CLOSE WINDOW

J467
བོད་ཡིག

@#/ /rgya gar skad du/ Ar+ya a tsa la ma hA kro d+ha rA dza s+ya sarba ta thA ga ta ta s+ya ba la a pa ri mi ta bI ra bi na ya swA khyA to nA ma kalpa/ bod skad du/ de bzhin gshegs pa thams cad kyi khro bo'i rgyal po 'phags pa mi g.yo ba de'i stobs dpag tu med pa brtul phod pa 'dul bar gsungs pa zhes bya ba'i rtog pa/ rje btsun 'phags pa spyan ras gzigs dbang phyug la phyag 'tshal lo/ /'di skad bdag gis thos pa dus gcig na/ bcom ldan 'das rlung la bzhugs te/ rin po che sna tshogs bkod pa rin po che'i gzhal yas khang bye ba grangs med pa du mas bkod cing yongs su bskor ba/ bsam gyis mi khyab cing grangs med pa'i de bzhin gshegs pa'i bsod nams las 'khrungs pa'i byang chub sems dpa'i seng ge'i khri bshams pa rin po ches spras pa/ 'jig rten gyi khams grangs med pa snang bar byed pa rin po che sna tshogs kyi lcags ris yongs su bskor cing shin tu yid 'phrog pa/ steng du rin po che sna tshogs kyis spras pa'i rin po che'i bla bres nam mkha'i khams go 'byed par snang bar byed pa bsam gyis mi khyab pa'i pad ma'i rgyal po rin po che sna bdun gyi rgyu las yang dag par byung ba/ sems can thams cad kyi bsam pa sna tshogs yongs su dga' bar byed pa/ 'od zer chen po phul du byung ba gsal bar byed cing mun nag thams cad rab tu dang bar byed pa/ byang chub sems dpa' thams cad kyi ye shes las 'khrungs pa'i seng ge'i khri bsam gyis mi khyab pa bye ba du mas yongs su bskor ba/ byang chub sems dpa' grangs med pas yongs su bskor ba/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po la sogs pa du mas yongs su bskor ba der bcom ldan 'das bzhugs nas chos ston to/ /'di lta ste/ 'phags pa spyan ras gzigs dbang phyug dang / 'jam dpal dang / kun du bzang po dang / byams pa dang / sgrib pa thams cad rnam par sel ba dang / zhi ba'i blo gros dang / sna tshogs bkod pa dang / nam mkha' me tog 'chang dang / nam mkha'i snying po dang / shin du rnam dag dang / phyag na rdo rje la sogs pa byang chub sems dpa' chen pos yongs su bskor ba/ nyan thos bye ba phrag du ma 'di lta ste/ shA ri'i bu dang / maud gal dang / rta thul dang / 'od srungs la sogs pas yongs su bskor ba/ grags chen snyan pa chen po brgya byin dang / tshangs pa dang / khyab 'jug dang / lus ngan po la sogs pas yongs su bskor zhing / bcom ldan 'das thugs rje chen po dang ldan pa'i thugs kyis chos ston pa 'di lta ste/ gsang sngags kyi tshul la 'jug pa la sogs pa'i chos kyi rnam grangs gang thos par byed pa'i byang chub sems dpa' de dag dang / nyan thos de dag dang / thams cad dang ldan pa'i 'khor de dag dang / bsam gyis mi khyab pa'i sems can gyi khams kyi bsam pa sna tshogs la dgos pa sna tshogs kyi spyod lam gyis zhugs zhing rdzu 'phrul gyi cho 'phrul rnams mdzad do/ /bsam gyis mi khyab pa'i sangs rgyas rnams bsnyen bkur dang / yongs su mnyes par mdzad do/ /sangs rgyas kyi rdzu 'phrul gyi cho 'phrul du ma rnams kyang gzigs so/ /sangs rgyas kyi sprul pa du ma yang mngon par sprul pa mdzad do/ /bkod pa chen po yang bskyed par mdzad do/ /mdor na thams cad gang dang gang gis sems can gyi don du gzigs pa de dang de mdzad do/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa des 'khor chen po rnams la gzigs nas byang chub sems dpa' sems dpa' chen po phyag na rdo rje la bka' stsal pa/ lag na rdo rje bdag gis sna tshogs du ma'i gsung gi 'khor lo'i dkyil 'khor rnam par phyung ste tshig dang yi ge du ma bkod pa sems can sna tshogs mgu bar byed pa/ phyag rgya dang sngags sna tshogs kyis rnam par mtshan par gyur pa/ 'gro ba sna tshogs kyi khyad par brjod pa/ sdug bsngal sna tshogs rab tu zhi bar byed pa/ dbang phyug du ma dang ldan zhing yid 'phrog pa'i yi ge gcig dang / stong phrag brgyad dang / grangs med pa dang / bye ba phrag gsum dang / rjes 'jug dang / ring po dang / thung ngu dang / nga ro dang / gsal byed kyi mtshan mas mtshan pa/ de bzhin gshegs pa'i chos kyi dbyings bcu la sogs pa'i byang chub sems dpa'i dpe dang / nyan thos dang / rang sangs rgyas dang / 'jig rten pa'i mngon par shes pa lnga dang / lha'i gnas la sogs pa'i dbye ba dang / mi'i 'gro ba dang / yi dags dang / dud 'gro'i 'gro ba la thug par phye zhing bcad pa rnams gang bdag gis sems can rnams la phan pa'i lhag pa'i bsam pa bye ba phrag grangs med pa bdun cu rtsa bdun gyi sems can rnams kyi don du gsungs pa yin no/ /de yang gzhi dang me tog gi snying pos brgyan pa'i 'jig rten khams 'dir dar bar gyur to/ / gsang ba'i bdag po bye ba phrag grangs med pa bdun cu rtsa bdun po de rnams kun gyi nang nas byang chub sems dpa' chen po 'phags pa spyan ras gzigs dbang dang / phyag na rdo rje dang / 'jam dpal la sogs pa'i byang chub sems dpa' rnams la bdag gis thabs sna tshogs kyi cho ga'i sgo bstan te/ gsang ba'i bdag po de rnams la ni mngag gzhug dang / mngag gzhug ma dang / pho nya dang / pho nya mo la sogs pa de rnams kyi phyag rgya dang / sngags dang / rtog pa'i cho ga yang rgyas par bstan to/ /las sna tshogs dang ldan pa'i sgrub pa'i thabs kyang bstan te/ sgrub thabs sna tshogs yang dag ldan/ /ras ris cho ga rnam par bstan/ / yang na las kyi cho ga dbye/ /gang du stobs chen gsang ba'i las/ /sbyin sreg dag ni bdag gis bstan/ /lhag ma de bzhin yul gnas gzhan/ /de nas ma lus me thab dang / /de bzhin zhi ba rgyas pa dang / /dbang du bya dang mngon spyod dang / /de nas dus kyi khyad par dang / /dkyil 'khor yang ni de bzhin bstan/ /phyag rgya dag kyang ma lus par/ /sa bon dang ni mtshan ma dang / /gsang ba yi ni sngags nyid dang / /rigs kyi mtshan ma de bzhin sku/ /ma lus pa yi dbyibs dang yang / /de lta bu la sogs pa'i las/ /de dag thams cad bdag gis bstan/ /mi g.yo zhes bya'i rtog pa ni/ /de ni slar yang bdag gis bshad/ /dag pa'i sems dpa' blo ldan gyis/ /sngags pas gang zhig bsgrub bya yi/ /bsam gyis mi khyab sna tshogs las/ /gsang sngags kyi ni sgrub thabs zhig /rtog pa 'di ru mdor bsdus nas/ /de yi cho ga yang dag bshad/ /yang dag rdzogs sangs rgyas bsnyen cing / /sgrub pas go 'phang thob par 'gyur/ /de bzhin gshegs pa'i sras kyi mchog /chos shes bya bar skye bar 'gyur/ sangs rgyas zhing ni ma lus par/ /de ni kun du dag par 'gyur/ /rtag par rgyun du rnam rtog med/ /nam mkha' yi ni lam la gnas/ /gzugs can lus la brten nas su/ /sems can bye brag thugs su chud/ /sems can zhi ba gdul dka' dang / /bgegs chen dang ni log par 'dren/ /de nas gdul bar bya ba'i phyir/ /rdzogs sangs rgyas kyis rtag tu sprul/ /mtshan ni mi g.yo ces bsgrags pa/ /khro bo 'phags pa stobs po che/ /dpal ldan gdul dka' 'dul mdzad pa/ /sangs rgyas rnams kyi sras kyi sras/ /de 'dir rgyal mchog rnams dang ni/ /de bzhin rgyal sras kyis rtag par/ /phyag 'tshal tshangs pa la sogs dang / /lus can thams cad kun tu mchod/ /sangs rgyas rnams ni byas pa gzo/ /de bzhin du ni sangs rgyas sras/ /'di kun smon lam yongs rdzogs shing / /bsam gyis mi khyab ye shes rdzogs/ /mi g.yo zhes bya'i sa thob pas/ /mi g.yo 'di yang de yi mtshan/ /bdud rnams kun gyis mi g.yo bas/ /rtag pa'i ye shes dri med bzang / /rtog pa'i rgyal po rdzu 'phrul che/ /bshad kyis bu khyod tshur nyon cig /sangs rgyas kun gyis byin gyis brlabs/ /chos kyi dbyings su rab gzhol bas/ /rtag tu tshe dang nad med mchog /dngos grub myur du gsol mdzad pa/ / rtag tu bgegs rnams gsol byed cing / /de bzhin bdud rnams rab tu 'joms/ /sems can rnams ni bde ba'i phyir/ /rtog pa 'di ni rab tu bshad/ /de nas byang chub sems dpa' sems dpa' chen po de dag dang / thams cad dang ldan pa'i 'khor de dag mgrin gcig gi ngag gis gsol pa/ sems can thams cad kyi don dang bdag cag la thugs brtse ba bskyed de bcom ldan 'das bshad du gsol/ bde bar gshegs pa bshad du gsol/ de skad ces gsol pa dang / bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pas gsol ba btab pa de mkhyen nas gzhi dang snying po me tog gis brgyan pa'i 'jig rten gyi khams 'od zer chen pos snang bar byas nas/ dpal gyi be'u las byung ba zhes bya ba'i 'od zer byung ste/ 'od zer bye ba khrag khrig brgya stong du ma grangs med pas yongs su bskor ba byas nas gzhi dang snying po me tog gis brgyan pa'i 'jig rten gyi khams 'di nas gzung ste/ ji srid brjod du med pa'i yang brjod du med pa'i sangs rgyas kyi zhing rdul phra rab dang mnyam pa'i 'jig rten gyi khams nas nam mkha'i khams kyi mtha' gtugs pa'i bar du de khyab nas g.yas phyogs nas bskor te/ de bzhin du byang phyogs dang / nub dang / lho dang / shar gyi phyogs dang / phyogs bcu'i 'jig rten gyi khams kyi bar du khebs par byas so/ /'jig rten gyi khams de rnams na bzhugs pa'i byang chub sems dpa' de thams cad kyis tshigs su bcad pa 'di smras so/ /shAkya'i mgon po rdzogs sangs rgyas/ / gzi brjid chen po gang bzhugs pa/ /chos kyi dbyings las byung ba yi/ /rgyal ba'i sras po thams cad gshegs/ /de ru dri med dam chos nyon/ /gsang sngags spyod pa'i tshul dge ba/ /gang thob 'jig rten mgon pos ni/ / byang chub 'dus ma byas pa brnyes/ /de nas 'od zer des tshigs su bcad pa 'di thos nas slar log ste bcom ldan 'das kyi dpal be'u nyid du zhugs par gyur to/ /de nas byang chub sems dpa' chen po de rnams 'jig rten gyi khams nas khro bo'i mthus/ bcom ldan 'das shAkya thub pa ga la ba der lhags so/ /de nas bcom ldan 'das shAkya thub pas thams cad dang ldan pa'i 'khor rnams kyi sems rtse gcig par mkhyen nas slar yang rdo rje bsgyings pa bsregs pa'i me lce kun du 'byung ba zhes bya ba'i ting nge 'dzin la snyoms par zhugs so/ /bcom ldan 'das snyoms par zhugs ma thag tu/ stong gsum gyi stong chen po'i 'jig rten gyi khams 'di rnam pa drug tu g.yos so/ /rab tu g.yos so/ /kun tu rab tu g.yos so/ /'gul/ rab tu 'gul/ kun du rab tu 'gul/ ldeg /rab tu ldeg / kun du rab tu ldeg /'khrugs/ rab tu 'khrugs/ kun du rab tu 'khrugs/ 'ur 'ur/ rab tu 'ur 'ur/ kun tu rab tu 'ur 'ur/ chem chem/ rab tu chem chem/ kun du rab tu chem chem/ 'jig rten du shin tu snang ba dpag tu med par byung bar gyur to/ /gzhan yang bsam gyis mi khyab pa'i cho 'phrul mthong ngo / /snyoms par zhugs pa 'di ni de bzhin gshegs pa thams cad kyi bsam pa yongs su rdzogs par byed pa/ bdud thams cad rab tu 'joms par byed pa/ sems can thams cad kyi bsam pa yongs su rdzogs par byed pa/ chos kyi dbyings grangs med par sems can gyi khams rnam par grol bar byed pa/ de bzhin gshegs pa thams cad kyi stong pa nyid kyi rang bzhin gyi ting nge 'dzin rnam par rtog pa med pa'i ye shes kyi me yang dag par byung ba/ byang chub sems dpa' thams cad kyi byang chub kyi snying po nye bar ston pa/ sna tshogs pa'i gsung gis 'khor lo'i dkyil 'khor rab tu sgrub pa/ byang chub sems dpa' rnams kyi yab/ sems can nyon mongs pa'i mun nag tu lhung ba thams cad kyi snang bar gyur pa/ ngan song dang / ngan 'gror ltung ba thams cad kyi ded dpon/ sdug bsngal bas nyams thag pa rnams kyi bde bar gyur pa/ mdor na sems can rnams kyi sdug bsngal gang dang gang ldan pa de dang der rab tu zhi bar byed pa'i gsang sngags kyi rgyal po'i snying po 'di sems can thams cad la phan pa dang bde ba'i phyir ro/ /na maH sar+b+bA sha pa ri pu ra ke b+h+yaH/ sar+b+ba ta thA ga te b+h+yaH/ sar+b+ba thA hA/ bcom ldan 'das kyis khro bo'i snying po 'di gsungs ma thag tu gzhi dang snying po me tog gis brgyan pa'i 'jig rten gyi khams 'di'i bdud kyi gnas thams cad dang / bdud kyi ris de dag dang / gang sems can thams cad mog mog por byas te/ sems can rnams kyi sdug bsngal ba rnams ni bde ba thams cad dang ldan par byed pa'i snang ba mdzad de/ sems can thams cad kyi bsam pa yongs su rdzogs par byas nas ma lus pa'i srid pa'i bdag po'i sa gzhi rab tu 'gul bar gyur to/ /gzhan yang 'jig rten du bsam gyis mi khyab pa'i ngo mtshar rab tu byung bar gyur to/ /de nas bcom ldan 'das shAkya thub pas gsang ba pa'i bdag po phyag na rdo rje la 'di skad ces bka' stsal to/ /lag na rdo rje 'di ni khro ba'i rgyal po de bzhin gshegs pa'i snying po mchog gi de kho na nyid/ stong nyid 'di las gzhan dag byung / /chos kyi dbyings kyi bdag nyid de/ /'di las rgyal ba byung ba mthong / /'di ru rgyal ba thams cad bzhugs/ /srid pa'i khams ni 'di las sprul/ /'das pa'i sangs rgyas thams cad dang / /ma byon pa de de bzhin gzhan/ thams cad 'di las yang dag byung / /nam mkha' lta bu dri ma med/ /spros pa thams cad rnam par bral/ /ngag gi spyod yul rnam par spangs/ / rtag par spros pa med pa nyid/ /nam mkha' lta bur gnas pa yin/ /tha snyad sngon du byas nas ni/ /gsang sngags rjes su brjod pa yin/ /tha snyad kyang ni rtog pa ste/ /de nyid du ni brjod pa med/ /tha snyad la ni brten nas su/ / skyob pas de nyid gsungs pa yin/ /sems can med de sgyu ma bzhin/ /yid kyis bsgom par bya ba yin/ /la lar sgyu ma ci bzhin du/ /rang bzhin med par yang gyur te/ /stong nyid de yi rang bzhin du/ tha snyad rnams ni rtogs par bya/ /de ltar gsang sngags mgon po 'di/ /rang bzhin med par mnyam par mdzes/ /'dod pa'i don rnams stsol ba yang / /thams cad kyang ni rdzogs par byed/ /de nas byang chub sems dpa' sems dpa' chen po kun du bzang po la sogs pa thams cad dang ldan pa'i 'khor dang / tshangs pa dang / dbang po la sogs pa rnams shin tu ngo mtshar rmad du gyur cing snying po rnams spangs te/ de thams cad bcom ldan 'das shAkya thub pa la bltas nas/ tshig 'di dag mgrin gcig gi ngag gis gsol pa/ bcom ldan 'das bdag cag gis sngon chad ma thos pa'i chos kyi 'khor lo 'di bskor ba bcom ldan 'das ngo mtshar to/ /bde bar gshegs pa ngo mtshar to/ / bcom ldan 'das bdag cag mchog tu bde ba dang ldan par 'gyur ro/ /bcom ldan 'das 'di ni bsam gyis mi khyab pa lags so/ /bcom ldan 'das 'di ni nyan thos thams cad dang / rang sangs rgyas rnams kyi spyod yul ma lags so/ /bcom ldan 'das bdud sdig to can rnams dang / bgegs kyi gzugs can thams cad gyis bgom par mi nus lags so/ /bcom ldan 'das 'di ni sems can thams cad kyi don dam pa'i yid bzhin gyi nor bu lags so/ /bcom ldan 'das 'di ni mngon par 'dod pa'i don skong ba lags so/ /bcom ldan 'das 'di ni de bzhin gshegs pa'i bstan pa dang / sems can rnams kyi srungs ma lags so/ / bcom ldan 'das 'di ni srin po dang grul bum la sogs pa thams cad kyis 'da' bar mi nus pa lags so/ /de skad ces gsol pa dang / bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pas byang chub sems dpa' chen po de dag dang / lha la sogs pa'i 'khor de rnams la legs so zhes bya ba byin te/ gtsug lag legs so legs so/ /slar yang gtsug lag nges par legs so/ / de ltar gtsug lag 'di'i tshig brjod pa mdzes pa de ltar ji lta ba de bzhin du yin no/ /'on kyang bsrung ba byed pa'i khro bo'i rgyal po chen po'i gzhung 'di bdag gis gti mug gi mun pas g.yogs pa'i sems can sdug bsngal ba rnams la bltas nas gsungs te/ 'di ni nyan par ma nus pa'i/ /go 'phang rdzogs sangs rgyas kyis gsungs/ /de rnams the tsom phyir bdag gis/ /ye shes sgron me yang dag spar/ / byis pa sdug bsngal yang dag khengs/ /sa gzhi steng ni 'di na gnas/ /tshul 'di rab tu mi shes pas/ /khyim gyi bcing ba dam pos bcings/ /de nas bcom ldan 'das la gsang ba'i bdag po lag na rdo rjes mig gnyis 'bru tshugs su bltas nas 'di skad ces gsol to/ /bcom ldan 'das ngo mtshar te/ /bde bar gshegs pa ngo mtshar to/ /bcom ldan 'das 'di ni mthu che lags so/ /bcom ldan 'das khro bo'i rgyal po de'i snying po'i gzi brjid dang mthu ni bdag gis mi bzod lags so/ /bcom ldan 'das khro bo'i rgyal po'i snying po 'di ni gdul dka' 'dul ba lags so/ /bcom ldan 'das shAkya thub pas bka' stsal pa/ gsang ba'i bdag po 'di ni ci skad du smras pa de bzhin no/ /'on kyang gsang ba'i bdag po bdag ni gsang sngags kyi rgyal po 'di'i mthus nyon mongs pa thams cad dang bdud ci snyed las rgyal lo/ /gsang ba'i bdag po gang yang bdag gis 'jig rten gyi khams na 'dod pa tha dad pa sna tshogs kyis sems can rnams dga' bar byed pa'i gsung gi 'khor lo'i dkyil 'khor 'jig rten gyi khams sna tshogs pa'i bsam pa tha dad pa rnams la bstan pa de rnams ni 'di'i byin gyis brlabs kyis bdag gis bstan to/ /gang yang gsang ba'i bdag po byang chub sems dpa' chen po dbang thang thams cad thob pa'i ye shes kyi stobs brtul phod pa mnyes pa 'di yang snying po'i byin gyis brlabs kyi yin no/ /gcig tu sems can don rab brtson/ /sa gzhi la ni rnam par bzhugs/ /sems can rnams la phan 'dod pas/ /sprul pa rnams kyang 'gyed par mdzad/ /mchod cing mnyes par rtag tu ni/ /rgyal ba zhing nas yang dag bzhugs/ /ji srid phyogs rnams gnas kyi bar/ /rtag par rgyun du mchod 'gyur ba'i/ /sangs rgyas kun ni mnyam pa ru/ /byang chub ces bya 'di las bzhugs/ /rang bzhin med pa'i chos rnams ni/ /skye ba dang ni 'gags pa yin/ /tha snyad la ni brten gnas su/ /gang zhig sgyu ma bzhin du gsungs/ /sgyu ma stong pa nyid yin ltar/ /chos rnams mtshan nyid de bzhin no/ /'on kyang gsang ba'i bdag po bdag gis bskal pa grangs med pa bye ba khrag khrig brgya stong phrag grangs med kyi bskal pa snyed du sems can sna tshogs kyi lus blangs nas sdug bsngal spyad de mgo dang / lag pa dang / rkang pa dang / mig dang / yan lag gi mchog dang chung ma dang / bu dang / bu mo dang / glang po dang / glang dang / shing rta la sogs pa dang / gzhan yang phyi rol gyi dngos po rnams yongs su btang ste/ pha rol tu phyin pa drug yongs su rdzogs nas bsam gyis mi khyab pa'i 'jig rten gyi khams sna tshogs pa rnams kyi tshul gyis bsam pa sna tshogs dang / 'dod pa sna tshogs pa la sgra dbyangs dang / tshig dang / yi ge bstan cing spyod lam sna tshogs kyi mtshan ma'i cha byad dang / dbyibs kyi khyad par can gyis bdag gis sems can rnams kyi don byas shing gang byang chub kyi snying por bdud bzhi bcom pa de thams cad gsang sngags kyi rgyal po 'di'i mthus byas so/ /'di ni sangs rgyas rnams 'phel bar byed pa bdud las kyang rgyal bar byed pa bstan pa thams cad kyi don yod par byed pa/ gzhan yang sna tshogs ma lus pa'i bgegs las kyang rgyal bar byed pa ste/ 'di las gnyis pa gzhan yod min/ /sangs rgyas rnams kyis mi 'gyur sngags/ /de bas snying gar gzhag nas kyang / /ci ltar bde bar rnam par gnas/ /spang bar byed pa'i bgegs kyang med/ /glags tshol gzhan yang yod ma yin/ /rtag tu dgra yi 'jigs pa 'ang med/ /rkun la sogs pa'i 'jigs pa 'ang med/ /'jigs pa kun las rnam par grol/ /de yi snying gar gnas bsgoms pas/ /bdag ni yun rings bsgral ba ru/ /'khor ba'i rgya mtsho 'jigs pa las/ /rdzogs sangs rgyas kyis bsngags pa'i gtso/ /go 'phang bdag gis ji ltar 'thob/ /bdag gis ci yang thob med par/ /tshul 'di las ni rnam spyod nas/ /de 'dir mi 'gyur thob par bya/ /sangs rgyas nyid kyis rgyas pa thob/ /rdzogs sangs rgyas kyis gsungs pa yi/ /gsang sngags sgrub thabs bsten par bya/ /de nas yid bzhin nor bu'i 'od/ /sku ni 'di ru thob par 'gyur/ / gang zhig tshul 'dir gnas pa yi/ /de rnams kyi ni dngos grub phyir/ /gang tshe sngags pas mnyam gzhag pas/ /de bas ma brnyes pa yang 'thob/ /'dis ni mi phyed pa yang 'byed/ /mi rgyal ba las ma lus rgyal/ /gang tshe gsang sngags rgyal po bsten/ /de las 'bras med ci yang med/ /gsang sngags stobs chen dran pa ni/ /las ni 'dod pa byed par 'gyur/ /sngags kyi mgon po ma lus pa/ /'di ni myur du 'grub par 'gyur/ /gang tshe gsang sngags 'bras 'dod pas/ /'dir ni the tsom mi bya'o/ /de nas byang chub sems dpa' de dag dang / thams cad dang ldan pa'i 'khor de dag ngo mtshar ba'i snying po ma spangs par sgra skad gcig tu dungs pa'i dbyangs kyis gsol pa/ e ma'o sangs rgyas bsam mi khyab/ /sems can don rnams thugs su chud/ /rtog pa med pa'i rang bzhin yang / /bsam mi khyab pa'i go 'phang shod/ /gang zhig 'chang bar byed pa'i mi/ /de yi ngan 'gro rnam par bcad/ /gang gis lag tu chud pa ltar/ /de yi dngos grub lag mthil gnas/ /'jigs pa med cing nga yir med/ / dogs pa thams cad rnam par spangs/ /zad par sa la bzhugs nas su/ /sems can la ni ma bsam byed/ /gsang sngags rgyal po skyob pa yis/ /bdag cag thams cad skyob par byed/ /'dod pa'i don ni byed 'dod pas/ /gsungs pa yid kyis sgom par byed/ /de nas thams cad dang ldan pa'i 'khor 'di dag tshig 'di brjod nas de ma thag tu cang mi smra bar gyur to/ /de nas thams cad ngo mtshar du gyur te spyan rgyas shing shAkya'i rigs dga' ba la gsol ba 'debs pa'i tshig gi nus pa med do/ /de nas nam mkhar gnas pa'i byang chub sems dpas ngo mtshar 'di thos nas bcom ldan 'das shAkya thub pa la steng gi nam mkha' la sna tshogs pa'i me tog gis snyim pa bkang ste bcom ldan 'das la tshigs su bcad pas mngon par bstod pa/ rtag tu dag cing dri med pa/ /rtag par rgyun du rtog pa med/ /rtag tu rtog pa med par bzhugs/ / dpa' bo chen po phyag 'tshal bstod/ /khyod kyi chos kun g.yo ba med/ /thams cad legs sbyar spyod yul bas/ /rtag tu g.yo ba med mkhyen pas/ /spros dang bral la phyag 'tshal bstod/ /sems can rnams la phan 'dod pas/ /spyod pa spyad pa gsungs pa ste/ /dag pa rnams ni yang dag phyug /dag pa'i sems dpa' phyag 'tshal bstod/ /ji ltar nam mkha' bzhin du dag /rdul phran thams cad rnam par spangs/ /de ltar mgon khyod sku yang ni/ /kun du rtog pa thams cad spangs/ /shel sgong bzhin du shin tu dag /nam mkha' lta bur spros pa med/ /dngos po thams cad rnam dag pas/ /ye shes rgya mtsho phyag 'tshal bstod/ /nam mkha' la ni 'ja' tshon ltar/ /gtso bo khyod ni rtag tu mthong / /de ltar dag pa'i sems can gyis/ /rtag tu gtso bo khyod mthong ngo / /ngan 'gro thams cad rnam par grol/ /dpa' bo chen po khyod nyid 'khrungs/ /dbyings kyi snying po yang dag byung / /ye shes gcig tu gzi brjid che/ /sa gzhi thams cad nges pa ru/ /sems can sdug bsngal kun tu gzigs/ /sdug bsngal 'di ni zad byas nas/ /bla med go 'phang 'dra bar 'gyur/ /gsang sngags rnams kyi gtso sngags 'di/ /chos rnams kyi ni blo 'phel bar/ /rgyal ba'i sras po thams cad bskyed/ /gtso bo khyod kyis gsungs pa yis/ /dang po thams cad yang dag 'gyur/ /rgyal ba bdag nyid rgyu med 'khrugs/ /las dang skye bas rnam par grol/ /rgyal mchog gtso bor 'khrungs par 'gyur/ /ye shes me lce rang bzhin med/ /'dus byas thams cad rnam par spangs/ /chos kyi dbyings kyi rang bzhin gcig /rgyal ba bla med phyag 'tshal 'dud ces so/ /de nas gsang ba'i bdag po lag na rdo rjes bcom ldan 'das la tshigs su bcad pas sngags kyi tshig gi don zhus pa/ bcom ldan gsang sngags ji ltar bsgrub/ /sgrub pa'i thabs ni ji ltar lags/ /sgrub thabs rtsa ba ci zhes bya/ /ji ltar yang ni de bstan lags/ /ji ltar sems ni dag pa'i phyir/ /gtso bo 'di ni ci zhig bsgom/ /ji ltar de ni 'bras bu med/ /sngags pa yis ni brten par bya/ /de skad ces gsol pa dang / bcom ldan 'das kyis byang chub sems dpa' phyag na rdo rje la 'di skad ces bka' stsal to/ /byang chub sems ni bstan byas nas/ /sngags kyi dngos grub brjod par bya/ /sngags kyi dngos grub bya ba'i mchog / gzhan du thams cad 'bras bu med/ /ji ltar rtsa ba bskyed min na/ /shing gi me tog 'bras bu med/ /de ltar gsang sngags 'bras bu shes/ /byang chub sems ni rtsa ba yin/ /byang chub sems ni bskyed nas su/ / bla na med pa'i go 'phang 'thob/ /'di la gnas pa'i chos kun ni/ /skye dang gnas pas 'byung ba ste/ /dngos po thams cad mdor bsdus nas/ /rang bzhin med cing bsam du med/ /byang chub sems ni nges par 'thob/ /gzhan du 'ba' zhig par 'gyur ro/ /bu ni seng ge 'dra yin te/ /stong nyid 'dus byas sgom par byed/ /srid pa thams cad sgyu ma yin/ /gang zhig bsam pa'i 'bras bur gnas/ / mu stegs rnams kyi 'dod bshad pa/ /bdag dang srog dang gang zag bcas/ /gtso bo skyes bur bshad pa dang / /gang du khyab par gnas pa dang / /de ltar 'khor ba rnams brtags nas/ /'khor ba'i dngos po 'ba' zhig ste/ /mngon pa'i nga rgyal gyis rmongs nas/ /byis pa sdug bsngal bden pa can/ /log pa'i zhags pas bcings pa yi/ /sdug bsngal ba de rnams bltas nas/ /de rnams kun la brjod pa yin/ / 'di skad gsung ni bka' stsal to/ /srog med sems can kyang yod min/ /byed pa po med gtso bo 'ang med/ /khyab pa med cing dngos po 'ang med/ /rdzas la sogs pa'i rang bzhin med/ /log shes rang bzhin zhags pa ni/ /srid pa'i 'ching ba rnam par spangs/ /dngos po thams cad rnam par bral/ /sna tshogs ji bzhin rnam bsgoms pas/ /dngos po kun las rnam par grol/ /stong pa nyid kyi go 'phang 'thob/ /phyi rol nang gi khyad par gyis/ /de ltar thams cad rnam par bsgom/ /dbu ba chu bur dang sgyu ma/ /stong nyid 'ba' zhig las ldang ste/ /de ltar thams cad rnam bsgoms nas/ /ye shes go 'phang ngo rnams rtog /sdig pa'i cho ga las grol nas/ /'chi med go 'phang du grol 'gyur/ /phung po khams dang skye mched dang / /gzhan yang gzung 'dzin rnams las 'das/ /kun mkhyen ye shes zhags pa ni/ /'chi ba'i don du rab tu brtag /gang du phung po khams med cing / /skye mched rnams ni 'byung ba med/ /dngos po kun las rnam grol bar/ /rgyal ba mchog gis rtag tu gsungs/ /gang du kun gzhi rnam shes med/ / bdag med gang zag kyang yod min/ /sangs rgyas byang chub sa steng 'di/ /gang du thams cad sgyu mar gsungs/ /nga ni kun mkhyen mnga' brnyes pa/ /sems can don rnams thugs su chud/ /cho ga bya ba la zhugs phyir/ /bu la ma lus par bshad do/ /gang zhig kun gzhi yod pa dang / /gal te rnam shes kyang yod pa/ /de yi bdag nyid bdag gi bu/ /yod do zhes kyang bstan gyur pa/ /dngos po'i gdon gyis brlams pa yi/ /byis pas sdug bsngal rnams mthong nas/ /bdag gis gzhug par bya phyir bu/ /cho ga rgyas pa gsungs pa yin/ /sems can med cing srog kyang med/ /gang zag med cing byed po 'ang med/ / rnam shes med cing kun gzhi med/ /gang la bdag med dbang phyug med/ /skyes bu med cing khyab pa 'ang med/ /dngos po med cing sgyu yang med/ /dngos po kun las rnam par grol/ /dam chos dri ma med pa bshad/ /de nyid mchog gi gtso bo ste/ /rdzogs sangs rgyas kyi go 'phang bsten/ /rtag par rgyun du go 'phang bsten/ /rtag tu rgyun du bsgom par bya/ /byang chub sems ni rnam par bsgom/ / gzung dang 'dzin pa rnam grol bar/ /dngos po thams cad rnam par sbyang / /phung po khams dang skye mched dang / /thams cad stong nyid sgyu ma ltar/ /byang chub sems ni bsdus pa nyid/ /byang chub sems dpa' blo ldan gyis/ /de ltar yid kyis bsgom par bya/ /phun sum tshogs pa thams cad nye/ /gang zhig sangs rgyas nyid kyi thugs/ /bag yod pas ni rtag bsten na/ /byang chub sems kyi myu gu 'char/ /bsnyen par gyur na 'bras bu chung / /gsang sngags spyod pas gang dag skye/ /yid bzhin nor bu lta bu'i sku/ /byang chub sems kyis 'thob par 'gyur/ /nam mkha' lta bur gos med pa'i/ /sku ni kun du 'thob par 'gyur/ /byang chub sems ni bsgom pa yi/ /bsod nams bsam gyis mi khyab bshad/ /sangs rgyas rdzu 'phrul che kun gyis/ /'bras bu 'ang bsam gyis mi khyab gsungs/ /de nas byang chub sems dpa' sems dpa' chen po phyag na rdo rje stan las langs te/ bcom ldan 'das la lan gsum bskor ba byas nas/ rdo rje'i skabs su rtol ba blangs te bcom ldan 'das la 'di skad ces gsol to/ / ye shes rgya mtsho las byung ba'i/ /khyod kyi sras po nga mnyes gshin/ /'di dag shin tu som nyi za/ /bdag gis ji ltar rtogs par bgyi/ /gang yang byams pa la sogs gzhan/ /sa bcu ma lus pa thams cad/ / 'di la the tshom 'tshal zhing mchis/ /thub pa chen po bshad du gsol/ /gang zhig sems can don ma byas/ /bsod nams ye shes rnam par spangs/ /de rnams la ni thugs brtse'i phyir/ /bcom ldan 'das la 'di gsol 'debs/ /de ring bdag la ma lus par/ /sems can phan pas brtson par gsungs/ /'di yi mthu stobs kyang ni ci/ /'di yi pha rol gnon pa ci/ /mi g.yo zhes bya'i gtso khyod kyis/ /'dir ni ji ltar yang dag gsungs/ /'di las gzhan pa'i go 'phang med/ /'di dag thams cad gsung du gsol/ /gang gi go 'phang de 'grub pa'i/ /dkyil 'khor yang ni bshad du gsol/ /gang gis sa steng 'di thob pa'i/ /bsam mi khyab pa'i go 'phang gsungs/ /gsang sngags kyi ni tshad kyang gsungs/ /dkyil 'khor yang ni ji ltar lags/ /mgon po 'di la the tshom za/ /gang 'dir 'gro ba la phan phyir/ /sngags kyi dngos grub de bzhin gsungs/ /de nyid las kyi dbye ba yang / /mngon spyod kyang ni rab tu bshad/ /zhi dang rgyas dang dbang dag gis/ /mgon pos ji ltar cher myur bar/ /sngags bzlas pa yi 'bras bu mchis/ /mgon pos bzla ba'i mtshan nyid ni/ /sa steng 'dir ni de ji ltar/ /de yang tshim dang bsang gtor dag /khro bo'i rgyal po dang ldan pa/ /mgon pos de dag thams cad gsungs/ /nyi ma gcig gi nyin phyed nas/ /zla ba brgyad pa'i skad cig tu/ /dngos grub dag ni yang dag gsungs/ /dug gi las kyi gso sbyong dang / /rdzas kyis sbyor ba'i las sna tshogs/ /mngon par brjod pa yang dag 'byung / /ma lus pa ni bshad du gsol/ /gang gis dngos grub thob pa yi/ /mgon po gzhan ni ma mchis te/ /gtso bo khyod spangs gzhan med do/ /byang chub sems dpa' dpa' bo rnams/ /nyan thos rang rgyal rdzu 'phrul che/ /gang yang 'jig rten par grags pa'i/ /tshangs sbyor rdzu 'phrul cher bshad pa/ /de rnams kyi yang mgon skyabs ni/ /gtso bo khyod spangs gzhan ma mchis/ / de nas byams pa la sogs pa'i byang chub sems dpa' rnams dang / phyag na rdo rje la sogs pas slar yang bcom ldan 'das la gsol ba btab pa/ chos kyi rgyal po sngags kyi sgo/ /bcom ldan 'das kyis bshad du gsol/ /byang chub sems dpa'i spyad spyod pa'i/ /byang chub sems dpa'i don gyi phyir/ /gsang sngags spyod pa'i sgrub pa'i thabs/ /gang gis bcom ldan nyid kyis gzigs/ /chos kyi dga' bde thob pa ni/ /sa gzhi'i steng na rnam par gnas/ /gsang sngags mnyes par rab brtson zhing / /mthong ba'i chos la bde thob pa'i/ /sems can sa stengs gnas pa yi/ /the tsom med par 'byung bar 'gyur/ /thams cad dbang phyug go 'phang 'thob/ /'jigs pa thams cad rnam par spangs/ /gsang sngags rgyal po rdzu 'phrul che/ /'jig rten 'di ru byung bar 'gyur/ /sdang ba'i srin po thams cad dang / /'byung po gdon dang sha za dang / /'jigs su rung dang drag shul las/ /sems can rnams la gnod bshad pa/ /gsang sngags stobs chen dran pa yis/ /de dag thams cad 'byung mi 'gyur/ / sa stengs sems can ma rungs pa/ /rnam pa sna tshogs gzhan yang bshad/ /de rnams gdul bar bya ba'i phyir/ /rtog pa 'di ni rab tu gsungs/ /lha dang klu dang gnod sbyin dang / /grul bum dang ni lus srul po/ / smyo byed rgyu skar thams cad dang / /ma rungs gza' sogs bshad pa dang / /sems can sdig can de rnams la/ /khro bo 'di ni rab tu gsungs/ /tshangs sogs gdon gyi tshogs kun dang / /de bzhin rgyal po nyan thos dang / / sa bcu'i byang chub sems dpa' yis/ /gang zhig bshad par mi nus shing / /de dag thams cad thal bar rlog /gsang sngags bzlas pa rdzu 'phrul che/ /snying la gnas pa yang dag bsam/ /gsang sngags zhes bya mthong dka' zhing / /ma lus pa ru thal bar brlags/ /tshangs pa la sogs dkyil 'khor dang / /byang chub sems dpa' bdag nyid che/ /dbang po'i gnas bcu bdag po yis/ /'di ni bzod par mi nus te/ /khro bo'i rgyal po rol pa ni/ /sdang ba'i sems can ci nas kyang / /ras bal 'da' ba mtshungs par brtag /ming nas smos pa tsam gyis ni/ /phyogs bcu rnams su 'byer bar 'gyur/ /de bas rnam pa thams cad kyis/ /gsang sngags 'di ru bzlas pa ni/ /rtag par rgyun du dran par bya/ /gsang sngags dngos grub 'dod pa yis/ /thams cad du ni 'jigs med par/ /sngags gnas sa stengs 'di ru bya/ /gsang sngags mgon po dran pa dang / /'chang ba dang ni rtag tu zlos/ /me yi nang du gnas pa ni/ /mche ba gtsigs pa yi ni skus/ /'byer te rtag tu 'jigs pa med/ /mtho ris them skas lta bur dga'/ /'jigs shing skrag pas 'khrigs pa na/ /rgyal po chen pos 'jigs pa sel/ /chom rkun gseb tu chud pa na/ /seng ge rnam par bsgyings pa'i sku/ /khro bo'i rgyal po rdzu 'phrul che/ /de yis rtag tu dran par byas/ /rims dang so mig gzer zug dang / /rked pa'i rtsibs logs lus las byung / /rnam pa sna tshogs kun 'byung ba'i/ /sa stengs lus can nad rnams ni/ /gsang sngags dran pa tsam nyid kyis/ /de dag thams cad zad par 'gyur/ /khro rgyal bsam gyis mi khyab pa'i/ / mthu dang stobs ni brtul phod pa'i/ /kun mkhyen las gzhan sa stengs na/ /rtag tu bzod gnas su zhig yod/ /'khor los sgyur ba'i mthu stobs ni/ /ji ltar smra bar mi nus pa/ /de bzhin khro rgyal bsgyings pa yis/ / brjod par yang ni mi nus so/ /ji ltar 'khor los sgyur ba yi/ /yon tan mi g.yos bgrang mi nus/ /de bzhin khro bo'i rgyal po yi/ /stobs ni brjod par mi nus so/ /rdo rje pad ma'i rigs zhes pa'i/ /khro bo'i rgyal po thams cad kyang / /khro bo'i mngag gzhug pho nya dang / /bka' nyan pho nya rdzu 'phrul che/ /de rnams kyis ni khro bo 'di/ /'khor los sgyur ba zhes su brjod/ /khro bo'i rgyal po blo ldan gyis/ /mthu stobs de ltar bshad pa ni/ /sangs rgyas kun gyi dpal gcig 'di/ /de yi dpa' bo zhes su bshad/ /gang gsungs bden pa'i tshig gyur pas/ /mi slu ba ni nyid yin no/ /de phyir 'di ni mi g.yo bas/ /mi g.yo ba zhes mngon par brjod/ /mi g.yo ba yi sa thob pa/ /bsam gtan rtse gcig blo yis gnas/ /nyan thos sa la sogs pa yi/ /bdud rnams kun gyis mi g.yo ba'i/ /de nas mgon pos mtshan gsol to/ /rdzogs pa'i sangs rgyas rkang gnyis mchog /byang chub sems dpa' dpa' bo rnams/ /'di ni don kun 'grub par byed/ /gang yang 'das pa'i sangs rgyas dang / /gang yang de bzhin ma byon pa/ /mgon po da ltar bzhugs pa gang / / 'gro la phan phyir cho ga ni/ /de dag kun gyis 'di gsungs pa/ /sangs rgyas spyan zhes bya bar bshad/ /sems can khams ni thams cad kyi/ /bstan pa gang yin bsrung bar mdzad/ /sangs rgyas kun gyi sprul pa gang / /byang chub sems dpa' mthu chen gyis/ /gang yang gsang sngags grangs med pa/ /sems can phan 'dogs bzhugs par gsungs/ /lag na rdo rje blo ldan pa/ /'di dag thams cad yang dag bshad/ / mi gang sdig pas bsgribs med kyi/ /sems can snang ba bskyed par byed/ /mi byed sdig ba'i zhags pas bcings/ /bla na med pa'i go 'phang 'gyur/ /khro bo'i rgyal po blo dang ldan/ /sngags pas ma bsgrubs pa yang 'grub/ /khro bo'i rgyal po'i byin brlabs kyis/ /'dod pa ma lus 'grub par 'gyur/ /de nas thams cad dang ldan pa'i 'khor de dag ngo mtshar te/ dga' zhing mig rgyas pas mgrin gcig dang ngag gcig tu tshig snyan pos gsol pa/ e ma'o sangs rgyas thams cad ni/ /thabs dang shes rab bsam du med/ /thugs rjer gyur pa'i thugs kyis ni/ /mtshungs med dam tshig bshad du gsol/ /gang yang sems can 'jigs pas 'khrigs/ /sa stengs thams cad 'jigs med cing / /gang gis gus chen rang bzhin gyis/ /de yi ngan 'gro stongs par 'gyur/ /de nas byang chub sems dpa' sems dpa' chen po lag na rdo rjes bcom ldan 'das la 'di skad ces gsol to/ /bcom ldan 'das khro bo'i rgyal po'i dkyil 'khor 'dir zhugs pa tsam gyis sems can thams cad rgyal po'i dbang phyug gi go 'phang 'thob par 'gyur ba/ bgegs dang log 'dren thams cad kyis 'tshe bar mi nus pa/ dngos grub myur du 'thob par byed pa/ dbang phyug thams cad yang dag par ldan par byed pa bshad du gsol/ de skad ces gsol pa dang / bcom ldan 'das kyis byang chub sems dpa' chen po lag na rdo rje la bka' stsal pa/ lag na rdo rje legs so legs so/ /lag na rdo rje slar yang shin tu legs so/ /khyod kyis kho bo la gsol ba btab pa'i don 'di rigs kyi bu nyon/ khro bo'i rgyal po'i dkyil 'khor 'di gang gis thos pas sa stengs su thams cad ngo mtshar zhing rgyas te nus pa med pas bzod par mi nus te/ de nas sa stengs su 'gyel bar 'gyur te/ de nas bcom ldan 'das kyis de'i tshe bdud thams cad bsreg pa'i me lce yang dag par byung ba zhes bya ba'i ting nge 'dzin la snyoms par zhugs nas gsang sngags kyi rgyal po 'di sems can thams cad kyi bsam pa yongs su rdzogs par mdzad pa/ dus gsum kun gyi byang chub sems dpa' ma lus pa bskyed par byed pa/ sems can thams cad kyi don gsal bar byed cing yod pa/ de bzhin gshegs pa thams cad bsod nams bsam gyis mi khyab pa la 'khrungs pa/ sems can thams cad kyis shin tu mthong bar dka' ba/ mthong ba'i bgegs rnams rab tu 'joms pa/ ngan 'gro thams cad rnam par sbyong bar byed pa/ nad thams cad rab tu zhi bar byed pa/ bsam pa thams cad yongs su rdzogs par byed pa/ gdon ma rungs pa thams cad la gso sbyong mdzad pa/ bdud kyi dgra thams cad las rab tu zhi bar mdzad pa'i sngags bka' stsal pa/ na maH sar+b+ba ta thA ga te b+h+yaH sar+b+bA sha pa ri pU ra ke b+h+yaH sar+b+ba thA/ tsaN+Da ma hA ro Sha Na s+pho Ta ya hU~M traT hA~M ma~M/ bcom ldan 'das kyis gsang sngags kyi rgyal po bka' stsal ma thag tu thams cad dang ldan pa'i 'khor de dag chu shing gi sdong bu lta bu dang nags tshal chen po lta bur bab chol du kha bub tu 'gyel bar gyur to/ /stong gsum gyi stong chen po 'jig rten gyi khams 'di rnam pa drug tu g.yos par gyur pa dang / ldeg pa dang / 'gul ba dang / rab tu 'gul ba dang / g.yos pa dang / rab tu g.yos pa dang / chem chem/ rab tu chem chem mo/ /lho phyogs mtho na nub phyogs dma' bar gyur ro/ /gzhan yang ngo mtshar zhing rmad du byung ba mthong ste ngo mtshar che bar gyur pa'i 'jig rten gyi khams rnams su sangs rgyas kyi zhing khams sna tshogs pa yang mthong ngo / /gang yang gzhi dang snying po me tog gis brgyan pa'i 'jig rten gyi khams 'di yi bgegs sna tshogs dang / srin po dang bdud kyi rigs sna tshogs dang / gzhan yang gdug pa'i sems dang ldan pa de dag thams cad thal bar brlags te kha cig kha sbub du gnas/ /'jig pa'i bskal pa lta bur ni/ /dud pa dud skyar kun tu gnas/ /nyi ma zla ba rdzu 'phrul che/ / 'di yi snang ba 'ang mun par 'gyur/ /mun nag smag ni shin tu 'jigs/ /glog 'gyu yul na 'jigs su rung / /phyogs kun du ni 'o dod 'bod/ /sa gzhi thams cad kun du 'khrug /gza' dang rgyu skar tshogs kun dang / /gang yang lha yi gtso bo gzhan/ /de dag thams cad 'jigs dngangs nas/ /sems med kha sbub tu ni 'gyel/ /lha min mi 'am ci dang klu/ /gnod sbyin srul po lus srul po/ /'di rnams lus kyis ma bzod pas/ /dug gis btab bzhin gnyid yur te/ /'di dag thams cad gcig tu 'bar/ /bskal pa'i me las yang dag byung / /'di dag thams cad 'bar zhing mched/ /sangs rgyas zhing ni kun nas kyang / /byang chub sems dpa' bdag nyid che/ /sa bcu gnas kyi dbang phyug rnams/ /de yang gnyid bro yur bar 'gyur/ /kha sbub tu ni sa la 'gyel/ /khro mo mngag gzhug bka' nyan pa/ /pho nya pho mo bran dang bcas/ /lus 'di'i tshugs ni mi thub par/ /sems stor kha sbub 'gyel bar gyur/ / gang yang nyan thos bse ru dang / /'jig rten rdzu 'phrul chen po gzhan/ /lcags ni shing phye thul ba ltar/ /de yang gnas su 'gyel bar 'gyur/ /tshangs pa brgya byin la sogs lha/ /lha min gnod sbyin rdzu 'phrul che/ /de dag thams cad thal bar 'gyur/ /sdug bsngal 'khrigs par 'gyur na ni/ /chung zad slar yang phan tshun du/ /byed cing 'jigs pas tshig smras te/ /bu gcig 'di ni ji ltar 'gyur/ /sa gzhi 'di dag shin tu 'jigs/ /bde gshegs go 'phang ma gtogs pa/ /zhi ba ci yang ma mthong ngo / /bdud dang bgegs kyi gzugs rnams kyang / /rnam pa sna tshogs yang dag gnas/ /lus ni 'gyur ba lta bu ru/ /sa stengs na ni shing bzhin gnas/ /tshangs pa la sogs yul rnams ni/ /'di dag thams cad 'bar bar mthong / /mnar med gyur pa'i lus kyang ni/ /dud ka dud skyar kun tu gnas/ /sangs rgyas zhing ni ma lus pa/ /'di dag thams cad bsreg par byed/ /snying rje zhugs shing yang dag ldan/ / phyag na rdo rjes 'di skad gsol/ /sems can don du ma bsags pas/ /bcom ldan bkod pa bsdu ru gsol/ /byis pa sdug bsngal rten can gyis/ /'di ni bzod par mi nus so/ /'gro ba'i sems can kun gyi mgon/ /thugs rje rnams ni byung bar mdzad/ /thugs brtse gcig pu'i ri las 'khrungs/ /sems can sdug bsngal 'grol mdzad pa'i/ /'gro ba'i mgon po khyod gcig pu/ /gnyen du gyur pa 'ang khyod kho na/ /'khor ba'i rgya mtsho las sgrol ba'i/ /mnyan pa 'ang ni khyod gcig pu/ /nad rnams thams cad gso mdzad pa'i/ /khyod nyid gcig pu sman par 'gyur/ /dam pa'i lam ston pa yang khyod/ /khyod ni 'khor ba'i rgya mtsho ba/ /sa stengs nyid ni khyod 'ba' zhig /mgon po thugs rje bskyed nas ni/ /sa gzhi thams cad yang dag 'phel/ /dpag bsam shing bzhin don gnyer ba'i/ /yang dag dpa' bo byang chub sems/ /sa bcu'i gnas kyi dbang phyug rnams/ / mgon po khyod nyid gcig pus 'phel/ /thugs rje pad ma 'dam skyes bzhin/ /sems ni ngan par 'gyur ba yi/ /'gro ba'i mgon pos bsreg par mdzod/ /snying po med pa lta bur 'gyur/ /chu shing gi ni sdong po bzhin/ / phye ma leb bzhin skye bo rnams/ /drag tu bod pa'i lung thob pa/ /bsregs kyang zug rngu mi 'byung ste/ /de bzhin 'dir ni byis pa rnams/ /bgegs dang log 'dren thams cad dang / /grangs med bcu yi stobs kyi bdag / gsang sngags rgyal po brjod pa yis/ /de dag thams cad thal bar brlag /de bas rnam pa thams cad kyis/ /bcom ldan khyod la bdag gsol 'debs/ /khyod kyi sras po bdag mnyes gshin/ /bdag gi de ni gsan pa'i rigs/ /de nas bcom ldan 'das shAkya thub pa thugs rje dang ldan pa'i thugs mnga' bas phyag na rdo rje sems can la phan pa'i phyir/ thub pa mchog gi gtso bo la/ /gsol ba btab pa'i tshig 'di ni/ shin tu rgya che bu lags so/ /de nas bcom ldan 'das kyis de'i tshe sems can thams cad kyi srog 'byung zhing ye shes 'khrung ba zhes bya ba'i ting nge 'dzin la snyoms par zhugs so/ /snyoms par zhugs nas rig pa'i rgyal mo 'di sems can thams cad la phan par byed pa/ 'dus byas thams cad rab tu 'gyur bar byed pa/ 'jigs pa thams cad rab tu 'jigs par byed pa/ dgra thams cad dang me dang chu sel bar byed pa/ sems can thams cad kyi dpal phun sum tshogs shing skal ba bzang ba/ sangs rgyas dang byang chub sems dpa' thams cad dang / nyan thos dang / rang rgyal skyed par byed pa/ 'jigs pa thams cad bsreg par byed pa/ rnam par 'tshe ba thams cad 'joms par byed pa/ sangs rgyas dang byang chub sems dpa' thams cad kyi bzhed pa gsungs pa/ na maH sar+b+ba ta thA ga te b+h+yaH sar+b+ba sha ba ri pU ra ke b+h+yaH sar+b+ba thA/ oM sar+b+ba sa~M ska ri pa ri Sh+kA ba ra bi shud d+ha/ d+har+m+ma te ma hA ya na pa ri bA re swA hA/ de nas 'di gsungs pa tsam gyis stong gsum gyi stong chen po'i 'jig rten gyi khams thams cad du bde ba thams cad gtad cing kun nas rgyal ba dang ldan pa/ dbang phyug go 'phang brnyes pa ni/ /rang gi lus la sems bcug pas/ /ngang tshul bzang por yang dag 'byung / /sdig pa thams cad rab tu zhi/ /bcom ldan 'das ni gzigs par 'gyur/ /rig par gyur pa'i sems dang ldan/ /thams cad rang gi srog dang ldan/ /rdzu 'phrul brtul phod par gyur pa/ /shin tu ngo mtshar go 'phang 'thob/ /de ni rgyal mchog spyan sngar gnas/ /rang gzhan brtul zhugs brtan 'gyur ba/ /rig pa 'di yi mthu stobs kyis/ /rang gi rdzu 'phrul g.yul las rgyal/ /sa stengs pha rol gnon pa 'byung / /thams cad dbang phyug go 'phang 'thob/ /bdud kun gyi ni gtsor gyur pa/ /sa stengs gyur to cog kun ni/ /'jigs pa thams cad rnam par bral/ /ngan 'gro zhes ni gang bshad pa'i/ /shin tu sdug bsngal gting gnas te/ /ngan 'gro thams cad rnam dral nas/ /bde ba yi ni snod du 'gyur/ /dmyal ba'i me zhes bya ba yi/ /shin tu blta dka' 'jigs rung de/ /de tshe lhag par bsil bar 'gyur/ /ston ka'i zla ba'i cha ltar gnas/ /gang yang dmyal ba zhes bshad pa/ /shin tu grang ba'i mun nag 'khrigs/ / drag shul me chen 'bar ba bzhin/ /de dag thams cad grol bar 'gyur/ /yi dags zhes bya'i sdug bsngal gang / /shin tu mi bzad 'jigs su rung / /rig pa 'di yi mthu stobs kyis/ /'di dag thams cad bral bar 'gyur/ / gang yang 'khor de thams cad ni/ /sdug bsngal gyis ni sems gdungs pa/ /bde ba thams cad yang dag gtad/ /phan tshun du ni dga' gtam smra/ /bgegs chen log par 'dren pa dang / /gzhan yang srog chags gyur pa gzhan/ / sa stengs 'byung po rang sems gnas/ /des par gyur nas 'di rnams ni/ /gcig la gcig ni blta bar 'gyur/ /byang chub sems dpa' dpa' bo dang / /tshangs pa la sogs rdzu 'phrul che/ /rang sems mdzes par rnal mar ni/ / de rnams thams cad bde ba 'thob/ /pho nya mngag gzhug bka' nyan rtsol/ /'byung po gdon dang sha za dang / /thams cad dbang phyug go 'phang 'thob/ /sa gzhi steng na rnam par gnas/ /gang yang byang chub sems dpa' brtan/ /thams cad dang ni ldan pa yi/ /rdzu 'phrul chen po 'khor rnams kyis/ /'gro la phan phyir tshig gsol pa/ /e ma'o kun mkhyen mtshungs pa med/ /thabs kyi ye shes bsam mi lang / /sa stengs khyod ma gtogs pa yi/ /'byung 'gyur gzhan ni su zhig yod/ /mtha' yas bde ba'i snod du ni/ /'di dag thams cad gang 'dzin mdzad/ /thams cad dbang phyug go 'phang brnyes/ /sa yi steng na rnam par gnas/ /srid pa sdug bsngal sngar yang med/ /de ltar shin tu mi bzad 'jigs/ /thams cad sangs rgyas sras su 'gyur/ /sems can kun la phan dga' bas/ /sems ni rtse gcig gyur pa yis/ /snyan pa yi ni tshig gis gsol/ /kun gyi gnyen du gyur pa ni/ /sangs rgyas nyid las gzhan pa med/ /sems ni smad pa'i rgyu gyur pa 'ang / /so so nas ni bde bar mdzad/ /skyes pas yang dag bstan pa ni/ /ji srid mya ngan ma 'das pa/ / de srid bar du 'khor bar zhugs/ /sangs rgyas theg pa tshul gyi mchog /byang chub sems dpa' thams cad dang / /tshangs pa la sogs 'khor rnams ni/ /thams cad stan las langs gyur te/ /gtso bo gang na bzhugs pa der/ / byang chub sems dpa' yongs su bskor/ /tshangs sogs rdzu 'phrul che ba'i lha/ /lhan cig yang dag par lhags te/ /bla med go 'phang gsol ba 'debs/ /sems can kun la phan bzhed pa/ /rdzogs sangs rgyas la bskor ba byas/ /'jig rten mgon la rab btud nas/ /'di skad kyi ni tshig gsol to/ /e ma'o sangs rgyas che ba'i bdag /sems can kun la smin par dgyes/ /'jig rten mgon po skyob pa yi/ /thabs ni mtshungs med bsam mi khyab/ / gang gis 'dir ni gnas par byas/ /sdug bsngal rgya mtsho rnam par sbyong / /'gro la sman pa khyod mthong na/ /bde ba yang dag 'byung bar 'gyur/ /de nas bcom ldan 'das shAkya thub pas thugs rje dang ldan pa'i thugs zab pas/ sgra dbyangs 'di skad kyis tshig bka' stsal pa/ byang chub sems dpa' rdzu 'phrul che/ /rdzu 'phrul ldan pa khyed la 'jigs/ /rdzogs sangs rkang gnyis mchog gi ni/ /bsam gyis mi khyab 'di dag gsungs/ /de 'dra'i chos ni brten pa ni/ /sdug bsngal gang gis slar yang ni/ /'khor bar de ltar 'ching 'gyur ba/ /bsnyen par gyur pas 'byung mi 'gyur/ /rdzogs sangs rkang gnyis mchog gi ni/ /theg pa chen po yang dag gsungs/ /lam ni yang dag bsdus nas ni/ /thams cad sdug bsngal las rab grol/ /de ni mchog gi de nyid zhi/ /sangs rgyas rnams kyi theg par brjod/ /theg pa dam pa 'di gzung nas/ /sangs rgyas nges par gdon mi za/ /'das pa'i sangs rgyas kun dang ni/ /de bzhin gang yang ma byon pa/ /mgon po da ltar bzhugs pa rnams/ /'gro la phan pa'i tshul nyid las/ /de dag thams cad yang dag gzung / /sdug bsngal zhi ba thob par 'gyur/ /de phyir rnam pa thams cad kyi/ /'di lta bu yi dam chos bsten/ /gtso bo 'di ni bsnyen gyur na/ /sdug bsngal rnams ni sel bar byed/ /gang yang byang chub sems dpa' gzhan/ /tshangs pa la sogs rdzu 'phrul che/ /sems can phan par bzhugs pa yi/ /spyan sngar snyan pa'i tshig 'di gsol/ /mgon po khyod kyis ci zhig gsungs/ / bdag gi yid kyang rten gzhan med/ /khyod nyid skyabs su gyur pa las/ /mchog gzhan zhig ni yod ma yin/ /kun gyis dbang phyug go 'phang brnyes/ /rang gi rdzu 'phrul snyems tshul gyur/ /'jigs pa kun dang rnam par bral/ /sdug bsngal thams cad rnam par spangs/ /sangs rgyas chos dang dge 'dun la/ /rdzu 'phrul chen po gus par ldan/ /theg pa chen por yang dag gnas/ /byang chub mdzad pa la sogs 'thad ces pa'o/ /de nas byang chub sems dpa' phyag na rdo rje la sogs pa thams cad dang ldan pa'i 'khor de dag bcom ldan 'das kyi zhabs gnyis la gtugs nas gsol ba btab pa/ bcom ldan 'das chos kyi rgyal po bdag cag la thugs brtse ba bskyed de/ sems can thams cad dbang phyug go 'phang thob par byed pa/ nad thams cad gso sbyong mdzad pa/ dpal thams cad dang ldan pa/ dus ma yin pa dang / bgegs thams cad 'joms par byed pa dang / dgra thams cad dang / nye bar 'tshe ba dang / chom rkun dang / mi rgod dang / rgyal po'i gnod pa dang / seng ge dang / stag la sogs pa dang / rims dang / skran dang / mtshan bar rdol ba dang / sdig sbrul gyi gnod pa thams cad 'joms par byed pa/ gang gis khro bo'i rgyal po'i dkyil 'khor gyi chos nyid mthong bas sems can thams cad kyis dbang phyug thams cad kyi go 'phang thob par 'gyur ba bshad du gsol/ de skad ces gsol bcom ldan 'das/ shAkya'i mgon po rdzu 'phrul che/ /rdo rje byung ba che ba'i bdag /snyan pa'i tshig gis bka' stsal pa/ /sa stengs kyi ni dkyil 'khor mchog /bshad par bya phyir bu khyod nyon/ /skyob pa sangs rgyas thams cad dang / /byang chub sems dpa'i gsang ba ni/ /khyod la yang dag bshad par bya/ /phan pa'i sems kyis tshur la nyon/ /khro bo'i rgyal po'i dkyil 'khor ni/ /'di dag thams cad ma gsungs pa/ /ngan pas sems ni 'khrigs pa la/ /bu khyod kyis ni sbyin mi bya/ /re shig slob dpon rab tu bshad/ /bu khyod mnyam par gzhag pas nyon/ /de ni kun du rab gnas 'gyur/ /gang mang cung zad bdag gis bshad/ /tshul khrims phun tshogs snying rjer ldan/ /bzod dang brtson ldan legs par gnas/ /gtsang zhing cho ga phun sum tshogs/ /bla ma yang ni smod mi byed/ / bdag nyid ji bzhin gzhan phan blta/ /sbyin la dga' zhing ched du brtson/ /bden pa'i tshig dang yang dag ldan/ /gtong phod la dga' mnyes gshin pa/ /lus kun yon tan phun sum tshogs/ /sangs rgyas nyan thos rgyal sras rnams/ / rtag tu mchod par 'gyur ba dang / /bla ma la gus nga rgyal med/ /'gro la gcig tu phan zhing dge/ blo gros zab mo yang dag ldan/ /dus dang dus min shes dang ldan/ /dbang po don gyi cha rig pa/ /rtag tu sems can phan par dga'/ /gsang sngags mnyes par shin tu brtson/ /dkyil 'khor 'di ru rab tu bsngags/ /rdzu 'phrul chen po lha rnams dang / /sangs rgyas nyan thos chos rnams dang / /skyob pa byang chub sems dpa' yang / /cha shas rig nas rtag pa yang / /zab mo'i don ni rab tu bstan/ /ser sna yang ni yod ma yin/ / khro ba gang yang brtse bar smra/ /bsdu ba bzhi yi ngang tshul shes/ /pha rol phyin pa drug gis brgyan/ /byang chub sems dpa'i go cha bgos/ /sgyu ma lta bu'i go 'phang gnas/ /nyan thos rnams kyi ji bzhin bshad/ /bden pa bzhi ni sgom byed pa/ /sngags pas de bzhin 'dir gsungs pa/ /byang chub sems kyis bsgom pa'o/ /byang chub sems dpa' blo ldan gyis/ /'di ni yid kyis sgom byed pa/ /bsam pa'i ye shes thob par byed/ /theg pa chen po las byung ba/ /bsdu ba'i dngos po rnam bzhi dang / /pha rol phyin nyid drug tu 'dod/ /bsam mi khyab pa'i 'bras stsol ba/ /shes rab can de sgom par byed/ /ljang gu dkar dang ser ba dang / /mdor na nag por gyur kyang rung / /ring dang thung yang mdangs bzang ba/ /phyag gis pus mor sleb pa nyid/ /rtag par rgyun du zhal ring zhing / /mgo bo mnyam par rnam par rgyas/ /smin mtshams ma chad shangs mtho ba/ /rkang pa'i long bu chung zad dmar/ /yon tan thams cad yang dag brgyan/ /sdig pa'i rgya mtsho rnam par sbyong / /chos rnams thams cad mchod par bya/ /de nyid kyang ni ston par byed/ /dkyil 'khor rnams kyi cha shes pa/ /sngags dang phyag rgya'i tshogs kyang ngo / /rjes gnang dang ni dbang bskur 'thob/ / gang zhig yang dag ye shes 'gyur/ /bla ma la gus lha dang ni/ /sngags dang phyag rgya bsdus dang ldan/ /gsang sngags rgyal po'i gsang sngags shes/ /sems can mnyes shing brtse ba smra/ /bzlas dang sbyin bsreg de nyid shes/ /zhi dang rgyas pa'i de nyid shes/ /sngon spyod dang ni dbang bya shes/ /sngags dang phyag rgya shin tu sbyor/ /bla ma yang dag bsten pa yang / /ston pa bzhin du sems par byed/ /'byung po thams cad mchod par byed/ /'jig rten pa yang de nyid rig /sems can snyom med phun sum tshogs/ /spro ba dang ni bstan par 'gyur/ /gang gi dbang phyug shes rab sngags/ /thams cad dbang du byed pa yin/ /khro bo rnams ni rtag tu bzlas/ /lha mnyes pa la ched du byed/ /tshul khrims dang ldan phun sum tshogs/ /sku dang gsung las yang dag byung / /brtul shugs kyis ni yang dag brgyan/ /rtag par thams cad skyong bar byed/ /de ltar yon tan mdor bsdus pa'i/ /mtshan nyid bdag gis bstan pa yin/ / 'di rnams yang dag yongs shes pa/ /slob dpon du ni rab tu bsngags/ /sngags kyi bzlas pa'i cho ga ni/ /gzhan du na ni 'bras med bu/ /gsang sngags rang gis mi 'grub cing / /gzhan la bstan yang 'grub pa med/ /dkyil 'khor 'bras bu bcas pa min/ /sngags kyi sgrub thabs dag kyang med/ /bsrung bar bya ba kun kyang min/ /sbyin bsreg lha yang med pa ste/ /'di ni sgom pa med gyur pa'i/ /mtshan nyid 'di ni rnam par spangs/ / de bas rnam pa thams cad kyi/ /slob dpon mtshan nyid bsngags pa yin/ /de bas gsang ba'i ye shes 'di/ /sangs rgyas thams cad 'byung bar ni/ /gsungs pa ru ni shes par bya/ /gzhan du na ni 'bras med 'gyur/ /slob dpon dang ni slob ma yis/ /rtag tu bag yod gyur pas kyang / /rtag par rgyun du bsrung bar bya/ /bdag nyid srog ni ji bzhin no/ /bskal pa bye ba brgyar yang ni/ /sangs rgyas 'byung ba shin tu dkon/ /de yang sa stengs gtso bo yis/ / bshad pa yis ni shin tu dkon/ /de phyir rnam pa thams cad kyis/ /yon tan kun gyis yang dag brgyan/ /slob dpon gyis ni rtag pa ru/ /gsang sngags yi ge bcwa lnga bzlas/ /'bum phrag gcig ni bzlas gyur nas/ /sbyin sreg kyang ni brtsam par bya/ /de ltar byas pa'i sngags shes pas/ /dkyil 'khor cho ga bri bar bya/ /gdug pa med cing bgegs kyang med/ /gzhan yang 'byung tshogs la sogs med/ /mthu stobs kyis ni bgegs byed pa/ /go 'phang 'bras bu yod ma yin/ /thams cad dbang phyug go 'phang 'thob/ /kun kyang bde bas yang dag brgyan/ /'jigs pa thams cad rnam par bral/ /the tsom med par 'gyur ba yin/ /gzhan du thams cad 'bras bu med/ / bgegs kyis glags ni btsal nas su/ /sngags pa'i lus ni 'phrog par byed/ /cho ga'i 'bras bu bya ba med/ /de ltar byas na sngags pa bdag /dkyil 'khor mchog ni bri bar bya/ /sangs rgyas gcig shos go 'phang ni/ / de ni thams cad 'grub par 'gyur/ /dbu la sa gzhi yang dag bshad/ /mnyam par gzhag pa'i yid kyis nyon/ /dkyil 'khor mdzes mchog rmad du byung / /'di ni gang du bri ba ni/ /chu klung mtsho bran yang dag bshad/ /ri bo me tog 'bras bus brgyan/ /skyed mos tshal du 'ang bshad pa ste/ /spu sdug rma byas rnam par brgyan/ /kun dga' ra ba khang bzangs dga'/ /phyugs lhas bres dang bzhi mdo dang / /gzhan yang phyi rol gang zhig tu/ /gtsug lag khang dang ri sul dang / /khang pa brtsegs dang khang pa dang / /mtshan ma gcig pa ji bzhin du/ /chu klung kun dga' ra ba dang / /de yi khong gseb khyad par du'o/ /gzhan yang rnam pa sna tshogs pa'o/ /gang du yid la 'dod par bya/ /de la sogs pa'i gnas rnams las/ /gang yang rung ba'i gnas bzung ste/ /lha ni spyan yang drang byas nas/ /yang dang yang du mchod par bya/ /yid nyid kyis ni gshegs su gsol/ /phyogs ni rab tu bcing bar bya/ /rang nyid go cha bgos nas gnas/ / lus la gtsug tor yang dag brgyan/ /lag tu rdo rje thogs nas ni/ /lha ni yid kyis byon par bsam/ /de ltar bdag nyid gnas nas su/ /skye bo bsrung ba dgod par bya/ /de ru bdag nyid byin brlabs te/ /sa gzhi gzhan la shin tu bsdad/ /pus mo gang tsam brkos nas ni/ /'bu srin rnam par bsal bar bya/ /skyon ni du ma dang bral ba/ /'bad pas slar yang rdung bar bya/ /ba yi rnam lngas byugs nas ni/ /me tog bdug pa dga' bar mchod/ /sa gzhi yi ni phyogs kun du/ /gtor ma rab tu gtang bar bya/ /me tog sil ma gcal du dgram/ /dri dang bdug pa cho ga rim/ /sbyin sreg cho ga bzhin du bya/ /rnal 'byor dge bar 'dod pa yis/ /de ltar rab tu 'bad pa yis/ /gnas su nyi ma gcig tu bya/ /legs par sbyangs par gyur pa la/ /lha ni spyan yang drang bar bya/ /khyad par du ni gtor ma dang / /dri dang me tog yang dag dbul/ /shes rab blo ldan mtshan ma bslang / /dge dang mi dge'i 'bras bu 'byung / /gal te rmi lam bzang mthong na/ /yid ni spro bar gyur pa yis/ /bdag dang gzhan ni bsgrub bya'i phyir/ /dkyil 'khor rgyal po bri bar bya/ /nang na shes rab can gyis spang / /'jigs dang rtsub pa'i mi dge ste/ /bdag dang gzhan la dngos grub med/ /de la 'bras med 'bras bu 'byung / /dkyil 'khor dngos grub 'dod pa yi/ /shes rab can gyis de dbus bri/ /de ni khru brgyad de bzhin du/ /bcu drug dag gi grangs kyang yod/ /rgyal ba mchog gis rtag tu ni/ /gtso bo lnga ni rab tu gsungs/ /de ru cha gnyis su bgos nas/ /khru tshad gang ni phyi rol yin/ /cha gcig yang dag bshad pa ni/ /dbus cha yin par rab tu brtag /khru tshad gang du gnas pa der/ /dbus su sangs rgyas bstan pa yin/ /gnyis pa rgyal ba'i sras po ste/ /mdo ru bsdus nas bstan pa yin/ /gnyis pa'i phyi rol gnas pa'i cha/ /der yang de bzhin rab tu brtag /khru tshad gang du mdor bsdus na/ /cha ni thams cad rab tu brtag /sgo bzhi rta babs dang bcas pa/ /bum pa yi ni rgyan gyis brgyan/ /sa gzhi thams cad 'bar ba ltar/ /sgo dang mtshams su rdo rje ste/ /mtshams rnams su ni gtso bo ru/ /bum pa thams cad nges par gnas/ /rdo rje rta babs bcings pa dang / /zhags pas bcings pa rnam par brgyan/ /'di dag thams cad kun byas nas/ /dbus su pad ma 'dab brgyad bcas/ /de yi snying po mdzes par ni/ /de la bum pa yang dag gnas/ /bum pa yi ni steng gi snod/ /pad ma dkar po gnas pa der/ /de la bzhugs pa 'gro ba'i mgon/ /gtso bo bstan pa'i don mdzad pa/ /skyob pa shAkya'i mgon po yi/ /lhung bzed phyag rgya rtag tu bri/ /de nas de yis kun du khyab/ /dkyil 'khor phun sum tshogs pa 'byung / /'di ltar sor mo bcu drug ni/ /skyob pa de yi dkyil 'khor yin/ /de yis thams cad rab tu bshad/ /lhag ma snam bu g.yas skor du/ /byang gi phyogs la brten nas ni/ /skyob pa 'jig rten dbang phyug bzhug /pad ma'i steng du rdo rje ni/ /kha dog dkar po gzi brjid che/ /byams pa yi ni go cha bgos/ /byams pa'i bdag nyid las byung ba'i/ /dbang ldan phyogs son phyag mtshan ni/ /de ni spyi blugs phyag rgya ste/ /ngo mtshar rtul phod bsam mi khyab/ /kun du bzang po rtag tu bri/ /me ru mtshon nas bzhugs pa ni/ /gtso bo yid bzhin nor bu bsnams/ /ye shes rgya mtsho yongs su gang / /zab mo'i don ni rnam par bsgom/ /dbang po phyogs la brten nas ni/ /ye shes uta pal bsnams pa bzhugs/ /gshin rje'i gnas su nyer mchis pa/ /kun gyi dgra yi gshed du 'byung / /gnas der bzhugs pa'i mgon po ni/ /rdo rje rtse mo'i rigs su 'byung / /bden bral phyogs su brten pas ni/ /rlung sogs de yi dbus su bzhugs/ /ye shes ral gri go cha bgos/ /khro bo'i rgyal po stobs chen bzhugs/ /khro bo grangs med pa yi mgon/ /kun du 'khor gyis yongs su bskor/ /dkyil 'khor yon tan rgya mtsho ni/ /kun nas gsal bar gyur pa yin/ /rlung gi phyogs la brten nas ni/ /rgyal ba kun bdag las byung bzhugs/ /thams cad ye shes nye bar mtshon/ /'od kyi dkyil 'khor yongs su rdzogs/ /gzugs kyi phyogs la brten nas su/ /rdo rje phyag rgya shin tu sbyor/ /pad ma dmar po'i phyogs na bzhugs/ /mdzes pas dus zad lta bur bzhugs/ /nub kyi phyogs su brten nas su/ /gang yang sa bcu'i gnas dbang phyug /de yang ji bzhin bkod nas gzhag /rang gi phyag rgya'i mtshan mas mtshan/ /de la 'og gi char gnas dang / /steng gi phyogs kyi cha nyid du/ /bdag nyid chen po skyob bral ba/ /de dag kun la dpa' bo bzhugs/ /dbus su gcig pu bzhugs par 'gyur/ /so sor byang chub la brten nas/ /shA ri'i bu ni rdzu 'phrul rdzu 'phrul che/ /de nas ye shes nam mkha' mkhyen/ /rdzu 'phrul yul ni mchog tu 'gyur/ /maud gal bu yang nyid dang ni/ /'od srungs bdag nyid chen po ni/ /rgyal mchog de nas sa stengs su/ /rta thul dang ni ba lang bdag /drag shul dbang chen changs bu can/ /ba ra dwa dza nyid dang ni/ /kun dga' bo ni dga' zhes bshad/ /sgra gcan 'dzin yang rim ji bzhin/ /'di ru ji bzhin bkod nas gzhag /lhung bzed chu skyems rnam par bsal/ /phyag na rdo rje sras po kun/ /dpung bzangs la sogs de bzhin kun/ /phyag na rdo rje nye bar ni/ /de rnams ji bzhin bkod nas gzhag /dam chos sras por bshad par ni/ /gang yang 'jam dpal la sogs gzhan/ /'jam dbyangs dang ni nye bar du/ /de dag thams cad gzhag par bya/ /gang yang khro bo yang dag bshad/ /phyag na rdo rje'i rigs las 'byung / /lho yi phyogs su brten nas su/ /'di ni rim pa bzhin du gzhag /rdo rje dgra sta yang dag ldan/ /rdo rje tho ba de bzhin no/ /shin tu drag shul yang dag bshad/ /'bar ba'i phreng ba'i 'od kyis 'khrigs/ /khro bo min pa 'ang yang dag ldan/ /rta mgrin shin tu mthong bar gnas/ /khro gnyer can dang yang dag rol/ /sgrol mar grags pa'ang bskyed par dka'/ /rang gi phyag rgya mtshan mar ldan/ /brtson pas der yang bri bar bya/ /sgrol ma khro gnyer can dag bri/ /rigs la bcom ldan ma de bzhin/ /mA ma kI dang lcags sgrog bshad/ /nam mkha' sangs rgyas spyan dang ni/ / rma bya 'od zer can nyid dang / /dug sel ri khrod lo ma can/ /rang gi phyag rgya mtshan mar ldan/ /skal ba chen po de yang bri/ /byang gi phyogs la brten nas su/ /shin tu rdzu 'phrul che bar bzhugs/ /phyag rgya gang tshe gzugs can ma/ /sku la rgyan gyis rnam par brgyan/ /pho nya pho mo de bzhin du/ /mngag gzhug pho mo shin tu rtsub/ /rang gi phyag rgya mtshan mar ldan/ /nub kyi phyogs su bri bar bya/ /sa yi dkyil 'khor zhes bshad pa/ /rgyal ba'i bdag nyid las 'khrungs lha/ /'jig rten skyong ba la sogs bri/ /sa stengs dam tshig gnas pa ni/ /lha yi rgyal po lha min che/ /tshangs pa khyab 'jug dbang phyug che/ /rang gi phyag rgya'i mtshan mar bcas/ /shar gyi phyogs la brten nas bri/ /gang yang drang srong bshad pa ni/ /sna tshogs bshes gnyen 'gro skyong dang / /ngan song gshin rje me dang mtshungs/ /gzhan yang shin tu mthong ba dka'/ /rig byed bden pa yang dag ldan/ /de ni byang gi phyogs su bri/ /nyi ma zla ba chu bdag dang / /me yang shin tu mthong bar dka'/ /gnod sbyin dbang po rtag tu ni/ /lho yi phyogs char bri bar bya/ /gang yang ma mor yang dag bshad/ /sa stengs shin tu drag pa ni/ /rang gi mchod pa'i phyag dang ldan/ /de yang nub kyi phyogs su bri/ /gang yang sring mor bshad pa ni/ /sna tshogs gzugs can 'phrul mo che/ /sems can phan pa shin tu brtson/ /de yang de yi phyogs brten bzhugs/ /shar gyi sgo na nag po bzhugs/ /rdzu 'phrul chen po skyong zhing bsrungs/ / dga' byed byang gi sgo bsrung zhing / /de bzhin lho na ngan song ngo / /nub sgor yang dag bshad pa ni/ /bgegs chen rigs las yang dag byung / /rang gi phyag rgya mtshan mar bcas/ /rdzu 'phrul chen po bsrung zhing bzhugs/ /bu gcig mdor na 'di dag ni/ /shin tu rgyas par bstan pa yin/ /sangs rgyas kun nor thams cad pa/ /sa stengs na ni gzhan ma mthong / /rtag tu bag yod par gyur pas/ /bdag nyid srog ni ji bzhin pa/ /de ltar mdzes pa'i rang bzhin bsrung / / sangs rgyas thams cad kyis ni bsrung / /byis pa so so skye bo la/ /khyod kyis yid ches par mi bya/ /rmongs pa de na rang rlag cing / /gzhan yang rlag par byed par 'gyur/ /bdag gis dam chos bshad pa 'di/ /sdug bsngal thams cad grol bar byed/ /de ni rlag par byed pa ni/ /mi shes bsgribs pas 'byung bar 'gyur/ /rdzogs pa'i sangs rgyas kyis gsungs pa'i/ /mchog 'di dad pa med pa dang / /sdig can 'jigs shing rtsub pa yi/ /drag shul mched par gyur pa la/ /bu yis cung zad mi sbyin par/ /khyod la rdzogs sangs rgyas kyis gsungs/ /rdzogs sangs rkang gnyis dam pa yis/ /shin tu gsang bar yang dag gsungs/ /khro bo'i rgyal po'i dkyil 'khor ni/ /'di dag thams cad bshad mi bya/ /rtag tu bag yod gyur pas na/ /rgyal ba'i bstan pa bsrung bar bya/ /dkyil 'khor ma mthong ba la ni/ /'di ni ston cing ster ba na/ /skyob pa sangs rgyas thams cad dang / /byang chub sems dpa' bslu bar bgyi/ /sdug bsngal kun gyi sder gyur pa/ /sdig pa can du nges par 'gro/ /sdig chen de yi gsang sngags kyi/ /dngos grub nges par 'byung mi 'gyur/ /bstan pa'i don ni mdzad pa yis/ /gtso bo dpal ldan rdo rje 'dzin/ /dkyil 'khor ma mthong ston byed kyi/ /mgo bo rdo rjes 'gems par byed/ /de yis gsang sngags mi 'grub cing / /bgegs rnams kyis kyang brlag par 'gyur/ /sngags kyi sgrub pa 'bras bu med/ /de phyir sangs rgyas kyis gsungs pa'i/ /gsung 'di bu khyod tshur nyon la/ /rna thos tsam du'ang mi sbyin te/ /dam tshig rdzogs sangs rgyas kyis gsungs/ /sangs rgyas kyis gsungs dam tshig ni/ /gang zhig shin tu 'da' byed na/ /'jig rten gsum bzhugs rdzogs sangs rgyas/ /dbang phyug bslus par gyur pa yin/ /de nas thams cad dang ldan pa'i 'khor de dag ngo mtshar du gyur nas mig bltas te/ shin tu ngo mtshar yid kyis su/ /'di skad kyi ni tshig gsol to/ /e ma'o sangs rgyas bsam du med/ /thugs rje'i dbang gis gyur pa yin/ / rgyu dang mi rgyu mi shes la/ /dam chos 'di ni rab tu gsungs/ /de rnams kyi ni ngan 'gro bcad/ /sdug bsngal thams cad 'jig par mdzad/ /gang gi lag na gnas pa de/ /bsam mi khyab par sangs rgyas gsungs/ /bgegs dang log par 'dren pa dang / /sdig can shin tu skrag pa gang / /sngags pas dkyil 'khor mthong ba yis/ /de dag thams cad zhi bar 'gyur/ /'di kun gang du gnas pa ni/ /dam pa'i chos ni gnas med do/ /sdig pa 'di dag thams cad dag /de tshe 'jigs pa las grol 'gyur/ /thams cad dbang phyug go 'phang ngo / /sems can thams cad dbang byed pa/ /the tsom med par rab tu 'gyur/ /sems can sa 'og gnas pa dang / /ji srid gdug pa'i sems can rnams/ / sa la gnas pa'i bar du ni/ /de kun dbang du byas nas ni/ /mngag gzhug de dag nyan par gnas/ /sa gzhi mthil gyi lha la sogs/ /lha 'am lto 'phye ches 'di ni/ /cung zad gang du gnas pa der/ /bdag nyid chen po bsrung bar byed/ / thams cad bka' bsgo rab tu byed/ /lha gang gnod sbyin mi yi bdag /sa gzhi steng gi rgyal po 'dir/ /ci bgyi zhes ni smra bar gnas/ /bgegs kyis nye bar 'tshe ba dang / /nad kyis sdug bsngal gzir bar byed/ /rgyal po gdug pas sngangs par byed/ /thams cad 'phrog par byed pa dang / /ma mo gdug pas 'debs par byed/ /seng ge stag dang chu de bzhin/ /sa gzhi'i steng 'dir mkha' 'gro ma/ /srin po lto 'phye 'jigs pa dang / /yul 'khor du ni mu ges yogs/ /nad rnams kun gyis 'jigs par byed/ /rims dang glo nad dbugs mi bde/ /lhog pa dang ni mtshan par rdol/ /mgo dang mig gi zug gzer dang / /lto bar zug gzer 'debs pa dang / /nad rnams kun gyis 'debs pa dang / /nye bar 'tshe ba kun gyis gdungs/ /yun du bkren par gyur pa dang / /'thab dang thab mo rtsod pa dang / /rgyal po chom rkun pho nya sogs/ /tha snyad du ni gyur pa na'ang / /bsrung chen 'di ni zung cig par/ /rgyal ba mchog gis rtag tu gsungs/ /gnod sbyin la sogs lha yi bdag /'byung po gnod sbyin mi 'am ci/ /gang yang sa stengs gnas pa yi/ /dam tshig la ni gnas pa kun/ /dam tshig dgur ni gsungs pa las/ /de rnams thams cad mi gdal lo/ /rdzogs sangs rkang gnyis mchog gis ni/ / gsungs pa'i bsam mi khyab pa kun/ /bsam mi khyab pa'i las gsungs pa/ /'bras bu'ang bsam mi khyab par 'byung / /de nas bcom ldan 'das kyis de'i tshe 'khor de dag la legs so zhes bya ba byin te legs so legs so/ / bdud thams cad kyis 'da' bar mi bya ba'i sems can thams cad kyi bsam pa yongs su rdzogs par byed pa'i tshig 'di shin tu ngo mtshar to/ /de nas bcom ldan shAkya thub/ /yid ni mgu bar gyur pa yis/ /snyan pa yi ni tshig gsungs pa/ /rdo rje dag ni chen po byung / /legs so dpa' bo ye shes che/ /slar yang rdo rje 'dzin khyed legs/ /bsam mi khyab pa'i las sna tshogs/ /rgyal sras khyed la bshad par bya/ /rgyal mchog gtso bos gsungs pa yi/ /bsam med ye shes brtul phod pa/ /gang gis nges pa 'grub pa yi/ /de dag thams cad spyad par bya/ /dkyil 'khor du ni 'jug pa dang / /mchod pa'i las dang gtor ma dang / /dri dang me tog la sogs dge/ bshad kyis bu khyod tshur la nyon/ /gang gis yang dag bsam mi khyab/ /bla na med pa'i go 'phang 'thob/ /nang gi sangs rgyas rang bzhin gnas/ /phyogs bzhi ru ni khor yug tu/ /sku ni sna tshogs mnga' ba yi/ /byang chub sems dpa' mdun bdar te/ /ji snyed nam mkha'i mthas gtugs pa/ /de snyed sems kyi spyod yul yin/ /mngon gsungs bzhin du yang dag blta/ /yon chab dbul la mdun byas te/ /sangs rgyas thams cad snyan gsan dbab/ /byang chub sems dpa' nyan thos bcas/ /gzhan yang bya ba byas pa dang / /'jig rten pa ni cho ga'i rim/ /mchod pa'i cho ga rgyas pa ru/ /yang dag cho ga shes par bya/ /ji srid sku yi dkyil 'khor ni/ /yang ni phyir zhing bltas nas ni/ /bsam mi khyab pa'i mchog stsol la/ / phyogs bcing ba ni rab tu bya/ /thugs rje'i thugs can gyur pa dang / /bsam mi khyab pa'i 'bras stsol ba/ /thams cad sems kyis bzhugs par ni/ /'jig rten mgon pos slar yang ni/ /de ltar sems kyis bsams nas kyang / /dri dang me tog dbul bar bya/ /khyad par du yang gtor ma ni/ /cho ga bzhin du dbul bar bya/ /byin nas steng gi sangs rgyas rnams/ /thugs rjer gyur pa'i thugs mnga' ba/ /bltas nas 'khor ba'i sdug bsngal ni/ /gtso bo de ru blta bar bya/ /de nas lag pas me tog dang / /bdug pa blangs nas snying gar gzhag /de la gsol ba gdab par bya/ /thugs rje'i ro gcig tu gyur pa/ /'gro ba phan par mdzad pa yi/ / ji snyed rdzogs sangs rgyas bzhugs pa/ /de snyed bdag gis 'dod pa yi/ /'bras bu yang dag thob par mdzod/ /de ltar phyogs rnams thams cad du/ /rgyal ba'i gnas su gsol ba gdab/ /de nas yang dag bsam byas pa'i/ / rjes su rgyal ba'i sras po yang / /yon tan la sogs cho ga yis/ /dri dang me tog sogs slar yang / /mngon sum bzhin du skyob pa ni/ /mnyam gzhag gyur pas mchod par bya/ /rang gi skur gyur thams cad ni/ /de bzhin rang gi mtshon char ldan/ /rang gi cha byad mtshon char ldan/ /'jigs pa med par bsam par bya/ /'di dag thams cad mchod sbyin phyag /cod pan mgon bor gnas par bshad/ /bsam pa thams cad rdzogs mdzad pa/ /skal ba chen po bsam par bya/ /de ltar dkyil 'khor mgon po ni/ /mchod sbyin bdag nyid bsam par bya/ /gtso bo bstan la sman mdzad pa/ /rnam pa kun du bsam par bya/ /de nas mkhas pas mar me dang / /mchod yon zhal bsil shin du mdzes/ /dri dang me tog mar me dang / /bdug pa gtor ma de bzhin du/ /zhal zas de la dbul bar bya/ /chan dang 'o thug de bzhin no/ /ras kyis mgrin pa bcings pa yi/ /bum pa bcu drug gzhag par bya/ /gdugs dang rgyal mtshan ba dan dang / /rta dang glang po bzhon pa'i mchog /dril bu'i sgra ni rab tu snyan/ /rol mo rin chen khyad par du/ /bye ba grangs ni med pa yi/ /mchog nyid kyang ni dbul bar bya/ /khyad par du yang snyan pa'i sgra/ / dbyangs glu sos dal yid 'phrog pa/ /dril bu'i rol mo khyad par du/ /dkyil 'khor dge ba mchod par bya/ /de ltar cho ga bzhin mchod nas/ /sor mo bcu yi thal sbyar te/ /smon lam rab tu 'phel bya'i phyir/ /rgyal mchog la sogs rab tu 'dud/ /de nas de byung slob ma ni/ /blo ldan dkyil 'khor du bos te/ /de tshe gsum la skyabs 'gro sbyin/ /dkon mchog gsum la gus par ldan/ /byang chub sems ni rnam dpyad pa/ /ma lus par ni gzung bar bya/ /rtag tu bla ma la gus shing / /blo gros zab mo yang dag ldan/ /spro chen blo gros phun sum tshogs/ /bzlas la dga' zhing ched du byed/ /bsngags shing tshul khrims phun sum tshogs/ /gtong la dga' zhing shin tu brtson/ /dbang po drug ni rab tu ldan/ /sgyu rtsal cho ga rnam par mkhas/ /spro ba che dang sems dpar ldan/ /byas pa shes shing byas pa gzo/ /pha dang ma la shin du gus/ /dkon mchog gsum la shin du nges/ /sangs rgyas nyan thos chos rnams dang / /'jig rten pa rnams mchod par byed/ /dad pa dang ni thugs rjer ldan/ /nad med dbang po ma tshang med/ /sems can phan par yang dag ldan/ /sdig pa'i sgra ni rab tu 'joms/ /log pa'i lta ba rnam par bral/ /yang dag lta ba yang dag bstan/ /ser zhing ljang bu dkar ba dang / /nag par gyur kyang mdangs bzang ba/ /gang yang lus ni rab tu drang / /mgo bo shin tu rgyas bcas pa/ /sna ldan smin mtshams bar ma chad/ /mig dang rdzi ma yang dag ldan/ /gang yang mnyam pa nyid du rgyas/ /de bzhin mgo bo gdugs lta bu/ /rked pa rgyas shing yang dag ldan/ /rkang pa shin tu gnas pa dang / /de sogs yon tan yang dag ldan/ /de tshe bla mas brtags na ni/ /lnga 'am brgyad ni gzung bar bya/ /grangs med yang dag 'dod tshad ni/ /de nas de la sbyin par bya/ /gsum la skyabs 'gro sdig pa bshags/ /bdag nyid dbul ba de dag la/ /sangs rgyas byang chub ched du sbyin/ /byang chub sems ni ma lus pa/ /blo gros ldan pa'i mi yis gzung / /de dag ma lus yang dag bya/ /slar yang dam chos bshad par bya/ /bskal pa bye ba grangs med du/ /dal 'byor shin tu rnyed par dka'/ /u dum ba ra'i me tog ltar/ /brgya lam na ni res 'ga' zhig /de bas kyang ni 'jig rten mgon/ /skyob pa shin tu rnyed par dka'/ /gtso bo gsang sngags tshul yang ni/ /sa stengs gsum yang de bzhin no/ /shin tu sdug bsngal 'jigs pa yang / /'khor ba'i rgya mtsho 'di ru bu/ /sa stengs gsang sngags ma gtogs pa/ /skyob pa su yang ma mthong ngo / /de bas rnam pa thams cad kyi/ /'khor ba'i skyon ni spong 'dod pas/ /rgas dang na dang 'jigs pa dang / /'chi ba'i 'jigs pa rtsub bltas nas/ /lam mchog 'di ni bsten pa na/ /sdug bsngal thams cad rgyun chad 'gyur/ /gdos chad pas bcing mtha' yas dang / /gzhan yang mi sdug ba yi tshogs/ /lam mchog 'di ni bstan pa ni/ /gang du mi 'byung shin tu dkon/ /nye du mdza' bo sdug bsngal dang / /grogs po gnyen dang snag gnyen mtshams/ /longs spyod phun tshogs sdug bsngal dang / /nad kyi sdug bsngal gyis gdungs dang / /zas kyis 'jigs pa'i sdug bsngal dang / /gang yang sa stengs 'khor gnas pas/ /tshul 'di bsten par gyur pa na/ /'byung ba ru ni mi 'gyur ro/ /bcu dang brgyad dang de dang lnga/ / gsum bskyabs 'gro dus khrims ni/ /bslab pa byin te blang bar bya/ /sangs rgyas bstan pa shin tu dkon/ /sdom pa yang dag blangs nas su/ /lus can rnams kyi srog bzhin du/ /bsdams par gyur pa bsrung bar bya/ /dal 'byor phun sum tshogs pa dkon/ /gsang sngags spyod pa las byung ba'i/ /dang po nyams gcig bsten par bya/ /yid bzhin nor bu lta bu'i sku/ /zhi ba'i sangs rgyas go 'phang 'thob/ /lam 'di mchog ste dpal dang ldan/ /bsam gyis mi khyab 'bras bu stsol/ /mi g.yo bas ni bsten gyur nas/ /bla na med pa'i go 'phang 'gyur/ /'di ni mchog gi de nyid zhing / /sdug bsngal thams cad rnam par sbyangs/ /shin tu gus pa dang ldan pa/ /theg pa chen po 'thob par 'gyur/ /de bas khyod kyis theg chen la/ /slu ba med par gus par gyis/ /gang gis khyod ni 'gro ba na/ /de bzhin gshegs pa 'byung bar 'gyur/ /sems can kun la phan pa'i yid/ /bsam pa thams cad rdzogs par byed/ /khyed ni theg pa gsum 'chad pa/ /tshul las gnas pa de nas 'byung / /zab mo yi ni blo gros ldan/ /zab mo'i don ni ston byas pa/ /rgyal ba'i tshul ni ston pa na/ /de las the tshom med pa 'byung / /gdod nas zhi la gnas med pa'i/ /dam pa'i chos ni de nas bshad/ /sems can sus thos thams cad kyang / /rgyal ba'i sras su skye bar 'gyur/ /'di na bdag med srog kyang med/ /dbang phyug kyang med byed pa'ang med/ /'jig rten byed po sems can med/ /skyes pa med cing ma ning med/ /gang zag kyang med gnas kyang med/ /gang du tshor ba byed pa med/ /gtso bo yod min khyab pa'ang med/ /phra ba med cing gsal ba 'ang med/ /rgyu 'am gzhan yang med pa ste/ /rang gi ngo bo rang bzhin med/ /bdag gi ba yi rang bzhin med/ /sa stengs na ni rtag pa med/ /thams cad sgyu ma'i las byung ltar/ /byed po la sogs rnam par spangs/ /'di dag thams cad stong par lta/ /ye shes go 'phang du ni brtag /bdag dang srog la sogs pa kun/ /byis pa 'ba' zhig gis ni brtags/ /'di ni bdag med sems can med/ /'dod med 'ba' zhig las byung ba/ /sgyu ma dang ni smig rgyu dang / /dri za'i grong khyer rmi lam ltar/ /dngos po thams cad stong pa nyid/ /chu shing lta bur yang dag gnas/ /gzung du med cing brjod du med/ /dbu ba chu bur lta bur gnas/ /sgyu ma skye ba skye ba med/ /nam mkha' lta bur stong pa nyid/ /nam mkha' lta bur gos pa med/ /dag par kun du yang dag gnas/ /zhi ba'i mchog gi de nyid de/ /rnam pa mchog gis rtag tu gsungs/ /de 'dor ye shes mchog thob pa'i/ /de bzhin gshegs pa 'byung 'gyur ro/ /de nas sngags pas gsol 'debs pa'i/ /slob ma sdig dang bral byed pa/ /ral gri'i phyag rgyas bsrung ba bya/ /de'i rjes su go cha bgo/ cho ga shes pas bsrung bar bya/ /slob ma la ni phan 'dod pas/ / sngags kyis tshim par byed pa yi/ /yi ge bcwa lnga sngags pa yis/ /thams cad du ni rab brjod do/ /yang dag sngags kyis gsang gtor bya/ /gdong ni ras kyis bcings nas su/ /mgo bo sa la btud par bya/ /dkon mchog gsum la sems phyogs te/ /snying rje dang ni ldan pa'i sems/ /skyob pa thams cad mngon sum du/ /gyur par bsams te zhugs par bya/ /kun kyang dbang phyug go 'phang 'thob/ /'dzin pa thams cad rnam par spangs/ /ji bzhin yod pa'i sangs rgyas kyang / /the tshom med par 'byung bar 'gyur/ /bla ma la ni yon phul nas/ /dbang bskur bar ni gsol ba gdab/ /gus par gyur pa'i rang srog gis/ /bla ma la ni 'dud par bya/ /bla ma la ni dbul ba'i yon/ /rang gi lus ni snyan mnan nas/ /bdag nyid dngos po dbul bar bya/ /gzhan du 'bras bu med par 'gyur/ /rin chen glang po rta dang phyugs/ /gzhan yang yid la gang bzhed pa/ /slob ma'i blo bdag gus pa yis/ /de dag thams cad dbul bar bya/ /de bzhin na bza' rab tu dbul/ /bla ma gang gis mnyes byas shing / /bla ma la ni yon phul bas/ /bsam mi khyab pa'i 'bras bu gsungs/ /de bas rnam pa thams cad kyis/ /rgyal ba skyes mchog 'di mchod bya/ /rdzogs sangs rgyas su de 'dir bshad/ /sa bcu'i gnas kyi dbang phyug dang / / 'jig rten skyong ba thams cad bshad/ /brgya byin la sogs bdud tshogs bzhin/ /tshangs pa khyab 'jug drag po dang / /klu mo dul ba'i sras po dang / /gza' dang rgyu skar tshogs thams cad/ /phung po yang ni rdzu 'phrul che/ /zag pa zad pa bshad pa dang / /thams cad de nyid du brjod do/ /dpal ldan gdul dka' 'dul mdzad pa/ /phyag na rdo rje sa stengs 'di/ /dpal ldan bstan pa'i don mdzad pa/ /dam pa'i lam gyi gdams ngag can/ /rdzogs sangs rgyas kyi ci bzhin sku/ / yon tan kun cig yang dag bshad/ /slob dpon gyi ni yon tan bu/ /skyon ni nam yang ma yin te/ /yon tan bzung bas dngos grub 'thob/ /skyon rnams kyis ni dngos grub brlag /de yi grib ma 'gom pa ni/ /mchod rten bshig pa zhes su bshad/ /bsam mi khyab pa'i 'bras ster ba/ /'di ni sangs rgyas lta bur blta/ /brtan dang g.yo ba yi gsang ba/ /mchog ni thams cad ston byed la/ /khyed kyis slob dpon smod pa dang / /rmi lam du yang phrad mi bya/ /gang yang slob dpon smod pa de/ /bgegs dang log par 'dren pas 'dzin/ /sdig can sems can thag ring du/ /sa stengs su ni spang bar bya/ /mnar med la sogs 'jigs rung bas/ /dmyal bar yang dag brtan pa gang / /slob dpon la ni smod pa gang / /de ru yang dag 'tshed par 'gyur/ /de bas rnam pa thams cad du/ /sangs rgyas 'bras bu 'dod pa yis/ /bsam gyis mi khyab 'bras ster ba/ /'di ni rmad byung gus pas mchod/ /dbang bskur cho ga rgyas par ni/ /bshad par bya yis bu khyod nyon/ /gang du dbang bskur bar gyur na/ /'jig rten sangs rgyas lta bur blta/ /de ru pad ma 'dab brgyad pa/ /khru gang tshad du brjod pa yin/ /nang na gnas pa'i rdo rje ni/ /'od zer gyis ni rnam par brgyan/ / bum pa brgyad ni yongs rdzogs par/ /gtsang ma'i chu yis rab tu bkang / /mgrin pa ras yug bzang pos bcings/ /lo 'dab bzang pos kha brgyan byas/ /khro bo'i rgyal pos bsngags nas ni/ /sman dang rin chen kun gyis bkang / / gdugs dang rgyal mtshan ba dan dang / /rol mo'i sgra sogs yid 'phrog pa/ /snyan cing rgya che ba yi tshogs/ /rab bsngags kun du mngon dga' bas/ /sngags pas de tshe dbang bskur te/ /skyob pa mngon sum bzhin du bya/ /dbang bskur byas ma thag tu ni/ /dpal ldan byang chub rtogs phyir sbyin/ /de nas gzung ste bu khyod 'di/ /sa stengs sangs rgyas sras po ni/ /brtan dang g.yo bas mchod pa ru/ /byang chub sems dpas gzung bar bya/ /de ni mi mthong bar gyur pas/ /byang chub sems dpa' brjod pa yin/ /bdud dang bgegs dang sbrul dang ni/ /gzhan yang log par 'dren pa yin/ /rgyal sras byang chub sems dpa' ni/ /de phyir mthong bar mi 'gyur ro/ /ma bsgrubs pa yang myur du 'grub/ /bdud rnams thams cad 'joms par byed/ /dkyil 'khor 'dir ni dbang bskur ba/ /de ni nges par sangs rgyas nyid/ /'dir ni sdug bsngal 'jigs rung ba'i/ /sdug bsngal slar yang 'byung mi 'gyur/ /thams cad dbang phyug go 'phang 'thob/ /'jigs pa thams cad rnam par spangs/ /yon tan kun gyis de bzhin brgyan/ /slob ma la ni sman bya'i phyir/ /de nas sbyin sreg rab tu brtsam/ /thab khung dag kyang bya ba ste/ /de la kha ran dang bcas nas/ /de yi dbus nas rdo rje ni/ /zhi ba ched du rmad du byung / /de yi thab khung khor yug tu/ /dris kyang rjes su byug par bya/ /me yi thab ni khru gang du/ /de bzhin gshegs pas yang dag gsungs/ /me ni kun du 'byung ba'i shing / /me thab 'di ru me sbar bya/ /de nas mchod yon zhal bsil bya/ /bsang gtod sa stengs su ni brjod/ /ku sha rtse mo dgram par bya/ /slar yang rtsa bas bskor bar bya/ /de ltar 'di dag thams cad bya/ /mar dang sbrang rtsi byug pas mdzes/ /gang zhig yam shing las rnams kyis/ /rnam par mkhas pas sbyin bsreg bya/ /sems ni snying rje dang ldan pa/ /slob ma re re brjod nas su/ /dpal ldan bsreg blugs bsreg par bya/ /nyi shu tham pa nyid kyang ngo / /'di dag thams cad byas nas su/ /sems ni snying rje dang ldan pa/ /rgyal mchog thams cad rab btud nas/ /de nas smon lam gdab par bya/ /bcom ldan 'das kyis bsags pa yi/ /bsod nams grangs med gzhal mi lang / /des ni 'gro ba ma lus pa/ /bla med go 'phang 'thob par shog /sems can bye ba grangs med gang / /gzhan yang ngan 'gror gyur pa gang / /bdag gi bsod nams mthu yis ni/ /thams cad bde dang ldan gyur cig /gang zhig yi dags sdug bsngal dang / /gang yang ngan 'gror gyur pa rnams/ /bdag gi bsod nams mthu yis ni/ /de dag thams cad bral 'gyur shog /ji snyed sems can thams cad kyang / /sdug bsngal sna tshogs nyid dag dang / /de dag thams cad zhi gyur nas/ /'ga' yang sdug bsngal ma gyur cig /ji snyed sems can nyes spyad pas/ /lus dang ngag dang yid las byung / /sems can thams cad de ma gyur/ /kun kyang bde dang ldan gyur cig /de nas rgyal mchog kun btud nas/ /dri dang me tog sogs thogs te/ /steng dang 'og tu bltas gyur pas/ /de nas rab tu bsdu ba'i phyir/ /de nas slar yang brjod par bya/ /skyob pa thams cad mngon sum du/ / bdag la slar yang brtse ba'i phyir/ /bcom ldan sras dang bcas pa yang / /ji srid bdag ni don grub par/ /bdag nyid chen po slar byon mdzod/ /de nas gtor ma me tog dang / /dri dang bcas pa'i rdul mtshon la/ /sngags pa dngos grub mchog 'dod pas/ /lag pas reg par mi bya'o/ /de nas rang gis byin brlabs te/ /sa la 'dug nas gos phud pas/ /'bad par gyur pas bsdus nas ni/ /chu bo la ni bskur bar bya/ /de ltar rab tu 'bad pas kyang / /nyi ma gnyis pa shar ba la/ /de tshe dngos grub kun byed pa'i/ /phyag rgya shes rab can gyis bstan/ /gang zhig bcings pa tsam gyis ni/ /de la lha ni nye bar 'gyur/ /sa stengs shin tu sdug bsngal gnas/ /sems can thams cad 'dul byed pa/ /'jigs pa brtan dang g.yo ba yi/ /'jig rten kun gyis mi mthong ngo / /sangs rgyas kun gyis byin gyis brlabs/ /phun sum tshogs pa yang dag ldan/ /phyag rgya rtag tu 'grub par ni/ /the tsom med par 'byung bar 'gyur/ /ral gri yi ni phyag rgya bshad/ /de nas de yi 'og tu ni/ /cho ga bshad par bya yis nyon/ /mgo bor yang ni tho bar bcas/ /spyi bor rdo ba dag dang ldan/ /bka' rtags phyag rgya snying gar ste/ /phyogs bcing bar ni rab tu bya/ /de bzhin mar me dri phyag rgya/ /gtor ma'i phyag rgya btung pa yang / /me tog zhal zas phyag rgya dang / /spyan drang ba ni nyid dang ni/ /de bzhin gshegs pa rgyal sras dang / /nyan thos dang yang pho nya sogs/ /'jig rten pa ni thams cad dang / /de bzhin drang srong tshogs rnams dang / / sring mo yang dag bshad pa dang / /ma mo yang ni bdun nyid dang / /de dag rnams ni ma lus pa/ /sa stengs su ni rgyas par nyon/ /tsham ngam skad cig mi g.yo bar/ /phan pa'i don du bu tshur nyon/ /gang zhig brjod pa tsam gyis su/ / bgegs dang log par 'dren pa 'joms/ /mdzub mo dang ni gung mo dag /blo dang ldan pas drang por brkyang / /srin lag dang ni mthe chung nyid/ /mthe bo yis ni brten par mnan/ /lag pa g.yas pas de ltar bya/ / ral gri yang dag ldan bcas te/ /ral gri shubs su bcug pa las/ /slar yang kun nas 'byung bar bya/ /phyogs kun du ni bskor bar bya/ /'di ni dpal ldan ral gri 'chang / /brtse chen bdag nyid rgyal ba'i sras/ /gang zhig mi shes las byung ba/ /ye shes rang bzhin ral gris gcod/ /de phyir rnam pa thams cad du/ /bgegs kyi rgyal po kun 'joms la/ /rgyun du nyin re dus gsum du/ /phyag rgya rab tu bcing bar bya/ /g.yon pa'i khu tshur dam por bcing / /mdzub mo mthe bong nang du ni/ /bcug pa sdigs mdzub bskums yin te/ /bcug pa de ni zhags par brjod/ /dpal ldan phyag rgya 'di 'chang ba/ /zhags pa'i phyag rgya zhes su grags/ /sa bcu gnas kyi dbang phyug rnams/ /kun nas rab tu 'gugs 'gyur na/ /gdug pa'i sems can dmyal ba ltar/ /gang las ci yi phyir mi blta/ /gung mo'i sor mo yang dag sbyar/ /phan tshun du ni rtse sprad de/ /mdzub mo dang ni ming med dag /kun nas lag pa'i nang du bcug /mthe bo de la kha bstan mnan/ /mthe'u chung dang por gzhag pa ni/ /rdzogs sangs rkang gnyis mchog gis ni/ /'di ni cho ga'i phyag rgya gsungs/ /ye shes ral gri snying gar ni/ /yan lag lnga la 'ang rnam par dgod/ /de tshe phyag rgyas go cha bgo/ phyag rgya sems can sdom pa yin/ /de ltar rab tu 'bad par bya/ /slob ma sdig dang bral byed pa/ /phun sum tshogs kun 'grub bya'i phyir/ /de tshe dbang bskur sbyin par bya/ /bzlas pa'i tshe dang gzhan rnams su/ / cho ga bzhin du bsrung bar bya/ /bgegs kyi rnam pa rnams dang ni/ /gzhan yang dgra bo byung ba la/ /bdag dang gzhan gnyis bsgrub bya'i phyir/ /'di ni rtag tu sbyar bar bya/ /lag pa phan tshun gzung nas su/ /lag pa gnyis ni brtan por bya/ /mdzub mo gnyis ni gyen du bsgreng / /mgo bo'i phyag rgya zhes su bshad/ /lag pa gnyis kyi bya ba ni/ /so sor khu tshur bcing bar bya/ /gsang ba pa yi lag pa yis/ /g.yon pa'i mthe bo nas gzung ste/ /g.yas pa'i mthe 'ong gyen du bsgreng / /rdo rje lta bur gzhom pa ni/ /me ni chen po lta bur 'bar/ /lag pa rdo rje lta bur gnas/ /sngags pa gang la khros gyur pa/ /lha dang klu mo 'khor dang ni/ /gnod sbyin lto 'phye srin po dang / /grul bum dang ni lus srul po/ /lha min yi dags mi 'am ci/ /gang yang bgegs ni byed pa gzhan/ /glang po rta dang shing rta dang / /gang yang rgya mtsho snyems pa dang / /gang yang rgyal po gdug pa dang / /'di ni bstan la gnod byed pa/ /gdug pa'i sems can de rnams ni/ /gdul pa'i phyir dang brlag pa'i phyir/ /de bzhin dngos grub myur ba'i phyir/ /phyag rgya chen po rab tu sbyar/ /sngags dang lhan cig dgod par bya/ /bdag nyid las byung lha rnams kyis/ /dkyil 'khor la ni rab tu gnas/ /rgyu dang 'bras bu sbyar bar bya/ /g.yas pa'i phyag rgya khu tshur bcing / /gung mo gyen du rnam par bsgreng / /rdzogs sangs rgyas kyi dbang phyug gis/ /'di ni spyi gtsug dag tu gsungs/ /lag pa g.yon pa khu tshur bcing / /mdzub mo gung mo bsgreng nas ni/ /de ni g.yon pa rtag tu bcing / / 'di ni bka' rtags phyag rgyar grags/ /lag pa gnyis kyi khu tshur ni/ /bcings nas phan tshun btsir bar bya/ /gcig tu brtan par btsugs pa ni/ /rdo ba lta bur yang dag bshad/ /g.yas pa khu tshur dam du bcing / /mkhas pas snying gar gzhag par bya/ /rdzogs sangs rkang gnyis dam pa yis/ /snying ga'i phyag rgya zhes su bshad/ /gung mo dang ni mdzub mo nyid/ /mthe bo so sor brkyang nas su/ /gnyis ka'ang 'di ltar gnas byas nas/ /phyogs bcur yongs su spro bar bya/ /'dis ni phyogs bcu bcings byas nas/ /mkhas pas sngags kyi bzlas pa bya/ /lag pa gnyis ni thal sbyar nas/ /gung mo nang du sbyar bar bya/ /rdzogs sangs rkang gnyis dam pa yis/ /dri yi phyag rgya zhes su bshad/ /lag pa phyi rol bsgril nas ni/ /mthe bo gung mo gyen du bsgreng / /mthe'u chung ni bsgreng nas gzhag /rgyal dang rgyal sras rnams kyis kyang / /mar me'i phyag rgya zhes su bshad/ /slar yang lag pa phyir bkrol nas/ /phyin ci log byas gung mo dang / /mdzub mo mthe bong snga ma bzhin/ /tshigs pa shin tu brtan par bya/ /sngags dang lhan cig bcas pa ni/ /gtor ma'i phyag rgya zhes su brjod/ /lag pa'i shugs kyi phyag rgya du/ /shugs ni lta bur rab tu mdzes/ /bdug spos phyag rgya mdor bsdus na/ /rgyal ba skyes bu mchog gis gsungs/ /gung mo ming med sbyar bkug nas/ /mthe bo steng na rnam par mnan/ /de ltar g.yon pa yang byas na/ /me tog phyag rgya zhes su brjod/ /lag pa 'og tu thal sbyar nas/ /gung mo dang ni srin lag dang / /mdzub mo yang ni bkug nas su/ /mthe'u chung phyi rol nyid du gnas/ /blo ldan de yi rtsa bar sbyar/ /gsang sngags shes pas spyan drang bya/ /skyob pa shAkya seng ge yi/ /dpa' bo chos gos ngur smrig bsnams/ /gtso bo brtan pa'i don mdzad pa/ /mtha' yas 'jig rten rab 'byam khams/ /shin tu mnyam par gzhag pa yang / /shes rab can gyis rtag bsams na/ /brnag pa'i 'bras bu thob par 'gyur/ /lag pa gnyis ni thal sbyar nas/ /mkhas pas mdzub mo bkug nas su/ /rtse mor mthe bong gzhag pa ni/ /rgyal sras rtag tu 'gugs par byed/ /lag pa pad ma ltar byas nas/ /sor mo gung mo ming med tsam/ /'di rnams thams cad 'gugs par byed/ /nyan thos rnams dang sa stengs bzhugs/ / gang yang pho nya ma tshogs bshad/ /pho nya yang ni rdzu 'phrul che/ /de rnams phyag rgya bshad pa ni/ /sa stengs lcags kyus 'gugs par byed/ /g.yas pa khu tshur dbang por bcing / /brtan por rab tu ldan byas te/ /mdzub mo shes rab can gyis brkyang / /tshigs pa gsum pa bcag par bya/ /lag pa g.yas pas g.yon pa yi/ /mkhrig ma nas ni gzung ba yis/ /sa stengs pho nya mo la sogs/ /brtan par gyur pas dgug par bya/ /lag pa phyi rol dkyil nas su/ /gung mo gyen du rnam par bsgreng / /mdzub mo drang por byas nas ni/ /de dang rab tu sprad par bya/ /gnang gi cha ru bkug nas su/ /mthe bo mi mthun pa ru gzhag /'jig rten pa yi phyag rgya ste/ /bkug pa ru ni rab tu grags/ /phyag rgya 'di dag nyid la yang / /g.yon pa rab tu phral ba yi/ /g.yas pa drang srong thams cad dang / /brtul zhugs gnas pa dgug pa yin/ /lag pa g.yon pa drang byas nas/ /mkhas pas gung mo dgug par bya/ /mdzub mo sor mo yang bkug nas/ /dpal ldan phyag rgya 'di 'chang ba/ /sring mo rnams kyi rab tu grags/ /sring mo dngos grub mdzad pa can/ /dam par gyur pa spyan drang bya/ /g.yas pa drang por brkyang nas su/ /sor mo gsum ni drang por brkyang / /de ru mdzub mo bkug pa yi/ /rtse mo mthe bos reg par bya/ /phyag rgya 'di yis nges pa ru/ /ma mo bdun nyin 'gugs par byed/ /rdzogs sangs rkang gnyis dam pa yis/ /phyag rgya 'di ni yang dag gsungs/ /rtag tu bag yod par gyur pas/ /sa gzhi dkyil 'khor bsrung bar bya/ /phyag rgya 'di ni 'chang ba dkon/ /rgyal ba mchog gis rab tu gsungs/ /phyag rgya 'di de la brten na/ /bsam gyis mi khyab 'bras bu 'thob/ /de bas rnam pa thams cad du/ /bsam mi khyab pa'i 'bras 'dod cing / /dngos grub 'dod par gyur pa yis/ /sngags pas rtag tu gzung bas na/ /bgegs dang log par 'dren pa dang / /klu dang srin po gdug pa kun/ /gnod sbyin grul bum mi 'am ci/ /yi dags lus srul lto 'phye che/ /phyag rgya 'di yis bsrungs pa yis/ /glags lta'i go skabs mi rnyed do/ /gzhan yang gdug pa'i sems can dang / /gang yang nad ni 'jigs rung ba/ /de dag thams cad mi 'byung ste/ /phyag rgya 'di yis shin tu bsrungs/ /'jigs pa thams cad rnam par bral/ /kun kyang dbang phyug yang dag ldan/ /de dag thams cad mi 'byung ste/ /'di ru dogs pa spyad mi bya/ /sems can lam ldan yod pa gang / /shin tu drag shul las byed pa/ /zhi ba'i thugs kyis bde gshegs kyis/ /gdul ba ru ni mi nus pa/ /de rnams rab tu gdul ba'i phyir/ /khro bo 'di ni rnyed par dka'/ /bde bar gshegs pas mdzes par gsungs/ /bsam mi khyab pa'i 'bras ster ba/ /sna tshogs bsam mi khyab pa'i las/ / bsam mi khyab par bshad pa ni/ /de phyir 'di yang bsam mi khyab/ /dam tshig ye shes bshad pa 'di/ /brlag pa ru ni 'byung bar 'gyur/ /sangs rgyas la ni bslus pas na/ /gsang sngags 'bras bu kun mi 'byung / /byang chub tshogs ni 'grub bya'i phyir/ /dam tshig rtag tu bsrung bar bya/ /dam tshig gsum gyis dngos grub kyi/ /'bras bu yang ni 'byung bar 'gyur/ /rtag tu g.yo ba med 'gyur bas/ /lus can rnams kyis phyag rgya dgod/ /bu med pa yang bu rnyed 'gyur/ /ma grub pa yang thams cad 'grub/ /gang tshe bu ma chags pa yang / /lus can 'dod pa mngal du chags/ /de tshe yang dag rab sbyar ba'i/ /phyag rgya don kun 'grub par byed/ /dkyil 'khor 'jug pa zhes bshad pa/ /phyag rgya bshad pa 'di yin no/ /gzhan du lus can thams cad kyis/ /cho ga nyams pas 'bras bu med/ /dbang phyug sogs rgyal gang su dag /mi yi mchog dang mtshungs pa 'thob/ /'di ni de yi cho ga'i lam/ /sa stengs na ni gzhan ma med/ /thams cad dbang phyug go 'phang 'thob/ / 'jigs pa thams cad rnam par spangs/ /phyag rgya 'chang bar gyur pa yis/ /sems can thams cad dbang thob 'gyur/ /tsham ngam mtshan nyid sa stengs su/ /rgyas par bshad kyis tshur la nyon/ /gang zhig bcings pa tsam gyis ni/ / bsam mi khyab pa'i go 'phang 'thob/ /gang yang sa stengs gdug pa can/ /lha dang klu dang gnod sbyin dang / /lto 'phye srin po mi 'am ci/ /'byung po gdon dang sha za dang / /gang yang bgegs gzhan log par 'dren/ /de rnams 'joms par bya ba'i phyir/ /tsham ngam 'dzin pa slob pa nyid/ /gnas gsum na ni gnas rnams la/ /mnyam gzhag gyur par rab sbyar nas/ /de ni brlag par 'gyur ba 'am/ /'chi bar 'gyur bar the tshom med/ /dam tshig ster ba'i gnas nas las/ /spyi bor me tog thal sbyar te/ /rgyal ba thams cad mchod byas nas/ /yang dang yang du phyag kyang bya/ /de nas mnyam par gzhag gyur pas/ /sa stengs phyag rgya 'ching bas 'ching / /rkang pa ya gcig brten nas su/ / ma rungs pa yi lta stangs dbab/ /khro dang bcas pas gzhag par bya/ /rkang pa'i 'og tu lta stangs dbab/ /lag pa g.yas pa bsgreng bar bya/ /g.yon pa snying gar yang dag gzhag /rkang pa bgrad nas gzhag par bya/ /sku las hU~M yig 'od zer 'bar/ /brtan dang g.yo ba'i bgegs sam gzhan/ /'og tu bsnun par yang dag gnas/ /rkang pa mnan nas bsnun pa yis/ /lha dang lha min g.yo bar byed/ /sa gsum yang ni g.yo ba dang / /shin tu mi bzad bsreg par byed/ /thams cad bsreg par gyur pa na/ /de dang nye ba'i drung du 'khor/ /bdag rang khro bo lta bu yis/ /zhags pa'i phyag rgya thogs nas ni/ /zhags pa'i phyag rgyas bcing bar bya/ /phyogs bcu kun na gnas pa yi/ / zhags pa'i phyag rgya de bcings te/ /shin tu gdung bar byed pa'o/ /ha ha zhes sgrogs rab tu 'phrul/ /la la thal bar brlag par 'gyur/ /bde gshegs che ba'i bdag nyid can/ /de dag thams cad snyan pa'i tshig /skal ba chen po bka' bsgo stsol/ /bdag cag khyed kyi bka' ltar bgyid/ /bdag ni yid bzhin ma yin pas/ /bka' bsgo gcog par mi bgyid do/ /de nas de rnams dam tshig ni/ /bde bar gshegs pa chen pos gsungs/ /sangs rgyas chos dang dge 'dun spangs/ /khyod kyis yid la bya bar 'os/ /bka' bsgo gyur pa thams cad kyis/ /khyod kyis bstan pa rnams kyang gsungs/ /sngags pa bdag nyid chen po yi/ /bka' bsgo ba ni gcag mi bya/ /kun la gnod pa mi bya ste/ /bgegs ni nam yang ma byed cig /sangs rgyas chos dang yid ldan pa'i/ /bka' bsgo bcag par mi 'gyur ro/ /sngags pa yi ni bka' bsgo ba/ /nam yang bcag pa ma yin te/ / gal te gsol ba don gnyer na/ /dam tshig 'di ltar 'bras bu ster/ /gal te khyod ni bka' gcog na/ /sngags pa che ba'i bdag nyid kyis/ /sngags pas kyang ni hU~M brjod na/ /rtag tu thal bar rlog par 'gyur/ /'di ni dpal ldan rdo rje 'chang / /khro bo chen po stobs po che/ /rdo rjes mgo bo ardza ka'i/ /dog pa bzhin du 'gems par byed/ /de dag thams cad myos nas su/ /'jigs par gyur pas tshig smras pa/ /sngags pas ji ltar bka' stsal pa'i/ / bka' bsgo gcog par mi bgyid do/ /nyid la bkur sti ci bzhin bgyid/ /bsrung bar yang ni shin tu bgyid/ /rtag tu rjes su 'brel par ni/ /gyur par sngags pa la bgyid do/ /bde bar gshegs pas gsungs pa'i gnas/ /dam pa'i chos ni bsrung bar bgyid/ /bstan pa yang ni bsrung bar ni/ /ji srid gnas kyi bar du bgyid/ /de ltar bde gshegs kyis bsgos te/ /dam tshig la ni nges par sbyar/ /bdag nyid chen po rdo rje can/ /bde bar gshegs pa tshim par mdzod/ / gal te bgegs kyis bstan pa la/ /gnod pa ru ni byed gyur dang / /gal te sems can rnams la yang / /'ga' zhig gnod par byed pa yi/ /bde gshegs thu bo sras gcig po/ /rdo rje khyod ni bdag nyid che/ /nga yi bka' yis rtag tu ni/ /khyod kyi mgo bo rdo rjes 'gems/ /de nas dpal ldan rdo rje 'chang / /mgu bar gyur pa'i thugs kyis su/ /sku ni brtan las bzhengs mdzad de/ /bde bar gshegs gsungs bka' bsgo ba/ /thal mo sbyar te pus mo btsugs/ /bka' stsal spyi bor 'jog par bgyid/ /mgon po khyod kyi chos kyi sras/ /bu ni bdag la bka' bsgo stsol/ /dus gsum pa ni bka' bsgo ba/ /bdag ni de bzhin skyong bar bgyid/ / de nas rdo rje rgyal chen bdag /kun mkhyen dkyil 'khor spyan snga ru/ /rnga sgra zab mo yi ni dbyangs/ /snyan pa'i gsung ni bka' stsal pa/ /gang yang rdzu 'phrul che kun dang / /gzhan yang bgegs dang srin po nyon/ / sngags pa bdag nyid chen po yi/ /bka' ni gcag par mi bya'o/ /gal te bka' ni gcog byed cing / /gal te sems can gnod pa dang / /sa stengs kyi ni dkyil 'khor du/ /gal te bstan la gnod byed na/ / bdag gi rdo rje 'bar ba yis/ /sras dang dpung du bcas pa ni/ /gang yang lha dang lha min gyi/ /lha yi bzhon pa 'am yang na gnas/ /bde gshegs bka' bsgo yang gnas pas/ /thams cad thal bar rlog par byed/ /bdag nyid chen po rdor 'byung ba/ /de nas de ru tshig smras pa/ /dpa'o bo khyod kyis ci bsgo ba/ /bdag cag bka' bsgo dbang du bgyid/ /de nas rkang pa g.yon brkyang nas/ /lag pa phan tshun bcings nas ni/ /bgegs yod pa yi gnas su bsnun/ /de nyid kyi ni g.yas kyi ni/ /'khor lo'i phyag rgyas bsnun gyur na/ /thal ba'i rdul du rlog par 'gyur/ /gal te bgegs ni byed gyur na/ /sa bcu'i byang chub sems dpa' yis/ /gal te tshangs sogs gyur pa dang / /lha yang de ni brlag par 'gyur/ /lag pa g.yon pa gnas su gzhag /g.yas pa mgo bor gzhag nas ni/ /'byung por gyur pa'i bgegs la bsnun/ /slar yang g.yon pa bsdus nas ni/ /bskal pa'i me lce ltar byung ste/ /rdo rje'i thal mos bsnun par bya/ /sa gzhi phye ma ltar 'gyur te/ /gdug pa'i sems can lta ci smos/ /khro ba'i so yis ma mchu mnan/ /mig ni khro gnyer dang ldan pa'i/ /rdo rje thal mo legs sbyar bas/ /srid gsum thams cad 'joms par byed/ /lus kyi g.yon pa brkyang gyur pas/ /rdo rje yi ni phyag rgyas bsnun/ /srid gsum thal bar rlog 'gyur na/ /gdug pa'i sems can smos ci dgos/ /rkang pa mnyam par gnas nas ni/ /mdzub mo g.yon pa dpral bar sbyar/ /g.yas pa steng du bteg pa yi/ /mdzub mo rtse mo rab tu 'bar/ /bgegs yod pa yi gnas su bsnun/ /zhal nas yi ge hU~M gis brgyan/ /rtsa ba'i phyag rgya yis bsnun pas/ /bus ni bskal pa'i me ltar blta/ /gal te rdo rje'i lus gyur kyang / /de ni brlag par 'gyur ba yin/ /rkang pa mi mnyam gya tshom gzhag /lag pa steng du dbyug pa bsgreng / /g.yas kyis yongs su bskor nas ni/ /bgegs kyi gzugs la bsnun par byed/ /dbyug pa'i phyag rgyas bsnun pa yis/ /'bar ba lta bu lus las byung / /the tshom med par thal bar rlog /gdon mi za bar 'chi bar 'gyur/ /g.yon brkyang ba yi rkang pa mnan/ /lag pa g.yas pa mgo bor bteg /g.yon pa'i rkang pa bteg nas ni/ /mi sdug zhal nas hU~M brjod pas/ /ri rgyal lhun po'ang 'gas par byed/ /rgya mtsho yang ni skam par 'gyur/ /dpal ldan phyag rgya 'di 'chang ba/ /'di ni brtul zhugs legs par gnas/ /gang yang ris sogs bshad pa dang / /bgegs dang shin tu mi bzad rnams/ /de rnams 'joms par bya ba'i phyir/ /phyag rgya 'di ni rab tu sbyar/ /ras bal 'da' ba rlung khyer bzhin/ /de dag thams cad thal bar rlog /yi ge hU~M gi sgra dang ldan/ /mthe bo mgo bor bteg par bya/ /g.yon pa snying gar yang dag gzhag /slar yang g.yas pa steng na gnas/ /mkhas pas 'khor lor gyur pa yis/ /mnyam par sbyar bas bsnun byas na/ /bgegs kun brlag pa nyid du ni/ /mdor bsdus nas ni brjod par bya/ /phyag rgya mtshan ma gzhan gyis ni/ /gang gis bzlog par mi nus pa/ /gsungs pa'i phyag rgya 'di yis ni/ /'dir ni 'joms par the tshom med/ /sa la rkang pa gzhag nas ni/ /rdo rje'i phyag rgya legs par sbyar/ /rdo rje'i me ni 'bar ba ltar/ /bltas na de ru bdag med kyang / /khros pas ya sos ma mchu mnan/ /gdug pa'i sems can rnams la bsnun/ /rdo rje'i phyag rgya bsnun pa yis/ /shin tu mi bzad bsreg par 'gyur/ /shin tu mi bzad bsdus nas ni/ /bka' bsgo'i lam ni gdon par byed/ /sngags pa yid la ci 'dod pa/ /de tshe de la sbyin par byed/ /gzhan yang 'gal tshabs can 'gyur te/ /sngags pa'i lus ni brlag par 'gyur/ /bskal pa'i me dang mtshungs gyur pas/ /ha ha zhes sgrogs rnam brgyan pa/ /blo ldan zhags pa'i phyag rgya yis/ /kun nas 'gugs par byed pa yis/ /gal te rdo rje 'dzin rang yang / /ral gri'i phyag rgya bsnams nas ni/ /sngags pa hU~M gis sgrogs pas kyang / /de ni bskams nas brlag par ni/ /the tshom med par 'gyur ba ru/ /rgyal ba mchog gis rtag tu gsungs/ /rkang pa mnyam por gzhag nas gnas/ /mchan khung dag tu lag pa gzhug /slar yang lag pa dgab par bya/ /so yis mchu mnan de bzhin no/ /slar yang g.yon brkyang ba yi gnas/ /lag pa g.yas pa phyar nas ni/ /g.yon pa snying gar rnam par dgod/ /bskal pa'i me ni lta bur byung / /bgegs kyi gnas su bsnun nas ni/ /de ma thag tu thal bar rlog /rkang pa khyog por byas nas ni/ /lag pa g.yas dang g.yon pa nyid/ /brla la bzung nas bstod par bya/ /khros pas ya sos ma mchu mnan/ /'og tu lta stangs dbab par bya/ /bgegs rnams thams cad bsdus nas ni/ /blo dang ldan pas mchan khung gzhug /thams cad gdung ba nyid du 'gyur/ /gang yang rlung dang srin po dang / /'jigs pa chen po'i bgegs dang ni/ /gang yang skye bo rnam 'tshe ba/ /phyag rgya 'di ni sbyar ba yis/ /de dag thams cad brlag par 'gyur/ /lag pa rgyab tu btang nas ni/ /g.yas kyis rnam par bsgyur bar bya/ /yang na mi mthun gya tshom gnas/ / rdo rje tho ba brdeg par bya/ /bgegs kyi gnas su nyer song ste/ /khro bo'i lta stangs dbab par bya/ /gal te sa stengs rdo rje 'dzin/ /bgegs kyi gzugs la bsnun nas ni/ /de ni brlag par gyur nas ni/ /'di ni the tsom med par 'chi/ /g.yon brkyang ba yi rkang pa yis/ /sngags pa shar du phyogs gyur pas/ /zhags pa'i phyag rgya go cha bzang / /me yi 'od dang mtshungs par 'bar/ /sa bcu'i gnas kyi dbang phyug gis/ / bgegs rnams thams cad 'gugs par byed/ /kun nas 'gugs par byas nas ni/ /ral gri phyag rgya gcod par byed/ /thams cad 'gugs par gyur pa na/ /shin tu mi bzad tshong ngas 'debs/ /de ring bdag cag rnams kyis dran/ /ma la bu dang bu mo rnams/ /yang ni sdug bsngal khyed 'di gzigs/ /'di ni 'chi ba nyid du 'gyur/ /gal te gson par 'dod na ni/ /bgegs ni rab tu ma byed cig /sngags pa bdag nyid chen po yi/ /bka' bsgo gcag par mi bya'o/ /bgegs kyi lag tu gson par gzhag /slar yang g.yas kyis song ba yis/ /rkang pas myur du mnan par bya/ /bdag nyid ri rab tu gyur par/ /bsams nas bdag nyid chen po 'di/ /khams gsum dag ni ma lus par/ /thams cad mnan pa nyid du 'gyur/ /gang yang bgegs dang log 'dren gzhan/ /sngags pas hU~M sgra sgrogs pa las/ /der ni slar yang klags mi tshol/ /gnas pa yang dag bshad pa 'di/ /gsang sngags kun gyi gsang ba yin/ /gal te sngags kyi 'bras 'dod na/ /'di ni gang la'ang mi bshad do/ /rang gi bdag nyid lha yi sku/ /de ni phyag rgya dkyil 'khor ldan/ /rang gi mtshan ma sa bon dang / /rang bzhin phyi ru bcos pa ni/ /rtag par rgyun du bsnun par bya/ /gzhan du na ni 'bras bu med/ /mdor bsdus nas ni 'di ru bu/ /bdag gis gsang ba gsungs pa yin/ /phyag rgya mtshan ma cho ga ni/ /'di ni kun du ma 'chad cig /gang yang sdig can sems can gzhan/ /bla ma la smod 'jigs su rung / /pha dang ma ni mi shes shing / /gang yang dkon mchog gsum la gnod/ /'jigs pa'i gzugs can dad pa med/ /gang yang mtshams med lnga byed pa/ /sems dpa' med cing snyom pa dang / /spro ba med cing snyom las ldan/ /ser sna'i dri ma'i 'dam 'dir bying / /gang yang rtag tu gnas pa ni/ /sangs rgyas kyis gsungs gsang ba ni/ /de rnams la ni bshad mi bya/ /gang yang gdug pa'i sems can gzhan/ /rtag tu sdig pa'i las can de/ /khro bo'i rgyal po mi bzla zhing / /dkyil 'khor yang ni bstan mi bya/ /gsang sngags mi shes phyag rgya med/ /gang yang bla ma sun 'byin pa/ /de rnams 'ga' yang rgyal ba yis/ /gsungs pa'i nus pa kun mi spyad/ /gsang ba cung zad gang yod pa/ /khro bo'i ming can snying po 'di/ /sems can rnams la phan 'dod pas/ /de ni ma lus bdag gis bshad/ /gsang ba 'di la brten nas ni/ /gang yang 'das pa'i sangs rgyas dang / /'gro la phan phyir 'byung 'gyur ba'i/ /gang yang mgon po ma byon pa/ /'gro la phan pa'i tshul gyis ni/ /mgon po da ltar bzhugs pa gang / / de kun mgon pos bsam du med/ /ye shes rtul phod mtshungs pa med/ /rnam par dpyad na bsam du med/ /rnyog pa med pa'i dam chos ni/ /zhing du bshad par gyur pa yang / /thams cad du ni bdud pas pham/ /gzod nas zhi la gnas med pa/ /chos kyi 'khor lo bskor bar 'gyur/ /sbas gsang mnyam pa'i ye shes nas/ /bdag gis gang yang ma bstan pa/ /sa stengs dkyil 'khor gsang ba ste/ /ma lus par ni bdag gis gsungs/ /mgon po grangs med 'das pa dang / /gang yang 'byung bar 'gyur ba gzhan/ /'gro la phan phyir 'di bzhugs pa'i/ /gang yang da ltar 'byung 'gyur ba'i/ /kun gyis gsang ba'i ye shes gang / /bsam gyis mi khyab 'bras stsol ba/ /gsang ba'i ye shes pha rol gnon/ /de dag ma lus bdag gis gsungs/ /gang zhig rgyud kun tu gsungs pa/ /gsang ba mchog gis rmad du dbyung / /de dag ma lus pa ru gsungs/ /bsam mi khyab pa'i 'bras stsol ba/ /thams cad dbang phyug go 'phang 'thob/ /bde ba thams cad yang dag gtad/ /'jigs pa thams cad rnam bral bar/ /lus can thams cad 'byung bar 'gyur/ /'di ni myur du dngos grub byed/ /bsam gyis mi khyab 'bras bu stsol/ /sems can thams cad bsrung ba yi/ /gsang ba'i pha rol gnon pa gsungs/ /de bas rnam pa thams cad du/ /gsang ba'i gsang ba yang 'byung ngo / /rtag tu bag yod par gyur pas/ /bsrung ba'i don du rgyal bas gsungs/ / sngags pa bdag nyid chen po yis/ /mchog tu yid 'ong yang dag bshad/ /gsang ba'i ye shes rtul phod pa/ /sngags pas ma bsgrubs pa yang 'grub/ /gsang ba'i ye shes pha rol gnon/ /gang la'ang bshad par mi bya ste/ /rdzogs sangs rkang gnyis mchog gis ni/ /mgon pos bsam gyis mi khyab gsungs/ /rgyal po med cing gdug pa 'ang med/ /bgegs dang log par 'dren pa med/ /srin po gnod sbyin dbang po med/ /gdug pa'i gza' dang ma mo med/ /dus min 'chi dang 'jigs pa med/ /nad kyis kun du 'khrug pa med/ /mkha' 'gro ma dang sha za'ang med/ /seng ge stag la sogs pa'ang med/ /chu yi 'jigs pa chen po 'ang med/ /rims sogs 'jigs su rung ba 'ang med/ /sdom la sogs pa kun kyang med/ /de bzhin thog gi 'jigs pa med/ /mi rgod chom rkun la sogs med/ /gzhan yang de bzhin yams med cing / /de ru mu ge'i 'jigs pa med/ /bdud kyi 'jigs pa 'ang de bzhin med/ /yul 'khor gzhan gyis 'jigs pa med/ / de la 'go nad 'jigs pa med/ /lhog pa mtshan bar rdol ba med/ /nad la sogs pa thams cad med/ /gzhan yang 'jigs par byed pa med/ /sa gzhi thams cad yod pa yi/ /sa gzhi stengs 'dir gnas pa yi/ /'di ni gang gi lag na gnas/ /gang gi snying gar gnas pa de/ / 'jigs pa thams cad rnam bral bas/ /mi yi skyes bu thob par 'gyur/ /bdag gis dka' bas rab btsal te/ /de bzhin srog la ltos med par/ /mgon po grangs med rab mnyes pas/ /go 'phang mchog 'di thob par 'gyur/ / ye shes shin tu rnyed dka' ba'i/ /yang dag 'di ni bdag gis 'thob/ /sems can don du bsam med par/ /grangs med bzhin du rnam par gnas/ /da ltar bdag gis sangs rgyas nyid/ /byang chub snying por yang dag bzhugs/ / phyag rgya 'di ni bstan pa yis/ /yang dag par na bdud las rgyal/ /srid gsum 'di ni 'jigs pa 'khrigs/ /sems can sdug bsngal yang dag khengs/ /'jig rten gsum na 'bad pa yis/ /bdag gis ma lus par bsgral to/ /ma lus sangs rgyas che ba'i bdag /sems can don du bstan pa yis/ /de dag thams cad bdag gis ni/ /phyag rgya 'di yi mthu yis byas/ /mtshungs med ye shes sa thob cing / /sa stengs kun mkhyen sa thob pas/ / de bas bdag ni kun mkhyen mdzod/ /dam pa'i go 'phang bgrod nas bzhugs/ /sna tshogs 'jig rten 'gro shes nas/ /dmyal ba la sogs 'jigs pa yis/ /sdug bsngal gyis gdungs mthong nas ni/ /thugs rjer ldan pa'i thugs kyis su/ /gsang sngags tshul gyis 'bras 'byung ba/ /bsam mi khyab pa'i dam chos bshad/ /ji bzhin gsungs pa'i 'jig rten gsum/ /yang dag ye shes rnam par bsgyings/ /gsang sngags cho ga rgyas par ni/ / de ni 'di ru bdag gis gsungs/ /de bas rnam pa thams cad kyis/ /bdag gis dam chos bshad pa 'di/ /rtag tu bag yod par gyur pas/ /cho ga rgyas par bshad par bya/ /gsang ba'i phyag rgyas rab gsungs pa/ /dam tshig mi shes la mi bshad/ /sangs rgyas thams cad bslus gyur cing / /gsang sngags 'bras bu mi 'byung ngo / /de rnams ngan 'gror ltung 'gyur gyi/ /'bras bu gzhan du 'byung ba med/ /gal te sems can thams cad ni/ /dam tshig nyams par gyur na ni/ / 'bad pas bla ma mnyes byas nas/ /sa stengs dam tshig gzung bar bya/ /gsang ba sa stengs bshad pa yi/ /phyag rgya de nas bcing bar bya/ /de ltar byas pa'i cho ga shes/ /sngags dang phyag rgya shin tu sbyar/ /bsam mi khyab pa'i sku 'thob ste/ /gzhan du na ni 'bras med 'gyur/ /de nas bcom ldan shAkya thub/ /thugs rje dang ni ldan pa'i thugs/ /rdor byung bdag nyid chen po la/ /snyan pa'i tshig gis bka' stsal pa/ /gsang sngags don kun grub byed pa/ / bshad par bya yis tshur la nyon/ /bsam mi khyab pa'i 'bras bu mang / /yang ni bde bar gshegs pas gsungs/ /bsam gyis mi khyab las sna tshogs/ /bsam gyis mi khyab 'bras bu gnon/ /gsang sngags 'chang ba 'di dag ldan/ / de phyir 'di yang bsam mi khyab/ /gang gis rdzogs sangs rgyas gsungs pa/ /rdzu 'phrul chen po rgyal gyur pa/ /bsrung ba 'ang 'ga' zhig 'jig rten ni/ /thams cad chags pas gzir gyur pa/ /de ni bshad par bya yis bu/ /phan par gyur pa'i yid kyis nyon/ /mthong ba'i chos la 'bras bu ni/ /gzhan du 'bras bu med par 'gyur/ /de nas bcom ldan 'das shAkya thub pas de'i tshe sems can thams cad kyi bsam pa yongs su rdzogs par rol pa zhes bya ba'i ting nge 'dzin la snyoms par zhugs so/ /snyoms par zhugs nas sems can thams cad kyi bsam pa yongs su rdzogs par byed pa/ ngan 'gro thams cad rnam par grol bar byed pa/ tshe dang nad med pa la sogs pa nad thams cad rab tu zhi bar byed pa/ mchog tu sangs rgyas pa de bzhin gshegs pa thams cad kyi snying po gsang sngags kyi rgyal po 'di bka' stsal pa/ na maH sar+b+bA shA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ a tsa la kA Na/ naT+Ta naT+Ta/ moT+Ta moT+Ta/ maT+Ta maT+Ta/ taT+Ta taT+Ta/ tiSh+Tha tiSh+Tha/ A be sha A be sha /AH mat+ta mA la ka /d+ha na d+ha na/ tr-i Ni tr-i Ni/ khA da khA da bi g+h+nAM mA ra ya mA ra ya/ duSh+TA~M rak+Sha rak+Sha/ satwAM/ ku ru ku ru/ ki ri ki ri/ ma hA bi dza ya badzra phaT/ hU~M hU~M hU~M/ tr-i ba li ta/ ra~M ga narta ka /ha~M ha~M ha~M/ a tsa la tse Ta phaT phaT yaH AHhU~M a sa ma~M/ tri ka trA Ta/ ma hA pa la shA ta ya/ sa mA na ya/ trA~M mA~M hA~M/ shud+h+ya tu lo kaH tuSh+ya tu badzrI na mo s+t+wa pra ti ha ta ba le b+h+yaH dz+wA la dzrA la/ tra Ta a sa ha na maH swA hA/ bcom ldan 'das kyis mchog tu gsang ba chen po'i snying po 'di gsungs ma thag tu stong gsum gyi stong chen po'i 'jig rten gyi khams 'di rnam pa drug tu g.yos te/ 'gul/ rab tu 'gul/ kun du rab tu 'gul/ chem chem/ rab tu chem chem/ kun du rab tu chem chem/ g.yos rab tu g.yos/ kun du rab tu g.yos/ ldeg rab tu ldeg /kun du rab tu ldeg /'khrugs/ rab tu 'khrugs/ kun du rab tu 'khrugs/ 'ur 'ur/ rab tu 'ur 'ur/ kun du rab tu 'ur 'ur/ shar phyogs mtho na nub phyogs dma'/ /lho phyogs mtho na byang phyogs dma' ste snang ba chen po 'jig rten du byung bar gyur to/ /gzhan yang ngo mtshar rmad du byung ba'i 'jig rten du mthong ngo / /bgegs dang log 'dren thams cad dang / /gang yang srin po 'jigs pa dang / /sha za gdug pa'i sems can dang / /gang yang bdud dang 'jigs su rung / /gnod sbyin klu dang mi 'am ci/ /grul bum dang ni lus srul po/ /gang yang lha min tshogs dang yang / /gang yang gza' dang ma mo rnams/ /ras bal 'dab ma rlung khyer bzhin/ /de dag thams cad thal bar brlags/ /zab mo yi ni dbyangs kyi sgra/ /phyogs kun du ni grags par gyur/ /'jigs pa chen po'i skar mda' lhung / /'jigs su rung ba'i glog kyang 'khrugs/ /sa gzhi thams cad 'bar ba ltar/ /sa stengs kun na me phung ngo / /phyogs kun 'jigs pa chen por gyur/ /sa gzhi dkyil 'khor kun 'khrugs gyur/ /mun nag 'jigs pa chen po ru/ /sa gzhi dkyil 'khor mthong bar gyur/ /sangs rgyas nyan thos lha dang ni/ /byang chub sems dpa' rdzu 'phrul che/ /lam gol ba yi yid can la/ /de dag thams cad ngo mtshar 'gyur/ /kun mkhyen spyan sngar 'dug nas ni/ /snyan pa yi ni tshig 'di gsol/ /kun mkhyen bkod pa bsdu bar mdzod/ /sems can sdug bsngal kun du 'khrugs/ /sa gzhi snying por gyur pa 'dir/ /tshul 'di bzod par mi nus so/ /de kun kun mkhyen bzhengs nas ni/ /ting nge 'dzin ni stong 'gyur bas/ /skyob pa byang chub sems dpa' yi/ / snyan pa'i tshig gis bka' stsal pa/ /byang chub sems dpa' ma 'jigs shig /gang yang 'jigs pas gzir ba'i lha/ /gzhan yang gdug pa'i sems can ni/ /'jig rten pa dang rgyu mi rgyu/ /rdzogs sangs rkang gnyis dam pa yis/ /'di ni bsam du med par bshad/ /de nas sems can thams cad kyis/ /bde ba thams cad yang dag 'thob/ /thams cad dbang phyug go 'phang 'thob/ /sdug bsngal thams cad rnam par spangs/ /bsam pa thams cad rdzogs nas ni/ / de ma thag tu sa stengs 'gyur/ /'gro bo'i rgyal po'i snying po 'di/ /rgyal ba mchog gis rtag tu gsungs/ /stobs chen 'di ni mi mthong bas/ /khro bo'i rgyal po rang nyid gnas/ /gnas med pa la sbyar mi bya/ /gsang sngags gsang ba pha rol gnon/ /rang nyid de bzhin gshegs pa ste/ /'di ni khro bo'i gzugs kyis bzhugs/ /las rnams sna tshogs yang dag ldan/ /gsang sngags 'di ni bzlas pas 'grub/ /mtshams med lnga po byas pa yang / /'di yis myur du 'grub par 'gyur/ /tshes grangs med cing rgyu skar med/ /smyung gnas yang ni med par mdzad/ /khrus kyi bya ba thams cad med/ /dri sogs cho ga'i rim pa med/ /ras ris med cing gnas yod min/ /dus kyi go cha'i rim pa med/ /sdig pa kun dang ldan pas kyang / /gang du yang dag gnas sgrub pa/ /slar yang bcom ldan 'das kyis ni/ /thugs rje dang ni ldan pa'i thugs/ /rdor 'byung che ba'i bdag nyid la/ /snyan pa'i tshig gis bka' stsal pa/ /gsang sngags rgyal po rdzu 'phrul che/ /khro rgyal nye ba'i snying po ni/ /dngos grub myur du stsol mdzad pa/ /bshad par bya yis bu tshur nyon/ /yid la 'dod pa'i cho ga nyid/ /bsam gyis mi khyab las dang ldan/ /gsang sngags chen po 'di bsgrubs nas/ /bsam gyis mi khyab 'bras bu ster/ /rdzogs sangs mchog tu gsang ba ni/ /brtan dang g.yo bas mi shes pa/ /bsam pa thams cad rdzogs mdzad na/ /rgyal ba mchog gis rtag tu gsungs/ /na maH sar+b+bA shA pa ri pU ra ke b+h+yaH sar+b+ba ta thA ga te b+h+yaH sar+b+ba thA tra Ta/ a mo g+ha tsaN Da ma hA ro Sha Na s+pho Ta ya hU~M/ trA sa ya hU~M/ tra tra ha~M ma~M/ phyag na rdo rje'i 'dir 'di'i khro bo chen po'i nye ba'i snying po'o/ /las kun nus pa can 'di ni/ /sngags kyi rgyal po rdzu 'phrul che/ / yid 'dod bsam gyis mi khyab pa/ /ma bsgrubs pa yi las kyang byed/ /rgyud rgyal gzhan pa rnams su ni/ /cho ga rgyas par gsungs pa gang / /'di nyid kyi ni cho ga yis/ /de yang grangs med kun bsgrub par bya/ /khro bo'i mngag gzhug bka' nyan pa/ /pho nya pho mo rdzu 'phrul che/ /cho ga 'di yi rim pa yis/ /de yang ji ltar rigs pas bsgrub/ /gang yang 'jig rten pa yi lha/ /gang yang khyab 'jug la sogs klu/ /gza' dang rgyu skar sogs thams cad/ /grul bum dang ni lus srul po/ /gnod sbyin lha min mi 'am ci/ /gnod sbyin mo dang sha za dang / /gang yang srin po dang ni mi/ /drang srong mkha' 'gro ma de bzhin/ /ma mo dang ni srin mo nyid/ /gang yang 'jig rten na bshad pa/ /de yang cho ga 'di nyid kyis/ /the tshom med par bsgrub par bya/ /na maH sar+b+bA shA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ ha na ha na/ mA ra ya dz+nyA na khad+ga phaT/ ral gri'i phyag rgya'i sngags so/ /na maH sar+b+bA shA pa ri pU ra ke b+h+yaH sar+b+ba ta thA ga te b+h+yaH sar+b+ba thA oM gr-ih+Na gr-ih+Na/ kaD+ha kaD+ha/ pA she na/ ban d+ha ban d+ha/ ma hA ma t+ya te d+har+m+ma te swA hA/ zhags pa'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ rak+Sha rak+Sha/ ha na ha na/ kuT+Ta kuT+Ta mA ra ya/ duSh+Ta na bi nA ya ka~M hU~M dzaH cho ga'i phyag rgya'i sngags so/ /na maH sar+b+ba sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ d+ha ra d+ha ra/ badzrA nI la khaD+ga pA sha d+ha rA ya swA hA/ spyi gtsug gi phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ b+hany+dza b+hany+dza/ da ha pa tsa b+hasmi ku ru/ ha na ha na/ badzrA g+ni nA hU~M phaT/ tho ba'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ shAn+ta mUr+t+te/ da ha da ha/ sA d+ha ya sA d+ha ya/ dza ya dza ya/ bi dza ya bi dza ya bi dza ya kIr+t+ti swA hA/ mgo bo'i phyag rgya'i sngags so/ /na maH sar+b+bA shA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ b+hu ra d+ha ra a tsin t+ya bi la bi kra ma/ oM b+hUr+b+hu ba/ rak+Sha rak+Sha sar+b+baM swA hA/ rdo rje'i phyag rgya'i sngags so/ /na maH sar+b+bA sA pa ri pu ra ke b+h+yaH sar+b+ba ta thA ga te b+h+yaH sar+b+ba thA/ badzra hrI ta/ da ma da ma hU~M/ badzra ma t+yiM gi swA hA/ snying ga'i phyag rgya'i sngags so/ /na mas sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ hU~M oM da ha da ha/ kiM tsi rA ya si/ A na ya shI g+h+ra~M rak+Sha rak+Sha/ ban d+ha ban d+ha/ duSh+TA~M da ma da ma swA hA/ phyogs bcing ba'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ oM d+hu na d+hu ma/ ma hA pA sha khaDa ga d+hA ra/ sar+b+ba sA pa ri pU ra ke b+h+yaH swA hA/ bka' rtags kyi phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ ga ga na gaM d+hod b+ha be ma hA sa ma ya/ pa ri pU ra ke swA hA/ dri'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga to b+h+yaH sar+b+ba thA/ bi shud d+hi dz+nyA ni r+ts+tsa sa~M b+ha be ga ga na nAn+ta swA hA/ mar me'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ shud d+ha d+har+m+ma te shud d+h+ya shud d+h+ya/ grIh+Na grIh+Na/ sar+b+bA sA pa ri pU ra ka swA hA/ gtor ma'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ bi shud d+ha ma hA dz+nyA na sam b+ha be dIp+ta dIp+ta/ ma hA na ye swA hA/ bdug pa'i phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga ti b+h+yaH sar+b+ba thA/ ga ga na bi kran ta gA ma ni ma hA shud d+ha na ye swA hA/ me tog gi phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ ha na ha na/ pa ra ma bi shud d+he/ d+ha r+m+ma nA ye pa ri pU ra ke swA hA/ zhal zas kyi phyag rgya'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ AH satwa hi to d+yata/ da ma da ma/ sar+b+bA sA pa ri pU ra ke swA hA/ dpa' bo chen po spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga ta b+h+ya/ sarbA thA/ bi shud d+ha bi shud d+ha/ satwa sa~M b+ha be A na ya/ a naM ya/ ma hA na ye swA hA/ byang chub sems dpa' spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ bi shud d+ha satwa/ ha ha/ ha na ha na/ da ma da ma/ ma hA nA ye swA hA/ nyan thos spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+bA ta thA ga te b+h+yaH sar+b+ba thA/ oM badzra A kar Sha ya/ shI g+h+ra~M/ da ha da ha/ pa ca pa ca/ ma hA na ya ba ri bA re swA hA/ pho nya mo la sogs pa spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ ma thA ma thA/ A na ya A na ya/ pra be sha ya pra be sha ya/ sar+b+ba b+hU tA~M sar+b+ba de ba~M/ ta ma ta ma/ ma hA na ya pa ri bA re hU~M swA hA/ 'jig rten pa rnams spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ sa t+ya sa t+ya/ ma hA sa t+ya/ da ma da ma/ ma hA da ma/ A kar Sha ya/ A kar Sha ya/ sa t+ya bA de/ ma hA nA ya bi shud d+he swA hA/ drang srong rnams spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ dza ya dza ya/ bi dza ya bi dza ya/ ma hA sat+ya bA de ni sar+b+ba hi te swA hA/ sring mo rnams spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ hriHha ha/ ma tha ma tha/ da ma da ma/ ha na ha na/ ma hA nA ye/ mA ra mA ra haHswA hA/ ma mo rnams spyan drang ba'i sngags so/ /na maH sar+b+bA sA pa ri pU ra ke b+h+yaH sar+b+ba ta thA ga te b+h+yaH sar+b+ba thA/ oM ha na ha na badzra hU~M phaT/ sar+b+ba duSh+Ta gra ha~M/ ma tha ma tha/ b+hany+dza b+hany+dza/ sar+b+ba big+h+na/ da ma da ma/ sar+b+ba duSh+TaM oM hU~M phaT swA hA/ thun mong gi ni tsham ngam du/ /rig 'di 'jig rten gtso bos gsungs/ / phyag rgya rnams ni ma lus dang / /sngags ni rgyas par gsungs pa yin/ /don kun sgrub par byed pa'i sngags/ /'di ni myur du 'grub byed cing / /bsam gyis mi khyab 'bras stsol ba/ /shin tu gsang ba yang dag gsungs/ /phyag rgya dang ni lhan cig sbyar/ /dri dang me tog bdug pa dang / /gtor ma yang ni ma lus pa/ /sus kyang gzhom par mi nus so/ /phyogs bcing ba dang de nas bza'/ /gzhan yang yid la ci 'dod 'byung / /de kun sngags dang bcas pa yi/ /phyag rgyar sbyar bas 'grub par 'gyur/ /de nas bcom ldan 'das kyis ni/ /phyag na rdo rje bka' stsal pa/ /khro bo'i rgyal po rnam par shul/ /'di ni khyod la rjes su sbyin/ /zhi ba dang ni rgyas pa dang / /de bzhin mngon spyod dbang du bya/ /de bzhin sna tshogs gyur pa dang / /khyod la rag lus mchog tu 'dod/ /bsod nams du ma las 'khrungs pa/ /mtshan dang dpe byad bzang pos 'bar/ /mtshan rnams thams cad yongs su rdzogs/ /phyag rgya brkyang bas sngon 'gro bas/ /bdag gis rdzogs sangs rgyas dbang bskur/ /bde gshegs las 'khrungs rdo rje can/ /zab mo dbyangs kyi sgra yis ni/ /bde bar gshegs pas kun gsungs pa/ /khro bo'i rgyal po'i cho ga'i rim/ /rim pa ji bzhin gsungs pa nyid/ /khyod nyid gcig tu brtan g.yo ba'i/ /snyan pa dag ni bsrung bar gnas/ / dam pa'i chos ni sprul pa'i sku/ /sa steng na ni zhi bar 'gyur/ /sangs rgyas kun gyi spyan sngar ni/ /sa steng khyod nyid gcig pu gnas/ /'das dang ma byon par gyur dang / /'gro la phan phyir bzhugs pa rnams/ /kha lo sgyur ba khyod gcig pu/ /bla na med pa'i go 'phang 'thob/ /rdo rje sems dpa' blo ldan pa/ /slar yang phyag rgyar gzhag pas kyang / /dbang chen thams cad g.yos nas ni/ /sa gzhi rnam pa drug tu bskyod/ /de dag thams cad sngon gyur te/ /sangs rgyas dam chos bsam med pas/ /bsam gyis mi khyab 'bras bu 'thob/ /sa steng rdo rje sems dpa'i bdag /nam mkha' mdzod kyi 'od zer thob/ /'phags pa chen po rmad 'byung che/ /'jig rten yang dag 'byung 'gyur te/ /sa gzhi snying po 'di ru yin/ /de nas bcom ldan rgyal gyur pas/ /sa bcu'i byang chub sems dpa' la/ /brtan dang g.yo ba'i gsang ba rnams/ /snyan pa'i gsung gis bka' stsal pa/ /khyod ni bdag gis tshim par bya/ /bdag nyid chen po rdo rje 'chang / /rtag tu bag yod par gyur pas/ /bdag nyid chen pos de nyid bya/ /de nas bcom ldan 'das zhi ba/ /chos kyi dbyings la mchog tu gzhol/ /chos nyid gcig pu thugs chud nas/ /kun mkhyen cang mi gsung bar 'gyur/ /de nas 'khor rnams thams cad kyis/ /ngo mtshar ba'i tshig gsol pa/ /sangs rgyas che ba bsam mi khyab/ /'jig rten mgon pos bstan pa nyid/ /deng nas gzung ste bdag cag kun/ /rtag pa gcig pu mthar phyin 'gyur/ /bdag nyid chen po'i rdo rje can/ /bde bar gshegs pas gtad par 'gyur/ /'khor rnams shin tu dga' ba yis/ /snyan pa yi ni tshig gis smras/ /skal ba chen po mchog tu gyur/ /ci bgyi yi ni bka' bsgo stsal/ /de nas dpal ldan rdo rje 'chang / /me stag 'phro bar gyur pa yis/ /thugs rjer ldan pa'i shugs kyis su/ /'khor rnams la ni bka' stsal pa/ /khro rgyal ras ris cho ga ni/ /rdzu 'phrul chen po de nyid nyon/ /gang zhig sngags kyi sgo nas ni/ /byang chub sems dpa'i spyad pa sbyod/ /sngags kyi sgrub thabs las gsungs pa'i/ /don ni de nas thob par 'gyur/ /sngags pa 'chang bar gyur pa dkon/ /lus can rnams kyis bzod mi nus/ /gdug pa log par 'dren pa kun/ /'jigs pa'i gzugs can srin po rnams/ /ring po nas ni rang mi mthong / / dpa' bo dregs pa bcom pa bzhin/ /nad rnams thams cad rnam par grol/ /'jigs pa thams cad rnam par spangs/ /thams cad dbang phyug go 'phang ni/ /gang zhig lag pa'i nang du 'thob/ /rgyu skar med cing gza' sogs med/ / ma mo med cing lha yang med/ /'jigs pa kun las rnam grol bar/ /sa gzhi'i dkyil 'khor 'di ru 'gyur/ /sems can thams cad dbang thob cing / /sa stengs sngags shes rgyal po ni/ /'khor bcas kyis mchod snyan par smra/ /ras bris mthong ba shin tu gsal/ /skra dang bral ba des brtags pa'i/ /dpa' bos btsongs pa'i ras blangs te/ /dri kar chu yis bkrus nas ni/ /kun da zla ba lta bur gtsang / /ji srid ngur smrig mdzes pa ru/ /slar yang byed du gzhug par bya/ / bdug pa yis ni bdug par mdzes/ /thams cad du ni gtsang sbra bya/ /de nas de ltar byas nas ni/ /sa gzhi rab tu byug par bya/ /de la yid ni dri zhim spos/ /shin tu mdzes par byug par bya/ /gdugs dang rgyal mtshan ba dan dang / / rnga dang dril bu sgra snyan mchog /rgyu skar nyi ma bzang po la/ /rtsa ba'i sngags ni rab sngags pa/ /yid du 'ong ba'i bum pa ni/ /dri yi chu yis yongs bkang nas/ /sngags pas cho ga bzhin du gzhag /zhal zas gtor ma cho ga bzhin/ /de ltar 'di kun byas pa yis/ /rgya che bar ni byas pa'i char/ /rol mo'i las ni legs bslabs pas/ /skal ba chen po de ru bod/ /de nas gso sbyong sbyin par bya/ /byang chub sems ni khyad du 'ong / /skal ba chen po de mchod bya/ /gos dang rgyan gyis brgyan pa yis/ /de ni yang dag par mchod nas/ /de nas shin tu dben pa ru/ /de nas blo ldan thig gdab bya/ /ras kyis kha nas g.yog par bya/ /kha tshar dang bcas ring por gzhag /blo ldan de dbus bri ba ni/ /khro bo shin tu mthong dka' ba/ /lto ba che la shin tu khros/ /lag 'gro'i bdag po phyag bzhi pa/ /zhal ni rnam 'gyur zur gyis gzigs/ /ljags la rak+ta rnam par 'dzag /mche ba gtsigs shing shin tu 'jigs/ /sprin phung gtibs pa lta bu'i 'od/ / spyan dag nyi ma 'char ka 'dra/ /gsum pa du ba lta bu'o/ /gar mdzad hri sgrogs par byung ba/ /klu yi 'od kyis tshogs rang bzhin/ /thod pa rlon pa'i phreng ba ni/ /tshar bzhi lta bur bltas pa yis/ /'jigs pa chen po'i dbu la brgyan/ /g.yon ngos zur phud rnam par 'phyang / /me stag dang bcas me 'od kyis/ /rdo rje g.yas kyi phyag na'o/ /'od zer 'bar ba lhag pa yi/ /ral gri gnyis pa na ni bsnams/ /g.yon pa yis ni zhags pa bsnams/ /gnyis pa yis ni sdigs mdzub mdzad/ /sku la sbrul gyi rgyan gyis brgyan/ /nor rgyas bu yis ska rags byas/ /thod pa rlon pa'i phreng ba ni/ /mchod phyir thogs su spras pa ni/ /dpa' bo na bza' ngur smrig bsnams/ /rin chen rdo ba'i steng du ni/ /g.yas brkyang ba yi zhabs kyis bzhugs/ /'og tu bgegs ni bri bar bya/ /bsregs pas 'bar bar gyur pa yis/ /myogs po ru ni gyur pa'o/ /rtsa dang rgyu ma rnam par 'byung / /khrag 'dzag lta bur gnas pa yin/ /'og tu blo ldan sgrub pa po/ / pus mo dag ni sa la btsugs/ /spos kyi snod kyis brel ba'i bdag /mchod yon snod ni 'dzin par brtson/ /'di ni ras bris rab mchog tu/ /rdzogs sangs rgyas kyis rab tu gsungs/ /ras bris 'di yis de ma thag / sngags pa'i ma grub pa yang 'grub/ /khro bo'i rgyal po ngo mtshar ba/ /thams cad gdung byed yang dag bri/ /shes rab chen pos ri mo mkhan/ /ston mo drangs te yon yang sbyin/ /pir ni sar pa'i mtshan ma dang / /rdza mkhan snod ni sar pa ste/ /mtshan ma bye brag byed pa'o/ /yang na thams cad 'byung ba yin/ /de ltar thams cad gyur bltas nas/ /dri yi ras kyis dgab par bya/ /sa steng shin tu gsang ba ste/ /su la'ang bstan par mi bya'o/ / gang gis khro bo 'di mthong ba/ /mi shes dran pa 'khrul bar 'gyur/ /skye bo nad kyis 'khrigs nas ni/ /de ma thag tu brlag par 'gyur/ /sngags pa dngos grub 'dod pa yis/ /rtag tu bag yod par gyur pas/ /sngags pas rtag tu ras bris 'di/ /rtag par rgyun du bsrung bar bya/ /sngags kyi slob dpon dag gis bshad/ /rdzogs pa'i sangs rgyas dpa' bo rnams/ /'di rnams bsam gyis mi khyab pa'i/ /yon tan rab tu sgrub par byed/ /sa steng dkyil 'khor rtsa ba'i sngags/ /yon tan gnas su gyur pa yis/ /de dag thams cad bsgrub par bya/ /gsang sngags ma lus bsam mi khyab/ /bsam gyis mi khyab 'bras bu 'byung / /gsang sngags sku chen khro bo 'di/ / bcom ldan thub pa zhes ni bya/ /khro bo'i rgyal po blo ldan gyis/ /gsang sngags 'di ni bklags pas 'grub/ /khro rgyal 'di ni bsam mi khyab/ /sngags kyang bsam gyis mi khyab 'dod/ /thams cad bsam med go 'phang 'thob/ /bklags pas 'grub par gsungs pa yis/ /sngags pa bdag gis mi nus so/ /sngags pa blo dang ldan pa ni/ /gal te mtshams med lnga byas kyang / /skye bo de yi bsam pa ni/ /yongs su rdzogs par byed pa yin/ /de bas rnam pa thams cad du/ /sngags 'di 'bras bu bsam med 'byung / /rtag tu mngon par sbyangs gyur na/ /sngags pa'i 'bras bu bsam med 'byung / /ras bris gnyis par gyur pa ni/ / bshad kyis phan pa'i sems kyis nyon/ /yon tan rgya che bsam mi khyab/ /rdzogs sangs rgyas kyis yang dag gsungs/ /ngur smrig ras ni blangs nas su/ /dri yi chu yis yongs su dgang / /tshes grangs med cing rgyu skar med/ /gso sbyong smyung ba la sogs med/ /ri mo mkhan bzang btsal nas su/ /mkhas pas ri mo bri bar bya/ /sangs rgyas mgon po rdzogs sangs rgyas/ /ting nge 'dzin rnams rim bral ba/ /'khor los sgyur bar gyur pa'i sku/ /'od zer sna tshogs nyams pa'i 'od/ /byang chub dpag bsam shing dang ni/ /gdugs dang rgyal mtshan rnam par brgyan/ /logs su 'dab chags rgyal po ni/ /snyim pa me tog gis bkang bya/ /g.yas na bzhugs pa'i dpa' bo ni/ /thub pa chen po 'jig rten gtso/ /sna tshogs pa yi rgyan gyis brgyan/ /bla gos phrag pa gcig tu gzar/ /thal mo sbyar te 'dud pa ni/ /rtag tu bzhugs pa blta bar bya/ /g.yon gyi drung na bzhugs pa ni/ /snyems tshul dang bcas zhal bzhad pa/ /g.yas kyi phyag gis spyi bor ni/ /rdo rje 'di ni rab 'bar bsnams/ /dpa' bo chen po cod pan can/ /rgyan rnams kun gyis rnam par brgyan/ /ras bris cha yi mtshan ma ni/ /bsam pa thams cad rdzogs par byed/ /'og tu khro bo mi g.yo ba/ / ral gri zhags pas rnam par brgyan/ /rdo ba dmar po'i gdan steng na/ /'od zer tshogs kyi nang na bzhugs/ /'bar ba'i 'od kyis khor yug bskor/ /mchu yis mchu mnan zur mig gzigs/ /bgegs kun bsreg par gyur pa ni/ / dus zad me 'od lta bur 'byung / /sgrub pa po ni dngos song blta/ /spos kyi khang bu lag na thogs/ /pus mo gnyis ni yang dag btsugs/ /rgyal ba'i sras la sems song ba/ /de yi 'og tu khro bo gtso/ /khams gsum brtan par rnam par gnon/ /bka' gnang ba yi lam gyur cing / /de bzhin gshegs pa la gzigs pa/ /rin chen sna bdun rang bzhin dang / /sdong bu rgyas la ze bar bcas/ /'dzin pa'i klu yi bu mo ni/ /de bzhin gshegs pa lta bur 'gyur/ /pad ma dkar po mgon po ni/ /'jig rten gtso bo thugs rje'i bdag /pad ma dmar po yang dag bshad/ /bde gshegs las byung rdo rje can/ /de ltar 'di dag kun byas pa'i/ / ras bris rgyal po rdzu 'phrul che/ /ras bris 'di ni mthong ba yis/ /sdig pa thams cad rnam par spangs/ /rtog pa'i zhags pa 'jigs pas 'khrigs/ /ngan song rnams ni rgyun chad 'gyur/ /thams cad dbang phyug go 'phang 'thob/ /rgyal ba skyes mchog 'byung bar 'gyur/ /gza' rnams kun gyis gzung ba dang / /nad rnams kun gyis nyen pa dang / /'jigs pa kun gyis 'dir zin rnams/ /cho ga mthong bas grol bar 'gyur/ /sems can kun la brtse bar 'gyur/ /sems can thams cad dbang du byed/ /thams cad dbang phyug go 'phang 'thob/ /rtag tu ras bris blta bar bya/ /rtag tu bag yod par gyur nas/ /gtsang zhing tshul khrims rnam par brgyan/ /ras bris yang dag mchod byas nas/ /de yi tshe na sangs rgyas 'thob/ /de nas rdo rje 'chang chen bdag /thugs ni rnal 'byor gcig pur bzhugs/ /sems can bde ba ster ba yi/ /'dod par gyur pa'i rtog pa gsungs/ /zhi ba dang ni rgyas pa dang / /dbang du bya dang mngon spyod des/ /las 'di mdo ru bsdus nas ni/ /sngags pas sa steng dkyil 'khor du/ /ras bris sgrub par 'dod pa ni/ /rdzu 'phrul che de rtag tu nyon/ /dpa' bo gcig gi bdag nyid che/ /gtso bo bstan pa'i don mdzad pa'i/ /lus can kun la gsungs pa yi/ /de yi rtog pa yang dag bshad/ /mgon po 'phral du las mdzad pa/ /rtag tu gdul dka' 'dul mdzad pa/ /rgyal po ngan par bshad pa dang / /bstan la gnod pa byed pa can/ /de rnams brlag par bya ba'i phyir/ /khro bo 'di ni rab tu sbyar/ /gang yang 'di ru gsungs pa gzhan/ /bstan pa la ni gnod byed pa/ /gnod sbyin srin po grul bum dang / /lha sogs mi 'am cir bcas pa/ /de rnams gzhom par bya ba'i phyir/ /khro bo'i rgyal po rab tu sbyar/ /nad rnams thams cad rab tu grol/ /pha rol yul 'khor rnam par 'joms/ /'di na dmag dpung byed 'gyur ba/ /gdug pa'i sems can bdud rnams la/ /khro bo'i rgyal po rab sbyar na/ /bsam mi khyab pa'i stobs gnon to/ /bskrad pa dang ni gsod pa nyid/ /'jig rten gsum po brlag pa 'am/ /rtag tu smyo bar byed pa na/ /'di ni rtag tu sbyar bar bya/ /mgon po'i ras bris mchog gang gi/ lag tu chud par gyur pa na/ /de ni sa steng snying po ru/ /lus can 'tsho ba 'bras bu bcas/ /de tshe dkyil 'khor rab tu bzhugs/ /phyag rgya'i las ni rnam par sbyar/ /gus par 'dzin pa'i sngags pa ni/ /gtsang zhing ngang tshul rnam par brgyan/ /bla ma mnyes par yang dag byed/ /cho ga'i rim pa yon phul ba/ /gsang sngags gang yang rung gzung nas/ /phyag rgya sbyin pa yongs su gzung / /bla ma la ni rjes gnang thob/ /sa steng sgrub pa brtson par byed/ /dur khrod dang ni ri bo'i rtse/ /lam gyi bzhi mdo 'am mtshan ma gcig /gang du yid ni nyams dga' ba'i/ /gnas de nyid du brtsam par bya/ /slongs mo gcig pu'i zas za 'am/ /yang na rtsa ba 'bras sogs za/ /dben zhing ca co med pa'i sar/ /de ru 'bum phrag gcig bzlas bya/ /'bum phrag yongs su rdzogs nas ni/ /a pa marga'i yam shing sogs/ /mngar gsum dang ni ldan par bsreg /'bum phrag gcig tu tshang ba na/ /de nas zla ba nya yi ni/ /dus tshigs kyi ni sngon du bsdad/ /sgrub thabs 'di ni rtogs pa yis/ /bsrung ba'i cho ga tshul bzhin bya/ /ral gri la sogs mtshon cha gsungs/ /yang na gang yang rung ba gsungs/ /der gnas 'di ni rab tu thugs/ /sgrub pa po yi gang zag bzhugs/ /nam phyed sgra ni byung ba na/ /ras bris mdun du bzhugs su gsol/ /gsang sngags gzhag te thun gzhag la/ /'di ni nang gi rnam dag gnas/ /de nas de yi mtshan ma ni/ /der ni du ma 'byung bar 'gyur/ /snyan pa'i rnga yi sgra mang ni/ /yang na me tog char du 'bab/ /gnas su lha yi bu 'ongs te/ /sna tshogs rnga yi sgra dang yang / /mi 'am cis ni rnam brgyan pa/ /glu ni snyan par len par byed/ /tshangs dang brgya byin la sogs lha/ /rdzu 'phrul chen po der 'ongs nas/ /me tog gi ni char yang 'bebs/ /'dud cing shin tu bka' stsol zhu/ /rig pa 'dzin pas me tog gi/ char pas sa stengs khengs par phab/ /sna tshogs rnga yi sgra dang ni/ /rab tu bde zhing yid 'phrog pa/ /sa stengs de ru kun khengs par/ /glu snyan pa yi sgra yang len/ /byang chub sems dpa' chen po'i bdag /sa bcu'i gnas kyi dbang phyug rnams/ /byang chub sems dpa' blo ldan pas/ /thugs rje can bdag bka' stsol te/ /dpa' bo chen po bu khyod legs/ /srid pa'i rgya mtsho rnam par rgal/ /bu khyod bla med go 'phang ni/ /brtul phod pa yi gnas phod pa'o/ /byang chub sems dpa' mnyam nyid 'gyur/ /'gro la gcig pu phan par 'gyur/ /bu khyod sangs rgyas thams cad de/ /skyon rnams thams cad rnam par spangs/ /de nas shar gyi phyogs cha ru/ /grangs med du ma'i tshad gyur pa/ /lha yi bzhon pa'i me tog ldan/ /slar yang de yi mdun na gnas/ /rin chen gdu bu'i dra ba ni/ /phyogs kun du ni kun du gtibs/ /mu tig gi ni chun 'phyang can/ /gdugs dang rgyal mtshan ba dan spras/ /rin chen sna tshogs rang bzhin gdugs/ /nyi ma lta bur snang bar byed/ /steng du rin chen bla re yis/ /ri bo'i phyogs dang mnyam par phub/ /bye ba du ma'i rig 'dzin ni/ /kun kyang lhab lhub rgyan gyis spras/ /kun nas yongs su bskor nas ni/ /de yi mdun du mod la gnas/ /sngags pa dngos grub 'dod pa yis/ /phyag na rdo rje dpal dang ldan/ /de ni myur bar bzlas par bya/ /rdzu 'phrul chen po byon gyi bar/ /bdag nyid chen po der byon nas/ /mtshan ma 'di dag 'byung bar 'gyur/ /sa gzhi rnam pa drug tu g.yo/ /sa gzhi me tog bcal du 'grems/ /che ba'i bdag nyid sna tshogs dri/ /sa steng rab tu zhim por 'gyur/ /phyogs bzhi ru ni rnga yi sgra/ /rol mo la sogs brdung ba 'byung / /ha ha zhes sgrogs sgra chen po/ /sgra ni phyogs bcur thos par 'gyur/ /der byon bdag nyid chen po la/ /yid ni dad par gyur pa yis/ /mchod yon zhal bsil brjod nas dbul/ /dri dang me tog rim ji bzhin/ /de nas myur bar brjod bya ba/ / legs par 'ongs so brjod par bya/ /sdig pa'i dgra yis zin pa na/ /dpa' bo chen po bdag sdug bsngal/ /mgon khyod bdag la brtse bar mdzod/ /de nas bdag nyid chen po 'di/ /phyag na rdo rje rdzu 'phrul che/ /sngags pa blo dang ldan pa la/ / snyan pa'i tshig gis bka' stsal pa/ /dpa' bo chen po bu khyod legs/ /rnyed par dka' ba khyod kyis mthong / /khro bo'i rgyal po rdzu 'phrul che/ /bu khyod kyis ni 'di bsgrubs pas/ /shin du sdug bsngal lang longs 'khrigs/ /'khor ba'i rgya mtsho las khyod brgal/ /slar yang skye ba'i 'jigs pa med/ /'chi ba'i 'jigs pa 'jigs rung med/ /rdzogs sangs sems can mnyes gshin pa/ /bdag nyid chen po rnams mthong ba/ /phyogs bcu dag na bzhugs pa'i mgon/ /rtag tu dam chos gsung bar 'gyur/ /de ltar rig nas 'di yis ni/ /bdag nyid lag pa nas gzung ste/ /bdag nyid chen po'i bzhon pa ni/ /bsam med yon tan kun 'byung ba/ /bskyon der gnas par gyur nas ni/ /sngags shes ji tsam 'dod kyi bar/ /sangs rgyas zhing rnams ston par byed/ /sems dpa' bsod nams nyer 'tsho bas/ /de tsam tsham tshom med par 'gro/ /de nas de tshe che ba'i bdag /lha yi bzhon pa mdzes pa la/ /de ru bskyon par gyur nas ni/ /de nas rdo rje can gyur pa/ /mi g.yo rdzu 'phrul che ldan tshim/ /de nas lha yi bzhon pa bcibs/ /rig pa 'dzin pa'i tshogs kyis bskor/ /glu chen rnga yi sgra dang ni/ /rig pa 'dzin pa'i glu sgra sgrogs/ /bye ba du ma bsam med pa'i/ /rig pa 'dzin pa'i mkha' lding gis/ /de yi tshe na bskor nas grol/ /'di ni sangs rgyas zhing rnams su/ /rig pa 'dzin pa thams cad kyi/ /'khor los sgyur ba'i mkha' lding yin/ /bsam gyis mi khyab yon tan brnyes/ /bskal pa grangs med pa ru 'tsho/ /nyi ma dang ni zla ba'i 'od/ /dpal ldan gdul ka 'dul mdzad pa/ /blo bzangs kyis ni kun spyad na/ /sangs rgyas zhing ni grangs med na/ /mchod garnas 'di ni snang bar byed/ /bsam med pa yi dam chos nyan/ /blo ldan gang zhig thos gyur pas/ / sangs rgyas yon tan bsam med 'byung / /khro bo'i rgyal po'i ldan pa yi/ /dngos grub 'di ni yang dag bshad/ /gzhan yang gzhan la ci rigs par/ /mtshungs med bsrung bar byed de nyon/ /ras bris gnyis pa 'di yis ni/ /bsam gyis mi khyab grangs med las/ /rdzogs pa'i sangs rgyas khyed kyis mkhyen/ /shAkya zhes bya bas ni gsungs/ /zhi ba dang ni rgyas pa dang / /dbang dang mngon spyod de bzhin du/ /ras bris gnyis par tshul bzhin du/ /ji ltar rigs par bya ba yin/ /ras bris gnyis pa 'di yis ni/ /rgyal bas sgrub thabs gang gsungs pa/ /gal te sa steng sgrub byed na/ /'di ni nyid du cho gas bsgrub/ /sgrub thabs cho ga bsam mi khyab/ /'di ni bsam mi khyab pas gsungs/ /'bras bu bsam gyis mi khyab pa/ /rdzogs sangs rkang gnyis mchog gis gsungs/ /tshes grangs med cing rgyu skar med// //'di las smyung bar gnas pa med/ /lhag ma lhag ma min yang rung / /slar yang 'bad pas bsgrub par bya/ /'bum phrag gcig ni bzlas brjod na/ /mtshams med lnga byas sngags pas kyang / /las rnams thams cad kun nas su/ /bdag nyid rgyal ba'i skyes mchog 'gyur/ /gso sbyor la sogs dur bas byas/ /yang na brjod de btab pas so/ /rims sogs nad kyis btab pa dang / /gdug pa rnams gso byed pa dang / /nad rnams kun gyis zin pa dang / /gza' kun gyis ni rab gzir ba/ /ras bris spyan sngar rab gzhag ste/ /khro bo'i sngags kyis bsngags pa'o/ / bum pa chu yis spos bkang nas/ /nad kyis btab pa'i mi khrus bya/ /mchog tu bde ba sbyin pa na/ /de rnams rnal mar sos par 'gyur/ /sa steng gdon gyis zin pa yi/ /sbyin sreg dag ni yang dag gsungs/ /dur ba mngar gsum gyis btags pa/ /gdon rnams zhi phyir sbyin sreg bya/ /srin po yang ni bshad pa dang / /mkha' 'gro ma dang rdzu 'phrul che/ /sha za dang ni grul bum dang / /ma mo rdzu 'phrul che gsungs pa/ /gzhan yang gdug pa byed pa yis/ / sa steng sems can 'tshe byed gang / /de rnams gzhom par bya ba'i phyir/ /khro bo'i rgyal po rab tu sbyar/ /nad rnams dang ni gdon dag la/ /sman gyi shing gi yam shing ni/ /a ru skyu ru la sogs pa la/ /sbyin sreg 'di ni rab tu sbyar/ /rgyal srid thob par 'dod pa yis/ /sa gzhi steng na gnas pa gang / /de yi cho ga 'di ni mchog /pad ma'i cho ga sbyin sreg rim/ /pad ma chu la 'bum phrag gcig /mngar gsum gyis gtags 'dod pa yi/ /ras bris spyan sngar sbyin sreg bya/ /rgyal po 'dod par gyur pa yis/ /cho ga yang dag tshul bzhin bya/ /blon po thob par 'dod na ni/ /de yi cho ga 'di ni bshad/ /ku mu da ni 'bum phrag gsum/ /'bras bu 'dod pas sbyin sreg bya/ /de ni rgyal po'i blon po nyid/ /gang zhig 'dod pas 'grub par 'gyur/ /a pa mar ga 'bras dag ni/ /mngar gsum gyis ni brtags nas su/ /sbyin sreg 'bum phrag gcig byas na/ /yul gyi bdag po 'am grong khyer 'thob/ /dri zhim rdzas rnams 'bum phrag bdun/ /ras bris mdun du sbyin sreg bya/ /de nas sngags pa'i yid la ni/ /ci 'dod pa ni thob par 'gyur/ /gal te bud med bu med pas/ /bu ni don du gnyer byed na/ /dur ba til dang 'bras stsogs pas/ /sbyin sreg byas na bu rnyed 'gyur/ /khyo ni dbang du byed 'dod pas/ /de yi gzegs ma 'bum phrag bsreg /bdag po dbang du gyur pa yin/ /pad ma'i ze ba pri yang ku/ /ka li ka bcas bsreg par bya/ /mi 'khrugs pa'i nor rnyed cing / /shin tu yid gcugs 'byung ba yin/ /so ba'i 'bru yi sbyin sreg gis/ /yad 'dod mi zad pa ru bshad/ /'bras kyi sbyin sreg byas pa yis/ /mi zad pa yi nor yang 'byung / / pad ma'i sa bon bil ba'i 'bras/ /ku mu ta yi 'bras bsregs na/ /de ni mi zad longs spyod 'thob/ /'bras bu thams cad sbyin sreg pas/ /sa gzhi rgyal srid thob par 'gyur/ /tshwa dang nim pa'i sbyin sreg gis/ /dgra bo de ma thag tu 'chi/ / dpa' bo gcig pa mthong dka' ba'i/ /ras bris legs par bkram nas su/ /de yi spyan sngar rab sbyar bya/ /gnyen po gnod byed mngon spyod ni/ /gnod sbyin che dang rgyal po che/ /sa stengs rang sems snyems tshul can/ /mngon pa'i nga rgyal nga rgyal che/ / gdug cing gdug pa'i las byed pa/ /dkon mchog gsum la gnod byed dang / /chad rtag gsang sngags dam pa spangs/ /gsang sngags mchod par mi byed cing / /der gus sten pa smod par byas/ /bzlas pas sun ni 'byin pa ste/ /de rnams pha rol smon pas na/ /las kyi cho ga mthong ba yis/ /de rnams nyid la sbyar bar bya/ /sdig pa'i yul can chos med pa/ /'byung po thams cad sreg par byed/ /de rnams la ni las sbyar na/ /de ma thag tu srog 'chad 'gyur/ /sbrul gyi shubs ni blangs nas su/ /dug dang lhan cig phye mar btag /de nas nim pa'i 'dab blangs la/ /dgra bo'i ming ni bri bar bya/ /dben pa'i sa phyogs su gnas te/ /dug gis rtag tu bri bar bya/ /thod pa lnga ni blangs nas su/ / yungs mar gyis byugs bkang nas ni/ /nim pa'i shing la blo ldan gyis/ /cho ga bzhin me spar bar bya/ /gsum gyis sgyed pu byas nas su/ /gcig ni steng du gzhag par bya/ /bzhi pa yungs dkar gyis bkang ba/ / de yi steng du gzhag par bya/ /sbrul gyi shubs ni blangs nas su/ /mi de nang du gzhug par bya/ /dum bu re rer gtubs nas su/ /thod pa re rer gzhug par bya/ /brgya rtsa brgyad ni mngon bsngags nas/ /ras bris byang du zhal gzigs te/ / sngags pa lho ru phyogs par bya/ /khros pas tsog tsog por 'dug ste/ /skra grol ba'i khro bo nyid/ /sngags pas gdug pa gtso bor bya/ /thar par gyur gyi bar du ni/ /'di ni nyin phyed na byas na/ /de ma thag tu srog 'chad 'gyur/ /'chi ltas kyi ni 'dab ma blangs/ /shun pa 'am ni rtsa bar bcas/ /rang gi khrag ni nyid dag dang / /yungs mar dag ni yang dag ldan/ /tshwa dang rgya skyegs nyid dang ni/ /'di dag thams cad gcig byas te/ /dben pa yi ni gnas dag tu/ /ras bris byang du zhal bstan te/ /sngags pa lho yi phyogs su phyogs/ /me yi thab khung byas nas su/ /tsha ba'i shing gis khyad par du/ /yam shing yang ni rab tu bya/ /tsha ba'i shing ni 'ba' zhig gis/ /de nyid kyis ni sbar bar bya/ / stobs chen me yi thab khung du/ /las kyi cho ga mthong ba yis/ /sreg blugs bdun du bsreg par bya/ /de ni khro bo'i gzugs can te/ /de ru ye shes me ni spar/ /ral gri'i phyag rgya bcings nas ni/ /mkhas pas sngags kyi bzlas pa bya/ /khros pas sreg blugs stong phrag brgyad/ /de yi thab tu dbul bar bya/ /dang po bu ni 'chi bar 'gyur/ /gnyis pa la ni bzhon par bcas/ /gsum pa la ni yul 'khor kun/ /bzhi pa la ni rang srog go/ bstan pa yi ni las 'di ni/ /nyi ma gcig gis 'byung bar 'gyur/ /yang na yul 'khor 'jig pa 'am/ /sa gzhi'i bdag po 'chi bar 'gyur/ /rlung nag char pa de bzhin bdud/ /me yis tshig par yang 'gyur te/ /char chen mi bzad pa yi rlung / /rdul tshub char pa 'byung bar 'gyur/ /pha rol dmag tshogs khros pas 'tshe/ /stag dang seng ge'i mche ba 'debs/ /phyogs kun nas ni 'byung ba yi/ /gnod pa chen po 'byung bar 'gyur/ /gdug pa'i las ni byas pa yis/ /nyi ma de la 'byung bar 'gyur/ /sngags pa dang ba med pas na/ /de ni zhi bar ga la 'gyur/ /tshangs pa la sogs lha tshogs dang / /'jig rten skyong dang rdzu 'phrul che/ / 'jig rten pa yi lha kun dang / /gang yang ma mor bshad pa gzhan/ /byang chub sems dpa' bdag nyid che/ /sa bcu gnas kyi dbang phyug dang / /rdzu 'phrul chen po sangs rgyas dang / /sngags pas sa stengs gnas pa dang / / de ni bsrung bar mi nus te/ /rgyal po khros par gyur pa yis/ /de ni bsrung bar mi nus so/ /rang gi khrag gis lan tshwa btags/ /tsha ba yang ni khyad par du'o/ /bdag nyid lho phyogs su bltas te/ /ras bris byang du zhal phyogs la/ /me yi thab khung byas pa ru/ /tsher ma yang ni me spar te/ /kun nas khros bcas gdug pa yis/ /de nas dgra bo'i mer gzung la/ /tsog tsog pur 'dug yang dag bsreg /sreg blugs bdun phrag gsum gnyis sam/ / stong phrag gsum du mngon bsngags nas/ /gdug pa'i las kyis sbyin sreg bya/ /dang po la ni bu yin te/ /gnyis pa la ni chung mar bshad/ /gsum pa la ni bdag nyid 'gro/ /bzhi pa la ni bzhon pa dpung / /lnga pa la ni rang gi yul/ /drug pa la ni rigs rgyud gnyen/ /bdun pa the tsom med par ni/ /sa gzhi'i steng du thal bar rlog /thun phyed dang ni dbyu gu 'am/ /nyi ma phyed nas khros pa yis/ /thags zangs ris kyang 'chi 'gyur na/ /skye bo phra mo lta ci smos/ /gal te bde legs 'gyur 'dod na/ /rang gi yul 'khor pho brang 'dir/ /'o ma'i sregs blugs stong phrag gis/ /de ma thag tu rnal mar 'gyur/ /gsang sngags 'chang bas sa stengs su/ /rtag tu yul med byed 'dod dam/ /dgra bo smyo par byed pa 'am/ /yang na dben bar 'dod pa na/ /mi rus phye ma tshwa dang ni/ /ske tshe dang ni gnod sbyin 'khrigs/ /ras bris spyan sngar sreg blugs bya/ /sreg blugs bdun gsum yang na lhag /sreg blugs las ni zin pa na/ /the tshom med par myos par 'gyur/ / de ni zhi bar 'dod pa na/ /d+'ur ba'i 'dab ma 'o mas btags/ /stong phrag gcig tu sreg blugs bya/ /gal te sngags pa 'dod pa na/ /de yi tshe na rnal mar 'gyur/ /dug nyid dang ni khrag dang ni/ /rus pa'i phye ma yang dag ldan/ /nim pa'i sa bon ldan pa ni/ /yungs mar gyis btags mnye bar bya/ /ras bris byang du zhal bltas la/ /khros dang ldan pas sreg blugs ni/ /nyi shu rtsa gcig sbyin sreg bya/ /brgya rtsa brgyad ni bsngags bsngags nas/ /stan la tsog tsog pur 'dug cing / / sreg blugs las ni rdzogs pa na/ /du ba me ni kun du 'khrigs/ /bu dang phyugs dang gnyen bcas pa'i/ /dgra yi srog ni 'chad par 'gyur/ /mi yi rus pa'i phye ma blangs/ /de nas nim pa lnga par blang / /bdag nyid kyi ni khrag gam ni/ /yungs mar gyis ni btags byas la/ /ras bris byang du phyogs byas te/ /sreg blugs bdun du sbyin sreg bya/ /bu dang phyugs dang nye dur bcas/ /dgra gtogs de ma thag tu skam/ /sems can dang ni rgyal po dang / /gzhan yang lha la sogs pa dang / /ma mo rnams kyis sa stengs su/ /sngags pa la ni gnod byed pa/ /de rnams gzhom par bya ba'i phyir/ /sbyor ba 'di ni brtsam par bya/ /ske tshe dug gis de bzhin brtag /nim pa'i 'bras bu yang de bzhin/ /ci rigs sbyin sreg byas gyur na/ /de ma thag tu srog 'chad 'gyur/ /rtse gcig pa yi yid kyis su/ /de nyid tshogs rnams mnyan par gyis/ /gang gis 'phral du 'bras bu 'byung / /gsang ba'i sbyor ba bshad par bya/ /nim pa'i 'dab ma dug gis btags/ /de la khrag gis ming bri bya/ /tsha ba gsum gyis me spar te/ /sngags pa rtag tu lho ru phyogs/ /ras bris byang du phyogs pas dgram/ /stan la tsog tsog pur 'dug ste/ /khros pa'i yid kyis bsreg par bya/ /bsreg blugs bdun la nyi shu sngags/ /rigs rgyud phyugs dang gnyen bcas pa'i/ /dgra bo de yi tshe na 'chi/ /dbyug gu phyed dam yud tsam cig /gang du la lar gnas nas ni/ /sngags pa'i dgra bo gnod byed la/ / sbyor ba 'di ni brtsam byas na/ /dgra bo de ma thag tu 'chi/ /tshig 'di gzhan du ma yin no/ /rang gi khrag gis tsha gsum btags/ /dgra bo yi ni gzugs brnyan bya/ /blo ldan nim pa'i 'dab ma la/ /ming bris gang du gzhug par bya/ / sa stengs nim pa'i shing yang dag /mkhas pas rnam par blangs nas su/ /yang dag cho ga shes pa yis/ /dug gis bgos ni byug par bya/ /cho ga bzhin du dug byugs la/ /skad cig de la sbyar bar bya/ /sngags pa lho ru phyogs pa dang / / ras bris rtag tu byang du phyogs/ /tsog tsog pur 'dug rgyud khros pa/ /'bar zhing mched pa'i me lta bur/ /dgra bo yi ni ming smos na/ /de nyid kyi yang bya ba ni/ /sreg blugs gsum du sbyin bsregs na/ /dgra bo mod la 'chi bar 'gyur/ lha ni 'bras bur bcas pa dang / /d+ha du ra yi sreg blugs bdun/ /de ma thag tu smyo bar 'gyur/ /tsha ba gsum dang lan tshwa nyid/ /rtag pa nyid du bsregs gyur na/ /nad chen pos ni zin gyur nas/ /shing skam bzhin du bskams par 'gyur/ /dzi bi ra ni rang skyur bcas/ /rgyun du bsregs pa nyid gyur na/ /grang ba'i rims ni tshabs po ches/ /de ma thag tu 'joms par 'gyur/ /zhi ba'i 'o ma'i sbyin sreg gis/ /thams cad du ni brjod pa yin/ /khwa'i sgro ni blangs nas su/ /e raN+Ta yi mar khus btags/ /d+ha du ra yi me la ni/ /sreg blugs nyi shu tham pa bsreg /khwa ta bzhin du phyogs kun du/ /de ma thag tu dgra bo 'khyam/ /lan tshwa dug dang kun du ldan/ /mi yi rus pa ske tsher bcas/ /yungs kar kun du ldan pa rnams/ /nim pa'i me ni mi bzad par/ /dgra bo'i sreg blugs byas gyur na/ /de ma thag tu thal bar rlog /ba lang mkhris pa lan tshwar ldan/ /rgya skyegs khu bar bcas pa rnams/ / bsregs nas dgra bo nyams nas ni/ /de ma thag tu 'chi bar 'gyur/ /sge 'u gsher gyi khu bar ldan/ /de bzhin lan tshwa tsha ba gsum/ /de yi gzugs brnyan byas nas su/ /dur khrod kyi ni mgal dum blangs/ /de nyid la ni me spar te/ /ming ni gzugs brnyan nang du gzhug /gang du cung zad ci yod pa/ /rkang pa'i rtse mo thug par bsreg /yul dang yul 'khor bcas pa dang / /'dir ni bu phyugs gnyen du bcas/ /bdag nyid dang ni chung mar bcas/ /'dir ni mod du thal bar rlog /mkhas pas sol ba thal ba'i sa/ /dgra bo'i gzugs brnyan bris nas su/ /rkang pas rab tu mnan nas su/ /kun nas khros pa'i bzlas pa brtsam/ /gzar zug tshabs po ches 'debs shing / /phol mig chen po 'byung bar 'gyur/ /sa gzhi kun du myos 'gyur bar/ /de ma thag tu 'gyur ba yin/ /gsang sngags 'dzin pa ma gtogs pa/ /sa stengs gzhan ma su yis nus/ /'o ma can shing yam shing dang / /dkar gsum sbyin sreg byas pa yis/ /skye bo de ni rnal mar 'gyur/ /sngags pa'i bka' drin bzang pos song / /spangs pa rab tu blangs nas su/ /mkhas pas khang pa stong par bya/ /nim pa'i 'dab mar dgra yi ming / /thams cad dug gis byugs nas su/ /slar yang rab tu bskam par bya/ /nim pa'i 'dab mar dgra yi ming / /rang gi khrag gis bris nas su/ /de yi nang du bcug nas su/ /rgyus pas rab tu bsgrim par bya/ /tsha ba gsum gyis me spar te/ /sreg blugs gsum du sbyin sreg bya/ /sngags pas 'jig rten gsum brlag na/ /gdug pa'i sa bdag smos ci dgos/ /gal te zhi bar byed 'dod na/ /snying rje yis ni sems brlan cing / /'o ma can shing yam shing ni/ /'o mas btags nas til dang 'bras/ /sreg blugs brgya rtsa bdun bsregs nas/ /de ma thag tu zhi bar 'gyur/ /bya rgod sha dang de bzhin 'ug /byi la yi ni sha rnams dang / /ne'u le'i spu ni blangs nas su/ /spun pa'i me la bsregs gyur na/ /sreg blugs gsum tsam nyid kyis su/ /myur ba nyid du dbye bar 'gyur/ /bya rgod rus pa sbrul rus rnams/ /mi yi kha yi rus pa rnams/ /'di rnams ser rtsir gtubs nas su/ /khyim gyi drung du sbas nas ni/ /gal te bde byed kyis bsrungs kyang / /de ma thag tu dgra bo brlag /dug dang bdag nyid khrag dang ni/ /lan tshwa tsha ba gsum de bzhin/ /de yis dgra ni rigs rgyud bcas/ /chung ma dang bcas bu dang gnyen/ /de bzhin gshegs pas bsrungs gyur kyang / /de ma thag tu thal bar rlog /gcig gis bdag nyid brlag 'gyur te/ /gnyis pa yis ni chung ma'o/ /gsum pas bu dang gnyen la sogs/ /'dir ni 'chi bar the tsom med/ /nim pa bdag nyid chen po yis/ /yan lag lnga ni blangs nas ni/ /rang gi khrag dang ldan pa ni/ /nim pa lnga ni btags nas su/ /de yi gzugs brnyan byas pa dang / /dgra bo'i ming ni bris pa dag /de ni gtubs nas sreg blugs ni/ /brgyad nyid kyang ni bsreg par bya/ /bu dang phyugs dang gnyen du bcas/ /skye bo de yi mod la 'chi/ /gal te dgra bo skyob byed pa/ /bde byed de nas khyab 'jug dang / /tshangs pas yang dag bsrungs gyur dang / /ma mos bsrung bar byed pa dang / /gzhan yang snyan par grags pa yi/ /brgya byin la sogs lha dbang gis/ /sngags pas dang ba med pas na/ /de tshe bsrung bar mi nus so/ /thugs brtse ldan pa'i thugs kyis ni/ /sngags pa gang tshe dang ba na/ /d+'ur ba dang ni bsres pa yi/ /'o ma'i sreg blugs de tshe bsreg /mchog tu bde ba gtad pas na/ /de nas rnal ma dag tu 'gyur/ /gos blon pa ni blangs nas su/ /rgya skyegs khu bas rnam par btags/ /dug gi phye ma nyid dag dang / /dug dang ske tshe yang dag ldan/ /dben pa'i gnas su 'dug nas ni/ /nim pa'i shing la me spar te/ / gsang shes gang zhig khros pa dang / /sngags shes gtum par gyur pa yis/ /nyi ma phyed kyi char gnas nas/ /sreg blugs bdun du bsregs pa na/ /sngags pa dogs med gsang bar gnas/ /de nas brjod pas sbyin sreg bya/ /dang po sreg blugs sbyar ba yis/ /dug dang phol mig rnam par ldan/ /gnyis pa la ni nyin bzhi pa/ /gsum pa la ni rims chen po/ /bzhi pa la ni lus bskams 'gyur/ /lnga pa la ni dran pa med/ /drug pa lhag ma cung zad tsam/ /bdun pa la ni srog 'gro ba'o/ /sngags pa'i las ni 'grub bya'i phyir/ /gsang ba 'di ni bshad pa yin/ /mdor bsdus nas ni bshad bya yis/ /rdzu 'phrul chen po rtag tu nyon/ /sngags pa dang ba med pas na/ /gzhan du na ni 'tsho mi nus/ / ji srid sngags pa dang med par/ /de ni gang las zhi bar 'gyur/ /ji srid sngags rgyal mnyes pa dang / /thugs brtses brlan pa de yi tshe/ /zhi ba ru ni 'gyur ba yin/ /dug dang nim pa sgog skya dang / /dung gi phye ma nyid dang ni/ /ras bris nye ba'i drung du ni/ /nyi shu tham pa bsreg par bya/ /gnyen dang 'khor dang phyugs bcas pa'i/ /dgra bo rtsad nas bcad par 'gyur/ /gsang sngags 'dzin pa ma gtogs pa/ /de bzhin de tshe su yis nus/ /tsha ba gsum dang lan tshwa dang / /dug dang rang skyur bcas pa dang / /yungs mar dang ni skra dang yang / /sbrul gyi shubs ni nyid dag dang / /nim pa'i 'dab ma 'bras bur bcas/ /mi yi rus pa'i phye ma dang / /ske tshe dang ni dung phye dang / /sgog tsong dang ni sgog skya nyid/ /'di rnams phye mar byas nas su/ /tsher ma'i ma la mnyam bzhag pa'i/ /sngags pas de ni sreg blugs bya/ /dgra bo'i ming ni myur smos nas/ /sregs blugs gcig ni bsregs gyur na/ /dgra bo de ni mod du brlag /gsum dang bdun dang de nas gcig /dgra bo sreg blugs sbyin bsregs na/ /rang gi pha tshan yul 'khor bcas/ /nye du phyugs rnams brlag par 'gyur/ /gal te mkhas pas dgra bo ni/ /sbyor ba bya bar 'dod pa yin/ /yan lag gzugs brnyan byas nas su/ /bsgrub bya'i ming ni rab tu gzhug /nim pa'i shing la me spar te/ /khro bo'i me ni yang dag mchod/ /gang du cung zad ci yod pa/ /sreg blugs gsum ni bsreg par bya/ /sreg blugs gcig ni byas pa yis/ /bdag nyid bu dang chung ma'o/ /gnyis kyis rang gi gnyen tshogs nyid/ /gsum pas yul 'khor bzhis dpung bcas/ /rang byung bas ni bsrungs gyur kyang / /thal ba nyid du rlog par 'gyur/ /bdag nyid kyi ni stobs kyis su/ /ras ni rlon pa kun du bya/ /bsgrub bya'i ming ni smos nas su/ /de 'og de bzhin gzugs brnyan bya/ /mgo bo rdog pas rab mnan te/ /khros pas ya sos ma mchu mnan/ /brgyad kyi cha ni bzlas pa na/ /nad ni chen pos 'debs par byed/ /rims dang brgyal bar 'gyur ba ste/ /mcher pa'i nad dang mtshan bar rdol/ /nad rnams thams cad kun du ldan/ /chu sri bas ni zin 'gyur zhing / /rigs rgyud phyugs dang gnyen du bcas/ /dgra bo de ma thag tu 'gyur/ /gsang sngags 'chang ba ma gtogs pa/ /gzhan ma nus pa su zhig yod/ /skra dang rkang pa'i sar gnas pa/ /dgra bo de ni blang bar bya/ /de yi gzugs brnyan byas nas ni/ /dug dang ske tshe bcas pa rnams/ /tsher ma'i me la sbyin sreg bya/ /dgra bo mod du brlag par 'gyur/ /dgra bo'i rus pa'i phye ma ni/ /dug dang rang skyur yang dag ldan/ /dgra bo'i gzugs ni byas nas su/ /nim pa'i shing ni mer bsregs na/ /gso bar mi nus nad kyis ni/ /skye bo de ma thag tu 'debs/ /gsang sngags 'chang ba ma gtogs pa/ /gso nus gzhan ma su zhig yod/ /nim pa dug dang tsha ba gsum/ /d+ha du ra yi 'bras bu rnams/ /'di rnams gcig tu byas nas ni/ /gzugs brnyan rab tu bya ba yin/ /de yi lus po gtubs bsregs na/ /de ma thag tu srog 'chad 'gyur/ /khrag dang lan tshwa dug dang ni/ /de nyid gcig tu byas nas su/ /ar ka'i shing me de bzhin du/ /sreg blugs gsum ni bsreg par byed/ /dbyug gu gcig gam thun phyed na/ /de ma thag tu sa steng 'chi/ /yungs mar gyis ni btags byas la/ /ras bris byang du phyogs byas te/ /lan tshwa nim pa'i 'dab ma dang / /tsha ba'i mar khus de bzhin du/ /sreg blugs lan bdun tsam nyid ni/ /sngags pas gang du gnas pas bsreg /sreg blugs lan bdun bsregs pa na/ /sa stengs de ma thag tu 'chi/ / rang gi khrag dang tsha ba gsum/ /yungs mar dang ni yang dag ldan/ /tsher ma'i me la bsregs gyur na/ /de ma thag tu thams cad kyi/ /arga nu hi 'o ma dang / /de bzhin du ni phag pa'i brun/ /dur khrod me la bsregs pa na/ /de ma thag tu mod la brlag /byi tsher phag pa'i spu de bzhin/ /sreg blugs lan gsum bsregs gyur na/ /'phral du mod la brlag par 'gyur/ /nim pa'i lo ma na le sham/ /dug dang yungs mar nyid dag ni/ /lan bdun rab tu sreg blugs na/ /'phral du srog ni 'chad par 'gyur/ /khwa yi rus pa mi rus dang / /ne'u le yi rus pa nyid/ /phye mar btags nas zhi bar bya/ /yungs mar yang dag ldan pa ru/ /nim pa'i shing gi mer bsregs na/ /grong dang grong khyer du bcas pa'i/ /dgra bo 'phral du brlag par 'gyur/ /'ug pa'i rus pa stag gi spu/ /thod pa'i rus pa legs par sbyar/ /dgra bo'i sgo ru brus nas sba/ /de ma thag tu skrod par 'gyur/ /stag gi rus pa ne'u le'i spu/ /de bzhin du ni khyi yi spu/ /tsher ma'i me la bsregs gyur na/ /de ma thag tu 'byed par 'gyur/ /sa ti me tog na le sham/ /nim pa'i lo ma de bzhin dug /thams cad gcig tu byas nas ni/ /brgya rtsa brgyad du bsreg par bya/ /gang gi ming nas smos nas su/ /blo ldan me yis bsregs pa na/ /sa stengs pa ni ma lus pa/ /'jig rten du ni 'byed par 'gyur/ /d+ha du ra yi sa bon dang / /de bzhin nim pa'i 'bras bu dang / /dug dang lan tshwa nyid dag ni/ /brgya rtsa brgyad du bsregs nas ni/ /bu dang phyug dang nye dur bcas/ /the tshom med par thal bar rlog /sbrul dang ne'u le nag po dang / /kha yi rus pa yang dag ldan/ /rtsangs pa yi ni mgo bo rnams/ /cha ni mnyam por byas nas su/ /rang gi khrag dang btags nas su/ /sdong bu gcig pu byas pa yin/ /brgya rtsa brgyad ni mngon bsngags nas/ /dgra bo'i sgo khar spar bar bya/ /bu dang phyugs dang gnyen du bcas/ /dgra bo de yi tshe na 'chi/ /mi yi zhag ni nyid dag dang / /thal ba thod par blangs nas su/ /rgya skyegs khu ba yang dag ldan/ /bsdoms nas ril gcig rab tu bya/ /khwa yi rus pa nang du gzhug /dgra bo'i sgo khar gzhag pa na/ /bdag nyid grong de dang bzhin bcas/ /dgra bo de yi tshe na brlag /d+ha du ra yi bdag nyid lnga/ /blangs nas dug dang tsha ba gsum/ /sregs blugs lan gsum bsregs nas ni/ /de ma thag tu 'chi bar 'gyur/ /ne'u le'i shing ni yang dag blangs/ /mkhas pas rab tu bskam par bya/ /dug dang tshwa ni yang dag ldan/ /sreg blugs lan gsum bsregs pa na/ /nad ni sna tshogs kun byung nas/ /'phral du srog ni 'chad par 'gyur/ /las 'di rab tu sbyar byas na/ /de ma thag tu 'grub par 'gyur/ /sol ba dang ni lan tshwa nyid/ /tsha ba gsum ni mnyam por bsgos/ /yungs mar dang ni yang dag ldan/ /de nas gzugs brnyan byas nas su/ /tsher ma yi ni me spar te/ /ras bris byang du phyogs pa dang / / sngags pa lho ru phyogs gyur cing / /khros pas me ni rab 'bar 'gyur/ /bsreg blugs lan gsum nyid du ni/ /dgra bo'i gzugs brnyan bsreg par bya/ /gcig gis bu ni 'chi bar 'gyur/ /gnyis pas chung ma phyugs dang gnyen/ /gsum pas bdag nyid yul 'khor dang / /phyugs dang gnyen du bcas pa rnams/ /de ma thag tu thal bar rlog /sngags pa'i bka' drin med par ni/ /slar yang zhi bar ga la nus/ /brgya rtsa brgyad las lhag pa yi/ /lo ma'i sreg blugs de nas dbul/ / de tshe de ru rang gi ni/ /'khor phyugs gnyen 'dab rnams dang ni/ /de bzhin du ni zhi bar 'gyur/ /d+ha du ra yi 'bras blangs nas/ /khong pa kun du bru bar bya/ /nim pa zhes bya'i lo ma 'di/ /dgra bo'i ming ni bri bar bya/ /dug dang khrag ni yang dag ldan/ /de yis rtag tu dgra bo bri/ /tsha ba gsum dang lan tshwa nyid/ /khrag gis gang bar dgang bar bya/ /de ru ming ni bcug nas su/ /skra yis yongs su bre bar bya/ /nim pa'i me la yungs mar gyis/ /cung zhig tsam du gtso bar bya/ /rang gi yul 'khor phyogs kun 'joms/ /rang gi lha ru gyur pa gang / /khams gsum pa yi bdag po yis/ /the tshom med par thal bar rlog /gdug pa'i sems can lta ci smos/ /rgyal po rdzu 'phrul chen po yang / /rang byung bas ni bsrungs gyur kyang / /de dag thams cad brlag par 'gyur/ /sbyor ba 'di la brten nas su/ /thugs rjer gyur pa'i yid kyis su/ /bstan pa yi ni don byed par/ /sa stengs 'dir ni the tsom med/ / yang dag bsam mi khyab pa 'di/ /khro bo'i rgyal pos rnam par 'phrul/ /rtag tu bag yod par gyur pas/ /thugs rje'i ro la gnas pa yis/ /bstan pa dag ni bsrung ba'i phyir/ /dam pa 'di ni sbyar bar bya/ / nim pa'i 'bras bu yang dag blangs/ /de nas tsha ba gsum gyis dgang / /khyad par nim pa'i 'dab ma la/ /dgra bo'i ming ni bris nas su/ /lnga yi bdag nyid yang dag blang / /de tshe cho ga bzhin me spar/ /byas thod pa dang ni dug nyid kyang / / gang du cung zad gnas nas ni/ /bcug ste sngags pas gtso bar bya/ /dgra bo de ni mod du 'chi/ /yul 'khor phyugs bcas de bzhin no/ /nye bar 'tshe ba thams cad dang / /dug dang rlung dang skye gnas nad/ /mu ge dang ni yul 'pho dang / /rlung gi char dbab kun du 'khrigs/ /srin po 'byung po'i tshogs kun gyis/ /sa stengs kun du khengs par 'gyur/ /gsang sngags 'chang ba ma gtogs pa/ /cung zad skyob pa yod pa min/ / snying rje'i sems ni bskyed nas su/ /'gro ba gzir ba la bltas te/ /nyi shu rtsa gcig 'o ma yis/ /dgang blugs de tshe dbul bar bya/ /sngags pa'i bka' drin bzang po yis/ /de yi tshe ni zhi bar 'gyur/ /sngags pa blo ldan ma mnyes na/ / gzhan du zhi bar ga la 'gyur/ /sngags kyi dngos grub bya ba'i phyir/ /yang dag sbyor ba 'di sbyar na/ /bstan pa bsrung ba'i don phyir dang / /gdug pa rnams ni gzhom phyir dang / /rgyal po 'am ni gdug pa can/ /bstan la gnod pa byed pa rnams/ /de rnams tshar gcad pa yi phyir/ /shin tu 'grub par byed pa yi/ /yang dag 'di ni rab sbyar na/ /de ma thag tu brlag par 'gyur/ /mi rus dug gi phye ma dang / /khyi yi rus pa nyid dag dang / /de bzhin ska tshe rgod rus dang / /yungs mar sbrul gyi shubs de bzhin/ /nim pa yang dag lnga bdag nyid/ /rgya skyegs lan tsha nyid dag ste/ /'di dag thams cad gcig bsdus nas/ /tsher ma'i me ni mi bzad pa/ /bdag nyid khro bo me lta bus/ /sreg blugs gsum ni bsreg par bya/ /de ru bdud ni 'tshe 'gyur zhing / /nad rnams mang pos kun du 'khrigs/ /bu phyugs gnyen du bcas pa yi/ /rgyal po 'ang brlag par 'gyur ba yin/ /rgyal po gdug pa'i sems ldan pa/ /sngags pa la ni 'tshe ba mang / / sbyor ba 'di ni rab brtsams nas/ /sngags pa mod du yang dag 'gyur/ /tsha ba gsum dang lan tshwa dug /skye tshe bsregs pa nyid dang ni/ /tsha ba tsha ba'i mar dang yang / /rgya skyegs khu ba sbrul gyi shubs/ /'di rnams gcig tu byas nas su/ /de yi tshe na gzugs brnyan bya/ /tsha ba yis ni kun du dgang / /tsha ba'i me ni yang dag ldan/ /de nyid la ni ming bris nas/ /mi bzad me la bsregs gyur na/ /dgra bo de yi mod la 'chi/ /gang tshe sngags pa ltos med na/ /gzhan du dug gi mtshan ma dang / /yang na mi bzad phol mig dang / /nad chen pos ni kun du dkrigs/ /rims dang rgyal nad 'byung bar 'gyur/ /mes bsregs char pa chen po 'bab/ /de nas rdo rje thogs nas kyang / /nad chen rtag pa'i rims kyis ni/ /bu dang phyugs dang gnyen du bcas/ /the tshom med par 'chi 'gyur te/ /sngags pa zhe ba gnag pas so/ /gang tshe slar yang mnyes nas su/ /thugs rje gtad pa'i sems gyur na/ /nad kun las ni rnam grol bar/ /sa stengs de ma thag tu 'gyur/ /gdug pa'i las ni mdor bsdus pa/ /ngo mtshar can 'di yang dag gsungs/ /sa stengs snying po 'di sngags pa'i/ /myur ba'i las ni yang dag bshad/ /ting 'dzin yul ni bsam mi khyab/ /rdzu 'phrul yul yang bsam mi khyab/ /pha rol gnon pa 'ang bsam mi khyab/ /rdzogs sangs rkang gnyis dam pa yis/ /kun kyang bsam gyis mi khyab gsungs/ /yon tan 'di ni su yis nus/ /yon tan rmad du byung ba ste/ /ji srid sems ni spyod gyur pa/ /de srid las ni bsdus pa yin/ /byang chub sems dpa' rdzu 'phrul che/ /rdzogs sangs rgyas kyis kun du gsungs/ /zhi ba dang ni rgyas pa dang / /de bzhin dbang du bya ba'i las/ /rgyud gzhan las kyang gsungs pa yi/ /de dag thams cad 'di ru byed/ /ji srid de ru gsang sngags ni/ /sa stengs dkyil 'khor de gsungs pa/ /de kun rtog pa'i rgyal po ni/ /rdzu 'phrul chen po 'di bsgrub bya/ /zhi ba 'o ma dur ba yis/ /'dab ma bsregs pas sbyin sreg bya/ /dkar gsum mngar ram sbyin sreg gam/ /'bras bu nyid kyang mnyam bzhag pa/ /gzhan yang 'bras bu'i tshul dang ni/ /yang na 'o ma can gyi shing / /so ba 'bru ni de bzhin no/ /rin chen sna tshogs las byung ba/ /las kyi khyad par cho ga ni/ /zhi bar gang zhig 'bras bu grags/ /me thab de bzhin bdag nyid dang / /gang zhig gnas ni rab tu grags/ /zhi ba'i las rnams gsungs pa yi/ /phyogs ni gang zhig yang dag gsungs/ /gang zhig yam shing gsungs pa yi/ /tshad ni gang zhig rab tu grags/ /gzhan yang gang zhig rab grags pa/ /de dag thams cad 'di ru bya/ /de la zhi ba nyid 'di ni/ /de dag thams cad 'di ru sbyar/ /gang zhig dbang phyug byas pa ni/ /las ni dbye ba 'ang de nas ni/ /me thab ci byin bdag nyid dang / /phyogs kyi cha 'am yang na gnas/ /cho ga sna tshogs yang dag 'khrigs/ /gzhan du gang zhig gsungs pa yi/ /bdag nyid chen po dbang gi las/ /dngos grub 'dod pa'i sngags pa yis/ /de dag thams cad 'di ru sbyar/ /rdzogs sangs sems can mnyes gshin pas/ /rgyas pa yang ni yang dag gsungs/ /cho ga sna tshogs zas dang ni/ /sna tshogs las ni legs sbyar ba/ /phyogs kyi khyad par gsungs pa dang / /de nas yang ni me yi thab/ /gzhan yang cung zad ci gsungs pa/ /byang chub snying po sogs gsungs pa/ /bdag nyid rnyed pa legs 'tsho ba/ /de dag thams cad rgyas par sbyar/ /'di kun yang dag bshad pa ni/ /khro bo'i rgyal po'i rnam 'phrul yin/ /sa bcu gnas kyi dbang phyug dang / /gang yang sus kyang mi nus pa/ /'di kun mod la myur du ni/ /dran pa tsam gyis kyang bsgrub bya/ /khro bo che la bsam mi khyab/ /rdzogs sangs rgyas kyis rab tu gsungs/ /de yi 'bras bu bsam mi khyab/ /gang zhig lag tu chud gyur pa/ /de yi ngan song stongs par 'gyur/ /'jigs pa thams cad 'jigs pa dang / /bgegs chen yang ni 'jigs par byed/ /gang yang nad ni thams cad 'dod/ /'jigs pa 'di ni thams cad dang / /sdig pa thams cad kun du 'khrigs/ /'di ni dran pa 'ba' zhig gis/ /de dag thams cad med par 'gyur/ /'jigs pa thams cad 'khrigs pa dang / /thams cad ldan pa'i 'khor bltas na/ /sa stengs yid ni mchog tu bde/ /byang chub sems dpa' thams cad kyang / /ngo mtshar spyan rgyas pa phye nas/ /rdo rje 'dzin pa blo ldan gyis/ /snyan pa yi ni tshig gis gsol/ /dpa' bo sems dpa' chen po legs/ /rdo rje'i rigs las yang dag 'byung / /bya shes khyod ni sangs rgyas kun/ /rdzu 'phrul chen po'i sras gcig khyod/ /bdag nyid chen po mi g.yo ba'i/ /rtog pa mchog 'di gsungs pa gang / /gang gi lag tu chud gyur pa/ /de yi lag na dngos grub gnas/ /yon tan bsam mi khyab ldan pa'i/ /bsam gyis mi khyab bsgrub pa'i thabs/ /ngo mtshar du ma dang ldan pa/ /gsang sngags 'di ni 'chang bar 'gyur/ /bdag cag kyang ni de bka' nyan/ /lha dang lha min bcas pa'i klu/ /rgyab phyogs rjes su 'brang bar ni/ /sngags pa de la 'byung bar 'gyur/ /sems can thams cad skal bzangs su/ /mnyes dga' bar ni 'byung bar 'gyur/ /bgegs su gyur pa thams cad ni/ /sngags pa'i bka' sgo byed par 'gyur/ /de nas bcom ldan 'das kyis bgegs thams cad 'joms par byed pa'i rdo rje kun du 'bar bar byed pa'i me lce 'byung ba zhes bya ba'i ting nge 'dzin la snyoms par zhugs so/ /bcom ldan 'das snyoms par zhugs ma thag tu de nas re shig sangs rgyas kyi zhing 'di nyid/ /'gul/ rab tu 'gul/ kun du rab tu 'gul/ g.yos/ rab tu g.yos/ kun du rab tu g.yos/ ldeg rab tu ldeg kun du rab tu ldeg /'ur 'ur/ rab tu 'ur 'ur/ kun du rab tu 'ur 'ur/ chem chem/ rab tu chem chem/ kun du rab tu chem chem mo/ /de nas re shig sangs rgyas kyi zhing 'di nyid bgegs thams cad dang / log par 'dren pa rnams dang / gang yang kha cig 'di na gdug pa'i sems dang ldan pa gzhan gyi srog 'phrog cing glags tshol ba'i srin po dang / 'jigs pa'i gzugs can log par 'dren pa de rnams rdo rje gar gyi dbang phyug gi gzi brjid kyis bsregs shing gnas med la/ gang yang sangs rgyas chos la ni/ /gus pa yis ni skyabs song bas/ / gang zhig skye bo de lus la/ /sdug bsngal ci yang yod ma yin/ /de nas bcom ldan 'das kyis byang chub sems dpa' phyag na rdo rje la bka' stsal pa/ sngar med pa yi bgegs kyi gzugs/ /bsgrub pa bya ba'i cho ga ni/ /phyag na rdo rje tshur la nyon/ /mi shes pa yi sems bsgribs pas/ /rgyud ni mi shes par gyur pa/ /de ni bgegs kyis zil mnan cing / /'dir ni sngags la dad ldan na/ /sel ba ru ni gyur pa ste/ /yangs pa yi ni mchog tu 'gyur/ /las kyis rgyud dang 'bras bu ni/ /legs byas nyes byas de bzhin du/ /log pa'i rgyal po zil mnan cing / /de dag thams cad brnyas pa byed/ /log pa'i kun rtog mang po yis/ /dmyal bar myur du skye bar 'gyur/ /ltas ngan las kyi 'bras bu kun/ /de nas gso sbyong yod ma yin/ /de nas gsang ba'i bdag po phyag na rdo rjes bcom ldan 'das kyi zhabs gnyis la gtugs nas 'di skad ces gsol to/ /bcom ldan 'das bshad du gsol/ bde bar gshegs pas bshad du gsol/ bgegs rnams kyi snga na med pa'i gzugs su gyur pa/ ma 'ongs pa'i byis pa'i sems can rnams shes rab chung bas/ bgegs rnams sngar med pa'i 'byung ba'i rgyu mi 'tshal bas na de rnams bsal bar bya ba'i phyir/ gtso bos bshad du gsol/ de nas bcom ldan 'das kyis byang chub sems dpa' phyag na rdo rje la bka' stsal pa/ bgegs rnams zhags pas bcings pas ni/ /sngon gyi las la rag las yin/ /ser sna goms pa'i sbyor ba yis/ /'dod pa'i dngos po la gnod pas/ / sems ni rtog pa'i skyon gyis ni/ /sngags pas bgegs su skye bar 'gyur/ /de rnams gzhom par bya ba'i phyir/ /sems ni byang chub gtad par bya/ /bgegs rnams thams cad rnam par 'jig /thog ma med pa'i 'khor ba'i zom/ / gang yang sdig pa cung zad pa/ /thog med bsreg pa'i 'khor lo ni/ /byang chub sems kyi mthu yis su/ /de dag thams cad zad par 'gyur/ /byang chub sems ni sems chen po/ /sems kyi nges pa rnam par spangs/ /thog ma med pa'i sdig pa'i skyon/ /nags mtshams me yis bsreg par 'gyur/ /sngags pas sems la mkhas pas na/ /las rnams thams cad bsreg par 'gyur/ /'di ltar byang chub sems 'dzin na/ /'dod pa'i dngos grub thob par 'gyur/ / gang zhig byang chub sems bskyed pa/ /gos med dri ma med cing brtan/ /the tshom med pa nyid du ni/ /de yi dngos grub lag na gnas/ /byang chub sems ni ma bskyed cing / /dad dang brtson 'grus rnam par spangs/ /skyes bu bka' bsgo byed pa ni/ /'dis ni dngos grub yod ma yin/ /phyag na rdo rje byang chub tu sems bskyed pa la sogs pa dam tshig 'dis sngags pas sngags bsgrubs na bgegs rnams bgegs byed par mi 'gyur te/ de ci'i phyir zhe na/ phyag na rdo rje de ni lha dang 'jig rten pa rnams kyis phyag bya bar 'os pa yin no/ /slar brjod cing dgongs te/ bgegs dang / log par 'dren pa dang / gnod sbyin dang / srin po dang / dri za dang / yi dags rnams dang / sha za rnams shin tu rgyang ring po nas sa stengs su sngags 'chang ba mthong bas spro ba bskyed de phyag byed do/ /skyon rnams thams cad rnam par grol/ /bsod nams thams cad shin tu rdzogs/ /byang chub sems tshogs yang dag ldan/ /bla ma sangs rgyas kun dang mnyam/ /de nas phyag na rdo rjes yang bcom ldan 'das la 'di skad ces gsol to/ /bcom ldan 'das ji ltar na bgegs kyi sngar gyi gzugs kyi gzugs rnams sgrub pa po la sbyar ba la ji ltar 'gyur/ bcom ldan 'das kyis bka' stsal pa/ gsang ba'i bdag po gang gi tshe sngags pa bgegs kyis zil gyis mnan pa de'i tshe rims dang tshad pa'i nad dang / bkres skom du gyur cing snyoms las la dga' la nges pa log te the tshom za bar gyur te/ /nad dang / 'tshe ba dang / bdag nyid kyi lha kha phyir bltas shing lha rnams ni dmigs kyis sel bar byed pa de'i tshe gsang ba'i bdag po sngags pa bgegs kyis zil gyis mnan pa yin par rig par bya'o/ /gsang ba'i bdag po de'i tshe slob dpon gyis bgegs thams cad zlog par byed pa'i khro bo'i rgyal po mi g.yo mgon po'i dkyil 'khor bris te/ bgegs thams cad bcom nas dbang bskur bar bya'o/ /de la gsang ba'i bdag po dkyil 'khor ni 'di yin te/ khor yug tu ni gru bzhi ste/ /khyam ni kun nas khor yug tu'o/ /rdo rje bcing ba'i sbyor ba nyid/ /rdo rje phan tshun bcings sbrel bya/ /khru brgyad dang ni bzhi dang lnga/ /bcu dang bcu drug pa nyid dam/ /khru gang 'am ni khru gnyis pa/ /ji ltar 'byor pa mdzes par bya/ /de ru sgo gcig pa yin te/ /rdo rje'i gur ni sbyar bar bya/ /rdo rje'i ra ba kun du bskor/ /dkyil 'khor dam pa bri bar bya/ /de yi dbus su dpa' bo ni/ /pad ma'i steng na yang dag bzhugs/ /de yi shar du sangs rgyas kyi/ /yum ni nam mkha'i spyan yin no/ /de yi g.yon du bri bar bya/ /nam mkha'i dri med rdo rje can/ /g.yas kyi phyogs su shugs chen po/ /'phro ba rdo rje phreng ba can/ /dpa' bo chen po g.yon phyogs su/ /rdo rje phyag can rdo rje can/ /dpa' bo chen po g.yas ngos su/ /khro chen snyems tshul zhes bya ba/ /'og tu ngos su mgon po ni/ /mi g.yo ba ni stobs chen po/ /khro bo chen po ral gri'i phyag /khams gsum rnams ni gcod par byed/ /sgo yi phyogs su bri bya ba/ /mthong dga' mngon phyogs de bzhin no/ / de ltar 'di dag kun byas na/ /kha dog nag dang dmar po ru/ /khro ba'i gzugs ni gzhag nas su/ /bum pa rnams ni mngon par bsngags/ /kha ni ba glang la sogs brgyan/ /kha nas sa bon gyis bkang ste/ /mgrin pa gos gyis yang dag bcings/ /me tog chun 'phyang nye bar spras/ /rin chen sna lnga 'bru sna lnga/ /sman chen po ni yang dag ldan/ /dri chu yis ni rab tu bkang / /lha rnams thams cad dgod par bya/ /dri dang me tog sogs dge bas/ /ji ltar rnyed pas mchod par bya/ /mi g.yo bdag nyid chen po yis/ /dbang bskur bas ni rab tu bya/ /de ru dkyil 'khor gnyis po ni/ /dkyil 'khor mngon par phyogs de nas/ /kun nas gru bzhi pa yin te/ /khru do pa 'am khru bzhi pa/ / dbus su pad ma bri bar bya/ /bar du rdo rje rnams 'phro ba/ /rdo rje'i phreng bas khor yug tu/ /rdo rje snyed pas bskor bar bya/ /de yi dkyil du gzhag nas ni/ /'dir ni 'bad pas dbang bskur bya/ /mi g.yo bdag nyid chen po yis/ / ral gri'i phyag rgya de nas bcing / /snying ga nas ni snying gar sbyin/ /kun nas 'bar ba'i phreng ba can/ /bgegs rnams kun las rnam grol nas/ /rdo rje 'dzin pa'i dngos grub 'thob/ /sdig pa thams cad rnam par grol/ /bgegs ni thams cad rnam par spangs/ /chos kun yon tan gyis brgyan pa/ /ji bzhin 'dod pa'i dngos grub 'thob/ /de nas phyag na rdo rjes bcom ldan 'das la 'di skad ces gsol to/ /bcom ldan 'das bshad du gsol/ khro bo'i rgyal po de bzhin gshegs pa thams cad kyis bka' bsgo mdzad pa can mthu stobs chen pos gsang ba'i rtog pa gang gis sgrub pa po rnams la ma 'ongs pa'i dus na dngos grub 'byung bar 'gyur ba/ sems can mang po'i don du phan pa dang bde ba byed par 'gyur ba/ bgegs thams cad rnam par spangs pa sngags kyang 'grub par 'gyur ba de bcom ldan 'das bshad du gsol/ bde bar gshegs pa bshad du gsol/ bcom ldan 'das kyis byang chub sems dpa' phyag na rdo rje la 'di skad ces bka' stsal to/ /lag na rdo rje legs so legs so/ /lag na rdo rje slar yang legs so/ /khyod kyis sems can thams cad la phan zhing bde ba'i phyir dang / ma 'ongs pa'i sems can gyi don gyi phyir khro bo'i rgyal po chen po thams cad du thogs pa med pa/ rtul phod pa de bzhin gshegs pa thams cad kyis rjes su gnang ba/ las thams cad byed par nus pa/ dngos grub sgrub par byed pa yongs su 'dri bar byed pa legs par nyon la yid la zung shig dang nga yis bshad do/ /de la lag na rdo rje slob dpon de bzhin gshegs pa'i go 'phang la gnas pas khro bo chen po'i dkyil 'khor chen po bri bar bya ste/ gru bzhi pa la sgo bzhi pa/ /rta babs bzhi yis rnam par brgyan/ / de la bcom ldan dpa' bo che/ /chos ni thams cad yang dag ldan/ /de yi g.yas dang g.yon ngos su/ /nam mkha' dri med shugs chen po/ /rdo rje 'dzin pa gnyis bri bya/ /'og tu khro bo chen po ni/ /mi g.yo ba ni stobs po che/ /phyag na ral gri zur gyis gzigs/ /'chi bdag mthar byed mngon sum bzhin/ /me yi dkyil 'khor la bzhugs pa/ /rlung dang lhan cig sbyar bar bya/ /mkhas pas dri dang me tog sogs/ /snga ma bzhin du mchod nas su/ /ngo mtshar bkra shis thams cad kyis/ /sngags pas mngon par dbang bskur bya/ /phyag rgya de ni bdag nyid kyis/ /slob dpon slob dpon dang ldan pas/ /bla ma la ni yon phul nas/ /sbyin sreg las ni yang dag brtsam/ /ri yi rtse mor gyur pa dang / / phyugs lhas chu 'gram bzhi mdo'i lam/ /me ni gnas pa nyid dag gam/ /dur khrod dang ni gzhi gnas su/ /slongs mo'i zas ni za ba dang / /yang na 'dab ma btsos pa nyid/ /dben pa'i gnas su mi smra bas/ /'bum phrag gsum du bzlas brjod pa/ /sngon du bsnyen pa bshad pa yin/ /mtshan ma cho ga bzhin shes nas/ /mkhas pas dngos grub sgrub par byed/ /ral gri'i cho ga bzhin bya ba/ /chag gas med pa sor bzhi pa/ /mthe'u chung sor gnyis dang bcas pa/ /sgrub pa'i rang bzhin shing las byas/ /lte bar rnam pa sna tshogs bri/ /ba yi rnam lngas bkrus nas su/ /dri dang me tog sogs kyis mchod/ /sngags pas dkyil 'khor bris nas su/ /snga ma de bzhin de bsgrub bya/ /sngags pas pad ma'i stan gnas te/ /ral gri yu ba nas thogs pa/ /khro bo sgom par ldan pa yis/ /gsang sngags g.yeng ba med par bzla/ /mtshan mo phyed dam yang na de/ /nyi ma shar ba'i dus nyid du/ / ral gri rab tu 'bar gyur nas/ /thams cad du ni snang bar byed/ /rig pa lus ni rjes nas su/ /nam mkha' spyod yul dag tu 'gyur/ /bar gyi bskal par kun du gnas/ /rang 'dod dus na 'chi bar 'gyur/ /rig 'dzin rgyal po kun dang ni/ /rig pa 'dzin pa kun gyis mchod/ /lha yi bzhon pa sna tshogs pa/ /lha yi tshogs ni bstan pa yin/ /de nas zhags pa sgrub par 'dod na sngar bzhin du 'bum phrag gsum bzlas nas de bzhin du gser ram dngul lam zangs kyi rang bzhin gyi zhags pa byas ste/ mtshan ma shes nas dkyil 'khor bris te bsgrubs na de bzhin du rig pa 'dzin par 'gyur ro/ /rig pa 'dzin pa'i rgyal po thams cad kyi bskal par gnas so/ / de ltar ral gri dang / rgyal mtshan dang / nor bu dang / 'gi'u wang dang / gdugs dang / lcags kyu bsgrubs par gyur na de bzhin du 'grub po/ /de nas rgyal po dbang du bya bar 'dod na ku sha'i rang bzhin la gzugs brnyan byas nas rkang pa g.yon pas mnan la ji srid rgyal po rang nyid 'ongs nas 'khor dang bcas pa dbang du 'gyur ba de srid du bzlas pa bya'o/ /de nas lha sgrub par 'dod na thang shing gi rang bzhin gyi gzugs brnyan byas la ji srid du lha 'ongs kyi bar de srid du bzlas pa bya'o/ /'ongs nas smra ba sgrub par byed de sngags pa gang 'dod pa de gnang bar ster ro/ /de bzhin du klu sgrub par 'dod pas na ga ge sar gyi shing las klu'i gzugs brnyan byas nas sngar gyi bzhin du 'bum phrag gsum bzlas te/ ji srid du klu thams cad dbang du gyur pa de srid du bzlas pa bya'o/ /de bzhin du gnod sbyin sgrub par 'dod pas gser las gnod sbyin gyi gzugs byas la sngar bzhin du 'bum phrag gsum bzlas te ji srid du gnod sbyin thams cad 'ongs te bka' bsgo sgrub par byed pa de srid kyi bar du bzlas pa bya'o/ /de nas dri za sgrub par 'dod pas 'od ma'i rang bzhin las dri za'i gzugs brnyan byas la sngar bzhin du 'bum phrag gsum bzlas te ji srid du dri za 'ongs nas smra bar 'gyur ba de srid kyi bar du bzlas par bya'o/ /de bzhin du nam mkha' lding sgrub par 'dod pas 'jim pa'i rang bzhin las nam mkha' lding byas la sngar bzhin du 'bum phrag bzlas na nam mkha' lding bka' stsal bar byed do/ /de ltar srin po sgrub par 'dod pas dur khrod kyi sol bas srin po'i gzugs bris la rkang pa g.yon pas mnan te ji srid du srin po thams cad smra ba sgrub par byed pa de srid du bzlas pa bya'o/ /de ltar skyes pa dang bud med rnams kyang kun du sbyar na de bzhin du 'grub po/ /de ltar lag na rdo rje ji ltar khro bo'i rgyal po 'di sbyar na de lta de ltar las thams cad byed do/ /thams cad du thogs pa med pa'i mthu chen po khro bo'i rgyal po chen po 'di sangs rgyas thams cad kyis rjes su gnang bar gyur pa las thams cad yang dag par ldan pa bklags pa tsam gyis 'grub pa'i khro bo'i rgyal po 'di la rtog pa thams cad kyi cho ga sbyar bar bya'o/ /byang chub tu sems ma bskyed pa dang / ma dad pa dang / som nyi za ba rnams spangs nas gnang ba thob par gyur pas rtog pa thams cad kyi cho ga sbyar bar bya'o/ /dgug pa dang / dbang du bya ba dang / gsad pa dang skem pa rnams la ji lta ji ltar kun du sbyar ba de lta de ltar don yod pa thogs pa med pa 'di sbyar bar bya'o/ /de nas byang chub sems dpa' phyag na rdo rjes bcom ldan 'das la 'di skad ces gsol to/ /dkyil 'khor bsgrub pa'i thabs dang ni/ / bgegs kyi sngon gyi gzugs brnyan rnams/ /bcom ldan 'das kyis bshad du gsol/ /sgrub par byed pa po'i cho gA'i/ /bgegs ni sna tshogs pa nyon cig /rtag tu sems ni g.yeng 'gyur zhing / /gsang sngags rnams ni kha phyir blta/ /bzlas pa bsam gtan dga' ba min/ /gnas dang lha yi las rnams dang / /sbyin sreg dbang bskur las dang ni/ /lha rnams kha ni phyi ru blta/ /sngags pa bgegs la mngon par 'tshe/ /yi dam med par gyur pa dang / / yul gzhan gyi ni rnam par rtog /rnam rtog mang po 'byung ba dang / /dad pa med cing snyoms las che/ /de bzhin yan lag 'bigs par byed/ /dus kyi dbang gis rnam par grol/ /khro ba can ni nyid du 'byung / /the tshom dag ni skye 'gyur zhing / /slar yang de yi dngos grub med/ /de la sogs pa'i skyon rnams ni/ /bgegs kyi gzugs su bstan pa yin/ /rtsod dang brang 'gro klu dang ni/ /yams ni 'byung bar gyur pa dang / /rims dang tsha nad bgegs kyis nyen/ /de bzhin du ni sgrub pa po/ /gza' yi dkyil 'khor dge ba ru/ /dbang ni rab tu bskur bar bya/ /de ltar sbyangs pa'i sngags pa yis/ /bgegs rnams thams cad 'jigs med par/ /slar yang rang gi yi dam lha/ /sbyin sreg dang bcas bsgom par bya/ /til rnams dang ni mar rnams ni/ /mnyam par bzhag pas stong phrag bsreg /gsang sngags kyis ni tshim bya zhing / /sbyin sreg cho ga bzhin du bya/ /mngon par 'dod pa bsgrub pa'i phyir/ /slar yang mnyes pa brtsam par bya/ /de nas yang ni rdo rje 'dzin/ /bcom ldan slar yang bka' stsal pa/ /bgegs rnams snga na med pa'i gzugs/ /phan pa'i yid kyis tshur la nyon/ /dkyil 'khor sgrub pa'i thabs la yang / /cho ga'i las rnams sbyar bar bya/ /gal te ngo mtshar can gyi las/ /sngags pa mkhas pa yis ni bya/ /gang gi skyon dang ldan pa yin/ /bgegs dang log par 'dren pa rnams/ /sems can rnams la bgegs byed pa/ /mi bzad 'jigs pas 'jigs par byed/ /gnas sogs cho ga nyams pa dang / /de bzhin lha nyid gzir ba dang / /sngags rnams 'gom par byed pa'i don/ /bdag nyid chen po gzi brjid 'bar/ /gang du gtor ma'i cho ga las/ /cho ga bzhin du gyur par bya/ /gang du mchod pa byas gyur dang / /gang zhig brnyas pa zhi bar 'gyur/ /rlung char de bzhin sol ba dang / /yi ge hU~M gi sgra sgrogs shing / /gnas gcig sngar ni sgra 'byin dang / /glog 'khyug pa yi sgra dang ni/ /me yis bsreg cing cher 'jigs pa'i/ /glang chen mi bzad sgra skad 'don/ /bong bu rnga mo spre'u 'dra ba/ /shin tu mi bzad ro langs rnams/ /ha ha'i sgra ni rab tu sgrog / /'bar ba'i me yis dkrigs pa'i 'od/ /rlung gi dkyil 'khor gzugs can rnams/ /la lar mched nas 'bar zhing byung / /seng ge'i sgra ni sgra chen po/ /sna tshogs gzugs can rnam par 'phrul/ /skrag pa yang ni skyed par byed/ /mi g.yo ba ni stobs po che/ /khro bo'i rgyal po rab tu sbyar/ /nus pas yang ni 'joms par byed/ /sngags kyis rmongs par byed 'gyur zhing / /mi bzad pa rnams rengs par byed/ /yi ge ha yi gzugs can dbyibs/ /me yi tshul ltar rigs pa ste/ /brtson chen thams cad dmar po ste/ /skyon rnams 'joms pa ral gri'i phyag /gdug pa thams cad bsdigs mdzub pa/ /g.yon pa'i phyag na zhags pa bsnams/ /'bar ba'i phreng ba'i dkyil na bzhugs/ /bskal pa'i me ni bzhin du gnas/ /hU~M sgra phaT kyi sgra dang bcas/ / mche ba gtsigs shing zur mig gzigs/ /gdug pa thams cad phyogs bcu ru/ /yi ge hU~M ni khro bo bcu/ /phyogs kun du ni brlag par 'gyur/ /ha ha rab tu sgrogs par byed/ /rdo rje'i me yis bsreg pa dang / /phan tshun du ni 'tshe 'gyur zhing / /phyogs kun du ni brlag par 'gyur/ /bdag nyid rnal 'byor la gnas nas/ /dpa' bo chen po'i go 'phang 'thob/ /khro bo'i rgyal po rab tu sbyar/ /bgegs dang log 'dren thams cad la/ /yi ge ha yi me yi tshul/ / mngon sum bzhin du 'joms par byed/ /yi ge hU~M gi sgra dang ldan/ /log par 'dren pa thams cad 'joms/ /yi ge hU~M ni rlung gi tshul/ /sprin rum gtibs pa mnyam pa'i 'od/ /sprin gyi yi ge hU~M 'ur gyis/ /gdug pa thams cad gtor bar byed/ /yi ge ha ni me yi tshul/ /rab tu 'bar ba rdo rje'i phyag /yi ge hU~M gi sgra dang ldan/ /lta stangs thams cad bsdu bar bya/ /bdag nyid yi ge har byas nas/ /thams cad dmar zhing khros dang bcas/ /'jigs pa'i sgra can cher 'jigs pa/ /phyag na zhags pa khros dang bcas/ /sngags 'chang zhags pa'i phyag rgya yis/ /bgegs rnams thams cad dgug par byed/ /bgegs rnams thams cad bkug nas ni/ /bcings nas rab tu sgrogs par byed/ /yang na bgegs rnams thams cad la/ /shin tu gtum shing khros pa yis/ /de rnams kyi ni gzugs byas te/ /zhags pa'i phyag rgyas bkug nas su/ /brdeg par byed cing rtog par byed/ /gcad pa dang ni bsreg par byed/ /bgegs rnams thams cad brlag par 'gyur/ /tshangs pa mdun na gnas gyur kyang / /de ma thag tu byer nas ni/ /the tshom med par 'chi bar 'gyur/ /yang na bgegs rnams thams cad ni/ /gdud ba slar yang bshad par bya/ /sa la bgegs ni bris nas su/ /mgo bo rkang pas mnan cing gzir/ /nyen nas rab tu 'dar gyur te/ /the tshom med par 'chi bar 'gyur/ /yang na bgegs rnams thams cad ni/ /tshar gcad pa ni slar yang bshad/ /'dzin pa yi ni rang bzhin las/ /de yi gzugs brnyan byas nas su/ /sngags pa de yi mer 'dug na/ /'di ni myur du bsregs pas 'dzin/ /brgya byin dang mtshungs bgegs kyang ni/ /de yi mod la myur du 'gro/ /de bzhin nyid du bgegs gzhan rnams/ /thun mong du ni yang bshad bya/ /sngags pas khros dang bcas pa yis/ /de rnams gzugs ni yang dag bya/ /ske tshe dang ni dug gis bskus/ /lan tshas kyang ni byug par bya/ /me la yang ni bsregs pa yi/ /de yi mod la myur du 'tshig /yang na bgegs rnams thams cad ni/ /phur bus gdab pa slar yang bshad/ /de yi gzugs brnyan byas nas su/ /rdo rje phur bus gdab par bya/ /btab pas rab tu zhi 'gyur zhing / /the tshom med par 'chi bar 'gyur/ /yang na bgegs rnams thams cad kyi/ /rengs pa yang ni bshad par bya/ /de yi gzugs brnyan byas nas su/ /lus la ri rab rnam par bsam/ /lcog brgyad dang ni ldan pa yi/ /rdo rjes yang dag mnan par bya/ / de nas rab tu zhi 'gyur zhing / /'chi bar 'gyur bar the tshom med/ /lha tshangs pa yi bgegs rnams kyang / /myur du mi g.yo brtan par gnas/ /de nas kun gyis kun thams cad/ /spyi yi las ni spyad par bya/ /de yi gzugs brnyan byas nas su/ /sbyin bsreg las ni yang dag brtsam/ /mtshon gyis gtub cing bcad nas su/ /rkang pa nas brtsams sbyin bsreg bya/ /bcad par gyur pas de ma thag /brlag par 'gyur bar the tshom med/ /de ltar kun la kun du ni/ /mkhas pas las ni bya bas na/ /kha cig gdug pa'i sems ldan pa'i/ /bgegs rnams thams cad brlag par 'gyur/ /rdeg cing gcod la phur bus 'debs/ /'bigs shing de bzhin rtog par byed/ /bsreg dang gang yang tshar gcod gzhan/ /byang chub sems kyis brgyan pa yi/ /sngags pas de dag thams cad bya/ /shin tu gdug pa'i sems rnams ni/ /pha rol srog ni gcod par byed/ /sems can rnams ni rnam par 'tshe/ /gang zhig phan pa nyid kyi gzhi/ /snying rje chen po skyed nas su/ /sangs rgyas chos ni rjes dran par/ /sangs rgyas kun gyi yid bzhin gzhom/ /gdug pa'i las ni bya ba yin/ /de nas dpal ldan rdo rje 'chang / /ngo mtshar spyan phye rgyas pa yis/ /chos kyi dbang phyug thub pa yis/ /snyan pa'i tshig gis bka' stsal pa/ /e ma'o sangs rgyas bsam mi khyab/ /sems can mi phan byed pa yi/ /ji srid ming ni bgags nas su/ /de srid blo ni ngan 'gro yi/ /phan dang mi phan rnam rtog rnams/ /mnar med sdug bsngal gzhom ba ru/ /rab tu zhugs nas 'gro bar 'gyur/ /de nas phyag na rdo rjes slar yang bcom ldan 'das la 'di skad ces gsol to/ /bcom ldan 'das khro bo'i rgyal po chen po de bzhin gshegs pa thams cad kyi rjes su gnang bar gyur pa/ sngags dang phyag rgya dang sngags kyi rim par phye ba gang myur ba nyid du phyag rgya'i mtshan pas mtshan pa/ lha thams dang klu dang / gnod sbyin dang / srin po rnams lhan cig sbyar bas las thams cad byed par 'gyur ba'i don yod cing thogs pa med par gyur pa bshad du gsol/ de nas bcom ldan 'das kyis byang chub sems dpa' phyag na rdo rje la 'di skad ces bka' stsal to/ / legs so legs so/ /lag na rdo rje slar yang legs so/ /da legs par nyon la rab tu yid la zung shig dang ngas khyod la bshad do/ /bcom ldan 'das la legs so zhes phyag na rdo rjes bcom ldan 'das la gsol to/ / slar yang bcom ldan 'das kyis 'di nyon cig ces bka' stsal to/ /rkang pa mnyam par gzhag pas gnas/ /phyag 'tshal ba yi thal mo sbyar/ /mthe bong dag ni gnas byas nas/ /sangs rgyas thams cad gdud par bya/ / rdo rje bkod pa'i sbyor ba yis/ /slar yang mdun du bya ba yin/ /slar yang thal mo sbyar byas nas/ /rgyab nyid du ni gzhag par bya/ /thal mo bkod pa'i sbyor ba yis/ /slar yang mdun du bya ba yin/ /khros pas hU~M gi sgra sgrogs shing / /bdud kyi rigs la bsdigs par bya/ /rkang pa bkod pa'i sbyor ba yis/ /lag pa dag ni gnyis ga yang / /gnyis ka'i sdigs mdzub sbyor ba yis/ /bgegs dang log par 'dren pa rnams/ / sdig pa thams cad kun 'byung ba'i/ /sdigs mdzub kyis ni 'byer bar 'gyur/ /slar yang rkang pa dgrad nas su/ /rdo rje'i sa gzhir gzhag par bya/ /sa 'og rim bdun bar du ni/ /thams cad du ni sbyar bar bya/ /lag pa sbyar ba'i sbyor ba yis/ /rkang pa ya gcig sa la gnas/ /de bzhin dum bu phra mo ru/ /bgegs rnams thams cad 'joms par byed/ /ma bsgrubs pa la rab tu sbyar/ /dkon mchog gsum gyi ral gri 'byung / /gang zhig gsod pa'i sbyor ba yis/ /klad la yongs su bskor bar bya/ /yi ge hU~M gi sgra sgrogs shing / /ral gri phyag rgya bcing bar byed/ /gnyis pa shubs kyi rtse mo nas/ /bstan la gnod pa byed pa dang / /sngags pa bla ma ngan smra zer/ /gang dag sems can gzhan la 'tshe/ /gang yang lha la smod par byed/ /lha dang gsang ba sa dang sprul/ /lha min srin po 'jigs su rung / /de rnams thams cad gzhom par bya/ /gnod pa de yang lan gnyis gsum/ /gus pas gal te bzod gsol na/ /gsang sngags tshogs ni de mnyes na/ /ji bzhin 'dod pa'i dngos grub 'thob/ /slar yang rdo rje rkang pa yis/ /rkang pa mnyam par gzhag nas gnas/ /lag pa phan tshun khu tshur bcing / /mdzub mo sbyar ba'i sbyor ba yis/ /dpral ba'i steng du bzlog la gzhag /rkang pa bkod de sbyar ba dang / /ya sos ma mchu mnan te khros/ /'brug gi hU~M gi sgra sgrogs pa/ /bgegs rnams thams cad 'gems par ni/ /yi ge hU~M gis the tshom med/ /rdo rje'i lta stangs 'bar ba che/ / gdug pa thams cad rnam par 'joms/ /thig le zhes ni bsgrags pa yis/ /phyag rgya don kun sgrub par byed/ /sngags pa gang zhig bsgrubs pa ni/ /gang dang gang ni rab sbyar ba/ / de dang de ru don yod par/ /byed par 'gyur te the tshom med/ /rdo rje rkang pa'i sbyar ba yis/ /rkang pa steng du gdeg par bya/ /sangs rgyas kun la gus phyag bya/ /sor mo phan tshun khu tshur bcang / /kha yi tshul du byas nas ni/ /kha yi thad kar sbyar bar bya/ /dkyil 'khor bsgrub pa'i thabs dang ni/ /de bzhin du yang las rnams dang / /phyogs kun las ni byung ba yi/ /sprin chen yang ni 'dus nas su/ /'brug chen sgra ni rab tu ldir/ /der yang glog ni 'khyug pa dang / /sku chen po ni ha ha sgrogs/ /char gyi rgyun ni yang dag 'bab/ /dus mtha' lta bur yang dag byung / /'di ni kha ru gzhug par bya/ /mi bzad pa yi sku chen gyis/ /kha yi phyag rgya 'ang 'dzin par byed/ /gzung ba tsam gyis brlag pa ru/ /ma lus par ni 'gyur ba yin/ /de nas khro bo rab 'bar ba/ /gzi brjid chen po zhal che ba/ /'di ni bkug nas zos pa na/ /bgegs kyi rgyal po thams cad brlag /khro bo mi g.yo ba yi sku/ /ji lta ji ltar rab sbyar nas/ /'jigs pa'i gzugs can bgegs srin po/ /de lta de ltar brlag par 'gyur/ /kha yi phyag rgya sbyor ldan pas/ /sngags pas kun du sbyar bar bya/ /'di ni don yod thogs pa med/ /sangs rgyas kun gyis rab tu mchod/ /slar yang rdo rje'i rkang pa sbyar/ /phyag 'tshal thal mo spyi bor sbyar/ /sngon bzhin rkang pa mnyam byas nas/ /rkang pa bteg nas g.yeng bar bya/ / lag pa yang ni phan tshun du/ /g.yas pa dang ni g.yon pa na/ /zhags pa ral gri thogs nas su/ /rdo rje dor nas yang dag gnas/ /g.yon pa sa yi cha la gzhag /g.yas pa mtshon cha dang bcas kyang / /zhags pas bkug ste gzhag nas ni/ / ral gris gzugs brnyan bcad na ni/ /tshangs pa 'am ni brgya byin yang / /de ma thag tu myur bar gcod/ /'di ni dpal ldan zhags pa bsnams/ /ral gri'i phyag rgya sbyar ba yis/ /sngags pas sbyar ba tsam gyis ni/ /gdug pa thams cad bsgrub par bya/ /thal mo bteg ste sbyar nas su/ /'khor lo lta bur rab bskor bya/ /sngags pas bskor zhing drangs nas ni/ /rkang pa sngar bzhin sbyar bar bya/ /phyag 'tshal ba yi thal mo sbyar/ /phan tshun so sor khu tshur bcing / /gnyis ka'i mdzub mo rtse sbyar te/ /rdo rje rtse gcig rnam par byas/ /gdug pa kun la gdab pa dang / /'bigs par yang dag brjod pa yin/ /bgegs rnams thams cad brlag byed pa'i/ /bsrung ba la sogs rab tu sbyar/ /lag pa gnyis ni mnyam byas nas/ /khu tshur sbyar te bcing bar bya/ /gung mo rtse mo sprad de sbyar/ /mdzub mo rdo rje'i rnam par bya/ /gung mo la sbyar rdo rje ni/ /phyag rgya chen po'i phyag rgya ste/ /gdug pa thams cad brlag par byed/ /de nas byang chub sems dpa' phyag na rdo rjes bcom ldan 'das kyi zhabs gnyis la mgo bos phyag 'tshal nas/ bcom ldan 'das la 'di skad ces gsol to/ /bcom ldan 'das ngo mtshar to/ /bde bar gshegs pa ngo mtshar to/ /ji snyed pa'i don yod pa'i thogs pa med pa stobs gnon pa'i khro bo'i rgyal po mi bzad pa'i phyag rgya ji lta ji ltar sgrub pa pos sbyar ba de lta de ltar dngos grub ster bar byed pa/ bgegs thams cad 'joms par byed pa'i khro bo'i rgyal po chen po'i rtog pa'i sgrub pa'i thabs 'di sems can thams cad la phan pa dang / bde bar bya ba'i phyir bdag kyang bshad par 'tshal lo/ /bcom ldan 'das kyis bka' stsal pa/ lag na rdo rje gang de'i dus la bab par sems na shod cig /de nas byang chub sems dpa' sems dpa' chen po lag na rdo rjes bcom ldan 'das kyis gnang ba thob ste/ bsam pa thams cad la mnyes gshin pa'i rol pas phyag 'tshal nas/ dngos grub thams cad kyi mchog snang ba zhes bya ba'i ting nge 'dzin la snyoms par zhugs so/ /bcom ldan 'das snyoms par zhugs ma thag tu de nas re shig 'jig rten gyi khams thams cad snang ba chen pos snang bar byas te/ sangs rgyas kyi zhing thams cad rdo rje 'chang gi skus gang bar byas nas/ phyogs bcur bskor te/ slar yang bcom ldan 'das nyid kyi sku la zhugs par 'gyur/ khro bo'i rgyal po chen po'i sgrub thabs su gyur pa rdzu 'phrul chen po rnams nyon cig /lo 'dab la sogs pa za zhing 'bum phrag gsum bzlas pa bya'o/ /de nas zhag gsum 'dug nas ras bris kyi mdun du mchod pa chen po byas te/ de'i mdun du nim pa'i yam shing gis me spar te/ mar gyis btags pa'i yungs kar dkar po snying po'i sngags kyis stong phrag brgyad sbyin bsreg bya ste/ sngon du bsnyen pa byas pas so/ /de la khro bo'i rgyal po chen po'i sgrub thabs ni 'di yin te/ dkyil 'khor bris nas ral gri'i phyag rgya bcings te/ skyil dkrung bcas nas ji srid du rig pa 'dzin par gyur gyi bar du bzlas pa bya'o/ /rig pa 'dzin pa thams cad kyis mchod cing bskal par gnas la 'dod pa'i 'chi ba'i dus med de sangs rgyas kyi zhing thams cad du phyed par de bzhin gshegs pa thams cad mchod cing sems can thams cad kyi don byed do/ /slar yang 'bum phrag gsum bzlas pa byas na gang 'dod pa'i las rnams thams cad byed do/ /tshig rnal mar 'bebs so/ /shing bsgyel bar byed do/ /nam mkha' nas 'dab chags ltung bar byed do/ /mtshe'u skems par byed do/ /rlung gzhan du byed do/ /zla ba gzas zin pa'i nub mo 'dug nas ba lci sa la ma lhung bas dkyil 'khor byas la dri zhim po'i me tog sil ma bkram ste ras bris sam shes rab kyi pha rol tu phyin pa'i glegs bam gyi spyan sngar se'u dang rigs mthun pa'i mar srang gcig zangs ma'i snod du bcug ste seng ldeng gi me spar te gdung zhing bzlas pas dngos grub gsum 'byung ngo / /de nas ri'i rtse mor gnas bcas te/ zas mi za bar bzlas pa 'bum byas na gter mthong bar 'gyur ro/ /phyugs ngas zhi bar 'dod na 'o ma'i sreg blugs stong phrag gcig bsregs pas zhi bar 'gyur ro/ /rtsa dur ba mngar gsum gyis btags nas sbyin sreg 'bum byas na phyugs ngas chen po zhi bar 'gyur ro/ /pad ma rnams zho dang sbrang rtsi dang mar gyis btags te sbyin sreg 'bum byas na mchog gsol ba gsum mthong bar 'gyur ro/ /rgya mtshor 'gro ba'i chu klung gi chu'i nang du zhugs te 'bum phrag gsum bzlas na yul du phyin par 'gyur ro/ /ji lta ba'i kha dog gi me tog bsregs na de lta bu'i kha dog gi gos rnyed par 'gyur ro/ /so ga gang bsregs pas cho ga gang mi zad par 'gyur ro/ /nas kyi sbyin sreg gis khyim bdag chen por 'gyur ro/ /pr-i yang kus dbang du byed do/ /spos shing gis 'khor g.yog mang bar 'gyur ro/ /mngar gsum gyis btags pa'i bil ba'i 'bras bu sbyin sreg 'bum byas na rgyal por 'gyur ro/ / ras bris kyi cho ga ji bzhin pa ni 'di yin te 'phags pa mi g.yo ba zhal gcig pa dpa' bo'i na bza' ngur smrig mnabs pa zur mig gis gzigs pa'i phyag na ral gri dang zhags pa bsnams pa/ khro gnyer rim par ldan pa'i zhal 'jig rten gsum 'jigs par mdzad pa ngur smrig mnabs pa bri bar bya'o/ /de nas rgya mtshor song ste ras bris bkram nas lus la gos gtsang ma bgos te/ dogs pa med cing bkug pa slongs mo za bas 'bum phrag lnga bzla'o/ /tha ma'i nyin zhag 'dug nas tsa na ka'i yam shing gis khri phrag gcig sbyin sreg byas na mi g.yo ba mthong zhing de bzhin gshegs pa yang nye bar spyod la ting nge 'dzin rnyed nas byang chub sems dpa'i ting nge 'dzin thob par 'gyur ro/ /yang na dur khrod kyi ras la 'phags pa mi g.yo mgon po bris la bdag nyid kyi phyag gis spyan phye ba bri bar bya'o/ /sgrub pa po shar du phyogs te phyi nas ras bris kha sprod du dgram ste dus gsum du khrus bya zhing gos rlon pa bgos te bkug pas 'bum phrag gsum bzlas par bya'o/ /mar ngo'i tshes brgyad kyi zhag la 'dug ste/ 'byung po thams cad la sha'i gtor ma byin nas ro chen po'i steng du khri phrag gcig bzlas pa bya'o/ /de nas ro de'i lus 'gul bar 'gyur te/ 'jigs par mi bya'o/ / de nas kha'i nang du pad ma kha phye ba'i lte ba mthong bar 'gyur te blangs nas gzung bas rig pa 'dzin par 'gyur zhing lha'i gzugs kyis tshangs pa'i 'jig rten du spyod do/ /yang na ras bris kyi mdun du zla ba drug tu thun gsum du bzlas shing ji ltar 'byor pa'i mchod pa byas nas a ga ru'i bdug pas bdugs na yul gyi bdag por 'gyur ro/ /rgyal mtshan la stong phrag gcig bsngags nas dmag gi mngon du bzung na pha rol gyi dmag tshogs g.yul nyes par 'gyur ro/ /dmag tshogs rengs par 'dod pas sku chen po sku mdog ser po zhal bzhi la phyag bzhi pa mdog mi sdug pa/ mche ba gtsigs shing 'jigs su rung ba 'bar ba'i phreng ba dkrigs pas pha rol gyi dpung bzung ba lta bur bsam pa'am/ bris nas bstan na pha rol gyi dmag tshogs rengs par 'gyur ro/ /rtsod par 'dod pas khwa dang 'ug pa'i sgros sbyin sreg byas na rtsod pa 'byung bar 'gyur ro/ /dgra bo myos par 'dod pas sreg blugs 'bum sbyin sreg bya'o/ /sbyin sreg byas pas mi g.yo ba'i mngag gzhug pas mgul nas bcings te lho'i phyogs su khyer nas myos shing khrag tu skyug cing skrag par dgra'i lus bltas pas rigs rgyud dang bcas pa brlag par 'gyur ro/ /mi'i rus pa la brgya rtsa brgyad mngon par sngags nas btags na gang gi ming nas smos pa de'i mod du rims kyis btab par 'gyur ro/ /nim pa'i 'bras bu mar khus btags nas sbyin sreg byas na nyi ma gsum gyis dgra bo brlag par 'gyur ro/ /tshwa dang 'jim pas dgra bo'i gzugs brnyan byas la myos byed kyi tsher mas btsugs te gtubs shing bcad pa'i sbyin sreg byas na de ma thag tu brlag par 'gyur ro/ /dgra bo'i ming nas smos shing sa la ma ri zhes bya ba brgya rtsa brgyad bsregs pas dgra bo dbul bar 'gyur ro/ /dbang du bya bar 'dod na lan tshwa'i rang bzhin gyi gzugs brnyan byas te gcad nas sbyin sreg byas na skyes bu chen po nyi ma bdun gyis dbang du 'gyur ro/ /'dzA ti kha 'bus pa'i sbyin sreg 'bum byas na gnod sbyin mo dbang du 'gyur ro/ /'phrul byed kyi 'dab mas sbyin sreg byas pas smyo bar 'gyur ro/ /lan tshwa'i sbyin sreg gis lha'i bu mo yang 'gugs so/ /gu gul gyi sbyin sreg gis rgyal po thob par 'gyur ro/ /ras bris gzhan gyi cho ga 'di yin te/ dbus su bcom ldan 'das shAkya thub pa de'i g.yas su 'jam dpal rgyan thams cad kyis brgyan pa/ g.yon du rdo rje 'dzin pa zhal cung zad 'dzum pa phyag na rdo rje bsnams pa bri bar bya'o/ /de'i spyan sngar 'bum phrag lnga bzlas pas las thams cad byed nus par 'gyur te/ pha rol gyi dmag tshogs la nad 'byung bar 'gyur ro/ /rgya bcings te khros pas yi ge hU~M la sogs pa'i mtha' can gyi sngags bzlas pas dgra bo gdon chen pos 'dzin pa 'am nges par brlag par 'gyur ro/ /dur khrod kyi thal ba la lan 'bum bzlas nas gang la byin pa de bran du 'gyur ro/ /'gi'u wang la lan bdun bzlas nas thig le byas pas skye bo thams cad dga' bar 'gyur zhing mi mthong bar 'gyur ro/ /bgegs thams cad dang log par 'dren pa la sogs pa 'bar bar 'grub par 'gyur ro/ /bdag nyid la bkod nas dpag tshad brgya nas kyang tshangs pa dang srin po grol bar byed do/ /sbrul nag pos zin pa zla drug nas mnan par 'dod na khros pas ral gri'-i phyag rgya bris la lto 'phye chen po'i rigs ldan gyis bskor te/ de nas ral gri la stong phrag gcig mngon par bsngags nas dbus su de lta bur 'bar ba 'dra ba dgod par bya ste de nad pa la bstan na nges par 'jug go / 'phags pa mi g.yo ba spyan gcig pa'i snying po thun gsum du brgya rtsa brgyad bzlas na rtag tu 'brel par 'gyur ro/ /dben pa'i sa phyogs su zan gyi chang bu byin na mchog chen po stsol bar 'gyur te/ snying po'i phyag rgya bcings te khros pas yi ge hU~M bzlas na sprin dral bar byed do/ /tsher ma skye tshes btags pa'i sbyin sreg byas na rlung gi char pa gtun shing ltar 'jog go/ sgrub pa po la bsrung ba chen po byed do/ /mi rnams rkang pa g.yon pa mnon pas bsgrubs na bka' nyan par 'gyur ro/ /lha dang mi rnams kyi gzugs brnyan byas nas gcad na 'chad par 'gyur ro/ /lha dang mi thams cad kyi gzugs brnyan byas nas de lcags kyi phur bus btab pas phur bu dang ldan par 'gyur ro/ /de nas 'ching bar 'dod par gyur na skud pa ser po la mngon par bsngags te gzugs dkris nas bcings par 'gyur ro/ /btsir bar 'dod na lha la sogs pa'i gzugs brnyan byas nas steng du spang leb kyis mnan na btsir bar 'gyur ro/ /de nas brdeg par 'dod na mi la sogs pa'i gzugs brnyan byas te re'u slu dbus brabs na gdung zhing 'ongs nas bka' sgo byed do/ /gnon par 'dod na lha dang mi thams cad kyi gzugs brnyan byas te spang leb la sogs pas mnan na gnon par 'gyur ro/ /de ltar khro bo'i rgyal po rdzu 'phrul chen po 'di ji lta ji ltar sbyor ba de lta de ltar las gzhan ngo mtshar che ba yang stong phrag byed do/ /de nas byang chub sems dpa' sems dpa' chen po phyag na rdo rjes khro bo'i rgyal po chen po'i sngags bka' stsal pa/ na maH sar+b+ba ta thA ga te b+h+yaH sar+b+ba bi shwa mu khe b+h+yaH sar+b+ba thA/ oM tsaN Da ma hA ro Sha Na hU~M trAT ma hA tsaN Da a tsa la kA Na/ hU~M hU~M hU~M/ a pra ti ha ta/ ta thA ga tA/ dz+nyA na sma ra hU~M phaT phaT swA hA/ de nas phyag na rdo rjes slar yang khro bo chen po thogs pa med pa'i cho ga'i snying po dpa' bo gcig pa bka' stsal pa/ na maH s+t+rai ya d+h+wi kA nA~M/ ta thA ga tA nA~M hA~M/ byang chub sems dpa' chen po phyag na rdo rjes bka' stsal ma thag tu de nas skad cig de la 'jig rten gyi khams thams cad snang ba chen pos snang bar byas nas de la 'jig rten gyi khams thams cad kyi gang bdud dang bdud chen po 'jigs su rung ba'i gzugs can dang lha dang klu dang gnod sbyin la sogs pa de khro bo chen po'i gzi brjid kyis bsregs par gyur/ gang dang gang rang rang gi der song ste bcom ldan 'das bskyab du gsol/ bde bar gshegs pa bsregs pa las bskyab tu gsol/ de nas de bzhin gshegs pa de rnams kyis rang rang gi zhing rnams kyi bgegs chen po de dag la 'di skad ces bka' stsal to/ /rigs kyi bu dag khro bo chen po mi g.yo ba zhes bya ba de bzhin gshegs pa thams cad kyis bka' stsal pa mdzad pa/ gdug pa thams cad rab tu 'joms par byed pa dran par gyis shig /gzhan du khyod rnams kyi mgo bo phyag na rdo rjes tshal pa brgyar 'gas par 'gyur ro/ /gang zhig sgyu ma lta bur sems bskyed cig /sems can thams cad la phan pa dang bde ba'i sems skyed cig /sems can sdig pa thams cad dang bral ba dran par gyis shig /rigs kyi bu dag khro bo'i rgyal po chen po sdug bsngal thams cad dang bral ba dran par gyis shig /de nas gdug pa de thams cad khro bo'i rgyal po chen po de nyid la skyabs su song ste bcom ldan 'das bdag ni sa'i phyogs su nye bar gnod par mi bgyid do/ /gang na khro bo'i rgyal po chen po 'di nyid bzhugs pa de bsrung bar bgyi'o/ /nye bar dgos pa bskyed do/ /nye bar 'tshe ba thams cad kyang gzhom par dam tshig byas nas bcom ldan 'das kyi zhabs kyi drung du lhags nas 'dug go/ de nas byang chub sems dpa' sems dpa' chen po lag na rdo rjes slar yang khro bo'i rgyal po chen po spyod pa'i cho ga yang bsgrub pa po rnams la bka' stsal pa/ khro bo'i rgyal po chen po 'di gang lkugs pas mi bzlog par yal ga dang / rtsa ba dang / 'bras bu za ba 'am/ chu dang / rlung za bar gyur pa'i skye bos dben pa'i gnas su bzlas pa bya'o/ /khro bo'i rgyal po don yod pa'i thogs pa med pa 'di dkon mchog gsum la rgyab kyis phyogs pa'i sems dang ldan pa nga rgyal can gyi gdug pa'i srin po la sogs pa sbyar bar phan pa'i sems kyis byang chub mchog tu sems bskyed par dad pa dkon mchog gsum la dang bar gyur par bsgrub par bya'o/ /rtog pa gzhan gyi cho gas kyang dman pa'i sems can sdug bsngal ba rnams ni sbyar bar mi bya'o/ /dkon mchog gsum la mos shing dad pa la khro bo'i rgyal po chen po sbyar bar bya'o/ /mtshams med pa lnga byed pas kyang gdon mi za bas cho ga ji ltar mngon par 'dod pa'i dngos grub thob po zhes bcom ldan 'das rdo rje 'dzin pas gsungs so/ /de nas dpal ldan rdo rje 'chang / /thugs rje dang ni ldan pa'i thugs/ /sems can khams ni ma lus pa/ /'di kun rnam par gzigs nas su/ /'gro la phan pa mdzad pa can/ /snyan pa yi ni tshig gis gsol/ /bcom ldan chos rnams thams cad kyi/ /khyod nyid gcig pu dbang phyug gtso/ /khyod nyid gcig pu kun mkhyen de/ /thams cad mkhyen pa'i nam mkha' can/ /khyod ni skyon med sems can gyi/ /skyob pa dpung gnyen thams cad yin/ /sems can kun gyi khyod gcig pu/ /mchog tu mnyes gshin pa yi pha/ /nyon mongs nad rnams gso mdzad pa/ /sman pa'i rgyal po khyod gcig pu/ / khyod ni sems can thams cad kyi/ /gtso bo mchog tu gzhol ba yin/ /bdag la 'dir ni khyod gcig pu/ /gtso bo bdag la gzhan ma mchis/ /sems can rnams la phan 'dod pas/ /gang zhig bdag nyid khyod la zhu/ /thugs rje dang ni ldan pa'i thugs/ /mgon po de ni bdag la gsungs/ /sems can ji ltar bde bar 'gyur/ /ji ltar sdug bsngal rten can du/ /gang gis 'dir ni gyur pa yin/ /de rnams bdag la gtso bos gsungs/ /rgyal po mi rgod chom rkun dang / / de bzhin du ni me dang chu/ /nad dang mu ge bdud rnams dang / /de bzhin dus min 'chi bas 'jigs/ /char ches pa dang char mi 'bab/ /rtag tu yams kyis 'tshe bas te/ /mgon po 'di ru ji ltar yang / /brgya la mi 'gyur ba zhig yin/ / dpal gyis mdzes pas brgyan pa yi/ /dbang du bya ba nyid dang ni/ /sems can thams cad brtse bar ni/ /thams cad ji ltar 'byung bar 'gyur/ /ngan dog ngan pa de ji ltar/ /ji ltar lus po dman par 'gyur/ /du ba'i mdog can hrud hrud po/ /de nas g.yeng ba nyid dag ni/ /sngags pa dag la 'byung mi 'gyur/ /nye bar 'tshe ba rnam par spangs/ /'di kun ji ltar brtse ba lags/ /longs spyod dang yang longs spyod 'phel/ /nyal ba dang ni 'dug pa dang / /'gro ba'i mi ni 'dug pa na/ /sngags pa ji ltar bde ba ru/ /de ni rtag tu 'gyur ba yin/ /de la lha ni mngon spyod cing / /rjes su 'brel ba ji ltar 'gyur/ /las kyi dngos grub ji ltar ni/ /myur ba nyid du 'gyur ba yin/ /srin po lto 'phye grul bum dang / / yi dags gcan zan sbrul de bzhin/ /gang yang rtag tu 'tshe bas 'debs/ /ji ltar 'tshe bas mi 'gyur lags/ /zhi ba dang ni rgyas pa 'am/ /de bzhin dbang dang mngon spyod kyi/ /las ni ji ltar myur grub nas/ /don yod par ni 'gyur ba lags/ / 'di kun skal ba chen po ni/ /da ltar yang ni gsung bar rigs/ /chos kyi dbang phyug thub pa yis/ /'di skad kyi ni tshig gsan nas/ /phyag na rdo rje dar chen la/ /snyan pa'i gsung gis bka' stsal pa/ /legs so bu gcig dpa' bo che/ / phyag na rdo rje stobs po che/ /rdzu 'phrul che nyid slar yang legs/ /nga yi bstan la khyod nyid de/ /khyod nyid gcig pu bdag gi sras/ /rtag tu rjes su 'phel byed pa/ /nga yi bstan pa bsrung ba yang / /khyod nyid kyi yang lag na gnas/ / rgyal ba'i sras po khyod gcig pu/ /gtso bo dbang phyug kha lo bsgyur/ /khyod nyid gcig pu la rag las/ /byang chub thams cad lag mthil gnas/ /gang zhig khyod kyis zhus pa yin/ /bu gcig 'di ni ngo mtshar to/ /gsang ba mchog gi rmad du byung / /ma lus par ni bshad par bya/ /gang zhig bdag nyid snying la gnas/ /de ni gzhan gyis byin gyis brlabs/ /chos rnams kun gyi gsang ba yang / /de nas gzhan du ma gsungs pa/ /dpa' bo khyod la ma lus par/ /bshad par bya yis tshur la nyon/ /gang gis dngos grub myur thob pa'i/ /gsang ba gang zhig gnas pa yang / /mchog gi gzugs can lhan cig tu/ /sa stengs 'di ni rnam par gnas/ /gtsug lag khang ni sna tshogs mdog /de bzhin sna tshogs gzugs 'chang ba/ /rdzu 'phrul chen po mthu che ba/ /de bzhin rgyal ba'i sras po 'chang / /rgyal ba'i chos rnams yang dag ldan/ /dkon mchog gsum la mchog tu gzhol/ /'di rnams mchod cing yang mchod la/ /gnod pa byed pa bsreg par 'gyur/ /de ni rgyal ba'i bden pas bcing / /sems can thams cad dbang du byed/ /'khrig pa brten par gyur pa dang / /me ni gang zhig sdig byed pa/ /tshangs spyod dang ni de bzhin gzhan/ /sa stengs skye bo gang cung zad/ /'di kun 'dir ni rnam par 'tshe/ /lha rnams kyi yang de bzhin grong / /gdug cing mdog sdug pa yi lus/ /gnod sems bdag nyid rnam par 'tshe/ /brtan dang g.yo ba phyag 'tshal nas/ / 'jig rten 'di ni rnam par spangs/ /sa stengs bstan pa ma gtogs par/ /de rnams bsten pas cung zad med/ /gang gis bde ba nyams byed pa/ /khyod kyis kyang ni mnyan par rigs/ /sngags pas dang po kun byas nas/ /rdzogs sangs rgyas ni nyi ma'i 'od/ /kun mkhyen dbang phyug blo dang ldan/ /spros pa thams cad 'di las gzhan/ /shin tu rnam par dag pa'i chos/ /gdod nas zhi ba chen po'i gnas/ /skyon rnams thams cad rnam par grol/ /phun sum tshogs pa thams cad byed/ /'di ni dkon mchog gsum mchod do/ /bsam pa thams cad rdzogs par byed/ /gza' rnams gzugs dang mtshan ma dang / /cha byad dang ni dbyibs nyid kyang / /brtan dang g.yo bas mi shes pas/ / bshad par bya yis bu khyod nyon/ /bdag gis ye shes gnas pa 'di/ /mdzes pa'i tshul can rmad du byung / /sa yi dkyil 'khor kun du ni/ /bu gcig kho bos ma gsungs so/ /gza' rnams kyi ni mchog gi gzugs/ / mchog tu rmad 'byung bsam mi khyab/ /mchog tu mdzes par gyur pa ste/ /khros shing bzhin mi sdug pa yi/ /mdzes pa'i gzugs can la brten nas/ /rang nyid mdzes shing phan par gnas/ /gang tshe gzugs ni bsam mi khyab/ /mchog tu mdzes par gyur pa ste/ /de tshe 'di ni bsam mi khyab/ /drang srong bsam gtan spyod yul min/ /zhi ba sems can la 'phya zhing / /khros pa nyid ni khros pa nyid/ /sems can la 'di zhi ba ru/ /de yi tshe na kun du spyod/ /sangs rgyas chos dang de bzhin du/ /dge 'dun mkhas pas mchod byas na/ /de yi gzugs ni nyer mtshon te/ /de yi tshe na mchod par bya/ /zhi ba zhi ba shes par bya/ /rgyas pa yang ni rim ji bzhin/ /mngon spyod zhes bya ba 'di dang / /dbang du bya ba'i gzugs mtshan nyid/ /'di dag thams cad mdor bsdus na/ /de ni rgyas par gsungs pa yin/ /shin tu mnyam par gzhag mchod pas/ /zhi ba la sogs 'di yang min/ /phun sum tshogs pa kun byed pa'i/ /dkon mchog gsum ni mngon du mchod/ /yid ni bsdams par gyur pa dang / /dbang po lnga ni bsdams pa yis/ /dri ma dkar chen zhag tu lon/ /lus la bsgos nas khrus kyis brgyan/ /shin tu dben zhing phyugs med par/ /'di ni 'ong bar song nas ni/ /ba lci la sogs rtag tu byugs/ /dri yis nye bar byugs nas ni/ /kha dog ser dang dmar ba dang / /dkar po 'am de bzhin ljang gu dang / /nag po yang dag gsungs pa yin/ / kha dog nag po yongs su bzung / /mkhas pas ji ltar rig pa nyid/ /yid du 'ong ba'i dkyil 'khor bya/ /sangs rgyas ser po bya ba ste/ /chos ni dkar po nyid du bya/ /dge 'dun ljang gur bya ba ste/ /gsang ba 'di ni yang dag grags/ /gza' rnams kha dog bye ba yis/ /dkyil 'khor dag ni nye bar mtshon/ /mkhas pas de yi 'og tu ni/ /sngags pa'i lus ni rtag tu bya/ /phyag rgya 'chang ba'i phyogs bris te/ /rang gi phyag rgya kha dog mtshan/ /dkyil 'khor gyi ni tshad dag ni/ /sor mo bcu drug rab tu grags/ /yang na gang ltar yid dga' ba/ /da ltar yang dag brtsam par bya/ / kha dog ji ltar nyer mtshon pa/ /dri dang me tog la sogs dbul/ /mnyam par gzhag pas so so ru/ /'di rnams kyi ni gsang sngags bzlas/ /sems ni rtse gcig gyur pa yis/ /bde gshegs bdag nyid bsgoms nas su/ /gza' rnams so sor mdun gnas nas/ /gsang sngags brjod par bya ba yin/ /de nas gsang sngags 'di yis ni/ /bsam pa thams cad yongs rdzogs byed/ /na maH sar+b+ba ta thA ga te b+h+yaH sar+b+bA sA pa ri pU ra ke b+h+yaH/ sar+b+ba ta thA ga b+hak+ti swA hA/ sar+b+ba tra ya~M/ AH A di t+ya/ su bi shud d+h+yaH/ nyi ma dang / zla ba dang / gnon po dang / mig dmar gyi'o/ /bi bUd+ha pha ka /gza' lhag gi'o/ /oM b+ho ga spa da yaH/ phur bu'i 'o/ /oM a su ro d+ha ma hoH/ pa sangs kyi'o/ /oM kr-iSh+Na bar+N+Na phaT/ spen pa'i 'o/ /oM bi kr-i ta bak+t+ra ru tsi swA hA/ sgra gcan gyi'o/ /yang ni gsang sngags re re ni/ /bdun phrag brgya rtsa bdun du bzlas/ /sna tshogs gzugs can gza' rnams ni/ /de ltar thams cad mchod par bya/ /skal bzangs skye bar 'gyur ba dang / /longs spyod rgya chen stsol bar 'gyur/ /rgyal po mi rgod chom rkun sogs/ /srin po lto 'phye grul bum rnams/ /de kun 'byung bar mi 'gyur te/ /de yi 'jigs pa nam yang min/ /de rnams kun las rnam par grol/ /sdug bsngal thams cad rnam par spangs/ /thams cad dbang phyug go 'phang 'thob/ /the tshom med par 'byung bar 'gyur/ /gang yang gzir ba nyid 'gyur ba/ /gzir ba'i rang bzhin 'gyur ba gnas/ /cho ga bzhin du mchod pa yis/ /phan pa de la 'byung mi 'gyur/ /rtag tu bde bas gnas gyur cing / /brtser ldan sems can mnyes gshin pa/ /sems ni dang zhing mnyes pa ste/ /sems can kun la phan par dga'/ /dngos grub las ni phan yon ni/ /zhi ba'i sems ni mnyam par gzhag /de yi phyi rol btsun par brtan/ /kun gyi gtso bo dbang phyug ste/ /rgyal po sgyu 'phrul chen po dang / /gdug pa'i sems can 'dul byed par/ /the tshom med par 'byung 'gyur te/ /rgyal ba bden pa gsung bas gsungs/ /char ches pa dang char mi 'bab/ /mu ge byung dang rtsod par song / /dkyil 'khor mchod par gyur pa na/ /de la de ni 'byung mi 'gyur/ /zhi ba dang ni rgyas pa dang / / gal te las 'di rtsom pa na/ /dri ni cho ga bzhin gsungs pas/ /dang por 'dir ni mchod par bya/ /'di ni sngags dang ldan pas kyang / /de ni myur du 'grub par 'gyur/ /nad rnams kun las rnam par grol/ /nyes pa thams cad rnam par spangs/ / sdig pa thams cad rnam par grol/ /rtsod pa thams cad rnam par spangs/ /thams cad rtag tu bde bar ni/ /the tshom med par 'byung bar 'gyur/ /de ltar mchod pa'i cho ga yis/ /gal te bsod nams byas mchod na/ /lha'i tshogs rnams kun mnyes nas/ /dngos grub rgya chen stsol bar 'gyur/ /gdug pa'i log par 'dren pa kun/ /srin pos 'jigs pa'i gzugs can rnams/ /sngags pa bzlas par brtson pa la/ /de ni de la 'tshe mi byed/ /rtag tu sna tshogs nad med cing / /longs spyod phun sum tshogs pa ru/ /de ni rtag tu 'gyur ba ste/ /cho ga bzhin du mchod pa yis/ /rgyal po yang ni dbang du 'gyur/ /yang na gdug pa stobs po che/ /'jigs pa'i gza' sogs thams cad dang / / mkha' 'gro ma yang stobs chen mo/ /de la don kun phyag 'tshal bar/ /the tshom med par 'byung bar 'gyur/ /de ltar rnam pa thams cad kyis/ /thams cad du ni mchod nas su/ /bde ba nyid du kun du shes/ /sdug bsngal rgya mtsho rnam par spangs/ /sna tshogs phun sum tshogs pas mdzes/ /de bzhin rtag tu rgyal por bcas/ /thams cad du ni snyan par smra/ /kun kyang dbang phyug rnam par brgyan/ /mchog tu skal ba bzang 'gyur ba/ / de ni kun du the tshom med/ /de skad gsungs nas rnal 'byor che/ /thub pa chos kun dbang phyug ni/ /cang mi gsung ba nyid du gyur/ /de tshe 'khor rnams 'di skad gsol/ /dpa' bo chen po sems dpa' legs/ / thams cad mkhyen pa'i rims nad bral/ /sngags kyi de nyid don nges pa/ /thams cad ma lus pa ru gsungs/ /mgon po sems can shin tu med/ /spyan snga ru ni brjod pa'i tshul/ /gsang sngags rgya mtsho rgya chen las/ /snying po 'di ni btus nas bsdus/ /thob pas 'jigs med 'di mngon 'gyur/ /de kun the tshom med pa ru/ /sa 'og gnas pa kun byas nas/ /sdug bsngal kun las rnam par grol/ /bde ba thams cad yang dag ldan/ /de tshe thams cad 'byung 'gyur zhing / /nad rnams thams cad rnam par spangs/ /gdug pas 'jigs pa'i gzugs can dang / /srin po gang yang mche ba can/ /gsang ba'i phyag rgya mthong ba yis/ / de dag thams cad brlag par 'gyur/ /gza' mchod pa'i rab 'byam gyi rim par phye ba'o// //mi g.yo mgon po zhes bya ba/ /sems can rjes su bsrung bar byed/ /'jam pa'i dpal gyi dkyil 'khor ston/ /de tshe dngos grub mdzes pa kun/ /rdo rje ral gri sogs de bzhin/ /phyis kyi dkyil 'khor nang du ni/ /sngags pas cho ga bzhin du bsgrub/ /las kyi cho ga mthong ba yis/ /sa gzhi dag par yang dag blta/ /slob ma rnams la phan 'dod pas/ / 'bad pas dkyil 'khor kun du bri/ /kun nas khru tshad lnga yin te/ /khyams kyis so sor rnam par brgyan/ /rta babs rnam par btsugs pa ni/ /nub gyi sgo ni bsgom par bya/ /sgo yi las ni 'jigs med par/ /byang phyogs kyi ni rab tu bya/ /gzhan du gang zhig rab byed na/ /ring por mi thogs nges par brlag /sngar gyi bzhin du cho ga yis/ /gru bzhi ru ni thig gdab bya/ /sgo khyud dang ni khyams dang ldan/ /snam bus kyang ni yang dag brgyan/ / de nas sngags pas dbus kyi char/ /ral gri'i phyag rgya gzugs bzang ldan/ /me yi dkyil 'khor dbus su ni/ /rin chen rdo bar legs par gnas/ /'bar ba'i phreng ba gzi brjid 'khrigs/ /nyi ma 'char ka'i 'od dang mtshungs/ /rang gi sa bon sa bon gyis/ /rdzogs pa'i sangs rgyas bsgom bya bri/ /'di ni byin gyis brlabs ba'i sngags/ /na maH sar+b+ba ta thA ga te b+h+yaH/ sar+b+ba bi shwa mu khe b+h+yaH he he he/ a dz+nyA pa ri mArga Na A gats+tsha b+ha ga ban sI graM swA hA/ de yi byang du bri ba ni/ /bum pa rdo rje mtshan ma can/ /zhi ba 'bar ba'i khreng bas khrigs/ /'jig rten gtso bo de rang bzhin/ /lho yi phyogs su mgon po yis/ /rdo rje 'bad pas bri bar bya/ /me yi dkyil 'khor dbus su ni/ /phyag na rdo rje blo ldan pas/ /dbang ldan phyogs la brten nas ni/ /mdzes pa'i gzugs brnyan phyag rgya bri/ /rin chen rdo bar bzhugs shing 'bar/ /yid bzhin nor bu zhes su bshad/ /khro rgyal phyag rgya brtul phod rol/ /steng du pad ma bris nas ni/ /sangs rgyas thams cad de ru bzhugs/ /me yi phyogs la brten nas ni/ /rab tu 'bad pas rdo rje bri/ /'bar ba'i phreng ba 'jigs su rung / /pad ma la ni rab tu bzhugs/ /blo dang ldan pas 'og tu ni/ /khro bo'i rgyal po mngag gzhug bri/ /rdo rje rdo ba'i steng na gnas/ /rdo rje 'bar bas yongs su bskor/ /rlung gi dkyil 'khor dbus son par/ /rtag tu 'bar bas 'khrigs pa yi/ /zhags pa'i phyag rgya de la bri/ /de nas gnyis pa'i cha la ni/ /pho nya mo ni kun nas bri/ /brtan pa zhes bya'i pho nya mo/ /byang phyogs su ni yang dag gnas/ /chu yi dkyil 'khor la bzhugs par/ / mkha' gsod ma ni de la bri/ /lho yi phyogs su rnam 'jigs ma/ /nyi ma'i dkyil 'khor dbus na bzhugs/ /bgegs rnams kun nas 'jigs par byed/ /'jig pa yi ni me ltar 'bar/ /'khor lo rdo ba'i steng du bri/ / de yi g.yog 'khor dag gi don/ /rab tu 'bad de bri bar bya/ /mkha' gsod ma ni snam bu la/ /gtun shing dang ni tho ba nyid/ /rab tu 'bad pas bri bar bya/ /slar yang nub phyogs su son par/ /bcom ldan ma ni 'jigs pa bri/ /mdzod spu zhes ni bshad pa yi/ /phyag rgya shar gyi cha la bri/ /lha mo pad dkar steng na bzhugs/ /rin chen phreng bas rnam par brgyan/ /de ltar kun nas nges la rung / /sngags pas phyag rgya dge ba'i tshogs/ /ngang gi sa bon nges sbyar bas/ /dkyil 'khor mchog gi rmad du byung / /sngags pas 'di kun cho ga bzhin/ /dri dang me tog sogs dgyes mchod/ /de nas phyag na rdo rjes byin gyis brlab pa'i sngags gsungs pa/ /lag pa thal mo sbyar nas ni/ /sor mo gung gi nang nyid du/ /dpal ldan phyag rgya 'di 'chang ba/ /pad ma mdzod ces mngon par bshad/ /skyobs pa thams cad mngon sum du/ /dkyil 'khor byin gyis rlob par byed/ /sngags ni 'di'o/ /na maH sar+b+ba ta thA ga te b+h+yaH sar+b+ba su khe b+h+yaH hU~M hU~M/ baHbaHma~M ma~M swA hA/ sngags 'di phyag rgya dang ldan par spyan drang ba dang gshegs su gsol ba la sogs pa dang / mchog tu gsang ba'i mi g.yo mgon po sangs rgyas thams cad kyis gsungs so/ /gang 'dir bzhugs nas phyogs na phyag rgya'i ye shes legs par bslabs na rgyud thams cad kyi gsang ba'i snying po dkyil 'khor du mchog tu zhugs pa yin no/ /'jam dpal gyi dkyil 'khor 'di su la yang bshad par mi bya'o/ /de ci'i slad du zhe na/ dkyil 'khor 'di ni mchog tu gsungs pa yin pas so/ /sngags pa gang zhig gzhan du byed/ /dkyil 'khor cho ga nyams pa yis/ /slob ma dang bcas gdon mi za/ /the tshom med par brlag par 'gyur/ /de nas 'jam dpal gyi dkyil 'khor 'dir zhugs pas mtshams bcing bar bya ste gzhan du ma yin no/ /slob dpon gyis dkyil 'khor bris te zhugs nas tsham ngam gyi las rnams la slob ma sbyar bar bya'o/ /de nas phyag na rdo rjes slar yang 'jam dpal gzhon nur gyur pa la 'di skad ces bka' stsal to/ /'jam dpal nyon cig /pha rol gyi stobs dpag tu med pa gnon pa'i ras ris kyi cho ga ni rin lhag pa bcal ba'i ras skra la sogs pa dang bral ba blangs te/ khro bo'i rgyal po dpa' bo gcig pa lag pa g.yas pa btag pa/ zhabs g.yas pa steng du bteg pa/ zhabs g.yon pa yang gyen du bsgreng ba/ phyag g.yon pa sdigs mdzub kyis bsdigs par mdzad pa/ zhal rnam par mi sdug pa nang steng du 'bar bar gnas pa de bzhin gshegs pas steng nas phyag gnyis kyis dbugs 'byin par mdzad pa/ me tog rgyal po ni byang du'o/ /g.yas su ni bcom ldan 'das rnam par snang mdzad/ 'og tu ni sgrub pa pos spos kyi snod kyis lag pa sgreng ba khro bo'i rgyal po la blta ba bri'o/ /'jam dpal mi g.yo mgon po 'di ras ris kyi cho ga sems can rnams la phan par 'dod pas bdag gis bshad do/ /'jam dpal mi g.yo mgon po'i sgrub thabs kyi cho ga gang thabs sla bas dngos grub chen po thob pa nyon cig /'dir dang por re zhig sngags kyi sgor byang chub sems dpa'i spyad pa spyod pa'i byang chub sems dpas gangs ri la sogs pa yid dga' ba'i gnas rnams su gcig pu slongs mo za zhing ras bris 'di'i spyan sngar sngon du bsnyen pa 'bum phrag gcig bya'o/ /de nas ri rtse'i zom la gnas bcas te 'bum phrag gsum bzlas pa bya'o/ /de nas nya la ji ltar 'byor pa'i mchod pa byas nas mtshan rangs par bzlas pa bya'o/ /nang par tho rangs sam nyi ma shar nas mtshan ma rnams 'byung ste/ nyi ma 'gyur ldog byed cing mun par yang 'gyur ro/ /phyogs bzhir ha ha zhes sgrogs pa'i sgra chen po thos par 'gyur ro/ /khro bo'i rgyal po me tog gi chun 'phyang g.yo bar 'gyur ba dang / sa gzhi g.yo zhing 'brug gi sgra chem chem sgrogs pa dang / rig pa 'dzin pa rnams kyis me tog gi char 'bebs so/ /'di'i drung du khro bo'i rgyal po chen po rang nyid lha thams cad dang klu la sogs pas bskor nas byon no/ /de'i dus su dmyal ba'i sdug bsngal rab tu zhi bar 'gyur ro/ /de nas yon chab phul te phyag byas nas gnas par bya'o/ / de nas khro bo'i rgyal po gsung bar 'gyur te bu gcig mchog sbyin par bya'o zhes pa dang / rig pa 'dzin pa 'am/ rgyal po 'am/ mi snang ba 'am/ gang 'dod pa de blang bar bya'o/ /gal te rig 'dzin du 'gyur na brgyad gnyis lo lon pa'i cha byad lag na ral gri thogs pa/ lha'i bzhon pa la bcibs pa/ rig pa 'dzin pa mang pos bskor ba/ rig pa 'dzin pa thams cad kyis bkur sti chen pos phyag byed pa sangs rgyas kyi zhing khams mang pos bskor ba/ sangs rgyas bcom ldan 'das rnams kyis mchod pa byed par 'gyur te/ bskal par 'tsho bar 'gyur ro/ /yang na mig sman grub par 'dod na lig bu mig dang / uta pa la sngon po dang / ru sta rnams gcig tu byas nas zangs kyi snod du bcug ste zla ba gzas zin pa na ji srid du du ba byung ba de srid du bzlas pa bya'o/ /de mig la bskus na 'dod pa'i khams su mi snang bar 'gyur ro/ /de nas ral gri sgrub par 'dod na ral gri chags med pa thogs te mar ngo'i brgyad dam bcu bzhi la ras ris la mchod pa rgya chen po byas nas bsrung ba'i ral gri lag pa g.yas su thogs la ji srid du 'phro bar 'gyur ba de srid du bzlas pa bya'o/ /'bar ba 'am 'phro ba na rang gcig pu rig pa 'dzin par 'gyur ro/ /'bar bas ni rig pa 'dzin pa'i rgyal por 'gyur ro/ /thogs pa pha rol gyi stobs gnon pa gang gi drung du mthong na mthong ba de dang babs pa thob par 'gyur ro/ /de nas rdo rje 'dzin pa sgrub par 'dod na khro chu'i lcags kyi rdo rje sor bcu drug pa/ ngos gnyis ka rtse gsum pa tsan dan dmar pos byugs la cho 'phrul gyi zla ba'i tshes gcig nas brtsams te ras ris la mchod pa rgya chen po byas la nyi ma re re bzlas pa bya'o/ /de nag nya la mchod pa rgya chen po byas nas mar gyi mar me brgya tham pa spar te/ ku sha'i chun po la nye bar 'dug la rdo rje lag pa gnyis kas gzung nas ji srid 'bar ba de srid du bzlas nas de bzung bas 'khor dang bcas pa rig pa 'dzin pa'i 'khor los sgyur ba thob par 'gyur ro/ /de ltar 'khor lo dang mdung la sogs pa'i mtshon cha rnams dang / gos dang / mchil lham dang / tshangs skud la sogs pa rtog pa gzhan gyi cho ga yang bsgrub par bya'o/ /snga ma bzhin du dngos grub gsum 'byung ngo / /de nas nor sgrub par 'dod na seng ldeng gi yam shing rnams zho dang mar gyis sbags nas stong phrag brgyad sreg blugs byas na ni nor stsol bar 'gyur ro/ /rgya mtshor 'bab pa'i 'gram du song nas tsan dan gyis sbags pa'i pad ma rnams stong phrag brgya chur bor la bskur na pad ma'i phung po dang mnyam pa'i nor thob par 'gyur ro/ /lha dbang du bya bar 'dod na a ga ru'i yam shing rnams zho dang sbrang rtsi dang mar gyis bsngags nas sreg blugs byas nas dbang du 'gyur ro/ /gsum po des bsngags pa'i 'bras bsregs na sngags mi bzad par 'gyur ro/ /gnod sbyin dbang du bya bar 'dod na mngar gsum gyis bsngags pa'i gu gul gyi ri lus sreg blugs bsregs pas dbang du 'gyur ro/ /mya ngan med kyi yam shing gis ni gnod sbyin mo dbang du 'gyur ro/ /rgyal po la yungs kar gyi sreg blugs byas na rgyal po dbang du 'gyur ro/ /rgya mtshor 'bab pa'i chu klung gi 'gram du song nas pad ma 'bum phrag gcig sbyin sreg byas na dpal 'dus nas nor stsol ba 'am yul phyogs gcig pa'i rgyal srid ster ro/ /de nas 'bum phrag gsum byas nas byin na sa stengs kun gyi bdag por 'gyur ro/ /'bum phrag lnga byin na 'dzam bu gling gi bdag por 'gyur ro/ /lha ma yin gyi bu ga'i sgor ras ris bzhag nas 'bum phrag gsum bzlas na 'dir thams cad 'byung ste dgos pa med par zhugs na bcud kyis len la sogs pa 'byung bar 'gyur ro/ /de nas de nyid du gnas na khyab 'jug gi 'khor los 'jigs pa bya ba 'byung ngo / /yar ngo'i tshes gcig nas brtsams te 'dza' ti'i me tog stong phrag brgyad du bcom ldan 'das kyis the bor reg par bya'o/ /ci srid du zhabs kyi mthe bong las 'od zer byung gi bar du bsregs na sgrub pa po'i lus de ma thag tu mi snang zhing dbu skra lcang lo 'khyil par 'gyur ro/ /'khor dang bcas pa rig pa 'dzin pa'i rgyal po thob par 'gyur te bskal par gnas so/ /sa la pad ma 'dab ma brgyad pa gcig bris te de'i steng du 'dug nas stong phrag brgya bzlas nas gzhi gar gnas pad mar gnas te 'khor stong dang ldan pa bskal par gnas so/ /de nas gter blang bar 'dod na gang na gter yod pa de ru bum pa skud pa nag pos dkris la tsan dan gyis byugs la chus bkang ste stong phrag brgyad du mngon par bsngags nas der gzhag par bya'o/ /sa de gas nas chu yis sa la gtor la khru gang tsam sa la brkos te blang bar bya'o/ /de nas seng ge sgrub na grog mkhar gyi sa la seng ge byas la 'gi'u wang gis byugs la dkyil 'khor du gzhag ste/ mchod pa chen po byas la ji srid du g.yo ba'i bar du bzlas na seng ger 'gyur te rgyab tu zhon pas skra li ba 'khyil bar 'gyur zhing bdag nyid snga ltas thob nas lo khri phrag gcig tu 'tsho'o/ / 'jam dpal 'phags pa mi g.yo ba'i rtog pa gsungs pa'i cho ga 'di bsgrubs na de ni myur bar 'gyur ro/ /bcom ldan 'das kyis de skad ces bka' stsal nas/ thams cad dang ldan pa'i 'khor de dag thams cad bcom ldan 'das kyis gsungs pa la mngon par bstod de/ rjes su yi rang nas stan las langs nas song ngo / /'phags pa khro bo'i rgyal po mi g.yo ba zhes bya ba'i rtog pa rdzogs so// // mi nyag rgyal po'i bka' lung gis/ rgya gar gyi mkhan po u la sha ma rak+Shi ta'i zhal snga nas lo ts+tsha ba glan dge slong dar ma blo gros kyis bsgyur cing zhus te/ dge slong yon tan rdo rjes gsol ba btab pa'o/