དེ་ལྟར་སྣང་བ་མིན།། དཔེར་ན་སྒྱུ་མའི་རང་བཞིན་ཡང། ། སླུ་ཞིང་འདྲིད་པ་ཅིར་སྣང་ཡང།། སྒྱུ་མའི་འཕྲུལ་པར་སྣང་བར་ཟད།། རྟག་ཏུ་དེ་ལྟར་སྣང་བ་མིན།། དཔེར་ན་རྡོ་ཡི་དངོས་པོ་ཡང། སྲ་ཞིང་མཁྲེགས་པའི་དངོས་པོ་ཡང།། བཏགས་སམ་ཕྱེ་མར་བྱས་ནས་ཀྱང། རླུང་གི་མཐུ་ཡིས་བཏོར་བྱས་ན།། དེ་ལ་རང་བཞིན་ལ་ག་ཡོད།། དཔེར་ན་མེ་ཡི་རང་བཞིན་དག། ཚང་ཚིང་སྦར་སྦུར་ཀུན་སྲེག་ཅིང།། འབར་འཕྲོ་སྣང་གསལ་མཆེད་བྱེད་ན།། ཆུ་ཡི་མཐུ་ཡིས་རླག་འགྱུར་ན། ། དེ་ལ་རང་བཞིན་ག་ལ་ཡོད།། དཔེར་ན་རྫས་ཀྱི་དངོས་པོ་ཡང།། མེ་ཡི་མཐུ་ཡིས་སྲེག་འགྱུར་ན།། དེ་ལ་རང་བཞིན་ག་ལ་ཡོད།། ཤེས་པས་ཟིན་པའི་སེམས་ཅན་རྣམས།། གཟུགས་དང་དྲན་པ་སྣ་ཚོགས་ཀྱིས། ། དབང་པོ་ལ་སོགས་མཛེས་གྱུར་ཀྱང།། ཕུང་པོ་མི་རྟགས་ཤི་འཕོས་ན།། དངོས་པོ་བརྟན་པར་མི་འགྱུར་ཏེ།། གཟུགས་རྣམས་སོ་སོར་ཞིག་ནས་ནི།། རུས་པ་དག་ཀྱང་མི་སྣང་སྟེ།། ཞིག་དག་རུལ་ལ་སོགས་པ་ཡིས། ། ཐ་མར་ཅི་ཡང་མི་སྣང་འབྱོར།། རི་བོ་ཆེན་པོ་ལ་སོགས་པ།། དངོས་པོ་བརྟན་གཡོའི་འཇིག་རྟེན་རྣམས། སྲེག་པའི་བསྐལ་བ་ལ་སོགས་པ།། བསྐལ་པ་གསུམ་གྱིས་བརླག་བྱས་ན།། དེ་ལ་རང་བཞིན་ལ་ག་ཡོད། ། དེས་ན་དངོས་པོའི་ཆོས་རྣམས་ཀུན།། དངོས་པོར་བརྟགས་པ་མ་ཡིན་པས།། ཆོས་རྣམས་རང་བཞིན་མེད་པར་ཤེས།། འདི་ནི་རྣལ་འབྱོར་ལམ་གྱི་མཆོག། འདུས་པའི་ཚོགས་རྣམས་གོམས་པར་གྱིས། ། ཞེས་སེམས་དཔའི་རྡོ་རྗེ་སྨྲ་བའི་སེང་གེས་རྣལ་འབྱོར་མཆོག་གི་ལམ་གསུངས་པའོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་རྗེས་སུ་འཇུག་པའི་ལེའུ་སྟེ་གཉིས་པའོ། །།། དེ་ནས་སྨྲ་བའི་སེང་གེ་སེམས་དཔའི་རྡོ་རྗེ་དེ་ཆོ་འཕྲུལ་ཆེན་པོ་སྣ་ཚོགས་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། ཏིང་ངེ་འཛིན་དེའི་བྱིན་གྱི་རླབས་ཞིང་ཁམས་ཐམས་ཅད་གཡོས་པར་གྱུར་ཏེ། ། དོན་ཡོངས་སུ་རྫོགས་པའི་སྔ་ལྟས་བྱུང་བར་གྱུར་རོ།། འཁོར་དེར་འདུས་པར་གྱུར་པ་རྣམས་ལ་ལ་ནི་ཉི་ཟླའི་སྟེང་ན་གནས་ཤིང་ཆོས་ཉིད་ཀྱི་ནམ་མཁའ་ལ་ལྡིང་བར་གྱུར་ཏོ། ། ལ་ལ་ནི་རི་རབ་རྒྱང་མར་འཕེན།། ལ་ལ་ནི་སྟོང་གསུམ་ཆེན་པོའི་ཁམས་འཕེན་པར་གྱུར་ཏོ།། ལ་ལ་ནི་ཆོས་ཉིད་བདེན་པའི་དོན་མཐོང་བར་གྱུར་ཏོ།། ལ་ལ་ནི་སེང་གེའི་ཁྲི་ལ་འདུག་པར་གྱུར་ཏོ།། དེ་ནས་སེམས་དཔའི་རྡོ་རྗེ་དེ་ཆོ་འཕྲུལ་གྱི་ཏིང་ངེ་འཛིན་དེ་ལས་བཞེངས་ཏེ། འདུས་པ་ཆེན་པོའི་རྣལ་འབྱོར་གྱིས་ཤིན་ཏུ་ངོ་མཚར་ཆེ་བར་གྱུར་ནས། སེམས་དཔའི་རྡོ་རྗེ་དེ་ལ་རྣལ་འབྱོར་གྱི་ཕྱག་ལུས་ཀུན་དུས་ལ་བརྡབས་ནས་འདི་སྐད་ཅེས་གསོལ་ཏོ། ། སེམས་དཔའ་ཆེན་པོ་ཆོ་འཕྲུལ་རྒྱ་ཆེར་གདའ་བ་འདི་དོན་ཇི་ལྟ་བུ་ལགས། རྟགས་ཅི་ལྟ་བུ་ལགས། བདག་ཅག་རྣམས་ལ་རྒྱ་ཆེར་བཤད་དུ་གསོལ་ཞེས་ཞུས་པ་ལས། སྨྲ་བའི་སེང་ངེ་ཆེན་པོས་བཀའ་སྩལ་པ། འདུས་པའི་རྣལ་འབྱོར་རྣམས་འདི་དག་ནི་དོན་ཡོངས་སུ་རྫོགས་པའི་ལྟས་ཆེན་པོ་ཡིན་ཏེ། སྔ་ལྟས་ཀྱི་མཚན་མ་འདི་དང་སྦྱར་ན་འདུས་པ་ཆེན་པོ་རྣམས་ས་ནས་སར་ཤིན་ཏུ་འཕར་ཞིང་ཡང་དག་ངེས་པའི་དོན་མཐོང་བའི་སྔ་ལྟས་ཡིན་ནོ་ཞེས་གསུངས་པའི་ལས། རྣལ་འབྱོར་གྱི་ཚོགས་ཀྱིས་གསོལ་པ། སེམས་དཔའ་ཆེན་པོ་ས་ནོན་པའི་སྔ་ལྟས་ནི་ཇི་ལྟ་བུ་ལགས། དོན་མཐོང་བའི་སྔ་ལྟས་ནི་ཇི་ལྟ་བུ་ལགས། བདག་ཅག་རྣམས་ལ་བཤད་དུ་གསོལ་ཞེས་ཞུས་པ་ལས་སེམས་དཔའ་རྡོ་རྗེས་བཀའ་སྩལ་བ། འདུས་པ་ཆེན་པོའི་ཚོགས་ལེགས་སོ།། ཁྱོད་ཀྱིས་ཞུས་པའི་དོན་རྒྱ་ཆེར་བཤད་པར་བྱའོ། རྣ་བ་ལྷོགས་ལ་གུས་པར་ཉོན་ཅིག། སྒྲུབ་པ་དོན་གྱི་རྣལ་འབྱོར་པ།། རྣལ་འབྱོར་དོན་ལ་སྦྱོར་བའི་ཚེ།། སྤྱད་པའི་ལས་ཀྱི་ཁྱད་པར་གྱིས།། ཁམས་དང་ས་ནི་གར་འགྲོ་བ།། མདོ་དོན་ཚུལ་ལྔས་ལུང་བསྟན་ནོ།། ངེས་པའི་སྔ་ལྟས་བྱུང་བ་ཡི། ། འབྲས་བུ་དོན་གྱི་ཁྱད་པར་ཡང།། ཆོ་འཕྲུལ་སྣ་ཚོགས་སྟོན་པར་ནུས།། དེ་ནས་ཡང་དག་བདེན་པ་འཐོབ།། ངེས་པའི་སྔ་ལྟས་རྣམ་པ་ལྔ།། རྒྱུ་ཡི་དུས་ན་འབྱུང་བ་ནི།། ཚིག་གི་བརྗོད་པ་འདི་ལྟ་སྟེ།། བློ་རྩལ་ལས་ཀྱི་ཁྱད་པར་ཡང། སྣང་བ་ལུས་ཀྱི་སྔ་ལྟས་དང།། ངོ་མཚར་རྫས་རྙེད་ཚུལ་རྟགས་དང། མཚན་མ་སྤྲ་ཡི་རྨི་ལྟས་དང། འདུན་པ་མང་པོའི་སྔ་ལྟས་ཀྱིས།། འབྲས་བུ་གང་དང་གང་འགྲུབ་པ།། མཚན་མ་གསལ་བར་རྒྱུད་ལས་འབྱུང། ། དཔེར་ན་མེ་ཡི་སྔ་ལྟས་ནི།། དུ་བའི་མཚན་མ་རྒྱས་པར་འབྱུང།། དུ་བ་གང་བྱུང་གནས་དེ་ནི།། མི་ཉིད་ཡོད་པར་ངེས་པ་ཡིན།། དེ་བཞིན་ཆུ་ཡི་སྔ་ལྟས་ཀྱང།། རླངས་དང་སྡབས་དང་སྲོག་ཆགས་འབྱུང། ། དེ་ན་ཆུ་ཉིད་ཡོད་པར་ངེས།། རླུང་གི་ལྟས་ཀྱང་འདི་ལྟ་སྟེ།། སྤྲིན་རྣམས་རྒྱུག་ཅིང་དུམ་བུར་འཆད།། དེས་ན་རླུང་ཆེན་འབྱུང་བར་ངེས།། རྩི་མཚལ་ལོ་མ་གང་བྱུང་བ།། དེ་ན་གསེར་ཁུར་ཡོད་པ་ལྟར། ། སྔ་ལྟས་མཚན་མ་འདི་དག་གིས།། འབྲས་བུ་མཐོ་དམན་གར་འགྱུར་བ།། རྒྱུ་ལ་མཁས་པར་བྱས་ནས་ནི།། མཚན་མ་ཅི་བྱུང་དེ་ལ་སྦྱར།། བར་ཆད་མེད་པའི་བརྩོན་འགྲུས་ཀྱིས།། སྲོག་ལ་བབ་ཀྱང་མི་བལྟ་བར། ། རྣལ་འབྱོར་ཡུལ་ལ་འཇུག་པ་དང། ཏིང་འཛིན་རིག་པའི་རྩལ་སྤྲུགས་ལ།། གཉེན་པོ་ཀུན་བསྟན་ས་སྦྱངས་ནས།། རྣལ་འབྱོར་ས་ལ་བརྩོན་པར་བྱ།། འདིས་ནི་གདོན་མི་ཟ་བ་དང།། ལ་ལ་ཐེ་ཚོམ་མི་སྐྱེ་ཞིང། ། མ་ངེས་ལ་ཞུགས་ཐེ་ཚོམ་མེད།། དཔེར་ན་འཇིག་རྟེན་བྱིས་པ་དག། ཡུན་རིངས་མ་ལ་སྐྱོ་བ་ལྟར།། སྔ་ལྟས་བྱུང་བའི་སྒྲ་ཐོས་ན།། ཤིན་ཏུ་བྲོད་པས་མདུན་བསུ་ལྟར།། ལྟས་ཆེན་བྱུང་བའི་བྲོད་ཚུལ་གྱིས། ། ཤིན་ཏུ་བརྩོན་པས་བདེ་ཐོབ་འགྱུར།། དེ་བས་སྔ་ལྟས་མཚན་མ་རྣམས།། ཤེས་ནས་བརྩོན་པར་འབད་པའི་རིགས།། བློ་རྩལ་ལས་ཀྱི་ཁྱད་པར་གྱིས།། ཏིང་འཛིན་དྲོད་ཀྱི་སྔ་ལྟས་འབྱུང།། ཡང་དག་བདེན་པའི་དོན་བསྟན་ན། ། མི་སྐྲག་མི་དངང་དགའ་བ་སྐྱེ།། ཡང་དག་དོན་ལ་ངེས་བལྟས་ན།། འཁོར་བའི་ཆོས་ལ་སྐྱོ་བ་སྐྱེ།། ཡང་དག་དོན་ལ་འདྲིས་པ་དང།། རྣམ་གྲངས་ཆོས་ལ་དད་མི་འགྱུར།། ཡང་དག་དོན་ཉིད་མཐོང་བ་ན། ། ཚིག་ལ་དགའ་བ་མི་སྐྱེ་ཞིང།། དོན་ཉིད་ཉེ་བར་འཛིན་པར་བྱེད།། དོན་མཐོང་བ་དང་ཡེ་ཤེས་སྐྱེ།། ཡེ་ཤེས་སྐྱེས་པར་གྱུར་པ་དང། དངོས་པོར་སྣང་བ་ཐམས་ཅད་ཀུན།། སྒྱུ་མ་བཞིན་དུ་ཤེས་པར་འགྱུར། ། སྒྱུ་མ་ཙམ་དུ་ཞེས་པ་ལ།། བརྟེན་ནས་ཆོས་ཉིད་དོན་བལྟས་ན།། སྣང་བ་མེད་པའི་དོན་ཉིད་ནི།། སྣང་བ་མེད་པར་མཐོང་བར་འགྱུར།། སྣང་མེད་སྲིད་པ་མཐོང་བའི་ཚེ།། ཆོ་འཕྲུལ་རྒྱུ་བ་ཐམས་ཅད་འབྱུང། ། དེ་ཉིད་བདེན་པའི་སྔ་ལྟས་སོ།། དེ་ནས་ཉི་མའི་འོད་ཟེར་གྱི།། རྡུལ་ཕྲན་འདྲ་བའི་མཚན་མ་འབྱུང།། དེ་ནི་གཡོ་བའི་སྔ་ལྟས་སོ།། དེ་ནས་སྨིག་རྒྱུ་ལྟ་བུར་འབྱུང།། དང་པོའི་དྲོད་ཅེས་བྱ་བར་ཤད།། དེ་ནས་མཚོ་ཡི་རླབས་ལྟར་འབྱུང། ། བར་གྱི་དྲོད་ཅེས་བྱ་བར་བཤད།། དེ་ནས་རླུང་ཆེན་ལྟ་བུར་ཡང།། ཐོགས་པ་མེད་པར་འབྱུང་བར་འགྱུར།། ཐ་མའི་དྲོད་ཅེས་བྱ་བར་བཤད།། དེ་ནས་ཡིག་འབྲུའི་དྲོད་སྤྲོས་པས།། ཆར་ཆེར་འབབ་པ་ལྟ་བུར་འབྱུང། ། དེ་ནི་ཐོབ་པའི་དྲོད་ཅེས་བྱ།། དེ་ནས་མཁའ་ལ་སྤྲིན་ལྡིང་བཞིན།། ཏིང་འཛིན་རྩལ་འཕང་མཐོ་བར་འགྱུར།། དེ་ནི་ཤིན་ཏུ་བརྟན་པའི་དྲོད།། དེ་ནས་ཏ་ལ་གཅིག་ཙམ་དུ།། བདག་གི་ལུས་ནི་དབང་མེད་པར། ། མཁའ་ལ་འཕར་ཞིང་འཕགས་པ་རྩོལ།། འདི་ནི་ཤིན་ཏུ་གསལ་བའི་དྲོད།། དེ་ནས་ས་ཆེན་གཡོ་བ་ལྟར།། ཤིན་ཏུ་ཡམ་ཡོམ་མར་མེར་འབྱུང།། འདི་ནི་དང་པོའི་རྟགས་ཤེས་བྱ།། དེ་ནས་ཏིང་འཛིན་རྩལ་སྦྱངས་ན། ། ཅི་ལྟར་དམིགས་པ་དེར་འགྲུབ་སྟེ།། མི་ཡི་སྐྱེ་མཆེད་དེར་བསྒོམས་ན།། མེ་ཡི་རང་བཞིན་ཉིད་དུ་འགྱུར།། ཆུ་ཡི་སྐྱེ་མཆེད་དེར་བསྒོམས་ན།། ཆུ་ཡི་སྐྱེ་མཆེད་ཉིད་དུ་འགྱུར། ། རླུང་གི་སྐྱེ་མཆེད་དེར་བསྒོམས་ན།། རླུང་གི་སྐྱེ་མཆེད་ཉིད་དུ་འགྱུར།། ཡིག་འབྲུའི་སྐྱེ་མཆེད་དེར་བསྒོམས་ན།། ཡིག་འབྲུ་གང་ལྟར་གསང་བར་འགྱུར།། དེ་ལྟར་རྫས་ཀྱི་སྐྱེ་མཆེད་དུ།། གང་ལྟར་བསྒོམས་པ་དེ་ལྟར་འགྱུར། ། དེ་ནི་རྟགས་ཆེན་ཐོབ་པ་ཡིན།། བློ་ཡི་ཏིང་འཛིན་རྩལ་རྫོགས་ན།། ངག་གི་བདེན་པའི་རྩ་འབྱུང་སྟེ།། སྲེག་པའི་མེ་ཆེན་མཐོང་བ་ན།། ཞི་བར་གྱུར་ཅིག་བྱས་པ་ཡིས།། དེ་ཉིད་དུ་ནི་ཞི་བར་འགྱུར། ། ཆུ་ཀླུང་གནོད་པའི་རྒྱུན་བྱུང་ན།། ཆད་པར་གྱུར་ཅིག་བརྗོད་པ་ཡིས།། དེ་ཉིད་དུ་ནི་ཆད་པར་འགྱུར།། རླུང་ཆེན་གནོད་པའི་རྒྱུན་བྱུང་ན།། ཞི་བར་གྱུར་ཅིག་བརྗོད་པ་ཡིས།། དེ་ཉིད་དུ་ནི་ཆད་པར་འགྱུར། ། ནད་པའི་ཚོགས་ནི་མཐོང་བ་ན།། གང་ན་ན་བའི་དམིགས་དེར་ནི།། སེ་གོལ་གཏོགས་པ་ཙམ་གྱིས་ཀྱང།། ནད་རྣམས་ཞི་བར་གྱུར་ཅེས་བརྗོད།། ནད་ཀྱི་ཚོགས་རྣམས་ཞི་བར་འགྱུར།། དེ་བཞིན་ངག་གིས་བརྗོད་བྱས་པ། ། ཐམས་ཅད་མ་ལུས་གྲུབ་པར་འགྱུར།། ངག་གི་བདེན་པའི་རྩལ་རྫོགས་ན།། ལུས་ཀྱི་དྲོད་ལ་རྩལ་འབྱུང་སྟེ།། གཉིད་ཀྱི་རྟོག་པ་ཆོམས་པ་དང།། ལུས་ཀྱི་བཟོད་པ་ཐོབ་པ་ནི།། འདི་ནི་དང་པོའི་དྲོད་ཡིན་ནོ། ཁམས་ཀྱི་ཟས་དང་བྲལ་བ་དང།། མདངས་དང་དབང་པོ་གསལ་འགྱུར་བ།། འདི་ནི་གཉིས་པའི་དྲོད་ཅེས་བྱ།། ཤིང་བལ་ལྟ་བུར་ཡང་བ་དང། ཁམས་བདེ་མི་བདེ་མི་འབྱུང་ཞིང།། ནད་ཀྱི་ཚོགས་དང་བྲལ་འགྱུར་བ། ། འདི་ནི་དྲོད་ཆེན་བསྟན་པ་ཡིན། ཁམས་ཀྱི་ཟས་དང་ལ་མ་བསྟེན་ཡང།། དབང་པོ་གཟི་མདངས་ཤིན་ཏུ་གསལ།། འདི་ནི་ཏིང་འཛིན་རོ་ཚོར་རྟགས།། གཞན་ཡང་ལུས་ཀྱི་སྔ་ལྟས་ནི།། མཉམ་པའི་སྐྱིལ་ཀྲུང་བཅས་ནས་ནི། ། ཁྲུ་གང་ཙམ་དུ་འཕར་བ་དང།། ཏ་ལ་གང་ཙམ་བར་དུ་འགྲོ།། འདི་ཡང་ལྟས་ཆེན་རྟགས་ཡིན་ནོ།། གཞན་ཡང་སྣང་བའི་ནམ་མཁའ་ལ།། གོམ་པས་བགྲོད་དེ་འགྲོ་བ་དང། ཆུ་ལ་མི་འབྱིང་ས་ལ་འཛུལ། ། མེ་ཡིས་མི་འཚིག་རླུང་བཅིང་བ།། འདི་ཡང་སྔ་ལྟས་ཆེན་པོ་ཡིན།། ལུས་ཀྱི་བདེན་པའི་རྩལ་རྫོགས་ན།། མཐུ་ཡི་རྩལ་ཡང་འབྱུང་བ་སྟེ།། མཐུ་ཡི་བྱིན་བརླབས་བསམ་མི་ཁྱབ།། གལ་ཏེ་དགོས་སམ་འདོད་པ་ན། ། སའམ་རྡོ་འམ་བྱེ་མ་དག། གསེར་དང་ངུས་ལ་སོགས་པར་སྒྱུར།། སྐམ་ས་དག་ལ་ཆུ་འབྱིན་ཅིང། སོལ་བ་དག་ལ་ལྗོན་ཤིང་འབྱུང།། དེ་ལ་སོགས་པའི་དགོས་པ་རྣམས།། ཇི་ལྟར་འདོད་པ་དེ་ལྟར་འགྲུབ། ། སྤྱོད་པའི་མཐུ་དང་རྩལ་རྫོགས་ན།། འབྱོར་བའི་ཡོན་ཏན་རྫོགས་འགྱུརཏེ།། ཡིད་དུ་འོང་བར་ནོར་འབྱུང་ཞིང།། འདོད་པའི་བསམ་པ་ཐམས་ཅད་འགྲུབ།། རྫས་ཀྱི་མཆོག་ཏུ་གྱུར་པ་ཡི།། ངོ་ཚར་ཅན་ཡང་རྙེད་པར་འགྱུར། ། དེ་དག་རུང་བའི་སྔ་ལྟས་སོ།། འགྲོ་གང་འདུ་བའི་སྔ་ལྟས་ཀྱང།། ཀུན་གྱིས་བཀུར་ཞིང་དགའ་བ་དང།། ཀུན་གྱི་ཡིད་དུ་འོང་བར་འགྱུར།། ཐམས་ཅད་འདུལ་ཞིང་ཐམས་ཅད་ལ། ། དབང་སྒྱུར་བྱེད་པའི་མཆོག་ཏུ་འགྱུར།། དེ་དག་སྔ་ལྟས་ཆེན་པོ་ཡིན།། མཚན་མ་པྲ་ཡི་རྨི་ལྟས་ཀྱང།། ཤིན་ཏུ་རྒྱ་ཆེར་འབྱུང་བ་སྟེ།། རྣལ་འབྱོར་ཅན་གྱིས་ཤེས་པར་གྱིས།། བག་ཆགས་བྱང་བའི་སྔ་ལྟས་ཀྱང། ། རྟག་པར་གཅེར་བུར་འབྱུང་བ་དང།། ཁྲུས་ཆེན་རྟག་ཏུ་བྱེད་པ་དང།། དྲི་མའི་ཚོགས་རྣམས་དག་པ་དང།། ཆུ་བོ་དག་ལས་རྒལ་བ་དང།། མཚོ་ཆུ་དག་ལ་རྐྱལ་བ་དང།། ཆར་གྱི་རྒྱུན་གྱིས་འཁྲུ་བ་དང། ། གཞན་གྱིས་བུམ་པ་གང་བའི་ཆུས།། བདག་གི་ལུས་ལ་ལྡུགས་པ་དང།། མེ་དཔུང་ཆེན་པོས་སྲེག་པ་དང།། ཤིན་ཏུ་མཐོན་པོའི་རྩེ་དག་ལས།། རླུང་གིས་ཤིན་ཏུ་གཡེང་ཞིང་འཐོར།། འདི་དག་བག་ཆགས་བྱང་བའི་ལྟས། ། འཇིགས་དང་བྲལ་བའི་སྔ་ལྟས་ནི།། གཡུལ་འགྱེད་པ་ལས་སླར་ལོག་དང།། ནད་ལས་ཐར་ཏེ་སོས་པ་དང།། བཙོན་ར་དག་ལས་ཐར་བ་དང།། གཤེད་མའི་ལག་ནས་ཤོར་བ་དང། གཅན་གཟན་ནང་ནས་བྲོས་པ་དང། ། དུག་ནད་དག་ལས་སོས་པ་དང།། བཅིངས་པ་དག་ལས་གྲོལ་བ་དང།། ཐག་པ་བཅད་པར་གྱུར་པ་རྣམས།། མཚན་མ་བཟང་པོའི་སྔ་ལྟས་ཡིན།། ས་རྣམས་ཐོབ་པའི་སྔ་ལྟས་ནི། ཁྲི་རྐང་དག་ལ་འཛེག་པ་དང། ། ཕལ་པའི་སྐས་ལ་འཇེག་པ་དང།། ལྗོན་ཤིང་དག་ལ་འཛེག་པ་དང། གྱེན་དུ་ཤིན་ཏུ་འགྲོ་བ་དང།། རོ་བོའི་རྩེ་ལ་འཛེག་པ་དང།། རིན་ཆེན་སྐས་ལ་འཛེག་པ་དང།། མཆོད་རྟེན་དག་ལ་འཛེག་པ་དང། ། ནམ་མཁའི་སྐས་ལ་འཛེག་པ་རྣམས།། འདི་དག་དོན་གྱི་སྔ་ལྟས་ཡིན།། ས་རྣམས་ནོན་པའི་སྔ་ལྟས་ཀྱང།། ཁྲི་མཐོན་སྟེང་ན་འདུག་པ་དང།། གླང་པོ་ཆེ་ལ་ཞོན་པ་དང།། སེང་གེ་དག་ལ་ཞོན་པ་དང། ། ཁྱུང་ཆེན་ལྡིང་ལ་ཞོན་པ་དང།། མཆོད་རྟེན་ཁ་ལ་ཕྱིན་པ་དང།། རི་བོའི་རྩེ་ལ་འདུག་པ་དང།། ནམ་མཁའི་དབྱིངས་ན་འདུག་པ་དང།། ལུས་ལས་སྤྲིན་ཕུང་འབྱུང་བ་དང།། ཟླ་བའི་སྟེང་ན་འདུག་པ་དང། ། ཉི་མའི་སྟེང་ན་འདུག་པ་རྣམས།། རྣལ་འབྱོར་ས་ལ་གནས་པའི་རྟགས།། སངས་རྒྱས་སྲས་ཀྱི་སྔ་ལྟས་ནི།། རྒྱལ་པོའི་བཀའ་ལ་བཏགས་པ་དང།། བཀའ་ཡི་དབང་པོར་བསྐོས་པ་དང།། གཞན་ལ་དབང་སྒྱུར་བྱེད་པ་དང། ། འཇིག་རྟེན་སྐོས་ལ་འབེབས་པ་དང། གཞན་གྱི་སྡེ་པ་དང་དབང་སྡུད་དང།། གཡུལ་ཆེན་དག་ལས་རྒྱལ་པ་དང།། བདག་ཉིད་རྒྱལ་པོར་གྱུར་པ་དང།། མགོ་ལ་མེ་ཏོག་སྐྱེ་བ་རྣམས།། རྒྱལ་བའི་སྲས་སུ་གྱུར་པའི་ལྟས། ། ཆོས་ལ་དབང་ཐོབ་སྔ་ལྟས་ནི།། གླེགས་བམ་ཟམ་མོ་རྙེད་པ་དང།། དེ་བཞིན་འདྲི་བ་མང་པོ་དང།། དེ་དག་ལ་ནི་དཔྱོད་པ་དང།། གཞན་ལ་འཆད་ཅིང་སྟོན་པ་དང།། དོན་ཉིད་གཏན་ལ་འབེབས་པ་དང། ། མེ་ལོང་དག་ལ་ལྟ་བ་དང།། ཤེལ་གྱི་བུམ་པ་གང་བ་ལ།། ལྟ་ཞིང་བརྟགས་ཏེ་འཐུང་བ་དང།། རིན་ཆེན་ནོར་བུ་ཐུ་བ་དང།། འཁོར་ལོ་ལག་ཏུ་བབས་པ་དང།། ཉི་ཟླ་ལག་པས་ཟིན་པ་དང། ། རི་རབ་ཀླད་ལ་སྐོར་བ་རྣམས།། ཆོས་ལ་དབང་ཐོབ་སྔ་ལྟས་སོ།། བདེན་པ་མཐོང་བའི་སྔ་ལྟས་ཀྱང།། སྔོན་མ་མཐོང་གི་ཡུལ་མཐོང་དང།། སྟོང་གསུམ་རྒྱ་ཆེར་མཐོང་བ་དང།། གླིང་རྣམས་གཞན་དུ་ཕྱིན་པ་དང། ། རི་རབ་ཁ་ལ་ཕྱིན་པ་དང།། ནམ་མཁའ་རྒྱ་ཆེར་མཐོང་བ་དང།། རྒྱ་མཚོའི་གཏིང་དུ་ཕྱིན་པ་དང།། ལག་ན་སྒྲོན་མེ་ཐོགས་པ་དང།། ཉི་མའི་སྙིང་པོར་ལྟ་བ་དང།། སྣང་སྲིད་དཔྱོད་པ་བྱེད་པ་རྣམས། ། ཆོས་ལ་དབང་ཐོབ་ལྟས་ཆེན་ཡིན།། ལུང་བསྟན་ཐོབ་པའི་སྔ་ལྟས་ནི།། རོལ་མོའི་སྒྲ་རྣམས་ཐོས་པ་དང།། འབྲུག་གི་སྒྲ་ནི་གྲགས་པ་དང། སེང་གེའི་ང་རོ་གྲག་པ་དང།། ཆོས་ཀྱི་སྒྲ་ཡི་གཏམ་ཐོས་དང། ། གཟུགས་བརྙད་ཞལ་ནི་འཛུམ་པ་དང།། སངས་རྒྱས་གསུང་ཐོས་སྐུ་མི་མཐོང།། ལྷ་མོ་གླུ་དབྱངས་སྒྲོགས་པ་དང།། གཞལ་ཡས་དག་ལས་སྒྲ་འབྱུང་དང།། གྲོགས་པོ་གྲོགས་པོ་ཞེས་བརྗོད་ཅིང།། ཆོས་ཀྱི་འགྲོ་བ་བྱེད་པ་རྣམས། ། ལུང་བསྟན་འབྱུང་བའི་སྔ་ལྟས་སོ།། དེ་ལ་སོགས་པའི་མཚན་མ་རྣམས།། ལྟས་ཆེན་ཀུན་ཏུ་སྣང་བ་དང།། གང་ཟག་ལས་ཀྱི་དང་པོ་རྣམས།། རིག་འཛིན་སོ་སོའི་ས་པ་ནི།། འགྱུར་བའི་སྔ་ལྟས་བཤད་པ་ཡིན། ། རྣལ་འབྱོར་ལས་ཀྱི་དང་པོ་ལ།། ལྟས་ཆེན་འདི་དག་གང་བྱུང་ཡང། འཁོར་བའི་འདུ་འཛིན་ཀུན་བསལ་ནས།། དོན་ལ་རྟོགས་ཤིང་ས་རྣམས་སྦྱོང།། དེ་ནི་དོན་ལ་རེག་པར་འགྱུར།། དོན་ལ་རིག་པའི་བྱིན་རླབས་ཀྱིས། ། རིག་འཛིན་རྡོ་རྗེར་ལྷུན་གྱིས་གྲུབ།། རིག་འཛིན་ས་ལ་གནས་པ་དང།། ས་ལ་རྩལ་ཆེན་སྦྱོང་བའི་ཚེ།། རྩལ་གྱི་ཆོ་འཕྲུལ་སྣ་ཚོགས་འབྱུང།། ཉི་ཟླ་ཞོན་ནས་འགྲོ་བ་དང།། རི་རབ་རྐེད་ནས་གསོར་བ་དང། འཇིག་རྟེན་རྒྱང་མར་འཕང་བ་དང།། སྲེག་པའི་བསྐལ་པ་གཞིལ་བ་ལ།། སོགས་པའི་ཆོ་འཕྲུལ་ཐམས་ཅད་ཀུན།། ཁྱད་པར་རྩལ་གྱིས་སྟོན་པར་ནུས།། དེ་ལ་སོགས་པའི་རྫུ་འཕྲུལ་རྣམས། ། རྫུ་འཕྲུལ་གྱི་ནི་ཆོ་འཕྲུལ་ཡིན།། རྗེས་སུ་བསྟན་པའི་ཆོ་འཕྲུལ་ནི།། འདུལ་བའི་འགྲོ་བ་ཐམས་ཅད་ལ།། སོ་སོའི་སྐད་དང་ཆོས་མཐུན་པར།། འདུལ་བའི་སྒོ་ནི་སྣ་ཚོགས་སུ།། སོ་སོའི་སྐད་དུ་སྟོན་པར་ནུས། ། དེ་དག་རྗེས་སུ་བསྟན་པ་ཡིན།། ཆོས་ཀྱི་སྒོ་རྣམས་སྣང་བ་ཡི།། ངེས་པའི་ཆོ་འཕྲུལ་བསྟན་པ་ནི།། ཏིང་འཛིན་རྩལ་གྱི་ཁྱད་པར་གྱིས།། འཇིག་རྟེན་ཁམས་རྣམས་གཡོས་ནས་ཀྱང།། ཐམས་ཅད་ཐོ་མཚར་སྐྱེ་འགྱུར་ཏེ། ། སེམས་ཀྱི་བསམ་པར་རངས་བྱས་ནས།། སོ་སོ་དགའ་བའི་རོ་མྱང་འགྱུར།། ཆོས་རྣམས་སྣང་བའི་ཆོ་འཕྲུལ་ཡིན།། ཀུན་ནས་ཀུན་དུ་བརྗོད་པ་ནི།། གསང་བའི་ཡི་གེའི་ཕྲེང་བ་ལས།། རྫུ་འཕྲུལ་ཆོས་ཀྱི་སྒྲ་སྒྲོགས་པས། ། མཐོང་ཡོད་སྣང་གྲགས་ཆོས་རྣམས་ཀུན།། ཀུན་ཀྱང་སྔགས་ཀྱི་སྒྲར་གྲག་པས།། སྔགས་སུ་མ་གྱུར་གང་ཡང་མེད།། དེས་ན་རྩལ་གྱི་ཁྱད་པར་ལས།། སོགས་པའི་ཡོན་ཏན་ཐམས་ཅད་འབྱུང། ། ཞེས་སྨྲ་བའི་སེང་གེ་ཆེན་པོ་སེམས་དཔའི་རྡོ་རྗེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཆོ་འཕྲུལ་བསྟན་པའི་ལེའུ་སྟེ་གསུམ་པའོ། །།། དེ་ནས་སྨྲ་བའི་སེང་གེ་སེམས་དཔའི་རྡོ་རྗེ་དེ་མི་འདའ་བའི་དམ་ཚིག་གསང་བ་ཆོག་གི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང། འདུས་པའི་རྣལ་འབྱོར་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། ། སྨྲ་བའི་སེང་གེ་སེམས་དཔའ་ཆེན་པོ་ཁྱོད་ཉིད་ནི་དམ་ཚིག་ཆེན་པོའི་བདག་ཉིད་དུ་བདག་ཅག་རྣམས་ཀྱིས་མཐོང་ངོ།། དེ་སྐད་ཅེས་གསོལ་པ་དང། སེམས་དཔའ་ཆེན་པོ་དེས་བཀའ་སྩལ་པ། འདུས་པའི་རྣལ་འབྱོར་རྣམས་ཆོས་ཐམས་ཅད་ཀྱི་སྲོག་ནི་དམ་ཚིག་ཡིན་པར་ཤེས་པར་གྱིས་ཤིགདེ་ནས་འདུས་པ་ཆེན་པོའི་ཚོགས་ཀྱིས་སེམས་དཔའ་ཆེན་པོ་ལ་འདི་སྐད་ཅེས་གསོལ་ཏོ། ། སེམས་དཔའ་ཆེན་པོ་དམ་ཚིག་མཆོག་གི་གསང་བ་རྣམས་བདག་ཅག་རྣམས་ཐོས་པར་འཚལ། ཐོས་ནས་ཀྱང་རྟོགས་པ་འཚལ། རྟོགས་ནས་ཀྱང་དེ་ལ་གནས་པར་འཚལ་ན།། སེམས་དཔའ་ཆེན་པོ་རྒྱ་ཆེར་བཤད་དུ་གསོལ། ། དེ་སྐད་ཅེས་གསོལ་བ་དང། སེམས་དཔའ་ཆེན་པོས་བཀའ་སྩལ་བ། འདུས་པ་ཆེན་པོའི་ཚོགས་དམ་ཚིག་རྣམས་འདི་ལྟ་སྟེ། ཤིན་ཏུ་གསང་བའི་དམ་ཚིག་ནི།། སྣོད་མ་ཡིན་པར་གྱུར་པ་ལས། ། ཕྱི་ནང་གསང་བ་གསུམ་དག་ཏུ།། སྦ་བའི་ཐབས་སུ་སྤྱད་ནས་ཀྱང།། གསང་བའི་ཆོས་རྣམས་གསང་བར་བྱ།། བསྟན་པའི་གནས་མིན་སྣོད་ངན་དག། རྣམ་པ་བཞིས་བསྡུས་བྱེ་བྲག་རྣམས།། མ་འོངས་རྣལ་འབྱོར་བཅུད་ཅན་གྱིས། ། ཤེས་ནས་སྤངས་བར་བྱ་ཕྱིར་བཤད།། འཇིག་རྟེན་པ་དང་ཐེག་དམན་དང།། མུ་སྟེགས་ལོག་ལྟའི་ལྟ་ལ་དགའ།། དད་མེད་བློ་ཞེན་གཡེང་རྨུགས་ཤིང།། བསླབ་ཉན་མི་བརྩོན་བྱོལ་སོང་མཚུངས། ། དད་ལོག་དམ་ཉམས་དོན་ལས་གོལ།། བྱང་ཆུབ་ཐག་པ་གཏིང་ནས་ཆད།། སེམས་ཀྱི་མྱུ་གུའི་རྩ་ཚིག་པ།། ངན་འགྲོའི་འདམ་དུ་ཁ་སྦུབ་ཡིན།། སྣོད་མེད་ཁ་སྦུབ་དེ་དག་ལ།། གསང་བའི་སྨྲ་བར་བྱ་བ་མིན། ། སྨྲས་ན་དེ་ཉིད་ཁ་སྦུབ་འགྱུར།། གསང་བའི་ཚིག་རྣམས་ཁ་སྨྲ་ཡང།། གབ་པ་གསང་བའི་དོན་མི་ཤེས།། སྐྱོན་ཅན་སྦ་ལོས་སྒྲོགས་རྣམས་ལ།། གསང་བའི་དོན་རྣམས་ལྷག་པར་སྨྲ།། བསྙེན་སྒྲུབ་གསང་བའི་ཚིག་རྣམས་ལ། ། སྒྲ་ལ་ཉན་ཀྱང་དོན་མི་གཉེར།། སྙིང་པོའི་དོན་གསང་མི་ཐུབ་པ།། བཅུད་མེད་འཁོར་བར་ཟག་པ་ཡིན།། གསང་དོན་མི་ཐུན་སྣོད་ངན་ལ།། གསང་བ་སྨྲ་བར་གང་བྱེད་པ།། དེ་དང་སྣོད་མེད་སྣོད་ངན་གཉིས། ། འཁོར་བའི་ཁམས་སུ་ཟག་པར་མཉམ།། ལྟ་དང་དམ་ཚིག་སྒྲུབ་པ་ཡི།། དམ་པའི་མཛོད་གསུམ་སྨྲ་ཤེས་ཀྱང།། གོམས་པའི་མཐུ་མེད་གནས་མ་གྱུར།། ངན་སྒྱུར་ཕྲག་དོག་སེར་སྣས་གདུངས། ། བྱ་མེད་ཆོས་ལ་བློ་གཏོད་ཅིང།། སྤྱོད་རྩིང་དམ་རལ་རྡེང་མེད་པར།། རྣལ་འབྱོར་སྤྱོད་ལ་ལྟ་དམན་ཞེས།། ཟེར་བ་ཕམ་འགྱུར་འཁོར་བར་འཕོ།། སྣོད་ངན་འཁོར་བར་འཕོ་བ་ལ།། གསང་བའི་དོན་རྣམས་སྨྲ་བྱེད་པ། ། གསང་བ་ཉམས་པའི་དབང་གིས་ནི།། ཉམས་པ་དེ་དང་དེ་འདྲར་འགྱུར།། ཟླ་ངན་ཉམས་སོད་ཅན་ལན་འདྲེན།། ཁ་གསག་ལྕེ་གཉིས་སྒྱུར་བྱེད་ཅིང།། སེམས་ལ་ཉོན་མོངས་ལྔ་བཅངས་ཏེ།། རྐུ་དང་སྒྱུ་སྤྱོད་བརྫུན་ལ་དགའ། ཚེ་གཅིག་གྲགས་པ་ཆེར་ཕྱིར་དུ།། གང་ཟག་ཕྱིར་འབྲེང་ཚིག་འགའ་ལ།། མཉན་ཏེ་བརྗོད་འདོད་ཚུལ་འཆོས་པ།། ལོག་སྨྲ་དུག་ཅན་ཐར་མ་ལྟུང།། དུག་ཅན་ལྟུང་བའི་སྣོད་དེ་ལ།། གསང་བའི་དམིགས་རྣམས་སྨྲ་བ་ནི། ། རྣལ་འབྱོར་ཉམས་པ་ཆེན་པོ་སྟེ།། འཁོར་བའི་ཐ་མར་དེ་ལྟུང་འགྱུར།། འདི་ལྟར་ཕམ་འགྱུར་སྣོད་ངན་ལ།། གསང་བ་གསང་ཆེན་ལ་སོགས་པའི།། དོན་དང་རང་བཞིན་གང་ཡིན་པ། ། བསྟན་ཀྱང་ཕམ་ལྟུང་གེགས་སུ་འགྱུར།། དེ་བས་བསྟན་པར་བྱ་བ་མིན།། གལ་ཏེ་བསྟན་པར་གྱུར་ན་ནི།། སྟོན་སྨྲ་ཉན་བྱེད་དེ་དག་རྣམས།། མཐོང་ཡུན་ཕུང་བྱེད་གཉིས་སྐྲག་འགྱུར།། རྣལ་འབྱོར་མཁས་གསལ་དོན་ལྡན་ལ། ། རྣལ་འབྱོར་མི་ཤེས་གང་དག་གིས།། དྲེགས་པའི་དབང་གི་ཕྲག་དོག་གི། སེམས་ཀྱི་རྣམ་གྲངས་གཅིག་སྐྱེད་པ།། དེ་སྙེད་བསྐལ་པའི་གྲངས་མཉམ་པར།། འབྲས་བུ་མི་བཟད་མྱོང་བར་འགྱུར། ། གལ་ཏེ་ལས་ཀྱི་འཕྲོ་ལེན་ན།། དེ་སྙེད་བསྐལ་པར་བཟོད་འཇུག་དགོས།། མཁས་གསལ་དོན་ལྡན་གྱིས་ཀྱང་ནི།། གོང་མ་བཞིན་དུ་ངན་བསམས་ན།། དེ་ཡང་གནས་ངན་ལེན་པ་སྟེ།། མཁས་པ་དེ་ལ་སྐྱོན་མི་ནུས། ། རྣལ་འབྱོར་དོན་ལྡན་ཚུལ་མཐུན་ལ།། ངན་པའི་ཚིག་གིས་སེམས་དཀྲུགས་ཤིང།། སྒྲོ་སྐུར་རྐུ་དང་བརླང་བཏབ་ན།། དམྱལ་བ་རྡོ་རྗེར་དེ་ལྟུང་འགྱུར།། ཞར་ལས་བྱུང་བའི་རྣམ་སྨིན་ཡང།། ཇི་ལྟར་རྒྱུ་མཐུན་དེ་འདྲར་འགྱུར། ། སྐལ་པ་དམན་པའི་རྣལ་འབྱོར་པ།། རྩ་ཉམས་སྐྱོན་ཅན་རང་བཞིན་ནི།། ངན་སེམས་ཁྲོ་གཏུམ་ལྡན་པ་དང། མི་ཟད་ཕྲ་མེན་ལས་སྤྱོད་བྱེད།། གང་དག་མི་ཤེས་དང་ཚུལ་ཅན།། བྱིས་པའི་རང་བཞིན་བློ་བཞིན་པས། ། ཤིན་ཏུ་དམན་པའི་ལྟ་སེམས་ཀྱིས།། ཚུལ་འཆོས་མཁན་ལ་བཀུར་བར་བྱེད།། གང་དག་དམ་ཚིག་ཡོན་ཏན་ལྡན།། བྱམས་ལ་གནས་ཤིང་རྟག་ཏུ་བཟོད། ཚུལ་ཤིས་དོན་གྱི་གཞུང་རྣམས་སྲོང། ། དེ་དག་ལ་ནི་འདུན་པ་མེད།། དམ་ཚིག་སྤྲེའུ་ལྟར་སྤྱོད་བཞིན་དུ།། བྱང་ཆུབ་སྙིང་པོ་ཐོབ་པ་ཡི།། སངས་རྒྱས་རྣམས་ཀྱང་མི་འབྱུང་ངོ།། འབྱུང་བར་ཡང་དག་ངས་མ་མཐོང།། རྒྱལ་བའི་སྲས་གྱུར་རྣལ་འབྱོར་པ། ། ལམ་སྟོན་སྐྱོན་སེལ་མཁས་པ་ལ།། ཁ་ཅིག་དྲེགས་དང་ཕྲག་དོག་གིས།། ཁྲོ་སྤོང་ཐབས་ཀྱིས་སྨོད་པར་བྱེད།། དེ་ནི་འཁོར་བའི་གཏིང་རྡོ་སྟེ།། ནམས་ཀྱང་ཐར་པའི་ཁར་མི་འབྱུང།། མི་ཤེས་པ་ཡི་རྣལ་འབྱོར་པ། ཡང་དག་དོན་དང་ལྡན་པའི་མི།། རྗེས་སུ་འགྲོ་བར་མི་བྱེད་ཅིང།། ལོངས་སྤྱོད་འདུ་འཛི་གང་ལྡན་པའི།། རྗེས་སུ་འགྲོ་ཞིང་དེ་ལ་འདུད།། དེ་ནི་ལོག་པའི་ལམ་པ་ཡིན།། རྣལ་འབྱོར་ལྟར་དང་བྱང་ཆུབ་ཁེ། ། འབན་ཐག་ཆད་པར་བློ་མི་འབྱུང།། ཟང་ཟིང་ནོར་དང་གཡོ་སྤྲུལ་ཁེ།། ཆུང་ཡང་ཅིས་འགྲུབ་སྲོག་དང་སྡོ།། རྣལ་འབྱོར་མཁས་པའི་རང་བཞིན་ཅན།། བུམ་སྣོད་ནང་གི་གསལ་བ་ལྟར།། ཤེས་རབ་མཛོད་ཀྱི་གཏེར་ལྡན་ཡང། ། སྲོག་ཆགས་རྐུན་མོའི་སྡེར་མོ་ལྟར།། ཁོང་ནས་གབ་སྦས་དོན་སྟོན་ལ།། བླུན་པོ་རྣམས་ཀྱིས་ཅིར་མི་མཐོང།། དཔེར་ན་འདི་འདྲར་ཚུལ་གཅིག་སྟེ།། ལུས་ལ་གཏེར་འཆག་མི་དང་ནི།། བླུན་པོར་གྱུར་པའི་མི་དག་གནས། ། འགྲོགས་ཀྱང་གཉིས་མཚུངས་ཁྱད་པར་འདྲ།། ཏིང་འཛིན་བསྔགས་པ་རྗོད་བྱེད་ཅིང།། ཏིང་འཛིན་དོན་དུ་གཉེར་བ་མེད།། ཡང་དག་བསྔགས་པ་རྗོད་བྱེད་ཅིང།། ཡང་དག་དོན་དུ་གཉེར་བ་མེད། ། དམ་ཚིག་བསྔགས་པ་རྗོད་བྱེད་ཅིང།། དམ་ཚིག་དོན་དུ་གཉེར་བ་མེད།། ཇི་ལྟར་འགྲོ་གང་ལ་ལ་དག། ནོར་བུ་རིན་ཆེན་འདི་འདྲ་སྟེ།། འདོད་པའི་ཡོན་ཏན་ཀུན་འབྱུང་ཞེས།། རིན་ཆེན་དག་གི་ཡོན་ཏན་བརྗོད། ། དེ་ལ་འགྲོ་གང་གཞན་དག་གིས།། དེ་ལྟར་འདོད་པ་འབྱུང་གྱུར་ན།། དེ་ལྟར་ཅུང་ཟད་ཡོད་དམ་ཞེས། དྲིས་ཀྱང་མེད་པས་སླར་སྨྲས་པ།། གང་ཞིག་དགོས་པ་སྐོང་བ་ཡི།། ཡོན་ཏན་ཅུང་ཟད་སྨོས་པ་ཟད། ། དེ་ཉིད་བདག་ལ་མེད་ཅེས་སྨྲ།། དེ་བཞིན་རྣལ་འབྱོར་མི་བརྩོན་པས།། བསླབ་པར་བྱ་བའི་ཆོས་བྲལ་ལ།། ཆོས་ཉིད་བསྔགས་པ་རྗོད་བྱེད་ཀྱང།། དེ་དག་ལ་ནི་ཆོས་ཉིད་མེད།། དེ་ལས་སྤྱོད་པའི་ལོག་སྤྱོད་རྣམས། ། དམ་ཚིག་ཅན་གྱིས་སྤང་བར་བྱ།། རྣལ་འབྱོར་ཆོས་འཛིན་གང་དག་གིས།། རྣལ་འབྱོར་ཉམས་འགྱུར་ལོག་སྲེག་ཅན།། གསང་བ་འཇིག་པའི་དགྲར་མཐོང་ནས།། དེ་དག་སྡིག་པ་མཐོང་བ་ལྟར།། སྐྲོད་ཅིང་ཆད་པས་གཅོད་བྱེད་པ། ། སྐྱེས་བུ་དེ་ནི་རྒྱལ་བའི་སྲས།། དཔེར་ན་བློན་པོ་གང་དག་གིས།། ཉེས་བྱས་ཁྲིམས་དང་འགལ་འགྱུར་ན།། འགལ་བར་མི་གཏོང་ཁྲིམས་དང་སྦྱོར།། བཀའ་ཡི་ཡོ་སྲོང་བློན་པོ་དེ།། རྒྱལ་པོའི་ཐུགས་འཛིན་དམ་པ་ཞེས། ། ཀུན་དུ་རྒྱ་ཆེར་གྲགས་པར་འགྱུར།། ལྡུམ་རར་དུག་གི་སྡོང་སྐྱེས་ན།། བདག་པོས་དུག་ཏུ་ཤེས་མ་ཐག། རྩད་ནས་ཕྱུང་སྟེ་མེད་པར་བྱེད།། ཅི་ཕྱིར་ལྡུམ་ཟས་དེ་དག་ལས།། དུག་འཕེལ་གྱུར་ན་འཆི་ཕྱིར་རོ། ། དེ་བཞིན་ཉམས་འགྱུར་དུག་ཅན་དེ།། བརྟུལ་ཞུགས་ཅན་གྱི་རྣལ་འབྱོར་དེས།། གནས་སམ་ལོ་ཡིས་སྤྱུགས་ཏེ་སྤང།། གང་དག་མི་སྤོང་མགོན་བྱེད་པ། དེ་དག་གསང་བའི་དམ་སྲི་ཡིན། ། དོན་ལ་རྣམ་འབྱོར་གང་ཞིག་གིས།། ཐ་ཚིག་ཟབ་མོར་བཅས་རྣམས་ལས།། བསྲུང་བའི་བསམ་པ་མི་གཡོ་བཞིན།། རྩ་བ་ཡན་ལག་བཅས་རྣམས་ལ།། གལ་ཏེ་མ་ཚོར་ཞིག་གྱུར་ཀྱང།། རྣམ་སྨིན་ཡོད་ཀྱང་རྩ་མི་ཉམས། ། ཇི་ལྟར་གླང་པོ་ཨེ་ནེ་ཡ།། ཤི་ནས་རོ་རུ་གྱུར་མོད་ཀྱང།། གི་ཝང་རྩིད་ནི་དོན་བྱེད་ལྟར།། རྣལ་འབྱོར་ཉམས་དེ་རོར་གྱུར་ཡང།། གཞན་གྱིས་བཀུར་བའི་གནས་ཡིན་ཞིང།། དེ་ཡི་དོན་བྱེད་ནུས་པ་ཡིན། ། དེ་ལྟར་མོད་ཀྱང་འདི་ཀུན་རྣམས།། རྨི་ལམ་དུ་ཡང་མཐོང་མི་བྱ།། ཅི་ཕྱིར་འོ་མ་ཉུང་ངུ་ཞིག། རུལ་བས་འོ་མ་ཀུན་རུལ་བཞིན།། རྣལ་འབྱོར་ཉམས་གྱུར་གཅིག་གིས་ནི།། རྣལ་འབྱོར་ཅན་ཀུན་མ་རུང་འགྱུར། ། འཁོར་བའི་གཡུལ་རྒྱལ་བྱེད་པ་ཡི།། ལོག་པའི་རྣལ་འབྱོར་ཐམས་ཅད་ཀུན།། དོན་ལ་མཁས་པའི་རྣལ་འབྱོར་པས།། ཐམས་ཅད་བསྒྲིམས་ཏེ་སྤང་བར་བྱ།། གལ་ཏེ་མ་སྤངས་ལོག་སྤྱད་ན།། འཁོར་བའི་གཡུལ་ནི་རྒྱལ་འགྱུར་ཏེ། ། བདེན་པའི་བྱིན་བརླབས་མཐུ་ཆུང་འགྱུར།། ཀུན་ཀྱང་དགེ་སྤྱད་དོན་ཆུང་ཞེས།། ཡང་དག་དོན་ལས་ཡིད་བྱུང་ཞིང།། ལོག་པའི་ཆོས་ལ་སྤྲོ་བར་བྱེད།། ཀུན་ཀྱང་ལོག་པའི་ལས་སྤྱད་པས། ། ཡིད་དུ་མི་འོང་སྣ་ཚོགས་འབྱུང།། དེས་ནི་སྒྲོ་སྐུར་གཉིས་སུ་འགྱུར།། བཀའ་ཡི་ཆད་པ་གང་ཡིན་པ།། ཡེ་ཤེས་ཅན་ལྟ་རང་བཞིན་གྱིས།། ནམས་ཀྱང་གནོད་པ་ཡོང་མི་མཛད།། དེ་ཡི་འཁོར་ན་གནས་པ་ཡི། ། གང་དག་མ་རུངས་མཐུ་ཆེན་རྣམས།། རྣལ་འབྱོར་ལོག་པར་སྤྱོད་རྣམས་ཀྱི།། སྐྱོན་མཐོང་ཙམ་ན་ཆད་པས་བཅོད།། ཐམས་ཅད་ངན་འགྲོར་སྤྱིའུ་ཚུགས་ལྟུང།། གྲུབ་པའི་སྣོད་མཆོག་གཅིག་ཡོད་དེ།། འདི་དང་མི་མཐུན་ཀུན་རྫོགས་པའི། ། རྒྱུད་མཉན་དོན་ལྡན་ངང་ཚུལ་བཟང། ཅི་ལ་ཆགས་མེད་གཏོར་ལྡན་སེམས།། ཤེས་རབ་རྣམ་གྲོལ་ལྡེ་མིག་གིས།། གཏི་མུག་ཐར་མ་བློ་ཕྱེ་ནས།། ཆོས་ཀྱི་སྙིང་པོའི་མིག་ལྡན་པས། ། རྟག་ཆད་ཕྲད་མཐོང་དབུ་མའི་ཡུལ།། མ་ནོར་ལམ་དུ་འཇུག་ཤེས་པས།། སྡོང་པོ་སྡོང་ཆེན་རབ་དུལ་བའོ།། ཐ་ཚིག་ལུང་ལས་བྱུང་བ་བཞིན།། གཞུང་སྲོང་ཐུབ་པར་བྱེད་པ་དེ།། རྒྱལ་བའི་སྲས་པོ་ཡིན་པས་ན། ། དེ་ལ་གསང་སྒྲོ་དབྱེ་བར་བྱ།། ཇི་ལྟར་དམ་ཚིག་ཐུབ་པར་ལྟར།། དེ་བཞིན་ཡིད་བཞིན་ནོར་བུ་སྟེ།། ཡིད་འོང་འདོད་དང་བདེ་བ་འབྱུང། རིགས་འཛིན་རྒྱལ་བ་ཀུན་ཡུམ་མོ། དེ་བཞིན་དམ་ཚིག་ཐུབ་པ་ལྟར། ། གནས་པར་བྱེད་པའི་རྟེན་ཡང་ཡིན།། དམ་ཚིག་ཀུན་གྱི་སྲོག་ཡིན་ཏེ།། དམ་ཚིག་ཀུན་གྱི་ནོར་མཆོག་གོ། དམ་ཚིག་འདི་ནི་འཇིགས་པའི་སྐྱབས།། དམ་ཚིག་བགྲོད་པ་ལམ་གྱི་མཆོག། དམ་ཚིག་ཆུ་བོ་གྲོལ་བའི་གྲུ། ། དམ་ཚིག་དངོས་གྲུབ་དམ་པ་ཡིན།། དམ་ཚིག་གྲོགས་གྱི་མཆོག་ཡིན་ཏེ།། དམ་ཚིག་ལོང་བའི་མིག་བུ་ཡིན།། ཇི་ལྟར་དམ་ཚིག་ཐུབ་པར་ལྟར།། གཞན་གྱི་སྡེ་པ་འཇོམས་པ་ཡིན།། འཁོར་བའི་གཡུལ་ལས་རྒྱལ་བར་བྱེད། ། དེས་ན་དམ་ཚིག་རྒྱུན་བཞིན་བསྲུང།། མདོར་ན་བདག་གི་སྒོ་གསུམ་པོ།། དག་པ་གསུམ་གྱི་མཐའ་བཟུང་ནས།། ལྷ་དང་གྲོགས་དང་སློབ་དཔོན་དང། བདག་ཉིད་དག་པ་མ་ཁྲེལ་བའི། ། ཚུལ་གསུམ་མི་གནོད་དམ་བཅས་གསུམ།། ཡོངས་སུ་མ་ཉམས་མདོ་བཞི་པོ།། མཐར་ཕྱིར་རྒྱ་རྟགས་རྣམ་བཞིར་བཅས།། མདོ་དོན་དྲན་པ་ལ་བགྲང་བསྔོ།། བརྟུལ་ཞུགས་སྤྱོད་པའི་དམ་ཚིག་ནི།། དམ་ཚིག་ཀུན་གྱི་ཐོག་མར་འགྲོ། ། ཝ་དང་ཅང་ཤེས་གྱི་ལིང་དང།། བླང་དོར་མིང་བྲལ་ཁོར་ཆེན་བདག། ཤིན་ཏུ་གླང་ཆེན་མྱོས་འདྲའི་སེམས།། དཔལ་རྟུལ་སྟག་མཆོག་རྔམ་ཞིང་ཏུམ།། མཁའ་ལྡིང་ཁྱུང་ཆེན་ལྷག་མི་ལྟ། ། གཏུམ་ཐུང་དོན་ཆེན་སྡོང་གཅིག་པ།། ཡིད་ཐུབ་མི་ལྡོག་རྒྱ་མཚོའི་གསེར།། གཏི་མུག་ལྐུགས་པའི་བློ་ཚོར་ལྡན།། རི་བོ་མི་འགྱུར་བརྟན་པ་ཆེ།། མཁའ་ལྟར་ཡངས་དོག་ཀུན་དང་བྲལ།། གནས་ལྕགས་ལྕེ་ཡི་དྲག་ཤུལ་ཅན། ། ཕྱག་ན་རྡོ་རྗེའི་བརྟུལ་ཞུགས་བདག། ཟོན་བག་ཁུ་འཕྲིག་ཁ་རོག་སེམས། ངེས་པའི་ང་རྒྱལ་གླང་ཚུལ་ལྡན། བླ་བྲལ་སེང་གེ་རི་དྭགས་རྒྱལ། རི་འཇམ་བྱ་ལྟར་ཆགས་འགྲོགས་བློ། གཡོ་ལྡན་ལྕག་ཆེན་སྒྱུ་མའི་རྒྱ། གཙང་སྨེ་མེད་པར་ཀུན་སྤྱོད་ཅིང།། ཐོགས་མེད་གསོ་སྦྱོང་ཅེ་སྤྱད་ཁྭ།། ཆེ་བའི་ང་རྒྱལ་སྟག་མཆོག་བློ།། ཀུམ་འཛེམ་བློ་ལྡན་ནམ་མཁའ་ལྡིང།། ས་ཐུབ་བག་ལེན་རྒྱལ་འཁོར་སྐྱོང།། རྣལ་འབྱོར་བརྟུལ་ཞུགས་ཆེན་པོ་ནི། ། བཅུ་གཉིས་དང་ནི་གསུམ་བློར་ལྡན།། གོམས་ནས་ཉམས་སུ་ལེན་བྱེད་པ།། རྣལ་འབྱོར་གསང་བའི་བཀའ་བ་ཡིན།། དལ་བའི་རྒྱུད་ལྡན་ཐ་ཚིག་ཅན།། སྐུ་དང་གསུང་ཐུགས་རྡོ་རྗེ་ཡི།། བསྲུང་དང་བརྗོད་དང་གསང་བ་དང། ། ཡན་ལག་སྤྱད་པའི་དམ་ཚིག་དང།། ཡིད་འོང་དང་དུ་བླང་བ་དང།། བརྟུལ་ཞུགས་ཟབ་མོར་སྤྱད་པ་དང།། རྣལ་འབྱོར་རྣལ་འབྱོར་ཐམས་ཅད་ཀྱི། མི་འདོར་མི་སྤོང་སྦྱར་བ་ཡི། ། རིག་ལྡན་ཤེས་པར་བྱ་བ་དང།། ཐོབ་ཅིང་གྲུབ་པར་བྱ་བ་ཡིན།། རེ་རེ་ལ་ཡང་ལྔ་ལྔ་སྟེ།། རྩ་བ་དང་ནི་ཡན་ལག་ལས།། བཅུ་གཉིས་དང་ནི་བརྒྱད་ལྡན་པ།། སྤྱད་པར་བྱ་བའི་ནོར་མཆོག་ཡིན།། རྣལ་འབྱོར་བྱང་ཆུབ་སེམས་རྒྱུད་ལ། ངེས་པར་བརྟགས་ཏེ་སྤྱོད་པའི་བུ།། ཟབ་མོར་རྫོགས་མཆོག་བདེ་བ་ཡི།། བློ་ལ་ངེས་པའི་ལུང་འདི་བསྟན།། འདི་ནི་སྔར་འགྲོ་ཐ་ཚིག་སྟེ།། ཟབ་མོ་སྒྲུབ་པའི་སྔོན་ལོགས་སུ།། རྡོ་རྗེ་ཐ་ཚིག་དྲག་པོའོ། ། གཅན་འཕྲང་ལམ་རྣམས་བསྲུང་བའི་ཕྱིར།། སྤྱི་དང་ཁྱད་པར་དམ་ཚིག་རྣམས།། ངེས་པའི་དོན་གྱིས་བསྲུང་བྱས་ནས།། དེ་ནི་དབྱིག་གི་སྣོད་ཆེན་ཡིན།། དེ་ལྟར་སྤྱི་ཡི་སྡོམ་པ་ལ།། གནས་ནས་དུས་ཀྱི་སྐབས་འདི་རུ། ། བསྲུང་བྱ་ཐུབ་པར་བྱ་བ་ནི།། མི་ཤིགས་པ་ནི་སེང་གེ་སྟེ།། གཅན་གཟན་རྒྱལ་པོ་ཡིན་པས་སོ།། ཟ་མ་ཏོག་ནི་འདོད་པའི་གཏེར།། དུག་སྤྱོ་བ་ནི་དེར་མི་རིགས།། རིན་ཆེན་མྱུ་གུའི་ལྕུག་ཕྲན་དག། དེ་ནི་བྲེག་པའི་རིགས་མ་ཡིན། ། གངས་ཀྱི་ཞུན་ཆུ་ཁོལ་མ་དག། མཁས་པས་བཏུང་བར་བྱ་བ་མིན།། པདྨའི་ཟེའུ་འབྲུ་ཁ་མ་བྱེ།། ཟླ་ཟེར་མ་ཡིན་ཁ་མི་དབྱེ།། མ་བརྟགས་བུག་རྡོལ་ཅན་གྱི་སྣོད།། ཁ་མི་དབྱེ་ཞིང་བཅུད་མི་བླུགས། ། དོན་དང་མི་ལྡན་བཅོས་མའི་རྟགས།། བསྲེལ་ཞིང་སྤྱད་པར་བྱ་བ་མིན།། ཤེལ་དཀར་རིན་ཆེ་སྒོ་ང་དག། འདམ་རྫབ་ཁུང་དུ་བསྲུབ་མི་བྱ།། སེང་གེ་དཀར་མོའི་འོ་མ་དག། དུག་ཅན་སྣོད་དུ་བླུགས་པ་མིན། ། ཡིད་བཞིན་ནོར་བུ་རིན་པོ་ཆེ།། བསྲེག་པར་བྱ་བ་ཡོད་མ་ཡིན།། ཁྱུང་ཆེན་གཤོག་པ་མཁར་བརྐྱང་བ།། དེ་དག་གཅག་པར་བྱ་བ་མིན།། གནམ་ལྕགས་མེ་ཡི་ངུར་མོ་དག། བརྡབ་པར་བྱ་བ་མ་ཡིན་ནོ། ། སྟགས་གཟིགས་འདྲོལ་བས་ལས་བྱས་པའི།། ལས་ཀྱི་ལྷག་མ་བསྡུ་མི་བྱ།། རྡོ་རྗེ་བྲག་ཆེན་གཏམས་པའི་གཞི།། དེ་དག་གཞིག་པར་བྱ་བ་མིན།། རྡོ་རྗེ་ར་བའི་གོ་ཚགས་ནི།། བསྡམ་བྱ་བྲལ་བར་བྱ་བ་མིན། ། བུད་ཤིང་སྲེག་པའི་སྒྲོན་མ་དག། གཡེང་བའི་རླུང་གིས་བསྐྱོད་མི་བྱ།། རྡོ་རྗེ་ཚིག་གི་ཆུ་རྒྱུན་དག། འོལ་ཀར་གཅད་པར་བྱ་བར་མིན།། རྒྱལ་པོའི་བཀའ་རྟགས་ཕྱག་རྒྱ་དག། ནམ་ཞར་དབྱི་བར་མི་བྱའོ།། རྡོ་རྗེ་ཕ་ལམ་གཏམས་པའི་མཁར། ། རྨང་ནས་བཟློག་པར་མི་བྱའོ།། གཙུགས་གི་ནོར་བུ་འབར་བ་དག། རྒྱལ་མཚན་རྩེ་ལས་དཔོན་མི་བྱ།། རྣལ་འབྱོར་ལས་ཀྱི་ཕྱད་པར་ཅན།། སྐལ་ཅན་རྣམས་ཀྱི་དམ་ཚིག་སྟེ།། སྐལ་བར་ལྡན་པའི་ནོར་མཆོག་ཡིན། ། རྒྱུན་དུ་སྤྱད་པའི་ནོར་མཆོག་ནི།། རྡོ་རྗེ་ལས་ཀྱི་ཐུན་ཚགས་དག། རྡོ་རྗེ་གོ་ཕུར་ཏྲོམ་ཆེན་གྱིས།། སྲོག་ལ་བར་ཆད་བྱེད་པའི་དགྲ།། ཉོན་མོངས་འཐིབས་པ་དེ་གཞོམ་བྱ།། སྙོམས་ལས་ལེ་ལོའི་དཔུང་བསྐྱེད་པ། ། ཐུག་ཐུབ་ར་ཆོད་ང་རྒྱལ་གཞི།། དྲེགས་བྱེད་དབང་པོ་མྱོས་པའི་བཅུད།། དཔའ་བྱེད་རྐྱེན་ཡངས་བསྡམ་པར་བྱ།། རྡོ་རྗེ་གསང་ཚིག་མ་གཏོགས་པ།། འདྲེས་པ་གང་ཟག་བྱིས་པའི་ཚིག། ཟུར་ཡང་བརྗོད་པར་མི་བྱ་ཞིང།། ཐམས་ཅད་རྡོ་རྗེ་གསང་བས་བྱའོ།། ཇི་ལྟར་གསོད་པའི་མི་རྣམས་དག། གཤེད་མའི་མིས་ནི་གསོད་པའི་ཚེ།། ཐར་པའི་ཐབས་ལ་བརྩོན་པ་བཞིན།། ལེ་ལོའི་དགྲ་བཅོམ་བརྩོམ་པར་འབད། ། རྣལ་འབྱོར་སྒྲིབ་པའི་གེགས་བསལ་བ།། དཀའ་ཐུབ་སྡོམ་པའི་མདུད་པ་ཅན།། འདོད་དང་ལོངས་སྤྱོད་མི་མཐུན་དང།། སྤྱི་མཐུན་ནང་དུ་མི་གཅིག་པ།། ཕྱི་ནང་ཅན་དང་གནོད་བྱེད་དང། ། འདོད་མྱོས་བྱིང་རྨུགས་བརྐམ་པ་དང།། དད་མེད་རྩ་ཉམས་འཕྱར་གཡེང་ཅན།། མཁས་པས་བསྒྲིམས་ཏེ་སྤང་བར་བྱའོ།། དེ་ནི་རྣལ་འབྱོར་གེགས་ཡིན་ཏེ།། དངོས་གྲུབ་ཆུ་བོ་གཅོད་པར་བྱེད།། རྣལ་འབྱོར་ངེས་པར་སྤྱོད་པ་ལ། ། བར་དུ་གཅོད་པའི་བདུད་ལྔ་འབྱུང།། རྣམ་རྟོག་འཕྲིག་པའི་བདུད་ཉིད་དང།། དེ་བཞིན་བཏང་སྙོམས་ལེ་ལོའི་བདུད།། ལོངས་སྤྱོད་འདུ་འཛིན་གཡེང་བའི་བདུད།། ཚིག་རྩུབམཚོན་ཆ་རྣོན་པོའི་བདུད། ཁྲོ་གཏུམ་ངག་ཐུང་འཁྲུག་པའི་བདུད།། རྣལ་འབྱོར་སྤྱོད་པའི་བདུད་ལྔ་པོ།། ཡང་དག་དོན་ལ་སྒྲིབ་པ་སྟེ།། གཉེན་པོ་བྱང་ཆུབ་སེམས་མཆོག་གིས།། ཞི་བ་ཆེན་པོའི་ངང་དུ་བཟློག། རྣལ་འབྱོར་སྤྱོད་པའི་དགྲ་བཞི་པོ། ། ཐབས་ལ་མཁས་པས་གདུལ་བར་བྱ།། རྡོ་རྗེ་བརྣག་པ་གསང་འཕེལ་བས།། ངག་གི་དབང་པོ་ཉམས་འགྱུར་ཏེ།། ཁ་ན་མ་ཐོས་ཕོག་པར་འགྱུར།། དེ་དག་བཅས་ཀར་འགྱུར་བའི་དགྲ། ལྟ་དམན་སྤྱོད་རྩིང་འཆོལ་བ་ཡིས།། བཀའ་ཡི་གཞུང་བོར་ལོགས་པར་སྤྱད།། ནོར་བས་བར་ཆད་འབྱུང་བའི་དགྲ། དམ་གཙོར་སྤྱོད་པའི་ལས་རྣམས་ཡིན།། འདའ་དཀའ་རྡོ་རྗེ་མཆོག་གསུམ་པོ།། བཏང་སྙོམས་ཕྱལ་བར་ཤོར་བ་ནི། ། རྩ་བ་རུལ་པའི་ལྗོན་ཤིང་བཞིན།། བཀའ་ཆད་ཆེན་པོ་འབབ་པའི་གནས།། བརྩམ་པ་ལས་ལ་སྦྱོར་བའི་ཚེ།། འབད་པའི་རྩལ་ཤུགས་ཆུང་བ་ཡིས།། དོན་རྣམས་གྲུབ་པ་མ་ཡིན་ཏེ།། འབྲས་བུར་མི་འགྱུར་འཕྲོ་བའི་དགྲ། ། རྣལ་འབྱོར་ཆེན་པོར་སྤྱོད་པ་ལ། འདོད་པའི་ནོར་མཆོག་འཕྲོག་པའི་དགྲ།། ཐབས་ལ་མཁས་པའི་སྐྱེས་བུ་ཡིས།། སྐྱོན་གྱི་དགྲ་བཞི་སྤང་བར་བྱ།། སྲིད་གསུམ་བསྒྲལ་བའི་ཞིང་འདི་དག། སངས་རྒྱས་ཞིང་དུ་རྟོག་པ་ནི།། ས་རྣམས་ཅིག་ཅར་སྦྱངས་པ་སྟེ།། ཞིང་རྣམས་དག་པའི་མཆོག་ཡིན་ནོ།། ཁམས་གསུམ་མཆོད་པའི་རྒྱུ་འདི་དག། ཡོ་བྱེད་ཆེན་པོའི་མཆོག་ཡིན་ཏེ།། རྒྱལ་བ་ཐམས་ཅད་མཉེས་པའི་རྒྱུ། ། རྨད་དུ་བྱུང་བའི་མཆོད་པའོ། འཁོར་བ་དུར་ཁྲོད་གནས་འདི་དག། བདེ་བ་ཆེན་པོའི་གནས་ཡིན་ཏེ།། མ་ནོར་མ་བཅོས་ཆོས་ཀྱི་དབྱིངས།། བཙལ་མེད་ལྷུན་གྱིས་གྲུབ་པ་ལ།། དུག་ལྔ་རྒྱུ་བའི་རྩ་བ་དག། ཡེ་ཤེས་ལྔ་ཡི་རྩ་བ་སྟེ།། ཀུན་ཤེས་ཀུན་རིག་གསལ་བའོ།། རང་རིག་ཡེ་ཤེས་རང་ལས་བྱུང།། རྣལ་འབྱོར་ཆོས་མིག་ལྡན་པ་ཡིས།། ངེས་པའི་དོན་དུ་འདི་ལྟར་བལྟའོ།། འདི་ནི་རྒྱུན་གྱི་དམ་ཚིག་སྟེ།། བརྗོད་དུ་མེད་པ་བསྲུང་བའོ། ། བསྲུང་བ་ཐུབ་པར་བྱ་བ་ལ། དམ་ཚིག་རྩལ་གྱི་ཁྱད་པར་ནི།། གང་དག་རིག་པ་འཛིན་པ་ཡི།། བློ་ལ་ངེས་པའི་ལུང་དུ་བསྟན།། འདོད་པས་ཆགས་དང་འཇོམས་པ་དང།། གཏི་མུག་ང་རྒྱལ་ཕྲག་དོག་རྣམས། ། རྣལ་འབྱོར་ཆེན་པོའི་དམ་ཚིག་སྟེ།། དོན་དང་ལྡན་པའི་སྐྱེས་བུས་སྤྱ།། སྦྱོར་དང་སྒྲོལ་བར་བྱེད་པ་དང།། མ་བྱིན་ལེན་དང་ངག་སྤྲུལ་བྱེད།། རྣལ་འབྱོར་དམ་ཚིག་སྤྱོད་པའི་མཆོག། སྤྱད་པར་བྱ་བའི་ལས་ཡིན་ནོ། ། རྒྱལ་བ་སེམས་ཅན་ཐམས་ཅད་དང།། དངོས་པོར་བརྟགས་པ་ཐམས་ཅད་ཀྱང།། དོན་གྱི་ངང་དུ་གཅིག་པ་སྟེ།། དེ་ཉིད་སྐུ་གསུང་ཐུགས་ཀྱི་བདག། མཚན་མའི་ཆོས་རྣམས་ཐམས་ཅད་ནི། ། མཉམ་པ་ཆེན་པོའི་ངང་དུ་གསལ།། ཐེག་པ་འོག་མའི་ཁྱད་པར་རྣམས།། ཀུན་ཀྱང་རང་རིག་བློ་ལ་གསལ།། ཡོན་ཏན་ཅི་འབྱུང་མི་བརྗོད་ཅིང།། འོག་མ་རྣམས་ལ་མི་སྨོད་ཅིང།། ཐམས་ཅད་མཉམ་པའི་དམ་ཚིག་སྟེ། ། འདི་ལྟར་ཤེས་ན་ཚོགས་མཆོག་རྫོགས།། གཟུགས་རྣམས་རྣམ་པར་བ་སྣང་བ་མཛད།། ཚིག་རྣམས་བརྗོད་པ་སྣང་མཐའ་ཡས།། རྣམ་རྟོག་ཀུན་དུ་སེམས་རྡོ་རྗེ།། རིག་དང་ཚོར་བ་རིན་ཆེན་འབྱུང། ། ཡིད་གཡོ་བྱེད་པ་དོན་ཀུན་རྫོགས།། སྟན་འགན་རང་བཞིན་སྤྱོད་པའི་གནས།། ཞིང་བཅུ་དག་དང་ལྡན་པ་ན།། བདེ་བ་ཆེན་པོའི་ལོངས་སྤྱོད་དེ།། ཐོགས་མེད་ཕྲིན་ལས་རྣམ་བཞིར་རྫོགས།། ཕྱི་ཡི་ཡུལ་དང་ནང་གི་སེམས། ། ཐམས་ཅད་མཉམ་པ་ཉིད་དུ་གནས།། དེ་ལ་སྒྲིབ་དང་མི་སྒྲིབ་ཅེས།། མཉམ་པའི་རྒྱལ་པོས་ཡོང་གསུངས།། ཐམས་ཅད་མཉམ་ཉིད་དབྱིངས་གྱུར་པས།། ཕུང་པོ་ལྔ་དོན་ཡེ་ཤེས་ལྔ།། སྐུ་གསུང་ཐུགས་ཀྱི་དབང་ཕྱུག་ནི། ། ཕྱག་རྒྱ་ཆེན་པོའི་རིག་འཛིན་ཡིན།། ཡུལ་དང་ཡེ་ཤེས་རང་བཞིན་ལས།། གཞན་གྱི་རང་བཞིན་མེད་པས་ན།། མཚན་མའི་རྣམ་པ་ཅིར་སྣང་ཡང།། དེ་ལ་ཆད་པའི་གནས་མེད་དོ། ། དམ་ཚིག་དམ་པ་གང་ཞེ་ན།། རྟོགས་པ་དམ་པ་དམ་ཚིག་སྟེ།། རྟོག་པར་བྱེད་པ་གང་ཡིན་པ།། དེ་ནི་དམ་ཚིག་ཆེན་པོའོ།། ཐམས་ཅད་མཉམ་པའི་ངང་ལ་གནས། ཏིང་ངེ་འཛིན་གྱི་ཆོ་འཕྲུལ་ལས།། དངོས་སུ་སྤྱོད་པ་ཐམས་ཅད་བྱ། ། དེ་ནི་དམ་ཚིག་ཆེན་པོ་ཡིན།། སྣོད་དུ་གྱུར་པ་ཡུམ་གྱི་དབྱིངས།། བཅུད་རྣམས་རྒྱལ་བ་ཡབ་ཀྱི་མཁའ།། འབྱུང་འཇུག་རིག་པས་ལོངས་སྤྱོད་དེ།། འདི་ནི་རྡོ་རྗེ་ཐ་ཚིག་ཡིན།། སྲིད་པའི་སེམས་ཅན་ཐམས་ཅད་དང། ། ཐར་པ་ཆོས་ཀྱི་རྣམ་གྲངས་ཀུན།། སོ་སོར་ཐམས་ཅད་སྣང་བར་སྟེ།། ཀུན་ཀྱང་མཉམ་པའི་ངག་དུ་གསལ།། སྤྱོད་པའི་ལས་དང་རྟོགས་པ་དང། མཚན་མར་གྱུར་པ་ཐམས་ཅད་ཀྱང། ། སེམས་ཀྱི་ཕྱི་ནང་སྤྱོད་ཡུལ་དེ།། བརྟགས་ན་ལོངས་སྤྱོད་ཚོགས་སུ་འགྱུར།། མ་སྐྱེས་སྟོང་པའི་སྐུ་ཡི་རྒྱ།། རང་བཞིན་སྨོན་མེད་གསུང་གི་དོན།། མཚན་མེད་ཡིད་ལས་འདས་པའི་ཐུགས།། རྣམ་གསུམ་བདེ་ཆེན་སངས་རྒྱས་སོ། ། མཉམ་པའི་ལྟ་བས་དབང་སྒྱུར་ན།། འཁོར་བ་ཐམས་ཅད་དབྱིངས་ལ་སྣང།། ལས་ཀུན་རྫོགས་པའི་མཆོག་ཡིན་ཏེ།། གཞན་དུ་ཕྲིན་ལས་ལུས་པ་མེད།། སྡུག་བསྔལ་བྱང་ཆུབ་ཆེན་པོ་སྟེ། ། འཁོར་བ་ཡེ་ནས་མྱང་ངན་འདས།། སྒྲིབ་པ་རྣམ་དག་ཆོས་ཀྱི་དབྱིངས།། ཉོན་མོངས་ཀུན་ཀྱང་བྱང་ཆུབ་དོན།། སྣང་བ་མེད་པའི་དོན་མཐོང་དང།། ས་དང་ས་ཡི་རིམ་པར་ནི།། འདི་དང་འདི་ཞེས་གཟུང་དུ་མེད། ། འདི་ནི་སྣང་མེད་ཐོབ་པའི་གནས།། སྐུ་དང་གསུང་ཐུགས་མི་གཡོ་བའི།། ཇི་བཞིན་ཉིད་ཀྱི་ངང་ལ་གནས།། ཇི་ལྟར་བསྒྱུར་ཡང་ཆོས་ཉིད་པས།། ཆད་པའི་གནས་ཞེས་བརྗོད་དང་བྲལ།། མེད་དང་ཕྱལ་བ་གཅིག་པོ་དང། ། ལྷུན་གྱིས་རྫོགས་པའི་དམ་ཚིག་ཆེ།། འདི་ཞེས་རིས་སུ་ཆད་མེད་པ།། འདི་ནི་བསྲུང་བའི་དམ་ཚིག་གོ། སྤྱད་དང་སྤྱོད་པར་བྱ་མེད་པས། སྲིད་དང་མུ་སྟེགས་འཇིག་རྟེན་པའི།། སྤྱོད་པར་སྣང་བ་ཐམས་ཅད་ཀུན། ། ལྷུན་གྱིས་གྲུབ་པའི་མཛད་སྤྱོད་དོ།། མ་སྤངས་ལྷུན་གྲུབ་དབྱེར་མེད་པས། དབྱིངས་ལས་གཞན་ན་ལྟ་ཡུལ་མེད།། འདི་ནི་ལྟ་བའི་དམ་ཚིག་གོ། ས་ཆུ་མེ་རླུང་སྣོད་བཅུད་བཅས། ། ཀུན་ཀྱང་རང་བཞིན་ཆོས་ཉིད་དོ།། ཆོས་ཉིད་དོན་ལ་གཞན་མེད་པ།། རང་བྱུང་ཡེ་ཤེས་གསལ་བའོ།། ཡིད་བཞིན་ནོར་བུ་རིན་པོ་ཆེ།། མ་བཙལ་རང་ལ་ཡོད་པ་ཡིན། འདོད་པ་འབྱུང་བའི་ལོངས་སྤྱོད་དེ། ། བདེ་ཆེན་ལོངས་སྤྱོད་ཚོགས་ཡིན་ནོ།། ངན་སོང་མཐོ་རིས་ཐམས་ཅད་དང།། འཕགས་ལམ་འཁོར་བའི་ཆོས་རྣམས་ཀུན།། རང་བཞིན་སོ་སོར་མི་དམིགས་ཏེ།། སངས་རྒྱས་ཀྱི་ནི་རང་བཞིན་ཡིན།། སྤྱོད་དང་གཟུགས་རིགས་ཐམས་ཅད་ཀུན། ། ཕྱག་རྒྱ་ཆེན་པོའི་རང་བཞིན་ཏེ།། སྐུ་གསུང་ཐུགས་ཚིག་རྒྱ་ཆེར་སྟོན།། དོན་རིགས་ཐུགས་ཀྱི་རང་བཞིན་ནོ།། མ་སྐྱེས་པ་དང་མ་བྱུང་པ།། མི་གནས་པ་ལ་ཆགས་པ་མེད།། དོན་གྱི་ཁྱད་པར་རྟོགས་ཆུད་ན། ། ཀུན་ཏུ་བཟང་པོ་མཆོག་གི་སའོ།། མཚན་དང་དཔེ་བྱད་ཀུན་རྫོགས་ཏེ།། ཐམས་ཅད་སྐུ་གསུང་ཐུགས་ཀྱི་དོན།། བདག་ཉིད་ཆེན་པོར་ཐམས་ཅད་རྫོགས།། ལྷུན་རྫོགས་བདེ་བ་ཆེན་པོ་ཡི། ཁྱབ་པ་ཆེན་པོར་ཀུན་བདལ་བས།། སྒྲིབ་པ་ཀུན་བྱང་ཚོགས་ཀུན་རྫོགས།། རྣམ་གྲོལ་བཅིངས་བ་ཀུན་དང་བྲལ།། ལྷུན་གྲུབ་བདེ་བའི་གནས་ཆེན་ཡིན།། ཞེས་སྨྲ་པའི་སེང་གེ་ཆེན་པོས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མ་ཚིག་གསང་བ་མཆོག་གི་ལེའུ་ཞེས་བྱ་སྟེ་བཞི་པའོ། །།། དེ་ནས་ཡང་སེམས་དཔའི་རྡོ་རྗེ་དེ་ཆོས་ཐམས་ཅད་བརྡས་མཚོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་ཏིང་ངེ་འཛིན་དེ་ལས་བཞེངས་པ་དང། འདུས་པ་ཆེན་པོའི་འཁོར་རྣམས་ཀྱིས་གསོལ་བ། སེམས་དཔའ་ཆེན་པོ་ཆོས་ཐམས་ཅད་ནི་བདག་ཅག་རྣམས་ཀྱིས་བརྡ་རིག་པ་ཙམ་གྱི་ངོ་བོར་མཐོང་ངོ། ། དེ་ནས་སེམས་དཔའ་ཆེན་པོས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ནི་བརྡ་དང། ཐ་སྙད་དང། བཏགས་པ་ཙམ་དུ་ཤེས་པར་གྱིས་ཤིགབཏགས་པའི་ཆོས་ཐམས་ཅད་ནི་ཕྱི་ནང་གང་ན་ཡང་མི་གནས་ཏེ། ཆོས་ཐམས་ཅད་ལ་མིང་གི་གཞི་མེད་ཅིང་བཏགས་པའི་ཐ་སྙད་དང་བྲལ་བ་ཡིན་ནོ།། བརྡ་ཞེས་བྱ་བ་ནི་སྦས་པ་བཏགས་པའི་ཐ་སྙད་ཡིན་ནོ།། སྦས་པའི་ཆོས་རྣམས་གསང་བའི་ཕྱིར། ཐམས་ཅད་སྔ་ཞིང་བརྒྱུད་པར་བྱ། འདི་ལྟར་བརྡ་ཡི་སྦྱོར་བ་ལ། རྣལ་འབྱོར་ཅན་གྱིས་ཤེས་པར་གྱིས། དེ་ནས་འདུས་པའི་རྣལ་འབྱོར་རྣམས་ཀྱིས་གསོལ་བ། སེམས་དཔའ་ཆེན་པོས་བརྡ་ཡི་ཆོས་རྣམས་རྒྱ་ཆེར་བཤད་དུ་གསོལ། བདག་ཅག་གིས་ཀྱང་ཆོས་ཐམས་ཅད།། བརྡ་ཡི་དོན་གྱིས་བརྒྱུད་པར་བགྱི།། བརྡ་ཞེས་བགྱི་བ་ཇི་ལྟ་བུ།། སྦས་པའི་ཆོས་ནི་གང་དང་གང།། མི་བསྟན་གསང་བ་གང་གང་ལགས།། དེ་སྐད་ཅེས་གསོལ་པ་དང། ། སྨྲ་བའི་སེང་གེས་བཀའ་སྩལ་པ།། ཉོན་ཅིག་འདུས་པ་ཆེན་པོའི་ཚོགས།། བརྡ་ཞེས་བྱ་བ་སྦས་པའི་ཚིག། སྦས་ཏེ་གསང་བའི་ཆོས་རྣམས་ནི།། རྣལ་འབྱོར་ཆེན་པོའི་སྤྱོད་པ་ཡིན། མི་བསྟན་གཞན་ལ་གསང་པ་ནི།། མུ་སྟེགས་ལ་སོགས་སྡེ་པ་རྣམས།། རྣལ་འབྱོར་སྤྱོད་ལ་འཕྱ་བ་ལས།། ཤིན་ཏུ་བླན་ཞིང་སྦ་བའི་ཕྱིར།། སྦས་པའི་བརྡ་ཡིས་བསྟན་པར་བྱ།། བརྡ་ཡི་ཡོན་ཏན་ཆེན་པོ་ནི།། གྲངས་ཀྱང་བསམ་གྱི་མི་ཁྱབ་ན། ། མདོར་བསྡུས་རྣམ་པ་བཞི་ཡོད་དེ།། གཞན་གྱི་སྤྱོད་ཡུལ་མ་ཡིན་དང།། རྣལ་འབྱོར་རིག་པའི་སྤྱོད་ཡུལ་དང།། སྦས་པས་གྲུབ་ཐག་ཉེ་བ་དང།། གསང་བའི་དམ་ཚིག་མི་ཉམས་ཤིང། ། བརྡ་ལ་དགའ་བའི་མ་སྲིང་རྣམས།། ཉེ་ཞིང་གདུང་པའི་ཐབས་སུ་འགྱུར།། དེ་བས་སྦས་པའི་བརྡ་རྣམས་ནི།། ཚིག་གིས་མཚོན་ཏེ་བརྗོད་པར་བྱ།། ཨ་ལ་ལ་ཧོཿ། ཨ་ཏི་པུ་ཧོཿ། པྲ་ཏི་པོ་ཧོ། མ་ཧཱ་གོ་རུ་སཾ་ཀྲ་མ། གུ་ཡ་དེ་བཱི་ས་མ་ཡ། མ་ཧཱ་ཙནྡྲ། མ་ཧཱ་པུརྴ། གུ་ཡ། བྷ་ག། མ་ཧཱ་བཛྲ། ས་མ་ཡ་ཧོཿ། ས་མ་ཡ་སྟཱཾ། ར་ཧོ་ཡ་ཧཾ:ར་ག་ཡཱ་མི།། ས་མ་ཡ་ཛཿ། ལྷན། ཨོཾ་ཨཱ~ཾཿཧཱུ~ཾ:ས་མ་ཡ། ས་མ་ཡ། ཨེ་ཧྱེ་ཧི:ེ་ཧྱེ་ཧི། ཧ་ཧེ་ཧ། ཧ་ཧེ་ཧ། མ་ཏ~ཾ་ཁ། མ་ཏ~ཾ་ཁ། ཀ་རུཀྵ། ཀ་རུཀྵ། ཀྵ~ཾ་བ་རི། ཀྵ~ཾ་བ་རི། ར་ཧོ་ཧ~ཾ་ར་ཧོ་ཧཾ། ས་མ་ཡ་ཧི། ཨ་ལ་སྟཱཾ། ཨ་ལ་སྟཱཾ། ཁ་ཁ་ལེ་ཁ་ལེ། ཤ་ད་པ། ཤ་ད་པ། ཁ་རཾ་ཁཱ་ཧི། ཁ་རཾ་ཁཱ་ཧི། ཁ་ལེ་བྷྱོ། ཁ་ལེ་ཧ་བྷྱོ། ཁ་ཀ་ཁ་ཁ་ཀ་ཁ། ཁ་ཧྱི་ཧ་ཧེ། རཀྵ་ཁཱ་ཧི་རཀྵ་ཁཱ་ཧི། ཧ་ཧ་ཧེ་རཾ། གུ་ཧྱ། གུ་ཧྱ། ས་མ། ས་མ། མ་ལེ་མུ་ལེ། ཏ་ལེ་དུ་ལེ། མ་ཙ་མེ་ཙ། གུ་ཧྱ་སིཏྟི། པ་ར་མ། པ་ར་མ། ཤི་རི་ཧོཿ། ཤི་རི་ཧོ། མ་མ་ཁ་ཀ་ཏྲཾ། ཨེ་ཨེ་ཨེ་ཨེ། ཧྲིཾ་ཧྲིཾ། བྷྱོ་བྷྱོ། ཁ་ཁ་ལེ་ལེ། ཀརྨ་མ་ཏི་བྷྱོ། རཀྵ་ཀྲ་ཏི་བྷྱོ། རཀྵ་ཀྲ་མ་བྷྱོ། ཀརྨ་མ་ལེ། ཀརྨ་མ་ལེ། ཀྵུ་ཏི་ཤ་ནེ། ཀྵུ་ཏི་ཤ་ནེ། རཀྵ་ཀརྨ། རཀྵ་ཀརྨ། ཀྲོ་དྷ་ཀྵ?~ཾ། ཁཱ་ཧི་བྷྱོ་ཁཱ་ཧི་བྷྱོ། ཙ་ལེ་ཡཾ། ཙ་ལེ་ཡ~ཾ། པྲ་ཙ་ལེ། པྲ་ཙ་ལེ། གུརྤ་ཡ~ཾ། གུརྤ་ཡ~ཾ། བི་གུརྟྟི། བི་གུརྟྟི། མ་མོ་ཧ~ཾ། མ་མོ་ཧཾ། ངག་བརྡ་དམ་ཚིག་གི་ཕྱག་རྒྱའོ།། བྱཱ་གྷྲི་ཙརྨ། བྱཱ་གྷྲི་ཙརྨ། བ་ཡ~ཾ་ཀྵཾ་ག་རི། བ་ཡ~ཾ་ཀྵཾ་ག་རི། བ་བྱཱ་ཛྙོ་བ་བ་ཏི། བ་བྱཱ་ཛྙོ་བ་བ་ཏི། ན་ར་ཧ་ས། ན་ར་ཧ་ས། བནྡྷ་ཀ་པཱ་ལ། བནྡྷ་ཀ་པཱ་ལ། ཙརྨ་ན་ག་ཏྲུཾ། ཙརྨ[¿]ན་ག་ཏྲུ~ཾ། རཱ་ག་རཀྟ་ཙ་རཱ་ག་རཀྟ་ཙ། རུ་དྷི་ར་མ་ཏ། རུ་དྷི་ར་མ་ཏ། ཀ་རུ་ག་ཙ། ཀ་རུ་ག་ཙ། པ་བྱ་བ་ཏི། བ་བྱ་བ་ཏི། གཾ་གྲོ་ཎ། གཾ་གྲོ་ཎ། ཐརྤ་ཏ། ཐརྤ་ཏ། དཔའ་བྱེད་ཁ། དཔའ་བྱེད་ཁ། ཟླ་བ་རྒྱས་དང་རྫོགས་པ་དང།། ཟླ་བ་དཀར་དང་ཟླ་ཕྲོམ་མཆོག། ཚེ་འཛིན་ཀུན་གྱི་གཙོ་མོ་དང།། འཇམ་པོ་ཐར་པ་ཆེན་པོ་དང། གལ་ཞེས་བྱ་བའི་རོ་མཆོག་དང། གཟི་བརྗིད་ཆེན་པོའི་དྲི་ཞིམ་དང། ། བྲན་མོ་དང་ནི་གཡོག་འཆང་མ། འཇམ་དཔལ་རྣོན་པོའི་ཀ་ཏར་དང། མཱ་ཐ་ཡ་མཱ་ཐ་ཡ། པརྤ་ཏི་པརྤ་རཱ་ཏི། རྭ་ཐ་མ་རྭ་ཐ་མ་ཁ་ཏཾ་ཉ་ཁ་ཏཾ་ཉ། རྭ་ཏི་ཧཱུ~ཾ་རྭ་ཏི་ཧཱུ~ཾ། ཤི་ཉཾ་ཐ། ཤི་ཉཾ་ཐ། ཀ་རཾ་ཐ། ཀ་རཾ་ཐ། ཤཀྟི་ཁ་ཤཀྟི་ཁ། ཡོ་ག་ཙརྦཱན་ཡོ་ག་ཙརྦཱན། སྒྲ་བརྡ་དམ་ཚིག་གི་ཕྱག་རྒྱའོ།། ལག་གི་ཕྱག་རྒྱ་ཆེན་པོ་ནི།། གར་ཐབས་གཡས་གཡོན་བསྐོར་ནས་ཀྱང།། སེ་གོལ་བརྡབས་པ་འདྲེན་པའི་བརྡ། ། བསྐོར་ནས་ཐལ་སྤྱར་རྒྱའི་བརྡ།། ཤིན་ཏུ་བསྐོར་ནས་སྤྱི་བོར་གྲོལ།། འདི་ནི་མཆོད་པ་བཞེས་པའི་བརྡ།། བསྐོ་ནས་སྙིང་གར་བཅངས་པ་ནི།། ཏིང་འཛིན་རྡོ་རྗེ་བརྟན་པའི་བརྡ།། གར་བསྐོར་ཤིན་ཏུ་གཉིས་སྟབས་པ། ། མཆོད་པ་སྟོབས་པར་བྱེད་པའི་བརྡ།། གར་བསྐོར་དབང་མོའི་སྤྱིར་བོར་བཞག། སྦྱོར་བའི་དོན་ལ་འཇུག་པའི་བརྡ།། ཐབས་ཀྱིས་སྦྱི་བོར་བཞག་པ་དང།། ཤེས་རབ་དབང་མོའི་སྙིང་གར་རོ།། ཐབས་ཀྱིས་གསང་བ་གཡས་བཅུག་ན། ། ཤེས་རབ་ཐོས་བྱེད་གསང་བ་ཡིན།། ཐབས་ཀྱིས་ན་ས་གཡས་བཏེག་ན།། ཤེས་རབ་ན་ས་གཡོན་བཏེག་པའོ།། ཐབས་ཀྱིས་རྡོ་རྗེ་ཕྱག་རྒྱ་བསྟན།། ཤེས་རབ་པདྨོའི་ཕྱག་རྒྱ་བསྟན། ། ཐབས་ཀྱིས་སྨིན་མ་གཡས་བསྐྱོད་ན།། ཤེས་རབ་སྨིན་མ་གཡོན་བཏེགས་བྱ།། ཐབས་ཀྱིས་ཕྱག་གཡོན་བརྐྱང་བ་དང།། ཤེས་རབ་གཡས་ཀྱིས་འཁྱུད་ཚུལ་བསྟན།། ཕྱག་རྒྱ་གར་བསྐོར་ཐལ་བརྡབས་ཤིང། ། དབང་མོ་ལྕེ་ལ་རེག་པ་ནི།། ཚོགས་མཆོད་དུས་ལ་བབ་པའི་བརྡ།། ལག་གཉིས་བསྐོར་ནས་དབང་མོ་འཐོང།། དེ་ནས་དབང་མོ་ལྕེ་ལ་རེག། འཛའ་གད་འདིམ་པའི་བརྡ་ཐབས་སོ།། མ་ཧཱ་གིང་ཆེན་ཀརྨ་དང། རྡོ་རྗེ་དྲོད་ཀྱི་རྟགས་འཛིན་ལས།། སོགས་པའི་བརྡ་ཡི་དམ་ཚིག་རྣམས།། རྣལ་འབྱོར་ཅན་གྱིས་སྤྱད་ན་འགྲུབ།། ལུས་བརྡ་དམ་ཚིག་ཕྱག་རྒྱའོ།། ཞེས་སྨྲ་བའི་སེང་གེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་བརྡའི་ལེའུ་སྟེ་ལྔ་པའོ། །།། དེ་ནས་ཡང་སྨྲ་བའི་སེང་གེ་སེམས་དཔའི་རྡོ་རྗེ་དེ་རྣལ་འབྱོར་རོལ་པའི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང།། འདུས་པ་ཆེན་པའི་ཚོགས་ཀྱིས་གསོལ་པ། སྨྲ་བའི་སེང་གེ་ཆེན་པོ་ཆོས་ཐམས་ཅད་ནི་རྡོ་རྗེ་ཚོགས་ཀྱི་དཀྱིལ་འཁོར་དུ་བདག་ཅག་རྣམས་ཀྱིས་མཐོང་ངོ་ཞེས་གསོལ་པ་དང། སྨྲ་བའི་སེང་གེས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ཀྱི་རང་བཞིན་ནི་རྡོ་རྗེ་ཚོགས་ཡིན་པར་ཤེས་པར་གྱིས་ཤིགཅེས་བཀའ་སྩལ་པ་དང། འདུས་པའི་ཚོགས་ཀྱིས་གསོལ་པ། སེམས་དཔའ་ཆེན་པོ་ཆོས་ཐམས་ཅད་ཀྱི་རང་བཞིན་ནི་རྡོ་རྗེ་ཚོགས་ཀྱི་དཀྱིལ་འཁོར་གྱི་དོན་བདག་ཅག་རྣམས་ལ་རྒྱ་ཆེར་བཤད་དུ་གསོལ།། སེམས་དཔའ་ཆེན་པོས་བཀའ་སྩལ་པ།། ཉོན་ཅིག་འདུས་པ་ཆེན་པོའི་ཚོགས། ། རྡོ་རྗེ་ཚོགས་ཀྱི་དཀྱིལ་འཁོར་འདི།། རྒྱལ་བ་རྣམས་ཀྱི་ཐུགས་དམ་སྟེ།། རྣལ་འབྱོར་ཀུན་གྱིས་སྤྱད་པའི་ལམ།། ས་མཆོག་བགྲོད་པའི་ལམ་འདི་དག། འདུས་པའི་ཚོགས་ལ་བཤད་པར་བྱ། ། བརྩམ་པ་ལས་ཀྱི་དང་པོ་པ།། རྡོ་རྗེ་ཚོགས་ལ་འཇུག་པ་ན།། ཁྱད་པར་རིམ་པ་ཅི་བཞིན་དུ།། ལས་མཆོག་འདི་ཡི་རང་བཞིན་གྱིས།། ཇི་བཞིན་རིམ་པར་སྦྱངས་ནས་ཀྱང།། ས་རབ་མཆོག་ཏུ་བགྲོད་པ་ལ། ། ཐབས་མཆོག་ལྔ་ཡིས་བགྲོད་བྱ་སྟེ།། རྡོ་རྗེ་ཚོགས་དང་བསྙེད་པ་དང།། ཉེ་བ་དང་ནི་བསྒྲུབ་པ་དང།། བསྒྲུབ་པ་ཆེན་པོར་སྦྱར་བར་བྱ།། ཇི་ལྟར་གྲངས་དང་དུས་ཆེན་དང།། མཚན་མ་བྱུང་བར་བཅས་རྣམས་ལས། ། གབ་པའི་སྦ་ཐབས་དེ་སྦྱར་ནས།། སུས་མི་རིག་པའི་ཐབས་ཆེན་བྱ།། དེ་དག་གསང་བའི་བདག་པོ་ཡིན།། གནས་འདིར་འཇུག་པའི་བྱིས་པ་དག། འཇིག་རྟེན་རྡུལ་ལས་དྲངས་ནས་ཀྱང། ། འགྱུར་དབང་མ་ངེས་སར་བཞག་སྟེ།། ཅི་ཕྱིར་དང་པོ་ཡིན་པས་ན།། བྱིས་པ་བློ་ཤེད་མ་བྱེ་བས།། བཟང་ངན་བདེ་སྡུག་མི་ཤེས་ཤིང།། བསྟན་དང་གསང་བའི་དམིགས་མི་བྱེད།། རྣལ་འབྱོར་སྤྱོད་པའི་བཀའ་སྒོའི་འདིར། ། གསང་སྒོ་མི་དབྱེ་སྐྲག་པར་འགྱུར།། རང་བཞིན་ངང་ཚུལ་མ་རྟོགས་པའི།། སོ་སོའི་སྐྱེ་བོ་བྱིས་པ་ལས།། སྣོད་མེད་སྣོད་བྱས་བདུད་ཉིད་ཀྱིས།། རྣལ་འབྱོར་འཚེ་བའི་སྲོག་གཅོད་ཅིང།། མ་ངེས་ལྡོག་འཇུག་བཅས་པ་ཡིས། ། གསང་འདི་བཅས་དཀར་འགྱུར་ཕྱིར་རོ།། དེ་ན་འདི་ཡི་སྤྱོད་པ་ཡང། ཇི་ལྟར་འཚམ་པར་བདེ་ཐབས་སྦྱར། དེ་ནས་སྨྲ་བའི་སེང་གེ་དེ་ཐབས་ཀྱི་རྡོ་རྗེ་ཚོགས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ། རྣལ་འབྱོར་མ་ཆེན་མོ་རྣམས་མི་སྣང་བར་གྱུར་ཏོ།། དེ་ནས་འདུས་པའི་ཚོགས་ཀྱིས་གསོལ་པ། སྨྲ་བའི་སེང་གེ་ཆེན་པོ་ཆོས་ཐམས་ཅད་ཀྱི་རང་བཞིན་ནི་ཐབས་ཀྱི་ཕྱག་རྒྱའི་རང་བཞིན་དུ་བདག་ཅག་རྣམས་ཀྱིས་མཐོང་ངོ། ། སེམས་དཔས་བཀའ་སྩལ་པ། འདུས་པ་ཆེན་པོའི་ཚོགས་འདི་དག་ནི་བརྒྱུད་དེ་སྦས་པའི་ཚོགས་ཡིན་པར་ཤེས་པར་བྱའོ།། རྡོ་རྗེ་རྣལ་འབྱོར་ཚོགས་ལྡན་ལྔ།། ཐབས་ཆེན་ཕྱག་རྒྱ་སྦས་ཚོགས་ལྔ། ། རྡོ་རྗེ་འཛིན་སོགས་བཅུ་དྲུག་དང།། བཅས་པའི་དཀྱིལ་འཁོར་རྡོ་རྗེ་ཅན། བྲི་བྱ་ཡང་ན་བསམ་པའམ།། བརྗོད་དམ་བསྔོས་སམ་མཚན་མ་ལ།། འཇིག་རྟེན་དབང་པོའི་ཆོས་ལུགས་ཀྱིས།། མོས་པ་ལ་བསྐྱེད་དྲན་བྱས་ཏེ། ། རང་བཞིན་ཡུལ་ནས་ཕབ་ནས་ནི།། ཕྱག་བྱ་ལ་སོགས་མཆོད་པ་ཡིས།། རྡོ་རྗེ་སྨན་དང་རྩིར་སྦྱར་བའི།། ཡོ་བྱད་ཆེན་པོ་ལ་སོགས་པས།། རྡོ་རྗེ་ཐབས་ཀྱི་ཚོགས་ལ་དབུལ།། རྡོ་རྗེ་རྣལ་འབྱོར་གླུ་བླངས་ཏེ། ། མཉེས་བྱས་ལས་གྲུབ་གྲངས་རྫོགས་ནས།། མཆོད་དང་དམ་སྐོངས་འདོད་པ་བྱ།། སྣོད་དུ་རུང་བའི་སློབ་མ་དག། དཔའ་མཁྱེན་ལ་སོགས་བྱ་བ་ཡིས།། འཇུག་ཚུལ་དབང་དང་དངོས་གྲུབ་སྩོལ།། རྡོ་རྗེ་ཐ་ཚིག་རྣམ་ལྔ་ཡིས། ། བསླབ་པའི་གཉེན་རྣམས་ཅི་རིགས་པར།། རྩལ་གྱི་རིམ་པར་བྱིན་ནས་ནི།། རྡོ་རྗེ་གལ་ཆེན་མནའ་འདོར་རོ།། དེ་ནས་སྒྲུབ་པ་ཆེ་ཆུང་རྣམས།། འདི་ལྟར་འདོད་པས་ནན་ཏན་གྱིས།། རྡོ་རྗེ་རྣལ་འབྱོར་བཀར་བྱའོ། ། མི་ནུས་ལ་སོགས་མི་གནང་བའི།། དམ་ཚིག་དག་གིས་ནན་ཆགས་བྱ།། རྨོངས་པའི་གསང་ཕྱིར་སེམས་བསྐྱེད་དེ།། ངོ་མཚར་ཚིག་གི་འདུ་ཤེས་བསྒྱུར།། ཤེས་ནས་མིག་ལ་ཤེས་བྱའི་ཡུལ། ། ཐམས་ཅད་རིམ་གྱིས་བསྟན་པར་བྱ།། དྲོད་ཅན་འཁྱིལ་བའི་བློ་ལྡན་ལ།། རྣལ་འབྱོར་ན་སྤར་མཛོད་སྒོ་དབྱེ།། རྩིང་པོ་འགྲོས་ཀྱིས་དམུ་རྒོད་ལ།། གཅན་འཕྲང་འཁོར་བའི་གཡེང་རྣམས་བསྟན།། རྡོ་རྗེ་ལུང་གི་ཚད་ཅན་ལ། ། ཇི་ལྟར་ནུས་པ་དེ་དབང་བསྐུར།། བཙལ་མེད་མི་ནུས་ཡུལ་ཅན་ལ།། ཕན་པ་འབའ་ཞིག་བསྔགས་པ་ཡིན།། གནས་འདིར་ཡོད་དང་མེད་པ་དང།། འོད་མི་བསུབ་ཅིང་ལྗིད་མི་དབབ།། རྡོ་རྗེ་བློ་ཡི་ཡུལ་ཅན་ལ། ། རྩལ་ཆེན་སྦྱོང་ཞེས་གདམས་པར་བྱ།། རྡོ་རྗེ་འདུས་པའི་དབང་གྲལ་དུ།། རྡོ་རྗེ་དོན་གྱི་ལྟང་ཆེན་བཤེར།། རྩལ་དང་རིམ་པ་ཁྱད་པར་དབྱེ།། སོ་སོ་རིགས་ཀྱི་ཕྱག་རྒྱ་དག། སྤྱིའམ་ཡང་ན་རེ་རེའོ།། དེ་ནས་སྨྲ་བའི་སེང་གེ་དེ་ཤེས་རབ་གཟུངས་ཀྱི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། ཏིང་ངེ་འཛིན་དེ་ལས་བཞེངས་པ་དང། འདུས་པའི་ཚོགས་རྣམས་ཀྱིས་འདི་སྐད་ཅེས་གསོལ་ཏོ། ། ཆོས་ཐམས་ཅད་ཀྱི་རང་བཞིན་ནི་ཤེས་རབ་ཚོགས་ཀྱི་དཀྱིལ་འཁོར་དུ་གདའ་བར་བདག་ཅག་རྣམས་ཀྱིས་མཐོང་ངོ།། དེ་སྐད་ཅེས་གསོལ་བ་དང། སེམས་དཔའ་ཆེན་པོས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ནི་ཤེས་རབ་ཚོགས་ཀྱི་དཀྱིལ་འཁོར་དུ་སངས་རྒྱས་པར་ཤེས་པར་གྱིས་ཤིགདེ་ཅིའི་ཕྱིར་ཞེ་ན། ཆོས་ཐམས་ཅད་ཤེས་རབ་ཀྱི་རང་བཞིན་ལས་བྱུང་ཞིང་ཤེས་རབ་ཀྱི་རང་བཞིན་དུ་གསལ་ལོ། ། དེ་ནས་འདུས་པའི་ཚོགས་ཀྱིས་གསོལ་པ། སེམ་དཔའ་ཆེན་པོ་ཤེས་རབ་གཟུངས་ཀྱི་རང་བཞིན་བདག་ཅག་རྣམས་ལ་རྒྱ་ཆེར་བཤད་དུ་གསོལ།། དེ་སྐད་ཅེས་གསོལ་བ་དང། སེམས་དཔའ་ཆེན་པོས་བཀའ་སྩལ་པ། འདུས་པའི་རྣལ་འབྱོར་ཆེན་པོའི་ཚོགས།། ཤེས་རབ་གཟུགས་ཀྱི་རང་བཞིན་ནི།། རྒྱ་ཆེར་བཤད་ཀྱིས་ཤེས་པར་གྱིས།། ཇི་ལྟར་ཐབས་ཀྱིས་ཚོགས་སྦྱར་ལྟར།། གང་དག་རྣལ་འབྱོར་མར་ལྡན་རྣམས།། རྡོ་རྗེ་འཛིན་མ་ལ་སོགས་པ། ། ལྷ་མོའི་ཚོགས་སུ་སྦྱར་ནས་ཀྱང།། གནས་འདིར་འཇུག་དགའ་ལ་སོགས་པ།། ཐབས་ཀྱི་ཕྱག་རྒྱ་མཚན་མར་སྦས།། རྡོ་རྗེ་མཉམ་པའི་གཟུངས་རྣམས་ལ། མཉམ་པའི་མཆོད་པས་མཉེས་པར་བྱ། ། བྲོ་གར་གླུ་ཚིགས་ལ་སོགས་པས།། རིག་འཛིན་རྣལ་འབྱོར་མ་རྣམས་བསྒྲུབ།། ཅེས་བཀའ་སྩལ་ཏོ།། དེ་ནས་ཡང་སེམས་དཔའི་རྡོ་རྗེ་དེ་ཆོས་ཐམས་ཅད་ཐབས་དང་ཤེ་རབ་ཕན་ཚུན་དྲ་བར་འབྲེལ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་ཏིང་ངེ་འཛིན་དེ་ལས་བཞེངས་པ་དང།། འཁོར་རྣམས་ཀྱིས་གསོལ་པ།། བཅོམ་ལྡན་འདས་ཆོས་ཐམས་ཅད་ཀྱི་རང་བཞིན་ནི་ཐབས་དང་ཤེས་རབ་ཏུ་འབྲེལ་པའི་རང་བཞིན་ཅན་དུ་བདག་ཅག་རྣམས་ཀྱིས་མཐོང་ངོ། ། ཞེས་གསོལ་ཏོ།། དེ་སྐད་ཅེས་གསོལ་པ་དང།། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་རྣལ་འབྱོར་པ་ཆོས་ཐམས་ཅད་ནི་ཐབས་དང་ཤེས་རབ་ཏུ་འབྲེལ་བ་སྟེ། གཉིས་སུ་མེད་པར་ཤེས་པར་གྱིས་ཤིགདེ་ནས་འདུས་པའི་རྣལ་འབྱོར་པ་རྣམས་ཀྱི་གསོལ་པ། སེམས་དཔའ་ཆེན་པོ་ཆོས་ཐམས་ཅད་དྲ་བར་འབྲེལ་པའི་དོན་བཤད་དུ་གསོལ། སེམས་དཔའ་ཆེན་པོས་བཀའ་སྩལ་པ།། འབྲེལ་པའི་དོན་ནི་འདི་ལྟ་སྟེ།། ཆོས་རྣམས་ཀུན་གྱི་མཚན་ཉིད་ནི།། ཕན་ཚུན་འབྲེལ་བའི་ཚུལ་དུ་སྣང།། ཆོས་ཀུན་ནམ་མཁའའི་མཚན་ཉིད་ལས།། སྤྲུལ་པ་བྱེ་བ་ཅིར་ཡང་སྣང། ། གཉིས་མེད་དྲ་བའི་ཚུལ་དུ་འབྲེལ།། རྣལ་འབྱོར་གསང་བའི་མཆོག་ཡིན་ཏེ།། རྩལ་དང་ལྡན་པ་གསང་སྒོ་བ།། འདི་ལ་གསང་སྒོ་དབྱེ་བར་བྱ།། གསང་འདིར་ཚུད་པའི་བུ་རྣམས་ལ།། རྡོ་རྗེ་གསང་བའི་བཀའ་འདི་བསྒྲགས། ། གསང་བའི་དཀྱིལ་འཁོར་དམ་པ་འདི།། རྡོ་རྗེ་རྒྱལ་པོ་རྒྱལ་མོར་བཅས།། ལྔ་ཉིད་ཟུང་དུ་འཁྲིལ་བ་ནི།། གཡས་ནས་གཡོན་དུ་འཁྲིལ་འཁྱུད་སྦྱོར།། གཡས་ཉིད་བྱང་ཆུབ་རྡོ་རྗེ་དང། ། རང་རང་མཚན་མ་འབར་བའོ།། གཡོན་གྱི་སྒྲ་སྙན་དྲིལ་བུ་དང།། རྟགས་ཀྱིས་མཛེས་པར་གསལ་བ་ལ།། འབྱོ་ཞིང་འདུད་པའི་མདངས་ལྡན་པས།། ཆགས་ཤིང་གཡོ་བའི་ཚུལ་གྱིས་ནི།། སེང་ཆེན་ཁྱུ་མཆོག་ལ་སོགས་པ། ། རྫོགས་པའི་ཚུལ་གྱིས་བསྒྱིངས་བཅས་ཏེ།། ཁ་དོག་ལྔ་ཡི་འོང་འབར་བས།། བཅུ་དྲུག་ཆས་ན་སྒེག་པ་རྣམས།། རིམ་གྱིས་བསྐྱེད་དང་ཅིག་ཅར་བསྐྱེད།། དབང་པོའི་རིམ་པ་སྦྱར་བར་བྱ།། གསང་ཉིད་ཚོགས་ཀྱི་འཁོར་རྣམས་ཀྱང། ། གནས་ནས་གྱུར་པའི་རང་བཞིན་གྱིས།། ཕྱག་རྒྱ་རྒྱལ་པོ་རྒྱ་མོར་བཅས།། བརྒྱད་གཉིས་ཟུང་སྒྲིལ་འཁྲིལ་འཁྱུད་སྦྱོར།། ས་དང་ནམ་མཁའ་སྤྱན་རྡོ་རྗེ།། བྱམས་དང་རྡོ་རྗེ་ཀུན་བཟང་དཔལ། ། ནང་དང་ཕྱི་ཡི་ཡོ་བྱད་ནི།། གཞི་གཉིས་དག་གིས་མཉེས་སྦྱོར་བ།། བསམ་བྱ་ལ་སོགས་དེ་བཞིན་ནོ།། རྡོ་རྗེ་སྒོ་དང་བཅས་པ་ནི།། རྡོ་རྗེ་འཁྲིལ་འཁྱུད་གསང་བའི་ཚོགས།། རྣལ་འབྱོར་ལོངས་སྤྱོད་ཆེ་སྦྱར་བས། ། མཉེས་ནས་སྐོངས་ཕྱིར་རིམ་བཞིན་དབུལ། གསང་བའི་འཇུག་ཚུལ་ལ་སོགས་ཀྱིས།། གསང་བའི་དོན་རྣམས་སྒྲུབ་པར་བྱེད།། ཅེས་བཀའ་སྩལ་ཏོ།། དེ་ནས་བཅོམ་ལྡན་འདས་སེམས་དཔའ་རྡོ་རྗེ་དེ་རྡོ་རྗེ་ཀུན་དུ་འབྲེལ་བའི་དབྱིངས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་བཅོམ་ལྡན་འདས་ལ་འདུས་པའི་འཁོར་གྱིས་འདི་སྐད་ཅེས་གསོལ་ཏོ།། ཆོས་ཐམས་ཅད་ཀྱི་རང་བཞིན་ནི་རྡོ་རྗེ་དྲ་བའི་དབྱིངས་སུ་བདག་ཅག་རྣམས་ཀྱིས་མཐོང་ངོ། ། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་དྲ་བའི་དབྱིངས་སུ་ཤེས་པར་གྱིས་ཤིག། ཆོས་ཐམས་ཅད་ནི་ཐུགས་ཀྱི་རིག་པ་ལས་བྱུང་ལ་ཐུགས་ཀྱི་རང་བཞིན་ནི་རྡོ་རྗེ་ཁོ་ན་ཡིན་པའི་ཕྱིར་རོ། ། འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་རྡོ་རྗེ་དྲ་བ་ཆེན་པོའི་ཚོགས་བདག་ཅག་རྣམས་ལ་རྒྱ་ཆེར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་རྣལ་འབྱོར་པ།། རྡོ་རྗེ་ཆེན་པོ་རིག་པའི་དོན།། དྲ་བ་འབྲེལ་བའི་དབྱིངས་ཉིད་ནི།། ངེས་པར་བཤད་ཀྱིས་རྩེ་གཅིག་ཉོན།། ཐུགས་ཀྱི་གསང་ཆེན་རིག་པ་འདི།། ངེས་པའི་རྡོ་རྗེ་ཡིན་པས་ན། ། རྡོ་རྗེ་དབང་ཡུལ་འབྲེལ་བའི་དོན།། ཐམས་ཅད་འབྱུང་བས་དབྱིངས་ཤེས་བྱའོ།། རྡོ་རྗེ་འཛིན་མ་འཛིན་སོགས་བཅས།། འཁྲིལ་མཉམ་པ་ཡང་དེ་བཞིན་ཏེ།། གཟུགས་བརྙན་ཏིང་འཛིན་རང་བཞིན་གནས། ། རིམ་པའི་ཚུལ་བཞིན་སྦྱར་བྱས་ནས།། ཇི་ལྟར་འདོད་པ་དེ་ལྟར་རོ།། ཞེས་བཀའ་སྩལ་ཏོ།། དེ་ནས་ཡང་བཅོམ་ལྡན་འདས་སེམས་དཔའི་རྡོ་རྗེ་དེ་ཐམས་ཅད་དུས་བཞི་མཉམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ཅག་རྣམས་ཀྱིས་ཆོས་ཐམས་ཅད་ནི་དུས་བཞི་མཉམ་པ་ཉིད་དུ་གཅིག་པར་མཐོང་ངོ་ཞེས་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ནི་དུས་བཞི་མཉམ་པར་རྟོག་པ་ཡིན་ཏེ། ཆོས་ཐམས་ཅད་ནི་དུས་བཞིའི་ངང་དུ་རྫོགས་པར་ཤེས་པར་གྱིས་ཤིགདེ་ཅིའི་ཕྱིར་ཞེ་ན། མཉམ་པ་ཉིད་ཀྱི་ངང་ལ་དུས་སྔ་ཕྱིར་སྣང་བ་མེད་དོ།། དེ་ནས་འདུས་པའི་ཚོགས་རྣམས་ཀྱིས་གསོལ་པ། བཅོམ་ལྡན་འདས་མཉམ་པ་ཆེན་པོའི་དུས་ཉིད་བདག་ཅག་རྣམས་ལ་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོ་ཡི་ནི་ཚོགས།། མཉམ་པ་ཉིད་ཀྱི་དུས་རིག་ན།། དུས་ཞེས་བྱ་བའི་མིང་ཡང་མེད། ། དུས་བཞི་མཉམ་པར་རབ་ཤེས་ན།། ཆོས་ཉིད་མཉམ་པའི་རང་བཞིན་ནོ།། རྡོ་རྗེ་དུས་ཀྱི་ལྷ་མོའི་ཚོགས།། འདས་དང་ད་ལྟར་བྱུང་བ་དང།། མི་འབྱུང་བ་ཡི་ཆ་རྣམས་ལ།། དབང་སྒྱུར་མཉམ་པའི་རྒྱལ་མོ་རྣམས། ། འཇིག་དང་སྐྱེ་དང་སྨིན་པ་དང། འགག་པར་གྱུར་བ་དེ་དག་དུ།། རྡོ་རྗེ་རྣམ་ཐར་ཚད་མེད་དང།། སེམས་དང་དེ་བཞིན་མཉམ་པ་ཡི།། ཤེས་རབ་འཁོར་དང་དཔལ་གྱི་དཀྱིལ།། དེ་བཞིན་རིམ་པར་རྡོ་རྗེ་ཡི། ། གླུ་གར་ལ་སོགས་ཡོ་བྱད་ཀྱིས།། མཆོད་དང་འཇུག་ཚུལ་གོང་མ་བཞིན།། ཆ་རྣམས་དུས་ལས་མི་འདའ་བར།། ལྷ་ཡི་ཉི་མ་རྣམས་ལའོ།། བདེ་བ་ཆེན་པོ་ལ་སོགས་པ།། ཚོམ་བུའང་ཡང་ན་ཕྱག་རྒྱ་རྣམས། ། སྤྱིར་རམ་རེ་རེར་སྦྱར་བར་བྱ།། འདས་ལ་རྣམ་ཐར་ཚོགས་བསྐུལ་ཏེ།། ད་ལྟ་བྱུང་དང་མི་འབྱུང་ལ།། ཚད་མེད་སེམས་དང་མཉམ་པར་བསྐྲུན།། མཉམ་པའི་རྒྱལ་པོར་དེ་འགྱུར་ཏེ།། བདེ་གཤེགས་དུས་ཀྱི་རྒྱལ་པོར་འགྱུར། ། ཞེས་བཀའ་སྩལ་ཏོ།། དེ་ནས་ཡང་བཅོམ་ལྡན་འདས་སེམས་དཔའི་རྡོ་རྗེ། ཉི་ཟླའི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ནས་ཡང་ཏིང་ངེ་འཛིན་དེ་ལས་བཞེངས་པར་གྱུར་པ་དང། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་ཆོས་ཐམས་ཅད་ནི་ཉི་ཟླའི་ཚོགས་སུ་མཐོང་ངོ།། དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ཀྱི་རང་བཞིན་ནི་བྱང་ཆུབ་སེམས་དང་སྙིང་རྗེ་ཆེན་པོའི་རང་བཞིན་ཡིན་པར་ཤེས་པར་གྱིས་ཤིགཆོས་ཐམས་ཅད་ནི་བྱང་ཆུབ་སེམས་ལས་བྱུང་ཞིང་སྙིང་རྗེའི་རང་བཞིན་ཅན་ཡིན་ནོ། ། དེ་ནས་འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་སྙིང་རྗེ་དང་བྱང་ཆུབ་སེམས་ཀྱི་དོན་བདག་ཅག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཆོས་རྣམས་ཀུན་གྱི་ཡོ་བྱད་ནི། ། སྙིང་རྗེ་བྱང་ཆུབ་སེམས་ཡིན་ཏེ།། ཡོ་བྱད་དེ་དག་མ་ལྡན་ན།། དོན་རྣམས་འགྲུབ་པར་མི་འགྱུར་རོ།། རྣལ་འབྱོར་བྱང་ཆུབ་སེམས་རྫོགས་པ།། བཅུ་དྲུག་རྫོགས་པའི་ཟླ་རྒྱས་ཚུལ།། སྙིང་རྗེ་ཡེ་ཤེས་ཤར་བ་ནི། ། མཁས་ལ་ཉི་གསལ་ཤར་བའི་ཚུལ།། དོན་གཉིས་རྫོགས་པའི་རྣལ་འབྱོར་པ།། རྣལ་འབྱོར་ངེས་པའི་ས་པ་ཡིན།། ངེས་པའི་ས་ལ་བགྲོད་པ་ནི།། རྡོ་རྗེ་དུས་ཀྱི་རྒྱུན་ཚོགས་ཀྱིས།། ཚོགས་ཆེན་རྣམ་གཉིས་བསྐྲུན་པར་བྱ། ། སྐར་ཚོགས་དབུས་ན་ཟླ་ཉ་བ།། བཅུ་དྲུག་ཞག་གིས་རྫོགས་པ་བཞིན།། བཅུ་གསུམ་རྩལ་ཆེན་རྫོགས་པའི་ས།། བཅུ་དྲུག་ཚོགས་ཀྱིས་རྫོགས་པས་ནི།། མཛེས་པའི་ཉི་མ་བཅུ་དྲུག་གིས། ། ཟླ་དཀྱིལ་འོད་ཀྱི་ཕྱག་རྒྱ་ལ།། མཛེས་པར་སྤྲས་པའི་བདེ་བ་དེ།། བཅུ་དྲུག་ཚོགས་ཀྱིས་བསོད་ནམས་བསྐྲུན།། ཕྱེད་རྫོགས་ཚོགས་འཕེལ་དེ་ཕན་ཆད།། མི་དམགིས་ཆོས་ལ་བློ་སྦྱངས་ཡིན།། ཇེ་ཞི་ཇེ་ཞི་མི་དམིགས་པ། མཚན་མ་ཤེས་བྱ་བསྲབས་པ་སྟེ།། བསོད་ནམས་ཚོགས་ཀྱང་མི་དམིགས་པ། མཉམ་པས་སྟོང་པར་གྱུར་པ་ན།། ཐམས་ཅད་ཆོས་སྐུར་རྫོགས་པ་སྟེ།། སྡུག་བསྔལ་བྱང་ཆུབ་གཉིས་མེད་དེ།། འདི་ལ་རྨད་འབྱུང་སེམས་བསྐྱེད་དེ། ། ཟླ་བ་དུས་ཀྱིས་མཚན་མ་དང།། གསང་བ་གཉིས་ཀྱིས་མཆོད་པར་བྱ།། ཕྲ་མོའི་དྲོད་དུ་བྱུང་བ་དང།། སྨྱུར་ཏེ་རང་ལས་བྱུང་རྣམས་ལ།། རྩ་བ་གཅད་ཕྱིར་ཡོངས་རྫོགས་པས།། ཐེ་ཚོམ་མེད་པར་དང་བླངས་ནས། དུས་དེ་ཉིད་དུ་ཉི་མ་འཆར།། དུས་འདི་རྒྱུན་གྱི་བར་བཅད་ན།། བསྙེད་པ་དག་གིས་བཟློག་པར་དཀའ།། བར་ཆད་བྱུང་ན་གསོ་ཞིང་བསྐང།། མཁའ་ལ་ཟླ་གསལ་གྲ་རྒྱས་ན།། ས་ལ་རྣལ་འབྱོར་གྲར་རྒྱས་པས། བསོད་ནམས་སྤེལ་བ་ཆེན་པོ་དང།། བསྔོ་བ་ཆེན་པོའི་ལས་རྣམས་བྱ།། དེ་ནས་འབྲས་བུ་ཆེན་པོ་ཡང།། ཉི་ཟླ་ཞོན་ནས་འགྲོ་བ་ཡི།། རིག་འཛིན་ས་ལ་སླེབས་ཕན་ཆད།། དཔལ་ཆེན་བཅུ་དྲུག་ས་ལ་འགྲུབ། ། ཅེས་བཀའ་སྩལ་ཏོ།། དེ་ནས་ཡང་སེམས་དཔའི་རྡོ་རྗེ་དེ་རྒྱུན་དུ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བཞེངས་པ་དང། འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་ཆོས་ཐམས་ཅད་ནི་ཡི་གེ་རྒྱུན་གྱི་དཀྱིལ་འཁོར་དུ་གནས་པར་མཐོང་ངོ།། བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ནི་རྒྱལ་བའི་དཀྱིལ་འཁོར་གྱི་རང་བཞིན་ཡིན་ལ།། རྒྱལ་བ་ཐམས་ཅད་ནི་ཡི་གེའི་དཀྱིལ་འཁོར་གྱི་རང་བཞིན་དུ་ཤེས་པར་གྱིས་ཤིག། གསོལ་བ། ཡི་གེ་ཕྱག་རྒྱའི་དོན་གང་ལགས་པ་བདག་ཅག་རྣམས་ལ་རྒྱ་ཆེར་བཤད་དུ་གསོལ་ཞེས་ཞུས་པ་ལ་བཅོམ་ལྡན་འདས་ཀྱིས་བཀའ་སྩལ་པ། ཆོས་ཀུན་རྒྱལ་བའི་རང་བཞིན།། རྒྱལ་བ་སྐུ་གསུང་ཐུགས་སུ་གསལ།། སྐུ་གསུང་ཐུགས་དང་ཕྱག་རྒྱ་དག། ཡི་གེའི་ཕྲེང་བ་ཉིད་ལ་རྫོགས།། ཡི་གེ་ཕྱག་རྒྱའི་དཀྱིལ་འཁོར་རྣམས།། རྒྱུན་དུ་བསྒྲུབ་པར་བྱ་བ་ཡིན། ། དེས་ནི་རྒྱུན་གྱི་ཏིང་འཛིན་ཐོབ།། རྒྱུན་གྱི་རྒྱུན་དུ་མི་གཅད་པ།། རྡོ་རྗེ་ནམ་དང་ཉི་ཚོད་ལ།། ཡི་གེའི་ཆོགས་བསྐྱེད་ཚོགས་སྦྱར་ལ།། ཕུད་ལྷག་བཅས་སྦྱར་དེ་བཞིན་ནོ།། འདི་ནི་དོན་ལ་ཉེ་བའི་ལམ། ། བསོད་ནམས་བསྐྲུན་པར་དེ་མྱུར་རོ།། ཀུན་རྫོགས་ཚོགས་ཀྱི་རྒྱུ་དེས་ནི།། ཡང་དག་ཚོགས་ཆེན་ཅི་འདྲ་བ།། མཆོག་གི་བདེ་བ་དམ་པ་དང།། དེ་ཉིད་ཆེན་པོར་དེ་ཉིད་འགྱུར།། འཇུག་སྒོ་སྤྱོད་དང་ལྟ་བ་མཐུན། ། ཐམས་ཅད་གཅིག་པར་གྱུར་པ་ཡི།། རྒྱུ་དང་རྐྱེན་ལྡན་ཕུན་སུམ་ཚོགས།། མཛའ་འཕྲོད་སྨན་དང་དགྱེས་སྦྱོར་ལྡན།། ལྷ་དང་རིག་འཛིན་རྣལ་འབྱོར་རིལ།། མ་ལུས་ཚོགས་པས་ཆོས་འདི་སྤྱད།། སྐད་ཅིག་ཡུད་དམ་ཐད་ཅིག་གམ། ། ཡུད་ཙམ་ཉིན་ཞག་ཟླ་རེ་འམ།། ལྷ་ཡི་ཉི་མ་བཀྲ་ཤིས་ཀྱི།། ཚོགས་ལ་བབ་པའི་དུས་འདི་དག། བྱིན་གྱིས་བརླབས་པའི་དུས་ཆེན་ཡིན།། ཇི་ལྟར་འབྱོར་པའི་ཡོ་བྱད་རྣམས།། ཕྱི་དག་ནང་གི་ཁྱད་པར་གྱིས། ། གཙང་མའི་ཁ་ཟས་འབྱུང་པོ་ལ།། རྣམ་རྟོག་རྟོག་བྲལ་རྒྱལ་བ་ལ།། ཇི་ལྟར་འབྱོར་བཞིན་ནན་ཏན་བྱ།། བདག་དང་གཞན་དང་གཉི་ག་དང།། ཆོས་ཀྱི་དོན་དུ་མི་འགྱུར་བའི།། སྐྱོན་བཞི་པོ་དག་སྤངས་ནས་ནི། ། དེ་ལས་བཟློག་པའི་ཚུལ་ལྡ་པས།། རྣལ་འབྱོར་སྙིང་དང་མིག་ལྟ་བུ།། གདུང་པའི་འདུ་ཤེས་ཉེར་བཞག་སྟེ།། ཇི་བཞིན་འདོད་པའི་ཉེ་བར་སྦྱར།། ལྷ་རྣམས་ཉེ་བར་བྱ་བ་དང།། བགེགས་རྣམས་ཞི་བར་བྱ་བ་དང། ། དོན་གྲུབ་ཤི་བ་གསོ་བའི་ཕྱིར།། ལས་འདིར་སྤྱད་པར་ཤིན་ཏུ་གཅེས།། ཚོགས་འདི་བློ་ཆུང་གསར་ཞུགས་པའི།། མདུན་དུ་བརྗོད་པར་བྱ་མི་རིགས།། རྫས་དང་ཡོ་བྱད་ཐམས་ཀྱང།། ཅིས་འདུས་དེ་ལྟར་སྟོབས་ཀྱིས་སྤྱད། ། དེས་ན་ལས་འདི་ཁྱད་པར་ཡང།། ཚོགས་ལ་ཚོགས་བསྐྱེད་སྒྲིབ་སྦྱངས་ཏེ།། བསྙེན་པ་དག་ལ་གོམས་བྱས་ནས།། བསྒྲུབས་པས་འབྲས་བུ་མཐར་ཕྱིན་པའོ།། ཞེས་བཀའ་སྩལ་ཏོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིགས་པའི་མདོ་ལས་རྣལ་འབྱོར་བདེ་བའི་ཚོགས་ཀྱི་ལེའུ་སྟེ་དྲུག་པའོ། །།། དེ་ནས་ཡང་སྨྲ་བའི་སེང་གེ་སེམས་དཔའི་རྡོ་རྗེ་དེ་འདས་པ་བརྗོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང།། འདུས་པ་ཆེན་པོའི་ཚོགས་རྣམས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་སྔགས་ཟབ་མོ་སྤྱོད་པའི་སྐྱོན་དང་ཡོན་ཏན་ཅི་ལགས་པར་བདག་ཅག་གི་རིག་པ་ལ་སྣང་བར་གྱུར་ཏོ། ། དེ་ནས་ཡང་བཅོམ་ལྡན་འདས་ཀྱིས་བཀའ་སྩལ་པ།། འདུས་པ་ཆེན་པོའི་ཚོགས་གསང་སྔགས་ཆེན་པོའི་དོན་ནི་རབ་ཏུ་སྤྱད་པར་དཀའ་བར་ཤེས་པར་གྱིས་ཤིག། དེ་ཅིའི་ཕྱིར་ཞེ་ན།། གསང་སྔགས་ཀྱི་ཚོགས་ནི་ཤིན་ཏུ་མེ་དང་འདྲ་སྟེ།། མེ་ནི་རྒྱུན་དུ་བཅངས་ཤིང་སྤྱད་ལེགས་ན་ཇི་ལྟར་འདོད་པ་བཞིན་དུ་རྒྱུན་དུ་སྤྱད་དུ་ཡོད་དོ།། མེ་ཉིད་ཇི་ལྟ་བ་བཞིན་དུ་སྤྱད་ན་མེའི་ཕུང་པོ་ཆེན་པོར་འགྱུར་ཏེ། ། སྤྱོད་པར་བྱེད་པ་ཉིད་ཀྱང་བསྲེགས། ཁྱིམ་ནས་ཁྱིམ་ཡང་བསྲེགས། རྫས་ཀྱི་དངོས་པོ་ཐམས་ཅད་ཀྱང་བསྲེགས་པར་འགྱུར་རོ།། དེ་བཞིན་དུ་གསང་སྔགས་འདི་ནི་ཆུ་དང་འདྲ་སྟེ། ཆུ་ཐབས་ཀྱིས་ཟན་ཅིང་སྤྱད་ལེགས་ན་ཇི་ལྟར་འདོད་པ་བཞིན་དུ་དགའ་བདེར་སྤྱད་དུ་ཡོད་དེ།། ཆུ་ལ་དགའ་བ་དེར་ཐར་ཆུ་ཆེན་པོ་ལ་འབྲོགས་པར་ནུས་སོ།། ཆུའི་རང་བཞིན་དང་ཐབས་ལ་མ་གོས་པས་ནི་སྤྱོད་པར་བྱེད་པ་དེ་གཡེང་ཞིང་འཆི་བར་བྱེད་དོ། ། གཞན་ཡང་གསང་སྔགས་ཆེན་པོ་འདི་ནི་གཅན་གཟན་གདུག་པ་ཅན་དང་འདྲ་སྟེ།། གཅན་གཟན་གྱིས་སེམས་ཅན་གཞན་གྱི་སྲོག་གཅོད་པར་བྱེད་པ་ཡང་ཐབས་ལ་མཁས་པས་ཇི་ལྟར་དགའ་བ་བཞིན་དུ་དབང་དུ་འདུའོ། ། ཐབས་ཀྱིས་མ་ཟིན་ན་སྲོག་གཅོད་པར་བྱེད་དོ།། གཞན་ཡང་གསང་སྔགས་ཆེན་པོ་འདི་ནི་སྦྲུལ་གྱི་མགོ་ལ་འདུག་པའི་ནོར་བུ་རིན་པོ་ཆེ་དང་འདྲ་སྟེ། སྦྲུལ་གྱི་མགོ་ལ་འདུག་པའི་ནོར་བུ་ཐབས་ཀྱིས་ཡོངས་སུ་ཟིན་ན་ནི་དབང་དུ་འདུ་ཞིང་སྤྱད་དུ་ཡོད་ལ།། ཐབས་ཀྱིས་མ་ཟིན་ན་ནི་འཚོ་བ་སྲོག་དང་འབྲལ་བར་བྱེད་དོ།། དེ་བས་ན་གསང་བ་ཆེན་པོ་འདི་ནི་སྤྱད་པར་དཀའ་བས་སྔོན་གྱི་དུས་ཀྱི་ཚེ་ན་ཡང་སྤྱད་ཉེས་པའི་ལོག་པའི་ལམ་པ་ཅན་མང་པོར་བྱུང་ངོ། ། དོན་དང་ལམ་ལ་མཁས་པའི་སྐྱེས་བུས་ཐབས་ཀྱིས་ཟིན་ཅིང་སྤྱད་ལེགས་ན་མ་ནོར་བའི་ལམ་དུ་ཞུགས་པ་ཡང་མང་པོར་བྱུར་བས་འདུས་པ་ཆེན་པོའི་ཚོགས་སྤྱད་པའི་ཐབས་ལ་ཡོངས་སུ་མཁས་པར་གྱིས་ཤིགདེ་སྐད་ཅེས་བཀའ་སྩལ་དང། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་གསང་སྔགས་ལོག་པའི་ལམ་ལས་བྱུང་བ་ནི་གང་གང་ལགས། སྤྱད་ལེགས་པའི་ཐབས་ལས་བྱུང་བ་ནི་གང་གང་ལགས། བདག་ཅག་ལ་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་འདུས་པ་ཆེན་པོའི་ཚོགས་ལ་བཀའ་སྩལ་པ། འདུས་པ་ཆེན་པོའི་ཚོགས་ཉེས་ལེགས་ཀྱི་རིམ་པ་བཤད་པར་བྱ་ཡིས་ཉོན་ཅིག་ཅེས་བཀའ་སྩལ་པ་དང། ང་ནི་དྲན་པ་ཐོག་མའི་ཚེ། གསང་པ་སྤྱོད་པའི་དོན་འདི་དག་ངེས་དོན་ཕལ་ཆེར་ནུབ་པར་གྱུར། ཚུལ་འདྲ་ཙམ་ཞིག་གནས་པ་ལ།། ཀུན་ཀྱང་ཕལ་ཆེར་སྤྱོད་མོད་ཀྱང།། དོན་དང་ཕྱད་པ་ངས་མ་མཐོང།། ཀུན་ཀྱང་ལོག་པའི་ལམ་སྤྱད་དོ།། ལོག་པ་ཅན་ཉིད་གང་ཞེ་ན། ། འདི་ལ་མི་གནས་འདི་ཉམས་དང། འདི་ལས་ལོག་དང་ལོགས་ཚུལ་སྤྱོད།། འདི་ཚུལ་མ་ཡིན་འདིར་མ་ངེས།། གཡོ་སྒྱུས་བདེན་བཅོས་འགལ་བའི་ལམ།། དེ་ཡང་ཇི་ལྟར་བུ་ཞེ་ན།། བསྐལ་པ་ཀུན་བཀོད་བྱ་བའི་ཚེ། ། སངས་རྒྱས་མངོན་བྱུང་རྒྱལ་པོ་དེ།། མྱ་ངན་འདས་པར་གྱུར་འོག་ཏུ།། བྱུང་བའི་རྣལ་འབྱོར་བཟང་རྒྱན་དེ།། མི་ཤེས་བྱིས་པའི་འཁོར་རྣམས་ལ།། ཚུལ་འཆོས་ལོག་པའི་ཚོགས་བསྐྱངས་པས། ། ཚོམ་བུ་ལྔ་བརྒྱར་བཅས་པ་ཞིག། དོན་ལས་གོལ་ཞིང་འཁོར་བར་ལོག། དེ་འདྲའི་ཚུལ་དུ་མ་སྤྱོད་ཅིག། རྨད་བྱུང་མཁས་པའི་བསྟན་པ་འདི།། རྣལ་འབྱོར་དབང་ཕྱུག་ཚད་མ་རྣམས།། ཕལ་ཆེར་མི་གནས་སྐབས་དག་ཏུ། ། མི་ཤེས་ངན་རྟོག་ཅན་རྣམས་ཀྱིས།། དཀྲུགས་འགྱུར་བཀའ་བསླད་བཞུང་པོར་ཏེ།། ནོར་པས་བདག་ཉིད་སུན་འབྱིན་ཅིང།། བདག་ཡིན་གཞན་འདི་མ་ཡིས་ཞེས།། བདག་བསྟོད་གཞན་ལ་སྨོད་པ་ལོག། དེ་ཡང་ཇི་ལྟ་བུ་ཞེ་ན།། བསྐལ་པ་དེ་ཉིད་དུས་དག་ལ།། རྣལ་འབྱོར་དཔའ་སྦྱིན་བྱ་བ་ཞིག། དོན་ལ་བློ་ཤེད་མ་བྱེ་ཞིང།། ལམ་གྱི་ཐབས་ལས་མི་མཁས་པས།། ངེས་དོན་བཀའ་ཡི་གཞུང་བོར་ནས།། ཆོས་མ་ཡིན་པའི་ཆོས་སྤྱོད་ཅིང། ། གཞན་དག་ངེས་དོན་སྤྱོད་པ་ལ།། ཁྱོད་ཀྱི་དེ་ནི་དོན་མ་ཡིན།། དོན་མཆོག་བདུད་རྩི་གང་ཡིན་པ།། དེ་ནི་ང་ཡི་ཆོས་འདི་ཡིན།། ཞེས་ནི་བདག་བསྟོད་གཞན་ལ་སྨོད།། འདི་ཡང་སྲིད་པ་ལོག་པའི་ལམ། ། དེ་འདྲའི་ཚུལ་དུ་མ་སྤྱོད་ཅིག། སྔར་བྱུང་རྒྱུད་ཀྱི་རྗེས་གནས་པས།། རྡེང་མེད་བཞིན་དུ་དཔོན་བསྟབས་ན།། ཚིག་གཉེར་དྲེགས་པའི་དབང་དེས་ནི།། མི་ཤེས་བཞིན་དུ་རས་གཅོད་པའི།། ཚུལ་འཆོས་སེམས་ཀྱི་གྱ་གྱུ་ཅན། ། སྨྱོན་ཐབས་བླུན་པའི་སྡེག་ཅན་ཡིན།། དེ་ཡང་ཇི་ལྟར་བུ་ཞེ་ན།། དགེ་སློང་དྲི་མེད་སྤྱོད་པ་ཞེས།། བྱ་བའི་རྣལ་འབྱོར་ཚུལ་འདྲ་ཞིག། དོན་ལ་མཁས་པའི་རྗེས་སུ་བྱུང།། ཚོམ་བུ་འབུམ་གྱི་འཁོར་རྣམས་ཀྱིས། ། རྒྱུད་ཀྱི་རྗེས་སུ་བྱུང་བ་ཡིས།། དོན་མེད་དགེ་སློང་དེ་ཉིད་ལ།། ཚིག་གི་གཉེར་ཆེན་ལྗིད་ཕབ་པས།། གདུང་འཚོབ་ཅེས་ནི་དཔོན་བསྟབས་ཏེ།། ཆེ་བ་ཆེན་པོའི་དྲེགས་པ་སྐྱེས།། མི་ཤེས་བཞིན་དུ་ཚུལ་བཅོས་ཏེ། ། འདྲ་ཚུལ་ལོག་པའི་ཆོས་སྤྱད་པས།། ཚོམ་བུ་འབུམ་དང་བཅས་པ་ཞིག། དྲེག་པ་ཆེན་པོའི་རུ་དྲར་ལྷུང།། དེ་འདྲའི་ཚུལ་དུ་མ་སྤྱོད་ཅིག། མཛའ་འདྲིན་བསླང་སྟེར་ཞིང་རྣམས་དང།། རྙེད་དང་བཀུར་སྟེས་འཚོ་བའི་འཁོར། ། གཞན་གྱི་དབང་དུ་གྱུར་དོགས་ནས། སྒོ་རིས་རྐྱང་ཆེན་སོ་སོར་གཅོད།། འཁོར་འདི་བདག་གིས་སྨིན་བྱ་ཡི།། གདུལ་བར་བྱ་བའི་ཞིང་ཡིན་གྱིས།། གང་དག་འདི་དང་མ་འབྲེལ་ཞེས། ། ཉོན་མོངས་ཚིག་གིས་སྒོ་བྱེད་ནོར།། དེ་ཡང་ཇི་ལྟ་བུ་ཞེ་ན།། རྣམ་འབྱོར་ན་ཞི་གནས་པ་ཞེས།། བྱ་བའི་ཚོམ་བུ་ལྔ་བརྒྱ་ཞིག། ཤིན་ཏུ་གསང་སྔགས་སྤྱོད་དོ་ཞེས།། དགོན་པའི་གནས་སུ་འདུ་གནས་ནི། ། ཡུལ་ཁམས་ཆེན་པོ་དེ་དག་གིས།། གནས་པར་གྱུར་པའི་མི་རྣམས་ཀུན།། གདུལ་བར་བྱ་བའི་ཞིང་དུ་སྤྱོད།། གཞན་གྱི་སྡེ་པར་གྱུར་པ་ཡི།། དགེ་སློང་དོན་དང་ལྡན་པ་ཞིག། ཡུལ་དེར་ཆེད་དུ་འོངས་ནས་ནི། ། རྣལ་འབྱོར་ངེས་པའི་ལམ་མཆོག་གཅིག། རྒྱ་ཆེར་བསྟན་པར་བསམ་པ་ལས། དགེ་སློང་དགོན་པར་གནས་པ་དེས།། ཉོན་མོངས་ཚིག་གི་བསྒོ་བ་བྱས།། འཁོར་འདི་བདག་གི་ཞིང་ཡིན་གྱིས།། ཁྱོད་ནི་འདི་ལ་མ་གཏོགས་ཞེས། ། སྒོ་དང་ཚན་དང་རིས་བཅད་པས།། ཉོན་མོངས་འཁོར་བའི་ལ་དུ་ལྷུང།། དེ་འདྲའི་ཚུལ་དུ་མ་སྤྱོད་ཅིག། རྣལ་འབྱོར་ཆེན་པོར་བསྔོས་གྱུར་ལ། སྣ་འགས་ཅི་རྒྱལ་གསོག་འཇོག་བྱེད།། གཅིག་ཡིད་གཅིག་གིས་འབྱིན་བྱེད་པ། ། ནམ་ཞར་ལོངས་སྤྱོད་ཐོབ་པ་མིན།། དེ་ཡང་ཇི་ལྟ་བུ་ཞེ་ན།། རྣལ་འབྱོར་བདེ་ལྡན་ཤེས་པ་ཞེས།། བྱ་བའི་ཚོམ་བུར་བཅས་པ་ཞིག། གསང་བ་རྒྱ་ཆེར་སྤྱོད་པ་ལས།། འཁོར་ན་གནས་པའི་རྣལ་འབྱོར་མ། ། བུད་མེད་བཟང་ལྡན་བྱ་བ་ཞིག། ཚོགས་སྦྱོར་གིང་དུ་བསྐོས་པ་ལས།། འབྱོར་བའི་ཡོ་བྱད་དེ་དག་ལ།། སེར་སྣའི་སེམས་ཀྱིས་གསོག་འཇོག་བྱས།། ལས་ཀྱི་རྣམ་སྨིན་དེ་ཡིས་ནི།། ཡི་དྭགས་ཁྱི་ཡི་ལུས་སུ་སྐྱེས། ། དེ་འདྲའི་ཚུལ་དུ་མ་སྤྱོད་ཅིག། གཞན་ཡང་རྣལ་འབྱོར་ཆེན་པོའི་ཚོགས།། ལོག་པར་སྤྱོད་པའི་རྣལ་འབྱོར་ནི།། ལོག་ལྟ་སྤྱི་བརྟོལ་གཏུམ་ཁྲོ་ཆེ།། སྡིག་སྤྱོད་དོན་དང་མི་ལྡན་ཡང།། བདག་ནི་ཡང་དག་ཡིན་ནོ་ཞེས། ། བབ་ཆོལ་བཀའ་རྐུ་སླུ་བྱེད་བསླད།། དེ་ཡང་ཇི་ལྟ་བུ་ཞེ་ན། ཆོས་སྐྱོང་བ་ཡི་རྣལ་འབྱོར་པ།། པྲ་མ་དེ་ཞེས་བྱ་བ་ཞིག། དོན་དང་ལམ་ལ་མི་མཁས་པར།། བདག་ནི་མཁན་པོ་ཡིན་ནོ་ཞེས།། ཀུན་ལ་རྒྱ་ཆེར་སྒྲ་བསྒྲགས་ནས། ། རྒྱལ་བའི་བཀའ་བརྐུས་འགྲོ་བ་རྣམས།། བསླུས་པར་གྱུར་པའི་རྣམ་སྨིན་གྱིས།། ལོག་པ་ཅན་གྱི་འཇིག་རྟེན་པ།། མི་སྟེགས་སྤྱོད་པའི་ཁམས་སུ་ལྷུང།། དེ་འདྲའི་ཚུལ་དུ་མ་སྤྱོད་ཅིག། ཐ་ཚིག་ཉམས་ཤིང་དོན་ལ་རྨུགས།། དྲེགས་པས་དོན་ལ་ཁས་འཆེས་ཕྱིར།། རྡོ་རྗེ་རྒྱལ་དབང་ཐོབ་འདོད་པ།། ཁྲེལ་མེད་སྤྱི་བརྟོལ་མུན་སྤྲུལ་འཆལ།། དེ་ཡང་ཇི་ལྟ་བུ་ཞེ་ན།། རྣལ་འབྱོར་སྔགས་ཀྱི་ཚུལ་སྤྱོད་པ། ། པེ་ན་ཡ་ཞེས་བྱ་བ་བཞིག། ཚོམ་བུ་བརྒྱ་དང་བཅས་པ་བྱུང། རྩ་བ་ཉམས་ཤིང་དོན་ལ་རྨུགས།། དྲེགས་པ་ཆེན་པོའི་ང་རྒྱལ་གྱིས།། དོན་ལ་མཁས་པའི་ཚུལ་བཅོས་ཕྱིར།། རྡོ་རྗེ་རྒྱལ་པོའི་དབང་མནོས་པས། ། རི་བོས་སྲོག་ཆགས་མནན་པ་བཞིན།། ང་རྒྱལ་དྲེགས་པའི་རི་བོ་ཡིས།། འཁོར་བའི་ལས་སྤྱོད་ལས་ངན་པའི།། སྲོག་ཆགས་ཕག་གི་རིགས་སུ་ལྷུང།། དེ་འདྲའི་ཚུལ་དུ་མ་སྤྱོད་ཅིག། མཉམ་པའི་དོན་ཉིད་མ་རྟོགས་པར། ཚིག་དུ་མཉམ་ཞེས་རྗོད་བྱེད་ཅིང།། ཆགས་སྡང་གཉིས་ལ་མངོན་འཆེལ་བ།། རྣལ་འབྱོར་ལས་ཀྱིས་འཁོར་བའི་ལམ།། དེ་ཡང་ཇི་ལྟར་བུ་ཞེ་ན།། དགེ་སློང་བདེ་སྦྱིན་བྱ་བ་ཞིག། ཚོམ་བུ་སྟོང་དང་བཅས་པར་དེ། ། རྣལ་འབྱོར་གསང་བའི་ལས་ལ་སྤྱོད།། ལ་ལ་ཆགས་ལ་མངོན་པར་འཆེལ།། ལ་ལས་སྡང་ཆེན་གསོད་པར་སྤྱོད།། ཆགས་སྡང་ལས་ཀྱི་རྣམ་སྨིན་གྱིས།། རཀྵ་སྲིན་པའི་ཁམས་སུ་ལྷུང། ། དེ་འདྲའི་ཚུལ་དུ་མ་སྤྱོད་ཅིག། གང་དག་རྣལ་འབྱོར་བློ་ཆུག་རྣམས།། རྡོ་རྗེ་གྲལ་ཚོགས་དོན་གླེངས་ན།། དེ་ལ་འཇིགས་ཤིང་སྐྲག་འགྱུར་ཏེ།། སྤ་ཞུམ་མི་དགའ་འབྱོལ་བྱེད་བླུན།། དེ་ཡང་ཇི་ལྟ་བུ་ཞེ་ན། ། དགེ་སློང་ལྷས་བྱིན་བྱ་བ་ཞིག། རྣལ་འབྱོར་དང་པོའི་སར་སློབ་ཚེ།། རྣལ་འབྱོར་དོན་ལྡན་མང་པོ་རྣམས།། ཕལ་ཆེར་ཚོགས་པར་གྱུར་པ་ལ།། ངེས་དོན་གསང་བའི་དོན་གླེངས་ན།། ལྷས་བྱིན་འཁོར་བཅས་དེ་ལས་བྱོལ། ། དོན་གླེང་བ་ལ་མི་དགའ་ཞིང།། ངན་པའི་སེམས་ཀྱིས་ཕྲག་དོག་སྐྱེས།། རང་གི་གནས་སུ་སོང་ནས་ནི།། མཁས་པ་དེ་ལ་མི་སྙན་བརྗོད།། ལས་ཀྱི་རྣམ་སྨིན་དེ་ཡིས་ནི།། བསྐལ་པ་དཔག་ཏུ་མེད་པ་རུ། ། ཡང་དག་དོན་ལས་གོལ་བར་འགྱུར།། འཁོར་བ་དོན་མེད་གནས་སུ་འཁྱམས།། དེ་འདྲའི་ཚུལ་དུ་མ་སྤྱོད་ཅིག། རྣལ་འབྱོར་ཉིད་ཀྱིས་རྣལ་འབྱོར་ལ།། ཤིན་ཏུ་གདུག་པའི་དུག་མདས་གཏོང།། ཐ་ཚིག་བཙན་པོ་རྫོང་ལྟ་བུ། ། འཇོམས་བྱེད་རྣལ་འབྱོར་རང་བགེས་སོ།། དེ་ཡང་ཇི་ལྟ་བུ་ཞེ་ན།། རྣལ་འབྱོར་རྣམ་དག་བློ་གྲོས་ཞེས།། བྱ་བའི་དོན་ལྡན་མཁས་པ་ཞིག། མི་འཇིགས་བློ་གྲོས་ཞེས་བྱ་བའི།། ཐབས་དང་དོན་ལ་མི་མཁས་པ། ། སྡེ་པ་མང་པོ་སྐྱོང་བའི་སར།། རྣམ་དག་བློ་གྲོས་འཁོར་བཅས་འོངས།། མཁས་པ་དོན་ལྡན་བཟོད་ཐོབ་ལ།། ངན་སེམས་ཕྱར་ཀའི་སྒྲོ་སྐུར་བཏབ།། ལས་ཀྱི་རྣམ་སྨིན་དེ་ཡིས་ནི།། མི་འཇིགས་བློ་གྲོས་མནར་མེ་ལྷུང། ། དེ་འདྲའི་ཚུལ་དུ་མ་སྤྱོད་ཅིག། ལྟ་བ་དམིགས་བུ་དང་བྲལ་བས།། ཡང་དག་དབུ་མའི་ལམ་མི་གསལ།། སྤྱི་ཡུལ་ཙམ་ལ་ལྟོས་སྤྱོད་པ།། དེ་ནི་རྣལ་འབྱོར་ལོང་པའི་ཚོགས།། དེ་ཡང་ཇི་ལྟ་བུ་ཞེ་ན། ། རྒྱལ་པོ་རབ་གསལ་འཛིན་པ་ཞེས།། བྱ་བའི་རྣལ་འབྱོར་ཅན་ཞིག་བྱུང།། ཤེས་རབ་ལྟ་བའི་མེད་མེད་པར།། རྣལ་འབྱོར་མིང་ཙམ་ཚུལ་བཟུང་ནས།། སྒྲ་ཐོས་ཙམ་གྱི་གཞུང་སྤྱད་པས།། མིག་མེད་འཁོར་བའི་ཁམས་སུ་ལྷུང། ། དེ་འདྲའི་ཚུལ་དུ་མ་སྤྱོད་ཅིག། དེ་ལ་སོགས་པའི་རྣལ་འབྱོར་པས།། ལོག་པའི་ཚོགས་སུ་སྤྱད་པས་ནི།། འཁོར་བ་ལོག་པའི་ཚུས་སུ་འགྱུར།། དེ་ན་འདུས་པའི་རྣལ་འབྱོར་རྣམས།། ཤིན་ཏུ་གསང་བའི་ཆོས་འདི་རྣམས། ། གོལ་ས་ཆེ་བར་རྒྱལ་བས་བཤད།། ཐབས་ལ་མཁས་པར་སྤྱོད་པ་ཡིས།། དོན་དང་ལྡན་པར་བྱ་བ་གཅེས།། ཐབས་ལ་མཁས་པར་སྤྱད་པ་ཡི།། ལེགས་པའི་ལམ་གྱི་རྣལ་འབྱོར་པ། ། སྔོན་འདས་དུས་ན་བྱུང་བ་ཡི།། རྩལ་ཅན་རྣམས་ཀྱི་དོན་བཤད་པ།། སྐྱེས་བུ་མཆོག་གི་སྤྱོད་པ་འདི།། ཡོན་ཏན་སྒྲ་བསྒྲགས་སུས་ཐོས་པ།། མིང་ཙམ་གྱིས་ཀྱང་དེ་ཐོབ་ཅིང།། དྲན་པས་ངན་འགྲོ་ལས་སྐྱོབ་ཡིན། ། དེ་ཡང་ཇི་ལྟ་བུ་ཞེ་ན།། ཤིན་ཏུ་གསང་བའི་སྤྱོད་པ་འདི།། ལྷ་གནས་གསུམ་དུ་གྲགས་པ་ལས།། ལྷ་ཡི་བུ་ནི་འོད་ལྡན་ཏེ།། མི་རྟག་འཆི་བའི་དུས་བབ་ནས།། འཆི་ཀའི་སྔ་ལྟས་བྱུང་བའི་ཚེ།། མི་དགའ་བར་ནི་འདུ་ཤེས་གྱུར། ། ཕྱི་མའི་འདུ་ཤེས་སྐྱེད་པ་ལས།། མི་གཙང་ཟས་སུ་ཟ་བ་ཡི།། བླུན་པའི་སྲོག་ཆགས་ལུས་ལེན་པར།། རང་གི་མངོན་པར་ཤེས་པས་མཐོང།། ཤིན་ཏུ་འཇིགས་པའི་འདུ་ཤེས་ཀྱིས།། སྐྱབས་ཀྱི་ཡུལ་རྣམས་ཡིད་ལ་བྱས། ། གཞན་གྱི་དྲན་པ་མི་གསལ་བར།། གསང་བ་ཆེན་པོའི་ཚོགས་ཆེན་གྱིས།། མཚན་ནི་རྣ་བའི་དབང་པོ་ཐོས།། ཐོས་པ་ཡིད་ལ་དྲན་བྱས་པས།། ངན་འགྲོའི་ལམ་ལས་སླར་ལོག་སྟེ།། ཚོགས་ཆེན་སྤྱོད་པའི་སྐལ་ལྡན་པས། ། གསང་བ་འཛིན་པའི་གནས་སུ་སྐྱེས།། དེ་བཞིན་ཐོས་པ་དག་པར་སྤྱོད།། རྒྱལ་བ་མཉེས་པའི་ཚོགས་འདི་ལ།། གང་ཞིག་དགའ་ཞིང་འདུན་སྐྱེད་པ།། གཞན་གྱི་བར་ཆད་མི་འབྱུང་བར། ། ཇི་ལྟར་མོས་པ་དེ་མྱུར་འཐོབ།། དེ་ཡང་ཇི་ལྟ་བུ་ཞེ་ན།། བྲམ་ཟེའི་བུ་ནི་བྱམས་ལྡན་ཏེ།། གསང་བ་ཆེན་པོའི་ཚོགས་འདི་དག། སྤྱོད་པར་མོས་ནས་ཀུན་ཏུ་བཙལ།། བཙལ་བས་རྙེད་པར་མ་གྱུར་ཏེ།། ས་ཕྱོགས་ཞིག་ཏུ་འདུག་ནས་ནི། ། ཤིན་ཏུ་ངུས་ནས་སྨྲས་པ་ནི།། ཨེ་མའོ་བདག་གི་ལས་རེ་ཕམ།། སྐྱེས་ནས་རྒས་པར་གྱུར་བར་དུ།། ཚོགས་ཆེན་ཟབ་མོའི་དོན་བཙལ་ན།། དོན་དང་མ་ཕྲང་ལས་རེ་ངན།། ད་འོང་ཇི་ལྟར་བཙལ་ན་རྙེད། ། བཙལ་བྱས་རྙེད་པར་ཡོང་མི་འགྱུར།། ཐུགས་རྗེས་བདག་ལ་སྐྱབས་སུ་འཆི།། གདུང་བ་སྒྲ་ཆེར་ཕྱུང་བ་ལས།། ནམ་མཁའི་ཁམས་ནས་སྒྲ་ཕྱུང་སྟེ།། སྐལ་དང་ལྡན་པའི་བྲམ་ཟེ་ཁྱོད།། དེ་ལྟར་ཡི་དམ་ལ་བརྟེན་པ། ། ཁྱོད་ནི་དོན་གྱི་སྐལ་པ་ཅན།། དུས་གསུམ་རྒྱལ་བའི་ཐམས་ཅད་ཀྱིས།། ཁྱོད་ལ་བྱིན་གྱིས་རློབ་པར་མཛད།། དེ་བས་ལྟ་བ་མ་གཡེལ་བར།། སྒྲིབ་པ་སྦྱང་བའི་ཐབས་དག་ལ།། མཁས་ཤིང་བརྩོན་པར་བྱ་དགོས་ཏེ། ། རང་གི་རྩ་རྣམས་བཀྲོས་ནས་ནི།། ཁྲག་ཆེན་དག་གིས་མཆོད་པ་དེ།། འདོད་ཆགས་དག་པ་ཙནྡན་ཆུས།། དམིགས་ནས་རྒྱལ་བ་ཀུན་མཆོད་ནས།། དེ་མ་ཐག་ཏུ་དོན་ཐོབ་འགྱུར།། དེ་སྐད་ལུང་བསྟན་ཐོབ་ནས་ནི། ། དགའ་བའི་བསམ་པ་ཆེར་གཡོས་ཏེ།། ལུང་བསྟན་པ་ལྟར་དེ་སྤྱད་པས།། རིག་འཛིན་རྒྱལ་བའི་སྲས་སུ་གྱུར།། དེ་བཞིན་མོས་པ་དག་པར་སྤྱོད།། མཐོང་ལ་སྐལ་ལྡན་འདིར་ཞུགས་པ། ། ཐམས་ཅད་དུ་ཡང་དེ་བཞིན་ཏེ།། ཏོག་ནི་རྩེ་མོར་གྱུར་པ་བཞིན།། ཡོངས་ཀྱི་ནུབ་པ་མ་ཡིན་ནོ།། དེ་ཡང་ཇི་ལྟ་བུ་ཞེ་ན།། ལྷ་ཡི་བུ་ཞེས་བྱ་བ་ནི།། དགེ་བའི་རྒྱལ་པོ་བྱ་བ་དེ།། ཚོམ་བུ་འབུམ་དང་བཅས་པ་ཞིག། གསང་བ་རྒྱ་ཆེར་སྤྱད་པ་ལས།། ལྷ་བུ་རིན་ཆེན་འོད་ལྡན་དེ།། ཤིན་ཏུ་དད་པ་ཆེར་གཡོས་ཏེ།། ལྷ་རྫས་ཡོ་བྱད་མང་པོ་དང།། བཅས་ནས་གསང་བའི་གནས་དེར་ཕྱིན།། དགའ་ཞིང་འདུན་པའི་ཚུལ་གྱིས་ནི། ། གུས་པར་གྱུར་ཏེ་དེར་གནས་པས།། ཆོ་འཕྲུལ་ཆེན་པོ་བཞི་ཐོབ་སྟེ།། ལྷ་གནས་ཀུན་དུ་བགྲོད་པ་དང།། འབྱུང་ཆེན་ལུས་ལས་སྤྲུལ་པ་དང།། རི་བོ་གདེག་དང་འཕང་བ་དང།། མི་འཆི་ཚེ་ལ་གནས་པ་ཐོབ། ། རྒྱལ་མཚན་རྩེ་མོའི་ཏོག་བཞིན་དུ།། མཐོང་བ་དག་པའི་ཆོས་དེ་ཉིད།། བསྐ་པར་ནུབ་པར་མ་གྱུར་རོ།། དེ་བཞིན་འཇུག་པ་དག་པར་གྱིས།། མཐོང་བས་ཆོས་འདི་ཡོངས་དག་པས།། ཡེ་ཤེས་སྒྲོན་མའི་མིག་རྙེད་ནས། ། བླ་མེད་སྙིང་པོ་ཅན་རྣམས་ཀྱིས།། ལམ་རྙེད་ལམ་དུ་ཞུགས་པ་བཞིན།། དེ་ཡང་ཇི་ལྟ་བུ་ཞེ་ན།། བྲམ་ཟེ་ཀུན་རི་བྱ་བ་ཞིག། ཆོས་ཀྱི་མིག་ལྡན་དོན་མཐོང་ནས།། གསང་ཆེན་གཞུང་བཞིན་སྤྱོད་པ་ལ། ། བྲམ་ཟེ་ཀཻ་ནི་བྱ་བ་ཞིག། དད་པས་དོན་གྱི་རྗེས་སུ་འབྲེངས།། གསང་ཆེན་འདུས་པའི་ཚོགས་མཐོང་བ།། ཆོས་ཀྱི་མིག་དང་ལྡན་འགྱུར་ཏེ།། དོན་གྱི་སྙིང་པོ་མཐོང་བར་འགྱུར།། ལྷུན་གྲུབ་རྩལ་ཆེན་རྫོགས་པ་ཡི། ། རིག་འཛིན་ཆེན་པོའི་ས་ཉིད་ཐོབ།། དེ་བཞིན་མཐོང་བས་དག་པར་གྱིས།། གཞན་དག་འདིར་ནི་མངོན་སྤྱོད་ལ།། དགའ་བའི་ཡིད་ཀྱིས་ཕྱོགས་བྱེད་པ།། དེ་ནི་དངོས་དང་འདྲ་བ་སྟེ།། འབྲས་བུ་ལ་ཡང་མཐོ་དམན་མེད། ། དེ་ཡང་ཇི་ལྟ་བུ་ཞེ་ན།། རྒྱལ་པོ་དབང་ཕྱུག་འོད་ལྡན་ཞེས།། བྱ་བའི་རྣལ་འབྱོར་ཅན་ཞིག་ལ།། ཚོམ་བུ་བཅུ་དང་བཅས་པའི་འཁོར།། རིག་འཛིན་སྤྱོད་པའི་དོན་ལ་ཞུགས།། སྔགས་སྤྱོད་འབྲས་བུ་ཆེར་ཐོབ་སྟེ། ། ངོ་མཚར་ཆོ་འཕྲུལ་མང་པོ་དག། ཐོབ་པ་ཀུན་ཏུ་གྲགས་པར་འགྱུར།། དེ་ལ་གཞན་གྱི་སྡེ་པ་ཡི།། བྲམ་ཟེ་དགེ་སློབ་བྱ་བ་ཞིག། ཤིན་ཏུ་དག་པའི་སེམས་བསྐྱེད་ནས།། འཇུག་ཅིང་བསླབ་པར་ཞུགས་པ་ལས། ། རྒྱལ་པོས་མ་གནང་གསང་སྒོ་བསྡམས།། བྲམ་ཟེ་དད་པ་མ་ལོག་པར།། འབྱོར་པའི་ཡོ་བྱད་ཅི་ཡོད་རྣམས།། རྒྱལ་པོ་འཁོར་དུ་ཕུལ་ནས་ཀྱང།། རྒྱལ་པོ་གནས་པའི་ཡུལ་ཕྱོགས་སུ།། ཡིད་ཀྱི་ཕྱོགས་ཏེ་སྨོན་ལམ་བཏབ། ། རྩེ་གཅིག་པར་ནི་སྨོན་ལམ་བཏབ།། རྗེས་སུ་ཡི་རང་དམ་པར་ནི།། ཡིད་ལ་བྱས་པའི་བསོད་ནམས་ཀྱིས།། སྒྲུབ་པར་བྱེད་པའི་རྒྱལ་པོ་དང།། སྒྲུབ་དང་མི་ལྡན་བྲམ་ཟེ་གཉིས།། འབྲས་བུ་མཐོ་དམན་མེད་པར་ཐོབ། ། འདི་ནི་ཚེགས་མེད་དོན་པོ་ཆེ།། ཐབས་ལ་མཁས་པའི་རིག་འཛིན་ཡིན།། དེ་བཞིན་སྤྱོད་པ་གཞན་དག་ལ།། དགའ་བས་རྗེས་སུ་ཡི་རང་གིས།། དགེ་བ་སྤྱད་དང་མ་སྤྱད་གཉིས།། འབྲས་བུ་མཉམ་པོར་ཐོབ་པར་གྱུར། ། བསམ་ཡས་བསམ་གྱིས་མི་ཁྱབ་པ།། རྒྱལ་རྣམས་འདིར་བསླབ་འདིར་མཁྱེན་པས།། སྲིད་གསུམ་འགྲོ་བའི་བཤེས་གཉེན་དུ།། ཀུན་གྱི་བདག་པོར་གྱུར་པ་ཡིན།། དེ་ཡང་ཇི་ལྟར་བུ་ཞེ་ན། ། སྔོན་གྱི་བྲམ་ཟེ་གསལ་བྱིན་གྱིས།། གསང་ཆེན་འདི་ཡི་དོན་བསླབས་ནས།། རང་གི་སེམས་ལ་གོམས་བྱས་ནས།། སེམས་ཉིད་བདེན་པའི་དོན་མཐོང་སྟེ།། ཆོས་རྣམས་ཀུན་ལ་མཁས་པར་འགྱུར་རོ། ། ཀུན་གྱི་རྩ་བ་སེམས་ཡིན་པས།། སེམས་ལས་ཆོས་བྱུང་འབུམ་ཕྲག་ཡས།། ཆོས་ཀྱི་རྒྱལ་པོར་དེར་གྱུར་ནས།། སངས་རྒྱས་སྨྲ་བའི་སེང་གེ་ཞེས།། ཞིང་ཁམས་ཀུན་ཏུ་གྲགས་པར་འགྱུར།། དེ་བཞིན་བསླབ་པར་དག་པར་གྱིས། ། ཚོགས་ཆེན་གཅིག་གི་བསོད་ནམས་ནི།། སྐྱེ་ལ་ཉན་ཐོས་བསམ་ཡས་ལ།། སྦྱིན་པའི་ཚོགས་ཆེན་སྤེལ་བས་ནི།། འབུམ་གྱི་ཆར་ཡང་མི་ཕོད་དོ།། ཅི་ཕྱིར་ཞེན་གཅིག་མཉེས་པས།། རྒྱལ་བ་ཐམས་ཅད་མཉེས་པ་ཡིན། ། ནམ་མཁའ་ཁྱབ་པའི་རྒྱལ་བ་དང།། ཉག་གཅིག་སྣང་བའི་རྒྱལ་བ་གཉིས།། སོ་སོ་མ་ཡིན་ཐ་མི་དད།། སྐུ་དང་གསུང་ཐུགས་གཅིག་ལས་མེད།། འདུལ་བའི་ངོ་གང་ཁྱད་པར་ལས།། བསམ་གྱིས་མི་ཁྱབ་བསྟན་པར་ཟད། ། དེ་ན་ཁྱད་པར་དེ་ལྟར་སྣང།། དེ་ཡང་ཇི་ལྟ་བུ་ཞེ་ན།། ལས་རྣམས་དག་པའི་བྲམ་ཟེ་ནི།། དགེ་ལྡན་གསལ་ལྡན་བྱ་བ་གཉིས།། དགའ་བའི་དད་པ་སོ་སོར་སྐྱེས།། གཅིག་ལ་གཅིག་ནི་ཐ་ཚིག་བྱས། ། གཅིག་གིས་ཉན་ཐོས་བསམ་ཡས་ལ།། མཆོད་སྦྱིན་བྱ་བ་རྒྱ་ཆེར་བྱས།། གཅིག་གིས་ཚོགས་མཆོད་རྒྱ་ཆེར་བྱས།། ཚོགས་ལ་སྤྱོད་པའི་གསལ་ལྡན་ནི།། འདི་ཚེ་གཅིག་ལ་མངོན་སངས་རྒྱས།། སྦྱིན་པ་སྤེལ་བའི་དགེ་ལྡན་ནི། ། བསྐལ་པ་གྲངས་མེད་གསུམ་གྱིས་གྲུབ།། དེ་བས་གནས་འདིར་སྤྱོད་པ་དག། རྣལ་འབྱོར་གསལ་ལྡན་ཚུལ་བཞིན་སྤྱོད།། འདི་དག་རྟག་ཏུ་སུ་འཆང་བ།། རྡོ་རྗེ་སེམས་དཔའ་ལ་སོགས་པའི། ། ཆེ་ཡོན་རྟག་ཏུ་ཅི་འདྲ་བར།། དོན་གྱི་གཟུགས་དང་བཅས་པར་འཐོབ།། དེ་ཡང་ཇི་ལྟ་དུ་ཞེ་ན།། ཁྱིམ་བདག་མེས་སྦྱིན་བྱ་བ་དེ།། ཚོམ་བུ་བརྒྱ་དང་བཅས་པ་ཞིག། རྒྱུན་གྱི་རྟག་པར་འདི་སྤྱད་པས།། སངས་རྒྱས་རྡོ་རྗེ་སེམས་དཔའ་ནི། ། འཁོར་དང་བཅས་པ་ཅི་འདྲ་བར།། སྐྱེ་བ་དེ་ཡིས་ངེས་པར་ཐོབ།། སྐུ་དང་གསུང་ཐུགས་རྡོ་རྗེ་ཡི།། དོན་དུ་ངེས་པར་སྒྲུབ་པའི་ཚོགས།། རྟོགས་ནས་སྨྲ་བར་གང་བྱེད་པ།། གོམས་དང་བརྗོད་དང་སྨོས་པ་ཡིས། ། ཆོས་ཀྱི་རྒྱལ་པོར་དེ་འགྱུར་ཞིང།། ཡོན་ཏན་སྤྱི་གཙུག་ཉིད་དུ་འགྱུར།། དེ་ཡང་ཇི་ལྟ་བུ་ཞེ་ན། དྲང་སྲོང་རྣལ་འབྱོར་ཀལ་ཡ་ནས།། དྲང་སྲོངས་རྣམ་པ་མང་པོ་ལ།། ཚོགས་འདི་ཡོན་ཏན་རྒྱ་ཆེར་བསྒྲགས། ། དོན་རྣམས་ངེས་པར་བཤད་པ་ལས།། དྲང་སྲོང་མང་པོས་རིག་འཛིན་ཐོབ།། སྟོན་པར་བྱེད་པའི་ཀལ་ཡ་ན།། གསང་བདག་ཆོས་ཀྱི་རྒྱལ་པོར་གྱུར།། འོན་ཏང་གསང་བའི་དོན་འདི་དག། སྣོད་དང་ལྡན་པའི་འགྲོ་བ་ལ། ། བསྟན་ཏམ་བཤད་དམ་བརྗོད་པར་གྱིས།། དེས་ནི་ཡོན་ཏན་ཆེན་པོ་དང། ང་ཡི་སྤོབས་པ་འཐོབ་པར་འགྱུར།། དེས་ན་འདུས་པ་ཆེན་པོའི་ཚོགས།། རྒྱལ་བ་ཀུན་གྱི་ཐུགས་དམ་ནི། ། རྣལ་འབྱོར་གསང་བའི་ཚོགས་འདི་ཡིན།། རྣལ་འབྱོར་གང་ཞིག་བློ་ལྡན་པས།། སྐད་ཅིག་ཙམ་མམ་ཐང་ཅིག་ལ།། རྒྱལ་བའི་ཚོགས་འདི་རབ་བསྐྲུན་ན།། རྒྱལ་བ་སངས་རྒྱས་ཐམས་ཅད་དང།། རིག་འཛིན་རྣལ་འབྱོར་མཐའ་དག་དང། ། ཐ་ཚིག་ཟབ་མོ་སྐོངས་ནས་ཀྱང།། ཆོས་ཀྱི་མིག་ནི་ཐོབ་པར་འགྱུར།། དེ་ནི་ཚོགས་སྤྱད་ཡོན་ཏན་དང།། ལོག་པར་སྤྱད་པའི་སྐྱོན་རྣམས་ནི།། སྔོན་བྱུང་གླེང་གཞི་བཤད་པ་ཡིན།། ཞེས་སེམས་དཔའི་རྡོ་རྗེས་གསུངས་སོ། ། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འདས་པ་སྔོན་བྱུང་གི་ལེའུ་ཞེས་བྱ་སྟེ་བདུན་པའོ།།།། དེ་ནས་བཅོམ་ལྡན་འདས་སེམས་དཔའི་རྡོ་རྗེ་དེ་བཅོམ་ལྡན་འདས་གསང་བ་མཆོག་གི་བདག་པོ་དེའི་ཞལ་དུ་ཤིན་ཏུ་རེ་ཞིང་བཀའ་སྡོད་པའི་ཚུལ་གྱིས་ལྟ་ཞིང་ཀུན་དུ་བརྗིད་པར་འཁོར་གྱིས་བསྐུལ་བའི་ས་ལ་སྟ་གོན་དུ་གནས་ཤིང་ཅང་མི་སྨྲ་བར་གྱུར་ཏཽ། ། དེ་ནས་འཁོར་ཕལ་པོ་ཆེས་རྣམ་པར་བསྐུལ་བར་རིག་ནས་རྣལ་འབྱོར་གྱི་ཕྱག་ལུས་ཀུན་ས་ལ་བརྡབས་ནས་ཨ་ལ་ལ་ཧོ་ཞེས་བྱ་བའི་སྒྲ་ཕྱུང་ནས་མགྲིན་གཅིག་ཏུ་གསོལ་བ་བཏབ་པ། ། ཨེ་མ་རྡོ་རྗེ་སེམས་ཆེན་པོ། ། རང་རིག་མཁྱེན་པའི་ཡེ་ཤེས་འབར།། མགོན་པོ་ཡོན་ཏན་བསམ་ལས་འདས།། རྒྱལ་ཐོབ་ཁྱོད་ལ་ཕྱག་འཚལ་ལོ།། ཨེ་མ་རང་སྣང་དབྱེར་མེད་སྐུ?།། རྣམ་དག་བསོད་ནམས་མཚན་གྱིས་བརྒྱན།། དཔེ་བྱད་འབྲུ་བཀོད་བལྟ་མི་ངོམས། ། སྐུ་ལྔའི་མཆོག་ལ་ཕྱག་འཚལ་ལོ།། ཨེ་མ་རྣམ་དག་ནམ་མཁའི་དབྱིངས།། གཅིག་གསུང་སྣ་ཚོགས་སྒྲར་རིག་མཁྱེན།། བསམ་འདས་བརྗོད་མེད་རྡོ་རྗེའི་གསུང།། གསུང་ལྔའི་མཆོག་ལ་ཕྱག་འཚལ་ལོ། ། ཨེ་མ་གསང་བ་ནམ་མཁའི་ཐུགས།། མཉམ་ཉིད་མི་གཡོ་སོ་སོར་གསལ།། ཀུན་རིག་སྙིང་པོ་ཡེ་ཤེས་མཆོག། ཐུགས་ལྔའི་མཆོག་ལ་ཕྱག་འཚལ་ལོ།། ཨེ་མ་མི་མཛད་མཛད་པ་ཆེ།། མ་ཆགས་ཆགས་བྲལ་འདོད་ཆགས་མཛོད། ། ཐམས་ཅད་སྒྲོལ་བའི་ལས་ཆེན་པོ།། ཕྲིན་ལས་མཆོག་ལ་ཕྱག་འཚལ་ལོ།། རྒྱལ་ཚབ་ཁྱོད་ལ་གསོལ་བ་ནི།། བྱམས་མགོན་ཐུགས་རྗེའི་བྱིན་བརླབས་ཀྱིས།། སྤྲུལ་པའི་གོ་ཚགས་རུ་མཉམ་སྟེ། ། འཁོར་བའི་སྐྱས་ལིངས་ཆེན་པོ་ལ།། སྡུག་བསྔལ་ཤིན་ཏུ་གསད་པའི་ཕྱིར།། ཐམས་ཅད་དུར་ཁྲོད་ཆེན་པོ་རུ།། བྱིན་གྱིས་བརླབས་པའི་ལས་ཆེན་མཛོད།། ཨ་ཧོ་ཞེས་གསོལ་བ་བཏབ་པ་ལས། སེམས་དཔའ་རྡོ་རྗེ་ཆེན་པོ་དེས་རྣལ་འབྱོར་པའི་ཕྱག་བྱས་ནས། ། བཅོམ་ལྡན་འདས་གསང་བ་མཆོག་གི་བདག་པོ་ལ་ཞུས་པ།། ཨ་ལ་ལ་ཧོ་བདེ་བ་ཆེན་པོའི་མཆོག་གསང་བ་ཀུན་གྱི་རྒྱལ་པོ། ཡང་གསང་བླ་ན་མེད་པའི་བདག་ཉིད། འདུས་པ་ཆེན་པོའི་ཚོགས་རྨད་དུ་བྱུང་བའི་ཚིག་ཤིན་ཏུ་རྟུལ་ཕོད་པ་གསོལ་བ་འཆལ་བ་འདི་ཤིན་ཏུ་ངོ་མཚར་ལགས་སོ།། འདི་དག་འདུལ་བའི་དབང་དུ་དགོངས་ཏེ། ཇི་ལྟར་འཚལ་བའི་བསམ་པ་རངས་པར་མཛད་དུ་གསོལ་ཞེས་གསོལ་བ་བཏབ་པ་ལས། བཅོམ་ལྡན་འདས་གསང་བ་མཆོག་གི་བདག་པོ་དེས་ཀུན་དུ་འདུལ་བའི་འདུས་མཁྱེན་ནས་བཀའ་གསང་རྨད་དུ་བྱུང་བའི་འཁོར་གྱིས་བསྐོར་བ་དུར་ཁྲོད་རྒྱན་གྱི་རོལ་པ་ལས་རྨད་དུ་བྱུང་བའི་ཏིང་ངེ་འཛིན་ལ་སྙོམས་པར་ཞུགས་སོ། ། སྙོམས་པར་ཞུགས་ནས་འཁོར་བྱིན་གྱིས་རློབ་པའི་ཚིག་འདི་གསུངས་སོ།། ཧཱུ~ཾ་ཧེ་ཧེ་ཕཊ། ཧཱུ~ཾ་ཧཱུ~ཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜལ་ལ་ཨཱ་ར་ལི་ཨ་ལི་ཨུ་ལི་ཏ་པ་ལི་ཏྲ~ཾ་སྟྭ~ཾ། ཁ་ལི་ཧོ། ན་ཤ་སྟ~ཾ་བྷ་ཡ་ཧཱུ~ཾ། བྲུ~ཾ་ཕུ་ཙ་ཁ་ཧི་ཕཊ་ཕཊ་ཧ་ལ་ཧཱུ~ཾ་ཞེས་གསུངས་སོ།། འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཐམས་ཅད་དུར་ཁྲོད་ཀྱི་དཀྱིལ་འཁོར་དུ་གྱུར་ནས། གཡོས། རབ་ཏུ་གཡོས། ཤིན་ཏུ་རྣམ་པར་འཐོར་རོ།། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་སེམས་དཔའ་རྡོ་རྗེའི་སྙིང་པོ་ལ་འཁོར་གཞན་གྱིས་ཡིད་ཚོད་དུ་མི་འགྱུར་བའི་སྐུའི་ཆོས་བསྟན་པ་ནི་སྐུ་ཀུན་དུ་དུར་ཁྲོད་ཀྱི་བདག་པོ་ཆེན་པོར་བསྒྱུར་ནས་དུར་ཁྲོད་ཀྱི་གནས་བརྒྱད་དང། ། ཧེ་རུ་ཀའི་གནས་བཅུ་དང།། དཔལ་གྱི་ཆས་བརྒྱད་དང།། དུར་ཁྲོད་ཀྱི་རྒྱན་ཆེན་པོ་དགུ་དང། དོན་གྱི་རྟགས་ཆེན་པོ་བཅོ་བརྒྱད་དང། ། དུར་ཁྲོད་ཀྱི་ལོངས་སྤྱོད་སྣ་ཚོགས་པ་བསྟན་པས་ཞལ་འཛུམ་པའི་མདངས་ཀྱིས་གཟིགས་པ་ལས་སཻམས་དཔའ་རྡོ་རྗེ་དེས་མཁྱེན་ཏེ།། བཀའ་གསང་དབང་ཆེན་འདིས་དོན་དུ་ནི་བཤད། ཚིག་ཏུ་བསྒྲགས་པར་རིག་ནས་འདུས་པའི་ཚོགས་ལ་ཤིན་ཏུ་ལྡེམ་དགོངས་ཀྱི་ཚིག་ཏུ་སྨྲས་པ།། བཀའ་གསང་རྨད་བྱུང་ཆེན་པོ་འདི་སྦས་པས་ཟབ་ཅིང་རྟོགས་དཀའ་བ།། མཚོན་པས་དོན་འབྱིན་མི་ཤེས་པས། ། ཉོན་མོངས་རང་དགའ་སྤྱོད་སྙམ་པའི།། ཤིན་ཏུ་བྱིས་པའི་བློ་ཞན་པའི།། ངེས་པའི་ཤེས་རབ་མིག་ལྡོངས་ཏེ།། དོན་གྱི་རྩལ་ཤུགས་ཆུང་བ་ཡིས།། དགའ་བདེའི་ལོངས་སྤྱོད་བསྐྲུན་སྙམ་ནས།། མཚན་མ་རང་དགར་སྤྱད་བསྒྲུབས་ཀྱང། ། རང་བཞིན་འགྲུབ་པར་མི་འགྱུར་ཏེ།། རྒྱུད་ཕུང་འབྲས་བུ་ཚིག་གྱུར་ནས།། མྱུ་གུ་བརླག་སྟེ་ག་ལ་འབྱུང།། གཏན་ཚིག་དེ་བས་འདི་དོན་དག། རྩལ་ཞན་དག་ལ་བསྟན་མིན་ཞེས། ། གསང་བདག་རྒྱལ་པོ་ཀུན་གསུང་ན།། ཅི་ཁྱོད་རྣམས་ཀྱིས་མི་ཤེས་སམ།། ཞེས་རྣམ་པར་སྨྲས་པ་ལས།། འདུས་པའི་ཚོགས་ཀྱིས་སླར་གསོལ་པ།། ཨེ་མའོ་སེམས་དཔའ་ཆེན་པོ་དེ་ལྟ་བུའི་རྒྱུ་ཚིག་ཆེན་པོ་དག་འཁོར་གྱི་དཀྱིལ་འཁོར་གྱི་ནང་དམ་པ་འདིར་གསུང་ངམ། འོན་ཏེ་མི་སྤྱོད་དམ་ཅང་མ་ལགས་གྲང། ཅི་བླང་དོར་མཛད་དམ། ཨེ་མ་སྣོད་དུ་མ་གྱུར་པ་ནི་གང་མཆིས། ཐམས་ཅད་བྱང་ཆུབ་ཀྱི་སྙིང་པོ་ཅན་ལགས་ན། ཐོང་ཀུན་རབ་ཏུ་ཐོང། རྣམ་པར་རབ་ཏུ་གསུངས། འགག་པ་མི་མངའ་མི་འགོག་གསུངས།། ཅི་ཕྱིར་མི་གསུང་ཐོགས་མེད་སྲས།། རྒྱལ་བའི་སྲས་པོ་དུས་འདི་ལགས།། གསང་བའི་སྙིང་པོ་སྣོད་འདི་ལགས། ། བཀའ་གསང་དཀྱིལ་འཁོར་གནས་འདི་ལགས།། གསང་བའི་དུར་ཁྲོད་ཚུལ་འདི་ལགས།། སྙིང་རྗེ་ཞེར་སེམས་ཁྱཽད་ལ་འདུད།། གསང་བ་ཡང་གསང་ཁྱོད་ལ་འདུད།། གསང་བ་ཡེ་གསང་ཁྱོད་ལ་འདུད། ། དཀྱིལ་འཁོར་རྒྱལ་པོ་ཁྱོད་ལ་འདུད།། འཁོར་ལོ་སྙིང་པོ་ཁྱོད་ལ་འདུད།། གསང་ཆེན་སྙིང་པོ་ཚུལ་ཅི་ལགས།། བཀའ་གསང་དཀྱིལ་འཁོར་ཐབས་ཅི་ལགས།། འབྲས་བུ་བདེ་བའི་དོན་ཅི་ལགས།[་]མ་འོངས་པ་ཡི་རྣལ་འབྱོར་དག། བསྒྲུབས་ན་དང་ལེན་འཚལ་བ་ཡི།། རིག་པར་འགྱུར་བའི་ཐབས་ཅི་ལགས།། འབྱུང་ཆེན་རྒྱལ་པོས་བཤད་དུ་གསོལ།། ཞེས་གསོལ་བ་བཏབ་པ་ལས།། སེམས་དཔའ་རྡོ་རྗེ་དམ་པ་དེ་ཤིན་ཏུ་བཞད་པ་ཆེན་པོས་རྣམ་པར་བཞད་དེ། ། ཨ་ཨ་ཧེ་ཧེའི་གད་རྒྱངས་བསྒྲགས་པས་འཁོར་ཐམས་ཅད་ཀྱང་གད་རྒྱངས་གྱི་སྒྲ་ཆེན་པོ་སྒྲོགས་པར་མཛད་དེ།། དགྱེས་པའི་འོད་ཟེར་ལས་ཤེས་རབ་ཀྱི་དཔལ་དེ་དགྱེས་པའི་རོལ་མོ་སྣ་ཚོགས་ལིང་ལོང་ཕྱད་པར་བྱུང་ངོ། ། དེ་ནས་སེམས་དཔའི་རྡོ་རྗེ་དམ་པ་དེ་ལུས་ཀུན་བསྲང་སྟེ། དུར་ཁྲོད་ཀྱི་ཆས་སྣ་ཚོགས་བསར་ཞིང་རྟགས་བཅོ་བརྒྱད་འབར་བར་བྱས་ནས་བརྗིད་པའི་གསུང་གིས་གསང་སྔགས་རྒྱ་མཚོ་དང། རྣམ་གྲངས་སྣ་ཚོགས་དོན་གྱི་བསྒྲུབ་པ་རྟགས་ཀྱི་རོལ་པ་གསང་བའི་དཀྱིལ་འཁོར་ཆེན་པོ་འདི་དག་བཤད་དོ།། གཅིག་ཏུ་ཡང་དག་ངེས་གྲུབ་པའི།། དོན་ལ་རྟོན་བྱེད་རྣལ་འབྱོར་རྣམས། ། ཐོགས་མེད་ཉིད་དུ་འགྲུབ་འདོད་པ།། ཇི་ལྟར་བཙོ་བླག་མཁན་དག་གིས།། རས་དཀར་སྦྱངས་པས་ཚོན་འཇེན་ལྟར།། རྣལ་འབྱོར་ལས་རྣམས་དང་པོར་ནི།། སྐོངས་དང་སྦྱོང་བའི་ལས་རྣམས་གཅེས། ། ཟབ་མོར་འཇུག་པའི་སྔོན་ལོགས་ནས།། སེམས་ཉིད་གཏིང་ནས་ཚར་གཅད་ཕྱིར།། ཐེག་པ་དམན་པའི་སྐྱེ་བོ་དང།། ལྷན་ཅིག་ཅི་ལའང་མི་བརྣལ་ལོ།། དེ་ལས་གྱུར་པའི་ཡོ་བྱད་དག། རུས་སྦལ་མགོ་ལ་འོངས་པ་དག། ཤིན་ཏུ་འཁྲུགས་པའི་སེམས་ཆེན་གྱིས།། རྒྱ་མཚོས་བཤུགས་ཏེ་སྤང་བར་བྱ།། གལ་ཏེ་གང་ཟག་དབང་གིས་ན།། ཉམས་པའི་ཆད་པར་བྱུང་བ་ན། མགོན་ཚུན་ཆོས་ཉིད་ཆུ་ཕབ་ནས།། སྐོང་ཟློག་ཆོ་ག་རྒྱ་ཆེར་བྱ། ། སྒྲུབ་རྩོམ་སྔོན་ནམ་ཡང་སྔོན་ནམ།། ཞག་གྲངས་དག་གི་སྔོན་ལོགས་ནས།། སྡིག་སྦྱངས་བྱང་ཆུབ་སེམས་བསྐྱེད་དེ།། དགེ་བའི་དོན་ལ་འདུན་པར་བྱ།། སློང་མོ་དང་སློང་ལ་དགའ་བ།། སློང་ལ་འཚོ་བའི་ཚེ་སྤྱོད་རྣམས། ། སྡེ་དང་ཚན་དང་གྲར་བྱས་ཏེ། སྙིང་རྗེ་ལུད་པའི་ཞིང་དུ་བྱ།། སྨན་དང་འབྲུ་དང་རྩི་རྣམས་དང།། བཅུད་ཀྱི་མཆོག་ཏུ་གྱུར་པ་དག། བཏགས་སམ་ཕྱེ་མར་སྦྱར་ནས་ཀྱང།། ཀླུང་ངམ་ཆུ་ཀླུང་མཚོ་ཆེན་དུ། ། དོར་ཏེ་ཆགས་མེད་སྤྱིན་པར་བྱ།། དགེ་བའི་ཡོན་བདག་དང་བླངས་ཏེ།། ནད་གསོ་ཤེས་སློབ་སྤྱོད་སྒོམ་གྲཝ།། གཙུགས་ཏེ་བསྟི་གནས་མཆོག་བྱ་ཞིང།། དུས་ཀྱི་འཁོར་ལོའི་མཆོད་ཆེན་བྱ།། གསུང་སྒྲ་རྒྱ་མཚོ་སྒྲོགས་པ་ཡི། ། གླེགས་བམ་ཟབ་མོ་ཀུན་བསྟེན་ཏེ།། བརྗོད་དང་བསྙེན་བཀུར་བསྟི་གནས་ཀྱིས།། རྒྱ་ཆེན་ཡངས་པའི་ལས་རྣམས་བྱ།། ཡེ་ཤེས་ཚོགས་རྣམས་རྫོགས་བྱའི་ཕྱིར།། ཤེས་རབ་ཚོགས་ཀྱི་སྦྱིན་མཆོག་དག། བསྟན་ཏམ་གླེགས་བམ་ལ་སོགས་པའི།། བློ་མཆོག་ལྡན་པ་རྣམས་ལ་སྦྱིན།། བསྒོམ་དང་གོམས་པར་བྱ་བ་ཡིས།། ཀུན་གཞི་དག་པར་བྱ་བའི་ཕྱིར།། ཏིང་འཛིན་བྱེ་བ་མང་པོ་ལ།། བློ་མཆོག་ཡིད་ཀྱི་རྩལ་དེ་སྤྱད། ། ཆོས་ཀྱི་འཁོར་ལོ་རབ་བསྐོར་ཏེ།། རྒྱུད་སྦྱང་ལྷག་པའི་ཤེས་རབ་བལྟ།། ཤོ་གམ་སྲང་དང་ཤོ་གམ་ལམ།། མི་བདེའི་གནོད་པ་ཀུན་གསལ་ཏེ།། ཚད་མེད་སྙིང་རྗེའི་འཁོར་ལོ་བསྐོར།། སྦྱིན་པའི་འཁོར་ལོ་རྒྱུན་མི་གཅད། ། ཆུ་འམ་སའམ་ནམ་མཁའ་འམ།། མེ་འམ་དེ་བཞིན་རླུང་རྣམས་ལ།། སྐུ་གདུང་སྤེལ་མཆོད་རིང་བསྲེལ་རྣམས། བརྩམ་པའི་ལས་ཆེན་འཁོར་ལོ་བྱ།། མཚན་མེད་ཟློག་པར་བྱེད་པ་ཡི།། ལུས་སེམས་རྒྱུད་ལ་རྡུལ་རླགས་ཏེ། ། འཕགས་པའི་སྤྱིན་ཚོགས་ཕོ་བྲང་དུ།། རྡུལ་སྙེད་ལུས་ཀྱིས་མཆོད་སེམས་བཤགས།། རྒྱལ་མཉེས་ལས་ནི་གྱིས་ཤིག་པ།། ཐམས་ཆེན་སྦྱོང་པའི་ལས་ཆེན་ལས།། རྣམ་བཞི་མེ་ཡི་ལས་མཆོག་བྱ། ། དེས་ནི་མཚམས་མེད་ཟློག་པ་ཡིན།། ཐུགས་རྗེ་འབྱུང་བའི་འཁོར་ལོ་དག། གང་ལྟར་གོམས་ལྟར་འབད་རྩོལ་བྱ།། བསྟན་པ་སྐྱོང་བའི་ཚོགས་རྣམས་ལ།། སྦྱིན་མཆོད་སྤེལ་བའི་ལས་རྣམས་བྱ།། དེ་ལ་སོགས་པའི་དགེ་བའི་ཚོགས། ། དོན་དུ་མི་འགྱུར་ཀུན་སྤངས་ལ།། ནན་ཏན་ཚོགས་ཀྱི་དཔུང་ཆེན་བསྐྱེད།། འདི་ལྟར་ལས་ཆེན་ལྟང་སོགས་པ།། གཞན་དུ་བསྐྱེད་པ་མ་ཡིན་ཏེ། རྩེ་གཅིག་དོན་ལྡན་རྣལ་འབྱོར་པ། ། རྒྱུད་ལྡན་སྣོད་ལྡན་བྱ་ཕྱིར་དང།། གལ་ཏེ་རྩལ་ཞན་མ་གྲུབ་ན།། དགེ་བསགས་ལྟང་ཆེན་ཀུན་བསྡོམས་ཏེ།། ལས་ཀྱི་བསགས་པ་དོན་བགྲངས་ཤིང།། གདུང་བའི་ཤུགས་ཕྱུང་རྩལ་སྤྲུགས་ནས།། ཉི་ཤར་ཆུ་ཀླུང་ཟླ་བརྙན་ལྟར། ། རང་བཞིན་ཤུགས་ཀྱིས་འགྲུབ་པར་གཅེས།། དེ་ཕྱིར་ཕྲ་མོ་ཡན་ཆད་ཀྱང།། བདག་གི་དོན་དུ་འགྱུར་བར་བྱ།། དེ་ལྟར་སྤྱད་པ་སྤྱོད་ཡི།། ཕྲ་མོའི་རྣལ་འབྱོར་བློ་འཕེལ་བ།། ཆུང་ངུ་ཆུང་སོགས་མཐར་ཟང་ནས། ། སྐོང་པའི་རྣལ་འབྱོར་འཁོར་ལོ་ཡིས།། ཞིག་དང་རལ་དང་ཆགས་འདྲེས་དག། བསྐང་གསོ་གཞུག་པའི་ལས་འདི་བྱ།། ལས་ཆེན་སྐོང་པའི་ཁྱད་པར་གྱིས།། གནས་སུ་བརྟག་པར་ངེས་མེད་དེ།། མི་སྡུག་སྐྱོན་ཅན་བཀྲ་མི་ཤིས། ། སྤངས་ཏེ་མེད་པར་གྱུར་པ་ཡི།། ཤིན་ཏུ་སར་པའི་གནས་ཆེན་དག། བསྐང་པའི་གནས་སུ་དེ་འགྱུར་རོ།། དེ་ལྟར་ཡིད་འོང་གནས་བཙལ་ནས།། དྲོད་ལྡན་བླ་མ་སྤྱན་དྲངས་ཏེ།། སྲི་ཞུ་རྒྱལ་ཆོས་སྤྱི་བོར་བཀུར། ། དེ་ཡང་དམིགས་ཀྱིས་ཞུ་བ་དག། མཎྜལ་ཁར་བསིལ་ཙམ་དག་ལ།། མེ་ལོང་སྙིང་པོར་ལྟར་བྱས་ཏེ།། གཙང་མའི་རྒྱུ་ལས་རྫས་བྱས་པ།། ཡིད་འོང་རྣམ་ལྔའི་མཆོད་པ་ལ། ། རྐྱེན་གྱི་རྣལ་འབྱོར་སྣ་ཚོགས་ཀྱིས།། བརྒྱན་ཏེ་བཀླུབས་པའི་སྤྲིན་ཕུང་རྣམས།། མཉེས་ནས་སྐོང་ཕྱིར་རྒྱལ་ལ་དབུལ།། ཕྱི་འཁོར་སྐྱོང་པའི་མགོན་པོ་ལ།། འདོད་ཡོན་ལྔ་ལ་སོགས་པ་ཡི།། ཡིད་བཞིན་ལོངས་སྤྱོད་རྐྱེན་དང་བཅས། ། ཡོན་ཏན་ཆ་ལས་སྨོན་བཅོལ་མཆོད།། མཉེས་ནས་སྐོངས་པའི་སྟོངས་སུ་འགྱུར།། ཁམས་གསུམ་སྙིང་རྗེའི་གནས་རྣམས་ལ།། ཡོ་བྱད་སྦྱིན་ཚོགས་ཆེན་པོ་ལས།། འདོད་པའི་བསམ་པ་རངས་བྱས་ན། ། མགུ་བས་སྐོངས་བའི་སྟོངས་སུ་འགྱུར། བགེགས་སུ་གྱུར་པའི་གེགས་རིས་ཀྱང།། མཉམ་པའི་དོན་གྱིས་སེམས་མི་དབྱུང།། དམིགས་ཀྱིས་ཁ་ཟས་སྣ་ཚོགས་ལས།། བགེགས་རྣམས་མགུ་ན་ཐམས་ཅད་ཀྱང། ། མཉམ་པའི་དོན་གྱིས་སྐོངས་པའི་རྒྱུར།། ཅུང་ཟད་ཙམ་དུ་སྣང་བ་ཡིན།། དེ་ལྟར་སྐོངས་པའི་ལས་རྣམས་ཀྱིས།། བསྐང་བར་བྱ་བའི་དམིགས་རྣམས་ནི།། རྣམ་པ་ལྔར་ནི་སྣང་བ་སྟེ།། ཀུན་དུ་ཉམས་པ་ཆེན་པོ་དང། ། རྩ་བ་ཉམས་དང་ཡན་ལག་ཉམས།། དེ་བཞིན་ཟླས་ཉམས་ཞར་ཉམས་ལྔ།། བསྐང་བའི་ཐབས་ཀྱང་ལྔ་ཡོད་དེ།། སྤྱད་པའི་ལས་ཀྱིས་བསྐང་བ་དང།། རྫས་དང་དོན་དང་ཏིང་འཛིན་དང།། མན་ངག་གསང་བའི་ཐབས་ཆེན་ནོ། ། དེ་དག་ལ་ཡང་ལྔ་ལྔ་སྟེ།། སྤྱོད་པའི་ཚུལ་གྱིས་བསྐང་བ་ལ།། རྣམ་པར་ལྔ་རུ་བཤད་པར་བྱ།། དང་པོ་འབུམ་ལྔ་ཁྲི་གསུམ་སྟེ།། རྩ་ཉམས་ཁྲི་ལྔ་སྟོང་གསུམ་མོ།། ཡན་ལག་ཉམས་པར་གྱུར་པ་ལ། ། སྟོང་ལྔ་བརྒྱ་གསུམ་ཐོན་པར་བྱ།། བཟླས་ཉམས་བརྒྱ་ལྔ་བཅུ་གསུམ་མོ།། ཞར་གྱིས་ཉམས་པར་གྱུར་པ་ལ།། བཅུ་ལྔ་གཅིག་གསུམ་དག་གིས་སྐོངས།། རྫས་ཀྱིས་བསྐང་བའི་ཐམས་མཆོག་ནི།། གལ་ཏེ་བསྲུང་བ་འགའ་ཞིག་ལས། ། བྱང་ཆུབ་ཚ་ཐིག་རལ་གྱུར་ན། གཏི་མུག་རིགས་ཀྱི་ཐ་ཚིག་བསྐང།། དམངས་རིགས་བླ་མ་སྤྱན་དྲངས་ལ།། ཉེས་འགལ་མི་བཅབ་སྟོང་དུ་བཤགས།། གསེར་ལ་སོགས་པའི་རྫས་ཆེན་གྱིས། ། ཐ་ཚིག་གང་བརླག་ནོར་དེས་བླུ།། བྱང་ཆུབ་སེམས་བསྐྱེད་རྒྱུད་སྦྱང་མཉན།། རྡོ་རྗེ་ཐ་ཚིག་རལ་གྱུར་ན།། ཞེས་སྡང་རིགས་ཀྱི་ཐ་ཚིག་བསྐང།། རྗེའུ་རིགས་བླ་མ་སྤྱན་དྲངས་ཏེ།། ཉེས་བྱས་མི་བཅབ་འབུམ་དུ་བཤགས། ། ཤེལ་ལ་སོགས་པའི་རྫས་ཆེན་གྱིས།། ཐ་ཚིག་གང་བརླག་ནོར་དེས་བླུ།། བསམ་གཏན་ཏིང་འཛིན་བསྒོམ་བརྩོན་བྱ།། རིན་ཆེན་ཐ་ཚིག་ཉམས་གྱུར་ན། ང་རྒྱལ་རིགས་ཀྱི་ཐ་ཚིག་བསྐང།། རྒྱལ་རིགས་བླ་མ་སྤྱན་དྲངས་ཏེ། ། ཉེས་བྱས་མི་བཅབ་བརྒྱད་ཁྲིར་བཤགས།། བཻཌཱུར་ལ་སོགས་རྫས་ཆེན་གྱིས།། ཐ་ཚིག་གང་བརླག་ནོར་དེས་བླུ།། སྐུ་གདུང་རིང་བསྲེལ་རྣམ་པར་སྤེལ།། པདྨའི་ཐ་ཚིག་རལ་གྱུར་ན།། འདོད་ཆགས་རིགས་ཀྱི་ཐ་ཚིག་བསྐང། ། གདོལ་རིགས་བླ་མ་སྤྱན་དྲངས་ལ།། ཉེས་བྱས་མི་བཅབ་བརྒྱར་བཤགས་བྱ།། བྱི་རུ་ལ་སོགས་རྫས་ཆེན་གྱིས།། ཐ་ཚིག་གང་བརླག་ནོར་དེས་བླུ།། བཤད་བྱ་ཟབ་མོའི་གླེགས་བམ་བརྗོད། ། ལས་ཀྱི་ཐ་ཚིག་རལ་གྱུར་ན།། ཕྲ་དོག་རིགས་ཀྱི་ཐ་ཚིག་བསྐང།། བྲམ་ཟེ་རིགས་བཤེས་སྤྱན་དྲངས་ལ།། ཉེས་བྱས་མི་བཅབ་བཅུ་ལྔར་བཤགས།། ཨིནྡྲ་ལ་སོགས་རྫས་རྣམས་ཀྱིས།། ཐ་ཚིག་གང་བརླག་ནོར་དེས་བླུ། ། མཆོད་སྦྱིན་བསོད་ནམས་ལས་ཆེན་བྱ།། དེས་ནི་བསྐང་བའི་ལས་ཆེན་འགྲུབ།། དོན་གྱིས་བསྐང་བའི་ཐབས་མཆོག་ཀྱང།། རྣམ་ལྔའི་ཚུལ་དུ་བཤད་པར་བྱ།། ཆོས་ཀུན་ནམ་མཁར་བསྒོམས་ནས་ཀྱང། ། བག་ཆགས་བཟང་ངན་ཐམས་ཅད་ཀུན།། ཅི་ཡང་མེད་པར་བློ་ལ་བཞག། དེ་ལ་གོམས་བྱས་ཉེས་པ་མེད།། ཀུན་ལ་མཁས་པའི་བླ་མ་ལ།། རྒྱ་ཆེ་ཡངས་པའི་ཆོས་མཉན་ཏེ།། བསམ་པའི་ལས་རྣམས་རྒྱ་ཆེར་བྱ། ། ཡིད་ཀྱིས་དམིགས་པའི་ལས་དག་ན།། རྩ་བ་ཉམས་པ་སྐོང་བར་འགྱུར།། གལ་ཏེ་ཡན་ལག་ཉམས་གྱུར་ན།། ཆོས་ཉིད་ནམ་མཁའི་དོན་སྟོན་པའི།། གླེགས་བམ་ཟབ་མོ་ཀུན་བརྟགས་ཏེ།། དོན་རྣམས་རྒྱ་ཆེར་བརྟག་པར་བྱ། ། དེ་ནི་ཡན་ལག་ཉམས་པ་མེད།། བཟླས་ན་ཐ་ཚིག་ཉམས་གྱུར་ན།། བླ་མ་སྐྱེས་བུ་མཁས་པ་ལ།། གཞུང་ཆེན་ཚུགས་པའི་བསྟན་པ་ཞིག། སྟོན་པའི་ཡོན་བདག་གཉེར་བླངས་ཏེ།། བློ་ཡི་རྩལ་ཅན་ཀུན་བསྡུས་ཏེ། ། དམ་ཆོས་བདུད་རྩི་བསྟན་པར་བསྒྲགས།། གལ་ཏེ་ཞར་གྱིས་ཉམས་གྱུར་ན།། བསྟན་པའི་གླེགས་བམ་རྒྱ་ཆེན་རྣམས།། བྲིས་ནས་ཆོས་ཀྱི་སྦྱིན་པར་བྱ། དེས་ནི་ཞར་ཉམས་སྐོངས་པར་འགྱུར། ། ཏིང་འཛིན་རྩལ་གྱི་ཐབས་མཆོག་ནི།། བག་ཆགས་ཅན་གྱི་སྤྱི་གཙུག་ཏུ།། རྩ་དམར་འོད་ནི་མེ་ལོང་ཙམ།། ཤིན་ཏུ་འབར་ཞིང་འཆར་གསལ་བས།། ཆགས་དང་བཅས་པའི་ཕུང་པོ་བསྲེགས།། རྣམ་གྲོལ་སེམས་ཀྱི་རང་བཞིན་དང། ། འོད་ཀྱི་རང་བཞིན་གཅིག་པ་ལས།། དཀར་དང་དམར་དང་མཐིང་ག་ཡི།། འོད་ཀྱི་ཐིག་ལེ་གསུམ་དུ་འགྱུར།། དཀར་པོར་སྤྲོས་པས་ཁྱབ་པ་ཆེ།། དམར་པོར་སྤྲོས་པས་ཆགས་པ་ཆེ། ། མཐིང་ག་ཐུགས་ཀྱི་ས་བོན་ཏེ།། རྣམ་གསུམ་གཅིག་ཏུ་འདུས་པ་ལས།། ངག་ཡིད་གསུམ་གྱི་བག་ཆགས་བསྲེགས།། སྐུ་གསུང་ཐུགས་ཀྱི་དམ་ཚིག་སྐོངས།། དཀར་པོ་རླུང་ཟླའི་དཀྱིལ་འཁོར་ལ།། དམར་པོ་འབུད་པའི་རླུང་བྱུང་བས། ། མཚན་མའི་བག་ཆགས་རྣམ་པར་གཏོར།། དམར་པོ་ཆུ་ཟླའི་དཀྱིལ་འཁོར་ལས།། མཐོང་ག་ཡེ་ཤེས་ཆུ་བྱུང་བས།། དངོས་པོའི་ལྗན་ལྗིན་ཐམས་ཅདབཀྲུས།། དེ་ལྟར་གསལ་བར་གྱུར་པ་དང། ། རྣལ་འབྱོར་ཅན་གྱིས་ཚིག་འདི་བརྗོད།། རྫས་བསྲེག་པ་ལ་མེ་དགོས་ཀྱང་མ།། བག་ཆགས་ཚིག་ལ་མེ་མི་དགོས།། རིག་པ་ཡེ་ཤེས་མེ་བྱུང་བས།། མཚན་མ་ཡི་ནི་བུད་ཤིང་བསྲེགས།། འཇིག་རྟེན་གཏོར་ལ་རླུང་དགོས་ཀྱང། ། མཚན་མ་གཏོར་ལ་རླུང་མི་དགོས།། རིག་པའི་ཡེ་ཤེས་རླུང་བྱུང་བས།། མཚན་མའི་རྡུལ་ཚོགས་རྣམ་པར་འཕྱག། ལུས་བཀྲུ་བ་ལ་ཆུ་དགོས་ཀྱང།། སེམས་བཀྲུ་བ་ལ་ཆུ་མི་དགོས། ། མཉམ་ཉིད་ཆུ་བོ་ཁྲུས་ཀྱི་རྫིང།། ཡེ་ཤེས་ཆུ་བོའི་རྒྱུན་བྱུང་བས།། བག་ཆགས་ལྗན་ལྗིན་ཐམས་ཅད་བཀྲུས།། ཨོཾ་ཀྲོ་དྷི་ཤྭ་རི་སརྦ་པཱ་པ~ཾ་ཤོ་དྷ་ཡ་ཨོཾ་ཨཱཿཧཱུ~ཾ:ར~ཾ་ཡ~ཾ་ཁ~ཾ། དེ་སྐད་ཚིག་ཏུ་བརྗོད་པ་ཡིས།། ཉམས་པའི་ཆད་པ་མི་འབྱུང་ངོ། ། གཅིག་ཏུ་བསྐང་པའི་ལས་ཆེན་ཡང།། རིགས་ཀྱི་རྫས་དང་ཡོ་བྱད་རྣམས།། གནས་སུ་བསགས་ནས་བྱིན་བརླབས་ཏེ།། ཕྱི་ནང་མཚམས་བཅད་བརྟན་བྱས་ནས།། སོ་སོ་རིགས་ཀྱི་དམ་ཚིག་ལ། ། འགལ་བར་གྱུར་པ་གང་དང་གང།། མཆོད་དང་བཤགས་དང་གནོང་བཀུར་ཏེ།། ཡན་ལག་བརྒྱད་ཀྱི་ཚུལ་བཟུང་ནས།། བསམ་གཏན་གནས་སྦྱངས་རྫས་བསབ་པ།། གཏི་མུག་རིགས་ཀྱི་དམ་ཚིག་ལ། ། ཤེས་ནས་རྟོགས་པར་བྱ་རྒྱ་ལས།། མ་རིག་ལོག་པའི་མཐུ་ཡིས་ན།། ཐ་ཚིག་དྲག་པོ་ཡལ་གྱུ་ན།། ཕོ་བྲང་ནམ་མཁའི་ལིངྒ་ལ།། ཟླ་བའི་དཀྱིལ་འཁོར་དབུས་གནས་པར།། ཨ་ཡི་རང་བཞིན་འོད་གསལ་བར། ། གསལ་འཕྲོ་འཁྲུག་པར་གྱུར་པ་ན།། ཕཊ་ཀྱིས་དྲག་ཏུ་བརྡབས་པ་ཡིས།། འོད་འདྲིལ་བསྐལ་པའི་མཁའ་གསལ་བས།། གཏི་མུག་རི་བོའི་མུན་བསལ་ཏེ།། བྱང་ཆུབ་མྱུ་གུ་འབར་བར་འགྱུར།། དེ་ལྟར་གསལ་བར་གྱུར་པ་དང། ། རྣལ་འབྱོར་ཅན་གྱིས་ཚིག་འདི་བརྗོད།། ཨེ་མའོ་བདེར་གཤེགས་ཐ་ཚིག་ལས།། བྱང་ཆུབ་སེམས་བདེ་གསལ་འབར་བ།། དོན་དུ་མི་གཏོང་གཞི་བསྐྱེད་དེ།། སངས་རྒྱས་གདུང་ཆེན་རྒྱུན་སྙམ་ལས། ། ཇི་ལྟར་ཟླ་བ་ར་རི་ལྟར།། རྒྱུ་ལས་བྱུང་བའི་རང་བཞིན་ལས།། བྱང་ཆུབ་མྱུ་གུ་ནུབ་མ་ཁད།། གཟུགས་ཀྱི་ཕུང་པོའི་ཞིང་ཁམས་སུ།། བདེ་མཆོག་མཁའ་མཉམ་དབྱིངས་ཆེན་གསལ།། གཉེན་པོས་འཇོམས་པའི་ཐབས་ཆེན་ལས། ། བསྐང་ངོ་བསྐལ་པའི་ཐུགས་དམ་བསྐང།། གསང་བ་དོན་གྱི་རྫས་མཆོག་འདིས།། བྱང་ཆུབ་བསྐལ་པའི་ཐུགས་དམ་རྣམས།། སྐོངས་འགྱུར་བསམ་པའི་དོན་དུ་སྦྱར།། སརྦ་ཏ་ཐཱ་ག་ཏ་པུ་ཏ་ས་མ་ཡ་ཧོ། ། དེ་སྐད་ཚིག་ཏུ་བརྗོད་ནས་ཀྱང།། སྤྱི་བོ་བརྡའི་ཚུལ་ཕྱག་རྒྱ་སྦྱར།། ཞེ་སྡང་རིགས་ཀྱི་ཐ་ཚིག་ལས།། ཕོ་བྲང་རྣམ་ཤེས་ལིངྒ་ལ།། རྡོ་རྗེ་བུམ་པའི་དབུས་གནས་པར།། ཧཱུ~ཾ་གི་རང་བཞིན་འོད་གསལ་འབར། ། གསལ་འཕྲོ་འཁྲུག་པར་གྱུར་པ་ན།། ཕཊ་ཀྱིས་དྲག་ཏུ་བརྡབས་པ་ཡིས།། འོད་འདྲིལ་རྡོ་རྗེའི་ཕལ་ལམ་གྱིས།། ཞེས་སྡང་རི་བོ་བརླགས་ནས་ཀྱང།། ཤེས་རབ་མེ་ལོང་འོད་གསལ་འབར།། དེ་ལྟར་གསལ་བར་གྱུར་པ་ན། ། རྣལ་འབྱོར་ཅན་གྱིས་ཚིག་འདི་བརྗོད།། ཨེ་མའོ་རྡོ་རྗེ་ཐ་ཚིག་རྣམས།། སེམས་ཆེན་ཡེ་ཤེས་གསལ་འབར་བ།། ཐུགས་མཆོག་གདུང་ཆེན་རྒྱུད་སྙམ་ལས།། ཇི་ལྟར་རལ་གྲི་སོ་རྒལ་ལྟར།། དེ་ལས་གྱུར་པའི་རང་བཞིན་ལས། ། ཤེས་རབ་མེ་ལོང་ནུབ་མ་ཁད།། རྣམ་ཤེས་ཕུང་པོའི་ཞིང་ཁམས་སུ།། གསལ་འབར་ཡེ་ཤེས་ཐིག་ལེ་འཕྲོ།། གཉེན་པོས་འཇོམས་པའི་ཐབས་ཆེན་གྱིས།། བསྐང་ངོ་བསྐལ་པའི་ཐུགས་དམ་བསྐང། ། གསང་བ་དོན་གྱི་རྫས་མཆོག་འདིས།། ཐུགས་མཆོག་བསྐལ་པའི་ཐུགས་དམ་བསྐང།། སྐོངས་གྱུར་བསམ་པའི་དོན་དུ་སྦྱང།། ཨོཾ་སརྦ་ཏ་ཐཱ་ག་ཏ་ས་མ་ཡ་ཧོ།། དེ་སྐད་ཚིག་ཏུ་བརྗོད་ནས་ཀྱང། ། སྙིང་གི་བརྡ་ཡི་ཚུལ་ཕྱག་སྦྱར།། ང་རྒྱལ་རིགས་ཀྱི་དམ་ཚིག་ལས།། སྙོམས་ནས་དང་དུ་བླང་རྒྱུ་ལས།། ལོག་པའི་ང་རྒྱལ་དེ་མ་ཆོམས།། ཐ་ཚིག་དྲག་པོ་ཡལ་འགྱུར་ན།། ཕོ་བྲང་སྐྱེ་རྒྱུའི་ལིངྒའི་དཀྱིལ།། རིན་ཆེན་འབར་བའི་དབུས་གནས་པར། ། སྭ་ཡི་རང་བཞིན་འོད་གསལ་འབར།། གསལ་འཕྲོ་འཁྲུག་པར་གྱུར་པ་ན། ཕཊ་ཀྱིས་དྲག་ཏུ་བརྡབས་པ་ལས།། འོད་འདྲིལ་རིན་ཆེན་འཁོར་ལོ་ཡིས།། ང་རྒྱལ་དེའུ་ཆེན་བརླག་འགྱུར་ནས། ། བསོད་ནམས་ལྗོན་ཤིང་མེ་ཏོག་འབར།། དེ་ལྟར་གསལ་བར་གྱུར་པ་ན།། རྣལ་འབྱོར་ཅན་གྱིས་ཚིག་འདི་བརྗོད།། ཨེ་མ་རིན་ཆེན་ཐ་ཚིག་ལས།། བསོད་ནམས་ཡོན་ཏན་འོད་འབར་བ།། དོན་དུ་མི་གཏོང་གཞི་བསྐྱེད་དེ། ། རྒྱུ་མཆོག་གདུང་ཆེན་རྒྱུད་མཉམ་ལས།། ཇི་ལྟར་མཁའ་ལ་འཁྲིགས་འཐིབས་ལྟར།། རྒྱུ་ལས་གྱུར་པའི་རང་བཞིན་གྱིས།། མེ་ཏོག་འོད་མཛེས་ཡལ་མ་ཁད།། ཚོར་བའི་ཕུང་པོའི་ཞིང་ཁམས་སུ། ། ཆེ་བའི་ཡེ་ཤེས་མཉམ་འབར་བས།། གཉེན་པོས་འཇོམས་པའི་ཐབས་ཆེན་ལས།། བསྐང་ངོ་བསྐལ་པའི་ཐུགས་དམ་བསྐང།། གསང་བ་དོན་གྱི་རྫས་མཆོག་འདིས།། སྐུ་མཆོག་བསྐལ་པའི་ཐུགས་དམ་བསྐང། སྐོངས་གྱུར་བསམ་པའི་དོན་དུ་སྦྱང།། ཨོཾ་སརྦ་ཏ་ཐཱ་ག་ཏ་རཏྣ་ས་མ་ཡ་ཧོ།། དེ་སྐད་ཚིག་ཏུ་བརྗོད་ནས་ཀྱང།། འཕྲལ་བ་བརྡ་ཡི་ཚུལ་ཕྱག་སྦྱར།། འདོད་ཆགས་རིགས་ཀྱི་དམ་ཚིག་ལས།། རྟོགས་ནས་སྤྱད་པར་བྱ་རྒྱུ་ལས། ། འདོད་ལོག་རྒྱ་མཚོ་མ་ངོམས་ཏེ།། ཐ་ཚིག་དྲག་པོ་ཡལ་འགྱུར་ནས།། ཕོ་བྲང་པདྨའི་ལིངྒའི་དཀྱིལ།། པདྨོ་འབར་བའི་དབུས་གནས་པར།། ཨོཾ་གྱི་རང་བཞིན་འོད་གསལ་འབར།། གསལ་འཕྲོ་འཁྲུག་པར་གྱུར་པ་ན། ། ཕཊ་ཀྱིས་དྲག་ཏུ་བརྡབས་པ་ལས།། འོད་འདྲིལ་པདྨའོ་མཚོན་ཆ་ལས།། འདོད་ཆགས་རྒྱ་མཚོ་བསྐམས་གྱུར་ནས།། པདྨ་ཆོས་ཀྱི་ཡེ་ཤེས་འབར།། དེ་ལྟར་གསལ་བར་གྱུར་པ་ན།། རྣལ་འབྱོར་ཅན་གྱིས་ཚིག་འདི་བརྗོད། ། ཨེ་མའི་པདྨོའི་ཐ་ཚིག་ལས།། པདྨའི་ཡེ་ཤེས་འོད་འབར་བས།། དོན་དུ་མི་གཏོང་གཞི་བསྐྱེད་དེ།། གསུང་མཆོག་གདུང་ཆེན་རྒྱུད་མཉམ་ནས།། ཇི་ལྟར་པད་སྟོང་ཚེར་མ་ལྟར།། རྒྱུ་ལས་གྱུར་པའི་རང་བཞིན་གྱིས། ། པདྨོའི་ཡེ་ཤེས་ནུབ་མ་ཁད།། འདུ་ཤེས་ཕུང་པོའི་ཞིང་ཁམས་སུ།། རྟོགས་པའི་ཆོས་ཉིད་འོད་འཕྲོས་པས།། གཉེན་པོས་འཇོམས་པའི་ཐབས་ཆེན་ལས།། བསྐང་ངོ་བསྐལ་པའི་ཐུགས་དམ་བསྐང། ། གསང་བ་དོན་གྱི་རྫས་མཆོག་འདིས།། གསུང་མཆོག་བསྐལ་པའི་ཐུགས་དམ་རྣམས།། སྐོངས་གྱུར་བསམ་པའི་དོན་དུ་སྦྱང།། ཨོཾ་སརྦ་ཏ་ཐཱ་ག་ཏ་དྷརྨ་ས་མ་ཡ་ཧོ།། དེ་སྐད་ཚིག་ཏུ་བརྗོད་ནས་ཀྱང། ། ལྕེ་ཡི་བརྡ་ཡི་ཚུལ་ཕྱག་སྦྱར།། ཕྲག་དོག་རིག་ཀྱི་དམ་ཚིག་ལས།། རྟོགས་ནས་སྤྱད་པར་བྱ་རྒྱུ་ལས།། ཕྲག་དོག་ལོག་བཟུང་དབང་གིས་ན།། ཐ་ཚིག་དྲག་པོ་ཡལ་འགྱུར་བ།། ཕོ་བྲང་གསང་བའི་ལིངྒའི་དཀྱིལ། ། རྡོ་རྗེ་རལ་གྲི་དབུས་གནས་པར། ཧ་ཡི་རང་བཞིན་འོད་གསལ་འབར།། གསལ་འཕྲོ་འཁྲུག་པར་གྱུར་པ་ན། ཕཊ་ཀྱིས་དྲག་ཏུ་བརྡབས་པ་ལས།། འོད་འདྲིལ་རྡོ་རྗེའི་རལ་གྲི་ཡིས།། ཕྲག་དོག་མཚོན་ཆགས་གསིབས་གྱུར་ནས། རྡོ་རྗེ་རལ་གྲི་ཡེ་ཤེས་འབར།། དེ་ལྟར་གསལ་བར་གྱུར་པ་ན།། རྣལ་འབྱོར་ཅན་གྱིས་ཚིག་འདི་བརྗོད།། ཨེ་མའོ་ཕྲིན་ལས་ཐ་ཚིག་ལས།། རྡོ་རྗེ་རལ་གྲི་འོད་འབར་བས།། དོན་དུ་མི་གཏོང་གཞི་བསྐྱེད་དེ། ། ཕྲིན་ལས་གདུང་ཆེན་རྒྱུད་མཉམ་ལས།། ཇི་ལྟར་ཉི་གསལ་སྤྲིན་བསྒྲིབས་ལྟར།། རྒྱུ་ལས་གྱུར་པའི་རང་བཞིན་གྱིས།། རྡོ་རྗེ་འོད་ཆེན་ནུབ་མ་ཁད།། འདུ་བྱེ་ཕུང་པོའི་ཞིང་ཁམས་སུ།། ཡེ་ཤེས་མཚོན་ཆའི་འོད་འཕྲོས་པས། ། གཉེན་པོས་འཇོམས་པའི་ཐབས་ཆེན་ལས།། བསྐང་ངོ་བསྐལ་པའི་ཐུགས་དམ་བསྐང།། གསང་བ་དོན་གྱི་རྫས་མཆོག་འདིས།། ཕྲིན་ལས་བསྐལ་པའི་ཐུགས་དམ་རྣམས།། སྐོང་གྱུར་བསམ་པའི་དོན་དུ་སྦྱང། ། ཨོཾ་སརྦ་ཏ་ཐཱ་ག་ཏ་ཀརྨ་ས་མ་ཡ་ཧོ།། དེ་སྐད་ཚིག་ཏུ་བརྗོད་ནས་ཀྱང།། ལུས་ཀྱི་བརྡ་ཡི་ཚུལ་ཕྱག་སྦྱར།། དེས་ཀྱང་སྐོང་པའི་ལས་ཆེན་འགྲུབ།། མན་ངག་ཐབས་ཀྱི་དོན་མཆོག་ནི།། རྩ་བ་ཡན་ལག་དེ་རྣམས་ལས། ། གང་དག་ཉམས་པར་གྱུར་པ་ལ།། མན་ངག་ཐབས་མཆོག་ལྔ་ཡིས་བསྐང།། ཉམས་པ་ཆེན་པོར་ལྟུང་འགྱུར་ན།། བླ་མར་གྱུར་པའི་སྐྱེས་བུ་དག། རྒྱལ་པོ་དགུ་ཡི་སྤྱན་ལམ་དུ།། སྒྲུབ་པ་ཆེན་པོ་དགུ་བརྩམ་ཞིང། ། མཆོག་ཆེན་དགུ་ཡི་བརྟུལ་ཞུགས་སྤྱད།། རང་གི་གཟུངས་མ་གང་ཡིན་པ།། བླ་མ་དགུ་ལ་གཟུངས་མར་དབུལ།། དེ་བཞིན་རྩ་བ་ཡན་ལག་དང།། ཟླ་དང་ཞར་ལས་ཉམས་པ་ལ།། སྒྲུབ་པ་དོན་གྱི་ཁྱད་པར་རྣམས། ། བདུན་ནམ་ལྔའམ་གསུམ་མམ་གཅིག། རིམ་པ་བཞིན་དུ་སྦྱར་བྱས་ན།། དེས་ནི་སྐོངས་པའི་མཆོག་ཏུ་འགྱུར།། བསྐང་བའི་ཡུལ་ཡང་རྣམ་ལྔ་སྟེ།། བདེར་གཤེགས་རྒྱལ་བ་མཐའ་དག་ཀྱང། ། མདོ་རུ་བསྡུ་ན་རྣམ་ལྔ་སྟེ།། གཏི་མུག་ཞེས་སྡང་ང་རྒྱལ་དང།། འདོད་ཆགས་ཕྲག་དོག་འདི་ལྔ་དག། རྩ་བར་གྱུར་པའི་དོན་གྱིས་ན།། གཞི་ཡང་ཐམས་ཅད་འདིས་བསྒྱུར་བས།། ཉམས་དང་མ་ཉམས་ཐ་ཚིག་དང། ལོངས་སྤྱོད་སྤོང་ལེན་ཐམས་ཅད་རྣམས།། འདི་རྒྱུ་ཡིན་པར་རིག་བྱ་སྟེ།། རྒྱུ་ཉིད་རྒྱུར་བཏགས་དབང་གིས་ནི།། བསྒྱུར་བས་དུག་འགྱུར་སྨན་ཆེན་ལྟར།། དེ་ཉིད་ཐ་ཚིག་བཙན་པོར་བསྒྱུར།། འདུལ་བའི་དབང་གི་ཁྱད་པར་གྱིས། ། དེ་བཞིན་རྡོ་རྗེ་རིན་ཆེན་དང།། པདྨོ་ལས་ལྔའི་རིགས་སུ་འདུས།། དེ་དག་ཐུགས་དམ་མཆོག་ཉིད་ཀྱང།། རྣམ་ལྔར་འདུས་པར་བསྟན་པ་ལ།། རྟོགས་ནས་བསྲུང་བསྒྲུབ་དམ་བཅས་པ། སོ་སོ་འགལ་ཞིང་ཆག་ཉམས་ན།། སོ་སོ་ཉིད་དུ་བསབ་པར་བྱ།། སྐུ་ཡི་ཆགས་ཉམས་གནས་སུ་གཞུག། གསུང་གི་འགལ་འཁྲུལ་སོ་རུ་བསབ།། ཐུགས་ཀྱི་འགལ་འཁྲུལ་གསོར་མེད་དེ།། རྡོ་རྗེ་སྙིང་པོའི་ཐ་ཚིག་ལ། ། བསྐངས་པས་སྐོངས་པར་གྱུར་པ་ཡི།། རྟགས་ཆེན་དག་ཀྱང་འདི་ལྟ་སྟེ།། རྒྱལ་བ་སངས་རྒྱས་རིག་འཛིན་གྱི།། གདུང་ཆེན་དག་ལས་བྱུང་བ་ཡི།། ཤ་རི་རམ་ཞེས་བྱ་བ་དེ།། ཐམས་ཅད་ལྟས་སུ་སྟོན་པར་བྱེད། ། ཤེལ་གྱི་ཟ་མ་ཏོག་ནང་དུ།། དག་པར་བཅུག་སྟེ་བཙས་པ་ལས།། ཉམས་པའི་ཆད་པ་འབྱུང་བའི་ཚེ།། ཁ་དོག་གནག་ཅིང་འབྲོས་པར་འགྱུར།། ཉམས་པ་སྐོངས་སམ་སོར་ཆུད་ཅིང།། གལ་ཏེ་དམ་ཚིག་མ་ཉམས་ན། ཁ་དོག་དཀར་ཞིང་འཚེར་བར་འགྱུར།། ལེགས་པའི་ཡོན་ཏན་འབྱུང་བའི་ཚེ།། གྲངས་མང་རྒྱ་ཆེར་འཕེལ་བར་འགྱུར།། གལ་ཏེ་གནག་གམ་མི་གསལ་ན།། སྨྱུར་ཏེ་བསྒྲིམས་ནས་བསྐོར་བཟློག་བྱ། འོན་ཏང་ཉམས་པ་མི་ཕོག་ཅིང། ། དེ་དག་སོ་རུ་གསོ་བ་ན།། རྟགས་ཆེན་འདི་ནི་བསྟེན་བྱ་སྟེ།། འདི་དག་ཤིན་ཏུ་བརྟགས་ནས་ནི།། དཀར་ལ་འཚེར་བར་གྱུར་པ་ན།། རྩ་བ་ཡན་ལག་ཉམས་པ་རྣམས།། སྐོངས་ཏེ་སོར་ཆུད་རྟགས་ཡིན་ནོ། ། དེས་ན་རྣམ་འབྱོར་ལས་ཀྱི་གཙོར།། སྦྱོང་དང་སྐོང་བའི་ལས་རྣམས་བྱ།། བཅོམ་ལྡན་འདས་སེམས་དཔའི་རྡོ་རྗེས་དེ་སྐད་ཅེས་གསུངས་པ་དང། འཁོར་དེར་འདུས་པར་གྱུར་པའི་བདུད་ཀྱི་སྡེ་པ་ལས་ལྷའི་རིགས་སུ་གྱུར་པ་སངས་རྒྱས་ཀྱི་འཁོར་འཕགས་པའི་རིགས་འཛིན་པ་ཉོན་མོངས་པའི་ལྔའི་བདག་པོ་ལྷ་ཆེན་པོ་ལྔ་ལ་སོགས་པ་བཀའི་སྣོད་དུ་རུང་བར་བྱིན་གྱིས་བརླབས་ཏེ་འཁོད་པ་ལས། འདོད་ཆགས་ཐམས་ཅད་ཀྱི་གཙོ་བོ་རྡོ་རྗེ་བྲམ་ཟེ་ཐོད་པ་ཅན་ཞེས་བྱ་བ་ལ་སོགས་པས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཀྱི་བཀའ་ལྟར་མ་བགྱིས་ན་མ་དད་མ་མགུས་འགལ་འཁྲུལ་དུ་གྱུར་པའི་ཆད་པའི་སྐྱེས་གནས་དང་རྣམ་པར་སྨིན་པ་ཇི་ལྟར་འགྱུར། བདག་ཅག་རྣམས་ལ་རྒྱ་ཆེར་བཤད་དུ་གསོལ་ཞེས་ཞུས་པ་ལས། བཅོམ་ལྡན་འདས་སེམས་དཔའི་རྡོ་རྗེས་བཀའ་སྩལ་པ། འདོད་ཆགས་ཀྱི་བདག་པོ་ལ་སོགས་པ་རྣམས་དམ་ཚིག་ཉམས་པའི་ཆད་པའི་སྐྱེ་གནས་འདྲི་བ་ལེགས་ཀྱིས་ཡིད་ཚིམ་པར་བྱེད་པ་བཤད་ཀྱིས་ཉོན་ཅིགརྩ་བ་ཡན་ལག་འདི་དག་ལས། ། གལ་ཏེ་ཞིག་གམ་ཉམས་གྱུར་ན།། རྣལ་འབྱོར་ལས་ཀྱི་དང་པོ་ལས།། ལུང་གི་གསང་སྒོར་ཞུགས་པའི་ཚེ། ། དོན་དང་ལྡན་པའི་བླ་མ་ཡིས།། རྡོ་རྗེ་ཐ་ཚིག་བྱིན་བརླབས་ནས།། ལྕེ་ལ་དམ་ཚིག་ཆུ་བཞག་པ།། དམྱལ་བ་རྡོ་རྗེར་དམོད་བཙུགས་ནས།། ཡི་གེ་ཧཱུ~ཾ་དུ་བྱས་པ་དེ།། སྙིང་གི་དཀྱིལ་དུ་ཐིམ་ནས་ཀྱང། ། ལྕགས་ཀྱི་སྡིག་པ་མགོ་དགུ་པའི།། ཁྲོ་བོ་རཀྵ་ཞེས་བྱ་བའི།། ཁྲག་འཐུང་ཆེན་པོར་གྱུར་ནས་ནི།། སྙིང་ཁྲག་བཞིབས་ཏེ་འཐུངས་ནས་ནི།། སྡུག་བསྔལ་ཆེན་པོར་བསད་ནས་ཀྱང། ། དམྱར་བ་རྡོ་རྗེར་དེ་ལྟུང་འགྱུར།། གལ་ཏེ་ཐ་ཚིག་མ་ཉམས་ལ།། ལྕེ་ལ་བཞག་པ་ཨརྒྷ་སྟེ།། སྙིང་གི་དཀྱིལ་དུ་ཐིམ་ནས་ཀྱང།། ཡེ་ཤེས་སེམས་དཔའ་ཚོན་གང་བར།། གྱུར་ཏེ་སྒྲིབ་པ་ཀུན་སྦྱངས་ནས། ། སངས་རྒྱས་སྲས་སུ་སྐྱེད་པར་བྱེད།། འདོད་ཆགས་དམ་ཚིག་ཉམས་གྱུར་ན།། མངལ་གྱི་གྲོང་ཁྱེར་ཆེན་པོར་འགྲོ།། ཞེས་སྡང་དམ་ཚིག་ཉམས་གྱུར་ན།། རཀྵ་སྲིན་པོའི་རིགས་སུ་འགྲོ།། གཏི་མུག་དམ་ཚིག་ཉམས་གྱུར་ན། ། མི་གཙང་ཟས་སུ་ཟ་བ་ཡི།། རྨོངས་པའི་ཕག་ཆེན་ལུས་སུ་ལྟུང།། ང་རྒྱལ་དམ་ཚིག་ཉམས་གྱུར་ན།། རུས་སྦས་ནག་པོའི་ལུས་སུ་ལྟུང།། ཕྲག་དོག་དམ་ཚིག་ཉམས་གྱུར་ན།། ཆུ་སྲིན་མགོ་དགུའི་ལུས་སུ་ལྟུང། ། དམ་ཚིག་ཆེན་པོ་ཀུན་ཉམས་ན།། རུ་དྲ་ནག་པོའི་ལུས་སུ་ལྟུང།། ལས་ཀྱི་རྐྱེན་དང་མ་ཕྲད་ན།། ཐར་པའི་སྐབས་ནི་མི་སྲིད་དོ།། སེམས་དཔའི་རྡོ་རྗེས་དེ་སྐད་ཅེས་གསུངས་སོ།། ཉོན་མོངས་པ་ལྔའི་བདག་པོ་རིག་འཛིན་རྣམས་ཀྱིས་ཤིན་ཏུ་ཆོ་ངེ་ཆེན་པོ་འབྱིན་ཅིང་དུས་དེར་ཨེ་མའོ་བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་ན་བདག་ལ་ལྟུང་རྒྱུ་མཆིས་ཏེ། དང་པོ་བཅོམ་ལྡན་འདས་ཀྱི་བཀའ་ལ་བཏགས་པའི་ཚེ། བཀའ་ལ་མ་དད་མ་གུས་པས་བཀའ་ལ་སྐུར་ཅིང་སྤྱས་ལོང་བཏགས་པ་དང། སྟོན་པ་དང་གྲོགས་ལ་སྨད་ཅིང་སྤྱས་ལོང་བཏགས་པ་ལ་སོགས་པ་ལྟུང་བའི་རྒྱུ་མང་པོ་བགྱིས་པས།། ད་ནི་བདག་ཀྱང་ཆད་པའི་སྐྱེ་གནས་སུ་མཆི་བར་ངེས་ན། ། བཅོམ་ལྡན་འདས་ཀྱི་ཐུགས་རྗེ་ཆེན་པོས་བཟུང་སྟེ་བཀའི་འཁོར་དུ་བཀོད་པས་ང་ནི་ཐར་པ་ཐོབ་ལགས་གྲང།། ལོན་ཀྱང་འགྱོད་པ་དྲག་པོའི་དབང་གིས་ཡིད་ཀྱི་སྒྲིབ་པ་ནི་བྱང་ཆུབ་སེམས་ཀྱིས་བཤགས། ། ངག་གི་སྒྲིབ་པ་ནི་ཚིག་ཏུ་འདོན་ཅིང་སྨྲེས་ཏེ་བཤགས། ལུས་ཀྱི་སྒྲིབ་པ་ནི་ལུས་གདན་ཁྲི་ལ་ཕུལ་ཏེ་བཤགས་ན། བཅོམ་ལྡན་འདས་ཀྱི་ཐུགས་རྗེས་བཟུང་འཚལ་ན་གཉེན་པོ་ནི་གང་ལགས། ཐབས་ནི་ཇི་ལྟར་བཤགས། ཡུལ་ནི་གང་ལ་བཤགས། རྒྱུ་ནི་གང་མཆིས་བཅོམ་ལྡན་འདས་ཀྱིས་བཤད་དུ་གསོལ། བདེ་བར་གཤེགས་པ་ཐུགས་རྗེས་བསྐྱབ་ཏུ་གསོལ།། བཅོམ་ལྡན་འདས་ཀྱིས་བཀའ་སྩལ་པ། ། རིག་འཛིན་ཆེན་པོ་མི་ཐོད་ཅན་རྣམས་ཉོན་ཅིག། ལྟུང་བར་གྱུར་པའི་གནས་རྣམ་ལ་འགྱོད་པར་གྱུར་ནས་ཞུས་པ་ལེགས་སོ།། ལྟུང་བའི་གཉེན་པོ་ནི་གང་ཞེ་ན། ཉེས་བྱས་རྣམས་བཤགས་པར་འདོད་ན་གང་འགྱོད་པ་དྲག་པོ་སྐྱེས་ནས་བ་སྤུ་ནི་གཟིངས་མཆིས་མ་འབྱིན་པ་ཡིན་ནོ། ། ཐབས་ནི་རྣམ་པ་བཞི་ཡོད་དེ། གང་ཞེ་ན། ཤེས་རབ་ཆེན་པོའི་རྒྱུད་ཀྱི་བག་ཆགས་ཐམས་ཅད་རང་བཞིན་མེད་པར་ཤེས་པ་དང། ཏིང་ངེ་འཛིན་ཆེན་པོའི་མེས་བག་ཆགས་ཐམས་ཅད་བསྲེགས་ཏེ་མེད་པར་བྱ་བ་དང། བྱང་ཆུབ་སེམས་ཀྱི་འོད་ཟེར་གྱིས་བག་ཆགས་ཀྱི་མུན་ནག་ཐམས་ཅད་བསལ་ཏེ་དེ་དག་དག་པར་བྱ་བ་དང། སྤྱོད་པ་རླབས་པོ་ཆེའི་ཆུས་བཀྲུ་བའོ།། དེ་ལ་བཤགས་པར་བྱ་བའི་ཡུལ་ནི་འདི་ལྟ་སྟེ། སངས་རྒྱས་དང། རིག་འཛིན་དང། ལྷ་དང། བླ་མ་དང། གླེགས་བམ་དང། གྲོགས་པོ་དང། རྟེན་དུ་གྱུར་པ་རྣམས་སོ། ། བཤགས་པར་བྱ་བའི་རྒྱུ་ནི་འདི་ལྟ་སྟེ། སྒྲིབ་པ་ཆེ་ཆུང་བཤགས་པའོ།། ཉོན་མོངས་པ་རགས་པ་མངོན་དུ་གྱུར་བ་བཤགས་པ་དང། བག་ལ་ཉན་དང་ཤེས་བྱའི་སྒྲིབ་པ་བཤགས་པའོ།། དེའི་ཕྱིར་ལྟུང་བར་གྱུར་པའི་ལས་རྣམས་འགྱོད་པ་དྲག་པོས་བསྟེན་ལ་ཐབས་ལ་མཁས་པས་དཔྱད་དེ། ། སྒྲིབ་པ་ཆེ་ཆུང་ཆ་ཤས་ཀྱིས་ཕྱེ་ལ་གུས་པར་བཤགས་པ་གྱིས་ཤིགདེ་སྐད་ཅེས་བཀའ་སྩལ་པ་དང། རིག་འཛིན་ཆེན་པོ་མིའི་ཐོད་པ་ཅན་རྣམས་མགུ་ཞིང་རངས་ཏེ་རྣལ་འབྱོར་སྦྱོར་བའི་ཕྱག་བྱས་ནས། འགྱོད་ཅིང་གདུག་བའི་གླུ་འདི་བླངས་སོ། ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི།། ཟླ་རྒྱས་བཞིན་དུ་སྤྲོས་པ་མི་མངའ་ཡང།། ཐུགས་རྗེ་ཉི་གསལ་འོད་བཞིན་སྙོམས་མཛད་ལྷ། ། བདེར་གཤེགས་གཞུགས་ཤིང་བདག་ལ་དགོངས་སུ་གསོལ།། བརྗོད་མེད་ཤེས་རབ་མི་གཡོ་ཆོས་མཆོག་དབྱིངས།། བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། ། ཐུགས་རྗེ་ཐབས་མཁས་རྒྱ་ཆེན་རོ་པ་ཡི།། ཆོ་འཕྲུལ་སྤྲུལ་པའི་ཚོགས་ལ་ཕྱག་འཚལ་ལོ།། དངོས་སུ་འབྱོར་དང་ཡིད་ཀྱིས་སྤྲུལ་པ་ཡི།། ཀུན་ཏུ་བཟང་པོ་བླ་མེད་མཆོད་སྤྲིན་གྱིས།། མཁའ་དབྱིངས་རྣམ་དག་རྒྱ་ཆེན་ཡོངས་བཀང་ནས། ། ཕྱི་ནང་གསང་བའི་མཆོད་པ་རྒྱ་ཆེར་མཆོད།། ཀུན་དུ་བཟང་མོ་ཡུམ་གྱི་བྷ་ག་ལ།། འདུ་འབྲལ་མེད་པའི་ངང་དུ་རོ་གཅིག་པའི།། གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ།། ཆོས་ཉིད་རྣམ་དག་རྒྱ་ཆེ་འོད་གསལ་བས།། རྣལ་འབྱོར་ཉིད་དབྱིངས་སྨྲ་བསམ་ལས་འདས་པས།། མཉམ་ཉིད་བྱང་ཆུབ་སེམས་ལ་རྟག་ཏུ་འདུད།། ཀུན་བཟང་རྫོགས་ཆེན་ཡེ་ནས་བདལ་བ་ལ། ། ཕྱི་ནང་གསང་བའི་དཀྱིལ་འཁོར་བཀོད་པ་ནི།། སྣང་སྲིད་རྣམ་དག་ཀུན་བཟང་ཡུམ་གྱི་དབྱིངས།། འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས།། གསང་ཆེན་རབ་རྫོགས་གཟུངས་ཆེན་བདག་ཉིད་མ། ། གཉིས་མེད་ཐིག་ལེ་ཆེན་པོར་འོད་གསལ་བ།། ཅིར་ཡང་སྣང་བས་བདེ་ཆེན་གཡུང་དྲུང་ལྷ། འདུ་འབྲལ་མེད་པ་གསང་བའི་དཀྱིལ་འཁོར་ནི།། བདག་ཉིད་ཆེན་པོ་བཅོམ་ལྡན་ཡབ་ཡུམ་དང། ། བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས།། རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག། མ་ལྟར་བྱམས་ཤིང་སྲིང་ལྟར་གདུང་ལ་སོགས།། ཉེས་ལེགས་ལྟར་འཛིན་དམ་ཚིག་རྗེས་གཅོད་མ།། དབང་གྱུར་རྡོ་རྗེ་དམ་ཅན་དགོངས་སུ་གསོལ། ། ཐུགས་རྗེས་གདུང་འཚོབ་རྡོ་རྗེ་ཐོད་པ་ཅན།། བདག་ཅག་དྲེགས་པའི་བདག་པོ་འདིར་ཚོགས་ཀུན།། འགྲོ་བའི་དོན་ཕྱིར་བྱང་ཆུབ་སེམས་བསྐྱེད་དེ།། བླ་མེད་གོ་འཕང་འཐོབ་པར་བྱ་བའི་ཕྱིར། ། བསྟན་པ་རྒྱ་མཚོ་སོ་སོའི་འདུལ་ཁྲིམས་དང།། སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག། འདའ་དཀའ་རྡོ་རྗེ་དམ་ཚིག་གཏན་གྱི་གཉེར།། སྤྱི་དང་ལྷག་པའི་ཁྱད་པར་དམ་ཚིག་རྣམས། ། སྔ་ཕྱི་མནོས་ཤིང་གཉེར་དུ་རྨའོ་འཚལ།། དོན་ལས་གོལ་ཞིང་ལྡོག་སེམས་མ་མཆིས་ཀྱང།། གདོད་བྱ་ལོང་ཡོད་སྙམ་པའི་ལེ་ལོ་དང།། ཀློང་དུ་གྱུར་པའི་རྩལ་ཤུག་ཆུང་བ་ཡིས།། ཤེས་བཞིན་མ་ལྡན་དམ་ཚིག་འགལ་འགྱུར་ཏེ། ། དང་པོའི་ཐ་ཚིག་བཀའ་ལ་བཏགས་པའི་ཚེ།། བཀའ་ལ་མ་གུས་གལ་བགྱིས་དཔྱས་ལོང་བཏོགས།། བར་དུ་བསླབ་པའི་གཉེར་ཆེན་ཕོག་པའི་ཚེ།། བསླབ་ལ་མི་བརྩོན་དོན་ལ་གཡེལ་བ་དང། ། ཐ་མ་འདི་ཚེ་འབྲས་བུ་སྒྲུབ་པ་ན།། བཀའ་དང་གཞུང་བཞིན་མ་ལྕོགས་དོན་ལས་འགལ།། ཚོར་དང་མ་ཚོར་སྒྲིབ་པ་ཆེ་ཆུང་རྣམས།། ཤིན་ཏུ་མི་ཤེས་མ་རིག་དབང་གིས་ན།། སྟོན་པའི་བཀའ་དང་དམ་ལས་འགལ་བགྱིས་པ། ། དཔའ་བོ་ཐུགས་རྗེས་བདག་ལ་བཟོད་པར་གསོལ།། འཁོར་བ་ཐོག་མ་མེད་པའི་དུས་མཐའ་ནས།། ལས་ཀྱི་དབང་གིས་བདག་ཅག་རིང་དུ་འཁྱམས།། ཉོན་མོངས་ལོག་པར་ལྟ་བའི་དུག་འཐུངས་ཏེ། ། སྡུག་བསྔལ་ནད་ཀྱིས་ཤིན་ཏུ་གདུངས་པ་ལ།། བདེ་གཤེགས་ཐུགས་རྗེས་སྨན་པའི་རྒྱལ་པོ་ཡིས།། དམ་ཚིག་བདུད་རྩི་ཐར་བའི་སྨན་སྩལ་བས།། ཉོན་མོངས་འཁྲུལ་པའི་ནད་རྣམས་ཞི་མཛད་ཅིང།། བླ་མེད་བྱང་ཆུབ་སྙིང་པོར་འཚོ་མཛད་པ། ། བྱམས་མགོན་ཐུགས་རྗེའི་བདག་ལ་སྐྱབས་སུ་མཆི།། ཞེས་ངུས་ནས། ཨ་ལ་ལ་ཧོ་ཞེས་བརྗོད་དེ་གཉེན་པོ་དྲག་པོར་བསྟེན་ནས་ལུས་གདན་ཁྲི་ཕུལ་ཏེ། བྱང་ཆུབ་སེམས་ཀྱིས་རྣམ་པར་འདུད་པའི་དོན་ལ་རྣམ་པར་སྦྱངས་པས་ལུས་གཅེར་བུ་ཟང་མར་ཕྱུང། གནོད་པ་དྲག་པོའི་འགྱོད་པ་བྱས་པས་བདེ་བར་གཤེགས་པ་རྣམས་མཉེས་པར་གྱུར་ཏོ།། དེས་སྦྲིབ་པ་བྱང་ཞིང་བསོད་ནམས་ཀྱི་ཚོགས་རྫོགས་པའི་རྟགས་ལུས་གོས་དང་ཕྲལ་ནས་ལྡན་པའི་ཐོད་པ་ཡང་ཟླ་བ་ཚེས་བརྒྱད་པར་གྱུར་ཏོ། ། ས་ཐོབ་པའི་རྟགས་སུ་དེ་བཞིན་གཤེགས་པའི་ཞབས་རྟེན་དུ་གནས་པར་གྱུར་ཏོ།། དེ་ནས་སེམས་དཔའི་རྡོ་རྗེ་དེ་དགྱེས་ཏེ་བཀའ་སྩལ་པ། མིའི་ཐོད་པ་ཅན་རྣམས་འགྱོད་པའི་ལས་ཀྱིས་བཤགས་པ་ལེགས་ཏེ། ཉོན་མོངས་པའི་སྒྲིབ་པ་རྣམ་པར་དག་པར་གྱུར་ཏོ།། ད་ནི་ཤེས་བྱའི་སྒྲིབ་པ་དག་ཅིང་ཡེ་ཤེས་ཀྱི་ཚོགས་རྫོགས་པར་བྱ་བའི་ཕྱིར་ཉན་པའི་དབང་པོས་སངས་རྒྱས་ཀྱིས་གསུང་ལ་གསང་སྔགས་ཀྱི་སྒྲ་རྣམས་ཉོན་ཅིག། དེས་ནི་ས་ནས་སར་འཕར་ཞིང་འབྲས་བུ་ཡོངས་སུ་རྫོགས་པར་འགྱུར་རོ།། དེ་སྐད་ཅེས་གསུངས་པས་འཁོར་བསམ་པ་རངས་པར་གྱུར་ཏོ། ། རྒྱུད་ཀྱི་རྒྱལ་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་སྐོང་བ་ལས་བསྒྲུབ་ལུགས་ཀྱི་ལེའུ་སྟེ་བརྒྱད་པའོ།།།། དེ་ནས་བཅོམ་ལྡན་འདས་གསང་བ་མཆོག་ཉིད་ཏིང་ངེ་འཛིན་རྒྱས་ཤིང་རྣམ་པར་འཕྲུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། སེམས་དཔའ་རྡོ་རྗེའི་སྙིང་པོ་ཡང་ཏིང་ངེ་འཛིན་རྣམ་པར་འཕྲུལ་པ་ཞེས་བྱ་བ་ལ་སྙོམས་པར་ཞུགས་སོ། ། འདུས་པའི་འཁོར་རྣམས་ཀྱང་སྣ་ཚོགས་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ནས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་ཅི་ཡང་མེད་པར་མཐོང་ངོ།། ཆོས་ཐམས་ཅད་ཅི་ཡང་མེད་པར་གསལ་བར་གྱུར་པ་དང། ཆོས་ཉིད་སྟོང་པའི་ནམ་མཁའ་ལས་བྲག་ཅའི་ཚུལ་དུ་སྒྲ་འདི་བྱུང་ངོ།། མི་གནས་མི་རྟོག་བསམ་དང་བྲལ།། མ་ཆགས་ཆགས་བྲལ་ཡུལ་ལས་འདས།། ཅི་ཡང་མི་འབྱུང་ཅིར་མ་ཡིན། ། རང་བྱུང་རང་ཞི་བརྗོད་དང་བྲལ།། ཞེས་སྒྲ་བྱུང་བས་སྟོན་པ་ནི་དོན་གྱི་ཆེ་བ་ཕྱུང།། འཁོར་རྣམས་ནི་རྩལ་སྦྱངས། ཐམས་ཅད་དོན་ལ་ངམ་ཞིང་ཆོས་ཉིད་ཀྱི་ནམ་མཁའ་མཐོང་ངོ།། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་ཉིད་སྙིང་རྗེ་རྒྱུན་གྱི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་སོ། ། དེ་ནས་ཆོས་ཉིད་ཀྱི་ནམ་མཁའ་ལ་སྙིང་རྗེ་བྱང་ཆུབ་སེམས་ཀྱི་གཟུགས་བརྙན་ཉི་མའི་དཀྱིལ་འཁོར་ཞིག་ཤར་བར་གྱུར་ཏོ། ། དེ་ནས་འདུས་པ་ཕལ་མོ་ཆེའི་འཁོར་རྣམས་ཡང་དག་པར་རྟོག་པ་འདི་ལྟར་སྐྱེས་ཏེ།། ཨེ་མ་ཆོས་ཐམས་ཅད་ཀྱི་རང་བཞིན་འདི་ལྟར་ཡིན་པ་ལས་འདི་ལྟར་མ་ཤེས་པའི་འགྲོ་བ་རྣམས་འཁོར་བའི་རྒྱ་མཚོར་བྱིང་བ་འདི་ཡང་སྙིང་རྗེ་ཞེས་སྙིང་རྗེ་བྱང་ཆུབ་ཀྱི་སེམས་སྐྱེས་པར་གྱུར་ཏོ། ། དེ་ནས་ཉི་མའི་སྙིང་པོའི་འོད་ཟེར་ལས་ཆོ་འཕྲུལ་གྱི་སྒྲ་བྱུང་ངོ།། ཡོངས་ལ་ཁྱབ་པའི་ཉི་མའི་འོད།། སྙིང་རྗེ་བྱང་ཆུབ་སེམས་ཡིན་ཏེ། ། རྣམ་རྟོག་མུན་པ་སེལ་བར་སྣང།། ཡིད་བཞིན་རིན་ཆེན་འབར་བའོ།། ཞེས་སྒྲ་བྱུང་བ་ལས་ཆོས་ཐམས་ཅད་བྱང་ཆུབ་ཀྱི་སེམས་ཀྱི་འོད་ཟེར་དུ་གསལ་བར་གྱུར་ཏོ།། དེ་ནས་ཡང་བཅོམ་ལྡན་འདས་གསང་བའི་མཆོག་གི་བདག་པོ་དེ་ཉིད་ཆོ་འཕྲུལ་འབྱུང་བའི་རྒྱུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་འདུས་པ་ཕལ་མོ་ཆེའི་འཁོར་རྣམས་ཀྱིས་ཉི་མའི་སྙིང་པོ་ལས་ཆོས་ཐམས་ཅད་ཀྱི་རྒྱུ་ཡི་གེ་ཨ་དཀར་པོ་ཤར་བར་མཐོང་ངོ། ། དེ་ནས་ཨ་ལས་ཆོ་འཕྲུལ་སྒྲ་བྱུང་ངོ།། ཨ་ནི་ཆགས་མེད་ཡི་གེའི་མཛོད།། ཆོ་འཕྲུལ་རྟོག་པ་ཀུན་གྱི་རྒྱུ།། ཉོན་མོངས་སྐྱོན་བྲལ་ཟླ་བའི་མདོག། ཆོ་འཕྲུལ་སྣ་ཚོགས་འབྱུང་བའི་རྒྱུ། ། ཞེས་སྒྲ་བྱུང་བས་འདུས་པའི་ཚོགས་རྣམས་ཀྱིས་ཆོས་ཐམས་ཅད་ཆོ་འཕྲུལ་གྱི་རང་བཞིན་དུ་གནས་པར་མཐོང་ངོ།། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ་ཅི་ཡང་མི་མཛད་པ་ཆོ་འཕྲུལ་སྣ་ཚོགས་ཀྱི་རང་བཞིན་དུ་སྣང་བར་གྱུར་ཏོ། ། དེ་ནས་ཡུམ་ཆེན་མོ་ནམ་མཁའི་དབྱིངས་ཕྱུག་མ་ཞེས་བྱ་བ་དེ་ཆོས་ཐམས་ཅད་ནམ་མཁའི་བྷ་གར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། ཞུགས་པར་གྱུར་པ་དང་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་ནམ་མཁའ་ཁྱབ་པའི་རང་བཞིན་དུ་མཐོང་ངོ།། དེ་ནས་ཡུམ་གྱི་བྷ་གའི་སྙིང་པོ་ལས་འོད་ཟེར་མཐིང་ག་འཕྲོས་ནས་ཉི་མའི་སྙིང་པོའི་ཨ་ལ་བསྐུལ་བས་ཡི་གེ་ཨེ་མཐིང་ག་འཕྲོས་ཏེ་ལྡིང་ཞིང་གནས་པ་ལས་ཆོ་འཕྲུལ་གྱི་རང་སྒྲ་འདི་བྱུང་ངོ། ། ཨ་ནི་ཨེ་ཡི་རང་བཞིན་ཏེ།། ཨ་ལས་ཨེ་བྱུང་མཁའ་ཁྱབ་བདལ།། མི་འགྱུར་ཐོགས་མེད་བསམ་ལས་འདས། ། མཐའ་དང་དབུས་མེད་ཀུན་དུ་བདལ།། ཞེས་སྒྲ་བྱུང་བས།། ཐམས་ཅད་ནམ་མཁའི་རང་བཞིན་དུ་ཕྱམ་ཆད་པར་གྱུར་ཏོ།། དེ་ནས་ཡང་ཡུམ་ཆེན་མོ་ལས་ཀྱི་དབྱིངས་ཕྱུག་མས་ཡང་ཞིང་གཡོ་བ་རླུང་གི་དཀྱིལ་འཁོར་ཞེས་བྱ་བ་ལ་སྙོམས་པར་ཞུགས་སོ། ། དེས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་རླུང་གི་རང་བཞིན་དུ་གནས་པར་མཐོང་ངོ།། དེ་ནས་རླུང་དེ་ལས་ཆོ་འཕྲུལ་ཀྱི་སྒྲ་བྱུང་ངོ། ། ཨ་ཡི་བྱིན་བརླབས་ཡེ་ཤེས་ལས།། རླུང་གི་ཆོ་འཕྲུལ་ཡ~ཾ་དུ་ཤར།། ཐམས་ཅད་འདེབས་པའི་སྟོབས་ལྡན་ཞིང།། རང་བཞིན་གཡོ་ཞིང་ཐོགས་མེད་འཕྱོ།། ཞེས་སྒྲ་བྱུང་བས་རླུང་གི་དཀྱིལ་འཁོར་དུ་འཁྱིལ་པར་གྱུར་ཏོ། ། དེ་ནས་ཡུམ་ཆོས་ཀྱི་དབྱིངས་ཕྱུག་མ་ཞེས་བྱ་བ་དེས་འབར་འཕྲོ་མེའི་ཏིང་ངེ་འཛིན་ལ་སྙོམས་པར་ཞུགས་སོ།། འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་མེའི་རང་བཞིན་དུ་གནས་པར་མཐོང་ངོ། ། དེ་ནས་མིའི་འོད་ཟེར་ལ་ཆོ་འཕྲུལ་གྱི་སྒྲ་བྱུང་བ།། ཨ་ཡི་བྱིན་བརླབས་ཡེ་ཤེས་ལས།། ཆོ་འཕྲུལ་མེ་ཡི་ཉིང་པོར་ཤར།། འབར་བས་གསལ་བྱེད་ཡེ་ཞེས་འཕྲོ།། དངོས་པོ་ཀུན་ཟད་མེད་ཀློང་འཚུབ།། ཅེས་སྒྲ་བྱུང་བས་མེའི་བསྐལ་པ་འབྱམ་ཀླས་སོ། ། དེ་ནས་ཡང་ཡུམ་རིན་ཆེན་དབྱིངས་ཕྱུག་མ་ཞེས་བྱ་བདེ་སྡུད་པ་རྒྱ་མཚོའི་ཏིང་ངེ་འཛིན་ལ་སྙོམས་པར་ཞུགས་སོ།། དེས་འདུས་པ་ཕལ་མོ་ཆེའི་འཁོར་གྱི་ཆོས་ཐམས་ཅད་ཆུའི་རང་བཞིན་དུ་གནས་པར་མཐོང་ངོ། ། དེ་ནས་རླབས་ཀྱི་འོད་ཟེར་ལས་ཆོ་འཕྲུལ་གྱི་སྒྲ་འདི་བྱུང་ངོ།། རྒྱུ་ཡི་ཡི་གེ་འོད་ཟེར་ལས།། ཆུ་ཡི་སྙིང་པོའི་ཆོ་འཕྲུལ་ཤར།། ནམ་མཁའི་མཐའ་དང་མཉམ་པའོ།། ཀླུང་མཚོ་ཐམས་ཅད་རྒྱས་པར་གྱུར། ། ཞེས་སྒྲ་བྱུང་བས་ཐམས་ཅད་ཡུམ་རིན་ཆེན་དབྱིངས་ཕྱུག་མའི་རང་བཞིན་གྱིས་ཁྱབ་པར་གནས་སོ།། དེ་ནས་ཡུམ་ཆེན་མོ་རྡོ་རྗེ་དབྱིངས་ཕྱུག་མ་ཞེས་བྱ་བས་ཞིང་ཁམས་ཐམས་ཅད་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་ས་རྣམས་ཡོངས་སུ་རྫོགས་པའི་རང་བཞིན་དུ་མཐོང་ངོ།། དེ་ནས་ས་རྡོ་རྗེ་འབར་བ་ཞེས་བྱ་བ་ལས་ཆོ་འཕྲུལ་གྱི་སྒྲ་བྱུང་བ། ། མི་དམིགས་པ་ལས་སྣ་ཚོགས་པར།། སྣང་བའི་ཆོ་འཕྲུལ་འདི་བྱུང་བ།། རྣལ་འབྱོར་ས་བཅུ་རྫོགས་པའི་དོན།། ལྷུན་གྱིས་གྲུབ་པས་བདེ་བ་ཆེ།། ཞེས་སྒྲ་བྱུང་བས་ས་དགུ་འདུལ་བའི་བྱེ་བྲག་ཏུ་ཐུགས་སུ་ཆུད་པར་གྱུར་ཏོ། ། དེ་ནས་སེམས་དཔའི་རྡོ་རྗེ་སྙིང་པོ་དེ་རི་བོ་བརྩེགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། དེས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་རྡོ་རྗེ་འབར་བའི་རི་བོར་མཐོང་ངོ། ། དེ་ནས་དེའི་འོད་ལས་ཆོ་འཕྲུལ་གྱི་སྒྲ་འདི་བྱུང་ངོ།། རྣམ་དག་ཤེས་རབ་མཁའ་ཀློང་ནས།། རྡོ་རྗ་འབར་བའི་རི་བོ་ཤར།། རྒྱ་ཆེ་གཏིང་ཟབ་ནམ་འཕང་གཅོད། ། རྟོག་པའི་རི་བོ་འཇོམས་པར་བྱེད།། ཅེས་སྒྲ་བྱུང་བས་རྡོ་རྗེ་འབར་བའི་རི་བོས་ཉོན་མོངས་པའི་རི་བོ་ཐམས་ཅད་ཟིལ་གྱིས་མནན་ཏོ།། དེ་ནས་དབྱིངས་ཕྱུག་མ་ཆེན་མོ་ལྔ། ཤེས་རབ་ཟབ་མོའི་གཞལ་ཡས་ཡུམ་གྱི་མཁའ་ཀློང་རྣམ་དག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། བྷ་གའི་སྙིང་པོ་ལས་ཆོ་འཕྲུལ་གྱི་སྒྲ་འདི་བྱུང་ངོ།། བྷ་ག་གསང་བའི་འོད་ཟེར་ལས།། བདེ་གཤེགས་བཞུགས་པའི་གཞལ་ཡས་ཁང། ། ནམ་མཁའི་མཐའ་ལྟར་དཔག་ཏུ་མེད།། དུས་གསུམ་རྒྱལ་བ་རྒྱ་མཚོའི་དབྱིངས།། ཞེས་སྒྲ་བྱུང་ངོ།། བྱུང་བས་ནམ་མཁའ་ཐམས་ཅད་ཕོ་བྲང་གི་གཞལ་ཡས་འབྱམས་ཀླས་པར་གྱུར་ཏོ།། དེ་ནས་བཅོམ་ལྡན་འདས་གསང་བ་མཆོག་དེ་ཉིད་ཆོས་ཐམས་ཅད་སྐུ་ལ་ཡོངས་སུ་རྫོགས་པ་ཞེས་བྱ་བའི་ཏིང་ངེ་འཛིན་ནམ་ཕྱག་རྒྱ་ཐམས་ཅད་རྣམ་པར་སྤྱོད་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དེ་ནས་འདུས་པ་པ་ཧལ་མོ་ཆེའི་འཁོར་རྣམས་ཀྱིས་འཁོར་བ་དང་མྱ་ངན་འདས་པའི་ཆོས་ཐམས་ཅད་བཅོམ་ལྡན་འདས་གསང་བ་མཆོག་གི་བདག་པོའི་ཞབས་ཀྱི་གདན་ཁྲི་ཡན་ཆད་ནས་དབུའི་གཙུག་ཏེར་མན་ཆད་དུ་རྫོགས་པར་མཐོང་ངོ། ། དེ་ནས་ཡང་འཁོར་བ་འདོད་པ་ཁམས་ནི་ཆགས་པ་ཁྲག་གི་རྒྱ་མཚོར་རྫོགས། འཁོར་བ་གཟུགས་ཀྱི་ཁམས་ནི་ཞིང་ཆེན་གྱི་ས་གཞི་བདལ་བ་ལ་རྫོགས་པར་མཐོང་ངོ།། ཀེང་རུས་ལ་གཟུགས་མེད་པའི་ཁམས་རྫོགས་པར་མཐོང་ངོ། རི་རབ་ཀྱི་ཁ་མུ་ཏིག་གི་གཅལ་དང། ཨ་སྨ་གར་བའི་འབར་བའི་འོད་འཁྲིགས་པའི་ནོར་བུ་རིན་པོ་ཆེ་འབར་བའི་བྲག་གཏམས་པ་ལ།། ཉན་ཐོས་དང། རང་སངས་རྒྱས་དང། བྱང་ཆུབ་སེམས་དཔའ་རྣམས་རྫོགས་པར་མཐོང་ངོ། ། ནོར་བུ་རིན་པོ་ཆེའི་སྟེང་ན་རྡོ་རྗེ་རྩེ་གསུམ་དང་རྩེ་ལྔའི་བྲག་གཏམས་པ་ལ་ཀྲི་ཡང་དང་ཨུ་པ་ཡ་དང་ཡོ་ག་རྣམས་རྫོགས་པར་མཐོང་ངོ།། རྡོ་རྗེ་བྲག་ཆེན་གྱི་སྟེང་ན་པདྨ་དཀར་པོའི་མནྜལ་ལ་བསྐྱེད་པའི་རྣལ་འབྱོར་པ་ཐམས་ཅད་རྫོགས་པར་མཐོང་ངོ། ། པདྨའི་སྟེང་ན་ཉི་མ་ཉི་ཤུ་རྩ་བཞི་དང། ཟླ་བ་ཉི་ཤུ་རྩ་བཞི་ཁ་སྦྱོར་དུ་བཀོད་པ་ལ་དབང་ཕྱུག་ཕོ་ཉི་ཤུ་རྩ་བཞི་དང། མོ་ཉི་ཤུ་རྩ་བཞི་རྫོགས་པར་མཐོང་ངོ། ། དབང་ཕྱུག་ཕོ་མོའི་སྟེང་བྱོལ་སོང་གི་གཙོ་བོ་བརྒྱད་ནི་རིག་འཛིན་ཆེན་པོའི་རྣལ་འབྱོར་ཉོན་མོངས་པ་སྦྱངས་ནས་ཤེས་བྱའི་སྒྲིབ་པ་སྦྱངས་པའི་ཕྱིར་དཔག་བརྟུལ་སྟག་དང། འཇིགས་བྱེད་སེང་གེ་དང། གདུག་པའི་གཟིགས་དང། གཏུམ་པའི་དོམ་དང། སྟོབས་ཀྱི་གླང་པོ་དང། བརྗིད་པའི་མ་ཧེ་དང། འཛིན་པའི་ཆུ་སྲིན་དང། ཞེ་སྡང་གི་སྦྲུལ་རྣམས་ལ་རིག་འཛིན་ཐམས་ཅད་ལ་ཡོངས་སུ་རྫོགས་པར་མཐོང་ངོ། ། གཞལ་ཡས་ཆེན་པོ་འབར་བ་ལ་ཡུལ་ཀུན་ཏུ་བཟང་མོ་རྫོས་པར་མཐོང་ངོ།། མེ་དཔུང་ཆེན་པོ་དགུ་ལ་ཡེ་ཤེས་ཀྱི་སྒོ་དགུ་བརྩེགས་སུ་ཡོངས་སུ་འབར་བར་རྫོགས་པར་མཐོང་ངོ། ། ཞབས་བརྒྱད་ལ་གསར་བའི་ཡུམ་བཞི་དང། སྒོ་མ་བཞི་རྫོགས་པར་མཐོང་ངོ།། དུར་ཁྲོད་ཀྱི་རྒྱན་ཆེན་པོ་བཅོ་བརྒྱད་ནི་མ་མོ་ཆེན་མོ་བཅོ་བརྒྱད་ཡོངས་སུ་རྫོགས་པར་གསལ་ལོ།། ཕྱག་མཚན་བཞི་བཅུ་རྩ་གཉིས་ནི་ཕྲ་མེན་མ་བཅུ་དབྱུག་པ་འཕྱར་བའི་ལག་ན་ཁྱུང་བཅུ་འབར་བའི་མཚོན་ཆ་སྣ་ཚོགས་འཕྲོ་བ། མཁའ་འགྲོ་བརྒྱད་དབྱུག་པར་འཕྱག་བའི་ནག་ན་སེང་གེ་ཁ་གླལ་བ་བརྒྱད་ཀྱི་ཁ་ནས་རལ་གྲི་འབར་བ་བརྒྱད་འཕྲོ་བ། ཤུགས་འགྲོ་བརྒྱད་དབྱུགས་པར་འཕྱར་བའི་ལག་ན་སྟག་མཆེ་བ་གཅིག་པ་བརྒྱད་ཀྱི་ཁ་ནས་རྡོ་རྗེ་སྣ་ཚོགས་འཕྲོ་བ། མ་མོ་བརྒྱད་དབྱུག་པར་འཕྱར་བའི་ལག་ན་མི་མགོ་བརྒྱད་རྡོ་རྗེ་ལུ་གུ་རྒྱུད་ཀྱིས་བཏགས་ནས་ཀླད་ལ་བསྐོར་བ། འབར་མ་བརྒྱད་དབྱུག་པར་འཕྱར་བའི་ལག་ན་མེ་དཔུང་འབར་བ་བརྒྱད་ལས་ཐུ་ལུམ་འཕྲོ་བ་སྟེ། བཞི་བཅུ་རྩ་གཉིས་སུ་གསལ་ལོ།། ཕྱག་བཞི་བཅུ་རྩ་གཉིས་ནི་ཁྲག་འཐུང་འབར་བ་བཞི། གིང་ཕོ་དགུ་མོ་དགུ། ཟ་བྱེད་ཕ་བཅུ་གསོད་བྱེད་མ་བཅུ་སྟེ་བཅུ་བཞི་རྩ་གཉིས་སུ་གསལ་ལོ།། ཞལ་ཉི་ཤུ་རྩ་གཅིག་ནི་སྲིད་པ་ཟ་བྱེད་གསང་བའི་དུར་ཁྲོད་ཉི་ཤུ་རྩ་གཅིག་ཏུ་གསལ་ལོ།། སྤྱན་འབར་བ་དྲུག་ཅུ་རྩ་བཞི་ནི་ཧེ་རུ་ཀ་ཡབ་ཡུམ་དྲུག་བཅུ་རྩ་བཞིར་གསལ་ལོ། ། དབུ་ཉི་ཤུ་རྩ་གཅིག་ནི་དུས་གསུམ་གྱི་སངས་རྒྱས་ཉི་ཤུ་རྩ་གཅིག་ཏུ་གསལ་ལོ།། གཡས་ཀྱི་དབུ་བདུན་གྱི་སྤྱི་གཙུག་ནས་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་འཁོར་ལོ་འོད་ཟེར་དང་བཅས་པ་རེ་རེ་འབར་བ། དབུས་ཀྱི་དབུ་བདུན་ལས་དབུ་རྒྱན་སངས་རྒྱས་ཀྱི་དབུ་རེ་རེ་བྱུང་བའི་སྐུ་ལ་རིན་པོ་ཆེའི་མཆོད་རྟེན་འབར་བ་བདུན་དུ་གསལ་བ། གཡོན་གྱི་དབུ་བདུན་ལས་དབུ་རྐྱེན་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་ནོར་བུ་རིན་པོ་ཆེ་བདུན་དུ་གསལ་བ། འཁོར་ལོ་དང་མཆོད་རྟེན་དང། རིན་པོ་ཆེ་དེ་དག་གི་ལྟེ་བ་དང། བུམ་པ་དང། རྩེ་མོ་ལས་རྒྱལ་མཚན་ཆེན་པོ་བཅུ་འབར་བ་ནི་རྒྱ་བྱེའུ་ལྕགས་ཀྱི་རྒྱལ་མཚན་དང། གདུལ་བྱ་ཤ་བའི་རྒྱལ་མཚན་དང།། གཅན་གཟན་གཟིག་གི་རྒྱལ་མཚན་དང།། སྤྲུལ་པ་རྡོ་རྗེའི་རྒྱལ་མཚན་དང། རིན་ཆེན་སྦྲུལ་ནག་གི་རྒྱལ་མཚན་དང། ། དཔའ་བོ་སྟག་གི་རྒྱལ་མཚན་དང།། གཟི་མདངས་མིའི་རྒྱལ་མཚན་དང།། དམར་གསལ་ཁྲག་གི་རྒྱལ་མཚན་དང།། རྩལ་ཆེན་སེང་གེའི་རྒྱལ་མཚན་དང།། གཏུམ་ཆེན་དོམ་གྱི་རྒྱལ་མཚན་དང། ། རྒྱལ་མཚན་དེ་རྣམས་ཀྱི་རྩེ་མོ་གཅིག་ཏུ་འདུས་ཏེ། གསེར་གྱི་གཙུག་ཏོར་ཏོག་སྟོང་འབར་བའོ།། དེ་ནས་འདུས་པ་ཕལ་མོ་ཆེའི་འཁོར་གྱིས་ཞབས་ཀྱི་གདན་ཁྲི་ཡན་ཆད་ནས་དབུའི་གཙུག་ཏོར་མན་ཆད་དུ་ཡོངས་སུ་རྫོགས་པར་མཐོང་ངོ། ། དབུ་ལས་བྱུང་བའི་སངས་རྒྱས་ཉི་ཤུ་རྩ་གཅིག་དང། རྒྱལ་མཚན་ཆེན་པོ་བཅུ་ལ་རྫོགས་པའི་རྣལ་འབྱོར་ཡོངས་སུ་རྫོགས་པར་མཐོང་ངོ།། དབུའི་གཙུག་ཏོར་རྒྱལ་མཚན་གྱི་རྩེ་མོ་ལ་གསེར་གྱི་ཏོག་སྟོང་ནི་རྫོགས་པ་ཆེན་པོའི་རྣལ་འབྱོར་ཉིད་དུ་གསལ་བར་མཐོང་ངོ། ། དེ་ལྟར་མཐོང་ཞིང་གསལ་བར་གྱུར་པ་དང། ཆོས་ཐམས་ཅད་སྐུ་ལ་ཡོངས་སུ་རྫོགས་པའི་དོན་ལ་འཁོར་ཐམས་ཅད་དམ་ཞིང་ངོ་མཚར་སྐྱེས་པར་གྱུར་ཏཽ། ། རྣལ་འབྱོར་ཆེན་པོ་རྣམས་ཀྱིས་སྐུ་ལ་ཡོངས་སུ་བསྟོད་པ། ཨེ་མའི་ཆོས་ཀུན་སྐུ་ལ་ཡོངས་སུ་རྫོགས་པས་ཆོས་ཀྱི་སྐུ།། རྡོ་རྗེ་ཆེ་མཆོག་ཕྱག་འཚལ་ཧེ་རུ་ཀ། ཆོས་ཉིད་མཁའ་ལ་སྐར་ཚོགས་རྒྱས་པའི་སྐུ། ། དབྱར་གྱི་ཆར་སྤྲིན་གཏིབས་པ་ལྟ་བུའི་གཟུགས།། ཆུ་རླབས་ལྟ་བུར་བརྗོད་པའི་ཞལ་གདངས་ཤིང།། ཉི་མ་འབུམ་གྱི་འོད་ཟེར་བདལ་བ་བཞིན།། ཐེག་ཆེན་དགུ་དང་འཁོར་བའི་ཆོས་རྣམས་ཀུན། ། ཕྱག་རྒྱ་གཅིག་ཏུ་བཀོད་ནས་རྫོགས་པའི་སྐུ།། སྐུ་གསུམ་ལྷུན་གྲུབ་ཆོས་སྐུ་ཏོག་སྟོང་འབར།། དབུ་སྐྲ་ཁམ་ནག་རལ་པའི་ཅོད་པན་ཅན།། ཀླུ་རྒྱལ་འབུམ་གྱིས་བཀླུབས་ཤིང་མཆོད་ཀུན་འབུལ།། རྡོ་རྗེ་གསུང་གིས་ལྗགས་སྒྲ་བརྡབས་བས་ཀྱང། ། ཧཱུ~ཾ་དང་ཕཊ་ཀྱི་སྒྲ་སྐད་འཇིགས་པར་སྒྲོགས།། ཐེག་ཆེན་དོན་དམ་གསང་སྔགས་སྒྲོགས་པའི་ཚིག། འབར་བའི་སྨིན་མ་མུན་རུམ་གློག་ལྟར་འགྱུ།། སྤྱན་དམར་བཟློག་པའི་སྡང་མིག་ཉི་ལྟར་འབར། ། འབར་བའི་ཤངས་ནས་བསྐལ་པའི་ཚུལ་ནག་འཁྱིལ།། རྡོ་རྗེ་ཐོག་དང་གནམ་ལྕགས་སེར་ཆེན་འབེབས།། རྣོ་དབལ་མཆེ་བ་ཟང་ཡག་གཙིགས་པ་ཡིས།། ཉོན་མོངས་ལོག་ལྟའི་ཚོགས་ལ་ངམ་ཞིང་འཁྲུག། ཐོས་རུས་ཤ་ཁྲག་རྐང་རུས་འབུ་དང་རྣག། ཟ་བྱེད་རྔམ་པའི་ཞལ་དུ་ཆེམ་ཆེམ་གསོལ།། སྦྲུལ་གདུག་ཀོ་རློན་ལ་སོགས་འཇིགས་པའི་རྒྱན།། རྔམ་པའི་སྐུ་ལ་ཤིན་ཏུ་བརྗིད་པར་བརྒྱན།། ཟ་བྱེད་རྔམ་དང་འཇིགས་བྱེད་མང་པོའི་ཚོགས། ། འབར་བའི་ཕྱག་འཚན་སྤྲུལ་པའི་ཕོ་ཉ་མཛད།། འཁོར་བ་ཀུན་དང་ཐར་པའི་ཆོས་རྣམས་ཀུན།། དཔའ་བོ་ཆེན་པོའི་གདན་དུ་བརྗིད་ཅིང་རོལ།། འགྲན་གྱི་ཟླ་མེད་ཆེ་བཙན་གཅིག་པུ་ཉིད། ། གསང་མཆོག་འབར་བའི་སྐུ་ལ་ཕྱག་འཚལ་བསྟོད།། དེ་སྐད་ཅེས་བསྟོད་པས་ཆོས་ཐམས་ཅད་སྐུ་ལ་ཡོངས་སུ་རྫོགས་ཤིང་སངས་མ་རྒྱས་པ་མེད་པར་གྱུར་ཏོ།། དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེ་ཉིད་ཕྱག་རྒྱ་ཐམས་ཅད་ཕྱག་རྒྱ་བཀོད་པའི་ཕོ་བྲང་དུ་གྱུར་ཏོ། ། སྤྲོ་བ་རྒྱུན་གྱི་ཏིང་ངེ་འཛིན་ཞེས་བྱའོ།། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་ཆོས་ཉིད་རྒྱུན་གྱི་ཏིང་ངེ་འཛིན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། ཆོས་ཀྱི་རྒྱུན་གྱི་ཏིང་ངེ་འཛིན་འདི་གསུངས་སོ།། ནམ་མཁའ་དོན་གྱི་གླེགས་བམ་ལ།། སྐར་ཚོགས་རིག་པའི་ཡིག་བྲིས་ཏེ།། འབྱུང་ཆེན་བཞི་ཡི་སྒྲ་སྒྲགས་པས། ། གསང་སྔགས་ཆོས་ཀྱི་རྒྱུན་མི་འཆད།། ཆོས་ཀྱི་རྒྱུན་གྱི་ཏིང་ངེ་འཛིན་ཞེས་བྱ་བ་ཡོངས་སུ་རྫོགས་སོ།། དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེས་བདུད་རྩི་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། ། སྟོང་གསུམ་བྷན་དྷའི་བཟང་ཁོང་དུ།། སྲིད་གསུམ་སེམས་ཅན་དུག་ཆེན་ལས།། དུས་གསུམ་སངས་རྒྱས་རྩི་སྦྱར་བས།། བདུད་རྩི་དཀྱིལ་འཁོར་ལྷུན་གྱིས་རྫོགས། ། ཞེས་གསུངས་སོ།། དེ་ནས་ཡང་བཅོམ་ལྡན་འདས་སེམས་དཔའི་རྡོ་རྗེ་སྙིང་པོ་དེ་མཆོད་པ་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ།། འཁོར་བ་རྒྱ་མཚོའི་ཡོ་བྱད་རྣམས། ། མཆོད་པ་རྒྱ་མཚོའི་རྒྱ?ན་ཡིན་ཏེ།། སྲིད་པ་རྒྱ་མཚོ་མཐའ་ཡས་ཀུན།། ཀུན་བཟང་མཆོད་སྤྲིན་མཆོག་ཏུ་རོལ།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་བཟླས་བརྗོད་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། ། འཁོར་བ་ཆོས་ཀྱི་དབྱིངས་ཉིད་ལ།། སེམས་ཅན་སངས་རྒྱས་ཉིང་པོར་ཤར།། སྒྲ་སྐད་བསམ་གྱིས་མི་ཁྱབ་པ།། ཐམས་ཅད་བཟླས་བརྗོད་སྔགས་ཀྱི་ཚིག། ཅེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་སྦྱོར་བ་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ།། འཁོར་བ་ཤེས་རབ་ཡུམ་ཉིད་ལ།། སྙིང་རྗེ་ཐབས་ཀྱི་རྒྱལ་པོ་ཡིས། ། འདུ་འབྲལ་མེད་པར་སྦྱར་བས་ནི།། ཐམས་ཅད་རྒྱལ་བའི་སྲས་སུ་བསྐྱེད།། ཅེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་སྒྲོལ་བ་རྒྱུན་གྱི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། ། འཁོར་བ་བསྒྲལ་བའི་ཞིང་འདི་དག། ཡེ་ཤེས་འབར་བའི་མཚོན་ཆེན་གྱིས།། རང་བཞིན་མེད་པར་བསྒྲལ་ནས་ནི།། མཉམ་ཉིད་ཆོས་སྐུ་ཆེན་པོར་བཏོན།། ཞེས་གསུངས་སོ།། དེ་ནས་ཡངས་སེམས་དཔའི་རྡོ་རྗེ་སྙིང་པོ་དེ་སྐུ་གདུང་རྒྱུན་གྱི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ།། འདོད་ཁམས་རྨང་གི་རི་རབ་ལ།། གཟུགས་ཁམས་བང་རིམ་ཁྲི་འཕང་བརྟན། ། གཟུགས་མེད་བུམ་རྟེན་བུམ་པར་བཅས།། གདུང་ཆེན་ཆོས་སྐུར་རྒྱུན་དུ་གནས།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། ནམ་མཁའ་མེད་ཆུ་ས་རླུང་རྣམས། ། རྨང་གཞི་རི་རབ་རྟེན་དུ་སྣང།། བང་རིམ་རི་བདུན་བཅས་པ་རྣམས།། དེ་ཉིད་བང་རིམ་ཁྲི་འཕང་བརྟན།། རོ་བོ་བུམ་རྟེན་བུམ་པར་བཅས།། འདི་ཡང་ཆོས་སྐུ་རྒྱུན་མི་ཆད།། སེམས་དཔའ་རྡོ་རྗེ་དེས་ཡང་འདི་སྐད་ཅེས་གསུངས་སོ། ། འཛུགས་པའི་ཡན་ལག་བཞི་རྨང་རྟན།། འཁོར་ལོ་ཚོགས་ཆེན་ཁྲི་འཕང་བརྟན།། ཡན་ལག་དང་པོ་བུམ་རྟེན་བཅས།། ལྕང་ལོ་ཅོད་པན་ཕྲེང་བས་བཀླུབས།། ཞེས་གསུངས་སོ། ། དེ་ནས་སེམས་དཔའི་རྡོ་རྗེ་སྙིང་པོ་དེས་ཞི་བ་ཡོངས་སུ་སློང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། རོ་ཡི་སྒྲུབ་ལུགས་ཆེན་པོ་ནི།། དུར་ཁྲོད་ཆེན་པོའི་གནས་རྣམས་སུ།། རོ་ཡི་རྫས་རྣམས་བཙན་ནས་ཀྱང། ། འདོད་པ་བསྒྱུར་བའི་སྔགས་ཀྱིས་གདབ།། རོ་ཡི་སྟེང་དུ་གནས་ནས་ནི།། རོ་ཡི་གཉེན་པོར་བདག་བསམས་ནས།། རོ་སྔགས་རྒྱུན་མི་ཆད་པར་བཟླས།། རོ་ཡི་བཀྲག་དང་མདངས་བྱུང་ན།། གྲུབ་པར་འགྱུར་བའི་རྟགས་ཡིན་ཏེ། ། རྒྱུན་མི་འཆད་པར་ཏིང་འཛིན་བྱ།། རོ་ནི་འགུལ་བར་གྱུར་པ་དང།། གསེར་འགྱུར་རྩིས་ནི་བྱུག་པར་བྱ།། རོ་ཡི་ཡན་ལག་ཀུན་བཅིངས་ནས།། སྔགས་ནི་དག་པར་བཟླས་པར་བྱ། ། རོ་ཉིད་ལངས་པར་གྱུར་པ་དང། རོ་ཡི་ཆོ་འཕྲུལ་སྟོན་པར་བྱེད།། བརྟུལ་ཞུགས་ལྡན་པའི་སྐྱེ་བུ་ཡིས།། དེ་ཚེ་རོ་ཡི་ལྕེ་བཅད་ནས།། རོ་ལ་བརྔབས་ནས་གསེར་དུ་འགྱུར།། དེ་བཞིན་ཇི་ལྟར་འདོད་པ་ཡིས། ། རྐྱེན་གྱིས་བསྒྱུར་ན་དེ་ལྟར་འགྱུར།། ལྕེ་བཅད་རལ་གྲི་མཚོན་ཆ་དེས།། རོ་ཡི་བྷན་དྷ་བཅད་པ་དང།། ཇི་ལྟར་འདོད་པའི་རྫས་འགྲུབ་སྟེ།། བྷན་དྷ་གོ་རུ་བཟུང་ནས་ནི།། ལྕེ་ཡི་རལ་གྲི་ཐོགས་ནས་ནི།། ལྷ་མིན་གཡུལ་ཡང་བཟློག་པར་འགྱུར། ། རོ་ལངས་གྲུབ་པའི་རྐང་མགྱོགས་ནི།། དཔག་པའི་ཚད་ལས་འདས་པ་སྟེ།། སྐྱེས་བུ་རྩལ་དང་ལྡན་པ་བཞིས།། ཕྱོགས་བཞི་དག་ཏུ་ཁ་བལྟས་ནས།། དུས་གཅིག་མདའ་ཡི་རྒྱང་འཕངས་ནས། ། མདའ་ནི་ས་ལ་མ་འབབས་པར།། བཞི་ཀ་བར་སྣང་ལས་བླངས་ནས།། སྐད་ཅིག་ཙམ་གྱིས་འཇིག་རྟེན་སྐོར།། སྐྱེས་བུ་ལག་ཚོད་མ་ཡལ་བར།། དེ་མ་ཐག་རུ་གནས་སུ་སླེབས།། རོ་ལ་འདོད་པ་ཀུན་འབྱུང་ཞེས། ། དུས་གསུམ་རྒྱལ་བ་རྣམས་ཀྱིས་བཤད།། ཅེས་གསུངས་སོ།། རོ་ལངས་བསྒྲུབ་པའི་ཏིང་ངེ་འཛིན་ཏོ།། དེ་ནས་ཡང་སེམས་དཔའི་རྡོ་རྗེའི་སྙིང་པོ་དེ་རྡོ་རྗེ་ནམ་མཁའི་ཐེམ་སྐས་ཞེས་བྱ་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། ནམ་མཁའ་རྡོ་རྗེར་བསྒོམས་ནས་ཀྱང།། ཏིང་འཛིན་རེད་པར་གྱུར་པ་ན།། ཕན་ཚུན་གྱ་གྱུའི་ཐབས་ཚུལ་དུ།། རྡོ་རྗེ་སྐས་ལ་བགྲོད་ནས་ནི།། ནམ་མཁའི་དབྱིངས་སུ་སོང་ནས་ཀྱང། ། སྣང་སྲིད་འཇིག་རྟེན་ཁམས་ལ་བལྟ།། དེ་ནི་སེམས་ཡུལ་ཡངས་པར་འགྱུར།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་རྒྱལ་མཚོ་ཆེན་པོ་གནོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། ། རྒྱ་མཚོ་རྡོ་རྗེས་གཏམས་པར་ནི།། ཏིང་འཛིན་གསལ་བར་གྱུར་པ་དང།། རྒྱ་མཚོ་ཆེན་པོར་བགྲོད་ནས་ནི།། རྒྱ་མཚོ་གནས་པའི་སེམས་ཅན་རྣམས། ། ཏིང་འཛིན་རྡོ་རྗེས་བསྒྲལ་བར་བྱ།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དཻ་ཐོགས་མེད་རླུང་ཟླའི་དཀྱིལ་འཁོར་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ།། ནམ་མཁའ་དག་གི་ལིངྒ་ལ། ། ཟླ་བའི་དཀྱིལ་འཁོར་དབུས་གནས་པར།། བསྒོམ་ཏེ་ཏིང་འཛིན་རྟས་པ་དང།། ཞིང་ཁམས་ཀུན་དུ་བགྲོད་པར་བྱ།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་ཉི་མར་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། ནམ་མཁའ་དག་གི་ལིངྒ་ལ།། ཉི་མའི་དཀྱིལ་འཁོར་དབུས་གནས་པར།། བསྒོམས་ཏེ་ཏིང་འཛིན་རྟས་པ་དང།། མུན་པའི་གནས་རྣམས་ཐམས་ཅད་བསལ། ། ཞེས་གསུངས་སོ།། དེ་ནས་ཡང་སེམས་པའི་རྡོ་རྗེ་སྙིང་པོ་ངེས་སྲེག་པའི་བསྐལ་པ་གཞིལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། རྣལ་འབྱོར་སྡིགས་འཛུབ་རྩེ་མོ་ལ། ། ཟླ་བའི་དཀྱིལ་འཁོར་འོད་གསལ་འབར།། བསྒོམས་ཏེ་ཏིང་འཛིན་རྟས་པ་དང།། ཆུ་རྒྱུན་བབས་ཏེ་གཞིལ་བར་བྱ།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་སྟོང་གི་འཇིག་རྟེན་རྒྱང་མར་འཕེན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། ། རྣལ་འབྱོར་ལས་ཀྱི་དཀྱིལ་འཁོར་དུ།། སྟོང་གི་འཇིག་རྟེན་འཁོར་ཡུག་བཅས།། ཤིན་ཏུ་གསལ་བར་བསྒོམས་པ་དང། ། ཏིང་འཛིན་རྩལ་ཅན་རབ་སྦྱང་ཕྱིར།། ནམ་མཁའི་ཁམས་སུ་འཕགས་ནས་ནི།། ས་ནས་ས་རུ་སྤར་བར་བྱ།། དེ་སྐད་ཅེས་གསུངས་སོ།། དེ་ནས་སེམས་དཔའི་རྡོ་རྗེ་ཉི་མའི་དཀྱིལ་འཁོར་འབུམ་འགྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། རྣལ་འབྱོར་སྡིགས་པའི་མཛུབ་མོ་ལ།། ཉི་མའི་དཀྱིལ་འཁོར་འབར་བར་ལས།། འོད་ཟེར་འབ་བ་འབུམ་འཕྲོས་པས།། འོད་ཟེར་དེ་དག་རེ་རེ་ལས། ། ཉི་མའི་དཀྱིལ་འཁོར་འབུམ་འཕྲོས་པས།། དེ་ནི་མུན་པ་ཐམས་ཅད་སེལ།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་འབྱུང་བ་ཆེན་པོ་བསྐལ་པའི་ཆུ་རྒྱུན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། རྣལ་འབྱོར་ལག་པའི་འཁོར་ལོ་ལས།། ཆུ་ཟླའི་སྙིང་པོར་རབ་ཤར་ཏེ།། བདུད་རྩི་ཆུ་བོའི་རྒྱུན་བབས་པས།། སྲེག་པའི་བསྐལ་པའི་མེ་ཆེན་གསོད།། ཅེས་གསུངས་སོ། ། དེ་ནས་ཡང་སེམས་དཔའི་རྡོ་རྗེ་དེ་སྐུ་ཕྱག་རྒྱ་འབར་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ།། རིན་ཆེན་འབར་བའི་ལིངྒ་ལ།། སངས་རྒྱས་ཡེ་ཤེས་དཔལ་གྱི་སྐུ། ། རིན་ཆེན་འབར་བའི་ངོས་བརྒྱད་ལ།། རིག་པའི་མ་མོ་དཔལ་འབར་བ།། བརྒྱད་དུ་གསལ་བར་གྱུར་པ་དང།། ཡེ་ཤེས་རྩ་བའི་དཀྱིལ་འཁོར་རྫོགས།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་གསུང་གི་ཕྱག་རྒྱ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། པདྨ་འབར་བའི་ལིངྒ་ལ།། རིན་ཆེན་འབར་བའི་ཡིག་འབྲུ་བརྒྱད།། ཤིན་ཏུ་འབར་ཞིང་འཕྲོ་འདུ་བ། ། གསུང་གི་རྩ་བའི་རྒྱག་རྒྱ་ཡིན།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་དེ་ཐུགས་ཀྱི་ཕྱག་རྒྱ་འབར་བ་ཞེས་བྱ་བའི་ཏིང་ངེ་འཛིན་ལ་ཉོམས་པར་ཞུགས་ནས་འདི་སྐད་ཅེས་གསུངས་སོ། ། རྡོ་རྗེ་འབར་བའི་ལིངྒ་ལ།། ཡི་གེ་ཧཱུ~ཾ་གི་འབྲུ་ཡིས་བསྐོར།། མཐའ་མ་རིན་ཆེན་ཡི་འབྲུ་བརྒྱད།། ཁ་དོག་མཐིང་གས་བསྐོར་བ་ནིམ།། ཐུགས་ཀྱི་གསང་བའི་ཡེ་ཤེས་ཡིན།། ཞེས་གསུངས་སོ།། དེ་ནས་སེམས་དཔའི་རྡོ་རྗེ་དེས་ཏིང་ངེ་འཛིན་གྱི་མདོ་འདི་གསུངས་སོ། ། སེམས་ནི་སྒྱུ་མའི་རང་བཞིན་ཏེ།། ཇི་ལྟར་བརྟགས་པ་དེ་ལྟར་སྣང།། མདོ་བཞིན་སྣང་བར་མ་གྱུར་ཀྱང།། སེམས་ཉིད་བརྟགས་པ་དེ་ལྟར་འགྱུར། ། གདོས་བཅས་དམིགས་བུས་མི་མཐོང་ཡང།། མངོན་ཤེས་ཡིད་གཟུགས་ཅན་གྱིས་མཐོང།། གང་ལྟར་བརྟགས་པར་ཡུན་བརྟགས་ན།། རྟོག་པ་རྟས་པའི་འབྲས་བུ་ནི།། མངོན་སུམ་གསལ་བར་རེད་པར་འགྱུར། ། དགེ་དང་མི་དགེའི་བག་ཆགས་དང།། ཡོད་དང་མེད་པའི་རང་བཞིན་རྣམས།། བག་ཆགས་རྟས་པ་ཁོར་ནར་ཟད།། དེ་བས་ཏིང་འཛིན་སེམས་ཉིད་གཙོ།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྒྱུན་གྱི་ཏིང་ངེ་འཛིན་གྱི་ལེའུ་སྟེ་དགུ་པའོ། །།། དེ་ནས་སེམས་དཔའི་རྡོ་རྗེ་སྙིང་པོ་དེས་གསང་སྦྱོར་ཆེན་པོ་སྒྲུབ་པ་འདི་གསུངས་སོ།། འདུས་པ་ཆེན་པོའི་རྣལ་འབྱོར་རྣམས། ། ཤིན་ཏུ་གསང་བའི་སྒྲུབ་པ་འདི།། བདེ་གཤེགས་རྒྱལ་བའི་གཤེགས་ཤུལ་ཏེ།། འཇིག་རྟེན་གང་ཟག་ལམ་ཡང་ཡིན།། མ་རྟོགས་པ་དང་ལོག་པར་རྟོགས།། ཕྱོགས་རྟོགས་ཡང་དག་ཉིད་མ་རྟོགས།། ལོག་པའི་ལམ་བཞི་མཐའ་བསལ་ནས། ། བདེ་གཤེགས་རྒྱལ་བའི་ལམ་ལ་འཇུག། དེས་ན་སྒྲུབ་པའི་ལམ་མཆོག་འདི།། འདུས་པའི་ཚོགས་ལ་བཤད་པར་བྱ།། ཤིན་ཏུ་གུས་པས་མཉན་པར་གྱིས།། དེ་ནས་འདུས་པའི་འཁོར་རྣམས་ཀྱིས། ། གསང་བ་སྦྱོར་བའི་ཕྱག་བྱས་ནས་འདི་སྐད་ཅེས་གསོལ་ཏོ།། བཅོམ་ལྡན་འདས་གསང་བའི་དབང་ཕྱུག་ཆེན་པོ་བདག་ཅག་རྣམས་ལ་གསང་བའི་ཡང་གསང་བ། བཀའ་གསང་བ་ཆེན་པོ་ཡེ་ཤེས་རྨད་དུ་བྱུང་བ། སངས་རྒྱས་བཤགས་པའི་ཤུལ་ཡང་དག་པའི་དོན་བདག་ཅག་རྣམས་ལ་བཤད་དུ་གསོལ། ཞེས་གསོལ་བ་བཏབ་པ་ལས་སེམས་དཔའི་རྡོ་རྗེ་སྙིང་པོ་དེ། བཙུན་མོའི་ཚོགས་ལ་དགྱེས་པར་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། བྷག་གསང་བའི་པདྨ་ནི།། བདེ་གཤེགས་རྒྱལ་བའི་ཕོ་བྲང་སྟེ།། སྔོན་འདས་རྒྱལ་བ་བརྣལ་བའི་དབྱིངས། ། ད་ལྟར་བཞུགས་པ་གནས་པའི་རྟེན།། སླད་ཀྱིས་བྱོན་པ་གཤེགས་པའི་ཤུལ།། རྒྱལ་བ་རྣམས་ལ་དེ་ལྟར་སྣང།། དེ་ལྟར་མ་ཤེས་འཁོར་བའི་ལམ།། རྣལ་འབྱོར་ཅན་གྱིས་ཤེས་པར་གྱིས།། ཡུལ་གྱི་མཆོག་ནི་འདིར་གཟུང་བ། ། མཚན་ལྡན་བཀྲ་ཤིས་གསང་བའི་ཡུམ།། སྨིན་དཀྱུས་རིང་ལ་ལག་སོར་ཕྲ།། ཚིགས་མིག་ཟླུམ་ལ་ཕྲ་བར་བཤད།། ཁ་ནས་ཨུཏྤལ་དང་ལྡན་ཞིང།། ཡིད་འོང་མཚན་ལྡན་རྐེད་སྐབས་བྱེད།། སྐྲ་འཇམ་མཐོན་མཐིང་ལྕང་ལོར་འཁྲིལ། ། སོ་དཀར་ཚགས་དམ་སྨིན་དཀྱུས་རིང།། ཟར་མའི་མེ་ཏོག་རྒྱས་འདྲའི་སྤྱན།། དཔྲལ་བའི་དབྱེས་ཆེ་སྒྲ་མཚམས་ལ་འཁྱུག། སྣ་བཟང་མདོག་གསལ་པདྨའི་རིགས།། ལུས་དྲང་སྐེ་རིང་སེམས་མའི་ཚུལ། ། ནུ་མའི་དཀྱིལ་འཁོར་ཟླ་རྒྱས་འདྲ།། ཤ་དཀར་ཚགས་དམ་འཁྲིལ་བག་ཅན།། ཁོང་དལ་འགྲོ་ན་གོམ་པ་འཇམ། སྐད་ནི་ངང་པ་གཞོན་ནུ་སྒྲོགས།། ཅི་ཡང་མཛེས་པའི་སྟབས་ཚུལ་ལྡན། ། སྐྱེས་བུ་བླ་མས་ཡུམ་དུ་གཟུང།། གཟུངས་སུ་བྱིན་གྱིས་བརླབས་པར་ནི།། དེ་ཡི་གཟུགས་ཀྱི་ཕུང་པོ་ལ།། བདེ་བར་གཤེགས་པའི་ས་བོན་ལྔ།། འཕྲོ་འདུ་གསལ་བར་གྱུར་པ་དེ།། རྒྱས་བཏབ་བྱིན་རླབས་དབང་བསྐུར་ནས། ། བདེ་གཤེགས་ཡུམ་ལྔའི་སྐུ་མཆོག་གསལ།། རྡོ་རྗེ་ཐབས་ལའང་དེ་བཞིན་ཏེ།། དེ་ལྟར་གསལ་བར་གྱུར་པ་དང།། ཡུམ་གྱི་མཁའ་ལ་མེ་རི་བསྒོམ།། གསང་བ་དབུས་ཀྱི་ཟླ་གམ་ལ།། བྱང་ཆུབ་སེམས་ཀྱི་སྤྲོ་བསྡུ་བྱ། ། གཟུགས་བརྙན་ཇི་ལྟར་གསལ་བ་བཞིན།། ཆགས་པའི་མཁའ་ལ་དེ་བཞིན་ནོ།། མ་སྐྱེས་པ་དང་མ་འགགས་པ།། རིག་པ་སྣང་མཉམ་པའོ།། མཁའ་དབྱིངས་རྣམ་དག་བདེ་ཆེན་ཀློང།། མི་གནས་བདེ་བ་ཆེན་པོའི་ལུང། ། རིག་པ་ཐབས་ཀྱི་རང་བཞིན་ལས།། བྱིན་བརླབས་རང་དབང་ངང་གིས་གསལ།། བཞིན་མདོག་དམར་པོ་སོག་ཀ་ལ།། དཔྲལ་བའི་དབྱེས་ཆེ་སྨིན་དཀྱུས་རིང།། མིག་གི་མདངས་གསལ་དཀྱུས་སུ་རིང། ། དུང་ཆེན་ཐགས་དམ་ཤེལ་མདོག་ཆགས།། བཞིན་གྱི་གཟངས་རིང་ཀོས་ཀོ་ཕྲ།། ལུས་ལ་ཞིམ་པའི་དྲི་ལྡང་ཞིང། ཁ་ནས་ག་བུར་ངད་ལྡན་བ།། ནུ་མའི་དཀྱིལ་མཐོ་ནུ་མར་འཁྱིལ།། པདྨ་ཅན་ཞེས་བྱ་བར་གྲགས། ། དུང་ཅན་མ་ཞེས་བསྟན་པ་ནི།། དཀར་མོ་ཟླ་བའི་མདངས་སུ་གསལ།། བཞིན་ལུས་དུང་ལྟར་གཡས་སུ་གཡོ།། གཙུག་པུད་མཐོན་མཐིང་གཡས་སུ་འཁྱིལ།། སྐད་ཆེ་གདངས་སྙན་ཚིག་ཏུ་གསལ། ། བོང་ཆུང་ལུས་ནི་མཛེས་པར་སྣང།། བུ་མོ་མིག་རིང་ཞེས་བྱ་བ།། ཤེས་རབ་གསལ་ཞིང་འདོད་པ་ཆེ།། གཙོ་བོ་ངེས་པའི་བརྟུལ་ཞུགས་ཅན།། ཟླ་གསང་དཀར་དམར་རླུང་ཀར་ལྕི།། རྣམ་པར་བརྡིག་ཅིང་འཁྱིལ་པས་ནི། ། ཀུན་གྱིས་དྲོད་ནི་ཡོང་མི་ལོན།། གསང་བ་སྦས་པའི་ཐབས་ལ་མཁས།། ཕྱི་ནང་རླུང་ཀར་གསེར་ལྟར་ལྕི།། རྟོག་པ་མེད་ཅིང་དོན་ལ་གཞོལ།། བཞིན་ནི་གྲུ་བཞིའི་དབྱིབས་ལྡན་ལ།། མིག་རིང་ཕྲ་བཤད་འཁྱིལ་བག་ཆགས། ། དཀར་དམར་མཛེས་པའི་རྒྱན་གྱིས་བརྒྱན།། ལྡོན་པ་དག་གི་རིགས་སྨོས་པ།། སྡོང་པོ་ཡལ་ག་མང་པོའི་དཀྱིལ།། ཤིན་ཏུ་འདབ་རྒྱས་ཡལ་གར་ལེགས།། མཐོན་མཐིང་སྐྲ་ཡི་རང་བཞིན་ནི། ། བྱང་ཆུབ་སེམས་འདྲར་ལྕང་ལོར་བཤད།། སྟོད་སྨད་ཀུན་དུ་ཕྲ་ལ་ལེགས།། སྲིད་དུ་རིང་ཞིང་ལྡེམ་བག་ཅན།། ལྕུག་ཕྲན་ཞེས་བྱའི་མཚན་མ་ནི།། བཅུ་གཉིས་ཉི་ཤུ་རྩ་ལྔ་པ།། རྡོ་རྗེའི་མཚོན་གྱིས་མ་ཕོག་ཅིང། ། མུ་ལ་རཀྟར་ལྡན་པ་ལ། ཕྲ་ཞིང་བཤད་ལ་གཟངས་སུ་རིང།། བན་གླང་སེར་མོ་གྲུ་བཞི་ལ།། ཁམ་ལ་མིག་འབུར་སྨིན་ཚོགས་ཆེ།། སྐྲ་ཁམས་མ་ལ་སོ་ཆེ་ཞིང།། སྣ་རིང་འགྲམ་སླང་རིང་པ་ཡིན།། རི་མོ་ཅན་གྱི་བུད་མེད་ནི། ། ནག་མོ་གྲཝ་གསུམ་རྩིད་མགོ་མ།། ཁྲོ་གཉེར་ཅན་ལ་གེལ་བག་ཆགས།། སྡོང་གཅིག་ཡན་ལག་གཏན་མེད་པའོ།། སྐྱེ་བའི་རྒྱུ་མེད་བཀྲ་མི་ཤིས།། མི་རེག་ཡལ་ག་མེས་ཚིག་ཡིན།། སྤྱིར་ནི་དེ་ལྟར་བསྟན་མོད་ཀྱང། ། གང་དག་དད་ལྡན་བརྟུལ་ཞུགས་ཅན།། ཡིད་དུ་འོང་དང་མི་འོང་རྣམས།། དད་པ་ཆགས་ཤིང་ལུས་འབུལ་ན།། ཐུགས་རྗེའི་ཡུལ་བས་ཀུན་སྙོམས་བྱ།། རྣམ་རྟོག་སྤོང་ལེན་གང་བྱེད་པ།། དེ་དག་སྒྲིབ་པ་མུ་མཐའ་ཡས། ། རྨད་དུ་གསང་བའི་མཆོད་པ་ལ།། གསང་བའི་ཕྱག་ཚང་གང་བྱེད་པ།། ལས་ཀྱི་སྒྲིབ་པ་ཀུན་བསལ་ཏེ།། མན་ངག་གསང་བའི་དམིགས་བུ་འཐོབ།། དེ་ལྟར་བརྟགས་པའི་ཡུམ་དེ་ལ།། དྲི་སྤོས་ཙནྡན་ལ་སོགས་པས། ། ཨ་ག་རུ་དང་སྦྱར་བའི་ཆུ།། ཁྲུས་ཀྱི་ཆོ་གས་དག་པར་བྱ།། དྲི་ཞིམ་ལ་སོགས་སྣ་ཚོགས་ཀྱིས།། ལུས་ལ་བྱུག་པ་སྣ་ཚོགས་བྱ།། དེ་ནས་ནང་གི་ཁྲུས་ཆེན་ཡང།། ཤིན་ཏུ་དག་པར་བྱ་བ་ནི། ། རྫས་ཀྱི་ཆུ་དང་རྫས་སྦྱར་བས།། ནང་གི་རྫས་རྣམས་དག་པར་བྱ།། བུར་ཤིང་སྙིང་པོ་ལ་སོགས་པ།། རོ་ཡི་མཆོག་ཏུ་གྱུར་པ་ཀུན།། རྩི་འམ་བཅུད་དང་སྦྱར་ནས་ཀྱང།། ནང་གི་རྫས་རྣམས་སྦྱར་བར་བྱ།། རྫས་ཀྱི་ཆོ་ག་རྫོགས་པ་དང། ། བྱང་ཆུབ་མཆོག་ཏུ་སེམས་བསྐྱེད་དེ།། མ་དམིགས་ཆོས་ལ་བློ་སྦྱངས་ཕྱིར།། རྩ་བ་བྱང་ཆུབ་སེམས་ཀྱི་དོན།། རྒྱ་ཆེར་ཤིན་ཏུ་བཤད་པར་བྱ།། ཕུང་པོ་སྒྱུ་མར་སྣང་བས་ན།། སེམས་ལ་རང་བཞིན་མེད་པར་ངེས། ། སྣང་སྲིད་ནམ་མཁར་གཅིག་པས་ན།། འཁོར་བ་སྒྱུ་མ་ཡིན་པར་ངེས།། ཀུན་གཞི་ཆོས་ཀྱི་མཛོད་ཡིན་པས།། སངས་རྒྱས་གཞན་ན་མེད་པར་ངེས།། བྱམས་ལ་ངང་མ་ཆགས་པས་ན།། སྡང་ལ་སེམས་མི་འཁྲུག་པར་ངེས། ། གནས་ལ་ངེས་པ་མེད་པས་ན།། ས་རྣམས་བགྲོད་པ་མེད་པར་ངེས།། སེམས་ལ་སྐྱེ་ཤི་མེད་པས་ན།། འཕོ་འགྱུར་དག་ལ་ཉམ་མི་ང།། དེས་ན་ཐམས་ཅད་སྒྱུ་མར་སྣང།། སྒྱུ་མ་རང་བཞིན་མེད་ཤེས་པས། ། ཐམས་ཅད་ཆོས་ཉིད་སྙིང་པོ་ཡིན།། མཚན་མ་རྟོག་བའི་དྲི་མ་དག། ཆོས་ཉིད་ཆུ་བོ་དེས་བཀྲུས་ན།། འཛིན་པའི་དྲི་མ་དག་པར་འགྱུར།། དེ་ནས་རྒྱན་གྱི་ཆོ་ག་ནི།། རྫས་ཀྱི་ཡོ་བྱད་ཡིན་པས་ན། ། རློབ་ཅིང་འཕུར་བའི་ཆས་གོས་དང།། རིན་ཆེན་ཕྲོག་དང་རྣ་ཆར་བཅས།། འཇོལ་སྒེག་མགུལ་རྒྱན་ལ་སོགས་པ།། དཔུང་རྒྱན་དོར་ཤལ་སེ་མོ་དོ།། ནོ་བུ་རིན་ཆེན་ལ་སོགས་བརྒྱན།། རྐང་གདུབ་ལག་གདུབ་ལ་སོགས་པ། ། གསེར་དང་དངུལ་ལ་སོགས་པས་བརྒྱན།། རོལ་མོ་སྒྲ་དབྱངས་སྣ་ཚོགས་པའི།། མཆོད་རྫས་སྣ་ཚོགས་ཐོགས་པར་བྱ།། དེ་ནས་འདྲེན་པའི་ཆོ་ག་ནི།། གསང་བའི་ཚིག་གིས་བསྲེ་བ་ན། ། རྡོ་རྗེ་ལྕེ་ཡི་དམ་ཚིག་གིས།། ཚིག་གི་བརྡས་ནི་མཚོར་པར་བྱ།། ས་མ་ཡ་ཧོ་ཞེས་བརྗོད་ན།། ས་མ་ཡ་སྟཾ་ཞེས་ཀྱང་བསྲེ།། ར་ག་ཡ་མི་ཞེས་བརྗོད་ན།། ར་ཧོ་ཧཾ་ཞེས་བརྗོད་པར་བྱ།། ཏི་པ་སུ་ཀི་ཞེས་བརྗོད་ན། ། གན་དེ་ཙི་ཏ་ཞེས་པས་མཚོན།། ཨ་ཏི་པུ་ཧོ་ཞེས་བརྗོད་ན།། པྲ་ཏི་པུ་ཧོ་ཞེས་པས་མཚོན།། གཡས་ཀྱི་སྨིན་མ་བསྐྱོད་བྱས་ན།། གཡོན་གྱི་སྨིན་མས་མཚོན་པར་བྱ།། ནཱ་ས་གཡས་ཀྱིས་མཚོན་བྱས་ན།། དེ་བཞིན་ནཱ་ས་གཡོན་གྱིས་མཚོན། ། གཙུག་ཏོར་གཙུག་ཏུ་མཚོན་བྱས་ན།། དེ་བཞིན་དཔལ་བེའུའི་ལིངྒར་མཚོན།། རྡོ་རྗེ་ལིངྒ་འོད་འཕྲོ་ན།། པདྨ་ཟེ་འབྲུ་འབར་འཕྲོ་འཁྱིལ།། ཞེས་པའི་ཚིག་གི་དོན་རྣམས་བསྲེ།། བསྐུལ་བའི་ཆོ་ག་ཁྱད་པར་ཡང། ། དོན་གྱིས་འདི་ལྟར་བསྐུལ་བར་རིགས།། ཤེས་རབ་ཉི་མའི་འོད་ཟེར་གྱིས།། ཐབས་མཆོག་ཟླ་བའི་འོད་ལ་བསྐུལ།། བསྐུལ་བའི་ཆོ་ག་རྫོགས་པ་དང།། མཆོད་པའི་ཡོ་བྱད་དབུལ་བར་བྱ། ། དེ་ནས་སངས་རྒྱས་ཐམས་ཅད་ཟླ་བའི་དཀྱིལ་འཁོར་གྱི་ངང་དུ་གསལ་བར་གྱུར་ཏོ།། ཤེས་རབ་ཉི་མའི་དཀྱིལ་འཁོར་གྱི་ངང་དུ་གསལ་བར་གྱུར་ཏོ།། དེ་ནས་ཉི་མའི་ཟེར་གྱིས་འདི་སྐད་ཅེས་བསྐུལ་ཏོ།། མི་གཡོ་མཆོག་གི་རྒྱལ་པོ་དགོངས་སུ་གསོལ། ། རྣམ་པར་མི་རྟོག་ཤིན་ཏུ་དྲི་མེད་སྐུ།། འོད་ཟེར་མདངས་ལྡན་ཟླ་བ་རྒྱས་འདྲའི་ཞལ།། དགྱེས་པ་རོལ་པའི་དོན་ལ་བཞེངས་སུ་གསོལ།། དེ་སྐད་ཅེས་བསྐུལ་བ་དང།། ཟླ་བའི་འོད་ཟེར་ལས་འདི་སྐད་ཅེས་བསྐུལ་ཏོ། ། ཡིད་འོང་འབྱོར་ལྡན་རྒྱལ་བ་རྒྱ་མཚོའི་དབྱིངས།། ཤེས་རབ་ཟབ་མོ་རྣམ་དག་པདྨའི་མདངས།། སྒྱུ་འཕྲུལ་རབས་ལ་མཁས་པའི་སྤྱོད་མཆོག་མ།། ཡིད་འོང་འབྱོར་ལྡན་ཆོ་འཕྲུལ་སྣ་ཚོགས་བསྟན། ། ཞེས་གསུངས་སོ།། དེ་ནས་ཡོ་བྱད་ཀྱི་ཚོགས་ཐམས་ཅད་ཤིན་ཏུ་འབུལ་བ་ཞེས་བྱ་བའི་ཆོ་འཕྲུལ་བྱུང་སྟེ། ཉི་མའི་འོད་ཟེར་ལས་སྒྲ་བྱུང་བ།། པདྨའི་ཟེ་འབྲུ་འབར་བ་འདི།། འཛུམ་པའི་མདངས་ཀྱིས་འབུལ་ལགས་ན། ། དགྱེས་པའི་རྡོ་རྗེ་ཆོ་འཕྲུལ་ལས།། བྱང་ཆུབ་ཆར་སྤྲིན་དབབ་ཏུ་གསོལ།། ཟླ་བའི་འོད་ཟེར་ལས་ཆོ་འཕྲུལ་གྱི་སྒྲ་བྱུང་བ།། ཨེ་མ་ཡིད་ཀྱི་དགའ་སྡེ་མོ།། གདུང་བའི་སྙིང་ཕྲེང་ཤེས་རབ་གཟུངས། ། པདྨའི་གའུ་འཁྱིལ་པ་ལ།། བདེ་བའི་རྡོ་རྗེ་བྱང་ཆུབ་འབར།། ཞེས་སྒྲ་བྱུང་བས།། ཕྱག་རྒྱ་སྣ་ཚོགས་ཀྱི་ཆོ་འཕྲུལ་འབྱུང་བའི་རྒྱུར་གྱུར་ཏོ།། དེ་ནས་སེམས་དཔའ་རྡོ་རྗེ་དམ་པ་དེས་འཁོར་བ་ཐམས་ཅད་ཐུགས་རྗེས་ཡོངས་སུ་བཟུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ། ཐབས་མཆོག་ཟླ་བ་རྡོ་རྗེ་ཞེས་བྱ་བ་ལས་ཆོ་འཕྲུལ་གྱི་སྒྲ་འདི་བྱུང་ངོ།། འདོད་པའི་དབང་པོ་ཐམས་ཅད་ནི། ། ཆགས་པའི་འགྱིང་བའི་གཙོ་མོ་ཡིན།། ཆགས་པ་རྣམ་པར་སྦྱང་བའི་ཕྱིར།། འདོད་པ་གནས་སུ་དྲང་བར་བྱ།། ཞེས་བྱུང་བས། འཁོར་བ་ཐམས་ཅད་ཐུགས་རྗེ་ཆེན་པོའི་ལྷུང་བཟེད་ཀྱིས་བཟུང་ངོ།། དེ་ནས་སེམས་དཔའི་རྡོ་རྗེ་དེ་སྒྲིབ་པ་སྲེག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། རྡོ་རྗེ་འབར་བའི་ལིངྒ་ལ།། ཨ་ཡི་ཡེ་ཤེས་འོད་འཕྲོས་པས།། ཆགས་པའི་སྒྲིབ་པའི་བུད་ཤིང་རྣམས། ། མེ་ཡི་ཡེ་ཤེས་ཀྱིས་སྦྱངས་སོ།། དེ་ནས་ཡང་སེམས་དཔའི་རྡོ་རྗེ་དེས།། བྷ་ག་བྱིན་གྱིས་རློབ་པ་ལ་སྙོམས་པར་ཞུགས་ནས་གསུངས་པ།། འཁོར་བར་སྣང་བའི་ཆོས་རྣམས་ཀུན།། བྷ་གའི་སྙིང་པོར་རབ་གསལ་བ། ། ཡུམ་གྱི་ལུས་ཀྱི་ཡན་ལག་རྣམས།། ཡུམ་ལྔའི་རང་བཞིན་ཉིད་དུ་གསལ།། ཞེས་གསུངས་སོ།། དེ་ནས་སེམས་དཔའི་རྡོ་རྗེ་སྙིང་པོ་དེས་ཆགས་པ་ཐམས་ཅད་གཅོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། ཆོས་ཉིད་ནམ་མཁར་རྟོགས་གྱུར་ན།། སྦྱོར་སྒྲོལ་མང་པོ་ཅི་བྱས་ཀྱང།། ཆགས་སྡང་དྲང་བའི་ཐབས་ཡིན་ཏེ།། རྡུལ་ཆ་ཙམ་ཡང་སྣང་བ་མེད།། ཅེས་གསུངས་སོ། ། དེ་ནས་སངས་རྒྱས་ཐམས་ཅད་བཙུན་མོའི་ཚོགས་ཐམས་ཅད་ལ་དགྱེས་པའི་རོལ་པ་ལ་ཞུགས་པར་གྱུར་ཏེ།། མི་དམིགས་པའི་བདེ་བ་ལ་ཅི་ཡང་མི་གཡོ་བར་གྱུར་ཏོ།། དེ་ནས་བྱང་ཆུབ་སེམས་ཀྱི་ཆར་ཆེན་པོ་པདྨའི་སྙིང་པོ་རྒྱུན་མི་འཆད་པར་འབབ་པར་གྱུར་ཏོ། ། འཁོར་བ་ཐམས་ཅད་ནི་རྒྱལ་བའི་སྲས་པོར་བསྐྱེད།། རྒྱལ་བ་འགོག་པ་ནི་བྱང་ཆུབ་སེམས་ཀྱི་བརླན་པར་མཛད་ཅིང་སྲིད་པའི་མྱུ་གུ་མངོན་པར་བསྐྱེད།། རྨད་དུ་བྱུང་བའི་མཆོད་པའི་ཡོ་བྱད་ནི་བསམ་གྱིས་མི་ཁྱབ་པའི་ལིང་ལོང་ཕྱད་པར་བྱུང་ངོ། ། རིག་འཛིན་གྱི་སེམས་དཔའ་ཐམས་ཅད་ནི། ཤེས་བྱའི་སྒྲིབ་པ་སྦྱངས་ནས་ཆོས་ཀྱི་སྐུའི་ནང་དུ་བརླན་པར་གྱུར་ཏོ།། དེ་ནས་སེམས་དཔའི་རྡོ་རྗེ་དེས་འགྲོ་བ་ཐམས་ཅད་ལ་དབང་བསྐུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། དཔག་ཏུ་མེད་པའི་རྒྱལ་བ་རྣམས།། འཁོར་བའི་སེམས་ཅན་རྒྱུ་ལསབྱུང།། འཁོར་བའི་སེམས་ཅན་རྒྱུན་ཆད་ན། ། སངས་རྒྱས་རྒྱུན་ཡང་འཆད་པར་འགྱུར།། འཁོར་བ་ཆོས་ཉིད་རང་བཞིན་དུ།། ཤེས་ནས་སྨྲ་བར་གང་བྱེད་པ།། རིག་པའི་ཡེ་ཤེས་རང་དབང་དེ།། ཆོས་ཀྱི་རྒྱལ་པོ་རྒྱལ་བའི་སྲས།། ཞེས་གསུངས་སོ། ། དེ་ནས་སེམས་དཔའི་རྡོ་རྗེ་དམ་པ་དེས་ཆོས་ཐམས་ཅད་གྲུབ་པ་སྨོན་ལམ་གྱི་སྒོ་ནས་འཇུག་པར་མཁྱེན་ནས་སྨོན་གནས་ཆེན་པོའི་ལམ་འདི་གསུངས་སོ།། འགྲོ་དྲུག་རྒྱལ་བའི་སྲས་པོ་འདི།། མ་རྟོགས་ལོག་པར་འཁྱམས་པ་རྣམས། ། རྒྱལ་བའི་སྲས་སུ་བསྐྱེད་ནས་ནི།། འཁོར་བའི་རྒྱུན་རྣམས་གཅད་པར་བྱ།། ཉི་ཟླའི་ནང་དུ་བཞག་ནས་ནི།། བཅུ་དྲུག་ས་ལ་རྫོགས་པར་འགྱུར།། དེས་ན་རིགས་ལྡན་མཚན་བཟང་ལ། ། དོན་དང་ལྡན་པའི་མཁས་པ་ཡིས།། སྦྱོར་བའི་ཡན་ལག་ཀུན་རྫོགས་ནས།། ཡུམ་གྱི་ནམ་མཁའ་དབྱིངས་ཟླ་གམ་ལ།། གྲུབ་པའི་གཞལ་ཡས་ཁང་དུ་བསྐྱེད།། རྩིབས་བརྒྱད་ཟླ་གམ་དགུར་གསལ་ལ། ། བྱང་ཆུབ་སེམས་ལས་ཕྱག་རྒྱའི་ཚོགས།། ལྷ་དགུ་གསལ་བའི་ཡེ་ཤེས་བསྐྱེད།། དེས་ནི་ཐམས་ཅད་རྫོགས་པར་འགྱུར།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་གསང་སྦྱོར་སྒྲུབ་པའི་ལེའུ་སྟེ་བཅུ་པའོ། །།། དེ་ནས་སེམས་དཔའི་རྡོ་རྗེ་སྙིང་པོ་དེ་མི་འགྱུར་བ་གཏན་འཕོ་བ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ།། རྣལ་འབྱོར་རིག་འཛིན་གང་ཞིག་རྣམས། ། མི་འཕོ་བར་ནི་གནས་འདོད་པ།། ལོ་གཅིག་གམ་ནི་ཟླ་གཅིག་གམ།། དེ་བཞིན་ཞག་གི་རྣམ་གྲངས་ཀྱང།། བཅོ་ལྔའང་ཡང་ན་བདུན་པར་དུ།། ཐོ་རངས་ཐུན་ཐའི་དང་པོའི་ཚེ། ། རིག་འཛིན་རྣལ་འབྱོར་སྒྲུབ་པ་པོ།། ཤར་གྱི་ཕྱོགས་སུ་ཁ་བལྟས་ཏེ།། ཤར་ཕྱོགས་ནམ་མཁས་བསྡུས་པ་ཡི།། ལྷ་ཀླུ་གནོད་སྦྱིན་འཇིག་རྟེན་བཅས།། ཐམས་ཅད་ཁོང་དུ་བསྡུས་ནས་ཀྱང།། དབུགས་དེ་སླར་ལ་མི་དབྱུང་བར། ། རང་གི་ཁོང་དུ་བསྟིམ་པར་བྱ།། ཐ་མར་སྣ་ཡི་ནང་དུ་བསྲེ།། དེ་ལྟར་མང་པོར་སྒྲུབས་པ་དང།། དཔལ་ཆེ་གཟི་བརྗིད་ཐམས་ཅད་འཐོབ།། ཅེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་རྟེན་པ་ཞེས་བྱ་བའི་ཏང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། གང་ཞིག་རྟེན་ལ་གནས་འདོད་པ།། མཚན་མ་བཟང་པོའི་གནས་མཆོག་ཏུ།། ཐམས་ཅད་འབྱོར་པར་བྱས་ནས་ནི།། ས་ལས་བྱས་པའི་སྟེགས་བུ་བཤམས། ། དབུས་ཀྱི་པདྨ་འདབ་བརྒྱད་ལ།། ཟླ་གམ་དམར་པོ་སྒོ་བཞིར་ལྡན།། མཐའ་མ་རྡོ་རྗེ་ར་བས་བསྐོར།། དཔལ་ལྡན་ཚེ་ཡི་ཕྱག་རྒྱ་དགོད།། རིན་ཆེན་ལུགས་ཀྱི་བུམ་པ་ལ།། ཚེ་རྫས་རྒྱས་པར་བྱས་ནས་ནི། ། མཚན་ལྡན་སྣོད་ཀྱིས་ཁ་དགབ་བྱ།། རྡོ་རྗེ་གཟུངས་ཀྱིས་བཏགས་ནས་ནི།། ཚེ་ཚད་མེད་པར་མངའ་གསོལ་ལ།། དབུས་སུ་དེ་བཞིན་གཞག་པར་བྱ།། རིན་ཆེན་བུམ་པ་བཞི་རྣམས་ལ། ། གསང་བའི་བུ་མོ་བཞི་བཀོད་གཞག། ཡ་མཚན་བྱུང་བའི་བུམ་པ་ལ།། རིགས་བཞི་སངས་རྒྱས་ཡབ་ཡུམ་དང།། སོ་སོའི་འཁོར་གྱི་སེམས་དཔའ་རྣམས།། ཐབས་དང་ཤེས་རབ་སྡེབས་ནས་ནི།། ཕྱོགས་ཕྱོགས་གནས་སུ་ཚོམ་བུར་བྲི། ། སྒོ་བཞིར་སྒོ་མ་བཞི་རྣམས་གཞག། སེམས་ཀྱི་ཕྱག་རྒྱ་ཀུན་བཀོད་ནས།། ཉི་ཟླ་ག་འུར་ཨ་ཡུ་ནི།། འཁྱིལ་འབར་འཚེར་ཞིང་གསལ་བར་བྱ།། ཨ་ཡུ་བྱང་ཆུབ་སེམས་སུ་ཞུ། ། རྒྱལ་མཚན་མཆོག་ལྡན་རིན་ཆེན་གཏེར།། དབང་བསྐུར་དཔལ་ལྡན་མཛོད་ལྡན་མ།། གསང་བའི་བུ་མོ་ཚེ་གཏེར་འཛིན།། ཨ་ཡུ་ཡུམ་བཞིའི་ཐུགས་ཀར་འཕྲོས།། དེ་བཞིན་ཚོམ་བུ་རིམ་བར་བརྒྱུད།། རྡོ་རྗེ་ཚེ་མཆོག་ཀུན་བསྡུས་ནས། ། དཀར་དམར་འོད་ཀྱིས་བདག་ལ་བསྟིམ།། དེ་ནས་རྡོ་རྗེ་ཚེ་ཕྲེང་བཟླས།། ནུབ་ཕྱོགས་ཚེ་ཡི་དབྱིངས་མཆོག་གི། པདྨ་དབང་གི་ཞིང་ཁམསསུ།། བྱམས་ལྡན་ཡེ་ཤེས་ཚེ་དཔག་མེད།། ཐུགས་ཀྱི་དཔལ་བེའུ་ཆེན་པོ་ནི། ། གཉིས་གསལ་འོད་ཀྱི་གའུ་ན།། བྱང་ཆུབ་སེམས་ཀྱི་ཨ་ཡུ་འབར།། དམར་གསལ་འབར་བའི་ཚེ་མཆོག་དེ།། རིག་འཛིན་རྣལ་འབྱོར་རྣམས་ལ་འཕྲོ།། འཕྲོས་པ་དགུ་ལུང་དམ་པ་ཡིས། ། ཙིཏྟའི་དབུགས་ལ་བཀྲག་ཏུ་བསླན།། ཚེ་ཉམས་རྒྱུ་དྲུག་ཀུན་སྤངས་ནས།། གཟི་བྱིན་སྐྱེ་བའི་རྒྱུ་ལྔ་བསྒོམ།། བྱང་ཆུབ་སེམས་ཀྱི་ཨ་ཡུ་དེ།། སྐྱེ་མེད་དབྱིངས་སུ་སྦས་ནས་ཀྱང།། ཕྱག་རྒྱའི་ཐ་མར་བདུན་གྱིས་བཤད། ། དང་པོ་སྐུ་གསུང་ཐུགས་ཀྱི་རྒྱ།། གཉིས་པ་གནོན་པའི་རྒྱ་གྲམ་འབར།། གསུམ་པ་རྟ་མཆོག་དཔལ་གྱི་རྒྱ།། བཞི་པ་རིན་ཆེན་དཔལ་བེའུ་སྟེ།། ལྔ་པ་གསེར་གྱི་གུ་ཧྱའོ།། དྲུག་པ་ཟླ་གམ་དམར་པོ་ལ། ། བདུན་པ་ཉི་ཟླ་གའུར་འབར།། ཚེ་ཡི་ངོ་བོ་རྒྱུད་གསུམ་པོ།། སྲོག་གི་ངོ་བོར་གཞལ་ཡས་ཁང།། ལེ་བརྒན་འབར་བའི་དཀྱིལ་འཁོར་དུ།། ཨ་ཡུ་དམར་པོ་འོད་འཕྲོ་བ།། འཆི་བ་མེད་པའི་སྲོག་བཙུགས་ཏེ། ། འགྱུར་བ་མེད་པའི་གཡུང་དྲུང་ཡིན།། ཆོས་ཉིད་དབྱིངས་སུ་ཚེ་སྦས་པས།། དུས་གསུམ་རྒྱལ་བ་དགྲར་ལངས་ཀྱང། དེ་ལ་གཟུང་ཞིང་བསྟན་དུ་མེད།། དེ་ནས་ཅི་བདེ་སྤྱད་པར་བྱ།། རྡོ་རྗེ་ཚེ་སྒྲུབ་པའོ།། དེ་ནས་སེམས་དཔའི་རྡོ་རྗེ་དམ་པ་དེ་རྡོ་རྗེ་ཁྲོ་བོ་ཚེ་ཀུན་དུ་འཕྲོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། ། གནས་འགྱུར་མཎྜལ་འབར་བྱས་ལ།། ཡེ་ཤེས་ཁྲོ་བོ་འབར་བ་ཡི། ། ཐུགས་ཀྱི་དཔལ་བེའུའི་འོད་ཟེར་ལས།། དབང་གི་ལྷ་མོ་མང་པོ་འཕྲོས།། ཟ་མ་ཏོག་དག་བཅས་པ་ཡི།། ལྕགས་ཀྱུ་དཀར་དམར་ལག་ན་ཐོགས།། དེ་ཡིས་འགྲོ་དྲུག་ཐམས་ཅད་ཀྱིས།། ཚེ་དང་གཟི་བྱིན་ཐམས་ཅད་འཕྲོགས། ། ཟ་མ་ཏོག་ཏུ་བསྡུས་ནས་ཀྱང།། ཚེ་ཡི་རིག་འཛིན་རྣམས་ལ་བསྟིམ།། ཇི་ལྟར་འདོད་པ་གོང་ལྟར་སྦྱར།། རྡོ་རྗེ་གཟི་མདངས་འཕྲོག་པ་ཞེས་བྱ་བའི་མདོའོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་ཚེ་བསྒྲུབ་པའི་ལེའུ་ཞེས་བྱ་སྟེ་བཅུ་གཅིག་པའོ། །།། དེ་ནས་སེམས་དཔའི་རྡོ་རྗེ་དམ་པ་དེ་ཚོགས་ཐམས་ཅད་ཡོངས་སུ་རྫོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པ་ཞུགས་སོ། ། སྙོམས་པར་ཞུགས་ནས་དུར་ཁྲོད་གསང་བ་མཆོག་གི་དཀྱིལ་འཁོར་ཞེས་བྱ་བ་འདི་རྒྱ་ཆེར་བཤད་དོ།། དཀྱིལ་འཁོར་དཀྱིལ་འཁོར་ཐམས་ཅད་ཀྱི།། རྩ་བའི་དཀྱིལ་འཁོར་དམ་པ་འདི། ། འཁོར་བ་ཐམས་ཅད་བསྒྲལ་བའི་ཕྱིར།། རྣལ་འབྱོར་ཅན་ལ་བཤད་པར་བྱ།། ཉོན་ཅིག་འདུས་པ་ཆེན་པོའི་ཚོགས།། སྒྲུབ་པའི་གནས་མཆོག་དམ་པ་དག། སྐྱོན་ཡོན་གཉིས་ཀྱི་བྱེ་བྲག་ལས།། ངེས་པར་བརྟགས་ཏེ་ཤེས་པ་ལས། ། བླང་དོར་གཉིས་སུ་སྦྱར་བར་བྱ།། རི་བོ་ཆེན་པོ་འདུས་པའི་རྩེ།། གངས་དཀར་ཤེལ་གྱི་འདབ་ཆེན་ནི།། སེང་ཕྲུག་འཁྲ་བའི་གནས་ཡིན་ཏེ།། ཐམས་ཅད་ཞི་བར་བྱེད་པའི་གནས།། རྡོ་རྗེ་བྲག་ཆེན་གཏམས་པའི་དཀྱིལ། ། དགོན་པ་ཆེན་པོའི་ཕུག་ཆེན་ནི།། གཅན་ཆེན་འཁྲ་བའི་གནས་ཡིན་ཏེ།། མངོན་སྤྱོད་ཆེན་པོ་བསྒྲུབ་པའི་གནས།། དུར་ཁྲོད་ངམ་གྲོག་བཤུང་བའི་གནས།། སུམ་མདོ་གྲོག་གླེ་རྩུབ་པའི་རི། ། དུར་གཅན་འཁྲ་བའི་གནས་ཡིན་ཏེ།། ཆགས་པ་བསྒྲུབ་པའི་གནས་ཡིན་ནོ།། ནགས་ཚལ་དྲ་བས་བཏིབས་པའི་ནང།། ཤིན་ཏུ་བཙན་ཞིང་འཇིགས་པའི་ངོགས།། སྟག་གཟིག་འཁྲ་བའི་གནས་ཡིན་ཏེ། ། འདོད་པ་སྒྲུབ་པའི་གནས་སུ་ཤིས།། ཆུ་མདོ་ཆུ་འཇིགས་རྒྱ་མཚོའི་གླིང།། ཆུ་ཡི་ར་བས་ཀུན་བསྐོར་བ།། ཆུ་གཅན་འཁྲ་བའི་གནས་ཡིན་པས།། བྱ་བ་མེད་པའི་ལས་ལ་བྱའོ།། དེར་ནི་ཡོ་བྱད་ཕུན་སུམ་ཚོགས། ། ཅི་འདོད་བལྟས་ཏེ་མ་ཐོགས་པར།། ཁ་ན་མ་ཐོ་བཅས་དང་བྲལ།། འབྱོར་པས་ནན་ཏན་མཆོག་བསྐྱེད་པ།། ཁམས་ལས་གྱུར་པའི་ནད་ཆེན་རྣམས།། བཅུད་ཀྱི་མཆོག་གིས་བཟློག་བྱའི་ཕྱིར།། རྩིའམ་བཅུ་དམ་ཐར་པ་རྣམས། ། ཉེར་རྫོགས་སུ་ནི་གཞག་པར་བྱ།། འདུས་པའི་ནད་དང་དུས་ཀྱི་ནད།། དུག་ལས་གྱུར་པའི་ནད་རྣམས་ཀྱི།། རྐྱེན་གྱིས་བར་ཆད་འབྱུང་སྲིད་ཕྱིར།། སྨན་དང་མཁས་པས་བཅས་ཏེ་སྦྱར།། ཀ་པཱ་ལ་དང་ལྕང་ལོར་བཅས། ། གའུ་ཆུང་ལ་སོགས་པའི་རྫས།། ཕྱག་རྒྱ་ཆེ་དང་ལྡན་བྱས་ལ།། དངོས་གྲུབ་འབྱུང་བའི་རྟེན་དུ་བྱ།། སྒྲུབ་མཆོག་གསང་བའི་རྣམ་འབྱོར་པ།། སྐྱོ་བའི་ཡིད་རྣམས་གསང་ཕྱིར་དང།། གཏི་མུག་མུན་པ་གཞོམ་པའི་ཕྱིར། ། དུང་དང་མཁར་རྔ་རྫ་རྔ་དང།། ཅང་ཏེའུ་པི་བང་ཀོ་ཀི་ལ།། སྙན་པར་རྫོགས་པའི་རྫས་རྣམས་ཀུན།། སྣ་ཚོགས་འབྱུང་བའི་རོལ་མོ་སྟེ།། ཉེར་རྫོགས་སུ་ནི་འབྱོར་པར་བྱ།། ཤིན་ཏུ་གཏམས་པས་ཚོགས་ཆེན་ནི། ། བླ་མ་རྡོ་རྗེ་འཁོར་ལོ་རྒྱལ།། གསང་བ་སྦྱོར་བའི་དུས་ཆེན་དུ།། སྒྲུབ་ཆེན་སྒྲུབ་པའི་རྣལ་འབྱོར་རྣམས།། སྙིང་རྗེ་བྱམས་དང་དགའ་སྙོམས་དང།། གདུང་བའི་བྱང་ཆུབ་སེམས་བསྐྱེད་དོ། ། དེ་ཡང་ཤེས་དང་ཤེས་བྱ་ཡིས།། རྩལ་ཆེན་ཀུན་དུ་རྫོགས་པ་ནི།། རྡོ་རྗེ་སྙིང་པོ་འབྲུ་མཆོག་དག། ཤིན་ཏུ་གཏམས་པས་ཚོགས་པ་ནི།། བླ་མ་རྡོ་རྗེ་འཁོར་ལོ་རྒྱལ།། ཡོན་ཏན་མཆོག་གི་གཏེར་གྱུར་ཅིང།། སྲིད་པས་ཞུས་ཀྱང་ཟད་མི་ཤེས། ། རྐྱེན་ཐུབ་དབང་ལུང་རྫོགས་པས་གཟུང།། རྡོ་རྗེ་ཀུན་གྱི་གཟུགས་འཛིན་པ།། ཀུན་སྡུད་ཀུན་འབྱུང་འཁྲུག་མེད་ཅིང།། ནམ་མཁའི་ཁྱོན་ལྟར་ཀུན་ལ་ཁྱབ།། མ་ལྟར་བྱམས་པའི་ཡུམ་མཆོག་གཟུང། ། རྒྱུད་སྦྱངས་བརྟུལ་ཞུགས་མཆོག་འཆང་ཞིང།། ཐོགས་མེད་ཐེ་ཚོམ་སོམ་ཉི་བྲལ།། འཛིན་ཆགས་མེད་ཅིང་བླང་དོར་མེད།། བརྟན་ལྡན་གཟུངས་ཐུབ་རྡོ་རྗེ་གིང།། རྡོ་རྗེ་དྲོད་ཀྱི་དུས་འཛིན་ཅིང། ། ཚིག་གི་འཕེན་སྡུད་སྐབས་སུ་སྦྱོར།། ཡོན་ཏན་རླབས་ཀྱིས་འཕང་བཅད་དེ།། ལེགས་ཉེས་དམིགས་སུ་གལ་འཛུགས་སོ།། རྡོ་རྗེ་ཚིག་གི་གདངས་སྐད་ཅན།། རྡོ་རྗེ་མཐོང་བ་རྣམ་པར་དག། ངག་གི་དབང་ཕྱུག་ཚིག་ལ་མཁས། ། ལས་ཀྱི་ཕྲེང་བ་རྫོགས་བྱེད་པའོ།། འདི་ལྟར་སྦྱར་བའི་དུས་ཆེན་ཡང།། ངེས་པར་བརྟགས་ཏེ་མདོ་གཟུང་བ།། རིག་བྱེད་དག་གི་ཡན་ལག་ལས།། ཤེས་པར་བྱ་སྟེ་ལེགས་སྦྱར་བ།། བཀྲ་ཤིས་ལྷ་ཡི་ཉི་མ་དང། ། འབྱོར་དང་དུས་ཚིགས་བཟང་པོ་རྣམས།། འཇིག་རྟེན་མཚན་མའི་རྟོག་པ་སྟེ།། བརྟགས་ན་བཀྲ་ཤིས་མཚན་མ་འབྱུང།། དུས་ཆ་བཞི་ཡི་དང་པོ་ནི།། མཆོག་ཉིད་མངོན་སྤྱོད་རོ་ལངས་ཡིན། ། དབྱར་ཚེ་སྟོན་སྨན་ཤིས་པ་སྟེ།། ཞི་དང་རྒྱས་པ་དེ་བཞིན་སྦྱར།། དབང་དུ་བསྡུས་པའང་དབང་ཡིན་ཏེ།། བམ་ཆེན་གསང་བའི་དུས་སུ་བཤད།། ནོར་འདོད་རྫུ་འཕྲུལ་ཐམས་ཅད་ཀྱང།། ཆ་བཞིར་ཁྱབ་པར་སྦྱར་བའོ། ། བསྒྲུབ་པ་ཆེན་པོའི་རྫས་མཆོག་དག། གལ་ཏེ་དུས་ལ་བབ་གྱུར་ན།། དུས་འདི་དངོས་གྲུབ་དུས་ཆེན་ཏེ།། དུས་འདི་མཁས་པས་ཡོང་མི་བཅག། རྣལ་འབྱོར་ལས་ཀྱི་དང་པོ་རྣམས།། ཅི་སྟེ་འདོད་པའི་མཚན་མ་དང། ། ཡིད་འོང་འབྱུང་ཞིང་རྟགས་རྙེད་པ།། དམ་ཚིག་གཟུངས་འདུ་དུས་ཆེན་ཡིན།། སྦྱངས་པས་རྩལ་གྱི་མཐར་ཕྱིན་ཅིང།། ཞེས་བློའི་ཡོན་ཏན་ཚོགས་རྒྱས་པ།། འདི་དག་ཚད་ལ་བབ་པ་སྟེ།། དུས་ཀྱི་མཆོག་འདི་ཉེ་བར་བརྟག། འདི་ལྟར་རྒྱུ་བཞི་འབྱོར་པ་ལས།། འབྲས་བུའི་དངོས་པོར་གྲུབ་པ་སྟེ།། གྲུ་དང་མཉན་པ་མཁས་པ་ལ། བསྟེན་པས་རིན་ཆེན་ལོན་པ་འདྲ།། ཇི་སྲིད་གནས་པའི་རྒྱ་མཚོ་རྣམས།། རང་བཞིན་མེད་པར་ཀུན་གཅིག་པའི། ། བདག་མེད་ཕྱོགས་བྲལ་ལྷུན་གྱིས་གྲུབ།། གཅིག་ལས་རྣམ་གྲངས་ངང་གིས་མེད།། ཐ་སྙད་དག་པར་ཡོངས་ཆུད་ན།། ངེས་པའི་དོན་ཆེན་དེ་ཉིད་དེ།། ཐམས་ཅད་དག་པར་འགྱུར་བའོ། ། བདག་དང་གཞན་དུ་མི་གཉིས་པས།། བདག་ཉིད་བདག་གི་རང་བཞིན་ཏེ།། སངས་རྒྱས་ཞེས་བྱ་གཞན་ན་མེད།། བདག་ཉིད་ལྷུན་གྲུབ་དབང་ཕྱུག་ཆེ།། གར་དོད་པ་ཡི་དངོས་པོ་ལ།། ཇི་ལྟ་བ་བཞིན་གྲུབ་འགྱུར་ཏེ། ། རྫ་མཁན་འཕང་ལོ་སྲུབ་པ་ལྟར།། གང་ལྟར་དམིགས་པ་དེ་ལྟར་འགྱུར།། འགྲོ་བའི་ཁམས་སུ་གཟི་ཆེ་ཞིང།། འབྱུང་ཆེན་ལྔ་ལ་དབང་བསྐུར་བའི།། ངོ་མཚར་རྩལ་གྱི་ཁྱད་པར་དག། གདོན་མི་ཟ་བར་འབྱུང་བ་ཡིན། ། དེ་ལྟར་བརྩོན་པའི་བསྒྲུབ་པ་དག། རྫས་དང་ཡོ་བྱད་ལ་སོགས་ཏེ།། ཤེས་དང་ཡོན་ཏན་ཕུན་སུམ་ཚོགས།། གཞན་དུ་རེག་ལས་མེད་པ་ནི།། ཐམས་ཅད་ཚང་བར་རྫོགས་པས་ན། ། ཕུན་སུམ་ཚོགས་ཞེས་དེ་ལ་བྱ།། གསང་ཆེན་བསྒྲུབ་པའི་ལས་འདི་དག། འཁོར་བའི་ལས་དང་མཐུན་སྤྱད་ཅིང།། ཉོན་མོངས་ལྔ་ལྟར་སྤྱོད་སྣང་ཡང།། འོད་ཀྱིས་མུན་པ་སྣང་འགྱུར་ལྟར།། སྐྱོན་ནི་ཡོན་ཏན་ཆེན་པོ་ལ། ། གཡོ་མཚང་དངོས་གྲུབ་ཆེན་པོར་འགྱུར།། དེ་ལྟར་འཁོར་བའི་རྐ་བཟློག་པས།། མི་གནས་ཡེ་ཤེས་རྒྱ་མཚོར་འཁྱིལ།། གནས་རབ་བརྟག་པའི་གལ་ཆེན་ཡང།། ནམ་མཁའ་འཁོར་ལོ་རྡོ་རྗེ་དང། ། རིན་ཆེན་ཟུར་བརྒྱད་པདྨའི་དབྱིངས།། རྒྱ་གྲམ་ལ་སོགས་འདྲ་བར་བརྟག། ས་གཞི་ཡང་ནི་དེ་བཞིན་ཏེ།། རི་བོ་བརྩེགས་དང་བཟུར་བ་དང།། དེ་བཞིན་བསྒྲང་དང་གཏམས་པའི་ཚུལ།། འདྲ་བར་མཁས་པས་བརྟག་པར་བྱ། ། དེ་ཡང་རིགས་ཀྱི་ཁྱད་པར་ནི།། ལྔ་ལ་སོགས་པ་སོ་སོ་ཡི།། གནས་གནས་དག་ཏུ་རྟོགས་ནས་ནི།། ནོར་བུ་རིན་ཆེན་དེ་བསྒྲུབ་བྱ།། སྐྱོན་གྱི་གནས་དག་སྤང་བ་ནི།། གཤིན་རྗེ་གདུག་པའི་གདུང་རྩེ་དང། ། མ་མོ་རྔམ་པའི་སྤར་ཤད་དང། སྲིན་མོ་ངུས་པའི་འཆི་རྫེས་དང།། གནོད་སྦྱིན་ཁྲོ་བོའི་རྦབ་ཤུལ་དང།། འབྱུང་པོ་རྐུན་པོ་འཇོལ་ལ་སོགས།། གནས་ཀྱི་སྐྱོན་རྣམས་དགྲ་དང་རྐུན།། མཁས་པས་ངེས་པར་སྤང་བར་བྱ། ། ཁ་ན་མ་ཐོར་བཅས་པ་དང།། ཉམས་པ་ལས་བྱུང་ཉིད་དང་བྲལ།། མ་དག་པ་ཡི་ཡོ་བྱད་རྣམས།། གདུག་ཅན་པང་དུ་འོངས་པ་ལྟར།། ལྔ་ཡི་བརྟུལ་ཞུགས་ཆེན་པོ་ཡི།། བསྐལ་བས་བཤུགས་ཏེ་སྤང་བར་བྱ། ། དགོམ་པ་ཆེན་པོའི་ས་ཕྱོགས་སམ།། བཀྲ་ཤིས་མཚན་མ་འབྱུང་བ་དག། དགའ་བ་སྐྱེ་བར་འགྱུར་བ་ཡི།། ཡིད་འོང་གནས་སུ་འདུག་ནས་ནི།། རྩོད་པ་ཉེར་བར་ཞི་བྱའི་ཕྱིར།། སྙིང་རྗེ་ལྡན་པའི་རྣལ་འབྱོར་གྱིས། ། བསྒྲུབ་པ་བརྣག་པ་མཐར་དབྱུང་ཕྱིར།། རྒྱལ་པོ་རྟེན་དང་འཁོར་བཅས་ལ།། བདེན་པར་བསྒོ་བ་འམ་ཡང་བསླང་བ།། དགོངས་ཤིག་ཐུགས་རྗེ་རྒྱལ་བའི་ལྷ།། ལྷ་ཀླུ་གནོད་སྦྱིན་སྡེ་དཔུང་བཅས།། གངས་རིག་རྩེ་དང་རིན་ཆེན་རི། ། ཀུན་དགའ་ལྡུམ་ར་སྐྱེད་མོས་ཚལ།། མཚོ་རྫིང་ལུ་མ་འབབ་ཆུའི་གནས།། འཇིག་རྟེན་འཇིག་རྟེན་ཐམས་ཅད་ཀྱི།། གང་དག་བདག་པོར་གྱུར་པ་རྣམས།། རྣལ་འབྱོར་དབང་ཕྱུག་བདག་ཉིད་ཀྱིས། ། ས་འདི་ལྷུན་གྱིས་གྲུབ་བྱའི་ཕྱིར།། འཛམ་གླིང་གྲུབ་པའི་ས་སློང་ན།། འཁོར་དང་བཅས་པ་འདིར་འཁོད་ལ།། རིན་ཆེན་གཏེར་གྱི་ས་གཞི་བསླང།། ཞེས་པས་རིན་ཆེན་སྣ་ཚོགས་ཀྱིས།། ས་ལ་གནས་པས་དེ་མགུ་བྱ། ། དེས་ནི་བདག་གིར་དེ་འགྱུར་ཞིང།། ཉེས་པ་དེ་དང་བྲལ་བ་ཡིན།། བྱང་ཆུབ་སྤྱོད་པ་གཡོ་བ་དང།། བསོད་ནམས་དགའ་བསྐྱེད་པ་ལ།། ཤེས་ལྡན་རྫུ་འཕྲུལ་ཅན་གྱི་བུ།། མ་སྐྲག་ཕྲག་དོག་ཡོང་མ་སྐྱེ། ། རྣལ་འབྱོར་མཆོག་གི་སྒྲུབ་པ་པོ།། བདུད་འདུལ་ཕྱག་རྒྱ་རྫོགས་པའི་ཚེ།། རུ་དྲ་ཚོགས་ཀྱི་རྒོལ་བ་ལ།། སྐྱེས་བུ་ལས་ཀྱི་དོན་བགྲངས་ཏེ།། དོན་གྱི་དབང་པོའི་ཕྱིར་སྦྲན་བ།། རྒྱལ་བ་དབང་ཕྱུག་ཐམས་ཅད་ཀྱིས། ། དོན་མཆོག་ཡང་དག་མཛད་པའི་ཚེ།། སྐྱེས་བུ་རྩལ་གྱི་ཁྱད་པར་ལས།། འདི་ཚེ་དཔང་མཁྱེན་དམིགས་འབྱེད་མ།། སྔོན་ཚེ་དཔལ་ཆེན་གར་དབང་གིས།། རུ་དྲ་སྡེ་བཞི་བསྒྲལ་ནས་ནི། ། གསང་བ་བསྟན་པའི་རྒྱས་མཛད་ནས།། འགྲོ་དྲུག་ཐུགས་རྗེས་བསྒྲལ་བ་ལྟར།། རྣམ་འབྱོར་ས་ལ་སྦྱོར་ཚེ་འདིར།། ལྷ་མོས་མཁྱེན་པར་མཛད་ནས་ཀྱང།། བདེ་ཆེན་ས་ལ་བགྲོད་པའི་ཚེ། རུ་དྲའི་རྒོལ་བ་འབྱུང་བའམ། ། སྤྱན་ལྡན་ཁྱོད་ཀྱིས་དཔང་མཛོད་ཅིག། སྒྲུབ་པའི་ལམ་མཆོག་ཁྱད་པར་གྱིས།། བརྩམས་པར་བྱ་བའི་ལས་རྣམས་ཀུན།། མཚན་མས་མཚན་མ་གཞོལ་བའི་ཕྱིར།། རོ་ལྔའི་མཚན་མ་བརྟག་པར་བྱ།། དགེ་བར་གྱུར་བ་དེར་གནས་བྱ། ། གལ་ཏེ་ཤིས་པར་མ་གྱུར་ན།། སྐྱེས་བུ་ཐམས་ལ་མཁས་པ་ཡིས།། གནན་ནམ་སྤོ་བའི་ལས་ཀྱིས་སྦྱར།། དེར་ནི་བསོད་ནམས་གཏེར་ལྡན་ཕྱིར།། རིན་ཆེན་ལྔ་ལ་སོགས་པའི་རྫས། ། ས་གཞི་གཏེར་ཆེན་རྒྱས་པར་བྱ།། བཀྲ་ཤིས་མཆོག་ཏུ་བསྔགས་པ་ཡིན།། ས་ཞག་སྤོས་ཆེན་རྣམ་ལྔའི་ཁུ།། བསྲེས་པས་ཀུན་ཏུ་གྲུབ་བཞི་ནི།། མཎྜལ་རྒྱས་པའི་དབྱིངས་འདྲ་ལ།། ཏིང་འཛིན་ཕྱག་རྒྱ་སྔགས་ལྡན་པས། ། མཚན་མའི་དངོས་པོ་ཀུན་སྦྱངས་ཏེ།། རྒྱལ་བ་བཞུགས་པའི་རྟེན་དུ་བྱ།། རྡོ་རྗེ་བྱིན་བརླབས་འབྱུང་གནས་དང།། གནས་རྣམས་ཤིན་ཏུ་བརྟན་བྱའི་ཕྱིར།། མཆོག་གི་སྦྱོ་བ་དག་པ་ཡིས།། ས་གཞི་གཟུང་ཞིང་བྱིན་གྱིས་བརླབས། ། དེ་དང་དེར་ནི་ས་སྦྱངས་ཏེ།། ཐིག་གིས་ཡུལ་བཅད་སྐབས་དག་ཏུ།། རྒྱལ་བ་བཞུགས་པའི་ཕོ་བྲང་དེར།། རྡོ་རྗེ་དྲག་པོའི་གིང་ཆེན་གྱིས།། ལྕེ་པོག་ནག་པོའི་དུད་པས་བདུག། རྒྱུན་མི་འཆད་དུ་བྱས་ནས་ནི། ། ཁྲ་བོ་དྲག་པོའི་སྔགས་ཟློས་ཤིང།། རྡོ་རྗེ་ཁྲོ་བའི་སྟབས་ཀྱིས་བསྐོར།། ཤེས་རབ་ཡུམ་གྱི་འཇོ་ཚུལ་གྱི། རྣམ་གཉིས་རྫས་ཀྱི་འདི་གུ་དག། སྲིན་བལ་ཡེའུ་སྦྱར་བ་ཡིས།། ཀུན་དུ་ཟླ་བའི་ཐིག་ལེ་བྱ། ། རྡོ་རྗེ་རྒྱལ་པོ་འཕགས་རྣམས་ཀྱིས།། སོ་སོའི་སྔགས་དང་རྩ་བའི་རྒྱ། སོ་སོའི་སྟང་སྟབས་སྦྱར་ནས་ཀྱང།། དེ་དག་གནས་སུ་བྱིན་གྱིས་རླབ།། གསང་བའི་དོན་ལ་ཞུགས་པའི་ཕྱིར།། གསང་བའི་ལས་ཀྱི་སྔོན་ལོགས་སུ། ། བསྟན་པའི་སྐྱོང་བའི་མགོན་པོ་ལ།། སྦྱིན་མཆོད་བསྲུང་བའི་ལས་ཆེན་བཅོལ།། གཞལ་ཡས་གནས་ཀྱི་ཕྱི་རོལ་དུ།། མགོན་པོ་གནས་པའི་རྟེན་གཞི་དག། རིན་ཆེན་འབྲས་སམ་འབྱུང་ཁུངས་སམ། ། ཤིང་ངམ་བ་སོ་དེ་དག་ལས། ལུགས་སམ་ཕྱག་རྒྱའི་གཟུགས་བྱས་ཏེ།། མགོན་པོ་བཞི་དུ་མངལ་གསོལ་ཏེ།། གནས་ཀྱི་སྒོ་སྤོང་སོ་བར་བྱ།། རི་རབ་གླིང་བཞིའི་ཕྱོགས་ཕྱོགས་ནས།། རྡོ་རྗེ་གསང་བདག་དབང་གི་མཐུས། ། འཇིག་རྟེན་སྐྱོང་བའི་ཐ་ཚིག་ཅན།། མཐུ་ཆེན་མགོན་པོ་སྡེ་གཞི་རྣམས།། སོ་སོའི་བགེགས་རིས་འདུས་ལ་མཁས།། ཆོས་སྐྱོང་ལོངས་སྤྱོད་རྫོགས་པའི་སྐུ།། ཕྲིན་ལས་རྣམ་བཞི་མཐར་ཕྱིན་པས། རིགས་བཞི་ཁ་དོག་སོ་སོར་གསལ།། རང་རྟགས་ལྷ་ཡི་མཚན་མ་ཐོགས།། ཕྱི་འཁོར་སྐྱོང་བའི་རྫུ་འཕྲུལ་ཅན།། བདག་ཅག་རྣལ་འབྱོར་རྩལ་སྦྱོང་གིས།། རང་རང་འཁོར་རྣམས་ཐུབ་པར་མཛོད། ། སྒྲུབ་པའི་རྩལ་འདི་མཐར་དབྱུང་ཞིང།། རྐྱེན་གྱི་བར་ཆད་བསལ་བ་དང།། གསང་བའི་མན་ངག་སྤྱད་པའི་ཕྱིར།། འཇུག་སྲིད་དམ་སྲི་གནོན་པར་བྱ།། དུར་ཁྲོད་ཆེན་པོའི་གནས་དག་ཏུ།། རྣལ་འབྱོར་གསང་བའི་གནས་དག་ཏུ། ། དངོས་གྲུབ་ཆུ་ལ་རྡུལ་འཇུག་ཅིང།། ཁྲོ་བོ་ཧཱུ~ཾ་ཆེན་ཀུན་འདུས་ནས།། གསད་ཅིང་གནོན་པའི་ལས་བྱ་སྟེ།། རི་རབ་ཆེན་པོའི་རྨད་དུ་གཏང།། ཡ་མ་ར་ཛའི་ཟས་སུ་སྦྱིན།། ཆུ་སྲིན་འབར་བའི་ཁ་རུ་བརྫང། ། འཁོར་ལོ་འབར་བའི་ཕྱག་རྒྱས་གནོན།། བདུན་རྒྱུད་རིག་ནི་བརླག་གྱུར་ནས།། ནམས་ཀྱང་ལྡང་བར་མི་ནུས་ཏེ།། བྱང་ཆུབ་སེམས་ནི་སྐྱེས་ན་བཏང། བཛྲ་མུཥྟི་པ~ཾ། མ་མ་བ་ཤཾ་ཀུ་རུ་ནན། སུ~ཾ་བྷ་ནི་སུ~ཾ་བྷཱ་ནཱ~ཾ། དེ་ལྟར་དྲག་པོའི་སྦྱོར་བ་ཡིས།། སྒོ་ནས་ཕྱི་རོལ་བར་ཁང་དུ།། མཁའ་འདྲའི་ཁུང་བུ་བྱས་ནས་ནི།། དུག་དང་རྩུབ་པའི་ཕྱེ་མ་དང།། ཁྲག་སྣ་ཚོགས་དང་མི་རོ་ཡིས།། ཤིན་ཏུ་བསུབ་ཅིང་གནོན་པར་བྱ། ། དེ་ནས་རྡོ་རྗེ་ནང་དག་ཏུ།། སེང་གེའི་ལྟ་བས་བལྟས་ནས་ནི། རྡོ་རྗེ་གོམ་པས་ཕྱོགས་ནས་ནི།། ཁྲོ་མིག་འབར་བས་ཕྱིར་བལྟས་ཏེ།། འགྱིང་བག་ཚུལ་དུ་བརྗིད་པ་ཡིས།། འབར་བའི་རྡོ་རྗེ་སྤར་ནས་ནི།། ཕྱི་ནང་རྡུལ་ཆེན་བསལ་བར་བྱ། ། ཧཱུ~ཾ་སྟོང་གསུམ་སྟོང་གི་འཇིག་རྟེན་ན།། སྐྱེ་འགྲོ་རྩི་ཤིང་ནགས་ཚལ་དང།། ཡོད་མཐོང་སྣང་གྲགས་ཇི་སྙེད་པ།། ཀུན་ཀྱང་འབར་བ་ཁྲག་འཐུང་སྟེ།། རྔམ་ཆེན་གཏུམ་ཐུང་ཤེས་དག་འབར། ། དུར་ཁྲོད་དཀྱིལ་འཁོར་ལྷུན་གྱིས་གྲུབ།། རཀྵ་རཀྵ་ཧེ་རུ་ཀ། རཀྟ་ཀྲོ་དྷི་ཛྭ་ལ་བ། ཧ་ལ་ཧ་ལ་ཏིཥྛ་ཕཊ། ཞེས་པས་ཁྲོ་བོ་རོལ་པ་ཡི།། སྟབས་དང་མ་མོའི་རྔམ་ཚུལ་དང། ཕྲ་མེན་ལྷགས་པའི་རྔམ་སྟབས་ཀྱིས། ། འབར་བའི་དཀྱིལ་འཁོར་བསྐོར་བར་བྱ།། རྡོ་རྗེ་དཀྲིགས་པའི་ཕྲེང་བ་དང།། ཐོ་བ་ལྕགས་ཀྱུ་འབར་བ་དང།། འཁོར་ལོ་རལ་གྲི་ལ་སོགས་རྫས།། ཀུན་གྱི་ཕྱག་རྒྱ་མཚན་མས་བསྐོར།། དེ་ལས་འབར་བའི་ཕྱག་རྒྱ་དང། ། མིག་ལས་འབར་བའི་མེ་མཆེད་པས།། མེ་འོད་འབར་བའི་ཕྲེང་བ་འདིས།། དམིགས་སམ་དངོས་སུ་སྦྱར་ནས་ཀྱང།། འབར་བ་དྲག་པོའི་ཡི་གེ་ལས།། སྲེག་པའི་དཔལ་ཆེན་གུར་དུ་གཏམས།། ཧཱུ~ཾ་ར་རྡོ་རྗེ་མེ་ཡི་རི། ། ལྷུན་པོ་འབར་བའི་རྩ་བརྒྱད་ལ། འབར་བའི་ལྷ་བརྒྱད་བསྒྱེལ་ནས་ཀྱང།། དབང་ཆེན་རྡོ་རྗེ་བཀའ་སྡོད་གནས།། ཤིན་ཏུ་མི་བཟད་འབར་བ་ཡིས།། གཏུམ་ཆེན་ཧ་ལ་རྔམ་པའི་གཟུགས།། ལྷ་ཆེན་ཁྱབ་འཇུག་ལྤགས་བཤུས་ནས། ། ཞིང་ཆེན་གཡང་གཞིའི་ན་བཟའ་བསྣམས།། གཤིན་རྗེ་མ་ཏྲ~ཾ་འབར་བ་ཡི།། རོ་དབྱུག་ཆེན་པོ་ཕྱག་ན་འཕྱར།། ཕྲ་མེན་དགུ་ཁྲི་མང་པོ་དག། འབར་བའི་ཚོགས་ནི་གཏིབས་ཐམས་བཅད། ། གང་ལ་ཅིས་འདུལ་དེར་སྟོན་པ།། ཙིཏྟ་འབར་བའི་མེ་ཕྲེང་གིས།། དོ་ཤལ་མགུར་ཆུ་ཕྲེང་བས་སྦྲེངས།། བསྐལ་པའི་མེ་དཔུང་འབར་བའི་ཀློང།། སྲིད་པའི་རྩེ་མོར་འཁྱིལ་ཅིང་འཕྲོ།། ནམ་མཁའི་ཁམས་ཀུན་མེ་དཔུང་གཏིབས། ། རྡོ་རྗེ་འཁོར་ལོ་མེ་ལྕེ་འཕྲོ།། དུར་ཁྲོད་དགོན་པའི་ས་ཕྱོགས་དག། མེ་ཡི་རི་བོ་འབར་བ་ལ།། མེ་ཡི་ཡི་དགས་མ་དག་ལས།། གང་ཡང་གནས་པར་མི་ཕོད་པ།། སྟེང་གི་མེ་ལྕེ་འབར་བ་ནི། ། འོག་གི་ཕྱོགས་སུ་འཕྲོ་ཞིང་འཕྲུལ།། འོག་མི་མེ་ལྕེ་འབར་བ་ཡང།། གྱེལ་དུ་འཁྱིལ་ཞིང་སྟེང་དུ་ཐལ།། མེ་ལྕེ་དགུ་ཕྲེང་འབར་བ་དག། འུར་ཆེམ་འཆད་པས་འཐབ་ཅིང་འཁྲུག། དུར་ཁྲོད་མེ་ནི་སྨུག་ཅིང་འབར། ། ཞེས་སྡང་འཇོམས་པས་མཐིང་ནག་འཚུབ།། ང་རྒྱལ་སྲེག་པས་སེང་ནག་འཕྲོ།། འདོད་ཆགས་མཉམ་པས་དམག་ནག་འཕྲོ།། ཕྲག་དོག་སྲེག་པས་ལྗང་ནག་འཁྱིལ།། གཏི་མུག་སེལ་ནས་སྨུག་ནག་འཁྱིལ། ། འབར་ཆེན་ཀློང་གི་འཁོར་ལོས་གཏམས།། ཛྭ་ལ་མཎྜ་ལ་ཧ་ལ་ཧ་ལ་ར~ཾ།། མེའི་རི་ལག་ཆུའི་ཕྱག་རྒྱ་ཡིས།། གནས་སམ་དཀྱིལ་འཁོར་བསྐོར་བར་བྱ།། ཆོས་ཉིད་བདལ་བའི་ནམ་མཁའ་ལ།། ཡེ་ཤེས་ལྔ་ཡི་འབྱུང་ཆེན་བརྩེགས། ། ཀུན་གཞི་བདལ་བའི་ནམ་མཁའ་ལ།། བསྐྱད་མའི་འབྱུང་ཆེན་རྣམ་ལྔ་བརྩེགས།། བྲུ~ཾ་ལས་རིན་ཆེན་འབར་བའི་གཞལ།། མཐའ་དག་དབུས་མེད་ཀུན་དུ་ཁྱབ།། ཏ་ལའི་བསྐྱེད་ཅིང་གསེར་ཙོང་དྲིལ། ། ཟླ་གམ་དམར་པོ་དབང་གི་རྒྱ།། བྲུ~ཾ་ཁ~ཾ་ཏྲ~ཾ་ཁ་ལ་ཏི་བྲུཾ།། ཞེས་པས་རྣམ་ལྔའི་བྱུག་པ་ཡིས།། གཏོར་ཞིང་ཀུན་དུ་བྱུག་པར་བྱའོ།། སྒྲུབ་མཆོག་སྐྱོང་བའི་རྣལ་འབྱོར་རྣམས།། རྡོ་རྗེ་ཚིག་གིས་བཏབ་ནས་ནི། ། རྒྱལ་སྲས་རིག་འཛིན་བཀའ་འཁོར་ལོ།། འབྲས་བུར་རེད་ཕྱིར་བྱིན་གྱིས་རློབ།། རྡོ་རྗེ་རྒྱལ་དབང་ཆེན་པོ་དེས།། སྒྲིབ་པ་སྲེག་པའི་ཡི་གེ་ནི།། ཕྲེང་བར་བྱས་ཏེ་གནས་སུ་འཕྲོ།། ཉི་མའི་དཀྱིལ་འཁོར་ལ་བཞག་སྟེ། ། རིག་འཛིན་ཕོ་མོའི་མཚན་མས་གདབ།། རྣམ་ལྔའི་བྱུག་པས་ཀུན་ལ་གཏོར།། རྟགས་ཀྱི་ཕྱག་རྒྱ་ལག་ཏུ་སྦྱིན།། རྣལ་འབྱོར་ཆེན་པོའི་ལུགས་སུ་སྤྱད།། འཇིག་རྟེན་སྐྱོང་ཚུལ་ཐམས་ཅད་ནི།། སྒྱུ་མ་ཡིན་ཕྱིར་ཤིན་ཏུ་ཡང། ། འཇིག་རྟེན་འདས་པའི་སྤྱོད་ཚུལ་དག། ཇི་ལྟར་འབྱུང་བ་དེ་ལྟར་སྤྱད།། ཨེ་མ་དུར་ཁྲོད་གསང་བ་ཡི།། རྨད་བྱུང་ཞིང་ཁམས་དགའ་ཚལ་འདིར།། སྐལ་ལྡན་དབང་ཕྱུག་རྒྱལ་བའི་སྲས།། འདུས་པས་ཚོགས་པའི་རིག་འཛིན་རྣམས། ཨེ་མའོ་དགའ་མཆོག་བདེ་ཆེན་གྲོགས།། དམ་ཚིག་སྲོག་གི་ལུ་གུ་རྒྱུད།། ཐབས་དང་ཤེས་རབ་འབྲེལ་པ་ཡིས།། སྤྲུལ་པའི་གཤོག་སྤྲུགས་གྲཝ་རྒྱས་པས།། ཚོགས་གཉིས་རྩལ་གྱིས་བརླབས་སྦར་ནས། ། ཆོས་ཉིད་མཁའ་ལ་ལྡིང་བར་རིགས།། ཨ་ཡ~ཾ་ཛ་ལཾ་ཁ~ཾ་ལྷན།། དེ་རིང་ཕན་ཅད་རྒྱལ་བའི་སྲས།། དབང་ཕྱུག་ཡིན་པས་ཅི་བདེར་སྤྱོད།། རྣལ་འབྱོར་ལོངས་སྤྱོད་བསྐྱེད་པ་དང།། དུག་རྣམས་བདུད་རྩིར་འགྱུར་བ་ཡི། ། མཱཾ་ལས་སྐྱེས་པའི་ཡེ་ཤེས་ཀྱིས།། ཟངས་ཀྱི་དངོས་པོ་འཇུག་འདུལ་བྱ།། དམ་རྫས་ཡོ་བྱད་ལོངས་སྤྱོད་རྣམས།། གོང་ནས་ཆ་གསུམ་སོ་སོ་ནས།། ཤན་མ་འདྲེས་པ་སྟ་གོན་བྱ།། ཕྱི་ཡི་ཆ་ལ་འཇུག་པ་ཡི། ། མཆོད་སྦྱིན་སྤེལ་བའི་ཡོ་བྱད་བྱ།། དེ་གཉིས་གཉིས་པའི་ཆ་དག་ལས།། མཇུག་གི་རྒྱལ་ཆོས་ལོངས་སྤྱོད་བྱ།། རྨད་འབྱུང་ནང་གི་ཆ་དག་ནི།། ཐམས་ཅད་གཅིག་ཏུ་བྱས་ན་ནི།། རས་སམ་ཤིང་ཁྱོན་དག་ཏུ་ནི། ། བསྡུས་ཏེ་བསྒྲུབ་པའི་རྫས་ཀྱིས་དགབ།། བྱུག་པ་ཆེན་པོས་དེ་ལ་གཏོར།། ལྕེ་པོག་ནག་པོའི་དུད་པས་བདུག། རྡོ་རྗེ་གར་གྱི་ཕྱག་རྒྱ་དང།། འབར་བའི་ལྟ་བས་བརྗིད་པར་བྱ།། ཚམ་ངམ་ཆེན་པོའི་སྟབས་ཀྱིས་བསྐོར། ། སྣ་ཚོགས་བསུར་གྱི་དྲི་ཆེན་གདོན།། དེ་ནས་རྒྱལ་པོའི་བྱིན་བརླབས་ཀྱིས།། ཡོ་བྱད་དེ་དག་བདུད་རྩི་ལྔ།། དམ་རྫས་ངོ་བོར་བསྡུས་ནས་ནི།། དེ་ལ་འབྲུ་ལྔའི་འཕྲོ་འདུ་ལས།། ཞུ་ནས་ཕྱག་མཚན་རྣམ་ལྔར་འབར། ། དག་པའི་བདུད་རྩི་ཆེན་པོར་ཞུ།། ཤེས་རབ་ལྷ་མོ་རིག་འཛིན་མ།། བཞི་འམ་ཡང་ན་རྣམ་པ་བརྒྱད།། རྫས་སམ་ཡོ་བྱད་རང་བཞིན་པས།། ཟས་མཆོག་གར་གྱིས་སྤྱིར་བླངས་ཏེ། ། ལོངས་སྤྱོད་སྤེལ་བའི་དབྱངས་འདིས་བསྟན།། བདག་ཅག་རིག་འཛིན་ཤེས་རབ་མ།། རྒྱལ་སྲས་ལྷ་ཡི་དངོས་གྲུབ་འཛིན། དགྱེས་པས་ཚིམ་པའི་ལོངས་སྤྱོད་དག། ཇི་ལྟར་ཡིད་བཞིན་ནོར་བུའམ།། དཔག་བསམ་ཤིང་ལྗོན་འདོད་འཇོའི་བ། ། མ་རྨོས་ལོ་ཏོག་རྒྱས་པ་ལྟར།། རྣལ་འབྱོར་ལོངས་སྤྱོད་ཆེན་པོ་དག། ནམ་མཁའི་ཁམས་སུ་གཏིབས་ནས་ཀྱང།། རྡོ་རྗེ་དགྱེས་ཚོགས་ཀུན་འདུས་ནས།། སྐལ་ལྡན་རྣམས་ཀྱིས་རབ་སྤྲུལ་ཅིག། རྡོ་རྗེ་གར་གྱི་དབང་སྒྱུར་ནས།། སྒྲེག་པས་ལྷ་མོ་འཇོ་ཚུལ་དག། འདུད་ཅིང་སྡོད་པའི་ཚུལ་གྱིས་ནི།། རོལ་མོའི་ཚོགས་ཀྱིས་དགའ་བ་སྐྱེད།། ཨོཾ་ཤྲཱི་བཛྲ་ལུ་སྱཻ་ཧཱུ~ཾ་ཧཱུ~ཾ། བཛྲ་མཱ་ལཻ་ཏྲཱ~ཾ་ཏྲཱ~ཾ།། བཛྲ་གཱི་ཏི་ཧྲཱིཿཧྲཱིཿ་བཛྲ་ནརི་ཏྱ་ཨཿཿ། རྡོ་རྗེ་ཀརྨའི་ཐབས་མཆོག་གིས།། རྡོ་རྗེ་གླུ་འདིས་གཟི་བྱིན་བསྐྱེད།། རྡོ་རྗེ་བདུད་རྩི་ལོངས་སྤྱོད་འདི།། རྩི་མཆོག་བཅུད་ཀྱི་སྙིང་པོ་སྟེ།། གཟི་མདངས་རྒྱས་པར་བྱེད་པའི་མཆོག། བཀྲག་འཛིན་གཟུགས་མཆོག་དྲན་པའི་དཔལ། ། རྡོ་རྗེ་ཅན་གྱི་བྱིན་སྟོབས་ཀྱིས།། སྐལ་པ་ཅན་གྱི་ཟས་སུ་བྱ།། སྐལ་མེད་རྣམས་ཀྱིས་དུག་ཏུ་འགྱུར།། དཔེར་ན་སྤྲུལ་ལ་འོ་མ་བཞིན།། ས་མ་ཡ་ཛོཾ:ཀུ་སུ་ཙ་མ་མ། སྨུག་ཟིལ་ལྷ་མ་མཉེན་གསལ་མ། ། རླན་རྣམས་བདུད་རྩིར་སྒྱུར་བྱེད་མ།། བདུད་རྩི་ཆུ་རྒྱུན་དངོས་གྲུབ་འཛིན།། རང་གཉེར་ལས་སྐལ་ཆུ་རྒྱུན་འབེབས།། ཤིང་ལོ་འདབ་ལས་བདུད་རྩིར་སྒྱུར།། འབྲུ་ཐོག་སྣ་ཚོགས་དངོས་གྲུབ་འཛིན། ། རང་གཉེར་ལས་སྐལ་འབྲས་བུར་སྐྱེད།། ལྷ་མོ་སྲབརྟན་དབང་སྒྱུར་མ།། ཁུ་བ་བཅུད་ལས་བདུད་རྩིར་འགྱུར།། བདུད་རྩི་ཞུན་ཆེན་དངོས་གྲུབ་འཛིན།། རང་གཉེར་ལས་སྐལ་བརྟན་པར་བྱེད། ། རྡོ་རྗེ་ལྷ་མོ་ཤེལ་མདོག་མ།། ཉི་ཟེར་བདུད་རྩིར་སྒྱུར་བྱེད་མ།། གསལ་བ་མདངས་ཀྱི་དངོས་གྲུབ་འཛིན།། རང་གཉེར་ལས་སྐལ་གཟི་བྱིན་སྐྱེད།། ལྷ་མོ་ཁྲོ་གཉེར་སྔོ་བསངས་མ།། དུར་ཁྲོད་རྫས་ལས་བདུད་རྩིར་སྒྱུར། ། ཤ་ཆེན་སྣ་ཚོགས་དངོས་གྲུབ་འཛིན།། རང་གཉེར་ལས་སྐལ་བྱིན་འབེབས་མ།། རྩི་ཡི་ལྷ་མོ་བློ་གྲོས་མ།། རྩི་ཐོག་བདུད་རྩིར་སྒྱུར་བྱེད་མ།། རྩི་མཆོག་ཀུན་གྱི་དངོས་གྲུབ་འཛིན།། རང་གཉེར་ལས་སྐལ་ཚིམ་བྱེད་མ། ། སྨན་གྱི་ལྷ་མོ་ནོར་གྱི་རྒྱུན།། དུག་རྣམས་བདུད་རྩིར་སྒྱུར་བྱེད་མ།། བདུད་རྩི་སྨན་གྱི་དངོས་གྲུབ་འཛིན།། རང་གཉེར་ལས་སྐལ་འདི་ཀུན་ཡང།། རྡོ་རྗེ་གླུ་ཡི་བརྟེན་ནས་ནི།། རྣལ་འབྱོར་ཆེན་པོའི་ཡོ་བྱད་དུ། ། རོལ་མོས་དགའ་སྟོན་ལོངས་སྤྱོད་བྱ།། དེ་ནས་ལས་ཀྱི་གནས་སྐབས་འདིར།། ཕྱི་ནང་མཐུན་འཇུག་བཀའ་སྡོད་པའི།། གཤིན་རྗེ་ཆོས་ཀྱི་ཕྱག་རྒྱ་ཡིས།། བྲན་གྱི་བྱ་བར་དབང་བསྡུས་ནས།། ཕྱི་མཚམས་བསྲུང་བར་དབང་བསྐུར་ཏེ། ། འབུར་རམ་ལུགས་སམ་རི་མོའམ།། ཅི་འདྲ་བར་ནི་བྱས་ནས་ཀྱང།། ཕྱི་ཁྱམས་སྒོ་ཡི་ཕྱི་རོལ་དུ།། མ་ཧེ་ཁྲི་ལ་བཞག་ནས་ནི།། མཐུན་པའི་རྫས་ཀྱིས་མགུ་བྱས་ལ།། དེ་ཚེ་འདི་ཡིས་བསྐོ་བར་བྱ། ། གསང་ཆེན་ལྷུན་གྲུབ་ཕོ་བྲང་ནས། ལས་ཀྱི་གཤིན་རྗེའི་ཕོ་བྲང་ནས།། བཅོམ་ལྡན་ཆོས་རྗེས་བཀའ་སྩལ་པ། དེ་བཞིན་རིག་འཛིན་སྒྲུབ་པ་པོས།། བཀའ་གསང་གཞུང་ཆེན་འདི་སྒྲུབ་ཅིང། ། ཡང་དག་དོན་ལ་ངེས་འཇུག་ན། འདི་དག་ནོར་བུ་རིན་ཆེན་ཏེ།། འདི་ལ་རྟོད་ཅིང་བར་གཅོད་པ།། ལྷ་སྲིན་སྡེ་བརྒྱད་འབྱུང་པོ་ཀུན། ཁྱོད་ཀྱི་འཁོར་དང་གཡོག་ཡིན་གྱི།། རྣམ་པར་སྨིན་པའི་ཆོས་ཤོད་ལ། ། གསང་བ་མཆོག་གི་རྣལ་འབྱོར་པས།། བླ་མེད་འབྲས་བུར་མ་གྱུར་ཚེར།། ས་འདི་ཡན་ཆད་མ་གཏང་བར།། དཔལ་ཆེན་མི་ཕམ་བཀའ་མ་འདའ།། བདག་ཅག་ཡེ་ནས་གཉིས་མེད་དེ།། དེ་ཙམ་དོན་གྱི་དབྱིངས་སུ་གཅིག། ཕྱི་རོལ་སྐྱོང་བའི་མུ་རན་ལ།། རྡོ་རྗེ་ཡལ་དམ་ཐུབ་པར་མཛོད།། བཛྲ་ཡ་མ་རཱ་ཛ་ས་མ་ཡ་སྟཾ།། ཞེས་པས་གཤིན་རྗེ་མནས་བསྒགས་ཏེ།། གལ་ཏེ་འདས་ན་ཁོ་བདག་འཚིག། བརྩམ་པ་བྱ་བའི་ལས་ཆེན་པོ། ། དངོས་གྲུབ་འབྱུང་བར་བྱེད་པའི་རྟེན།། ཕྱག་རྒྱ་ཆེ་དང་གཟུགས་མཆོག་གི། སྟེགས་བུ་ལེགས་པར་སྦྱངས་ན་འགྲུབ།། མཚོན་པས་ཁྲིད་པར་བྱེད་པ་ཡི།། རྡུལ་ཚོན་འདུས་བྱས་རྒྱུ་རྣམས་ལ།། བརྙན་མའི་དཀྱིལ་འཁོར་བཤད་བགྱི་བ། ། སོ་སོར་བརྟགས་ཏེ་བཤད་བགྱི་བ།། བརྟན་ཞིང་ངོས་འཇམ་ཁང་བུ་ལ།། འབུར་ཁུང་ཁོད་སྙོམས་འཕང་མཐོ་བའི། ཁ་དོག་ལྔ་ཡི་གཟུགས་བྱས་ནས།། དེས་ནི་མཚན་མའི་དངོས་གྲུབ་སྟེར། ། ཤིང་ཤུན་རས་སམ་དུར་ཁྲོད་ཀྱི།། ཞིང་ཆེར་རས་ལ་ཁ་དོག་ལྔས།། ཕྱག་རྒྱ་འབར་བའི་གཟུགས་བྲིས་ན།། དེ་ཡང་མཚན་མ་འབྱུང་བའི་རྟེན།། རྡོ་དང་ཤེལ་རྡོ་ལ་སོགས་པ།། དུང་ངམ་བ་སོའི་རྒྱུ་ལས་ནི། ། མཁས་པས་འབུར་དུ་བཏོད་བྱས་ནས།། མཚན་མ་འབྱུང་བའི་རྟེན་དུ་འགྱུར།། གསེར་དངུལ་རིན་ཆེན་ལ་སོགས་པ།། ཟངས་ལྕགས་ཁར་བའི་རྒྱུ་དག་ལས།། མཁན་གྱིས་བླུགས་ཏེ་མ་ཉམས་ན།། དེ་ཡང་མཚན་མའི་རྟེན་དུ་འགྱུར། ། བླཀྵ་བྱང་ཆུབ་ཤིང་ལ་སོགས།། རྒྱུད་ཤིང་ཡལ་ག་མཉེན་པ་ལས།། ཕྱག་རྒྱའི་གཟུགས་དེ་ལེགས་སྦྱར་ན།། དེ་ཡང་རྟེན་དུ་མཁས་པས་བཤད།། མཉེན་ཅིང་སྦྱིན་པའི་མཆོག་རྣམས་ལ། ། བཞིན་དང་འདྲིལ་ཁུགས་ལེགས་སྦྱར་ཏེ།། ཕྱག་རྒྱ་ཆེན་པོའི་གཟུགས་བྱས་ན།། དེ་ཡང་རྟེན་བའི་འོས་སུ་འགྱུར།། དེ་ལ་སོགས་པའི་རྒྱུ་རྣམས་ལ།། ཡི་གེ་འམ་ཡང་ན་མཚན་རྟགས་སམ།། མིང་ངམ་ཐིག་ལེར་རྫས་ལ་བྲི། ། བསྒྲུབས་ན་མཚན་མའི་རྟེན་དུ་འགྱུར།། དེ་ལ་རེ་ཞིག་འདིར་བཤད་པ།། སྟེགས་བུ་ལ་བརྟེན་མཚན་མ་དག། བསྒྲུབ་པའི་དོན་དུ་བརྟག་གཟུང་བ།། བརྩམ་པའི་ཐབས་ནི་འདི་ལྟ་སྟེ།། གོང་དུ་སྨོས་པའི་རྒྱུ་རྣམས་ལ། ། སྟེགས་བུ་མཛེས་ཤིང་མཉམ་བྱས་ཏེ། ཀུན་དུ་གྲུབ་བཞི་ཆ་མཉམ་ལ།། བདུད་རྩི་ལྔ་ཡི་སྦྱོར་བ་ཡིས།། མེ་ལོང་ལྟ་བུར་སྙིང་པོར་བྱ།། སྣང་བྱུང་ཡང་དག་བྱིན་བརླབས་ཅན།། ཡེ་ཤེས་རང་བྱུང་གྲུབ་པའི་རྫས། ། བཀའ་གསང་རྨད་བྱུང་ཕོ་བྲང་དུ།། དུར་ཁྲོད་རྫས་ལྔས་སྐྱང་ནུལ་བྱ།། རྡོ་རྗེ་སྲད་བུའི་ཐིག་གདབ་པ་ཆོ་ག་རྣམ་པར་བཤད་བགྱི་བ།། གསང་བའི་ལྕང་ལོ་འཁྲིལ་མངས་དང། རྡོ་རྗེ་རྒྱུན་ཐག་ལ་སོགས་པ། ། རིང་ཐུང་མཎྜལ་འཁོར་ཁྱུད་ལ།། འཇུར་མདུད་ཅན་དུ་མ་གྱུར་པའི།། སུམ་སྒྲིལ་སྙོམས་པའི་ཚད་ལྡན་ལ།། ཡེ་ཤེས་ལྔ་ཡི་རང་བཞིན་གསལ།། རྒྱུ་དེ་བྱིན་གྱིས་བརླབ་པའི་ཐབས།། ཐབས་དང་ཤེས་རབ་འབྲེལ་པ་ཡི། ། ཡི་གེ་གཉིས་ཀྱི་འཕྲོ་འདུ་ལས།། དཀར་དམར་འོད་ཀྱི་གསེར་ཕྲེང་འཕྲོ།། རྡོ་རྗེ་གསང་བའི་ཐབས་ཀྱིས་ད།། བྱང་ཆུབ་སེམས་འདྲེ་འཁལ་བའི་ཡུམ།། ངེས་པར་རྟགས་ཏེ་འདིར་བཟུང་བ།། མཚན་ལྡན་བཀྲ་ཤིས་གསང་བའི་ཡུམ། ། སྨིན་དཀྱུས་རིང་ལ་ལག་སོར་ཕྲ།། ཚིགས་མིག་སླུམ་ལ་ཕྲ་བར་བཤད། ཁ་ནས་ཨུཏྤལ་ངད་ལྡན་ཞིང།། ལུས་ལ་ག་པུར་ཙནྡན་དྲི།། ཡིད་འོང་མཚན་ལྡན་རྐེད་སྐབས་ཕྱེ།། སྐྲ་འཇམ་མཐོན་མཐིང་གཡས་སུ་འཁྱིལ། ། སོ་དཀར་ཚགས་དམ་དཀར་དམར་ཕྱེད།། མིག་གི་དཀྱུས་རིང་སྨིན་དཀྱུགས་ལེགས།། ཟར་མའི་མེ་ཏོག་རྒྱས་འདྲའི་སྤྱན།། དཔྲལ་བའི་དབྱེས་ཆེ་སྐྲ་མཚམས་འཁྱུག། སྣ་བཟང་མདོག་གསལ་པདྨའི་རིགས། ། ལུས་དྲང་སྐེ་རིང་སེམས་མའི་ཚུལ།། ནུ་མའི་ཀྱིལ་མཐོ་ཟླ་རྒྱས་འདྲ།། ཤ་དཀར་ཚགས་དམ་འཁྲིལ་བག་ཆགས།། ཁོང་དལ་འགྲོ་ན་གོམ་པ་འཇལ།། སྐད་ནི་ངང་པ་གཞོན་ནུ་སྒྲོགས།། ཅིར་ཡང་མཛེས་པའི་སྟབས་ཚུལ་ལྡན། ། སྐྱེས་བུ་བླ་མས་ཡུམ་དུ་གཟུང།། གཟུངས་མར་བྱིན་གྱིས་བརླབ་པ་ནི།། ཡུམ་གྱི་ཕུང་པོ་གནས་ལྔར་ནི།། བདེ་བར་གཤེགས་པའི་ས་བོན་ལྔ།། འཕྲོ་འདུ་གསལ་བར་གྱུར་པ་དང། ། སངས་རྒྱས་བྱིན་བརླབས་དབང་བསྐུར་ནས། བདེ་གཤེགས་ཡུམ་ལྔའི་སྐུ་མཆོག་གསལ།། རྡོ་རྗེ་ཡབ་ལའང་དེ་བཞིན་ཏེ།། དེ་ལྟར་གསལ་བར་ཡུར་པ་དང།། ཡུམ་གྱི་མཁའ་ལ་མེ་རི་སྒོམ། ། གསང་བ་དབུགས་ཀྱི་ཟླ་གམ་ལ།། བྱང་ཆུབ་སེམས་ཀྱི་འཕྲོ་འདུ་བྱ།། གཟུགས་བརྙན་ཇི་ལྟར་གསལ་བ་བཞིན།། ཡུམ་གྱི་མཁའ་ལ་དེ་བཞིན་ནོ།། དེ་ནས་རྡོ་རྗེ་ཚིག་འདི་ཡིས།། ལུས་ཀྱི་ཡུམ་ལ་ངེས་པར་བསྒོ། ། ཤེས་རབ་ལྷ་མོ་གསང་བའི་ཡུམ།། འདོད་དགུར་སྒྱུར་བའི་འཕྲུལ་མོ་ཆེ།། ཆགས་པའི་ཚུལ་གྱིས་ཐབས་ལ་འདུད།། གཡོན་དུ་འཁྲིལ་ཅིག་གཡས་སུ་འཁྱུད།། འཛུམ་པའི་མདངས་ཀྱིས་ཟླ་གམ་སྦྱོར།། གསང་བའི་བྱང་ཆུབ་སེམས་འདྲེན་པ། ། ཁྱོད་ནི་ལྷ་མོ་རྒྱལ་བའི་སྲས།། རང་བཞིན་ཆོས་ཀྱི་མཚན་ལྡན་མ།། རྡོ་རྗེ་ལས་གྱི་ཡུམ་ཡིན་གྱིས།། གསང་བའི་ལས་རྣམས་ཀུན་བྱོས་ཤིག། ལག་པ་འཁོར་ལོའི་གཞན་ཡས་སུ།། ཉི་ཟླ་འབར་བའི་ཚོགས་བཀོད་དེ། ། གསང་བའི་བྱང་ཆུབ་དཀར་དམར་འདི།། ཐིག་ལེ་ཡི་གེའི་ངོ་བོར་གདབ།། ལས་ཀྱི་རྡོ་རྗེ་འབར་བ་ཡི།། རྡོ་རྗེ་གར་གྱི་ཕྱག་རྒྱ་ཡིས།། བྱང་ཆུབ་སེམས་ཀྱི་ཐིག་འདི་དྲོངས།། རྡོ་རྗེ་གསང་བའི་ལས་འདི་དྲོངས། ། རྡོ་རྗེ་གསང་བའི་ལས་འདི་གྱིས།། ཨོཾ་ཙནྡྲ་དྷ་ར་ཧྲཱི་ཞེས་པའི།། གསང་བའི་ཐབས་ཀྱི་སྦྱོར་བ་ཡིས།། རྫས་མཆོག་འབར་བའི་ཐིག་ལེ་ཡིས།། གནས་ལྔ་དག་གི་གཞལ་ཡས་སུ།། གསང་བ་ཐབས་ཀྱི་ཐིག་ལེ་བྱ། ། སྲད་བུའི་སྦྱོར་བ་དེ་རྫོགས་ནས།། གོལ་སྒྲིབ་རྟག་ཆད་སྐྱོན་བྲལ་བའི།། ཆེ་ཆུང་ཡ་ཡོ་མེད་པ་ཡི།། རྡོ་རྗེ་དབུ་མའི་ཐིག་འདི་དགྱེ།། ཆོས་ཀྱི་དབྱིངས་ཀྱི་གཞལ་ཡས་སུ།། མི་དམིགས་བདལ་བའི་མཎྜལ་ལ། ། ཡེ་ཤེས་ལྔ་ཡི་ཐིག་འཕྲོས་པས།། བདེ་ཆེན་རྣམ་ཐར་ཕྱག་རྒྱའི་ཚོགས།། ཀུན་གཞི་ནམ་མཁའི་གཞལ་ཡས་སུ།། ཉོན་མོངས་རྟོགས་པའི་མཎྜལ་ལ།། ཏིང་འཛིན་འོད་ཟེར་ཐིག་འཕྲོས་པས། ཕྱག་རྒྱ་རྡོ་རྗེ་འབར་བའི་ཚོགས། ། མཁའ་དབྱིངས་གསང་བའི་གཞལ་ཡས་སུ།། ཟླ་གམ་པདྨའི་མཎྜལ་ལས།། བྱང་ཆུབ་སེམས་ཀྱི་ཐིག་འཕྲོས་པས།། ཡེ་ཤེས་སེམས་དཔའ་གསལ་བའི་ཚོགས།། བཀྲ་ཤིས་དབེན་པའི་གཞལ་ཡས་སུ། ། མཚན་མ་རྟེན་གྱི་མཎྜལ་ལ།། རྡོ་རྗེ་སྲད་བུའི་ཐིག་འཕྲོས་པས། ཆོ་འཕྲུལ་གཟུགས་བརྙན་ཕྱག་རྒྱ་འབར།། སྟོང་གསུམ་གསང་བའི་དཀྱིལ་འཁོར་དུ།། རྨད་བྱུང་རྡོ་རྗེའི་ཐིག་འགྱེད་ན།། གསང་བའི་དམ་ལ་གནས་པ་ཡི། ། འབྱུང་པོ་སྐྱེ་བོ་གདོལ་པ་ཅན།། རྡོ་རྗེ་རྩལ་གྱི་ཧཱུ~ཾ་རིང་ལས།། རྡོ་རྗེ་མཚོན་ཆའི་བུ་ཡུག་འཚུབ།། ཕྱོགས་མཚམས་བླ་འོག་ཁྲོ་བོས་གཏམས།། འབར་བ་གསང་བའི་མཚམས་བཟུང་སྟེ།། ཕྱི་རོལ་སྡེ་པའི་འདྲུལ་རྣམས་གཅད། ། རྡོ་རྗེ་མཚོན་ཆ་འབར་བའི་ཚོགས།། སྲེག་དང་འཇོམས་པའི་དྲག་ཤུལ་ཅན།། རྡོ་རྗེ་ལྕེ་ཡིས་འདིར་བརྡེག་བྱ།། རྡོ་རྗེ་ཉི་མའི་གཞལ་ཡས་སུ།། རྡོ་རྗེ་དཔལ་བེའུ་འོད་ཀྱི་ཐིག། མེ་ལོང་ཡེ་ཤེས་རང་བཞིན་ཅན།། རྣལ་འབྱོར་ཅན་གྱིས་གདབ་པར་བྱ།། དེ་བཞིན་རིན་ཆེན་འབར་བའི་གཞལ།། པདྨ་ཟླ་བ་འཁོར་ལོ་ཡི།། དཔག་མེད་ནམ་མཁའི་གཞལ་ཡས་སུ།། རིགས་ཀྱི་དཔལ་བེའུ་འོད་ཀྱི་ཐིག། ཡེ་ཤེས་བཞི་ཡི་རང་བཞིན་ཅན།། རྣམ་འབྱོར་ཅན་གྱིས་གདབ་པར་བྱ།། རྡོ་རྗེ་མཁའ་ལ་འཁོར་ལོ་བསྐོར།། ཐབས་དང་ཤེས་རབ་ཟུང་ཡ་བཞིས།། སོ་སོའི་ཕྱག་ཏུ་གནས་ནས་ནི། ནམ་མཁའ་དབུས་ཀྱི་སྙིང་པོ་ལ། ། སྲད་བུ་བཞི་ཡི་རྒྱ་གྲམ་བྲེ།། དེ་ནས་རྡོ་རྗེ་བརྟན་པའི་ས།། དབུས་ཀྱི་ཕོ་བྲང་དགུ་པ་ནི།། རྡོ་རྗེ་སྲད་བུའི་ཐིག་ཆེན་གྱིས།། ཕྱག་རྒྱ་བཞུགས་པའི་གནས་རྣམས་ཀུན།། ཆ་ཆུང་མེད་པར་སྙོམས་པར་བྱ། ། འདིར་ནི་རྡོ་རྗེ་མུ་ཁྱུད་བདུན།། འབྱུང་བའི་རིམ་པ་དྲུག་བར་དུ།། འཁོར་ལོ་དྲུག་བརྩེགས་སྙིང་པོར་འབར།། གྲུ་ཆད་རྩིབས་མཆན་མེ་རི་འཕྲོ།། མུ་ཁྱུད་ཚར་གསུམ་འབར་བའི་ཕྲེང།། བར་ཁྱམས་བཞིས་མཛེས་ཕྱི་ཁྱམས་དང། ལྔར་གསལ་སྒོ་དགུ་ཤར་དུ་བརྩེགས།། ཕོ་བྲང་དེ་ཡི་གནས་གནས་སུ།། ཕྱག་རྒྱའི་ཚུལ་རྣམས་འབྱུང་བ་ནི།། མི་ཁྱུད་མཐའ་ཟད་ཡན་ཆད་དུ།། ཡབ་ཡུམ་དྲུག་ཅུ་རྩ་ཞི་ཡི།། ཆོ་འཕྲུལ་དམ་ཚིག་ཚད་མེད་པ། ། རོལ་བ་འཇིགས་བྱེད་འཇིགས་བྱེད་ཆེ།། ཀ་ཙ་ལི་ལ་སོགས་པར་བྲི།། དེ་བཞིན་ཟ་བྱེད་ཡབ་ཡུམ་བཞི།། ལས་ཀྱི་ལྷ་སྟེ་ཧེ་རུ་ཀ།། འཁོར་ལོ་ཐ་མའི་རྩིབས་ལ་དགོད།། གནས་དང་ཡུལ་གྱི་ཕྱག་རྒྱ་དག། གྲུ་ཆད་ཕྱི་དང་ནང་ན་དགྲམ།། ཧཱུ~ཾ་ཆེན་བཅུ་ཡི་ཡབ་ཡུམ་དག། ཤིན་ཏུ་མཛེས་པར་དག་པོ་ལའོ།། དེ་ཉིད་ལ་ནི་མ་བརྒྱད་དང།། གིང་ཆེན་བཅོ་བརྒྱད་རྒྱས་པར་དགོད།། གཉིས་པའི་ཁྱམས་ལ་མཁའ་འགྲོ་བརྒྱད། ། ཤུགས་འགྲོ་བརྒྱད་ཀྱང་དེ་བཞིན་ནོ།། གསུམ་པ་ཁྱམས་ལ་ཕྲ་མེན་བརྒྱད།། དེ་བཞིན་འབར་མ་བརྒྱད་རྣམས་བྲིས།། བཞི་པའི་ཁྱམས་ལ་ཕོར་ཐོགས་བརྒྱད།། དེ་བཞིན་སྲིན་མོ་གཞོང་ཐོགས་བརྒྱད།། ཀུན་ཏུ་མཛེས་པར་བྲི་བར་བྱ། ། ལྔ་པའི་ཁྱམས་ནི་ཐ་མ་ལ།། རྡོ་རྗེ་སླས་དང་བྲམ་མོ་དང།། ཕོ་ཉ་ལ་སོགས་རྒྱས་པར་དགྲམ།། དེ་ཡང་ཚུལ་དུ་དགོད་པ་ནི།། གོང་མ་དག་ནི་རྒྱུ་རྣམས་ལས།། ཀ་ཙ་ལི་ལ་སོགས་པ་དང། ། ཇི་ལྟར་འབྱོར་བ་དེ་ལྟར་བྲི།། མཆོད་པའི་ཡོ་བྱད་ཐམས་ཅད་དང།། རྨད་དུ་བྱུང་བའི་རྫས་མཆོག་དང།། རྡོ་རྗེ་གསང་བའི་རིམ་གྱིས་བཀོད།། རྡོ་རྗེ་གསང་སྒོ་ཕྱེ་ནས་ནི།། ཏིང་འཛིན་དཀྱིལ་འཁོར་ཀུན་རྫོགས་ནས། ། རང་བཞིན་ཡུལ་ནས་ཕབ་ནས་ནི།། བསྒྲུབ་པའི་དཀྱིལ་འཁོར་དེར་རྫོགས་བྱ།། འདིར་ཡང་དོན་གྱི་ཁྱད་པར་གྱིས།། རིག་འཛིན་ཆེ་བའི་ས་སྤར་བ།། ཤར་གྱི་གདན་གྱི་ཁྱད་པར་ལ།། རྡོ་རྗེ་སེང་གེས་བཏེགས་འཁོར་ལོ། ། ཟླ་བ་ཉི་མ་གཡས་གཡོན་གྱི།། ཞབས་རྟེན་ཚུལ་གྱི་མཎྜལ་ནི།། རྡོ་རྗེ་རྒྱལ་པོ་ཡབ་ཡུམ་བཞུགས།། ལྷོ་ཡི་གདན་གྱི་ཁྱད་པར་ལ།། གླང་ཅེན་རྡོ་རྗེས་བཏེགས་འཁོར་ལོ།། པདྨ་གཡས་གཡོན་ཞབས་བརྟེན་ཚུལ། ། རྡོ་རྗེས་རྒྱལ་བ་ཡབ་ཡུམ་བཞུགས།། བྱང་ངུ་གདན་གྱི་ཁྱད་པར་ལ།། པདྨ་རྡོ་རྗེ་བཏེག་རྒྱ་གྲལ།། རྡོ་རྗེ་ཀརྨ་ཡབ་ཡུམ་བཞུགས།། ནུབ་བམ་ཕྱོགས་སམ་མཚམས་གཞན་དུ།། གཞི་རྣམས་གཅིག་ཏུ་གྱུར་པ་ལ། ། མཎྜལ་རྒྱུན་མ་ཆད་པ་ལ།། རྡོ་རྗེས་གཏམས་ཤིང་སྦྲེལ་བྱས་ནས།། པདྨ་ཕྱོགས་གཅིག་ཆེར་འབར་བ། ཁ་དོག་འབར་བའི་འོད་ཀྱིས་དཀྲིགས།། རྩལ་ཕང་ཆེ་ཆུང་ཁྱད་པར་གྱིས།། སྐལ་དང་ལྡན་ནས་མི་ལྡན་པའི། ། ལ་ལ་དག་ལ་ཟླ་བ་ནི།། རངས་པའི་གདན་གྱི་མཚན་མ་ལ།། དེ་ཡང་རྩལ་འཕང་ཆེ་ཆུང་ལ།། ལ་ལ་རྩེ་གསུམ་རྡོ་རྗེས་མཚན།། ལ་ལ་རྡོ་རྗེ་ཕྱེད་མས་མཚན།། ལ་ལ་མ་རངས་ཟླ་གམ་ཁ། ། ནང་དུ་བསན་པོས་མཚན་པར་བྱའོ།། ལ་ལ་རྩེས་འབིགས་རྣམ་པར་མཚན།། ལ་ལ་པདྨ་བརྩེགས་པས་མཚན།། ལ་ལ་དག་མ་མཚན་མ་མེད།། ལ་ལས་གདན་དེ་མི་ནོན་རེ།། ནར་མ་གང་ཟག་མི་ཡི་རྫས།། སོ་སོའི་བདེ་བའི་ཐབས་སུ་སྦྱར། ། ཀུན་ཏུ་བདེ་བར་སྦྱར་བའི་ཕྱིར།། པི་པར་བསྟན་ཞེས་གྲགས་པ་སྟེ།། ཀུན་ཏུ་ཁྱབ་པར་ལུས་བདེར་སྦྱར།། རྨད་བྱུང་སྒྲུབ་པའི་དཀྱིལ་འཁོར་དུ།། འཇུག་དང་དངོས་གྲུབ་གསོལ་བ་དང། ། དབང་བསྐུར་བ་ཡི་ལས་རྣམས་བྱ།། འདོད་པར་བྱ་བ་སྒྲུབ་པ་དང།། གཏོར་མ་ལ་སོགས་རྫས་ཀྱི་རྣམས།། ཆ་གསུམ་དག་ལ་བགོས་ནས་ཀྱང།། གཅིག་གི་སྦྱིན་སྲེགས་ལས་མཆོག་བྱ།། གཅིག་ལ་རྣམ་འབྱོར་ལོངས་སྤྱོད་གཏེར། ། གཅིག་ནི་མཁའ་འགྲོའོ་འཁོར་ཚོགས་བསྐྱང།། གནས་སུ་བཀྲ་ཤིས་ལ་སོགས་ཀྱིས།། སྒྲུབ་པ་རྫོགས་པས་མཐར་དབྱུང་ངོ།། དུར་ཁྲོད་གསང་མཆོག་དབྱིངས་ཉིད་ལ།། དཀྱིལ་འཁོར་དགུ་བརྩེགས་དཔལ་གྱི་རྒྱ། ། ཡེ་ཤེས་དགུ་ཡི་ཁོང་གསེང་གསལ།། མེ་རི་འོད་ཀྱི་ཐིག་ཐག་གཅད།། འཁོར་ལོ་ཚོགས་ཆེན་གྲུབ་པའི་ས།། རྣལ་འབྱོར་རྩལ་མཆོག་ཅན་གྱི་གནས།། སྒྲུབ་པ་རྩ་ཡི་དཀྱིལ་འཁོར་དེ། ། དུར་ཁྲོད་གསང་བ་མཆོག་གི་མདོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཚོགས་ཆེན་འདུས་པའི་བསྒྲུབ་ལུགས་ཀྱི་ལེའུ་སྟེ་བཅུ་གཉིས་པའོ།།།། དེ་ནས་སེམས་དཔའི་རྡོ་རྗེ་དམ་པ་དེས་འདི་སྐད་ཅེ་བཀའ་སྩལ་ཏོ། ། འདུས་པ་ཆེན་པོའི་ཚོགས་རིག་འཛིན་ཐམས་ཅད་ངེས་པར་འགྲུབ་པར་འདོད་ན་འདི་ལྟར་རིག་པར་བྱའོ།། དེ་བཞིན་ཐམས་ཅད་ཀུན་རྫོགས་ནས།། རིགས་ཀྱི་ཁྱད་པར་འདི་དག་དབྱེ། ། སོ་སོའི་རིགས་སུ་བསྒྲུབ་པར་བྱ།། རྡོ་རྗེ་ཅན་ལ་དཔལ་བེའུ་ནི།། དཀྱིལ་འཁོར་རྡོ་རྗེ་འབར་བའོ།། དེ་བཞིན་རིན་ཆེན་རིན་ཆེན་ཏེ།། པདྨ་དམར་པོ་འོད་ཀྱི་དཀྱིལ།། ལས་ནི་ཀུན་ཏུ་རྒྱ་གྲམ་འབར། ། དེ་བཞིན་རིན་ཆེན་འཁོར་ལོར་འབར།། སོ་སོའི་རིགས་རྣམས་གཙོར་གཞག་སྟེ།། འཁོར་ནི་དེ་བཞིན་མི་འགྱུར་བར།། རྣམ་པར་བཀོད་དེ་ལེགས་སྦྱར་ནས།། བསྙེན་པ་དང་ནི་ཉེ་བསྙེན་པ། ། བསྒྲུབ་དང་སྒྲུབ་ཆེན་རྫོགས་པར་བསྒྲུབ།། ཏིང་འཛིན་རྩལ་གྱི་ཁྱད་པར་ནི།། སོ་སོའི་རིག་ནི་གང་ཡིན་པ།། ཏིང་འཛིན་བྱེ་བྲག་མང་པོ་ལ།། ཡིད་ཀྱི་སྦྱོར་བ་གསལ་བར་བྱ།། དེས་ནི་རིག་འཛིན་གང་འདོད་པ། ། གསོལ་བར་ངེས་པར་འགྲུབ་པ་ཡིན།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་རིག་འཛིན་བསྒྲུབ་པའི་ལེའུ་སྟེ་བཅུ་གསུམ་པའོ།།།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། ། འདུས་པ་ཆེན་པོའི་ཚོགས་ཆོས་ཐམས་ཅད་ནི་བླང་དོར་མེད་པར་རིག་པར་བྱའོ།། ཆོས་ཉིད་མཉམ་པའི་རང་བཞིན་ལ།། བཟང་ངན་རྟོག་པའི་ཚིག་དང་བྲལ། ། བདག་དང་གཞན་དུ་དབྱེར་མེད་དེ།། གཙང་དང་མི་གཙང་གཉིས་སུ་མེད།། ཅེས་གསུངས་སོ།། དེ་ནས་འཁོར་དེར་འདུས་པར་གྱུར་པའི་རིག་འཛིན་མིའི་ཐོད་པ་ཅན་མང་པོ་དག་རྣམ་པར་བཀོད་པ་རྣལ་འབྱོར་གྱི་གྲལ་ནས་ལངས་ཏེ། ། ཨ་ལ་ལ་ཧོ་ཞེས་བྱ་བའི་སྒྲ་ཆེན་པོ་བརྗོད་ནས་འདི་སྐད་ཅེས་གསོལ་ཏོ།། བཅོམ་ལྡན་འདས་ཀྱིས་བཀའ་སྩལ་པ་ལ་བདག་ཅག་ཤིན་ཏུ་གནས་པར་འཚལ་ན།། བདག་ཅག་རྣམས་ཀྱིས་དམ་ཚིག་ནི་བཅོམ་ལྡན་འདས་ཀྱིས་མ་གསུངས་སོ་ཞེས་གསོལ་པ་ལས། ། བཅོམ་ལྡན་འདས་ཀྱིས་བཀའ་སྩལ་པ།། མིའི་ཐོད་པ་ཅན་རྣམས་རང་རང་ཇི་ལྟར་དགའ་བའི་དམ་ཚིག་རྣམས་སྤོབས་པ་སྐྱེད་ལ་ཕུལ་ཅིག་ཅེས་གསུངས་པ་ལས། འདོད་ཆགས་ཀྱི་རིག་འཛིན་བྲམ་ཟེའི་མིའི་ཐོད་པ་ཅན་རྡོ་རྗེ་ཐལ་བའི་དབྱངས་ཞེས་བྱ་བས་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ཅག་གི་དམ་ཚིག་ནི་འདི་ལྟ་སྟེ།། མ་དང་སྲིང་མོ་བུ་མོ་དང། ། རྒྱུ་དང་མི་རྒྱུའི་འཇིག་རྟེན་གྱི།། བུད་མེད་ཐམས་ཅད་ཐམས་ཅད་ལ།། འདོད་པའི་ཆགས་པ་ཅི་སྤྲད་ཀྱང།། ཡང་དག་རིག་ན་མི་གོས་སོ།། ཞེས་གསོལ་ཏོ།། དེ་ནས་རིག་འཛིན་རཀྵ་མིའི་ཐོད་པ་ཅན་ཞེས་བྱ་བ་དེས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་དམ་ཚིག་འདི་ལྟ་སྟེ།། བདག་ནི་གསོད་ལ་དགའ་བ་སྟེ།། སེམས་ཅན་ཐམས་ཅད་བསོད་ནས་ཀྱང།། ཟག་པ་མི་གཙང་སྙིགས་མ་དང། ། མི་ཤ་ལ་སོགས་ཐམས་ཅད་ཀུན།། ཟོས་ན་དམ་ཚིག་མཆོག་ལགས་ཏེ།། མཐུ་དང་གཟི་བྱིན་འཕེལ་བར་འགྱུར།། བདག་གི་དམ་ཚིག་དེ་ལགས་སོ།། ཞེས་གསོལ་ཏོ།། དེ་ནས་ཡང་གནོད་སྦྱིན་རིག་འཛིན་ཡཀྵ་མིའི་ཐོད་པ་ཅན་ཞེས་བྱ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་དམ་ཚིག་འདི་ལྟ་སྟེ། མི་ཡི་བདག་པོ་ཐམས་ཅད་ལ།། འདོད་པ་ཐམས་ཅད་འཕྲོག་པ་དང། གསེར་ལ་སོགས་པར་བརྐུས་སྤྱད་ཀྱང། ། ཡང་དག་རིག་ན་མི་གོས་ཏེ།། འདོད་པ་གྲུབ་པའི་མཆོག་ཏུ་འགྱུར།། བདག་གི་དམ་ཚིག་དེ་ལགས་སོ།། ཞེས་གསོལ་ཏོ།། དེ་ནས་ཡང་མུ་སྟེགས་རིག་འཛིན་འོད་སྲུང་རལ་པ་ཅན་ཞེས་བྱ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གི་དམ་ཚིག་ནི་འདི་ལྟ་སྟེ།། མི་ཡི་མགོ་བོ་བཅད་ནས་ཀྱང།། བཟང་དང་ངན་ནི་བྱེ་བྲག་རྣམས།། རིགས་པས་བརྟགས་ཏེ་ཤེས་བྱས་ནས།། བཟང་བའི་རྟགས་ཅན་བསྟེན་བྱ་སྟེ། ། དཀར་པོ་ར་རི་ལྕང་ལོ་ཅན།། འདི་དག་རྟག་ཏུ་སུས་འཆང་བ།། འདོད་པ་ཐམས་ཅད་འགྲུབ་པ་སྟེ།། རྒོལ་བ་ཐམས་ཅད་འཇོམས་པར་ནུས།། ཡིད་བཞིན་ནོར་བུ་ཅི་འདྲ་བར།། དེ་ཡི་ཡོན་ཏན་འདི་ལས་འབྱུང། ། བདག་གི་དམ་ཚིག་དེ་ལགས་སོ།། ཞེས་གསོལ་ཏོ།། དེ་ནས་ཡང་བྲམ་ཟེ་ཤ་ལ་དགའ་བ་དང།། ཤ་ཟ་མོའི་རིག་འཛིན་རྣམས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་ཅག་གི་དམ་ཚིག་ནི་འདི་ལྟ་སྟེ། ། བ་གླང་ཁྱི་ཤ་རྟ་ཤ་དང།། མི་ཤ་གླང་ཆེན་ཤ་ལ་སོགས།། ཤ་རྣམས་འདྲ་བར་གཙང་སྨེ་མེད།། ཟོས་ན་ཡོད་ཏན་སྣ་ཚོགས་འགྲུབ།། བདག་གི་དམ་ཚིག་དེ་ལགས་སོ།། ཞེས་གསོལ་ཏོ། ། དེ་ནས་ཡང་སྲིན་མོའི་རིགས་འཛིན་ཁྲག་འཕྲོག་མ་ཞེས་བྱ་བ་ལ་སོགས་པས་འདི་སྐད་ཅེས་གསོལ་ཏོ།། བཅོམ་ལྡན་འདས་བདག་གི་དམ་ཚིག་ནི་འདི་ལྟ་སྟེ།། སྲོག་ཆགས་སེམས་ཅན་ཐམས་ཅད་ཀྱི།། བསད་པའི་ཁྲག་ནི་དྲོན་མོ་དག། འཐུངས་ན་གཟི་བྱིན་འབར་བར་འགྱུར།། བདག་གི་དམ་ཚིག་དེ་ལགས་སོ།། ཞེས་གསོལ་ཏོ།། ལྷ་མོ་ཀླུ་མོ་རིགས་ངན་མོ་ལ་སོགས་པ་བུད་མེད་ཀྱི་ཚོགས་ཐམས་ཅད་ཀྱིས་འདི་སྐད་ཅེས་གསོལ་ཏོ། ། བདག་ཅག་རྣམས་ཀྱི་དམ་ཚིག་འདི་ལྟ་སྟེ། གྲོ་བར་གླུ་ཚིག་ཆེན་པོ་ནི།། ཐམས་ཅད་བསྟེན་པའི་མཆོག་ལགས་ཏེ།། བྲོ་ཡི་འཇོ་ཚུལ་སྟབས་ཆེན་དང།། གླུ་ཡི་སྙན་དངགས་དོན་བསྒྲགས་ནས།། ཡིད་ཀྱི་དབང་པོ་ཐམས་ཅད་འཕྲོག། བསྟེན་པའི་ཐབས་ཀྱིས་འཁྲིག་སྤྱོད་པ།། འདི་ནི་དགའ་བའི་དམ་ཚིག་སྟེ།། བདག་ཅག་རྣམས་ཀྱི་དམ་ཚིག་ལས།། ཞེས་གསོལ་ཏོ།། དེ་ནས་རིག་འཛིན་དེ་ཀུན་གྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་རྣམས་ཀྱི་སྤྱིའི་དམ་ཚིག་ནི་འདི་ལྟ་སྟེ།། དཀར་ནག་ལས་ནི་ཅི་སྤྱད་ཀྱང།། རྣམ་པར་སྨིན་པའི་འབྲས་བུ་དང།། རབ་འབྲིང་ཐ་དད་བྱེ་བྲག་མེད།། དེ་བཞིན་འདི་ལ་བདེ་སྡུག་གམ། ། དགེ་དང་མི་དགེའི་རྩོད་པ་མེད།། རྣོན་པོའི་མཚོན་གྱིས་གཅད་དུ་མེད།། ཅི་ཕྱིར་རྣམ་པ་བདུན་སྟོང་པས།། ཐོག་པ་མེད་པའི་དོན་ཕྱིར་རོ།། སྲོག་ཀྱང་བཅད་ཅང་གསད་དུ་མེད།། ཅི་ཕྱིར་རྫས་འདི་འཇིགས་པས་སོ། ། སྡིག་པ་ཆེན་པོའི་ལས་རྣམས་ཀུན། བདག་གིས་བྱས་སམ་གཞན་བྱེད་བཅུག། གལ་ཏེ་གང་གཱའི་བྱེ་སྙེད་ཀྱི།། སེམས་ཅན་དེ་ལ་སྦྱིན་བྱིན་དང།། དེ་བཞིན་གང་གཱའི་བྱེ་སྙེད་ཀྱི།། སེམས་ཅན་ཐམས་ཅད་གསད་པ་གཉིས། ། ཡང་དག་རིག་ལ་ཐ་དད་མེད།། ནམ་མཁའ་དག་ལ་རྡུལ་དང་ཆུས།། ཇི་ལྟར་མི་ཆགས་བ་བཞིན་ནོ།། གང་ཞིག་ཁྲེལ་དང་འཛེམ་ལྡན་ན།། དོགས་པའི་རྟོག་པ་དེ་བཟུང་བས། ། དམྱལ་བ་ཆེན་པོར་ལྟུང་བར་འགྱུར།། ཆགས་པའི་སྤྱོད་པ་ལ་སོགས་ཀྱིས།། ལུས་རྣམས་གདུང་བར་བྱེད་པ་ཡི།། སེམས་ཅན་དེ་ནི་འདུ་ཤེས་ཆུང།། ཞེས་གསོལ་ཏོ།། དེ་ནས་བཅོམ་ལྡན་འདས་སེམས་དཔའི་རྡོ་རྗེས་འདི་སྐད་ཅེས་གསུངས་སོ། ། ཨེ་མའོ་ཐོད་པ་ཅན་གྱི་ཚོགས།། ཁྱེད་ཀྱིས་སྨྲས་པའི་ཚིག་འདི་རྣམས།། མདུད་པས་བཅིངས་པའི་ཚིག་ཡིན་ཏེ།། ཁུར་དང་བྲལ་བར་མི་འགྱུར་རོ།། ཡང་དག་ཡང་དག་ཅེས་སྨྲ་བ། ། ཡང་དག་ཉིད་ཀྱི་མདུད་པ་སྟེ།། མདུད་པ་བཀྲོལ་བ་མ་བྱས་ན།། ཐ་རམ་ཕྱེད་པར་མི་འགྱུར་རོ།། ཆམས་པའི་ལས་རྣམས་སྦྱོར་བ་དག། ཆགས་པའི་དབང་གིས་དེར་སྦྱོར་ན།། དེ་དག་དེ་ཡི་གྲོང་ཁྱེར་དུ། ། གནས་འགྱུར་དེ་ཡི་སེམས་ཅན་ཡིན།། འདུ་ཤེས་སྒྱུར་བའི་ལས་ཆེན་དག། སྡང་བའི་དབང་གི་སེམས་ཤོར་ན།། ཤན་པ་གསོད་པའི་རིག་འཛིན་དུ།། ལྟུང་འགྱུར་སྡིག་པའི་རི་བོ་ཡིན།། རྒྱལ་བ་རྣམས་ནི་གཙང་བས་ན། ། གང་ཚེ་བདེ་གཤེགས་རྒྱལ་བའི་ཞལ།། མི་གཙང་རྣམ་པ་སྣ་ཚོགས་ཀྱིས།། ཡོངས་སུ་བསྟབས་པར་གྱུར་ན་ཀོ། དེ་ཚེ་ལས་ཀྱི་རྣམ་སྨིན་གྱིས།། ཐར་མེད་ནད་ཀྱིས་བཟུང་ནས་ནི།། འདམ་དུ་བྱིང་བར་མི་འགྱུར་རམ། ། ཤ་དང་ཁྲག་ལ་སོགས་པའི་ཟས།། དགུ་པའི་རྔད་ཟས་ཆེན་པོ་སྟེ།། གང་གིས་ཟོས་པའི་ལུས་རྣམས་ལ།། འབྱུང་པོ་དྲི་ཟ་ཀུན་འདུས་ནས།། དྲི་མནམ་རོ་དང་བཅུད་རྣམས་འབྱིན།། དེས་ནི་གཟི་མདངས་ཡབ་འགྱུར་ན། ། ཅི་ཕྱིར་ཅི་སྟེ་དེ་རྣམས་བཟའ།། སེམས་ཉིད་རིན་ཆེན་ཡོད་བཞིན་དུ།། གཞན་གྱི་རིན་ཆེན་སྤྱོད་བྱེད་པ།། ལོག་པས་ལོག་པ་ལེན་པའི་ཆོས།། འདི་དག་མདུད་པ་དམ་པོ་ཡིན།། དཀར་གནག་ལས་ལ་ཁྱད་མེད་ཅེས། ། ཐམས་ཅད་ཁྲ་བོས་སྤྱོད་པ་ནི།། རིགས་མེད་རིགས་ཆད་ལོག་པའི་ལས།། འབྲས་བུ་ལོག་པའི་ཁམས་སུ་འགྱུར།། བདེ་གཤེགས་གཉེས་བྱའི་ལས་རྣམས་ལ།། ཡན་ལག་ཚིག་ཏུ་མ་དག་ན།། ཉེས་བྱས་ལས་ཀྱི་རྒྱུ་དེས་ནི། ། གང་གི་དུས་རྣམས་ཐམས་ཅད་དུ།། དབང་པོ་ཡན་ལག་མ་ཚང་ཞིང།། དྲན་པའི་སྙིང་པོ་ཉམས་པར་འགྱུར།། རིག་པ་འཛིན་པའི་རྣལ་འབྱོར་པས།། བདེར་གཤེགས་རྒྱལ་བ་སྒོམ་ཟློས་པ། ། ཆོ་འཕྲུལ་ཁྲོ་ཚུལ་བསྟན་པ་ལྟར།། མཚན་མ་ཉིད་དུ་དེར་གོ་ན།། ལས་ཀྱི་སྲིན་པོའི་རིག་འཛིན་ཡིན།། རྒྱན་དང་ཆ་ལུགས་ཐམས་ཅད་ཀུན།། མཚན་མ་ཉིད་དུ་བརྟགས་གྱུར་ན།། ཅི་ལའང་རྟོག་ཅིང་ཆགས་པ་ཡི། ། འཛིན་པའི་ཕུར་པ་ཆེན་པོར་འགྱུར།། ཨ་དང་ཧཱུ~ཾ་ལ་སོགས་པ་ཡི།། རྒྱུ་ཡི་ཡི་གེ་ཐམས་ཅད་ཀུན།། མཚན་མ་ཉིད་དུ་དེར་བརྟགས་ན།། ཙནྡན་སྦྲུལ་གདུག་ལ་སོགས་པར།། ལྟུང་འགྱུར་རྟོག་པའི་གེགས་ཆེན་ཡིན། ། ཁྲལ་ལ་སོགས་པའི་རྫས་ཆེན་ལྔ།། དེ་ཉིད་དངོར་པོར་དེ་བརྟགས་ན།། འབྱུང་པོ་ཁྲག་གི་དྲི་མནམ་པའི།། ལུས་ལེན་རིགས་ནི་འཛིན་པ་ཡི།། མ་བདུན་རྔམ་པའི་ཆ་ལུགས་སུ།། གང་ཞིག་རྟོག་པ་དེར་གོ་ན། ། སྲིན་མོ་མི་སྡུག་ཤ་ཟ་མོ།། ལངྐའི་ཡུལ་དུ་དེ་དག་འཁོར།། མཚན་མའི་བླ་ཐབས་མགོ་བརྙན་ཅན།། དེར་བཙན་དེར་བཟུང་དམིགས་པས་ནི།། ཤོ་གམ་གནས་ཀྱི་གཅན་ཆེན་རིགས།། འཛིན་ཅིང་གནས་དེར་རྟོགས་པར་འགྱུར། ། ལས་ཀྱི་དབང་བཙན་བྲན་མོའི་ཚོགས།། དེ་འདྲ་ཉིད་དུ་དེ་བརྟགས་ན།། གནོད་སྦྱིན་ཆེན་མོའི་ཚོགས་སུ་འགྱུར།། གཞན་གྱི་ཚེ་ལ་འཚེ་བ་ཡིན།། དེས་ན་མདུད་པ་ཆེན་པོ་འདི།། ཁུར་དུ་བཤལ་བའི་གདོས་ཡིན་ཏེ། ། འཆལ་བས་ལྟ་བའི་མིག་ལོང་སྟེ།། སེམས་ཀྱི་ནོར་བུ་རིན་ཆེན་དེ།། རྟག་ཆད་ཁམས་སུ་སྟོར་བར་འགྱུར།། དེ་ལྟའི་སྐྱོན་ཆེན་སྤང་བར་གྱིས།། དེ་སྐད་ཅེས་བཀའ་སྩལ་པ་ལས་ཐོད་པ་ཅན་གྱི་ཚོགས་རྣམས་རྟོགས་པའི་འདུ་ཤེས་ཀྱིས་ཟིན་ཅིང་རང་རང་གི་སྤྱོད་པ་ལ་སྐྱོ་བ་སྐྱེས་པ་གྱུར་རོ། ། དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།། ཨེ་མའོ་བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་ལོག་པའི་དཀའ་ཐུབ་ཏུ་འགྱུར་བ་ལགས་ན། འདི་དག་ཡང་དག་པའི་དཀའ་ཐུབ་ཏུ་གནས་པར་འཚལ་ན། ཆོས་ཐམས་ཅད་ནི་སྒྱུ་མ་ལྟ་བུ་སྟེ། ཅིར་ཡང་འགྱུར་བ་ལགས་སོ།། གསང་སྔགས་ཆེན་པོའི་སྒོ་ནི་བསྐལ་པ་མེ་དཔུང་ལྟ་བུ་སྟེ། བདག་ཅག་རྣམས་ཀྱི་རྟོག་པ་སོ་སོར་ཇི་ལྟར་མོས་པར་ལྟར་བཤད་དུ་གསོལ་ཞེས་ཞུས་པ་ལས། བཅོམ་ལྡན་འདས་ཀྱིས་དགྱེས་པ་ཆེན་པའི་བཞད་པ་མཛད་ནས། རིགས་ཀྱི་བུ་རྣམས་ནི་དེ་ལྟར་ཞུ་བར་ལེགས་ཀྱིས་ཤིན་ཏུ་ཉོན་ཅིགཁྱེད་རྣམས་ཀྱི་སྤྱོད་པ་མི་དགག་པར་ཇི་ལྟར་དགའ་བའི་བསམ་པ་སོ་སོར་རངས་པར་བྱ་སྟེ། འཇིག་རྟེན་མཚན་མའི་སྤྱོད་པ་བསམ་གྱིས་མི་ཁྱབ་པ་རྣམས་གསང་སྔགས་ཀྱི་དཀའ་ཐུབ་ཆེན་པོར་བྱའོ། ། རང་རང་གི་སྤྱོད་པ་མ་བཀག་པར་སྒོ་གསུམ་ལྷུག་པར་སྤྱོད་ཅིགདེ་ནས་སེམས་དཔའི་རྡོ་རྗེས་ཡང་འདི་སྐད་ཅེས་གསུངས་སོ། ཀྱེ་མའོ་ཐོད་པ་ཅན་གྱི་ཚོགས།། བུད་མེད་བུད་མེད་ཐམས་ཅད་ཀུན། ། སྐྱེད་པར་བྱེད་པའི་རྟེན་ཡིན་ཏེ།། འབྲས་བུ་སྨིན་པའི་ཞིག་ཡང་ཡིན།། བསྒྲལ་ཞིང་གདོན་པའི་གནས་ཡིན་ཏེ།། ཤེས་རབ་དགའ་བའི་ཡུལ་ཡིན་ནོ།། འདི་ལ་སེམས་གསུམ་གསན་པ་སྟེ།། ཡེ་ནས་དག་པ་ཆོས་ཉིད་སེམས། ། མཁའ་དང་སྤྱོད་པ་བྱང་ཆུབ་སེམས།། སྙིང་རྗེ་སྒྲོལ་བ་གསུམ་སྦྱར་ཏེ།། ཆོས་ཉིད་གསང་བ་ཉི་ཤར་ཁྱབ།། སྙིང་རྗེས་སྒྲོལ་བ་གསུམ་གྱིས་སྦྱར།། ཏིང་འཛིན་བྱིན་བརླབས་ཡེ་ཤེས་ཀྱིས། ། ཆོས་ཉིད་དུར་ཁྲཽད་མཁའ་ལ་བསྒྲལ།། བསྒྲལ་བའི་རྒྱུ་མཆོག་མན་ཆད་ནས།། ཤེལ་ཆེན་ཙ་ར་ལ་སོགས་པ།། དེ་ལ་རྒྱུ་དྲུག་ས་བོན་གདབ།། རང་བཞིན་ཡེ་ནས་དེ་གཞོམ་བྱ།། ཁྱད་པར་འདས་པའི་ཡི་གེ་ལྔ། ། གནས་བཀོད་འཕྲོས་པས་མཐའ་ཡས་བཀང།། ཐམས་ཅད་སྟོངས་ཤིང་ཟད་བྱས་ནས།། འདུས་པའི་ཡི་གེ་ལྔ་རུ་གསལ།། དེ་ལས་ཕྱག་མཚན་ཡེ་ཤེས་ལྔ།། མི་གནས་ཡེ་ཤེས་ངང་དུ་ཐིམ།། སྒྲིན་པའི་ཕུང་པོར་སྨིན་པ་དེ། ། རྡོ་རྗེ་རོལ་པའི་རྔམ་ཚོགས་ཀྱིས།། འཇོ་ཚུལ་སྟབས་ཀྱིས་སྦྱར་བར་བྱ།། ཁ་ཊཱ~ཾ་ལ་སོགས་སྔགས་བཅས་པས།། བསྒྱེལ་ཏེ་མ་རིག་སྒོ་དབྱེ་བྱ།། རྣམ་ཤེས་དབུགས་ཀྱི་སྒྲོམ་དྲངས་ལ།། རྡོ་རྗེ་རྒྱལ་པོའི་རླུང་སྒྲོམ་དུ། ། བསྡུས་ཏེ་རྡོ་རྗེ་དབུགས་ཅན་ལ།། ཧཱུ~ཾ་བྱས་སྒྲིལ་མ་དེ་ལ་བསླན།། གསང་བ་ཐུགས་ཀྱི་དཀྱིལ་འཁོར་དུ།། མཚོན་གང་འོད་དུ་བསྟིམ་པར་བྱ།། ཡུ་ཏི་ཨ་ཧ~ཾ་གིས་སྦར་ཏེ།། གསལ་ན་དེ་དང་མཉམ་དུ་གསལ། ། རྡོ་རྗེ་ཚེ་ལ་བསླན་པར་བྱ།། རྡོ་རྗེ་རླུང་གིས་དབུགས་སྦར་ཏེ།། ཐུགས་ལས་རླུང་སྒྲོམ་ལམ་དུ་སྦྱར།། ནམ་མཁའ་ཆོས་ཀྱི་གཞལ་ཡས་སུ།། ཉི་མའི་སྟེང་ན་ཧཱུ~ཾ་དུ་གསལ།། ཡེ་ཤེས་སེམས་དཔའ་ཚོན་གང་བ། ། ཉི་ཟླ་གའུའི་བར་ན་གསལ།། ཨ་ཡང་ཕཊ་གྱིས་བསྐྱོད་འཕངས་པས།། རྡོ་རྗེ་སེམས་དཔའི་ཐུགས་ཀར་འཕྲོས། ཡེ་ཤེས་སེམས་དཔར་གསལ་བ་ལ།། དངོས་པོར་སྣང་བ་འཛིན་དང་བྲལ།། གཡོ་འགུལ་འཕར་འཕྲིག་མ་ཆད་པར། ། རྡོ་རྗེ་མིང་གི་དབང་བསྐུར་ཏེ།། རིག་ཀྱི་ལྷ་དང་སྙིང་པོའི་སྦྱིན།། རྡོ་རྗེ་གདུང་བའི་བླུ་བླངས་ཏེ།། མན་ངག་གནས་ཀྱི་སྨོན་ལམ་གདབ།། བཞི་ཚལ་དག་ཏུ་བྱས་ནས་ནི། སྨན་གྱིས་བཏབ་སྟེ་ཕུང་པོར་བཙལ། ། འཁོར་བའི་ཕུང་པོ་དེ་བསྡུས་ལ།། རྡོ་རྗེ་སྟབས་དང་གླུ་ཡིས་སྦྱང།། གནས་གནས་དག་ཏུ་བསྔོ་བར་བྱ།། ཕུང་པོ་མཆོད་པའི་རྫས་སུ་བསྟིམ།། རྡོ་རྗེ་པྲ་ཡི་ལས་རྣམས་གདབ།། དེས་ནི་མཉེས་དང་སྐོངས་པ་དང། རྡོ་རྗེས་ལས་རྣམས་འསྒྲུབ་པ་ཡིན།། རྣལ་འབྱོར་ལས་ཀྱི་དབང་ཕྱུག་ཆེ།། མཐོ་གཙང་ཤེས་རབ་གངས་རུམ་ནས།། རིག་པའི་སྡེར་མོ་སྦར་བཤད་ཅན།། ང་རྒྱལ་དྲེགས་པའི་གླང་པོ་འཇོམས། ། རྣལ་འབྱོར་རྩལ་རྒྱས་སེང་ཕྲུག་རྣམས།། རྡོ་རྗེ་རྩལ་ཆེན་འདི་སྦྱངས་པས།། རྣལ་འབྱོར་ལྷ་མཆོག་གཤེགས་པའི་རྟེན།། དངོས་གྲུབ་འགྱུར་བའི་རིན་པོ་ཆེ།། མཐུ་སྟོབས་སྐྱེ་བའི་ཐབས་ཆེན་པོ།། བྱིན་བརླབས་ཕེབས་པའི་དབང་མཆོག་འདིས། ། རྒྱལ་བའི་དངོས་གྲུབ་མན་ཆད་ནས།། འཁའ་འགྲོའི་ཆོ་འཕྲུལ་ཐམས་ཅད་དང།། དྲེགས་པ་མ་རུངས་སྡེ་པ་རྣམས།། ཐམས་ཅད་དབང་དུ་འགྱུར་ངེས་ན། ། འབྱུང་པོ་གཞན་ལྟ་སྨོས་ཅི་དགོས།། འཁོར་བའི་སྐམ་གླིང་ཆེན་པོ་ལ།། རིས་དྲུག་འཁོར་བའི་སེམས་ཅན་རྣམས།། རྒྱུད་དྲུག་འདས་པའི་རྣམ་ཤེས་སོ།། དུས་གསུམ་མཚོན་གྱིས་བསད་པས།། རྟག་ཆད་མཐར་ཤིའི་རོ་གླིང་ནས། ། གཏི་མུག་བམ་ཆེན་རོ་བླངས་ནས།། བདུད་རྩི་སྨན་ཆེན་ཡེ་ཤེས་ཀྱིས།། རྟགས་ཆད་མཐའ་ལས་རོ་བླངས་ཤིང།། བྱང་ཆུབ་སེམས་སུ་གསལ་བའི་ཕྱིར།། རོ་ཡི་རྫས་རྣམས་བཙལ་བར་བྱ།། ཁྲོ་ཚོགས་རྔམ་པར་བདག་བྱས་ཏེ། ། རྡོ་རྗེ་འབར་བའི་མིག་ནས་ནས།། མཐིང་ནག་ཧཱུ~ཾ་གི་སེང་ཆེན་ནི།། འཁོར་བའི་རོ་གླིང་ཁམས་སུ་སྤྲོ།། བསྒྲལ་བའི་དུར་ཁྲོད་མཐའ་དག་ཀུན།། ཡེ་ཤེས་རོལ་པའི་ཞིང་དུ་བལྟ། ། ཁྲོ་བོ་གྱད་ཀྱི་འདོར་ཐབས་ཀྱིས།། ཚམ་ངམ་ཆེན་པོའི་རྔམ་ཚུལ་གྱིས།། དཔའ་བོ་རྡོ་རྗེའི་འཛུར་འགྲོས་སྦྱར།། ཐབས་ཆེན་བཅོ་བརྒྱད་སྟབས་ཀྱིས་སྦྱར།། འཇོ་ཚུལ་ཐབས་ཀྱི་འགྲོ་སྟབས་ཀྱིས།། འཛེམ་ཚུལ་ལྟ་ཞིང་རྣམ་པར་རྩེན། ། སྒྲ་སྐད་གྱུར་ཞིང་ཧེ་ཧེས་སྒྲོགས།། འཐབ་ཅིང་རྩོད་པས་རྣམ་པར་རྔམ།། འབྲི་ཚུག་ལྟ་ཞིང་འདྲོག་ཚུལ་སྤྱོད།། གཡས་སུ་ལྟ་ཞིག་གཡོན་དུ་འགྱུར།། ཡིད་མ་ཆེད་ཏེ་ཕྱིར་ཡང་བལྟ།། སྡང་མིག་ལོགས་ཀྱི་ཁྱད་པར་བལྟ། ། རྡོ་རྗེ་འགྲོས་སུ་རྒྱུག་ཅིང་འགྲོ།། ཧ་ཧ་རུ་ལུའི་རྔམ་སྒྲ་སྒྲོགས།། སོ་སོའི་བརྡ་སྐད་འབྱིན་བྱེད་ཅིང།། རྟོད་པའི་ཚུལ་གྱིས་མཆོང་ཞིང་རྒྱུག། ཡིད་བཞིན་གཏེར་ཆེན་ཁ་ཕྱེ་ནས། འདོད་འབྱུང་རིན་ཆེན་ཕུང་པོ་དེ། ། འཁོར་བའི་རྣམ་སྨིན་དབྱིས་ཕྱུང་ནས།། རྣམ་གསུམ་དུག་ཆེན་གཏན་སྤྲུགས་ནས།། ཐུགས་རྗེ་རྔམ་པའི་ཁ་ལོང་ཁ།། རྡོ་རྗེ་འབར་བའི་ཚོགས་ཆེན་གྱིས།། དངོས་གྲུབ་ལོ་ཏོག་ཕྲལ་ནས་ཀྱང། ། རྡོ་རྗེ་བཞིན་ཕྱོགས་མ་ནོར་བར།། ཤེལ་ཕུར་གཉིས་ཀྱིས་གསང་གནས་བཟུང།། དེས་པར་གཤིན་པའི་གཞི་མ་ལ།། ཅུང་ཞིག་བརྟོད་དེ་ཉེ་འཁོར་བསྒྱུར།། བཞིན་ཕྱོགས་གང་ལས་ལེགས་ཉེས་བརྟག། ཕྱི་ཡི་བཟང་ངན་དེ་ཉིད་ནི། ། ནང་དུ་ངེས་པར་གསལ་བ་ཡིན།། ཉེས་པའི་མཚན་བྱུང་མཁས་པས་མནན།། གལ་ཏེ་དྲི་བས་གླེང་སློང་ན།། དེ་ཡི་ཐེ་ཚོམ་གསལ་བ་དག། དངོས་པོར་སྤྱིད་ལ་ཞུགས་རྣམས་ཀྱིས།། མཚན་མར་རྟོག་པའི་འདི་དག་རྣམས། འཇིག་བྱེད་བཀའ་ལ་བཏགས་པ་ཡི།། འདོད་ཆགས་བདག་པོ་ང་ལ་གསོལ།། ཇི་སྐད་སྨྲས་པ་དེ་བཤད་ཀྱིས།། མཚན་མའི་རྫས་རྣམས་རྟོགས་པར་གྱིས།། འཇིག་རྟེན་མགོན་ཁྱོད་བདག་ལ་གསོལ།། བདག་ཅག་སྤྱོད་པ་གསོལ་བར་བགྱི།། སྣོད་ཀྱི་མཚན་ཉིད་བཟང་ངན་གྱིས།། ཉེས་དང་ལེགས་པ་འདི་ལས་བྱུང།། སྐྱོན་གྱི་མཚན་མ་བདུན་པ་སྟེ།། ཀ་སྦུབ་པ་དང་གདན་ས་ལས་བསྐྱོད།། རྒྱུད་མི་འཕེལ་དང་མཚམས་སུ་གས། ། བར་ཆད་འབྱུང་དང་བགེགས་ལྡང་བ།། མཚན་མ་ངན་པ་འབྱུང་བའོ།། འདི་དག་མཁས་པས་ཡོང་མི་འཆང།། ལེགས་པའི་རྒྱུ་ནི་བཅུ་གཅིག་སྟེ།། གསུམ་གྱི་དངོས་གྲུབ་ཐོབ་པ་དང། ། རིག་འཛིན་ལམ་འགྲོ་ནམ་མཁར་འཕུར།། ཁམས་གསུམ་དབང་བསྡུ་རྡོ་རྗེ་སྤྱན།། ཕ་རོལ་གཡུལ་ཟློག་ཟིལ་གྱིས་གནོན།། མཐུ་དག་བྱིན་བརླབས་ཚེ་འཕེལ་དང།། མཚན་མ་གསལ་པོར་འབྱུང་བ་དང། ། སློབ་མ་ཆུ་ཡི་རྒྱུད་འཕེལ་བ།། དམིགས་པའི་བསམ་པ་འགྲུབ་པ་དང།། ཕྱི་མར་སངས་རྒྱས་མྱུར་བ་དང།། དངོས་གྲུབ་རྣམ་གསུམ་ཐོབ་པ་སྟེ།། སྨོན་ལམ་བཞིན་དུ་འགྲུབ་པའོ།། དེ་ཡང་བྱེ་བྲག་འདི་ལྟ་སྟེ། ། ཕྱེད་དུ་འགྱུར་ན་ཐོབ་ཐང་ཡིན།། སུམ་ཆ་ཙམ་ལ་བཏང་སྙོམས་སོ།། དེ་ཡང་སོ་སོའི་མཚན་རྟགས་སུ།། བརྟག་ཅིང་མིང་དུ་བརྗོད་བྱ་བ།། དཀར་པོ་སྤྲོས་མེད་ཆོས་ཀྱི་སྐུ།། ལྕང་ལོ་ཀུན་རྫོགས་ལོངས་སྤྱོད་ལྡན། ། མ་འོངས་སྤྲུལ་པ་མཛད་པའི་རྒྱུན།། འདས་དང་ད་ལྟར་མ་འོངས་པའི།། རྣལ་འབྱོར་ས་ལ་འགྲོ་བ་རིགས།། བདེར་གཤེགས་དུས་གསུམ་འབྱུང་བའི་རྟགས།། རིན་ཆེན་གཏེར་གྱི་གའུ་འདི། ། ཐབས་ཀྱི་རྒྱལ་པོ་དཔལ་གྱི་དཀོར།། ཕོ་བྲང་རྟག་ལྡན་སྣོད་བཅུད་རྫོགས།། འཕྲུལ་ཞལ་ཡིད་བཞིན་འདོད་ཞོའི་བ།། རྐང་མེད་མཁའ་ལ་འགྲོ་བའི་མཆོག། ངོ་མཚར་ཐོག་ཐོག་རྐན་སྒྲ་ཅན།། རྨད་འབྱུང་གསང་བའི་རང་སྒྲ་དག། རིག་འཛིན་རྩལ་ཅན་ཀུན་ལ་སྒྲོགས།། ང་ནི་སྐྱེས་མཆོག་རྩལ་ཅན་གྱི།། རྨད་བྱུང་བསྒྲུབ་པའི་རྫས་ཡིན་པས།། སུ་ཞིག་དངོས་གྲུབ་གང་འདོད་པ།། ཐེ་ཚོམ་མེད་པར་དུས་འདིར་ལོང། ། གང་དག་བཀའ་ལྟར་མི་བྱེད་ཅིང།། སུ་ཞིག་དམ་ལ་མི་གནས་པ།། ང་ཡི་གཟུགས་མཐོང་ཙམ་གྱིས་འཚིག། སྒྲ་ཐོས་ཙམ་གྱིས་བརླག་པར་འགྱུར།། ཞེས་པའི་སྒྲ་བྱུང་ཆོ་འཕྲུལ་ནི།། རྒྱལ་བའི་གཞལ་ཡས་ཀུན་ལས་སྒྲོགས། ། འདི་དག་དོན་དང་ལྡན་པར་སྤྱོད།། འདི་ལ་གྲགས་པ་ངེས་དོན་ནི།། རྣལ་འབྱོར་ཅན་གྱིས་ཤེས་བྱ་བ།། ཐམས་ཅད་དཔལ་ལྡན་ལྕང་ལོ་ཅན།། ལ་ལ་བཀྲ་ཤིས་མཚན་ལྡན་ཏེ།། དེ་བཞིན་པ~ཾ་ཙ་ཀུ་ལ་ཡིན། ། ལ་ལ་དཔྱད་ཀྱི་ན་ཤ་ཡིན།། དེ་བཞིན་མི་འགྱུར་སྲ་འཁྲེགས་ཡིན།། མ་ཧཱ་ཀེ་ས་དཔལ་དང་ལྡན།། ཡེ་ཤེས་ལྔ་ལྡན་ཞེས་ནི་བྱ།། ཨཱ་ཡུཿཕ་ལ་ཚེ་ཡི་མཆོགལ་ལ་མེ་ལེ་དེ་བྱི་བརྟན།། ལ་ལ་དེ་བཞིན་ཁ་སྭ་ཁ། ། ཁ་ཧུ་པ་ཡི་དཔལ་དང་ལྡན།། བཀྲ་ཤིས་དོན་འབྱུང་དེ་ལྟའོ།། བདེ་གཤེགས་མཚན་ལྡན་རྫོགས་པ་ཡིན།། གཙུག་པུད་དགེ་གཙུག་དཔལ་དང་ལྡན།། ཛྙཱ་ན་མིརྟྟི་དེ་བཞིན་ནོ།། ལ་ལ་ཛྙཱ་ན་ཀུཎྜ་ལི།། དེ་བཞིན་ཁྲོ་བོ་ཀུཎྜ་ལི། ། ཨ་ཀ་ཛ་ཊི་མཚན་ལྡན་པ།། ཨ་བི་མུ་ག་རྫོགས་པའོ།། འདོད་པ་བརྟན་ལྡན་བདེ་བ་སྟེ།། གཉིས་མེད་དོན་ལྡན་ཐོབ་པའོ།། པུ་ཏྲ་མང་འཕེལ་ལྕུག་ཕྲན་རྒྱས།། རྡོ་རྗེ་བསེ་ཕོར་མཚན་རྫོགས་ནས། ཤེས་པོར་གསང་བའི་དོན་འབྱུང་བ།། སྐུ་གསུང་ལྷུན་གྲུབ་ཀ་པཱ་ལ།། ཐམས་ཅད་རེ་བ་ཡིད་བཞིན་སྐོང།། དེ་བཞིན་ཡོན་ཏན་རྫོགས་ཀུན་རྫོགས།། བཀྲ་ཤིས་མཚེ་ནི་ཀུན་ལྡན་པ།། དེ་བཞིན་མི་འགྱུར་གཡུང་དྲུང་བརྟན། ། མི་ཤིགས་མཛོད་ཡིན་ཀུན་འབྱུང་བའོ།། ཆོ་འཕྲུལ་རྟགས་འབྱིན་དམ་པ་འབྱུང།། སྲིད་པ་ཡོངས་སྒྲོལ་ལས་གྱི་མཆོག། ཁམས་གསུམ་དབང་སྡུད་ཁྱད་པར་ལྡན།། དྲུག་གསུམ་གཏན་སྤྲུགས་ལས་མཆོག་ཅན། ། མཚན་མའི་སྤྲོད་བྲལ་ངེས་པའི་དོན།། རིགས་དྲུག་མདོག་དྲུག་དབྱིངས་དྲུག་དག། ཡོན་ཏན་སྐྱོན་རྣམས་སྦྱར་བར་བྱ།། མང་དང་ཉུང་བའི་གསང་བ་ནི།། བཅས་དཀར་འཕེལ་དང་མགོ་མི་འབྱུང།། རྗེས་འདྲ་ལ་སོགས་སྐྱོན་རྣམས་སྤང། ། དུག་གསུམ་སྟོང་མཛད་རྒྱལ་བའི་བཀའ།། སྐུ་གསུམ་སྨིན་པའི་གཡུང་དྲུང་རྟགས།། སྤ་ཐབས་གསང་བའི་མན་ངག་འདི།། སྐལ་ལྡན་རྣལ་འབྱོར་རྣམས་ཀྱིས་སྟེ། ། སྐལ་མེད་ཀུན་གྱི་རྟོག་པའི་བདུད།། མི་ཙམ་འཛིན་ལ་ག་ལ་བརྟན།། མཁས་པས་བརྟག་ཅིང་བཟང་པོ་བརྟེན།། དངོས་གྲུབ་འབྱུང་བའི་དུས་ཆེན་ཡང།། གཅིག་དང་གསུང་ནི་རབ་ཏུ་བཤད།། དེ་བཞིན་ལྔ་བདུན་འབྲིང་དུ་གྲགས། ། དགི་ནི་དངོས་གྲུབ་ཐ་མ་སྟེ།། བཅུ་གཅིག་ཕན་ཆད་ཡན་བར་བཤད།། དེ་བས་རྣལ་འབྱོར་རྩལ་ཅན་གྱིས།། ངེས་པ་བརྩོན་ཏེ་བརྟག་པར་རིགས།། འདོད་ཆགས་བདག་པོས་དེ་སྐད་བཤད། ། མཚན་མ་ཡིན་ཕྱིར་དེར་ངེས་པ།། མཚན་མ་ཅན་དང་མཐུན་བྱའི་ཕྱིར།། ཐབས་ཀྱིས་དེ་དང་མཐུན་སྤྱོད་ལ།། ཡང་དག་དོན་ལ་ཁ་ལོ་སྒྱུར།། དེ་དག་རྣམ་པར་སྦྱང་བ་དང།། འགྲོ་དྲུག་ཤིན་ཏུ་གཡེང་བ་ཅན། ། ཡིད་རྣམས་དྲངས་ཏེ་བརྟེན་བྱས་ནས། ཐབས་ཀྱི་དོན་ན་སྦྱར་བའི་ཚིག། རྒྱུ་དྲུག་འདུས་པའི་ས་གཞི་ལ། གླུ་བྲོ་གར་གྱི་རོལ་པ་ཡིས།། སྲིད་གསུམ་ཟིན་གནོན་དབང་སྡུད་པ།། འཇིག་རྟེན་མཐུན་འཇུག་སྤྱད་པར་བྱ། ། དཔེར་ན་འཇིག་རྟེན་ཁམས་དག་ན།། འགྲོ་བས་འགྲོ་བ་འདུལ་བྱེད་པ།། དེ་དགའི་ལས་ལ་དེ་ཞུགས་ཏེ།། དེ་དང་བསམ་པ་མཐུན་སྤྱད་པས།། དེ་དང་འདྲིས་ནས་དེ་དགའ་བྱས།། དེ་ནས་དེ་ཡི་དྲོད་ལོན་ནས། ། དེ་ཡི་འདུ་ཤེས་སྒྱུར་བའི་ཚིག། དེ་སྔ་བདག་གི་གྲོགས་ཁྱོད་ཀྱི།། ལས་ལ་ཞུགས་པ་ཤིན་ཏུ་ནོར།། འདིར་ཉེས་ལས་ཀྱི་བསག་པ་བགྲང།། ཉེས་ཀྱང་བདག་གིས་ཁྱེད་དགར་བྱས།། ད་ནི་བདག་དགའི་ལས་འདི་ལ། ། གྲོགས་ཁྱོད་ཤིན་ཏུ་འཇུགས་དགོས་སོ།། བྱས་པས་དེ་ཡི་སྔ་སེམས་དེ།། ཟིན་པས་གཅིག་གི་ཕྱི་སེམས་ཀྱང།། འཛིན་ཅིང་དེ་དགའི་ལས་ལ་འཇུག། སྤྱོད་པའི་ལས་ཀྱང་འདི་ལྟ་སྟེ།། རྒྱུ་དྲུག་འདུས་པའི་ཕུང་པོ་ལ། ། ངན་སོང་གནས་འཇོམས་རྡོ་རྗེའི་རྟགས།། ཡེ་ཤེས་ཐབས་ཀྱིས་སྙན་པའི་གླུ།། རྨད་འབྱུང་གསང་ཆེན་སྒྲོགས་པའི་ཚིག། ཉོན་མོངས་ལྔ་ཡི་ས་གཞི་ལ།། ཡི་གེ་ཡེ་ཤེས་ལྔ་གསལ་བས།། འབར་བ་ཁྲག་འཐུང་སྤྲིན་ཕུང་བཞིན། ། ཁྱུ་མཆོག་ལྔ་ཡི་སྟབས་ཀྱིས་རོལ།། སེང་གེ་ང་རོ་རྔམ་པའི་གླུ།། རྡོ་རྗེ་དོན་རབ་སྒྲོགས་པའི་ཚིག། རྨད་བྱུང་རོལ་པའི་དོན་བྱུང་བ།། ཨེ་མ་ངོ་མཚར་ཡ་མཚན་ཆེ།། དགྱེས་པས་རོལ་པའི་བྱིན་བརླབས་ལས། ། རྒྱུད་དྲུག་རྩད་གཅོད་ངོ་མཚར་ཆེ།། མཉམ་པ་ཆེན་པོའི་ནམ་མཁའ་ལས།། ཡེ་ཤེས་འབར་བའི་མེ་བྱུང་བས།། འཁོར་བ་ཁྲག་གི་རྒྱ་མཚོ་སྐམས།། སྡུག་བསྔལ་དབྱིངས་སུ་ཟད་མཛད་དོ།། མི་གནས་ཀློང་ནས་ཆོ་འཕྲུལ་བ། ། གཏུམ་རྔམ་འཁྲུག་པའི་ངོ་བོར་འབར།། ཁྲག་འཐུང་འབར་བའི་སྤྲིན་འཕྲོས་པས།། སྲིད་གསུམ་ཁྲག་མཚོ་རྔོ་ནས་སྐབས།། དཔའ་བོ་ཚམ་ངམ་གྱད་ཀྱི་སྟབས།། སྲིན་པོ་མ་ཏྲཾ་ཁྲོས་པའི་གླུ། ། ཐེག་ཆེན་རྨད་བྱུང་གསང་བའི་ཚིག། ཆགས་པའི་རྟོད་ཕུར་གཏིག་ནས་ཕྱུང།། མཁའ་བཞི་དབྱིངས་ཀྱི་བདེ་ཀློང་ནས།། ཚོམ་བུ་འབུམ་གྱི་ཆོ་འཕྲུལ་འཕྲོས།། དགྱེས་མཆོག་རོལ་པའི་ཕྲིན་ལས་ལས། ། ལ་ལ་ཤེས་རབ་ཐབས་ལ་རོལ།། ལ་ལ་ཐུགས་རྗེ་ལས་ལ་རོལ།། ལ་ལ་དགུལ་བྱའི་ཡུལ་ལ་རོལ།། ལ་ལ་ཡེ་ཤེས་དབྱིངས་ལ་རོལ།། ཐབས་ཀྱི་རྒྱལ་པོ་རྟོགས་པའི་དབང།། ཆེ་བ་ལུང་གི་ཁྱད་པར་ལས། ། རྒྱལ་བ་ཀུན་དང་མཉམ་པར་སྦྱོར།། རྡོ་རྗེ་པདྨ་རོལ་པའི་སྟབས།། ཆགས་མེད་མཁའ་ལ་གསལ་བའི་ཚིག། དུག་གསུམ་ཟིལ་གྱིས་གནོན་པའི་གླུ། འཇིག་རྟེན་རིམ་གྱིས་སྦྱང་བའི་ཕྱིར།། འཇིག་རྟེན་ཁམས་སུ་རོལ་པ་བྱུང། ། འཇིག་རྟེན་དྲུག་གི་སྙིང་ལ་རོལ།། བདག་པོ་གཙོ་བོ་ཟིལ་མནན་ནས།། འཁོར་ནི་སྙན་པའི་ཚིག་གིས་བསྟེན།། འཁོར་བའི་ལམ་ལྔ་རྒྱུད་བཅད་ནས།། རྣམ་ཐར་ནམ་མཁའི་ངང་དུ་བསླན།། གར་མཆོག་གློག་ལྟར་འགྱུ་པ་ཡིན། ། རྨད་བྱུང་གསང་བའི་དཀྱིལ་འཁོར་ནས།། ཡི་གེ་འབར་བའི་ཆོ་འཕྲུལ་འཕྲོས།། འཕྲོ་འདུ་སྐར་རྟར་འཁྲུག་པ་ལས། ཁམས་གསུམ་བུད་ཤིང་ཐལ་བར་རླགས།། རྡོ་རྗེ་བུ་ཡུག་སྐར་མདའི་སྟབས། ། རྡོ་རྗེ་འབྲུག་ཆེན་ལྡིར་བའི་གླུ།། དོན་གྲུབ་རྡོ་རྗེ་གསང་བའི་ཤིག། གདུག་པའི་དཔུག་རྣམས་རྣམ་པར་འཇོམས།། རྡོ་རྗེ་སྤྲུལ་པའི་དཀྱིལ་འཁོར་པས།། ཐབས་ཀྱི་བྱང་ཆུབ་སེམས་སྤྲིན་སྤྲོས།། དབང་སྡུད་ཆགས་པའི་ཁྱད་པར་ལས། ། འཇིག་རྟེན་བུ་མོ་དྲུག་དང་རོལ།། སེང་གེ་རྣམ་པར་རོལ་པའི་སྟབས།། རྡོ་རྗེ་ཁྱུང་སྐད་འགྱུར་བའི་གླུ།། ཆགས་པ་རྩད་ནས་གཅོད་པའི་ཚིག། རྡོ་རྗེ་རོལ་པའི་དོན་ཆེན་པོ།། འཁོར་ལོ་འབར་བའི་དཀྱིལ་འཁོར་ནས། ། མཚོན་ཆ་འབར་བའི་ཡིག་འབྲུ་འཕྲོས།། རྒྱུ་དྲུག་ངོ་བོ་རྩད་ནས་གཅོད།། དུག་ལྔའི་ཕུང་པོ་རྣམ་པར་སྤྲོས། ཡེ་ཤེས་རྣོ་དབལ་མཚོན་ཆེན་པོ།། ཆོས་ཉིད་བདལ་བའི་ཀློང་ནས་འཕྲོ། ། ཐབས་མཆོག་དབྱིག་གི་རྩལ་ཤུགས་ལས།། འབར་བའི་མཚོན་ཆ་ཆར་ལྟར་འབབ།། ཡི་གེ་ཡེ་ཤེས་མཚན་ཆའི་ཆར།། རྡོ་རྗེ་ལྕེ་ཡི་ཤུགས་ཀྱིས་དབབ།། རིན་ཆེན་གཏེར་གྱི་ལོངས་སྤྱོད་རྣམས།། རྟོགས་པའི་རི་བོ་གཞོམ་པ་དང། ། དུག་གསུམ་ཕུང་པོ་གཞིག་པའི་ཕྱིར།། འཁོར་ལོ་ལྕགས་ཀྱུ་ལ་སོགས་པ། རྟེན་དང་གསང་ཆེན་ཏིལ་མཆོག་དང།། དངས་མ་ལ་སོགས་པའི་སྒོ་ཀུན་རྣམས།། སོ་སོའི་ཆ་རུ་ཕྱེ་ནས་ནི།། ཐུགས་རྗེས་ཉོན་མོངས་སྦྱོང་བ་ཡི། ། སོ་སོ་གཉེན་གྱི་རང་སྐལ་དུ།། ཕྱག་རྒྱ་སོ་སོའི་སྐབས་སུ་གདབ།། དེ་ལྟར་རྫོགས་པར་གྱུར་པ་དང།། མཎྜལ་ཀུན་གྱི་ཚད་འདྲ་ལ།། དབུས་སུ་ཐིག་བཞི་ལེ་ཚེ་དགུ།། མཐའ་སྐོར་འཁོར་ལོའི་རྩིབས་བརྒྱད་བྱ། ། དེ་ལ་སྒོམ་བཞི་སྒོ་ཁྱུད་བཅས།། མཐའ་ཟད་བསྐལ་པའི་མེ་རི་བྲི།། དབུས་སུ་དཀར་དམར་ཁ་སྤྲོད་བྲི།། ཕྱོགས་མཚམས་བརྒྱད་དུ་ཁ~ཾ་བརྒྱད་བྲ།[་ཨུ0f72]། འཁོར་ལོའི་བར་མཚམས་མུ་ཁྱུད་ལ།། ནང་དུ་བལྟས་པའི་ཁ~ཾ་བརྒྱད་གསལ། ། རྩིབས་ལ་ནང་དུ་ལྟ་བ་བརྒྱད།། མུ་ཁྱུད་བརྒྱད་ལ་ཕྱིར་ལྟ་བརྒྱད།། གྲུ་ཆད་བཞི་ལ་ནང་དུ་ལྟ།། ཐིག་ལེ་རྣམ་བཞི་བྲི་བར་བྱ།། ཕྱི་རིམ་བར་ཁྱམས་དེ་དག་ལ།། ཐིག་ལེ་ཉི་ཤུར་རྩ་བརྒྱད་ནི། ། ཕྱི་རུ་ལྟ་བ་བྲི་བར་བྱ།། བསྐལ་པ་ཆེན་པོའི་མེ་ཁྱམས་ན།། ཐིག་ལེ་ཕྱིར་ལྟ་བཅུ་གསལ་བྲི།། དེ་ལ་ཕྱག་རྒྱ་རིམ་པར་དགོད།། མཎྜལ་སྒོ་རུ་བམ་ཆེན་གཅིག། གླུ་བྲོ་གར་གྱིས་རྣམ་སྦྱངས་ཏེ། ། དབུས་སུ་བཞག་སྟེ་ཤར་དུ་བསྟན།། དེ་ཡི་ཕུང་པོ་གཞལ་ཡས་ཁང།། བྷྲུ~ཾ་ལས་བསྐྱེད་དེ་གསལ་བར་བྱ།། དེ་རུ་ཕྱག་རྒྱའི་ཚོགས་ཆེན་བསྒོམ།། རྫས་ཀྱི་གནས་རྣམས་སོ་སོ་ལ།། རིགས་ཀྱི་ལྷ་རྣམས་རིམ་པར་དགོད། ། དེ་ནས་རྡོ་རྗེ་བསྙེད་པ་བྱ།། བྱིན་ཕེབས་རྟག་ལུང་མགུ་བ་ན།། བམ་དེ་བྱང་ཤར་མཚམས་སུ་བསྒྲལ།། རྫས་རྣམས་སོ་སོར་བསྔོས་ནས་ཀྱང།། ཕྱག་རྒྱ་གཞུགས་པའི་གནས་རྣམས་སུ།། མ་ནོར་བར་ཡང་དགོད་དེ་སྦྱར། ། དཔག་དང་ལྡན་པའི་སྣོད་དགུ་ལ།། རྨད་དུ་བྱུང་པ་དགུ་བཀོད་དེ།། འབར་བ་ཆེན་པོའི་གནས་གནས་སུ།། བརྗིད་པའི་ཚུལ་དུ་གསལ་བར་བསྒོམ།། ཕྱག་རྒྱ་གཞན་ཡང་རྫོགས་པར་དགོད།། ཡེ་ཤེས་རྫོགས་པའི་དཀྱིལ་འཁོར་དུ། ། དབང་ཆེན་ཟླ་གམ་སྐར་ཚོགས་བཀྲམ།། རྡོ་རྗེ་མི་ཕྱེད་དགུར་འབར་བ།། ཆེ་བ་དགུ་ཡི་ཁྱད་པར་ལས།། དཔལ་ཆེན་དགུ་ནི་སྐུ་ལ་རྫོགས།། ཡུམ་ཆེན་དགུ་ནི་དབྱིངས་ལ་རོལ། དཔལ་བེའུ་དགུ་ནི་ཐུགས་ལ་འབར།། འབྱུང་ཆེན་དག་ནི་ཀློང་དུ་འཁྱིལ།། ཁུ་བྱུག་དགུ་ནི་རང་སྐད་རྫོགས།། བྷན་དྷ་དགུར་ནི་དཔལ་དང་ལྡན།། ཟླ་གམ་དགུ་ནི་ཡུམ་གྱི་དབྱིངས།། ཐེག་ལེ་དགུ་ནི་བྱང་ཆུབ་སེམས། ། ཉི་ཟླ་དགུ་ནི་འོད་འཕྲོས་འབར།། དེ་ལྟར་དགུ་དགུར་གསལ་བ་ཡི།། དགུ་ཀློང་བྷ་ག་གཅིག་གི་ངང།། དགུ་བཀག་གཅིག་ཕྱེ་ཐིག་ལེའི་དོན།། ཐམས་ཅད་འབྱོར་བ་རྒྱས་བྱས་ལ།། བམ་དགུ་ཕན་ཅད་སྨན་དུ་སྦྱར། ། རྫས་ཀྱི་དངོས་གྲུ་བླངས་ཏེ་སྤྱད།། ཅེས་བཅོམ་ལྡན་འདས་སེམས་དཔའི་རྡོ་རྗེས་གསུངས་སོ།། རྒྱུད་ཀྱི་རྒྱལ་པོ་ཆེ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྨད་བྱུང་རྫས་ཀྱི་ལེའུ་སྟེ་བཅུ་བཞི་པའོ། །།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་ཆོས་ཐམས་ཅད་ནི་མངོན་སུམ་དུ་ཤེས་ཤེས་རིག་པར་བྱའོ།། མངོན་སུམ་གང་ཞེ་ན། དྲན་པ་མངོན་སུ་བཞག་པས་ཡུལ་ལ་མི་གནས་པའི་ཆོས་ཐམས་ཅད་དང། ། ཕྱིས་འབྱུང་བའི་ཆོས་ཐམས་ཅད་དང།། སྔོན་དུ་བྱུང་བའི་ཆོས་ཐམས་ཅད་མངོན་སུམ་མར་རིག་པའོ།། དེ་ཅིའི་ཕྱིར་ཞེ་ན།། མངོན་སུམ་མར་ཤེས་པ་ནི་ཡེ་ཤེས་ཆེན་པོའི་རྒྱུ་ཡིན་པའི་ཕྱིར་རོ། ། དེ་ཡང་ཇི་ལྟ་ཞེ་ན།། ཆོས་ཐམས་ཅད་སྒྱུ་མའི་རང་བཞིན་དུ་དྲན་པ་མངོན་དུ་བཞག་ན་མངོན་དུ་གྱུར་པའི་ཆོས་ཉིད་ཕྱིན་ཅི་ལོག་པར་ཤེས་པ་ཡིན་ནོ།། ཆོས་ཉིད་ཕྱིན་ཅི་ལོག་པར་མངོན་དུ་གྱུར་ན་མི་གནས་པའི་ཡེ་ཤེས་ཆེན་པོ་ཉིད་དེ་ཡིན་ནོ། ། དེ་བས་ན་མངོན་པར་ཤེས་པ་རྣམས་དྲན་པ་མངོན་སུམ་མར་ཡིད་ལ་བྱོས་ཤིག་དེ་སྐད་ཅེས་གསུང་པ་དང། མངོན་ཤེས་རིག་པའི་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས་མངོན་པར་ཤེས་པ་ནི་བདག་ཅག་རྣམས་ཀྱི་དམ་ཚིག་ལགས་སོ།། བཅོམ་ལྡན་འདས་ཀྱིས་བདག་ཅག་རྣམས་ཀྱི་དམ་ཚིག་བཤད་དུ་གསོལ་ཞེས་ཞུས་པ་ལས། ། བཅོམ་ལྡན་འདས་ཀྱི་བཀའ་སྩལ་པ། རིག་འཛིན་ཆེན་པོ་རྣམས་ཡེ་ཤེས་ཆེན་པོའི་རྒྱུ་མངོན་པར་ཤེས་པ་ནི་རྣམ་པ་ལྔར་རིག་པར་བྱའོ།། མིག་གི་དབང་པོ་ཐམས་ཅད་ལས། ཞིབ་ཏུ་བཏགས་པའི་ཕྱེ་མར་བྱ། ། བཅུད་ཀྱི་སྙིང་པོར་སྦྱར་བྱས་ནས།། མཐོང་བའི་སྙིང་པོ་འབུམ་བཟླས་ན།། ཐམས་ཅད་མ་ལུས་མཐོང་བར་འགྱུར།། འདི་ནི་མིག་གི་མངོན་ཤེས་སོ།། རྡོ་རྗེ་ལྕེ་ཡིས་བརྗོད་པའི་ཚིག། དུས་སམ་རྒྱུན་དུ་བརྗོད་པར་བྱའོ། ། བཛྲ་ཙཀྵུ་གརྦྷ་བིདྱཱ་ཧཱུ~ཾ། རྣ་བའི་དབང་པོ་ཐམས་ཅད་ཀྱང།། བཏགས་སམ་ཕྱེ་མར་བྱས་ནས་ནི།། བཅུད་ཀྱི་སྙིང་པོར་སྦྱར་བྱས་ཏེ།། ཐོས་པའི་སྙིང་པོ་འབུམ་བཟླས་ན།། སྒྲ་ཡི་བྱེ་བྲག་ཐམས་ཅད་ཐོས། ། འདི་ནི་རྣ་བའི་མངོན་ཤེས་སོ།། རྡོ་རྗེ་ཚིག་ཏུ་བརྟག་པ་ནི།། བཛྲ་གརྦྷ་སྟ་མ་སི་ཧོ།། སྣ་ཡི་དབང་པོ་ཐམས་ཅད་ཀུན།། བསྐམས་སམ་ཕྱི་མར་བྱས་ནས་ནི།། བཅུད་ཀྱི་སྙིང་པོ་སྦྱར་བྱས་ཏེ།། དྲི་སྣ་ཚོགས་དང་བསྲེས་པ་ལས། ། ཚོར་བའི་སྙིང་པོ་འབུམ་བཟླས་ན།། སྣ་ཡི་མངོན་ཤེས་ཐོབ་པར་འགྱུར།། རྡོ་རྗེ་ཚིག་ཏུ་གཟུང་བ་ནི།། བཛྲ་ན་མ་སི་ཏ~ཾ་ཧཱུ~ཾ། ལྕེ་ཡི་དབང་པོ་ཐམས་ཅད་ཀུན།། བསྐམས་སམ་ཕྱེ་མར་བྱས་ནས་ནི། ། བཅུད་ཀྱི་སྙིང་པོར་སྦྱར་བྱས་ཏེ།། རོ་ཡི་མཆོག་ལ་སོགས་པ་ལས།། རོ་ཡི་སྙིང་པོ་འབུམ་བཟླས་ཏེ།། སྨྲ་བྱེད་ལྕེ་ཡི་དཀྱིལ་འཁོར་ནི།། སྟེགས་བུ་ཁྲུ་གང་གྲུ་བཞི་ལ།། དབུས་སུ་གསང་བའི་རྡོ་རྗེ་བྲི། མཐའ་མ་ལྕེ་ཡི་པདྨས་བསྐོར། ། ལྕེ་ཚིག་གི་འོད་ཟེར་འཕྲོ།། སྨྲ་བའི་བསྒྲུབ་པས་འདི་རྫོགས་ན།། སྨྲ་བའི་དབང་པོ་ཁ་དབྱེ་ཞིང།། རོ་རྣམས་ཐམས་ཅད་ཤེས་པར་འགྱུར།། འདི་ནི་ལྕེ་ཡི་མངོན་ཤེས་ཡིན།། རྡོ་རྗེ་ཚིག་ཏུ་བརྟག་པ་ནི། བཛྲ་པཱཤཱ་སིདྱཱ་ཧཱུ~ཾ། སྙིང་གི་དབང་པོ་ཐམས་ཅད་ཀུན།། བསྐམས་སམ་ཕྱེ་མར་བྱས་ནས་ཀྱང།། སྙིང་པོ་མཆོག་དང་སྦྱར་བྱས་ཤིང། དྲན་པའི་སྙིང་པོ་འབུམ་བཟླས་ཤིང།། དཔལ་བེའུ་ཙིཏྟའི་དཀྱིལ་འཁོར་ནས། ། དྲན་པའི་རྗེ་གྱིས་ཡོངས་བསྐོར་ཏེ།། སྙིང་གི་དཀྱིལ་འཁོར་རྫོགས་པ་དང།། དབང་པོ་ཐམས་ཅད་གསལ་བ་དང།། ཐམས་ཅད་མ་ལུས་ཤེས་པར་འགྱུར།། གཞན་གྱི་སེམས་ནི་ཤེས་པའི་མཆོག། བཛྲ་ཙིཏྟ་སིདྱཱ་ཧཱུ~ཾ། ལུས་གྱི་དབང་པོ་ཐམས་ཅད་ཀུན།། བཏགས་སམ་ཕྱེ་མར་བྱས་ནས་ནི།། སྲ་མཁྲེགས་བཅུ་དག་སྦྱར་བྱས་ཏེ།། རེ་བྱའི་སྙིང་པོ་འབུམ་བཟླས་ན།། ལུས་ཀྱི་མངོན་ཤེས་ཐོབ་པར་འགྱུར།། མངོན་ཤེས་འདི་དག་ཀུན་རྫོགས་ན། ། མི་གནས་ཡེ་ཤེས་ཆེན་པོའི་རྒྱུ།། ཕྲ་མོའང་ནན་ཏན་མཆོག་ཏུ་བྱའོ།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མངོན་ཤེས་རིག་པའི་བསྒྲུབ་ལུག་ཀྱི་ལེའུ་ཞེས་བྱ་སྟེ་བཅོ་ལྔ་པའོ། །།། དེ་ནས་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་མཆོག་ཆེན་པོའི་བསྒྲུབ་ལུགས་ནི་འདི་ལྟར་རིག་པར་བྱའོ། དོན་ལ་བརྩོན་པའི་རྣལ་འབྱོར་པས།། ལས་ཀྱི་སྟེགས་བུ་ཆགས་ཕྱེད་པ།། མེ་རིས་བསྐོར་ཏེ་འབར་བར་བྱ།། དཀྱིལ་འཁོར་དེ་ཡི་མཎྜལ་ནི།། སུམ་བརྩེགས་བྱས་པའི་དབུས་ཟླ་གམ།། བརྒྱད་ཀྱིས་མཛེས་པར་བྱ་བའོ། ། ཕྱི་མཐའ་ཐོད་པའི་ཕྲེང་བས་བསྐོར།། དེ་མཐའ་མེད་དཔུང་འབར་བས་བསྐོར།། དེ་ཡི་ཕྱི་མཐའ་དམར་ཆེན་རྒྱས།། ཟླ་གམ་དབུས་སུ་དཔལ་ཆེན་འབར།། ཟླ་གམ་བརྒྱད་ལ་གནས་བདག་བརྒྱད།། མཐིང་ནག་ཡ་ཐ་མེ་རི་འབར། ། དེ་འོག་ཐོད་པ་ཚར་གསུམ་དང།། སྒོ་ཁྱམས་དུར་ཁྲོད་རྫས་ཀྱི་བསྐོར།། སྒོ་བརྩེགས་སྒོ་ཁྱུད་ཐ་མ་བྲན།། ཐམས་ཅད་གང་ཡིན་དེ་ལྟ་སྦྱར།། ཕུན་སུམ་ཚོགས་པར་གྱུར་པ་ན།། རྣམ་བཞི་ལས་ཀྱི་མཎྜལ་བརྩམ། ། འཇིགས་བྱེད་བསྐལ་པའིདཀྱིལ་འཁོར་དུ།། ཟ་བྱེད་འབར་བའི་ཕྱག་རྒྱ་ཡིས།། ཐར་པ་ཙ་ར་བསྒྲལ་བའི་ཕྱིར།། དྲོད་ལྡན་མན་ངག་འཆང་བ་དེས།། མཆོག་གི་བྱིན་བརླབས་གཞག་པར་བྱ། ། དག་པ་གསུམ་གྱིས་གཞུང་བསྲང་ནས།། གནས་མཆོག་དབེན་པའི་རི་བོ་རྩེ།། རྣ་ཉན་ཕྲ་གསག་ཅན་དང་བྲལ།། འདུ་འཛི་འགྲོ་འོང་ཆད་པ་དག། གསང་ཆེན་སྤྱོད་པའི་གནས་སུ་ཤེས།། རྣམ་བཞི་ལས་ཀྱི་རྟགས་ཉུང་ནའང། ། གཅིག་གཉིས་ལྡན་ན་འབྲིང་དུ་བཤད།། བསྒྲུབ་པའི་རྒྱལ་པོ་གདེང་ལྡན་པ།། ཤིན་ཏུ་བརྗིད་ཅིང་སྲན་ཚུགས་པ།། ཁུ་འཕྲིག་རྟོག་བྲལ་བརྟུལ་ཞུགས་ཅན།། ལས་ཀྱི་ཕྲེང་བ་ལྷག་ཆད་མེད།། དྲི་ཞིམ་དག་པའི་སྨན་དག་གིས། ། ཕྱི་བཀྲུ་ཤི་ན་ད་ཧུ་ལས།། ནང་ཡང་དག་པ་ཆེན་པོར་བྱ།། ཚད་མར་སྦྱར་བའི་བཀའ་དང་ནི།། ལྡན་ནས་དུས་བཏབ་ཤིན་ཏུ་བརྩམ།། དེ་ཡང་བརྟག་པའི་གལ་ཆེན་ནི།། བཀྲ་ཤིས་མཛེས་དང་ལྡན་འགྱུར་བ། ། བོང་ཚོད་ལོ་ནི་དར་ལ་བབ།། རིག་ལྔའི་མཚན་དང་ལྡན་པ་ལ།། བསྒྲལ་བའི་རྫས་སུ་རུང་བ་དག། ཡིད་འོང་འབྱོར་ལྡན་བཙལ་ནས་ནི།། བསྒྲུབ་པའི་རྫས་སུ་བྱ་བ་དེ།། དེ་འདྲའི་མཚན་རྟགས་ཡོད་པ་ནི། ། ས་སྦྱངས་ས་ལ་སླེབས་པའོ།། བསྒྲུབ་པའི་རྒྱུ་མཆོག་དེ་དག་ནི།། འདའ་ཧུ་མན་འདས་དབང་པོ་བསྒྱུར།། རྡོ་རྗེ་ཕྲ་མཁན་ཕབ་ནས་ནི།། སྣང་སྲིད་ཐམས་ཅད་དྲི་བའམ།། ལེགས་ཉེས་ཐམས་ཅད་དྲི་བར་བྱ། ། དབང་པོ་སྒོ་ལྔའི་དཀྱིལ་འཁོར་དུ།། བདུད་རྩི་རྣམ་ལྔའི་ཐིག་ལེ་གདབ།། རྣམ་ཤེས་འབྱུང་བའི་སྒོ་ལྔ་རུ།། སོ་སོ་འབྱུང་བའི་རྫས་རྣམས་གདབ།། སོ་སོ་རིགས་ཀྱི་ཕྱག་རྒྱས་གདབ།། ཕྱག་རྒྱ་བཀོད་དེ་ཉོན་མོངས་བསྒྲལ། ། བསྒྲལ་སྦྱར་ཐམས་ཅད་སྦྱངས་ནས་ནི།། མཆོད་དང་མཉེས་དང་དམ་སྐོངས་དང།། དངོས་གྲུབ་རྣམ་གསུམ་གང་ཐོབ་བླང།། ཐོབ་ནས་ཏམས་ཅད་ཅི་བདེར་སྤྱད།། ཅེས་གསུངས་སོ། ། དེ་ནས་སེམས་དཔའི་རྡོ་རྗེས་ཡང་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་བར་དུ་གཅོད་པ་ཐམས་ཅད་བཟློག་པའི་བསྒྲུབ་པ་ཆེན་པོ་ནི་འདི་ལྟར་རིག་པར་བྱའོ།། གོང་མ་བཞིན་དུ་ལས་བརྩམས་ནས། ། ཐར་པའི་རྒྱུ་མཆོག་དེ་དག་ནི།། རུས་པ་རྡོ་རྗེ་ཐལ་བར་བསྒྲུབ།། རུས་པའི་ཚོགས་ནི་ཐམས་ཅད་ཀུན།། བསྲེགས་དང་ལྕེ་པོག་ནག་པོར་སྦྱར།། ཁྱབ་འཇུག་གའུ་ཁ་སྦྱར་དུ།། བཅུག་སྟེ་འཇོམས་པའི་ཕྱག་རྒྱ་དང། ། དྲང་པོ་སྔགས་ཀྱིས་བསྒྲུབ་བྱས་ནས།། གྲུབ་ན་རྣལ་འབྱོར་དོན་ལྡན་གྱིས།། བར་ཆད་ཟློག་པའི་གཉེན་པོར་སྦྱར།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་ཐལ་ཆེན་གྱི་སྒྲུབ་ཐབས་ཀྱི་ལེའུ་སྟེ་བཅུ་དྲུག་པའོ། །།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་པྲ་ཐམས་ཅད་ནི་འདི་ལྟར་རིག་པར་བྱའོ། ། མཎྜལ་གྲུ་བཞི་པ་གཅིག་ལ།། ཟླ་གམ་སྒོ་གཅིག་རྡོ་རྗེས་བསྐོར།། མཐའ་ཁྱུད་སྒོ་བཞི་ལྡན་པར་བྲི།། རྒྱུ་མཆོག་དབང་པོ་བྱེད་ལྡན་ཤིག། ཕྱི་ཡི་ཁྲུས་རྣམས་བྱས་ནས་ནི།། ཤར་དུ་ཁ་བསྟན་དབུས་སུ་གཞག། ལྕེ་ལ་གཟུངས་ཐག་སྣ་ལྔས་གདགས།། རྣལ་འབྱོར་རྣམས་ཀྱིས་བསྐོར་བར་བྱ།། ཕྱག་རྒྱ་རྫས་དང་བཅས་པར་དགྲམ།། དེ་ཡི་ཁོག་དུ་གཞལ་ཡས་བསྐྱེད།། རིམ་པར་བརྩེགས་པའི་དཀྱིལ་འཁོར་ནི། ། འབར་བའི་འབྱུང་ཆེན་འབར་བ་ལྔ།། དོན་གྱི་ལྷ་མོ་ལྔ་རུ་གསལ།། ཀུན་གཞི་ཀུན་ཏུ་བཟང་མོར་གསལ།། དེ་ཡི་ཐུགས་ཀྱི་ཁོག་ཐག་ཏུ།། ཐིག་ལེ་ཟླ་བ་ཉ་རྒྱས་ལ།། ཡེ་ཤེས་སེམས་དཔའ་ཆོན་གང་བ།། ཐུགས་ཀར་ནོར་བུ་རིན་ཚོན་འབར། ། དབུས་སུ་ཉི་མའི་གའུ་ལ།། དཔལ་བེའུ་ཡུངས་འབྲུའི་བུམ་པ་ལ།། ཧཱུ~ཾ་དམར་ཏིལ་འབྲུར་གནས་པ་ནི།། བདེ་ཆེན་བྱང་ཆུབ་སེམས་ཞེས་བྱ།། རྡོ་རྗེ་གསང་ཐག་རྒྱུན་མི་གཅད།། རྡོ་རྗེ་ཁ་པྲ་གདབ་པར་བྱ། ། དེ་ནས་མཚན་མ་བྱུང་གྱུར་ན།། དངོས་གྲུབ་བླངས་ཏེ་དེ་བསྒྲལ་ལ།། བསྐམས་ཏེ་བདུད་རྩི་རྩ་བར་བྱ།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མཆོག་ཕྲན་ཐབས་ཀྱིས་བསྒྲུབ་ལུགས་ཀྱི་ལེའུ་སྟེ་བཅུ་བདུན་པའོ། །།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་ཆོས་ཐམས་ཅད་ནི་སྒྱུ་མའི་རང་བཞིན་དུ་ཤེས་པར་བྱའོ། ། དེ་ཅིའི་ཕྱིར་ཞེ་ན། སྒྱུ་མ་ནི་དངོས་པོར་སྣང་ཡང་རང་བཞིན་མེད་པ་ཡིན་ཏེ། རང་བཞིན་མེད་པའི་དོན་ནི་ཆོས་ཉིད་རྡོ་རྗེ་ཡིན་ནོ།། དེ་བས་ན་སྒྱུ་མའི་ཆོས་ཐམས་ཅད་ཁོང་དུ་ཆུད་པར་བྱའོ།། དེ་ནས་འཁོར་དེས་འདུས་པར་གྱུར་པའི་ལྷ་མ་ཡིན་གྱི་ཚོགས་བདག་སྒྱུ་མ་མཁན་ཞེས་བྱ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་སྒྱུ་མའི་ཆོ་འཕྲུལ་ལ་གནས་ཤིང་སྒྱུ་མ་ཆེད་དུ་བགྱིད་ལགས་ཀྱིས་བདག་ཅག་རྣམས་ཀྱི་དོན་ཆེད་དུ་སྒྱུར་མའི་ཆོས་ཐམས་ཅད་བཤད་དུ་གསོལ་ཞེས་གསོལ་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཚོགས་བདག་ཆེན་པོ་སྒྱུ་མའི་ཆོ་འཕྲུལ་ནི་དེ་ལྟར་རིག་པར་བྱའོ། ། ཆོས་ཐམས་ཅད་སྒྱུར་མར་སྣང།། སྒྱུ་མའི་རང་བཞིན་སྟོང་པ་སྟེ།། སྟོང་པའི་དོན་རྣམས་གང་ཡིན་པ།། མི་འགྱུར་མི་ཤིགས་རྡོ་རྗེའི་དོན།། སྟོང་པ་ཉིད་ལ་སྒྱུ་མ་ཡི།། ཆོ་འཕྲུལ་བྱེ་བ་མང་པོ་འབྱུང། ། དེ་བཞིན་སྒྱུ་མའི་ཆོ་འཕྲུལ་ཡང།། གྱིན་ད་ཙམ་གྱི་རྒྱུ་རྐྱེན་ལས།། ཆོ་འཕྲུལ་གཟུགས་ནི་ཐ་དད་སྣང།། སྣང་ཡང་དངོས་པོར་མ་གྲུབ་སྟེ།། འགྱུར་འཇིགས་མེད་པས་རྡོ་རྗེའི་དོན།། ཀུན་རྫོབ་སྒྱུ་མའི་མཚན་ཉིད་ཀྱང། ། རྡེའུ་དང་ཤིན་བུའི་རྒྱུ་དག་ལས།། སྨན་དང་སྔགས་ཀྱིས་རྐྱེན་སྦྱར་ནས།། འབྲས་བུ་སྒྱུར་མའི་ཆོ་འཕྲུལ་འབྱུང།། སྒྱུ་མའི་གསང་ཚིག་སྦྱོར་བ་ནི།། སྒྱུ་མའི་བདག་པོས་འདི་སྐད་བཤད།། རྒྱུ་ལ་འདོད་པའི་གཟུགས་བྱས་ལ། ། ཤེའུ་རེའུ་སྨན་གྱིས་བཏབ་ནས་ནི།། གསང་སྔགས་འདི་ཡི་སྦྱོར་བ་བྱ།། ཤེའུ་རེའུ་ཨི་ན་ཡ།། ཨ་མོ་ཁ་ཨ་གུསྶ་གུས།། ཆག་ཤིང་དག་གིས་བརྡབས་བྱས་ན།། ཇི་ལྟར་འདོད་པ་སྣ་ཚོགས་བྱ།། བསྡུ་བར་འདོད་ན་སླར་བཟློག་བྱ། ། དེས་ན་སྒྱུ་མའི་གཡེང་བ་ཅན།། དྲང་བའི་ཐབས་ཀྱིས་བཀྲི་བར་བྱ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་སྒྱུ་མ་རྡོ་རྗེའི་སྒྲུབ་ལུགས་ཀྱི་ལེའུ་བཅོ་བརྒྱད་པའོ། །།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་ཆོས་ཐམས་ཅད་དབང་སྒྱུར་བར་འདོད་ན་འདི་ལྟར་རིག་པར་བྱའོ།། ཕུན་སུམ་ཚོགས་པ་ཀུན་ལྡན་ནས། ། སྟེགས་བུ་ལུན་དུ་གྲུ་བཞི་ལ།། མུ་ཁྱུད་གཅིག་ཏུ་བསྐོར་ནས་ནི།། ཟླ་བ་ཁམ་པའི་དབྱིབས་སུ་སྦྱར།། སྒོ་བཞི་གྲུ་ཆད་བཞིར་ལྡན་བྱ།། དབྱིབས་ཀྱིས་ཐིག་ལེ་ཟླུམ་པོ་ལ།། རྡོ་རྗེ་དང་ནི་ཉི་མས་བསྐོར། ། དབུས་སུ་བྷན་དྷ་དཔལ་ལྡན་ལ།། དཔལ་ཆེན་ཡབ་ཡུམ་སྦྱར་ལ་གཞག། ཚོལ་བུ་བརྒྱད་ལ་གནས་བརྒྱད་སྦྱར།། ལྟེ་བ་བསྐོར་ཏེ་རིམ་པར་གཞག། ཐིག་ལེ་ཤར་གྱི་སྒོ་གང་དུ།། རྡོ་རྗེ་རྣལ་འབྱོར་གསང་མིང་དང། ། དངོས་གྲུབ་གསོལ་བྱ་བྲིས་ལ་གཞག། མཆོད་པའི་ཁྱམས་སུ་གྱུར་པ་ལ།། བསྒྲུབ་པའི་རྫས་དང་མཆོད་པ་རྣམས།། རིམ་པ་བཞིན་དུ་མཛེས་པར་དགྲམ།། རྡོ་རྗེ་རྣལ་འབྱོར་དེ་དག་རྣམས། རྡོ་རྗེ་ལྷགས་པའི་རྟགས་ཀྱིས་མཚན། ། ཏིང་འཛིན་དཀྱིལ་འཁོར་རྫོགས་བྱས་ནས།། སྤྱན་དྲངས་མཆོད་པ་ཀུན་བསོགས་ཏེ།། འཇུག་དང་དངོས་གྲུབ་གསོལ་བ་དང།། དབང་བསྐུར་ལས་རྣམས་ཀུན་རྫོགས་ནས།། རྨད་དུ་བྱུང་བའི་གཏོར་མ་དག། ཆ་གསུམ་དང་པོ་སྦྱིན་སྲེག་བྱ།། བར་མ་མི་ཟད་གཏེར་དུ་སྦ།། བྱང་ཆུབ་སེམས་ཀྱི་ཆུ་བོ་དང།། ཆོས་ཉིད་ནམ་མཁའི་དབྱིངས་ཆེན་དང།། བྷ་ག་ཡུམ་གྱི་ས་གཞི་ལ། ཤིན་ཏུ་སྦ་བའི་ཚུལ་དུ་སྦྱར། ། ཆ་གཅིག་གཞལ་ཡས་ཤར་སྒོ་ནས།། བཅུ་གསུམ་བཅལ་བར་སྟེགས་བུ་བྱ།། དེར་ནི་གནས་བདུན་གཙོ་རྣམས་ཀྱང།། དེ་བཞིན་བཅུ་གསུམ་ལམ་རེ་ལ།། གནས་གྱི་མགྲོན་ནི་མ་སྲིང་རྣམས།། བདུན་ཅུ་བར་དུ་ཀུན་རྫོགས་བྱ། ། ཐ་མར་མཎྜལ་ཟླ་གམ་ལ།། ནུས་ན་མཁའ་འགྲོ་ནམ་མཁའི་ཧོམ།། རྫོགས་བྱ་མ་ལས་དེ་མགུ་བྱ།། ལྷག་མར་གྱུར་པ་ཀུན་རྫོགས་བྱ།། སྙིགས་མར་གྱུར་པ་ཐམས་ཅད་ཀྱང།། སྦའམ་བསྲེགས་ག་ལ་ཆུ་ཀླུང་འདོར། ། རྡོ་རྗེ་གནས་ཆེན་དེ་བསྲུངས་ཏེ།། གནས་ནི་སྦ་ཕྱིར་སུ་དག་གསང།། མི་རིགས་ཕྱིར་མ་མཚན་མ་དག། རང་རང་གནས་སུ་སླེབས་པར་བྱ།། གང་དག་འདུ་ཚེའང་དེ་བཞིན་ནོ།། འདི་ནི་ཐེག་ལེ་གཅིག་པ་ཡི། ། བསྒྲུབ་ལུགས་ཡིན་པར་རྒྱལ་བས་བཤད།། འདི་དག་སྒྲུབ་པའི་སྐྱེ་བུ་ནི།། ཟླ་བའི་འཁོར་ལོ་ལ་གནས་ནས།། ཉི་མའི་འཁོར་ལོ་ཐོགས་ནས་ནི།། ཡང་དག་ཆོས་ཀྱི་དབྱིངས་ཉིད་ལ། ། དབང་སྒྱུར་བྱེད་པའི་རྒྱལ་པོར་འགྱུར།། ཞེས་གསུངས་སོ།། ཡང་སེམས་དཔའ་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་རྣལ་འབྱོར་པ།། འདི་ཡང་རིམ་གྱིས་གོང་མ་ལྟར།། ཐམས་ཅད་ཚུལ་བཞིན་སྦྱར་བྱས་ནས། ། ཕྱིར་ཀུན་དུ་གྲུ་བཞི་ལ།། ཐིག་ལེ་ཟླ་བ་གཅིག་ཏུ་བྱ།། དེ་ལ་སྲད་དབུ་བཞི་བསྣོལ་བས།། ལེའུ་ཚེ་དགུ་རུ་གྱུར་པར་བྱ།། ཕྱི་རོལ་མུ་ཁྱུད་ཐོས་པས་བསྐོར།། གྲུ་བཞི་གྲུ་ཆད་རབ་མཛེས་བརྒྱན། ། དེ་ཡི་མཐའ་ཟད་ཁྱམས་གཅིག་ལ།། སྒོ་གདོང་སྒྲུབ་པ་པོ་ལ་ལྟ།། དབུས་སུ་ཐིག་ལེ་དཀར་དམར་ལ།། ཁ་སྦྱོར་བར་དག་རྡོ་རྗེས་འབྲེལ།། དེར་ནི་དཔལ་ཆེན་ཡབ་ཡུམ་བཞུགས།། ཕྱི་མཚམས་ལེའུ་ཚེ་དེ་བརྒྱད་ལ། ། ཟླ་གམ་བརྐྱང་བ་བརྒྱད་བྱས་ཏེ།། ཡེ་ཤེས་གནས་ཀྱི་མ་བརྒྱད་དགོད།། ཕྱི་རོལ་སྒོ་གཅིག་ཁྱམས་དེ་ལ།། བསྒྲུབས་པའི་རྫས་ཀྱིས་མཛེས་པར་དགྲམ།། བསམ་བྱ་བསྒྲུབ་པ་ལ་སོགས་ཀུན།། ཐམས་ཅད་དེ་བཞིན་འདིར་སྦྱར་བྱ། ། འདི་ལྟར་གྲུབ་པའི་སྐྱེས་བུ་གང།། ཆོས་ཀྱི་རྒྱལ་པོར་རྒྱུ་པ་སྟེ། ཐམས་ཅད་ཀུན་ལ་དབང་སྒྱུར་བའི།། སྐྱེས་བུ་ཆེན་པོར་དེ་འགྱུར་རོ།། ཞེས་གསུངས་སོ།། དེ་ནས་ཡང་སེམས་དཔའི་རྡོ་རྗེ་དེས་ཆོ་འཕྲུལ་ཐམས་ཅད་ལ་དབང་སྒྱུར་བ་ཞེས་བྱ་བ་འདི་གསུངས་སོ། ། འདུས་པ་ཆེན་པོའི་རྣལ་འབྱོར་པ།། འདི་ཡང་ཐམས་ཅད་དེ་འདྲར་སྦྱར།། ཀུན་ཏུ་གྲུ་བཞིར་ལྡན་འགྱུར་བ།། འཁོར་ལོ་རྩིབས་བརྒྱད་དག་ཏུ་བྱ། ། གྲུ་ཆད་བཞི་ཡི་ཕྱི་རོལ་དུ།། སྒོ་བཞི་དག་དང་ལྡན་པར་བྱ།། ཕྱི་ཁྱམས་དམར་ནག་མེ་རི་ཀློང།། ཤིན་ཏུ་བརྗིད་ཅིང་འཇིགས་པར་བྲི།། ཐིག་ལེ་དབུས་ཀྱི་སྙིང་པོ་ལ།། ཟླ་གམ་འབར་བས་མཚན་པར་བྱ། ། རྩིབས་མཆོག་བརྒྱད་ལ་ཟླ་གམ་ནི།། ནང་དུ་ལྟ་བ་དེ་བརྒྱད་བྲི།། རྩིབས་མཚན་བརྒྱད་ལའང་དེ་བཞིན་ཏེ།། རྡོ་རྗེ་སྒོ་མོ་བཞི་རྣམས་ཏེ།། ཕྱག་རྒྱ་རིམ་པར་བཀྲམ་བྱས་ནས།། བསྒྲུབ་པའི་ལས་རྣམས་ཀུན་རྫོགས་བྱའོ། ། དེ་ལྟར་གྲུབ་པའི་རྣལ་འབྱོར་པ།། འཇིག་རྟེན་པ་དང་འཇིག་རྟེན་ལས།། འདས་པའི་ཆོ་འཕྲུལ་ཐམས་ཅད་ལ།། དབང་སྒྱུར་བྱེད་པའི་རྒྱལ་པོར་འགྱུར།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཐིག་ལེ་སྒྲུབ་པའི་ལེའུ་ཞེས་བྱ་སྟེ་བཅུ་དགུ་པའོ། །།། དེ་ནས་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་རྣལ་འབྱོར་རྣམས་དྲེགས་པ་ཅན་གྱི་ཚོགས་ཐམས་ཅད་ལ་དབང་སྒྱུར་བར་འདོད་ན་འདི་ལྟར་རིག་པར་བྱའོ། ། འདི་ནི་བྱས་ལ་སོགས་པའི་ལས།། འདི་ལྟར་འབྱོར་དང་ཕུན་སུམ་ཚོགས།། ཐབས་ལ་མཁས་དང་ཡོ་བྱད་དང།། ཇི་ལྟར་རིག་པར་འདིར་བསྡུ་བྱ། ། དེ་ནས་མཎྜལ་འདྲ་ཅིག་ལ།། དུར་ཁྲོད་མགོ་མ་ཡང་དུ་བྱ།། ཟུར་བཞི་མཎྜལ་བཞི་བྱས་ལ།། བཞི་ལས་དེ་བཞིས་ཆག་རེས་བསྟོད།། དེ་ཉིད་མ་ཏང་གཟུགས་སུ་བྱ།། སྙིང་ག་མན་ཆད་དབུས་སུ་བསྣོལ། ། དཀྱིལ་འཁོར་ཆེན་པོའི་འོག་ཏུ་གཞུག། འཁོར་ལོ་འབར་བའི་ཐིག་བཏབ་སྟེ།། དཔལ་ཆེན་ལྔ་ཡི་ཕྱག་རྒྱ་བྱ།། ཁྱམས་གཉིས་དག་གིས་མཛེས་པ་ལ།། གནས་དང་ཡུལ་གྱི་ཕྱག་རྒྱ་དགོད།། སྒོ་བཞིར་རྡོ་རྗེའི་སྒོ་བ་བཞི། ། ཡན་ལག་སྤྲུལ་པའི་མགོ་བརྙེན་གནས།། ཕྱི་ཁྱམས་རྡོ་རྗེ་མི་རིར་བྱ།། དེ་ཡི་ཕྱིར་རོལ་ཕྲེང་ཆེན་གཏམས།། སྐམ་དང་ར་རི་རློན་པས་བསྐོར།། དེ་ཡི་ཕྱིར་རོལ་མེ་བུར་འཚུབ།། བསྐལ་པའི་བུ་ཡུག་བྲི་བར་བྱ། ། རྡོ་རྗེ་སྒོ་ཁྱུད་སྒོ་ཁང་དུ།། གུ་གུ་ཐུལ་དང་ཟ་ར་ཚགས།། ཞིང་དང་སྦྲུལ་གྱི་ཆུན་པོ་བྲི།། དེ་ནས་བནྡ་དཔལ་ལྡན་ལ།། རྡོ་རྗེ་དཔལ་གྱི་ཡི་གེ་དག། བྲིས་ལ་ཁ་སྦྱར་སྦུབ་སྟེ་གཞག། གའུ་ཆུང་ལ་རལ་པ་ཅན། ། བརྒྱད་བྲིས་འབྱུང་བའི་གནས་སུ་གཞག། ལས་བྱེད་བརྒྱད་དམ་བཅུ་གཉིས་ལ།། ལས་བྱེད་བཅུ་གཉིས་བྲིས་ལ་འགོད།། ཐར་པ་གནས་ཀྱི་དཀྱིལ་འཁོར་དུ།། གདོལ་པ་འབྱུང་པོ་ང་རྒྱལ་ཅན། ། ཆགས་སྡང་རྣམས་ཀྱིས་བསླད་པའི་རྒྱུ།། དེ་ཡི་དུག་གསུམ་བཤིག་པའི་ཕྱིར།། དོན་གྱི་བསྒྲུབ་པ་ཆེན་པོ་བཤད།། དུ་དྲ་ལྔ་ཡི་ཚོགས་ཆེན་ཏེ།། ཏིང་འཛིན་ཡེ་ཤེས་ལྔས་བཅོམ་ནས།། རྡོ་རྗེ་དྲོད་ཀྱིས་རྣམ་པར་སྦྱར། ། མདོ་ཡིས་ས་ལ་སྟབས་གཅིག་ཏུའོ།། བགེགས་ཀྱི་བགེགས་ཏེ་བགེགས་ཆེན་པོ།། དུག་ལྔ་རྟོག་པ་ཉིད་ལས་སྐྱེས།། ཕྱེད་དག་གསུམ་གྱི་དུར་ཁྲོད་ན།། གཞི་རྩ་ངག་དང་ལུས་སེམས་སོ།། བརྗིད་ལྡན་དཔལ་ཆེན་དུར་ཁྲོད་བདག། བདག་རྟོག་རྟོག་འཇོམས་ཏིང་འཛིན་གྱིས།། སྲིད་གསུམ་རུ་དྲ་དུར་ཁྲོད་དུ།། ཚོགས་བདག་ཅེན་པོ་དེ་བརྒྱད་བྱ།། མ་རིག་མུན་ཁང་སྒོ་ཕྱེད་ནས།། གླང་ཆེན་སྨྱོན་པ་དེ་བཟུང་ནས།། གཟུང་འཛིན་དམ་པོའི་རྟོད་ཐག་བཅད། ། དུག་གསུམ་རྣམ་རྟོག་རྟོད་ཕུར་དབྱུང།། ངན་སོང་འདམ་ནས་དྲངས་ནས་ནི།། ཉོན་མོངས་དཔུང་རྒོད་དེ་བཏུལ་ནས།། ཡེ་ཤེས་ཐབས་ཀྱིས་རྣམ་སྦྱངས་ཏེ།། ནམ་མཁའ་ཀློང་དུ་དམིགས་མེད་པར། ། བདེ་ཆེན་མཆོད་པའི་ཚོགས་ཆེན་དག། རོ་མཆོག་ལྔ་དང་མཉམ་སྦྱར་བས།། ཆོས་ཀྱི་ལོངས་སྤྱོད་རྒྱས་པར་སྦྱར།། མཉམ་ཉིད་བདེ་བའི་སྙིང་རྗེ་ཡིས།། དྲེགས་པ་ཆེན་པོ་གཞོམ་པ་དང། ། འཁོར་བའི་དྲ་བ་གཅད་པའི་ཕྱིར།། ཁྲོ་ཚོགས་འབར་བའི་སྤྲིན་འཕྲོས་པས།། གཏུམ་ཐུང་རྔམ་པ་མགྱོགས་པའི་ཚོགས།། ཕྱག་བརྙན་ཆར་ཆེན་ཕབ་ནས་ནི།། འཁོར་བའི་ཐ་བ་སྤངས་ནས་ནི།། བདེ་བ་ཆེན་པོའི་ཞིང་བཟློག་སྟེ། ། བྱང་ཆུབ་མྱུ་གུ་བསྐྱེད་ནས་ནི།། བྱང་ཆུབ་སེམས་དཔའི་ལོ་ཏོག་བསྐྱེད།། དུར་ཁྲོད་ཆེན་པོའི་བཞིན་ཕྱོགས་ནི།། མགོ་ནི་ལྷོ་ནུབ་མཚམས་སུ་བཏིང།། རྐང་པ་བྱང་ཤར་མཚམས་སུ་བཏིང།། ང་ནི་དུར་ཁྲོད་དབང་ཕྱུག་ཆེ། ། སངས་རྒྱས་སྐུ་སྟེ་ཡེ་ཤེས་ཡིན།། ཐུགས་རྗེ་རྣོན་པོའི་དམག་ཚོགས་ལ།། ཡེ་ཤེས་རྣོན་པོའི་མཚོན་ཆ་ཡིས།། ལོག་རྟོག་འཁོར་བའི་རྒྱུན་བཅད་དོ།། གྲུ་བཞི་ཁ་བཞིར་རྡོ་རྗེ་ཡི།། དབྱིངས་འདྲའི་ཐབ་ནི་བརྩིགས་ནས་ཀྱང། ། སྙིང་གར་འཁོར་ལོའི་ཐབ་ཏུ་བྱ།། རིགས་ཀྱི་ཡམ་ཤིང་ལྔ་བརྩིགས་ཏེ།། ཧོམ་ལྔ་འབྲེལ་པའི་ལས་ཆེན་བརྩིགས།། ཐབས་ཆེན་ལྔ་ཡི་ཧོམ་ཁུང་དུ།། འཁོར་བའི་སྡུག་བསྔལ་ཡམ་ཤིང་ལ། ། ཡེ་ཤེས་ཆེན་པོའི་མེ་ཀློང་དུ།། ཉོན་མོངས་ལྔ་ཡི་བསྲེགས་སྦྱངས་རྫོགས།། བྱ་བར་སྦྱོར་བ་མཐའ་དག་ཀུན།། ཇི་ལྟར་འབྱོར་ཅིང་འཚམས་པར་འོས།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་དྲེགས་པ་ཅན་གནོན་པ་ཞེས་བྱ་བའི་ལེའུ་སྟེ་ཉི་ཤུ་པའོ། །།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་ཚོགས་འཁོར་བའི་རྒྱ་མཚོ་ཟད་པར་བྱེད་པའི་ཞལ་གྱི་དཀྱིལ་འཁོར་ཞེས་བྱ་བ་བསྒྲུབ་པའི་དོན་ནི་འདི་ལྟ་རིག་པར་བྱའོ། ། འདི་ཡང་དེ་འདྲར་ཀུན་སྦྱར་ནས།། འཁོར་ཁང་ཅན་གྱི་གཞལ་ཡས་སུ།། ཁྲུ་གང་གྲུ་བཞིའི་ཚད་དེ་ལ།། བཞི་ནི་འཁོར་ཁང་ཁྱམས་དེ་དག། ཕྱོགས་བཞི་དག་ཏུ་བརྩམས་པར་བྱ།། དྲི་ཞམ་ཙནྡན་འདི་གུ་བཏང།། དྲི་སྤོས་ཚོམ་བུ་རིན་ཆེན་ཕྲོག། སྦྱིན་མཆོད་རྒྱས་པར་དེ་བཤམ་བྱ།། ལྷ་ཡི་དགེ་བསྙེན་རྣམ་པ་བཞི།། ཕྱོགས་མཚམས་བསྲུང་བའི་ལས་རྣམས་བསྒོ། ། ཁྱམས་ཀྱི་ནང་རིམ་ཕྱོགས་མཚམས་སུ།། ཆག་ཕྱེད་པ་ཡི་སྟེགས་བུ་བཅུ།། བསྐལ་པའི་མེ་དཔུང་འབར་བྲིས་ལ།། སྣ་ཚོགས་རྒྱུ་ལས་བྱས་པ་ཡིས།། མཐུན་པའི་གཟུགས་བཅུ་དབང་བསྐུར་ཏེ། ། ཁྲོ་བོ་གར་གྱི་ནང་མཚམས་གཅད།། དེ་ནས་མ་ཏྲཾ་གནོན་པར་བྱ།། དྲེགས་པར་རུ་དྲ་སྡིག་ཅན་འདི།། ནམས་ཀྱང་བསྒྲལ་བའི་ཞིང་ཡིན་ཏེ།། ཛཿཧཱུ~ཾཿབ~ཾ་ཧོཿམ་ཧཱ་ཤྲཱི་ཧེ་རུ་ཀ་མ་ཏྲ~ཾ་རུ་དྲ་ཧ་ཧ་པྲ་བེ་ཤ་ཕཊ། ཁ་ཊཱཾ་ཕྱག་རྒྱས་བསྒྱེལ་ནས་ནི།། མ་རིག་མུན་པའི་སྒོ་ཕྱེ་ནས།། རྣམ་ཤེས་ཨ་རུ་བྱིན་བརླབས་ཏེ།། གསང་ཆེན་ཐུགས་ཀྱི་ཀློང་དུ་བསྟིམ།། སྦུབས་ནི་གཞལ་ཡས་འབར་བར་བྱ།། སྟེགས་བུ་མ་ཏྲཾ་གཟུགས་འདྲ་ལ། ། འགྱེལ་ཐབས་བཞིན་ཕྱོགས་ཅི་འདྲར་བྱ།། ཁ་དོག་སྔོ་སྐྱ་གནས་རྐྱལ་ཐབས།། ཆེ་ཆུང་ཚད་མེད་གནས་ཀྱིས་སྦྱར།། དེ་ཡི་སྙིང་གར་བང་རིམ་གསུམ།། དང་པོར་དམར་པོ་གྲུབ་བཞི་བརྩིགས། ། གཉིས་པ་མཐིང་ནག་གྲུ་གསུམ་བྱ།། གསུམ་པ་སྨུག་ནག་ཟླ་གམ་བྱ།། ཡན་ལག་བཞི་དང་མགོ་མཚན་དྲུག། གསང་སྒོ་གཉིས་ཏེ་བརྒྱད་དག་ལ།། སྟེགས་བུ་ཆག་ཕྱེད་གྲུ་བཞི་བརྒྱད།། དེ་ཡི་མཐའ་རིམ་ཡོངས་ཟད་དུ། ། ཟླ་གམ་གསལ་བར་མཎྜལ་བྱ།། དེ་དག་མེ་ཀློང་འབར་བར་བསྐོར།། ཡ་ཐོག་ཟླ་གལ་སྟེང་ངག་ཏུ།། དཔལ་དང་ལྡན་པའི་ལྷ་མཆོག་བཞུགས།། མཐིང་ནག་གྲུ་གསུམ་མེ་དཔུང་བྲི།། གྲུ་བཞིའི་དམར་པོ་བང་རིམ་ལ། ། རིགས་བཞི་ལྷ་མཆོག་དཔལ་ལྡན་གཞག། ཡན་ལག་མགོ་མཚན་གཡས་གཡོན་བརྒྱད།། དབང་ཕྱུག་གནས་ཀྱི་བདག་མོ་བརྒྱད།། བྲི་བྱ་ཡང་ན་མཚམ་མ་བཞག། ཚིགས་ཆེན་བརྒྱད་ལ་ཡུལ་བདག་བརྒྱད། ། ཇི་ལྟར་འོས་པ་དེ་ལྟར་བྱའོ།། གོ་བཞིར་གསང་བ་སྒོ་མར་གཞག། མཐའ་ཟད་ཡོངས་ཀྱི་ཟླ་གམ་ལ།། བུད་མེད་ཉི་ཤུ་རྩ་བརྒྱད་གཞག། མིང་ངམ་མཚན་མ་རྟེན་ཏེ་གཞག། དེ་ཡི་ཁ་ལ་ཐབ་ཏུ་བརྩིབས། ། པདྨ་དཔལ་བེའུ་དབྱིངས་འདྲ་ཐམ།། མཁས་པས་ཡམ་ཤིང་བརྩམ་པར་བྱ།། བྱ་བའི་བྱ་བ་ཐམས་ཅད་ཀུན།། གོང་དུ་སྦྱོར་བ་དེ་ལྟར་སྦྱོར།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འཁོར་བ་ཐམས་ཅད་སྒྲོལ་བ་བསྒྲུབ་པ་ཞེས་བྱ་བའི་ལེའུ་སྟེ་ཉི་ཤུ་རྩ་གཅིག་པའོ། །།། དེ་ནས་ཡང་སེམས་དཔའི་རྡོ་རྗེ་དེས་དུག་གསུམ་ཐུགས་སུ་དབང་སྒྱུར་བ་ཞེས་བྱ་བའི་མདོ་འདི་གསུངས་སོ། ། འདུས་པ་ཆེན་པོའི་རྣལ་འབྱོར་པ།། དུག་གསུམ་དབང་དུ་བསྒྱུར་བ་ཡང།། འདི་ལྟར་ཁོང་དུ་ཆུད་པར་བྱ།། དུག་གསུམ་རང་བཞིན་གང་ཡིན་པ།། སྐུ་གསུམ་ཉིད་ཀྱི་ངོ་བོ་སྟེ།། གཞན་ནས་བཙལ་བ་ཅི་ཡང་མེད། ། དེ་ལྟར་ཤེས་པར་འགྱུར་བ་དང།། ཀུན་རྫོབ་ཚུལ་དུ་འདི་ལྟར་བསྒྱུར།། ཐམས་ཅད་གོང་མ་བཞིན་སྦྱར་ལ།། སྟེགས་བུ་འདོམས་གང་པ་ཞིག་ལ།། ཕྱི་ར་དམར་པོ་རྒྱས་པར་བྱ།། དེ་ནས་མཐིང་ནག་གྲུ་གསུམ་བརྩིགས། ། དེ་ནས་དམར་ནག་ཟླ་གམ་བྱ།། ཟླ་གམ་དབུས་སུ་དཔལ་ཆེན་འབར།། དབང་ཕྱུག་གནས་བརྒྱད་ཟླ་གམ་མཐའ།། བང་རིམ་བར་ལ་དུར་ཁྲོད་འབར།། ཐ་མར་དམར་པོ་གྲུ་བཞི་ལ།། སྒོ་བཞི་སྒོ་སྲུང་བཅས་པར་བྱ། ། དེ་ཡི་མཐའ་མ་མེ་རིས་བསྐོར།། ཁྲོ་བཅུ་འབར་བའི་རྟགས་རྣམས་དགོད།། བསྒྲུབ་དག་འཇུག་དང་དབང་བསྐུར་རྣམས།། གོང་མ་བཞིན་དུ་སྦྱིན་པར་བྱ།། དེས་ནི་ཐམས་ཅད་རྫོགས་པ་ཡིན། ། དུག་གསུམ་ཐམས་ཅད་ཟིལ་གྱིས་གནོན།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་དུག་གསུམ་དབང་བསྒྱུར་བ་ཞེས་བྱ་བའི་བསྒྲུབ་པའི་ལེའུ་སྟེ་ཉི་ཤུ་རྩ་གཉིས་པའོ། །།། དེ་ནས་སེམས་དཔའི་རྡོ་རྗེ་དམ་པ་དེས་བུད་མེད་ཐམས་ཅད་ལ་དབང་བསྒྱུར་བ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ།། འདུས་པ་ཆེན་པོའི་ཚོགས་ཆགས་པ་ཐམས་ཅད་དབང་དུ་འདུ་བར་འདོད་ན་འདི་ལྟར་རིག་པར་བྱའོ། ། བུད་མེད་ཆགས་པའི་རང་བཞིན་ཏེ།། ཆགས་པ་ཁྲག་གི་རྒྱ་མཚོ་ཡིན།། ལས་ཀྱིས་འཁོར་བའི་སེམས་ཅན་རྣམས།། ཆགས་པ་ཁྲག་གི་རྒྱ་མཚོར་བྱིང། ། ཆགས་ལས་རྣམ་གྲོལ་འགོག་པ་སྟེ།། ཆགས་པ་དེ་ཉིད་ཁྲག་ཅེས་བྱ།། ཁྲག་གི་རྒྱ་མཚོ་བསྐམ་པའི་ཕྱིར།། བུད་མེད་ཁྲག་གི་རྒྱ་མཚོ་རྣམས།། འཚོ་བ་བདུད་རྩིའི་རྒྱ་མཚོ་བསྒྱུར།། དེ་ལྟར་ཤེས་པར་གྱུར་པ་དང། ། ཀུན་རྫོབ་ཚུལ་དུ་འདི་ལྟར་སྦྱར།། ལས་ཀྱི་བརྩམས་པ་ཕུན་སུམ་ཚོགས།། རིམ་པ་བཞིན་དུ་བརྩམས་ནས་ཀྱང།། མཎྜལ་འདོམ་གང་གྲུ་བཞི་ལ།། འཁོར་ལོ་བཞི་ཡི་ཐིག་ཏུ་གདབ།། མི་ཁྱུད་ཕྱི་རིམ་གྲུ་ཆད་བཞི། ། དེ་ནས་སྒོ་ཁྱམས་དམར་པོར་བྱ།། ཀུན་གྱི་ཕྱི་རིམ་ལག་ཆུ་ཧྭའི།། མེ་རི་འབར་བས་གཏིབ་ཐག་གཅད།། དབུས་སུ་ཤར་ལྟ་ཟླ་གམ་བྲི།། བྷན་དྷ་དཔལ་ལྡན་ཡབ་ཡུམ་དགོད།། འཁོར་ལོ་བཞི་ལ་རིག་བཞིར་ལྡན། ། བར་འཁྱམས་གཉིས་ལ་གནས་ཡུལ་རྣམས།། ཟླ་གམ་ཐིག་ལེར་ལྡན་པར་བྱ།། སྒོ་ཁྱམས་སྒོ་བཞི་ཟླ་གམ་བཅས།། ཕྱི་ཁྱམས་ལག་ཆུ་ཧྭ་ཡི་མེ།། མེ་ཡི་ཁྲོ་བོ་སུ་ཐེག་ལེར་བཅས།། དུར་ཁྲོད་རྒྱན་གྱིས་ཀུན་བརྒྱན་བྱ། ། ཏིང་འཛིན་རྫོགས་དང་དངོས་བསྒྲུབ་དད།། འཇུག་པ་དབང་བསྐུར་དངོས་གྲུབ་རྣམས།། གནས་བསྲུང་ལ་སོགས་རྫོགས་པར་བྱ།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འཁོར་ལོ་དབང་སྒྱུར་གྱི་སྒྲུབ་ལུགས་ཀྱི་ལེའུ་སྟེ་ཉི་ཤུ་རྩ་གསུམ་པའོ། །།། དེ་ནས་སེམས་དཔའི་རྡོ་རྗེ་དམ་པ་དེས་འདི་སྐད་ཅེས་བཀའ་སྩལ་ཏོ།། འདུས་པ་ཆེན་པོའི་ཚོགས་ཆོས་ཐམས་ཅད་བདུད་རྩི་སྨན་གྱི་རང་བཞིན་དུ་ཞེས་པར་བྱའོ། ། དེ་ཅིའི་ཕྱིར་ཞེ་ན།། འདི་ལྟར་སྣང་བའི་ཆོས་ཐམས་ཅད་ཀྱི་དོན་རྟོགས་ན་ནི་འཚོ་བ་ཆོས་ཉིད་ཀྱི་རྩི་ཡིན།། མ་རྟོག་ན་ནི་འཆི་བ་འཁོར་བའི་དུག་ཡིན།། དེ་ནས་ན་ཆོས་འདི་དག་ཐམས་ཅད་བདུད་རྩིའི་རང་བཞིན་དུ་ཤེས་པར་བྱའོ། ། དེ་ལྟར་ཤེས་ནས་ཀུན་རྫོབ་ཏུ་འདི་ལྟར་བསྒྲུབ་པར་བྱའོ།། ཇི་བཞིན་འབྱུང་ལྡན་བདེ་སྦྱར་ནས།། མ་ཏྲཾ་ཁོག་པའི་སྙིང་ག་རུ།། འདོམ་གང་ཚད་དང་མཐུན་པ་ལ། ། རྩི་བས་བརྒྱད་འབར་བའི་འཁོར་ལོར་གདབ།། མེ་ཡི་འོད་ཀྱིས་བསྐོར་བར་བྱ།། རྡོ་རྗེ་ར་བས་བསྐོར་བ་ཡི།། མཐའ་མ་སྒོ་ཁྱུད་འབར་བར་བྱ།། དབུས་སུ་རིན་ཆེན་ཟུར་བརྒྱད་བྱ།། དེར་ནི་ཕྱག་རྒྱ་འབར་བ་དགོད། ། ལང་ཀ་བསྒྲལ་བའི་གནས་མཆོག་འདིར།། རབ་པ་ཅན་གྱི་ཚོགས་འདུས་ཏེ།། རཀྵ་འཇོམས་པའི་མཐུ་ཆེན་ཀུན།། སྲིད་པ་གསུམ་རིལ་འདིར་སྒྲོལ་པའོ།། དུས་བཞི་མཆོད་པའི་དམ་རྫས་ཀྱིས། ། དེ་དག་ཇི་ལྟར་རིག་པར་མཆོད།། དུས་བཞི་བཅུད་སྨིན་སྙིང་པོ་ཡིས།། དངོས་གྲུབ་ཆེན་པོའི་རྫས་སུ་བྱ།། ཕྱོགས་བཞི་དབུས་ཀྱི་རྫས་ཆེན་རྣམས།། རྨད་དུ་བྱུང་བའི་རལ་པ་ཅན།། འབྱུང་བ་ལྔ་ལ་དབང་སྒྱུར་མཛད། ། འབྱུང་བ་ལྔ་ཡི་ཆོ་འཕྲུལ་སྒྲུབ།། དབྱར་ཆུ་སྟོན་མེ་དགུན་ས་སྟེ།། དཔྱིད་རླུང་ནམ་མཁའ་གསང་བར་སྦྱར།། ཆོ་འཕྲུལ་དེ་ལ་དབང་ཐོབ་ནས།། དེ་དག་རལ་པ་ཅན་དུ་བསྒྲུབ།། ཏིང་འཛིན་རྣམ་པ་ལྔ་གསལ་བས། ། འབྱུང་ལྔ་ལས་བྱུང་ཤ་རིགས་ལྔ།། ཁྱི་ཤ་བ་ལང་རྟ་ཤ་དང།། བྱ་དང་རི་དགས་སྣ་ཚོགས་ནི།། རྫུ་འཕྲུལ་ཤུགས་སུ་སྒྲུབ་པའི་རྫས།། སྒྲུབ་པའི་རྫས་ཆེན་འབྱུང་ཆེན་ལྔ།། འཇིག་རྟེན་ཀུན་ལ་དབང་སྒྱུར་བའི། ། དེ་ལྟར་རྫས་རྣམས་འབྱོར་བ་དང།། ཏིང་འཛིན་བསྒོམ་དང་བསྒྲུབ་པ་དང།། ཐམས་ཅད་གོང་དང་མཐུན་སྦྱར་ནས།། འཇུག་དང་དངོས་གྲུབ་དབང་ཆེན་རྣམས།། ཅི་རིགས་པ་ནི་བདེ་བར་སྦྱར།། ཞེས་གསུངས་སོ། ། བདུད་རྩི་རང་བྱུང་དཀྱིལ་འཁོར་ཞེས་བྱ་བའི་མདོ་བཤད་པའོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་རྣལ་འབྱོར་པ།། གཞན་ཡང་བདུད་རྩིཆེན་པོ་ནི། ། གོང་མ་བཞིན་དུལེགས་སྦྱར་ནས།། མཎྜ་ལ་ཚད་དང་མཐུན་པ་ལ།། པདྨ་དམར་པོ་འོད་ཀྱི་མཁའ།། ཕྱི་རིམ་ཟླ་གམ་དམར་པོ་བཞི།། རྡོ་རྗེ་འབར་བས་མཛེས་པར་བསྐོར།། མེ་ལྕེ་འབར་བའི་ཕྲེང་བ་ནི།། ཟླ་གམ་མཐའ་ཟད་བྲི་བར་བྱ། ། རིན་ཆེན་གེ་སར་ཕྲེང་བས་ནི།། པདྨའི་ལྕེ་ལ་བསྐོར་བར་བྱ།། སྒོ་བཞི་རིན་ཆེན་འབར་བས་བྱ།། ཕྱག་རྒྱ་འབར་བའི་ལྷ་བཀོད་ན།། དབུས་སུ་གསེར་ཕོར་སུལ་མེད་ལ།། དུང་ཆེན་འཁོར་བ་ཅན་གྱིས་སྦྱར། ། ཤར་དུ་ཤེལ་ཕོར་སུལ་འགྲེང་ལ།། རིག་ཆེན་མཛོད་སྤུ་གསལ་བས་སྦྱར།། ལྷོ་རུ་རིན་ཆེན་སུལ་མང་ལ།། རིན་ཆེན་ལོ་འདབ་རྒྱས་པར་སྦྱར།། ནུབ་ཏུ་རྒྱ་ཕོར་ཟླ་གམ་ལ།། བཞིན་མཚམས་རིན་ཆེན་འབུར་གཉིས་སྦྱར། ། བྱང་དུ་བསེ་ཕོར་རྒྱ་གྲམ་ལ།། གཙུག་ཏོག་རིན་ཆེན་འབུར་བཞི་རྒྱས།། རྩ་བ་ལྔ་ནི་ཕྱོགས་ཕྱོགས་སྦྱར།། སྒོ་ལྔའི་གཙོ་བོ་རིགས་སུ་སྦྱར།། དབུས་ན་ཤར་ལྷོ་ནུབ་བྱང་དུ།། ཀ་ཀོ་ལ་དང་དུ་རུ་སྐ། ། ཛ་ཏི་ཕ་ལ་ཁ་དྲི་ཞིམ།། ལྕེ་པོག་དཀར་ཞེས་རིམ་པར་སྦྱར།། དེ་བཞིན་གོང་གི་རིམ་པ་བཞིན།། ཨ་རུ་ར་དང་ག་པུར་དང།། གུར་གུམ་པདྨ་ལི་ག་དུར།། དེ་ན་རྭ་ས་ཡཱ་ན་རྣམས།། ཐམས་ཅད་རིགས་དག་ཁ་དོག་དང། ། ལས་དག་མཐུན་པར་སྦྱར་བར་བྱ།། ས་བོན་ལྔ་ནི་རིམ་པར་སྦྱར།། དཔལ་དང་ལྡན་པའི་སྣོད་ནང་དུ།། ཡབ་ཡུམ་སྙིང་པོ་རིམ་བཞིན་བྱ།། དབུས་དང་པདྨ་ལྕེ་ལ་དགོད།། གནས་ཡུལ་ལ་སོགས་མཛེས་པར་གཞག། དུར་ཁྲོད་རྫས་དང་བཀྲ་ཤིས་རྫས།། འབྱོར་པའི་ཡོ་བྱད་ཐམས་ཅད་བཤམས།། དེ་ནས་བྱིན་ཕབ་དངོས་གྲུབ་གསོལ།། ཐམས་ཅད་རྣམ་པར་སྦྱར་བར་བྱ།། དམ་པ་དེ་ཉིད་གསང་ཆེན་གྱི། ། རིགས་བརྒྱ་རིགས་ལྔ་རིགས་གཅིག་གིས།། ཐམས་ཅད་སྦྱང་བའི་མཆོག་ཏུ་བྱ།། དེ་ནས་ཁྲོལ་བུ་སྦྱང་བ་ན།། བསལ་བསྔོ་བསྡུ་དང་དབྱེ་བ་དང།། ཁྲུས་བྱ་བ་དང་བཤགས་པ་དང།། ཡོན་ཏན་བརྗོད་དང་བྱིན་དབབ་བྱ། ། དེ་ནས་སྐད་ཅིག་ཐང་ཅིག་གམ།། ཞག་གཅིག་དག་གིས་སྦྱར་བར་བྱ།། རྟགས་དག་བྱུང་ན་དེར་འབྱོངས་པའོ།། ཕྱེ་མའི་མཆོག་ཏུ་སྦྱར་བ་ནི།། སྣོད་གྱི་སྨན་རྣམས་ཤེས་རབ་མས། ། བསྡུས་ཏེ་བཏགས་པའི་ཆོ་ག་ཡང།། ཡུམ་གྱིས་བཟིང་ཞིང་ཡབ་ཀྱིས་བཏགས།། རིག་འཛིན་རྩལ་ཅན་དབབ་ཅིང་དྲང།། སོ་སོ་ལས་ཀྱི་སྔགས་བརྗོད་ཅིང། གཏན་གཏུན་ཐབས་དང་ཤེས་རབ་སྟེ།། སྨན་ཉིད་བྱང་ཆུབ་སེམས་སུ་སྦྱར། ། རྡོ་རྗེ་གླུ་འདི་ལྷ་མོས་བླང།། ཀུན་ཏུ་བཟང་མོའི་གཞལ་ཡས་སུ།། ཐམས་ཅད་ཤེས་རབ་ལྡན་པ་ལས།། འཁོར་བ་བདུད་རྩི་སྨན་དུ་སྦྱར།། ཡེ་ཤེས་ལྔ་རུ་གསལ་བ་ལས།། འབྲས་བུ་སྐུ་གསུང་ཐུགས་སུ་རྫོགས། ། འཆི་མེད་བདུད་རྩིས་གཅོང་རྙིང་སྦྱང།། མཚན་མ་བརྟག་ཕྱིར་བཅལ་ནས་ནི།། རྡོ་རྗེ་དཔལ་ལྡན་ཁ་སྦྱོར་བླུགས། ཁ་དོག་རིགས་ལྔའི་རས་ཀྱིས་དཀྲི།། རྡོ་རྗེ་དབང་གི་རྒྱ་ཡིས་གདབ།། རྡོ་རྗེ་སྔགས་ཀྱི་གཟུངས་ཀྱིས་གདགས། ། དཔལ་ཆེན་སྐུ་ལྔ་མངའ་གསོལ་ཏེ། ཡེ་ཤེས་ལྔ་ཡི་དབང་བསྐུར་བྱ།། མཎྜལ་དག་ཏུ་དགོད་པར་བྱ།། ཀུན་གྱིས་བསྐོར་ཞིང་དངོས་གྲུབ་དབབ།། རྩི་དང་སྨན་གྱི་བདག་པོ་དང། ། རྟགས་ལྡན་རིག་འཛིན་ཕྲ་མོ་དག། རོལ་མོ་ཆ་བྱད་མང་པོ་བསྟེན།། བསྒྲུབ་པ་འབྲུ་མཆོག་གཏམས་བས་དགང།། བཀྲ་ཤིས་གོས་ཀྱིས་རྒྱས་པར་བཀླུབས།། གཟུངས་ཐག་གཉེར་ཅན་རིགས་སུ་དབུལ། ། ཏིང་འཛིན་མེ་ཡིས་རྣམ་པར་སྦྱར།། རྟགས་ཆེན་ལྔ་ནི་གང་བྱུང་ཡང།། སྨྱུར་ཏེ་དངོས་གྲུབ་བླང་བར་བྱའོ།། བདུད་རྩི་སྒྲ་ལས་དྲངས་ནས་ནི།། དཔལ་ལྡན་པདྨ་ལྡན་པ་རུ།། ཐམས་ཅད་བདུད་རྩིར་ས་མ་ཡ། ། མཁའ་ཀློང་ཡངས་པར་བདེ་ཆེན་རྫོགས།། རང་ཉིད་བདུད་རྩིའི་དཀྱིལ་འཁོར་རྫོགས།། གཞན་ནས་བསྒྲུབ་པ་ཅི་ཡང་མེད།། འཇུག་པ་ལ་སོགས་ཐམས་ཅད་ཀྱང།། ཚུལ་བཞིན་དུ་ནི་རྒྱས་པར་བྱ།། ཞེས་གསུངས་སོ། ། བདུད་རྩི་ཕྱེ་མའི་བསྒྲུབ་པ་རྣམ་པར་བཤད་པའོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་རྣལ་འབྱོར་པ།། ཐམས་ཅད་དེ་འདྲར་སྦྱར་ནས་ཀྱང།། མཎྜལ་འཁོར་ལོ་རྩིབས་བརྒྱད་པ། ། ཕྱག་རྒྱའི་ལྷ་རྣམས་རྫོགས་བྱས་ནས།། སྨན་སྦྱང་བཏགས་བཙགས་བཅལ་ནས་ཀྱང།། སྦྲང་ཆང་འོ་མས་གོང་བུར་བྱ།། བསེ་ཕོར་མཚན་ལྡན་ནང་དུ་གཞག། ལེགས་པར་ཁ་སྦྱར་རས་ཀྱིས་དཀྲི། ། གོང་མ་བཞིན་དུ་ཀུན་སྦྱར་ནས།། དངོས་གྲུབ་མཆོག་རྣམས་བདག་གིས་བྱ།། ཞེས་གསུངས་སོ།། བདུད་རྩི་རི་ལུའི་ཆོ་ག་རྣམ་པར་བཤད་པའོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། ། འདུས་པ་ཆེན་པོའི་རྣལ་འབྱོར་པ།། སྐྱོ་མའི་ཆོ་ག་འདི་ལྟ་སྟེ།། ཐམས་ཅད་གོང་མ་བཞིན་སྦྱར་ནས།། མཚན་མ་གསལ་པོ་འབྱུང་པོ་དང། ཕྱེ་མ་ཆུ་ཚགས་ནང་ནས་དབྱུང།། ཕྱེ་མའི་མཆོག་ཏུ་འགྱུར་བ་དང། ། ཕྱེ་མའི་རྒྱལ་མོ་དེ་དག་ནི།། བསེ་ཕོར་ཁ་སྦྱར་ནང་དུ་བླུགས།། རྒྱས་བཏབ་བྱིན་བརླབས་དབང་བསྐུར་ནས།། བཟླས་བརྗོད་འཕྲོ་འདུ་རྒྱུན་མི་ཆད།། སྦྲང་ཆང་ར་ཆང་བུར་རམ་ཆང།། རྒུན་ཆང་འོ་མ་ལ་སོགས་པ། ། བཅུད་ཀྱི་ཁུ་བ་ཐམས་ཅད་སྦྱར།། རིན་ཆེན་གའུ་མཚན་ལྡན་དུ།། བླུགས་ཏེ་ཁ་སྦྱར་རྒྱས་བཏབ་ནས། འཕྲོ་འདུ་བཟླས་བརྗོད་གོང་མ་བཞིན།། བྱས་ཏེ་མཚན་མ་བྱུང་བ་དང།། དངོས་གྲུབ་ཆེན་པོ་བླང་བར་བྱ། ། ཕྱེ་མའི་བསྒྲུབ་རྫས་དེ་དག་ནི།། ཆ་ལྔ་དག་ཏུ་བགོས་ནས་ཀྱང།། རྣལ་འབྱོར་སོ་སོའི་ཆ་རྣམས་ལས།། ཅི་རན་ཙམ་གྱིས་ཆ་གཅིག་དང། སྦྱར་ཆང་ཆ་ལྡང་བགོས་པ་ལས།། རྣལ་འབྱོར་སོ་སོའི་ཆ་རྣམས་ལས། ། སྦྱར་ཏེ་དངོས་གྲུབ་བརྟེན་དུ་བྱ།། ཟླ་བ་གཅིག་ཏུ་ཟོས་པས་ནི།། བ་སྤྲུ་རངས་ཤིང་གཉེར་མ་རངས།། ཟླ་བ་གཉིས་སུ་ཟོས་བྱས་ན།། གཟི་མདངས་ཐམས་ཅད་འབར་བར་འགྱུར།། ཟླ་བ་གསུམ་གྱི་ཕན་ཡོན་གྱིས། ། ནད་ཀྱི་བསྐལ་བ་དག་ལས་ཐར།། ཟླ་བཞི་ཕན་ཆད་གང་ཟག་གིས།། ཟས་དང་མ་འདྲེས་བརྩོན་བསྒྲུབས་ན།། གཞན་གྱི་ནད་རྣམས་འཇོམས་པར་ནུས།། དྲུག་དང་བདུན་དང་བརྒྱད་རྣམས་ལ། ། བདུད་རྩི་བཅུད་ཀྱིས་འཚོ་བར་འགྱུར།། དགུ་དག་བཅུ་ལ་ཟད་པ་ཟད།། བཅུ་གཅིག་རིག་འཛིན་ནམ་མཁར་འཕུར།། ཞེས་གསུངས་སོ།། བདུད་རྩི་སྐྱོ་མའི་བསྒྲུབ་པ་རྣམ་པར་བཤད་པའོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། ། འདུས་པ་ཆེན་པོའི་རྣལ་འབྱོར་པ།། རྡོ་རྗེ་རིག་འཛིན་རྩལ་ལྔའི་ཟས།། ལྡེ་གུའི་ཆོ་ག་ཆེན་པོ་ནི།། འདི་ལྟར་ཁོང་དུ་ཆུད་པར་བྱ།། སྦྲང་རྩི་བུ་རམ་རྒུན་འབྲུམ་རྣམས། ། ལོ་ཡི་འཚོར་བར་སྦྱར་ནས་ཀྱང།། ཁ་དོག་མཚན་ལྡན་དམར་པོའི་བ།། ལོ་ཡི་འཚོ་བར་གཟུང་ཞིང་བསྲེག། སྨན་གྱི་རྒྱལ་པོ་རམ་ཉེ་བས།། རྒྱུན་དུ་གསོས་པའི་འོ་མ་དེ།། རིག་འཛིན་ཟས་ཀྱི་མཆོག་ཏུ་འགྱུར། ། བདུད་རྩི་རྒྱལ་མོ་རམ་ཉེ་བ།། བྱེ་མའི་མཆོག་ཏུ་བྱ་ནས་ཀྱང།། ལོ་ཡི་འཚོ་བའི་སྦྱར་བྱས་ཏེ།། སུས་མི་མཐོང་བའི་ས་ཕྱོགས་སུ།། བསྒྲུབ་རྫས་དེ་དག་འགྲམ་ནས་ཀྱང།། བདུད་རྩི་བསྒྲུབ་པ་དེ་བཞིན་བྱ། ། དུས་བབ་པ་ནི་ཚོད་རྣམས་ལ།། བསྒྲུབ་རྫས་དེ་དག་ཐམས་ཅད་ཀྱང།། བ་ཡི་འོ་མས་ལྡེ་གུར་བྱ།། ཆ་རེས་བསྐྱེད་ཅིང་བཟའ་བར་བྱ།། ཟོས་པའི་ཡོན་ཏན་བསམ་མི་ཁྱབ།། ཟག་པ་ཟས་ནས་ནམ་མཁར་འགྲོ། ། ཞེས་གསུངས་སོ།། བདུད་རྩི་ལྡེ་གུའི་སྒྲུབ་པར་རྣམ་པར་བཤད་པའོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་རྣལ་འབྱོར་པ། འདི་ཡང་གོང་མ་ལྟར་བྱས་ཏེ། ། དེ་དང་མི་མཐུན་སྒྲུབ་རྫས་རྣམས།། བདུད་རྩིར་འགྱུར་བའི་སྨན་རྣམས་ཀུན།། ཐམས་ཅད་ཐམས་ཅད་བསྡུས་བར་བྱ།། ཏིལ་ཆེན་ལ་སོགས་ཞུན་གྱི་མཆོག། ཐམས་ཅད་བསྡུས་ཤིང་སྦྱར་བྱས་ནས། ། གནས་ཀྱང་གོང་མ་བཞིན་བཙལ་ཏེ།། བདུད་རྩི་བཀྲམ་ནས་བསྒྲུབ་པར་བྱ།། འཕྲོ་འདུ་བཟླས་བརྗོད་རྒྱུན་མི་གཅད།། གྲུབ་པའི་རྫས་སུ་གྱུར་པ་དང།། སྨན་རྣམས་ཕྱེ་མར་བཏག་པར་བྱ།། དེ་དག་ཕྱེ་མར་གྱུར་པ་དང། ། ཞུན་ཆེན་དག་དང་སྦྱར་བར་བྱ།། སྦྱོར་བའི་ཆོ་ག་རྫོགས་པ་དང། དངོས་གྲུབ་མཆོག་ནི་བླང་བར་བྱ།། གཞོན་ནམ་གཞན་གྱི་སྡེ་པ་དང།། ལོ་ཡིས་བཤུགས་ཏེ་འཕྲད་མི་བྱ།། འཚོ་བ་བདུད་རྩི་ཞུན་གྱིས་སྦྱར། ། བདུད་རྩི་གྲུབ་པའི་རྟགས་ཆེན་ནི།། བ་སྤུ་ལངས་དང་གཟི་མདངས་འབར། ཁམ་གྱི་ཟས་བྲལ་བདེ་བར་འཚོ།། ཤེས་རབ་གསལ་ཞིང་ཐོག་པ་མེད།། ཟག་པ་ཟད་ནས་ནམ་མཁའ་འགྲོ།། ཞེས་གསུངས་སོ། ། བདུད་རྩི་ཞུན་ཆེན་གྱི་བསྒྲུབ་པ་བཤད་པའོ།། དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ།། འདུས་པ་ཆེན་པོའི་རྣལ་འབྱོར་པ།། རློན་པའི་རྫས་ལ་སྨན་བསྒྲུབ་ན།། ཐམས་ཅད་གོང་མ་བཞིན་སྦྱར་ནས། ། མཎྜལ་ཐིག་ལེ་ལྔ་པ་ལ།། བཀྲ་ཤིས་དཔལ་ལྡན་ལྔ་བཞག་ནས།། གཙོ་བོ་ལྔ་དང་འབྲས་བུ་ལྔ།། རློན་པ་བཀོད་ནས་ཡི་གེས་སྦྱང།། ཏིང་འཛིན་བཟླས་པའི་མེ་སྤར་པས།། དང་པོ་རོ་འབྱུང་སྐམས་པ་དང། ། དེ་ནས་བཏགས་བཙག་གོང་མ་བཞིན།། སྦྱར་ནས་རིགས་ཀྱི་བསྙེན་པས་སྦྱང།། དེས་ནི་མཚན་མ་བྱུང་བ་དང།། དེ་བཞིན་གོང་ལྟར་ཅི་བདེར་སྤྱད།། ཅེས་གསུངས་སོ།། བདུད་རྩི་རློན་སྦྱོར་གྱི་བསྒྲུབ་པ་བཤད་པའོ། ། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས། བདུད་རྩི་སྨན་གྱི་བསྲུབ་པའི་ལེའུ་སྟེ་ཉི་ཤུ་རྩ་བཞི་པའོ།།།། དེ་ནས་སེམས་དཔའི་རྡོ་རྗེ་ཆེན་པོ་དེས།། སྒྲུབ་པ་ཐམས་ཅད་ཀྱི་སྙིང་པོ་གསང་ཆེན་ཐུགས་ཀྱི་སྒྲུབ་པ་ཞེས་བྱ་བ་འདི་བཤད་དོ། ། འདུས་པ་ཆེན་པོའི་རྣལ་འབྱོར་པ་ཐམས་ཅད་ནི་དབྱིངས་སུ་ཤེས་པར་བྱ་སྟེ། འཁོར་བའི་ཆོས་ཐམས་ཅད་ནི་དབྱིངས་སུ་འདུས་པ་ལ། མྱ་ངན་ལས་འདས་པའི་ཆོས་ཐམས་ཅད་ནི་ཡེ་ཤེས་སུ་འདུས་སོ། ། དེ་གཉིས་སུ་མེད་པ་ནི་ཆོས་ཉིད་བྱང་ཆུབ་སེམས་ཀྱི་བདེ་བ་ཆེན་པོར་འདུས་པར་ཤེས་པར་གྱིས་ཤིགདེ་བས་ན་ཆོས་ཐམས་ཅད་ནི་ཐུགས་ཡེ་ཤེས་ཀྱི་རང་བཞིན་དུ་འདུས་ཏེ་གཉིས་མེད་དོ། ། དེ་ལྟར་ན་ཀུན་རྫོབ་ཏུ་འདི་ལྟར་རིག་པར་བྱ་སྟེ་གཉིས་སུ་མེད་པའི་དོན་ལ་འཇུག་པར་བྱའོ།། འདུས་པ་ཆེན་པོའི་རྣལ་འབྱོར་པ།། དམ་པའི་དོན་གྱི་ཆོས་རྣམས་ཀུན།། ཐམས་ཅད་རང་གི་སེམས་ལ་རྫོགས། ། ཀུན་རྫོབ་ཆོས་རྣམས་གང་ཡིན་ལ།། ལུས་དང་ངག་ལ་རྫོགས་པར་བཤད།། དེས་ན་ཆོས་འདི་ཐམས་ཅད་ཀྱང།། རྩ་བར་རང་ལ་རྫོགས་པ་སྟེ།། འདི་དག་བགྲུབ་པའི་ཐབས་མཆོག་ཀྱང། ། རྣམ་པར་རྟོག་པའི་རྡུལ་བསལ་ནས།། བསྒྲུབ་པའི་རྒྱལ་པོ་ཡབ་ཡུམ་གཉིས།། དོན་ལ་མཁས་པར་བྱས་ན་ནི།། སོ་སོའི་ཐུགས་ལ་ཐིག་ལེ་དག། ཟླ་གམ་དཀར་དམར་གདབ་པར་བྱ།། དེ་ཡི་རྫས་མཆོག་ཆེན་པོ་ཡང། ། ཐབས་ཀྱིས་ག་པུར་ཆེན་པོ་དང།། ཤེས་རབ་གསང་བའི་ཙནྡན་གཉིས།། དཀར་དམར་ཟླ་གམ་ཆེན་པོར་བྱ།། ཡབ་ཀྱི་ཐུགས་ཀར་དཀར་པོ་ལ།། ཐིག་ལེ་ཁ་ནི་མར་ལྟ་བའོ། ། ཡུམ་གྱི་ཐུགས་ཀར་དམར་པོ་ལ།། ཐིག་ལེ་ཁ་ནི་ཡར་ལྟ་བའོ།། ཡབ་ཀྱི་ཐིག་ལེའི་དབུས་སུ་ནི།། དཔལ་བེའུ་དབུས་སུ་ཉི་མ་བྲི།། དབུས་སུ་ཨོཾ་གསལ་ནང་དུ་ཧཱུ~ཾ།། ཡུམ་གྱི་ཐིག་ལེའི་དབུས་སུ་ནི།། པདྨ་དབུས་སུ་ཟླ་བ་བྲི། ། དབུས་སུ་ཨ་གསལ་ནང་དུ་ཧཱུ~ཾ།། དེ་ལྟར་གསལ་བར་གྱུར་པ་ན།། ཀུན་ཏུ་བཟང་པོ་ཡབ་ཡུམ་དུ།། གཉིས་སུ་མེད་པར་བསྒྱུར་བར་བྱ།། ཏིང་འཛིན་གསལ་བར་གྱུར་པ་དང།། རང་ལས་བྱུང་བའི་བདུད་རྩི་ཡིས། ། གསང་བ་གཉིས་ཀྱི་མཆོད་པ་བྱ།། རང་ལས་བྱུང་བའི་དངོས་གྲུབ་དག། རང་ཉིད་ས་ནི་བསྟིམ་པར་བྱ།། འདི་ལྟར་སྒྲུབ་པ་གཙོར་བྱེད་ན།། བདུད་རྩིའི་ཡོ་བྱད་ཐམས་ཅད་དང།། བཅུད་ཀྱི་མཆོག་ཏུ་གྱུར་པ་རྣམས། ། ལོ་ཡི་འཚོ་བ་སྦྱར་ནས་ཀྱང།། བསྙེན་སྒྲུབ་ཡན་ལག་རྣམ་བཞི་ལས།། བསྙེན་པདག་གི་དུས་སུ་ནི།། གང་ཟག་མི་ཡི་ཟས་ལ་བརྟེན།། དེ་ཡང་ལོ་ཡི་སྐད་ཅིག་གམ།། གཉིས་དང་གསུམ་གྱི་བར་དུ་སྦྱར། ། ལོ་ཡི་སྐད་ཅིག་བར་དུ་ནི།། བདུད་རྩི་ཡོ་བྱད་རྣམས་ལ་བརྟེན།། དེ་ནས་ལོ་ཡི་སྐད་ཅིག་ནི།། གཅིག་གམ་གཉིས་ཀྱི་བར་དག་ཏུ།། རང་ལས་བྱུང་བའི་རྫས་རྣམ་ལྔས།། འཕགས་པ་མཆོད་ཅིང་རང་གི་བཟའ། ། དེས་ནི་དྲོད་ལ་གནས་པར་འགྱུར།། དྲོད་ཐོབ་གྱུར་པ་ཕན་ཆད་ནི།། ལོ་ཡི་སྐད་ཅིག་ཐང་ཅིག་གིས།། ཏིང་འཛིན་ཟས་ཀྱི་རོ་རྙེད་ནས།། ཁམ་གྱི་ཟས་དང་བྲལ་བར་འགྱུར།། དྲོད་ཆེན་རྣམས་གསུམ་རྫོགས་ནས་ནི། ། རྟགས་ཆེན་དག་ནི་ཐོབ་པར་འགྱུར།། རྟགས་ཀྱི་ཆོ་འཕྲུལ་འབྱུང་བ་ནི།། རིན་ཆེན་ཕུང་པོ་འདོད་པ་ན།། ས་རྡོ་ལ་སོགས་བྱས་ནས་འགྲུབ།། ཆུ་དང་མཁའ་ལ་འགྲོ་འདོད་ན། བརྩམས་པས་མི་འབྱིང་ཐོགས་མེད་འགྲོ། ། མེ་ཡི་ཕུང་པོ་འཇིལ་འདོད་ན།། སྡིག་པའི་མཛུབ་མོ་ཕྱར་ནས་ཀྱང།། བདེན་པའི་བསྒོ་བ་བྱས་པས་འགྲུབ།། དེ་ལ་སོགས་པ་ཐམས་ཅད་ནུས།། རྟགས་ཐོབ་ཕན་ཆད་སངས་རྒྱས་ཡིན། ། ཞེས་གསུངས་སོ།། གསང་ཆེན་ཐུགས་ཀྱི་སྒྲུབ་པ་བཤད་པའོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་རྒྱུད་ལས་བཀའ་གསང་བ་འཁོར་ལོའི་བསྒྲུབ་པའི་ལེའུ་སྟེ་ཉི་ཤུ་ལྔ་པའོ། །།། དེ་ནས་བཅོམ་ལྡན་འདས་སེམས་དཔའི་རྡོ་རྗེ་དེ་རྡོ་རྗེ་མེ་ཀློང་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ནས་འདུས་པའི་ཚོགས་ཐམས་ཅད་ཀྱིས་ཆོས་ཐམས་ཅད་མེའི་རང་བཞིན་དུ་སྣང་བར་མཐོང་ངོ། ། དེ་ནས་འཁོར་རྣམས་ཀྱིས་ཤིན་ཏུ་བསྟོད་པ། ཨེ་མའོ་སེམས་དཔའ་ཆེ་བ་ཆེ།། ཏིང་འཛིན་ཆེན་པོ་སྣང་བ་ཆེ།། ཆོ་འཕྲུལ་ཆེན་པོ་སྣ་ཚོགས་ཆེ།། ཐབས་མཆོག་ཁྱོད་ལ་ཕྱག་འཚལ་ལོ། ། ཆོས་ཀུན་མེ་ཀློང་བཞིན་དུ་སྣང།། མི་ཉི་ཡེ་ཤེས་གསལ་བའི་ཀློང།། འབར་འཕྲོ་གསལ་བར་གྱུར་པས་ནི།། མུན་བསལ་དངོས་པོ་ཐམས་ཅད་བསྲེགས།། བདེ་ཆེན་དབྱིངས་སུ་ཀུན་རྫོགས་པས། ། དཔའ་བོ་ཁྱོད་ཀྱིས་མཛད་པ་ལགས།། ཐུགས་རྗེ་ཆེན་པོ་ཨ་ལ་ལ།། དོན་གྲུབ་ཆེན་པོ་ཨ་ལ་ལ།། སྒེག་པ་ཆེན་པོ་ཨ་ལ་ལ།། འཇིགས་བྱེད་ཆེན་པོ་ཨ་ལ་ལ།། དགྱེས་པ་ཆེན་པོ་ཨ་ལ་ལ། དྲེགས་པ་ཆེན་པོ་ཨ་ལ་ལ། ། དཔའ་བོ་ཁྱོད་ཀྱི་བྱིན་བརླབས་ཀྱིས། བདག་ཅག་རྣམས་ལ་བཤད་པ་ཤོད།། མེ་ཡི་རང་བཞིན་ཆེན་པོ་དག། བདག་ཅག་རྣམས་ལ་བཤད་པར་གསོལ།། ཞེས་གསོལ་བ་བཏབ་པ་ལས།། སེམས་དཔའི་རྡོ་རྗེས་དགྱེས་ཏེ་འདི་སྐད་ཅེས་བཀའ་སྩལ་ཏོ། ། འདུས་པ་ཆེན་པོའི་རྣལ་འབྱོར་པ།། རྡོ་རྗེ་མི་ཡི་རང་བཞིན་དག། བཤད་ཀྱིས་ཁྱེད་རྣམས་གུས་པར་ཉོན།། རྡོ་རྗེ་མེ་ཡི་ལས་མཆོག་འདིས།། རྣམ་འབྱོར་ཐབས་སུ་བདེ་སྦྱར་བས། ། རྒྱལ་བ་ཀུན་མཉེས་ཀུན་བསྲེགས་སྐོངས།། དོན་གྲུབ་ལས་ཀྱི་མཆོག་ཏུ་བཤད།། སྐྱེ་མེད་རྣམ་དག་ཧོམ་ཁུང་དུ།། ཆོས་ཅན་སྐྱེ་བའི་ཡམ་ཤིང་ལ།། སྤྲོས་མེད་བྱང་ཆུབ་ཡེ་ཤེས་མེས།། མཚན་མའི་བག་ཆགས་བསྲེགས་སྦྱངས་ཐིམ། ། རྣམ་དག་བྷ་གའི་ཧོམ་ཁུང་དུ།། ཆགས་པའི་ཡམ་ཤིང་སྤུངས་པ་ལ།། བདེ་ཆེན་བྱང་ཆུབ་མེ་སྤར་ཏེ།། འཁོར་བའི་དངོས་པོ་བསྲེགས་སྦྱངས་ཐིམ།། དཔལ་ཆེན་ཞལ་གྱི་ཧོམ་ཁུང་དུ། ། ཉོན་མོངས་ལྔ་ཡི་ཡམ་ཤིང་ལ།། ཡེ་ཤེས་ལྔ་ཡི་མེ་སྦར་ཏེ།། གཟུག་འཛིན་རྫས་རྣམས་བསྲེགས་སྦྱངས་ཐིམ།། སྣང་སྲིད་ནམ་མཁའི་ཧོམ་ཁུང་དུ།། འབྱུང་བ་བཞི་ཡི་ཡམ་ཤིང་ལ།། ཕྱག་རྒྱའི་ཚོགས་ཀྱི་མེ་སྤར་ཏེ། ། སྣང་སྲིད་དངོས་པོ་བསྲེགས་སྦྱངས་ཐིམ།། ལས་བཞིའི་སོ་སོའི་ཁྱད་པར་གྱིས།། ཕྱོགས་དང་ཁ་དོག་དབྱིབས་དང་རྫས།། ཇི་ལྟར་ཡིན་པ་དེ་ལྟར་སྦྱར།། ཤར་ལྷོ་ནུབ་བྱང་དཀར་སེར་དམར།། མཐིང་ག་ནག་པོ་ཐལ་མདོག་སྦྱར། ། ཟླུམ་པོ་པདྨ་ལེའུ་ཙེ་ཞི།། འཁོར་ལོ་གྲུ་བཞི་ཟུར་བརྒྱད་རྒྱས།། ཟླ་གམ་གྲུ་ཆད་གཞི་དབྱིངས་དབང།། གྲུ་གསུམ་བྷ་ག་ཀ་མངོན་སྦྱོར།། སུམ་བརྩེ་མདངས་དང་རི་མོར་མཛེས།། ལས་ཀྱི་ཡམ་ཤིང་རྫས་ཀྱིས་རྒྱས། ། ཡེ་ཤེས་རྡོ་རྗེའི་ལས་རྒྱུད་ལྡན།། བླ་མ་གསུམ་གྱིས་ཐབས་མཆོག་སྦྱར།། དག་པའི་མཐའ་འཛིན་ཉེས་མཆོག་འཛིན། རྡོ་རྗེ་གསང་བའི་གླུ་བྲོ་གར།། མཆོད་པ་གསང་བ་དུས་ཚིགས་སྦྱོར།། རྡོ་རྗེ་ལམ་གྱི་སྨོན་ལམ་སྦྱར། ། གསང་བ་ལས་ཀྱི་རྒྱུད་ལྡན་པས།། བཤར་གདབ་ཞི་བའི་ལྷ་རྒྱུད་དང།། རྒྱས་དང་དབག་བཤར་རྒྱུད་བཤད་བས། ལྷ་དང་སྔགས་དང་ཕྱག་རྒྱ་དང།། དེ་བཞིན་རྒྱུད་དང་འབྱོར་བར་བྱ། ། རིགས་ཀྱི་ལྷ་རྒྱུད་ལྔ་རྣམས་ནི།། སོ་སོའི་རིགས་སུ་བཤར་བཏབ་སྟེ།། ཀློང་ཡངས་འཁྱིལ་བའི་ཧོམ་ཁུང་དུ།། དམ་རྫས་བདུད་རྩི་འབར་བ་ཡིས།། སྦྱང་དང་ཐོབ་ཕྱིར་བསྲེག་བྱས་འོས།། བསྲེག་རྫས་སྐྱེ་བའི་ཆོས་ཡིན་ཏེ། ། སྐྱེ་བར་སྣང་བའི་ཆོས་ཐམས་ཅད།། འདིར་ནི་དངོས་པོ་བཞིན་སྣང་སྟེ།། ཆོས་ཅན་རྐྱེན་དང་འབྱུང་ནས་དང།། རང་བཞིན་ཉིད་ལས་ཆོ་འཕྲུལ་ནི།། སྐྱེ་བ་ཉིད་དུ་འདོད་པ་ཡིན།། འདི་ནི་སྐྱེ་བའི་ཆོས་ཅན་ཏེ། ། རང་བྱུང་སྲེག་རྫས་རང་ཞིར་ཐིམ།། ཉོན་མོངས་ལྔ་ཡི་དམ་རྫས་དག། ཡེ་ཤེས་ལྔ་ཡི་ཀློང་དུ་དབུལ།། ལུང་པོ་ལྔ་ཡི་དམ་རྫས་རྣམས།། ཐབས་མཆོག་ཡབ་ལྔའི་སྐུ་ལ་བསྟིམ།། འབྱུང་ལྔས་བསྡུས་པའི་བསྲེག་རྫས་རྣམས། ། ཤེས་རབ་ཡུམ་ལྔའི་ཀློང་དུ་བསྟབས།། རྣམ་ཤེས་བརྒྱད་ཀྱི་བསྲེག་རྫས་ན།། ཡེ་ཤེས་གནས་ཀྱི་མ་བརྒྱད་དོ།། ཡུལ་གྱི་གཡེང་བ་རྣམ་པ་བརྒྱད།། དམིགས་མེད་དབྱིངས་ཀྱི་བྱེ་བྲག་བརྒྱད། ། སྐྱེ་བཞི་ལས་ཀྱི་བསྲེག་རྫས་རྣམས།། རྣམ་ཐར་སྒོ་བཞིའི་ཀློང་དུ་ཐིམ།། ཐབས་མཆོག་ལ་སོགས་རྒྱ་མཚོའི་ཚོགས།། སོ་སོའི་ཡོན་ཏན་ཐམས་ཅད་དག། རྡོ་རྗེ་གླུ་ཡིས་བརྗོད་ནས་ཀྱང།། དེ་དག་མཉེས་པའི་མཆོད་པ་བརྩམ། ། མཆོད་པ་ཐམས་ཅད་རྫོགས་པ་དང།། སྒྲིབ་བྱང་མ་བྱང་དོན་ཆེན་རྣམས།། གྲུབ་དང་གྲུབ་དོན་རྣམས་ནི།། མེ་ལ་མཁས་པས་བརྟག་པར་བྱ།། མེ་སྒྲ་གཉིས་དང་ཁ་དོག་གཉིས།། འབར་ཚུལ་གཉིས་དང་དབྱིབས་རྣམས་དྲུག། དེ་དག་ཡོངས་སུ་ཤེས་པར་བྱ།། གལ་ཏེ་མཚན་མ་མི་སྡུག་ན།། བཀྲ་མི་ཤིས་པའི་རྟགས་ཡིན་པས།། བསྲེག་སྦྱང་ཆེན་པོ་རྒྱས་པར་བྱ།། དེ་ནས་འདོད་པའི་རྟགས་བྱུང་ནས། མེ་ལ་འདོད་པའི་དངོས་གྲུབ་རྣམས། ། རྣམ་གསུམ་གག་ལྟར་གྲུབ་པ་བླང།། རོ་ཡི་རྫས་རྣམས་བསྲེག་སྦྱངས་ནས། རོ་ལ་སྔགས་ཀྱིས་བཏབ་ནས་ཀྱང།། ཤིན་ཏུ་དྲི་ཞིམ་སྣ་ཚོགས་ཀྱིས།། རོ་ལ་བྱུག་ཅིང་བཀྲུ་བར་བྱ། ། བདུད་རྩི་ཞུན་ཆེན་ཁུ་བ་ཡིས།། རས་ལ་བྱུགས་པས་རོ་དཀྲིས་ཏེ།། རོ་ཡི་གནས་རྣམས་གང་ཡིན་པར།། སྔགས་ཀྱི་སྦྱོར་བ་ཀུན་བཀོད་ནས།། ཕྱག་རྒྱའི་མཚན་མས་གདབ་པར་བྱ།། རྒྱལ་བའི་དཀྱིལ་འཁོར་གང་དག་ནི། ། གཞུང་ཡིན་པ་ཡི་ཕྱག་རྒྱ་རྣམས།། དུ་འབྱུང་བ་དང་མཉམ་པ་ཡི།། སྡོང་བུའི་གྲངས་ཀྱང་དེ་ལྟར་བྱ།། སྡོང་བུ་རེ་ལ་ལྷ་རྣམས་ཀྱི།། མ་ནོར་རྩ་བའི་སྙིང་པོ་དག། རས་ཆེན་དག་ལ་བྲིས་ཏེ་གདགས།། རོ་ཡི་སྦྱོར་བ་རྫོགས་པ་དང། ། རོ་ཡི་ཕྱི་ཤུལ་ཐམས་ཅད་ལ།། འཁོར་བའི་བག་ཆགས་ཀུན་བཀོད་དེ།། རས་སམ་ཤིང་ཤུན་ཤོག་ཤོག་ལ།། འཁོར་བའི་ས་བོན་ཐམས་ཅད་དགོད།། ཉོན་མོངས་ལྔ་དང་དུག་གསུམ་བཅས། ། སྐྱེས་པའི་ལས་ལ་རྒྱུད་དྲུག་རྣམས།། མིང་ངམ་གཟུགས་སུ་བྱས་ནས་ནི།། གནས་གནས་དག་ཏུ་དགོད་པར་བྱ།། ཁམས་དང་སྐྱེ་མཆེད་ཕུང་པོ་ལྔ།། གཟུང་འཛིན་མིང་དུ་བཅས་པ་རྣམས། ། བརྡ་ཡི་ཚུལ་དུ་བྲིས་ནས་ནི།། རོ་རྣམས་ཁྱད་པར་དགོད་པར་བྱ།། དེ་ནས་རོ་ཡི་ཕུང་པོ་དེ།། རྟེན་ནམ་གླེགས་སམ་སྟེགས་བུ་ཡི།། སྟེང་དུ་མཁས་པས་གཞག་པར་བྱ།། ཐབས་ཀྱི་ཆོ་ག་བརྩམ་པ་ནི། ། མཎྜལ་འཁོར་ཁྱུད་ཙམ་ཞིག་ལ།། དཀྱིལ་འཁོར་གང་དང་གང་ཡིན་པའི།། ཕྱག་རྒྱ་བཞུགས་པའི་ཕོ་བྲང་དག། ཐིག་གིས་ཡུལ་གཅས་སོ་སོར་བྱ།། དེ་ཡི་སྟེང་དུ་ཞིང་བརྩིགས་པ།། དབྱིབས་ནི་གྲུ་བཞི་གཏམས་པ་ལ། ། ཟུར་བཞི་ཀ་བ་བཞིས་བརྟན་བྱ། སུམ་བརྩེགས་ཡང་ཐོག་པར་ཁང་བཅས།། མཐའ་མ་ཤིང་གིས་བརྫང་བར་བྱ།། བར་ཀང་དག་གི་གླེགས་མ་ལ།། རོ་ཡི་བཞིན་ཕྱོས་ཤར་དུ་བསྟན།། རོ་ཡི་སྟེང་གི་ཁང་པ་ལ། ། རས་སམ་ཤོག་ཤོག་ལ་བྲིས་པའི།། ཕྱག་རྒྱའི་དཀྱིལ་འཁོར་གསལ་བར་དགོད།། རོ་ཁང་གློ་སྐར་བཞི་ཕྱེ་ལ།། ཐུགས་རྗེ་གཟུང་ཐག་བཞིས་བཏགས་ནས། ཕྱོགས་བཞི་བླ་མ་བཞི་ལ་དབུལ།། ཤིང་གི་ཆོ་ག་རྫོགས་པ་དང། ། ཤིང་གི་ཕྱི་མཐའ་སྟེགས་བུ་ལ།། ཕྱག་རྒྱའི་ལྷ་རྣམས་རིམ་པར་དགོད།། སྟེགས་བུ་རྫོགས་པར་གྱུར་པ་དང།། རྡོ་རྗེ་ལས་ཀྱི་སྐོས་གདབ་པ།། རྡོ་རྗེ་རྒྱལ་པོ་བླ་མ་ལ།། འཁོར་བ་བསྲེགས་པའི་མངའ་གསོལ་ཏེ། ། ཏིང་འཛིན་ཡེ་ཤེས་རྩེ་གཅིག་པས།། མེ་ཡི་འདུ་འཕྲོ་རྒྱུན་དུ་བྱ།། རྡོ་རྗེ་ལས་ཀྱི་ཀརྨ་ལ།། ལས་རྣམས་རྫོགས་པའི་མངའ་གསོལ་ཏེ།། ལས་ཀྱི་ཕྲེང་བ་རྫོགས་པར་བྱ།། རྡོ་རྗེ་ཆེན་པོའི་བླ་མ་ཞིགརོ་ཡི་ཉེས་པའི་མཐའ་བཟུང་ནས། ། ལས་ཀྱི་བསགས་པ་བགྲང་ཞིང་བཤགས།། རྡོ་རྗེ་སྟབས་སྦྱོར་བླ་མ་ཡིས།། བདུད་རྩི་སྐབས་ཀྱི་མཆོད་པ་སྦྲེང།། རྡོ་རྗེར་བྲོ་གར་གླུ་ཚིག་གིས།། སྐབས་ཀྱི་གླུ་གར་མཆོད་པ་དག། རོལ་མོས་དྲངས་ཏེ་དབུར་བར་བྱ། ། རྡོ་རྗེ་གནས་ཀྱི་སྨོན་ལམ་ནི།། སྐབས་དང་ལས་ཀྱི་མཇུག་ཏུ་གདབ།། རྡོ་རྗེ་ལས་ཀྱི་ལྟང་འཛིན་པས།། རྩ་བརྒྱད་ལས་ཀྱི་གྲངས་བཟུང་སྟེ།། དཀར་བྱང་བླ་མའི་ཕྱག་ཏུ་དབུལ།། རོ་ཡི་ལས་ངན་ལྟང་འཛིན་པས། ། གྲངས་མེད་གྲངས་སུ་བཟུང་ནས་ནི།། མཚན་མ་ནག་པོའི་བྱང་བུ་དག། ཡེ་ཤེས་མེ་ཡི་ཀློང་དུ་བསྲེག། མེ་ཡིས་སྦྱོར་བའི་ཆོ་ག་བྱ།། མེ་ཡི་ལྷ་ནི་གང་ཡིན་པ།། མེ་ཡིས་སངས་རྒྱས་སྣང་མཐའ་ཡས། ། མེ་ཡི་ལྷ་མོ་གོས་དཀར་མ།། རྒྱལ་བ་ཀུན་གྱི་འོད་མཆོག་སྟེ།། འབྱུང་བ་མེ་ལ་དབང་གྱུར་ཞིང།། ཐམས་ཅད་ཀུན་གྱི་དྲོད་བདག་ཡིན།། སྲིད་གསུམ་སྲ་པར་ཞལ་གྱིས་འཆེས།། འཁོར་བའི་སྲེག་པའི་ཕྲིན་ལས་ལ། ། ཐུག་དམ་དབང་གིས་ཡོང་མི་འདའ།། མེ་ཡི་ཆོ་ག་ཐམས་ཅད་ནི།། ཡུམ་ཆེན་དཀར་མོ་ཉིད་ལ་བསྒོ།། དེ་ནས་ཆོ་ག་ཀུན་རྫོགས་ནས།། རོ་ཡི་སྒྲིབ་པ་བྱང་མ་བྱང།། མེ་ཡི་དངོས་གྲུབ་ཐོབ་མི་ཐོབ། ། མེ་ལས་མཁས་པས་གོང་བཞིན་བརྟག། མཚན་མ་མི་སྡུག་བྱུང་བ་ན།། བསྲེག་སྦྱང་ཆོ་ག་རྒྱ་ཆེར་བྱ།། གལ་ཏེ་མགུ་ན་དངོས་གྲུབ་ཐོབ། རོ་ཡི་ཐལ་བ་ཆེན་པོ་ལ།། གཏགས་ནས་ཐལ་བའི་བདུད་རྩིར་བསྒྲུབས། ། དེས་ནི་བསོད་ནམས་ཆེན་པོ་ནི།། དཔག་ཏུ་མེད་པ་ཐོབ་པར་འགྱུར།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་མེའི་ཆོ་ག་བསྒྲུབ་པའི་ལེའུ་སྟེ་ཉི་ཤུ་རྩ་དྲུག་པའོ། །།། དེ་ནས་སེམས་དཔའི་རྡོ་རྗེ་དམ་པ་དེས་དཀྱིལ་འཁོར་ཐམས་ཅད་བྱིན་གྱིས་རློབ་པ་ཞེས་བྱ་བའི་རྡོ་རྗེ་སྔགས་ཀྱི་ཚིག་འདི་གསུངས་སོ།། སརྦ་ཏ་ཐཱ་ག་ཏ་མ་ཧཱ་ཧེ་རུ་ཀ་བཛྲ་ཙནྜ། སརྦ་དུཥྟཱཾ་ས~ཾ་ཤྲཱི་ཧེ་རུ་ཀཱཾ་ཏ་ཀ་ཧ་ན་པ་ཙ་ཧཱུ~ཾ་ཧཱུ~ཾ། ས་ས་ས་ས་ས་མ་ཡ་ས་ནུ་ནེ། ས་ནོ་རྦ་ར། བཛྲ་གརྦྷ། རཏྣ་གརྦྷ། པདྨ་གརྦྷ། ཀརྨ་གརྦྷ། མཻ་ཏྲི་གརྦྷ། ཀཱ་རུ་ཎ་གརྦྷ། ལོ་ཀ་གརྦྷ། བུ་དུ་མ་གརྦྷ། ཡཀྵ། རཱཀྵ་ས། བི་ཤྭ། ཏེ་ཤྭ། ཀེ་ཤྭ། བ་ཤྭ། བི་ཤྭ། ཏྲཀྴ། ཧྲི་ཤྭ། བཀྵྭ། རུ་ཏི། རཀྟི། ཁཱ་ཧི། ས་ཧ། ས་ས་ས་ས་ས་ས་ས། ས་ས་ས་ས་ས་ས་ས། ས་ས་ས་ས་ས་ས་ས། ས་ས་ས་ས་ས་ས་ས། རྦ་རྦ་རྦ་རྦ་རྦ་རྦ་རྦ། རྦ་རྦ་རྦ་རྦ་རྦ་རྦ་རྦ། རྦ་རྦ་རྦ་རྦ་རྦ་རྦ་རྦ། རྦ་རྦ་རྦ་རྦ་རྦ་རྦ་རྦ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ག་ག་ག་ག་ག་ག་གག་ག་ག་ག་ག་ག་གག་ག་ག་ག་ག་ག་གག་ག་ག་ག་ག་ག་གཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། མ་མ་མ་མ་མ་མ་མ། མ་མ་མ་མ་མ་མ་མ། མ་མ་མ་མ་མ་མ་མ། མ་མ་མ་མ་མ་མ་མ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཧེ་ཧེ་ཧེ་ཧེ་ཧེ་ཧེ་ཧེ། ཧེ་ཧེ་ཧེ་ཧེ་ཧེ་ཧེ་ཧེ། ཧེ་ཧེ་ཧེ་ཧེ་ཧེ་ཧེ་ཧེ། ཧེ་ཧེ་ཧེ་ཧེ་ཧེ་ཧེ་ཧེ། རུ་རུ་རུ་རུ་རུ་རུ་རུ། རུ་རུ་རུ་རུ་རུ་རུ་རུ། རུ་རུ་རུ་རུ་རུ་རུ་རུ། རུ་རུ་རུ་རུ་རུ་རུ་རུ། ཀ་ཀ་ཀ་ཀ་ཀ་ཀ་ཀཀ་ཀ་ཀ་ཀ་ཀ་ཀ་ཀཀ་ཀ་ཀ་ཀ་ཀ་ཀ་ཀཀ་ཀ་ཀ་ཀ་ཀ་ཀ་ཀ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ། ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ། ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ། ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། རི་རི་རི་རི་རི་རི་རི། རི་རི་རི་རི་རི་རི་རི། རི་རི་རི་རི་རི་རི་རི། རི་རི་རི་རི་རི་རི་རི། ཁ་ཁ་ཁ་ཁ་ཁ་ཁ་ཁ། ཁ་ཁ་ཁ་ཁ་ཁ་ཁ་ཁ། ཁ་ཁ་ཁ་ཁ་ཁ་ཁ་ཁ། ཁ་ཁ་ཁ་ཁ་ཁ་ཁ་ཁ། མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ། མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ། མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ། མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ་མུ~ཾ། བ་བ་བ་བ་བ་བ་བ་བ། ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ། གཽ་རཱི། ཙཽ་རཱི། པྲ་མོ་ཧཱ། བེ་ཏཱ་ལཱི། གྷསྨ་རཱི། པུཀྐ་སཱི། སྨ་ཤཱའ་ནཱི། ཙནྜ་ལཱི། ཧ་ཧ་ཧ་ཧ་ཧ་ཧ་ཧ། སིངྷ། བྱཱ་གྷྲྀ། སྲིཾ་ག་ལ། ཤྭ་ན། ཀྲྀཌྷ། ཀཱངྐ། ཁ་གཱུ་ལུ། མུ་མུ་མུ་མུ་མུ་མུ་མུ་མུ། ཁ་ཁ་ཁ་ཁ་ཁ་ཁ་ཁ་ཁ། ཧེ་ཧེ་ཧེ་ཧེ་ཧེ་ཧེ་ཧ་ཧཻ། བ་བ་བ་བ། ཛྲ་ཛྲ་ཛྲ་ཛྲ། ཕཊ་ཕཊ་ཕཊ་ཕཊ། ཛཿཧཱུ~ཾ་བ~ཾ་ཧོཿ། ཨཱརྱ་ཏེ་ཙ་ཏེ་ད་ཛཿཔཱ་ཤ~ཾ་ཧཱུ~ཾ། ལོ་ཀ་བ~ཾ། བྷསྨི་ཡ་ཏི་ཧོཿབ་བ་བ་བ་བ་བ་བ་བ་བ་བ། ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ། ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ། དྷ་དྷ་དྷ་དྷ་དྷ་དྷ་དྷ་དྷ་དྷ་དྷ། ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ་ཧཱུ~ཾ། མཎ་མཎ་མཎ་མཎ་མཎ། ཌ་ཌ་ཌ་ཌ་ཌ། ལ་ལ་ལ་ལ་ལ། ཨེ་གརྦྷ། ཡ~ཾ་ཀརྨ། ར་རཀྟ། བ~ཾ་སྣིགྡྷ། ར~ཾ་ཛྭ་ལ། ཀེཾ་རུ་དྷིཿ། བྷྲུ~ཾ་ཛྙཱ་ན། པ~ཾ་བནྡྷ། ཧ་ཀ་པཱ་ལ། ཛྙཱ་ན་པརྦ་རཾ། བུདྡྷ་ཀཱ་ཡ། མ་ཧཱ་ཝ་ཀབཛྲ་ཙིཏྟ། ཛཿཧཱུ~ཾ་བ~ཾ་ཧོ། ཨེ་ཧྱེ་ཧི། རུ་ལུ་རུ་ལུ་ཧཱུ~ཾ་བྷྱོ་ཛཿཛཿ། བཛྲ་ས་མ་ཡ་མུ་དྲ་ཧཱུ~ཾ་ཨཱཿབཛྲ་ཤྲཱི་ཧེ་རུ་ཀ། ཏིཥྛ་ས་མ་ཡ་ལྷན། མ་ཧཱ་ཤྲཱི་ཧེ་རུ་ཀ་ཧ་ཧ་ཧམ། ས་མ་ཡ་ཧོཿཕཊ། བཛྲ་ཨཱ་ར་ལི་ཕཊ། ཨ་ཏི་པུ་ཧོ། པྲ་ཏི་པུ་ཧོ།། ཨི་དྷ~ཾ་པུཥྤེ་དྷུ་པ། བ་ལི། ཏི་ཛ་ཧོ། ཁ་ར~ཾ་ཁཱ་ཧི། མ་ཧཱ་རཀྟ། རུ་དྷི་སྣིགྡྷ། པཉྩ་ཨ་མྲྀ་ཏ། ཙིཏྟ། བཱ་སུ་ཏ། གོ་རོ་ཙ་ན། ཌཱ་ཀི་ནཱ། ཡོ་གི་ནི་མ་ཧཱ་ཙིཏྟ། ཁ་ར~ཾ་ཁཱ་ཧི། ཁ་ཁ་ལེ། ཤ་ཏ་པ་ཁཱ་ཧི། ཨ་ལ་ལ་ཧོ། ས་མ་ཡ་ཧོཿི་དན་དེ་ནཱ་ར་ཀཱན། ཨི་ཙི་ར་ས་མ་ཡ་ཕཊ། བཛྲ་ས་མ་ཡ་ཨ་བེ་ཤ་ཨཱཿཱཿ། ཞེས་གསུངས་པས་ལས་ཀྱི་འབར་བའི་ཆོ་ག་ཞེས་ཐམས་ཅད་ཤིན་ཏུ་འབར་ཞིང་རྒྱས་པར་གྱུར་ཏོ། ། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་གསང་སྔགས་ཀྱི་ལེའུ་ཉི་ཤུ་རྩ་བདུན་པའོ།།།། དེ་ནས་ཡང་སེམས་དཔའི་རྡོ་རྗེ་དེས་སྒྱུར་བ་ཕྱག་རྒྱའི་ལེའུ་འདི་རྒྱ་ཆེར་གསུངས་སོ། ། རྣལ་འབྱོར་མཆོག་གི་ལག་གཉིས་ལ།། ཉི་ཟླ་འབར་བའི་ལིངྒར་ནི།། ཨ་དང་པདྨ་གཉིས་གསལ་ཏེ།། ཐབས་དང་ཤེས་རབ་གཉིས་མེད་སྦྱར།། མཉམ་པའི་ཚུལ་གྱིས་གནས་པ་ལ། མེ་ཡི་སྟེང་དུ་ཨ་ཉིད་གཞག། བྱ་བ་ཐམས་ཅད་བྲལ་བའི་རྒྱ།། ཨ་དང་མ་ཡི་འབྲུ་བཅུ་རྣམས།། འཕྲོ་འདུ་བྱ་ཞིང་ཀུན་ཏུ་བསྒྱུར།། གཡས་སུ་འཁྱིལ་ཅིང་གཡོན་དུ་འཁྱུད།། འདི་ནི་ཆོ་འཕྲུལ་དབྱུང་བའི་རྒྱ། ། ཨ་དང་མ་ཡི་འབྲུ་རྣམས་བཅུ།། སོ་སོར་བཅངས་ཏེ་མྱུ་གུར་བྱ།། ཤིན་ཏུ་བསྟོད་དེ་ཀུན་དུ་བསྒྱུར།། འདི་ནི་སྙིང་པོར་གྱུར་པའི་རྒྱུ།། མ་ཡིས་སྦྱིན་པ་གཏོང་ཚུལ་ལ།། ཨ་ཡིས་ཐམས་ཅད་སྐྱོབ་བྱེད་པ།། འདི་ནི་ཚད་མེད་ཆེན་པོའོ། ། ཀུན་ལ་སྙོམས་པའི་ཕྱག་རྒྱ་ཡིན།། མ་ཉིད་ཁྲག་འཕྲོག་པ་ཡི་སྣོད།། ཨ་ཉིད་སོ་ཕྲེང་མཆེ་བར་སྦྱར།། འདི་ནི་ཐམས་ཅད་རོལ་པ་ཡི།། འཇིགས་ཚུལ་སྟོན་པའི་ཕྱག་རྒྱ་ཡིན།། ཨ་དང་མ་གཉིས་གཏིང་སྦྱར་ཏེ། ། སོ་ཕྲེང་མཆེ་བའི་ཚུལ་གྱིས་ནི།། ཤིན་ཏུ་ཁ་གླན་བ་ཡི་ཚུལ།། འདི་ནི་འཇིགས་བྱེད་ཆེན་པོའོ་རྒྱ།། མ་ཡིས་བཟུང་སྟེ་འཐེན་ནས་ནི།། ཤ་ཡིས་གདེངས་ཤིང་འཇོམས་བྱེད་པ།། འཇོམས་བྱེད་ཆེན་པོའི་ཕྱག་རྒྱ་ཡིན། ། མ་དང་ཨ་ཡིས་མགོ་འཇུག་ནས།། བཟུང་བའི་ཚུལ་དུ་བྱས་ནས་ནི།། ཁ་ཡིག་དྲང་ཅིང་འཐེན་བྱེད་པ།། ས་བྱེད་ཆེན་པའི་ཕྱག་རྒྱ་ཡིན།། ཨ་དང་མ་ཡི་ཤེས་རབ་ལས།། གཡས་གཡོན་ཚུལ་གྱིས་བསྒྱུར་བྱས་ཏེ། ། སོ་སོ་ཇི་ལྟར་ཡིན་ཐབས་སྦྱར།། གནས་དང་ཡུལ་གྱི་གཏན་ཚིགས་སུ།། བསྒྱུར་བ་གར་གྱི་ཕྱག་རྒྱར་བཤད།། དཔའ་བོ་གདན་ལ་བཞེངས་ནས་ནི།། ཕྱོགས་མཚམས་ཀུན་ཏུ་བལྟས་བྱས་ནས། ། ཤིན་ཏུ་འགྱིང་ཞིང་བརྗིད་པར་བྱེད།། ཨ་དང་མ་ཡི་འབྲུ་རྣམས་ནི།། སོ་སོར་བརྡབས་ནས་དཀུར་བརྟེན་བྱ།། འགྱོང་བའི་ཚུལ་གྱིས་སྦྱང་བྱས་ནས།། སྟག་གི་སྟབས་ཀྱིས་ཀུན་ཏུ་བསྐོར།། དེ་ནས་རྨུན་བྱ་སྟབས་ཀྱིས་ནི། ། གོང་མ་བཞིན་དུ་བསྐོར་བར་བྱ།། དེ་བཞིན་རུས་སྦལ་གཟིགས་དང་སྟག། སྤྱང་ཀི་སེང་གེ་དམ་སྟབས་དང།། ཕལ་ཆེན་དྲེང་ཀྱི་སྟབས་ཀྱིས་ནི།། ཐམས་ཅད་ཐམས་ཅད་བསྐོར་བར་བྱ།། དེ་བཞིན་འདབ་ཆགས་ཐམས་ཅད་ཀྱིས། ། འཇོ་ཚུལ་སྟབས་རྣམ་རྫོགས་བྱས་ནས།། དཀྱིལ་འཁོར་ཐམས་ཅད་རྫོགས་པར་འགྱུར།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་སྒྱུར་བ་ཕྱག་རྒྱའི་ལེའུ་སྟེ་ཉི་ཤུ་རྩ་བརྒྱད་པའོ། །།། དེ་ནས་སེམས་དཔའི་རྡོ་རྗེ་དེས་མཆོད་པ་དམ་པ་གསང་བའི་ལེའུ་འདི་གསུངས་སོ།། ཧཱུ~ཾ་འབྱུང་བ་ཆེན་པོ་ནམ་མཁའ་ནི།། འབྱུང་བ་ཆེན་པོ་ལྔ་ཡི་མཛོད།། ནམ་མཁའ་ལས་ནི་འདོད་པ་འབྱུང། ། འདོད་པའི་མཆོད་པ་འགྱུར་གྱུར་ཅིག། ཟླ་རྒྱས་ལ་སོགས་སྙིང་པོ་མཆོག། མཾ་ས་ལ་སོགས་རྣམ་ལྔའི་རྫས།། མེ་ཏོག་ལ་སོགས་ཙནྡན་ཕྲེང།། སྣ་ཚོགས་མཆོད་པ་འབྱུང་གྱུར་ཅིག། མི་མོ་རྣམས་ཀྱི་རེག་བྱ་མཆོག། འཁྲིལ་འཁྱུག་སྒྱུར་བའི་གཟུང་ཆེན་མ།། དབང་པོ་སྦྱོར་བའི་དགྱེས་མཆོད་དེ།། བདེ་བའི་མཆོད་པས་ཚིམ་གྱུར་ཅིག། རྡོ་རྗེ་རོལ་པས་ཚོགས་མཆོག་འདི། མཆོད་སྤྲིན་ཀུན་ཏུ་རྒྱས་གྱུར་ཅིག། དུག་གསུམ་བརྩིགས་པའི་རི་བོ་འདི།། སྐུ་གསུང་ཐུགས་ཀྱི་ཀློང་དུ་བསྟབས།། དུག་ལྔ་རོལ་པའི་ཚོགས་མཆོག་འདི།། ཡེ་ཤེས་ལྔ་ཡི་ནང་དུ་ཐིམ།། གཟུང་འཛིན་རྟོག་པའི་མཚམ་མ་འདི།། དབྱིངས་དང་ཡེ་ཤེས་ཀློང་དུ་ཐིམ། ། འཁོར་བ་མཚན་མའི་ཆོས་ཅན་འདི།། ཆོས་ཉིད་དབྱིངས་ཀྱི་ངང་དུ་ཐིམ།། ཕུང་པོ་ཚོགས་ཀྱི་ཡན་ལག་འདི།། རྣམ་གྲོལ་ཕུང་པོ་ལྔ་ཏུ་ཐིམ།། འབྱུང་ཆེན་རྒྱུ་ཡི་མཚན་མ་འདི།། མཁའ་ཀློང་འབར་བ་ལྔ་རུ་ཐིམ། ། རོལ་པ་ཆེན་པོ་མཆོད་སྦྱིན་ལ།། རྒྱལ་བ་རྒྱ་མཚོའི་ཚོགས་རྣམས་རོལ།། བླ་མེད་སྟན་འགན་མཆོད་པ་འདི།། སྔོན་ཆད་རྒྱལ་བས་བགྲོད་པའི་ལམ།། དུག་གསུམ་གཏིང་ནས་གསོད་པའི་ཐབས། ། སྔོན་གྱི་ཐུགས་དམ་བཞིན་དུ་བཞེས།། འཆི་མེད་བདུད་རྩི་གཡུང་དྲུང་ཆུ།། རོ་ཡི་ཁམས་རྣམས་སློང་བར་བྱེད།། དུག་གི་ཕུང་པོ་འཇོམས་བྱེད་པ།། རྩི་མཆོག་སྨན་གྱི་མཆོད་པ་བཞེས།། ཞེས་མཆོད་པའི་ཚོགས་རྣམས་ལོང་ལོང་ཕྱད་པར་གྱུར་བར་རྒྱལ་བ་རྒྱ་མཚོའི་ཚོགས་ལོངས་སྤྱོད་དེས་མཉེས་པར་གྱུར་ཏོ། ། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མཆོད་པ་དམ་པ་གསང་བའི་ལེའུ་སྟེ་ཉི་ཤུ་རྩ་དགུ་པའོ། །།། དེ་ནས་སེམས་དཔའི་རྡོ་རྗེ་དེས་རྡོ་རྗེ་གླུའི་ལེའུ་འདི་གསུངས་སོ།། འདིར་ནི་རྡོ་རྗེ་རྣལ་འབྱོར་རྣམས།། བསྙེན་པར་སྣང་བའི་དབང་ཐོབ་ནས།། བསྒོམ་དབྱངས་ཡི་གེ་འབྲུ་བརྒྱད་སྤྲོ། ། ཡི་གེ་གླུ་ཡི་རྒྱན་ཡིན་ཏེ།། གླུ་ཡི་ཡེ་གེ་བཅུ་དྲུག་ལས།། ཡི་གེ་ཡན་ལག་བསྒྱུར་བསྡེབས་ནས། གླུ་ཡི་བྱེ་བྲག་བསམ་མི་ཁྱབ།། དང་པོར་གླུ་ཡི་དོན་བྱུང་བ།། ཨོཾ་གྱིས་གླུ་རྣམས་རབ་ཏུ་འདྲེན།། ཨོཾ་ཡང་ཨ་ཡི་ཆོ་འཕྲུལ་ཏེ། ། ཨ་ནི་ཆོས་ཀྱི་ཡི་གེ་ཡིན།། ཨ་ལས་ཨོཾ་བྱུང་རྒྱལ་བའི་ཐུགས།། རྒྱལ་བ་ཆོས་ཀྱི་དབྱིངས་ལས་བྱུང།། ཨ་ལས་ཨཾ་བྱུང་གསུང་གི་མཆོག། གསུང་ལས་གླུ་ཡི་ཡན་ལག་འབྱུང།། དབྱངས་ཀྱི་ཡན་ལག་དྲུག་ཅུར་གྲགས། ། གླུ་ཡི་ཡོན་ཏན་བསམ་མི་ཁྱབ།། སྔོན་གྱི་རྒྱལ་བ་གླུ་ཡིས་གྲུབ།། རིག་འཛིན་རྡོ་རྗེ་གླུ་ཡིས་འདྲེན།། རྣལ་འབྱོར་དབང་ཕྱུག་གླུ་ཡིས་འགྲུབ།། བསྟན་པ་རྒྱ་མཚོ་གླུ་ཡིས་སྤེལ།། སྲིད་པའི་བུ་མོ་གླུ་ཡིས་བསྟེན། ། བདུད་དང་སྲིན་པོ་གླུ་ཡིས་འདུལ།། དངོས་གྲུབ་རྒྱ་མཚོ་གླུ་ཡིས་འབེབས།། ཆོས་ཉིད་དབྱིངས་ཀྱི་ཀློང་དཀྱིལ་ན།། དཔལ་བེའུ་ཉི་མ་དགུ་ཤར་བས།། རྣམ་ཐར་སྒོ་བཞི་རབ་གསལ་ཡང།། མ་རིག་མུན་གནག་འཐིབས་པ་ཡིས། ། བསྒྲུབས་པར་རིག་པའི་སྒོམ་མོ་བྱ།། འཁོར་བའི་མུན་གནག་གོང་རུམ་ན།། བྱང་ཆུབ་སེམས་ཀྱི་ཟླ་ཤར་བས།། མུན་བསལ་རྣམ་ཐར་སྒོ་བཞིར་སྣང།། རིན་ཆེ་འབར་བའི་ཉི་མ་རྣམས། ། དཔལ་ཆེན་ཐུགས་ནས་འོད་ཤར་བས།། བག་ཆགས་སྤྲིན་མཐོང་བྱེད་པ་རུ།། རྣལ་འབྱོར་ཐུགས་ཀར་ཟེར་བབ་པས།། མུན་བསལ་རིག་པའི་སྒོ་ཕྱེ་སྟེ།། རྣལ་འབྱོར་དོན་ལ་འཇུག་པར་བྱ།། རིག་པ་ཐུགས་ཀྱི་དཀྱིལ་འཁོར་ནས། ། རུ་ལུའི་འོད་ཟེར་སྒོ་ཕྱེ་བས།། སྤྲོས་པས་ཆོ་འཕྲུལ་སྣ་ཚོགས་འབྱུང།། སྲིད་པ་གསུམ་གྱི་བྱེ་བྲག་ཕྱེད།། འཁོར་བའི་རྒྱ་མཚོ་གཏིང་ནས་སྐེམས།། ཉོན་མོངས་རྒྱུ་དྲུག་གནས་ནས་སྒྲོལ།། དུག་གསུམ་རྩ་བ་རྩད་ནས་གཅོད། ། བདུད་དང་སྲིན་པོ་གདུག་པ་འདུལ། བྱིན་བརླབས་དངོས་གྲུབ་ཆར་ལྟར་འབེབས།། ཇི་ལྟར་དབང་པོའི་སྒོ་ཕྱེ་ནས།། འཛུམ་མདངས་གསལ་བར་འབྱུང་བ་ལྟར།། དཔལ་བེའུ་ཐུགས་ཀྱི་སྒོ་ཕྱེ་བས། ། རུ་ལུའི་འོད་ཟེར་ཡིག་འབྲུ་ཤར།། མཐིང་ནག་སེར་ནག་དམག་ནག་ལྗང།། སྨུག་ནག་འབར་བའི་ཡིག་འབྲུ་རྣམས།། ཡི་གེ་རིགས་ཀྱི་ཕྲེང་བར་དྲང།། རྒྱངས་ཀྱིས་བསྐུལ་དང་དཀར་གྱིས་དབབ། ། བསྟེན་ཀོས་ཉེ་བར་གྱུར་པ་ལ།། འཇིམ་གོས་མངོན་སུམ་གསལ་བར་བྱ།། འབིར་ཀྭས་གཉིས་སུ་མེད་པ་ལ།། འདྲེན་ཀོས་ཡི་གེའི་ཕྲེང་བ་དྲང།། དེ་ཉིད་ལ་ནི་གླུ་དྲུག་སྟེ།། ཤ་ཏ་པ་དང་གར་ཏ་པ། ཅང་ཀ་དེའུ་དང་བང་ཀ་དེའུ། ། བྲེང་ངེ་བ་དང་རུང་ངེ་བ།། གླུ་ཡི་ཡན་ལག་སུམ་བརྒྱས་ནི།། རྒྱལ་བ་མཉེས་པའི་མཆོག་ཏུ་འགྱུར།། གླུ་ཡི་རྒྱལ་པོ་འདི་དྲུག་གིས།། དོན་དྲུག་ཡོངས་སུ་རྫོགས་པར་འགྱུར།། ཤ་ཏ་པ་ཡི་གླུ་བླང་པས། ། གདུག་བྱེད་ཐམས་ཅད་སྤ་ཡང་བཀོད།། གར་ཏ་པ་ཡི་གླུ་བླངས་པས།། གནོད་བྱེད་ཐམས་ཅད་རྡུལ་དུ་རློག། ཅང་ཀ་དེའུ་ཡི་གླུ་བླངས་པས།། འབར་བའི་དཀྱིལ་འཁོར་མེ་ལྟར་མཆོད།། བང་ཀ་དེའུ་ཡི་གླུ་བླངས་པས། ། དྲག་པོ་གཏུམ་པོ་ལྷན་ནེ་འགྱུར།། བྲེང་ངེ་བ་ཡི་གླུ་བླངས་པས།། སྤྲུལ་པའི་ཆོ་འཕྲུལ་ཐམས་ཅད་འགྱེད།། དུང་ངེ་བ་ཡི་གླུ་བླངས་པས།། སྲིད་པའི་བུ་མོ་དབང་དུ་སྡུད།། ཡི་གེ་འབྲུ་དགུའི་རང་བཞིན་ལ། ། ཕྱག་རྒྱའི་དཀྱིལ་འཁོར་ཐམས་ཅད་རྫོགས།། དེ་བཞིན་འཁོར་ལོ་མུ་ཁྱུད་བཅས།། ཁྱམས་དང་སྒོ་ཁྱུད་གསལ་བའོ།། སྲིད་པ་མཐོང་ཡོད་སྣང་གྲགས་ཀྱང།། ཐམས་ཅད་སྔགས་ཀྱི་ཚིག་ཏུ་རྫོགས། ། ཡི་གེ་རྒྱལ་བ་ཀུན་དང་བྲལ།། འཁོར་ལོའི་ས་ལ་ཉེ་བའོ།། ཡི་གེས་དམིགས་པཐམས་ཅད་འགྲུབ།། ཆགས་མེད་ལྷུན་གྲུབ་དོན་པོ་ཆེ།། རྣམ་བཞི་ལས་ཀྱི་ཁྱད་པར་ཡང། བྱ་བ་མེད་པར་དོན་དུ་འགྱུར།། ཡོ་གེ་གསང་བའི་འཕྲོ་འདུ་ཡིས། ། རྒྱལ་བ་དཔའ་བོ་ཐམས་ཅད་མཉེས།། དེ་ཀུན་ཡི་གེས་རྣམ་སྤྲུལ་ཡང།། རང་བཞིན་དངོས་མེད་ཆོས་ཀྱི་དབྱིངས།། ཡིག་འབྲུ་འབར་བའི་ཆོ་འཕྲུལ་ལས།། དམ་པའི་ངོ་མཚར་སྣ་ཚོགས་འབྱུང། ། དེ་བཞིན་སྒྲིབ་པའི་བུད་ཤིང་བསྲེག། གཏི་མུག་མུན་སེལ་ཡེ་ཤེས་འབར།། རིག་པའི་ཉི་མ་གསལ་བར་འབེབས།། བདག་ཉིད་དཔལ་ཆེན་འབར་བའི་ཐུགས། ཙིཏྟ་དཔའ་བེའུ་ཟུར་བརྒྱད་འབར། ། རིན་ཆེན་ཡི་གེ་འབྲུ་བརྒྱད་གསལ།། དཔལ་ཆེན་རིན་ཆེན་འབར་བའི་ཐུགས།། དཔལ་བེའུ་སྨུན་པོ་ཟུར་བརྒྱད་ལས།། གསེར་གྱི་ཉི་མ་དགུ་ཤར་བ།། འོད་ཟེར་རུ་ལུ་ཡིག་འབྲུ་བརྒྱད།། རྡོ་རྗེ་འབར་བའི་རླིང་སྒྲོམ་དུ། ཤིན་ཏུ་འབར་འཕྲོ་འཁྲུག་བྱས་ཏེ།། སྤྲོས་པས་རྣམ་འབྱོར་དབང་ཕྱུག་གི། ན་ས་གཡས་སུ་དྲང་བར་བྱ།། བོ་རོ་ཙ་ནའི་གཞལ་ཡས་སུ།། སེན་ཟླུམ་ཙམ་གྱི་རྒྱ་ཁྱོན་ལ། གསེར་གྱི་ཉི་མ་གའུ་དགུ། ཤར་བའི་དཀྱིལ་ན་ཡིག་འབྲུ་དགུ། ། གསལ་བས་འོད་ཀྱི་གཞལ་ཡས་ཁང།། དངོས་པོའི་བག་ཆགས་ཀུན་བསྲེགས་ཏེ།། སེམས་ནི་གསེར་ཆུ་ཞུམ་མ་བཞིན།། ལྟེམ་ལ་འཚེ་ཞིང་འོད་འབར་བ།། རྩལ་ལས་གྱུར་པའི་ཟླ་དཀྱིལ་འཁོར། ། ཉི་མའི་སྟེང་ན་དཔའ་བེའུ་འབར།། དེ་ལ་རུ་ལུ་འཕྲོ་ཞིང་འདུ།། དཔལ་བེའི་ཙིཏྟ་དཀྱིལ་འཁོར་འདི།། ཡིག་འབྲུ་འབར་བའི་གའུར་གསལ།། པདྨ་འབར་བའི་གའུ་འདི།། ཡི་གེ་ཕྲེང་བ་འཁྱིལ་བའི་གནས། ། དཔེར་ན་མེ་ཏོག་འབར་བ་ལས།། བཅུད་ལེན་བུང་བས་བཅུད་བླང་ཏེ།། རྩི་ཡི་བུར་བུ་སོག་པ་ལྟར།། དཔལ་བེའུ་ཐུགས་ཀྱི་དཀྱིལ་འཁོར་ནས།། རིན་ཆེན་འོད་ཀྱི་མེ་ཏོག་འབར།། རུ་ལུའི་ཡིག་འབྲུ་བཅུད་ཀྱིས་རྒྱས། ། རྣལ་འབྱོར་སེམས་ལས་བྱས་པ་ཡི།། བཅུད་འབྱིན་བུང་མ་མང་པོ་འཕྲོ།། ཕར་ལྡིང་ཡི་གེའི་བཅུད་ཕྱུང་ནས།། ཚུར་ལྡིང་སེམས་ཀྱི་གའུར་བསྟིམ།། དང་པོ་ཤེལ་གྱི་ཁ་དོག་ལ།། ཤིན་ཏུ་གསལ་ཞིང་འཚེར་འབར་བ། ། གནས་དུག་དག་ཏུ་ཟླ་བ་ཡི།། ཐིག་ལེ་དཀྱིལ་གྱི་དཔའ་བེའུ་ལ།། འབྲུ་བཀོད་གསལ་བར་གྱུར་པ་དང།། ཤེལ་གྱི་བུང་བ་མང་པོ་དག། ཁྱུང་ཆེན་དིང་བའི་བོང་ཚོད་ཙམ།། ཕར་ལྡིང་བཅུད་ཕྱུང་ཚུད་གསིབས་པས། ། ཡིག་འབྲུ་ཡེ་ཤེས་མེ་འབར་བས།། བག་ཆགས་བུད་ཤིང་ཕུང་པོ་བསྲེགས།། ཕར་སྤྲོས་ཐུགས་རྗེས་ས་ལ་བསྐུལ།། ཇི་ལྟར་ཉི་ཟེར་ཚ་ཚ་ལྟར།། རྒྱུན་མི་འཆད་པ་རྩེ་གཅིག་འབར། ། བར་དུ་བྱི་རུའི་ཁ་དོག་ལ།། གོང་མ་བཞིན་དུ་བཀོད་གསལ་ལ།། བྱི་རུ་བུང་བ་མང་པོ་དང།། གོང་བ་བཞིན་དུ་འཕུར་ལྡིང་བས།། བཅུད་ཕྱུང་བསྟིམས་ཞིང་སླར་ལ་འཕྲོ།། ཇི་ལྟར་མེ་འགལ་འཁོར་ཚུལ་དུ། ། དཔལ་བེའུ་སྨུག་པོའི་ཀློང་སུ་བསྟིམ།། ཀུན་གྱི་ཐ་མར་བསྡུ་བ་ནི།། བཀོད་པ་གོང་མ་ཐམས་ཅད་ཀུན།། མཐིང་ནག་འབར་བ་བསྒྱུར་ནས་ནི།། ཁྱུང་ཆེན་གཟན་ལ་འཇུགས་ཚོད་ཙམ།། ཧཱུ~ཾ་སྒྲ་འབྱིན་ཅིང་ཕན་ཚུལ་ལྡིང། ། རུ་ལུ་བཅུད་འབྱིན་དངོས་གྲུབ་རློམ།། དྲན་པའི་དཀྱིལ་མས་ཛ་ཕྱུང་སྟེ།། ལྕགས་ཀླུ་འབར་བ་གའུར་བཅས།། དཔལ་བེའི་དཀྱིལ་ན་སྤུངས་པ་ཡིས།། རུ་ལུ་རིན་ཆེན་ཕུང་པོ་དག། བསྡུས་ཤིང་དྲངས་ཏེ་གནས་སུ་བསྟིམ། ། འབབ་པའི་ཤུགས་སམ་བྱིན་བརླབས་ནི།། མཚོ་ལ་སེར་ཆེན་འདྲིལ་ལྟར་རོ།། འདི་ལྟ་ཡི་གེ་སྦྱར་བའི་ཚེ།། རྣལ་འབྱོར་ཉག་གཅིག་མ་ཡིན་གྱི།། ལྷ་མཆོག་དབྱིངས་ན་བཞུགས་པ་ཡང།། ཆོས་ཉིད་དང་དུ་མི་དམིགས་ཀྱང། ། རྣལ་འབྱོར་མཆོག་གི་བསྐུལ་བའི་ཚེ།། ཐུགས་རྗེ་ཆགས་པའི་དམངས་ཕྱུང་ནས།། སྲོག་རྩོལ་དྲན་རིག་གསུང་གསུངས་ལྟར།། མགུར་ཆུ་ཡན་ལག་འགུལ་འགུལ་ལྟར།། རྡོ་རྗེ་ཡི་གེར་འབྲུ་འབར་ལྟར། ། གུག་སྐྱེད་ཀླད་ཀོ་ཚེག་བར་ཕྱིན།། ར་རི་ཁལ་ཁོལ་སྒྲིབ་མེད་པ།། ཡེ་ཤེས་དོན་ལ་མཁྱེན་རིག་རྒྱས།། དེ་ལྟ་མོད་ཀྱང་འདུལ་དབང་གིས།། རྒྱལ་བ་སྐུལ་བའི་ས་ལ་གཞེས།། རྣལ་འབྱོར་གསོ་བའི་ཆོ་ག་བྱེད། ། ལྷ་དང་གཅིག་གུ་བྱ་བའི་ཕྱིར།། བཟླས་བརྗོད་གངས་དང་བསྙེན་པ་དང། སྦྱོར་བས་དོན་ལ་ཉེ་བར་འགྱུར།། འདི་ལྟར་སྟོར་བའི་དུས་དག་ན།། བྱིན་བརླབས་ཕེལ་སམ་ཉེ་བ་ཡི།། རྟགས་སམ་དྲོད་དམ་མཚན་མ་ནི། ། རྣལ་འབྱོར་ཉིད་དང་བསྒྲུབ་རྫས་དང། ཡོད་མཐོང་སྒྲ་ཐོས་ཀུན་ལ་འབྱུང།། ལུས་ཀྱི་དྲོད་དང་རྨི་ལམ་དང།། སེམས་ཀྱི་རྟགས་སུ་གསལ་བ་དང།། དབུགས་དག་ལ་ཡང་ངེས་པར་འབྱུང།། ཤིང་བལ་ལྟ་བུར་ཡང་པ་དང། མི་བདེའི་གནོད་པ་བྲལ་བ་ཡིན།། རེག་པ་ཏིང་འཛིན་གསལ་བ་དག། རྨི་ལམ་དུ་ཡང་མྱོས་པར་འགྱུར།། དང་ཞིང་དག་ལ་མགུ་བ་སྐྱེ།། གདུང་བའི་བྱང་ཆུབ་སེམས་སྐྱེས་ཤིང།། ངོ་མཚར་སྐྱེས་པ་དེ་ཉིད་དོ། ། འགྱུར་བའི་དབུགས་གསལ་དབང་ཐོབ་སྟེ།། དགག་དང་དབྱུང་བ་ཇི་ལྟ་བའོ།། རྫས་ནི་འབར་དང་འཕར་བ་དང།། དྲི་དང་འོད་འབྱུང་རོ་མཆོག་སྐྱེས།། མི་ཟད་མང་དུ་འཕེལ་བ་དང།། མངར་འཇམ་དང་ཞིང་རོ་མཆོག་རྙེད། ། ལྟོ་ལ་མི་གནོད་མགྲིན་ལ་མིན།། ཟོས་ན་བཞིན་འགྱུར་ལུས་རྟས་འགྱུར།། སིན་སྙན་ཡིད་འོང་སྒྲ་སྙན་གཟུགས།། དྲི་ཞིམ་འབྱུང་བ་དེ་ལྟའོ།། རྡོ་རྗེ་པྲ་རྣམས་བཟང་བ་ན། ། རྟགས་དང་མཚན་མ་ཕེབས་པ་སྟེ།། སྨྱུར་ཏེ་དངོས་གྲུབ་བླང་བར་བྱའོ།། བདེ་དང་གའུའི་ཕྱག་རྒྱ་དང།། རྡོ་རྗེ་བུམ་པའི་འཕྲོ་འདུ་ཡིས།། དངོས་གྲུབ་ཡུམ་གྱི་མཁའ་ལ་དབབ།། ཡབ་ཡུམ་སྦྱོར་བའི་ལྷག་སེམས་དག། མ་ཕེབས་པ་ཡི་བར་དུ་དག། ཤེས་རབ་གསལ་བའི་ལྷ་མོ་བཞིས།། ཧ་སྟ་མེ་ལོང་བྷན་དྷ་དང།། ཞིང་ཆེན་ཕྲེང་བ་ལ་སོགས་པ།། ཁ་དོག་ལྔ་ཡི་དར་གཡབ་ཀྱིས།། གཡབ་ཅིང་རིག་འཛིན་མང་པོ་འབོད།། རོལ་ལོ་ཆ་བྱང་མང་པོ་དག། རྡོ་རྗེ་གར་དང་སྙན་པའི་གླུ།། སྲིད་པའི་མ་མོ་ཀུན་རྟེན་ཅིང།། བྱིན་བརླབས་ཆེན་པོ་དབབ་པར་བྱ།། ཕེབས་མ་དག་དུ་དངོས་གྲུབ་བསྟིམ།། འདི་ནི་རྡོ་རྗེ་གླུ་འཁོར་ལོ།། ཡེ་ཤེས་རྒྱན་གྱི་ལས་ཡིན་ནོ། ། ཞེས་སེམས་དཔའི་རྡོ་རྗེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་གླུའི་ལེའུ་ཞེས་བྱ་སྟེ་སུམ་ཅུ་པའོ།།།། དེ་ནས་ཡང་སེམས་དཔའི་རྡོ་རྗེ་དེས་རྡོ་རྗེ་རྣལ་འབྱོར་འཇུག་པ་ཞེས་བྱ་བའི་ལེའུ་འདི་གསུངས་སོ། ། འདུས་པ་ཆེན་པོའི་རྣལ་འབྱོར་པ།། གསང་བའི་དཀྱིལ་འཁོར་དམ་པ་འདིར།། གང་དག་འཇུག་པར་བྱེད་པ་ཡི།། རྣལ་འབྱོར་རིགས་ཀྱི་བུ་རྣམས་ཀུན། ། སྣོད་དུ་གྱུར་པ་ཀུན་བསྡུས་ནས།། བྱང་ཆུབ་མཆོག་གི་སེམས་བསྐྱེད་དེ།། ཚིག་འདི་བརྗོད་དེ་གནས་པར་བྱ།། ཨེ་མ་བདེ་མཆོག་དགའ་ཚུལ་འདིར།། བདག་ཅག་ཀུན་དུ་འཇུག་པར་འཚལ།། དགའ་བ་བྱང་ཆུབ་སེམས་བསྐྱེད་ནས། ། གསང་བའི་དོན་འདི་སྤྱད་པར་བགྱི།། དེ་སྐད་གསོལ་ཏེ་ཞུས་པ་དག། གསང་བའི་མཆོག་གི་བདག་པོ་ཡིས།། རྒྱུད་སྦྱང་རྒྱུད་དྲུག་ལས་སྒོ་གཅད།། རིག་པ་འཛིན་པའི་རྣལ་འབྱོར་ཀུན། ། དཀྱིལ་འཁོར་ཆེན་པོ་གསལ་བཏོན་ཏེ།། ཕྱག་རྒྱ་དབང་དང་བཅས་པ་ཡི།། འཁོར་བའི་རྒྱུད་རྣམས་སྦྱང་བར་བྱ།། འཇུག་པ་དེ་ཡི་གནས་ལྔ་དུ།། རྒྱུད་དྲུག་ས་བོན་བསྐྱེད་ནས་ཀྱང།། ཨོཾ་ལྔ་དག་གིས་གནན་པར་བྱ། ། བཅུག་པ་དེ་ཡི་སྤྱི་བོར་ནི།། པ་ཡི་ཡེ་ཤེས་ལ་བསྐྲུན་པ།། པདྨ་ཁ་བཞི་ལྟེ་བ་ལ།། མི་དང་ལྷ་ཡི་ས་བོན་དགོད།། ཤར་ལྷོ་ནུབ་དང་བྱང་དག་ཏུ། ལྷ་མིན་དུད་འགྲོ་ཡི་དྭགས་དང།། དམྱལ་བ་རྣམས་ཀྱི་ས་བོན་གདབ། ། ཧཱུ~ཾ་གི་ལམ་སྒོ་གཅད་པར་བྱ།། ལག་གཉིས་མཐེའུ་ཆུང་མཐེ་བོས་མནན།། སོར་མོ་གསུམ་སྦྱར་དཔྱལ་བར་བསྣོལ།། ལྷ་དང་ལྷ་མིན་གནས་དག་ཏུ། མི་གཏོང་བཟློག་པའི་ཕྱག་རྒྱ་ཡིན།། ལག་གཉིས་བསྣོལ་ནས་མཆན་ཁུང་བསྡམ། ། མི་ཡི་ཁམས་ནས་བཟློག་པའི་རྒྱ།། ཁུ་ཚུར་བཅངས་ཏེ་འབྲུ་བསྒྲེང་ནས།། གཡོན་གྱི་སྟེང་དུ་མནན་པ་འདི།། བྱོལ་སོང་གནས་ནས་བཟློག་པའི་རྒྱ།། ཐལ་མོ་མཉམ་སྦྱར་གུང་རྩེ་སྦྲད། ། གུང་མོ་རྒྱ་བཅུ་སྲིན་ལག་བསྣོལ།། མགུན་ནས་མཛུབ་མོས་འཁྱུད་པ་ནི།། ཡི་དྭགས་ཁམས་ལས་བཟློག་པའི་རྒྱ།། གཡོན་ཐོགས་གཡས་ཀྱི་རྒྱབ་སྦྱར་སྟེ།། སྲིན་ལག་གུང་མཛུབ་གཅིག་ནས་གཅིག། འཁྱུད་པ་དམྱལ་བའི་སྒོ་གཅོད་རྒྱ།། ལག་གི་ཕྱག་རྒྱ་བཅས་ནས་ནི།། ངག་གི་རྡོ་རྗེ་རྒྱ་བརྗོད་པ།། ཀྱེ་མ་རུ་ཏྲ་ཀྲོ་དྷ་ཧཱུ~ཾ།། ཧྲི་ས་མ་པ་ཙ་ཧཱུ~ཾ། ཧྲཱི་ས་བ་ཛ་ཧཱུ~ཾ། འདི་ལྟར་གསལ་པར་གྱུར་པ་དང།། སྒྲིབ་པ་དག་པར་བྱ་བའི་ཕྱིར། ། རྣལ་འབྱོར་སྦྱོར་བའི་ཕྱག་རྒྱ་སྟེ།། རྡོ་རྗེ་རྣལ་འབྱོར་མཆོག་གི་ལྷ།། འགྲོ་དྲུག་འདྲེན་པའི་དཔལ་མཛད་པ།། རྡོ་རྗེ་ཅན་ལ་ཕྱག་འཚལ་ལོ།། བྱམས་མགོན་ཁྱོད་ལ་སྐྱབས་སུ་མཆིའོ།། དེ་སྐད་གསོལ་བ་བཏབ་པ་དང། ། རྣལ་འབྱོར་ཆེན་པོ་ཞབས་གཉིས་ལ།། འཇུག་པ་དེ་ཡི་སྤྱི་བོས་གཏུགས།། སངས་རྒྱས་བདེ་མཆོག་ཐམས་ཅད་ཀྱི།། རྡོ་རྗེ་གསུང་མཆོག་གསུམ་ལས་བྱུང།། སྲིད་པ་གསུམ་གྱིས་ཕྱག་བྱས་པ། ། དབང་བསྐུར་གསན་བ་ཆེན་པོ་སྦྱིན།། ཨ་ཏི་ཧོ་སྟ་ཧྲི་ད་ཁ~ཾ།། དེ་ནས་སྣོད་དུ་གྱུར་པ་དང།། གསང་བའི་མིག་ནི་དབྱེ་བར་བྱ།། མེ་ཏོག་ཕོག་པའི་ལྷ་ཡང་སྦྱིན།། དེ་ནས་དམ་ཚིག་ཆེན་པོ་བསྒྲགས།། རྒྱལ་བ་ཀུན་དང་མཉམ་སྦྱོར་བའི། ། དམ་ཚིག་འདི་ལས་གང་འདས་པ།། རྒྱལ་བ་ཐམས་ཅད་བསླུས་པ་ཡིན།། ཁྲག་འཐུང་ཁ་འབར་མ་ཡི་ཚོགས།། ཁྲོས་ནས་སྙིང་ཁྲག་ཐོགས་པས་འཐུང།། བཛྲ་ས་མ་ཡ་ཨི་དན་ཐེ་ན་ན་ར་ཀན། ། པ་ར་ཧྲྀ་ད་ཡ་ན་མ་བ་སྟི་ནཱན།། ས་མ་ཡ་རཀྵ་སིདྡྷི་བིདྱ་བཛྲ་ཨ་མྲྀ་ཏོ་ད་ཀ~ཾ། རྡོ་རྗེ་ཐ་ཚིག་ཆུ་བླུད་ནས།། རྡོ་རྗེ་གལ་ཆེན་མནའ་དོར་རོ།། རྡོ་རྗེ་དམ་ཚིག་སྡོམ་པ་རྣམས།། ཐམས་ཅད་ཐམས་ཅད་དཔོག་པར་བྱ། ། སློབ་པའི་གཉེར་ཡང་དཔོག་པར་བྱ།། ཀྱེ་རིག་འཛིན་རྡོ་རྗེ་བུ་མཆོག་ཁྱེད།། རྣལ་འབྱོར་རྒྱལ་བའི་སྲས་ཀྱིས་ཡིན།། གཞན་ཡང་གསང་བ་མ་སྨྲས་ཤིག། གལ་ཏེ་སྨྲས་ན་དབྱར་བར་འཚིག། ཁྱོད་ནི་རྡོ་རྗེ་ཆེ་གེ་མོ། ། རྒྱལ་བའི་སྲས་པོ་གདུང་རྒྱུད་འཛིན།། གསང་བ་མཆོག་གི་མིག་སྦྱིན་གྱིས།། ཞིང་ཁམས་ཀུན་དུ་བདེ་བར་སྤྱོད།། དེས་ནི་སངས་རྒྱས་ཞིང་དུ་སྐྱེ།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་རྣལ་འབྱོར་འཇུག་པའི་ལེའུ་ཞེས་བྱ་སྟེ་སུམ་ཅུ་རྩ་གཅིག་པའོ། །།། དེ་ནས་ཡང་སེམས་དཔའི་རྡོ་རྗེས་ཡོངས་སུ་རྫོགས་པ་དབང་གི་ལེའུ་འདི་གསུངས་སོ།། འདུས་པ་ཆེམ་པོའི་རྣལ་འབྱོར་བ། ། སྲིད་པ་གསུམ་གྱིས་ཕྱག་བྱས་པས།། བླ་མའི་ས་ལ་གནས་པ་ནི།། གསང་མཆོག་སུམ་ཅུ་རྩ་དྲུག་ཡིན།། ཕྱི་ཡི་དབང་དང་ནང་གི་དབང།། བསྒྲུབ་པའི་དབག་དང་གསང་བའི་དབང།། བཅུ་དང་བཅི་གཅིག་བཅུ་གསུམ་དང། ། རྣམ་པ་གཉིས་ཀྱིས་རྫོགས་པར་འགྱུར།། དེ་ལ་དང་པོ་སྦྱིན་པའི་དབང་འདི་ཡིན་ཏེ། ཨོཾ་ཧཱུ~ཾ་ས་ཧྲཱིཿཧ། ཀུན་གྱིས་འདའ་བར་དཀའ་བ་ཡི།། ཚིག་བཙན་ཡུལ་ལ་དབང་སྒྱུར་པ།། རྒྱལ་པོ་བཀའ་རྟགས་ཕྱག་རྒྱའི་དབང། ། སྐུ་ལྔ་ཡོངས་སུ་རྫོགས་པར་འགྱུར།། རིགས་རྣམས་སོ་སོའི་རྒྱུད་འཛིན་ཅིང།། རྟགས་ཀྱི་མཚན་མ་ཆེན་པོ་ནི།། སྦྱོར་བ་ཆེན་པོའི་ཕྱག་མཚན་ཏེ།། དམ་ཚིག་ཕྱག་རྒྱ་རྫོགས་པར་འགྱུར། ། ཤེས་རབ་གཟུངས་ཀྱི་གསང་མཆོག་ནི།། དོན་དང་ལྡན་པར་གྱུར་པ་ཡི།། མཐ་གཉིས་དག་ཏུ་མི་གཏོང་བའི།། གཟུང་མའི་རྒྱལ་མོ་ཆེན་མོ་ཡིན།། གཉིས་མེད་ཡོངས་སུ་རྫོགས་པ་ནི།། ཐམས་ཅད་བདེ་བ་ཆེན་པོའི་ངང། ། བྱང་ཆུབ་སེམས་དང་དོན་དང་འབྲེལ།། ཤེས་རབ་ཆེན་པོ་རྫོགས་པའི་དབང།། བཀྲ་ཤིས་ཆེན་པོ་བུམ་པ་ནི།། བདེ་གཤེགས་བཞུགས་པའི་ཕོ་བྲང་སྟེ།། དཀྱིལ་འཁོར་རྫོགས་པར་གྱུར་པ་ཡི། ། དབང་ཆེན་དེ་ལ་སྦྱིན་པར་བྱ།། གསང་བའི་བསྟན་པ་རྒྱས་ནས་ནི།། ཡུན་རིང་གནས་པར་འགྱུར་བ་ཡི།། བཀྲ་ཤིས་རྫས་ཀྱི་དབང་མཆོག་ཀྱང།། གནང་བ་ཆེན་པོ་སྦྱིན་པར་བྱ།། དོན་རྣམས་གྲུབ་པར་འགྱུར་བ་ཡི། ། འདོད་དགུར་རེ་སྐོང་རིན་པོ་ཆེ།། རྒྱལ་སྲིད་རིན་ཆེན་སྣ་བདུན་གྱིས།། རྒྱལ་པོ་མཆོག་ཏུ་དབང་བསྐུར་རོ།། རིན་ཆེན་པདྨ་སེང་གེའི་ཁྲི།། བླ་མར་གྱུར་པའི་གནད་མཆོག་དེ།། ཁྱད་པར་ཆེན་པར་གྱུར་པའི་དབང། ། ཁྲིན་ཆེན་དག་ལ་གཞག་པར་བྱ།། ཅོད་པན་མེ་ཏོག་ཕྲེང་ལ་སོགས།། དབང་མཆོག་བརྗིད་པའི་རྒྱན་གྱིས་བཀླུབས།། དབུ་རྒྱན་དོ་ཤལ་སེ་མོ་དོ།། དཔུང་རྒྱན་རླང་གདུབ་ལག་གདུབ་རྣམས།། དབང་ཐོབ་རྒྱལ་པོས་དེ་ལ་སྦྱིན། ། དབང་ཐོབ་མཛེས་པས་བརྗིད་པའི་རྒྱལ་པོ་དེ།། དབང་ཕྱུག་ཡིན་པས་དེ་ལ་ཀུན་ཕྱག་འཚལ།། རྡོ་རྗེ་དབང་ཕྱུག་རྒྱལ་པོའོ་ཞེས་པར་ནི།། ཀུན་གྱིས་སྐ་ཆེན་བོད་ཅིང་བསྒྲགས་པར་བྱ།། གསེར་གྱི་འཁོར་ལོ་རྩིབས་ཁྱུད་ལྡན་པ་ཞིག། རྒྱལ་པོ་དེ་ཡི་ལག་ཏུ་བསྐུར་ནས་ནི།། འཇིག་རྟེན་ཀུན་ལ་ཁ་ལོ་སྒྱུར་བ་ཡི།། དབང་མཆོག་རྒྱལ་པོ་འདི་ཡང་སྦྱིན་པར་བྱ།། ཕྱི་འཁོར་སྐྱོང་བའི་རྒྱལ་པོར་གྱུར་ཕན་ཆད།། བླ་མེད་མཆོག་གི་རྟགས་དང་ལྡན་འགྱུར་བས། ། གསང་སྒོ་ཕྱེ་ནས་ནང་དུ་གཞུག་པར་བྱ།། ཤིན་ཏུ་གསང་བའི་རྫས་དང་ལྡན་གྱུར་ནས།། གསང་སྒོ་གང་ལས་འདོད་པའི་དོན་རྣམས་ཞུ།། གནང་ཆེན་པོ་ཡི་རྟགས་སུ་བྱིན་གྱིས་བརླབས། ། གསང་བའི་དོན་ལ་ཉན་ཅིང་སློབ་པའི་དབང།། དབང་ཐོབ་སླན་ཅན་དེ་ལ་སྦྱིན་པར་བྱ།། བདུད་རྩི་ཆི་འདིས་རྣ་བའི་གསང་སྒོ་དབྱེ།། སརྦ་ཏ་ཐཱ་ག་ཏ་སྟ་མ་ཏི་ཧོ།། གླེགས་བམ་ཟབ་མོ་ལ་སོགས་ཐསམ་ཅད་རྣམས། ། རིགས་ཀྱི་བུ་མཆོག་དེ་ལ་སྦྱིན་པར་བྱ།། དེས་ནི་འགྲོ་བའི་དོན་བྱེད་ནུས་པས་ན།། ལས་རྣམས་རྒྱ་མཚོ་ཐམས་ཅད་སྒྲུབ་པའི་རྟགས།། རྡོ་རྗེ་རྒྱ་གྲམ་ལ་སོགས་རྣམས་བཞིའི་རྫས།། བུ་མཆོག་དེ་ལ་ཐབས་ཀྱིས་སྦྱིན་པར་བྱ། ། གཞན་གྱི་རེ་འདོད་སྐོང་བའི་བུ་མཆོག་དེ།། རྒྱལ་པོ་རྒྱལ་རིགས་རྒྱུད་དུ་བྱུང་བ་བཞིན།། རྒྱལ་ཚབ་ཆོས་ཀྱི་རྒྱུད་དུ་བྱུང་བས་ན།། ཏནྟྲ་ལ་སོགས་དམ་པའི་མཛོད་གསུམ་སྦྱིན། ། དེས་ནི་སློབ་མའི་ཚོགས་ཀུན་སྐྱོང་ནུས་ཕྱིར།། བསྟན་པ་སྒྲོགས་པའི་ས་ལ་གནས་བྱའི་ཕྱིར།། རྡོ་རྗེ་རྒྱལ་པོ་དཔལ་གྱི་དབང་མཆོག་འདི།། ཐེག་ཆེན་དགུ་ཡི་རྟགས་དང་ཆས་ཏེ་སྦྱིན།། དེ་ནི་བླ་མེད་རྒྱལ་པོར་འགྱུར་བས་ན། ། ས་རྣམས་ནོན་པའི་རྟགས་མཆོག་གདན་ཁྲིའི་དབང།། ལྷ་ཆེན་ལ་སོགས་ཞིང་ཆེན་ཉི་ཟླ་བཅས།། ཁྱུ་མཆོག་སེང་གེ་མ་ཧེ་གཟིགས་དང་སྟག། གཏུམ་པའི་དོན་གྱིས་སྤར་ཏེ་སྦྱིན་པར་བྱ། ། རྒྱལ་པོ་ཡིན་པའི་རྟགས་ནི་རྣམ་པ་བདུན།། སྐྱེ་ལ་དབང་སྒྱུར་རྒྱལ་པོ་མཉེས་པའི་གཟུངས།། ཕ་རོལ་དཔུང་འཇོམས་སྲིད་ཐུབ་འཛིན་པ་དང།། བདག་གཞན་དོན་སྒྲུབ་རྫུ་འཕྲུལ་རྐང་པར་ལྡན།། དགོས་འདོད་ཡིད་བཞིན་སྐོང་བའི་རིན་པོ་ཆེ། ། རྒྱལ་པོ་དེ་ལ་ཐབས་ཀྱིས་སྦྱིན་པར་བྱ།། དེ་ནི་རྒྱལ་བའི་མཆོག་སྲས་ཡིན་པས་ན།། ཕྱག་རྒྱ་ཆེན་པོའི་དབང་མཆོག་སྦྱིན་པར་བྱ།། རས་སམ་འབུར་རམ་ལུགས་སུ་བླུགས་པ་ཡི། ། ཕྱག་རྒྱའི་གཟུགས་བརྙན་དེ་ཡི་སྦྱི་བོར་གཞག། ཡེ་ཤེས་ཆེན་པོའི་དོན་དང་དེ་ལྡན་པས།། ཡེ་ཤེས་ལྔ་ཡི་རྟགས་མཆོག་ཕྱག་རྒྱ་ཡིས།། གནས་ལྔར་གཏུགས་ཏེ་ཐུགས་ཀྱི་དབང་མཆོག་སྦྱིན།། ཨོཾ་མ་ཧཱ་ཤཱུ་ནྱ་ཛྙཱ་ན་བཛྲ་སྭ་བྷ་བ་ཨཱཏྨ་ཀོ་ཧཾ། ། ཨོཾ་མ་ཧཱ་ཨཱ་དརྴ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ་ཧ~ཾ། ཨོཾ་མ་ཧྭ་ས་མ་ཏྭ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོཧ~ཾ། ཨོཾ་མ་ཧཱ་པྲ་ཏྱ་བེཀྵ་ཎ་བཛྲ་སྭབྷཱ་བ་ཨཱཏྨ་ཀོ་ཧ~ཾ། ཨོཾ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོཧ~ཾ།། སྐུ་དང་གསུང་ཐུགས་རྡོ་རྗེ་ཡི།། རྣལ་འབྱོར་བདེ་མཆོག་དེ་ཡིན་བས།། སྐུ་གསུང་ཐུགས་ཀྱི་གསང་མཆོག་འདི།། རྡོ་རྗེ་ཅན་ལ་སྦྱིན་པར་བྱ།། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭཱ་བྷཱ་བ་ཨཱཏྨ་ཀོཧ~ཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭཱ་བྷཱ་བ་ཨཏྨ་ཀོ་ཧ~ཾ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ་ཧ~ཾ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ་ཧ~ཾ།། དབང་མཆོག་ཐོབ་པའི་བུ་མཆོག་དེ།། དོན་རྣམས་གྲུབ་པར་བཀྲ་ཤིས་ཕྱིར། ། བདུད་འདུལ་བཀྲ་ཤིས་རྫས་མཆོག་རྣམས།། རྟགས་ཀྱིས་བརྒྱན་ཏེ་སྦྱིན་པར་བྱ།། དོན་རྣམས་གྲུབ་པའི་བུ་མཆོག་དེ།། རྡོ་རྗེ་དབང་མཆོག་ཐོབ་པ་ན།། ཞིང་ཁམས་ཀུན་དུ་གྲགས་པ་ཡི། ། རྩལ་གྱི་ཐིག་ལེ་རྡོ་རྗེ་སྦྱིན།། ནང་དུ་འཇུག་པའི་དབང་ཐོབ་ནས།། དེ་དག་ཀུན་ལ་སྤྱོད་སྒྲུབ་པའི།། དབང་མཆོག་དམ་པ་སྦྱིན་པར་བྱ།། སྐྱེ་མེད་ཆོས་ཀྱི་དབྱིངས་ཉིད་ལ།། སེམས་ཀྱིས་དབང་བསྐུར་ཐོབ་པ་ཡི། ། ཤེས་རབ་ཆེན་པོ་རིག་པའི་དབང།། སེམས་ལོན་དོན་གྱི་གཏན་ཚིགས་སྦྱིན།། བྱ་བའི་མཚན་ཉིད་ཀུན་བྲལ་ཞིང།། བཙལ་མེད་གནས་པའི་བྱང་ཆུབ་སེམས།། སྙིང་རྗེ་ཆེན་པོ་བདེ་མཆོག་གིས།། ཁམས་གསུམ་ཀུན་ལ་དབང་སྒྱུར་སྦྱིན། ། སྲིད་གསུམ་འགྲོ་བའི་དོན་རྣམས་ཀུན།། ཐམས་ཅད་རྫོགས་པར་ནུས་པ་ཡི།། རྟགས་ཀྱི་དབང་མཆོག་དམ་པ་ནི། ཐོང་གཤོལ་འབར་བ་སྦྱིན་པར་བྱེད།། དུག་གསུམ་གཏིང་ནས་སྤྲུགས་པ་ཡི། ། རྟགས་ཆན་གའུ་རྣམ་པ་གསུམ།། དམར་ཆེན་དག་གིས་བཀང་ནས་ཀྱང།། དབང་ཆེན་ཐོབ་དེའི་ལག་ཏུ་སྦྱིན།། སྲིད་གསུམ་སྒྲོལ་བར་བྱ་བ་ཡི།། དབང་མཆོག་ཆེན་པོ་སྦྱིན་པའི་ཕྱིར།། ཀ་ཏར་ལ་སོགས་མཚོན་ཆ་རྣམས། ། དབང་ཐོབ་དེ་ཡི་ལག་ཏུ་སྦྱིན།། འཁོར་བའི་ཆོས་ལ་ཅིར་སྤྱད་ཀྱང།། སྐྱོན་གྱིས་གོས་པར་མི་འགྱུར་བའི།། རྟགས་ཀྱི་ཕྱག་རྒྱ་ཆེན་པོ་ནི།། རྣམ་དག་རྫས་ཀྱི་པདྨ་སྦྱིན།། ལས་རྣམས་རྫོགས་པར་གྱུར་པ་ཡི། ། དབང་མཆོག་ཐོབ་པའི་རྟགས་ཆེན་ནི།། སྟི་རའི་དབྱུག་པ་ཆེན་པོ་དག། དབང་ཐོབ་དེ་ཡི་ལག་ཏུ་སྦྱིན།། ཡུམ་དང་གཉིས་མེད་འཁྲིལ་བ་ཡི།། ཆོས་ཉིད་དོན་དང་གཉིས་མེད་རྟགས།། སྦྲུལ་ནག་འཁྲིལ་བའི་ཆུལ་པོ་འདི། ། དབང་ཐོབ་དེ་ཡི་ལག་ཏུ་སྦྱིན།། གསང་བ་སྦྱོར་བའི་ཤེས་རབ་མ།། དྲི་མེད་རྣམ་དག་ལྷ་མོ་ཞིག། མཚན་ལྡན་ཤིན་ཏུ་བརྒྱན་བྱས་ལ།། དབང་ཐོབ་དེ་ལ་སྦྱིན་པར་བྱ།། དབང་ཐོབ་རྒྱལ་པོ་ཆེན་པོ་དེ། ། ཀུན་གྱི་བདག་པོ་ཡིན་པས་ན།། རོལ་མོ་དྲི་དག་ཞས་ཟས་དང། འདོད་ཡོན་ལྔ་ལ་སོགས་པ་དང།། ཉེ་བའི་ལོངས་སྤྱོད་རྒྱན་རྣམས་ཀུན།། ཐམས་ཅད་ཐམས་ཅད་སྦྱིན་པར་བྱ།། སྒྲུབ་པའི་རྒྱལ་པོ་དེ་ལ་ནི། ། སྒྲུབ་པའི་ལས་ལ་དབང་ཐོབ་ཕྱིར།། རྡོ་རྗེ་སེམས་དཔའ་ལ་སོགས་པ།། རྒྱལ་བ་ཐམས་ཅད་བསྒྲུབ་པ་དང།། རྡོ་རྗེ་ཚེ་དང་སྨན་ལ་སོགས།། སྒྲུབ་པ་མ་ལུས་སྒྲུབ་ཤིག་ཅེས།། བསྒྲུབ་རྫས་ཐམས་ཅད་སྦྱིན་པར་བྱ། ། རྒྱལ་བ་སངས་རྒྱས་ཐམས་ཅད་དང།། དབང་ཐོབ་དེ་གཉིས་གཅིག་པའི་ཕྱིར།། རིག་འཛིན་རྡོ་རྗེ་རྩལ་གྱི་དབང།། རྡོ་རྗེ་མིང་ནི་སྦྱིན་པར་བྱ།། བསྒྲུབ་པའི་དབང་དང་རྫས་མཆོག་དང།། གསང་བའི་བདག་པོ་ཡིན་པས་ན། ། གསང་བའི་དབང་མཆོག་སྦྱིན་པར་བྱ།། དགའ་བ་བྱང་ཆུབ་སེམས་ཆེན་པོ།། ཀུན་ཏུ་ཚིམ་པར་བྱེད་པ་ཡི།། དཀར་དམར་ལྷག་པའི་བྱང་ཆུབ་སེམས།། དབང་ཐོབ་དེ་ཡི་ལྕེ་ལ་གཞག། བཙལ་མེད་བྱང་ཆུབ་སེམས་ཆེན་པོ། ། ཤེས་རབ་ཆེན་པོའི་རྩལ་གྱིས་ནི།། ཆོས་སྐུ་སྒྱུ་མར་དབང་སྒྱུར་ནས།། རྩལ་ཆེན་རྫོགས་པའི་དབང་ཡིན་པས།། རྫས་དང་ཚིག་དང་གང་ཟག་དང།། ཀུན་རྫོབ་དབང་དེ་མ་ཐོབ་ཀྱང།། ཆོས་ལ་སེམས་ཀྱི་དབང་ཐོབ་ནས། ། རྒྱལ་བའི་རིག་འཛིན་ཐམས་ཅད་དང།། སྲིད་གསུམ་དབང་ཅན་ཐམས་ཅད་ཀུན།། དེ་ལ་དབང་ཐོབ་བསྐུར་བར་འགྱུར།། དབང་གི་ཚད་ནི་འདི་ལྟ་སྟེ།། དད་ལྡན་སྲི་ཞུར་ལྡན་པ་ལ། ། གསང་བ་ཉན་པའི་དབང་ཆེན་བསྐུར།། རྣམ་བཞི་ལས་ཀྱི་དོན་ཚང་ན།། ལས་རྣམས་བྱེད་པའི་དབང་ཐོབ་བོ།། ལྟ་བའི་དམིགས་བུས་ཆོས་མཐོང་ན།། རྒྱལ་ཐེབ་འཆད་པའི་དབང་ཐོབ་བོ།། རྐྱེན་ཐུབ་ཚད་མ་གསུམ་ལྡན་ན། ། བླ་མ་རྡོ་རྗེ་སློབ་དཔོན་དབང།། དམ་པ་མཛོད་གསུམ་ཐམས་ཅད་ལ།། ཕྱོགས་མེད་པར་ནི་འཆད་ཤེས་ནས།། རབ་འབྱམ་རྒྱལ་པོའི་དབང་འཐོབ་བོ།། དད་མེད་བློ་ཞན་རྫོབ་པ་ཆེ།། ཚུལ་འཆོས་མཁན་ལ་རས་གཅོད་བྱེད། ། དེ་ནི་དབང་གིས་འཆིག་པར་བཤད།། གསང་མེད་བརྗེད་ངན་དབང་མི་འཆགས།། དད་མེད་གཡེལ་རྨུགས་དབང་གི་འགོས།། སྣོད་མེད་བཅུད་བྲལ་ཀུན་སྟོངས་པ།། དེས་ནི་དབང་ཐོབ་མ་ཡིན་ནོ། ། སྣོད་ལྡན་བཅུད་རྫོགས་དབང་ཐོབ་ན།། དབང་མཆོག་ཐོབ་པའི་རྒྱུ་ཞེས་བཤད།། ཅེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་དབང་གི་ལེའུ་ཞེས་བྱ་སྟེ་སུམ་ཅུ་རྩ་གཉིས་པའོ། །།། དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དང།། སེམས་དཔའི་རྡོ་རྗེ་དམ་པ་རྒྱུད་ཀྱི་རྒྱལ་པོ་ཆེན་པོ་ཀུན་འདུས་རིག་པའི་མདོ་དང་བཅས་པ་ཆོས་ཐམས་ཅད་ཀྱི་མེ་ལོང་ཡིན་པར་རིག་ནས། ། འདུས་པ་ཕལ་མོ་ཆེའི་འཁོར་རྣམས་ཀྱིས་ཤིན་ཏུ་ངམ་ཞིང་ངོ་མཚར་སྐྱེས་ནས།། བཏོད་པ་ཤིན་ཏུ་དགའ་བ་ཆེམ་པོའི་གླུ་གསུངས་སོ།། ཨེ་མ་ཧོཿཉེས་བཅོམ་ལེགས་ལྡན་མཚན་ཞི་མཐའ་ལས་འདས། ། དཔག་མེད་བྱམས་སྙོམས་དོན་གྱིས་བདག་གཞན་དཔལ།། དོན་དམ་གསང་སྦས་ནམ་མཁའི་དཀྱིལ་དུ་འཁྱིལ།། རྡོ་རྗེ་ཆེ་མཆོག་དབང་ཕྱུག་ཀུན་གྱི་བདག། འཛིན་པ་མི་རྟོག་ཤ་རུས་ཁྲག་ལ་རོལ། ། ཐུགས་ཀྱི་གདུང་ཐག་འཁོར་བའི་མཐའ་ལ་རྗེ།། ཡུལ་མེད་མ་སྐྱེས་མཚན་མའི་གཡུལ་ལས་རྒྱལ།། བདེ་མཆོག་རྒྱལ་པོ་ཁྱོད་ལ་ཕྱག་འཚལ་བསྟོད།། ཤེས་རབ་ཆེན་པོ་ནམ་མཁའི་ཉི་མར་གསལ། ། བྱང་ཆུབ་སེམས་ཀྱི་འོད་ཟེར་དབྱིངས་སུ་འཆར།། འབར་བརྟུལ་མྱུར་བའི་ཤུགས་ཀྱིས་འགྲོ་དྲུག་སྒྲོལ།། རྟོགས་འཇོམས་ཡེ་ཤེས་རྡོ་རྗེ་ཆོ་འཕྲུལ་འཕྲོ།། དམ་པའི་དོན་གསུངས་གཉིས་མེད་སྟོན་པའི་སྐུ། ། སྨྲ་བའི་སེང་གེ་ཁྱོད་ལ་ཕྱག་འཚལ་ལོ།། རིན་ཆེན་གཏེར་ལྡན་འདོད་དགུར་ཀུན་སྐོང་ཞིང།། ལུང་དང་རིགས་པ་གཏན་ཚིགས་ཀུན་གྱི་མཛོད།། བརྡ་ཅན་ཡང་དག་ལེན་པའི་མེ་ལོང་གསལ།། རྡོ་རྗེ་ཀུན་འདུས་འཇིགས་བྱེད་རྒྱལ་པོའི་རྒྱུད། ། ཆོས་ཀྱི་མེ་ལོང་འདི་ལ་བདག་ཅག་འདུད།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ངོ་མཚར་བསྟོད་པའི་ལེའུ་སྟེ་སུམ་ཅུ་རྩ་གསུམ་པའོ།།།། རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིགས་པའི་མདོ་རྫོགས་སོ། །།།
CLOSE WINDOW