CLOSE WINDOW

H634
བོད་ཡིག

/ //rgya gar skad du/ shrI ma hA kA la tan+t+ra/ bod skad du/ dpal nag po chen po'i rgyud/ dbang gi rta mchog sku la phyag 'tshal lo/ /'di skad bdag gis thos pa dus gcig na/ shar lho'i dur khrod chen po ha ha drag tu dgod pa'i gnas shing tsan+dan gyi nags tshal rab tu dga' ba'i ming zhes bya ba mi ma yin pho mo mang po 'dus pa'i pho brang du dpal nag po chen po zhes bya ba bi nA ya ka la sogs te 'khor gdug pa can rnams kyi dbus na skye 'gro sems can rnams kyi srog dbugs la dbang byed pa'i nag po chen po zhes bya ba zhig yod de/ de'i tshe de'i dus na nub phyogs kyi 'jig rten gyi khams na mthar byed rta'i rgyal po zhes bya ba rgyal po chen po bzhi la sogs pa'i 'khor byis bskor te dregs pa can 'dul ba'i ting nge 'dzin la snyoms par zhugs nas lcags kyu'i phyag rgya bcas nas oM badzra kro d+ha ha ya gri ba hUM hu lu hu lu hUM baM zhes brjod pas/ dur khrod ha ha drag tu dgod pa'i gnas nas nag po rang dbang med par mthar byed rta'i rgyal po'i mngon du byung ste las ci bya zer zhing rang rtags srog gi snying po 'di mdongs gsol du phul ba/ oM badzra ma hA kA la k+ShiM k+She tra big+h+nAM bi nA ya ka hUM hUM phaT ces phul lo/ /dpal nag po chen po'i rgyud las/ gleng gzhi'i le'u ste dang po'o// //de nas rgyal po mig mi bzang gis mthar byed rta'i rgyal po la 'di skad ces gsol to/ /e ma pad+ma khros pa'i bdag /nag po chen po drag shul can/ /gsang ba'i sgrub pa bshad du gsol/ /mgon po bsgrub par bya ba gang / /gsad cing lus srog dbye ba dang / /ma grub shi sa bstan pa dang / /mgon po'i rtags dang ser ba rnams/ /rta mchog chen pos bdag la stsol/ /ces zhus pas/ de nas pad+ma khros pa yis/ /nag po'i sgrub thabs ched du brjod/ /dam tshig ldan pa'i sngags pa yis/ /sangs rgyas bstan pa bsrung slad du/ /gza' skar tshes grangs shis pa la/ /dur khrod la sogs shing gcig tu/ /bsod nams tshogs ni bsags byas la/ /nag po chen po bsgrub par bya/ /phung sa'am sa nag dag la ni/ /stegs bu gru bzhi byas nas ni/ /dri spos khrag gis chag chag bya/ /dbus su gru gsum zla kham ldan/ /phyi rol pad+ma 'dab brgyad bri/ /de dbus thod chen nang du ni/ /sha lnga snying snas brgyan pa yi/ /gtor ma bshos bu khru gang tshad/ /de la mda' gzugs dmar nag dar/ /gri snying tsa ka li yang gzugs/ /de nyid mgon po'i rten du gzhag/ DA ma ru yi pags pa'i nang / /mgon po'i srog sngags bri bar bya/ /ldo yi nang du bla rdos dril/ /spos dang rgyun gtor gtang bar bya/ /dkon mchog spyi la mchod pa bsham/ /de nas pad+mar bdag bsgoms la/ /thugs ka'i hrI las 'od 'phros pas/ /bla ma sangs rgyas la sogs pa/ /rang gi mdun du bsam byas la/ /mchod pa rnams lnga dbul bar bya/ /rnam dag bdun gyi 'og tu ni/ /tshad med bzhi po bsgom par bya/ /btang snyoms la sogs paM raM tri/ /pad steng yi ge hUM las ni/ /nag po zhal gcig phyag drug pa/ /gri gug phreng ba DA ma ru/ /thod pa mdung dang zhags pa bsnams/ /g.yas g.yon rim pas bsnams pa'o/ /sbrul dang rin chen rgyan gyis brgyan/ /sku smad ba ti khra bo gsol/ /stag lpags zhing gi sham thabs can/ /gtum po spyan gsum mche ba gtsigs/ /dpral bar dri yi thig les brgyan/ /spyi gtsug mi bskyod sprul sku brtan/ /de ltar bdag mdun gsal bsgoms nas/ /spyan drangs mchod dang bzlas par bya/ /gtor ma pU dza la sogs pas/ /nag po che la sbyin par bya/ /mgon po'i thugs ka'i hUM las ni/ /srog gi yi ge g.yas nas bskor/ /khor yug dag gis bzla bar bya/ /oM badzra ma hA ka la k+ShiM k+She tra big+h+nAM bi nA ya ka hUM hUM phaT/ de skad ces ni rab brjod pas/ /nag po grub pa'i rtags rnams 'byung / /dpal nag po chen po'i rgyud las/ bsnyen cing sgrub pa'i le'u ste gnyis pa'o// //de nas yang dag bshad bya ba/ /sangs rgyas bstan pa bshig pa dang / /rnal 'byor bar chad byed pa rnams/ /nag pa chen pos bsgral 'dod na/ /stegs bu gru bzhi byas nas kyang / /drag po e yi nang du ni/ /pho mo rabs chad thod pa'i nang / /gzugs ni sbra tshil dag la bya/ /ming rus dag ni bkod nas kyang / /bsad dang na ba skabs dang sbyar/ /mgon po'i sku dang dam rdzas rnams/ /kha dang kha la dgod par bya/ /phag thod nang du thun rdzas blugs/ /rtag gtor rgyun gtor g.yas dang g.yon/ /gsang sngags 'di yis gsad par bya/ /oM badzra ma hA ka la k+ShiM k+She tra big+h+nAM bi nA ya ka hUM hUM phaT/ oM ma hA kA lA ya shA sa na u pa ha ri Ni e Sha a pa sh+tsi ma ka lo a yaM i daM rat+na tra ya a pa ka ri NaM ya di pra ti dz+nyA sma ra si ta dA i daM du Sh+TaM kha kha khA hi khA hi/ mA ra mA ra/ grih+Na grih+Na/ ban+d+ha ban+d+ha/ ha na ha na/ da ha da ha/ pa tsa pa tsa/ de na me ke na dgra bo mA ra ya hUM hUM phaT phaT/ hUM bi nA ya ka bi la sa traM bi hr-i hUM dza si ma bu bi nA ya ka a mu ka pri srog hur thums dza mA ra ya rbad/ drag sngags bzlas shing thun gyis brab/ /zhag bdun bar du smra mi bya/ /de la rtags rnams rdzogs par 'gyur/ /dpal nag po chen po'i rgyud las/ lus srog dbye ba'i le'u ste gsum pa'o// //de nas yang dag bshad bya ba/ /las mtha' sbyin sreg dag gis brtul/ /gru gsum dbus su gdug pa'i shing / /dbus su nag po 'khor bcas bskyed/ /ling+ga gtor ma dam rdzas rnams/ /nag po'i zhal du dbul bar bya/ /sngags 'di bzlas shing bsreg par bya/ /ag+ni dz+wa la raM las rdzogs/ /thal ba rlung dmar dag la bskur/ /a mu ka ni myur du rlog /dpal nag po chen po'i rgyud las/ mtha' brtul ba'i le'u ste bzhi pa'o// //de nas yang dag bshad bya ba/ /de ltar bsgrubs kyang ma grub na/ /gcig dang gnyis la nan tan bskyed/ /de ltar byas kyang ma grub na/ /sa gsum khrag gsum dug gsum la/ /khru gang pa yi gzugs kyi tshad/ /gru gsum dbus su nag po'i gzugs/ /spyi tshar dag tu lding du gzhug /bris sku dam rdzas bla rdo rnams/ /rang gi gru gsum mal gyi 'og /dug dang tsher mas steng nas dgab/ /thun rdzas brab cing sngags 'di bzlas/ /oM badzra kro d+ha ha ya gri ba hUM hu lu hu lu hUM phaT/ phaT hUM hUM ka ya nA bi g+hAM bi kra k+She k+ShiM la kA hA ma badzra oM/ /de skad brjod cing thun gyis brab/ /de la rtags rnams rdzogs pa dang / /de nas gso ba'i cho ga bya/ /bris sku bla rdo dam rdzas rnams/ /spos chus bkru zhing sngags 'di bzlas/ /oM badzra ma hA ka la k+ShiM k+She tra big+h+nI bi nA ya ka hUM hUM phaT sos sos swA hA/ de skad byas la gnas su ni/ /mgon po'i gzugs kyang spos chus bkru/ /gru gsum dbus su blangs byas la/ /dgra bo'i ming rus snying gar gzhug /zhag bdun bsgrubs la dgra la bskyal/ /a mu ka ni myur du brlag/ /dpal mgon bo nag po'i rgyud las/ ma grub na spogs pa'i cho ga dang gso ba'i le'u ste lnga pa'o// //de nas yang dag bshad bya ba/ /bya nag 'phur zhing lding ba dang / /mon pa a tsa ra dang ni/ /dge bshes ban+d+he slob dpon dang / /'od dang sgra dang khang pa 'tsheg /mgon po'i sku dag dngos su mthong / /dgra la dmag drangs sems can bsad/ /mi nag dag la snying stobs dang / /mdze bo dang ni sprang po dang / /bya nag thang la lhung ba 'byung / /dpal mgon po nag po'i rgyud las/ rtags kyi rim ba'i le'u ste drug pa'o// //de nas yang dag bshad bya ba/ /ser ba dbab pa'i las bya na/ /mon nam mdze can thod pa ru/ /'khor lo rtsibs bzhi bris nas kyang / /rigs lnga klu yi sa bon dgod/ /rtsibs mchan ser srung ming rus dang / /yul du phob ces bya ba bri/ /de mthar 'khor lo rtsibs dgu la/ /dregs pa'i sngags dag bri bar bya/ /rgyab tu gang yin yul ming dang / /rlung gi snying po bri bar bya/ /bdag nyid pad+ma khros par bsgom/ /gsang sngags 'di yis gnad la bor/ /oM badzra ma hA kA la k+Shi k+She tra bi g+h+nAM bi nA ya ka hUM hUM phaT/ nA ga snying gzer/ phu hur thums dza khrom shar hril b+h+yo/ /de skad ces ni rab brjod la/ /nyungs kar nyungs nag ske tshe dang / /khrag dang dug gis thod par brab/ /lo 'bras rlung khyer rtags byung na/ /dgra yi yul du dbab par bya/ /gal te 'jig rten phung ba'o /dpal mgon po nag po'i rgyud las/ ser ba dbab pa'i le'u ste bdun pa'o// //de nas yang dag nges gsungs pa/ /e ma 'khor 'dus ngo mtshar can/ /ma 'ongs dam can sgrub byed na/ /dam tshig la gnas sdom pa gzung / /gtor ma dag la brtson par bya/ /dam rdzas bla rdo lus la bsrel/ /zhes gsungs pas rgyal po mig mi bzang la sogs pa'i 'khor rnams yid rangs nas nag po chen pos bstan pa srung bar khas blangs nas mi snang bar gyur to/ /dpal nag po chen po'i rgyud las/ le'u brgyad pa rdzogs so// //rgya gar gyi mkhan po a mo g+ha badzra dang / bod kyi lo tsA ba phur bu 'od kyis bsgyur ba'o/

CLOSE WINDOW