| Wylie |
རྒྱ་གར་སྐད་དུ། རཏྣ་བྷ་བཱནྟ་རཱ་ལོ་ཀ་ཏནྟྲ། བོད་སྐད་དུ། རིན་པོ་ཆེ་སྲིད་པ་བར་མ་དོ་སྣང་བའི་རྒྱུད། བཅོམ་ལྡན་འདས་རང་སྣང་ཀུན་ཏུ་བཟང་པོ་ལ་ཕྱག་འཚལ་ལོ།། དུས་བཞི་མཉམ་པར་གཅིག་པར་སྣང་བའི་དུས། ། རྒྱུ་རྐྱེན་མ་བསྐྱེད་ཡེ་ཤེས་སྣང་བའི་དུས།། ལུས་སེམས་གཉིས་པོ་ཐ་དད་སྣང་བའི་དུས།། རང་གི་རྣམ་རྟོག་དབུགས་ལ་བརྟེན་པའི་དུས།། འཁོར་འདས་གཅིག་པར་སྣང་བའི་དུས།། ཆོས་སྐུ་སྐྱེ་མེད་རང་བཞིན་གྲུབ་པའི་གནས། ། ཡེ་ཤེས་མ་སྐྱེས་རིག་པ་སྟོང་པའི་གནས།། ལུས་དང་སེམས་གཉིས་སྲིད་པར་སྣང་བའི་གནས།། སྣང་བ་ཐོགས་མེད་སྤྱོད་ཡུལ་སྟོན་པའི་གནས།། འཁོར་བའི་རྒྱུད་འདས་སྣང་བའི་གནས། ། ཆོས་སྐུའི་སྙིང་པོ་བརྗོད་མེད་སྟོན་པ་དང།། ཡེ་ཤེས་སྙིང་པོ་མི་བརྗོད་སྟོན་པ་དང།། ལུས་ཀྱི་སྣང་ཚུལ་སེམས་ཀྱི་སྟོན་པ་དང།། དབུགས་ཀྱི་རྣམ་རྟོག་སྣང་བའི་སྟོན་པ་དང།། འཁོར་བའི་ལམ་དང་མྱ་ངན་འདས་པའི་ལམ་སྟོན་པའོ། ། རང་བྱུང་ཆོས་སྐུ་མ་འགགས་འཁོར་དེ་དང།། རང་བྱུང་ཡེ་ཤེས་འགགས་མེད་འཁོར་ཉིད་དང།། ལུས་ཀྱི་འཁོར་དང་སེམས་ཀྱི་འཁོར་ཉིད་དང།། བླགས་ཀྱི་རྣམ་རྟོག་ལམ་ཚོལ་འཁོར་ཉིད་དང། ། ཐ་མི་དད་པར་གཅིག་སྣང་འཁོར་ཉིད་དོ།། རང་བྱུང་ཡེ་ཤེས་མི་བརྗོད་བསྟན་པ་དང།། མིང་དང་བརྡའ་རུ་བྱུང་བའི་བསྟན་པ་དང།། བརྗོད་པའི་ངག་མེད་སེམས་བརྗོད་བསྟན་པ་དང།། བརྗོད་མེད་མི་བརྗོད་དབྱེར་མེད་བསྟན་པའོ།། གླེང་གཞིའི་ལེའུ་སྟེ་དང་པོའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། ལུས་མེད་ལུས་སུ་གྲུབ་པ་སེམས་ཅན་ལུས། ། དང་པོ་ལུས་འདི་རྒྱུ་ཉིད་ཅི་ལས་བྱུང།། བར་དུ་བསྐྱེད་ལུགས་ཇི་ལྟར་བྱུང།། ཐ་མར་ལུས་ཀྱི་འབྲས་བུ་འཁྲུལ་པ་ཅི་ལྟར་རྒྱས།། སྟོན་པའི་སྟོན་པ་ཀུན་ཏུ་བཟང་པོ་ཡིས།། དང་པོ་ལུས་མེད་ལུས་ཀྱི་རྒྱུ་འདི་ནི། ། རང་བྱུང་ཡེ་ཤེས་མ་འགགས་དག་ལས་བྱུང།། བར་དུ་ལུས་ཀྱི་རྒྱུ་འདི་ནི།། ཡེ་ཤེས་གཟུགས་ཀྱི་ཡོན་ཏན་ལས།། ཟེར་གྱི་ཡན་ལག་འོད་སྣང་ལུས།། ཐོག་མར་ལུས་ཀྱི་རྒྱུ་འདི་ནི།། རྒྱུ་ཡི་ལུས་དང་རྐྱེན་གྱི་ལུས། ། རྒྱུ་ཡི་ལུས་ནི་རྣམ་གཉིས་ཏེ།། རང་གི་རྒྱུ་དང་ཚོགས་པའི་རྒྱུ།། རང་གི་རྒྱུ་ཡི་ལུས་ལ་ཡང།། རིག་པ་འགགས་མེད་འོད་ཀྱི་ལུས།། རྐྱེན་གྱི་ལུས་ལ་རྣམ་གཉིས་ཏེ།། འདུན་པའི་སྒོ་ནས་ལུས་བཙལ་ཏེ།། བཟང་ངན་མེད་པའི་ལུས་ངག་ལ། ། ཐོབ་པའི་འདུ་ཤེས་སྐྱེས་པ་ཡིས།། འདུན་པའི་སེམས་ཀྱིས་བཙལ་ཏེ་འདུག། རྒྱུ་མཐུན་སྣང་བས་ཕ་མར་མཐོང།། ཕ་ཡི་རྡོ་རྗེའི་བྱང་སེམས་ལས།། རང་གི་ལུས་དེའི་རྒྱུ་རུ་མཐོང།། མ་ཡི་རིན་ཆེན་པདྨ་ལས། ། གནས་ཀྱི་སྒོ་ནས་བསྐྱེད་བྱར་མཐོང།། བསྐྱེད་རྒྱུ་བསྐྱེད་བྱ་གཉིས་སྣང་ལས།། རང་གི་ལུས་དེ་གྲུབ་པར་མཐོང།། མཐོང་བའི་འདུན་པས་སྣང་བའི་ལུས་བཙལ་ནས། ཁུ་བ་ཁྲག་ལས་ལུས་ཉིད་མཐོང། ། མཐོང་བའི་ཤེས་པ་བརྟས་པའི་བག་ཆགས་ཀྱིས།། བག་ཆགས་རང་སྣང་ལུས་དེ་བསྐྱེད་པར་སྣང།། སྣང་བའི་ཤེས་པས་དངོས་སུ་ཡོད་པར་གྲུབ།། ནར་ནར་ནུར་ནུར་ནུས་པས་ལུས་ཉིད་བསྐྱེད་པར་གནས། ། ལྟར་ལྟར་ལྟུར་ལྟུར་ལུས་ཀྱི་གཞི་རུ་གྲུབ།། གར་གར་གོར་གོར་ལུས་ཀྱི་དངོས་པོར་ཆགས།། སྡུད་པའི་ལྟེ་བར་དྲི་ཟ་ལྟེ་འཁོར་ལུས།། དབང་པོ་ཡན་ལག་ཚང་བའི་ལུས་སུ་གནས། ། ལུས་སུ་སྨིན་པའི་འབྲས་བུ་སྡུག་བསྔལ་བཅུ་གཉིས་མྱོང།། དོགས་པའི་སྡུག་བསྔལ་ཉི་མེད་དམྱལ་བར་འདྲ།། དབང་པོ་ཡན་ལག་སྡུག་བསྔལ་ཁྱད་པར་རེ།། རྣམ་ཤེས་དབང་པོ་སྡུག་བསྔལ་ལྷག་པ་རེ། ། འདུན་པའི་འདོད་ཆགས་དག་གིས་ལུས་ཉིད་གྲུབ།། ཕ་ལ་ཞེ་སྡང་སྐྱེ་ཞིང་མ་ལ་འདོད་ཆགས་སྐྱེ།། རིག་པ་ཕོ་ཡི་ལུས་སུ་གྲུབ་པའི་རྟགས།། མ་ལ་ཞེ་སྡང་སྐྱེ་ཞིང་ཕ་ལ་འདོད་ཆགས་སྐྱེ།། རིག་པ་མོ་ཡི་ལུས་སུ་གྲུབ་པའི་རྟགས། ། ལུས་ཉིད་མཐོན་པོ་མངོན་དུ་རྒྱས་པ་ན།། འཁྲུལ་པ་མ་རིག་བཞི་བརྒྱ་རྩ་བཞི་རྒྱས།། འཁྲུལ་པ་བཞི་བརྒྱ་རྩ་བཞི་ལས།། སྡུག་བསྔལ་བཞི་བརྒྱ་རྩ་བཞི་བྱུང།། སེམས་ཅན་ལུས་སུ་གྲུབ་པ་བསྟན་པའི་ལེའུ་སྟེ་གཉིས་པའོ། །།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། སེམས་ཅན་ལུས་སུ་གྲུབ་པ་ལ།། ཡེ་ཤེས་ཀྱིས་ནི་བཟློག་པ་དང།། ཡེ་ཤེས་ཉིད་ལུས་ཐོབ་པ་ཅི་ལྟ་བུ། ། སྟོན་པའི་སྟོན་པ་ཀུན་ཏུ་བཟང་པོ་ཡིས།། ཡེ་ཤེས་ལུས་ཉིད་ཐོབ་པའི་དངོས་པོ་ནི།། ཡེ་ཤེས་ལ་ཡང་རྣམ་གཉིས་ཏེ།། རིག་པའི་ཡེ་ཤེས་ལུས་དག་དང།། རིག་མེད་ཡེ་ཤེས་ལུས་དག་གོ། རིག་པའི་ཡེ་ཤེས་ལུས་ཀྱི་དངོས་པོ་ནི།། ཆོས་རྣམས་ཐམས་ཅད་ནམ་མཁའི་ངང་དུ་རིག། ལུས་ཀྱི་དངོས་པོ་ཤིང་བལ་འདབ་བས་ཡང།། སེམས་ཅན་ལུས་ལ་སངས་རྒྱས་དགོངས་པ་ཅན།། ཐ་མལ་པ་ཡི་ལུས་ཉིད་བཟློག་པར་བྱེད། ། ཡེ་ཤེས་སྙིང་པོ་མ་འགགས་འགག་མེད་ལུས།། ལོངས་སྤྱོད་རྫོགས་སྐུའི་མཚན་དང་དཔེ་བྱད་གསལ།། མ་འགགས་མི་གཡོ་ཐོགས་པ་མེད་པའི་སྐུ།། བརྗོད་མེད་མི་བརྗོད་གཡོས་པ་མེད་པའི་ངང། ། ལུས་ཉིད་སྣང་བས་བྱང་སེམས་གྲོལ་བ་སེལ།། ཤེས་བྱའི་སྒྲིབ་པ་གཏིང་དཔག་དཀའ་ཕྲ་མོ།། སྐུ་ཉིད་སྣང་བ་ཙམ་གྱིས་སེལ་བར་བྱེད།། ཐོགས་མེད་འོད་ཀྱི་ལུས་སུ་གྲུབ་པ་སྟེ།། ཐོགས་བཅས་ལུས་ཀྱི་སྣང་བ་བཟློག་པར་འབྱེད། ། རིག་མེད་ཡེ་ཤེས་སྙིང་པོའི་ལུས་དེ་ནི།། ཡེ་ཤེས་སྙིང་པོ་འགག་མེད་འགག་པ་མེད།། ཡུལ་དང་ཡུལ་ཅན་གཉིས་སུ་མི་རིག་ཅིང།། མཚན་མ་རྣམ་རྟོག་གཉིས་སུ་རིག་པ་མེད།། རིག་མེད་ལུས་དེ་ཆོས་ཉིད་ནམ་མཁའ་འདྲ། ། ཆོས་ཉིད་ནམ་མཁའ་གཟུགས་སུ་གྲུབ་པ་མེད།། གཟུགས་སུ་མ་གྲུབ་དངོས་པོར་ཐོགས་པ་མེད།། ཡེ་ཤེས་རང་དབང་ཆེན་པོའི་ལུས་སུ་གྲུབ་པ་ཡིན།། གཞན་ལ་མི་ལྟོས་ཁྱད་པར་ཆེན་པོའི་ལུས། ། རང་གི་ལུས་དེ་རང་གི་དབང་ཐོབ་པོ།། རྒྱུ་རྐྱེན་བྲལ་བའི་ལུས་སུ་གྲུབ་པ་ཡིན།། སེམས་ཅན་ལུས་དེ་ཡེ་ཤེས་ལུས་སུ་གྲུབ་པའོ།། ཡེ་ཤེས་ལུས་ཉིད་གྲུབ་པའི་ཡོན་ཏན་ནི།། ལུས་དེང་རྒས་དང་ན་བ་མེད་པར་འོང། ། ལུས་དེ་ཡང་ཞིང་བཅོས་སུ་བཏུབ་པར་འོང།། ཤི་བ་མེད་ཅིང་ཡེ་ཤེས་འཕོ་འཇུག་ཤེས།། དམིགས་པའི་ལུས་མེད་ལུས་དེ་ཅིར་ཡང་སྣང།། སེམས་ཅན་ལུས་དེ་རྐྱེན་གྱིས་བསྒྲུབ་པར་ཡོད། ། ཡེ་ཤེས་ལུས་དེ་རྒྱུ་རྐྱེན་བྲལ་བའི་ལུས།། གཟུགས་མེད་ནམ་མཁའི་ལུས་ཀྱིས་བཟློག་པར་བྱེད།། གཟུགས་ཁམས་འོད་ལས་གྲུབ་པའི་དངོས་པོ་དེ།། གཟུགས་དེ་ཐོགས་མེད་ཡེ་ཤེས་འོད་ཀྱིས་བཟློག། ལུས་མེད་ལུས་དེ་ལུས་ཀྱི་མཆོག་ཆེན་པོ།། ལུས་ཀྱི་མཐའ་ཉིད་རྟོགས་པས་ལུས་ཀུན་རྟོག། གཟུགས་སུ་བཟུང་བའི་ལུས་དེ་འཁྲུལ་ལུས་སོ།། སངས་རྒྱས་ཀུན་གྱི་རྟོགས་པའི་ལུས་ཆེན་པོ།། སེམས་ཅན་ལུས་ཀྱི་ཡེ་ཤེས་མ་འཁྲུལ་པར་བསྟན་པའི་ལེའུ་སྟེ་གསུམ་པའོ། །།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། སེམས་ཅན་ལུས་སུ་གྲུབ་པ་ཐམས་ཅད་ལ།། མི་རྟག་འཆི་བའི་ལུས་དེ་སྣང་ཚུལ་གང། ། སྟོན་པའི་སྟོན་པ་ཀུན་ཏུ་བཟང་པོ་ཡིས།། སེམས་ཅན་ལུས་སུ་གྲུབ་པ་ཐམས་ཅད་ལ།། རྒྱུ་དང་རྐྱེན་གྱིས་བསྐྱེད་པ་ཡིན་པས་ན།། རྒྱུ་ཡི་ནུས་པ་ཟད་པས་འཆི་བར་སྣང། ། ནུས་པ་ཟད་པའི་རྟགས་ནི་འདི་རྣམས་འབྱུང།། འབྱུང་བ་ལྔ་ཡིས་བསྐྱེད་པའི་ལུས་ཡིན་པས།། ས་ཡི་ནུས་པ་ཟད་པས་སྐམ་པོར་སྣང།། ཆུ་ཡི་ནུས་པ་ཟད་པས་ལྕི་བར་འོང།། མེ་ཡི་ནུས་པ་ཟད་པས་གྲང་བར་འོང། ། རླུང་གི་ནུས་པ་ཟད་པས་ལྡང་མི་ནུས།། ནམ་མཁའི་ནུས་པ་ཟད་པས་བཀྲག་མདངས་ཉམས།། འཆི་བ་ལྟ་བུའི་སྣང་བ་འབྱུང་བ་ཡིན།། དགེ་སྡིག་བྱས་པའི་འཆི་བའི་སྣང་བ་གང།། དགེ་བ་བྱས་པའི་སྣང་བ་འདི་རྣམས་འབྱུང། ། རང་གི་སྣང་བ་ལྷ་དང་ལྷ་མོ་ཡིས།། འདོད་ཡོན་མཆོད་པ་འབུལ་བའི་སྣང་བ་འབྱུང། ཁ་དོག་དཀར་པོ་འོད་དང་བཅས་པར་སྣང།། ཞིང་ཁམས་མ་ལུས་གསལ་ཞིང་ཡི་དམ་གསལ།། བདེ་གཤེགས་སངས་རྒྱས་རྣམས་ཀྱི་སྲས་ཀྱི་དམ་པར་བྱེད། ། ལྷ་དང་མཁའ་འགྲོས་སྤུན་དང་གྲོགས་པོར་བྱེད།། གཤིན་རྗེ་ཤ་ཟ་མང་པོས་ཁུར་ཞིང་རྗེ་བོར་མཐོང།། ལྷ་སྲིན་སྡེ་བརྒྱད་བྲན་དང་གཡོག་པོར་སྣང། ། དབུགས་ཀྱི་དྲོད་དེ་རྐང་མཐིལ་ནས་ཡལ་ནས།། སྤྱི་གཙུག་ཚངས་པའི་གནས་སུ་སྡུད་པར་བྱེད།། ཕྱི་ཡི་དབུགས་དེ་རིང་དུ་རྒྱུས་པ་ལས།། རྟོག་མེད་ནམ་མཁའི་ངང་ལ་སེང་རྩེར་ཐོང།། སྡིག་པ་བྱེད་པའི་འཆི་བའི་སྣང་བ་དེ། ། ཤ་ཟ་གཤིན་རྗེ་མང་པོ་མཐོང་བ་དང།། མི་སྡུག་གཟུགས་ཉིད་སྣ་ཚོགས་སྟོན་པར་བྱེད།། ཚེ་སྲོག་དབུགས་ཀྱིས་བརྒྱལ་བ་མི་རྟོགས་ཏེ།། ངུ་ཞིང་ཆོ་ངེ་མང་པོ་འདོན་པར་བྱེད།། ཞགས་ཐོགས་མཚོན་ཐོགས་མང་པོའི་གཤིན་རྗེ་ཡིས། ། ད་འདོང་ཟེར་ཞིང་རྒྱབ་ནས་ཕུལ་བར་བྱེད།། ཚ་གྲང་དམྱལ་བའི་སྡུག་བསྔལ་མང་པོ་མྱོང་བར་སྟོན།། སྲིད་པའི་འཁོར་ལོ་ཉིན་བདུན་མཚན་བདུན་བསྐོར། ། རང་གིས་སྡུག་བསྔལ་མང་པོ་ཞར་ལ་སྣང།། བསྐལ་པར་བསགས་པའི་སྡུག་བསྔལ་སྟོན་པར་བྱེད།། རིགས་དྲུག་སྣང་བ་ཐམས་ཅད་སྟོན་པར་འོང།། རང་གི་མཚན་མ་ནག་པོར་མཐོང།། རང་གིས་དུས་ནས་ཕ་བོས་མ་བོས་ཀྱང། ། མུན་ནག་ཆེན་པོར་རང་ཉིད་གཅིག་པུར་འཁྱམས།། སྲིད་པར་འཁྱམས་པའི་སྡུག་བསྔལ་མང་པོ་མཐོང།། ལྷ་སྲིན་སྡེ་བརྒྱད་ཤ་དང་ཁྲག་ལ་ཟ།། ལུས་ཀྱི་དྲོད་དེ་སྤྱི་བོ་ནས་བཟུང་ནས། ། རྐང་མཐིལ་བར་དུ་དྲོད་དེ་ཡལ་བར་བྱེད།། རང་གི་སྣང་བ་འཁྲུལ་པས་དམྱལ་བ་མཐོང།། འཆི་བའི་ལུས་སྣང་བའི་ལེའུ་སྟེ་བཞི་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ། ། སྲིད་པ་བར་མ་དོ་སྣང་བའི་ལུས་དེ་ཅི་ལྟ་བུ་ལགས།། སྟོན་པའི་སྟོན་པ་ཀུན་ཏུ་བཟང་པོ་དེས།། བྱུང་བའི་བར་དོ་འབྱུང་བའི་བར་དོ་དང།། གནས་པའི་བར་དོ་རྣམ་པ་གསུམ་དུ་བྱུང། ། བར་དོར་ཕལ་ཆེར་ཞགས་ནི་བདུན་ལ་འབྱུང།། བདུན་ཚེ་བདུན་ལ་བར་དོ་ཐེངས་རེ་འབྱུང།། བར་དོ་རང་ལ་གནས་པའི་སྣང་ཚུལ་ནི།། ལུས་ཀྱི་སྣང་ཚུལ་སེམས་ཀྱི་སྣང་ཚུལ་ལོ།། ལུས་ཀྱི་སྣང་ཚུལ་འདི་ལྟར་སྣང་བ་སྟེ། ། དབང་པོ་ཀུན་ཚང་ཐོགས་མེད་ལུས།། སྔོན་འབྱུང་སྲིད་པའི་ཤ་གཟུགས་ཅན།། ཐོགས་མེད་ལུས་དེ་ཐམས་ཅད་འཁྱམས།། དབུགས་ཀྱི་རྟ་ལ་རབ་ཞོན་ཏེ།། འདས་དང་མ་འོངས་ཐམས་ཅད་ཀུན། ། རང་གི་བག་ཆགས་ཐམས་ཅད་གསལ།། དགེ་སྡིག་ཅི་བྱས་གསལ་བར་སྣང།། སྔོན་དུ་འདྲིས་པ་ཐམས་ཅད་ཀུན།། གདུང་བའི་སེམས་ཀྱིས་གསལ་བར་སྣང།། འདྲིས་པའི་ཡུལ་གྱིས་བོས་པའི་ཚེ།། ལམ་དེ་བཞག་ནས་མལ་ལ་འཁོར། ། སྔོན་དུ་ཅི་བྱས་རྣམ་པར་གསལ།། འདྲིས་པའི་དངོས་པོ་བརྗེད་མི་བྱེད།། རྣམ་རྟོག་དབུགས་ཀྱི་རྟ་ལ་ཞོན།། ཀུན་ཏུ་འཁྱམས་ཏེ་ཀུན་ཏུ་འཁོར།། ས་མལ་དུས་རྟགས་མེད་པ་རུ།། རང་གི་སྣང་བ་གཅིག་པུར་མཐོང། ། ཤིན་ཏུ་འཇིགས་པའི་གཤིན་རྗེ་ཡིས།། སྡིག་བྱེད་ལུས་ལ་གནོད་པར་བྱེད།། སྡུག་བསྔལ་སྣ་ཚོགས་མྱོང་བར་བྱེད།། འདི་དང་ཕྱི་མ་གཉིས་ཀ་གསལ།། གསལ་བའི་ཡེ་ཤེས་ཕྲ་མོ་དེ། ། ཡེ་ཤེས་གསུམ་དུ་འགྱུར་བ་ཡིན།། རིག་པའི་ཡེ་ཤེས་ཆོས་རྣམས་གསལ།། རིག་པ་མི་གཡོ་ཡེ་ཤེས་གསལ།། རིག་མེད་སྙིང་པོ་ཆོས་ཉིད་གསལ།། ཡེ་ཤེས་གསུམ་ལ་གནས་པར་བྱའོ།། སེམས་ཅན་དུས་ན་འདུ་ཤེས་ཡིན། ། ཐེག་པའི་དུས་ན་སེམས་ཉིད་ཡིན།། སངས་རྒྱས་དུས་ན་ཡེ་ཤེས་ཡིན།། དབུགས་ལ་བརྟེན་པའི་ཤེས་པ་དེ།། ཕྱི་རུ་སྤྲོ་ཡང་མི་སྤྲོ་གདགས།། ནང་དུ་རྔུབ་ཀྱང་སྡོག་མི་བསྐྱོད།། རང་སོར་གནས་ཀྱང་སྤྲོ་མི་བྱ། ། ཕྱི་ནང་ཐམས་ཅད་གསལ་བ་སྟེ།། ཡེ་ཤེས་གསལ་བའི་རྒྱུ་ཡིན་པས།། དམིགས་བྱ་དམིགས་བྱེད་མེད་པ་རུ།། ཆོས་སྐུ་ནམ་མཁའི་ངང་ལ་བཞག། ཐོག་མ་མེད་པའི་ལུས་དེ་ནི།། མིང་ཙམ་མེད་པའི་སྐུ་འགྲུབ་པས། ། ཐོགས་བཅས་ལུས་པོ་ཆོས་ཉིད་ཐོབ།། རང་བཞིན་མེད་པར་གཞག་པར་བྱ།། སྣ་ཚོགས་གཟུགས་སུ་གསལ་བ་དེ།། ཡེ་ཤེས་ཡོན་ཏན་མ་འགགས་པས།། མ་འགགས་འགག་པ་མེད་པར་བཞག། མཚན་མེད་ཆོས་ཉིད་མཐོང་བ་མེད།། བརྡ་དང་མིང་གི་མཐོང་བ་སྟེ།། མཐོང་མེད་དོན་དམ་མཐོང་བ་སྟེ།། ཆོས་ཉིད་མཐོང་ན་ནམ་མཁའ་འདྲའོ།། བར་དོ་རང་སྣང་གི་ལེའུ་སྟེ་ལྔ་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས། ། སྟོན་པའི་སྟོན་པ་ཀུན་ཏུ་བཟང་པོ་ལ།། བར་དོའི་ཤེས་པ་དེ་དག་ལ།། བཅོས་པའི་ཐབས་ནི་ཇི་ལྟ་བུ།། བར་དོའི་ཤེས་པ་དེ་དག་ལ།། བཅོས་པའི་ཐབས་ནི་རྣམ་གསུམ་སྟེ། ། མ་ཆགས་མི་གཡོ་བཅོས་པ་ནི།། ལོངས་སྤྱོད་ལུས་ལ་མ་ཆགས་པས།། དམིགས་པ་མེད་པའི་འབྲས་བུ་ཐོབ།། ལོངས་སྤྱོད་ལ་ནི་རྣམ་གཉིས་ཏེ།། དབང་པོ་ལྔ་ཡི་ལོངས་སྤྱོད་ལ།། ཆགས་ན་འདོད་པའི་ཁམས་སུ་སྐྱེ། ། རང་གི་ལུས་ལ་ཆགས་པས་ནི།། འདོད་པའི་ཁམས་ཀྱི་ལྷ་རུ་སྐྱེ།། རང་སེམས་རང་ལ་ཆགས་པས་ནི།། གཟུགས་ཁམས་གནས་སུ་ལུས་ལེན་ཏེ།། ཞེ་སྡང་རྒྱུན་ཆེན་དྲགས་པ་ན།། དམྱལ་བའི་གནས་སུ་ལུས་ལེན་ཏེ། ། འདོད་ཆགས་རྒྱུན་ཆེན་དྲགས་པས་ན།། ཡི་དྭགས་གནས་སུ་ལུས་ལེན་ཏེ།། གཏི་མུག་རྒྱུན་ཆེན་དྲགས་པ་ན།། དུད་འགྲོའི་གནས་སུ་ལུས་ལེན་ཏོ།། ང་རྒྱལ་རྒྱུན་ཆེན་དྲགས་པ་ན།། མི་ཡི་གནས་སུ་ལུས་ལེན་ཏོ། ། ཕྲག་དོག་རྒྱུན་ཆེན་དྲགས་པ་ན།། ལྷ་མིན་གནས་སུ་ལུས་ལེན་ཏོ།། ལེ་ལོ་རྒྱུན་ཆེན་དྲགས་པ་ན།། ལྷ་ཡི་གནས་སུ་ལུས་ལེན་ཏོ།། ཡེ་ཤེས་གཡོ་བ་མེད་པའི་རྟགས།། འགགས་ན་ལོངས་སྤྱོད་རྫོགས་སྐུར་སྐྱེ། ། ཆོས་ཉིད་མི་འགྱུར་ནམ་མཁའ་ལ།། རང་བཞིན་མེད་པར་རྟོགས་པ་ན།། སངས་རྒྱས་ཆོས་སྐུའི་སྙིང་པོ་ཐོབ།། འཆི་བ་དབུགས་ཀྱི་བར་དོ་རུ།། ཆོས་རྣམས་ཐམས་ཅད་དྲན་མི་བྱ།། དྲན་རྟོག་མེད་པའི་ནམ་མཁའ་ལ། ། དམིགས་པ་མེད་པར་སིང་ངེར་བཞག། བག་ཆགས་མི་གཡོ་ཡེ་ཤེས་ཏེ།། རང་བཞིན་མེད་པར་གཞག་པར་བྱ།། རང་བཞིན་མེད་པར་རྟོགས་གྱུར་ན།། སངས་རྒྱས་ཀུན་གྱི་སྙིང་པོ་ཐོབ།། ཆོས་རྣམས་ནམ་མཁའི་སྙིང་པོ་ལ། ། མཚན་མའི་རྣམ་རྟོག་ཅི་བྱུང་ཡང།། རྟོག་མེད་ནམ་མཁའི་ངང་དུ་བསྒོམ།། ཆོས་རྣམས་ཐམས་ཅད་ལྟ་བས་གཅོད།། ལུས་ངག་སྤྱོད་པ་ཆེན་པོ་དེ།། ལུས་ཀྱི་སྡུག་བསྔལ་ཅི་བྱུང་ཡང།། རིག་པའི་ཤེས་པ་དེ་དག་ཀུན། ། རིག་མེད་དབུགས་ཀྱི་རྟ་ཕོ་ལ།། རྣམ་རྟོག་བཅས་དེ་མཁའ་ལ་བཞག། རྣམ་རྟོག་སྐྱེད་པ་ཡིད་ཡིན་པས།། ཡིད་ཀྱི་ཡེ་ཤེས་མིང་མེད་བསྒོམ།། ལོ་དང་བསྐལ་པ་མང་པོ་རུ།། ཉོན་མོངས་བག་ཆགས་མང་ཡོད་ཀྱང། ། བར་དོའི་ཡེ་ཤེས་སྐད་ཅིག་གིས།། གསལ་བས་ཐམས་ཅད་དག་པར་བྱེད།། འཆི་ཁའི་ཡེ་ཤེས་སྟོབས་དྲགས་ན།། གོང་གི་རྣམ་རྟོག་ཉོན་མོངས་ཀུན།། ཡེ་ཤེས་སྐད་ཅིག་དག་གིས་སེལ། ། འཆི་ཁའི་ཡེ་ཤེས་སྟོབས་ཞན་ན།། ལོ་དང་བསྐལ་པའི་བག་ཆགས་ཀུན།། དུས་དེ་ཉིད་དུ་རྫོགས་པར་སྣང།། བར་དོའི་ཤེས་པ་ཡེ་ཤེས་སུ་བཅོས་པའི་ཐབས་བསྟན་པའི་ལེའུ་སྟེ་དྲུག་པའོ། །།། སྡུད་པོ་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། མཐོ་རིས་ངན་སོང་གར་འགྲོ་བ།། དབུགས་དང་དྲོད་ཀྱི་ཆ་ཡིས་ཤེས།། དྲོད་དབུགས་བརྟག་པ་ཅི་ལྟ་བུ། ། སྟོན་པའི་སྟོན་པ་ཀུན་ཏུ་བཟང་པོ་དེས།། མཐོ་རིས་འགྲོ་བའི་དྲོད་དེ་ནི།། རྐང་མཐིལ་དག་ནས་དྲོད་ཡལ་བ།། སྲིད་པ་ཆགས་པའི་ལྟེ་བ་རུ། ལུས་ཀྱི་དྲོད་ནི་དེར་འདུས་ན། ཁྱད་པར་ལྷ་ཡི་གནས་སུ་སྐྱེ།། དེ་ནས་སྙིང་དྲོད་ཡར་བསྡུས་ཏེ། ། མགྲིན་པའི་ངག་གི་གནས་དེར་སྡུད།། ལུས་ཀྱི་དྲོད་ནི་དེར་འདུས་ན། ཁྱད་པར་ལྷ་མིན་གནས་སུ་སྐྱེ།། མགྲིན་པའི་དྲོད་དེ་ཡར་བསྡུས་ནས།། སྤྱི་བོ་ཚངས་པའི་གནས་དེར་འདུས། ། བསྡུས་ཏེ་འོད་དང་གཞའ་སོང་ན།། ཕྱག་རྒྱ་ཆེན་པོའི་རྒྱུ་རུ་སྐྱེ།། མཐོ་རིས་ཐོབ་པའི་དབུགས་རྟགས་ནི།། ནང་དུ་སུམ་ཆ་རྔུབ་པ་ན།། ལྷ་དང་ལྷ་མིན་ཁྱད་པར་ཐོབ།། ཕྱི་རུ་སུམ་གཉིས་སྤྲོ་བ་ན།། རིག་པ་འཛིན་པའི་ས་རུ་སྐྱེ། ། ངན་སོང་སྐྱེ་བའི་དྲོད་དེ་ནི།། སྤྱི་བོའི་གཙུག་ནས་དྲོད་ཡལ་ཏེ།། ལྟེ་བའི་གནས་སུ་དྲོད་བསྡུས་ན།། གླེན་ལྐུགས་བྱོལ་སོང་གནས་སུ་སྐྱེ།། ལྟེ་བ་ནས་བཟུང་དྲོད་ཡལ་ཏེ།། རྐང་མཐིལ་གནས་སུ་དྲོད་ཡལ་ན། ། དམྱལ་བའི་གནས་སུ་སྐྱེ་བར་ངེས།། ལུས་ཀྱི་ཕྱི་རུ་དྲོད་བྲོས་ནས།། ཐད་ཁར་རང་རང་ཡལ་བ་ན།། བཀྲེས་སྐོམ་ཡི་དྭགས་གནས་སུ་སྐྱེ།། ངན་སོང་འགྲོ་བའི་དབུགས་དེ་ནི།། ནང་དུ་སུམ་གཉིས་རྔུབ་པ་དང། ། ཕྱི་རུ་སུམ་ཆ་སྤྲོ་བ་ནི།། ངན་སོང་གནས་སུ་སྐྱེ་བར་ངེས།། མཐོ་རིས་གནས་སུ་སྐྱེ་བ་ན།། ཆོས་སྐུ་རིག་མེད་ནམ་མཁའ་བསྒོམ།། ངན་སོང་གནས་སུ་སྐྱེ་བ་ན།། ཡེ་ཤེས་རིག་གསལ་སྟོང་པ་བསྒོམ།། མཐོ་རིས་ངན་སོང་བརྟགས་པའི་ལེའུ་སྟེ་བདུན་པའོ། །།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། མཐོ་རིས་ངན་སོང་རིགས་པ་ལ།། ངན་སོང་གནས་ནས་འདྲེན་པ་ལ། ། ཕྱག་རྒྱ་ཏིང་འཛིན་ལྡན་པ་ལ།། དམིགས་པ་མེད་པའི་ཐུགས་རྗེ་ཡིས།། ཉོན་མོངས་དྲངས་ཤིང་གནས་ནས་འགུགས།། ཉོན་མོངས་དབང་གིས་སྐྱེ་བ་སྦྱོང་བའི་ཐབས་དེ་གང།། སྟོན་པའི་སྟོན་པ་ཀུན་བཟང་གིས། ། ཚེ་འདས་རིགས་ཀྱི་བུ་དེ་ཡང།། དྲི་མ་རུས་པའི་རྟེན་དག་ལ།། རིན་ཆེན་དར་དང་ཚོན་སྐུད་ཀྱིས།། ལེགས་པར་རིགས་དྲུག་སྙིང་པོ་འགོད།། ཡི་གེ་ཨཱཿཧཱུཾ་ཕཊ་དག་གིས།། རྒྱ་ཡིས་གདབ་སྟེ་གུར་ཆེན་དབུས། ། ཉོན་མོངས་སྦྱང་ཕྱིར་བཀུག་ལ་བསྟིམ།། ཡེ་ཤེས་ཕྱག་རྒྱ་ཀུན་བཟང་གིས།། ཐུགས་ཀྱི་ཡི་གེ་ཧཱུཾ་བཏོན་ནས།། ཨཱཿཡིས་བསྟིམ་ཏེ་ཕཊ་ཀྱིས་སྤར།། ཕཊ་ཀྱི་འོད་ཟེར་ནག་པོ་ཡིས།། ཉོན་མོངས་སྦྱངས་པས་ཡེ་ཤེས་གསལ། ། ཡེ་ཤེས་དེ་ཡི་བྱིན་རླབས་ལས།། བྱང་ཆུབ་སེམས་དེ་ཡི་གེ་ཨཱཿ།། དམིགས་པ་མེད་པའི་ཆོས་ཉིད་བསྒོམ།། དེ་ཡི་ཁྱད་པར་ཡོན་ཏན་ལ།། ཉོན་མོངས་སྦྱངས་ཏེ་ཡེ་ཤེས་གསལ།། རང་བཞིན་མེད་པའི་ཆོས་སྐུ་ཐོབ། ། བར་དོའི་ཉོན་མོངས་སྦྱོང་བའི་ལེའུ་སྟེ་བརྒྱད་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། བར་དོའི་སེམས་ཉིད་དྲི་མ་མེད། ། དག་པའི་རྟགས་ནི་ཅི་ཞིག་འབྱུང།། སྟོན་པའི་སྟོན་པ་ཀུན་ཏུ་བཟང་པོ་དེས།། དྲི་མ་དག་རྟགས་གསུམ་འབྱུང་སྟེ།། ཉོན་མོངས་དྲི་མ་དག་པ་ནི།། བྱུང་བའི་ཉོན་མོངས་དྲི་མ་དང།། འབྱུང་བའི་ཉོན་མོངས་དྲི་མ་དང། ། བྱུང་ནས་གནས་པའི་ཉོན་མོངས་དྲི་མའོ།། བྱུང་བའི་ཉོན་མོངས་དྲི་མ་ནི།། མ་རིག་པ་ཡི་རྒྱུ་ཡིན་ནོ།། འཁྲུལ་དང་མ་འཁྲུལ་མི་ཤེས་པས།། མ་རིག་པ་ཞེས་དེ་ལ་བྱ།། བྱུང་བའི་མ་རིག་པ་དེས་ནི།། བྱིང་བའི་ཤེས་པ་སྐྱེད་པར་བྱེད། ། རང་བྱུང་ཡེ་ཤེས་མི་གསལ་བས།། བར་དཽའི་གནས་སུ་ཤེས་པ་སྐྱེ།། འབྱུང་བའི་ཉོན་མོངས་དྲི་མ་དེས།། ཉོན་མོངས་རྒོད་པའི་རྒྱུ་བྱས་ཏེ།། ཆོས་རྣམས་ཐམས་ཅད་མིང་དུ་སྣང།། མིང་ཚིག་ཟུང་དུ་འབྲེལ་བ་ཡིས། ། ཆོས་རྣམས་ཐམས་ཅད་བརྗོད་བྱར་མཐོང།། མཐོང་བའི་དོན་ལ་བློ་ཆགས་པས།། སྣ་ཚོགས་གཟུགས་ཀྱི་སྣང་བར་བྱུང།། སྣང་བའི་དོན་དེ་འཁྲུལ་པ་ཡིས།། བར་དོ་སྣ་ཚོགས་འཁོར་བ་ལས། ། ཉིན་མཚན་དུས་སུ་ལུས་ཉིད་བྲལ།། འབྲས་བུ་སྡུག་བསྔལ་མི་འདོད་འདུ།། བྱུང་ནས་གནས་པའི་དྲི་མ་ནི།། རང་གནས་ཤེས་པས་རྒྱུ་བྱས་ཏེ།། འབྲས་བུ་རིགས་དྲུག་སྡུག་བསྔལ་མྱོང།། འདོད་ཆགས་ཞེ་སྡང་གཏི་མུག་དང། ། ང་རྒྱལ་ཕྲག་དོག་རེ་རེ་ཡིས།། ཉོན་མོངས་སྟོབས་དང་ཡེ་ཤེས་སྟོབས།། སྟོབས་ཀྱི་ཁྱད་པར་རེ་རེ་ལས།། རང་སྟོབས་རང་གནས་འབྲས་བུ་ཐོབ།། བར་དོའི་ཤེས་པ་དེ་དག་ལ།། ཉོན་མོངས་དྲི་མ་དག་པའི་རྟགས། ། འབྲས་བུ་སྨྱག་ཤད་ལྕུག་མ་ཙམ།། དཀར་ལ་འཚེར་བའི་རྒྱུ་ཉིད་འབྱུང།། ཉོན་མོངས་སྒྲིབ་པ་དག་པའི་རྟགས། ཁ་དོག་དཀར་པོ་འོད་ཉིད་འབྱུང།། ཤེས་བྱའི་སྒྲིབ་པ་དག་པའི་རྟགས།། ཤ་རཱི་རམ་དང་ཉ་རཱི་རམ། ། གདུང་ནི་རྒུན་འབྲུམ་ཚད་ཙམ་འབྱུང། ཁ་དོག་སྨུག་ཅིང་མདངས་ཆེ་བ།། བྱང་སེམས་འབྲས་བུ་ཐོབ་པའི་རྟགས།། གསང་སྔགས་རྣལ་འབྱོར་ལྷ་བསྒོམས་པས།། སྐུ་གདུང་རིང་བསྲེལ་རྣམ་ལྔ་འབྱུང། ། ཕྱག་རྒྱ་ཐོབ་པས་སྐུ་གཟུགས་འབྱུང།། གསུང་ཉིད་ཐོབ་པས་སྒྲ་འོད་འབྱུང།། ཐུགས་ཉིད་ཐོབ་པས་འཇའ་འོད་འབྱུང།། གསང་སྔགས་འབྲས་བུ་ཐོབ་པའི་རྟགས།། འབྲས་བུ་ཐོབ་པའི་རྣལ་འབྱོར་པས། ། ཡེ་ཤེས་ཡོན་ཏན་མ་འགགས་པས།། འབྲས་བུ་ཐམས་ཅད་ཐོབ་པའི་རྟགས།། སྐུ་གཟུགས་ཁ་དོག་ཅི་ཡང་སྣང།། ཆེ་ཆུང་མཐེ་བོང་ཙམ་དུ་འབྱུང།། འཇའ་དང་འོད་དང་ཁུ་རླངས་འབྱུང།། སྒྲ་དང་ན་བུན་སྐར་མདའ་འབྱུང། ། ཆོས་སྐུ་ལོངས་སྐུ་སྤྲུལ་སྐུ་ཡང།། ཐ་དད་མེད་པར་ལྷུན་གྱིས་གྲུབ།། ཉོན་མོངས་སྒྲིབ་པ་དག་པའི་རྟགས།། འབྲས་བུ་མངོན་དུ་འགྲུབ་རྟགས་ཡིན།། བར་དོའི་དྲི་མ་དག་པའི་རྟགས་ཀྱི་ལེའུ་སྟེ་དགུ་པའོ། །།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། ཚེ་འདས་ལུས་ཀྱི་ཕུང་པོ་ལ།། སྦྱོང་བའི་ཐབས་ནི་ཅི་ལྟ་བུ།། ལུས་དེ་སྦྱངས་པས་ཅི་ལ་ཕན། ། སྟོན་པའི་སྟོན་པ་ཀུན་ཏུ་བཟང་པོ་ཡིས།། ལུས་ཀྱི་ཕུང་པོ་སྦྱོང་ཐབས་གསུམ།། ཡེ་ཤེས་མེ་ལྷས་སྦྱང་བ་དང།། ཡིག་འབྲུ་སྔགས་ཀྱིས་སྦྱང་བ་དང།། ཆོས་ཉིད་ཏིང་འཛིན་གྱིས་སྦྱང་བའོ།། ཡེ་ཤེས་མེ་ལྷ་རྣམ་གཉིས་ཏེ། ། དམ་ཚིག་མེ་ལྷ་ཡེ་ཤེས་མེ་ལྷའོ།། དམ་ཚིག་མེ་ལྷས་སྦྱང་བ་ནི།། ཆོས་ཉིད་ནམ་མཁའི་རང་བཞིན་ལ།། རིག་པ་ཡེ་ཤེས་ཆེན་པོ་དེའང།། འཛིན་རྟོག་མེད་པའི་ཐུགས་ཉིད་ལས།། རང་བྱུང་ཡེ་ཤེས་མེ་སྦར་བས། ། རྣམ་རྟོག་བག་ཆགས་མཁའ་ལ་ཐིམ།། ཡེ་ཤེས་མེ་ལྷས་སྦྱང་བ་ནི།། ཐོག་མ་མེད་པའི་དུས་ཉིད་ནས།། སྐྱེས་དང་མ་སྐྱེས་གཉིས་མེད་དེ།། རང་ལ་གནས་པའི་ཡེ་ཤེས་དེར།། མཉམ་པར་བཞག་པས་ལུས་ཉིད་སྦྱངས། ། ལུས་ཀྱི་རྣམ་རྟོག་བག་ཆགས་ཀུན།། ཆོས་ཉིད་ནམ་མཁའི་ངང་ལ་ཐིམ།། འབྱུང་བའི་མེ་ཡིས་ལུས་ཉིད་བསྲེག། ཡིག་འབྲུ་སྔགས་ཀྱིས་སྦྱང་བ་ནི།། རྐང་མཐིལ་གཉིས་སུ་ཡཾ་གཉིས་བསམ།། གསང་བའི་སྒོ་རུ་རཾ་བསམ་མོ། ། ལྟེ་བར་རིགས་དྲུག་ཡིག་འབྲུ་བསམ།། སྙིང་གར་ཕཊ་ཀྱི་གདན་དག་ལ།། སྐུ་གསུང་ཐུགས་ཀྱི་སྙིང་པོ་བསམ།། ཡཾ་ལས་ཡེ་ཤེས་རླུང་བྱུང་བས།། རཾ་ལས་ཡེ་ཤེས་མེ་སྦར་ནས།། རིགས་དྲུག་བག་ཆགས་ཐམས་ཅད་བསྲེག། ལུས་དང་ངག་ཡིད་སྐུ་གསུང་ཐུགས་སུ་འགྱུར།། ཕཊ་ཀྱིས་ཆོས་ཉིད་གནས་སུ་འཕང།། སྐུ་གསུང་ཐུགས་སུ་ལྷུན་གྲུབ་ཐོབ།། ཡེ་ཤེས་ཡིག་འབྲུས་སྦྱང་བའི་གཞི།། སྐྱེ་བ་མེད་པའི་ཡིག་འབྲུ་ནི། ། མཚོན་དུ་མེད་པའི་ཆོས་ཉིད་ཡིན།། གནས་པ་མེད་པའི་ཡིག་འབྲུ་ནི།། འཕོ་འགྱུར་མེད་པའི་ཡེ་ཤེས་ཡིན།། ཤི་བ་མེད་པའི་ཡིག་འབྲུ་ནི།། བརྗོད་དུ་མེད་པའི་ནམ་མཁའ་ཡིན།། སྔགས་ཀྱིས་སྦྱང་བ་རྣམ་གཉིས་ཏེ། ། དག་པའི་སྔགས་དང་མ་དག་སྔགས།། དག་པའི་སྔགས་ཀྱིས་སྦྱང་བ་ནི།། སྒྲ་དང་ཚིག་ཏུ་མ་བརྗོད་ཀྱང།། ཆོས་རྣམས་ཐམས་ཅད་སྟོང་པར་སྦྱང།། ཆོས་ཉིད་བདེན་པའི་སྔགས་འདི་ཡིས།། མཚན་མའི་རྣམ་རྟོག་སྟོང་པར་དག། མ་དག་སྔགས་ཀྱིས་སྦྱང་བ་ནི།། ཆོས་རྣམས་ཐམས་ཅད་སྟོང་པར་སྤྲུལ་པ་སྟེ།། བདེ་གཤེགས་གསུང་གི་སྤྲུལ་པ་ཡིན།། སྐུ་དང་གསུང་དང་ཐུགས་དང་ནི།། ཡོན་ཏན་ཕྲིན་ལས་སྔགས་ཀྱིས་སྦྱང། ། གསུང་ཉིད་རྣམ་རྟོག་བག་ཆགས་ཀུན།། བདེར་གཤེགས་གསུང་གིས་སྦྱང་བར་བྱ།། ལུས་ཀྱི་རྣམ་རྟོག་ཐམས་ཅད་ཀུན།། བདེ་གཤེགས་སྐུ་ཡིས་སྦྱང་བར་བྱ།། སེམས་ཀྱི་རྣམ་རྟོག་ཐམས་ཅད་ཀུན། ། ཆོས་སྐུ་ཆེན་པོས་སྦྱང་བར་བྱ།། ཐོག་མ་མེད་པའི་སྡིག་སྒྲིབ་ཀུན།། ཡེ་ཤེས་འོད་ཟེར་དག་གིས་སྦྱང།། ཆོས་ཉིད་ཏིང་འཛིན་སྦྱང་བ་ནི།། ཆོས་སྐུ་སྤྲུལ་པའི་ཡུལ་དག་བྲལ།། སྦྱང་དང་མ་སྦྱངས་གཉིས་མེད་པས། ། ཆོས་རྣམས་ཐམས་ཅད་ནམ་མཁར་བསྒོམ། འཁྲུལ་པའི་ལུས་ཉིད་སྦྱང་བས་ནི།། སྐྱེ་མེད་ལུས་སུ་མངོན་སངས་རྒྱས།། ལུས་སྦྱོང་བ་བསྟན་པའི་ལེའུ་སྟེ་བཅུ་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས། ། སྟོན་པའི་སྟོན་པ་ཀུན་ཏུ་བཟང་པོ་ལ།། འཁོར་བ་བག་ཆགས་སྣང་བ་ཡི།། སེམས་དེ་སྦྱང་བ་ཅི་ལྟ་བུ།། སྟོན་པའི་སྟོན་པ་ཀུན་ཏུ་བཟང་པོ་ཡིས།། སེམས་སྦྱང་བ་ལ་རྣམ་གསུམ་སྟེ།། ཐོག་མའི་སེམས་ཉིད་སྦྱང་བ་དང། ། བར་དོའི་སེམས་ཉིད་སྦྱང་བ་དང།། གནས་པའི་སེམས་ཉིད་སྦྱང་བའོ།། ཐོག་མའི་སེམས་ཉིད་སྦྱང་བ་ནི།། རང་བྱུང་ཡེ་ཤེས་སྙིང་པོ་དང།། རིག་མེད་ནམ་མཁའ་ཡོད་པ་ལ། ། གཡོས་པ་མེད་པའི་ཡོན་ཏན་ལས།། རིག་པའི་ཟེར་ཚོགས་འབུམ་བྱུང་བས།། སྣ་ཚོགས་རིག་པར་གྱུར་པ་ཡིན།། འཁྲུལ་པའི་རིག་པ་འབུམ་ཚོགས་ཤར།། ཐོག་མའི་རིག་པ་བཟློག་པའི་ཕྱིར།། རིགས་མེད་ངང་དུ་བསྒོམ་པར་བྱའོ། ། བར་དོའི་སེམས་ཉིད་སྦྱང་བའི་ཕྱིར།། རང་ཉིད་རྨུགས་པར་གྱུར་པ་ལ། ཁྱད་པར་ཅན་གྱི་བླ་མས་སྦྱང།། ལྟ་བ་སྤྱོད་པ་སྒོམ་པ་ཡིས།། སྦྱངས་ཏེ་ལམ་ལ་འཇུག་པར་བྱ།། ལྟ་བས་སྦྱང་བ་རྣམ་གསུམ་སྟེ། ། ཆོས་ཉིད་ལྟ་བས་སྦྱང་བ་ནི།། ཆོས་རྣམས་ཐམས་ཅད་ཆོས་སྐུ་སྟེ།། འཁོར་དང་མྱ་ངན་འདས་པ་ཀུན།། ཕྱི་དང་ནང་མེད་ཆོས་ཀྱི་སྐུ།། བཅོས་སུ་མེད་དེ་ནམ་མཁའོ།། ཡེ་ཤེས་ལྟ་བས་སྦྱང་བ་ནི།། ཆོས་རྣམས་ཐམས་ཅད་གཅིག་པ་ལ། ། འདོད་འདི་མེད་ན་ཡེ་ཤེས་སོ།། རྒྱུ་དང་འབྲས་བུ་ཐམས་ཅད་ཀུན།། རིག་པ་མེད་པའི་ཡེ་ཤེས་ཡིན།། ཐུགས་རྗེའི་ལྟ་བས་སྦྱང་བ་ནི།། ང་དང་བདག་ཏུ་སྣང་བ་ཀུན།། ཐ་དད་མེད་པའི་ཐུགས་རྗེ་ཡིས། ། རིག་པའི་ཡེ་ཤེས་ལས་ལ་གཟུད།། བསྒོམ་པས་སྦྱང་བའི་ཐབས་དེ་ནི།། ཆོས་ཉིད་སྟོང་པས་སྦྱང་བ་ན།། རྟོགས་དང་མི་རྟོག་གཉིས་མེད་དེ།། མཚན་མའི་རྣམ་རྟོག་ཅི་བྱུང་ཡང།། བརྗོད་དུ་མེད་པའི་ནམ་མཁའ་ལ། ། མིང་དང་བྲལ་བར་བསྒོམ་པར་བྱ།། ཐབས་ཀྱི་བསྒོམ་པས་སྦྱང་བ་ནི།། མཚན་མའི་རྣམ་རྟོག་ཐམས་ཅད་ཀུན།། ཡིད་ཀྱི་རྣམ་ཤེས་དག་ལས་བྱུང།། ཡིད་ཀྱི་རྣམ་ཤེས་རྒྱུན་གཅད་དེ།། བརྗོད་དང་བྲལ་བའི་ཆོས་ཉིད་བསྒོམ། ། ཐུགས་རྗེ་ཐབས་ཀྱི་བསྒོམ་པ་ནི།། ཆོས་རྣམས་ཐམས་ཅད་སྣང་བ་སྟེ།། སྣང་བ་དེ་ལ་མིང་ཆགས་ཏེ།། མིང་ལ་བརྟེན་ནས་ཉོན་མོངས་ཏེ།། ཉོན་མོངས་དེ་རྣམས་བཟློག་པའི་ཕྱིར། ། རང་བྱུང་ཡེ་ཤེས་རིག་པ་དེ།། མ་བཙལ་མི་བསྐྱེད་ཡུལ་ལས་བཟློག། འབྱེད་པ་མེད་པའི་ཡེ་ཤེས་ཀྱིས།། ཆོས་རྣམས་ཐམས་ཅད་མཉམ་པར་གཞག། བར་དོའི་སྤྱོད་པས་སྦྱང་བ་མེད།། ཚེ་ལས་འདས་པའི་རིག་པ་དེ། ། ཞག་བདུན་དག་ནས་ལུས་ལ་འཇུག། ལུས་དེ་སྐྱོན་ཉིད་མི་འཛིན་པས།། སྲེད་པའི་སྡུག་བསྔལ་དེ་ཉིད་སྦྱང་བའི་ཕྱིར།། ཚེ་འདས་རིག་པའི་ཤེས་པ་དགུག། དྲི་མ་མིང་དང་རུས་བྲིས་ལ། ། བསྟིམས་ཏེ་སྐྱབས་འགྲོ་ལུས་དབུལ་བྱ།། ལུས་ཀྱི་སྡིག་སྒྲིབ་སྦྱང་བའི་ཕྱིར།། སངས་རྒྱས་བདེ་བ་དཔག་མེད་ལ།། ལུས་འབུལ་ངག་བརྗོད་སེམས་གདུང་ལ།། མཚོན་གྱི་ཡོན་ཏན་མང་པོ་བརྗོད།། ལུས་ངག་ཡིད་གསུམ་དག་པ་ཡིས། ། བརྫུས་ཏེ་སྐྱེ་བའི་ལུས་ཉིད་ཐོབ།། སྦྱིན་དང་མཆོད་པ་མང་པོ་ཡིས།། ལུས་ངག་དགེ་བ་ཅི་ནུས་བྱ།། དམིགས་པ་མེད་པའི་ཚོགས་སུ་བསྔོ།། ཞག་ནི་བདུན་ཚོ་བདུན་དག་ཏུ།། ཞག་གི་དགེ་བ་ཅི་ནུས་བྱ། ། རང་བཞིན་གནས་པའི་སེམས་སྦྱོང་བ།། ཏིང་འཛིན་བརྒྱ་ནི་རྩ་བརྒྱད་ཀྱིས།། སྦྱངས་པས་འབྲས་བུ་ཐོབ་པ་ནི།། ཡོན་ཏན་བརྒྱ་དང་རྩ་བརྒྱད་ཐོབ།། སངས་རྒྱས་ས་ལ་ལྷུན་གྱིས་འགྲུབ།། སེམས་རྣམ་པ་གསུམ་སྦྱང་བའི་ལེའུ་སྟེ་བཅུ་གཅིག་པའོ། །།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། སྲིད་པའི་ལུས་དེ་འཕོས་པ་ལ།། ཡེ་ཤེས་ཚོགས་དེ་བསག་པའི་ཕྱིར། ། རུས་པ་སྦྱང་བ་ཅི་ལྟ་བུ།། སྟོན་པའི་སྟོན་པ་ཀུན་བཟང་གིས།། སྲིད་པའི་རུས་པ་དེ་ཉིད་ཀྱང།། སྐུ་གསུང་ཐུགས་སུ་སྦྱང་བ་ནི།། སྐུ་རུ་རུས་པ་སྦྱང་བ་ལ།། ལྟ་བ་སྒོམ་པ་སྤྱོད་པ་ཡིས།། རང་བཞིན་གཅིག་ཏུ་སྦྱང་བར་བྱའོ། ། ལྟ་བ་གདེང་དང་ལྡན་པ་ཡིས།། སྲོག་ཆགས་ཤི་བའི་རུས་དེ་ལ།། སྐུ་གསུང་ཐུགས་ཀྱི་ཡིག་འབྲུ་ཡིས།། བྱིན་གྱིས་བརླབས་ཏེ་བསྐོར་བ་བྱ།། ཆོས་ཉིད་སྐྱེ་མེད་གཏན་པ་ལ།། རང་བྱུང་ཡེ་ཤེས་གཏུན་བུ་ཡིས། ། གཉིས་སུ་མེད་པར་བརྡུང་བྱས་ལ།། རྣམ་རྟོག་བག་ཆགས་ཐམས་ཅད་ཀུན།། བྱང་ཆུབ་སེམས་ཀྱི་ཕྱེ་རུ་གནས།། བདེ་གཤེགས་ཐུགས་རྗེ་ཆེན་པོ་ཡི།། ཐུགས་ལས་ཡེ་ཤེས་ཆུ་ཕྱུང་སྟེ།། བྱང་ཆུབ་སེམས་སུ་རབ་བྲན་ནས། ། གཉིས་སུ་མེད་པར་འཇི་བར་འགྱུར།། རང་བྱུང་ཡེ་ཤེས་ལྔ་ཡི་རྩལ།། རྟེན་ཅིང་འབྲེལ་བའི་སྔགས་དེ་ཡིས།། སྐྱེ་བ་མེད་པའི་སྐུ་རུ་འགྱུར།། གཉིས་སུ་མེད་པའི་ལོངས་སྤྱོད་རྫོགས།། སྲིད་པའི་རུས་པ་སྦྱངས་པས་ཚོགས་བསགས་པའི་ལེའུ་སྟེ་བཅུ་གཉིས་པའོ། །།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། ལུས་འཕོས་སེམས་ཅན་དེ་དག་ལ།། སྲིད་པའི་ཐལ་བ་སྦྱང་བ་ཅི་ལྟ་བུ། ། སྟོན་པའི་སྟོན་པ་ཀུན་ཏུ་བཟང་པོ་ཡིས།། འབྱུང་བ་ལྔ་ལས་བསྐྱེད་པའི་ལུས་དེ་ཡང།། ཡེ་ཤེས་འབྱུང་བ་ལྔ་ཡིས་སྦྱང་བར་བྱའོ།། ཡེ་ཤེས་འབྱུང་བ་ཆུ་དེ་ཡིས། ཁྲག་ཆེན་སྣང་བ་མཐའ་ཡས་སྐུ། ། ཐ་དད་མེད་པར་སྦྱང་བར་བྱའོ།། སྣང་བ་མཐའ་ཡས་སྙིང་པོ་ཡིས།། ཐལ་ཆེན་ཆུ་ལ་རབ་བཏབ་སྟེ།། སྣང་བ་ཆེན་པོའི་སྐུ་རུ་བསྐྱེད།། ཚིལ་ཆེན་མེ་ལ་རབ་བཏབ་སྟེ།། རིན་ཆེན་འབྱུང་ལྡན་སྙིང་པོ་ཡིས། ། རྒྱལ་བའི་སྐུ་རུ་སྐྱེད་པར་བྱེད།། རུས་ཆེན་ས་ལ་རབ་བཏབ་སྟེ།། རྡོ་རྗེ་སེམས་དཔའི་སྙིང་པོ་ཡིས།། རྒྱལ་བའི་སྐུ་རུ་བསྐྱེད་པར་བྱ།། རྩ་ཆེན་རླུང་ལ་རབ་བཏབ་སྟེ།། དོན་ཡོད་གྲུབ་པའི་སྙིང་པོ་ཡིས། ། ཕྲིན་ལས་རྒྱལ་བར་བསྐྱེད་པར་བྱ།། ཤ་ཆེན་མཁའ་ལ་རབ་བཏབ་སྟེ།། རྣམ་པར་སྣང་མཛད་སྙིང་པོ་ཡིས།། རྒྱལ་བའི་སྐུ་རུ་བསྐྱེད་པར་བྱ།། ལུས་ཉིད་བསྲེག་པའི་ཐལ་བ་ཡིས།། འབྱུང་ཆེན་ལྔ་ཡི་རྒྱུ་དག་ལ། ། བདེ་གཤེགས་ཀུན་བཟང་ཆེན་པོ་ཡིས།། སྙིང་པོ་བརྗོད་པས་སྐུ་རུ་བསྐྱེད།། ཉོན་མོངས་མ་སྤངས་དག་པའི་རྟགས།། རིགས་ཀྱི་གཙོ་བོ་ལྔ་རུ་བསྐྱེད།། ཡེ་ཤེས་རྣམ་ལྔ་འཐོབ་པའི་རྒྱུ།། འབྱུང་ཆེན་རྣམ་ལྔ་དག་པའི་རྟགས། ། གཉིས་མེད་རྒྱལ་བའི་སྐུ་ཆེན་པོ།། ཚེ་འདས་ཐལ་ཆེན་སྦྱངས་པས་ཚོགས་བསགས་པའི་ལེའུ་སྟེ་བཅུ་གསུམ་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ། ། བདེ་གཤེགས་སྐུ་གཟུགས་དེ་དག་ལ།། གནས་ཁང་བརྩིགས་པའི་ཐབས་ཉིད་གང།། རབ་ཏུ་གནས་པ་ཅི་ལྟ་བུ།། སྟོན་པའི་སྟོན་པ་ཀུན་ཏུ་བཟང་པོ་ཡིས།། གནས་ཁང་བརྩིགས་པའི་རྒྱུ་གསུམ་སྟེ། ། ཆོས་ཉིད་གནས་ཁང་ཆེན་པོ་ནི།། ཆོས་ཉིད་ཡངས་པའི་བདེ་ཆེན་ལ།། བཅོས་སུ་མེད་པའི་གཞལ་ཡས་ཁང།། དམིགས་པ་མེད་པའི་ཕོ་བྲང་དུ།། མ་ཆགས་མི་གཡོ་པདྨའི་གདན།། གཉིས་སུ་མེད་པར་བཞུགས་སུ་གསོལ། ། ཡེ་ཤེས་གནས་ཁང་ཆེན་པོ་ནི།། རིག་པའི་ཡེ་ཤེས་ཀུན་ཁྱབ་ཏུ།། རྒྱུ་རྐྱེན་མེད་པའི་གཞལ་ཡས་ཁང།། སྣང་སྟོང་མེད་པའི་ཡེ་ཤེས་དེས།། དྲི་མེད་པདྨའི་གདན་ཐོག་ལ།། གཟུང་འཛིན་མེད་པར་བཞུགས་སུ་གསོལ། ། ཕྱོགས་བཅུ་དུས་གསུམ་ཐམས་ཅད་དུ།། ཕྱག་རྒྱ་ཆེན་པོའི་སྐུ་ཡིན་པས།། ཀུན་རྫོབ་ལྷ་ཚོགས་མཆོད་པའི་ཕྱིར།། མཆོད་པའི་བྱེ་བྲག་སྣ་ཚོགས་འབུལ།། དམིགས་པ་མེད་པར་ཐིམ་པར་བྱ། ། ཆོས་སྐུ་ལ་ནི་ཆོས་སྐུ་རབ་ཏུ་གནས། ཁྱད་པར་སྤངས་ཏེ་བཙལ་དུ་མེད།། ཡེ་ཤེས་ལ་ནི་ཡེ་ཤེས་གནས། ཁྱད་པར་གཞན་ནས་བཙལ་དུ་མེད།། སྐུ་ཡི་ཕྱག་རྒྱ་ཆེན་པོ་ལ།། ལོངས་སྤྱོད་རྫོགས་པའི་རབ་གནས་བྱ། ། ཐ་མི་དད་པར་གཅིག་པར་བསྟིམ།། གནས་ཁང་བརྩིག་ཅིང་རབ་ཏུ་གནས་པར་བྱ་བའི་ལེའུ་སྟེ་བཅུ་བཞི་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ། ། སྲིད་པ་བར་དོའི་དུས་ཉིད་དུ།། ལུས་སེམས་སྦྱང་བའི་ཡོན་ཏན་གང།། སྟོན་པའི་སྟོན་པ་ཀུན་ཏུ་བཟང་པོ་དེས།། ལུས་ཉིད་སྦྱངས་པའི་ཡོན་ཏན་ནི།། སྲིད་པ་ཐོག་མ་མེད་པ་ནས།། ལུས་ཀྱིས་སྡིག་པ་ཅི་བསགས་ཀྱང། ། དག་པའི་སྐུ་གཟུགས་གཅིག་གིས་བྱང།། བདེ་གཤེགས་ཐུགས་ཀྱི་དམ་པ་བསྐང།། བྱང་སེམས་ལྷ་དང་རྒྱལ་པོ་ཡིས།། སྐྱེ་བ་དག་པའི་ལུས་ཉིད་ཐོབ།། སྲིད་པའི་ལྷ་སྲིན་མང་པོ་ཡིས། ། རྗེ་བོར་མཐོང་སྟེ་འཁོར་དུ་བྱེད།། དམྱལ་བའི་ཚ་གྲང་མང་པོ་ཡང།། སྐུ་གདུང་གཅིག་གིས་སེལ་བར་བྱེད།། དབུལ་བ་སེལ་ཞིང་ལོངས་སྤྱོད་ལྡན།། འཁོར་ལོ་བསྒྱུར་བའི་རྒྱལ་པོར་སྐྱེ།། ལུས་ཀྱི་སྒྲིབ་པ་ཐམས་ཅད་སེལ། ། ནད་ངན་རིགས་རྣམས་མི་འབྱུང་ཞིང།། ཤིན་ཏུ་གཞོན་པའི་ལུས་སུ་ཐོབ།། སེམས་ཉིད་སྦྱངས་པའི་ཡོན་ཏན་ནི།། ཐེག་པ་ཆེན་པོའི་ཆོས་རྣམས་ལ།། དམིགས་པ་མེད་པར་བརྗོད་པ་འོང། ། ཉན་རྒྱུ་མེད་དེ་དོན་ཉིད་རྟོགས།། བཙལ་རྒྱུ་མེད་པར་ལས་རྣམས་འགྲུབ།། བསྒོམ་རྒྱུ་མེད་པར་འབྲས་བུ་འཐོབ།། རང་གི་ཡེ་ཤེས་རང་ལ་སྣང།། ཆོས་རྣམས་ཐམས་ཅད་ནམ་མཁར་རྟོགས།། སངས་རྒྱས་ཐམས་ཅད་ལྷུན་གྱིས་གྲུབ། ། རང་བཞིན་ཀུན་བཟང་ཆེན་པོ་འཐོབ། སྦྱངས་པའི་ཡོན་ཏན་ཏེ་བཅོ་ལྔ་པའོ།།།། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ། ། རྒྱུད་འདི་གང་ནས་འབྱུང་ཞིང་གང་ལ་གཏད་པ་ཡིན།། སྟོན་པའི་སྟོན་པ་ཀུན་ཏུ་བཟང་པོ་དེས།། ཆོས་སྐུ་སྤྲོས་དང་བྲལ་བ་ཡིས།། རང་བྱུང་ཡེ་ཤེས་ཆེ་ལ་གཏད།། རང་བྱུང་ཡེ་ཤེས་ཆེན་པོ་དེས།། ཟེར་གྱི་ཀུན་བཟང་ཆེ་ལ་གཏད། ། ཟེར་གྱི་སྟོན་པ་ཀུན་བཟང་དེས།། སྟོན་པ་ཀུན་བཟང་ཆེ་ལ་གཏད།། སྟོན་པ་ཀུན་བཟང་ཆེན་པོ་དེས།། སྡུད་པའི་གསང་དབང་ཆེ་ལ་གཏད།། སྡུད་པའི་གསང་དབང་ཆེན་པོ་དེས།། རིགས་ཀྱི་སྤྲུལ་སྐུ་ཆེ་ལ་གཏད། ། རིགས་ཀྱི་སྤྲུལ་སྐུ་དེ་རྣམས་ཀྱིས།། ལྷ་དང་མཁའ་འགྲོ་རྣམས་ལ་གཏད།། ལྷ་དང་མཁའ་འགྲོ་མང་པོ་དེས།། འཇིག་རྟེན་མི་ལ་སྐལ་མེད་པས།། མཆོད་པའི་རྟེན་དུ་རབ་མཐོང་སྟེ།། བཻ་ཌཱུརྻ་ཡི་གླེགས་བམ་ལ། ། རིན་ཆེན་གསེར་གྱི་ཞུན་མས་བྲིས།། རིན་ཆེན་སྣ་ལྔའི་སྒྲོམ་བཅུག་སྟེ།། ཡི་གེ་ཧཱུཾ་གི་རྒྱས་བཏབ་ནས།། རང་བྱུང་མཆོད་རྟེན་ཆེ་ལ་གཏད།། ལྷ་དང་མཁའ་འགྲོ་མང་པོ་ཡིས།། ལས་དང་དམ་ཚིག་ཅན་ལ་སྤྲོད། ། རིན་པོ་ཆེ་སྲིད་པ་བར་མ་དོ་སྣང་བའི་རྒྱུད་བར་དོ་སྦྱང་བའི་ཐབས་དང་རྒྱུད་གཏད་པའི་ལེའུ་སྟེ་བཅུ་དྲུག་པའོ།།།།
CLOSE WINDOW