CLOSE WINDOW

H360
བོད་ཡིག

/'phags pa rgyal bu don grub kyi mdo zhes bya ba'i bam po gcig pa rdzogs so// //sngon rgya las 'gyur ba'i brda rnying par 'dug/ //rgya gar skad du/ brah+ma dzA la sU tra/ bod skad du/ tshangs pa dra ba'i mdo/ dkon mchog gsum la phyag 'tshal lo/ /'di skad bdag gis thos pa dus gcig na/ bcom ldan 'das dge slong gi dge 'dun chen po dge slong stong nyis brgya lnga bcu dang / dge bsnyen stong dang / slong mo pa lnga brgya rnams dang thabs gcig tu yul ma ga d+ha'i ljongs rgyu zhing gshegs pa gshegs pa las/ mtshan mo rgyal po'i khab dang / skya snang can gyi grong gi bar de na/ 'od ma'i lcug phran rgyal po'i gnas su dge slong gi dge 'dun dang thabs gcig tu bzhugs so| |de'i tshe kun tu rgyu rab dga' rnam grangs du ma'i sgo nas sangs rgyas la mi snyan par brjod la/ chos dang dge 'dun la yang mi snyan pa brjod pa dang / kun tu rgyu rab dga'i slob ma bram ze'i bu tshangs byin zhes bya ba ni/ rnam grangs du ma'i sgo nas sangs rgyas la snyan pa brjod la/ chos dang / dge 'dun la snyan par brjod pa zhig ste/ de ltar slob dpon dang / slob ma de gnyis phan tshun lta ba dang / mos pa dang / bye brag phyed pa dang / bzod pa dag gis mi mthun par smra zhing / dge slong gi dge 'dun dag dang / de bzhin gshegs pa dgra bcom pa yang dag par rdzogs pa'i sangs rgyas kyi phyi bzhin zhabs 'bring du dong ngo / /de nas dge slong mang po rgyal po'i gnas na 'dus shing 'khod pa rnams na re/ tshe dang ldan pa dag /sems can rnams kyi mos pa sna tshogs 'di lta ste/ kun tu rgyu rab dga' rnam grangs du ma'i sgo nas sangs rgyas la mi snyan par brjod la/ chos dang dge 'dun la yang mi snyan pa brjod pa dang / kun tu rgyu rab dga'i slob ma bram ze'i bu tshangs byin zhes bya ba ni rnam grangs du ma'i sgo nas sangs rgyas la snyan pa brjod la/ chos dang dge 'dun la yang snyan pa brjod pa zhig ste/ de ltar slob dpon dang / slob ma de gnyis phan tshun lta ba dang / mos pa dang / bye brag phyed pa dang / bzod pa dag gis mi mthun par smra zhing dge slong gi dge 'dun dang / de bzhin gshegs pa dgra bcom pa yang dag par rdzogs pa'i sangs rgyas kyi phyi bzhin du zhabs 'bring du dong ba 'di ni ngo mtshar rab tu che'o zhes skabs kyi gtam de lta bu dag yang dag par brjod par gyur to/ / de nas dge slong mang po dag rgyal po'i gnas na 'dus shing 'khod pa rnams kyi skabs kyi gtam dus la bab pa dag /bcom ldan 'das nyin mo'i gnas na bzhugs bzhugs pa'i lha'i snyan rnam par dag pa mi'i las 'das pas gsan par gyur to/ /gsan nas kyang ting nge 'dzin de las bzhengs nas/ rgyal po'i gnas ga la ba der gshegs te/ byon nas dge slong gi dge 'dun gyi mdun du gdan bting ba nyid la bzhugs so/ /bzhugs nas kyang dge slong rnams la bka' stsal pa/ dge slong dag /khyed rgyal po'i gnas su dge slong mang po rnams 'dus shing 'khod pa rnams kyi skabs kyi gtam dus la bab pa ni gang yin/ khyed gtam gang gis na da ltar 'dus shing 'khod/ btsun pa/ bdag cag dge slong mang po rnams rgyal po'i gnas 'dir 'dus shing mchis pa na/ kun tu rgyu rab dga' rnam grangs du ma'i sgo nas sangs rgyas la mi snyan pa brjod la/ chos dang / dge 'dun la yang mi snyan pa brjod pa dang / kun tu rgyu rab dga'i slob ma bram ze'i bu tshangs sbyin zhes bgyi ba ni/ rnam grangs du ma'i sgo nas sangs rgyas la snyan pa brjod la/ chos dang / dge 'dun la yang snyan pa brjod pa zhig ste/ de ltar na slob dpon dang / slob ma de gnyis phan tshun lta ba dang / mos pa dang / bye brag phyed ba dang / bzod pa dag gis mi mthun par smra zhing dge slong gi dge 'dun dag dang / de bzhin gshegs pa dgra bcom pa yang dag par rdzogs pa'i sangs rgyas kyi slad bzhin zhabs 'bring du mchis pa 'di ni/ ngo mtshar rab tu che'o zhes skabs kyi gtam de lta bu dag glengs slangs pa lags la/ btsun pa/ bdag cag dge slong mang po rnams/ rgyal po'i gnas su 'dus shing mchis pa ni skabs kyi gtam dus la bab pa ni de lags te/ gtam des de ltar bdag cag 'dus shing mchis pa lags so/ /dge slong dag /nga la mi snyan pa brjod pa dang / chos dang / dge 'dun la yang mi snyan pa brjod pa de la gnod sems mi bya'o/ /mi bzod pa mi bya'o/ /ngan sems mi bya'o/ /sems mngon par mi dga' bar mi bya'o/ /dge slong dag /nga la mi snyan par brjod pa dang / chos dang / dge 'dun la yang mi snyan pa brjod pa de la/ tshe dang ldan pa dag gis gnod sems dang / mi bzod pa dang / ngan sems dang / sems mngon par mi dga' bar byas na/ des na khyod kyi bar du gcod pa kho nar 'gyur ba'i phyir ro/ /de ci'i phyir zhe na/ dge slong de re zhig khros 'khrugs la/ rngams te yid mi dga' bar gyur pas/ gzhan brjod pa'i don gyi rnam pa thams cad yongs su rdzogs par shes pa'am/ mthong bar 'gyur ba 'di ni gnas med do/ /dge slong dag /de'i phyir nga la mi snyan par brjod la/ chos dang / dge 'dun la yang mi snyan pa brjod pa na/ yang dag pa la ni yang dag pa nyid du khas blang bar bya la/ yang dag pa ma yin pa la ni yang dag pa ma yin pa nyid du ste/ 'di ltar de ni yang dag par ma yin zhing | de kho na ma yin pas nged kyi chos 'di la ni yod pa ma yin no zhes lan gdab par bya'o/ /dge slong dag /nga la snyan pa brjod la/ chos dang / dge 'dun la yang snyan pa brjod pa na/ dga' bar yang mi bya'o/ /yid bde bar yang mi bya'o/ /sems ya ya por yang mi bya'o/ /dge slong dag /nga la snyan pa brjod la/ chos dang / dge 'dun la'ang snyan pa brjod pa na/ dga' ba'am/ yid bde ba'am/ sems ya ya por gyur na/ des na khyed kyi bar du gcod pa kho nar 'gyur ba'i phyir ro/ /dge slong dag /de ci'i phyir zhe na/ dge slong de re zhig dga' bar gyur pa dang / yid bde bar gyur pa dang / sems ya ya por gyur pas gzhan brjod pa'i don gyi rnam pa thams cad yongs su rdzogs par shes pa'am/ mthong bar 'gyur ba 'di ni gnas med do/ /dge slong dag /de'i phyir nga la snyan pa brjod la/ chos dang / dge 'dun la yang snyan pa brjod pa na/ yang dag pa la ni yang dag pa nyid du khas blang bar bya la/ yang dag pa ma yin pa la ni/ yang dag pa ma yin pa nyid du ste/ 'di ltar de ni yang dag par ma yin zhing de kho na ma yin pas/ nged kyi chos 'di la ni yod pa ma yin no zhes lan gdab par bya'o/ /dge slong dag /gang byis pa so so'i skye bo thos pa dang mi ldan pa dag de bzhin gshegs pa'i snyan pa cung zad tsam 'di smra zhing brjod pa/ 'di lta ste/ tshul khrims tsam dang / 'dod pa dag las rab tu dben pa yin no/ /ji ltar na tshul khrims tsam yin zhe na/ gau ta ma de ni 'phel ba'i tshul khrims can yin la/ ji skad smras pa de bzhin byed cing ji ltar byed pa de bzhin smra ba yin no/ /gau ta ma de ni 'di ltar srog gcod pa spangs nas srog gcod pa las slar log pa ste/ srog chags su gyur pa'i sems can thams cad la snying rje dang ldan zhing ngo tsha shes pa dang / dbyug pa spangs shing mtshon cha spangs pas tha na srog chags grog sbur yan chad la yang srog gcod pa spangs pa yin no/ /gau ta ma de ni 'di ltar ma byin par len pa spangs nas ma byin par len pa las slar log pa ste/ ma byin par mi len la/ byin pa la ni dga' ba yin te/ de bzhin du rgya cher ro/ /ji ltar 'di na dge sbyong dang / bram ze kha cig dad pas byin pa yongs su sbyod cing / rig pa yon po dag gis log par 'tsho bas/ 'tsho bar byed de/ 'di lta ste/ nyi ma dang / zla ba gnyis lam nas rgyu ba'i rnam par smin pa ni 'di lta bu'o/ /nyi ma dang zla ba gnyis lam log pa nas rgyu ba'i rnam par smin pa ni 'di lta bu'o/ /gza' nyi ma dang / gza' zla ba'i lam dang / skar mda' ltung ba las phyogs 'bar ba dang / bar snang las lha'i rnga sgra grag pa'i rnam par smin pa ni 'di lta bu'o/ /gza' nyi ma dang / gza' zla ba'i lam log pa dang / skar mda' ltung ba las phyogs 'bar ba dang / bar snang las lha'i rnga sgra grag pa dang / yang nyi ma dang / zla ba 'di gnyis 'di ltar mthu che ba/ 'di ltar rdzu 'phrul che ba'i rnam par smin pa ni 'di lta bu'o/ /'char ba dang / 'ong ba dang / kun nas nyon mongs pa dang / rnam par byang ba rnam par gzhag pa dag tu mi shes pa ni/ 'di lta ste/ lam dang / lam log pa'i phyir ro/ /gau ta ma/ de ni rig pa yon pa dag gis log par 'tsho bas log par 'tsho bar byed pa de lta bu dag spangs pa yin no/ /ji ltar na 'dod pa rnams las rab tu dben pa yin zhe na/ gau ta ma/ de ni 'di ltar 'phags pa'i tshul khrims kyi phung po 'di dag dang ldan zhing / dbang po rnams kyi sgo bsdams pa la gnas pa/ dran pas kun nas bsrungs pa/ rtag par dran pa dang / dran pas yid kun nas bsrungs pa/ gnas skabs mnyam pa la 'jog par byed pa/ de mig gis gzugs rnams la lta ba na mtshan mar 'dzin pa med pa yin te/ yid kyi dbang po'i bar du yang sdom pa blangs pa yin no/ /gau ta ma/ de ni 'di ltar tshul khrims kyi phung po 'di dang / dbang po'i sgo bsdams pa 'di dang ldan pa yin la/ 'gro ba dang / 'ong ba la shes bzhin du gnas pa yang yin zhing / lta ba dang / rnam par lta ba nas gnyid kyis dub ba sel ba'i bar du'ang shes bzhin du gnas pa yin no/ /gau ta ma de ni 'di ltar 'phags pa'i tshul khrims kyi phung po 'di dang / dbang po'i sgo bsdams pa 'di dang ldan la/ dran pa dang / shes bzhin mchog 'di dang ldan pa'i phyir mal stan bde ba la gnas pa nas/ 'dod pa dag las dben pa/ sdig pa mi dge ba'i chos rnams las dben pa/ rtog pa dang bcas shing dpyod pa dang bcas pa/ dben pa las skyes pa'i dga' ba dang / bde ba can/ bsam gtan dang po rdzogs par byas nas gnas pa'i bar te/ 'dod pa rnams las dben pa ni de lta bu yin no/ /dge slong dag |chos gang dag gzhan zab pa zab par snang ba yongs su dag pa/ yongs su byang ba de dag ngas rang gi mngon par shes pas/ mngon par rdzogs par sangs rgyas nas bshad la pha rol pos kyang de bzhin gshegs pa la/ gang yang dag pa ji lta ba bzhin snyan pa smra zhing rjod par byed do/ /dge slong dag /chos gang dag gzhan zab pa/ zab par snang ba yongs su dag pa/ yongs su byang ba de dag ngas rang gi mngon par shes pas mngon par rdzogs par sangs rgyas nas bshad la/ pha rol bos kyang de bzhin gshegs pa la gang yang dag pa ji lta ba bzhin snyan par smra zhing / rjod par byed pa gang zhe na/ dge slong dag /dge sbyong dang bram ze kha cig rtag par smra ba rnams sngon gyi mtha' la rtog cing / bdag dang 'jig rten ni rtag go zhes mngon par smra zhing mngon par brjod pa yod pa ni/ 'di lta ste/ gzhi bzhi po dag la'o/ /dge sbyong dang / bram ze shes ldan rtag par smra ba de dag /ci la rten cing ci la gnas nas ci la gnas bcas te/ sngon gyi mtha' la rtog cing bdag dang / 'jig rten ni rtag go zhes mngon par brjod pa ni/ 'di lta ste/ gzhi bzhi po dag la'o/ /dge slong dag /'di na dge sbyong dang / bram ze kha cig dgon pa na gnas kyang rung / shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgom pa'i rgyu las byung ba dang / lan mang du byed pa'i rgyu las byung ba dang / yang dag pa'i yid la byed pa'i rgyu las byung ba dag gis/ sems zhi ba'i ting nge 'dzin de lta bu la reg par byed do/ /de ltar sems mnyam par bzhag pa na/ 'jig pa dang / chags pa'i bskal pa phrag nyi shu yang dag pa rjes su dran no/ /de 'di snyam du sems te/ de'i phyir bdag dang / 'jig rten rtag pa des na/ bdag 'di snyam du bdag dgon pa na gnas kyang rung / shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgom pa'i rgyu las byung ba dang / lan mang du byed pa'i rgyu las byung ba dang / yang dag pa yid la byed pa'i rgyu las byung ba dag gis/ sems zhi ba'i ting nge 'dzin de lta bu la reg par bya'o snyam mo/ /de ltar sems mnyam par bzhag pa na/ 'jig pa dang / chags pa'i bskal pa phrag nyi shu yang dag par rjes su dran no/ /de ltar bdag dang / 'jig rten rtag pa ni/ mi 'gro ba med/ 'gro ba med pa/ bsgyur du mi rung pa/ ther zug tu gnas pa/ lcags kyi sdong po ltar 'dug pa ste/ de ltar na sems can shes ldan 'di dag ni/ kun tu rgyug cing 'khor la rtag pa de lta bu dang mtshungs pa med pa'o/ /rtag par smra ba rnams ci la rten cing / ci la gnas nas/ ci la gnas bcas te/ sngon gyi mtha' la rtog cing bdag dang 'jig rten rtag pa'o zhes mngon par smra zhing mngon par brjod pa 'di ni gzhi dang po'o/ /gnyis pa ni/ dge sbyong dang / bram ze shes ldan rtag par smra ba rnams/ ci la rten cing ci la gnas nas/ ci la gnas bcas te/ sngon gyi mtha' la rtog cing / bdag dang / 'jig rten rtag pa'o zhes mngon par smra zhing / mngon par brjod pa ste/ dge slong dag /'di ni dge slong dang / bram ze shes ldan can rtag par smra ba rnams dgon pa na gnas kyang rung | shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgom pa'i rgyu las byung ba dang / lan mang du byed pa'i rgyu las byung ba dang / yang dag pa yid la byed pa'i rgyu las byung ba dag gis sems zhi ba'i ting nge 'dzin de lta bu la reg par byed do/ /de ltar sems mnyam par bzhag pa na/ 'jig pa dang / chags pa'i bskal pa phrag bzhi bcu yang dag par rjes su dran no/ /de 'di snyam du sems te/ de'i phyir bdag dang / 'jig rten rtag pa des na/ bdag 'di snyam du bdag dgon pa na gnas kyang rung / shing drung na gnas kyang rung / khang stong na gnas kyang rung ba nas/ rtag par smra ba rnams ci la rten cing / ci la gnas nas ci la gnas bcas te/ sngon gyi mtha' la rtog cing / bdag dang / 'jig rten rtag pa'o zhes mngon par smra zhing / mngon par brjod pa 'di ni gzhi gnyis pa'o zhes bya ba'i bar du snga ma bzhin no/ /gsum pa ni/ dge sbyong dang / bram ze shes ldan rtag par smra ba rnams ci la rten cing / ci la gnas nas/ ci la gnas bcas te/ sngon gyi mtha' la rtog cing / bdag dang / 'jig rten rtag pa'o zhes mngon par smra zhing / mngon par brjod pa ste/ dge slong dag /'di ni dge sbyong dang / bram ze kha cig ces bya ba nas/ sems mnyam par bzhag pa nas 'jig pa dang / chags pa'i bskal pa phrag brgyad cu yang dag par rjes su dran no zhes bya ba'i bar du snga ma bzhin pa dang / de 'di snyam du sems te/ bdag dang / 'jig rten ni rtag pa'o zhes bya ba nas/ de ltar na sems can shes ldan 'di dag ni kun tu rgyug cing 'khor la/ rtag pa de lta bu dang mtshungs pa med pa'o/ /rtag par smra ba rnams ci la rten cing / ci la gnas nas/ ci la gnas bcas te/ sngon gyi mtha' la rtog cing bdag dang / 'jig rten rtag pa'o zhes mngon par smra zhing mngon bar brjod pa 'di ni gzhi gsum pa'o/ /bzhi pa ni| dge sbyong dang / bram ze shes ldan rtag par smra ba rnams ci la rten cing / ci la gnas nas/ ci la gnas bcas te/ sngon gyi mtha' rtog cing bdag dang / 'jig rten rtag pa'o zhes mngon par smra zhing mngon par brjod pa ste/ dge slong dag /'di na dge sbyong dang / bram ze zhes bya ba dag snga ma bzhin no/ /sems mnyam par bzhag pa na lha'i mig rnam par dag pa mi'i las 'das pas sems can 'chi ba dang / skye ba dang / kha dog bzang po dang / kha dog ngan pa dang / dman pa dang / gya nom pa dang / bde 'gro dang / ngan 'gro dang / ngan 'gror 'gro ba dag lta ste/ de ltar na bdag dang / 'jig rten ni rtag pa'o zhes bya ba nas/ rtag par smra ba rnams ci la rten cing / /ci la gnas nas/ ci la gnas bcas te/ sngon gyi mtha' la rtog cing bdag dang / 'jig rten rtag pa'o zhes mngon par smra zhing mngon par brjod pa 'di ni gzhi bzhi pa'o zhes bya ba'i bar du snga ma bzhin no| |dge slong dag /dge sbyong dang bram ze kha cig rtag par smra ba rnams sngon gyi mtha' la rtog cing / bdag dang / 'jig rten rtag pa'o zhes mngon par smra zhing / mngon par brjod pa de thams cad ni gzhi bzhi po 'di dag lta ste/ de las mi lhag mi mang la de ltar na lta bar song ba 'di dag 'di ltar 'dzin pa dang / 'di ltar mchog tu 'dzin pa de dag de bzhin gshegs pas yang dag pa ji lta ba bzhin du rab tu mkhyen/ de las lhag par yang dag pa ji lta ba bzhin du mkhyen to/ /'di ltar rab tu mkhyen pa na/ mchog tu mi 'dzin to/ /mchog tu mi 'dzin pas bdag nyid mya ngan las 'das par yang rig cing de ltar lta bar song ba 'di dag gi 'gro ba ni 'di lta bu'o/ /skye ba ni 'di lta bu'o/ /tshe phyi ma ni lta bu yin no zhes de dag de bzhin gshegs pas yang dag pa ji lta ba bzhin du rab tu mkhyen/ de las lhag par yang dag pa ji lta ba bzhin du mkhyen/ de dag de bzhin gshegs bas yang dag pa ji lta ba bzhin du mkhyen/ de las lhag par yang dag pa ji lta ba bzhin du rab tu mkhyen nas kyang mchog tu mi 'dzin to/ /mchog tu mi 'dzin pas bdag nyid mya ngan las 'das par rig nas/ kun 'byung tshor ba rnams nub par thugs su chud de/ 'di ni sdug bsngal lo/ /'di ni sdug bsngal nges par 'phyin pa'o zhes bya bar mkhyen to/ /dge slong dag |chos gang dag gzhan zab pa zab par snang ba/ yongs su dag pa/ yongs su byang ba de dag ngas rang gi mngon par shes pas mngon par rdzogs par sangs rgyas nas bshad la/ pha rol pos kyang de bzhin gshegs pa la gang yang dag pa ji lta ba bzhin snyan pa smra zhing rjod par byed do/ /dge slong dag /chos gang dag gzhan zab pa zab par snang ba dag ces bya ba sde ma bzhin no/ /dge slong dag /dge sbyong dang / bram ze kha cig sngon gyi mtha' la rtog cing / kha cig ni rtag pa ste/ bdag dang / 'jig rten kha cig rtag go zhes smra zhing mngon par brjod pa ni/ 'di lta ste/ gzhi bzhi po 'di dag la'o/ /dge sbyong dang / bram ze shes ldan de dag ci la rten cing / ci la gnas nas/ ci la gnas bcas te/ sngon gyi mtha' la rtog cing / kha cig ni rtag pa pa ste/ bdag dang / 'jig rten pa rtag go zhes mngon par smra zhing mngon par brjod pa ni/ 'di lta ste/ gzhi bzhi po dag la'o/ /dge slong dag /gang 'jig rten 'di 'jig pa'i dus la bab ste/ 'jig rten 'jig pa na sems can phal cher 'od gsal gyi lha'i ris su skye bar 'gyur te/ de dag der yid las 'byung zhing / gzugs can yin la dbang po dman pa ma yin zhing / ma tshang ba med pa/ yan lag dang / nying lag thams cad dang ldan zhing kha dog mdzes pa dang ldan pa rnams rang gi mthus nam mkha' la 'gro zhing dga' ba'i zas dang ldan la/ dga' ba'i zas za ba dag tshe ring por 'khod do/ /dge slong dag /gang 'jig rten 'di chags pa'i dus la bab ste/ 'jig rten chags pa na nam mkha' stong pa la tshangs pa'i gzhal med khang dag mngon par 'grub la/ yang 'od gsal gyi lha'i ris kyi sems can 'ga' tshe zad cing las zad la/ bsod nams zad pa zhes shi 'phos nas/ tshangs pa'i gzhal med khang stong par skye/ da de na gcig pu zla med cing grogs med par tshe ring bas yun ring por gnas so/ /de nas sems can de yun ring po las 'das pa dang / sred pa skyes shing mi dga' bar gyur te/ kye ma/ bdag dang skal ba mnyam pa'i sems can gzhan zhig 'dir skyes kyang ci ma rung zhes sems can de'i sems kyis smon pa dang / 'od gsal gyi lha'i ris kyi sems can gzhan tshe zad cing las zad la bsod nams zad pa zhig shi 'phos nas tshangs pa'i gzhal med khang du sems can de dag skal pa mnyam par skyes so/ /de nas sems can de 'di snyam du bdag gcig pu zla med cing grogs med par tshe ring bas yun ring por gnas te/ bdag yun ring por gnas pa las 'das pas sred pa skyes shing mi dga' bar 'gyur te/ kye ma/ bdag dang skal ba mnyam pa'i sems can gzhan zhig 'dir skyes kyang ci ma rung zhes/ bdag gi sems kyis de ltar smon pa dang / sems can 'di dag 'dir bdag dang skal ba mnyam par skyes pa las na/ sems can de dag ni bdag gis sprul to/ /bdag sems can 'di dag dang / dngos po rnams kyi phar gyur pa ste/ dbang phyug go /byed pa po'o/ /'byin pa pa'o/ /'byin byed do snyam mo/ /sems can de dag kyang 'di snyam du sems te/ sems can 'di dag ni bdag gis gcig pu zla med cing grogs med par tshe ring bas yun ring por gnas par mthong ngo / /de yun ring por gnas pa las 'das nas srid pa skyes shing mi dga' bar gyur te/ kye ma| bdag dang skal ba mnyam pa'i sems can gzhan zhig 'dir skyes kyang ci ma rung snyam nas/ sems can des de ltar sems kyis smon pa dang / 'dir bdag cag sems can de dang skal ba mnyam par skyes pa las na/ bdag cag ni sems can des sprul pa'o/ /sems can de ni bdag cag dang / dngos po rnams kyi phar gyur pa ste/ dbang phyug go /byed pa po'o| |'byin pa pa'o/ /'byin byed do/ /snyam mo/ /de nas sems can 'ga' tshe zad cing / las zad la bsod nams zad pa zhig gnas de nas shi 'phos nas 'dir mi rnams dang skal ba mnyam par gyur la/ de dbang po rnams yongs su smin cing nar son pa'i rgyus na/ skra dang / kha spu bregs te/ gos ngur smrig bgos nas/ yang dag pa nyid kyi dad pas khyim nas khyim med par rab tu byung ste/ de dgon pa na gnas kyang rung / shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgo pa'i rgyu las byung ba dang / lan mang du byed pa'i rgyu las byung ba dang / yang dag pa yid la byed pa dag gi rgyu las byung ba dag gis sems zhi ba'i ting nge 'dzin de lta bu la reg par byed do/ /de ltar sems mnyam par bzhag pa las sngon gyi lus de yang dag par rjes su dran no/ /de 'di snyam du sems te/ tshangs pa de ni dngos po rnams kyi phar gyur pa ste/ dbang phyug go /byed pa po'o/ /sprul pa pa'o/ /'byin pa pa'o/ /'byin byed do/ /de ni rtag pa'o/ /brtan pa'o| |ther zug pa'o/ /rnam par mi 'gyur ba'i chos can no/ /yang bdag cag ni tshangs pa des sprul pa'i phyir bdag cag ni mi rtag pa'o/ /yid brtan du mi rung ba'o/ /rnam par 'gyur ba'i chos can no snyam mo/ /de ltar kha cig ni rtag la/ kha cig ni mi rtag pa ste/ ci la rten cing ci la gnas nas/ ci la gnas bcas te/ sngon gyi mtha' la rtog cing kha cig ni rtag pa ba ste/ bdag dang / 'jig rten kha cig ni rtag go zhes mngon par smra zhing mngon par brjod pa 'di ni gzhi dang po'o/ /gnyis pa ni/ dge sbyong dang bram ze shes ldan ci la rten cing ci la gnas nas/ ci la gnas bcas te sngon gyi mtha' la rtog cing / kha cig ni rtag pa pa ste/ bdag dang / 'jig rten kha cig ni rtag go zhes mngon par smra zhing mngon par brjod pa ste/ tshangs pa de'i lta ba ni 'di lta bu'o/ /smra ba ni 'di lta bus 'di skad ces brjod pa bya ste/ sa dang / chu dang / me dang / rlung de ni mi rtag pa mi brtan pa/ yid brtan du mi rung ba rnam par 'gyur ba'i chos can yin la/ yang 'di skad ces brjod par bya ste/ sems zhes bya ba'am/ yid ces bya ba'am/ rnam par shes pa zhes bya ba de ni rtag pa/ brtan pa/ ther zug pa/ rnam par 'gyur ba'i chos can ma yin no/ /yang sems can 'ga' tshe zad cing las zad pa la bsod nams zad pa zhig gnas de nas shi 'phos nas 'dir mi rnams dang skal ba mnyam par 'gyur la/ de dbang po rnams yongs su smin cing nar son pa'i rgyus ni skra dang / kha spu bregs te/ gos ngur smrig bgos nas yang dag pa nyid kyi dad pas khyim nas khyim med par rab tu byung ste/ de dgon pa na gnas kyang rung / shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgom pa'i rgyu las byung ba dang / lan mang du byas pa'i rgyu las byung ba dang / yang dag pa yid la byed pa'i rgyu las byung ba dag gis sems zhi ba'i ting nge 'dzin la reg par byed do/ /de ltar mnyam par bzhag pa dang / de 'di snyam du sems te/ tshangs pa de ni lta bar gyur pa nyams su myong ba'i phyir 'di skad ces bya ste/ sa dang / chu dang / me dang / rlung de ni mi rtag pa'o/ /mi brtan pa'o/ /yid brtan du yang mi rung ba'o/ /rnam par 'gyur ba'i chos can yin no snyam la yang 'di skad ces bya ste/ sems zhes bya ba'am/ yid ces bya ba'am/ rnam par shes pa zhes bya ba de ni rtag pa'o/ /brtan pa'o/ /ther zug pa'o/ /rnam par 'gyur ba'i chos can ma yin pa'o snyam mo/ /de ltar kha cig ni rtag la/ kha cig ni mi rtag pa ste/ ci la rten cing la gnas nas/ ci la rten bcas te/ sngon gyi mtha' la rtog cing / kha cig ni rtag pa pa ste/ bdag dang / 'jig rten kha cig ni rtag go zhes mngon par smra zhing mngon par brjod pa 'di ni gzhi gnyis pa'o/ /gsum pa ni/ dge sbyong dang / bram ze shes ldan kha cig ci la rten cing ci la gnas nas/ ci la gnas bcas te/ sngon gyi mtha' la rtog cing / kha cig ni rtag pa pa ste/ bdag dang / 'jig rten kha cig rtag go zhes mngon par smra zhing mngon par brjod pa ni/ dge slong dag/ 'dod pa'i khams ni lha'i rtsod mos myos zhes bya ba dag yod de/ de dag gang gi tshe shin tu rtse dga' rangs pa dang ldan zhing 'khod de/ rtse dga' rangs pa ldan pa'i sems can de dag gi nang nas/ lus dub cing dran pa rmongs la dran pa'i sems can gnas de nas shi 'phos nas 'gyur ro/ /'di lta ste/ sems can 'ga' tshe zad la bsod nams zad pa 'ga' zhig gnas de nas shi 'phos nas/ 'dir mi rnams dang skal ba mnyam par 'gyur la/ dbang po yongs su smin cing nar son pa'i rgyus na/ skra dang / kha spu bregs te/ gos ngur smrig bgos nas/ yang dag pa nyid kyi dad pas khyim nas khyim med par rab tu 'byung ste/ de dgon pa na gnas kyang rung / shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgom pa'i rgyu las byung ba dang / lan mang du byed pa'i rgyu las byung ba dang / yang dag pa yid la byed pa dag gi rgyu las byung bdag gis/ sems zhi ba'i ting nge 'dzin de lta bu la reg par byed do/ /de ltar mnyam par bzhag pa na/ sngon gyi lus de yang dag par rjes su dran no/ /de 'di snyam du sems te/ 'dod pa'i khams na gang lha rtsed mos myos zhes bya ba dag gi nang nas gang dag rtse dga' rangs pa dang shin tu mi ldan par 'khod de/ de dag ni rtag pa'o/ /brtan pa'o/ /ther zug pa'o/ /rnam par mi 'gyur ba'i chos can yin no snyam mo/ /yang bdag cag ni shin tu rtse dga' rangs pa dang ldan pa'i sems kyis gnas pas bdag cag ni mi brtag pa'o/ /mi brtan pa'o/ /ther zug ma yin pa'o/ /yid brtan du mi rung ba'o/ /rnam par 'gyur ba'i chos can no snyam mo/ /de ltar na kha cig ni rtag la kha cig ni mi rtag pa ste/ ci la rten nas zhes bya ba ni snga ma bzhin te/ 'di ni gzhi gsum pa'o/ /bzhi pa ni/ dge sbyong dang / bram ze shes ldan ci la rten cing ci la gnas nas/ ci la gnas bcas te/ sngon gyi mtha' la rtog cing kha cig ni chags pa ste/ bdag dang / 'jig rten kha cig rtag go zhes mngon par smra zhing mngon par brjod pa ni| dge slong dag/ 'dod pa'i khams na lha yid 'khrug ces bya ba dag yod de/ de dag gang gi tshe shin tu mig gis mig tshugs su lta'o/ /de dag shin tu mig gis mig tshugs su lta ba na/ yid 'khrug cing yid khros pas sems can de dag gnas de nas shi 'pho bar 'gyur ro/ /ji ste sems can 'ga' tshe zad cing las zad la bsod nams zad pa zhig gnas de nas shi 'phos nas 'dir mi rnams dang skal ba mnyam par 'gyur la/ de dbang po rnams yongs su smin cing nar son pa'i rgyus na zhes bya ba nas/ sngon gyi lus yang dag par rjes su dran no zhes bya ba'i bar du snga ma bzhin no/ /de 'di snyam du sems te/ 'dod pa'i khams na gang lha yid 'khrug ces bya ba de dag gi nang nas gang dag mig gis mig tshugs su shin tu mi lta ba de dag rtag pa'o/ /brtan pa'o/ /ther zug pa'o/ /mi 'gyur ba'i chos can no snyam mo/ /yang bdag cag ni shin tu mig gis mig tshugs su lta ba dang / ldan pas/ bdag cag ni mi rtag pa'o/ /mi brtan pa'o/ /yid brtan du mi rung ba'o/ /rnam par 'gyur ba'i chos can no snyam mo/ /de ltar na kha cig ni rtag la kha cig ni mi rtag pa ste| ci la rten cing ci la gnas nas/ ci la gnas bcas te/ sngon gyi mtha' la rtog cing / kha cig ni rtag pa ba ste/ bdag dang / 'jig rten kha cig rtag go zhes mngon par smra zhing mngon par brjod pa 'di ni gzhi bzhi pa'o/ /dge slong dag /dge sbyong dang bram ze kha cig sngon gyi mtha' la rtog cing / bdag dang / 'jig rten kha cig rtag go zhes mngon par smra zhing mngon par brjod pa de thams cad ni/ gzhi bzhi po 'di dag la ste/ de las mi lhag mi mang la de ltar lta bar song ba 'di dag 'di ltar 'dzin pa de dag de bzhin gshegs pas yang dag pa ji lta ba bzhin du rab tu mkhyen ces bya ba dag ni snga ma bzhin no/ /dge slong dag /chos gang dag gzhan zab pa zab par snang ba/ yongs su dag pa yongs su byang ba de dag ngas rang gi mngon par shes pas mngon par rdzogs par sangs rgyas nas bshad la/ pha rol pos kyang de bzhin gshegs pa la gang yang dag pa ji lta ba bzhin snyan par smra zhing rjod par byed do/ /dge slong dag /chos gang dag gzhan zab pa zab par snang ba yongs su dag pa/ yongs su byang ba de dag ngas rang gi mngon par shes pas mngon par rdzogs par sangs rgyas nas bshad la pha rol pos kyang de bzhin gshegs pa la gang yang dag pa ji lta ba bzhin snyan par smra zhing rjod par byed pa gang zhe na/ dge slong dag /dge sbyong dang / bram ze kha cig sngon gyi mtha' la rtog cing rgyu med par 'byung ba ste/ bdag dang / 'jig rten ni rgyu med pa las 'byung ba'o zhes mngon par smra zhing mngon par brjod pa yod pa ni/ 'di lta ste/ gzhi gnyis pa la'o/ /dge sbyong dag dang / bram ze shes ldan de dag ci la rten cing ci la gnas nas/ ci la gnas bcas te/ sngon gyi mtha' la rtog cing rgyu med par 'byung ba ste/ bdag dang / 'jig rten ni rgyu med pa las 'byung ba'o zhes mngon par smra zhing mngon par brjod pa ni/ 'di lta ste/ gzhi gnyis po dag la'o/ /dge sbyong dag /gzugs kyi khams na/ 'du shes med pa'i sems can gyi lha rnams kyi 'du shes 'byung ba'i phyir/ sems can de dag gnas de nas shi 'pho bar 'gyur la/ ji ltar sems can 'ga' zhig gnas de nas shi 'phos nas 'dir mi rnams dang skal pa mnyam par 'gyur zhes bya ba nas| sngon 'du shes 'byung ba de yang dag par rjes su dran no zhes bya ba'i bar du snga ma bzhin no/ /'di snyam du sems te/ bdag dang / 'jig rten rgyu med pa las 'byung ba de'i phyir| des na bdag ni 'di snyam du bdag dang / 'jig rten rgyu med pa las byung bas bdag sngon chad ma byung la/ da ltar byung ngo snyam pa ni gzhi dang po ste/ ci la rten cing zhes bya ba dag ni snga ma bzhin no/ /gzhi gnyis pa dag ni/ dge slong dang / bram ze shes ldan ci la rten cing / ci la gnas nas zhes bya ba dag ni snga ma bzhin no/ /'di na kha cig dpyod pa can rtog gar zhugs pa'i sa la gnas pa/ rang gi spobs pa las byung ba/ so so'i skye bo pa/ rtog ge'i rjes su 'brang ba de/ 'di snyam du sems/ bdag dang / 'jig rten rgyu med pa las 'byung ba de'i phyir/ des na bdag ni 'di snyam du bdag dang / 'jig rten rgyu med pa las byung bas/ bdag ni rtog ge pa/ dpyod pa can/ rtog ger zhugs pa'i sa la gnas pa| rang gi spobs pa las byung ba/ so so'i skye bo dpyod pa'i rjes su 'brang ba 'di ni gzhi gnyis pa ste/ ci la rten cing zhes bya ba ni snga ma bzhin no/ / dge slong dag /dge sbyong dang / bram ze kha cig sngon gyi mtha' la rtog cing rgyu med par 'byung ba pa ste/ bdag dang / 'jig rten ni rgyu med pa las 'byung ba'o/ /zhes mngon par smra zhing mngon par brjod pa de thams cad ni gzhi gnyis po 'di dag la ste/ de las mi lhag mi mang la/ de ltar na lta bar song ba de dag 'di ltar 'dzin pa dang / 'di ltar mchog tu 'dzin pa de dag de bzhin gshegs pas yang dag pa ji lta ba bzhin du rab tu mkhyen/ de las lhag par yang dag pa ji lta ba bzhin du mkhyen to/ /'di ltar rab tu mkhyen pa nas/ mchog tu mi 'dzin te/ mchog tu mi 'dzin pas bdag nyid mya ngan las 'das par yang rig cing de ltar lta bar song ba de dag gi 'gro ba ni 'di lta bu'o/ /skye ba ni 'di lta bu'o/ /skye ba ni 'di lta bu'o/ /tshe phyi ma ni 'di lta bu zhes de bzhin gshegs pas yang dag pa ji lta ba bzhin du rab tu mkhyen/ de las lhag par yang dag pa ji lta ba bzhin du rab tu mkhyen to/ /de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin rab tu mkhyen nas kyang mchog tu mi 'dzin to/ /mchog tu mi 'dzin pas bdag nyid mya ngan las 'das par rig nas/ kun 'byung tshor ba rnams nub bar thugs su chud nas 'di ni sdug bsngal lo/ / 'di ni sdug bsngal nges par 'byin pa'o zhes bya ba mkhyen to/ /dge slong dag /gang dag chos gzhan zab pa zab par snang ba zhes bya ba snga ma bzhin no/ /dge slong dag /chos gang dag gzhan zab pa zab par snang ba nas/ de dag gang zhe na/ zhes bya ba'i bar du snga ma bzhin no/ /dge slong dag /dge sbyong dang / bram ze kha cig sngon gyi mtha' la rtog cig / mtha' yod pa dang / mtha' med pa pa ste/ bdag dang / 'jig rten ni mtha' yod ba'ang ma yin/ mtha' med pa'ang ma yin zhes mngon par smra zhing mngon par brjod pa de dag yod pa ni| 'di lta ste/ gzhi bzhi po dag la'o/ /dge sbyong dang / bram ze shes ldan de dag ci la rten cing ci la gnas nas/ ci la gnas bcas te/ sngon gyi mtha' la rtog cing / mtha' yod pa dang / mtha' med pa ste/ bdag dang / 'jig rten ni mtha' yod pa'ang ma yin/ mtha' med pa'ang ma yin zhes mngon par smra zhing mngon par brjod pa ni/ 'di lta ste| gzhi bzhi po dag la'o/ /dge slong dag/ 'di ni dge sbyong dang bram ze shes ldan gcig dgon pa na gnas kyang rung / shing drung na gnas kyang rung / khang stong na gnas kyang rung ste/ brtson pa'i rgyu las byung ba dang / spong ba'i rgyu las byung ba dang / sgom pa'i rgyu las byung ba dang / lan mang du byed pa'i rgyu las byung ba dang / yang dag pa yid la byed pa'i rgyu las byung ba dag gis sems zhi ba'i ting nge 'dzin de lta bu la reg par byed do/ /de ltar sems mnyam par bzhag pa na/ 'jig rten la mtha' yod pa'i 'du shes can du gnas so/ /de 'di snyam du sems te/ 'jig rten mtha' dang ldan pa de'i phyir des na bdag ni 'di snyam du 'jig rten ni mtha' dang ldan zhing yongs su chud pas bdag dgon pa na gnas kyang rung / shing drung na gnas kyang rung / khang stong na gnas kyang rung ste/ zhes bya ba nas/ 'jig rten la mtha' yod pa'i 'du shes can du gnas par bya'o snyam pa'i bar du snga ma bzhin no/ /de ltar na 'jig rten mtha' dang ldan zhing yongs su chad pa 'di ni gzhi dang po ste/ ci la rten cing zhes bya ba ni snga ma bzhin no| |gnyis pa ni/ dge sbyong dang / bram ze shes ldan ci la rten cing ci la gnas nas zhes bya ba nas/ 'di na dge sbyong dang / bram ze kha cig dgon pa na gnas kyang rung / shing drung na gnas kyang rung / khang stong na gnas kyang rung zhes bya ba'i bar du snga ma bzhin no/ /de ltar sems mnyam par bzhag pa na/ 'jig rten la mtha' med pa'i 'du shes can du gnas so/ /de 'di snyam du sems te/ 'jig rten na mtha' med cing tshad med pa de'i phyir/ des na bdag ni 'di snyam du 'jig rten ni mtha' med cing tshad med pas bdag dgon pa na gnas kyang rung / shing drung na gnas kyang rung / khang stong na gnas kyang rung zhes bya ba nas/ de ltar sems mnyam par bzhag pa na/ 'jig rten la mtha' med pa'i 'du shes can du gnas par bya'o snyam mo| |de ltar na 'jig rten mtha' med cing tshad med pa 'di ni gzhi gnyis pa ste/ ci la rten cing ci la gnas nas zhes bya ba'i bar du snga ma bzhin no/ /gsum pa ni/ dge sbyong dang / bram ze shes ldan ci la rten cing ci la gnas nas zhes bya ba dag ni snga ma bzhin no/ /'di na dge sbyong dang / bram ze kha cig dgon pa na gnas kyang rung / shing drung na gnas kyang rung / zhes bya ba nas/ sems mnyam par bzhag pa na/ steng dang / 'og gi 'jig rten la ni mtha' yod pa'i 'du shes can yin zhing thad kar ni mtha' med pa'i 'du shes can du gnas so| |zhes bya ba'i bar du snga ma bzhin no/ /de 'di snyam du sems te/ steng dang / 'og gi 'jig rten la ni mtha' yod cing / thad kar ni mtha' med do snyam pa de'i phyir/ des na bdag 'di snyam du steng dang / 'og ni mtha' yod la thad kar ni mtha' med do snyam nas/ bdag dgon pa na gnas kyang rung / shing drung na gnas kyang rung zhes bya ba nas 'di ni gzhi gsum pa ste/ ci la rten cing ci la gnas zhes bya ba'i bar du snga ma bzhin no/ /bzhi pa ni/ zhes bya ba nas dge sbyong dang / bram ze shes ldan ci la rten cing ci la gnas nas zhes bya ba'i bar du snga ma bzhin no/ /'di na dge sbyong dang / bram ze shes ldan kha cig dgon pa na gnas kyang rung / shing drung na gnas kyang rung zhes bya ba dag dang sems mnyam par bzhag pa na 'jig rten mtha' yod pa ma yin pa'i 'du shes can dang / mtha' med pa ma yin pa'i 'du shes can du gnas so| |de 'di snyam du sems te/ 'jig rten 'di ni mtha' med yod pa yang ma yin/ mtha' med pa yang ma yin pa de'i phyir/ des na bdag 'di snyam du 'jig rten ni mtha' yod pa yang ma yin/ mtha' med pa yang ma yin no snyam nas/ bdag dgon pa na gnas kyang rung / shing drung na gnas kyang rung / khang stong na gnas kyang rung ste zhes bya ba nas/ sems mnyam par bzhag pa na/ 'jig rten mtha' yod pa yang ma yin pa'i 'du shes can dang / mtha' med pa yang ma yin pa'i 'du shes can du gnas par bya'o snyam mo/ /de ltar na 'jig rten mtha' yod pa yang ma yin/ mtha' med pa yang ma yin pa 'di ni gzhi bzhi pa ste/ ci la rten cing ci la gnas nas zhes bya ba'i bar du snga ma bzhin no/ /dge sbyong dang / bram ze kha cig sngon gyi mtha' la rtog cing / mtha' yod pa dang / mtha' med pa ba ste/ bdag dang / 'jig rten mtha' yod pa dang | mtha' med pa'o zhes mngon par smra zhing mngon par brjod pa de thams cad ni gzhi bzhi po dag la ste/ de las mi lhag mi mang la/ de dag de bzhin gshegs pas yang pa ji lta ba bzhin du rab tu mkhyen/ de las lhag par yang dag pa ji lta ba bzhin du rab tu mkhyen to/ /de ltar na lta bar song ba 'di dag 'di ltar 'dzin pa dang / 'di ltar mchog tu 'dzin pa dang / 'di ltar len pa dang / 'di ltar spyod pa zhes bya ba ni snga ma bzhin no/ /dge slong dag /gang dag chos gzhan zab pa zab par snang ba zhes bya ba ni snga ma bzhin no/ / dge slong dag /chos gang dag gzhan zab pa zab par snang ba dag gang zhe na/ zhes bya ba dag ni snga ma bzhin no/ /dge slong dag /dge sbyong dang bram ze kha cig sngon gyi mtha' la rtog cing lha mi spong la lta mi spong ba bri ba dris pa dang / gtam rlung bskur ba dag yod pa ni/ 'di lta ste/ gzhi bzhi po dag la'o/ /dge sbyong dang bram ze shes ldan ci la rten cing ci la gnas nas/ ci la gnas bcas te/ sngon gyi mtha' la rtog cing / lha mi spong la/ lha mi spong ba dri ba dris pa dang / tshig rlung bskur ba ni/ 'di lta ste/ gzhi bzhi po dag la'o/ / 'di na dge sbyong dang / bram ze kha cig mi dge ba yang dag pa ji lta ba bzhin du mi shes shing / dge ba dang / sdug bsngal dang / kun 'byung dang / 'gog pa dang / lam yang dag par ji lta ba bzhin rab tu mi shes so/ /de 'di snyam du sems te/ bdag gis ni mi dge ba yang dag pa ji lta ba bzhin rab tu mi shes shing / dge ba dang / sdug bsngal dang / kun 'byung dang / 'gog pa dang / lam yang dag pa ji lta ba bzhin rab tu mi shes so snyam mo/ /dge sbyong dang / bram ze kha cig gang dag mi dge ba yang dag pa ji lta ba bzhin rab tu mi shes shing / dge ba dang / sdug bsngal dang / kun 'byung dang / 'gog pa dang / lam yang dag par ji lta ba bzhin rab tu mi shes pa dag yod de/ de dag bdag la mi dge ba'i dri ba dris par 'gyur pa dang / dge ba dang / sdug bsngal dang / kun 'byung ba dang / 'gog pa dang / lam dag gi dri ba dris par 'gyur na/ bdag gis de dag gi mi spong ba dri ba dris par lung bstan pa dang / dge ba dang / sdug bsngal dang / kun 'byung ba dang / 'gog pa dang / lam dag gi dri ba bris pa rnams lung bstan du ni bdag gi brdzun du 'gyur bas/ de ltar na dge sbyong dang / bram ze de brdzun du smra bas 'jigs pa dang / brdzun du smra bas 'jigs skrag pa dang | brdzun du smra ba yongs su smad pas gzhi de dang / gling de dang / mgon de dang / skyabs de dang / gzhol ba de la gnas so/ /lha mi spong ba de dri ba dris pa dang / tshig rlung skur bar byed de/ ci la rten cing ci la gnas nas/ ci la gnas bcas te/ sngon gyi mtha' la rtog cing lha mi spong la/ lha mi spong ba dri ba dris pa dang / tshig rlung bskur pa 'di ni gzhi dang po'o| |gzhi gnyis pa ni/ dge sbyong dang / bram ze shes ldan ci la rten cing ci la gnas nas/ ci la gnas bcas te/ zhes bya ba dag ni snga ma bzhin no/ /'di na dge sbyong dang / bram ze kha cig mi dge ba yang dag pa ji lta ba bzhin rab tu shes shing zhes bya ba dag ni snga ma bzhin no/ /de ni bdag gi brdzun du 'gyur la gang bdag gi brdzun du 'gyur ba de ni bdag gi log par 'gyur te/ de ltar na dge sbyong dang / bram ze shes ldan de ni log par lta bas 'jigs pa dang / log par lta bas 'jigs skrag pa dang / log par lta ba nyid yongs su smad pas gzhi de la gnas so zhes bya ba ni snga ma bzhin no/ /ci la rten cing ci la gnas nas/ ci la gnas bcas te zhes bya ba nas/ tshig rlung bskur zhes bya ba'i bar 'di ni gzhi gnyis pa'o/ /gsum pa ni/ dge sbyong dang / bram ze shes ldan ci la rten cing ci la gnas nas la ci la gnas bcas te/ sngon gyi mtha' la rtog cing zhes bya ba dag ni snga ma bzhin no/ /'di na dge sbyong dang / bram ze shes ldan kha cig mi dge ba yang dag pa ji lta ba bzhin rab tu mi shes shing dge ba dag ces bya ba snga ma bzhin no/ /de ni bdag gi brdzun du 'gyur la/ gang bdag gi brdzun du 'gyur ba de bdag gi log par 'gyur zhing gang bdag gi log par 'gyur ba de ni bdag gi shes bzhin ma yin par 'gyur te/ de ltar na dge sbyong dang / bram ze de ni shes bzhin ma yin pas 'jigs pa dang / shes bzhin ma yin pas 'jigs skrag pa dang / shes bzhin ma yin pa nyid yongs su smad pas gzhi de dang / gling de la gnas zhes bya ba nas/ tshig rlung bskur ba 'di ni gzhi gsum pa'o zhes bya ba'i bar du snga ma bzhin no/ /bzhi pa ni/ dge sbyong dang / bram ze shes ldan ci la rten cing ci la gnas nas zhes bya ba dag ni snga ma bzhin no/ /'di na dge sbyong dang / bram ze kha cig rang bzhin gyis yid rtul zhing blun pa yin te/ de 'di snyam du sems te/ ji ste bdag gi thad du la la zhig 'ongs nas/ de 'jig rten pha rol yod snyam nas 'jig rten pha rol yod dam zhes dri ba dris na/ bdag gis de la 'jig rten pha rol yod do zhes lung bstan par bya'o/ /'jig rten pha rol med pa ma yin nam/ yod pa yang yin/ med pa yang yin nam/ yod pa yang ma yin/ med pa yang ma yin nam/ de 'jig rten 'di lta bu'am/ 'on te ma yin/ rnam par gzhan zhig gam/ 'on te ma yin/ ma yin nam/ 'on te ma yin/ 'di lta bu ma yin nam/ 'on te ma yin/ de 'jig rten pha rol ma yin nam/ 'on te ma yin/ 'di lta bu ma yin nam/ 'on te ma yin zhes dri ba dris na/ bdag gis 'jig rten pha rol zhes bya ba ma yin nam/ 'on te ma yin/ 'di lta bu ma yin nam/ 'on te ma yin zhes lung bstan par bya'o/ /dge sbyong dang / bram ze de gti mug gi 'jigs pa dang / gti mug gis 'jigs skrag pa dang / des gti mug nyid yongs su smad pas gzhi de dang / gling de dang / mgon de dang / skyabs de dang / gzhol ba de la gnas so| |lha mi spong pa dri ba dris pa dang / tshig rlung bskur ba 'di ni gzhi bzhi pa ste/ ci la rten cing ci la gnas nas zhes bya ba dag ni snga ma bzhin no/ /dge sbyong dang / bram ze sngon gyi mtha' la rtog cing lha mi spong la lha mi spong ba dri ba dris pa dang / tshig rlung bskur ba de thams cad ni gzhi bzhi po 'di dag la ste/ de las mi lhag mi mang la/ de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin du rab tu mkhyen to/ /de ltar na lta bar song ba 'di ltar 'dzin pa dang / 'di ltar mchog tu 'dzin pa dag ni snga ma bzhin no/ /dge slong dag /dge sbyong dang / bram ze kha cig sngon gyi mtha' la rtog cing sngon gyi mtha' dang ldan pa lta bar song ba dag mngon par smra zhing mngon par brjod pa de thams cad ni lta bar song ba bco brgyad po/ 'di lta ste/ de las mi lhag mi mang zhes bya ba nas/ lhag par mkhyen to zhes bya ba'i bar du snga ma bzhin no/ /dge slong dag /chos gang dag gzhan zab pa zab par snang ba zhes bya ba dag ni snga ma bzhin no/ /dge slong dag /chos gang dag gzhan zab pa zab par snang ba dag gang zhe na zhes bya ba dag ni snga ma bzhin no/ /dge slong dag /dge sbyong dang / bram ze kha cig phyi ma'i mtha' la rtog cing 'du shes can du smra ba dag yod de/ de phan chad bdag ni 'du shes can ma yin no zhes kha cig mngon par smra zhing mngon par brjod pa ni/ 'di lta ste/ bzhi bcu drug po la'o/ /dge sbyong dang / bram ze shes ldan de dag ci la rten cing ci la gnas nas/ ci la gnas bcas te/ phyi ma'i mtha' la rtog cing 'du shes can du smra ba dag /de phan chad bdag ni 'du shes can ma yin no zhes kha cig mngon par smra zhing mngon par brjod pa ni/ 'di lta ste/ gzhi bcu drug po dag la'o/ /dge slong dag /dge sbyong dang / bram ze kha cig 'di ltar lta zhing / 'di skad du/ smra ba dag yod de/ de phan chad bdag gzugs dang ldan pa'i 'du shes can dang / de phan chad bdag gzugs dang mi ldan pa yin pa dang / gzugs dang ldan pa yang yin la/ gzugs dang mi ldan pa yang yin pa dang / gzugs dang ldan pa yang ma yin la/ gzugs dang mi ldan pa yang ma yin pa'i 'du shes can dang / de phan chad bdag mtha' dang ldan pa'i 'du shes can dang / mtha' dang mi ldan pa dang / de phan chad bdag mtha' dang ldan pa yang yin la/ mtha' dang mi ldan pa yang yin pa dang / mtha' dang ldan pa yang ma yin la/ mtha' dang mi ldan pa yang ma yin pa'i 'du shes can dang / de phan chad bdag gcig pa'i 'du shes can dang / tha dad pa'i 'du shes can dang / chung du'i 'du shes can dang / tshad med pa'i 'du shes can dang / gcig tu bde ba can dang / gcig tu sdug bsngal ba can dang / bde ba dang / sdug bsngal ba can dang / bde ba dang / sdug bsngal ba can ma yin pa'i 'du shes can 'di dag ni/ dge slong dag /gzhi bcu drug po dag la ste/ ci la rten cing zhes bya ba nas mngon par smra zhing mngon par brjod pa zhes bya ba'i bar du'o/ /dge sbyong dang / bram ze kha cig phyi ma'i mtha' la rtog cing 'du shes can du smra ba dag de phan chad bdag gi 'du shes can no zhes kha cig mngon par smra zhing mngon par brjod pa de thams cad ni gzhi bcu drug po 'di dag la ste/ de las mi lhag mi mang la/ de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin rab tu mkhyen to/ /de ltar na lta bar song ba 'di dag 'di ltar 'dzin pa dang / 'di ltar mchog tu 'dzin pa dang / 'di ltar len pa dang / 'di ltar spyod pa dang / 'gro ba ni 'di lta bu'o/ /skye ba ni 'di lta bu'o/ /tshe phyi ma ni 'di lta bu yin no zhes de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin du rab tu mkhyen to/ /de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin du rab tu mkhyen nas kyang mchog tu mi 'dzin to/ /mchog tu mi 'dzin pas bdag nyid mya ngan las 'das par rig nas tshor ba rnams kun tu 'byung ba nub par thugs su chud de/ 'di ni sdug bsngal lo/ /'di ni sdug bsngal nges par 'byin pa'o/ /zhes bya bar mkhyen to/ /dge slong dag /chos gang dag gzhan zab ba zab par snang ba yongs su dag pa/ yongs su byang ba de dag ngas rang gi mngon par shes pas mngon par rdzogs par sangs rgyas nas bshad la/ pha rol pos kyang de bzhin gshegs pa la gang yang dag pa ji lta ba bzhin du snyan nas smra zhing rjod par byed do/ /dge slong dag /chos gang dag gzhan zab pa zad bar snang ba yongs su dag pa/ yongs su byang ba de dag ngas rang gi mngon par shes pas mngon par rdzogs par sangs rgyas nas bshad la/ pha rol pos kyang de bzhin gshegs pa la gang yang dag pa ji lta ba bzhin du snyan pa smra zhing rjod par byed pa gang zhe na/ dge slong dag /dge sbyong dang bram ze kha cig phyi ma'i mtha' la rtog cing 'du shes can du smra ba dag de phan chad bdag ni 'du shes can yin no zhes kha cig mngon par smra zhing mngon par brjod pa yod pa ni/ 'di lta ste/ gzhi brgyad po 'di dag la'o/ /dge sbyong dang bram ze shes ldan de dag ci la rten cing ci la gnas nas ci la gnas bcas te/ phyi ma'i mtha' la rtog cing 'du shes med pa can du smra ba dag de phan chad bdag ni 'du shes med pa can yin no zhes kha cig mngon par smra zhing mngon par brjod pa ni| 'di lta ste/ gzhi brgyad po dag la'o/ /dge slong dag /dge sbyong dang / bram ze kha cig 'di ltar lta zhing / 'di skad du/ smra ba dag yod de/ de phan chad pa dag ni gzugs can ma yin zhing / 'du shes can yang yin pa dang / de phan chad pa dag ni gzugs can ma yin pa dang / gzugs can yin la/ gzugs can ma yin pa yang yin pa dang / gzugs can yang ma yin la/ gzugs can ma yin pa yang ma yin zhing 'du shes can yang ma yin pa dang / de phan chad bdag ni mtha' dang ldan zhing 'du shes can yin pa dang / de phan chad bdag ni mtha' dang mi ldan pa dang / mtha' dang ldan pa'ang yin la mtha' dang mi ldan pa'ang yin pa dang / mtha' dang ldan pa yang ma yin la mtha' dang mi ldan pa'ang ma yin zhing 'du shes can yang yin pa 'di ni gzhi brgyad pa'o/ /ci la rten cing zhes bya ba dag ni snga ma bzhin no/ /dge sbyong dang / bram ze kha cig phyi ma'i mtha' la rtog cing 'du shes med pa can du smra ba dag de phan chad bdag ni 'du shes med pa can yin no zhes kha cig mngon par smra zhing mngon par brjod pa de thams cad ni gzhi brgyad po dag la ste/ de las mi lhag mi mang la/ /de dag de bzhin gshegs pas yang dag pa ji lta ba bzhin rab tu mkhyen/ de lhag par yang dag pa ji lta ba bzhin rab tu mkhyen te/ de ltar na lta bar song ba 'di dag 'di ltar 'dzin pa dang zhes bya ba dag ni snga ma bzhin no/ /dge slong dag /chos gang dag gzhan zab pa zab par snang ba zhes bya ba dag ni snga ma bzhin no/ /dge slong dag /chos gang dag gzhan zab pa zas par snang ba gang zhe na/ zhes bya ba dag ni snga ma bzhin no/ /dge slong dag /dge sbyong dang / bram ze kha cig phyi ma'i mtha' la rtog cing 'du shes can yang ma yin la/ 'du shes can ma yin pa yang ma yin par smra ba dag yod de/ de phan chad bdag ni 'du shes can yang ma yin la/ 'du shes can ma yin pa yang ma yin no zhes kha cig mngon par smra zhing mngon par brjod pa ni/ 'di lta ste/ gzhi brgyad po dag la'o/ / dge sbyong dang / bram ze de dag ci la rten cing ci la gnas nas/ ci la gnas bcas te/ phyi ma'i mtha' la rtog cing 'du shes can yang ma yin la 'du shes can ma yin pa yang ma yin no zhes smra ba dag de phan chad bdag ni 'du shes can yang ma yin la 'du shes can ma yin pa'ang ma yin no/ /zhes kha cig mngon par smra zhing mngon par brjod pa dag ni gzhi brgyad po dag la'o/ /dge slong dag /dge sbyong dang / bram ze kha cig 'di ltar lta zhing / 'di skad du smra ba dag de phan chad bdag ni gzugs can yin zhing 'du shes can yang ma yin la 'du shes can ma yin pa yang ma yin pa dang / de phan chad bdag ni gzugs can ma yin pa dang / gzugs can yang yin la gzugs can ma yin pa yang yin pa dang / gzugs can yang ma yin pa la gzugs can ma yin pa yang ma yin zhing / 'du shes can yang ma yin la 'du shes can ma yin pa yang ma yin pa dang / de phan chad bdag ni mtha' dang ldan pa yin zhing 'du shes can yang ma yin la/ 'du shes can ma yin pa yang ma yin pa dang / de phan chad bdag ni mtha' dang mi ldan pa dang mtha' dang ldan pa yang yin la/ mtha' dang mi ldan pa yang yin pa dang / mtha' dang ldan pa yang ma yin la/ mtha' dang mi ldan pa yang ma yin zhing 'du shes can yang ma yin la 'du shes can ma yin pa yang ma yin pa 'di ni gzhi brgyad la'o/ /ci la brten cing ci la gnas nas/ ci la gnas bcas te/ phyi ma'i mtha' la rtog cing 'du shes can yang ma yin/ 'du shes can ma yin pa yang ma yin no zhes smra ba dag de phan chad bdag ni 'du shes can yang ma yin/ 'du shes can ma yin pa yang ma yin no zhes kha cig mngon par smra zhing mngon par brjod pa de thams cad gzhi brgyad po dag la ste/ de las mi lhag mi mang ba de dag de bzhin gshegs pas yang dag pa ji lta ba bzhin du rab tu mkhyen/ de las lhag par yang dag pa ji lta ba bzhin rab tu mkhyen to/ /de ltar na lta bar song ba 'di dag ces bya ba dag ni snga ma bzhin no/ /dge slong dag chos gang dag gzhan zab ba zab par snang ba zhes bya ba dag ni snga ma bzhin no/ /dge slong dag /chos gang dag gzhan zab pa za ba bar snang ba dag gang zhe na/ zhes bya ba dag ni snga ma bzhin no/ /dge slong dag /dge sbyong dang / bram ze kha cig phyi ma'i mtha' la rtog cing chad par smra ba dag yod de/ de phan chad bdag ni chad par 'gyur te med do/ /zhes kha cig mngon par smra zhing mngon par brjod pa ni/ 'di lta ste/ gzhi bdun po dag la'o/ /dge slong dag /dge sbyong dang / bram ze shes ldan ci la rten cing ci la gnas nas/ ci la gnas bcas te/ phyi ma'i mtha' la rtog cing chad par smra ba dag de phan chad bdag ni chad par 'gyur te/ med do zhes kha cig mngon par smra zhing mngon par brjod pa ni 'di lta ste/ gzhi bdun po dag la'o/ /dge slong dag /dge slong dang / bram ze kha cig 'di ltar lta zhing 'di skad du smra ba dag yod de/ bdag gzugs can ni 'byung pa chen po bzhi po rags pa ji srid du 'tsho zhing gnas la/ brtan zhing 'dug pa de srid du nad dang bcas so/ /shu ba dang bcas so/ /zug rngu dang bcas so/ /rims nad dang bcas so| |yongs su gdung ba dang bcas so/ /bdag ni nam zhig na yongs su chad par 'gyur ro/ /'dod pa na spyod pa'i lha dang / gzugs na spyod pa'i lha dang / gzugs can ma yin pa nam mkha' mtha' yas skye mched la gnas pa dang / gzugs can ma yin pa rnam shes mtha' yas skye mched la gnas pa dang / gzugs can ma yin pa ci yang med pa'i skye mched la gnas pa dang / gzugs can ma yin pa yod min med min skye mched la gnas pa dag ji srid du 'tsho zhing gnas pa zhes bya ba nas/ 'di ni gzhi bdun po'o zhes bya ba'i bar du snga ma bzhin no/ /ci la rten cing ci la gnas nas/ ci la gnas bcas te/ phyi ma'i mtha' la rtog cing chad par smra ba dag de phan chad bdag ni chad par 'gyur te med do/ /zhes kha cig mngon par smra zhing mngon par brjod do/ /dge slong dag /dge sbyong dang / bram ze kha cig phyi ma'i mtha' la rtog cing chad par smra ba dag de phan chad bdag ni chad par 'gyur te/ med do zhes kha cig mngon par smra zhing mngon par brjod pa thams cad kyang gzhi bdun po 'di dag la ste/ de las mi lhag mi mang la de dag de bzhin gshegs pas yang dag pa ji lta ba bzhin rab tu mkhyen ces bya ba dag ni snga ma bzhin no/ /dge slong dag /chos gang dag gzhan zab pa zab par snang ba zhes bya ba dag ni snga ma bzhin no/ /dge slong dag /chos gang dag gzhan zab pa zab par snang ba de dag kyang gang zhe na/ zhes bya ba dag kyang snga ma bzhin no/ /dge slong dag /dge sbyong dang / bram ze kha cig 'di ltar lta zhing 'di skad du smra ba dag yod de/ gang gi tshe bdag 'dod pa'i yon tan lnga 'byor par gyur cing / rtse dga' yongs su spyod pa de tsam gyis na/ bdag 'di mthong ba'i chos la mya ngan las 'das pa thob pa yin no/ /gang gi tshe bdag 'dod pa dag las dben zhing bsam gtan bzhi pa'i bar du rdzogs par byas te gnas pa de tsam gyis na/ bdag 'di mthong ba'i chos la mya ngan las 'das pa thob pa yin no zhes bya ba 'di ni gzhi lnga pa'o/ /ci la rten cing ci la gnas nas/ ci la gnas bcas te| phyi ma'i mtha' la rtog cing / mthong ba'i chos la mya ngan las 'das par mngon par smra ba dag /mthong ba'i chos la mya ngan las 'das par mngon par smra zhing mngon par brjod do| |dge slong dag /dge sbyong dang bram ze kha cig phyi ma'i mtha' la rtog cing / mthong ba'i chos la mya ngan las 'das par smra ba dag /mthong ba'i chos la mya ngan las 'das par mngon par smra zhing mngon par brjod pa thams cad kyang / gzhi lnga po 'di dag la ste/ de las mi lhag mi mang la/ de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag par ji lta ba bzhin du rab tu mkhyen to/ /de ltar na lta bar song ba 'di dag 'di ltar 'dzin pa dang / zhes bya ba nas thugs su chud do zhes bya ba'i bar du snga ma bzhin no/ /dge slong dag /dge sbyong dang / bram ze kha cig phyi ma'i mtha' la rtog cing / phyi ma'i mtha' la gnas pa/ lta bar song ba dag mngon par smra zhing mngon par brjod pa thams cad kyang lta bar song ba bzhi bcu rtsa bzhi po 'di dag ste/ de las mi lhag mi mang la/ de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin du rab tu mkhyen to/ /de ltar na lta bar song ba 'di dag 'di ltar 'dzin pa dang zhes bya ba nas thugs su chud do zhes bya ba'i bar du snga ma bzhin no/ /dge slong dag /dge sbyong dang / bram ze kha cig phyi ma'i mtha' la rtog cing phyi ma'i mtha' la gnas pa lta bar song ba dag mngon par smra zhing mngon par brjod pa thams cad kyang lta bar song ba bzhi bcu rtsa bzhi po 'di dag ste/ de las mi lhag mi mang la/ de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin rab tu mkhyen to/ /de ltar na lta bar song ba 'di ltar 'dzin pa dang zhes bya ba nas thugs su chud do zhes bya ba'i bar du snga ma bzhin no/ /dge slong dag /dge sbyong dang / bram ze shes ldan kha cig sngon gyi mtha' la rtog cing spon gyi mtha' la gnas pa lta bar song ba dag mngon par smra zhing mngon par brjod pa dang / phyi ma'i mtha' la rtog cing / phyi ma'i mtha' la gnas pa lta bar song ba dag mngon par smra zhing mngon par brjod pa thams cad kyang lta bar song ba drug cu rtsa gnyis po 'di dag la ste/ de las mi lhag mi mang la/ de dag de bzhin gshegs pas yang dag pa ji lta ba bzhin rab tu mkhyen/ de las lhag par yang dag pa ji lta ba bzhin rab tu mkhyen to/ /de ltar na lta bar song ba 'di dag 'di ltar 'dzin pa dang / 'di ltar len pa dang / 'di ltar spyong ba dang / 'gro ba ni 'di lta bu'o/ /skye ba ni 'di lta bu'o/ /tshe phyi ma ni 'di lta bu'o zhes de bzhin gshegs pas yang dag pa ji lta ba bzhin rab tu mkhyen to/ /de las lhag par yang dag par ji lta ba bzhin rab tu mkhyen nas kyang mchog tu mi 'dzin to/ / mchog tu mi 'dzin pas bdag nyid mya ngan las 'das par rig nas/ tshor ba rnams kun 'byung ba nub par thugs su chud de 'di ni sdug bsngal lo/ /'di ni sdug bsngal nges par 'byin pa'o zhes bya bar mkhyen to/ /dge slong dag /de la dge sbyong dang / bram ze gang de dag sngon gyi mtha' la rtog cing sngon gyi mtha' la gnas pa lta bar song ba rnams dang / phyi ma'i mtha' la rtog cing phyi ma'i mtha' la gnas pa lta bar song ba rnams kyis gyan du dmyugs su zin kyang / de thams cad lta ba'i chu'i nang na 'dug pas bdud sdig to can gyi dbang du song zhing lag tu song ba ste/ bdud sdig to can gyis ci dga' mgur bya ba bdud kyi zhags pa dag las yongs su grol ba ma yin no/ /dge slong dag /dper na/ nya pa'am/ nya pa'i slob ma mkhas pa dag gis rgya mig phra mo thogs te lteng ka'i chu chung du bcus pa na de srog chags gang rags pa che long rnams kyis gyen du dmyugs su zin kyang / de thams cad chu'i nang na gnas pas nya ba'i dbang du song zhing lag tu song ba ste/ nya bas ci dga' mgur bya ba yin par rig par bya'o/ /de bzhin du dge sbyong dang | bram ze gang kha cig sngon gyi mtha' la rtog cing / sngon gyi mtha' la gnas pa lta bar song ba rnams dang / phyi ma'i mtha' la rtog cing phyi ma'i mtha' la gnas pa lta bar song ba rnams kyis kyang gyen du dmyugs zin kyang / de thams cad lta ba'i chu'i nang na 'dug pas bdud sdig to can gyi dbang du song zhing lag tu song ste/ bdud sdig to can gyis ci dga' dga' mgur bya ba dag go /dge slong dag /de la dge sbyong dang / bram ze gang de dag sngon gyi mtha' la rtog cing rtag par smra ba dag bdag dang / 'jig rten rtag to zhes mngon par brjod pa ni/ 'di lta ste/ gzhi bzhi po dag la ste/ dge slong dag /dge sbyong dang / bram ze mkhas pa ma yin zhing ma rig par gyur pa bag med cing rmongs pa la gnas pa de dag srid par rig par bya ste/ de ni srid pas rnam par bskyod pa'o/ /dge slong dag /de la dge sbyong dang / bram ze gang de dag phyi mtha' la rtog cing zhes pa ni mthong ba'i chos la mya ngan las 'das par smra ba dag mthong ba'i chos la mya ngan las 'das par mngon par smra zhing mngon par brjod pa ni gzhi bzhi po dag la ste zhes bya ba'i bar du'o/ /dge sbyong dang / bram ze mkhas pa ma yin zhing ma rig par gyur pa bag med cing rmongs pa la gnas pa de dag la rig par bya ste/ de ni srid pas rnam par bskyod pa'o/ /dge slong dag /de la dge sbyong dang / bram ze gang de dag sngon gyi mtha' la rtog cing rtag par smra ba dag bdag dang / 'jig rten ni rtag go zhes mngon par smra zhing mngon par brjod pa ni 'di lta ste/ gzhi bzhi po dag la ste/ de yang rten cing 'brel bar 'byung ba yin par srid kyi rten cing 'brel bar 'byung ba ma yin par 'gyur ba de ni gnas med do/ /mthong ba'i chos la mya ngan las 'das par smra ba dag mthong ba'i chos la mya ngan las 'das par mngon par smra zhing mngon par brjod pa dag gzhi lnga po dag la ste zhes bya ba'i bar du'o/ /de yang rten cing 'brel bar 'byung ba yin par srid kyi rten cing 'brel bar 'byung ba ma yin par 'gyur ba 'di ni gnas med do/ /dge slong dag /de la dge sbyong dang / bram ze gang de dag sngon gyi mtha' la rtog cing rtog par smra ba mthong ba'i chos la bdag dang 'jig rten ni rtag go zhes mngon par smra zhing mngon par brjod pa ni gzhi bzhi po dag ste/ de yang rtag pa'i rkyen las byung srid kyi reg pa las byung ba las gzhan pa'i tshor bar 'gyur ba 'di ni gnas med do/ /phyi ma'i mtha' la rtog cing zhes bya ba ni mthong ba'i ni chos la mya ngan las 'das par smra ba dag mthong ba'i chos la mya ngan las 'das par mngon par smra zhing mngon par brjod pa ni/ 'di lta ste/ gzhi lnga po dag la'o zhes bya ba'i bar du'o/ /de yang reg pa'i rkyen las byung bar srid kyi rig pa las byung ba las gzhan ba'i tshor bar 'gyur ba 'di ni gnas med do/ /dge slong dag gis gang tshun chad reg pa'i skye mched drug po dag ni kun 'byung ba nub pa dang / ro myang ba dang / nyes dmigs yang dag pa ji lta ba bzhin khong du chud pa 'di ni 'di ltar lhag par yang dag par ji lta ba bzhin khong du chud pa yin no/ /dge slong dag /de la gang zag pa kun nas nyon mongs pa can yang srid pa pa/ rims nad dang bcas pa/ sdug bsngal rnam par smin pa/ tshe phyi ma'i rga shi'i rjes su mthun pa de dag de bzhin gshegs pas spangs shing yongs su mkhyen la/ shing ta la'i mgo bzhin rtsa ba nas bcad de/ 'gro ba snang ba med pa skye ste/ phyi ma la mi skye ba'i chos can du 'gyur ro/ /chos kyi rnam grangs 'di bshad pa na/ stong gsum gyi stong chen po'i 'jig rten gyi khams 'di rnam pa gsum du g.yos/ rab tu g.yos/ kun tu rab tu g.yos so/ /'gul/ rab tu 'gul/ kun tu rab tu 'gul to/ / ldeg |kun tu ldeg /kun tu rab tu ldeg go /de'i tshe tshe dang ldan pa kun dga' bo bcom ldan 'das kyi snam logs na 'dug cing bsil yang thogs nas/ bcom ldan 'das la g.yob cing | bcom ldan 'das la 'di skad ces gsol to/ /btsun pa/ chos kyi rnam grangs 'di'i ming ci lags/ ji ltar gzung bar bgyi/ kun dga' bo/ de'i phyir chos kyi rnam grangs 'di ni rgyu'i dra ba zhes bya bar yang zungs shig /don gyi dra ba dang / chos kyi dra ba dang / tshangs pa'i dra ba zhes bya bar yang zungs shig /de bas ni tshangs pa'i dra ba zhes bya ba 'di ni chos kyi rnam grangs 'di'i tshig bla dwags so/ /bcom ldan 'das kyis de skad ces bka' stsal nas/ dge slong de dag bcom ldan 'das kyis gsungs pa la yi rangs te mngon par bstod do// //bar gyi sdom ni/ rtag dang gcig pu rgyu med dang / /mtha' lan de bzhin lha mi spong / /'du shes 'du shes med can dang / /chad dang mya ngan 'das pa dang /

CLOSE WINDOW