བོད་ཡིག |
308a1 @##/ /rgya gar skad du/ Ar+ya rad na ko Ti nA ma ma hA yA na sU tra/ bod skad du/ 'phags pa rin po che'i mtha' zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /
308a2 'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong lnga brgya tham pa'i dge slong gi dge 'dun chen po dang thabs gcig du bzhugs te/ de nas 'jam dpal gzhon
308a3 nur gyur pa mtshan mo srod la bcom ldan 'das kyi bzhugs khang ga la ba der song ste phyin nas bzhugs khang gi sgo drung na 'greng ste bcom ldan 'das la sdod do/ /de'i tshe bcom ldan 'das rin po che'i mtha' zhes bya ba'i ting
308a4 nge 'dzin la snyoms par bzhugs so/ /de nas bcom ldan 'das dran pa dang mkhyen bzhin du ting nge 'dzin de las bzhengs nas 'jam dpal gzhon nur gyur pa sgo na 'dug pa gzigs so/ /gzigs nas kyang 'jam
308a5 dpal khyod nang du shog ces de skad ces bka' stsal to/ /bcom ldan 'das legs so legs so zhes gsol te/ 'jam dpal gzhon nur gyur pas bcom ldan 'das kyi ltar mnyan nas bcom ldan 'das ga la ba
308a6 der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'greng ngo / /'jam dpal gzhon nur gyur pa phyogs gcig tu 'greng ba dang / bcom ldan 'das kyis stan la 'dug ces
308a7 gnang ba mdzad do/ /bcom ldan 'das kyis gnang bas de nas 'jam dpal gzhon nur gyur pa/ bcom ldan 'das ga la ba de logs su thal mo sbyar ba btud de phyogs gcig du 'dug go/ /phyogs gcig du
308a8 'dug nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das da gdod ting nge 'dzin gang gis bzhugs bzhugs pa las bzhengs lags/ de skad
308b1 ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal rin po che'i mtha' zhes bya ba'i ting nge 'dzin yod do/ /ting nge 'dzin des nga da gdod gnas
308b2 gnas pa las langs so/ /gsol pa/ bcom ldan 'das ci'i slad du de la rin po che'i mtha' zhes bgyi lags/ bcom ldan 'das kyis bka' stsal pa/ 'jam dpal 'di lta ste/ dper na nor bu rin po che shin du dag
308b3 cing shin du byi dor byas pa sa phyogs mnyam pa la bzhag na de gang dang gang kho nar bzhag pa de dang der rin po che bye ba gnas par 'gyur ro/ /'jam dpal de bzhin du nga ting nge 'dzin de la gnas nas shar phyogs su bltas
308b4 te/ shar phyogs su bltas na ngas 'jig rten gyi khams dpag tu med grangs med pa dag na de bzhin gshegs pa dgra bcom pa yang dag par rdzogs pa'i sangs rgyas chos ston cing bzhugs pa dag mthong ngo / /de bzhin
308b5 du lho phyogs dang / nub phyogs dang / byang phyogs dang / 'og dang / steng nas phyogs bcu'i bar du bltas na ngas 'jig rten gyi khams dpag tu med pa dag na de bzhin gshegs pa dgra bcom pa yang dag par rdzogs pa'i sangs
308b6 rgyas chos ston cing bzhugs pa dag mthong ngo / /'jam dpal ngas ting nge 'dzin 'di la gnas nas gang yang dag pa'i mtha' ma yin pa'i chos de gang yang yang dag par rjes su ma mthong ngo / /'jam dpal yang dag pa'i mtha'i
308b7 phyag rgya 'di ngas phyag rgyar bzhag ste/ dad pa can gyi rigs kyi bu rnams dang / rigs kyi bu mo rnams kyis phyag rgya 'di la spyad na spobs pa mi chod pa 'dzin par 'gyur ro/ /gsol pa/ bcom ldan 'das bdag spobs
308b8 lags so/ /bde bar gshegs pa spobs lags so/ /bka' stsal pa/ 'jam dpal khyod spobs par gyis shig /gsol pa/ bcom ldan 'das dper bgyi na nor bu rin po che de nyid ngos gang dang gang kho nas
309a1 phab ste gzhag pa'i rin po che'i ngos de dang de kho na 'bab cing gnas par 'gyur lags so/ /bcom ldan 'das de bzhin du chos thams cad ni yang dag pa'i mtha' kho nas gnas lags so/ /bka' stsal pa/ 'jam
309a2 dpal khyod kyis yang dag pa'i mtha' shes sam/ gsol pa/ bcom ldan 'das 'tshal lags so/ /bka' stsal pa/ 'jam dpal 'o na yang dag pa'i mtha' gang na 'dug /gsol pa/ bcom ldan 'das yang dag pa'i mtha' ni
309a3 bdag gi mtha' gang na mchis pa de na mchis lags so/ /yang dag pa'i mtha' ni so so'i skye bo'i chos rnams gang na ma mchis pa de na mchis lags so/ /yang dag pa'i mtha' ni las sam/ rnam par smin pa yang ma
309a4 lags la chos thams cad kyi mtha' yang de kho na lags so/ /bcom ldan 'das gang dag de ltar mos pa de dag ni gang las kyang rnam par grol ba ma mchis lags so/ /gang dag gang las kyang grol ba ma mchis pa de dag ni log pa
309a5 las rnam par grol ba lags so/ /gang dag log pa las rnam par grol ba de dag ni yang dag par rnam par grol ba lags so/ /gang dag yang dag par rnam par grol ba de dag ni spyod yul ma lags pa la zhugs pa lags
309a6 so/ /gang dag spyod yul ma lags pa la zhugs pa de dag ni yang dag par zhugs pa lags so/ /de ci'i slad du zhe na/ bcom ldan 'das spyod yul ma lags pa zhes bgyi ba ni spyod yul des bgyis lags pa ste/
309a7 de'i slad du spyod yul ma lags pa zhes 'dogs lags so/ /bka' stsal pa/ 'jam dpal spyod yul ma yin pa zhes bya ba de gang gi tshig bla dgas yin/ gsol pa/ bcom ldan 'das spyod yul ma lags pa zhes bgyi ba de
309a8 ni yang dag pa'i mtha'i tshig bla dgas lags so/ /bka' stsal pa/ 'jam dpal lam sgom pa zhes bya ba de gang gi tshig bla dgas yin/ gsol pa/ bcom ldan 'das lam bsgom pa zhes bgyi ba de ni lam sgom pa ma
309b1 mchis pa'i tshig bla dgas lags so/ /bka' stsal pa/ 'jam dpal khyod las dang po pa'i rigs kyi bu rnams dang / rigs kyi bu mo rnams la chos ji ltar ston/ gsol pa/ bcom ldan 'das bdag ni las dang po pa'i
309b2 rigs kyi bu rnams dang / rigs kyi bu mo rnams la 'jig tshogs dor du ma mchis par chos ston lags so/ /bdag ni 'dod chags dang / zhe sdang dang / gti mug rnams spang du ma mchis par chos ston pa lags so/ /de ci'i slad du
309b3 zhe na/ bcom ldan 'das chos 'di rnams kyi rang bzhin gang lags pa de ni spang bar rngo mi thog pa'i slad du lags so/ /bcom ldan 'das 'jig tshogs sam/ /'jig tshogs kun 'byung ba spong bar 'tshal ba de ni yang dag pa'i mtha' spong
309b4 bar bas te/ bcom ldan 'das bdag ni las dang po pa'i rigs kyi bu rnams dang / rigs kyi bu mo rnams la mngon par zhen pa ma mchis pa'i tshul gyis sangs rgyas kyi chos rnams gzung bar mi bgyi ba 'am/ mngon sum du mi bgyi ba dang /
309b5 so so'i skye bo'i chos rnams lhag par mi dmigs pa 'am/ spang bar mi bgyi ba de lta bur chos ston lags na gdul ba las dang po pa rnams la bcom ldan 'das ji ltar chos ston par mdzad lags/ bka' stsal pa/ 'jam dpal
309b6 nga ni gzugs rnam par 'jig pa med pa dang / skye ba med par chos ston to/ /tshor ba dang / 'du shes dang / 'du byed rnams dang / rnam par shes pa rnam par 'jig pa med pa dang / skye ba med par chos ston to/ /'dod chags dang / zhe sdang dang /
309b7 gti mug rnams rnam par 'jig pa med pa dang / skye ba med pa dang / bsam gyis mi khyab pa'i chos rnams kyang thob pa med par chos ston to/ /ngas ni 'di ltar chos gang yang ma bshig ma bskyed pa de ltar bla na med pa yang dag par rdzogs
309b8 pa'i byang chub mngon par rdzogs par sangs rgyas so/ /'jam dpal sangs rgyas nyid ces bya ba de ni chos kyi dbyings kyi tshig bla dgas lags so/ /stobs rnams dang / mi 'jigs pa rnams dang / ma 'dres pa la thug pa'i sangs
310a1 rgyas kyi chos gang dag yin pa de dag kyang chos kyi dbyings kho na yin par khong du chud par bya'o/ /ngas ni chos kyi dbyings la 'di lta ste/ so so'i skye bo'i chos rnams sam/ dgra bcom pa'i chos rnams sam/ rang sangs
310a2 rgyas kyi chos rnams sam/ sangs rgyas kyi chos rnams kyang rung ste/ de dag tha dad par yang dag par rjes su mi mthong ngo / /de ci'i phyir zhe na/ 'jam dpal dbyings de la ni bye brag med de/ 'di lta ste/ chos kyi dbyings so/ /
310a3 chos kyi dbyings ni ma 'dres pa'i dbyings so/ /'jam dpal 'di lta ste/ dper na chu klung ming tha dad pa dang / kha dog tha dad pa dang / ro tha dad pa rgya mtsho'i nang du bab pa rnams la ni 'di lta ste/ 'di ni gang gA'o zhe'am si ta'o zhe
310a4 'am/ /ya mu na'o zhes bye brag tu dbye ba'am tha dad du byar mi nus so/ /'jam dpal de bzhin du ming tha dad pa'i chos rnams kyang chos kyi dbyings la 'di ni so so'i skye bo'i chos rnams so zhe 'am/ nyan thos dang / rang sangs
310a5 rgyas dang / byang chub sems dpa' dang / sangs rgyas kyi chos rnams so zhes tha dad par gdags par mi nus so/ /'jam dpal 'di lta ste/ dper na 'bru'i phung po sna tshogs la ni 'di ni 'bru che ge mo zhig gi phung po'o/ /
310a6 'di ni che ge mo zhig go zhes gdags su yod pa bzhin du chos kyi dbyings la ni 'di dag so so'i skye bo'i chos rnams so zhe 'am/ nyan thos dang / rang sangs rgyas dang / byang chub sems dpa' dang / sangs rgyas
310a7 kyi chos rnams so zhes tha dad par gdags par mi nus so/ /'jam dpal 'di lta ste/ dper na 'bru'i phung po sna tshogs la ni 'di ni 'bru che ge mo zhig gi phung po'o/ /'di ni che ge mo zhig go zhes gdags su yod pa bzhin
310a8 du chos kyi dbyings la ni 'di dag ni so so'i skye bo'i chos rnams so/ /'di dag ni dgra bcom pa'i chos rnams so/ /'di dag ni rang sangs rgyas kyi chos rnams so/ /'di dag ni byang chub sems dpa'i chos rnams so/ /
310b1 'di dag ni sangs rgyas kyi chos rnams so zhes tha dad par gdags par mi nus so/ /'di ni chos kyi dbyings te de ni 'di na 'dug go zhe 'am/ ga ge mo zhig na 'dug go zhes de ltar bstan pa'am gdags par mi nus so/ /de ci
310b2 'i phyir zhe na/ 'di ltar chos kyi dbyings ni bltar mi mthong zhing bstan du med de/ gdags par bya ba ma yin zhing gdags pa las yang dag par 'das pa'i phyir ro/ /'gro ba 'di de lta bu'i dbyings yin par ngas ji skad bstan pa
310b3 la gal te mtshams med pa byed pa de ltar mos te/ mtshams med pa yang de lta bu'i dbyings yin par shes na/ de kun nas nyon mongs pa can du mi 'gyur ro/ /de ci'i phyir zhe na/ 'jam dpal mtshams med pa ni chos kyi
310b4 dbyings dang mtshungs par mnyam pa'i phyir te/ 'di ltar mtshams med pa'i dbyings dang / chos kyi dbyings 'di ni gnyis su med cing gnyis su dbyer med de/ 'di la ni 'ong ba 'am/ 'gro ba 'am/ kun nas ldang ba mi
310b5 dmigs so/ /bcom ldan 'das kyis de skad ces bka' stsal pa dang / 'jam dpal gzhon nur gyur pas bcom ldan 'das la 'di skad ces gsol to/ /bcom ldan 'das bdag gis kyang chos kyi dbyings ngan
310b6 song du mchi ba 'am/ mtho ris su mchi ba 'am/ mya ngan las 'das par mchi bar ma mthong lags so/ /bka' stsal pa/ 'jam dpal gal te/ la la zhig khyod la 'di skad du 'dri ste/ khyod kyi ston pa 'gro ba drug dang ldan pa
310b7 'i 'khor ba ji ltar 'dogs shes de skad dris na 'jam dpal khyod kyis ji skad lan gdab/ gsol pa/ bcom ldan 'das de skad du smras na bdag gis 'di skad du lan gdab par bgyi ste/ dper na mi gnyid kyis log pa
310b8 'i rmi lam du sems can dmyal ba 'am/ dud 'gro'i skye gnas sam/ yi dags kyi yul lam/ lha ma yin gyi ris sam/ lha rnams sam/ mi rnams mthong na/ bcom ldan 'das ji ltar g.yar lam rmi ba'i mis sna tshogs mthong yang
311a1 g.yar lam sna tshogs ma mchis pa de bzhin du bdag gis 'gro ba tha dad pa bstan kyang chos kyi dbyings kyi ngo bo nyid tha dad pa gdags par rngo mi thog ste/ de lta lags pas bcom ldan 'das bdag gis ni de skad 'dri ba la de
311a2 skad ces lan gdab par bgyi lags so/ /bcom ldan 'das de bzhin du sangs rgyas rnams dang / byang chub sems dpa' rnams dang / rang sangs rgyas rnams dang / nyan thos kyi yongs su mya ngan las 'das pa yang tha dad par
311a3 gdags par rngo mi thog lags so/ /bcom ldan 'das de dag gis gnas pa dag kyang tha dad par gdags par rngo mi thog lags so/ /de ci'i slad du zhe na/ 'di ltar chos kyi dbyings las tha mi dad pa'i slad du lags so/ /
311a4 bcom ldan 'das dper bgyi na rgya mtsho chen po'i rin po che sna tshogs dung dang / man shel dang / byi ru la sogs pa tha ma dang / 'bring dang / mchog rnams la 'di ni rin po che che ge mo zhig go/ /'di ni rin po che che ge mo zhig
311a5 go zhes tha dad par gdags su mchis lags kyi/ chos kyi dbyings la ni de ltar tha dad par gdags pa'i rngo mi thog la/ gdags pa de la yang tha dad par dbyer ma mchis lags so/ /de la ni 'chi 'pho ba dang / skye ba
311a6 tha dad par gdags pa'i rngo mi thog lags so/ /de ci'i slad du zhe na/ chos kyi dbyings la ni 'chi 'pho 'am/ skye ba 'am/ kun nas nyon mongs pa 'am/ rnam par byang ba ma mchis pa'i slad du lags so/ /chos kyi dbyings ni
311a7 kun nas nyon mongs pa can ma lags/ chos kyi dbyings ni 'dres pa ma lags te/ chos kyi dbyings la ni gang dag spang bar bgyi ba 'am/ bskyed par bgyi ba'i chos de dag ma mchis lags so/ /de nas bcom ldan 'das
311a8 kyis mkhyen bzhin du 'jam dpal gzhon nur gyur pa la 'di skad ces bka' stsal to/ /'jam dpal khyod kyis chos kyis dbyings shes sam/ gsol pa/ gal te dmigs na bdag gis 'tshal lags so/ /
311b1 bka' stsal pa/ 'jig rten gang la spyod shes sam/ gsol pa/ bcom ldan 'das 'jig rten ni sgyu ma sprul pa'i mi gang kho na la spyod pa de la spyod lags so/ /bcom ldan 'das 'jig rten zhes bgyi ba de ni ming
311b2 tsam du pas te/ /bdag gis ni gang bstan par bgyi ba'i 'jig rten gyi dngos po dang / 'jig rten gang la spyod pa yang yang dag par rjes su ma mthong lags te/ bdag gis ni 'jig rten gyi chos kyi dbyings las tha dad par yang
311b3 dag par rjes su ma mthong lags so/ /de ci'i slad du zhe na/ ma mchis pa'i slad du lags so/ /bcom ldan 'das kyis 'jig rten gang la spyod ces bka' stsal pa de yang / gzugs kyi ngo bo nyid gang lags pa de la ni
311b4 'chi 'pho dang / skye ba yang ma mchis/ de la ni 'jigs pa 'am/ rab tu 'jigs pa yang ma mchis na gang la spyod par 'gyur lags/ de bzhin du tshor ba dang / 'du shes dang / 'du byed dang / rnam par shes pa rnams kyi
311b5 ngo bo nyid gang lags pa de ni gtan ma mchis pa'i slad du skye ba 'am 'gag pa ma mchis la/ mtshan nyid gcig las mi 'da' ste/ 'di lta ste mtshan nyid gcig pa lags so/ /bka' stsal pa/ 'jam dpal 'di ji snyam
311b6 du sems/ nga da ltar de bzhin gshegs pa dgra bcom pa yang dag par rdzogs pa'i sangs rgyas su 'gyur ba 'di la khyod 'di snyam du 'di yongs su mya ngan las 'das par 'gyur ba 'am/ mi snang bar 'gyur ro snyam du sems
311b7 sam/ gsol pa/ bcom ldan 'das de ni ma lags so/ /de ci'i slad du zhe na/ chos kyi dbyings ni yang dag par grub pa ma lags pa'i slad du lags so/ /bcom ldan 'das gal te chos kyi dbyings yang dag par
311b8 grub pa zhig lags na ni de'i slad du de mi 'da' bar yang 'gyur ba zhig na/ de la ni yang dag par grub pa mi dmigs pa ste/ de mi gda' ba 'am/ yongs su mya ngan las 'da' bar lta ga la 'gyur lags/ de bzhin gshegs pa
312a1 ni de lta bu'i dbyings lags te/ de'i slad du bcom ldan 'das ni skyes pa yang ma lags/ yongs su mya ngan las 'da' bar mi 'gyur lags so/ /bcom ldan 'das kyis bka' stsal pa/ 'jam dpal 'o na khyod
312a2 'das pa'i de bzhin gshegs pa gang gA'i klung gi bye ma snyed po de dag yongs su mya ngan las 'das so zhes de la khyod ji ltar mos/ gsol pa/ gal te de dag gi skye ba yang dag par rjes su mthong na ni bdag mos lags so/ /
312a3 bka' stsal pa/ khyod so so'i skye bo shi ba rnams nying mtshams sbyor bar 'dod dam/ gsol pa/ bcom ldan 'das so so'i skye bo nyid kyang bdag gis yang dag par rjes su ma mthong mi dmigs na de'i nying mtshams sbyor ba lta ga la
312a4 dmigs lags/ bka' stsal pa/ 'jam dpal de bzhin gshegs pa chos gnas par gzhed kyis khyod spobs par gyis shig gsol pa/ ci zhig las brtsams te spobs par bgyis lags/ bka' stsal pa/ chos kyi
312a5 dbyings las brtsoms shig gsol pa/ bcom ldan 'das gang chos kyi dbyings ma lags pa'i chos de bdag gis yang dag par rjes su ma mthong lags so/ /bka' stsal pa/ 'jam dpal mngon pa'i nga rgyal can rnams skrag
312a6 par 'gyur ro/ /gsol pa/ bcom ldan 'das gal te yang dag pa'i mtha' skrag par 'gyur na ni de'i slad du mngon pa'i nga rgyal can yang skrag par 'gyur lags so/ /de ci'i slad du zhe na/ bcom ldan 'das yang dag pa'i mtha'
312a7 yang gzhan la mngon pa'i nga rgyal can yang gzhan pa ni ma lags kyi/ mngon pa'i nga rgyal can rnams kyi mtha' gang lags pa'i mtha' de nyid yang dag pa'i mtha' lags la/ yang dag pa'i mtha' gang lags pa de yang chos thams
312a8 cad kyi mtha' lags te/ de'i slad du mi skrag lags so/ /chos thams cad yang dag par ma bsgrubs pa zhes bgyi ba 'di ni rdo rje'i gzhi lags so/ /bcom ldan 'das kyis bka' stsal pa/ 'jam dpal ci'i phyir na 'di rdo rje'i gzhi
312b1 zhes bya/ gsol pa/ bcom ldan 'das chos thams cad ni mi phyed pa lags te/ de'i slad du 'di rdo rje'i gzhi lags so/ /de bzhin gshegs pa bsam gyis mi khyab pa'i slad du chos thams cad bsam gyis mi khyab pa 'di ni rdo rje
312b2 'i gzhi lags te/ ci'i slad du rdo rje'i gzhi zhes bgyi zhe na/ chos thams cad sems ma mchis pa'i slad du lags so/ /chos thams cad byang chub ces bgyi ba 'di ni rdo rje'i gzhi lags te/ de ci'i slad du zhe na/ chos thams cad brjod
312b3 pa ma mchis pa'i slad du ste/ 'di na ming gang dang gang gis chos gang dang gang brjod pa'i chos de dang de chos de dang de la ma mchis lags so/ /gang ma mchis pa de ni stong pa lags so/ /gang stong pa de ni med pa lags so/ /gang med pa de ni brjod pa'i
312b4 rngo mi thog pa lags so/ /brjod du ma mchis pa de ni byang chub lags te/ de'i slad du/ 'di ni rdo rje'i gzhi lags so/ /chos thams cad ni de bzhin gshegs pa'i yul lags te/ 'di ni rdo rje'i gzhi lags so/ /bka' stsal pa/
312b5 ci'i phyir rdo rje'i gzhi zhes bya/ gsol pa/ bcom ldan 'das chos thams cad ni rang gi yul las dben pa lags so/ de'i slad du 'di rdo rje'i gzhi lags so/ /bka' stsal pa/ 'jam dpal dge slong kun dga' bo de yang chos kyi
312b6 rnam grangs 'di kun 'dzin par 'gyur na/ 'dir 'ongs pa'i mtshan ma ngas bya 'am/ gsol pa/ bcom ldan 'das 'di ni chos brjod pa 'am/ bstan pa mchis lags sam/ bdag gis ni yi ge gcig kyang bstan
312b7 par yang dag par rjes su ma mthong lags na/ mang po lta ga la mthong lags/ bka' stsal pa/ 'jam dpal legs so legs so/ /'jam dpal khyod 'di skad du 'chad pa ni khyod kyi tshig 'di legs par smras pa yin te
312b8 'jam dpal khyod legs so/ /'jam dpal ngas ni phyogs bcu'i 'jig rten gyi khams dpag tu med grangs med pa dag na de bzhin gshegs pa dgra bcom pa yang dag par rdzogs pa'i sangs rgyas rnams chos nyid 'di kho na
313a1 ston cing bzhugs pa dag mthong ngo / /de nas tshe dang ldan pa shA ri'i bu rang gi gnas khang nas byung nas/ 'jam dpal gzhon nur gyur pa'i gnas khang ga la ba der song ste phyin nas 'jam dpal gzhon nur gyur pa ma
313a2 mthong ste/ bcom ldan 'das kyi bzhugs khang ga la ba der song nas/ bzhugs khang gi phyi sgo na 'greng ba dang / gsung ba'i gsung thos so/ /de nas bcom ldan 'das kyis 'jam dpal gzhon nur gyur pa la 'di skad ces
313a3 bka' stsal to/ /'jam dpal dge slong shA ri'i bu 'di gnas khang gi phyi sgo na 'greng ste/ chos nyan par 'dod na 'jam dpal shA ri'i bu chos nyan par nang du 'ong bar gyis shig /gsol pa/ mtha' 'di ni yang dag pa'i mtha'
313a4 lags na/ gang gi slad rol dang / nang dang gnyis ka ma mchis par gda' lags sam/ bka' stsal pa/ 'jam dpal de ni ma yin no/ /gsol pa/ bcom ldan 'das de lta lags pas yang dag pa'i mtha' ni mtha' ma
313a5 mchis pa lags te/ de lta bu'i mtha' gang lags pa de la ni tshur mchi ba 'am/ phar mchi ba ma mchis te/ bcom ldan 'das de lta bu'i mtha' can gyi btsun pa shA ri'i bu de ni tshur mchi ba 'am/ nang du mchi ba'i mi rigs
313a6 lags so/ /bka' stsal pa/ 'jam dpal gal te nga gnas khang gi nang na nyan thos dag dang lhan cig tu gtam zer shing 'dug la/ khyod ni phyi rol na 'dug ste/ nang du 'ong du yang mi dbang na ci khyod sdug bsngal bar mi
313a7 'gyur ram/ gsol pa/ bcom ldan 'das de ni ma lags te/ de ci'i slad du zhe na/ chos thams cad ni chos kyi dbyings su yang dag par 'du ba'i slad du ste/ 'di ni de bzhin gshegs pa zhes brjod pa gang lags pa
313a8 'di yang chos kyi dbyings lags te/ mtshan nyid gcig pa'i slad du de bzhin gshegs pa yang gzhan la chos kyi dbyings kyang gzhan ma lags so/ /chos sam chos bstan pa zhes bgyi ba 'am/ chos nyan pa zhes bgyi
313b1 ba'i chos 'di dag kyang gnyis su ma mchis pa'i slad du tha dad pa ma mchis te/ de'i slad du yang chos kyi dbyings las tha dad pa ma lags so/ /'jam dpal zhes bgyi ba'i yi ge gang lags pa 'di dag kyang chos kyi dbyings su gtogs
313b2 te/ bcom ldan 'das rnam grangs des na bdag chung zad kyang gdung ba ma mchis lags so/ /bcom ldan 'das bskal pa gang gA'i klung gi bye ma snyed du chos ston du lags kyang bdag der mchi yang mi mchi/ der mchir dga'
313b3 ba 'am/ yongs su gdung ba yang mi skyed lags so/ /de ci'i slad du zhe na/ bcom ldan 'das gnyis shig mchis na ni dga' ba 'am/ yongs su gdung ba skyed par 'gyur na chos kyi dbyings de ni gnyis su ma mchis te/ de'i slad du
313b4 bdag dga' ba 'am/ yongs su gdung bar mi 'gyur lags so/ /bcom ldan 'das chos ston pa mdzad pa'i chos bstan pa des kyang chos gang yang sogs pa 'am/ 'bri ba 'am/ 'phel ba 'am/ 'grib par mi bgyid de/ 'di ltar
313b5 chos bstan pa de ni chos gang yang dmigs pas nye bar gnas pa ma lags te/ bcom ldan 'das de'i slad du yang bdag dga' bar mi 'gyur zhing yongs su gdung bar mi 'gyur lags so/ /de nas bcom ldan 'das kyis tshe dang ldan pa
313b6 shA ri'i bu la bka' stsal pa/ shA ri'i bu khyod kyis 'jam dpal gzhon nur gyur pa'i spobs pa thos sam/ gsol pa/ bcom ldan 'das thos lags te/ bcom ldan 'das bdag ni bcom ldan 'das dang 'jam dpal
313b7 gzhon nur gyur pa'i spobs pa thos kyang ci ma rung snyam ste/ de'i slad du bdag 'di na mchis lags so/ /de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das
313b8 tshe dang ldan pa shA ri'i bu nang du mchi bar mdzad du gsol/ de nas bcom ldan 'das kyis tshe dang ldan pa shA ri'i bu la 'di skad du shA ri'i bu khyod gnas khang gi nang du shog ces bka' stsal to/ /de nas tshe dang ldan pa
314a1 shA ri'i bu gnas khang du 'ongs nas/ bcom ldan 'das kyi zhabs la phyag 'tshal te phyogs gcig tu 'dug go/ /phyogs gcig tu 'dug pa dang / tshe dang ldan pa shA ri'i bu la 'jam dpal gzhon nur gyur pas
314a2 'di skad ces smras so/ /btsun pa shA ri'i bu khyod don gyi dbang gang mthong bas 'dir 'ongs/ smras pa/ 'jam dpal kho bo ni chos nyan par 'dod pa'i phyir 'dir 'ongs te/ 'di ltar gang na bcom ldan 'das dang / skyes bu dam pa
314a3 khyod lta bu gnas pa de na bstan pa zab mo yang dag par phul du byung ba yod de/ de'i phyir kho bo 'ongs so/ smras pa/ btsun pa shA ri'i bu de ni de bzhin te bstan pa 'di ni zab bo/ /smras pa/ bcom ldan 'das nyid dang thabs gcig tu
314a4 brtsams pa'i chos bstan pa de ji tsam du zab/ smras pa/ de ni btsun pa shA ri'i bus rtogs par mi 'gyur te/ dgra bcom pa zag pa zad pa chos bstan pa 'di'i snod ma yin no/ /de ci'i phyir zhe na/ 'di ltar chos
314a5 bstan pa 'di ni so so'i skye bo'i chos la zhugs pa ma yin/ dgra bcom pa nyid kyi chos la zhugs pa ma yin/ rang sangs rgyas kyi chos la zhugs pa ma yin/ de bzhin gshegs pa'i chos la zhugs pa ma yin pa'i phyir ro/ /'di ni chos gang dmigs pa'i
314a6 phyir yang zhugs pa ma yin no/ /'di ni gang du zhugs pa 'am ldog pa yang med de/ chos thams cad shin tu dben pa'i phyir ro/ /smras pa/ 'jam dpal khyod kyis ci las bsams te/ dgra bcom pa zag pa
314a7 zad pa chos bstan pa 'di'i snod ma yin zhes de skad smra/ smras pa/ btsun pa shA ri'i bu dgra bcom pa nyid ni/ 'dod chags dang / zhe sdang dang / gti mug zad pa yin na de gang gi snod yin zhing dag gi ji lta bu
314a8 zhig gi snod du 'gyur snyam ste/ de las bsam nas dgra bcom pa zag pa zad pa/ chos bstan pa 'di'i snod ma yin no zhes kho bo de skad smra'o/ /smras pa/ 'jam dpal kho bo ni chos bstan
314b1 pa 'di'i don du gtsug lag khang nas gtsug lag khang dang / gnas khang nas gnas khang dang / phug nas phug tu khyod tshol te/ bdag gis khyod las zab pa zab pa yang dag pa'i spobs pa 'di lta bu 'di dag thos kyang
314b2 ci ma rung snyam ste/ 'jam dpal kho bo ni bcom ldan 'das dang / khyod kyi chos bstan pa la chog mi shes so/ /smras pa/ btsun pa shA ri'i bu khyod chos bstan pas chog mi shes sam/ smras pa/ kho bo chog mi shes so/ /
314b3 smras pa/ btsun pa shA ri'i bu ci chos kyi dbyings chos tshol bar byed dam/ smras pa/ 'jam dpal mi byed do/ /smras pa/ chos kyi dbyings kyang gzhan la/ tshe dang ldan pa shA ri'i bu ni gzhan pa ni ma yin na ci'i phyir tshe dang ldan pa
314b4 shA ri'i bu chos mnyan pa la chog mi shes/ de ci'i phyir zhe na/ btsun pa shA ri'i bu chos kyi dbyings ni chos tshol bar mi byed pa'i phyir ro/ /gal te de tshol bar byed na ni de'i phyir de chog shes par 'gyur ba zhig na gang gi phyir tshol
314b5 bar mi byed pa de'i phyir chog mi shes so/ /smras pa/ 'jam dpal de bzhin gshegs pa ma gtogs par kho bo lta bu chos nyan pa de lta bu khyod kyis ga la rnyed/ smras pa/ btsun pa shA ri'i bu khyod shA ri'i bu yongs
314b6 su mya ngan las mi 'da' ba'i chos can yin par mos sam/ smras pa/ mos so/ /smras pa/ ji ltar mos/ smras pa/ chos thams cad yongs su ma grub pas na kho bo yang yongs su mya ngan las
314b7 mi 'da' ba'i chos can yin no snyam du de ltar mos so/ /smras pa/ btsun pa shA ri'i bu khyod shi 'pho med pa dang / skye ba med pa'i chos can yin par mos sam/ smras pa/ mos so/ /
314b8 smras pa/ ji ltar mos smras pa/ chos kyi dbyings su gtogs pa'i phyir te/ chos kyi dbyings la 'chi 'pho 'am skye ba med pa de ltar mos so/ /smras pa/ btsun pa shA ri'i bu
315a1 khyod dgra bcom pa zag pa zad pa mi shes pa dang ldan par mos sam/ smras pa/ mos so/ /smras pa/ ji ltar mos/ smras pa/ shes pa dang / mi shes pa mnyam pa nyid kyi phyir dgra bcom pa zag pa zad pa mi shes pa dang ldan te 'di ltar mi
315a2 shes pa dang / shes pa ni mi zad pa'i chos can yin pa'i phyir dben pa ste/ de bas na mi shes pa dang / shes par rnam par mi rtogs pa'i phyir dgra bcom pa zag pa zad pa mi shes pa dang ldan par mos so/ /smras pa/ btsun pa shA ri'i bu khyod
315a3 dgra bcom pa zag pa zad pa/ shes pa dang bral bar mos sam/ smras pa/ mos so/ /smras pa/ ji ltar mos/ smras pa/ 'di ltar chos thams cad ni ngo bo nyid dang bral ba ste/ de bas na dgra bcom pa zag pa zad pa shes pa dang bral bar
315a4 mos so/ /smras pa/ btsun pa shA ri'i bu khyod dgra bcom pa zag pa zad pa/ rnam par ma grol ba'i chos can du mos sam/ smras pa/ mos so/ /smras pa/ ji ltar mos/ smras pa/ nyon mongs pa med pa'i phyir te/ 'di ltar nyon mongs pa med na
315a5 gang dag las rnam par grol bar 'gyur te/ de ltar mos so/ /smras pa/ btsun pa shA ri'i bu khyod sngon gyi de bzhin gshegs pa rnams ma byung zhing yongs su mya ngan las ma 'das par mos sam/ smras pa/ mos so/ /smras pa/ ji ltar mos/ smras pa/
315a6 'jam dpal bsam gyis mi khyab pa'i dbyings la ni skye ba med de/ gang mi skye ba de la mi snang bar 'gyur ba 'am/ yongs su mya ngan las 'da' bar 'gyur ba ga la yod de de ltar mos so/ /smras pa/ btsun pa shA ri'i bu khyod sangs rgyas thams cad gcig
315a7 yin par mos sam/ smras pa/ mos so/ /smras pa/ ji ltar mos/ smras pa/ 'jam dpal chos kyi dbyings la ni tha dad pa med pa de de ltar mos so/ /smras pa/ btsun pa shA ri'i bu khyod sangs rgyas kyi zhing thams cad sangs rgyas kyi zhing gcig yin par
315a8 mos sam/ smras pa/ mos so/ /smras pa/ ji ltar mos/ smras pa/ 'jam dpal sangs rgyas kyi zhing thams cad ni mi zad pa nyid kyi zhing yin te de ltar mos so/ /smras pa/ btsun pa shA ri'i bu khyod chos thams cad yongs su shes par bya ba ma
315b1 yin pa dang / spang bar bya ba ma yin pa dang / mngon sum du bya ba ma yin pa dang / bsgom par bya ba ma yin par mos sam/ smras pa/ mos so/ /smras pa/ ji ltar mos/ smras pa/ 'jam dpal ngo bo nyid kyis ngo bo nyid yongs su mi shes pa dang / rang bzhin
315b2 gyis rang bzhin spong ba dang / mngon sum du mi byed pa dang / sgom par mi byed pa dang / skyed par mi byed pa dang / 'gag par mi byed pa dang / len par mi byed pa dang / 'dor bar mi byed pa dang / mtha' de ni mi gnas pa nyid de/ de ltar mos so/ /smras pa/ btsun
315b3 pa shA ri'i bu khyod chos kyi dbyings ni phung por mi 'dug pa'i dbyings yin pa dang / chos gang yang skye ba 'am/ 'gag pa med pa dang / chos gang yang phung por 'dug pa med par mos sam/ smras pa mos so/ /smras pa/ ji ltar mos/ smras pa/ 'jam dpal
315b4 chos gang skye ba 'am/ 'gag pa 'am/ phung por 'dug pa de mi dmigs te de ltar mos so/ /smras pa/ btsun pa shA ri'i bu khyod shes rab gang yin pa de chos kyi dbyings yin la/ chos kyi dbyings gang yin pa de shes rab yin te/ chos kyi dbyings shes bya ba'i ming
315b5 yang thob pa dang / de'i phyir yang dgra bcom pa zhes bya bar mos sam/ smras pa/ mos so/ /smras pa/ ji ltar mos/ smras pa/ 'jam dpal rtogs par 'gyur ba'i shes rab kyis dgra bcom pa nyid du 'gyur ba de bzhin du chos kyi dbyings yongs su shes par zad kyi chos
315b6 kyi dbyings ni 'dod chags kyi bdag nyid dam/ zhe sdang gi bdag nyid dam/ gti mug gi bdag nyid kyang ma yin la/ chos kyi dbyings las kyang dgra bcom pa gud na med de de ltar mos so/ /smras pa/ btsun pa shA ri'i bu khyod chos thams cad sangs rgyas kyi
315b7 khyu mchog dang mnyam par mos sam/ smras pa/ mos so/ /smras pa/ ji ltar mos/ smras pa/ 'jam dpal 'di ltar bcom ldan 'das kyis ni chos thams cad rang bzhin gyis dben par mngon par rdzogs par sangs rgyas te/ de ltar mos so/ /smras
315b8 pa/ btsun pa shA ri'i bu khyod kyi yul ji tsam pa de tsam du khyod kyis lan btab pa legs so legs so/ /de tsam zhig khyod la dris kyis da ni rang gi gnas su song shig /shA ri'i bus smras pa/ 'jam dpal 'di ltar 'di nyid ni bdag gi ji
316a1 srid 'tsho'i bar gyi gnas yin no/ /de nas bcom ldan 'das kyis tshe dang ldan pa shA ri'i bu la bka' stsal pa/ shA ri'i bu rigs kyi bu 'am rigs kyi bu mo gang la la chos kyi rnam grangs 'di 'dzin pa 'am/ 'chang ba 'am/ klog pa
316a2 'am/ kun chub par byed pa des ni spobs pa myur du thob par 'gyur ro/ /gsol pa/ bcom ldan 'das de ni de lta lags te/ ji skad bka' stsal pa bzhin du rigs kyi bu 'am/ rigs kyi bu mo gang dag gi slad du chos kyi phyag rgya 'di bzhag pa de dag
316a3 ni sngon gyi rgyal ba rnams la bgyi ba bgyis pa lags te/ de dag de ltar rig par bya'o/ /de nas bcom ldan 'das la tshe dang ldan pa shA ri'i bus 'di skad ces gsol to/ /bcom ldan 'das chos kyi rnam grangs 'di'i ming ci lags/ 'di ji ltar gzung
316a4 bar bgyi/ de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu de'i phyir khyod kyis chos kyi rnam grangs 'di 'jam dpal gzhon nur gyur pas zhus nas ngas lan btab pa zhes bya bar
316a5 zung shig chos kyi dbyings shes bya bar yang zung shig /yang dag pa'i mtha' zhes bya ba dang / rin po che'i mtha' zhes bya bar yang zung shig /shA ri'i bu rigs kyi bu 'am/ rigs kyi bu mo gang dag chos kyi rnam grangs 'di 'dzin pa dang / 'chang ba dang / klog pa dang /
316a6 kun chub par byed pa dang / sgom pa dang / sbyor ba la brtson par gnas pa de dag ni rin po che dang 'dra ba yin te/ mi skye ba'i chos rnams la yang bzod pa myur du thob par 'gyur ro/ /gzhan dag la yang dge ba'i rtsa ba rnams yang dag par bskyed par 'gyur ro/ /chos nyung ngu
316a7 kun chub par byas pas kyang chos mang po ston par 'gyur ro/ /spobs pa mi chod par yang 'gyur ro/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / tshe dang ldan pa shA ri'i bu dang / lha dang mi dang lha ma yin dang / dri zar bcas pa
316a8 'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa rin po che'i mtha' zhes bya ba theg pa chen po'i mdo/ /rdzogs so// // rgya gar gyi mkhan po pradz+nyA barma dang / zhu chen gyi lo ts+tsha ba ban de ye shes sde la sogs pas bsgyur cing zhus te gtan la phab pa// //
CLOSE WINDOW