| Wylie |
། བྱང་ཆུབ་ཀྱི་སེམས་བསྒོམ་པ་ཡི་གེ་མེད་པ་ཞེས་པའི་སྐབས་རྫོགས་སོ།། འདི་གོང་འོག་གཉིས་མེད་དང་སྐབས་གྲངས་འདྲ་ཡང་གསན་ཡིག་ན་བཞུགས་རྒྱུ་གོང་མ་འདི་ཡིན་འདྲ།།།། བོད་སྐད་དུ། བྱང་ཆུབ་ཀྱི་སེམས་བསྒོམ་པ་ཡི་གེ་མེད་པའི་རྒྱུད། དཔལ་བདེ་བའི་མཆོག་ལ་ན་མོ། བཅོམ་ལྡན་འདས་ཆོས་ཀྱི་དབྱིངས་རང་བཞིན་མེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་བཞིན་གྱི་འཁོར་ལ་རང་བཞིན་གྱི་སྟོན་པས་རང་བཞིན་གསུང་དུ་མེད་པ་བཀའ་སྩལ་པ། རང་བཞིན་རང་བཞིན་ཙམ་མིན་ཏེ།། དེ་ནི་རང་བཞིན་མི་བཟུང་བ།། རང་བཞིན་གབ་པ་བག་ལ་ཉལ།། རང་བཞིན་གྱི་སྐབས།།།། དབྱིངས་དང་ཡེ་ཤེས་གཉིས་མེད་དེ།། གཉིས་ན་རིམ་པ་ཅན་ཞེས་བྱ། ། རིམ་པའི་ཆ་ལ་མི་བརྟེན་པར།། དེ་ཀ་ཡི་གེ་མེད་པའོ།། ཡི་གེ་མེད་པའི་སྐབས།། རང་བཞིན་ཙམ་ཡང་མ་ཡིན་པ།། དེ་ནི་རང་བཞིན་ཆེན་པོའོ།། རང་བཞིན་རང་གིས་རྟོགས་ན་རྟོགས། ། ཐམས་ཅད་མེ་དང་རང་བཞིན་སྣང།། བལྟར་མེད་བག་ལ་ཉལ་བ་དེ།། འབད་པས་མི་རྙེད་བཏང་སྙོམས་ཙམ།། དེ་ཡང་མིན་ཏེ་ཅིར་མི་གནས།། ཡི་གེ་མེད་པའི་སྐབས།། འདི་ལྟར་སྣང་བའི་ཁྱད་པར་ལས། ། བདུད་བཞི་མི་འབྱུང་རྟོག་པ་ཟད།། ངེས་ཐོབ་ས་ཆེན་ཁྱད་པར་འཔགས།། སྐྱོན་བྲལ་རྫོགས་ཆེན་དོན་ལས་འདས།། སྟོང་དང་མི་སྟོང་ཚིག་ལས་འདས།། སངས་རྒྱས་ཆོས་དང་དགེ་འདུན་མེད།། ཡི་གེ་མེད་པའི་སྐབས། ། མན་ངག་གསུམ་དང་གསང་བ་གསུམ།། ཡི་གེ་མེད་པས་འདི་མི་བརྟག། སྟོང་པ་ཆེན་པོའི་རང་བཞིན་སྟོང།། དེ་ནི་ཀུན་ལས་འཕགས་པ་ཡིན།། མཆོག་འཕགས་ཁྱད་པར་ཆེན་པོའོ།། ཡི་གེ་མེད་པའི་སྐབས། ། མི་དམིགས་མི་རྟོག་ཀུན་བཟང་ངང།། རང་ཀ་མ་ལ་རང་བཞིན་ཡང།། བག་ཆགས་ཀུན་བཟང་ལྷུན་གྱིས་གྲུབ།། གསེར་མེད་བོང་བ་མེད་པའི་སེམས།། དྲན་རྟོག་བག་ཆགས་ཅི་བྱུང་ཡང།། དེ་ཉིད་རང་བཞིན་ཡིག་མེད་དང། ། མཚོན་པ་ལས་འདས་དཔེ་མེད་པ།། དེས་ན་སྒྲུབ་པ་ཆེན་པོའོ།། ཡི་གེ་མེད་པའི་སྐབས།། གང་ཡང་མི་བསམ་ཅིར་མི་བཏགས།། མཚན་བསམ་ཉམས་ཏེ་ཆགས་ན་འཁོར།། བྱང་ཆུབ་སེམས་སུ་གདགས་པ་མེད། ། འདི་ལྟར་སྤྱོད་པའི་ཁྱད་པར་ལ།། སེམས་དང་ཡིད་དུ་རྣམ་མི་དབྱེ།། ཕྱེ་བས་ཆགས་པའི་མཚན་མའོ།། འདི་ཞེས་གང་ལའང་གནས་མི་བྱ།། བསྒོམ་ཆགས་སྐྱོན་དུ་ཏིང་འཛིན་འགྲོ།། ཡི་གེ་མེད་པའི་སྐབས། ། ལྷུན་གྱིས་གྲུབ་པའི་ཡེ་ཤེས་ཏེ།། ཡེ་ཤེས་ཀུན་གྱི་ཐུ་བོ་ཡིན།། ཆོས་སྐུ་བདེ་བའི་མཆོག་ཡིན་པས།། ནམ་མཁའ་ཆེའོ་ཏིང་འཛིན་གཙོ།། ཡི་གེ་མེད་པའི་སྐབས།། རིགས་ཀྱི་བདེ་བར་གཤེགས་པ་རྣམས། ། ཏིང་འཛིན་འབུམ་སྡེའི་དོན་འདི་ནི།། རབ་ཏུ་རྟོགས་དང་དཔྱད་དཀའ་བས།། རྒྱ་ཆེན་རྩིང་བོར་རབ་དཔྱད་ལ།། ཕྲ་མོ་བག་ལ་ཉལ་བ་དབབ།། གཏན་ཚིགས་ཀྱིས་ནི་མ་ཡིན་ནོ།། བྱང་ཆུབ་ཀྱི་སེམས་བསྒོམ་པ་ཡི་གེ་མེད་པ་ལས། བསྡུ་བ་གསུངས་པའི་སྐབས་རྫོགས་སོ།།།།
CLOSE WINDOW