བོད་ཡིག |
197a1 @#/ /rgya gar skad du/ Ar+ya b+ha ba sa krA ni ta nA ma ma hA yA sU tra/ bod skad du/ 'phags pa srid pa 'pho ba zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /
197a2 'di skad bdag gis thos pa dus gcig na/ bcom ldan 'das rgyal po'i khab na 'od ma'i tshal bya ka lan da ka gnas pa na dge slong stong nyis brgya lnga bcu'i dge slong gi dge 'dun chen po dang / byang chub sems dpa' sems dpa'
197a3 chen po rab tu mang po dang thabs gcig tu bzhugs te/ de nas bcom ldan 'das 'khor brgya stong du mas yongs su bskor cing mdun gyis bltas nas chos ston te/ tshangs par spyod pa/ thog mar dge ba/ bar du dge ba/
197a4 tha mar dge ba/ don bzang po/ /tshig 'bru bzang po/ /ma 'dres pa/ yongs su rdzogs pa/ yongs su dag pa/ yongs su byang ba yang dag par ston to/ /de'i tshe yul ma ga d+hA'i rgyal po bzo sbyangs gzugs can snying po
197a5 rgyal po'i khab kyi grong khyer chen po nas byung ste/ rgyal po'i 'byor pa chen po dang / rgyal po'i mthu chen pos phyir 'od ma'i tshal ga la ba dang / bcom ldan 'das ga la ba der song ste phyin nas/ bcom ldan 'das kyi zhabs
197a6 la mgo bos phyag 'tshal te/ lan gsum bskor ba byas nas phyogs gcig tu 'dug go/ /phyogs gcig tu 'dug nas yul ma ga d+hA'i rgyal po bzo sbyangs gzugs can snying pos bcom ldan 'das la 'di skad
197a7 ces gsol to/ /bcom ldan 'das ji ltar na las bgyis shing bsags pa 'gags nas yun ring du 'gags pa 'gum pa'i dus kyi tshe nye bar gnas shing yid la mngon du 'gyur lags/ 'du byed thams cad stong pa
197a8 la ji ltar las rnams chab mi 'tshal bar gda'/ de skad ces gsol pa dang / bcom ldan 'das kyis yul ma ga d+hA'i rgyal po bzo sbyangs gzugs can snying po la 'di skad ces bka' stsal to/ /rgyal po
197b1 chen po 'di lta ste/ dper na mi zhig nyal ba'i rmi lam na yul gyi bud med bzang mo dang lhan cig tu yongs su spyod pa rmi la/ de nyal ba las sad nas yul gyi bud med bzang mo de dran na rgyal po chen po 'di ji snyam du sems/
197b2 rmi lam gyi yul gyi bud med bzang mo de yod dam/ gsol pa/ bcom ldan 'das de ni ma mchis lags so/ /bcom ldan 'das kyis bka' stsal pa/ rgyal po chen po 'di ji snyam du sems/ 'o na gang rmi lam gyi yul gyi
197b3 bud med bzang mo la mngon par zhen pa'i mi de ci mkhas pa'i rang bzhin can yin nam/ gsol pa/ bcom ldan 'das de ni ma lags te/ de ci'i slad du zhe na/ bcom ldan 'das rmi lam gyi yul gyi bud med bzang
197b4 mo yang shin du ma mchis shing mi dmigs lags na de dang yongs su spyod pa lta ga la mchis te/ 'di ltar mi de ni phongs shing dub pa'i skal ba can du 'gyur lags so/ /bcom ldan 'das kyis bka' stsal pa/
197b5 rgyal po chen po de bzhin du byis pa so so'i skye bo thos pa dang mi ldan pa yang mig gis gzugs rnams mthong na yid bde bar 'gyur ba'i gzugs rnams la mngon par zhen te/ mngon par zhen par gyur nas rjes su chags
197b6 par 'gyur ro/ /rjes su chags nas kun du chags par 'gyur ro/ /kun du chags nas 'dod chags las byung ba dang / zhe sdang las byung ba dang / gti mug las byung ba'i las lus dang / ngag dang / yid kyis
197b7 mngon par 'du byed de/ las de mngon par 'dus byas par gyur nas 'gag go/ /'gag pa ni shar phyogs su brten te gnas pa ma yin/ lho phyogs su ma yin/ nub phyogs su ma yin/ byang phyogs su
197b8 ma yin/ steng du ma yin/ 'og tu ma yin/ phyogs mtshams rnams su brten te gnas pa ma yin no/ /dus gzhan ji tsam zhig na 'chi ba'i dus dang tshod nye bar gnas pa'i tshe de dang /
198a1 skal ba 'dra ba'i las zad nas rnam par shes pa tha ma 'gag pa'i tshe 'di lta ste/ dper na nyal nyal ba las sad pa'i mi'i yul gyi bud med bzang mo lta bur las de yid la mngon du 'gyur ro/ /
198a2 rgyal po chen po de ltar rnam par shes pa tha ma 'gag cing skye ba'i char gtogs pa'i rnam par shes pa dang po yang na ni lha'i nang du/ yang na ni mi'i nang du/ yang na ni lha ma yin gyi nang du/ yang na ni sems can dmyal
198a3 ba'i rnams su/ yang na ni dud 'gro rnams su/ yang na ni yi dags rnams su 'byung bar 'gyur ro/ /rgyal po chen po rnam par shes pa dang po de 'gags ma thag tu gang la rnam par smin pa myong bar 'gyur ba mngon pa de dang skal
198a4 ba 'dra ba'i sems kyi rgyud 'byung ngo / /rgyal po chen po de la chos gang yang / 'jig rten 'di nas 'jig rten pha rol du 'pho ba yang med la 'chi 'pho dang skye bar mngon pa yang yod de/ rgyal po chen po de la gang rnam par shes pa tha ma
198a5 'gag pa de ni 'chi 'pho zhes bya/ gang rnam par shes pa dang po 'byung ba de ni skye ba zhes bya'o/ /rgyal po chen po rnam par shes pa tha ma 'gag pa'i tshe yang gang du yang mi 'gro/ rnam par shes pa dang po skye ba'i char gtogs
198a6 pa 'byung ba'i tshe yang gang nas kyang mi 'ong ngo / /de ci'i phyir zhe na/ ngo bo nyid dang bral ba'i phyir ro/ /rgyal po chen po de la rnam par shes pa tha ma ni rnam par shes pa tha mas stong / 'chi 'pho ni 'chi 'phos stong /
198a7 las ni las kyis stong / rnam par shes pa dang po ni rnam par shes pa dang pos stong / skye ba ni skye bas stong la las rnams chud mi za bar mngon pa yang yod do/ /rgyal po chen po rnam par shes pa dang po'i skye ba'i
198a8 char gtogs pa 'gags ma thag tu bar mi chad par pang la rnam par smin pa myong bar 'gyur ba mngon pa'i sems kyi rgyud 'byung ngo / /bcom ldan 'das kyis de skad ces bka' stsal te/ bde bar gshegs pas de
198b1 skad gsungs nas ston pas gzhan yang 'di skad bka' stsal to/ /'di dag thams cad ming tsam ste/ /'du shes tsam du gnas pa yin/ /brjod pa las ni gzhan gyur pa/ /brjod par bya ba yod ma yin/ /
198b2 ming ni gang dang gang gis su/ /chos rnams gang dang gang brjod pa/ /de la de ni yod ma yin/ /'di ni chos rnams chos nyid do/ /ming gis ming nyid stong pa ste/ /ming ni ming gis yod ma yin/ /ming med pa yi
198b3 chos rnams kun/ /ming gis yongs su brjod par byas/ /chos rnams 'di dag yod min te/ /rtog pa las ni kun du 'byung / /gang gis stong par rnam rtog pa/ /rtog pa de yang 'di na med/ /mig gis gzugs
198b4 ni mthong ngo zhes/ /yang dag gzigs pas gang gsungs pa/ /'jig rten log pa'i nga can la/ /kun rdzob bden par de gsungs so/ /tshogs nas mthong zhes gang dag tu/ /'dren pas rab tu bstan mdzad pa/ /
198b5 de ni don dam gdags pa'i sa/ /blo dang ldan pas bka' stsal to/ /mig gis gzugs rnams mi mthong zhing / /yid kyis chos rnams mi rig pa/ /de ni bden pa mchog yin te/ /de la 'jig rten mi
198b6 dpogs so/ /bcom ldan 'das kyis de skad ces bka' stsal nas/ yul ma ga d+hA'i rgyal po bzo sbyangs gzugs can snying po dang / byang chub sems dpa' de dag dang / dge slong de dag dang / lha dang mi dang /
198b7 lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa srid pa 'pho ba zhes bya ba theg pa chen po'i mdo rdzogs so// //
198b8 rgya gar gyi mkhan po dzi na mi tra dang / dA na shI la dang / zhu chen gyi lo ts+tshA ba ban de ye shes sdes bsgyur cing zhus te/ skad gsar chad kyis kyang bcos nas gtan la phab pa // // //
CLOSE WINDOW