CLOSE WINDOW

J979
བོད་ཡིག

/yi dags kha nas me 'bar ba la skyabs mdzad pa'i gzungs/ rdzogs s+ho// // bod skad du/ 'jur 'gegs zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /ser sna las cher lhag pa/ gzhan gyi la 'jur 'gegs byas pa'i nyes pa'i 'bras bu 'di lta ste/ 'phags pa shA ri'i bu dang / 'phags pa maud gal gyi bu gnyis bas mtha' zhig na so sor rtog pa'i shes rab yid la byed cing yod pa las/ nyi ma'i gung la gnyis pos khams seng du mchis pa'i sa na yi dags mo lus sngo la skam pa/ khog khog zer ba/ skra 'dzings pa/ mig dmar la g.yon du yo ba/ ma mchu ring la g.yas su yo ba/ ske dang rkang lag shin tu phra la ring ba/ lag pa khu tshur bsdams pa'i sen mos thad kar phug nas sen mo sngo zang nge yod pa/ kha nas sgra rnam pa lnga sgrogs pa ni 'di lta ste/ dgos na zhes bya ba dang / med na zhes bya ba dang / ma sbyin cig zhes bya ba dang / ster na yang ma che ches par 'ong ngo zhes bya ba dang / de tsam ches kyis phri la byin zhes bya ba dang lnga brjod pa/ skyi zing byed pa cig dang phrad pa las/ der gang zag gnyis po des bsams pa/ dgon pa bas grong yul thag nye la zas mod pas grong khyer du phyin te bslangs pas dkar gsum dang / mngar gsum dang / 'bras dang / nas kyi zan la sogs pa bza' ba dang / btung ba mang du rnyed nas yi dags kyi drung du khyer te phyin nas bstabs pas mi len par gong gi sgra rnam pa lnga sgrogs shing bros so/ /der gang zag gnyis po des shin tu ma dga' nas yi dags mo de'i sems su song nas gzhan yid la ma dran te/ bcom ldan 'das 'od ma'i tshal na bzhugs pa can du de ma thag phyin te/ zhabs la phyag btsal bas 'khangs nas thang chad de dri ba ma spobs so/ /bcom ldan 'das kyis bka' stsal pa/ rigs kyi bu khyod ci nyes/ dri ba yod na dbugs phyung la dris shig ces gsungs so/ /bcom ldan 'das lags bdag cag ni shin tu ma dga' ste/ nyid la khong yus che nas 'khams pa lags so/ /bka' stsal pa/ ci las gyur smras pa/ bdag cag gnyis ni bas mtha' zhig na bcom ldan 'das kyi zhal nas gsungs pa so sor rtog pa yid la byed pa las rgyang ring por 'chag tu phyin pa las/ yi dags mo lus po sngo la skam pa/ khog khog zer ba/ skra 'dzings pa/ mig dmar la g.yon du yo ba/ ma mchu ring la g.yas su yo ba/ rke dang rkang lag shin tu phra la ring ba/ lag pas khu tshur bsdams pa'i sen mos thad kar phug nas sngo zang nge ba/ kha nas sgra rnam pa lnga sgrogs pa 'di lta ste/ dgos na zhes bya ba dang / med na zhes bya ba dang / ma sbyin cig ces bya ba dang / ster na yang ma che ches par 'ong ngo zhes bya ba dang / de tsam ches kyis phri la byin ces bya ba dang lnga brjod pa/ skyi zing byed pa cig dang phrad nas/ bdag cag gnyis kyis bsams pas dgon pa bas grong yul thag nye la zas mod pas grong khyer du phyin te/ bslangs pas dkar gsum dang / mngar gsum dang / 'bras dang / nas kyi zan la sogs pa bza' ba dang / btung ba mang du rnyed nas yi dags mo de'i drung du khyer nas bstabs pas/ kha nas gong gi sgra rnam pa lnga brjod cing gang byin pa mi len par bros te thal na 'di ci las gyur pa dang / 'di la sman pa'i thabs ci mchis zhu ru mchis pa lags so/ /bka' stsal pa/ rigs kyi bu dag de ni shin tu yang legs so/ /ngas bshad kyis legs par nyon la yid la zung shig /de ci las gyur na lus sngo la skam pa ni rang gis za ma phod pa las gyur to/ / ske phra ba ni gzhan za zhing spyod pa la bdag gis ser sna byas pa las gyur to/ /yan lag phra la sor mos thad kar phug pa ni gzhan la sbyin pa dag la ches kyis phri la byin ces byas pa dang / rang gis kyang spyod mi phod pa las gyur to/ /skra 'dzings pa ni kun gyi yid du mi 'ong ba byas pa las gyur to/ /mig dmar ba ni 'dod chags kyis yongs su rgyas pa las gyur to/ /g.yon du yo ba ni mig mi legs par gzhan la bltas pa las gyur to/ /ma mchu ring la g.yas su yo ba ni ster na yang ches par 'ong ngo zhes byas pa las gyur to/ /kha nas sgra rnam pa lnga sgrogs pa ni byed pa rgyu 'thun pa'i 'bras bu ste/ sngon brjod pa'i bag chags rtas pa las gyur to/ /de lta bu'i las kyi dbang gis gzhan ci byin yang phan par mi 'gyur te/ chu gcig pu las rang gis sbyin nus pa ma yin te/ gzhan gyi chu la 'jur 'gegs ma byas pas da lta yang chu gtsang ma tsam pas ma reg pa la sngags lan cig btab ste/ se gol lan cig gtogs te byin na de'i rgyud grol zhing 'dod pa tshim par 'gyur ro/ /de 'di lta ste/ oM dz+wa la mI dam sarba pre te b+h+yaHswA hA/ gsol pa/ de'i 'bru don bshad du gsol/ bka' stsal pa/ oM ni ye shes lnga'i rang bzhin te don dam pa'o/ / dz+wa la 'dod pa me ltar 'bar ba'o/ /mI dam ni mi'i rgyud kyis ser sna dang 'jur 'gegs byas pa'o/ /sarba ni de lta bu'i las las gyur pa thams cad do/ /pre te ni yi dags kyi snying po ste las kyi rgyud smin pa'i don to/ /b+h+yaHni las dang sdug bsngal byang bar bya ba'i don to/ /swA hA ni las dang sdug bsngal bkres skom byang bar gyur cig pa'o/ /da myur du song la de ltar gsos gcig ces gsungs pas/ de nas gnyis kyis myur du phyin nas/ de bzhin du bgyis pas gzod dga' nas longs spyod cing lus bag glan no/ /de nas chos ston la bab nas gnyis po re mos byas te/ shA ri'i bus bshos gsol nas gcig gsol du stsal te/ chab byin pas yang gong bzhin brjod de bros so/ /yang gnyis kyis yid ma ches nas bcom ldan 'das la zhu ru mchis so/ /bcom ldan 'das lags/ bdag cag gis gsungs pa bzhin bgyis lags pas gso ru btub par gda' ba la chos ston yol du dogs nas 'tshal nas yang sngar bzhin brjod cing bros nas yang zhu ru mchis so/ /bka' stsal pa/ de ni khyod kyi sen bar du tsam pa las pas lan pa yin gyis/ lag pa khrus la gzod byin cig /de'i drung du 'gro mi dgos te 'di nyid kyis btub po zhes gsungs so/ /de gnyis kyis khrus bgyis te/ chu sbyin stsal bas yi dags mo de nyid du 'ongs nas cung zad na mdangs dang ldan par gyur to/ /de nas yang bcom ldan 'das kyis bka' stsal pa/ 'di lta bu'i chu sbyin 'di ni 'dir ma zad de dus thams cad du yang yi dam du gyis la thong cig /gzhan la yang rgya cher spel cig /de ci'i phyir zhe na/ 'di'i phan yon ni dpag tu med de tshad las 'das so/ /mdo tsam brjod na 'di lta ste/ 'jig rten gyi khams kyi mi phyug po rnams la sbyin pa byas pa bas dbul po 'ga' zhig la sbyin pa byas na de'i bsod nams brgya'i char yang mi nye ste/ de ci ste zhe na/ phyug po rnams ni nga rgyal te dregs pa dang rgyags pas gnas ngan len spro bar byed do/ /'jig rten gyi khams kyi dbul po rnams la sbyin pa byas pa bas yi dags 'ga' zhig la sbyin pa byas na de'i bsod nams brgya'i char yang mi nye'o/ /de ci ste zhe na/ dbul po rnams la ni 'bad du yod/ btsal du yod/ bslang du yod do/ /yi dags las kyis de lta bu dag ma yin gyi/ ma bsngos na kha ru chud kyang dug chen por 'gyur ro/ /'jig rten gyi khams kyi yi dags la sbyin pa byas pa bas 'jur 'gegs kyi yi dags gcig la chu byin na de'i bsod nams brgya'i char yang mi nye'o/ /de ci ste zhe na/ yi dags de dag la ni dmigs pas tshim pa dang / bshams pas tshim pa dang / bsngos pas tshim pa dang / reg pas tshim pa dang / rjes kyis tshim pa dang / bshal bas tshim pa yod de/ las kyi rim pa bzhin no/ /'jur 'gegs ni gzhan bkag pa'i las kyis sngags dang / phyag rgya dang dmigs pa gzhan gyis mi thob/ rdzas thams cad la 'thams te bkag pas rdzas gzhan mi myong / gzhan gyi chu gcig bu ma bkag pas chu gtsang tsam pas ma reg pa las dbang med/ rang gi rgyud zhi bar byed pa'i sngags dang / phyag rgya se gol gcig min pa gzhan gang gis kyang thob par mi nus so/ /se gol gcig tu gzhag pa ci zhe na gnyis su gyur na gzhan gyi sgrar gyur nas mi thob/ des na rang gi go ba bskyed pa sgra gcig tu nges pa'o/ /'dis ni bar chad kyis mi tshugs pa dang / nad nyung ba dang / tshe ring ba dang / longs spyod dang / ldan pa dang / yi ga 'chus pa rnams 'byed par byed pa dang / mdangs nyams pa rnams gsal bar byed pa dang / 'di gzhan la spel na rgyud grol nas yi dags kyi rgyud chad de mthar mngon par rdzogs par 'tshang rgya'o/ /de skad ces bka' stsal nas/ rigs kyi bu de dag gis bcom ldan 'das kyis gsungs pa la mngon par bstod do/ /'jur 'gegs zhes bya ba'i gzungs rdzogs s+ho// //zhu chen gyi lo ts+tsha ba ban de ye shes sdes bsgyur te gtan la phab pa'o// //