| Wylie |
། གཏེར་སྲུང་ཤིན་ཏུ་གཉན་ནོ།། འདིར་མན་ངག་སྙིང་གི་དགོངས་པ་རྒྱལ་བའི་བཀའ་མ་བྱུང།།།། རྒྱ་གར་སྐད་དུ། ཏི་ལ་ཀ་ས་མ་ག་ཎ་མ་ཧཱ་ཏནྟྲ་ནཱ་མ། བོད་སྐད་དུ། ཐིག་ལེ་ཀུན་འདུས་ཆེན་པོའི་རྒྱུད་ཅེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་འཆང་ཆེན་པོ་དེས། རྣམ་དག་པདྨོའི་ཚལ། རིན་པོ་ཆེའི་ཡེ་ཤེས་ཀྱི་གཞལ་མེད་ཁང་ཆེན་པོ་ན། སངས་རྒྱས་རབས་བདུན་དང། མཁའ་འགྲོ་མ་རྣམས་དང། གཞན་ཡང་སོ་སོའི་འཁོར་རྣམས་དང། ཐབས་ཅིག་གོ། དེའི་ཚེ་གསང་བའི་བདག་པོས་སྣ་དྲངས་ཏེ། བསྐོར་བ་ལན་དཔག་ཏུ་མེད་པ་བྱས་ནས། འདི་སྐད་ཅེས་གསོལ་ཏོ།། ཀྱེ་ཀྱེ་བཅོམ་ལྡན་རྡོ་རྗེ་འཆང། ཐམས་ཅད་མཁྱེན་པའི་ཡེ་ཤེས་ཀྱིས། ད་ལྟར་ཚོགས་དང་མ་འོངས་རྗེས་འཇུག་ལ། ། མ་རིག་མུན་པ་སེལ་བའི་སྒྲོན་མེ་རུ།། ཚིག་གི་རྒྱུད་རྣམས་ཐུགས་ཀྱི་ཀློང་ནས་བརྟོལ།། དོན་ཀྱི་རྒྱུད་ཆེན་མ་ལུས་མཚོན་པའི་སྒྲ།། ཤེས་རབ་རླུང་གིས་བརྡའ།། ཕྱི་ནང་གསང་བའི་མན་ངག་རྒྱུད་དུ་བཤད། ། ཐིག་ལེ་གསང་བའི་ཡི་གེ་གསུམ་དུ་བསྟན།། དེ་ཡི་དོན་གྱི་དགོངས་པ་གསལ་བྱའི་ཕྱིར།། ཐིག་ལེ་ཀུན་འདུས་ཆེན་པོ་གསུང་དུ་གསོལ།། ཞེས་ཞུས་སོ།། དེའི་ཚེ་སྟོན་པས་བཀའ་སྩལ་པ། ཀྱེ་རྡོ་རྗེ་སེམས་དཔའ་འཁོར་དང་བཅས་པ་རྣམས་ངེས་པར་ཟུང་ཞིག། ངས་རྒྱུད་ཐམས་ཅད་ཀྱི་ཁོག་དོན་སོ་སོའི་མཚན་དང་ལེའུ་བསྡུས་ཏེ། དོན་གྱི་སྙིང་པོ་གསལ་བའི་དགོངས་པར་བཤད་དོ།། ཞེས་གསུངས་སོ།། ཐིག་ལེ་ཀུན་འདུས་ཆེན་པོ་ལས། གླེང་གཞི་དང་གླེང་སློང་བའི་ལེའུ་སྟེ་དང་པོའོ།།།། གྲག་ཏ་ཀཱ་ཡ་ཏནྟྲ་ཨ་ཏྲ་ག་ལ་ངས་སུ་ཨ། དེའི་ཚེ་བཅོམ་ལྡན་འདས་རྡོ་རྗེ་འཆང་ཆེན་པོ་དེས། འགྱུར་བ་མེད་པའི་ཆོས་ཀྱི་སྐུའི་ཏིང་ངེ་འཛིན་ལ་ཞུགས་སོ། ། དེའི་ཚེ་གསང་བའི་བདག་པོས་ཞུས་པ། ཀྱེ་བཅོམ་ལྡན་རྡོ་རྗེ་འཆང། འགྱུར་བ་མེད་པའི་སྐུའི་དོན་མཚོན་རྒྱུད་ཀྱི་དགོངས་པ་གསུངས་ཞེས་ཞུས་སོ།། དེའི་ཚེ་ཏིང་ངེ་འཛིན་ལས་མི་འགྱུར་བའི་ངང་ནས། སྐུའི་རྒྱུད་བཀའ་སྩལ་པ། རིགས་ཀྱི་བུ་ལེགས་པར་ཟུང་ཞིག། གཞི་འགྱུར་བ་མེད་པ་ཆོས་ཀྱི་སྐུ་དང་འབྲས་བུ་འགག་པ་མེད་པ་ཡེ་ཤེས་གཟུགས་ཀྱི་སྐུ་གཉིས། དོན་འདུ་འབྲལ་མེད་པ་ལྷུན་གྱིས་གྲུབ་པ། དེ་གཏན་ལ་དབབ་པའི་ཆེད་དུ། ངས་པདྨ་འཁྱིལ་བའི་རྒྱུད་འདི་བསྟན་ནོ།། རིག་པ་འཛིན་པ་ངོས་ཟུང་ཞིག། ཆོས་ཉིད་ཆོས་སྐུ་དབྱེར་མེད་ཀློང།། དྲི་མ་དག་གསལ་མཚན་ཉིད་ལྔ།། ཡེ་ཤེས་འོད་ཀྱི་བུམ་པ་གསལ། ། ཐུགས་རྗེ་འགགས་མེད་སྙིང་པོའི་སྐུ།། དབྱེར་མེད་རིག་པའི་ངང་ན་གནས།། ནང་གསལ་ཕྱིར་མ་འཕྲོས་པ་སྟེ།། པདྨ་འཁྱིལ་ཞེས་བཤད་པ་ཡིན།། སྐུ་གསུམ་ནང་གསལ་འདུ་འབྲལ་མེད་པ་ལས། ། ཐུགས་རྗེ་མ་འགགས་སྐུ་ཉིད་ཕྱིར་ཤར་ཏེ།། པདྨ་ལས་གྲུབ་སྤྲུལ་སྐུ་འོད་གསལ་བས།། ངེས་པའི་འཁོར་ཚོགས་ང་ཡི་ཡུལ་དུ་སྣང།། དེ་དུས་ང་ཡི་སྐུ་ཡི་རྒྱུད་ཆེན་ནི།། དཔག་བསམ་ཤིང་ལྟར་ཡོངས་སུ་རྒྱས་པར་བཤད། ། དང་པོའི་གནས་ལུགས་བར་དུ་འཁྲུལ་ལུགས་དང།། ཐ་མ་འཁྲུལ་པ་ལྡོག་པའི་ཐབས།། ནང་མེད་ནང་ནས་ཕྱི་རུ་ཤར་ལུགས་དང།། རྩལ་གྱི་སྣང་བ་མཚན་མ་སྣ་ཚོགས་རྣམས།། རང་ལ་སྣང་ཞིང་རང་ལས་གཡོས་པ་མེད། ། མཚན་མ་སྣ་ཚོགས་རང་གི་ངང་དུ་དག། དྲི་མེད་སྐུ་དང་ཡེ་ཤེས་གཞི་ཡི་ངང་དུ་ཐིམ།། རང་གསལ་འཛིན་པ་མེད་པར་བཤད།། དུས་གསུམ་སངས་རྒྱས་དགོངས་པ་བརྒྱུད་པ་ཡི།། སངས་རྒྱས་ཞལ་ནས་གསུངས་པར་ངེས་ཤེས་བསྐྱེད། ། སོ་སོའི་ཕུན་སུམ་ཚོགས་པ་རྣམ་པ་ལྔས།། ས་ཕྱོགས་ངེས་དང་ཆོས་ངེས་དང།། དབང་པོ་ངེས་དང་དུས་ངེས་དང།། རང་རིག་ངོ་བོ་མི་འགྱུར་བར།། ཡེ་ཤེས་ཟང་ཐལ་སྣང་བས་ཁྱབ། ། ཐིག་ལེ་ཉག་གཅིག་ངང་དུ་རྫོགས།། དེ་ལྟར་སྣོད་བཅུད་རང་གྲོལ་བས།། དང་པོའི་འབྱུང་གནས་ཆེན་པོ་ཤེས།། བར་དུ་རྩ་ལ་གནས་པ་ཤེས།། ཐ་མ་གྲོལ་བ་ཉག་གཅིག་ཤེས།། དུས། གསུམ་ཡང་འདུག་མཉམ་བདུན་པ་རིན་པས་སྣང། ། གཉིས་མེད་ཡེ་ཤེས་ཟང་ཐལ་བས།། ཆོས་སྐུའི་ངང་ལས་མི་འདའ་བར།། ལོངས་སྐུའི་ཡེ་ཤེས་སྤྱན་དུ་སྣང།། མཚན་ཉིད་འོད་ཀྱི་བུམ་པ་འཛིན།། སྤྲུལ་སྐུ་རིགས་ཀྱི་སྐུ་ལྔར་གསལ། བུམ་པ་ནང་གི་མར་མེ་གསལ།། རྟོག་མེད་གསལ་བའི་ངོ་བོར་གནས།། ཕྲ་དང་རགས་པའི་བྱེ་བྲག་ལས།། སྐུ་གསུམ་རིམ་པ་ང་ཡིས་བཤད།། ཇ་ལོག་རྣམ་གསུམ་དགོངས་པ་དེ།། སྐུ་གསུམ་ལྷུན་གྲུབ་དོན་དུ་བསྟན། ། དེ་འཆད་སྟོན་པའི་ལོ་རྒྱུས་ནི།། ང་ཡི་གཞི་དང་བྱུང་ཚུལ་དང།། ང་ཡི་ཤེས་པ་རྫོགས་ཚུལ་དང།། ང་ཡི་འཁྲུལ་པའི་རིགས་དྲུག་སྣང་བ་ལ།། ང་ཡི་འཁྲུལ་པ་ལོག་རྐྱེན་བྱས།། དེ་ཕྱིར་སྐྱེ་རྒྱུད་དགོངས་པ་ཡིན། ། སྟོན་པ་རྡོ་རྗེ་སེམས་དཔའ་ངས།། སངས་རྒྱས་ཡེ་ཤེས་ལུས་ཅན་དང།། འགྲོ་དྲུག་བག་ཆགས་ལུས་ཅན་གཉིས།། རྟོགས་དང་མ་རྟོགས་བྱེ་བྲག་ལས།། ཡེ་ཤེས་འོད་ལས་སྣང་བར་བསྟན།། འབྱུང་བའི་དངས་མ་རྣམ་པ་ལྔ། ། སངས་རྒྱས་སེམས་ཅན་ལུས་སུ་བསྟན།། གཉིས་ཀ་མ་ཡིན་འབྱུང་བ་རྣམ་པ་ལྔ།། ཤ་ཁྲག་ལུས་སུ་བསྟན་པ་ཡིན།། དེ་ལ་མུ་བཞིར་ཕྱེ་སྟེ་བཤད།། བག་ཆགས་ལུས་ལ་གནས་པ་ནི།། ཙིཏྟ་རིན་ཆེན་གཞལ་ཡས་ནི། ། འབྱུང་བའི་དངས་མ་རྩ་རླུང་དང།། རང་རིག་ཡེ་ཤེས་གནས་ལུགས་ནི།། མཚོན་དཔེ་རྣམས་དང་སྦྱར་ཏེ་བསྟན།། ལུས་ཀྱི་ཀུན་གཞི་དགོངས་པ་ཡིན།། བག་ཆགས་ལུས་ལ་སྐུ་གསུམ་རྫོགས། ། གཟུགས་སུ་སྣང་བ་རང་བཞིན་མེད།། ཆོས་སྐུ་མི་སྣང་རང་བཞིན་ཡོད།། དོན་ནི་གཉིས་མེད་ཆོས་ཀྱི་སྐུ།། སྟོན་པ་ཡེ་ཤེས་སྙིང་པོ་ཅན།། སྐུ་གསུམ་བསྲེ་བའི་དགོངས་པ་ཡིན།། གོང་བཞིན་མཚན་ཉིད་རྒྱས་བཤད་པ། ། རིག་པ་རིན་ཆེན་ལྟ་བུའི་ངང་ནས་ཤར།། ཐམས་ཅད་དེ་ཉིད་ངང་དུ་གྲོལ། དེ་བཞིན་ངེས་པར་རྟོགས་བྱའི་ཕྱིར།། སྐུ་གསུམ་རང་ལ་ངོ་སྤྲད་ཅིང།། སྐད་ཅིག་མ་ལས་ངེས་པར་བསྐྱེད། ། ཕར་ལ་ངོས་བཟུང་དཔེ་གཉིས་ཀྱིས།། གཉིས་མེད་དགོངས་པའི་ངང་དུ་བསྐྱལ།། ཟ་མ་ཏོག་གི་དགོངས་པ་ཡིན།། དེ་ཡི་མཚོན་ཐབས་རྣམ་པ་གཉིས།། གདམས་ངག་གཉིས་ཀྱིས་གཏན་ལ་ཕབ།། རྟོགས་པ་རྒྱུད་ལ་སྐྱེས་པ་སྟེ། ། བསྒོམ་དུ་ཡོད་མེད་བྱེ་བྲག་གིས།། ཉམས་བླངས་མེད་པའི་ཉམས་བླངས་བྱས།། འཁོར་འདས་མ་ལུས་རིག་པར་བསྐྱལ།། རིག་པ་འདུ་འབྲལ་མེད་པར་བསྐྱལ།། སྤྱི་བཅིངས་དོན་གྱི་དགོངས་པ་ཡིན། ། དེ་ལྟར་རང་རིག་དོན་རྟོགས་ན།། དུས་གསུམ་སངས་རྒྱས་ཐམས་ཅད་དང།། དགོངས་པ་གཉིས་སུ་མེད་པས་ན།། ཕྱི་ནང་སྣོད་བཅུད་ཡེ་སངས་རྒྱས།། ཡེ་ནས་བདག་ཉིད་སངས་རྒྱས་པས།། རེ་དོགས་རྩོལ་བསྒྲུབ་རྣམ་པར་དག། རང་རིག་ཡེ་ཤེས་རང་དངས་ལས།། འདུ་འབྲལ་མེད་པ་ལྷ་ཡི་དོན།། ལས་དང་ཐུགས་རྗེ་རྣམ་པར་དག། དགེ་སྡིག་མི་གནས་བྱིས་པའི་ཆོས། ཁ་འབྱམས་དགོངས་པ་ང་ཡིས་བཤད།། དེ་ལྟར་གདམས་ངག་རྣམ་གཉིས་ཀྱིས། ། བློ་ཡི་ཐེ་ཚོམ་ཀུན་བྲལ་ཏེ།། ངེས་པའི་ཤེས་པ་སྐྱེས་པ་ནི།། ཚིག་ལ་ནེམ་ནུར་མི་མངའ་བར།། དོན་ལ་གོལ་འཁྲུལ་མེད་པ་ནི།། ལ་ཆོད་དོན་གྱི་དགོངས་པ་ཡིན།། ངས་བསྟན་དོན་གྱི་མན་ངག་གིས། ། སེམས་ཅན་མ་རིག་མུན་པ་སེལ།། རང་རིག་གསལ་བའི་ངོ་ཡང་སྤྲད།། མུན་པ་སེལ་དོན་དགོངས་པ་ཡིན།། སྟོན་པ་རྡོ་རྗེ་སེམས་དཔའ་ངས།། རང་རིག་དག་པའི་ཆོས་སྐུ་ལས།། ཕྱོགས་མེད་ཡོན་ཏན་འབྱུང་བར་བཤད། ། དེ་བཞིན་དག་དང་ཡོངས་རྫོགས་ནས།། དུག་ལྔ་ཡེ་ཤེས་ལྔར་གྲོལ་རྫོགས།། འཁོར་རྣམས་ཀུན་ལ་འཆད་པ་ནི།། ནོར་བུ་རིན་ཆེན་དགོངས་པ་ཡིས།། དཔེར་ན་རིན་ཆེན་སྒྲོམ་བུ་ལས། ། ཅི་འདོད་ཐམས་ཅད་འབྱུང་བ་ལྟར།། དེ་བཞིན་དངོས་མེད་རིག་པ་ལས།། འཁོར་འདས་ཡོན་ཏན་ཚུལ་དུ་ཤར།། རང་རིག་ཡེ་ཤེས་ཆེན་པོ་སྟེ།། བསྒོམ་པས་གཞན་ནས་རྙེད་པ་མེད།། མ་བསྒོམས་སྟོར་དང་ཤོར་བ་མེད། ། ཐུགས་རྗེ་འཚམས་པར་ཆུ་བོ་བཞིན།། རིན་ཆེན་སྒྲོན་མེའི་དགོངས་པ་ཡིན།། པདྨ་འདམ་ན་གནས་ན་ཡང། ཁ་དོག་མདངས་དང་ལྡན་པ་ཡིན།། འདམ་གྱི་སྐྱོན་གྱིས་གོས་པ་མེད།། འཁྲུལ་པ་རྣམ་གསུམ་སྣང་མོད་ཀྱང། ། མ་འཁྲུལ་པ་ཡི་སངས་རྒྱས་སུ།། ང་ཡིས་ལུང་བསྟན་ངེས་པའི་དོན།། གསེར་ཕུར་དོན་གྱི་དགོངས་པ་ཡིན།། དེ་ལྟར་ང་ཡིས་གདམས་པ་ཡིས།། རང་རིག་ཡེ་ཤེས་བསྟན་པའི་ཚེ།། ཨ་ནུ་ཡོ་ག་མན་ཆད་ནས། ། མུ་སྟེགས་རྟག་ཆད་ཡན་ཆད་ཀྱི།། བླཽ་ཡི་ཞེ་འདོད་མི་གནས་པར།། རང་རིག་ཡེ་ཤེས་གཏན་ལ་ཕེབས།། བླཽ་དང་དངོས་པོའི་དོན་ཆོད་པས།། སྤུ་གྲི་ལྟ་བུའི་དགོངས་པ་ཡིན།། རང་རིག་དག་པའི་ཆོས་སྐུ་ལ། ། ཡེ་ཤེས་སྤྱན་གྱི་མྱུ་གུ་ལྔ། ཁ་དོག་ལྔ་ཡི་བདག་ཉིད་ཅན།། མ་འགགས་ཟླ་བའི་མྱུ་གུར་ཤར།། རྟོགས་དང་མ་རྟོགས་ཁྱད་པར་གྱིས།། འཁོར་དང་མྱ་ངན་འདས་པར་ཤར།། སྣ་ཚོགས་སྣང་བར་ཟད་མོད་ཀྱང། ། རང་གི་ངོ་ལ་རྣམ་པར་དག། སཱ་ལུའི་ལྗང་པའི་དགོངས་པ་ཡིན།། ཆོས་སྐུའི་དོན་མ་རྟོགས་པ་ལ།། གཟུང་འཛིན་རྟོག་པ་སྣ་ཆོགས་ཤར།། དེ་ཡི་གཟུང་འཛིན་སྣང་བ་ཡི།། དེ་ཡིས་ཆོས་ཅན་སྣ་ཚོགས་ཤར། ། དེ་ལ་ཐེག་པ་སྣ་ཚོགས་འཆར།། ལོག་པར་རྟོག་པ་ཕྱོགས་རེ་སེལ།། ངེས་པ་དོན་གྱི་གདམས་པ་ཡིན།། གཞི་སྣང་ཆེན་པོའི་དོན་བརྗོད་པས།། གཞི་ཡི་ཡོན་ཏན་ཕྱོགས་རེ་ཡིས།། མི་མཐུན་རྟོག་པ་ཕྱོགས་རེ་སེལ། ། བློ་ཡི་མཐའ་ལས་ངེས་གྲོལ་བ།། རྟོག་པ་མཐའ་སེལ་དགོངས་པ་ཡིན།། ངས་བསྟན་དོན་གྱི་དགོངས་པ་ལས།། ང་ཉིད་འཇིག་རྟེན་འདས་པའི་ཚེ།། ལོག་ལྟ་ཅན་རྣམས་རྩོད་སྲིད་པས།། ཡང་དག་དོན་གྱི་མཐའ་ཐོབ་ལས། ། དྲི་དང་ལན་གདབ་ལན་བྱུང་བས།། སེང་གེ་རྣམ་པར་འགྱིངས་པ་ཡིས།། གཅན་གཟན་ཕྲ་མོ་ཟིལ་གནོན་ལྟར།། ཆོས་ཉིད་དོན་གྱི་རིག་པ་དང།། དེ་བཞིན་སྒྲུབ་བྱེད་གཞན་སེལ་གྱིས། ། ལོག་པར་བལྟ་བ་སུན་ཕྱུང་བས། སེང་གེ་འགྱིངས་པའི་དགོངས་པ་ཡིན། དེ་བཞིན་འཆད་མཁན་ང་ཉིད་ཀྱང།། སྐུ་གསུམ་འདུ་འབྲལ་མེད་པར་གནས།། དེ་ཡི་དོན་ཆེན་ཡང་དག་མཚན།། རྩོལ་བ་མེད་པར་རང་ལ་རྫོགས། ། འཁོར་རྣམས་ལ་ཡང་དེ་བཞིན་ནོ།། མཚན་རྫོགས་དོན་གྱི་དགོངས་པ་ཡིན།། དེ་ཡི་དགོངས་པ་ཡོངས་རྫོགས་པ།། ཆོས་ཉིད་ཀློང་ན་ཆོས་སྐུ་གནས།། གཉིས་མེད་ཟང་ཐལ་སྟོང་པ་ཉིད།། དེ་ཡི་ངང་ན་ཡེ་ཤེས་ལྔ། ། དེ་ཡི་ངང་ལ་སྐུ་ལྔར་བཞུགས།། སྐུ་གསུང་ཐུགས་ཀྱི་རྡོ་རྗེ་བདག། སྟོང་མཐུན་མ་གཞིའི་དགོངས་པ་ཡིན།། དེ་ལ་ཡོན་ཏན་མི་འགག་པས།། རིན་ཆེན་གཏེར་གྱི་འབྱུང་གནས་སོ།། ང་ཡིས་དེ་བཞིན་བསྟན་པ་ཡིས། ། སྐུ་དང་ཡེ་ཤེས་མ་རིག་སེལ།། ཞེས་གསུངས་སོ།། ཐིག་ལེ་ཀུན་འདུས་ཆེན་པོའི་རྒྱུད་ལས།། སྐུའི་རྒྱུད་ཀྱི་དོན་བསྟན་པའི་ལེའུ་སྟེ་གཉིས་པའོ།།།། བནྷ་ཏནྟྲ་ས་མ་ཏི་ཨཱ་ཏ་ཀ་ལ་པཱ་རུ་ན་ཨཱ། ། དེ་ནས་བཅོམ་ལྡན་འདས་གསུང་འགག་པ་མེད་པའི་ཏིང་ངེ་འཛིན་ལ་ཞུགས་སོ།། དེའི་ཚེ་གསང་བའི་བདག་པོས་ཞུས་པ། ཀྱེ་བཅོམ་ལྡན་འདས་གསུང་གི་དགོངས་པ་གསུང་དུ་གསོལ།། ཞེས་ཞུས་སོ།། སྟོན་པས་བཀའ་སྩལ་པ། ། གསང་བའི་བདག་པོ་ངེས་པར་ཟུང་ཞིག། གཞི་ནི་འགྱུར་བ་མེད་པ་ལས།། ཡེ་ཤེས་འགག་པ་མེད་པར་འཆར་བར་གསུངས་པ་ནི།། གཞིའི་མཚན་ཉིད་སྟོང་ཞིང་བདག་མེད་ལ།། དོན་འགྱུར་བ་མེད་པས་ནམ་མཁའ་ལྟ་བུའི་ཆོས་ཉིད། ། སྟོང་པ་རྡོ་རྗེའི་ཆོས་ཅན།། དེ་ཡང་གདོས་པ་ཅན་གྱི་ཆོས་མིན་ཏེ།། ཡོན་ཏན་གྱི་སྒོ་ཡངས་པས།། རང་བྱུང་ཡེ་ཤེས་འགག་པ་མེད་དོ།། དེ་ལ་ནུབ་པ་མེད་ཅིང་དོན་དངོས་པོ་མཚན་མ་འབིགས་གཅོད་ལ་གོང་ན་གཞན་མེད་པས་རྩེ་མོའོ། ། དོན་ཐམས་ཅད་འདུས་པས་ནི།། ཐམས་ཅད་ཀྱི་གཞི་རྩ་དང་དགོངས་པ་ཞེས་བྱའོ།། གཞི་མཚོན་པའི་ཐབས་སུ་གསུང་རྒྱུད་བསྟན་ཏེ། ། བཤད་པའི་རྒྱུད་ཆེན་པོ་འདིས་རྒྱུད་རྣམས་ཀུན་གྱི་དོན་རྡོ་རྗེ་ལྟ་བུ་འདིས་གཅོད་ཅིང་འབིགས་ལ་རྒྱུད་རྣམས་ཀྱི་དགོངས་པ་དང་བཤད་ཐབས་འདིར་འདུས་པར་ངས་བསྟན་པ་ནི། རྒྱུད་རྣམས་ཀྱི་ཚིག་དོན་ལ་སྦྱོར་བས་མཚན་གྱི་དོན་གྱི་དགོངས་པའོ། ། ཀྱེ་འཁོར་གྱི་ཏིང་ངེ་འཛིན་རྣམས། འབྱུང་བཞི་རང་རིག་ཡེ་ཤེས་ནི།། དང་པོ་རྒྱུ་ལས་མ་བྱུང་ཞིང།། བར་དུ་རྐྱེན་ཀྱིས་གྲོགས་མ་བྱས།། ཐ་མ་གཉེན་པོས་མི་འཇུག་པས། ། རྡོ་རྗེ་ལྟ་བུའི་ཆོས་སྐུ་སྟེ།། རང་གི་ངོ་བོ་དག་པ་ལ།། རང་བཞིན་ཐུགས་རྗེ་མི་འགག་འབྱུང།། ཡེ་ཤེས་རང་བྱུང་དགོངས་པ་ཡིན།། ངས་བཤད་རྒྱུད་ལུང་ཐམས་ཅད་ལ། ཁུངས་དང་ལོ་རྒྱུས་ཡོད་པའི་ཕྱིར། ། སྟོན་པ་གསུམ་ལ་བསྟན་པ་གསུམ།། འཁོར་གསུམ་གནས་དང་དུས་ཀྱང་གསུམ།། ལྔ་གསུམ་བཅོ་ལྔས་གཏན་ལ་ཕབ་པའོ།། ངེས་པའི་རྒྱུད་ཆེན་རྣམ་པ་ལྔ།། ཡོན་ཏན་སྣང་ཚུལ་རྣམ་པ་ལྔས།། ཀུན་ལས་མཆོག་ཏུ་གསང་བར་གནས། ། ཆེ་བའི་ཡོན་ཏན་དགོངས་པ་ཡིན།། ངས་བཤད་པདྨ་འཁྱིལ་པའི་རྒྱུད།། ཚིག་རྒྱུད་ཀུན་གྱི་རྩ་བ་སྟེ།། དེ་སོགས་རྒྱུད་ཀྱི་བཤད་རྒྱུད་པས།། པདྨ་འཁྱིལ་པའི་མན་ངག་གིས།། གཞི་ཡི་མ་རིག་མུན་བསལ་ནས། ། རྟོག་པའི་རྡོ་རྗེ་རང་སྣང་བས།། མུན་པའི་སྒྲོན་མེའི་དགོངས་པ་ཡིན།། གཞི་དང་ཡོན་ཏན་མ་འགགས་པས།། འཁོར་འདས་གཉིས་སུ་སྣང་ཞིང་འབྲེལ།། དངོས་པོའི་དོན་ལ་གཉིས་མེད་པར། ། བྱིན་གྱི་རླབས་ཀྱིས་སྣང་ཞིང་འཆར།། བཞུགས་ཤིང་འབྱུང་བས་གཞི་ཉིད་དེ།། རིན་ཆེན་ཕྲེང་བའི་དགོངས་པ་ཡིན།། ངོ་བོ་སྤྲོས་པ་ལས་འདས་ཤིང།། ཉོན་མོངས་རྟོག་པའི་ཟུག་རྔུ་ཞི།། ཐུགས་རྗེ་སྐུ་གཉིས་མི་འགག་པས། ། རང་རིག་ཡེ་ཤེས་ཆེན་པོར་འདུས།། འཁོར་འདས་སྤྱི་ཡི་དོན་བསྟན་པ།། འཇམ་དཔལ་ཡེ་ཤེས་འདུས་པའི་དགོངས་པ་ཡིན།། ཀྱེ་མ་རིགས་ཀྱི་བུ་ལེགས་པར་ཟུང་ཞིག། གཞི་སྣང་ཆེན་པོའི་འདུག་ཚུལ་ལས། ། འཁོར་འདས་གཉིས་སུ་ཤར་བ་ནི། བསྐལ་པ་དང་པོ་ལ་སངས་རྒྱས་འོད་མི་འགྱུར་བ་འཁོར་འདས་ཀྱི་ཆོས་ཐམས་ཅད་ས་བོན་དུ་གནས་པའོ།། བར་དུ་མ་འགགས་པའི་ཡེ་ཤེས་འོད་དུ་ཤར་ཏེ་མྱུ་གུ་ལྟ་བུའོ། ། ཐ་མ་འབྲས་བུ་མངོན་པར་སྣང་སྟེ།། སངས་རྒྱས་སེམས་ཅན་གཉིས་སུ་སྣང་ཞིང་སྨིན་ཏེ།། འཁྲུལ་པ་གསུམ་དུ་སྣང་ངོ།། དེའི་ཚེ་དེའི་གཉེན་པོ་རྡོ་རྗེ་སེམས་དཔས་ཐོག་མའི་སངས་རྒྱས་ངོ་སྤྲད་དེ། འཁོར་བ་ཁེང་ཟློག་གིས། མི་འགྱུར་དོན་གྱི་སྙིང་པོ་དེ་གདམས་ངག་གཉིས་ཀྱིས་བཀྲོལ་ཏེ་བསྟན།། ཐུགས་ཀྱི་སྙིང་པོའི་དགོངས་པ་ཡིན།། དེ་ཡི་དུས་གཞི་སྣང་བ་གཏན་ལ་ཕེབས།། མི་འགྱུར་ངང་ལ་སྐུ་གསུམ་གནས། ། ཆོས་ཉིད་ཆོས་སྐུ་ཡེ་ཤེས་ནི།། སྐུ་དང་གསུང་དང་ཐུགས་སུ་གསལ།། གྲུབ་པ་མཐར་ཕྱིན་འཁྲུལ་པ་མེད།། སྟོང་མཐུན་མ་གཞིའི་དགོངས་པ་ཡིན།། རིགས་ཀྱི་བུ་དོན་དེ་ཀུན་གྱི་ཐུན་མོང་མ་ཡིན་ཏེ། ། རིགས་གྱི་བུ་རྒྱུད་སོ་སོར་ཟུང་ཞིག། ཀུན་ལས་ཆེ་ལྔས་འཕགས་པ་ནི།། དེ་ཡི་གདམས་པར་ངས་བསྟན་ཏོ།། དེ་ལྟར་གདམས་པ་སྒྲོགས་སུ་ནི།། བར་ཆད་སེལ་དང་ཚིག་རྫོགས་ལས།། སྣོད་བཅུད་འགྱུར་མེད་མན་ངག་མཐར་ཕྱིན་ཕྱིར། ། བླ་མ་སངས་རྒྱས་བཅས་པ་དང།། བྱང་སེམས་ཆོས་སྐྱོང་སྲུང་མ་དང།། རིག་འཛིན་རིམ་པ་ཚོགས་ཀྱིས་མཆོད།། རིག་པ་འཛིན་པ་ས་ལ་བསྐུལ།། བར་ཆད་སེལ་འགྱུར་ངས་ལུང་བསྟན། ། དགུ་པ་དོན་གྱི་དགོངས་པ་བསྟན།། མ་འོངས་རྗེས་འཇུག་དོན་མཛད་པས།། མ་ནོར་དོན་གྱི་རྒྱུད་ཆེན་ལྔ།། དགའ་རབ་ལ་སོགས་འཁོར་ལ་བཤད།། དེ་བཞིན་ཤོད་ཅིག་རྗེས་སུ་གནང།། འཇུག་པའི་དགོངས་པས་ངས་བཤད་དོ། ། ཞེས་གསུངས་སོ།། ཐིག་ལེ་ཀུན་འདུས་ཆེན་པོའི་རྒྱུད་ལས།། གསུང་གི་རྒྱུད་བསྟན་པའི་ལེའུ་སྟེ་གསུམ་པའོ།།།། བོ་དྷི་ཙིཏྟ་ཏནྟྲ་མ་ཧཱ་ས་མ་ཏི་ཨ་ཏ་ཀ་མ་ཧཱ་ས་རུ་ཨ། དེའི་ཚེ་སྟོན་པ་རྡོ་རྗེ་འཆང་ཆེན་པོ་དེ་ཐུགས་འགྱུར་བ་མེད་པའི་དགོངས་པ་ལ་བཞུགས་སོ། ། དེའི་ཚེ་གསང་བའི་བདག་པོས་ཞུས་པ།། ཀྱེ་ཀྱེ་བཅོམ་ལྡན་རྡོ་རྗེ་འཆང།། ཐུགས་ཀྱི་རྒྱུད་ཆེན་དགོངས་པ་གསུང།། ཞེས་ཞུས་སོ། ། དེ་ནས་སྟོན་པས་བཀའ་སྩལ་པ།། ལག་ན་རྡོ་རྗེ་ལེགས་ཟུང་ཞིག། རང་རིག་ཡེ་ནས་རྣམ་དག་པས།། ཉོན་མོངས་པ་ཡི་དྲི་མ་མེད།། ཡེ་ནས་རང་བྱུང་ཡེ་ཤེས་པས།། རྒྱུ་རྐྱེན་མེད་པར་གཉེན་པོ་མེད།། ཡེ་ནས་གཉིས་མེད་ཆོས་སྐུ་བས། ། འཁྲུལ་པའི་བག་ཆགས་བསླད་པ་མེད།། རྡོ་རྗེ་བཞིན་དུ་འགྱུར་བ་མེད།། གཞི་ལ་ཡོན་ཏན་འགག་པ་མེད།། ཐམས་ཅད་མ་བཙལ་ལྷུན་གྱིས་གྲུབ།། བྱ་བཙལ་འདས་པའི་ཆོས་ལ་གནས། ། འདུ་འབྲལ་མེད་པས་སྐུ་གསུམ་རྒྱན།། ཚིག་དང་དོན་གྱིས་མཚོན་དགོངས་ཡིན།། ས་གཞི་ལྟ་བུའི་རང་རིག་ལས།། རྩི་ཤིང་ལྟ་བུའི་འཁོར་འདས་སྣང།། མི་འགྱུར་ཆོས་ཉིད་སྤྲོས་དང་བྲལ།། རང་རིག་ཡེ་ཤེས་མན་ཤེལ་བཞིན། ། འགྱུར་མེད་ཡེ་ཤེས་རྒྱ་མ་ཆད།། ལྷུན་གྲུབ་ཡེ་སངས་རྒྱས་པ་ལ།། ངོ་བོ་མི་འགྱུར་ཐུགས་རྗེ་འགག་པ་མེད།། དང་པོ་གནས་ལུགས་དགོངས་པ་ཡིན།། ཀྱེ་མ་རིགས་ཀྱི་བུ་ལེགས་པར་ཟུང་ཞིག། མི་གནས་ཡེ་ཤེས་ཆོས་ཀྱི་སྐུ།། ཡེ་ཤེས་ལྔ་ཡི་མཚན་ཉིད་ཅན།། རང་བྱུང་ཡེ་ཤེས་འབྱུང་བ་ལྔ།། ཆོས་ཉིད་དག་པའི་ཀློང་དུ་ཤར།། ཐིག་ལེ་འོད་ཀྱི་ཁ་དོག་ལྔ།། མཐིང་ག་ལ་སོགས་ཁ་དོག་ལྔ།། རིགས་ལྔའི་སངས་རྒྱས་ངོ་བོར་ཤེས། ། སྐུ་ལྔ་ཡེ་ཤེས་ལུས་ཅན་རྫོགས།། བཞི་བཅུ་རྩ་གཉིས་འོད་དུ་གསལ།། རང་རང་ཡེ་ཤེས་གདངས་ལ་བཞུགས།། གསལ་འཚེར་ལྷུན་སྡུག་འོད་ཟེར་འཕྲོ།། ཡེ་ཤེས་ལྔ་ཡི་གཞལ་མེད་ཁང། ། གསལ་དང་དྲོད་དང་བསིལ་བ་དང།། ཡང་དང་ཡངས་ཤིང་ཁྱབ་པའི་བདག། ཀུན་འབྱུང་ཡེ་ཤེས་ཕུང་པོར་འབར།། གདན་གསུམ་ངང་ལ་མ་བསྐྱེད་རྫོགས།། སྦྱོར་བ་གསུམ་གྱི་སྤྲུལ་པ་འབྱིན། ། འགྲོ་བའི་མ་རིག་མུན་པ་སེལ།། ཐུགས་རྗེ་འབྱུང་བའི་དགོངས་པ་ཡིན།། ཀྱེ་མ་ཀྱེ་མ་རྡོ་རྗེ་འཛིན།། རིན་ཆེན་ཟུར་བརྒྱད་ཉི་ཟླའི་ཁང་པ་ན།། སྐུ་དང་ཡེ་ཤེས་བུམ་པའི་མར་མེ་ལྟར།། ལོགས་ན་མི་གནས་རང་བཞིན་ལྷུན་གྱིས་གྲུབ། ། རྟོགས་པས་འདུ་འབྲལ་མེད་པའི་དགོངས་པ་ཡིན།། ཡེ་ནས་སངས་རྒྱས་ཆེན་པོ་ལས།། ལུས་ངག་ཡིད་གསུམ་བྱ་བ་ཡིས།། ས་དང་ལམ་རྣམས་རིམ་བགྲོད་དེ།། སངས་རྒྱས་ཡེ་ཤེས་བཙལ་དུ་མེད། ། ཆུ་ཡི་རང་བཞིན་དངས་པ་ལ།། རྙོག་པས་དེ་བཞིན་མི་གསལ་བཞིན།། ཆོས་སྐུའི་རང་བཞིན་སངས་རྒྱས་ལ།། སྐུ་གཉིས་མ་བཙལ་ལྷུན་གྱིས་གྲུབ།། ལུས་ངག་རྩོལ་བས་བསལ་མི་ནུས།། ང་ཡི་ངོ་བོ་དག་པ་ལ། ། དགེ་དང་སྡིག་པ་གདོད་ནས་མེད།། མེད་པའི་ཆོས་ལ་ཕན་གནོད་མེད།། བྱས་པའི་ཆོས་ཀྱིས་སངས་མི་རྒྱ།། མ་བཅོས་རང་གིས་ངང་ལ་བཞག། བྱ་བཙལ་འདས་པའི་དགོངས་པ་ཡིན།། མི་གནས་ཡེ་ཤེས་དངོས་རྟོག་མཐའ་དང་བྲལ། ། སྨྲ་བསམ་བརྗོད་མེད་རང་བཞྀན་རྣམ་པར་དག། མ་བཙལ་བཞག་པས་འདུ་འབྲལ་ཡོངས་ཀྱིས་མེད།། རང་རིག་ཟང་ཐལ་ཆེན་པོ་ལས།། སྒྲིབ་མེད་རང་སྣང་རྩེ་གཅིག་གསལ། ། བློས་བཞག་བསྒོམ་པས་གྲོལ་འདོད་པ།། མ་ཚོར་ཡིད་ཀྱི་ཡུལ་གྱུར་པས།། རིན་ཆེན་གསེར་ཀྱི་སྒྲོག་བཅུག་བཞིན།། གཟུང་འཛིན་རྩོལ་བས་བསྡམ་ཞིང་འཆིང།། ལྔ་པ་དོན་གྱི་དགོངས་པ་ཡིན།། ཞེས་གསུངས་སོ། ། ཐིག་ལེ་ཀུན་འདུས་ཆེན་པོ་ལས། ཐུགས་ཀྱི་རྒྱུད་ཀྱི་དོན་གྱི་དགོངས་པ་བསྟན་པའི་ལེའུ་སྟེ་བཞི་པའོ།།།། རཏྣ་ཀ་དྷ་མ་ཏ་མཱ་ཏཱ་ན་ཨ་ཏཱ་ཀ་ལ་ས་ཏུ་ཨ།། དེའི་ཚེ་ཡང་སྟོན་པ་རྡོ་རྗེ་འཆང་ཆེན་པོ་དེ། ཡོན་ཏན་འགག་པ་མེད་པ་དང།། ཕྲིན་ལས་ཐོགས་པ་མེད་པའི་དགོངས་པ་ལ་བཞུགས་སོ།། ཡང་དེའི་ཚེ་གསང་བའི་བདག་པོས་ཞུས་པ།། ཡོན་ཏན་ཕྲིན་ལས་དགོངས་པ་གསུང་དུ་གསོལ།། ཞེས་ཞུས་སོ། ། སྟོན་པས་བཀའ་སྩལ་པ། རང་རིག་ཆོས་སྐུ་དངོས་མེད་དག་པ་ལས།། ཡོན་ཏན་སྒོ་ཡངས་སྣང་བ་སོ་སོར་ཤར།། ཆོས་ཉིད་ངང་ནས་མ་འདྲེས་སོ་སོར་གསལ།། ཆོས་སྐུའི་ཐུགས་རྗེས་ལོངས་སྐུ་ཡོངས་སུ་ཤར། ། དེ་ཡི་ཐུགས་རྗེས་འགྲོ་བ་གནས་སུ་སྒྲོལ།། རྟོག་པའི་མཐའ་སེལ་ཡོན་ཏན་ཕྱོགས་རེ་བརྗོད།། ཨ་ཏིའི་ངང་དུ་མ་འདྲེས་རྫོགས་པར་བསྐྱལ།། ཡོན་ཏན་འགག་མེད་དོན་གྱི་དགོངས་པར་བཤད།། སངས་རྒྱས་ཕྲིན་ལས་མ་བཙལ་ལྷུན་གྱིས་གྲུབ། ། ནམ་མཁའ་ལྟ་བུའི་ཆོས་ཉིད་དག་པ་ལས།། ཉི་མ་ལྟ་བུའི་སྐུ་གསུམ་འདུ་འབྲལ་མེད།། བྱ་བཙལ་མེད་པའི་ཐབས་ཆེན་གྱིས།། མ་རིག་མུན་པ་སེལ་བར་མཛད། ། ནམ་མཁའ་ཉི་མ་ལྟ་བུ་རྒྱུད་ཆེན་དགོངས་པ་ཡིན།། ཞེས་གསུངས་སོ།། ཐིག་ལེ་ཀུན་འདུས་ཆེན་པོ་ལས། ཡོན་ཏན་ཕྲིན་ལས་ཀྱི་རྒྱུད་བཤད་པ་སྟེ་ལེའུ་ལྔ་པའོ།།།། ཨུ་པ་དེ་ཤ་ཏནྟྲ་ཀ་ལ་ས་དྷུ་ཨ། དེའི་ཚེ་ཡང་སྟོན་པ་རྡོ་རྗེ་འཆང་ཆེན་པོ་དེ། མན་ངག་དོན་གྱི་དགོངས་པ་ཆེན་པོ་བཞི་ལ་བཞུགས་སོ།། དེའི་ཚེ་གསང་བའི་བདག་པོས་ཞུས་པ། མན་ངག་རྒྱུད་ཆེན་རིམ་པ་གསུང་དུ་གསོལ།། ཞེས་ཞུས་སོ། ། སྟོན་པས་བཀའ་སྩལ་པ། ལག་ན་རྡོ་རྗེ་ལེགས་པར་ཟུང་ཞིག། ལྟ་བའི་ངོ་བོའི་མན་ངག་ནི།། འབྱེད་མེད་ཤེས་རབ་གསལ་ལ་རྟོག་པ་མེད།། ལོགས་ན་མི་གནས་རང་རིག་ཡེ་ཤེས་ཉིད།། ཐུགས་ཀྱི་ཀློང་ན་འགྱུར་མེད་འགག་པ་མེད། ། མི་རྟོག་ཆོས་སྐུ་འགག་མེད་ལོངས་སྤྱོད་སྐུ།། རྣམ་དག་དབྱིངས་ལ་ཡེ་ཤེས་མ་བསྒྲིབས་གསལ།། ཐུགས་རྗེའི་སྤྲུལ་པ་ཡེ་ཤེས་ཟང་ཐལ་ཡིན།། དེ་ལས་གང་གྱུར་ཡེ་ཤེས་ལོགས་ན་མེད། ། དེ་ཉིད་མཆོག་གྱུར་ཡེ་ཤེས་བླ་མ་ཉིད།། རྒྱུ་རྐྱེན་མེད་པར་རང་བྱུང་ཡེ་ཤེས་གསལ།། རང་རིག་ཡེ་ཤེས་ཆོས་རྣམས་ཀུན་གཞི་ཉིད།། མ་ནོར་མ་བཅོས་དབྱེར་མེད་རྟོགས་པའི་མཆོག། སྐུ་གསུམ་ངོ་བོར་གྲོལ་བའི་རྒྱུད་ལ་སྦྱར། ། རྟོགས་པའི་གང་ཟག་ཆོས་ཀྱི་མཐའ་ལས་གྲོལ།། དེ་ལ་མི་གནས་རྣམ་པར་དག་པའི་དབྱིངས།། འགྱུར་མེད་ཀློང་དུ་སྐུ་ལྔ་རྫོགས་སངས་རྒྱས།། དེ་ཉིད་རང་ཡིན་གཞན་ལས་འབྱུང་བ་མེད། ། དེ་ཡི་དོན་རྟོགས་བྱ་བཙལ་ལས་འདས་ཏེ།། སྐུ་གསུམ་རང་ཆས་རྫོགས་པར་གྲོལ་སྨིན་ཏེ།། མི་འགྱུར་སྤྲོས་བྲལ་ཀློང་ན་ཟང་ཐལ་ཡེ་ཤེས་གསལ།། བླ་མེད་རྒྱུད་ཆེན་དོན་གྱི་དགོངས་པ་ཡིན།། ཀྱེ་ཀྱེ་རྡོ་རྗེ་འཛིན་པ་ཉོན་ཅིག། བླ་མེད་ཡེ་ཤེས་ཟང་ཐལ་དོན་ཆེན་རྟོགས་པ་ཡིས།། ཆོས་ཉིད་རྡོ་རྗེ་ཆོས་སྐུ་དབྱེར་མེད་སྟོང་པའི་ཀློང་ཆེན་དུ།། ཕྱི་ནང་སྣོད་བཅུད་བག་ཆགས་མཚན་མ་དག། གཟུང་འཛིན་མི་གནས་གཉིས་མེད་ཆོས་སྐུར་གནས། ། སྟོང་ཉིད་དོན་རྟོགས་གཉིས་མེད་ཡེ་ཤེས་ཆོས།། འཛིན་པའི་སེམས་མེད་གཟུང་བའི་ཡུལ་དང་བྲལ།། གཟུང་འཛིན་རྟོག་མེད་ཡེ་ཤེས་མཁའ་ལ་གསལ།། མ་རིག་བདག་སྣང་ཆོས་ཉིད་ངང་དུ་ཐིམ། ། ཡེ་ཤེས་ཀློང་ན་རིག་པ་རང་གསལ་བ།། ཐུགས་རྗེའི་འོད་ཀྱིས་མ་རིག་མུན་པ་སེལ།། རང་རིག་རྣམ་དག་ཤེས་རབ་ཀློང་དུ་ཐིམ།། མཚོན་པའི་ཐབས་ཆེན་མཚོན་བྱའི་དོན་ལ་སྦྱོར།། སྨྲ་བསམ་བརྗོད་ལས་འདས་པ་འབྲས་བུ་ཐུན་གཅིག་ནས། ། སྐུ་དང་ཕྱག་རྒྱ་དབྱེར་མེད་ངང་ལ་གསལ།། རང་སྣང་ཡེ་ཤེས་གཞན་སྣང་རྟོག་དང་བྲལ།། རྟོག་པའི་ཤེས་རབ་རིམ་པས་ཟིལ་གནོན་ཅིང།། འཁོར་བའི་ཆོས་མེད་རིག་པ་རང་ས་འཛིན། ། བལྟ་བའི་གནས་གཅོད་དོན་གྱི་དགོངས་པ་ཡིན།། འཁོར་གྱི་རིག་པ་འཛིན་པ་ཉོན་ཅིག། ངས་བསྟན་རང་རིག་ཡེ་ཤེས་དེ།། བསྒོམ་དུ་ཡོད་པ་མ་ཡིན་ཏེ།། བསྒོམ་དུ་མེད་པ་ཡང་མ་ཡིན། ། གཉིས་མེད་འདུ་འབྲལ་ཡོངས་ཀྱིས་མེད།། ཆོས་ཉིད་ཀློང་ན་རང་རིག་ཆོས་སྐུ་གསལ།། མཚན་ཉིད་འཛིན་པའི་ཡེ་ཤེས་འགག་མེད་འོད་དུ་གསལ།། སྤྲུལ་སྐུ་མ་འགགས་འོད་ཟེར་ཀུན་ཏུ་འཕྲོ།། མ་རིག་མུན་སེལ་ཐུགས་རྗེས་གནས་སུ་སྒྲོལ། ། དེ་ཡི་ཐབས་སུ་བསྒོམ་དུ་ཡོད་མེད་གཉིས།། གང་ཟག་འབྲིང་ལ་གཞི་ལམ་འབྲས་བུར་བསྟན།། རང་གི་བློ་ལ་འཚམས་ལ་འོས་པར་མཛེས།། གང་ཟག་རབ་ལ་བསྒོམ་དུ་མེད་པར་བསྟན། ། རང་གི་བློ་ལ་འཚམས་ལ་འོས་པས་མཛེས།། ཡང་དག་དོན་ལ་ཡོད་པ་མ་བཀག་པར།། འཛིན་པ་ཕྱོགས་རེར་ཞེན་པ་བཟློག་ཆེད་དུ།། མེད་པར་ཞེན་ལ་ཡོད་པའི་དོན་དུ་བསྟན།། དོན་དམ་སྙིང་པོ་འགྱུར་མེད་ཆོས་ཀྱི་སྐུ། ། འགྱུར་མེད་གཞི་རྟོགས་ཉམས་བླངས་བློ་དངོས་འདྲེ།། མཚན་མའི་སྒྲིབ་གཡོགས་སྤོངས་ཆོད་པ།། འཁྲུལ་པའི་བློ་ལ་སྒྲིབ་གཡོགས་མེད་པར་སྣང།། ཡེ་ཤེས་རང་གི་ངོ་བོ་སྒྲིབ་མེད་ཟང་ཐལ་ཏེ། ། བློ་དངོས་བསྲེ་ཚེ་འདི་ལྟར་ངེས་པར་ཟུང།། ཡུལ་མེད་སེམས་མེད་ཅེར་གྱིས་མཐོང་བར་འགྱུར།། དེ་ཚེ་རིག་པ་ཡུལ་ལ་ཤར་བ་ཡིན།། ཚུར་ལ་མི་བསྡུ་མ་བསྐྱོད་ཟང་ཐལ་བཞག། ཐབས་གསུམ་ཉོན་མོངས་མི་སྤོང་མི་རྟོག་མ་གཡོས་ངང་ཉིད་དེ། ། རང་གསལ་མི་འགག་རང་བཞིན་དོན།། གཉིས་མེད་བདག་ཉིད་ཆེན་པོར་བཤད།། དེ་ཡིས་རྟོགས་པ་མངོན་དུ་ངེས་པར་འགྱུར།། རྣམ་རྟོག་སྦྱངས་པས་མཚན་མ་ཟིལ་གྱིས་གནོན། ། ཆོས་སྐུའི་ངོ་བོར་བདག་ཉིད་མངོན་གྱུར་པས།། དེ་ཡི་ཡོན་ཏན་འགྲོ་ལ་ཐུགས་རྗེ་འཆར།། ཡོད་པར་ཞེན་ལ་མེད་པའི་དོན་བསྟན་པ།། གཞི་སྣང་ཡེ་ཤེས་རང་བཞིན་རྣམ་པར་དག། མི་གནས་ཡེ་ཤེས་ཆུ་བོ་གང་གཱ་བཞིན། ། བསྒོམ་སྒྲུབ་མ་བྱས་རང་བྱུང་ཡེ་ཤེས་སྐུ།། ཚོགས་གཉིས་མ་བསགས་སྒྲིབ་གཉིས་མ་སྦྱངས་པར།། གོང་མའི་དོན་རྟོགས་བདག་ཉིད་མངོན་སངས་རྒྱས།། མ་འོངས་ད་ལྟར་རྗེས་འཇུག་རྫོགས་སངས་རྒྱས། ། དེ་ལྟར་དེ་བཞིན་ང་ཡིས་ལུང་བསྟན་བཞིན།། ཡོན་ཏན་ཕྱོགས་རྗེ་སྐུ་དང་ཡེ་ཤེས་གསལ།། ཆེ་བ་སོ་སོའི་མཆོག་གྱུར་རྣམ་པར་དཔག། མཛེས་པའི་དོན་ཆེན་རྒྱུད་ཀྱི་དགོངས་པ་ཡིན།། རང་རིག་ཆོས་སྐུ་ཐུགས་རྗེ་མ་འགགས་པར། ། སྐྱོབ་པའི་སྐུ་མཆོག་ཡེ་ཤེས་གཟུགས་ཀྱི་སྐུ།། ཤེས་རབ་བདག་ཉིད་མ་འགགས་མཛེས་པའི་སྐུ།། སྣང་ལ་རང་བཞིན་མེད་ཅིང་སོ་སོར་འཕྲོ།། ངོ་བོ་རྣམ་དག་མཚན་ཉིད་ཡེ་ཤེས་ལྔ། ། དེ་ཡི་རང་གདངས་ཡེ་ཤེས་འོད་དུ་འཆར།། དེ་ཉིད་རྣམ་དག་སྣང་ལ་རང་བཞིན་མེད།། ཡོད་མེད་གཉིས་མེད་ཡེ་ཤེས་རང་ཆས་རྫོགས།། བློ་ལས་འདས་ཏེ་དཔག་མེད་ཡེ་ཤེས་སྐུ།། བློ་ཡི་ཡུལ་གྱུར་ཚད་བཟུང་མཚོན་པའི་རྟགས། ། ཐུགས་རྗེའི་ཞགས་པས་རྒྱུད་ཆེན་དགོངས་པ་ཡིན།། ཞེས་གསུངས་སོ།། ཐིག་ལེ་ཀུན་འདུས་ཆེན་པོ་ལས། མན་ངག་གི་རྒྱུད་བཤད་པ་སྟེ་ལེའུ་དྲུག་པའོ།།།། ཛྙ་ན་གུ་རུ་བཛྲ་རཀྴ་ཚེ་ཏི་ཀྲིང་ཀྲིང་ར་ཛཱ་ཨུ་མ་དེ་བ་ཛྙཱ་ན་ཀ་ལ་པྲ་སཾ་རཾ་ཨུ་དེ་ཤན་ཏནྟྲ་ཙ་རི་པྲ་ཏ་ཨ་ཏ་ཀ་ལ་ས་ངྷུ་ཨཿ། དེ་ནས་བཅོམ་ལྡན་འདས་དགོངས་པ་མི་འགྱུར་བའི་དོན་ལ་བཞུགས་སོ།། དེའི་ཚེ་གསང་བའི་བདག་པོས་ཞུས་པ། ། ཀྱེ་ཀྱེ་བཅོམ་ལྡན་རྡོ་རྗེ་འཆང།། རྒྱུད་ཀྱི་བུ་བཞི་སྤྱིའི་དགོངས་པ་བཤད་དུ་གསོལ། ཞེས་ཞུས་སོ།། སྟོན་པས་བཀའ་སྩལ་པ།། རྡོ་རྗེ་སེམས་དཔའ་ལེགས་ཟུང་ཞིག། དྲི་མེད་དག་པའི་ཆོས་སྐུ་ལ། ། ཡོན་ཏན་སྣང་བ་མི་འགག་པ།། འཁོར་དང་མྱ་ངན་འདས་པར་སྣང།། རང་ཉིད་མ་གཡོས་གོས་པ་མེད།། དེ་ལ་སྐྱེ་འགག་འགྱུར་མེད་པ།། རྩ་བའི་རྒྱུད་ཆེན་ལྔ་ཡི་དོན།། དེ་མཚོན་ཚིག་རྒྱུད་རྣམ་པ་ལྔ།། སྐུ་གསུམ་རྒྱལ་པོ་བཤད་ལུགས་གསུམ། ། སོ་སོའི་འཁོར་ལ་གནས་སུ་གསུངས།། མཚོན་པའི་རྒྱུད་ལ་ངེས་ཤེས་བསྐྱེད།། རྒྱུད་ལྔ་དོན་གྱི་སྙིང་པོ་ནི།། སྐུ་གསུམ་འདུ་འབྲལ་མེད་པར་བཤད།། སངས་རྒྱས་བདག་ཉིད་སྟོན་པ་ཡིས། ། སྐད་ཅིག་གསུམ་ལ་རྣམ་གྲོལ་བའི།། སོ་སོར་རྟོག་པའི་ཡེ་ཤེས་ཅན།། སངས་རྒྱས་བདག་ཏུ་འདུ་བར་བསྟན།། ཤེས་རབ་ཏིང་འཛིན་དབང་གྱུར་པས།། གཞི་ལ་གནས་ཏེ་ལྷག་མཐོང་མེད།། བྱང་སེམས་ཤེས་བྱའི་སྒྲིབ་པ་ཅན། ། སེམས་ཅན་སྡེ་རུ་ང་ཡིས་བཤད།། ཡེ་ཤེས་ཆེན་པོ་རྒྱུད་ལ་བཤད། བག་ཆགས་ལུས་ལ་ཐོགས་པ་ནི།། མཚན་ཉིད་ལྔ་ལྡན་གཉིས་མེད་པའི།། ཕུང་པོ་གསུམ་པའི་གནས་སྐབས་སུ། ། བསྡུ་བའི་རིམ་པར་རྣམ་ཕྱེ་བའོ།། དྲི་མེད་རྒྱུད་ཀྱི་དགོངས་པ་ཡིན།། ཀྱེ་མ་ཀྱེ་མ་རིགས་ཀྱི་བུ།། ངས་བསྟན་དོན་གྱི་དགོངས་པ་ལ།། ཤར་བ་མེད་ལ་ནུབ་པ་མེད།། སྐྱེ་བ་མེད་ལ་འགག་པ་མེད།། འགྲོ་བ་མེད་ལ་འོང་བ་མེད། ། གཟུང་འཛིན་རྣམ་རྟོག་རྒྱུན་བཅད་དེ།། འགྱུར་མེད་ཡེ་ཤེས་དོན་རྟོགས་དེ།། གཞི་ཡི་གནས་ལུགས་ཡིན་པར་བཤད།། དེ་དོན་ཀུན་ཏུ་བཟང་པོ་ཡིས།། བཟང་ངན་ཆེ་ཆུང་དབྱེ་བ་མེད།། དེ་ཡི་གནས་ལུགས་དེས་མཐོང་བ། ། ངོ་སྤྲོད་རྣམ་བཞིས་རྟོགས་པ་བསྐྱེད།། ཉོན་མོངས་ལྔ་དང་དོན་གནད་ལྔས།། མ་རྟོགས་བཅིངས་ཏེ་མདུད་བཞིན་བསྡམས་པ་རྟོགས་པས་གྲོལ།། དེ་བཞིན་ཀུན་གྱིས་མི་རྟོག་པས།། བློ་དང་སྦྱར་ཏེ་སོ་སོར་བཤད། ། ནུབ་མེད་རྒྱལ་མཚན་དགོངས་པ་ཡིན།། རིག་པའི་སྐུ་ལ་དབང་བཞི་རྫོགས།། རང་སྣང་འཁོར་ལ་བྱིན་རླབས་དབང།། དང་པོ་བྱིན་གྱིས་རླབས་ཀྱིས་ཤར།། མཐའ་མ་བྱིན་གྱིས་རླབས་ཀྱིས་བསྐུར། ། རང་ལ་དབང་བསྐུར་རང་ལ་རང་དབང་ཐོབ།། དེ་ཉིད་མཆོག་གྱུར་འཁོར་འདས་ཀུན་ལ་དབང།། རྫས་ལ་མ་བརྟེན་ཤེས་རབ་སྟོབས་ཀྱིས་བསྐུར།། རིག་པའི་རྩལ་དབང་ཞེས་སུ་བསྟན་པ་ཡིན།། རང་རིག་ཡེ་ཤེས་ངོ་བོ་སྟེ།། རང་རིག་ཐུགས་ཀྱི་ཀློང་ན་བཞུགས།། ཆོས་སྐུ་འགྱུར་མེད་ནུབ་པ་མེད།། སྐྱེ་ཤི་མེད་པའི་རྡོ་རྗེའི་ཚེ།། བློ་ཡི་ཡུལ་ལས་རབ་འདས་པ།། བཅོམ་ལྡན་རྡོ་རྗེ་ཚེ་དཔག་མེད། ། གཟུགས་སྐུ་གཉིས་དང་ཐབས་ཅིག་བཞུགས།། རྫས་དང་སྔགས་དང་ཆོ་ག་རྣམས།། ཕྱིར་བསྟན་དེ་ཉིད་རྟོགས་པའི་ཐབས།། དེ་རྟོགས་དེ་ལ་བསྒྲུབ་ཏུ་མེད།། རིག་པའི་རང་གདངས་བུམ་པ་ལྔ།། ཡུམ་གྱི་རང་བཞིན་ཡེ་ཤེས་སྤྱན། ། སྙིང་པོ་སྐུ་ལ་བཞུགས་པའི་ཀློང།། དེ་རྟོགས་བྱ་ཕྱིར་བུམ་པའི་དབང།། ཕྱིར་བསྐུར་ནང་དུ་གདམས་པ་དབབ།། དེ་ནི་ལོངས་སྐུའི་ངོ་བོ་སྟེ།། དེ་ལས་སྤྲུལ་པའི་སྐུར་སྣང་བ།། ཚོགས་དྲུག་དག་ལ་ཡེ་ཤེས་ཁྱབ། ། མི་གསལ་གསལ་བའི་བདག་ཉིད་ཅན།། ལྷུན་གྲུབ་མངོན་དུ་འགྱུར་བའི་ཕྱིར།། ཕྱག་རྒྱ་རྣམ་དྲུག་ཕྱིར་དབང་བསྐུར།། ནང་དུ་བསྐུར་མེད་ཐོབ་མེད་པས།། ཡེ་ནས་གནས་པའི་ཐབས་སུ་བསྟན། ། དེ་རང་སྣང་ཞིང་རང་གིས་ཤེས།། རང་ཉིད་ངང་ན་འདུ་འབྲལ་མེད།། རྫས་བཞི་དག་ལ་བརྟེན་ནས་རྟོགས་པ་ཐོབ།། ཐུན་མོང་གྱུར་དང་མ་གྱུར་པས།། སོ་སོའི་ཡུལ་དང་གང་ཟག་བསྟན།། ཚིག་དབང་དོན་གྱི་དགོངས་པ་ཡིན། ། ཆོས་སྐུ་འགྱུར་མེད་རྡོ་རྗེ་གསུམ།། ལོངས་སྐུ་སྲོག་མེད་སྐུ་ལྔ་གསུམ།། དེ་གདུང་སྤྲུལ་སྐུས་ཡོངས་བཟུང་སྟེ།། སེམས་ཅན་མ་རིག་མུན་པ་སེལ།། དེ་བཞིན་དེ་ཡི་རིམ་པས་བཟུང།། དེ་ལ་དེ་བཞིན་རིམ་པས་གནས། ། དེ་ནི་སྐུ་གདུང་དོན་གྱི་དགོངས་པ་ཡིན།། ཞེས་གསུངས་སོ།། ཐིག་ལེ་ཀུན་འདུས་ཆེན་པོ་ལས།། གདམས་ངག་རྒྱུད་བཞིའི་དགོངས་པ་སྟེ་ལེའུ་བདུན་པའོ།།།། ཨཱ་སུ་ཨུདྡྷ་ཏྲེ་ཤ་ས་ན་ཙཱ་ཀ་ཧཱ་ཨ་ཧཱ་མ་ཏི་ཨ། ། དེའི་ཚེ་བཅོམ་ལྡན་འདས་མན་ངག་དོན་གྱི་དགོངས་པ་ལ་ཞུགས་སོ།། དེ་ནས་ཡང་གསང་བའི་བདག་པོས་ཞུས་པ།། ཀྱེ་ཀྱེ་བཅོམ་ལྡན་རྡོ་རྗེ་འཆང།། མན་ངག་ལུང་གི་དགོངས་པ་གསུང་དུ་གསོལ། ། ཞེས་ཞུས་སོ།། སྟོན་པས་བཀའ་སྩལ་པ།། སྟོན་པ་རྡོ་རྗེ་སེམས་དཔའ་ངས།། རྒྱུད་དང་རྒྱུད་ཀྱི་མན་ངག་དང།། མན་ངག་ལུང་དང་བཅས་པར་བསྟན།། མན་ངག་དོན་གྱི་དགོངས་པ་ཡིན།། ཆོས་སྐུ་རིན་ཆེན་ལྟ་བུ་ལ། ། ཡོན་ཏན་སྣང་བ་སྐུ་གཉིས་འཆར།། དབྱེར་མེད་འདུ་འབྲལ་མེད་པར་གནས།། ངོ་སྤྲོད་རྣམ་བཞིས་གྲོལ་བར་བྱས།། ཐུགས་ཀྱི་དཀྱིལ་འཁོར་སྒོ་ཕྱེ་སྟེ།། སྐུ་གསུམ་རིན་ཆེན་གཏེར་མཛོད་བརྟོལ། ། མི་འགྱུར་དགོངས་པ་རྣམ་བཞི་རྫོགས།། འགྱུར་མེད་གཅིག་གི་ངང་ལ་གནས།། ཞལ་ཆེམས་དོན་གྱི་དགོངས་པ་ཡིན།། ཆོས་ཉིད་འགྱུར་བ་མེད་པ་དང།། རིག་པ་འགག་པ་མེད་པ་ལས།། སྣང་ལ་རང་བཞིན་མེད་པའི་ཡེ་ཤེས་གསལ། ། སྙིང་པོ་སྐུ་ལྔ་ཕྱག་རྒྱ་མ་བསྐྱེད་ཚུལ།། ས་བོན་རྒྱུ་རུ་བཤད་པ་དང།། རྒྱུ་ཉིད་མྱུ་གུའི་ཚུལ་དུ་བྱུང།། རིག་དང་མ་རིག་བྱེ་བྲག་གིས།། འབྲས་བུ་སངས་རྒྱས་སེམས་ཅན་གཉིས། ། ཆོས་སྐུ་གཅིག་ལ་ཐ་དད་པས།། ཟླ་བ་ཉི་མ་ཇི་བཞིན་ནོ།། ཆོས་ཉིད་འགྱུར་བ་མེད་པ་དང།། རང་རིག་བརྒྱན་དུ་འགྲོ་བའི་ལུས་སེམས་ཤར།། སྟོན་པའི་རྒྱན་དུ་ལུང་དང་མན་ངག་ཤར།། དེ་རྟོགས་སྐད་ཅིག་བཞིས་གྲོལ་ལ། ། རིག་པ་མ་འགགས་ཚུལ་དུ་ཤར།། དེ་ཉིད་མ་འགགས་ཡུལ་ལ་ཤར།། གཉིས་མེད་གཉིས་སུ་མེད་པར་གནས།། གཉིས་མེད་གཟུང་འཛིན་མཐའ་ལས་འདས།། གཞི་ལྡན་དོན་གྱི་དགོངས་པ་ཡིན། ། ཀྱེ་མ་ཀྱེ་མ་རྡོ་རྗེ་འཛིན།། དེ་ལྟར་རྟོགས་པའི་རྣལ་འབྱོར་ལ།། སྐད་ཅིག་གཅིག་གིས་རྫོགས་སངས་རྒྱས།། མི་འགྱུར་གཞི་ཡི་ངང་ལ་བཞུགས།། བག་ཆགས་ལུས་ཀྱིས་བསྒྲིབས་མོད་ཀྱང། ། མ་ཐུབ་སྒོ་ནང་ཟང་ཐལ་གསལ།། ཡང་ཞུན་དོན་གྱི་དགོངས་པ་ཡིན།། དེ་རྣམས་ངས་བསྟན་ཡིད་ཆེས་བྱེད།། དེ་ཡི་དངོས་གཞི་གོང་བཞིན་བསྟན།། ངེས་པའི་མཚན་ཉིད་ཇི་བཞིན་ཤེས།། དེ་དང་དེ་རྣམས་མི་འགལ་བར། ། གང་ཟག་བློ་ལ་ངེས་ཤེས་བསྐྱེད།། དབང་གསུམ་དོན་གྱི་དགོངས་པ་ཡིན།། ཐིག་ལེ་ཀུན་འདུས་ཆེན་པོ་ལས།། མན་ངག་གི་དགོངས་པ་བསྟན་པའི་ལེའུ་སྟེ་བརྒྱད་པའོ།།།། ཐུགས་རྗེ་ཆོས་ཀྱི་འཁོར་ལོའི་སྐབས་དོན་ཀུན་ལ་ཁྱབ་པའི་ཐིག་ལེའོ། ། ཨ་ཏཱ་ཀ་ཛྙཱ་ན་ཙཀྲ་ཏནྟྲ་ཨུ་པ་དེ་ཤ་སཱ་ཏ་ས་མ་ཏི་མ་ལ་ཨཱ།། བུ་ཏ་སཏྭ་སརྦ་བུ་ཏ། ཙ་ཀ་ཤུ་སིང་ཏ་ཤི་མ་ཎ་ཛྙཱ་ན་ཨཱ་ན།། བཛྲ་པ་ནེ་ཨ་ཏ་མ་ཏི་ཙ་རི་ཀ་ལ།། དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་རྟོགས་པའི་ཡེ་ཤེས་ཀྱི་དགོངས་པ་ལ་ཞུགས་སོ། ། དེའི་ཚེ་གསང་བའི་བདག་པོས་ཞུས་པ།། རྟོགས་པའི་ཡེ་ཤེས་འཁོར་ལོ་གསུང་དུ་གསོལ།། ཞེས་ཞུས་སོ།། སྟོན་པས་བཀའ་སྩལ་པ་ཉོན་ཅིག། གཞི་གནས་ཀྱི་ཡེ་ཤེས་ལ་མཚན་ཉིད་འཛིན་པའི་ཡེ་ཤེས་ཀྱིས་བསྐོར་ཏེ།། རིག་པའི་སྟོང་པ་དང་དབྱེར་མེད་དང་ཐོགས་པ་མེད་པ་དང་ཐ་དད་གཅོད་པ་བཞིས་བསྐོར་ཏེ། ཤེས་རབ་ཀྱི་སྲོག་ཤིང་ལ་ཡེ་ཤེས་འཁོར་ལོ་བཞིས་བསྐོར་བ་ན། ། ཕྱོགས་ལྷུང་མེད་པའི་ཤེས་རབ་སོ་སོར་རྟོགས་པའི་ཤེས་རབ་ཀྱིས་གཅོད་པའོ།། རིགས་ཀྱི་བུ་དེའི་དོན་ནི་ཀུན་གྱི་ཐུན་མོང་མ་ཡིན་ཏེ། རབ་ཏུ་རྟོགས་པར་དཀའ་བའོ། ། ཀྱེ་ཀྱེ་གསང་བདག་ངེས་པར་ཟུང།། སྟོན་པ་ལ་སོགས་རྣམ་པ་ལྔ།། གསང་བའི་དོན་ཆེན་གཏན་ལ་ཕབ།། མ་རྟོགས་འཁྲུལ་པར་ཤར་བར་བཤད།། གདམས་ངག་རྣམ་གཉིས་གཙོར་བསྟན་ཅིང།། རྒྱུ་རྐྱེན་རང་རིག་གཅིག་པུ་ཉིད། ། བདག་རྐྱེན་རང་རིག་ཆོས་སྐུ་ལ།། རྟགས་ཀྱི་ཡེ་ཤེས་མ་འགགས་སྣང།། དམིགས་རྐྱེན་ཐུགས་ཀྱི་མེ་ལོང་བྱས།། མཚུངས་རྐྱེན་བླ་མའི་གདམས་ངག་བྱས།། ཡེ་ཤེས་འཁོར་ལོས་རབ་བཅད་པས། ། འཁྲུལ་གསུམ་གཞི་གསུམ་ངང་དུ་དག། རང་རིག་ཡེ་ཤེས་བྱ་བཙལ་འདས།། ལས་དང་ཐུགས་རྗེ་རྣམ་པར་དག། བསྒོམས་པས་གཞན་ནས་ཐོབ་པ་མེད།། མ་བསྒོམས་དོན་དང་འབྲལ་བ་མེད།། འདུ་འབྲལ་མེད་པའི་དགོངས་པ་ནི། ། ཆུ་བོ་གང་གཱ་ཇི་བཞིན་ནོ།། དེ་ལྟར་དོན་ནི་རིམ་པར་སྤྱོད།། མ་འགགས་ཤར་བས་རང་བཞིན་ཏེ།། རྟོགས་པས་མཚན་མ་ཟིལ་གྱིས་གནོན།། མཚན་མ་ཟིལ་གནོད་སྣང་བ་ཡང། ། རྟོགས་པས་ཡོན་ཏན་རང་གསལ་ཏེ།། རང་ལས་མ་གཏོགས་གཞན་སྣང་མེད།། དེ་དོན་རྟོགས་པའི་རྣལ་འབྱོར་ལ།། རང་མ་ཡིན་པ་གཞན་མེད་ཅིང།། རང་ཡང་དངོས་གཞི་རྗཻས་གྲུབ་མེད།། དེ་བས་དེ་ལ་གཉིས་མེད་པས། ། དོན་ལས་མི་ཉམས་བསྲུང་མཚམས་མེད།། འཕྲལ་ལ་བྱས་པ་མ་ཡིན་ཏེ།། ང་ཡི་རང་བཞིན་ཡེ་ནས་དེ་བཞིན་ཉིད།། ང་ཡི་དོན་གྱི་ཕྱོགས་རེ་ནས།། ཐེག་བརྒྱད་འདོད་པ་ཕྱོགས་རེ་བརྗོད། ། ཐམས་ཅད་ང་ཡི་དབང་དུ་རྫོགས།། ང་ཡི་དོན་ལ་འདའ་བ་མེད།། ང་ཡི་རང་བཞིན་རང་བྱུང་ཡེ་ཤེས་པས།། ལྷུན་གྲུབ་གཞི་ཡི་སངས་རྒྱས་ལས།། བྱ་བཙལ་འབད་རྩོལ་རྣམ་པར་དག། ང་ཡི་དོན་ཆེན་མ་རྟོགས་པར། ། ལུས་ངག་འབད་རྩོལ་ཅི་བྱས་ཀྱང།། བྱས་ཀྱིན་འཛིན་པ་ཆེན་པོར་གྱུར།། གསང་བ་དོན་ཆེན་དགོངས་པ་ཡིན།། དྲི་མེད་རྣམ་དག་རང་རིག་ཆོས་ཀྱི་སྐུ།། ཡོན་ཏན་འགག་མེད་སྐུ་དང་ཡེ་ཤེས་གསལ། ། བྱ་བྱེད་འབད་རྩོལ་མི་གནས་བདེ་ཆེན་ལྷུན་གྱིས་གྲུབ།། མ་རྟོགས་བློ་ལ་ཕྱི་ནང་འཁྲུལ་པར་ཤར།། རྟོགས་པའི་དོན་ལ་མི་གནས་རྣམ་པར་དག། བྷན་དྷ་འབར་བའི་གཞལ་མེད་ཁང། རྒྱ་མཚོ་ཆེན་པོ་ཀློང་དཀྱིལ་ནས། ། སྣང་བ་ཆོས་སྐུའི་བར་ན་ཡེ་ཤེས་གསལ།། དེ་ཉིད་རང་གི་ངོ་བོ་ནི།། མྱང་འདས་དོན་གྱི་དགོངས་པ་ཡིན།། གཉིས་མེད་ཆོས་སྐུ་དབྱེར་མེད་ཤེས་རབ་ལས།། མ་འགགས་ཡེ་ཤེས་འབྲས་བུ་གཟུགས་སྐུར་སྨིན། ། ཆོས་སྐུའི་འོད་དང་ལོངས་སྐུའི་ཟེར།། འགྲོ་བ་རིགས་དྲུག་གནས་སུ་ཤར།། ལས་དང་གང་ཟག་ཐུགས་རྗེས་གནས་སུ་སྒྲོལ།། ཀུན་ཏུ་བཟང་པོ་བདེ་ཆེན་ངང་དུ་སྦྱོར།། དྲི་མེད་རྣམ་དག་འབྱེད་མེད་ཤེས་རབ་གསལ། ། མཉམ་སྦྱོར་དོན་གྱི་དགོངས་པ་ཡིན།། རང་རིག་ཡེ་ཤེས་རང་བྱུང་གཉིས་མེད་པས།། མཐའ་བཞི་བདུད་བཞིའི་གནས་རྣམས་རྣམ་པར་དག། མི་གནས་ཡེ་ཤེས་མཚན་ཉིད་ལྔ་དང་ལྡན།། དམ་པ་ཆོས་སྐུ་འབྲས་བུ་ཡེ་ཤེས་སྐུ། ། བྱ་བཙལ་མི་མངའ་རང་བཞིན་ལྷུན་གྱིས་གྲུབ།། ས་ལམ་མི་བགྲོད་འགྱུར་མེད་གཅིག་པ་ཉིད།། བྱ་བཙལ་མི་མངའ་རེ་དོགས་མཐའ་ལས་འདས།། རང་བཞིན་ལྷུན་གྲུབ་ཡེ་སངས་རྒྱས་པའི་སྐུ། ། སྤྲོས་བྲལ་ཀློང་ན་འགྱུར་མེད་རིག་པ་གསལ།། ཐུགས་རྗེ་འགག་མེད་མི་འབྲལ་གཡོས་པ་མེད།། རེ་དོགས་མི་མངའ་རྩོལ་བསྒྲུབ་རྣམ་པར་དག། ཤེས་རབ་རྩལ་རྫོགས་འགྱུར་མེད་དབྱིངས་ན་གསལ།། ཆོས་རྣམས་ཐམས་ཅད་རང་བཞིན་རྣམ་དག་ཀློང། ། མི་རྟོག་ཆོས་སྐུ་འགག་མེད་ཡེ་ཤེས་གསལ།། སྐུ་དང་ཡེ་ཤེས་རོལ་པ་མཛད་སྤྱོད་ལས།། ཕྱི་ནང་སྣོད་བཅུད་གཟུང་འཛིན་སྣང་བ་རྣམས།། སྤྲུལ་པའི་སྣང་བ་ཆོས་ཉིད་ངང་དུ་དག། རང་གི་ངོ་བོ་མ་བསྒྲིབས་ཀུན་ཏུ་གསལ།། སྐྱོན་དང་ཡོན་ཏན་རེ་དོགས་བཟང་ངན་རྣམས།། གཉིས་མེད་བདེ་ཆེན་རྟོག་པའི་མཐའ་ལས་འདས།། ཆོས་ཉིད་དག་པའི་མེ་ལོང་ལྟ་བུ་ལ། ། ཆོས་སྐུ་དག་པ་མེ་ལོང་གཟུགས་ལྟར་ཤར།། གཉིས་མེད་ཆོས་སྐུ་ནམ་མཁའི་བདག་ཉིད་ཅན།། རང་གསལ་འཛིན་མེད་མ་བཅོས་བདེ་བའི་ངང།། སྟོང་དེ་སྟོང་པ་མ་ཡིན་སྟོང་པའི་སྙིང་པོ་འབྱུང།། ཤེས་རབ་འགྱུར་མེད་ཀློང་ནས་འགག་མེད་ཡེ་ཤེས་ཤར། ། སྣང་ལ་རང་བཞིན་མེད་དེ་རྣམ་དག་ཆོས་ཀྱི་སྐུ།། ཡོན་ཏན་མི་འགག་དངོས་མེད་ངང་གིས་འབྱུང།། དེ་ཡི་ངང་ལས་མི་གཡོ་འགག་པ་མེད།། རྒྱུ་རྐྱེན་བྱེད་པ་མེད་པས་རང་རིག་ཡེ་ཤེས་གསལ། ། འཁོར་འདས་ལ་སོགས་ཅིར་སྣང་འཕེལ་འགྲིབ་མེད།། ཕྱི་ནང་སྣོད་བཅུད་སྣང་སྲིད་འཁོར་འདས་ཀུན།། གཉིས་མེད་ཆོས་སྐུ་རྣམ་དག་ཀློང་ཆེན་ན།། མ་འདྲེས་ཡོངས་རྫོགས་གསལ་ལ་རྟོག་པ་མེད། ། ཡོན་ཏན་རང་སྣང་ཐིག་ལེ་རང་སངས་རྒྱས།། སྣ་ཚོགས་སྣང་ལ་རང་བཞིན་ཡོངས་ཀྱིས་མེད།། ཏིང་འཛིན་རྣམ་དྲུག་དོན་གྱི་དགོངས་པ་ཡིན།། མི་གནས་ཡེ་ཤེས་མ་འགགས་ཀུན་ཏུ་གསལ། ། ཐུགས་ཀྱི་མེ་ལོང་ཀུན་གཞི་གཏན་ལ་འབེབས།། ལུང་གི་ཤར་ལུགས་གནས་ལུགས་ཐིམ་ལུགས་ཤེས།། ཐུགས་རྗེའི་སྟོབས་ཀྱིས་རིགས་དྲུག་གནས་སུ་ཤར།། རྟགས་ཀྱི་ཡེ་ཤེས་འགྱུར་མེད་དོན་དང་འཕྲད། ། སྦུབས་དང་བྲལ་བས་གཟུང་འཛིན་རྣམ་པར་དག། གཉིས་མེད་ཀློང་ནས་ཡེ་ཤེས་འོད་དུ་གསལ།། བདུད་བཞི་རྒྱས་འདེབས་ཡེ་ཤེས་རྩེ་གཅིག་གསལ།། རྟོག་མེད་ཤེས་རབ་འབྲས་བུ་མངོན་སངས་རྒྱས། ། རྡོ་རྗེ་གདན་ལ་རིན་ཆེན་སྐུ་རུ་སྨིན།། དམིགས་སེལ་རྣམ་དྲུག་དོན་གྱི་དགོངས་པ་ཡིན།། ཐུགས་ནི་དཀྱིལ་འཁོར་གསལ་འགྲིབ་ལས་འདས་པའི།། མི་འགྱུར་མ་བསླད་འགག་མེད་ཡེ་ཤེས་གསལ།། མ་ནོར་མ་བཅོས་དབྱེར་མེད་གྲོལ་བའི་ཆོས། ། གནས་སྐབས་ཆོས་ལྔས་སྲིད་པའི་མཐའ་ལ་བསྐྱལ།། ཡི་གེ་རྣམ་དྲུག་དོན་གྱི་གནས་བསྟན་པས།། སྒྲ་སྐད་འབྱུང་དང་ཐུགས་རྗེ་རང་བྱུང་ཞིང།། མི་གནས་མྱ་ངན་འདས་དང་དགོངས་པ་རྫཽགས། ། ཆོས་ལྔ་དོན་གྱི་དགོངས་པ་ཆེན་པོ་ཡིན།། དྲི་མེད་ངང་དུ་ཐམས་ཅད་འདུས།། དེ་མཚོན་ཕྱི་ནང་གསང་བས་བསྡུས་པ་རྣམས།། སྒྲ་དང་བརྡའ་དང་གཉིས་མེད་དོན་དུ་འདུས།། དེ་ཡི་དོན་ལ་རྒྱུ་རྐྱེན་རྣམ་པར་དག། རང་བྱུང་སྐུ་གསུམ་འགྱུར་མེད་ཆོས་ཀྱི་སྐུ།། རྟོགས་དང་མ་རྟོགས་འཁོར་འདས་ཀུན་ཏུ་ཤར།། སྣ་ཚོགས་སྣང་ཡང་དྲི་མེད་རྣམ་པར་དག། ཚིག་གིས་མཚོན་པས་ཚིག་ལས་འདས་པར་རྟོགས། ། ཚིག་གིས་མཚོན་པ་བློ་ཡི་བྱེ་བྲག་གིས།། བསྒོམ་དུ་ཡོད་དང་མེད་པ་གཉིས་སྤང་ལ།། གཉིས་ལ་ཡོད་མེད་དོན་ལ་རྣམ་པར་དག། དེ་ལྟར་རྟོགས་པས་སྐད་ཅིག་གསུམ་ལ་གྲོལ།། སངས་རྒྱས་སེམས་ཅན་ཐུགས་རྗེའི་ལྕགས་ཀྱུས་འཛིན། ། རང་རིག་མེ་ཏོག་ཆོས་ལས་འདས།། དེ་ལྟར་རྟོག་པས་ཐམས་ཅད་བཅིངས།། རང་རིག་ཡེ་ཤེས་གཉིས་ཀྱི་མཐའ་ལས་འདས།། རྟོགས་པའི་སྟོབས་ཀྱིས་མ་རིག་རིག་པར་གྲོལ། ། འཁོར་འདས་གཉིས་མེད་བདེ་ཆེན་གསལ་བའི་ངང།། ཐུན་མོང་མ་ཡིན་སྨྲ་བསམ་འདས་པའི་སྐུ།། དེ་ལྟར་རྟོགས་པས་རྩོལ་བའི་མཐའ་དང་བྲལ།། དེ་ཡི་མཚོན་ཐབས་མན་ངག་ཀུན་གྱི་གཞི།། སྐུ་གསུམ་ལྷུན་གྲུབ་རྟོགས་པའི་ཤེས་རབ་སྐྱེ། ། དོན་གྱི་བཀའ་བཞི་མ་ལུས་གཏན་ལ་ཕེབས།། དགོངས་པ་འདུས་པའི་དགོངས་པ་འདུས་པ་ཡིན།། གསང་བའི་དོན་ཆེན་བློ་ཡི་ཡུལ་ལས་འདས།། ཐུན་མོང་མ་ཡིན་སྨྲ་བསམ་འདས་པའི་སྐུ། ། ཐུགས་ཀྱི་གཏེར་མཛོད་དགོངས་པ་ཀུན་གྱི་ཐུགས།། ཀུན་འབྱུང་ཀུན་མཁྱེན་ཡེ་ཤེས་དག་པའི་གཞི། རིག་དང་མ་རིག་སངས་རྒྱས་སེམས་ཅན་སྣང།། ངས་བཤད་དོན་གྱི་རྣམ་དག་དབྱིངས་ཀྱི་ངང། ། ཡེ་ཤེས་མི་འགག་བཅོམ་ལྡན་རྡོ་རྗེ་འཆང།། ཐུགས་ཀྱི་ཀློང་དུ་འགག་མེད་ཡེ་ཤེས་ཤར།། གློ་བའི་ནང་དུ་དེ་ཡི་རྩལ་ཤར་བའི།། རླུང་དང་འཕྲད་དེ་དེ་ཡིས་རྟོག་པ་འགྱུས།། དེ་ཡི་སྐྱོན་གྱིས་མ་གོས་མཚན་མ་སོ་སོར་འཛིན། ། དེ་བཞིན་རིམ་འགྲོ་རླུང་དང་བྲལ་ནས་གནས།། དེ་ནི་རང་ཤར་ཀུན་ནས་ཀུན་མཁྱེན་འགྱུར།། ལུས་ཀྱི་རྣམ་ཤེས་ཀུན་རྫོབ་ཐིག་ལེ་གསུམ།། ཕྱིར་ཤར་རྩལ་དེ་སྤྲུལ་སྐུ་འབྱིན་པར་བྱེད།། སེམས་ལས་གྲོལ་བས་གཟུང་འཛིན་རྣམ་རྟོག་གྲོལ། ། རྟོག་མེད་ཡེ་ཤེས་ནམ་མཁའི་འཇའ་ལྟར་གསལ།། བདག་ཉིད་སངས་རྒྱས་ཐུགས་རྗེས་འགྲོ་བ་སྐྱོབ།། འགྱུར་མེད་ཀློང་དུ་ཡེ་ཤེས་རླུང་གིས་བསྐྱོད།། སྐུ་གསུམ་ནང་གསལ་བུམ་པའི་མར་མེ་བཞིན། ། ཐུགས་ཀྱི་གཏེར་མཛོད་དོན་གྱི་དགོངས་པ་ཡིན།། ཡུལ་གྱི་མཛོད་དང་རིག་པ་སེམས་ཀྱི་མཛོད།། ལུས་ཀྱི་མཛོད་དང་རིགས་ལྔའི་མཛོད།། ཡེ་ཤེས་མཛོད་ནས་སོ་སོའི་དོན་བཞུགས་དབྱེར་མེད་ཚུལ་གྱིས་འཆང། ། རྟོགས་དང་མ་རྟོགས་སངས་རྒྱས་སེམས་ཅན་སྣང།། དེ་ན་གནས་དང་དེ་ཡི་ངང་དུ་གྲོལ།། རྟོགས་པའི་ཡེ་ཤེས་རིག་པ་རང་ས་འཛིན།། འབྱེད་པའི་མུ་བཞི་སྐྱོན་སེལ་ཡོན་ཏན་བསྒྲུབ། ། འཁོར་ལོ་ལྔ་པ་དོན་གྱི་དགོངས་པ་ཡིན།། ཀུན་གཞི་ཡེ་ཤེས་མེ་ལོང་རིགས་ལྔའི་བདེ་གཤེགས་གསལ།། མ་ལུས་རྫཽགས་ཚེ་ལུས་ཀྱི་ཀློང་ན་གསལ།། དོན་གྱི་དབང་བཞི་མ་བསྐུར་ལྷུན་གྱིས་གྲུབ། ། ཡིད་ཀྱི་དབང་པོ་མ་འགགས་ཤེས་རབ་སོ་སོར་མཁྱེན།། གཟིགས་པའི་སྤྱན་ལྔས་གདུལ་བྱ་དོན་ལ་འཛིན།། གསུང་གི་སྒོ་མོ་ལྗགས་ཀྱི་ལྡེ་མིག་གིས་ནི་འབྱེད་པར་བྱེད།། ཚིག་དང་དོན་སྦྱོར་འགྲོ་དོན་མ་ལུས་རྫོགས། ། བཀའ་བཞིན་དོན་གྱི་དགོངས་པ་དམ་པ་ཡིན།། བྱ་བཙལ་ལྷུན་གྲུབ་རང་བྱུང་ཡེ་ཤེས་ལ།། ཡོན་ཏན་འགག་མེད་སྐུ་གཉིས་ལྷུན་གྱིས་རྫོགས།། ཕྱི་ནང་གསང་གསུམ་མན་ངག་རྣམ་གསུམ་གྱིས།། ཕྱི་རུ་སྣང་བ་ཡེ་ཤེས་གདངས་སུ་གསལ། ། གཟུང་བ་མི་གནས་རང་བཞིན་རྣམ་པར་དག། ནང་དུ་སྣང་བ་བདེ་གཤེགས་སྐུ་ལྔར་གྲོལ།། ལུས་སེམས་མི་གནས་འཛིན་པའི་མཐའ་དང་བྲལ།། གཟུང་འཛིན་གཉིས་མེད་རང་རིག་ཆོས་ཀྱི་སྐུ། ། གསལ་ལ་མི་རྟོག་བུམ་པའི་མར་མེ་བཞིན།། མཚོན་བྱའི་ཚིག་གི་སྒྲོན་མེས་ངེས་མཚོན་ནས།། དེ་ནི་ཉམས་སུ་ཕྱི་ནང་གསུམ་གྱིས་བླངས།། ཇི་བཞིན་ཉམས་མྱོང་མི་འགྱུར་ངེས་པ་རྙེད། ། སྙིང་པོའི་དོན་ལ་འགྱུར་བ་མེད་པར་གནས།། འགྱུར་མེད་དོན་གྱིས་སྐད་ཅིག་གསུམ་ལ་གྲོལ།། རྟོགས་པའི་ཡེ་ཤེས་གསལ་ལ་འཛིན་པ་མེད།། མི་ལྡོག་དངས་པའི་རང་ས་ཟིན་པར་འགྱུར།། དེ་ཡི་ཚེ་ན་གསལ་བ་རྣམ་གསུམ་སྟེ། ། ཆོས་སྐུ་ཕྱི་ནང་མེད་པ་མ་བསྒྲིབས་གསལ།། ཡེ་ཤེས་འོད་ལྔ་སྤྲུལ་སྐུ་ལོངས་སྐུ་གསལ།། རིགས་ལྔ་ལོངས་སྐུ་ནང་ན་གསལ།། སྐུ་གསུམ་ཇ་ལོག་དོན་གྱི་དགོངས་པ་ཡིན།། དེ་ཡི་དོན་དུ་མྱང་ངན་འདས་ཞེས་བྱ། ། དེ་ལྟར་མི་ལྡོག་གསལ་བར་གནས་པ་ཡང།། ས་ལམ་རིམ་པས་བགྲོད་པ་མ་ཡིན་ཏེ།། སྐད་ཅིག་གསུམ་གྱིས་རང་ས་ཟིན་པར་འགྱུར།། རྡོ་རྗེ་རྣལ་འབྱོར་ལྔ་ཡི་དགོངས་པ་ཡིན།། ཞེས་གསུངས་སོ། ། ཐིག་ལེ་ཀུན་འདུས་ཆེན་པོ་ལས། རྟོགས་པ་ཡེ་ཤེས་འཁོར་ལོ་བསྟན་པའི་ལེའུ་སྟེ་དགུ་པའོ།།།། ཡེ་ཤེས་རང་བྱུང་བའི་སྐབས་ཡེ་ཤེས་ཆེན་པོའི་ཐིག་ལེའོ།། མ་ཧཱ་གུ་ཡ་ཏནྟྲ་ཨུ་པ་དེ་ཤ་ཀ་མ་སཱ་ཧཱུཾ་ཨཱ། ། བོ་དྷི་ཙིཏྟ་ཀོ་ཤ་ཙ་མུ་ཏི་ཨ་ཏི་ཀ་ལ། དེའི་ཚེ་སྟོན་པ་རྡོ་རྗེ་འཆང་ཆེན་པོ་དེས་གསང་བ་དོན་གྱི་དགོངས་པ་ཞུགས་སོ།། དེའི་ཚེ་གསང་བའི་བདག་པོས་གསོལ་པ།། ཀྱེ་ཀྱེ་བཅོམ་ལྡན་རྡོ་རྗེ་འཆང། ། གསང་བའི་དོན་གྱི་དགོངས་པ་ཇི་ལྟར་ལགས།། ཞེས་ཞུས་པས།། སྟོན་པས་བཀའ་སྩལ་པ། ཀྱེ་རྡོ་རྗེ་འཛིན་པ་ངེས་ཟུང་ཞིག། ཨེ་མ་ངོ་མཚར་རྨད་ཀྱི་ཆོས།། དེ་ནི་ཚིག་ལ་མི་གནས་པས།། དོན་གྱི་དགོངས་པ་མ་ནོར་བཤད། ། རང་རིག་ཡེ་ཤེས་མ་འགགས་པ།། འཁོར་དང་མྱ་ངན་འདས་པར་གནས།། དེ་ལ་རྒྱུ་རྐྱེན་བྱེད་པ་མེད།། འཁོར་འདས་ཀུན་ལས་ང་སྔར་བྱུང།། ང་ཡི་གོང་ན་གཞན་མ་མེད།། ཐམས་ཅད་རང་རིག་ཀློང་ན་བཞུགས། ། ཐམས་ཅད་རང་རིག་ཀློང་ནས་འཆར།། དེ་ཡི་ངོ་བོ་མི་འགྱུར་བར།། ཡེ་ཤེས་ཡོན་ཏན་ཀུན་ཏུ་གསལ།། དེ་ལ་རྒྱུ་མེད་གཉེན་པོ་མེད།། དངོས་མེད་སྣོད་བཅུད་རྩལ་དུ་སྣང།། འབྱུང་གནས་མ་འགགས་ཀུན་ཏུ་ཁྱབ། ། ཀུན་འབྱུང་སྙིང་པོ་འགྱུར་བ་མེད།། དཔེར་ན་ཡིད་བཞིན་ནོར་བུ་རིན་ཆེན་བཞིན།། འཁོར་དང་མྱང་ངན་འདས་པའི་ཆོས།། དངོས་མེད་བྱིན་གྱིས་བརླབས་ལས་བྱུང།། མཚན་ཉིད་དོན་གྱི་དགོངས་པ་ཡིན། ། ང་ཉིད་མ་འོངས་སྔོན་རོལ་ན།། སྟོན་པ་ཀུན་རིག་ཆོས་ཀྱི་རྗེ།། པདྨ་བདེ་གསལ་གྲོང་ཁྱེར་དུ།། བསྟན་པའི་སྙིང་པོ་ཡེ་ཤེས་ལྔ།། རང་སྣང་རྟོག་པའི་འཁོར་རྣམས་ལ།། རྟོག་མེད་བྱིན་གྱིས་རླབས་ལས་བཤད། ། སོ་སོའི་རྒྱུད་ལ་བྱིན་གྱིས་སོ་སོར་རྟོགས།། སྟོན་པ་ཀུན་སྣང་ཡེ་ཤེས་ཀྱིས།། ཆོས་ཉིད་གསལ་བའི་རང་གདངས་ལ།། ཡེ་ཤེས་འགག་མེད་དཀྱིལ་འཁོར་བྲིས།། རང་རིག་དབུས་ཀྱི་གཙོར་གནས་ཏེ། ། ཉིད་ལས་མི་གཞན་སྟོན་པ་བཞི།། རང་རང་རིགས་ཀྱི་འཁོར་རྣམས་ལ།། གསུང་གིས་ཆོས་རྣམས་མི་འཆད་པར།། བྱིན་རླབས་རང་གི་ངོ་བོའི་སྒོ་ནས་བསྟན།། བསྟན་པའི་སྙིང་པོ་གོང་མ་བཞིན། ། ཨུ་དུམ་ཝ་རའི་མེ་ཏོག་ལ།། ང་ཉིད་བརྫུས་ཏེ་འོངས་པའི་ཚེ།། ང་ཡི་ཐུགས་ཀྱི་དཀྱིལ་འཁོར་དུ།། རང་བྱུང་ཐུགས་ཀྱི་ཆུ་བོ་བཞི་རྫོགས་པས།། དགོངས་པའི་ཡེ་ཤེས་རང་དབང་ཐོབ།། བརྡའ་སྒྲ་ངེས་པའི་དོན་གསུམ་བཤད། ། རྒྱུད་ཀྱི་སྙིང་པོ་སེམས་ཕྱོགས་ཆེན་པོའི་དོན།། ཡིད་འདྲེས་པ་ཡི་ཚོགས་ལ་བསྟན།། དེ་བཞིན་བྱོས་ཤིག་ངས་ལུང་བསྟན།། ལོ་རྒྱུས་དོན་གྱི་དགོངས་པ་ཡིན།། སྲིད་པའི་མཛོད་གྱུར་ཆོས་ཉིད་ཐིག་ལེ་ན། ། རང་རིག་མི་འགག་འགྱུར་མེད་ཆོས་སྐུ་བཞུགས།། ཐ་དད་མི་གནས་འོ་མ་མར་གྱི་ཚུལ།། རང་བྱུང་ཡེ་ཤེས་མ་འགགས་འོད་ཀྱི་མྱུ་གུ་ལྔ།། སྲོག་མེད་སྙིང་པོ་སྐུ་ལྔ་བསྐྱེད་ཅིང་འདུ་འབྲལ་མེད།། མི་འགྱུར་སྐུ་ཡི་བདག་ཉིད་ཆེ། ། མི་གནས་གསུང་གི་བདག་ཉིད་ཆཻ།། མི་འགྱུར་ཐུགས་ཀྱི་བདག་ཉིད་ཆེ།། རྒྱུ་ཉིད་རྡོ་རྗེ་རྐྱེན་དང་འདྲ། བྲལ་ཡང་བྱུང།། མ་བསྐྱེད་པས་ན་འཇིག་པ་མེད།། མན་ངག་དོན་ཀྱི་དགོངས་པ་ཡིན་པར་བསྟན་པའོ། ། ཐུན་མེད་ཐུན་ཆེན་དགོངས་པ་གཅིག་ཏུ་དྲིལ།། ཆོས་ཉིད་ཆོས་སྐུ་འབྱེད་མེད་སྟོང་པ་དང།། སྙིང་པོ་སྐུ་ལྔ་བར་ན་ཡེ་ཤེས་གསལ།། ཆོས་ཉིད་ཆོས་སྐུའི་བར་ན་འོད་ལྔ་གསལ་བ་ལོངས་སྐུའི་དོན། ། སྣང་བ་ཆོས་སྐུའི་བར་ན་ཡེ་ཤེས་གསལ་བ་སྤྲུལ་སྐུའི་དོན།། དངོས་ཉིད་གཞི་དང་སྦྱར་བའི་དགོངས་པ་ཡིན།། རྒྱུ་རྐྱེན་མེད་པར་འཁོར་འདས་རང་ལས་བྱུང།། ཡོན་ཏན་མ་འགགས་སྟོབས་ཀྱིས་ཤར་བ་ཡིན། ། ཐུགས་རྗེ་མ་འགགས་སྐུ་ཉིད་སྣང་བར་ཤར།། སྣ་ཚོགས་ཤར་ཀྱང་གཉིས་མེད་ཆོས་སྐུའི་ངང།། དེ་ནས་བྱུང་དང་དེ་ནས་འཇུག་ཅིང་ཐིམ།། ཐམས་ཅད་མ་འགགས་པ་ཡི་ཡེ་ཤེས་རྨད་བྱུང་ཆོས།། རང་གི་རྒྱུད་ལ་ངེས་པའི་ཤེས་པ་སྐྱེས། ། དོན་གྱི་སྒོ་རྣམས་འབྱེད་ཅིང་གསལ་བར་བྱེད།། སྒོ་དང་ལྡེ་མིག་དོན་གྱི་དགོངས་པ་ཡིན།། ཆོས་སྐུ་ནམ་མཁའ་ལྟ་བུ་ཡེ་ནས་ཚད་མེད་སྟོང།། དེ་ཡི་སྟོབས་ལས་ཡེ་ཤེས་སྐུ་རུ་སྣང།། སྐུ་དང་ཡེ་ཤེས་དངོས་པོ་མཚན་མའི་ཆོས། ། དང་པོ་ཤར་ཀྱང་རང་གི་སྟོབས་ལས་ཤར།། ཐ་མ་ཐིམ་ཡང་རང་གི་ངང་ལ་ཐིམ།། དབྱིངས་དང་ཡེ་ཤེས་གཉིས་མེད་བདེ་བའི་ངང།། སྐུ་གསུམ་དབྱེར་མེད་དོན་གྱི་དགོངས་པར་བཞུགས། ། ནམ་མཁའ་ལྟོ་སྦྱོར་དོན་གྱི་དགོངས་པ་བསྟན།། ཆོས་ཉིད་ཀློང་ན་ཆོས་སྐུ་གསལ་བ་ནི།། ནམ་མཁའི་ངང་ན་ཉི་མའི་སྙིང་པོ་གནས་པ་བཞིན།། མི་འགྱུར་ཡོངས་ལ་ཁྱབ་པའི་སྐུ།། དེ་ལ་ཡེ་ཤེས་སྣང་བ་འཆར་བ་ནི། ། སྤྲིན་མེད་ནམ་མཁར་ཉི་མ་སྣང་བ་བཞིན།། རིགས་ལྔའི་སངས་རྒྱས་མ་འདྲེས་རྫོགས་པ་ནི།། ནམ་མཁའི་ངང་ན་འཇའ་ཚོན་གསལ་བ་བཞིན།། ཐིག་ལེ་ཆེན་པོ་དོན་གྱི་དགོངས་པ་ཡིན། ། མི་གཡོ་འདུ་འབྲལ་མེད་པའི་ཡེ་ཤེས་གསལ།། མཚོན་པའི་ཐབས་ཀྱི་རིམ་པས་བློ་ལ་སྦྱར།། མི་འགྱུར་བ་གཅིག་རྟོགས་ཚུལ་རྒྱུད་ལས་སྐྱེས།། སྦུབས་དང་བྲལ་བས་བདག་ཉིད་མངོན་སངས་རྒྱས།། འགག་མེད་ཐུགས་རྗེས་འགྲོ་དྲུག་གནས་སུ་འདྲེན། ། མི་གནས་བདག་མེད་ཆོས་སྐུའི་ཀློང་ན་གསལ།། རིན་ཆེན་སྒྲོན་མ་དོན་གྱི་དགོངས་པ་ཡིན།། མ་འགགས་མི་གཡོ་ངང་དངས་རང་བཞིན་ནོ།། ཡེ་ཤེས་ཟང་ཐལ་སྒྲིབ་མེད་ཀུན་ཏུ་གསལ། ། ཆོས་སྐུའི་ངང་ལ་གཟུགས་སྐུའི་རང་བཞིན་ཏེ།། ཡོད་པ་མེད་དང་མེད་པ་ཡོད་པའི་ས།། སྐུ་གསུམ་དབྱེར་མེད་རང་རིག་ཡེ་ཤེས་བདག། མིག་གི་སྒྲོན་མ་དོན་གྱི་དགོངས་པ་ཡིན།། ཡོན་ཏན་མི་འགྱུར་རང་རིག་ཡེ་ཤེས་ཏེ། ། སྐུ་གསུམ་སྦུབས་སུ་དེ་ཡི་གནས་སྐབས་བསྟན།། དེ་མཚོན་ཕྱི་ནང་གསང་བ་འདུས་པར་བསྟན།། ངོ་མཚར་ཐབས་ཀྱི་སྙིང་པོ་དོན་དང་མཇལ།། འཕྲུལ་གྱི་ཡི་གེ་དོན་གྱི་དགོངས་པ་ཡིན། ། མ་རིག་ཡེ་ཤེས་མཐར་ཐུག་ཡོངས་ལ་ཁྱབ།། གསང་བའི་ཤེས་རབ་སྒྲིབ་པ་ཀུན་ལས་འདས།། ཀུན་ལས་མཆོག་གྱུར་ཁྱད་པར་ཆེ་བས་འཕགས།། ནམ་མཁའ་ཁྱབ་པ་དོན་གྱི་དགོངས་པ་ཡིན།། ཞེས་གསུངས་སོ། ། ཐིག་ལེ་ཀུན་འདུས་ཆེན་པོ་ལས། ཕྱཽགས་འཛིན་གྱི་དགོངས་པ་བསྟན་པ་སྟེ་ལེའུ་བཅུ་པའོ།།།། ཀོ་ཤ་དྷ་ཏཱ་མ་ཧཱ་བཛྲ་དྷ་ཏི་ཏནྟྲ་ཙཀྲ་པ་ཙ་ཨུ་པ་དེ་ཤ་ཨུ་ཏ་ཀ་ལ་པ་རུ་ཨ། དེའི་ཚེ་ཡང་སྟོན་པ་རྡོ་རྗེ་འཆང་ཆེན་པོ་དེས། གསང་བའི་སྙིང་པོ་བླ་ན་མེད་པའི་དགོངས་པ་ལ་སྙོམས་པར་ཞུགས་སོ།། དེའི་ཚེ་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང།། གསང་བ་དོན་གྱི་སྙིང་པོའི་དགོངས་པ་གསུང་དུ་གསོལ། ། ཞེས་ཞུས་སོ།། སྟོན་པས་བཀའ་སྩལ་པ།། ལག་ན་རྡོ་རྗེ་ལེགས་ཟུང་ཞིག། ཆོས་སྐུ་ཡུལ་མེད་ཡེ་ཤེས་རང་གདངས་བཅས།། དོན་ལ་འགྱུར་མེད་འབྱེད་མེད་ཤེས་རབ་བཅས།། སྟོང་ཉིད་སྤྲོས་བྲལ་ཡོངས་ལ་ཁྱབ་པའི་སྐུ། ། ཐུགས་རྗེ་མི་འགག་སྤྲུལ་སྐུ་རྒྱུན་མི་འཆད།། མི་འགྱུར་ཀློང་ནས་ཡེ་ཤེས་སྤྱན་མ་འགགས།། རང་སྣང་ཡེ་ཤེས་གཞན་སྣང་རྟོག་པ་མེད།། ཐམས་ཅད་ཡོངས་རྫོགས་སྐྱེ་འགག་འཆར་ནུབ་མེད། ། དོན་གྱི་དབང་བཞི་མ་བསྐུར་ལྷུན་རྫོགས་པས།། མ་བསྒོམས་མ་བསྒྲུབས་ཡེ་ཉིད་རྫོགས་སངས་རྒྱས།། དོན་གྱི་རྫས་བཞི་མ་བསགས་ལྷུན་གྲུབ་པས།། རྟོགས་པའི་ཤེས་རབ་རང་རིག་ཁོང་ནས་འཆར། ། བཀོད་པ་བཞི་ལྡན་དོན་གྱི་དབང་ཆེན་རྫོགས།། རང་བྱུང་ཡེ་ཤེས་རྒྱུ་རྐྱེན་རྣམ་པར་དག། གཉེན་པོས་མི་ཤིགས་གཞན་གྱི་དབང་གྱུར་མེད།། གཉིས་མེད་བདེ་ཆེན་ཆོས་སྐུ་རྣམ་དག་དེ།། ལུང་དང་སྒྲ་ཡིས་ངེས་པར་གཏན་ལ་དབབ། ། ཆོས་རྣམས་ཐམས་ཅད་དབྱེར་མེད་མཉམ་ཉིད་ངང།། དངོས་པོ་མེད་པར་རང་རྫོགས་དེ་བཞིན་ཉིད།། རང་རིག་ཆོས་སྐུ་ཡེ་ཤེས་རང་སྣང་ལ།། འབྱུང་བ་ནམ་མཁའ་དང་པོ་ཉིད་ནས་མེད། ། རང་བྱུང་ཡེ་ཤེས་དོན་གྱི་འབྱུང་བ་ལ།། མཚན་མའི་འབྱུང་བ་དངོས་པོ་གདོད་ནས་དག། གཉིས་མེད་ཆོས་སྐུ་ཡེ་ཤེས་ཟང་ཐལ་ལ།། གཟུང་འཛིན་གནས་སུ་རང་གསལ་འཛིན་པ་མེད།། དང་པོ་རྒྱུ་མེད་རྡོ་རྗེའི་ངང། ། བར་དུ་རྐྱེན་མེད་རང་བྱུང་ཉིད།། ཐ་མ་མི་འགྱུར་ཡེ་ཤེས་ནི།། འཆར་ནུབ་མེད་པའི་ཟང་ཐལ་དེ།། ནམ་མཁའི་མཐའ་བཞིན་ཐུག་པ་མེད།། བློ་ཡི་ཡུལ་ལས་རབ་འདས་ཤིང།། མི་འགྱུར་རྡོ་རྗེ་ལྟ་བུའི་སྐུ། ། ཕྱི་ནང་མདུན་རྒྱབ་སྟེང་འོག་མེད།། དག་པ་ཟང་ཐལ་སྤྲོས་དང་བྲལ།། ཆ་ཤས་བྲལ་བའི་ངང་ཉིད་དེ།། སྐུ་གཉིས་མི་འགག་འོད་དུ་གསལ།། རང་ལ་རང་སྣང་སྐུ་མི་འཇིག། མི་གནས་འདུ་འབྲལ་ཡོངས་ཀྱིས་མེད། ། རྡོ་རྗེ་མཁའ་འགྲོའི་དགོངས་པ་ཡིན།། སྤྲོས་བྲལ་དབྱིངས་ལ་འགྱུར་མེད་ཀློང།། མི་འགྱུར་ཁོད་སྙོམས་གཡུ་ཡི་མཎྜལ་ནས།། ཡོན་ཏན་མི་འགག་རང་རིག་ཡེ་ཤེས་ལས།། རྩལ་དང་རོལ་པས་འཁོར་འདས་རྣམ་གཉིས་ཤར། ། འཁོར་འདས་ཀུན་ལ་ཁྱབ་འབྲེལ་གཉིས་སུ་མེད།། ཐམས་ཅད་དེ་ལས་ཤར་ཅིང་དེ་ཡི་ངང་དུ་འདུས།། བསྒོམ་མེད་སངས་རྒྱས་བསྒོམ་པ་ཡེ་སངས་རྒྱས།། དེ་ཉིད་མི་འགྱུར་ཡེ་སངས་རྒྱས་པའི་སྐུ། ། རང་རིག་ཡེ་ཤེས་འཁོར་ལོ་ལྔ་ཡི་བདག། དེ་ཉིད་སངས་རྒྱས་བྱ་བཙལ་འདས་པའི་སྐུ།། རང་སྣང་ཡེ་ཤེས་གཞན་སྣང་རྟོག་དང་བྲལ།། གདོད་ནས་རྣམ་དག་ཆོས་སྐུ་ཟང་ཐལ་ལ།། བར་དོ་སྐད་ཅིག་སྐྱེ་འགག་ལས་འདས་པས། ། རིམ་རྩོལ་མི་མངའ་ཡེ་ཤེས་ཟང་ཐལ་ངང།། སྦུབས་དང་བྲལ་བས་དེ་ཉིད་མཐར་ཕྱིན་པའོ།། གདམས་ངག་དོན་གྱི་ངེས་དོན་བསྡུས་པ་ཡིན།། ཞེས་གསུངས་སོ།། ཐིག་ལེ་ཀུན་འདུས་ཆེན་པོ་ལས། གསང་བ་དོན་གྱི་སྙིང་པོ་བསྟན་པ་སྟེ་ལེའུ་བཅུ་གཅིག་པའོ།།།། དེ་ནས་ཡང་སྟོན་པས་རྒྱུད་ཀྱི་གདམས་པ་འདི་གསུངས་སོ།། ཀྱེ་མ་ཀྱེ་མ་འདུས་པའི་ཚོགས།། རྒྱུད་ལུང་མན་ངག་ཁོག་གི་སྙིང། ། ཀུན་ཏུ་དོན་གྱི་དགོངས་པ་ཡིན།། རྡོ་རྗེ་འཛིན་པ་ཁྱོད་ལ་གཏད།། དགའ་རབ་རྡོ་རྗེ་ཁྱེད་ཀྱིས་ཟུང།། གཞན་ལ་དེ་བཞིན་དགོངས་པས་ཆོངས།། མང་དུ་གསུམ་ལས་མ་སྤེལ་ཅིག། ཉུང་དུ་གཅིག་ལ་མ་བསྣུབས་ཤིག། གལ་ཏེ་དེ་ལས་མངས་སམ་ཉུང།། མི་འགྱུར་རཀྴ་ཀརྟི་ཀས།། འདི་རུ་ཚེ་ཡི་འདུ་བྱེད་བྱེད།། བྱང་ཆུབ་མྱུ་གུ་གཏན་དུ་བརླག། དེ་བས་དེ་བཞིན་དགོངས་པས་ཆོངས།། ཞེས་གསུངས་སོ།། དེ་ནས་ལག་ན་རྡོ་རྗེས་སྣ་དྲངས་ནས། ། ཕྱག་བྱས་བསྐོར་བ་ལན་བདུན་དུ་མཛད་དེ། ཨེ་མ་ཧོ་ལེགས་སོ་ལེགས་སོ།། དཔལ་ལྡན་རྡོ་རྗེ་འཆང་མགོན་པོ།། མ་བྱུང་འབྱུང་བར་མི་འགྱུར་བའི།། ཐིག་ལེ་ཀུན་འདུས་ཆེན་པོའི་རྒྱུད། ། འདིར་འདུས་ཚོགས་ལ་བཀའ་སྩལ་པ།། རྒྱུད་ལུང་ཀུན་གྱི་སྙིང་པོའི་དོན།། མི་འགྱུར་དོན་གྱི་དགོངས་པར་ཕྱིན།། བློ་དང་ཚིག་ལས་དེ་ཡིས་འདས།། རྩོལ་སྒྲུབ་མཐའ་ལས་དེ་ཡིས་གྲོལ། ། དགོངས་པའི་དོན་ལ་དེ་ཡིས་གནས། ཁོང་དོན་དགོངས་པས་མུན་པ་བསལ།། རྗེས་འཇུག་རྣམས་ཀྱང་དེ་བཞིན་པས།། རྣམ་མཁྱེན་ཀུན་ལ་ཕྱག་འཚལ་འདུད།། ཐམས་ཅད་མཁྱེན་ལ་རྗེས་ཡི་རང།། ཞེས་བསྟོད་དོ། ། ཐིག་ལེ་ཀུན་འདུས་ཆེན་པོ་ལས། རྒྱུད་ཡོངས་སུ་གཏད་པ་དང་རྗེས་སུ་ཡི་རང་བ་སྟེ་ལེའུ་བཅུ་གཉིས་པའོ།།།། ཐིག་ལེ་ཀུན་འདུས་ཆེན་པོ་ཞེས་བྱ་བ་ལེའུ་ཆེན་པོ་བཅུ་གཉིས་པའོ།། ལེ་ཕྲན་ཞེ་བདུན་པའོ། ། རྫོགས་སོ།།།། རྒྱ་གར་སྐད་དུ། ཀཱ་ཡ་ཏནྟྲ་པདྨ་ཀུཎྜ་ལ་ནཱ་མ། བོད་སྐད་དུ། སྐུའི་རྒྱུད་པདྨ་འཁྱིལ་པ་ཞེས་བྱ་བ། ཨ་པྲ་བྷན་མཉྫུ་ཤྲཱི་པྲ་ས་ར་དུ་ས་ནཱ་མ་མ་ཧཱ་ཏྲི། བརྒྱུད་པ་གསུམ་པའོ།
CLOSE WINDOW